𑁨𑁦. 𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨𑁬𑁩. 𑀇𑀤𑀸𑀦𑀺 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀸𑀬 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀦𑀺𑀤𑁆𑀤𑁂𑀲𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀸 𑀧𑀦 𑀬𑀲𑁆𑀫𑀸 𑀑𑀪𑀸𑀲𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀲𑀫𑁆𑀪𑀯𑁂 𑀲𑀢𑀺 𑀳𑁄𑀢𑀺, 𑀑𑀪𑀸𑀲𑀸𑀤𑀬𑁄 𑀘 𑀉𑀤𑀬𑀩𑁆𑀩𑀬𑀜𑀸𑀡𑁂 𑀲𑀫𑁆𑀪𑀯𑀦𑁆𑀢𑀺, 𑀉𑀤𑀬𑀩𑁆𑀩𑀬𑀜𑀸𑀡𑀜𑁆𑀘 𑀢𑀺𑀮𑀓𑁆𑀔𑀡𑀯𑀺𑀧𑀲𑁆𑀲𑀦𑀸𑀬 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘 𑀓𑀮𑀸𑀧𑀲𑀫𑁆𑀫𑀲𑀦𑀁 𑀆𑀤𑀺. 𑀢𑀜𑁆𑀳𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀲𑀼𑀓𑀭𑀲𑀫𑁆𑀫𑀲𑀦𑀁, 𑀢𑀲𑁆𑀫𑀸 𑀧𑀞𑀫𑀁 𑀢𑀢𑁆𑀣𑁂𑀯 𑀅𑀪𑀺𑀬𑁄𑀕𑀁 𑀓𑀭𑁄𑀦𑁆𑀢𑁂𑀦 𑀓𑀫𑀢𑁄 𑀢𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀮𑀸𑀧𑀲𑀫𑁆𑀫𑀲𑀦𑁂𑀦𑁂𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀣 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀺𑀲𑀼𑀤𑁆𑀥𑀻𑀦𑀫𑀦𑁆𑀢𑀭𑁂 𑀓𑀮𑀸𑀧𑀲𑀫𑁆𑀫𑀲𑀦𑀁 𑀳𑁄𑀢𑀺, 𑀢𑀜𑁆𑀘 𑀔𑁄 𑀤𑁆𑀯𑀻𑀲𑀼 𑀏𑀓𑀸𑀬 𑀯𑀺𑀲𑀼𑀤𑁆𑀥𑀺𑀬𑀸 𑀲𑀗𑁆𑀕𑀳𑁂𑀢𑀩𑁆𑀩𑀁, 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀲𑁆𑀲 𑀘 𑀆𑀤𑀺𑀪𑀽𑀢𑀢𑁆𑀢𑀸 𑀢𑀢𑁆𑀣𑁂𑀯𑀲𑁆𑀲 𑀲𑀗𑁆𑀕𑀳𑁄 𑀬𑀼𑀢𑁆𑀢𑁄𑀢𑀺 𑀏𑀢𑁆𑀣𑁂𑀯 𑀦𑀁 𑀲𑀗𑁆𑀕𑀳𑀺𑀢𑀼𑀓𑀸𑀫𑀢𑀸𑀬 𑀯𑀼𑀢𑁆𑀢𑀁 ‘‘𑀓𑀮𑀸𑀧𑀲𑀫𑁆𑀫𑀲𑀦𑁂𑀦𑁂𑀯𑀸’’𑀢𑀺𑀆𑀤𑀺. 𑀓𑁂𑀘𑀺 𑀧𑀦 𑀓𑀮𑀸𑀧𑀲𑀫𑁆𑀫𑀲𑀦𑀁 𑀦𑀸𑀫 𑀏𑀓𑀯𑀺𑀲𑀼𑀤𑁆𑀥𑀺𑀬𑀫𑁆𑀧𑀺 𑀦 𑀅𑀦𑁆𑀢𑁄𑀕𑀥𑀦𑁆𑀢𑀺 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸𑀯 𑀯𑀺𑀧𑀲𑁆𑀲𑀦𑀸𑀘𑀸𑀭𑀁 𑀯𑀡𑁆𑀡𑁂𑀦𑁆𑀢𑀺. 𑀓𑀮𑀸𑀧𑀲𑀫𑁆𑀫𑀲𑀦𑁂𑀦𑁂𑀯𑀸𑀢𑀺 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀯𑀢𑁆𑀣𑀸𑀦𑀯𑀲𑁂𑀦 𑀓𑀮𑀸𑀧𑀢𑁄, 𑀓𑀮𑀸𑀧𑀸𑀦𑀁 𑀯𑀸 𑀲𑀫𑁆𑀫𑀲𑀦𑁂𑀦 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀧𑀲𑁆𑀲𑀦𑀸𑀬 𑀬𑁄𑀕𑁄 𑀓𑀭𑀡𑀻𑀬𑁄. 𑀅𑀣 𑀯𑀸 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀮𑀸𑀧𑀲𑀫𑁆𑀫𑀲𑀦𑁂 𑀬𑁄𑀕𑁄 𑀓𑀭𑀡𑀻𑀬𑁄𑀢𑀺 𑀅𑀢𑁆𑀣𑁄. ‘‘𑀓𑀮𑀸𑀧𑀲𑀫𑁆𑀫𑀲𑀦𑁂𑀦𑁂𑀯 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺 𑀯𑀢𑁆𑀯𑀸𑀧𑀺 𑀢𑀁 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁨.𑁬𑁯𑁨) 𑀕𑀳𑁂𑀢𑀩𑁆𑀩𑀦𑁆𑀢𑀺 𑀕𑀦𑁆𑀣𑀯𑀺𑀢𑁆𑀣𑀸𑀭𑀧𑀭𑀺𑀳𑀸𑀭𑀢𑁆𑀣𑀁 𑀇𑀥 𑀦 𑀤𑀲𑁆𑀲𑀺𑀢𑀦𑁆𑀢𑀺.

𑁧𑁨𑁬𑁪. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲, 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀯𑀸. 𑀆𑀤𑀺𑀢𑁄 𑀧𑀦 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀉𑀤𑀬𑀯𑀬𑀁 𑀤𑀼𑀧𑁆𑀧𑀭𑀺𑀕𑁆𑀕𑀳𑀁, 𑀢𑀲𑁆𑀫𑀸 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀧𑀞𑀫𑀁 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀁 𑀓𑀸𑀢𑀩𑁆𑀩𑀁. 𑀦𑀺𑀩𑁆𑀩𑀢𑁆𑀢𑀻𑀢𑀺 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀯𑀲𑁂𑀦 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀘 𑀔𑀡𑀦𑀺𑀩𑁆𑀩𑀢𑁆𑀢𑀺 𑀘. 𑀯𑀺𑀧𑀭𑀺𑀡𑀸𑀫𑁄𑀢𑀺 𑀯𑀺𑀦𑀸𑀲𑁄.

𑁧𑁨𑁬𑁫. 𑀅𑀦𑀼𑀧𑀲𑁆𑀲𑀦𑀸𑀧𑀺 𑀜𑀸𑀡𑀦𑁆𑀢𑀺 𑀬𑀸 𑀉𑀤𑀬𑀲𑁆𑀲 𑀘 𑀯𑀬𑀲𑁆𑀲 𑀘 𑀅𑀦𑀼𑀧𑀲𑁆𑀲𑀦𑀸, 𑀲𑀸 𑀜𑀸𑀡𑀦𑁆𑀢𑀺 𑀯𑀭𑀜𑀸𑀡𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀓𑀣𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑁂 𑀜𑀸𑀡𑀁? 𑀚𑀸𑀢𑀁 𑀭𑀽𑀧𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀉𑀤𑀬𑁄. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀯𑀬𑁄. 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡𑀁. 𑀚𑀸𑀢𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁… 𑀚𑀸𑀢𑀁 𑀘𑀓𑁆𑀔𑀼𑀁…𑀧𑁂… 𑀚𑀸𑀢𑁄 𑀪𑀯𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀉𑀤𑀬𑁄. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀯𑀬𑁄. 𑀅𑀦𑀼𑀧𑀲𑁆𑀲𑀦𑀸 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁪𑁯).

𑀏𑀢𑁆𑀣 𑀧𑀦 𑀉𑀤𑀬𑀤𑀲𑁆𑀲𑀦𑀁 𑀬𑀸𑀯𑀤𑁂𑀯 𑀔𑀬𑀤𑀲𑁆𑀲𑀦𑀦𑁆𑀢𑀺 𑀯𑀬𑀤𑀲𑁆𑀲𑀦𑀲𑁆𑀲 𑀧𑀥𑀸𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸’’𑀢𑀺 𑀯𑀢𑁆𑀯𑀸 𑀢𑀁 𑀧𑀦 𑀯𑀬𑀤𑀲𑁆𑀲𑀦𑀁 𑀉𑀤𑀬𑀤𑀲𑁆𑀲𑀦𑀧𑀼𑀩𑁆𑀩𑀓𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑁂 𑀜𑀸𑀡’’𑀦𑁆𑀢𑀺.

𑁧𑁨𑁬𑁬-𑁮. 𑀧𑀼𑀩𑁆𑀩𑁂 𑀉𑀧𑁆𑀧𑀢𑁆𑀢𑀺𑀢𑁄𑀢𑀺 𑀚𑀦𑀦𑀢𑁄 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀘𑀬𑁄 𑀭𑀸𑀲𑀺 𑀯𑀸 𑀦𑀢𑁆𑀣𑀺, 𑀬𑀢𑁄 𑀆𑀕𑀘𑁆𑀙𑁂𑀬𑁆𑀬 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀮𑀤𑁆𑀥𑀢𑁆𑀢𑀪𑀸𑀯𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀣𑀸 𑀉𑀧𑁆𑀧𑀚𑁆𑀚𑀢𑁄’’𑀢𑀺𑀆𑀤𑀺. 𑀬𑀣𑀸 𑀅𑀦𑀸𑀕𑀢𑁂 𑀅𑀤𑁆𑀥𑀸𑀦𑁂 𑀇𑀫𑁂 𑀥𑀫𑁆𑀫𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀺, 𑀏𑀯𑀁 𑀅𑀢𑀻𑀢𑁂𑀧𑀺 𑀅𑀤𑁆𑀥𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸 𑀦𑀺𑀭𑀼𑀚𑁆𑀛𑀫𑀸𑀦𑀲𑁆𑀲𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀅𑀯𑀺𑀚𑁆𑀚𑀫𑀸𑀦𑀸𑀦𑀁𑀬𑁂𑀯 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀸𑀤𑁄, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘 𑀲𑀩𑁆𑀩𑀲𑁄 𑀅𑀪𑀸𑀯𑀽𑀧𑀕𑀫𑁄𑀢𑀺 𑀇𑀫𑀫𑀢𑁆𑀣𑀁 𑀲𑀫𑀼𑀤𑀸𑀬𑀕𑀢𑀁 𑀢𑀤𑁂𑀓𑀤𑁂𑀲𑀪𑀽𑀢𑀸𑀬 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀝𑁆𑀞𑀓𑀣𑀸𑀬 (𑀯𑀺𑀲𑀼𑀤𑁆𑀥𑀺. 𑁨.𑁭𑁨𑁩) 𑀯𑀻𑀡𑀽𑀧𑀫𑀸 𑀆𑀕𑀢𑀸. 𑀲𑀸 𑀇𑀥𑀸𑀧𑀺 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀏𑀢𑁆𑀣 𑀯𑀻𑀡𑀽𑀧𑀫𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑀲𑁆𑀲𑀢𑁆𑀣𑀲𑁆𑀲𑀸𑀢𑀺 𑀅𑀯𑀺𑀚𑁆𑀚𑀫𑀸𑀦𑀸𑀦𑀁𑀬𑁂𑀯 𑀉𑀧𑁆𑀧𑀸𑀤𑁄, 𑀉𑀧𑁆𑀧𑀦𑁆𑀦𑀸𑀦𑀜𑁆𑀘 𑀧𑀭𑀢𑁄 𑀅𑀪𑀸𑀯𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀧𑀓𑀸𑀲𑀦𑁂. 𑀯𑀻𑀡𑀽𑀧𑀫𑀸𑀢𑀺 𑀯𑀻𑀡𑀸𑀯𑀲𑁂𑀦 𑀆𑀕𑀢𑀸 𑀉𑀧𑀫𑀸. 𑀲𑀸 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀸 𑁋 𑀬𑀣𑀸 𑀯𑀻𑀡𑀸𑀬 𑀯𑀸𑀤𑀺𑀬𑀫𑀸𑀦𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀲𑀤𑁆𑀤𑀲𑁆𑀲 𑀦𑁂𑀯 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀲𑀦𑁆𑀦𑀺𑀘𑀬𑁄 𑀅𑀢𑁆𑀣𑀺, 𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀦𑁆𑀦𑀺𑀘𑀬𑀢𑁄 𑀆𑀕𑀢𑁄. 𑀦 𑀦𑀺𑀭𑀼𑀚𑁆𑀛𑀫𑀸𑀦𑀲𑁆𑀲 𑀤𑀺𑀲𑀸𑀯𑀺𑀤𑀺𑀲𑀸𑀕𑀫𑀦𑀁 𑀅𑀢𑁆𑀣𑀺, 𑀦 𑀦𑀺𑀭𑀼𑀤𑁆𑀥𑁄 𑀓𑀢𑁆𑀣𑀘𑀺 𑀲𑀦𑁆𑀦𑀺𑀘𑀺𑀢𑁄 𑀢𑀺𑀝𑁆𑀞𑀢𑀺, 𑀅𑀣 𑀔𑁄 𑀯𑀻𑀡𑀜𑁆𑀘 𑀯𑀻𑀡𑀯𑀸𑀤𑀦𑀜𑁆𑀘 𑀧𑀼𑀭𑀺𑀲𑀲𑁆𑀲 𑀘 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀢𑀺, 𑀏𑀯𑀁 𑀲𑀩𑁆𑀩𑁂𑀧𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻𑀢𑀺.

𑁧𑁨𑁬𑁯-𑁭𑁦. 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀉𑀤𑀬𑀩𑁆𑀩𑀬𑀫𑀦𑀲𑀺𑀓𑀸𑀭𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀬𑀸𑀦𑀺 𑀏𑀢𑀲𑁆𑀲𑁂𑀯 𑀉𑀤𑀬𑀩𑁆𑀩𑀬𑀜𑀸𑀡𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺, ‘‘𑀢𑀡𑁆𑀳𑀸𑀲𑀫𑀼𑀤𑀬𑀸…𑀧𑁂… 𑀓𑀫𑁆𑀫𑀲𑀫𑀼𑀤𑀬𑀸…𑀧𑁂… 𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺, 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺, 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺, ‘‘𑀢𑀡𑁆𑀳𑀸𑀦𑀺𑀭𑁄𑀥𑀸…𑀧𑁂… 𑀓𑀫𑁆𑀫𑀦𑀺𑀭𑁄𑀥𑀸…𑀧𑁂… 𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺, 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. 𑀢𑀣𑀸 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺, ‘‘𑀢𑀡𑁆𑀳𑀸𑀲𑀫𑀼𑀤𑀬𑀸…𑀧𑁂… 𑀓𑀫𑁆𑀫𑀲𑀫𑀼𑀤𑀬𑀸…𑀧𑁂… 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺, 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺. ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸…𑀧𑁂… 𑀢𑀡𑁆𑀳𑀸𑀦𑀺𑀭𑁄𑀥𑀸…𑀧𑁂… 𑀓𑀫𑁆𑀫𑀦𑀺𑀭𑁄𑀥𑀸…𑀧𑁂… 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺, 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀺𑀬 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸𑀦𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀨𑀲𑁆𑀲𑀝𑁆𑀞𑀸𑀦𑁂 ‘‘𑀦𑀸𑀫𑀭𑀽𑀧𑀲𑀫𑀼𑀤𑀬𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑀸’’𑀢𑀺.

𑀏𑀯𑀁 𑀏𑀓𑁂𑀓𑀲𑁆𑀲 𑀔𑀦𑁆𑀥𑀲𑁆𑀲 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂 𑀤𑀲 𑀤𑀲 𑀓𑀢𑁆𑀯𑀸 𑀲𑀫𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀁 𑀯𑀲𑁂𑀦𑀧𑀺 ‘‘𑀏𑀯𑀫𑁆𑀧𑀺 𑀭𑀽𑀧𑀲𑀫𑀼𑀤𑀬𑁄, 𑀏𑀯𑀫𑁆𑀧𑀺 𑀭𑀽𑀧𑀯𑀬𑁄, 𑀏𑀯𑀫𑁆𑀧𑀺 𑀭𑀽𑀧𑀁 𑀉𑀤𑁂𑀢𑀺, 𑀏𑀯𑀫𑁆𑀧𑀺 𑀭𑀽𑀧𑀁 𑀯𑁂𑀢𑀻’’𑀢𑀺 𑀧𑀘𑁆𑀘𑀬𑀢𑁄 𑀘𑁂𑀯 𑀔𑀡𑀢𑁄 𑀘 𑀯𑀺𑀢𑁆𑀣𑀸𑀭𑁂𑀦 𑀘 𑀫𑀦𑀲𑀺𑀓𑀸𑀭𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲𑁂𑀯 𑀜𑀸𑀡𑀲𑁆𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸𑀢𑀺 𑀅𑀯𑀺𑀚𑁆𑀚𑀸𑀬 𑀉𑀧𑁆𑀧𑀸𑀤𑀸, 𑀅𑀢𑁆𑀣𑀺𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀭𑁄𑀥𑀯𑀺𑀭𑀼𑀤𑁆𑀥𑁄 𑀳𑀺 𑀉𑀧𑁆𑀧𑀸𑀤𑁄 𑀅𑀢𑁆𑀣𑀺𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀸𑀬 𑀅𑀯𑀺𑀚𑁆𑀚𑀸𑀬 𑀲𑀢𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀭𑀽𑀧𑀲𑀫𑀼𑀤𑀬𑁄 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀆𑀤𑀺-𑀲𑀤𑁆𑀤𑀲𑀗𑁆𑀕𑀳𑀺𑀢𑁂𑀲𑀼 ‘‘𑀢𑀡𑁆𑀳𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀓𑀫𑁆𑀫𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺 𑀘, 𑀢𑀣𑀸 𑀯𑀬𑀤𑀲𑁆𑀲𑀦𑁂 ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄, 𑀢𑀡𑁆𑀳𑀸𑀦𑀺𑀭𑁄𑀥𑀸… 𑀓𑀫𑁆𑀫𑀦𑀺𑀭𑁄𑀥𑀸… 𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄’’𑀢𑀺 𑀘 𑀆𑀤𑀻𑀲𑀼 𑀅𑀯𑀺𑀚𑁆𑀚𑀸𑀤𑀻𑀳𑀺 𑀢𑀻𑀳𑀺 𑀅𑀢𑀻𑀢𑀓𑀸𑀮𑀺𑀓𑀸𑀦𑀺 𑀢𑁂𑀲𑀁 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑀸𑀦𑀺 𑀉𑀧𑀸𑀤𑀸𑀦𑀸𑀤𑀻𑀦𑀺𑀧𑀺 𑀕𑀳𑀺𑀢𑀸𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀯𑀢𑁆𑀢𑀺𑀧𑀘𑁆𑀘𑀬𑁂𑀲𑀼 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀩𑀮𑀯𑀢𑀸𑀬 𑀲𑁄 𑀏𑀯 𑀕𑀳𑀺𑀢𑁄 ‘‘𑀆𑀳𑀸𑀭𑀲𑀫𑀼𑀤𑀬𑀸’’𑀢𑀺. 𑀢𑀲𑁆𑀫𑀺𑀁 𑀧𑀦 𑀕𑀳𑀺𑀢𑁂 𑀧𑀯𑀢𑁆𑀢𑀺𑀧𑀘𑁆𑀘𑀬𑀢𑀸𑀲𑀸𑀫𑀜𑁆𑀜𑁂𑀦 𑀉𑀢𑀼𑀘𑀺𑀢𑁆𑀢𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑁆𑀲 𑀧𑀘𑁆𑀘𑀬𑀢𑁄 𑀉𑀤𑀬𑀤𑀲𑁆𑀲𑀦𑀁 𑀯𑀺𑀪𑀸𑀯𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀺𑀚𑁆𑀚𑀸𑀢𑀡𑁆𑀳𑀽𑀧𑀦𑀺𑀲𑁆𑀲𑀬𑀲𑀳𑀺𑀢𑁂𑀦𑁂𑀯 𑀓𑀫𑁆𑀫𑀼𑀦𑀸 𑀭𑀽𑀧𑀓𑀸𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀺, 𑀅𑀲𑀢𑀺 𑀘 𑀅𑀯𑀺𑀚𑁆𑀚𑀽𑀧𑀦𑀺𑀲𑁆𑀲𑀬𑀸𑀬 𑀪𑀯𑀦𑀺𑀓𑀦𑁆𑀢𑀺𑀬𑀸 𑀚𑀸𑀢𑀺𑀬𑀸 𑀅𑀲𑀫𑁆𑀪𑀯𑁄𑀬𑁂𑀯𑀸𑀢𑀺. 𑀬𑀣𑀸 𑀭𑀽𑀧𑀲𑁆𑀲 𑀅𑀯𑀺𑀚𑁆𑀚𑀸𑀢𑀡𑁆𑀳𑀽𑀧𑀦𑀺𑀲𑁆𑀲𑀬𑀢𑀸, 𑀏𑀯𑀁 𑀯𑁂𑀤𑀦𑀸𑀤𑀻𑀦𑀫𑁆𑀧𑀺 𑀤𑀝𑁆𑀞𑀩𑁆𑀩𑀸. 𑀆𑀳𑀸𑀭𑁄 𑀧𑀦 𑀉𑀧𑁆𑀧𑀦𑁆𑀦𑀲𑁆𑀲 𑀭𑀽𑀧𑀲𑁆𑀲 𑀧𑁄𑀲𑀓𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀓𑀸𑀫𑀁 𑀬𑀣𑀸𑀥𑀺𑀝𑁆𑀞𑀸𑀦𑀢𑁆𑀢𑀸 𑀯𑀸 𑀤𑁂𑀲𑀦𑀸𑀬. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀯𑀸 𑀆𑀳𑀸𑀭𑀕𑁆𑀕𑀳𑀡𑀁. 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸𑀢𑀺 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦 𑀅𑀯𑀺𑀚𑁆𑀚𑀸𑀬 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀢𑁄 𑀅𑀦𑀸𑀕𑀢𑀲𑁆𑀲 𑀭𑀽𑀧𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑁄𑀢𑀺 𑀧𑀘𑁆𑀘𑀬𑀸𑀪𑀸𑀯𑁂 𑀅𑀪𑀸𑀯𑀢𑁄. ‘‘𑀢𑀡𑁆𑀳𑀸𑀦𑀺𑀭𑁄𑀥𑀸 𑀓𑀫𑁆𑀫𑀦𑀺𑀭𑁄𑀥𑁄’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀆𑀳𑀸𑀭𑀦𑀺𑀭𑁄𑀥𑀸𑀢𑀺 𑀧𑀯𑀢𑁆𑀢𑀺𑀧𑀘𑁆𑀘𑀬𑀲𑁆𑀲 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀅𑀪𑀸𑀯𑁂. 𑀭𑀽𑀧𑀦𑀺𑀭𑁄𑀥𑁄𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀅𑀪𑀸𑀯𑁄 𑀳𑁄𑀢𑀻𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 ‘‘𑀨𑀼𑀝𑁆𑀞𑁄 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻𑀢𑀺 (𑀲𑀁. 𑀦𑀺. 𑁪.𑁯𑁩), 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀲𑀜𑁆𑀜𑀸 𑀘𑁂𑀢𑀦𑀸’’𑀢𑀺 𑀯𑀘𑀦𑀢𑁄 𑀨𑀲𑁆𑀲𑁄 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑀺𑀧𑀘𑁆𑀘𑀬𑁄, 𑀢𑀦𑁆𑀦𑀺𑀭𑁄𑀥𑀸 𑀘 𑀢𑁂𑀲𑀁 𑀦𑀺𑀭𑁄𑀥𑁄, 𑀫𑀳𑀸𑀧𑀤𑀸𑀦𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑁂𑀲𑀼, 𑀅𑀪𑀺𑀥𑀫𑁆𑀫𑁂 𑀘 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀯𑀸𑀭𑁂 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀤𑀻. 𑀦𑀺. 𑁨.𑁫𑁭, 𑁯𑁭; 𑀓𑀣𑀸. 𑁭𑁧𑁯) 𑀯𑀘𑀦𑀢𑁄 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀧𑀘𑁆𑀘𑀬𑁄, 𑀢𑀦𑁆𑀦𑀺𑀭𑁄𑀥𑀸 𑀘 𑀢𑀲𑁆𑀲 𑀦𑀺𑀭𑁄𑀥𑁄𑀢𑀺 𑀯𑀼𑀢𑁆𑀢𑀁 ‘‘𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄’’𑀢𑀺𑀆𑀤𑀺.

𑁧𑁨𑁭𑁧. 𑀤𑀲 𑀤𑀲𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀤𑀲𑁆𑀲𑀦𑁂 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀓𑀫𑁆𑀫𑀁 𑀆𑀳𑀸𑀭𑁄𑀢𑀺 𑀇𑀫𑁂𑀲𑀁 𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀺𑀢𑀸𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺 𑀘𑁂𑀯 𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀜𑁆𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺, 𑀯𑀬𑀤𑀲𑁆𑀲𑀦𑁂 𑀅𑀯𑀺𑀚𑁆𑀚𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄, 𑀭𑀽𑀧𑀲𑁆𑀲 𑀔𑀡𑀦𑀺𑀭𑁄𑀥𑁄 𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀮𑀓𑁆𑀔𑀡𑀸𑀦𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀤𑀲 𑀮𑀓𑁆𑀔𑀡𑀸𑀦𑀺, 𑀢𑀣𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀘𑀢𑁆𑀢𑀸𑀮𑀻𑀲 𑀮𑀓𑁆𑀔𑀡𑀸𑀦𑀻𑀢𑀺 𑀏𑀯𑀁 𑀲𑀫𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀻’’𑀢𑀺. 𑀮𑀓𑁆𑀔𑀡𑀝𑁆𑀞𑁄 𑀧𑀦 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀺𑀢𑀸, 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀘𑀸𑀢𑀺 𑀅𑀝𑁆𑀞 𑀮𑀓𑁆𑀔𑀻𑀬𑀢𑀺 𑀏𑀢𑁂𑀳𑀺 𑀭𑀽𑀧𑀸𑀤𑀻𑀦𑀁 𑀉𑀤𑀬𑁄 𑀘 𑀯𑀬𑁄 𑀘𑀸𑀢𑀺 𑀮𑀓𑁆𑀔𑀡𑀸𑀦𑀺. 𑀘𑀢𑀼𑀦𑁆𑀦𑀜𑁆𑀳𑀺 𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀺𑀢𑀸𑀳𑀺 𑀭𑀽𑀧𑀸𑀤𑀺𑀉𑀤𑀬𑁄 𑀮𑀓𑁆𑀔𑀻𑀬𑀢𑀺, 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑁂𑀳𑀺 𑀯𑀬𑁄, 𑀦𑀺𑀩𑁆𑀩𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀸𑀦𑀺 𑀧𑀦 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑁂𑀯𑀸𑀢𑀺. 𑀥𑀫𑁆𑀫𑁂 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀭𑀽𑀧𑀸𑀤𑀺𑀓𑁂 𑀥𑀫𑁆𑀫𑁂 𑀉𑀤𑀬𑀩𑁆𑀩𑀬𑀯𑀦𑁆𑀢𑁂 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀢𑁆𑀣 𑀘 𑀓𑁂𑀘𑀺 𑀢𑀸𑀯 𑀆𑀳𑀼 ‘‘𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁 𑀅𑀤𑁆𑀥𑀸𑀲𑀦𑁆𑀢𑀢𑀺𑀯𑀲𑁂𑀦, 𑀦 𑀔𑀡𑀯𑀲𑁂𑀦𑀸’’𑀢𑀺, 𑀢𑁂𑀲𑀁 𑀫𑀢𑁂𑀦 𑀔𑀡𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀫𑁂𑀯 𑀦 𑀲𑀺𑀬𑀸. 𑀅𑀧𑀭𑁂 𑀧𑀦𑀸𑀳𑀼 ‘‘𑀧𑀘𑁆𑀘𑀬𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑁂𑀦 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑀩𑁆𑀩𑀲𑀸𑀥𑀸𑀭𑀡𑀢𑁄 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀸 𑀯𑁂𑀤𑀦𑀸𑀬 𑀲𑀫𑁆𑀪𑀯𑀁 𑀮𑀩𑁆𑀪𑀫𑀸𑀦𑀢𑀁 𑀧𑀲𑁆𑀲𑀢𑀺, 𑀦 𑀉𑀧𑁆𑀧𑀸𑀤𑀁. 𑀅𑀯𑀺𑀚𑁆𑀚𑀸𑀤𑀺𑀅𑀪𑀸𑀯𑁂 𑀘 𑀢𑀲𑁆𑀲𑀸 𑀅𑀲𑀫𑁆𑀪𑀯𑀁 𑀅𑀮𑀩𑁆𑀪𑀫𑀸𑀦𑀢𑀁 𑀧𑀲𑁆𑀲𑀢𑀺, 𑀦 𑀪𑀗𑁆𑀕𑀓𑁆𑀔𑀡𑀢𑁄. 𑀉𑀤𑀬𑀩𑁆𑀩𑀬𑀲𑁆𑀲 𑀤𑀲𑁆𑀲𑀦𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀁, 𑀪𑀗𑁆𑀕𑀜𑁆𑀘 𑀧𑀲𑁆𑀲𑀢𑀻’’𑀢𑀺, 𑀢𑀁 𑀅𑀬𑀼𑀢𑁆𑀢𑀁. 𑀲𑀦𑁆𑀢𑀢𑀺𑀯𑀲𑁂𑀦 𑀳𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀉𑀤𑀬𑀩𑁆𑀩𑀬𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀪𑀸𑀯𑀦𑀸𑀬 𑀩𑀮𑀧𑁆𑀧𑀢𑁆𑀢𑀓𑀸𑀮𑁂 𑀜𑀸𑀡𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀔𑀡𑀢𑁄 𑀉𑀤𑀬𑀩𑁆𑀩𑀬𑀸 𑀉𑀧𑀝𑁆𑀞𑀳𑀦𑁆𑀢𑀻𑀢𑀺.

𑁧𑁨𑁭𑁨-𑁫. 𑀅𑀬𑀜𑁆𑀳𑀺 𑀧𑀞𑀫𑀁 𑀧𑀘𑁆𑀘𑀬𑀢𑁄 𑀉𑀤𑀬𑀩𑁆𑀩𑀬𑀁 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀧𑀘𑁆𑀙𑀸 𑀅𑀯𑀺𑀚𑁆𑀚𑀸𑀤𑀺𑀓𑁂 𑀧𑀘𑁆𑀘𑀬𑀥𑀫𑁆𑀫𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀯𑀦𑁆𑀢𑁂 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀧𑀘𑁆𑀘𑀬𑀢𑁄 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀫𑀼𑀔𑁂𑀦 𑀔𑀡𑀢𑁄𑀧𑀺 𑀉𑀤𑀬𑀩𑁆𑀩𑀬𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀬𑀤𑀸 𑀜𑀸𑀡𑀁 𑀢𑀺𑀓𑁆𑀔𑀁 𑀯𑀺𑀲𑀤𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑀤𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀸, 𑀪𑀺𑀚𑁆𑀚𑀦𑁆𑀢𑀸 𑀘 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀭𑀽𑀧𑀼𑀤𑀬𑁄 𑀳𑁄𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀁 𑀭𑀽𑀧𑀼𑀤𑀬𑁄𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸…𑀧𑁂… 𑀢𑀡𑁆𑀳𑀸𑀲𑀫𑀼𑀤𑀬𑀸…𑀧𑁂… 𑀓𑀫𑁆𑀫…𑀧𑁂… 𑀆𑀳𑀸𑀭𑀲𑀫𑀼𑀤𑀬𑀸𑀧𑀺 𑀭𑀽𑀧𑀲𑁆𑀲 𑀲𑀫𑁆𑀪𑀯𑁄. 𑀏𑀯𑀫𑀲𑁆𑀲 𑀯𑀬𑁄𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸…𑀧𑁂… 𑀢𑀡𑁆𑀳𑀸𑀦𑀺𑀭𑁄𑀥𑀸…𑀧𑁂… 𑀓𑀫𑁆𑀫…𑀧𑁂… 𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀲𑁆𑀲 𑀯𑀬𑁄 𑀅𑀦𑀼𑀧𑁆𑀧𑀸𑀤𑁄𑀢𑀺 𑀅𑀬𑀁 𑀧𑀘𑁆𑀘𑀬𑀢𑁄 𑀯𑀺𑀢𑁆𑀣𑀸𑀭𑁂𑀦 𑀫𑀦𑀲𑀺𑀓𑀸𑀭𑁄. 𑀉𑀤𑁂𑀢𑀺 𑀏𑀯𑀁 𑀭𑀽𑀧𑀫𑁆𑀧𑀻𑀢𑀺 𑀏𑀯𑀁 𑀲𑀫𑀼𑀤𑀬𑀢𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁆𑀧𑀺 𑀆𑀳𑀸𑀭𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁆𑀧𑀺 𑀉𑀤𑁂𑀢𑀺 𑀉𑀧𑁆𑀧𑀚𑁆𑀚𑀢𑀺 𑀦𑀺𑀩𑁆𑀩𑀢𑁆𑀢𑀢𑀺. 𑀏𑀯𑀁 𑀭𑀽𑀧𑀁 𑀢𑀼 𑀯𑁂𑀢𑀻𑀢𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁆𑀧𑀺 𑀆𑀳𑀸𑀭𑀉𑀢𑀼𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁆𑀧𑀺 𑀏𑀯𑀁 𑀯𑁂𑀢𑀺 𑀦𑀺𑀭𑀼𑀚𑁆𑀛𑀢𑀻𑀢𑀺 𑀅𑀬𑀁 𑀔𑀡𑀢𑁄 𑀯𑀺𑀢𑁆𑀣𑀸𑀭𑁂𑀦 𑀫𑀦𑀲𑀺𑀓𑀸𑀭𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀧𑀘𑁆𑀘𑀬𑀢𑁄𑀧𑁂𑀢𑁆𑀣 𑀔𑀡𑀢𑁄 𑀉𑀤𑀬𑀩𑁆𑀩𑀬’’𑀦𑁆𑀢𑀺. 𑀲𑀩𑁆𑀩𑀥𑀫𑁆𑀫𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀇𑀢𑀺 𑀇𑀫𑁂 𑀥𑀫𑁆𑀫𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀺. 𑀬𑀣𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀏𑀯𑀁 𑀅𑀢𑀻𑀢𑀸𑀦𑀸𑀕𑀢𑁂𑀧𑀻𑀢𑀺 𑀦𑀬𑀯𑀲𑁂𑀦 𑀅𑀢𑀻𑀢𑀸𑀤𑀺𑀥𑀫𑁆𑀫𑀸𑀦𑀁 𑀤𑁆𑀯𑁂𑀥𑀸 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀢𑁄 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀮𑀓𑁆𑀔𑀡𑀪𑁂𑀤𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀢𑀲𑁆𑀲𑁂𑀯𑀁 𑀧𑀸𑀓𑀝𑀻𑀪𑀽𑀢𑀲𑀩𑁆𑀩𑀥𑀫𑁆𑀫𑀲𑀪𑀸𑀯𑀲𑁆𑀲 ‘‘𑀏𑀯𑀁 𑀓𑀺𑀭 𑀦𑀸𑀫𑀺𑀫𑁂 𑀥𑀫𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀦𑀺𑀘𑁆𑀘𑀦𑀯𑀸𑀯 𑀳𑀼𑀢𑁆𑀯𑀸 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀦𑀺𑀘𑁆𑀘𑀦𑀯𑀸𑀯, 𑀉𑀤𑀓𑁂 𑀤𑀡𑁆𑀟𑀓𑁂𑀦 𑀓𑀢𑀮𑁂𑀔𑀸 𑀯𑀺𑀬, 𑀆𑀭𑀕𑁆𑀕𑁂 𑀞𑀧𑀺𑀢𑀲𑀸𑀲𑀧𑁄 𑀯𑀺𑀬, 𑀯𑀺𑀚𑁆𑀚𑀼𑀲𑀜𑁆𑀘𑀸𑀭𑁄 𑀯𑀺𑀬 𑀘 𑀧𑀭𑀺𑀢𑁆𑀢𑀓𑀸𑀮𑀝𑁆𑀞𑀸𑀬𑀺𑀦𑁄 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦𑀸𑀳 ‘‘𑀉𑀤𑀓𑁂 𑀤𑀡𑁆𑀟𑀭𑀸𑀚𑀻𑀯𑀸’’𑀢𑀺𑀆𑀤𑀺. 𑀉𑀤𑀓𑁂 𑀤𑀡𑁆𑀟𑀭𑀸𑀚𑀺𑀆𑀤𑀬𑁄𑀯 𑀓𑀺𑀜𑁆𑀘𑀸𑀧𑀺 𑀉𑀢𑁆𑀢𑀭𑀼𑀢𑁆𑀢𑀭𑀺 𑀅𑀢𑀺𑀧𑀭𑀺𑀢𑁆𑀢𑀝𑁆𑀞𑀸𑀬𑀺𑀪𑀸𑀯𑀦𑀺𑀤𑀲𑁆𑀲𑀦𑀢𑁆𑀣𑀁 𑀤𑀲𑁆𑀲𑀺𑀢𑀸, 𑀢𑀣𑀸𑀧𑀺 𑀤𑀦𑁆𑀥𑀦𑀺𑀭𑁄𑀥𑀸 𑀏𑀯 𑀦𑀺𑀤𑀲𑁆𑀲𑀺𑀢𑀸, 𑀢𑀢𑁄𑀧𑀺 𑀮𑀳𑀼𑀢𑀭𑀦𑀺𑀭𑁄𑀥𑀢𑁆𑀢𑀸 𑀲𑀗𑁆𑀔𑀸𑀭𑀸𑀦𑀁. 𑀢𑀣𑀸 𑀳𑀺 𑀕𑀫𑀦𑀲𑁆𑀲𑀸𑀤𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑁂𑀦 𑀧𑀭𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺, 𑀧𑀸𑀤𑁂 𑀘 𑀩𑀤𑁆𑀥𑀔𑀼𑀭𑀥𑀸𑀭𑀸𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀲𑀻𑀖𑀢𑀭𑁄 𑀭𑀽𑀧𑀦𑀺𑀭𑁄𑀥𑁄 𑀯𑀼𑀢𑁆𑀢𑁄, 𑀧𑀕𑁂𑀯 𑀅𑀭𑀽𑀧𑀥𑀫𑁆𑀫𑀸𑀦𑀁. 𑀦 𑀓𑁂𑀯𑀮𑀁 𑀧𑀭𑀺𑀢𑁆𑀢𑀢𑀭𑀓𑀸𑀮𑀝𑁆𑀞𑀸𑀬𑀺𑀦𑁄𑀯 𑀉𑀧𑀝𑁆𑀞𑀳𑀦𑁆𑀢𑀺, 𑀅𑀣 𑀔𑁄 𑀅𑀲𑀸𑀭𑀸𑀧𑀺 𑀔𑀸𑀬𑀦𑁆𑀢𑀻𑀢𑀺 𑀆𑀳 ‘‘𑀓𑀤𑀮𑀻’’𑀢𑀺𑀆𑀤𑀺. 𑀢𑀢𑁆𑀣 𑀫𑀡𑁆𑀟𑀮𑀸𑀓𑀸𑀭𑁂𑀦 𑀆𑀯𑀺𑀚𑁆𑀛𑀺𑀬𑀫𑀸𑀦𑀁 𑀅𑀮𑀸𑀢𑀫𑁂𑀯 𑀅𑀮𑀸𑀢𑀘𑀓𑁆𑀓𑀁. 𑀫𑀦𑁆𑀢𑁄𑀲𑀥𑀧𑁆𑀧𑀪𑀸𑀯𑀺𑀢𑀸 𑀇𑀦𑁆𑀤𑀚𑀸𑀮𑀸𑀤𑀺𑀓𑀸 𑀫𑀸𑀬𑀸.

𑁧𑁨𑁭𑁬-𑁭. 𑀏𑀢𑁆𑀢𑀸𑀯𑀢𑀸𑀢𑀺 𑀬𑁆𑀯𑀸𑀬𑀁 𑀓𑀮𑀸𑀧𑀲𑀫𑁆𑀫𑀲𑀦𑀦𑀺𑀬𑁄𑀚𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀤𑀬𑀩𑁆𑀩𑀬𑀧𑀝𑀺𑀯𑁂𑀥𑀸𑀬 𑀪𑀸𑀯𑀦𑀸 𑀯𑀺𑀥𑀺 𑀆𑀭𑀤𑁆𑀥𑁄, 𑀏𑀢𑁆𑀢𑀸𑀯𑀢𑀸 𑀪𑀸𑀯𑀦𑀸𑀯𑀺𑀥𑀸𑀦𑁂𑀦 𑀓𑀮𑀸𑀧𑀲𑀫𑁆𑀫𑀲𑀦𑀫𑁆𑀧𑀺 𑀉𑀤𑀬𑀩𑁆𑀩𑀬𑀜𑀸𑀡𑀼𑀧𑁆𑀧𑀸𑀤𑀲𑁆𑀲𑁂𑀯 𑀧𑀭𑀺𑀓𑀫𑁆𑀫𑀦𑁆𑀢𑀺. 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁 𑀜𑀸𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀓𑁆𑀔𑀡𑀸𑀦𑀺 𑀘…𑀧𑁂… 𑀞𑀺𑀢𑀦𑁆𑀢𑀺 𑀯𑀬𑀥𑀫𑁆𑀫𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀯𑀬𑀁 𑀉𑀧𑁂𑀢𑀻𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀲𑀫𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀁. 𑀅𑀥𑀼𑀦𑀸 𑀉𑀧𑁆𑀧𑀦𑁆𑀦𑀁 𑀦 𑀢𑀸𑀯 𑀩𑀮𑀧𑁆𑀧𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀭𑀼𑀡’’𑀦𑁆𑀢𑀺. 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀲𑀫𑁆𑀫𑀲𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀧𑀲𑁆𑀲𑀦𑀸𑀲𑀫𑀜𑁆𑀜𑀁 𑀮𑀪𑀢𑀺. 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑁂𑀯 𑀮𑀪𑀢𑀻𑀢𑀺 𑀆𑀳 ‘‘𑀬𑀲𑁆𑀲 𑀘𑀸’’𑀢𑀺𑀆𑀤𑀺.

𑁧𑁨𑁭𑁮-𑁮𑁦. 𑀅𑀣𑀲𑁆𑀲 𑀇𑀫𑀸𑀬 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀤𑀲 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀬𑀸’’𑀢𑀺𑀆𑀤𑀺. 𑀏𑀢𑀸𑀬𑀸𑀢𑀺 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬, 𑀦 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀤𑀺𑀲𑀗𑁆𑀔𑀸𑀢𑀸𑀬 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬, 𑀦𑀸𑀧𑀺 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀤𑀺𑀲𑀗𑁆𑀔𑀸𑀢𑀸𑀬 𑀩𑀮𑀯𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀢𑀤𑀸 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀯𑀺𑀧𑀲𑁆𑀲𑀓𑀲𑁆𑀲𑀸𑀢𑀺 𑀘 𑀯𑀺𑀧𑀲𑁆𑀲𑀓𑀲𑁆𑀲𑁂𑀯𑀸𑀢𑀺 𑀏𑀯-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀲𑀫𑁆𑀧𑀢𑁆𑀢𑀧𑀝𑀺𑀯𑁂𑀥𑀲𑁆𑀲𑀸’’𑀢𑀺𑀆𑀤𑀺. 𑀤𑀺𑀝𑁆𑀞𑀺𑀕𑁆𑀕𑀸𑀳𑀸𑀤𑀺𑀯𑀢𑁆𑀣𑀼𑀪𑀸𑀯𑁂𑀦 𑀯𑀺𑀧𑀲𑁆𑀲𑀦𑀁 𑀉𑀧𑀓𑁆𑀓𑀺𑀮𑁂𑀲𑀦𑁆𑀢𑀻𑀢𑀺 𑀉𑀧𑀓𑁆𑀓𑀺𑀮𑁂𑀲𑀸. 𑀲𑀫𑁆𑀧𑀢𑁆𑀢𑁄 𑀘𑀢𑀼𑀲𑀘𑁆𑀘𑀨𑀮𑀧𑀝𑀺𑀯𑁂𑀥𑁄 𑀬𑁂𑀦 𑀲𑁄 𑀲𑀫𑁆𑀧𑀢𑁆𑀢𑀧𑀝𑀺𑀯𑁂𑀥𑁄, 𑀲𑁄 𑀘 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑁄𑀢𑀸𑀧𑀦𑁆𑀦𑀸𑀤𑀺𑀦𑁄’’𑀢𑀺. 𑀅𑀧𑀺𑀘𑀸𑀢𑀺 𑀅𑀬𑀁 𑀯𑀓𑁆𑀔𑀫𑀸𑀦𑀲𑀫𑀼𑀘𑁆𑀘𑀬𑀢𑁆𑀣𑁄. 𑀇𑀤𑀜𑁆𑀘 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀁 𑀩𑀮𑀯𑀯𑀺𑀧𑀲𑁆𑀲𑀦𑀸𑀧𑀢𑁆𑀢𑀲𑁆𑀲𑀸𑀧𑀺 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀲𑀫𑁆𑀧𑀢𑁆𑀢𑀧𑀝𑀺𑀯𑁂𑀥𑀲𑁆𑀲𑀸𑀢𑀺 𑀯𑀸 𑀩𑀮𑀯𑀺𑀧𑀲𑁆𑀲𑀦𑀸𑀧𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄𑀧𑀺 𑀳𑀺 𑀧𑀝𑀺𑀯𑁂𑀥𑀧𑁆𑀧𑀢𑁆𑀢𑀺𑀬𑀸 𑀆𑀲𑀦𑁆𑀦𑀸𑀭𑀳𑀤𑁂𑀲𑁂 𑀞𑀺𑀢𑀢𑁆𑀢𑀸 𑀲𑀫𑁆𑀧𑀢𑁆𑀢𑀧𑀝𑀺𑀯𑁂𑀥𑁄 𑀦𑀸𑀫 𑀳𑁄𑀢𑀺. 𑀏𑀯𑀜𑁆𑀘 𑀲𑀢𑀺 𑀅𑀧𑀺𑀘𑀸𑀢𑀺 𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄 𑀳𑁄𑀢𑀺. 𑀅𑀣 𑀯𑀸 𑀅𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄. 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀅𑀦𑁆𑀢𑀭𑀸 𑀯𑁄𑀲𑀸𑀦𑀁 𑀆𑀧𑀦𑁆𑀦𑀲𑁆𑀲𑀸𑀧𑀺 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀯𑀺𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀆𑀤𑀺𑀯𑀲𑁂𑀦 𑀬𑀣𑀸 𑀢𑀣𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀓𑀲𑁆𑀲, 𑀕𑀭𑀳𑀺𑀢𑀩𑁆𑀩𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀲𑀗𑁆𑀔𑀸𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀦 𑀯𑀺𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀓𑀲𑁆𑀲.

𑁧𑁨𑁮𑁧. 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀢𑁆𑀢𑀺𑀬𑁂𑀯 𑀳𑀺 𑀲𑀲𑀫𑁆𑀪𑀸𑀭𑀸 𑀧𑀼𑀩𑁆𑀩𑀪𑀸𑀕𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺, 𑀢𑀤𑀜𑁆𑀜𑀸 𑀯𑀺𑀧𑁆𑀧𑀝𑀺𑀧𑀢𑁆𑀢𑀺, 𑀢𑁂𑀦𑁂𑀯𑀲𑁆𑀲 𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑁂 ‘‘𑀲𑀫𑁆𑀫𑀸𑀯 𑀧𑀝𑀺𑀧𑀦𑁆𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀲𑀸 𑀘 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀲𑁆𑀲𑀸𑀧𑀺 𑀳𑁄𑀢𑀻𑀢𑀺 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑁄𑀧𑀺 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺. 𑀲𑀫𑁆𑀫𑀸𑀯 𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀺𑀥𑀸𑀦𑁂𑀦 𑀲𑀫𑁆𑀫𑀸 𑀏𑀯 𑀧𑀝𑀺𑀧𑀦𑁆𑀦𑀲𑁆𑀲, 𑀦 𑀯𑀺𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀯𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀲𑁆𑀲 𑀯𑀸. 𑀬𑀼𑀢𑁆𑀢𑀬𑁄𑀕𑀲𑁆𑀲𑀸𑀢𑀺 𑀬𑀼𑀢𑁆𑀢𑁂𑀦 𑀬𑁄𑀕𑁂𑀦, 𑀜𑀸𑀡𑁂𑀦 𑀯𑀸 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑀲𑀻𑀮𑀲𑁆𑀲. 𑀲𑀸 𑀧𑀦 𑀬𑀼𑀢𑁆𑀢𑀬𑁄𑀕𑀺𑀢𑀸 𑀲𑀫𑀣𑀯𑀲𑁂𑀦𑀸𑀧𑀺 𑀳𑁄𑀢𑀻𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀲𑀤𑀸 𑀯𑀺𑀧𑀲𑁆𑀲𑀓𑀲𑁆𑀲𑁂𑀯𑀸’’𑀢𑀺. 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀯-𑀓𑀸𑀭𑁄 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄, 𑀢𑁂𑀦 𑀦 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄. 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀼𑀢𑀺𑀬𑀁. 𑀲𑀸 𑀧𑀦𑁂𑀲𑀸 𑀅𑀦𑀼𑀲𑁆𑀲𑀼𑀢𑀺 𑀧𑀸𑀴𑀺𑀯𑀲𑁂𑀦𑁂𑀯 𑀆𑀕𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 𑁋

‘‘𑀓𑀣𑀁 𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀁 𑀫𑀸𑀦𑀲𑀁 𑀳𑁄𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀑𑀪𑀸𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀑𑀪𑀸𑀲𑁄 𑀥𑀫𑁆𑀫𑁄𑀢𑀺 𑀑𑀪𑀸𑀲𑀁 𑀆𑀯𑀚𑁆𑀚𑁂𑀢𑀺, 𑀢𑀢𑁄 𑀯𑀺𑀓𑁆𑀔𑁂𑀧𑁄 𑀉𑀤𑁆𑀥𑀘𑁆𑀘𑀁, 𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄 𑀅𑀦𑀺𑀘𑁆𑀘𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀢𑁄…𑀧𑁂… 𑀅𑀦𑀢𑁆𑀢𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑀣𑀸 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺 𑀲𑀼𑀔𑀁 𑀅𑀥𑀺𑀫𑁄𑀓𑁆𑀔𑁄 𑀧𑀕𑁆𑀕𑀳𑁄 𑀉𑀧𑀝𑁆𑀞𑀸𑀦𑀁 𑀉𑀧𑁂𑀓𑁆𑀔𑀸 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀓𑀦𑁆𑀢𑀺 𑀥𑀫𑁆𑀫𑁄𑀢𑀺 𑀦𑀺𑀓𑀦𑁆𑀢𑀺𑀁 𑀆𑀯𑀚𑁆𑀚𑁂𑀢𑀺, 𑀢𑀢𑁄 𑀯𑀺𑀓𑁆𑀔𑁂𑀧𑁄 𑀉𑀤𑁆𑀥𑀘𑁆𑀘𑀁, 𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄 𑀅𑀦𑀺𑀘𑁆𑀘𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀢𑁄…𑀧𑁂… 𑀅𑀦𑀢𑁆𑀢𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺 (𑀧𑀝𑀺. 𑀫. 𑁨.𑁬).

𑁧𑁨𑁮𑁨. 𑀇𑀤𑀸𑀦𑀺 𑀢𑁂𑀲𑀁 𑀑𑀪𑀸𑀲𑀸𑀤𑀻𑀦𑀁 𑀲𑀭𑀽𑀧𑀯𑀺𑀪𑀸𑀯𑀦𑀢𑁆𑀣𑀁 𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀯𑀺𑀧𑀲𑁆𑀲𑀦𑀸𑀬 𑀉𑀧𑀓𑁆𑀓𑀺𑀮𑀺𑀲𑁆𑀲𑀦𑀸𑀓𑀸𑀭𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑀲𑁆𑀲𑀦𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀬 𑀑𑀪𑀸𑀲𑁄𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀁, 𑀲𑀲𑀦𑁆𑀢𑀢𑀺𑀧𑀢𑀺𑀢𑀉𑀢𑀼𑀲𑀫𑀼𑀝𑁆𑀞𑀸𑀦𑀜𑁆𑀘 𑀪𑀸𑀲𑀼𑀭𑀁 𑀭𑀽𑀧𑀁. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀬𑁄𑀕𑀺𑀦𑁄 𑀲𑀭𑀻𑀭𑀝𑁆𑀞𑀫𑁂𑀯 𑀧𑀪𑀲𑁆𑀲𑀭𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀇𑀢𑀭𑀁 𑀲𑀭𑀻𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀜𑀸𑀡𑀸𑀦𑀼𑀪𑀸𑀯𑀸𑀦𑀼𑀭𑀽𑀧𑀁 𑀲𑀫𑀦𑁆𑀢𑀢𑁄 𑀨𑀭𑀢𑀺, 𑀢𑀁 𑀢𑀲𑁆𑀲𑁂𑀯 𑀧𑀜𑁆𑀜𑀸𑀬𑀢𑀺, 𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑁂 𑀭𑀽𑀧𑀕𑀢𑀫𑁆𑀧𑀺 𑀧𑀲𑁆𑀲𑀢𑀺. 𑀧𑀲𑁆𑀲𑀦𑁆𑀢𑁄 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀢𑀺, 𑀉𑀤𑀸𑀳𑀼 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀫𑁂𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 ‘‘𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀺𑀦𑁄 𑀯𑀺𑀬 𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑀫𑀳𑀸. 𑁨.𑁭𑁩𑁩) 𑀯𑀼𑀢𑁆𑀢𑀁.

𑁧𑁨𑁮𑁩-𑁪. 𑀫𑀕𑁆𑀕𑀧𑁆𑀧𑀢𑁆𑀢𑁄 𑀨𑀮𑀧𑁆𑀧𑀢𑁆𑀢𑁄, 𑀅𑀳𑀫𑀲𑁆𑀫𑀻𑀢𑀺 𑀕𑀡𑁆𑀳𑀢𑀻𑀢𑀺 ‘‘𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑁄 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑁄, 𑀅𑀤𑁆𑀥𑀸 𑀅𑀭𑀺𑀬𑀫𑀕𑁆𑀕𑀁 𑀧𑀢𑁆𑀢𑁄𑀲𑁆𑀫𑀺, 𑀨𑀮𑀁 𑀲𑀘𑁆𑀙𑀸𑀓𑀸𑀲𑀺’’𑀦𑁆𑀢𑀺 𑀅𑀫𑀕𑁆𑀕𑀁𑀬𑁂𑀯 ‘‘𑀫𑀕𑁆𑀕𑁄’’𑀢𑀺 𑀕𑀡𑁆𑀳𑀸𑀢𑀺. 𑀢𑀲𑁆𑀲𑁂𑀯𑀁 𑀧𑀦 𑀕𑀡𑁆𑀳𑀢𑁄𑀢𑀺 𑀢𑀲𑁆𑀲 𑀅𑀫𑀕𑁆𑀕𑀁𑀬𑁂𑀯 ‘‘𑀫𑀕𑁆𑀕𑁄’’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲. 𑀯𑀺𑀧𑀲𑁆𑀲𑀦𑀸𑀯𑀻𑀣𑀻𑀢𑀺 𑀧𑀝𑀺𑀧𑀸𑀝𑀺𑀬𑀸 𑀧𑀯𑀢𑁆𑀢𑀫𑀸𑀦𑀸 𑀯𑀺𑀧𑀲𑁆𑀲𑀦𑀸𑀯 𑀉𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺, 𑀬𑁄𑀕𑀺𑀦𑁄 ‘‘𑀫𑀕𑁆𑀕𑀁 𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀅𑀥𑀺𑀫𑀸𑀦𑁂𑀦 𑀯𑀺𑀲𑁆𑀲𑀝𑁆𑀞𑀢𑁆𑀢𑀸. 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀯𑀺𑀧𑀲𑁆𑀲𑀦𑀸 𑀢𑀢𑁄𑀬𑁂𑀯 𑀯𑀻𑀣𑀺𑀁 𑀉𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀑𑀪𑀸𑀲𑀫𑁂𑀯 𑀲𑁄 𑀪𑀺𑀓𑁆𑀔𑀼, 𑀅𑀲𑁆𑀲𑀸𑀤𑁂𑀦𑁆𑀢𑁄 𑀦𑀺𑀲𑀻𑀤𑀢𑀻𑀢𑀺 𑀲𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀆𑀭𑀤𑁆𑀥𑀁 𑀯𑀺𑀧𑀲𑁆𑀲𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀑𑀪𑀸𑀲𑀫𑁂𑀯 𑀮𑁄𑀪𑀯𑀲𑁂𑀦 𑀯𑀸 𑀤𑀺𑀝𑁆𑀞𑀺𑀯𑀲𑁂𑀦 𑀯𑀸 𑀅𑀲𑁆𑀲𑀸𑀤𑁂𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀲𑁄 𑀔𑁄 𑀧𑀦𑀸𑀬𑀁 𑀑𑀪𑀸𑀲𑁄 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑀫𑀢𑁆𑀢𑀫𑁂𑀯 𑀑𑀪𑀸𑀲𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀲𑁆𑀲𑀘𑀺 𑀅𑀦𑁆𑀢𑁄𑀕𑀩𑁆𑀪𑀁, 𑀓𑀲𑁆𑀲𑀘𑀺 𑀩𑀳𑀺𑀕𑀩𑁆𑀪𑀁, 𑀓𑀲𑁆𑀲𑀘𑀺 𑀲𑀓𑀮𑀯𑀺𑀳𑀸𑀭𑀁 𑀕𑀸𑀯𑀼𑀢𑀁 𑀅𑀟𑁆𑀠𑀬𑁄𑀚𑀦𑀁 𑀬𑁄𑀚𑀦𑀁 𑀤𑁆𑀯𑀺𑀬𑁄𑀚𑀦𑀁 𑀢𑀺𑀬𑁄𑀚𑀦𑀁, 𑀓𑀲𑁆𑀲𑀘𑀺 𑀧𑀣𑀯𑀻𑀢𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀸𑀮𑁄𑀓𑀁 𑀓𑀼𑀭𑀼𑀫𑀸𑀦𑁄, 𑀬𑀣𑀸 𑀲𑀫𑀼𑀤𑁆𑀤𑀫𑁆𑀳𑀺 𑀬𑁄𑀚𑀦𑀫𑀢𑁆𑀢𑁂 𑀫𑀘𑁆𑀙𑀓𑀘𑁆𑀙𑀧𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀧𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀪𑀸𑀲𑁂𑀦𑁆𑀢𑁄 𑀉𑀤𑀧𑀸𑀤𑀺.

𑁧𑁨𑁮𑁫. 𑀯𑀺𑀧𑀲𑁆𑀲𑀦𑀸𑀧𑀻𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀻𑀢𑀺. 𑀔𑀼𑀤𑁆𑀤𑀺𑀓𑀸𑀤𑀺𑀓𑀸 𑀳𑁂𑀝𑁆𑀞𑀸 𑀯𑀡𑁆𑀡𑀺𑀢𑀸𑀬𑁂𑀯, 𑀅𑀬𑀜𑁆𑀘 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀯𑀻𑀣𑀺𑀧𑀝𑀺𑀧𑀦𑁆𑀦𑀸𑀬 𑀅𑀦𑀼𑀓𑁆𑀓𑀫𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀫𑀢𑁆𑀣𑀓𑀧𑁆𑀧𑀢𑁆𑀢𑁂𑀦 𑀧𑀦 𑀉𑀤𑀬𑀩𑁆𑀩𑀬𑀜𑀸𑀡𑁂𑀦 𑀲𑀤𑁆𑀥𑀺𑀁 𑀨𑀭𑀡𑀸𑀧𑀻𑀢𑀺𑀬𑁂𑀯 𑀳𑁄𑀢𑀺. 𑀉𑀧𑀘𑀸𑀭𑀧𑁆𑀧𑀦𑀓𑁆𑀔𑀡𑀢𑁄 𑀅𑀜𑁆𑀜𑀤𑀸𑀧𑀺 𑀳𑀺 𑀨𑀭𑀡𑀸𑀧𑀻𑀢𑀺 𑀳𑁄𑀢𑀺𑀬𑁂𑀯𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀓𑀮𑀲𑀭𑀻𑀭𑀁 𑀧𑀽𑀭𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁭𑁩𑁪; 𑀥. 𑀲. 𑀅𑀝𑁆𑀞. 𑁧.𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭 𑀛𑀸𑀦𑀗𑁆𑀕𑀭𑀸𑀲𑀺𑀯𑀡𑁆𑀡𑀦𑀸).

𑁧𑁨𑁮𑁬-𑁭. 𑀬𑁄𑀕𑀺𑀦𑁄…𑀧𑁂… 𑀳𑁄𑀦𑁆𑀢𑀺 𑀳𑀻𑀢𑀺 𑀬𑀲𑁆𑀲𑀸𑀬𑀁 𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲 𑀬𑁄𑀕𑀺𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑁂 𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑀘𑀺𑀢𑁆𑀢𑀸𑀦𑀺 𑀧𑀲𑁆𑀲𑀤𑁆𑀥𑀸𑀦𑁂𑀯 𑀳𑁄𑀦𑁆𑀢𑀺, 𑀦𑁂𑀯 𑀤𑀭𑀣𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀤𑁆𑀥𑀺𑀆𑀤𑀻𑀦𑀺 𑀙 𑀬𑀼𑀕𑀴𑀸𑀦𑀺 𑀅𑀜𑁆𑀜𑀫𑀜𑁆𑀜𑀬𑁄𑀕𑀻𑀦𑀻𑀢𑀺 𑀧𑀲𑁆𑀲𑀤𑁆𑀥𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀇𑀢𑀭𑀸𑀧𑀺 𑀉𑀧𑁆𑀧𑀦𑁆𑀦𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀓𑀺𑀘𑁆𑀘𑀤𑀲𑁆𑀲𑀦𑀫𑀼𑀔𑁂𑀦 𑀢𑀸 𑀲𑀩𑁆𑀩𑀸𑀧𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀮𑀳𑀽𑀦𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀓𑀸𑀬-𑀕𑁆𑀕𑀳𑀡𑁂𑀦 𑀭𑀽𑀧𑀓𑀸𑀬𑀲𑁆𑀲𑀸𑀧𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀦 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲𑁂𑀯. 𑀓𑀸𑀬𑀧𑀲𑁆𑀲𑀤𑁆𑀥𑀺𑀆𑀤𑀬𑁄 𑀳𑀺 𑀭𑀽𑀧𑀓𑀸𑀬𑀲𑁆𑀲𑀸𑀧𑀺 𑀤𑀭𑀣𑀸𑀤𑀺𑀦𑀺𑀫𑁆𑀫𑀤𑁆𑀤𑀓𑀸𑀢𑀺. 𑀓𑀫𑁆𑀫𑀜𑁆𑀜𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀦 𑀓𑁂𑀯𑀮𑀁 𑀓𑀫𑁆𑀫𑀜𑁆𑀜𑀸𑀦𑁂𑀯 𑀲𑀼𑀯𑀺𑀲𑀤𑀸𑀦𑀺 𑀉𑀚𑀼𑀓𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀅𑀯𑀺𑀦𑀸𑀪𑀸𑀯𑀺𑀢𑀸𑀬 𑀧𑀦 𑀢𑀤𑀼𑀪𑀬𑀁 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀁. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑁄 𑀘 𑀢𑁂𑀲𑀁 𑀅𑀧𑀲𑁆𑀲𑀤𑁆𑀥𑀸𑀤𑀺𑀳𑁂𑀢𑀼𑀪𑀽𑀢𑀸𑀦𑀁 𑀉𑀤𑁆𑀥𑀘𑁆𑀘𑀸𑀤𑀺𑀣𑀺𑀦𑀫𑀺𑀤𑁆𑀥𑀸𑀤𑀺𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀲𑁂𑀲𑀦𑀻𑀯𑀭𑀡𑀸𑀤𑀺𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀯𑀺𑀤𑁆𑀥𑀁𑀲𑀦𑀯𑀲𑁂𑀦𑁂𑀯 𑀢𑀤𑀸 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀦𑀢𑁄.

𑁧𑁨𑁮𑁮-𑁯𑁦. 𑀫𑀦𑀼𑀲𑁆𑀲𑀸𑀦𑀁 𑀅𑀬𑀦𑁆𑀢𑀺 𑀫𑀸𑀦𑀼𑀲𑀻, 𑀫𑀦𑀼𑀲𑁆𑀲𑀬𑁄𑀕𑁆𑀬𑀓𑀸𑀫𑀲𑀼𑀔𑀭𑀢𑀺. 𑀢𑀸𑀤𑀺𑀲𑁂𑀳𑀺 𑀫𑀦𑀼𑀲𑁆𑀲𑀯𑀺𑀲𑁂𑀲𑁂𑀳𑀺 𑀅𑀦𑀼𑀪𑀯𑀺𑀢𑀩𑁆𑀩𑀢𑀸𑀦𑀢𑀺𑀯𑀢𑁆𑀢𑀦𑀢𑁄 𑀤𑀺𑀩𑁆𑀩𑀭𑀢𑀺𑀧𑀺 𑀲𑀗𑁆𑀕𑀳𑀺𑀢𑀸, 𑀫𑀸𑀦𑀼𑀲𑀻𑀲𑀤𑀺𑀲𑀢𑀸𑀬, 𑀓𑀸𑀫𑀲𑀼𑀔𑀪𑀸𑀯𑁂𑀦 𑀤𑀺𑀩𑁆𑀩𑀸 𑀭𑀢𑀺 𑀯𑀸 𑀫𑀸𑀦𑀼𑀲𑀻, 𑀢𑀲𑁆𑀲𑀸 𑀅𑀢𑀺𑀓𑁆𑀓𑀦𑁆𑀢𑀢𑀸𑀬 𑀦 𑀫𑀸𑀦𑀼𑀲𑀻𑀢𑀺 𑀅𑀫𑀸𑀦𑀼𑀲𑀻, 𑀢𑀁 𑀅𑀫𑀸𑀦𑀼𑀲𑀺𑀁. 𑀲𑀼𑀜𑁆𑀜𑀸𑀕𑀸𑀭𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁, 𑀯𑀺𑀧𑀲𑁆𑀲𑀦𑀁 𑀏𑀯 𑀯𑀸, 𑀲𑀸𑀧𑀺 𑀳𑀺 𑀦𑀺𑀘𑁆𑀘𑀪𑀸𑀯𑀸𑀤𑀺𑀲𑀼𑀜𑁆𑀜𑀢𑀸𑀬, 𑀬𑁄𑀕𑀺𑀦𑁄 𑀲𑀼𑀔𑀲𑀦𑁆𑀦𑀺𑀲𑁆𑀲𑀬𑀢𑀸𑀬 𑀘 ‘‘𑀲𑀼𑀜𑁆𑀜𑀸𑀕𑀸𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀲𑀫𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀺𑀕𑀫𑁂𑀦 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀲𑀁𑀲𑀸𑀭𑁂 𑀪𑀬𑀲𑁆𑀲 𑀇𑀓𑁆𑀔𑀦𑁂𑀦 𑀪𑀺𑀓𑁆𑀔𑀼𑀦𑁄 𑀲𑀫𑁆𑀫𑀸 𑀜𑀸𑀬𑁂𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀢𑁂 𑀯𑀺𑀧𑀲𑁆𑀲𑀢𑁄 𑀲𑀫𑁆𑀫𑀲𑀢𑁄 𑀲𑀫𑁆𑀫𑀸𑀭𑀤𑁆𑀥𑀯𑀺𑀧𑀲𑁆𑀲𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀺𑀲𑀬𑀢𑀸𑀬 𑀅𑀫𑀸𑀦𑀼𑀲𑀻 𑀯𑀺𑀧𑀲𑁆𑀲𑀦𑀸𑀧𑀻𑀢𑀺𑀲𑀼𑀔𑀲𑀜𑁆𑀜𑀺𑀢𑀸 𑀭𑀢𑀺 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀕𑀸𑀣𑀸𑀬 𑀲𑀗𑁆𑀔𑁂𑀧𑀢𑁆𑀣𑁄. 𑀤𑀼𑀢𑀺𑀬𑀕𑀸𑀣𑀸 𑀧𑀦 𑀉𑀤𑀬𑀩𑁆𑀩𑀬𑀜𑀸𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑀢𑁄 𑀬𑀢𑁄𑀢𑀺 𑀭𑀽𑀧𑀢𑁄, 𑀅𑀭𑀽𑀧𑀢𑁄 𑀯𑀸.

𑁧𑁨𑁯𑁧. 𑀜𑀸𑀡𑀸𑀤𑀬𑁄𑀢𑀺 𑀜𑀸𑀡𑀲𑀤𑁆𑀥𑀸𑀤𑀬𑁄 𑀲𑀢𑁆𑀢. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀜𑀸𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀲𑀤𑁆𑀥𑀸𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀲𑀤𑁆𑀥𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀜𑁂𑀬𑁆𑀬𑀸. 𑀢𑀢𑁆𑀣 𑀜𑀸𑀡𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀢𑀼𑀮𑀬𑀦𑁆𑀢𑀲𑁆𑀲 𑀢𑀻𑀭𑁂𑀦𑁆𑀢𑀲𑁆𑀲 𑀯𑀺𑀲𑁆𑀲𑀝𑁆𑀞𑀇𑀦𑁆𑀤𑀯𑀚𑀺𑀭𑀫𑀺𑀯 𑀅𑀯𑀺𑀕𑀢𑀯𑁂𑀕𑀁 𑀢𑀺𑀔𑀺𑀡𑀁 𑀲𑀽𑀭𑀁 𑀅𑀢𑀺𑀯𑀺𑀲𑀤𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀳𑀺 𑀢𑁂𑀦 𑀬𑁄𑀕𑀻 ‘‘𑀫𑀕𑁆𑀕𑀁 𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀫𑀜𑁆𑀜𑀢𑀺. 𑀲𑀤𑁆𑀥𑀸𑀢𑀺 𑀓𑀺𑀮𑁂𑀲𑀓𑀸𑀮𑀼𑀲𑀺𑀬𑀸𑀧𑀕𑀫𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀢𑀺𑀲𑀬𑀧𑀲𑀸𑀤𑀪𑀽𑀢𑀸 𑀩𑀮𑀯𑀢𑀻 𑀲𑀤𑁆𑀥𑀸, 𑀦 𑀧𑀦 𑀓𑀫𑁆𑀫𑀨𑀮𑀁, 𑀭𑀢𑀦𑀢𑁆𑀢𑀬𑀁 𑀯𑀸 𑀲𑀤𑁆𑀤𑀳𑀦𑀯𑀲𑁂𑀦 𑀧𑀯𑀢𑁆𑀢𑀸. 𑀲𑀢𑀺𑀧𑀺 𑀲𑀽𑀧𑀝𑁆𑀞𑀺𑀢𑀸 𑀅𑀘𑀮𑀸 𑀧𑀩𑁆𑀩𑀢𑀭𑀸𑀚𑀲𑀤𑀺𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀺𑀲𑁆𑀲𑀸 𑀘 𑀉𑀧𑁆𑀧𑀦𑁆𑀦𑀸𑀬 𑀲𑁄 𑀬𑀁 𑀬𑀁 𑀞𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀢𑀁 𑀞𑀸𑀦𑀫𑀲𑁆𑀲 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀑𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑀡𑁆𑀟𑀪𑀽𑀢𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀉𑀧𑀝𑁆𑀞𑀳𑀦𑁆𑀢𑁂 𑀧𑀭𑀮𑁄𑀓𑀯𑀺𑀲𑀬𑀢𑁆𑀢𑀸 𑀯𑀡𑁆𑀡𑀸𑀬𑀢𑀦𑀯𑀺𑀲𑀬𑀫𑀢𑀻𑀢𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀧𑀭𑀮𑁄𑀓𑁄 𑀯𑀺𑀬 𑀲𑀢𑀺𑀬𑀸 𑀉𑀧𑀝𑁆𑀞𑀸𑀢𑀺. 𑀲𑀼𑀔𑀁 𑀧𑀦 𑀲𑀓𑀮𑀲𑀭𑀻𑀭𑀁 𑀅𑀪𑀺𑀲𑀦𑁆𑀤𑀫𑀸𑀦𑀁 𑀅𑀢𑀺𑀧𑀡𑀻𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀉𑀧𑁆𑀧𑀦𑁆𑀦𑁂 𑀢𑀁𑀲𑀫𑀼𑀝𑁆𑀞𑀺𑀢𑁂𑀳𑀺 𑀅𑀢𑀺𑀧𑀡𑀻𑀢𑁂𑀳𑀺 𑀭𑀽𑀧𑁂𑀳𑀺 𑀲𑀩𑁆𑀩𑁄 𑀓𑀸𑀬𑁄 𑀧𑀭𑀺𑀨𑀼𑀝𑁄, 𑀧𑀭𑀺𑀩𑁆𑀭𑀽𑀳𑀺𑀢𑁄 𑀘 𑀳𑁄𑀢𑀺. 𑀉𑀧𑁂𑀓𑁆𑀔𑀸 𑀧𑀦 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀘𑁂𑀯 𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸 𑀘. 𑀢𑀢𑁆𑀣 𑀯𑀺𑀘𑀺𑀦𑀺𑀢𑀯𑀺𑀘𑀬𑀢𑁆𑀢𑀸 𑀲𑀗𑁆𑀔𑀸𑀭𑀸𑀦𑀁 𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀞𑀺𑀢𑀸 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸. 𑀲𑀸 𑀧𑀦 𑀅𑀢𑁆𑀣𑀢𑁄 𑀢𑀣𑀸𑀧𑀯𑀢𑁆𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀯. 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀆𑀯𑀚𑁆𑀚𑀦𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀯𑀺𑀥𑀸 𑀧𑀦𑁂𑀲𑀸 𑀢𑀤𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀳𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀩𑁆𑀩𑀬𑁂 𑀫𑀚𑁆𑀛𑀢𑁆𑀢𑀪𑀽𑀢𑀸 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀩𑀮𑀯𑀢𑀻 𑀉𑀧𑁆𑀧𑀚𑁆𑀚𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸𑀧𑀺. 𑀲𑀸 𑀳𑀺𑀲𑁆𑀲 𑀢𑀁 𑀢𑀁 𑀞𑀸𑀦𑀁 𑀆𑀯𑀚𑁆𑀚𑀦𑁆𑀢𑀲𑁆𑀲 𑀯𑀺𑀲𑁆𑀲𑀝𑁆𑀞𑀇𑀦𑁆𑀤𑀯𑀚𑀺𑀭𑀫𑀺𑀯, 𑀧𑀢𑁆𑀢𑀧𑀼𑀝𑁂 𑀧𑀓𑁆𑀔𑀦𑁆𑀤𑀢𑀢𑁆𑀢𑀦𑀸𑀭𑀸𑀘𑁄 𑀯𑀺𑀬 𑀘 𑀲𑀽𑀭𑀸 𑀢𑀺𑀔𑀺𑀡𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀯𑀻𑀭𑀺𑀬𑀫𑁆𑀧𑀺 𑀅𑀲𑀺𑀣𑀺𑀮𑀫𑀦𑀘𑁆𑀘𑀸𑀭𑀤𑁆𑀥𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀓𑀺𑀮𑁂𑀲𑀧𑀓𑁆𑀔𑀢𑁄 𑀓𑁄𑀲𑀚𑁆𑀚𑀧𑀓𑁆𑀔𑀢𑁄 𑀧𑀕𑁆𑀕𑀡𑁆𑀳𑀦𑁆𑀢𑀁 𑀲𑀼𑀧𑀕𑁆𑀕𑀳𑀺𑀢𑀫𑀼𑀧𑁆𑀧𑀚𑁆𑀚𑀢𑀺, 𑀦𑀺𑀓𑀦𑁆𑀢𑀺 𑀘 𑀑𑀪𑀸𑀲𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀮𑀬𑀁 𑀓𑀼𑀭𑀼𑀫𑀸𑀦𑀸 𑀪𑀸𑀯𑀦𑀸𑀬 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀬𑀸 𑀲𑀼𑀔𑀼𑀫𑀸 𑀲𑀦𑁆𑀢𑀸𑀓𑀸𑀭𑀸 𑀉𑀧𑁆𑀧𑀚𑁆𑀚𑀢𑀺. 𑀬𑀸 𑀓𑀺𑀮𑁂𑀲𑁄𑀢𑀺 𑀧𑀭𑀺𑀕𑁆𑀕𑀳𑀺𑀢𑀼𑀫𑁆𑀧𑀺 𑀦 𑀬𑀼𑀢𑁆𑀢𑀸. 𑀬𑀣𑀸 𑀘 𑀑𑀪𑀸𑀲𑁂, 𑀏𑀯𑀁 𑀏𑀢𑁂𑀲𑀼𑀧𑀺 𑀅𑀜𑁆𑀜𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀬𑁄𑀕𑀸𑀯𑀘𑀭𑁄 ‘‘𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀸 𑀧𑀻𑀢𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸, 𑀏𑀯𑀭𑀽𑀧𑀸 𑀧𑀲𑁆𑀲𑀤𑁆𑀥𑀺 𑀜𑀸𑀡𑀁 𑀲𑀤𑁆𑀥𑀸 𑀲𑀢𑀺 𑀲𑀼𑀔𑀁 𑀉𑀧𑁂𑀓𑁆𑀔𑀸 𑀯𑀻𑀭𑀺𑀬𑀁 𑀦𑀺𑀓𑀦𑁆𑀢𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸, 𑀅𑀤𑁆𑀥𑀸 𑀫𑀕𑁆𑀕𑀨𑀮𑀧𑁆𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀕𑀡𑁆𑀳𑀸𑀢𑀺, 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀯𑀺𑀧𑀲𑁆𑀲𑀦𑀸 𑀯𑀻𑀣𑀺𑀉𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀢𑀺. 𑀲𑁄 𑀢𑁂𑀬𑁂𑀯 𑀅𑀲𑁆𑀲𑀸𑀤𑁂𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀇𑀫𑁂 𑀘 𑀧𑀦 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀸 𑀬𑁂𑀪𑀼𑀬𑁆𑀬𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀺𑀦𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁄 𑀲𑀫𑀸𑀧𑀢𑁆𑀢𑀺𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀲𑀫𑀼𑀤𑀸𑀘𑀸𑀭𑀢𑁄 ‘‘𑀅𑀭𑀳𑀸 𑀅𑀳’’𑀦𑁆𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀻𑀢𑀺.

𑁧𑁨𑁯𑁨-𑁩. 𑀉𑀧𑀓𑁆𑀮𑁂𑀲𑀲𑁆𑀲 𑀯𑀢𑁆𑀣𑀼𑀢𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀤𑀺𑀝𑁆𑀞𑀺𑀫𑀸𑀦𑀢𑀡𑁆𑀳𑀸 𑀇𑀥 𑀉𑀧𑀓𑁆𑀓𑀺𑀮𑁂𑀲𑀸 𑀢𑁂𑀲𑀁 𑀯𑀢𑁆𑀣𑀼𑀢𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬, 𑀦 𑀲𑀪𑀸𑀯𑀢𑁄 𑀅𑀓𑀼𑀲𑀮𑀢𑁆𑀢𑀸. 𑀬𑀣𑀸 𑀧𑀦 𑀑𑀪𑀸𑀲𑀸𑀤𑀬𑁄, 𑀏𑀯𑀁 𑀦𑀺𑀓𑀦𑁆𑀢𑀺𑀧𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑀸𑀤𑀻𑀦𑀁 𑀞𑀸𑀦𑀁 𑀳𑁄𑀢𑀻𑀢𑀺 𑀯𑀢𑁆𑀣𑀼𑀪𑀸𑀯𑁄𑀧𑀺𑀲𑁆𑀲𑀸 𑀬𑀼𑀚𑁆𑀚𑀢𑁂𑀯. 𑀢𑀁𑀢𑀫𑀸𑀯𑀚𑁆𑀚𑀫𑀸𑀦𑀲𑁆𑀲, 𑀪𑀸𑀯𑀦𑀸 𑀧𑀭𑀺𑀳𑀸𑀬𑀢𑀻𑀢𑀺 𑀢𑀁 𑀢𑀁 𑀑𑀪𑀸𑀲𑀸𑀤𑀺𑀓𑀁 𑀆𑀯𑀚𑁆𑀚𑀫𑀸𑀦𑀲𑁆𑀲 𑀤𑀺𑀝𑁆𑀞𑀺𑀫𑀸𑀦𑀢𑀡𑁆𑀳𑀸𑀯𑀲𑁂𑀦 ‘‘𑀫𑀫 𑀑𑀪𑀸𑀲𑁄’’𑀢𑀺𑀆𑀤𑀺𑀕𑁆𑀕𑀸𑀳𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀪𑀸𑀯𑀦𑀸 𑀯𑀻𑀣𑀺𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀯𑀝𑁆𑀝𑀢𑀺. 𑀅𑀧𑁆𑀧𑀁 𑀲𑀼𑀢𑀫𑁂𑀢𑀲𑁆𑀲𑀸𑀢𑀺 𑀅𑀧𑁆𑀧𑀲𑁆𑀲𑀼𑀢𑁄.

𑁧𑁨𑁯𑁪-𑁭. 𑀩𑀳𑀼𑀲𑁆𑀲𑀼𑀢𑁄 𑀧𑀦 𑀑𑀪𑀸𑀲𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 ‘‘𑀅𑀬𑀁 𑀔𑁄 𑀫𑁂 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑁄, 𑀲𑁄 𑀔𑁄 𑀧𑀦𑀸𑀬𑀁 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄’’𑀢𑀺 𑀯𑀸, 𑀲𑀘𑁂 𑀑𑀪𑀸𑀲𑁄 𑀅𑀢𑁆𑀢𑀸 𑀪𑀯𑁂𑀬𑁆𑀬, 𑀅𑀢𑁆𑀢𑀸𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑁂𑀬𑁆𑀬, 𑀅𑀦𑀢𑁆𑀢𑀸 𑀘 𑀧𑀦𑀸𑀬𑀁 𑀅𑀢𑁆𑀢𑀸𑀢𑀺 𑀕𑀳𑀺𑀢𑁄, 𑀢𑀲𑁆𑀫𑀸 ‘‘𑀲𑁄 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸, 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑁄, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑁄’’𑀢𑀺𑀆𑀤𑀺𑀦𑀸 𑀲𑀫𑀦𑀼𑀧𑀲𑁆𑀲𑀢𑀺, 𑀲𑁄 𑀏𑀯𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀉𑀧𑀓𑁆𑀓𑀺𑀮𑁂𑀲𑀚𑀝𑀁 𑀯𑀺𑀚𑀝𑁂𑀢𑁆𑀯𑀸 𑀑𑀪𑀸𑀲𑀸𑀤𑀬𑁄 𑀥𑀫𑁆𑀫𑀸 𑀦 𑀫𑀕𑁆𑀕𑁄, 𑀉𑀧𑀓𑁆𑀓𑀺𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀁 𑀧𑀦 𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀕𑁆𑀕𑁄𑀢𑀺 𑀫𑀕𑁆𑀕𑀜𑁆𑀘 𑀅𑀫𑀕𑁆𑀕𑀜𑁆𑀘 𑀯𑀯𑀢𑁆𑀣𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁄𑀪𑀸𑀲𑀸𑀤𑀬𑁄’’𑀢𑀺𑀆𑀤𑀺. 𑀫𑀕𑁆𑀕𑀸𑀫𑀕𑁆𑀕𑁂𑀲𑀼 𑀜𑀸𑀡𑀦𑁆𑀢𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀺𑀬𑀸 𑀘 𑀢𑁂𑀦 𑀬𑁄𑀕𑀺𑀦𑀸 𑀢𑀺𑀡𑁆𑀡𑀁 𑀲𑀘𑁆𑀘𑀸𑀦𑀜𑁆𑀘 𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺. 𑀓𑀣𑀁? 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀸 𑀢𑀸𑀯 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑁂𑀦 𑀤𑀼𑀓𑁆𑀔𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺, 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀬𑀸 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀯𑀯𑀢𑁆𑀣𑀸𑀦𑀁. 𑀅𑀪𑀺𑀥𑀫𑁆𑀫𑀦𑀬𑀲𑁆𑀫𑀺𑀜𑁆𑀳𑀺 𑀲𑀩𑁆𑀩𑀓𑀺𑀮𑁂𑀲𑀸, 𑀓𑀫𑁆𑀫𑀜𑁆𑀘 𑀲𑀫𑀼𑀤𑀬𑀲𑀘𑁆𑀘𑀁, 𑀇𑀫𑀺𑀲𑁆𑀲𑀁 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀁 𑀲𑀫𑁆𑀫𑀸 𑀫𑀕𑁆𑀕𑀲𑁆𑀲 𑀅𑀯𑀥𑀸𑀭𑀡𑁂𑀦 𑀫𑀕𑁆𑀕𑀲𑀘𑁆𑀘𑀁. 𑀢𑀤𑀼𑀧𑀸𑀬𑀪𑀽𑀢𑀲𑁆𑀲 𑀳𑀺 𑀫𑀕𑁆𑀕𑀲𑁆𑀲 𑀅𑀯𑀥𑀸𑀭𑀡𑁂𑀦 𑀢𑀁 𑀅𑀯𑀥𑀸𑀭𑀺𑀢𑀫𑁂𑀯𑀸𑀢𑀺 𑀏𑀯𑀁 𑀮𑁄𑀓𑀺𑀬𑁂𑀦𑁂𑀯 𑀢𑀸𑀯 𑀜𑀸𑀡𑁂𑀦 𑀢𑀺𑀡𑁆𑀡𑀁 𑀲𑀘𑁆𑀘𑀸𑀦𑀁 𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.