𑁧𑁩. 𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀸𑀭𑀓𑀧𑀝𑀺𑀯𑁂𑀥𑀯𑀡𑁆𑀡𑀦𑀸

𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀸𑀤𑀺𑀯𑀲𑁂𑀦 𑀤𑀲𑁆𑀲𑀺𑀢𑀸. 𑀓𑀼𑀲𑀮𑀸𑀤𑀬𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀸. 𑀏𑀢𑁂𑀲𑀁 𑀧𑀦 𑀦 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀩𑁆𑀩𑁂 ‘‘𑀓𑀸𑀭𑀓𑁄’’𑀢𑀺 𑀯𑀘𑀦𑀁 𑀯𑀺𑀬 ‘‘𑀯𑁂𑀤𑀓𑁄’’𑀢𑀺 𑀅𑀯𑀼𑀢𑁆𑀢𑁂𑀧𑀺 ‘‘𑀅𑀢𑁆𑀢𑀸 𑀓𑀸𑀭𑀓𑁄 𑀯𑁂𑀤𑀓𑁄’’𑀢𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀢𑀸𑀬 ‘‘𑀢𑀲𑁆𑀲 𑀳𑀺 𑀓𑀸𑀭𑀓𑀲𑁆𑀲 𑀯𑁂𑀤𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑀪𑀸𑀯𑁄𑀧𑀺 𑀲𑀺𑀬𑀸, 𑀇𑀢𑀭𑀣𑀸 𑀅𑀳𑁂𑀢𑀼𑀓𑀤𑁄𑀲𑀸𑀧𑀢𑁆𑀢𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀆𑀬𑀢𑁆𑀢𑀸 𑀯𑀼𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁄. 𑀢𑁂𑀲𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀤𑀻𑀦𑀁. 𑀢𑀲𑁆𑀫𑀸𑀢𑀺 𑀓𑀸𑀭𑀓𑀸𑀪𑀸𑀯𑁂 𑀓𑀼𑀲𑀮𑀸𑀓𑀼𑀲𑀮𑀸𑀦𑀁, 𑀢𑀩𑁆𑀩𑀺𑀧𑀸𑀓𑀸𑀦𑀜𑁆𑀘 𑀅𑀪𑀸𑀯𑀢𑁄. 𑀦𑀺𑀭𑀢𑁆𑀣𑀺𑀓𑀸𑀢𑀺 𑀤𑁂𑀲𑁂𑀢𑁆𑀯𑀸𑀧𑀺 𑀩𑁄𑀥𑁂𑀢𑀩𑁆𑀩𑀸𑀪𑀸𑀯𑀢𑁄 𑀦𑀺𑀭𑀢𑁆𑀣𑀺𑀓𑀸. ‘‘𑀦𑀸𑀬𑀁 𑀦𑀺𑀭𑀢𑁆𑀣𑀺𑀓𑀸’’𑀢𑀺 𑀯𑀢𑁆𑀯𑀸𑀧𑀺 ‘‘𑀲𑀸𑀢𑁆𑀣𑀺𑀓𑀸’’𑀢𑀺 𑀯𑀘𑀦𑀁 𑀧𑀦 𑀧𑀭𑀲𑁆𑀲 𑀤𑀴𑁆𑀳𑀕𑁆𑀕𑀸𑀳𑀢𑁆𑀣𑀁. 𑀮𑁄𑀓𑁂𑀧𑀺 𑀳𑀺 𑀏𑀯𑀁 𑀯𑁄𑀳𑀸𑀭𑀁 𑀯𑁄𑀳𑀭𑀦𑁆𑀢𑀺, 𑀏𑀯𑀫𑁂𑀯 𑀪𑀯𑀢𑀺, 𑀦𑀸𑀜𑁆𑀜𑀣𑀸𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀓𑀸𑀭𑀓𑀸𑀪𑀸𑀯𑁂𑀧𑀺 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀕𑀳𑀡𑁂. 𑀅𑀦𑀼𑀭𑁄𑀥𑁄𑀢𑀺 𑀅𑀦𑀼𑀓𑀽𑀮𑀧𑀓𑁆𑀔𑀧𑀸𑀢𑁄𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀓𑀸𑀭𑀓𑀸𑀪𑀸𑀯𑁂𑀧𑀺 𑀓𑀼𑀲𑀮𑀸𑀤𑀬𑁄 𑀅𑀢𑁆𑀣𑀻𑀢𑀺 𑀕𑀳𑀡𑁂. 𑀯𑀺𑀭𑁄𑀥𑁄𑀢𑀺 𑀧𑀝𑀺𑀖𑁄.

𑀏𑀯𑀁 𑀓𑀸𑀭𑀓𑀸𑀪𑀸𑀯𑁂𑀧𑀺 𑀓𑀼𑀲𑀮𑀸𑀤𑀻𑀦𑀁 𑀲𑀩𑁆𑀪𑀸𑀯𑀁 𑀬𑀼𑀢𑁆𑀢𑀺𑀢𑁄 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀮𑁄𑀓𑀲𑀺𑀤𑁆𑀥𑁂𑀦 𑀦𑀺𑀤𑀲𑁆𑀲𑀦𑁂𑀦 𑀲𑀸𑀥𑁂𑀢𑀼𑀁 ‘‘𑀅𑀣𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣𑀸𑀧𑀻𑀢𑀺 𑀓𑀸𑀭𑀓𑀸𑀪𑀸𑀯𑁂𑀧𑀺. 𑀧𑀣𑀯𑀺-𑀕𑁆𑀕𑀳𑀡𑁂𑀦 𑀧𑀣𑀯𑁄𑀚𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀆𑀧-𑀕𑁆𑀕𑀳𑀡𑁂𑀦 𑀆𑀧𑁄𑀚𑀁. 𑀢𑁂𑀚𑁄𑀢𑀺 𑀲𑀻𑀢𑀼𑀡𑁆𑀳𑀯𑀲𑁂𑀦 𑀤𑀼𑀯𑀺𑀥𑀸 𑀢𑁂𑀚𑁄𑀥𑀸𑀢𑀼. 𑀉𑀢𑀽𑀢𑀺 𑀳𑁂𑀫𑀦𑁆𑀢𑀸𑀤𑀺𑀉𑀢𑀼. 𑀆𑀤𑀺-𑀕𑁆𑀕𑀳𑀡𑁂𑀦 𑀩𑀻𑀚𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀚𑀦𑀓𑀧𑀘𑁆𑀘𑀬𑁄 𑀳𑁂𑀢𑀼, 𑀅𑀦𑀼𑀧𑀸𑀮𑀦𑀓𑀧𑀘𑁆𑀘𑀬𑁄 𑀧𑀘𑁆𑀘𑀬𑁄 𑀦𑀸𑀫𑀸𑀢𑀺 𑀆𑀳 ‘‘𑀳𑁂𑀢𑀼𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸’’𑀢𑀺. ‘‘𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼, 𑀧𑀘𑁆𑀘𑀬𑁄 𑀅𑀦𑀼𑀧𑀸𑀮𑀦𑀓𑁄’’𑀢𑀺 𑀳𑀺 𑀯𑀼𑀢𑁆𑀢𑀁.

𑀏𑀯𑀁 𑀓𑀸𑀭𑀓𑀸𑀪𑀸𑀯𑁂𑀧𑀺 𑀓𑀼𑀲𑀮𑀸𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀧𑀭𑀺𑀓𑀧𑁆𑀧𑀺𑀢𑀁 𑀅𑀢𑁆𑀢𑀸𑀦𑀫𑁂𑀯 𑀢𑀸𑀯 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 ‘‘𑀅𑀣𑀸𑀧𑀺 𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑀸𑀫𑀁 𑀧𑀜𑁆𑀜𑀸𑀧𑀭𑀺𑀩𑀸𑀳𑀺𑀭𑀤𑀺𑀝𑁆𑀞𑀺𑀬𑀸 𑀏𑀯 𑀅𑀢𑁆𑀢𑀸 𑀧𑀭𑀺𑀓𑀧𑁆𑀧𑀻𑀬𑀢𑀺, 𑀧𑀭𑁄 𑀧𑀦 ‘‘𑀧𑀜𑁆𑀜𑀸𑀬 𑀧𑀭𑀺𑀓𑀧𑁆𑀧𑁂𑀫𑀻’’𑀢𑀺 𑀫𑀜𑁆𑀜𑀢𑀻𑀢𑀺 𑀢𑀲𑁆𑀲 𑀮𑀤𑁆𑀥𑀺𑀯𑀲𑁂𑀦 ‘‘𑀧𑀜𑁆𑀜𑀸𑀬 𑀧𑀭𑀺𑀓𑀧𑁆𑀧𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀉𑀧𑀧𑀭𑀺𑀓𑁆𑀔𑀺𑀲𑁆𑀲𑀸𑀫 𑀢𑀸𑀯𑀸𑀢𑀺 𑀢𑀺𑀝𑁆𑀞𑀢𑀼 𑀢𑀸𑀯 𑀘𑁂𑀲𑀸 𑀓𑀸𑀭𑀓𑀸𑀪𑀸𑀯𑁂𑀧𑀺 𑀓𑀼𑀲𑀮𑀸𑀤𑀻𑀦𑀁 𑀪𑀸𑀯𑀸𑀪𑀸𑀯𑀯𑀺𑀘𑀸𑀭𑀡𑀸 𑀧𑀞𑀫𑀁 𑀢𑀫𑁂𑀯 𑀅𑀢𑁆𑀢𑀸𑀦𑀁 𑀉𑀧𑀧𑀭𑀺𑀓𑁆𑀔𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄. 𑀤𑁄𑀲𑀫𑁂𑀢𑁆𑀣 𑀯𑀢𑁆𑀢𑀼𑀓𑀸𑀫𑁄 𑀧𑀼𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀝𑀺𑀜𑁆𑀜𑀁 𑀅𑀤𑀢𑁆𑀯𑀸𑀯 𑀧𑀼𑀘𑁆𑀙𑀦𑁆𑀢𑁄 𑀆𑀳 ‘‘𑀓𑀺𑀜𑁆𑀘𑁂𑀢𑁆𑀣𑀸’’𑀢𑀺. 𑀲𑀘𑁂𑀢𑀦𑁄 𑀯𑀸 𑀉𑀤𑀸𑀳𑀼 𑀅𑀘𑁂𑀢𑀦𑁄 𑀯𑀸𑀢𑀺 𑀏𑀢𑁆𑀣 𑀓𑁄 𑀤𑁄𑀲𑁄𑀢𑀺 𑀅𑀢𑁆𑀣𑁄. 𑀇𑀢𑀭𑁄 𑀉𑀪𑀬𑀣𑀸𑀧𑀺 𑀤𑁄𑀲𑁄𑀬𑁂𑀯. 𑀬𑀜𑁆𑀳𑀺 𑀅𑀘𑁂𑀢𑀦𑀁 𑀅𑀢𑁆𑀢𑀸𑀦𑀁, 𑀦 𑀢𑀁 𑀓𑀸𑀭𑀓𑀁, 𑀯𑁂𑀤𑀓𑀜𑁆𑀘, 𑀬𑀣𑀸 𑀢𑀁 𑀧𑀸𑀓𑀸𑀭𑀢𑀭𑀼𑀆𑀤𑀬𑁄. ‘‘𑀅𑀘𑁂𑀢𑀦𑁄𑀯𑀸𑀬𑀁 𑀅𑀢𑁆𑀢𑀸’’𑀢𑀺 𑀅𑀦𑀼𑀫𑀸𑀦𑁂𑀦 𑀓𑀸𑀭𑀓𑀯𑁂𑀤𑀓𑀢𑁆𑀢𑀸𑀪𑀸𑀯𑀲𑀺𑀤𑁆𑀥𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀺 𑀅𑀘𑁂𑀢𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀜𑁆𑀜𑁄𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑀯𑀲𑁂𑀦 𑀅𑀦𑀜𑁆𑀜𑁄. 𑀇𑀢𑀭𑀣𑀸 ‘‘𑀲𑀘𑁂𑀢𑀦𑁄’’𑀢𑀺 𑀯𑀘𑀦𑀫𑁂𑀯 𑀦 𑀉𑀧𑀧𑀚𑁆𑀚𑁂𑀬𑁆𑀬. 𑀲𑀳𑀪𑀸𑀯𑀻 𑀦𑀸𑀫 𑀅𑀜𑁆𑀜𑁄 𑀦 𑀳𑁄𑀢𑀻𑀢𑀺. 𑀅𑀢𑁆𑀢𑀦𑁄𑀧𑀺 𑀦𑀸𑀲𑁄 𑀲𑀺𑀬𑀸𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀭𑀽𑀧𑁂𑀲𑀼 𑀏𑀓𑀲𑁆𑀲 𑀦𑀸𑀲𑁂 𑀇𑀢𑀭𑀲𑁆𑀲𑀸𑀧𑀺 𑀯𑀺𑀦𑀸𑀲𑁄 𑀯𑀺𑀬. 𑀘𑁂𑀢𑀦𑀸𑀬𑀧𑀺 𑀦𑀸𑀲𑁄 𑀦 𑀪𑀯𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑁂𑀲𑀼 𑀏𑀓𑀲𑁆𑀲 𑀅𑀯𑀺𑀦𑀸𑀲𑁂 𑀇𑀢𑀭𑀲𑁆𑀲𑀸𑀧𑀺 𑀅𑀯𑀺𑀦𑀸𑀲𑁄 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀘𑁂𑀢𑀦𑀸𑀬 𑀅𑀦𑀜𑁆𑀜𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸 𑀢𑀫𑁂𑀯 𑀲𑀫𑀢𑁆𑀣𑁂𑀢𑀼𑀁 ‘‘𑀘𑁂𑀢𑀦𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀦𑁄 𑀅𑀦𑀸𑀲𑁂 𑀲𑀢𑀺 𑀘𑁂𑀢𑀦𑀸𑀬𑀧𑀺 𑀯𑀺𑀦𑀸𑀲𑁄 𑀦 𑀪𑀯𑀢𑀻’’𑀢𑀺 𑀲𑀼𑀢𑁆𑀯𑀸𑀧𑀺 𑀧𑀭𑀲𑁆𑀲 𑀦𑀺𑀭𑀼𑀢𑁆𑀢𑀭𑀪𑀸𑀯𑁄, 𑀘𑁂𑀢𑀦𑀸𑀬 𑀦𑀸𑀲𑁂 𑀯𑀺𑀲𑁂𑀲𑀓𑀸𑀭𑀡𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀣 𑀘𑁂𑀢𑀦𑀸𑀬𑀬𑁂𑀯𑀸’’𑀢𑀺𑀆𑀤𑀺. 𑀅𑀢𑁆𑀢𑀸𑀯 𑀦𑀲𑁆𑀲𑀢𑀼, 𑀢𑀺𑀝𑁆𑀞𑀢𑀼 𑀘𑁂𑀢𑀦𑀸. 𑀓𑁄 𑀳𑀺 𑀯𑀺𑀲𑁂𑀲𑀓𑀸𑀭𑀡𑀸𑀪𑀸𑀯𑁂 𑀅𑀢𑁆𑀢𑀦𑀺 𑀅𑀦𑀼𑀭𑁄𑀥𑁄, 𑀘𑁂𑀢𑀦𑀸𑀬 𑀯𑀺𑀭𑁄𑀥𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀜𑁆𑀜𑀸 𑀳𑀻𑀦𑀸𑀢𑀺 𑀧𑀼𑀩𑁆𑀩𑁂 𑀤𑀺𑀦𑁆𑀦𑀧𑀝𑀺𑀜𑁆𑀜𑀸 𑀧𑀭𑀺𑀳𑀻𑀦𑀸. 𑀅𑀣 𑀦 𑀪𑀯𑀢𑀺, ‘‘𑀧𑀝𑀺𑀜𑁆𑀜𑀸 𑀳𑀻𑀦𑀸’’𑀢𑀺 𑀬𑀤𑀺 𑀅𑀢𑁆𑀢𑀦𑁄 𑀯𑀺𑀦𑀸𑀲𑁂 𑀘𑁂𑀢𑀦𑀸𑀬 𑀅𑀯𑀺𑀦𑀸𑀲𑁄 𑀦 𑀪𑀯𑀢𑀺. 𑀘𑁂𑀢𑀦𑀢𑁆𑀢𑀸𑀦𑀁 𑀅𑀦𑀜𑁆𑀜𑀪𑀸𑀯𑁂𑀦 𑀘𑁂𑀢𑀦𑀸𑀬 𑀦𑀸𑀲𑁂 𑀅𑀢𑁆𑀢𑀦𑁄𑀧𑀺 𑀯𑀺𑀦𑀸𑀲𑀧𑁆𑀧𑀲𑀗𑁆𑀕𑀢𑁄 𑀅𑀢𑁆𑀢𑀸 𑀦 𑀦𑀲𑁆𑀲𑀢𑀻𑀢𑀺 𑀢𑀯 𑀧𑀝𑀺𑀜𑁆𑀜𑀸 𑀳𑀻𑀦𑀸. 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀯𑀺𑀧𑀭𑀻𑀢𑀁 𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀯𑀺𑀧𑀭𑀻𑀢𑀁. 𑀘𑁂𑀢𑀦𑀸𑀬 𑀯𑀺𑀦𑀸𑀲𑁂𑀧𑀺 𑀅𑀢𑁆𑀢𑀸 𑀦 𑀦𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀧𑀦 𑀅𑀯𑀺𑀦𑀸𑀲𑁂𑀧𑀺 𑀘𑁂𑀢𑀦𑀸 𑀦𑀲𑁆𑀲𑀢𑀻𑀢𑀺 𑀏𑀯𑀁 𑀯𑀸 𑀢𑀯 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸 𑀦𑀲𑁆𑀲𑀢𑀼, 𑀘𑁂𑀢𑀦𑀸 𑀢𑀺𑀝𑁆𑀞𑀢𑀼 𑀅𑀜𑁆𑀜𑀪𑀸𑀯𑁂 𑀉𑀪𑀺𑀦𑁆𑀦𑀁 𑀲𑀫𑀸𑀦𑀬𑁄𑀕𑀓𑁆𑀔𑀫𑀢𑀸𑀬 𑀪𑀯𑀺𑀢𑀩𑁆𑀩𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀝𑀺𑀜𑁆𑀜𑀸𑀳𑀻𑀦𑁄 𑀪𑀯𑀲𑀻𑀢𑀺 𑀘𑁂𑀢𑀦𑀸𑀬𑁂𑀯 𑀦𑀲𑁆𑀲𑀢𑀺, 𑀅𑀢𑁆𑀢𑀸 𑀦 𑀦𑀲𑁆𑀲𑀢𑀺 𑀧𑀝𑀺𑀜𑁆𑀜𑀸𑀬 𑀳𑀻𑀦𑁄 𑀪𑀯𑀲𑀺.

𑀇𑀥𑀸𑀢𑀺 𑀅𑀜𑁆𑀜𑀢𑁆𑀣 𑀧𑀓𑁆𑀔𑁂. 𑀮𑀓𑁆𑀔𑀡𑀓𑀢𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑁂𑀳𑀺 𑀪𑀺𑀦𑁆𑀦𑀮𑀓𑁆𑀔𑀡𑁂𑀳𑀺 𑀓𑀢𑀁. 𑀤𑁂𑀲𑀦𑁆𑀢𑀭𑀓𑀢𑀦𑁆𑀢𑀺 𑀪𑀺𑀦𑁆𑀦𑀤𑁂𑀲𑀓𑀢𑀁. 𑀚𑀸𑀢𑁄 𑀯𑁂𑀤𑀻𑀬𑀢𑀺 𑀜𑀸𑀬𑀢𑀻𑀢𑀺 𑀚𑀸𑀢𑀯𑁂𑀤𑁄, 𑀅𑀕𑁆𑀕𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀟𑀬𑁆𑀳𑀫𑀸𑀦𑁂𑀢𑀺 𑀉𑀤𑁆𑀥𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀫𑀸𑀦𑁂. 𑀏𑀓𑁄 𑀧𑀯𑀢𑁆𑀢𑀺𑀧𑀤𑁂𑀲𑁄 𑀇𑀫𑁂𑀲𑀦𑁆𑀢𑀺 𑀏𑀓𑀤𑁂𑀲𑀸, 𑀢𑁂𑀲𑀁 𑀪𑀸𑀯𑁄𑀢𑀺 𑀏𑀓𑀤𑁂𑀲𑀢𑁆𑀢𑀁.

𑀅𑀯𑀺𑀦𑀺𑀩𑁆𑀪𑁄𑀕𑀢𑁄𑀢𑀺 𑀮𑀓𑁆𑀔𑀡𑀢𑁄 𑀪𑁂𑀤𑁂𑀧𑀺 𑀞𑀸𑀦𑀯𑀲𑁂𑀦 𑀅𑀯𑀺𑀦𑀺𑀩𑁆𑀪𑀼𑀚𑁆𑀚𑀦𑀢𑁄 𑀅𑀯𑀺𑀲𑀁𑀲𑀝𑁆𑀞𑀢𑁆𑀢𑀸 ‘‘𑀏𑀓𑀤𑁂𑀲𑀢𑁆𑀢𑁂’’𑀢𑀺𑀇𑀫𑀲𑁆𑀲𑁂𑀯 𑀯𑁂𑀯𑀘𑀦𑀯𑀲𑁂𑀦 ‘‘𑀅𑀯𑀺𑀦𑀺𑀩𑁆𑀪𑁄𑀕𑀪𑀸𑀯𑁂𑀧𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀅𑀬𑀼𑀢𑁆𑀢𑀦𑁆𑀢𑀺 𑀢𑀁 ‘‘𑀉𑀪𑀺𑀦𑁆𑀦𑀁 𑀏𑀓𑀤𑁂𑀲𑀢𑀸 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀲𑀳 𑀦 𑀬𑀼𑀚𑁆𑀚𑀢𑀺. 𑀧𑀝𑀺𑀜𑁆𑀜𑀸 𑀳𑀻𑀦𑀸𑀢𑀺 𑀬𑀤𑀺 𑀧𑀼𑀩𑁆𑀩𑀧𑀝𑀺𑀜𑁆𑀜𑀸 𑀧𑀫𑀸𑀡𑀁, 𑀅𑀬𑀁 𑀧𑀝𑀺𑀜𑁆𑀜𑀸 𑀳𑀻𑀦𑀸. 𑀬𑀤𑀺 𑀯𑀸 𑀧𑀦 𑀅𑀬𑀁 𑀧𑀫𑀸𑀡𑀁, 𑀇𑀢𑀭𑀸 𑀳𑀻𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀘𑁂𑀢𑀦𑀸𑀬 𑀅𑀢𑁆𑀢𑀦𑁄 𑀧𑀤𑁂𑀲𑀯𑀲𑁂𑀦 𑀦𑀸𑀦𑀢𑁆𑀢𑁂 𑀅𑀢𑁆𑀢𑀦𑁄 𑀅𑀘𑁂𑀢𑀦𑀢𑁆𑀢𑀪𑀸𑀯𑀧𑁆𑀧𑀢𑁆𑀢𑀺𑀢𑁄 ‘‘𑀲𑀘𑁂𑀢𑀦𑁄 𑀅𑀢𑁆𑀢𑀸’’𑀢𑀺 𑀳𑁂𑀝𑁆𑀞𑀸 𑀢𑀬𑀸 𑀤𑀺𑀦𑁆𑀦𑀧𑀝𑀺𑀜𑁆𑀜𑀸 𑀧𑀭𑀺𑀳𑀻𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀘𑁂𑀢𑀦𑁄 𑀅𑀢𑁆𑀢𑀸𑀢𑀺 𑀅𑀢𑁆𑀢𑀸 𑀅𑀘𑁂𑀢𑀦𑁄𑀢𑀺 𑀓𑀢𑁆𑀯𑀸. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁄𑀲𑀢𑁄𑀢𑀺 ‘‘𑀬𑀤𑀺 𑀅𑀘𑁂𑀢𑀦𑁄 𑀲𑀺𑀬𑀸’’𑀢𑀺𑀆𑀤𑀺𑀦𑀸 𑀆𑀤𑀺𑀢𑁄 𑀯𑀼𑀢𑁆𑀢𑀤𑁄𑀲𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂 𑀯𑀺𑀫𑀤𑁆𑀤𑀦𑀲𑀳𑁄 𑀳𑁄𑀢𑀺, 𑀢𑀲𑁆𑀫𑀸.

𑁭𑁭𑁯. 𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀧𑀭𑀫𑀢𑁆𑀣𑀢𑁄 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀓𑀸𑀭𑀓𑁄, 𑀢𑀩𑁆𑀩𑀺𑀧𑀸𑀓𑀸𑀦𑀜𑁆𑀘 𑀯𑁂𑀤𑀓𑁄 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂 𑀅𑀣 𑀓𑀲𑁆𑀫𑀸 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀦𑁆𑀥𑀸𑀯𑀢𑀻𑀢𑀺 𑀲𑀁𑀲𑀭𑀢𑀺. 𑀅𑀢𑁆𑀢𑀦𑀸 𑀓𑀢𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀧𑀘𑁆𑀘𑀬𑀢𑁆𑀢𑀸 𑀯𑀺𑀧𑀸𑀓𑀪𑀽𑀢𑀁 𑀲𑀼𑀔𑀤𑀼𑀓𑁆𑀔𑀫𑁆𑀧𑀺 𑀅𑀢𑁆𑀢𑀦𑀸 𑀓𑀢𑀫𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀔𑀤𑀼𑀓𑁆𑀔𑀁 𑀲𑀬𑀁𑀓𑀢’’𑀦𑁆𑀢𑀺.

𑁭𑁮𑁦. 𑀲𑀁𑀲𑀸𑀭𑀫𑀸𑀧𑀦𑁆𑀦𑁄𑀢𑀺 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, ‘𑀲𑀁𑀲𑀸𑀭𑁄’𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁯) 𑁋

𑀏𑀯𑀁 𑀯𑀼𑀢𑁆𑀢𑀔𑀦𑁆𑀥𑀧𑀝𑀺𑀧𑀸𑀝𑀺𑀆𑀤𑀺𑀯𑀲𑀧𑁆𑀧𑀯𑀢𑁆𑀢𑀁 𑀲𑀁𑀲𑀸𑀭𑀁 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀯𑀲𑁂𑀦 𑀧𑀝𑀺𑀧𑀦𑁆𑀦𑁄. 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀦𑁆𑀢𑀺 𑀅𑀲𑁆𑀲 𑀲𑀁𑀲𑀸𑀭𑀸𑀧𑀦𑁆𑀦𑀲𑁆𑀲 𑀲𑀢𑁆𑀢𑀲𑁆𑀲 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀁 𑀫𑀳𑀩𑁆𑀪𑀬𑀁 𑀫𑀳𑀸𑀪𑀬𑀲𑀁𑀯𑀢𑁆𑀢𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀑𑀧𑀧𑀸𑀢𑀺𑀓𑁄𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑁄.

𑁭𑁮𑁧. 𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀭𑀽𑀧𑀸𑀤𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀪𑀸𑀭𑀪𑀽𑀢𑀸, 𑀲𑀻𑀲𑁂 𑀦𑀺𑀓𑁆𑀔𑀺𑀢𑁆𑀢𑀪𑀸𑀭𑀲𑀤𑀺𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀭𑀳𑀸𑀭𑁄 𑀘 𑀧𑀼𑀕𑁆𑀕𑀮𑁄 𑀢𑀲𑁆𑀲 𑀧𑀜𑁆𑀘𑀓𑁆𑀔𑀦𑁆𑀥𑀪𑀸𑀭𑀲𑁆𑀲 𑀳𑀸𑀭𑀓𑁄. 𑀪𑀸𑀭𑀸𑀤𑀸𑀦𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀪𑀸𑀭𑀕𑁆𑀕𑀳𑀡𑀁. 𑀪𑀸𑀭𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀧𑀼𑀦 𑀅𑀕𑁆𑀕𑀳𑁂𑀢𑀩𑁆𑀩𑀢𑀸𑀧𑀸𑀤𑀦𑁂𑀦 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁂𑀦 𑀪𑀸𑀭𑀲𑁆𑀲 𑀦𑀺𑀓𑁆𑀔𑀺𑀧𑀦𑀁.

𑁭𑁮𑁨. 𑀬𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁. 𑀲𑀓𑀦𑁆𑀢𑀺 𑀆𑀬𑀢𑁆𑀢𑀁.

𑁭𑁮𑁩. 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁂𑀦 𑀓𑀧𑁆𑀧𑁂𑀦𑀸𑀢𑀺 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂.

𑁭𑁮𑁪. 𑀅𑀲𑁆𑀲𑀤𑁆𑀥𑁄𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀁.

‘‘𑀢𑀜𑁆𑀘 𑀔𑁄 𑀲𑀫𑁆𑀫𑀼𑀢𑀺𑀯𑀲𑁂𑀦, 𑀦 𑀧𑀭𑀫𑀢𑁆𑀣𑀢𑁄’’𑀢𑀺 𑀯𑀢𑁆𑀯𑀸 𑀢𑀤𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀦𑀦𑀼 𑀪𑀕𑀯𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀓𑀺𑀁 𑀦𑀼 𑀲𑀢𑁆𑀢𑁄’’𑀢𑀺 𑀕𑀸𑀣𑀸 𑀯𑀚𑀺𑀭𑀸𑀬 𑀣𑁂𑀭𑀺𑀬𑀸 𑀯𑀼𑀢𑁆𑀢𑀸𑀧𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀯𑀲𑁂𑀦𑁂𑀯 𑀯𑀼𑀢𑁆𑀢𑀢𑁆𑀢𑀸 𑀪𑀕𑀯𑀢𑀸 𑀯𑀼𑀢𑁆𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀪𑀕𑀯𑀢𑀸 𑀇𑀤𑀫𑁆𑀧𑀺 𑀯𑀼𑀢𑁆𑀢’’𑀦𑁆𑀢𑀺.

𑁭𑁮𑁫. 𑀓𑀺𑀁 𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀻𑀢𑀺 𑀭𑀽𑀧𑀯𑁂𑀤𑀦𑀸𑀤𑀻𑀲𑀼 𑀓𑀺𑀁 𑀦𑀸𑀫 𑀲𑀢𑁆𑀢𑁄 𑀧𑀼𑀕𑁆𑀕𑀮𑁄𑀢𑀺 𑀕𑀡𑁆𑀳𑀸𑀲𑀺.

𑁭𑁮𑁬. 𑀅𑀗𑁆𑀕𑀲𑀫𑁆𑀪𑀸𑀭𑀸𑀢𑀺 𑀘𑀓𑁆𑀓𑀸𑀤𑀺𑀅𑀯𑀬𑀯𑀲𑀫𑁆𑀪𑀸𑀭𑁂𑀲𑀼, 𑀘𑀓𑁆𑀓𑀸𑀤𑀺𑀅𑀯𑀬𑀯𑀸𑀦𑀁 𑀲𑀫𑁄𑀥𑀸𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀤𑁄𑀢𑀺 𑀯𑁄𑀳𑀸𑀭𑁄.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑀲𑁆𑀲 𑀅𑀪𑀸𑀯𑁄 𑀪𑀕𑀯𑀢𑀸 𑀯𑀼𑀢𑁆𑀢𑁄, 𑀢𑀲𑁆𑀫𑀸. 𑀦 𑀯𑀘𑀦𑀫𑀢𑁆𑀢𑀫𑁂𑀯 𑀆𑀮𑀫𑁆𑀩𑀺𑀢𑀩𑁆𑀩𑀁 𑀅𑀥𑀺𑀧𑁆𑀧𑀸𑀬𑀁 𑀧𑀳𑀸𑀬𑀸𑀢𑀺 𑀅𑀢𑁆𑀣𑁄. 𑀤𑀴𑁆𑀳𑀫𑀽𑀴𑁆𑀳𑁄𑀯 𑀳𑀼𑀢𑁆𑀯𑀸 𑀕𑀡𑁆𑀳𑀸𑀢𑀻𑀢𑀺 𑀤𑀴𑁆𑀳𑀫𑀽𑀴𑁆𑀳𑀕𑁆𑀕𑀸𑀳𑀻, 𑀓𑀸𑀭𑀡𑁂 𑀤𑀲𑁆𑀲𑀺𑀢𑁂𑀧𑀺 𑀅𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀕𑀳𑀡𑀁 𑀤𑀴𑁆𑀳𑀕𑁆𑀕𑀳𑀡𑀁. 𑀓𑀸𑀭𑀡𑀲𑁆𑀲𑁂𑀯 𑀤𑀝𑁆𑀞𑀼𑀫𑀲𑀫𑀢𑁆𑀣𑀢𑀸𑀯𑀲𑁂𑀦 𑀕𑀳𑀡𑀁 𑀫𑀽𑀴𑁆𑀳𑀕𑁆𑀕𑀳𑀡𑀁. 𑀢𑀸𑀤𑀺𑀲𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀦 𑀘…𑀧𑁂… 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀲𑀼𑀢𑁆𑀢𑀧𑀤𑀸𑀦𑀦𑁆𑀢𑀺 𑀦𑁂𑀬𑁆𑀬𑀢𑁆𑀣𑀦𑀻𑀢𑀢𑁆𑀣𑀯𑀲𑁂𑀦 𑀉𑀪𑀬𑀣𑀸 𑀞𑀺𑀢𑀸𑀦𑀁 𑀲𑀼𑀢𑁆𑀢𑀦𑁆𑀢𑀸𑀦𑀁.

𑀤𑁆𑀯𑁂 𑀲𑀘𑁆𑀘𑀸𑀦𑀺 𑀯𑀼𑀢𑁆𑀢𑀸𑀦𑀺 𑀢𑀣𑀸 𑀢𑀣𑀸 𑀯𑀺𑀦𑁂𑀢𑀩𑁆𑀩𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂𑀲𑀜𑁆𑀳𑀺 𑀲𑀫𑁆𑀫𑀼𑀢𑀺𑀤𑁂𑀲𑀦𑀸𑀬 𑀯𑀺𑀲𑁂𑀲𑀸𑀥𑀺𑀕𑀫𑁄 𑀳𑁄𑀢𑀺, 𑀢𑁂𑀲𑀁 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀤𑁂𑀲𑁂𑀢𑀺. 𑀬𑁂𑀲𑀜𑁆𑀘 𑀧𑀭𑀫𑀢𑁆𑀣𑀤𑁂𑀲𑀦𑀸𑀬, 𑀢𑁂𑀲𑀁 𑀧𑀭𑀫𑀢𑁆𑀣𑀯𑀲𑁂𑀦 𑀤𑁂𑀲𑁂𑀢𑀺. 𑀤𑁂𑀲𑀪𑀸𑀲𑀸𑀓𑀼𑀲𑀮𑁄 𑀯𑀺𑀬 𑀆𑀘𑀭𑀺𑀬𑁄 𑀢𑀁𑀢𑀁𑀤𑁂𑀲𑀯𑀸𑀲𑀺𑀫𑀸𑀡𑀯𑀸𑀦𑀁 𑀢𑀸𑀬 𑀢𑀸𑀬 𑀪𑀸𑀲𑀸𑀬. 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀧𑀭𑀫𑀢𑁆𑀣𑀲𑀘𑁆𑀘𑀜𑁆𑀘𑀸𑀢𑀺 𑀏𑀢𑁆𑀣 ‘‘𑀧𑀼𑀕𑁆𑀕𑀮𑁄 𑀲𑀢𑁆𑀢𑁄 𑀇𑀢𑁆𑀣𑀻 𑀧𑀼𑀭𑀺𑀲𑁄 𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑁄’’𑀢𑀺𑀏𑀯𑀫𑀸𑀤𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀮𑁄𑀓𑁂 𑀓𑀢𑀲𑀗𑁆𑀓𑁂𑀢𑀯𑀲𑁂𑀦 𑀢𑀣𑀢𑁆𑀢𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀁. 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀸𑀢𑀺𑀏𑀯𑀫𑀸𑀤𑀺 𑀧𑀭𑀫𑀢𑁆𑀣𑀯𑀲𑁂𑀦𑁂𑀯 𑀢𑀣𑀢𑁆𑀣𑀸 𑀧𑀭𑀫𑀢𑁆𑀣𑀲𑀘𑁆𑀘𑀁. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋

‘‘𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀁;

𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀁, 𑀥𑀫𑁆𑀫𑀸𑀦𑀁 𑀪𑀽𑀢𑀓𑀸𑀭𑀡𑀁. (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁩𑁯-𑁪𑁪𑁩);

‘‘𑀢𑀲𑁆𑀫𑀸 𑀯𑁄𑀳𑀸𑀭𑀓𑀼𑀲𑀮𑀲𑁆𑀲, 𑀮𑁄𑀓𑀦𑀸𑀣𑀲𑁆𑀲 𑀲𑀢𑁆𑀣𑀼𑀦𑁄;

𑀲𑀫𑁆𑀫𑀼𑀢𑀺𑀁 𑀯𑁄𑀳𑀭𑀦𑁆𑀢𑀲𑁆𑀲, 𑀫𑀼𑀲𑀸𑀯𑀸𑀤𑁄 𑀦 𑀚𑀸𑀬𑀢𑀻’’𑀢𑀺.

𑁭𑁮𑁭-𑁮. 𑀬𑁄 𑀲𑁄 𑀇𑀫𑀁 𑀕𑀦𑁆𑀣𑀁 𑀅𑀘𑁆𑀘𑀦𑁆𑀢𑀁 𑀲𑀢𑀢𑀫𑁆𑀧𑀺 𑀘𑀺𑀦𑁆𑀢𑁂𑀢𑀺, 𑀢𑀲𑁆𑀲 𑀢𑀢𑁄 𑀲𑀺𑀤𑁆𑀥𑀸 𑀧𑀭𑀫𑀸 𑀧𑀜𑁆𑀜𑀸 𑀯𑁂𑀧𑀼𑀮𑁆𑀮𑀪𑀸𑀯𑀁 𑀕𑀘𑁆𑀙𑀢𑀺. 𑀅𑀥𑀺𑀁 𑀘𑀺𑀢𑁆𑀢𑀲𑀦𑁆𑀢𑀸𑀧𑀁 𑀦𑀻𑀳𑀭𑀢𑀺 𑀅𑀧𑀦𑁂𑀢𑀻𑀢𑀺 𑀅𑀥𑀺𑀦𑀻𑀳𑀭𑀁. 𑀯𑀺𑀫𑀢𑀺𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀬, 𑀫𑁄𑀳𑀲𑁆𑀲 𑀯𑀸 𑀯𑀺𑀦𑀸𑀲𑀁 𑀓𑀭𑁄𑀢𑀺 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄𑀢𑀺 𑀯𑀺𑀫𑀢𑀺𑀯𑀺𑀦𑀸𑀲𑀓𑀭𑀁. 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀤𑀸𑀬 𑀫𑀦𑀯𑀟𑁆𑀠𑀦𑀢𑁄 𑀧𑀺𑀬𑀓𑀭𑀁. 𑀯𑀺𑀓𑀲𑀢𑀻𑀢𑀺 𑀤𑀺𑀩𑁆𑀩𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂, 𑀅𑀪𑀺𑀥𑀫𑁆𑀫𑁂 𑀯𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀓𑀸𑀭𑀓𑀧𑀝𑀺𑀯𑁂𑀥𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.