𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨𑁨𑁭. 𑀅𑀦𑀦𑁆𑀢𑀭𑀁 𑀦𑀺𑀤𑁆𑀤𑀺𑀝𑁆𑀞𑀸𑀬 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀸 𑀯𑀺𑀲𑀬𑀪𑀸𑀯𑁂𑀦 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀏𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀦 𑀢𑀤𑀜𑁆𑀜𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 𑀢𑀤𑀜𑁆𑀜𑀲𑁆𑀲 𑀘 𑀅𑀪𑀸𑀯𑀢𑁄. 𑀅𑀚𑁆𑀛𑀢𑁆𑀢𑀁 𑀯𑀸 𑀳𑀺 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀼 𑀩𑀳𑀺𑀤𑁆𑀥𑀸 𑀯𑀸, 𑀅𑀢𑁆𑀣𑀲𑀺𑀤𑁆𑀥𑀺𑀬𑀁 𑀧𑀦 𑀮𑀓𑁆𑀔𑀡𑀢𑁄 𑀲𑀩𑁆𑀩𑀫𑁆𑀧𑀺 𑀦𑀸𑀫𑀭𑀽𑀧𑀁 𑀅𑀦𑀯𑀲𑁂𑀲𑀢𑁄 𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺. 𑀚𑀸𑀦𑀺𑀢𑁆𑀯𑀸 𑀳𑁂𑀢𑀼𑀧𑀘𑁆𑀘𑀬𑁂𑀢𑀺 𑀳𑁂𑀢𑀼𑀧𑀘𑁆𑀘𑀬𑁂 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸, 𑀳𑁂𑀢𑀼𑀧𑀘𑁆𑀘𑀬𑁂 𑀧𑀭𑀺𑀕𑁆𑀕𑀡𑁆𑀳𑀦𑀳𑁂𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀡𑀳𑁂𑀢𑀼 𑀳𑀺𑀲𑁆𑀲 𑀅𑀤𑁆𑀥𑀢𑁆𑀢𑀬𑁂 𑀓𑀗𑁆𑀔𑀸𑀯𑀺𑀢𑀭𑀡𑀁 𑀳𑁄𑀢𑀻𑀢𑀺. 𑀯𑀺𑀢𑀭𑀺𑀢𑁆𑀯𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸, 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀜𑀸𑀡𑀁 𑀢𑀣𑀸𑀯𑀺𑀕𑀢𑀁 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀁 𑀛𑀸𑀦𑀁 𑀯𑀺𑀬 𑀬𑁄𑀕𑀺𑀦𑁄 𑀲𑀦𑁆𑀢𑀸𑀦𑁂 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀞𑀺𑀢’’𑀦𑁆𑀢𑀺.

𑁧𑁨𑁨𑁯-𑁩𑁦. 𑀦𑀸𑀫𑀭𑀽𑀧𑀲𑁆𑀲…𑀧𑁂… 𑀆𑀯𑀚𑁆𑀚𑀺𑀢𑁆𑀯𑀸𑀢𑀺 𑀬𑀣𑀸 𑀦𑀸𑀫 𑀓𑀼𑀲𑀮𑁄 𑀪𑀺𑀲𑀓𑁆𑀓𑁄 𑀭𑁄𑀕𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀫𑀼𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀢𑀺, 𑀬𑀣𑀸 𑀯𑀸 𑀧𑀦 𑀅𑀦𑀼𑀓𑀫𑁆𑀧𑀓𑁄 𑀧𑀼𑀭𑀺𑀲𑁄 𑀓𑀼𑀫𑀸𑀭𑀁 𑀉𑀢𑁆𑀢𑀸𑀦𑀲𑁂𑀬𑁆𑀬𑀁 𑀭𑀣𑀺𑀓𑀸𑀬 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀲 𑀦𑀼 𑀔𑁄 𑀅𑀬𑀁 𑀧𑀼𑀢𑁆𑀢𑀓𑁄’’𑀢𑀺 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀆𑀯𑀚𑁆𑀚𑀢𑀺, 𑀏𑀯𑀫𑁂𑀯𑀁 𑀦𑀸𑀫𑀭𑀽𑀧𑀲𑁆𑀲 𑀓𑁄 𑀳𑁂𑀢𑀼, 𑀓𑁄 𑀯𑀸 𑀧𑀘𑁆𑀘𑀬𑁄 𑀪𑀯𑁂. 𑀦 𑀢𑀸𑀯𑁂𑀢𑀁 𑀅𑀳𑁂𑀢𑀼𑀓𑀁 𑀲𑀩𑁆𑀩𑀢𑁆𑀣, 𑀲𑀩𑁆𑀩𑀤𑀸, 𑀲𑀩𑁆𑀩𑁂𑀲𑀜𑁆𑀘 𑀏𑀓𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀢𑁄, 𑀦 𑀇𑀲𑁆𑀲𑀭𑀸𑀤𑀺𑀳𑁂𑀢𑀼𑀓𑀁 𑀦𑀸𑀫𑀭𑀽𑀧𑀢𑁄 𑀉𑀤𑁆𑀥𑀁 𑀇𑀲𑁆𑀲𑀭𑀸𑀤𑀻𑀦𑀁 𑀅𑀪𑀸𑀯𑀢𑁄. 𑀬𑁂𑀧𑀺 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀇𑀲𑁆𑀲𑀭𑀸𑀤𑀬𑁄𑀢𑀺 𑀯𑀤𑀦𑁆𑀢𑀺 𑀢𑁂𑀲𑀁 𑀇𑀲𑁆𑀲𑀭𑀸𑀤𑀺𑀲𑀗𑁆𑀔𑀸𑀢𑀦𑀸𑀫𑀭𑀽𑀧𑀲𑁆𑀲 𑀅𑀳𑁂𑀢𑀼𑀪𑀸𑀯𑀸𑀧𑀢𑁆𑀢𑀺𑀢𑁄, 𑀢𑀲𑁆𑀫𑀸 𑀪𑀯𑀺𑀢𑀩𑁆𑀩𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀳𑀺, ‘‘𑀓𑁄 𑀦𑀼 𑀔𑁄’’𑀢𑀺 𑀦𑀸𑀫𑀭𑀽𑀧𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂 𑀆𑀯𑀚𑁆𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀢𑀸𑀯 𑀓𑀢𑁆𑀯𑀸 𑀇𑀫𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁂𑀦 𑀑𑀴𑀸𑀭𑀺𑀓𑀢𑁆𑀢𑀸, 𑀲𑀼𑀧𑀸𑀓𑀝𑀢𑁆𑀢𑀸 𑀘 𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀲𑀼𑀓𑀭𑁄𑀢𑀺 𑀧𑀞𑀫𑀁 𑀢𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀽𑀧𑀓𑀸𑀬𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀣𑀸 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀯𑀸𑀤𑀦𑀺𑀯𑀢𑁆𑀢𑀺𑀬𑀸 𑀳𑁄𑀢𑀺, 𑀏𑀯𑀁 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀸𑀯𑀳𑀪𑀸𑀯𑁂𑀦 𑀢𑀢𑁆𑀣 𑀢𑀢𑁆𑀣 𑀅𑀪𑀺𑀭𑀢𑀺𑀦𑀺𑀯𑀢𑁆𑀢𑀺𑀬𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀢𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀲𑀸 𑀮𑁄𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁨𑁩𑁨-𑁩. 𑀅𑀯𑀺𑀚𑁆𑀚𑀸…𑀧𑁂… 𑀫𑀢𑁄𑀢𑀺 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀉𑀧𑀸𑀤𑀸𑀦𑀁 𑀓𑀫𑁆𑀫𑀦𑁆𑀢𑀺 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀥𑀫𑁆𑀫𑀚𑀸𑀢𑀁 𑀏𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀭𑀽𑀧𑀓𑀸𑀬𑀲𑁆𑀲 𑀳𑁂𑀢𑀼, 𑀘𑀢𑀼𑀩𑁆𑀩𑀺𑀥𑁄 𑀆𑀳𑀸𑀭𑁄 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 𑀧𑀼𑀭𑀺𑀫𑀁 𑀳𑁂𑀢𑀼, 𑀇𑀢𑀭𑁄 𑀧𑀘𑁆𑀘𑀬𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 ‘‘𑀚𑀦𑀓𑁄’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀢𑀁 𑀮𑁄𑀓𑀯𑀲𑁂𑀦 𑀲𑀫𑀢𑁆𑀣𑁂𑀢𑀼𑀁 ‘‘𑀳𑁂𑀢𑁆𑀯𑀗𑁆𑀓𑀼𑀭𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀦𑀓𑁄𑀢𑀺, 𑀅𑀦𑀼𑀧𑀸𑀮𑀓𑁄𑀢𑀺 𑀘 𑀅𑀦𑁆𑀢𑁄𑀕𑀢𑀳𑁂𑀢𑁆𑀯𑀢𑁆𑀣𑀫𑀺𑀤𑀁 𑀯𑀺𑀲𑁂𑀲𑀦𑀁, 𑀚𑀦𑀓𑀢𑁆𑀢𑀸, 𑀅𑀦𑀼𑀧𑀸𑀮𑀓𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀚𑀦𑀓𑀢𑁆𑀢𑀸𑀢𑀺 𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀸. 𑀇𑀫𑀺𑀦𑀸 𑀩𑀻𑀚𑀁 𑀯𑀺𑀬 𑀅𑀗𑁆𑀓𑀼𑀭𑀲𑁆𑀲 𑀅𑀯𑀺𑀚𑁆𑀚𑀸𑀤𑀬𑁄 𑀭𑀽𑀧𑀓𑀸𑀬𑀲𑁆𑀲 𑀅𑀲𑀸𑀥𑀸𑀭𑀡𑀓𑀸𑀭𑀡𑀢𑀸𑀬 𑀳𑁂𑀢𑀽𑀢𑀺 𑀤𑀲𑁆𑀲𑀺𑀢𑀁. 𑀅𑀦𑀼𑀧𑀸𑀮𑀓𑀢𑁆𑀢𑀸𑀢𑀺 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀸. 𑀇𑀫𑀺𑀦𑀸 𑀧𑀦 𑀅𑀗𑁆𑀓𑀼𑀭𑀲𑁆𑀲 𑀧𑀣𑀯𑀻𑀲𑀮𑀺𑀮𑀸𑀤𑀬𑁄 𑀯𑀺𑀬 𑀆𑀳𑀸𑀭𑁄 𑀲𑀸𑀥𑀸𑀭𑀡𑀓𑀸𑀭𑀡𑀢𑀸𑀬 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁨𑁩𑁪-𑁭. 𑀇𑀢𑀺𑀫𑁂…𑀧𑁂… 𑀕𑀢𑀸𑀢𑀺 𑀏𑀯𑀫𑁂𑀢𑁂 𑀅𑀯𑀺𑀚𑁆𑀚𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀬𑀣𑀸𑀭𑀳𑀁 𑀳𑁂𑀢𑀼𑀪𑀸𑀯𑀁, 𑀧𑀘𑁆𑀘𑀬𑀪𑀸𑀯𑀜𑁆𑀘 𑀕𑀢𑀸. 𑀫𑀸𑀢𑀸𑀯 𑀉𑀧𑀦𑀺𑀲𑁆𑀲𑀬𑀸𑀢𑀺 𑀅𑀯𑀺𑀚𑁆𑀚𑀸 𑀪𑀯𑁂𑀲𑀼 𑀯𑀺𑀚𑁆𑀚𑀫𑀸𑀦𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀪𑀸𑀯𑁂𑀦, 𑀢𑀡𑁆𑀳𑀸 𑀧𑀢𑁆𑀣𑀦𑀸𑀪𑀸𑀯𑁂𑀦, 𑀉𑀧𑀸𑀤𑀸𑀦𑀁 𑀤𑀴𑁆𑀳𑀕𑁆𑀕𑀸𑀳𑀪𑀸𑀯𑁂𑀦𑀸𑀢𑀺 𑀏𑀯𑀁 𑀲𑀗𑁆𑀔𑀸𑀭𑀪𑀯𑀸𑀦𑀁 𑀳𑁂𑀢𑀼𑀪𑀽𑀢𑀸 𑀚𑀦𑀓𑀲𑀳𑀸𑀬𑀢𑀸𑀬 𑀪𑀯𑀦𑀺𑀓𑀦𑁆𑀢𑀺𑀢𑀁𑀲𑀳𑀚𑀸𑀢𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸 𑀅𑀪𑀺𑀲𑀗𑁆𑀔𑀸𑀭𑀺𑀓𑀸, 𑀅𑀧𑀲𑁆𑀲𑀬𑀪𑀽𑀢𑀸 𑀯𑀸𑀢𑀺 𑀫𑀸𑀢𑀸 𑀯𑀺𑀬 𑀉𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺. 𑀬𑀣𑀸 𑀧𑀺𑀢𑀼𑀚𑀦𑀺𑀢𑀲𑀼𑀓𑁆𑀓𑁂 𑀧𑀼𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀻𑀢𑀺 𑀧𑀺𑀢𑀸 𑀚𑀦𑀓𑁄, 𑀏𑀯𑀁 𑀓𑀫𑁆𑀫𑀁 𑀲𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑀢𑁆𑀢𑀸 𑀚𑀦𑀓𑀦𑁆𑀢𑀺 𑀆𑀳. 𑀬𑀣𑀸 𑀥𑀸𑀢𑀻 𑀚𑀸𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀯𑀟𑁆𑀠𑀺𑀢𑀸 𑀲𑀦𑁆𑀥𑀸𑀭𑀺𑀓𑀸, 𑀏𑀯𑀁 𑀆𑀳𑀸𑀭𑁄 𑀉𑀧𑁆𑀧𑀦𑁆𑀦𑀲𑁆𑀲 𑀓𑀸𑀬𑀲𑁆𑀲 𑀩𑁆𑀭𑀽𑀳𑁂𑀢𑀸, 𑀲𑀦𑁆𑀥𑀸𑀭𑀓𑁄 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀥𑀸𑀢𑀻…𑀧𑁂… 𑀪𑀯𑁂’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄 𑀦𑀸𑀫𑀓𑀸𑀬𑀲𑁆𑀲𑀸𑀧𑀺 𑀧𑀘𑁆𑀘𑀬𑁄, 𑀧𑀓𑀸𑀭𑀦𑁆𑀢𑀭𑁂𑀦 𑀧𑀦 𑀢𑀲𑁆𑀲 𑀧𑀸𑀓𑀝𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀓𑁆𑀔𑀼𑀜𑁆𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀤𑀺𑀁 𑀅𑀚𑁆𑀛𑀢𑁆𑀢𑀁 𑀲𑀩𑁆𑀩𑀁 𑀧𑀘𑁆𑀘𑀬𑀚𑀸𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀭𑀽𑀧𑀫𑀸𑀮𑁄𑀓𑀫𑁂𑀯 𑀘𑀸𑀢𑀺 𑀧𑀦 𑀘-𑀲𑀤𑁆𑀤𑁂𑀦 𑀬𑀣𑀸 𑀩𑀸𑀳𑀺𑀭𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀬𑀣𑀸 𑀘 𑀆𑀮𑁄𑀓𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀏𑀯𑀁 𑀅𑀜𑁆𑀜𑀫𑁆𑀧𑀺 𑀩𑀸𑀳𑀺𑀭𑀁 𑀧𑀘𑁆𑀘𑀬𑀚𑀸𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀝𑀺𑀘𑁆𑀘𑀸𑀢𑀺 𑀧𑀘𑁆𑀘𑀬𑀪𑀽𑀢𑀁 𑀮𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀘𑀓𑁆𑀔𑀼𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦, 𑀭𑀽𑀧𑀸𑀮𑁄𑀓𑀸𑀦𑀜𑁆𑀘 𑀬𑀣𑀸𑀲𑀫𑁆𑀪𑀯𑀁 𑀆𑀭𑀫𑁆𑀫𑀡𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦, 𑀇𑀢𑀭𑁂𑀲𑀜𑁆𑀘 𑀲𑀤𑁆𑀤𑀲𑀗𑁆𑀕𑀳𑀺𑀢𑀸𑀦𑀁 𑀅𑀦𑀦𑁆𑀢𑀭𑀸𑀤𑀺𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀨𑀲𑁆𑀲𑀸𑀤𑀻𑀦𑀁 𑀯𑀺𑀬 𑀲𑀳 𑀧𑀘𑁆𑀘𑀬𑁂𑀳𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀫𑁆𑀫𑀲𑀦𑀽𑀧𑀕𑀁 𑀲𑀩𑁆𑀩𑀁 𑀦𑀸𑀫𑀁 𑀲𑀳 𑀧𑀘𑁆𑀘𑀬𑁂𑀦 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀦𑀸𑀫𑀓𑀸𑀬𑀲𑁆𑀲 𑀧𑀘𑁆𑀘𑀬𑀁 𑀧𑀭𑀺𑀕𑀡𑁆𑀳𑀢𑀻’’𑀢𑀺.

𑁧𑁨𑁩𑁮-𑁪𑁦. 𑀤𑀺𑀲𑁆𑀯𑀸𑀦𑀸𑀢𑀺 𑀏𑀢𑀭𑀳𑀺 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸. 𑀢𑀣𑁂𑀯𑀺𑀤𑀦𑁆𑀢𑀺 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀲𑀧𑁆𑀧𑀘𑁆𑀘𑀬𑀢𑀸𑀫𑀢𑁆𑀢𑀫𑁂𑀯 𑀧𑀘𑁆𑀘𑀸𑀫𑀝𑁆𑀞𑀁, 𑀅𑀣 𑀔𑁄 𑀬𑀸𑀤𑀺𑀲𑁂𑀳𑀺 𑀏𑀢𑀭𑀳𑀺 𑀧𑀯𑀢𑁆𑀢𑀢𑀺, 𑀢𑀸𑀤𑀺𑀲𑁂𑀳𑀺 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑁂𑀳𑁂𑀯 𑀅𑀢𑀻𑀢𑁂𑀧𑀺 𑀧𑀯𑀢𑁆𑀢𑀺𑀢𑁆𑀣𑀸𑀢𑀺 𑀧𑀘𑁆𑀘𑀬𑀲𑀳𑀺𑀢𑀢𑀸𑀧𑀺 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀩𑁆𑀩𑀦𑁆𑀢𑁂𑀢𑀺 𑀅𑀢𑀻𑀢𑀔𑀦𑁆𑀥𑀧𑁆𑀧𑀩𑀦𑁆𑀥𑀓𑁄𑀝𑁆𑀞𑀸𑀲𑁂. 𑀧𑀜𑁆𑀘𑀥𑀸𑀕𑀢𑀸𑀢𑀺 𑁋

‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦𑀁, 𑀦 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀳𑀫𑀢𑀻𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀳𑀫𑀢𑀻𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀳𑀫𑀢𑀻𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦; 𑀫𑀳𑀸𑀦𑀺. 𑁧𑁭𑁪) 𑁋

𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀆𑀕𑀢𑀸, 𑀧𑀯𑀢𑁆𑀢𑀸 𑀯𑀸. 𑀅𑀧𑀭𑀦𑁆𑀢𑁂𑀢𑀺 𑀅𑀦𑀸𑀕𑀢𑁂 𑀔𑀦𑁆𑀥𑀧𑁆𑀧𑀩𑀦𑁆𑀥𑀓𑁄𑀝𑁆𑀞𑀸𑀲𑁂. 𑀧𑀜𑁆𑀘𑀥𑀸 𑀲𑀫𑀼𑀤𑀻𑀭𑀺𑀢𑀸𑀢𑀺 𑁋

‘‘𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀫𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀳𑀫𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀳𑀫𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀳𑀫𑀦𑀸𑀕𑀢𑀫𑀤𑁆𑀥𑀸𑀦𑀁, 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀫𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦; 𑀫𑀳𑀸𑀦𑀺. 𑁧𑁭𑁪) 𑁋

𑀏𑀯𑀁 𑀧𑀜𑁆𑀘𑀥𑀸 𑀓𑀣𑀺𑀢𑀸.

𑁧𑁨𑁪𑁧. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀅𑀤𑁆𑀥𑀸𑀦𑁂𑀢𑀺 𑀏𑀢𑀭𑀳𑀺 𑀧𑀝𑀺𑀲𑀦𑁆𑀥𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀘𑀼𑀢𑀺𑀧𑀭𑀺𑀬𑀦𑁆𑀢𑁂 𑀅𑀤𑁆𑀥𑀸𑀦𑁂𑀧𑀺. 𑀅𑀤𑁆𑀥𑀸𑀦-𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀔𑀦𑁆𑀥𑀓𑁄𑀝𑁆𑀞𑀸𑀲𑀫𑁂𑀯 𑀯𑀤𑀢𑀺. 𑀦 𑀳𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀓𑀸𑀮𑁄 𑀦𑀸𑀫 𑀅𑀢𑁆𑀣𑀻𑀢𑀺. 𑀙𑀩𑁆𑀩𑀺𑀥𑀸 𑀧𑀭𑀺𑀓𑀺𑀢𑁆𑀢𑀺𑀢𑀸𑀢𑀺 𑁋

‘‘𑀅𑀳𑀁 𑀦𑀼 𑀔𑁄𑀲𑁆𑀫𑀺, 𑀦𑁄 𑀦𑀼 𑀔𑁄𑀲𑁆𑀫𑀺, 𑀓𑀺𑀁 𑀦𑀼 𑀔𑁄𑀲𑁆𑀫𑀺, 𑀓𑀣𑀁 𑀦𑀼 𑀔𑁄𑀲𑁆𑀫𑀺, 𑀅𑀬𑀁 𑀦𑀼 𑀔𑁄 𑀲𑀢𑁆𑀢𑁄 𑀓𑀼𑀢𑁄 𑀆𑀕𑀢𑁄, 𑀲𑁄 𑀓𑀼𑀳𑀺𑀁 𑀕𑀸𑀫𑀻 𑀘 𑀪𑀯𑀺𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦; 𑀫𑀳𑀸𑀦𑀺. 𑁧𑁭𑁪) 𑁋

𑀏𑀯𑀁 𑀙𑀩𑁆𑀩𑀺𑀥𑀸 𑀯𑀼𑀢𑁆𑀢𑀸. ‘‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁨𑁯-𑁧𑁩𑁦) 𑀯𑀺𑀬 𑀧𑀤𑁂𑀲𑁂𑀧𑀺 𑀲𑀩𑁆𑀩-𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀦𑀢𑁄 ‘‘𑀲𑀩𑁆𑀩𑀸’’𑀢𑀺 𑀯𑀢𑁆𑀯𑀸𑀧𑀺 ‘‘𑀅𑀦𑀯𑀲𑁂𑀲𑀸’’𑀢𑀺 𑀯𑀼𑀢𑁆𑀢𑀁. 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸 𑀅𑀯𑀲𑁂𑀲𑁄 𑀅𑀯𑀲𑀺𑀝𑁆𑀞𑁄𑀢𑀺 𑀅𑀦𑀯𑀲𑁂𑀲𑀸, 𑀲𑁄𑀴𑀲𑀯𑀺𑀥𑀸𑀧𑀺 𑀘𑁂𑀲𑀸 𑀏𑀓𑀓𑀗𑁆𑀔𑀸𑀯𑀲𑁂𑀦𑀸𑀧𑀺 𑀅𑀦𑀯𑀲𑀺𑀝𑁆𑀞𑀸 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀳𑀺𑀬𑁆𑀬𑀢𑀻𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀺𑀬𑁆𑀬𑀢𑀺. 𑀓𑀸𑀫𑀁 𑀦𑀸𑀫𑀭𑀽𑀧𑀫𑀢𑁆𑀢𑀁 𑀯𑀺𑀦𑀸 𑀲𑀢𑁆𑀢𑀲𑁆𑀲 𑀅𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀗𑁆𑀔𑀸 𑀧𑀳𑀻𑀦𑀸, 𑀅𑀢𑀻𑀢𑀸𑀦𑀸𑀕𑀢𑁂 𑀓𑀗𑁆𑀔𑀸𑀦𑀁 𑀧𑀳𑀸𑀦𑁂𑀦 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀗𑁆𑀔𑀸𑀬 𑀅𑀢𑀺𑀲𑀬𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀢𑀼𑀁 𑀇𑀥𑁂𑀯 𑀲𑀸 𑀯𑀼𑀢𑁆𑀢𑀸. 𑀅𑀣 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀦𑀺𑀲𑁆𑀲𑀢𑁆𑀢𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁂𑀲𑀼 𑀧𑀯𑀢𑁆𑀢𑀓𑀗𑁆𑀔𑀸𑀬 𑀇𑀥𑁂𑀯 𑀢𑀻𑀭𑀡𑀢𑁄 𑀲𑀸 𑀇𑀥 𑀯𑀼𑀢𑁆𑀢𑀸. 𑀯𑀡𑁆𑀡𑀪𑀡𑀦𑀁 𑀯𑀸 𑀏𑀢𑀁 𑀇𑀥 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀗𑁆𑀔𑀸𑀬 𑀧𑀳𑀸𑀦𑀯𑀘𑀦𑀁 𑀬𑀣𑀸 𑀢𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀲𑀼 𑀧𑀳𑀻𑀦𑀸𑀦𑀫𑁆𑀧𑀺 𑀘 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸𑀢𑀺𑀆𑀤𑀺𑀦𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑀸𑀤𑀻𑀲𑀼 𑀯𑀘𑀦𑀦𑁆𑀢𑀺.

𑁧𑁨𑁪𑁨. 𑀓𑀫𑁆𑀫𑀯𑀺𑀧𑀸𑀓𑀸𑀦𑀁 𑀯𑀲𑁂𑀦𑀸𑀧𑀻𑀢𑀺 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀆𑀬𑀽𑀳𑀦𑀁 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸, 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁, 𑀘𑁂𑀢𑀦𑀸 𑀪𑀯𑁄 𑀇𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸, 𑀇𑀥 𑀧𑀝𑀺𑀲𑀦𑁆𑀥𑀺 𑀯𑀺𑀜𑁆𑀜𑀸𑀡𑀁, 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀁, 𑀧𑀲𑀸𑀤𑁄 𑀆𑀬𑀢𑀦𑀁, 𑀨𑀼𑀝𑁆𑀞𑁄 𑀨𑀲𑁆𑀲𑁄, 𑀯𑁂𑀤𑀬𑀺𑀢𑀁 𑀯𑁂𑀤𑀦𑀸 𑀇𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀇𑀥𑀽𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀧𑀼𑀭𑁂 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸, 𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸…𑀧𑁂… 𑀘𑁂𑀢𑀦𑀸 𑀪𑀯𑁄 𑀇𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀓𑀫𑁆𑀫𑀪𑀯𑀲𑁆𑀫𑀺𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀓𑀫𑁆𑀫𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀸𑀦𑀁 𑀯𑀲𑁂𑀦. 𑀓𑀺𑀮𑁂𑀲𑀯𑀝𑁆𑀝𑁄𑀧𑀺 𑀘𑁂𑀢𑁆𑀣 𑀓𑀫𑁆𑀫𑀲𑀳𑀸𑀬𑀢𑀸𑀬 𑀓𑀫𑁆𑀫𑀯𑀝𑁆𑀝𑁂𑀦𑁂𑀯 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁨𑁪𑁩. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀦𑁆𑀢𑀺 𑀏𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁. 𑀉𑀧𑀧𑀚𑁆𑀚𑀸𑀧𑀭𑀸𑀧𑀭𑀺𑀬𑀸𑀳𑁄𑀲𑀺𑀓𑀫𑁆𑀫𑀯𑀲𑀸 𑀧𑀦𑀸𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀅𑀳𑁄𑀲𑀺𑀓𑀫𑁆𑀫𑀯𑀲𑁂𑀦. 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀳𑀺 ‘‘𑀉𑀧𑀧𑀚𑁆𑀚𑀸𑀧𑀭𑀸𑀧𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀢𑁄 𑀅𑀦𑀦𑁆𑀢𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁. 𑀅𑀧𑀭𑁂 𑀅𑀧𑀭𑁂 𑀤𑀺𑀝𑁆𑀞𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀫𑀺𑀁 𑀅𑀜𑁆𑀜𑀲𑁆𑀫𑀺𑀁 𑀬𑀢𑁆𑀣𑀓𑀢𑁆𑀣𑀘𑀺 𑀅𑀢𑁆𑀢𑀪𑀸𑀯𑁂 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁. 𑀅𑀳𑁄𑀲𑀺 𑀏𑀯 𑀓𑀫𑁆𑀫𑀁, 𑀦 𑀢𑀲𑁆𑀲 𑀯𑀺𑀧𑀸𑀓𑁄 𑀅𑀳𑁄𑀲𑀺, 𑀅𑀢𑁆𑀣𑀺, 𑀪𑀯𑀺𑀲𑁆𑀲𑀢𑀺 𑀘𑀸𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀓𑀫𑁆𑀫𑀁 𑀅𑀳𑁄𑀲𑀺𑀓𑀫𑁆𑀫𑀁.

𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀽𑀢𑀢𑀸𑀬, 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀢𑀸𑀬 𑀘 𑀩𑀮𑀯𑀪𑀸𑀯𑀧𑁆𑀧𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀲𑁂𑀦 𑀲𑀸𑀢𑀺𑀲𑀬𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀨𑀮𑀤𑀸𑀬𑀺𑀦𑀻 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸 𑀦𑀸𑀫. 𑀲𑀸 𑀳𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀩𑀮𑀯𑀢𑀺 𑀚𑀯𑀦𑀲𑀦𑁆𑀢𑀸𑀦𑁂 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁂𑀲𑀼 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀯𑀲𑀧𑁆𑀧𑀯𑀢𑁆𑀢𑀺𑀬𑀸, 𑀆𑀲𑁂𑀯𑀦𑀸𑀮𑀸𑀪𑁂𑀦 𑀅𑀧𑁆𑀧𑀯𑀺𑀧𑀸𑀓𑀢𑀸𑀬 𑀘 𑀇𑀢𑀭𑀤𑁆𑀯𑀬𑀁 𑀯𑀺𑀬 𑀧𑀯𑀢𑁆𑀢𑀲𑀦𑁆𑀢𑀸𑀦𑀼𑀧𑀭𑀫𑀸𑀧𑁂𑀓𑁆𑀔𑀁, 𑀑𑀓𑀸𑀲𑀮𑀸𑀪𑀸𑀧𑁂𑀓𑁆𑀔𑀜𑁆𑀘 𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀇𑀥𑁂𑀯 𑀧𑀼𑀧𑁆𑀨𑀫𑀢𑁆𑀢𑀁 𑀯𑀺𑀬 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀁 𑀅𑀳𑁂𑀢𑀼𑀓𑀨𑀮𑀁 𑀤𑁂𑀢𑀺, 𑀲𑀳𑁂𑀢𑀼𑀓𑀨𑀮𑀤𑀸𑀦𑁂 𑀧𑀦 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀫𑁆𑀧𑀺 𑀆𑀧𑀚𑁆𑀚𑁂𑀬𑁆𑀬. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀦𑁆𑀢𑀺 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀤𑀸𑀦𑀁 𑀦𑀸𑀫 𑀉𑀧𑀥𑀺𑀧𑁆𑀧𑀬𑁄𑀕𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂𑀦𑁂𑀯 𑀳𑁄𑀢𑀻𑀢𑀺 𑀢𑀤𑀪𑀸𑀯𑀢𑁄 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁. 𑀅𑀳𑁄𑀲𑀺𑀓𑀫𑁆𑀫𑀁…𑀧𑁂… 𑀯𑀺𑀧𑀸𑀓𑁄𑀢𑀺 𑀏𑀢𑁆𑀣 ‘‘𑀅𑀳𑁄𑀲𑀺 𑀓𑀫𑁆𑀫’’𑀦𑁆𑀢𑀺 𑀧𑀤𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑀩𑁆𑀩𑀁 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀳𑁄𑀲𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 (𑀧𑀝𑀺. 𑀫. 𑁧.𑁨𑁩𑁪). 𑀢𑀢𑁆𑀣 𑀲𑀓𑀲𑀓𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀲𑁆𑀲 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀲𑁆𑀲, 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀲𑁆𑀲 𑀘 𑀯𑀲𑁂𑀦 𑀧𑀼𑀭𑀺𑀫𑀁 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀓𑀫𑁆𑀫𑀲𑁆𑀲, 𑀯𑀺𑀧𑀸𑀓𑀓𑀸𑀮𑀲𑁆𑀲 𑀘 𑀅𑀢𑀻𑀢𑀢𑁆𑀢𑀸 𑀢𑀣𑀸 𑀯𑀢𑁆𑀢𑀩𑁆𑀩𑀢𑁆𑀢𑀁 𑀮𑀪𑀢𑀺, 𑀤𑀼𑀢𑀺𑀬𑀁 𑀅𑀦𑀸𑀕𑀢𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀲𑁆𑀲 𑀧𑀼𑀭𑀺𑀫𑀪𑀯𑁂𑀲𑀼 𑀓𑀢𑀁 𑀅𑀤𑀺𑀦𑁆𑀦𑀯𑀺𑀧𑀸𑀓𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀢𑀺𑀬𑀁 𑀧𑀦 𑀅𑀦𑀦𑁆𑀢𑀭𑀪𑀯𑁂 𑀓𑀢𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁, 𑀅𑀭𑀳𑀢𑁄 𑀅𑀢𑀻𑀢𑀪𑀯𑁂𑀲𑀼 𑀓𑀢𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 ‘‘𑀏𑀓𑀫𑁂𑀯 𑀅𑀢𑀻𑀢𑀁 𑀓𑀫𑁆𑀫𑀁 𑀅𑀤𑁆𑀥𑀢𑁆𑀢𑀬𑁂 𑀯𑀺𑀧𑀸𑀓𑀸𑀪𑀸𑀯𑀁 𑀲𑀦𑁆𑀥𑀸𑀬 𑀢𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀅𑀢𑁆𑀣𑀲𑀸𑀥𑀺𑀓𑀸𑀢𑀺 𑀤𑀸𑀦𑀸𑀤𑀺𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀢𑁆𑀣𑀲𑁆𑀲 𑀦𑀺𑀧𑁆𑀨𑀸𑀤𑀺𑀓𑀸. 𑀓𑀸 𑀧𑀦 𑀲𑀸𑀢𑀺 𑀆𑀳 ‘‘𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸’’𑀢𑀺. 𑀲𑀸 𑀳𑀺 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀸, 𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀺𑀦𑁄 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀯𑀸 𑀢𑀣𑀸 𑀅𑀪𑀺𑀲𑀗𑁆𑀔𑀢𑀸 𑀲𑀫𑀸𑀦𑀸 𑀅𑀦𑀦𑁆𑀢𑀭𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀤𑀸𑀬𑀺𑀦𑀻 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀦𑀸𑀫. 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀬𑀸 𑀘𑁂𑀢𑁆𑀣 ‘‘𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀺𑀢𑀸𑀤𑀺𑀧𑀯𑀢𑁆𑀢𑀺𑀬𑀁 𑀧𑀦 𑀧𑀜𑁆𑀘𑀫𑀸𑀤𑀺𑀓𑀸𑀧𑀺 𑀳𑁄𑀢𑀺. 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀢𑀺, 𑀅𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀓𑀁 𑀧𑀦 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀦𑀢𑁆𑀣𑀺. 𑀘𑀼𑀢𑀺𑀅𑀦𑀦𑁆𑀢𑀭𑀜𑁆𑀳𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀲𑁆𑀲 𑀑𑀓𑀸𑀲𑁄𑀢𑀺 𑀆𑀘𑀭𑀺𑀬𑀸. 𑀧𑀝𑀺𑀲𑀦𑁆𑀥𑀺𑀬𑀸 𑀧𑀦 𑀤𑀺𑀦𑁆𑀦𑀸𑀬 𑀚𑀸𑀢𑀺𑀲𑀢𑁂𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀢𑀺𑀭𑀘𑁆𑀙𑀸𑀦𑀕𑀢𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀢𑀕𑀼𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁩.𑁩𑁭𑁯). 𑀉𑀪𑀺𑀦𑁆𑀦…𑀧𑁂… 𑀤𑁂𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀯𑀺𑀭𑀳𑀢𑁄 𑀤𑀺𑀝𑁆𑀞𑀥𑀫𑁆𑀫𑀽𑀧𑀧𑀚𑁆𑀚𑀯𑁂𑀤𑀦𑀻𑀬𑀪𑀸𑀯𑀁 𑀅𑀲𑀫𑁆𑀧𑀢𑁆𑀢𑀸 𑀧𑀜𑁆𑀘 𑀘𑁂𑀢𑀦𑀸 𑀯𑀺𑀧𑀸𑀓𑀤𑀸𑀦𑀲𑀪𑀸𑀯𑀲𑁆𑀲 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀬𑀤𑀸 𑀑𑀓𑀸𑀲𑀁 𑀮𑀪𑀢𑀺, 𑀢𑀤𑀸 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀁, 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀯𑀸 𑀤𑁂𑀢𑀺. 𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀇𑀫𑀺𑀦𑀸 𑀅𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀁 𑀅𑀳𑁄𑀲𑀺𑀓𑀫𑁆𑀫𑀧𑀓𑁆𑀔𑁂 𑀢𑀺𑀝𑁆𑀞𑀢𑀺 𑀯𑀺𑀧𑀘𑁆𑀘𑀦𑁄𑀓𑀸𑀲𑀲𑁆𑀲 𑀅𑀪𑀸𑀯𑀢𑁄𑀢𑀺 𑀤𑀻𑀧𑁂𑀢𑀺.

𑁧𑁨𑁪𑁪. 𑀏𑀯𑀁 𑀢𑀸𑀯 𑀯𑀺𑀧𑀸𑀓𑀤𑀸𑀦𑀓𑀸𑀮𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀧𑀸𑀓𑀤𑀸𑀦𑀧𑀭𑀺𑀬𑀸𑀬𑀢𑁄, 𑀓𑀺𑀘𑁆𑀘𑀢𑁄 𑀘 𑀘𑀢𑀼𑀩𑁆𑀩𑀺𑀥𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀭𑀼𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀕𑀭𑀼𑀓𑀦𑁆𑀢𑀺 𑀫𑀳𑀸𑀲𑀸𑀯𑀚𑁆𑀚𑀁, 𑀫𑀳𑀸𑀦𑀼𑀪𑀸𑀯𑀜𑁆𑀘 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀓𑀫𑁆𑀫𑀁. 𑀩𑀳𑀼𑀮𑀦𑁆𑀢𑀺 𑀅𑀪𑀺𑀡𑁆𑀳𑀲𑁄 𑀓𑀢𑀁, 𑀏𑀓𑀯𑀸𑀭𑀁 𑀓𑀢𑁆𑀯𑀸𑀧𑀺 𑀅𑀪𑀺𑀡𑁆𑀳𑀲𑀫𑀸𑀲𑁂𑀯𑀺𑀢𑀜𑁆𑀘. 𑀆𑀲𑀦𑁆𑀦𑀦𑁆𑀢𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀅𑀦𑀼𑀲𑁆𑀲𑀭𑀺𑀢𑀁, 𑀢𑀤𑀸 𑀓𑀢𑀜𑁆𑀘. 𑀓𑀝𑀢𑁆𑀢𑀸𑀓𑀫𑁆𑀫𑀦𑁆𑀢𑀺 𑀕𑀭𑀼𑀓𑀸𑀤𑀺𑀪𑀸𑀯𑀁 𑀅𑀲𑀫𑁆𑀧𑀢𑁆𑀢𑀁 𑀓𑀢𑀫𑀢𑁆𑀢𑀢𑁄𑀬𑁂𑀯 𑀓𑀫𑁆𑀫𑀦𑁆𑀢𑀺 𑀯𑀢𑁆𑀢𑀩𑁆𑀩𑀓𑀫𑁆𑀫𑀁. 𑀢𑀢𑁆𑀣 𑀓𑀼𑀲𑀮𑀁 𑀯𑀸 𑀳𑁄𑀢𑀼 𑀅𑀓𑀼𑀲𑀮𑀁 𑀯𑀸, 𑀕𑀭𑀼𑀓𑀸𑀕𑀭𑀼𑀓𑁂𑀲𑀼 𑀬𑀁 𑀕𑀭𑀼𑀓𑀁 𑀫𑀸𑀢𑀼𑀖𑀸𑀢𑀓𑀸𑀤𑀺𑀓𑀫𑁆𑀫𑀁 𑀯𑀸 𑀫𑀳𑀕𑁆𑀕𑀢𑀓𑀫𑁆𑀫𑀁 𑀯𑀸, 𑀢𑀤𑁂𑀯 𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀢𑀣𑀸 𑀩𑀳𑀼𑀮𑀸𑀩𑀳𑀼𑀮𑁂𑀲𑀼 𑀬𑀁 𑀩𑀳𑀼𑀮𑀁 𑀲𑀼𑀲𑀻𑀮𑁆𑀬𑀁 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸, 𑀢𑀤𑁂𑀯 𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀤𑀽𑀭𑀸𑀲𑀦𑁆𑀦𑁂𑀲𑀼 𑀬𑀁 𑀆𑀲𑀦𑁆𑀦𑀁 𑀫𑀭𑀡𑀓𑀸𑀮𑁂 𑀅𑀦𑀼𑀲𑁆𑀲𑀭𑀺𑀢𑀁, 𑀢𑁂𑀦𑁂𑀯 𑀉𑀧𑀧𑀚𑁆𑀚𑀢𑀺. 𑀆𑀲𑀦𑁆𑀦𑀓𑀸𑀮𑁂 𑀓𑀢𑁂 𑀘 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀓𑀝𑀢𑁆𑀢𑀸 𑀧𑀦 𑀓𑀫𑁆𑀫𑀁 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸𑀲𑁂𑀯𑀦𑀁 𑀧𑀼𑀭𑀺𑀫𑀸𑀦𑀁 𑀅𑀪𑀸𑀯𑁂 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺. 𑀇𑀢𑀺 𑀕𑀭𑀼𑀓𑀁 𑀲𑀩𑁆𑀩𑀧𑀞𑀫𑀁 𑀯𑀺𑀧𑀘𑁆𑀘𑀢𑀺. 𑀢𑀣𑀸 𑀳𑀺 𑀢𑀁 ‘‘𑀕𑀭𑀼𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀕𑀭𑀼𑀓𑁂 𑀅𑀲𑀢𑀺 𑀩𑀳𑀼𑀮𑀻𑀓𑀢𑀁, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀆𑀲𑀦𑁆𑀦𑀁, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀓𑀝𑀢𑁆𑀢𑀸𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀫𑀚𑀸𑀢𑀻𑀲𑀼 𑀓𑀢𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀻’’𑀢𑀺.

𑁧𑁨𑁪𑁫. 𑀧𑀝𑀺𑀲𑀦𑁆𑀥𑀺𑀤𑀸𑀦𑀸𑀤𑀺𑀯𑀲𑁂𑀦 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀁 𑀚𑀦𑀓𑀁. 𑀲𑀼𑀔𑀤𑀼𑀓𑁆𑀔𑀲𑀦𑁆𑀢𑀸𑀦𑀲𑁆𑀲, 𑀦𑀸𑀫𑀭𑀽𑀧𑀧𑁆𑀧𑀩𑀦𑁆𑀥𑀲𑁆𑀲 𑀯𑀸 𑀘𑀺𑀭𑀢𑀭𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀉𑀧𑀢𑁆𑀣𑀫𑁆𑀪𑀓𑀁. 𑀢𑁂𑀦𑀸𑀳 ‘‘𑀲𑀼𑀔𑀤𑀼𑀓𑁆𑀔𑀁 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀻’’𑀢𑀺. 𑀲𑀼𑀔𑀤𑀼𑀓𑁆𑀔𑁂 𑀧𑀯𑀢𑁆𑀢𑀫𑀸𑀦𑁂 𑀩𑀯𑁆𑀳𑀸𑀩𑀸𑀥𑀢𑀸𑀤𑀺𑀧𑀘𑁆𑀘𑀬𑀽𑀧𑀦𑀺𑀧𑀸𑀢𑀦𑁂𑀦 𑀲𑀡𑀺𑀓𑀁 𑀲𑀡𑀺𑀓𑀁 𑀢𑀲𑁆𑀲 𑀯𑀺𑀩𑀸𑀥𑀓𑀁 𑀉𑀧𑀧𑀻𑀴𑀓𑀁. 𑀢𑁂𑀦𑀸𑀳 ‘‘𑀲𑀼𑀔𑀤𑀼𑀓𑁆𑀔𑀁 𑀧𑀻𑀴𑁂𑀢𑀺 𑀩𑀸𑀥𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀻’’𑀢𑀺. 𑀢𑀣𑀸 𑀧𑀝𑀺𑀧𑀓𑁆𑀔𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀉𑀧𑀘𑁆𑀙𑁂𑀤𑀓𑀁 𑀧𑀝𑀺𑀩𑀸𑀳𑀓𑀁 𑀉𑀧𑀖𑀸𑀢𑀓𑀁. 𑀢𑁂𑀦𑀸𑀳 ‘‘𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸’’𑀢𑀺.

𑀭𑀽𑀧𑀜𑁆𑀘 𑀅𑀭𑀽𑀧𑀯𑀺𑀧𑀸𑀓𑀓𑁆𑀔𑀦𑁆𑀥𑁄 𑀘𑀸𑀢𑀺 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀓𑁆𑀔𑀦𑁆𑀥𑁄, 𑀓𑀫𑁆𑀫𑀚𑀭𑀽𑀧𑀲𑁆𑀲𑀸𑀧𑀺 𑀯𑀺𑀧𑀸𑀓𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 ‘‘𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀓𑁆𑀔𑀦𑁆𑀥𑁂’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦𑀸𑀢𑀺 𑀓𑀼𑀲𑀮𑁂𑀦 𑀯𑀸 𑀅𑀓𑀼𑀲𑀮𑁂𑀦 𑀯𑀸 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀓𑀢𑁆𑀢𑀼𑀪𑀽𑀢𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀧𑀸𑀓𑁂 𑀚𑀦𑀺𑀢𑁂. 𑀢𑁂𑀦𑀸𑀳 ‘‘𑀚𑀦𑀺𑀢𑁂 𑀯𑀺𑀧𑀸𑀓𑁂’’𑀢𑀺. 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀲𑀦𑁆𑀥𑀸𑀬 ‘‘𑀚𑀦𑀺𑀢𑁂 𑀯𑀺𑀧𑀸𑀓𑁂’’𑀢𑀺 𑀯𑀤𑀦𑁆𑀢𑀺. 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀁 𑀉𑀧𑀢𑁆𑀣𑀫𑁆𑀪𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑀓𑀓𑀫𑁆𑀫𑀁 𑀓𑀼𑀲𑀮𑀁 𑀲𑀫𑀸𑀦𑀁 𑀅𑀜𑁆𑀜𑁂𑀦𑀧𑀺 𑀓𑀼𑀲𑀮𑀓𑀫𑁆𑀫𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀓𑀁 𑀲𑀼𑀔𑀁 𑀢𑀲𑁆𑀲 𑀧𑀝𑀺𑀧𑀓𑁆𑀔𑀯𑀺𑀩𑀸𑀥𑀦𑀯𑀲𑁂𑀦 𑀉𑀧𑀢𑁆𑀣𑀫𑁆𑀪𑁂𑀢𑀺. 𑀅𑀓𑀼𑀲𑀮𑀁 𑀅𑀜𑁆𑀜𑁂𑀦 𑀅𑀓𑀼𑀲𑀮𑀓𑀫𑁆𑀫𑁂𑀦 𑀉𑀧𑀧𑀚𑁆𑀚𑀫𑀸𑀦𑀁 𑀤𑀼𑀓𑁆𑀔𑀁 𑀢𑀣𑁂𑀯 𑀉𑀧𑀢𑁆𑀣𑀫𑁆𑀪𑁂𑀢𑀺. 𑀏𑀯𑀜𑁆𑀘 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀁 𑀢𑀁 𑀤𑀻𑀖𑀓𑀸𑀮𑀁 𑀧𑀯𑀢𑁆𑀢𑁂𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀻’’𑀢𑀺. 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀁 𑀧𑀻𑀴𑁂𑀢𑀻𑀢𑀺 𑀉𑀧𑀧𑀻𑀴𑀓𑀁 𑀅𑀓𑀼𑀲𑀮𑀁 𑀲𑀫𑀸𑀦𑀁 𑀲𑀼𑀔𑀺𑀢𑀲𑁆𑀲 𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑀓𑀸𑀭𑀡𑀲𑀫𑁆𑀧𑀸𑀤𑀓𑀪𑀸𑀯𑁂𑀦 𑀲𑀼𑀔𑀲𑀦𑁆𑀢𑀸𑀦𑀁 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀁 𑀧𑀻𑀴𑁂𑀢𑀺, 𑀓𑀼𑀲𑀮𑀜𑁆𑀘 𑀭𑁄𑀕𑀸𑀤𑀺𑀦𑀸 𑀤𑀼𑀓𑁆𑀔𑀺𑀢𑀲𑁆𑀲 𑀪𑁂𑀲𑀚𑁆𑀚𑀸𑀤𑀺𑀲𑀼𑀔𑀸𑀤𑀺𑀓𑀸𑀭𑀡𑀲𑀫𑁆𑀧𑀸𑀤𑀓𑀪𑀸𑀯𑁂𑀦 𑀤𑀼𑀓𑁆𑀔𑀲𑀦𑁆𑀢𑀸𑀦𑀁 𑀯𑀺𑀘𑁆𑀙𑀺𑀦𑁆𑀤𑀦𑁆𑀢𑀁 𑀧𑀻𑀴𑁂𑀢𑀺. 𑀓𑁂𑀘𑀺 𑀧𑀦 ‘‘𑀲𑀼𑀔𑀤𑀼𑀓𑁆𑀔𑀲𑁆𑀲 𑀓𑀸𑀭𑀡𑀁 𑀅𑀲𑀫𑁆𑀧𑀸𑀤𑁂𑀦𑁆𑀢𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀬𑀁 𑀯𑀺𑀧𑀸𑀓𑀤𑀸𑀬𑀓𑀓𑀫𑁆𑀫𑀁 𑀉𑀧𑀧𑀻𑀴𑀓𑀓𑀫𑁆𑀫’’𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀧𑀦 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀫𑁂𑀯 𑀚𑀦𑀓𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸.

𑀅𑀧𑀺𑀘 𑀉𑀧𑀖𑀸𑀢𑀓𑁂𑀦 𑀲𑀳 𑀇𑀫𑀲𑁆𑀲 𑀯𑀺𑀲𑁂𑀲𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀢𑀁 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀲𑁆𑀲 𑀧𑀝𑀺𑀩𑀸𑀳𑀓𑀦𑁆𑀢𑀺 𑀘𑁂? 𑀢𑀁 𑀦, 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸𑀢𑀺. ‘‘𑀤𑀼𑀩𑁆𑀩𑀮𑀁 𑀓𑀫𑁆𑀫𑀁 𑀖𑀸𑀢𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀦𑀦𑀼 𑀢𑀲𑁆𑀲 𑀧𑀼𑀩𑁆𑀩𑁂𑀬𑁂𑀯 𑀲𑀺𑀤𑁆𑀥𑀢𑁆𑀢𑀸, 𑀦𑀺𑀭𑀼𑀤𑁆𑀥𑀢𑁆𑀢𑀸 𑀘 𑀓𑀣𑀫𑀺𑀤𑀁 𑀢𑀤𑀼𑀧𑀖𑀸𑀢𑀓𑀁 𑀳𑁄𑀢𑀻’’𑀢𑀺 𑀆𑀧𑀦𑁆𑀦𑀁 𑀘𑁄𑀤𑀦𑀁 𑀲𑀦𑁆𑀥𑀸𑀬 𑀓𑀫𑁆𑀫𑀲𑁆𑀲 𑀖𑀸𑀢𑀦𑀁 𑀦𑀸𑀫 𑀢𑀲𑁆𑀲 𑀯𑀺𑀧𑀸𑀓𑀧𑀝𑀺𑀩𑀸𑀳𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸’’𑀢𑀺. 𑀢𑀁𑀧𑀝𑀺𑀩𑀸𑀳𑀦𑀜𑁆𑀘 𑀅𑀢𑁆𑀢𑀦𑁄 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀻’’𑀢𑀺. 𑀯𑀺𑀧𑀘𑁆𑀘𑀦𑀸𑀬 𑀓𑀢𑁄𑀓𑀸𑀲𑀁 𑀓𑀫𑁆𑀫𑀁 𑀯𑀺𑀧𑀓𑁆𑀓𑀫𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀻’’𑀢𑀺.

𑀉𑀧𑀧𑀻𑀴𑀓𑀁 𑀅𑀜𑁆𑀜𑀲𑁆𑀲 𑀯𑀺𑀧𑀸𑀓𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀲𑀬𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑁂𑀢𑀺, 𑀉𑀧𑀖𑀸𑀢𑀓𑀁 𑀧𑀦 𑀤𑀼𑀩𑁆𑀩𑀮𑀓𑀫𑁆𑀫𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀓𑁂𑀘𑀺 𑀧𑀦 𑀆𑀘𑀭𑀺𑀬𑀸 𑀅𑀧𑀭𑁂𑀦𑀸𑀧𑀺 𑀦𑀬𑁂𑀦 𑀚𑀦𑀓𑀸𑀤𑀺𑀓𑀫𑁆𑀫𑀁 𑀇𑀘𑁆𑀙𑀦𑁆𑀢𑀺. 𑀓𑀣𑀁? 𑀬𑀲𑁆𑀫𑀺𑀁 𑀓𑀫𑁆𑀫𑁂 𑀓𑀢𑁂 𑀧𑀝𑀺𑀲𑀦𑁆𑀥𑀺𑀬𑀁, 𑀧𑀯𑀢𑁆𑀢𑁂 𑀘 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀢𑀁 𑀚𑀦𑀓𑀁. 𑀬𑀲𑁆𑀫𑀺𑀁 𑀧𑀦 𑀓𑀢𑁂 𑀅𑀜𑁆𑀜𑁂𑀦 𑀚𑀦𑀺𑀢𑀲𑁆𑀲 𑀇𑀝𑁆𑀞𑀲𑁆𑀲 𑀯𑀸 𑀅𑀦𑀺𑀝𑁆𑀞𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀺𑀩𑀸𑀥𑀓𑀯𑀺𑀘𑁆𑀙𑁂𑀤𑀓𑀧𑀘𑁆𑀘𑀬𑀸𑀦𑀼𑀧𑁆𑀧𑀢𑁆𑀢𑀺𑀬𑀸, 𑀉𑀧𑀩𑁆𑀭𑀽𑀳𑀓𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀬𑀸 𑀘 𑀚𑀦𑀓𑀸𑀦𑀼𑀪𑀸𑀯𑀸𑀦𑀼𑀭𑀽𑀧𑀁 𑀧𑀭𑀺𑀧𑁄𑀲𑀓𑀘𑀺𑀭𑀢𑀭𑀧𑁆𑀧𑀩𑀦𑁆𑀥𑀸 𑀳𑁄𑀦𑁆𑀢𑀺, 𑀢𑀁 𑀉𑀧𑀢𑁆𑀣𑀫𑁆𑀪𑀓𑀁. 𑀚𑀦𑀓𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁 𑀓𑀼𑀲𑀮𑀨𑀮𑀁, 𑀅𑀓𑀼𑀲𑀮𑀨𑀮𑀁 𑀯𑀸 𑀬𑁂𑀦 𑀧𑀘𑁆𑀘𑀦𑀻𑀓𑀪𑀽𑀢𑁂𑀦 𑀭𑁄𑀕𑀥𑀸𑀢𑀼𑀯𑀺𑀲𑀫𑀢𑀸𑀤𑀺𑀦𑀺𑀫𑀺𑀢𑁆𑀢𑀢𑀸𑀬 𑀩𑀸𑀥𑀻𑀬𑀢𑀺, 𑀢𑀁 𑀉𑀧𑀧𑀻𑀴𑀓𑀁. 𑀬𑁂𑀦 𑀧𑀦 𑀓𑀫𑁆𑀫𑀼𑀦𑀸 𑀚𑀦𑀓𑀲𑀸𑀫𑀢𑁆𑀣𑀺𑀬𑀯𑀲𑁂𑀦 𑀘𑀺𑀭𑀢𑀭𑀧𑁆𑀧𑀩𑀦𑁆𑀥𑀸𑀭𑀳𑀫𑁆𑀧𑀺 𑀲𑀫𑀸𑀦𑀁 𑀨𑀮𑀯𑀺𑀘𑁆𑀙𑁂𑀤𑀓𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀳𑀜𑁆𑀜𑀢𑀺 𑀯𑀺𑀘𑁆𑀙𑀺𑀚𑁆𑀚𑀢𑀺, 𑀢𑀁 𑀉𑀧𑀖𑀸𑀢𑀓𑀦𑁆𑀢𑀺.

𑀏𑀢𑁆𑀣 𑀘 𑀓𑁂𑀘𑀺 𑀅𑀧𑁆𑀧𑀸𑀩𑀸𑀥𑀤𑀻𑀖𑀸𑀬𑀼𑀓𑀢𑀸𑀲𑀁𑀯𑀢𑁆𑀢𑀦𑀯𑀲𑁂𑀦 𑀤𑀼𑀢𑀺𑀬𑀲𑁆𑀲 𑀓𑀼𑀲𑀮𑀪𑀸𑀯𑀁, 𑀩𑀯𑁆𑀳𑀸𑀩𑀸𑀥𑀅𑀧𑁆𑀧𑀸𑀬𑀼𑀓𑀢𑀸𑀲𑀁𑀯𑀢𑁆𑀢𑀦𑀯𑀲𑁂𑀦 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀓𑀼𑀲𑀮𑀪𑀸𑀯𑀜𑁆𑀘 𑀯𑀡𑁆𑀡𑁂𑀦𑁆𑀢𑀺, 𑀪𑀽𑀭𑀺𑀤𑀢𑁆𑀢𑀸𑀤𑀻𑀦𑀁 𑀧𑀦 𑀦𑀸𑀕𑀸𑀤𑀻𑀦𑀁, 𑀇𑀢𑁄 𑀅𑀦𑀼𑀧𑁆𑀧𑀤𑀺𑀦𑁆𑀦𑀬𑀸𑀧𑀦𑀓𑀧𑁂𑀢𑀸𑀦𑀜𑁆𑀘 𑀅𑀧𑀸𑀬𑁂𑀲𑀼 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀽𑀧𑀧𑀻𑀴𑀦𑀽𑀧𑀖𑀸𑀢𑀓𑀸𑀦𑀺 𑀓𑀫𑁆𑀫𑀸𑀦𑀺 𑀲𑀦𑁆𑀢𑀻𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁄 𑀦 𑀯𑀺𑀭𑀼𑀚𑁆𑀛𑀢𑀺. 𑀓𑀺𑀜𑁆𑀘𑀸𑀧𑀺 𑀓𑀫𑁆𑀫𑀸𑀦𑀁 𑀓𑀫𑁆𑀫𑀦𑁆𑀢𑀭𑀜𑁆𑀘𑁂𑀯 𑀯𑀺𑀧𑀸𑀓𑀦𑁆𑀢𑀭𑀜𑁆𑀘 𑀩𑀼𑀤𑁆𑀥𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀜𑀸𑀡𑀲𑁆𑀲𑁂𑀯 𑀬𑀸𑀣𑀸𑀯𑀲𑀭𑀲𑀢𑁄 𑀧𑀸𑀓𑀝𑀁 𑀳𑁄𑀢𑀺. 𑀩𑀼𑀤𑁆𑀥𑀸𑀯𑁂𑀡𑀺𑀓𑀜𑁆𑀳𑁂𑀢𑀁 𑀅𑀲𑀸𑀥𑀸𑀭𑀡𑀁 𑀲𑀸𑀯𑀓𑁂𑀳𑀺, 𑀯𑀺𑀧𑀲𑁆𑀲𑀓𑁂𑀦 𑀧𑀦 𑀏𑀓𑀤𑁂𑀲𑀢𑁄 𑀚𑀸𑀦𑀺𑀢𑀩𑁆𑀩𑀁. 𑀦 𑀳𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀚𑀸𑀦𑀦𑁆𑀢𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀧𑀭𑀺𑀧𑀽𑀭𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀁 𑀧𑀭𑀺𑀕𑁆𑀕𑀳𑀁 𑀲𑀦𑁆𑀥𑀸𑀬 ‘‘𑀇𑀢𑀺 𑀇𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀸𑀤𑀺𑀲𑁂𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀤𑁆𑀥𑀸𑀦𑁂 𑀦𑀸𑀫𑀭𑀽𑀧𑀲𑁆𑀲 𑀧𑀯𑀢𑁆𑀢𑀺, 𑀢𑀸𑀤𑀺𑀲𑁂𑀳𑁂𑀯 𑀇𑀢𑀭𑀲𑁆𑀫𑀺𑀫𑁆𑀧𑀺 𑀅𑀤𑁆𑀥𑀤𑁆𑀯𑀬𑁂𑀢𑀺 𑀏𑀯𑀁 𑀬𑀣𑀸 𑀅𑀢𑀻𑀢𑀸𑀦𑀸𑀕𑀢𑁂 𑀦𑀬𑀁 𑀦𑁂𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀇𑀤’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀤𑁆𑀥𑀢𑁆𑀢𑀬𑁂𑀧𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀸𑀨𑀮𑀫𑀢𑁆𑀢𑀢𑀸𑀤𑀲𑁆𑀲𑀦𑀧𑀭𑀢𑁆𑀢𑀸 𑀘𑁄𑀤𑀦𑀸𑀬. 𑀇𑀢𑀻 𑀓𑀫𑁆𑀫𑀜𑁆𑀘𑁂𑀯𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀲𑁂𑀯𑀁…𑀧𑁂… 𑀧𑀳𑀺𑀬𑁆𑀬𑀢𑀻𑀢𑀺 𑀢𑀲𑁆𑀲𑁂𑀯𑀁 𑀲𑀫𑀦𑀼𑀧𑀲𑁆𑀲𑀢𑁄 𑀬𑀸 𑀲𑀸 𑀧𑀼𑀩𑁆𑀩𑀦𑁆𑀢𑀸𑀤𑀬𑁄 𑀆𑀭𑀩𑁆𑀪 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀺𑀬𑁆𑀬𑀢𑀺.

𑁧𑁨𑁪𑁬-𑁮. 𑀧𑀳𑀻𑀦𑀸𑀬 𑀧𑀦 𑀢𑀸𑀬 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀔𑀸𑀬𑀢𑀺. 𑀢𑁂𑀦𑁂𑀯𑀸𑀳 ‘‘𑀳𑁂𑀢𑀼𑀨𑀮𑀲𑁆𑀲 𑀲𑀫𑁆𑀩𑀦𑁆𑀥𑀯𑀲𑁂𑀦𑁂𑀯𑀸’’𑀢𑀺𑀆𑀤𑀺. 𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀁 𑀤𑀸𑀦𑀸𑀤𑀻𑀳𑀺 𑀲𑀸𑀥𑀺𑀢𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀫𑀸𑀦𑀸𑀬 𑀓𑀸𑀭𑀡𑀫𑀢𑁆𑀢𑁂 𑀓𑀢𑁆𑀢𑀼𑀯𑁄𑀳𑀸𑀭𑁄𑀢𑀺 𑀆𑀳 ‘‘𑀓𑀸𑀭𑀡𑀢𑁄 𑀉𑀤𑁆𑀥𑀁 𑀓𑀸𑀭𑀡𑀁 𑀦 𑀘 𑀧𑀲𑁆𑀲𑀢𑀻’’𑀢𑀺. 𑀧𑀸𑀓…𑀧𑁂… 𑀧𑀝𑀺𑀯𑁂𑀤𑀓𑀁 𑀦 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀓𑀧𑀝𑀺𑀯𑁂𑀤𑀓𑀦𑁆𑀢𑀺 𑀯𑀺𑀧𑀸𑀓𑀯𑀺𑀦𑁆𑀤𑀓𑀁. 𑀏𑀯𑀁 𑀅𑀧𑀲𑁆𑀲𑀦𑁆𑀢𑁄 𑀧𑀦 𑀓𑀸𑀭𑀡𑁂 𑀲𑀢𑀺 𑀓𑀸𑀭𑀓𑁄𑀢𑀺, 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀬𑀸 𑀲𑀢𑀺 𑀧𑀝𑀺𑀲𑀁𑀯𑁂𑀤𑀓𑁄𑀢𑀺 𑀲𑀫𑀜𑁆𑀜𑀸𑀫𑀢𑁆𑀢𑁂𑀦𑁂𑀯 𑀧𑀡𑁆𑀟𑀺𑀢𑀸 𑀯𑁄𑀳𑀭𑀦𑁆𑀢𑀺. 𑀇𑀘𑁆𑀘𑁂𑀯𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀲𑀼𑀤𑁆𑀥𑀥𑀫𑁆𑀫𑀸𑀢𑀺 𑀓𑁂𑀦𑀘𑀺 𑀲𑀢𑁆𑀢𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸 𑀅𑀫𑀺𑀲𑁆𑀲𑀥𑀫𑁆𑀫𑀸. 𑀏𑀯𑁂𑀢𑀦𑁆𑀢𑀺 𑀏𑀯𑀁𑀯𑀺𑀥𑀁 𑀏𑀢𑀁 𑀤𑀲𑁆𑀲𑀦𑀁 𑀲𑀫𑁆𑀫𑀤𑀲𑁆𑀲𑀦𑀁, 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁨𑁪𑁯. 𑀩𑀻𑀚𑀭𑀼𑀓𑁆𑀔𑀸𑀤𑀺𑀓𑀸𑀦𑀁 𑀯𑀸𑀢𑀺 𑀬𑀣𑀸 𑀩𑀻𑀚𑀢𑁄 𑀭𑀼𑀓𑁆𑀔𑁄, 𑀭𑀼𑀓𑁆𑀔𑀢𑁄 𑀩𑀻𑀚𑀦𑁆𑀢𑀺 𑀏𑀯𑀁 𑀓𑀸𑀭𑀡𑀧𑀭𑀫𑁆𑀧𑀭𑀕𑀯𑁂𑀲𑀦𑁂 𑀅𑀦𑀸𑀤𑀺𑀓𑀸𑀮𑀺𑀓𑀢𑁆𑀢𑀸 𑀩𑀻𑀚𑀭𑀼𑀓𑁆𑀔𑀲𑀦𑁆𑀢𑀸𑀦𑀲𑁆𑀲 𑀧𑀼𑀩𑁆𑀩𑀸 𑀓𑁄𑀝𑀺 𑀦𑀢𑁆𑀣𑀺, 𑀏𑀯𑀁 𑀓𑀫𑁆𑀫𑀧𑀘𑁆𑀘𑀬𑀸 𑀯𑀺𑀧𑀸𑀓𑁄, 𑀯𑀺𑀧𑀸𑀓𑀧𑀘𑁆𑀘𑀬𑀸 𑀓𑀫𑁆𑀫𑀦𑁆𑀢𑀺 𑀧𑀭𑀺𑀬𑁂𑀲𑀦𑁂 𑀅𑀦𑀸𑀤𑀺𑀓𑀸𑀮𑀺𑀓𑀢𑁆𑀢𑀸 𑀓𑀫𑁆𑀫𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀁, 𑀅𑀡𑁆𑀟𑀢𑁄 𑀓𑀼𑀓𑁆𑀓𑀼𑀝𑀻, 𑀧𑀼𑀦𑀧𑀺 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟’’𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁨𑁫𑁦-𑁩. 𑀅𑀦𑀸𑀕𑀢𑁂𑀧𑀺 𑀲𑀁𑀲𑀸𑀭𑁂𑀢𑀺 𑀬𑀣𑀸 𑀅𑀢𑀻𑀢𑁂, 𑀏𑀯𑀁 𑀅𑀦𑀸𑀕𑀢𑁂𑀧𑀺 𑀅𑀤𑁆𑀥𑀸𑀦𑁂 𑀔𑀦𑁆𑀥𑀸𑀦𑀁 𑀧𑀝𑀺𑀧𑀸𑀝𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑀁𑀲𑀸𑀭𑁂 𑀲𑀢𑀺. 𑀅𑀧𑁆𑀧𑀯𑀢𑁆𑀢𑀺 𑀦 𑀤𑀺𑀲𑁆𑀲𑀢𑀻𑀢𑀺 𑀓𑀫𑁆𑀫𑀢𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀯𑀺𑀧𑀸𑀓𑀢𑁄 𑀓𑀫𑁆𑀫𑀦𑁆𑀢𑀺 𑀅𑀦𑀸𑀕𑀢𑁂 𑀓𑀸𑀭𑀺𑀬𑀧𑀭𑀫𑁆𑀧𑀭𑀸𑀬 𑀕𑀯𑁂𑀲𑀺𑀬𑀫𑀸𑀦𑀸𑀬 𑀅𑀧𑀭𑀺𑀓𑁆𑀔𑀻𑀡𑀲𑀁𑀬𑁄𑀚𑀦𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀸𑀦𑀁 𑀅𑀧𑁆𑀧𑀯𑀢𑁆𑀢𑀦𑀁 𑀦 𑀤𑀺𑀲𑁆𑀲𑀢𑀺, 𑀧𑀯𑀢𑁆𑀢𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂 𑀲𑀁𑀲𑀸𑀭𑁂 ‘‘𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀘𑀦𑁂𑀦 𑀓𑀸𑀭𑀡𑁂 𑀆𑀤𑀺𑀲𑁆𑀲 𑀅𑀪𑀸𑀯𑁄 𑀯𑀼𑀢𑁆𑀢𑁄, ‘‘𑀅𑀧𑁆𑀧𑀯𑀢𑁆𑀢𑀺 𑀦 𑀤𑀺𑀲𑁆𑀲𑀢𑀻’’𑀢𑀺 𑀯𑀘𑀦𑁂𑀦 𑀨𑀮𑀲𑁆𑀲 𑀅𑀯𑀲𑀸𑀦𑀸𑀪𑀸𑀯𑁄 𑀯𑀼𑀢𑁆𑀢𑁄𑀢𑀺. 𑀏𑀢𑀫𑀢𑁆𑀣𑀦𑁆𑀢𑀺 ‘‘𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁. 𑀅𑀲𑀬𑀁𑀯𑀲𑀻𑀢𑀺 𑀦 𑀲𑀬𑀁𑀯𑀲𑀺𑀦𑁄, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀧𑀭𑀯𑀲𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀺𑀦𑁄𑀢𑀺 𑀇𑀢𑀭𑀻𑀢𑀭𑀯𑀺𑀭𑀼𑀤𑁆𑀥𑀸 𑀤𑀺𑀝𑁆𑀞𑀺𑀬𑁄 𑀯𑀸 𑀤𑀺𑀝𑁆𑀞𑀺𑀬𑀸 𑀯𑀸 𑀅𑀜𑁆𑀜𑀫𑀜𑁆𑀜𑁂𑀦 𑀲𑀳 𑀯𑀺𑀭𑁄𑀥𑀺𑀦𑁄. 𑀕𑀫𑁆𑀪𑀻𑀭𑀜𑀸𑀡𑀕𑁄𑀘𑀭𑀢𑀸𑀬 𑀕𑀫𑁆𑀪𑀻𑀭𑀁. 𑀢𑀣𑀸 𑀦𑀺𑀧𑀼𑀡𑀁. 𑀲𑀢𑁆𑀢𑀲𑀼𑀜𑁆𑀜𑀢𑀸𑀬, 𑀅𑀜𑁆𑀜𑀫𑀜𑁆𑀜𑀲𑀪𑀸𑀯𑀲𑀼𑀜𑁆𑀜𑀢𑀸𑀬 𑀘 𑀲𑀼𑀜𑁆𑀜𑀁. 𑀧𑀘𑁆𑀘𑀬𑀦𑁆𑀢𑀺 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀁, 𑀢𑀧𑁆𑀧𑀘𑁆𑀘𑀬𑀧𑀝𑀺𑀯𑁂𑀥𑁂𑀦𑁂𑀯 𑀘 𑀲𑀩𑁆𑀩𑀁 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀻𑀢𑀺.

𑁧𑁨𑁫𑁪-𑁬. 𑀓𑀫𑁆𑀫𑀁 𑀦𑀢𑁆𑀣𑀺 𑀯𑀺𑀧𑀸𑀓𑀫𑁆𑀳𑀻𑀢𑀺 𑀓𑀼𑀝𑁆𑀝𑀸𑀤𑀻𑀲𑀼 𑀭𑀚𑀸𑀤𑀺 𑀯𑀺𑀬 𑀯𑀺𑀧𑀸𑀓𑁂 𑀲𑀦𑁆𑀢𑀺𑀝𑁆𑀞𑀫𑀸𑀦𑀁 𑀓𑀫𑁆𑀫𑀁 𑀦𑀢𑁆𑀣𑀺. 𑀧𑀸𑀓𑁄 𑀓𑀫𑁆𑀫𑁂 𑀦 𑀯𑀺𑀚𑁆𑀚𑀢𑀻𑀢𑀺 𑀢𑀣𑀸 𑀓𑀫𑁆𑀫𑁂 𑀲𑀦𑁆𑀢𑀺𑀝𑁆𑀞𑀫𑀸𑀦𑁄 𑀯𑀺𑀧𑀸𑀓𑁄 𑀦𑀢𑁆𑀣𑀺. 𑀬𑀣𑀸𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀦 𑀲𑀽𑀭𑀺𑀬𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀡𑀺𑀫𑁆𑀳𑀻𑀢𑀺 𑀲𑀽𑀭𑀺𑀬𑀓𑀦𑁆𑀢𑀫𑀡𑀺𑀫𑁆𑀳𑀺. 𑀦 𑀢𑁂𑀲𑀁 𑀩𑀳𑀺 𑀲𑁄 𑀅𑀢𑁆𑀣𑀻𑀢𑀺 𑀢𑁂 𑀫𑀼𑀜𑁆𑀘𑀺𑀢𑁆𑀯𑀸 𑀢𑁂𑀳𑀺 𑀩𑀳𑀺 𑀲𑁄 𑀅𑀕𑁆𑀕𑀺 𑀦𑀢𑁆𑀣𑀺. 𑀲𑀫𑁆𑀪𑀸𑀭𑁂𑀳𑀻𑀢𑀺 𑀲𑀫𑀗𑁆𑀕𑀻𑀪𑀽𑀢𑁂𑀳𑀺 𑀆𑀢𑀧𑀸𑀤𑀻𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀦 𑀅𑀦𑁆𑀢𑁄 𑀓𑀫𑁆𑀫𑀲𑁆𑀲𑀸𑀢𑀺𑀆𑀤𑀺 𑀅𑀢𑁆𑀣𑀢𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁆𑀧𑀺 𑀉𑀧𑀫𑀸𑀦𑀺𑀕𑀫𑀦𑀢𑁆𑀣𑀁 𑀧𑀼𑀦𑀧𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁨𑁫𑁭-𑁮. 𑀬𑀤𑀺 𑀳𑁂𑀢𑀼, 𑀨𑀮𑀜𑁆𑀘 𑀅𑀜𑁆𑀜𑀫𑀜𑁆𑀜𑀭𑀳𑀺𑀢𑀁, 𑀓𑀣𑀁 𑀳𑁂𑀢𑀼𑀢𑁄 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀆𑀳 ‘‘𑀓𑀫𑁆𑀫𑀜𑁆𑀘 𑀔𑁄 𑀉𑀧𑀸𑀤𑀸𑀬𑀸’’𑀢𑀺. 𑀦 𑀓𑁂𑀯𑀮𑀁 𑀓𑀫𑁆𑀫𑀨𑀮𑀫𑁂𑀯 𑀲𑀼𑀜𑁆𑀜𑀁 𑀓𑀢𑁆𑀢𑀼𑀭𑀳𑀺𑀢𑀁, 𑀲𑀩𑁆𑀩𑀫𑁆𑀧𑀺 𑀥𑀫𑁆𑀫𑀚𑀸𑀢𑀁 𑀓𑀸𑀭𑀓𑀭𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑁂𑀢𑁆𑀣 𑀤𑁂𑀯𑁄’’𑀢𑀺𑀆𑀤𑀺𑀕𑀸𑀣𑀸 𑀯𑀼𑀢𑁆𑀢𑀸. 𑀳𑁂𑀢𑀼𑀲𑀫𑁆𑀪𑀸𑀭𑀧𑀘𑁆𑀘𑀬𑀸𑀢𑀺 𑀏𑀓𑁂𑀦 𑀳𑁂𑀢𑀼𑀦𑀸 𑀏𑀓𑀲𑁆𑀲, 𑀅𑀦𑁂𑀓𑀲𑁆𑀲 𑀯𑀸 𑀨𑀮𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀺𑀢𑁄 𑀳𑁂𑀢𑀼𑀲𑀫𑀽𑀳𑀦𑀺𑀫𑀺𑀢𑁆𑀢𑀁, 𑀲𑀫𑁆𑀪𑀸𑀭𑁄𑀢𑀺 𑀯𑀸 𑀧𑀘𑁆𑀘𑀬𑀸𑀥𑀺𑀯𑀘𑀦𑀦𑁆𑀢𑀺 𑀳𑁂𑀢𑀼𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁧𑁨𑁫𑁯. 𑀅𑀤𑁆𑀥𑀸𑀲𑀼 𑀢𑀭𑀺𑀢𑁆𑀯𑀸 𑀓𑀗𑁆𑀔𑀦𑁆𑀢𑀺 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀲𑁄𑀴𑀲𑀯𑀺𑀥𑀁 𑀓𑀗𑁆𑀔𑀁 𑀯𑀺𑀢𑀭𑀺𑀢𑁆𑀯𑀸. 𑀦 𑀓𑁂𑀯𑀮𑀫𑁂𑀢𑀁 𑀲𑁄𑀴𑀲𑀯𑀺𑀥𑀫𑁂𑀯 𑀓𑀗𑁆𑀔𑀁 𑀯𑀺𑀢𑀭𑀢𑀺, 𑀅𑀣 𑀔𑁄 ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀥. 𑀲. 𑁧𑁧𑁨𑁩; 𑀯𑀺𑀪. 𑁯𑁧𑁫) 𑀅𑀝𑁆𑀞𑀯𑀺𑀥𑀁 𑀓𑀗𑁆𑀔𑀫𑁆𑀧𑀺 𑀧𑀚𑀳𑀢𑀺. 𑀢𑀣𑀸 𑀳𑁂𑀢𑁆𑀣 𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄 𑀲𑀺𑀓𑁆𑀔𑀸𑀢𑀺 𑀓𑀗𑁆𑀔𑀸𑀬 𑀕𑁄𑀘𑀭𑀪𑀽𑀢𑀸 𑀮𑁄𑀓𑀺𑀬𑀸 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀆𑀭𑀩𑁆𑀪 𑀓𑀺𑀮𑁂𑀲𑀸 𑀧𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀧𑀼𑀩𑁆𑀩𑀦𑁆𑀢𑁄𑀢𑀺 𑀅𑀢𑀻𑀢𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄, 𑀅𑀧𑀭𑀦𑁆𑀢𑁄𑀢𑀺 𑀅𑀦𑀸𑀕𑀢𑀸, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁄𑀢𑀺 𑀢𑀤𑀼𑀪𑀬𑀁, 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀢𑀤𑀼𑀪𑀬𑀪𑀸𑀕𑀬𑀼𑀢𑁆𑀢𑀢𑁆𑀢𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀕𑁆𑀕𑀳𑀡𑁂𑀦 𑀕𑀳𑀺𑀢𑁄 𑀅𑀝𑁆𑀞𑀫𑁄 𑀓𑀗𑁆𑀔𑀸𑀯𑀺𑀲𑀬𑁄 𑀦𑀸𑀫𑀭𑀽𑀧𑀫𑀢𑁆𑀢𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸-𑀕𑁆𑀕𑀳𑀡𑁂𑀦 𑀧𑀦 𑀢𑀲𑁆𑀲 𑀧𑀘𑁆𑀘𑀬𑁄 𑀕𑀳𑀺𑀢𑁄, 𑀢𑀲𑁆𑀫𑀸 𑀲𑁄𑀴𑀲𑀯𑀢𑁆𑀣𑀼𑀓𑀸𑀬 𑀧𑀳𑀻𑀦𑀸𑀬 𑀅𑀝𑁆𑀞𑀯𑀢𑁆𑀣𑀼𑀓𑀸 𑀓𑀗𑁆𑀔𑀸 𑀅𑀧𑁆𑀧𑀢𑀺𑀝𑁆𑀞𑀸𑀯 𑀳𑁄𑀢𑀻𑀢𑀺. 𑀏𑀢𑀸𑀲𑀜𑁆𑀘 𑀧𑀳𑀸𑀦𑁂𑀦 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺𑀧𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺 𑀤𑀺𑀝𑁆𑀞𑁂𑀓𑀝𑁆𑀞𑀢𑁆𑀢𑀸 𑀯𑀺𑀘𑀺𑀓𑀺𑀘𑁆𑀙𑀸𑀬. 𑀬𑀣𑀸 𑀳𑀺 𑀤𑀺𑀝𑁆𑀞𑀺 𑀲𑀫𑀼𑀘𑁆𑀙𑀺𑀚𑁆𑀚𑀫𑀸𑀦𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀤𑁆𑀥𑀺𑀁𑀬𑁂𑀯 𑀲𑀫𑀼𑀘𑁆𑀙𑀺𑀚𑁆𑀚𑀢𑀺, 𑀏𑀯𑀁 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀓𑁆𑀔𑀫𑁆𑀪𑀺𑀬𑀫𑀸𑀦𑀸 𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁𑀬𑁂𑀯 𑀯𑀺𑀓𑁆𑀔𑀫𑁆𑀪𑀻𑀬𑀢𑀺. 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀽𑀧𑀦𑀺𑀲𑁆𑀲𑀬𑀸 𑀳𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦; 𑀫𑀳𑀸𑀦𑀺. 𑁧𑁭𑁪) 𑀲𑁄𑀴𑀲𑀯𑀢𑁆𑀣𑀼𑀓𑀸 𑀓𑀗𑁆𑀔𑀸, 𑀲𑀸 𑀏𑀯 𑀘 𑀧𑀼𑀩𑁆𑀩𑀦𑁆𑀢𑀸𑀤𑀺𑀯𑀢𑁆𑀣𑀼𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀯𑀢𑁆𑀣𑀼𑀓𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀩𑀼𑀤𑁆𑀥𑀸𑀤𑀺𑀯𑀢𑁆𑀣𑀼𑀓𑀸 𑀘 𑀢𑀤𑁂𑀓𑀝𑁆𑀞𑀸𑀢𑀺. 𑀉𑀝𑁆𑀞𑀺𑀢𑀦𑁆𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑀁.

𑁧𑁨𑁬𑁦-𑁨. 𑀓𑀗𑁆𑀔𑀸𑀯𑀺𑀢𑀭𑀡𑀁 𑀦𑀸𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀗𑁆𑀔𑀸𑀯𑀺𑀢𑀭𑀡𑀢𑁄 𑀓𑀗𑁆𑀔𑀸𑀯𑀺𑀢𑀭𑀡𑀁 𑀦𑀸𑀫. 𑀦 𑀓𑁂𑀯𑀮𑀁 𑀓𑀗𑁆𑀔𑀸𑀯𑀺𑀢𑀭𑀡𑀁 𑀦𑀸𑀫, 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺𑀧𑀺 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺𑀧𑀺 𑀲𑀫𑁆𑀫𑀸𑀤𑀲𑁆𑀲𑀦𑀦𑁆𑀢𑀺𑀧𑀺 𑀇𑀤𑀁 𑀲𑀫𑀼𑀤𑀻𑀭𑀺𑀢𑀁. 𑀏𑀢𑁆𑀣 𑀘 𑀥𑀭𑀻𑀬𑀦𑁆𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀻𑀢𑀺 𑀥𑀫𑁆𑀫𑀸, 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀺𑀢𑀺, 𑀥𑀫𑁆𑀫𑀸𑀦𑀁 𑀞𑀺𑀢𑀺 𑀥𑀫𑁆𑀫𑀝𑁆𑀞𑀺𑀢𑀺, 𑀧𑀘𑁆𑀘𑀬𑀥𑀫𑁆𑀫𑀸. 𑀅𑀣 𑀯𑀸 𑀥𑀫𑁆𑀫𑁄𑀢𑀺 𑀓𑀸𑀭𑀡𑀁 ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁧𑁮-𑁭𑁨𑁧) 𑀯𑀺𑀬, 𑀥𑀫𑁆𑀫𑀲𑁆𑀲 𑀞𑀺𑀢𑀺𑀲𑀪𑀸𑀯𑁄, 𑀥𑀫𑁆𑀫𑀢𑁄 𑀘 𑀅𑀜𑁆𑀜𑁄 𑀲𑀪𑀸𑀯𑁄 𑀦𑀢𑁆𑀣𑀻𑀢𑀺 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑁄, 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀜𑀸𑀡𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀲𑀗𑁆𑀔𑀸𑀭𑀸𑀦𑀁 𑀬𑀣𑀸𑀪𑀽𑀢𑀁 𑀅𑀦𑀺𑀘𑁆𑀘𑀢𑀸𑀤𑀺 𑀬𑀣𑀸𑀪𑀽𑀢𑀁, 𑀢𑀢𑁆𑀣 𑀜𑀸𑀡𑀦𑁆𑀢𑀺 𑀬𑀣𑀸𑀪𑀽𑀢𑀜𑀸𑀡𑀁. 𑀲𑀫𑁆𑀫𑀸 𑀧𑀲𑁆𑀲𑀢𑀻𑀢𑀺 𑀲𑀫𑁆𑀫𑀸𑀤𑀲𑁆𑀲𑀦𑀁. 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑁄𑀢𑀺 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸 𑀦𑀸𑀫 𑀅𑀭𑀺𑀬𑀫𑀕𑁆𑀕𑁄. 𑀅𑀬𑀁 𑀧𑀦 𑀢𑀁 𑀅𑀦𑀥𑀺𑀕𑀢𑁄𑀧𑀺 𑀢𑀤𑀥𑀺𑀕𑀫𑀼𑀧𑀸𑀬𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀢𑁆𑀢𑀸 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑁄 𑀯𑀺𑀬 𑀳𑁄𑀢𑀻𑀢𑀺 ‘‘𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁄. 𑀢𑀢𑁄𑀬𑁂𑀯 𑀘𑀽𑀴𑀓𑁄 𑀲𑁄𑀢𑀸𑀧𑀦𑁆𑀦𑁄, 𑀮𑁄𑀓𑀺𑀬𑀸𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀲𑁄𑀢𑀸𑀧𑀦𑁆𑀦𑁄 𑀯𑀺𑀬 𑀦𑀺𑀬𑀢𑁄, 𑀲𑀼𑀕𑀢𑀺𑀧𑀭𑀸𑀬𑀡𑁄 𑀘 𑀳𑁄𑀢𑀻𑀢𑀺 𑀘𑀽𑀴𑀲𑁄𑀢𑀸𑀧𑀦𑁆𑀦𑁄. 𑀲𑁄𑀢𑀸𑀧𑀦𑁆𑀦𑁄 𑀳𑀺 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄𑀢𑀺. 𑀅𑀣 𑀯𑀸 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑁄 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀲𑀫𑀥𑀺𑀕𑀫𑁂𑀦. 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑁂𑀦 𑀳𑀺 𑀲𑀫𑁆𑀫𑀤𑁆𑀤𑀺𑀢𑀤𑀺𑀝𑁆𑀞𑀺𑀓𑀡𑁆𑀝𑀓𑁄 𑀯𑀺𑀦𑀺𑀤𑁆𑀥𑀼𑀢𑀅𑀳𑁂𑀢𑀼𑀓𑀯𑀺𑀲𑀫𑀳𑁂𑀢𑀼𑀯𑀸𑀤𑁄 𑀬𑀣𑀸𑀲𑀓𑀧𑀘𑁆𑀘𑀬𑁂𑀳𑁂𑀯 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀲𑀸𑀲𑀦𑁂 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑁄 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑁄 𑀦𑀸𑀫 𑀳𑁄𑀢𑀻𑀢𑀺. 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦 𑀤𑀼𑀓𑁆𑀔𑀲𑀘𑁆𑀘𑀁, 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀲𑁆𑀲𑁂𑀯 𑀅𑀧𑀭𑀪𑀸𑀕𑁂 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀸𑀭𑀸𑀤𑀺𑀯𑀺𑀥𑀺𑀦𑀸 𑀫𑀕𑁆𑀕𑀲𑀘𑁆𑀘𑀜𑁆𑀘 𑀅𑀪𑀺𑀜𑁆𑀜𑀸𑀬 𑀧𑀯𑀢𑁆𑀢𑀺𑀬𑀸 𑀤𑀼𑀓𑁆𑀔𑀪𑀸𑀯𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀧𑁆𑀧𑀯𑀢𑁆𑀢𑁂 𑀦𑀺𑀭𑁄𑀥𑁂 𑀏𑀓𑀁𑀲𑁂𑀦𑁂𑀯 𑀦𑀺𑀦𑁆𑀦𑀚𑁆𑀛𑀸𑀲𑀬𑀢𑀸𑀬 𑀮𑁄𑀓𑀺𑀬𑁂𑀦𑁂𑀯 𑀜𑀸𑀡𑁂𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀥𑀺𑀕𑀢𑀢𑁆𑀢𑀸 𑀅𑀧𑀸𑀬𑁂𑀲𑀼 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄, 𑀲𑁄𑀢𑀸𑀧𑀦𑁆𑀦𑀪𑀽𑀫𑀺𑀬𑀜𑁆𑀘 𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀳𑁄𑀢𑀻𑀢𑀺 𑀘𑀽𑀴𑀲𑁄𑀢𑀸𑀧𑀦𑁆𑀦𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀲𑁄𑀢𑀸𑀧𑀦𑁆𑀦𑁄 𑀳𑀺 𑀘𑀽𑀴𑀓𑁄’’𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀫𑀳𑀸𑀦𑀺𑀲𑀁𑀲𑀫𑁂𑀢𑀁 𑀜𑀸𑀡𑀁, 𑀢𑀲𑁆𑀫𑀸 𑀲𑀧𑀜𑁆𑀜𑁄 𑀅𑀢𑁆𑀢𑀦𑁄 𑀳𑀺𑀢𑀸𑀦𑀼𑀧𑁂𑀓𑁆𑀔𑀦𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀦𑀸𑀳 ‘‘𑀅𑀢𑁆𑀣𑀓𑀸𑀫𑁄’’𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.