𑁧𑁬. 𑀲𑁄𑀴𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀅𑀪𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁦𑁪𑁩-𑁭. 𑀧𑀭𑀦𑁆𑀢𑀺 𑀯𑀺𑀲𑀺𑀝𑁆𑀞𑀁 𑀓𑀢𑁆𑀯𑀸, 𑀯𑀺𑀲𑁂𑀲𑀢𑁄𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀢𑁆𑀢𑁂𑀧𑀻𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀢𑁆𑀢𑁂𑀧𑀺, 𑀦𑀸𑀯𑀲𑁆𑀲𑀁 𑀅𑀭𑀽𑀧𑀚𑁆𑀛𑀸𑀦𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀅𑀧𑁆𑀧𑀝𑀺𑀮𑀤𑁆𑀥𑁄𑀧𑀺 𑀳𑀺 𑀓𑀢𑀸𑀥𑀺𑀓𑀸𑀭𑁄 𑀪𑀺𑀓𑁆𑀔𑀼 𑀅𑀪𑀺𑀜𑁆𑀜𑀸 𑀲𑀫𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀏𑀢𑁆𑀣 𑀘𑀢𑀼𑀢𑁆𑀣𑀚𑁆𑀛𑀸𑀦𑀕𑁆𑀕𑀳𑀡𑁂𑀦𑁂𑀯 𑀳𑁂𑀝𑁆𑀞𑀸 𑀢𑀻𑀡𑀺 𑀛𑀸𑀦𑀸𑀦𑀺 𑀕𑀳𑀺𑀢𑀸𑀦𑀺. 𑀢𑁂𑀲𑀼 𑀳𑀺 𑀅𑀘𑀺𑀡𑁆𑀡𑀯𑀲𑀻 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀢𑀺. 𑀅𑀪𑀺𑀜𑁆𑀜𑀸𑀲𑀼 𑀅𑀦𑀼𑀬𑁄𑀕𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀜𑁆𑀜𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀝𑁆𑀞𑀗𑁆𑀕𑀢𑀸𑀢𑀺 𑀅𑀥𑀺𑀕𑀢𑀸𑀦𑀺𑀲𑀁𑀲𑀢𑀸𑀬 𑀘𑁂𑀯 𑀪𑀸𑀯𑀦𑀸𑀲𑀼𑀔𑀢𑀸𑀬 𑀘 𑀦𑀺𑀝𑁆𑀞𑀁 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑀸. 𑀲𑀫𑀸𑀥𑀺𑀪𑀸𑀯𑀦𑀸𑀬 𑀳𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸 𑀉𑀤𑀬𑀨𑀮𑀪𑀸𑀯𑁂𑀦 𑀧𑀸𑀓𑀝𑀸. 𑀲𑁄 𑀅𑀪𑀺𑀜𑁆𑀜𑀸𑀬 𑀘 𑀲𑀫𑀸𑀥𑀺𑀦𑀸 𑀘 𑀲𑀫𑀦𑁆𑀦𑀸𑀕𑀢𑁄 𑀲𑀼𑀔𑁂𑀦𑁂𑀯 𑀧𑀜𑁆𑀜𑀸𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀺.

𑁧𑁦𑁪𑁮-𑁯. 𑀤𑀺𑀩𑁆𑀩𑀸𑀦𑀻𑀢𑀺𑀆𑀤𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀦𑀁 𑀲𑀭𑀽𑀧𑀢𑁄 𑀉𑀤𑁆𑀤𑀺𑀲𑀦𑀁. 𑀤𑀺𑀩𑁆𑀩𑀸𑀦𑀺 𑀘𑀓𑁆𑀔𑀼𑀲𑁄𑀢𑀸𑀦𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁, 𑀤𑀺𑀩𑁆𑀩𑀲𑁄𑀢𑀜𑀸𑀡𑀜𑁆𑀘𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀤𑁆𑀥𑀻𑀢𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑀁. 𑀇𑀫𑀸 𑀧𑀦 𑀅𑀪𑀺𑀜𑁆𑀜𑀸𑀬𑁄 𑀧𑀢𑁆𑀢𑀼𑀓𑀸𑀫𑁂𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀬𑁄𑀕𑀺𑀦𑀸 𑀬𑀲𑁆𑀫𑀸 𑀑𑀤𑀸𑀢𑀓𑀲𑀺𑀡𑀧𑀭𑀺𑀬𑀦𑁆𑀢𑁂𑀲𑀼 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀢𑀩𑁆𑀩𑀲𑁂𑀦 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀸 𑀦 𑀯𑀸 𑀓𑀲𑀺𑀡𑀸𑀦𑀼𑀮𑁄𑀫𑀢𑀸𑀤𑀻𑀳𑀺 𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀤𑀫𑁂𑀢𑀩𑁆𑀩𑀁. 𑀦 𑀳𑀺 𑀏𑀯𑀁 𑀅𑀤𑀫𑁂𑀢𑁆𑀯𑀸 𑀧𑀼𑀩𑁆𑀩𑁂 𑀅𑀪𑀸𑀯𑀺𑀢𑀪𑀸𑀯𑀦𑁄 𑀆𑀤𑀺𑀓𑀫𑁆𑀫𑀺𑀓𑁄 𑀬𑁄𑀕𑀸𑀯𑀘𑀭𑁄 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀧𑁆𑀨𑀸𑀤𑁂𑀲𑁆𑀲𑀢𑀻𑀢𑀺 𑀢𑀲𑁆𑀫𑀸 𑀢𑀁 𑀘𑀺𑀢𑁆𑀢𑀧𑀭𑀺𑀤𑀫𑀦𑀁 𑀅𑀯𑀲𑁆𑀲𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀲𑀺𑀡𑀸𑀦𑀼𑀮𑁄𑀫𑀢𑀸𑀤𑀻𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀲𑀺𑀡𑀸𑀦𑀼𑀮𑁄𑀫𑀢𑀸𑀤𑀻𑀳𑀻𑀢𑀺 𑀓𑀲𑀺𑀡𑀸𑀦𑀼𑀮𑁄𑀫𑀢𑀸 𑀓𑀲𑀺𑀡𑀧𑀝𑀺𑀮𑁄𑀫𑀢𑀸 𑀓𑀲𑀺𑀡𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑀸 𑀛𑀸𑀦𑀸𑀦𑀼𑀮𑁄𑀫𑀢𑀸 𑀛𑀸𑀦𑀧𑀝𑀺𑀮𑁄𑀫𑀢𑀸 𑀛𑀸𑀦𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑀸 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀢𑀸 𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑀸 𑀛𑀸𑀦𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑀸 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀓𑀢𑀸 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀓𑀢𑀸 𑀅𑀗𑁆𑀕𑀸𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀓𑀢𑀸 𑀅𑀗𑁆𑀕𑀯𑀯𑀢𑁆𑀣𑀸𑀧𑀦𑀢𑀸 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀧𑀦𑀢𑀸𑀢𑀺 𑀇𑀫𑁂𑀳𑀺 𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺.

𑀢𑀢𑁆𑀣 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀲𑀢𑀓𑁆𑀔𑀢𑁆𑀢𑀼𑀁 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀲𑀫𑀸𑀧𑀚𑁆𑀚𑀦𑀁, 𑀢𑀣𑁂𑀯 𑀉𑀧𑁆𑀧𑀝𑀺𑀧𑀸𑀝𑀺𑀬𑀸, 𑀧𑀝𑀺𑀧𑀸𑀝𑀺𑀉𑀧𑁆𑀧𑀝𑀺𑀧𑀸𑀝𑀺𑀯𑀲𑁂𑀦 𑀘 𑀲𑀫𑀸𑀧𑀚𑁆𑀚𑀦𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀆𑀓𑀸𑀭𑀸𑀦𑀁 𑀯𑀲𑁂𑀦 𑀓𑀲𑀺𑀡𑀸𑀦𑀼𑀮𑁄𑀫𑀢𑀸𑀤𑀬𑁄 𑀯𑀼𑀢𑁆𑀢𑀸. 𑀧𑀞𑀫𑀚𑁆𑀛𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁, 𑀅𑀬𑀁 𑀛𑀸𑀦𑀸𑀦𑀼𑀮𑁄𑀫𑀢𑀸 𑀦𑀸𑀫. 𑀢𑁂𑀲𑀁 𑀧𑀝𑀺𑀮𑁄𑀫𑀢𑁄 𑀛𑀸𑀦𑀧𑀝𑀺𑀮𑁄𑀫𑀢𑀸 𑀦𑀸𑀫. 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀛𑀸𑀦𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑀸 𑀦𑀸𑀫.

𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀢𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀢𑁄 𑀢𑀤𑁂𑀯 𑀉𑀕𑁆𑀖𑀸𑀝𑁂𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀢𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀏𑀯𑀁 𑀓𑀲𑀺𑀡𑀁 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀛𑀸𑀦𑀲𑁆𑀲𑁂𑀯 𑀏𑀓𑀦𑁆𑀢𑀭𑀺𑀓𑀪𑀸𑀯𑁂𑀦 𑀉𑀓𑁆𑀓𑀫𑀦𑀁 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀢𑀸 𑀦𑀸𑀫. 𑀏𑀯𑀁 𑀆𑀧𑁄𑀓𑀲𑀺𑀡𑀸𑀤𑀺𑀫𑀽𑀮𑀺𑀓𑀸𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀢𑁂𑀚𑁄𑀓𑀲𑀺𑀡𑁂, 𑀢𑀢𑁄 𑀦𑀻𑀮𑀓𑀲𑀺𑀡𑁂, 𑀢𑀢𑁄 𑀮𑁄𑀳𑀺𑀢𑀓𑀲𑀺𑀡𑁂𑀢𑀺 𑀛𑀸𑀦𑀁 𑀅𑀦𑀼𑀓𑁆𑀓𑀫𑀺𑀢𑁆𑀯𑀸 𑀓𑀲𑀺𑀡𑀲𑁆𑀲𑁂𑀯 𑀏𑀓𑀦𑁆𑀢𑀭𑀺𑀓𑀪𑀸𑀯𑁂𑀦 𑀉𑀓𑁆𑀓𑀫𑀦𑀁 𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑀸 𑀦𑀸𑀫. 𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸, 𑀢𑁂𑀚𑁄𑀓𑀲𑀺𑀡𑁂 𑀢𑀢𑀺𑀬𑀁, 𑀦𑀻𑀮𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀮𑁄𑀳𑀺𑀢𑀓𑀲𑀺𑀡𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀛𑀸𑀦𑀲𑁆𑀲 𑀘𑁂𑀯 𑀓𑀲𑀺𑀡𑀲𑁆𑀲 𑀘 𑀉𑀓𑁆𑀓𑀫𑀦𑀁 𑀛𑀸𑀦𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑀸 𑀦𑀸𑀫.

𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀇𑀢𑀭𑁂𑀲𑀫𑁆𑀧𑀺 𑀲𑀫𑀸𑀧𑀚𑁆𑀚𑀦𑀁 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀓𑀢𑀸 𑀦𑀸𑀫. 𑀲𑀩𑁆𑀩𑀓𑀲𑀺𑀡𑁂𑀲𑀼 𑀏𑀓𑁂𑀓𑀲𑁆𑀲𑁂𑀯 𑀲𑀫𑀸𑀧𑀚𑁆𑀚𑀦𑀁 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀓𑀢𑀸 𑀦𑀸𑀫. 𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸, 𑀆𑀧𑁄𑀓𑀲𑀺𑀡𑁂 𑀤𑀼𑀢𑀺𑀬𑀁, 𑀢𑁂𑀚𑁄𑀓𑀲𑀺𑀡𑁂 𑀢𑀢𑀺𑀬𑀁, 𑀯𑀸𑀬𑁄𑀓𑀲𑀺𑀡𑁂 𑀘𑀢𑀼𑀢𑁆𑀣𑀁, 𑀦𑀻𑀮𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀧𑀻𑀢𑀓𑀲𑀺𑀡𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁, 𑀮𑁄𑀳𑀺𑀢𑀓𑀲𑀺𑀡𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀑𑀤𑀸𑀢𑀓𑀲𑀺𑀡𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀏𑀯𑀁 𑀅𑀗𑁆𑀕𑀸𑀦𑀁, 𑀆𑀭𑀫𑁆𑀫𑀡𑀸𑀦𑀜𑁆𑀘 𑀲𑀫𑀢𑀺𑀓𑁆𑀓𑀫𑀦𑀁 𑀅𑀗𑁆𑀕𑀸𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀓𑀢𑀸 𑀦𑀸𑀫.

𑀧𑀞𑀫𑀚𑁆𑀛𑀸𑀦𑀁 𑀦𑀸𑀫 𑀧𑀜𑁆𑀘𑀗𑁆𑀕𑀺𑀓𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀤𑀼𑀢𑀺𑀬𑀁 𑀘𑀢𑀼𑀭𑀗𑁆𑀕𑀺𑀓𑀁, 𑀢𑀢𑀺𑀬𑀁 𑀢𑀺𑀯𑀗𑁆𑀕𑀺𑀓𑀁, 𑀘𑀢𑀼𑀢𑁆𑀣𑀁 𑀤𑀼𑀯𑀗𑁆𑀕𑀺𑀓𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀏𑀯𑀁 𑀛𑀸𑀦𑀗𑁆𑀕𑀫𑀢𑁆𑀢𑀲𑁆𑀲𑁂𑀯 𑀯𑀯𑀢𑁆𑀣𑀸𑀧𑀦𑀁 𑀅𑀗𑁆𑀕𑀯𑀯𑀢𑁆𑀣𑀸𑀧𑀦𑀁 𑀦𑀸𑀫. 𑀢𑀣𑀸 ‘‘𑀇𑀤𑀁 𑀧𑀣𑀯𑀻𑀓𑀲𑀺𑀡𑀁, 𑀇𑀤𑀁 𑀆𑀧𑁄𑀓𑀲𑀺𑀡’’𑀦𑁆𑀢𑀺𑀆𑀤𑀺𑀦𑀸 𑀆𑀭𑀫𑁆𑀫𑀡𑀫𑀢𑁆𑀢𑀲𑁆𑀲𑁂𑀯 𑀯𑀯𑀢𑁆𑀣𑀸𑀧𑀦𑀁 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀧𑀦𑀁 𑀦𑀸𑀫. 𑀅𑀗𑁆𑀕𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀧𑀦𑀫𑁆𑀧𑀺 𑀏𑀓𑁂 𑀇𑀘𑁆𑀙𑀦𑁆𑀢𑀻𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀅𑀦𑀸𑀕𑀢𑀢𑁆𑀢𑀸 𑀅𑀤𑁆𑀥𑀸 𑀢𑀁 𑀪𑀸𑀯𑀦𑀸𑀲𑀼𑀔𑀁 𑀦 𑀳𑁄𑀢𑀺. 𑀇𑀫𑁂𑀳𑀺 𑀧𑀦 𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺 𑀘𑀺𑀢𑁆𑀢𑀧𑀭𑀺𑀤𑀫𑀦𑀁 𑀓𑀸𑀢𑀼𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀦𑀁 𑀲𑀢𑁂𑀲𑀼, 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄𑀯 𑀲𑀓𑁆𑀓𑁄𑀢𑀺.

𑁧𑁦𑁫𑁦-𑁧. 𑀤𑀦𑁆𑀢𑁂𑀢𑀺 𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺 𑀤𑀦𑁆𑀢𑁂. 𑀲𑀫𑀸𑀳𑀺𑀢𑁂𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁂. 𑀲𑀼𑀤𑁆𑀥𑁂𑀢𑀺 𑀦𑀻𑀯𑀭𑀡𑀤𑀽𑀭𑀻𑀪𑀸𑀯𑁂𑀦, 𑀧𑀘𑁆𑀘𑀦𑀻𑀓𑀲𑀫𑀦𑁂𑀧𑀺 𑀅𑀩𑁆𑀬𑀸𑀯𑀝𑀸𑀬 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀲𑀫𑁆𑀧𑀸𑀤𑀺𑀢𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀲𑀩𑁆𑀪𑀸𑀯𑁂𑀦 𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑁂. 𑀧𑀭𑀺𑀬𑁄𑀤𑀸𑀢𑁂𑀢𑀺 𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀲𑁆𑀲 𑀦𑀺𑀖𑀁𑀲𑀦𑁂𑀦 𑀯𑀺𑀬 𑀧𑀭𑀺𑀲𑀼𑀤𑁆𑀥𑀢𑁆𑀢𑀸𑀬𑁂𑀯 𑀧𑀭𑀺𑀬𑁄𑀤𑀸𑀢𑁂, 𑀧𑀪𑀲𑁆𑀲𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀺𑀭𑀳𑀯𑀲𑁂𑀦 𑀧𑀭𑀺𑀬𑁄𑀤𑀸𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀗𑁆𑀕𑀡𑁂𑀢𑀺 ‘‘𑀫𑀸𑀤𑀺𑀲𑀲𑁆𑀲 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀲𑁆𑀲 𑀈𑀤𑀺𑀲𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦𑀁 ‘‘𑀅𑀳𑁄 𑀯𑀢 𑀫𑀫𑁂𑀯 𑀲𑀢𑁆𑀣𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀦𑀁 𑀧𑀸𑀧𑀓𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀪𑀸𑀯𑁂𑀦 𑀅𑀦𑀗𑁆𑀕𑀡𑁂. 𑀅𑀦𑀼𑀧𑀓𑁆𑀓𑀺𑀮𑁂𑀲𑁂𑀢𑀺 𑀉𑀧𑀕𑀦𑁆𑀢𑁆𑀯𑀸 𑀓𑀺𑀮𑀺𑀲𑁆𑀲𑀦𑀝𑁆𑀞𑁂𑀦 𑀉𑀧𑀓𑁆𑀓𑀺𑀮𑁂𑀲𑀲𑀗𑁆𑀔𑀸𑀢𑀸𑀦𑀁 𑀭𑀸𑀕𑀸𑀤𑀻𑀦𑀁, ‘‘𑀅𑀪𑀺𑀚𑁆𑀛𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄, 𑀩𑁆𑀬𑀸𑀧𑀸𑀤𑁄, 𑀓𑁄𑀥𑁄’’𑀢𑀺𑀆𑀤𑀺𑀦𑀸 𑀆𑀕𑀢𑀸𑀦𑀁 𑀘𑀺𑀢𑁆𑀢𑀼𑀧𑀓𑁆𑀓𑀺𑀮𑁂𑀲𑀸𑀦𑀁 𑀯𑀸 𑀯𑀺𑀕𑀢𑀢𑁆𑀢𑀸 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑁂. 𑀫𑀼𑀤𑀼𑀪𑀽𑀢𑁂𑀢𑀺 𑀧𑀕𑀼𑀡𑀪𑀸𑀯𑀸𑀧𑀸𑀤𑀦𑁂𑀦 𑀲𑀼𑀪𑀸𑀯𑀺𑀢𑀢𑁆𑀢𑀸 𑀫𑀼𑀤𑀼𑀪𑀽𑀢𑁂, 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀜𑁆𑀳𑀺 𑀘𑀺𑀢𑁆𑀢𑀁 𑀲𑀼𑀧𑀭𑀺𑀫𑀤𑁆𑀤𑀺𑀢𑀁 𑀯𑀺𑀬 𑀘𑀫𑁆𑀫𑀁 𑀲𑀼𑀧𑀭𑀺𑀓𑀫𑁆𑀫𑀓𑀢𑀸 𑀯𑀺𑀬 𑀘 𑀮𑀸𑀔𑀸 𑀫𑀼𑀤𑀽𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀦𑀻𑀬𑁂𑀢𑀺 𑀫𑀼𑀤𑀼𑀢𑁆𑀢𑀸𑀬𑁂𑀯 𑀇𑀤𑁆𑀥𑀺𑀧𑀸𑀤𑀪𑀸𑀯𑀽𑀧𑀕𑀫𑀦𑁂𑀦 𑀓𑀫𑁆𑀫𑀓𑁆𑀔𑀫𑁂, 𑀯𑀺𑀓𑀼𑀩𑁆𑀩𑀦𑀸𑀤𑀺𑀇𑀤𑁆𑀥𑀺𑀓𑀫𑁆𑀫𑀬𑁄𑀕𑁆𑀬𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀤𑀼𑀚𑀸𑀢𑀜𑁆𑀳𑀺 𑀘𑀺𑀢𑁆𑀢𑀁 𑀓𑀫𑁆𑀫𑀓𑁆𑀔𑀫𑀁 𑀳𑁄𑀢𑀺, 𑀲𑀼𑀥𑀦𑁆𑀢𑀫𑀺𑀯 𑀲𑀼𑀯𑀡𑁆𑀡𑀁, 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀲𑀼𑀪𑀸𑀯𑀺𑀢𑀢𑁆𑀢𑀸𑀬𑁂𑀯 𑀳𑁄𑀢𑀺. 𑀬𑀣𑀸𑀳 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀫𑀼𑀤𑀼𑀜𑁆𑀘 𑀳𑁄𑀢𑀺 𑀓𑀫𑁆𑀫𑀦𑀺𑀬𑀜𑁆𑀘, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁭). 𑀞𑀺𑀢𑁂𑀢𑀺 𑀏𑀢𑁂𑀲𑀼 𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀤𑀻𑀲𑀼 𑀦𑀺𑀘𑁆𑀘𑀮𑀁 𑀅𑀯𑀝𑁆𑀞𑀺𑀢𑁂, 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀯𑀸 𑀧𑀡𑀻𑀢𑀪𑀸𑀯𑀁 𑀲𑀫𑁆𑀫𑀲𑀺𑀢𑁆𑀯𑀸 𑀞𑀺𑀢𑁂. 𑀅𑀘𑀮𑁂𑀢𑀺 𑀞𑀺𑀢𑀢𑁆𑀢𑀸𑀬𑁂𑀯 𑀅𑀓𑀫𑁆𑀧𑁂, 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀤𑀼𑀓𑀫𑁆𑀫𑀜𑁆𑀜𑀪𑀸𑀯𑁂𑀳𑀺 𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀞𑀺𑀢𑀢𑁆𑀢𑀸 𑀞𑀺𑀢𑁂, 𑀲𑀤𑁆𑀥𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀳𑀺 𑀅𑀓𑀫𑁆𑀧𑀦𑀢𑁄 𑀅𑀘𑀮𑁂.

𑀅𑀝𑁆𑀞𑀗𑁆𑀕𑀲𑀫𑁆𑀧𑀦𑁆𑀦𑁂𑀢𑀺 𑀞𑀺𑀢𑀺𑀅𑀘𑀮𑀢𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀕𑁆𑀕𑀳𑀡𑁂𑀦 𑀲𑀫𑀸𑀳𑀺𑀢𑁂𑀢𑀺 𑀯𑀺𑀲𑀼𑀁 𑀏𑀓𑀗𑁆𑀕𑀁 𑀓𑀢𑁆𑀯𑀸. 𑀢𑀸𑀲𑀁 𑀧𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀳𑀡𑁂 𑀲𑀼𑀯𑀺𑀲𑀼𑀤𑁆𑀥𑀢𑀸𑀤𑀻𑀦𑀁 𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲 𑀅𑀗𑁆𑀕𑀪𑀽𑀢𑀢𑁆𑀢𑀸 𑀲𑀫𑀸𑀳𑀺𑀢𑁂𑀢𑀺 𑀇𑀫𑀁 𑀅𑀗𑁆𑀕𑀪𑀸𑀯𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀯𑀺𑀲𑀼𑀤𑁆𑀥𑀢𑀸𑀤𑀻𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑁆𑀧𑀦𑁆𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀤𑁆𑀥𑀺𑀯𑀺𑀥𑀸𑀬𑀸𑀢𑀺 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑀢𑁆𑀣𑀸𑀬, 𑀇𑀤𑁆𑀥𑀺𑀧𑁆𑀧𑀪𑁂𑀤𑀸𑀬 𑀯𑀸. 𑀅𑀢𑁆𑀣𑀢𑁄 𑀧𑀦 𑀇𑀤𑁆𑀥𑀺𑀯𑀺𑀥𑀸 𑀦𑀸𑀫 𑀏𑀓𑀲𑁆𑀲 𑀩𑀳𑀼𑀪𑀸𑀯𑀸𑀤𑀺𑀅𑀦𑁂𑀓𑀯𑀺𑀥𑀸𑀦𑀧𑀘𑁆𑀘𑀬𑀪𑀽𑀢𑀁 𑀅𑀪𑀺𑀜𑁆𑀜𑀸𑀜𑀸𑀡𑀁. 𑀅𑀪𑀺𑀦𑀻𑀳𑀭𑀢𑀻𑀢𑀺 𑀅𑀪𑀺𑀜𑁆𑀜𑀸𑀥𑀺𑀕𑀫𑀢𑁆𑀣𑀸𑀬 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 𑀓𑀲𑀺𑀡𑀸𑀭𑀫𑁆𑀫𑀡𑀢𑁄 𑀅𑀧𑀦𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀪𑀺𑀫𑀼𑀔𑀁 𑀧𑁂𑀲𑁂𑀢𑀺. 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀦𑁆𑀢𑀺 𑀏𑀢𑁆𑀣 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀦𑀺𑀧𑁆𑀨𑀚𑁆𑀚𑀢𑀺 𑀧𑀝𑀺𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀜𑁆𑀳𑀺 𑀦𑀺𑀧𑁆𑀨𑀚𑁆𑀚𑀢𑀺, 𑀧𑀝𑀺𑀮𑀩𑁆𑀪𑀢𑀺 𑀘, 𑀢𑀁 𑀇𑀚𑁆𑀛𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂𑀢𑀁 𑀲𑀫𑀺𑀚𑁆𑀛𑀢𑀻’’𑀢𑀺𑀆𑀤𑀺; (𑀲𑀼. 𑀦𑀺. 𑁭𑁭𑁨; 𑀫𑀳𑀸𑀦𑀺. 𑁧; 𑀦𑁂𑀢𑁆𑀢𑀺. 𑁫,𑁪𑁪);

𑀇𑀤𑁆𑀥𑀺𑀬𑁂𑀯 𑀯𑀺𑀓𑀼𑀩𑁆𑀩𑀦𑀁 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀓𑀺𑀭𑀺𑀬𑀦𑁆𑀢𑀺 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁, 𑀇𑀤𑀁 𑀇𑀤𑁆𑀥𑀻𑀲𑀼 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀬𑀸 𑀧𑀥𑀸𑀦𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀇𑀤𑁆𑀥𑀺 𑀘 𑀯𑀺𑀓𑀼𑀩𑁆𑀩𑀦𑀜𑁆𑀘𑀸𑀢𑀺 𑀯𑀸 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁. 𑀯𑀺𑀲𑀼𑀁 𑀕𑀳𑀡𑀫𑁆𑀧𑀺 𑀯𑀼𑀢𑁆𑀢𑀓𑀸𑀭𑀡𑁂𑀦𑁂𑀯 𑀤𑀝𑁆𑀞𑀩𑁆𑀩𑀁.

𑁧𑁦𑁫𑁨-𑁪. 𑀬𑀣𑀸 𑀧𑀦 𑀢𑀁 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀁, 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀅𑀦𑀼𑀧𑀼𑀩𑁆𑀩𑁂𑀦 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬𑀸’’𑀢𑀺 𑀓𑁂𑀘𑀺, 𑀢𑀁 𑀅𑀬𑀼𑀢𑁆𑀢𑀁. 𑀬𑀤𑀺𑀘𑁆𑀙𑀓𑀁 𑀲𑀫𑀸𑀧𑀚𑁆𑀚𑀦𑀢𑁆𑀣𑀜𑁆𑀳𑀺 𑀘𑀺𑀢𑁆𑀢𑀧𑀭𑀺𑀤𑀫𑀦𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀘 𑀅𑀪𑀺𑀜𑁆𑀜𑀸𑀧𑀸𑀤𑀓𑀁, 𑀦 𑀇𑀢𑀭𑀸𑀦𑀺. 𑀲𑀢𑀁…𑀧𑁂… 𑀫𑀸𑀦𑀲𑀦𑁆𑀢𑀺 𑀲𑀘𑁂 𑀲𑀢𑀁 𑀇𑀘𑁆𑀙𑀢𑀺, ‘‘𑀲𑀢𑀁 𑀳𑁄𑀫𑀺, 𑀲𑀢𑀁 𑀳𑁄𑀫𑀻’’𑀢𑀺, 𑀲𑀘𑁂 𑀲𑀳𑀲𑁆𑀲𑀁 𑀇𑀘𑁆𑀙𑀢𑀺, ‘‘𑀲𑀳𑀲𑁆𑀲𑀁 𑀳𑁄𑀫𑀺, 𑀲𑀳𑀲𑁆𑀲𑀁 𑀳𑁄𑀫𑀻’’𑀢𑀺 𑀏𑀯𑀁 𑀧𑀭𑀺𑀓𑀫𑁆𑀫𑀫𑀸𑀦𑀲𑀁 𑀓𑀢𑁆𑀯𑀸. ‘‘𑀧𑀭𑀺𑀓𑀫𑁆𑀫𑀫𑀸𑀦𑀲’’𑀦𑁆𑀢𑀺 𑀘 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 ‘‘𑀲𑀢𑀁 𑀳𑁄𑀫𑀻’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀺𑀢𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁, 𑀧𑀸𑀤𑀓𑀚𑁆𑀛𑀸𑀦𑀜𑁆𑀘. 𑀅𑀪𑀺…𑀧𑁂… 𑀧𑀼𑀦𑀸𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀁 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀢𑁆𑀣𑀁, 𑀧𑀼𑀦 𑀲𑀫𑀸𑀧𑀚𑁆𑀚𑀦𑀁 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀲𑁆𑀲 𑀩𑀮𑀕𑁆𑀕𑀸𑀳𑀢𑁆𑀣𑀁. 𑀅𑀥𑀺𑀝𑁆𑀞𑀸𑀢𑀻𑀢𑀺 𑀲𑀢𑀁 𑀆𑀯𑀚𑁆𑀚𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀸𑀦𑀁 𑀢𑀺𑀡𑁆𑀡𑀁, 𑀘𑀢𑀼𑀦𑁆𑀦𑀁 𑀯𑀸 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀁 𑀅𑀦𑀦𑁆𑀢𑀭𑀸 𑀉𑀧𑁆𑀧𑀦𑁆𑀦𑁂𑀦 𑀲𑀦𑁆𑀦𑀺𑀝𑁆𑀞𑀸𑀧𑀦𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑁄𑀢𑀺, 𑀲𑀢𑀁 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀳𑀺 𑀲𑀩𑁆𑀩𑀢𑁆𑀣 𑀅𑀪𑀺𑀜𑁆𑀜𑀸𑀜𑀸𑀡𑀁 𑀯𑀼𑀘𑁆𑀘𑀢𑀺.

𑁧𑁦𑁫𑁫-𑁭. 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁. 𑀧𑀭𑀺𑀓𑀫𑁆𑀫𑀫𑀦𑀸𑀦𑁂𑀢𑁆𑀣 𑀲𑀢𑀸𑀭𑀫𑁆𑀫𑀡𑀺𑀓𑀸𑀦𑀻𑀢𑀺 𑀏𑀢𑁆𑀣 𑀏𑀢𑁂𑀲𑀼 𑀧𑀭𑀺𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑁂𑀲𑀼 𑀧𑀭𑀺𑀓𑀫𑁆𑀫𑀫𑀸𑀦𑀲𑀸𑀦𑀺 ‘‘𑀲𑀢𑀁 𑀳𑁄𑀫𑀻’’𑀢𑀺 𑀧𑀯𑀢𑁆𑀢𑀸𑀦𑀺 𑀓𑀸𑀫𑀸𑀯𑀘𑀭𑀫𑀸𑀦𑀲𑀸𑀦𑀺 𑀲𑀢𑀸𑀭𑀫𑁆𑀫𑀡𑀺𑀓𑀸𑀦𑀺 𑀏𑀓𑁂𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀲𑀢𑀸𑀭𑀫𑁆𑀫𑀡𑀺𑀓𑀸𑀦𑀺 𑀳𑁄𑀦𑁆𑀢𑀺 𑀧𑀘𑁆𑀘𑁂𑀓𑀁 ‘‘𑀲𑀢𑀁 𑀳𑁄𑀫𑀻’’𑀢𑀺 𑀧𑀯𑀢𑁆𑀢𑀦𑀢𑁄. 𑀲𑀳𑀲𑁆𑀲𑀸𑀭𑀫𑁆𑀫𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀤𑀸𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀫𑁆𑀧𑀻𑀢𑀺 𑀢𑀲𑁆𑀲 𑀲𑀢𑀸𑀤𑀺𑀓𑀲𑁆𑀲 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀫𑁆𑀧𑀺. 𑀲𑀢𑀸𑀭𑀫𑁆𑀫𑀡𑀺𑀓𑀢𑀸 𑀘 𑀧𑀦 𑀦𑁂𑀲𑀁 𑀯𑀡𑁆𑀡𑀯𑀲𑁂𑀦, 𑀦𑁄 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀯𑀲𑁂𑀦. 𑀭𑀽𑀧𑀜𑁆𑀳𑀺 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀓𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀁, 𑀦 𑀧𑀜𑁆𑀜𑀢𑁆𑀢𑀺. 𑀏𑀢𑁆𑀣 𑀘 𑀬𑀤𑀺 𑀦𑀻𑀮𑀯𑀡𑁆𑀡𑀫𑁂𑀯 𑀲𑀢𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀯𑀡𑁆𑀡𑀲𑁆𑀲 𑀢𑀁𑀢𑀁𑀲𑀦𑁆𑀢𑀸𑀦𑀯𑀲𑁂𑀦 𑀦𑀸𑀦𑀢𑁆𑀢𑁂𑀧𑀺 𑀦𑀻𑀮𑀯𑀲𑁂𑀦 𑀏𑀓𑀢𑁆𑀢𑀸 𑀏𑀓𑀫𑁂𑀓𑀁 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 𑀲𑀩𑁆𑀩𑀁 𑀦𑀻𑀮𑀚𑀸𑀢𑀁 𑀆𑀮𑀫𑁆𑀩𑀢𑀺.

𑀬𑀤𑀺 𑀧𑀦 𑀦𑀸𑀦𑀸𑀯𑀡𑁆𑀡𑀦𑀸𑀦𑀸𑀓𑀺𑀭𑀺𑀬𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀸𑀦𑀫𑁆𑀧𑀺 𑀩𑀳𑀼𑀪𑀸𑀯𑁄 𑀳𑁄𑀢𑀺, 𑀏𑀓𑀫𑁂𑀓𑀁 𑀏𑀓𑁂𑀓𑀯𑀡𑁆𑀡𑀁, 𑀏𑀓𑁂𑀓𑀯𑀡𑁆𑀡𑁂𑀲𑀼 𑀘 𑀦𑀸𑀦𑀸𑀓𑀺𑀭𑀺𑀬𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺. 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀁 𑀧𑀦 𑀯𑀡𑁆𑀡𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸𑀧𑀺 𑀧𑀭𑀺𑀓𑀫𑁆𑀫𑀸𑀭𑀫𑁆𑀫𑀡𑀁 𑀦𑀸𑀦𑀸𑀯𑀡𑁆𑀡𑀯𑀦𑁆𑀢𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀢𑁆𑀢𑀸 𑀇𑀤𑁆𑀥𑀺𑀯𑀺𑀲𑀬𑀲𑁆𑀲. 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀯𑀺𑀬𑀸𑀢𑀺 𑀯𑀺𑀬-𑀕𑁆𑀕𑀳𑀡𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀲𑁆𑀲, 𑀛𑀸𑀦𑀘𑀺𑀢𑁆𑀢𑀲𑁆𑀲 𑀘 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀁 𑀲𑀤𑀺𑀲𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀦 𑀢𑀲𑁆𑀲 𑀅𑀧𑁆𑀧𑀦𑀸𑀪𑀸𑀯𑀢𑁄. 𑀢𑁂𑀦𑁂𑀯 𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀕𑁆𑀕𑀳𑀡𑁂𑀦 𑀯𑀺𑀲𑁂𑀲𑀺𑀢𑀦𑁆𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀦𑁆𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀦𑁆𑀢𑀁, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲, 𑀇𑀫𑀲𑁆𑀲 𑀘 𑀓𑁄 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀧𑀭𑀺𑀓𑀫𑁆𑀫𑀯𑀺𑀲𑁂𑀲𑁄𑀯𑀸’’𑀢𑀺. 𑀦 𑀳𑁂𑀢𑁆𑀣 𑀧𑀭𑀺𑀓𑀫𑁆𑀫𑀯𑀺𑀲𑁂𑀲𑀁 𑀯𑀺𑀦𑀸 𑀅𑀜𑁆𑀜𑁄 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀅𑀧𑁆𑀧𑀦𑀸𑀬 𑀧𑀼𑀩𑁆𑀩𑀪𑀸𑀕𑀧𑁆𑀧𑀯𑀢𑁆𑀢𑀸𑀦𑀺𑀧𑀺 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀚𑀯𑀦𑀸𑀦𑀺 𑀕𑀳𑀺𑀢𑀕𑁆𑀕𑀳𑀡𑁂𑀦, 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀯𑀸 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀸𑀦𑀺 𑀲𑀩𑁆𑀩𑀧𑀘𑁆𑀙𑀺𑀫𑀁 𑀕𑁄𑀢𑁆𑀭𑀪𑀼𑀦𑀸𑀫𑀓𑀦𑁆𑀢𑀺𑀆𑀤𑀺 𑀲𑁂𑀲𑀁 𑀲𑀫𑀸𑀦𑀫𑁂𑀯. 𑀢𑁂𑀦𑀸𑀳 ‘‘𑀲𑁂𑀲𑀁 𑀧𑀼𑀩𑁆𑀩𑀲𑀫𑀁 𑀇𑀥𑀸’’𑀢𑀺. 𑀇𑀤𑁆𑀥𑀺𑀯𑀺𑀥𑀜𑀸𑀡𑀯𑀡𑁆𑀡𑀦𑀸.

𑁧𑁦𑁫𑁮. 𑀤𑀺𑀩𑁆𑀩𑀲𑁄𑀢𑀦𑁆𑀢𑀺 𑀤𑁂𑀯𑀢𑀸𑀦𑀁 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑁂𑀳𑀺 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀕𑁆𑀕𑀳𑀡𑀲𑀫𑀢𑁆𑀣𑁂𑀳𑀺 𑀤𑀺𑀩𑁆𑀩𑀲𑁄𑀢𑀧𑀲𑀸𑀤𑁂𑀳𑀺 𑀲𑀫𑀸𑀦𑀢𑁆𑀢𑀸, 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀤𑀺𑀩𑁆𑀩𑀁, 𑀲𑀯𑀦𑀝𑁆𑀞𑁂𑀦 𑀲𑁄𑀢𑀓𑀺𑀘𑁆𑀘𑀓𑀭𑀡𑀢𑁄, 𑀢𑀁𑀲𑀤𑀺𑀲𑀢𑀸𑀬 𑀘 𑀲𑁄𑀢𑀁. 𑀇𑀤𑀦𑁆𑀢𑀺 𑀬𑀁 𑀉𑀤𑁆𑀤𑁂𑀲𑁂 ‘‘𑀤𑀺𑀩𑁆𑀩𑀸𑀦𑀺 𑀘𑀓𑁆𑀔𑀼𑀲𑁄𑀢𑀸𑀦𑀻’’𑀢𑀺 (𑀅𑀪𑀺𑀥. 𑁧𑁦𑁪𑁮) 𑀤𑀺𑀩𑁆𑀩𑀲𑁄𑀢𑀁 𑀉𑀤𑁆𑀤𑀺𑀝𑁆𑀞𑀁, 𑀢𑀁 𑀇𑀤𑀦𑁆𑀢𑀺 𑀅𑀢𑁆𑀣𑁄.

𑁧𑁦𑁫𑁯-𑁬𑁪. 𑀧𑀞𑀫𑀁 𑀑𑀴𑀸𑀭𑀺𑀓𑀲𑀤𑁆𑀤𑀁 𑀆𑀯𑀚𑁆𑀚𑁂𑀢𑁆𑀯𑀸 𑀧𑀘𑁆𑀙𑀸 𑀲𑀼𑀔𑀼𑀫𑀲𑀤𑁆𑀤𑀲𑁆𑀲 𑀆𑀯𑀚𑁆𑀚𑀺𑀢𑀩𑁆𑀩𑀢𑁄 𑀆𑀳 ‘‘𑀫𑀳𑀦𑁆𑀢𑁄 𑀲𑀼𑀔𑀼𑀫𑁄𑀧𑀺 𑀘𑀸’’𑀢𑀺. 𑀧𑀭𑀺𑀘𑀬𑀓𑀭𑀡𑀢𑁆𑀣𑀜𑁆𑀳𑀺 𑀧𑀞𑀫𑀁 𑀅𑀭𑀜𑁆𑀜𑁂 𑀲𑀻𑀳𑀸𑀤𑀻𑀦𑀁 𑀲𑀤𑁆𑀤𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀑𑀴𑀸𑀭𑀺𑀓𑀢𑁄 𑀧𑀝𑁆𑀞𑀸𑀬 𑀬𑀣𑀸𑀦𑀼𑀓𑁆𑀓𑀫𑁂𑀦 𑀲𑀼𑀔𑀼𑀫𑀲𑀤𑁆𑀤𑀸 𑀆𑀯𑀚𑁆𑀚𑀺𑀢𑀩𑁆𑀩𑀸, 𑀢𑀣𑀸 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀤𑀺𑀲𑀸𑀲𑀼 𑀑𑀴𑀸𑀭𑀺𑀓𑀸𑀦𑀫𑁆𑀧𑀺 𑀲𑀼𑀔𑀼𑀫𑀸𑀦𑀫𑁆𑀧𑀺 𑀲𑀤𑁆𑀤𑀸𑀦𑀁 𑀲𑀤𑁆𑀤𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀢𑀲𑁆𑀲 𑀢𑁂 𑀲𑀤𑁆𑀤𑀸 𑀧𑀓𑀢𑀺𑀘𑀺𑀢𑁆𑀢𑀲𑁆𑀲𑀧𑀺 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲 𑀧𑀦 𑀅𑀢𑀺𑀯𑀺𑀬 𑀧𑀸𑀓𑀝𑀸. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀬𑁄𑀕𑀺𑀦𑁄. 𑀲𑀤𑁆𑀤𑀲𑁆𑀲 𑀦𑀺𑀫𑀺𑀢𑁆𑀢𑀦𑁆𑀢𑀺 𑀑𑀴𑀸𑀭𑀺𑀓𑀲𑁆𑀲, 𑀲𑀼𑀔𑀼𑀫𑀲𑁆𑀲 𑀯𑀸 𑀲𑀤𑁆𑀤𑀲𑁆𑀲 𑀬𑀣𑀸𑀯𑀼𑀢𑁆𑀢𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀮𑀩𑁆𑀪𑀫𑀸𑀦𑀑𑀴𑀸𑀭𑀺𑀓𑀲𑀼𑀔𑀼𑀫𑀸𑀓𑀸𑀭𑀁. 𑀫𑀦𑀲𑀺 𑀓𑀼𑀩𑁆𑀩𑀢𑁄𑀢𑀺 ‘‘𑀇𑀫𑀺𑀲𑁆𑀲𑀸 𑀤𑀺𑀲𑀸𑀬 𑀅𑀬𑀁 𑀲𑀤𑁆𑀤𑁄 𑀑𑀴𑀸𑀭𑀺𑀓𑁄, 𑀲𑀼𑀔𑀼𑀫𑁄 𑀯𑀸’’𑀢𑀺 𑀏𑀯𑀁 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑁂𑀦 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲. 𑀲𑀤𑁆𑀤𑁂𑀲𑀽𑀢𑀺 𑀬𑁂 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲 𑀯𑀺𑀲𑀬𑀪𑀽𑀢𑀸 𑀑𑀴𑀸𑀭𑀺𑀓𑀸, 𑀲𑀼𑀔𑀼𑀫𑀸 𑀯𑀸 𑀲𑀤𑁆𑀤𑀸, 𑀢𑁂𑀲𑀼. 𑀅𑀜𑁆𑀜𑀢𑀭𑀦𑁆𑀢𑀺 𑀬𑀢𑁆𑀣 𑀧𑀭𑀺𑀓𑀫𑁆𑀫𑀓𑀭𑀡𑀯𑀲𑁂𑀦 𑀅𑀪𑀺𑀡𑁆𑀳𑀁 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁄, 𑀢𑀁 𑀏𑀓𑀁 𑀲𑀤𑁆𑀤𑀁. 𑀬𑀤𑀺 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀫𑁆𑀧𑀺 𑀧𑀭𑀺𑀓𑀫𑁆𑀫𑁂𑀦 𑀕𑀳𑀺𑀢𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀓𑁄 𑀧𑀦 𑀢𑀲𑁆𑀲, 𑀇𑀫𑀲𑁆𑀲 𑀯𑀸 𑀯𑀺𑀲𑁂𑀲𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 𑀅𑀲𑀼𑀢𑀲𑁆𑀲 𑀕𑀳𑀡𑀢𑁄 𑀲𑀤𑁆𑀤𑀫𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀁 𑀧𑀦 𑀅𑀲𑀼𑀢𑀫𑁆𑀧𑀺 𑀕𑀡𑁆𑀳𑀦𑁆𑀢𑀁 𑀲𑀯𑀦𑀸𑀓𑀸𑀭𑁂𑀦 𑀕𑀳𑀡𑀢𑁄 𑀅𑀢𑁆𑀣𑀸𑀯𑀩𑁄𑀥𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀕𑀡𑁆𑀳𑀸𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀲𑀼𑀢𑀓𑁄𑀯𑀺𑀤𑀸𑀢𑀺 𑀧𑀭𑀺𑀬𑀢𑁆𑀢𑀺𑀬𑀁 𑀙𑁂𑀓𑀸.

𑁧𑁦𑁬𑁫-𑁬. 𑀣𑀸𑀫𑀚𑀸𑀢𑀦𑁆𑀢𑀺 𑀚𑀸𑀢𑀣𑀸𑀫𑀁, 𑀤𑀴𑁆𑀳𑀪𑀸𑀯𑀧𑁆𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀟𑁆𑀠𑁂𑀢𑀩𑁆𑀩𑀁 𑀧𑀸𑀤𑀓𑀚𑁆𑀛𑀸𑀦𑀸𑀭𑀫𑁆𑀫𑀡𑀁 𑀓𑀺𑀢𑁆𑀢𑀓𑀦𑁆𑀢𑀺 𑀆𑀳 ‘‘𑀏𑀢𑁆𑀣𑀦𑁆𑀢𑀭𑀕𑀢’’𑀦𑁆𑀢𑀺𑀆𑀤𑀺. 𑀧𑀸𑀤𑀓𑀚𑁆𑀛𑀸𑀦𑀲𑁆𑀲 𑀳𑀺 𑀆𑀭𑀫𑁆𑀫𑀡𑀪𑀽𑀢𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 ‘‘𑀏𑀢𑁆𑀢𑀓𑀁 𑀞𑀸𑀦𑀁 𑀨𑀭𑀢𑀽’’𑀢𑀺 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀢𑀢𑁆𑀢𑀓𑀁 𑀞𑀸𑀦𑀁 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀲𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀧𑀼𑀦 𑀧𑀸𑀤𑀓𑀚𑁆𑀛𑀸𑀦𑀁 𑀅𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀧𑀺 𑀅𑀦𑁂𑀓𑀧𑁆𑀧𑀪𑁂𑀤𑁂𑀧𑀺 𑀲𑀤𑁆𑀤𑁂 𑀆𑀯𑀚𑁆𑀚𑀢𑀺 𑀲𑀼𑀪𑀸𑀯𑀺𑀢𑀪𑀸𑀯𑀦𑀢𑁆𑀢𑀸. 𑀢𑀢𑁆𑀣 𑀅𑀜𑁆𑀜𑀢𑀭𑀁 𑀲𑀤𑁆𑀤𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀘𑀢𑁆𑀢𑀸𑀭𑀺, 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀼 𑀧𑀘𑁆𑀙𑀺𑀫𑀁 𑀇𑀤𑁆𑀥𑀺𑀘𑀺𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀬𑀢𑁆𑀢𑀓𑀁 𑀲𑀤𑁆𑀤𑀁 𑀇𑀘𑁆𑀙𑀢𑀺, 𑀢𑀢𑁆𑀢𑀓𑀁 𑀢𑀢𑁆𑀣 𑀕𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀚𑀸𑀦𑀸𑀢𑀺. 𑀬𑁂𑀦 𑀧𑀦 𑀏𑀯𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀅𑀯𑀟𑁆𑀠𑀺𑀢𑀁, 𑀢𑁂𑀦 𑀧𑀼𑀦𑀧𑀺 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀫𑁂𑀯. 𑀲𑁄 𑀳𑀺 𑀢𑀁 𑀞𑀸𑀦𑀕𑀢𑀲𑀤𑁆𑀤𑀁 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀯 𑀢𑀢𑁄 𑀯𑀼𑀝𑁆𑀞𑀸𑀬 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀲𑀼𑀡𑀸𑀢𑀺. 𑀢𑀢𑁄 𑀏𑀯 𑀳𑀺 ‘‘𑀧𑀸𑀤𑀓𑀸𑀭𑀫𑁆𑀫𑀡𑁂𑀦…𑀧𑁂… 𑀲𑀼𑀡𑀸𑀢𑀻𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑀫𑀳𑀸. 𑁨.𑁪𑁦𑁦) 𑀯𑀼𑀢𑁆𑀢𑀁. 𑀇𑀤𑁆𑀥𑀺𑀯𑀺𑀥𑀮𑀸𑀪𑀻 𑀧𑀦 𑀲𑁂𑀲𑀸𑀪𑀺𑀜𑁆𑀜𑀮𑀸𑀪𑀺𑀦𑁄 𑀯𑀺𑀬 𑀯𑀺𑀚𑁆𑀚𑀫𑀸𑀦𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀫𑀢𑁆𑀢𑀫𑁂𑀯 𑀅𑀓𑀢𑁆𑀯𑀸 𑀆𑀕𑀦𑁆𑀢𑀼𑀓𑀭𑀽𑀧𑀦𑀺𑀫𑁆𑀫𑀸𑀧𑀦𑀢𑁄 𑀲𑀩𑁆𑀩𑀣𑀸𑀧𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀯 𑀢𑀁 𑀦𑀺𑀧𑁆𑀨𑀸𑀤𑁂𑀢𑀺. 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮-𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑀼𑀔𑀼𑀫𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀓𑀢𑀁.

𑁧𑁦𑁬𑁮. 𑀲𑀼𑀡𑀦𑁆𑀢𑁄𑀢𑀺 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀯𑀦𑁂𑀦 𑀯𑀲𑀺𑀓𑀢𑀸𑀪𑀺𑀜𑁆𑀜𑁄 𑀳𑀼𑀢𑁆𑀯𑀸 𑀬𑀣𑀸𑀯𑀚𑁆𑀚𑀺𑀢𑁂 𑀲𑀼𑀡𑀦𑁆𑀢𑁄. 𑀧𑀸𑀝𑀺𑀬𑁂𑀓𑁆𑀓𑀫𑁆𑀧𑀻𑀢𑀺 𑀏𑀓𑀚𑁆𑀛𑀁 𑀧𑀯𑀢𑁆𑀢𑀫𑀸𑀦𑁂𑀧𑀺 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 𑀉𑀝𑁆𑀞𑀺𑀢𑁂 𑀲𑀗𑁆𑀔𑀪𑁂𑀭𑀻𑀧𑀡𑀯𑀸𑀤𑀺𑀲𑀤𑁆𑀤𑁂 𑀧𑀘𑁆𑀘𑁂𑀓𑀁 𑀯𑀢𑁆𑀣𑀼𑀪𑁂𑀤𑁂𑀦 𑀯𑀯𑀢𑁆𑀣𑀸𑀧𑁂𑀢𑀼𑀓𑀸𑀫𑀢𑀸𑀬 𑀲𑀢𑀺 ‘‘𑀅𑀬𑀁 𑀲𑀗𑁆𑀔𑀲𑀤𑁆𑀤𑁄, 𑀅𑀬𑀁 𑀪𑁂𑀭𑀻𑀲𑀤𑁆𑀤𑁄, 𑀅𑀬𑀁 𑀧𑀡𑀯𑀲𑀤𑁆𑀤𑁄’’𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁𑀬𑁂𑀯 𑀯𑀯𑀢𑁆𑀣𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺𑀬𑁂𑀯𑀸𑀢𑀺. 𑀤𑀺𑀩𑁆𑀩𑀲𑁄𑀢𑀜𑀸𑀡𑀯𑀡𑁆𑀡𑀦𑀸.

𑁧𑁦𑁬𑁯-𑁭𑁩. 𑀘𑁂𑀢𑁄𑀧𑀭𑀺𑀬𑀫𑀸𑀦𑀲𑀦𑁆𑀢𑀺 𑀧𑀭𑀺𑀬𑀸𑀢𑀻𑀢𑀺 𑀧𑀭𑀺𑀬𑀁, 𑀲𑀭𑀸𑀕𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀬𑁂𑀲𑀜𑁆𑀳𑀺 𑀥𑀸𑀢𑀽𑀦𑀁 𑀕𑀢𑀺 𑀅𑀢𑁆𑀣𑁄, 𑀩𑀼𑀤𑁆𑀥𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄 𑀳𑁄𑀢𑀻𑀢𑀺. 𑀘𑁂𑀢𑀲𑁄 𑀧𑀭𑀺𑀬𑀁 𑀘𑁂𑀢𑁄𑀧𑀭𑀺𑀬𑀁, 𑀫𑀦𑀲𑀺 𑀪𑀯𑀦𑁆𑀢𑀺 𑀫𑀸𑀦𑀲𑀁, 𑀜𑀸𑀡𑀁, 𑀘𑁂𑀢𑁄𑀧𑀭𑀺𑀬𑀜𑁆𑀘 𑀢𑀁 𑀫𑀸𑀦𑀲𑀜𑁆𑀘𑀸𑀢𑀺 𑀘𑁂𑀢𑁄𑀧𑀭𑀺𑀬𑀫𑀸𑀦𑀲𑀁. 𑀤𑀺𑀩𑁆𑀩𑀘𑀓𑁆𑀔𑀼𑀯𑀲𑁂𑀦𑁂𑀯𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀉𑀧𑀦𑀺𑀲𑁆𑀲𑀬𑁂𑀦𑁂𑀯. 𑀢𑀜𑁆𑀳𑀺 𑀏𑀢𑀲𑁆𑀲 𑀉𑀧𑁆𑀧𑀸𑀤𑀦𑁂 𑀧𑀭𑀺𑀓𑀫𑁆𑀫𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀤𑀁 𑀤𑀺𑀩𑁆𑀩𑀘𑀓𑁆𑀔𑀼𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑀸𑀤𑀻𑀳𑀺 ‘‘𑀤𑀺𑀩𑁆𑀩𑀘𑀓𑁆𑀔𑀽’’𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀤𑀺𑀲𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀤𑀬𑀦𑁆𑀢𑀺 𑀦 𑀳𑀤𑀬𑀯𑀢𑁆𑀣𑀼, 𑀅𑀣 𑀔𑁄 𑀳𑀤𑀬𑀫𑀁𑀲𑀧𑁂𑀲𑀺. 𑀬𑀁 𑀩𑀳𑀺 𑀓𑀫𑀮𑀫𑀓𑀼𑀴𑀲𑀡𑁆𑀞𑀸𑀦𑀁 𑀅𑀦𑁆𑀢𑁄 𑀓𑁄𑀲𑀸𑀢𑀓𑀻𑀨𑀮𑀲𑀤𑀺𑀲𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀮𑁄𑀳𑀺𑀢𑀁 𑀢𑀺𑀝𑁆𑀞𑀢𑀺. 𑀳𑀤𑀬𑀯𑀢𑁆𑀣𑀼 𑀧𑀦 𑀇𑀫𑀁 𑀮𑁄𑀳𑀺𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺. 𑀮𑁄𑀳𑀺𑀢𑀁 𑀤𑀺𑀲𑁆𑀯𑀸𑀢𑀺 𑀮𑁄𑀳𑀺𑀢𑀲𑁆𑀲 𑀯𑀡𑁆𑀡𑀁 𑀤𑀺𑀲𑁆𑀯𑀸. 𑀤𑀺𑀩𑁆𑀩𑀘𑀓𑁆𑀔𑀼𑀦𑁄𑀧𑀺 𑀳𑀺 𑀯𑀡𑁆𑀡𑀫𑁂𑀯 𑀤𑀺𑀲𑁆𑀲𑀢𑀺. 𑀢𑁂𑀦𑁂𑀯 𑀳𑀺 𑀢𑀁 𑀘𑀓𑁆𑀔𑀼𑀲𑀤𑀺𑀲𑀢𑁆𑀢𑀸 ‘‘𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀲𑁆𑀲𑀸𑀢𑀺 𑀅𑀜𑁆𑀜𑀲𑁆𑀲. 𑀬𑀣𑀸 𑀳𑀺 𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸, 𑀏𑀯𑀁 𑀬𑁄 𑀅𑀢𑁆𑀢𑀸 𑀦 𑀳𑁄𑀢𑀺, 𑀲𑁄 𑀧𑀭𑁄. 𑀓𑀣𑀁 𑀧𑀦 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀮𑁄𑀳𑀺𑀢𑀲𑁆𑀲 𑀯𑀡𑁆𑀡𑀤𑀲𑁆𑀲𑀦𑁂𑀦 𑀧𑀭𑀘𑀺𑀢𑁆𑀢𑀁 𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀆𑀳 ‘‘𑀲𑁄𑀫𑀦𑀲𑁆𑀲𑀬𑀼𑀢𑁂’’𑀢𑀺𑀆𑀤𑀺. 𑀮𑁄𑀳𑀺𑀢𑀦𑁆𑀢𑀺 𑀭𑀢𑁆𑀢𑀁 𑀦𑀺𑀕𑁆𑀭𑁄𑀥𑀨𑀮𑀲𑀫𑀸𑀦𑀯𑀡𑁆𑀡𑀁. 𑀓𑀸𑀴𑀓𑀦𑁆𑀢𑀺 𑀚𑀫𑁆𑀩𑀼𑀲𑀤𑀺𑀲𑀯𑀡𑁆𑀡𑀁. 𑀢𑀺𑀮𑀢𑁂𑀮𑀽𑀧𑀫𑀦𑁆𑀢𑀺 𑀅𑀦𑁂𑀦 𑀧𑀲𑀦𑁆𑀦𑀪𑀸𑀯𑀫𑀸𑀳.

𑀓𑀣𑀁 𑀧𑀦 𑀘𑀺𑀢𑁆𑀢𑁂 𑀲𑁄𑀫𑀦𑀲𑁆𑀲 𑀲𑀳𑀕𑀢𑀸𑀤𑀺𑀫𑁆𑀳𑀺 𑀲𑀢𑀺 𑀓𑀫𑁆𑀫𑀚𑀲𑁆𑀲 𑀮𑁄𑀳𑀺𑀢𑀲𑁆𑀲 𑀯𑀺𑀯𑀺𑀥𑀯𑀡𑁆𑀡𑀪𑀸𑀯𑀸𑀧𑀢𑁆𑀢𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀪𑀽𑀢𑀸𑀦𑀺 𑀓𑀫𑁆𑀫𑀚𑀸𑀦𑁂𑀯, 𑀢𑀁 𑀧𑀦 𑀮𑁄𑀳𑀺𑀢𑀁 𑀓𑀫𑁆𑀫𑀚𑀫𑁂𑀯𑀸𑀢𑀺 𑀦𑀢𑁆𑀣𑀺 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀲𑁆𑀲𑀧𑀺 𑀢𑀢𑁆𑀣 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀤𑀁 𑀭𑀽𑀧𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀁, 𑀇𑀤𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀁, 𑀇𑀤𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀧𑀭𑀲𑁆𑀲 𑀳𑀤𑀬𑀮𑁄𑀳𑀺𑀢𑀯𑀡𑁆𑀡𑀁 𑀧𑀲𑁆𑀲𑀺𑀢𑁆𑀯𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁧) 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 𑀬𑀁 𑀢𑀢𑁆𑀣 𑀅𑀘𑀺𑀢𑁆𑀢𑀚𑀁, 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀡𑁆𑀡𑀪𑁂𑀤𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀪𑀯𑀺𑀢𑀩𑁆𑀩𑀁 𑀲𑁂𑀲𑀲𑀦𑁆𑀢𑀢𑀺𑀭𑀽𑀧𑀸𑀦𑀁 𑀢𑀤𑀦𑀼𑀯𑀢𑁆𑀢𑀦𑀢𑁄. 𑀬𑀣𑀸 𑀳𑀺 𑀕𑀫𑀦𑀸𑀤𑀻𑀲𑀼 𑀘𑀺𑀢𑁆𑀢𑀚𑀭𑀽𑀧𑀸𑀦𑀺 𑀉𑀢𑀼𑀚𑀓𑀫𑁆𑀫𑀚𑀸𑀳𑀸𑀭𑀚𑀭𑀽𑀧𑁂𑀳𑀺 𑀅𑀦𑀼𑀯𑀢𑁆𑀢𑀻𑀬𑀦𑁆𑀢𑀺, 𑀅𑀜𑁆𑀜𑀣𑀸 𑀓𑀸𑀬𑀲𑁆𑀲 𑀤𑁂𑀲𑀦𑁆𑀢𑀭𑀧𑁆𑀧𑀢𑁆𑀢𑀺𑀬𑁂𑀯 𑀦 𑀲𑀺𑀬𑀸𑀢𑀺, 𑀏𑀯𑀫𑀺𑀥𑀸𑀧𑀺 𑀘𑀺𑀢𑁆𑀢𑀚𑀭𑀽𑀧𑀁 𑀲𑁂𑀲𑀲𑀦𑁆𑀢𑀢𑀺𑀭𑀽𑀧𑁂𑀳𑀺 𑀅𑀦𑀼𑀯𑀢𑁆𑀢𑀻𑀬𑀢𑀺, 𑀧𑀲𑀸𑀤𑀓𑁄𑀥𑀯𑁂𑀮𑀸𑀲𑀼 𑀘 𑀘𑀓𑁆𑀔𑀼𑀲𑁆𑀲 𑀯𑀡𑁆𑀡𑀪𑁂𑀤𑀸𑀧𑀢𑁆𑀢𑀺𑀬𑁂𑀯 𑀢𑀲𑁆𑀲𑀢𑁆𑀣𑀲𑁆𑀲 𑀦𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀫𑀸 𑀲𑁄𑀫𑀦𑀲𑁆𑀲𑀸𑀤𑀺𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑀼𑀭𑀽𑀧𑀁 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀯𑀲𑁂𑀦 𑀲𑁂𑀲𑀢𑀺𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀫𑁆𑀧𑀺 𑀦𑀸𑀦𑀸𑀯𑀡𑁆𑀡𑀢𑀸 𑀳𑁄𑀢𑀺𑀬𑁂𑀯𑀸𑀢𑀺 𑀲𑀼𑀝𑁆𑀞𑀼 𑀯𑀼𑀢𑁆𑀢𑀁 ‘‘𑀮𑁄𑀳𑀺𑀢𑀁 𑀮𑁄𑀳𑀺𑀢𑀁 𑀲𑀺𑀬𑀸’’𑀢𑀺𑀆𑀤𑀺. 𑀤𑀺𑀲𑁆𑀯𑀸 𑀳𑀤𑀬𑀮𑁄𑀳𑀺𑀢𑀦𑁆𑀢𑀺 𑀧𑀞𑀫𑀁 𑀢𑀸𑀯 𑀅𑀦𑀼𑀫𑀸𑀦𑀜𑀸𑀡𑁂𑀦 𑀮𑁄𑀳𑀺𑀢𑀁 𑀤𑀺𑀲𑁆𑀯𑀸. 𑀓𑀸𑀢𑀩𑁆𑀩𑀁 𑀣𑀸𑀫𑀢𑀁 𑀕𑀢𑀦𑁆𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀣𑀸𑀫𑀪𑀸𑀯𑀁 𑀕𑀢𑀁 𑀓𑀸𑀢𑀩𑁆𑀩𑀁.

𑀘𑁂𑀢𑁄𑀧𑀭𑀺𑀬𑀜𑀸𑀡𑀜𑁆𑀳𑀺 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀬𑁄𑀕𑀺𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀺𑀦𑀸 𑀏𑀯 𑀲𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀓𑀢𑁆𑀯𑀸 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀧𑀭𑀲𑁆𑀲 𑀳𑀤𑀬𑀫𑀁𑀲𑀧𑁂𑀲𑀺𑀁 𑀦𑀺𑀲𑁆𑀲𑀸𑀬 𑀯𑀢𑁆𑀢𑀫𑀸𑀦𑀲𑁆𑀲 𑀮𑁄𑀳𑀺𑀢𑀲𑁆𑀲 𑀯𑀡𑁆𑀡𑀤𑀲𑁆𑀲𑀦𑁂𑀦 𑀇𑀤𑀸𑀦𑀺 𑀇𑀫𑀲𑁆𑀲 𑀘𑀺𑀢𑁆𑀢𑀁 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢’’𑀦𑁆𑀢𑀺 𑀯𑀸 ‘‘𑀤𑁄𑀫𑀦𑀲𑁆𑀲𑀲𑀳𑀕𑀢’’𑀦𑁆𑀢𑀺 𑀯𑀸 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢’’𑀦𑁆𑀢𑀺 𑀯𑀸 𑀦𑀬𑀕𑁆𑀕𑀸𑀳𑀯𑀲𑁂𑀦 𑀯𑀯𑀢𑁆𑀣𑀸𑀧𑁂𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀇𑀫𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀫𑀻’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀓𑀸𑀮𑀲𑀢𑀫𑁆𑀧𑀺 𑀓𑀸𑀮𑀲𑀳𑀲𑁆𑀲𑀫𑁆𑀧𑀺 𑀧𑀼𑀦𑀧𑁆𑀧𑀼𑀦𑀁 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀣𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀢𑀲𑁆𑀲𑁂𑀯𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀳𑀤𑀬𑀮𑁄𑀳𑀺𑀢𑀯𑀡𑁆𑀡𑀤𑀲𑁆𑀲𑀦𑀸𑀤𑀺𑀯𑀺𑀥𑀺𑀦𑀸 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 ‘‘𑀇𑀤𑀸𑀦𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀬𑀁 𑀢𑀤𑀸 𑀧𑀯𑀢𑁆𑀢𑀢𑀻𑀢𑀺 𑀯𑀯𑀢𑁆𑀣𑀸𑀧𑀺𑀢𑀁 𑀘𑀺𑀢𑁆𑀢𑀁, 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀚𑀯𑀦𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺 𑀚𑀯𑀦𑁆𑀢𑀺. 𑀘𑀢𑀼𑀢𑁆𑀣𑀁, 𑀧𑀜𑁆𑀘𑀫𑀁 𑀯𑀸 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁. 𑀢𑀢𑁆𑀣 𑀬𑀁 𑀢𑁂𑀦 𑀅𑀧𑁆𑀧𑀦𑀸𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁, 𑀇𑀤𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁. 𑀢𑀜𑁆𑀳𑀺 𑀬𑀢𑁆𑀣 𑀅𑀦𑁂𑀦 𑀧𑀭𑀺𑀓𑀫𑁆𑀫𑀁 𑀓𑀢𑀁, 𑀢𑀁 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀧𑀘𑁆𑀘𑀓𑁆𑀔𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀭𑀽𑀧𑀁 𑀯𑀺𑀬 𑀘 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁, 𑀲𑀤𑁆𑀤𑀁 𑀯𑀺𑀬 𑀘 𑀤𑀺𑀩𑁆𑀩𑀲𑁄𑀢𑀜𑀸𑀡𑀁. 𑀢𑀢𑁄 𑀧𑀭𑀁 𑀧𑀦 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺 𑀲𑀭𑀸𑀕𑀸𑀤𑀺𑀯𑀯𑀢𑁆𑀣𑀸𑀧𑀦𑀁 𑀳𑁄𑀢𑀺 𑀦𑀻𑀮𑀸𑀤𑀺𑀯𑀯𑀢𑁆𑀣𑀸𑀧𑀦𑀁 𑀯𑀺𑀬.

𑁧𑁦𑁭𑁪-𑁫. 𑀏𑀯𑀫𑀥𑀺𑀕𑀢𑀲𑁆𑀲 𑀧𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀣𑀸𑀫𑀕𑀫𑀦𑀯𑀺𑀥𑀸𑀦𑀫𑁆𑀧𑀺 𑀅𑀥𑀺𑀕𑀫𑀯𑀺𑀥𑀸𑀦𑀲𑀤𑀺𑀲𑀫𑁂𑀯, 𑀢𑀤𑁂𑀯𑁂𑀢𑁆𑀣 𑀆𑀘𑀭𑀺𑀬𑁂𑀦 𑀤𑀲𑁆𑀲𑀺𑀢𑀁. 𑀏𑀯𑀁 𑀣𑀸𑀫𑀕𑀢𑁂𑀢𑀺𑀆𑀤𑀺 𑀣𑀸𑀫𑀕𑀫𑀦𑀸𑀦𑀺𑀲𑀁𑀲𑀤𑀲𑁆𑀲𑀦𑀁. 𑀲𑀩𑁆𑀩𑀫𑁂𑀯𑀸𑀢𑀺 𑀇𑀤𑀁 ‘‘𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁, 𑀭𑀽𑀧𑀸𑀭𑀽𑀧𑁂𑀲𑀼 𑀫𑀸𑀦𑀲’’𑀦𑁆𑀢𑀺 𑀉𑀪𑀬𑀧𑀤𑁂𑀦𑀧𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀘𑀢𑀼𑀧𑀡𑁆𑀡𑀸𑀲𑀯𑀺𑀥𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁, 𑀧𑀜𑁆𑀘𑀤𑀲𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀁, 𑀤𑁆𑀯𑀸𑀤𑀲𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑀫𑁂𑀯, 𑀧𑀘𑁆𑀘𑁂𑀓𑀁 𑀲𑀭𑀸𑀕𑀸𑀤𑀺𑀧𑁆𑀧𑀪𑁂𑀤𑀓𑀁 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀲𑁂𑀦𑀸𑀬𑀁 𑀅𑀪𑀺𑀜𑁆𑀜𑀸𑀓𑀣𑀸𑀢𑀺 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁 𑀇𑀥 𑀅𑀦𑀼𑀤𑁆𑀥𑀝𑀁. 𑀢𑀫𑁆𑀧𑀺 𑀳𑀺 𑀉𑀧𑀭𑀺𑀫𑁄, 𑀲𑀤𑀺𑀲𑁄 𑀯𑀸 𑀅𑀭𑀺𑀬𑁄 𑀳𑁂𑀝𑁆𑀞𑀺𑀫𑀲𑁆𑀲, 𑀲𑀤𑀺𑀲𑀲𑁆𑀲 𑀘 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀳𑁂𑀝𑁆𑀞𑀺𑀫𑁄 𑀧𑀦 𑀉𑀧𑀭𑀺𑀫𑀲𑁆𑀲 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀬𑀣𑀸 𑀘𑁂𑀢𑀁, 𑀏𑀯𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀅𑀓𑀢𑀸𑀪𑀺𑀦𑀺𑀯𑁂𑀲𑁄 𑀧𑀼𑀣𑀼𑀚𑁆𑀚𑀦𑁄, 𑀲𑁂𑀔𑁄𑀧𑀺 𑀯𑀸 𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀓𑀲𑁆𑀲 𑀧𑀦 𑀯𑀲𑁂𑀦 𑀇𑀥𑀸𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀚𑀸𑀦𑀦𑀁 𑀯𑀼𑀢𑁆𑀢𑀁. 𑀅𑀭𑀳𑀸 𑀧𑀦 𑀆𑀭𑀼𑀧𑁆𑀧𑁂 𑀅𑀓𑀢𑀸𑀪𑀺𑀦𑀺𑀯𑁂𑀲𑁄𑀧𑀺 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀅𑀯𑀺𑀚𑁆𑀚𑀸𑀬 𑀯𑀺𑀳𑀢𑀢𑁆𑀢𑀸 𑀢𑀫𑁆𑀧𑀺 𑀚𑀸𑀦𑀸𑀢𑀺𑀬𑁂𑀯. 𑀘𑁂𑀢𑁄𑀧𑀭𑀺𑀬𑀜𑀸𑀡𑀯𑀡𑁆𑀡𑀦𑀸.

𑁧𑁦𑁭𑁬-𑁭. 𑀧𑀼𑀩𑁆𑀩𑁂 𑀅𑀢𑀻𑀢𑀚𑀸𑀢𑀻𑀲𑀼 𑀦𑀺𑀯𑀸𑀲𑀸 𑀦𑀺𑀯𑀼𑀢𑁆𑀣𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸, 𑀲𑀧𑀭𑀯𑀺𑀜𑁆𑀜𑀸𑀡𑁂𑀳𑀺 𑀕𑁄𑀘𑀭𑀸𑀲𑁂𑀯𑀦𑀸𑀬 𑀆𑀲𑁂𑀯𑀺𑀢𑀸 𑀘 𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸. 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸𑀧𑀺 𑀳𑀺 𑀧𑀼𑀩𑁆𑀩𑁂 𑀦𑀺𑀯𑀲𑀺𑀁𑀲𑀼 𑀏𑀢𑁆𑀣𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀧𑀦 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼 𑀩𑀼𑀤𑁆𑀥𑀸𑀦𑀁𑀬𑁂𑀯 𑀯𑀺𑀲𑀬𑀸, 𑀧𑀼𑀩𑁆𑀩𑁂 𑀦𑀺𑀯𑀸𑀲𑁂𑀲𑀼 𑀲𑀭𑀽𑀧𑀯𑀺𑀪𑀸𑀯𑀓𑀁 𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁. 𑀢𑁂𑀦. 𑀢𑀤𑀦𑀼𑀲𑁆𑀲𑀢𑀻𑀢𑀺 𑀢𑁂𑀲𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀁 𑀅𑀦𑀼𑀲𑁆𑀲𑀢𑀺. 𑀳𑁂𑀝𑁆𑀞𑀸 𑀢𑀻𑀲𑀼 𑀛𑀸𑀦𑁂𑀲𑀼 𑀬𑀣𑀸𑀭𑀳𑀁 𑀧𑀻𑀢𑀺𑀲𑀼𑀔𑁂𑀳𑀺 𑀓𑀸𑀬𑀘𑀺𑀢𑁆𑀢𑀸𑀦𑀁 𑀲𑀫𑁆𑀧𑀻𑀡𑀦𑀸𑀬 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀛𑀸𑀦𑀸𑀦𑀺 𑀧𑀦𑀸’’𑀢𑀺𑀆𑀤𑀺. 𑀅𑀜𑁆𑀜𑀣𑀸 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀬𑀸𑀬 𑀦𑀺𑀲𑀚𑁆𑀚𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀅𑀦𑀼𑀲𑁆𑀲𑀭𑀡𑀸𑀭𑀫𑁆𑀪𑁄, 𑀲𑀸 𑀇𑀥 𑀲𑀩𑁆𑀩𑀧𑀘𑁆𑀙𑀺𑀫𑀸 𑀦𑀺𑀲𑀚𑁆𑀚𑀸.

𑁧𑁦𑁭𑁮-𑁮𑁦. 𑀢𑀢𑁄 𑀧𑀪𑀼𑀢𑀺…𑀧𑁂… 𑀓𑁆𑀓𑀫𑀸𑀢𑀺 𑀢𑀲𑁆𑀫𑀺𑀁 𑀪𑀯𑁂 𑀧𑀼𑀭𑀺𑀫𑀪𑀯𑀸𑀤𑀻𑀲𑀼 𑀓𑀢𑀁 𑀲𑀩𑁆𑀩𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀲𑀩𑁆𑀩𑀫𑀸𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀭𑀢𑁆𑀢𑀺𑀦𑁆𑀤𑀺𑀯𑀸𑀤𑀺𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀤𑀺𑀯𑀲𑁂 𑀭𑀢𑁆𑀢𑀺𑀬𑀁 𑀓𑀢𑀦𑁆𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀦𑀺𑀲𑀚𑁆𑀚𑀸𑀢𑁄 𑀧𑀝𑁆𑀞𑀸𑀬 𑀆𑀲𑀦𑀧𑀜𑁆𑀜𑀸𑀧𑀦𑀁 𑀲𑁂𑀦𑀸𑀲𑀦𑀧𑁆𑀧𑀯𑁂𑀲𑀦𑀦𑁆𑀢𑀺 𑀧𑀝𑀺𑀮𑁄𑀫𑁂𑀦 𑀲𑀓𑀮𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀓𑀢𑀓𑀺𑀘𑁆𑀘𑀁 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀓𑀢𑀫𑀸𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑀁 𑀏𑀢𑁆𑀣𑀦𑁆𑀢𑀭𑁂 𑀓𑀢𑀓𑀺𑀘𑁆𑀘𑀁, 𑀲𑀩𑁆𑀩𑀁 𑀢𑀁 𑀧𑀝𑀺𑀮𑁄𑀫𑀓𑁆𑀓𑀫𑁂𑀦𑁂𑀯 𑀆𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀓𑀁 𑀧𑀦 𑀧𑀓𑀢𑀺𑀘𑀺𑀢𑁆𑀢𑀲𑁆𑀲𑀧𑀺 𑀧𑀸𑀓𑀝𑀁, 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲 𑀧𑀦 𑀅𑀢𑀺𑀧𑀸𑀓𑀝𑀫𑁂𑀯. 𑀲𑀘𑁂 𑀧𑀦𑁂𑀢𑁆𑀣 𑀓𑀺𑀜𑁆𑀘𑀺 𑀦 𑀧𑀸𑀓𑀝𑀁 𑀳𑁄𑀢𑀺, 𑀧𑀼𑀦 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀆𑀯𑀚𑁆𑀚𑀺𑀢𑀩𑁆𑀩𑀁, 𑀏𑀢𑁆𑀢𑀓𑁂𑀦 𑀤𑀻𑀧𑁂 𑀚𑀮𑀺𑀢𑁂 𑀯𑀺𑀬 𑀧𑀸𑀓𑀝𑀁 𑀳𑁄𑀢𑀺. 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀜𑁆𑀳𑀺 𑀲𑀢𑁆𑀣𑀓𑀲𑁆𑀲 𑀯𑀺𑀬 𑀦𑀺𑀲𑀸𑀦𑀲𑀺𑀮𑀸 𑀲𑀢𑀺𑀧𑀜𑁆𑀜𑀸𑀦𑀁 𑀦𑀺𑀲𑀺𑀢𑀪𑀸𑀯𑀸𑀯𑀳𑀁, 𑀢𑀲𑁆𑀫𑀸 𑀢𑀸 𑀢𑀁𑀲𑀫𑀸𑀧𑀚𑁆𑀚𑀦𑁂𑀦 𑀧𑀭𑀫𑀦𑁂𑀧𑀓𑁆𑀓𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺. 𑀧𑀼𑀭𑀺𑀫𑀲𑁆𑀫𑀺𑀁 𑀪𑀯𑁂𑀢𑀺 𑀇𑀫𑀫𑁆𑀳𑀸 𑀪𑀯𑀸 𑀅𑀦𑀦𑁆𑀢𑀭𑁂 𑀧𑀼𑀭𑀺𑀫𑀲𑁆𑀫𑀺𑀁 𑀪𑀯𑁂.

𑁧𑁦𑁮𑁧. 𑀦𑀺𑀩𑁆𑀩𑀢𑁆𑀢𑀁 𑀦𑀸𑀫𑀭𑀽𑀧𑀜𑁆𑀘𑀸𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑀦𑀸𑀫𑀭𑀽𑀧𑀁. 𑀲𑀸𑀥𑀼𑀓𑀦𑁆𑀢𑀺 𑀲𑀼𑀝𑁆𑀞𑀼 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀧𑀳𑁄𑀢𑀺 𑀳𑀺 𑀇𑀫𑀺𑀲𑁆𑀲𑀸 𑀅𑀪𑀺𑀜𑁆𑀜𑀸𑀬 𑀓𑀢𑀸𑀥𑀺𑀓𑀸𑀭𑁄 𑀪𑀺𑀓𑁆𑀔𑀼 𑀧𑀞𑀫𑀯𑀸𑀭𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀘𑀼𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀸𑀢𑀼𑀁, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦𑀸𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀢𑀢𑁄 𑀘 𑀯𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀆𑀯𑀚𑁆𑀚𑀦𑁆𑀢𑁂𑀦 𑀘 𑀧𑀦 𑀧𑀞𑀫𑀁 𑀭𑀽𑀧𑀁 𑀆𑀯𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀦𑀸𑀫𑀁 𑀆𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀆𑀘𑀭𑀺𑀬𑀸. 𑀅𑀧𑀭𑁂 𑀧𑀦 𑀯𑀺𑀧𑀭𑀺𑀬𑀸𑀬𑁂𑀦 𑀯𑀤𑀦𑁆𑀢𑀺.

𑀢𑀢𑁆𑀣 𑀧𑀘𑁆𑀙𑀺𑀫𑀦𑀺𑀲𑀚𑁆𑀚𑀸𑀢𑁄 𑀧𑀪𑀼𑀢𑀺 𑀬𑀸𑀯 𑀧𑀝𑀺𑀲𑀦𑁆𑀥𑀺𑀢𑁄 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀜𑀸𑀡𑀁 𑀅𑀢𑀻𑀢𑀚𑀸𑀢𑀻𑀲𑀼 𑀦𑀺𑀯𑀼𑀢𑁆𑀣𑀥𑀫𑁆𑀫𑀸𑀭𑀫𑁆𑀫𑀡𑀸𑀪𑀸𑀯𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀦𑀸𑀫 𑀦 𑀳𑁄𑀢𑀺, 𑀢𑀁 𑀧𑀦 𑀧𑀭𑀺𑀓𑀫𑁆𑀫𑀜𑀸𑀡𑀫𑁂𑀯. 𑀬𑀤𑀸 𑀧𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀁 𑀅𑀢𑀺𑀓𑁆𑀓𑀫𑁆𑀫 𑀘𑀼𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀯𑀼𑀢𑁆𑀢𑀦𑀬𑁂𑀦 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀦𑀸𑀫. 𑀢𑁂𑀦𑀸𑀳 ‘‘𑀬𑀤𑀸 𑀧𑀦𑀸’’𑀢𑀺𑀆𑀤𑀺.

𑀏𑀢𑁆𑀣𑀸𑀳 𑁋 𑀓𑀺𑀁 𑀏𑀓𑁂𑀦𑁂𑀯 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀘𑀼𑀢𑀺𑀓𑁆𑀔𑀡𑁂 𑀧𑀯𑀢𑁆𑀢𑀦𑀸𑀫𑀭𑀽𑀧𑀁 𑀲𑀩𑁆𑀩𑀫𑁆𑀧𑀺 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀦 𑀅𑀜𑁆𑀜𑁂𑀦𑀸𑀢𑀺. 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀏𑀓𑁂𑀦𑁂𑀯, 𑀤𑀽𑀭𑀢𑁄 𑀘𑀺𑀢𑁆𑀢𑀧𑀝𑀁 𑀧𑁂𑀓𑁆𑀔𑀦𑁆𑀢𑀲𑁆𑀲 𑀯𑀺𑀬 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀯𑀯𑀢𑁆𑀣𑀸𑀦𑀁 𑀳𑁄𑀢𑀺. 𑀬𑀤𑀺 𑀘 𑀅𑀜𑁆𑀜𑁂𑀦 𑀅𑀜𑁆𑀜𑁂𑀦, 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀸𑀤𑀺𑀦𑀸 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀉𑀪𑀬𑀣𑀸𑀧𑀺 𑀦 𑀤𑁄𑀲𑁄. 𑀇𑀤𑁆𑀥𑀺𑀯𑀺𑀲𑀬𑀲𑁆𑀲 𑀳𑀺 𑀅𑀘𑀺𑀦𑁆𑀢𑁂𑀬𑁆𑀬𑀢𑁆𑀢𑀸 𑀏𑀓𑁂𑀦𑀧𑀺 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀦𑀸𑀫𑀭𑀽𑀧𑁂 𑀧𑀲𑁆𑀲𑀦𑁆𑀢𑁄 𑀦𑀺𑀭𑀽𑀧𑀺𑀢𑀭𑀽𑀧𑁂𑀦𑁂𑀯 𑀧𑀲𑁆𑀲𑀢𑀺, 𑀦 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦𑁂𑀯 𑀧𑀲𑁆𑀲𑀢𑀺, 𑀅𑀜𑁆𑀜𑁂𑀦𑀧𑀺 𑀯𑀸 𑀧𑀞𑀫𑀫𑁂𑀯 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀲𑀫𑀸𑀳𑀺𑀢𑀘𑀺𑀢𑁆𑀢𑁂𑀦 𑀓𑀢𑀧𑀭𑀺𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀢𑀢𑁆𑀢𑀸 𑀧𑀼𑀦 𑀲𑀫𑀸𑀧𑀚𑁆𑀚𑀦𑀁 𑀯𑀺𑀦𑀸 𑀆𑀯𑀚𑁆𑀚𑀺𑀢𑁆𑀯𑀸 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺𑀬𑁂𑀯𑀸𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀯𑀡𑁆𑀡𑀦𑀸.

𑁧𑁦𑁮𑁬-𑁮. 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸, 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀪𑀺𑀢𑀩𑁆𑀩𑀢𑁆𑀢𑀸, 𑀅𑀢𑁆𑀢𑀦𑀸 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀫𑀳𑀸𑀚𑀼𑀢𑀺𑀓𑀢𑀸𑀤𑀻𑀳𑀺 𑀯𑀸 𑀤𑀺𑀩𑁆𑀩𑀁, 𑀭𑀽𑀧𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼𑀫𑀺𑀯𑀸𑀢𑀺 𑀘𑀓𑁆𑀔𑀼. 𑀬𑀣𑀸 𑀳𑀺 𑀫𑀁𑀲𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀺, 𑀇𑀤𑀁 𑀧𑀦 𑀢𑀢𑁄 𑀲𑀸𑀢𑀺𑀲𑀬𑀁 𑀘𑀓𑁆𑀔𑀼𑀓𑀺𑀘𑁆𑀘𑀓𑀸𑀭𑀻𑀢𑀺 𑀤𑀺𑀩𑁆𑀩𑀜𑁆𑀘 𑀢𑀁 𑀘𑀓𑁆𑀔𑀼 𑀘𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼, 𑀢𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀦𑀸. 𑀓𑀲𑀺𑀡𑀸𑀭𑀫𑁆𑀫𑀡𑀦𑁆𑀢𑀺 𑀅𑀝𑁆𑀞𑀦𑁆𑀦𑀫𑁆𑀧𑀺 𑀓𑀲𑀺𑀡𑀸𑀦𑀁 𑀯𑀲𑁂𑀦 𑀓𑀲𑀺𑀡𑀸𑀭𑀫𑁆𑀫𑀡𑀁. 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀓𑀢𑁆𑀯𑀸𑀢𑀺 𑀘𑀼𑀤𑁆𑀤𑀲𑀯𑀺𑀥𑁂𑀦 𑀘𑀺𑀢𑁆𑀢𑀧𑀭𑀺𑀤𑀫𑀦𑁂𑀦 𑀅𑀝𑁆𑀞𑀗𑁆𑀕𑀲𑀫𑁆𑀧𑀦𑁆𑀦𑀢𑀸𑀓𑀭𑀡𑁂𑀦 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀪𑀺𑀫𑀼𑀔𑀁 𑀧𑁂𑀲𑀦𑀸𑀭𑀳𑀁 𑀧𑁂𑀲𑀦𑀬𑁄𑀕𑁆𑀬𑀁 𑀓𑀢𑁆𑀯𑀸. ‘‘𑀢𑁂𑀚𑁄…𑀧𑁂… 𑀓𑀲𑀺𑀡𑀫𑁆𑀧𑀺 𑀯𑀸 𑀆𑀲𑀦𑁆𑀦𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀆𑀲𑀦𑁆𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀲𑀫𑀻𑀧𑀪𑀽𑀢𑀁 𑀓𑀸𑀭𑀡𑀪𑀽𑀢𑀁 𑀓𑀸𑀢𑀩𑁆𑀩𑀁, 𑀢𑀢𑁆𑀣 𑀉𑀧𑀘𑀸𑀭𑀚𑁆𑀛𑀸𑀦𑀁 𑀧𑀕𑀼𑀡𑀢𑀭𑀁 𑀓𑀢𑁆𑀯𑀸 𑀢𑀁 𑀯𑀟𑁆𑀠𑁂𑀢𑁆𑀯𑀸 𑀇𑀘𑁆𑀙𑀺𑀢𑀓𑁆𑀔𑀡𑁂 𑀉𑀧𑀝𑁆𑀞𑀸𑀦𑀬𑁄𑀕𑁆𑀬𑀁 𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀭𑀽𑀧𑀤𑀲𑁆𑀲𑀦𑀯𑀺𑀲𑀬𑁂. 𑀲𑁂𑀝𑁆𑀞𑀦𑁆𑀢𑀺 𑀧𑀭𑀺𑀤𑀻𑀧𑀺𑀢𑀦𑁆𑀢𑀺 𑀆𑀮𑁄𑀓𑀓𑀲𑀺𑀡𑀲𑁆𑀲𑁂𑀯 𑀧𑀪𑀸𑀯𑀺𑀲𑁆𑀲𑀚𑁆𑀚𑀦𑀲𑀪𑀸𑀯𑁂𑀦 𑀆𑀮𑁄𑀓𑀓𑀭𑀡𑁂𑀦 𑀇𑀢𑀭𑁂𑀳𑀺 𑀯𑀺𑀲𑀺𑀝𑁆𑀞𑀢𑁆𑀢𑀸 𑀯𑀺𑀲𑀺𑀝𑁆𑀞𑀦𑁆𑀢𑀺 𑀧𑀭𑀺𑀤𑀻𑀧𑀺𑀢𑀁.

𑁧𑁦𑁮𑁯-𑁯𑁦. 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀉𑀧𑀘𑀸𑀭𑀚𑁆𑀛𑀸𑀦𑀼𑀧𑁆𑀧𑀸𑀤𑀦𑁂𑀦 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀉𑀧𑀘𑀸𑀭𑀚𑁆𑀛𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀳𑀺 𑀲𑀤𑁆𑀥𑀺𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺. 𑀬𑀲𑁆𑀫𑀸 𑀧𑀸𑀤𑀓𑀚𑁆𑀛𑀸𑀦𑀁 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀆𑀮𑁄𑀓𑁂 𑀅𑀧𑁆𑀧𑀦𑀸𑀯𑀲𑁂𑀦 𑀧𑀯𑀢𑁆𑀢𑀺𑀫𑀢𑁆𑀢𑀁 𑀯𑀺𑀦𑀸 𑀅𑀢𑁆𑀢𑀦𑁄 𑀩𑀮𑁂𑀦 𑀆𑀮𑁄𑀓𑀁 𑀨𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦𑀸𑀧𑀺 𑀬𑀣𑀸𑀧𑀢𑁆𑀣𑀝𑀁 𑀣𑀸𑀯𑀭𑀁 𑀓𑀸𑀢𑀼𑀁, 𑀧𑀭𑀺𑀓𑀫𑁆𑀫𑀁 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀓𑀸𑀢𑀼𑀁 𑀲𑀫𑀢𑁆𑀣𑀁, 𑀢𑀲𑁆𑀫𑀸 𑀉𑀧𑀘𑀸𑀭𑀪𑀽𑀫𑀺𑀬𑀁𑀬𑁂𑀯 𑀢𑀁 𑀯𑀟𑁆𑀠𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀉𑀧𑀘𑀸𑀭𑀪𑀽𑀫𑀺𑀬’’𑀦𑁆𑀢𑀺𑀆𑀤𑀺. 𑀉𑀧𑀘𑀸𑀭𑀪𑀽𑀫𑀻𑀢𑀺 𑀘𑁂𑀢𑁆𑀣 𑀆𑀮𑁄𑀓𑀲𑁆𑀲 𑀣𑀸𑀯𑀭𑀓𑀭𑀡𑀯𑀲𑀧𑁆𑀧𑀯𑀢𑁆𑀢𑀁 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑁆𑀧𑀦𑀦𑁆𑀢𑀺 𑀛𑀸𑀦𑀯𑀲𑁂𑀦 𑀅𑀧𑁆𑀧𑀦𑀁. 𑀦 𑀳𑀺 𑀅𑀓𑀢𑀧𑀭𑀺𑀓𑀫𑁆𑀫𑀲𑁆𑀲 𑀅𑀪𑀺𑀜𑁆𑀜𑀸𑀯𑀲𑁂𑀦 𑀅𑀧𑁆𑀧𑀦𑀸 𑀲𑀺𑀚𑁆𑀛𑀢𑀺. 𑀢𑁂𑀦𑀸𑀳 ‘‘𑀧𑀸𑀤𑀓𑀚𑁆𑀛𑀸𑀦𑀦𑀺𑀲𑁆𑀲𑀺𑀢’’𑀦𑁆𑀢𑀺. 𑀧𑀸𑀤𑀓𑀚𑁆𑀛𑀸𑀦𑀦𑀺𑀲𑁆𑀲𑀺𑀢𑀦𑁆𑀢𑀺 𑀧𑀸𑀤𑀓𑀚𑁆𑀛𑀸𑀦𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀧𑀭𑀺𑀓𑀫𑁆𑀫𑀦𑀺𑀲𑁆𑀲𑀺𑀢𑀁 𑀧𑀭𑀺𑀓𑀫𑁆𑀫𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀣𑀸 𑀘 𑀲𑀢𑀺 𑀆𑀮𑁄𑀓𑀯𑀟𑁆𑀠𑀦𑀸𑀪𑀸𑀯𑀢𑁄 𑀭𑀽𑀧𑀤𑀲𑁆𑀲𑀦𑀁 𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁦𑁯𑁧-𑁩. 𑀅𑀦𑁆𑀢𑁄…𑀧𑁂… 𑀪𑀯𑁂𑀢𑀺 𑀅𑀦𑁆𑀢𑁄𑀕𑀢𑀫𑁂𑀯 𑀭𑀽𑀧𑀕𑀢𑀁 𑀧𑀲𑁆𑀲𑀺𑀢𑀩𑁆𑀩𑀁 𑀪𑀯𑁂, 𑀦 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀧𑀲𑁆𑀲𑀺𑀢𑀩𑁆𑀩𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀆𑀮𑁄𑀓𑁂 𑀨𑀭𑀺𑀢𑁂𑀧𑀺 𑀫𑀁𑀲𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀳𑁄𑀢𑀺. 𑀧𑀭𑀺𑀓𑀫𑁆𑀫𑀲𑁆𑀲 𑀯𑀸𑀭𑁄 𑀳𑀺 𑀅𑀢𑀺𑀓𑁆𑀓𑀫𑀢𑀺 𑀢𑀸𑀯𑀤𑁂𑀢𑀺 𑀇𑀥 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀬𑀣𑀸𑀯𑀼𑀢𑁆𑀢𑀓𑀲𑀺𑀡𑀸𑀭𑀫𑁆𑀫𑀡𑀁 𑀉𑀧𑀘𑀸𑀭𑀚𑁆𑀛𑀸𑀦𑀁, 𑀢𑀁 𑀭𑀽𑀧𑀕𑀢𑀁 𑀧𑀲𑁆𑀲𑀢𑁄 𑀦 𑀧𑀯𑀢𑁆𑀢𑀢𑀺, 𑀓𑀲𑀺𑀡𑀸𑀮𑁄𑀓𑀯𑀲𑁂𑀦 𑀘 𑀭𑀽𑀧𑀕𑀢𑀤𑀲𑁆𑀲𑀦𑀁 𑀓𑀲𑀺𑀡𑀸𑀮𑁄𑀓𑁄 𑀘 𑀧𑀭𑀺𑀓𑀫𑁆𑀫𑀯𑀲𑁂𑀦𑀸𑀢𑀺 𑀢𑀤𑀼𑀪𑀬𑀫𑁆𑀧𑀺 𑀧𑀭𑀺𑀓𑀫𑁆𑀫𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀬𑀸 𑀦 𑀳𑁄𑀢𑀺. 𑀢𑁂𑀦𑀸𑀳 ‘‘𑀆𑀮𑁄𑀓𑁄𑀧𑀻’’𑀢𑀺𑀆𑀤𑀺. 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀭𑀽𑀧𑀕𑀢𑀫𑁆𑀧𑀺 𑀦 𑀘 𑀤𑀺𑀲𑁆𑀲𑀢𑀺, 𑀭𑀽𑀧𑀕𑀢𑀁 𑀧𑀲𑁆𑀲𑀢𑁄 𑀧𑀭𑀺𑀓𑀫𑁆𑀫𑀲𑁆𑀲 𑀯𑀸𑀭𑁄 𑀅𑀢𑀺𑀓𑁆𑀓𑀫𑀢𑀺, 𑀧𑀭𑀺𑀓𑀫𑁆𑀫𑀧𑀲𑀼𑀢𑀲𑁆𑀲 𑀓𑀲𑀺𑀡𑀸𑀭𑀫𑁆𑀫𑀡𑀜𑀸𑀡𑀁 𑀳𑁄𑀢𑀻𑀢𑀺 𑀭𑀽𑀧𑀕𑀢𑀁 𑀤𑀺𑀲𑁆𑀲𑀢𑀺, 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑁂𑀦𑀸’’𑀢𑀺𑀆𑀤𑀺.

𑁧𑁦𑁯𑁪-𑁯. 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀅𑀪𑀺𑀡𑁆𑀳𑀁 𑀆𑀮𑁄𑀓𑀨𑀭𑀡𑁂𑀦. 𑀆𑀮𑁄𑀓𑁄 𑀣𑀸𑀫𑀯𑀸𑀢𑀺 𑀆𑀮𑁄𑀓𑀕𑀢𑁄 𑀘𑀺𑀭𑀝𑁆𑀞𑀸𑀬𑀻 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 𑀢𑀢𑁆𑀣 𑀲𑀼𑀘𑀺𑀭𑀫𑁆𑀧𑀺 𑀭𑀽𑀧𑀕𑀢𑀁 𑀧𑀲𑁆𑀲𑀢𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀮𑁄𑀓𑁄 𑀏𑀢𑁆𑀣𑀸’’𑀢𑀺𑀆𑀤𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀢𑀺𑀡𑀼𑀓𑁆𑀓𑀽𑀧𑀫𑀸𑀬 𑀯𑀺𑀪𑀸𑀯𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀺𑀡𑀼𑀓𑁆𑀓𑀸𑀬𑀸’’𑀢𑀺𑀆𑀤𑀺. 𑀏𑀓𑁄 𑀓𑀺𑀭 𑀭𑀢𑁆𑀢𑀺𑀬𑀁 𑀢𑀺𑀡𑀼𑀓𑁆𑀓𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺, 𑀢𑀲𑁆𑀲 𑀲𑀸 𑀢𑀺𑀡𑀼𑀓𑁆𑀓𑀸 𑀯𑀺𑀚𑁆𑀛𑀸𑀬𑀺, 𑀅𑀣𑀲𑁆𑀲 𑀲𑀫𑀯𑀺𑀲𑀫𑀸𑀦𑀺 𑀦 𑀧𑀜𑁆𑀜𑀸𑀬𑀺𑀁𑀲𑀼, 𑀲𑁄 𑀢𑀁 𑀢𑀺𑀡𑀼𑀓𑁆𑀓𑀁 𑀪𑀽𑀫𑀺𑀬𑀁 𑀖𑀁𑀲𑀺𑀢𑁆𑀯𑀸 𑀧𑀼𑀦 𑀉𑀚𑁆𑀚𑀸𑀮𑁂𑀲𑀺, 𑀲𑀸 𑀧𑀚𑁆𑀚𑀮𑀺𑀢𑁆𑀯𑀸 𑀧𑀼𑀭𑀺𑀫𑀸𑀮𑁄𑀓𑀢𑁄 𑀫𑀳𑀦𑁆𑀢𑀭𑀫𑀸𑀮𑁄𑀓𑀁 𑀅𑀓𑀸𑀲𑀺, 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀯𑀺𑀚𑁆𑀛𑀸𑀢𑀁 𑀉𑀚𑁆𑀚𑀸𑀮𑀬𑀢𑁄 𑀓𑀫𑁂𑀦 𑀲𑀽𑀭𑀺𑀬𑁄 𑀉𑀝𑁆𑀞𑀸𑀲𑀺, 𑀲𑀽𑀭𑀺𑀬𑁂 𑀉𑀝𑁆𑀞𑀺𑀢𑁂 ‘‘𑀉𑀓𑁆𑀓𑀸𑀬 𑀓𑀫𑁆𑀫𑀁 𑀦𑀢𑁆𑀣𑀻’’𑀢𑀺 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀤𑀺𑀯𑀲𑀫𑁆𑀧𑀺 𑀅𑀕𑀫𑀸𑀲𑀺. 𑀢𑀢𑁆𑀣 𑀉𑀓𑁆𑀓𑀸𑀮𑁄𑀓𑁄 𑀯𑀺𑀬 𑀧𑀭𑀺𑀓𑀫𑁆𑀫𑀓𑀸𑀮𑁂 𑀓𑀲𑀺𑀡𑀸𑀮𑁄𑀓𑁄, 𑀉𑀓𑁆𑀓𑀸𑀬 𑀯𑀺𑀚𑁆𑀛𑀸𑀢𑀸𑀬 𑀲𑀫𑀯𑀺𑀲𑀫𑀸𑀦𑀁 𑀅𑀤𑀲𑁆𑀲𑀦𑀁 𑀯𑀺𑀬 𑀭𑀽𑀧𑀕𑀢𑀁 𑀧𑀲𑁆𑀲𑀢𑁄 𑀧𑀭𑀺𑀓𑀫𑁆𑀫𑀲𑁆𑀲 𑀯𑀸𑀭𑀸𑀢𑀺𑀓𑁆𑀓𑀫𑁂𑀦 𑀆𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁂 𑀭𑀽𑀧𑀕𑀢𑀸𑀦𑀁 𑀅𑀤𑀲𑁆𑀲𑀦𑀁, 𑀉𑀓𑁆𑀓𑀸𑀬 𑀖𑀁𑀲𑀦𑀁 𑀯𑀺𑀬 𑀧𑀼𑀦𑀧𑁆𑀧𑀼𑀦𑀁 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀁, 𑀉𑀓𑁆𑀓𑀸𑀬 𑀧𑀼𑀭𑀺𑀫𑀸𑀮𑁄𑀓𑀢𑁄 𑀫𑀳𑀦𑁆𑀢𑀢𑀭𑀸𑀮𑁄𑀓𑀓𑀭𑀡𑀁 𑀯𑀺𑀬 𑀧𑀼𑀦 𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑁄 𑀩𑀮𑀯𑀢𑀭𑀸𑀮𑁄𑀓𑀨𑀭𑀡𑀁, 𑀲𑀽𑀭𑀺𑀬𑀼𑀝𑁆𑀞𑀸𑀦𑀁 𑀯𑀺𑀬 𑀣𑀸𑀫𑀕𑀢𑀸𑀮𑁄𑀓𑀲𑁆𑀲 𑀬𑀣𑀸𑀯𑀟𑁆𑀠𑀺𑀢𑀧𑀭𑀺𑀘𑁆𑀙𑁂𑀤𑀁 𑀨𑀭𑀺𑀢𑁆𑀯𑀸 𑀅𑀯𑀝𑁆𑀞𑀸𑀦𑀁, 𑀢𑀺𑀡𑀼𑀓𑁆𑀓𑀁 𑀙𑀟𑁆𑀟𑁂𑀢𑁆𑀯𑀸 𑀤𑀺𑀯𑀲𑀫𑁆𑀧𑀺 𑀕𑀫𑀦𑀁 𑀯𑀺𑀬 𑀧𑀤𑀺𑀢𑁆𑀢𑀸𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀣𑀸𑀫𑀕𑀢𑁂𑀦𑀸𑀮𑁄𑀓𑁂𑀦 𑀤𑀺𑀯𑀲𑀫𑁆𑀧𑀺 𑀭𑀽𑀧𑀤𑀲𑁆𑀲𑀦𑀁. 𑀏𑀢𑁆𑀢𑀸𑀯𑀢𑀸 𑀘 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀦𑀸𑀦𑀸𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀜𑁆𑀘𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀜𑁆𑀘 𑀤𑀲𑁆𑀲𑀺𑀢𑀁, 𑀦 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑁆𑀧𑀸𑀤𑀦𑀓𑁆𑀓𑀫𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸𑀢𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀦𑁆𑀢𑀺. ‘‘𑀢𑀻𑀡𑀺 𑀘𑀢𑁆𑀢𑀸𑀭𑀺 𑀯𑀸 𑀧𑀦𑀸’’𑀢𑀺 𑀧𑀸𑀞𑁄.

𑁧𑁧𑁦𑁦. 𑀢𑀢𑁆𑀣 𑀅𑀢𑁆𑀣𑀲𑀸𑀥𑀓𑀘𑀺𑀢𑁆𑀢𑀦𑁆𑀢𑀺 𑀬𑀤𑀢𑁆𑀣𑀸𑀬𑁂𑀲 𑀧𑀝𑀺𑀧𑀦𑁆𑀦𑁄, 𑀢𑀲𑁆𑀲 𑀢𑀤𑀢𑁆𑀣𑀲𑀸𑀥𑀦𑀢𑁄 𑀅𑀢𑁆𑀣𑀲𑀸𑀥𑀓𑀪𑀽𑀢𑀁 𑀘𑀺𑀢𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀉𑀧𑁆𑀧𑀦𑁆𑀦𑁂 𑀫𑀁𑀲𑀘𑀓𑁆𑀔𑀼𑀲𑁆𑀲 𑀅𑀦𑀸𑀧𑀸𑀣𑀬𑁄𑀕𑁆𑀬𑀁 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀁 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀳𑁂𑀝𑁆𑀞𑀸𑀧𑀣𑀯𑀻𑀢𑀮𑀦𑀺𑀲𑁆𑀲𑀺𑀢𑀁 𑀢𑀺𑀭𑁄𑀓𑀼𑀝𑁆𑀝𑀧𑀩𑁆𑀩𑀢𑀧𑀸𑀓𑀸𑀭𑀕𑀢𑀁 𑀧𑀭𑀘𑀓𑁆𑀓𑀯𑀸𑀴𑀕𑀢𑀦𑁆𑀢𑀺 𑀇𑀤𑀁 𑀭𑀽𑀧𑀁 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀫𑀁𑀲𑀘𑀓𑁆𑀔𑀼𑀦𑀸 𑀤𑀺𑀲𑁆𑀲𑀫𑀸𑀦𑀁 𑀯𑀺𑀬 𑀳𑁄𑀢𑀺. 𑀢𑀤𑁂𑀯 𑀘𑁂𑀢𑁆𑀣 𑀭𑀽𑀧𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑀦𑀲𑀫𑀢𑁆𑀣𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀬. 𑀦 𑀧𑀦 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀧𑀼𑀩𑁆𑀩𑀪𑀸𑀕𑀘𑀺𑀢𑁆𑀢𑀸𑀦𑀺. 𑀢𑀸𑀦𑀺 𑀳𑀺 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀸𑀦𑀺𑀧𑀺 𑀦 𑀬𑀸𑀣𑀸𑀯𑀢𑁄 𑀢𑀁 𑀯𑀺𑀪𑀸𑀯𑁂𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺 𑀆𑀯𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀘𑀺𑀢𑁆𑀢𑀸𑀦𑀺 𑀯𑀺𑀬𑀸𑀢𑀺.

𑁧𑁧𑁦𑁧-𑁨. 𑀦𑀦𑀼 𑀘 𑀅𑀦𑀸𑀕𑀢𑀁𑀲𑀜𑀸𑀡𑀁 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀦𑁆𑀢𑀺 𑀤𑁆𑀯𑁂 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀺 𑀅𑀢𑁆𑀣𑀺, 𑀓𑀲𑁆𑀫𑀸 𑀢𑀸𑀦𑀺 𑀇𑀥 𑀦 𑀤𑀲𑁆𑀲𑀺𑀢𑀸𑀦𑀻𑀢𑀺 𑀆𑀳 ‘‘𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀸’’𑀢𑀺𑀆𑀤𑀺. 𑀇𑀚𑁆𑀛𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀢𑀺 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀲𑁆𑀲 𑀅𑀪𑀸𑀯𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀧𑀝𑀺𑀮𑀸𑀪𑁂𑀦𑁂𑀯 𑀢𑀲𑁆𑀲 𑀧𑀭𑀺𑀯𑀸𑀭𑀸𑀦𑀺 𑀳𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁄𑀬𑁂𑀯 𑀳𑀺 𑀢𑀸𑀦𑀺 𑀢𑀲𑁆𑀲 𑀧𑀭𑀺𑀪𑀡𑁆𑀟𑀜𑀸𑀡𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸 𑀳𑀺 𑀲𑀺𑀦𑁂𑀭𑀼𑀲𑁆𑀲 𑀧𑀭𑀺𑀯𑀸𑀭𑀝𑁆𑀞𑀸𑀦𑀺𑀬𑀸𑀦𑀺 𑀢𑀁𑀲𑀺𑀤𑁆𑀥𑀺𑀬𑀸 𑀲𑀺𑀤𑁆𑀥𑀸𑀦𑀺 𑀫𑁂𑀔𑀮𑀝𑁆𑀞𑀸𑀦𑀸𑀦𑀺 𑀧𑀭𑀺𑀪𑀡𑁆𑀟𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀇𑀫𑀸𑀦𑀺𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑀺𑀤𑁆𑀥𑀺𑀬𑀸 𑀲𑀺𑀤𑁆𑀥𑀸𑀦𑀺 𑀢𑀲𑁆𑀲 𑀧𑀭𑀺𑀪𑀡𑁆𑀟𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀳𑁄𑀢𑀼 𑀢𑀸𑀯 𑀏𑀯𑀫𑁂𑀢𑀁, 𑀘𑀼𑀢𑀽𑀧𑀧𑀸𑀢𑀜𑀸𑀡𑀁 𑀧𑀦 𑀓𑀺𑀁 𑀦 𑀤𑀲𑁆𑀲𑀺𑀢𑀦𑁆𑀢𑀺 𑀆𑀳 ‘‘𑀘𑀼𑀢𑀽𑀧𑀧𑀸𑀢𑀜𑀸𑀡𑀫𑁆𑀧𑀻’’𑀢𑀺𑀆𑀤𑀺. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀫𑁂𑀯 𑀳𑀺 𑀘𑀼𑀢𑀺𑀬𑀁, 𑀉𑀧𑀧𑀢𑁆𑀢𑀺𑀬𑀜𑁆𑀘 𑀭𑀽𑀧𑀁 𑀯𑀺𑀪𑀸𑀯𑁂𑀦𑁆𑀢𑀁 𑀘𑀼𑀢𑀽𑀧𑀧𑀸𑀢𑁂 𑀧𑀯𑀢𑁆𑀢𑀢𑁆𑀢𑀸 ‘‘𑀘𑀼𑀢𑀽𑀧𑀧𑀸𑀢𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀅𑀯𑀲𑁂𑀲𑀭𑀽𑀧𑀯𑀺𑀪𑀸𑀯𑀦𑀓𑀸𑀮𑁂 ‘‘𑀤𑀺𑀩𑁆𑀩𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀧𑀭𑀫𑀢𑁆𑀣𑀢𑁄 𑀦𑀸𑀫𑀤𑁆𑀯𑀬𑁂𑀦 𑀆𑀕𑀢𑀁 𑀏𑀓𑀫𑁂𑀯 𑀜𑀸𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀦𑁆𑀢𑀺 𑀧𑀦 𑀩𑁆𑀬𑀜𑁆𑀚𑀦𑀢𑁄𑀬𑁂𑀯 𑀦𑀸𑀦𑀦𑁆𑀢𑀺. 𑀓𑀢𑁆𑀣𑀘𑀺 𑀫𑀦𑁄𑀫𑀬𑀜𑀸𑀡𑀦𑁆𑀢𑀺𑀧𑀺 𑀯𑀺𑀲𑀼𑀁 𑀅𑀪𑀺𑀜𑁆𑀜𑀸𑀜𑀸𑀡𑀁 𑀆𑀕𑀢𑀁, 𑀢𑀁 𑀅𑀢𑁆𑀣𑀢𑁄 𑀇𑀤𑁆𑀥𑀺𑀯𑀺𑀥𑀜𑀸𑀡𑀫𑁂𑀯. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀡𑁆𑀡𑀦𑀸.

𑁧𑁧𑁦𑁩. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀅𑀦𑁂𑀦 𑀢𑀭𑁂𑀦𑀸𑀢𑀺 𑀅𑀦𑁂𑀦 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀦𑀸𑀫𑀓𑁂𑀦 𑀢𑀭𑁂𑀦.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀅𑀪𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.