𑁧𑁧. 𑀏𑀓𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀦𑀺𑀩𑁆𑀩𑀸𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁬𑁮-𑁯. 𑀆𑀤𑀺𑀢𑁄 𑀭𑀽𑀧𑀸𑀦𑀦𑁆𑀢𑀭𑀫𑀼𑀤𑁆𑀤𑀺𑀝𑁆𑀞𑀁 𑀬𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀯𑀺𑀪𑀸𑀯𑀦𑀁 𑀬𑀣𑀸𑀩𑀮𑀁 𑀧𑀯𑀓𑁆𑀔𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀪𑀯𑀸𑀪𑀯𑀦𑁆𑀢𑀺 𑀪𑀯𑀢𑁄 𑀪𑀯𑀁, 𑀔𑀼𑀤𑁆𑀤𑀓𑀁, 𑀫𑀳𑀦𑁆𑀢𑀁 𑀯𑀸 𑀪𑀯𑀁. 𑀯𑀺𑀦𑀦𑀢𑁄𑀢𑀺 𑀲𑀁𑀲𑀺𑀩𑁆𑀩𑀦𑀢𑁄. 𑀢𑀡𑁆𑀳𑀸 𑀳𑀺 𑀲𑀁𑀲𑀸𑀭𑀦𑀸𑀬𑀺𑀓𑀪𑀸𑀯𑁂𑀦 𑀪𑀯𑀢𑁄 𑀪𑀯𑀁, 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀔𑀼𑀤𑁆𑀤𑀓𑀫𑀳𑀦𑁆𑀢𑀁 𑀪𑀯𑀁 𑀯𑀸 𑀅𑀧𑀭𑀸𑀧𑀭𑀪𑀸𑀯𑀸𑀬 𑀲𑀁𑀲𑀺𑀩𑁆𑀩𑀢𑀺, 𑀢𑀼𑀦𑁆𑀦𑀓𑀭𑀡𑀁 𑀯𑀺𑀬 𑀓𑀭𑁄𑀢𑀺. 𑀦𑀺𑀓𑁆𑀔𑀦𑁆𑀢𑀢𑁆𑀢𑀸𑀢𑀺 𑀯𑀺𑀲𑀁𑀬𑁄𑀕𑀯𑀲𑁂𑀦 𑀦𑀺𑀲𑁆𑀲𑀝𑀢𑁆𑀢𑀸. 𑀫𑀭𑀡𑀧𑀝𑀺𑀧𑀓𑁆𑀔𑀢𑀸𑀬, 𑀅𑀫𑀢𑀲𑀤𑀺𑀲𑀢𑀸𑀬 𑀯𑀸 𑀅𑀫𑀢𑀁. 𑀲𑀩𑁆𑀩𑀤𑀼𑀓𑁆𑀔𑀦𑀺𑀲𑁆𑀲𑀝𑀢𑁆𑀢𑀸 𑀧𑀭𑀫𑀁 𑀲𑀼𑀔𑀁. 𑀲𑀩𑁆𑀩𑁂𑀧𑀺 𑀲𑀗𑁆𑀔𑀸𑀭𑀸 𑀲𑀫𑀦𑁆𑀢𑀺 𑀉𑀧𑀲𑀫𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄. 𑀔𑀦𑁆𑀥𑀽𑀧𑀥𑀺𑀆𑀤𑀬𑁄 𑀲𑀩𑁆𑀩𑁂𑀧𑀺 𑀉𑀧𑀥𑀻 𑀉𑀧𑀤𑁆𑀤𑀯𑀸 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄. 𑀬𑀲𑁆𑀫𑀸 𑀢𑀁 𑀆𑀕𑀫𑁆𑀫 𑀓𑀸𑀫𑀢𑀡𑁆𑀳𑀸𑀤𑀺𑀪𑁂𑀤𑀸 𑀢𑀡𑁆𑀳𑀸 𑀲𑀩𑁆𑀩𑀲𑁄 𑀔𑀬𑀁 𑀕𑀘𑁆𑀙𑀢𑀺, 𑀯𑀺𑀭𑀚𑁆𑀚𑀢𑀺, 𑀦𑀺𑀭𑀼𑀚𑁆𑀛𑀢𑀺 𑀘, 𑀢𑀲𑁆𑀫𑀸 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀭𑀼𑀚𑁆𑀛𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀓𑀺𑀮𑁂𑀲𑀦𑀺𑀕𑀴𑀩𑀦𑁆𑀥𑀸𑀢𑀺 𑀭𑁄𑀥𑁄, 𑀲𑀁𑀲𑀸𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀢𑁄 𑀦𑀺𑀓𑁆𑀔𑀦𑁆𑀢𑁄𑀢𑀺 𑀦𑀺𑀭𑁄𑀥𑁄.

𑁭𑁭𑁦. 𑀅𑀥𑀺𑀕𑀫𑀸𑀢𑀺 𑀢𑀤𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀭𑀺𑀬𑀫𑀕𑁆𑀕𑁂𑀦 𑀧𑀝𑀺𑀯𑀺𑀚𑁆𑀛𑀦𑁂𑀦.

𑀭𑀸𑀕𑀓𑁆𑀔𑀬𑀸𑀤𑀺𑀪𑀸𑀯𑁂𑀦 𑀲𑀩𑁆𑀩𑀤𑀼𑀓𑁆𑀔𑀲𑀦𑁆𑀢𑀺𑀬𑀸 𑀧𑀘𑁆𑀘𑀬𑀢𑀸𑀬, 𑀓𑀺𑀮𑁂𑀲𑀲𑀦𑁆𑀢𑀸𑀧𑀸𑀪𑀸𑀯𑁂𑀦 𑀘 𑀲𑀦𑁆𑀢𑀺𑀮𑀓𑁆𑀔𑀡𑀁. 𑀅𑀘𑁆𑀘𑀼𑀢𑀺𑀭𑀲𑀦𑁆𑀢𑀺 𑀲𑀪𑀸𑀯𑀸𑀧𑀭𑀺𑀘𑁆𑀘𑀚𑀦𑀢𑁄 𑀅𑀘𑀯𑀦𑀲𑀫𑁆𑀧𑀢𑁆𑀢𑀺𑀓𑀁. 𑀅𑀲𑁆𑀲𑀸𑀲𑀓𑀭𑀡𑀭𑀲𑀦𑁆𑀢𑀺 𑀅𑀲𑁆𑀲𑀸𑀲𑀓𑀭𑀡𑀓𑀺𑀘𑁆𑀘𑀁. 𑀢𑀜𑁆𑀳𑀺 𑀧𑀸𑀦𑀪𑁄𑀚𑀦𑀸𑀤𑀺𑀲𑀼𑀜𑁆𑀜𑁂 𑀲𑀪𑀬𑀓𑀦𑁆𑀢𑀸𑀭𑁂 𑀧𑀭𑀺𑀩𑁆𑀪𑀫𑀦𑁂𑀦 𑀧𑀭𑀺𑀲𑁆𑀲𑀦𑁆𑀢𑀲𑁆𑀲 𑀅𑀤𑁆𑀥𑀺𑀓𑀧𑀼𑀭𑀺𑀲𑀲𑁆𑀲 𑀅𑀲𑁆𑀲𑀸𑀲𑀚𑀦𑀓𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀁 𑀯𑀦𑀦𑁆𑀢𑁄𑀤𑀓𑀁 𑀯𑀺𑀬 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀫𑁆𑀧𑀺 𑀯𑀘𑀦𑀧𑀣𑀸𑀢𑀺𑀓𑁆𑀓𑀦𑁆𑀢𑀫𑀳𑀸𑀤𑀼𑀓𑁆𑀔𑀪𑁂𑀭𑀯𑁂 𑀲𑀁𑀲𑀸𑀭𑀓𑀦𑁆𑀢𑀸𑀭𑁂 𑀧𑀭𑀺𑀩𑁆𑀪𑀫𑀦𑁂𑀦 𑀧𑀭𑀺𑀲𑁆𑀲𑀦𑁆𑀢𑀲𑁆𑀲 𑀬𑀣𑀸𑀦𑀼𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑀸𑀬 𑀤𑀲𑁆𑀲𑀦𑀲𑀫𑀓𑀸𑀮𑀫𑁂𑀯 𑀧𑀭𑀫𑀲𑁆𑀲𑀸𑀲𑀁 𑀚𑀦𑁂𑀢𑀺. 𑀔𑀦𑁆𑀥𑀦𑀺𑀫𑀺𑀢𑁆𑀢𑀯𑀺𑀘𑀺𑀢𑁆𑀢𑀢𑀸𑀬 𑀅𑀯𑀺𑀕𑁆𑀕𑀳𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀭𑀡𑀼𑀧𑀸𑀬𑀪𑀸𑀯𑀢𑁄 𑀦𑀺𑀲𑁆𑀲𑀭𑀡𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀻𑀢𑀺 𑀦𑀺𑀲𑁆𑀲𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀏𑀯𑀁 𑀦𑀺𑀩𑁆𑀩𑀸𑀦𑀲𑁆𑀲 𑀮𑀓𑁆𑀔𑀡𑀸𑀤𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀢𑀡𑁆𑀟𑀯𑀸𑀤𑀺𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑁄 𑀆𑀳 ‘‘𑀏𑀢𑁆𑀣𑀸𑀳𑀸’’𑀢𑀺𑀆𑀤𑀺, 𑀦 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺 𑀅𑀜𑁆𑀜𑀢𑁆𑀭 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀢𑁄 𑀧𑀦𑀸𑀬𑀫𑀪𑀺𑀦𑀺𑀯𑁂𑀲𑁄𑀢𑀺 𑀆𑀳 ‘‘𑀢𑀺𑀢𑁆𑀣𑀺𑀬𑀸𑀦𑀁…𑀧𑁂… 𑀦𑀻𑀬𑀢𑁄’’𑀢𑀺. 𑀬𑀣𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸. 𑀬𑀣𑀸 𑀳𑀺 𑀘𑁂𑀢𑁄𑀜𑀸𑀡𑀮𑀸𑀪𑀺𑀦𑁄 𑀏𑀯 𑀅𑀭𑀺𑀬𑀸 𑀧𑀭𑁂𑀲𑀁 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀘 𑀅𑀭𑀳𑀸 𑀏𑀯 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀏𑀯𑀁 𑀦𑀺𑀩𑁆𑀩𑀸𑀦𑀫𑁆𑀧𑀺 𑀲𑀻𑀮𑀸𑀤𑀺𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀪𑀽𑀢𑁂𑀦 𑀉𑀧𑀸𑀬𑁂𑀦𑁂𑀯 𑀉𑀧𑀮𑀩𑁆𑀪𑀢𑀻𑀢𑀺 ‘‘𑀦𑀢𑁆𑀣𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀅𑀭𑀺𑀬𑁂𑀳𑀺 𑀉𑀧𑀮𑀩𑁆𑀪𑀦𑀻𑀬𑀢𑁄. 𑀬𑀣𑀸 𑀳𑀺 𑀚𑀘𑁆𑀘𑀦𑁆𑀥𑀢𑁂𑀫𑀺𑀭𑀺𑀓𑀸𑀤𑀻𑀦𑀁 𑀅𑀤𑀲𑁆𑀲𑀦𑁂𑀦 ‘‘𑀲𑀽𑀭𑀺𑀬𑀸𑀤𑀬𑁄 𑀦𑀢𑁆𑀣𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀸 𑀘𑀓𑁆𑀔𑀼𑀫𑀦𑁆𑀢𑀸𑀦𑀁 𑀕𑁄𑀘𑀭𑀪𑀸𑀯𑁂𑀦 𑀅𑀢𑁆𑀣𑁂𑀯𑀸𑀢𑀺 𑀲𑀺𑀤𑁆𑀥𑀢𑁆𑀢𑀸, 𑀏𑀯𑀫𑁂𑀢𑀫𑁆𑀧𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀤𑀲𑁆𑀲𑀦𑀫𑀢𑁆𑀢𑁂𑀦 ‘‘𑀦𑀢𑁆𑀣𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀭𑀺𑀬𑀸𑀦𑀁 𑀧𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀧𑀤𑁂𑀲𑁂𑀦𑁂𑀯 𑀉𑀧𑀝𑁆𑀞𑀸𑀦𑀢𑁄 𑀏𑀓𑀦𑁆𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁 ‘‘𑀅𑀢𑁆𑀣𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀭𑀸𑀕𑀸𑀤𑀻𑀦𑀁 𑀔𑀬𑀫𑀢𑁆𑀢𑀫𑁂𑀯 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀬𑀲𑁆𑀫𑀢𑀸…𑀧𑁂… 𑀣𑁂𑀭𑁂𑀦 𑀤𑀲𑁆𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀸𑀕𑀓𑁆𑀔𑀬𑀸𑀤𑀺𑀤𑀻𑀧𑀓𑀁 𑀲𑀼𑀢𑁆𑀢𑀁 𑀦𑁂𑀬𑁆𑀬𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀢𑀁 𑀦’’𑀇𑀢𑀺 𑀧𑀝𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀏𑀓𑀁𑀲𑁂𑀦 𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀇𑀢𑀭𑀣𑀸 𑀬𑀣𑀸𑀭𑀼𑀢𑀯𑀲𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀩𑀳𑀼𑀤𑁄𑀲𑀸 𑀆𑀧𑀚𑁆𑀚𑀦𑁆𑀢𑀻𑀢𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀳𑀢𑁆𑀢𑀲𑁆𑀲𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀁 𑀧𑀼𑀝𑁆𑀞𑁂𑀦 𑀢𑁂𑀦𑁂𑀯𑀸𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀯 𑀫𑀢𑁂𑀦𑀸𑀢𑀺 𑀲𑀸𑀲𑀦𑀬𑀼𑀢𑁆𑀢𑀺𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀧𑀸𑀴𑀺𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀯𑀺𑀧𑁆𑀧𑀮𑀧𑀢𑁄 𑀢𑀯𑀚𑁆𑀛𑀸𑀲𑀬𑁂𑀦. 𑀦 𑀘 𑀧𑀦𑁂𑀢𑀁 𑀬𑀼𑀢𑁆𑀢𑀁, 𑀢𑀣𑀸𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑁄𑀓𑀼𑀢𑁆𑀢𑀭𑀨𑀮𑀘𑀺𑀢𑁆𑀢𑀲𑁆𑀲 𑀭𑀸𑀕𑀸𑀤𑀻𑀦𑀁 𑀔𑀬𑀫𑀢𑁆𑀢𑀢𑀸𑀧𑀚𑁆𑀚𑀦𑀁 𑀦 𑀬𑀼𑀢𑁆𑀢𑀁 𑀢𑀲𑁆𑀲 𑀅𑀕𑁆𑀕𑀨𑀮𑀲𑁆𑀲 𑀘𑀢𑀼𑀓𑁆𑀔𑀦𑁆𑀥𑀪𑀸𑀯𑁂𑀦 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸. 𑀢𑀲𑁆𑀫𑀸𑀢𑀺 𑀬𑀼𑀢𑁆𑀢𑀺𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀧𑀸𑀴𑀺𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀯𑁄𑀳𑀭𑀦𑁆𑀢𑀲𑁆𑀲 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬𑀸𑀢𑀺 𑀯𑀺𑀫𑀤𑁆𑀤𑀸𑀲𑀳𑀪𑀽𑀢𑀸𑀬 𑀲𑀤𑁆𑀤𑀢𑁆𑀣𑀫𑀢𑁆𑀢𑀘𑁆𑀙𑀸𑀬𑀸𑀬. 𑀉𑀪𑀺𑀦𑁆𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀯𑀲𑁂𑀦, 𑀅𑀭𑀳𑀢𑁆𑀢𑀯𑀲𑁂𑀦 𑀘 𑀆𑀕𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀼𑀢𑁆𑀢𑀸𑀦𑀁. 𑀅𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑀢𑁆𑀣𑁄.

𑀓𑁄 𑀧𑀦 𑀲𑁄 𑀅𑀢𑁆𑀣𑁄𑀢𑀺 𑀆𑀳 ‘‘𑀬𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀭𑀸𑀕𑀸𑀤𑀻𑀦𑀁 𑀔𑀬𑁄𑀢𑀺 𑀭𑀸𑀕𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄. 𑀲𑁄 𑀥𑀫𑁆𑀫𑁄 𑀅𑀓𑁆𑀔𑀬𑁄𑀧𑀺 𑀲𑀫𑀸𑀦𑁄 𑀭𑀸𑀕𑀸𑀤𑀻𑀦𑀁 𑀔𑀬𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀸 𑀔𑀬𑁄𑀧𑀘𑀸𑀭𑁂𑀦 ‘‘𑀭𑀸𑀕𑀸𑀤𑀻𑀦𑀁 𑀔𑀬𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄 ‘‘𑀢𑀺𑀧𑀼𑀲𑀁 𑀚𑀭𑁄, 𑀕𑀼𑀴𑁄 𑀲𑁂𑀫𑁆𑀳𑁄’’𑀢𑀺𑀆𑀤𑀻𑀲𑀼 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀁 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀓𑁆𑀔𑀬𑀲𑁆𑀲 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀢𑁄 ‘‘𑀔𑀬𑀲𑁆𑀲 𑀉𑀧𑀦𑀺𑀲𑁆𑀲𑀬𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀔𑀬𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀸’’𑀢𑀺. 𑀔𑀬𑁄𑀧𑀘𑀸𑀭𑁂𑀦𑀸𑀢𑀺 𑀅𑀢𑁆𑀢𑀦𑁄 𑀓𑀸𑀭𑀺𑀬𑀪𑀽𑀢𑀲𑁆𑀲 𑀔𑀬𑀲𑁆𑀲 𑀅𑀢𑁆𑀢𑀦𑀺 𑀉𑀧𑀘𑀸𑀭𑁂𑀦 𑀢𑀲𑁆𑀲 𑀦𑀸𑀫𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀭𑀓𑀸𑀭𑀡𑀁 𑀢𑀺𑀧𑀼𑀲𑀁 𑀚𑀭𑁄𑀢𑀺 𑀯𑀼𑀢𑁆𑀢𑁄, 𑀲𑁂𑀫𑁆𑀳𑀓𑀸𑀭𑀡𑀁 𑀕𑀼𑀴𑁄 𑀲𑁂𑀫𑁆𑀳𑁄𑀢𑀺 𑀯𑀼𑀢𑁆𑀢𑁄. 𑀔𑀬𑀦𑁆𑀢𑁂𑀢𑀺 𑀭𑀸𑀕𑀸𑀤𑀻𑀦𑀁 𑀧𑀭𑀺𑀓𑁆𑀔𑀬𑀸𑀯𑀲𑀸𑀦𑁂. 𑀔𑀬𑁄𑀢𑀺 𑀯𑀸 𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 ‘‘𑀔𑀬𑁂 𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁪𑁨) 𑀯𑀺𑀬, 𑀢𑀲𑁆𑀲 𑀅𑀦𑁆𑀢𑁂 𑀦𑀺𑀭𑁄𑀥𑀸𑀯𑀲𑀸𑀦𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀔𑀬𑁄𑀢𑀺 𑀯𑀼𑀢𑁆𑀢𑀁 𑀨𑀮𑀽𑀧𑀘𑀸𑀭𑁂𑀦, 𑀲𑀫𑀻𑀧𑀽𑀧𑀘𑀸𑀭𑁂𑀦 𑀯𑀸.

𑀲𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀧𑀻𑀢𑀺 𑀲𑁄𑀡𑀲𑀺𑀕𑀸𑀮𑀸𑀤𑀬𑁄 𑀲𑀩𑁆𑀩𑁂𑀧𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀲𑀫𑀥𑀺𑀕𑀢…𑀧𑁂… 𑀪𑀯𑁂𑀬𑁆𑀬𑀼𑀁 𑀔𑀡𑀯𑀲𑁂𑀦 𑀭𑀸𑀕𑀸𑀤𑀻𑀦𑀁 𑀔𑀬𑀲𑁆𑀲 𑀢𑁂𑀲𑀫𑁆𑀧𑀺 𑀅𑀢𑁆𑀣𑀺𑀢𑀸𑀬. 𑀢𑀣𑀸 𑀘 𑀲𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀭𑀢𑁆𑀣𑀓𑀪𑀸𑀯𑁄 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀸𑀕𑀸𑀤𑀺𑀓𑁆𑀔𑀬𑀸𑀦𑀁 𑀩𑀳𑀼𑀪𑀸𑀯𑀢𑁄𑀢𑀺 𑀭𑀸𑀕𑀸𑀤𑀻𑀦𑀁 𑀯𑀺𑀬 𑀢𑁂𑀲𑀁 𑀔𑀬𑀸𑀦𑀫𑁆𑀧𑀺 𑀢𑀩𑁆𑀩𑀺𑀓𑀸𑀭𑀪𑀸𑀯𑁂𑀦 𑀩𑀳𑀼𑀪𑀸𑀯𑀢𑁄. 𑀏𑀯𑀜𑁆𑀳𑀺 𑀲𑀢𑀺 𑀭𑀸𑀕𑀲𑁆𑀲 𑀔𑀬𑁄 𑀭𑀸𑀕𑀓𑁆𑀔𑀬𑁄, 𑀦 𑀤𑁄𑀲𑀸𑀤𑀻𑀦𑀁, 𑀢𑀣𑀸 𑀤𑁄𑀲𑀓𑁆𑀔𑀬𑁄𑀧𑀻𑀢𑀺 𑀅𑀜𑁆𑀜𑁄 𑀭𑀸𑀕𑀓𑁆𑀔𑀬𑁄, 𑀅𑀜𑁆𑀜𑁄 𑀤𑁄𑀲𑀓𑁆𑀔𑀬𑁄, 𑀅𑀜𑁆𑀜𑁄 𑀫𑁄𑀳𑀓𑁆𑀔𑀬𑁄𑀢𑀺 𑀢𑀺𑀡𑁆𑀡𑀁 𑀅𑀓𑀼𑀲𑀮𑀫𑀽𑀮𑀸𑀦𑀁 𑀔𑀬𑀪𑀽𑀢𑀸𑀦𑀺 𑀢𑀻𑀡𑀺 𑀦𑀺𑀩𑁆𑀩𑀸𑀦𑀸𑀦𑀺, 𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀔𑀬𑀪𑀽𑀢𑀸𑀦𑀺 𑀘𑀢𑁆𑀢𑀸𑀭𑀻𑀢𑀺𑀆𑀤𑀺𑀦𑀸 𑀩𑀳𑀽𑀦𑀺 𑀦𑀺𑀩𑁆𑀩𑀸𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀇𑀤𑀸𑀦𑀺 𑀆𑀤𑀺-𑀲𑀤𑁆𑀤𑀲𑀗𑁆𑀕𑀳𑀺𑀢𑁂 𑀤𑁄𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑀢𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺, 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺 (𑀅. 𑀦𑀺. 𑁩.𑁪𑁭) 𑀯𑀘𑀦𑀢𑁄 𑀯𑀬𑀲𑀗𑁆𑀔𑀸𑀢𑁄 𑀔𑀬𑁄 𑀲𑀗𑁆𑀔𑀢𑀮𑀓𑁆𑀔𑀡𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀢𑀮𑀓𑁆𑀔𑀡𑀜𑁆𑀘 𑀦𑀺𑀩𑁆𑀩𑀸𑀦𑀁 𑀪𑀯𑁂𑀬𑁆𑀬𑀸’’𑀢𑀺. ‘‘𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁦) 𑀯𑀘𑀦𑀢𑁄 𑀆𑀳 ‘‘𑀲𑀗𑁆𑀔𑀢𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺. 𑀬𑀁 𑀧𑀦 𑀲𑀗𑁆𑀔𑀢𑀧𑀭𑀺𑀬𑀸𑀧𑀦𑁆𑀦𑀁, 𑀢𑀁 𑀇𑀢𑀭𑀲𑀗𑁆𑀔𑀢𑀥𑀫𑁆𑀫𑁄 𑀯𑀺𑀬 𑀅𑀦𑀺𑀘𑁆𑀘𑀁 𑀳𑁄𑀢𑀺 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀢𑁄𑀢𑀺 𑀆𑀳 ‘‘𑀲𑀗𑁆𑀔𑀢𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀦𑀺𑀘𑁆𑀘’’𑀦𑁆𑀢𑀺. ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 (𑀤𑀻. 𑀦𑀺. 𑁨.𑁨𑁨𑁧) 𑀳𑀺 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀘 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀤𑀺 𑀪𑀯𑀢𑁄 𑀫𑀦𑁄𑀭𑀣𑀧𑀭𑀺𑀧𑀽𑀭𑀡𑀢𑁆𑀣𑀁 𑀔𑀬𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀤𑀸𑀫, 𑀅𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀢𑁆𑀢𑀸, 𑀲𑀗𑁆𑀔𑀢𑀧𑀝𑀺𑀧𑀓𑁆𑀔𑀲𑁆𑀲 𑀲𑀗𑁆𑀔𑀢𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀲𑀩𑁆𑀩𑀓𑀸𑀮𑀺𑀓𑀪𑀸𑀯𑁂𑀦 𑀦𑀺𑀘𑁆𑀘𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀢𑀢𑁄 𑀘 𑀧𑀭𑀫𑀲𑀼𑀔𑀲𑁆𑀲 𑀤𑀼𑀓𑁆𑀔𑀢𑀸 𑀘 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀪𑀗𑁆𑀕𑀓𑁆𑀔𑀬𑀲𑁆𑀲 𑀦𑀺𑀩𑁆𑀩𑀸𑀦𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀧𑁆𑀧𑀸𑀤𑀓𑁆𑀔𑀬𑀲𑁆𑀲 𑀢𑀩𑁆𑀪𑀸𑀯𑀁 𑀦𑀺𑀲𑁂𑀥𑁂𑀢𑀼𑀁 ‘‘𑀬𑀤𑀺 𑀔𑀬𑁄 𑀦𑀺𑀩𑁆𑀩𑀸𑀦𑀁 𑀪𑀯𑁂𑀬𑁆𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀞𑀫𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀁 𑀜𑀸𑀡𑀁 𑀕𑁄𑀢𑁆𑀭𑀪𑀼 𑀦𑀸𑀫. 𑀲𑁂𑀲𑀫𑀕𑁆𑀕𑀧𑀼𑀭𑁂𑀘𑀭𑀁 𑀯𑁄𑀤𑀸𑀦𑀁 𑀦𑀸𑀫. 𑀨𑀮𑀲𑀫𑀸𑀧𑀢𑁆𑀢𑀺𑀧𑀼𑀭𑁂𑀘𑀭𑀁 𑀅𑀦𑀼𑀮𑁄𑀫𑀁 𑀦𑀸𑀫. 𑀢𑀁 𑀧𑀦 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀇𑀥 𑀦 𑀕𑀳𑀺𑀢𑀁. 𑀪𑀤𑁆𑀭𑀫𑀼𑀔𑀸𑀢𑀺 𑀧𑀭𑀲𑁆𑀲 𑀅𑀦𑀼𑀦𑀬𑀯𑀘𑀦𑀁. ‘‘𑀔𑀻𑀬𑀦𑁆𑀢𑀻’’𑀢𑀺 𑀯𑀢𑁆𑀢𑀫𑀸𑀦𑀦𑀺𑀤𑁆𑀤𑁂𑀲𑁂𑀦 𑀇𑀤𑀸𑀦𑀺 𑀔𑀻𑀬𑀫𑀸𑀦𑀢𑀁 𑀧𑀼𑀘𑁆𑀙𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀉𑀧𑀥𑀸𑀭𑁂𑀢𑁆𑀯𑀸𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. ‘‘𑀕𑁄𑀢𑁆𑀭𑀪𑀼…𑀧𑁂… 𑀫𑀼𑀔𑀸’’𑀢𑀺 𑀧𑀼𑀘𑁆𑀙𑀸𑀬 ‘‘𑀭𑀸𑀕𑀸𑀤𑀻𑀦𑀁 𑀔𑀬𑀫𑁂𑀯 𑀯𑀤𑀸𑀫𑀻’’𑀢𑀺 𑀢𑀬𑀸 𑀤𑀺𑀦𑁆𑀦𑀧𑀝𑀺𑀯𑀘𑀦𑀲𑁆𑀲 𑀅𑀯𑀺𑀭𑀼𑀚𑁆𑀛𑀦𑀯𑀲𑁂𑀦 𑀲𑀢𑀺𑀧𑀼𑀭𑁂𑀓𑁆𑀔𑀸𑀭𑀁 𑀓𑀣𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀸𑀤𑀻𑀦𑀁 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀫𑀕𑁆𑀕𑀸𑀦𑀁. 𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀲𑁆𑀲 𑀅𑀪𑀸𑀯𑀢𑁄 𑀆𑀳 ‘‘𑀭𑀸𑀕𑀸𑀤𑀬𑁄 𑀔𑀻𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀨𑀮𑀫𑁂𑀯𑀸𑀢𑀺 𑀓𑀺𑀮𑁂𑀲𑀸𑀦𑀁 𑀔𑀻𑀡𑀓𑀸𑀮𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀨𑀮𑀘𑀺𑀢𑁆𑀢𑀫𑁂𑀯. 𑀆𑀭𑀫𑁆𑀫𑀡𑀁 𑀅𑀧𑀲𑁆𑀲𑀦𑁆𑀢𑁄𑀢𑀺 𑀕𑁄𑀢𑁆𑀭𑀪𑀼𑀆𑀤𑀻𑀦𑀁 𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀅𑀧𑀲𑁆𑀲𑀦𑁆𑀢𑁄. 𑀅𑀣 𑀯𑀸 𑀇𑀢𑀭𑁂𑀲𑀁 𑀆𑀭𑀫𑁆𑀫𑀡𑀪𑀸𑀯𑁂 𑀲𑀢𑀺 𑀕𑀳𑁂𑀢𑀩𑁆𑀩𑀧𑀘𑁆𑀘𑀬𑀁 𑀅𑀧𑀲𑁆𑀲𑀦𑁆𑀢𑁄.

‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀧𑀭𑀺𑀬𑀸𑀬𑀦𑁆𑀢𑀭𑁂𑀦𑀧𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀲𑁆𑀲 𑀦𑀺𑀩𑁆𑀩𑀸𑀦𑀪𑀸𑀯𑀦𑀺𑀲𑁂𑀥𑀦𑀁. ‘‘𑀉𑀧𑁆𑀧𑀸𑀤𑀻𑀬𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀧𑀦 𑀫𑀕𑁆𑀕𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀓𑀺𑀮𑁂𑀲𑀓𑁆𑀔𑀬𑁄𑀧𑀺 𑀉𑀧𑁆𑀧𑀸𑀤𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀦 𑀳𑀺 𑀇𑀢𑀭𑀣𑀸 𑀔𑀬𑀲𑁆𑀲 𑀉𑀧𑁆𑀧𑀸𑀤𑁄 𑀦𑀸𑀫 𑀅𑀢𑁆𑀣𑀺. 𑀅𑀣 𑀯𑀸 ‘‘𑀅𑀤𑁆𑀥𑀸 𑀲𑁄…𑀧𑁂… 𑀦𑀺𑀭𑀼𑀢𑁆𑀢𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀢𑀓𑁂𑀦 𑀕𑀦𑁆𑀣𑁂𑀦 𑀔𑀡𑀦𑀺𑀭𑁄𑀥𑀲𑁆𑀲 𑀘𑁂𑀯 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀲𑁆𑀲 𑀘 𑀦𑀺𑀩𑁆𑀩𑀸𑀦𑀪𑀸𑀯𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀔𑀬𑁂 𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁪𑁨) 𑀯𑀺𑀬 𑀫𑀕𑁆𑀕𑀲𑁆𑀲𑀸𑀧𑀺 𑀔𑀬𑀧𑀭𑀺𑀬𑀸𑀬𑀢𑁆𑀢𑀸 ‘‘𑀭𑀸𑀕𑀓𑁆𑀔𑀬𑁄’’𑀢𑀺𑀆𑀤𑀺𑀯𑀘𑀦𑀫𑀢𑁆𑀢𑁂𑀬𑁂𑀯 𑀲𑀫𑀸𑀦𑀪𑀸𑀯𑁂𑀦 𑀕𑀳𑀺𑀢𑁂 𑀫𑀕𑁆𑀕𑀲𑁆𑀲𑀸𑀧𑀺 𑀦𑀺𑀩𑁆𑀩𑀸𑀦𑀪𑀸𑀯𑀧𑁆𑀧𑀲𑀗𑁆𑀕𑀁, 𑀢𑀣𑀸 𑀘 𑀲𑀢𑀺 𑀅𑀦𑀺𑀝𑁆𑀞𑀸𑀧𑀢𑁆𑀢𑀺𑀁 𑀲𑀫𑁆𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀏𑀯𑀜𑁆𑀳𑀺 𑀲𑀢𑀺 ‘‘𑀉𑀧𑁆𑀧𑀸𑀤𑀻𑀬𑀢𑀻’’𑀢𑀺 𑀫𑀕𑁆𑀕𑀫𑁂𑀯 𑀲𑀦𑁆𑀥𑀸𑀬 𑀢𑀺𑀝𑁆𑀞𑀢𑀺. 𑀬𑀤𑀺 𑀫𑀕𑁆𑀕𑀲𑁆𑀲 𑀦𑀺𑀩𑁆𑀩𑀸𑀦𑀪𑀸𑀯𑀧𑁆𑀧𑀲𑀗𑁆𑀕𑁄 𑀇𑀥 𑀲𑀫𑁆𑀪𑀸𑀯𑀺𑀢𑁄, 𑀏𑀯𑀁 𑀲𑀢𑀺 𑀕𑁄𑀢𑁆𑀭𑀪𑀼𑀲𑁆𑀲 𑀫𑀕𑁆𑀕𑀸𑀭𑀫𑁆𑀫𑀡𑀢𑀸𑀤𑀺𑀤𑁄𑀲𑀸 𑀯𑀢𑁆𑀢𑀩𑁆𑀩𑀸𑀢𑀺? 𑀲𑀘𑁆𑀘𑀁 𑀯𑀢𑁆𑀢𑀩𑁆𑀩𑀸, 𑀏𑀢𑁆𑀢𑀓𑁂𑀦𑀸𑀧𑀺 𑀧𑀦 𑀧𑀭𑀲𑁆𑀲 𑀯𑀘𑀦𑀧𑀝𑀺𑀩𑀸𑀳𑀦𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀧𑀭𑀺𑀳𑀸𑀭𑀦𑁆𑀢𑀭𑀤𑀲𑁆𑀲𑀦𑁂 𑀩𑁆𑀬𑀸𑀧𑀸𑀭𑁄 𑀓𑀢𑁄𑀢𑀺. 𑀬𑀣𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀙𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀲𑀗𑁆𑀔𑀸𑀢𑀸𑀬 𑀬𑀣𑀸𑀦𑀼𑀮𑁄𑀫𑀧𑀝𑀺𑀧𑀢𑁆𑀢𑀺𑀬𑀸.

𑁭𑁭𑁧. 𑀅𑀲𑁆𑀲𑀤𑁆𑀥𑁄𑀢𑀺 𑀧𑀩𑀼𑀤𑁆𑀥𑀲𑀤𑁆𑀥𑁄, 𑀫𑀕𑁆𑀕𑀸𑀕𑀢𑀸𑀬 𑀅𑀘𑀮𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀫𑀕𑁆𑀕𑀸𑀕𑀢𑀲𑀤𑁆𑀥𑀸𑀬 𑀳𑀺 𑀲𑀫𑀦𑁆𑀦𑀸𑀕𑀢𑁄 𑀆𑀓𑀸𑀲𑁂 𑀩𑀼𑀤𑁆𑀥𑀯𑁂𑀲𑀁 𑀫𑀸𑀧𑁂𑀢𑁆𑀯𑀸𑀧𑀺 ‘‘𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀲𑁆𑀲 𑀦 𑀲𑀤𑁆𑀤𑀳𑀢𑀺 𑀲𑁂𑀬𑁆𑀬𑀣𑀸𑀧𑀺 𑀲𑀽𑀭𑀫𑁆𑀩𑀝𑁆𑀞𑁄𑀢𑀺 (𑀅. 𑀦𑀺. 𑁧.𑁨𑁫𑁫). 𑀅𑀓𑀢𑀜𑁆𑀜𑀽𑀢𑀺 𑀅𑀓𑀢𑀁 𑀦𑀺𑀩𑁆𑀩𑀸𑀦𑀁 𑀚𑀸𑀦𑀸𑀢𑀻𑀢𑀺 𑀅𑀓𑀢𑀜𑁆𑀜𑀽. 𑀲𑀦𑁆𑀥𑀺𑀘𑁆𑀙𑁂𑀤𑁄𑀢𑀺 𑀪𑀯𑀲𑀦𑁆𑀥𑀸𑀦𑀓𑀭𑀲𑁆𑀲 𑀢𑀡𑁆𑀳𑀸𑀧𑀸𑀧𑀲𑁆𑀲 𑀙𑀺𑀦𑁆𑀤𑀦𑁂𑀦 𑀧𑀼𑀦 𑀪𑀯𑀧𑀝𑀺𑀲𑀦𑁆𑀥𑀺𑀬𑀸𑀧𑀺 𑀙𑀺𑀦𑁆𑀦𑀢𑀸𑀬 𑀧𑀝𑀺𑀲𑀦𑁆𑀥𑀺𑀁 𑀔𑁂𑀧𑁂𑀢𑁆𑀯𑀸 𑀞𑀺𑀢𑁄. 𑀳𑀢𑀸𑀯𑀓𑀸𑀲𑁄𑀢𑀺 𑀔𑀻𑀡𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸𑀬𑁂𑀯 𑀆𑀬𑀢𑀺𑀁 𑀓𑀢𑁆𑀣𑀘𑀺 𑀑𑀓𑀸𑀲𑀮𑁄𑀓𑁂 𑀅𑀤𑀺𑀲𑁆𑀲𑀫𑀸𑀦𑀢𑁆𑀢𑀸 𑀯𑀺𑀳𑀢𑀸𑀯𑀓𑀸𑀲𑁄. 𑀯𑀦𑁆𑀢𑀸𑀲𑁄𑀢𑀺 𑀓𑀢𑁆𑀣𑀘𑀺 𑀅𑀪𑀺𑀲𑀗𑁆𑀕𑀸𑀪𑀸𑀯𑀢𑁄 𑀙𑀟𑁆𑀟𑀺𑀢𑀢𑀡𑁆𑀳𑁄𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀫𑀧𑁄𑀭𑀺𑀲𑁄𑀢𑀺 𑀲𑀤𑁂𑀯𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀬 𑀯𑀺𑀲𑀺𑀝𑁆𑀞𑁄 𑀧𑁄𑀭𑀺𑀲𑁄.

𑀤𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀧𑀝𑀺𑀮𑀪𑀺𑀢𑀼𑀜𑁆𑀘 𑀤𑀼𑀓𑁆𑀓𑀭𑀸. 𑀓𑀸𑀫𑀸𑀤𑀻𑀦𑀁 𑀦𑀺𑀲𑁆𑀲𑀭𑀡𑀻𑀬𑀢𑀸𑀬 𑀦𑀺𑀲𑁆𑀲𑀭𑀡𑀻𑀬𑀸, 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫𑀁, 𑀏𑀢𑀁 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀦𑁆𑀢𑀺 𑀓𑀸𑀫𑁂𑀳𑀺 𑀦𑀺𑀕𑁆𑀕𑀫𑀦𑀁, 𑀅𑀣 𑀯𑀸 𑀦𑀺𑀲𑁆𑀲𑀭𑀦𑁆𑀢𑀺 𑀦𑀺𑀕𑁆𑀕𑀘𑁆𑀙𑀦𑁆𑀢𑀺 𑀏𑀢𑁆𑀣 𑀏𑀢𑁂𑀦𑀸𑀢𑀺 𑀯𑀸 𑀦𑀺𑀲𑁆𑀲𑀭𑀡𑀁, 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀝𑁆𑀞𑀸𑀦𑀁, 𑀦𑀺𑀲𑁆𑀲𑀭𑀡𑀼𑀧𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀁. 𑀢𑀜𑁆𑀳𑀺 𑀓𑀸𑀫𑁂𑀳𑀺 𑀦𑀺𑀓𑁆𑀔𑀦𑁆𑀢𑀦𑁆𑀢𑀺 ‘‘𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 𑀇𑀥 𑀕𑀳𑀺𑀢𑀁, 𑀅𑀜𑁆𑀜𑀢𑁆𑀣 𑀧𑀦 𑀧𑀩𑁆𑀩𑀚𑁆𑀚𑀸𑀤𑀬𑁄𑀧𑀺 ‘‘𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 𑀧𑀯𑀼𑀘𑁆𑀘𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀧𑀩𑁆𑀩𑀚𑁆𑀚𑀸 𑀧𑀞𑀫𑀁 𑀛𑀸𑀦𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸;

𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸, ‘𑀦𑁂𑀓𑁆𑀔𑀫𑁆𑀫’𑀦𑁆𑀢𑀺 𑀧𑀯𑀼𑀘𑁆𑀘𑀭𑁂’’𑀢𑀺. (𑀇𑀢𑀺𑀯𑀼. 𑀅𑀝𑁆𑀞. 𑁧𑁦𑁯; 𑀤𑀻. 𑀦𑀺. 𑀝𑀻. 𑁨.𑁩𑁬𑁦; 𑀅. 𑀦𑀺. 𑀝𑀻. 𑁨.𑁩.𑁬𑁬; 𑀯𑀺𑀲𑀼𑀤𑁆𑀥𑀺. 𑀫𑀳𑀸. 𑁧.𑁫𑁬; 𑀦𑁂𑀢𑁆𑀢𑀺. 𑀝𑀻. 𑁭𑁬 𑀫𑀺𑀲𑁆𑀲𑀓𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸);

𑀅𑀭𑀽𑀧𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀪𑀽𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀁, 𑀔𑀦𑁆𑀥𑀧𑀜𑁆𑀘𑀓𑀦𑁆𑀢𑀺 𑀅𑀢𑁆𑀣𑁄. ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 𑀔𑀦𑁆𑀥𑀧𑀜𑁆𑀘𑀓𑀁 ‘‘𑀪𑀽𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀢𑀦𑁄 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀲𑀫𑀁, 𑀲𑀫𑁆𑀫𑀸 𑀘 𑀉𑀧𑁆𑀧𑀦𑁆𑀦𑀦𑁆𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁. 𑀧𑀞𑀫…𑀧𑁂… 𑀪𑀯𑁂𑀬𑁆𑀬𑀸𑀢𑀺 𑀲𑀗𑁆𑀔𑀢𑀦𑀺𑀲𑁆𑀲𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀘 𑀢𑀤𑁂𑀓𑀬𑁄𑀕𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀬𑀣𑀸𑀓𑁆𑀓𑀫𑀁 𑀓𑀸𑀫𑀭𑀽𑀧𑀦𑀺𑀲𑁆𑀲𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀦𑀫𑁆𑀧𑀺 𑀅𑀪𑀸𑀯𑁄𑀬𑁂𑀯 𑀆𑀧𑀚𑁆𑀚𑁂𑀬𑁆𑀬. 𑀇𑀤𑀸𑀦𑀺 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀆𑀕𑀫𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀦 𑀢𑀼 𑀔𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀅𑀢𑁆𑀣𑀺…𑀧𑁂… 𑀲𑀼𑀨𑀼𑀲𑀺𑀢𑀦𑁆𑀢𑀺 𑀘𑀸’’𑀢𑀺 𑀦𑀢𑁆𑀣𑀺 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀓𑀺𑀁 𑀯𑀺𑀯𑁂𑀓𑁂𑀦 𑀓𑀸𑀫𑀸𑀧𑀻𑀢𑀺 𑀏𑀯𑀁 𑀫𑀸𑀭𑁂𑀦 𑀧𑀝𑀺𑀩𑀸𑀳𑀺𑀢𑁂. ‘‘𑀅𑀢𑁆𑀣𑀺…𑀧𑁂… 𑀲𑀼𑀨𑀼𑀲𑀺𑀢’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑁂𑀦 𑀆𑀴𑀯𑀓𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀲𑀼𑀨𑀼𑀲𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀨𑀼𑀲𑀺𑀢𑀁, 𑀲𑀘𑁆𑀙𑀺𑀓𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀚𑀸𑀢𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀅𑀣 𑀯𑀸 𑀯𑁂𑀤𑀦𑀸𑀤𑀬𑁄 𑀯𑀺𑀬 𑀳𑁂𑀢𑀼𑀧𑀘𑁆𑀘𑀬𑀲𑀫𑀯𑀸𑀬𑀲𑀗𑁆𑀔𑀸𑀢𑀸𑀬 𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀸 𑀦 𑀚𑀸𑀢𑀁 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀚𑀸𑀢𑀁. 𑀓𑀸𑀭𑀡𑁂𑀦 𑀯𑀺𑀦𑀸 𑀲𑀬𑀫𑁂𑀯 𑀘 𑀦 𑀪𑀽𑀢𑀁 𑀦 𑀧𑀸𑀢𑀼𑀪𑀽𑀢𑀁 𑀦 𑀉𑀧𑁆𑀧𑀦𑁆𑀦𑀦𑁆𑀢𑀺 𑀅𑀪𑀽𑀢𑀁. 𑀏𑀯𑀁 𑀅𑀚𑀸𑀢𑀢𑁆𑀢𑀸 𑀅𑀪𑀽𑀢𑀢𑁆𑀢𑀸 𑀬𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀦 𑀓𑀢𑀦𑁆𑀢𑀺 𑀅𑀓𑀢𑀁. 𑀚𑀸𑀢𑀪𑀽𑀢𑀓𑀢𑀪𑀸𑀯𑁄 𑀘 𑀦𑀸𑀫 𑀭𑀽𑀧𑀸𑀤𑀻𑀦𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀳𑁄𑀢𑀺, 𑀦 𑀅𑀲𑀗𑁆𑀔𑀢𑀲𑀪𑀸𑀯𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀲𑀗𑁆𑀔𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀮𑁄𑀫𑀢𑁄 𑀯𑀸 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀦𑁆𑀢𑀺 𑀲𑀗𑁆𑀔𑀢𑀁, 𑀦 𑀢𑀣𑀸 𑀲𑀗𑁆𑀔𑀢𑀁, 𑀲𑀗𑁆𑀔𑀢𑀮𑀓𑁆𑀔𑀡𑀭𑀳𑀺𑀢𑀦𑁆𑀢𑀺 𑀘 𑀅𑀲𑀗𑁆𑀔𑀢𑀦𑁆𑀢𑀺. 𑀏𑀯𑀁 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀪𑀸𑀯𑁂 𑀧𑀝𑀺𑀲𑀺𑀤𑁆𑀥𑁂 𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬 𑀲𑀺𑀬𑀸 𑀦𑀼 𑀔𑁄, 𑀏𑀓𑁂𑀦𑁂𑀯 𑀓𑀸𑀭𑀡𑁂𑀦 𑀏𑀢𑀁 𑀓𑀢𑀦𑁆𑀢𑀺 𑀆𑀲𑀗𑁆𑀓𑀸𑀬 𑀦 𑀓𑁂𑀦𑀘𑀺 𑀓𑀢𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀅𑀧𑀘𑁆𑀘𑀬𑀫𑁆𑀧𑀺 𑀲𑀫𑀸𑀦𑀁 𑀲𑀬𑀫𑁂𑀯 𑀦𑀼 𑀔𑁄 𑀇𑀤𑀁 𑀪𑀽𑀢𑀁 𑀧𑀸𑀢𑀼𑀪𑀽𑀢𑀦𑁆𑀢𑀺 𑀆𑀲𑀗𑁆𑀓𑀸𑀬 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀅𑀪𑀽𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀘𑁂𑀢𑀲𑁆𑀲 𑀅𑀲𑀗𑁆𑀔𑀢𑀸𑀓𑀢𑀸𑀪𑀽𑀢𑀪𑀸𑀯𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀚𑀸𑀢𑀥𑀫𑁆𑀫𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀲𑀗𑁆𑀔𑀢𑀦𑁆𑀢𑀻𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 𑁋

‘‘𑀦𑁄 𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀪𑀯𑀺𑀲𑁆𑀲 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁. 𑀦𑀬𑀺𑀥 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑁂𑀣. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁, 𑀢𑀲𑁆𑀫𑀸 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀻’’𑀢𑀺 (𑀉𑀤𑀸. 𑁭𑁩) 𑁋

𑀏𑀯𑀫𑀸𑀤𑀺𑀲𑀼𑀢𑁆𑀢𑀧𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀽’’𑀢𑀺. 𑀥𑀫𑁆𑀫𑁂𑀦 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀸𑀫𑀻, 𑀥𑀫𑁆𑀫𑀲𑁆𑀲 𑀯𑀸 𑀬𑀣𑀺𑀘𑁆𑀙𑀺𑀢𑀁 𑀤𑁂𑀲𑀦𑀢𑁄 𑀲𑀸𑀫𑀻 𑀇𑀲𑁆𑀲𑀭𑁄𑀢𑀺 𑀥𑀫𑁆𑀫𑀲𑀸𑀫𑀻. 𑀢𑀣𑀸𑀕𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀓𑀣𑀺𑀢𑁄𑀯. 𑀲𑀫𑁆𑀫𑀸 𑀲𑀸𑀫𑀁 𑀲𑀩𑁆𑀩𑀥𑀫𑁆𑀫𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀲𑀫𑁆𑀫𑀸 𑀲𑀬𑀫𑁂𑀯 𑀲𑀫𑁆𑀫𑁄𑀳𑀦𑀺𑀤𑁆𑀤𑀸𑀯𑀺𑀕𑀫𑁂𑀦 𑀧𑀝𑀺𑀩𑀼𑀤𑁆𑀥𑁄, 𑀩𑀼𑀤𑁆𑀥𑀺𑀬𑀸 𑀯𑀺𑀓𑀲𑀺𑀢𑀯𑀸𑀢𑀺 𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄.

𑀧𑀭𑀺𑀢𑁆𑀢𑀢𑁆𑀢𑀺𑀓𑁂𑀢𑀺 ‘‘𑀧𑀭𑀺𑀢𑁆𑀢𑀸 𑀥𑀫𑁆𑀫𑀸, 𑀫𑀳𑀕𑁆𑀕𑀢𑀸 𑀥𑀫𑁆𑀫𑀸, 𑀅𑀧𑁆𑀧𑀫𑀸𑀡𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁨) 𑀏𑀯𑀁 𑀧𑀭𑀺𑀢𑁆𑀢𑀸𑀤𑀺𑀥𑀫𑁆𑀫𑀯𑀲𑁂𑀦 𑀆𑀕𑀢𑁂 𑀧𑀭𑀺𑀢𑁆𑀢𑀢𑁆𑀢𑀺𑀓𑁂.

𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀧𑁆𑀧𑀲𑀗𑁆𑀕𑀢𑁄. 𑀢𑁂𑀦𑀸𑀳 ‘‘𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀧𑀓𑁆𑀔𑀁 𑀪𑀚𑁂𑀬𑁆𑀬𑀼’’𑀦𑁆𑀢𑀺. 𑀭𑀽𑀧𑀸𑀯𑀘𑀭𑀢𑁆𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀢𑀺 𑀘𑀢𑀼𑀓𑁆𑀓𑀦𑀬𑁂𑀦 𑀢𑀺𑀓𑀚𑁆𑀛𑀸𑀦𑀸, 𑀧𑀜𑁆𑀘𑀓𑀦𑀬𑁂𑀦 𑀘𑀢𑀼𑀓𑁆𑀓𑀚𑁆𑀛𑀸𑀦𑀸. 𑀓𑀼𑀲𑀮𑀓𑀺𑀭𑀺𑀬𑀸𑀦𑀁 𑀅𑀪𑀺𑀜𑁆𑀜𑀸𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀧𑀭𑀺𑀢𑁆𑀢𑀸𑀤𑀺𑀓𑁂𑀧𑀺 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄 ‘‘𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀯𑀺𑀧𑀸𑀓𑁄’’𑀢𑀺 𑀆𑀳. 𑀢𑀲𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀬𑀼𑀢𑁆𑀢𑀺𑀢𑁄 𑀘𑁂𑀯 𑀧𑀸𑀴𑀺𑀢𑁄 𑀘. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀅𑀧𑀺𑀘 𑀅𑀦𑀼𑀮𑁄𑀫𑀪𑀸𑀯𑀧𑁆𑀧𑀢𑁆𑀢𑀁 𑀓𑀺𑀮𑁂𑀲𑁂 𑀢𑀤𑀗𑁆𑀕𑀯𑀲𑁂𑀦 𑀧𑀚𑀳𑀢𑀺, 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀭𑀫𑁆𑀫𑀡𑀁 𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑀼𑀲𑀮𑀜𑀸𑀡𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑁂𑀯 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦. 𑀇𑀢𑀺 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲, 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀭𑀫𑁆𑀫𑀡𑀲𑁆𑀲 𑀘 𑀜𑀸𑀡𑀲𑁆𑀲 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂 𑀅𑀲𑀫𑀢𑁆𑀣𑀪𑀸𑀯𑀢𑁄 𑀢𑁂𑀲𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀓𑀭𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀢𑀤𑀼𑀪𑀬𑀯𑀺𑀧𑀭𑀻𑀢𑀪𑀸𑀯𑁂𑀦 𑀆𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀜𑁆𑀘 𑀦𑀺𑀩𑁆𑀩𑀸𑀦𑀫𑁂𑀯. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀜𑀸𑀡𑀁 𑀬𑀁 𑀲𑀗𑁆𑀔𑀢𑀸𑀮𑀫𑁆𑀩𑀁, 𑀧𑀜𑁆𑀜𑀢𑁆𑀢𑀸𑀮𑀫𑁆𑀩𑀫𑁂𑀯 𑀯𑀸;

𑀧𑀸𑀧𑁂 𑀳𑀦𑁆𑀢𑀺 𑀦 𑀢𑀁 𑀯𑀢𑁆𑀣𑀼𑀁, 𑀢𑀤𑀜𑁆𑀜𑀁 𑀲𑀫𑁆𑀧𑀝𑀺𑀘𑁆𑀙𑀺𑀬’’𑀦𑁆𑀢𑀺.

𑀭𑀽𑀧𑀲𑀪𑀸𑀯𑀸𑀪𑀸𑀯𑀢𑁄𑀢𑀺 𑀏𑀢𑁂𑀦 𑀬𑀣𑀸 𑀭𑀽𑀧𑀥𑀫𑁆𑀫𑀸𑀦𑀁 𑀭𑀼𑀧𑁆𑀧𑀦𑀲𑀪𑀸𑀯𑁄, 𑀧𑀝𑀺𑀖𑀸𑀢𑀯𑀦𑁆𑀢𑀢𑀸 𑀓𑀮𑀸𑀧𑀢𑁄 𑀯𑀼𑀢𑁆𑀢𑀺𑀬𑀸 𑀧𑀤𑁂𑀲𑀲𑀫𑁆𑀩𑀦𑁆𑀥𑁄 𑀲𑀪𑀸𑀯𑁄, 𑀏𑀯𑀁 𑀦𑀺𑀩𑁆𑀩𑀸𑀦𑀲𑁆𑀲 𑀓𑀢𑁆𑀣𑀘𑀺 𑀧𑀝𑀺𑀖𑀸𑀢𑁄, 𑀲𑀧𑁆𑀧𑀤𑁂𑀲𑀢𑀸 𑀘 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀦𑀺𑀩𑁆𑀩𑀸𑀦𑀁 ‘‘𑀅𑀲𑀼𑀓𑀤𑀺𑀲𑀸𑀬, 𑀅𑀲𑀼𑀓𑀧𑀤𑁂𑀲𑁂’’𑀢𑀺 𑀯𑀸 𑀦𑀺𑀤𑁆𑀤𑀺𑀲𑀻𑀬𑀢𑀺. 𑀧𑀧𑀜𑁆𑀘𑀸𑀪𑀸𑀯𑀢𑁄𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑁂𑀳𑀺 𑀲𑀳 𑀅𑀯𑀝𑁆𑀞𑀸𑀦𑀯𑀲𑁂𑀦 𑀅𑀪𑀸𑀯𑀢𑁄, 𑀢𑁂𑀲𑀁 𑀅𑀪𑀸𑀯𑀧𑀘𑁆𑀘𑀬𑀢𑀸𑀬 𑀘. 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀸 𑀳𑀺 𑀲𑀁𑀲𑀸𑀭𑁂 𑀲𑀢𑁆𑀢𑁂 𑀧𑀧𑀜𑁆𑀘𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸 𑀦𑀸𑀫.

𑁭𑁭𑁨-𑁫. 𑀏𑀯𑀁 𑀦𑀺𑀩𑁆𑀩𑀸𑀦𑀁 𑀬𑀼𑀢𑁆𑀢𑀺𑀢𑁄, 𑀲𑀼𑀢𑁆𑀢𑀢𑁄 𑀘 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀧𑀭𑀺𑀬𑀸𑀬𑀲𑀦𑁆𑀤𑀲𑁆𑀲𑀦𑀢𑁆𑀣𑀁 ‘‘𑀅𑀘𑁆𑀘𑀦𑁆𑀢𑀫𑀦𑀦𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑀪𑀽𑀢𑀢𑁆𑀢𑀸 𑀅𑀦𑁆𑀢𑀁. 𑀇𑀫𑀺𑀦𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀣𑀺𑀢𑀸𑀢𑀺 𑀯𑀤𑀦𑁆𑀢𑀺, 𑀲𑁄𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑀺 𑀯𑀝𑁆𑀝𑀢𑀺, 𑀅𑀓𑀢𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀲𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑁄𑀯. 𑀲𑀉𑀧𑁆𑀧𑀸𑀤𑀯𑀬𑀦𑁆𑀢𑀸𑀪𑀸𑀯𑁂𑀦 𑀅𑀦𑀦𑁆𑀢𑀁. 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑁂𑀦, 𑀓𑀺𑀮𑁂𑀲𑀓𑁆𑀔𑁄𑀪𑀸𑀪𑀸𑀯𑁂𑀦 𑀘 𑀲𑀦𑁆𑀢𑀁. 𑀧𑀮𑁄𑀓𑀺𑀢𑀸𑀪𑀸𑀯𑁂𑀦 𑀅𑀧𑀮𑁄𑀓𑀺𑀢𑀁. 𑀅𑀢𑀺𑀢𑁆𑀢𑀺𑀓𑀭𑀪𑀸𑀯𑁂𑀦 𑀧𑀡𑀻𑀢𑀁. 𑀲𑀩𑁆𑀩𑀤𑀼𑀓𑁆𑀔𑀳𑀦𑀦𑀢𑁄 𑀲𑀭𑀡𑀁. 𑀓𑀺𑀮𑁂𑀲𑀘𑁄𑀭𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸 𑀦𑀺𑀩𑁆𑀪𑀬𑀢𑀸𑀬 𑀔𑁂𑀫𑀁. 𑀲𑀩𑁆𑀩𑀼𑀧𑀤𑁆𑀤𑀯𑀦𑀺𑀯𑀸𑀭𑀡𑀢𑁄 𑀢𑀸𑀡𑀁. 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑁂𑀳𑀺 𑀅𑀦𑀼𑀩𑀦𑁆𑀥𑀲𑁆𑀲 𑀅𑀮𑁆𑀮𑀻𑀬𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀢𑀸𑀬 𑀮𑁂𑀡𑀁. 𑀬𑀣𑀸𑀧𑀝𑀺𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀤𑀸𑀬𑀓𑀢𑁆𑀢𑁂𑀦 𑀧𑀭𑀁 𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀧𑀭𑀸𑀬𑀡𑀁.

𑀲𑀩𑁆𑀩𑀧𑀻𑀴𑀸𑀯𑀺𑀫𑀼𑀢𑁆𑀢𑀢𑀸𑀬 𑀲𑀺𑀯𑀁. 𑀉𑀧𑀦𑀺𑀲𑁆𑀲𑀬𑀳𑀻𑀦𑀸𑀦𑀁 𑀲𑀩𑁆𑀩𑀜𑁆𑀜𑀼𑀫𑀼𑀔𑀢𑁄 𑀲𑀼𑀢𑁆𑀯𑀸𑀧𑀺 𑀞𑀧𑁂𑀢𑁆𑀯𑀸 𑀕𑀼𑀡𑀯𑀲𑁂𑀦 𑀲𑀪𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀦𑀺𑀧𑀼𑀡𑀁. 𑀅𑀯𑀺𑀧𑀭𑀻𑀢𑀢𑀸𑀬 𑀲𑀘𑁆𑀘𑀁. 𑀲𑀩𑁆𑀩𑀤𑀼𑀓𑁆𑀔𑀧𑀭𑀺𑀓𑁆𑀔𑀬𑀓𑀭𑀢𑁆𑀢𑀸 𑀤𑀼𑀓𑁆𑀔𑀓𑁆𑀔𑀬𑀁. 𑀢𑁂𑀚𑀼𑀲𑁆𑀲𑀤𑀢𑀸𑀬 𑀲𑀦𑁆𑀢𑀢𑁆𑀢𑀅𑀬𑁄𑀕𑀼𑀴𑁂 𑀫𑀓𑁆𑀔𑀺𑀓𑀸𑀳𑀺 𑀯𑀺𑀬 𑀘𑀢𑀽𑀳𑀺 𑀆𑀲𑀯𑁂𑀳𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀦𑀸𑀲𑀯𑀁. 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸𑀧𑀺 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀪𑀸𑀯𑀸𑀧𑀸𑀤𑀦𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀲𑀼𑀤𑀼𑀤𑁆𑀤𑀲𑀁. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼𑀧𑀺 𑀅𑀲𑀗𑁆𑀔𑀢𑀕𑀼𑀡𑁂𑀦 𑀯𑀺𑀲𑀺𑀝𑁆𑀞𑀢𑀸𑀬 𑀧𑀭𑀁. 𑀲𑀁𑀲𑀸𑀭𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀢𑀻𑀭𑀪𑀽𑀢𑀢𑁆𑀢𑀸 𑀧𑀸𑀭𑀁. 𑀫𑀁𑀲𑀘𑀓𑁆𑀔𑀼𑀦𑁄, 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀯𑀸 𑀅𑀕𑁄𑀘𑀭𑀢𑀸𑀬 𑀅𑀦𑀺𑀤𑀲𑁆𑀲𑀦𑀁. 𑀦𑀺𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀉𑀧𑀫𑀸𑀬 𑀅𑀪𑀸𑀯𑀢𑁄 𑀯𑀸 𑀅𑀦𑀺𑀤𑀲𑁆𑀲𑀦𑀁.

𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁆𑀢𑀸 𑀥𑀼𑀯𑀁. 𑀢𑀢𑁄𑀬𑁂𑀯 𑀧𑀭𑀫𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀤𑀻𑀧𑀁. 𑀭𑁄𑀕𑀸𑀤𑀺𑀧𑀻𑀴𑀸𑀪𑀸𑀯𑀢𑁄 𑀅𑀩𑁆𑀬𑀸𑀧𑀚𑁆𑀛𑀁. 𑀢𑀢𑁄𑀬𑁂𑀯 𑀅𑀦𑀻𑀢𑀺𑀓𑀁. 𑀢𑀡𑁆𑀳𑀸𑀮𑀬𑀸𑀪𑀸𑀯𑀢𑁄 𑀅𑀦𑀸𑀮𑀬𑀁. 𑀲𑀗𑁆𑀔𑀢𑀸𑀲𑀗𑁆𑀔𑀢𑁂𑀲𑀼 𑀅𑀲𑀗𑁆𑀔𑀢𑀓𑁄𑀝𑁆𑀞𑀸𑀲𑀪𑀽𑀢𑀢𑁆𑀢𑀸, 𑀧𑀭𑀫𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀯𑀸 𑀧𑀤𑀁. 𑀅𑀯𑀺𑀦𑀸𑀲𑀪𑀸𑀯𑁂𑀦 𑀅𑀘𑁆𑀘𑀼𑀢𑀁. 𑀅𑀓𑁆𑀔𑀭𑀡𑀢𑁄 𑀅𑀯𑀺𑀦𑀲𑁆𑀲𑀦𑀢𑁄 𑀅𑀓𑁆𑀔𑀭𑀁.

𑀲𑀗𑁆𑀔𑀢𑀦𑀺𑀲𑁆𑀲𑀝𑀢𑁆𑀢𑀸 𑀯𑀺𑀫𑀼𑀢𑁆𑀢𑀺. 𑀪𑀯𑀩𑀦𑁆𑀥𑀦𑀯𑀺𑀫𑀼𑀢𑁆𑀢𑀺𑀳𑁂𑀢𑀼𑀢𑀸𑀬 𑀫𑁄𑀓𑁆𑀔𑀁.

𑁭𑁭𑁬-𑁭. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦. 𑀯𑀺𑀜𑁆𑀜𑀸𑀬𑀸𑀢𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀚𑀸𑀦𑀺𑀢𑁆𑀯𑀸. 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀧𑀝𑀺𑀯𑀺𑀚𑁆𑀛𑀦𑀽𑀧𑀸𑀬𑀪𑀽𑀢𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸. 𑀓𑀸𑀢𑀩𑁆𑀩𑁄𑀢𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄.

𑀲𑀤𑁆𑀥𑀁, 𑀩𑀼𑀤𑁆𑀥𑀺𑀜𑁆𑀘 𑀓𑀭𑁄𑀢𑀺 𑀯𑀟𑁆𑀠𑁂𑀢𑀻𑀢𑀺 𑀲𑀤𑁆𑀥𑀸𑀩𑀼𑀤𑁆𑀥𑀺𑀓𑀭𑀁. 𑀢𑀣𑀸𑀕𑀢𑀫𑀢𑁂𑀢𑀺 𑀢𑀺𑀧𑀺𑀝𑀓𑀩𑀼𑀤𑁆𑀥𑀯𑀘𑀦𑁂, 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀯𑀸. 𑀧𑀜𑁆𑀜𑀸𑀬 𑀲𑀫𑁆𑀪𑀽𑀢𑀁, 𑀧𑀜𑁆𑀜𑀸𑀬 𑀯𑀸 𑀲𑀫𑁆𑀪𑀯𑁄 𑀏𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀲𑀫𑁆𑀪𑀯𑀁, 𑀢𑀤𑁂𑀯 𑀲𑀫𑁆𑀧𑀲𑀸𑀤𑀦𑀁 𑀩𑀼𑀤𑁆𑀥𑀸𑀤𑀻𑀲𑀼 𑀅𑀥𑀺𑀫𑀼𑀘𑁆𑀘𑀦𑀁, 𑀢𑀁 𑀓𑀭𑁄𑀢𑀻𑀢𑀺 𑀧𑀜𑁆𑀜𑀸𑀲𑀫𑁆𑀪𑀯𑀲𑀫𑁆𑀧𑀲𑀸𑀤𑀦𑀓𑀭𑀁. 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀸𑀮𑀺𑀦𑀦𑁆𑀢𑀺 𑀅𑀢𑀺𑀫𑀥𑀼𑀭𑁂𑀳𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀸𑀭𑀯𑀦𑁆𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸. 𑀲𑀸𑀭𑀁 𑀚𑀸𑀦𑀦𑁆𑀢𑀻𑀢𑀺 𑀲𑀸𑀭𑀜𑁆𑀜𑀽, 𑀢𑁂 𑀯𑀺𑀫𑁆𑀳𑀸𑀧𑁂𑀢𑀻𑀢𑀺 𑀲𑀸𑀭𑀜𑁆𑀜𑀼𑀯𑀺𑀫𑁆𑀳𑀸𑀧𑀦𑀁. 𑀦𑀺𑀝𑁆𑀞𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀁, 𑀲𑀼𑀢𑀫𑀬𑀫𑀽𑀮𑀓𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀦𑀺𑀩𑁆𑀩𑀸𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.