𑁧𑁪. 𑀘𑀼𑀤𑁆𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁮𑁯. 𑀏𑀯𑀁 𑀧𑀭𑀫𑀢𑁆𑀣𑀲𑀫𑁆𑀫𑀼𑀢𑀺𑀯𑀲𑁂𑀦 𑀉𑀪𑀬𑀣𑀸𑀧𑀺 𑀲𑀩𑁆𑀩𑀥𑀫𑁆𑀫𑁂 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑁂𑀲𑀼 𑀉𑀕𑁆𑀕𑀳𑀡𑀧𑀭𑀺𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀓𑀢𑀧𑀭𑀺𑀘𑀬𑁂𑀦 𑀅𑀢𑁆𑀣𑀓𑀸𑀫𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀏𑀓𑀁𑀲𑀢𑁄 𑀪𑀸𑀯𑀦𑀸𑀬 𑀅𑀪𑀺𑀬𑁄𑀕𑁄 𑀓𑀸𑀢𑀩𑁆𑀩𑁄, 𑀢𑀲𑁆𑀫𑀸 𑀪𑀸𑀯𑀦𑀸𑀦𑀬𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀭𑀪𑀦𑁆𑀢𑁄 𑀆𑀳 ‘‘𑀪𑀸𑀯𑀦𑀸𑀦𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀪𑀸𑀯𑀦𑀸𑀦𑀬𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑀸𑀯𑀦𑀸𑀦𑀬𑀁, 𑀓𑀼𑀲𑀮𑀥𑀫𑁆𑀫𑀸𑀦𑀁 𑀯𑀟𑁆𑀠𑀦𑀓𑁆𑀓𑀫𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀳𑀺𑀢𑀁 𑀆𑀦𑀬𑀢𑀺 𑀉𑀧𑀦𑁂𑀢𑀻𑀢𑀺 𑀳𑀺𑀢𑀸𑀦𑀬𑁄, 𑀢𑀁 𑀳𑀺𑀢𑀸𑀦𑀬𑀁. 𑀫𑀸𑀦𑀬𑀦𑁆𑀢𑀺 𑀫𑀸𑀦𑁂𑀦𑁆𑀢𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂𑀳𑀺 𑀅𑀦𑀼𑀲𑀸𑀲𑀦𑀢𑁄 𑀲𑀢𑁆𑀢𑀸𑀦𑀁 𑀲𑀼𑀔𑀁 𑀆𑀦𑁂𑀢𑀻𑀢𑀺 𑀲𑀼𑀔𑀸𑀦𑀬𑁄, 𑀢𑀁 𑀲𑀼𑀔𑀸𑀦𑀬𑀁. 𑀧𑀭𑀫𑀁 𑀩𑁆𑀬𑀸𑀓𑀭𑁄𑀫𑀺, 𑀧𑀭𑀫𑀁 𑀪𑀸𑀯𑀦𑀸𑀦𑀬𑀦𑁆𑀢𑀺 𑀯𑀸 𑀬𑁄𑀚𑀦𑀸.

𑁭𑁯𑁦. 𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀢𑁄 𑀉𑀢𑁆𑀢𑀭𑀁 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀸 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀧𑀓𑀢𑀺𑀥𑀫𑁆𑀫𑀪𑀽𑀢𑀸 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸, 𑀢𑀢𑁄 𑀉𑀢𑁆𑀢𑀭𑀁 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸. 𑀢𑁂 𑀳𑀺 𑀚𑀸𑀦𑀦𑀝𑁆𑀞𑁂𑀦 𑀜𑀸𑀡𑀁, 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀤𑀲𑁆𑀲𑀦𑀝𑁆𑀞𑁂𑀦 𑀘 𑀤𑀲𑁆𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀯𑀸 𑀬𑀣𑀸𑀞𑀺𑀢𑀯𑀲𑁂𑀦𑁂𑀯 𑀲𑀫𑁆𑀩𑀦𑁆𑀥𑁄. 𑀩𑀸𑀮𑀫𑀦𑀼𑀲𑁆𑀲𑀸𑀤𑀺𑀢𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀛𑀸𑀬𑀻𑀦𑀜𑁆𑀘𑁂𑀯 𑀅𑀭𑀺𑀬𑀸𑀦𑀜𑁆𑀘𑀸𑀢𑀺 𑀅𑀢𑁆𑀣𑁄.

𑁭𑁯𑁧. 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁂𑀢𑀺𑀆𑀤𑀻𑀳𑀺 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸 𑀧𑀬𑁄𑀚𑀦𑀤𑀲𑁆𑀲𑀦𑀁. 𑀢𑀢𑁆𑀣 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑁄 𑀲𑀫𑀸𑀘𑀸𑀭𑁄 𑀅𑀲𑁆𑀲𑀸𑀢𑀺 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄. 𑀬𑀁 𑀓𑀺𑀜𑁆𑀘𑀺 𑀮𑀸𑀫𑀓𑀓𑀫𑁆𑀫𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀅𑀲𑀼𑀓𑁂𑀦 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑁂𑀢𑀩𑁆𑀩𑀸𑀬 𑀲𑀗𑁆𑀓𑀸𑀬 𑀅𑀢𑁆𑀢𑀦𑁄 𑀯𑀸 𑀧𑀭𑁂 𑀬𑀁𑀓𑀺𑀜𑁆𑀘𑀺 𑀫𑀦𑁆𑀢𑁂𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀫𑀫 𑀇𑀤𑀜𑁆𑀘𑀺𑀤𑀜𑁆𑀘 𑀅𑀲𑀸𑀭𑀼𑀧𑁆𑀧𑀁 𑀚𑀸𑀦𑀺𑀢𑁆𑀯𑀸 𑀫𑀦𑁆𑀢𑁂𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀲𑀗𑁆𑀓𑀸𑀬 𑀉𑀧𑀕𑀦𑁆𑀢𑀩𑁆𑀩𑀲𑀫𑀸𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀤𑀼𑀲𑁆𑀲𑀻𑀮𑁂𑀢𑀺 𑀏𑀢𑀤𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀻𑀮𑀯𑀚𑁆𑀚𑀺𑀢𑁂’’𑀢𑀺 𑀯𑀼𑀢𑁆𑀢𑀁. 𑀤𑀼𑀲𑁆𑀲𑀻𑀮𑁂𑀢𑀺 𑀯𑀸 𑀤𑀽𑀲𑀺𑀢𑀲𑀻𑀮𑁂 𑀔𑀡𑁆𑀟𑀸𑀤𑀺𑀪𑀸𑀯𑀁 𑀉𑀧𑀕𑀢𑀲𑀻𑀮𑁂. 𑀲𑀻𑀮𑀯𑀚𑁆𑀚𑀺𑀢𑁂𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀻𑀮𑀯𑀺𑀭𑀳𑀺𑀢𑁂. 𑀦𑀢𑁆𑀣𑀺 𑀛𑀸𑀦𑀦𑁆𑀢𑀺 𑀮𑁄𑀓𑀺𑀬𑀚𑁆𑀛𑀸𑀦𑀫𑁆𑀧𑀺 𑀢𑀸𑀯 𑀦𑀢𑁆𑀣𑀺. 𑀓𑀼𑀢𑁄 𑀫𑀕𑁆𑀕𑁄𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀓𑀼𑀢𑁄, 𑀓𑁂𑀦 𑀓𑀸𑀭𑀡𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀳𑁂𑀢𑀼𑀬𑁂𑀯 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁭𑁯𑁨. 𑀘𑀭𑀦𑁆𑀢𑀺 𑀢𑀲𑁆𑀫𑀺𑀁 𑀲𑀻𑀮𑁂 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀧𑀯𑀢𑁆𑀢𑀦𑁆𑀢𑀻𑀢𑀺 𑀘𑀸𑀭𑀺𑀢𑁆𑀢𑀁. 𑀯𑀸𑀭𑀺𑀢𑀁 𑀢𑀸𑀬𑀦𑁆𑀢𑀺 𑀭𑀓𑁆𑀔𑀦𑁆𑀢𑀺 𑀢𑁂𑀦, 𑀯𑀸𑀭𑀺𑀢𑀢𑁄 𑀯𑀸 𑀅𑀢𑁆𑀢𑀸𑀦𑀁 𑀢𑀸𑀬𑀢𑀻𑀢𑀺 𑀯𑀸𑀭𑀺𑀢𑁆𑀢𑀁. 𑀬𑀁 𑀪𑀕𑀯𑀢𑀸 ‘‘𑀇𑀤𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀁, 𑀇𑀤𑀁 𑀘𑀸𑀭𑀺𑀢𑁆𑀢𑀁 𑀦𑀸𑀫. 𑀬𑀁 ‘‘𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲 𑀅𑀓𑀭𑀡𑀁 𑀯𑀸𑀭𑀺𑀢𑁆𑀢𑀁 𑀦𑀸𑀫. 𑀅𑀘𑁆𑀙𑀺𑀤𑁆𑀤𑀦𑁆𑀢𑀺𑀆𑀤𑀻𑀲𑀼 𑀬𑀲𑁆𑀲 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀫𑀚𑁆𑀛𑁂 𑀲𑀺𑀓𑁆𑀔𑀸𑀧𑀤𑀁 𑀪𑀺𑀦𑁆𑀦𑀁, 𑀢𑀲𑁆𑀲 𑀲𑀻𑀮𑀁 𑀙𑀺𑀤𑁆𑀤𑀲𑀸𑀝𑀓𑁄 𑀯𑀺𑀬 𑀙𑀺𑀤𑁆𑀤𑀁 𑀦𑀸𑀫 𑀳𑁄𑀢𑀺, 𑀢𑀩𑁆𑀩𑀺𑀧𑀭𑀻𑀢𑀁 𑀅𑀘𑁆𑀙𑀺𑀤𑁆𑀤𑀁. 𑀬𑀲𑁆𑀲 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸 𑀪𑀺𑀦𑁆𑀦𑀁, 𑀢𑀲𑁆𑀲 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬 𑀔𑀡𑁆𑀟𑀁 𑀦𑀸𑀫 𑀳𑁄𑀢𑀺, 𑀢𑀤𑀜𑁆𑀜𑀁 𑀅𑀓𑁆𑀔𑀡𑁆𑀟𑀁. 𑀓𑀫𑀲𑁆𑀲 𑀆𑀤𑀭𑀓𑀭𑀡𑀯𑀲𑁂𑀦 𑀅𑀓𑁆𑀔𑀡𑁆𑀟𑀦𑁆𑀢𑀺, 𑀓𑀫𑀯𑀺𑀮𑀗𑁆𑀖𑀦𑀯𑀲𑁂𑀦 ‘‘𑀅𑀓𑁆𑀔𑀡𑁆𑀟𑀫𑀘𑁆𑀙𑀺𑀤𑁆𑀤’’𑀦𑁆𑀢𑀺 𑀯𑀸 𑀧𑀸𑀞𑁄. 𑀅𑀓𑀫𑁆𑀫𑀸𑀲-𑀕𑁆𑀕𑀳𑀡𑁂𑀦 𑀅𑀲𑀩𑀮𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀁, 𑀲𑀩𑀮𑀓𑀫𑁆𑀫𑀸𑀲𑀸𑀦𑀁 𑀪𑁂𑀤𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀪𑀸𑀯𑀢𑁄. 𑀏𑀢𑁆𑀢𑀓𑁄 𑀳𑀺 𑀢𑁂𑀲𑀁 𑀯𑀺𑀲𑁂𑀲𑁄. 𑀬𑀲𑁆𑀲 𑀧𑀝𑀺𑀧𑀸𑀝𑀺𑀬𑀸 𑀤𑁆𑀯𑁂 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀧𑀺𑀝𑁆𑀞𑀺𑀬𑀸, 𑀓𑀼𑀘𑁆𑀙𑀺𑀬𑀸 𑀯𑀸 𑀉𑀝𑁆𑀞𑀺𑀢𑁂𑀦 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀓𑀸𑀴𑀭𑀢𑁆𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑁂𑀦 𑀲𑀩𑀮𑀯𑀡𑁆𑀡𑀸 𑀕𑀸𑀯𑀻 𑀯𑀺𑀬 𑀲𑀩𑀮𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀲𑀪𑀸𑀕𑀯𑀡𑁆𑀡𑀩𑀺𑀦𑁆𑀤𑀼𑀘𑀺𑀢𑁆𑀭𑀕𑀸𑀯𑀻 𑀯𑀺𑀬 𑀓𑀫𑁆𑀫𑀸𑀲𑀁 𑀦𑀸𑀫 𑀳𑁄𑀢𑀺. 𑀬𑀁 𑀧𑀦 𑀢𑀣𑀸𑀯𑀺𑀥𑀁 𑀦 𑀳𑁄𑀢𑀺, 𑀢𑀁 ‘‘𑀅𑀲𑀩𑀮𑀁 𑀅𑀓𑀫𑁆𑀫𑀸𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀺𑀦𑁆𑀤𑀺𑀢𑀦𑁆𑀢𑀺 𑀇𑀫𑀺𑀦𑀸 𑀪𑀼𑀚𑀺𑀲𑁆𑀲𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀅𑀧𑀭𑀸𑀫𑀝𑁆𑀞𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀪𑀸𑀯𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 𑀏𑀯𑀁 𑀢𑀡𑁆𑀳𑀸𑀬 𑀅𑀧𑀭𑀸𑀫𑀝𑁆𑀞𑀁 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑀺𑀢𑀢𑁆𑀢𑀸 𑀪𑀼𑀚𑀺𑀲𑁆𑀲𑀁 𑀦𑀸𑀫. 𑀅𑀤𑀸𑀲𑀜𑁆𑀳𑀺 𑀮𑁄𑀓𑁂 𑀪𑀼𑀚𑀺𑀲𑁆𑀲𑁄𑀢𑀺 𑀯𑀤𑀦𑁆𑀢𑀺. 𑀬𑀣𑀸𑀯𑀼𑀢𑁆𑀢𑀕𑀼𑀡𑀧𑀸𑀭𑀺𑀧𑀽𑀭𑀺𑀬𑀸 𑀩𑀼𑀤𑁆𑀥𑀸𑀤𑀻𑀳𑀺 𑀯𑀺𑀜𑁆𑀜𑀽𑀳𑀺 𑀧𑀲𑀁𑀲𑀺𑀢𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀁. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀁 𑀞𑀺𑀢𑀺𑀪𑀸𑀕𑀺𑀬𑀁 𑀅𑀧𑀭𑀸𑀫𑀝𑁆𑀞𑀁 𑀦𑀸𑀫. 𑀛𑀸𑀦𑀸𑀤𑀻𑀦𑀁 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀁 𑀯𑀺𑀲𑁂𑀲𑀪𑀸𑀕𑀺𑀬𑀁 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀁 𑀦𑀸𑀫.

𑁭𑁯𑁩-𑁭. 𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀽𑀧𑀥𑀺𑀯𑀺𑀯𑁂𑀓𑀲𑀼𑀔𑀁. 𑀓𑀸𑀬𑀯𑀺𑀯𑁂𑀓𑀲𑀼𑀔𑀫𑁆𑀧𑀺 𑀳𑀺 𑀲𑀫𑁆𑀧𑀦𑁆𑀦𑀲𑀻𑀮𑀲𑁆𑀲𑁂𑀯 𑀤𑀼𑀲𑁆𑀲𑀻𑀮𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑀸𑀤𑀻𑀲𑀼 𑀯𑀲𑀢𑁄𑀧𑀺 𑀪𑁂𑀭𑀯𑀸𑀭𑀫𑁆𑀫𑀡𑀸𑀤𑀺𑀆𑀧𑀸𑀣𑀕𑀫𑀦𑁂𑀦 𑀤𑀼𑀓𑁆𑀔𑀲𑁆𑀲𑁂𑀯 𑀯𑀺𑀲𑁂𑀲𑀢𑁄 𑀲𑀫𑁆𑀧𑀚𑁆𑀚𑀦𑀢𑁄. 𑀅𑀮𑀗𑁆𑀓𑀸𑀭𑁄 𑀅𑀦𑀼𑀢𑁆𑀢𑀭𑁄𑀢𑀺 𑀤𑁂𑀯𑀩𑁆𑀭𑀳𑁆𑀫𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀫𑀚𑁆𑀛𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑁄𑀪𑀸𑀧𑀝𑀺𑀮𑀸𑀪𑀳𑁂𑀢𑀼𑀢𑀸𑀬 𑀦𑀺𑀭𑀼𑀢𑁆𑀢𑀭𑁄 𑀅𑀮𑀗𑁆𑀓𑀸𑀭𑀯𑀺𑀲𑁂𑀲𑁄. 𑀭𑀢𑀦𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀻𑀦𑀁 𑀘𑀓𑁆𑀓𑀭𑀢𑀦𑀸𑀤𑀺𑀢𑁄𑀧𑀺 𑀲𑀯𑀺𑀲𑁂𑀲𑀁 𑀭𑀢𑀺𑀚𑀦𑀦𑀢𑁄 𑀅𑀦𑀼𑀢𑁆𑀢𑀭𑀁 𑀭𑀢𑀦𑀁. 𑀘𑀓𑁆𑀓𑀭𑀢𑀦𑀸𑀤𑀺𑀓𑀜𑁆𑀳𑀺 𑀯𑀝𑁆𑀝𑀦𑀺𑀲𑁆𑀲𑀺𑀢𑀫𑁂𑀯 𑀭𑀢𑀺𑀁 𑀚𑀦𑁂𑀢𑀺, 𑀇𑀤𑀁 𑀧𑀦 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀫𑁆𑀧𑀺 𑀚𑀦𑁂𑀢𑀻𑀢𑀺 𑀯𑀺𑀲𑁂𑀲𑀢𑁄 𑀭𑀢𑀺𑀚𑀦𑀓𑀁 𑀳𑁄𑀢𑀺. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀯𑀺𑀲𑁂𑀲𑀲𑁆𑀲 𑀦𑀺𑀧𑁆𑀨𑀸𑀤𑀦𑀢𑁄 𑀘𑀺𑀦𑁆𑀢𑀸𑀫𑀡𑀺𑀲𑀫𑀦𑁆𑀢𑀺 𑀘𑀺𑀦𑁆𑀢𑀸𑀫𑀡𑀺. 𑀬𑀸𑀦𑀦𑁆𑀢𑀺 𑀲𑀁𑀲𑀸𑀭𑀓𑀦𑁆𑀢𑀸𑀭𑀢𑀭𑀡𑁂 𑀬𑀸𑀦𑀁. 𑀲𑀻𑀢𑀮𑀦𑁆𑀢𑀺 𑀘𑀺𑀢𑁆𑀢𑀲𑀻𑀢𑀺𑀪𑀸𑀯𑀓𑀭𑀡𑁂𑀦 𑀲𑀻𑀢𑀮𑀁. 𑀓𑀺𑀮𑁂𑀲𑀫𑀮𑀥𑁄𑀯𑀦𑀦𑁆𑀢𑀺 𑀕𑀗𑁆𑀕𑀸𑀬𑀫𑀼𑀦𑀸𑀤𑀻𑀳𑀺𑀧𑀺 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑀲𑁆𑀲 𑀓𑀺𑀮𑁂𑀲𑀓𑀸𑀮𑀼𑀲𑀺𑀬𑀲𑁆𑀲 𑀥𑁄𑀯𑀦𑀁. 𑀕𑀼𑀡𑀸𑀦𑀁 𑀫𑀽𑀮𑀪𑀽𑀢𑀦𑁆𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀦𑀁 𑀫𑀽𑀮𑀪𑀽𑀢𑀁. ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 (𑀲𑀁. 𑀦𑀺. 𑁧.𑁨𑁩), 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥’’𑀦𑁆𑀢𑀺 (𑀲𑀁. 𑀦𑀺. 𑁫.𑁩𑁬𑁯) 𑀘 𑀆𑀤𑀺𑀯𑀘𑀦𑀜𑁆𑀳𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀤𑁄𑀲𑀸𑀦𑀁 𑀯𑀻𑀢𑀺𑀓𑁆𑀓𑀫𑀯𑀢𑁆𑀣𑀼𑀪𑀽𑀢𑀲𑁆𑀲 𑀩𑀮𑀲𑁆𑀲 𑀯𑀺𑀦𑀸𑀲𑀦𑀢𑁄 𑀤𑁄𑀲𑀸𑀦𑀁 𑀩𑀮𑀖𑀸𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁𑀯𑀺𑀥𑀸𑀦𑀺𑀲𑀁𑀲𑀲𑀫𑁆𑀧𑀦𑁆𑀦𑀁 𑀲𑀻𑀮𑀁, 𑀢𑀲𑁆𑀫𑀸. 𑀤𑀼𑀯𑀺𑀥𑀮𑀓𑁆𑀔𑀡𑀦𑁆𑀢𑀺 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀅𑀧𑁆𑀧𑀲𑀤𑁆𑀤𑀸𑀤𑀺𑀯𑀲𑁂𑀦 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀲𑀸𑀥𑀦𑀢𑁄 𑀲𑀫𑀸𑀥𑀸𑀦𑀮𑀓𑁆𑀔𑀡𑀁, 𑀓𑀼𑀲𑀮𑀥𑀫𑁆𑀫𑀸𑀦𑀁 𑀫𑀽𑀮𑀪𑀸𑀯𑀢𑁄 𑀧𑀢𑀺𑀝𑁆𑀞𑀸𑀦𑀮𑀓𑁆𑀔𑀡𑀦𑁆𑀢𑀺 𑀏𑀯𑀁 𑀤𑀼𑀯𑀺𑀥𑀮𑀓𑁆𑀔𑀡𑀁, 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦 𑀯𑀸 𑀤𑀼𑀯𑀺𑀥𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀸𑀦𑀁 𑀓𑀸𑀫𑁂𑀢𑀺 𑀢𑀲𑁆𑀲 𑀳𑀺𑀢𑀸𑀲𑀻𑀲𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑀓𑀸𑀫𑁄. 𑀧𑀺𑀬𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑀺𑀬𑀲𑀻𑀮𑁄.

𑁭𑁯𑁮-𑁯. 𑀓𑀸𑀢𑀩𑁆𑀩𑁄 𑀧𑀮𑀺𑀩𑁄𑀥𑀲𑁆𑀲𑀼𑀧𑀘𑁆𑀙𑁂𑀤𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀢𑀺𑀯𑀺𑀥𑁄 𑀧𑀦𑀸𑀬𑀁 𑀧𑀮𑀺𑀩𑁄𑀥𑁄, 𑀓𑀺𑀁 𑀲𑀭𑀽𑀧𑁄 𑀘𑀸𑀢𑀺 𑀆𑀳 ‘‘𑀧𑀮𑀺𑀩𑁄𑀥𑀸 𑀤𑀲𑀸’’𑀢𑀺𑀆𑀤𑀺, ‘‘𑀆𑀳 𑀫𑀳𑀸𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀆𑀯𑀸𑀲𑁄𑀢𑀺 𑀏𑀓𑀫𑁆𑀧𑀺 𑀑𑀯𑀭𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀓𑀮𑁄𑀧𑀺 𑀲𑀗𑁆𑀖𑀸𑀭𑀸𑀫𑁄, 𑀲𑁄 𑀢𑀢𑁆𑀣 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀲𑁆𑀲 𑀧𑀮𑀺𑀩𑁄𑀥𑁄, 𑀦 𑀇𑀢𑀭𑀲𑁆𑀲. 𑀓𑀼𑀮𑀦𑁆𑀢𑀺 𑀜𑀸𑀢𑀺𑀓𑀼𑀮𑀁 𑀯𑀸 𑀉𑀧𑀝𑁆𑀞𑀸𑀓𑀓𑀼𑀮𑀁 𑀯𑀸, 𑀢𑀁 𑀢𑁂𑀳𑀺 𑀲𑀁𑀲𑀝𑁆𑀞𑀯𑀺𑀳𑀭𑀢𑁄𑀯 𑀧𑀮𑀺𑀩𑁄𑀥𑁄. 𑀮𑀸𑀪𑁄𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸, 𑀢𑁂𑀧𑀺 𑀢𑀢𑁆𑀣 𑀲𑀸𑀧𑁂𑀓𑁆𑀔𑀲𑁆𑀲𑁂𑀯 𑀧𑀮𑀺𑀩𑁄𑀥𑀸. 𑀕𑀡𑁄𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀕𑀡𑁄 𑀯𑀸 𑀆𑀪𑀺𑀥𑀫𑁆𑀫𑀺𑀓𑀕𑀡𑁄 𑀯𑀸. 𑀲𑁄 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀸𑀦𑁂𑀦 𑀲𑀫𑀡𑀥𑀫𑁆𑀫𑀲𑁆𑀲 𑀑𑀓𑀸𑀲𑀸𑀮𑀸𑀪𑀺𑀦𑁄 𑀧𑀮𑀺𑀩𑁄𑀥𑁄. 𑀓𑀫𑁆𑀫𑀦𑁆𑀢𑀺 𑀦𑀯𑀓𑀫𑁆𑀫𑀁, 𑀢𑀁 𑀓𑀭𑁄𑀦𑁆𑀢𑁂𑀦 𑀯𑀟𑁆𑀠𑀓𑀺𑀆𑀤𑀻𑀳𑀺 𑀮𑀤𑁆𑀥𑀸𑀮𑀤𑁆𑀥𑀁 𑀚𑀸𑀦𑀺𑀢𑀩𑁆𑀩𑀁, 𑀓𑀢𑀸𑀓𑀢𑁂 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀣𑀸𑀧𑀺 𑀧𑀮𑀺𑀩𑁄𑀥𑁄. 𑀅𑀤𑁆𑀥𑀸𑀦𑀦𑁆𑀢𑀺 𑀫𑀕𑁆𑀕𑀕𑀫𑀦𑀘𑀺𑀢𑁆𑀢𑀲𑁆𑀲 𑀤𑀼𑀩𑁆𑀩𑀺𑀦𑁄𑀤𑀦𑀻𑀬𑀢𑀸𑀬 𑀢𑀁 𑀲𑀫𑀡𑀥𑀫𑁆𑀫𑀲𑁆𑀲 𑀧𑀮𑀺𑀩𑁄𑀥𑁄. 𑀜𑀸𑀢𑀻𑀢𑀺 𑀏𑀢𑁆𑀣 𑀓𑀼𑀮-𑀕𑁆𑀕𑀳𑀡𑁂𑀦 𑀜𑀸𑀢𑀺𑀓𑀼𑀮𑀲𑁆𑀲𑀧𑀺 𑀕𑀳𑀺𑀢𑀢𑁆𑀢𑀸 𑀏𑀓𑁂𑀓𑀸 𑀜𑀸𑀢𑀺 𑀇𑀥 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑁂 𑀧𑀦 𑀯𑀺𑀳𑀸𑀭𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀬𑁄, 𑀖𑀭𑁂 𑀫𑀸𑀢𑀸𑀤𑀬𑁄, 𑀢𑁂 𑀕𑀺𑀮𑀸𑀦𑀸 𑀧𑀮𑀺𑀩𑁄𑀥𑀸. 𑀆𑀩𑀸𑀥𑁄𑀢𑀺 𑀬𑁄 𑀓𑁄𑀘𑀺 𑀭𑁄𑀕𑁄, 𑀲𑁄 𑀩𑀸𑀥𑀬𑀫𑀸𑀦𑁄 𑀧𑀮𑀺𑀩𑁄𑀥𑁄. 𑀕𑀦𑁆𑀣𑁄𑀢𑀺 𑀧𑀭𑀺𑀬𑀢𑁆𑀢𑀺𑀧𑀭𑀺𑀳𑀭𑀡𑀁, 𑀢𑀁 𑀲𑀚𑁆𑀛𑀸𑀬𑀸𑀤𑀻𑀳𑀺 𑀦𑀺𑀘𑁆𑀘𑀩𑁆𑀬𑀸𑀯𑀝𑀲𑁆𑀲𑁂𑀯 𑀧𑀮𑀺𑀩𑁄𑀥𑁄. 𑀇𑀤𑁆𑀥𑀻𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀇𑀤𑁆𑀥𑀺. 𑀲𑀸 𑀳𑀺 𑀤𑀼𑀧𑁆𑀧𑀭𑀺𑀳𑀸𑀭𑀸 𑀅𑀧𑁆𑀧𑀫𑀢𑁆𑀢𑀓𑁂𑀦𑁂𑀯 𑀪𑀺𑀚𑁆𑀚𑀢𑀺, 𑀅𑀬𑀁 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀧𑀮𑀺𑀩𑁄𑀥𑁄, 𑀦 𑀲𑀫𑀸𑀥𑀺𑀲𑁆𑀲 𑀲𑀫𑀸𑀥𑀺𑀁 𑀧𑀢𑁆𑀯𑀸 𑀧𑀝𑀺𑀮𑀪𑀺𑀢𑀩𑁆𑀩𑀢𑁆𑀢𑀸. 𑀢𑁂𑀢𑀺 𑀢𑁂 𑀧𑀮𑀺𑀩𑁄𑀥𑀸.

𑁮𑁦𑁦-𑁨. 𑀧𑀮𑀺𑀩𑁄𑀥𑀲𑁆𑀲𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀧𑀞𑀫𑁄 𑀢𑀢𑁆𑀣 𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀢𑀸𑀬, 𑀤𑀼𑀢𑀺𑀬𑁄 𑀅𑀲𑀁𑀲𑀕𑁆𑀕𑁂𑀦, 𑀢𑀢𑀺𑀬𑁄 𑀮𑀸𑀪𑀲𑀓𑁆𑀓𑀸𑀭𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀧𑀳𑀸𑀬 𑀅𑀜𑁆𑀜𑀢𑁆𑀣 𑀕𑀫𑀦𑁂𑀦, 𑀘𑀢𑀼𑀢𑁆𑀣𑁄 𑀬𑀣𑀸𑀭𑀤𑁆𑀥𑀕𑀦𑁆𑀣𑀲𑀫𑀸𑀧𑀦𑁂𑀦, 𑀅𑀜𑁆𑀜𑀲𑁆𑀲 𑀲𑀗𑁆𑀕𑀸𑀳𑀡𑁂𑀦 𑀯𑀸, 𑀧𑀜𑁆𑀘𑀫𑁄 𑀬𑀣𑀸𑀭𑀤𑁆𑀥𑀓𑀫𑁆𑀫𑀲𑁆𑀲 𑀦𑀺𑀝𑁆𑀞𑀸𑀧𑀦𑁂𑀦, 𑀲𑀗𑁆𑀖𑀸𑀤𑀻𑀦𑀁 𑀦𑀺𑀬𑁆𑀬𑀸𑀢𑀦𑁂𑀦 𑀯𑀸, 𑀙𑀝𑁆𑀞𑁄 𑀕𑀦𑁆𑀢𑁆𑀯𑀸 𑀓𑀺𑀘𑁆𑀘𑀢𑀻𑀭𑀡𑁂𑀦, 𑀲𑀢𑁆𑀢𑀫𑁄 𑀉𑀧𑀝𑁆𑀞𑀳𑀺𑀢𑁆𑀯𑀸 𑀜𑀸𑀢𑀻𑀦𑀁 𑀧𑀸𑀓𑀢𑀺𑀓𑀓𑀭𑀡𑁂𑀦, 𑀅𑀝𑁆𑀞𑀫𑁄 𑀪𑁂𑀲𑀚𑁆𑀚𑀓𑀭𑀡𑁂𑀦, 𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑁂𑀦 𑀯𑀸, 𑀦𑀯𑀫𑀤𑀲𑀫𑀸 𑀢𑀢𑁆𑀣 𑀅𑀩𑁆𑀬𑀸𑀯𑀝𑀢𑀸𑀬 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸. 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄𑀢𑀺 𑀬𑀢𑁆𑀣 𑀲𑁄 𑀯𑀲𑀢𑀺, 𑀢𑀢𑁆𑀣 𑀉𑀧𑀲𑀗𑁆𑀓𑀫𑀦𑀯𑀺𑀥𑀺𑀜𑁆𑀘𑁂𑀯 𑀉𑀧𑀲𑀗𑁆𑀓𑀫𑀦𑁆𑀢𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀸𑀦𑀜𑁆𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀇𑀢𑁄 𑀧𑀭𑀜𑁆𑀳𑀺 𑀕𑀦𑁆𑀣𑀯𑀺𑀢𑁆𑀣𑀸𑀭𑀧𑀭𑀺𑀳𑀭𑀡𑀢𑁆𑀣𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀆𑀕𑀢𑀯𑀺𑀢𑁆𑀣𑀸𑀭𑀁 𑀧𑀳𑀸𑀬 𑀧𑀤𑀢𑁆𑀣𑀯𑀡𑁆𑀡𑀦𑀫𑀢𑁆𑀢𑀁 𑀓𑀭𑀺𑀲𑁆𑀲𑀸𑀫. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬, 𑀉𑀧𑀭𑀽𑀧𑀭𑀺𑀪𑀸𑀯𑀦𑀸𑀓𑀫𑁆𑀫𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀘 𑀓𑀫𑁆𑀫𑀝𑁆𑀞𑀸𑀦𑀁. 𑀢𑀁 𑀧𑀦 𑀲𑀩𑁆𑀩𑀢𑁆𑀣𑀓𑀧𑀸𑀭𑀺𑀳𑀸𑀭𑀺𑀬𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀫𑁂𑀢𑁆𑀢𑀸, 𑀫𑀭𑀡𑀲𑁆𑀲𑀢𑀺, 𑀅𑀲𑀼𑀪𑀲𑀜𑁆𑀜𑀸 𑀘 𑀲𑀩𑁆𑀩𑀢𑁆𑀣 𑀅𑀢𑁆𑀣𑀬𑀺𑀢𑀩𑁆𑀩𑀢𑁄 𑀇𑀘𑁆𑀙𑀺𑀢𑀩𑁆𑀩𑀢𑁄 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫. 𑀘𑀭𑀺𑀬𑀸𑀦𑀼𑀓𑀽𑀮𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀘𑁆𑀘𑀁 𑀧𑀭𑀺𑀳𑀭𑀺𑀢𑀩𑁆𑀩𑀢𑁆𑀢𑀸 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫. 𑀇𑀫𑀁 𑀤𑀼𑀯𑀺𑀥𑀁 𑀓𑀫𑁆𑀫𑀝𑁆𑀞𑀸𑀦𑀁 𑀬𑁄 𑀤𑁂𑀢𑀺, 𑀅𑀬𑀁 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀤𑀸𑀬𑀓𑁄, 𑀲𑁄𑀧𑀺 𑀈𑀤𑀺𑀲𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀺𑀬𑁄 𑀕𑀭𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀺𑀬𑁄𑀢𑀺 𑀲𑀻𑀮𑀲𑀫𑁆𑀧𑀤𑀸𑀤𑀻𑀳𑀺 𑀲𑀢𑁆𑀢𑀸𑀦𑀁 𑀧𑀺𑀬𑀸𑀬𑀺𑀢𑀩𑁆𑀩𑁄. 𑀕𑀭𑀽𑀢𑀺 𑀢𑀢𑁄𑀬𑁂𑀯 𑀕𑀭𑀼𑀓𑀸𑀢𑀩𑁆𑀩𑁄 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀁 𑀓𑀢𑁆𑀯𑀸 𑀤𑀝𑁆𑀞𑀩𑁆𑀩𑁄. 𑀪𑀸𑀯𑀦𑀻𑀬𑁄𑀢𑀺 𑀲𑀫𑁆𑀪𑀸𑀯𑀦𑀻𑀬𑁄. 𑀯𑀢𑁆𑀢𑀸𑀢𑀺 𑀓𑀺𑀜𑁆𑀘𑀺 𑀆𑀮𑀲𑀺𑀬𑀫𑁆𑀧𑀺 𑀤𑀺𑀲𑁆𑀯𑀸 𑀘𑁄𑀤𑁂𑀢𑁆𑀯𑀸 𑀑𑀯𑀸𑀤𑀯𑀲𑁂𑀦 𑀯𑀤𑀦𑀲𑀻𑀮𑁄. 𑀯𑀘𑀦𑀓𑁆𑀔𑀫𑁄𑀢𑀺 𑀧𑀝𑀺𑀧𑀼𑀘𑁆𑀙𑀓𑁆𑀔𑀫𑁄, 𑀧𑀝𑀺𑀧𑀼𑀘𑁆𑀙𑀺𑀢𑁄 𑀅𑀲𑀁𑀳𑀻𑀭𑁄 𑀳𑀼𑀢𑁆𑀯𑀸 𑀲𑀫𑁆𑀪𑀸𑀲𑀦𑀓𑁆𑀔𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸𑀢𑀺 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀓𑀣𑁂𑀢𑁆𑀯𑀸 𑀤𑀲𑀓𑀣𑀸𑀯𑀢𑁆𑀣𑀼𑀧𑀝𑀺𑀲𑀁𑀬𑀼𑀢𑁆𑀢𑀁 𑀕𑀫𑁆𑀪𑀻𑀭𑀫𑁂𑀯 𑀓𑀣𑀁 𑀓𑀢𑁆𑀢𑀸. 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄𑀢𑀺 𑀅𑀧𑁆𑀧𑀯𑀢𑁆𑀢𑀺𑀢𑀩𑁆𑀩𑀝𑁆𑀞𑀸𑀦𑀪𑀽𑀢𑁂 𑀅𑀳𑀺𑀢𑁂 𑀦 𑀦𑀺𑀬𑁄𑀚𑀓𑁄. 𑀏𑀯𑀫𑀸𑀤𑀺𑀕𑀼𑀡𑁄𑀧𑁂𑀢𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀤𑁆𑀥𑀸𑀲𑀫𑁆𑀧𑀤𑀸𑀤𑀺𑀕𑀼𑀡𑀬𑁄𑀕𑀁 𑀤𑀲𑁆𑀲𑁂𑀢𑀺. 𑀓𑀸𑀮𑁂𑀦𑀸𑀢𑀺 𑀅𑀢𑁆𑀢𑀦𑁄, 𑀆𑀘𑀭𑀺𑀬𑀲𑁆𑀲 𑀘 𑀲𑀧𑁆𑀧𑀸𑀬𑀓𑀸𑀮𑁂𑀦.

𑁮𑁦𑁩. 𑀯𑀢𑁆𑀢𑀁 𑀓𑀢𑁆𑀯𑀸𑀢𑀺 𑀆𑀘𑀭𑀺𑀬𑀲𑁆𑀲 𑀦𑀯𑀓𑀫𑀳𑀮𑁆𑀮𑀓𑀪𑀸𑀯𑀸𑀦𑀼𑀭𑀽𑀧𑁂𑀦 𑀔𑀦𑁆𑀥𑀓𑁂 𑀆𑀕𑀢𑀁 𑀆𑀘𑀭𑀺𑀬𑀯𑀢𑁆𑀢𑀁 𑀓𑀢𑁆𑀯𑀸. 𑀇𑀤𑀸𑀦𑀺 𑀆𑀘𑀭𑀺𑀬𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀧𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑁂𑀦𑀧𑀺. 𑀘𑀭𑀺𑀢𑀁 𑀜𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀺𑀦𑀸 𑀢𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁, 𑀳𑀤𑀬𑀮𑁄𑀳𑀺𑀢𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀇𑀢𑀭𑁂𑀦 ‘‘𑀢𑁆𑀯𑀁 𑀓𑀺𑀁𑀘𑀭𑀺𑀢𑁄𑀲𑀺, 𑀓𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀘𑀭𑀺𑀢𑀁 𑀚𑀸𑀦𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑁂𑀦 𑀤𑀸𑀢𑀩𑁆𑀩𑀁.

𑁮𑁦𑁪. 𑀇𑀭𑀺𑀬𑀸𑀧𑀣𑀸𑀤𑀺𑀢𑁄𑀧𑀺 𑀓𑁂𑀲𑀜𑁆𑀘𑀺 𑀘𑀭𑀺𑀢𑀁 𑀚𑀸𑀦𑀺𑀢𑀼𑀁 𑀲𑀓𑁆𑀓𑀸, 𑀢𑀁 𑀧𑀦 𑀦 𑀏𑀓𑀦𑁆𑀢𑀺𑀓𑀁, ‘‘𑀘𑀭𑀺𑀢𑀁 𑀜𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀓𑀢𑀫𑀁 𑀧𑀦 𑀢𑀁, 𑀓𑀢𑀺𑀯𑀺𑀥𑀸 𑀯𑀸𑀢𑀺 𑀆𑀳 ‘‘𑀘𑀭𑀺𑀢𑀁 𑀧𑀦𑀺𑀤𑀁 𑀭𑀸𑀕𑀤𑁄𑀲𑀫𑁄𑀳𑀯𑀲𑁂𑀦𑀸’’𑀢𑀺𑀆𑀤𑀺. 𑀉𑀲𑁆𑀲𑀦𑁆𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀘𑀭𑀢𑀻𑀢𑀺 𑀘𑀭𑀺𑀢𑀁, 𑀅𑀲𑀢𑀺 𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀬𑀁 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀦𑀸𑀭𑀳𑀸 𑀭𑀸𑀕𑀸𑀤𑀬𑁄.

𑁮𑁦𑁫. 𑀯𑁄𑀫𑀺𑀲𑁆𑀲𑀓𑀦𑀬𑀸𑀢𑀺 𑀲𑀫𑁆𑀧𑀬𑁄𑀕𑀯𑀲𑁂𑀦, 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀯𑀲𑁂𑀦 𑀘 𑀦𑁂𑀲𑀁 𑀲𑀁𑀲𑀕𑁆𑀕𑀪𑁂𑀤𑀸. 𑀘𑀢𑀼𑀲𑀝𑁆𑀞𑀺 𑀪𑀯𑀦𑁆𑀢𑀻𑀢𑀺 𑁋

‘‘𑀭𑀸𑀕𑀸𑀤𑀺𑀓𑁂 𑀢𑀺𑀓𑁂 𑀲𑀢𑁆𑀢, 𑀲𑀢𑁆𑀢 𑀲𑀤𑁆𑀥𑀸𑀤𑀺𑀓𑁂 𑀢𑀺𑀓𑁂;

𑀏𑀓𑀤𑁆𑀯𑀺𑀢𑀺𑀓𑀫𑀽𑀮𑀫𑁆𑀳𑀺, 𑀫𑀺𑀲𑁆𑀲𑀢𑁄 𑀲𑀢𑁆𑀢𑀲𑀢𑁆𑀢𑀓’’𑀦𑁆𑀢𑀺 𑁋

𑀏𑀯𑀁 𑀯𑀼𑀢𑁆𑀢𑁂𑀳𑀺 𑀦𑀯𑀳𑀺 𑀲𑀢𑁆𑀢𑀓𑁂𑀳𑀺 𑀬𑀣𑀸𑀭𑀳𑀁 𑀯𑀺𑀪𑀚𑀺𑀬𑀫𑀸𑀦𑀸 𑀢𑁂𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀘𑀢𑀼𑀲𑀝𑁆𑀞𑀺 𑀪𑀯𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀉𑀧𑀦𑀦𑁆𑀤𑀢𑁆𑀣𑁂𑀭𑁂𑀦 𑁋

‘‘𑀭𑀸𑀕𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀭𑀸𑀕𑁂𑀦 𑀧𑀝𑀺𑀖𑁄𑀧𑀺 𑀘;

𑀲𑀤𑁆𑀥𑀺𑀁 𑀭𑀸𑀕𑁂𑀦 𑀫𑁄𑀳𑁄 𑀘, 𑀫𑁄𑀳𑁄𑀧𑀺 𑀧𑀝𑀺𑀖𑁂𑀦 𑀘.

‘‘𑀭𑀸𑀕𑀸𑀤𑀺𑀢𑁆𑀢𑀬𑀫𑁂𑀓𑀦𑁆𑀢𑀺, 𑀲𑀢𑁆𑀢 𑀭𑀸𑀕𑀸𑀤𑀺𑀓𑁂 𑀢𑀺𑀓𑁂;

𑀲𑀤𑁆𑀥𑀸 𑀩𑀼𑀤𑁆𑀥𑀺 𑀘 𑀢𑀓𑁆𑀓𑁄 𑀘, 𑀲𑀤𑁆𑀥𑀺𑀁 𑀲𑀤𑁆𑀥𑀸𑀬 𑀩𑀼𑀤𑁆𑀥𑀺 𑀘.

‘‘𑀲𑀤𑁆𑀥𑀸𑀬 𑀢𑀓𑁆𑀓𑀦𑀜𑁆𑀘𑁂𑀯, 𑀩𑀼𑀤𑁆𑀥𑀺𑀬𑀸 𑀢𑀓𑁆𑀓𑀦𑀫𑁆𑀧𑀺 𑀘;

𑀲𑀤𑁆𑀥𑀸𑀤𑀺𑀢𑁆𑀢𑀬𑀫𑁂𑀓𑀦𑁆𑀢𑀺, 𑀲𑀢𑁆𑀢 𑀲𑀤𑁆𑀥𑀸𑀤𑀺𑀓𑁂 𑀢𑀺𑀓𑁂.

‘‘𑀭𑀸𑀕𑀸𑀤𑀺𑀓𑀁 𑀢𑀺𑀓𑀜𑁆𑀘𑁂𑀓-𑀫𑁂𑀓𑀤𑁆𑀯𑀺𑀢𑀺𑀓𑀪𑁂𑀤𑀢𑁄;

𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑁂𑀳𑀺, 𑀬𑀣𑀸𑀬𑁄𑀕𑀁 𑀯𑀺𑀫𑀺𑀲𑁆𑀲𑀺𑀬.

‘‘𑀏𑀓𑀫𑀽𑀮𑁂 𑀤𑁆𑀯𑀺𑀫𑀽𑀮𑁂 𑀘, 𑀧𑀘𑁆𑀘𑁂𑀓𑀁 𑀲𑀢𑁆𑀢𑀓𑀢𑁆𑀢𑀬𑀁;

𑀢𑀺𑀫𑀽𑀮𑁂 𑀲𑀢𑁆𑀢𑀓𑀜𑁆𑀘𑁂𑀓𑀁, 𑀜𑁂𑀬𑁆𑀬𑀁 𑀢𑀁 𑀲𑀢𑁆𑀢𑀲𑀢𑁆𑀢𑀓𑀁.

‘‘𑀲𑀤𑁆𑀥𑀺𑀁 𑀭𑀸𑀕𑁂𑀦 𑀲𑀤𑁆𑀥𑀸 𑀘, 𑀲𑀤𑁆𑀥𑀺𑀁 𑀢𑁂𑀦𑁂𑀯 𑀩𑀼𑀤𑁆𑀥𑀺 𑀘;

𑀢𑁂𑀦𑁂𑀯 𑀢𑀓𑁆𑀓𑀦𑀁 𑀢𑁂𑀦, 𑀲𑀤𑁆𑀥𑀸𑀩𑀼𑀤𑁆𑀥𑀺 𑀘 𑀢𑁂𑀦 𑀘.

‘‘𑀲𑀤𑁆𑀥𑀸𑀲𑀗𑁆𑀓𑀧𑁆𑀧𑀦𑀁 𑀢𑁂𑀦, 𑀩𑀼𑀤𑁆𑀥𑀺𑀲𑀗𑁆𑀓𑀧𑁆𑀧𑀦𑀫𑁆𑀧𑀺 𑀘;

𑀯𑀺𑀫𑀺𑀲𑁆𑀲𑁂𑀢𑁆𑀯𑀸𑀦 𑀢𑁂𑀦𑁂𑀯, 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀦𑀁.

‘‘𑀭𑀸𑀕𑀫𑀽𑀮𑀦𑀬𑁂 𑀘𑁂𑀯-𑀫𑁂𑀓𑀁 𑀲𑀢𑁆𑀢𑀓𑀫𑀼𑀤𑁆𑀤𑀺𑀲𑁂;

𑀲𑀤𑁆𑀥𑀺𑀁 𑀤𑁄𑀲𑁂𑀦 𑀲𑀤𑁆𑀥𑀸 𑀘, 𑀲𑀤𑁆𑀥𑀺𑀁 𑀢𑁂𑀦𑁂𑀯 𑀩𑀼𑀤𑁆𑀥𑀺 𑀘.

‘‘𑀢𑁂𑀦𑁂𑀯 𑀢𑀓𑁆𑀓𑀦𑀁 𑀢𑁂𑀦, 𑀲𑀤𑁆𑀥𑀸𑀩𑀼𑀤𑁆𑀥𑀺 𑀘 𑀢𑁂𑀦 𑀘;

𑀲𑀤𑁆𑀥𑀸𑀲𑀗𑁆𑀓𑀧𑁆𑀧𑀦𑀁 𑀢𑁂𑀦, 𑀩𑀼𑀤𑁆𑀥𑀺𑀲𑀗𑁆𑀓𑀧𑁆𑀧𑀦𑀫𑁆𑀧𑀺 𑀘.

‘‘𑀯𑀺𑀫𑀺𑀲𑁆𑀲𑁂𑀢𑁆𑀯𑀸𑀦 𑀢𑁂𑀦𑁂𑀯, 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀦𑀁;

𑀤𑁄𑀲𑀫𑀽𑀮𑀦𑀬𑁂 𑀘𑁂𑀯-𑀫𑁂𑀓𑀁 𑀲𑀢𑁆𑀢𑀓𑀫𑀼𑀤𑁆𑀤𑀺𑀲𑁂.

‘‘𑀲𑀤𑁆𑀥𑀺𑀁 𑀫𑁄𑀳𑁂𑀦 𑀲𑀤𑁆𑀥𑀸 𑀘, 𑀲𑀤𑁆𑀥𑀺𑀁 𑀢𑁂𑀦𑁂𑀯 𑀩𑀼𑀤𑁆𑀥𑀺 𑀘;

𑀢𑁂𑀦𑁂𑀯 𑀢𑀓𑁆𑀓𑀦𑀁 𑀢𑁂𑀦, 𑀲𑀤𑁆𑀥𑀸𑀩𑀼𑀤𑁆𑀥𑀺 𑀘 𑀢𑁂𑀦 𑀘.

‘‘𑀲𑀤𑁆𑀥𑀸𑀲𑀗𑁆𑀓𑀧𑁆𑀧𑀦𑀁 𑀢𑁂𑀦, 𑀩𑀼𑀤𑁆𑀥𑀺𑀲𑀗𑁆𑀓𑀧𑁆𑀧𑀦𑀫𑁆𑀧𑀺 𑀘;

𑀯𑀺𑀫𑀺𑀲𑁆𑀲𑁂𑀢𑁆𑀯𑀸𑀦 𑀢𑁂𑀦𑁂𑀯, 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀦𑀁.

‘‘𑀫𑁄𑀳𑀫𑀽𑀮𑀦𑀬𑁂 𑀘𑁂𑀯-𑀫𑁂𑀓𑀁 𑀲𑀢𑁆𑀢𑀓𑀫𑀼𑀤𑁆𑀤𑀺𑀲𑁂;

𑀏𑀓𑀫𑀽𑀮𑁂 𑀦𑀬𑁂 𑀘𑁂𑀯𑀁, 𑀜𑁂𑀬𑁆𑀬𑀁 𑀢𑀁 𑀲𑀢𑁆𑀢𑀓𑀢𑁆𑀢𑀬𑀁.

‘‘𑀫𑀺𑀲𑁆𑀲𑁂𑀢𑁆𑀯𑀸 𑀭𑀸𑀕𑀤𑁄𑀲𑁂𑀳𑀺, 𑀲𑀤𑁆𑀥𑀸 𑀢𑁂𑀳𑁂𑀯 𑀩𑀼𑀤𑁆𑀥𑀺 𑀘;

𑀢𑁂𑀳𑀺 𑀲𑀗𑁆𑀓𑀧𑁆𑀧𑀦𑀁 𑀢𑁂𑀳𑀺, 𑀲𑀤𑁆𑀥𑀸𑀩𑀼𑀤𑁆𑀥𑀺 𑀘 𑀢𑁂𑀳𑀺 𑀘.

‘‘𑀲𑀤𑁆𑀥𑀸𑀲𑀗𑁆𑀓𑀧𑁆𑀧𑀦𑀁 𑀢𑁂𑀳𑀺, 𑀩𑀼𑀤𑁆𑀥𑀺𑀲𑀗𑁆𑀓𑀧𑁆𑀧𑀦𑀫𑁆𑀧𑀺 𑀘;

𑀢𑁂𑀳𑀺 𑀤𑁆𑀯𑀻𑀳𑁂𑀯 𑀫𑀺𑀲𑁆𑀲𑁂𑀢𑁆𑀯𑀸, 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀦𑀁.

‘‘𑀭𑀸𑀕𑀤𑁄𑀲𑀦𑀬𑁂 𑀘𑁂𑀯-𑀫𑁂𑀓𑀁 𑀲𑀢𑁆𑀢𑀓𑀫𑀼𑀤𑁆𑀤𑀺𑀲𑁂;

𑀫𑀺𑀲𑁆𑀲𑁂𑀢𑁆𑀯𑀸 𑀭𑀸𑀕𑀫𑁄𑀳𑁂𑀳𑀺, 𑀲𑀤𑁆𑀥𑀸 𑀢𑁂𑀳𑁂𑀯 𑀩𑀼𑀤𑁆𑀥𑀺 𑀘.

‘‘𑀢𑁂𑀳𑀺 𑀲𑀗𑁆𑀓𑀧𑁆𑀧𑀦𑀁 𑀢𑁂𑀳𑀺, 𑀲𑀤𑁆𑀥𑀸𑀩𑀼𑀤𑁆𑀥𑀺 𑀘 𑀢𑁂𑀳𑀺 𑀘;

𑀲𑀤𑁆𑀥𑀸𑀲𑀗𑁆𑀓𑀧𑁆𑀧𑀦𑀁 𑀢𑁂𑀳𑀺, 𑀩𑀼𑀤𑁆𑀥𑀺𑀲𑀗𑁆𑀓𑀧𑁆𑀧𑀦𑀫𑁆𑀧𑀺 𑀘.

‘‘𑀢𑁂𑀳𑀺 𑀤𑁆𑀯𑀻𑀳𑁂𑀯 𑀫𑀺𑀲𑁆𑀲𑁂𑀢𑁆𑀯𑀸, 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀦𑀁;

𑀭𑀸𑀕𑀫𑁄𑀳𑀦𑀬𑁂 𑀘𑁂𑀯-𑀫𑁂𑀓𑀁 𑀲𑀢𑁆𑀢𑀓𑀫𑀼𑀤𑁆𑀤𑀺𑀲𑁂.

‘‘𑀫𑀺𑀲𑁆𑀲𑁂𑀢𑁆𑀯𑀸 𑀤𑁄𑀲𑀫𑁄𑀳𑁂𑀳𑀺, 𑀲𑀤𑁆𑀥𑀸 𑀢𑁂𑀳𑁂𑀯 𑀩𑀼𑀤𑁆𑀥𑀺 𑀘;

𑀢𑁂𑀳𑀺 𑀲𑀗𑁆𑀓𑀧𑁆𑀧𑀦𑀁 𑀢𑁂𑀳𑀺, 𑀲𑀤𑁆𑀥𑀸𑀩𑀼𑀤𑁆𑀥𑀺 𑀘 𑀢𑁂𑀳𑀺 𑀘.

‘‘𑀲𑀤𑁆𑀥𑀸𑀲𑀗𑁆𑀓𑀧𑁆𑀧𑀦𑀁 𑀢𑁂𑀳𑀺, 𑀩𑀼𑀤𑁆𑀥𑀺𑀲𑀗𑁆𑀓𑀧𑁆𑀧𑀦𑀫𑁆𑀧𑀺 𑀘;

𑀢𑁂𑀳𑀺 𑀤𑁆𑀯𑀻𑀳𑁂𑀯 𑀫𑀺𑀲𑁆𑀲𑁂𑀢𑁆𑀯𑀸, 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀦𑀁.

‘‘𑀤𑁄𑀲𑀫𑁄𑀳𑀦𑀬𑁂 𑀘𑁂𑀯-𑀫𑁂𑀓𑀁 𑀲𑀢𑁆𑀢𑀓𑀫𑀼𑀤𑁆𑀤𑀺𑀲𑁂;

𑀤𑁆𑀯𑀺𑀫𑀽𑀮𑀫𑁆𑀳𑀺 𑀦𑀬𑁂 𑀘𑁂𑀯𑀁, 𑀜𑁂𑀬𑁆𑀬𑀁 𑀢𑀁 𑀲𑀢𑁆𑀢𑀓𑀢𑁆𑀢𑀬𑀁.

‘‘𑀭𑀸𑀕𑀧𑁆𑀧𑀝𑀺𑀖𑀫𑁄𑀳𑁂𑀳𑀺, 𑀲𑀤𑁆𑀥𑀸 𑀢𑁂𑀳𑁂𑀯 𑀩𑀼𑀤𑁆𑀥𑀺 𑀘;

𑀢𑁂𑀳𑀺 𑀲𑀗𑁆𑀓𑀧𑁆𑀧𑀦𑀁 𑀢𑁂𑀳𑀺, 𑀲𑀤𑁆𑀥𑀸𑀩𑀼𑀤𑁆𑀥𑀺 𑀘 𑀢𑁂𑀳𑀺 𑀘.

‘‘𑀲𑀤𑁆𑀥𑀸𑀲𑀗𑁆𑀓𑀧𑁆𑀧𑀦𑀁 𑀢𑁂𑀳𑀺, 𑀩𑀼𑀤𑁆𑀥𑀺𑀲𑀗𑁆𑀓𑀧𑁆𑀧𑀦𑀫𑁆𑀧𑀺 𑀘;

𑀢𑁂𑀳𑀺 𑀢𑀻𑀳𑁂𑀯 𑀫𑀺𑀲𑁆𑀲𑁂𑀢𑁆𑀯𑀸, 𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑀦𑀁.

‘‘𑀢𑀺𑀫𑀽𑀮𑀫𑁆𑀳𑀺 𑀦𑀬𑁂 𑀘𑁂𑀯-𑀫𑁂𑀓𑀁 𑀲𑀢𑁆𑀢𑀓𑀫𑀼𑀤𑁆𑀤𑀺𑀲𑁂;

𑀏𑀯𑀁 𑀢𑁂𑀲𑀝𑁆𑀞𑀺 𑀳𑁄𑀢𑀻𑀢𑀺, 𑀯𑀺𑀜𑁆𑀜𑁂𑀬𑁆𑀬𑀁 𑀦𑀯𑀲𑀢𑁆𑀢𑀓𑀁;

𑀤𑀺𑀝𑁆𑀞𑀺𑀬𑀸𑀧𑀺 𑀘 𑀳𑁄𑀢𑁂𑀯, 𑀘𑀢𑀼𑀲𑀝𑁆𑀞𑀻𑀢𑀺 𑀓𑁂𑀘𑀦𑀸’’𑀢𑀺.

𑁮𑁦𑁬-𑁭. 𑀦𑀦𑀼 𑀘 ‘‘𑀘𑀭𑀺𑀢𑀁 𑀜𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀺𑀁𑀘𑀭𑀺𑀢𑀲𑁆𑀲 𑀧𑀦 𑀓𑀺𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀓𑀽𑀮𑀦𑁆𑀢𑀺 𑀇𑀫𑀁 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑀢𑀁𑀢𑀁𑀘𑀭𑀺𑀢𑀸𑀦𑀼𑀓𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀕𑀡𑀦𑀢𑁄 𑀅𑀧𑁆𑀧𑀦𑀸𑀯𑀳𑀢𑁄 𑀛𑀸𑀦𑀧𑁆𑀧𑀪𑁂𑀤𑀢𑁄 𑀲𑀫𑀢𑀺𑀓𑁆𑀓𑀫𑀢𑁄 𑀯𑀟𑁆𑀠𑀦𑀸𑀯𑀟𑁆𑀠𑀦𑀢𑁄 𑀆𑀭𑀫𑁆𑀫𑀡𑀢𑁄 𑀪𑀽𑀫𑀺𑀢𑁄 𑀕𑀳𑀡𑀢𑁄 𑀧𑀘𑁆𑀘𑀬𑀢𑁄 𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀼𑀪𑀸 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑀲 𑀅𑀲𑀼𑀪𑀸𑀢𑀺 𑀉𑀤𑁆𑀥𑀼𑀫𑀸𑀢𑀓𑀁 𑀯𑀺𑀦𑀻𑀮𑀓𑀁 𑀯𑀺𑀧𑀼𑀩𑁆𑀩𑀓𑀁 𑀯𑀺𑀘𑁆𑀙𑀺𑀤𑁆𑀤𑀓𑀁 𑀯𑀺𑀓𑁆𑀔𑀸𑀬𑀺𑀢𑀓𑀁 𑀯𑀺𑀓𑁆𑀔𑀺𑀢𑁆𑀢𑀓𑀁 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁 𑀮𑁄𑀳𑀺𑀢𑀓𑀁 𑀧𑀼𑀴𑀯𑀓𑀁 𑀅𑀝𑁆𑀞𑀺𑀓𑀦𑁆𑀢𑀺 𑀇𑀫𑁂 𑀤𑀲. 𑀢𑀣𑀸 𑀓𑀸𑀬𑀕𑀢𑀸𑀲𑀢𑀺 𑀘𑀸𑀢𑀺 𑀇𑀫𑁂 𑀏𑀓𑀸𑀤𑀲 𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀉𑀧𑀸𑀬𑀪𑀸𑀯𑀢𑁄 𑀭𑀸𑀕𑀘𑀭𑀺𑀢𑀲𑁆𑀲 𑀅𑀦𑀼𑀓𑀽𑀮𑀸. 𑀅𑀲𑀼𑀪-𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀤𑀸𑀭𑀫𑁆𑀫𑀡𑀲𑀫𑀸𑀥𑀺𑀧𑀼𑀩𑁆𑀩𑀗𑁆𑀕𑀫𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑀺𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁 𑀤𑀝𑁆𑀞𑀩𑁆𑀩𑀁. 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀅𑀧𑁆𑀧𑀫𑀜𑁆𑀜𑀸, 𑀫𑁂𑀢𑁆𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀘𑀢𑀼𑀦𑁆𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂 𑀧𑀦 𑀲𑀯𑀡𑁆𑀡𑀓𑀲𑀺𑀡𑀸 𑀦𑀻𑀮𑀓𑀲𑀺𑀡𑀁 𑀧𑀻𑀢𑀓𑀲𑀺𑀡𑀁 𑀮𑁄𑀳𑀺𑀢𑀓𑀲𑀺𑀡𑀁 𑀑𑀤𑀸𑀢𑀓𑀲𑀺𑀡𑀦𑁆𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀯𑀡𑁆𑀡𑀓𑀲𑀺𑀡𑁂𑀳𑀺 𑀲𑀳𑀺𑀢𑀸 𑀅𑀝𑁆𑀞 𑀤𑁄𑀲𑀯𑀺𑀓𑁆𑀔𑀫𑁆𑀪𑀦𑀼𑀧𑀸𑀬𑀪𑀸𑀯𑀢𑁄, 𑀅𑀧𑁆𑀧𑀝𑀺𑀖𑀸𑀢𑀯𑀺𑀲𑀬𑀢𑁆𑀢𑀸 𑀘 𑀤𑁄𑀲𑀘𑀭𑀺𑀢𑀲𑁆𑀲 𑀅𑀦𑀼𑀓𑀽𑀮𑀸.

𑁮𑁦𑁮. 𑀢𑀁…𑀧𑁂… 𑀧𑀦𑁂𑀓𑀓𑀦𑁆𑀢𑀺 𑀏𑀢𑁆𑀣 𑀏𑀓𑀓𑀦𑁆𑀢𑀺 𑀇𑀤𑀁 𑀅𑀦𑀼𑀲𑁆𑀲𑀢𑀺𑀅𑀧𑁂𑀓𑁆𑀔𑀁, 𑀅𑀦𑀼𑀲𑁆𑀲𑀢𑀻𑀲𑀼 𑀏𑀓𑀦𑁆𑀢𑀺 𑀅𑀢𑁆𑀣𑁄, 𑀦 𑀫𑁄𑀳𑀘𑀭𑀺𑀢𑀯𑀺𑀢𑀓𑁆𑀓𑀘𑀭𑀺𑀢𑀸𑀧𑁂𑀓𑁆𑀔𑀁 𑀢𑁂𑀲𑀁 𑀅𑀜𑁆𑀜𑀲𑁆𑀲𑀸𑀧𑀺 𑀅𑀦𑀼𑀓𑀽𑀮𑀲𑁆𑀲 𑀮𑀩𑁆𑀪𑀦𑀢𑁄. 𑀢𑀁 𑀧𑀦 𑀫𑁄𑀳𑀘𑀭𑀺𑀢𑀲𑁆𑀲, 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀘 𑀕𑀡𑀦𑀩𑀮𑁂𑀦 𑀘𑀺𑀢𑁆𑀢𑀲𑁆𑀲 𑀧𑀢𑀺𑀝𑁆𑀞𑀸𑀦𑀢𑁄 𑀅𑀦𑀼𑀓𑀽𑀮𑀁.

𑁮𑁦𑁯-𑁧𑁧. 𑀧𑀼𑀭𑀺𑀫𑀸…𑀧𑁂… 𑀤𑁂𑀳𑀺𑀦𑁄𑀢𑀺 ‘‘𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺 𑀤𑁂𑀯𑀢𑀸𑀦𑀼𑀲𑁆𑀲𑀢𑀻’’𑀢𑀺 𑀇𑀤𑀁 𑀧𑀸𑀴𑀺𑀓𑁆𑀓𑀫𑁂𑀦 𑀧𑀼𑀭𑀺𑀫𑀁 𑀅𑀦𑀼𑀲𑁆𑀲𑀢𑀺𑀙𑀓𑁆𑀓𑀁 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀅𑀢𑀺𑀲𑀧𑁆𑀧𑀸𑀬𑀯𑀲𑁂𑀦 𑀅𑀦𑀼𑀓𑀽𑀮𑀁. 𑀫𑀭𑀡𑀽𑀧𑀲𑀫𑀸𑀬𑀼𑀢𑁆𑀢𑀸 𑀲𑀢𑀻𑀢𑀺 𑀫𑀭𑀡𑁂, 𑀉𑀧𑀲𑀫𑁂 𑀘 𑀬𑀼𑀢𑁆𑀢𑀸 𑀲𑀢𑀺, 𑀫𑀭𑀡𑀸𑀦𑀼𑀲𑁆𑀲𑀢𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀳𑀸𑀭𑀦𑀺𑀲𑁆𑀲𑀺𑀢𑀸 𑀲𑀜𑁆𑀜𑀸𑀢𑀺 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸. 𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁. 𑀩𑀼𑀤𑁆𑀥𑀺𑀧𑁆𑀧𑀓𑀢𑀺𑀚𑀦𑁆𑀢𑀼𑀦𑁄𑀢𑀺 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲 𑀲𑀢𑁆𑀢𑀲𑁆𑀲. 𑀲𑁂𑀲𑀸𑀦𑀺 𑀓𑀲𑀺𑀡𑀸𑀦𑀻𑀢𑀺 𑀤𑁄𑀲𑀘𑀭𑀺𑀢𑀲𑁆𑀲 𑀅𑀦𑀼𑀓𑀽𑀮𑁂𑀲𑀼 𑀯𑀼𑀢𑁆𑀢𑁂𑀳𑀺 𑀘𑀢𑀽𑀳𑀺 𑀯𑀡𑁆𑀡𑀓𑀲𑀺𑀡𑁂𑀳𑀺 𑀅𑀯𑀲𑁂𑀲𑀸𑀦𑀺 𑀧𑀣𑀯𑀻𑀆𑀧𑁄𑀢𑁂𑀚𑁄𑀯𑀸𑀬𑁄𑀆𑀮𑁄𑀓𑀸𑀓𑀸𑀲𑀓𑀲𑀺𑀡𑀸𑀦𑀺, 𑀏𑀯𑀁 𑀧𑀼𑀭𑀺𑀫𑀸𑀦𑀺 𑀘𑀢𑁆𑀢𑀸𑀭𑀺, 𑀇𑀫𑀸𑀦𑀺 𑀙𑀸𑀢𑀺 𑀤𑀲 𑀇𑀫𑀲𑁆𑀲𑁂𑀯 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀸, 𑀇𑀫𑀲𑁆𑀲 𑀅𑀲𑀧𑁆𑀧𑀸𑀬𑀦𑁆𑀢𑀺 𑀕𑀳𑁂𑀢𑀩𑁆𑀩𑀯𑀺𑀲𑁂𑀲𑀲𑁆𑀲 𑀅𑀪𑀸𑀯𑀢𑁄 𑀭𑀸𑀕𑀸𑀤𑀺𑀲𑀩𑁆𑀩𑀘𑀭𑀺𑀢𑀸𑀦𑀁 𑀅𑀦𑀼𑀓𑀽𑀮𑀸𑀢𑀺 𑀯𑀡𑁆𑀡𑀺𑀢𑀸.

𑁮𑁧𑁨. 𑀏𑀓𑀦𑁆𑀢𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄𑀢𑀺 𑀭𑀸𑀕𑀘𑀭𑀺𑀢𑀸𑀤𑀻𑀦𑀁 𑀅𑀲𑀼𑀪𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬. 𑀅𑀢𑀺𑀲𑀧𑁆𑀧𑀸𑀬𑀢𑁄𑀢𑀺 𑀲𑀤𑁆𑀥𑀸𑀘𑀭𑀺𑀢𑀸𑀤𑀻𑀦𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀺𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀢𑀺𑀲𑀧𑁆𑀧𑀸𑀬𑀢𑁄. 𑀏𑀯𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀲𑁂𑀦, 𑀅𑀢𑀺𑀲𑀧𑁆𑀧𑀸𑀬𑀯𑀲𑁂𑀦 𑀘 𑀇𑀤𑀁 𑀲𑀩𑁆𑀩𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀢𑁂𑀲𑀁 𑀅𑀦𑀼𑀓𑀽𑀮𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀇𑀢𑀭𑀲𑁆𑀲 𑀅𑀦𑀦𑀼𑀓𑀽𑀮𑀪𑀸𑀯𑀢𑁄. 𑀦 𑀳𑀺 𑀭𑀸𑀕𑀸𑀤𑀻𑀦𑀁 𑀅𑀯𑀺𑀓𑁆𑀔𑀫𑁆𑀪𑀺𑀓𑀸, 𑀲𑀤𑁆𑀥𑀸𑀤𑀻𑀦𑀁 𑀯𑀸 𑀅𑀦𑀼𑀧𑀓𑀸𑀭𑀺𑀓𑀸 𑀓𑀼𑀲𑀮𑀪𑀸𑀯𑀦𑀸 𑀦𑀸𑀫 𑀅𑀢𑁆𑀣𑀺. 𑀢𑀣𑀸 𑀳𑀺 𑀫𑁂𑀖𑀺𑀬𑀲𑀼𑀢𑁆𑀢𑁂 𑁋

‘‘𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀉𑀢𑁆𑀢𑀭𑀺 𑀪𑀸𑀯𑁂𑀢𑀩𑁆𑀩𑀸, 𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬, 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬, 𑀆𑀦𑀸𑀧𑀸𑀦𑀲𑁆𑀲𑀢𑀺 𑀪𑀸𑀯𑁂𑀢𑀩𑁆𑀩𑀸 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬, 𑀅𑀦𑀺𑀘𑁆𑀘𑀲𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬𑀸’’𑀢𑀺 (𑀅. 𑀦𑀺. 𑁯.𑁩; 𑀉𑀤𑀸. 𑁩𑁧) 𑁋

𑀏𑀓𑀲𑁆𑀲𑁂𑀯 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑁂𑀧𑀺 ‘‘𑀫𑁂𑀢𑁆𑀢𑀁, 𑀭𑀸𑀳𑀼𑀮, 𑀪𑀸𑀯𑀦𑀁 𑀪𑀸𑀯𑁂𑀳𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁧𑁨𑁦) 𑀲𑀢𑁆𑀢 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀦 𑀘𑀸𑀬𑀲𑁆𑀫𑀢𑁄 𑀫𑁂𑀖𑀺𑀬𑀲𑁆𑀲 𑀘𑀢𑁆𑀢𑀸𑀭𑀺𑀧𑀺 𑀘𑀭𑀺𑀢𑀸𑀦𑀺 𑀲𑀦𑁆𑀢𑀺, 𑀦𑀸𑀧𑀺 𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲 𑀲𑀩𑁆𑀩𑀘𑀭𑀺𑀢𑀸𑀦𑀺, 𑀢𑀲𑁆𑀫𑀸 𑀯𑀘𑀦𑀫𑀢𑁆𑀢𑁂 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁧𑁩-𑁪. 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄𑀧𑀺 𑀲𑀓𑁆𑀓𑀸 𑀜𑀸𑀢𑀼𑀁, 𑀲𑀗𑁆𑀓𑀭𑀢𑁆𑀢𑀸 𑀧𑀦 𑀲𑀼𑀔𑁂𑀦 𑀯𑀺𑀜𑁆𑀜𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀢𑁂𑀲𑀁 𑀲𑀸𑀫𑀜𑁆𑀜𑀢𑁄, 𑀯𑀺𑀲𑀼𑀁 𑀯𑀺𑀲𑀼𑀁 𑀚𑀸𑀢𑀺𑀢𑁄 𑀘 𑀕𑀡𑀦𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀮𑀻𑀲𑀸𑀢𑀺 𑀦𑀺𑀤𑁆𑀤𑀺𑀲𑁂𑀢𑀺 𑀧𑀸𑀴𑀺𑀢𑁄, 𑀅𑀝𑁆𑀞𑀓𑀣𑀸𑀢𑁄 𑀘 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀲𑀫𑀘𑀢𑁆𑀢𑀸𑀮𑀻𑀲𑀸’’𑀢𑀺 𑀦𑀺𑀤𑁆𑀤𑀺𑀲𑁂𑀬𑁆𑀬. 𑀓𑀣𑀁? 𑀓𑀲𑀺𑀡𑀸𑀦𑀺 𑀤𑀲…𑀧𑁂… 𑀲𑀜𑁆𑀜𑀸 𑀘𑀸𑀳𑀸𑀭𑀢𑀸 𑀇𑀢𑀺. 𑀅𑀲𑀼𑀪𑀸𑀦𑀼𑀲𑁆𑀲𑀢𑀻 𑀤𑀲𑀸𑀢𑀺 𑀤𑀲-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀤𑀲 𑀅𑀲𑀼𑀪𑀸, 𑀤𑀲 𑀅𑀦𑀼𑀲𑁆𑀲𑀢𑀻’’𑀢𑀺. 𑀤𑀲 𑀅𑀲𑀼𑀪𑀸 𑀳𑁂𑀝𑁆𑀞𑀸 𑀓𑀣𑀺𑀢𑀸𑀯. ‘‘𑀧𑀼𑀭𑀺𑀫𑀸𑀦𑀼𑀲𑁆𑀲𑀢𑀺𑀙𑀓𑁆𑀓’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀸 𑀙, 𑀫𑀭𑀡𑀸𑀦𑀼𑀲𑁆𑀲𑀢𑀺 𑀓𑀸𑀬𑀕𑀢𑀸𑀲𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀻𑀢𑀺 𑀇𑀫𑀸 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄. 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀧𑀣𑀯𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀯𑀯𑀢𑁆𑀣𑀸𑀦𑀁. 𑀲𑀜𑁆𑀜𑀸 𑀘𑀸𑀳𑀸𑀭𑀢𑀸𑀢𑀺 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀕-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀆𑀳𑀸𑀭𑀕𑀢𑀸 𑀲𑀜𑁆𑀜𑀸 ‘‘𑀆𑀳𑀸𑀭𑀢𑀸 𑀲𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸. 𑀆𑀳𑀸𑀭𑁄𑀬𑁂𑀯 𑀯𑀸 𑀆𑀳𑀸𑀭𑀢𑀸, 𑀢𑀕𑁆𑀕𑀢𑀸 𑀘 𑀲𑀜𑁆𑀜𑀸 𑀉𑀧𑀘𑀸𑀭𑀢𑁄 ‘‘𑀆𑀳𑀸𑀭𑀢𑀸’’𑀢𑀺 𑀯𑀼𑀢𑁆𑀢𑀸, 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸𑀢𑀺 𑀅𑀢𑁆𑀣𑁄.

𑁮𑁧𑁫-𑁬. 𑀓𑀺𑀁 𑀇𑀫𑁂𑀲𑀼 𑀲𑀩𑁆𑀩𑁂𑀲𑀼𑀬𑁂𑀯 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺? 𑀆𑀫, 𑀦𑀺𑀩𑁆𑀩𑀢𑁆𑀢𑀢𑀺 𑀲𑀩𑁆𑀩𑁂𑀲𑁆𑀯𑁂𑀯 𑀉𑀧𑀘𑀸𑀭𑀚𑁆𑀛𑀸𑀦𑀁, 𑀅𑀧𑁆𑀧𑀦𑀸𑀛𑀸𑀦𑀁 𑀧𑀦 𑀓𑁂𑀲𑀼𑀘𑀺 𑀦 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀸 𑀓𑀸𑀦𑀺𑀘𑀺 𑀉𑀧𑀘𑀸𑀭𑀫𑁂𑀯 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀓𑀸𑀦𑀺𑀘𑀺 𑀅𑀧𑁆𑀧𑀦𑀫𑁆𑀧𑀺. 𑀓𑀣𑀁 𑀧𑀦𑁂𑀢𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀆𑀳 ‘‘𑀏𑀢𑁂𑀲𑀽’’𑀢𑀺𑀆𑀤𑀺. 𑀉𑀧𑀘𑀸𑀭𑀫𑁂𑀯 𑀆𑀯𑀳𑀦𑁆𑀢𑀻𑀢𑀺 𑀉𑀧𑀘𑀸𑀭𑀸𑀯𑀳𑀸 ‘‘𑀅𑀧𑁂𑀓𑁆𑀔𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑁆𑀣 𑀅𑀯𑀥𑀸𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀆𑀦𑀸𑀧𑀸𑀦𑀲𑁆𑀲𑀢𑀺𑀁, 𑀓𑀸𑀬𑀕𑀢𑀸𑀲𑀢𑀺𑀜𑁆𑀘 𑀳𑀺𑀢𑁆𑀯𑀸 𑀲𑁂𑀲𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀬𑁄 𑀅𑀝𑁆𑀞 𑀅𑀦𑀼𑀲𑁆𑀲𑀢𑀺𑀬𑁄, 𑀲𑀜𑁆𑀜𑀸, 𑀯𑀯𑀢𑁆𑀣𑀸𑀦𑀜𑁆𑀘𑀸𑀢𑀺 𑀏𑀢𑁂 𑀤𑀲 𑀦𑀸𑀦𑀧𑁆𑀧𑀓𑀸𑀭𑀓𑀢𑁆𑀢𑀸, 𑀕𑀫𑁆𑀪𑀻𑀭𑀢𑁆𑀢𑀸, 𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀘 𑀅𑀲𑀢𑀺 𑀪𑀸𑀯𑀦𑀸𑀯𑀺𑀲𑁂𑀲𑁂 𑀉𑀧𑀘𑀸𑀭𑀸𑀯𑀳𑀸 𑀯𑀼𑀢𑁆𑀢𑀸.

𑁮𑁧𑁭-𑁮. 𑀏𑀯𑀁 𑀉𑀧𑀘𑀸𑀭𑀧𑁆𑀧𑀦𑀸𑀯𑀳𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀛𑀸𑀦𑀧𑁆𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀦𑀸𑀬𑀸𑀯𑀳𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀢𑀺 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀯𑀦𑁆𑀢𑁄, 𑀢𑁂𑀲𑀁 𑀏𑀓𑁂𑀓𑀲𑁆𑀲𑁂𑀯 𑀆𑀭𑀫𑁆𑀫𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀓𑀦𑀬𑀯𑀲𑁂𑀦 𑀧𑀦 ‘‘𑀧𑀜𑁆𑀘𑀓𑀚𑁆𑀛𑀸𑀦𑀺𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀚𑁆𑀛𑀸𑀦𑀺𑀓𑀸𑀢𑀺 𑀧𑀞𑀫𑀚𑁆𑀛𑀸𑀦𑀲𑁆𑀲𑁂𑀯 𑀆𑀭𑀫𑁆𑀫𑀡𑀪𑀽𑀢𑀸, 𑀧𑀝𑀺𑀓𑁆𑀓𑀽𑀮𑀪𑀸𑀯𑀢𑁄 𑀧𑀦 𑀇𑀢𑀭𑁂𑀲𑀁 𑀆𑀭𑀫𑁆𑀫𑀡𑀸𑀦𑀺 𑀦 𑀳𑁄𑀦𑁆𑀢𑀺. 𑀧𑀝𑀺𑀓𑁆𑀓𑀽𑀮𑁂𑀧𑀺 𑀳𑀺 𑀯𑀺𑀲𑀬𑁂 𑀯𑀺𑀢𑀓𑁆𑀓𑀩𑀮𑁂𑀦 𑀧𑀞𑀫𑀚𑁆𑀛𑀸𑀦𑀁 𑀅𑀧𑁆𑀧𑁂𑀢𑀺 𑀘𑀡𑁆𑀟𑀲𑁄𑀢𑀦𑀤𑀺𑀬𑀁 𑀅𑀭𑀺𑀢𑁆𑀢𑀩𑀮𑁂𑀦 𑀦𑀸𑀯𑀸 𑀯𑀺𑀬. 𑀲𑁂𑀲𑀸𑀦𑀺 𑀧𑀦 𑀢𑀤𑀪𑀸𑀯𑀢𑁄 𑀦 𑀢𑁂𑀲𑀼 𑀅𑀧𑁆𑀧𑁂𑀦𑁆𑀢𑀺.

𑁮𑁧𑁯. 𑀢𑀺𑀓𑀚𑁆𑀛𑀸𑀦𑀯𑀳𑀸𑀢𑀺 𑀘𑀢𑀼𑀓𑁆𑀓𑀦𑀬𑁂𑀦 𑀢𑀺𑀓𑀚𑁆𑀛𑀸𑀦𑀯𑀳𑀸, 𑀧𑀜𑁆𑀘𑀓𑀦𑀬𑁂𑀦 𑀧𑀦 𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀳𑀸, 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸 𑀳𑀺 𑀫𑁂𑀢𑁆𑀢𑀸𑀤𑀻𑀦𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀫𑁂𑀯 𑀆𑀭𑀫𑁆𑀫𑀡𑀢𑁆𑀢𑀸 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸 𑀦 𑀳𑁄𑀦𑁆𑀢𑀺. 𑀅𑀧𑁆𑀧𑀦𑀧𑁆𑀧𑀢𑁆𑀢𑀸 𑀳𑀺 𑀫𑁂𑀢𑁆𑀢𑀸𑀤𑀬𑁄 𑀲𑁄𑀫𑀦𑀲𑁆𑀲𑁂𑀦 𑀯𑀺𑀦𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀘𑀢𑀼𑀢𑁆𑀣𑁄𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀩𑁆𑀭𑀳𑁆𑀫𑀸𑀦𑀁 𑀉𑀢𑁆𑀢𑀫𑀸𑀦𑀁 𑀯𑀺𑀳𑀸𑀭𑁄, 𑀩𑁆𑀭𑀳𑁆𑀫𑀪𑀽𑀢𑁄 𑀯𑀸 𑀯𑀺𑀳𑀸𑀭𑁄𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁄, 𑀲𑁄 𑀉𑀧𑁂𑀓𑁆𑀔𑀸𑀪𑀸𑀯𑀦𑀸𑀯𑀲𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑁄. 𑀢𑀢𑁆𑀣𑀸𑀧𑀺 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀘𑀢𑀼𑀓𑁆𑀓𑀲𑁆𑀲𑁂𑀯𑁂𑀢𑀁 𑀅𑀧𑁆𑀧𑁂𑀢𑀺, 𑀦𑁂𑀢𑀭𑀲𑁆𑀲. 𑀓𑀲𑁆𑀫𑀸? 𑀫𑁂𑀢𑁆𑀢𑀸𑀤𑀻𑀦𑀁 𑀦𑀺𑀲𑁆𑀲𑀦𑁆𑀤𑀢𑁆𑀢𑀸. 𑀬𑀣𑀸 𑀳𑀺 𑀓𑀲𑀺𑀡𑀸𑀦𑀁 𑀦𑀺𑀲𑁆𑀲𑀦𑁆𑀤𑀸 𑀆𑀭𑀼𑀧𑁆𑀧𑀸, 𑀬𑀣𑀸 𑀘 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀦𑁆𑀤𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, 𑀏𑀯𑀁 𑀫𑁂𑀢𑁆𑀢𑀸𑀤𑀺𑀦𑀺𑀲𑁆𑀲𑀦𑁆𑀤𑀸 𑀉𑀧𑁂𑀓𑁆𑀔𑀸. 𑀆𑀭𑀼𑀧𑁆𑀧𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸𑀢𑀺 𑀅𑀗𑁆𑀕𑀲𑀫𑀢𑀸𑀯𑀲𑁂𑀦 𑀆𑀭𑀼𑀧𑁆𑀧𑀸𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲𑁂𑀯 𑀧𑀪𑁂𑀤𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑁮𑁨𑁦. 𑀏𑀯𑀁 𑀛𑀸𑀦𑀪𑁂𑀤𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀲𑀫𑀢𑀺𑀓𑁆𑀓𑀫𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀯𑀲𑁂𑀦𑀸𑀭𑀫𑁆𑀫𑀡𑀗𑁆𑀕𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑁄 𑀅𑀗𑁆𑀕𑀲𑀫𑀢𑀺𑀓𑁆𑀓𑀫𑁄𑀢𑀺 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀸𑀦𑀁, 𑀅𑀗𑁆𑀕𑀸𑀦𑀜𑁆𑀘 𑀯𑀲𑁂𑀦 𑀲𑀫𑀢𑀺𑀓𑁆𑀓𑀫𑁄 𑀤𑀼𑀯𑀺𑀥𑁄. 𑀓𑀺𑀁 𑀲𑀩𑁆𑀩𑁂𑀲𑁆𑀯𑁂𑀯 𑀤𑀼𑀯𑀺𑀥𑁄 𑀮𑀩𑁆𑀪𑀢𑀺, 𑀦𑁄𑀢𑀺 𑀆𑀳 ‘‘𑀕𑁄𑀘𑀭𑀸…𑀧𑁂… 𑀢𑀺𑀓𑁆𑀓𑀫𑁄’’𑀢𑀺. 𑀘𑀢𑀽𑀲𑀼 𑀳𑀺 𑀆𑀭𑀼𑀧𑁆𑀧𑁂𑀲𑀼 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑁄𑀯 𑀳𑁄𑀢𑀺 𑀆𑀓𑀸𑀲𑀓𑀲𑀺𑀡𑀯𑀚𑁆𑀚𑀺𑀢𑁂𑀲𑀼 𑀦𑀯𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑁆𑀲, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀦𑀺 𑀘 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀤𑀻𑀦𑀁 𑀧𑀢𑁆𑀢𑀩𑁆𑀩𑀢𑁆𑀢𑀸, 𑀅𑀗𑁆𑀕𑀸𑀢𑀺𑀓𑁆𑀓𑀫𑁄 𑀧𑀦 𑀅𑀭𑀽𑀧𑁂 𑀦𑀢𑁆𑀣𑀺 𑀘𑀢𑀼𑀦𑁆𑀦𑀜𑁆𑀘𑀸𑀧𑀺 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀲𑀫𑀸𑀦𑀢𑁆𑀢𑀸. 𑀭𑀽𑀧𑁂 𑀛𑀸𑀦𑀗𑁆𑀕𑀢𑀺𑀓𑁆𑀓𑀫𑁄𑀢𑀺 𑀭𑀽𑀧𑀸𑀯𑀘𑀭𑀺𑀓𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀯𑀺𑀢𑀓𑁆𑀓𑀸𑀤𑀻𑀦𑀁 𑀛𑀸𑀦𑀗𑁆𑀕𑀸𑀦𑀁 𑀅𑀢𑀺𑀓𑁆𑀓𑀫𑁄, 𑀇𑀤𑀜𑁆𑀘 𑀮𑀩𑁆𑀪𑀫𑀸𑀦𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀞𑀫𑀚𑁆𑀛𑀸𑀦𑀺𑀓𑁂𑀲𑀼 𑀤𑀼𑀯𑀺𑀥𑁄𑀧𑀺 𑀲𑀫𑀢𑀺𑀓𑁆𑀓𑀫𑁄 𑀦𑀢𑁆𑀣𑀺, 𑀦𑀻𑀯𑀭𑀡𑀲𑀫𑀢𑀺𑀓𑁆𑀓𑀫𑁄 𑀇𑀥 𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀸𑀧𑀢𑁆𑀢𑀻𑀦𑀁 𑀲𑀸𑀥𑀸𑀭𑀡𑀢𑁆𑀢𑀸 𑀦 𑀕𑀳𑀺𑀢𑁄.

𑁮𑁨𑁧. 𑀏𑀯𑀁 𑀲𑀫𑀢𑀺𑀓𑁆𑀓𑀫𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀯𑀟𑁆𑀠𑀦𑀸𑀯𑀟𑁆𑀠𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀤𑀲𑁂𑀯 𑀓𑀲𑀺𑀡𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀇𑀫𑁂𑀲𑀼 𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀤𑀲 𑀓𑀲𑀺𑀡𑀸𑀦𑁂𑀯 𑀯𑀟𑁆𑀠𑁂𑀢𑀩𑁆𑀩𑀸𑀦𑀺. 𑀦 𑀘…𑀧𑁂… 𑀅𑀲𑀼𑀪𑀸𑀤𑀬𑁄𑀢𑀺 𑀲𑁂𑀲𑀸 𑀅𑀲𑀼𑀪𑀸𑀤𑀬𑁄 𑀧𑀦 𑀦𑁂𑀯 𑀯𑀟𑁆𑀠𑁂𑀢𑀩𑁆𑀩𑀸. 𑀓𑀲𑁆𑀫𑀸? 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀭𑁂𑀦𑁂𑀯 𑀉𑀧𑀝𑁆𑀞𑀸𑀦𑀢𑁄, 𑀆𑀦𑀺𑀲𑀁𑀲𑀸𑀪𑀸𑀯𑀢𑁄 𑀘. 𑀢𑀣𑀸 𑀳𑀺 𑀤𑀲 𑀅𑀲𑀼𑀪𑀸𑀦𑀺, 𑀓𑀸𑀬𑀕𑀢𑀸𑀲𑀢𑀺 𑀘 𑀅𑀢𑁆𑀢𑀦𑁄 𑀞𑀺𑀢𑁄𑀓𑀸𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀭𑁂𑀦𑁂𑀯 𑀉𑀧𑀝𑁆𑀞𑀳𑀦𑁆𑀢𑀺. 𑀯𑀟𑁆𑀠𑀺𑀢𑁂𑀲𑀼𑀧𑀺 𑀓𑀼𑀡𑀧𑀭𑀸𑀲𑀺 𑀏𑀯 𑀉𑀧𑀝𑁆𑀞𑀸𑀢𑀻𑀢𑀺 𑀦 𑀓𑁄𑀘𑀺 𑀆𑀦𑀺𑀲𑀁𑀲𑁄 𑀅𑀢𑁆𑀣𑀺. 𑀅𑀯𑀟𑁆𑀠𑀺𑀢𑁂𑀲𑀼𑀧𑀺 𑀳𑀺 𑀢𑁂𑀲𑀼 𑀓𑀸𑀫𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑀸 𑀳𑁄𑀢𑀺𑀬𑁂𑀯. 𑀬𑀤𑀺 𑀏𑀯𑀁, 𑀅𑀲𑀼𑀪𑀚𑁆𑀛𑀸𑀦𑀸𑀦𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺? 𑀦 𑀯𑀺𑀭𑀼𑀚𑁆𑀛𑀢𑀺. 𑀏𑀓𑀘𑁆𑀘𑁄 𑀳𑀺 𑀉𑀤𑁆𑀥𑀼𑀫𑀸𑀢𑀓𑁂 𑀯𑀸 𑀅𑀝𑁆𑀞𑀺𑀓𑁂 𑀯𑀸 𑀫𑀳𑀦𑁆𑀢𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀏𑀓𑀘𑁆𑀘𑁄 𑀅𑀧𑁆𑀧𑀓𑁂𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀚𑁆𑀛𑀸𑀦𑀁 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. 𑀬𑁄 𑀯𑀸 𑀏𑀢𑀁 𑀆𑀦𑀺𑀲𑀁𑀲𑀸𑀪𑀸𑀯𑀁 𑀅𑀧𑀲𑁆𑀲𑀦𑁆𑀢𑁄 𑀯𑀟𑁆𑀠𑁂𑀬𑁆𑀬, 𑀢𑀲𑁆𑀲 𑀯𑀲𑁂𑀦 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀆𑀦𑀸𑀧𑀸𑀦𑀦𑀺𑀫𑀺𑀢𑁆𑀢𑀫𑁆𑀧𑀺 𑀦𑀸𑀲𑀺𑀓𑀕𑁆𑀕𑀫𑀼𑀔𑀦𑀺𑀫𑀺𑀢𑁆𑀢𑀸𑀤𑀺𑀧𑀭𑀺𑀘𑁆𑀙𑀺𑀦𑁆𑀦𑀁 𑀉𑀧𑀝𑁆𑀞𑀸𑀢𑀺, 𑀯𑀟𑁆𑀠𑀬𑀢𑁄𑀧𑀺 𑀘 𑀯𑀸𑀢𑀭𑀸𑀲𑀺𑀬𑁂𑀯 𑀯𑀟𑁆𑀠𑀢𑀺. 𑀧𑀺𑀘𑀼𑀧𑀺𑀡𑁆𑀟𑀸𑀤𑀺𑀯𑀲𑁂𑀦 𑀉𑀧𑀝𑁆𑀞𑀳𑀦𑁆𑀢𑀫𑁆𑀧𑀺 𑀳𑀺 𑀦𑀺𑀫𑀺𑀢𑁆𑀢𑀁 𑀯𑀸𑀢𑀲𑀗𑁆𑀖𑀸𑀝𑀫𑀢𑁆𑀢𑀫𑁂𑀯, 𑀢𑀣𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀦𑀺𑀫𑀺𑀢𑁆𑀢𑀫𑁆𑀧𑀺 𑀯𑀟𑁆𑀠𑁂𑀦𑁆𑀢𑀲𑁆𑀲 𑀲𑀢𑁆𑀢𑀭𑀸𑀲𑀺𑀬𑁂𑀯 𑀯𑀟𑁆𑀠𑁂𑀬𑁆𑀬, 𑀦 𑀘 𑀢𑁂𑀦 𑀓𑁄𑀘𑀺 𑀅𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀤𑀼𑀪𑀬𑀫𑁆𑀧𑀺 𑀦 𑀯𑀟𑁆𑀠𑁂𑀢𑀩𑁆𑀩𑀁. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺 (𑀯𑀺𑀪. 𑁬𑁬𑁩), 𑀢𑀫𑁆𑀧𑀺 𑀧𑀭𑀺𑀕𑁆𑀕𑀳𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀯𑀲𑁂𑀦. 𑀓𑀺𑀜𑁆𑀘𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑁂𑀯 𑀦𑀢𑁆𑀣𑀺, 𑀓𑀺𑀫𑀬𑀁 𑀯𑀟𑁆𑀠𑁂𑀬𑁆𑀬, 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀧𑀦𑁂𑀢𑁆𑀣 𑀧𑀭𑀺𑀕𑁆𑀕𑀳𑀺𑀢𑀫𑀢𑁆𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀆𑀭𑀼𑀧𑁆𑀧𑀸𑀭𑀫𑁆𑀫𑀡𑁂𑀲𑀼 𑀆𑀓𑀸𑀲𑀁 𑀓𑀲𑀺𑀡𑀼𑀕𑁆𑀖𑀸𑀝𑀫𑀢𑁆𑀢𑀢𑁆𑀢𑀸 𑀓𑀲𑀺𑀡𑀸𑀧𑀕𑀫𑀯𑀲𑁂𑀦𑁂𑀯 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀢𑀢𑁄 𑀧𑀭𑀁 𑀯𑀟𑁆𑀠𑀬𑀢𑁄 𑀦 𑀓𑀺𑀜𑁆𑀘𑀺 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀁 𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀦 𑀲𑀓𑁆𑀓𑀸 𑀯𑀟𑁆𑀠𑁂𑀢𑀼𑀁, 𑀧𑀭𑀺𑀓𑀫𑁆𑀫𑀫𑁂𑀯 𑀳𑀺 𑀯𑀟𑁆𑀠𑁂𑀢𑀼𑀁 𑀲𑀓𑁆𑀓𑀸, 𑀯𑀺𑀜𑁆𑀜𑀸𑀡𑀸𑀧𑀕𑀫𑁄 𑀢𑀲𑁆𑀲 𑀅𑀪𑀸𑀯𑀫𑀢𑁆𑀢𑀢𑁆𑀢𑀸, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸𑀭𑀫𑁆𑀫𑀡𑀫𑁆𑀧𑀺 𑀲𑀪𑀸𑀯𑀥𑀫𑁆𑀫𑀢𑁆𑀢𑀸𑀬𑁂𑀯 𑀦 𑀲𑀓𑁆𑀓𑀸 𑀯𑀟𑁆𑀠𑁂𑀢𑀼𑀁, 𑀢𑀲𑁆𑀫𑀸 𑀢𑀸𑀦𑀺𑀧𑀺 𑀦 𑀯𑀟𑁆𑀠𑁂𑀢𑀩𑁆𑀩𑀸𑀦𑀺. 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀆𑀭𑀼𑀧𑁆𑀧𑀸𑀦𑀁 𑀯𑀺𑀧𑀼𑀮𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀬𑁄 𑀘 𑀅𑀦𑀺𑀫𑀺𑀢𑁆𑀢𑀢𑁆𑀢𑀸 𑀦 𑀯𑀟𑁆𑀠𑁂𑀢𑀩𑁆𑀩𑀸. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀜𑁆𑀳𑀺 𑀅𑀬𑀁 𑀯𑀟𑁆𑀠𑁂𑀬𑁆𑀬, 𑀢𑀜𑁆𑀘 𑀦𑁂𑀲𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀫𑁂 𑀅𑀲𑀼𑀪𑀸𑀤𑀬𑁄 𑀢𑀺𑀁𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀧𑀭𑀺𑀘𑁆𑀙𑀺𑀦𑁆𑀦𑁄𑀓𑀸𑀲𑀢𑁆𑀢𑀸, 𑀧𑀬𑁄𑀚𑀦𑀸𑀪𑀸𑀯𑀢𑁄, 𑀅𑀯𑀟𑁆𑀠𑀦𑀢𑁄 𑀘 𑀦 𑀯𑀟𑁆𑀠𑁂𑀢𑀩𑁆𑀩𑀸𑀦𑀺.

𑁮𑁨𑁨-𑁩. 𑀏𑀯𑀁 𑀯𑀟𑁆𑀠𑀦𑀸𑀯𑀟𑁆𑀠𑀦𑀢𑁄 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀆𑀭𑀫𑁆𑀫𑀡𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑀲𑁂𑀯 𑀓𑀲𑀺𑀡𑀸𑀦𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺 𑀆𑀭𑀫𑁆𑀫𑀡𑀸𑀦𑀻𑀢𑀺 𑀇𑀫𑀸𑀦𑀺 𑀤𑁆𑀯𑀸𑀯𑀻𑀲 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀲𑁂𑀲𑀸𑀢𑀺 𑀅𑀯𑀲𑁂𑀲𑀸 𑀅𑀝𑁆𑀞𑀸𑀭𑀲 𑀦𑁂𑀯 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸 𑀲𑀺𑀬𑀼𑀁.

𑁮𑁨𑁪-𑁫. 𑀇𑀤𑀸𑀦𑀺 𑀪𑀽𑀫𑀺𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀼𑀪𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁂𑀯𑁂𑀲𑀼 𑀦𑀧𑁆𑀧𑀯𑀢𑁆𑀢𑀦𑁆𑀢𑀺 𑀢𑀢𑁆𑀣 𑀅𑀲𑀼𑀪𑀸𑀦𑀁, 𑀧𑀝𑀺𑀓𑁆𑀓𑀽𑀮𑀲𑁆𑀲 𑀘 𑀆𑀳𑀸𑀭𑀲𑁆𑀲 𑀅𑀪𑀸𑀯𑀢𑁄. 𑀢𑀘𑀧𑀜𑁆𑀘𑀓𑀫𑁆𑀧𑀺 𑀳𑀺 𑀢𑀢𑁆𑀣 𑀧𑀯𑀢𑁆𑀢𑀫𑀸𑀦𑀁 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑁂𑀦 𑀦𑁄𑀧𑀝𑁆𑀞𑀸𑀢𑀺. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑁂 𑀅𑀪𑀸𑀯𑀢𑁄 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀛𑀸𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀸𑀦𑀜𑁆𑀳𑀺 𑀅𑀢𑁆𑀣𑀲𑁆𑀲 𑀅𑀪𑀸𑀯𑀢𑁄 𑀦𑀢𑁆𑀣𑀺 𑀩𑁆𑀭𑀳𑁆𑀫𑀮𑁄𑀓𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸.

𑁮𑁨𑁭. 𑀇𑀤𑀸𑀦𑀺 𑀕𑀳𑀡𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀢𑁆𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀢𑀼𑀢𑁆𑀣𑀁…𑀧𑁂… 𑀤𑀺𑀝𑁆𑀞𑁂𑀦𑁂𑀯 𑀕𑀳𑁂𑀢𑀩𑁆𑀩𑀸𑀢𑀺 𑀯𑀸𑀬𑁄𑀓𑀲𑀺𑀡𑀁 𑀯𑀚𑁆𑀚𑁂𑀢𑁆𑀯𑀸 𑀲𑁂𑀲𑀸 𑀦𑀯 𑀓𑀲𑀺𑀡𑀸, 𑀤𑀲 𑀅𑀲𑀼𑀪𑀸𑀦𑀻𑀢𑀺 𑀇𑀫𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀤𑀺𑀝𑁆𑀞𑁂𑀦𑁂𑀯 𑀯𑀢𑁆𑀣𑀼𑀦𑀸 𑀓𑀭𑀡𑀪𑀽𑀢𑁂𑀦 𑀕𑀳𑁂𑀢𑀩𑁆𑀩𑀸𑀦𑀺 𑀉𑀕𑁆𑀕𑀳𑁂𑀢𑀩𑁆𑀩𑀸𑀦𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀤𑀺𑀝𑁆𑀞𑁂𑀦 𑀕𑀳𑁂𑀢𑀩𑁆𑀩𑀸𑀦𑀺, 𑀧𑀼𑀩𑁆𑀩𑀪𑀸𑀕𑁂 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀁 𑀦𑁂𑀲𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁭).

𑁮𑁨𑁮-𑁩𑁧. 𑀲𑀢𑀺𑀬𑀫𑁆𑀧𑀺 𑀘 𑀓𑀸𑀬𑀫𑁆𑀳𑀻𑀢𑀺 𑀓𑀸𑀬𑀕𑀢𑀸𑀲𑀢𑀺𑀬𑀫𑁆𑀧𑀺. 𑀤𑀺𑀝𑁆𑀞𑁂𑀦 𑀢𑀘𑀧𑀜𑁆𑀘𑀓𑀦𑁆𑀢𑀺 𑀢𑀘𑀧𑀜𑁆𑀘𑀓𑀫𑀢𑁆𑀢𑀫𑁂𑀯 𑀤𑀺𑀝𑁆𑀞𑁂𑀦 𑀕𑀳𑁂𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀢𑁂𑀦𑁂𑀯𑀸𑀢𑀺 𑀏𑀢𑁆𑀣 𑀓𑀸𑀬𑀕𑀢𑀸𑀲𑀢𑀺𑀬𑀁 𑀲𑁂𑀲𑀁 𑀯𑀓𑁆𑀓𑀧𑀜𑁆𑀘𑀓𑀸𑀤𑀺 𑀲𑀼𑀢𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀇𑀢𑀺 𑀓𑀸𑀬𑀕𑀢𑀸𑀲𑀢𑀺 𑀤𑀺𑀝𑁆𑀞𑀲𑀼𑀢𑁂𑀦 𑀕𑀳𑁂𑀢𑀩𑁆𑀩𑀸. 𑀉𑀢𑁆𑀢𑀭𑁄𑀝𑁆𑀞𑀦𑀸𑀲𑀺𑀓𑀕𑁆𑀕𑁂𑀲𑀼 𑀨𑀼𑀝𑁆𑀞𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑁆𑀲 𑀕𑀳𑁂𑀢𑀩𑁆𑀩𑀢𑁄 𑀯𑀼𑀢𑁆𑀢𑀁 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺 𑀏𑀢𑁆𑀣, 𑀨𑀼𑀝𑁆𑀞𑁂𑀦 𑀧𑀭𑀺𑀤𑀻𑀧𑀺𑀢𑀸’’𑀢𑀺. 𑀉𑀘𑁆𑀙𑀼𑀲𑀲𑁆𑀲𑀸𑀤𑀻𑀦𑀁 𑀧𑀢𑁆𑀢𑁂𑀲𑀼 𑀘𑀮𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀫𑀼𑀔𑁂𑀦, 𑀲𑀭𑀻𑀭𑀲𑀫𑁆𑀨𑀲𑁆𑀲𑀯𑀲𑁂𑀦 𑀘 𑀯𑀸𑀢𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀸𑀬𑁄𑀓𑀲𑀺𑀡𑀫𑁂𑀯𑁂𑀢𑁆𑀣, 𑀤𑀺𑀝𑁆𑀞𑀨𑀼𑀝𑁆𑀞𑁂𑀦 𑀕𑀬𑁆𑀳𑀢𑀻’’𑀢𑀺. 𑀆𑀤𑀺𑀢𑁄𑀯 𑀕𑀳𑁂𑀢𑀩𑁆𑀩𑀸 𑀦 𑀳𑁄𑀦𑁆𑀢𑀻𑀢𑀺𑀆𑀤𑀺𑀓𑀫𑁆𑀫𑀺𑀓𑁂𑀦 𑀪𑀸𑀯𑀦𑀸𑀭𑀫𑁆𑀪𑀯𑀲𑁂𑀦 𑀦 𑀧𑀝𑁆𑀞𑀧𑁂𑀢𑀩𑁆𑀩𑀸𑀦𑀺, 𑀳𑁂𑀝𑁆𑀞𑀺𑀫𑁂 𑀢𑀬𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂, 𑀓𑀲𑀺𑀡𑁂𑀲𑀼 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀜𑁆𑀘 𑀅𑀦𑀥𑀺𑀕𑀦𑁆𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸.

𑁮𑁩𑁨-𑁫. 𑀏𑀯𑀁 𑀕𑀳𑀡𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀘𑁆𑀘𑀬𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀳𑁂𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀢𑁂𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀽𑀢𑀺 𑀏𑀢𑁆𑀣 𑀬𑀣𑀸𑀭𑀳𑀁 𑀆𑀭𑀫𑁆𑀫𑀡𑀸𑀦𑀁, 𑀛𑀸𑀦𑀸𑀦𑀜𑁆𑀘 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀓𑀸𑀲𑀓𑀲𑀺𑀡𑀲𑁆𑀲 𑀉𑀕𑁆𑀖𑀸𑀝𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀆𑀓𑀸𑀲𑀓𑀲𑀺𑀡𑀁 𑀯𑀺𑀦𑀸’’𑀢𑀺. 𑀫𑁂𑀢𑁆𑀢𑀸𑀤𑀺𑀏𑀓𑁂𑀓𑀲𑁆𑀫𑀺𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀢𑀻𑀡𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑀞𑀺𑀢𑀲𑁆𑀲𑁂𑀯 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀧𑀜𑁆𑀘𑀫𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀬𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸’’𑀢𑀺𑀆𑀤𑀺. 𑀤𑁆𑀯𑀺𑀦𑁆𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀚𑀯𑀦𑀸𑀦𑀁 𑀲𑀫𑀦𑀦𑁆𑀢𑀭𑀸 𑀦𑀺𑀭𑁄𑀥𑀁 𑀨𑀼𑀲𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀘𑀢𑀼𑀢𑁆𑀣𑀫𑀸𑀭𑀼𑀧𑁆𑀧’’𑀦𑁆𑀢𑀺𑀆𑀤𑀺. 𑀯𑀺𑀧𑀲𑁆𑀲𑀦𑀸𑀪𑀯𑀲𑀫𑁆𑀧𑀢𑁆𑀢𑀺𑀲𑀼𑀔𑀸𑀦𑀁 𑀧𑀘𑁆𑀘𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀬, 𑀪𑀯𑀲𑀫𑁆𑀧𑀢𑁆𑀢𑀺𑀬𑀸, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑁆𑀲 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁮𑁩𑁬-𑁯. 𑀏𑀯𑀁 𑀧𑀲𑀗𑁆𑀕𑁂𑀦 𑀆𑀕𑀢𑀁 𑀓𑀫𑁆𑀫𑀝𑁆𑀞𑀸𑀦𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀆𑀘𑀭𑀺𑀬𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑀲𑁆𑀲𑀸𑀢𑀺 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀏𑀓𑀕𑁂𑀳𑁂, 𑀏𑀓𑀯𑀺𑀳𑀸𑀭𑁂 𑀯𑀸 𑀯𑀲𑀦𑁆𑀢𑀲𑁆𑀲. 𑀓𑀣𑁂𑀢𑀩𑁆𑀩𑀦𑁆𑀢𑀺 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑀼𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀆𑀕𑀢𑀲𑁆𑀲𑀸𑀕𑀢𑀓𑁆𑀔𑀡𑁂𑀢𑀺 𑀲-𑀓𑀸𑀭𑁄 𑀧𑀤𑀲𑀦𑁆𑀥𑀺𑀫𑀢𑁆𑀢𑀓𑀭𑁄, 𑀆𑀕𑀢𑀸𑀕𑀢𑀓𑁆𑀔𑀡𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀆𑀕𑀢𑀲𑁆𑀲 𑀆𑀕𑀢𑀓𑁆𑀔𑀡𑁂 𑀓𑀣𑁂𑀢𑀩𑁆𑀩𑀁. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀆𑀫𑁂𑀟𑀺𑀢𑀲𑀸𑀫𑀢𑁆𑀣𑀺𑀬𑀢𑁄𑀯 𑀮𑀩𑁆𑀪𑀢𑀺. 𑀦 𑀳𑀺 𑀏𑀓𑀯𑀸𑀭𑀫𑁂𑀯 𑀆𑀕𑀢𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀓𑀣𑁂𑀢𑀩𑁆𑀩𑀁, 𑀢𑀢𑁄 𑀧𑀭𑀁 𑀦 𑀓𑀣𑁂𑀢𑀩𑁆𑀩𑀦𑁆𑀢𑀺 𑀬𑀼𑀚𑁆𑀚𑀢𑀺.

𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑁆𑀢𑀺 𑀅𑀢𑀺𑀲𑀁𑀔𑀺𑀢𑁆𑀢𑀁, 𑀅𑀢𑀺𑀯𑀺𑀢𑁆𑀣𑀸𑀭𑀜𑁆𑀘 𑀅𑀓𑀢𑁆𑀯𑀸 𑀢𑀲𑁆𑀲 𑀲𑀼𑀔𑁂𑀦 𑀉𑀕𑁆𑀕𑀡𑁆𑀳𑀦𑀧𑁆𑀧𑀫𑀸𑀡𑀁 𑀓𑀣𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀲𑁄 𑀧𑀓𑀢𑀺𑀬𑀸𑀯 𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑁄 𑀳𑁄𑀢𑀺, 𑀲𑀚𑁆𑀛𑀸𑀬𑀯𑀲𑁂𑀦 𑀯𑀸 𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀓𑀢𑀧𑀭𑀺𑀘𑀬𑁄, 𑀢𑀲𑁆𑀲 𑀏𑀓𑀁, 𑀤𑁆𑀯𑁂 𑀯𑀸 𑀦𑀺𑀲𑀚𑁆𑀚𑀸 𑀅𑀢𑁆𑀢𑀦𑁄 𑀲𑀫𑁆𑀫𑀼𑀔𑀸𑀯 𑀲𑀚𑁆𑀛𑀸𑀬𑀁 𑀓𑀸𑀭𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀏𑀯𑀁 𑀆𑀘𑀭𑀺𑀬𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑁂𑀦 𑀢𑁂𑀦 𑀬𑁄𑀕𑀺𑀦𑀸 𑀉𑀢𑁆𑀢𑀭𑀺 𑀓𑀸𑀢𑀩𑁆𑀩𑀯𑀺𑀥𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀦𑀧𑀻’’𑀢𑀺𑀆𑀤𑀺. 𑀲𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀬𑀢𑁆𑀣 𑀧𑀳𑀝𑁄 𑀲𑀫𑀢𑀺, 𑀢𑀁 𑀲𑀫𑁆𑀫𑀝𑁆𑀞𑀸𑀦𑀁, 𑀇𑀤𑀁 𑀲𑀫𑁆𑀫𑀝𑁆𑀞𑀸𑀦𑀁 𑀯𑀺𑀬𑀸𑀢𑀺 𑀲𑀫𑁆𑀫𑀝𑁆𑀞𑀸𑀦𑀁. 𑀬𑀣𑀸 𑀳𑀺 𑀲𑀫𑁆𑀫𑀝𑁆𑀞𑀸𑀦𑁂 𑀕𑀳𑀺𑀢𑁂 𑀧𑀼𑀕𑁆𑀕𑀮𑀁 𑀅𑀢𑁆𑀢𑀦𑁄 𑀯𑁂𑀭𑀻 𑀅𑀪𑀺𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑁂 𑀕𑀳𑀺𑀢𑁂 𑀫𑀦𑁄𑀪𑀼𑀲𑀗𑁆𑀔𑀸𑀢𑁄 𑀓𑀸𑀫𑀭𑀸𑀕𑁄 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀝𑁆𑀞𑀸𑀦𑀁 𑀯𑀺𑀬𑀸𑀢𑀺 𑀲𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺. 𑀫𑀦𑁄 𑀅𑀪𑀺𑀪𑀯𑀢𑀻𑀢𑀺 𑀫𑀦𑁄𑀪𑀽, 𑀢𑀲𑁆𑀲 𑀫𑀦𑁄𑀪𑀼𑀦𑁄. 𑀅𑀝𑁆𑀞𑀸𑀭𑀲𑀳𑀺…𑀧𑁂… 𑀯𑀺𑀯𑀚𑁆𑀚𑀺𑀢𑁂𑀢𑀺 𑁋

‘‘𑀫𑀳𑀸𑀯𑀸𑀲𑀁 𑀦𑀯𑀸𑀯𑀸𑀲𑀁, 𑀚𑀭𑀸𑀯𑀸𑀲𑀜𑁆𑀘 𑀧𑀦𑁆𑀣𑀦𑀺𑀁;

𑀲𑁄𑀡𑁆𑀟𑀺𑀁 𑀧𑀡𑁆𑀡𑀜𑁆𑀘 𑀧𑀼𑀧𑁆𑀨𑀜𑁆𑀘, 𑀨𑀮𑀁 𑀧𑀢𑁆𑀣𑀺𑀢𑀫𑁂𑀯 𑀘.

‘‘𑀦𑀕𑀭𑀁 𑀤𑀸𑀭𑀼𑀦𑀸 𑀔𑁂𑀢𑁆𑀢𑀁, 𑀯𑀺𑀲𑀪𑀸𑀕𑁂𑀦 𑀧𑀝𑁆𑀝𑀦𑀁;

𑀧𑀘𑁆𑀘𑀦𑁆𑀢𑀲𑀻𑀫𑀸𑀲𑀧𑁆𑀧𑀸𑀬𑀁, 𑀬𑀢𑁆𑀣 𑀫𑀺𑀢𑁆𑀢𑁄 𑀦 𑀮𑀩𑁆𑀪𑀢𑀺.

‘‘𑀅𑀝𑁆𑀞𑀸𑀭𑀲𑁂𑀢𑀸𑀦𑀺 𑀞𑀸𑀦𑀸𑀦𑀺, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀫𑀕𑁆𑀕𑀁 𑀲𑀧𑁆𑀧𑀝𑀺𑀪𑀬𑀁 𑀬𑀣𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁫𑁨) 𑁋

𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀺𑀳𑀸𑀭𑀤𑁄𑀲𑁂𑀳𑀺 𑀲𑀩𑁆𑀩𑀓𑀸𑀮𑀯𑀺𑀬𑀼𑀢𑁆𑀢𑁂. 𑀅𑀦𑀼𑀭𑀽𑀧𑁂𑀢𑀺 𑀇𑀫𑁂𑀲𑀼 𑀅𑀝𑁆𑀞𑀸𑀭𑀲𑀲𑀼 𑀤𑁄𑀲𑁂𑀲𑀼 𑀅𑀜𑁆𑀜𑀢𑀭𑁂𑀦𑀧𑀺 𑀲𑀫𑀦𑁆𑀦𑀸𑀕𑀢𑁄 𑀅𑀦𑀦𑀼𑀭𑀽𑀧𑁄 𑀦𑀸𑀫, 𑀢𑀤𑀪𑀸𑀯𑁂𑀦 𑀅𑀢𑁆𑀢𑀦𑁄 𑀬𑁄𑀕𑀓𑀫𑁆𑀫𑀲𑁆𑀲 𑀅𑀦𑀼𑀓𑀽𑀮𑁂. 𑀫𑀳𑀸𑀯𑀺𑀳𑀸𑀭𑀸𑀤𑀬𑁄 𑀳𑀺 𑀬𑁄𑀕𑀓𑀫𑁆𑀫𑀲𑁆𑀲 𑀅𑀦𑀼𑀓𑀽𑀮𑀸 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀫𑀳𑀸𑀯𑀺𑀳𑀸𑀭𑁂 𑀢𑀸𑀯 𑀯𑀢𑁆𑀢𑀓𑀭𑀡𑀸𑀤𑀺𑀦𑀸 𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀬𑀢𑁆𑀣 𑀧𑀦 𑀲𑀩𑁆𑀩𑀁 𑀓𑀢𑀫𑁂𑀯, 𑀅𑀯𑀲𑁂𑀲𑀸𑀧𑀺 𑀲𑀗𑁆𑀖𑀝𑁆𑀝𑀦𑀸 𑀦𑀢𑁆𑀣𑀺, 𑀏𑀯𑀭𑀽𑀧𑁄 𑀫𑀳𑀸𑀯𑀺𑀳𑀸𑀭𑁄𑀧𑀺 𑀅𑀦𑀼𑀭𑀽𑀧𑁄𑀯. 𑀦𑀯𑀯𑀺𑀳𑀸𑀭𑁂 𑀩𑀳𑀼𑀁 𑀦𑀯𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀅𑀲𑀢𑀺 𑀅𑀜𑁆𑀜𑀲𑁆𑀫𑀺𑀁 𑀅𑀦𑀼𑀓𑀽𑀮𑁂 𑀓𑀸𑀭𑀡𑁂 𑀅𑀦𑀦𑀼𑀭𑀽𑀧𑁄 𑀳𑁄𑀢𑀺. 𑀢𑀣𑀸 𑀚𑀺𑀡𑁆𑀡𑀯𑀺𑀳𑀸𑀭𑁄𑀧𑀺 𑀩𑀳𑀼𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀢𑀸𑀬 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀭𑀸𑀬𑀺𑀓𑁄. 𑀧𑀦𑁆𑀣𑀦𑀺𑀲𑁆𑀲𑀺𑀢𑀓𑁄 𑀆𑀕𑀦𑁆𑀢𑀼𑀓𑁂𑀳𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑀫𑁄𑀓𑀺𑀡𑁆𑀡𑀢𑀸𑀬. 𑀬𑀢𑁆𑀣 𑀲𑁄𑀡𑁆𑀟𑀻 𑀦𑀸𑀫 𑀧𑀸𑀲𑀸𑀡𑀧𑁄𑀓𑁆𑀔𑀭𑀡𑀻 𑀳𑁄𑀢𑀺, 𑀲𑁄 𑀲𑁄𑀡𑁆𑀟𑀺𑀯𑀺𑀳𑀸𑀭𑁄. 𑀢𑀢𑁆𑀣 𑀩𑀳𑀽 𑀧𑀸𑀦𑀻𑀬𑀢𑁆𑀣𑀸𑀬 𑀲𑀫𑁄𑀲𑀭𑀦𑁆𑀢𑀺, 𑀢𑀣𑀸 𑀧𑀡𑁆𑀡𑀧𑀼𑀧𑁆𑀨𑀨𑀮𑀯𑀢𑀺 𑀯𑀺𑀳𑀸𑀭𑁂 𑀢𑀁𑀢𑀤𑀢𑁆𑀣𑀸𑀬. 𑀧𑀢𑁆𑀣𑀦𑀻𑀬𑁂 𑀮𑁄𑀓𑀲𑀫𑁆𑀫𑀢𑁂 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑀁 ‘‘𑀅𑀭𑀳𑀸’’𑀢𑀺 𑀲𑀫𑁆𑀪𑀸𑀯𑁂𑀦𑁆𑀢𑀸 𑀩𑀳𑀽 𑀆𑀕𑀘𑁆𑀙𑀦𑁆𑀢𑀺. 𑀦𑀕𑀭𑀲𑀦𑁆𑀦𑀺𑀲𑁆𑀲𑀺𑀢𑁂𑀧𑀺 𑀯𑀺𑀳𑀸𑀭𑁂 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀸𑀧𑀸𑀣𑀕𑀫𑀦𑀸𑀤𑀻𑀦𑀺 𑀳𑁄𑀦𑁆𑀢𑀺. 𑀤𑀸𑀭𑀼𑀲𑀦𑁆𑀦𑀺𑀲𑁆𑀲𑀺𑀢𑁂 𑀓𑀝𑁆𑀞𑀳𑀸𑀭𑀺𑀓𑀸𑀤𑀻𑀳𑀺 𑀅𑀨𑀸𑀲𑀼 𑀳𑁄𑀢𑀺. 𑀔𑁂𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑁂 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯 𑀔𑀮𑀫𑀡𑁆𑀟𑀮𑀓𑀭𑀡𑀸𑀤𑀺𑀦𑀸 𑀅𑀨𑀸𑀲𑀼 𑀳𑁄𑀢𑀺. 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑀸𑀥𑀺𑀯𑀼𑀢𑁆𑀣𑁂𑀧𑀺 𑀓𑀮𑀳𑀦𑀺𑀯𑀸𑀭𑀡𑀸𑀤𑀻𑀲𑀼 𑀢𑁂 𑀉𑀧𑀯𑀤𑀦𑁆𑀢𑀺. 𑀧𑀝𑁆𑀝𑀦𑀲𑀦𑁆𑀦𑀺𑀲𑁆𑀲𑀺𑀢𑁂 𑀅𑀪𑀺𑀡𑁆𑀳𑀁 𑀦𑀸𑀯𑀸𑀲𑀢𑁆𑀣𑁂𑀳𑀺 𑀆𑀕𑀢𑀫𑀦𑀼𑀲𑁆𑀲𑁂𑀳𑀺 𑀅𑀨𑀸𑀲𑀼 𑀳𑁄𑀢𑀺. 𑀧𑀘𑁆𑀘𑀦𑁆𑀢𑀦𑀺𑀲𑁆𑀲𑀺𑀢𑁂 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀸𑀤𑀻𑀲𑀼 𑀅𑀧𑁆𑀧𑀲𑀦𑁆𑀦𑀸 𑀳𑁄𑀦𑁆𑀢𑀺. 𑀭𑀚𑁆𑀚𑀲𑀻𑀫𑀲𑀦𑁆𑀦𑀺𑀲𑁆𑀲𑀺𑀢𑁂 𑀤𑁆𑀯𑀺𑀦𑁆𑀦𑀁 𑀭𑀸𑀚𑀽𑀦𑀁 𑀓𑀮𑀳𑁂 𑀲𑀢𑀺 𑀤𑁆𑀯𑀺𑀦𑁆𑀦𑀁 𑀯𑀺𑀚𑀺𑀢𑁂𑀲𑀼 𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀁 𑀪𑀺𑀓𑁆𑀔𑀼𑀁 ‘‘𑀅𑀬𑀁 𑀘𑀭𑀧𑀼𑀭𑀺𑀲𑁄’’𑀢𑀺 𑀕𑀳𑁂𑀢𑁆𑀯𑀸 𑀩𑀦𑁆𑀥𑀦𑀸𑀤𑀺𑀓𑀁 𑀧𑀸𑀧𑁂𑀬𑁆𑀬𑀼𑀁, 𑀅𑀲𑀧𑁆𑀧𑀸𑀬𑁂 𑀅𑀫𑀦𑀼𑀲𑁆𑀲𑀸𑀤𑀺𑀉𑀧𑀤𑁆𑀤𑀯𑀸 𑀳𑁄𑀦𑁆𑀢𑀺. 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀥𑀺𑀯𑀼𑀢𑁆𑀣𑁂 𑀉𑀧𑁆𑀧𑀦𑁆𑀦𑀓𑀗𑁆𑀔𑀸𑀬 𑀯𑀺𑀦𑁄𑀤𑀓𑁂 𑀅𑀲𑀢𑀺 𑀫𑀳𑀸𑀤𑁄𑀲𑁄𑀬𑁂𑀯𑀸𑀢𑀺 𑀏𑀢𑁂𑀧𑀺 𑀯𑀺𑀳𑀸𑀭𑀸 𑀅𑀦𑀦𑀼𑀭𑀽𑀧𑀸, 𑀢𑀲𑁆𑀫𑀸 𑀢𑀸𑀤𑀺𑀲𑁂 𑀯𑀺𑀳𑀸𑀭𑁂 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀯𑀼𑀢𑁆𑀢𑀤𑁄𑀲𑀯𑀺𑀭𑀳𑀺𑀢𑁂 𑀅𑀦𑀼𑀭𑀽𑀧𑁂 𑀯𑀺𑀳𑀸𑀭𑁂 𑀯𑀺𑀳𑀸𑀢𑀩𑁆𑀩𑀁.

𑀢𑀲𑁆𑀲 𑀧𑀦 𑀯𑀺𑀳𑀸𑀭𑀲𑁆𑀲 𑀅𑀦𑀼𑀭𑀽𑀧𑀪𑀸𑀯𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀕𑀸𑀫𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀸𑀫𑀢𑁄𑀢𑀺 𑀕𑁄𑀘𑀭𑀕𑀸𑀫𑀢𑁄. 𑀦𑀸𑀢𑀺𑀤𑀽𑀭𑁂𑀢𑀺 𑀕𑁄𑀘𑀭𑀕𑀸𑀫𑀲𑁆𑀲 𑀅𑀟𑁆𑀠𑀕𑀸𑀯𑀼𑀢𑀢𑁄 𑀑𑀭𑀪𑀸𑀕𑀢𑀸𑀬 𑀦 𑀅𑀢𑀺𑀤𑀽𑀭𑁂. 𑀦𑀘𑁆𑀘𑀸𑀲𑀦𑁆𑀦𑁂𑀢𑀺 𑀧𑀘𑁆𑀙𑀺𑀫𑁂𑀦 𑀧𑀫𑀸𑀡𑁂𑀦 𑀕𑁄𑀘𑀭𑀕𑀸𑀫𑀢𑁄 𑀧𑀜𑁆𑀘𑀥𑀦𑀼𑀲𑀢𑀺𑀓𑀢𑀸𑀬 𑀦 𑀅𑀢𑀺𑀲𑀦𑁆𑀦𑁂. 𑀇𑀫𑀺𑀦𑀸 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀺. 𑀕𑁄𑀘𑀭𑀕𑀸𑀫𑀲𑁆𑀲 𑀧𑀦 𑀉𑀢𑁆𑀢𑀭𑀤𑀺𑀲𑀸𑀬 𑀯𑀸 𑀤𑀓𑁆𑀔𑀺𑀡𑀤𑀺𑀲𑀸𑀬 𑀯𑀸 𑀦𑀸𑀢𑀺𑀤𑀽𑀭𑀁 𑀦𑀘𑁆𑀘𑀸𑀲𑀦𑁆𑀦𑀁 𑀲𑁂𑀦𑀸𑀲𑀦𑀁 𑀯𑀺𑀲𑁂𑀲𑁂𑀦 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 𑀳𑁄𑀢𑀺, 𑀦𑀸𑀢𑀺𑀤𑀽𑀭𑀦𑀘𑁆𑀘𑀸𑀲𑀦𑁆𑀦𑀢𑀸 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀧𑀜𑁆𑀘𑀗𑁆𑀕𑀲𑀁𑀬𑀼𑀢𑁂𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀦𑀸𑀢𑀺𑀤𑀽𑀭𑀦𑀘𑁆𑀘𑀸𑀲𑀦𑁆𑀦𑀢𑀸𑀬 𑀲𑀳 𑀤𑀺𑀯𑀸 𑀅𑀧𑁆𑀧𑀓𑀺𑀡𑁆𑀡𑀢𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀜𑁆𑀘𑀗𑁆𑀕𑀲𑀁𑀬𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀦𑀸𑀢𑀺𑀤𑀽𑀭𑀁 𑀳𑁄𑀢𑀺 𑀦𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 𑀤𑀺𑀯𑀸 𑀅𑀧𑁆𑀧𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸, 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺 𑀧𑀜𑁆𑀳𑀁 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁; 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄𑀢𑀺. 𑀢𑀲𑁆𑀲 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀯𑀺𑀯𑀝𑀜𑁆𑀘𑁂𑀯 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀝𑁆𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁧).

𑀏𑀢𑁆𑀣 𑀘 𑀦𑀸𑀢𑀺𑀤𑀽𑀭𑀦𑀘𑁆𑀘𑀸𑀲𑀦𑁆𑀦𑀪𑀸𑀯𑁂𑀦 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀢𑀸 𑀧𑀞𑀫𑀁 𑀅𑀗𑁆𑀕𑀁, 𑀤𑀺𑀯𑀸 𑀫𑀳𑀸𑀚𑀦𑀲𑀁𑀓𑀺𑀡𑁆𑀡𑀢𑀸𑀪𑀸𑀯𑁂𑀦, 𑀭𑀢𑁆𑀢𑀺𑀬𑀁 𑀚𑀦𑀸𑀮𑀸𑀧𑀲𑀤𑁆𑀤𑀸𑀪𑀸𑀯𑁂𑀦, 𑀲𑀩𑁆𑀩𑀤𑀸𑀧𑀺 𑀚𑀦𑀲𑀦𑁆𑀦𑀺𑀧𑀸𑀢𑀦𑀺𑀕𑁆𑀖𑁄𑀲𑀸𑀪𑀸𑀯𑁂𑀦 𑀅𑀧𑁆𑀧𑀓𑀺𑀡𑁆𑀡𑀅𑀧𑁆𑀧𑀲𑀤𑁆𑀤𑀅𑀧𑁆𑀧𑀦𑀺𑀕𑁆𑀖𑁄𑀲𑀪𑀸𑀯𑁄 𑀤𑀼𑀢𑀺𑀬𑀁, 𑀟𑀁𑀲𑀫𑀓𑀲𑀸𑀤𑀺𑀧𑀭𑀺𑀲𑁆𑀲𑀬𑀸𑀪𑀸𑀯𑁄 𑀢𑀢𑀺𑀬𑀁, 𑀅𑀧𑁆𑀧𑀓𑀲𑀺𑀭𑁂𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀤𑀺𑀧𑀘𑁆𑀘𑀬𑀮𑀸𑀪𑁄 𑀘𑀢𑀼𑀢𑁆𑀣𑀁, 𑀩𑀳𑀼𑀲𑁆𑀲𑀼𑀢𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀸𑀦𑀁 𑀣𑁂𑀭𑀸𑀦𑀁 𑀯𑀲𑀦𑀪𑀸𑀯𑁄 𑀧𑀜𑁆𑀘𑀫𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀁𑀬𑀼𑀢𑁆𑀢𑁂 𑀲𑀫𑀦𑁆𑀦𑀸𑀕𑀢𑁂 𑀯𑀺𑀳𑀸𑀭𑀲𑁆𑀫𑀺𑀁 𑀯𑀺𑀳𑀸𑀢𑀩𑁆𑀩𑀁.

𑁮𑁪𑁦-𑁧. 𑀧𑀞𑀫𑀁 𑀯𑀼𑀢𑁆𑀢𑀆𑀯𑀸𑀲𑀸𑀤𑀺𑀫𑀳𑀸𑀧𑀮𑀺𑀩𑁄𑀥𑁂 𑀉𑀧𑀸𑀤𑀸𑀬 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑁄, 𑀇𑀤𑀸𑀦𑀺 𑀢𑀁 𑀧𑀮𑀺𑀩𑁄𑀥𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀉𑀧𑀘𑁆𑀙𑀺𑀦𑁆𑀤𑀦𑀸𑀓𑀸𑀭𑀁 𑀆𑀯𑀺 𑀓𑀸𑀢𑀼𑀁 ‘‘𑀤𑀻𑀖𑀸 𑀓𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄 𑀧𑀢𑁆𑀢𑁄 𑀲𑀼𑀝𑁆𑀞𑀼 𑀧𑀘𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁮𑁪𑁨-𑁫. 𑀧𑀯𑀺𑀯𑀺𑀢𑁆𑀢𑁂𑀢𑀺 𑀚𑀦𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂. 𑀯𑀚𑁆𑀚𑁂𑀢𑁆𑀯𑀸…𑀧𑁂… 𑀮𑁄𑀳𑀺𑀢𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀓𑀲𑀺𑀡𑀤𑁄𑀲𑀸, 𑀢𑀲𑁆𑀫𑀸 𑀏𑀯𑀭𑀽𑀧𑀸 𑀫𑀢𑁆𑀢𑀺𑀓𑀸 𑀯𑀚𑁆𑀚𑁂𑀢𑁆𑀯𑀸. 𑀲𑀡𑁆𑀳𑀸𑀬𑀸𑀢𑀺 𑀅𑀧𑀦𑀻𑀢𑀢𑀺𑀡𑀫𑀽𑀮𑀲𑀓𑁆𑀔𑀭𑀯𑀸𑀮𑀼𑀓𑀸𑀬 𑀲𑀼𑀫𑀤𑁆𑀤𑀺𑀢𑀸𑀬 𑀲𑀼𑀔𑀼𑀫𑀸𑀬. 𑀅𑀭𑀼𑀡𑀯𑀡𑁆𑀡𑀸𑀬𑀸𑀢𑀺 𑀅𑀭𑀼𑀡𑀦𑀺𑀪𑀸𑀬, 𑀅𑀭𑀼𑀡𑀯𑀡𑁆𑀡𑀧𑁆𑀧𑀪𑀸𑀬𑀸𑀢𑀺 𑀅𑀢𑁆𑀣𑁄. 𑀩𑀳𑀺𑀤𑁆𑀥𑀸 𑀯𑀸𑀧𑀺 𑀢𑀸𑀤𑀺𑀲𑁂𑀢𑀺 𑀩𑀳𑀺𑀤𑁆𑀥𑀸𑀧𑀺 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂. 𑀲𑀁𑀳𑀸𑀭𑀺𑀫𑀦𑁆𑀢𑀺 𑀲𑀁𑀳𑀭𑀺𑀢𑀩𑁆𑀩𑀁 𑀕𑀳𑁂𑀢𑁆𑀯𑀸 𑀘𑀭𑀡𑀬𑁄𑀕𑁆𑀬𑀁. 𑀢𑀢𑁆𑀭𑀝𑁆𑀞𑀓𑀦𑁆𑀢𑀺 𑀬𑀢𑁆𑀣 𑀓𑀢𑀁, 𑀢𑀢𑁆𑀣𑁂𑀯 𑀢𑀺𑀝𑁆𑀞𑀦𑀓𑀁.

𑁮𑁪𑁭-𑁫𑁦. 𑀧𑀫𑀸𑀡𑀢𑁄𑀢𑀺 𑀯𑀓𑁆𑀔𑀫𑀸𑀦𑀧𑁆𑀧𑀫𑀸𑀡𑀢𑁄. 𑀯𑀝𑁆𑀝𑀁 𑀆𑀓𑁄𑀝𑁂𑀢𑁆𑀯𑀸𑀢𑀺 𑀧𑀭𑀺𑀫𑀡𑁆𑀟𑀮𑀁 𑀓𑀢𑁆𑀯𑀸 𑀆𑀓𑁄𑀝𑁂𑀢𑁆𑀯𑀸. 𑀢𑀦𑁆𑀢𑀺 𑀢𑀁 𑀘𑀫𑁆𑀫𑀁 𑀯𑀸 𑀓𑀝𑀲𑀸𑀭𑀁 𑀯𑀸 𑀤𑀼𑀲𑁆𑀲𑀧𑀝𑁆𑀝𑀁 𑀯𑀸. 𑀓𑀡𑁆𑀡𑀺𑀓𑀦𑁆𑀢𑀺 𑀓𑀡𑁆𑀡𑀺𑀓𑀸𑀲𑀤𑀺𑀲𑀁, 𑀧𑀭𑀺𑀫𑀡𑁆𑀟𑀮𑀢𑁄 𑀧𑀤𑀼𑀫𑀓𑀡𑁆𑀡𑀺𑀓𑀸𑀓𑀸𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀫’’𑀦𑁆𑀢𑀺. ‘‘𑀓𑀡𑁆𑀡𑀺𑀓𑀸𑀲𑀫’’𑀦𑁆𑀢𑀺 𑀯𑀸 𑀧𑀸𑀞𑁄. 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀦𑁆𑀢𑀺 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀁. 𑀏𑀢𑀤𑁂𑀯 𑀳𑀺 𑀧𑀫𑀸𑀡𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀧𑁆𑀧𑀫𑀢𑁆𑀢𑁂 𑀯𑀸 𑀲𑀭𑀸𑀯𑀫𑀢𑁆𑀢𑁂 𑀯𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁫𑁫) 𑀯𑀼𑀢𑁆𑀢𑀁. 𑀯𑀺𑀯𑀝𑁆𑀝𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀳𑀺 𑀏𑀢𑁆𑀢𑀓𑁂𑀬𑁂𑀯 𑀅𑀝𑁆𑀞𑀢𑁆𑀯𑀸 𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑁂𑀯 𑀯𑀸𑀬𑀫𑀢𑀺. 𑀪𑁂𑀭𑀻𑀢𑀮𑀲𑀫𑀁 𑀓𑀢𑁆𑀯𑀸𑀢𑀺 𑀧𑀸𑀡𑀺𑀓𑀸𑀬 𑀖𑀁𑀲𑁂𑀢𑁆𑀯𑀸 𑀦𑀺𑀦𑁆𑀦𑀢𑀼𑀦𑁆𑀦𑀢𑀝𑁆𑀞𑀸𑀦𑀸𑀪𑀸𑀯𑁂𑀦 𑀪𑁂𑀭𑀻𑀢𑀮𑀁 𑀯𑀺𑀬 𑀲𑀫𑀁 𑀓𑀢𑁆𑀯𑀸. 𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦 𑀢𑀁 𑀞𑀸𑀦𑀦𑁆𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀓𑀲𑀺𑀡𑀁 𑀑𑀮𑁄𑀓𑁂𑀢𑀺, 𑀢𑀁 𑀞𑀸𑀦𑀁 𑀲𑀘𑁂 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀲𑀫𑁆𑀫𑀚𑁆𑀚𑀺𑀢𑁆𑀯𑀸. 𑀦𑁆𑀳𑀢𑁆𑀯𑀸𑀢𑀺 𑀲𑀭𑀻𑀭𑀤𑀭𑀣𑀯𑀺𑀦𑁄𑀤𑀦𑀢𑁆𑀣𑀁 𑀦𑁆𑀳𑀢𑁆𑀯𑀸.

𑁮𑁫𑁧-𑁨. 𑀢𑀫𑁆𑀳𑀸 𑀓𑀲𑀺𑀡𑀫𑀡𑁆𑀟𑀮𑀸 𑀳𑀢𑁆𑀣𑀧𑀸𑀲𑀧𑁆𑀧𑀫𑀸𑀡𑀲𑁆𑀫𑀺𑀁 𑀧𑀤𑁂𑀲𑁂𑀢𑀺 𑀢𑀫𑁆𑀳𑀸 𑀓𑀲𑀺𑀡𑀫𑀡𑁆𑀟𑀮𑀲𑁆𑀲, 𑀞𑀧𑀺𑀢𑀝𑁆𑀞𑀸𑀦𑀫𑁆𑀳𑀸 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀦𑁆𑀢𑀭𑁂 𑀧𑀤𑁂𑀲𑁂, 𑀓𑀲𑀺𑀡𑀫𑀡𑁆𑀟𑀮𑀲𑁆𑀲, 𑀧𑀻𑀞𑀲𑁆𑀲 𑀘 𑀫𑀚𑁆𑀛𑀁 𑀳𑀢𑁆𑀣𑀧𑀸𑀲𑀧𑁆𑀧𑀫𑀸𑀡𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑁂 𑀉𑀘𑁆𑀘𑁂𑀢𑀺 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀁 𑀳𑀼𑀢𑁆𑀯𑀸 𑀉𑀘𑁆𑀘𑁂, 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀧𑀸𑀤𑀓𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀽𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀓𑀲𑀺𑀡𑀁 𑀦 𑀉𑀧𑀝𑁆𑀞𑀸𑀢𑀺, 𑀆𑀲𑀦𑁆𑀦𑀢𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀢𑁆𑀣𑀧𑀸𑀡𑀺𑀓𑀸𑀧𑀤𑀸𑀤𑀬𑁄 𑀓𑀲𑀺𑀡𑀤𑁄𑀲𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀉𑀘𑁆𑀘𑀢𑀭𑁂 𑀦𑀺𑀲𑀺𑀦𑁆𑀦𑁂𑀦 𑀘 𑀕𑀻𑀯𑀁 𑀧𑀡𑀸𑀫𑁂𑀢𑁆𑀯𑀸 𑀑𑀮𑁄𑀓𑁂𑀢𑀩𑁆𑀩𑀁 𑀳𑁄𑀢𑀺, 𑀦𑀻𑀘𑀢𑀭𑁂 𑀚𑀡𑁆𑀡𑀼𑀓𑀸𑀦𑀺 𑀭𑀼𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀳𑀢𑁆𑀣𑀧𑀸𑀲𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀧𑀸𑀤𑀓𑁂 𑀧𑀻𑀞𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀲𑀬𑀦𑀁 𑀓𑁄𑀲𑀚𑁆𑀚𑀧𑀓𑁆𑀔𑀺𑀬𑀁, 𑀞𑀸𑀦𑀘𑀗𑁆𑀓𑀫𑀦𑀸𑀦𑀺 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀬𑀸𑀦𑀺, 𑀦𑀺𑀲𑀚𑁆𑀚𑀸 𑀧𑀦 𑀅𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀬𑀸, 𑀲𑀦𑁆𑀢𑁄 𑀇𑀭𑀺𑀬𑀸𑀧𑀣𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺, 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁂𑀦𑀸𑀓𑀸𑀭𑁂𑀦 𑀦𑀺𑀲𑀻𑀤𑀦𑁆𑀢𑀲𑁆𑀲 𑀦𑀺𑀲𑀚𑁆𑀚𑀸 𑀲𑀼𑀔𑀸 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸’’𑀢𑀺. 𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀦𑀺𑀲𑀺𑀦𑁆𑀦𑀲𑁆𑀲 𑀘𑀫𑁆𑀫𑀫𑀁𑀲𑀦𑀳𑀸𑀭𑀽𑀦𑀺 𑀦 𑀑𑀡𑀫𑀦𑁆𑀢𑀺, 𑀅𑀣𑀲𑁆𑀲 𑀬𑀸 𑀢𑁂𑀲𑀁 𑀑𑀡𑀫𑀦𑀧𑀘𑁆𑀘𑀬𑀸 𑀔𑀡𑁂 𑀔𑀡𑁂 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀲𑀼 𑀅𑀦𑀼𑀧𑁆𑀧𑀦𑁆𑀦𑀸𑀲𑀼 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀭𑀺𑀧𑀢𑀢𑀺. 𑀢𑀢𑁄 𑀘 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀧𑁆𑀧𑀢𑁆𑀢𑀺𑀬𑀸 𑀯𑀼𑀤𑁆𑀥𑀺𑀁 𑀨𑀸𑀢𑀺𑀁 𑀉𑀧𑀕𑀘𑁆𑀙𑀢𑀺. 𑀇𑀤𑀸𑀦𑀺 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀼𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀢𑁆𑀯𑀸 𑀧𑀭𑀺𑀫𑀼𑀔𑀁 𑀲𑀢𑀺’’𑀦𑁆𑀢𑀺, 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀲𑀢𑀺𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀪𑀺-𑀲𑀤𑁆𑀤𑁂𑀦 𑀳𑀺 𑀲𑀫𑀸𑀦𑀢𑁆𑀣𑁄 𑀇𑀥 𑀧𑀭𑀺-𑀲𑀤𑁆𑀤𑁄, 𑀅𑀣 𑀯𑀸 𑀲𑀫𑀻𑀧𑀢𑁆𑀣𑁂𑀦 𑀧𑀭𑀺-𑀲𑀤𑁆𑀤𑁂𑀦 𑀫𑀼𑀔𑀲𑁆𑀲 𑀲𑀫𑀻𑀧𑁂 𑀲𑀢𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋 ‘‘𑀅𑀬𑀁 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺 𑀲𑀼𑀧𑀝𑁆𑀞𑀺𑀢𑀸 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 (𑀯𑀺𑀪. 𑁫𑁩𑁭). 𑀅𑀣 𑀯𑀸 ‘‘𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄, 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀲𑀢𑀻𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁄. 𑀢𑁂𑀦 𑀯𑀼𑀘𑁆𑀘𑀢𑀺 ‘𑀧𑀭𑀺𑀫𑀼𑀔𑀁 𑀲𑀢𑀺’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁬𑁪) 𑀯𑀘𑀦𑀢𑁄 ‘‘𑀧𑀭𑀺𑀡𑀸𑀬𑀺𑀓𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀭𑀺-𑀲𑀤𑁆𑀤𑁄 𑀧𑀭𑀺𑀕𑁆𑀕𑀳𑀝𑁆𑀞𑁄, ‘‘𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀫𑀼𑀔-𑀲𑀤𑁆𑀤𑁄 𑀦𑀺𑀬𑁆𑀬𑀸𑀦𑀝𑁆𑀞𑁄𑀢𑀺 𑀓𑀢𑁆𑀯𑀸 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀲𑀢𑀺𑀁 𑀓𑀢𑁆𑀯𑀸 𑀲𑀩𑁆𑀩𑀣𑀸 𑀕𑀳𑀺𑀢𑀸𑀲𑀫𑁆𑀫𑁄𑀲𑀁 𑀧𑀭𑀺𑀘𑁆𑀘𑀢𑁆𑀢𑀲𑀫𑁆𑀫𑁄𑀲𑀁 𑀲𑀢𑀺𑀦𑁂𑀧𑀓𑁆𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁫𑁩-𑁫. 𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀤𑀺𑀲𑁆𑀯𑀸𑀢𑀺 ‘‘𑀓𑀸𑀫𑀸 𑀦𑀸𑀫𑁂𑀢𑁂 𑀅𑀝𑁆𑀞𑀺𑀓𑀗𑁆𑀔𑀮𑀺𑀓𑀽𑀧𑀫𑀸 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄𑀢𑀺 𑀦𑁂𑀓𑁆𑀔𑀫𑁆𑀫𑀁 𑀔𑁂𑀫𑀢𑁄 𑀤𑀺𑀲𑁆𑀯𑀸 𑀓𑀸𑀫𑀦𑀺𑀲𑁆𑀲𑀭𑀡𑀁 𑀲𑀩𑁆𑀩𑀤𑀼𑀓𑁆𑀔𑀲𑀫𑀢𑀺𑀓𑁆𑀓𑀫𑀲𑁆𑀲 𑀉𑀧𑀸𑀬𑀪𑀽𑀢𑀁 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀏𑀯𑀁 𑀦𑁂𑀓𑁆𑀔𑀫𑁆𑀫𑀲𑀗𑁆𑀔𑀸𑀢𑀁 𑀲𑀉𑀧𑀘𑀸𑀭𑀚𑁆𑀛𑀸𑀦𑀁, 𑀦𑀺𑀩𑁆𑀩𑀸𑀦𑀁, 𑀯𑀺𑀧𑀲𑁆𑀲𑀦𑀁, 𑀲𑀩𑁆𑀩𑁂𑀧𑀺 𑀯𑀸 𑀓𑀼𑀲𑀮𑀥𑀫𑁆𑀫𑁂 𑀔𑁂𑀫𑀢𑁄 𑀦𑀺𑀩𑁆𑀪𑀬𑀢𑁄 𑀤𑀺𑀲𑁆𑀯𑀸, 𑀢𑀢𑁆𑀣 𑀚𑀸𑀢𑀸𑀪𑀺𑀮𑀸𑀲𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀫𑀁…𑀧𑁂… 𑀭𑀢𑀦𑀢𑁆𑀢𑀬𑁂𑀢𑀺 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑁂 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀩𑀮𑀯𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀚𑀦𑀬𑀺𑀢𑁆𑀯𑀸. 𑀪𑀸𑀕𑀻…𑀧𑁂… 𑀫𑀼𑀢𑁆𑀢𑀫𑀦𑁆𑀢𑀺 ‘‘𑀅𑀳𑀁 𑀇𑀫𑀸𑀬 𑀲𑀩𑁆𑀩𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀺𑀬𑀲𑀸𑀯𑀓𑁂𑀳𑀺 𑀧𑀝𑀺𑀧𑀦𑁆𑀦𑀸𑀬 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀯𑀺𑀯𑁂𑀓𑀸𑀤𑀺𑀧𑁆𑀧𑀯𑀺𑀯𑁂𑀓𑀚𑀲𑁆𑀲 𑀲𑀼𑀔𑀲𑁆𑀲 𑀅𑀤𑁆𑀥𑀸 𑀏𑀓𑀦𑁆𑀢𑁂𑀦 𑀪𑀸𑀕𑀻 𑀅𑀲𑁆𑀲𑀁, 𑀮𑀸𑀪𑀻 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀧𑀝𑀺𑀧𑀢𑁆𑀢𑀺𑀬𑀁 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦 𑀢𑀩𑁆𑀩𑀺𑀲𑀬𑀁 𑀉𑀢𑁆𑀢𑀫𑀁 𑀫𑀳𑀦𑁆𑀢𑀁 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸. 𑀆𑀓𑀸𑀭𑁂𑀦 𑀲𑀫𑁂𑀦𑁂𑀯𑀸𑀢𑀺 𑀅𑀢𑀺𑀉𑀫𑁆𑀫𑀻𑀮𑀺𑀢𑀅𑀢𑀺𑀫𑀦𑁆𑀤𑀸𑀮𑁄𑀘𑀦𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀦𑀸𑀢𑀺𑀉𑀫𑁆𑀫𑀻𑀮𑀺𑀢𑀦𑀸𑀢𑀺𑀫𑀦𑁆𑀤𑀸𑀮𑁄𑀘𑀦𑀲𑀗𑁆𑀔𑀸𑀢𑁂𑀦 𑀲𑀫𑁂𑀦 𑀆𑀮𑁄𑀘𑀦𑀸𑀓𑀸𑀭𑁂𑀦. 𑀅𑀢𑀺𑀉𑀫𑁆𑀫𑀻𑀮𑀬𑀢𑁄 𑀳𑀺 𑀅𑀢𑀺𑀲𑀼𑀔𑀼𑀫𑀁, 𑀅𑀯𑀺𑀪𑀽𑀢𑀜𑁆𑀘 𑀭𑀽𑀧𑀕𑀢𑀁 𑀉𑀧𑀦𑀺𑀚𑁆𑀛𑀸𑀬𑀢𑁄 𑀯𑀺𑀬 𑀘𑀓𑁆𑀔𑀼 𑀓𑀺𑀮𑀫𑀢𑀺, 𑀅𑀢𑁆𑀢𑀦𑁄 𑀲𑀪𑀸𑀯𑀯𑀺𑀪𑀸𑀯𑀦𑀢𑁄 𑀘 𑀫𑀡𑁆𑀟𑀮𑀁 𑀅𑀢𑀺𑀯𑀺𑀪𑀽𑀢𑀁 𑀳𑁄𑀢𑀺, 𑀢𑀣𑀸 𑀯𑀡𑁆𑀡𑀢𑁄, 𑀮𑀓𑁆𑀔𑀡𑀢𑁄 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬, 𑀢𑁂𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀅𑀢𑀺𑀫𑀦𑁆𑀤𑀁 𑀉𑀫𑁆𑀫𑀻𑀮𑀬𑀢𑁄 𑀘 𑀕𑀚𑀦𑀺𑀫𑀻𑀮𑀓𑁂𑀦 𑀧𑁂𑀓𑁆𑀔𑀦𑁆𑀢𑀲𑁆𑀲 𑀯𑀺𑀬 𑀭𑀽𑀧𑀕𑀢𑀁 𑀫𑀡𑁆𑀟𑀮𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺. 𑀤𑀲𑁆𑀲𑀦𑁂 𑀫𑀦𑁆𑀤𑀩𑁆𑀬𑀸𑀧𑀸𑀭𑀢𑀸𑀬 𑀓𑁄𑀲𑀚𑁆𑀚𑀧𑀸𑀢𑀢𑁄 𑀘𑀺𑀢𑁆𑀢𑀜𑁆𑀘 𑀮𑀻𑀦𑀁 𑀳𑁄𑀢𑀺, 𑀏𑀯𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀆𑀤𑀸𑀲𑀢𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀦 𑀢𑀢𑁆𑀣 𑀅𑀢𑀺𑀕𑀸𑀴𑁆𑀳𑀁 𑀉𑀫𑁆𑀫𑀻𑀮𑀢𑀺, 𑀦 𑀅𑀢𑀺𑀫𑀦𑁆𑀤𑀁, 𑀅𑀣 𑀔𑁄 𑀲𑀫𑁂𑀦 𑀆𑀓𑀸𑀭𑁂𑀦 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯 𑀦𑀸𑀢𑀺𑀉𑀫𑁆𑀫𑀻𑀮𑀦𑀸𑀤𑀺𑀦𑀸 𑀲𑀫𑁂𑀦 𑀆𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑀦𑁆𑀢𑀺. 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀢𑀸𑀢𑀺 𑀧𑀣𑀯𑀻𑀓𑀲𑀺𑀡𑁂 𑀘𑀓𑁆𑀔𑀼𑀦𑀸 𑀕𑀳𑀺𑀢𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀸 𑀕𑀡𑁆𑀳𑀦𑁆𑀢𑁂𑀦.

𑁮𑁫𑁬-𑁭. 𑀇𑀤𑀸𑀦𑀺 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑁄𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀯𑀡𑁆𑀡𑁄 𑀧𑁂𑀓𑁆𑀔𑀺𑀢𑀩𑁆𑀩𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀯𑀡𑁆𑀡𑁄 𑀧𑁂𑀓𑁆𑀔𑀺𑀢𑀩𑁆𑀩𑁄 𑀲𑁄𑀢𑀺 𑀬𑁄 𑀢𑀢𑁆𑀣 𑀧𑀣𑀯𑀻𑀓𑀲𑀺𑀡𑁂 𑀅𑀭𑀼𑀡𑀯𑀡𑁆𑀡𑁄, 𑀲𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄 𑀯𑀡𑁆𑀡𑀯𑀲𑁂𑀦 𑀫𑀦𑀲𑀺𑀓𑀭𑁄𑀢𑁄 𑀯𑀡𑁆𑀡𑀓𑀲𑀺𑀡𑀪𑀸𑀯𑀽𑀧𑀕𑀫𑀦𑀢𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀦 𑀕𑀳𑀺𑀢𑀕𑁆𑀕𑀳𑀡𑀁 𑀦 𑀲𑀓𑁆𑀓𑀸 𑀯𑀸𑀭𑁂𑀢𑀼𑀁, 𑀢𑁂𑀦𑁂𑀯𑁂𑀢𑁆𑀣 ‘‘𑀦 𑀑𑀮𑁄𑀓𑁂𑀢𑀩𑁆𑀩𑁄’’𑀢𑀺 𑀅𑀯𑀢𑁆𑀯𑀸 ‘‘𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀫𑀦𑀲𑀸 𑀘𑀺𑀦𑁆𑀢𑀦𑀯𑀲𑁂𑀦 𑀧𑁂𑀓𑁆𑀔𑀦𑀕𑁆𑀕𑀳𑀡𑀁 𑀓𑀢𑀁. 𑀤𑀝𑁆𑀞𑀩𑁆𑀩𑀁 𑀦 𑀘 𑀮𑀓𑁆𑀔𑀡𑀦𑁆𑀢𑀺 𑀬𑀁 𑀢𑀢𑁆𑀣 𑀧𑀣𑀯𑀻𑀥𑀸𑀢𑀼𑀬𑀸 𑀣𑀤𑁆𑀥𑀮𑀓𑁆𑀔𑀡𑀁 𑀦 𑀫𑀦𑀲𑀺𑀓𑀸𑀢𑀩𑁆𑀩𑀁 𑀢𑀲𑁆𑀲 𑀫𑀦𑀲𑀺𑀓𑀸𑀭𑁂 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀯𑀡𑁆𑀡𑀁 𑀧𑀦 𑀅𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀤𑀺𑀲𑁆𑀯𑀸 𑀕𑀳𑁂𑀢𑀩𑁆𑀩𑀢𑁆𑀢𑀸 𑀧𑀦 𑀯𑀡𑁆𑀡𑀁 𑀅𑀫𑀼𑀜𑁆𑀘𑀺𑀢𑁆𑀯𑀸. 𑀉𑀲𑁆𑀲𑀤𑀲𑁆𑀲 𑀯𑀲𑁂𑀦 𑀳𑀺 𑀘𑀺𑀢𑁆𑀢𑀁 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑀲𑁆𑀫𑀺𑀦𑁆𑀢𑀺 𑀧𑀣𑀯𑀻𑀥𑀸𑀢𑀼𑀬𑀸 𑀲𑀢𑁆𑀢𑀺𑀢𑁄 𑀅𑀥𑀺𑀓𑀪𑀸𑀯𑁂𑀦 𑀲𑀲𑀫𑁆𑀪𑀸𑀭𑀧𑀣𑀯𑀺𑀬𑀸 ‘‘𑀧𑀣𑀯𑀻’’𑀢𑀺 𑀯𑁄𑀳𑀸𑀭𑁄, 𑀢𑀲𑁆𑀫𑀺𑀁 𑀲𑀲𑀫𑁆𑀪𑀸𑀭𑀧𑀣𑀯𑀺𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁂 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑁂 𑀆𑀤𑀸𑀲𑀢𑀮𑀕𑀢𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀺𑀬 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸. 𑀏𑀓𑀕𑁆𑀕𑀫𑀸𑀦𑀲𑁄𑀢𑀺 𑀧𑀼𑀦 𑀦𑀸𑀦𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀯𑀺𑀲𑀸𑀭𑁂𑀢𑁆𑀯𑀸 𑀏𑀓𑀕𑁆𑀕𑀫𑀸𑀦𑀲𑁄 𑀳𑀼𑀢𑁆𑀯𑀸. 𑀧𑀣𑀯𑀻 𑀧𑀣𑀯𑀺𑀘𑁆𑀘𑁂𑀯𑀁 𑀯𑀢𑁆𑀯𑀸𑀢𑀺 𑀏𑀢𑁆𑀣 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁂 𑀓𑀲𑁆𑀲𑀘𑀺 𑀯𑀘𑀻𑀪𑁂𑀤𑁄𑀧𑀺 𑀲𑀺𑀬𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄 𑀆𑀳.

𑁮𑁫𑁮. 𑀬𑀤𑀺 𑀯𑁄𑀳𑀸𑀭𑀫𑀢𑁆𑀢𑁂 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁, 𑀦𑀸𑀫𑀦𑁆𑀢𑀭𑀯𑀲𑁂𑀦 𑀧𑀣𑀯𑀻 𑀫𑀦𑀲𑀺𑀓𑀸𑀢𑀩𑁆𑀩𑀸 𑀪𑀯𑁂𑀬𑁆𑀬𑀸𑀢𑀺 𑀳𑁄𑀢𑀼, 𑀓𑁄 𑀤𑁄𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀣𑀯𑀻 𑀫𑁂𑀤𑀦𑀻’’𑀢𑀺𑀆𑀤𑀺. 𑀅𑀣 𑀯𑀸 𑀓𑀺𑀁 𑀧𑀣𑀯𑀻𑀦𑀸𑀫𑁂𑀬𑁂𑀯 𑀯𑀼𑀢𑁆𑀢𑁂 𑀪𑀸𑀯𑀦𑀸 𑀳𑁄𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀲𑁆𑀫𑀺𑀫𑁆𑀧𑀻𑀢𑀺 𑀆𑀳 ‘‘𑀧𑀣𑀯𑀻 𑀫𑁂𑀤𑀦𑀻’’𑀢𑀺𑀆𑀤𑀺. 𑀏𑀓𑀁 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀏𑀢𑁂𑀲𑀼 𑀬𑀁 𑀇𑀘𑁆𑀙𑀢𑀺, 𑀢𑀁 𑀅𑀢𑁆𑀢𑀦𑁄 𑀧𑀕𑀼𑀡𑀢𑀸𑀬 𑀯𑀸 𑀧𑀘𑀼𑀭𑀢𑀸𑀬 𑀯𑀸 𑀆𑀕𑀘𑁆𑀙𑀦𑁆𑀢𑀁 𑀏𑀓𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀯𑀝𑁆𑀝𑀢𑀺, 𑀅𑀧𑀺𑀘 ‘‘𑀧𑀣𑀯𑀻’’𑀢𑀺 𑀏𑀢𑀤𑁂𑀯 𑀦𑀸𑀫𑀁 𑀧𑀸𑀓𑀝𑀁, 𑀢𑀲𑁆𑀫𑀸 𑀧𑀸𑀓𑀝𑀯𑀲𑁂𑀦𑁂𑀯 ‘‘𑀧𑀣𑀯𑀻 𑀧𑀣𑀯𑀻’’𑀢𑀺 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀆𑀘𑀭𑀺𑀬𑀸.

𑁮𑁫𑁯-𑁬𑁦. 𑀉𑀫𑁆𑀫𑀻𑀮𑀺𑀢𑁆𑀯𑀸…𑀧𑁂… 𑀢𑀸𑀯 𑀲𑁄𑀢𑀺 𑀬𑀸𑀯 𑀯𑀓𑁆𑀔𑀫𑀸𑀦𑀸𑀓𑀸𑀭𑁂𑀦 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀓𑀺𑀜𑁆𑀘𑀺 𑀓𑀸𑀮𑀁 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑀺𑀢𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀯𑀲𑁂𑀦 𑀧𑀣𑀯𑀻𑀫𑀡𑁆𑀟𑀮𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀦 𑀓𑀺𑀜𑁆𑀘𑀺 𑀓𑀸𑀮𑀁 𑀘𑀓𑁆𑀔𑀽𑀦𑀺 𑀦𑀺𑀫𑀻𑀮𑀺𑀢𑁆𑀯𑀸𑀢𑀺 𑀏𑀯𑀁 𑀯𑀸𑀭𑀲𑀢𑀫𑁆𑀧𑀺 𑀯𑀸𑀭𑀲𑀳𑀲𑁆𑀲𑀫𑁆𑀧𑀺 𑀢𑀢𑁄 𑀪𑀺𑀬𑁆𑀬𑁄𑀧𑀺 𑀉𑀫𑁆𑀫𑀻𑀮𑀺𑀢𑁆𑀯𑀸 𑀲𑁄 𑀬𑁄𑀕𑀻 𑀆𑀯𑀚𑁆𑀚𑁂𑀬𑁆𑀬, 𑀬𑁂𑀦𑀸𑀓𑀸𑀭𑁂𑀦 𑀑𑀮𑁄𑀓𑁂𑀢𑁆𑀯𑀸 𑀕𑀳𑀺𑀢𑀁, 𑀢𑁂𑀦𑀸𑀓𑀸𑀭𑁂𑀦 𑀢𑀁 𑀲𑀫𑀦𑁆𑀦𑀸𑀳𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁮𑁬𑁧-𑁩. 𑀆𑀧𑀸𑀣𑀁 𑀢𑀼 𑀬𑀸𑀢𑀺 𑀘𑁂𑀢𑀺 𑀬𑀤𑀺 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀕𑁄𑀘𑀭𑀪𑀸𑀯𑀁 𑀉𑀧𑀕𑀘𑁆𑀙𑀢𑀺, 𑀢𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀢𑀤𑀸 𑀉𑀧𑁆𑀧𑀦𑁆𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀬𑀤𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂𑀧𑀺 𑀧𑀣𑀯𑀻𑀫𑀡𑁆𑀟𑀮𑀁 𑀑𑀮𑁄𑀓𑁂𑀢𑁆𑀯𑀸 𑀪𑀸𑀯𑁂𑀢𑀺, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀦 𑀲𑀺𑀬𑀸. 𑀲𑀫𑀻𑀧𑀝𑁆𑀞𑁂𑀦 𑀘 𑀦 𑀲𑀓𑁆𑀓𑀸 𑀅𑀦𑁄𑀮𑁄𑀓𑁂𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀲𑀻𑀤𑀺𑀢𑀩𑁆𑀩𑀁 𑀦𑁄 𑀘𑁂𑀯’’𑀦𑁆𑀢𑀺𑀆𑀤𑀺. 𑀬𑀣𑀸𑀲𑀼𑀔𑀁 𑀦𑀺𑀲𑀺𑀦𑁆𑀦𑁂𑀦, 𑀬𑀣𑀸𑀲𑀼𑀔𑀁 𑀯𑀸 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁬𑁪-𑁫. 𑀧𑀧𑀜𑁆𑀘…𑀧𑁂… 𑀥𑁄𑀯𑀦𑁂𑀢𑀺 𑀧𑀲𑁆𑀲𑀸𑀯𑀸𑀤𑀺𑀦𑀸 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀦 𑀆𑀕𑀫𑁆𑀫 𑀦𑀺𑀲𑀻𑀤𑀦𑁆𑀢𑁂𑀦 𑀧𑀸𑀤𑀸 𑀥𑁄𑀯𑀺𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀅𑀥𑁄𑀢𑀧𑀸𑀤𑁂𑀦 𑀳𑀺 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀢𑁄 𑀆𑀧𑀢𑁆𑀢𑀺 𑀳𑁄𑀢𑀺, 𑀔𑀡𑁂 𑀔𑀡𑁂 𑀧𑀸𑀤𑀥𑁄𑀯𑀦𑁂 𑀘 𑀧𑀧𑀜𑁆𑀘𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀧𑀭𑀺𑀳𑀸𑀭𑀢𑁆𑀣𑀁 𑀤𑁆𑀯𑁂 𑀉𑀧𑀸𑀳𑀦𑀸𑀬𑁂𑀯 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀸𑀯 𑀩𑀳𑀼𑀢𑀮𑀺𑀓𑀸 𑀲𑀤𑁆𑀤𑀫𑁆𑀧𑀺 𑀚𑀦𑁂𑀬𑁆𑀬𑀼𑀁, 𑀲𑀤𑁆𑀤𑁄 𑀘 𑀛𑀸𑀦𑀓𑀡𑁆𑀝𑀓𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀓𑀢𑀮𑀺𑀓𑀸’’𑀢𑀺. 𑀢𑀣𑀸 ‘‘𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀓𑀢𑁆𑀢𑀭𑀤𑀡𑁆𑀟𑁄 𑀘 𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁫𑁭) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀲𑀧𑁆𑀧𑀸𑀬𑁂𑀦 𑀓𑁂𑀦𑀘𑀻𑀢𑀺 𑀯𑀓𑁆𑀔𑀫𑀸𑀦𑁂𑀦 𑀆𑀯𑀸𑀲𑀸𑀤𑀺𑀅𑀲𑀧𑁆𑀧𑀸𑀬𑁂𑀲𑀼 𑀓𑁂𑀦𑀘𑀺𑀤𑁂𑀯 𑀅𑀲𑀧𑁆𑀧𑀸𑀬𑁂𑀦. 𑀢𑀁 𑀞𑀸𑀦𑀦𑁆𑀢𑀺 𑀓𑀲𑀺𑀡𑀫𑀡𑁆𑀟𑀮𑀲𑁆𑀲 𑀞𑀺𑀢𑀝𑁆𑀞𑀸𑀦𑀁. 𑀆𑀤𑀸𑀬 𑀢𑀁 𑀧𑀼𑀦𑀸𑀢𑀺 𑀬𑀣𑀸𑀚𑀸𑀢𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀼𑀦 𑀕𑀳𑁂𑀢𑁆𑀯𑀸, 𑀧𑀼𑀦 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁮𑁬𑁬-𑁭. 𑀧𑀻𑀞𑁂 𑀲𑀼𑀔𑀦𑀺𑀲𑀺𑀦𑁆𑀦𑁂𑀦𑀸𑀢𑀺 𑀧𑀼𑀦 𑀯𑀲𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀧𑀻𑀞𑁂 𑀲𑀼𑀔𑀦𑀺𑀲𑀺𑀦𑁆𑀦𑁂𑀦. 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀢𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀟𑁆𑀠𑁂𑀢𑀩𑁆𑀩𑀁. 𑀲𑀫𑀦𑁆𑀦𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀫𑀸 𑀆𑀯𑀚𑁆𑀚𑀺𑀢𑀩𑁆𑀩𑀁, 𑀲𑀫𑁆𑀫𑀸 𑀯𑀸 𑀅𑀦𑀼 𑀆𑀳𑀭𑀺𑀢𑀩𑁆𑀩𑀁. 𑀢𑀓𑁆𑀓𑀸𑀳𑀢𑀦𑁆𑀢𑀺 ‘‘𑀢𑀓𑁆𑀓𑀦𑀢𑁄 𑀢𑀓𑁆𑀓𑁄’’𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑁂𑀦 𑀪𑀸𑀯𑀦𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀓𑀺𑀘𑁆𑀘𑁂𑀦 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀦𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀆𑀳𑀢𑀁, 𑀧𑀭𑀺𑀬𑀸𑀳𑀢𑀜𑁆𑀘 𑀓𑀸𑀢𑀩𑁆𑀩𑀁, 𑀩𑀮𑀧𑁆𑀧𑀢𑁆𑀢𑀯𑀺𑀢𑀓𑁆𑀓𑁄 𑀫𑀦𑀲𑀺𑀓𑀸𑀭𑁄 𑀩𑀳𑀼𑀮𑀁 𑀧𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁮𑁬𑁮-𑁭𑁦. 𑀢𑀁 𑀇𑀘𑁆𑀙𑀢𑀻𑀢𑀺 𑀢𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀼𑀁 𑀇𑀘𑁆𑀙𑀢𑀺. 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀁 𑀢𑀓𑁆𑀓𑀸𑀳𑀢𑀁 𑀓𑀭𑁄𑀦𑁆𑀢𑀲𑁆𑀲. 𑀬𑀣𑀸 𑀪𑀸𑀯𑀦𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀆𑀯𑀳𑀢𑀺, 𑀏𑀯𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲, 𑀏𑀯𑀁 𑀓𑀭𑁄𑀢𑁄 𑀧𑀦 𑀬𑀤𑀸 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀯𑀺𑀲𑀤𑀸𑀦𑀺 𑀢𑀺𑀓𑁆𑀔𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀤𑀽𑀭𑀻𑀪𑀸𑀯𑁂𑀦 𑀲𑀸𑀢𑀺𑀲𑀬𑀁 𑀣𑀸𑀫𑀧𑁆𑀧𑀢𑁆𑀢𑁂𑀳𑀺 𑀲𑀢𑁆𑀢𑀳𑀺 𑀩𑀮𑁂𑀳𑀺 𑀮𑀤𑁆𑀥𑀼𑀧𑀢𑁆𑀣𑀫𑁆𑀪𑀸𑀦𑀺 𑀯𑀺𑀢𑀓𑁆𑀓𑀸𑀤𑀻𑀦𑀺 𑀓𑀸𑀫𑀸𑀯𑀘𑀭𑀸𑀦𑁂𑀯 𑀛𑀸𑀦𑀗𑁆𑀕𑀸𑀦𑀺 𑀩𑀳𑀽𑀦𑀺 𑀳𑀼𑀢𑁆𑀯𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀢𑁄 𑀘 𑀢𑁂𑀲𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀲𑀤𑁆𑀥𑀺𑀁 𑀢𑀤𑁂𑀓𑀝𑁆𑀞𑁂𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀤𑀽𑀭𑀻𑀪𑀯𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀓𑁆𑀔𑀫𑁆𑀪𑀦𑁆𑀢𑀺…𑀧𑁂… 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺𑀧𑀻’’𑀢𑀺. 𑀲𑀫𑀸𑀥𑀺𑀬𑀢𑀺…𑀧𑁂… 𑀬𑁄𑀕𑀺𑀦𑁄𑀢𑀺 𑀢𑀲𑁆𑀲 𑀬𑁄𑀕𑀺𑀦𑁄 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀉𑀧𑀘𑀸𑀭𑀚𑁆𑀛𑀸𑀦𑁂𑀦 𑀘𑀺𑀢𑁆𑀢𑀫𑁆𑀧𑀺 𑀲𑀫𑀸𑀥𑀺𑀬𑀢𑀺, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑀲𑁆𑀲 𑀢𑁂𑀦 𑀯𑀺𑀦𑀸 𑀅𑀪𑀸𑀯𑀢𑁄.

𑁮𑁭𑁧-𑁪. 𑀇𑀫𑀲𑁆𑀲𑀸𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲. 𑀧𑀼𑀭𑀺𑀫𑀲𑁆𑀲𑀸𑀢𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀲𑁆𑀲. 𑀣𑀯𑀺𑀓𑀸𑀢𑀺 𑀆𑀤𑀸𑀲𑀣𑀯𑀺𑀓𑀢𑁄. 𑀩𑀮𑀸𑀓𑀸𑀯𑀺𑀬 𑀢𑁄𑀬𑀤𑁂𑀢𑀺 𑀫𑁂𑀖𑀲𑀫𑀻𑀧𑁂 𑀩𑀮𑀸𑀓𑀸 𑀯𑀺𑀬. 𑀲𑀸 𑀳𑀺 𑀫𑁂𑀖𑀲𑁆𑀲 𑀦𑀻𑀮𑀢𑁆𑀢𑀸 𑀲𑀬𑀁 𑀅𑀢𑀺𑀧𑀭𑀺𑀲𑀼𑀤𑁆𑀥𑀸 𑀉𑀧𑀝𑁆𑀞𑀸𑀢𑀺, 𑀢𑀤𑀸 𑀢𑀁 𑀉𑀧𑀝𑁆𑀞𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀆𑀤𑀸𑀲𑀫𑀡𑁆𑀟𑀮𑀽𑀧𑀫𑀸𑀤𑀻𑀳𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀢𑁄 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲 𑀲𑀼𑀯𑀺𑀲𑀼𑀤𑁆𑀥𑀢𑀁, 𑀲𑀡𑁆𑀳𑀲𑀼𑀔𑀼𑀫𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀢𑀢𑁄𑀥𑀺𑀓𑀢𑀭’’𑀦𑁆𑀢𑀺. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂 𑀅𑀗𑁆𑀕𑀼𑀮𑀺𑀧𑀤𑀧𑀸𑀡𑀺𑀓𑀸𑀧𑀤𑀸𑀤𑀬𑁄 𑀓𑀲𑀺𑀡𑀤𑁄𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀇𑀤𑀁 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀢𑀢𑁄𑀧𑀺 𑀲𑀢𑀕𑀼𑀡𑀁 𑀲𑀳𑀲𑁆𑀲𑀕𑀼𑀡𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀦𑀼𑀲𑀡𑁆𑀞𑀸𑀦𑀯𑀦𑁆𑀢𑀦𑁆𑀢𑀺𑀆𑀤𑀺 𑀅𑀧𑀭𑀫𑀢𑁆𑀣𑀲𑀪𑀸𑀯𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀢𑀁 𑀏𑀤𑀺𑀲𑀁 𑀪𑀯𑁂𑀬𑁆𑀬, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀲𑀺𑀬𑀸, 𑀑𑀴𑀸𑀭𑀺𑀓𑀁 𑀲𑀫𑁆𑀫𑀲𑀦𑀽𑀧𑀕𑀁 𑀢𑀺𑀮𑀓𑁆𑀔𑀡𑀸𑀳𑀝𑀁, 𑀦 𑀧𑀦𑁂𑀢𑀁 𑀢𑀸𑀤𑀺𑀲𑀦𑁆𑀢𑀺. 𑀬𑀤𑀺 𑀧𑀦𑁂𑀢𑀁 𑀦 𑀲𑀡𑁆𑀞𑀸𑀦𑀸𑀤𑀺𑀯𑀦𑁆𑀢𑀁, 𑀓𑀣𑀁 𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑁄𑀢𑀺 𑀆𑀳 ‘‘𑀉𑀧𑀝𑁆𑀞𑀸…𑀧𑁂… 𑀫𑀬’’𑀦𑁆𑀢𑀺. 𑀢𑀢𑁆𑀣 𑀧𑀜𑁆𑀜𑀚𑀦𑁆𑀢𑀺 𑀪𑀸𑀯𑀦𑀸𑀫𑀬𑀁 𑀧𑀜𑁆𑀜𑀸𑀚𑀦𑀺𑀢𑀁, 𑀪𑀸𑀯𑀦𑀸𑀧𑀜𑁆𑀜𑀸𑀬 𑀲𑀜𑁆𑀚𑀸𑀦𑀦𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑀺 𑀅𑀲𑀪𑀸𑀯𑀥𑀫𑁆𑀫𑀲𑁆𑀲 𑀓𑀼𑀢𑁄𑀘𑀺𑀲𑀫𑀼𑀝𑁆𑀞𑀸𑀦𑀁 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀪𑀸𑀯𑀦𑀸𑀫𑀬𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢’’𑀦𑁆𑀢𑀺, 𑀓𑁂𑀯𑀮𑀁 𑀲𑀫𑀸𑀥𑀺𑀮𑀸𑀪𑀺𑀦𑁄 𑀪𑀸𑀯𑀦𑀸𑀯𑀺𑀲𑁂𑀲𑀚𑀦𑀺𑀢𑀁 𑀢𑀫𑁆𑀫𑀬𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢𑀫𑁂𑀯 𑀪𑀸𑀯𑀦𑀸𑀯𑀺𑀲𑁂𑀲𑀸𑀦𑀼𑀪𑀸𑀯𑁂𑀦 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄.

𑁮𑁭𑁫-𑁮. 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑁂𑀯 𑀦 𑀧𑀼𑀦 𑀢𑀤𑀢𑁆𑀣𑀁 𑀉𑀲𑁆𑀲𑀸𑀳𑁄 𑀓𑀸𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁂𑀬𑁂𑀯 𑀢𑀁𑀯𑀺𑀲𑀬𑀁 𑀉𑀧𑀘𑀸𑀭𑀚𑁆𑀛𑀸𑀦𑀁 𑀦𑀻𑀯𑀭𑀡𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀺𑀦𑁆𑀦𑀸𑀯𑀸𑀢𑀺 𑀅𑀯𑀲𑁂𑀲𑀸 𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀸 𑀘 𑀲𑀫𑁆𑀫𑀤𑁂𑀯 𑀦𑀺𑀲𑀺𑀦𑁆𑀦𑀸, 𑀉𑀧𑀲𑀦𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀉𑀧𑀘𑀸𑀭𑀲𑀫𑀸𑀥𑀺𑀦𑀸’’𑀢𑀺 𑀯𑀼𑀢𑁆𑀢𑁂 𑀇𑀢𑀭𑁄𑀧𑀺 𑀲𑀫𑀸𑀥𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀦𑁆𑀢𑀺 𑀢𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀓𑀸𑀭𑁂𑀳𑀺 𑀧𑀦 𑀤𑁆𑀯𑀻𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀻𑀢𑀺 𑀛𑀸𑀦𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁄, 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺 𑀘𑀸𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺. 𑀇𑀤𑀸𑀦𑀺 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀲𑀫𑀸𑀥𑀺𑀅𑀯𑀢𑁆𑀣𑀸𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀘𑀸𑀭𑀓𑁆𑀔𑀡𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀘𑀸𑀭𑀓𑁆𑀔𑀡𑁂𑀢𑀺 𑀉𑀧𑀘𑀸𑀭𑀪𑀽𑀫𑀺𑀬𑀁 𑀉𑀧𑀘𑀸𑀭𑀸𑀯𑀢𑁆𑀣𑀸𑀬𑀁. 𑀢𑀲𑁆𑀲 𑀧𑀝𑀺𑀮𑀸𑀪𑁂𑀢𑀺 𑀬𑀤𑀢𑁆𑀣𑀸𑀬 𑀅𑀬𑀁 𑀧𑀝𑀺𑀧𑀦𑁆𑀦𑁄, 𑀢𑀲𑁆𑀲 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀧𑀝𑀺𑀮𑀸𑀪𑁂 𑀅𑀥𑀺𑀕𑀫𑀸𑀯𑀢𑁆𑀣𑀸𑀬𑀁. 𑀓𑀣𑀁 𑀉𑀧𑀘𑀸𑀭𑀪𑀽𑀫𑀺𑀬𑀁 𑀲𑀫𑀸𑀥𑀺𑀬𑀢𑀺, 𑀓𑀣𑀜𑁆𑀘 𑀅𑀧𑁆𑀧𑀦𑀸𑀪𑀽𑀫𑀺𑀬𑀦𑁆𑀢𑀺 𑀆𑀳 ‘‘𑀦𑀻𑀯𑀸𑀭𑀡𑀧𑁆𑀧𑀳𑀸𑀦𑁂𑀦𑀸’’𑀢𑀺𑀆𑀤𑀺. 𑀉𑀧𑀘𑀸𑀭𑀓𑁆𑀔𑀡𑁂 𑀬𑀤𑀺𑀧𑀺 𑀛𑀸𑀦𑀗𑁆𑀕𑀸𑀦𑀺 𑀧𑀝𑀼𑀢𑀭𑀸𑀦𑀺 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀦𑀺 𑀦 𑀳𑁄𑀦𑁆𑀢𑀺, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑁂𑀦 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀧𑀝𑀺𑀮𑀸𑀪𑀪𑀽𑀫𑀺𑀬𑀫𑁆𑀧𑀺 𑀅𑀧𑁆𑀧𑀦𑀸𑀧𑀢𑁆𑀢𑀸𑀦𑀁 𑀛𑀸𑀦𑀗𑁆𑀕𑀸𑀦𑀁 𑀧𑀸𑀢𑀼𑀪𑀸𑀯𑁂𑀦 𑀲𑀫𑀸𑀥𑀺𑀬𑀢𑀻𑀢𑀺 𑀅𑀢𑁆𑀣𑁄.

𑁮𑁭𑁯-𑁮𑁦. 𑀅𑀗𑁆𑀕𑀸𑀦𑀺…𑀧𑁂… 𑀦 𑀘𑀸𑀢𑀺 𑀉𑀧𑀘𑀸𑀭𑀓𑁆𑀔𑀡𑁂 𑀅𑀗𑁆𑀕𑀸𑀦𑀺 𑀦 𑀘 𑀣𑀸𑀫𑀚𑀸𑀢𑀸𑀦𑀺 𑀦𑁂𑀯 𑀪𑀸𑀯𑀦𑀸𑀩𑀮𑀧𑁆𑀧𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀦𑀸𑀬𑀸𑀢𑀺 𑀅𑀧𑁆𑀧𑀦𑀓𑁆𑀔𑀡𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀗𑁆𑀕𑀸𑀦𑀺 𑀣𑀸𑀫𑀚𑀸𑀢𑀸𑀦𑀺 𑀚𑀸𑀬𑀭𑁂, 𑀢𑀲𑁆𑀫𑀸. 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀤𑀺𑀯𑀲𑀫𑁆𑀧𑀺 𑀧𑀯𑀢𑁆𑀢𑀢𑀻𑀢𑀺 𑀬𑀣𑀸 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀤𑀺𑀯𑀲𑀫𑁆𑀧𑀺 𑀢𑀺𑀝𑁆𑀞𑁂𑀬𑁆𑀬, 𑀏𑀯𑀫𑁂𑀯𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀛𑀸𑀦𑀘𑀺𑀢𑁆𑀢𑀁 𑀲𑀓𑀺𑀁 𑀪𑀯𑀗𑁆𑀕𑀯𑀸𑀭𑀁 𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀓𑁂𑀯𑀮𑀁 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀲𑀫𑁆𑀧𑀺 𑀓𑀼𑀲𑀮𑀚𑀯𑀦𑀧𑀝𑀺𑀧𑀸𑀝𑀺𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀧𑁆𑀧𑀦𑀸𑀧𑀢𑁆𑀢𑀁 𑀤𑀺𑀯𑀲𑀫𑁆𑀧𑀺 𑀧𑀯𑀢𑁆𑀢𑀢𑀻’’𑀢𑀺 𑀯𑀤𑀢𑀸 𑀉𑀧𑀘𑀸𑀭𑀓𑁆𑀔𑀡𑁂 𑀦 𑀢𑀣𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀢𑁆𑀣 𑀳𑀺 𑀅𑀗𑁆𑀕𑀸𑀦𑀁 𑀅𑀣𑀸𑀫𑀚𑀸𑀢𑀢𑁆𑀢𑀸 𑀬𑀣𑀸 𑀦𑀸𑀫 𑀤𑀳𑀭𑁄 𑀓𑀼𑀫𑀸𑀭𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀬𑀫𑀸𑀦𑁄 𑀧𑀼𑀦𑀧𑁆𑀧𑀼𑀦𑀁 𑀪𑀽𑀫𑀺𑀬𑀁 𑀧𑀢𑀢𑀺, 𑀏𑀯𑀫𑁂𑀯𑀁 𑀘𑀺𑀢𑁆𑀢𑀁 𑀓𑀸𑀮𑁂𑀦 𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀓𑀸𑀮𑁂𑀦 𑀪𑀯𑀗𑁆𑀕𑀁 𑀑𑀢𑀭𑀢𑀺.

𑁮𑁮𑁧-𑁪. 𑀢𑁂𑀦𑁂𑀯 𑀧𑀮𑁆𑀮𑀗𑁆𑀓𑁂𑀦𑀸𑀢𑀺 𑀬𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁄 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀅𑀥𑀺𑀕𑀘𑁆𑀙𑀺, 𑀢𑁂𑀦𑁂𑀯 𑀧𑀮𑁆𑀮𑀗𑁆𑀓𑁂𑀦 𑀓𑀭𑀡𑀪𑀽𑀢𑁂𑀦, 𑀳𑁂𑀢𑀼𑀪𑀽𑀢𑁂𑀦 𑀯𑀸 𑀢𑀁 𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸. 𑀉𑀧𑀘𑀸𑀭𑀪𑀽𑀫𑀺𑀬𑀜𑁆𑀳𑀺 𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀁 𑀬𑀼𑀢𑁆𑀢𑀁. 𑀘𑀓𑁆𑀓𑀯𑀢𑁆𑀢𑀺𑀬𑀕𑀩𑁆𑀪𑁄𑀯𑀸𑀢𑀺 𑀘𑀓𑁆𑀓𑀯𑀢𑁆𑀢𑀺 𑀪𑀯𑀺𑀢𑀼𑀁 𑀧𑀼𑀜𑁆𑀜𑀯𑀸 𑀕𑀩𑁆𑀪𑁄 𑀯𑀺𑀬. 𑀧𑀭𑀺𑀳𑀸𑀦𑀺 𑀦 𑀯𑀺𑀚𑁆𑀚𑀢𑀻𑀢𑀺 𑀮𑀤𑁆𑀥𑀽𑀧𑀘𑀸𑀭𑀚𑁆𑀛𑀸𑀦𑀲𑁆𑀲 𑀧𑀭𑀺𑀳𑀸𑀦𑀺 𑀦 𑀯𑀺𑀚𑁆𑀚𑀢𑀺. 𑀦𑀺𑀫𑀺𑀢𑁆𑀢𑁂 𑀳𑀺 𑀅𑀧𑀭𑀺𑀳𑀻𑀦𑁂 𑀢𑀤𑀸𑀭𑀫𑁆𑀫𑀡𑀁 𑀛𑀸𑀦𑀁 𑀅𑀧𑀭𑀺𑀳𑀻𑀦𑀫𑁂𑀯 𑀳𑁄𑀢𑀺, 𑀦𑀺𑀫𑀺𑀢𑁆𑀢𑁂 𑀧𑀦 𑀆𑀭𑀓𑁆𑀔𑀸𑀪𑀸𑀯𑁂𑀦 𑀯𑀺𑀦𑀝𑁆𑀞𑁂 𑀮𑀤𑁆𑀥𑀚𑁆𑀛𑀸𑀦𑀫𑁆𑀧𑀺 𑀯𑀺𑀦𑀲𑁆𑀲𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁆𑀢𑀸. 𑀢𑁂𑀦𑀸𑀳 ‘‘𑀆𑀭𑀓𑁆𑀔𑀡𑁂’’𑀢𑀺𑀆𑀤𑀺.

𑁮𑁮𑁫. 𑀆𑀯𑀸𑀲𑁄𑀢𑀺 𑀬𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀦𑁆𑀢𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀁 𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀁 𑀯𑀸 𑀯𑀺𑀦𑀲𑁆𑀲𑀢𑀺, 𑀅𑀦𑀼𑀧𑀝𑁆𑀞𑀺𑀢𑀸 𑀘 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀬𑀁 𑀅𑀲𑀧𑁆𑀧𑀸𑀬𑁄 𑀆𑀯𑀸𑀲𑁄, 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀩𑀳𑀽 𑀆𑀯𑀸𑀲𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀏𑀓𑁂𑀓𑀲𑁆𑀫𑀺𑀁 𑀢𑀻𑀡𑀺 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀯𑀲𑀺𑀢𑁆𑀯𑀸 𑀬𑀢𑁆𑀣 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀦 𑀳𑁄𑀢𑀺, 𑀢𑀁 𑀧𑀳𑀸𑀬 𑀢𑀩𑁆𑀩𑀺𑀧𑀭𑀻𑀢𑁂 𑀯𑀲𑀺𑀢𑀩𑁆𑀩𑀁. 𑀕𑁄𑀘𑀭𑁄𑀢𑀺 𑀕𑁄𑀘𑀭𑀕𑀸𑀫𑁄, 𑀲𑁄 𑀲𑁂𑀦𑀸𑀲𑀦𑀢𑁄 𑀅𑀢𑀺𑀤𑀽𑀭𑁂 𑀅𑀘𑁆𑀘𑀸𑀲𑀦𑁆𑀦𑁂 𑀧𑀼𑀩𑁆𑀩𑀤𑀺𑀲𑀸𑀬 𑀯𑀸 𑀧𑀘𑁆𑀙𑀺𑀫𑀤𑀺𑀲𑀸𑀬 𑀯𑀸 𑀅𑀲𑀼𑀮𑀪𑀪𑀺𑀓𑁆𑀔𑁄 𑀅𑀲𑀧𑁆𑀧𑀸𑀬𑁄. 𑀪𑀲𑁆𑀲𑀦𑁆𑀢𑀺 𑀤𑁆𑀯𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀸𑀧𑀭𑀺𑀬𑀸𑀧𑀦𑁆𑀦𑀸 𑀅𑀲𑀧𑁆𑀧𑀸𑀬𑀓𑀣𑀸. 𑀲𑀸 𑀳𑀺𑀲𑁆𑀲 𑀦𑀺𑀫𑀺𑀢𑁆𑀢𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀧𑀼𑀕𑁆𑀕𑀮𑁄𑀢𑀺 𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁄, 𑀲𑀻𑀮𑀸𑀤𑀺𑀕𑀼𑀡𑀯𑀺𑀭𑀳𑀺𑀢𑁄 𑀧𑀼𑀕𑁆𑀕𑀮𑁄, 𑀬𑀁 𑀦𑀺𑀲𑁆𑀲𑀸𑀬 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑀁 𑀯𑀸 𑀣𑀺𑀭𑀁 𑀦 𑀳𑁄𑀢𑀺, 𑀏𑀯𑀭𑀽𑀧𑁄. 𑀲𑁄 𑀳𑀺 𑀢𑀁 𑀓𑀤𑁆𑀤𑀫𑁄𑀤𑀓𑀫𑀺𑀯 𑀅𑀘𑁆𑀙𑀁 𑀉𑀤𑀓𑀁 𑀫𑀮𑀻𑀦𑀫𑁂𑀯 𑀓𑀭𑁄𑀢𑀺. 𑀪𑁄𑀚𑀦𑀁 𑀧𑀦 𑀓𑀲𑁆𑀲𑀘𑀺 𑀅𑀫𑁆𑀩𑀺𑀮𑀁, 𑀓𑀲𑁆𑀲𑀘𑀺 𑀫𑀥𑀼𑀭𑀁 𑀅𑀲𑀧𑁆𑀧𑀸𑀬𑀁 𑀳𑁄𑀢𑀺. 𑀉𑀢𑀼𑀧𑀺 𑀓𑀲𑁆𑀲𑀘𑀺 𑀲𑀻𑀢𑁄, 𑀓𑀲𑁆𑀲𑀘𑀺 𑀉𑀡𑁆𑀳𑁄. 𑀢𑀲𑁆𑀫𑀸 𑀬𑀁 𑀪𑁄𑀚𑀦𑀁 𑀯𑀸 𑀉𑀢𑀼𑀁 𑀯𑀸 𑀲𑁂𑀯𑀦𑁆𑀢𑀲𑁆𑀲 𑀨𑀸𑀲𑀼 𑀦 𑀳𑁄𑀢𑀺, 𑀢𑀁 𑀪𑁄𑀚𑀦𑀁 𑀲𑁄 𑀘 𑀉𑀢𑀼 𑀅𑀲𑀧𑁆𑀧𑀸𑀬𑁄. 𑀇𑀭𑀺𑀬𑀸𑀧𑀣𑁄𑀢𑀺 𑀞𑀸𑀦𑀘𑀗𑁆𑀓𑀫𑀦𑀸𑀤𑀻𑀲𑀼 𑀬𑁄 𑀇𑀫𑀲𑁆𑀲 𑀅𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀸𑀬, 𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲 𑀘 𑀣𑀺𑀭𑀪𑀸𑀯𑀸𑀬 𑀦 𑀳𑁄𑀢𑀺, 𑀅𑀬𑀁 𑀅𑀲𑀧𑁆𑀧𑀸𑀬𑁄 𑀇𑀭𑀺𑀬𑀸𑀧𑀣𑁄, 𑀢𑀲𑁆𑀫𑀸 𑀢𑀫𑁆𑀧𑀺 𑀆𑀯𑀸𑀲𑀁 𑀯𑀺𑀬 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀚𑁆𑀚𑁂𑀢𑀩𑁆𑀩𑀁.

𑁮𑁮𑁬. 𑀲𑀧𑁆𑀧𑀸𑀬𑁂 𑀲𑀢𑁆𑀢 𑀲𑁂𑀯𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀯𑀺𑀧𑀭𑀻𑀢𑀯𑀲𑁂𑀦 𑀲𑀧𑁆𑀧𑀸𑀬𑁂 𑀆𑀯𑀸𑀲𑀸𑀤𑀺𑀓𑁂 𑀲𑀢𑁆𑀢 𑀲𑁂𑀯𑁂𑀬𑁆𑀬. 𑀢𑀢𑁆𑀣 𑀪𑀲𑁆𑀲𑀲𑀧𑁆𑀧𑀸𑀬𑀁 𑀦𑀸𑀫 𑀤𑀲𑀓𑀣𑀸𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁, 𑀢𑀫𑁆𑀧𑀺 𑀫𑀢𑁆𑀢𑀸𑀬 𑀪𑀸𑀲𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀢𑁄𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀢𑁆𑀢 𑀅𑀲𑀧𑁆𑀧𑀸𑀬𑁂 𑀯𑀚𑁆𑀚𑁂𑀢𑁆𑀯𑀸 𑀲𑀢𑁆𑀢 𑀲𑀧𑁆𑀧𑀸𑀬𑁂 𑀲𑁂𑀯𑀦𑀯𑀲𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀸𑀲𑁂𑀯𑀦𑀩𑀳𑀼𑀮𑀲𑁆𑀲.

𑁮𑁮𑁮-𑁯. 𑀬𑁂𑀦 𑀯𑀺𑀦𑀸 𑀅𑀧𑁆𑀧𑀦𑀸𑀬 𑀓𑀼𑀲𑀮𑁄 𑀦 𑀳𑁄𑀢𑀺, 𑀲𑁄 𑀤𑀲𑀯𑀺𑀥𑁄 𑀯𑀺𑀥𑀺, 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁, 𑀢𑀦𑁆𑀦𑀺𑀩𑁆𑀩𑀢𑁆𑀢𑀁 𑀯𑀸 𑀜𑀸𑀡𑀁 𑀕𑀦𑁆𑀣𑀯𑀺𑀢𑁆𑀣𑀸𑀭𑀪𑀬𑁂𑀦 𑀇𑀥 𑀦 𑀤𑀲𑁆𑀲𑀺𑀢𑀁, 𑀅𑀢𑁆𑀣𑀺𑀓𑁂𑀦 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁧.𑁬𑁦) 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀮𑀤𑁆𑀥𑁂 𑀦𑀺𑀫𑀺𑀢𑁆𑀢𑀲𑁆𑀫𑀺𑀁, 𑀏𑀯𑀜𑁆𑀳𑀺 𑀲𑀫𑁆𑀧𑀸𑀤𑀬𑀢𑁄 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀅𑀧𑁆𑀧𑀦𑀸 𑀲𑀫𑁆𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁯𑁦-𑁨. 𑀲𑀸𑀢𑀺 𑀅𑀧𑁆𑀧𑀦𑀸. 𑀏𑀯𑀜𑁆𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄, 𑀬𑀲𑁆𑀫𑀸 𑀞𑀸𑀦𑀫𑁂𑀢𑀁 𑀦 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀁 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀮𑀻𑀦𑀼𑀤𑁆𑀥𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑀬𑀁 𑀉𑀧𑀥𑀸𑀭𑁂𑀦𑁆𑀢𑁄 𑀲𑀫𑀢𑀁 𑀯𑀻𑀭𑀺𑀬𑀲𑁆𑀲𑁂𑀯 𑀯𑀻𑀭𑀺𑀬𑀲𑁆𑀲 𑀲𑀫𑀸𑀥𑀺𑀦𑀸 𑀲𑀫𑀢𑀁𑀬𑁂𑀯 𑀬𑁄𑀚𑀬𑁂𑀣, 𑀓𑀣𑀁 𑀧𑀦 𑀬𑁄𑀚𑀬𑁂𑀣𑀸𑀢𑀺 𑀆𑀳 ‘‘𑀈𑀲𑀓𑀫𑁆𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀮𑀬𑀦𑁆𑀢𑀺 𑀮𑀻𑀦𑀪𑀸𑀯𑀁, 𑀲𑀗𑁆𑀓𑁄𑀘𑀦𑁆𑀢𑀺 𑀅𑀢𑁆𑀣𑁄. 𑀬𑀦𑁆𑀢𑀦𑁆𑀢𑀺 𑀕𑀘𑁆𑀙𑀦𑁆𑀢𑀁, 𑀧𑀕𑁆𑀕𑀡𑁆𑀳𑁂𑀣𑁂𑀯 𑀲𑀫𑀪𑀸𑀯𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀘𑁆𑀘𑀸𑀭𑀤𑁆𑀥𑀁 𑀦𑀺𑀲𑁂𑀥𑁂𑀢𑁆𑀯𑀸 𑀲𑀫𑀫𑁂𑀯 𑀧𑀯𑀢𑁆𑀢𑀬𑁂’’𑀢𑀺. 𑀢𑀁 𑀫𑀸𑀦𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁯𑁪-𑁯. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀯𑀲𑁂𑀦, 𑀧𑀝𑀺𑀧𑀦𑁆𑀦𑀪𑀸𑀯𑀦𑀸𑀫𑀸𑀦𑀲𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂𑀬𑁂𑀯 𑀞𑀧𑀦𑀯𑀲𑁂𑀦 𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁 𑀧𑀝𑀺𑀧𑀸𑀤𑀬𑀢𑁄 𑀢𑀲𑁆𑀲 𑀬𑁄𑀕𑀺𑀦𑁄. 𑀲𑀫𑀺𑀚𑁆𑀛𑀺𑀲𑁆𑀲𑀢𑀻𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀧𑀣𑀯𑀻𑀢𑀺 𑀪𑀸𑀯𑀦𑀸𑀯𑀲𑁂𑀦 𑀉𑀧𑀝𑁆𑀞𑀺𑀢𑀁 𑀢𑀤𑁂𑀯 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀚𑀯𑀦𑀸𑀦𑀻𑀢𑀺 𑀓𑀸𑀫𑀭𑀽𑀧𑀸𑀯𑀘𑀭𑀚𑀯𑀦𑀸𑀦𑀺. 𑀢𑁂𑀦𑀸𑀳 ‘‘𑀏𑀓𑀁 𑀢𑀼 𑀭𑀽𑀧𑀸𑀯𑀘𑀭𑀺𑀓𑀁 𑀪𑀯𑁂’’𑀢𑀺. 𑀅𑀜𑁆𑀜𑁂𑀳𑀻𑀢𑀺 𑀧𑀸𑀓𑀢𑀺𑀓𑁂𑀳𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺. 𑀩𑀮𑀯𑀢𑀭𑀸𑀢𑀺 𑀪𑀸𑀯𑀦𑀸𑀩𑀮𑁂𑀦 𑀧𑀝𑀼𑀢𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀅𑀘𑁆𑀘𑀦𑁆𑀢𑀩𑀮𑀯𑀦𑁆𑀢𑁄. 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀢𑁄𑀢𑀺 𑀧𑀭𑀺𑀓𑀫𑁆𑀫𑀢𑁆𑀢𑀸, 𑀉𑀧𑀘𑀸𑀭𑀢𑁆𑀢𑀸 𑀘. 𑀢𑀢𑁆𑀣 𑀧𑀭𑀺𑀓𑀫𑁆𑀫𑀢𑁆𑀢𑀸𑀢𑀺 𑀧𑀝𑀺𑀲𑀗𑁆𑀔𑀭𑀡𑀢𑁆𑀢𑀸. 𑀉𑀧𑀘𑀸𑀭𑀢𑁆𑀢𑀸𑀢𑀺 𑀬𑀣𑀸 𑀕𑀸𑀫𑀸𑀤𑀻𑀦𑀁 𑀆𑀲𑀦𑁆𑀦𑀤𑁂𑀲𑁄 ‘‘𑀕𑀸𑀫𑀽𑀧𑀘𑀸𑀭𑁄, 𑀦𑀕𑀭𑀽𑀧𑀘𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀧𑁆𑀧𑀦𑀸𑀬 𑀆𑀲𑀦𑁆𑀦𑀢𑁆𑀢𑀸 𑀲𑀫𑀻𑀧𑀘𑀸𑀭𑀺𑀢𑁆𑀢𑀸. 𑀉𑀧𑀘𑀸𑀭𑀸𑀦𑀺 𑀅𑀧𑁆𑀧𑀦𑀁 𑀉𑀧𑁂𑀘𑁆𑀘 𑀘𑀭𑀦𑁆𑀢𑀻𑀢𑀺 𑀓𑀢𑁆𑀯𑀸. 𑀅𑀧𑁆𑀧𑀦𑀸𑀬𑀸𑀦𑀼𑀮𑁄𑀫𑀢𑁆𑀢𑀸𑀢𑀺 𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀧𑀭𑀺𑀓𑀫𑁆𑀫𑀢𑁄𑀧𑀺 𑀮𑀳𑀼𑀓𑀁 𑀅𑀧𑁆𑀧𑀦𑀸𑀦𑀺𑀧𑁆𑀨𑀸𑀤𑀓𑀯𑀲𑁂𑀦, 𑀕𑀼𑀡𑀯𑀲𑁂𑀦 𑀯𑀸 𑀅𑀧𑁆𑀧𑀦𑀸𑀬 𑀅𑀦𑀼𑀓𑀽𑀮𑀢𑁆𑀢𑀸. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀲𑀜𑁆𑀜𑀺𑀢𑁂𑀲𑀼. 𑀲𑀩𑁆𑀩𑀦𑁆𑀢𑀺𑀫𑀁 𑀢𑀢𑀺𑀬𑀁, 𑀘𑀢𑀼𑀢𑁆𑀣𑀁 𑀯𑀸 𑀕𑁄𑀢𑁆𑀭𑀪𑀽𑀢𑀺 𑀧𑀯𑀼𑀘𑁆𑀘𑀢𑀺 𑀧𑀭𑀺𑀢𑁆𑀢𑀕𑁄𑀢𑁆𑀢𑀲𑁆𑀲 𑀅𑀪𑀺𑀪𑀯𑀦𑀢𑁄, 𑀫𑀳𑀕𑁆𑀕𑀢𑀕𑁄𑀢𑁆𑀢𑀲𑁆𑀲 𑀪𑀸𑀯𑀦𑀢𑁄 𑀘.

𑁯𑁦𑁦-𑁩. 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑁂𑀲𑀁 𑀲𑀩𑁆𑀩𑀸 𑀲𑀫𑀜𑁆𑀜𑀸𑀢𑀺 𑀧𑀞𑀫𑁂 𑀦𑀬𑁂 𑀕𑀳𑀺𑀢𑀸𑀕𑀳𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀕𑀳𑀺𑀢𑀸𑀕𑀳𑀡𑁂𑀦𑀸’’𑀢𑀺𑀆𑀤𑀺. 𑀏𑀓𑁂𑀓𑀲𑁆𑀲 𑀕𑀳𑀺𑀢𑀦𑀸𑀫𑀁 𑀇𑀢𑀭𑁂𑀲𑀁 𑀅𑀕𑁆𑀕𑀳𑀡𑀢𑁄, 𑀏𑀓𑁂𑀓𑀦𑀸𑀫𑀯𑀲𑁂𑀦 𑀕𑀳𑀺𑀢𑀲𑁆𑀲 𑀇𑀢𑀭𑀦𑀸𑀫𑀯𑀲𑁂𑀦 𑀅𑀕𑁆𑀕𑀳𑀡𑀢𑁄 𑀯𑀸 𑀦𑀸𑀦𑀸𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀫𑁂𑀯 𑀧𑀭𑀺𑀓𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀞𑀫𑀁 𑀉𑀧𑀘𑀸𑀭𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑁄, 𑀲𑁄 𑀧𑀦 𑀔𑀺𑀧𑁆𑀧𑀸𑀪𑀺𑀜𑁆𑀜𑀤𑀦𑁆𑀥𑀸𑀪𑀺𑀜𑁆𑀜𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀔𑀺𑀧𑁆𑀧𑀸𑀪𑀺𑀜𑁆𑀜𑀲𑁆𑀲 𑀳𑀺 𑀘𑀢𑀼𑀢𑁆𑀣𑀁 𑀅𑀧𑁆𑀧𑁂𑀢𑀺, 𑀤𑀦𑁆𑀥𑀸𑀪𑀺𑀜𑁆𑀜𑀲𑁆𑀲 𑀧𑀜𑁆𑀘𑀫𑀁. 𑀢𑀢𑁄 𑀧𑀭𑀦𑁆𑀢𑀺 𑀧𑀜𑁆𑀘𑀫𑀢𑁄 𑀧𑀭𑀁. 𑀢𑁂𑀦𑀸𑀳 ‘‘𑀙𑀝𑁆𑀞𑁂 𑀯𑀸’’𑀢𑀺𑀆𑀤𑀺. 𑀓𑀲𑁆𑀫𑀸 𑀦 𑀚𑀸𑀬𑀢𑀻𑀢𑀺 𑀆𑀳 ‘‘𑀆𑀲𑀦𑁆𑀦𑀢𑁆𑀢𑀸 𑀪𑀯𑀗𑁆𑀕𑀲𑁆𑀲𑀸’’𑀢𑀺. 𑀘𑀺𑀢𑁆𑀢𑀦𑀺𑀬𑀸𑀫𑀯𑀲𑁂𑀦 𑀳𑀺 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑁂𑀲𑀼 𑀲𑀢𑁆𑀢𑀲𑀼 𑀚𑀯𑀦𑁂𑀲𑀼 𑀙𑀝𑁆𑀞𑀲𑀢𑁆𑀢𑀫𑀚𑀯𑀦𑀯𑀸𑀭𑀕𑀴𑀦𑀝𑁆𑀞𑀸𑀦𑀪𑀽𑀢𑀢𑁆𑀢𑀸 𑀪𑀯𑀗𑁆𑀕𑀲𑁆𑀲 𑀆𑀲𑀦𑁆𑀦𑀁 𑀚𑀯𑀦𑀁 𑀧𑀢𑀢𑀺. 𑀢𑀸𑀯𑀤𑁂𑀢𑀺 𑀢𑀸𑀯𑀤𑁂𑀯. 𑀙𑀝𑁆𑀞𑀁, 𑀲𑀢𑁆𑀢𑀫𑀁 𑀯𑀸 𑀚𑀯𑀦𑀁 𑀧𑀢𑀦𑁆𑀢𑀁 𑀯𑀺𑀬 𑀳𑁄𑀢𑀺 𑀧𑀭𑀺𑀓𑁆𑀔𑀻𑀡𑀚𑀯𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯𑁦𑁪-𑁬. 𑀅𑀣 𑀓𑀺𑀫𑁂𑀢𑀁 𑀯𑀼𑀘𑁆𑀘𑀢𑀺 ‘‘𑀙𑀝𑁆𑀞𑁂 𑀲𑀢𑁆𑀢𑀫𑁂 𑀯𑀸𑀧𑀺 𑀅𑀧𑁆𑀧𑀦𑀸 𑀦 𑀚𑀸𑀬𑀢𑀻’’𑀢𑀺? 𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁄 𑀳𑀺 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁨) 𑀇𑀫𑀁 𑀲𑀼𑀢𑁆𑀢𑀁 𑀯𑀢𑁆𑀯𑀸 𑀬𑀣𑀸 𑀅𑀮𑀤𑁆𑀥𑀸𑀲𑁂𑀯𑀦𑀁 𑀧𑀞𑀫𑀚𑀯𑀦𑀁 𑀕𑁄𑀢𑁆𑀭𑀪𑀼𑀁 𑀦 𑀉𑀧𑁆𑀧𑀸𑀤𑁂𑀢𑀺, 𑀮𑀤𑁆𑀥𑀸𑀲𑁂𑀯𑀦𑀁 𑀧𑀦 𑀩𑀮𑀯𑀪𑀸𑀯𑀢𑁄 𑀤𑀼𑀢𑀺𑀬𑀁, 𑀢𑀢𑀺𑀬𑀁 𑀯𑀸 𑀕𑁄𑀢𑁆𑀭𑀪𑀼𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀩𑀮𑀯𑀪𑀸𑀯𑀢𑁄 𑀙𑀝𑁆𑀞𑀁, 𑀲𑀢𑁆𑀢𑀫𑀫𑁆𑀧𑀺 𑀯𑀸 𑀅𑀧𑁆𑀧𑁂𑀢𑀻𑀢𑀺 𑀙𑀝𑁆𑀞𑀁, 𑀲𑀢𑁆𑀢𑀫𑀫𑁆𑀧𑀺 𑀯𑀸 𑀅𑀧𑁆𑀧𑀦𑀸 𑀳𑁄𑀢𑀻𑀢𑀺 𑀯𑀤𑀢𑀻’’𑀢𑀺 𑀇𑀫𑀁 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬 𑀣𑁂𑀭𑀲𑁆𑀲 𑀢𑀁 𑀫𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀫𑀢𑀫𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀧𑀼𑀭𑀺𑀫𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀭𑀺𑀬𑀦𑁆𑀢𑁂 𑀞𑀸𑀢𑀼𑀁 𑀦𑁂𑀯 𑀲𑀓𑁆𑀓𑁄𑀢𑀻𑀢𑀺 𑀧𑀧𑀸𑀢𑁂 𑀏𑀯 𑀧𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀧𑀢𑀺𑀝𑁆𑀞𑀸𑀢𑀼𑀁 𑀅𑀧𑁆𑀧𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦 𑀘𑁂𑀢𑁆𑀣 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸’’𑀢𑀺𑀆𑀤𑀺𑀲𑀼𑀢𑁆𑀢𑀧𑀤𑀁 𑀲𑀸𑀥𑀓𑀁 𑀆𑀲𑁂𑀯𑀦𑀧𑀘𑁆𑀘𑀬𑀮𑀸𑀪𑀲𑁆𑀲 𑀩𑀮𑀯𑀪𑀸𑀯𑁂 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸. 𑀢𑀣𑀸 𑀳𑀺 𑀅𑀮𑀤𑁆𑀥𑀸𑀲𑁂𑀯𑀦𑀸𑀧𑀺 𑀧𑀞𑀫𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸 𑀳𑁄𑀢𑀺, 𑀮𑀤𑁆𑀥𑀸𑀲𑁂𑀯𑀦𑀸 𑀤𑀼𑀢𑀺𑀬𑀘𑁂𑀢𑀦𑀸 𑀬𑀸𑀯 𑀙𑀝𑁆𑀞𑀘𑁂𑀢𑀦𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀸, 𑀢𑀲𑁆𑀫𑀸 𑀮𑀤𑁆𑀥𑀸𑀲𑁂𑀯𑀦𑁂𑀧𑀺 𑀙𑀝𑁆𑀞𑀲𑀢𑁆𑀢𑀫𑁂 𑀅𑀧𑁆𑀧𑀦𑀸 𑀦 𑀳𑁄𑀢𑀺 𑀆𑀲𑀦𑁆𑀦𑀪𑀯𑀗𑁆𑀕𑀢𑀸𑀬 𑀤𑀼𑀩𑁆𑀩𑀮𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁 𑀓𑀣𑀁 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸 𑀆𑀦𑀦𑁆𑀢𑀭𑀺𑀬𑀸 𑀳𑁄𑀢𑀺? 𑀦𑀸𑀬𑀁 𑀯𑀺𑀲𑁂𑀲𑁄, 𑀆𑀲𑁂𑀯𑀦𑀧𑀘𑁆𑀘𑀬𑀮𑀸𑀪𑁂𑀦 𑀩𑀮𑀯𑀧𑁆𑀧𑀢𑁆𑀢𑀺𑀬𑀸, 𑀓𑀺𑀜𑁆𑀘𑀭𑀳𑀺 𑀓𑀺𑀭𑀺𑀬𑀸𑀯𑀢𑁆𑀣𑀸𑀯𑀺𑀲𑁂𑀲𑀢𑁄. 𑀓𑀺𑀭𑀺𑀬𑀸𑀯𑀢𑁆𑀣𑀸 𑀳𑀺 𑀆𑀭𑀫𑁆𑀪𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀢𑀺𑀯𑀺𑀥𑀸. 𑀢𑀢𑁆𑀣 𑀧𑀭𑀺𑀬𑁄𑀲𑀸𑀦𑀸𑀯𑀢𑁆𑀣𑀸𑀬 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀪𑀸𑀯𑁂𑀦 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀤𑀺𑀢𑀸 𑀳𑁄𑀢𑀺, 𑀦 𑀩𑀮𑀯𑀪𑀸𑀯𑁂𑀦𑀸𑀢𑀺 𑀆𑀘𑀭𑀺𑀬𑀸.

𑁯𑁦𑁭. 𑀏𑀓…𑀧𑁂… 𑀧𑀦𑀸𑀢𑀺 𑀅𑀬𑀁 𑀅𑀧𑁆𑀧𑀦𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑁂𑀯 𑀏𑀓𑀯𑀸𑀭𑀫𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀦 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀯𑀺𑀬 𑀬𑀣𑀺𑀘𑁆𑀙𑀓𑀁 𑀧𑀯𑀢𑁆𑀢𑀢𑀺. 𑀲𑀢𑁆𑀢𑀲𑀼 𑀳𑀺 𑀞𑀸𑀦𑁂𑀲𑀼 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀧𑀞𑀫𑀧𑁆𑀧𑀦𑀸𑀬𑀁, 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀼, 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼, 𑀫𑀕𑁆𑀕𑀸𑀦𑀦𑁆𑀢𑀭𑁂 𑀨𑀮𑁂, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀪𑀯𑀗𑁆𑀕𑀝𑁆𑀞𑀸𑀦𑁂 𑀦𑀺𑀭𑁄𑀥𑀲𑁆𑀲 𑀧𑀘𑁆𑀘𑀬𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺. 𑀏𑀢𑁂𑀲𑀼 𑀳𑀺 𑀓𑀢𑁆𑀣𑀘𑀺 𑀅𑀢𑀺𑀇𑀢𑁆𑀢𑀭𑀸, 𑀓𑀢𑁆𑀣𑀘𑀺 𑀅𑀧𑁆𑀧𑀫𑀸𑀡𑀸 𑀘𑀺𑀢𑁆𑀢𑀓𑁆𑀔𑀡𑀸 𑀳𑁄𑀦𑁆𑀢𑀺, 𑀓𑀢𑁆𑀣𑀘𑀺 𑀲𑀫𑁆𑀧𑀼𑀡𑁆𑀡𑀚𑀯𑀦𑀯𑀻𑀣𑀺 𑀅𑀤𑁆𑀥𑀸 𑀮𑀩𑁆𑀪𑀢𑀺. 𑀢𑀣𑀸 𑀳𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀨𑀮𑀁 𑀢𑀺𑀡𑁆𑀡𑀁 𑀉𑀧𑀭𑀺 𑀦 𑀳𑁄𑀢𑀺, 𑀦𑀺𑀭𑁄𑀥𑀲𑁆𑀲 𑀧𑀘𑁆𑀘𑀬𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀤𑁆𑀯𑀺𑀦𑁆𑀦𑀁 𑀉𑀧𑀭𑀺 𑀦 𑀳𑁄𑀢𑀺, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀪𑀯𑀗𑁆𑀕𑀲𑁆𑀲 𑀧𑀭𑀺𑀫𑀸𑀡𑀁 𑀦𑀢𑁆𑀣𑀺, 𑀲𑁂𑀲𑁂𑀲𑀼 𑀧𑀦 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀏𑀓𑀫𑁂𑀯 𑀘𑀺𑀢𑁆𑀢𑀦𑁆𑀢𑀺 𑀢𑀲𑁆𑀫𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀬𑁂𑀯 𑀅𑀧𑁆𑀧𑀦𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁯𑁦𑁮. 𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀁 𑀓𑀢𑁆𑀯𑀸. 𑀦𑀦𑀼 𑀘 𑀧𑀘𑁆𑀘𑀯𑁂𑀓𑁆𑀔𑀡𑀁 𑀆𑀯𑀚𑁆𑀚𑀦𑀸𑀤𑀻𑀳𑀺, 𑀦 𑀧𑀦 𑀢𑁂𑀦 𑀆𑀯𑀚𑁆𑀚𑀦𑀸𑀤𑀺, 𑀢𑀲𑁆𑀫𑀸 𑀓𑀣𑀁 𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑀁 𑀳𑁄𑀢𑀻𑀢𑀺 𑀬𑀼𑀚𑁆𑀚𑀢𑀺? 𑀦𑀸𑀬𑀁 𑀤𑁄𑀲𑁄 𑀪𑀯𑀦𑀓𑀺𑀭𑀺𑀬𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑀢𑁆𑀢𑀸. 𑀦 𑀳𑀺 𑀅𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑁂 𑀲𑀸 𑀳𑁄𑀢𑀺 𑀦𑀺𑀭𑁄𑀥𑀲𑁆𑀲 𑀧𑀘𑁆𑀘𑀬𑀪𑀽𑀢𑀛𑀸𑀦𑀦𑁆𑀢𑀭𑀫𑀺𑀯, 𑀲𑀢𑀺 𑀧𑀦 𑀧𑀘𑁆𑀘𑀯𑁂𑀓𑁆𑀔𑀡𑁂 𑀲𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀮𑀩𑁆𑀪𑀢𑀺. 𑀢𑀲𑁆𑀲𑀸 𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑀢𑀸𑀢𑀺 𑀦 𑀦 𑀬𑀼𑀚𑁆𑀚𑀢𑀺 ‘‘𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓’’𑀦𑁆𑀢𑀺 𑀯𑀘𑀦𑀁. 𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑀁 𑀆𑀯𑀚𑁆𑀚𑀦𑀦𑁆𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀆𑀯𑀚𑁆𑀚𑀦𑀜𑁆𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀓𑀸𑀭𑀡𑀁 𑀳𑁄𑀢𑀺.

𑁯𑁧𑁧-𑁩. 𑀦𑀸𑀦𑀸𑀯𑀺𑀲𑀬𑀮𑀼𑀤𑁆𑀥𑀲𑁆𑀲, 𑀇𑀢𑁄 𑀘𑀺𑀢𑁄 𑀘 𑀪𑀫𑀦𑁆𑀢𑀲𑁆𑀲 𑀘𑁂𑀢𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀸𑀥𑀸𑀦𑁂𑀯𑀸𑀢𑀺 𑀲𑀫𑀸𑀥𑀸𑀦𑀸 𑀏𑀯, 𑀲𑀫𑀸𑀥𑀸𑀦𑀓𑀭𑀡𑀢𑁄𑀢𑀺 𑀅𑀢𑁆𑀣𑁄. 𑀧𑀸𑀫𑁄𑀚𑁆𑀚𑀪𑀸𑀯𑀢𑁄𑀢𑀺 𑀧𑀸𑀫𑁄𑀚𑁆𑀚𑁂𑀦 𑀲𑀫𑀸𑀦𑀬𑁄𑀕𑀓𑁆𑀔𑀫𑀢𑀸𑀬 𑀢𑀲𑁆𑀲𑀸 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁆𑀢𑀸. 𑀅𑀣 𑀯𑀸 𑀩𑁆𑀬𑀸𑀧𑀸𑀤𑁂𑀦 𑀖𑀝𑁆𑀝𑀺𑀬𑀫𑀸𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀫𑀼𑀤𑀺𑀢𑀪𑀸𑀯𑀓𑀭𑀡𑀢𑁄 𑀧𑀻𑀢𑀺𑀬𑁂𑀯 ‘‘𑀧𑀸𑀫𑁄𑀚𑁆𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀪𑀸𑀯𑁄, 𑀢𑀲𑁆𑀫𑀸 𑀧𑀸𑀫𑁄𑀚𑁆𑀚𑀲𑀪𑀸𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀻𑀢𑀮𑀢𑁆𑀢𑀲𑀪𑀸𑀯𑀢𑁄𑀢𑀺 𑀩𑁆𑀬𑀸𑀧𑀸𑀤𑀕𑁆𑀕𑀺𑀦𑀸 𑀲𑀦𑁆𑀢𑀸𑀧𑀺𑀬𑀫𑀸𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀩𑁆𑀩𑀸𑀧𑀦𑀯𑀲𑁂𑀦 𑀲𑀻𑀢𑀮𑀢𑁆𑀢𑀲𑀪𑀸𑀯𑀢𑁆𑀢𑀸.

𑁯𑁧𑁪-𑁬. 𑀲𑀯𑀺𑀧𑁆𑀨𑀸𑀭𑀺𑀓𑀪𑀸𑀯𑁂𑀦𑀸𑀢𑀺 𑀬𑁄𑀦𑀺𑀲𑁄 𑀲𑀗𑁆𑀓𑀧𑁆𑀧𑀯𑀲𑁂𑀦 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀁 𑀫𑀤𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀲𑀯𑀺𑀧𑁆𑀨𑀸𑀭𑀺𑀓𑀲𑀪𑀸𑀯𑁂𑀦. 𑀦𑁂𑀓𑁆𑀔𑀫𑁆𑀫𑀸𑀤𑀺𑀧𑀯𑀢𑁆𑀢𑀺𑀢𑁄𑀢𑀺 𑀏𑀢𑁆𑀣 𑀦𑁂𑀓𑁆𑀔𑀫𑁆𑀫-𑀕𑁆𑀕𑀳𑀡𑁂𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀚𑁆𑀚𑀁 𑀧𑀞𑀫𑀚𑁆𑀛𑀸𑀦𑀁 𑀕𑀳𑀺𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀢𑀻𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀧𑀞𑀫𑀚𑁆𑀛𑀸𑀦𑀁 𑀕𑀳𑀺𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀯𑀽𑀧𑀲𑀦𑁆𑀢𑀪𑀸𑀯𑀲𑁆𑀲𑀸𑀢𑀺 𑀉𑀤𑁆𑀥𑀘𑁆𑀘𑀲𑁆𑀲 𑀲𑀭𑀽𑀧𑀓𑀣𑀦𑁂𑀦 𑀢𑀁𑀲𑀳𑀯𑀢𑁆𑀢𑀺𑀦𑁄 𑀅𑀦𑀼𑀢𑀸𑀧𑀲𑀪𑀸𑀯𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑀸𑀧𑀺 𑀲𑀭𑀽𑀧𑀁 𑀓𑀣𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀲𑀬𑀜𑁆𑀘𑁂𑀯𑀸𑀢𑀺𑀲𑀦𑁆𑀢𑀢𑁄𑀢𑀺 𑀉𑀤𑁆𑀥𑀘𑁆𑀘𑀧𑀝𑀺𑀧𑀓𑁆𑀔𑀲𑀪𑀸𑀯𑀯𑀘𑀦𑁂𑀦 𑀓𑀼𑀓𑁆𑀓𑀼𑀘𑁆𑀘𑀧𑀝𑀺𑀧𑀓𑁆𑀔𑁄 𑀧𑀻𑀢𑀺𑀪𑀸𑀯𑁄𑀧𑀺. 𑀢𑁂𑀦𑀸𑀳 ‘‘𑀲𑀼𑀔𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀤𑁆𑀯𑀬𑀲𑁆𑀲𑀸’’𑀢𑀺. 𑀫𑀢𑀺𑀬𑀸 𑀅𑀦𑀼𑀭𑀽𑀧𑀢𑁆𑀢𑀸𑀢𑀺 𑀧𑀜𑁆𑀜𑀸𑀬 𑀅𑀦𑀼𑀭𑀽𑀧𑀢𑁆𑀢𑀸. 𑀢𑀣𑀸 𑀘 𑀯𑀼𑀢𑁆𑀢𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 ‘‘𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀝𑀺𑀧𑀓𑁆𑀔𑁄 𑀆𑀭𑀫𑁆𑀫𑀡𑁂 𑀅𑀦𑀼𑀫𑀚𑁆𑀚𑀦𑀯𑀲𑁂𑀦 𑀧𑀜𑁆𑀜𑀸𑀧𑀢𑀺𑀭𑀽𑀧𑀓𑀲𑀪𑀸𑀯𑀢𑁆𑀢𑀸’’𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀧𑀻𑀢𑀺𑀬𑀸 𑀅𑀦𑀼𑀭𑀽𑀧𑀢𑁆𑀢𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀲 𑀘 𑀯𑀺𑀘𑀸𑀭𑁄 𑀅𑀦𑀼𑀫𑀚𑁆𑀚𑀦𑀲𑀪𑀸𑀯𑀯𑀦𑁆𑀢𑀢𑀸𑀬 𑀧𑀻𑀢𑀺 𑀯𑀺𑀬 𑀆𑀭𑀫𑁆𑀫𑀡𑁂 𑀅𑀦𑀺𑀯𑀢𑁆𑀢𑀦𑁆𑀢𑁄 𑀑𑀕𑀸𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀧𑀻𑀢𑀺𑀬𑀸 𑀅𑀦𑀼𑀭𑀽𑀧𑀢𑁆𑀢𑀸 𑀲𑀦𑁆𑀤𑁂𑀳𑀲𑀪𑀸𑀯𑀢𑁆𑀢𑀸 𑀆𑀭𑀫𑁆𑀫𑀡𑀁 𑀅𑀦𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀝𑀺𑀧𑀓𑁆𑀔𑁄𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺.

𑁯𑁧𑁭. 𑀢𑀺𑀯𑀺𑀥𑀓𑀮𑁆𑀬𑀸𑀡𑀦𑁆𑀢𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀢𑀸𑀲𑀗𑁆𑀔𑀸𑀢𑀸𑀳𑀺 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀆𑀤𑀻𑀳𑀺 𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀸𑀳𑀺 𑀬𑀼𑀢𑁆𑀢𑀁. 𑀬𑀣𑀸𑀳 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁫𑁮). 𑀢𑀢𑁆𑀣 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀯𑀲𑁂𑀦 𑀛𑀸𑀦𑀲𑁆𑀲 𑀧𑀭𑀺𑀧𑀦𑁆𑀣𑀢𑁄 𑀯𑀺𑀲𑀼𑀚𑁆𑀛𑀦𑀁 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀦𑀸𑀫, 𑀲𑀸 𑀧𑀦 𑀬𑀲𑁆𑀫𑀸 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀻’’𑀢𑀺. 𑀯𑀺𑀲𑁄𑀥𑁂𑀢𑀩𑁆𑀩𑀢𑀸𑀤𑀻𑀦𑀁 𑀅𑀪𑀸𑀯𑀢𑁄 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀸𑀬 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀅𑀦𑀼𑀩𑁆𑀭𑀽𑀳𑀦𑀸 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀦𑀸𑀫. 𑀲𑀸 𑀧𑀦𑀸𑀬𑀁 𑀯𑀺𑀲𑁂𑀲𑀢𑁄 𑀛𑀸𑀦𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀮𑀩𑁆𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂’’𑀢𑀺. 𑀢𑀢𑁆𑀣 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀲𑀸𑀥𑀓𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀧𑀭𑀺𑀬𑁄𑀤𑀧𑀦𑀸 𑀲𑀫𑁆𑀧𑀳𑀁𑀲𑀦𑀸 𑀦𑀸𑀫. 𑀲𑀸 𑀛𑀸𑀦𑀲𑁆𑀲 𑀑𑀲𑀸𑀦𑀓𑁆𑀔𑀡𑁂 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺.

𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 ‘‘𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀦𑀸𑀫 𑀲𑀲𑀫𑁆𑀪𑀸𑀭𑀺𑀓𑁄 𑀉𑀧𑀘𑀸𑀭𑁄, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀦𑀸𑀫 𑀅𑀧𑁆𑀧𑀦𑀸, 𑀲𑀫𑁆𑀧𑀳𑀁𑀲𑀦𑀸 𑀦𑀸𑀫 𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁭𑁫) 𑀏𑀯𑀁 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀆𑀤𑀺𑀓𑁂 𑀯𑀡𑁆𑀡𑁂𑀦𑁆𑀢𑀺, 𑀢𑀁 𑀅𑀬𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀲𑀢𑀺 𑀅𑀛𑀸𑀦𑀥𑀫𑁆𑀫𑁂𑀳𑀺 𑀛𑀸𑀦𑀥𑀫𑁆𑀫𑀲𑁆𑀲 𑀕𑀼𑀡𑀲𑀁𑀓𑀺𑀢𑁆𑀢𑀦𑀁 𑀦𑀸𑀫 𑀓𑀢𑀁 𑀳𑁄𑀢𑀺. 𑀦 𑀳𑀺 𑀪𑀽𑀫𑀦𑁆𑀢𑀭𑀁 𑀪𑀽𑀫𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀁 𑀳𑁄𑀢𑀺, 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀫𑁂𑀯 𑀆𑀕𑀫𑀦𑀯𑀲𑁂𑀦 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺, 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀆𑀤𑀻𑀳𑀺 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸𑀤𑀬𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 ‘‘𑀏𑀓𑀢𑁆𑀢𑀕𑀢𑀁 𑀘𑀺𑀢𑁆𑀢𑀁 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑀦𑁆𑀢𑀭𑀜𑁆𑀘𑁂𑀯 𑀳𑁄𑀢𑀺 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀺𑀢𑀜𑁆𑀘 𑀜𑀸𑀡𑁂𑀦 𑀲𑀫𑁆𑀧𑀳𑀁𑀲𑀺𑀢’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁫𑁮). 𑀏𑀢𑁆𑀣 𑀳𑀺 𑀏𑀓𑀢𑁆𑀢𑀕𑀢𑀁 𑀘𑀺𑀢𑁆𑀢𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀪𑀸𑀯𑁂𑀦, 𑀏𑀓𑀕𑁆𑀕𑀢𑀸𑀬 𑀘 𑀲𑀺𑀔𑀧𑁆𑀧𑀢𑁆𑀢𑀺𑀬𑀸 𑀢𑀤𑀦𑀼𑀕𑀼𑀡𑀏𑀓𑀢𑁆𑀢𑀕𑀢𑀁 𑀲𑀲𑀫𑁆𑀧𑀬𑀼𑀢𑁆𑀢𑀫𑀧𑁆𑀧𑀦𑀸𑀘𑀺𑀢𑁆𑀢𑀁, 𑀢𑀲𑁆𑀲𑁂𑀯 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑀦𑁆𑀤𑀦𑀸𑀤𑀺 𑀧𑀓𑁆𑀔𑀦𑁆𑀢𑀭𑀁 𑀯𑀼𑀘𑁆𑀘𑀢𑀺.

𑀤𑀲𑀮𑀓𑁆𑀔𑀡𑀲𑀁𑀬𑀼𑀢𑀦𑁆𑀢𑀺 ‘‘𑀆𑀤𑀺𑀫𑁆𑀳𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺, 𑀫𑀚𑁆𑀛𑁂 𑀢𑀻𑀡𑀺, 𑀧𑀭𑀺𑀬𑁄𑀲𑀸𑀦𑁂 𑀘𑀢𑁆𑀢𑀸𑀭𑀻’’𑀢𑀺 𑀏𑀯𑀁 𑀤𑀲𑀧𑀭𑀺𑀫𑀸𑀡𑁂𑀳𑀺 𑀅𑀧𑁆𑀧𑀦𑀸𑀬 𑀮𑀓𑁆𑀔𑀺𑀢𑀩𑁆𑀩𑀪𑀸𑀯𑁂𑀦 𑀮𑀓𑁆𑀔𑀡𑀲𑀗𑁆𑀔𑀸𑀢𑁂𑀳𑀺 𑀧𑀭𑀺𑀧𑀦𑁆𑀣𑀢𑁄 𑀯𑀺𑀲𑀼𑀤𑁆𑀥𑀺𑀛𑀸𑀦𑀸𑀤𑀻𑀳𑀺 𑀲𑀁𑀬𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺. 𑀆𑀤𑀺𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀆𑀤𑀺𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀬𑁄 𑀢𑀲𑁆𑀲 𑀧𑀭𑀺𑀧𑀦𑁆𑀣𑁄, 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺, 𑀬𑀜𑁆𑀘 𑀧𑀭𑀺𑀧𑀦𑁆𑀣𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀬𑀜𑁆𑀘 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀬𑀜𑁆𑀘 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀆𑀤𑀺𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀞𑀫𑀁 𑀛𑀸𑀦𑀁 𑀆𑀤𑀺𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘.

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀫𑀚𑁆𑀛𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀫𑀚𑁆𑀛𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀫𑀚𑁆𑀛𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀞𑀫𑀁 𑀛𑀸𑀦𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘.

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀧𑀭𑀺𑀬𑁄𑀲𑀸𑀦𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀧𑀭𑀺𑀬𑁄𑀲𑀸𑀦𑀲𑁆𑀲 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺. 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁, 𑀧𑀭𑀺𑀬𑁄𑀲𑀸𑀦𑀲𑁆𑀲 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀞𑀫𑀁 𑀛𑀸𑀦𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘𑀸’’𑀢𑀺 (𑀧𑀝𑀺. 𑀫. 𑁧.𑁧𑁫𑁮).

𑀏𑀢𑁆𑀣 𑀘 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀲𑁆𑀲 𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀧𑀭𑀺𑀧𑀦𑁆𑀣𑀢𑁄 𑀯𑀺𑀲𑀼𑀚𑁆𑀛𑀦𑀢𑁄 𑀢𑀤𑀸𑀕𑀫𑀦𑀯𑀲𑁂𑀦 𑀛𑀸𑀦𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀚𑁆𑀛𑀦𑀸𑀓𑀸𑀭𑀁 𑀲𑀦𑁆𑀥𑀸𑀬 ‘‘𑀬𑁄 𑀢𑀲𑁆𑀲 𑀧𑀭𑀺𑀧𑀦𑁆𑀣𑁄, 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁. 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀲𑁆𑀲𑁂𑀯 𑀢𑀣𑀸 𑀯𑀺𑀲𑀼𑀤𑁆𑀥𑀢𑁆𑀢𑀸 𑀆𑀯𑀭𑀡𑀯𑀺𑀭𑀳𑀺𑀢𑀁 𑀳𑀼𑀢𑁆𑀯𑀸 𑀏𑀓𑀢𑁆𑀢𑀦𑀬𑁂𑀦 𑀫𑀚𑁆𑀛𑀺𑀫𑀲𑀫𑀣𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀁 𑀲𑀫𑀧𑁆𑀧𑀯𑀢𑁆𑀢𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀧𑀝𑀺𑀧𑀚𑁆𑀚𑀦𑀁 𑀲𑀦𑁆𑀥𑀸𑀬 ‘‘𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀔𑀻𑀭𑀲𑁆𑀲𑁂𑀯 𑀤𑀥𑀺𑀪𑀸𑀯𑀸𑀪𑀸𑀯𑁂𑀧𑀺 𑀢𑀤𑁂𑀯 𑀔𑀻𑀭𑀁 𑀤𑀥𑀺𑀲𑀫𑁆𑀧𑀦𑁆𑀦𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀲𑁆𑀲 𑀅𑀧𑁆𑀧𑀦𑀸𑀪𑀸𑀯𑀸𑀪𑀸𑀯𑁂𑀧𑀺 𑀏𑀓𑀲𑀦𑁆𑀢𑀢𑀺𑀧𑀭𑀺𑀡𑀸𑀫𑀽𑀧𑀕𑀫𑀦𑀯𑀲𑁂𑀦 𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀮𑀻𑀦𑀼𑀤𑁆𑀥𑀘𑁆𑀘𑀲𑀗𑁆𑀔𑀸𑀢𑀅𑀦𑁆𑀢𑀤𑁆𑀯𑀬𑀸𑀦𑀼𑀧𑀕𑀫𑀦𑁂𑀦 𑀫𑀚𑁆𑀛𑀺𑀫𑀁 𑀧𑀘𑁆𑀘𑀦𑀻𑀓𑀯𑀽𑀧𑀲𑀫𑀦𑀢𑁄 𑀬𑀣𑀸 𑀲𑀫𑀣𑀲𑀗𑁆𑀔𑀸𑀢𑀁 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 𑀦𑀺𑀫𑀺𑀢𑁆𑀢𑀪𑀽𑀢𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀧𑀝𑀺𑀧𑀚𑁆𑀚𑀢𑀺 𑀦𑀸𑀫, 𑀢𑀣𑀸 𑀧𑀝𑀺𑀧𑀦𑁆𑀦𑀢𑁆𑀢𑀸 𑀧𑀦 𑀲𑀫𑀸𑀳𑀺𑀢𑀪𑀸𑀯𑀽𑀧𑀕𑀫𑀦𑁂𑀦 𑀏𑀓𑀢𑁆𑀢𑀦𑀬𑀯𑀲𑁂𑀦𑁂𑀯 𑀢𑀢𑁆𑀣 𑀧𑀓𑁆𑀔𑀦𑁆𑀤𑀦𑀁 𑀲𑀦𑁆𑀥𑀸𑀬 ‘‘𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀓𑀢𑁆𑀢𑀦𑀬𑀜𑁆𑀳𑀺 𑀯𑀺𑀦𑀸 𑀕𑁄𑀢𑁆𑀭𑀪𑀼𑀲𑁆𑀲 𑀅𑀧𑁆𑀧𑀦𑀸𑀧𑀓𑁆𑀔𑀦𑁆𑀤𑀦𑀁 𑀦𑀢𑁆𑀣𑀺. 𑀏𑀯𑀁 𑀢𑀸𑀯 𑀧𑀼𑀭𑀺𑀫𑀘𑀺𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑀸𑀓𑀸𑀭𑀲𑁆𑀲 𑀇𑀥 𑀦𑀺𑀩𑁆𑀩𑀢𑁆𑀢𑀺𑀬𑀸 𑀛𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀺𑀯𑀺𑀥𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀦𑀸𑀫. 𑀬𑀣𑀸 𑀳𑀺 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀬 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 ‘‘𑀯𑀺𑀧𑀲𑁆𑀲𑀦𑀸’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀺𑀲𑀼𑀤𑁆𑀥𑀲𑁆𑀲 𑀧𑀦 𑀢𑀲𑁆𑀲 𑀧𑀼𑀦 𑀯𑀺𑀲𑁄𑀥𑀦𑁂 𑀩𑁆𑀬𑀸𑀧𑀸𑀭𑀸𑀓𑀭𑀡𑀢𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀓𑀺𑀘𑁆𑀘𑀯𑀲𑁂𑀦 𑀧𑀼𑀕𑁆𑀕𑀮𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑁄 𑀯𑀼𑀢𑁆𑀢𑀁 ‘‘𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀻’’𑀢𑀺. 𑀅𑀧𑁆𑀧𑀦𑀸𑀲𑀫𑀸𑀥𑀺𑀪𑀸𑀯𑀽𑀧𑀕𑀫𑀦𑁂𑀦 𑀲𑀫𑀣𑀯𑀺𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀦 𑀲𑀫𑀸𑀥𑀸𑀦𑁂 𑀩𑁆𑀬𑀸𑀧𑀸𑀭𑀸𑀓𑀭𑀡𑀢𑁄 𑀯𑀼𑀢𑁆𑀢𑀁 ‘‘𑀲𑀫𑀣𑀧𑀝𑀺𑀧𑀦𑁆𑀦𑀁 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀻’’𑀢𑀺.

𑀏𑀯𑀁 𑀲𑀫𑀣𑀧𑀝𑀺𑀧𑀦𑁆𑀦𑀪𑀸𑀯𑀢𑁄𑀬𑁂𑀯 𑀧𑀼𑀩𑁆𑀩𑁂 ‘‘𑀓𑀣𑀁 𑀦𑀼 𑀔𑁄 𑀓𑀺𑀮𑁂𑀲𑀲𑀁𑀲𑀕𑁆𑀕𑀁 𑀧𑀚𑀳𑁂𑀬𑁆𑀬’’𑀦𑁆𑀢𑀺 𑀧𑀝𑀺𑀧𑀦𑁆𑀦𑀲𑁆𑀲 𑀇𑀤𑀸𑀦𑀺 𑀲𑀫𑀣𑀧𑀝𑀺𑀧𑀢𑁆𑀢𑀺𑀬𑀸 𑀢𑀲𑁆𑀲 𑀧𑀳𑀻𑀦𑀢𑁆𑀢𑀸 𑀧𑀸𑀧𑀫𑀺𑀢𑁆𑀢𑀲𑀁𑀲𑀕𑁆𑀕𑀁 𑀧𑀳𑀸𑀬 𑀏𑀓𑀲𑁆𑀲 𑀯𑀺𑀳𑀭𑀢𑁄 𑀲𑀧𑁆𑀧𑀼𑀭𑀺𑀲𑀲𑁆𑀲 𑀯𑀺𑀬 𑀏𑀓𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀲𑁆𑀲 𑀛𑀸𑀦𑀘𑀺𑀢𑁆𑀢𑀲𑁆𑀲 𑀧𑀼𑀦 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑁂 𑀩𑁆𑀬𑀸𑀧𑀸𑀭𑀸𑀓𑀭𑀡𑀁 𑀲𑀦𑁆𑀥𑀸𑀬 ‘‘𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀯𑀲𑁂𑀦 𑀛𑀸𑀦𑀁 𑀫𑀚𑁆𑀛𑁂 𑀢𑀺𑀯𑀺𑀥𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀧𑀼𑀩𑁆𑀩𑀪𑀸𑀕𑀧𑁆𑀧𑀯𑀢𑁆𑀢𑀧𑀸𑀭𑀺𑀳𑀸𑀭𑀺𑀬𑀜𑀸𑀡𑁂𑀦 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀓𑀭𑀥𑀫𑁆𑀫𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀬𑀣𑀸 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀁 𑀳𑁄𑀢𑀺, 𑀢𑀣𑀸 𑀪𑀸𑀯𑀦𑀸𑀬 𑀲𑀫𑁆𑀧𑀳𑀁𑀲𑀺𑀢𑀢𑁆𑀢𑀸 𑀯𑀺𑀲𑁄𑀥𑀺𑀢𑀢𑁆𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀯𑀲𑁂𑀦 𑀅𑀦𑀼𑀩𑁆𑀭𑀽𑀳𑀺𑀢𑁂 𑀘𑀺𑀢𑁆𑀢𑁂 𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀬𑀼𑀕𑀦𑀤𑁆𑀥𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀺𑀬𑀸 𑀧𑀯𑀢𑁆𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸’’𑀢𑀺. 𑀲𑀤𑁆𑀥𑀸𑀧𑀜𑁆𑀘𑀫𑀓𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀸𑀦𑀸𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀏𑀓𑀭𑀲𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸’’𑀢𑀺. 𑀢𑁂𑀲𑀁 𑀅𑀦𑀢𑀺𑀯𑀢𑁆𑀢𑀦𑀲𑀫𑁆𑀧𑀳𑀁𑀲𑀦𑀸𑀦𑀁 𑀅𑀦𑀼𑀭𑀽𑀧𑀯𑀲𑁂𑀦 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁 𑀳𑀼𑀢𑁆𑀯𑀸 𑀯𑀻𑀭𑀺𑀬𑀲𑁆𑀲 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀸 𑀧𑀦𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀧𑀯𑀢𑁆𑀢𑀸 𑀆𑀲𑁂𑀯𑀦𑀸, 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀞𑀺𑀢𑀺𑀧𑀭𑀺𑀬𑁄𑀲𑀸𑀦𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑀯𑀲𑁂𑀦 𑀧𑀯𑀢𑁆𑀢𑀸𑀓𑀸𑀭𑁄, 𑀢𑀁 𑀲𑀦𑁆𑀥𑀸𑀬 ‘‘𑀆𑀲𑁂𑀯𑀦𑀝𑁆𑀞𑁂𑀦 𑀲𑀫𑁆𑀧𑀳𑀁𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀪𑀸𑀯𑀲𑀸𑀥𑀦𑁂𑀦 𑀧𑀭𑀺𑀬𑁄𑀤𑀸𑀧𑀓𑀲𑁆𑀲 𑀜𑀸𑀡𑀲𑁆𑀲 𑀓𑀺𑀘𑁆𑀘𑀯𑀲𑁂𑀦 𑀛𑀸𑀦𑀧𑀭𑀺𑀬𑁄𑀲𑀸𑀦𑁂 𑀘𑀢𑀽𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑁆𑀧𑀦𑁆𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁯𑁧𑁯-𑁨𑁦. 𑀯𑀺𑀲𑁄𑀥𑁂𑀢𑁆𑀯𑀸𑀦 𑀧𑀸𑀧𑀓𑁂𑀢𑀺 𑀧𑀸𑀭𑀺𑀧𑀦𑁆𑀣𑀺𑀓𑁂 𑀥𑀫𑁆𑀫𑁂 𑀯𑀺𑀲𑁂𑀲𑁂𑀦 𑀲𑁄𑀥𑁂𑀢𑁆𑀯𑀸 𑀲𑀬𑀁 𑀧𑀳𑀸𑀦𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀅𑀢𑀺𑀲𑀬𑀧𑁆𑀧𑀳𑀸𑀦𑀯𑀲𑁂𑀦 𑀧𑀼𑀦 𑀲𑁄𑀥𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢𑀪𑀸𑀯𑀦𑀯𑁂𑀧𑀼𑀮𑁆𑀮𑀦𑁆𑀢𑀺 𑀲𑀫𑀸𑀥𑀺𑀪𑀸𑀯𑀦𑀸𑀬 𑀯𑀺𑀧𑀼𑀮𑀪𑀸𑀯𑀁. 𑀬𑀣𑀸 𑀳𑀺 𑀪𑀸𑀯𑀦𑀸𑀯𑀲𑁂𑀦 𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺, 𑀏𑀯𑀫𑀲𑁆𑀲 𑀪𑀸𑀯𑀦𑀸𑀯𑀲𑁂𑀦 𑀯𑀟𑁆𑀠𑀦𑀫𑁆𑀧𑀺, 𑀢𑀲𑁆𑀫𑀸 𑀏𑀓𑀗𑁆𑀕𑀼𑀮𑀸𑀤𑀺𑀯𑀲𑁂𑀦 𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑀬𑀦𑁆𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀩𑀳𑀼𑀮𑀻𑀓𑀸𑀭𑁂𑀦 𑀛𑀸𑀦𑀪𑀸𑀯𑀦𑀸𑀧𑀺 𑀯𑀼𑀟𑁆𑀠𑀺𑀁 𑀯𑀺𑀭𑀼𑀴𑁆𑀳𑀺𑀁, 𑀅𑀪𑀺𑀜𑁆𑀜𑀸𑀯𑀲𑁂𑀦 𑀘 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀪𑀸𑀯𑀦𑀯𑁂𑀧𑀼𑀮𑁆𑀮𑀁…𑀧𑁂… 𑀯𑀟𑁆𑀠𑁂𑀢𑀩𑁆𑀩’’𑀦𑁆𑀢𑀺.

𑁯𑁨𑁧-𑁩. 𑀯𑀟𑁆𑀠𑀦𑀸𑀪𑀽𑀫𑀺𑀬𑁄 𑀤𑁆𑀯𑁂𑀯𑀸𑀢𑀺 𑀯𑀟𑁆𑀠𑀦𑀝𑁆𑀞𑀸𑀦𑀸𑀦𑀺 𑀤𑁆𑀯𑁂𑀬𑁂𑀯. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀅𑀯𑀲𑁆𑀲𑀁 𑀏𑀓𑀢𑁆𑀢𑀁 𑀯𑀟𑁆𑀠𑁂𑀢𑀩𑁆𑀩𑀦𑁆𑀢𑀺 𑀆𑀘𑀭𑀺𑀬𑀸. 𑀢𑀢𑁆𑀭𑀸𑀢𑀺 𑀲𑀸𑀫𑀺𑀅𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀢𑀺 𑀯𑀸 𑀤𑁆𑀯𑀻𑀲𑀼 𑀪𑀽𑀫𑀻𑀲𑀼. 𑀓𑀲𑀺𑀢𑀩𑁆𑀩𑀁…𑀧𑁂… 𑀬𑀣𑀺𑀘𑁆𑀙𑀓𑀦𑁆𑀢𑀺 𑀬𑀣𑀸 𑀦𑀸𑀫 𑀓𑀲𑁆𑀲𑀓𑁄 𑀓𑀲𑀺𑀢𑀩𑁆𑀩𑀝𑁆𑀞𑀸𑀦𑀁 𑀦𑀗𑁆𑀕𑀮𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑀁 𑀓𑀲𑀺𑀢𑀼𑀁 𑀢𑀁 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀏𑀯𑀫𑁂𑀯𑀁 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀢𑀺𑀯𑀗𑁆𑀕𑀼𑀮𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀫𑀦𑀲𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀯𑀟𑁆𑀠𑁂𑀢𑀩𑁆𑀩𑀁. 𑀢𑀢𑁄 𑀯𑀺𑀤𑀢𑁆𑀣𑀺𑀭𑀢𑀦𑀧𑁆𑀧𑀫𑀼𑀔𑀧𑀭𑀺𑀯𑁂𑀡𑀯𑀺𑀳𑀸𑀭𑀲𑀻𑀫𑀸𑀦𑀁, 𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀚𑁆𑀚𑀲𑀫𑀼𑀤𑁆𑀤𑀲𑀻𑀫𑀸𑀦𑀜𑁆𑀘 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀟𑁆𑀠𑀬𑀦𑁆𑀢𑁂𑀦 𑀘𑀓𑁆𑀓𑀯𑀸𑀴𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀸 𑀢𑀢𑁄 𑀯𑀸𑀧𑀺 𑀉𑀢𑁆𑀢𑀭𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀟𑁆𑀠𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀺𑀘𑁆𑀙𑀓𑀁 𑀯𑀟𑁆𑀠𑁂𑀢𑀩𑁆𑀩’’𑀦𑁆𑀢𑀺. 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀦 𑀦 𑀯𑀟𑁆𑀠𑁂𑀢𑀩𑁆𑀩𑀁. 𑀦 𑀳𑀺 𑀅𑀧𑀭𑀺𑀘𑁆𑀙𑁂𑀤𑁂 𑀪𑀸𑀯𑀦𑀸 𑀧𑀯𑀢𑁆𑀢𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀲𑀦𑁆𑀢𑀓𑁂 𑀦𑁄 𑀅𑀦𑀦𑁆𑀢𑀓𑁂’’𑀢𑀺. 𑀏𑀯𑀁 𑀯𑀟𑁆𑀠𑀺𑀢𑀜𑁆𑀘 𑀢𑀁 𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑀺𑀢𑀯𑀟𑁆𑀠𑀺𑀢𑀝𑁆𑀞𑀸𑀦𑁂 𑀧𑀣𑀯𑀺𑀬𑀸 𑀉𑀓𑁆𑀓𑀽𑀮𑀯𑀺𑀓𑀽𑀮𑀦𑀤𑀻𑀯𑀺𑀤𑀼𑀕𑁆𑀕𑀧𑀩𑁆𑀩𑀢𑀯𑀺𑀲𑀫𑁂𑀲𑀼 𑀲𑀗𑁆𑀓𑀼𑀲𑀢𑀲𑀫𑀩𑁆𑀪𑀸𑀳𑀢𑀁 𑀉𑀲𑀪𑀘𑀫𑁆𑀫𑀁 𑀯𑀺𑀬 𑀳𑁄𑀢𑀺.

𑁯𑁨𑁪-𑁬. 𑀢𑀲𑁆𑀫𑀺𑀁 𑀧𑀦 𑀦𑀺𑀫𑀺𑀢𑁆𑀢𑁂 𑀧𑀢𑁆𑀢𑀧𑀞𑀫𑀚𑁆𑀛𑀸𑀦𑁂𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀇𑀤𑀸𑀦𑁂𑀯 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀅𑀥𑀺𑀕𑀫𑀸𑀬 𑀉𑀲𑁆𑀲𑀸𑀳𑀁 𑀅𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀧𑀞𑀫𑀚𑁆𑀛𑀸𑀦𑁂 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀲𑀼𑀘𑀺𑀡𑁆𑀡𑀯𑀲𑀺𑀦𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀢𑁆𑀢𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀘𑀺𑀡𑁆𑀡𑁄 𑀯𑀲𑁄 𑀯𑀲𑀺𑀪𑀸𑀯𑁄 𑀏𑀢𑁂𑀦𑀸𑀢𑀺 𑀲𑀼𑀘𑀺𑀡𑁆𑀡𑀯𑀲𑀺𑀦𑀸, 𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑀯𑀲𑀺𑀦𑀸𑀢𑀺 𑀅𑀢𑁆𑀣𑁄. 𑀓𑀢𑀫𑀸 𑀢𑀸 𑀯𑀲𑀺𑀬𑁄, 𑀬𑀸𑀲𑀁 𑀯𑀲𑁂𑀦𑀸𑀬𑀁 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀲𑀼𑀘𑀺𑀡𑁆𑀡𑀯𑀲𑀻𑀢𑀺 𑀆𑀳 ‘‘𑀆𑀯𑀚𑁆𑀚𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀆𑀯𑀚𑁆𑀚𑀦𑀦𑁆𑀢𑀺 𑀦 𑀆𑀯𑀚𑁆𑀚𑀦𑀫𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 𑀆𑀯𑀚𑁆𑀚𑀦𑀯𑀲𑀺𑀢𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀆𑀯𑀚𑁆𑀚𑀦𑀸𑀬 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀚𑀯𑀦𑁂𑀳𑀺𑀧𑀺 𑀪𑀯𑀺𑀢𑀩𑁆𑀩𑀁. 𑀢𑀸𑀦𑀺 𑀘 𑀔𑁄 𑀆𑀯𑀚𑁆𑀚𑀦𑀓𑀧𑁆𑀧𑀭𑀢𑀸𑀬 𑀘𑀺𑀢𑁆𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀬𑀣𑀸𑀯𑀚𑁆𑀚𑀺𑀢𑀯𑀲𑁂𑀦 𑀳𑁄𑀦𑁆𑀢𑀺. 𑀅𑀥𑀺𑀕𑀫𑁂𑀦 𑀲𑀫𑀁, 𑀲𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀫𑀸 𑀆𑀧𑀚𑁆𑀚𑀦𑀁 𑀧𑀝𑀺𑀧𑀚𑁆𑀚𑀦𑀁 𑀲𑀫𑀸𑀧𑀢𑁆𑀢𑀺. 𑀅𑀪𑀺𑀪𑀼𑀬𑁆𑀬 𑀞𑀧𑀦𑀁, 𑀅𑀥𑀺𑀝𑁆𑀞𑀸𑀦𑀁 𑀯𑀺𑀬𑀸𑀢𑀺 𑀯𑀸 𑀅𑀥𑀺𑀝𑁆𑀞𑀸𑀦𑀁. 𑀯𑀲𑀺𑀢𑀸𑀢𑀺 𑀏𑀢𑁂𑀲𑀼 𑀆𑀯𑀚𑁆𑀚𑀦𑀸𑀤𑀻𑀲𑀼 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺𑀬𑁄, 𑀬𑀢𑁆𑀣𑀺𑀘𑁆𑀙𑀓𑀁, 𑀬𑀤𑀺𑀘𑁆𑀙𑀓𑀁, 𑀬𑀸𑀯𑀢𑀺𑀘𑁆𑀙𑀓𑀁 𑀧𑀯𑀢𑁆𑀢𑀺𑀢𑀼𑀁 𑀲𑀫𑀢𑁆𑀣𑀪𑀸𑀯𑁄.

𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀞𑀫𑀁 𑀯𑀺𑀢𑀓𑁆𑀓𑀁 𑀆𑀯𑀚𑁆𑀚𑀬𑀢𑁄 𑀪𑀯𑀗𑁆𑀕𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀯𑀺𑀢𑀓𑁆𑀓𑀸𑀭𑀫𑁆𑀫𑀡𑀸𑀦𑁂𑀯 𑀘𑀢𑁆𑀢𑀸𑀭𑀺, 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺, 𑀢𑀢𑁄 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺, 𑀢𑀢𑁄 𑀧𑀼𑀦 𑀯𑀺𑀘𑀸𑀭𑀸𑀭𑀫𑁆𑀫𑀡𑀁 𑀆𑀯𑀚𑁆𑀚𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀚𑀯𑀦𑀸𑀦𑀻𑀢𑀺 𑀏𑀯𑀁 𑀧𑀜𑁆𑀘𑀲𑀼 𑀛𑀸𑀦𑀗𑁆𑀕𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀦𑀺𑀭𑀦𑁆𑀢𑀭𑀁 𑀘𑀺𑀢𑁆𑀢𑀁 𑀧𑁂𑀲𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑁄, 𑀢𑀢𑁆𑀣 𑀅𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀆𑀯𑀚𑁆𑀚𑀦𑀯𑀲𑀺𑀢𑀸 𑀦𑀸𑀫. 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀦𑀦𑁆𑀢𑀭𑀁 𑀤𑁆𑀯𑀻𑀲𑀼 𑀪𑀯𑀗𑁆𑀕𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀪𑀯𑀗𑁆𑀕𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑀢𑀸 𑀲𑀫𑀸𑀧𑀚𑁆𑀚𑀦𑀯𑀲𑀺𑀢𑀸 𑀦𑀸𑀫. 𑀅𑀬𑀜𑁆𑀘 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀸 𑀲𑀢𑁆𑀣𑀼 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀸𑀮𑀥𑀫𑁆𑀫𑀤𑁂𑀲𑀦𑀸𑀤𑀻𑀲𑀼 𑀮𑀩𑁆𑀪𑀢𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀬𑀓𑁆𑀔𑁂𑀦 𑀲𑀻𑀲𑁂 𑀧𑀳𑀸𑀭𑀤𑀸𑀦𑀲𑀫𑀬𑁂, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀦𑀦𑁆𑀤𑁄𑀧𑀦𑀦𑁆𑀤𑀤𑀫𑀦𑀲𑀫𑀬𑁂 𑀯𑀸 𑀮𑀩𑁆𑀪𑀢𑀺, 𑀅𑀜𑁆𑀜𑀢𑁆𑀣 𑀧𑀦 𑀢𑀢𑁄 𑀤𑀦𑁆𑀥𑀸𑀬𑁂𑀯, 𑀲𑁂𑀢𑀼 𑀯𑀺𑀬 𑀲𑀻𑀖𑀲𑁄𑀢𑀸𑀬 𑀦𑀤𑀺𑀬𑀸 𑀑𑀖𑀁 𑀪𑀯𑀗𑁆𑀕𑀯𑁂𑀕𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀛𑀸𑀦𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑀢𑀸, 𑀪𑀯𑀗𑁆𑀕𑀧𑀸𑀢𑀢𑁄 𑀭𑀓𑁆𑀔𑀡𑀬𑁄𑀕𑁆𑀬𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀺𑀢𑀸 𑀦𑀸𑀫. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀅𑀤𑀢𑁆𑀯𑀸 𑀛𑀸𑀦𑀢𑁄 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀺𑀢𑀸 𑀦𑀸𑀫.

𑀅𑀣 𑀯𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀢𑁄 𑀉𑀧𑀭𑀺 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀞𑀧𑀦𑀲𑀫𑀢𑁆𑀣𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀺𑀢𑀸 𑀦𑀸𑀫. 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀢𑁄 𑀅𑀦𑁆𑀢𑁄 𑀅𑀯𑀼𑀝𑁆𑀞𑀳𑀺𑀢𑁆𑀯𑀸 𑀬𑀣𑀸𑀓𑀸𑀮𑀯𑀲𑁂𑀦𑁂𑀯 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀺𑀢𑀸 𑀦𑀸𑀫. 𑀅𑀣 𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀢𑁄 𑀅𑀦𑀽𑀦𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑀢𑀸𑀯 𑀅𑀥𑀺𑀝𑁆𑀞𑀸𑀦𑀯𑀲𑀺𑀢𑀸 𑀦𑀸𑀫. 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲𑀧𑀺 𑀦𑀺𑀤𑁆𑀤𑀸𑀮𑀼𑀓𑀲𑁆𑀲 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀦𑀺𑀤𑁆𑀤𑁄𑀓𑁆𑀓𑀫𑀦𑀁 𑀯𑀺𑀬 𑀯𑀼𑀝𑁆𑀞𑀺𑀢𑀲𑀫𑀸𑀧𑀢𑁆𑀢𑀺𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀅𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀢𑀸, 𑀢𑀢𑁆𑀣 𑀆𑀮𑀬𑀸𑀓𑀭𑀡𑀬𑁄𑀕𑁆𑀬𑀢𑀸 𑀘 𑀯𑀼𑀝𑁆𑀞𑀸𑀦𑀯𑀲𑀺𑀢𑀸 𑀦𑀸𑀫.

𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀺𑀢𑀸 𑀧𑀦 𑀆𑀯𑀚𑁆𑀚𑀦𑀯𑀲𑀺𑀢𑀸𑀬 𑀏𑀯 𑀲𑀗𑁆𑀕𑀳𑀺𑀢𑀸. 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀸𑀦𑁂𑀯 𑀳𑀺 𑀢𑁂𑀲𑀁 𑀢𑁂𑀲𑀁 𑀛𑀸𑀦𑀗𑁆𑀕𑀸𑀦𑀁 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀧𑀯𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀬𑀤𑀕𑁆𑀕𑁂𑀦 𑀆𑀯𑀚𑁆𑀚𑀦𑀯𑀲𑀺𑀬𑀸 𑀲𑀺𑀤𑁆𑀥𑀺, 𑀢𑀤𑀕𑁆𑀕𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀺𑀢𑀸 𑀲𑀺𑀤𑁆𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀧𑀦 𑀛𑀸𑀦𑀗𑁆𑀕𑀸𑀦𑀁 𑀅𑀧𑀸𑀓𑀝𑀪𑀸𑀯𑁂𑀧𑀺 𑀢𑁂𑀲𑀼 𑀦𑀺𑀭𑀦𑁆𑀢𑀭𑀁 𑀆𑀯𑀚𑁆𑀚𑀦𑀸𑀬 𑀧𑀯𑀢𑁆𑀢𑀦𑀲𑀫𑀢𑁆𑀣𑀢𑀸 𑀆𑀯𑀚𑁆𑀚𑀦𑀯𑀲𑀺𑀢𑀸 𑀦𑀸𑀫, 𑀢𑁂𑀲𑀁 𑀬𑀣𑀸𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀚𑀯𑀦𑀧𑁆𑀧𑀯𑀢𑁆𑀢𑀦𑀲𑀫𑀢𑁆𑀣𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀺𑀢𑀸 𑀦𑀸𑀫. 𑀅𑀣 𑀯𑀸 𑀲𑀢𑀺𑀧𑀺 𑀲𑀢𑁆𑀢𑀦𑁆𑀦𑀁 𑀚𑀯𑀦𑀸𑀦𑀁 𑀧𑀯𑀢𑁆𑀢𑀺𑀬𑀁 𑀦𑀺𑀭𑀦𑁆𑀢𑀭𑀁 𑀆𑀯𑀚𑁆𑀚𑀦𑀲𑀫𑀢𑁆𑀣𑀢𑀸 𑀆𑀯𑀚𑁆𑀚𑀦𑀯𑀲𑀺𑀢𑀸 𑀦𑀸𑀫, 𑀯𑀲𑀺𑀢𑀸𑀩𑀮𑁂𑀦 𑀲𑀢𑁆𑀢𑀫𑀚𑀯𑀦𑀁 𑀅𑀧𑁆𑀧𑀢𑁆𑀯𑀸 𑀘𑀢𑀼𑀧𑀜𑁆𑀘𑀚𑀯𑀦𑁂𑀳𑁂𑀯 𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑀢𑁆𑀣𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀺𑀢𑀸 𑀦𑀸𑀫. 𑀅𑀣 𑀯𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀳𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁂𑀧𑀺 ‘‘𑀧𑀘𑁆𑀘𑀯𑁂𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀫𑁂𑀯 𑀪𑀯𑀗𑁆𑀕𑁂𑀲𑀼 𑀓𑀸𑀮𑀁 𑀅𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀻𑀖𑀫𑁂𑀯 𑀆𑀯𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑀢𑀸 𑀆𑀯𑀚𑁆𑀚𑀦𑀯𑀲𑀺𑀢𑀸 𑀦𑀸𑀫, 𑀯𑀲𑀺𑀢𑀸𑀩𑀮𑁂𑀦, 𑀧𑀘𑁆𑀘𑀯𑁂𑀓𑁆𑀔𑀡𑀩𑀮𑁂𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀳𑀺𑀧𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀺𑀢𑀸 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦𑁂𑀢𑀸 𑀬𑀣𑀸𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀦𑀸𑀤𑀺𑀦𑀸 𑀲𑀸𑀥𑁂𑀢𑀩𑁆𑀩𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀆𑀯𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺.

𑁯𑁨𑁭. 𑀇𑀫𑁂𑀲𑀼 𑀧𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀲𑀫𑀸𑀧𑀚𑁆𑀚𑀦𑀩𑀳𑀼𑀮𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀦 𑀧𑀘𑁆𑀘𑀯𑁂𑀓𑁆𑀔𑀡𑀩𑀳𑀼𑀮𑁂𑀦. 𑀧𑀘𑁆𑀘𑀯𑁂𑀓𑁆𑀔𑀡𑀩𑀳𑀼𑀮𑀲𑁆𑀲 𑀳𑀺 𑀛𑀸𑀦𑀗𑁆𑀕𑀸𑀦𑀺 𑀣𑀽𑀮𑀸𑀦𑀺 𑀤𑀼𑀩𑁆𑀩𑀮𑀸𑀦𑀺 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀅𑀣𑀲𑁆𑀲 𑀢𑀸𑀦𑀺 𑀏𑀯 𑀉𑀧𑀝𑁆𑀞𑀺𑀢𑀢𑁆𑀢𑀸 𑀉𑀧𑀭𑀺 𑀉𑀲𑁆𑀲𑀼𑀓𑁆𑀓𑀦𑀸𑀬 𑀧𑀘𑁆𑀘𑀬𑀢𑀁 𑀦𑀸𑀧𑀚𑁆𑀚𑀦𑁆𑀢𑀺, 𑀲𑁄 𑀅𑀧𑁆𑀧𑀕𑀼𑀡𑁂 𑀛𑀸𑀦𑁂 𑀉𑀲𑁆𑀲𑀼𑀓𑁆𑀓𑀫𑀸𑀦𑁄 𑀧𑀞𑀫𑀚𑁆𑀛𑀸𑀦𑀸𑀯 𑀧𑀭𑀺𑀳𑀸𑀬𑀢𑀺, 𑀦 𑀘 𑀲𑀓𑁆𑀓𑁄𑀢𑀺 𑀤𑀼𑀢𑀺𑀬𑀁 𑀅𑀥𑀺𑀕𑀦𑁆𑀢𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀞𑀫𑁂 𑀅𑀯𑀲𑀺𑀧𑁆𑀧𑀢𑁆𑀢𑁂’’𑀢𑀺𑀆𑀤𑀺. 𑀉𑀪𑀢𑁄 𑀪𑀝𑁆𑀞𑁄𑀢𑀺 𑀧𑀼𑀦 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀔𑁂𑀢𑁆𑀢𑀜𑁆𑀜𑀽 𑀅𑀓𑀼𑀲𑀮𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀦𑀸𑀲𑁂𑀯𑀢𑀺, 𑀦 𑀪𑀸𑀯𑁂𑀢𑀺, 𑀦 𑀩𑀳𑀼𑀮𑀺𑀁 𑀓𑀭𑁄𑀢𑀺, 𑀦 𑀲𑁆𑀯𑀸𑀥𑀺𑀝𑁆𑀞𑀺𑀢𑀁 𑀅𑀥𑀺𑀝𑁆𑀞𑀸𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘𑀬𑀁𑀦𑀽𑀦𑀸𑀳𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀲𑁄 𑀦 𑀲𑀓𑁆𑀓𑁄𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘𑀬𑀁𑀦𑀽𑀦𑀸𑀳𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀲𑁄 𑀦 𑀲𑀓𑁆𑀓𑁄𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀪𑀢𑁄 𑀪𑀝𑁆𑀞𑁄 𑀉𑀪𑀢𑁄 𑀧𑀭𑀺𑀳𑀻𑀦𑁄’’𑀢𑀺 (𑀅. 𑀦𑀺. 𑁯.𑁩𑁫).

𑁯𑁨𑁮-𑁩𑁧. 𑀓𑀸𑀫𑀲𑁆𑀲𑀳𑀕𑀢𑀸…𑀧𑁂… 𑀘𑀭𑀦𑁆𑀢𑀻𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀓𑀸𑀫𑀲𑀳𑀕𑀢𑀸 𑀳𑀼𑀢𑁆𑀯𑀸 𑀲𑀜𑁆𑀜𑀸 𑀘𑁂𑀯 𑀫𑀦𑀲𑀺𑀓𑀸𑀭𑀸 𑀘 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀲𑀜𑁆𑀜𑀸𑀲𑀻𑀲𑁂𑀦 𑀘𑁂𑀢𑁆𑀣 𑀢𑀁𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀕𑀳𑀺𑀢𑁄, 𑀫𑀦𑀓𑁆𑀓𑀸𑀭-𑀕𑁆𑀕𑀳𑀡𑁂𑀦 𑀆𑀯𑀚𑁆𑀚𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀫𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀳𑀸𑀦𑀁 𑀧𑀭𑀺𑀳𑀸𑀦𑀺𑀁 𑀪𑀚𑀢𑀻𑀢𑀺 𑀳𑀸𑀦𑀪𑀸𑀕𑀺𑀬𑀁. 𑀓𑁂𑀘𑀺 𑀧𑀦 ‘‘𑀲𑀁𑀓𑀺𑀮𑁂𑀲𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑁄 𑀥𑀫𑁆𑀫𑁄’𑀢𑀺 (𑀯𑀺𑀪. 𑁮𑁨𑁮) 𑀯𑀘𑀦𑀢𑁄 𑀳𑀸𑀦𑀪𑀸𑀕𑀺𑀬𑀸 𑀓𑀸𑀫𑀲𑀜𑁆𑀜𑀸𑀤𑀺𑀓𑀸𑀢𑀺 𑀢𑁂𑀳𑀺 𑀧𑀭𑀺𑀳𑀸𑀧𑀺𑀬𑀫𑀸𑀦𑀁 𑀛𑀸𑀦𑀫𑁆𑀧𑀺 𑀓𑀸𑀭𑀡𑀽𑀧𑀘𑀸𑀭𑁂𑀦 𑀳𑀸𑀦𑀪𑀸𑀕𑀺𑀬𑀁 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀻𑀢𑀺 𑀢𑀲𑁆𑀲𑁂𑀯 𑀛𑀸𑀦𑀲𑁆𑀲 𑀅𑀦𑀼𑀥𑀫𑁆𑀫𑀢𑀸 𑀆𑀭𑀫𑁆𑀫𑀡𑀯𑀲𑁂𑀦 𑀢𑀤𑀦𑀼𑀕𑀢𑀸 𑀲𑀢𑀺𑀧𑀢𑀺𑀭𑀽𑀧𑀓𑀸 𑀦𑀺𑀓𑀦𑁆𑀢𑀺. 𑀅𑀢𑀓𑁆𑀓𑀲𑀳𑀺𑀢𑀸𑀢𑀺 𑀅𑀯𑀺𑀢𑀓𑁆𑀓𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀧𑀢𑁆𑀢𑀼𑀓𑀸𑀫𑀲𑁆𑀲 𑀢𑀁 𑀲𑀦𑁆𑀢𑀢𑁄, 𑀫𑀦𑀲𑀺 𑀓𑀭𑁄𑀢𑁄 𑀆𑀭𑀫𑁆𑀫𑀡𑀯𑀲𑁂𑀦 𑀢𑀁𑀲𑀳𑀕𑀢𑀸. 𑀯𑀺𑀲𑁂𑀲𑀪𑀸𑀕𑀺𑀬𑀦𑁆𑀢𑀺 𑀯𑀺𑀲𑁂𑀲𑀪𑀽𑀢𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀢𑀸𑀬 𑀢𑀁 𑀪𑀚𑀢𑀻𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑀁. 𑀦𑀺𑀩𑁆𑀩𑀺𑀤𑀸𑀲𑀁𑀬𑀼𑀢𑀸𑀢𑀺 𑀯𑀺𑀧𑀲𑁆𑀲𑀦𑀸𑀭𑀫𑁆𑀫𑀡𑀸.

𑁯𑁩𑁨-𑁫. 𑀧𑀕𑀼𑀡𑀢𑁄𑀢𑀺 𑀯𑀲𑀺𑀢𑀧𑁆𑀧𑀢𑁆𑀢𑀢𑁄. 𑀆𑀲𑀦𑁆𑀦𑀸𑀓𑀼𑀲𑀮𑀸𑀭𑀺𑀓𑀸𑀢𑀺 𑀦𑀻𑀯𑀭𑀡𑀧𑁆𑀧𑀳𑀸𑀦𑀲𑁆𑀲 𑀢𑀁𑀧𑀞𑀫𑀢𑀸𑀬 𑀆𑀲𑀦𑁆𑀦𑀦𑀻𑀯𑀭𑀡𑀧𑀘𑁆𑀘𑀢𑁆𑀣𑀺𑀓𑀸. 𑀣𑀽𑀮𑀁 𑀦𑀸𑀫 𑀯𑀺𑀧𑀼𑀮𑀫𑁆𑀧𑀺 𑀨𑁂𑀕𑁆𑀕𑀼 𑀯𑀺𑀬 𑀲𑀼𑀔𑀪𑀜𑁆𑀚𑀦𑀻𑀬𑀦𑁆𑀢𑀺 𑀆𑀳 ‘‘𑀣𑀽𑀮𑀢𑁆𑀢𑀸…𑀧𑁂… 𑀤𑀼𑀩𑁆𑀩𑀮𑀸’’𑀢𑀺. 𑀢𑀢𑁄𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀢𑁄. 𑀤𑀼𑀩𑁆𑀩𑀮𑀸𑀦𑀺 𑀅𑀗𑁆𑀕𑀸𑀦𑀺 𑀇𑀫𑀺𑀲𑁆𑀲𑀸𑀢𑀺 𑀅𑀗𑁆𑀕𑀤𑀼𑀩𑁆𑀩𑀮𑀸. 𑀲𑀦𑁆𑀢𑀢𑁄 𑀘𑀺𑀦𑁆𑀢𑀬𑀺𑀢𑁆𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑁂 𑀯𑀺𑀬 𑀑𑀴𑀸𑀭𑀺𑀓𑀗𑁆𑀕𑀸𑀦𑀁 𑀅𑀪𑀸𑀯𑀢𑁄, 𑀲𑀦𑁆𑀢𑀥𑀫𑁆𑀫𑀲𑀫𑀗𑁆𑀕𑀺𑀢𑀸𑀬 𑀘 𑀲𑀦𑁆𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑀯𑀲𑁂𑀦 𑀫𑀦𑀲𑀺 𑀓𑀢𑁆𑀯𑀸. 𑀓𑀺𑀜𑁆𑀘𑀸𑀧𑀺 𑀳𑀺 𑀬𑁂 𑀥𑀫𑁆𑀫𑀸 𑀤𑀼𑀢𑀺𑀬𑀚𑁆𑀛𑀸𑀦𑁂 𑀧𑀻𑀢𑀺𑀲𑀼𑀔𑀸𑀤𑀬𑁄, 𑀢𑁂 𑀧𑀞𑀫𑀚𑁆𑀛𑀸𑀦𑁂𑀧𑀺 𑀲𑀦𑁆𑀢𑀺, 𑀢𑁂𑀳𑀺 𑀧𑀦 𑀢𑁂 𑀲𑀦𑁆𑀢𑀢𑀭𑀸, 𑀧𑀡𑀻𑀢𑀢𑀭𑀸 𑀘 𑀳𑁄𑀦𑁆𑀢𑀺. 𑀦𑀺𑀓𑀦𑁆𑀢𑀺𑀦𑁆𑀢𑀺 𑀦𑀺𑀓𑀸𑀫𑀦𑀁 𑀅𑀧𑁂𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀸𑀤𑀸𑀬𑀸𑀢𑀺 𑀔𑁂𑀧𑁂𑀢𑁆𑀯𑀸, 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁯𑁪𑁩-𑁪. 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀲𑀫𑁆𑀧𑀲𑀸𑀤𑀦𑀲𑀗𑁆𑀔𑀸𑀢𑀸𑀬 𑀲𑀤𑁆𑀥𑀸𑀬 𑀬𑁄𑀕𑀢𑁄 𑀛𑀸𑀦𑀫𑁆𑀧𑀺 𑀲𑀫𑁆𑀧𑀲𑀸𑀤𑀦𑀁 𑀦𑀻𑀮𑀯𑀡𑁆𑀡𑀬𑁄𑀕𑀢𑁄 𑀦𑀻𑀮𑀯𑀢𑁆𑀣𑀁 𑀯𑀺𑀬. 𑀦𑀦𑀼 𑀘𑀸𑀬𑀁 𑀲𑀤𑁆𑀥𑀸 𑀧𑀞𑀫𑀚𑁆𑀛𑀸𑀦𑁂𑀧𑀺 𑀅𑀢𑁆𑀣𑀺, 𑀓𑀲𑁆𑀫𑀸 𑀇𑀤𑀫𑁂𑀯 ‘‘𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑁂𑀦 𑀯𑀻𑀘𑀺𑀢𑀭𑀗𑁆𑀕𑀲𑀫𑀸𑀓𑀼𑀮𑀫𑀺𑀯 𑀚𑀮𑀁 𑀦 𑀲𑀼𑀧𑁆𑀧𑀲𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀢𑀺𑀧𑀺 𑀲𑀤𑁆𑀥𑀸𑀬 𑀢𑀁 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀸𑀪𑀸𑀯𑁂𑀦 𑀮𑀤𑁆𑀥𑁄𑀓𑀸𑀲𑀸 𑀩𑀮𑀯𑀢𑀻 𑀲𑀤𑁆𑀥𑀸, 𑀢𑀲𑁆𑀫𑀸 𑀩𑀮𑀯𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀇𑀤𑀫𑁂𑀯 ‘‘𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀁, 𑀅𑀢𑁆𑀢𑀦𑀺 𑀚𑀸𑀢𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀇𑀫𑀲𑁆𑀲𑀸𑀢𑀺 𑀢𑀺𑀯𑀗𑁆𑀕𑀺𑀓𑀁. 𑀲𑁂𑀲𑀦𑁆𑀢𑀺 𑀧𑀻𑀢𑀺𑀆𑀤𑀻𑀦𑀁 𑀅𑀜𑁆𑀜𑁂𑀳𑀺 𑀩𑀮𑀯𑀪𑀸𑀯𑁄, 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁 𑀯𑀸 𑀚𑀯𑀦𑀸𑀦𑀁 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀪𑀸𑀯𑁄, 𑀙𑀝𑁆𑀞𑁂 𑀲𑀢𑁆𑀢𑀫𑁂 𑀯𑀸 𑀅𑀧𑁆𑀧𑀦𑀸𑀬𑀸𑀦𑀼𑀧𑁆𑀧𑀢𑁆𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀢𑀸, 𑀢𑀢𑁄 𑀪𑀯𑀗𑁆𑀕𑀧𑀸𑀢𑁄, 𑀧𑀼𑀦 𑀪𑀯𑀗𑁆𑀕𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀢𑁆𑀣𑀸𑀬 𑀆𑀯𑀚𑁆𑀚𑀦𑀁, 𑀢𑀢𑁄 𑀛𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀇𑀤𑀁 𑀲𑀩𑁆𑀩𑀁 𑀯𑀼𑀢𑁆𑀢𑀸𑀯𑀲𑁂𑀲𑀁 𑀳𑁂𑀝𑁆𑀞𑀸 𑀧𑀞𑀫𑀚𑁆𑀛𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀼𑀧𑀮𑀓𑁆𑀔𑀺𑀢𑀩𑁆𑀩𑀁.

𑁯𑁪𑁮-𑁯. 𑀧𑀺𑀬𑀢𑁄𑀢𑀺 𑀓𑀸𑀫𑀬𑀢𑁄. 𑀉𑀧𑁆𑀧𑀺𑀮𑀸𑀧𑀦𑀦𑁆𑀢𑀺 𑀓𑀸𑀫𑀜𑁆𑀘𑀸𑀬𑀁 𑀧𑀭𑀺𑀕𑁆𑀕𑀳𑁂𑀲𑀼 𑀅𑀧𑀭𑀺𑀘𑁆𑀘𑀢𑁆𑀢𑀧𑁂𑀫𑀲𑁆𑀲 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀦𑁄 𑀢𑀡𑁆𑀳𑀸𑀲𑀳𑀕𑀢𑀸𑀬 𑀧𑀻𑀢𑀺𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑁄, 𑀇𑀥 𑀘 𑀤𑀼𑀢𑀺𑀬𑀚𑁆𑀛𑀸𑀦𑀧𑀻𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀢𑀣𑀸𑀧𑀺 𑀲𑀩𑁆𑀩𑀲𑁄 𑀧𑀻𑀢𑀺𑀬𑀁 𑀅𑀯𑀺𑀭𑀢𑁆𑀢𑀲𑁆𑀲𑀸𑀧𑀺 𑀅𑀦𑀼𑀩𑀦𑁆𑀥𑁂𑀬𑁆𑀬𑀸𑀢𑀺 𑀉𑀧𑁆𑀧𑀺𑀮𑀸𑀧𑀦𑀁 𑀇𑀥 𑀆𑀤𑀻𑀦𑀯𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀣 𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲𑁂𑀯 𑀢𑀢𑀺𑀬𑀚𑁆𑀛𑀸𑀦𑀁 𑀯𑀺𑀬 𑀅𑀳𑀼𑀢𑁆𑀯𑀸 𑀉𑀧𑁆𑀧𑀺𑀮𑀸𑀧𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀉𑀧𑁆𑀧𑀺𑀮𑀸𑀧𑀦𑀁 𑀯𑀺𑀬𑀸𑀢𑀺 𑀉𑀧𑁆𑀧𑀺𑀮𑀸𑀧𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑀺𑀬𑀁 𑀲𑀦𑁆𑀢𑀢𑁄 𑀤𑀺𑀲𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁯𑁫𑁭-𑁮. 𑀲𑀢𑀺𑀬𑀸 𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑁆𑀧𑀦𑁆𑀦𑀦𑁆𑀢𑀺 𑀲𑀭𑀡𑀮𑀓𑁆𑀔𑀡𑀸𑀬 𑀲𑀢𑀺𑀬𑀸, 𑀅𑀲𑀫𑁆𑀫𑁄𑀳𑀮𑀓𑁆𑀔𑀡𑁂𑀦 𑀲𑀫𑁆𑀧𑀚𑀜𑁆𑀜𑁂𑀦 𑀘 𑀲𑀫𑁆𑀧𑀦𑁆𑀦𑀁. 𑀓𑀸𑀫𑀁 𑀧𑀼𑀭𑀺𑀫𑀚𑁆𑀛𑀸𑀦𑁂𑀲𑀼𑀧𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀅𑀢𑁆𑀣𑀺, 𑀦 𑀳𑀺 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲, 𑀅𑀲𑀫𑁆𑀧𑀚𑀸𑀦𑀢𑁄 𑀘 𑀉𑀧𑀘𑀸𑀭𑀫𑀢𑁆𑀢𑀫𑁆𑀧𑀺 𑀲𑀫𑁆𑀧𑀚𑁆𑀚𑀢𑀺, 𑀧𑀕𑁂𑀯 𑀅𑀧𑁆𑀧𑀦𑀸, 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀅𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁂𑀲𑀼 𑀧𑀻𑀢𑀺𑀲𑀼𑀔𑁂𑀲𑀼 𑀧𑀻𑀢𑀺𑀲𑀗𑁆𑀔𑀸𑀢𑀲𑁆𑀲 𑀑𑀴𑀸𑀭𑀺𑀓𑀗𑁆𑀕𑀲𑁆𑀲 𑀧𑀳𑀸𑀦𑁂 𑀲𑀼𑀔𑀼𑀫𑀢𑀸𑀬 𑀇𑀥 𑀲𑀸𑀢𑀺𑀲𑀬𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑁆𑀬𑀸𑀧𑀸𑀭𑁄𑀢𑀺 𑀇𑀥𑁂𑀯 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀫𑁆𑀧𑀦𑁆𑀦𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀓𑀗𑁆𑀕𑀳𑀻𑀦𑀦𑁆𑀢𑀺 𑀧𑀻𑀢𑀺𑀬𑀸 𑀧𑀳𑀻𑀦𑀪𑀸𑀯𑁂𑀦 𑀏𑀓𑀗𑁆𑀕𑀯𑀺𑀧𑁆𑀧𑀳𑀻𑀦𑀁. 𑀲𑀸 𑀧𑀦𑁂𑀲𑀸 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀺𑀬 𑀅𑀧𑁆𑀧𑀦𑀸𑀓𑁆𑀔𑀡𑁂𑀬𑁂𑀯 𑀧𑀳𑀻𑀬𑀢𑀺. 𑀢𑁂𑀦𑀲𑁆𑀲 𑀲𑀸 ‘‘𑀧𑀳𑀸𑀦𑀗𑁆𑀕’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁯𑁭𑁨. 𑀲𑁄𑀫𑀦𑀲𑁆𑀲𑀲𑁆𑀲 𑀧𑀳𑀻𑀦𑀢𑁆𑀢𑀸 𑀆𑀳 ‘‘𑀏𑀓𑀗𑁆𑀕𑀯𑀺𑀧𑁆𑀧𑀳𑀻𑀦’’𑀦𑁆𑀢𑀺. 𑀢𑀜𑁆𑀘 𑀧𑀦 𑀲𑁄𑀫𑀦𑀲𑁆𑀲𑀁 𑀏𑀓𑀯𑀻𑀣𑀺𑀬𑀁 𑀧𑀼𑀭𑀺𑀫𑀚𑀯𑀦𑁂𑀲𑀼𑀬𑁂𑀯 𑀧𑀳𑀻𑀬𑀢𑀺.

𑁯𑁭𑁪. 𑀧𑀼𑀭𑀺𑀫𑀚𑁆𑀛𑀸𑀦𑁂𑀲𑀼 𑀧𑀭𑀺𑀓𑀫𑁆𑀫𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀁 𑀏𑀓𑀲𑀤𑀺𑀲𑀢𑁆𑀢𑀸 𑀇𑀥 𑀮𑀩𑁆𑀪𑀫𑀸𑀦𑀁 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀲𑁂𑀯𑀦𑀁 𑀦 𑀳𑁄𑀢𑀻𑀢𑀺 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀧𑀤𑀦𑁆𑀢𑀭𑀲𑀗𑁆𑀕𑀳𑀺𑀢𑀲𑁆𑀲 𑀅𑀢𑁆𑀢𑀦𑁄 𑀲𑀪𑀸𑀯𑀕𑁆𑀕𑀸𑀳𑀸𑀧𑀦𑀲𑀗𑁆𑀔𑀸𑀢𑀆𑀲𑁂𑀯𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄 𑀲𑀼𑀔𑀯𑁂𑀤𑀦𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀯 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬 𑀪𑀯𑀺𑀢𑀩𑁆𑀩𑀁 𑀲𑀸𑀢𑀺𑀲𑀬𑀁 𑀲𑀼𑀔𑀯𑀺𑀭𑀸𑀕𑀪𑀸𑀯𑀦𑀢𑁆𑀢𑀸, 𑀢𑀲𑁆𑀫𑀸 𑀇𑀥 𑀅𑀧𑁆𑀧𑀦𑀸𑀯𑀻𑀣𑀺𑀬𑀁 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀚𑀯𑀦𑁂𑀳𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺.

𑁯𑁭𑁬. 𑀏𑀯𑀁 𑀘𑀢𑀼𑀓𑁆𑀓𑀦𑀬𑀯𑀲𑁂𑀦 𑀛𑀸𑀦𑀧𑁆𑀧𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀜𑁆𑀘𑀓𑀦𑀬𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀘𑀢𑀼𑀓𑁆𑀓𑀦𑀬𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁆𑀯𑀺𑀥𑀸 𑀧𑀦 𑀓𑀢𑁆𑀯𑀸𑀦𑀸𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀳𑀸𑀦𑀗𑁆𑀕𑀯𑀲𑁂𑀦 𑀕𑀡𑀦𑀢𑁄 𑀤𑁆𑀯𑀺𑀥𑀸 𑀓𑀢𑁆𑀯𑀸. 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀓𑀢𑀦𑁆𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀦𑁆𑀢𑀺 𑀏𑀯𑀁 𑀤𑀼𑀢𑀺𑀬𑀚𑁆𑀛𑀸𑀦𑀜𑁆𑀘𑁂𑀯 𑀢𑀢𑀺𑀬𑀚𑁆𑀛𑀸𑀦𑀜𑁆𑀘 𑀓𑀢𑀁 𑀅𑀪𑀺𑀥𑀫𑁆𑀫𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀢𑁆𑀢𑀦𑁆𑀢𑁂𑀲𑀼 𑀳𑀺 𑀧𑀜𑁆𑀘𑀓𑀦𑀬𑁄 𑀲𑀭𑀽𑀧𑀢𑁄 𑀦 𑀕𑀳𑀺𑀢𑁄, 𑀓𑀲𑁆𑀫𑀸 𑀧𑀦 𑀅𑀪𑀺𑀥𑀫𑁆𑀫𑁂 𑀕𑀳𑀺𑀢𑁄𑀢𑀺? 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀢𑁄, 𑀲𑀦𑁆𑀦𑀺𑀲𑀺𑀦𑁆𑀦𑀤𑁂𑀯𑀧𑀭𑀺𑀲𑀸𑀬 𑀳𑀺 𑀬𑁂𑀲𑀁 𑀧𑀞𑀫𑀚𑁆𑀛𑀸𑀦𑁂 𑀯𑀺𑀢𑀓𑁆𑀓𑁄 𑀏𑀯 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀸𑀢𑀺, 𑀇𑀢𑀭𑁂 𑀲𑀦𑁆𑀢𑀢𑁄, 𑀢𑁂𑀲𑀁 𑀘𑀢𑀼𑀭𑀗𑁆𑀕𑀺𑀓𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀓𑀢𑁆𑀯𑀸 𑀧𑀜𑁆𑀘𑀓𑀦𑀬𑁂𑀦 𑀤𑁂𑀲𑁂𑀲𑀺. 𑀬𑁂𑀲𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀺𑀢𑀸, 𑀢𑀢𑁄 𑀢𑁂𑀲𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀢𑀺𑀯𑀗𑁆𑀕𑀺𑀓𑀁 𑀓𑀢𑁆𑀯𑀸 𑀘𑀢𑀼𑀓𑁆𑀓𑀦𑀬𑁂𑀦 𑀤𑁂𑀲𑁂𑀲𑀺. 𑀬𑁂𑀲𑀁 𑀯𑀺𑀢𑀓𑁆𑀓𑁄𑀯 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀸𑀢𑀺, 𑀢𑁂𑀳𑀺 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀓𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑀸. 𑀬𑁂𑀲𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸, 𑀢𑁂𑀳𑀺 𑀤𑁆𑀯𑁂𑀧𑀺 𑀏𑀓𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀯𑀗𑁆𑀕𑀺𑀓𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑀸.

𑁯𑁭𑁯. 𑀅𑀢𑁆𑀣𑀩𑁆𑀬𑀜𑁆𑀚𑀦𑀯𑀲𑁂𑀦 𑀲𑀼𑀝𑁆𑀞𑀼 𑀫𑀥𑀼𑀭𑀁, 𑀢𑀢𑁄𑀬𑁂𑀯 𑀯𑀭𑀢𑀭𑀁 𑀯𑀘𑀦𑀁 𑀬𑀲𑁆𑀲 𑀲𑁄𑀬𑀁 𑀲𑀼𑀫𑀥𑀼𑀭𑀯𑀭𑀢𑀭𑀯𑀘𑀦𑁄. 𑀓𑀁 𑀦𑀼 𑀚𑀦𑀁 𑀦𑁂𑀯 𑀭𑀜𑁆𑀚𑀬𑀢𑀺, 𑀦 𑀳𑀺 𑀏𑀓𑀫𑁆𑀧𑀺 𑀦 𑀭𑀜𑁆𑀚𑀬𑀢𑀺. 𑀅𑀢𑀺𑀦𑀺𑀲𑀺𑀢 …𑀧𑁂… 𑀦𑀻𑀬𑁄𑀬𑀦𑁆𑀢𑀺 𑀅𑀢𑀺𑀢𑀺𑀔𑀺𑀡𑀩𑀼𑀤𑁆𑀥𑀺𑀧𑁆𑀧𑀲𑀸𑀤𑁂𑀳𑀺 𑀚𑀦𑁂𑀳𑀺 𑀯𑁂𑀤𑀦𑀻𑀬𑁄 𑀅𑀬𑀁 𑀕𑀦𑁆𑀣𑁄, 𑀧𑀭𑀺𑀘𑁆𑀙𑁂𑀤𑁄𑀢𑀺 𑀯𑀸 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀭𑀽𑀧𑀸𑀯𑀘𑀭𑀲𑀫𑀸𑀥𑀺𑀪𑀸𑀯𑀦𑀸𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.