𑁨𑁨. 𑀩𑀸𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩𑁧𑁯-𑁨𑁧. 𑀇𑀤𑀸𑀦𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀦𑀺𑀤𑁆𑀤𑁂𑀲𑁂 𑀅𑀦𑀼𑀧𑁆𑀧𑀢𑁆𑀢𑁂 𑀲𑀸 𑀬𑀲𑁆𑀲 𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑁄 𑀧𑀭’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑁄 𑀧𑀭𑀦𑁆𑀢𑀺 𑀇𑀢𑁄 𑀅𑀦𑀼𑀮𑁄𑀫𑀜𑀸𑀡𑀢𑁄 𑀉𑀧𑀭𑀺. 𑀆𑀯𑀚𑁆𑀚𑀦𑀺𑀬𑀞𑀸𑀦𑀢𑁆𑀢𑀸𑀢𑀺 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀁 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀯𑀺𑀬 𑀫𑀕𑁆𑀕𑀲𑁆𑀲 𑀆𑀯𑀚𑁆𑀚𑀦𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯 𑀉𑀪𑀬𑀯𑀺𑀲𑀼𑀤𑁆𑀥𑀺𑀮𑀓𑁆𑀔𑀡𑀸𑀪𑀸𑀯𑀢𑁄. 𑀓𑀺𑀜𑁆𑀘𑀸𑀧𑀺 𑀏𑀯𑀁, 𑀢𑀣𑀸𑀧𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀧𑀓𑁆𑀔𑀺𑀬𑀫𑁂𑀯𑀸𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀬 𑀲𑁄𑀢𑀲𑁆𑀫𑀺𑀁, 𑀧𑀢𑀺𑀢𑀢𑁆𑀢𑀸 𑀯𑀺𑀧𑀲𑁆𑀲𑀦𑀸’’𑀢𑀺. 𑀏𑀢𑁂𑀦𑀲𑁆𑀲 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀪𑀚𑀦𑀁 𑀤𑀲𑁆𑀲𑁂𑀢𑀺.

𑁧𑁩𑁨𑁨. 𑀧𑀼𑀣𑀼𑀚𑁆𑀚𑀦𑁂𑀲𑀼 𑀪𑀯𑀁 𑀧𑁄𑀣𑀼𑀚𑁆𑀚𑀦𑀺𑀓𑀁, 𑀢𑀤𑁂𑀯 𑀕𑁄𑀢𑁆𑀢𑀁 𑀅𑀭𑀺𑀬𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀸 𑀧𑀼𑀣𑀼𑀚𑁆𑀚𑀦𑀲𑀫𑀜𑁆𑀜𑀸𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀕𑁄𑀢𑁆𑀢𑀁. 𑀏𑀓𑀯𑀁𑀲𑀚𑀸𑀦𑀜𑁆𑀳𑀺 𑀲𑀫𑀸𑀦𑀸 𑀲𑀫𑀜𑁆𑀜𑀸 ‘‘𑀕𑁄𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀕𑀁 𑀢𑀸𑀬𑀢𑀺 𑀩𑀼𑀤𑁆𑀥𑀺𑀁, 𑀅𑀪𑀺𑀥𑀸𑀦𑀜𑁆𑀘 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀭𑀓𑁆𑀔𑀢𑀻𑀢𑀺 𑀓𑀢𑁆𑀯𑀸. 𑀯𑀸-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀢𑁆𑀣𑀯𑀺𑀓𑀧𑁆𑀧𑀦𑁂. 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀺𑀢𑁄 𑀕𑁄𑀢𑁆𑀭𑀪𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀕𑁄𑀢𑁆𑀢𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁 ‘‘𑀅𑀭𑀺𑀬𑁄’’𑀢𑀺 𑀩𑀼𑀤𑁆𑀥𑀺𑀬𑀸, 𑀅𑀪𑀺𑀥𑀸𑀦𑀲𑁆𑀲 𑀘 𑀢𑀸𑀬𑀦𑀢𑁄 𑀧𑀯𑀢𑁆𑀢𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄 𑀪𑀯𑀢𑀻𑀢𑀺 𑀢𑀢𑁄 𑀕𑁄𑀢𑁆𑀢𑀢𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁄 𑀪𑀯𑀢𑀺. 𑀇𑀢𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀳𑁂𑀢𑀼𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀬𑀲𑁆𑀫𑀸 𑀢𑀢𑁄 𑀪𑀯𑀢𑀺, 𑀢𑀲𑁆𑀫𑀸 𑀕𑁄𑀢𑁆𑀭𑀪𑀽𑀢𑀺 𑀅𑀢𑁆𑀣𑁄.

𑁧𑁩𑁨𑁩-𑁫. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀏𑀯 𑀜𑀸𑀡𑀤𑀲𑁆𑀲𑀦𑀲𑀼𑀤𑁆𑀥𑀺𑀓𑀁. 𑀢𑀁 𑀲𑀫𑁆𑀧𑀸𑀤𑁂𑀢𑀼𑀁 𑀧𑀦𑀺𑀘𑁆𑀙𑀢𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀬𑀁 𑀅𑀜𑁆𑀜𑀁 𑀓𑀺𑀜𑁆𑀘𑀺𑀧𑀺 𑀓𑀸𑀢𑀩𑁆𑀩𑀁, 𑀢𑀁 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀦𑀢𑁆𑀣𑀻𑀢𑀺 𑀘𑁂 𑀆𑀳 ‘‘𑀬𑀁 𑀳𑀻’’𑀢𑀺𑀆𑀤𑀺. ‘‘𑀓𑀢𑀫𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀣’’𑀦𑁆𑀢𑀺 𑀅𑀦𑀼𑀬𑁄𑀕𑀲𑁆𑀲 𑀉𑀧𑀝𑁆𑀞𑀺𑀢𑀢𑁆𑀢𑀸 ‘‘𑀅𑀦𑀼𑀮𑁄𑀫𑀸𑀯𑀲𑀸𑀦𑀁 𑀳𑀻’’𑀢𑀺𑀆𑀤𑀺𑀦𑀸 𑀢𑀁 𑀲𑀫𑀢𑁆𑀣𑁂𑀢𑀺.

𑁧𑁩𑁨𑁬-𑁭. 𑀏𑀯𑀁 𑀉𑀧𑁆𑀧𑀦𑁆𑀦𑀅𑀦𑀼𑀮𑁄𑀫𑀜𑀸𑀡𑀲𑁆𑀲 𑀧𑀦𑀲𑁆𑀲 𑀏𑀢𑁂𑀳𑀺 𑀢𑀻𑀳𑀺𑀧𑀺 𑀅𑀦𑀼𑀮𑁄𑀫𑀜𑀸𑀡𑁂𑀳𑀺 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑁂𑀦 𑀣𑀽𑀮𑀣𑀽𑀮𑁂 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀫𑁆𑀳𑀺 𑀅𑀦𑁆𑀢𑀭𑀥𑀸𑀧𑀺𑀢𑁂 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺, 𑀦 𑀮𑀕𑁆𑀕𑀢𑀺, 𑀧𑀤𑀼𑀫𑀧𑀮𑀸𑀲𑀢𑁄 𑀉𑀤𑀓𑀁 𑀯𑀺𑀬 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀝𑁆𑀝𑀢𑀺, 𑀲𑀩𑁆𑀩𑀁 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀫𑁆𑀧𑀺 𑀲𑀩𑁆𑀩𑀁 𑀧𑀯𑀢𑁆𑀢𑀸𑀭𑀫𑁆𑀫𑀡𑀫𑁆𑀧𑀺 𑀧𑀮𑀺𑀩𑁄𑀥𑀢𑁄 𑀉𑀧𑀝𑁆𑀞𑀸𑀢𑀺, 𑀅𑀣𑀲𑁆𑀲 𑀲𑀩𑁆𑀩𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀧𑁆𑀧𑀯𑀢𑁆𑀢𑀸𑀭𑀫𑁆𑀫𑀡𑁂 𑀧𑀮𑀺𑀩𑁄𑀥𑀢𑁄 𑀉𑀧𑀝𑁆𑀞𑀺𑀢𑁂 𑀤𑀼𑀢𑀺𑀬𑀲𑁆𑀲 𑀯𑀸 𑀢𑀢𑀺𑀬𑀲𑁆𑀲 𑀯𑀸 𑀅𑀦𑀼𑀮𑁄𑀫𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀕𑁄𑀢𑁆𑀭𑀪𑀼𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀲𑀸’’𑀢𑀺𑀆𑀤𑀺. 𑀧𑀞𑀫𑀸𑀯𑀚𑁆𑀚𑀦𑀜𑁆𑀘𑁂𑀯 𑀧𑀞𑀫𑀸𑀪𑁄𑀕𑀢𑀸𑀧𑀺 𑀘𑀸𑀢𑀺 𑀧𑀞𑀫𑀸𑀯𑀚𑁆𑀚𑀦𑀁 𑀧𑀞𑀫𑀸𑀪𑁄𑀕𑀪𑀽𑀢𑀁. 𑀲𑀓𑀢𑁆𑀣𑁂 𑀳𑀺 𑀅𑀬𑀁 𑀢𑀸-𑀧𑀘𑁆𑀘𑀬𑁄𑀢𑀺. 𑀢𑀢𑁆𑀣 𑀆𑀯𑀚𑁆𑀚𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀧𑀭𑀺𑀡𑀸𑀫𑀦𑀯𑀲𑁂𑀦, 𑀆𑀪𑁄𑀕𑁄 𑀅𑀢𑁆𑀢𑀦𑁄 𑀆𑀪𑀼𑀚𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑁄.

𑁧𑁩𑁨𑁮-𑁩𑁩. 𑀅𑀦𑀦𑁆𑀢𑀭𑀸𑀤𑀻𑀳𑀻𑀢𑀺 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀆𑀲𑁂𑀯𑀦𑀉𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀯𑀲𑁂𑀦 𑀙𑀳𑀺 𑀧𑀘𑁆𑀘𑀬𑁂𑀳𑀺. 𑀫𑀼𑀤𑁆𑀥𑀦𑁆𑀢𑀺 𑀫𑀼𑀤𑁆𑀥𑀪𑀽𑀢𑀁. 𑀏𑀓𑀦𑁆𑀢𑀺𑀓𑀢𑀸𑀬 𑀏𑀓𑀯𑀸𑀭𑀫𑁂𑀯 𑀘 𑀉𑀧𑁆𑀧𑀚𑁆𑀚𑀦𑀢𑁄 𑀧𑀼𑀦𑀭𑀸𑀯𑀢𑁆𑀢𑀸𑀪𑀸𑀯𑁂𑀦 𑀧𑀦 𑀅𑀦𑀸𑀯𑀢𑁆𑀢𑀁. 𑀅𑀦𑀸𑀯𑀚𑁆𑀚𑀦𑀫𑁆𑀧𑀺 𑀘𑀸𑀢𑀺 𑀅𑀦𑀸𑀯𑀚𑁆𑀚𑀦𑀫𑁆𑀧𑀺𑀲𑀫𑀸𑀦𑀁. 𑀲𑀜𑁆𑀜𑀁 𑀤𑀢𑁆𑀯𑀸 𑀯𑀺𑀬𑀸𑀢𑀺 ‘‘𑀏𑀯𑀁 𑀉𑀧𑁆𑀧𑀚𑁆𑀚𑀸𑀳𑀻’’𑀢𑀺 𑀲𑀜𑁆𑀜𑀁 𑀤𑀢𑁆𑀯𑀸 𑀯𑀺𑀬. 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀦𑁆𑀢𑀺 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀁. 𑀯𑀺𑀤𑁆𑀥𑀁𑀲𑁂𑀦𑁆𑀢𑁄𑀯𑀸𑀢𑀺 𑀯𑀺𑀦𑀸𑀲𑁂𑀦𑁆𑀢𑁄 𑀏𑀯. 𑀚𑀸𑀬𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀢𑀺. 𑀏𑀢𑁆𑀣 𑀘 𑀇𑀫𑀁 𑀉𑀧𑀫𑀁 𑀆𑀳𑀭𑀦𑁆𑀢𑀺 𑁋 𑀏𑀓𑁄 𑀓𑀺𑀭 𑀇𑀲𑁆𑀲𑀸𑀲𑁄 𑀅𑀝𑁆𑀞𑀉𑀲𑀪𑀫𑀢𑁆𑀢𑁂 𑀧𑀤𑁂𑀲𑁂 𑀨𑀮𑀓𑀲𑀢𑀁 𑀞𑀧𑀸𑀧𑁂𑀢𑁆𑀯𑀸 𑀯𑀢𑁆𑀣𑁂𑀦 𑀫𑀼𑀔𑀁 𑀯𑁂𑀞𑁂𑀢𑁆𑀯𑀸 𑀲𑀭𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀘𑀓𑁆𑀓𑀬𑀦𑁆𑀢𑁂 𑀅𑀝𑁆𑀞𑀸𑀲𑀺, 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀘𑀓𑁆𑀓𑀬𑀦𑁆𑀢𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀬𑀤𑀸 𑀇𑀲𑁆𑀲𑀸𑀲𑀲𑁆𑀲 𑀨𑀮𑀓𑀁 𑀅𑀪𑀺𑀫𑀼𑀔𑀁 𑀳𑁄𑀢𑀺, 𑀢𑀤𑀸 𑀢𑀢𑁆𑀣 𑀤𑀡𑁆𑀟𑀓𑁂𑀦 𑀲𑀜𑁆𑀜𑀁 𑀤𑁂𑀢𑀺. 𑀇𑀲𑁆𑀲𑀸𑀲𑁄 𑀤𑀡𑁆𑀟𑀓𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀲𑀭𑀁 𑀔𑀺𑀧𑀺𑀢𑁆𑀯𑀸 𑀨𑀮𑀓𑀲𑀢𑀦𑀺𑀩𑁆𑀩𑀺𑀚𑁆𑀛𑀢𑀺. 𑀢𑀢𑁆𑀣 𑀤𑀡𑁆𑀟𑀓𑀲𑀜𑁆𑀜𑀁 𑀤𑁂𑀦𑁆𑀢𑁄 𑀯𑀺𑀬 𑀕𑁄𑀢𑁆𑀭𑀪𑀼𑀜𑀸𑀡𑀁, 𑀇𑀲𑁆𑀲𑀸𑀲𑁄 𑀯𑀺𑀬 𑀫𑀕𑁆𑀕𑀜𑀸𑀡𑀁, 𑀤𑀡𑁆𑀟𑀓𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀨𑀮𑀓𑀲𑀢𑀁 𑀦𑀺𑀩𑁆𑀩𑀺𑀚𑁆𑀛𑀦𑀁 𑀯𑀺𑀬 𑀫𑀕𑁆𑀕𑀜𑀸𑀡𑀲𑁆𑀲 𑀕𑁄𑀢𑁆𑀭𑀪𑀼𑀜𑀸𑀡𑁂𑀦 𑀤𑀺𑀦𑁆𑀦𑀲𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀸𑀦𑀁 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀸𑀦𑀁 𑀮𑁄𑀪𑀤𑁄𑀲𑀫𑁄𑀳𑀓𑁆𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀺𑀚𑁆𑀛𑀦𑀦𑁆𑀢𑀺.

𑁧𑁩𑁩𑁫-𑁮. 𑀅𑀦𑀸𑀫𑀢𑀕𑁆𑀕…𑀧𑁂… 𑀫𑀳𑁄𑀤𑀥𑀺𑀦𑁆𑀢𑀺 𑀅𑀝𑁆𑀞𑀫𑀪𑀯𑀢𑁄 𑀧𑀝𑁆𑀞𑀸𑀬 𑀦𑀺𑀩𑁆𑀩𑀢𑁆𑀢𑀓𑀁 𑀅𑀜𑁆𑀜𑀸𑀢𑀓𑁄𑀝𑀺𑀁 𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀫𑀳𑀸𑀲𑀫𑀼𑀤𑁆𑀤𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀯𑁂𑀭𑀸𑀦𑀺 𑀘𑁂𑀯 𑀧𑀜𑁆𑀘𑀯𑀻𑀲𑀢𑀺 𑀫𑀳𑀸𑀪𑀬𑀸𑀦𑀺 𑀘𑀸𑀢𑀺 𑀲𑀩𑁆𑀩𑀯𑁂𑀭𑀪𑀬𑀸𑀦𑀺. 𑀅𑀦𑁂𑀓𑁂𑀧𑀺 𑀆𑀦𑀺𑀲𑀁𑀲𑁂𑀢𑀺 𑀭𑀢𑀦𑀢𑁆𑀢𑀬𑁂 𑀦𑀺𑀯𑀺𑀝𑁆𑀞𑀲𑀤𑁆𑀥𑀸𑀤𑀺𑀓𑁂 𑀆𑀦𑀺𑀲𑀁𑀲𑁂. 𑀆𑀤𑀺𑀫𑀕𑁆𑀕𑁂𑀦𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀗𑁆𑀔𑀸𑀢𑁂𑀦 𑀧𑀞𑀫𑀫𑀕𑁆𑀕𑁂𑀦. 𑀧𑀞𑀫𑀫𑀕𑁆𑀕𑀜𑀸𑀡𑀯𑀡𑁆𑀡𑀦𑀸.

𑁧𑁩𑁩𑁯. 𑀢𑀲𑁆𑀲𑁂𑀯𑀸𑀦𑀦𑁆𑀢𑀭𑀦𑁆𑀢𑀺 𑀢𑀲𑁆𑀲 𑀅𑀦𑀦𑁆𑀢𑀭𑀁𑀬𑁂𑀯. 𑀤𑁆𑀯𑁂𑀧𑀺 𑀢𑀻𑀡𑀺 𑀯𑀸𑀢𑀺 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀤𑁆𑀯𑁂, 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀢𑀻𑀡𑀺 𑀨𑀮𑀘𑀺𑀢𑁆𑀢𑀸𑀦𑀺.

𑁧𑁩𑁪𑁦-𑁩. ‘‘𑀅𑀚𑀸𑀦𑀺𑀢𑁆𑀯𑀸 𑀯𑀤𑀦𑁆𑀢𑀺 𑀢𑁂’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀫𑀁 𑀫𑀕𑁆𑀕𑀘𑀺𑀢𑁆𑀢𑀦𑁆𑀢𑀺 𑀇𑀫𑀺𑀦𑀸𑀯 𑀙𑀝𑁆𑀞𑀲𑁆𑀲 𑀅𑀪𑀸𑀯𑀤𑀻𑀧𑀦𑁂𑀦 ‘‘𑀏𑀓𑀁 𑀨𑀮𑀘𑀺𑀢𑁆𑀢’’𑀦𑁆𑀢𑀺 𑀯𑀤𑀢𑁄 𑀕𑁄𑀤𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀸𑀤𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄.

𑁧𑁩𑁪𑁪. ‘‘𑀏𑀢𑁆𑀢𑀸𑀯𑀢𑀸’’𑀢𑀺 𑀧𑀞𑀫𑀫𑀕𑁆𑀕𑀲𑁆𑀲 𑀉𑀧𑁆𑀧𑀢𑁆𑀢𑀺𑀅𑀦𑀦𑁆𑀢𑀭𑀁 𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑁂𑀦. 𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑁄𑀢𑀸𑀧𑀦𑁆𑀦𑁄 𑀦𑀸𑀫 𑀤𑀼𑀢𑀺𑀬𑁄 𑀅𑀭𑀺𑀬𑀧𑀼𑀕𑁆𑀕𑀮𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀤𑁂𑀯𑀭𑀚𑁆𑀚𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀸𑀤𑀺𑀧𑀫𑀸𑀤𑀝𑁆𑀞𑀸𑀦𑀁 𑀆𑀕𑀫𑁆𑀫 𑀪𑀼𑀲𑀁 𑀧𑀫𑀢𑁆𑀢𑁄𑀧𑀺 𑀳𑀼𑀢𑁆𑀯𑀸 𑀓𑀸𑀫𑀲𑀼𑀕𑀢𑀺𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀫𑁂𑀯 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀡𑀲𑀫𑀢𑁆𑀣𑁄 𑀳𑁄𑀢𑀺. 𑀬𑀣𑀸𑀳 𑁋

‘‘𑀓𑀺𑀜𑁆𑀘𑀸𑀧𑀺 𑀢𑁂 𑀳𑁄𑀦𑁆𑀢𑀺 𑀪𑀼𑀲𑀁 𑀧𑀫𑀢𑁆𑀢𑀸,

𑀦 𑀢𑁂 𑀪𑀯𑀁 𑀅𑀝𑁆𑀞𑀫𑀫𑀸𑀤𑀺𑀬𑀦𑁆𑀢𑀻’’𑀢𑀺. (𑀔𑀼. 𑀧𑀸. 𑁬.𑁯; 𑀲𑀼. 𑀦𑀺. 𑁨𑁩𑁨; 𑀦𑁂𑀢𑁆𑀢𑀺. 𑁧𑁧𑁫);

𑀭𑀽𑀧𑀸𑀭𑀽𑀧𑀮𑁄𑀓𑁂𑀲𑀼 𑀧𑀦 𑀦 𑀢𑀣𑀸 𑀦𑀺𑀬𑀫𑁄𑀢𑀺 𑀆𑀘𑀭𑀺𑀬𑀸.

𑁧𑁩𑁪𑁭. 𑀨𑀮𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀳𑀻𑀦𑀓𑀺𑀮𑁂𑀲𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀘 ‘‘𑀇𑀫𑀺𑀦𑀸 𑀯𑀢𑀸𑀳𑀁 𑀫𑀕𑁆𑀕𑁂𑀦 𑀆𑀕𑀢𑁄’’𑀢𑀺 𑀧𑀞𑀫𑀁 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀢𑁄 ‘‘𑀅𑀬𑀁 𑀫𑁂 𑀆𑀦𑀺𑀲𑀁𑀲𑁄 𑀮𑀤𑁆𑀥𑁄’’𑀢𑀺 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀢𑁄 ‘‘𑀇𑀫𑁂 𑀦𑀸𑀫 𑀫𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀢𑁄 ‘‘𑀇𑀫𑁂 𑀦𑀸𑀫 𑀫𑁂 𑀓𑀺𑀮𑁂𑀲𑀸 𑀅𑀯𑀲𑀺𑀝𑁆𑀞𑀸’’𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑁂 𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀯𑀲𑀸𑀦𑁂 ‘‘𑀅𑀬𑀁 𑀫𑁂 𑀥𑀫𑁆𑀫𑁄 𑀆𑀭𑀫𑁆𑀫𑀡𑀢𑁄 𑀧𑀝𑀺𑀯𑀺𑀤𑁆𑀥𑁄’’𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀇𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀏𑀯𑀁 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀻𑀦𑀫𑁆𑀧𑀺. 𑀅𑀭𑀳𑀢𑁄 𑀧𑀦 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺. 𑀢𑁂𑀦𑀸𑀳 ‘‘𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀪𑀯𑀦𑁆𑀢𑁂𑀓𑀽𑀦𑀯𑀻𑀲𑀢𑀻’’𑀢𑀺.

𑁧𑁩𑁪𑁮-𑁫𑁦. 𑀬𑀸𑀲𑀁 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀸 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑁄 𑀨𑀮𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄𑀬𑁂𑀯 𑀘𑁂𑀲𑁄. 𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀜𑁆𑀳𑀺 𑀲𑁂𑀔𑀸𑀦𑀫𑁆𑀧𑀺 𑀳𑁄𑀢𑀺 𑀯𑀸 𑀦 𑀯𑀸. 𑀦 𑀳𑀺 𑀲𑀩𑁆𑀩𑁂𑀯 𑀢𑀢𑁆𑀣 𑀲𑀫𑀢𑁆𑀣𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀫𑀳𑀸𑀦𑀸𑀫𑁄 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺 ‘‘𑀓𑁄 𑀲𑀼 𑀦𑀸𑀫 𑀫𑁂 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀅𑀧𑁆𑀧𑀳𑀻𑀦𑁄, 𑀬𑁂𑀦 𑀫𑁂 𑀏𑀓𑀤𑀸 𑀮𑁄𑀪𑀥𑀫𑁆𑀫𑀸𑀧𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁧𑁭𑁫). 𑀬𑁄𑀕𑀫𑀸𑀭𑀪𑀢𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀯𑀸 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄, 𑀅𑀧𑀭𑁂𑀦 𑀯𑀸 𑀲𑀫𑀬𑁂𑀦 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀪𑀸𑀯𑀓𑀭𑀸𑀬 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑀗𑁆𑀔𑀸𑀢𑀸𑀬 𑀤𑀼𑀢𑀺𑀬𑀸𑀬 𑀪𑀽𑀫𑀺𑀬𑀸 𑀅𑀥𑀺𑀕𑀫𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀬𑁄𑀕𑀁 𑀓𑀭𑁄𑀢𑀺, 𑀤𑀼𑀢𑀺𑀬𑀪𑀸𑀯𑁄 𑀘𑀲𑁆𑀲 𑀤𑁂𑀲𑀦𑀸𑀯𑀲𑁂𑀦, 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀦 𑀦𑀺𑀲𑁆𑀲𑀬𑀪𑀸𑀯𑁂𑀦 𑀢𑁂 𑀥𑀫𑁆𑀫𑀸 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀽𑀫𑀺, 𑀬𑀲𑁆𑀫𑀸 𑀯𑀸 𑀲𑀫𑀸𑀦𑁂𑀧𑀺 𑀮𑁄𑀓𑀼𑀢𑁆𑀢𑀭𑀪𑀸𑀯𑁂 𑀲𑀬𑀫𑁆𑀧𑀺 𑀪𑀯𑀢𑀺, 𑀦 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀅𑀧𑀸𑀢𑀼𑀪𑀽𑀢𑀁, 𑀢𑀲𑁆𑀫𑀸𑀧𑀺 ‘‘𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀢𑀺. 𑀜𑀸𑀡𑁂𑀦 𑀧𑀭𑀺𑀫𑀚𑁆𑀚𑀢𑀻𑀢𑀺 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀢𑀭𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸, 𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀜𑁆𑀘 𑀧𑀝𑀼𑀢𑀭𑀪𑀸𑀯𑀁 𑀲𑀸𑀥𑁂𑀢𑁆𑀯𑀸 𑀮𑀓𑁆𑀔𑀡𑀢𑁆𑀢𑀬𑀁 𑀢𑀻𑀭𑀡𑀯𑀲𑁂𑀦 𑀧𑀭𑀺𑀫𑀚𑁆𑀚𑀢𑀺.

𑁧𑁩𑁫𑁧-𑁨. 𑀢𑀢𑁆𑀣 𑀅𑀧𑀭𑀸𑀧𑀭𑀁 𑀜𑀸𑀡𑀁 𑀘𑀸𑀭𑁂𑀦𑁆𑀢𑁄 𑀧𑀭𑀺𑀯𑀢𑁆𑀢𑁂𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀑𑀕𑀸𑀳𑀢𑀻’’𑀢𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀻𑀦𑀁 𑀉𑀧𑁆𑀧𑀸𑀤𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀕𑁄𑀢𑁆𑀭𑀪𑀼𑀲𑁆𑀲 𑀅𑀦𑀦𑁆𑀢𑀭𑀦𑁆𑀢𑀺 𑀏𑀢𑁆𑀣 𑀕𑁄𑀢𑁆𑀭𑀪𑀼 𑀯𑀺𑀬 𑀕𑁄𑀢𑁆𑀭𑀪𑀼. 𑀧𑀞𑀫𑀫𑀕𑁆𑀕𑀧𑀼𑀭𑁂𑀘𑀸𑀭𑀺𑀓𑀜𑀸𑀡𑀜𑁆𑀳𑀺 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀸𑀪𑀺𑀪𑀯𑀦𑀢𑁄, 𑀅𑀭𑀺𑀬𑀕𑁄𑀢𑁆𑀢𑀪𑀯𑀦𑀢𑁄 𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 ‘‘𑀕𑁄𑀢𑁆𑀭𑀪𑀽’’𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀁 𑀧𑀦 𑀢𑀁𑀲𑀤𑀺𑀲𑀢𑀸𑀬 𑀧𑀭𑀺𑀬𑀸𑀬𑀢𑁄 𑀕𑁄𑀢𑁆𑀭𑀪𑀼. 𑀏𑀓𑀘𑁆𑀘𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀺𑀬𑀸, 𑀧𑀦 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀆𑀭𑀫𑁆𑀫𑀡𑀓𑀭𑀡𑀢𑁄 𑀘 ‘‘𑀯𑁄𑀤𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑀧𑀝𑁆𑀞𑀸𑀦𑁂 ‘‘𑀅𑀦𑀼𑀮𑁄𑀫𑀁 𑀯𑁄𑀤𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭). 𑀬𑀲𑁆𑀫𑀸 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀉𑀧𑁆𑀧𑀸𑀤𑀸𑀤𑀺𑀅𑀪𑀺𑀪𑀯𑀦𑀝𑁆𑀞𑀁 𑀉𑀧𑀸𑀤𑀸𑀬 𑀅𑀝𑁆𑀞 𑀕𑁄𑀢𑁆𑀭𑀪𑀼𑀥𑀫𑁆𑀫𑀸 𑀲𑀫𑀸𑀥𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀤𑀲 𑀕𑁄𑀢𑁆𑀭𑀪𑀼𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁬𑁦) 𑀕𑁄𑀢𑁆𑀭𑀪𑀼𑀦𑀸𑀫𑀯𑀲𑁂𑀦𑁂𑀯 𑀆𑀕𑀢𑀁, 𑀢𑀲𑁆𑀫𑀸 𑀇𑀥𑀸𑀧𑀺 ‘‘𑀕𑁄𑀢𑁆𑀭𑀪𑀼𑀲𑁆𑀲 𑀅𑀦𑀦𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁 𑀕𑁄𑀢𑁆𑀢𑀲𑀗𑁆𑀔𑀸𑀢𑀦𑀺𑀩𑁆𑀩𑀸𑀦𑀢𑁄 𑀪𑀽𑀢𑀦𑁆𑀢𑀺 𑀓𑀢𑁆𑀯𑀸. 𑀤𑀼𑀢𑀺𑀬𑀫𑀕𑁆𑀕𑀜𑀸𑀡𑀯𑀡𑁆𑀡𑀦𑀸.

𑁧𑁩𑁫𑁫-𑁭. 𑀬𑀦𑁆𑀢𑀺 𑀬𑀲𑁆𑀫𑀸. 𑀲𑀓𑀺𑀤𑁂𑀯𑀸𑀢𑀺 𑀏𑀓𑀯𑀸𑀭𑀫𑁂𑀯. 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸𑀢𑀺 𑀇𑀫𑀺𑀦𑀸 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀘𑀢𑁆𑀢𑀸𑀭𑁄 𑀯𑀚𑁆𑀚𑁂𑀢𑁆𑀯𑀸 𑀏𑀓𑁄𑀯 𑀕𑀳𑀺𑀢𑁄. 𑀏𑀓𑀘𑁆𑀘𑁄 𑀳𑀺 𑀇𑀥 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀇𑀥𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑀘𑁆𑀘𑁄 𑀤𑁂𑀯𑀮𑁄𑀓𑁂 𑀧𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄𑀧𑀺 𑀇𑀥 𑀦 𑀕𑀳𑀺𑀢𑀸. 𑀬𑁄 𑀧𑀦 𑀇𑀥 𑀧𑀢𑁆𑀯𑀸 𑀤𑁂𑀯𑀮𑁄𑀓𑁂 𑀬𑀸𑀯𑀢𑀸𑀬𑀼𑀓𑀁 𑀯𑀲𑀺𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀫𑁂𑀓𑁄𑀯 𑀇𑀥 𑀕𑀳𑀺𑀢𑁄𑀢𑀺. 𑀅𑀦𑁆𑀢𑀓𑀭𑁄 𑀪𑀯𑁂𑀢𑀺 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀪𑀯𑁂𑀬𑁆𑀬, 𑀪𑀯𑁂 𑀯𑀸 𑀅𑀦𑁆𑀢𑀓𑀭𑁄 𑀪𑀯𑀲𑁆𑀲 𑀅𑀦𑁆𑀢𑀓𑀭𑁄𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀩𑁆𑀬𑀸𑀧𑀸𑀤𑀓𑀸𑀫𑀭𑀸𑀕𑀸𑀦𑀁 𑀧𑀳𑀸𑀦𑀸𑀬𑀸𑀢𑀺 𑀢𑁂𑀲𑀁𑀬𑁂𑀯 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑀦𑀼𑀓𑀭𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀸𑀬. 𑀢𑀢𑀺𑀬𑀫𑀕𑁆𑀕𑀜𑀸𑀡𑀯𑀡𑁆𑀡𑀦𑀸.

𑁧𑁩𑁬𑁩-𑁭. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀓𑀸𑀫𑀪𑀯𑀲𑁆𑀲 𑀅𑀦𑀸𑀕𑀫𑀦𑀢𑁄 𑀅𑀦𑀸𑀕𑀸𑀫𑀻. 𑀢𑁂𑀦𑀸𑀳 ‘‘𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀲𑀼𑀤𑁆𑀥𑀸𑀯𑀸𑀲𑁂 𑀯𑀸 𑀅𑀜𑁆𑀜𑀢𑁆𑀣 𑀯𑀸 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀅𑀦𑀸𑀯𑀢𑁆𑀢𑀺𑀲𑀪𑀸𑀯𑁄𑀢𑀺 𑀢𑀲𑁆𑀫𑀸 𑀮𑁄𑀓𑀸 𑀇𑀥 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀇𑀫𑀁 𑀮𑁄𑀓𑀁 𑀧𑀼𑀦𑀭𑀸𑀕𑀫𑀦𑀸𑀪𑀸𑀯𑀢𑁄 𑀅𑀦𑀸𑀯𑀢𑁆𑀢𑀦𑀲𑀪𑀸𑀯𑁄, 𑀩𑀼𑀤𑁆𑀥𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑀥𑀫𑁆𑀫𑀲𑁆𑀲𑀯𑀦𑀸𑀦𑀁 𑀧𑀦𑀢𑁆𑀣𑀸𑀬 𑀆𑀕𑀫𑀦𑀁 𑀳𑁄𑀢𑀺𑀬𑁂𑀯. 𑀭𑀽𑀧𑀭𑀸𑀕𑀸𑀤𑀺𑀧𑀳𑀸𑀦𑀸𑀬𑀸𑀢𑀺 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀁 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀸𑀬. 𑀯𑀺𑀤𑁆𑀥𑀁𑀲𑀸𑀬𑀸𑀢𑀺 𑀯𑀺𑀦𑀸𑀲𑀸𑀬. 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀯𑀡𑁆𑀡𑀦𑀸.

𑁧𑁩𑁭𑁧-𑁪. 𑀫𑀳𑀸𑀔𑀻𑀡𑀸𑀲𑀯𑁄𑀢𑀺 𑀫𑀳𑀸𑀦𑀼𑀪𑀸𑀯𑀢𑁄 𑀦𑀺𑀩𑀤𑁆𑀥𑀧𑀽𑀚𑀸𑀯𑀘𑀦𑀫𑁂𑀢𑀁, 𑀦 𑀉𑀧𑀸𑀤𑀸𑀬𑀯𑀘𑀦𑀁 ‘‘𑀬𑀣𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺. 𑀦 𑀳𑀺 𑀘𑀽𑀴𑀔𑀻𑀡𑀸𑀲𑀯𑁄 𑀦𑀸𑀫 𑀅𑀢𑁆𑀣𑀺. 𑀅𑀦𑀼𑀧𑁆𑀧𑀢𑁆𑀢𑁄 𑀲𑀤𑀢𑁆𑀣𑁄 𑀲𑀓𑀢𑁆𑀣𑁄, 𑀧𑀽𑀚𑀢𑁆𑀣𑁄 𑀯𑀸 𑀏𑀢𑁂𑀦𑀸𑀢𑀺 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄, 𑀲𑀤𑀢𑁆𑀣𑁄𑀢𑀺 𑀘 𑀅𑀭𑀳𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀅𑀢𑁆𑀢𑀼𑀧𑀦𑀺𑀩𑀦𑁆𑀥𑀦𑀝𑁆𑀞𑁂𑀦, 𑀅𑀢𑁆𑀢𑀸𑀦𑀁 𑀅𑀯𑀺𑀚𑀳𑀦𑀝𑁆𑀞𑁂𑀦, 𑀅𑀢𑁆𑀢𑀦𑁄 𑀧𑀭𑀫𑀢𑁆𑀣𑀝𑁆𑀞𑁂𑀦 𑀘 𑀅𑀢𑁆𑀢𑀦𑁄 𑀅𑀢𑁆𑀣𑀢𑁆𑀢𑀸 ‘‘𑀲𑀤𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀔𑀻𑀡𑀸𑀦𑀺 𑀤𑀲𑀧𑀺 𑀪𑀯𑀲𑀁𑀬𑁄𑀚𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀔𑀻𑀡𑀲𑀁𑀬𑁄𑀚𑀦𑁄. 𑀤𑀓𑁆𑀔𑀺𑀡𑀁 𑀅𑀭𑀳𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄. 𑀘𑀢𑀲𑁆𑀲𑁄𑀧𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀅𑀭𑀳𑀢𑁆𑀢𑀫𑀕𑁆𑀕𑁄𑀢𑀺 𑀘𑀢𑀲𑁆𑀲𑁄𑀧𑀺. 𑀯𑀺𑀲𑀼𑀤𑁆𑀥𑀺𑀓𑀸𑀫𑁂𑀦𑀸𑀢𑀺 𑀅𑀢𑁆𑀢𑀦𑁄 𑀯𑀺𑀲𑀼𑀤𑁆𑀥𑀺𑀁 𑀇𑀘𑁆𑀙𑀦𑁆𑀢𑁂𑀦. 𑀢𑀧𑁄𑀬𑁂𑀯 𑀥𑀦𑀫𑀲𑁆𑀲𑀸𑀢𑀺 𑀢𑀧𑁄𑀥𑀦𑁄, 𑀢𑁂𑀦.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.