𑁨𑁪. 𑀘𑀢𑀼𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩𑁯𑁫. 𑀇𑀤𑀸𑀦𑀺 𑀦𑁂𑀲𑀁 𑀧𑀘𑁆𑀘𑀬𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀲’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀧𑀝𑀺𑀘𑁆𑀘 𑀏𑀦𑀁 𑀨𑀮𑀫𑁂𑀢𑀺 𑀧𑀯𑀢𑁆𑀢𑀢𑀺, 𑀢𑀺𑀝𑁆𑀞𑀢𑀺, 𑀉𑀧𑁆𑀧𑀚𑁆𑀚𑀢𑀺 𑀯𑀸𑀢𑀺 𑀧𑀘𑁆𑀘𑀬𑁄, 𑀳𑀺𑀦𑁄𑀢𑀺 𑀧𑀢𑀺𑀝𑁆𑀞𑀸𑀢𑀺 𑀏𑀢𑁆𑀣𑀸𑀢𑀺 𑀳𑁂𑀢𑀼, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦𑀁 𑀳𑀺-𑀲𑀤𑁆𑀤𑁄 𑀫𑀽𑀮-𑀲𑀤𑁆𑀤𑁄 𑀯𑀺𑀬 𑀧𑀢𑀺𑀝𑁆𑀞𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀳𑀺𑀦𑁄𑀢𑀺 𑀯𑀸 𑀏𑀢𑁂𑀦 𑀓𑀫𑁆𑀫𑀦𑀺𑀤𑀸𑀦𑀪𑀽𑀢𑁂𑀦 𑀉𑀤𑁆𑀥𑀁 𑀑𑀚𑀁 𑀅𑀢𑀺𑀳𑀭𑀦𑁆𑀢𑁂𑀦 𑀫𑀽𑀮𑁂𑀦 𑀯𑀺𑀬 𑀧𑀸𑀤𑀧𑁄 𑀢𑀧𑁆𑀧𑀘𑁆𑀘𑀬𑀁 𑀨𑀮𑀁 𑀕𑀘𑁆𑀙𑀢𑀺 𑀯𑀺𑀭𑀼𑀴𑁆𑀳𑀺𑀁 𑀆𑀧𑀚𑁆𑀚𑀢𑀻𑀢𑀺 𑀳𑁂𑀢𑀼, 𑀳𑁂𑀢𑀼 𑀘 𑀲𑁄 𑀫𑀽𑀮𑀝𑁆𑀞𑁂𑀦, 𑀧𑀘𑁆𑀘𑀬𑁄 𑀘 𑀉𑀧𑀓𑀸𑀭𑀓𑀝𑁆𑀞𑁂𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁄, 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄.

𑀏𑀯𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑀁. 𑀲𑁆𑀯𑀸𑀬𑀁 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁, 𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁, 𑀉𑀪𑀬𑀢𑁆𑀣 𑀲𑀳𑀚𑀸𑀢𑀦𑀸𑀫𑀥𑀫𑁆𑀫𑀸𑀦𑀜𑁆𑀘 𑀧𑀘𑁆𑀘𑀬𑁄. 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀇𑀫𑀺𑀦𑀸 𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀮𑁄𑀓𑁂 𑀯𑀺𑀤𑀺𑀢𑀪𑀸𑀯𑁂𑀦 𑀮𑁄𑀓𑀺𑀬𑀧𑀤𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀭𑀽𑀧𑀸𑀤𑀺𑀪𑁂𑀤𑁂𑀲𑀼 𑀙𑀩𑁆𑀩𑀺𑀥𑁂𑀲𑀼 𑀲𑀗𑁆𑀔𑀢𑀸𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁂𑀲𑀼 𑀦 𑀓𑁄𑀘𑀺 𑀥𑀫𑁆𑀫𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 ‘‘𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪𑀸’’𑀢𑀺 𑀅𑀦𑀺𑀬𑀢𑁄 𑀓𑀢𑁄𑀢𑀺. 𑀦𑀦𑀼 𑀘 ‘‘𑀬𑀁 𑀬𑀁 𑀥𑀫𑁆𑀫’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁨-𑁩) 𑀯𑀼𑀢𑁆𑀢𑀢𑁆𑀢𑀸 𑀧𑀜𑁆𑀜𑀢𑁆𑀢𑀺𑀬𑀸 𑀕𑀳𑀡𑀁 𑀦 𑀳𑁄𑀢𑀻𑀢𑀺? 𑀦𑀸𑀬𑀁 𑀤𑁄𑀲𑁄 𑀥𑀫𑁆𑀫𑀲𑀤𑁆𑀤𑀲𑁆𑀲 𑀜𑁂𑀬𑁆𑀬𑀯𑀘𑀦𑀢𑁆𑀢𑀸. 𑀆𑀭𑀩𑁆𑀪𑀸𑀢𑀺 𑀆𑀮𑀫𑁆𑀩𑀺𑀢𑁆𑀯𑀸, 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀢𑁂 𑀧𑀦 𑀢𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀢𑀺𑀝𑁆𑀞𑀦𑁆𑀢𑀺 𑀘. 𑀬𑀣𑀸 𑀳𑀺 𑀤𑀼𑀩𑁆𑀩𑀮𑁄 𑀧𑀼𑀭𑀺𑀲𑁄 𑀤𑀡𑁆𑀟𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀆𑀮𑀫𑁆𑀩𑀺𑀢𑁆𑀯𑀸 𑀉𑀝𑁆𑀞𑀳𑀢𑀺 𑀘𑁂𑀯 𑀢𑀺𑀝𑁆𑀞𑀢𑀺 𑀘, 𑀏𑀯𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀆𑀮𑀫𑁆𑀩𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀢𑀺𑀝𑁆𑀞𑀦𑁆𑀢𑀺 𑀘𑀸𑀢𑀺.

𑀚𑁂𑀝𑁆𑀞𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄. 𑀚𑁂𑀝𑁆𑀞𑀓𑀝𑁆𑀞𑁂𑀦𑀸𑀢𑀺 𑀘 𑀧𑀫𑀼𑀔𑀪𑀸𑀯𑁂𑀦. 𑀅𑀢𑁆𑀢𑀸𑀥𑀻𑀦𑀸𑀦𑀜𑁆𑀳𑀺 𑀧𑀢𑀺𑀪𑀽𑀢𑁄 𑀥𑀫𑁆𑀫𑁄 𑀅𑀥𑀺𑀧𑀢𑀻𑀢𑀺 𑀲𑁄 𑀢𑁂𑀲𑀁 𑀧𑀫𑀼𑀔𑀪𑀸𑀯𑁂𑀦 𑀧𑀯𑀢𑁆𑀢𑀢𑀺. ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀯𑀘𑀦𑀢𑁄 𑀙𑀦𑁆𑀤𑀸𑀤𑀬𑁄 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀳𑀚𑀸𑀢𑀦𑀸𑀫𑀭𑀽𑀧𑀸𑀦𑀁 𑀲𑀳𑀚𑀸𑀢𑀸𑀥𑀺𑀧𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣 𑀲𑀳𑀚𑀸𑀢𑀸𑀥𑀺𑀧𑀢𑀻’’𑀢𑀺𑀆𑀤𑀺. ‘‘𑀙𑀦𑁆𑀤𑀯𑀢𑁄 𑀓𑀺𑀁 𑀦𑀸𑀫 𑀓𑀫𑁆𑀫𑀁 𑀦 𑀲𑀺𑀚𑁆𑀛𑀢𑀻’’𑀢𑀺𑀆𑀤𑀺𑀓𑀁 𑀧𑀼𑀭𑀺𑀫𑀸𑀪𑀺𑀲𑀗𑁆𑀔𑀸𑀭𑀽𑀧𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀙𑀦𑁆𑀤𑀸𑀤𑀬𑁄 𑀥𑀼𑀭𑀪𑀽𑀢𑀸 𑀚𑁂𑀝𑁆𑀞𑀓𑀪𑀽𑀢𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂, 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑁂 𑀘 𑀲𑀸𑀥𑀬𑀫𑀸𑀦𑀸 𑀯𑀲𑁂 𑀯𑀢𑁆𑀢𑀬𑀫𑀸𑀦𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀢𑁂 𑀘 𑀢𑁂𑀲𑀁 𑀯𑀲𑁂𑀦 𑀯𑀢𑁆𑀢𑀦𑁆𑀢𑀺 𑀳𑀻𑀦𑀸𑀤𑀺𑀪𑀸𑀯𑁂𑀦 𑀢𑀤𑀦𑀼𑀯𑀢𑁆𑀢𑀦𑀢𑁄. 𑀢𑁂𑀦 𑀢𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑁄 𑀘 𑀔𑁄 𑀏𑀓𑀢𑁄. 𑀬𑀤𑀸 𑀳𑀺 𑀙𑀦𑁆𑀤𑀁 𑀥𑀼𑀭𑀁 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀤𑀸 𑀙𑀦𑁆𑀤𑁄𑀯 𑀅𑀥𑀺𑀧𑀢𑀺, 𑀦 𑀇𑀢𑀭𑁂. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀥𑀺𑀧𑀢𑀺𑀪𑀸𑀯𑁄𑀧𑀺 𑀳𑀺 𑀦𑁂𑀲𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀦𑀺𑀯𑀸𑀭𑀓𑁂 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀦𑀢𑁄 𑀳𑁄𑀢𑀺. 𑀅𑀯𑀲𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀕𑀭𑀼𑀓𑀸𑀢𑀩𑁆𑀩𑀢𑀸𑀪𑀸𑀯𑀢𑁄, 𑀕𑀭𑀼𑀓𑀢𑀲𑁆𑀲𑁂𑀯 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑀯𑀘𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀁 𑀬𑀁 𑀥𑀫𑁆𑀫𑀁 𑀕𑀭𑀼𑀁 𑀓𑀢𑁆𑀯𑀸 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁩). 𑀢𑀢𑁆𑀣 𑀕𑀭𑀼𑀁 𑀓𑀢𑁆𑀯𑀸𑀢𑀺 𑀕𑀭𑀼𑀓𑀸𑀭𑀘𑀺𑀢𑁆𑀢𑀻𑀓𑀸𑀭𑀯𑀲𑁂𑀦 𑀯𑀸 𑀅𑀲𑁆𑀲𑀸𑀤𑀦𑀯𑀲𑁂𑀦 𑀯𑀸 𑀕𑀭𑀼𑀁 𑀪𑀸𑀭𑀺𑀓𑀁 𑀮𑀤𑁆𑀥𑀩𑁆𑀩𑀁 𑀅𑀦𑀯𑀜𑁆𑀜𑀸𑀢𑀁 𑀓𑀢𑁆𑀯𑀸. 𑀕𑀭𑀼𑀓𑀸𑀢𑀩𑁆𑀩𑀜𑁆𑀳𑀺 𑀆𑀭𑀫𑁆𑀫𑀡𑀁 𑀢𑀦𑁆𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀸𑀦𑀁 𑀅𑀲𑁆𑀲𑀸𑀤𑀦𑀧𑀘𑁆𑀘𑀯𑁂𑀓𑁆𑀔𑀡𑀫𑀕𑁆𑀕𑀨𑀮𑀸𑀦𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀬𑀫𑀸𑀦𑀁 𑀯𑀺𑀬 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀅𑀬𑀁 𑀅𑀢𑁆𑀢𑀸𑀥𑀻𑀦𑀸𑀦𑀁 𑀧𑀢𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑁆𑀢𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀤𑀝𑁆𑀞𑀩𑁆𑀩𑁄.

𑀅𑀦𑁆𑀢𑀭𑀬𑀢𑀻𑀢𑀺 𑀅𑀦𑁆𑀢𑀭𑀁, 𑀩𑁆𑀬𑀯𑀥𑀸𑀬𑀓𑀦𑁆𑀢𑀺 𑀅𑀢𑁆𑀣𑁄, 𑀦𑀸𑀲𑁆𑀲 𑀅𑀦𑁆𑀢𑀭𑀁 𑀯𑀺𑀚𑁆𑀚𑀢𑀻𑀢𑀺 𑀅𑀦𑀦𑁆𑀢𑀭𑁄, 𑀲𑁄𑀬𑁂𑀯 𑀧𑀘𑁆𑀘𑀬𑁄𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀅𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸𑀢𑀺 𑀅𑀢𑁆𑀢𑀦𑁄 𑀦𑀺𑀭𑁄𑀥𑀸𑀦𑀦𑁆𑀢𑀭𑀁 𑀅𑀦𑀼𑀭𑀽𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀉𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀧𑀼𑀭𑀺𑀫𑀪𑀸𑀕𑁂 𑀅𑀦𑀦𑁆𑀢𑀭𑀁 𑀳𑀼𑀢𑁆𑀯𑀸 𑀦𑀺𑀭𑀼𑀤𑁆𑀥𑀸, 𑀭𑀽𑀧𑀥𑀫𑁆𑀫𑀸 𑀧𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑀸 𑀦𑀢𑁆𑀣𑀺.

𑀲𑀫𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄, 𑀢𑀣𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄𑀧𑀻𑀢𑀺 𑀞𑀧𑁂𑀢𑁆𑀯𑀸 𑀉𑀧𑀲𑀕𑁆𑀕𑀫𑀢𑁆𑀢𑀁 𑀦 𑀏𑀢𑁆𑀣 𑀓𑁄𑀘𑀺 𑀯𑀺𑀲𑁂𑀲𑁄. 𑀬𑁄 𑀳𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀲𑁄𑀯 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺. 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀜𑁆𑀳𑀺 𑀅𑀦𑀦𑁆𑀢𑀭𑀼𑀧𑁆𑀧𑀸𑀤𑀪𑀸𑀯𑀢𑁄 𑀦𑀺𑀭𑀦𑁆𑀢𑀭𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸, 𑀭𑀽𑀧𑀓𑀮𑀸𑀧𑀸𑀦𑀁 𑀯𑀺𑀬 𑀲𑀡𑁆𑀞𑀸𑀦𑀸𑀪𑀸𑀯𑀢𑁄 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀲𑀳𑀝𑁆𑀞𑀸𑀦𑀸𑀪𑀸𑀯𑀢𑁄 𑀘 ‘‘𑀇𑀤𑀫𑀺𑀢𑁄 𑀉𑀤𑁆𑀥𑀁 𑀳𑁂𑀝𑁆𑀞𑀸 𑀢𑀺𑀭𑀺𑀬’’𑀦𑁆𑀢𑀺 𑀯𑀺𑀪𑀸𑀕𑀸𑀪𑀸𑀯𑀸 𑀅𑀢𑁆𑀢𑀦𑁄 𑀏𑀓𑀢𑁆𑀢𑀫𑀺𑀯 𑀉𑀧𑀦𑁂𑀢𑁆𑀯𑀸 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑀢𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸, 𑀢𑀲𑁆𑀫𑀸 𑀥𑀫𑁆𑀫𑀢𑁄 𑀅𑀯𑀺𑀲𑁂𑀲𑁂𑀧𑀺 𑀯𑀺𑀦𑁂𑀬𑁆𑀬𑀯𑀲𑁂𑀦 𑀩𑁆𑀬𑀜𑁆𑀚𑀦𑀢𑁆𑀣𑀫𑀢𑁆𑀢𑀢𑁄 𑀯𑀺𑀲𑁂𑀲𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀯𑀺𑀲𑀼𑀁 𑀤𑁂𑀲𑀦𑀸 𑀓𑀢𑀸. 𑀬𑀫𑁆𑀧𑀺 ‘‘𑀅𑀢𑁆𑀣𑀸𑀦𑀦𑁆𑀢𑀭𑀢𑀸𑀬 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀓𑀸𑀮𑀸𑀦𑀦𑁆𑀢𑀭𑀢𑀸𑀬 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄’’𑀢𑀺 𑀆𑀘𑀭𑀺𑀬𑀸𑀦𑀁 𑀫𑀢𑀁, 𑀢𑀁 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀓𑀼𑀲𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀻𑀳𑀺 (𑀧𑀝𑁆𑀞𑀸. 𑁧.𑁧.𑁪𑁧𑁮) 𑀯𑀺𑀭𑀼𑀚𑁆𑀛𑀢𑀻𑀢𑀺𑀆𑀤𑀺𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀳𑀼𑀧𑁆𑀧𑀸𑀤𑀦𑀯𑀲𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀳𑀚𑀸𑀢𑀧𑀘𑁆𑀘𑀬𑁄 𑀧𑀓𑀸𑀲𑀲𑁆𑀲 𑀧𑀤𑀻𑀧𑁄 𑀯𑀺𑀬, 𑀲𑁄 𑀧𑀦𑀸𑀬𑀁 ‘‘𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁, 𑀲𑀳𑀚𑀸𑀢𑀭𑀽𑀧𑀸𑀦𑀜𑁆𑀘, 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁, 𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀯𑀺𑀧𑀸𑀓𑀸 𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑀘 𑀢𑀺𑀯𑀺𑀥𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀘𑁂𑀢𑀲𑀺𑀓𑀸’’𑀢𑀺𑀆𑀤𑀺. 𑀬𑀫𑁆𑀧𑀺 𑀳𑀺 𑀧𑀸𑀴𑀺𑀬𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦𑀲𑁆𑀲 𑀙𑀩𑁆𑀩𑀺𑀥𑀢𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀁. 𑀬𑁄 𑀧𑀦𑁂𑀢𑁆𑀣 𑀲𑁂𑀲𑀭𑀽𑀧𑀥𑀫𑁆𑀫𑀸𑀦𑀁, 𑀉𑀪𑀬𑀢𑁆𑀣 𑀯𑀢𑁆𑀣𑀼𑀦𑁄 𑀘 𑀧𑀯𑀢𑁆𑀢𑀺𑀬𑀸 𑀅𑀭𑀽𑀧𑀥𑀫𑁆𑀫𑀸𑀦𑀁, 𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀫𑀳𑀸𑀪𑀽𑀢𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁄, 𑀲𑁄 𑀧𑀘𑁆𑀘𑀬𑀪𑀸𑀯𑀲𑀸𑀫𑀢𑁆𑀣𑀺𑀬𑀯𑀺𑀲𑁂𑀲𑀸𑀬𑁄𑀕𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀜𑁆𑀜𑀫𑀜𑁆𑀜𑀁 𑀉𑀧𑁆𑀧𑀸𑀤𑀦𑀼𑀧𑀢𑁆𑀣𑀫𑁆𑀪𑀦𑀪𑀸𑀯𑁂𑀦 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀲𑁆𑀲 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄. 𑀅𑀜𑁆𑀜𑀫𑀜𑁆𑀜𑀼𑀧𑀢𑁆𑀣𑀫𑁆𑀪𑀓𑀢𑀺𑀤𑀡𑁆𑀟𑀓𑀁 𑀯𑀺𑀬 𑀉𑀧𑀓𑀸𑀭𑀓𑀢𑀸 𑀘 𑀅𑀜𑁆𑀜𑀫𑀜𑁆𑀜𑀢𑀸𑀯𑀲𑁂𑀦𑁂𑀯 𑀤𑀝𑁆𑀞𑀩𑁆𑀩𑀸, 𑀦 𑀲𑀳𑀚𑀸𑀢𑀸𑀤𑀺𑀯𑀲𑁂𑀦. 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁄 𑀳𑁄𑀦𑁆𑀢𑁄𑀬𑁂𑀯 𑀳𑀺 𑀓𑁄𑀘𑀺 𑀓𑀲𑁆𑀲𑀘𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀦 𑀳𑁄𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀘𑀺𑀢𑁆𑀢𑀚𑀭𑀽𑀧𑁂 𑀲𑀢𑀺, 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀭𑀽𑀧𑁂 𑀲𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄. 𑀬𑀣𑀸𑀳 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸…𑀧𑁂… 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁭). 𑀆𑀘𑀭𑀺𑀬𑁂𑀦 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀅𑀧𑀭𑀸𑀫𑀲𑀺𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 ‘‘𑀢𑀣𑀸 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄’’𑀢𑀺.

𑀢𑀭𑀼𑀆𑀤𑀻𑀦𑀁 𑀧𑀣𑀯𑀻 𑀯𑀺𑀬 𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦, 𑀘𑀺𑀢𑁆𑀢𑀓𑀫𑁆𑀫𑀸𑀤𑀻𑀦𑀁 𑀧𑀝𑀸𑀤𑀬𑁄 𑀯𑀺𑀬 𑀘 𑀦𑀺𑀲𑁆𑀲𑀬𑀸𑀓𑀸𑀭𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄. 𑀯𑀢𑁆𑀣𑀼𑀭𑀽𑀧𑀸𑀦𑀻𑀢𑀺 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑀸𑀦𑀺 𑀯𑀢𑁆𑀣𑀼𑀭𑀽𑀧𑀸𑀦𑀺. 𑀫𑀳𑀸𑀪𑀽𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀘𑀸𑀢𑀺 𑀅𑀜𑁆𑀜𑀫𑀜𑁆𑀜𑀁, 𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘 𑀢𑀣𑁂𑀯 𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀫𑀳𑀸𑀪𑀽𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀁, 𑀲𑀳𑀚𑀸𑀢𑀭𑀽𑀧𑀸𑀦𑀜𑁆𑀘 𑀦𑀺𑀲𑁆𑀲𑀬𑀸𑀓𑀸𑀭𑁂𑀦 𑀧𑀘𑁆𑀘𑀬𑀸𑀦𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀺, 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀅𑀢𑁆𑀢𑀦𑁄 𑀨𑀮𑁂𑀦 𑀦𑀺𑀲𑁆𑀲𑀺𑀢𑁄 𑀦 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀦𑀺𑀲𑁆𑀲𑀬𑁄.

𑀬𑀣𑀸 𑀧𑀦 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄, 𑀏𑀯𑀁 𑀪𑀼𑀲𑁄 𑀦𑀺𑀲𑁆𑀲𑀬𑁄 𑀉𑀧𑀦𑀺𑀲𑁆𑀲𑀬𑁄, 𑀩𑀮𑀯𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀩𑀮𑀯𑀓𑀸𑀭𑀡𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀢𑀺𑀯𑀺𑀥𑁄𑀢𑀺 𑀆𑀳 ‘‘𑀆𑀭𑀫𑁆𑀫𑀡𑀸’’𑀢𑀺𑀆𑀤𑀺. 𑀢𑀢𑁆𑀣 𑁋

‘‘𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀛𑀸𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀲𑁂𑀔𑀸 𑀕𑁄𑀢𑁆𑀭𑀪𑀼𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀯𑁄𑀤𑀸𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀲𑁂𑀔𑀸 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑁋

𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀢𑀸𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀸 𑀲𑀤𑁆𑀥𑀺𑀁 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸𑀯 𑀯𑀺𑀪𑀢𑁆𑀢𑁄. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀬𑁂𑀯𑀸’’𑀢𑀺. 𑀓𑀺𑀜𑁆𑀘𑀸𑀧𑀺 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸 𑀯𑀺𑀪𑀢𑁆𑀢𑁄, 𑀢𑀣𑀸𑀧𑀺 𑀅𑀬𑀁 𑀢𑁂𑀲𑀁 𑀯𑀺𑀲𑁂𑀲𑁄 𑁋 𑀬𑀁 𑀆𑀭𑀫𑁆𑀫𑀡𑀁 𑀕𑀭𑀼𑀁 𑀓𑀢𑁆𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀦𑀺𑀬𑀫𑀢𑁄 𑀢𑁂𑀲𑀁 𑀆𑀭𑀫𑁆𑀫𑀡𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀇𑀢𑀺 𑀕𑀭𑀼𑀓𑀸𑀢𑀩𑁆𑀩𑀫𑀢𑁆𑀢𑀝𑁆𑀞𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀩𑀮𑀯𑀓𑀸𑀭𑀡𑀝𑁆𑀞𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀢𑀺 𑀘 𑀏𑀯𑀫𑁂𑀢𑁂𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄𑀧𑀺 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀦𑀬𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸𑀯 𑀯𑀺𑀪𑀢𑁆𑀢𑁄𑀢𑀺 𑀆𑀳 ‘‘𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀧𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀯𑀸’’𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀸 𑀅𑀦𑀼𑀭𑀽𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀩𑀮𑀯𑀓𑀸𑀭𑀡𑀯𑀲𑁂𑀦 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁂𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀓𑀢𑀺𑀬𑀸 𑀏𑀯 𑀧𑀘𑁆𑀘𑀬𑀦𑁆𑀢𑀭𑀭𑀳𑀺𑀢𑁂𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄, 𑀆𑀭𑀫𑁆𑀫𑀡𑀅𑀦𑀦𑁆𑀢𑀭𑁂𑀳𑀺 𑀅𑀫𑀺𑀲𑁆𑀲𑁄𑀯 𑀧𑀼𑀣𑀕𑁂𑀯 𑀓𑁄𑀘𑀺 𑀉𑀧𑀦𑀺𑀲𑁆𑀲𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀧𑀓𑀢𑁄 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀧𑀓𑀢𑁄𑀢𑀺 𑀘𑁂𑀢𑁆𑀣 𑀧-𑀓𑀸𑀭𑁄 𑀉𑀧𑀲𑀕𑁆𑀕𑁄, 𑀲𑁄 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀦𑀺𑀧𑁆𑀨𑀸𑀤𑀺𑀢𑀪𑀸𑀯𑀁, 𑀉𑀧𑀲𑁂𑀯𑀺𑀢𑀪𑀸𑀯𑀜𑁆𑀘 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀧𑁆𑀨𑀦𑁆𑀦𑁄 𑀯𑀸 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀲𑀤𑁆𑀥𑀸𑀲𑀻𑀮𑀸𑀤𑀺 𑀉𑀧𑀲𑁂𑀯𑀺𑀢𑁄 𑀯𑀸 𑀉𑀢𑀼𑀪𑁄𑀚𑀦𑀸𑀤𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀅𑀢𑁆𑀣𑁄. 𑀉𑀧𑀲𑁂𑀯𑀦𑀜𑁆𑀘𑁂𑀢𑁆𑀣 𑀤𑀼𑀯𑀺𑀥𑀁 𑀉𑀧𑀬𑁄𑀕𑁄𑀧𑀲𑁂𑀯𑀦𑀁 𑀆𑀭𑀫𑁆𑀫𑀡𑀽𑀧𑀲𑁂𑀯𑀦𑀜𑁆𑀘. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀦𑀸𑀕𑀢𑀲𑁆𑀲𑀸𑀧𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸 𑀮𑀤𑁆𑀥𑀸 𑀳𑁄𑀢𑀺. 𑀓𑀸𑀬𑀺𑀓𑀲𑀼𑀔…𑀧𑁂… 𑀬𑁄 𑀘𑀸𑀢𑀺 𑀏𑀢𑁆𑀣 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀦𑀺 𑀭𑀸𑀕𑀲𑀤𑁆𑀥𑀸𑀤𑀻𑀦𑀁, 𑀉𑀢𑀼𑀪𑁄𑀚𑀦𑀸𑀤𑀬𑁄 𑀘𑀺𑀢𑁆𑀢𑀲𑀫𑀸𑀥𑀸𑀦𑀸𑀤𑀻𑀦𑀁, 𑀲𑀤𑁆𑀥𑀸𑀲𑀻𑀮𑀸𑀤𑀬𑁄 𑀲𑀤𑁆𑀥𑀸𑀲𑀻𑀮𑀸𑀤𑀻𑀦𑀜𑁆𑀘 𑀉𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀬𑀁 𑀬𑀁 𑀉𑀧𑀦𑀺𑀲𑁆𑀲𑀸𑀬 𑀬𑀲𑁆𑀲 𑀬𑀲𑁆𑀲 𑀲𑀫𑁆𑀪𑀯𑁄, 𑀢𑀁 𑀢𑀁 𑀢𑀲𑁆𑀲 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀘𑁆𑀘𑀬𑀫𑀳𑀸𑀧𑀤𑁂𑀲𑁄 𑀳𑁂𑀲, 𑀬𑀤𑀺𑀤𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺.

𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄 𑀧𑀞𑀫𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀢𑁆𑀢𑀫𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄. 𑀲𑁄 𑀘 𑀭𑀽𑀧𑀥𑀫𑁆𑀫𑁄𑀯 𑀲𑀫𑀸𑀦𑁄 𑀅𑀭𑀽𑀧𑀥𑀫𑁆𑀫𑀲𑁆𑀲𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁄 𑀦𑀸𑀫𑀸’’𑀢𑀺𑀆𑀤𑀺. 𑀬𑀣𑀸 𑀘𑁂𑀢𑁆𑀣 ‘‘𑀯𑀢𑁆𑀣𑀼𑀭𑀽𑀧𑀸𑀦𑀻’’𑀢𑀺 𑀳𑀤𑀬𑀯𑀢𑁆𑀣𑀼𑀦𑁄𑀧𑀺 𑀕𑀳𑀡𑀁, 𑀏𑀯𑀁 ‘‘𑀭𑀽𑀧𑀸𑀤𑀻𑀦𑀻’’𑀢𑀺𑀆𑀤𑀺-𑀕𑁆𑀕𑀳𑀡𑁂𑀦 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲𑀸𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀘 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑁂𑀯 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀪𑀸𑀯𑁂𑀦 𑀆𑀕𑀢𑀸𑀦𑀻𑀢𑀺? 𑀲𑀘𑁆𑀘𑀁 𑀆𑀕𑀢𑀸𑀦𑀺, 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀲𑁂𑀔𑀸 𑀯𑀸 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁨𑁪) 𑀅𑀯𑀺𑀲𑁂𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀓𑁆𑀔𑀸𑀤𑀻𑀦𑀫𑁆𑀧𑀺 𑀕𑀳𑀺𑀢𑀢𑁆𑀢𑀸 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀪𑀸𑀯𑁄 𑀦 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀁. 𑀅𑀢𑁆𑀣𑀢𑁄𑀧𑀺 𑀳𑁂𑀢𑀁 𑀲𑀺𑀤𑁆𑀥𑀁 ‘‘𑀬𑀁 𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀁 𑀢𑀲𑁆𑀲 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀳𑁄𑀢𑀻’’𑀢𑀺. 𑀏𑀢𑁆𑀣 𑀘 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀸𑀓𑀸𑀭𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑀸 𑀧𑀼𑀭𑁂𑀚𑀸𑀢𑀪𑀸𑀯𑁂𑀦 𑀯𑀺𑀦𑀸 𑀉𑀧𑀓𑀸𑀭𑀪𑀸𑀯𑀁 𑀅𑀕𑀘𑁆𑀙𑀦𑁆𑀢𑀸𑀦𑀁 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀼𑀭𑁂𑀚𑀸𑀢𑀸𑀓𑀸𑀭𑁂𑀦 𑀉𑀧𑀓𑀸𑀭𑀓𑀢𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀸𑀢𑀺 𑀅𑀬𑀫𑀲𑁆𑀲 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀧𑀘𑁆𑀘𑀬𑀢𑀸𑀳𑀺 𑀯𑀺𑀲𑁂𑀲𑁄.

𑀕𑀺𑀚𑁆𑀛𑀧𑁄𑀢𑀓𑀲𑀭𑀻𑀭𑀸𑀦𑀁 𑀆𑀳𑀸𑀭𑀸𑀲𑀸 𑀘𑁂𑀢𑀦𑀸 𑀯𑀺𑀬 𑀧𑀼𑀭𑁂𑀚𑀸𑀢𑀸𑀦𑀁 𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄. 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀯𑀲𑁂𑀦 𑀳𑀺 𑀧𑀘𑁆𑀙𑀸𑀚𑀸𑀢𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀳𑀺 𑀯𑀺𑀦𑀸 𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀳𑁂𑀢𑀼𑀪𑀸𑀯𑀁 𑀅𑀕𑀘𑁆𑀙𑀦𑁆𑀢𑀸𑀦𑀁 𑀧𑀘𑁆𑀙𑀸𑀚𑀸𑀢𑀸𑀓𑀸𑀭𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀉𑀧𑀓𑀸𑀭𑀓𑀢𑀸 𑀯𑀺𑀧𑁆𑀧𑀬𑀼𑀢𑁆𑀢𑀸𑀓𑀸𑀭𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀢𑀸𑀢𑀺 𑀏𑀯𑀁 𑀲𑀩𑁆𑀩𑀧𑀘𑁆𑀘𑀬𑀸𑀦𑀁 𑀧𑀘𑁆𑀘𑀬𑀦𑁆𑀢𑀭𑀸𑀓𑀸𑀭𑀯𑀺𑀲𑀺𑀝𑁆𑀞𑀸 𑀉𑀧𑀓𑀸𑀭𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀲𑁄 𑀧𑀦 ‘‘𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁧) 𑀆𑀕𑀢𑀢𑁆𑀢𑀸 𑀏𑀓𑀯𑀺𑀥𑁄𑀢𑀺 𑀆𑀳 ‘‘𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀯𑀸’’𑀢𑀺.

𑀧𑀼𑀭𑀺𑀫𑀧𑀼𑀭𑀺𑀫𑀧𑀭𑀺𑀘𑀺𑀢𑀕𑀦𑁆𑀣𑁄 𑀯𑀺𑀬 𑀉𑀢𑁆𑀢𑀭𑀼𑀢𑁆𑀢𑀭𑀲𑁆𑀲 𑀕𑀦𑁆𑀣𑀲𑁆𑀲 𑀓𑀼𑀲𑀮𑀸𑀤𑀺𑀪𑀸𑀯𑁂𑀦 𑀅𑀢𑁆𑀢𑀲𑀤𑀺𑀲𑀧𑀕𑀼𑀡𑀩𑀮𑀯𑀪𑀸𑀯𑀯𑀺𑀲𑀺𑀝𑁆𑀞𑀁 𑀅𑀢𑁆𑀢𑀲𑀚𑀸𑀢𑀺𑀬𑀢𑀸𑀕𑀸𑀳𑀓𑀁 𑀆𑀲𑁂𑀯𑀦𑀁, 𑀢𑁂𑀦 𑀧𑀘𑁆𑀘𑀬𑀸 𑀲𑀚𑀸𑀢𑀺𑀬𑀥𑀫𑁆𑀫𑀸𑀯 𑀆𑀲𑁂𑀯𑀦𑀧𑀘𑁆𑀘𑀬𑁄. 𑀪𑀺𑀦𑁆𑀦𑀚𑀸𑀢𑀺𑀓𑀸 𑀳𑀺 𑀪𑀺𑀦𑁆𑀦𑀚𑀸𑀢𑀺𑀓𑀸𑀦𑀁 𑀆𑀲𑁂𑀯𑀦𑀕𑀼𑀡𑁂𑀦 𑀧𑀕𑀼𑀡𑀩𑀮𑀯𑀪𑀸𑀯𑀯𑀺𑀲𑀺𑀝𑁆𑀞𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀢𑀦𑁄 𑀕𑀢𑀺𑀁 𑀕𑀸𑀳𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀦 𑀘 𑀲𑀬𑀁 𑀢𑀢𑁄 𑀕𑀡𑁆𑀳𑀦𑁆𑀢𑀺. 𑀢𑁂 𑀧𑀦 𑀅𑀦𑀦𑁆𑀢𑀭𑀸𑀢𑀻𑀢𑀸𑀦𑀺 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀘𑁂𑀯 𑀅𑀦𑀸𑀯𑀚𑁆𑀚𑀦𑀓𑀺𑀭𑀺𑀬𑀸𑀚𑀯𑀦𑀸𑀦𑀺 𑀘𑀸𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀆𑀯𑀚𑁆𑀚𑀦𑀤𑁆𑀯𑀬’’𑀦𑁆𑀢𑀺𑀆𑀤𑀺. ‘‘𑀦 𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀏𑀓’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁨𑁨𑁧) 𑀯𑀘𑀦𑀢𑁄 𑀅𑀳𑁂𑀢𑀼𑀓𑀓𑀺𑀭𑀺𑀬𑀸𑀲𑀼 𑀳𑀲𑀺𑀢𑀼𑀧𑁆𑀧𑀸𑀤𑀲𑁆𑀲𑁂𑀯 𑀆𑀲𑁂𑀯𑀦𑀪𑀸𑀯𑁂𑀦, 𑀆𑀯𑀚𑁆𑀚𑀦𑀤𑁆𑀯𑀬𑀁 𑀆𑀲𑁂𑀯𑀦𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀫𑁆𑀧𑀺 𑀓𑀼𑀲𑀮𑀁 𑀪𑀺𑀦𑁆𑀦𑀚𑀸𑀢𑀺𑀓𑀲𑁆𑀲𑁂𑀯 𑀨𑀮𑀲𑁆𑀲 𑀧𑀼𑀭𑁂𑀘𑀭𑀢𑁆𑀢𑀸 𑀦 𑀢𑁂𑀦, 𑀆𑀲𑁂𑀯𑀦𑀕𑀼𑀡𑀁 𑀕𑀡𑁆𑀳𑀸𑀧𑁂𑀢𑀺, 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀫𑁆𑀧𑀺 𑀓𑀫𑁆𑀫𑀯𑀲𑁂𑀦. 𑀯𑀺𑀧𑀸𑀓𑀪𑀸𑀯𑀧𑁆𑀧𑀢𑁆𑀢𑀁 𑀓𑀫𑁆𑀫𑀧𑀭𑀺𑀡𑀸𑀫𑀺𑀢𑀁 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀁 𑀧𑀢𑀺𑀢𑀁 𑀯𑀺𑀬 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀕𑀸𑀳𑁂𑀢𑁆𑀯𑀸 𑀧𑀭𑀺𑀪𑀸𑀯𑁂𑀢𑁆𑀯𑀸 𑀦𑁂𑀯 𑀅𑀜𑁆𑀜𑀯𑀺𑀧𑀸𑀓𑀁 𑀧𑀯𑀢𑁆𑀢𑁂𑀢𑀺, 𑀦 𑀘 𑀧𑀼𑀭𑀺𑀫𑀯𑀺𑀧𑀸𑀓𑀸𑀦𑀼𑀪𑀸𑀯𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀫𑁆𑀧𑀺 𑀳𑀺 𑀓𑀺𑀜𑁆𑀘𑀸𑀧𑀺 𑀚𑀯𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀆𑀲𑁂𑀯𑀦𑀕𑀼𑀡𑀁 𑀧𑀦 𑀕𑀡𑁆𑀳𑀸𑀢𑀺, 𑀦 𑀘 𑀅𑀜𑁆𑀜𑀁 𑀕𑀸𑀳𑀸𑀧𑁂𑀢𑀺. 𑀬𑀫𑁆𑀧𑀺 ‘‘𑀆𑀲𑁂𑀯𑀦𑀯𑀺𑀦𑀺𑀫𑀼𑀢𑁆𑀢𑀁 𑀚𑀯𑀦𑀁 𑀦𑀢𑁆𑀣𑀻’’𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀢𑀫𑁆𑀧𑀺 ‘‘𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀇𑀢𑀭𑀣𑀸 𑀧𑀦 𑀆𑀘𑀭𑀺𑀬𑀲𑁆𑀲 𑀅𑀲𑀫𑀧𑁂𑀓𑁆𑀔𑀺𑀢𑀸𑀯𑀺𑀥𑀸𑀬𑀓𑀢𑁆𑀢𑀧𑁆𑀧𑀲𑀗𑁆𑀕𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀝𑁆𑀞𑀸𑀦𑀝𑁆𑀞𑀓𑀣𑀸𑀬𑀁 ‘‘𑀮𑁄𑀓𑀼𑀢𑁆𑀢𑀭𑁄 𑀧𑀦 𑀆𑀲𑁂𑀯𑀦𑀧𑀘𑁆𑀘𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁧𑁨). 𑀫𑀕𑁆𑀕𑁄 𑀧𑀦 𑀕𑁄𑀢𑁆𑀭𑀪𑀼𑀢𑁄 𑀆𑀲𑁂𑀯𑀦𑀁 𑀦 𑀕𑀡𑁆𑀳𑀸𑀢𑀻𑀢𑀺 𑀦𑀢𑁆𑀣𑀺 𑀪𑀽𑀫𑀺𑀆𑀤𑀺𑀯𑀲𑁂𑀦 𑀦𑀸𑀦𑀸𑀚𑀸𑀢𑀺𑀓𑀢𑀸𑀬 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀝𑁆𑀞𑀸𑀦𑁂 ‘‘𑀕𑁄𑀢𑁆𑀭𑀪𑀼 𑀫𑀕𑁆𑀕𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀯𑁄𑀤𑀸𑀦𑀁 𑀫𑀕𑁆𑀕𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁬).

𑀘𑀺𑀢𑁆𑀢𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑀆𑀬𑀽𑀳𑀦𑀓𑀺𑀭𑀺𑀬𑀸𑀪𑀸𑀯𑁂𑀦 𑀲𑀳𑀚𑀸𑀢𑀸𑀦𑀁, 𑀦𑀸𑀦𑀓𑁆𑀔𑀡𑀺𑀓𑀸𑀦𑀜𑁆𑀘 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀓𑀫𑁆𑀫𑀧𑀘𑁆𑀘𑀬𑁄. 𑀓𑀫𑁆𑀫𑀦𑁆𑀢𑀺 𑀳𑀺 𑀘𑁂𑀢𑀦𑀸 𑀯𑀼𑀘𑁆𑀘𑀢𑀺, 𑀲𑀸 𑀘 𑀆𑀬𑀽𑀳𑀦𑀩𑁆𑀬𑀸𑀧𑀸𑀭𑀸. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀦 𑀲𑀳 𑀉𑀧𑁆𑀧𑀦𑁆𑀦𑀸 𑀲𑀳𑀚𑀸𑀢𑀸, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄 𑀦𑀸𑀦𑀓𑁆𑀔𑀡𑁂 𑀪𑀯𑀸 𑀦𑀸𑀦𑀓𑁆𑀔𑀡𑀺𑀓𑀸. 𑀲𑀳𑀚𑀸𑀢𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀘𑁂𑀢𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸 𑀲𑀳𑀚𑀸𑀢𑀦𑀸𑀫𑀸𑀦𑀁, 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀧𑀘𑁆𑀘𑀬𑁄, 𑀇𑀢𑀭𑀸 𑀧𑀦 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀸𑀲𑀯𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀢𑀺 𑀅𑀢𑁆𑀢𑀦𑁄 𑀉𑀧𑁆𑀧𑀸𑀤𑀯𑀺𑀲𑀺𑀝𑁆𑀞𑁂 𑀲𑀦𑁆𑀢𑀸𑀦𑁂 𑀲𑁂𑀲𑀧𑀘𑁆𑀘𑀬𑀲𑀫𑀸𑀕𑀫𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀲𑀦𑁆𑀢𑀸𑀦𑀯𑀺𑀲𑁂𑀲𑀦𑀓𑀺𑀭𑀺𑀬𑀸𑀪𑀸𑀯𑁂𑀦 𑀉𑀧𑀓𑀸𑀭𑀺𑀓𑀸 𑀓𑀸𑀫𑀭𑀽𑀧𑀸𑀭𑀽𑀧𑀓𑀼𑀲𑀮𑀘𑁂𑀢𑀦𑀸, 𑀅𑀓𑀼𑀲𑀮𑀘𑁂𑀢𑀦𑀸 𑀘. 𑀢𑀲𑁆𑀲𑀸 𑀳𑀺 𑀢𑀣𑀸 𑀓𑀺𑀭𑀺𑀬𑀸𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸 𑀢𑁂𑀲𑀁 𑀧𑀯𑀢𑁆𑀢𑀺, 𑀦 𑀅𑀜𑁆𑀜𑀣𑀸. 𑀇𑀢𑀭𑀸 𑀧𑀦 𑀲𑀳𑀚𑀸𑀢𑀸𑀦𑀁 𑀆𑀬𑀽𑀳𑀦𑀓𑀺𑀭𑀺𑀬𑀸𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀉𑀧𑀓𑀸𑀭𑀺𑀓𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀯𑀥𑀸𑀭𑀡𑁂𑀦 𑀧𑀦𑁂𑀢𑁆𑀣 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀁 𑀅𑀪𑀺𑀚𑁆𑀛𑀸𑀤𑀺𑀓𑀫𑁆𑀫𑀁 𑀧𑀝𑀺𑀓𑁆𑀔𑀺𑀧𑀢𑀺 𑀲𑀢𑀺𑀧𑀺 𑀯𑀺𑀧𑀸𑀓𑀥𑀫𑁆𑀫𑀲𑀪𑀸𑀯𑁂 𑀘𑁂𑀢𑀦𑀸𑀯𑀚𑁆𑀚𑀸𑀦𑀁 𑀅𑀢𑀁𑀲𑀪𑀸𑀯𑀢𑁆𑀢𑀸. 𑀅𑀦𑀸𑀲𑀯…𑀧𑁂… 𑀧𑀘𑁆𑀘𑀬𑁄𑀢𑀺 𑀇𑀫𑀺𑀦𑀸 𑀮𑁄𑀓𑀺𑀬𑀓𑀼𑀲𑀮𑀘𑁂𑀢𑀦𑀸𑀬 𑀯𑀺𑀲𑁂𑀲𑀫𑀢𑁆𑀢𑀁 𑀤𑀲𑁆𑀲𑁂𑀢𑀺, 𑀦 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀢𑀸𑀪𑀸𑀯𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀭𑀽𑀧𑀸𑀯𑀘𑀭𑀘𑁂𑀢𑀦𑀸, 𑀧𑀦 𑀮𑁄𑀓𑀼𑀢𑁆𑀢𑀭𑀘𑁂𑀢𑀦𑀸 𑀘 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺.

𑀅𑀢𑁆𑀢𑀦𑁄 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁂𑀦 𑀲𑀳𑀚𑀸𑀢𑀦𑀸𑀫𑀭𑀽𑀧𑀸𑀦𑀁 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀸𑀬 𑀉𑀧𑀓𑀸𑀭𑀓𑀸 𑀅𑀭𑀽𑀧𑀥𑀫𑁆𑀫𑀸𑀯 𑀯𑀺𑀧𑀸𑀓𑀧𑀘𑁆𑀘𑀬𑁄. 𑀢𑁂𑀦𑀸𑀳 ‘‘𑀯𑀺𑀧𑀸𑀓𑀘𑀺𑀢𑁆𑀢𑀘𑁂𑀢𑀲𑀺𑀓𑀸’’𑀢𑀺. 𑀢𑁂 𑀳𑀺 𑀧𑀬𑁄𑀕𑁂𑀦 𑀅𑀲𑀸𑀥𑁂𑀢𑀩𑁆𑀩𑀢𑀸𑀬 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀦𑀺𑀧𑁆𑀨𑀚𑁆𑀚𑀦𑀫𑀢𑁆𑀢𑀢𑁄 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀸 𑀳𑁄𑀦𑁆𑀢𑀺, 𑀦 𑀓𑀺𑀮𑁂𑀲𑀯𑀽𑀧𑀲𑀫𑀲𑀦𑁆𑀢𑀪𑀸𑀯𑀸. 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀢𑁄 𑀏𑀯 𑀳𑀺 𑀪𑀯𑀗𑁆𑀕𑀸𑀤𑀬𑁄 𑀤𑀼𑀯𑀺𑀜𑁆𑀜𑁂𑀬𑁆𑀬𑀸. 𑀧𑀜𑁆𑀘𑀤𑁆𑀯𑀸𑀭𑁂𑀧𑀺 𑀳𑀺 𑀚𑀯𑀦𑀧𑁆𑀧𑀯𑀢𑁆𑀢𑀺𑀬𑀸𑀯 𑀭𑀽𑀧𑀸𑀤𑀻𑀦𑀁 𑀕𑀳𑀺𑀢𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀅𑀪𑀺𑀦𑀺𑀧𑀸𑀢𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀫𑀢𑁆𑀢𑀸 𑀧𑀦 𑀯𑀺𑀧𑀸𑀓𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀸 𑀏𑀯.

𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀉𑀧𑀓𑀸𑀭𑁄 𑀆𑀳𑀸𑀭𑀧𑀘𑁆𑀘𑀬𑁄. 𑀲𑀢𑀺𑀧𑀺 𑀳𑀺 𑀚𑀦𑀓𑀪𑀸𑀯𑁂 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀫𑁂𑀯 𑀆𑀳𑀸𑀭𑀲𑁆𑀲 𑀧𑀥𑀸𑀦𑀓𑀺𑀘𑁆𑀘𑀁, 𑀚𑀦𑀬𑀦𑁆𑀢𑁄𑀧𑀺 𑀘 𑀆𑀳𑀸𑀭𑁄 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄𑀯 𑀚𑀦𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑀦𑀪𑀸𑀯𑁄𑀯 𑀆𑀳𑀸𑀭𑀪𑀸𑀯𑁄𑀢𑀺. 𑀢𑀢𑁆𑀣 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀭𑀽𑀧𑀓𑀸𑀬𑀲𑁆𑀲𑁂𑀯 𑀉𑀧𑀢𑁆𑀣𑀫𑁆𑀪𑀓𑁄, 𑀲𑁂𑀲𑀸 𑀢𑀬𑁄 𑀭𑀽𑀧𑀸𑀭𑀽𑀧𑀓𑀸𑀬𑀲𑁆𑀲. 𑀦 𑀓𑁂𑀯𑀮𑀜𑁆𑀳𑀺 𑀢𑁂 𑀦𑀸𑀫𑀥𑀫𑁆𑀫𑀸𑀦𑀫𑁂𑀯 𑀅𑀯𑀺𑀘𑁆𑀙𑁂𑀤𑀳𑁂𑀢𑀼𑀓𑀸, 𑀅𑀣 𑀔𑁄 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀧𑀯𑀢𑁆𑀢𑁂 𑀘𑀺𑀢𑁆𑀢𑀚𑀭𑀽𑀧𑀸𑀦𑀫𑁆𑀧𑀺.

𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀳𑀺 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑀸𑀧𑀦𑀓𑀲𑀗𑁆𑀔𑀸𑀢𑀆𑀥𑀺𑀧𑀘𑁆𑀘𑀝𑁆𑀞𑁂𑀦 𑀧𑀘𑁆𑀘𑀬𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀅𑀥𑀺𑀧𑀢𑀺𑀧𑀘𑁆𑀘𑀬𑀥𑀫𑁆𑀫𑀸𑀦𑀜𑁆𑀳𑀺 𑀧𑀯𑀢𑁆𑀢𑀺𑀯𑀺𑀦𑀺𑀯𑀸𑀭𑀓𑁂 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑁂𑀦 𑀕𑀭𑀼𑀪𑀸𑀯𑁄 𑀅𑀥𑀺𑀧𑀢𑀺𑀬𑀝𑁆𑀞𑁄, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀦 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺, 𑀚𑀻𑀯𑀦𑁂 𑀓𑀫𑁆𑀫𑀚𑀭𑀽𑀧𑁂𑀳𑀺, 𑀅𑀭𑀽𑀧𑀥𑀫𑁆𑀫𑁂𑀳𑀺 𑀘 𑀚𑀻𑀯𑀦𑁆𑀢𑁂𑀳𑀺 𑀲𑀼𑀔𑀺𑀢𑀸𑀤𑀺𑀪𑀸𑀯𑁂𑀲𑀼 𑀲𑀼𑀔𑀺𑀢𑀸𑀤𑀻𑀳𑀺 𑀅𑀥𑀺𑀫𑁄𑀓𑁆𑀔𑀧𑀕𑁆𑀕𑀳𑀉𑀧𑀝𑁆𑀞𑀸𑀦𑀸𑀯𑀺𑀓𑁆𑀔𑁂𑀧𑀧𑁆𑀧𑀚𑀸𑀦𑀦𑁂𑀲𑀼 ‘‘𑀅𑀦𑀜𑁆𑀜𑀸𑀢𑀁 𑀜𑀲𑁆𑀲𑀸𑀫𑀻’’𑀢𑀺 𑀧𑀯𑀢𑁆𑀢𑀺𑀬𑀁 𑀆𑀚𑀸𑀦𑀦𑁂, 𑀅𑀜𑁆𑀜𑀸𑀢𑀸𑀯𑀺𑀪𑀸𑀯𑁂 𑀘 𑀲𑀤𑁆𑀥𑀸𑀤𑀺𑀲𑀳𑀚𑀸𑀢𑁂𑀳𑀻𑀢𑀺 𑀏𑀯𑀁 𑀢𑀁𑀢𑀁𑀓𑀺𑀘𑁆𑀘𑁂𑀲𑀼 𑀘𑀓𑁆𑀔𑀸𑀤𑀺𑀧𑀘𑁆𑀘𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀓𑁆𑀔𑀸𑀤𑀻𑀦𑀁 𑀅𑀦𑀼𑀯𑀢𑁆𑀢𑀦𑀺𑀬𑀢𑀸𑀫𑀢𑁆𑀢𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀆𑀥𑀺𑀧𑀘𑁆𑀘𑀝𑁆𑀞𑁄𑀢𑀺 𑀅𑀬𑀫𑁂𑀯 𑀢𑁂𑀲𑀁 𑀯𑀺𑀲𑁂𑀲𑁄. 𑀭𑀽𑀧𑀲𑀢𑁆𑀢𑀓-𑀕𑁆𑀕𑀳𑀡𑁂𑀦 𑀘𑀓𑁆𑀔𑀸𑀤𑀻𑀦𑀺 𑀧𑀜𑁆𑀘, 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀤𑁆𑀯𑀬𑀜𑁆𑀘 𑀤𑀲𑁆𑀲𑁂𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀦 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀓𑀢𑁆𑀯𑀸 𑀚𑀻𑀯𑀺𑀢-𑀕𑁆𑀕𑀳𑀡𑁂𑀦 𑀕𑀳𑀺𑀢𑀁. 𑀏𑀯𑀜𑁆𑀳𑀺 𑀤𑁆𑀯𑀸𑀯𑀻𑀲𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺. ‘‘𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀅𑀦𑀜𑁆𑀜𑀸𑀢𑀁 𑀅𑀲𑀘𑁆𑀙𑀺𑀓𑀢𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀜𑀲𑁆𑀲𑀸𑀫𑀻’’𑀢𑀺 𑀧𑀯𑀢𑁆𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀧𑀞𑀫𑀫𑀕𑁆𑀕𑀜𑀸𑀡𑀁. 𑀆𑀚𑀸𑀦𑀢𑁄 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀸𑀦𑀢𑁄 𑀇𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀲𑁄𑀢𑀸𑀧𑀢𑁆𑀢𑀺𑀨𑀮𑀢𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀙𑀲𑀼 𑀜𑀸𑀡𑀁, 𑀅𑀜𑁆𑀜𑀸𑀢𑀸𑀯𑀺𑀦𑁄 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀲𑁆𑀲 𑀇𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁, 𑀅𑀭𑀳𑀢𑁆𑀢𑀨𑀮𑀜𑀸𑀡𑀁. 𑀧𑀞𑀫𑀁 𑀧𑀭𑀺𑀬𑀸𑀬𑀢𑁄 𑀇𑀦𑁆𑀤𑁆𑀭𑀺𑀬𑀢𑁆𑀢𑀁 𑀲𑀦𑁆𑀥𑀸𑀬 𑀭𑀽𑀧𑀲𑀢𑁆𑀢𑀓-𑀕𑁆𑀕𑀳𑀡𑁂𑀦 𑀕𑀳𑁂𑀢𑁆𑀯𑀸𑀧𑀺 𑀧𑀼𑀦 𑀓𑀣𑀜𑁆𑀘𑀺 𑀉𑀧𑀓𑀸𑀭𑀓𑀢𑁆𑀢𑀸𑀪𑀸𑀯𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀏𑀢𑁆𑀣 𑀅𑀕𑁆𑀕𑀳𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀸𑀦𑀺 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀮𑀺𑀗𑁆𑀕𑀸𑀤𑀻𑀳𑀺 𑀅𑀦𑀼𑀯𑀢𑁆𑀢𑀺𑀬𑀫𑀸𑀦𑀸𑀦𑀺𑀧𑀺 𑀧𑀘𑁆𑀘𑀬𑀪𑀸𑀯𑀢𑁄 𑀦𑀸𑀦𑀼𑀯𑀢𑁆𑀢𑀻𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄.

𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀯𑀲𑁂𑀦 𑀉𑀧𑀕𑀦𑁆𑀢𑁆𑀯𑀸 𑀆𑀭𑀫𑁆𑀫𑀡𑀦𑀺𑀚𑁆𑀛𑀸𑀦𑀁 𑀛𑀸𑀦𑀧𑀘𑁆𑀘𑀬𑀢𑀸, 𑀲𑁄 𑀘 𑀯𑀺𑀢𑀓𑁆𑀓𑀸𑀤𑀻𑀦𑀫𑁂𑀯 𑀆𑀯𑁂𑀡𑀺𑀓𑁄 𑀲𑀪𑀸𑀯𑁄𑀢𑀺 𑀆𑀳 ‘‘𑀛𑀸𑀦𑀧𑀘𑁆𑀘𑀬𑁄’’𑀢𑀺𑀆𑀤𑀺. 𑀢𑁂 𑀧𑀦 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀧𑀯𑀢𑁆𑀢𑁂 𑀘𑀺𑀢𑁆𑀢𑀚𑀭𑀽𑀧𑀸𑀦𑀁, 𑀉𑀪𑀬𑀢𑁆𑀣 𑀦𑀸𑀫𑀥𑀫𑁆𑀫𑀸𑀦𑀜𑁆𑀘 𑀧𑀘𑁆𑀘𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀼𑀕𑀢𑀺𑀢𑁄, 𑀤𑀼𑀕𑁆𑀕𑀢𑀺𑀢𑁄, 𑀓𑀼𑀲𑀮𑀢𑁄, 𑀅𑀓𑀼𑀲𑀮𑀢𑁄 𑀯𑀸 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀲𑀳𑀚𑀸𑀢𑀸𑀦𑀁 𑀉𑀧𑀓𑀸𑀭𑀓𑀢𑀸 𑀫𑀕𑁆𑀕𑀧𑀘𑁆𑀘𑀬𑀢𑀸, 𑀲𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀻𑀦𑀦𑁆𑀢𑀺 𑀆𑀳 ‘‘𑀫𑀕𑁆𑀕𑀧𑀘𑁆𑀘𑀬𑁄’’𑀢𑀺𑀆𑀤𑀺. 𑀲𑀗𑁆𑀓𑀧𑁆𑀧-𑀕𑁆𑀕𑀳𑀡𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀁, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀜𑁆𑀘 𑀤𑀲𑁆𑀲𑁂𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀳𑀺 𑀅𑀧𑀸𑀬𑀫𑀕𑁆𑀕𑀗𑁆𑀕𑀸, 𑀫𑀺𑀘𑁆𑀙𑀸𑀲𑀢𑀺𑀫𑀺𑀘𑁆𑀙𑀸𑀯𑀸𑀘𑀸𑀤𑀬𑁄 𑀘𑁂𑀢𑁆𑀣 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀘𑁂𑀢𑀦𑀸 𑀘, 𑀅𑀬𑀫𑁆𑀧𑀺 𑀛𑀸𑀦𑀧𑀘𑁆𑀘𑀬𑁂 𑀯𑀼𑀢𑁆𑀢𑀸𑀦𑀫𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀭𑀫𑀢𑁆𑀣𑁂𑀦 𑀪𑀺𑀦𑁆𑀦𑀸𑀦𑀫𑁆𑀧𑀺 𑀏𑀓𑀻𑀪𑀸𑀯𑀕𑀢𑀸𑀦𑀁 𑀯𑀺𑀬 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑁂𑀦 𑀉𑀧𑀓𑀸𑀭𑀓𑀢𑀸 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸, 𑀲𑀸 𑀘 𑀦𑀸𑀫𑀥𑀫𑁆𑀫𑀸𑀦𑀫𑁂𑀯, 𑀦 𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀆𑀳 ‘‘𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄’’𑀢𑀺𑀆𑀤𑀺.

𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀢𑀸𑀬 𑀬𑀼𑀢𑁆𑀢𑀸𑀦𑀫𑁆𑀧𑀺 𑀲𑀫𑀸𑀦𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀯𑀺𑀲𑀁𑀲𑀝𑁆𑀞𑀢𑀸𑀬 𑀦𑀸𑀦𑀢𑁆𑀢𑀽𑀧𑀕𑀫𑀦𑁂𑀦 𑀉𑀧𑀓𑀸𑀭𑀓𑀢𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸, 𑀲𑀸 𑀘 𑀯𑀢𑁆𑀣𑀽𑀦𑀁, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀫𑁂𑀯 𑀯𑀸𑀢𑀺 𑀆𑀳 ‘‘𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄’’𑀢𑀺𑀆𑀤𑀺. 𑀙 𑀯𑀢𑁆𑀣𑀽𑀦𑀺 𑀳𑀺 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀬𑀣𑀸𑀭𑀳𑀁 𑀧𑀝𑀺𑀲𑀦𑁆𑀥𑀺𑀬𑀁, 𑀧𑀯𑀢𑁆𑀢𑁂, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄. 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀸𑀦𑀻𑀢𑀺 𑀇𑀤𑀁 𑀘𑀓𑁆𑀔𑀸𑀤𑀺𑀯𑀢𑁆𑀣𑀼𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀳𑀤𑀬𑀯𑀢𑁆𑀣𑀼 𑀧𑀦 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺 𑀧𑀘𑁆𑀘𑀬𑀪𑀸𑀯𑀢𑁄 𑀲𑀳𑀚𑀸𑀢𑀫𑁆𑀧𑀺 𑀮𑀩𑁆𑀪𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀅𑀩𑁆𑀬𑀸𑀓𑀢𑀧𑀤𑀲𑁆𑀲 𑀲𑀳𑀚𑀸𑀢𑀯𑀺𑀪𑀗𑁆𑀕𑁂 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀔𑀦𑁆𑀥𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀔𑀦𑁆𑀥𑀸 𑀯𑀢𑁆𑀣𑀼𑀲𑁆𑀲, 𑀯𑀢𑁆𑀣𑀼 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀢𑀣𑀸 𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀢𑀺 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, ‘‘𑀲𑀳𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁧.𑁧.𑁪𑁩𑁪) 𑀧𑀦 𑀲𑀳𑀚𑀸𑀢𑀸𑀧𑀺 𑀮𑀩𑁆𑀪𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀢𑀺𑀯𑀺𑀥𑁄’’𑀢𑀺. 𑀅𑀬𑀁 𑀧𑀦 𑀭𑀽𑀧𑀥𑀫𑁆𑀫𑁄 𑀲𑀫𑀸𑀦𑁄 𑀭𑀽𑀧𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀬 𑀅𑀪𑀸𑀯𑀢𑁄.

𑀬𑁂𑀲𑀜𑁆𑀳𑀺 𑀦𑀸𑀫𑀸𑀦𑀁 𑀘𑀓𑁆𑀔𑀸𑀤𑀻𑀦𑀁 𑀅𑀩𑁆𑀪𑀦𑁆𑀢𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑀸𑀦𑀁 𑀯𑀺𑀬 𑀧𑀯𑀢𑁆𑀢𑀺, 𑀭𑀽𑀧𑀸𑀦𑀜𑁆𑀘 𑀦𑀸𑀫𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸 𑀳𑁄𑀢𑀺, 𑀢𑁂𑀲𑀫𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸. 𑀭𑀽𑀧𑀸𑀦𑀁 𑀧𑀦 𑀭𑀽𑀧𑁂𑀳𑀺 𑀲𑀸𑀲𑀗𑁆𑀓𑀸 𑀦𑀢𑁆𑀣𑀺, 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯 𑀘 𑀚𑀸𑀬𑀦𑁆𑀢𑀸𑀦𑀁 𑀦𑀸𑀫𑀸𑀦𑀁 𑀯𑀺𑀲𑀬𑀫𑀢𑁆𑀢𑀁 𑀆𑀭𑀫𑁆𑀫𑀡𑀦𑁆𑀢𑀺 𑀢𑁂𑀦𑀸𑀧𑀺 𑀢𑁂𑀲𑀁 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸 𑀦𑀢𑁆𑀣𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀪𑀸𑀯𑁂𑀦 𑀅𑀢𑁆𑀣𑀺𑀪𑀸𑀯𑁂𑀦 𑀢𑀸𑀤𑀺𑀲𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀉𑀧𑀓𑀸𑀭𑀓𑀢𑀸 𑀅𑀢𑁆𑀣𑀺𑀧𑀘𑁆𑀘𑀬𑀢𑀸. 𑀲𑀢𑀺𑀧𑀺 𑀳𑀺 𑀚𑀦𑀓𑀢𑁆𑀢𑁂 𑀞𑀺𑀢𑀺𑀬𑀁𑀬𑁂𑀯 𑀲𑀸𑀢𑀺𑀲𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑀸𑀦𑀁 𑀩𑁆𑀬𑀸𑀧𑀸𑀭𑁄𑀢𑀺 𑀉𑀧𑀢𑁆𑀣𑀫𑁆𑀪𑀓𑀢𑀸 𑀢𑁂𑀲𑀁 𑀕𑀳𑀺𑀢𑀸, 𑀢𑁂 𑀘 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑁂𑀯𑀸𑀢𑀺 𑀆𑀳 ‘‘𑀅𑀢𑁆𑀣𑀺𑀧𑀘𑁆𑀘𑀬𑁄’’𑀢𑀺𑀆𑀤𑀺. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀳𑀺 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲, 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀸𑀦𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀯𑀼𑀢𑁆𑀢𑀥𑀫𑁆𑀫𑀸, 𑀢𑀢𑁆𑀣𑁂𑀯 𑀯𑀼𑀢𑁆𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘 𑀅𑀢𑁆𑀣𑀺𑀧𑀘𑁆𑀘𑀬𑁄. 𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀯𑀼𑀢𑁆𑀢𑀥𑀫𑁆𑀫𑀸𑀢𑀺 𑀘 𑀯𑀢𑁆𑀣𑀼𑀭𑀽𑀧𑀫𑀳𑀸𑀪𑀽𑀢𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀲𑀸𑀫𑀜𑁆𑀜𑁂𑀦𑁂𑀯 𑀕𑀳𑀡𑀁, 𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀻𑀦𑀁𑀬𑁂𑀯. 𑀧𑀘𑁆𑀙𑀸𑀚𑀸𑀢𑀸𑀦𑀫𑁆𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀼𑀭𑁂𑀚𑀸𑀢𑀲𑁆𑀲 𑀓𑀸𑀬𑀲𑁆𑀲 𑀧𑀜𑁆𑀳𑀸𑀯𑀸𑀭𑁂 𑀧𑀘𑁆𑀘𑀬𑀪𑀸𑀯𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀏𑀢𑁆𑀣 𑀘 𑀅𑀢𑁆𑀣𑀺𑀪𑀸𑀯𑀸𑀪𑀸𑀯𑁂𑀦 𑀅𑀦𑀼𑀧𑀓𑀸𑀭𑀓𑀸𑀦𑀫𑁂𑀯 𑀅𑀢𑁆𑀣𑀺𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸𑀬 𑀅𑀢𑁆𑀣𑀺𑀧𑀘𑁆𑀘𑀬𑀢𑀸𑀪𑀸𑀯𑀢𑁄 𑀦𑀢𑁆𑀣𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀩𑁆𑀩𑀤𑀸 𑀪𑀸𑀯𑀺𑀦𑁄 𑀅𑀢𑁆𑀣𑀺𑀧𑀘𑁆𑀘𑀬𑀢𑀸, 𑀉𑀧𑁆𑀧𑀸𑀤𑀸𑀤𑀺𑀬𑀼𑀢𑁆𑀢𑀸𑀦𑀁 𑀯𑀸 𑀦𑀢𑁆𑀣𑀺𑀪𑀸𑀯𑁄𑀧𑀓𑀸𑀭𑀢𑀸𑀯𑀺𑀭𑀼𑀤𑁆𑀥𑁄 𑀉𑀧𑀓𑀸𑀭𑀓𑀪𑀸𑀯𑁄 𑀅𑀢𑁆𑀣𑀺𑀧𑀘𑁆𑀘𑀬𑀢𑀸𑀢𑀺 𑀦 𑀢𑀲𑁆𑀲 𑀢𑀧𑁆𑀧𑀘𑁆𑀘𑀬𑀢𑁆𑀢𑀧𑁆𑀧𑀲𑀗𑁆𑀕𑁄.

𑀦𑀢𑁆𑀣𑀺𑀧𑀘𑁆𑀘𑀬𑁄𑀢𑀺𑀆𑀤𑀻𑀲𑀼 𑀅𑀦𑀦𑁆𑀢𑀭𑀢𑀸𑀫𑀢𑁆𑀢𑁂𑀦, 𑀘𑀺𑀢𑁆𑀢𑀦𑀺𑀬𑀸𑀫𑀓𑀪𑀸𑀯𑁂𑀦 𑀯𑀸 𑀉𑀧𑀓𑀸𑀭𑀓𑀢𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸. 𑀏𑀓𑀲𑁆𑀫𑀺𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀫𑀸𑀦𑁂 𑀤𑀼𑀢𑀺𑀬𑀲𑁆𑀲 𑀅𑀪𑀸𑀯𑀢𑁄 𑀅𑀢𑁆𑀢𑀦𑁄 𑀞𑀺𑀢𑀺𑀬𑀸 𑀑𑀓𑀸𑀲𑀫𑀮𑀪𑀦𑁆𑀢𑀸𑀦𑀁 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀓𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀑𑀓𑀸𑀲𑀤𑀸𑀦𑀯𑀲𑁂𑀦 𑀉𑀧𑀓𑀸𑀭𑀓𑀢𑀸 𑀦𑀢𑁆𑀣𑀺𑀧𑀘𑁆𑀘𑀬𑀢𑀸. 𑀅𑀢𑁆𑀢𑀦𑁄 𑀲𑀪𑀸𑀯𑀸𑀯𑀺𑀕𑀫𑁂𑀦 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀺𑀕𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀯𑀺𑀕𑀢𑀧𑀘𑁆𑀘𑀬𑀢𑀸. 𑀅𑀢𑁆𑀣𑀢𑁄 𑀧𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀻𑀥𑀫𑁆𑀫𑀢𑁆𑀢𑀸 𑀅𑀯𑀺𑀲𑁂𑀲𑁄 𑀯𑀼𑀢𑁆𑀢𑁄. 𑀲𑀪𑀸𑀯𑀢𑀸𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑀢𑀸 𑀅𑀢𑁆𑀣𑀺𑀧𑀘𑁆𑀘𑀬𑀢𑀸, 𑀦𑀺𑀭𑁄𑀥𑀸𑀦𑀼𑀧𑀕𑀫𑀦𑀯𑀲𑁂𑀦 𑀉𑀧𑀓𑀸𑀭𑀓𑀢𑀸 𑀅𑀯𑀺𑀕𑀢𑀧𑀘𑁆𑀘𑀬𑀢𑀸𑀢𑀺 𑀧𑀘𑁆𑀘𑀬𑀯𑀺𑀲𑁂𑀲𑁄 𑀢𑁂𑀲𑀁 𑀥𑀫𑁆𑀫𑀸𑀯𑀺𑀲𑁂𑀲𑁂𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀸𑀦𑀜𑁆𑀳𑀺 𑀲𑀫𑀢𑁆𑀣𑀢𑀸𑀯𑀺𑀲𑁂𑀲𑀁 𑀲𑀩𑁆𑀩𑀸𑀓𑀸𑀭𑁂𑀦 𑀜𑀢𑁆𑀯𑀸 𑀪𑀕𑀯𑀢𑀸 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑀸 𑀤𑁂𑀲𑀺𑀢𑀸𑀢𑀺 𑀪𑀕𑀯𑀢𑀺 𑀲𑀤𑁆𑀥𑀸𑀬 ‘‘𑀏𑀯𑀁 𑀯𑀺𑀲𑁂𑀲𑀸 𑀏𑀢𑁂 𑀥𑀫𑁆𑀫𑀸’’𑀢𑀺 𑀲𑀼𑀢𑀫𑀬𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀦𑁆𑀢𑀸𑀪𑀸𑀯𑀦𑀸𑀫𑀬𑀜𑀸𑀡𑁂𑀳𑀺 𑀢𑀤𑀪𑀺𑀲𑀫𑀬𑀸𑀬 𑀬𑁄𑀕𑁄 𑀓𑀭𑀡𑀻𑀬𑁄. 𑀅𑀯𑀺𑀲𑁂𑀲𑁂𑀧𑀺 𑀥𑀫𑁆𑀫𑀲𑀸𑀫𑀢𑁆𑀣𑀺𑀬𑀲𑁆𑀲 𑀢𑀣𑀸 𑀢𑀣𑀸 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀧𑀺 𑀧𑀘𑁆𑀘𑀬𑁄 𑀧𑀼𑀦 𑀧𑀓𑀸𑀭𑀦𑁆𑀢𑀭𑁂𑀦 𑀯𑀼𑀘𑁆𑀘𑀢𑀺 𑀬𑀣𑀸 𑀅𑀳𑁂𑀢𑀼𑀓𑀤𑀼𑀓𑀁 𑀯𑀢𑁆𑀯𑀸𑀧𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀤𑀼𑀓𑀁 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀲𑁆𑀫𑀸 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁, 𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘 𑀲𑀳𑀚𑀸𑀢𑀧𑀘𑁆𑀘𑀬𑀸, 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀧𑀘𑁆𑀘𑀬𑀸, 𑀉𑀧𑀸𑀤𑀸𑀭𑀽𑀧𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀯, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁄, 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁, 𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘 𑀅𑀢𑁆𑀣𑀺𑀅𑀯𑀺𑀕𑀢𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀭𑀽𑀧𑀁 𑀭𑀽𑀧𑀲𑁆𑀲…𑀧𑁂… 𑀲𑀢𑁆𑀢𑀥𑀸 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺.

𑀭𑀽𑀧𑀁 𑀅𑀭𑀽𑀧𑀲𑁆𑀲𑀸𑀢𑀺𑀆𑀤𑀻𑀲𑀼𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀲𑀼𑀝𑁆𑀞𑀼 𑀉𑀧𑀮𑀓𑁆𑀔𑁂𑀢𑁆𑀯𑀸 𑀧𑀘𑁆𑀘𑀬𑁄 𑀬𑁄𑀚𑁂𑀢𑀩𑁆𑀩𑁄. 𑀭𑀽𑀧𑀁 𑀭𑀽𑀧𑀸𑀭𑀽𑀧𑀲𑁆𑀲𑀸𑀢𑀺 𑀦𑀢𑁆𑀣𑀻𑀢𑀺 𑀇𑀤𑀁 𑀲𑀳𑀚𑀸𑀢𑀧𑀘𑁆𑀘𑀬𑀪𑀽𑀢𑀫𑁆𑀧𑀺 𑀭𑀽𑀧𑀁 𑀭𑀽𑀧𑀸𑀭𑀽𑀧𑀤𑁆𑀯𑀬𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀅𑀦𑀸𑀕𑀢𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂, 𑀲𑀳𑀚𑀸𑀢𑀦𑀸𑀦𑀓𑁆𑀔𑀡𑀺𑀓𑀘𑁂𑀢𑀦𑀸𑀬 𑀓𑀫𑁆𑀫𑀧𑀘𑁆𑀘𑀬𑁂, 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀤𑀺𑀪𑁂𑀤𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂 𑀘 𑀲𑀫𑁄𑀥𑀸𑀦𑀢𑁄 𑀲𑀩𑁆𑀩𑁂𑀧𑀺 𑀧𑀘𑁆𑀘𑀬𑀸 𑀲𑀗𑁆𑀔𑁂𑀧𑀢𑁄 𑀘𑀢𑀼𑀩𑁆𑀩𑀺𑀥𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑁂 𑀧𑀦𑀺𑀫𑁂’’𑀢𑀺𑀆𑀤𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁧𑁪𑁦𑁦-𑁨. 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀕𑀢𑀺𑀢𑀸𑀬 𑀲𑀼𑀦𑁆𑀤𑀭𑀸 𑀫𑀢𑀺 𑀇𑀫𑀲𑁆𑀲𑀸𑀢𑀺 𑀲𑀼𑀫𑀢𑀺, 𑀢𑀲𑁆𑀲 𑀲𑀼𑀫𑀢𑀺𑀲𑁆𑀲 𑀪𑀕𑀯𑀢𑁄 𑀫𑀢𑀺𑀯𑀺𑀘𑀸𑀭𑀁 𑀜𑀸𑀡𑀘𑀸𑀭𑀁 𑀩𑁄𑀥𑁂𑀢𑀻𑀢𑀺 𑀲𑀼𑀫𑀢𑀺𑀫𑀢𑀺𑀯𑀺𑀘𑀸𑀭𑀩𑁄𑀥𑀦𑁄. 𑀯𑀺𑀭𑀼𑀤𑁆𑀥𑀸 𑀫𑀢𑀺 𑀬𑁂𑀲𑀁 𑀢𑁂 𑀯𑀺𑀫𑀢𑀺𑀦𑁄, 𑀯𑀺𑀭𑀼𑀤𑁆𑀥𑀸 𑀫𑀢𑀻𑀢𑀺 𑀘 𑀯𑀺𑀭𑀼𑀤𑁆𑀥𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀯𑀺𑀫𑁄𑀳𑀁 𑀯𑀺𑀦𑀸𑀲𑁂𑀢𑀻𑀢𑀺 𑀯𑀺𑀫𑀢𑀺𑀯𑀺𑀫𑁄𑀳𑀯𑀺𑀦𑀸𑀲𑀦𑁄. 𑀬𑀢𑁄 𑀬𑀲𑁆𑀫𑀸 𑀦𑀸𑀫𑀢𑁄 𑀲𑀼𑀫𑀢𑀺𑀦𑀸 𑀪𑀺𑀓𑁆𑀔𑀼𑀦𑀸 𑀫𑀸𑀦𑀢𑁄 𑀩𑀳𑀼𑀫𑀸𑀦𑁂𑀦 𑀆𑀬𑀸𑀘𑀺𑀢𑀲𑀫𑁆𑀫𑀸𑀦𑀢𑁄 𑀆𑀬𑀸𑀘𑀺𑀢𑁄 𑀳𑀼𑀢𑁆𑀯𑀸 𑀲𑀫𑁆𑀫𑀸 𑀅𑀯𑀦𑀢𑁄 𑀲𑀤𑀸𑀬𑁂𑀯 𑀫𑀢𑁄 𑀅𑀬𑀁, 𑀢𑀢𑁄 𑀢𑀲𑁆𑀫𑀸 𑀫𑀬𑀸 𑀭𑀘𑀺𑀢𑁄 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄. 𑀢𑀣𑀸 𑀳𑀺 𑀪𑀸𑀯𑀦𑀸 𑀲𑀸𑀥𑀽𑀦𑀁 𑀲𑀫𑁆𑀪𑀸𑀯𑀦𑀸 𑀳𑀺𑀢𑀯𑀺𑀪𑀸𑀯𑀦𑀸 𑀳𑀺𑀢𑀧𑁆𑀧𑀓𑀸𑀲𑀦𑀢𑁄 𑀲𑀤𑀸 𑀢𑁄𑀲𑀤𑀸𑀢𑀺 𑀬𑁄𑀚𑀦𑀸.

𑁧𑁪𑁦𑁩-𑁧𑁪. 𑀅𑀬𑀼𑀢𑁆𑀢𑀁 𑀯𑀸 𑀯𑀺𑀭𑀼𑀤𑁆𑀥𑀁 𑀯𑀸𑀢𑀺 𑀏𑀢𑁆𑀣 ‘‘𑀅𑀝𑁆𑀞𑀓𑀣𑀸𑀬 𑀯𑀺𑀫𑀼𑀔𑀪𑀽𑀢𑀁 𑀅𑀬𑀼𑀢𑁆𑀢𑀁 𑀦𑀸𑀫, 𑀧𑀸𑀴𑀺𑀬𑀸 𑀯𑀺𑀫𑀼𑀔𑀪𑀽𑀢𑀁 𑀯𑀺𑀭𑀼𑀤𑁆𑀥’’𑀦𑁆𑀢𑀺 𑀯𑀤𑀦𑁆𑀢𑀺. 𑀩𑁆𑀬𑀧𑁆𑀧𑀣𑀸𑀦𑀦𑁆𑀢𑀺 𑀘 𑀯𑀸𑀘𑀦𑀸𑀫𑀕𑁆𑀕𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀯𑀺𑀥𑀸𑀢𑀺 𑀏𑀓𑁄 𑀩𑁆𑀬𑀧𑁆𑀧𑀣𑁄 𑀲𑀤𑁆𑀤𑀲𑀫𑁆𑀧𑀦𑁆𑀦𑁄, 𑀦 𑀅𑀢𑁆𑀣𑀲𑀫𑁆𑀧𑀦𑁆𑀦𑁄, 𑀏𑀓𑁄 𑀅𑀢𑁆𑀣𑀲𑀫𑁆𑀧𑀦𑁆𑀦𑁄, 𑀦 𑀲𑀤𑁆𑀤𑀲𑀫𑁆𑀧𑀦𑁆𑀦𑁄, 𑀏𑀓𑁄 𑀉𑀪𑀬𑀲𑀫𑁆𑀧𑀦𑁆𑀦𑁄𑀢𑀺 𑀢𑀺𑀧𑁆𑀧𑀓𑀸𑀭𑀸𑀢𑀺 𑀅𑀢𑁆𑀣𑁄. 𑀳𑀺𑀢𑀫𑁂𑀯 𑀅𑀢𑁆𑀣𑁄𑀢𑀺 𑀳𑀺𑀢𑀢𑁆𑀣𑁄, 𑀢𑀁 𑀅𑀢𑁆𑀢𑀦𑁄 𑀓𑀸𑀫𑁂𑀢𑀻𑀢𑀺 𑀳𑀺𑀢𑀢𑁆𑀣𑀓𑀸𑀫𑁄. 𑀅𑀲𑀁𑀓𑀺𑀡𑁆𑀡𑀓𑀼𑀮𑀸𑀓𑀼𑀮𑁂𑀳𑀺 𑀅𑀲𑀫𑁆𑀪𑀺𑀦𑁆𑀦𑀓𑀼𑀮𑁂𑀳𑀺 𑀲𑀁𑀓𑀺𑀡𑁆𑀡𑁂. 𑀓𑁂𑀮𑀸𑀲𑁄𑀬𑁂𑀯 𑀲𑀺𑀔𑀭𑁄𑀢𑀺 𑀓𑁂𑀮𑀸𑀲𑀲𑀺𑀔𑀭𑁄, 𑀲𑁄 𑀳𑀺 𑀳𑀺𑀫𑀯𑀢𑁄 𑀘𑀢𑀼𑀭𑀸𑀲𑀻𑀢𑀺𑀬𑀸 𑀓𑀽𑀝𑀲𑀳𑀲𑁆𑀲𑀸𑀦𑀁 𑀧𑀸𑀫𑁄𑀓𑁆𑀔𑁄 𑀭𑀚𑀢𑀫𑀬𑁄 𑀫𑀳𑀸𑀲𑀺𑀔𑀭𑁄. 𑀢𑀤𑀸𑀓𑀸𑀭𑁂𑀳𑀺 𑀲𑀩𑁆𑀩𑀲𑁂𑀢𑁂𑀳𑀺 𑀧𑀸𑀲𑀸𑀤𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀓𑁂𑀮𑀸𑀲…𑀧𑁂… 𑀫𑀡𑁆𑀟𑀺𑀢𑁄. 𑀓𑀡𑁆𑀳𑀤𑀸𑀲𑁂𑀦𑀸𑀢𑀺 𑀏𑀯𑀁𑀦𑀸𑀫𑀓𑁂𑀦 𑀉𑀧𑀸𑀲𑀓𑁂𑀦. 𑀧𑀸𑀘𑀻𑀦𑀧𑀸𑀲𑀸𑀤𑁂𑀢𑀺 𑀧𑀸𑀘𑀻𑀦𑀤𑀺𑀲𑀸𑀪𑀸𑀕𑀲𑀦𑁆𑀦𑀺𑀲𑁆𑀲𑀺𑀢𑁂 𑀧𑀸𑀲𑀸𑀤𑁂. 𑀅𑀬𑀦𑁆𑀢𑀺 𑀅𑀬𑀫𑀪𑀺𑀥𑀫𑁆𑀫𑀸𑀯𑀢𑀸𑀭𑁄.

𑀦𑀺𑀝𑁆𑀞𑀺𑀢𑀸𑀬𑀁 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀻 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸.

𑀦𑀺𑀕𑀫𑀦𑀓𑀣𑀸

𑁧. 𑀭𑀫𑁆𑀫𑁂 𑀧𑀼𑀮𑀢𑁆𑀣𑀺𑀦𑀕𑀭𑁂 𑀦𑀕𑀭𑀸𑀥𑀺𑀭𑀸𑀚𑁂,

𑀭𑀜𑁆𑀜𑀸 𑀧𑀭𑀓𑁆𑀓𑀫𑀪𑀼𑀚𑁂𑀦 𑀫𑀳𑀸𑀪𑀼𑀚𑁂𑀦;

𑀓𑀸𑀭𑀸𑀧𑀺𑀢𑁂 𑀯𑀲𑀢𑀺 𑀚𑁂𑀢𑀯𑀦𑁂 𑀯𑀺𑀳𑀸𑀭𑁂,

𑀬𑁄 𑀭𑀫𑁆𑀫𑀳𑀫𑁆𑀫𑀺𑀬𑀯𑀭𑀽𑀧𑀯𑀦𑀸𑀪𑀺𑀭𑀸𑀫𑁂.

𑁨. 𑀲𑀫𑁆𑀧𑀦𑁆𑀦𑀲𑀻𑀮𑀤𑀫𑀲𑀁𑀬𑀫𑀢𑁄𑀲𑀺𑀢𑁂𑀳𑀺,

𑀲𑀫𑁆𑀫𑀸𑀦𑀺𑀢𑁄 𑀯𑀲𑀺𑀕𑀡𑁂𑀳𑀺 𑀕𑀼𑀡𑀸𑀓𑀭𑁂𑀳𑀺;

𑀧𑀢𑁆𑀢𑁄 𑀫𑀼𑀦𑀺𑀦𑁆𑀤𑀯𑀘𑀦𑀸𑀤𑀺𑀲𑀼 𑀦𑁂𑀓𑀕𑀦𑁆𑀣-

𑀚𑀸𑀢𑁂𑀲𑀼 𑀘𑀸𑀘𑀭𑀺𑀬𑀢𑀁 𑀫𑀳𑀺𑀢𑀁 𑀯𑀺𑀤𑀽𑀳𑀺.

𑁩. 𑀜𑀸𑀡𑀸𑀦𑀼𑀪𑀸𑀯𑀫𑀺𑀳 𑀬𑀲𑁆𑀲 𑀘 𑀲𑀽𑀘𑀬𑀦𑁆𑀢𑀻,

𑀲𑀁𑀯𑀡𑁆𑀡𑀦𑀸 𑀘 𑀯𑀺𑀦𑀬𑀝𑁆𑀞𑀓𑀣𑀸𑀤𑀺𑀓𑀸𑀦𑀁;

𑀲𑀸𑀭𑀢𑁆𑀣𑀤𑀻𑀧𑀦𑀺𑀫𑀼𑀔𑀸 𑀫𑀥𑀼𑀭𑀢𑁆𑀣𑀲𑀸𑀭-

𑀲𑀦𑁆𑀤𑀻𑀧𑀦𑁂𑀦 𑀲𑀼𑀚𑀦𑀁 𑀧𑀭𑀺𑀢𑁄𑀲𑀬𑀦𑁆𑀢𑀻.

𑁪. 𑀢𑀲𑁆𑀲𑀸𑀦𑀼𑀓𑀫𑁆𑀧𑀫𑀯𑀮𑀫𑁆𑀩𑀺𑀬 𑀲𑀸𑀭𑀺𑀧𑀼𑀢𑁆𑀢-

𑀢𑁆𑀣𑁂𑀭𑀲𑁆𑀲 𑀣𑀸𑀫𑀕𑀢𑀲𑀸𑀭𑀕𑀼𑀡𑀸𑀓𑀭𑀲𑁆𑀲;

𑀬𑁄 𑀲𑀸𑀲𑀦𑁂 𑀚𑀺𑀦𑀯𑀭𑀲𑁆𑀲 𑀭𑀢𑀺𑀁 𑀉𑀴𑀸𑀭𑀁,

𑀧𑀧𑁆𑀧𑁄𑀢𑀺 𑀦𑀦𑁆𑀤𑀺𑀧𑀭𑀺𑀯𑁂𑀡𑀦𑀺𑀯𑀸𑀲𑀯𑀸𑀲𑀻.

𑁫. 𑀲 𑀲𑀸𑀥𑀬𑀁 𑀲𑁄𑀢𑀼𑀳𑀺𑀢𑀁 𑀅𑀦𑀧𑁆𑀧𑀓𑀁,

𑀲𑀼𑀫𑀗𑁆𑀕𑀮𑁄𑀤𑀻𑀭𑀺𑀢𑀦𑀸𑀫𑀯𑀺𑀲𑁆𑀲𑀼𑀢𑁄;

𑀅𑀓𑀸𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀁 𑀇𑀫𑀁,

𑀧𑀓𑀸𑀲𑀬𑀦𑁆𑀢𑀺𑀁 𑀫𑀥𑀼𑀭𑀢𑁆𑀣𑀲𑀫𑁆𑀧𑀤𑀦𑁆𑀢𑀺.

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸 𑀲𑀫𑀢𑁆𑀢𑀸.