𑁧𑁨. 𑀤𑁆𑀯𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀏𑀢𑁆𑀣𑀸𑀢𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑀥𑀫𑁆𑀫𑀸𑀦𑀁 𑀦𑀺𑀤𑁆𑀤𑁂𑀲𑀧𑀭𑀺𑀬𑁄𑀲𑀸𑀦𑁂. 𑀏𑀢𑁆𑀢𑀓𑀫𑁂𑀯𑀸𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀽𑀧𑀦𑀺𑀩𑁆𑀩𑀸𑀦𑀫𑀢𑁆𑀢𑀫𑁂𑀯. 𑀧𑀜𑁆𑀜𑀸𑀧𑁂𑀢𑀩𑁆𑀩𑀢𑁄𑀢𑀺 𑀧𑀭𑀫𑀢𑁆𑀣𑀥𑀫𑁆𑀫𑀸 𑀯𑀺𑀬 𑀲𑀓𑀲𑀓𑀲𑀪𑀸𑀯𑀯𑀲𑁂𑀦 𑀅𑀧𑀜𑁆𑀜𑀸𑀬𑀫𑀸𑀦𑀸 𑀳𑀼𑀢𑁆𑀯𑀸 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦 𑀧𑀜𑁆𑀜𑀸𑀧𑀺𑀬𑀫𑀸𑀦𑀢𑁆𑀢𑀸. 𑀧𑀜𑁆𑀜𑀸𑀧𑀦𑀢𑁄𑀢𑀺 𑀧𑀭𑀫𑀢𑁆𑀣𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀥𑀫𑁆𑀫𑀸𑀦𑀁 𑀧𑀓𑀸𑀲𑀦𑀯𑀲𑁂𑀦 𑀧𑀜𑁆𑀜𑀸𑀧𑀦𑀢𑁄. 𑀢𑀢𑁆𑀣 ‘‘𑀧𑀜𑁆𑀜𑀸𑀧𑁂𑀢𑀩𑁆𑀩𑀢𑁄’’𑀢𑀺 𑀇𑀫𑀺𑀦𑀸 𑀧𑀜𑁆𑀜𑀸𑀧𑀻𑀬𑀢𑀺 𑀧𑀓𑀸𑀭𑁂𑀦 𑀜𑀸𑀧𑀻𑀬𑀢𑀻𑀢𑀺 𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀓𑀫𑁆𑀫𑀲𑀸𑀥𑀦𑀯𑀲𑁂𑀦 𑀅𑀢𑁆𑀣𑀧𑀜𑁆𑀜𑀢𑁆𑀢𑀺𑀪𑀽𑀢𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸. ‘‘𑀧𑀜𑁆𑀜𑀸𑀧𑀦𑀢𑁄’’𑀢𑀺 𑀇𑀫𑀺𑀦𑀸 𑀧𑀜𑁆𑀜𑀸𑀧𑁂𑀢𑀺 𑀧𑀓𑀸𑀭𑁂𑀦 𑀜𑀸𑀧𑁂𑀢𑀻𑀢𑀺 𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀓𑀢𑁆𑀢𑀼𑀲𑀸𑀥𑀦𑀯𑀲𑁂𑀦 𑀢𑀲𑁆𑀲𑀸 𑀅𑀪𑀺𑀥𑀸𑀬𑀓𑀪𑀽𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀡𑁆𑀡𑀢𑁆𑀢𑀺𑀤𑀼𑀓𑀦𑀺𑀤𑁆𑀤𑁂𑀲𑁂 ‘‘𑀲𑀗𑁆𑀔𑀸…𑀧𑁂… 𑀯𑁄𑀳𑀸𑀭𑁄’’𑀢𑀺 (𑀥. 𑀲. 𑁧𑁩𑁧𑁩-𑁧𑁩𑁧𑁪) 𑀘𑀢𑀽𑀳𑀺 𑀧𑀤𑁂𑀳𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸. ‘‘𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄’’𑀢𑀺 (𑀥. 𑀲. 𑁧𑁩𑁧𑁩-𑁧𑁩𑁧𑁪) 𑀙𑀳𑀺 𑀧𑀤𑁂𑀳𑀺 𑀦𑀸𑀫𑀧𑀜𑁆𑀜𑀢𑁆𑀢𑀺 𑀓𑀣𑀺𑀢𑀸𑀢𑀺 𑀆𑀘𑀭𑀺𑀬𑀸𑀦𑀁 𑀇𑀘𑁆𑀙𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑁂𑀦𑁂𑀯𑀸𑀳𑀸’’𑀢𑀺𑀆𑀤𑀺. 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀳𑁂𑀝𑁆𑀞𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀬 𑀯𑀼𑀢𑁆𑀢𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁. 𑀲𑀗𑁆𑀔𑀸𑀢𑀺 ‘‘𑀅𑀳𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑀸𑀬𑀫𑀸𑀦𑀢𑀸. 𑀲𑀫𑀜𑁆𑀜𑀸𑀢𑀺 𑀲𑀗𑁆𑀓𑁂𑀢𑀯𑀲𑁂𑀦 𑀜𑀸𑀬𑀫𑀸𑀦𑀢𑀸. 𑀧𑀜𑁆𑀜𑀢𑁆𑀢𑀻𑀢𑀺 𑀅𑀲𑀗𑁆𑀓𑀭𑀯𑀲𑁂𑀦 𑀅𑀦𑁂𑀓𑀥𑀸 𑀯𑀺𑀪𑀚𑀺𑀢𑁆𑀯𑀸 𑀧𑀜𑁆𑀜𑀸𑀧𑀺𑀬𑀫𑀸𑀦𑀢𑀸. 𑀯𑁄𑀳𑀸𑀭𑁄𑀢𑀺 𑀧𑀸𑀓𑀝𑀁 𑀓𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀢𑀸, 𑀓𑀣𑀦𑀯𑀲𑁂𑀦 𑀉𑀧𑀬𑀼𑀚𑁆𑀚𑀫𑀸𑀦𑀢𑀸 𑀯𑀸. 𑀅𑀢𑁆𑀣𑀸𑀪𑀺𑀫𑀼𑀔𑀁 𑀦𑀫𑀢𑀻𑀢𑀺 𑀦𑀸𑀫𑀁. 𑀢𑀁 𑀧𑀦 𑀅𑀦𑁆𑀯𑀢𑁆𑀣𑀭𑀼𑀴𑁆𑀳𑀻𑀯𑀲𑁂𑀦 𑀤𑀼𑀯𑀺𑀥𑀁, 𑀲𑀸𑀫𑀜𑁆𑀜𑀕𑀼𑀡𑀓𑀺𑀢𑁆𑀢𑀺𑀫𑀑𑀧𑀧𑀸𑀢𑀺𑀓𑀦𑀸𑀫𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀦𑀸𑀫𑀓𑀫𑁆𑀫𑀦𑁆𑀢𑀺 𑀦𑀸𑀫𑀓𑀭𑀡𑀁. 𑀦𑀸𑀫𑀥𑁂𑀬𑁆𑀬𑀦𑁆𑀢𑀺 𑀦𑀸𑀫𑀞𑀧𑀦𑀁, 𑀦𑀸𑀫𑀥𑁂𑀬𑁆𑀬𑀦𑁆𑀢𑀺 𑀯𑀸 𑀲𑁂𑀝𑁆𑀞𑀸𑀦𑀁 𑀦𑀸𑀫𑀁. 𑀅𑀓𑁆𑀔𑀭𑀤𑁆𑀯𑀸𑀭𑁂𑀦 𑀅𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀉𑀢𑁆𑀢𑀺 𑀓𑀣𑀦𑀁 𑀦𑀺𑀭𑀼𑀢𑁆𑀢𑀺. 𑀩𑁆𑀬𑀜𑁆𑀚𑀦𑀦𑁆𑀢𑀺 𑀧𑀸𑀓𑀝𑀓𑀭𑀡𑀁. 𑀅𑀪𑀺𑀮𑀸𑀧𑁄𑀢𑀺 𑀅𑀪𑀺𑀮𑀸𑀧𑀦𑀁.

𑀅𑀳𑀦𑁆𑀢𑀺 𑀭𑀽𑀧𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀅𑀳𑀁𑀓𑀸𑀭𑀩𑀼𑀤𑁆𑀥𑀺𑀯𑀺𑀲𑀬𑀪𑀽𑀢𑀁 𑀅𑀢𑁆𑀢𑀦𑁄 𑀔𑀦𑁆𑀥𑀲𑀫𑀽𑀳𑀲𑀦𑁆𑀢𑀸𑀦𑀫𑀼𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀁 𑀢𑀤𑀜𑁆𑀜𑀸𑀦𑀜𑁆𑀜𑀪𑀸𑀯𑁂𑀦 𑀅𑀦𑀺𑀩𑁆𑀩𑀘𑀦𑀻𑀬𑀁 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀅𑀳𑀦𑁆𑀢𑀺 𑀳𑀻’’𑀢𑀺𑀆𑀤𑀺. ‘‘𑀅𑀳𑀦𑁆𑀢𑀺…𑀧𑁂… 𑀓𑀢𑁆𑀯𑀸’’𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀬𑀣𑀸𑀢𑀺𑀆𑀤𑀺𑀦𑀸 𑀢𑀁 𑀧𑀓𑀸𑀲𑁂𑀢𑀺.

𑀬𑀲𑁆𑀫𑀸 ‘‘𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄’’𑀢𑀺 ‘‘𑀏𑀯𑀁 𑀲𑀗𑁆𑀔𑀸’’𑀢𑀺 𑀇𑀫𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀇𑀤𑀸𑀦𑀺 𑀧𑀜𑁆𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺’’𑀦𑁆𑀢𑀺𑀆𑀤𑀺.

𑀢𑀤𑀦𑀼𑀭𑀽𑀧𑀸 𑀚𑀸𑀢𑀸𑀢𑀺 𑀢𑀚𑁆𑀚𑀸, 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀯𑀺𑀬 𑀓𑁂𑀯𑀮𑀁 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦𑁂𑀯 𑀅𑀳𑀼𑀢𑁆𑀯𑀸 𑀥𑀫𑁆𑀫𑀲𑀪𑀸𑀯𑀲𑁆𑀲 𑀅𑀦𑀼𑀭𑀽𑀧𑀯𑀲𑁂𑀦 𑀧𑀯𑀢𑁆𑀢𑀸 𑀧𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀸𑀫𑀧𑀜𑁆𑀜𑀢𑁆𑀢𑀺𑀧𑀺 𑀯𑀘𑀦𑀢𑁆𑀣𑀲𑀗𑁆𑀔𑀸𑀢𑀓𑀸𑀭𑀡𑀁 𑀉𑀧𑀸𑀤𑀸𑀬 𑀧𑀝𑀺𑀘𑁆𑀘 𑀧𑀯𑀢𑁆𑀢𑀦𑀢𑁄 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑀁 𑀮𑀪𑀢𑀻𑀢𑀺 𑀢𑀲𑁆𑀲𑀸𑀧𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄. 𑀕𑀡𑁆𑀞𑀺𑀧𑀤𑀓𑀸𑀭𑁂𑀦𑀸𑀧𑀺 𑀳𑀺 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀻𑀢𑀺 𑀉𑀧𑀸𑀤𑀸𑀦𑀯𑀢𑀻 𑀧𑀜𑁆𑀜𑀢𑁆𑀢𑀺 𑀓𑀸𑀭𑀡𑀯𑀢𑀺𑀁 𑀓𑀸𑀭𑀡𑀪𑀽𑀢𑀫𑀢𑁆𑀣𑀫𑀼𑀧𑀸𑀤𑀸𑀬 𑀕𑀳𑁂𑀢𑁆𑀯𑀸 𑀢𑀦𑁆𑀦𑀺𑀲𑁆𑀲𑀬𑁂𑀦 𑀧𑀜𑁆𑀜𑀸𑀧𑀻𑀬𑀢𑀺, 𑀲𑀩𑁆𑀩𑁄𑀧𑀺 𑀧𑀜𑁆𑀜𑀢𑁆𑀢𑀺𑀪𑁂𑀤𑁄 𑀅𑀦𑁂𑀦 𑀮𑀓𑁆𑀔𑀡𑁂𑀦 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀫𑁂𑀯 𑀪𑀚𑀢𑀺. 𑀅𑀦𑀼𑀧𑀸𑀤𑀸𑀬 𑀳𑀺 𑀧𑀜𑁆𑀜𑀢𑁆𑀢𑀺 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁. 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀻𑀢𑀺 𑀧𑀝𑀺𑀧𑀓𑁆𑀔𑀪𑀽𑀢𑀁 𑀏𑀓𑀧𑀜𑁆𑀜𑀢𑁆𑀢𑀺𑀁 𑀉𑀧𑀦𑀺𑀥𑀸𑀬 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑀸 𑀧𑀜𑁆𑀜𑀢𑁆𑀢𑀺. 𑀘𑀓𑁆𑀔𑀼𑀲𑁄𑀢-𑀕𑁆𑀕𑀳𑀡𑁂𑀦 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺 𑀤𑀲𑁆𑀲𑁂𑀢𑀺, 𑀭𑀽𑀧𑀲𑀤𑁆𑀤-𑀕𑁆𑀕𑀳𑀡𑁂𑀦 𑀩𑀸𑀳𑀺𑀭𑀸𑀬𑀢𑀦𑀸𑀦𑀺. 𑀧𑀣𑀯𑀻𑀢𑁂𑀚𑁄𑀯𑀸𑀬𑀼-𑀕𑁆𑀕𑀳𑀡𑁂𑀦 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀺. 𑀏𑀢𑁂𑀦𑁂𑀯 𑀥𑀫𑁆𑀫𑀸𑀬𑀢𑀦𑁂𑀧𑀺 𑀮𑀩𑁆𑀪𑀫𑀸𑀦𑀪𑁂𑀤𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀲𑁆𑀫𑀸 𑀧𑀣𑀯𑀸𑀤𑀺𑀓𑀸 𑀧𑀜𑁆𑀜𑀢𑁆𑀢𑀺 𑀲𑀲𑀫𑁆𑀪𑀸𑀭𑀧𑀣𑀯𑀺𑀬𑀁 𑀏𑀓𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀲𑀫𑀽𑀳𑀫𑁂𑀯𑁄𑀧𑀸𑀤𑀸𑀬 𑀧𑀜𑁆𑀜𑀸𑀧𑀻𑀬𑀢𑀺, 𑀖𑀝𑀸𑀤𑀺𑀓𑀸 𑀘 𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑀲𑀫𑀽𑀳𑁂𑀲𑀼 𑀲𑀩𑁆𑀩𑁂𑀲𑀫𑁂𑀯 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀲𑀫𑀽𑀳𑀫𑁂𑀯𑁄𑀧𑀸𑀤𑀸𑀬 𑀧𑀜𑁆𑀜𑀸𑀧𑀻𑀬𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀓𑀲𑁆𑀲 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀓𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀲𑀫𑀽𑀳𑀫𑀼𑀧𑀸𑀤𑀸𑀬 𑀧𑀜𑁆𑀜𑀸𑀧𑀺𑀬𑀫𑀸𑀦𑀸𑀬 𑀧𑀣𑀯𑀸𑀤𑀺𑀯𑀲𑁂𑀦 𑀧𑀸𑀓𑀝𑀪𑀸𑀯𑀢𑁄 𑀢𑀁 𑀞𑀧𑁂𑀢𑁆𑀯𑀸 𑀇𑀢𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀲𑀫𑀽𑀳𑀧𑀜𑁆𑀜𑀢𑁆𑀢𑀺 𑀦𑀸𑀫 𑀲𑀫𑀽𑀳𑀲𑁆𑀲 𑀧𑀜𑁆𑀜𑀸𑀧𑀦𑀢𑁄. 𑀤𑀺𑀲𑀸𑀓𑀸𑀲𑀸𑀤𑀻𑀲𑀼 𑀤𑀺𑀲𑀸-𑀕𑁆𑀕𑀳𑀡𑁂𑀦 𑀘𑀦𑁆𑀤𑀲𑀽𑀭𑀺𑀬𑀸𑀯𑀢𑁆𑀢𑀦𑀫𑀼𑀧𑀸𑀤𑀸𑀬 𑀧𑀜𑁆𑀜𑀸𑀧𑀺𑀬𑀫𑀸𑀦𑀁 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀆𑀓𑀸𑀲-𑀕𑁆𑀕𑀳𑀡𑁂𑀦 𑀅𑀲𑀫𑁆𑀨𑀼𑀝𑁆𑀞𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑀺𑀬𑀫𑀸𑀦𑀁 𑀓𑀽𑀧𑀕𑀼𑀳𑀸𑀤𑀺𑀆𑀓𑀸𑀲𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀓𑀸𑀮-𑀕𑁆𑀕𑀳𑀡𑁂𑀦 𑀘𑀦𑁆𑀤𑀸𑀯𑀢𑁆𑀢𑀦𑀸𑀤𑀺𑀓𑀫𑀼𑀧𑀸𑀤𑀸𑀬 𑀧𑀜𑁆𑀜𑀸𑀧𑀺𑀬𑀫𑀸𑀦𑀁 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑀸𑀮𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀦𑀺𑀫𑀺𑀢𑁆𑀢-𑀕𑁆𑀕𑀳𑀡𑁂𑀦 𑀩𑀳𑀺𑀤𑁆𑀥𑀸 𑀧𑀣𑀯𑀻𑀫𑀡𑁆𑀟𑀮𑀸𑀤𑀺𑀓𑀁, 𑀅𑀚𑁆𑀛𑀢𑁆𑀢𑀺𑀓𑀜𑁆𑀘 𑀪𑀸𑀯𑀦𑀸𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑀺𑀬𑀫𑀸𑀦𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀤𑀲𑁆𑀲𑁂𑀢𑀺. 𑀅𑀪𑀸𑀯-𑀕𑁆𑀕𑀳𑀡𑁂𑀦 𑀪𑀸𑀯𑀦𑀸𑀩𑀮𑁂𑀦 𑀅𑀧𑁆𑀧𑀯𑀢𑁆𑀢𑀦𑀲𑀪𑀸𑀯𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀛𑀸𑀦𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀛𑀸𑀦𑀸𑀭𑀫𑁆𑀫𑀡𑀁 𑀅𑀪𑀸𑀯𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀦𑀺𑀭𑁄𑀥-𑀕𑁆𑀕𑀳𑀡𑁂𑀦 𑀪𑀸𑀯𑀦𑀸𑀩𑀮𑁂𑀦 𑀦𑀺𑀭𑀼𑀤𑁆𑀥𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀲𑁆𑀲𑀸𑀬 𑀧𑀜𑁆𑀜𑀢𑁆𑀢𑀁 𑀦𑀺𑀭𑁄𑀥𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀆𑀤𑀺-𑀕𑁆𑀕𑀳𑀡𑁂𑀦 𑀔𑀬𑀸𑀤𑀺𑀲𑀪𑀸𑀯𑀁 𑀢𑀁 𑀢𑀁 𑀥𑀫𑁆𑀫𑀫𑀼𑀧𑀸𑀤𑀸𑀬 𑀧𑀜𑁆𑀜𑀸𑀧𑀺𑀬𑀫𑀸𑀦𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀸𑀧𑀺 𑀳𑀺 𑀤𑀺𑀲𑀸𑀓𑀸𑀲𑀸𑀤𑀺𑀓𑀸 𑀯𑀺𑀬 𑀥𑀫𑁆𑀫𑀲𑀫𑀽𑀳𑀫𑀼𑀧𑀸𑀤𑀸𑀬 𑀅𑀧𑀜𑁆𑀜𑀢𑁆𑀢𑀪𑀸𑀯𑀢𑁄 𑀅𑀲𑀫𑀽𑀳𑀧𑀜𑁆𑀜𑀢𑁆𑀢𑀺𑀬𑁂𑀯𑀸𑀢𑀺.

𑀲𑀸𑀢𑀺 𑀅𑀬𑀁 𑀤𑁆𑀯𑀺𑀥𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺. 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀯𑀘𑀦𑀢𑁆𑀣𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀬𑀁𑀬𑁂𑀯 𑀲𑀗𑁆𑀕𑀬𑁆𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀚𑁆𑀚𑀫𑀸𑀦𑀁 𑀧𑀭𑀫𑀢𑁆𑀣𑀁 𑀚𑁄𑀢𑀬𑀢𑀻’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀉𑀧𑀭𑀺 ‘‘𑀙 𑀧𑀜𑁆𑀜𑀢𑁆𑀢𑀺𑀬𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀲𑀪𑀸𑀯𑁂𑀦 𑀉𑀧𑀮𑀩𑁆𑀪𑀫𑀸𑀦𑀁. 𑀅𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀞𑀧𑁂𑀢𑁆𑀯𑀸 𑀮𑁄𑀓𑀲𑀗𑁆𑀓𑁂𑀢𑀁 𑀲𑀪𑀸𑀯𑀯𑀲𑁂𑀦 𑀅𑀦𑀼𑀧𑀮𑀩𑁆𑀪𑀫𑀸𑀦𑀁. 𑀦𑀸𑀫𑀫𑀢𑁆𑀢𑀦𑁆𑀢𑀺 𑀦𑀸𑀫𑀫𑀢𑁆𑀢𑀯𑀦𑁆𑀢𑀁. 𑀲𑁄𑀢𑀤𑁆𑀯𑀸𑀭𑀚𑀯𑀦𑀸𑀦𑀦𑁆𑀢𑀭𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀤𑁆𑀤𑀸𑀭𑀫𑁆𑀫𑀡𑀸𑀬 𑀲𑁄𑀢𑀤𑁆𑀯𑀸𑀭𑀚𑀯𑀦𑀯𑀻𑀣𑀺𑀬𑀸, 𑀢𑀤𑀦𑀼𑀲𑀸𑀭𑀧𑁆𑀧𑀯𑀢𑁆𑀢𑀸𑀬 𑀅𑀢𑀻𑀢𑀲𑀤𑁆𑀤𑀸𑀭𑀫𑁆𑀫𑀡𑀸𑀬 𑀫𑀦𑁄𑀤𑁆𑀯𑀸𑀭𑀚𑀯𑀦𑀯𑀻𑀣𑀺𑀬𑀸 𑀘 𑀅𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑁂𑀦. 𑀫𑀦𑁄𑀤𑁆𑀯𑀸𑀭𑀚𑀯𑀦𑀯𑀻𑀣𑀺𑀧𑀺 𑀳𑀺 𑀲𑁄𑀢𑀤𑁆𑀯𑀸𑀭𑀚𑀯𑀦𑀸𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑀸 𑀢𑀕𑁆𑀕𑀳𑀡𑁂𑀦𑁂𑀯 𑀇𑀥 𑀕𑀳𑀺𑀢𑀸. 𑀕𑀳𑀺𑀢𑀧𑀼𑀩𑁆𑀩𑀲𑀗𑁆𑀓𑁂𑀢𑁂𑀦𑀸𑀢𑀺 ‘‘𑀅𑀬𑀁 𑀇𑀫𑀲𑁆𑀲 𑀅𑀢𑁆𑀣𑁄, 𑀇𑀤𑀫𑀺𑀫𑀲𑁆𑀲 𑀯𑀸𑀘𑀓’’𑀦𑁆𑀢𑀺 𑀏𑀯𑀁 𑀯𑀘𑀦𑀯𑀘𑀦𑀢𑁆𑀣𑀲𑀫𑁆𑀩𑀦𑁆𑀥𑀕𑁆𑀕𑀳𑀡𑀯𑀲𑁂𑀦 𑀕𑀳𑀺𑀢𑀧𑀼𑀩𑁆𑀩𑀪𑀸𑀯𑀲𑀗𑁆𑀓𑁂𑀢𑁂𑀦. 𑀬𑀸𑀬𑀸𑀢𑀺 𑀬𑀸𑀬 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀓𑀭𑀡𑀪𑀽𑀢𑀸𑀬. 𑀫𑀦𑁄𑀤𑁆𑀯𑀸𑀭𑀚𑀯𑀦𑀯𑀺𑀜𑁆𑀜𑀸𑀡𑁂𑀦 𑀓𑀢𑁆𑀢𑀼𑀪𑀽𑀢𑁂𑀦. 𑀫𑀦𑁄𑀤𑁆𑀯𑀸𑀭𑀚𑀯𑀦𑀯𑀺𑀜𑁆𑀜𑀸𑀡𑁂𑀦 𑀯𑀸 𑀓𑀭𑀡𑀪𑀽𑀢𑁂𑀦, 𑀬𑀸𑀬 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀓𑀢𑁆𑀢𑀼𑀪𑀽𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀯𑀲𑁂𑀦 𑀧𑀦 𑀤𑀼𑀯𑀺𑀥𑀁 𑀅𑀢𑁆𑀣𑀚𑀸𑀢𑀁 𑀧𑀜𑁆𑀜𑀸𑀧𑀻𑀬𑀢𑀺 𑀯𑀺𑀜𑁆𑀜𑀸𑀧𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀅𑀢𑁆𑀣𑀸 𑀬𑀲𑁆𑀲𑀸𑀦𑀼𑀲𑀸𑀭𑁂𑀦, 𑀯𑀺𑀜𑁆𑀜𑀸𑀬𑀦𑁆𑀢𑀺 𑀢𑀢𑁄 𑀧𑀭𑀁;

𑀲𑀸𑀬𑀁 𑀧𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀮𑁄𑀓𑀲𑀗𑁆𑀓𑁂𑀢𑀦𑀺𑀫𑁆𑀫𑀺𑀢𑀸’’𑀢𑀺.

𑀓𑀢𑀭𑀚𑀯𑀦𑀯𑀻𑀣𑀺𑀬𑀁 𑀧𑀦𑀸𑀬𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀖𑀝𑁄’’𑀢𑀺𑀆𑀤𑀺𑀲𑀤𑁆𑀤𑀁 𑀲𑀼𑀡𑀦𑁆𑀢𑀲𑁆𑀲 𑀏𑀓𑀫𑁂𑀓𑀁 𑀲𑀤𑁆𑀤𑀁 𑀆𑀭𑀩𑁆𑀪 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀭𑀫𑁆𑀫𑀡𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀚𑀯𑀦𑀯𑀸𑀭𑀸 𑀳𑁄𑀦𑁆𑀢𑀺, 𑀢𑀢𑁄 𑀲𑀤𑁆𑀤𑀲𑀫𑀼𑀤𑀸𑀬𑀫𑀸𑀭𑀩𑁆𑀪 𑀏𑀓𑁄, 𑀢𑀢𑁄 𑀦𑀸𑀫𑀧𑀜𑁆𑀜𑀢𑁆𑀢𑀺𑀫𑀸𑀭𑀩𑁆𑀪 𑀏𑀓𑁄𑀢𑀺 𑀏𑀯𑀁 𑀲𑀤𑁆𑀤𑀲𑀫𑀼𑀤𑀸𑀬𑀸𑀭𑀫𑁆𑀫𑀡𑀸𑀬 𑀚𑀯𑀦𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀁 𑀦𑀸𑀫𑀧𑀜𑁆𑀜𑀢𑁆𑀢𑀺 𑀧𑀸𑀓𑀝𑀸 𑀳𑁄𑀢𑀺, 𑀢𑀢𑁄 𑀧𑀭𑀁 𑀅𑀢𑁆𑀣𑀸𑀯𑀩𑁄𑀥𑁄𑀢𑀺 𑀆𑀘𑀭𑀺𑀬𑀸.

𑀬𑀁 𑀲𑀦𑁆𑀥𑀸𑀬 𑀙𑀓𑁆𑀓𑀦𑀬𑁄 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀅𑀯𑀺𑀚𑁆𑀚𑀫𑀸𑀦𑀸𑀦𑀦𑁆𑀢𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀦𑀁. 𑀓𑁂𑀦𑀘𑀺 𑀆𑀓𑀸𑀭𑁂𑀦𑀸𑀢𑀺 𑀧𑀭𑀫𑀢𑁆𑀣𑀢𑁄, 𑀮𑁄𑀓𑀲𑀗𑁆𑀓𑁂𑀢𑀢𑁄 𑀯𑀸 𑀓𑁂𑀦𑀘𑀺 𑀧𑀓𑀸𑀭𑁂𑀦. 𑀅𑀦𑀼𑀧𑀮𑀩𑁆𑀪𑀫𑀸𑀦𑀸𑀦𑀁 𑀧𑀜𑁆𑀘𑀫𑀲𑀘𑁆𑀘𑀸𑀤𑀻𑀦𑀦𑁆𑀢𑀺 𑀆𑀓𑀸𑀲𑀸𑀤𑀺𑀧𑀜𑁆𑀘𑀫𑀲𑀘𑁆𑀘𑀸𑀤𑀻𑀦𑀁. 𑀆𑀤𑀺-𑀕𑁆𑀕𑀳𑀡𑁂𑀦 𑀅𑀝𑁆𑀞𑀫𑀩𑁄𑀚𑁆𑀛𑀗𑁆𑀕𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀓𑀢𑀺𑀧𑀼𑀭𑀺𑀲𑀸𑀤𑀻𑀦𑀦𑁆𑀢𑀺 𑀲𑀢𑁆𑀯𑀭𑀚𑀢𑀫𑀸𑀦𑀁 𑀲𑀫𑀸𑀦𑀸𑀯𑀢𑁆𑀣𑀸 𑀧𑀓𑀢𑀺𑀅𑀗𑁆𑀕𑀼𑀝𑁆𑀞𑀸𑀤𑀺𑀧𑀭𑀺𑀫𑀸𑀡𑁄 𑀓𑀸𑀭𑀓𑁄 𑀯𑁂𑀤𑀓𑁄 𑀅𑀢𑁆𑀢𑀸 𑀧𑀼𑀭𑀺𑀲𑁄𑀢𑀺𑀆𑀤𑀺𑀦𑀸 𑀧𑀭𑀺𑀓𑀧𑁆𑀧𑀺𑀢𑀸𑀦𑀁 𑀧𑀓𑀢𑀺𑀧𑀼𑀭𑀺𑀲𑀸𑀤𑀻𑀦𑀁. 𑀆𑀤𑀺-𑀕𑁆𑀕𑀳𑀡𑁂𑀦 𑀆𑀓𑀸𑀲𑀓𑀼𑀲𑀼𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀸𑀳𑀺 𑀯𑀺𑀚𑁆𑀚𑀸𑀤𑀻𑀳𑀺 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸. 𑀲𑁂𑀲𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣𑁂𑀯𑀸𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀬𑀫𑁂𑀯.

‘‘𑀓𑀼𑀲𑀕𑁆𑀕𑁂𑀦𑀼𑀤𑀓𑀫𑀸𑀤𑀸𑀬, 𑀲𑀫𑀼𑀤𑁆𑀤𑁂 𑀉𑀤𑀓𑀁 𑀫𑀺𑀦𑁂;

𑀏𑀯𑀁 𑀫𑀸𑀦𑀼𑀲𑀓𑀸 𑀓𑀸𑀫𑀸, 𑀤𑀺𑀩𑁆𑀩𑀓𑀸𑀫𑀸𑀦 𑀲𑀦𑁆𑀢𑀺𑀓𑁂’’𑀢𑀺. (𑀚𑀸. 𑁨.𑁨𑁧.𑁩𑁮𑁯) 𑁋

𑀯𑀘𑀦𑀢𑁄 𑀫𑀦𑀼𑀲𑁆𑀲𑀮𑁄𑀓𑁂 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀉𑀧𑀦𑀺𑀥𑀸𑀬 𑀦𑀺𑀳𑀻𑀦𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀧𑀡𑀁…𑀧𑁂… 𑀦𑀺𑀥𑀸𑀬𑀸’’𑀢𑀺. 𑀫𑀸𑀦𑀼𑀲𑀓𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀪𑀯𑀁. 𑀧𑀭𑀫𑀢𑁆𑀣𑁄 𑀘 𑀯𑀺𑀚𑁆𑀚𑀢𑀻𑀢𑀺 𑀧𑀸𑀞𑀲𑁂𑀲𑁄.

𑁭𑁭𑁮. 𑀢𑀢𑀺𑀬𑀸 𑀓𑁄𑀝𑀺 𑀦 𑀯𑀺𑀚𑁆𑀚𑀢𑀺 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑁋

‘‘𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄;

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑁄𑀧𑀮𑀩𑁆𑀪𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁩𑁯-𑁪𑁪𑁩);

𑀧𑀭𑀯𑀸𑀤𑁂𑀲𑀼 𑀦 𑀓𑀫𑁆𑀧𑀢𑀻𑀢𑀺 𑀧𑀓𑀢𑀺𑀧𑀼𑀭𑀺𑀲𑀦𑁆𑀢𑀭𑀸𑀤𑀺𑀯𑀸𑀤𑀻𑀦𑀁 𑀧𑀭𑁂𑀲𑀁 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸𑀤𑁂𑀲𑀼 𑀲𑀫𑁆𑀧𑀢𑁆𑀢𑁂𑀲𑀼, 𑀦𑀺𑀫𑀺𑀢𑁆𑀢𑀪𑀽𑀢𑁂𑀲𑀼 𑀯𑀸 𑀦 𑀓𑀫𑁆𑀧𑀢𑀺 𑀦 𑀧𑀯𑁂𑀥𑀢𑀺 𑀦 𑀘𑀮𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀧𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.