𑁧𑁫. 𑀧𑀦𑁆𑀦𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁮𑁦. 𑀏𑀯𑀁 𑀧𑀣𑀯𑀻𑀓𑀲𑀺𑀡𑀯𑀲𑁂𑀦 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀬𑀲𑁆𑀫𑀸 𑀲𑁂𑀲𑀓𑀲𑀺𑀡𑀯𑀲𑁂𑀦 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁂 𑀕𑀦𑁆𑀣𑀕𑀸𑀭𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀲𑀩𑁆𑀩𑀁 𑀞𑀧𑁂𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀭𑀽𑀧𑀸𑀭𑀽𑀧’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀭𑀽𑀧𑀸𑀭𑀽𑀧𑀫𑀢𑀻𑀢𑁂𑀦𑀸𑀢𑀺 𑀭𑀽𑀧𑀸𑀭𑀽𑀧𑀪𑀯𑀁 𑀅𑀢𑀺𑀓𑁆𑀓𑀦𑁆𑀢𑁂𑀦, 𑀧𑀼𑀦𑀸𑀦𑀽𑀧𑀧𑀢𑁆𑀢𑀺𑀯𑀲𑁂𑀦 𑀭𑀽𑀧𑀸𑀭𑀽𑀧𑀪𑀯𑀁 𑀅𑀢𑀺𑀓𑁆𑀓𑀦𑁆𑀢𑁂𑀦, 𑀧𑀕𑁂𑀯 𑀓𑀸𑀫𑀸𑀯𑀘𑀭𑀪𑀯𑀁. 𑀭𑀽𑀧𑀸𑀭𑀽𑀧𑀸𑀤𑀺𑀯𑁂𑀤𑀺𑀦𑀸𑀢𑀺 𑀭𑀽𑀧𑀸𑀭𑀽𑀧𑀸𑀤𑀺𑀪𑀽𑀫𑀦𑁆𑀢𑀭𑀯𑁂𑀤𑀺𑀦𑀸.

𑁯𑁮𑁨-𑁪. 𑀬𑀲𑁆𑀫𑀸 𑀅𑀬𑀁 𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺 𑀦𑀸𑀫 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸 𑀭𑀽𑀧𑀯𑀺𑀭𑀸𑀕𑀯𑀲𑁂𑀦𑁂𑀯 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸𑀯, 𑀢𑀲𑁆𑀫𑀸 𑀢𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑀲𑁆𑀲 𑀭𑀽𑀧𑁂 𑀯𑀺𑀭𑀚𑁆𑀚𑀦𑀸𑀓𑀸𑀭𑀁, 𑀯𑀺𑀭𑀢𑁆𑀢𑀫𑀸𑀦𑀲𑁂𑀦 𑀘 𑀢𑀤𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑁂 𑀔𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀤𑀡𑁆𑀟𑀦𑀝𑁆𑀞𑁂𑀦 𑀤𑀡𑁆𑀟𑁄, 𑀫𑀼𑀕𑁆𑀕𑀭𑀸𑀤𑀺, 𑀧𑀭𑀧𑀻𑀴𑀦𑀸𑀥𑀺𑀧𑁆𑀧𑀸𑀬𑁂𑀦 𑀢𑀲𑁆𑀲 𑀆𑀤𑀸𑀦𑀁 𑀤𑀡𑁆𑀟𑀸𑀤𑀸𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀸𑀤𑀻𑀦𑀁, 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀜𑁆𑀘 𑀕𑀳𑀡𑀁. 𑀘𑀓𑁆𑀔𑀼𑀭𑁄𑀕𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑁄𑀢𑀭𑁄𑀕𑀸𑀤𑀻𑀦𑀁. 𑀭𑀽𑀧𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸𑀢𑀺 𑀓𑀭𑀚𑀭𑀽𑀧𑀸𑀤𑀺𑀑𑀴𑀸𑀭𑀺𑀓𑀭𑀽𑀧𑁂 𑀢𑀦𑁆𑀦𑀺𑀤𑀸𑀦𑀁 𑀤𑁄𑀲𑀁 𑀤𑀺𑀲𑁆𑀯𑀸. 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑀲𑁄𑀢𑀺 𑀯𑀺𑀭𑀢𑁆𑀢𑀫𑀸𑀦𑀲𑁄. 𑀅𑀭𑀽𑀧𑀦𑁆𑀢𑀺 𑀅𑀭𑀽𑀧𑀸𑀯𑀘𑀭𑀪𑀸𑀯𑀦𑀁. 𑀢𑀫𑁆𑀳𑀸 𑀓𑀲𑀺𑀡𑀭𑀽𑀧𑀸𑀢𑀺 𑀢𑀫𑁆𑀳𑀸 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀸 𑀓𑀲𑀺𑀡𑀭𑀽𑀧𑀸. 𑀦𑀦𑀼 𑀘𑀸𑀬𑀁 𑀭𑀽𑀧𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀁 𑀲𑀫𑀢𑀺𑀓𑁆𑀓𑀫𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀜𑁆𑀘 𑀅𑀭𑀽𑀧𑀁 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀢𑁆𑀢𑀸𑀢𑀺 𑀓𑀣𑀁 𑀢𑀲𑁆𑀫𑀸 𑀦𑀺𑀩𑁆𑀩𑀺𑀚𑁆𑀚𑀢𑀻𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑀑𑀧𑀫𑁆𑀫𑀯𑀲𑁂𑀦 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀽𑀓𑀭𑀸𑀪𑀺𑀳𑀢𑁄𑀯 𑀲𑀸’’𑀢𑀺. 𑀬𑀣𑀸 𑀳𑀺 𑀯𑀦𑁂 𑀲𑀽𑀓𑀭𑁂𑀦 𑀧𑀳𑀢𑀫𑀢𑁆𑀢𑁄 𑀲𑀼𑀦𑀔𑁄 𑀢𑀢𑁄 𑀪𑀻𑀢𑁄 𑀭𑀽𑀧𑀤𑀲𑁆𑀲𑀦𑀯𑁂𑀮𑀸𑀬𑀁 𑀪𑀢𑁆𑀢𑀧𑀘𑀦𑀉𑀓𑁆𑀔𑀮𑀺𑀁 𑀤𑀽𑀭𑀢𑁄 𑀤𑀺𑀲𑁆𑀯𑀸 𑀲𑀽𑀓𑀭𑀧𑀝𑀺𑀪𑀸𑀕𑀢𑀸𑀬 𑀢𑀲𑁆𑀲𑀁 𑀲𑀽𑀓𑀭𑀸𑀲𑀗𑁆𑀓𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀢𑁆𑀭𑀲𑁆𑀢𑁄 𑀧𑀮𑀸𑀬𑀢𑁂𑀯, 𑀏𑀯𑀫𑁂𑀯 𑀭𑀽𑀧𑁂 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑀲𑁄 𑀢𑀁 𑀅𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑁄 𑀢𑀧𑁆𑀧𑀝𑀺𑀪𑀸𑀕𑁂 𑀓𑀲𑀺𑀡𑀭𑀽𑀧𑁂𑀧𑀺 𑀦𑀺𑀩𑁆𑀩𑀺𑀚𑁆𑀚𑀢𑀺, 𑀲𑀫𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯𑁮𑁫-𑁬. 𑀘𑀢𑀼𑀢𑁆𑀣𑁂 𑀧𑀦 𑀛𑀸𑀦𑀲𑁆𑀫𑀺𑀦𑁆𑀢𑀺 𑀞𑀧𑁂𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀁 𑀦𑀯𑀲𑀼 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀝𑀺𑀮𑀤𑁆𑀥𑀘𑀢𑀼𑀢𑁆𑀣𑀚𑁆𑀛𑀸𑀦𑁂. 𑀓𑁂𑀘𑀺 𑀧𑀦 𑀆𑀮𑁄𑀓𑀓𑀲𑀺𑀡𑀫𑁆𑀧𑀺 𑀞𑀧𑁂𑀢𑁆𑀯𑀸 𑀅𑀝𑁆𑀞𑀲𑀽𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲 𑀧𑀦 𑀞𑀧𑀦𑁂 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀲𑀼𑀝𑁆𑀞𑀼 𑀘𑀺𑀡𑁆𑀡𑁄 𑀘𑀭𑀺𑀢𑁄 𑀅𑀢𑀺𑀧𑁆𑀧𑀕𑀼𑀡𑀺𑀓𑀢𑁄 𑀆𑀯𑀚𑁆𑀚𑀦𑀸𑀤𑀺𑀮𑀓𑁆𑀔𑀡𑁄 𑀯𑀲𑀻𑀪𑀸𑀯𑁄 𑀏𑀢𑁂𑀦𑀸𑀢𑀺 𑀲𑀼𑀘𑀺𑀡𑁆𑀡𑀯𑀲𑀻. 𑀓𑀭𑁄𑀢𑀺…𑀧𑁂… 𑀬𑀢𑁄𑀢𑀺 𑀬𑀲𑁆𑀫𑀸 𑀇𑀤𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀫𑀬𑀸 𑀦𑀺𑀩𑁆𑀩𑀺𑀦𑁆𑀤𑀓𑀲𑀺𑀡𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺. 𑀆𑀲𑀦𑁆𑀦𑀲𑁄𑀫𑀦𑀲𑁆𑀲𑀜𑁆𑀘𑀸𑀢𑀺 𑀬𑀢𑁄 𑀢𑀢𑀺𑀬𑀚𑁆𑀛𑀸𑀦𑀲𑁆𑀲 𑀆𑀲𑀦𑁆𑀦𑀢𑀸𑀬 𑀆𑀲𑀦𑁆𑀦𑀲𑁄𑀫𑀦𑀲𑁆𑀲𑀧𑀘𑁆𑀘𑀢𑁆𑀣𑀺𑀓𑀜𑁆𑀘. 𑀣𑀽𑀮𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑁄𑀢𑀺 𑀲𑀦𑁆𑀢𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑀅𑀭𑀽𑀧𑀚𑁆𑀛𑀸𑀦𑀢𑁄 𑀏𑀢𑀁 𑀬𑀢𑁄 𑀣𑀽𑀮𑀁 𑀑𑀴𑀸𑀭𑀺𑀓𑀁. 𑀅𑀭𑀽𑀧𑀚𑁆𑀛𑀸𑀦𑀜𑁆𑀳𑀺 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀦𑁆𑀢𑀺𑀆𑀤𑀻𑀲𑀼 ‘‘𑀲𑀦𑁆𑀢𑀯𑀺𑀫𑁄𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀦𑁆𑀢𑀢𑀸𑀲𑀺𑀤𑁆𑀥𑀺 𑀘𑀲𑁆𑀲 𑀅𑀦𑀼𑀲𑁆𑀲𑀢𑀺𑀢𑁄 𑀤𑀝𑁆𑀞𑀩𑁆𑀩𑀸.

𑁯𑁮𑁭-𑁯𑁧. 𑀘𑀢𑀼𑀢𑁆𑀣𑁂𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑁂. 𑀧𑀞𑀫𑀸𑀭𑀼𑀧𑁆𑀧𑀜𑁆𑀘 𑀲𑀦𑁆𑀢𑀢𑁄 𑀤𑀺𑀲𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀦𑁆𑀢𑀯𑀲𑁂𑀦 𑀫𑀦𑀲𑀺 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑀡𑁂𑀦𑁂𑀯 𑀘𑁂𑀢𑁆𑀣 𑀧𑀡𑀻𑀢𑀢𑁄, 𑀲𑀼𑀔𑀼𑀫𑀢𑁄 𑀘 𑀫𑀦𑀲𑀺𑀓𑀸𑀭𑁄 𑀲𑀺𑀤𑁆𑀥𑁄𑀯 𑀳𑁄𑀢𑀻𑀢𑀺 𑀦 𑀢𑁂 𑀯𑀺𑀲𑀼𑀁 𑀕𑀳𑀺𑀢𑀸. 𑀧𑀢𑁆𑀣𑀭𑀺𑀢𑁆𑀯𑀸𑀦𑀸𑀢𑀺 𑀧𑀕𑁂𑀯 𑀯𑀟𑁆𑀠𑀺𑀢𑀁, 𑀢𑀤𑀸 𑀯𑀟𑁆𑀠𑀦𑀯𑀲𑁂𑀦 𑀯𑀸 𑀧𑀢𑁆𑀣𑀭𑀺𑀢𑁆𑀯𑀸. 𑀧𑀼𑀩𑁆𑀩𑀓𑀸𑀮𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦 𑀦𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀧𑀘𑁆𑀙𑀸 𑀦 𑀯𑀟𑁆𑀠𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀢𑀁 𑀧𑀘𑁆𑀙𑀸 𑀯𑀟𑁆𑀠𑀦𑀢𑁆𑀣𑀸𑀬 𑀯𑀸𑀬𑀫𑀺𑀬𑀫𑀸𑀦𑀫𑁆𑀧𑀺 𑀯𑀟𑁆𑀠𑀢𑀻𑀢𑀺. 𑀢𑁂𑀦𑀸𑀢𑀺 𑀓𑀲𑀺𑀡𑀭𑀽𑀧𑁂𑀦.

𑀇𑀤𑀸𑀦𑀺𑀲𑁆𑀲 𑀉𑀕𑁆𑀖𑀸𑀝𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀓𑀸𑀲𑁄 𑀇𑀢𑀺 𑀯𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀼𑀦 𑀢𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀉𑀕𑁆𑀖𑀸𑀝𑁂𑀦𑁆𑀢𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀤𑀬𑀯𑀲𑁂𑀦, 𑀧𑀭𑀺𑀘𑁆𑀙𑁂𑀤𑀨𑀭𑀡𑀯𑀲𑁂𑀦 𑀘 𑀅𑀦𑁆𑀢𑀸𑀪𑀸𑀯𑀢𑁄 𑀅𑀦𑀦𑁆𑀢𑁄. 𑀦 𑀲𑀁𑀯𑁂𑀮𑁆𑀮𑁂𑀢𑀻𑀢𑀺 𑀓𑀝𑀲𑀸𑀭𑀓𑀓𑀺𑀮𑀜𑁆𑀚𑀸𑀤𑀬𑁄 𑀯𑀺𑀬 𑀦 𑀧𑀝𑀺𑀲𑀁𑀳𑀭𑀢𑀺. 𑀦𑀸𑀯𑀚𑁆𑀚𑀦𑁆𑀢𑁄 𑀦 𑀧𑁂𑀓𑁆𑀔𑀦𑁆𑀢𑁄𑀢𑀺 𑀅𑀦𑀸𑀯𑀚𑁆𑀚𑀦𑁆𑀢𑁄 𑀅𑀦𑀧𑁂𑀓𑁆𑀔𑀦𑁆𑀢𑁄. 𑀅𑀜𑁆𑀜𑀤𑀢𑁆𑀣𑀼 𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀯𑀼𑀢𑁆𑀢𑀦𑀬𑁂𑀦 𑀫𑀦𑀲𑀺𑀓𑀭𑁄𑀦𑁆𑀢𑁄𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀓𑀲𑀺𑀡𑀭𑀽𑀧𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀫𑀦𑀲𑀺𑀓𑀭𑁄𑀢𑁄, 𑀢𑁂𑀦 𑀘 𑀨𑀼𑀝𑁆𑀞𑁄𑀓𑀸𑀲𑀁 ‘‘𑀆𑀓𑀸𑀲𑁄 𑀆𑀓𑀸𑀲𑁄’’𑀢𑀺 𑀫𑀦𑀲𑀺𑀓𑀭𑁄𑀢𑁄 𑀬𑀤𑀸 𑀢𑀁 𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀢𑀤𑀸 𑀲𑁄 𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑀺 𑀦𑀸𑀫𑀸𑀢𑀺.

𑁯𑁯𑁨-𑁫. 𑀏𑀯𑀁 𑀓𑀲𑀺𑀡𑀼𑀕𑁆𑀖𑀸𑀝𑀦𑀯𑀲𑁂𑀦 𑀧𑀝𑀺𑀮𑀤𑁆𑀥𑁂 𑀆𑀓𑀸𑀲𑀦𑀺𑀫𑀺𑀢𑁆𑀢𑁂 𑀧𑀼𑀦 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁, 𑀬𑀲𑁆𑀲𑀢𑁆𑀣𑀸𑀬 𑀬𑁂𑀲𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀤𑀢𑁆𑀣𑀲𑀺𑀤𑁆𑀥𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀓𑀸𑀲𑀲𑁆𑀲 𑀅𑀦𑀺𑀫𑀺𑀢𑁆𑀢𑀪𑀸𑀯𑁂𑀧𑀺 𑀦𑀺𑀫𑀺𑀢𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀪𑀸𑀯𑀢𑁄 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘…𑀧𑁂… 𑀯𑀺𑀓𑁆𑀔𑀫𑁆𑀪𑀦𑁆𑀢𑀻𑀢𑀺 𑀦𑀦𑀼 𑀭𑀽𑀧𑀸𑀯𑀘𑀭𑀧𑀞𑀫𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺, 𑀢𑀢𑁄 𑀧𑀝𑁆𑀞𑀸𑀬 𑀘 𑀦 𑀢𑁂𑀲𑀁 𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀛𑀸𑀦𑀢𑁄 𑀧𑀭𑀺𑀳𑀸𑀬𑁂𑀬𑁆𑀬𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀇𑀫𑀲𑁆𑀲 𑀧𑀦 𑀛𑀸𑀦𑀲𑁆𑀲 𑀯𑀡𑁆𑀡𑀪𑀡𑀦𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁 𑀬𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 𑀳𑁂𑀝𑁆𑀞𑀸 𑀧𑀳𑀻𑀦𑀸𑀦𑀁 𑀉𑀧𑀭𑀺 𑀧𑀳𑀸𑀦𑀯𑀘𑀦𑀦𑁆𑀢𑀺. 𑀬𑁂 𑀧𑀦 ‘‘𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀩𑁆𑀩𑁂𑀲𑀁 𑀅𑀓𑀼𑀲𑀮𑀸𑀦𑀁 𑀧𑀝𑀺𑀧𑀓𑁆𑀔𑀸𑀢𑀺 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀳𑀺 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑀸𑀤𑀻𑀲𑀼 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀸𑀯𑀘𑀦𑀲𑁆𑀲 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀬𑀫𑁆𑀧𑀺 𑀘𑁂𑀓𑁂 𑀯𑀤𑀦𑁆𑀢𑀺 ‘‘𑀲𑀦𑁆𑀢𑁂𑀯 𑀲𑀼𑀔𑀼𑀫𑀸𑀦𑀺 𑀭𑀽𑀧𑀸𑀯𑀘𑀭𑀅𑀯𑀺𑀓𑁆𑀔𑀫𑁆𑀪𑀦𑀻𑀬𑀸𑀦𑀺, 𑀢𑀸𑀦𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀦 𑀳𑀺 𑀫𑀳𑀕𑁆𑀕𑀢𑀓𑀼𑀲𑀮𑁂𑀲𑀼 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀯𑀺𑀬 𑀑𑀥𑀺𑀲𑁄 𑀧𑀳𑀸𑀦𑀁 𑀦𑀸𑀫 𑀅𑀢𑁆𑀣𑀺. 𑀬𑁄 𑀧𑀦 𑀭𑀽𑀧𑀸𑀯𑀘𑀭𑁂𑀳𑀺 𑀅𑀭𑀽𑀧𑀸𑀦𑀁 𑀉𑀴𑀸𑀭𑀨𑀮𑀢𑀸𑀤𑀺𑀯𑀺𑀲𑁂𑀲𑁄, 𑀲𑁄 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀲𑀦𑁆𑀢𑀢𑀭𑀧𑁆𑀧𑀡𑀻𑀢𑀢𑀭𑀪𑀸𑀯𑁂𑀦 𑀢𑁂𑀲𑀼𑀬𑁂𑀯 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀸𑀦𑀁 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀥𑀸𑀧𑀻𑀢𑀺 𑀦 𑀓𑁂𑀯𑀮𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑁂, ‘‘𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀻’’𑀢𑀺𑀆𑀤𑀻𑀲𑀼 𑀧𑀦 𑀇𑀥 𑀬𑀁 𑀯𑀢𑁆𑀢𑀩𑁆𑀩𑀁 𑀅𑀯𑀼𑀢𑁆𑀢𑀁, 𑀢𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁯𑁯𑁭-𑁧𑁦𑁦𑁧. ‘‘𑀧𑀼𑀦 𑀪𑀸𑀯𑁂𑀢𑀼𑀓𑀸𑀫𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀧𑀞𑀫𑀫𑁂𑀯 𑀧𑀞𑀫𑀸𑀭𑀼𑀧𑁆𑀧𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀓𑀺𑀁 𑀪𑀸𑀯𑁂𑀢𑀼𑀓𑀸𑀫𑁂𑀦𑀸𑀢𑀺 𑀅𑀦𑀼𑀬𑁄𑀕𑁂 ‘‘𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 ‘‘𑀤𑀼𑀢𑀺𑀬𑀸𑀭𑀼𑀧𑁆𑀧𑀫𑀸𑀦𑀲𑀁 𑀪𑀸𑀯𑁂𑀢𑀼𑀓𑀸𑀫𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀚𑁆𑀛𑀸𑀲𑀬𑁂𑀦. 𑀦 𑀳𑀺 𑀧𑀞𑀫𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀁 𑀪𑀸𑀯𑀺𑀢𑀦𑁆𑀢𑀺. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑀥𑀺𑀕𑀦𑁆𑀢𑀩𑁆𑀩𑀢𑁄 𑀢𑀁 𑀫𑀦𑀲𑀺𑀓𑀸𑀭𑀲𑀫𑀼𑀤𑀸𑀘𑀸𑀭𑀲𑁆𑀲 𑀳𑀸𑀦𑀪𑀸𑀕𑀺𑀬𑀪𑀸𑀯𑀸𑀯𑀳𑀦𑀢𑁄 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑁂𑀢𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀆𑀲𑀦𑁆𑀦…𑀧𑁂… 𑀧𑀘𑁆𑀘𑀢𑁆𑀣𑀺𑀓𑀦𑁆𑀢𑀺 𑀘𑀸’’𑀢𑀺. 𑀯𑀻𑀣𑀺𑀧𑀝𑀺𑀧𑀦𑁆𑀦𑀸𑀬 𑀪𑀸𑀯𑀦𑀸𑀬 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀸𑀯𑀳𑀪𑀸𑀯𑀢𑁄, 𑀧𑀡𑀻𑀢𑀪𑀸𑀯𑀲𑀺𑀤𑁆𑀥𑀺𑀢𑁄 𑀘 𑀧𑀞𑀫𑀸𑀭𑀼𑀧𑁆𑀧𑀢𑁄 𑀤𑀼𑀢𑀺𑀬𑀸𑀭𑀼𑀧𑁆𑀧𑀁 𑀲𑀦𑁆𑀢𑀢𑀭𑀲𑀪𑀸𑀯𑀦𑁆𑀢𑀺 𑀆𑀳 ‘‘𑀤𑀼𑀢𑀺𑀬𑀸𑀭𑀼𑀧𑁆𑀧…𑀧𑁂… 𑀧𑀦𑀸’’𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀲𑀼𑀧𑀡𑀻𑀢𑀢𑀭𑀸 𑀳𑁄𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀇𑀥𑀸’’𑀢𑀺 (𑀅𑀪𑀺𑀥. 𑁧𑁦𑁪𑁦). 𑀯𑀺𑀜𑁆𑀜𑀸𑀡𑀫𑀺𑀘𑁆𑀘𑁂𑀯𑀁 𑀫𑀦𑀲𑀸 𑀓𑀸𑀢𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀁 𑀇𑀘𑁆𑀘𑁂𑀯𑀁 𑀫𑀦𑀲𑀸 𑀓𑀸𑀢𑀩𑁆𑀩𑀁, 𑀓𑁂𑀯𑀮𑀁 𑀅𑀦𑀦𑁆𑀢𑀁 𑀅𑀦𑀦𑁆𑀢𑀦𑁆𑀢𑀺 𑀦 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀦𑀦𑁆𑀢𑀦𑁆𑀢𑀺…𑀧𑁂… 𑀫𑀦𑀲𑀸 𑀦𑀺𑀥𑀸’’𑀢𑀺. 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀁 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀧𑀦 𑀫𑀦𑀲𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑁧𑁦𑁦𑁨-𑁬. 𑀢𑀲𑁆𑀫𑀺𑀁 𑀧𑀦 𑀦𑀺𑀫𑀺𑀢𑁆𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑁂 𑀯𑀺𑀜𑁆𑀜𑀸𑀡𑀦𑀺𑀫𑀺𑀢𑁆𑀢𑁂. 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀫𑀸𑀦𑀲𑀦𑁆𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲. 𑀆𑀓𑀸𑀲𑀨𑀼𑀝𑀯𑀺𑀜𑁆𑀜𑀸𑀡𑁂𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑁂 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂 𑀆𑀭𑀫𑁆𑀫𑀡𑀪𑀽𑀢𑁂. 𑀅𑀧𑁆𑀧𑁂𑀢𑀻𑀢𑀺 𑀅𑀧𑁆𑀧𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀲𑀪𑀸𑀯𑀥𑀫𑁆𑀫𑁂𑀧𑀺 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀪𑀸𑀯𑀦𑀸𑀯𑀺𑀲𑁂𑀲𑀪𑀸𑀯𑀢𑁄 𑀇𑀤𑀁 𑀅𑀧𑁆𑀧𑀦𑀸𑀧𑀢𑁆𑀢𑀁 𑀳𑁄𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀁 𑀯𑀺𑀬. 𑀅𑀧𑁆𑀧𑀦𑀸…𑀧𑁂… 𑀦𑀬𑁄𑀯𑀸𑀢𑀺 𑀤𑀼𑀢𑀺𑀬𑀸𑀭𑀼𑀧𑁆𑀧𑀚𑁆𑀛𑀸𑀦𑁂 𑀧𑀼𑀭𑀺𑀫𑀪𑀸𑀕𑁂 𑀢𑀻𑀡𑀺, 𑀘𑀢𑁆𑀢𑀸𑀭𑀺 𑀯𑀸 𑀚𑀯𑀦𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀘𑀢𑀼𑀢𑁆𑀣𑀁, 𑀧𑀜𑁆𑀘𑀫𑀁 𑀯𑀸 𑀆𑀭𑀼𑀧𑁆𑀧𑀫𑀸𑀦𑀲𑀦𑁆𑀢𑀺𑀆𑀤𑀺𑀦𑀸 𑀅𑀧𑁆𑀧𑀦𑀸𑀦𑀬𑁄 𑀧𑀞𑀫𑀸𑀭𑀼𑀧𑁆𑀧𑀚𑁆𑀛𑀸𑀦𑁂 𑀯𑀼𑀢𑁆𑀢𑀦𑀬𑁄𑀯. 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀦𑁆𑀢𑀺 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀜𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀭𑀼𑀴𑁆𑀳𑀻𑀲𑀤𑁆𑀤𑀯𑀲𑁂𑀦 𑀯𑀼𑀢𑁆𑀢𑀪𑀸𑀯𑀫𑁂𑀯 𑀧𑀓𑀸𑀲𑁂𑀢𑀼𑀁 ‘‘𑀯𑀺𑀜𑁆𑀜𑀸𑀡𑀸…𑀧𑁂… 𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀅𑀦𑀦𑁆𑀢𑀲𑁆𑀲 𑀆𑀓𑀸𑀲𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀦𑀦𑁆𑀢𑀢𑀸𑀬 ‘‘𑀯𑀺𑀜𑁆𑀜𑀸𑀡𑀜𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀧𑀼𑀦 𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀅𑀦𑀦𑁆𑀢𑀢𑀸𑀬 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀓𑁆𑀓𑀸𑀭𑀯𑀲𑁂𑀦𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀸𑀭𑀼𑀧𑁆𑀧𑀁 𑀪𑀸𑀯𑁂𑀦𑁆𑀢𑁄 𑀳𑀺 𑀧𑀞𑀫𑀸𑀭𑀼𑀧𑁆𑀧𑀁 𑀅𑀦𑀦𑁆𑀢𑀢𑁄 𑀅𑀦𑀯𑀲𑁂𑀲𑀢𑁄 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀅𑀦𑀦𑁆𑀢𑀦𑁆𑀢𑀺 𑀫𑀦𑀲𑀺 𑀓𑀭𑁄𑀢𑀺.

𑁧𑁦𑁧𑁦. 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑁄𑀢𑀺 𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀆𑀓𑀸𑀲𑁄 𑀯𑀺𑀬 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀧𑀳𑀸𑀬 𑀢𑀲𑁆𑀲 𑀅𑀪𑀸𑀯𑁄 𑀫𑀦𑀲𑀺 𑀓𑀸𑀢𑀩𑁆𑀩𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑀁 𑀅𑀫𑀦𑀲𑀺𑀓𑀢𑁆𑀯𑀸 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑁄 𑀫𑀦𑀲𑀺 𑀓𑀸𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀬𑀺𑀤𑀁 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀦𑀯𑀲𑁂𑀦 𑀧𑀢𑁆𑀢𑀩𑁆𑀩𑀁, 𑀦 𑀧𑀦 𑀅𑀗𑁆𑀕𑀸𑀢𑀺𑀓𑁆𑀓𑀫𑀦𑀯𑀲𑁂𑀦. 𑀢𑀣𑀸 𑀘 𑀲𑀢𑀺 𑀆𑀭𑀫𑁆𑀫𑀡𑁂𑀬𑁂𑀯 𑀲𑀸𑀢𑀺𑀲𑀬𑀁 𑀤𑁄𑀲𑀤𑀲𑁆𑀲𑀦𑁂𑀦 𑀢𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀁, 𑀆𑀭𑀫𑁆𑀫𑀡𑀜𑁆𑀘 𑀤𑀼𑀢𑀺𑀬𑀸𑀭𑀼𑀧𑁆𑀧𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀫𑁂𑀯, 𑀢𑀲𑁆𑀫𑀸 𑀓𑀲𑀺𑀡𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀢𑀩𑁆𑀩𑀺𑀯𑀺𑀢𑁆𑀢𑀸𑀓𑀸𑀲𑀲𑁆𑀲 𑀯𑀺𑀬 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀁 𑀧𑀳𑀸𑀬 𑀢𑀤𑀪𑀸𑀯𑀲𑁆𑀲𑁂𑀯 𑀫𑀦𑀲𑀺𑀓𑀭𑀡𑀁 𑀬𑀼𑀢𑁆𑀢𑀦𑁆𑀢𑀺. 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀧𑀦 ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀪𑀸𑀯𑁄𑀬𑁂𑀯 𑀫𑀦𑀲𑀺 𑀓𑀸𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺, 𑀢𑁂 𑀧𑀦 𑀇𑀫𑁂𑀲𑀁 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀦𑀯𑀲𑁂𑀦 𑀧𑀢𑁆𑀢𑀩𑁆𑀩𑀪𑀸𑀯𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀣𑁂𑀦𑁆𑀢𑀺. 𑀬𑀤𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑀺, 𑀅𑀜𑁆𑀜𑀢𑁆𑀣 𑀤𑁄𑀲𑀁 𑀤𑀺𑀲𑁆𑀯𑀸 𑀅𑀜𑁆𑀜𑀲𑁆𑀲 𑀲𑀫𑀢𑀺𑀓𑁆𑀓𑀫𑁂 𑀅𑀢𑀺𑀧𑁆𑀧𑀲𑀗𑁆𑀕𑀤𑁄𑀲𑀢𑁄 𑀦 𑀫𑀼𑀘𑁆𑀘𑀦𑁆𑀢𑀺.

𑀅𑀣𑀸𑀧𑀺 𑀯𑀤𑁂𑀬𑁆𑀬𑀼𑀁 𑁋 ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀢𑁄 𑀲𑀫𑀸𑀧𑀚𑁆𑀚𑀢𑀺, 𑀲𑀢𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀢𑁄 𑀯𑀼𑀝𑁆𑀞𑀸𑀢𑀺, 𑀲𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀁 𑀪𑀸𑀯𑁂𑀢𑀻’𑀢𑀺 𑀯𑀘𑀦𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀪𑀸𑀯𑁄𑀬𑁂𑀯 𑀫𑀦𑀲𑀺 𑀓𑀸𑀢𑀩𑁆𑀩𑁄’’𑀢𑀺, 𑀢𑀬𑀺𑀤𑀁 𑀧𑀸𑀴𑀺𑀅𑀢𑁆𑀣𑀁 𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀕𑀳𑀡𑀯𑀲𑁂𑀦 𑀘𑀺𑀦𑁆𑀢𑀺𑀢𑀁. 𑀦 𑀳𑁂𑀢𑁆𑀣 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀬𑀤𑀺 𑀳𑀺 𑀢𑀁 𑀅𑀥𑀺𑀧𑁆𑀧𑁂𑀢𑀁 𑀲𑀺𑀬𑀸, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁆𑀢𑀺 𑀢𑀲𑁆𑀲 𑀧𑀥𑀸𑀦𑀪𑀸𑀯𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀢𑀜𑁆𑀜𑁂𑀯𑀸𑀢𑀺 𑀯𑀘𑀦𑁂𑀦𑁂𑀯 𑀧𑀭𑀺𑀬𑀢𑁆𑀢𑀁, 𑀓𑀺𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀘𑀦𑁂𑀦. 𑀅𑀣 𑀲𑀭𑀽𑀧𑀦𑀺𑀤𑁆𑀤𑁂𑀲𑀢𑁆𑀣𑀁 𑀯𑀺𑀜𑁆𑀜𑀸𑀡𑀯𑀘𑀦𑀁, 𑀏𑀯𑀁 𑀲𑀢𑀺 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁆𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀘𑀦𑁂𑀦 𑀬𑀁 𑀆𑀭𑀩𑁆𑀪 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀧𑀯𑀢𑁆𑀢𑀁, 𑀢𑀲𑁆𑀲𑁂𑀯 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑁆𑀲 𑀕𑀳𑀡𑀁, 𑀦 𑀇𑀢𑀭𑀲𑁆𑀲𑀸𑀢𑀺 𑀲𑀼𑀝𑁆𑀞𑀼 𑀯𑀼𑀢𑁆𑀢𑀁.

𑁧𑁦𑁧𑁧-𑁨. 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑁄𑀫𑀦𑀲𑀺𑀓𑀸𑀢𑀩𑁆𑀩𑁄𑀢𑀺 𑀯𑀢𑁆𑀯𑀸 𑀫𑀦𑀲𑀺𑀓𑀸𑀭𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀓𑀢𑁆𑀯𑀸 𑀫𑀦𑀲𑀸𑀢𑀺 𑀫𑀦𑀲𑀸 𑀆𑀭𑀫𑁆𑀫𑀡𑀁 𑀅𑀓𑀢𑁆𑀯𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀢𑀁 𑀅𑀘𑀺𑀦𑁆𑀢𑁂𑀢𑁆𑀯𑀸. ‘‘𑀆𑀓𑀸𑀲𑀁 𑀆𑀓𑀸𑀲’’𑀦𑁆𑀢𑀺 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀓𑀲𑀺𑀡𑀯𑀺𑀯𑀺𑀢𑁆𑀢𑀸𑀓𑀸𑀲𑀁 𑀯𑀺𑀬 ‘‘𑀦𑀢𑁆𑀣𑀺 𑀦𑀢𑁆𑀣𑀻’’𑀢𑀺, ‘‘𑀲𑀼𑀜𑁆𑀜𑀁 𑀲𑀼𑀜𑁆𑀜’’𑀦𑁆𑀢𑀺 𑀯𑀸 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀯𑀺𑀜𑁆𑀜𑀸𑀡𑀯𑀺𑀯𑀺𑀢𑁆𑀢𑀁 𑀅𑀪𑀸𑀯𑀫𑀢𑁆𑀢𑀫𑁂𑀯 𑀉𑀧𑀝𑁆𑀞𑀸𑀢𑀻𑀢𑀺 𑀆𑀳 ‘‘𑀦𑀢𑁆𑀣𑀻’’𑀢𑀺𑀆𑀤𑀺. 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀤𑁆𑀯𑀻𑀲𑀼 𑀧𑀓𑀸𑀭𑁂𑀲𑀼 𑀏𑀓𑁂𑀦𑀧𑀺 𑀅𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀦𑀢𑁆𑀣𑁄 𑀯𑀸 𑀯𑀸-𑀲𑀤𑁆𑀤𑁄, 𑀢𑁂𑀦 ‘‘𑀯𑀺𑀯𑀺𑀢𑁆𑀢𑀁 𑀯𑀺𑀯𑀺𑀢𑁆𑀢’’𑀦𑁆𑀢𑀺 𑀇𑀫𑀲𑁆𑀲𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀦𑀺𑀬𑀫𑁄 𑀧𑀦𑁂𑀢𑁆𑀣 𑀢𑀺𑀡𑁆𑀡𑀫𑁆𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀬𑀸𑀬𑀪𑀸𑀯𑀢𑁄𑀯 𑀲𑀺𑀤𑁆𑀥𑁄. 𑀧𑀭𑀺𑀬𑀸𑀬𑀲𑀤𑁆𑀤𑀸 𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀅𑀢𑁆𑀣𑀁 𑀲𑀸𑀥𑁂𑀦𑁆𑀢𑀸 𑀧𑀭𑀺𑀬𑀸𑀬𑀸𑀢𑀺 𑀮𑁄𑀓𑁂 𑀦𑀺𑀭𑀼𑀴𑁆𑀳𑀸. 𑀬𑀣𑀸𑀳𑀼 𑁋

‘‘𑀧𑀭𑀺𑀬𑀸𑀬𑁂𑀦𑁂𑀯 𑀢𑁂 𑀬𑀲𑁆𑀫𑀸, 𑀯𑀤𑀦𑁆𑀢𑀢𑁆𑀣𑀁 𑀦 𑀲𑀁𑀳𑀢𑀸;

𑀧𑀭𑀺𑀬𑀸𑀬𑀢𑁆𑀣𑀁 𑀢𑀢𑁄 𑀲𑀩𑁆𑀩𑀁, 𑀧𑀭𑀺𑀬𑀸𑀬𑁂𑀲𑀼 𑀯𑀯𑀢𑁆𑀣𑀺𑀢’’𑀦𑁆𑀢𑀺.

𑁧𑁦𑁧𑁩-𑁬. 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂𑀢𑀺 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑀲𑀗𑁆𑀔𑀸𑀢𑁂 𑀛𑀸𑀦𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀪𑀽𑀢𑁂 𑀦𑀺𑀫𑀺𑀢𑁆𑀢𑁂. 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀅𑀪𑀸𑀯𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸 𑀲𑀢𑀺 𑀲𑀫𑁆𑀫𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀲𑀢𑀺𑀲𑀻𑀲𑁂𑀦 𑀘𑁂𑀢𑁆𑀣 𑀉𑀧𑀘𑀸𑀭𑀚𑁆𑀛𑀸𑀦𑀸𑀦𑀼𑀕𑀼𑀡𑀸𑀦𑀁 𑀲𑀤𑁆𑀥𑀸𑀧𑀜𑁆𑀘𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀓𑀺𑀘𑁆𑀘𑀬𑁄𑀕𑀁 𑀤𑀲𑁆𑀲𑁂𑀢𑀺. 𑀉𑀧𑀘𑀸𑀭𑀚𑁆𑀛𑀸𑀦𑀁 𑀧𑀦 ‘‘𑀪𑀺𑀬𑁆𑀬𑁄𑀧𑀺 𑀲𑀫𑀸𑀥𑀺𑀬𑀢𑀺 𑀫𑀸𑀦𑀲’’𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸…𑀧𑁂… 𑀅𑀪𑀸𑀯𑀓𑁂𑀢𑀺 𑀏𑀯𑀁 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀲𑁆𑀲 𑀦𑀢𑁆𑀣𑀺𑀪𑀸𑀯𑀲𑀗𑁆𑀔𑀸𑀢𑁂 𑀯𑀺𑀦𑀸𑀲𑀸𑀪𑀸𑀯𑀓𑁂 𑀦 𑀧𑀼𑀭𑁂 𑀅𑀪𑀸𑀯𑀸𑀤𑀺𑀓𑁂. 𑀅𑀧𑁆𑀧𑀦𑀸𑀦𑀬𑁄 𑀧𑀦𑁂𑀢𑁆𑀣 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀧𑁆𑀧𑀦𑀸𑀬 𑀦𑀬𑁄’’𑀢𑀺𑀆𑀤𑀺.

𑁧𑁦𑁧𑁭-𑁯. 𑀏𑀯𑀁 𑀬𑀁 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁, 𑀢𑀁 𑀅𑀢𑀺𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀓𑀸𑀲𑀕𑀢𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀓𑀫𑁆𑀫𑀫𑀦𑀓𑁆𑀓𑀸𑀭𑁂 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂𑀢𑀺 ‘‘𑀦𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀧𑀯𑀢𑁆𑀢𑀧𑀭𑀺𑀓𑀫𑁆𑀫𑀫𑀦𑀲𑀺𑀓𑀸𑀭𑁂 𑀅𑀫𑀦𑀲𑀺𑀓𑀭𑀡𑁂𑀦 𑀅𑀲𑁆𑀫𑀺𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑁂 𑀅𑀦𑁆𑀢𑀭𑀳𑀺𑀢𑁂, 𑀦 𑀧𑀦 𑀔𑀡𑀪𑀗𑁆𑀕𑀯𑀲𑁂𑀦, 𑀛𑀸𑀦𑀧𑀭𑀺𑀳𑀸𑀦𑀺𑀯𑀲𑁂𑀦 𑀯𑀸 𑀅𑀦𑁆𑀢𑀭𑀳𑀺𑀢𑁂. 𑀔𑀡𑀪𑀗𑁆𑀕𑀯𑀲𑁂𑀦 𑀳𑀺 𑀅𑀦𑁆𑀢𑀭𑀥𑀸𑀦𑀁 𑀔𑀡𑁂 𑀔𑀡𑁂 𑀉𑀧𑀮𑀩𑁆𑀪𑀢𑀺. 𑀧𑀭𑀺𑀳𑀸𑀦𑀺𑀯𑀲𑁂𑀦 𑀘 𑀅𑀦𑁆𑀢𑀭𑀥𑀸𑀦𑁂 𑀧𑀼𑀦 𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀉𑀢𑁆𑀢𑀭𑀺 𑀜𑀸𑀡𑀸𑀥𑀺𑀕𑀫𑁄𑀬𑁂𑀯 𑀦𑀢𑁆𑀣𑀻𑀢𑀺. 𑀢𑀲𑁆𑀲𑀸𑀧𑀕𑀫𑀫𑀢𑁆𑀢𑀁𑀯 𑀧𑀲𑁆𑀲𑀦𑁆𑀢𑁄 𑀯𑀲𑀢𑀻𑀢𑀺 𑀢𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀲𑁆𑀲 𑀅𑀪𑀸𑀯𑀫𑀢𑁆𑀢𑀁 𑀧𑀲𑁆𑀲𑀦𑁆𑀢𑁄 𑀲𑁄 𑀬𑁄𑀕𑀸𑀯𑀘𑀭𑁄 𑀯𑀺𑀳𑀭𑀢𑀺. 𑀬𑀣𑀸 𑀓𑀣𑀁 𑀯𑀺𑀬𑀸𑀢𑀺 𑀆𑀳 ‘‘𑀲𑀦𑁆𑀦𑀺𑀧𑀸𑀢’’𑀦𑁆𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀦𑀸𑀫 𑀓𑁄𑀘𑀺 𑀧𑀼𑀭𑀺𑀲𑁄 𑀫𑀡𑁆𑀟𑀮𑀫𑀸𑀴𑀸𑀤𑀻𑀲𑀼 𑀓𑀢𑁆𑀣𑀘𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀺𑀲𑁆𑀯𑀸 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀲𑀦𑁆𑀦𑀺𑀧𑀸𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀉𑀝𑁆𑀞𑀸𑀬 𑀧𑀓𑁆𑀓𑀦𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀼𑀦 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀲𑀼𑀜𑁆𑀜𑀫𑁂𑀯 𑀧𑀲𑁆𑀲𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀲𑀦𑁆𑀦𑀺𑀧𑀢𑀺𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀺𑀲𑁆𑀯𑀸 𑀕𑀢𑁄, 𑀢𑀢𑁄 𑀲𑀩𑁆𑀩𑁂𑀲𑀼 𑀪𑀺𑀓𑁆𑀔𑀽𑀲𑀼 𑀅𑀧𑀕𑀢𑁂𑀲𑀼 𑀢𑀁 𑀞𑀸𑀦𑀁 𑀢𑁂𑀳𑀺 𑀲𑀼𑀜𑁆𑀜𑀫𑁂𑀯 𑀧𑀲𑁆𑀲𑀢𑀺, 𑀦 𑀧𑀦 𑀢𑁂𑀲𑀁 𑀓𑀼𑀢𑁄𑀘𑀺 𑀅𑀧𑀕𑀢𑀓𑀸𑀭𑀡𑀁, 𑀏𑀯𑀫𑀬𑀁 𑀬𑁄𑀕𑀸𑀯𑀘𑀭𑁄 𑀧𑀼𑀩𑁆𑀩𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀚𑁆𑀛𑀸𑀦𑀘𑀓𑁆𑀔𑀼𑀦𑀸 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀤𑀺𑀲𑁆𑀯𑀸 𑀦𑀢𑁆𑀣𑀻𑀢𑀺 𑀫𑀦𑀲𑀺𑀓𑀸𑀭𑁂𑀦 𑀢𑀲𑁆𑀫𑀺𑀁 𑀅𑀧𑀕𑀢𑁂 𑀢𑀢𑀺𑀬𑀸𑀭𑀼𑀧𑁆𑀧𑀘𑀓𑁆𑀔𑀼𑀦𑀸 𑀢𑀲𑁆𑀲 𑀦𑀢𑁆𑀣𑀺𑀪𑀸𑀯𑀫𑁂𑀯 𑀧𑀲𑁆𑀲𑀢𑀺, 𑀦 𑀢𑀲𑁆𑀲 𑀅𑀧𑀕𑀢𑀓𑀸𑀭𑀡𑀁 𑀯𑀻𑀫𑀁𑀲𑀢𑀺 𑀛𑀸𑀦𑀲𑁆𑀲 𑀢𑀸𑀤𑀺𑀲𑀸𑀪𑁄𑀕𑀸𑀪𑀸𑀯𑀢𑁄𑀢𑀺.

𑁧𑁦𑁨𑁦-𑁪. 𑀘𑀢𑀼𑀢𑁆𑀣𑀸…𑀧𑁂… 𑀦 𑀘 𑀲𑀦𑁆𑀢𑀦𑁆𑀢𑀺 𑀬𑀣𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀺𑀢𑁆𑀢𑀁 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀯𑀺𑀲𑁂𑀲𑀁 𑀲𑀦𑁆𑀢𑀁, 𑀏𑀯𑀫𑀬𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀦 𑀘 𑀲𑀦𑁆𑀢𑀸 𑀢𑀤𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 ‘‘𑀲𑀜𑁆𑀜𑀸 𑀭𑁄𑀕𑁄, 𑀲𑀜𑁆𑀜𑀸 𑀕𑀡𑁆𑀟𑁄, 𑀲𑀜𑁆𑀜𑀸 𑀲𑀮𑁆𑀮𑀁, 𑀏𑀢𑀁 𑀲𑀦𑁆𑀢𑀁, 𑀏𑀢𑀁 𑀧𑀡𑀻𑀢𑀁, 𑀬𑀤𑀺𑀤𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦’’𑀦𑁆𑀢𑀺 𑀇𑀫𑀲𑁆𑀲𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀢𑁆𑀣𑀁 𑀲𑀦𑁆𑀢𑀢𑁄𑀢𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦𑁂𑀯 𑀲𑀯𑀺𑀲𑁂𑀲𑀁 𑀲𑀦𑁆𑀢𑀢𑀸𑀬, 𑀅𑀲𑀦𑁆𑀢𑀪𑀸𑀯𑀓𑀭𑀭𑁄𑀕𑀸𑀤𑀺𑀲𑀭𑀺𑀓𑁆𑀔𑀓𑀲𑀜𑁆𑀜𑀸𑀯𑀺𑀭𑀳𑀢𑁄 𑀘 𑀲𑀦𑁆𑀢𑀢𑁄 𑀤𑀺𑀲𑁆𑀯𑀸. ‘‘𑀲𑀦𑁆𑀢𑀁 𑀲𑀦𑁆𑀢𑀫𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀪𑀸𑀯𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀯𑀺𑀪𑀗𑁆𑀕𑁂𑀧𑀺 𑀳𑀺 𑀢𑀁𑀬𑁂𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀅𑀬𑀫𑁂𑀯 𑀪𑀸𑀯𑀦𑀸𑀓𑀸𑀭𑁄 𑀕𑀳𑀺𑀢𑁄. 𑀅𑀧𑀭𑁂 𑀧𑀦 ‘‘𑀧𑀸𑀴𑀺𑀬𑀁 𑀇𑀫𑀲𑁆𑀲 𑀪𑀸𑀯𑀦𑀸𑀓𑀸𑀭𑁄 𑀦 𑀕𑀳𑀺𑀢𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀁 𑀯𑀤𑀦𑁆𑀢𑀺, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀤𑀺𑀢𑁄 𑀕𑀳𑁂𑀢𑀩𑁆𑀩𑀁.

𑁧𑁦𑁨𑁭. 𑀢𑀢𑀺𑀬𑀸𑀭𑀼𑀧𑁆𑀧𑀲𑀗𑁆𑀔𑀸𑀢𑀓𑁆𑀔𑀦𑁆𑀥𑁂𑀲𑀼 𑀘 𑀘𑀢𑀽𑀲𑀼𑀧𑀺 𑀆𑀭𑀫𑁆𑀫𑀡𑀪𑀽𑀢𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁦𑁨𑁯-𑁩𑁧. 𑀅𑀪𑀸𑀯𑀫𑀢𑁆𑀢𑀫𑁆𑀧𑀻𑀢𑀺 𑀲𑀼𑀜𑁆𑀜𑀢𑀫𑀢𑁆𑀢𑀫𑁆𑀧𑀺 𑀏𑀯𑀁 𑀲𑀼𑀔𑀼𑀫𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀦𑁆𑀢𑀸𑀭𑀫𑁆𑀫𑀡𑀢𑀸𑀬𑀸𑀢𑀺 𑀲𑀦𑁆𑀢𑀁 𑀆𑀭𑀫𑁆𑀫𑀡𑀁 𑀏𑀢𑀲𑁆𑀲𑀸𑀢𑀺 𑀲𑀦𑁆𑀢𑀸𑀭𑀫𑁆𑀫𑀡𑀸, 𑀢𑀩𑁆𑀪𑀸𑀯𑁄 𑀲𑀦𑁆𑀢𑀸𑀭𑀫𑁆𑀫𑀡𑀢𑀸, 𑀢𑀸𑀬, 𑀦 𑀛𑀸𑀦𑀲𑀦𑁆𑀢𑀢𑀸𑀬. 𑀦 𑀳𑀺 𑀢𑀢𑀺𑀬𑀸𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀢𑁄 𑀲𑀦𑁆𑀢𑀢𑀭𑀸. 𑀘𑁄𑀤𑀓𑁄 𑀬𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀦 𑀢𑀢𑁆𑀣 𑀆𑀤𑀻𑀦𑀯𑀤𑀲𑁆𑀲𑀦𑀁 𑀪𑀯𑁂𑀬𑁆𑀬. 𑀅𑀲𑀢𑀺 𑀘 𑀆𑀤𑀻𑀦𑀯𑀤𑀲𑁆𑀲𑀦𑁂 𑀦 𑀲𑀫𑀢𑀺𑀓𑁆𑀓𑀫𑁄 𑀏𑀯 𑀲𑀺𑀬𑀸𑀢𑀺 ‘‘𑀲𑀦𑁆𑀢𑀢𑁄 𑀘𑁂 𑀫𑀦𑀓𑁆𑀓𑀸𑀭𑁄 𑀓𑀣𑀜𑁆𑀘 𑀲𑀫𑀢𑀺𑀓𑁆𑀓𑀫𑁄’’𑀢𑀺 𑀆𑀳. 𑀇𑀢𑀭𑁄 ‘‘𑀅𑀦𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀳𑀸𑀭𑀫𑀸𑀳. 𑀢𑁂𑀦 𑀆𑀤𑀻𑀦𑀯𑀤𑀲𑁆𑀲𑀦𑀫𑁆𑀧𑀺 𑀅𑀢𑁆𑀣𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀺𑀜𑁆𑀳𑀺 𑀛𑀸𑀦𑁂 𑀅𑀪𑀺𑀭𑀢𑀺, 𑀢𑀢𑁆𑀣 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁. 𑀲𑀸 𑀧𑀦𑀲𑁆𑀲 𑀢𑀢𑀺𑀬𑀸𑀭𑀼𑀧𑁆𑀧𑁂 𑀲𑀩𑁆𑀩𑀲𑁄𑀯 𑀦𑀢𑁆𑀣𑀺, 𑀓𑁂𑀯𑀮𑀁 𑀲𑀼𑀜𑁆𑀜𑀪𑀸𑀯𑀢𑁄 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑀫𑁂𑀯. 𑀢𑀣𑀸 𑀳𑁂𑀲 𑀓𑀺𑀜𑁆𑀘𑀸𑀧𑀺 𑀢𑀁 𑀲𑀦𑁆𑀢𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀅𑀣 𑀔𑁆𑀯𑀲𑁆𑀲 ‘‘𑀅𑀳𑀫𑁂𑀢𑀁 𑀆𑀯𑀚𑁆𑀚𑀺𑀲𑁆𑀲𑀸𑀫𑀺, 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀡𑀻𑀢𑀢𑀭𑀢𑀸𑀬. 𑀬𑀣𑀸 𑀳𑀺 𑀭𑀸𑀚𑀸 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦 𑀦𑀕𑀭𑀯𑀻𑀣𑀺𑀬𑀁 𑀘𑀭𑀦𑁆𑀢𑁄 𑀤𑀦𑁆𑀢𑀓𑀸𑀭𑀸𑀤𑀬𑁄 𑀓𑀫𑁆𑀫𑀓𑀸𑀭𑁂 𑀙𑁂𑀓𑁂 𑀅𑀦𑁂𑀓𑀸𑀦𑀺 𑀤𑀦𑁆𑀢𑀯𑀺𑀓𑀢𑀺𑀆𑀤𑀻𑀦𑀺 𑀲𑀺𑀧𑁆𑀧𑀸𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀳𑁄 𑀯𑀢 𑀭𑁂 𑀙𑁂𑀓𑀸 𑀆𑀘𑀭𑀺𑀬𑀸, 𑀈𑀤𑀺𑀲𑀸𑀦𑀺 𑀲𑀺𑀧𑁆𑀧𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀢𑁂𑀲𑀁 𑀙𑁂𑀓𑀢𑀸𑀬 𑀢𑀼𑀲𑁆𑀲𑀢𑀺, 𑀦 𑀘𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀅𑀳𑁄 𑀯𑀢𑀸𑀳𑀫𑁆𑀧𑀺 𑀭𑀚𑁆𑀚𑀁 𑀧𑀳𑀸𑀬 𑀏𑀯𑀭𑀽𑀧𑁄 𑀲𑀺𑀧𑁆𑀧𑀺𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀭𑀚𑁆𑀚𑀲𑀺𑀭𑀺𑀬𑀸 𑀫𑀳𑀸𑀦𑀺𑀲𑀁𑀲𑀢𑀸𑀬, 𑀲𑁄 𑀢𑁂𑀲𑀁 𑀚𑀻𑀯𑀺𑀢𑀁 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄 𑀢𑁂 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑁧𑁦𑁩𑁨. 𑀲𑀼𑀔𑀼𑀫𑀁 𑀧𑀭𑀦𑁆𑀢𑀺 𑀉𑀓𑁆𑀓𑀁𑀲𑀢𑁄 𑀲𑀼𑀔𑀼𑀫𑀁, 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑀢𑁄 𑀧𑀝𑁆𑀞𑀸𑀬 𑀳𑀺 𑀢𑀘𑁆𑀙𑁂𑀦𑁆𑀢𑀺𑀬𑀸 𑀯𑀺𑀬 𑀧𑀯𑀢𑁆𑀢𑀫𑀸𑀦𑀸𑀬 𑀪𑀸𑀯𑀦𑀸𑀬 𑀅𑀦𑀼𑀓𑁆𑀓𑀫𑁂𑀦 𑀲𑀗𑁆𑀔𑀸𑀭𑀸 𑀢𑀢𑁆𑀣 𑀅𑀦𑁆𑀢𑀺𑀫𑀓𑁄𑀝𑁆𑀞𑀸𑀲𑀢𑀁 𑀧𑀸𑀧𑀺𑀢𑀸𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀪𑀸𑀯𑀦𑀸 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀦𑀦𑀼 𑀘𑁂𑀲𑀸 𑀢𑀤𑀯𑀢𑁆𑀣𑀁 𑀧𑀸𑀧𑀺𑀢𑀸 𑀆𑀭𑀫𑁆𑀫𑀡𑀁 𑀦 𑀲𑀫𑁆𑀫𑀸 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺? 𑀦𑀬𑀺𑀤𑀫𑁂𑀯 𑀤𑀝𑁆𑀞𑀩𑁆𑀩𑀁. 𑀪𑀸𑀯𑀦𑀸𑀩𑀮𑁂𑀦 𑀲𑀼𑀔𑀼𑀫𑀪𑀸𑀯𑀁 𑀧𑀸𑀧𑀺𑀢𑀸𑀧𑀺 𑀘𑁂𑀲𑀸 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂 𑀤𑀼𑀩𑁆𑀩𑀮𑀢𑁆𑀢𑀁 𑀦 𑀧𑀸𑀧𑀺𑀢𑀸, 𑀅𑀣 𑀔𑁄 𑀯𑀺𑀧𑁆𑀨𑀸𑀭𑀺𑀓𑀢𑀸𑀪𑀸𑀯𑀁 𑀕𑀫𑀺𑀢𑀸, 𑀢𑁂𑀦 𑀢𑀣𑀸 𑀲𑀼𑀔𑀼𑀫𑀸𑀧𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂 𑀦 𑀤𑀼𑀩𑁆𑀩𑀮𑀸 𑀏𑀯𑀸𑀢𑀺 𑀦 𑀢𑀢𑁆𑀣 𑀢𑀲𑁆𑀲𑀸 𑀅𑀲𑀸𑀫𑀢𑁆𑀣𑀺𑀬𑀁 𑀳𑁄𑀢𑀺.

𑁧𑁦𑁩𑁩-𑁪. 𑀬𑀸𑀬 𑀲𑀜𑁆𑀜𑀸𑀬𑀸𑀢𑀺 𑀬𑀸𑀤𑀺𑀲𑀸𑀬 𑀲𑀜𑁆𑀜𑀸𑀬 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀸𑀬. 𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄. 𑀦𑁂𑀯𑀲𑀜𑁆𑀜𑀻 𑀘 𑀦𑀸𑀲𑀜𑁆𑀜𑀻 𑀳𑁄𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀲𑀫𑀗𑁆𑀕𑀻 𑀳𑁄𑀢𑀺. 𑀦 𑀓𑁂𑀯𑀮𑀁 𑀢𑀼 𑀲𑀜𑁆𑀜𑀸𑀯 𑀏𑀤𑀺𑀲𑀻 𑀲𑀼𑀔𑀼𑀫𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸 𑀳𑁄𑀢𑀺, 𑀅𑀣 𑀔𑁄 𑀧𑀦 𑀯𑁂𑀤𑀦𑀸𑀤𑀬𑁄𑀧𑀺 𑀲𑀼𑀔𑀼𑀫𑀸, 𑀯𑁂𑀤𑀦𑀸𑀧𑀺 𑀦𑁂𑀯𑀯𑁂𑀤𑀦𑀸𑀦𑀸𑀯𑁂𑀤𑀦𑀸, 𑀘𑀺𑀢𑁆𑀢𑀫𑁆𑀧𑀺 𑀦𑁂𑀯𑀘𑀺𑀢𑁆𑀢𑀁𑀦𑀸𑀘𑀺𑀢𑁆𑀢𑀁, 𑀨𑀲𑁆𑀲𑁄𑀧𑀺 𑀦𑁂𑀯𑀨𑀲𑁆𑀲𑁄𑀦𑀸𑀨𑀲𑁆𑀲𑁄. 𑀏𑀲 𑀦𑀬𑁄 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼. 𑀲𑀜𑁆𑀜𑀸𑀲𑀻𑀲𑁂𑀦 𑀧𑀦 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁩𑁨, 𑁩𑁪𑁧, 𑁩𑁫𑁭, 𑁩𑁫𑁯; 𑀅. 𑀦𑀺. 𑁭.𑁪𑁪; 𑁯.𑁨𑁪) 𑀯𑀺𑀬. 𑀦𑀦𑀼 𑀘𑁂𑀢𑁆𑀣 𑀬𑀤𑀺 𑀲𑀜𑁆𑀜𑀸 𑀅𑀢𑁆𑀣𑀺, 𑀓𑀣𑀁 𑀦𑁂𑀯𑀲𑀜𑁆𑀜𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀬𑀤𑀺 𑀦𑀢𑁆𑀣𑀺, 𑀓𑀣𑀁 𑀦𑀸𑀲𑀜𑁆𑀜𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑀇𑀫𑀫𑀢𑁆𑀣𑀁 𑀉𑀧𑀫𑀸𑀳𑀺 𑀲𑀸𑀥𑁂𑀢𑀼𑀁 ‘‘𑀧𑀢𑁆𑀢𑀫𑀓𑁆𑀔𑀦𑀢𑁂𑀮𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀢𑁆𑀢𑀫𑀓𑁆𑀔𑀡𑀢𑁂𑀮𑁂𑀦𑀸𑀢𑀺 𑀅𑀦𑁆𑀢𑁄𑀯𑀼𑀢𑁆𑀣𑀢𑀸𑀬 𑀬𑀸𑀕𑀼𑀬𑀸 𑀲𑀤𑁆𑀥𑀺𑀁 𑀅𑀓𑀧𑁆𑀧𑀺𑀬𑀝𑁆𑀞𑁂𑀦 𑀢𑁂𑀮𑀁 𑀅𑀢𑁆𑀣𑀻𑀢𑀺, 𑀦𑀸𑀴𑀺𑀧𑀽𑀭𑀸𑀤𑀻𑀦𑀁 𑀯𑀲𑁂𑀦 𑀦𑀢𑁆𑀣𑀻𑀢𑀺 𑀘 𑀯𑀢𑁆𑀢𑀩𑁆𑀩𑁂𑀦 𑀧𑀢𑁆𑀢𑁂 𑀫𑀓𑁆𑀔𑀺𑀢𑀢𑁂𑀮𑁂𑀦. 𑀫𑀕𑁆𑀕𑀲𑁆𑀫𑀺𑀁 𑀉𑀤𑀓𑁂𑀦 𑀘𑀸𑀢𑀺 𑀉𑀧𑀸𑀳𑀦𑀢𑁂𑀫𑀦𑀫𑀢𑁆𑀢𑀝𑁆𑀞𑁂𑀦 𑀉𑀤𑀓𑀁 𑀅𑀢𑁆𑀣𑀻𑀢𑀺, 𑀦𑀳𑀸𑀦𑀯𑀲𑁂𑀦 𑀦𑀢𑁆𑀣𑀻𑀢𑀺 𑀘 𑀯𑀢𑁆𑀢𑀩𑁆𑀩𑁂𑀦 𑀫𑀕𑁆𑀕𑀲𑁆𑀫𑀺𑀁 𑀉𑀤𑀓𑁂𑀦.

𑁧𑁦𑁩𑁫-𑁭. 𑀅𑀬𑀁 𑀅𑀢𑁆𑀣𑁄𑀢𑀺 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀲𑀪𑀸𑀯𑀢𑁄 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀦𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀢𑀸𑀲𑀗𑁆𑀔𑀸𑀢𑁄 𑀅𑀬𑀫𑀢𑁆𑀣𑁄. 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀳𑀺 𑀦𑁂𑀯𑀲𑀜𑁆𑀜𑀢𑀸, 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦 𑀦𑀸𑀲𑀜𑁆𑀜𑀢𑀸 𑀘 𑀳𑁄𑀢𑀺. 𑀢𑁂𑀦𑀸𑀳 ‘‘𑀧𑀝𑀼𑀲𑀜𑁆𑀜𑀸𑀬 𑀓𑀺𑀘𑁆𑀘𑀲𑁆𑀲𑀸’’𑀢𑀺𑀆𑀤𑀺. 𑀆𑀭𑀫𑁆𑀫𑀡𑀲𑀜𑁆𑀚𑀸𑀦𑀦𑀜𑁆𑀘𑁂𑀯 𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑀬𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀺𑀤𑀸𑀚𑀦𑀦𑀜𑁆𑀘 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀣𑀫𑀬𑀁 𑀲𑀜𑁆𑀜𑀸𑀯 𑀲𑀫𑀸𑀦𑀸 𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀆𑀳 ‘‘𑀬𑀣𑀸 𑀤𑀳𑀦𑀓𑀺𑀘𑁆𑀘’’𑀦𑁆𑀢𑀺𑀆𑀤𑀺. 𑀦𑁆𑀳𑀸𑀢𑀼𑀓𑀸𑀫𑀲𑁆𑀲 𑀉𑀡𑁆𑀳𑀲𑀻𑀢𑀪𑀸𑀯𑀁 𑀅𑀓𑀢𑁆𑀯𑀸 𑀲𑀼𑀔𑀚𑀦𑀦𑀢𑀸𑀬 𑀲𑀼𑀔𑁄𑀤𑀓𑀁, 𑀢𑀲𑁆𑀫𑀺𑀁. 𑀢𑁂𑀚𑁄𑀥𑀸𑀢𑀼 𑀬𑀣𑀸 𑀤𑀳𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀲𑀸 𑀅𑀢𑀺𑀲𑀦𑁆𑀢𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀢𑁆𑀢𑀸 𑀆𑀭𑀫𑁆𑀫𑀡𑀲𑀜𑁆𑀚𑀸𑀦𑀦𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀭𑀫𑀲𑀼𑀔𑀼𑀫𑀢𑁆𑀢𑀁 𑀕𑀢𑀸𑀯. 𑀢𑁂𑀦𑁂𑀯 𑀳𑁂𑀲𑀸 𑀅𑀓𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀼𑀔𑀕𑁆𑀕𑀬𑁆𑀳𑀸 𑀦 𑀳𑁄𑀢𑀻𑀢𑀺 𑀲𑁂𑀲𑀲𑀫𑀸𑀧𑀢𑁆𑀢𑀻𑀲𑀼 𑀲𑀜𑁆𑀜𑀸 𑀯𑀺𑀬 𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑀬𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀺𑀤𑀸𑀚𑀦𑀦𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀜𑁆𑀜𑁂𑀲𑀼 𑀳𑀺 𑀔𑀦𑁆𑀥𑁂𑀲𑀼 𑀅𑀓𑀢𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀪𑀺𑀓𑁆𑀔𑀼 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑁆𑀔𑀦𑁆𑀥𑁂 𑀲𑀫𑁆𑀫𑀲𑀺𑀢𑁆𑀯𑀸 𑀦𑀺𑀩𑁆𑀩𑀺𑀤𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀅𑀧𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀧𑀓𑀢𑀺𑀯𑀺𑀧𑀲𑁆𑀲𑀓𑁄 𑀧𑀦 𑀲𑀸𑀭𑀺𑀧𑀼𑀢𑁆𑀢𑀲𑀤𑀺𑀲𑁄 𑀪𑀺𑀓𑁆𑀔𑀼 𑀔𑀦𑁆𑀥𑀸𑀤𑀺𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑀸𑀦𑀁 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀞𑀺𑀢𑁄 𑀲𑀓𑁆𑀓𑀼𑀡𑁂𑀬𑁆𑀬 𑀢𑀩𑁆𑀩𑀺𑀲𑀬𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀼𑀁, 𑀲𑁄𑀧𑀺 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦𑁂𑀯, 𑀦𑁄 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀯𑀲𑁂𑀦. 𑀦 𑀳𑀺 𑀲𑀸𑀭𑀺𑀧𑀼𑀢𑁆𑀢𑀲𑀤𑀺𑀲𑁄 𑀪𑀺𑀓𑁆𑀔𑀼 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀨𑀲𑁆𑀲𑀸𑀤𑀺𑀥𑀫𑁆𑀫𑁂𑀲𑀼 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀭𑀽𑀧𑀢𑁄 𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀫𑁆𑀫𑀲𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀓𑁂𑀯𑀮𑀁 𑀧𑀦 𑀅𑀯𑀺𑀦𑀺𑀩𑁆𑀪𑀼𑀚𑁆𑀚 𑀏𑀓𑀢𑁄 𑀕𑀳𑁂𑀢𑁆𑀯𑀸 𑀓𑀮𑀸𑀧𑀢𑁄 𑀲𑀫𑀽𑀳𑀢𑁄𑀬𑁂𑀯 𑀲𑀫𑁆𑀫𑀲𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀏𑀯𑀁 𑀲𑀼𑀔𑀼𑀫𑀢𑁆𑀢𑁂𑀦𑁂𑀲𑀸 𑀯𑀺𑀚𑁆𑀚𑀢𑀺.

𑁧𑁦𑁩𑁮-𑁪𑁦. 𑀭𑀽𑀧𑀦𑁆𑀢𑀺 𑀓𑀲𑀺𑀡𑀭𑀽𑀧𑀲𑀗𑁆𑀔𑀸𑀢𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀆𑀓𑀸𑀲𑀦𑁆𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀁. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀆𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁. 𑀢𑀤𑀪𑀸𑀯𑀓𑀦𑁆𑀢𑀺 𑀢𑀲𑁆𑀲 𑀆𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑀓𑀁. 𑀓𑀫𑀢𑁄𑀢𑀺 𑀧𑀞𑀫𑀸𑀭𑀼𑀧𑁆𑀧𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀳𑁄𑀢𑀻𑀢𑀺𑀆𑀤𑀺𑀦𑀸 𑀅𑀦𑀼𑀓𑁆𑀓𑀫𑀢𑁄. 𑀅𑀢𑁆𑀢𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀅𑀝𑁆𑀞𑀓𑀣𑀸𑀯𑀘𑀦𑀁 𑀆𑀳𑀭𑀺𑀢𑁆𑀯𑀸 𑀲𑀸𑀥𑁂𑀦𑁆𑀢𑁄 ‘‘𑀆𑀳 𑀘𑀸’’𑀢𑀺𑀆𑀤𑀺𑀫𑀸𑀳. 𑀇𑀥𑀸𑀢𑀺 𑀇𑀫𑀸𑀲𑀼 𑀘𑀢𑀽𑀲𑀼 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀲𑀼. 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀲𑀫𑀸𑀧𑀢𑁆𑀢𑀺𑀬𑁄 𑀳𑀺 𑀧𑀼𑀭𑀺𑀫𑀸𑀧𑀼𑀭𑀺𑀫𑀸𑀳𑀺 𑀲𑀫𑀸𑀧𑀢𑁆𑀢𑀻𑀳𑀺 𑀲𑀼𑀧𑀡𑀻𑀢𑀢𑀭𑀸 𑀲𑀼𑀝𑁆𑀞𑀼 𑀧𑀡𑀻𑀢𑀢𑀭𑀸, 𑀲𑀼𑀦𑁆𑀤𑀭𑀧𑀡𑀻𑀢𑀢𑀭𑀸𑀢𑀺 𑀯𑀸 𑀅𑀢𑁆𑀣𑁄. 𑀧𑀸𑀲𑀸𑀤𑀢𑀮𑀲𑀸𑀝𑀺𑀓𑀸𑀢𑀺 𑀘𑀢𑀼𑀪𑀽𑀫𑀓𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀢𑁄 𑀉𑀧𑀭𑀽𑀧𑀭𑀺 𑀲𑀯𑀺𑀲𑁂𑀲𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀘𑀢𑁆𑀢𑀸𑀭𑁄 𑀧𑀸𑀲𑀸𑀤𑀢𑀮𑀸 𑀘 𑀣𑀽𑀮𑀲𑀡𑁆𑀳𑀲𑀡𑁆𑀳𑀢𑀭𑀲𑀡𑁆𑀳𑀢𑀫𑀲𑀼𑀢𑁆𑀢𑁂𑀳𑀺 𑀯𑀺𑀳𑀺𑀢𑀸 𑀆𑀬𑀸𑀫𑀯𑀺𑀢𑁆𑀣𑀸𑀭𑀢𑁄 𑀲𑀫𑀧𑁆𑀧𑀫𑀸𑀡𑀸 𑀲𑀸𑀝𑀺𑀓𑀸 𑀘.

𑁧𑁦𑁪𑁨. 𑀭𑀽𑀧𑀸𑀭𑀽𑀧𑀪𑀯𑀁 𑀅𑀪𑀺𑀪𑀼𑀬𑁆𑀬 𑀦𑀺𑀩𑁆𑀩𑀸𑀦𑀁 𑀬𑀸𑀢𑀺, 𑀅𑀣 𑀯𑀸 𑀦𑀻𑀯𑀭𑀡𑁂 𑀅𑀪𑀺𑀪𑀼𑀬𑁆𑀬 𑀭𑀽𑀧𑀸𑀭𑀽𑀧𑀪𑀯𑀁 𑀬𑀸𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀅𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.