𑁧𑁮. 𑀅𑀝𑁆𑀞𑀸𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁧𑁭𑁦-𑁨. 𑀇𑀤𑀸𑀦𑀺 𑀬𑀲𑁆𑀫𑀸 𑀏𑀯𑀁 𑀅𑀪𑀺𑀜𑁆𑀜𑀸𑀯𑀲𑁂𑀦 𑀅𑀥𑀺𑀕𑀢𑀸𑀦𑀺𑀲𑀁𑀲𑀸𑀬 𑀣𑀺𑀭𑀢𑀭𑀸𑀬 𑀲𑀫𑀸𑀥𑀺𑀪𑀸𑀯𑀦𑀸𑀬 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸 𑀳𑁄𑀢𑀺. 𑀏𑀯𑀜𑁆𑀳𑀺 𑀲𑀸 𑀲𑀩𑁆𑀩𑀸𑀓𑀸𑀭𑁂𑀦 𑀣𑀺𑀭𑀢𑀭𑀸 𑀲𑀺𑀔𑀧𑁆𑀧𑀢𑁆𑀢𑀸 𑀘 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲𑀸 𑀪𑀸𑀯𑀦𑀸𑀦𑀬𑀯𑀺𑀪𑀸𑀯𑀦𑀢𑁆𑀣𑀫𑀸𑀭𑀪𑀦𑁆𑀢𑁄 𑀆𑀳 ‘‘𑀲𑀫𑀸𑀥𑀺𑀁 𑀧𑀦𑀸’’𑀢𑀺𑀆𑀤𑀺. 𑀓𑀸 𑀧𑀜𑁆𑀜𑀸𑀢𑀺 𑀲𑀭𑀽𑀧𑀧𑀼𑀘𑁆𑀙𑀸. 𑀓𑁄 𑀘𑀢𑁆𑀣𑁄𑀢𑀺 𑀇𑀫𑀺𑀲𑁆𑀲𑀸 𑀓𑁄 𑀅𑀢𑁆𑀣𑁄. 𑀧𑀜𑁆𑀜𑀸𑀢𑀺 𑀧𑀤𑀁 𑀓𑀁 𑀅𑀪𑀺𑀥𑁂𑀬𑁆𑀬𑀢𑁆𑀣𑀁 𑀦𑀺𑀲𑁆𑀲𑀸𑀬 𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁧𑁭𑁩-𑁪. 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀫𑁂𑀯 𑀧𑀜𑁆𑀜𑀁 𑀤𑀲𑁆𑀲𑁂𑀢𑀺, 𑀅𑀜𑁆𑀜𑀢𑁆𑀣 𑀧𑀦 𑀩𑀳𑀼𑀯𑀺𑀥𑁄 𑀧𑀜𑁆𑀜𑀸𑀧𑀪𑁂𑀤𑁄 𑀳𑁄𑀢𑀺. 𑀧𑀼𑀜𑁆𑀜𑀘𑀺𑀢𑁆𑀢𑀲𑀫𑀸𑀬𑀼𑀢𑀸𑀢𑀺 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸. 𑀏𑀢𑁆𑀣 𑀘 𑀧𑀼𑀜𑁆𑀜-𑀕𑁆𑀕𑀳𑀡𑁂𑀦 𑀤𑀼𑀯𑀺𑀥𑀫𑁆𑀧𑀺 𑀅𑀩𑁆𑀬𑀸𑀓𑀢𑀁 𑀦𑀺𑀯𑀢𑁆𑀢𑁂𑀢𑀺, 𑀢𑀣𑀸 ‘‘𑀅𑀢𑁆𑀣𑀺 𑀲𑀁𑀓𑀺𑀮𑀺𑀝𑁆𑀞𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀲𑁂𑀥𑁂𑀢𑀺. 𑀯𑀺𑀧𑀲𑁆𑀲𑀦𑀸-𑀕𑁆𑀕𑀳𑀡𑁂𑀦 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀁 𑀲𑁂𑀲𑀓𑀼𑀲𑀮𑀧𑀜𑁆𑀜𑀁. 𑀚𑀸𑀦𑀦𑀸 𑀯𑀸 𑀧𑀓𑀸𑀭𑀢𑁄𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀫𑀺𑀤𑀁 𑀧𑀓𑀸𑀭𑀢𑁄 𑀚𑀸𑀦𑀦𑀁 𑀦𑀸𑀫𑀸’’𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀦𑀺𑀥𑀸𑀬 𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑀸𑀓𑀸𑀭𑀯𑀺𑀲𑀺𑀝𑁆𑀞𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀚𑀸𑀦𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁, 𑀓𑁄 𑀯𑀺𑀲𑁂𑀲𑁄 𑀓𑀺𑀫𑀦𑁆𑀢𑀭’’𑀦𑁆𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀫𑀸𑀳 ‘‘𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦’’𑀦𑁆𑀢𑀺𑀆𑀤𑀺𑀦𑀸. 𑀚𑀸𑀦𑀦𑀢𑁆𑀢𑁂 𑀲𑀫𑁂𑀧𑀺 𑀘𑀸𑀢𑀺 𑀯𑀺𑀲𑀬𑀯𑀺𑀚𑀸𑀦𑀦𑀸𑀓𑀸𑀭𑁂 𑀲𑀫𑀸𑀦𑁂𑀧𑀺.

𑁧𑁧𑁭𑁫. 𑀲𑀜𑁆𑀚𑀸𑀦𑀦𑀫𑀢𑁆𑀢𑀁𑀯𑀸𑀢𑀺 ‘‘𑀦𑀻𑀮𑀧𑀻𑀢’’𑀦𑁆𑀢𑀺𑀆𑀤𑀺𑀓𑀁 𑀆𑀭𑀫𑁆𑀫𑀡𑁂 𑀯𑀺𑀚𑁆𑀚𑀫𑀸𑀦𑀁, 𑀅𑀯𑀺𑀚𑁆𑀚𑀫𑀸𑀦𑀁 𑀯𑀸 𑀲𑀜𑁆𑀜𑀸𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀚𑀸𑀦𑀦𑀁. 𑀢𑀣𑀸 𑀳𑁂𑀲𑀸 𑀧𑀼𑀦 𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀓𑀭𑀡𑀭𑀲𑀸. 𑀫𑀢𑁆𑀢-𑀲𑀤𑁆𑀤𑁂𑀦 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁂𑀦 𑀯𑀺𑀚𑀸𑀦𑀦𑀧𑁆𑀧𑀚𑀸𑀦𑀦𑀸𑀓𑀸𑀭𑁂 𑀦𑀺𑀯𑀢𑁆𑀢𑁂𑀢𑀺, 𑀏𑀯-𑀓𑀸𑀭𑁂𑀦 𑀓𑀤𑀸𑀘𑀺𑀧𑀺 𑀇𑀫𑀺𑀲𑁆𑀲𑀸 𑀢𑁂 𑀯𑀺𑀲𑁂𑀲𑀸 𑀦 𑀲𑀦𑁆𑀢𑀺𑀬𑁂𑀯𑀸𑀢𑀺 𑀅𑀯𑀥𑀸𑀭𑁂𑀢𑀺. 𑀢𑁂𑀦𑀸𑀳 ‘‘𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥’’𑀦𑁆𑀢𑀺𑀆𑀤𑀺. ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀓𑀸𑀢𑀼𑀁 𑀦𑁂𑀯 𑀲𑀓𑁆𑀓𑁄𑀢𑀺, 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀜𑁆𑀜𑀸 𑀓𑀼𑀢𑁄 𑀧𑀜𑁆𑀜𑀸𑀓𑀺𑀘𑁆𑀘𑀁 𑀓𑀭𑁂𑀬𑁆𑀬𑀸𑀢𑀺 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺.

𑁧𑁧𑁭𑁬. 𑀯𑀺𑀜𑁆𑀜𑀸𑀡𑀁 𑀧𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀁 𑀦 𑀢𑀢𑁆𑀣 𑀲𑀜𑁆𑀜𑀸 𑀯𑀺𑀬 𑀦𑀻𑀮𑀧𑀻𑀢𑀸𑀤𑀺𑀓𑀲𑁆𑀲 𑀲𑀜𑁆𑀚𑀸𑀦𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀅𑀣 𑀔𑁄 𑀢𑀁 𑀢𑀢𑁆𑀣 𑀅𑀦𑀺𑀘𑁆𑀘𑀢𑀸𑀤𑀺𑀯𑀺𑀲𑁂𑀲𑀁, 𑀅𑀜𑁆𑀜𑀜𑁆𑀘 𑀢𑀸𑀤𑀺𑀲𑀁 𑀯𑀺𑀲𑁂𑀲𑀁 𑀚𑀸𑀦𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀡𑀁 𑀧𑀦𑀸’’𑀢𑀺𑀆𑀤𑀺. 𑀓𑀣𑀁 𑀧𑀦 𑀯𑀺𑀜𑁆𑀜𑀸𑀡𑀁 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀓𑀭𑁄𑀢𑀻𑀢𑀺? 𑀧𑀜𑁆𑀜𑀸𑀬 𑀤𑀲𑁆𑀲𑀺𑀢𑀫𑀕𑁆𑀕𑁂𑀦. 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀳𑀺 𑀅𑀦𑁂𑀓𑀯𑀸𑀭𑀁 𑀮𑀓𑁆𑀔𑀡𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸𑀬 𑀧𑀕𑀼𑀡𑀪𑀸𑀯𑀢𑁄 𑀧𑀭𑀺𑀘𑀬𑀯𑀲𑁂𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑀧𑀺 𑀯𑀺𑀧𑀲𑁆𑀲𑀦𑀸 𑀲𑀫𑁆𑀪𑀯𑀢𑀺, 𑀬𑀣𑀸 𑀢𑀁 𑀧𑀕𑀼𑀡𑀲𑁆𑀲 𑀕𑀦𑁆𑀣𑀲𑁆𑀲 𑀲𑀚𑁆𑀛𑀸𑀬𑀦𑁂 𑀜𑀸𑀬𑀸𑀕𑀢𑀸𑀧𑀺 𑀯𑀸𑀭𑀸 𑀦 𑀯𑀺𑀜𑁆𑀜𑀸𑀬𑀦𑁆𑀢𑀺. 𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀦𑁆𑀢𑀺 𑀘 𑀮𑀓𑁆𑀔𑀡𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀝𑀺𑀯𑀺𑀚𑁆𑀛𑀦𑀁.

𑁧𑁧𑁭𑁭. 𑀉𑀲𑁆𑀲𑀓𑁆𑀓𑀺𑀢𑁆𑀯𑀸𑀢𑀺 𑁨𑁨𑁦 𑀉𑀤𑀬𑀩𑁆𑀩𑀬𑀸𑀤𑀺𑀜𑀸𑀡𑀧𑀝𑀺𑀧𑀸𑀝𑀺𑀬𑀸 𑀆𑀭𑀪𑀺𑀢𑁆𑀯𑀸 𑀫𑀕𑁆𑀕𑀁 𑀧𑀸𑀧𑁂𑀢𑀼𑀫𑁂𑀯 𑀢𑀁 𑀯𑀺𑀜𑁆𑀜𑀸𑀡𑀁 𑀦 𑀲𑀓𑁆𑀓𑁄𑀢𑀺 𑀅𑀲𑀫𑁆𑀩𑁄𑀥𑀲𑀪𑀸𑀯𑀢𑁆𑀢𑀸. 𑀯𑀼𑀢𑁆𑀢𑀦𑀬𑀦𑁆𑀢𑀺 𑀯𑀺𑀜𑁆𑀜𑀸𑀡𑁂 𑀯𑀼𑀢𑁆𑀢𑀦𑀬𑀁. 𑀲𑀸 𑀳𑀺 𑀆𑀭𑀫𑁆𑀫𑀡𑀜𑁆𑀘 𑀚𑀸𑀦𑀸𑀢𑀺, 𑀮𑀓𑁆𑀔𑀡𑀜𑁆𑀘 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀢𑁆𑀢𑀦𑁄 𑀧𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀆𑀦𑀼𑀪𑀸𑀯𑁂𑀦 𑀫𑀕𑁆𑀕𑀁 𑀧𑀸𑀧𑁂𑀢𑀼𑀜𑁆𑀘 𑀲𑀓𑁆𑀓𑁄𑀢𑀺. 𑀩𑀸𑀮𑀕𑀸𑀫𑀺𑀓𑀳𑁂𑀭𑀜𑁆𑀜𑀺𑀓𑀸𑀦𑀁 𑀓𑀳𑀸𑀧𑀡𑀚𑀸𑀦𑀦𑀫𑀺𑀯 𑀘 𑀦𑁂𑀲𑀁 𑀆𑀭𑀫𑁆𑀫𑀡𑀚𑀸𑀦𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀳𑁂𑀭𑀜𑁆𑀜𑀺𑀓𑀨𑀮𑀓𑁂 𑀞𑀧𑀺𑀢𑀁 𑀓𑀳𑀸𑀧𑀡𑀭𑀸𑀲𑀺𑀁 𑀏𑀓𑁄 𑀅𑀲𑀜𑁆𑀚𑀸𑀢𑀯𑁄𑀳𑀸𑀭𑀩𑀼𑀤𑁆𑀥𑀺 𑀩𑀸𑀮𑀤𑀸𑀭𑀓𑁄, 𑀏𑀓𑁄 𑀕𑀸𑀫𑀺𑀓𑀧𑀼𑀭𑀺𑀲𑁄, 𑀏𑀓𑁄 𑀳𑁂𑀭𑀜𑁆𑀜𑀺𑀓𑁄𑀢𑀺 𑀢𑀻𑀲𑀼 𑀚𑀦𑁂𑀲𑀼 𑀧𑀲𑁆𑀲𑀫𑀸𑀦𑁂𑀲𑀼 𑀩𑀸𑀮𑀤𑀸𑀭𑀓𑁄 𑀓𑀳𑀸𑀧𑀡𑀸𑀦𑀁 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀤𑀻𑀖𑀭𑀲𑁆𑀲𑀘𑀢𑀼𑀭𑀲𑁆𑀲𑀧𑀭𑀺𑀫𑀡𑁆𑀟𑀮𑀪𑀸𑀯𑀫𑀢𑁆𑀢𑀫𑁂𑀯 𑀚𑀸𑀦𑀸𑀢𑀺, ‘‘𑀇𑀤𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀯𑀳𑀁 𑀭𑀢𑀦𑀲𑀫𑁆𑀫𑀢’’𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀕𑀸𑀫𑀺𑀓𑀧𑀼𑀭𑀺𑀲𑁄 𑀢𑀤𑀼𑀪𑀬𑀁 𑀚𑀸𑀦𑀸𑀢𑀺, ‘‘𑀅𑀬𑀁 𑀙𑁂𑀓𑁄 𑀫𑀳𑀸𑀲𑀸𑀭𑁄, 𑀅𑀬𑀁 𑀓𑀽𑀝𑁄, 𑀅𑀬𑀁 𑀅𑀟𑁆𑀠𑀲𑀸𑀭𑁄, 𑀅𑀬𑀁 𑀧𑀸𑀤𑀲𑀸𑀭𑁄’’𑀢𑀺𑀆𑀤𑀺𑀓𑀁 𑀧𑀦 𑀯𑀺𑀪𑀸𑀕𑀁 𑀦 𑀚𑀸𑀦𑀸𑀢𑀺. 𑀳𑁂𑀭𑀜𑁆𑀜𑀺𑀓𑁄 𑀲𑀩𑁆𑀩𑁂𑀧𑀺 𑀢𑁂 𑀧𑀓𑀸𑀭𑁂 𑀚𑀸𑀦𑀸𑀢𑀺, 𑀚𑀸𑀦𑀦𑁆𑀢𑁄 𑀘 𑀑𑀮𑁄𑀓𑁂𑀢𑁆𑀯𑀸𑀧𑀺 𑀚𑀸𑀦𑀸𑀢𑀺, 𑀆𑀓𑁄𑀝𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸𑀧𑀺 𑀚𑀸𑀦𑀸𑀢𑀺, 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸𑀧𑀺 𑀭𑀲𑀁 𑀲𑀸𑀬𑀺𑀢𑁆𑀯𑀸𑀧𑀺 𑀳𑀢𑁆𑀣𑁂𑀦 𑀥𑀸𑀭𑀬𑀺𑀢𑁆𑀯𑀸𑀧𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀦𑀕𑀭𑁂 𑀯𑀸 𑀧𑀩𑁆𑀩𑀢𑁂 𑀯𑀸 𑀦𑀤𑀻𑀢𑀻𑀭𑁂 𑀯𑀸 𑀓𑀢𑁄’’𑀢𑀺𑀧𑀺 ‘‘𑀅𑀲𑀼𑀓𑀆𑀘𑀭𑀺𑀬𑁂𑀦 𑀓𑀢𑁄’’𑀢𑀺𑀧𑀺 𑀚𑀸𑀦𑀸𑀢𑀺. 𑀢𑀢𑁆𑀣 𑀲𑀜𑁆𑀜𑀸 𑀅𑀲𑀜𑁆𑀚𑀸𑀢𑀯𑁄𑀳𑀸𑀭𑀩𑀼𑀤𑁆𑀥𑀺𑀦𑁄 𑀩𑀸𑀮𑀤𑀸𑀭𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀁 𑀯𑀺𑀬 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀧𑀺𑀡𑁆𑀟𑀯𑀲𑁂𑀦𑁂𑀯 𑀆𑀭𑀫𑁆𑀫𑀡𑀁 𑀕𑀡𑁆𑀳𑀸𑀢𑀺 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀉𑀧𑀝𑁆𑀞𑀸𑀦𑀸𑀓𑀸𑀭𑀕𑁆𑀕𑀳𑀡𑀢𑁄, 𑀯𑀺𑀜𑁆𑀜𑀸𑀡𑀁 𑀕𑀸𑀫𑀺𑀓𑀧𑀼𑀭𑀺𑀲𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀫𑀺𑀯 𑀏𑀓𑀘𑁆𑀘𑀯𑀺𑀲𑁂𑀲𑀕𑁆𑀕𑀳𑀡𑀲𑀫𑀢𑁆𑀣𑀢𑀸𑀬, 𑀧𑀜𑁆𑀜𑀸 𑀅𑀦𑀯𑀲𑁂𑀲𑀕𑁆𑀕𑀳𑀡𑀲𑀫𑀢𑁆𑀣𑀢𑀸𑀬 𑀳𑁂𑀭𑀜𑁆𑀜𑀺𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀫𑀺𑀯 𑀤𑀝𑁆𑀞𑀩𑁆𑀩𑀸𑀢𑀺.

𑁧𑁧𑁭𑁮-𑁮𑁦. 𑀲𑀪𑀸𑀯𑀧𑀝𑀺𑀯𑁂𑀥𑀦𑀦𑁆𑀢𑀺 𑀲𑀓𑁄 𑀪𑀸𑀯𑁄, 𑀲𑀫𑀸𑀦𑁄 𑀯𑀸 𑀪𑀸𑀯𑁄 𑀲𑀪𑀸𑀯𑁄, 𑀢𑀲𑁆𑀲 𑀧𑀝𑀺𑀯𑁂𑀥𑀦𑀁 𑀜𑀸𑀢𑀧𑀭𑀺𑀜𑁆𑀜𑀸𑀢𑀻𑀭𑀡𑀧𑀭𑀺𑀜𑁆𑀜𑀸𑀯𑀲𑁂𑀦 𑀲𑀪𑀸𑀯𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀝𑀺𑀯𑁂𑀥𑀦𑀁. 𑀖𑀝𑀧𑀝𑀸𑀤𑀺𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀩𑀸𑀳𑀺𑀭𑀦𑁆𑀥𑀓𑀸𑀭𑀲𑁆𑀲 𑀤𑀻𑀧𑀸𑀮𑁄𑀓𑁄 𑀯𑀺𑀬 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀯𑀺𑀤𑁆𑀥𑀁𑀲𑀦𑀭𑀲𑀸. 𑀉𑀧𑁆𑀧𑀚𑁆𑀚𑀫𑀸𑀦𑁄𑀬𑁂𑀯 𑀳𑀺 𑀜𑀸𑀡𑀸𑀮𑁄𑀓𑁄 𑀳𑀤𑀬𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀲𑀫𑁆𑀫𑁄𑀳𑀦𑀦𑁆𑀥𑀓𑀸𑀭𑀲𑁆𑀲, 𑀯𑀺𑀤𑁆𑀥𑀁𑀲𑀦𑀭𑀲𑀸 𑀫𑀢𑀸’’𑀢𑀺. 𑀢𑀢𑁄𑀬𑁂𑀯 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀓𑀸𑀭𑀡𑀪𑀽𑀢𑀸 𑀯𑀸 𑀲𑀬𑀁 𑀨𑀮𑀪𑀽𑀢𑀁 𑀅𑀲𑀫𑁆𑀫𑁄𑀳𑀁 𑀧𑀘𑁆𑀘𑀼𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀆𑀳 ‘‘𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑀫𑀸𑀥𑀺 𑀢𑀲𑁆𑀲𑀸 𑀧𑀤𑀝𑁆𑀞𑀸𑀦𑀁. 𑀢𑀣𑀸 𑀳𑀺 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁪.𑁯𑁯; 𑁫.𑁧𑁦𑁭𑁧; 𑀅. 𑀦𑀺. 𑁧𑁧.𑁨) 𑀲𑀼𑀢𑁆𑀢𑀧𑀤𑀦𑁆𑀢𑀺 𑀆𑀳 ‘‘𑀲𑀫𑀸𑀥𑀸𑀲𑀦𑁆𑀦𑀓𑀸𑀭𑀡𑀸’’𑀢𑀺.

𑁧𑁧𑁮𑁧-𑁨. 𑀥𑀫𑁆𑀫𑀲𑀪𑀸𑀯𑀧𑀝𑀺𑀯𑁂𑀥𑁄 𑀦𑀸𑀫 𑀧𑀜𑁆𑀜𑀸𑀬 𑀆𑀯𑁂𑀡𑀺𑀓𑁄 𑀲𑀪𑀸𑀯𑁄, 𑀦 𑀢𑁂𑀦𑀲𑁆𑀲𑀸 𑀓𑁄𑀘𑀺 𑀯𑀺𑀪𑀸𑀕𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀮𑀓𑁆𑀔𑀡𑁂𑀦𑁂𑀓𑀥𑀸 𑀯𑀼𑀢𑁆𑀢𑀸’’𑀢𑀺. 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄 𑀯𑀼𑀘𑁆𑀘𑀢𑀺 𑀯𑀝𑁆𑀝𑀁, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀮𑁄𑀓𑁂 𑀦𑀺𑀬𑀼𑀢𑁆𑀢𑀸, 𑀢𑀢𑁆𑀣 𑀯𑀸 𑀯𑀺𑀤𑀺𑀢𑀸𑀢𑀺 𑀮𑁄𑀓𑀺𑀓𑀸. 𑀢𑀢𑁆𑀣 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀮𑁄𑀓𑀺𑀓𑀸. 𑀓𑀢𑀫𑀸 𑀧𑀦𑁂𑀢𑁆𑀣 𑀮𑁄𑀓𑀺𑀬𑀸, 𑀓𑀢𑀫𑀸 𑀮𑁄𑀓𑀼𑀢𑁆𑀢𑀭𑀸 𑀘𑀸𑀢𑀺 𑀆𑀳 ‘‘𑀮𑁄𑀓𑀺𑀬𑁂𑀦𑀸’’𑀢𑀺𑀆𑀤𑀺. 𑀮𑁄𑀓𑀺𑀬𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀮𑁄𑀓𑀺𑀬𑁂𑀦 𑀫𑀕𑁆𑀕𑁂𑀦 𑀬𑀼𑀢𑁆𑀢𑀸. 𑀯𑀺𑀲𑁂𑀲𑀢𑁄 𑀧𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀆𑀤𑀺𑀯𑀺𑀲𑀼𑀤𑁆𑀥𑀺𑀘𑀢𑀼𑀓𑁆𑀓𑀲𑀗𑁆𑀕𑀳𑀺𑀢𑀫𑀕𑁆𑀕𑀲𑀁𑀬𑀼𑀢𑁆𑀢𑀸 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀸 𑀧𑀜𑁆𑀜𑀸 𑀢𑀤𑁂𑀓𑀤𑁂𑀲𑁂𑀲𑀼𑀧𑀺 𑀧𑀯𑀢𑁆𑀢𑀢𑀻𑀢𑀺 𑀫𑀕𑁆𑀕-𑀕𑁆𑀕𑀳𑀡𑀁 𑀓𑀢𑀁, 𑀧𑀘𑁆𑀘𑁂𑀓𑀫𑁆𑀧𑀺 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀫𑀕𑁆𑀕𑀲𑀫𑀜𑁆𑀜𑀸𑀢𑀺 𑀓𑀢𑁆𑀯𑀸. 𑀮𑁄𑀓𑀢𑁄 𑀉𑀢𑁆𑀢𑀭𑀸 𑀉𑀢𑁆𑀢𑀺𑀡𑁆𑀡𑀸𑀢𑀺 𑀮𑁄𑀓𑀼𑀢𑁆𑀢𑀭𑀸. 𑀮𑁄𑀓𑀼𑀢𑁆𑀢𑀭𑀸𑀧𑀺 𑀳𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸, 𑀯𑀺𑀧𑀲𑁆𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀮𑀩𑁆𑀪𑀢𑁂𑀯𑀸𑀢𑀺 𑀮𑁄𑀓𑀼𑀢𑁆𑀢𑀭-𑀕𑁆𑀕𑀳𑀡𑀁 𑀦 𑀯𑀺𑀭𑀼𑀚𑁆𑀛𑀢𑀺. 𑀢𑁂𑀦𑀸𑀳 ‘‘𑀮𑁄𑀓𑀼𑀢𑁆𑀢𑀭𑁂𑀦𑀸’’𑀢𑀺𑀆𑀤𑀺. 𑀲𑀼𑀢𑀫𑀬𑀸𑀤𑀺𑀢𑁄𑀢𑀺𑀆𑀤𑀺𑀕𑁆𑀕𑀳𑀡𑁂𑀦 𑀪𑀸𑀯𑀦𑀸𑀫𑀬𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁧𑁮𑁩-𑁫. 𑀅𑀢𑁆𑀢𑀦𑁄𑀯 𑀘𑀺𑀦𑁆𑀢𑀸𑀬𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀦𑀯𑀚𑁆𑀚𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀦𑁂 𑀧𑀭𑁄𑀧𑀤𑁂𑀲𑁂𑀦 𑀯𑀺𑀦𑀸 𑀅𑀢𑁆𑀢𑀦𑁄 𑀉𑀧𑀸𑀬𑀘𑀺𑀦𑁆𑀢𑀸𑀯𑀲𑁂𑀦𑁂𑀯. 𑀪𑀽𑀭𑀺𑀧𑀜𑁆𑀜𑁂𑀦𑀸𑀢𑀺 𑀫𑀳𑀸𑀧𑀜𑁆𑀜𑁂𑀦, 𑀧𑀢𑁆𑀣𑀝𑀢𑀸𑀬 𑀧𑀣𑀯𑀻𑀲𑀫𑀸𑀦𑀧𑀜𑁆𑀜𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀢𑁄 𑀧𑀦 𑀲𑀼𑀢𑁆𑀯𑀸𑀦𑀸𑀢𑀺 𑀧𑀭𑀢𑁄 𑀉𑀧𑀤𑁂𑀲𑀁 𑀲𑀼𑀢𑁆𑀯𑀸. 𑀲𑀼𑀢𑁂𑀦𑁂𑀯 𑀘 𑀦𑀺𑀧𑁆𑀨𑀦𑁆𑀦𑀸𑀢𑀺 𑀅𑀦𑁆𑀢𑁄𑀕𑀢𑀳𑁂𑀢𑁆𑀯𑀢𑁆𑀣𑀫𑀺𑀤𑀁 𑀯𑀺𑀲𑁂𑀲𑀦𑀁, 𑀲𑀼𑀢𑁂𑀦𑁂𑀯 𑀦𑀺𑀧𑁆𑀨𑀦𑁆𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀲𑀼𑀢𑁂𑀦 𑀯𑀸’’𑀢𑀺 𑀯𑀸 𑀧𑀸𑀞𑁄. 𑀬𑀣𑀸 𑀯𑀸𑀧𑀺 𑀢𑀣𑀸 𑀯𑀸𑀢𑀺 𑀧𑀭𑀢𑁄 𑀲𑀼𑀢𑁆𑀯𑀸 𑀯𑀸 𑀅𑀲𑀼𑀢𑁆𑀯𑀸 𑀯𑀸. 𑀅𑀧𑁆𑀧𑀦𑀸𑀧𑀢𑁆𑀢𑀸𑀢𑀺 𑀇𑀤𑀁 𑀲𑀺𑀔𑀸𑀧𑀢𑁆𑀢𑀁 𑀪𑀸𑀯𑀦𑀸𑀫𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀦 𑀧𑀦 𑀅𑀧𑁆𑀧𑀦𑀸𑀧𑀢𑁆𑀢𑀸𑀯 𑀪𑀸𑀯𑀦𑀸𑀫𑀬𑀸𑀢𑀺. 𑀢𑀺𑀲𑁆𑀲𑁄𑀧𑀺 𑀧𑀦𑁂𑀢𑀸 𑀧𑀜𑁆𑀜𑀸 𑀧𑀸𑀴𑀺𑀯𑀲𑁂𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋

‘‘𑀢𑀢𑁆𑀣 𑀓𑀢𑀫𑀸 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸? 𑀬𑁄𑀕𑀯𑀺𑀳𑀺𑀢𑁂𑀲𑀼 𑀯𑀸 𑀓𑀫𑁆𑀫𑀸𑀬𑀢𑀦𑁂𑀲𑀼 𑀬𑁄𑀕𑀯𑀺𑀳𑀺𑀢𑁂𑀲𑀼 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀲𑀼 𑀬𑁄𑀕𑀯𑀺𑀳𑀺𑀢𑁂𑀲𑀼 𑀯𑀸 𑀯𑀺𑀚𑁆𑀚𑀸𑀞𑀸𑀦𑁂𑀲𑀼 𑀓𑀫𑁆𑀫𑀲𑁆𑀲𑀓𑀢𑀁 𑀯𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀯𑀸 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸, 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸, 𑀬𑀁 𑀏𑀯𑀭𑀽𑀧𑀁 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀤𑀺𑀝𑁆𑀞𑀺𑀁 𑀭𑀼𑀘𑀺𑀁 𑀫𑀼𑀤𑀺𑀁 𑀧𑁂𑀓𑁆𑀔𑀁 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁 𑀧𑀭𑀢𑁄 𑀅𑀲𑀼𑀢𑁆𑀯𑀸 𑀧𑀝𑀺𑀮𑀪𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸. 𑀢𑀢𑁆𑀣 𑀓𑀢𑀫𑀸 𑀲𑀼𑀢𑀫𑀬𑀸 𑀧𑀜𑁆𑀜𑀸…𑀧𑁂… 𑀲𑀼𑀢𑁆𑀯𑀸 𑀧𑀝𑀺𑀮𑀪𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀼𑀢𑀫𑀬𑀸 𑀧𑀜𑁆𑀜𑀸. 𑀲𑀩𑁆𑀩𑀸𑀧𑀺 𑀲𑀫𑀸𑀧𑀦𑁆𑀦𑀲𑁆𑀲 𑀧𑀜𑁆𑀜𑀸 𑀪𑀸𑀯𑀦𑀸𑀫𑀬𑀸 𑀧𑀜𑁆𑀜𑀸’’𑀢𑀺 (𑀯𑀺𑀪. 𑁭𑁬𑁮).

𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀓𑀫𑁆𑀫𑀸𑀬𑀢𑀦𑀸𑀤𑀺𑀯𑀲𑁂𑀦 𑀘𑀺𑀦𑁆𑀢𑀸𑀫𑀬𑀲𑀼𑀢𑀫𑀬𑀧𑀜𑁆𑀜𑀸 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀪𑀸𑀯𑀦𑀸𑀫𑀬𑀧𑀜𑁆𑀜𑀸 𑀘 𑀯𑀼𑀢𑁆𑀢𑀸, 𑀇𑀥 𑀧𑀦 𑀅𑀦𑁆𑀢𑀺𑀫𑀪𑀯𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀫𑁂𑀯 𑀮𑀩𑁆𑀪𑀫𑀸𑀦𑀸 𑀘𑀺𑀦𑁆𑀢𑀸𑀫𑀬𑀪𑀽𑀢𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀸 𑀧𑀜𑁆𑀜𑀸, 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀅𑀯𑀲𑁂𑀲𑀫𑀳𑀸𑀧𑀜𑁆𑀜𑀸𑀦𑀁 𑀮𑀩𑁆𑀪𑀫𑀸𑀦𑀸 𑀲𑀼𑀢𑀫𑀬𑀸 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀸 𑀧𑀜𑁆𑀜𑀸, 𑀮𑁄𑀓𑀼𑀢𑁆𑀢𑀭𑀧𑁆𑀧𑀦𑀸𑀧𑀢𑁆𑀢𑀸𑀧𑀺 𑀪𑀸𑀯𑀦𑀸𑀫𑀬𑀧𑀜𑁆𑀜𑀸𑀯 𑀅𑀥𑀺𑀧𑁆𑀧𑁂𑀢𑀸.

𑁧𑁧𑁮𑁬. 𑀧𑀝𑀺𑀲𑀫𑁆𑀪𑀺𑀤𑀸𑀘𑀢𑀼𑀓𑁆𑀓𑀲𑁆𑀲𑀸𑀢𑀺 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀲𑀗𑁆𑀔𑀸𑀢𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸𑀘𑀢𑀼𑀓𑁆𑀓𑀲𑁆𑀲 𑀯𑀲𑁂𑀦. 𑀦𑀦𑀼 𑀘𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸, 𑀓𑀲𑁆𑀫𑀸 𑀧𑀝𑀺𑀲𑀫𑁆𑀪𑀺𑀤𑀸 𑀆𑀳𑀝𑀸𑀢𑀺? 𑀯𑀺𑀧𑀲𑁆𑀲𑀓𑀸𑀦𑀁 𑀜𑀸𑀡𑀧𑀸𑀝𑀯𑀢𑁆𑀣𑀁 𑀧𑀜𑁆𑀜𑀸𑀧𑁆𑀧𑀪𑁂𑀤𑁂 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑀜𑁆𑀜𑀸𑀧𑀺 𑀯𑀢𑁆𑀢𑀼𑀓𑀸𑀫𑀢𑀸𑀬, 𑀧𑀝𑀺𑀲𑀫𑁆𑀪𑀺𑀤𑀸𑀧𑀜𑁆𑀜𑀸𑀬 𑀯𑀸 𑀯𑀺𑀧𑀲𑁆𑀲𑀦𑀸𑀨𑀮𑀪𑀽𑀢𑀢𑁆𑀢𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀥𑀺𑀓𑀸𑀭𑁂 𑀯𑀸 𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀬 𑀲𑀳 𑀧𑀸𑀧𑀼𑀡𑀺𑀢𑀩𑁆𑀩𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀜𑁆𑀜𑀫𑁆𑀧𑀺 𑀯𑀢𑁆𑀢𑀼𑀓𑀸𑀫𑀢𑀸𑀬 𑀇𑀥𑁂𑀯 𑀯𑀼𑀢𑁆𑀢𑀸𑀢𑀺. 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀦𑁆𑀢𑀺 ‘‘𑀅𑀢𑁆𑀣𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁮) 𑀏𑀯𑀫𑀸𑀕𑀢𑀁 𑀅𑀢𑁆𑀣𑀸𑀤𑀻𑀲𑀼 𑀢𑀻𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡𑀢𑁆𑀢𑀬𑀁. 𑀢𑀻𑀲𑀼𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀢𑀻𑀲𑀼𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑁂𑀲𑀼 𑀕𑁄𑀘𑀭𑀓𑀺𑀘𑁆𑀘𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀪𑀽𑀫𑀺𑀆𑀤𑀺𑀯𑀲𑁂𑀦 𑀢𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻𑀢𑀺 𑀏𑀯𑀁 𑀧𑀪𑁂𑀤𑀕𑀢𑀁 𑀜𑀸𑀡𑀁, 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀯𑀲𑁂𑀦 𑀯𑀸 𑀢𑀻𑀲𑀼 𑀜𑀸𑀡𑁂𑀲𑀼 𑀜𑀸𑀡𑀁. 𑀧𑀝𑀺𑀲𑀫𑁆𑀪𑀺𑀤𑀸𑀭𑀫𑁆𑀫𑀡𑀫𑁆𑀧𑀺 𑀳𑀺 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀳𑁄𑀢𑀺. 𑀢𑁂𑀦𑁂𑀯 𑀘 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀧𑀸𑀴𑀺𑀬𑀁 ‘‘𑀜𑀸𑀡𑁂𑀲𑀼 𑀜𑀸𑀡’’𑀦𑁆𑀢𑀺, 𑀅𑀝𑁆𑀞𑀓𑀣𑀸𑀬 𑀘 ‘‘𑀲𑀩𑁆𑀩𑀢𑁆𑀣𑀓𑀜𑀸𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀪𑁂𑀤𑀕𑀢𑀁 𑀜𑀸𑀡’’𑀦𑁆𑀢𑀺 (𑀯𑀺𑀪. 𑀅𑀝𑁆𑀞. 𑁭𑁧𑁮) 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀫𑀳𑀕𑁆𑀕𑀢𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀲𑁆𑀲 𑀅𑀪𑀸𑀯𑁂𑀧𑀺 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸𑀢𑀺 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀢𑀸𑀧𑀺 𑀧𑀜𑁆𑀳𑀸𑀧𑀼𑀘𑁆𑀙𑀓𑀧𑀸𑀴𑀺𑀬𑀁 𑀯𑀼𑀢𑁆𑀢𑀸.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀦 𑁋

‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸, 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀬𑀸𑀬 𑀦𑀺𑀭𑀼𑀢𑁆𑀢𑀺𑀬𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸. 𑀬𑁂𑀦 𑀜𑀸𑀡𑁂𑀦 𑀢𑀸𑀦𑀺 𑀜𑀸𑀡𑀸𑀦𑀺 𑀚𑀸𑀦𑀸𑀢𑀺 ‘𑀇𑀫𑀸𑀦𑀺 𑀜𑀸𑀡𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻’𑀢𑀺, 𑀢𑁂𑀲𑀼 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁨𑁫) 𑁋

𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑁆𑀓𑀫𑁂𑀦 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸 𑀲𑀸𑀯𑀲𑁂𑀲𑁄 𑀧𑀸𑀞𑁄 𑀓𑀢𑁄. 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀗𑁆𑀕𑀳𑀺𑀢𑁂 𑀅𑀢𑁆𑀣𑁂 𑀅𑀲𑁂𑀲𑁂𑀢𑁆𑀯𑀸 𑀤𑁂𑀲𑀦𑀸 𑀳𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀯𑀢𑁆𑀢𑀸, 𑀦 𑀲𑀩𑁆𑀩𑀜𑁂𑀬𑁆𑀬𑁂𑀢𑀺 𑀬𑀣𑀸𑀤𑀲𑁆𑀲𑀺𑀢𑀯𑀺𑀲𑀬𑀯𑀘𑀦𑀯𑀲𑁂𑀦 ‘‘𑀬𑁂𑀦 𑀜𑀸𑀡𑁂𑀦 𑀢𑀸𑀦𑀺 𑀜𑀸𑀡𑀸𑀦𑀺 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀢𑀁 𑀅𑀜𑁆𑀜𑀸𑀭𑀫𑁆𑀫𑀡𑀢𑀁 𑀧𑀝𑀺𑀲𑁂𑀥𑁂𑀢𑀺 𑀤𑁂𑀲𑀦𑀸𑀬 𑀅𑀢𑀧𑁆𑀧𑀭𑀪𑀸𑀯𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀸𑀦𑁂, 𑀅𑀦𑀸𑀕𑀢𑁂𑀧𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑀅𑀢𑀻𑀢𑀸𑀭𑀫𑁆𑀫𑀡𑀸𑀢𑀺𑀧𑀺 𑀅𑀦𑀸𑀕𑀢𑀸𑀭𑀫𑁆𑀫𑀡𑀸𑀢𑀺𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀢𑀺𑀧𑀻𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀏𑀢𑁆𑀣 𑀘 𑀅𑀢𑁆𑀣𑁄𑀢𑀺 𑀲𑀗𑁆𑀔𑁂𑀧𑀢𑁄 𑀳𑁂𑀢𑀼𑀨𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀳𑁂𑀢𑀼𑀨𑀮𑀜𑁆𑀳𑀺 𑀬𑀲𑁆𑀫𑀸 𑀳𑁂𑀢𑀼𑀅𑀦𑀼𑀲𑀸𑀭𑁂𑀦 𑀅𑀭𑀻𑀬𑀢𑀺 𑀅𑀥𑀺𑀕𑀫𑀻𑀬𑀢𑀺 𑀲𑀫𑁆𑀧𑀸𑀧𑀼𑀡𑀻𑀬𑀢𑀺, 𑀢𑀲𑁆𑀫𑀸 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑁄𑀢𑀺𑀧𑀺 𑀲𑀗𑁆𑀔𑁂𑀧𑀢𑁄 𑀧𑀘𑁆𑀘𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁄 𑀳𑀺 𑀬𑀲𑁆𑀫𑀸 𑀢𑀁 𑀢𑀁 𑀤𑀳𑀢𑀺 𑀧𑀯𑀢𑁆𑀢𑁂𑀢𑀺, 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀯𑀸 𑀥𑀸𑀭𑁂𑀢𑀺, 𑀢𑀲𑁆𑀫𑀸 𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑀼𑀢𑁆𑀢𑀻𑀢𑀺 𑀲𑀢𑁆𑀢𑀸𑀦𑀁 𑀫𑀽𑀮𑀪𑀸𑀲𑀸𑀪𑀽𑀢𑀸 𑀫𑀸𑀕𑀥𑀺𑀓𑀪𑀸𑀲𑀸, 𑀬𑀸𑀬 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸 𑀳𑁄𑀢𑀺. 𑀧𑀝𑀺𑀪𑀸𑀦𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀜𑀸𑀡𑀢𑁆𑀢𑀬𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀪𑀺𑀥𑀫𑁆𑀫𑁂 ‘‘𑀤𑀼𑀓𑁆𑀔𑁂 𑀜𑀸𑀡𑀁…𑀧𑁂… 𑀢𑀲𑁆𑀲 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀺.

𑁧𑁧𑁮𑁭. 𑀬𑀲𑁆𑀫𑀸 𑀧𑀦𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄𑀯, 𑀧𑀪𑁂𑀤𑀯𑀲𑁂𑀦 𑀘 𑀯𑀼𑀘𑁆𑀘𑀫𑀸𑀦𑁄 𑀧𑀸𑀓𑀝𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀲𑀗𑁆𑀕𑀳𑁂𑀢𑁆𑀯𑀸 𑀧𑀪𑁂𑀤𑀢𑁄𑀯 𑀅𑀢𑁆𑀣𑀸𑀤𑀺𑀓𑁂 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀳𑁂𑀢𑀸𑀤𑀺𑀧𑀘𑁆𑀘𑀬𑀢𑁄 𑀲𑀫𑀼𑀧𑁆𑀧𑀦𑁆𑀦𑀁. 𑀢𑀁 𑀧𑀦 ‘‘𑀇𑀤𑀁 𑀇𑀢𑁄 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀏𑀯𑀁 𑀳𑁂𑀢𑀼𑀅𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑀫𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀁, 𑀢𑀣𑀸 𑀓𑀼𑀲𑀮𑀸𑀓𑀼𑀲𑀮𑀨𑀮𑀪𑀽𑀢𑀸 𑀯𑀺𑀧𑀸𑀓𑀸 𑀅𑀩𑁆𑀬𑀸𑀧𑀸𑀭𑀲𑀦𑁆𑀢𑀺𑀯𑀲𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑀸, 𑀲𑁂𑀲𑀸 𑀅𑀩𑁆𑀬𑀸𑀧𑀸𑀭𑀪𑀽𑀢𑀸 𑀓𑀺𑀭𑀺𑀬𑀸 𑀥𑀫𑁆𑀫𑀸 𑀅𑀯𑀺𑀧𑀸𑀓𑀲𑀦𑁆𑀢𑀺𑀯𑀲𑁂𑀦, 𑀅𑀲𑀗𑁆𑀔𑀢𑀁 𑀦𑀺𑀲𑁆𑀲𑀭𑀡𑀪𑀽𑀢𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀼𑀢𑀺𑀲𑀦𑁆𑀢𑀺𑀯𑀲𑁂𑀦, 𑀩𑀼𑀤𑁆𑀥𑀯𑀘𑀦𑀢𑁆𑀣𑀪𑀽𑀢𑁄 𑀔𑀦𑁆𑀥𑀸𑀤𑀺𑀧𑀭𑀫𑀢𑁆𑀣𑀥𑀫𑁆𑀫𑁄 𑀇𑀫𑀸𑀬 𑀅𑀬𑀁 𑀤𑀻𑀧𑀺𑀢𑁄𑀢𑀺 𑀏𑀯𑀁 𑀧𑀸𑀴𑀺𑀅𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑁄𑀯 𑀅𑀢𑁆𑀣𑀲𑀫𑀜𑁆𑀜𑀁 𑀮𑀪𑀢𑀻𑀢𑀺 𑀆𑀳 ‘‘𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀳𑁂𑀢𑀼𑀨𑀮𑀁, 𑀪𑀸𑀲𑀺𑀢𑀢𑁆𑀣𑁄 𑀘 𑀲𑀓𑀲𑀓𑀳𑁂𑀢𑀼𑀧𑀝𑀺𑀩𑀤𑁆𑀥𑁄, 𑀪𑀸𑀲𑀺𑀢𑀧𑀝𑀺𑀩𑀤𑁆𑀥𑁄 𑀘 𑀯𑀺𑀜𑁆𑀜𑀸𑀬𑀢𑀻𑀢𑀺 𑀧𑀭𑀺𑀬𑀸𑀬𑀢𑁄, 𑀲𑁂𑀲𑀁 𑀲𑀓𑀲𑀓𑀪𑀸𑀯𑀯𑀲𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀅𑀢𑁆𑀣𑁄 𑀦𑀸𑀫. 𑀢𑀢𑁆𑀣 𑀧𑀭𑀺𑀬𑀸𑀬𑀢𑁆𑀣𑁄 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀲𑁂𑀦 𑀯𑀼𑀢𑁆𑀢𑁄, 𑀦𑀺𑀧𑁆𑀧𑀭𑀺𑀬𑀸𑀬𑀢𑁆𑀣𑁄 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀪𑀸𑀲𑀺𑀢𑀦𑁆𑀢𑀺 𑀧𑀸𑀴𑀺𑀥𑀫𑁆𑀫𑀫𑀸𑀳. 𑀲𑁂𑀲𑀁 𑀅𑀢𑁆𑀣𑀧𑀜𑁆𑀘𑀓𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸𑀭𑀳𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀘 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀩𑁆𑀩𑁄 𑀅𑀢𑁆𑀣𑁄, 𑀪𑀸𑀲𑀺𑀢𑀢𑁆𑀣𑁄 𑀜𑀸𑀧𑁂𑀢𑀩𑁆𑀩𑁄 𑀅𑀢𑁆𑀣𑁄, 𑀇𑀢𑀭𑁄 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑁄 𑀅𑀢𑁆𑀣𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺 𑀅𑀢𑁆𑀣𑁄. 𑀫𑀕𑁆𑀕𑁄 𑀲𑀫𑁆𑀧𑀸𑀧𑀓𑁄 𑀳𑁂𑀢𑀼, 𑀪𑀸𑀲𑀺𑀢𑀁 𑀜𑀸𑀧𑀓𑁄 𑀳𑁂𑀢𑀼, 𑀇𑀢𑀭𑀁 𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀽𑀢𑀺 𑀏𑀯𑀁 𑀢𑀺𑀯𑀺𑀥𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀭𑀺𑀬𑀸𑀥𑀫𑁆𑀫𑀸𑀦𑀜𑁆𑀘𑁂𑀢𑁆𑀣 𑀅𑀯𑀺𑀧𑀸𑀓𑀢𑀸𑀬 𑀥𑀫𑁆𑀫𑀪𑀸𑀯𑁄 𑀦 𑀯𑀼𑀢𑁆𑀢𑁄. 𑀬𑀤𑀺 𑀏𑀯𑀁 𑀯𑀺𑀧𑀸𑀓𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑀪𑀸𑀯𑁄 𑀦 𑀯𑀢𑁆𑀢𑀩𑁆𑀩𑁄? 𑀦, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀢𑁄. 𑀏𑀯𑀁 𑀲𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑁆𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀢𑁆𑀣𑀪𑀸𑀯𑁄 𑀆𑀧𑀚𑁆𑀚𑀢𑀺? 𑀦𑀸𑀬𑀁 𑀤𑁄𑀲𑁄 𑀅𑀧𑁆𑀧𑀝𑀺𑀲𑀺𑀤𑁆𑀥𑀢𑁆𑀢𑀸. 𑀯𑀺𑀧𑀸𑀓𑀲𑁆𑀲 𑀧𑀦 𑀧𑀥𑀸𑀦𑀳𑁂𑀢𑀼𑀢𑀸𑀬 𑀧𑀸𑀓𑀝𑀪𑀸𑀯𑀢𑁄 𑀥𑀫𑁆𑀫𑀪𑀸𑀯𑁄 𑀏𑀯 𑀢𑁂𑀲𑀁 𑀯𑀼𑀢𑁆𑀢𑁄, 𑀓𑀺𑀭𑀺𑀬𑀸𑀦𑀁 𑀧𑀘𑁆𑀘𑀬𑀪𑀸𑀯𑀸 𑀥𑀫𑁆𑀫𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦𑀸𑀬𑀁 𑀤𑁄𑀲𑁄 𑀅𑀧𑁆𑀧𑀝𑀺𑀲𑀺𑀤𑁆𑀥𑀢𑁆𑀢𑀸. 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀲𑁆𑀲 𑀧𑀦 𑀳𑁂𑀢𑀼𑀪𑀸𑀯𑀸𑀪𑀸𑀯𑀢𑁄 𑀥𑀫𑁆𑀫𑀪𑀸𑀯𑁄 𑀦 𑀬𑀼𑀢𑁆𑀢𑁄𑀢𑀺. 𑀅𑀧𑀺𑀘 ‘‘𑀅𑀬𑀁 𑀇𑀫𑀲𑁆𑀲 𑀧𑀘𑁆𑀘𑀬𑁄, 𑀅𑀬𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄’’𑀢𑀺 𑀏𑀯𑀁 𑀪𑁂𑀤𑀫𑀓𑀢𑁆𑀯𑀸 𑀓𑁂𑀯𑀮𑀁 𑀓𑀼𑀲𑀮𑀸𑀓𑀼𑀲𑀮𑁂 𑀯𑀺𑀧𑀸𑀓𑀓𑀺𑀭𑀺𑀬𑀥𑀫𑁆𑀫𑁂 𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀥𑀫𑁆𑀫𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀦 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀅𑀢𑁆𑀣𑀥𑀫𑁆𑀫𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁧𑁮𑁯. 𑀲𑀪𑀸𑀯𑀦𑀺𑀭𑀼𑀢𑁆𑀢𑀻𑀢𑀺 𑀅𑀯𑀺𑀧𑀭𑀻𑀢𑀦𑀺𑀭𑀼𑀢𑁆𑀢𑀺, 𑀅𑀯𑀺𑀧𑀭𑀻𑀢𑀦𑀺𑀭𑀼𑀢𑁆𑀢𑀻𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀩𑁄𑀥𑀦𑁂 𑀲𑀩𑁆𑀩𑀓𑀸𑀮𑀁 𑀧𑀝𑀺𑀦𑀺𑀬𑀢𑀲𑀫𑁆𑀩𑀦𑁆𑀥𑁄 𑀅𑀩𑁆𑀬𑀪𑀺𑀘𑀸𑀭𑀯𑁄𑀳𑀸𑀭𑁄 𑀫𑀸𑀕𑀥𑀪𑀸𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸 𑀳𑀺 𑀲𑀩𑁆𑀩𑀓𑀸𑀮𑀁 𑀧𑀝𑀺𑀦𑀺𑀬𑀢𑀲𑀫𑁆𑀩𑀦𑁆𑀥𑁄, 𑀇𑀢𑀭𑀸 𑀪𑀸𑀲𑀸 𑀧𑀦 𑀓𑀸𑀮𑀦𑁆𑀢𑀭𑁂𑀦 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀅𑀢𑁆𑀣𑀢𑁄 𑀧𑀦𑁂𑀲𑀸 𑀦𑀸𑀫𑀧𑀜𑁆𑀜𑀢𑁆𑀢𑀻𑀢𑀺 𑀆𑀘𑀭𑀺𑀬𑀸. 𑀬𑀣𑀸𑀳𑀼 𑁋

‘‘𑀦𑀺𑀭𑀼𑀢𑁆𑀢𑀺 𑀫𑀸𑀕𑀥𑀸 𑀪𑀸𑀲𑀸, 𑀅𑀢𑁆𑀣𑀢𑁄 𑀦𑀸𑀫𑀲𑀫𑁆𑀫𑀼𑀢𑀻’’𑀢𑀺.

𑀅𑀧𑀭𑁂 𑀧𑀦 𑁋 𑀬𑀤𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀸, 𑀏𑀯𑀁 𑀲𑀢𑀺 𑀧𑀜𑁆𑀜𑀢𑁆𑀢𑀺 𑀅𑀪𑀺𑀮𑀧𑀺𑀢𑀩𑁆𑀩𑀸, 𑀦 𑀯𑀘𑀦𑀦𑁆𑀢𑀺 𑀆𑀧𑀚𑁆𑀚𑀢𑀺, 𑀏𑀯𑀜𑁆𑀘 𑀲𑀢𑀺 ‘‘𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀇𑀤𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀅𑀪𑀺𑀮𑀧𑀺𑀢𑀩𑁆𑀩𑁄𑀢𑀺 𑀅𑀪𑀺𑀮𑀸𑀧𑁄. 𑀦 𑀳𑀺 𑀯𑀘𑀦𑀢𑁄 𑀅𑀜𑁆𑀜𑀁 𑀅𑀪𑀺𑀮𑀧𑀺𑀢𑀩𑁆𑀩𑀁 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀢𑁆𑀣𑀺, 𑀅𑀣 𑀨𑀲𑁆𑀲𑀸𑀤𑀺𑀯𑀘𑀦𑁂𑀳𑀺 𑀩𑁄𑀥𑁂𑀢𑀩𑁆𑀩𑀁 𑀅𑀪𑀺𑀮𑀧𑀺𑀢𑀩𑁆𑀩𑀁, 𑀏𑀯𑀜𑁆𑀘 𑀲𑀢𑀺 𑀅𑀢𑁆𑀣𑀥𑀫𑁆𑀫𑀸𑀦𑀫𑁆𑀧𑀺 𑀩𑁄𑀥𑁂𑀢𑀩𑁆𑀩𑀢𑁆𑀢𑀸 𑀢𑁂𑀲𑀫𑁆𑀧𑀺 𑀦𑀺𑀭𑀼𑀢𑁆𑀢𑀺𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀅𑀧𑀺𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀨𑀲𑁆𑀲𑁄𑀢𑀺 𑀘 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀨𑀲𑁆𑀲𑀸 𑀨𑀲𑁆𑀲𑀦𑁆𑀢𑀺 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁭𑁧𑁮) 𑀯𑀘𑀦𑀢𑁄 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑁄 𑀲𑀤𑁆𑀤𑁄 𑀦𑀺𑀭𑀼𑀢𑁆𑀢𑀻𑀢𑀺 𑀤𑀲𑁆𑀲𑀺𑀢𑀫𑁂𑀯, ‘‘𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀏𑀯𑀫𑀬𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀲𑀤𑁆𑀤𑀸𑀭𑀫𑁆𑀫𑀡𑀸 𑀦𑀸𑀫 𑀚𑀸𑀢𑀸, 𑀦 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀸’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁭𑁧𑁮) 𑀯𑀼𑀢𑁆𑀢𑀢𑁆𑀢𑀸 𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀸𑀭𑀫𑁆𑀫𑀡𑀸𑀬 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀭𑀢𑁄 𑀫𑀦𑁄𑀤𑁆𑀯𑀸𑀭𑁂 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀯𑀢𑁆𑀢𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀯𑀘𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀆𑀘𑀭𑀺𑀬𑀚𑁄𑀢𑀺𑀧𑀸𑀮𑀢𑁆𑀣𑁂𑀭𑀸𑀤𑀬𑁄 𑀧𑀦𑀸𑀳𑀼 𑁋 ‘‘𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺 𑀯𑀘𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀏𑀯𑀜𑁆𑀘 𑀲𑀢𑀺 𑀅𑀜𑁆𑀜𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂 𑀅𑀜𑁆𑀜𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀧𑀚𑁆𑀚𑀢𑀺, 𑀬𑀣𑀸 𑀧𑀦 𑀤𑀺𑀩𑁆𑀩𑀲𑁄𑀢𑀜𑀸𑀡𑀁 𑀫𑀦𑀼𑀲𑁆𑀲𑀸𑀤𑀺𑀲𑀤𑁆𑀤𑀪𑁂𑀤𑀦𑀺𑀘𑁆𑀙𑀬𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀢𑀁𑀢𑀁𑀲𑀤𑁆𑀤𑀯𑀺𑀪𑀸𑀯𑀓𑀁, 𑀏𑀯𑀁 𑀲𑀪𑀸𑀯𑀸𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀦𑀺𑀘𑁆𑀙𑀬𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀸𑀭𑀫𑁆𑀫𑀡𑀁 𑀢𑀁𑀯𑀺𑀪𑀸𑀯𑀓𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀓𑁄𑀘𑀺 𑀧𑀸𑀴𑀺𑀯𑀺𑀭𑁄𑀥𑁄, 𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀢𑀺 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀤𑁆𑀤𑀸𑀭𑀫𑁆𑀫𑀡𑀧𑀘𑁆𑀘𑀯𑁂𑀓𑁆𑀔𑀡𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲𑀸𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀫𑁆𑀧𑀺 𑀳𑀺 𑀜𑀸𑀡𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀢𑀁𑀢𑀁𑀲𑀤𑁆𑀤𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀦𑁆𑀢𑀭𑀁 𑀢𑀁𑀢𑀁𑀧𑀪𑁂𑀤𑀦𑀺𑀘𑁆𑀙𑀬𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀦𑀺𑀭𑀼𑀢𑁆𑀢𑀺𑀁 𑀪𑀺𑀦𑁆𑀤𑀦𑁆𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘 𑀧𑀪𑁂𑀤𑀕𑀢𑀫𑁆𑀧𑀺 𑀳𑁄𑀢𑀻𑀢𑀺.

𑁧𑁧𑁯𑁦. 𑀢𑀺𑀯𑀺𑀥𑀦𑁆𑀢𑀺 𑀇𑀤𑀁 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑀦𑀬𑀫𑁂𑀯𑀸𑀢𑀺. 𑀧𑀘𑁆𑀘𑀯𑁂𑀓𑁆𑀔𑀢𑁄𑀢𑀺 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻𑀢𑀺 𑀅𑀲𑀫𑁆𑀫𑁄𑀳𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲. 𑀦𑀦𑀼 𑀘 𑀢𑀻𑀡𑀺 𑀜𑀸𑀡𑀸𑀦𑀺𑀧𑀺 𑀅𑀢𑁆𑀣𑀥𑀫𑁆𑀫𑀲𑀪𑀸𑀯𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀜𑀸𑀡𑁂𑀲𑀼 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀘 𑀳𑁄𑀢𑀺, 𑀓𑀲𑁆𑀫𑀸 𑀧𑀦 ‘‘𑀢𑁂𑀲𑀼…𑀧𑁂… 𑀫𑀢’’𑀦𑁆𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀦𑁆𑀢𑀺? 𑀲𑀸𑀭𑀫𑁆𑀫𑀡𑁂𑀲𑀼 𑀢𑀻𑀲𑀼 𑀜𑀸𑀡𑁂𑀲𑀼 𑀧𑀯𑀢𑁆𑀢𑀜𑀸𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀬𑀜𑁆𑀳𑀺 𑀜𑀸𑀡𑀸𑀭𑀫𑁆𑀫𑀡𑀁 𑀜𑀸𑀡𑀁 𑀢𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 𑀅𑀲𑀫𑁆𑀫𑁄𑀳𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀺, 𑀢𑀁 𑀇𑀥 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀇𑀫𑀸𑀦𑀺 𑀜𑀸𑀡𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻’’𑀢𑀺. 𑀜𑀸𑀡𑀫𑀢𑁆𑀢𑀸𑀭𑀫𑁆𑀫𑀡𑀁 𑀧𑀦 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬𑁂𑀯. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀧𑀝𑀺𑀲𑀫𑁆𑀪𑀺𑀤𑀸 𑀲𑀸𑀭𑀫𑁆𑀫𑀡𑁂𑀲𑀼 𑀜𑀸𑀡𑁂𑀲𑀼 𑀧𑀯𑀢𑁆𑀢𑀢𑀺, 𑀆𑀭𑀫𑁆𑀫𑀡𑀸𑀦𑀁 𑀧𑀦 𑀧𑀪𑁂𑀤𑀁 𑀳𑁂𑀝𑁆𑀞𑀸 𑀜𑀸𑀡𑀢𑁆𑀢𑀬𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀲𑀫𑀢𑁆𑀣𑁄 𑀩𑀳𑀼𑀲𑁆𑀲𑀼𑀢𑁄 𑀓𑀺𑀜𑁆𑀘𑀸𑀧𑀺 𑀥𑀫𑁆𑀫𑀓𑀣𑀺𑀓𑁂𑀦 𑀓𑀣𑁂𑀢𑀩𑁆𑀩𑀁 𑀥𑀫𑁆𑀫𑀁 𑀚𑀸𑀦𑀸𑀢𑀺, 𑀤𑁂𑀲𑀦𑀸 𑀧𑀦 𑀥𑀫𑁆𑀫𑀓𑀣𑀺𑀓𑀲𑁆𑀲𑁂𑀯 𑀯𑀺𑀲𑀬𑁄𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀇𑀫𑀸𑀲𑀼 𑀧𑀦 𑀧𑀘𑁆𑀙𑀺𑀫𑀸𑀦𑀁 𑀢𑀺𑀲𑁆𑀲𑀦𑁆𑀦𑀁 𑀲𑁂𑀔𑀸𑀲𑁂𑀔𑀫𑀕𑁆𑀕𑀓𑁆𑀔𑀡𑁂 𑀅𑀲𑀫𑁆𑀫𑁄𑀳𑀯𑀲𑁂𑀦 𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀧𑀺. 𑀢𑀣𑀸 𑀳𑀺 𑀲𑀸 𑀫𑀕𑁆𑀕𑀨𑀮𑀲𑀪𑀸𑀯𑀸𑀧𑀺 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸, 𑀲𑁂𑀲𑀸 𑀢𑀺𑀲𑁆𑀲𑁄 𑀮𑁄𑀓𑀺𑀬𑀸𑀯. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀮𑀸𑀪𑁄 𑀢𑀸𑀲𑀫𑀲𑀫𑁆𑀫𑁄𑀳𑀸, 𑀲𑁂𑀔𑀸𑀲𑁂𑀔𑀧𑀣𑀓𑁆𑀔𑀡𑁂;

𑀅𑀢𑁆𑀣𑀧𑀜𑁆𑀜𑀸 𑀬𑀣𑀸𑀮𑀫𑁆𑀩𑀸, 𑀲𑀸 𑀤𑁆𑀯𑀺𑀥𑀸𑀜𑁆𑀜𑀸 𑀢𑀼 𑀲𑀸𑀲𑀯𑀸’’𑀢𑀺.

𑁧𑁧𑁯𑁧. 𑀇𑀫𑀸 𑀧𑀦 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀯𑀺𑀲𑀤𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀬𑀢𑁆𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀭𑀺𑀬𑀢𑁆𑀢𑀺 𑀦𑀸𑀫 𑀩𑀼𑀤𑁆𑀥𑀯𑀘𑀦𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑀁, 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 𑀕𑀡𑁆𑀞𑀺𑀧𑀤𑀅𑀢𑁆𑀣𑀧𑀤𑀯𑀺𑀦𑀺𑀘𑁆𑀙𑀬𑀓𑀣𑀸 𑀧𑀭𑀺𑀧𑀼𑀘𑁆𑀙𑀸 𑀧𑀭𑀺𑀢𑁄 𑀲𑀩𑁆𑀩𑀢𑁄 𑀜𑀸𑀢𑀼𑀁 𑀧𑀼𑀘𑁆𑀙𑀸𑀢𑀺 𑀓𑀢𑁆𑀯𑀸. 𑀲𑀯𑀦𑀁 𑀲𑀓𑁆𑀓𑀘𑁆𑀘𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀯𑀲𑁂𑀦 𑀕𑀳𑀡𑀁, 𑀅𑀥𑀺𑀕𑀫𑁄 𑀫𑀕𑁆𑀕𑀼𑀧𑁆𑀧𑀢𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀥𑀺𑀕𑀫𑁄 𑀦𑀸𑀫 𑀅𑀭𑀳𑀢𑁆𑀢𑀫𑀕𑁆𑀕𑀼𑀧𑁆𑀧𑀢𑁆𑀢𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁭𑁧𑁮) 𑀯𑀼𑀢𑁆𑀢𑀁. 𑀢𑀁 𑀲𑁂𑀔𑀪𑀽𑀫𑀺𑀬𑀁 𑀧𑀪𑁂𑀤𑀕𑀫𑀦𑀁 𑀅𑀧𑁆𑀧𑀯𑀺𑀲𑀬𑀁, 𑀅𑀲𑁂𑀔𑀪𑀽𑀫𑀺𑀬𑀁 𑀩𑀳𑀼𑀯𑀺𑀲𑀬𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀸𑀢𑀺𑀲𑀬𑀁 𑀯𑀸 𑀅𑀥𑀺𑀕𑀫𑀦𑀁 𑀲𑀦𑁆𑀥𑀸𑀬𑁂𑀯 𑀯𑀼𑀢𑁆𑀢𑀁. 𑀲𑁂𑀔𑁂𑀦 𑀧𑀢𑁆𑀢𑀸𑀦𑀫𑁆𑀧𑀺 𑀳𑀺 𑀇𑀫𑀸𑀲𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀤𑀪𑀸𑀯𑀸𑀥𑀺𑀕𑀫𑁄𑀢𑀺. 𑀧𑀼𑀩𑁆𑀩𑀬𑁄𑀕𑁄 𑀯𑀺𑀬 𑀧𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀅𑀭𑀳𑀢𑁄𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀤𑀢𑀸𑀬 𑀧𑀘𑁆𑀘𑀬𑁄 𑀦 𑀦 𑀳𑁄𑀢𑀻𑀢𑀺 𑀧𑀜𑁆𑀘𑀦𑁆𑀦𑀫𑁆𑀧𑀺 𑀬𑀣𑀸𑀬𑁄𑀕𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀤𑀢𑀸𑀬 𑀓𑀸𑀭𑀡𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀼𑀩𑁆𑀩𑀬𑁄𑀕𑁄 𑀦𑀸𑀫 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀕𑀢𑀧𑀘𑁆𑀘𑀸𑀕𑀢𑀺𑀓𑀪𑀸𑀯𑁂𑀦 𑀬𑀸𑀯 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀲𑀫𑀻𑀧𑀁, 𑀢𑀸𑀯 𑀯𑀺𑀧𑀲𑁆𑀲𑀦𑀸𑀪𑀺𑀬𑁄𑀕𑁄. 𑀅𑀥𑀺𑀕𑀫𑀧𑀼𑀩𑁆𑀩𑀬𑁄𑀕𑀸 𑀘𑁂𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀯𑀺𑀲𑀤𑀁 𑀓𑀭𑁄𑀦𑁆𑀢𑀺, 𑀲𑁂𑀲𑀸𑀦𑀺 𑀧𑀦 𑀲𑀼𑀯𑀺𑀲𑀤𑀪𑀸𑀯𑀲𑁆𑀲𑁂𑀯 𑀧𑀘𑁆𑀘𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁧𑁯𑁨-𑁪. 𑀏𑀯𑀁 𑀏𑀓𑀯𑀺𑀥𑀸𑀤𑀺𑀯𑀲𑁂𑀦 𑀧𑀜𑁆𑀜𑀸𑀬 𑀧𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀪𑀸𑀯𑀦𑀸𑀯𑀺𑀥𑀸𑀦𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀣𑀁 𑀪𑀸𑀯𑁂𑀢𑀩𑁆𑀩𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀲𑁆𑀫𑀸 𑀇𑀫𑀸𑀬 𑀧𑀜𑁆𑀜𑀸𑀬 𑀔𑀦𑁆𑀥𑀸𑀤𑀬𑁄 𑀥𑀫𑁆𑀫𑀸 𑀪𑀽𑀫𑀺, 𑀲𑀻𑀮𑀯𑀺𑀲𑀼𑀤𑁆𑀥𑀺 𑀘𑁂𑀯 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀘𑀸𑀢𑀺 𑀇𑀫𑀸 𑀤𑁆𑀯𑁂 𑀯𑀺𑀲𑀼𑀤𑁆𑀥𑀺𑀬𑁄 𑀫𑀽𑀮𑀁, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀇𑀫𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀲𑀭𑀻𑀭𑀁, 𑀢𑀲𑁆𑀫𑀸 𑀢𑁂𑀲𑀼 𑀪𑀽𑀫𑀺𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀜𑀸𑀡𑀧𑀭𑀺𑀘𑀬𑀁 𑀓𑀢𑁆𑀯𑀸 𑀫𑀽𑀮𑀪𑀽𑀢𑀸 𑀤𑁆𑀯𑁂 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀭𑀻𑀭𑀪𑀽𑀢𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀔𑀦𑁆𑀥𑀸𑀤𑀻𑀲𑀽’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀔𑀦𑁆𑀥𑀸𑀤𑀻𑀲𑀽𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑁂𑀲𑀼. 𑀪𑀽𑀫𑀺𑀪𑀽𑀢𑁂𑀲𑀼 𑀘𑀸𑀢𑀺 𑀮𑀓𑁆𑀔𑀡𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂𑀲𑀼. 𑀲𑀻𑀮𑀁 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀦𑁆𑀢𑀺 𑀫𑀽𑀮𑀪𑀽𑀢𑀁 𑀲𑀻𑀮𑀯𑀺𑀲𑀼𑀤𑁆𑀥𑀺𑀁, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀜𑁆𑀘. 𑀲𑀢𑀺 𑀳𑀺 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀁, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀜𑁆𑀘 𑀅𑀬𑀁 𑀧𑀜𑁆𑀜𑀸 𑀫𑀽𑀮𑀚𑀸𑀢𑀸 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀻𑀢𑀺. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀸𑀤𑀬𑁄 𑀧𑀜𑁆𑀘𑀸𑀢𑀺 𑀉𑀧𑀩𑁆𑀭𑀽𑀳𑁂𑀢𑀩𑁆𑀩𑀢𑁆𑀢𑀸 𑀲𑀭𑀻𑀭𑀪𑀽𑀢𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀆𑀤𑀬𑁄 𑀧𑀜𑁆𑀘. 𑀇𑀫𑀺𑀲𑁆𑀲𑀸 𑀳𑀺 𑀧𑀜𑁆𑀜𑀸𑀬 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀧𑀸𑀤𑀧𑀸𑀡𑀺𑀲𑀻𑀲𑀝𑁆𑀞𑀸𑀦𑀺𑀬𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀆𑀤𑀬𑁄 𑀇𑀫𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀅𑀯𑀬𑀯𑁂𑀦 𑀲𑀫𑀼𑀤𑀸𑀬𑀽𑀧𑀮𑀓𑁆𑀔𑀡𑀦𑀬𑁂𑀦 𑀲𑀭𑀻𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀬 𑀧𑀜𑁆𑀜𑀸𑀬𑀸𑀢𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀔𑀦𑁆𑀥𑀸𑀤𑀻𑀲𑀼 𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀧𑀜𑁆𑀜𑀸𑀬. 𑀚𑀦𑀦𑀸𑀤𑀺𑀢𑁄𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀸𑀤𑀻𑀳𑀺.

𑁧𑁧𑁯𑁫-𑁬. ‘‘𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀔𑀦𑁆𑀥𑀸𑀤𑀺𑀪𑀽𑀫𑀻𑀲𑀼 𑀲𑀻𑀮𑀯𑀺𑀲𑀼𑀤𑁆𑀥𑀺𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑁂𑀳𑀺 𑀫𑀽𑀮𑁂𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁂𑀦 𑀧𑀜𑁆𑀘𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀲𑀭𑀻𑀭𑀲𑁆𑀲 𑀯𑀟𑁆𑀠𑀦𑁂𑀦𑁂𑀯 𑀧𑀜𑁆𑀜𑀸𑀯𑀟𑁆𑀠𑀦𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀪𑀽𑀫𑀺𑀪𑀽𑀢𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀏𑀓𑀤𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀭𑀽𑀧𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼. 𑀬𑀁 𑀓𑀺𑀜𑁆𑀘𑀻𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁. 𑀅𑀢𑀻𑀢𑀸𑀦𑀸𑀕𑀢𑀸𑀤𑀺𑀓𑀦𑁆𑀢𑀺𑀆𑀤𑀺𑀦𑀸 𑀧𑀦 𑀢𑀤𑁂𑀯 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀆𑀤𑀺-𑀕𑁆𑀕𑀳𑀡𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀕𑀳𑀡𑀁.

𑁧𑁧𑁯𑁭-𑁧𑁨𑁦𑁦. 𑀳𑀻𑀦𑀦𑁆𑀢𑀺𑀆𑀤𑀻𑀲𑀼 𑀅𑀓𑀼𑀲𑀮𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑀸𑀬 𑀳𑀻𑀦𑀁, 𑀓𑀼𑀲𑀮𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑀸𑀬 𑀧𑀡𑀻𑀢𑀁. 𑀅𑀓𑀼𑀲𑀮𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀢𑀸𑀬 𑀯𑀸 𑀳𑀻𑀦𑀁, 𑀯𑀺𑀧𑀭𑀺𑀬𑀸𑀬𑁂𑀦 𑀧𑀡𑀻𑀢𑀁. 𑀤𑀼𑀧𑁆𑀧𑀭𑀺𑀕𑁆𑀕𑀳𑀪𑀽𑀢𑀲𑀼𑀔𑀼𑀫𑀭𑀽𑀧𑀸𑀤𑀺𑀯𑀲𑁂𑀦 𑀤𑀽𑀭𑀁, 𑀇𑀢𑀭𑀯𑀲𑁂𑀦 𑀲𑀦𑁆𑀢𑀺𑀓𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀁 𑀢𑀁 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀪𑀺𑀦𑁆𑀦𑀁 𑀲𑀩𑁆𑀩𑀁 𑀢𑀁 𑀭𑀽𑀧𑀭𑀸𑀲𑀺𑀯𑀲𑁂𑀦 𑀩𑀼𑀤𑁆𑀥𑀺𑀬𑀸 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ‘‘𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 𑀯𑀺𑀬 ‘‘𑀭𑀸𑀲𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀢𑁆𑀢𑁂𑀧𑀺 𑀳𑀺 𑀯𑀼𑀢𑁆𑀢𑀁 ‘‘𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀁𑀬𑀽𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸’’𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑁂𑀓𑁂𑀲𑀼 𑀧𑀦 𑀯𑁂𑀤𑀦𑀸𑀤𑀻𑀲𑀼 ‘‘𑀲𑀫𑀼𑀤𑁆𑀤𑁄 𑀫𑀬𑀸 𑀤𑀺𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀫𑀼𑀤𑀸𑀬𑀯𑁄𑀳𑀸𑀭𑀲𑁆𑀲 𑀅𑀯𑀬𑀯𑁂𑀧𑀺 𑀤𑀺𑀲𑁆𑀲𑀦𑀢𑁄 𑀔𑀦𑁆𑀥-𑀲𑀤𑁆𑀤𑁄 𑀭𑀼𑀴𑁆𑀳𑀻𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀢𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀮𑀓𑁆𑀔𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀬𑁂𑀯 𑀯𑁂𑀤𑀦𑀸𑀓𑁆𑀔𑀦𑁆𑀥𑀢𑀸. 𑀯𑁂𑀤𑀦𑀸𑀬 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁂 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁨.𑁪𑁯𑁭 𑀆𑀤𑀬𑁄) 𑀕𑀳𑁂𑀢𑀩𑁆𑀩𑀸. 𑀅𑀪𑀺𑀲𑀗𑁆𑀔𑀸𑀭𑀮𑀓𑁆𑀔𑀡𑀦𑁆𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀘𑁂𑀢𑀦𑀸𑀧𑀥𑀸𑀦𑀢𑀸𑀬 𑀏𑀯𑀁 𑀯𑀼𑀢𑁆𑀢𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀭𑀸𑀲𑀺𑀓𑀭𑀡𑀮𑀓𑁆𑀔𑀡𑀁 𑀲𑀫𑁆𑀧𑀺𑀡𑁆𑀟𑀦𑀮𑀓𑁆𑀔𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 ‘‘𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁯) 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸 𑀅𑀢𑁆𑀢𑀦𑁄 𑀨𑀮𑀲𑀗𑁆𑀔𑀢𑀁 𑀲𑀫𑁆𑀫𑀤𑁂𑀯 𑀦𑀺𑀧𑁆𑀨𑀦𑁆𑀦𑀁 𑀳𑁄𑀢𑀺, 𑀏𑀯𑀁 𑀅𑀪𑀺𑀲𑀗𑁆𑀔𑀭𑀡𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀬 𑀯𑀲𑁂𑀦 𑀯𑀝𑁆𑀝𑀢𑀺.

𑁧𑁨𑁦𑁨-𑁫. 𑀏𑀯𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀪𑀽𑀫𑀺𑀪𑀽𑀢𑁂 𑀥𑀫𑁆𑀫𑁂 𑀏𑀓𑀤𑁂𑀲𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀻𑀮𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀢𑀸 𑀅𑀯𑀢𑁆𑀯𑀸 𑀇𑀤𑀁 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀤𑀺𑀪𑀽𑀢𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀘 𑀬𑁄𑀕𑀸𑀯𑀘𑀭𑁂𑀦 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑀸 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦 𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀯𑀸 𑀉𑀪𑀺𑀦𑁆𑀦𑀁 𑀲𑀗𑁆𑀔𑁂𑀧𑀓𑁄𑀝𑁆𑀞𑀸𑀲𑀸𑀦𑀁 𑀯𑀲𑁂𑀦 𑀯𑀸 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦 𑀯𑀸 𑀦𑀸𑀫𑀭𑀽𑀧𑀲𑁆𑀲 𑀯𑀯𑀢𑁆𑀣𑀸𑀧𑁂𑀢𑀩𑁆𑀩𑀪𑀸𑀯𑁂𑀧𑀺 𑀢𑁂𑀦 𑀢𑁂𑀦 𑀫𑀼𑀔𑁂𑀦 𑀯𑀯𑀢𑁆𑀣𑀸𑀦𑀧𑁆𑀧𑀓𑀸𑀲𑀦𑀲𑁆𑀲 𑀅𑀢𑀺𑀧𑀧𑀜𑁆𑀘𑀸𑀯𑀳𑀢𑁆𑀢𑀸 𑀬𑀣𑀸𑀥𑀺𑀕𑀢𑀓𑁆𑀔𑀦𑁆𑀥𑀯𑀲𑁂𑀦𑁂𑀯 𑀇𑀥 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁. 𑀏𑀓𑀸𑀲𑀻𑀢𑀺𑀬𑀸 𑀘𑀺𑀢𑁆𑀢𑁂𑀦𑀸𑀢𑀺 𑀏𑀓𑀸𑀲𑀻𑀢𑀺𑀬𑀸 𑀮𑁄𑀓𑀺𑀬𑀘𑀺𑀢𑁆𑀢𑁂𑀦. 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀧𑀦 𑀦𑁂𑀯 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲, 𑀦 𑀲𑀫𑀣𑀬𑀸𑀦𑀺𑀓𑀲𑁆𑀲 𑀧𑀭𑀺𑀕𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀅𑀦𑀥𑀺𑀕𑀢𑀢𑁆𑀢𑀸. 𑀘𑀢𑁆𑀢𑀸𑀭𑁄𑀭𑀽𑀧𑀺𑀦𑁄 𑀔𑀦𑁆𑀥𑁂𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑁂. 𑀲𑀻𑀢𑀼𑀡𑁆𑀳𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀺𑀓𑀸𑀭𑀸𑀧𑀚𑁆𑀚𑀦𑀢𑁄 𑀭𑀽𑀧𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑀁. 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀢𑁄 𑀦𑀸𑀫𑀁 𑀦𑀫𑀦𑀮𑀓𑁆𑀔𑀡𑀁. 𑀧𑀭𑀺𑀕𑀡𑁆𑀳𑀢𑀻𑀢𑀺 𑀧𑀭𑀺𑀘𑁆𑀙𑁂𑀤𑀓𑀸𑀭𑀺𑀓𑀸𑀬 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀸𑀢𑀺.

𑁧𑁨𑁦𑁬-𑁯. 𑀢𑀸𑀮𑀲𑁆𑀲 𑀓𑀦𑁆𑀤𑀁 𑀢𑀼 𑀬𑀫𑀓𑀦𑁆𑀢𑀺 𑀤𑁆𑀯𑀻𑀳𑀺 𑀩𑀻𑀚𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀁 𑀏𑀓𑀻𑀪𑀽𑀢𑀁 𑀬𑀫𑀓𑀢𑀸𑀮𑀓𑀦𑁆𑀤𑀁. 𑀢𑀜𑁆𑀳𑀺 𑀬𑀫𑀓𑀁 𑀪𑀺𑀦𑁆𑀦𑀲𑀦𑁆𑀢𑀸𑀦𑀫𑁆𑀧𑀺 𑀅𑀪𑀺𑀦𑁆𑀦𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀏𑀯𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀢𑀺. 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸𑀢𑀺 𑀏𑀢𑁂𑀦𑁂𑀯 𑀢𑀲𑁆𑀲 𑀤𑀼𑀯𑀺𑀥𑀪𑀸𑀯𑁂 𑀲𑀺𑀤𑁆𑀥𑁂 ‘‘𑀤𑁆𑀯𑀺𑀥𑀸 𑀯𑀯𑀢𑁆𑀣𑀧𑁂𑀢𑀻’’𑀢𑀺 𑀇𑀤𑀁 𑀦𑀸𑀫𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑁂𑀯𑀸𑀳 ‘‘𑀦𑀸𑀫𑀢𑁄 𑀭𑀽𑀧𑀢𑁄’’𑀢𑀺𑀆𑀤𑀺. 𑀦𑀸𑀫𑀭𑀽𑀧𑀫𑀢𑁆𑀢𑀢𑀸𑀬 𑀅𑀯𑀺𑀦𑀺𑀘𑁆𑀙𑀺𑀢𑀢𑁆𑀢𑀸, 𑀲𑀦𑁆𑀢𑀸𑀦𑀸𑀤𑀺𑀖𑀦𑀪𑁂𑀤𑀲𑁆𑀲 𑀘 𑀅𑀓𑀢𑀢𑁆𑀢𑀸 𑀅𑀪𑀺𑀦𑀺𑀯𑁂𑀲𑁂𑀦 𑀯𑀺𑀦𑀸 𑀲𑀫𑀽𑀳𑁂𑀓𑀢𑁆𑀢𑀕𑁆𑀕𑀳𑀡𑀯𑀲𑁂𑀦 ‘‘𑀲𑀢𑁆𑀢𑁄’’𑀢𑀺 𑀧𑀯𑀢𑁆𑀢𑁄 𑀲𑀫𑁆𑀫𑁄𑀳𑁄 𑀲𑀢𑁆𑀢𑀲𑀫𑁆𑀫𑁄𑀳𑁄, 𑀢𑀲𑁆𑀲 𑀖𑀸𑀢𑀢𑁆𑀣𑀁 𑀯𑀺𑀓𑁆𑀔𑀫𑁆𑀪𑀦𑀢𑁆𑀣𑀁. 𑀩𑀳𑀼𑀲𑀼𑀢𑁆𑀢𑀯𑀲𑁂𑀦𑀸𑀢𑀺 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀦𑀸 𑀇𑀥 𑀤𑀲𑁆𑀲𑀺𑀢𑀸𑀦𑀁, 𑀅𑀜𑁆𑀜𑁂𑀲𑀜𑁆𑀘 ‘‘𑀭𑀽𑀧𑀜𑁆𑀘 𑀳𑀺𑀤𑀁, 𑀫𑀳𑀸𑀮𑀺, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁨𑁦; 𑀲𑀁. 𑀦𑀺. 𑁩.𑁫𑁯) 𑀏𑀯𑀫𑀸𑀤𑀻𑀦𑀁 𑀲𑀫𑁆𑀩𑀳𑀼𑀮𑀸𑀦𑀁 𑀲𑀼𑀢𑁆𑀢𑀦𑁆𑀢𑀸𑀦𑀁 𑀯𑀲𑁂𑀦. 𑀢𑀦𑁆𑀢𑀺 𑀢𑀁 𑀦𑀸𑀫𑀭𑀽𑀧𑀁.

𑁧𑁨𑁧𑁦-𑁨. 𑀅𑀗𑁆𑀕𑀲𑀫𑁆𑀪𑀸𑀭𑀸𑀢𑀺 𑀅𑀗𑁆𑀕𑀲𑀫𑁆𑀪𑀸𑀭𑀳𑁂𑀢𑀼 𑀢𑀦𑁆𑀦𑀺𑀫𑀺𑀢𑁆𑀢𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀲𑀢𑀺 𑀏𑀯 𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁆𑀤𑁄𑀢𑀺 𑀯𑁄𑀳𑀸𑀭𑁄. 𑀔𑀦𑁆𑀥𑁂𑀲𑀽𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼 𑀢𑁂 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀺 𑀯𑁄𑀳𑀸𑀭𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀓𑁆𑀔𑀘𑀓𑁆𑀓𑀧𑀜𑁆𑀚𑀭𑀈𑀲𑀸𑀤𑀻𑀲𑀼 𑀅𑀗𑁆𑀕𑀲𑀫𑁆𑀪𑀸𑀭𑁂𑀲𑀼 𑀏𑀓𑁂𑀦𑀸𑀓𑀸𑀭𑁂𑀦 𑀏𑀓𑀚𑁆𑀛𑀁 𑀭𑀸𑀲𑀺 𑀳𑀼𑀢𑁆𑀯𑀸 𑀲𑀡𑁆𑀞𑀺𑀢𑁂𑀲𑀼 ‘‘𑀭𑀣𑁄’’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺, 𑀧𑀭𑀫𑀢𑁆𑀣𑀢𑁄 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀅𑀗𑁆𑀕𑁂 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 𑀭𑀣𑁄 𑀦𑀸𑀫 𑀦𑀢𑁆𑀣𑀺, 𑀏𑀯𑀫𑁂𑀯 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂𑀲𑀼 ‘‘𑀲𑀢𑁆𑀢𑁄’’𑀢𑀺 𑀯𑀸 ‘‘𑀧𑀼𑀕𑁆𑀕𑀮𑁄’’𑀢𑀺 𑀯𑀸 ‘‘𑀚𑀻𑀯𑁄’’𑀢𑀺 𑀯𑀸 𑀯𑁄𑀳𑀸𑀭𑀫𑀢𑁆𑀢𑀁, 𑀧𑀭𑀫𑀢𑁆𑀣𑀢𑁄 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀥𑀫𑁆𑀫𑁂 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 ‘‘𑀅𑀲𑁆𑀫𑀻’’𑀢𑀺 𑀯𑀸 ‘‘𑀅𑀳’’𑀦𑁆𑀢𑀺 𑀯𑀸 𑀕𑀸𑀳𑀲𑁆𑀲 𑀯𑀢𑁆𑀣𑀼𑀪𑀽𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀓𑁂𑀯𑀮𑀁 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀅𑀢𑁆𑀣𑀻𑀢𑀺. 𑀏𑀯𑀁 𑀧𑀲𑁆𑀲𑀢𑁄 𑀳𑀺 𑀤𑀲𑁆𑀲𑀦𑀁 𑀬𑀣𑀸𑀪𑀽𑀢𑀤𑀲𑁆𑀲𑀦𑀁 𑀦𑀸𑀫 𑀳𑁄𑀢𑀺, 𑀬𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀘𑁂 𑀓𑁄𑀘𑀺 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀓𑀣𑀜𑁆𑀘𑀭𑀳𑀺 𑀦𑀸𑀫𑀭𑀽𑀧𑀫𑀢𑁆𑀢𑁂 𑀕𑀫𑀦𑀸𑀤𑀺𑀅𑀢𑁆𑀣𑀓𑀺𑀘𑁆𑀘𑀲𑀺𑀤𑁆𑀥𑀢𑀸 𑀳𑁄𑀢𑀻𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸𑀧𑀻’’𑀢𑀺𑀆𑀤𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀤𑀸𑀭𑀼𑀫𑀬𑀁 𑀬𑀦𑁆𑀢𑀁 𑀦𑀺𑀚𑁆𑀚𑀻𑀯𑀁 𑀚𑀻𑀯𑀯𑀺𑀭𑀳𑀺𑀢𑀁 𑀅𑀩𑁆𑀪𑀦𑁆𑀢𑀭𑁂 𑀯𑀢𑁆𑀢𑀫𑀸𑀦𑀲𑁆𑀲 𑀚𑀻𑀯𑀲𑁆𑀲 𑀅𑀪𑀸𑀯𑀢𑁄 𑀢𑀢𑁄𑀬𑁂𑀯 𑀦𑀺𑀭𑀻𑀳𑀓𑀁 𑀦𑀺𑀩𑁆𑀬𑀸𑀧𑀸𑀭𑀁, 𑀅𑀣 𑀘 𑀧𑀦 𑀤𑀸𑀭𑀼𑀭𑀚𑁆𑀚𑀼𑀲𑀫𑀸𑀬𑁄𑀕𑁂 𑀧𑀘𑁆𑀘𑀬𑀯𑀺𑀲𑁂𑀲𑀯𑀲𑁂𑀦 𑀢𑀁 𑀤𑀸𑀭𑀼𑀬𑀦𑁆𑀢𑀁 𑀕𑀘𑁆𑀙𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺, 𑀲𑀚𑀻𑀯𑀁 𑀲𑀩𑁆𑀬𑀸𑀧𑀸𑀭𑀁 𑀯𑀺𑀬 𑀕𑀫𑀦𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀫𑀺𑀯 𑀔𑀸𑀬𑀢𑀺, 𑀢𑀣𑀸 𑀇𑀤𑀁 𑀦𑀸𑀫𑀭𑀽𑀧𑀫𑁆𑀧𑀺 𑀓𑀺𑀜𑁆𑀘𑀸𑀧𑀺 𑀦𑀺𑀚𑁆𑀚𑀻𑀯𑀁 𑀦𑀺𑀭𑀻𑀳𑀓𑀜𑁆𑀘, 𑀅𑀣 𑀘 𑀧𑀦 𑀅𑀜𑁆𑀜𑀫𑀜𑁆𑀜𑀲𑀗𑁆𑀔𑀢𑀧𑀘𑁆𑀘𑀬𑀯𑀺𑀲𑁂𑀲𑀲𑁆𑀲 𑀲𑀫𑀸𑀬𑁄𑀕𑁂 𑀲𑀚𑀻𑀯𑀁 𑀲𑀩𑁆𑀬𑀸𑀧𑀸𑀭𑀁 𑀕𑀘𑁆𑀙𑀦𑁆𑀢𑀁 𑀢𑀺𑀝𑁆𑀞𑀦𑁆𑀢𑀜𑁆𑀘 𑀔𑀸𑀬𑀢𑀻𑀢𑀺.

𑁧𑁨𑁧𑁩. 𑀲𑀘𑁆𑀘𑀢𑁄𑀢𑀺 𑀪𑀽𑀢𑀢𑁄, 𑀧𑀭𑀫𑀢𑁆𑀣𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀁 𑀦𑀸𑀫𑀭𑀽𑀧𑀁 𑀅𑀪𑀺𑀲𑀗𑁆𑀔𑀢𑀁 𑀬𑀦𑁆𑀢𑀫𑀺𑀯 𑀲𑀼𑀜𑁆𑀜𑀁 𑀚𑀻𑀯𑀸𑀤𑀺𑀦𑀸. 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀗𑁆𑀔𑀢𑀁 𑀇𑀤𑀁 𑀦𑀸𑀫𑀭𑀽𑀧𑀁 𑀬𑀦𑁆𑀢𑀫𑀺𑀯 𑀲𑀼𑀜𑁆𑀜𑀦𑁆𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀤𑀼𑀓𑁆𑀔𑀲𑁆𑀲 𑀧𑀼𑀜𑁆𑀚𑁄𑀢𑀺 𑀦𑀺𑀘𑁆𑀘𑀸𑀢𑀼𑀭𑀢𑀸𑀬 𑀤𑀼𑀓𑁆𑀔𑀲𑁆𑀲 𑀭𑀸𑀲𑀺. 𑀢𑀺𑀡𑀓𑀝𑁆𑀞𑀲𑀸𑀤𑀺𑀲𑁄𑀢𑀺 𑀅𑀢𑁆𑀢𑀲𑀼𑀜𑁆𑀜𑀢𑀸𑀬 𑀢𑀺𑀡𑀓𑀝𑁆𑀞𑀲𑀫𑁄.

𑁧𑁨𑁧𑁫. 𑀬𑀫𑀓𑀦𑁆𑀢𑀺 𑀬𑀼𑀕𑀴𑀁. 𑀲𑁄 𑀘 𑀬𑀫𑀓𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀺𑀢𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀉𑀪𑁄 𑀅𑀜𑁆𑀜𑁄𑀜𑁆𑀜𑀦𑀺𑀲𑁆𑀲𑀺𑀢𑀸’’𑀢𑀺. 𑀢𑀢𑁄 𑀏𑀯 𑀏𑀓𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁 𑀉𑀪𑁄 𑀪𑀺𑀚𑁆𑀚𑀦𑁆𑀢𑀺. 𑀦 𑀳𑀺 𑀓𑀤𑀸𑀘𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀫𑀭𑀡𑀯𑀲𑁂𑀦 𑀭𑀽𑀧𑁂 𑀦𑀺𑀭𑀼𑀚𑁆𑀛𑀦𑁆𑀢𑁂 𑀅𑀭𑀽𑀧𑀁 𑀅𑀦𑀺𑀭𑀼𑀚𑁆𑀛𑀦𑁆𑀢𑀁, 𑀅𑀭𑀽𑀧𑁂 𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑁂 𑀭𑀽𑀧𑀁 𑀅𑀦𑀺𑀭𑀼𑀚𑁆𑀛𑀦𑁆𑀢𑀁 𑀅𑀢𑁆𑀣𑀺. 𑀏𑀓𑀯𑁄𑀓𑀸𑀭𑀪𑀯𑀘𑀢𑀼𑀯𑁄𑀓𑀸𑀭𑀪𑀯𑁂𑀲𑀼 𑀧𑀦 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯𑀸𑀢𑀺. 𑀲𑁄 𑀧𑀦𑀸𑀬𑀁 𑀪𑀗𑁆𑀕𑁄 𑀧𑀘𑁆𑀘𑀬𑀯𑀲𑁂𑀦𑁂𑀯, 𑀧𑀘𑁆𑀘𑀬𑀦𑀺𑀭𑁄𑀥𑁂𑀦𑁂𑀯 𑀦𑀸𑀫𑀭𑀽𑀧𑀦𑀺𑀭𑁄𑀥𑁄𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀸𑀢𑀺 𑀧𑀘𑁆𑀘𑀬𑀪𑀽𑀢𑀸, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀸𑀧𑀺 𑀏𑀓𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁 𑀉𑀪𑁄 𑀪𑀺𑀚𑁆𑀚𑀦𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑁧𑁨𑁧𑁬-𑁯. 𑀦𑀺𑀢𑁆𑀢𑁂𑀚𑀦𑁆𑀢𑀺 𑀢𑁂𑀚𑀳𑀻𑀦𑀁 𑀆𑀦𑀼𑀪𑀸𑀯𑀯𑀺𑀭𑀳𑀺𑀢𑀁. 𑀬𑀢𑁆𑀣 𑀧𑀦 𑀢𑀁 𑀦𑀺𑀢𑁆𑀢𑁂𑀚𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀩𑁆𑀬𑀸𑀳𑀭𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀜𑁆𑀜𑀣𑀸 𑀲𑀤𑁆𑀤𑀳𑀦𑀼𑀲𑁆𑀲𑀸𑀳𑀦𑀸𑀤𑀻𑀲𑀼 𑀦𑀸𑀫𑀁 𑀦𑀺𑀢𑁆𑀢𑁂𑀚𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀦𑀸𑀧𑀺 𑀭𑀽𑀧𑀁 𑀲𑀦𑁆𑀥𑀸𑀭𑀡𑀸𑀩𑀦𑁆𑀥𑀦𑀸𑀤𑀻𑀲𑀼. 𑀢𑁂𑀦𑁂𑀯 𑀳𑀺 ‘‘𑀢𑀣𑀸 𑀭𑀽𑀧𑀫𑁆𑀧𑀺 𑀦𑀺𑀢𑁆𑀢𑁂𑀚’’𑀦𑁆𑀢𑀺 𑀯𑀢𑁆𑀯𑀸 ‘‘𑀪𑀼𑀜𑁆𑀚𑀸𑀫𑀻𑀢𑀺…𑀧𑁂… 𑀦 𑀯𑀺𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁.

𑁧𑁨𑁨𑁦-𑁧. 𑀦𑀸𑀫𑀁 𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀺𑀦𑀸 𑀩𑁆𑀬𑀢𑀺𑀭𑁂𑀓𑀯𑀲𑁂𑀦𑀧𑀺 𑀦𑀸𑀫𑀭𑀽𑀧𑀸𑀦𑀁 𑀦𑀺𑀢𑁆𑀢𑁂𑀚𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀭𑀽𑀧𑀜𑁆𑀳𑀺 𑀕𑀫𑀦𑀸𑀤𑀺𑀓𑀺𑀭𑀺𑀬𑀸𑀲𑀼 𑀦𑀸𑀫𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺, 𑀦𑀸𑀫𑀁 𑀤𑀲𑁆𑀲𑀦𑀸𑀤𑀺𑀓𑀺𑀭𑀺𑀬𑀸𑀲𑀼 𑀭𑀽𑀧𑀁 𑀦𑀺𑀲𑁆𑀲𑀸𑀬. 𑀅𑀜𑁆𑀜𑀫𑀜𑁆𑀜𑀁 𑀲𑀦𑁆𑀦𑀺𑀲𑁆𑀲𑀸𑀬 𑀘𑀲𑁆𑀲 𑀅𑀢𑁆𑀢𑀓𑀺𑀘𑁆𑀘𑀲𑀺𑀤𑁆𑀥𑀺𑀧𑀺 𑀧𑀘𑁆𑀘𑁂𑀓𑀁 𑀅𑀲𑀫𑀢𑁆𑀣𑀢𑀁 𑀯𑀺𑀪𑀸𑀯𑁂𑀢𑀺. 𑀢𑀣𑀸 𑀳𑀺 𑀦𑀸𑀫𑀭𑀽𑀧𑀲𑁆𑀲 𑀅𑀢𑁆𑀢𑀲𑀼𑀜𑁆𑀜𑀢𑀸, 𑀦𑀺𑀩𑁆𑀬𑀸𑀧𑀸𑀭𑀢𑀸 𑀘 𑀲𑀼𑀝𑁆𑀞𑀼𑀢𑀭𑀁 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺. 𑀓𑀣𑀁 𑀧𑀦 𑀧𑀘𑁆𑀘𑁂𑀓𑀁 𑀅𑀲𑀫𑀢𑁆𑀣𑀸𑀦𑀁 𑀲𑀫𑀼𑀤𑀺𑀢𑀪𑀸𑀯𑁂 𑀲𑀢𑀺 𑀲𑀫𑀢𑁆𑀣𑀢𑀸 𑀳𑁄𑀢𑀺 𑀅𑀲𑀸𑀫𑀕𑁆𑀕𑀺𑀬𑀁 𑀅𑀳𑁂𑀢𑀽𑀦𑀁 𑀲𑀸𑀫𑀕𑁆𑀕𑀺𑀬𑀫𑁆𑀧𑀺 𑀅𑀳𑁂𑀢𑀼𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀦 𑀳𑀺 𑀧𑀘𑁆𑀘𑁂𑀓𑀁 𑀤𑀝𑁆𑀞𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀲𑀫𑀼𑀤𑀺𑀢𑀁 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀻𑀢𑀺 𑀘𑁄𑀤𑀦𑀁 𑀳𑀤𑀬𑁂 𑀓𑀢𑁆𑀯𑀸 𑀆𑀳 ‘‘𑀇𑀫𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀉𑀧𑀫𑀸𑀬𑀧𑀺 𑀳𑀺 𑀅𑀲𑀺𑀤𑁆𑀥𑁄 𑀅𑀢𑁆𑀣𑁄 𑀲𑀸𑀥𑁂𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀉𑀧𑀫𑀸𑀬𑀧𑀺 𑀇𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁨𑁫𑁮; 𑀅. 𑀦𑀺. 𑁮.𑁮; 𑁧𑁦.𑁯𑁫; 𑀚𑀸. 𑁨.𑁧𑁯.𑁨𑁪). 𑀅𑀬𑀁 𑀧𑀦𑁂𑀢𑁆𑀣 𑀚𑀘𑁆𑀘𑀦𑁆𑀥𑀧𑀻𑀞𑀲𑀧𑁆𑀧𑀻𑀦𑀁 𑀉𑀧𑀫𑀸 𑁋 𑀬𑀣𑀸 𑀚𑀘𑁆𑀘𑀦𑁆𑀥𑁄 𑀘 𑀧𑀻𑀞𑀲𑀧𑁆𑀧𑀻 𑀘 𑀤𑀺𑀲𑀸 𑀧𑀓𑁆𑀓𑀫𑀺𑀢𑀼𑀓𑀸𑀫𑀸 𑀅𑀲𑁆𑀲𑀼. 𑀚𑀘𑁆𑀘𑀦𑁆𑀥𑁄 𑀧𑀻𑀞𑀲𑀧𑁆𑀧𑀺𑀁 𑀏𑀯𑀫𑀸𑀳 ‘‘𑀅𑀳𑀁 𑀔𑁄, 𑀪𑀡𑁂, 𑀲𑀓𑁆𑀓𑁄𑀫𑀺 𑀧𑀸𑀤𑁂𑀳𑀺 𑀧𑀸𑀤𑀓𑀭𑀡𑀻𑀬𑀁 𑀓𑀸𑀢𑀼𑀁, 𑀦𑀢𑁆𑀣𑀺 𑀘 𑀫𑁂 𑀘𑀓𑁆𑀔𑀽𑀦𑀺, 𑀬𑁂𑀳𑀺 𑀲𑀫𑀁 𑀯𑀺𑀲𑀫𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀧𑀻𑀞𑀲𑀧𑁆𑀧𑀻 𑀚𑀘𑁆𑀘𑀦𑁆𑀥𑀁 𑀏𑀯𑀫𑀸𑀳 ‘‘𑀅𑀳𑀁 𑀔𑁄, 𑀪𑀡𑁂, 𑀲𑀓𑁆𑀓𑁄𑀫𑀺 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀓𑀭𑀡𑀻𑀬𑀁 𑀓𑀸𑀢𑀼𑀁, 𑀦𑀢𑁆𑀣𑀺 𑀘 𑀫𑁂 𑀧𑀸𑀤𑀸, 𑀬𑁂𑀳𑀺 𑀅𑀪𑀺𑀓𑁆𑀓𑀫𑁂𑀬𑁆𑀬𑀁 𑀧𑀝𑀺𑀓𑁆𑀓𑀫𑁂𑀬𑁆𑀬𑀁 𑀯𑀸’’𑀢𑀺. 𑀲𑁄 𑀢𑀼𑀝𑁆𑀞𑀳𑀝𑁆𑀞𑁄 𑀚𑀘𑁆𑀘𑀦𑁆𑀥𑁄 𑀧𑀻𑀞𑀲𑀧𑁆𑀧𑀺𑀁 𑀅𑀁𑀲𑀓𑀽𑀝𑀁 𑀆𑀭𑁄𑀧𑁂𑀲𑀺, 𑀧𑀻𑀞𑀲𑀧𑁆𑀧𑀻 𑀚𑀘𑁆𑀘𑀦𑁆𑀥𑀲𑁆𑀲 𑀅𑀁𑀲𑀓𑀽𑀝𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀫𑀸𑀳 ‘‘𑀯𑀸𑀫𑀁 𑀫𑀼𑀜𑁆𑀘, 𑀤𑀓𑁆𑀔𑀺𑀡𑀁 𑀕𑀡𑁆𑀳, 𑀤𑀓𑁆𑀔𑀺𑀡𑀁 𑀫𑀼𑀜𑁆𑀘, 𑀯𑀸𑀫𑀁 𑀕𑀡𑁆𑀳𑀸’’𑀢𑀺. 𑀢𑀢𑁆𑀣 𑀚𑀘𑁆𑀘𑀦𑁆𑀥𑁄𑀧𑀺 𑀦𑀺𑀢𑁆𑀢𑁂𑀚𑁄 𑀤𑀼𑀩𑁆𑀩𑀮𑁄 𑀦 𑀲𑀓𑁂𑀦 𑀩𑀮𑁂𑀦 𑀕𑀘𑁆𑀙𑀢𑀺, 𑀢𑀣𑁂𑀯 𑀧𑀻𑀞𑀲𑀧𑁆𑀧𑀻 𑀦 𑀲𑀓𑁂𑀦 𑀩𑀮𑁂𑀦 𑀕𑀘𑁆𑀙𑀢𑀺, 𑀦 𑀘 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀕𑀫𑀦𑀁 𑀦 𑀧𑀯𑀢𑁆𑀢𑀢𑀺, 𑀏𑀯𑀫𑁂𑀯 𑀦𑀸𑀫𑀫𑁆𑀧𑀺 𑀦𑀺𑀢𑁆𑀢𑁂𑀚𑀁 𑀦 𑀲𑀓𑁂𑀦 𑀢𑁂𑀚𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀸𑀲𑀼 𑀢𑀸𑀲𑀼 𑀓𑀺𑀭𑀺𑀬𑀸𑀲𑀼 𑀧𑀯𑀢𑁆𑀢𑀢𑀺, 𑀭𑀽𑀧𑀫𑁆𑀧𑀺 𑀦𑀺𑀢𑁆𑀢𑁂𑀚𑀁 𑀦 𑀲𑀓𑁂𑀦 𑀢𑁂𑀚𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀸𑀲𑀼 𑀢𑀸𑀲𑀼 𑀓𑀺𑀭𑀺𑀬𑀸𑀲𑀼 𑀧𑀯𑀢𑁆𑀢𑀢𑀺, 𑀦 𑀘 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀢𑁆𑀢𑀺 𑀯𑀸 𑀧𑀯𑀢𑁆𑀢𑀺 𑀯𑀸 𑀦 𑀳𑁄𑀢𑀻𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀦 𑀲𑀓𑁂𑀦 𑀩𑀮𑁂𑀦 𑀚𑀸𑀬𑀭𑁂,

𑀦𑁄𑀧𑀺 𑀲𑀓𑁂𑀦 𑀩𑀮𑁂𑀦 𑀢𑀺𑀝𑁆𑀞𑀭𑁂;

𑀧𑀭𑀥𑀫𑁆𑀫𑀯𑀲𑀸𑀦𑀼𑀯𑀢𑁆𑀢𑀺𑀦𑁄,

𑀚𑀸𑀬𑀭𑁂 𑀲𑀗𑁆𑀔𑀢𑀸 𑀅𑀢𑁆𑀢𑀤𑀼𑀩𑁆𑀩𑀮𑀸.

‘‘𑀧𑀭𑀧𑀘𑁆𑀘𑀬𑀢𑁄 𑀘 𑀚𑀸𑀬𑀭𑁂, 𑀧𑀭𑀆𑀭𑀫𑁆𑀫𑀡𑀢𑁄 𑀲𑀫𑀼𑀝𑁆𑀞𑀺𑀢𑀸;

𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀳𑀺 𑀘, 𑀧𑀭𑀥𑀫𑁆𑀫𑁂𑀳𑀺 𑀘𑀺𑀫𑁂 𑀧𑀪𑀸𑀯𑀺𑀢𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁨.𑁬𑁭𑁭);

𑁧𑁨𑁨𑁨-𑁩. 𑀇𑀤𑀸𑀦𑀺 𑀦𑀸𑀯𑀸𑀬𑀦𑁆𑀢𑀺𑀓𑀽𑀧𑀫𑀸𑀬𑀧𑀺 𑀦𑀸𑀫𑀭𑀽𑀧𑀸𑀦𑀁 𑀅𑀯𑀲𑀯𑀢𑁆𑀢𑀺𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀕𑀸𑀣𑀸𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀲𑁆𑀲𑀸𑀬𑀸𑀢𑀺 𑀧𑀢𑀺𑀝𑁆𑀞𑀸𑀬. 𑀬𑀦𑁆𑀢𑀻𑀢𑀺 𑀕𑀘𑁆𑀙𑀦𑁆𑀢𑀺. 𑀫𑀦𑀼𑀲𑁆𑀲𑁂 𑀦𑀺𑀲𑁆𑀲𑀸𑀬𑀸𑀢𑀺 𑀦𑁂𑀢𑀼𑀪𑀽𑀢𑁂 𑀦𑀺𑀬𑀸𑀫𑀓𑀓𑀫𑁆𑀫𑀓𑀭𑀸𑀤𑀺𑀫𑀦𑀼𑀲𑁆𑀲𑁂 𑀅𑀧𑀲𑁆𑀲𑀸𑀬. 𑀦 𑀳𑀺 𑀢𑁂𑀲𑀁 𑀅𑀭𑀡𑀕𑁆𑀕𑀳𑀡𑀮𑀗𑁆𑀓𑀸𑀭𑀲𑀡𑁆𑀞𑀸𑀧𑀦𑀉𑀤𑀓𑀲𑀺𑀜𑁆𑀘𑀦𑀸𑀤𑀺𑀓𑀺𑀭𑀺𑀬𑀸𑀬 𑀯𑀺𑀦𑀸 𑀦𑀸𑀯𑀸 𑀇𑀘𑁆𑀙𑀺𑀢𑀤𑁂𑀲𑀁 𑀧𑀸𑀧𑀼𑀡𑀸𑀢𑀺, 𑀬𑀣𑀸 𑀧𑀦 𑀉𑀪𑁄𑀧𑀺 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀅𑀡𑁆𑀡𑀯𑁂 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀉𑀪𑁄 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀺𑀢𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁨𑁨𑁪. 𑀲𑀢𑁆𑀢𑀲𑀜𑁆𑀜𑀁 𑀯𑀺𑀦𑁄𑀤𑁂𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀳𑀺 𑀅𑀦𑀸𑀤𑀺𑀓𑀸𑀮𑀪𑀸𑀯𑀺𑀢𑀁 𑀔𑀦𑁆𑀥𑀧𑀜𑁆𑀘𑀓𑁂 𑀲𑀢𑁆𑀢𑀕𑁆𑀕𑀸𑀳𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸. 𑀦𑀸𑀫…𑀧𑁂… 𑀯𑀼𑀘𑁆𑀘𑀢𑀻𑀢𑀺 ‘‘𑀇𑀤𑀁 𑀦𑀸𑀫𑀁, 𑀏𑀢𑁆𑀢𑀓𑀁 𑀦𑀸𑀫𑀁, 𑀦 𑀇𑀢𑁄 𑀪𑀺𑀬𑁆𑀬𑁄. 𑀇𑀤𑀁 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀘 𑀏𑀯𑀁 𑀲𑀩𑁆𑀩𑀸𑀓𑀸𑀭𑁂𑀦 𑀢𑁂𑀲𑀁 𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀫𑀼𑀔𑁂𑀦 𑀢𑀫𑀢𑁆𑀣𑀪𑀸𑀯𑀤𑀲𑁆𑀲𑀦𑀁 𑀏𑀢𑀁 𑀅𑀢𑁆𑀢𑀤𑀺𑀝𑁆𑀞𑀺𑀫𑀮𑀯𑀺𑀲𑁄𑀥𑀦𑀢𑁄 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺 𑀩𑀼𑀤𑁆𑀥𑀸𑀤𑀻𑀳𑀻𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀜𑁆𑀘𑁂𑀢𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑁂𑀯 𑀯𑀼𑀘𑁆𑀘𑀢𑀺, 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀦𑁆𑀢𑀺𑀧𑀺 𑀏𑀢𑀲𑁆𑀲𑁂𑀯 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀢𑀺𑀆𑀤𑀺𑀢𑁄𑀢𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀆𑀤𑀺𑀢𑁄 𑀤𑀼𑀓𑁆𑀔𑀢𑁄. 𑀬𑀣𑀸𑀳 ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀩𑁆𑀬𑀸𑀥𑀺𑀧𑀺 𑀤𑀼𑀓𑁆𑀔𑁄, 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺, 𑀢𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 (𑀫𑀳𑀸𑀯. 𑁧𑁪; 𑀲𑀁. 𑀦𑀺. 𑁫.𑁧𑁦𑁮𑁧; 𑀧𑀝𑀺. 𑀫. 𑁨.𑁩𑁦). 𑀅𑀦𑁆𑀢𑀤𑁆𑀯𑀬𑀦𑁆𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀁 𑀅𑀦𑁆𑀢𑀤𑁆𑀯𑀬𑀁. 𑀅𑀣 𑀯𑀸 𑀲𑀢𑁆𑀢𑀲𑁆𑀲 𑀅𑀘𑁆𑀘𑀦𑁆𑀢𑀁 𑀅𑀢𑁆𑀣𑀺𑀪𑀸𑀯𑀲𑀗𑁆𑀔𑀸𑀢𑀁, 𑀢𑀲𑁆𑀲 𑀦𑀢𑁆𑀣𑀺𑀪𑀸𑀯𑀲𑀗𑁆𑀔𑀸𑀢𑀜𑁆𑀘 𑀅𑀦𑁆𑀢𑀤𑁆𑀯𑀬𑀁. 𑀧𑀭𑀫𑀢𑁆𑀣𑀢𑁄 𑀅𑀦𑀼𑀧𑀮𑀩𑁆𑀪𑀦𑀢𑁄 𑀳𑀺 𑀲𑀢𑁆𑀢𑁄 𑀅𑀢𑁆𑀣𑀻𑀢𑀺 𑀯𑀚𑁆𑀚𑀺𑀢𑀩𑁆𑀩𑀫𑁂𑀯, 𑀮𑁄𑀓𑀲𑀗𑁆𑀓𑁂𑀢𑀢𑁄𑀯 𑀉𑀧𑀮𑀩𑁆𑀪𑀦𑀢𑁄 𑀦𑀢𑁆𑀣𑀻𑀢𑀺𑀧𑀺 𑀯𑀚𑁆𑀚𑀺𑀢𑀩𑁆𑀩𑀫𑁂𑀯𑀸𑀢𑀺. 𑀲𑀼𑀝𑁆𑀞𑀼𑀢𑀭𑀁 𑀧𑀭𑀺𑀲𑀼𑀤𑁆𑀥𑀁 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀺𑀝𑁆𑀞𑀺𑀕𑀢𑀸𑀦𑀺 𑀫𑀮𑀸𑀦𑀻𑀢𑀺 𑀤𑀺𑀝𑁆𑀞𑀺𑀕𑀢𑀲𑀗𑁆𑀔𑀸𑀢𑀸𑀦𑀺 𑀫𑀮𑀸𑀦𑀺. 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀢𑁄 𑀦𑀸𑀲𑀁 𑀯𑀺𑀦𑀸𑀲𑀁 𑀯𑀺𑀓𑁆𑀔𑀫𑁆𑀪𑀦𑀁 𑀉𑀧𑁂𑀦𑁆𑀢𑀺. 𑀢𑀣𑀸 𑀳𑁂𑀢𑀁 𑀤𑀺𑀝𑁆𑀞𑀺𑀫𑀮𑀯𑀺𑀲𑁄𑀥𑀦𑀢𑁄 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.