𑁨𑁧. 𑀏𑀓𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨𑁯𑁮. 𑀅𑀝𑁆𑀞𑀜𑀸𑀡𑀯𑀲𑁂𑀦𑁂𑀯𑀸𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀜𑀸𑀡𑀸𑀦𑀁 𑀯𑀲𑁂𑀦. 𑀯𑀺𑀧𑀲𑁆𑀲𑀦𑀸𑀘𑀸𑀭𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀲𑀺𑀔𑀸𑀧𑀢𑁆𑀢𑀸 𑀯𑀺𑀧𑀲𑁆𑀲𑀦𑀸. 𑀲𑀺𑀔𑀸𑀧𑀢𑁆𑀢𑀺 𑀧𑀦𑀲𑁆𑀲𑀸 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀻𑀦𑀁 𑀅𑀝𑁆𑀞𑀜𑀸𑀡𑀸𑀦𑀁 𑀯𑀲𑁂𑀦𑀸𑀢𑀺 𑀆𑀳 ‘‘𑀅𑀝𑁆𑀞𑀜𑀸𑀡𑀯𑀲𑁂𑀦𑀸’’𑀢𑀺. 𑀦𑀯𑀫𑀦𑁆𑀢𑀺 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁. 𑀇𑀢𑀺 𑀉𑀤𑀬𑀩𑁆𑀩𑀬𑀸𑀤𑀻𑀦𑀺 𑀅𑀝𑁆𑀞, 𑀇𑀤𑀜𑁆𑀘 𑀦𑀯𑀫𑀜𑀸𑀡𑀁 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀺. 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬 𑀅𑀭𑀺𑀬𑀫𑀕𑁆𑀕𑁄𑀢𑀺 𑀧𑀝𑀺𑀧𑀤𑀸, 𑀉𑀤𑀬𑀩𑁆𑀩𑀬𑀸𑀤𑀻𑀦𑀁 𑀚𑀸𑀦𑀦𑀝𑁆𑀞𑁂𑀦, 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀜𑀸𑀡𑀤𑀲𑁆𑀲𑀦𑀜𑁆𑀘𑀸𑀢𑀺 𑀓𑀢𑁆𑀯𑀸.

𑁧𑁨𑁯𑁯. 𑀢𑀸𑀦𑀺 𑀧𑀦 𑀜𑀸𑀡𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞 𑀜𑀸𑀡𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀺𑀜𑁆𑀘𑀸𑀧𑀺 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀢𑀺𑀝𑁆𑀞𑀁, 𑀢𑀣𑀸𑀧𑀺 𑀬𑀣𑀸𑀯𑀼𑀢𑁆𑀢𑀝𑁆𑀞𑁂𑀦 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀫𑁆𑀧𑀺 𑀳𑁄𑀢𑀺𑀬𑁂𑀯𑀸𑀢𑀺 𑀢𑀫𑁆𑀧𑀺 𑀇𑀥 𑀯𑀼𑀢𑁆𑀢𑀁. 𑀇𑀢𑀭𑀢𑁆𑀣 𑀧𑀦 𑀉𑀧𑁆𑀧𑀦𑁆𑀦𑀫𑀢𑁆𑀢𑀁 𑀅𑀧𑁆𑀧𑀕𑀼𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀧𑁆𑀧𑀕𑀼𑀡𑀜𑁆𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀳𑀸𑀦𑀲𑀺𑀤𑁆𑀥𑀺𑀬𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑀁. 𑀬𑀢𑁄 𑀢𑀤𑀥𑀺𑀕𑀫𑁂𑀦 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀧𑀲𑁆𑀲𑀦𑀸𑀲𑀼 𑀏𑀓𑀘𑁆𑀘𑀸 𑀅𑀥𑀺𑀕𑀢𑀸𑀯 𑀳𑁄𑀦𑁆𑀢𑀺. 𑀦 𑀳𑀺 𑀉𑀤𑀬𑀩𑁆𑀩𑀬𑀸𑀦𑀁 𑀧𑀘𑁆𑀘𑀓𑁆𑀔𑀢𑁄 𑀧𑀝𑀺𑀯𑁂𑀥𑁂𑀦 𑀯𑀺𑀦𑀸 𑀲𑀸𑀫𑀜𑁆𑀜𑀸𑀓𑀸𑀭𑀸𑀦𑀁 𑀢𑀻𑀭𑀡𑀫𑀢𑁆𑀢𑁂𑀦 𑀲𑀸𑀢𑀺𑀲𑀬𑀁 𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑀁 𑀲𑀫𑁆𑀪𑀯𑀢𑀺. 𑀅𑀲𑀢𑀺 𑀘 𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑁂 𑀓𑀼𑀢𑁄 𑀜𑀸𑀡𑀸𑀤𑀻𑀦𑀁 𑀯𑀚𑀺𑀭𑀫𑀺𑀯 𑀅𑀯𑀺𑀳𑀢𑀯𑁂𑀕𑀢𑀸 𑀢𑀺𑀔𑀺𑀡𑀯𑀺𑀲𑀤𑀸𑀤𑀺𑀢𑀸 𑀯𑀸, 𑀢𑀲𑁆𑀫𑀸 𑀧𑀕𑀼𑀡𑀪𑀸𑀯𑀧𑁆𑀧𑀢𑁆𑀢𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀧𑀳𑀸𑀦𑀧𑀭𑀺𑀜𑁆𑀜𑀸𑀧𑀓𑁆𑀔𑀺𑀬𑀫𑁂𑀯 𑀤𑀝𑁆𑀞𑀩𑁆𑀩𑀁.

𑁧𑁩𑁦𑁦-𑁨. 𑀪𑀗𑁆𑀕𑁂𑀢𑀺 𑀲𑀗𑁆𑀔𑀸𑀭𑀸𑀦𑀁 𑀪𑀗𑁆𑀕𑁂. 𑀬𑀣𑀸𑀪𑀽𑀢𑀤𑀲𑁆𑀲𑀸𑀯𑀻 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀢𑁂𑀪𑀽𑀫𑀓𑀥𑀫𑁆𑀫𑀸, 𑀢𑁂𑀲𑀼 𑀪𑀬𑀢𑁄 𑀉𑀧𑀢𑀺𑀝𑁆𑀞𑀦𑁆𑀢𑁂𑀲𑀼 𑀪𑀸𑀬𑀺𑀢𑀩𑁆𑀩𑀸𑀓𑀸𑀭𑀕𑁆𑀕𑀸𑀳𑀺𑀜𑀸𑀡𑀁 𑀪𑀬𑁂𑀜𑀸𑀡𑀁. 𑀢𑀣𑀸 𑀳𑁂𑀢𑀁 ‘‘𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀼𑀘𑁆𑀘𑀺𑀢𑀼𑀁 𑀇𑀘𑁆𑀙𑀢𑀻𑀢𑀺 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀁, 𑀘𑀺𑀢𑁆𑀢𑀁, 𑀧𑀼𑀕𑁆𑀕𑀮𑁄 𑀯𑀸, 𑀢𑀲𑁆𑀲 𑀪𑀸𑀯𑁄 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸, 𑀢𑀁 𑀧𑀦 𑀜𑀸𑀡𑀫𑁂𑀯𑀸𑀢𑀺 𑀆𑀳 ‘‘𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸’’𑀢𑀺. 𑀧𑀼𑀦 𑀧𑀝𑀺𑀲𑀗𑁆𑀔𑀸𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁. 𑀦𑀺𑀭𑀧𑁂𑀓𑁆𑀔𑀢𑀸𑀬 𑀲𑀗𑁆𑀔𑀸𑀭𑀸𑀦𑀁 𑀉𑀧𑁂𑀓𑁆𑀔𑀦𑀯𑀲𑁂𑀦 𑀧𑀯𑀢𑁆𑀢𑀁 𑀜𑀸𑀡𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁. 𑀕𑀸𑀣𑀸𑀩𑀦𑁆𑀥𑀢𑁆𑀣𑀁 𑀧𑀦 𑀯𑀺𑀲𑀦𑁆𑀥𑀺𑀦𑀺𑀤𑁆𑀤𑁂𑀲𑁄. 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀲𑁆𑀲 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀢𑀫𑀲𑁆𑀲 𑀯𑀺𑀕𑀫𑀦𑁂𑀦 𑀲𑀘𑁆𑀘𑀧𑀝𑀺𑀯𑁂𑀥𑀸𑀦𑀼𑀓𑀽𑀮𑀢𑁆𑀢𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁. 𑀢𑀁 𑀧𑀦 𑀇𑀤𑀦𑁆𑀢𑀺 𑀆𑀳 ‘‘𑀲𑀘𑁆𑀘𑀸𑀦𑀼𑀮𑁄𑀫𑀜𑀸𑀡𑀦𑁆𑀢𑀺, 𑀅𑀦𑀼𑀮𑁄𑀫𑀁 𑀧𑀯𑀼𑀘𑁆𑀘𑀢𑀻’’𑀢𑀺.

𑁧𑁩𑁦𑁩. 𑀦𑀦𑀼 𑀘 𑀉𑀤𑀬𑀩𑁆𑀩𑀬𑀜𑀸𑀡𑀲𑁆𑀲 𑀧𑀕𑁂𑀯 𑀲𑀺𑀤𑁆𑀥𑀢𑁆𑀢𑀸 𑀓𑀺𑀫𑀢𑁆𑀣𑀁 𑀧𑀼𑀦 𑀢𑀢𑁆𑀣𑀸𑀧𑀺 𑀅𑀪𑀺𑀬𑁄𑀕𑁄𑀢𑀺 𑀘𑁂? 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀢𑁆𑀣𑀁. 𑀉𑀤𑀬𑀩𑁆𑀩𑀬𑀜𑀸𑀡𑀜𑁆𑀳𑀺 𑀳𑁂𑀝𑁆𑀞𑀸 𑀤𑀲𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀳𑀼𑀢𑁆𑀯𑀸 𑀬𑀸𑀣𑀸𑀯𑀲𑀭𑀲𑀢𑁄 𑀢𑀺𑀮𑀓𑁆𑀔𑀡𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀉𑀧𑀓𑁆𑀓𑀺𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀁 𑀧𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀢𑁆𑀣𑀁 𑀧𑀼𑀦 𑀢𑀢𑁆𑀣𑁂𑀯 𑀬𑁄𑀕𑁄 𑀓𑀸𑀢𑀩𑁆𑀩𑁄. 𑀮𑀓𑁆𑀔𑀡𑀸𑀦𑀺 𑀘𑀲𑁆𑀲 𑀉𑀤𑀬𑀩𑁆𑀩𑀬𑀸𑀤𑀻𑀦𑀁 𑀅𑀫𑀦𑀲𑀺𑀓𑀸𑀭𑀸, 𑀲𑀦𑁆𑀢𑀢𑀺𑀇𑀭𑀺𑀬𑀸𑀧𑀣𑀖𑀦𑀙𑀦𑁆𑀦𑀢𑀸𑀬 𑀘 𑀦𑁄𑀧𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀉𑀤𑀬𑀩𑁆𑀩𑀬𑀁 𑀫𑀦𑀲𑀺 𑀓𑀢𑁆𑀯𑀸 𑀲𑀦𑁆𑀢𑀢𑀺𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀅𑀪𑀺𑀡𑁆𑀳𑀧𑀻𑀴𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀇𑀭𑀺𑀬𑀸𑀧𑀣𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀤𑀼𑀓𑁆𑀔𑀮𑀓𑁆𑀔𑀡𑀁, 𑀥𑀸𑀢𑀼𑀬𑁄 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀅𑀦𑀢𑁆𑀢𑀮𑀓𑁆𑀔𑀡𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸’’𑀢𑀺 𑀲𑀗𑁆𑀔𑀸𑀭𑀸 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀺𑀢𑀩𑁆𑀩𑀸. 𑀢𑀲𑁆𑀲𑁂𑀯𑀁 𑀢𑀼𑀮𑀬𑀢𑁄 𑀢𑀻𑀭𑀬𑀢𑁄 𑀬𑀤𑀸 𑀲𑀗𑁆𑀔𑀸𑀭𑀕𑀢𑀁 𑀅𑀢𑁆𑀢𑀦𑁄 𑀮𑀳𑀼𑀉𑀧𑀝𑁆𑀞𑀸𑀦𑁂𑀦, 𑀜𑀸𑀡𑀲𑁆𑀲 𑀘 𑀢𑀺𑀓𑁆𑀔𑀢𑀸𑀬 𑀢𑀺𑀭𑁄𑀳𑀺𑀢𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑀁 𑀪𑀺𑀚𑁆𑀚𑀫𑀸𑀦𑀫𑁂𑀯 𑀉𑀧𑀝𑁆𑀞𑀸𑀢𑀺, 𑀪𑀗𑁆𑀕𑁂𑀬𑁂𑀯 𑀢𑀲𑁆𑀲 𑀜𑀸𑀡𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀤𑀸 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸 𑀦𑀸𑀫 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀥𑀺𑀕𑀢𑀁 𑀳𑁄𑀢𑀺. 𑀢𑀲𑁆𑀲 𑀢𑀤𑁂𑀯 𑀲𑀗𑁆𑀔𑀸𑀭𑀦𑀺𑀭𑁄𑀥𑀸𑀭𑀫𑁆𑀫𑀡𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁 𑀆𑀲𑁂𑀯𑀦𑁆𑀢𑀲𑁆𑀲 𑀬𑀤𑀸 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀝𑁆𑀞𑀺𑀢𑀺𑀦𑀺𑀯𑀸𑀲𑁂𑀲𑀼 𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑀲𑀪𑀸𑀯𑀢𑀸𑀬 𑀬𑀓𑁆𑀔𑀭𑀓𑁆𑀔𑀲𑀸𑀤𑀬𑁄 𑀯𑀺𑀬 𑀫𑀳𑀸𑀪𑀬𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀢𑀤𑀸𑀲𑁆𑀲 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀅𑀥𑀺𑀕𑀢𑀁 𑀳𑁄𑀢𑀺. 𑀓𑀺𑀁 𑀧𑀦𑀺𑀤𑀁 𑀜𑀸𑀡𑀁 𑀪𑀸𑀬𑀢𑀻𑀢𑀺? 𑀦 𑀪𑀸𑀬𑀢𑀺. 𑀢𑀜𑁆𑀳𑀺 ‘‘𑀅𑀢𑀻𑀢𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀦𑀸𑀕𑀢𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀻𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀩𑁆𑀬𑀲𑀦𑀸𑀧𑀦𑁆𑀦𑀸𑀦𑀁 𑀧𑀦 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀪𑀬𑀢𑁄 𑀉𑀧𑀝𑁆𑀞𑀺𑀢𑀸𑀦𑀁 𑀕𑀳𑀡𑁂𑀦 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀢𑀲𑁆𑀲 𑀢𑀁 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀆𑀲𑁂𑀯𑀦𑁆𑀢𑀲𑁆𑀲 𑀬𑀤𑀸 𑀲𑀩𑁆𑀩𑀪𑀯𑀕𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀢𑀸𑀡𑀁 𑀯𑀸 𑀮𑁂𑀡𑀁 𑀯𑀸 𑀧𑀭𑀸𑀬𑀡𑀁 𑀯𑀸 𑀦 𑀧𑀜𑁆𑀜𑀸𑀬𑀢𑀺, 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁄 𑀯𑀺𑀬 𑀧𑀘𑁆𑀘𑀸𑀫𑀺𑀢𑁆𑀢𑁄 𑀲𑀸𑀤𑀻𑀦𑀯𑀸 𑀏𑀯 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀢𑀲𑁆𑀲 𑀲𑀗𑁆𑀔𑀸𑀭𑀸𑀦𑀁 𑀆𑀤𑀻𑀦𑀯𑀫𑁂𑀯 𑀧𑀲𑁆𑀲𑀦𑁆𑀢𑀲𑁆𑀲 𑀆𑀤𑀻𑀦𑀯𑀜𑀸𑀡𑀁 𑀦𑀸𑀫 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀢𑀲𑁆𑀲𑁂𑀯𑀁 𑀲𑀩𑁆𑀩𑀲𑀗𑁆𑀔𑀸𑀭𑁂 𑀆𑀤𑀻𑀦𑀯𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀬𑀤𑀸 𑀢𑀺𑀪𑀯𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀦𑀺𑀩𑁆𑀩𑁂𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀓𑁆𑀓𑀡𑁆𑀞𑀸 𑀲𑀡𑁆𑀞𑀳𑀦𑁆𑀢𑀺, 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀲𑀁𑀬𑀼𑀢𑁆𑀢𑁂 𑀲𑀦𑁆𑀢𑀺𑀧𑀤𑁂 𑀅𑀪𑀺𑀭𑀢𑀺𑀁 𑀧𑀝𑀺𑀮𑀪𑀢𑀺, 𑀢𑀤𑀸𑀲𑁆𑀲 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀁 𑀦𑀸𑀫 𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀢𑀲𑁆𑀲 𑀬𑀤𑀸 𑀇𑀫𑀺𑀦𑀸 𑀦𑀺𑀩𑁆𑀩𑀺𑀤𑀸𑀜𑀸𑀡𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀲𑁆𑀲 𑀏𑀓𑀲𑀗𑁆𑀔𑀸𑀭𑁂𑀧𑀺 𑀘𑀺𑀢𑁆𑀢𑀁 𑀦 𑀲𑀚𑁆𑀚𑀢𑀺, 𑀲𑀩𑁆𑀩𑀲𑁆𑀫𑀸 𑀲𑀗𑁆𑀔𑀸𑀭𑀢𑁄 𑀲𑀧𑁆𑀧𑀫𑀼𑀔𑀕𑀢𑀲𑁆𑀲 𑀯𑀺𑀬 𑀫𑀡𑁆𑀟𑀽𑀓𑀲𑁆𑀲 𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀦𑀸𑀫 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀢𑀲𑁆𑀲𑁂𑀯𑀁 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀫𑀼𑀘𑁆𑀘𑀺𑀢𑀼𑀓𑀸𑀫𑀲𑁆𑀲 𑀦𑀺𑀘𑁆𑀘𑀲𑀼𑀔𑀲𑀼𑀪𑀅𑀢𑁆𑀢𑀸𑀓𑀸𑀭𑁂𑀦 𑀧𑀦 𑀉𑀧𑀝𑁆𑀞𑀺𑀢𑀼𑀁 𑀅𑀲𑀫𑀢𑁆𑀣𑀢𑀁 𑀧𑀸𑀧𑁂𑀢𑁆𑀯𑀸 𑀫𑀼𑀘𑁆𑀘𑀦𑀲𑁆𑀲 𑀉𑀧𑀸𑀬𑀲𑀫𑁆𑀧𑀸𑀤𑀦𑀢𑁆𑀣𑀁 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑀸𑀤𑀻𑀳𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀅𑀪𑀺𑀡𑁆𑀳𑀧𑀝𑀺𑀧𑀻𑀴𑀦𑀢𑀸𑀤𑀻𑀳𑀺 𑀤𑀼𑀓𑁆𑀔𑀮𑀓𑁆𑀔𑀡𑀁, 𑀅𑀚𑀜𑁆𑀜𑀓𑀢𑀸𑀤𑀻𑀳𑀺 𑀧𑀝𑀺𑀓𑁆𑀓𑀽𑀮𑀢𑀁, 𑀢𑀼𑀘𑁆𑀙𑀢𑀸𑀤𑀻𑀳𑀺 𑀅𑀦𑀢𑁆𑀢𑀮𑀓𑁆𑀔𑀡𑀜𑁆𑀘 𑀆𑀭𑁄𑀧𑁂𑀢𑁆𑀯𑀸 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀸𑀫 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀢𑁂𑀦 𑀧𑀦𑁂𑀯𑀁 𑀧𑀭𑀺𑀕𑁆𑀕𑀳𑀺𑀢𑀲𑀗𑁆𑀔𑀸𑀭𑁂𑀦 𑀬𑀸 𑀲𑀸 ‘‘𑀲𑀼𑀜𑁆𑀜𑀫𑀺𑀤𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺𑀆𑀤𑀺𑀦𑀸 𑀤𑁆𑀯𑀺𑀓𑁄𑀝𑀺𑀓𑀸𑀤𑀺𑀪𑁂𑀤𑀸 𑀲𑀼𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀲𑀸 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸. 𑀢𑀲𑁆𑀲𑁂𑀯𑀁 𑀲𑀼𑀜𑁆𑀜𑀢𑁄 𑀤𑀺𑀲𑁆𑀯𑀸 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑀲𑁆𑀲 𑀬𑀤𑀸 𑀪𑀬𑀜𑁆𑀘 𑀦𑀦𑁆𑀤𑀺𑀜𑁆𑀘 𑀯𑀺𑀧𑁆𑀧𑀳𑀸𑀬 𑀯𑀺𑀲𑁆𑀲𑀝𑁆𑀞𑀪𑀭𑀺𑀬𑀲𑁆𑀲 𑀯𑀺𑀬 𑀲𑀗𑁆𑀔𑀸𑀭𑀕𑀢𑁂𑀲𑀼 𑀉𑀧𑁂𑀓𑁆𑀔𑀸 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀻𑀲𑀼 𑀪𑀯𑁂𑀲𑀼 𑀘𑀺𑀢𑁆𑀢𑀁 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺, 𑀢𑀤𑀸𑀲𑁆𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀦𑀸𑀫 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀢𑀁 𑀧𑀦𑁂𑀢𑀁 𑀬𑀸𑀯 𑀦𑀺𑀩𑁆𑀩𑀸𑀦𑀁 𑀦 𑀧𑀲𑁆𑀲𑀢𑀺, 𑀢𑀸𑀯 𑀤𑀺𑀲𑀸𑀓𑀸𑀓𑁄 𑀯𑀺𑀬 𑀓𑀽𑀧𑀓𑀬𑀝𑁆𑀞𑀺𑀁 𑀧𑀼𑀦𑀧𑁆𑀧𑀼𑀦𑀁 𑀲𑀗𑁆𑀔𑀸𑀭𑀫𑁂𑀯 𑀅𑀦𑀪𑀺𑀫𑀢𑀫𑁆𑀧𑀺 𑀦𑀺𑀲𑁆𑀲𑀸𑀬 𑀲𑀗𑁆𑀔𑀸𑀭𑀯𑀺𑀘𑀺𑀦𑀦𑁂𑀧𑀺 𑀫𑀚𑁆𑀛𑀢𑁆𑀢𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀢𑁂𑀲𑀼 𑀧𑀦 𑀜𑀸𑀡𑁂𑀲𑀽’’𑀢𑀺𑀆𑀤𑀺.

𑁧𑁩𑁦𑁬. 𑀯𑀺𑀧𑀲𑁆𑀲𑀦𑀸…𑀧𑁂… 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀢𑀺 𑀲𑀺𑀔𑀁 𑀉𑀢𑁆𑀢𑀫𑀪𑀸𑀯𑀁 𑀧𑀢𑁆𑀢𑀢𑁆𑀢𑀸 𑀲𑀺𑀔𑀸𑀧𑀢𑁆𑀢𑀸. 𑀯𑀼𑀝𑁆𑀞𑀸𑀦𑀁 𑀕𑀘𑁆𑀙𑀢𑀻𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻. ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀳𑀺 𑀩𑀳𑀺𑀤𑁆𑀥𑀸 𑀦𑀺𑀫𑀺𑀢𑁆𑀢𑀪𑀽𑀢𑀸 𑀅𑀪𑀺𑀦𑀺𑀯𑀺𑀝𑁆𑀞𑀯𑀢𑁆𑀣𑀼𑀢𑁄 𑀘𑁂𑀯 𑀅𑀚𑁆𑀛𑀢𑁆𑀢𑀧𑁆𑀧𑀯𑀢𑁆𑀢𑀢𑁄 𑀘 𑀯𑀼𑀝𑁆𑀞𑀳𑀦𑀢𑁄 𑀫𑀕𑁆𑀕𑁄 𑀯𑀼𑀘𑁆𑀘𑀢𑀺, 𑀢𑀁 𑀕𑀘𑁆𑀙𑀢𑀻𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻, 𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀖𑀝𑀻𑀬𑀢𑀻𑀢𑀺 𑀅𑀢𑁆𑀣𑁄.

𑁧𑁩𑁦𑁭. 𑀢𑀦𑁆𑀢𑀺 𑀬𑀁 𑀲𑀺𑀔𑀸𑀧𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀲𑀘𑁆𑀘𑀸𑀦𑀼𑀮𑁄𑀫𑀜𑀸𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁. 𑀆𑀲𑁂𑀯𑀦𑁆𑀢𑀲𑁆𑀲𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀦𑀯𑀲𑁂𑀦 𑀲𑁂𑀯𑀦𑁆𑀢𑀲𑁆𑀲 𑀪𑀸𑀯𑁂𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲. 𑀢𑀲𑁆𑀲 𑀳𑀺 𑀅𑀥𑀺𑀫𑁄𑀓𑁆𑀔𑀲𑀤𑁆𑀥𑀸 𑀪𑀸𑀯𑀦𑀸𑀯𑀲𑁂𑀦 𑀩𑀮𑀯𑀢𑀭𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀯𑀻𑀭𑀺𑀬𑀁 𑀲𑀼𑀧𑀕𑁆𑀕𑀳𑀺𑀢𑀁 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀲𑀫𑀢𑁆𑀣𑀁 𑀳𑁄𑀢𑀺, 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑁂𑀦 𑀲𑀢𑀺 𑀲𑀼𑀧𑀢𑀺𑀝𑁆𑀞𑀺𑀢𑀸 𑀳𑁄𑀢𑀺, 𑀧𑀲𑁆𑀲𑀤𑁆𑀥𑀺𑀲𑀼𑀔𑀸𑀦𑀁 𑀲𑀸𑀢𑀺𑀲𑀬𑀢𑀸𑀬 𑀘𑀺𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀁, 𑀢𑀢𑁄𑀯 𑀅𑀦𑀼𑀮𑁄𑀫𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀸 𑀢𑀺𑀓𑁆𑀔𑀢𑀫𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀉𑀧𑁆𑀧𑀚𑁆𑀚𑀢𑀺.

𑁧𑁩𑁦𑁮-𑁧𑁨. 𑀅𑀦𑀺𑀘𑁆𑀘𑀸…𑀧𑁂… 𑀯𑁄𑀢𑀭𑀢𑁂𑀯 𑀲𑀸𑀢𑀺 𑀅𑀦𑀺𑀘𑁆𑀘𑀸𑀤𑀻𑀲𑀼 𑀏𑀓𑁂𑀦 𑀆𑀓𑀸𑀭𑁂𑀦 𑀲𑀫𑁆𑀫𑀲𑀦𑁆𑀢𑀻 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀻 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑀸 𑀦𑀸𑀫 𑀳𑁄𑀢𑀺, 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀯𑀸𑀭𑁄𑀢𑀺 𑀓𑀢𑁆𑀯𑀸. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀓𑀢𑀦𑀬𑁂𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀦𑀸 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑁂𑀯 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀓𑀢𑀦𑀬𑁂𑀦, 𑀦 𑀲𑀫𑁆𑀫𑀲𑀺𑀢𑀦𑀬𑁂𑀦. 𑀢𑁂𑀦𑀸𑀳 ‘‘𑀅𑀦𑀺𑀘𑁆𑀘𑀸𑀤𑀺…𑀧𑁂… 𑀓𑀼𑀭𑀼𑀫𑀸𑀦’’𑀦𑁆𑀢𑀺. 𑀪𑀯𑀗𑁆𑀕𑀸𑀯𑀝𑁆𑀝𑀦𑀁 𑀓𑀢𑁆𑀯𑀸𑀢𑀺 𑀪𑀯𑀗𑁆𑀕𑀲𑁆𑀲 𑀦𑀺𑀯𑀢𑁆𑀢𑀦𑀁 𑀓𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀪𑀯𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀺𑀢𑀼𑀁 𑀅𑀤𑀢𑁆𑀯𑀸. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀫𑀕𑁆𑀕𑀲𑁆𑀲 𑀧𑀭𑀺𑀓𑀫𑁆𑀫𑀢𑁆𑀢𑀸 𑀧𑀝𑀺𑀲𑀗𑁆𑀔𑀸𑀭𑀓𑀢𑁆𑀢𑀸. 𑀉𑀧𑀘𑀸𑀭𑀦𑁆𑀢𑀺 𑀫𑀕𑁆𑀕𑀲𑁆𑀲 𑀆𑀲𑀦𑁆𑀦𑀢𑁆𑀢𑀸, 𑀲𑀫𑀻𑀧𑀘𑀸𑀭𑀺𑀢𑁆𑀢𑀸 𑀯𑀸.

𑁧𑁩𑁧𑁩-𑁬. 𑀅𑀦𑀼𑀮𑁄𑀫𑀢𑁆𑀢𑀁 𑀲𑀬𑀫𑁂𑀯 𑀯𑀤𑀢𑀺 ‘‘𑀧𑀼𑀭𑀺𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸. 𑀇𑀤𑀜𑁆𑀳𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸, ‘‘𑀉𑀤𑀬𑀩𑁆𑀩𑀬𑀯𑀦𑁆𑀢𑀸𑀦𑀁𑀬𑁂𑀯 𑀯𑀢 𑀥𑀫𑁆𑀫𑀸𑀦𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀉𑀧𑁆𑀧𑀸𑀤𑀯𑀬𑁂 𑀅𑀤𑁆𑀤𑀲𑀸’’𑀢𑀺 𑀘 ‘‘𑀪𑀗𑁆𑀕𑀯𑀦𑁆𑀢𑀸𑀦𑀁𑀬𑁂𑀯 𑀯𑀢 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀁 𑀪𑀗𑁆𑀕𑀫𑀤𑁆𑀤𑀲𑀸’’𑀢𑀺 𑀘 ‘‘𑀲𑀪𑀬𑀁𑀬𑁂𑀯 𑀯𑀢 𑀪𑀬𑀢𑀼𑀧𑀝𑁆𑀞𑀸𑀦𑀲𑁆𑀲 𑀪𑀬𑀢𑁄 𑀉𑀧𑀝𑁆𑀞𑀺𑀢’’𑀦𑁆𑀢𑀺 𑀘 ‘‘𑀲𑀸𑀤𑀻𑀦𑀯𑁂𑀬𑁂𑀯 𑀯𑀢 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀁 𑀆𑀤𑀻𑀦𑀯𑀫𑀤𑁆𑀤𑀲𑀸’’𑀢𑀺 𑀘 ‘‘𑀦𑀺𑀩𑁆𑀩𑀺𑀦𑁆𑀤𑀺𑀢𑀩𑁆𑀩𑁂𑀬𑁂𑀯 𑀯𑀢 𑀦𑀺𑀩𑁆𑀩𑀺𑀤𑀸𑀜𑀸𑀡𑀁 𑀦𑀺𑀩𑁆𑀩𑀺𑀦𑁆𑀤’’𑀦𑁆𑀢𑀺 𑀘 ‘‘𑀫𑀼𑀘𑁆𑀘𑀺𑀢𑀩𑁆𑀩𑀫𑁆𑀳𑀺𑀬𑁂𑀯 𑀯𑀢 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀸𑀫𑀁 𑀚𑀸𑀢’’𑀦𑁆𑀢𑀺 𑀘 ‘‘𑀧𑀝𑀺𑀲𑀗𑁆𑀔𑀸𑀢𑀩𑁆𑀩𑀫𑁂𑀯 𑀯𑀢 𑀧𑀝𑀺𑀲𑀗𑁆𑀔𑀸𑀜𑀸𑀡𑁂𑀦 𑀧𑀝𑀺𑀲𑀗𑁆𑀔𑀸𑀢’’𑀦𑁆𑀢𑀺 𑀘 ‘‘𑀉𑀧𑁂𑀓𑁆𑀔𑀺𑀢𑀩𑁆𑀩𑀁𑀬𑁂𑀯 𑀯𑀢 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀺𑀢’’𑀦𑁆𑀢𑀺 𑀘 𑀅𑀢𑁆𑀣𑀢𑁄 𑀯𑀤𑀫𑀸𑀦𑀁 𑀯𑀺𑀬 𑀇𑀫𑁂𑀲𑀜𑁆𑀘 𑀅𑀝𑁆𑀞𑀦𑁆𑀦𑀁 𑀜𑀸𑀡𑀸𑀦𑀁 𑀓𑀢𑀓𑀺𑀘𑁆𑀘𑀢𑀸𑀬 𑀅𑀦𑀼𑀮𑁄𑀫𑁂𑀢𑀺 𑀲𑀩𑁆𑀩𑀸𑀲𑀁𑀬𑁂𑀯 𑀯𑀺𑀧𑀲𑁆𑀲𑀦𑀸𑀦𑀁 𑀮𑀓𑁆𑀔𑀡𑀢𑁆𑀢𑀬𑀲𑀫𑁆𑀫𑀲𑀦𑀓𑀺𑀘𑁆𑀘𑀢𑁆𑀢𑀸, 𑀢𑀣𑀸 𑀉𑀧𑀭𑀺 𑀘 𑀅𑀭𑀺𑀬𑀫𑀕𑁆𑀕𑁂 𑀲𑀢𑁆𑀢𑀢𑀺𑀁𑀲𑀸𑀬 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀢𑀸𑀬 𑀧𑀝𑀺𑀧𑀤𑀸𑀬 𑀧𑀢𑁆𑀢𑀩𑁆𑀩𑀢𑀸𑀬. 𑀦 𑀳𑀺 𑀅𑀦𑀼𑀮𑁄𑀫𑀜𑀸𑀡𑁂 𑀣𑀽𑀮𑀣𑀽𑀮𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀲𑀁𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑁆𑀢𑁂 𑀕𑁄𑀢𑁆𑀭𑀪𑀼𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀕𑁄𑀢𑁆𑀭𑀪𑀼𑀜𑀸𑀡𑁂 𑀘 𑀅𑀦𑀼𑀧𑁆𑀧𑀦𑁆𑀦𑁂 𑀫𑀕𑁆𑀕𑀜𑀸𑀡𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀪𑀸𑀕𑀸𑀦𑀁 𑀅𑀦𑀼𑀮𑁄𑀫𑀢𑁆𑀢𑀸 ‘‘𑀅𑀦𑀼𑀮𑁄𑀫𑀦𑁆𑀢𑀺 𑀲𑀜𑁆𑀜𑀺𑀢’’𑀦𑁆𑀢𑀺. 𑀢𑁂𑀦𑁂𑀯𑀸𑀢𑀺 𑀳𑁂𑀝𑁆𑀞𑀺𑀫𑀜𑀸𑀡𑀸𑀦𑀁 𑀅𑀦𑀼𑀮𑁄𑀫𑀫𑀼𑀔𑁂𑀦, 𑀉𑀧𑀭𑀺 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀅𑀦𑀼𑀮𑁄𑀫𑀦𑀢𑁄 𑀘. 𑀲𑀘𑁆𑀘𑀸𑀦𑀼𑀮𑁄𑀫𑀜𑀸𑀡𑀦𑁆𑀢𑀺 𑀧𑀯𑀼𑀘𑁆𑀘𑀢𑀺 𑀫𑀕𑁆𑀕𑀲𑀘𑁆𑀘𑀲𑁆𑀲 𑀅𑀦𑀼𑀮𑁄𑀫𑀺𑀓𑀢𑁆𑀢𑀸. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸𑀢𑀺 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬. 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀧𑀼𑀭𑀺𑀫𑀸 𑀓𑁄𑀝𑀺. 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀯𑀺𑀧𑀲𑁆𑀲𑀦𑀸𑀲𑀼 𑀳𑀺 𑀅𑀬𑀁 𑀯𑀺𑀲𑁂𑀲𑀢𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀢𑀺. 𑀅𑀲𑀗𑁆𑀔𑀢𑀸𑀭𑀫𑁆𑀫𑀡𑀁 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀯𑀼𑀝𑁆𑀞𑀸𑀦𑀁 𑀕𑀘𑁆𑀙𑀢𑀺 𑀉𑀧𑁂𑀢𑀻𑀢𑀺. 𑀢𑀢𑁄𑀧𑀺 𑀳𑀺 𑀯𑀺𑀲𑁂𑀲𑀢𑁄 ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀆𑀳 ‘‘𑀜𑁂𑀬𑁆𑀬𑀁 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀸’’𑀢𑀺𑀆𑀤𑀺.

𑁧𑁩𑁧𑁭-𑁮. 𑀓𑀺𑀢𑁆𑀢𑀺𑀢𑀸𑀢𑀺 𑀣𑁄𑀫𑀺𑀢𑀸, 𑀅𑀭𑀺𑀬𑀫𑀕𑁆𑀕𑀸𑀥𑀺𑀝𑁆𑀞𑀸𑀦𑀢𑀸𑀬 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀦𑀢𑁄 𑀕𑀯𑁂𑀲𑀦𑀢𑁄 𑀫𑀳𑁂𑀲𑀺𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀲𑀦𑁆𑀢𑀓𑀺𑀮𑁂𑀲𑀢𑀸𑀬 𑀲𑀦𑁆𑀢𑀸. 𑀬𑁄𑀕𑀦𑁆𑀢𑀺 𑀪𑀸𑀯𑀦𑀁, 𑀪𑀸𑀯𑀦𑀸𑀪𑀺𑀬𑁄𑀕𑀁 𑀯𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.