𑁧𑁦. 𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀭𑀽𑀧𑀯𑀺𑀪𑀸𑀕𑀯𑀡𑁆𑀡𑀦𑀸

𑁬𑁨𑁨. 𑀆𑀤𑀺𑀫𑁆𑀳𑀻𑀢𑀺 𑀉𑀤𑁆𑀤𑁂𑀲𑀕𑀸𑀣𑀸𑀬𑀁. 𑀇𑀤𑀸𑀦𑀻𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀯𑀺𑀪𑀸𑀯𑀦𑀸𑀦𑀦𑁆𑀢𑀭𑀁. 𑀯𑀺𑀪𑀸𑀯𑀦𑀦𑁆𑀢𑀺 𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀲𑀭𑀽𑀧𑀢𑁄 𑀧𑀓𑀸𑀲𑀦𑀁.

𑁬𑁨𑁩. 𑀭𑀼𑀧𑁆𑀧𑀢𑀻𑀢𑀺 𑀲𑀻𑀢𑀼𑀡𑁆𑀳𑀸𑀤𑀻𑀳𑀺 𑀯𑀺𑀓𑀸𑀭𑀫𑀸𑀧𑀚𑁆𑀚𑀢𑀺, 𑀆𑀧𑀸𑀤𑀻𑀬𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀯𑀺𑀓𑀸𑀭𑀸𑀧𑀢𑁆𑀢𑀺 𑀘 𑀲𑀻𑀢𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀥𑀸𑀦𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀬𑁂𑀯. 𑀦 𑀳𑀺 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑀥𑀫𑁆𑀫𑀸𑀦𑀁 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀯𑀺𑀓𑀸𑀭𑀸𑀧𑀸𑀤𑀦𑀁 𑀲𑀓𑁆𑀓𑀸 𑀓𑀸𑀢𑀼𑀁, 𑀢𑀲𑁆𑀫𑀸 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀭𑀽𑀧𑀲𑀦𑁆𑀢𑀢𑀺 𑀯𑀺𑀬 𑀅𑀳𑀼𑀢𑁆𑀯𑀸 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀯𑀺𑀲𑀪𑀸𑀕𑀧𑀘𑁆𑀘𑀬𑀲𑀫𑀯𑀸𑀬𑁂𑀦 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀬𑁂𑀯 𑀇𑀥 ‘‘𑀭𑀼𑀧𑁆𑀧𑀦’’𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀗𑁆𑀖𑀺𑀬𑀸𑀦𑀁 𑀯𑀺𑀧𑀭𑀺𑀡𑀸𑀫𑀯𑀸𑀤𑁄 𑀧𑀘𑁆𑀘𑀓𑁆𑀔𑀢𑁄 𑀳𑁄𑀢𑀺. 𑀦𑀦𑀼 𑀘 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀮𑀩𑁆𑀪𑀢𑀻𑀢𑀺? 𑀲𑀘𑁆𑀘𑀁 𑀮𑀩𑁆𑀪𑀢𑀺, 𑀦 𑀧𑀦 𑀯𑀺𑀪𑀽𑀢𑀢𑀭𑀸. 𑀯𑀺𑀪𑀽𑀢𑀢𑀭𑀸 𑀳𑁂𑀢𑁆𑀣 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸 𑀉𑀓𑁆𑀓𑀝𑁆𑀞𑀕𑀢𑀺𑀯𑀲𑁂𑀦 𑀬𑀣𑀸 ‘‘𑀅𑀪𑀺𑀭𑀽𑀧𑀲𑁆𑀲 𑀓𑀜𑁆𑀜𑀸 𑀤𑀸𑀢𑀩𑁆𑀩𑀸’’𑀢𑀺 (𑀲𑀁. 𑀦𑀺. 𑁩.𑁭𑁮).

𑀓𑀼𑀢𑁄 𑀏𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀲𑀻𑀢𑀸𑀤𑀺𑀕𑁆𑀕𑀳𑀡𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀯𑀤𑁂𑀣, 𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺? 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀚𑀺𑀖𑀘𑁆𑀙𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀧𑀺𑀧𑀸𑀲𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁯).

𑀏𑀢𑁆𑀣 𑀳𑀺 𑀲𑀻𑀢𑀸𑀤𑀺𑀕𑁆𑀕𑀳𑀡𑀁 𑀲𑀻𑀢𑀸𑀤𑀺𑀦𑀸 𑀨𑀼𑀝𑁆𑀞𑀲𑁆𑀲 𑀭𑀼𑀧𑁆𑀧𑀦𑀁 𑀯𑀺𑀪𑀽𑀢𑀢𑀭𑀁, 𑀢𑀲𑁆𑀫𑀸 𑀢𑀤𑁂𑀯𑁂𑀢𑁆𑀣 𑀕𑀳𑀺𑀢𑀦𑁆𑀢𑀺 𑀜𑀸𑀧𑀦𑀢𑁆𑀣𑀁. 𑀇𑀢𑀭𑀣𑀸 𑀭𑀼𑀧𑁆𑀧𑀢𑀻𑀢𑀺 𑀲𑀸𑀫𑀜𑁆𑀜𑀯𑀘𑀦𑁂𑀦𑁂𑀯 𑀲𑀺𑀤𑁆𑀥𑁂 𑀲𑀻𑀢𑀸𑀤𑀺𑀕𑁆𑀕𑀳𑀡𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸𑀢𑀺.

𑀬𑀤𑀺 𑀏𑀯𑀁, 𑀓𑀣𑀁 𑀩𑁆𑀭𑀳𑁆𑀫𑀮𑁄𑀓𑁂 𑀭𑀽𑀧𑀲𑀫𑀜𑁆𑀜𑀸? 𑀦 𑀳𑀺 𑀢𑀢𑁆𑀣 𑀉𑀧𑀖𑀸𑀢𑀓𑁄 𑀲𑀻𑀢𑀸𑀤𑀺𑀨𑀲𑁆𑀲𑀯𑀺𑀲𑁂𑀲𑁄 𑀮𑀩𑁆𑀪𑀢𑀻𑀢𑀺? 𑀲𑀘𑁆𑀘𑀁, 𑀢𑀢𑁆𑀣𑀸𑀧𑀺 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄. 𑀅𑀭𑀼𑀧𑁆𑀧𑀦𑀲𑁆𑀲𑀸𑀧𑀺 𑀳𑀺 𑀭𑀼𑀧𑁆𑀧𑀦𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀭𑀽𑀧𑀲𑀫𑀜𑁆𑀜𑀸 𑀳𑁄𑀢𑀺. 𑀬𑀣𑀸 𑀅𑀤𑀼𑀤𑁆𑀥𑀫𑁆𑀧𑀺 𑀔𑀻𑀭𑀁 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 ‘‘𑀤𑀼𑀤𑁆𑀥’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀅𑀣 𑀯𑀸 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀉𑀧𑀖𑀸𑀢𑀓𑁄 𑀲𑀻𑀢𑀸𑀤𑀺𑀨𑀲𑁆𑀲𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀅𑀦𑀼𑀕𑁆𑀕𑀸𑀳𑀓𑁄 𑀧𑀦 𑀅𑀢𑁆𑀣𑀺. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀸𑀦𑀁 𑀉𑀢𑀼𑀚𑀭𑀽𑀧𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀢𑁆𑀣𑁂𑀯 𑀢𑀢𑁆𑀣 𑀭𑀼𑀧𑁆𑀧𑀦𑀦𑁆𑀢𑀺 𑀦 𑀓𑁄𑀘𑀺 𑀢𑀢𑁆𑀣 𑀭𑀽𑀧𑀲𑀫𑀜𑁆𑀜𑀸𑀬 𑀯𑀺𑀩𑀦𑁆𑀥𑁄𑀢𑀺.

𑀭𑀽𑀧𑀬𑀢𑀻𑀢𑀺 𑀯𑀸𑀢𑀺 𑀲𑀬𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀯𑀺𑀓𑀸𑀭𑀫𑀸𑀧𑀸𑀤𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀧𑀼𑀭𑀺𑀫𑀯𑀺𑀕𑁆𑀕𑀳𑁂𑀦 𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺 ‘‘𑀭𑀼𑀧𑁆𑀧𑀦’’𑀦𑁆𑀢𑀺 𑀤𑀻𑀧𑀺𑀢𑀁. 𑀇𑀫𑀺𑀦𑀸 𑀧𑀦 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀬𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄, 𑀢𑀁 𑀭𑀼𑀧𑁆𑀧𑀦𑀦𑁆𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀭𑀽𑀧𑀲𑁆𑀲 𑀭𑀽𑀧𑀲𑀫𑀜𑁆𑀜𑀸𑀧𑀲𑀗𑁆𑀕𑁄 𑀏𑀯 𑀦𑀢𑁆𑀣𑀺. 𑀦𑀺𑀭𑀼𑀤𑁆𑀥𑀫𑁂𑀯 𑀳𑀺 𑀢𑀁 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑁂𑀳𑀺 𑀅𑀭𑀽𑀧𑀁 𑀉𑀧𑁆𑀧𑀸𑀤𑁂𑀢𑀺, 𑀦 𑀯𑀺𑀚𑁆𑀚𑀫𑀸𑀦𑀦𑁆𑀢𑀺. 𑀖𑀝𑁆𑀝𑀦𑁂 𑀯𑀺𑀓𑀸𑀭𑀸𑀧𑀢𑁆𑀢𑀺𑀬𑀁 𑀭𑀽𑀧-𑀲𑀤𑁆𑀤𑀲𑁆𑀲 𑀭𑀼𑀴𑁆𑀳𑀻, 𑀢𑀲𑁆𑀫𑀸 𑀅𑀭𑀽𑀧𑀥𑀫𑁆𑀫𑀸𑀦𑀁 𑀖𑀝𑁆𑀝𑀦𑀸𑀪𑀸𑀯𑀢𑁄 𑀦 𑀢𑁂𑀲𑀼 𑀭𑀽𑀧𑀲𑀫𑀜𑁆𑀜𑀸𑀢𑀺 𑀓𑁂𑀘𑀺. 𑀧𑀝𑀺𑀖𑀸𑀢𑁄 𑀭𑀼𑀧𑁆𑀧𑀦𑀦𑁆𑀢𑀺 𑀅𑀧𑀭𑁂, 𑀢𑁂𑀲𑀁 𑀫𑀢𑁂𑀦 𑀓𑀺𑀜𑁆𑀘𑀸𑀧𑀺 𑀲𑀧𑁆𑀧𑀝𑀺𑀖𑀭𑀽𑀧𑀸𑀦𑀫𑁂𑀯 𑀭𑀽𑀧𑀲𑀫𑀜𑁆𑀜𑀸𑀧𑀲𑀗𑁆𑀕𑁄, 𑀅𑀣 𑀔𑁄 𑀅𑀯𑀬𑀯𑀯𑁄𑀳𑀸𑀭𑁂𑀦 𑀲𑀫𑀼𑀤𑀸𑀬𑁄𑀧𑀺 𑀯𑁄𑀳𑀭𑀻𑀬𑀢𑀻𑀢𑀺 𑀲𑀩𑁆𑀩𑀫𑁂𑀯 𑀭𑀽𑀧𑀁 𑀭𑀽𑀧𑀲𑀫𑀜𑁆𑀜𑀁 𑀮𑀪𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀭𑀽𑀧𑀬𑀢𑀻𑀢𑀺 𑀯𑀡𑁆𑀡𑀸𑀬𑀢𑀦𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀜𑁆𑀳𑀺 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀭𑀽𑀧𑀬𑀢𑀺, 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺. 𑀢𑀬𑀺𑀤𑀁 𑀉𑀧𑀭𑀺 𑀯𑀡𑁆𑀡𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀯𑀺𑀲𑀼𑀁𑀬𑁂𑀯 𑀯𑀼𑀘𑁆𑀘𑀢𑀻𑀢𑀺 𑀦 𑀢𑀲𑁆𑀲 𑀇𑀥 𑀲𑀁𑀯𑀡𑁆𑀡𑀦𑁂 𑀧𑀬𑁄𑀚𑀦𑀁 𑀅𑀢𑁆𑀣𑀺. 𑀲𑀼𑀭𑀽𑀧𑁄𑀢𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀓𑁂𑀢𑀼𑀫𑀸𑀮𑀸𑀤𑀻𑀳𑀺 𑀅𑀮𑀗𑁆𑀓𑀢𑀢𑁆𑀢𑀸 𑀲𑁄𑀪𑀦𑀭𑀽𑀧𑀓𑀸𑀬𑁄, 𑀲𑀪𑀸𑀯𑀢𑁆𑀣𑁄 𑀯𑀸 𑀭𑀽𑀧-𑀲𑀤𑁆𑀤𑁄 ‘‘𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁧𑁧𑁪) 𑀯𑀺𑀬, 𑀢𑀲𑁆𑀫𑀸 𑀲𑀼𑀭𑀽𑀧𑁄𑀢𑀺 𑀲𑁄𑀪𑀦𑀲𑀪𑀸𑀯𑁄, 𑀢𑁂𑀦 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀺𑀅𑀲𑀸𑀥𑀸𑀭𑀡𑀕𑀼𑀡𑀯𑀺𑀲𑁂𑀲𑀲𑀫𑀸𑀬𑁄𑀕𑀤𑀻𑀧𑀦𑀢𑁄 𑀲𑀢𑁆𑀣𑀼 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀲𑁄𑀪𑀦𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑁬𑁨𑁪. 𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀢𑁄𑀢𑀺 𑀏𑀢𑁆𑀣 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀪𑀯𑀢𑀺 𑀏𑀢𑁆𑀣 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀪𑀽𑀢𑀁. 𑀅𑀣 𑀯𑀸 𑀫𑀳𑀸𑀪𑀽𑀢𑀸𑀬𑁂𑀯 𑀇𑀥 𑀧𑀼𑀭𑀺𑀫𑀧𑀤𑀮𑁄𑀧𑀯𑀲𑁂𑀦 𑀪𑀽𑀢-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀘𑀢𑀼𑀩𑁆𑀩𑀺𑀥𑀸 𑀫𑀳𑀸𑀪𑀽𑀢𑀸’’𑀢𑀺. 𑀪𑀽𑀢𑀸𑀦𑀺 𑀉𑀧𑀸𑀤𑀺𑀬𑀢𑁂𑀯, 𑀦 𑀧𑀦 𑀲𑀬𑀁 𑀢𑁂𑀳𑀺 𑀅𑀜𑁆𑀜𑁂𑀳𑀺 𑀯𑀸 𑀉𑀧𑀸𑀤𑀺𑀬𑀢𑀻𑀢𑀺 𑀉𑀧𑀸𑀤𑀸𑀬𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀉𑀧𑀸𑀤𑀸𑀬𑀭𑀽𑀧𑀢𑀸𑀧𑀲𑀗𑁆𑀕𑁄 𑀦𑀢𑁆𑀣𑀺. 𑀦 𑀳𑀺 𑀢𑁂 𑀓𑁂𑀯𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀸𑀤𑀺𑀬𑀦𑁆𑀢𑁂𑀯, 𑀅𑀣 𑀔𑁄 𑀲𑀬𑀁 𑀉𑀧𑀸𑀤𑀸𑀬𑀭𑀽𑀧𑁂𑀳𑀺 𑀉𑀧𑀸𑀤𑀺𑀬𑀦𑁆𑀢𑀺, 𑀢𑀲𑁆𑀫𑀸 𑀉𑀧𑀸𑀤𑀸𑀬-𑀲𑀤𑁆𑀤𑀕𑁆𑀕𑀳𑀡𑀲𑀸𑀫𑀢𑁆𑀣𑀺𑀬𑀢𑁄 𑀦 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀢𑀸𑀧𑀲𑀗𑁆𑀕𑁄𑀢𑀺. 𑀅𑀣 𑀯𑀸 ‘‘𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 (𑀥. 𑀲. 𑁫𑁮𑁪) 𑀯𑀘𑀦𑀢𑁄 𑀘𑀢𑀼𑀫𑀳𑀸𑀪𑀽𑀢𑀲𑀦𑁆𑀦𑀺𑀲𑁆𑀲𑀺𑀢𑀢𑀸𑀯 𑀉𑀧𑀸𑀤𑀸𑀬𑀭𑀽𑀧𑀮𑀓𑁆𑀔𑀡𑀁, 𑀦 𑀪𑀽𑀢𑀢𑁆𑀢𑀬𑀸𑀤𑀺𑀲𑀦𑁆𑀦𑀺𑀲𑁆𑀲𑀺𑀢𑀢𑀸𑀧𑀻𑀢𑀺 𑀦 𑀢𑁂𑀲𑀁 𑀉𑀧𑀸𑀤𑀸𑀬𑀭𑀽𑀧𑀢𑀸𑀢𑀺. 𑀪𑀽𑀢𑀜𑁆𑀘 𑀉𑀧𑀸𑀤𑀸𑀬𑀜𑁆𑀘 𑀪𑀽𑀢𑁄𑀧𑀸𑀤𑀸𑀬𑀁, 𑀢𑁂𑀲𑀁 𑀯𑀲𑁂𑀦 𑀪𑁂𑀤𑀢𑁄𑀢𑀺 𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀢𑁄. 𑀪𑀽𑀢𑀲𑀤𑁆𑀤𑀲𑁆𑀲 𑀉𑀪𑀬𑀮𑀺𑀗𑁆𑀕𑀢𑁆𑀢𑀸 𑀆𑀳 ‘‘𑀫𑀳𑀸𑀪𑀽𑀢𑀸’’𑀢𑀺. 𑀉𑀧𑀸𑀤𑀸𑀢𑀺 𑀉𑀧𑀸𑀤𑀸𑀬𑀭𑀽𑀧𑀸𑀦𑀺 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀏𑀢𑁆𑀣 𑀬-𑀓𑀸𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄.

𑁬𑁨𑁫. 𑀓𑀢𑀫𑁂 𑀧𑀦 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸, 𑀓𑀣𑀜𑁆𑀘 𑀢𑁂 𑀫𑀳𑀸𑀪𑀽𑀢𑀲𑀜𑁆𑀜𑀺𑀢𑀸, 𑀓𑀸𑀦𑀺 𑀘 𑀉𑀧𑀸𑀤𑀸𑀬𑀭𑀽𑀧𑀸𑀦𑀺, 𑀓𑀣𑀜𑁆𑀘 𑀢𑀸𑀦𑀺 ‘‘𑀉𑀧𑀸𑀤𑀸𑀬𑀭𑀽𑀧𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀇𑀤𑀁 𑀘𑁄𑀤𑀦𑀁 𑀳𑀤𑀬𑁂 𑀓𑀢𑁆𑀯𑀸 𑀓𑀫𑁂𑀦 𑀲𑁄𑀥𑁂𑀦𑁆𑀢𑁄 𑀆𑀳 ‘‘𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺. 𑀘𑀢𑁆𑀢𑀸𑀭𑁄𑀫𑁂𑀢𑀺 𑀘𑀢𑁆𑀢𑀸𑀭𑁄 𑀇𑀫𑁂. 𑀫𑀳𑀸 𑀘 𑀲𑁄 𑀪𑀽𑀢𑁄 𑀘𑀸𑀢𑀺 𑀫𑀳𑀸𑀪𑀽𑀢𑁄, 𑀢𑁂𑀦 𑀫𑀳𑀸𑀪𑀽𑀢𑁂𑀦 𑀲𑀤𑁂𑀯𑀓𑁂 𑀮𑁄𑀓𑁂 𑀫𑀳𑀦𑁆𑀢𑀪𑀸𑀯𑁂𑀦 𑀧𑀸𑀢𑀼𑀪𑀽𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑁋

‘‘𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀺,

𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸;

𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄,

𑀲 𑀪𑀽𑀢𑀧𑀘𑀦𑀺𑀁 𑀧𑀘𑀻’’𑀢𑀺. (𑀚𑀸. 𑁧.𑁨.𑁧𑁯𑁦) 𑁋

𑀆𑀤𑀻𑀲𑀼 𑀯𑀺𑀬 𑀪𑀽𑀢-𑀲𑀤𑁆𑀤𑀲𑁆𑀲 𑀲𑀢𑁆𑀢𑁂𑀲𑀼, 𑀔𑀻𑀡𑀸𑀲𑀯𑁂𑀲𑀼 𑀘 𑀧𑀯𑀢𑁆𑀢𑀦𑀢𑁄 𑀫𑀳𑀸𑀪𑀽𑀢𑁂𑀦𑀸𑀢𑀺 𑀫𑀳𑀢𑀸 𑀲𑀢𑁆𑀢𑁂𑀦, 𑀫𑀳𑀸𑀔𑀻𑀡𑀸𑀲𑀯𑁂𑀦𑀸𑀢𑀺 𑀯𑀸 𑀅𑀢𑁆𑀣𑁄. 𑀔𑀻𑀡𑀸𑀲𑀯𑁄𑀧𑀺 𑀳𑀺 𑀧𑀭𑀺𑀓𑁆𑀔𑀻𑀡𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀪𑀽𑀢𑁄𑀬𑁂𑀯 𑀦 𑀪𑀯𑀢𑀺, 𑀦 𑀘 𑀪𑀯𑀺𑀲𑁆𑀲𑀢𑀻𑀢𑀺 𑀪𑀽𑀢𑁄𑀢𑀺 𑀯𑀼𑀘𑁆𑀘𑀢𑀺.

𑁬𑁨𑁬. 𑀫𑀳𑀦𑁆𑀢𑀸 𑀧𑀸𑀢𑀼𑀪𑀽𑀢𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀸𑀦𑁂𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀸𑀦𑁂𑀧𑀺 𑀲𑀲𑀫𑁆𑀪𑀸𑀭𑀥𑀸𑀢𑀼𑀯𑀲𑁂𑀦 𑀫𑀳𑀦𑁆𑀢𑀸 𑀳𑀼𑀢𑁆𑀯𑀸 𑀪𑀽𑀢𑀸 𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀸𑀦𑁂 𑁋

‘‘𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸’’𑀢𑀺. (𑀥. 𑀲. 𑀅𑀝𑁆𑀞. 𑁫𑁮𑁪) 𑁋

𑀆𑀤𑀺𑀦𑀸 𑀦𑀬𑁂𑀦 𑀫𑀳𑀦𑁆𑀢𑀧𑀸𑀢𑀼𑀪𑀽𑀢𑀢𑀸 𑀯𑀼𑀢𑁆𑀢𑀸. 𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀸𑀦𑁂𑀧𑀺 𑀅𑀦𑁂𑀓𑀬𑁄𑀚𑀦𑀲𑀢𑀺𑀓𑀫𑀘𑁆𑀙𑀓𑀘𑁆𑀙𑀧𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀤𑁂𑀯𑀤𑀸𑀦𑀯𑀸𑀤𑀺𑀲𑀭𑀻𑀭𑀯𑀲𑁂𑀦 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸’’𑀢𑀺𑀆𑀤𑀺 (𑀅. 𑀦𑀺. 𑁮.𑁨𑁦; 𑀘𑀽𑀴𑀯. 𑁩𑁮𑁫; 𑀉𑀤𑀸. 𑁪𑁫).

𑀫𑀳𑀸𑀪𑀽𑀢𑀲𑀫𑀸𑀢𑀺 𑀅𑀦𑁂𑀓𑀩𑁆𑀪𑀼𑀢𑀯𑀺𑀲𑁂𑀲𑀤𑀲𑁆𑀲𑀦𑁂𑀦, 𑀅𑀦𑁂𑀓𑀪𑀽𑀢𑀤𑀲𑁆𑀲𑀦𑁂𑀦 𑀘 𑀫𑀳𑀦𑁆𑀢𑀸 𑀪𑀽𑀢𑀸, 𑀫𑀳𑀦𑁆𑀢𑀸𑀦𑀺 𑀅𑀩𑁆𑀪𑀼𑀢𑀸𑀦𑀺 𑀯𑀸 𑀏𑀢𑁂𑀲𑀽𑀢𑀺 𑀫𑀳𑀸𑀪𑀽𑀢𑀸, 𑀫𑀸𑀬𑀸𑀓𑀸𑀭𑀸, 𑀬𑀓𑁆𑀔𑀸𑀤𑀬𑁄 𑀯𑀸 𑀚𑀸𑀢𑀺𑀯𑀲𑁂𑀦𑁂𑀯 𑀫𑀳𑀦𑁆𑀢𑀸 𑀪𑀽𑀢𑀸𑀢𑀺 𑀫𑀳𑀸𑀪𑀽𑀢𑀸, 𑀢𑁂𑀳𑀺 𑀏𑀢𑁂 𑀲𑀫𑀸𑀢𑀺 𑀫𑀳𑀸𑀪𑀽𑀢𑀲𑀫𑀸. 𑀏𑀢𑁂 𑀳𑀺 𑀬𑀣𑀸 𑀫𑀸𑀬𑀸𑀓𑀸𑀭𑀸 𑀅𑀫𑀡𑀺𑀁 𑀏𑀯 𑀉𑀤𑀓𑀁 𑀫𑀡𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺, 𑀅𑀲𑀼𑀯𑀡𑁆𑀡𑀁𑀬𑁂𑀯 𑀮𑁂𑀟𑁆𑀟𑀼𑀆𑀤𑀺𑀓𑀁 𑀲𑀼𑀯𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺, 𑀬𑀣𑀸 𑀘 𑀲𑀬𑀁 𑀦𑁂𑀯 𑀬𑀓𑁆𑀔𑀸 𑀦 𑀧𑀓𑁆𑀔𑀺𑀦𑁄 𑀲𑀫𑀸𑀦𑀸 𑀬𑀓𑁆𑀔𑀸𑀤𑀺𑀪𑀸𑀯𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑀺, 𑀏𑀯𑀫𑁂𑀯𑀁 𑀲𑀬𑀁 𑀅𑀦𑀻𑀮𑀸𑀦𑁂𑀯 𑀳𑀼𑀢𑁆𑀯𑀸 𑀦𑀻𑀮𑀁 𑀉𑀧𑀸𑀤𑀸𑀬𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀺, 𑀲𑀬𑀁 𑀅𑀧𑀻𑀢𑀸𑀬𑁂𑀯…𑀧𑁂… 𑀲𑀬𑀁 𑀅𑀦𑁄𑀤𑀸𑀢𑀸𑀬𑁂𑀯 𑀳𑀼𑀢𑁆𑀯𑀸 𑀑𑀤𑀸𑀢𑀁 𑀉𑀧𑀸𑀤𑀸𑀬𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀫𑀸𑀬𑀸𑀓𑀸𑀭𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄 𑀫𑀳𑀸𑀪𑀽𑀢𑀸.

𑀬𑀣𑀸 𑀘 𑀬𑀓𑁆𑀔𑀸 𑀫𑀳𑀸𑀪𑀽𑀢𑀸 𑀬𑀁 𑀕𑀡𑁆𑀳𑀦𑁆𑀢𑀺, 𑀦𑁂𑀯𑀲𑁆𑀲 𑀅𑀦𑁆𑀢𑁄𑀲𑀭𑀻𑀭𑁂 𑀞𑀸𑀦𑀁 𑀉𑀧𑀮𑀩𑁆𑀪𑀢𑀺, 𑀦 𑀲𑀭𑀻𑀭𑀢𑁄 𑀩𑀳𑀺, 𑀦 𑀘 𑀢𑀲𑁆𑀲 𑀅𑀗𑁆𑀕𑀫𑀗𑁆𑀕𑀁 𑀦𑀺𑀲𑁆𑀲𑀸𑀬 𑀦 𑀢𑀺𑀝𑁆𑀞𑀦𑁆𑀢𑀺. 𑀬𑀤𑀺 𑀳𑀺 𑀲𑀭𑀻𑀭𑀲𑁆𑀲 𑀅𑀦𑁆𑀢𑁄 𑀞𑀺𑀢𑀸, 𑀲𑀓𑀮𑀲𑀭𑀻𑀭𑁂 𑀩𑁆𑀬𑀸𑀧𑀦𑀁 𑀦 𑀲𑀺𑀬𑀸. 𑀅𑀣 𑀩𑀳𑀺 𑀞𑀺𑀢𑀸, 𑀬𑀓𑁆𑀔𑀕𑁆𑀕𑀳𑀺𑀢𑀓𑁂𑀦 𑀓𑀢𑀓𑀼𑀲𑀮𑀸𑀓𑀼𑀲𑀮𑀁 𑀬𑀓𑁆𑀔𑀲𑁆𑀲 𑀦 𑀲𑀺𑀬𑀸. 𑀬𑀤𑀺 𑀘𑀲𑁆𑀲 𑀅𑀗𑁆𑀕𑀫𑀗𑁆𑀕𑀁 𑀦𑀺𑀲𑁆𑀲𑀸𑀬 𑀦 𑀞𑀺𑀢𑀸, 𑀬𑀓𑁆𑀔𑀕𑁆𑀕𑀳𑀺𑀢𑀓𑁂 𑀧𑀳𑀝𑁂 𑀬𑀓𑁆𑀔𑀲𑁆𑀲 𑀤𑀼𑀓𑁆𑀔𑀯𑁂𑀤𑀦𑀼𑀧𑁆𑀧𑀢𑁆𑀢𑀺 𑀦 𑀲𑀺𑀬𑀸, 𑀦 𑀘 𑀲𑀭𑀻𑀭𑁂 𑀭𑀸𑀚𑀺𑀉𑀝𑁆𑀞𑀸𑀦𑀁 𑀪𑀯𑁂𑀬𑁆𑀬. 𑀬𑀲𑁆𑀫𑀸 𑀧𑀦𑁂𑀢𑀁 𑀲𑀩𑁆𑀩𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑁂 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑀸, 𑀏𑀯𑀫𑁂𑀢𑁂𑀧𑀺 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑁆𑀢𑁄 𑀦 𑀩𑀳𑀺 𑀞𑀺𑀢𑀸 𑀉𑀧𑀮𑀩𑁆𑀪𑀦𑁆𑀢𑀺, 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀦 𑀢𑀺𑀝𑁆𑀞𑀦𑁆𑀢𑀺. 𑀬𑀤𑀺 𑀳𑀺 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑁆𑀢𑁄 𑀞𑀺𑀢𑀸, 𑀦 𑀲𑀓𑀲𑀓𑀓𑀺𑀘𑁆𑀘𑀓𑀭𑀸 𑀲𑀺𑀬𑀼𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀼𑀧𑀯𑁂𑀲𑀦𑀢𑁄. 𑀅𑀣 𑀅𑀜𑁆𑀜𑀫𑀜𑁆𑀜𑀢𑁄 𑀩𑀳𑀺 𑀞𑀺𑀢𑀸, 𑀯𑀺𑀦𑀺𑀩𑁆𑀪𑀼𑀢𑁆𑀢𑀸 𑀲𑀺𑀬𑀼𑀁, 𑀢𑀣𑀸 𑀘 𑀲𑀢𑀺 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀯𑀸𑀤𑁄 𑀧𑀭𑀺𑀳𑀸𑀬𑁂𑀬𑁆𑀬, 𑀢𑀲𑁆𑀫𑀸 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑀸𑀢𑀺. 𑀬𑀓𑁆𑀔𑀫𑀳𑀸𑀪𑀽𑀢𑀲𑀫𑀸𑀦𑀢𑀸𑀬 𑀫𑀳𑀸𑀪𑀽𑀢𑀲𑀫𑀸. 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑀸𑀦𑀸𑀧𑀺 𑀘𑁂𑀢𑁂 𑀧𑀢𑀺𑀝𑁆𑀞𑀸𑀦𑀸𑀤𑀺𑀦𑀸 𑀬𑀣𑀸𑀲𑀓𑀓𑀺𑀘𑁆𑀘𑀯𑀺𑀲𑁂𑀲𑁂𑀦 𑀲𑁂𑀲𑀸𑀦𑀁 𑀢𑀺𑀡𑁆𑀡𑀁 𑀉𑀧𑀓𑀸𑀭𑀓𑀸 𑀳𑁄𑀦𑁆𑀢𑀸 𑀲𑀳𑀚𑀸𑀢𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬𑁂𑀯 𑀢𑀺𑀝𑁆𑀞𑀦𑁆𑀢𑀺.

𑀯𑀜𑁆𑀘𑀓𑀢𑁆𑀢𑀸 𑀅𑀪𑀽𑀢𑁂𑀦𑀸𑀢𑀺 𑀬𑀓𑁆𑀔𑀺𑀦𑀻𑀆𑀤𑀬𑁄 𑀯𑀺𑀬 𑀅𑀪𑀽𑀢𑁂𑀦 𑀅𑀢𑀘𑁆𑀙𑁂𑀦 𑀫𑀦𑀸𑀧𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀦𑀸 𑀲𑀢𑁆𑀢𑀸𑀦𑀁 𑀯𑀜𑁆𑀘𑀓𑀢𑁆𑀢𑀸 𑀫𑀳𑀦𑁆𑀢𑀸𑀦𑀺 𑀅𑀪𑀽𑀢𑀸𑀦𑀺 𑀏𑀢𑁂𑀲𑀽𑀢𑀺 𑀫𑀳𑀸𑀪𑀽𑀢𑀸𑀢𑀺 𑀲𑀫𑁆𑀫𑀢𑀸. 𑀬𑀣𑀸 𑀳𑀺 𑀬𑀓𑁆𑀔𑀺𑀦𑀻𑀆𑀤𑀬𑁄 𑀫𑀦𑀸𑀧𑁂𑀳𑀺 𑀓𑀸𑀴𑀲𑀸𑀫𑀸𑀤𑀺𑀯𑀡𑁆𑀡𑁂𑀳𑀺, 𑀧𑀼𑀣𑀼𑀮𑀧𑀻𑀯𑀭𑀓𑀺𑀲𑀸𑀤𑀺𑀲𑀡𑁆𑀞𑀸𑀦𑁂𑀳𑀺, 𑀳𑀢𑁆𑀣𑀪𑀫𑀼𑀆𑀤𑀺𑀯𑀺𑀓𑁆𑀔𑁂𑀧𑁂𑀳𑀺 𑀘 𑀅𑀢𑁆𑀢𑀦𑁄 𑀪𑀬𑀸𑀦𑀓𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀢𑁆𑀢𑁂 𑀯𑀜𑁆𑀘𑁂𑀦𑁆𑀢𑀺, 𑀅𑀢𑁆𑀢𑀦𑁄 𑀯𑀲𑀁 𑀦𑁂𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀻𑀲𑀼 𑀫𑀦𑀸𑀧𑁂𑀦 𑀙𑀯𑀺𑀯𑀡𑁆𑀡𑁂𑀦, 𑀫𑀦𑀸𑀧𑁂𑀦 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀡𑁆𑀞𑀸𑀦𑁂𑀦, 𑀫𑀦𑀸𑀧𑁂𑀦 𑀘 𑀳𑀢𑁆𑀣𑀧𑀸𑀤𑀅𑀗𑁆𑀕𑀼𑀮𑀺𑀪𑀫𑀼𑀓𑀯𑀺𑀓𑁆𑀔𑁂𑀧𑁂𑀦 𑀅𑀢𑁆𑀢𑀦𑁄 𑀓𑀓𑁆𑀔𑀴𑀢𑁆𑀢𑀸𑀤𑀺𑀲𑀭𑀻𑀭𑀮𑀓𑁆𑀔𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀩𑀸𑀮𑀚𑀦𑀁 𑀯𑀜𑁆𑀘𑁂𑀦𑁆𑀢𑀺, 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀤𑀝𑁆𑀞𑀼𑀁 𑀦 𑀤𑁂𑀦𑁆𑀢𑀸 𑀢𑀁 𑀅𑀢𑁆𑀢𑀦𑁄 𑀯𑀲𑀁 𑀦𑁂𑀦𑁆𑀢𑀺.

𑁬𑁨𑁭-𑁩𑁦. 𑀘𑀓𑁆𑀔𑀼𑀲𑁄𑀢𑀦𑁆𑀢𑀺𑀆𑀤𑀻𑀲𑀼 𑀭𑀽𑀧𑀫𑁂𑀯 𑀭𑀽𑀧𑀢𑀸. 𑀳𑀤𑀬𑀜𑁆𑀘 𑀢𑀁 𑀯𑀢𑁆𑀣𑀼 𑀘 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀦𑁆𑀢𑀺 𑀳𑀤𑀬𑀯𑀢𑁆𑀣𑀼, 𑀳𑀤𑀬𑀲𑁆𑀲 𑀯𑀸 𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀽𑀢𑀺 𑀳𑀤𑀬𑀯𑀢𑁆𑀣𑀼, 𑀧𑀼𑀭𑀺𑀫𑀧𑀤𑀮𑁄𑀧𑁂𑀦 𑀧𑀦 ‘‘𑀯𑀢𑁆𑀣𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀬𑁂𑀯 𑀆𑀳𑀸𑀭𑀢𑀸. 𑀓𑀺𑀜𑁆𑀘𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀭𑀽𑀧𑀦𑀺𑀤𑁆𑀤𑁂𑀲𑁂 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀑𑀲𑀸𑀦𑁂 𑀉𑀤𑁆𑀤𑀺𑀝𑁆𑀞𑁄, 𑀇𑀥 𑀧𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀁 𑀏𑀓𑀝𑁆𑀞𑀸𑀦𑁂 𑀤𑀲𑁆𑀲𑀦𑀢𑁆𑀣𑀁 𑀳𑀤𑀬𑀯𑀢𑁆𑀣𑀼𑀅𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑁄𑀢𑀺. 𑀮𑀳𑀼𑀢𑀸 𑀆𑀤𑀺 𑀬𑀸𑀲𑀁 𑀫𑀼𑀤𑀼𑀢𑀸𑀓𑀫𑁆𑀫𑀜𑁆𑀜𑀢𑀸𑀦𑀦𑁆𑀢𑀺 𑀮𑀳𑀼𑀢𑀸𑀤𑀬𑁄, 𑀢𑀸𑀲𑀁 𑀢𑀬𑀁 𑀮𑀳𑀼𑀢𑀸𑀤𑀺𑀢𑁆𑀢𑀬𑀁, 𑀢𑀢𑁆𑀣 𑀮𑀳𑀼𑀪𑀸𑀯𑁄 𑀮𑀳𑀼𑀢𑀸, 𑀢𑀣𑀸 𑀫𑀼𑀤𑀼𑀢𑀸𑀧𑀺. 𑀓𑀫𑁆𑀫𑀦𑀺 𑀲𑀸𑀥𑀼 𑀓𑀫𑁆𑀫𑀜𑁆𑀜𑀁, 𑀢𑀲𑁆𑀲 𑀪𑀸𑀯𑁄 𑀓𑀫𑁆𑀫𑀜𑁆𑀜𑀢𑀸. 𑀮𑀳𑀼𑀢𑀸𑀤𑀻𑀦𑀁 𑀲𑀬𑀁 𑀅𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀦𑀺𑀧𑁆𑀨𑀦𑁆𑀦𑀭𑀽𑀧𑀯𑀺𑀓𑀸𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀲𑁆𑀲𑀸’’𑀢𑀺 𑀯𑀺𑀲𑁂𑀲𑀦𑀁 𑀓𑀢𑀁. 𑀘𑀢𑀼𑀯𑀻𑀲𑀢𑀻𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀩𑀮𑀯𑀭𑀽𑀧𑀸𑀤𑀻𑀦𑀁 𑀦𑀺𑀲𑁂𑀥𑀦𑀢𑁆𑀣𑁄. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀦𑀺𑀲𑁆𑀲𑀸𑀬𑀸𑀢𑀺 𑀦𑀺𑀲𑁆𑀲𑀸𑀬 𑀏𑀯, 𑀦 𑀧𑀦 𑀦𑀺𑀲𑁆𑀲𑀬𑀯𑀲𑁂𑀦𑀧𑀺. 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀦𑀺𑀫𑀼𑀢𑁆𑀢𑀢𑀸𑀬 𑀦𑀺𑀓𑁆𑀔𑀦𑁆𑀢𑀁 𑀉𑀧𑀸𑀤𑀸𑀦𑀢𑁄 𑀫𑀸𑀦𑀲𑀁 𑀏𑀢𑀲𑁆𑀲𑀸𑀢𑀺 𑀦𑀺𑀭𑀼𑀧𑀸𑀤𑀸𑀦𑀫𑀸𑀦𑀲𑁄.

𑁬𑁩𑁧-𑁨. 𑀧𑀢𑁆𑀣𑀝𑀢𑁆𑀢𑀸𑀢𑀺 𑀧𑀼𑀣𑀼𑀢𑁆𑀢𑀸, 𑀢𑁂𑀦 𑀧𑀼𑀣𑀼𑀪𑀸𑀯𑀢𑁄 𑀧𑀼𑀣𑀯𑀻, 𑀧𑀼𑀣𑀯𑀻 𑀏𑀯 𑀧𑀣𑀯𑀻𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺 𑀤𑀻𑀧𑀺𑀢𑀸 𑀳𑁄𑀢𑀺. 𑀅𑀬𑀁 𑀧𑀦 𑀲𑀫𑁆𑀪𑀸𑀭𑀧𑀣𑀯𑀺𑀬𑀸 𑀯𑀲𑁂𑀦 𑀬𑀼𑀚𑁆𑀚𑀢𑀺. 𑀲𑀸 𑀳𑀺 𑀧𑀼𑀣𑀼𑀪𑀽𑀢𑀸 𑀧𑀢𑁆𑀣𑀝𑀸𑀢𑀺. 𑀮𑀓𑁆𑀔𑀡𑀧𑀣𑀯𑀺𑀬𑀸 𑀯𑀲𑁂𑀦 𑀧𑀦 𑀧𑀣𑀦𑀝𑁆𑀞𑁂𑀦 𑀧𑀣𑀯𑀻, 𑀲𑀳𑀚𑀭𑀽𑀧𑀸𑀦𑀁 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀧𑀓𑁆𑀔𑀸𑀬𑀢𑀺 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑁄𑀧𑀺 𑀯𑀸 𑀅𑀢𑁆𑀣𑁄 𑀮𑀓𑁆𑀔𑀡𑀧𑀣𑀯𑀺𑀬𑀸 𑀯𑀲𑁂𑀦 𑀮𑀩𑁆𑀪𑀢𑀺. 𑀯𑀸𑀬𑀦𑀢𑁄𑀢𑀺 𑀲𑀫𑀼𑀤𑀻𑀭𑀡𑀢𑁄, 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀪𑀽𑀢𑀲𑀗𑁆𑀖𑀸𑀝𑀲𑁆𑀲 𑀧𑀸𑀧𑀦𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀚𑁂𑀢𑀺 𑀧𑀭𑀺𑀧𑀸𑀘𑁂𑀢𑀺, 𑀦𑀺𑀲𑁂𑀢𑀺 𑀯𑀸, 𑀢𑀺𑀓𑁆𑀔𑀪𑀸𑀯𑁂𑀦 𑀲𑁂𑀲𑀪𑀽𑀢𑀢𑁆𑀢𑀬𑀁 𑀉𑀲𑁆𑀫𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀘𑁂𑀢𑁆𑀣 𑀇𑀢𑀺-𑀲𑀤𑁆𑀤𑀮𑁄𑀧𑀢𑁄 ‘‘𑀢𑁂𑀚𑁂𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀏𑀯𑀁 ‘‘𑀆𑀧𑁂𑀢𑀻’’𑀢𑀺 𑀏𑀢𑁆𑀣𑀸𑀧𑀺. 𑀢𑀲𑁆𑀫𑀸 𑀢𑁂𑀚𑁂𑀢𑀻𑀢𑀺 𑀢𑁂𑀚𑁄, 𑀆𑀧𑁂𑀢𑀻𑀢𑀺 𑀆𑀧𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀧𑁂𑀢𑀺 𑀧𑀸𑀮𑀦𑀸𑀢𑀺 𑀅𑀦𑀼𑀧𑀸𑀮𑁂𑀢𑀩𑁆𑀩𑀭𑀽𑀧𑀧𑀭𑀺𑀬𑁄𑀲𑀸𑀦𑀁 𑀆𑀧𑁂𑀢𑀺 𑀧𑀢𑁆𑀣𑀭𑀢𑀺. 𑀢𑀣𑀸 𑀳𑁂𑀢𑀁 ‘‘𑀆𑀩𑀦𑁆𑀥𑀦𑀓𑀺𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀧𑀻𑀬𑀢𑀻𑀢𑀺 𑀆𑀧𑁄. 𑀲𑁄𑀲𑀻𑀬𑀢𑀺 𑀧𑀺𑀯𑀻𑀬𑀢𑀻𑀢𑀺 𑀅𑀢𑁆𑀣𑁄𑀢𑀺 𑀓𑁂𑀘𑀺. 𑀅𑀬𑀁 𑀧𑀦𑀢𑁆𑀣𑁄 𑀲𑀲𑀫𑁆𑀪𑀸𑀭𑀸𑀧𑁂 𑀬𑀼𑀚𑁆𑀚𑀢𑀻𑀢𑀺 𑀯𑀤𑀦𑁆𑀢𑀺, 𑀮𑀓𑁆𑀔𑀡𑀸𑀧𑁂𑀧𑀺 𑀬𑀼𑀚𑁆𑀚𑀢𑁂𑀯. 𑀲𑁄𑀧𑀺 𑀳𑀺 𑀨𑀭𑀼𑀲𑀧𑀸𑀘𑀦𑀯𑀺𑀲𑁄𑀲𑀦𑀸𑀓𑀸𑀭𑁂𑀦 𑀲𑁂𑀲𑀪𑀽𑀢𑀢𑁆𑀢𑀬𑁂𑀦 𑀧𑀻𑀬𑀫𑀸𑀦𑁄 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺. 𑀆𑀧𑀸𑀬𑀢𑀻𑀢𑀺 𑀯𑀸 𑀆𑀧𑁄, 𑀩𑁆𑀭𑀽𑀳𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑁂𑀲 𑀧𑀭𑀺𑀩𑁆𑀭𑀽𑀳𑀦𑀭𑀲𑁄. 𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀸𑀦𑀁 𑀭𑀽𑀧𑀸𑀦𑀁. 𑀯𑀓𑁆𑀔𑀸𑀫𑀻𑀢𑀺 𑀓𑀣𑁂𑀲𑁆𑀲𑀸𑀫𑀺. 𑀓𑀺𑀁 𑀓𑀸𑀭𑀡𑀸𑀢𑀺 𑀆𑀳 ‘‘𑀮𑀓𑁆𑀔𑀡𑀸𑀤𑀻𑀲𑀽’’𑀢𑀺𑀆𑀤𑀺. 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀮𑀓𑁆𑀔𑀡𑀸𑀤𑀻𑀲𑀼 𑀜𑀸𑀢𑁂𑀲𑀼 𑀥𑀫𑁆𑀫𑀸 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀧𑀭𑀢𑁄 𑀆𑀯𑀺𑀪𑀸𑀯𑀳𑁂𑀢𑀽𑀢𑀺 𑀅𑀢𑁆𑀣𑁄.

𑁬𑁩𑁩-𑁪. 𑀓𑀸𑀦𑀺 𑀧𑀦 𑀢𑀸𑀦𑀺 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺 𑀦𑀸𑀫, 𑀬𑁂𑀲𑀼 𑀜𑀸𑀢𑁂𑀲𑀼 𑀥𑀫𑁆𑀫𑀸 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀁 𑀘𑁄𑀤𑀦𑀁 𑀲𑁄𑀥𑁂𑀢𑀼𑀁 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺 𑀲𑀭𑀽𑀧𑀢𑁄 𑀓𑀣𑁂𑀦𑁆𑀢𑁄 𑀆𑀳 ‘‘𑀲𑀸𑀫𑀜𑁆𑀜𑀁 𑀯𑀸’’𑀢𑀺𑀆𑀤𑀺. 𑀲𑀸𑀫𑀜𑁆𑀜𑀁 𑀲𑀸𑀥𑀸𑀭𑀡𑁄 𑀅𑀦𑀺𑀘𑁆𑀘𑀸𑀤𑀺𑀓𑁄. 𑀲𑀪𑀸𑀯𑁄 𑀓𑀓𑁆𑀔𑀴𑀸𑀤𑀺𑀨𑀼𑀲𑀦𑀸𑀤𑀺𑀓𑁄 𑀅𑀲𑀸𑀥𑀸𑀭𑀡𑀪𑀸𑀯𑁄. 𑀓𑀺𑀘𑁆𑀘𑀦𑁆𑀢𑀺 𑀲𑀦𑁆𑀥𑀸𑀭𑀡𑀸𑀤𑀺𑀓𑀺𑀘𑁆𑀘𑀁. 𑀲𑀫𑁆𑀧𑀢𑁆𑀢𑀻𑀢𑀺 𑀲𑀫𑁆𑀧𑀦𑁆𑀦𑀪𑀸𑀯𑁄. ‘‘𑀲𑀼𑀭𑀲𑁄 𑀕𑀦𑁆𑀥𑀩𑁆𑀩𑁄’’𑀢𑀺𑀆𑀤𑀻𑀲𑀼 𑀳𑀺 𑀕𑀦𑁆𑀥𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀭𑀲-𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀲𑀫𑁆𑀧𑀢𑁆𑀢𑀺 𑀭𑀲𑁄𑀢𑀺. 𑀨𑀮𑀦𑁆𑀢𑀺 𑀲𑀳𑀚𑀸𑀢𑀦𑀸𑀦𑀓𑁆𑀔𑀡𑀺𑀓𑀯𑀲𑁂𑀦 𑀞𑀺𑀢𑀁 𑀨𑀮𑀁. 𑀉𑀧𑀝𑁆𑀞𑀸𑀦𑀦𑀬𑁄𑀢𑀺 𑀕𑀳𑁂𑀢𑀩𑁆𑀩𑀪𑀸𑀯𑁂𑀦 𑀜𑀸𑀡𑀲𑁆𑀲 𑀉𑀧𑀝𑁆𑀞𑀸𑀦𑀸𑀓𑀸𑀭𑁄. 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀧𑀥𑀸𑀦𑀓𑀸𑀭𑀡𑀁.

𑀮𑀓𑁆𑀔𑀻𑀬𑀢𑀺 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁, 𑀓𑀓𑁆𑀔𑀴𑀢𑁆𑀢𑀁 𑀮𑀓𑁆𑀔𑀡𑀫𑁂𑀢𑀺𑀲𑁆𑀲𑀸𑀢𑀺 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸. 𑀦𑀦𑀼 𑀘 𑀓𑀓𑁆𑀔𑀴𑀢𑁆𑀢𑀫𑁂𑀯 𑀧𑀣𑀯𑀻𑀥𑀸𑀢𑀽𑀢𑀺? 𑀲𑀘𑁆𑀘𑀫𑁂𑀢𑀁. 𑀢𑀣𑀸 𑀳𑀺 𑀯𑀺𑀜𑁆𑀜𑀸𑀢𑀸𑀯𑀺𑀜𑁆𑀜𑀸𑀢𑀲𑀤𑁆𑀤𑀢𑁆𑀣𑀢𑀸𑀯𑀲𑁂𑀦 𑀅𑀲𑀫𑁆𑀪𑀺𑀦𑁆𑀦𑁂𑀧𑀺 𑀥𑀫𑁆𑀫𑁂 𑀓𑀧𑁆𑀧𑀦𑀸𑀲𑀺𑀤𑁆𑀥𑁂𑀦 𑀪𑁂𑀤𑁂𑀦 𑀏𑀯𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀏𑀯𑀜𑁆𑀳𑀺 𑀅𑀢𑁆𑀣𑀯𑀺𑀲𑁂𑀲𑀸𑀯𑀩𑁄𑀥𑁄 𑀳𑁄𑀢𑀻𑀢𑀺. 𑀅𑀣 𑀯𑀸 𑀮𑀓𑁆𑀔𑀻𑀬𑀢𑀻𑀢𑀺 𑀮𑀓𑁆𑀔𑀡𑀁, 𑀓𑀓𑁆𑀔𑀴𑀸 𑀳𑀼𑀢𑁆𑀯𑀸 𑀮𑀓𑁆𑀔𑀺𑀬𑀫𑀸𑀦𑀸 𑀥𑀸𑀢𑀼 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀢𑀺𑀝𑁆𑀞𑀸𑀦𑀭𑀲𑀸𑀢𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀸𑀯𑀓𑀺𑀘𑁆𑀘𑀸. 𑀅𑀲𑀳𑀚𑀸𑀢𑀸𑀦𑀫𑁆𑀧𑀺 𑀲𑀦𑁆𑀢𑀢𑀺𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀪𑀸𑀯𑁄 𑀳𑁄𑀢𑁂𑀯. 𑀢𑀢𑁄 𑀏𑀯 𑀦𑁂𑀲𑀁 𑀲𑀫𑁆𑀧𑀝𑀺𑀘𑁆𑀙𑀦𑀸𑀓𑀸𑀭𑁂𑀦 𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀇𑀫𑀺𑀦𑀸 𑀓𑀺𑀘𑁆𑀘𑀯𑀲𑁂𑀦𑁂𑀯𑁂𑀢𑁆𑀣 ‘‘𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀤𑀝𑁆𑀞𑀸𑀦𑀁 𑀧𑀦𑁂𑀢𑁆𑀣 𑀘𑀢𑀼𑀦𑁆𑀦𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀯𑀓𑁆𑀔𑀢𑀺.

𑀧𑀕𑁆𑀖𑀭𑀡𑀮𑀓𑁆𑀔𑀡𑀸𑀢𑀺 𑀤𑁆𑀭𑀯𑀢𑀸𑀪𑀸𑀯𑀢𑁄 𑀯𑀺𑀲𑁆𑀲𑀦𑁆𑀤𑀦𑀮𑀓𑁆𑀔𑀡𑀸. 𑀩𑁆𑀭𑀽𑀳𑀦𑀭𑀲𑀸𑀢𑀺 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀫𑀺𑀮𑀸𑀢𑀪𑀸𑀯𑀽𑀧𑀕𑀫𑀦𑀁 𑀅𑀤𑀢𑁆𑀯𑀸 𑀯𑀟𑁆𑀠𑀦𑀓𑀺𑀘𑁆𑀘𑀸. 𑀢𑀣𑀸 𑀳𑀺 𑀲𑀸 𑀢𑁂𑀲𑀁 𑀧𑀻𑀡𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀗𑁆𑀕𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀩𑀸𑀳𑀺𑀭𑀓𑀉𑀤𑀓𑀁 𑀯𑀺𑀬 𑀦𑀳𑀸𑀦𑀺𑀬𑀘𑀼𑀡𑁆𑀡𑀲𑁆𑀲 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀯𑀺𑀧𑁆𑀧𑀓𑀺𑀭𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑀦𑀯𑀲𑁂𑀦 𑀲𑀗𑁆𑀕𑀡𑁆𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀧𑀭𑀺𑀧𑀸𑀘𑀦𑀭𑀲𑀸𑀢𑀺 𑀧𑀭𑀺𑀡𑀢𑀪𑀸𑀯𑀓𑀭𑀡𑀭𑀲𑀸. 𑀫𑀤𑁆𑀤𑀯𑀸𑀦𑀼𑀧𑁆𑀧𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀩𑀸𑀳𑀺𑀭𑀕𑁆𑀕𑀺 𑀯𑀺𑀬 𑀚𑀢𑀼𑀮𑁄𑀳𑀸𑀤𑀻𑀦𑀁 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀫𑀼𑀤𑀼𑀪𑀸𑀯𑀸𑀦𑀼𑀧𑁆𑀧𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸𑀢𑀺 𑀧𑀽𑀭𑀡𑀮𑀓𑁆𑀔𑀡𑀸. 𑀲𑀫𑀼𑀤𑀻𑀭𑀡𑀭𑀲𑀸𑀢𑀺 𑀓𑀫𑁆𑀧𑀦𑀭𑀲𑀸. 𑀅𑀪𑀺𑀦𑀻𑀳𑀸𑀭𑁄 𑀪𑀽𑀢𑀢𑁆𑀢𑀬𑀲𑁆𑀲 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄, 𑀦𑀻𑀳𑀭𑀡𑀁 𑀯𑀸 𑀩𑀻𑀚𑀢𑁄 𑀅𑀗𑁆𑀓𑀼𑀭𑀸𑀤𑀺𑀓𑀲𑁆𑀲 𑀯𑀺𑀬. 𑀏𑀓𑁂𑀓𑀸…𑀧𑁂… 𑀢𑀩𑁆𑀩𑀸𑀢𑀺 𑀧𑀣𑀯𑀻𑀥𑀸𑀢𑀼 𑀆𑀧𑀸𑀤𑀺𑀪𑀽𑀢𑀢𑁆𑀢𑀬𑀧𑀤𑀝𑁆𑀞𑀸𑀦𑀸, 𑀆𑀧𑁄𑀥𑀸𑀢𑀼 𑀧𑀣𑀯𑀻𑀢𑁂𑀚𑀸𑀤𑀺𑀪𑀽𑀢𑀢𑁆𑀢𑀬𑀧𑀤𑀝𑁆𑀞𑀸𑀦𑀸𑀢𑀺 𑀏𑀯𑀁 𑀏𑀓𑁂𑀓𑀸 𑀥𑀸𑀢𑀼 𑀅𑀯𑀲𑀺𑀝𑁆𑀞𑀪𑀽𑀢𑀢𑁆𑀢𑀬𑀧𑀤𑀝𑁆𑀞𑀸𑀦𑀸.

𑀆𑀭𑁄𑀳𑀧𑀭𑀺𑀡𑀸𑀳𑀯𑀲𑁂𑀦 𑀳𑀺 𑀫𑀚𑁆𑀛𑀺𑀫𑁂 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑀸 𑀧𑀭𑀫𑀸𑀡𑀼𑀪𑁂𑀤𑀲𑀜𑁆𑀘𑀼𑀡𑁆𑀡𑀸 𑀲𑀼𑀔𑀼𑀫𑀭𑀚𑀪𑀽𑀢𑀸 𑀧𑀣𑀯𑀻𑀥𑀸𑀢𑀼 𑀤𑁄𑀡𑀫𑀢𑁆𑀢𑀸 𑀲𑀺𑀬𑀸. 𑀲𑀸 𑀘 𑀢𑀢𑁄 𑀉𑀧𑀟𑁆𑀠𑀧𑁆𑀧𑀫𑀸𑀡𑀸𑀬 𑀆𑀧𑁄𑀥𑀸𑀢𑀼𑀬𑀸 𑀬𑀣𑀸 𑀦 𑀯𑀺𑀓𑀺𑀭𑀢𑀺, 𑀏𑀯𑀁 𑀆𑀩𑀦𑁆𑀥𑀦𑀯𑀲𑁂𑀦 𑀲𑀗𑁆𑀕𑀳𑀺𑀢𑀸. 𑀬𑀣𑀸 𑀧𑀦 𑀧𑀕𑁆𑀖𑀭𑀡𑀲𑀪𑀸𑀯𑀸𑀬 𑀆𑀧𑁄𑀥𑀸𑀢𑀼𑀬𑀸 𑀯𑀲𑁂𑀦 𑀓𑀺𑀮𑀺𑀦𑁆𑀦𑀪𑀸𑀯𑀁 𑀧𑀺𑀘𑁆𑀙𑀮𑀪𑀸𑀯𑀁 𑀦𑀸𑀧𑀚𑁆𑀚𑀢𑀺, 𑀏𑀯𑀁 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀧𑀸𑀮𑀺𑀢𑀸. 𑀬𑀣𑀸 𑀧𑀦 𑀢𑀲𑁆𑀲𑀸 𑀯𑀲𑁂𑀦 𑀦 𑀯𑀺𑀓𑀺𑀭𑀻𑀬𑀢𑀺, 𑀏𑀯𑀁 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀢𑁆𑀣𑀫𑁆𑀪𑀺𑀢𑀸 𑀲𑀗𑁆𑀖𑀸𑀢𑀪𑀸𑀯𑀁 𑀧𑀸𑀧𑀺𑀢𑀸. 𑀏𑀯𑀁 𑀲𑀼𑀔𑀼𑀫𑀭𑀚𑀪𑀽𑀢𑀸𑀧𑀺 𑀆𑀩𑀦𑁆𑀥𑀦𑀧𑀭𑀺𑀧𑀸𑀘𑀦𑀲𑀫𑀼𑀤𑀻𑀭𑀡𑀓𑀺𑀘𑁆𑀘𑀸𑀳𑀺 𑀆𑀧𑁄𑀢𑁂𑀚𑁄𑀯𑀸𑀬𑁄𑀥𑀸𑀢𑀽𑀳𑀺 𑀮𑀤𑁆𑀥𑀧𑀘𑁆𑀘𑀬𑀸 𑀲𑀺𑀦𑁂𑀳𑁂𑀦 𑀢𑁂𑀫𑀺𑀢𑀸, 𑀢𑁂𑀚𑀲𑀸 𑀧𑀭𑀺𑀧𑀓𑁆𑀓𑀸, 𑀯𑀸𑀬𑀼𑀦𑀸 𑀯𑀺𑀢𑁆𑀣𑀫𑁆𑀪𑀺𑀢𑀸 𑀧𑀺𑀝𑁆𑀞𑀘𑀼𑀡𑁆𑀡𑀸𑀦𑀺 𑀯𑀺𑀬 𑀦 𑀇𑀢𑁄 𑀘𑀺𑀢𑁄 𑀘 𑀯𑀺𑀓𑀺𑀭𑀻𑀬𑀢𑀺 𑀯𑀺𑀤𑁆𑀥𑀁𑀲𑀻𑀬𑀢𑀺, 𑀅𑀯𑀺𑀓𑀺𑀭𑀺𑀬𑀫𑀸𑀦𑀸 𑀅𑀯𑀺𑀤𑁆𑀥𑀁𑀲𑀺𑀬𑀫𑀸𑀦𑀸 𑀦𑀸𑀦𑀧𑁆𑀧𑀓𑀸𑀭𑀓𑀁 𑀇𑀢𑁆𑀣𑀺𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀺𑀪𑀸𑀯𑀯𑀺𑀪𑀸𑀕𑀁 𑀉𑀧𑀕𑀘𑁆𑀙𑀢𑀺, 𑀅𑀡𑀼𑀣𑀽𑀮𑀤𑀻𑀖𑀭𑀲𑁆𑀲𑀣𑀺𑀭𑀓𑀣𑀺𑀦𑀸𑀤𑀺𑀪𑀸𑀯𑀜𑁆𑀘 𑀧𑀓𑀸𑀲𑁂𑀢𑀺.

𑀬𑀽𑀲𑀕𑀢𑀸 𑀆𑀩𑀦𑁆𑀥𑀦𑀸𑀓𑀸𑀭𑀪𑀽𑀢𑀸 𑀧𑀦𑁂𑀢𑁆𑀣 𑀆𑀧𑁄𑀥𑀸𑀢𑀼 𑀧𑀣𑀯𑀻𑀧𑀢𑀺𑀝𑁆𑀞𑀺𑀢𑀸 𑀢𑁂𑀚𑀸𑀦𑀼𑀧𑀸𑀮𑀺𑀢𑀸 𑀯𑀸𑀬𑁄𑀯𑀺𑀢𑁆𑀣𑀫𑁆𑀪𑀺𑀢𑀸 𑀦 𑀕𑀴𑀢𑀺, 𑀦 𑀧𑀕𑁆𑀖𑀭𑀢𑀺, 𑀦 𑀧𑀭𑀺𑀲𑁆𑀲𑀯𑀢𑀺. 𑀏𑀯𑀁 𑀢𑀻𑀳𑀺 𑀥𑀸𑀢𑀽𑀳𑀺 𑀅𑀦𑀼𑀧𑀸𑀮𑀺𑀢𑀸 𑀅𑀧𑀕𑁆𑀖𑀭𑀫𑀸𑀦𑀸 𑀅𑀧𑀭𑀺𑀲𑁆𑀲𑀯𑀫𑀸𑀦𑀸 𑀧𑀺𑀡𑁆𑀟𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀲𑀸 𑀳𑀺 𑀅𑀦𑀼𑀩𑁆𑀭𑀽𑀳𑀦𑀭𑀲𑀸.

𑀅𑀲𑀺𑀢𑀧𑀻𑀢𑀸𑀤𑀺𑀧𑀭𑀺𑀧𑀸𑀘𑀺𑀢𑀸 𑀘𑁂𑀢𑁆𑀣 𑀉𑀲𑀼𑀫𑀸𑀓𑀸𑀭𑀪𑀽𑀢𑀸 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀸 𑀢𑁂𑀚𑁄𑀥𑀸𑀢𑀼 𑀧𑀣𑀯𑀻𑀧𑀢𑀺𑀝𑁆𑀞𑀺𑀢𑀸 𑀆𑀧𑁄𑀲𑀗𑁆𑀕𑀳𑀺𑀢𑀸 𑀯𑀸𑀬𑁄𑀯𑀺𑀢𑁆𑀣𑀫𑁆𑀪𑀺𑀢𑀸 𑀇𑀫𑀁 𑀓𑀸𑀬𑀁 𑀧𑀭𑀺𑀧𑀸𑀘𑁂𑀢𑀺, 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀜𑁆𑀘𑀲𑁆𑀲 𑀆𑀯𑀳𑀢𑀺. 𑀲𑀸 𑀳𑀺 𑀬𑀣𑀸𑀦𑀼𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀲𑀫𑁆𑀫𑀸 𑀧𑀭𑀺𑀡𑀸𑀫𑀦𑁂𑀦 𑀭𑀲𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑀁 𑀕𑀘𑁆𑀙𑀦𑁆𑀢𑀻 𑀇𑀫𑀁 𑀓𑀸𑀬𑀁 𑀧𑀭𑀺𑀧𑀸𑀘𑁂𑀢𑀺, 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀜𑁆𑀘 𑀆𑀯𑀳𑀢𑀺. 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀸𑀬 𑀳𑀺 𑀘𑀺𑀢𑁆𑀢𑀧𑀲𑀸𑀤𑀳𑁂𑀢𑀼𑀓𑀸𑀬 𑀘 𑀲𑀭𑀻𑀭𑁂 𑀯𑀡𑁆𑀡𑀲𑀫𑁆𑀧𑀤𑀸𑀬 𑀢𑁂𑀚𑁄𑀥𑀸𑀢𑀼 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀧𑀕𑁂𑀯 𑀉𑀢𑀼𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀬 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸𑀢𑀺. 𑀢𑀸𑀬 𑀘 𑀧𑀦 𑀧𑀭𑀺𑀧𑀸𑀘𑀺𑀢𑁄 𑀅𑀬𑀁 𑀓𑀸𑀬𑁄 𑀦 𑀧𑀽𑀢𑀺𑀪𑀸𑀯𑀁 𑀕𑀘𑁆𑀙𑀢𑀺.

𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀝𑀸 𑀘𑁂𑀢𑁆𑀣 𑀲𑀫𑀼𑀤𑀻𑀭𑀡𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸 𑀯𑀸𑀬𑁄𑀥𑀸𑀢𑀼 𑀧𑀣𑀯𑀻𑀥𑀸𑀢𑀼𑀬𑀸 𑀅𑀢𑁆𑀢𑀦𑀺 𑀧𑀢𑀺𑀝𑁆𑀞𑀸𑀧𑀻𑀬𑀢𑀺. 𑀬𑀣𑀸 𑀲𑀳𑀚𑀸𑀢𑀥𑀫𑁆𑀫𑁂𑀳𑀺 𑀯𑀺𑀲𑀼𑀁 𑀦 𑀳𑁄𑀢𑀺, 𑀏𑀯𑀁 𑀆𑀧𑁄𑀥𑀸𑀢𑀼𑀬𑀸 𑀲𑀗𑁆𑀕𑀬𑁆𑀳𑀢𑀺. 𑀬𑀣𑀸 𑀲𑀳𑀚𑀸𑀢𑀥𑀫𑁆𑀫𑀸 𑀦 𑀧𑀭𑀺𑀲𑁆𑀲𑀯𑀦𑁆𑀢𑀺, 𑀏𑀯𑀁 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀧𑀸𑀮𑀻𑀬𑀢𑀺. 𑀲𑀸 𑀏𑀯𑀁 𑀢𑀻𑀳𑀺 𑀥𑀸𑀢𑀽𑀳𑀺 𑀬𑀣𑀸𑀭𑀳𑀁 𑀅𑀦𑀼𑀧𑀸𑀮𑀺𑀬𑀫𑀸𑀦𑀸 𑀇𑀫𑀁 𑀓𑀸𑀬𑀁 𑀯𑀺𑀢𑁆𑀣𑀫𑁆𑀪𑁂𑀢𑀺. 𑀢𑀸𑀬 𑀧𑀦 𑀯𑀺𑀢𑁆𑀣𑀫𑁆𑀪𑀺𑀢𑁄 𑀅𑀬𑀁 𑀓𑀸𑀬𑁄 𑀦 𑀧𑀭𑀺𑀧𑀢𑀢𑀺, 𑀉𑀚𑀼𑀓𑀁 𑀢𑀺𑀝𑁆𑀞𑀢𑀺, 𑀇𑀘𑁆𑀘𑁂𑀯𑀁 𑀏𑀓𑁂𑀓𑀸𑀬 𑀥𑀸𑀢𑀼𑀬𑀸 𑀢𑀺𑀲𑁆𑀲𑀦𑁆𑀦𑀁 𑀥𑀸𑀢𑀽𑀦𑀁 𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁 ‘‘𑀏𑀓𑁂𑀓𑀸 𑀘𑁂𑀢𑁆𑀣 𑀲𑁂𑀲𑀪𑀽𑀢𑀢𑁆𑀢𑀬𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀏𑀯𑀁 𑀪𑀽𑀢𑀭𑀽𑀧𑀸𑀦𑀁 𑀲𑀤𑁆𑀥𑀺𑀁 𑀯𑀘𑀦𑀢𑁆𑀣𑁂𑀳𑀺 𑀮𑀓𑁆𑀔𑀡𑀸𑀤𑀬𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀉𑀧𑀸𑀤𑀸𑀬𑀭𑀽𑀧𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀓𑁆𑀔𑀢𑀻’’𑀢𑀺𑀆𑀤𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀘𑀓𑁆𑀔𑀢𑀺-𑀲𑀤𑁆𑀤𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀢𑀸𑀧𑀺 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀯𑀺𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀘𑀓𑁆𑀔𑀢𑀻𑀢𑀺 𑀧𑀦 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬, 𑀅𑀪𑀺𑀩𑁆𑀬𑀢𑁆𑀢𑀁 𑀯𑀤𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀘𑀓𑁆𑀔𑀢𑀻𑀢𑀺 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀭𑀽𑀧𑀁 𑀅𑀲𑁆𑀲𑀸𑀤𑁂𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀢𑀻𑀢𑀺 𑀳𑀺 𑀅𑀬𑀁 𑀲𑀤𑁆𑀤𑁄 ‘‘𑀫𑀥𑀼𑀁 𑀘𑀓𑁆𑀔𑀢𑀺, 𑀩𑁆𑀬𑀜𑁆𑀚𑀦𑀁 𑀘𑀓𑁆𑀔𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀲𑁆𑀲𑀸𑀤𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀘𑀓𑁆𑀔𑀼𑀁 𑀔𑁄, 𑀫𑀸𑀕𑀡𑁆𑀟𑀺𑀬, 𑀭𑀽𑀧𑀸𑀭𑀸𑀫𑀁 𑀭𑀽𑀧𑀭𑀢𑀁 𑀭𑀽𑀧𑀲𑀫𑀼𑀤𑀺𑀢’’𑀦𑁆𑀢𑀺 (𑀫. 𑀦𑀺. 𑁨.𑁨𑁦𑁯). 𑀯𑀓𑁆𑀔𑀢𑀺 𑀘 ‘‘𑀭𑀽𑀧𑁂𑀲𑀼 𑀆𑀯𑀺𑀜𑁆𑀙𑀦𑀭𑀲’’𑀦𑁆𑀢𑀺. 𑀬𑀤𑀺 𑀏𑀯𑀁 ‘‘𑀲𑁄𑀢𑀁 𑀔𑁄, 𑀫𑀸𑀕𑀡𑁆𑀟𑀺𑀬, 𑀲𑀤𑁆𑀤𑀸𑀭𑀸𑀫’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫. 𑀦𑀺. 𑁨.𑁨𑁦𑁯) 𑀲𑁄𑀢𑀸𑀤𑀻𑀦𑀫𑁆𑀧𑀺 𑀲𑀤𑁆𑀤𑀸𑀤𑀺𑀅𑀲𑁆𑀲𑀸𑀤𑀓𑀪𑀸𑀯𑁄 𑀅𑀢𑁆𑀣𑀻𑀢𑀺 𑀢𑁂𑀲𑀫𑁆𑀧𑀺 𑀘𑀓𑁆𑀔𑀼𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀦𑀺𑀭𑀼𑀴𑁆𑀳𑁄 𑀳𑀺 𑀏𑀲 𑀘𑀓𑁆𑀔𑀼-𑀲𑀤𑁆𑀤𑁄 𑀮𑁄𑀘𑀦𑁂𑀬𑁂𑀯 𑀧𑀤𑀼𑀫𑀸𑀤𑀻𑀲𑀼 𑀧𑀗𑁆𑀓𑀚𑀸𑀤𑀺𑀲𑀤𑁆𑀤𑀸 𑀯𑀺𑀬𑀸𑀢𑀺.

𑁬𑁩𑁫-𑁬. 𑀘𑀓𑁆𑀔𑀼𑀭𑀽𑀧𑀲𑁆𑀲 𑀦𑀺𑀤𑁆𑀤𑁂𑀲𑀧𑁆𑀧𑀓𑀭𑀡𑁂𑀧𑀺 𑀘𑀓𑁆𑀔𑀼-𑀲𑀤𑁆𑀤𑀲𑀸𑀫𑀜𑁆𑀜𑀢𑁄 𑀆𑀕𑀢𑀁 𑀲𑀩𑁆𑀩𑀫𑁆𑀧𑀺 𑀘𑀓𑁆𑀔𑀼𑀁 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀘𑀓𑁆𑀔𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀘𑀓𑁆𑀔𑀼𑀦𑀺𑀤𑁆𑀤𑁂𑀲𑁂. 𑀧𑀜𑁆𑀜𑀸𑀫𑀁𑀲𑀧𑁆𑀧𑀪𑁂𑀤𑀢𑁄𑀢𑀺 𑀧𑀜𑁆𑀜𑀸𑀘𑀓𑁆𑀔𑀼 𑀫𑀁𑀲𑀘𑀓𑁆𑀔𑀽𑀢𑀺 𑀏𑀯𑀁 𑀧𑀜𑁆𑀜𑀸𑀫𑀁𑀲𑀸𑀦𑀁 𑀯𑀲𑁂𑀦 𑀧𑀪𑁂𑀤𑀢𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀤𑀼𑀯𑀺𑀥𑁂 𑀘𑀓𑁆𑀔𑀼𑀫𑁆𑀳𑀺. 𑀧𑀜𑁆𑀜𑀸𑀬𑁂𑀯 𑀧𑀜𑁆𑀜𑀸𑀫𑀬𑀁. 𑀦𑀸𑀫𑀢𑁄𑀢𑀺 𑀦𑀸𑀫𑁂𑀳𑀺 𑀧𑀜𑁆𑀘𑀯𑀺𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀢𑀫𑁂𑀳𑀺 𑀦𑀸𑀫𑁂𑀳𑀻𑀢𑀺 𑀆𑀳 ‘‘𑀩𑀼𑀤𑁆𑀥𑀥𑀫𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀩𑀼𑀤𑁆𑀥𑀥𑀫𑁆𑀫𑀲𑀫𑀦𑁆𑀢𑁂𑀳𑀻𑀢𑀺 𑀩𑀼𑀤𑁆𑀥𑀘𑀓𑁆𑀔𑀼 𑀥𑀫𑁆𑀫𑀘𑀓𑁆𑀔𑀼 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀇𑀫𑁂𑀳𑀺 𑀦𑀸𑀫𑁂𑀳𑀺. 𑀜𑀸𑀡𑀤𑀺𑀩𑁆𑀩𑁂𑀳𑀻𑀢𑀺 𑀜𑀸𑀡𑀘𑀓𑁆𑀔𑀼 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀘 𑀦𑀸𑀫𑁂𑀳𑀺. 𑀬𑀣𑀸𑀦𑀼𑀓𑁆𑀓𑀫𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀅𑀦𑀼𑀓𑁆𑀓𑀫𑀢𑁄. 𑀦𑀸𑀦𑀢𑁆𑀢𑀦𑁆𑀢𑀺 𑀪𑁂𑀤𑀁. 𑀫𑁂𑀢𑀺 𑀫𑀬𑁆𑀳𑀁 𑀲𑀦𑁆𑀢𑀺𑀓𑀸, 𑀫𑀬𑁆𑀳𑀁 𑀯𑀘𑀦𑀢𑁄𑀢𑀺 𑀯𑀸 𑀅𑀢𑁆𑀣𑁄. 𑀦𑀺𑀩𑁄𑀥𑀣 𑀚𑀸𑀦𑀸𑀣.

𑁬𑁩𑁭. 𑀢𑀢𑁆𑀣 ‘‘𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁮𑁩) 𑀆𑀕𑀢𑀁 𑀩𑀼𑀤𑁆𑀥𑀘𑀓𑁆𑀔𑀼 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀲𑀬𑀸𑀦𑀼𑀲𑀬𑁂’’𑀢𑀺𑀆𑀤𑀺. 𑀢𑀢𑁆𑀣 𑀆𑀲𑀬𑀸𑀦𑀼𑀲𑀬𑁂𑀢𑀺 𑀲𑀢𑁆𑀢𑀸𑀦𑀁 𑀆𑀲𑀬𑁂 𑀘𑁂𑀯 𑀅𑀦𑀼𑀲𑀬𑁂 𑀘, 𑀢𑀲𑁆𑀫𑀺𑀁 𑀧𑀯𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀲𑁂𑀢𑀺 𑀘𑀺𑀢𑁆𑀢𑀁 𑀏𑀢𑁆𑀣𑀸𑀢𑀺 𑀆𑀲𑀬𑁄. 𑀩𑁆𑀬𑀕𑁆𑀖𑀸𑀲𑀬𑁄 𑀯𑀺𑀬. 𑀬𑀣𑀸 𑀳𑀺 𑀩𑁆𑀬𑀕𑁆𑀖𑁄 𑀕𑁄𑀘𑀭𑀢𑁆𑀣𑀸𑀬 𑀧𑀓𑁆𑀓𑀦𑁆𑀢𑁄𑀧𑀺 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀯𑀦𑀕𑀳𑀦𑁂𑀬𑁂𑀯 𑀲𑀬𑀢𑀺, 𑀢𑁂𑀦𑁂𑀯 𑀘 𑀢𑀁 𑀢𑀲𑁆𑀲 𑀆𑀲𑀬𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀜𑁆𑀜𑀢𑁆𑀣𑀸𑀧𑀺 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀆𑀕𑀦𑁆𑀢𑁆𑀯𑀸 𑀬𑀢𑁆𑀣 𑀲𑀬𑀢𑀺, 𑀢𑀁 𑀢𑀲𑁆𑀲 𑀆𑀲𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀧𑀦 𑀲𑀲𑁆𑀲𑀢𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻 𑀘, 𑀔𑀦𑁆𑀢𑀺 𑀘𑁂𑀯𑀸𑀦𑀼𑀮𑁄𑀫𑀺𑀓𑀸;

𑀬𑀣𑀸𑀪𑀽𑀢𑀜𑁆𑀘 𑀬𑀁 𑀜𑀸𑀡𑀁, 𑀏𑀢𑀁 𑀆𑀲𑀬𑀲𑀜𑁆𑀜𑀺𑀢’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑀫𑀳𑀸. 𑁧.𑁧𑁩𑁬; 𑀤𑀻. 𑀦𑀺. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸; 𑀲𑀸𑀭𑀢𑁆𑀣. 𑀝𑀻. 𑁧. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀯𑀡𑁆𑀡𑀦𑀸; 𑀯𑀺. 𑀯𑀺. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸)

𑀅𑀦𑀼𑀲𑀬𑀓𑀣𑀸 𑀉𑀧𑀭𑀺 𑀆𑀕𑀫𑀺𑀲𑁆𑀲𑀢𑀺. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑁄𑀧𑀭𑁂𑀢𑀺 𑀲𑀤𑁆𑀥𑀸𑀧𑀜𑁆𑀘𑀫𑀓𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑁂. 𑀢𑀺𑀓𑁆𑀔𑀜𑁆𑀳𑀺 𑀇𑀦𑁆𑀤𑁆𑀭𑀺𑀬𑀁 𑀉𑀓𑁆𑀓𑀝𑁆𑀞𑀕𑀢𑀢𑁆𑀢𑀸 𑀧𑀭𑀁, 𑀫𑀼𑀤𑀼 𑀅𑀧𑀭𑀁 𑀅𑀦𑀼𑀓𑁆𑀓𑀝𑁆𑀞𑀕𑀢𑀢𑁆𑀢𑀸. 𑀇𑀤𑀁 𑀧𑀦 𑀩𑀼𑀤𑁆𑀥𑀘𑀓𑁆𑀔𑀼 𑀙𑀲𑀼 𑀅𑀲𑀸𑀥𑀸𑀭𑀡𑀜𑀸𑀡𑁂𑀲𑀼 𑀧𑀼𑀭𑀺𑀫𑀤𑁆𑀯𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁬𑁩𑁮. 𑀳𑁂𑀝𑁆𑀞𑀸…𑀧𑁂… 𑀲𑀜𑁆𑀜𑀺𑀢𑀦𑁆𑀢𑀺 ‘‘𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀳𑁂𑀝𑁆𑀞𑀸 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀲𑀜𑁆𑀜𑀺𑀢𑀁. 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀸 𑀧𑀦𑀸𑀢𑀺 𑀲𑀩𑁆𑀩𑀜𑁆𑀜𑀼𑀪𑀸𑀯𑀲𑀗𑁆𑀔𑀸𑀢𑀁 𑀜𑀸𑀡𑀁. 𑀢𑀜𑁆𑀳𑀺 𑀲𑀩𑁆𑀩𑀜𑁆𑀜𑀽𑀢𑀺 𑀅𑀪𑀺𑀥𑀸𑀦𑀲𑁆𑀲, 𑀩𑀼𑀤𑁆𑀥𑀺𑀬𑀸 𑀘 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀲𑀩𑁆𑀩𑀜𑁆𑀜𑀼𑀪𑀸𑀯𑁄 𑀦𑀸𑀫 𑀳𑁄𑀢𑀺. 𑀜𑁂𑀬𑁆𑀬𑀁 𑀲𑀫𑀦𑁆𑀢𑀘𑀓𑁆𑀔𑀼𑀦𑁆𑀢𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀫𑀦𑁆𑀢𑀢𑁄 𑀲𑀩𑁆𑀩𑀲𑁄 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑀦𑁆𑀢𑀘𑀓𑁆𑀔𑀼𑀦𑁆𑀢𑀺 𑀜𑁂𑀬𑁆𑀬𑀁. 𑀢𑁂𑀦𑁂𑀯𑀸𑀳 𑁋

‘‘𑀦 𑀢𑀲𑁆𑀲 𑀅𑀤𑁆𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀺,

𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;

𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀜𑁂𑀬𑁆𑀬𑀁,

𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺. (𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫);

𑁬𑁩𑁯. 𑀬𑀁 𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑀆𑀕𑀢𑀦𑁆𑀢𑀺 𑀬𑀁 𑀜𑀸𑀡𑀁 ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀻’’𑀢𑀺 (𑀫𑀳𑀸𑀯. 𑁧𑁫) 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑁂𑀲𑀼 𑀆𑀕𑀢𑀁, 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀢𑁂𑀧𑀭𑀺𑀯𑀝𑁆𑀝𑀯𑀲𑁂𑀦 ‘‘𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀤𑁆𑀯𑀸𑀤𑀲𑀯𑀺𑀥𑁂𑀦 𑀆𑀓𑀸𑀭𑁂𑀦 𑀧𑀯𑀢𑁆𑀢𑀁, 𑀇𑀤𑀁 𑀜𑀸𑀡𑀘𑀓𑁆𑀔𑀼. 𑀬𑀸 𑀧𑀦 ‘‘𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁮𑁪) 𑀆𑀕𑀢𑀸 𑀧𑀜𑁆𑀘𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸, 𑀅𑀬𑀁 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀚𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀧𑀞𑀫𑀢𑀢𑀺𑀬𑀜𑀸𑀡𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺𑀬𑁂𑀯. 𑀘𑀢𑀼𑀢𑁆𑀣𑀫𑁆𑀧𑀺 𑀧𑀦 𑀧𑀼𑀭𑀺𑀫𑀤𑁆𑀯𑀬𑀫𑀺𑀯 𑀓𑀸𑀫𑀸𑀯𑀘𑀭𑀦𑁆𑀢𑀺 𑀆𑀦𑀦𑁆𑀤𑀸𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀜𑀸𑀡𑀘𑀓𑁆𑀔𑀼𑀁 𑀲𑀳𑀅𑀭𑀺𑀬𑀫𑀕𑁆𑀕𑀯𑀺𑀧𑀲𑁆𑀲𑀦𑀸𑀜𑀸𑀡𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀻𑀢𑀺 𑀅𑀧𑀭𑁂. 𑀅𑀕𑁆𑀕𑀫𑀕𑁆𑀕𑁂𑀦 𑀲𑀳 𑀯𑀺𑀧𑀲𑁆𑀲𑀦𑀸𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑁆𑀢𑀺 𑀧𑀦 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺.

𑁬𑁪𑁦-𑁪. 𑀏𑀯𑀁 𑀧𑀜𑁆𑀜𑀸𑀘𑀓𑁆𑀔𑀼𑀲𑁆𑀲 𑀧𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀫𑀁𑀲𑀘𑀓𑁆𑀔𑀼𑀲𑁆𑀲𑀸𑀧𑀺 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀁𑀲𑀘𑀓𑁆𑀔𑀼𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀲𑀫𑁆𑀪𑀸𑀭𑀧𑀲𑀸𑀤𑀢𑁄𑀢𑀺 𑀲𑀲𑀫𑁆𑀪𑀸𑀭𑀘𑀓𑁆𑀔𑀼 𑀧𑀲𑀸𑀤𑀘𑀓𑁆𑀔𑀽𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀲𑀫𑁆𑀪𑀭𑀻𑀬𑀢𑀺 𑀏𑀢𑁂𑀳𑀻𑀢𑀺 𑀲𑀫𑁆𑀪𑀸𑀭𑀸, 𑀅𑀯𑀬𑀯𑀸. 𑀢𑁂 𑀧𑀦 𑀉𑀧𑀢𑁆𑀣𑀫𑁆𑀪𑀓𑀪𑀽𑀢𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑀦𑁆𑀢𑀢𑀺𑀬𑁄 𑀤𑀝𑁆𑀞𑀩𑁆𑀩𑀸. 𑀲𑀳 𑀲𑀫𑁆𑀪𑀸𑀭𑁂𑀳𑀻𑀢𑀺 𑀲𑀲𑀫𑁆𑀪𑀸𑀭𑀁. 𑀲𑀲𑀫𑁆𑀪𑀸𑀭𑀜𑁆𑀘 𑀦𑀸𑀫 𑀫𑀁𑀲𑀧𑀺𑀡𑁆𑀟𑁄 𑀧𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑁆𑀔𑀺𑀓𑀽𑀧𑀝𑁆𑀞𑀺𑀦𑀸 𑀳𑁂𑀝𑁆𑀞𑀸𑀢𑀺 𑀳𑁂𑀝𑁆𑀞𑀸𑀕𑀢𑀅𑀓𑁆𑀔𑀺𑀓𑀽𑀧𑀲𑁆𑀲 𑀅𑀝𑁆𑀞𑀺𑀦𑀸 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑁆𑀥𑀦𑁆𑀢𑀺 𑀅𑀓𑁆𑀔𑀺𑀓𑀽𑀧𑀢𑁄 𑀉𑀤𑁆𑀥𑀁. 𑀉𑀪𑀢𑁄 𑀅𑀓𑁆𑀔𑀺𑀓𑁄𑀝𑀻𑀳𑀻𑀢𑀺 𑀅𑀓𑁆𑀔𑀺𑀓𑀽𑀧𑀲𑁆𑀲 𑀉𑀪𑀬𑀪𑀸𑀕𑁂 𑀅𑀓𑁆𑀔𑀺𑀓𑁄𑀝𑀻𑀳𑀺. 𑀫𑀢𑁆𑀣𑀮𑀼𑀗𑁆𑀕𑁂𑀦 𑀅𑀦𑁆𑀢𑀢𑁄𑀢𑀺 𑀅𑀓𑁆𑀔𑀺𑀓𑀽𑀧𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑁂𑀦 𑀫𑀢𑁆𑀣𑀮𑀼𑀗𑁆𑀕𑁂𑀦. 𑀦𑁆𑀳𑀸𑀭𑀼𑀲𑀼𑀢𑁆𑀢𑁂𑀦 𑀆𑀩𑀦𑁆𑀥𑁄𑀢𑀺 𑀦𑀳𑀸𑀭𑀼𑀭𑀚𑁆𑀚𑀽𑀳𑀺 𑀅𑀦𑁆𑀢𑁄 𑀫𑀢𑁆𑀣𑀮𑀼𑀗𑁆𑀕𑁂𑀦 𑀲𑀳 𑀆𑀩𑀦𑁆𑀥𑁄. 𑀲𑀓𑀮𑁄𑀧𑀺 𑀘 𑀮𑁄𑀓𑁄𑀢𑀺 𑀲𑀓𑀮𑁄𑀧𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑀮𑁄𑀓𑁄. 𑀬𑀦𑁆𑀢𑀺 𑀬𑀁 𑀫𑀁𑀲𑀧𑀺𑀡𑁆𑀟𑀁. 𑀓𑀫𑀮𑀲𑁆𑀲 𑀤𑀮𑀁 𑀯𑀺𑀬𑀸𑀢𑀺 𑀧𑀼𑀣𑀼𑀮𑀯𑀺𑀧𑀼𑀮𑀦𑀻𑀮𑀢𑀸𑀬 𑀦𑀻𑀮𑀼𑀧𑁆𑀧𑀮𑀤𑀮𑀁 𑀯𑀺𑀬. 𑀚𑀸𑀦𑀸𑀢𑀻𑀢𑀺 𑀕𑀡𑁆𑀳𑀸𑀢𑀺. 𑀘𑀓𑁆𑀔𑀼 𑀦𑀸𑀫 𑀦 𑀢𑀁 𑀳𑁄𑀢𑀻𑀢𑀺 𑀢𑀣𑀸 𑀕𑀬𑁆𑀳𑀫𑀸𑀦𑀁 𑀢𑀁 𑀘𑀓𑁆𑀔𑀼 𑀦𑀸𑀫 𑀦 𑀳𑁄𑀢𑀺. 𑀓𑀺𑀜𑁆𑀘𑀭𑀳𑀺 𑀢𑀦𑁆𑀢𑀺 𑀆𑀳 ‘‘𑀯𑀢𑁆𑀣𑀼 𑀢𑀲𑁆𑀲𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀧𑀭𑀫𑀢𑁆𑀣𑀘𑀓𑁆𑀔𑀼𑀦𑁄. 𑀇𑀤𑀁 𑀧𑀦𑀸𑀢𑀺 𑀦𑀺𑀕𑀫𑀦𑀁.

𑁬𑁪𑁫-𑁭. 𑀢𑀁 𑀧𑀦 𑀲𑀲𑀫𑁆𑀪𑀸𑀭𑀘𑀓𑁆𑀔𑀼 𑀬𑁂𑀳𑀺 𑀲𑀫𑁆𑀪𑀸𑀭𑁂𑀳𑀺 𑀲𑀫𑁆𑀪𑀭𑀻𑀬𑀢𑀺, 𑀢𑁂 𑀲𑀭𑀽𑀧𑀢𑁄, 𑀕𑀡𑀦𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀯𑀡𑁆𑀡𑁄 𑀕𑀦𑁆𑀥𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀸𑀯𑁄𑀢𑀺 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀪𑀸𑀯𑁄, 𑀧𑀼𑀭𑀺𑀲𑀲𑁆𑀲 𑀧𑀼𑀫𑁆𑀪𑀸𑀯𑁄𑀢𑀺 𑀮𑀩𑁆𑀪𑀫𑀸𑀦𑀓𑀪𑀸𑀯𑁄. 𑀲𑀫𑁆𑀪𑀯𑁄𑀢𑀺 𑀆𑀧𑁄𑀥𑀸𑀢𑀼𑀫𑁂𑀯 𑀲𑀫𑁆𑀪𑀯𑀪𑀽𑀢𑀫𑀸𑀳. 𑀲𑀡𑁆𑀞𑀸𑀦𑀦𑁆𑀢𑀺 𑀘 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀲𑀦𑁆𑀦𑀺𑀯𑀺𑀝𑁆𑀞𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀢𑀁𑀢𑀁𑀲𑀡𑁆𑀞𑀸𑀦𑀯𑀲𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑀁 𑀯𑀡𑁆𑀡𑀸𑀬𑀢𑀦𑀫𑀸𑀳. 𑀆𑀧𑁄𑀥𑀸𑀢𑀼𑀯𑀡𑁆𑀡𑀸𑀬𑀢𑀦𑁂𑀳𑀺 𑀘 𑀅𑀦𑀢𑁆𑀣𑀦𑁆𑀢𑀭𑀪𑀽𑀢𑀸𑀦𑀫𑁆𑀧𑀺 𑀲𑀫𑁆𑀪𑀯𑀲𑀡𑁆𑀞𑀸𑀦𑀸𑀦𑀁 𑀯𑀺𑀲𑀼𑀁 𑀯𑀘𑀦𑀁 𑀢𑀣𑀸𑀪𑀽𑀢𑀸𑀦𑀁, 𑀅𑀢𑀣𑀸𑀪𑀽𑀢𑀸𑀦𑀜𑁆𑀘 𑀆𑀧𑀸𑀤𑀻𑀦𑀁 𑀬𑀣𑀸𑀯𑀼𑀢𑁆𑀢𑀫𑀁𑀲𑀧𑀺𑀡𑁆𑀟𑁂 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀆𑀧𑁄𑀥𑀸𑀢𑀼𑀯𑀡𑁆𑀡𑀸𑀬𑀢𑀦𑀸𑀦𑀜𑁆𑀳𑀺 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑁄 𑀲𑀫𑁆𑀪𑀯𑁄 𑀲𑀡𑁆𑀞𑀸𑀦𑀜𑁆𑀘𑀸𑀢𑀺. 𑀤𑀲𑁂𑀢𑁂𑀢𑀺 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄, 𑀢𑀦𑁆𑀦𑀺𑀲𑁆𑀲𑀺𑀢𑀸 𑀯𑀡𑁆𑀡𑀸𑀤𑀬𑁄 𑀘𑀸𑀢𑀺 𑀇𑀫𑁂 𑀤𑀲. 𑀘𑀢𑀼𑀲𑀫𑀼𑀝𑁆𑀞𑀸𑀦𑀸𑀢𑀺 𑀅𑀦𑁆𑀢𑁄𑀕𑀢𑀳𑁂𑀢𑁆𑀯𑀢𑁆𑀣𑀫𑀺𑀤𑀁 𑀯𑀺𑀲𑁂𑀲𑀦𑀁, 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁪𑁮. 𑀘𑀓𑁆𑀔𑀼…𑀧𑁂… 𑀚𑀻𑀯𑀺𑀢𑀫𑁂𑀯 𑀘𑀸𑀢𑀺 𑀇𑀫𑀸𑀦𑀺 𑀏𑀓𑀦𑁆𑀢𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀺, 𑀧𑀼𑀭𑀺𑀫𑀸𑀦𑀺 𑀘 𑀘𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀘𑀢𑁆𑀢𑀸𑀮𑀻𑀲𑀜𑁆𑀘 𑀘𑀢𑁆𑀢𑀸𑀭𑀺 𑀘 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀘𑀢𑀼𑀘𑀢𑁆𑀢𑀸𑀮𑀻𑀲 𑀭𑀽𑀧𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁬𑁪𑁯-𑁫𑁨. 𑀇𑀫𑁂𑀲𑀁 𑀧𑀦 𑀭𑀽𑀧𑀸𑀦𑀁 𑀯𑀲𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀲𑀗𑁆𑀔𑁂𑀧𑀢𑁄 𑀘𑀼𑀤𑁆𑀤𑀲𑀦𑁆𑀦𑀁, 𑀯𑀺𑀢𑁆𑀣𑀸𑀭𑀢𑁄 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀦𑀜𑁆𑀘 𑀭𑀽𑀧𑀸𑀦𑀁 𑀯𑀲𑁂𑀦. 𑀧𑀭𑀺𑀧𑀺𑀡𑁆𑀟𑀺𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀧𑀺𑀡𑁆𑀟𑀺𑀢𑀁. 𑀬𑀢𑁆𑀣 𑀲𑁂𑀢𑀫𑁆𑀧𑀺 𑀅𑀢𑁆𑀣𑀺, 𑀓𑀡𑁆𑀳𑀫𑁆𑀧𑀺 𑀮𑁄𑀳𑀺𑀢𑀫𑁆𑀧𑀺 𑀧𑀣𑀯𑀻𑀧𑀺 𑀆𑀧𑁄𑀧𑀺 𑀢𑁂𑀚𑁄𑀧𑀺 𑀯𑀸𑀬𑁄𑀧𑀺, 𑀇𑀤𑀁 𑀧𑀦 𑀲𑁂𑀫𑁆𑀳𑀼𑀲𑁆𑀲𑀤𑀢𑁆𑀢𑀸 𑀲𑁂𑀢𑀁 𑀳𑁄𑀢𑀺, 𑀧𑀺𑀢𑁆𑀢𑀼𑀲𑁆𑀲𑀤𑀢𑁆𑀢𑀸 𑀓𑀡𑁆𑀳𑀁, 𑀭𑀼𑀳𑀺𑀭𑀼𑀲𑁆𑀲𑀤𑀢𑁆𑀢𑀸 𑀮𑁄𑀳𑀺𑀢𑀓𑀁, 𑀧𑀣𑀯𑀼𑀲𑁆𑀲𑀤𑀢𑁆𑀢𑀸 𑀧𑀢𑁆𑀣𑀺𑀦𑀁 𑀳𑁄𑀢𑀺, 𑀆𑀧𑀼𑀲𑁆𑀲𑀤𑀢𑁆𑀢𑀸 𑀧𑀕𑁆𑀖𑀭𑀢𑀺, 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀧𑀭𑀺𑀟𑀬𑁆𑀳𑀢𑀺, 𑀯𑀸𑀬𑀼𑀲𑁆𑀲𑀤𑀢𑁆𑀢𑀸 𑀲𑀫𑁆𑀪𑀫𑀢𑀺. 𑀇𑀤𑀁 𑀲𑀫𑁆𑀪𑀸𑀭𑀯𑀦𑁆𑀢𑀢𑀸𑀬 𑀲𑀫𑁆𑀪𑀸𑀭𑀘𑀓𑁆𑀔𑀽𑀢𑀺 𑀧𑀡𑁆𑀟𑀺𑀢𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀓𑀸𑀲𑀺𑀢𑀁 𑀧𑀭𑀺𑀤𑀻𑀧𑀺𑀢𑀁. 𑀏𑀢𑁆𑀣 𑀲𑀺𑀢𑁄𑀢𑀺 𑀏𑀢𑀁 𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀁 𑀦𑀺𑀲𑁆𑀲𑀺𑀢𑁄 𑀢𑀤𑀸𑀬𑀢𑁆𑀢𑀪𑀽𑀢𑁄. 𑀢𑁂𑀦𑀸𑀳 ‘‘𑀏𑀢𑁆𑀣 𑀧𑀝𑀺𑀩𑀤𑁆𑀥𑁄’’𑀢𑀺. 𑀘𑀢𑀼𑀦𑁆𑀦𑀁 𑀧𑀦 𑀪𑀽𑀢𑀸𑀦𑀁 𑀧𑀲𑀸𑀤𑁄𑀢𑀺 𑀘𑀢𑀼𑀦𑁆𑀦𑀁 𑀪𑀽𑀢𑀸𑀦𑀁 𑀧𑀲𑀦𑁆𑀦𑀢𑀸𑀲𑀪𑀸𑀯𑁄 𑀧𑀲𑀸𑀤𑁄, ‘‘𑀲𑁂𑀢𑁂𑀦 𑀫𑀡𑁆𑀟𑀮𑁂𑀦𑀲𑁆𑀲𑀸’’𑀢𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀲𑁂𑀢𑁂 𑀢𑀼 𑀫𑀡𑁆𑀟𑀮𑁂 𑀢𑀲𑁆𑀲𑀸’’𑀢𑀺 𑀮𑀺𑀔𑀦𑁆𑀢𑀺. 𑀓𑀡𑁆𑀳𑀫𑀡𑁆𑀟𑀮𑀫𑀚𑁆𑀛𑁂𑀢𑀺 𑀇𑀥𑀸𑀧𑀺 ‘‘𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀫𑀚𑁆𑀛𑁂’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀘𑀢𑀼𑀢𑁆𑀣𑀤𑀽’’𑀢𑀺𑀆𑀤𑀻𑀲𑀼 𑀯𑀺𑀬 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀯𑀺𑀪𑀢𑁆𑀢𑀺𑀮𑁄𑀧𑀁 𑀓𑀢𑁆𑀯𑀸 ‘‘𑀓𑀡𑁆𑀳𑀫𑀡𑁆𑀟𑀮𑀫𑀚𑁆𑀛𑁂’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀅𑀢𑁆𑀣𑁄 𑀘 𑀬𑁄𑀚𑀦𑀸 𑀘 𑀲𑀼𑀝𑁆𑀞𑀼 𑀉𑀧𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀳𑀺 ‘‘𑀲𑁂𑀢𑀫𑀡𑁆𑀟𑀮𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀫𑀚𑁆𑀛𑁂’’𑀢𑀺 (𑀥. 𑀲. 𑀅𑀝𑁆𑀞. 𑁫𑁯𑁬) 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 𑀬𑀣𑀸𑀞𑀺𑀢𑀯𑀲𑁂𑀦𑁂𑀯 𑀧𑀸𑀞𑀁 𑀕𑀳𑁂𑀢𑁆𑀯𑀸 ‘‘𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀢𑀲𑁆𑀲 𑀲𑀲𑀫𑁆𑀪𑀸𑀭𑀲𑁆𑀲 𑀘𑀓𑁆𑀔𑀼𑀦𑁄 𑀫𑀚𑁆𑀛𑁂 𑀲𑁂𑀢𑀫𑀡𑁆𑀟𑀮𑁂 𑀓𑀡𑁆𑀳𑀫𑀡𑁆𑀟𑀮𑁂 𑀫𑀚𑁆𑀛𑁂’’𑀢𑀺 𑀬𑁄𑀚𑁂𑀦𑁆𑀢𑀺. 𑀤𑀺𑀝𑁆𑀞𑀫𑀡𑁆𑀟𑀮𑁂𑀢𑀺 𑀅𑀪𑀺𑀫𑀼𑀔𑁂 𑀞𑀺𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀤𑁂𑀲𑀪𑀽𑀢𑁂 𑀤𑀺𑀝𑁆𑀞𑀫𑀡𑁆𑀟𑀮𑁂.

𑁬𑁫𑁩-𑁫. 𑀲𑀦𑁆𑀥𑀸𑀭𑀡𑀸…𑀧𑁂… 𑀳𑀼𑀢𑁆𑀯𑀸𑀦𑀸𑀢𑀺 𑀲𑀦𑁆𑀥𑀸𑀭𑀡𑀦𑀳𑀸𑀧𑀦𑀫𑀡𑁆𑀟𑀦𑀩𑀻𑀚𑀦𑀓𑀺𑀘𑁆𑀘𑀸𑀳𑀺 𑀘𑀢𑀽𑀳𑀺 𑀥𑀸𑀢𑀻𑀳𑀺 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀯𑀺𑀬 𑀲𑀦𑁆𑀥𑀸𑀭𑀡𑀸𑀩𑀦𑁆𑀥𑀦𑀧𑀭𑀺𑀧𑀸𑀘𑀦𑀲𑀫𑀼𑀤𑀻𑀭𑀡𑀓𑀺𑀘𑁆𑀘𑀸𑀳𑀺 𑀅𑀢𑁆𑀢𑀦𑀺𑀲𑁆𑀲𑀬𑀪𑀽𑀢𑀸𑀳𑀺 𑀘𑀢𑀽𑀳𑀺 𑀥𑀸𑀢𑀽𑀳𑀺 𑀓𑀢𑀽𑀧𑀓𑀸𑀭𑀁 𑀳𑀼𑀢𑁆𑀯𑀸. 𑀉𑀢𑀼𑀘𑀺𑀢𑁆𑀢𑀸𑀤𑀺𑀦𑀸𑀢𑀺 𑀢𑀻𑀳𑀺 𑀲𑀦𑁆𑀢𑀢𑀺𑀲𑀫𑀼𑀝𑁆𑀞𑀸𑀧𑀓𑁂𑀳𑀺 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺. 𑀏𑀢𑁆𑀣 𑀘 𑀓𑀮𑀸𑀧𑀦𑁆𑀢𑀭𑀕𑀢𑀸 𑀉𑀢𑀼𑀆𑀳𑀸𑀭𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀤𑀦𑁆𑀢𑀺. 𑀆𑀬𑀼𑀦𑀸 𑀓𑀢𑀧𑀸𑀮𑀦𑀦𑁆𑀢𑀺 𑀘𑀢𑀼𑀥𑀸𑀢𑀼𑀦𑀺𑀲𑁆𑀲𑀺𑀢𑁂𑀦𑁂𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀭𑀓𑁆𑀔𑀺𑀬𑀫𑀸𑀦𑀁. 𑀢𑀣𑀸 𑀳𑁂𑀢𑀁 𑀓𑀫𑁆𑀫𑀚𑀭𑀽𑀧𑀧𑀭𑀺𑀧𑀸𑀮𑀦𑀮𑀓𑁆𑀔𑀡𑀁. 𑀯𑀡𑁆𑀡𑀕𑀦𑁆𑀥𑀭𑀲𑀸𑀤𑀻𑀳𑀻𑀢𑀺 𑀆𑀤𑀺-𑀕𑁆𑀕𑀳𑀡𑁂𑀦 𑀑𑀚𑀁 𑀲𑀗𑁆𑀕𑀡𑁆𑀳𑀸𑀢𑀺, ‘‘𑀯𑀡𑁆𑀡𑀕𑀦𑁆𑀥𑀭𑀲𑁄𑀚𑀸𑀳𑀻’’𑀢𑀺 𑀯𑀸 𑀧𑀸𑀞𑁄. 𑀯𑀢𑁆𑀣𑀼𑀤𑁆𑀯𑀸𑀭𑀜𑁆𑀘 𑀲𑀸𑀥𑀬𑀦𑁆𑀢𑀺 𑀬𑀣𑀸𑀬𑁄𑀕𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑀬𑀫𑀸𑀦𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀳𑀺 𑀦𑀺𑀲𑁆𑀲𑀬𑀪𑀸𑀯𑀢𑁄 𑀯𑀢𑁆𑀣𑀼𑀪𑀸𑀯𑀁, 𑀧𑀯𑀢𑁆𑀢𑀺𑀫𑀼𑀔𑀪𑀸𑀯𑀢𑁄 𑀤𑁆𑀯𑀸𑀭𑀪𑀸𑀯𑀜𑁆𑀘 𑀲𑀸𑀥𑁂𑀢𑀺. 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀧𑀦 𑀢𑀤𑀸𑀭𑀫𑁆𑀫𑀡𑀸𑀯𑀲𑀸𑀦𑀸𑀦𑀁 𑀅𑀜𑁆𑀜𑀦𑀺𑀲𑁆𑀲𑀺𑀢𑀢𑁆𑀢𑀸 𑀤𑁆𑀯𑀸𑀭𑀪𑀸𑀯𑀫𑁂𑀯 𑀲𑀸𑀥𑁂𑀢𑀺, 𑀦 𑀯𑀢𑁆𑀣𑀼𑀪𑀸𑀯𑀁. 𑀊𑀓𑀸𑀲𑀺𑀭𑀲𑀫𑀸𑀦𑁂𑀦 𑀧𑀫𑀸𑀡𑁂𑀦𑀸𑀢𑀺 𑀊𑀓𑀸𑀲𑀺𑀭𑀲𑀫𑀸𑀦𑁂𑀦 𑀧𑀤𑁂𑀲𑀧𑁆𑀧𑀫𑀸𑀡𑁂𑀦 𑀮𑀓𑁆𑀔𑀺𑀢𑀁 𑀳𑀼𑀢𑁆𑀯𑀸 𑀊𑀓𑀸𑀲𑀺𑀭𑀲𑀫𑀸𑀦𑀧𑁆𑀧𑀫𑀸𑀡𑁂 𑀞𑀸𑀦𑁂𑀢𑀺 𑀯𑀸 𑀅𑀢𑁆𑀣𑁄. 𑀢𑀺𑀝𑁆𑀞𑀢𑀻𑀢𑀺 𑀲𑀢𑁆𑀢 𑀅𑀓𑁆𑀔𑀺𑀧𑀝𑀮𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸 𑀲𑀢𑁆𑀢𑀲𑀼 𑀧𑀺𑀘𑀼𑀧𑀝𑀮𑁂𑀲𑀼 𑀆𑀲𑀺𑀢𑁆𑀢𑀢𑁂𑀮𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀘𑀓𑁆𑀔𑀼𑀲𑁆𑀲 𑀅𑀦𑁂𑀓𑀓𑀮𑀸𑀧𑀕𑀢𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀉𑀧𑀤𑁆𑀤𑀯𑀸𑀦𑀁 𑀧𑀝𑀮𑀦𑀺𑀭𑀸𑀓𑀭𑀡𑁂𑀧𑀺 𑀳𑀺 𑀘𑀓𑁆𑀔𑀼 𑀯𑀺𑀚𑁆𑀚𑀢𑁂𑀯𑀸𑀢𑀺. 𑀬𑀣𑀸 𑀘 𑀘𑀓𑁆𑀔𑀼, 𑀏𑀯𑀫𑀺𑀫𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄, 𑀆𑀬𑀼𑀯𑀡𑁆𑀡𑀸𑀤𑀻𑀦𑀺 𑀘 𑀲𑀢𑁆𑀢 𑀅𑀓𑁆𑀔𑀺𑀧𑀝𑀮𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀸𑀦𑁂𑀯 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀁.

𑁬𑁫𑁬. 𑀯𑀼𑀢𑁆𑀢𑀦𑁆𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀯𑀼𑀢𑁆𑀢𑀁. 𑀭𑀽𑀧𑀸𑀦𑀺 𑀫𑀦𑀼𑀧𑀲𑁆𑀲𑀢𑀻𑀢𑀺 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄 ‘‘𑀅𑀜𑁆𑀜𑀫𑀜𑁆𑀜𑀁 𑀲𑀫𑀡𑀫𑀘𑀮𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀣 𑀯𑀸 𑀫𑀦𑀽𑀢𑀺 𑀫𑀘𑁆𑀘𑁄𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 𑀘𑀓𑁆𑀔𑀼 𑀭𑀽𑀧𑀁 𑀦 𑀧𑀲𑁆𑀲𑀢𑀺, 𑀓𑀺𑀜𑁆𑀘𑀭𑀳𑀺 𑀢𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀫𑁂𑀯. 𑀢𑀣𑀸 𑀳𑀺 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀦𑀺𑀲𑁆𑀲𑀺𑀢𑀓𑀺𑀭𑀺𑀬𑀁 𑀦𑀺𑀲𑁆𑀲𑀬𑁂 𑀯𑀺𑀬 𑀓𑀢𑁆𑀯𑀸 𑀯𑁄𑀳𑀸𑀭𑀲𑀫𑁆𑀪𑀯𑀢𑁄 ‘‘𑀘𑀓𑁆𑀔𑀼𑀧𑀲𑀸𑀤𑁂𑀦 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀚𑁄𑀢𑀺𑀧𑀸𑀮𑀢𑁆𑀣𑁂𑀭𑁂𑀦𑀸𑀧𑀺 𑀳𑀺 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 𑀇𑀤𑀁 𑀯𑀼𑀢𑁆𑀢𑀁. 𑀇𑀤𑀫𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁, 𑀓𑀺𑀁 𑀘𑀓𑁆𑀔𑀼 𑀭𑀽𑀧𑀁 𑀧𑀲𑁆𑀲𑀢𑀺, 𑀉𑀤𑀸𑀳𑀼 𑀯𑀺𑀜𑁆𑀜𑀸𑀡𑀦𑁆𑀢𑀺, 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀘𑀓𑁆𑀔𑀼 𑀧𑀲𑁆𑀲𑁂𑀬𑁆𑀬, 𑀅𑀜𑁆𑀜𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑁄𑀧𑀺 𑀘𑀓𑁆𑀔𑀼 𑀧𑀲𑁆𑀲𑁂𑀬𑁆𑀬. 𑀅𑀣 𑀯𑀺𑀜𑁆𑀜𑀸𑀡𑀁, 𑀓𑀼𑀝𑁆𑀝𑀸𑀤𑀺𑀅𑀦𑁆𑀢𑀭𑀺𑀢𑀫𑁆𑀧𑀺 𑀧𑀲𑁆𑀲𑁂𑀬𑁆𑀬 𑀢𑀲𑁆𑀲 𑀅𑀧𑁆𑀧𑀝𑀺𑀖𑀸𑀢𑀢𑁆𑀢𑀸? 𑀦𑀸𑀬𑀁 𑀤𑁄𑀲𑁄. 𑀬𑀲𑁆𑀲 ‘‘𑀘𑀓𑁆𑀔𑀼 𑀧𑀲𑁆𑀲𑀢𑀻’’𑀢𑀺 𑀫𑀢𑀁, 𑀢𑀲𑁆𑀲𑀸𑀧𑀺 𑀦 𑀲𑀩𑁆𑀩𑀁 𑀘𑀓𑁆𑀔𑀼 𑀧𑀲𑁆𑀲𑀢𑀺, 𑀅𑀣 𑀔𑁄 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀫𑁂𑀯. 𑀬𑀲𑁆𑀲 𑀧𑀦 𑀯𑀺𑀜𑁆𑀜𑀸𑀡𑀁 𑀧𑀲𑁆𑀲𑀢𑀻𑀢𑀺 𑀫𑀢𑀁, 𑀢𑀲𑁆𑀲𑀸𑀧𑀺 𑀦 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀧𑀲𑁆𑀲𑀢𑀺, 𑀅𑀣 𑀔𑁄 𑀘𑀓𑁆𑀔𑀼𑀦𑀺𑀲𑁆𑀲𑀺𑀢𑀫𑁂𑀯, 𑀢𑀜𑁆𑀘 𑀅𑀦𑁆𑀢𑀭𑀺𑀢𑁂 𑀦𑀼𑀧𑁆𑀧𑀚𑁆𑀚𑀢𑀺. 𑀬𑀢𑁆𑀣 𑀆𑀮𑁄𑀓𑀲𑁆𑀲 𑀓𑀼𑀝𑁆𑀝𑀸𑀤𑀻𑀳𑀺 𑀯𑀺𑀦𑀺𑀩𑀦𑁆𑀥𑁄, 𑀬𑀢𑁆𑀣 𑀧𑀦 𑀲𑁄 𑀦𑀢𑁆𑀣𑀺 𑀨𑀮𑀺𑀓𑀅𑀩𑁆𑀪𑀧𑀝𑀮𑀸𑀤𑀺𑀫𑁆𑀳𑀺, 𑀢𑀢𑁆𑀣 𑀅𑀦𑁆𑀢𑀭𑀺𑀢𑁂𑀧𑀺 𑀉𑀧𑁆𑀧𑀚𑁆𑀚𑀢𑀺 𑀏𑀯, 𑀢𑀲𑁆𑀫𑀸 𑀢𑀁 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑁆𑀢𑀭𑀺𑀢𑀁 𑀦 𑀧𑀲𑁆𑀲𑀢𑀺. 𑀇𑀤𑀫𑁂𑀯 𑀘 𑀲𑀦𑁆𑀦𑀺𑀝𑁆𑀞𑀸𑀦𑀁, 𑀬𑀁 𑀔𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀧𑀲𑁆𑀲𑀢𑀻𑀢𑀺. 𑀢𑀜𑁆𑀳𑀺 𑀤𑀲𑁆𑀲𑀦𑀓𑀺𑀘𑁆𑀘𑀁. 𑀬𑀤𑀺 𑀏𑀯𑀁 𑀓𑀣𑀁 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺. 𑀢𑁂𑀦 𑀤𑁆𑀯𑀸𑀭𑁂𑀦 𑀓𑀭𑀡𑀪𑀽𑀢𑁂𑀦𑀸𑀢𑀺 𑀅𑀬𑀫𑁂𑀢𑁆𑀣 𑀅𑀪𑀺𑀲𑀦𑁆𑀥𑀺. 𑀅𑀣 𑀯𑀸 𑀦𑀺𑀲𑁆𑀲𑀺𑀢𑀓𑀺𑀭𑀺𑀬𑀸 𑀦𑀺𑀲𑁆𑀲𑀬𑀲𑁆𑀲 𑀧𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀊𑀓𑀸𑀲𑀺𑀭𑀲𑀫𑀽𑀧𑀫𑀦𑁆𑀢𑀺 𑀊𑀓𑀸𑀲𑀺𑀭𑀲𑀫𑀸𑀦𑀽𑀧𑀫𑀁, 𑀊𑀓𑀸𑀲𑀺𑀭𑀧𑁆𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀘𑀲𑁆𑀲 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀧𑀦 𑀅𑀢𑁆𑀢𑀦𑁄 𑀧𑀫𑀸𑀡𑀯𑀲𑁂𑀦. 𑀢𑀜𑁆𑀳𑀺 𑀧𑀭𑀫𑀸𑀡𑀼𑀧𑀭𑀺𑀬𑀦𑁆𑀢𑁂𑀦 𑀧𑀫𑀸𑀡𑁂𑀦 𑀅𑀢𑀺𑀲𑀼𑀔𑀼𑀫𑀫𑁂𑀯𑀸𑀢𑀺. 𑀊𑀓𑀸𑀲𑀺𑀭𑀧𑁆𑀧𑀫𑀸𑀡𑁂 𑀧𑀦 𑀧𑀤𑁂𑀲𑁂 𑀇𑀤𑀁 𑀧𑀯𑀢𑁆𑀢𑀢𑀺. 𑀦 𑀓𑁂𑀯𑀮𑀜𑁆𑀘 𑀇𑀤𑀫𑁂𑀯, 𑀲𑀩𑁆𑀩𑀸𑀦𑀺𑀧𑀺 𑀲𑀩𑁆𑀩𑀝𑁆𑀞𑀸𑀦𑀺𑀓𑀭𑀽𑀧𑀸𑀦𑀺 𑀢𑀢𑁆𑀣 𑀧𑀯𑀢𑁆𑀢𑀦𑁆𑀢𑁂𑀯. 𑀇𑀤𑀜𑁆𑀘 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀁 𑀢𑀁 𑀧𑀤𑁂𑀲𑀁 𑀧𑀽𑀭𑁂𑀢𑁆𑀯𑀸 𑀏𑀯 𑀦𑀺𑀩𑁆𑀩𑀢𑁆𑀢𑀢𑀺. 𑀏𑀓𑀽𑀦𑀧𑀡𑁆𑀡𑀸𑀲𑀓𑀮𑀸𑀧𑀯𑀲𑁂𑀦 𑀘 𑀲𑀳𑁂𑀯 𑀧𑀯𑀢𑁆𑀢𑀢𑀺, 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑁆𑀢𑀸 𑀭𑀽𑀧𑀸𑀦𑀁, 𑀏𑀓𑁂𑀓𑀲𑁆𑀲 𑀘 𑀘𑀺𑀢𑁆𑀢𑀲𑁆𑀲 𑀢𑀻𑀲𑀼 𑀢𑀻𑀲𑀼 𑀔𑀡𑁂𑀲𑀼 𑀓𑀫𑁆𑀫𑀚𑀭𑀽𑀧𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀢𑁆𑀢𑀸.

𑁬𑁫𑁭. 𑀲𑀼𑀡𑀸𑀢𑀻𑀢𑀺 𑀲𑁄𑀢𑀦𑁆𑀢𑀺 𑀏𑀢𑁆𑀣 𑀓𑀺𑀁 𑀲𑁄𑀢𑀁 𑀲𑀼𑀡𑀸𑀢𑀺, 𑀉𑀤𑀸𑀳𑀼 𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀦𑀼𑀢𑀫𑁆𑀩𑀮𑁄𑀫𑀸𑀘𑀺𑀢𑁂𑀢𑀺 𑀲𑀲𑀫𑁆𑀪𑀸𑀭𑀲𑁄𑀢𑀩𑀺𑀮𑀲𑁆𑀲 𑀅𑀦𑁆𑀢𑁄 𑀲𑀼𑀔𑀼𑀫𑁂𑀳𑀺 𑀢𑀫𑁆𑀩𑀯𑀡𑁆𑀡𑀮𑁄𑀫𑁂𑀳𑀺 𑀲𑀜𑁆𑀘𑀺𑀢𑁂. 𑀅𑀗𑁆𑀕𑀼𑀮𑀺𑀯𑁂𑀥𑀓𑀲𑀡𑁆𑀞𑀸𑀦𑁂 𑀧𑀤𑁂𑀲𑁂𑀢𑀺 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸𑀲𑀡𑁆𑀞𑀸𑀦𑀫𑀁𑀲𑀬𑀼𑀢𑁆𑀢𑁂 𑀧𑀤𑁂𑀲𑁂. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀳𑀻𑀢𑀺 𑀲𑀦𑁆𑀥𑀸𑀭𑀡𑀸𑀤𑀺𑀓𑀺𑀘𑁆𑀘𑀸𑀳𑀺. 𑀆𑀬𑀼𑀦𑀸 𑀧𑀭𑀺𑀧𑀸𑀮𑀺𑀬𑀫𑀸𑀦𑀦𑁆𑀢𑀺 𑀏𑀢𑁆𑀣 𑀯𑀡𑁆𑀡𑀸𑀤𑀻𑀳𑀺 𑀧𑀭𑀺𑀯𑀸𑀭𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀺𑀝𑁆𑀞𑀢𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀢𑀁 𑀧𑀤𑁂𑀲𑀁 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀖𑀸𑀬𑀢𑀻𑀢𑀺 𑀕𑀦𑁆𑀥𑁄𑀧𑀸𑀤𑀸𑀦𑀁 𑀓𑀭𑁄𑀢𑀺. 𑀲𑀸𑀬𑀢𑀻𑀢𑀺 𑀭𑀲𑀁 𑀯𑀺𑀦𑁆𑀤𑀢𑀺. 𑀚𑀻𑀯𑀺𑀢𑀫𑀯𑁆𑀳𑀸𑀬𑀢𑀻𑀢𑀺 𑀏𑀢𑁆𑀣 𑀭𑀲𑀕𑁆𑀕𑀳𑀡𑀫𑀽𑀮𑀓𑀢𑁆𑀢𑀸 𑀅𑀚𑁆𑀛𑁄𑀳𑀭𑀡𑀲𑁆𑀲 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀁 𑀅𑀚𑁆𑀛𑁄𑀳𑀭𑀡𑀭𑀲𑁄 𑀚𑀻𑀯𑀺𑀢𑀁, 𑀢𑀁 𑀅𑀯𑁆𑀳𑀸𑀬𑀢𑀺 𑀢𑀲𑁆𑀫𑀺𑀁 𑀦𑀺𑀦𑁆𑀦𑀢𑀸𑀬 𑀅𑀯𑁆𑀳𑀸𑀬𑀦𑁆𑀢𑀫𑀺𑀯 𑀳𑁄𑀢𑀺. 𑀉𑀧𑁆𑀧𑀮𑀤𑀮𑀕𑁆𑀕𑀲𑀡𑁆𑀞𑀸𑀦𑁂 𑀧𑀤𑁂𑀲𑁂𑀢𑀺 𑀫𑀚𑁆𑀛𑁂 𑀙𑀺𑀦𑁆𑀦𑀲𑁆𑀲 𑀉𑀧𑁆𑀧𑀮𑀤𑀮𑀲𑁆𑀲 𑀅𑀕𑁆𑀕𑀪𑀸𑀕𑀲𑀡𑁆𑀞𑀸𑀦𑁂 𑀧𑀤𑁂𑀲𑁂. 𑀫𑀮𑀸𑀦𑀦𑁆𑀢𑀺 𑀓𑀺𑀮𑁂𑀲𑀸𑀤𑀺𑀫𑀮𑀸𑀦𑀜𑁆𑀘𑁂𑀯 𑀫𑀮𑀯𑀺𑀲𑀬𑀸𑀦𑀜𑁆𑀘 𑀲𑀸𑀲𑀯𑀥𑀫𑁆𑀫𑀸𑀦𑀁 𑀅𑀦𑀼𑀢𑁆𑀢𑀭𑀺𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑁂𑀲𑀼 𑀓𑀸𑀫𑀭𑀸𑀕𑀦𑀺𑀤𑀸𑀦𑀓𑀫𑁆𑀫𑀚𑀦𑀺𑀢𑁂𑀲𑀼 𑀓𑀸𑀫𑀭𑀸𑀕𑀲𑁆𑀲 𑀘 𑀯𑀺𑀲𑁂𑀲𑀧𑀘𑁆𑀘𑀬𑁂𑀲𑀼 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑁂𑀲𑀼 𑀓𑀸𑀬𑀲𑁆𑀲 𑀯𑀺𑀲𑁂𑀲𑀢𑁄 𑀲𑀸𑀲𑀯𑀧𑀘𑁆𑀘𑀬𑀢𑁆𑀢𑀸 𑀲𑁄𑀬𑁂𑀯 𑀢𑁂𑀲𑀁 𑀆𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀳𑀺 𑀨𑁄𑀝𑁆𑀞𑀩𑁆𑀩𑀲𑀼𑀔𑀁 𑀅𑀲𑁆𑀲𑀸𑀤𑁂𑀦𑁆𑀢𑀸 𑀲𑀢𑁆𑀢𑀸 𑀫𑁂𑀣𑀼𑀦𑀫𑁆𑀧𑀺 𑀲𑁂𑀯𑀦𑁆𑀢𑀺. 𑀅𑀣 𑀯𑀸 𑀓𑀸𑀬𑀺𑀦𑁆𑀤𑁆𑀭𑀺𑀬𑀯𑀢𑁆𑀣𑀼𑀓𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀩𑀮𑀯𑀓𑀸𑀫𑀭𑀸𑀕𑀸𑀤𑀺𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑁂𑀲𑀢𑁄 𑀫𑀮𑀸, 𑀢𑁂𑀲𑀫𑀬𑀁 𑀆𑀬𑁄 𑀳𑁂𑀢𑀽𑀢𑀺 𑀓𑀸𑀬𑁄𑀢𑀺 𑀯𑀼𑀢𑁆𑀢𑁄. 𑀇𑀫𑀲𑁆𑀫𑀺𑀁 𑀓𑀸𑀬𑁂𑀢𑀺 𑀇𑀫𑀲𑁆𑀫𑀺𑀁 𑀲𑀲𑀫𑁆𑀪𑀸𑀭𑀓𑀸𑀬𑁂. 𑀲𑁄𑀧𑀺 𑀳𑀺 𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀺𑀫𑀮𑀸𑀦𑀁 𑀆𑀬𑀪𑀸𑀯𑀢𑁄 𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀸𑀯𑀢𑀸 𑀉𑀧𑀸𑀤𑀺𑀦𑁆𑀦𑀓𑀁 𑀅𑀢𑁆𑀣𑀻𑀢𑀺 𑀇𑀫𑀺𑀦𑀸 𑀓𑁂𑀲𑀕𑁆𑀕𑀦𑀔𑀕𑁆𑀕𑀸𑀤𑀻𑀲𑀼 𑀓𑀸𑀬𑀧𑀲𑀸𑀤𑀲𑁆𑀲 𑀅𑀪𑀸𑀯𑀫𑀸𑀳. 𑀓𑀧𑁆𑀧𑀸𑀲𑀧𑀝𑀮𑁂 𑀲𑁆𑀦𑁂𑀳𑁄 𑀯𑀺𑀬𑀸𑀢𑀺 𑀇𑀫𑀺𑀦𑀸𑀲𑁆𑀲 𑀦𑀺𑀭𑀦𑁆𑀢𑀭𑀪𑀸𑀯𑀁. 𑀇𑀫𑁂 𑀘 𑀧𑀦 𑀘𑀓𑁆𑀔𑀸𑀤𑀬𑁄 𑀭𑀽𑀧𑀸𑀤𑀺𑀕𑁄𑀘𑀭𑀦𑀺𑀦𑁆𑀦𑀢𑀸𑀬 𑀯𑀫𑁆𑀫𑀺𑀓𑀉𑀤𑀓𑀆𑀓𑀸𑀲𑀕𑀸𑀫𑀲𑀺𑀯𑀣𑀺𑀓𑀸𑀲𑀗𑁆𑀔𑀸𑀢𑀕𑁄𑀘𑀭𑀦𑀺𑀦𑁆𑀦𑀢𑀸𑀬 𑀅𑀳𑀺𑀲𑀼𑀁𑀲𑀼𑀫𑀸𑀭𑀧𑀓𑁆𑀔𑀺𑀓𑀼𑀓𑁆𑀓𑀼𑀭𑀲𑀺𑀕𑀸𑀮𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀯𑀺𑀲𑀫𑀚𑁆𑀛𑀸𑀲𑀬𑀢𑀸𑀬 𑀳𑀺 𑀘𑀓𑁆𑀔𑀼 𑀯𑀫𑁆𑀫𑀺𑀓𑀘𑁆𑀙𑀺𑀤𑁆𑀤𑀸𑀪𑀺𑀭𑀢𑀲𑀧𑁆𑀧𑁄 𑀯𑀺𑀬, 𑀩𑀺𑀮𑀚𑁆𑀛𑀸𑀲𑀬𑀢𑀸𑀬 𑀲𑁄𑀢𑀁 𑀉𑀤𑀓𑀩𑀺𑀮𑀸𑀪𑀺𑀭𑀢𑀲𑀼𑀁𑀲𑀼𑀫𑀸𑀭𑁄 𑀯𑀺𑀬, 𑀆𑀓𑀸𑀲𑀚𑁆𑀛𑀸𑀲𑀬𑀢𑀸𑀬 𑀖𑀸𑀦𑀁 𑀅𑀚𑀝𑀸𑀓𑀸𑀲𑀸𑀪𑀺𑀭𑀢𑀧𑀓𑁆𑀔𑀺 𑀯𑀺𑀬, 𑀕𑀸𑀫𑀚𑁆𑀛𑀸𑀲𑀬𑀢𑀸𑀬 𑀚𑀺𑀯𑁆𑀳𑀸 𑀕𑀸𑀫𑀸𑀪𑀺𑀭𑀢𑀓𑀼𑀓𑁆𑀓𑀼𑀭𑁄 𑀯𑀺𑀬, 𑀉𑀧𑀸𑀤𑀺𑀦𑁆𑀦𑀓𑀚𑁆𑀛𑀸𑀲𑀬𑀢𑀸𑀬 𑀓𑀸𑀬𑁄 𑀆𑀫𑀓𑀲𑀼𑀲𑀸𑀦𑀸𑀪𑀺𑀭𑀢𑀲𑀺𑀕𑀸𑀮𑁄 𑀯𑀺𑀬𑀸𑀢𑀺. 𑀯𑀺𑀲𑀫𑀚𑁆𑀛𑀸𑀲𑀬𑀢𑀸𑀬𑀸𑀢𑀺 𑀘𑀓𑁆𑀔𑀼𑀲𑁆𑀲 𑀯𑀺𑀲𑀫𑀚𑁆𑀛𑀸𑀲𑀬𑀁 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀸. 𑀘𑀓𑁆𑀔𑀼𑀫𑀢𑁄 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀘𑀓𑁆𑀔𑀼 𑀯𑀺𑀲𑀫𑀚𑁆𑀛𑀸𑀲𑀬𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀤𑀝𑁆𑀞𑀼…𑀧𑁂… 𑀮𑀓𑁆𑀔𑀡𑀦𑁆𑀢𑀺 𑀏𑀢𑁆𑀣 𑀤𑀝𑁆𑀞𑀼𑀁 𑀓𑀸𑀫𑁂𑀢𑀻𑀢𑀺 𑀤𑀝𑁆𑀞𑀼𑀓𑀸𑀫𑁄 𑀢𑀲𑁆𑀲 𑀪𑀸𑀯𑁄 𑀤𑀝𑁆𑀞𑀼𑀓𑀸𑀫𑀢𑀸, 𑀭𑀽𑀧𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀸 𑀧𑀦 𑀅𑀦𑀸𑀕𑀢𑁂 𑀘𑀓𑁆𑀔𑀸𑀤𑀻𑀲𑀼 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀺𑀓𑀸𑀯𑀺𑀚𑁆𑀚𑀸𑀫𑀽𑀮𑀧𑀢𑁆𑀣𑀦𑀸𑀲𑀪𑀸𑀯𑀸 𑀧𑀸𑀓𑀝𑀸 𑀅𑀧𑀸𑀓𑀝𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀬𑀸 𑀅𑀬𑀁 ‘‘𑀈𑀤𑀺𑀲𑀁 𑀈𑀤𑀺𑀲𑀜𑁆𑀘 𑀲𑀼𑀔𑀼𑀫𑀢𑀫𑀯𑀺𑀲𑀬𑀕𑁆𑀕𑀳𑀡𑀲𑀫𑀢𑁆𑀣𑀁 𑀘𑀓𑁆𑀔𑀼 𑀳𑁄𑀢𑀽’’𑀢𑀺 𑀏𑀯𑀁 𑀓𑀫𑁆𑀫𑀸𑀬𑀽𑀳𑀦𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀯𑀸 𑀉𑀧𑁆𑀧𑀦𑁆𑀦𑀸 𑀧𑀸𑀓𑀝𑀸. 𑀇𑀦𑁆𑀤𑁆𑀭𑀺𑀬𑀯𑀺𑀲𑁂𑀲𑀁 𑀧𑀦 𑀅𑀦𑀸𑀫𑀲𑀺𑀢𑁆𑀯𑀸 𑀅𑀯𑀺𑀲𑁂𑀲𑁂𑀦 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀪𑀯𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀢𑁆𑀯𑀸, 𑀅𑀧𑀢𑁆𑀣𑁂𑀢𑁆𑀯𑀸 𑀯𑀸 𑀢𑀢𑁆𑀣 𑀅𑀯𑀺𑀕𑀢𑀢𑀡𑁆𑀳𑀸𑀯𑀲𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀅𑀦𑀼𑀲𑀬𑀺𑀢𑀸 𑀅𑀧𑀺 𑀓𑀫𑁆𑀫𑀲𑀸𑀫𑀢𑁆𑀣𑀺𑀬𑀯𑀺𑀘𑀺𑀢𑁆𑀢𑀳𑁂𑀢𑀼𑀪𑀽𑀢𑀸 𑀅𑀧𑀸𑀓𑀝𑀸. 𑀲𑀸 𑀤𑀼𑀯𑀺𑀥𑀸𑀧𑀺 𑀦𑀺𑀤𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀬𑀲𑁆𑀲 𑀢𑀁 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀁, 𑀢𑀤𑁂𑀯 𑀓𑀫𑁆𑀫𑀁, 𑀢𑀁 𑀲𑀫𑀼𑀝𑁆𑀞𑀸𑀦𑀫𑁂𑀢𑁂𑀲𑀦𑁆𑀢𑀺 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀺, 𑀏𑀯𑀁𑀯𑀺𑀥𑀸𑀦𑀁 𑀪𑀽𑀢𑀸𑀦𑀁 𑀧𑀲𑀸𑀤𑁄 𑀤𑀝𑁆𑀞𑀼𑀓𑀸𑀫𑀢𑀸…𑀧𑁂… 𑀧𑀲𑀸𑀤𑁄, 𑀢𑀁 𑀮𑀓𑁆𑀔𑀡𑀫𑀲𑁆𑀲, 𑀢𑀣𑀸 𑀳𑀼𑀢𑁆𑀯𑀸 𑀮𑀓𑁆𑀔𑀻𑀬𑀢𑀻𑀢𑀺 𑀯𑀸 𑀤𑀝𑁆𑀞𑀼𑀓𑀸𑀫𑀢𑀸𑀦𑀺𑀤𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀪𑀽𑀢𑀧𑀲𑀸𑀤𑀮𑀓𑁆𑀔𑀡𑀁.

𑀏𑀢𑁆𑀣 𑀘 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀓𑀁, 𑀅𑀜𑁆𑀜𑀁 𑀯𑀸 𑀓𑀫𑁆𑀫𑀁 𑀘𑀓𑁆𑀔𑀸𑀤𑀻𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀑𑀧𑀧𑀸𑀢𑀺𑀓𑀸𑀦𑀁 𑀧𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀯 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁 𑀧𑀝𑀺𑀲𑀦𑁆𑀥𑀺𑀚𑀦𑀓𑀫𑁂𑀯 𑀓𑀫𑁆𑀫𑀁 𑀧𑀭𑀺𑀧𑀼𑀡𑁆𑀡𑀲𑀓𑀮𑀫𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀓𑀣𑀁 𑀧𑀦 𑀏𑀓𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑁂𑀲𑁄𑀢𑀺? 𑀓𑀸𑀭𑀡𑀲𑁆𑀲 𑀪𑀺𑀦𑁆𑀦𑀢𑁆𑀢𑀸. 𑀢𑀁𑀢𑀁𑀪𑀯𑀧𑀢𑁆𑀣𑀦𑀸𑀪𑀽𑀢𑀸 𑀳𑀺 𑀢𑀡𑁆𑀳𑀸 𑀢𑀁𑀢𑀁𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀬𑀢𑀦𑀸𑀪𑀺𑀮𑀸𑀲𑀢𑀸𑀬 𑀲𑀬𑀁 𑀯𑀺𑀘𑀺𑀢𑁆𑀢𑀭𑀽𑀧𑀸 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀢𑀁𑀢𑀁𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀲𑁆𑀲𑀧𑀺 𑀯𑀺𑀘𑀺𑀢𑁆𑀢𑀪𑁂𑀤𑀢𑀁 𑀯𑀺𑀤𑀳𑀢𑀺. 𑀬𑀢𑁄 𑀢𑀤𑀸𑀳𑀺𑀢𑀯𑀺𑀲𑁂𑀲𑀁 𑀢𑀣𑀸𑀯𑀺𑀥𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀅𑀦𑁂𑀓𑀭𑀽𑀧𑀸𑀧𑀦𑁆𑀦𑀁 𑀯𑀺𑀬 𑀅𑀦𑁂𑀓𑀯𑀺𑀲𑀺𑀝𑁆𑀞𑀲𑀪𑀸𑀯𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀦 𑀘𑁂𑀢𑁆𑀣 𑀲𑀫𑀢𑁆𑀣𑀢𑀸𑀲𑀫𑀢𑁆𑀣𑀢𑀸𑀲𑀪𑀸𑀯𑀢𑁄 𑀅𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀭𑀡𑀯𑀺𑀲𑁂𑀲𑁂𑀦 𑀆𑀳𑀺𑀢𑀯𑀺𑀲𑁂𑀲𑀲𑁆𑀲 𑀯𑀺𑀲𑀺𑀝𑁆𑀞𑀨𑀮𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀢𑀸𑀪𑀸𑀯𑀢𑁄 𑀏𑀓𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀲𑁄𑀴𑀲𑀸𑀤𑀺𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑀳𑁂𑀢𑀼𑀪𑀸𑀯𑁂𑀦 𑀘 𑀅𑀬𑀫𑀢𑁆𑀣𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄. 𑀮𑁄𑀓𑁂𑀧𑀺 𑀏𑀓𑀲𑁆𑀲𑁂𑀯 𑀲𑀸𑀮𑀺𑀩𑀻𑀚𑀲𑁆𑀲 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀢𑀡𑁆𑀟𑀼𑀮𑀨𑀮𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀢𑀸 𑀤𑀺𑀲𑁆𑀲𑀢𑁂𑀯. 𑀓𑀺𑀁 𑀯𑀸 𑀏𑀢𑀸𑀬 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬, 𑀦 𑀘𑀺𑀦𑁆𑀢𑀺𑀢𑀩𑁆𑀩𑀫𑁂𑀯𑁂𑀢𑀁. 𑀬𑀢𑁄 𑀓𑀫𑁆𑀫𑀨𑀮𑀁 𑀘𑀓𑁆𑀔𑀸𑀤𑀻𑀦𑀺, 𑀓𑀫𑁆𑀫𑀯𑀺𑀧𑀸𑀓𑁄 𑀘 𑀲𑀩𑁆𑀩𑀲𑁄 𑀩𑀼𑀤𑁆𑀥𑀸𑀦𑀁𑀬𑁂𑀯 𑀜𑀸𑀡𑀲𑁆𑀲 𑀯𑀺𑀲𑀬𑁄, 𑀦 𑀅𑀜𑁆𑀜𑁂𑀲𑀁 𑀅𑀢𑀓𑁆𑀓𑀸𑀯𑀘𑀭𑀢𑁆𑀢𑀸. 𑀢𑁂𑀦𑁂𑀯 𑀪𑀕𑀯𑀢𑀸 ‘‘𑀓𑀫𑁆𑀫𑀯𑀺𑀧𑀸𑀓𑁄 𑀅𑀘𑀺𑀦𑁆𑀢𑁂𑀬𑁆𑀬𑁄, 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄, 𑀬𑁄 𑀘𑀺𑀦𑁆𑀢𑁂𑀬𑁆𑀬, 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺𑀆𑀤𑀻𑀦𑀯𑀁 (𑀅. 𑀦𑀺. 𑁪.𑁭𑁭) 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀭𑀽𑀧𑁂𑀲𑀼 𑀆𑀯𑀺𑀜𑁆𑀙𑀦𑀭𑀲𑀦𑁆𑀢𑀺 𑀆𑀯𑀺𑀜𑁆𑀙𑀦𑀁 𑀧𑀼𑀕𑁆𑀕𑀮𑀲𑁆𑀲, 𑀆𑀯𑀚𑁆𑀚𑀦𑀸𑀤𑀺𑀯𑀺𑀜𑁆𑀜𑀸𑀡𑀲𑁆𑀲 𑀯𑀸 𑀢𑀦𑁆𑀦𑀺𑀦𑁆𑀦𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁄. 𑀆𑀥𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀦𑁆𑀢𑀺 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄. 𑀆𑀮𑁄𑀓𑀸𑀤𑀺𑀲𑀦𑁆𑀦𑀺𑀲𑁆𑀲𑀬𑁂𑀦 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀏𑀯 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀏𑀢𑁆𑀣𑀸𑀳 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀲𑀫𑀬𑁂 𑀲𑀫𑁆𑀪𑀯𑀦𑁆𑀢𑁂𑀲𑀼 𑀫𑀦𑁆𑀤𑀸𑀫𑀦𑁆𑀤𑀫𑀚𑁆𑀛𑀺𑀫𑀸𑀬𑀼𑀓𑁂𑀲𑀼 𑀏𑀓𑀽𑀦𑀧𑀡𑁆𑀡𑀸𑀲𑀘𑀓𑁆𑀔𑀽𑀲𑀼 𑀓𑀢𑀫𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀁 𑀧𑀘𑁆𑀘𑀦𑀼𑀪𑁄𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋

‘‘𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀞𑀸𑀦𑀧𑁆𑀧𑀢𑁆𑀢𑀁 𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀤𑀼𑀢𑀺𑀬𑀪𑀯𑀗𑁆𑀕𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀁 𑀞𑀸𑀦𑀧𑁆𑀧𑀢𑁆𑀢𑀁 𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀢𑀢𑀺𑀬𑀪𑀯𑀗𑁆𑀕𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀫𑀺𑀦𑀸 𑀦𑀬𑁂𑀦 𑀬𑀸𑀯𑀢𑀸𑀬𑀼𑀓𑀁 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁭𑁦𑁦) 𑁋

𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀁 𑀘𑀓𑁆𑀔𑀼 𑀭𑀽𑀧𑁂 𑀖𑀝𑁆𑀝𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀪𑀯𑀗𑁆𑀕𑀘𑀮𑀦𑁂𑀲𑀼 𑀧𑀼𑀭𑀺𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑁂𑀦 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀲𑀳 𑀉𑀧𑁆𑀧𑀦𑁆𑀦𑀦𑁆𑀢𑀺 𑀅𑀬𑀫𑀢𑁆𑀣𑁄 𑀇𑀥 𑀲𑀻𑀳𑀴𑀲𑀁𑀯𑀡𑁆𑀡𑀦𑀸𑀬𑀁, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀲𑀻𑀳𑀴𑀲𑀁𑀯𑀡𑁆𑀡𑀦𑀸𑀬𑀜𑁆𑀘 𑀯𑀼𑀢𑁆𑀢𑁄.

𑀢𑀴𑀸𑀓𑀕𑀸𑀫𑀫𑀽𑀮𑀯𑀸𑀲𑀺𑀤𑀸𑀞𑀸𑀦𑀸𑀕𑀢𑁆𑀣𑁂𑀭𑁂𑀦 𑀧𑀦 ‘‘𑀆𑀯𑀚𑁆𑀚𑀦𑁂𑀦, 𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑁂𑀦 𑀪𑀯𑀗𑁆𑀕𑁂𑀦 𑀯𑀸 𑀲𑀳 𑀉𑀧𑁆𑀧𑀦𑁆𑀦𑀁 𑀘𑀓𑁆𑀔𑀼’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀼𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀲𑀢𑀺 𑀅𑀜𑁆𑀜𑀲𑁆𑀫𑀺𑀁 𑀖𑀝𑁆𑀝𑀺𑀢𑁂 𑀅𑀜𑁆𑀜𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀜𑁆𑀘 𑀪𑀯𑀗𑁆𑀕𑀘𑀮𑀦𑀢𑁄 𑀳𑁂𑀝𑁆𑀞𑀸 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀺 𑀬𑀸𑀯 𑀢𑁂𑀭𑀲𑀫𑀘𑀺𑀢𑁆𑀢𑁂𑀦 𑀲𑀳 𑀉𑀧𑁆𑀧𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀦 𑀘𑁂𑀢𑀁 𑀯𑀢𑁆𑀢𑀩𑁆𑀩𑀁, 𑀢𑀢𑀺𑀬𑀘𑀢𑀼𑀢𑁆𑀣𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀁 𑀓𑁂𑀲𑀜𑁆𑀘𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀤𑁆𑀯𑀸𑀭𑀪𑀸𑀯𑀁 𑀦 𑀕𑀘𑁆𑀙𑀢𑀺 𑀦𑀺𑀭𑀼𑀤𑁆𑀥𑀢𑁆𑀢𑀸, 𑀫𑀦𑁄𑀤𑁆𑀯𑀸𑀭𑀲𑁆𑀲 𑀦𑀺𑀭𑀼𑀤𑁆𑀥𑀲𑁆𑀲𑁂𑀯 𑀤𑁆𑀯𑀸𑀭𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁄. 𑀬𑀤𑀺 𑀲𑀺𑀬𑀸 ‘‘𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀤𑀼𑀢𑀺𑀬𑀪𑀯𑀗𑁆𑀕𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀫𑁂𑀯 𑀦𑀺𑀲𑁆𑀲𑀬𑁄𑀢𑀺 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀇𑀤𑀫𑁆𑀧𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀁 𑀦𑀺𑀲𑁆𑀲𑀬𑁄𑀢𑀺 𑀬𑀼𑀚𑁆𑀚𑀢𑀻𑀢𑀺, 𑀏𑀯𑀁 𑀲𑀢𑀺 ‘‘𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑁂𑀦 𑀪𑀯𑀗𑁆𑀕𑁂𑀦 𑀯𑀸’’𑀢𑀺 𑀯𑀘𑀦𑀁 𑀬𑀼𑀚𑁆𑀚𑁂𑀬𑁆𑀬, 𑀢𑁂𑀦 𑀳𑀺 ‘‘𑀘𑀺𑀢𑁆𑀢𑀓𑁆𑀔𑀡𑀤𑁆𑀯𑀬𑀸𑀢𑀻𑀢𑀫𑁆𑀧𑀺 𑀦𑀺𑀲𑁆𑀲𑀬𑁄’’𑀢𑀺 𑀧𑀝𑀺𑀜𑁆𑀜𑀸𑀢𑀁 𑀲𑀺𑀬𑀸, 𑀢𑀲𑁆𑀫𑀸 𑀦𑀸𑀬𑀁 𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄𑀢𑀺 𑀤𑀺𑀲𑁆𑀲𑀢𑀺. ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀺𑀓𑁆𑀓𑀫𑁄’’𑀢𑀺 𑀘 𑀅𑀦𑀢𑀻𑀢𑁂𑀓𑀘𑀺𑀢𑁆𑀢𑀓𑁆𑀔𑀡𑀲𑁆𑀲 𑀤𑀼𑀩𑁆𑀩𑀮𑀢𑀸𑀬 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀺𑀓𑁆𑀓𑀫𑁂𑀦 𑀢𑀲𑁆𑀲 𑀩𑀮𑀯𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀘𑁆𑀘𑀢𑀺, 𑀦 𑀧𑀦 𑀤𑁆𑀯𑀺𑀢𑀺𑀘𑀢𑀼𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀁 𑀦𑀺𑀲𑁆𑀲𑀬𑀪𑀸𑀯𑀸𑀪𑀸𑀯𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 ‘‘𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀺 𑀘𑀼𑀢𑀺𑀆𑀲𑀦𑁆𑀦𑀸𑀦𑀺 𑀢𑀤𑀼𑀤𑁆𑀥𑀁 𑀓𑀫𑁆𑀫𑀚𑀭𑀽𑀧𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀏𑀓𑀲𑁆𑀫𑀺𑀁𑀬𑁂𑀯 𑀳𑀤𑀬𑀯𑀢𑁆𑀣𑀼𑀲𑁆𑀫𑀺𑀁 𑀯𑀢𑁆𑀢𑀦𑁆𑀢𑀻’’𑀢𑀺, 𑀢𑀲𑁆𑀫𑀸 𑀢𑀁 𑀣𑁂𑀭𑀲𑁆𑀲 𑀫𑀦𑁄𑀭𑀣𑀫𑁂𑀯𑀸𑀢𑀺 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁.

𑀲𑀳𑀚𑀸𑀢𑁂𑀲𑀼 𑀩𑀳𑀽𑀲𑀼 𑀧𑀲𑀸𑀤𑁂𑀲𑀼 𑀓𑀺𑀁 𑀏𑀓𑁄 𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀉𑀤𑀸𑀳𑀼 𑀲𑀩𑁆𑀩𑁂𑀬𑁂𑀯𑀸𑀢𑀺? 𑀦𑀦𑀼 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂 𑀏𑀓𑀫𑁆𑀧𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺, 𑀓𑀢𑀫𑀁 𑀧𑀦 𑀢𑀦𑁆𑀢𑀺? 𑀬𑀁 𑀢𑀢𑁆𑀣 𑀯𑀺𑀲𑀤𑀁 𑀳𑀼𑀢𑁆𑀯𑀸 𑀭𑀽𑀧𑀸𑀪𑀺𑀖𑀝𑁆𑀝𑀦𑀸𑀭𑀳𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀻𑀳𑀴𑀲𑀁𑀯𑀡𑁆𑀡𑀦𑀸𑀬𑀁 𑀧𑀦 ‘‘𑀲𑀩𑁆𑀩𑁂𑀬𑁂𑀯 𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀬𑀤𑀺 𑀏𑀯𑀁 ‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’𑀦𑁆𑀢𑀺 𑀏𑀢𑁆𑀣 ‘𑀭𑀽𑀧𑁂 𑀘𑀸’𑀢𑀺 𑀯𑀘𑀦𑀁 𑀯𑀺𑀬 ‘𑀘𑀓𑁆𑀔𑀽𑀦𑀻’𑀢𑀺𑀧𑀺 𑀩𑀳𑀼𑀯𑀘𑀦𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀅𑀦𑀼𑀬𑁄𑀕𑀁 𑀓𑀢𑁆𑀯𑀸 𑀢𑀁𑀯𑀺𑀲𑁄𑀥𑀦𑀢𑁆𑀣𑀁 ‘𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀤𑁆𑀯𑀬𑀦𑀺𑀲𑁆𑀲𑀺𑀢𑀁 𑀧𑀲𑀸𑀤𑀤𑁆𑀯𑀬𑀁 𑀦𑀺𑀲𑁆𑀲𑀸𑀬 𑀏𑀓𑀫𑁂𑀯 𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀕𑀡𑁆𑀳𑁂𑀬𑁆𑀬𑀼’𑀦𑁆𑀢𑀺 𑀇𑀫𑀁 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀦𑀺𑀭𑀸𑀓𑀭𑁄𑀦𑁆𑀢𑁂𑀦 𑀪𑀕𑀯𑀢𑀸 𑀩𑀳𑀼𑀯𑀘𑀦𑀫𑀓𑀢𑁆𑀯𑀸 ‘𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑁧.𑁧.𑁨) 𑀯𑀺𑀬 𑀲𑀸𑀫𑀜𑁆𑀜𑀯𑀲𑁂𑀦 𑀏𑀓𑀯𑀘𑀦𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 𑀢𑀤𑁂𑀯 𑀲𑀻𑀳𑀴𑀲𑀁𑀯𑀡𑁆𑀡𑀦𑀸𑀯𑀘𑀦𑀁 𑀅𑀦𑀺𑀘𑁆𑀙𑀦𑁆𑀢𑁂𑀦 ‘‘𑀏𑀓𑀫𑁆𑀧𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀁 𑀧𑀦 𑀅𑀦𑁂𑀓𑀫𑁂𑀯 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀘𑁂𑀯 𑀅𑀫𑁆𑀳𑁂𑀳𑀺𑀧𑀺 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑀦𑁆𑀢𑀺. 𑀬𑁂𑀲𑀁 𑀪𑀽𑀢𑀸𑀦𑀫𑀬𑀁 𑀧𑀲𑀸𑀤𑁄, 𑀢𑁂𑀬𑁂𑀯 𑀇𑀫𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀤𑀝𑁆𑀞𑀼…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀲𑁄𑀢𑀧𑀲𑀸𑀤𑀸𑀤𑀻𑀦𑀫𑁆𑀧𑀺 𑀮𑀓𑁆𑀔𑀡𑀸𑀤𑀺𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄.

𑁬𑁫𑁮. 𑀓𑁂𑀘𑀻𑀢𑀺 𑀫𑀳𑀸𑀲𑀗𑁆𑀖𑀺𑀬𑁂𑀲𑀼 𑀏𑀓𑀘𑁆𑀘𑁂. 𑀘𑀓𑁆𑀔𑀸𑀤𑀻𑀲𑀼 𑀢𑁂𑀚𑀸𑀤𑀺𑀅𑀥𑀺𑀓𑀢𑀸 𑀦𑀸𑀫 𑀢𑀦𑁆𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀢𑀤𑀥𑀺𑀓𑀢𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀚𑀸𑀥𑀺𑀓𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀚𑀸𑀥𑀺𑀓𑀸𑀦𑀦𑁆𑀢𑀺 𑀧𑀫𑀸𑀡𑀯𑀲𑁂𑀦 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀲𑀫𑀸𑀦𑀪𑀸𑀯𑁂𑀧𑀺 𑀓𑀺𑀘𑁆𑀘𑀯𑀲𑁂𑀦 𑀢𑁂𑀚𑁄𑀥𑀸𑀢𑀼𑀅𑀥𑀺𑀓𑀸𑀦𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀆𑀓𑀸𑀲 …𑀧𑁂… 𑀲𑁂𑀲𑀓𑀸𑀢𑀺 𑀆𑀓𑀸𑀲𑀸𑀥𑀺𑀓𑀸𑀦𑀁 𑀪𑀽𑀢𑀸𑀦𑀁 𑀧𑀲𑀸𑀤𑁄 𑀲𑁄𑀢𑀁, 𑀯𑀸𑀬𑀼𑀅𑀥𑀺𑀓𑀸𑀦𑀁 𑀖𑀸𑀦𑀁, 𑀢𑁄𑀬𑀸𑀥𑀺𑀓𑀸𑀦𑀁 𑀚𑀺𑀯𑁆𑀳𑀸, 𑀨𑁄𑀝𑁆𑀞𑀩𑁆𑀩𑀲𑀗𑁆𑀔𑀸𑀢𑀧𑀣𑀯𑀸𑀥𑀺𑀓𑀸𑀦𑀁 𑀓𑀸𑀬𑁄𑀢𑀺 𑀅𑀢𑁆𑀣𑁄.

𑁬𑁫𑁯. 𑀏𑀯𑀁 𑀧𑀦 𑀯𑀤𑀦𑁆𑀢𑀸𑀦𑀁 𑀓𑀺𑀁 𑀉𑀢𑁆𑀢𑀭𑀦𑁆𑀢𑀺 𑀆𑀳 ‘‘𑀢𑁂 𑀧𑀦𑀸’’𑀢𑀺𑀆𑀤𑀺. 𑀲𑀼𑀢𑁆𑀢𑀁 𑀆𑀳𑀭𑀣𑀸𑀢𑀺 𑀦 𑀢𑀼𑀫𑁆𑀳𑀸𑀓𑀁 𑀯𑀘𑀦𑀫𑀢𑁆𑀢𑁂𑀦𑁂𑀯 𑀅𑀬𑀫𑀢𑁆𑀣𑁄 𑀲𑀓𑁆𑀓𑀸 𑀲𑀤𑁆𑀥𑀸𑀢𑀼𑀁, 𑀢𑀲𑁆𑀲 𑀧𑀦 𑀧𑀭𑀺𑀤𑀻𑀧𑀓𑀁 𑀲𑀼𑀢𑁆𑀢𑀫𑀸𑀳𑀭𑀣. 𑀲𑀼𑀢𑁆𑀢𑁂 𑀳𑀺 𑀆𑀳𑀝𑁂 𑀢𑀲𑁆𑀲 𑀦𑁂𑀬𑁆𑀬𑀢𑁆𑀣𑀢𑀁 𑀦𑀻𑀢𑀢𑁆𑀣𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀬𑀤𑀺 𑀢𑀲𑁆𑀲 𑀯𑀲𑁂𑀦 𑀅𑀬𑀫𑀢𑁆𑀣𑁄 𑀧𑀜𑁆𑀜𑀸𑀬𑁂𑀣, 𑀕𑀡𑁆𑀳𑁂𑀬𑁆𑀬𑀸𑀫 𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀢𑁆𑀢𑀫𑁂𑀯…𑀧𑁂… 𑀓𑀺𑀜𑁆𑀘𑀺𑀧𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀲𑀼𑀢𑁆𑀢𑀁 𑀕𑀯𑁂𑀲𑀫𑀸𑀦𑀸𑀧𑀺 𑀅𑀤𑁆𑀥𑀸 𑀏𑀓𑀦𑁆𑀢𑁂𑀦 𑀓𑀺𑀜𑁆𑀘𑀺𑀧𑀺 𑀏𑀓𑀕𑀸𑀣𑀸𑀧𑀤𑀫𑀢𑁆𑀢𑀫𑁆𑀧𑀺 𑀢𑀤𑀢𑁆𑀣𑀧𑀭𑀺𑀤𑀻𑀧𑀓𑀁 𑀲𑀼𑀢𑁆𑀢𑀁 𑀦 𑀤𑀓𑁆𑀔𑀺𑀲𑁆𑀲𑀦𑁆𑀢𑁂𑀯 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀢𑀸𑀤𑀺𑀲𑀲𑁆𑀲𑁂𑀯 𑀲𑀼𑀢𑁆𑀢𑀦𑁆𑀢𑀲𑁆𑀲 𑀅𑀪𑀸𑀯𑀢𑁄.

𑁬𑁬𑁦. 𑀓𑀺𑀜𑁆𑀘𑀸𑀧𑀺 𑀲𑀼𑀢𑁆𑀢𑀦𑁆𑀢𑀯𑀲𑁂𑀦 𑀅𑀬𑀫𑀢𑁆𑀣𑁄 𑀦 𑀤𑀺𑀲𑁆𑀲𑀢𑀺, 𑀬𑀼𑀢𑁆𑀢𑀺𑀢𑁄 𑀧𑀦 𑀤𑀺𑀲𑁆𑀲𑀢𑀻𑀢𑀺 𑀘𑁂, 𑀢𑀫𑁆𑀧𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀲𑁂𑀲𑁂 𑀲𑀢𑀻’’𑀢𑀺𑀆𑀤𑀺. 𑀪𑀽𑀢𑀸𑀦𑀜𑁆𑀳𑀺 𑀯𑀺𑀲𑁂𑀲𑁂 𑀲𑀢𑀺 𑀧𑀲𑀸𑀤𑁄 𑀓𑀣𑀁 𑀪𑀯𑁂, 𑀦𑁂𑀯 𑀪𑀯𑁂𑀬𑁆𑀬, 𑀦 𑀘 𑀪𑀯𑁂𑀬𑁆𑀬, 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀲𑀫𑀸𑀦𑀸𑀦𑀜𑁆𑀳𑀺 𑀪𑀽𑀢𑀸𑀦𑀁, 𑀧𑀲𑀸𑀤𑁄 𑀧𑀭𑀺𑀤𑀻𑀧𑀺𑀢𑁄’’𑀢𑀺. 𑀬𑀲𑁆𑀫𑀸 𑀲𑀫𑀸𑀦𑀸𑀦𑀫𑁂𑀯 𑀪𑀽𑀢𑀸𑀦𑀁 𑀧𑀲𑀸𑀤𑁄 𑀧𑁄𑀭𑀸𑀡𑁂𑀳𑀺 𑀧𑀭𑀺𑀤𑀻𑀧𑀺𑀢𑁄, 𑀦 𑀯𑀺𑀲𑀫𑀸𑀦𑀸𑀦𑀁. 𑀧𑀣𑀯𑀻𑀥𑀸𑀢𑀼𑀅𑀥𑀺𑀓𑀓𑀮𑀸𑀧𑀲𑁆𑀲 𑀳𑀺 𑀓𑀓𑁆𑀔𑀴𑀢𑁆𑀢𑀸, 𑀆𑀧𑁄𑀥𑀸𑀢𑀼𑀅𑀥𑀺𑀓𑀓𑀮𑀸𑀧𑀲𑁆𑀲 𑀯𑀺𑀲𑁆𑀲𑀦𑁆𑀤𑀦𑀢𑁄, 𑀢𑁂𑀚𑁄𑀥𑀸𑀢𑀼𑀅𑀥𑀺𑀓𑀓𑀮𑀸𑀧𑀲𑁆𑀲 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑀢𑁆𑀢𑀸, 𑀯𑀸𑀬𑁄𑀥𑀸𑀢𑀼𑀅𑀥𑀺𑀓𑀓𑀮𑀸𑀧𑀲𑁆𑀲 𑀘 𑀯𑀺𑀲𑁆𑀲𑀭𑀡𑀢𑁄 𑀦 𑀢𑁂𑀲𑀼 𑀧𑀲𑀸𑀤𑁄 𑀧𑀢𑀺𑀝𑁆𑀞𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀓𑀺𑀘𑁆𑀘𑀢𑁄 𑀲𑀫𑀸𑀦𑀸𑀦𑀁𑀬𑁂𑀯 𑀧𑀲𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦 𑀯𑀺𑀲𑀫𑀸𑀦𑀸𑀦𑀦𑁆𑀢𑀺.

𑁬𑁬𑁧-𑁨. 𑀬𑀤𑀺 𑀏𑀯𑀁 𑀓𑀣𑀁 𑀧𑀲𑀸𑀤𑀸𑀦𑀁 𑀯𑀺𑀲𑁂𑀲𑀢𑀸𑀢𑀺 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀲𑀸𑀤𑀯𑀢𑁆𑀣𑀼𑀓𑀸𑀦𑀁 𑀪𑀽𑀢𑀸𑀦𑀁 𑀯𑀺𑀲𑁂𑀲𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀏𑀢𑁂𑀲𑀁 𑀧𑀲𑀸𑀤𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀇𑀤𑀫𑀽𑀦𑀁, 𑀇𑀤𑀫𑀥𑀺𑀓𑀦𑁆𑀢𑀺 𑀏𑀢𑀁 𑀯𑀺𑀲𑁂𑀲𑀧𑀭𑀺𑀓𑀧𑁆𑀧𑀦𑀁 𑀲𑀩𑁆𑀩𑀲𑁄 𑀲𑀩𑁆𑀩𑀸𑀓𑀸𑀭𑁂𑀦 𑀧𑀳𑀸𑀬 𑀜𑁂𑀬𑁆𑀬𑀸 𑀓𑀫𑁆𑀫𑀯𑀺𑀲𑁂𑀲𑁂𑀦 𑀧𑀲𑀸𑀤𑀸𑀦𑀁 𑀯𑀺𑀲𑁂𑀲𑀢𑀸. 𑀬𑀣𑀸 𑀅𑀯𑀺𑀲𑁂𑀲𑁂𑀧𑀺 𑀪𑀽𑀢𑀸𑀦𑀁 𑀭𑀽𑀧𑀸𑀦𑀁 𑀭𑀲𑀸𑀤𑀬𑁄 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀏𑀯𑀁 𑀘𑀓𑁆𑀔𑀸𑀤𑀬𑁄𑀧𑀺 𑀪𑀽𑀢𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀲𑁄 𑀧𑀦𑀸𑀬𑀁 𑀯𑀺𑀲𑀺𑀝𑁆𑀞𑀪𑀸𑀯𑁄 𑀓𑀫𑁆𑀫𑀯𑀺𑀲𑁂𑀲𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑁄. 𑀏𑀓𑀫𑁆𑀧𑀺 𑀳𑀺 𑀓𑀫𑁆𑀫𑀁 𑀧𑀜𑁆𑀘𑀸𑀬𑀢𑀦𑀺𑀓𑀢𑁆𑀢𑀪𑀸𑀯𑀧𑀢𑁆𑀣𑀦𑀸𑀦𑀺𑀧𑁆𑀨𑀦𑁆𑀦𑀁 𑀘𑀓𑁆𑀔𑀸𑀤𑀺𑀯𑀺𑀲𑁂𑀲𑀳𑁂𑀢𑀼𑀢𑀸𑀬 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀲𑀸𑀥𑀸𑀭𑀡𑀯𑀺𑀲𑀺𑀝𑁆𑀞𑀁 𑀲𑀸𑀫𑀢𑁆𑀣𑀺𑀬𑀯𑀺𑀲𑁂𑀲𑀢𑁄. 𑀦 𑀳𑀺 𑀬𑁂𑀦 𑀯𑀺𑀲𑁂𑀲𑁂𑀦 𑀘𑀓𑁆𑀔𑀼𑀲𑁆𑀲 𑀧𑀘𑁆𑀘𑀬𑁄, 𑀢𑁂𑀦𑁂𑀯 𑀲𑁄𑀢𑀲𑁆𑀲 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀦𑁆𑀢𑀭𑀪𑀸𑀯𑀧𑁆𑀧𑀢𑁆𑀢𑀺𑀢𑁄. ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀫𑀳𑀕𑁆𑀕𑀢𑀸 𑀘𑁂𑀢𑀦𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀘𑀦𑀢𑁄 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀚𑁆𑀚𑀫𑀸𑀦𑀸𑀦𑀁 𑀲𑀩𑁆𑀩𑁂𑀲𑀁𑀬𑁂𑀯 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀏𑀓𑀸 𑀘𑁂𑀢𑀦𑀸 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦𑀸𑀦𑀸𑀘𑁂𑀢𑀦𑀸𑀬 𑀳𑀺 𑀢𑀤𑀸 𑀇𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺𑀬𑀁 𑀲𑀢𑀺 𑀧𑀭𑀺𑀢𑁆𑀢𑁂𑀦 𑀘 𑀫𑀳𑀕𑁆𑀕𑀢𑁂𑀦 𑀘 𑀓𑀫𑁆𑀫𑁂𑀦 𑀓𑀝𑀢𑁆𑀢𑀸𑀭𑀽𑀧𑀁 𑀆𑀧𑀚𑁆𑀚𑁂𑀬𑁆𑀬, 𑀦 𑀘𑁂𑀓𑀸 𑀧𑀝𑀺𑀲𑀦𑁆𑀥𑀺 𑀅𑀦𑁂𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀳𑁄𑀢𑀻𑀢𑀺 𑀲𑀺𑀤𑁆𑀥𑀫𑁂𑀓𑁂𑀦 𑀓𑀫𑁆𑀫𑁂𑀦 𑀅𑀦𑁂𑀓𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺. ‘‘𑀦 𑀳𑀺 𑀪𑀽𑀢𑀯𑀺𑀲𑁂𑀲𑁂𑀦, 𑀳𑁄𑀢𑀺 𑀢𑁂𑀲𑀁 𑀯𑀺𑀲𑁂𑀲𑀢𑀸’’𑀢𑀺 𑀇𑀤𑀁 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁.

𑁬𑁬𑁩. 𑀏𑀯𑀁 𑀓𑀫𑁆𑀫𑀯𑀺𑀲𑁂𑀲𑀢𑁄 𑀯𑀺𑀲𑀺𑀝𑁆𑀞𑁂𑀲𑀼 𑀘 𑀏𑀢𑁂𑀲𑀼 𑀆𑀭𑀫𑁆𑀫𑀡𑀕𑁆𑀕𑀳𑀡𑁂𑀧𑀺 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀫𑁂𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀢𑁆𑀢𑀕𑀸𑀳𑀓𑀦𑁆𑀢𑀺 𑀅𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀁 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑁂𑀦 𑀲𑀳 𑀅𑀦𑀮𑁆𑀮𑀻𑀬𑀦𑀦𑀺𑀲𑁆𑀲𑀬𑁂 𑀏𑀯 𑀭𑀽𑀧𑀸𑀤𑀺𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀓𑁂𑀘𑀺 𑀧𑀦 𑀢𑀫𑁆𑀧𑀺 ‘‘𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 𑀲𑀸𑀦𑁆𑀢𑀭𑁂 𑀅𑀥𑀺𑀓𑁂 𑀘 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀬𑀤𑀺 𑀳𑀺 𑀘𑀓𑁆𑀔𑀼𑀲𑁄𑀢𑀸𑀦𑀺 𑀲𑀫𑁆𑀧𑀢𑁆𑀢𑀯𑀺𑀲𑀬𑀫𑁂𑀯 𑀕𑀡𑁆𑀳𑀦𑁆𑀢𑀺, 𑀘𑀓𑁆𑀔𑀼𑀧𑀲𑀸𑀤𑀢𑁄 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀞𑀺𑀢𑁂𑀲𑀼 𑀢𑀸𑀭𑀓𑀸𑀤𑀻𑀲𑀼 𑀦𑀺𑀲𑁆𑀲𑀬𑀯𑀲𑁂𑀦 𑀘 𑀧𑀫𑀸𑀡𑀢𑁄 𑀅𑀥𑀺𑀓𑁂𑀲𑀼 𑀘𑀦𑁆𑀤𑀫𑀡𑁆𑀟𑀮𑀸𑀤𑀻𑀲𑀼 𑀭𑀽𑀧𑀸𑀬𑀢𑀦𑁂𑀲𑀼 𑀲𑁄𑀢𑀧𑀲𑀸𑀤𑀢𑁄 𑀘 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑀲𑀫𑁆𑀪𑀽𑀢𑁂𑀲𑀼 𑀉𑀤𑀭𑀘𑀫𑁆𑀫𑀲𑀦𑁆𑀥𑀺𑀘𑀫𑁆𑀫𑀸𑀤𑀺𑀅𑀦𑁆𑀢𑀭𑀺𑀢𑁂𑀲𑀼 𑀓𑀼𑀘𑁆𑀙𑀺𑀲𑀤𑁆𑀤𑀲𑀦𑁆𑀥𑀺𑀲𑀤𑁆𑀤𑀸𑀤𑀻𑀲𑀼 𑀧𑀼𑀣𑀼𑀮𑁂𑀲𑀼 𑀘 𑀲𑀫𑀼𑀤𑁆𑀤𑀲𑀤𑁆𑀤𑀸𑀤𑀻𑀲𑀼 𑀲𑀤𑁆𑀤𑀸𑀬𑀢𑀦𑁂𑀲𑀼 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺 𑀦 𑀲𑀺𑀬𑀸 𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀸𑀦𑀁 𑀓𑀸𑀬𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀢𑀣𑀸 𑀅𑀤𑀲𑁆𑀲𑀦𑀢𑁄.

𑀏𑀢𑁆𑀣 𑀘 𑀯𑀤𑁂𑀬𑁆𑀬 𑁋 𑀅𑀥𑀺𑀝𑁆𑀞𑀸𑀦𑀢𑁄 𑀩𑀳𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀲𑀫𑁆𑀧𑀢𑁆𑀢𑀯𑀺𑀲𑀬𑀫𑁂𑀯 𑀬𑀢𑁆𑀢𑀓𑀁 𑀯𑀺𑀲𑀬𑀁, 𑀢𑀢𑁆𑀢𑀓𑀁 𑀯𑀺𑀲𑀬𑀁 𑀕𑀳𑀡𑀸𑀓𑀸𑀭𑀁 𑀨𑀭𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀅𑀲𑀺𑀤𑁆𑀥𑀫𑁂𑀢𑀁 ‘‘𑀲𑀸𑀦𑁆𑀢𑀭𑁂 𑀅𑀥𑀺𑀓𑁂 𑀘 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄’’𑀢𑀺? 𑀢𑀁 𑀦, 𑀅𑀥𑀺𑀝𑁆𑀞𑀸𑀦𑀢𑁄 𑀩𑀳𑀺 𑀇𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺𑀬𑀸 𑀏𑀯 𑀅𑀪𑀸𑀯𑀸. 𑀅𑀥𑀺𑀝𑁆𑀞𑀸𑀦𑀤𑁂𑀲𑁂 𑀏𑀯 𑀳𑀺 𑀇𑀦𑁆𑀤𑁆𑀭𑀺𑀬𑀁 𑀧𑀯𑀢𑁆𑀢𑀢𑀺 𑀢𑀢𑁆𑀣 𑀓𑀺𑀘𑁆𑀘𑀸𑀤𑀺𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄. 𑀲𑀢𑀺 𑀘 𑀏𑀢𑀲𑁆𑀲 𑀩𑀳𑀺 𑀧𑀯𑀢𑁆𑀢𑀺𑀬𑀁 𑀅𑀥𑀺𑀝𑁆𑀞𑀸𑀦𑁂 𑀧𑀺𑀳𑀺𑀢𑁂𑀧𑀺 𑀯𑀺𑀲𑀬𑀕𑁆𑀕𑀳𑀡𑀁 𑀲𑀺𑀬𑀸, 𑀢𑀲𑁆𑀫𑀸 𑀅𑀥𑀺𑀝𑁆𑀞𑀸𑀦𑀤𑁂𑀲𑁂 𑀞𑀺𑀢𑀸𑀦𑀁𑀬𑁂𑀯 𑀘𑀓𑁆𑀔𑀼𑀲𑁄𑀢𑀸𑀦𑀁 𑀅𑀲𑀫𑁆𑀧𑀢𑁆𑀢𑀯𑀺𑀲𑀬𑀲𑁆𑀲𑁂𑀯 𑀕𑀳𑀡𑀢𑁄 𑀦𑀸𑀲𑀺𑀤𑁆𑀥𑀫𑁂𑀢𑀁 ‘‘𑀲𑀸𑀦𑁆𑀢𑀭𑁂 𑀅𑀥𑀺𑀓𑁂 𑀘 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄’’𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀲𑀩𑁆𑀩𑀕𑁄𑀘𑀭𑀬𑁄𑀕𑁂𑀧𑀺, 𑀤𑀺𑀝𑁆𑀞𑀁 𑀭𑀽𑀧𑀭𑀯𑁂𑀲𑀼 𑀬𑀁;

𑀯𑀺𑀘𑁆𑀙𑀺𑀦𑁆𑀦𑀧𑀼𑀣𑀼𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀩𑀸𑀥𑀓’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀩𑁆𑀩𑁂𑀲𑀁 𑀘𑀓𑁆𑀔𑀸𑀤𑀻𑀦𑀁 𑀕𑁄𑀘𑀭𑁂𑀦 𑀭𑀽𑀧𑀸𑀤𑀺𑀦𑀸 𑀬𑁄𑀕𑁂 𑀏𑀓𑀓𑀸𑀭𑀺𑀬𑀲𑀸𑀥𑀓𑀢𑁆𑀢𑀸 𑀲𑀫𑁆𑀩𑀦𑁆𑀥𑁂 𑀖𑀝𑁆𑀝𑀦𑁂 𑀯𑀸 𑀲𑀫𑀸𑀦𑁂 𑀲𑀢𑀺 𑀭𑀽𑀧𑀭𑀯𑁂𑀲𑀼 𑀭𑀽𑀧𑀲𑀤𑁆𑀤𑀸𑀬𑀢𑀦𑁂𑀲𑀼 𑀯𑀺𑀲𑀬𑀪𑀽𑀢𑁂𑀲𑀼 𑀘𑀓𑁆𑀔𑀸𑀤𑀺𑀢𑁄 𑀤𑀽𑀭𑀪𑀸𑀯𑁂𑀦 𑀘𑁂𑀯 𑀓𑁂𑀦𑀘𑀺 𑀅𑀦𑀦𑁆𑀢𑀭𑀺𑀢𑀪𑀸𑀯𑁂𑀦 𑀘 𑀯𑀺𑀘𑁆𑀙𑀺𑀦𑁆𑀦𑁂𑀲𑀼 𑀧𑀫𑀸𑀡𑀢𑁄 𑀧𑀼𑀣𑀼𑀮𑁂𑀲𑀼 𑀘 𑀯𑀺𑀲𑀬𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀁 𑀬𑀁 𑀯𑀺𑀜𑁆𑀜𑀸𑀡𑀁, 𑀢𑀁 𑀘𑀓𑁆𑀔𑀼𑀲𑁄𑀢𑀸𑀦𑀁 𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀲𑁆𑀲 𑀲𑀫𑁆𑀧𑀢𑁆𑀢𑀕𑁆𑀕𑀳𑀡𑀲𑁆𑀲 𑀩𑀸𑀥𑀓𑀦𑁆𑀢𑀺.

𑀅𑀧𑀺𑀘 𑀬𑀤𑀺 𑀘𑀓𑁆𑀔𑀼 𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀁 𑀲𑀺𑀬𑀸, 𑀅𑀢𑁆𑀢𑀦𑁄 𑀫𑀡𑁆𑀟𑀮𑁂 𑀞𑀺𑀢𑀁 𑀯𑀡𑁆𑀡𑀫𑁆𑀧𑀺 𑀧𑀲𑁆𑀲𑁂𑀬𑁆𑀬. 𑀢𑀣𑀸 𑀅𑀓𑁆𑀔𑀺𑀧𑀼𑀝𑁂 𑀅𑀜𑁆𑀚𑀦𑀁 𑀧𑀔𑀼𑀫𑀫𑀽𑀮𑁂 𑀅𑀓𑁆𑀔𑀺𑀯𑀡𑁆𑀡𑀁 𑀧𑀔𑀼𑀫𑀫𑀽𑀮𑁂 𑀖𑀝𑁆𑀝𑀺𑀬𑀫𑀸𑀦𑀁 𑀅𑀜𑁆𑀚𑀦𑀲𑀮𑀸𑀓𑀫𑁆𑀧𑀺 𑀧𑀲𑁆𑀲𑁂𑀬𑁆𑀬, 𑀦 𑀘 𑀧𑀦𑁂𑀢𑀁 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀦𑁆𑀦𑀺𑀲𑁆𑀲𑀬𑁂 𑀤𑁂𑀲𑁂 𑀞𑀺𑀢𑀫𑁂𑀯 𑀯𑀺𑀲𑀬𑀁 𑀕𑀡𑁆𑀳𑀸𑀢𑀺. 𑀲𑁄𑀢𑀸𑀬𑀢𑀦𑀫𑁆𑀧𑀺 𑀬𑀤𑀺 𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀁 𑀅𑀪𑀯𑀺𑀲𑁆𑀲, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀓𑀤𑀸𑀘𑀺𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀦 𑀲𑀺𑀬𑀸. 𑀦 𑀳𑀺 𑀩𑀳𑀺𑀤𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺. 𑀧𑀝𑁆𑀞𑀸𑀦𑁂 𑀘 ‘‘𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁨) 𑀅𑀯𑀺𑀲𑁂𑀲𑁂𑀦𑁂𑀯 𑀲𑀤𑁆𑀤𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀪𑀸𑀯𑁄 𑀯𑀼𑀢𑁆𑀢𑁄. 𑀓𑀺𑀜𑁆𑀘 𑀬𑀤𑀺 𑀲𑁄𑀢𑀁 𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀁 𑀲𑀺𑀬𑀸, 𑀅𑀢𑁆𑀢𑀦𑁄 𑀯𑀺𑀲𑀬𑀧𑀤𑁂𑀲𑁂𑀬𑁂𑀯 𑀕𑀳𑁂𑀢𑀩𑁆𑀩𑀢𑁄 𑀕𑀦𑁆𑀥𑀲𑁆𑀲 𑀯𑀺𑀬 𑀲𑀤𑁆𑀤𑀲𑁆𑀲𑀸𑀧𑀺 𑀤𑀺𑀲𑀸𑀤𑁂𑀲𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸. 𑀏𑀯𑀜𑁆𑀘 𑀲𑀤𑁆𑀤𑀸𑀦𑀼𑀲𑀸𑀭𑁂𑀦 𑀓𑀡𑁆𑀟𑀁 𑀧𑀸𑀢𑁂𑀦𑁆𑀢𑀲𑁆𑀲 𑀲𑀤𑁆𑀤𑀯𑁂𑀥𑀺𑀦𑁄 𑀅𑀢𑁆𑀢𑀦𑁄 𑀓𑀡𑁆𑀡𑀩𑀺𑀮𑁂𑀬𑁂𑀯 𑀲𑀭𑀧𑀸𑀢𑀦𑀁 𑀲𑀺𑀬𑀸, 𑀢𑀲𑁆𑀫𑀸 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄 𑀲𑀤𑁆𑀤𑁄, 𑀢𑀢𑁆𑀣𑁂𑀯 𑀞𑀺𑀢𑁄 𑀲𑁄𑀢𑀧𑀣𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺.

𑀬𑀤𑀺 𑀏𑀯𑀁 𑀓𑀣𑀁 𑀤𑀽𑀭𑁂 𑀞𑀺𑀢𑁂𑀳𑀺 𑀭𑀚𑀓𑀸𑀤𑀺𑀲𑀤𑁆𑀤𑀸 𑀘𑀺𑀭𑁂𑀦 𑀲𑀼𑀬𑁆𑀬𑀦𑁆𑀢𑀺. 𑀅𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀢𑁆𑀢𑁂 𑀳𑀺 𑀤𑀽𑀭𑀸𑀲𑀦𑁆𑀦𑀤𑁂𑀲𑀯𑀢𑁆𑀢𑀻𑀦𑀁 𑀲𑀫𑀓𑀫𑁂𑀯 𑀲𑀯𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁 𑀤𑀽𑀭𑀸𑀲𑀦𑁆𑀦𑀸𑀦𑀁 𑀬𑀣𑀸𑀧𑀸𑀓𑀝𑁂 𑀲𑀤𑁆𑀤𑁂 𑀕𑀳𑀡𑀯𑀺𑀲𑁂𑀲𑀢𑁄. 𑀬𑀣𑀸 𑀳𑀺 𑀤𑀽𑀭𑀸𑀲𑀦𑁆𑀦𑀸𑀦𑀁 𑀯𑀘𑀦𑀲𑀤𑁆𑀤𑁂 𑀬𑀣𑀸𑀧𑀸𑀓𑀝𑁂𑀯 𑀕𑀳𑀡𑀯𑀺𑀲𑁂𑀲𑀢𑁄 𑀅𑀓𑁆𑀔𑀭𑀯𑀺𑀲𑁂𑀲𑀦𑀁 𑀕𑀳𑀡𑀁, 𑀅𑀕𑁆𑀕𑀳𑀡𑀜𑁆𑀘 𑀳𑁄𑀢𑀺, 𑀏𑀯𑀁 𑀭𑀚𑀓𑀸𑀤𑀺𑀲𑀤𑁆𑀤𑁂𑀧𑀺 𑀆𑀲𑀦𑁆𑀦𑀲𑁆𑀲 𑀆𑀤𑀺𑀢𑁄 𑀧𑀪𑀼𑀢𑀺 𑀬𑀸𑀯 𑀅𑀯𑀲𑀸𑀦𑀸 𑀓𑀫𑁂𑀦 𑀧𑀸𑀓𑀝𑀻𑀪𑀽𑀢𑁂, 𑀤𑀽𑀭𑀲𑁆𑀲 𑀘 𑀅𑀯𑀲𑀸𑀦𑁂, 𑀫𑀚𑁆𑀛𑁂 𑀯𑀸 𑀧𑀺𑀡𑁆𑀟𑀯𑀲𑁂𑀦 𑀧𑀯𑀢𑁆𑀢𑀺𑀧𑀸𑀓𑀝𑀻𑀪𑀽𑀢𑁂 𑀬𑀣𑀸𑀧𑀸𑀓𑀝𑀁 𑀦𑀺𑀘𑁆𑀙𑀬𑀕𑁆𑀕𑀸𑀳𑀓𑀸𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀭𑀢𑁄 𑀧𑀯𑀢𑁆𑀢𑀸𑀦𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀕𑀳𑀡𑀯𑀺𑀲𑁂𑀲𑀢𑁄 𑀮𑀳𑀼𑀓𑀁 𑀲𑀼𑀢𑁄, 𑀘𑀺𑀭𑁂𑀦 𑀲𑀼𑀢𑁄𑀢𑀺 𑀅𑀪𑀺𑀫𑀸𑀦𑁄 𑀳𑁄𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺 𑀧𑀦 𑀉𑀪𑀬𑀢𑁆𑀣 𑀲𑀫𑀸𑀦𑀸 𑀲𑀤𑁆𑀤𑀲𑁆𑀲 𑀉𑀧𑁆𑀧𑀦𑁆𑀦𑀤𑁂𑀲𑁂 𑀞𑀺𑀢𑀲𑁆𑀲 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂𑀬𑁂𑀯 𑀲𑁄𑀢𑀸𑀧𑀸𑀣𑀕𑀫𑀦𑀢𑁄. 𑀬𑀤𑀺 𑀲𑀤𑁆𑀤𑀲𑁆𑀲 𑀪𑀽𑀢𑀧𑀭𑀫𑁆𑀧𑀭𑀸𑀬 𑀲𑀫𑀦𑁆𑀢𑀢𑁄 𑀧𑀯𑀢𑁆𑀢𑀺 𑀦𑀢𑁆𑀣𑀺, 𑀓𑀣𑀁 𑀧𑀝𑀺𑀖𑁄𑀲𑀼𑀧𑁆𑀧𑀢𑁆𑀢𑀻𑀢𑀺? 𑀤𑀽𑀭𑁂 𑀞𑀺𑀢𑁄𑀧𑀺 𑀲𑀤𑁆𑀤𑁄 𑀅𑀜𑁆𑀜𑀢𑁆𑀣 𑀧𑀝𑀺𑀖𑁄𑀲𑀼𑀧𑁆𑀧𑀢𑁆𑀢𑀺𑀬𑀸, 𑀪𑀸𑀚𑀦𑀸𑀤𑀺𑀘𑀮𑀦𑀲𑁆𑀲 𑀘 𑀧𑀘𑁆𑀘𑀬𑁄 𑀳𑁄𑀢𑀺 𑀅𑀬𑁄𑀓𑀦𑁆𑀢𑁄 𑀯𑀺𑀬 𑀅𑀬𑁄𑀘𑀮𑀦𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑁂𑀲𑀁…𑀧𑁂… 𑀕𑀸𑀳𑀓𑀦𑁆𑀢𑀺 𑀬𑀁 𑀧𑀦 𑀅𑀯𑀲𑁂𑀲𑀁 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀲𑀗𑁆𑀔𑀸𑀢𑀁 𑀧𑀲𑀸𑀤𑀢𑁆𑀢𑀬𑀁, 𑀢𑀁 𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀓𑀁 𑀳𑁄𑀢𑀺 𑀦𑀺𑀲𑁆𑀲𑀬𑀯𑀲𑁂𑀦 𑀘𑁂𑀯 𑀲𑀬𑀜𑁆𑀘 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑁂 𑀅𑀮𑁆𑀮𑀻𑀦𑁂𑀬𑁂𑀯 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀕𑀦𑁆𑀥𑀭𑀲𑀸𑀦𑀁 𑀦𑀺𑀲𑁆𑀲𑀬𑁂𑀲𑀼 𑀖𑀸𑀦𑀚𑀺𑀯𑁆𑀳𑀸𑀦𑀺𑀲𑁆𑀲𑀬𑁂𑀳𑀺 𑀲𑀳 𑀅𑀮𑁆𑀮𑀻𑀦𑀸𑀬𑁂𑀯 𑀕𑀦𑁆𑀥𑀭𑀲𑀸 𑀯𑀺𑀜𑁆𑀜𑀸𑀬𑀦𑁆𑀢𑀺. 𑀨𑁄𑀝𑁆𑀞𑀩𑁆𑀩𑀜𑁆𑀘 𑀪𑀽𑀢𑀢𑁆𑀢𑀬𑀭𑀽𑀧𑀁 𑀓𑀸𑀬𑀦𑀺𑀲𑁆𑀲𑀬𑁂𑀦 𑀅𑀮𑁆𑀮𑀻𑀦𑀫𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀯𑀡𑁆𑀡𑀯𑀺𑀓𑀸𑀭𑀫𑀸𑀧𑀚𑁆𑀚𑀫𑀸𑀦𑀦𑁆𑀢𑀺 𑀤𑁄𑀲𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀅𑀫𑀦𑀸𑀧𑀯𑀡𑁆𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁. 𑀳𑀤𑀬𑀗𑁆𑀕𑀢𑀪𑀸𑀯𑀦𑁆𑀢𑀺 𑀘𑀺𑀢𑁆𑀢𑀕𑀢𑀁 𑀅𑀚𑁆𑀛𑀸𑀲𑀬𑀁. 𑀧𑀓𑀸𑀲𑁂𑀢𑀻𑀢𑀺 𑀭𑀽𑀧𑀫𑀺𑀯 𑀧𑀓𑀸𑀲𑀁 𑀓𑀭𑁄𑀢𑀺, 𑀲𑀯𑀺𑀕𑁆𑀕𑀳𑀫𑀺𑀯 𑀤𑀲𑁆𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀳𑀺 𑀥𑀸𑀢𑀽𑀦𑀁 𑀧𑀓𑀸𑀲𑀦𑀢𑁆𑀣𑁄 𑀏𑀯 𑀭𑀽𑀧-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀢𑀁 𑀧𑀦 𑀭𑀽𑀧𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀓𑁆𑀔𑀼𑀫𑁆𑀳𑀺, 𑀘𑀓𑁆𑀔𑀼𑀲𑁆𑀲 𑀯𑀸 𑀧𑀝𑀺𑀳𑀦𑀦𑀁 𑀮𑀓𑁆𑀔𑀡𑀫𑁂𑀢𑀲𑁆𑀲𑀸𑀢𑀺 𑀘𑀓𑁆𑀔𑀼𑀧𑀝𑀺𑀳𑀦𑀦𑀮𑀓𑁆𑀔𑀡𑀁. 𑀏𑀯𑀁 𑀲𑁄𑀢𑀧𑀝𑀺𑀳𑀦𑀦𑀮𑀓𑁆𑀔𑀡𑀦𑁆𑀢𑀺𑀆𑀤𑀻𑀲𑀼𑀧𑀺. 𑀧𑀝𑀺𑀳𑀦𑀦𑀜𑁆𑀘𑁂𑀢𑁆𑀣 𑀯𑀺𑀲𑀬𑀯𑀺𑀲𑀬𑀻𑀦𑀁 𑀅𑀜𑁆𑀜𑀫𑀜𑁆𑀜𑀸𑀪𑀺𑀫𑀼𑀔𑀪𑀸𑀯𑁄 𑀬𑁄𑀕𑁆𑀬𑀤𑁂𑀲𑀸𑀯𑀝𑁆𑀞𑀸𑀦𑀁 𑀧𑀝𑀺𑀖𑀸𑀢𑁄 𑀯𑀺𑀬𑀸𑀢𑀺 𑀓𑀢𑁆𑀯𑀸. 𑀬𑀣𑀸 𑀧𑀝𑀺𑀖𑀸𑀢𑁂 𑀲𑀢𑀺 𑀤𑀼𑀩𑁆𑀩𑀮𑀲𑁆𑀲 𑀘𑀮𑀦𑀁 𑀳𑁄𑀢𑀺, 𑀏𑀯𑀁 𑀯𑀺𑀲𑀬𑀸𑀪𑀺𑀫𑀼𑀔𑀪𑀸𑀯𑁂 𑀲𑀢𑀺 𑀯𑀺𑀲𑀬𑀺𑀦𑁄 𑀢𑀁𑀲𑀫𑁆𑀩𑀦𑁆𑀥𑀲𑁆𑀲 𑀘 𑀯𑀢𑁆𑀣𑀼𑀭𑀽𑀧𑀲𑁆𑀲, 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀘 𑀪𑀯𑀗𑁆𑀕𑀲𑁆𑀲 𑀘𑀮𑀦𑀁 𑀳𑁄𑀢𑀺. 𑀲𑁄 𑀭𑀽𑀧𑀲𑁆𑀲 𑀘𑀓𑁆𑀔𑀼𑀫𑁆𑀳𑀺, 𑀘𑀓𑁆𑀔𑀼𑀲𑁆𑀲 𑀯𑀸 𑀭𑀽𑀧𑁂 𑀳𑁄𑀢𑀺. 𑀢𑁂𑀦𑀸𑀳 ‘‘𑀬𑀫𑁆𑀳𑀺 𑀘𑀓𑁆𑀔𑀼𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀧𑀝𑀺𑀳𑀜𑁆𑀜𑀺 𑀯𑀸, 𑀬𑀁 𑀘𑀓𑁆𑀔𑀼 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀭𑀽𑀧𑀫𑁆𑀳𑀺 𑀲𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸’’𑀢𑀺 (𑀥. 𑀲. 𑁫𑁯𑁭) 𑀘 𑀆𑀤𑀺. 𑀯𑀺𑀲𑀬𑀪𑀸𑀯𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑀸. 𑀕𑁄𑀘𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀅𑀦𑀜𑁆𑀜𑀣𑀸𑀪𑀸𑀯𑁄 𑀯𑀺𑀲𑀬𑀢𑀸, 𑀢𑀩𑁆𑀩𑀳𑀼𑀮𑀢𑀸 𑀕𑁄𑀘𑀭𑀪𑀸𑀯𑁄𑀢𑀺 𑀅𑀬𑀁 𑀯𑀺𑀲𑀬𑀕𑁄𑀘𑀭𑀸𑀦𑀁 𑀯𑀺𑀲𑁂𑀲𑁄. 𑀲𑀤𑁆𑀤𑀸𑀬𑀢𑀻𑀢𑀺 𑀉𑀤𑀸𑀳𑀭𑀻𑀬𑀢𑀺, 𑀲𑀓𑁂𑀳𑀺 𑀯𑀸 𑀧𑀘𑁆𑀘𑀬𑁂𑀳𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀁 𑀉𑀧𑀦𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸𑀦𑀁 𑀕𑀦𑁆𑀥𑀬𑀢𑀻𑀢𑀺 𑀲𑀼𑀕𑀦𑁆𑀥𑀁, 𑀤𑀼𑀕𑁆𑀕𑀦𑁆𑀥𑀦𑁆𑀢𑀺 𑀯𑀸 𑀅𑀢𑁆𑀢𑀸𑀦𑀁 𑀧𑀓𑀸𑀲𑁂𑀢𑀺. 𑀢𑁂𑀦𑀸𑀳 ‘‘𑀲𑀽𑀘𑀬𑀢𑀻’’𑀢𑀺.

𑁬𑁬𑁪. 𑀇𑀢𑁆𑀣𑀺𑀬𑀸 𑀏𑀯 𑀇𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁. 𑀬𑀣𑀸 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀼𑀭𑀺𑀲𑀲𑁆𑀲𑀧𑀺 𑀳𑁄𑀦𑁆𑀢𑀺, 𑀦𑀬𑀺𑀤𑀁 𑀢𑀣𑀸. 𑀇𑀤𑀁 𑀧𑀦 𑀦𑀺𑀬𑀫𑁂𑀦 𑀇𑀢𑁆𑀣𑀺𑀬𑀸 𑀏𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀇𑀢𑁆𑀣𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀧𑀺. 𑀇𑀢𑁆𑀣𑀺𑀬𑀸 𑀪𑀸𑀯𑁄, 𑀇𑀢𑁆𑀣𑀻𑀢𑀺 𑀪𑀯𑀢𑀺 𑀏𑀢𑁂𑀦 𑀘𑀺𑀢𑁆𑀢𑀁, 𑀅𑀪𑀺𑀥𑀸𑀦𑀁 𑀯𑀸𑀢𑀺 𑀇𑀢𑁆𑀣𑀺𑀪𑀸𑀯𑁄. 𑀧𑀝𑀺𑀲𑀦𑁆𑀥𑀺𑀲𑀫𑀼𑀝𑁆𑀞𑀺𑀢𑁄𑀢𑀺 𑀧𑀝𑀺𑀲𑀦𑁆𑀥𑀺𑀬𑀁𑀬𑁂𑀯 𑀲𑀫𑀼𑀝𑁆𑀞𑀺𑀢𑁄, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳 𑀏𑀓𑀓𑁆𑀔𑀡𑁂 𑀲𑀫𑀼𑀝𑁆𑀞𑀺𑀢𑁄. 𑀏𑀢𑁂𑀦 𑀞𑀧𑁂𑀢𑁆𑀯𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀯𑀺𑀬 𑀇𑀫𑀲𑁆𑀲 𑀅𑀧𑀸𑀢𑀼𑀪𑀸𑀯𑀫𑀸𑀳. 𑀬𑀜𑁆𑀘𑁂𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀢𑀺 𑀬𑀁 𑀧𑀦𑁂𑀢𑀁 𑀇𑀦𑁆𑀤𑁆𑀭𑀺𑀬𑀨𑀮𑀪𑀽𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺. 𑀆𑀤𑀺-𑀕𑁆𑀕𑀳𑀡𑁂𑀦 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀇𑀢𑁆𑀣𑀺𑀓𑀼𑀢𑁆𑀢𑀇𑀢𑁆𑀣𑀸𑀓𑀧𑁆𑀧𑀸𑀦𑀁 𑀲𑀗𑁆𑀕𑀳𑁄. 𑀢𑀢𑁆𑀣 𑀯𑀺𑀲𑀤𑀅𑀯𑀺𑀲𑀤𑀳𑀢𑁆𑀣𑀧𑀸𑀤𑀸𑀤𑀺𑀢𑀸 𑀲𑀡𑁆𑀞𑀸𑀦𑀁 𑀇𑀢𑁆𑀣𑀺𑀮𑀺𑀗𑁆𑀕𑀁. 𑀇𑀢𑁆𑀣𑀻𑀦𑀜𑁆𑀳𑀺 𑀳𑀢𑁆𑀣𑀧𑀸𑀤𑀕𑀻𑀯𑀸𑀉𑀭𑀆𑀤𑀺𑀲𑀡𑁆𑀞𑀸𑀦𑀁 𑀦 𑀧𑀼𑀭𑀺𑀲𑀸𑀦𑀁 𑀯𑀺𑀬 𑀳𑁄𑀢𑀺. 𑀢𑀣𑀸 𑀳𑀺 𑀢𑀸𑀲𑀁 𑀳𑁂𑀝𑁆𑀞𑀺𑀫𑀓𑀸𑀬𑁄 𑀯𑀺𑀲𑀤𑁄, 𑀉𑀧𑀭𑀺𑀫𑀓𑀸𑀬𑁄 𑀅𑀯𑀺𑀲𑀤𑁄, 𑀳𑀢𑁆𑀣𑀧𑀸𑀤𑀸 𑀔𑀼𑀤𑁆𑀤𑀓𑀸, 𑀫𑀼𑀔𑀁 𑀔𑀼𑀤𑁆𑀤𑀓𑀁, 𑀣𑀦𑀫𑀁𑀲𑀸 𑀅𑀯𑀺𑀲𑀤𑀸, 𑀢𑀸 𑀦𑀺𑀫𑁆𑀫𑀲𑁆𑀲𑀼𑀤𑀸𑀞𑀺𑀓𑀸. 𑀓𑁂𑀲𑀩𑀦𑁆𑀥𑀯𑀢𑁆𑀣𑀕𑁆𑀕𑀳𑀡𑀜𑁆𑀘 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁. 𑀤𑀳𑀭𑀓𑀸𑀮𑁂𑀧𑀺 𑀲𑀼𑀧𑁆𑀧𑀓𑀫𑀼𑀲𑀮𑀓𑀸𑀤𑀻𑀳𑀺 𑀓𑀻𑀴𑀸 𑀫𑀓𑀘𑀺𑀯𑀸𑀓𑁂𑀦 𑀲𑀼𑀢𑁆𑀢𑀓𑀦𑁆𑀢𑀦𑀦𑁆𑀢𑀺 𑀘 𑀏𑀯𑀫𑀸𑀤𑀺 𑀇𑀢𑁆𑀣𑀺𑀓𑀼𑀢𑁆𑀢𑀁, 𑀇𑀢𑁆𑀣𑀺𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀲𑀤𑀝𑁆𑀞𑀸𑀦𑀕𑀫𑀦𑀸𑀤𑀺𑀆𑀓𑀸𑀭𑁄 𑀇𑀢𑁆𑀣𑀸𑀓𑀧𑁆𑀧𑁄. 𑀧𑀼𑀭𑀺𑀲𑀫𑁆𑀧𑀺 𑀳𑀺 𑀅𑀯𑀺𑀲𑀤𑀁 𑀤𑀺𑀲𑁆𑀯𑀸 𑀫𑀸𑀢𑀼𑀕𑀸𑀫𑁄 𑀯𑀺𑀬 𑀢𑀺𑀝𑁆𑀞𑀢𑀺 𑀦𑀺𑀧𑀚𑁆𑀚𑀢𑀺 𑀦𑀺𑀲𑀻𑀤𑀢𑀺 𑀔𑀸𑀤𑀢𑀺 𑀪𑀼𑀜𑁆𑀚𑀢𑀻𑀢𑀺 𑀯𑀤𑀦𑁆𑀢𑀺. 𑀇𑀤𑀁 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀧𑀭𑀺𑀤𑀻𑀧𑀦𑀁 𑀅𑀓𑀼𑀲𑀮𑀦𑁆𑀢𑀺 𑀯𑀢𑁆𑀯𑀸 𑀅𑀜𑁆𑀜𑀣𑀸𑀧𑀺 𑀯𑀡𑁆𑀡𑁂𑀦𑁆𑀢𑀺 𑀆𑀘𑀭𑀺𑀬𑀸. 𑀓𑀣𑀁? 𑀬𑁄𑀦𑀺𑀧𑀤𑁂𑀲𑁄 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀲𑀭𑀸𑀥𑀺𑀧𑁆𑀧𑀸𑀬𑀸 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁, 𑀅𑀯𑀺𑀲𑀤𑀝𑁆𑀞𑀸𑀦𑀕𑀫𑀦𑀸𑀤𑀬𑁄 𑀇𑀢𑁆𑀣𑀺𑀓𑀼𑀢𑁆𑀢𑀁, 𑀇𑀢𑁆𑀣𑀺𑀲𑀡𑁆𑀞𑀸𑀦𑀁 𑀇𑀢𑁆𑀣𑀸𑀓𑀧𑁆𑀧𑁄𑀢𑀺. 𑀏𑀢𑁆𑀣 𑀘 𑀅𑀥𑀺𑀧𑁆𑀧𑀸𑀬𑁄 𑀦𑀸𑀫 𑀧𑀼𑀭𑀺𑀲𑀲𑁆𑀫𑀺𑀁 𑀫𑁂𑀣𑀼𑀦𑀢𑀡𑁆𑀳𑀸. 𑀲𑀸 𑀳𑀺 𑀢𑀸𑀲𑀁 𑀦𑀺𑀘𑁆𑀘𑀁 𑀩𑀮𑀯𑀢𑀭𑀸 𑀧𑀯𑀢𑁆𑀢𑀢𑀺, 𑀅𑀢𑁄 𑀲𑀸𑀧𑀺 𑀇𑀢𑁆𑀣𑀻𑀢𑀺 𑀲𑀜𑁆𑀚𑀸𑀦𑀦𑀲𑁆𑀲 𑀦𑀺𑀫𑀺𑀢𑁆𑀢𑀢𑀸𑀬 ‘‘𑀇𑀢𑁆𑀣𑀺𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘𑀸𑀧𑀺 𑀇𑀢𑁆𑀣𑀻𑀢𑀺 𑀲𑀜𑁆𑀜𑀸𑀡𑀲𑁆𑀲 𑀦𑀺𑀫𑀺𑀢𑁆𑀢𑀢𑀸𑀬 𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀫𑁆𑀧𑀺 𑀦𑀺𑀫𑀺𑀢𑁆𑀢𑁂𑀬𑁂𑀯 𑀅𑀦𑁆𑀢𑁄𑀕𑀥𑀢𑀸, 𑀢𑀣𑀸𑀧𑀺 𑀢𑁂𑀲𑀁 𑀯𑀺𑀲𑀼𑀁 𑀕𑀳𑀡𑀢𑁄 𑀲𑀭𑀸𑀥𑀺𑀧𑁆𑀧𑀸𑀬𑀸 𑀏𑀯 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀸.

𑁬𑁬𑁫. 𑀓𑀺𑀁 𑀧𑀦𑁂𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀧𑀝𑀺𑀲𑀦𑁆𑀥𑀺𑀲𑀫𑀼𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘𑁂𑀯𑀸’’𑀢𑀺𑀆𑀤𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀬𑀣𑀸𑀲𑀓𑀁 𑀓𑀫𑁆𑀫𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑀳𑀺𑀢𑁂𑀬𑁂𑀯 𑀲𑀦𑁆𑀢𑀸𑀦𑁂 𑀢𑀁𑀢𑀤𑀸𑀓𑀸𑀭𑀸 𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀺, 𑀇𑀢𑀭𑀢𑁆𑀣 𑀘 𑀦 𑀪𑀯𑀦𑁆𑀢𑀻𑀢𑀺 𑀢𑁂𑀲𑀁 𑀢𑀩𑁆𑀪𑀸𑀯𑀪𑀸𑀯𑀺𑀢𑀁 𑀉𑀧𑀸𑀤𑀸𑀬 ‘‘𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘𑁂𑀯 𑀚𑀸𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀓𑁆𑀔𑀢𑀺 ‘‘𑀇𑀢𑁆𑀣𑀺…𑀧𑁂… 𑀓𑀸𑀭𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺. 𑀈𑀤𑀺𑀲𑁂𑀦𑁂𑀯 𑀓𑀸𑀭𑀡𑀪𑀸𑀯𑀲𑀗𑁆𑀔𑀸𑀢𑁂𑀦 𑀅𑀥𑀺𑀧𑀢𑀺𑀪𑀸𑀯𑁂𑀦 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀢𑀸 𑀯𑀼𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀳𑀺𑀢𑁂 𑀲𑀦𑁆𑀢𑀸𑀦𑁂 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀆𑀓𑀸𑀭𑀭𑀽𑀧𑀧𑀘𑁆𑀘𑀬𑀸𑀦𑀁 𑀅𑀜𑁆𑀜𑀣𑀸 𑀅𑀦𑀼𑀧𑁆𑀧𑀸𑀤𑀦𑀢𑁄, 𑀦 𑀧𑀦 𑀇𑀦𑁆𑀤𑁆𑀭𑀺𑀬𑀸𑀤𑀺𑀧𑀘𑁆𑀘𑀬𑀲𑀫𑁆𑀪𑀯𑀢𑁄. 𑀢𑀣𑀸 𑀳𑁂𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀏𑀓𑀓𑀮𑀸𑀧𑀕𑀢𑀸𑀦𑀁 𑀆𑀳𑀸𑀭𑁄 𑀯𑀺𑀬 𑀓𑀮𑀸𑀧𑀦𑁆𑀢𑀭𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀫𑀦𑀼𑀧𑀸𑀮𑀓𑀁 𑀯𑀸 𑀦 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀆𑀳𑀸𑀭𑀸𑀦𑀁 𑀯𑀺𑀬 𑀇𑀫𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸, 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀢𑀸 𑀘 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀘𑁆𑀘𑀬𑀦𑁆𑀢𑀭𑀸𑀥𑀻𑀦𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺, 𑀢𑀲𑁆𑀫𑀸 𑀬𑀢𑁆𑀣𑀲𑁆𑀲 𑀆𑀥𑀺𑀧𑀘𑁆𑀘𑀁, 𑀢𑀁𑀲𑀤𑀺𑀲𑁂𑀲𑀼 𑀫𑀢𑀘𑀺𑀢𑁆𑀢𑀓𑀢𑀭𑀽𑀧𑁂𑀲𑀼𑀧𑀺 𑀢𑀁𑀲𑀡𑁆𑀞𑀸𑀦𑀢𑀸 𑀤𑀺𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦𑁂𑀢𑁂 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀚𑀸𑀬𑀦𑁆𑀢𑀸𑀧𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀦 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀧𑀯𑀢𑁆𑀢𑁂𑀬𑁂𑀯 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀆𑀳 ‘‘𑀧𑀯𑀢𑁆𑀢𑁂…𑀧𑁂… 𑀧𑀝𑀺𑀲𑀦𑁆𑀥𑀺𑀬’’𑀦𑁆𑀢𑀺.

𑁬𑁬𑁬-𑁭. 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀸𑀦𑀁 𑀧𑀦 𑀓𑀺𑀜𑁆𑀘𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑁂𑀦 𑀲𑀳 𑀧𑀝𑀺𑀲𑀦𑁆𑀥𑀺𑀬𑀫𑁂𑀯 𑀦𑀺𑀩𑁆𑀩𑀢𑁆𑀢𑀢𑀺. 𑀦 𑀘𑀸𑀢𑀺 𑀘-𑀓𑀸𑀭𑁄 𑀯𑀘𑀦𑀻𑀬𑀦𑁆𑀢𑀭𑀲𑀫𑀼𑀘𑁆𑀘𑀬𑁂. ‘‘𑀓𑀺𑀜𑁆𑀘𑀸’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀮𑀺𑀗𑁆𑀕𑀸𑀤𑀺𑀆𑀓𑀸𑀭𑁂𑀲𑀼 𑀭𑀽𑀧𑁂𑀲𑀼 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁, 𑀢𑀲𑁆𑀫𑀸 𑀆𑀳 ‘‘𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀬𑁄 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀦𑁆𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 𑀢𑀢𑁄 𑀅𑀜𑁆𑀜𑀸𑀦𑀺 𑀬𑀣𑀸𑀬𑁄𑀕𑀁 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀘𑁂𑀯 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀘, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦 𑀯𑀸’’𑀢𑀺. 𑀬𑀣𑀸𑀯𑀼𑀢𑁆𑀢𑁄 𑀧𑀧𑀜𑁆𑀘𑁄 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀧𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄𑀢𑀺 𑀅𑀢𑀺𑀤𑁂𑀲𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀏𑀲𑁂𑀯𑀸’’𑀢𑀺𑀆𑀤𑀺. 𑀲𑁂𑀲𑁂𑀧𑀻𑀢𑀺 𑀏𑀢𑁆𑀢𑀓𑁂𑀬𑁂𑀯 𑀯𑀼𑀢𑁆𑀢𑁂 𑀇𑀢𑁄 𑀲𑁂𑀲𑁂𑀲𑀼 𑀲𑀩𑁆𑀩𑁂𑀲𑀼𑀧𑀻𑀢𑀺 𑀓𑀤𑀸𑀘𑀺 𑀓𑁄𑀘𑀺 𑀘𑀺𑀦𑁆𑀢𑁂𑀬𑁆𑀬𑀸𑀢𑀺 𑀆𑀳 ‘‘𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂’’𑀢𑀺. 𑀧𑀞𑀫𑀓𑀧𑁆𑀧𑀸𑀦𑀦𑁆𑀢𑀺 𑀧𑀞𑀫𑀓𑀧𑁆𑀧𑀺𑀓𑀦𑀭𑀸𑀦𑀁. 𑀢𑁂𑀲𑀜𑁆𑀳𑀺 𑀆𑀪𑀲𑁆𑀲𑀭𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸𑀦𑀁 𑀤𑀻𑀖𑀲𑁆𑀲 𑀓𑀸𑀮𑀲𑁆𑀲 𑀅𑀘𑁆𑀘𑀬𑁂𑀦 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀢𑀁 𑀫𑀼𑀢𑁆𑀢𑀓𑀭𑀻𑀲𑁂𑀲𑀼 𑀲𑀜𑁆𑀚𑀸𑀢𑁂𑀲𑀼 𑀢𑁂𑀲𑀁 𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀯𑀡𑀫𑀼𑀔𑀸𑀦𑀺 𑀪𑀺𑀚𑁆𑀚𑀦𑁆𑀢𑀺, 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀪𑀸𑀯𑁄, 𑀇𑀢𑁆𑀣𑀺𑀬𑀸 𑀘 𑀇𑀢𑁆𑀣𑀺𑀪𑀸𑀯𑁄 𑀧𑀸𑀢𑀼𑀭𑀳𑁄𑀲𑀺. 𑀢𑀣𑀸 𑀳𑀺 𑀧𑀼𑀭𑀺𑀫𑀢𑁆𑀢𑀪𑀸𑀯𑁂𑀲𑀼 𑀧𑀯𑀢𑁆𑀢𑀉𑀧𑀘𑀸𑀭𑀛𑀸𑀦𑀸𑀦𑀼𑀪𑀸𑀯𑁂𑀦 𑀬𑀸𑀯 𑀲𑀢𑁆𑀢𑀲𑀦𑁆𑀢𑀸𑀦𑁂 𑀓𑀸𑀫𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑀯𑁂𑀕𑁄 𑀦 𑀧𑀝𑀺𑀧𑀲𑁆𑀲𑀫𑁆𑀪𑀢𑀺, 𑀦 𑀢𑀸𑀯 𑀩𑀮𑀯𑀓𑀸𑀫𑀭𑀸𑀕𑀽𑀧𑀦𑀺𑀲𑁆𑀲𑀬𑀸𑀦𑀺 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁. 𑀬𑀤𑀸 𑀧𑀦𑀲𑁆𑀲 𑀯𑀺𑀘𑁆𑀙𑀺𑀦𑁆𑀦𑀢𑀸𑀬 𑀩𑀮𑀯𑀓𑀸𑀫𑀭𑀸𑀕𑁄 𑀮𑀤𑁆𑀥𑀸𑀯𑀲𑀭𑁄 𑀅𑀳𑁄𑀲𑀺, 𑀢𑀤𑀸 𑀢𑀤𑀽𑀧𑀦𑀺𑀲𑁆𑀲𑀬𑀸𑀦𑀺 𑀢𑀸𑀦𑀺 𑀲𑀢𑁆𑀢𑀸𑀦𑀁 𑀲𑀦𑁆𑀢𑀸𑀦𑁂 𑀲𑀜𑁆𑀚𑀸𑀬𑀦𑁆𑀢𑀺.

𑁬𑁬𑁮. 𑀧𑀭𑀢𑁄𑀢𑀺 𑀧𑀞𑀫𑀓𑀧𑁆𑀧𑀢𑁄 𑀅𑀧𑀭𑀪𑀸𑀕𑁂. 𑀧𑀯𑀢𑁆𑀢𑁂…𑀧𑁂… 𑀧𑀭𑀺𑀯𑀢𑁆𑀢𑀢𑀻𑀢𑀺 𑀬𑀣𑀸 𑀢𑀁 𑀲𑁄𑀭𑁂𑀬𑁆𑀬𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀺-𑀲𑀤𑁆𑀤𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑀸𑀬𑀁 𑀯𑀺𑀦𑀻𑀢𑀯𑀢𑁆𑀣𑀼𑀧𑀸𑀴𑀺𑀬𑀁 𑀆𑀕𑀢𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀼𑀦𑀺𑀬𑀸 𑀯𑀺𑀬 𑀘 𑀧𑀝𑀺𑀲𑀦𑁆𑀥𑀺𑀬𑀁 𑀲𑀫𑀼𑀝𑁆𑀞𑀺𑀢𑀲𑁆𑀲𑀧𑀺 𑀧𑀯𑀢𑁆𑀢𑁂 𑀧𑀭𑀺𑀯𑀢𑁆𑀢𑀦𑀁 𑀤𑀻𑀧𑁂𑀢𑀺. 𑀬𑀣𑀸𑀳 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁 𑀳𑁄𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁬𑁯).

𑀬𑀲𑁆𑀲 𑀧𑀦 𑀧𑀝𑀺𑀲𑀦𑁆𑀥𑀺𑀬𑀁 𑀤𑁆𑀯𑀻𑀲𑀼 𑀏𑀓𑀫𑁆𑀧𑀺 𑀦 𑀲𑀫𑀼𑀝𑁆𑀞𑀺𑀢𑀁, 𑀲𑁄 𑀅𑀪𑀸𑀯𑀓𑁄 𑀦𑀸𑀫, 𑀢𑀲𑁆𑀲 𑀧𑀯𑀢𑁆𑀢𑀺𑀬𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁬𑁬𑁯. 𑀓𑀺𑀁 𑀧𑀦𑁂𑀢𑀲𑁆𑀲 𑀉𑀪𑀬𑀲𑁆𑀲𑀧𑀺 𑀦𑀺𑀩𑁆𑀩𑀢𑁆𑀢𑀺𑀬𑀸, 𑀯𑀺𑀦𑀸𑀲𑀦𑀲𑁆𑀲 𑀘 𑀓𑀸𑀭𑀡𑀁, 𑀬𑀢𑁄 𑀇𑀤𑀁 𑀲𑀫𑀼𑀝𑁆𑀞𑀸𑀢𑀺, 𑀧𑀭𑀺𑀯𑀢𑁆𑀢𑀢𑀻𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀇𑀫𑀁 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀫𑀳𑀢𑀸 𑀧𑀸𑀧𑀓𑀫𑁆𑀫𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀫𑀳𑀢𑀸𑀢𑀺 𑀧𑀭𑀤𑀸𑀭𑀺𑀓𑀓𑀫𑁆𑀫𑀸𑀤𑀺𑀦𑀸 𑀫𑀳𑀸𑀩𑀮𑁂𑀦. 𑀧𑀸𑀧𑀓𑀫𑁆𑀫𑁂𑀦 𑀉𑀧𑀦𑀺𑀲𑁆𑀲𑀬𑀪𑀽𑀢𑁂𑀦. 𑀫𑀳𑀢𑀸 𑀓𑀼𑀲𑀮𑁂𑀦𑁂𑀯𑀸𑀢𑀺 𑀇𑀤𑀁 𑀲𑀼𑀕𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀼𑀕𑁆𑀕𑀢𑀺𑀬𑀁 𑀧𑀦 𑀉𑀪𑀬𑀫𑁆𑀧𑀺 𑀅𑀓𑀼𑀲𑀮𑀓𑀫𑁆𑀫𑁂𑀦𑁂𑀯 𑀚𑀸𑀬𑀢𑀺.

𑁬𑁭𑁦. 𑀇𑀦𑁆𑀤𑁆𑀭𑀺𑀬𑁂 𑀯𑀺𑀦𑀝𑁆𑀞𑁂 𑀏𑀓𑀦𑁆𑀢𑁂𑀦𑁂𑀯 𑀮𑀺𑀗𑁆𑀕𑀫𑁆𑀧𑀺 𑀯𑀺𑀦𑀲𑁆𑀲𑀢𑁂𑀯𑀸𑀢𑀺 𑀆𑀳 ‘‘𑀇𑀢𑁆𑀣𑀺𑀮𑀺𑀗𑁆𑀕𑀁 𑀯𑀺𑀦𑀲𑁆𑀲𑀢𑀻’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄 𑁋 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀢𑁆𑀢𑀫𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀳𑀻𑀦𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀫𑀳𑀦𑁆𑀢𑁂𑀦 𑀅𑀓𑀼𑀲𑀮𑁂𑀦 𑀓𑀫𑁆𑀫𑁂𑀦 𑀳𑁄𑀢𑀺, 𑀲𑀫𑀼𑀝𑁆𑀞𑀸𑀦𑀁 𑀫𑀳𑀦𑁆𑀢𑁂𑀦 𑀓𑀼𑀲𑀮𑀓𑀫𑁆𑀫𑁂𑀦, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀤𑀼𑀩𑁆𑀩𑀮𑀸𑀓𑀼𑀲𑀮𑁂𑀦, 𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀤𑀼𑀩𑁆𑀩𑀮𑀓𑀼𑀲𑀮𑁂𑀦, 𑀤𑀼𑀕𑁆𑀕𑀢𑀺𑀬𑀁 𑀧𑀦 𑀉𑀪𑀬𑀲𑁆𑀲𑀸𑀧𑀺 𑀅𑀦𑁆𑀢𑀭𑀥𑀸𑀦𑀁, 𑀲𑀫𑀼𑀝𑁆𑀞𑀸𑀦𑀜𑁆𑀘 𑀅𑀓𑀼𑀲𑀮𑁂𑀦𑁂𑀯 𑀳𑁄𑀢𑀻𑀢𑀺. 𑀬𑀤𑀺 𑀲𑀼𑀕𑀢𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀓𑀼𑀲𑀮𑁂𑀦𑁂𑀯 𑀦𑀺𑀩𑁆𑀩𑀢𑁆𑀢𑀢𑀺, 𑀓𑀣𑀜𑁆𑀘𑀭𑀳𑀺 ‘‘𑀧𑀭𑀤𑀸𑀭𑀺𑀓𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑁂𑀦𑁂𑀯 𑀧𑀸𑀧𑀓𑀫𑁆𑀫𑁂𑀦 𑀧𑀜𑁆𑀘𑀲𑀢𑀓𑁆𑀔𑀢𑁆𑀢𑀼𑀁 𑀫𑀦𑀼𑀲𑁆𑀲𑀮𑁄𑀓𑁂 𑀇𑀢𑁆𑀣𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺𑀆𑀤𑀺𑀯𑀘𑀦𑀦𑁆𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄 𑀦𑀺𑀲𑁆𑀲𑀦𑁆𑀤𑀨𑀮𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀢𑀣𑀸 𑀳𑀺 𑀧𑀝𑀺𑀲𑀦𑁆𑀥𑀺𑀬𑀁 𑀢𑀸𑀯 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑀫𑁆𑀧𑀺 𑀓𑀫𑁆𑀫𑀁 𑀓𑀤𑀸𑀘𑀺 𑀧𑀭𑀤𑀸𑀭𑀺𑀓𑀸𑀤𑀺𑀦𑀸 𑀩𑀮𑀯𑀧𑀸𑀧𑀓𑀫𑁆𑀫𑁂𑀦 𑀧𑀝𑀺𑀩𑀸𑀳𑀺𑀢𑀲𑀸𑀫𑀢𑁆𑀣𑀺𑀬𑀁 𑀅𑀲𑁆𑀲, 𑀢𑀤𑀸 𑀅𑀢𑁆𑀢𑀦𑁄 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀦𑀺𑀩𑁆𑀩𑀢𑁆𑀢𑀦𑁂 𑀅𑀲𑀫𑀢𑁆𑀣𑀢𑀸𑀬 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀫𑁂𑀯 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀧𑀯𑀢𑁆𑀢𑀺𑀬𑀁 𑀧𑀦 𑀅𑀢𑁆𑀢𑀦𑁄 𑀩𑀮𑀯𑀪𑀸𑀯𑁂𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀽𑀧𑀦𑀺𑀲𑁆𑀲𑀬𑀁 𑀧𑀭𑀤𑀸𑀭𑀺𑀓𑀫𑀓𑀼𑀲𑀮𑀓𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀁 𑀓𑀤𑀸𑀘𑀺 𑀮𑀤𑁆𑀥𑀲𑀸𑀫𑀕𑁆𑀕𑀺𑀢𑀸𑀲𑀜𑁆𑀚𑀸𑀢𑀩𑀮𑀯𑀺𑀲𑁂𑀲𑁂𑀦 𑀧𑀭𑀤𑀸𑀭𑀺𑀓𑀸𑀤𑀺𑀦𑀸 𑀓𑀫𑁆𑀫𑁂𑀦 𑀧𑀝𑀺𑀩𑀸𑀳𑀺𑀢𑀲𑀸𑀫𑀢𑁆𑀣𑀺𑀬𑀁 𑀪𑀯𑁂𑀬𑁆𑀬, 𑀢𑀤𑀸 𑀅𑀢𑁆𑀢𑀦𑁄 𑀤𑀼𑀩𑁆𑀩𑀮𑀢𑀸𑀬 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀫𑁂𑀯 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀏𑀯𑀁 𑀧𑀭𑀤𑀸𑀭𑀺𑀓𑀸𑀤𑀺𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑁂𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁄 𑀢𑀁 𑀢𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺.

𑁬𑁭𑁧-𑁨. 𑀬𑀤𑀸 𑀧𑀦 𑀢𑀁 𑀓𑀫𑁆𑀫𑀁 𑀧𑀼𑀦 𑀲𑀸𑀫𑀕𑁆𑀕𑀺𑀧𑀝𑀺𑀮𑀸𑀪𑀢𑁄, 𑀧𑀭𑀺𑀓𑁆𑀔𑀻𑀡𑀧𑀸𑀧𑀓𑀫𑁆𑀫𑀢𑀸𑀬 𑀯𑀸 𑀩𑀮𑀯𑀧𑁆𑀧𑀢𑁆𑀢𑀁 𑀅𑀪𑀯𑀺𑀲𑁆𑀲, 𑀢𑀤𑀸 𑀤𑀺𑀦𑁆𑀦𑀯𑁂𑀥𑀁 𑀯𑀺𑀬 𑀭𑀼𑀓𑁆𑀔𑀁 𑀢𑀤𑀧𑀕𑀫𑁂 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀦 𑀅𑀢𑁆𑀢𑀦𑁄 𑀓𑀸𑀭𑀡𑀸𑀪𑀸𑀯𑀢𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀉𑀪𑀬𑀲𑁆𑀲 𑀧𑀦 𑀦𑀺𑀩𑁆𑀩𑀢𑁆𑀢𑀺𑀬𑀫𑁆𑀧𑀺 𑀯𑀺𑀲𑀤𑀺𑀲𑀺𑀦𑁆𑀤𑁆𑀭𑀺𑀬𑀦𑀺𑀩𑁆𑀩𑀢𑁆𑀢𑀦𑀢𑁄 𑀧𑀼𑀭𑁂 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑀸𑀮𑀫𑀼𑀧𑀸𑀤𑀸𑀬 𑀢𑀁𑀢𑀁𑀲𑀫𑀼𑀝𑁆𑀞𑀸𑀧𑀓𑀓𑀫𑁆𑀫𑀁 𑀢𑀁 𑀢𑀁 𑀇𑀦𑁆𑀤𑁆𑀭𑀺𑀬𑀁 𑀦 𑀚𑀦𑁂𑀢𑀺. 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑁂𑀦 𑀲𑀳 𑀉𑀧𑁆𑀧𑀦𑁆𑀦𑀁 𑀯𑀺𑀲𑀤𑀺𑀲𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑀺𑀫𑀘𑀺𑀢𑁆𑀢𑁂𑀦 𑀲𑀳 𑀦𑀺𑀭𑀼𑀚𑁆𑀛𑀢𑀺. 𑀬𑀤𑀺 𑀳𑀺 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁄 𑀧𑀭𑀫𑁆𑀧𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀇𑀢𑀭𑀁 𑀦𑀼𑀧𑁆𑀧𑀚𑁆𑀚𑀢𑀺 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀤𑁆𑀯𑀺𑀦𑁆𑀦𑀁 𑀲𑀳𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀺𑀘𑁆𑀙𑀺𑀢𑀢𑁆𑀢𑀸. 𑀢𑁂𑀦𑁂𑀯 𑀳𑀺 ‘‘𑀬𑀲𑁆𑀲 𑀯𑀸 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁮) 𑀇𑀫𑀲𑁆𑀫𑀺𑀁 𑀧𑀜𑁆𑀳𑁂 ‘‘𑀦𑁄’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁮) 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀓𑁆𑀔𑀢𑀺 ‘‘𑀉𑀪𑀢𑁄𑀩𑁆𑀬𑀜𑁆𑀚𑀦𑀲𑁆𑀲𑀸𑀧𑀻’’𑀢𑀺𑀆𑀤𑀺. 𑀏𑀓𑀲𑁆𑀫𑀺𑀜𑁆𑀘 𑀦𑀺𑀭𑀼𑀤𑁆𑀥𑁂 𑀢𑀧𑁆𑀧𑀝𑀺𑀩𑀤𑁆𑀥𑀸𑀦𑀺 𑀮𑀺𑀗𑁆𑀕𑀸𑀤𑀻𑀦𑀺 𑀓𑀢𑀺𑀧𑀬𑀤𑀺𑀯𑀲𑁂𑀳𑀺 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀼 𑀦𑀺𑀭𑀼𑀤𑁆𑀥𑁂𑀲𑀼 𑀇𑀢𑀭𑀸𑀦𑀺 𑀅𑀦𑀼𑀓𑁆𑀓𑀫𑁂𑀦 𑀚𑀸𑀬𑀦𑁆𑀢𑀻𑀢𑀺 𑀆𑀘𑀭𑀺𑀬𑀸. 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀓𑀓𑀫𑁆𑀫𑀢𑁄, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀓𑀓𑀫𑁆𑀫𑀢𑁄 𑀯𑀸𑀢𑀺 𑀉𑀪𑀢𑁄 𑀤𑀼𑀯𑀺𑀥𑀁 𑀩𑁆𑀬𑀜𑁆𑀚𑀦𑀫𑀲𑁆𑀲𑀸𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑁄. 𑀢𑀲𑁆𑀲𑀸𑀧𑀻𑀢𑀺 𑀬𑀲𑁆𑀲 𑀤𑀼𑀯𑀺𑀥𑀁 𑀩𑁆𑀬𑀜𑁆𑀚𑀦𑀫𑀢𑁆𑀣𑀺, 𑀢𑀲𑁆𑀲𑀸𑀧𑀺 𑀏𑀓𑀫𑁂𑀯 𑀇𑀦𑁆𑀤𑁆𑀭𑀺𑀬𑀁 𑀲𑀺𑀬𑀸, 𑀓𑀺𑀁 𑀧𑀦 𑀇𑀢𑀭𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺.

𑀦𑀦𑀼 𑀘 𑀤𑀼𑀯𑀺𑀥𑁂 𑀩𑁆𑀬𑀜𑁆𑀚𑀦𑁂 𑀲𑀢𑀺 𑀇𑀦𑁆𑀤𑁆𑀭𑀺𑀬𑀤𑁆𑀯𑀬𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀁, 𑀩𑁆𑀬𑀜𑁆𑀚𑀦𑀜𑁆𑀳𑀺 𑀢𑀁 𑀢𑀁 𑀇𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀚𑀸𑀬𑀢𑀻𑀢𑀺? 𑀲𑀘𑁆𑀘𑀁 𑀚𑀸𑀬𑀢𑀺, 𑀏𑀢𑁆𑀣𑀸𑀧𑀺 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀫𑁂𑀯 𑀬𑀸𑀯𑀚𑀻𑀯𑀁 𑀧𑀯𑀢𑁆𑀢𑀢𑀺, 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀫𑁂𑀯, 𑀇𑀢𑀭𑀁 𑀧𑀦 𑀦 𑀢𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀳𑁂𑀢𑀼𑀢𑁄 𑀚𑀸𑀬𑀢𑀺. 𑀢𑀁 𑀧𑀦 𑀬𑁂𑀦 𑀓𑀸𑀭𑀡𑁂𑀦 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀲𑀦𑁆𑀢𑁂’’𑀢𑀺 𑀅𑀦𑀼𑀬𑁄𑀕𑀁 𑀓𑀢𑁆𑀯𑀸 ‘‘𑀦 𑀘𑀸𑀪𑀸𑀯𑁄’’𑀢𑀺𑀆𑀤𑀺𑀦𑀸 𑀲𑁄𑀥𑀦𑀁 𑀢𑀼 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀇𑀦𑁆𑀤𑁆𑀭𑀺𑀬𑁂 𑀲𑀢𑀺. 𑀅𑀪𑀸𑀯𑁄 𑀘𑀸𑀢𑀺 𑀬𑀁 𑀧𑀝𑀺𑀘𑁆𑀘 𑀚𑀸𑀬𑀢𑀺, 𑀢𑀲𑁆𑀲 𑀅𑀪𑀸𑀯𑀢𑁄 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀲𑁆𑀲 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑀸𑀪𑀸𑀯𑁄, 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀲𑁆𑀲 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀸𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀦 𑀘𑀸𑀪𑀸𑀯𑁄 𑀲𑀺𑀬𑀸𑀢𑀺 𑀦𑁂𑀯 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀲𑁆𑀲 𑀅𑀪𑀸𑀯𑁄 𑀲𑀺𑀬𑀸. 𑀦 𑀢𑀁 𑀩𑁆𑀬𑀜𑁆𑀚𑀦𑀓𑀸𑀭𑀡𑀦𑁆𑀢𑀺 𑀢𑀁 𑀇𑀦𑁆𑀤𑁆𑀭𑀺𑀬𑀁 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀓𑀸𑀭𑀡𑀁 𑀦 𑀳𑁄𑀢𑀺. 𑀓𑀲𑁆𑀫𑀸? 𑀲𑀤𑀸 𑀅𑀪𑀸𑀯𑀢𑁄. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀲𑁆𑀲 𑀳𑀺 𑀬𑀤𑀸 𑀇𑀢𑁆𑀣𑀺𑀬𑀸 𑀭𑀸𑀕𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑀁 𑀧𑀝𑀺𑀘𑁆𑀙𑀦𑁆𑀦𑀁 𑀕𑀼𑀴𑁆𑀳𑀁 𑀳𑁄𑀢𑀺, 𑀢𑀣𑀸 𑀇𑀢𑀭𑀲𑁆𑀲 𑀇𑀢𑀭𑀁. 𑀬𑀤𑀺 𑀘 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀁 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀓𑀸𑀭𑀡𑀁 𑀪𑀯𑁂𑀬𑁆𑀬, 𑀲𑀤𑀸𑀧𑀺 𑀩𑁆𑀬𑀜𑁆𑀚𑀦𑀤𑁆𑀯𑀬𑀁 𑀢𑀺𑀝𑁆𑀞𑁂𑀬𑁆𑀬, 𑀦 𑀧𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀦 𑀢𑀲𑁆𑀲 𑀢𑀁 𑀩𑁆𑀬𑀜𑁆𑀚𑀦𑀓𑀸𑀭𑀡’’𑀦𑁆𑀢𑀺. 𑀓𑀺𑀜𑁆𑀘𑀭𑀳𑀺 𑀓𑀸𑀭𑀡𑀦𑁆𑀢𑀺 𑀘𑁂? 𑀆𑀳 ‘‘𑀢𑀲𑁆𑀲𑀸…𑀧𑁂… 𑀓𑀸𑀭𑀡’’𑀦𑁆𑀢𑀺. 𑀢𑀢𑁆𑀣 𑀓𑀫𑁆𑀫𑀲𑀳𑀸𑀬𑀦𑁆𑀢𑀺 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀲𑁆𑀲 𑀇𑀦𑁆𑀤𑁆𑀭𑀺𑀬𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀲𑁆𑀲 𑀲𑀳𑀸𑀬𑀁. 𑀭𑀸𑀕𑀘𑀺𑀢𑁆𑀢𑀦𑁆𑀢𑀺 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀫𑀺𑀁, 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀺𑀬𑀁 𑀯𑀸 𑀉𑀧𑁆𑀧𑀦𑁆𑀦𑀁 𑀫𑁂𑀣𑀼𑀦𑀭𑀸𑀕𑀘𑀺𑀢𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀉𑀧𑁆𑀧𑀦𑁆𑀦𑁂 𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁂 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺. 𑀬𑀲𑁆𑀫𑀸 𑀧𑀦𑀺𑀫𑀲𑁆𑀲 𑀏𑀓𑀫𑁂𑀯 𑀇𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀲𑀬𑀫𑁆𑀧𑀺 𑀧𑀭𑀁 𑀉𑀤𑁆𑀤𑀺𑀲𑁆𑀲 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀭𑀫𑁆𑀧𑀺 𑀕𑀡𑁆𑀳𑀸𑀧𑁂𑀢𑀺. 𑀲𑁄 𑀳𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀯𑀦𑁆𑀢𑀢𑀸𑀬 𑀲𑀬𑀁 𑀕𑀡𑁆𑀳𑀸𑀢𑀺, 𑀧𑀭𑁂𑀲𑀼 𑀉𑀧𑀓𑁆𑀓𑀫𑀓𑀭𑀡𑀢𑁄 𑀧𑀭𑀁 𑀕𑀡𑁆𑀳𑀸𑀧𑁂𑀢𑀺. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀭𑁂𑀲𑀼 𑀉𑀧𑀓𑁆𑀓𑀫𑀓𑀭𑀡𑀢𑁄 𑀧𑀭𑀁 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑀺, 𑀲𑀬𑀁 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀯𑀦𑁆𑀢𑀢𑀸𑀬 𑀕𑀩𑁆𑀪𑀁 𑀦 𑀕𑀡𑁆𑀳𑀸𑀢𑀺.

𑀬𑀲𑁆𑀫𑀸 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑁂 𑀲𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀬𑁄 𑀳𑁄𑀦𑁆𑀢𑀺, 𑀢𑁂𑀲𑀼 𑀘 𑀲𑀦𑁆𑀢𑁂𑀲𑀼 𑀇𑀢𑁆𑀣𑀻𑀢𑀺 𑀧𑀓𑀸𑀲𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀢𑀲𑁆𑀲 𑀧𑀓𑀸𑀲𑀦𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀇𑀢𑁆𑀣𑀻𑀢𑀺 𑀧𑀓𑀸𑀲𑀦𑀭𑀲’’𑀦𑁆𑀢𑀺. 𑀤𑀼𑀯𑀺𑀥𑀫𑁆𑀧𑀺 𑀧𑀦𑁂𑀢𑀁 𑀇𑀦𑁆𑀤𑁆𑀭𑀺𑀬𑀁 𑀓𑀸𑀬𑀧𑀲𑀸𑀤𑁄 𑀯𑀺𑀬 𑀲𑀓𑀮𑀲𑀭𑀻𑀭𑀩𑁆𑀬𑀸𑀧𑀓𑀫𑁂𑀯, 𑀦 𑀘𑀲𑁆𑀲 𑀓𑀸𑀬𑀧𑀲𑀸𑀤𑁂𑀦 𑀲𑀗𑁆𑀓𑀭𑁄 𑀮𑀓𑁆𑀔𑀡𑀪𑁂𑀤𑀢𑁄, 𑀦𑀺𑀲𑁆𑀲𑀬𑀪𑁂𑀤𑀢𑁄 𑀘.

𑁬𑁭𑁩. 𑀲𑀳𑀚𑀭𑀽𑀧𑀧𑀭𑀺𑀧𑀸𑀮𑀦𑀮𑀓𑁆𑀔𑀡𑀦𑁆𑀢𑀺 𑀬𑀣𑀸 𑀅𑀢𑁆𑀢𑀦𑀸 𑀲𑀳𑀚𑀸𑀢𑀭𑀽𑀧𑀸𑀦𑀺 𑀢𑀻𑀲𑀼 𑀔𑀡𑁂𑀲𑀼 𑀧𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀏𑀓𑀦𑁆𑀢𑀓𑀫𑁆𑀫𑀚𑀢𑁆𑀢𑀸 𑀲𑀳𑀚𑀕𑁆𑀕𑀳𑀡𑁂𑀦𑁂𑀯 𑀅𑀦𑀼𑀧𑀸𑀮𑁂𑀢𑀩𑁆𑀩𑀸𑀦𑀫𑁆𑀧𑀺 𑀓𑀫𑁆𑀫𑀚𑀪𑀸𑀯𑁄𑀯 𑀲𑀺𑀤𑁆𑀥𑁄𑀢𑀺 𑀓𑀫𑁆𑀫𑀚𑀕𑁆𑀕𑀳𑀡𑀁 𑀦 𑀓𑀢𑀁. 𑀬𑀣𑀸𑀲𑀓𑀁 𑀔𑀡𑀢𑁆𑀢𑀬𑀫𑀢𑁆𑀢𑀝𑁆𑀞𑀸𑀬𑀻𑀦𑀫𑁆𑀧𑀺 𑀓𑀫𑁆𑀫𑀚𑀭𑀽𑀧𑀸𑀦𑀁 𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦𑁂𑀯 𑀢𑀁 𑀅𑀦𑀼𑀧𑀸𑀮𑀓𑀁. 𑀢𑁂𑀦𑀸𑀳 ‘‘𑀢𑁂𑀲𑀁 𑀧𑀯𑀢𑁆𑀢𑀦𑀭𑀲’’𑀦𑁆𑀢𑀺. 𑀧𑀯𑀢𑁆𑀢𑀦𑀜𑁆𑀘𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀢𑁂𑀲𑀁 𑀬𑀸𑀧𑀦𑀁 𑀞𑀧𑀦𑀁 𑀞𑀺𑀢𑀺𑀳𑁂𑀢𑀼𑀓𑀢𑀸. 𑀦 𑀳𑀺 𑀓𑀫𑁆𑀫𑀚𑀸𑀦𑀁 𑀓𑀫𑁆𑀫𑀫𑁂𑀯 𑀞𑀺𑀢𑀺𑀳𑁂𑀢𑀼 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺 𑀆𑀳𑀸𑀭𑀚𑀸𑀤𑀻𑀦𑀁 𑀆𑀳𑀸𑀭𑀸𑀤𑀺 𑀯𑀺𑀬. 𑀓𑀺𑀁 𑀓𑀸𑀭𑀡𑀁? 𑀢𑀗𑁆𑀔𑀡𑀸𑀪𑀸𑀯𑀢𑁄. 𑀓𑀫𑁆𑀫𑀜𑁆𑀳𑀺 𑀦𑀺𑀭𑀼𑀤𑁆𑀥𑀁 𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀢𑁄 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀺 𑀫𑀢𑀧𑀺𑀢𑀺𑀓𑀸 𑀯𑀺𑀬 𑀧𑀼𑀢𑁆𑀢𑀸 𑀘𑀽𑀴𑀧𑀺𑀢𑀼𑀆𑀤𑀺𑀦𑀺𑀲𑁆𑀲𑀬𑁂𑀦 𑀅𑀜𑁆𑀜𑀦𑀺𑀲𑁆𑀲𑀬𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀅𑀜𑁆𑀜𑀜𑁆𑀘 𑀢𑁂𑀲𑀁 𑀬𑀸𑀧𑀦𑀲𑀫𑀢𑁆𑀣𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦𑀸𑀢𑀺 𑀢𑀤𑁂𑀯 𑀢𑁂𑀲𑀁 𑀧𑀯𑀢𑁆𑀢𑀦𑀭𑀲𑀁. 𑀆𑀳𑀸𑀭𑀚𑀸𑀤𑀬𑁄 𑀧𑀦 𑀥𑀭𑀫𑀸𑀦𑀓𑀧𑀺𑀢𑀺𑀓𑀸 𑀯𑀺𑀬 𑀧𑀼𑀢𑁆𑀢𑀸 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑀸 𑀲𑀓𑀲𑀓𑀧𑀘𑁆𑀘𑀬𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀆𑀳𑀸𑀭𑀸𑀤𑀬𑁄 𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀲𑀁 𑀞𑀺𑀢𑀺𑀧𑀯𑀢𑁆𑀢𑀺𑀬𑀸𑀯 𑀢𑀺𑀝𑁆𑀞𑀦𑁆𑀢𑀺, 𑀢𑀢𑁄 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀺𑀭𑀧𑁂𑀓𑁆𑀔𑀸𑀦𑀺. 𑀲𑁂𑀲𑀸𑀦𑀺𑀧𑀺 𑀢𑀁𑀢𑀁𑀧𑀘𑁆𑀘𑀬𑀯𑀲𑁂𑀦𑁂𑀯 𑀢𑀺𑀝𑁆𑀞𑀦𑁆𑀢𑀻𑀢𑀺 𑀦 𑀅𑀜𑁆𑀜𑀁 𑀞𑀧𑀦𑀓𑀸𑀭𑀡𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀘𑁂𑀢𑀁 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬𑁂𑀯 𑀅𑀦𑀼𑀧𑀸𑀮𑀓𑀁. 𑀬𑀸𑀧𑁂𑀢𑀩𑁆𑀩𑀸𑀦𑀺 𑀧𑀯𑀢𑁆𑀢𑁂𑀢𑀩𑁆𑀩𑀸𑀦𑀺 𑀲𑀳𑀚𑀸𑀢𑀪𑀽𑀢𑀸𑀦𑀺 𑀧𑀤𑀝𑁆𑀞𑀸𑀦𑀫𑁂𑀢𑀲𑁆𑀲𑀸𑀢𑀺 𑀬𑀸𑀧𑁂𑀢𑀩𑁆𑀩𑀪𑀽𑀢𑀧𑀤𑀝𑁆𑀞𑀸𑀦𑀁.

𑁬𑁭𑁪. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀞𑀧𑁂𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀅𑀯𑀲𑁂𑀲𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑁂𑀦𑀸𑀳 ‘‘𑀧𑀜𑁆𑀘𑀯𑁄𑀓𑀸𑀭𑁂’’𑀢𑀺. 𑀧𑀜𑁆𑀘𑀯𑁄𑀓𑀸𑀭𑁂 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀘 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑁆𑀢𑀺, 𑀢𑀁 ‘‘𑀯𑀢𑁆𑀣𑀽’’𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀜𑁆𑀘𑀯𑁄𑀓𑀸𑀭𑁂𑀢𑀺 𑀘 𑀯𑀺𑀲𑁂𑀲𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀓𑀢𑀁, 𑀫𑀦𑁄𑀥𑀸𑀢𑀼 𑀧𑀦 𑀘𑀢𑀼𑀯𑁄𑀓𑀸𑀭𑀪𑀯𑁂 𑀦𑀢𑁆𑀣𑁂𑀯. 𑀧𑀸𑀴𑀺𑀬𑀁 𑀅𑀦𑀸𑀕𑀢𑀲𑁆𑀲𑀸𑀧𑀺 𑀳𑀤𑀬𑀯𑀢𑁆𑀣𑀼𑀦𑁄 𑀆𑀕𑀫𑀢𑁄, 𑀬𑀼𑀢𑁆𑀢𑀺𑀢𑁄 𑀘 𑀅𑀢𑁆𑀣𑀺𑀪𑀸𑀯𑁄 𑀯𑀺𑀜𑁆𑀜𑀸𑀢𑀩𑁆𑀩𑁄. 𑀢𑀢𑁆𑀣 𑀆𑀕𑀫𑁄 𑀢𑀸𑀯 𑁋

‘‘𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀧𑀯𑀢𑁆𑀢𑀦𑁆𑀢𑀺, 𑀢𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁮) 𑁋

𑀏𑀯𑀫𑀸𑀤𑀺 𑀧𑀝𑁆𑀞𑀸𑀦𑀯𑀘𑀦𑀁. 𑀬𑀼𑀢𑁆𑀢𑀺 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀦𑀺𑀧𑁆𑀨𑀦𑁆𑀦𑀉𑀧𑀸𑀤𑀸𑀬𑀭𑀽𑀧𑀦𑀺𑀲𑁆𑀲𑀬𑀁 𑀥𑀸𑀢𑀼𑀤𑁆𑀯𑀬𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀭𑀽𑀧𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁆𑀢𑀸. 𑀬𑀁 𑀬𑀜𑁆𑀳𑀺 𑀭𑀽𑀧𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺, 𑀢𑀁 𑀢𑀁 𑀦𑀺𑀧𑁆𑀨𑀦𑁆𑀦𑀉𑀧𑀸𑀤𑀸𑀬𑀭𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀲𑀢𑀺 𑀬𑀣𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀢𑁆𑀣 𑀦 𑀢𑀸𑀯 𑀭𑀽𑀧𑀸𑀬𑀢𑀦𑀸𑀤𑀻𑀦𑀁, 𑀑𑀚𑀸𑀬 𑀘 𑀢𑀦𑁆𑀦𑀺𑀲𑁆𑀲𑀬𑀢𑀸 𑀬𑀼𑀚𑁆𑀚𑀢𑀺 𑀇𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀢𑁄 𑀩𑀳𑀺𑀧𑀺 𑀢𑁂𑀲𑀁 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁄, 𑀦𑀸𑀧𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀢𑀤𑀼𑀪𑀬𑀯𑀺𑀭𑀳𑀺𑀢𑁂 𑀅𑀪𑀸𑀯𑀓𑀲𑀦𑁆𑀢𑀸𑀦𑁂𑀧𑀺 𑀥𑀸𑀢𑀼𑀤𑁆𑀯𑀬𑀤𑀲𑁆𑀲𑀦𑀢𑁄. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀸𑀧𑀺 𑀲𑀳𑀚𑀧𑀭𑀺𑀧𑀸𑀮𑀦𑀮𑀓𑁆𑀔𑀡𑀓𑀺𑀘𑁆𑀘𑀦𑁆𑀢𑀭𑀁 𑀯𑀺𑀚𑁆𑀚𑀢𑀻𑀢𑀺 𑀦 𑀢𑀦𑁆𑀦𑀺𑀲𑁆𑀲𑀬𑀢𑀸 𑀬𑀼𑀚𑁆𑀚𑀢𑀺. 𑀢𑀜𑁆𑀳𑀺 𑀓𑀺𑀘𑁆𑀘𑀦𑁆𑀢𑀭𑁂 𑀧𑀲𑀼𑀢𑀁 𑀦 𑀇𑀫𑀸𑀲𑀁 𑀦𑀺𑀲𑁆𑀲𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀧𑀸𑀭𑀺𑀲𑁂𑀲𑀢𑁄 𑀢𑁂𑀲𑀁 𑀦𑀺𑀲𑁆𑀲𑀬𑁄 𑀳𑀤𑀬𑀯𑀢𑁆𑀣𑀼 𑀦𑀸𑀫 𑀅𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁. 𑀳𑁄𑀢𑀼 𑀢𑀸𑀯 𑀥𑀸𑀢𑀼𑀤𑁆𑀯𑀬𑀦𑀺𑀲𑁆𑀲𑀬𑁄 𑀯𑀢𑁆𑀣𑀼, 𑀉𑀧𑀸𑀤𑀸𑀬𑀭𑀽𑀧𑀜𑁆𑀘, 𑀢𑀁 𑀧𑀦𑁂𑀢𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀧𑀝𑀺𑀦𑀺𑀬𑀢𑀓𑀺𑀘𑁆𑀘𑀁 𑀳𑀤𑀬𑀧𑁆𑀧𑀤𑁂𑀲𑁂 𑀞𑀺𑀢𑀫𑁂𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀯𑀢𑁆𑀣𑀼𑀭𑀽𑀧𑀪𑀸𑀯𑀢𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀘𑀓𑁆𑀔𑀼 𑀯𑀺𑀬. 𑀬𑀜𑁆𑀳𑀺 𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼𑀪𑀽𑀢𑀁 𑀭𑀽𑀧𑀁, 𑀢𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑀬𑀣𑀸 𑀘𑀓𑁆𑀔𑀼𑀧𑀲𑀸𑀤𑁄, 𑀢𑀢𑁄 𑀏𑀯 𑀧𑀝𑀺𑀦𑀺𑀬𑀢𑀓𑀺𑀘𑁆𑀘𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀳𑀤𑀬𑀧𑁆𑀧𑀤𑁂𑀲𑀲𑁆𑀲 𑀔𑀺𑀚𑁆𑀚𑀦𑀢𑁄 𑀢𑀢𑁆𑀣𑁂𑀤𑀁 𑀢𑀺𑀝𑁆𑀞𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸𑀳𑀼 𑀆𑀘𑀭𑀺𑀬𑀸 𑁋

‘‘𑀓𑀫𑁆𑀫𑀚𑀁 𑀯𑀢𑁆𑀣𑀼𑀪𑀸𑀯𑀸 𑀢𑀁, 𑀘𑀓𑁆𑀔𑀼𑀁𑀯 𑀦𑀺𑀬𑀢𑀓𑁆𑀭𑀺𑀬𑀁;

𑀘𑀺𑀦𑁆𑀢𑀸𑀬 𑀘 𑀉𑀭𑁄𑀔𑁂𑀤𑀸, 𑀢𑀢𑁆𑀭 𑀢𑀺𑀝𑁆𑀞𑀦𑁆𑀢𑀺 𑀯𑀺𑀚𑀸𑀦𑀺𑀬’’𑀦𑁆𑀢𑀺.

𑀬𑀤𑀺 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀦𑀺𑀲𑁆𑀲𑀬𑀪𑀽𑀢𑀁 𑀳𑀤𑀬𑀯𑀢𑁆𑀣𑀼 𑀦𑀸𑀫 𑀅𑀢𑁆𑀣𑀺, 𑀓𑀲𑁆𑀫𑀸 𑀧𑀦𑁂𑀢𑀁 𑀭𑀽𑀧𑀓𑀡𑁆𑀟𑁂 𑀦 𑀯𑀼𑀢𑁆𑀢𑀁. 𑀦 𑀳𑀺 𑀮𑀩𑁆𑀪𑀫𑀸𑀦𑀲𑁆𑀲 𑀅𑀯𑀘𑀦𑁂 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺 𑀓𑀸𑀭𑀡𑀦𑁆𑀢𑀭𑀲𑀫𑁆𑀪𑀯𑀢𑁄. 𑀓𑀺𑀁 𑀧𑀦 𑀢𑀁 𑀓𑀸𑀭𑀡𑀁? 𑀤𑁂𑀲𑀦𑀸𑀪𑁂𑀤𑁄. 𑀬𑀣𑀸 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀏𑀓𑀦𑁆𑀢𑀢𑁄 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀸𑀦𑀺, 𑀦 𑀏𑀯𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀏𑀓𑀦𑁆𑀢𑁂𑀦 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀬𑁂𑀯 𑀢𑀦𑁆𑀦𑀺𑀲𑁆𑀲𑀬𑀢𑁆𑀢𑀸, 𑀏𑀓𑀦𑁆𑀢𑁂𑀦 𑀦𑀺𑀲𑁆𑀲𑀺𑀢𑀯𑀲𑁂𑀦𑁂𑀯 𑀘 𑀯𑀢𑁆𑀣𑀼𑀤𑁂𑀲𑀦𑀸 𑀧𑀯𑀢𑁆𑀢𑀸. ‘‘𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼, 𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦 𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸 (𑀥. 𑀲. 𑁫𑁮𑁪) 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀦𑀺𑀲𑁆𑀲𑀺𑀢𑁂𑀳𑀺 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀬𑀫𑁆𑀧𑀺 𑀏𑀓𑀦𑁆𑀢𑁂𑀦 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀁 𑀢𑀲𑁆𑀲 𑀯𑀲𑁂𑀦 ‘‘𑀅𑀢𑁆𑀣𑀺 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸 𑀤𑀼𑀓𑀸𑀤𑀻𑀲𑀼 𑀯𑀼𑀘𑁆𑀘𑀫𑀸𑀦𑁂𑀲𑀼 𑀦 𑀢𑀤𑀦𑀼𑀕𑀼𑀡𑀸 𑀆𑀭𑀫𑁆𑀫𑀡𑀤𑀼𑀓𑀸𑀤𑀬𑁄 𑀲𑀫𑁆𑀪𑀯𑀦𑁆𑀢𑀺. 𑀦 𑀳𑀺 ‘‘𑀅𑀢𑁆𑀣𑀺 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁, 𑀅𑀢𑁆𑀣𑀺 𑀭𑀽𑀧𑀁 𑀦 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡’’𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀤𑀼𑀓𑀸 𑀪𑀺𑀦𑁆𑀦𑀕𑀢𑀺𑀓𑀸 𑀲𑀺𑀬𑀼𑀁, 𑀦 𑀏𑀓𑀭𑀲𑀸 𑀤𑁂𑀲𑀦𑀸 𑀪𑀯𑁂𑀬𑁆𑀬, 𑀏𑀓𑀭𑀲𑀜𑁆𑀘 𑀤𑁂𑀲𑀦𑀁 𑀤𑁂𑀲𑁂𑀢𑀼𑀁 𑀢𑀢𑁆𑀣 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑁄, 𑀢𑀲𑁆𑀫𑀸 𑀢𑀢𑁆𑀣 𑀳𑀤𑀬𑀯𑀢𑁆𑀣𑀼 𑀦 𑀯𑀼𑀢𑁆𑀢𑀁, 𑀦 𑀅𑀮𑀩𑁆𑀪𑀫𑀸𑀦𑀢𑁆𑀢𑀸. 𑀏𑀲𑀸 𑀳𑀺 𑀪𑀕𑀯𑀢𑁄 𑀧𑀓𑀢𑀺, 𑀬𑀁 𑀏𑀓𑀭𑀲𑁂𑀦𑁂𑀯 𑀤𑁂𑀲𑀦𑀁 𑀤𑁂𑀲𑁂𑀢𑀼𑀁 𑀮𑀩𑁆𑀪𑀫𑀸𑀦𑀲𑁆𑀲𑀸𑀧𑀺 𑀓𑀲𑁆𑀲𑀘𑀺 𑀅𑀕𑁆𑀕𑀳𑀡𑀁. 𑀢𑀣𑀸 𑀳𑀺 𑀦𑀺𑀓𑁆𑀔𑁂𑀧𑀓𑀡𑁆𑀟𑁂𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀺𑀪𑀸𑀕𑁂𑀦 𑀅𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀧𑀤𑀯𑀺𑀲𑀚𑁆𑀚𑀦𑁂 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀘𑀸𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀧𑀤𑀯𑀺𑀲𑀚𑁆𑀚𑀦𑁂 𑀮𑀩𑁆𑀪𑀫𑀸𑀦𑁄𑀧𑀺 𑀯𑀺𑀢𑀓𑁆𑀓𑁄 𑀦 𑀉𑀤𑁆𑀥𑀝𑁄, 𑀅𑀜𑁆𑀜𑀣𑀸 ‘‘𑀯𑀺𑀢𑀓𑁆𑀓𑁄 𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀦𑀺𑀲𑁆𑀲𑀬𑀪𑀸𑀯𑀢𑁄 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀯𑀳𑀦𑁆𑀢𑀁 𑀯𑀺𑀬 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀉𑀩𑁆𑀩𑀸𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑁬𑁭𑁫. 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼 𑀇𑀥 𑀭𑀽𑀧𑀸𑀥𑀺𑀓𑀸𑀭𑀢𑁄 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀆𑀳𑀸𑀭𑀢𑀸𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄’’𑀢𑀺. 𑀢𑀢𑁆𑀣 𑀓𑀩𑀴𑀁 𑀓𑀭𑀻𑀬𑀢𑀻𑀢𑀺 𑀓𑀩𑀴𑀻𑀓𑀸𑀭𑁄. 𑀆𑀳𑀭𑀻𑀬𑀢𑀻𑀢𑀺 𑀆𑀳𑀸𑀭𑁄, 𑀓𑀩𑀴𑀁 𑀓𑀢𑁆𑀯𑀸 𑀅𑀚𑁆𑀛𑁄𑀳𑀭𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸 𑀆𑀳𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀧𑀦 𑀑𑀚𑀸 𑀇𑀥 𑀆𑀳𑀸𑀭𑁄 𑀦𑀸𑀫. 𑀢𑁂𑀦𑀸𑀳 ‘‘𑀬𑀸𑀬 𑀑𑀚𑀸𑀬𑀸’’𑀢𑀺𑀆𑀤𑀺. 𑀲𑁄 𑀘 𑀭𑀽𑀧𑀸𑀳𑀭𑀡𑀲𑀪𑀸𑀯𑁄 𑀉𑀧𑀢𑁆𑀣𑀫𑁆𑀪𑀦𑀩𑀮𑀓𑀭𑁄 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀻𑀭𑀲𑀸𑀳𑀭𑀡𑀪𑀽𑀢𑁄 𑀪𑀽𑀢𑀦𑀺𑀲𑁆𑀲𑀺𑀢𑁄 𑀏𑀓𑁄 𑀯𑀺𑀲𑁂𑀲𑁄. 𑀩𑀸𑀳𑀺𑀭𑀸𑀳𑀸𑀭𑀧𑀘𑁆𑀘𑀬𑀁 𑀧𑀝𑀺𑀮𑀪𑀺𑀢𑁆𑀯𑀸 𑀏𑀯 𑀅𑀚𑁆𑀛𑀢𑁆𑀢𑀺𑀓𑀸𑀳𑀸𑀭𑁄 𑀭𑀽𑀧𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀬𑀁 𑀅𑀚𑁆𑀛𑀢𑁆𑀢𑀺𑀓𑀸𑀳𑀸𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦𑀸𑀧𑀺 𑀭𑀽𑀧𑀁 𑀆𑀳𑀭𑀢𑀻𑀢𑀺 𑀆𑀳 ‘‘𑀑𑀚𑀝𑁆𑀞𑀫𑀓𑀁 𑀭𑀽𑀧𑀁 𑀆𑀳𑀭𑀢𑀻’’𑀢𑀺. 𑀑𑀚𑀸 𑀅𑀝𑁆𑀞𑀫𑀻 𑀬𑀲𑁆𑀲 𑀢𑀁 𑀑𑀚𑀝𑁆𑀞𑀫𑀓𑀁. 𑀬𑀸𑀬 𑀑𑀚𑀸𑀬𑀸𑀢𑀺 𑀅𑀢𑁆𑀢𑀦𑁄 𑀉𑀤𑀬𑀸𑀦𑀦𑁆𑀢𑀭𑀁 𑀭𑀽𑀧𑀚𑀦𑀦𑀢𑁄 𑀑𑀚𑀸𑀲𑀗𑁆𑀔𑀸𑀢𑀸𑀬 𑀑𑀤𑀦𑀓𑀼𑀫𑁆𑀫𑀸𑀲𑀸𑀤𑀺𑀯𑀢𑁆𑀣𑀼𑀕𑀢𑀸𑀬 𑀬𑀸𑀬 𑀨𑀭𑀡𑀑𑀚𑀸𑀬. 𑀬𑀢𑁆𑀣 𑀬𑀢𑁆𑀣𑀸𑀢𑀺 𑀬𑀫𑁆𑀳𑀺 𑀬𑀫𑁆𑀳𑀺 𑀚𑀦𑀧𑀤𑁂, 𑀦𑀕𑀭𑀸𑀤𑀻𑀲𑀼 𑀘. ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄’’𑀢𑀺 𑀧𑀯𑀼𑀘𑁆𑀘𑀢𑀺 𑀢𑀩𑁆𑀩𑀢𑁆𑀣𑀼𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁭𑁬. 𑀓𑀺𑀁 𑀧𑀦 𑀯𑀢𑁆𑀣𑀼𑀦𑁄 𑀓𑀺𑀘𑁆𑀘𑀁, 𑀓𑀺𑀁 𑀑𑀚𑀸𑀬𑀸𑀢𑀺 𑀘𑁂? 𑀧𑀭𑀺𑀲𑁆𑀲𑀬𑀳𑀭𑀡𑀁 𑀯𑀢𑁆𑀣𑀼𑀲𑁆𑀲 𑀓𑀺𑀘𑁆𑀘𑀁, 𑀧𑀸𑀮𑀦𑀁 𑀑𑀚𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀦𑀧𑀸𑀦𑀸𑀤𑀺𑀓’’𑀦𑁆𑀢𑀺𑀆𑀤𑀺. 𑀅𑀕𑁆𑀕𑀺𑀁 𑀳𑀭𑀢𑀺 𑀓𑀫𑁆𑀫𑀚𑀦𑁆𑀢𑀺 𑀓𑀫𑁆𑀫𑀚𑀢𑁂𑀚𑀁 𑀕𑀡𑁆𑀳𑀸𑀢𑀺. 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀜𑁆𑀳𑀺 𑀑𑀤𑀦𑀸𑀤𑀺𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀢𑀺 𑀓𑀫𑁆𑀫𑀚𑀢𑁂𑀚𑁄 𑀉𑀝𑁆𑀞𑀳𑀺𑀢𑁆𑀯𑀸 𑀉𑀤𑀭𑀧𑀝𑀮𑀲𑀗𑁆𑀔𑀸𑀢𑀫𑀼𑀧𑀸𑀤𑀺𑀦𑁆𑀦𑀭𑀽𑀧𑀁 𑀕𑀡𑁆𑀳𑀸𑀢𑀺, ‘‘𑀙𑀸𑀢𑁄𑀫𑁆𑀳𑀺, 𑀆𑀳𑀸𑀭𑀁 𑀫𑁂 𑀤𑁂𑀣𑀸’’𑀢𑀺 𑀯𑀤𑀸𑀧𑁂𑀢𑀺, 𑀪𑀼𑀢𑁆𑀢𑀓𑀸𑀮𑁂 𑀉𑀤𑀭𑀧𑀝𑀮𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀯𑀢𑁆𑀣𑀼𑀁 𑀕𑀡𑁆𑀳𑀸𑀢𑀺, 𑀅𑀣 𑀲𑀢𑁆𑀢𑁄 𑀏𑀓𑀕𑁆𑀕𑁄 𑀳𑁄𑀢𑀺. 𑀬𑀣𑀸 𑀳𑀺 𑀙𑀸𑀬𑀸𑀭𑀓𑁆𑀔𑀲𑁄 𑀙𑀸𑀬𑀸𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 𑀕𑀳𑁂𑀢𑁆𑀯𑀸 𑀤𑁂𑀯𑀲𑀗𑁆𑀔𑀮𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑁂 𑀫𑁄𑀤𑀦𑁆𑀢𑁄 𑀙𑀸𑀢𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀲𑀻𑀲𑁂 𑀤𑀁𑀲𑀢𑀺, 𑀲𑁄 𑀤𑀝𑁆𑀞𑀢𑁆𑀢𑀸 𑀯𑀺𑀭𑀯𑀢𑀺, 𑀢𑀁 𑀯𑀺𑀭𑀯𑀁 𑀲𑀼𑀢𑁆𑀯𑀸 𑀲𑀘𑁂 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑀸 𑀆𑀕𑀘𑁆𑀙𑀦𑁆𑀢𑀺, 𑀲𑁄 𑀆𑀕𑀢𑀸𑀕𑀢𑁂 𑀕𑀳𑁂𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀲𑀓𑀪𑀯𑀦𑁂 𑀫𑁄𑀤𑀢𑀺, 𑀏𑀯𑀁 𑀬𑀁 𑀬𑀁 𑀅𑀦𑁆𑀦𑀧𑀸𑀦𑀸𑀤𑀺𑀓𑀁 𑀯𑀢𑁆𑀣𑀼, 𑀢𑀁 𑀢𑀁 𑀓𑀫𑁆𑀫𑀚𑀢𑁂𑀚𑁄 𑀕𑀳𑁂𑀢𑁆𑀯𑀸 𑀚𑀻𑀭𑀸𑀧𑁂𑀢𑁆𑀯𑀸 𑀧𑀼𑀦 𑀉𑀤𑀭𑀧𑀝𑀮𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀅𑀦𑁆𑀦𑀧𑀸𑀦𑀸𑀤𑀺𑀓𑀁 𑀯𑀢𑁆𑀣𑀼 𑀅𑀢𑁆𑀢𑀦𑁄 𑀉𑀤𑀭𑀧𑀝𑀮𑀁 𑀧𑀯𑀺𑀝𑁆𑀞𑀓𑀸𑀮𑁂 𑀉𑀧𑀸𑀤𑀺𑀦𑁆𑀦𑀓𑀸𑀬𑀁 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀢𑀢𑁄 𑀫𑁄𑀘𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀕𑀡𑁆𑀳𑀸𑀧𑀦𑀯𑀲𑁂𑀦 𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀳𑀭𑀢𑀺. 𑀓𑁂𑀯𑀮𑀦𑁆𑀢𑀺 𑀑𑀚𑀸𑀯𑀺𑀬𑀼𑀢𑁆𑀢𑀁 𑀯𑀢𑁆𑀣𑀼 𑀚𑀻𑀯𑀺𑀢𑀁 𑀓𑀫𑁆𑀫𑀚𑀪𑀽𑀢𑀁 𑀢𑀁 𑀧𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑁬𑁭𑁭. 𑀑𑀚𑀸…𑀧𑁂… 𑀧𑀸𑀘𑀓𑀦𑁆𑀢𑀺 𑀑𑀚𑀸 𑀚𑀻𑀯𑀺𑀢𑀁 𑀧𑀸𑀮𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀓𑀫𑁆𑀫𑀚𑀁 𑀢𑁂𑀚𑀁 𑀳𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀆𑀫𑀸𑀲𑀬𑀲𑁆𑀲 𑀅𑀧𑀼𑀡𑁆𑀡𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀑𑀚𑀝𑁆𑀞𑀫𑀓𑀭𑀽𑀧𑀳𑀭𑀡𑀯𑀲𑁂𑀦𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀺. 𑀓𑀸𑀬𑁂𑀦𑀸𑀢𑀺 𑀭𑀽𑀧𑀓𑀸𑀬𑁂𑀦. 𑀅𑀢𑁆𑀢𑀦𑁄 𑀪𑀸𑀯𑀦𑁆𑀢𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁. 𑀯𑀺𑀜𑁆𑀜𑀸𑀧𑁂𑀦𑁆𑀢𑀸𑀦𑀦𑁆𑀢𑀺 𑀧𑀭𑁂𑀲𑀁 𑀲𑀜𑁆𑀜𑀸𑀧𑁂𑀦𑁆𑀢𑀸𑀦𑀁. 𑀓𑀸𑀬𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦𑀸𑀢𑀺 𑀨𑀦𑁆𑀤𑀫𑀸𑀦𑀓𑀸𑀬𑀕𑀢𑀯𑀡𑁆𑀡𑀲𑁆𑀲 𑀕𑀳𑀡𑀪𑀽𑀢𑀸𑀦𑀁 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀦𑀁 𑀦𑀺𑀘𑁆𑀙𑀬𑀕𑁆𑀕𑀳𑀡𑀲𑀗𑁆𑀔𑀸𑀢𑀸𑀦𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀅𑀦𑀼𑀲𑁆𑀲𑀭𑀡𑁂𑀦 𑀢𑁂𑀲𑀁 𑀅𑀦𑀦𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀤𑁆𑀯𑀸𑀭𑁂 𑀳𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀬𑀣𑀸𑀧𑀘𑁆𑀘𑀬𑀁 𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑁂 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀢𑀤𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀧𑀼𑀦 𑀢𑀲𑁆𑀫𑀺𑀁𑀬𑁂𑀯 𑀤𑁆𑀯𑀸𑀭𑁂 𑀯𑀺𑀲𑀬𑀁 𑀯𑀯𑀢𑁆𑀣𑀸𑀧𑁂𑀢𑁆𑀯𑀸 𑀚𑀯𑀦𑀁 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀢𑀲𑁆𑀫𑀸 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀚𑀯𑀦𑀯𑀸𑀭𑀸𑀦𑀫𑀦𑀦𑁆𑀢𑀭𑀁 𑀢𑀢𑀺𑀬𑀯𑀸𑀭𑁂 𑀧𑀯𑀢𑁆𑀢𑀸𑀬 𑀫𑀦𑁄𑀤𑁆𑀯𑀸𑀭𑀚𑀯𑀦𑀯𑀻𑀣𑀺𑀬𑀸 𑀏𑀯 𑀕𑀳𑀺𑀢𑀸𑀬 𑀏𑀢𑀸𑀬 𑀓𑀭𑀡𑀪𑀽𑀢𑀸𑀬 𑀘𑀢𑀼𑀢𑁆𑀣𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑁂 𑀚𑀯𑀦𑁂𑀦𑁂𑀯 𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺. 𑀏𑀢𑁂𑀦 𑀯𑀺𑀜𑁆𑀜𑀢𑁆𑀢𑀺-𑀲𑀤𑁆𑀤𑀲𑁆𑀲 𑀓𑀭𑀡𑀲𑀸𑀥𑀦𑀢𑀸 𑀯𑀼𑀢𑁆𑀢𑀸. 𑀲𑀬𑀁 𑀯𑀸𑀢𑀺𑀆𑀤𑀺𑀦𑀸 𑀧𑀦 𑀓𑀫𑁆𑀫𑀲𑀸𑀥𑀦𑀢𑁆𑀢𑀫𑀸𑀳.

𑀏𑀯𑀁 𑀯𑀺𑀜𑁆𑀜𑀢𑁆𑀢𑀺-𑀲𑀤𑁆𑀤𑀲𑁆𑀲 𑀓𑀸𑀭𑀓𑀤𑁆𑀯𑀬𑁂 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀸𑀬-𑀲𑀤𑁆𑀤𑁂𑀦 𑀲𑀳 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑀁 𑀤𑀲𑁆𑀲𑁂𑀢𑀼𑀁, ‘‘𑀓𑀸𑀬𑁄’’𑀢𑀺 𑀯𑁄𑀳𑀸𑀭𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀘 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀬𑁂𑀦 𑀲𑀁𑀯𑀭𑁄’’𑀢𑀺𑀆𑀤𑀺𑀲𑀼𑀢𑁆𑀢𑀫𑀸𑀳. 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀳𑁂𑀢𑀼𑀢𑁆𑀢𑀸𑀢𑀺 𑀯𑀺𑀧𑁆𑀨𑀦𑁆𑀤𑀫𑀸𑀦𑀓𑀸𑀬𑁂𑀦 𑀓𑀭𑀡𑀪𑀽𑀢𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀳𑁂𑀢𑀼𑀪𑀸𑀯𑀢𑁄 𑀓𑀸𑀬𑁂𑀦 𑀯𑀺𑀜𑁆𑀜𑀢𑁆𑀢𑀻𑀢𑀺𑀧𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀢𑀁𑀳𑁂𑀢𑀼𑀓𑀁 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀲𑀗𑁆𑀔𑀸𑀢𑀁 𑀓𑀸𑀬𑀁 𑀕𑀳𑁂𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀚𑀸𑀦𑀦𑀢𑁄 𑀯𑀺𑀜𑁆𑀜𑀢𑁆𑀢𑀺 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀕𑀬𑁆𑀳𑀢𑀻𑀢𑀺 𑀓𑀸𑀬𑁂𑀦 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀻𑀢𑀺. 𑀢𑀣𑀸 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀕𑀬𑁆𑀳𑀫𑀸𑀦𑀢𑁆𑀢𑀸 𑀲𑀬𑀜𑁆𑀘 𑀓𑀸𑀬𑁂𑀦 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀓𑀸𑀬𑁂𑀦 𑀯𑀺𑀜𑁆𑀜𑀢𑁆𑀢𑀻𑀢𑀺𑀧𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀢𑀺.

𑁬𑁭𑁮. 𑀘𑀺𑀢𑁆𑀢𑀚𑀸𑀦𑀺𑀮𑀥𑀸𑀢𑀼𑀬𑀸𑀢𑀺 𑀅𑀪𑀺𑀓𑁆𑀓𑀫𑀸𑀤𑀺𑀧𑀯𑀢𑁆𑀢𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀬𑀸. 𑀆𑀓𑀸𑀭𑀯𑀺𑀓𑀸𑀭𑀢𑀸𑀢𑀺 𑀆𑀓𑀸𑀭𑀪𑀽𑀢𑁄 𑀯𑀺𑀓𑀸𑀭𑁄. 𑀓𑀲𑁆𑀲 𑀧𑀦 𑀲𑀸 𑀆𑀓𑀸𑀭𑀯𑀺𑀓𑀸𑀭𑀢𑀸𑀢𑀺? 𑀲𑀸𑀫𑀢𑁆𑀣𑀺𑀬𑀢𑁄 𑀯𑀸𑀬𑁄𑀥𑀸𑀢𑀼𑀅𑀥𑀺𑀓𑀸𑀦𑀁 𑀘𑀺𑀢𑁆𑀢𑀚𑀫𑀳𑀸𑀪𑀽𑀢𑀸𑀦𑀁. 𑀓𑀺𑀁 𑀢𑀁 𑀲𑀸𑀫𑀢𑁆𑀣𑀺𑀬𑀁? 𑀘𑀮𑀦𑀳𑁂𑀢𑀼𑀢𑀸, 𑀘𑀺𑀢𑁆𑀢𑀚𑀢𑀸, 𑀉𑀧𑀸𑀤𑀸𑀬𑀭𑀽𑀧𑀢𑀸 𑀘. 𑀅𑀣 𑀯𑀸 𑀘𑀺𑀢𑁆𑀢𑀚𑀸𑀦𑀺𑀮𑀥𑀸𑀢𑀼𑀬𑀸 𑀏𑀓𑀸 𑀆𑀓𑀸𑀭𑀯𑀺𑀓𑀸𑀭𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀓𑁂𑀯𑀮𑀜𑁆𑀳𑀺 𑀲𑀸𑀫𑀺𑀯𑀘𑀦𑀁 𑀘𑀮𑀦𑀲𑀫𑁆𑀩𑀦𑁆𑀥𑀸𑀧𑁂𑀓𑁆𑀔𑀸𑀬 𑀏𑀯, 𑀅𑀣 𑀔𑁄 𑀆𑀓𑀸𑀭𑀯𑀺𑀓𑀸𑀭𑀲𑀫𑁆𑀩𑀦𑁆𑀥𑀸𑀧𑁂𑀓𑁆𑀔𑀸𑀬𑀧𑀻𑀢𑀺.

𑀬𑀤𑀺 𑀏𑀯𑀁, 𑀓𑀣𑀁 𑀯𑀺𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀬𑀭𑀽𑀧𑀢𑁆𑀢𑀁. ‘‘𑀘𑀺𑀢𑁆𑀢𑀚𑀸𑀦𑀺𑀮𑀥𑀸𑀢𑀼𑀬𑀸’’𑀢𑀺 𑀳𑀺 𑀯𑀘𑀦𑁂𑀦 𑀯𑀸𑀬𑁄𑀥𑀸𑀢𑀼𑀬𑀸𑀯 𑀆𑀓𑀸𑀭𑀯𑀺𑀓𑀸𑀭𑀢𑀸 𑀯𑀺𑀜𑁆𑀜𑀢𑁆𑀢𑀺 𑀆𑀧𑀚𑁆𑀚𑀢𑀺, 𑀦 𑀘 𑀏𑀓𑀪𑀽𑀢𑀦𑀺𑀲𑁆𑀲𑀺𑀢𑀁 𑀉𑀧𑀸𑀤𑀸𑀬𑀭𑀽𑀧𑀁 𑀦𑀸𑀫 𑀅𑀢𑁆𑀣𑀺 ‘‘𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 (𑀥. 𑀲. 𑁫𑁮𑁪) 𑀯𑀘𑀦𑀢𑁄𑀢𑀺? 𑀦𑀸𑀬𑀁 𑀤𑁄𑀲𑁄, 𑀘𑀢𑀼𑀦𑁆𑀦𑀁 𑀯𑀺𑀓𑀸𑀭𑀢𑀸 𑀘𑀢𑀽𑀲𑀼 𑀏𑀓𑀲𑁆𑀲𑀧𑀺 𑀳𑁄𑀢𑀺 𑀘𑀢𑀼𑀲𑀸𑀥𑀸𑀭𑀡𑀥𑀦𑀁 𑀯𑀺𑀬. 𑀅𑀦𑀺𑀮𑀥𑀸𑀢𑀼𑀅𑀥𑀺𑀓𑀓𑀮𑀸𑀧𑁄 𑀯𑀸 𑀇𑀥 ‘‘𑀅𑀦𑀺𑀮𑀥𑀸𑀢𑀽’’𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀥𑀺𑀓𑁂 𑀢𑀁𑀯𑁄𑀳𑀸𑀭𑀢𑁄 𑀬𑀣𑀸 𑀲𑀫𑁆𑀪𑀸𑀭𑀥𑀸𑀢𑀼𑀬𑀸 𑀅𑀥𑀺𑀓𑀪𑀸𑀯𑁂𑀦 𑀧𑀣𑀯𑀻𑀯𑁄𑀳𑀸𑀭𑁄, 𑀢𑀲𑁆𑀫𑀸 𑀯𑀸𑀬𑁄𑀥𑀸𑀢𑀼𑀅𑀥𑀺𑀓𑀸𑀦𑀁 𑀘𑀺𑀢𑁆𑀢𑀚𑀫𑀳𑀸𑀪𑀽𑀢𑀸𑀦𑀁 𑀏𑀓𑀸 𑀆𑀓𑀸𑀭𑀯𑀺𑀓𑀸𑀭𑀢𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀢𑀺 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀅𑀥𑀺𑀓𑀢𑀸 𑀘𑀲𑁆𑀲𑀸 𑀲𑀸𑀫𑀢𑁆𑀣𑀺𑀬𑀢𑁄 𑀤𑀝𑁆𑀞𑀩𑁆𑀩𑀸, 𑀦 𑀧𑀫𑀸𑀡𑀢𑁄. 𑀇𑀢𑀭𑀣𑀸 𑀳𑀺 𑀢𑁂𑀲𑀁 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀢𑀸 𑀦 𑀬𑀼𑀚𑁆𑀚𑁂𑀬𑁆𑀬. 𑀅𑀥𑀺𑀓𑀢𑀸 𑀳𑀺 𑀅𑀢𑁆𑀢𑀦𑁄 𑀅𑀥𑀺𑀓𑀯𑀲𑁂𑀦 𑀇𑀢𑀭𑁂𑀳𑀺 𑀯𑀺𑀦𑀺𑀩𑁆𑀪𑁄𑀕𑀧𑁆𑀧𑀯𑀢𑁆𑀢𑀺𑀢𑁄 𑀳𑁄𑀢𑀺. 𑀲𑀸𑀫𑀢𑁆𑀣𑀺𑀬𑀸𑀥𑀺𑀓𑀜𑁆𑀘 𑀓𑀸𑀭𑀡𑀸𑀦𑀼𑀓𑀸𑀭𑀺𑀢𑀸𑀬. 𑀓𑀸𑀭𑀡𑀜𑁆𑀳𑀺 𑀅𑀪𑀺𑀓𑁆𑀓𑀫𑀸𑀤𑀺𑀧𑀯𑀢𑁆𑀢𑀓𑀁 𑀘𑀺𑀢𑁆𑀢𑀁, 𑀢𑀁 𑀘𑀮𑀦𑀸𑀥𑀺𑀧𑁆𑀧𑀸𑀬𑀲𑀪𑀸𑀯𑀁 𑀢𑀢𑁄 𑀲𑀫𑀼𑀝𑁆𑀞𑀺𑀢𑁂 𑀓𑀮𑀸𑀧𑁂 𑀅𑀦𑀼𑀓𑀭𑁄𑀦𑁆𑀢𑁂 𑀯𑀸𑀬𑁄𑀥𑀸𑀢𑀼𑀬𑀸 𑀏𑀯 𑀅𑀥𑀺𑀓𑀢𑁆𑀢𑀁 𑀬𑀼𑀢𑁆𑀢𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀯𑀸𑀬𑁄𑀥𑀸𑀢𑀼𑀬𑀸 𑀏𑀯 𑀆𑀓𑀸𑀭𑀯𑀺𑀓𑀸𑀭𑀢𑀸’’𑀢𑀺 𑀕𑀡𑁆𑀳𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀉𑀧𑀸𑀤𑀸𑀭𑀽𑀧𑀢𑁆𑀢𑀁 𑀤𑀼𑀭𑀽𑀧𑀧𑀦𑁆𑀦𑀁. 𑀦 𑀳𑀺 𑀏𑀓𑀲𑁆𑀲 𑀯𑀺𑀓𑀸𑀭𑁄 𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁.

𑀓𑀻𑀤𑀺𑀲𑀻 𑀧𑀦𑀸𑀬𑀁 𑀯𑀺𑀓𑀸𑀭𑀢𑀸𑀢𑀺 𑀆𑀳 ‘‘𑀲𑀳𑀚𑀸𑀢𑀲𑁆𑀲 𑀭𑀽𑀧𑀲𑁆𑀲 𑀘𑀮𑀦𑁂 𑀳𑁂𑀢𑀽’’𑀢𑀺. 𑀢𑀢𑁆𑀣 𑀲𑀳𑀚𑀸𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀲𑁆𑀲. 𑀬𑀲𑁆𑀫𑀸 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀚𑀸𑀦𑀁 𑀘𑀮𑀦𑀁 𑀘𑀺𑀢𑁆𑀢𑀚𑀭𑀽𑀧𑀲𑀫𑁆𑀩𑀦𑁆𑀥𑁂𑀦𑁂𑀯 𑀳𑁄𑀢𑀺, 𑀦𑀤𑀻𑀲𑁄𑀢𑀘𑀮𑀦𑁂𑀦 𑀢𑀢𑁆𑀣 𑀧𑀓𑁆𑀔𑀺𑀢𑁆𑀢𑀲𑀼𑀓𑁆𑀔𑀕𑁄𑀫𑀬𑀧𑀺𑀡𑁆𑀟𑀸𑀤𑀻𑀦𑀁 𑀯𑀺𑀬. 𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀦 𑀘𑀺𑀢𑁆𑀢𑀚𑀸𑀦𑀫𑁂𑀯 𑀘𑀮𑀦𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀳𑀚𑀸𑀢𑀲𑁆𑀲𑀸’’𑀢𑀺. 𑀭𑀽𑀧𑀲𑁆𑀲𑀸𑀢𑀺 𑀭𑀽𑀧𑀓𑀸𑀬𑀲𑁆𑀲. 𑀘𑀮𑀦𑁂𑀢𑀺 𑀲𑀦𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀘𑀮𑀦𑀲𑀗𑁆𑀔𑀸𑀢𑁂 𑀘𑀮𑀺𑀢𑀪𑀸𑀯𑁂. 𑀲𑀦𑁆𑀣𑀫𑁆𑀪𑀦𑀸𑀤𑀺𑀓𑀫𑁆𑀧𑀺 𑀳𑀺 𑀘𑀮𑀦𑀸𑀪𑀺𑀫𑀼𑀔𑀢𑀸𑀬 𑀘𑀮𑀦𑀦𑁆𑀢𑀺 𑀬𑀼𑀚𑁆𑀚𑀢𑀺. 𑀳𑁂𑀢𑀽𑀢𑀺 𑀳𑁂𑀢𑀼𑀪𑀽𑀢𑀸 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑀸. 𑀏𑀢𑁆𑀢𑀸𑀯𑀢𑀸 𑀘 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀦𑁂𑀯 𑀨𑀦𑁆𑀤𑀫𑀸𑀦𑀭𑀽𑀧𑀓𑀸𑀬𑁄, 𑀦 𑀘 𑀨𑀦𑁆𑀤𑀫𑀸𑀦𑀸 𑀯𑀸𑀬𑁄𑀥𑀸𑀢𑀼, 𑀅𑀣 𑀔𑁄 𑀫𑀳𑀦𑁆𑀢𑀁 𑀧𑀸𑀲𑀸𑀡𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀲𑀩𑁆𑀩𑀣𑀸𑀫𑁂𑀦 𑀕𑀳𑀡𑀓𑀸𑀮𑁂 𑀲𑀭𑀻𑀭𑀲𑁆𑀲 𑀉𑀲𑁆𑀲𑀸𑀳𑀦𑀯𑀺𑀓𑀸𑀭𑁄 𑀯𑀺𑀬 𑀭𑀽𑀧𑀓𑀸𑀬𑀲𑁆𑀲 𑀧𑀭𑀺𑀧𑁆𑀨𑀦𑁆𑀤𑀦𑀧𑀘𑁆𑀘𑀬𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑁄 𑀏𑀓𑁄 𑀆𑀓𑀸𑀭𑀯𑀺𑀓𑀸𑀭𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀦𑀦𑀼 𑀘 𑀨𑀦𑁆𑀤𑀫𑀸𑀦𑀯𑀡𑁆𑀡𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀯𑀺𑀓𑀸𑀭𑁄 𑀅𑀢𑁆𑀣𑀺, 𑀢𑀲𑁆𑀲 𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀕𑀳𑀡𑀁 𑀳𑁄𑀢𑀻𑀢𑀺 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀢𑁄. 𑀦 𑀳𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀭𑀳𑀺𑀢𑁂𑀲𑀼 𑀭𑀼𑀓𑁆𑀔𑀘𑀮𑀦𑀸𑀤𑀻𑀲𑀼 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀁 𑀤𑀺𑀝𑁆𑀞𑀁, 𑀳𑀢𑁆𑀣𑀘𑀮𑀦𑀸𑀤𑀻𑀲𑀼 𑀧𑀦 𑀤𑀺𑀝𑁆𑀞𑀁, 𑀢𑀲𑁆𑀫𑀸 𑀨𑀦𑁆𑀤𑀫𑀸𑀦𑀯𑀡𑁆𑀡𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀯𑀺𑀓𑀸𑀭𑁄 𑀅𑀢𑁆𑀣𑀺 𑀅𑀥𑀺𑀧𑁆𑀧𑀸𑀬𑀲𑁆𑀲 𑀯𑀺𑀜𑁆𑀜𑀸𑀧𑀓𑁄𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀢𑀁 𑀏𑀓𑀦𑁆𑀢𑁂𑀦. 𑀜𑀸𑀧𑀓𑁄 𑀘 𑀳𑁂𑀢𑀼 𑀲𑀬𑀁 𑀕𑀳𑀺𑀢𑁄𑀬𑁂𑀯 𑀅𑀢𑁆𑀢𑀦𑁄 𑀜𑀸𑀧𑁂𑀢𑀩𑁆𑀩𑀫𑀢𑁆𑀣𑀁 𑀜𑀸𑀧𑁂𑀢𑀺, 𑀦 𑀯𑀺𑀚𑁆𑀚𑀫𑀸𑀦𑀫𑀢𑁆𑀢𑁂𑀦𑀸𑀢𑀺. 𑀜𑀸𑀧𑁂𑀢𑀩𑁆𑀩𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀯𑀺𑀓𑀸𑀭𑀕𑁆𑀕𑀳𑀡𑀫𑁆𑀧𑀺 𑀅𑀦𑀼𑀫𑀸𑀦𑀢𑁄 𑀲𑀺𑀤𑁆𑀥𑀁. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀯𑀺𑀲𑀬𑀢𑁆𑀢𑀫𑀦𑀸𑀧𑀦𑁆𑀦𑀸,

𑀲𑀤𑁆𑀤𑀸 𑀦𑁂𑀯𑀢𑁆𑀣𑀩𑁄𑀥𑀓𑀸;

𑀦 𑀲𑀢𑁆𑀢𑀸𑀫𑀢𑁆𑀢𑀢𑁄 𑀅𑀢𑁆𑀣𑁂,

𑀢𑁂 𑀅𑀜𑁆𑀜𑀸𑀢𑀸 𑀧𑀓𑀸𑀲𑀓𑀸’’𑀢𑀺.

𑀬𑀤𑀺 𑀯𑀺𑀓𑀸𑀭𑀕𑁆𑀕𑀳𑀡𑀫𑁂𑀯 𑀓𑀸𑀭𑀡𑀫𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲, 𑀓𑀲𑁆𑀫𑀸 𑀅𑀕𑁆𑀕𑀳𑀺𑀢𑀲𑀗𑁆𑀓𑁂𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀁 𑀦 𑀳𑁄𑀢𑀻𑀢𑀺? 𑀦 𑀓𑁂𑀯𑀮𑀁 𑀯𑀺𑀓𑀸𑀭𑀕𑁆𑀕𑀳𑀡𑀫𑁂𑀯 𑀅𑀥𑀺𑀧𑁆𑀧𑀸𑀬𑀲𑁆𑀲 𑀕𑀳𑀡𑀲𑁆𑀲 𑀓𑀸𑀭𑀡𑀁, 𑀅𑀣 𑀔𑁄 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀕𑁆𑀕𑀳𑀡𑀜𑁆𑀘 𑀇𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 𑀅𑀭𑀜𑁆𑀜𑁂 𑀉𑀤𑀓𑀢𑀺𑀢𑁆𑀣𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀞𑀧𑀺𑀢𑀕𑁄𑀲𑀻𑀲𑀸𑀤𑀻𑀦𑀺 𑀉𑀤𑀓𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀢𑀤𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀬 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑀸𑀬 𑀫𑀦𑁄𑀤𑁆𑀯𑀸𑀭𑀚𑀯𑀦𑀯𑀻𑀣𑀺𑀬𑀸 𑀕𑁄𑀲𑀻𑀲𑀸𑀤𑀻𑀦𑀁 𑀉𑀤𑀓𑀲𑀳𑀘𑀸𑀭𑀻𑀧𑀓𑀸𑀭𑀲𑀜𑁆𑀜𑀸𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 ‘‘𑀉𑀤𑀓𑀫𑁂𑀢𑁆𑀣 𑀅𑀢𑁆𑀣𑀻’’𑀢𑀺 𑀚𑀸𑀦𑀦𑀁, 𑀏𑀯𑀁 𑀨𑀦𑁆𑀤𑀫𑀸𑀦𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀢𑀤𑀦𑀦𑁆𑀢𑀧𑁆𑀧𑀯𑀢𑁆𑀢𑀸𑀬 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑀸𑀬 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀬𑀸 𑀧𑀼𑀭𑀺𑀫𑀕𑁆𑀕𑀳𑀺𑀢𑀲𑀫𑁆𑀩𑀦𑁆𑀥𑀽𑀧𑀦𑀺𑀲𑁆𑀲𑀬𑀲𑀳𑀺𑀢𑀸𑀬 𑀲𑀸𑀥𑀺𑀧𑁆𑀧𑀸𑀬𑀯𑀺𑀓𑀸𑀭𑀕𑁆𑀕𑀳𑀡𑀁 𑀳𑁄𑀢𑀻𑀢𑀺.

𑁬𑁮𑁧-𑁨. 𑀲𑀳𑀚𑀭𑀽𑀧𑀘𑀮𑀦𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀳𑁂𑀢𑀼𑀪𑀸𑀯𑁄 𑀬𑀼𑀢𑁆𑀢𑁄, 𑀓𑀺𑀁 𑀲𑀩𑁆𑀩𑀸 𑀏𑀯 𑀯𑀸𑀬𑁄𑀥𑀸𑀢𑀼 𑀲𑀳𑀚𑀭𑀽𑀧𑀁 𑀘𑀸𑀮𑁂𑀢𑀻𑀢𑀺 𑀇𑀫𑀁 𑀘𑁄𑀤𑀦𑀁 𑀲𑁄𑀥𑁂𑀢𑀼𑀁 ‘‘𑀮𑀪𑀺𑀢𑁆𑀯𑀸 𑀧𑀦𑀼𑀧𑀢𑁆𑀣𑀫𑁆𑀪’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀢𑁆𑀣𑀫𑁆𑀪𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑀁, 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀯𑀻𑀣𑀺𑀁 𑀲𑀦𑁆𑀥𑀸𑀬𑀸𑀳 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀻𑀣𑀺𑀬𑀸 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀸𑀪𑀸𑀯𑀢𑁄. 𑀳𑁂𑀝𑁆𑀞𑀸𑀳𑀺 𑀙𑀳𑀺 𑀘 𑀘𑀺𑀢𑁆𑀢𑁂𑀳𑀻𑀢𑀺 𑀲𑀢𑁆𑀢𑀲𑀼 𑀚𑀯𑀦𑁂𑀲𑀼 𑀳𑁂𑀝𑁆𑀞𑀺𑀫𑁂𑀳𑀺 𑀙𑀳𑀺 𑀚𑀯𑀦𑁂𑀳𑀺 𑀲𑀫𑀼𑀝𑁆𑀞𑀺𑀢𑀁 𑀯𑀸𑀬𑁄𑀥𑀸𑀢𑀼𑀁 𑀉𑀧𑀢𑁆𑀣𑀫𑁆𑀪𑀁 𑀮𑀪𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀘𑀺 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀯𑀸𑀬𑁄𑀥𑀸𑀢𑀼𑀲𑀫𑀼𑀝𑁆𑀞𑀺𑀢’’𑀦𑁆𑀢𑀺 𑀧𑀸𑀞𑀁 𑀤𑀺𑀲𑁆𑀯𑀸 𑀉𑀧𑀢𑁆𑀣𑀫𑁆𑀪𑀦𑁆𑀢𑀺 𑀪𑀸𑀯𑀲𑀸𑀥𑀦𑀯𑀲𑁂𑀦 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸 𑀙𑀳𑀺 𑀘𑀺𑀢𑁆𑀢𑁂𑀳𑀺 𑀉𑀧𑁆𑀧𑀦𑁆𑀦𑀯𑀸𑀬𑁄𑀥𑀸𑀢𑀼𑀲𑀫𑀼𑀝𑁆𑀞𑀺𑀢𑀁 𑀉𑀧𑀢𑁆𑀣𑀫𑁆𑀪𑀁 𑀮𑀪𑀺𑀢𑁆𑀯𑀸𑀢𑀺 𑀬𑁄𑀚𑁂𑀦𑁆𑀢𑀺. 𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀢𑁆𑀢𑀦𑀸𑀢𑀺 𑀲𑀬𑀁 𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸 𑀅𑀢𑁆𑀢𑀦𑀸 𑀲𑀳𑀚𑀸𑀢𑀁 𑀘𑀺𑀢𑁆𑀢𑀚𑀭𑀽𑀧𑀁 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀘𑀮𑀬𑀢𑀺, 𑀦 𑀇𑀢𑀭𑀸𑀢𑀺 𑀅𑀢𑁆𑀣𑁄.

𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀦𑀸𑀫 𑀲𑀢𑁆𑀢𑀳𑀺 𑀬𑀼𑀕𑁂𑀳𑀺 𑀆𑀓𑀟𑁆𑀠𑀺𑀢𑀩𑁆𑀩𑀲𑀓𑀝𑁂 𑀲𑀢𑁆𑀢𑀫𑀬𑀼𑀕𑀬𑀼𑀢𑁆𑀢𑀸 𑀏𑀯 𑀕𑁄𑀡𑀸 𑀳𑁂𑀝𑁆𑀞𑀸 𑀙𑀲𑀼 𑀬𑀼𑀕𑁂𑀲𑀼 𑀬𑀼𑀢𑁆𑀢𑀕𑁄𑀡𑁂𑀳𑀺 𑀮𑀤𑁆𑀥𑀼𑀧𑀢𑁆𑀣𑀫𑁆𑀪𑀸 𑀲𑀓𑀝𑀁 𑀘𑀸𑀮𑁂𑀦𑁆𑀢𑀺, 𑀧𑀞𑀫𑀬𑀼𑀕𑀸𑀤𑀺𑀬𑀼𑀢𑁆𑀢𑀸 𑀧𑀦 𑀲𑀦𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀫𑀢𑁆𑀢𑀫𑁂𑀯 𑀲𑀸𑀥𑁂𑀦𑁆𑀢𑀸 𑀢𑁂𑀲𑀁 𑀉𑀧𑀢𑁆𑀣𑀫𑁆𑀪𑀓𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯𑀁 𑀲𑀢𑁆𑀢𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸 𑀯𑀸𑀬𑁄𑀥𑀸𑀢𑀼 𑀳𑁂𑀝𑁆𑀞𑀸 𑀙𑀳𑀺 𑀚𑀯𑀦𑁂𑀳𑀺 𑀲𑀫𑀼𑀝𑁆𑀞𑀺𑀢𑀯𑀸𑀬𑁄𑀥𑀸𑀢𑀼𑀢𑁄 𑀮𑀤𑁆𑀥𑀼𑀧𑀢𑁆𑀣𑀫𑁆𑀪𑀸 𑀘𑀺𑀢𑁆𑀢𑀚𑀭𑀽𑀧𑀁 𑀘𑀸𑀮𑁂𑀢𑀺. 𑀧𑀞𑀫𑀚𑀯𑀦𑀸𑀤𑀺𑀲𑀫𑀼𑀝𑁆𑀞𑀺𑀢𑀸 𑀧𑀦 𑀲𑀦𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀫𑀢𑁆𑀢𑀁 𑀲𑀸𑀥𑁂𑀦𑁆𑀢𑀸 𑀢𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀸 𑀳𑁄𑀦𑁆𑀢𑀺, 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑁂𑀯 𑀘𑁂𑀢𑁆𑀣 𑀘𑀮𑀦𑀁 𑀉𑀧𑁆𑀧𑀦𑁆𑀦𑀤𑁂𑀲𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀥𑀫𑁆𑀫𑀸𑀦𑀁 𑀘𑀮𑀦𑀸𑀪𑀸𑀯𑀢𑁄, 𑀇𑀢𑀭𑀣𑀸 𑀥𑀫𑁆𑀫𑀸𑀦𑀁 𑀅𑀩𑁆𑀬𑀸𑀧𑀸𑀭𑀢𑀸, 𑀔𑀡𑀺𑀓𑀢𑀸 𑀘 𑀦 𑀲𑀺𑀬𑀸. 𑀓𑀣𑀁 𑀧𑀦𑀲𑁆𑀲 𑀲𑀳𑀚𑀭𑀽𑀧𑀸𑀦𑀁 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁄𑀢𑀺? 𑀬𑀣𑀸 𑀅𑀢𑁆𑀢𑀦𑀸 𑀲𑀳𑀚𑀭𑀽𑀧𑀸𑀦𑀺 𑀳𑁂𑀝𑁆𑀞𑀺𑀫𑀚𑀯𑀦𑀸𑀤𑀺𑀲𑀫𑀼𑀝𑁆𑀞𑀺𑀢𑀭𑀽𑀧𑁂𑀳𑀺 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀢𑁂𑀳𑀺 𑀲𑀳 𑀢𑀢𑁆𑀣 𑀉𑀧𑁆𑀧𑀢𑁆𑀢𑀺𑀬𑁂𑀯𑀲𑁆𑀲 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 𑀨𑀦𑁆𑀤𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀯𑀺𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀢𑀺 𑀲𑀢𑁆𑀢𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸𑀬 𑀏𑀯 𑀘 𑀯𑀺𑀲𑁂𑀲𑀺𑀢𑀢𑁆𑀢𑀸 𑀘𑀮𑀦𑀸𑀓𑀸𑀭𑀲𑀳𑀺𑀢𑀸𑀬𑁂𑀯 𑀯𑀸𑀬𑁄𑀥𑀸𑀢𑀼 𑀯𑀺𑀓𑀸𑀭𑀲𑀳𑀺𑀢𑀸𑀢𑀺? 𑀦𑀬𑀺𑀤𑀫𑁂𑀯𑀁 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀘𑀮𑀬𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑀺𑀬𑁄𑀧𑀺 𑀲𑀦𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀫𑀢𑁆𑀢𑀓𑀭𑀡𑁂𑀦 𑀧𑀞𑀫𑀚𑀯𑀦𑀸𑀤𑀺𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀬𑁄𑀧𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸 𑀏𑀯. 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀕𑀦𑁆𑀢𑁆𑀯𑀸 𑀅𑀪𑀺𑀓𑁆𑀓𑀫𑀸𑀤𑀻𑀦𑀺 𑀧𑀯𑀢𑁆𑀢𑁂𑀢𑀼𑀓𑀸𑀫𑁄 𑀢𑀤𑀪𑀺𑀫𑀼𑀔𑀪𑀸𑀯𑀯𑀺𑀓𑀸𑀭𑀲𑀫𑁆𑀪𑀯𑀢𑁄. 𑀅𑀥𑀺𑀧𑁆𑀧𑀸𑀬𑀲𑀳𑀪𑀸𑀯𑀺𑀦𑀜𑁆𑀳𑀺 𑀯𑀺𑀓𑀸𑀭𑀁 𑀯𑀺𑀜𑁆𑀜𑀢𑁆𑀢𑀺𑀫𑀸𑀘𑀺𑀓𑁆𑀔𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀪𑀕𑀯𑀢𑀸 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺? 𑀬𑀸 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸…𑀧𑁂… 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲 𑀯𑀸 𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲 𑀯𑀸…𑀧𑁂… 𑀧𑀲𑀸𑀭𑁂𑀦𑁆𑀢𑀲𑁆𑀲 𑀯𑀸 𑀓𑀸𑀬𑀲𑁆𑀲 𑀣𑀫𑁆𑀪𑀦𑀸 𑀲𑀦𑁆𑀣𑀫𑁆𑀪𑀦𑀸 𑀲𑀦𑁆𑀣𑀫𑁆𑀪𑀺𑀢𑀢𑁆𑀢𑀁 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀧𑀦𑀸 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀁. 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀻’’𑀢𑀺 (𑀥. 𑀲. 𑁭𑁨𑁦) 𑀲𑀦𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀸𑀦𑀫𑁆𑀧𑀺 𑀧𑀘𑁆𑀘𑀬𑀪𑀸𑀯𑀸𑀓𑀸𑀭𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑀸𑀯𑀘𑀦𑀁 𑀲𑀼𑀝𑁆𑀞𑀼 𑀉𑀧𑀧𑀦𑁆𑀦𑀁 𑀳𑁄𑀢𑀺.

𑁬𑁮𑁩-𑁪. 𑀘𑀺𑀢𑁆𑀢𑀚𑀸𑀢𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑁂 𑀧𑀘𑁆𑀘𑀬𑁄 𑀬𑁄 𑀆𑀓𑀸𑀭𑀯𑀺𑀓𑀸𑀭𑁄, 𑀅𑀬𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀘𑀺𑀢𑁆𑀢𑀚𑀸𑀢𑀸𑀬𑀸𑀢𑀺 𑀯𑀘𑀻𑀪𑁂𑀤𑀧𑁆𑀧𑀯𑀢𑁆𑀢𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀬. 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑁂𑀢𑀺 𑀉𑀧𑀸𑀤𑀺𑀦𑁆𑀦𑀓𑀓𑀮𑀸𑀧𑀲𑀗𑁆𑀔𑀸𑀢𑀲𑁆𑀲 𑀅𑀓𑁆𑀔𑀭𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀲𑁆𑀲 𑀖𑀝𑁆𑀝𑀦𑀲𑀜𑁆𑀜𑀺𑀢𑁂 𑀓𑀺𑀘𑁆𑀘𑁂 𑀖𑀝𑁆𑀝𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑁄𑀢𑀺 𑀢𑀲𑁆𑀲 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑁄. 𑀏𑀓𑁄 𑀆𑀓𑀸𑀭𑀯𑀺𑀓𑀸𑀭𑁄𑀢𑀺 𑀖𑀝𑁆𑀝𑀺𑀬𑀫𑀸𑀦𑀉𑀧𑀸𑀤𑀺𑀦𑁆𑀦𑀭𑀽𑀧𑀢𑁄, 𑀖𑀝𑁆𑀝𑀦𑁆𑀢𑀺 𑀬𑀸 𑀧𑀣𑀯𑀻𑀥𑀸𑀢𑀼𑀢𑁄 𑀘 𑀯𑀺𑀦𑀺𑀯𑀝𑁆𑀝𑁄 𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀧𑀘𑁆𑀘𑀬𑀲𑀪𑀸𑀯𑀭𑀽𑀧𑁄 𑀏𑀓𑁄 𑀆𑀓𑀸𑀭𑀯𑀺𑀓𑀸𑀭𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄. 𑀧𑀣𑀯𑀺𑀥𑀸𑀢𑀼𑀬𑀸𑀢𑀺 𑀲𑀸𑀫𑀺𑀯𑀘𑀦𑀁 ‘‘𑀉𑀪𑀬𑀲𑀫𑁆𑀩𑀦𑁆𑀥𑀸𑀧𑁂𑀓𑁆𑀔’’𑀦𑁆𑀢𑀺𑀆𑀤𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀣𑀸 𑀢𑀢𑁆𑀣 𑀨𑀦𑁆𑀤𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀕𑀬𑁆𑀳𑀢𑀺, 𑀏𑀯𑀫𑀺𑀥 𑀲𑀼𑀬𑁆𑀬𑀫𑀸𑀦𑀲𑀤𑁆𑀤𑀲𑀯𑀦𑀸𑀦𑀦𑁆𑀢𑀭𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀜𑁆𑀘 𑀲𑀦𑁆𑀣𑀫𑁆𑀪𑀦𑀸𑀤𑀻𑀦𑀁 𑀅𑀪𑀸𑀯𑁂𑀦 𑀖𑀝𑁆𑀝𑀦𑁂𑀦 𑀲𑀤𑁆𑀥𑀺𑀁𑀬𑁂𑀯 𑀲𑀤𑁆𑀤𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 ‘‘𑀮𑀪𑀺𑀢𑁆𑀯𑀸 𑀧𑀦𑀼𑀧𑀢𑁆𑀣𑀫𑁆𑀪’’𑀦𑁆𑀢𑀺𑀆𑀤𑀺𑀦𑀬𑁄 𑀦 𑀮𑀩𑁆𑀪𑀢𑀺. 𑀖𑀝𑁆𑀝𑀦𑀜𑁆𑀳𑀺 𑀧𑀞𑀫𑀚𑀯𑀦𑀸𑀤𑀻𑀲𑀼𑀧𑀺 𑀮𑀩𑁆𑀪𑀢𑁂𑀯. 𑀢𑁂𑀦𑀸𑀳 ‘‘𑀲𑀤𑁆𑀤𑀯𑀲𑀸’’𑀢𑀺. 𑀅𑀣 𑀖𑀝𑁆𑀝𑀦𑀘𑀮𑀦𑀸𑀦𑀁 𑀓𑁄 𑀯𑀺𑀲𑁂𑀲𑁄𑀢𑀺? 𑀖𑀝𑁆𑀝𑀦𑀁 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀪𑀽𑀢𑀓𑀮𑀸𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀆𑀲𑀦𑁆𑀦𑀢𑀭𑀼𑀧𑁆𑀧𑀸𑀤𑀢𑀸, 𑀘𑀮𑀦𑀁 𑀏𑀓𑀲𑁆𑀲𑀸𑀧𑀺 𑀤𑁂𑀲𑀦𑁆𑀢𑀭𑀼𑀧𑁆𑀧𑀸𑀤𑀦𑀧𑀭𑀫𑁆𑀧𑀭𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀕𑁄𑀲𑀻𑀲𑀸𑀤𑀺𑀉𑀧𑀫𑀸𑀧𑁂𑀢𑁆𑀣 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀸. 𑀲𑀸𑀯𑀸𑀢𑀺 𑀲𑀸 𑀏𑀯 𑀲𑀳𑀲𑀤𑁆𑀤𑀸 𑀯𑀺𑀜𑁆𑀜𑀢𑁆𑀢𑀺. 𑀲𑀓𑁆𑀬𑀓𑀼𑀮𑀺𑀦𑁆𑀤𑀼𑀦𑀸𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀕𑀕𑀦𑀢𑀮𑀲𑁆𑀲 𑀲𑀓𑁆𑀓𑀭𑀸𑀚𑀓𑀼𑀮𑀲𑁆𑀲 𑀅𑀯𑀪𑀸𑀲𑀓𑀝𑁆𑀞𑁂𑀦 𑀢𑀲𑁆𑀲 𑀦𑀺𑀲𑀸𑀓𑀭𑀪𑀽𑀢𑁂𑀦. 𑀅𑀣 𑀯𑀸 𑀇𑀦𑁆𑀤𑀢𑀺 𑀧𑀭𑀫𑀺𑀲𑁆𑀲𑀭𑀺𑀬𑀁 𑀓𑀭𑁄𑀢𑀻𑀢𑀺 𑀇𑀦𑁆𑀤𑀼. 𑀇𑀦𑁆𑀤𑀼-𑀲𑀤𑁆𑀤𑀲𑁆𑀲 𑀉𑀢𑁆𑀢𑀫𑀯𑀸𑀘𑀓𑀢𑁆𑀢𑀸 𑀲𑀓𑁆𑀓𑀓𑀼𑀮𑀼𑀢𑁆𑀢𑀫𑁂𑀦𑀸𑀢𑀺 𑀅𑀢𑁆𑀣𑁄.

𑁬𑁮𑁫. 𑀅𑀣 𑀯𑀺𑀜𑁆𑀜𑀢𑁆𑀢𑀺 𑀢𑀸𑀯 𑀲𑀳𑀲𑀤𑁆𑀤𑀸𑀯, 𑀲𑀤𑁆𑀤𑁄 𑀧𑀦 𑀘𑀺𑀢𑁆𑀢𑀚𑁄 𑀅𑀯𑀺𑀜𑁆𑀜𑀢𑁆𑀢𑀺𑀓𑁄 𑀅𑀢𑁆𑀣𑀻𑀢𑀺 𑀘𑁂? 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀤𑁆𑀤𑁄 𑀦 𑀘𑀺𑀢𑁆𑀢𑀚𑁄’’𑀢𑀺𑀆𑀤𑀺. 𑀯𑀺𑀜𑁆𑀜𑀢𑁆𑀢𑀺𑀖𑀝𑁆𑀝𑀦𑀦𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀁 𑀧𑀣𑀯𑀻𑀥𑀸𑀢𑀼𑀬𑀸 𑀖𑀝𑁆𑀝𑀦𑀁. 𑀥𑀸𑀢𑀼𑀲𑀗𑁆𑀖𑀝𑁆𑀝𑀦𑁂𑀦𑁂𑀯𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀬𑀲𑁆𑀫𑀸 𑀥𑀸𑀢𑀼𑀲𑀗𑁆𑀖𑀝𑁆𑀝𑀦𑁂𑀦𑁂𑀯 𑀲𑀤𑁆𑀤𑁄 𑀚𑀸𑀬𑀢𑀺, 𑀦 𑀢𑁂𑀦 𑀯𑀺𑀦𑀸, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀅𑀦𑁂𑀦 𑀘 𑀬𑁂 𑀯𑀤𑀦𑁆𑀢𑀺 ‘‘𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. ‘𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀧𑀦𑀸’𑀢𑀺 (𑀥. 𑀲. 𑁬𑁩𑁬) 𑀳𑀺 𑀯𑀘𑀦𑀢𑁄 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁂𑀦 𑀲𑀤𑁆𑀤𑁂𑀦 𑀲𑀳 𑀯𑀺𑀜𑁆𑀜𑀢𑁆𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄𑀯 𑀘𑀺𑀢𑁆𑀢𑀚𑁄𑀧𑀺 𑀲𑀤𑁆𑀤𑀦𑀯𑀓𑁄 𑀅𑀢𑁆𑀣𑀻’’𑀢𑀺, 𑀢𑁂𑀲𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁄𑀧𑀺 𑀳𑀺 𑀲𑀤𑁆𑀤𑁄𑀯 𑀳𑁄𑀢𑀺, 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀯𑀺𑀭𑀼𑀤𑁆𑀥𑀫𑁂𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑁂𑀳𑀺 𑀲𑀗𑁆𑀕𑀳𑀓𑀸𑀭𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁄𑀯. 𑀆𑀦𑀦𑁆𑀤𑀸𑀘𑀭𑀺𑀬𑁄 𑀧𑀦 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀯 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑀁 𑀯𑀡𑁆𑀡𑁂𑀢𑀺. 𑀓𑀣𑀁? ‘‘𑀚𑀺𑀯𑁆𑀳𑀸𑀢𑀸𑀮𑀼𑀘𑀮𑀦𑀸𑀤𑀺𑀓𑀭𑀯𑀺𑀢𑀓𑁆𑀓𑀲𑀫𑀼𑀝𑁆𑀞𑀺𑀢𑀁 𑀯𑀺𑀜𑁆𑀜𑀢𑁆𑀢𑀺𑀲𑀳𑀚𑀫𑁂𑀯 𑀲𑀼𑀔𑀼𑀫𑀲𑀤𑁆𑀤𑀁 𑀤𑀺𑀩𑁆𑀩𑀲𑁄𑀢𑁂𑀦 𑀲𑀼𑀢𑁆𑀯𑀸 𑀆𑀤𑀺𑀲𑀢𑀻’’𑀢𑀺 𑀲𑀼𑀢𑁆𑀢𑁂, 𑀧𑀝𑁆𑀞𑀸𑀦𑁂 𑀘 𑀑𑀴𑀸𑀭𑀺𑀓𑀁 𑀲𑀤𑁆𑀤𑀁 𑀲𑀦𑁆𑀥𑀸𑀬 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀲𑁆𑀲 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀢𑀸 𑀯𑀼𑀢𑁆𑀢𑀸𑀢𑀺.

𑁬𑁮𑁬-𑁭. 𑀯𑀺𑀜𑁆𑀜𑀸𑀧𑀦𑀢𑁄𑀢𑀺 𑀯𑀘𑀻𑀖𑁄𑀲𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀳𑁂𑀢𑀼𑀢𑁆𑀢𑀸. 𑀲𑀬𑀁 𑀯𑀺𑀜𑁆𑀜𑁂𑀬𑁆𑀬𑀢𑁄𑀢𑀺 𑀕𑀳𑀡𑀸𑀦𑀼𑀲𑀸𑀭𑁂𑀦 𑀯𑀘𑀻𑀖𑁄𑀲𑁂𑀦 𑀯𑀸 𑀳𑁂𑀢𑀼𑀦𑀸 𑀲𑀬𑀁 𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀢𑀲𑁆𑀲𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀲𑀤𑁆𑀤𑀲𑁆𑀲. 𑀲𑀫𑁆𑀪𑀯𑁄 𑀓𑀸𑀭𑀓𑀤𑁆𑀯𑀬𑁂𑀢𑀺 𑀯𑀺𑀜𑁆𑀜𑀸𑀧𑀬𑀢𑀻𑀢𑀺 𑀯𑀺𑀜𑁆𑀜𑀢𑁆𑀢𑀺, 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀺𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀳𑁂𑀢𑀼𑀫𑁆𑀳𑀺, 𑀓𑀫𑁆𑀫𑀦𑀺 𑀯𑀸 𑀢𑀲𑁆𑀲 𑀲𑀫𑁆𑀪𑀯𑁄 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦𑁂𑀢𑀁 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀉𑀤𑀸𑀳𑀼 𑀓𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀦 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬’’𑀦𑁆𑀢𑀺𑀆𑀤𑀺. 𑀅𑀝𑁆𑀞 𑀭𑀽𑀧𑀸𑀦𑀺 𑀯𑀺𑀬𑀸𑀢𑀺 𑀲𑀓𑀲𑀓𑀓𑀮𑀸𑀧𑀕𑀢𑀅𑀝𑁆𑀞𑀭𑀽𑀧𑀸𑀦𑀺 𑀯𑀺𑀬, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀲𑁆𑀲 𑀏𑀓𑀢𑁄 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀳𑀚𑀓𑀮𑀸𑀧𑁂 𑀲𑀤𑁆𑀤𑁄 𑀦 𑀮𑀩𑁆𑀪𑀢𑀻𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀓𑀮𑀸𑀧𑁂 𑀮𑀩𑁆𑀪𑀫𑀸𑀦𑀫𑁆𑀧𑀺 𑀢𑀁 𑀳𑀺𑀢𑁆𑀯𑀸 ‘‘𑀅𑀝𑁆𑀞’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀬𑀣𑀸𑀯𑀼𑀢𑁆𑀢𑀯𑀺𑀓𑀸𑀭𑀕𑁆𑀕𑀳𑀡𑀫𑀼𑀔𑁂𑀦 ‘‘𑀅𑀬𑀁 𑀇𑀤𑀁 𑀦𑀸𑀫 𑀓𑀸𑀢𑀼𑀓𑀸𑀫𑁄’’𑀢𑀺 𑀢𑀁𑀲𑀫𑀗𑁆𑀕𑀺𑀦𑁄 𑀅𑀥𑀺𑀧𑁆𑀧𑀸𑀬𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀅𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀭𑀲𑀸’’𑀢𑀺. 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀳𑁂𑀢𑀼𑀪𑀽𑀢𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀓𑀸𑀭𑀢𑁆𑀢𑀸 𑀢𑀲𑁆𑀲𑀸 𑀓𑀸𑀬𑀯𑀺𑀧𑁆𑀨𑀦𑁆𑀤𑀦𑀲𑁆𑀲 𑀳𑁂𑀢𑀼𑀪𑀸𑀯𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀬…𑀧𑁂… 𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺. 𑀯𑀸𑀬𑁄𑀥𑀸𑀢𑀼𑀬𑀸 𑀓𑀺𑀘𑁆𑀘𑀸𑀥𑀺𑀓𑀢𑀸𑀬 𑀆𑀳 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀧𑀤𑀝𑁆𑀞𑀸𑀦𑀸’’𑀢𑀺. 𑀯𑀘𑀻𑀖𑁄𑀲𑀲𑁆𑀲 𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀘𑀻𑀖𑁄𑀲𑀲𑀗𑁆𑀔𑀸𑀢𑀲𑁆𑀲 𑀘𑀺𑀢𑁆𑀢𑀚𑀲𑀤𑁆𑀤𑀲𑁆𑀲 𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀖𑀝𑁆𑀝𑀦𑁂 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 𑀖𑀝𑁆𑀝𑀦𑀸𑀦𑀦𑁆𑀢𑀭𑀁 𑀲𑀤𑁆𑀤𑀲𑁆𑀲 𑀉𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀣𑀯𑀻𑀥𑀸𑀢𑀼 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀫𑀢𑁆𑀢𑀁 𑀓𑀭𑁄𑀢𑀺, 𑀖𑀝𑁆𑀝𑀺𑀢𑀓𑁆𑀔𑀡𑁂 𑀉𑀢𑀼𑀲𑀫𑀼𑀝𑁆𑀞𑀸𑀦𑁄𑀯 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀧𑀦 𑀘𑀺𑀢𑁆𑀢𑀧𑀘𑁆𑀘𑀬𑀢𑁆𑀢𑀸 𑀧𑀭𑀺𑀬𑀸𑀬𑁂𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀫𑀢𑁂𑀦 𑀘𑀺𑀢𑁆𑀢𑀚𑀲𑀤𑁆𑀤𑁄𑀬𑁂𑀯 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀏𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 𑀉𑀤𑀓𑀢𑀸𑀧𑀦𑀓𑀸𑀮𑁂 𑀅𑀦𑁆𑀢𑁄𑀉𑀤𑀓𑁂𑀬𑁂𑀯 𑀉𑀧𑁆𑀧𑀚𑁆𑀚𑀦𑀓𑀲𑀤𑁆𑀤𑁄 𑀯𑀺𑀬 𑀉𑀧𑀸𑀤𑀺𑀦𑁆𑀦𑁂 𑀖𑀝𑁆𑀝𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑁆𑀧𑀢𑁆𑀢𑀺𑀲𑀫𑀓𑀸𑀮𑀫𑁂𑀯 𑀢𑀲𑁆𑀫𑀺𑀁 𑀓𑀮𑀸𑀧𑁂 𑀦𑀯𑀫𑀁 𑀳𑀼𑀢𑁆𑀯𑀸 𑀅𑀦𑁆𑀢𑁄𑀬𑁂𑀯 𑀪𑀽𑀢𑀺𑀓𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀤𑁆𑀤𑁄𑀧𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀅𑀘𑁆𑀙𑀭𑀸𑀧𑀳𑀭𑀡𑀸𑀤𑀺𑀲𑀤𑁆𑀤𑁄 𑀧𑀦 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑁄𑀬𑁂𑀯𑀸𑀢𑀺.

𑁬𑁮𑁮. 𑀯𑀺𑀕𑁆𑀕𑀳𑀸𑀪𑀸𑀯𑀢𑁄 𑀦 𑀓𑀲𑁆𑀲𑀢𑀺, 𑀓𑀲𑀺𑀢𑀼𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀓𑀸𑀲𑁄, 𑀲𑁄𑀬𑁂𑀯 𑀆𑀓𑀸𑀲𑁄𑀢𑀺 𑀆𑀳 ‘‘𑀦 𑀓𑀲𑁆𑀲𑀢𑀻𑀢𑀺 𑀆𑀓𑀸𑀲𑁄’’𑀢𑀺, 𑀓𑁄 𑀧𑀦𑁂𑀲𑁄𑀢𑀺 𑀆𑀳 ‘‘𑀭𑀽𑀧𑀸𑀦𑀁 𑀯𑀺𑀯𑀭𑁄’’𑀢𑀺, 𑀓𑀡𑁆𑀡𑀘𑁆𑀙𑀺𑀤𑁆𑀤𑀸𑀤𑀺𑀭𑀽𑀧𑀸𑀦𑀁 𑀅𑀦𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁂𑀦 𑀅𑀚𑀝𑀸𑀓𑀸𑀲𑀫𑀸𑀳. 𑀬𑁄…𑀧𑁂… 𑀧𑀭𑀺𑀘𑁆𑀙𑁂𑀤𑁄𑀢𑀺 𑀧𑀦 𑀇𑀫𑀺𑀦𑀸 𑀇𑀥𑀸𑀥𑀺𑀧𑁆𑀧𑁂𑀢𑀫𑀸𑀓𑀸𑀲𑀁, 𑀲𑁄 𑀧𑀦 𑀭𑀼𑀴𑁆𑀳𑀻𑀯𑀲𑁂𑀦 𑀆𑀓𑀸𑀲𑁄𑀢𑀺 𑀧𑀯𑀼𑀘𑁆𑀘𑀢𑀺.

𑀭𑀽𑀧𑀸𑀦𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀲𑀬𑀁 𑀯𑀸 𑀢𑁂𑀳𑀺 𑀧𑀭𑀺𑀘𑁆𑀙𑀺𑀚𑁆𑀚𑀢𑀺, 𑀢𑁂𑀲𑀁 𑀯𑀸 𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑀦𑁆𑀢𑀺 𑀭𑀽𑀧𑀧𑀭𑀺𑀘𑁆𑀙𑁂𑀤𑁄, 𑀢𑀁 𑀮𑀓𑁆𑀔𑀡𑀫𑁂𑀢𑀲𑁆𑀲𑀸𑀢𑀺 𑀭𑀽𑀧𑀧𑀭𑀺𑀘𑁆𑀙𑁂𑀤𑀮𑀓𑁆𑀔𑀡𑁄. 𑀅𑀬𑀜𑁆𑀳𑀺 𑀢𑀁 𑀢𑀁 𑀭𑀽𑀧𑀓𑀮𑀸𑀧𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀭𑀽𑀧𑀧𑀭𑀺𑀬𑀦𑁆𑀢𑀧𑁆𑀧𑀓𑀸𑀲𑀦𑀭𑀲𑁄’’𑀢𑀺. ‘‘𑀅𑀬𑀁 𑀭𑀽𑀧𑀸𑀦𑀁 𑀳𑁂𑀝𑁆𑀞𑀺𑀫𑁄 𑀧𑀭𑀺𑀬𑀦𑁆𑀢𑁄, 𑀅𑀬𑀁 𑀉𑀧𑀭𑀺𑀫𑁄’’𑀢𑀺 𑀏𑀯𑀁 𑀯𑀺𑀪𑀸𑀯𑀦𑀓𑀺𑀘𑁆𑀘𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀢𑁄 𑀧𑀦 𑀬𑀲𑁆𑀫𑀸 𑀭𑀽𑀧𑀸𑀦𑀁 𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑀁 𑀳𑀼𑀢𑁆𑀯𑀸 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀭𑀽𑀧𑀫𑀭𑀺𑀬𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺. 𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀦𑁂𑀲 𑀭𑀽𑀧𑁂 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀘𑀢𑀼𑀲𑀫𑀼𑀝𑁆𑀞𑀸𑀦𑀓𑀮𑀸𑀧𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀅𑀣 𑀏𑀓𑀲𑀫𑀼𑀝𑁆𑀞𑀸𑀦𑀩𑀳𑀼𑀓𑀮𑀸𑀧𑀢𑁄, 𑀉𑀤𑀸𑀳𑀼 𑀏𑀓𑁂𑀓𑀲𑀫𑀼𑀝𑁆𑀞𑀸𑀦𑀏𑀓𑁂𑀓𑀓𑀮𑀸𑀧𑀢𑁄, 𑀏𑀓𑁂𑀓𑀭𑀽𑀧𑀢𑁄 𑀯𑀸𑀢𑀺? 𑀏𑀓𑁂𑀓𑀲𑀫𑀼𑀝𑁆𑀞𑀸𑀦𑀏𑀓𑁂𑀓𑀓𑀮𑀸𑀧𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀤𑀺 𑀳𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀓𑀮𑀸𑀧𑀢𑁄, 𑀏𑀓𑀲𑀫𑀼𑀝𑁆𑀞𑀸𑀦𑀩𑀳𑀼𑀓𑀮𑀸𑀧𑀢𑁄 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀏𑀯𑀁 𑀲𑀢𑀺 𑀲𑀫𑁆𑀨𑀼𑀝𑁆𑀞𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑁂𑀬𑁆𑀬, 𑀏𑀓𑀓𑀮𑀸𑀧𑀕𑀢𑀭𑀽𑀧𑀸𑀦𑀁 𑀯𑀺𑀬 𑀦𑀸𑀦𑀸𑀓𑀮𑀸𑀧𑀕𑀢𑀭𑀽𑀧𑀸𑀦𑀫𑁆𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀢𑀸 𑀯𑀸 𑀆𑀧𑀚𑁆𑀚𑁂𑀬𑁆𑀬. 𑀅𑀣 𑀯𑀸 𑀏𑀓𑁂𑀓𑀭𑀽𑀧𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀏𑀯𑀁 𑀲𑀢𑀺 𑀏𑀓𑁂𑀓𑀓𑀮𑀸𑀧𑀕𑀢𑀭𑀽𑀧𑀸𑀦𑀫𑁆𑀧𑀺 𑀦𑀸𑀦𑀸𑀓𑀮𑀸𑀧𑀕𑀢𑀭𑀽𑀧𑀸𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀢𑀸𑀧𑀲𑀗𑁆𑀕𑁄 𑀲𑀺𑀬𑀸, 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀦𑀺𑀝𑁆𑀞𑀁, 𑀢𑀲𑁆𑀫𑀸 𑀏𑀓𑁂𑀓𑀲𑀫𑀼𑀝𑁆𑀞𑀸𑀦𑀏𑀓𑁂𑀓𑀓𑀮𑀸𑀧𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑀙𑀺𑀤𑁆𑀤𑀯𑀺𑀯𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸𑀢𑀺 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸 𑀙𑀺𑀤𑁆𑀤𑀯𑀺𑀯𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀺𑀁 𑀓𑀮𑀸𑀧𑁂 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑁂𑀯 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑀸 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀲𑀫𑁆𑀨𑀼𑀝𑁆𑀞𑀸𑀯 𑀏𑀓𑀖𑀦𑀧𑀺𑀡𑁆𑀟𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸, 𑀢𑀣𑀸𑀧𑀺 𑀥𑀫𑁆𑀫𑀢𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀺𑀢𑁆𑀢𑀢𑁆𑀢𑀸 𑀅𑀲𑀁𑀓𑀺𑀡𑁆𑀡𑀸 𑀏𑀯. 𑀢𑁂𑀲𑀁 𑀬𑀸 𑀯𑀺𑀯𑀺𑀢𑁆𑀢𑀢𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀓𑀺𑀡𑁆𑀡𑀢𑀸, 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄. 𑀪𑀽𑀢𑀦𑁆𑀢𑀭𑁂𑀳𑀺 𑀯𑀺𑀬 𑀢𑁂𑀳𑀺 𑀲𑁄 𑀅𑀲𑀫𑁆𑀨𑀼𑀝𑁆𑀞𑁄𑀯, 𑀇𑀢𑀭𑀣𑀸 𑀧𑀭𑀺𑀘𑁆𑀙𑀺𑀦𑁆𑀦𑀢𑀸 𑀦 𑀲𑀺𑀬𑀸 𑀢𑁂𑀲𑀁 𑀪𑀽𑀢𑀸𑀦𑀁 𑀩𑁆𑀬𑀸𑀧𑀺𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀩𑁆𑀬𑀸𑀧𑀺𑀪𑀸𑀯𑁄 𑀳𑀺 𑀅𑀲𑀫𑁆𑀨𑀼𑀝𑁆𑀞𑀢𑀸. 𑀢𑁂𑀦𑀸𑀳 𑀪𑀕𑀯𑀸 𑀇𑀫𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀅𑀲𑀫𑁆𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻’’𑀢𑀺 (𑀥. 𑀲. 𑁬𑁩𑁭).

𑀅𑀣 𑀯𑀸 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀓𑀺𑀡𑁆𑀡𑀪𑀸𑀯𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄 𑀅𑀲𑀫𑁆𑀨𑀼𑀝𑁆𑀞𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀪𑀸𑀯𑁄 𑀯𑀼𑀢𑁆𑀢𑁄, 𑀓𑀡𑁆𑀡𑀘𑁆𑀙𑀺𑀤𑁆𑀤𑀫𑀼𑀔𑀯𑀺𑀯𑀭𑀸𑀤𑀺𑀯𑀲𑁂𑀦 𑀙𑀺𑀤𑁆𑀤𑀯𑀺𑀯𑀭𑀪𑀸𑀯𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄 𑀙𑀺𑀤𑁆𑀤𑀯𑀺𑀯𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸. 𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀳𑀺 𑀲𑀢𑀺 𑀙𑀺𑀤𑁆𑀤𑀯𑀺𑀯𑀭𑀪𑀸𑀯𑁄 𑀳𑁄𑀢𑀺. 𑀬𑁂𑀲𑀁 𑀭𑀽𑀧𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀢𑀢𑁆𑀣𑁂𑀯 𑀢𑁂𑀲𑀁 𑀧𑀭𑀺𑀘𑁆𑀙𑁂𑀤𑀪𑀸𑀯𑁂𑀦 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀧𑀤𑀝𑁆𑀞𑀸𑀦𑁄’’𑀢𑀺.

𑁬𑁮𑁯-𑁯𑁧. 𑀭𑀽𑀧𑀲𑁆𑀲𑀮𑀳𑀼𑀢𑀸𑀤𑀺𑀢𑁆𑀢𑀬𑀦𑀺𑀤𑁆𑀤𑁂𑀲𑁂𑀢𑀺 𑀭𑀽𑀧𑀲𑁆𑀲𑀮𑀳𑀼𑀢𑀸 𑀭𑀽𑀧𑀲𑁆𑀲𑀫𑀼𑀤𑀼𑀢𑀸 𑀭𑀽𑀧𑀲𑁆𑀲𑀓𑀫𑁆𑀫𑀜𑁆𑀜𑀢𑀸𑀢𑀺 𑀇𑀫𑀲𑁆𑀲 𑀭𑀽𑀧𑀮𑀳𑀼𑀢𑀸𑀤𑀺𑀢𑁆𑀢𑀬𑀲𑁆𑀲 𑀦𑀺𑀤𑁆𑀤𑁂𑀲𑁂 𑀲𑀫𑁆𑀧𑀢𑁆𑀢𑁂 𑀇𑀤𑀁 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀭𑀽𑀧𑀲𑁆𑀲 𑀮𑀳𑀼𑀢𑀸𑀤𑀻𑀲𑀼 ‘‘𑀓𑀸𑀬𑀮𑀳𑀼𑀪𑀸𑀯𑁄 𑀓𑀸𑀬𑀮𑀳𑀼𑀢𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 ‘‘𑀭𑀽𑀧𑀲𑁆𑀲 𑀮𑀳𑀼𑀪𑀸𑀯𑁄 𑀮𑀳𑀼𑀢𑀸’’𑀢𑀺𑀆𑀤𑀺𑀦𑀸 𑀭𑀽𑀧𑀲𑀫𑁆𑀩𑀦𑁆𑀥𑀻𑀪𑀸𑀯𑁂𑀦 𑀭𑀽𑀧𑀯𑀺𑀓𑀸𑀭𑀸𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑀸. 𑀭𑀽𑀧𑀲𑁆𑀲 𑀮𑀳𑀼𑀪𑀸𑀯𑁄 𑀮𑀳𑀼𑀢𑀸, 𑀲𑀸 𑀭𑀽𑀧𑀲𑁆𑀲 𑀕𑀭𑀼𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀕𑀭𑀼𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀅𑀤𑀦𑁆𑀥𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀮𑀳𑀼𑀭𑀽𑀧𑀧𑀤𑀝𑁆𑀞𑀸𑀦𑀸. 𑀭𑀽𑀧𑀲𑁆𑀲 𑀫𑀼𑀤𑀼𑀪𑀸𑀯𑁄 𑀫𑀼𑀤𑀼𑀢𑀸, 𑀲𑀸 𑀭𑀽𑀧𑀲𑁆𑀲 𑀣𑀤𑁆𑀥𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀣𑀤𑁆𑀥𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀅𑀯𑀺𑀭𑁄𑀥𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀫𑀼𑀤𑀼𑀭𑀽𑀧𑀧𑀤𑀝𑁆𑀞𑀸𑀦𑀸. 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀪𑀸𑀯𑁄 𑀓𑀫𑁆𑀫𑀜𑁆𑀜𑀢𑀸, 𑀲𑀸 𑀭𑀽𑀧𑀲𑁆𑀲 𑀅𑀓𑀫𑁆𑀫𑀜𑁆𑀜𑀪𑀸𑀯𑀯𑀽𑀧𑀲𑀫𑀮𑀓𑁆𑀔𑀡𑀸, 𑀅𑀓𑀫𑁆𑀫𑀜𑁆𑀜𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸, 𑀲𑀭𑀻𑀭𑀓𑀺𑀭𑀺𑀬𑀸𑀲𑀼 𑀅𑀦𑀼𑀓𑀽𑀮𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀫𑁆𑀫𑀜𑁆𑀜𑀭𑀽𑀧𑀧𑀤𑀝𑁆𑀞𑀸𑀦𑀸𑀢𑀺. 𑀅𑀢𑁆𑀣𑁄 𑀧𑀦𑁂𑀢𑁆𑀣 𑀢𑀢𑁆𑀣 𑀢𑀢𑁆𑀣 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀸 𑀧𑀦 𑀢𑀺𑀲𑁆𑀲𑁄 𑀭𑀽𑀧𑀸𑀦𑀁 𑀯𑀺𑀓𑀸𑀭𑀪𑀸𑀯𑀢𑁄 ‘‘𑀭𑀽𑀧𑀯𑀺𑀓𑀸𑀭𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀲𑁆𑀲𑁄…𑀧𑁂… 𑀯𑀺𑀪𑀸𑀯𑀺𑀦𑀸’’𑀢𑀺 𑀯𑀼𑀢𑁆𑀢𑀁.

𑀬𑀣𑀸𑀓𑁆𑀓𑀫𑀁 𑀧𑀦𑁂𑀢𑀸 𑀭𑀽𑀧𑀲𑁆𑀲 𑀤𑀦𑁆𑀥𑀢𑁆𑀢𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀸, 𑀣𑀤𑁆𑀥𑀢𑁆𑀢𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀸, 𑀭𑀽𑀧𑀸𑀦𑀁 𑀲𑀭𑀻𑀭𑀓𑀺𑀭𑀺𑀬𑀸𑀲𑀼 𑀅𑀦𑀦𑀼𑀓𑀽𑀮𑀪𑀸𑀯𑀓𑀭𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀥𑀸𑀢𑀼𑀓𑁆𑀔𑁄𑀪𑁄𑀢𑀺 𑀯𑀸𑀢𑀧𑀺𑀢𑁆𑀢𑀲𑁂𑀫𑁆𑀳𑀧𑀓𑁄𑀧𑁄, 𑀭𑀲𑀸𑀤𑀺𑀥𑀸𑀢𑀽𑀦𑀁 𑀯𑀸 𑀯𑀺𑀓𑀸𑀭𑀸𑀯𑀢𑁆𑀣𑀸, 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸𑀧𑀺 𑀅𑀢𑁆𑀣𑀢𑁄 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁𑀬𑁂𑀯 𑀯𑀺𑀓𑀸𑀭𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀸 𑀲𑀧𑁆𑀧𑀸𑀬𑀉𑀢𑀼𑀆𑀳𑀸𑀭𑀸𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀸, 𑀲𑀸 𑀘 𑀢𑀁𑀢𑀁𑀯𑀺𑀓𑀸𑀭𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀢𑁄 𑀯𑀼𑀢𑁆𑀢𑀸, 𑀅𑀯𑀺𑀲𑁂𑀲𑁂𑀦 𑀧𑀦 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀸, 𑀢𑀣𑀸 𑀳𑀺 𑀢𑁂 𑀓𑀤𑀸𑀘𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀺𑀚𑀳𑀦𑁆𑀢𑀺. 𑀢𑀣𑀸 𑀅𑀯𑀺𑀚𑀳𑀦𑁆𑀢𑀸𑀦𑀁 𑀧𑀦 𑀤𑀼𑀩𑁆𑀩𑀺𑀚𑀸𑀦𑀻𑀬𑀁 𑀦𑀸𑀦𑀢𑁆𑀢𑀦𑁆𑀢𑀺 𑀢𑀁𑀧𑀓𑀸𑀲𑀦𑀢𑁆𑀣𑀁 ‘‘𑀏𑀢𑀸𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀫𑀢𑁄𑀯 𑀦𑀺𑀤𑀲𑁆𑀲𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀳𑀼𑀢𑀸𑀬 𑀳𑀺 𑀅𑀭𑁄𑀕𑀻 𑀦𑀺𑀤𑀲𑁆𑀲𑀦𑀁, 𑀫𑀼𑀤𑀼𑀢𑀸𑀬 𑀫𑀤𑁆𑀤𑀺𑀢𑀘𑀫𑁆𑀫𑀁, 𑀓𑀫𑁆𑀫𑀜𑁆𑀜𑀢𑀸𑀬 𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀁.

𑀦𑀦𑀼 𑀘𑁂𑀢𑁆𑀣 𑀅𑀭𑁄𑀕𑀺𑀦𑁄 𑀢𑀸𑀯 𑀦𑀺𑀤𑀲𑁆𑀲𑀦𑀁 𑀬𑀼𑀢𑁆𑀢𑀁 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀦𑁆𑀢𑀸𑀦𑀢𑁆𑀢𑀸, 𑀲𑀼𑀧𑀭𑀺𑀫𑀤𑁆𑀤𑀺𑀢𑀘𑀫𑁆𑀫𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀸𑀦𑀁 𑀧𑀦 𑀓𑀣𑀁. 𑀦 𑀳𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀲𑀦𑁆𑀢𑀸𑀦𑁂 𑀮𑀳𑀼𑀢𑀸𑀤𑀻𑀦𑀺 𑀲𑀫𑁆𑀪𑀯𑀦𑁆𑀢𑀺 𑀢𑀣𑀸 𑀥𑀸𑀢𑀼𑀓𑁆𑀔𑁄𑀪𑀧𑀝𑀺𑀧𑀓𑁆𑀔𑀧𑀘𑁆𑀘𑀬𑀸𑀪𑀸𑀯𑀢𑁄? 𑀲𑀘𑁆𑀘𑀁, 𑀫𑀼𑀤𑀼𑀓𑀫𑁆𑀫𑀜𑁆𑀜𑀲𑀤𑀺𑀲𑀭𑀽𑀧𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀦 𑀧𑀦 𑀢𑀢𑁆𑀣 𑀇𑀥𑀸𑀥𑀺𑀧𑁆𑀧𑁂𑀢𑀫𑀼𑀤𑀼𑀢𑀸𑀓𑀫𑁆𑀫𑀜𑁆𑀜𑀢𑀸𑀲𑀪𑀸𑀯𑀢𑁄. 𑀬𑀤𑀺 𑀏𑀯𑀁, 𑀓𑀣𑀁 𑀢𑀽𑀮𑀧𑀺𑀘𑀼𑀆𑀤𑀻𑀲𑀼 𑀮𑀳𑀼𑀪𑀸𑀯𑀸𑀤𑀺𑀓𑀦𑁆𑀢𑀺? 𑀦 𑀢𑀢𑁆𑀣 𑀧𑀭𑀫𑀢𑁆𑀣𑀢𑁄 𑀮𑀳𑀼𑀪𑀸𑀯𑀸𑀤𑀺𑀓𑀁 𑀅𑀢𑁆𑀣𑀺, 𑀕𑀭𑀼𑀪𑀸𑀯𑀸𑀤𑀺𑀳𑁂𑀢𑀽𑀦𑀁 𑀧𑀦 𑀅𑀪𑀸𑀯𑀢𑁄 𑀢𑀢𑁆𑀣 𑀮𑀳𑀼𑀪𑀸𑀯𑀸𑀤𑀺𑀯𑁄𑀳𑀸𑀭𑁄.

𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀏𑀓𑀦𑁆𑀢𑁂𑀦 𑀢𑀸𑀲𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀸𑀧𑁂𑀓𑁆𑀔𑀢𑁆𑀢𑀸, 𑀇𑀢𑀭𑀣𑀸 𑀲𑀩𑁆𑀩𑀤𑀸𑀪𑀸𑀯𑀺𑀦𑀻𑀳𑀺 𑀮𑀳𑀼𑀢𑀸𑀤𑀻𑀳𑀺 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀅𑀤𑀦𑁆𑀥𑀢𑀸𑀮𑀓𑁆𑀔𑀡𑀸𑀢𑀺 𑀅𑀕𑀭𑀼𑀪𑀸𑀯𑀮𑀓𑁆𑀔𑀡𑀸. 𑀕𑀭𑀼𑀪𑀸𑀯𑀲𑁆𑀲 𑀯𑀺𑀦𑁄𑀤𑀦𑀁 𑀔𑀺𑀧𑀦𑀁 𑀅𑀧𑀦𑀬𑀦𑀁 𑀓𑀺𑀘𑁆𑀘𑀫𑁂𑀢𑀺𑀲𑁆𑀲𑀸𑀢𑀺 𑀕𑀭𑀼𑀪𑀸𑀯𑀯𑀺𑀦𑁄𑀤𑀦𑀭𑀲𑀸. 𑀓𑀺𑀜𑁆𑀘𑀸𑀧𑀺 𑀳𑀺 𑀅𑀬𑀁 𑀭𑀽𑀧𑀸𑀦𑀁 𑀕𑀭𑀼𑀪𑀸𑀯𑀁 𑀯𑀺𑀦𑁄𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀕𑀭𑀼𑀭𑀽𑀧𑀧𑀝𑀺𑀧𑀓𑁆𑀔𑀸𑀦𑀁 𑀧𑀦 𑀅𑀤𑀦𑁆𑀥𑀭𑀽𑀧𑀸𑀦𑀁 𑀯𑀺𑀓𑀸𑀭𑀢𑁆𑀢𑀸 ‘‘𑀚𑀸𑀢𑀺 𑀦𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀭𑀺𑀬𑀸𑀬𑁂𑀦 𑀕𑀭𑀼𑀪𑀸𑀯𑀁 𑀯𑀺𑀦𑁄𑀤𑁂𑀢𑀺 𑀦𑀸𑀫. 𑀢𑀲𑁆𑀲𑀜𑁆𑀳𑀺 𑀯𑀺𑀚𑁆𑀚𑀫𑀸𑀦𑀸𑀬𑀁 𑀉𑀧𑁆𑀧𑀦𑁆𑀦𑀭𑀽𑀧𑀸𑀦𑀁 𑀅𑀕𑀭𑀼𑀪𑀸𑀯𑁄𑀬𑁂𑀯𑀸𑀢𑀺. 𑀏𑀲 𑀦𑀬𑁄 𑀫𑀼𑀤𑀼𑀢𑀸𑀓𑀫𑁆𑀫𑀜𑁆𑀜𑀢𑀸𑀲𑀼. 𑀘𑁂𑀢𑀲𑀺𑀓𑀮𑀳𑀼𑀢𑀸𑀤𑀬𑁄 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀸𑀦𑀁 𑀢𑀁𑀢𑀁𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀯𑀺𑀤𑁆𑀥𑀁𑀲𑀓𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀺𑀓𑀸𑀭𑀫𑀢𑁆𑀢𑀪𑀸𑀯𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀢𑀸𑀲𑀁 𑀢𑀁𑀓𑀺𑀘𑁆𑀘𑀢𑀸 𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀅𑀤𑀦𑁆𑀥𑀲𑁆𑀲 𑀅𑀭𑁄𑀕𑀻𑀧𑀼𑀭𑀺𑀲𑀲𑁆𑀲 𑀅𑀧𑀭𑀸𑀧𑀭𑀁 𑀲𑀗𑁆𑀓𑀦𑁆𑀢𑀺 𑀧𑀭𑀺𑀯𑀢𑁆𑀢𑀦𑀁 𑀯𑀺𑀬 𑀅𑀤𑀦𑁆𑀥𑀧𑀭𑀺𑀯𑀢𑁆𑀢𑀦𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀢𑀢𑁆𑀣𑁂𑀯 𑀯𑀺𑀓𑀸𑀭𑀪𑀸𑀯𑁂𑀦 𑀉𑀧𑀮𑀩𑁆𑀪𑀦𑀢𑁄 𑀮𑀳𑀼𑀭𑀽𑀧𑀧𑀤𑀝𑁆𑀞𑀸𑀦𑀸. 𑀏𑀯𑀫𑀺𑀢𑀭𑀸𑀲𑀼𑀧𑀺. 𑀅𑀣𑀤𑁆𑀥𑀢𑀸𑀢𑀺 𑀅𑀓𑀣𑀺𑀦𑀢𑀸. 𑀅𑀢𑁆𑀢𑀦𑁄 𑀫𑀼𑀤𑀼𑀪𑀸𑀯𑁂𑀦𑁂𑀯 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀅𑀯𑀺𑀭𑀼𑀤𑁆𑀥𑀸 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀅𑀯𑀺𑀭𑁄𑀥𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀫𑀼𑀤𑀼 𑀳𑀺 𑀓𑀢𑁆𑀣𑀘𑀺 𑀦 𑀯𑀺𑀭𑀼𑀚𑁆𑀛𑀢𑀺. 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀧𑀝𑀺𑀧𑀓𑁆𑀔𑀢𑁆𑀣𑁂 𑀅-𑀓𑀸𑀭𑁄. 𑀤𑀦𑁆𑀥𑀢𑀸𑀤𑀺𑀳𑁂𑀢𑀽𑀦𑀁 𑀧𑀝𑀺𑀧𑀓𑁆𑀔𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀮𑀳𑀼𑀢𑀸𑀤𑀻𑀦𑀦𑁆𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 𑀲𑀢𑁆𑀢𑀸𑀧𑀝𑀺𑀲𑁂𑀥𑁂𑀢𑀺 𑀯𑀤𑀦𑁆𑀢𑀺. 𑀲𑀭𑀻𑀭𑁂𑀦 𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸𑀦𑀁 𑀅𑀦𑀼𑀓𑀽𑀮𑀢𑀸𑀲𑀗𑁆𑀔𑀸𑀢𑁄 𑀓𑀫𑁆𑀫𑀜𑁆𑀜𑀪𑀸𑀯𑁄 𑀮𑀓𑁆𑀔𑀡𑀫𑁂𑀢𑀺𑀲𑁆𑀲𑀸𑀢𑀺 𑀲𑀭𑀻𑀭𑀓𑀺𑀭𑀺𑀬𑀸𑀦𑀼𑀓𑀽𑀮𑀓𑀫𑁆𑀫𑀜𑁆𑀜𑀪𑀸𑀯𑀮𑀓𑁆𑀔𑀡𑀸. 𑀅𑀓𑀫𑁆𑀫𑀜𑁆𑀜𑀁 𑀤𑀼𑀩𑁆𑀩𑀮𑀁 𑀦𑀸𑀫 𑀳𑁄𑀢𑀻𑀢𑀺 𑀓𑀫𑁆𑀫𑀜𑁆𑀜𑀢𑀸 𑀅𑀤𑀼𑀩𑁆𑀩𑀮𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀼𑀢𑁆𑀢𑀸.

𑁬𑁯𑁨. 𑀭𑀽𑀧𑀸𑀦𑀫𑀸𑀘𑀬𑁄 𑀬𑁄𑀢𑀺𑀆𑀤𑀻𑀲𑀼 𑀬𑁄 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀁 𑀆𑀤𑀺𑀢𑁄 𑀘𑀬𑁄, 𑀬𑀣𑀸𑀧𑀘𑁆𑀘𑀬𑀁 𑀢𑀢𑁄 𑀢𑀢𑁄 𑀆𑀕𑀢𑀲𑁆𑀲 𑀯𑀺𑀬 𑀘𑀬𑁄𑀢𑀺 𑀯𑀸 𑀆𑀘𑀬𑀲𑀗𑁆𑀔𑀸𑀢𑁄 𑀭𑀽𑀧𑀸𑀦𑀁 𑀧𑀞𑀫𑀼𑀧𑁆𑀧𑀸𑀤𑁄 𑀯𑀟𑁆𑀠𑀺 𑀘, 𑀲𑁄 𑀉𑀧𑀘𑀬𑁄𑀢𑀺 𑀉𑀤𑁆𑀤𑁂𑀲𑁂 𑀯𑀼𑀢𑁆𑀢𑁄 ‘‘𑀉𑀧𑀜𑁆𑀜𑀢𑁆𑀢𑀁 𑀉𑀧𑀲𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀉𑀧-𑀲𑀤𑁆𑀤𑀲𑁆𑀲 𑀧𑀞𑀫𑀽𑀧𑀭𑀺𑀅𑀢𑁆𑀣𑀤𑀲𑁆𑀲𑀦𑀢𑁄. 𑀬𑀸 𑀧𑀦 𑀢𑁂𑀲𑀁𑀬𑁂𑀯 𑀭𑀽𑀧𑀸𑀦𑀁 𑀅𑀦𑀼𑀧𑁆𑀧𑀩𑀦𑁆𑀥𑀢𑀸 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀺, 𑀲𑀸 𑀲𑀦𑁆𑀢𑀢𑀻𑀢𑀺 𑀧𑀯𑀼𑀘𑁆𑀘𑀢𑀺. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀳𑀺 𑀭𑀽𑀧𑀼𑀧𑁆𑀧𑀢𑁆𑀢𑀺𑀆𑀤𑀺𑀘𑀬𑀪𑀸𑀯𑀢𑁄 𑀆𑀘𑀬𑁄 𑀦𑀸𑀫, 𑀢𑀢𑁄 𑀧𑀭𑀁 𑀬𑀸𑀯 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀟𑁆𑀠𑀺𑀪𑀸𑀯𑀢𑁄 𑀉𑀧𑀘𑀬𑁄 𑀦𑀸𑀫. 𑀢𑀤𑀸 𑀳𑀺 𑀭𑀽𑀧𑀲𑁆𑀲 𑀓𑀫𑁆𑀫𑀘𑀺𑀢𑁆𑀢𑀉𑀢𑀽𑀳𑀺 𑀘𑀬𑁄𑀬𑁂𑀯, 𑀦 𑀳𑀸𑀦𑀺. 𑀅𑀣 𑀯𑀸 𑀬𑀸𑀯 𑀆𑀳𑀸𑀭𑀲𑀫𑀼𑀝𑁆𑀞𑀸𑀦 𑀭𑀽𑀧𑀼𑀧𑁆𑀧𑀸𑀤𑁄, 𑀘𑀓𑁆𑀔𑀸𑀤𑀺𑀉𑀧𑁆𑀧𑀸𑀤𑁄 𑀯𑀸, 𑀢𑀸𑀯 𑀉𑀧𑀘𑀬𑁄 𑀦𑀸𑀫, 𑀢𑀢𑁄 𑀧𑀭𑀁 𑀧𑀦 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀲𑀦𑁆𑀢𑀢𑀺 𑀦𑀸𑀫. 𑀏𑀯𑀜𑁆𑀘 𑀓𑀢𑁆𑀯𑀸 𑁋

‘‘𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄, 𑀲𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄. 𑀬𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀲𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀻’’𑀢𑀺 (𑀥. 𑀲. 𑁬𑁪𑁧-𑁬𑁪𑁨) 𑁋

𑀏𑀯𑀁 𑀉𑀧𑀘𑀬𑀲𑀦𑁆𑀢𑀢𑀻𑀦𑀁 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀸𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸𑀬 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀆𑀘𑀬𑁄 𑀦𑀸𑀫 𑀦𑀺𑀩𑁆𑀩𑀢𑁆𑀢𑀺, 𑀉𑀧𑀘𑀬𑁄 𑀦𑀸𑀫 𑀯𑀟𑁆𑀠𑀺, 𑀲𑀦𑁆𑀢𑀢𑀺 𑀦𑀸𑀫 𑀧𑀯𑀢𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀦𑀤𑀻𑀢𑀻𑀭𑁂 𑀔𑀢𑀓𑀽𑀧𑀲𑁆𑀫𑀺𑀜𑁆𑀳𑀺 𑀉𑀤𑀓𑀼𑀕𑁆𑀕𑀫𑀦𑀓𑀸𑀮𑁄 𑀯𑀺𑀬 𑀆𑀘𑀬𑁄 𑀦𑀺𑀩𑁆𑀩𑀢𑁆𑀢𑀺, 𑀧𑀭𑀺𑀧𑀼𑀡𑁆𑀡𑀓𑀸𑀮𑁄 𑀯𑀺𑀬 𑀉𑀧𑀘𑀬𑁄 𑀯𑀟𑁆𑀠𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀫𑀦𑀓𑀸𑀮𑁄 𑀯𑀺𑀬 𑀲𑀦𑁆𑀢𑀢𑀺 𑀧𑀯𑀢𑁆𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁬𑁪𑁧; 𑀯𑀺𑀲𑀼𑀤𑁆𑀥𑀺. 𑁨.𑁪𑁪𑁪) 𑁋

𑀉𑀧𑀫𑀸 𑀯𑀼𑀢𑁆𑀢𑀸. ‘‘𑀭𑀽𑀧𑀸𑀦𑀫𑀸𑀘𑀬𑁄’’𑀢𑀺 𑀘𑁂𑀢𑁆𑀣 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁂𑀦 𑀉𑀧𑁆𑀧𑀸𑀤𑁄 𑀦𑀸𑀫 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀯𑀺𑀓𑀸𑀭𑁄. 𑀯𑀺𑀓𑀸𑀭𑀢𑁆𑀢𑁂 𑀘 𑀲𑀢𑀺 𑀅𑀢𑁆𑀢𑀦𑁄 𑀯𑀺𑀓𑀸𑀭𑀯𑀦𑁆𑀢𑀥𑀫𑁆𑀫𑀪𑁂𑀤𑀪𑀺𑀦𑁆𑀦𑀢𑁆𑀢𑀸 𑀏𑀓𑀓𑁆𑀔𑀡𑁂𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀩𑀳𑀽𑀦𑀫𑁆𑀧𑀺 𑀭𑀽𑀧𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀉𑀧𑁆𑀧𑀸𑀤𑀯𑀺𑀓𑀸𑀭𑀪𑀸𑀯𑁄, 𑀦 𑀧𑀺𑀡𑁆𑀟𑀲𑁆𑀲𑁂𑀯𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀭𑀽𑀧𑀸𑀦𑀫𑁂𑀯 𑀉𑀧𑁆𑀧𑀢𑁆𑀢𑀺 𑀈𑀤𑀺𑀲𑀻, 𑀅𑀣 𑀔𑁄 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀉𑀧𑁆𑀧𑀸𑀤𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀚𑀭𑀢𑀸, 𑀅𑀦𑀺𑀘𑁆𑀘𑀢𑀸, 𑀭𑀽𑀧𑀲𑁆𑀲 𑀮𑀳𑀼𑀫𑀼𑀤𑀼𑀓𑀫𑁆𑀫𑀜𑁆𑀜𑀢𑀸 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁬𑁯𑁩. 𑀚𑀸𑀢𑀺𑀭𑀽𑀧𑀦𑁆𑀢𑀺 𑀤𑀻𑀧𑀺𑀢𑀁 𑀅𑀝𑁆𑀞𑀓𑀣𑀸𑀲𑀼 𑀉𑀪𑀬𑀲𑁆𑀲𑀧𑀺 𑀭𑀽𑀧𑀼𑀧𑁆𑀧𑀸𑀤𑀲𑀪𑀸𑀯𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀯𑀺𑀪𑀚𑁆𑀚 𑀯𑀼𑀢𑁆𑀢𑀁? 𑀪𑀕𑀯𑀢𑀸 𑀢𑀣𑁂𑀯 𑀤𑁂𑀲𑀺𑀢𑀢𑁆𑀢𑀸. 𑀪𑀕𑀯𑀢𑀸𑀧𑀺 𑀓𑀲𑁆𑀫𑀸 𑀢𑀣𑀸 𑀤𑁂𑀲𑀺𑀢𑀦𑁆𑀢𑀺 𑀆𑀳 ‘‘𑀯𑀼𑀢𑁆𑀢𑀫𑀸𑀓𑀸𑀭𑀦𑀸𑀦𑀢𑁆𑀢𑀸’’𑀢𑀺𑀆𑀤𑀺. 𑀆𑀓𑀸𑀭𑀦𑀸𑀦𑀢𑁆𑀢𑀁 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑀫𑁂𑀯. 𑀅𑀓𑁆𑀔𑀭𑀲𑁆𑀲 𑀧𑀞𑀫𑀼𑀧𑁆𑀧𑀢𑁆𑀢𑀺 𑀉𑀧𑀘𑀬𑁄, 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺 𑀲𑀦𑁆𑀢𑀢𑀺. 𑀏𑀯𑀁 𑀢𑀺𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀫𑁆𑀧𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 𑀏𑀯𑀁 𑀢𑁂𑀲𑀁 𑀆𑀓𑀸𑀭𑀦𑀸𑀦𑀢𑁆𑀢𑀁 𑀯𑀡𑁆𑀡𑁂𑀦𑁆𑀢𑀺. 𑀯𑁂𑀦𑁂𑀬𑁆𑀬𑀸𑀦𑀁 𑀯𑀲𑁂𑀦 𑀯𑀸𑀢𑀺 𑀢𑀤𑀸 𑀓𑀺𑀭 𑀲𑁄𑀢𑀽𑀦𑀁 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀅𑀬𑀁 𑀚𑀸𑀢𑀺 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀧𑀪𑀯𑁄, 𑀲𑀬𑀁 𑀧𑀦 𑀦 𑀓𑀼𑀢𑁄𑀘𑀺 𑀚𑀸𑀬𑀢𑀺, 𑀬𑀣𑀸 𑀢𑀁 ‘‘𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀻’’𑀢𑀺. 𑀢𑁂𑀲𑀁 𑀫𑀺𑀘𑁆𑀙𑀸𑀕𑀸𑀳𑀁 𑀯𑀺𑀥𑀫𑁂𑀦𑁆𑀢𑁄 ‘‘𑀚𑀸𑀢𑀺 𑀦𑀸𑀫 𑀦 𑀅𑀜𑁆𑀜𑀸, 𑀉𑀧𑀘𑀬𑀲𑀦𑁆𑀢𑀢𑀺𑀯𑀲𑁂𑀦 𑀞𑀺𑀢𑀸 𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑁂𑀯 𑀧𑀦 𑀢𑀣𑀸 𑀯𑀼𑀘𑁆𑀘𑀢𑀺, 𑀲𑀸 𑀘 𑀬𑀲𑁆𑀲 𑀉𑀧𑁆𑀧𑀸𑀤𑁄, 𑀢𑀲𑁆𑀲 𑀧𑀘𑁆𑀘𑀬𑁂𑀳𑁂𑀯 𑀚𑀸𑀢𑀧𑀭𑀺𑀬𑀸𑀬𑀁 𑀮𑀩𑁆𑀪𑀢𑀻’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀉𑀧𑀘𑀬𑁄 𑀲𑀦𑁆𑀢𑀢𑀻𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑁂𑀲𑁂𑀢𑀻𑀢𑀺 𑀆𑀘𑀭𑀺𑀬𑀸.

𑀧𑀼𑀩𑁆𑀩𑀦𑁆𑀢𑀢𑁄 𑀧𑀼𑀩𑁆𑀩𑀓𑁄𑀝𑁆𑀞𑀸𑀲𑀢𑁄, 𑀅𑀦𑀸𑀕𑀢𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀚𑁆𑀚𑀫𑀸𑀦𑁂 𑀭𑀽𑀧𑀥𑀫𑁆𑀫𑁂 𑀉𑀧𑁆𑀧𑀸𑀤𑁄 𑀅𑀦𑀸𑀕𑀢𑀓𑁆𑀔𑀡𑀢𑁄 𑀉𑀫𑁆𑀫𑀼𑀚𑁆𑀚𑀸𑀧𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀫𑁆𑀫𑀼𑀚𑁆𑀚𑀸𑀧𑀦𑀭𑀲𑁄’’𑀢𑀺. ‘‘𑀇𑀫𑁂 𑀭𑀽𑀧𑀥𑀫𑁆𑀫𑀸 𑀲𑀫𑁆𑀧𑀝𑀺𑀘𑁆𑀙𑀣 𑀦𑁂’’𑀢𑀺 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑀯𑀺𑀬 𑀕𑀬𑁆𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀬𑁆𑀬𑀸𑀢𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺. 𑀧𑀭𑀺𑀧𑀼𑀡𑁆𑀡𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸 𑀉𑀧𑀭𑀺 𑀘𑀬𑁄 𑀉𑀧𑀘𑀬𑁄𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀉𑀧𑁆𑀧𑀸𑀤𑀓𑁆𑀔𑀡𑀧𑁆𑀧𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺 𑀆𑀤𑀺𑀓𑀫𑁆𑀫𑁂 𑀢𑀧𑁆𑀧𑀘𑁆𑀘𑀬𑀯𑀲𑁂𑀦, 𑀏𑀯𑀁 𑀉𑀧𑁆𑀧𑀸𑀤𑀓𑁆𑀔𑀡𑀕𑀢𑀁 𑀉𑀧𑀘𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀘𑀺𑀢𑀭𑀽𑀧𑀧𑀤𑀝𑁆𑀞𑀸𑀦𑁄’’𑀢𑀺.

𑀧𑀯𑀢𑁆𑀢𑀺𑀮𑀓𑁆𑀔𑀡𑀸𑀢𑀺 𑀅𑀦𑀼𑀧𑁆𑀧𑀩𑀦𑁆𑀥𑀢𑁄 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀭𑀽𑀧𑀸𑀦𑀁 𑀧𑀯𑀢𑁆𑀢𑀦𑀦𑁆𑀢𑀺 𑀮𑀓𑁆𑀔𑀺𑀢𑀩𑁆𑀩𑀸. 𑀅𑀦𑀼𑀧𑁆𑀧𑀩𑀦𑁆𑀥𑀦𑀭𑀲𑀸𑀢𑀺 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀅𑀦𑀼𑀧𑁆𑀧𑀩𑀦𑁆𑀥𑀦𑀓𑀺𑀘𑁆𑀘𑀸. 𑀅𑀲𑀢𑀺 𑀳𑀺 𑀉𑀧𑁆𑀧𑀸𑀤𑁂 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀅𑀦𑀼𑀧𑁆𑀧𑀩𑀦𑁆𑀥𑁄 𑀦 𑀲𑀺𑀬𑀸. 𑀅𑀦𑀼𑀧𑁆𑀧𑀩𑀦𑁆𑀥𑀭𑀲𑀢𑁆𑀢𑀸𑀬𑁂𑀯 𑀅𑀦𑀼𑀧𑀘𑁆𑀙𑁂𑀤𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁄 𑀆𑀳 ‘‘𑀅𑀦𑀼𑀧𑀘𑁆𑀙𑁂𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺. 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀖𑀝𑀺𑀢𑀭𑀽𑀧𑁂𑀲𑀼 𑀉𑀧𑀮𑀩𑁆𑀪𑀦𑀢𑁄 𑀯𑀼𑀢𑁆𑀢𑀁 ‘‘𑀅𑀦𑀼𑀧𑁆𑀧𑀩𑀦𑁆𑀥𑀭𑀽𑀧𑀧𑀤𑀝𑁆𑀞𑀸𑀦𑀸’’𑀢𑀺.

𑁬𑁯𑁪. 𑀚𑀻𑀭𑀡𑀦𑁆𑀢𑀺 𑀚𑀺𑀡𑁆𑀡𑀪𑀸𑀯𑁄, 𑀅𑀪𑀺𑀦𑀯𑀪𑀸𑀯𑀳𑀸𑀦𑀻𑀢𑀺 𑀅𑀢𑁆𑀣𑁄.

𑀧𑀸𑀓𑀝𑀸 𑀭𑀽𑀧𑀥𑀫𑁆𑀫𑁂𑀲𑀼 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀤𑀦𑁆𑀢𑀸𑀤𑀻𑀲𑀼 𑀯𑀺𑀓𑀸𑀭𑀤𑀲𑁆𑀲𑀦𑀢𑁄, 𑀇𑀢𑀭𑀸 𑀢𑀤𑀪𑀸𑀯𑀢𑁄 𑀅𑀧𑀸𑀓𑀝𑀸. 𑀓𑀸𑀫𑀁 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀔𑀡𑀺𑀓𑀚𑀭𑀸 𑀧𑀝𑀺𑀘𑁆𑀙𑀦𑁆𑀦𑀸 𑀏𑀯, 𑀬𑀸 ‘‘𑀅𑀯𑀻𑀘𑀺𑀚𑀭𑀸’’𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀚𑀭𑀸𑀬 𑀲𑀼𑀝𑁆𑀞𑀼 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀧𑀸𑀓𑀝𑀸 𑀭𑀽𑀧𑀥𑀫𑁆𑀫𑁂𑀲𑀽’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁. 𑀔𑀡𑁆𑀟𑀺𑀘𑁆𑀘𑀸𑀤𑀺𑀯𑀺𑀓𑀸𑀭𑁄 𑀧𑀦 𑀔𑀡𑀺𑀓𑀚𑀭𑀸𑀬 𑀦𑀢𑁆𑀣𑀺. 𑀭𑀽𑀧𑀧𑀭𑀺𑀧𑀸𑀓𑁄 𑀭𑀽𑀧𑀥𑀫𑁆𑀫𑀸𑀦𑀁 𑀚𑀺𑀡𑁆𑀡𑀢𑀸, 𑀚𑀭𑀁 𑀧𑀢𑁆𑀢𑀲𑁆𑀲 𑀪𑀗𑁆𑀕𑁄 𑀅𑀯𑀲𑁆𑀲𑀁𑀪𑀸𑀯𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀦𑀬𑀦𑀭𑀲𑀸’’𑀢𑀺, 𑀪𑀗𑁆𑀕𑀽𑀧𑀦𑀬𑀦𑀓𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀲𑀪𑀸𑀯𑀸𑀦𑀧𑀕𑀫𑁂𑀧𑀻𑀢𑀺𑀓𑀓𑁆𑀔𑀴𑀢𑁆𑀢𑀸𑀤𑀺𑀲𑀪𑀸𑀯𑀸𑀦𑀧𑀕𑀫𑁂𑀧𑀺, 𑀞𑀺𑀢𑀺𑀓𑁆𑀔𑀡𑁂 𑀳𑀺 𑀚𑀭𑀸 𑀦𑀸𑀫, 𑀦 𑀘 𑀢𑀤𑀸 𑀥𑀫𑁆𑀫𑀲𑀪𑀸𑀯𑀁 𑀯𑀺𑀚𑀳𑀢𑀺. 𑀦𑀯𑀪𑀸𑀯𑁄 𑀉𑀧𑁆𑀧𑀸𑀤𑀸𑀯𑀢𑁆𑀣𑀸, 𑀢𑀲𑁆𑀲𑀸 𑀅𑀧𑀕𑀫𑀪𑀸𑀯𑁂𑀦 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀦𑀯𑀪𑀸𑀯𑀸𑀧𑀕𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺. 𑀯𑀻𑀳𑀺𑀧𑀼𑀭𑀸𑀡𑀪𑀸𑀯𑁄 𑀯𑀺𑀬𑀸𑀢𑀺 𑀯𑀻𑀳𑀺𑀪𑀸𑀯𑀸𑀦𑀧𑀕𑀫𑁂𑀧𑀺 𑀅𑀪𑀺𑀦𑀯𑀪𑀸𑀯𑀸𑀧𑀕𑀫𑀦𑀓𑀭𑁄 𑀯𑀻𑀳𑀺𑀧𑀼𑀭𑀸𑀡𑀪𑀸𑀯𑁄 𑀯𑀺𑀬. 𑀯𑀻𑀳𑀺𑀧𑀼𑀭𑀸𑀡𑀪𑀸𑀯𑁄 𑀲𑀩𑁆𑀩𑀸𑀯𑀢𑁆𑀣𑀸𑀦𑀺 𑀅𑀧𑀦𑁂𑀢𑀺, 𑀅𑀬𑀁 𑀧𑀦 𑀓𑁂𑀯𑀮𑀁 𑀉𑀧𑁆𑀧𑀸𑀤𑀸𑀯𑀢𑁆𑀣𑀫𑁂𑀯 𑀅𑀧𑀦𑁂𑀢𑀺. 𑀧𑀭𑀺𑀢𑁄 𑀲𑀩𑁆𑀩𑀢𑁄 𑀪𑀺𑀚𑁆𑀚𑀦𑀦𑁆𑀢𑀺 𑀮𑀓𑁆𑀔𑀺𑀢𑀩𑁆𑀩𑀸𑀢𑀺 𑀧𑀭𑀺𑀪𑁂𑀤𑀮𑀓𑁆𑀔𑀡𑀸. 𑀦𑀺𑀘𑁆𑀘𑀁 𑀦𑀸𑀫 𑀥𑀼𑀯𑀁, 𑀭𑀽𑀧𑀁 𑀧𑀦 𑀔𑀡𑀪𑀗𑁆𑀕𑀺𑀢𑀸𑀬 𑀦 𑀦𑀺𑀘𑁆𑀘𑀦𑁆𑀢𑀺 𑀅𑀦𑀺𑀘𑁆𑀘𑀁, 𑀢𑀲𑁆𑀲 𑀪𑀸𑀯𑁄 𑀅𑀦𑀺𑀘𑁆𑀘𑀢𑀸. 𑀲𑀸 𑀧𑀦 𑀞𑀺𑀢𑀺𑀧𑁆𑀧𑀢𑁆𑀢𑀭𑀽𑀧𑀁 𑀞𑀺𑀢𑀺𑀬𑀫𑁂𑀯 𑀯𑀺𑀦𑀸𑀲𑀦𑀪𑀸𑀯𑁂𑀦 𑀲𑀁𑀲𑀻𑀤𑁂𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀲𑀁𑀲𑀻𑀤𑀦𑀭𑀲𑀸. 𑀬𑀲𑁆𑀫𑀸 𑀘 𑀲𑀸 𑀪𑀗𑁆𑀕𑀪𑀸𑀯𑀢𑁄 𑀔𑀬𑀯𑀬𑀸𑀓𑀸𑀭𑁂𑀦𑁂𑀯 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀔𑀬𑀯𑀬𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺. 𑀅𑀦𑀼𑀓𑁆𑀓𑀫𑁂𑀦 𑀯𑀺𑀦𑀸𑀲𑁄 𑀔𑀬𑁄 𑀦𑀸𑀫, 𑀤𑀻𑀧𑀯𑀝𑁆𑀝𑀺𑀓𑀸𑀬 𑀲𑀳 𑀢𑁂𑀮𑀲𑁆𑀲 𑀯𑀺𑀬 𑀲𑀳 𑀦𑀺𑀭𑁄𑀥𑁄 𑀯𑀬𑁄𑀢𑀺 𑀯𑀤𑀦𑁆𑀢𑀺.

𑁬𑁯𑁬-𑁭. 𑀲𑀫𑁄𑀥𑀸𑀦𑀢𑁄𑀢𑀺 𑀭𑀸𑀲𑀺𑀢𑁄. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀫𑀺𑀤𑁆𑀥𑀭𑀽𑀧𑀲𑁆𑀲 𑀯𑀤𑀦𑀲𑀻𑀮𑀸, 𑀫𑀺𑀤𑁆𑀥𑀯𑀸𑀤𑁄 𑀯𑀸 𑀏𑀢𑁂𑀲𑀦𑁆𑀢𑀺 𑀫𑀺𑀤𑁆𑀥𑀯𑀸𑀤𑀺𑀦𑁄. 𑀫𑀺𑀤𑁆𑀥𑀭𑀽𑀧𑀁 𑀦𑀸𑀫𑀸𑀢𑀺 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀯𑀲𑁂𑀦 𑀢𑀺𑀲𑀫𑀼𑀝𑁆𑀞𑀸𑀦𑀁 𑀫𑀺𑀤𑁆𑀥𑀁 𑀦𑀸𑀫 𑀭𑀽𑀧𑀁. 𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀫𑀼𑀦𑀻𑀲𑀻’’𑀢𑀺𑀆𑀤𑀺. 𑀦𑀢𑁆𑀣𑀺 𑀦𑀻𑀯𑀭𑀡𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀲𑁆𑀲, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀸𑀦𑀁, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀸𑀦𑀜𑁆𑀘 𑀧𑀳𑀻𑀦𑀢𑁆𑀢𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀫𑀺𑀤𑁆𑀥𑀁 𑀭𑀽𑀧𑀁 𑀲𑀺𑀬𑀸, 𑀅𑀧𑁆𑀧𑀳𑀸𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀭𑀽𑀧𑀓𑁆𑀔𑀦𑁆𑀥𑁄 𑀅𑀪𑀺𑀜𑁆𑀜𑁂𑀬𑁆𑀬𑁄 𑀧𑀭𑀺𑀜𑁆𑀜𑁂𑀬𑁆𑀬𑁄 𑀦 𑀧𑀳𑀸𑀢𑀩𑁆𑀩𑁄 𑀦 𑀪𑀸𑀯𑁂𑀢𑀩𑁆𑀩𑁄 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑁄. ‘‘𑀓𑀢𑀫𑁂 𑀥𑀫𑁆𑀫𑀸 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸. 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑀁, 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑁄, 𑀢𑀻𑀲𑀼 𑀪𑀽𑀫𑀻𑀲𑀼 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁, 𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘, 𑀇𑀫𑁂 𑀥𑀫𑁆𑀫𑀸 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸’’𑀢𑀺 (𑀥. 𑀲. 𑁧𑁪𑁦𑁭) 𑀯𑀘𑀦𑁂𑀦 𑀭𑀽𑀧𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀪𑀸𑀯𑀢𑁄. 𑀏𑀯𑀜𑁆𑀘 𑀲𑀢𑀺 𑀢𑀲𑁆𑀲 𑀦𑀻𑀯𑀭𑀡𑀪𑀸𑀯𑁄 𑀯𑀺𑀭𑀼𑀚𑁆𑀛𑁂𑀬𑁆𑀬 𑀦𑀻𑀯𑀭𑀡𑀸𑀦𑀁 𑀧𑀳𑀸𑀢𑀩𑁆𑀩𑀢𑁆𑀢𑀸. 𑀦 𑀳𑀺 𑀦𑀻𑀯𑀭𑀡𑀸𑀦𑀁 𑀅𑀧𑁆𑀧𑀳𑀸𑀢𑀩𑁆𑀩𑀢𑁆𑀢𑁂 𑁋

‘‘𑀬𑀸 𑀫𑁂 𑀓𑀗𑁆𑀔𑀸 𑀧𑀼𑀭𑁂 𑀆𑀲𑀺, 𑀢𑀁 𑀫𑁂 𑀅𑀓𑁆𑀔𑀸𑀲𑀺 𑀘𑀓𑁆𑀔𑀼𑀫𑀸;

𑀅𑀤𑁆𑀥𑀸 𑀫𑀼𑀦𑀻𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀦𑀢𑁆𑀣𑀺 𑀦𑀻𑀯𑀭𑀡𑀸 𑀢𑀯𑀸’’𑀢𑀺. (𑀲𑀼. 𑀦𑀺. 𑁫𑁪𑁬) 𑁋

𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀪𑀕𑀯𑀢𑁄 𑀣𑁄𑀫𑀦𑀁 𑀬𑀼𑀚𑁆𑀚𑁂𑀬𑁆𑀬. 𑀬𑀤𑀺 𑀲𑀺𑀬𑀸, ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣𑀸𑀢𑀺𑀆𑀤𑀺𑀯𑀘𑀦𑀢𑁄 (𑀫. 𑀦𑀺. 𑁧.𑁨𑁪𑁭; 𑀲𑀁. 𑀦𑀺. 𑁩.𑁩𑁩-𑁩𑁪) 𑀭𑀽𑀧𑀲𑁆𑀲 𑀧𑀳𑀸𑀢𑀩𑁆𑀩𑀢𑀸𑀧𑀺 𑀧𑀜𑁆𑀜𑀸𑀬𑀢𑀻𑀢𑀺? 𑀢𑀁 𑀦, 𑀢𑀩𑁆𑀩𑀺𑀲𑀬𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀲𑁆𑀲 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑁂 𑀙𑀦𑁆𑀤𑀭𑀸𑀕𑀯𑀺𑀦𑀬𑁄, 𑀢𑀁 𑀢𑀢𑁆𑀣 𑀧𑀳𑀸𑀦’’𑀦𑁆𑀢𑀺. 𑀦 𑀘 𑀧𑀦𑁂𑀢𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀏𑀢𑁆𑀣𑀸𑀧𑀺 ‘‘𑀢𑀩𑁆𑀩𑀺𑀲𑀬𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀯𑀲𑁂𑀦𑁂𑀯 𑀯𑀼𑀢𑁆𑀢’’𑀦𑁆𑀢𑀺 𑀲𑀸𑀥𑀓𑀯𑀘𑀦𑀪𑀸𑀯𑀢𑁄, 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀢𑀢𑁆𑀣 𑀧𑀳𑀸𑀦𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀘, 𑀢𑀲𑁆𑀫𑀸 ‘‘𑀦𑀢𑁆𑀣𑀺 𑀦𑀻𑀯𑀭𑀡𑀸 𑀢𑀯𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀯𑀺𑀭𑀼𑀚𑁆𑀛𑀦𑀢𑁄 𑀦 𑀫𑀺𑀤𑁆𑀥𑀁 𑀭𑀽𑀧𑀦𑁆𑀢𑀺.

𑀬𑀤𑀺 𑀧𑀦 𑀧𑀭𑁄 𑀤𑀴𑁆𑀳𑀫𑀽𑀴𑁆𑀳𑀕𑁆𑀕𑀸𑀳𑀺𑀢𑀸𑀬 𑀢𑀁𑀯𑀺𑀲𑀬𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀯𑀲𑁂𑀦𑁂𑀯 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀲𑀓𑀯𑀸𑀤𑀁 𑀑𑀟𑁆𑀟𑁂𑀬𑁆𑀬, 𑀢𑀲𑁆𑀲 𑀢𑀦𑁆𑀦𑀺𑀲𑁂𑀥𑀦𑀢𑁆𑀣𑀁 𑀧𑀼𑀦 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀲𑁆𑀲 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 𑀲𑀳 𑀲𑀫𑁆𑀧𑀬𑁄𑀕𑀯𑀘𑀦𑀜𑁆𑀘 𑀆𑀳𑀭𑀦𑁆𑀢𑁄 𑀆𑀳 ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡’’𑀦𑁆𑀢𑀺𑀆𑀤𑀺. 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀜𑁆𑀘𑁂𑀯 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀜𑁆𑀘 𑀦𑀻𑀯𑀭𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄’’𑀢𑀺 (𑀥𑀸𑀢𑀼. 𑁩) 𑀯𑀘𑀦𑀢𑁄 𑀅𑀭𑀽𑀧𑀥𑀫𑁆𑀫𑀸𑀦𑀫𑁂𑀯 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀫𑁆𑀧𑀬𑁄𑀕𑁄 𑀮𑀩𑁆𑀪𑀢𑀺, 𑀦 𑀭𑀽𑀧𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀭𑀽𑀧𑁂𑀦 𑀯𑀸, 𑀢𑀲𑁆𑀫𑀸 𑀬𑀤𑀺 𑀫𑀺𑀤𑁆𑀥𑀁 𑀭𑀽𑀧𑀁 𑀲𑀺𑀬𑀸, 𑀦 𑀢𑀁 𑀲𑀫𑁆𑀧𑀬𑁄𑀕𑀯𑀘𑀦𑀫𑀭𑀳𑀢𑀻𑀢𑀺. 𑀅𑀣 𑀲𑀺𑀬𑀸 𑁋 𑀬𑀣𑀸𑀮𑀸𑀪𑀯𑀘𑀦𑀫𑁂𑀢𑁆𑀣 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, ‘‘𑀲𑀓𑁆𑀔𑀭𑀓𑀣𑀮𑀫𑁆𑀧𑀺 𑀫𑀘𑁆𑀙𑀕𑀼𑀫𑁆𑀩𑀫𑁆𑀧𑀺 𑀘𑀭𑀦𑁆𑀢𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁪𑁯) 𑀯𑀺𑀬. 𑀬𑀣𑀸 𑀳𑀺 ‘‘𑀲𑀓𑁆𑀔𑀭𑀓𑀣𑀮𑀺𑀓𑀁 𑀫𑀘𑁆𑀙𑀕𑀼𑀫𑁆𑀩𑀫𑁆𑀧𑀺 𑀘𑀭𑀦𑁆𑀢𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀻’’𑀢𑀺𑀆𑀤𑀻𑀲𑀼 𑀲𑀓𑁆𑀔𑀭𑀓𑀣𑀮𑀺𑀓𑀲𑁆𑀲 𑀘𑀭𑀡𑀸𑀬𑁄𑀕𑀢𑁄 𑀫𑀘𑁆𑀙𑀕𑀼𑀫𑁆𑀩𑀸𑀧𑁂𑀓𑁆𑀔𑀸𑀬 𑀘𑀭𑀡𑀁, 𑀉𑀪𑀬𑀸𑀧𑁂𑀓𑁆𑀔𑀸𑀬 𑀞𑀸𑀦𑀦𑁆𑀢𑀺 𑀏𑀯𑀁 𑀬𑀣𑀸𑀮𑀸𑀪𑁄 𑀬𑁄𑀚𑀻𑀬𑀢𑀺, 𑀏𑀯𑀫𑀺𑀥𑀸𑀧𑀺 𑀣𑀺𑀦𑀸𑀧𑁂𑀓𑁆𑀔𑀸𑀬 𑀲𑀫𑁆𑀧𑀬𑁄𑀕𑀯𑀘𑀦𑀁, 𑀉𑀪𑀬𑀸𑀧𑁂𑀓𑁆𑀔𑀸𑀬 𑀦𑀻𑀯𑀭𑀡𑀯𑀘𑀦𑀦𑁆𑀢𑀺? 𑀢𑀫𑁆𑀧𑀺 𑀦, 𑀭𑀽𑀧𑀪𑀸𑀯𑀲𑁆𑀲𑁂𑀯 𑀅𑀲𑀺𑀤𑁆𑀥𑀢𑁆𑀢𑀸. 𑀲𑀺𑀤𑁆𑀥𑁂 𑀳𑀺 𑀭𑀽𑀧𑀪𑀸𑀯𑁂 𑀅𑀲𑀫𑁆𑀪𑀯𑀢𑁄 𑀬𑀣𑀸𑀮𑀸𑀪𑀬𑁄𑀚𑀦𑀸 𑀬𑀼𑀚𑁆𑀚𑁂𑀬𑁆𑀬𑀸𑀢𑀺. 𑀏𑀢𑁆𑀢𑀓𑁂𑀦𑁂𑀯 𑀫𑀺𑀤𑁆𑀥𑀲𑁆𑀲 𑀅𑀭𑀽𑀧𑀪𑀸𑀯𑁂 𑀲𑀺𑀤𑁆𑀥𑁂𑀧𑀺 𑀬𑀣𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀩𑀦𑁆𑀥𑀁 𑀲𑀼𑀩𑀦𑁆𑀥𑀁 𑀳𑁄𑀢𑀺, 𑀏𑀯𑀫𑀦𑁂𑀓𑀲𑀼𑀢𑁆𑀢𑀲𑀸𑀥𑀺𑀢𑀁 𑀅𑀧𑁆𑀧𑀥𑀁𑀲𑀺𑀬𑀁 𑀳𑁄𑀢𑀻𑀢𑀺 𑀧𑀝𑁆𑀞𑀸𑀦𑀧𑁆𑀧𑀓𑀭𑀡𑁂 ‘‘𑀦𑀻𑀯𑀭𑀡𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘…𑀧𑁂… 𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁩.𑁮.𑁮) 𑀇𑀫𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀅𑀭𑀽𑀧𑁂…𑀧𑁂… 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁩.𑁮.𑁮) 𑀯𑀼𑀢𑁆𑀢𑀁 𑀅𑀭𑀽𑀧𑀪𑀯𑀼𑀧𑁆𑀧𑀢𑁆𑀢𑀺𑀫𑁆𑀧𑀺 𑀆𑀳𑀭𑀦𑁆𑀢𑁄 𑀆𑀳 ‘‘𑀫𑀳𑀸𑀧𑀓𑀭𑀡𑀧𑀝𑁆𑀞𑀸𑀦𑁂’’𑀢𑀺𑀆𑀤𑀺. 𑀛𑀸𑀦𑀦𑀺𑀓𑀦𑁆𑀢𑀺𑀆𑀤𑀻𑀦𑀫𑁆𑀧𑀺 𑀥𑀫𑁆𑀫𑀢𑁄 𑀮𑁄𑀪𑀸𑀤𑀺𑀪𑀸𑀯𑀢𑁄 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀸𑀤𑀻𑀳𑀺 𑀅𑀪𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡’’𑀦𑁆𑀢𑀺𑀆𑀤𑀺.

𑀏𑀢𑁆𑀣 𑀲𑀺𑀬𑀸 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀸 𑀦𑀻𑀯𑀭𑀡𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁫𑁧) 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀻𑀯𑀭𑀡𑀪𑀸𑀯𑁂𑀦 𑀏𑀓𑀢𑁄 𑀆𑀕𑀢𑀢𑁆𑀢𑀸 𑀇𑀥𑀸𑀧𑀺 ‘‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡’’𑀦𑁆𑀢𑀺 𑀏𑀓𑀢𑁄 𑀯𑀼𑀢𑁆𑀢𑀁, 𑀣𑀺𑀦𑀫𑁂𑀯 𑀘 𑀧𑀦 𑀅𑀭𑀽𑀧𑀪𑀯𑁂 𑀉𑀧𑁆𑀧𑀚𑁆𑀚𑀢𑀺 𑀣𑀺𑀦𑀫𑀺𑀤𑁆𑀥𑀦𑁆𑀢𑀺? 𑀢𑀬𑀺𑀤𑀫𑀲𑀸𑀭𑀁, 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀦 𑀕𑀳𑀺𑀢𑀢𑁆𑀢𑀸. 𑀬𑀤𑀺 𑀳𑀺 𑀏𑀓𑀢𑁄 𑀕𑀳𑀺𑀢𑀫𑀢𑁆𑀢𑁂𑀦𑁂𑀯 𑀇𑀥𑀸𑀧𑀺 𑀏𑀓𑀢𑁄 𑀕𑀳𑀡𑀁 𑀲𑀺𑀬𑀸, 𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑀧𑀺 𑀢𑀢𑁆𑀣 𑀏𑀓𑀢𑁄 𑀯𑀼𑀢𑁆𑀢𑀲𑁆𑀲 𑀇𑀥 𑀕𑀳𑀡𑀁 𑀲𑀫𑁆𑀪𑀯𑁂𑀬𑁆𑀬, 𑀦 𑀘 𑀧𑀦𑁂𑀯𑀁 𑀅𑀢𑁆𑀣𑀺 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀦 𑀢𑀲𑁆𑀲 𑀅𑀭𑀽𑀧𑀪𑀯𑀼𑀧𑁆𑀧𑀢𑁆𑀢𑀺𑀁 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀓𑁂𑀯𑀮𑁄 𑀳𑀸𑀬𑀁, 𑀪𑀺𑀓𑁆𑀔𑀯𑁂, 𑀅𑀓𑀼𑀲𑀮𑀭𑀸𑀲𑀺, 𑀬𑀤𑀺𑀤𑀁 𑀧𑀜𑁆𑀘 𑀦𑀻𑀯𑀭𑀡𑀸 (𑀅. 𑀦𑀺. 𑁫.𑁫𑁨), 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬, 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄𑀢𑀺 𑀢𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀘𑀢𑁆𑀢𑀢𑁆𑀢𑀸 𑀯𑀦𑁆𑀢𑀢𑁆𑀢𑀸 𑀫𑀼𑀢𑁆𑀢𑀢𑁆𑀢𑀸 𑀧𑀳𑀻𑀦𑀢𑁆𑀢𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄𑀢𑀺, 𑀇𑀤𑀁 𑀘𑀺𑀢𑁆𑀢𑀁 𑀇𑀫𑀫𑁆𑀳𑀸 𑀣𑀺𑀦𑀫𑀺𑀤𑁆𑀥𑀫𑁆𑀳𑀸 𑀲𑁄𑀥𑁂𑀢𑀺 𑀯𑀺𑀲𑁄𑀥𑁂𑀢𑀺 𑀧𑀭𑀺𑀲𑁄𑀥𑁂𑀢𑀺 𑀫𑁄𑀘𑁂𑀢𑀺 𑀯𑀺𑀫𑁄𑀘𑁂𑀢𑀺 𑀧𑀭𑀺𑀫𑁄𑀘𑁂𑀢𑀺 𑀯𑀸’’𑀢𑀺 (𑀯𑀺𑀪. 𑁫𑁫𑁧) 𑀏𑀯𑀫𑀸𑀤𑀺𑀁 𑀧𑀸𑀴𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀬𑀤𑀺𑀧𑀺 𑀲𑀺𑀬𑀸 𑀤𑀼𑀯𑀺𑀥𑀁 𑀫𑀺𑀤𑁆𑀥𑀁 𑀭𑀽𑀧𑀁, 𑀅𑀭𑀽𑀧𑀜𑁆𑀘. 𑀢𑀢𑁆𑀣 𑀬𑀁 𑀅𑀭𑀽𑀧𑀁, 𑀢𑀁 𑀦𑀻𑀯𑀭𑀡𑁂𑀲𑀼 𑀤𑁂𑀲𑀺𑀢𑀁, 𑀦 𑀭𑀽𑀧𑀦𑁆𑀢𑀺? 𑀢𑀫𑁆𑀧𑀺 𑀦, 𑀯𑀺𑀲𑁂𑀲𑀯𑀘𑀦𑀸𑀪𑀸𑀯𑀢𑁄. 𑀦 𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀫𑀺𑀤𑁆𑀥𑀁 𑀦𑀻𑀯𑀭𑀡𑁂𑀲𑀼 𑀤𑁂𑀲𑀺𑀢𑀁 ‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀣𑀺𑀦𑀁, 𑀢𑀤𑀧𑀺 𑀦𑀻𑀯𑀭𑀡𑀁, 𑀬𑀤𑀧𑀺 𑀫𑀺𑀤𑁆𑀥𑀁, 𑀢𑀤𑀧𑀺 𑀦𑀻𑀯𑀭𑀡𑀁, 𑀣𑀺𑀦𑀫𑀺𑀤𑁆𑀥𑀁 𑀦𑀻𑀯𑀭𑀡𑀦𑁆𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀫𑀺𑀤𑁆𑀥𑀲𑁆𑀲 𑀤𑀼𑀯𑀺𑀥𑀢𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸𑀧𑀺 𑀦 𑀲𑀓𑁆𑀓𑀸 𑀦𑀻𑀯𑀭𑀡𑀪𑀸𑀯𑀁 𑀦𑀺𑀯𑀢𑁆𑀢𑁂𑀢𑀼𑀁. 𑀲𑀓𑁆𑀓𑀸 𑀳𑀺 𑀯𑀢𑁆𑀢𑀼𑀁 𑀬𑀁 𑀢𑀁 𑀅𑀭𑀽𑀧𑀢𑁄 𑀅𑀜𑁆𑀜𑀁 𑀫𑀺𑀤𑁆𑀥𑀁 𑀧𑀭𑀺𑀓𑀧𑁆𑀧𑀺𑀢𑀁, 𑀢𑀫𑁆𑀧𑀺 𑀦𑀻𑀯𑀭𑀡𑀁 𑀫𑀺𑀤𑁆𑀥𑀲𑀪𑀸𑀯𑀢𑁆𑀢𑀸 𑀇𑀢𑀭𑀁 𑀦𑀻𑀯𑀭𑀡𑀁 𑀯𑀺𑀬𑀸𑀢𑀺. 𑀬𑀤𑀺 𑀫𑀺𑀤𑁆𑀥𑀲𑁆𑀲 𑀭𑀽𑀧𑀪𑀸𑀯𑀁 𑀦 𑀲𑀫𑁆𑀧𑀝𑀺𑀘𑁆𑀙𑀣, 𑀓𑀣𑀁 𑀪𑀕𑀯𑀢𑁄 𑀦𑀺𑀤𑁆𑀤𑀸 𑀳𑁄𑀢𑀺, 𑀦𑀦𑀼 𑀫𑀺𑀤𑁆𑀥𑀲𑁆𑀲 ‘‘𑀦𑀺𑀤𑁆𑀤𑀸 𑀧𑀘𑀮𑀸𑀬𑀺𑀓𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀢𑁆𑀢𑀸 𑀦𑀺𑀤𑁆𑀤𑀸𑀪𑀸𑀯𑁄 𑀲𑀺𑀤𑁆𑀥𑁄𑀢𑀺? 𑀦𑀬𑀺𑀤𑀫𑁂𑀯𑀁, 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀲𑀼 𑀯𑀺𑀬 𑀦𑀺𑀤𑁆𑀤𑀸𑀳𑁂𑀢𑀼𑀦𑁄 𑀫𑀺𑀤𑁆𑀥𑀲𑁆𑀲 𑀦𑀺𑀤𑁆𑀤𑀸𑀪𑀸𑀯𑁂𑀦 𑀯𑀺𑀪𑀢𑁆𑀢𑀢𑁆𑀢𑀸. 𑀏𑀯𑀫𑁆𑀧𑀺 𑀦𑀺𑀤𑁆𑀤𑀸𑀳𑁂𑀢𑀼𑀦𑁄 𑀫𑀺𑀤𑁆𑀥𑀲𑁆𑀲 𑀅𑀪𑀸𑀯𑀢𑁄 𑀓𑀣𑀁 𑀪𑀕𑀯𑀢𑁄 𑀦𑀺𑀤𑁆𑀤𑀸𑀢𑀺 𑀘𑁂? 𑀲𑀸 𑀪𑀕𑀯𑀢𑁄 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁 𑀅𑀕𑁆𑀕𑀺𑀯𑁂𑀲𑁆𑀲𑀦…𑀧𑁂… 𑀤𑀺𑀯𑀸 𑀲𑀼𑀧𑀺𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀫. 𑀦𑀺. 𑁧.𑁩𑁮𑁭) 𑀦 𑀦𑀺𑀤𑁆𑀤𑀸 𑀪𑀕𑀯𑀢𑁄 𑀫𑀺𑀤𑁆𑀥𑁂𑀦, 𑀅𑀣 𑀔𑁄 𑀲𑀭𑀻𑀭𑀕𑁂𑀮𑀜𑁆𑀜𑁂𑀦, 𑀢𑀜𑁆𑀘 𑀪𑀕𑀯𑀢𑁄 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀺, 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻’’𑀢𑀺 (𑀫. 𑀦𑀺. 𑁨.𑁨𑁨; 𑀲𑀁. 𑀦𑀺. 𑁪.𑁨𑁪𑁩) 𑀯𑀘𑀦𑀢𑁄. 𑀦 𑀘𑁂𑀢𑁆𑀣 𑀏𑀯𑀫𑀯𑀥𑀸𑀭𑀡𑀁 𑀤𑀝𑁆𑀞𑀩𑁆𑀩𑀁 ‘‘𑀫𑀺𑀤𑁆𑀥𑀫𑁂𑀯 𑀦𑀺𑀤𑁆𑀤𑀸𑀳𑁂𑀢𑀽’’𑀢𑀺, 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀅𑀢𑁆𑀣𑀺 𑀦𑀺𑀤𑁆𑀤𑀸𑀳𑁂𑀢𑀼. 𑀓𑁄 𑀧𑀦 𑀲𑁄𑀢𑀺? 𑀲𑀭𑀻𑀭𑀕𑁂𑀮𑀜𑁆𑀜𑀁, 𑀢𑀲𑁆𑀫𑀸 𑀦 𑀪𑀕𑀯𑀢𑁄 𑀦𑀺𑀤𑁆𑀤𑀸 𑀫𑀺𑀤𑁆𑀥𑀳𑁂𑀢𑀼𑀓𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁬𑁯𑁮. 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀯𑀸𑀬𑁄𑀥𑀸𑀢𑀼𑀆𑀤𑀺𑀢𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀢𑁆𑀣𑀺𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸. 𑀓𑀣𑀁 𑀧𑀦 𑀲𑁄 𑀤𑀲𑁆𑀲𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀯𑀸𑀬𑁄𑀥𑀸𑀢𑀼𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀬𑀩𑀮𑀁 𑀦𑀸𑀫 𑀅𑀢𑁆𑀣𑀢𑁄 𑀯𑀸𑀬𑁄𑀥𑀸𑀢𑀼𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁄 𑀢𑀲𑁆𑀲𑀸 𑀯𑀺𑀧𑁆𑀨𑀸𑀭𑀪𑀸𑀯𑀢𑁄. 𑀬𑀢𑁄 𑀩𑀸𑀮𑀸𑀦𑀁 𑀩𑀮𑀦𑁆𑀢𑀺 𑀯𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀸𑀬𑁄𑀥𑀸𑀢𑀼𑀬𑀸 𑀕𑀳𑀺𑀢𑀸𑀬 𑀩𑀮𑀭𑀽𑀧𑀁 𑀕𑀳𑀺𑀢𑀫𑁂𑀯𑀸’’𑀢𑀺. 𑀲𑀫𑁆𑀪𑀯𑁄 𑀓𑀸𑀫𑀥𑀸𑀢𑀼𑀬𑀁 𑀏𑀓𑀘𑁆𑀘𑀲𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀧𑀘𑁆𑀘𑀬𑁄 𑀆𑀧𑁄𑀥𑀸𑀢𑀼𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀆𑀧𑁄𑀥𑀸𑀢𑀼𑀬𑀸 𑀲𑀫𑁆𑀪𑀯𑀭𑀽𑀧’’𑀦𑁆𑀢𑀺. 𑀕𑀳𑀺𑀢𑀸𑀬 𑀕𑀳𑀺𑀢𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀘𑀬𑀲𑀦𑁆𑀢𑀢𑀺𑀯𑀺𑀦𑀺𑀫𑀼𑀢𑁆𑀢𑁄 𑀭𑀽𑀧𑀼𑀧𑁆𑀧𑀸𑀤𑁄 𑀦𑀢𑁆𑀣𑀺, 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀘 𑀅𑀜𑁆𑀜𑀸 𑀚𑀸𑀢𑀺 𑀦𑀸𑀫 𑀦𑀢𑁆𑀣𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀘𑀬𑀲𑀦𑁆𑀢𑀢𑀻𑀳𑀺 𑀚𑀸𑀢𑀺𑀭𑀽𑀧’’𑀦𑁆𑀢𑀺. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲𑀧𑀺 𑀭𑁄𑀕𑀲𑁆𑀲 𑀯𑀺𑀲𑀪𑀸𑀕𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑁄 𑀥𑀸𑀢𑀼𑀓𑁆𑀔𑁄𑀪𑁄 𑀆𑀲𑀦𑁆𑀦𑀓𑀸𑀭𑀡𑀁, 𑀧𑀕𑁂𑀯 𑀇𑀢𑀭𑀲𑁆𑀲. 𑀲𑁄 𑀅𑀢𑁆𑀣𑀢𑁄 𑀭𑀽𑀧𑀥𑀫𑁆𑀫𑀸𑀦𑀁 𑀧𑀸𑀓𑀸𑀯𑀢𑁆𑀣𑀸 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼 𑀏𑀯 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀚𑀭𑀢𑀸𑀅𑀦𑀺𑀘𑁆𑀘𑀢𑀸𑀤𑀻𑀳𑀺 𑀭𑁄𑀕𑀭𑀽𑀧𑀁 𑀕𑀳𑀺𑀢’’𑀦𑁆𑀢𑀺.

𑁬𑁯𑁯-𑁭𑁦𑁪. 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀳𑀦𑁆𑀢𑀺 𑀚𑀸𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀽𑀧𑀲𑀫𑀼𑀝𑁆𑀞𑀸𑀦𑀸𑀦𑀺. 𑀓𑀸𑀦𑀺 𑀧𑀦 𑀢𑀸𑀦𑀻𑀢𑀺 𑀆𑀳 ‘‘𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀓𑀫𑁆𑀫𑀸𑀦𑀻’’𑀢𑀺.

𑀆𑀳𑀸𑀭𑁄 𑀭𑀽𑀧𑀳𑁂𑀢𑀼𑀬𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑁆𑀔𑀺𑀧𑀺𑀢𑀩𑁆𑀩𑁄, 𑀓𑀫𑁆𑀫𑀁, 𑀉𑀢𑀼 𑀘 𑀘𑀺𑀢𑁆𑀢𑀜𑁆𑀘 𑀆𑀳𑀸𑀭𑁄𑀢𑀺 𑀇𑀫𑁂 𑀭𑀽𑀧𑀳𑁂𑀢𑀼𑀬𑁄𑀢𑀺. 𑀭𑀽𑀧𑀳𑁂𑀢𑀼𑀬𑁄𑀢𑀺 𑀘 𑀭𑀽𑀧𑀲𑁆𑀲 𑀚𑀦𑀓𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀢𑁂𑀳𑁂𑀯𑀸’’𑀢𑀺𑀆𑀤𑀺. 𑀏𑀓𑀫𑁂𑀓𑀁𑀬𑁂𑀯 𑀲𑀫𑀼𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀏𑀓𑀲𑀫𑀼𑀝𑁆𑀞𑀸𑀦𑀸. 𑀦𑀦𑀼 𑀏𑀓𑀢𑁄 𑀏𑀯 𑀧𑀘𑁆𑀘𑀬𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀭𑀽𑀧𑀚𑀦𑀓𑀧𑀘𑁆𑀘𑀬𑁂𑀲𑀼 𑀏𑀓𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀪𑀺𑀲𑀦𑁆𑀥𑀺. 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀘𑀓𑁆𑀔𑀸𑀤𑀻𑀦𑀺 𑀧𑀜𑁆𑀘, 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀤𑁆𑀯𑀬𑀁, 𑀚𑀻𑀯𑀺𑀢𑀜𑁆𑀘𑀸𑀢𑀺 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺. 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁.

𑀤𑁆𑀯𑀻𑀳𑀻𑀢𑀺 𑀓𑁄𑀘𑀺 𑀘𑀺𑀢𑁆𑀢𑁂𑀦, 𑀓𑁄𑀘𑀺 𑀉𑀢𑀼𑀦𑀸 𑀘𑀸𑀢𑀺 𑀏𑀯𑀁 𑀤𑁆𑀯𑀻𑀳𑀺. 𑀦 𑀳𑀺 𑀏𑀓𑀲𑁆𑀲𑁂𑀯 𑀤𑁆𑀯𑁂 𑀏𑀓𑀓𑁆𑀔𑀡𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀉𑀢𑀼𑀆𑀳𑀸𑀭…𑀧𑁂… 𑀓𑀢𑀦𑁆𑀢𑀺 𑀏𑀓𑁂𑀓𑀁 𑀉𑀢𑀼𑀦𑀸, 𑀆𑀳𑀸𑀭𑁂𑀦, 𑀘𑀺𑀢𑁆𑀢𑁂𑀦 𑀘𑀸𑀢𑀺 𑀢𑀻𑀳𑀺 𑀓𑀢𑀁. 𑀘𑀢𑀲𑁆𑀲𑁄 𑀘𑀸𑀧𑀺 𑀥𑀸𑀢𑀼𑀬𑁄𑀢𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺. 𑀢𑀸𑀦𑀺 𑀳𑀺 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀸𑀢𑀽𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀫𑁆𑀫𑀸𑀤𑀻𑀳𑀺 𑀘𑀢𑀽𑀳𑀺 𑀪𑀯𑀦𑁆𑀢𑀻𑀢𑀺 𑀘𑀢𑀼𑀩𑁆𑀪𑀯𑀸. 𑀤𑁆𑀯𑁂𑀢𑀺 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸.

𑁭𑁦𑁫-𑁬. 𑀇𑀤𑀸𑀦𑀺 𑀫𑀺𑀲𑁆𑀲𑀓𑀲𑀫𑀼𑀝𑁆𑀞𑀸𑀦𑀸𑀦𑀺𑀧𑀺 𑀕𑀳𑁂𑀢𑁆𑀯𑀸 𑀢𑀁𑀢𑀁𑀧𑀘𑁆𑀘𑀬𑀚𑀸𑀢𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀢𑁆𑀣𑀼 𑀲𑀼𑀤𑁆𑀥𑀝𑁆𑀞𑀓𑀁 𑀲𑀦𑁆𑀢𑀢𑁆𑀬𑀽𑀧𑀘𑀬𑀸𑀓𑀸𑀲𑀸𑀢𑀺 𑀯𑀻𑀲𑀢𑀺 𑀓𑀫𑁆𑀫𑀚𑀸. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀲𑀤𑁆𑀤𑁄 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀲𑀼𑀤𑁆𑀥𑀝𑁆𑀞𑀓𑀸𑀤𑀬𑁄 𑀏𑀓𑀸𑀤𑀲𑀸𑀢𑀺 𑀲𑀢𑁆𑀢𑀭𑀲 𑀘𑁂𑀢𑀲𑀸 𑀚𑀸𑀬𑀭𑁂, 𑀘𑀺𑀢𑁆𑀢𑀚𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀤𑁄 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀲𑀼𑀤𑁆𑀥𑀝𑁆𑀞𑀓𑀸𑀤𑀬𑁄 𑀏𑀓𑀸𑀤𑀲𑀸𑀢𑀺 𑀤𑀲𑀧𑀜𑁆𑀘𑁂𑀯 𑀧𑀦𑁆𑀦𑀭𑀲 𑀉𑀢𑀼𑀦𑀸 𑀚𑀸𑀬𑀭𑁂. 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀲𑀼𑀤𑁆𑀥𑀝𑁆𑀞𑀓𑀸𑀤𑀬𑁄 𑀏𑀓𑀸𑀤𑀲𑀸𑀢𑀺 𑀘𑀼𑀤𑁆𑀤𑀲 𑀆𑀳𑀸𑀭𑀢𑁄. 𑀚𑀭𑀢𑀸𑀅𑀦𑀺𑀘𑁆𑀘𑀢𑀸𑀳𑀺 𑀢𑁂 𑀅𑀝𑁆𑀞𑀲𑀝𑁆𑀞𑀺 𑀘 𑀳𑁄𑀦𑁆𑀢𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁦𑁭-𑁮. ‘‘𑀚𑀭𑀢𑀸…𑀧𑁂… 𑀲𑀫𑀼𑀝𑁆𑀞𑀺𑀢𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀸𑀢𑀲𑁆𑀲 𑀧𑀸𑀓𑀪𑁂𑀤𑀢𑁆𑀢𑀸𑀢𑀺 𑀚𑀭𑀢𑀸𑀬 𑀚𑀸𑀢𑀥𑀫𑁆𑀫𑀲𑁆𑀲 𑀧𑀸𑀓𑀢𑁆𑀢𑀸, 𑀅𑀦𑀺𑀘𑁆𑀘𑀢𑀸𑀬 𑀘 𑀪𑁂𑀤𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀚𑀭𑀢𑀸𑀅𑀦𑀺𑀘𑁆𑀘𑀢𑀸 𑀦𑀸𑀫 𑀉𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲 𑀳𑁄𑀦𑁆𑀢𑀺, 𑀦𑁄 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲. 𑀬𑀤𑀺 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀲𑀺𑀬𑀼𑀁, 𑀢𑀤𑀸 𑀢𑀸𑀲𑀫𑁆𑀧𑀺 𑀚𑀸𑀬𑀫𑀸𑀦𑀢𑁆𑀢𑀧𑀭𑀺𑀬𑀸𑀬𑁄 𑀬𑀼𑀚𑁆𑀚𑁂𑀬𑁆𑀬. 𑀉𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲 𑀧𑀦 𑀚𑀸𑀢𑀺𑀢𑁄 𑀧𑀭𑀁 𑀇𑀫𑀸𑀲𑀁 𑀲𑀫𑁆𑀪𑀯𑀢𑁄 𑀦 𑀚𑀸𑀬𑀦𑁆𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀬𑀤𑀺 𑀧𑀦 𑀓𑁄𑀘𑀺 𑀢𑁂𑀲𑀫𑁆𑀧𑀺 𑀚𑀸𑀢𑀪𑀸𑀯𑁂 𑀓𑁄 𑀯𑀺𑀭𑁄𑀥𑁄𑀢𑀺 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀢𑀁 𑀤𑀼𑀕𑁆𑀕𑀸𑀳𑀁 𑀯𑀺𑀥𑀫𑁂𑀦𑁆𑀢𑁄 𑀆𑀳 ‘‘𑀚𑀸𑀬𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺. 𑀳𑁄𑀦𑁆𑀢𑀼 𑀦𑀸𑀫 𑀢𑁂𑀲𑀫𑁆𑀧𑀺 𑀧𑀸𑀓𑀪𑁂𑀤𑀸, 𑀢𑀤𑀸𑀧𑀺 𑀓𑁄 𑀯𑀺𑀭𑁄𑀥𑁄𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀧𑀸𑀓𑁄 𑀦 𑀧𑀭𑀺𑀧𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀢𑁂𑀦 𑀦 𑀪𑀺𑀚𑁆𑀚𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀧𑀓𑁆𑀓𑀲𑁆𑀲 𑀳𑀺 𑀪𑀗𑁆𑀕𑁄 𑀦𑀺𑀬𑀢𑁄. 𑀪𑁂𑀤𑁄 𑀯𑀸 𑀦 𑀘 𑀪𑀺𑀚𑁆𑀚𑀢𑀻𑀢𑀺 𑀏𑀢𑁆𑀣𑀸𑀧𑀺 𑀧𑀸𑀓𑀪𑀸𑀯𑁄𑀧𑀺 𑀯𑀼𑀢𑁆𑀢𑁄𑀯. 𑀦 𑀳𑀺 𑀅𑀧𑀓𑁆𑀓𑀁 𑀪𑀺𑀚𑁆𑀚𑀢𑀻𑀢𑀺, 𑀅𑀜𑁆𑀜𑀣𑀸 𑀉𑀧𑁆𑀧𑀸𑀤𑀪𑀗𑁆𑀕𑀸𑀦𑀁 𑀅𑀦𑀜𑁆𑀜𑀢𑁆𑀢𑀧𑁆𑀧𑀲𑀗𑁆𑀕𑀢𑁄. 𑀦𑀢𑁆𑀣𑀺 𑀢𑀦𑁆𑀢𑀺 𑀧𑀸𑀓𑀪𑁂𑀤𑀸𑀦𑀁 𑀧𑀘𑁆𑀘𑀦𑀁 𑀪𑀺𑀚𑁆𑀚𑀦𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀆𑀳.

𑀏𑀢𑁆𑀢𑀸𑀯𑀢𑀸 𑀘 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀤𑀺 𑀚𑀭𑀢𑀸𑀅𑀦𑀺𑀘𑁆𑀘𑀢𑀸 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀚𑀸𑀬𑁂𑀬𑁆𑀬𑀼𑀁, 𑀢𑀤𑀸 𑀉𑀧𑁆𑀧𑀦𑁆𑀦𑀲𑁆𑀲 𑀦𑀸𑀫 𑀚𑀭𑀸𑀬, 𑀪𑀗𑁆𑀕𑁂𑀦 𑀘 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑁂𑀲𑀁 𑀚𑀭𑀢𑀸𑀅𑀦𑀺𑀘𑁆𑀘𑀢𑀸𑀧𑀺 𑀲𑀺𑀬𑀼𑀁, 𑀦 𑀘 𑀧𑀦𑁂𑀢𑀸 𑀉𑀧𑀮𑀩𑁆𑀪𑀦𑁆𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀦 𑀚𑀭𑀢𑀸 𑀅𑀜𑁆𑀜𑀚𑀭𑀸𑀬 𑀚𑀻𑀭𑀢𑀺, 𑀪𑀺𑀚𑁆𑀚𑀢𑀺 𑀯𑀸, 𑀦 𑀘 𑀪𑀗𑁆𑀕𑁄 𑀅𑀜𑁆𑀜𑁂𑀦 𑀪𑀗𑁆𑀕𑁂𑀦 𑀪𑀺𑀚𑁆𑀚𑀢𑀺, 𑀚𑀻𑀭𑀢𑀺 𑀯𑀸, 𑀇𑀢𑀭𑀣𑀸 𑀲𑀸𑀧𑀺 𑀚𑀭𑀸 𑀅𑀧𑀭𑀸𑀬 𑀚𑀭𑀸𑀬, 𑀪𑀗𑁆𑀕𑁂𑀦 𑀘 𑀚𑀻𑀭𑀢𑀺, 𑀪𑀺𑀚𑁆𑀚𑀢𑀺, 𑀲𑁄 𑀘 𑀪𑀗𑁆𑀕𑁄 𑀅𑀜𑁆𑀜𑀸𑀬 𑀚𑀭𑀸𑀬, 𑀅𑀜𑁆𑀜𑁂𑀦 𑀪𑀗𑁆𑀕𑁂𑀦 𑀚𑀻𑀭𑀢𑀺, 𑀪𑀺𑀚𑁆𑀚𑀢𑀻𑀢𑀺 𑀅𑀦𑀯𑀝𑁆𑀞𑀸𑀦𑀧𑁆𑀧𑀲𑀗𑁆𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁦𑁯-𑁧𑁦. ‘‘𑀚𑀸𑀢𑀲𑁆𑀲𑀸’’𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀅𑀣 𑀯𑀸 𑀉𑀢𑁆𑀢𑀭𑀺 𑀯𑀢𑁆𑀢𑀩𑁆𑀩𑀘𑁄𑀤𑀦𑀸𑀬 𑀨𑀮𑀞𑀧𑀦𑀁. ‘‘𑀲𑀺𑀬𑀸 𑀓𑀢𑁆𑀣𑀘𑀻’’𑀢𑀺𑀆𑀤𑀺 𑀧𑀭𑀫𑀢𑀸𑀲𑀗𑁆𑀓𑀦𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 ‘‘𑀚𑀭𑀢𑀸𑀅𑀦𑀺𑀘𑁆𑀘𑀢𑀸𑀤𑁆𑀯𑀬𑀁 𑀦 𑀧𑀘𑁆𑀘𑀢𑀺, 𑀦 𑀪𑀺𑀚𑁆𑀚𑀢𑀺 𑀯𑀸’’𑀢𑀺 𑀅𑀥𑀺𑀓𑀸𑀭𑁂. 𑀭𑀽𑀧𑀲𑁆𑀲𑀽𑀧𑀘𑀬𑁄𑀢𑀻𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 ‘‘𑀭𑀽𑀧𑀲𑁆𑀲 𑀉𑀧𑀘𑀬𑁄 𑀲𑀦𑁆𑀢𑀢𑀻’’𑀢𑀺 𑀯𑀘𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀸𑀓𑁄𑀧𑀺 𑀧𑀘𑁆𑀘𑀢𑀼, 𑀪𑁂𑀤𑁄𑀧𑀺 𑀧𑀭𑀺𑀪𑀺𑀚𑁆𑀚𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀓𑀫𑁆𑀫𑀸𑀤𑀻𑀳𑀺 𑀉𑀧𑁆𑀧𑀚𑁆𑀚𑀦𑀓𑀭𑀽𑀧𑀦𑀺𑀤𑁆𑀤𑁂𑀲𑁂 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀺𑀦𑁆𑀦𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀸𑀬𑀸𑀬𑀢𑀦𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀭𑀽𑀧𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀓𑀸𑀲𑀥𑀸𑀢𑀼 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁬𑁫𑁨) 𑀉𑀧𑀘𑀬𑀲𑀦𑁆𑀢𑀢𑀻𑀦𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀚𑀸𑀢𑀺 𑀚𑀸𑀬𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺 𑀢𑀲𑁆𑀲𑀸 𑀅𑀧𑀭𑀚𑀸𑀢𑀺𑀬𑀸 𑀅𑀪𑀸𑀯𑁂𑀧𑀺. 𑀏𑀯𑀁 𑀚𑀭𑀸𑀪𑀗𑁆𑀕𑀸𑀦𑀁 𑀅𑀧𑀭𑀚𑀭𑀸𑀪𑀗𑁆𑀕𑀸𑀪𑀸𑀯𑁂𑀧𑀺 𑀚𑀻𑀭𑀡𑀁, 𑀪𑀺𑀚𑁆𑀚𑀦𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀇𑀢𑀭𑀣𑀸 𑀚𑀸𑀢𑀺𑀬𑀸𑀧𑀺 𑀪𑁂𑀤𑀦𑀸 𑀢𑀤𑀯𑀢𑁆𑀣𑀸𑀬𑁂𑀯𑀸𑀢𑀺.

𑁭𑁧𑁧. ‘‘𑀦 𑀘𑁂𑀯𑀸’’𑀢𑀺𑀆𑀤𑀺 𑀬𑀣𑀸𑀲𑀗𑁆𑀓𑀺𑀢𑀧𑀭𑀫𑀢𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑀁. 𑀬𑀤𑀺 𑀚𑀸𑀬𑀢𑀻𑀢𑀺 𑀦 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀏𑀯𑀜𑁆𑀘 𑀲𑀢𑀺 𑀦𑀺𑀤𑁆𑀤𑁂𑀲𑁂 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀚𑀸𑀬𑀫𑀸𑀦𑀲𑁆𑀲𑀸’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀲𑀢𑀺𑀧𑀺 𑀚𑀸𑀢𑀺𑀬𑀸 𑀚𑀸𑀬𑀫𑀸𑀦𑀢𑁆𑀢𑁂 𑀚𑀸𑀬𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑀢𑁄 𑀢𑀲𑁆𑀲𑀸 𑀢𑀧𑁆𑀧𑀘𑁆𑀘𑀬𑀪𑀸𑀯𑀯𑁄𑀳𑀸𑀭𑁄 𑀅𑀦𑀼𑀫𑀢𑁄𑀢𑀺 𑀢𑀢𑁆𑀣 𑀯𑀼𑀢𑁆𑀢𑀸, 𑀦 𑀧𑀦 𑀧𑀭𑀫𑀢𑁆𑀣𑀢𑁄 𑀚𑀸𑀬𑀫𑀸𑀦𑀢𑁆𑀢𑀸. 𑀚𑀸𑀬𑀫𑀸𑀦𑀲𑁆𑀲 𑀳𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀫𑀢𑁆𑀢𑀁 𑀚𑀸𑀢𑀺, 𑀢𑀲𑁆𑀫𑀸 𑀅𑀲𑀺𑀤𑁆𑀥𑁂𑀦 𑀅𑀲𑀺𑀤𑁆𑀥𑀲𑀸𑀥𑀦𑀫𑁂𑀢𑀦𑁆𑀢𑀺.

𑁭𑁧𑁨-𑁭. ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀧𑀼𑀦𑀧𑀺 𑀧𑀭𑀫𑀢𑀸𑀲𑀗𑁆𑀓𑀁 𑀓𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀢𑁆𑀣 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀬𑀸 𑀚𑀸𑀢𑀺, 𑀲𑀸 𑀢𑀧𑁆𑀧𑀘𑁆𑀘𑀬𑀢𑁆𑀢𑀯𑁄𑀳𑀸𑀭𑀁, 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀫𑁆𑀫𑀼𑀢𑀺𑀜𑁆𑀘 𑀮𑀪𑀢𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸𑀢𑀺 𑀬𑀣𑀸 𑀮𑀪𑀢𑁂𑀯, 𑀢𑀣𑀸. 𑀬𑀁𑀢𑀁-𑀲𑀤𑁆𑀤𑀸 𑀳𑀺 𑀅𑀩𑁆𑀬𑀪𑀺𑀘𑀸𑀭𑀺𑀢𑀲𑀫𑁆𑀩𑀦𑁆𑀥𑀸. 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀏𑀢𑀺𑀲𑁆𑀲𑀸𑀢𑀺 𑀢𑀧𑁆𑀧𑀘𑁆𑀘𑀬𑀸, 𑀢𑀲𑁆𑀲𑀸 𑀪𑀸𑀯𑁄 𑀢𑀧𑁆𑀧𑀘𑁆𑀘𑀬𑀢𑁆𑀢𑀁, 𑀢𑀧𑁆𑀧𑀘𑁆𑀘𑀬𑀢𑁆𑀢𑁂𑀦 𑀧𑀯𑀢𑁆𑀢𑁄 𑀯𑁄𑀳𑀸𑀭𑁄 𑀢𑀧𑁆𑀧𑀘𑁆𑀘𑀬𑀢𑁆𑀢𑀯𑁄𑀳𑀸𑀭𑁄, 𑀢𑀁 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀸𑀤𑀺𑀯𑁄𑀳𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀫𑁆𑀫𑀼𑀢𑀺𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀢𑀺 𑀚𑀸𑀬𑀢𑀻𑀢𑀺 𑀏𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀲𑀫𑁆𑀫𑀼𑀢𑀺𑀁. 𑀓𑀫𑁆𑀫𑀸𑀤𑀺𑀲𑀫𑁆𑀪𑀯𑀦𑁆𑀢𑀺 𑀓𑀫𑁆𑀫𑀸𑀤𑀺𑀘𑀢𑀼𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀁. 𑀚𑀦𑀓𑀸𑀦𑀁 𑀧𑀘𑁆𑀘𑀬𑀸𑀦𑀁 𑀆𑀦𑀼𑀪𑀸𑀯𑀓𑁆𑀔𑀡𑀼𑀧𑁆𑀧𑀸𑀤𑁂 𑀅𑀪𑀸𑀯𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀬𑁂 𑀢𑁂 𑀭𑀽𑀧𑀸𑀦𑀁 𑀚𑀦𑀓𑀧𑀘𑁆𑀘𑀬𑀸, 𑀢𑁂𑀲𑀁 𑀢𑀤𑀼𑀧𑁆𑀧𑀸𑀤𑀦𑀁 𑀧𑀢𑀺 𑀅𑀦𑀼𑀧𑀭𑀢𑀩𑁆𑀬𑀸𑀧𑀸𑀭𑀸𑀦𑀁 𑀬𑁄 𑀲𑁄 𑀧𑀘𑁆𑀘𑀬𑀽𑀧𑀮𑀓𑁆𑀔𑀡𑀺𑀬𑁄 𑀓𑀺𑀘𑁆𑀘𑀸𑀦𑀼𑀪𑀸𑀯𑀓𑁆𑀔𑀡𑁄, 𑀢𑀤𑀸 𑀚𑀸𑀬𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀓𑀸𑀭𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑀢𑀁 𑀲𑀦𑁆𑀥𑀸𑀬 𑀯𑀺𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦 𑀚𑀸𑀢𑀺𑀬𑀸 𑀧𑀘𑁆𑀘𑀬𑀢𑁄 𑀚𑀸𑀢𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀁 𑀢𑀢𑁄 𑀧𑀼𑀭𑁂, 𑀧𑀘𑁆𑀙𑀸 𑀘 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸, 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀚𑀸𑀢𑀺𑀬𑀸 𑀧𑀦 𑀮𑀩𑁆𑀪𑀢𑀻’’𑀢𑀺. 𑀚𑀭𑀸𑀪𑀗𑁆𑀕𑀸𑀦𑀁 𑀧𑀦 𑀧𑀘𑁆𑀘𑀬𑀸𑀦𑀼𑀪𑀸𑀯𑀓𑁆𑀔𑀡𑀢𑁄 𑀉𑀢𑁆𑀢𑀭𑀺 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼 𑀮𑀩𑁆𑀪𑀫𑀸𑀦𑀢𑁆𑀢𑀸 𑀦 𑀏𑀯𑀁 𑀅𑀦𑀼𑀜𑁆𑀜𑀸𑀢𑀼𑀁 𑀲𑀓𑁆𑀓𑀸𑀢𑀺, 𑀚𑀸𑀢𑀺𑀬𑀸 𑀧𑀦 𑀮𑀩𑁆𑀪𑀢𑀺 𑀲𑁄 𑀯𑁄𑀳𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀧𑁆𑀧𑀘𑁆𑀘𑀬𑀢𑁆𑀢𑀯𑁄𑀳𑀸𑀭𑀦𑁆𑀢𑀺𑀆𑀤𑀺𑀕𑀸𑀣𑀸𑀤𑁆𑀯𑀬𑀁 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁.

𑁭𑁧𑁮-𑁯. 𑀅𑀣 𑀓𑀺𑀁 𑀇𑀫𑀸𑀬 𑀕𑀻𑀯𑀸𑀓𑀡𑁆𑀟𑀽𑀬𑀸𑀬, 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀲𑀼𑀢𑁆𑀢𑀦𑁆𑀢𑁂 ‘‘𑀚𑀭𑀸𑀫𑀭𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁦), 𑀢𑀲𑁆𑀫𑀸 𑀓𑀣𑀫𑁂𑀢𑀁 𑀯𑀼𑀘𑁆𑀘𑀢𑀺, 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸 𑀘𑁂𑀯 𑀦 𑀓𑁂𑀳𑀺𑀘𑀺 𑀲𑀫𑀼𑀝𑁆𑀞𑀺𑀢𑀸𑀢𑀺 𑀬𑁄 𑀯𑀤𑁂𑀬𑁆𑀬, 𑀢𑀲𑁆𑀲 𑀯𑀺𑀢𑀓𑁆𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀸 𑀳𑀺 𑀧𑀭𑀺𑀬𑀸𑀬𑀤𑁂𑀲𑀦𑀸’’𑀢𑀺. 𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀫𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀦𑀺𑀘𑁆𑀘𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸-𑀲𑀤𑁆𑀤𑁂𑀦 ‘‘𑀲𑀗𑁆𑀔𑀢𑀸𑀦’’𑀦𑁆𑀢𑀺 𑀲𑀗𑁆𑀕𑀡𑁆𑀳𑀸𑀢𑀺.

𑁭𑁨𑁦-𑁩. 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀜𑁆𑀘𑀸𑀢𑀺 𑀘-𑀲𑀤𑁆𑀤𑁂𑀦 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀦𑀺𑀘𑁆𑀘𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀢𑁆𑀢𑀸 𑀢𑁂𑀲𑀼 𑀲𑀦𑁆𑀢𑁂𑀲𑀼 𑀳𑁄𑀢𑀺, 𑀅𑀲𑀦𑁆𑀢𑁂𑀲𑀼 𑀦 𑀳𑁄𑀢𑀺. 𑀦 𑀳𑀺 𑀅𑀚𑀸𑀢𑀁 𑀧𑀭𑀺𑀧𑀘𑁆𑀘𑀢𑀺, 𑀪𑀺𑀚𑁆𑀚𑀢𑀺 𑀯𑀸, 𑀢𑀲𑁆𑀫𑀸 𑀢𑀁 𑀚𑀸𑀢𑀺𑀧𑀘𑁆𑀘𑀬𑀢𑀁 𑀲𑀦𑁆𑀥𑀸𑀬 ‘‘𑀚𑀭𑀸𑀫𑀭𑀡𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁, 𑀢𑀢𑁄𑀬𑁂𑀯 𑀘 𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀭𑀺𑀬𑀸𑀬𑁂𑀦 𑀲𑀼𑀢𑁆𑀢𑁂 𑀆𑀕𑀢𑀁. 𑀬𑀣𑀸 𑀯𑀺𑀜𑁆𑀜𑀢𑁆𑀢𑀺𑀆𑀤𑀻𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑀸𑀪𑀸𑀯𑁂𑀧𑀺 𑀘𑀺𑀢𑁆𑀢𑀚𑀸𑀦𑀁 𑀯𑀺𑀓𑀸𑀭𑀢𑁆𑀢𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀪𑀸𑀯𑁄𑀢𑀺. 𑀯𑀺𑀜𑁆𑀜𑀢𑁆𑀢𑀺𑀬𑁄 𑀯𑀺𑀬𑀸𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀮𑀳𑀼𑀢𑀸𑀤𑀻𑀦𑀫𑁆𑀧𑀺 𑀘𑀺𑀢𑁆𑀢𑀚𑀸𑀤𑀺𑀪𑀸𑀯𑀲𑁆𑀲 𑀧𑀭𑀺𑀬𑀸𑀬𑁂𑀦𑁂𑀯 𑀇𑀘𑁆𑀙𑀺𑀢𑀢𑁆𑀢𑀸. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀝𑁆𑀞𑀸𑀭𑀲𑁂𑀯 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺 𑀓𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺. 𑀢𑀬𑀦𑁆𑀢𑀺 𑀚𑀸𑀢𑀺𑀚𑀭𑀸𑀪𑀗𑁆𑀕𑀲𑀗𑁆𑀔𑀸𑀢𑀸𑀦𑀁 𑀮𑀓𑁆𑀔𑀡𑀭𑀽𑀧𑀢𑁆𑀢𑀬𑀁.

𑀔𑀁𑀧𑀼𑀧𑁆𑀨𑀁𑀯𑀸𑀢𑀺 𑀆𑀓𑀸𑀲𑀓𑀼𑀲𑀼𑀫𑀁 𑀯𑀺𑀬. 𑀬𑀣𑀸 𑀆𑀓𑀸𑀲𑀓𑀼𑀲𑀼𑀫𑀁 𑀲𑀩𑁆𑀩𑀲𑁄 𑀅𑀚𑀸𑀢𑀢𑁆𑀢𑀸 𑀦𑀢𑁆𑀣𑀺, 𑀏𑀯𑀫𑀺𑀤𑀫𑁆𑀧𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀦𑀺𑀘𑁆𑀘𑀁 𑀯𑀸𑀲𑀗𑁆𑀔𑀢𑀁 𑀯𑀺𑀬𑀸𑀢𑀺 𑀬𑀣𑀸 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁 𑀓𑁂𑀦𑀘𑀺 𑀅𑀲𑀗𑁆𑀔𑀢𑀢𑁆𑀢𑀸 𑀦𑀺𑀘𑁆𑀘𑀁 𑀥𑀼𑀯𑀁, 𑀏𑀯𑀫𑀺𑀤𑀫𑁆𑀧𑀺 𑀓𑁂𑀦𑀘𑀺 𑀅𑀲𑀗𑁆𑀔𑀢𑀢𑁆𑀢𑀸 𑀦𑀺𑀘𑁆𑀘𑀁 𑀲𑀲𑁆𑀲𑀢𑀁 𑀯𑀸𑀢𑀺 𑀅𑀢𑁆𑀣𑁄. 𑀦𑁄𑀪𑀬𑀁 𑀧𑀦𑀺𑀤𑀦𑁆𑀢𑀺 𑀇𑀤𑀁 𑀧𑀦 𑀉𑀪𑀬𑀫𑁆𑀧𑀺 𑀔𑀁𑀧𑀼𑀧𑁆𑀨𑀁 𑀯𑀺𑀬 𑀦𑁄 𑀦𑀢𑁆𑀣𑀺, 𑀦 𑀘 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀅𑀲𑀗𑁆𑀔𑀢𑀁 𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄𑀢𑀺 𑀚𑀸𑀬𑀫𑀸𑀦𑀧𑀭𑀺𑀧𑀘𑁆𑀘𑀫𑀸𑀦𑀪𑀺𑀚𑁆𑀚𑀫𑀸𑀦𑀸𑀦𑀁 𑀚𑀸𑀢𑀺𑀆𑀤𑀺𑀫𑀢𑁆𑀢𑀪𑀸𑀯𑁂𑀦 𑀚𑀸𑀬𑀫𑀸𑀦𑀸𑀤𑀺𑀦𑀺𑀲𑁆𑀲𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁆𑀢𑀸. 𑀢𑀫𑁂𑀯 𑀦𑀺𑀲𑁆𑀲𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀪𑀸𑀯𑁂 𑀧𑀣𑀯𑀺𑀬𑀸𑀤𑀻𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀧𑀣𑀯𑀻𑀆𑀤𑀻𑀦𑀁 𑀦𑀺𑀲𑁆𑀲𑀬𑀸𑀦𑀁 𑀪𑀸𑀯𑁂 𑀚𑀸𑀢𑀺𑀆𑀤𑀺𑀢𑁆𑀢𑀬𑀁 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀦𑁄 𑀦𑀢𑁆𑀣𑀺, 𑀬𑀲𑁆𑀫𑀸 𑀘 𑀢𑁂𑀲𑀁 𑀅𑀪𑀸𑀯𑁂 𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀦 𑀦𑀺𑀘𑁆𑀘𑀦𑁆𑀢𑀺 𑀇𑀫𑀫𑁂𑀯 𑀘 𑀅𑀪𑀺𑀦𑀺𑀯𑁂𑀲𑀁 𑀦𑀺𑀲𑁂𑀥𑁂𑀢𑀼𑀁 𑀪𑀕𑀯𑀢𑀸 𑀚𑀸𑀢𑀺𑀬𑀸 𑀘𑀢𑀼𑀚𑀢𑁆𑀢𑀁, 𑀚𑀭𑀸𑀫𑀭𑀡𑀲𑁆𑀲 𑀘 𑀅𑀦𑀺𑀘𑁆𑀘𑀸𑀤𑀺𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁭𑁨𑁪-𑁫. 𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫𑀸𑀢𑀺 ‘‘𑀭𑀽𑀧𑀲𑁆𑀲 𑀧𑀭𑀺𑀘𑁆𑀙𑁂𑀤𑁄, 𑀭𑀽𑀧𑀲𑁆𑀲 𑀯𑀺𑀓𑀸𑀭𑁄, 𑀭𑀽𑀧𑀲𑁆𑀲 𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀘𑁆𑀙𑁂𑀤𑀸𑀤𑀺𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀓𑁆𑀔𑀴𑀢𑁆𑀢𑀸𑀤𑀺𑀦𑀸 𑀲𑀪𑀸𑀯𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑁂𑀢𑀩𑁆𑀩𑀢𑁆𑀢𑀸, 𑀅𑀧𑀭𑀺𑀬𑀸𑀬𑁂𑀦𑁂𑀯 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀯𑀸 𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫. 𑀢𑀩𑁆𑀩𑀺𑀧𑀭𑀻𑀢𑀢𑁄 𑀅𑀦𑀺𑀧𑁆𑀨𑀦𑁆𑀦𑀸.