𑁯. 𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀼𑀜𑁆𑀜𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁬𑁦-𑁧. 𑀯𑀝𑁆𑀝𑀓𑀣𑀸𑀬 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀦𑀁 𑀅𑀮𑀩𑁆𑀪𑀦𑀢𑁄 ‘‘𑀮𑁄𑀓𑀺𑀬𑀸𑀦𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀤𑀺𑀲𑀗𑁆𑀔𑀸𑀭𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀢𑀬𑁄 𑀲𑀗𑁆𑀔𑀸𑀭𑀸. 𑀢𑀢𑁆𑀣 𑀧𑀼𑀦𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀅𑀧𑀼𑀜𑁆𑀜𑀨𑀮𑀢𑁄, 𑀤𑀼𑀓𑁆𑀔𑀲𑀁𑀓𑀺𑀮𑁂𑀲𑀢𑁄 𑀘 𑀲𑁄𑀥𑁂𑀢𑀺, 𑀧𑀼𑀚𑁆𑀚𑀁 𑀪𑀯𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀯𑀸 𑀧𑀼𑀜𑁆𑀜𑀁, 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑀝𑁆𑀞𑁂𑀦 𑀅𑀪𑀺𑀲𑀗𑁆𑀔𑀸𑀭𑁄 𑀘𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀧𑀼𑀜𑁆𑀜𑀧𑀝𑀺𑀧𑀓𑁆𑀔𑀢𑁄 𑀅𑀧𑀼𑀜𑁆𑀜𑀁, 𑀯𑀼𑀢𑁆𑀢𑀦𑀬𑁂𑀦 𑀅𑀪𑀺𑀲𑀗𑁆𑀔𑀸𑀭𑁄 𑀘𑀸𑀢𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄. 𑀲𑀫𑀸𑀥𑀺𑀧𑀘𑁆𑀘𑀦𑀻𑀓𑀸𑀦𑀁 𑀅𑀢𑀺𑀤𑀽𑀭𑀢𑀸𑀬 𑀦 𑀇𑀜𑁆𑀚𑀢𑀺 𑀦 𑀓𑀫𑁆𑀧𑀢𑀻𑀢𑀺 𑀆𑀦𑁂𑀜𑁆𑀚𑀁, 𑀢𑀁 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄. 𑀢𑀢𑁆𑀣 𑀤𑀸𑀦𑀲𑀻𑀮𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸, 𑀪𑀸𑀯𑀦𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑀸 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀘𑀸𑀢𑀺 𑀢𑁂𑀭𑀲 𑀘𑁂𑀢𑀦𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. 𑀪𑀸𑀯𑀦𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑀸 𑀘𑀢𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. 𑀪𑀯𑀸𑀤𑀻𑀲𑀼 𑀬𑀣𑀸 𑀧𑀘𑁆𑀘𑀬𑀸, 𑀢𑀣𑀸 𑀬𑁂𑀲𑀜𑁆𑀘 𑀯𑀺𑀧𑀸𑀓𑀸𑀦𑀁 𑀧𑀘𑁆𑀘𑀬𑀸, 𑀢𑁂𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀘𑀺 𑀧𑀦 ‘‘𑀢𑁂𑀧𑀻𑀢𑀺 𑀲𑀗𑁆𑀔𑀸𑀭𑀸𑀦𑀁 𑀕𑀳𑀡’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀏𑀯𑀁 𑀲𑀢𑀺 ‘‘𑀬𑁂𑀲’’𑀦𑁆𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀲𑁆𑀲 𑀦𑀺𑀬𑀫𑀓𑀯𑀘𑀦𑀸𑀪𑀸𑀯𑀢𑁄.

𑁫𑁬𑁨. 𑀓𑀢𑀫𑁂 𑀧𑀦 𑀢𑁂 𑀪𑀯𑀸𑀤𑀬𑁄𑀢𑀺 𑀆𑀳 ‘‘𑀢𑀬𑁄 𑀪𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀫𑀭𑀽𑀧𑀸𑀭𑀽𑀧𑀯𑀲𑁂𑀦 𑀢𑀬𑁄 𑀪𑀯𑀸. 𑀲𑀜𑁆𑀜𑀻𑀪𑀯𑀅𑀲𑀜𑁆𑀜𑀻𑀪𑀯𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀪𑀯𑀯𑀲𑁂𑀦, 𑀧𑀦 𑀏𑀓𑀯𑁄𑀓𑀸𑀭𑀪𑀯𑀘𑀢𑀼𑀯𑁄𑀓𑀸𑀭𑀪𑀯𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦 𑀘 𑀢𑀬𑁄 𑀪𑀯𑀸 𑀏𑀢𑁆𑀣𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄𑀢𑀺 𑀅𑀡𑁆𑀟𑀚𑀚𑀮𑀸𑀩𑀼𑀚𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀯𑀲𑁂𑀦 𑀘𑀢𑁆𑀢𑀸𑀭𑁄 𑀲𑀢𑁆𑀢𑀦𑀺𑀓𑀸𑀬𑀸. 𑀢𑀢𑁆𑀣 𑀩𑀻𑀚𑀓𑀧𑀸𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀢𑀦𑀺𑀓𑀸𑀬𑁄 𑀅𑀡𑁆𑀟𑀚𑀬𑁄𑀦𑀺 𑀦𑀸𑀫. 𑀫𑀸𑀢𑀼𑀕𑀩𑁆𑀪𑁂 𑀚𑀮𑀸𑀩𑀼𑀚𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀦𑀺𑀓𑀸𑀬𑁄 𑀚𑀮𑀸𑀩𑀼𑀚𑀬𑁄𑀦𑀺 𑀦𑀸𑀫. 𑀧𑀤𑀼𑀫𑀕𑀩𑁆𑀪𑀫𑀸𑀦𑀼𑀲𑀓𑀕𑀩𑁆𑀪𑀫𑀮𑀸𑀤𑀺𑀲𑀁𑀲𑁂𑀤𑀽𑀧𑀦𑀺𑀲𑁆𑀲𑀬𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑀦𑀺𑀓𑀸𑀬𑁄 𑀲𑀁𑀲𑁂𑀤𑀚𑀬𑁄𑀦𑀺 𑀦𑀸𑀫. 𑀓𑀼𑀢𑁄𑀘𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀓𑁂𑀯𑀮𑀁 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀧𑀼𑀡𑁆𑀡𑀗𑁆𑀕𑀧𑀘𑁆𑀘𑀗𑁆𑀕𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑀦𑀺𑀓𑀸𑀬𑁄 𑀑𑀧𑀧𑀸𑀢𑀺𑀓𑀬𑁄𑀦𑀺 𑀦𑀸𑀫. 𑀕𑀢𑀺𑀧𑀜𑁆𑀘𑀓𑀁 𑀳𑁂𑀝𑁆𑀞𑀸 𑀯𑀺𑀪𑀸𑀯𑀺𑀢𑀫𑁂𑀯. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼𑀪𑀽𑀢𑀸 𑀘 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸 𑀙 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀦𑀸𑀫. 𑀢𑀸 𑀧𑀦 𑀦𑀸𑀦𑀢𑁆𑀢𑀓𑀸𑀬𑀸𑀤𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑀸𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀢𑁆𑀢𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀢𑁆𑀢𑀺𑀫𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀓𑀢𑀫𑀸 𑀲𑀢𑁆𑀢? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄. 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸 𑀏𑀓𑀘𑁆𑀘𑁂 𑀘 𑀤𑁂𑀯𑀸 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸, 𑀅𑀬𑀁 𑀧𑀞𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄. 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸, 𑀅𑀬𑀁 𑀤𑀼𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄. 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀆𑀪𑀲𑁆𑀲𑀭𑀸, 𑀅𑀬𑀁 𑀢𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄. 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀲𑀼𑀪𑀓𑀺𑀡𑁆𑀳𑀸, 𑀅𑀬𑀁 𑀘𑀢𑀼𑀢𑁆𑀣𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸, 𑀅𑀬𑀁 𑀧𑀜𑁆𑀘𑀫𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸, 𑀅𑀬𑀁 𑀙𑀝𑁆𑀞𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸, 𑀅𑀬𑀁 𑀲𑀢𑁆𑀢𑀫𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁩𑁨; 𑀅. 𑀦𑀺. 𑁭.𑁪𑁪).

𑀏𑀢𑁆𑀣 𑀳𑀺 𑀅𑀧𑀭𑀺𑀫𑀸𑀡𑀘𑀓𑁆𑀓𑀯𑀸𑀴𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀓𑀸𑀫𑀸𑀯𑀘𑀭𑀤𑁂𑀯𑀸 𑀧𑀼𑀦𑀩𑁆𑀩𑀲𑀼𑀫𑀸𑀢𑀼𑀧𑀺𑀬𑀗𑁆𑀓𑀭𑀫𑀸𑀢𑀸𑀤𑀬𑁄 𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸 𑀘 𑀓𑀼𑀲𑀮𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀺𑀓𑀸 𑀯𑁂𑀫𑀸𑀦𑀺𑀓𑀧𑁂𑀢𑀸 𑀘𑁂𑀢𑀺 𑀇𑀫𑁂 𑀤𑀻𑀖𑀭𑀲𑁆𑀲𑀓𑀺𑀲𑀣𑀽𑀮𑀓𑀸𑀴𑀑𑀤𑀸𑀢𑀸𑀤𑀺𑀯𑀡𑁆𑀡𑀲𑀡𑁆𑀞𑀸𑀦𑀯𑀲𑁂𑀦 𑀭𑀽𑀧𑀓𑀸𑀬𑀲𑁆𑀲, 𑀅𑀳𑁂𑀢𑀼𑀤𑀼𑀳𑁂𑀢𑀼𑀢𑀺𑀳𑁂𑀢𑀼𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀬 𑀘 𑀦𑀸𑀦𑀸𑀪𑀸𑀯𑀢𑁄 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄 𑀦𑀸𑀫, 𑀅𑀬𑀁 𑀧𑀞𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀧𑀞𑀫𑀚𑁆𑀛𑀸𑀦𑀢𑀮𑀯𑀸𑀲𑀺𑀦𑁄 𑀧𑀦 𑀢𑀬𑁄 𑀤𑁂𑀯𑀸 𑀉𑀧𑀭𑀽𑀧𑀭𑀺𑀯𑀸𑀲𑀻𑀦𑀁 𑀯𑀡𑁆𑀡𑀸𑀤𑀺𑀓𑀫𑀧𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀡𑁆𑀡𑀸𑀤𑀻𑀦𑀁 𑀦𑀺𑀳𑀻𑀦𑀢𑀸𑀬 𑀭𑀽𑀧𑀓𑀸𑀬𑀲𑁆𑀲 𑀦𑀸𑀦𑀸𑀪𑀸𑀯𑀢𑁄, 𑀧𑀞𑀫𑀚𑁆𑀛𑀸𑀦𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀯𑀲𑁂𑀦 𑀲𑀫𑀸𑀦𑀲𑀜𑁆𑀜𑀺𑀢𑀸𑀬 𑀘 𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀺𑀦𑁄 𑀦𑀸𑀫, 𑀅𑀬𑀁 𑀤𑀼𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀘𑀢𑀼𑀭𑀸𑀧𑀸𑀬𑀯𑀸𑀲𑀺𑀦𑁄𑀧𑀺 𑀯𑀡𑁆𑀡𑀲𑀡𑁆𑀞𑀸𑀦𑀯𑀲𑁂𑀦 𑀭𑀽𑀧𑀓𑀸𑀬𑀲𑁆𑀲 𑀦𑀸𑀦𑀸𑀲𑀪𑀸𑀯𑀢𑁆𑀢𑀸, 𑀅𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸𑀯𑀲𑁂𑀦 𑀲𑀜𑁆𑀜𑀸𑀬 𑀏𑀓𑀲𑀪𑀸𑀯𑀢𑁆𑀢𑀸 𑀘 𑀤𑀼𑀢𑀺𑀬𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀁𑀬𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀢𑀺𑀬𑀚𑁆𑀛𑀸𑀦𑀢𑀮𑀯𑀸𑀲𑀺𑀦𑁄 𑀢𑀬𑁄 𑀤𑁂𑀯𑀸 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀲𑀫𑀸𑀦𑀢𑁆𑀢𑀸 𑀭𑀽𑀧𑀓𑀸𑀬𑀲𑁆𑀲 𑀯𑀺𑀲𑁂𑀲𑀸𑀪𑀸𑀯𑀢𑁄 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀲𑀜𑁆𑀜𑀸𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀬 𑀦𑀸𑀦𑀸𑀪𑀸𑀯𑀢𑁄 𑀏𑀓𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄 𑀦𑀸𑀫, 𑀅𑀬𑀁 𑀢𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀢𑀢𑀺𑀬𑀚𑁆𑀛𑀸𑀦𑀢𑀮𑀯𑀸𑀲𑀺𑀦𑁄 𑀧𑀦 𑀢𑀬𑁄 𑀤𑁂𑀯𑀸 𑀭𑀽𑀧𑀓𑀸𑀬𑀯𑀲𑁂𑀦 𑀲𑀫𑀸𑀦𑀢𑁆𑀢𑀸, 𑀧𑀜𑁆𑀘𑀓𑀦𑀬𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀧𑀸𑀓𑀲𑀜𑁆𑀜𑀸𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀬 𑀘 𑀏𑀓𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀺𑀦𑁄 𑀦𑀸𑀫, 𑀅𑀬𑀁 𑀘𑀢𑀼𑀢𑁆𑀣𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀯𑁂𑀳𑀧𑁆𑀨𑀮𑀯𑀸𑀲𑀺𑀦𑁄 𑀘𑁂𑀯 𑀧𑀜𑁆𑀘 𑀲𑀼𑀤𑁆𑀥𑀸𑀯𑀸𑀲𑀯𑀸𑀲𑀺𑀦𑁄 𑀘 𑀯𑀡𑁆𑀡𑀲𑀡𑁆𑀞𑀸𑀦𑀯𑀲𑁂𑀦 𑀭𑀽𑀧𑀓𑀸𑀬𑀲𑁆𑀲, 𑀧𑀜𑁆𑀘𑀫𑀚𑁆𑀛𑀸𑀦𑀯𑀺𑀧𑀸𑀓𑀲𑀜𑁆𑀜𑀸𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀬 𑀘 𑀲𑀫𑀸𑀦𑀢𑁆𑀢𑀸 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀫𑁂𑀯 𑀪𑀚𑀦𑁆𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀬𑁄 𑀢𑀺𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀧𑀸𑀴𑀺𑀯𑀲𑁂𑀦𑁂𑀯 𑀧𑀸𑀓𑀝𑀸. 𑀅𑀲𑀜𑁆𑀜𑀲𑀢𑁆𑀢𑀸 𑀧𑀦 𑀯𑀺𑀜𑁆𑀜𑀸𑀡𑀸𑀪𑀸𑀯𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀸𑀲𑀺𑀦𑁄 𑀘 𑀲𑀜𑁆𑀜𑀸𑀬 𑀯𑀺𑀬 𑀯𑀺𑀜𑁆𑀜𑀸𑀡𑀲𑁆𑀲 𑀲𑀼𑀔𑀼𑀫𑀪𑀸𑀯𑁂𑀦𑁂𑀯 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀦 𑀕𑀳𑀺𑀢𑀸, 𑀲𑀢𑁆𑀢𑀸𑀦𑀁 𑀦𑀺𑀯𑀸𑀲𑀢𑀸𑀬 𑀧𑀦 ‘‘𑀲𑀢𑁆𑀢𑀸𑀯𑀸𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀢𑁂𑀳𑀺 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀫𑁄𑀥𑀸𑀦𑁂𑀢𑁆𑀯𑀸 𑀦𑀯 𑀲𑀢𑁆𑀢𑀸𑀯𑀸𑀲𑀸 𑀯𑀼𑀢𑁆𑀢𑀸.

𑁫𑁬𑁩-𑁪. 𑀇𑀤𑀸𑀦𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀪𑀯𑀸𑀤𑀻𑀲𑀼 𑀤𑁆𑀯𑀢𑁆𑀢𑀺𑀁𑀲𑀯𑀺𑀧𑀸𑀓𑀸𑀦𑀁 𑀢𑀺𑀡𑁆𑀡𑀁 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀜𑁆𑀜𑀺𑀢𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀦𑀯𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀦𑁆𑀢𑀺 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀯𑀲𑁂𑀦 𑀦𑀯𑀦𑁆𑀦𑀁 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁. 𑀦𑀸𑀦𑀓𑁆𑀔𑀡𑀺𑀓…𑀧𑁂… 𑀧𑀘𑁆𑀘𑀬𑁂𑀳𑀺 𑀘𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑁆𑀲 𑀅𑀢𑀻𑀢𑀲𑁆𑀲𑁂𑀯 𑀅𑀢𑁆𑀢𑀦𑀸 𑀚𑀦𑁂𑀢𑀩𑁆𑀩𑀯𑀺𑀧𑀸𑀓𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦, 𑀢𑁂𑀲𑀫𑁂𑀯 𑀩𑀮𑀯𑀓𑀸𑀭𑀡𑀪𑀸𑀯𑀢𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘. 𑀯𑀼𑀢𑁆𑀢𑀜𑁆𑀳𑀺 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀁 ‘‘𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁩). 𑀲𑀩𑁆𑀩𑀢𑁆𑀣 𑀉𑀧𑀦𑀺𑀲𑁆𑀲𑀬𑀪𑀸𑀯𑁄 𑀩𑀮𑀯𑀓𑀫𑁆𑀫𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀤𑀼𑀩𑁆𑀩𑀮𑀜𑁆𑀳𑀺 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀬𑁄 𑀦 𑀳𑁄𑀢𑀻𑀢𑀺 𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 𑀤𑀲𑁆𑀲𑀺𑀢𑀫𑁂𑀢𑀁.

𑁫𑁬𑁬-𑁮. 𑀧𑀜𑁆𑀘𑀦𑁆𑀦𑀦𑁆𑀢𑀺 𑀓𑀼𑀲𑀮𑀯𑀺𑀧𑀸𑀓𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀤𑁆𑀯𑀬𑀯𑀲𑁂𑀦 𑀧𑀜𑁆𑀘𑀦𑁆𑀦𑀁. 𑀤𑀼𑀕𑁆𑀕𑀢𑀺𑀬𑀁 𑀓𑀼𑀲𑀮𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀺𑀬𑀸 𑀅𑀪𑀸𑀯𑀢𑁄 𑀆𑀳 ‘‘𑀦 𑀳𑁄𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬’’𑀦𑁆𑀢𑀺. 𑀏𑀯𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁 𑀅𑀲𑀗𑁆𑀓𑀭𑀯𑀲𑁂𑀦 𑀧𑀘𑁆𑀘𑀬𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀳𑁄𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀴𑀲𑀦𑁆𑀦𑀁 𑀧𑀯𑀢𑁆𑀢𑁂, 𑀧𑀝𑀺𑀲𑀦𑁆𑀥𑀺𑀬𑀁 𑀦𑀯𑀦𑁆𑀦𑀦𑁆𑀢𑀺 𑀬𑀣𑀸𑀮𑀸𑀪𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁.

𑁫𑁬𑁯-𑁭𑁪. 𑀭𑀽𑀧𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀢𑀺 𑀅𑀪𑀺𑀜𑁆𑀜𑀸𑀯𑀚𑁆𑀚𑀺𑀢𑀸 𑀧𑀜𑁆𑀘 𑀭𑀽𑀧𑀸𑀯𑀘𑀭𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸. 𑀓𑀲𑁆𑀫𑀸 𑀧𑀦 𑀅𑀪𑀺𑀜𑁆𑀜𑀸𑀬 𑀧𑀭𑀺𑀯𑀚𑁆𑀚𑀦𑀦𑁆𑀢𑀺? 𑀯𑀺𑀧𑀸𑀓𑀤𑀸𑀦𑀸𑀪𑀸𑀯𑀢𑁄, 𑀢𑀜𑁆𑀘 𑀔𑁄 𑀧𑀦𑀲𑁆𑀲𑀸 𑀯𑀺𑀧𑀸𑀓𑀲𑁆𑀲 𑀅𑀲𑀫𑁆𑀪𑀯𑀢𑁄, 𑀦 𑀧𑀦 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀪𑀸𑀯𑀸𑀪𑀸𑀯𑀢𑁄. 𑀬𑀤𑀺 𑀳𑀺 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀅𑀜𑁆𑀜𑀪𑀽𑀫𑀺𑀓𑀓𑀫𑁆𑀫𑀲𑁆𑀲 𑀅𑀜𑁆𑀜𑀪𑀽𑀫𑀺𑀓𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀸𑀬𑁄𑀕𑀢𑁄 𑀲𑀪𑀽𑀫𑀺𑀓𑀫𑁂𑀯 𑀉𑀧𑁆𑀧𑀸𑀤𑁂𑀬𑁆𑀬. 𑀢𑀁 𑀧𑀦 𑀓𑀺𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀉𑀧𑁆𑀧𑀸𑀤𑁂𑀬𑁆𑀬 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀯𑀸? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀏𑀓𑀦𑁆𑀢𑁂𑀦 𑀓𑀫𑁆𑀫𑀲𑀫𑀸𑀦𑀸𑀭𑀫𑁆𑀫𑀡𑀢𑀸𑀬 𑀤𑀲𑁆𑀲𑀺𑀢𑀢𑁆𑀢𑀸, 𑀅𑀪𑀺𑀜𑁆𑀜𑀸𑀘𑁂𑀢𑀦𑀸𑀬 𑀘 𑀲𑀬𑀁 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀢𑁆𑀢𑀸. 𑀅𑀣 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀏𑀓𑀦𑁆𑀢𑁂𑀦𑁂𑀯 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑁋

‘‘𑀭𑀽𑀧𑀸𑀯𑀘𑀭𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸 𑀓𑀼𑀲𑀮𑀢𑁄 𑀘 𑀯𑀺𑀧𑀸𑀓𑀢𑁄 𑀘 𑀓𑀺𑀭𑀺𑀬𑀢𑁄 𑀘 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀯𑀺𑀧𑀸𑀓𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀇𑀫𑁂 𑀥𑀫𑁆𑀫𑀸 𑀦𑀯𑀢𑁆𑀢𑀩𑁆𑀩𑀸 ‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’𑀢𑀺𑀧𑀺 ‘𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸’𑀢𑀺𑀧𑀺 ‘𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’𑀢𑀺𑀧𑀻’’𑀢𑀺 (𑀥. 𑀲. 𑁧𑁪𑁨𑁨).

𑀅𑀧𑀺𑀘 𑀲𑀫𑀸𑀥𑀺𑀯𑀺𑀚𑁆𑀚𑀸𑀲𑀫𑁆𑀪𑀸𑀭𑀪𑀽𑀢𑀸 𑀅𑀪𑀺𑀜𑁆𑀜𑀸 𑀲𑀫𑀸𑀥𑀺𑀲𑁆𑀲 𑀆𑀦𑀺𑀲𑀁𑀲𑀫𑀢𑁆𑀢𑀁 𑀲𑀫𑀸𑀥𑀺𑀨𑀮𑀲𑀤𑀺𑀲𑀸. 𑀢𑀲𑁆𑀲 𑀢𑀲𑁆𑀲 𑀳𑀺 𑀅𑀥𑀺𑀝𑁆𑀞𑀸𑀦𑀯𑀺𑀓𑀼𑀩𑁆𑀩𑀦𑀤𑀺𑀩𑁆𑀩𑀲𑀤𑁆𑀤𑀲𑀯𑀦𑀸𑀤𑀺𑀓𑀲𑁆𑀲 𑀬𑀣𑀺𑀘𑁆𑀙𑀺𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀦𑀺𑀧𑁆𑀨𑀸𑀤𑀦𑀫𑀢𑁆𑀢𑀨𑀮𑀸 𑀅𑀪𑀺𑀜𑁆𑀜𑀸𑀘𑁂𑀢𑀦𑀸. 𑀢𑁂𑀦𑀸𑀳 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺 (𑀧𑀸𑀭𑀸. 𑁧𑁨-𑁧𑁩) 𑀢𑀲𑁆𑀫𑀸 𑀲𑀫𑀸𑀥𑀺𑀲𑁆𑀲 𑀨𑀮𑀲𑀤𑀺𑀲𑀸 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀦 𑀘 𑀨𑀮𑀁 𑀤𑁂𑀢𑀺, 𑀤𑀸𑀦𑀲𑀻𑀮𑀸𑀦𑀺𑀲𑀁𑀲𑀪𑀽𑀢𑁄 𑀢𑀲𑁆𑀫𑀺𑀁 𑀪𑀯𑁂 𑀧𑀘𑁆𑀘𑀬𑀮𑀸𑀪𑁄 𑀯𑀺𑀬 𑀦𑀢𑁆𑀣𑀺 𑀢𑀲𑁆𑀲 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀲𑀫𑀸𑀦𑀪𑀽𑀫𑀺𑀓𑀢𑁄 𑀆𑀲𑁂𑀯𑀦𑀮𑀸𑀪𑁂𑀦 𑀩𑀮𑀯𑀦𑁆𑀢𑀸𑀦𑀺 𑀛𑀸𑀦𑀸𑀦𑀺 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀪𑀸𑀯𑀢𑁄, 𑀅𑀪𑀺𑀜𑁆𑀜𑀸 𑀧𑀦 𑀲𑀢𑀺𑀧𑀺 𑀛𑀸𑀦𑀪𑀸𑀯𑁂 𑀢𑀤𑀪𑀸𑀯𑀢𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀆𑀕𑀦𑁆𑀢𑀼𑀓𑀸𑀬𑁂𑀯𑀸𑀢𑀺 𑀤𑀼𑀩𑁆𑀩𑀮𑀸, 𑀢𑀲𑁆𑀫𑀸 𑀯𑀺𑀧𑀸𑀓𑀁 𑀦 𑀤𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀅𑀦𑀼𑀭𑀼𑀤𑁆𑀥𑀸𑀘𑀭𑀺𑀬𑁂𑀦 𑁋

‘‘𑀲𑀫𑀸𑀦𑀸𑀲𑁂𑀯𑀦𑁂 𑀮𑀤𑁆𑀥𑁂, 𑀯𑀺𑀚𑁆𑀚𑀫𑀸𑀦𑁂 𑀫𑀳𑀩𑁆𑀩𑀮𑁂;

𑀅𑀮𑀤𑁆𑀥𑀸 𑀢𑀸𑀤𑀺𑀲𑀁 𑀳𑁂𑀢𑀼𑀁, 𑀅𑀪𑀺𑀜𑁆𑀜𑀸 𑀦 𑀯𑀺𑀧𑀘𑁆𑀘𑀢𑀻’’𑀢𑀺. (𑀦𑀸𑀫. 𑀧𑀭𑀺. 𑁪𑁭𑁪);

𑀢𑀬𑀺𑀤𑀫𑀓𑀸𑀭𑀡𑀁, 𑀧𑀭𑀺𑀢𑁆𑀢𑀛𑀸𑀦𑀲𑁆𑀲 𑀅𑀯𑀺𑀲𑁂𑀲𑁂𑀦 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀲𑀼 𑀯𑀺𑀧𑀸𑀓𑀤𑀸𑀦𑀯𑀘𑀦𑀢𑁄. 𑀦 𑀳𑀺 𑀧𑀭𑀺𑀢𑁆𑀢𑀁 𑀮𑀤𑁆𑀥𑀸𑀲𑁂𑀯𑀦𑀫𑁂𑀯 𑀢𑀢𑁆𑀣 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀫𑀸𑀦𑀸𑀲𑁂𑀯𑀦𑁂 𑀮𑀤𑁆𑀥𑁂𑀬𑁂𑀯 𑀛𑀸𑀦𑀲𑁆𑀲 𑀯𑀺𑀧𑀸𑀓𑀤𑀸𑀦𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀧𑀺𑀘 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀪𑀺𑀜𑁆𑀜𑀸𑀬𑀧𑀺 𑀯𑀲𑀺𑀪𑀸𑀯𑀲𑀩𑁆𑀪𑀸𑀯𑀸 𑀢𑀲𑁆𑀲𑀸𑀧𑀺 𑀘 𑀩𑀮𑀯𑀪𑀸𑀯𑁄 𑀅𑀢𑁆𑀣𑁂𑀯𑀸𑀢𑀺 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀬𑁆𑀬.

𑀧𑀜𑁆𑀘𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁. 𑀫𑀸𑀧𑀼𑀜𑁆𑀜𑀲𑀗𑁆𑀔𑀸𑀭𑀸𑀢𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸. ‘‘𑀇𑀫𑁂 𑀅𑀧𑀼𑀜𑁆𑀜𑀲𑀗𑁆𑀔𑀸𑀭𑀸’’𑀢𑀺 𑀯𑀸 𑀧𑀤𑀘𑁆𑀙𑁂𑀤𑁄. 𑀏𑀓𑀲𑁆𑀲𑀸𑀢𑀺 𑀏𑀓𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀲𑀦𑁆𑀢𑀻𑀭𑀡𑀲𑁆𑀲. 𑀙𑀦𑁆𑀦𑀦𑁆𑀢𑀺 𑀲𑀦𑁆𑀢𑀻𑀭𑀡𑀯𑀚𑁆𑀚𑀸𑀦𑀁 𑀙𑀦𑁆𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁. 𑀧𑀯𑀢𑁆𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀅𑀦𑀺𑀝𑁆𑀞𑀭𑀽𑀧𑀸𑀤𑀺𑀆𑀧𑀸𑀣𑀸𑀕𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀕𑀢𑀺𑀬𑀁 𑀅𑀓𑀼𑀲𑀮𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀺𑀬𑀸 𑀅𑀪𑀸𑀯𑀢𑁄 𑀆𑀳 ‘‘𑀦 𑀳𑁄𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬’’𑀦𑁆𑀢𑀺. 𑀘𑀢𑀼𑀦𑁆𑀦𑀦𑁆𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑀲𑁂𑀦 𑀘𑀢𑀼𑀦𑁆𑀦𑀁. 𑀢𑀸𑀦𑀺 𑀧𑀦 𑀏𑀓𑀦𑁆𑀢𑀢𑁄 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀺. 𑀭𑀽𑀧𑀪𑀯𑁂 𑀘 𑀓𑀣𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁄𑀢𑀺 𑀆𑀳 ‘‘𑀲𑁄 𑀘𑀸’’𑀢𑀺𑀆𑀤𑀺. 𑀲𑁄𑀢𑀺 𑀲𑁄 𑀧𑀘𑁆𑀘𑀬𑀪𑀸𑀯𑁄. ‘‘𑀓𑀸𑀫𑀪𑀯𑁂’’𑀢𑀺 𑀇𑀤𑀁 𑀅𑀦𑀺𑀝𑁆𑀞𑀭𑀽𑀧𑀸𑀤𑀻𑀦𑀁 𑀯𑀺𑀲𑁂𑀲𑀦𑀁, 𑀦 𑀧𑀦 ‘‘𑀉𑀧𑀮𑀤𑁆𑀥𑀺𑀬’’𑀦𑁆𑀢𑀺 𑀇𑀫𑀲𑁆𑀲. 𑀢𑁂𑀦𑀸𑀳 ‘‘𑀅𑀦𑀺𑀝𑁆𑀞…𑀧𑁂… 𑀦 𑀯𑀺𑀚𑁆𑀚𑀭𑁂’’𑀢𑀺. 𑀓𑁂𑀘𑀺 𑀧𑀦 ‘‘𑀉𑀧𑀮𑀤𑁆𑀥𑀺𑀬𑀦𑁆𑀢𑀺 𑀇𑀫𑀲𑁆𑀲𑁂𑀯 𑀯𑀺𑀲𑁂𑀲𑀦𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀽𑀦𑀁 𑀓𑀸𑀫𑀪𑀯𑀁 𑀆𑀕𑀢𑀓𑁆𑀔𑀡𑁂 𑀭𑀽𑀧𑀸𑀤𑀺𑀉𑀧𑀮𑀤𑁆𑀥𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀦𑀺𑀝𑁆𑀞…𑀧𑁂… 𑀦 𑀯𑀺𑀚𑁆𑀚𑀭𑁂 𑀏𑀓𑀦𑁆𑀢𑀲𑀼𑀔𑀯𑀢𑁆𑀣𑀼𑀪𑀽𑀢𑁂 𑀢𑀢𑁆𑀣 𑀯𑁄𑀓𑀺𑀡𑁆𑀡𑀲𑀼𑀔𑀤𑀼𑀓𑁆𑀔𑀓𑀸𑀭𑀡𑀲𑁆𑀲 𑀅𑀪𑀸𑀯𑀢𑁄.

𑁫𑁭𑁬. ‘‘𑀏𑀯𑀁 𑀢𑀸𑀯𑀸’’𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀅𑀧𑁆𑀧𑀦𑀁. 𑀬𑀣𑀸 𑀘𑀸𑀢𑀺 𑀘-𑀲𑀤𑁆𑀤𑁂𑀦 ‘‘𑀬𑁂𑀲𑀜𑁆𑀘𑀸’’𑀢𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀢𑁂’’𑀢𑀺 𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑀁.

𑁫𑁭𑁭-𑁮𑁧. 𑀬𑀢𑁆𑀣 𑀯𑀺𑀢𑁆𑀣𑀸𑀭𑀧𑁆𑀧𑀓𑀸𑀲𑀦𑀁 𑀓𑀢𑀁, 𑀢𑀢𑁄 𑀪𑀯𑀢𑁄 𑀧𑀝𑁆𑀞𑀸𑀬 𑀫𑀼𑀔𑀫𑀢𑁆𑀢𑀧𑁆𑀧𑀓𑀸𑀲𑀦𑀁 𑀓𑀸𑀢𑀼𑀓𑀸𑀫𑁄 𑀆𑀳 ‘‘𑀢𑀢𑁆𑀭𑀺𑀤’’𑀦𑁆𑀢𑀺𑀆𑀤𑀺. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀪𑀯𑀸𑀤𑀻𑀲𑀼. 𑀇𑀤𑀦𑁆𑀢𑀺 𑀦𑀺𑀤𑀲𑁆𑀲𑀺𑀢𑀩𑁆𑀩𑀪𑀸𑀯𑁂𑀦 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀫𑀸𑀳. 𑀆𑀤𑀺𑀢𑁄 𑀧𑀦 𑀧𑀝𑁆𑀞𑀸𑀬𑀸𑀢𑀺 𑀪𑀯𑀢𑁄 𑀧𑀝𑁆𑀞𑀸𑀬. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀲𑁂𑀦 𑀯𑀺𑀲𑁂𑀲𑀸𑀪𑀸𑀯𑁂𑀦 𑀢𑁂𑀭𑀲 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸. 𑀤𑁆𑀯𑀺𑀪𑀯𑁂𑀲𑀽𑀢𑀺 𑀓𑀸𑀫𑀭𑀽𑀧𑀪𑀯𑁂𑀲𑀼. 𑀓𑁂𑀲𑀜𑁆𑀘𑀺 𑀫𑀦𑀼𑀲𑁆𑀲𑀸𑀦𑀁, 𑀪𑀼𑀫𑁆𑀫𑀤𑁂𑀯𑀸𑀦𑀜𑁆𑀘 𑀅𑀡𑁆𑀟𑀚𑀚𑀮𑀸𑀩𑀼𑀚𑀸𑀦𑀫𑁆𑀧𑀺 𑀲𑀫𑁆𑀪𑀯𑀢𑁄 𑀢𑀤𑀧𑁂𑀓𑁆𑀔𑀸𑀬 ‘‘𑀘𑀢𑀽𑀲𑀼…𑀧𑁂… 𑀬𑁄𑀦𑀺𑀲𑀽’’𑀢𑀺 𑀯𑀼𑀢𑁆𑀢𑀁. 𑀦𑀸𑀦𑀢𑁆𑀢…𑀧𑁂… 𑀞𑀺𑀢𑀻𑀲𑀼𑀧𑀻𑀢𑀺 𑀅𑀮𑀼𑀢𑁆𑀢𑀲𑀫𑀸𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀸𑀤𑀻𑀲𑀼 𑀘𑀢𑀽𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀽𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀫𑀺𑀦𑁆𑀢𑀺 𑀦𑀸𑀦𑀢𑁆𑀢𑀓𑀸𑀬𑀸𑀤𑀺𑀓𑁂, 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀪𑀯𑀸𑀤𑀻𑀲𑀼 𑀏𑀓𑀯𑀻𑀲𑀢𑀺𑀯𑀺𑀧𑀸𑀓𑀸𑀦𑀁 𑀏𑀓𑀸𑀯𑀢𑁆𑀣𑀸𑀬 𑀧𑀘𑁆𑀘𑀬𑁄 𑀅𑀳𑀼𑀢𑁆𑀯𑀸 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀅𑀤𑀢𑁆𑀯𑀸 𑀧𑀯𑀢𑁆𑀢𑁂𑀬𑁂𑀯 𑀅𑀝𑁆𑀞𑀦𑁆𑀦𑀁 𑀯𑀺𑀧𑀸𑀓𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄, 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀧𑀯𑀢𑁆𑀢𑁂 𑀲𑁄𑀴𑀲𑀦𑁆𑀦𑀁 𑀯𑀺𑀧𑀸𑀓𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄, 𑀭𑀽𑀧𑀸𑀯𑀘𑀭𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀧𑀯𑀢𑁆𑀢𑁂 𑀤𑀲𑀦𑁆𑀦𑀁 𑀯𑀺𑀧𑀸𑀓𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀬𑀣𑀸𑀭𑀳’’𑀦𑁆𑀢𑀺.

𑁫𑁮𑁨-𑁩. 𑀓𑀸𑀫𑁂 𑀪𑀯𑁂, 𑀭𑀽𑀧𑁂 𑀪𑀯𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀻𑀲𑀼 𑀕𑀢𑀻𑀲𑀽𑀢𑀺 𑀤𑁂𑀯𑀫𑀦𑀼𑀲𑁆𑀲𑀯𑀚𑁆𑀚𑁂𑀲𑀼 𑀢𑀻𑀲𑀼 𑀕𑀢𑀻𑀲𑀼. 𑀏𑀓𑀺𑀲𑁆𑀲𑀸𑀢𑀺 𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀲𑀗𑁆𑀔𑀸𑀢𑀸𑀬 𑀏𑀓𑀺𑀲𑁆𑀲𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸. 𑀏𑀓𑀲𑁆𑀫𑀺𑀦𑁆𑀢𑀺 𑀦𑀸𑀦𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀲𑀗𑁆𑀔𑀸𑀢𑁂𑀬𑁂𑀯 𑀏𑀓𑀲𑁆𑀫𑀺𑀁 𑀲𑀢𑁆𑀢𑀸𑀯𑀸𑀲𑁂.

𑁫𑁮𑁪-𑁬. 𑀏𑀓𑀸𑀭𑀽𑀧𑀪𑀯𑁂𑀢𑀺 𑀏𑀓𑀲𑁆𑀫𑀺𑀁 𑀅𑀭𑀽𑀧𑀪𑀯𑁂. 𑀏𑀓𑀺𑀲𑁆𑀲𑀸 𑀬𑁄𑀦𑀺𑀬𑀸𑀢𑀺 𑀏𑀓𑀺𑀲𑁆𑀲𑀸𑀬𑁂𑀯 𑀑𑀧𑀧𑀸𑀢𑀺𑀓𑀬𑁄𑀦𑀺𑀬𑀸. 𑀢𑀻𑀲𑀼 𑀘𑀺𑀢𑁆𑀢𑀝𑁆𑀞𑀺𑀢𑀻𑀲𑀽𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀲𑀼 𑀢𑀻𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼. 𑀲𑀢𑁆𑀢𑀸𑀯𑀸𑀲𑁂 𑀘𑀢𑀼𑀩𑁆𑀩𑀺𑀥𑁂𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀓𑁂𑀬𑁂𑀯 𑀘𑀢𑀼𑀩𑁆𑀩𑀺𑀥𑁂 𑀲𑀢𑁆𑀢𑀸𑀯𑀸𑀲𑁂. 𑀯𑀺𑀚𑀸𑀦𑀺𑀢𑀩𑁆𑀩𑀸…𑀧𑁂… 𑀧𑀘𑁆𑀘𑀬𑀸𑀢𑀺 𑀲𑀗𑁆𑀔𑀸𑀭𑀸 𑀬𑀣𑀸 𑀧𑀘𑁆𑀘𑀬𑀸 𑀬𑁂𑀲𑀜𑁆𑀘 𑀧𑀘𑁆𑀘𑀬𑀸, 𑀢𑀣𑀸 𑀢𑁂𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑁫𑁮𑁭-𑁯𑁦. 𑀦𑀦𑀼 𑀘 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼𑀧𑀺 𑀯𑀺𑀧𑀸𑀓𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑁂𑀯 𑀢𑀸𑀯 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀬𑀤𑀺 𑀳𑀺 𑀧𑀼𑀭𑀺𑀫𑀪𑀯𑀢𑁄 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀇𑀥𑀸𑀕𑀘𑁆𑀙𑀢𑀻𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀢𑀁 𑀦 𑀬𑀼𑀢𑁆𑀢𑀁, 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑁂𑀲𑀦𑁆𑀢𑀭𑀲𑀗𑁆𑀓𑀫𑀦𑀸𑀪𑀸𑀯𑀢𑁄. 𑀅𑀣 𑀅𑀢𑀻𑀢𑀪𑀯𑀦𑀺𑀩𑁆𑀩𑀢𑁆𑀢𑀲𑀗𑁆𑀔𑀸𑀭𑀢𑁄 𑀦 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺 𑀅𑀳𑁂𑀢𑀼𑀓𑀤𑁄𑀲𑀸𑀧𑀢𑁆𑀢𑀺𑀢𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀘𑁄𑀤𑁂𑀦𑁆𑀢𑁄 𑀆𑀳 ‘‘𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺. 𑀆𑀘𑀭𑀺𑀬𑁄 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀲𑀜𑁆𑀜𑀸𑀧𑁂𑀢𑀼𑀓𑀸𑀫𑁄 𑀆𑀳 ‘‘𑀦𑀢𑁆𑀣𑀺 𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸𑀢𑀺 𑀢𑀢𑁆𑀣 𑀳𑁂𑀢𑀼𑀁 𑀯𑀺𑀦𑀸, 𑀅𑀢𑀻𑀢𑀪𑀯𑀦𑀺𑀩𑁆𑀩𑀢𑁆𑀢𑀓𑀫𑁆𑀫𑀲𑀗𑁆𑀔𑀸𑀭𑀦𑀺𑀓𑀦𑁆𑀢𑀺𑀆𑀭𑀫𑁆𑀫𑀡𑀁 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀲𑀼𑀮𑀤𑁆𑀥𑀧𑀘𑁆𑀘𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀤𑀺𑀲𑀳𑀓𑀸𑀭𑀻𑀓𑀸𑀭𑀡𑀲𑀳𑀺𑀢𑀲𑁆𑀲 𑀲𑀗𑁆𑀔𑀸𑀭𑀲𑁆𑀲 𑀯𑀲𑁂𑀦 𑀲𑀼𑀝𑁆𑀞𑀼 𑀅𑀯𑁂𑀓𑀮𑁆𑀮𑀢𑁄 𑀧𑀝𑀺𑀮𑀤𑁆𑀥𑀧𑀘𑁆𑀘𑀬𑀁. 𑀭𑀽𑀧𑀸𑀭𑀽𑀧𑀫𑀢𑁆𑀢𑀦𑁆𑀢𑀺 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀥𑀺𑀢𑀺𑀝𑁆𑀞𑀦𑀓𑀲𑁆𑀲 𑀲𑀢𑁆𑀢𑀚𑀻𑀯𑀸𑀤𑀺𑀦𑁄 𑀅𑀪𑀸𑀯𑀢𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀦 𑀘 𑀲𑀢𑁆𑀢𑁄’’𑀢𑀺𑀆𑀤𑀺. 𑀪𑀯𑀦𑁆𑀢𑀭…𑀧𑁂… 𑀧𑀯𑀼𑀘𑁆𑀘𑀢𑀻𑀢𑀺 𑀯𑁄𑀳𑀸𑀭𑀫𑀢𑁆𑀢𑁂𑀦 𑀪𑀯𑀦𑁆𑀢𑀭𑀫𑀼𑀧𑁂𑀢𑀻𑀢𑀺 𑀧𑀯𑀼𑀘𑁆𑀘𑀢𑀺. 𑀅𑀢𑁆𑀣𑀢𑁄 𑀧𑀦 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀪𑀯𑀦𑁆𑀢𑀭𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑀫𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁯𑁧. 𑀇𑀤𑀸𑀦𑀺 𑀢𑀁 𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑀁 𑀧𑀸𑀓𑀝𑀸𑀬 𑀫𑀦𑀼𑀲𑁆𑀲𑀧𑀝𑀺𑀲𑀦𑁆𑀥𑀺𑀬𑀸 𑀯𑀲𑁂𑀦 𑀧𑀓𑀸𑀲𑁂𑀢𑀼𑀁 𑀲𑀫𑀸𑀭𑀪𑀦𑁆𑀢𑁄 𑀆𑀳 ‘‘𑀢𑀬𑀺𑀤’’𑀦𑁆𑀢𑀺𑀆𑀤𑀺. 𑀲𑀼𑀤𑀼𑀩𑁆𑀩𑀼𑀥𑀦𑁆𑀢𑀺 𑀅𑀢𑀺𑀤𑀼𑀩𑁆𑀩𑀺𑀚𑀸𑀦𑀺𑀬𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀲𑀘𑁆𑀘𑀁 𑀲𑀢𑁆𑀢𑁄 𑀧𑀝𑀺𑀲𑀦𑁆𑀥𑀺, 𑀧𑀘𑁆𑀘𑀬𑀸𑀓𑀸𑀭𑀫𑁂𑀯 𑀘;

𑀤𑀼𑀤𑁆𑀤𑀲𑀸 𑀘𑀢𑀼𑀭𑁄 𑀥𑀫𑁆𑀫𑀸, 𑀤𑁂𑀲𑁂𑀢𑀼𑀜𑁆𑀘 𑀲𑀼𑀤𑀼𑀓𑁆𑀓𑀭𑀸’’𑀢𑀺.

𑁫𑁯𑁨-𑁩. 𑀆𑀲𑀦𑁆𑀦𑀫𑀭𑀡𑀲𑁆𑀲𑀸𑀢𑀺 𑀧𑀭𑀽𑀧𑀓𑁆𑀓𑀫𑁂𑀦 𑀯𑀸 𑀆𑀬𑀼𑀓𑁆𑀔𑀬𑀸𑀤𑀺𑀯𑀲𑁂𑀦 𑀯𑀸 𑀲𑀫𑀸𑀲𑀦𑁆𑀦𑀫𑀭𑀡𑀲𑁆𑀲. 𑀲𑀼𑀲𑁆𑀲𑀫𑀸𑀦𑁂𑀢𑀺 𑀅𑀦𑀼𑀓𑁆𑀓𑀫𑁂𑀦 𑀉𑀧𑀲𑀼𑀲𑁆𑀲𑀫𑀸𑀦𑁂. 𑀕𑀩𑁆𑀪𑀲𑁂𑀬𑁆𑀬𑀓𑀲𑁆𑀲 𑀆𑀬𑀢𑀦𑀸𑀦𑀁 𑀅𑀦𑀼𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺 𑀯𑀺𑀬 𑀦𑀺𑀭𑁄𑀥𑁄𑀧𑀺 𑀅𑀦𑀼𑀧𑀼𑀩𑁆𑀩𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀝𑁆𑀞𑁂 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀓𑁂’’𑀢𑀺. 𑀓𑁂𑀘𑀺 𑀧𑀦 ‘‘𑀦𑀸𑀦𑀸𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑁂𑀲𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀦𑀝𑁆𑀞𑁂𑀲𑀽’’𑀢𑀺 𑀯𑀤𑀦𑁆𑀢𑀺. ‘‘𑀳𑀤𑀬…𑀧𑁂… 𑀓𑁂’’𑀢𑀺 𑀇𑀫𑀺𑀦𑀸 𑀲𑁂𑀲𑀓𑀸𑀬𑁂 𑀓𑀸𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀭𑀼𑀤𑁆𑀥𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀏𑀓𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀫𑁆𑀧𑀺 𑀦𑀲𑁆𑀲𑀢𑁂𑀯𑀸𑀢𑀺 𑀅𑀧𑀭𑁂. 𑀆𑀦𑀦𑁆𑀤𑀸𑀘𑀭𑀺𑀬𑁄 𑀧𑀦 ‘‘𑀬𑀫𑀓𑁂’’ 𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀫𑀦𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀻𑀢𑀺. 𑀆𑀫𑀦𑁆𑀢𑀸. 𑀬𑀲𑁆𑀲 𑀯𑀸 𑀧𑀦 𑀫𑀦𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀻𑀢𑀺. 𑀲𑀘𑀺𑀢𑁆𑀢𑀓𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀫𑀦𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺, 𑀦𑁄 𑀘 𑀢𑁂𑀲𑀁 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺. 𑀲𑀘𑀓𑁆𑀔𑀼𑀓𑀸𑀦𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀫𑀦𑀸𑀬𑀢𑀦𑀜𑁆𑀘 𑀦𑀺𑀭𑀼𑀚𑁆𑀛𑀢𑀺, 𑀘𑀓𑁆𑀔𑀸𑀬𑀢𑀦𑀜𑁆𑀘 𑀦𑀺𑀭𑀼𑀚𑁆𑀛𑀢𑀻’𑀢𑀺𑀆𑀤𑀺𑀦𑀸 (𑀬𑀫. 𑁧.𑀆𑀬𑀢𑀦𑀬𑀫𑀓.𑁧𑁨𑁦) 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀳 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀘𑀼𑀢𑀺𑀢𑁄 𑀧𑀼𑀩𑁆𑀩𑁂 𑀦 𑀦𑀲𑁆𑀲𑀦𑁆𑀢𑀺. 𑀅𑀢𑀺𑀫𑀦𑁆𑀤𑀪𑀸𑀯𑀽𑀧𑀕𑀫𑀦𑀁 𑀧𑀦 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬 ‘𑀦𑀺𑀭𑀼𑀤𑁆𑀥𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀽’𑀢𑀺 𑀯𑀼𑀢𑁆𑀢𑀁, 𑀦 𑀅𑀦𑀯𑀲𑁂𑀲𑀦𑀺𑀭𑁄𑀥𑀁 𑀲𑀦𑁆𑀥𑀸𑀬. 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀦𑁆𑀢𑀭𑀫𑁆𑀧𑀺 𑀘𑀼𑀢𑀺 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑀸’’𑀢𑀺 𑀯𑀤𑀢𑀺. 𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑀲𑁆𑀫𑀺𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀧𑀤𑁂𑀲𑀫𑀢𑁆𑀢𑁂. 𑀦 𑀳𑀺 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀧𑀯𑀢𑁆𑀢𑀢𑀺.

𑁫𑁯𑁪-𑁭. 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀲𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀭𑀼𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀽𑀧𑀕𑀫𑀦𑀲𑀸𑀫𑀢𑁆𑀣𑀺𑀬𑀸𑀬𑁄𑀕𑁂𑀦 𑀫𑀦𑁆𑀤𑀪𑀸𑀯𑀢𑁄 𑀯𑀸 𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁. 𑀘𑀺𑀢𑁆𑀢𑀦𑁆𑀢𑀺 𑀢𑀤𑀸 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀻𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀚𑀯𑀦𑀯𑀺𑀜𑁆𑀜𑀸𑀡𑀁. 𑀢𑀁 𑀧𑀦 𑀲𑀼𑀕𑀢𑀺𑀬𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀲𑁆𑀲 𑀓𑀼𑀲𑀮𑀁 𑀳𑁄𑀢𑀺, 𑀤𑀼𑀕𑁆𑀕𑀢𑀺𑀬𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀲𑁆𑀲 𑀅𑀓𑀼𑀲𑀮𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀥𑀺𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀲𑁆𑀲𑀸𑀤𑀕𑀥𑀺𑀢𑀁 𑀯𑀸, 𑀢𑀲𑁆𑀫𑀺𑀁 𑀘𑁂 𑀲𑀫𑀬𑁂 𑀓𑀸𑀮𑀁 𑀓𑀭𑁄𑀢𑀺, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀉𑀧𑀧𑀚𑁆𑀚𑁂𑀬𑁆𑀬 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁪.𑁨𑁩𑁫).

𑀬𑀤𑀺 𑀏𑀯𑀁 𑁋

‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀓𑀢𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺, 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑀸𑀧𑀺 𑀲𑀗𑁆𑀔𑀸𑀭𑀸. 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑀸𑀧𑀺 𑀲𑀗𑁆𑀔𑀸𑀭𑀸. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀅𑀩𑁆𑀬𑀸𑀓𑀢𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀧𑀺 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀧𑀺 𑀦𑀸𑀫𑀭𑀽𑀧’’𑀦𑁆𑀢𑀺 (𑀧𑀝𑀺. 𑀫. 𑁧.𑁨𑁩𑁨) 𑁋

𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀳𑁂𑀢𑀼𑀤𑁆𑀯𑀬𑀧𑀘𑁆𑀘𑀬𑀸𑀧𑀺 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀓𑀣𑀁 𑀤𑀲𑁆𑀲𑀺𑀢𑀸𑀢𑀺? 𑀦𑀬𑀺𑀤𑀁 𑀫𑀭𑀡𑀸𑀲𑀦𑁆𑀦𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀓𑀢𑀓𑀫𑁆𑀫𑀲𑁆𑀲 𑀢𑀁 𑀓𑀫𑁆𑀫𑀁 𑀆𑀭𑀩𑁆𑀪 𑀅𑀲𑁆𑀲𑀸𑀤𑀯𑀲𑁂𑀦 𑀧𑀯𑀢𑁆𑀢𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀬𑁄 𑀲𑀦𑁆𑀥𑀸𑀬. 𑀓𑀢𑀽𑀧𑀘𑀺𑀢𑀫𑁆𑀧𑀺 𑀳𑀺 𑀓𑀫𑁆𑀫𑀁 𑀢𑀡𑁆𑀳𑀸𑀬 𑀅𑀲𑁆𑀲𑀸𑀤𑀺𑀢𑀁 𑀯𑀺𑀧𑀸𑀓𑀸𑀪𑀺𑀦𑀺𑀧𑁆𑀨𑀸𑀤𑀦𑁂 𑀲𑀫𑀢𑁆𑀣𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀓𑀫𑁆𑀫𑀓𑀭𑀡𑀓𑀸𑀮𑁂 𑀅𑀧𑁆𑀧𑀳𑀻𑀦𑀸𑀯𑀢𑁆𑀣𑀸𑀬 𑀲𑀦𑁆𑀢𑀸𑀦𑁂 𑀅𑀦𑀼𑀲𑀬𑀺𑀢𑀳𑁂𑀢𑀼𑀬𑁄 𑀲𑀦𑁆𑀥𑀸𑀬 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀼𑀬𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺, 𑀢𑁂𑀲𑀁 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀬𑁄𑀕𑀢𑁄. 𑀧𑀼𑀩𑁆𑀩𑀸𑀦𑀼𑀲𑁂𑀯𑀺𑀢𑀁 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀫𑁂𑀯 𑀯𑀸 𑀓𑀫𑁆𑀫𑀁, 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀮𑀫𑁆𑀩𑀺𑀢𑁆𑀯𑀸 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀩𑁆𑀩𑀸𑀦𑀼𑀲𑁂𑀯𑀺𑀢𑀦𑁆𑀢𑀺 𑀧𑀼𑀩𑁆𑀩𑁂 𑀆𑀲𑁂𑀯𑀺𑀢𑀁. ‘‘𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀬 𑀅𑀦𑀼𑀲𑁂𑀯𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀸 ‘‘𑀧𑀼𑀩𑁆𑀩𑀸𑀦𑀼𑀲𑁂𑀯𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀧𑀼𑀩𑁆𑀩𑀲𑁂𑀯𑀺𑀢’’𑀦𑁆𑀢𑀺𑀧𑀺 𑀧𑀸𑀞𑀁 𑀯𑀤𑀦𑁆𑀢𑀺, 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀼𑀩𑁆𑀩𑁂 𑀆𑀲𑁂𑀯𑀺𑀢𑀁, 𑀧𑀼𑀩𑁆𑀩𑁂 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀓𑀫𑁆𑀧𑀺 𑀧𑀦 𑀅𑀧𑀭𑀚𑀸𑀢𑀻𑀲𑀼 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀦 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀦𑀢𑁆𑀣𑀺. 𑀧𑀼𑀜𑁆𑀜𑀸𑀧𑀼𑀜𑁆𑀜𑀕𑁆𑀕𑀳𑀡𑁂𑀦 𑀬𑀣𑀸𑀓𑀫𑁆𑀫𑀁 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀻𑀦𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀕𑀢𑀺𑀦𑀺𑀫𑀺𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀓𑀫𑁆𑀫𑀁, 𑀕𑀢𑀺𑀦𑀺𑀫𑀺𑀢𑁆𑀢𑀜𑁆𑀘 𑀫𑀦𑁄𑀤𑁆𑀯𑀸𑀭𑁂𑀬𑁂𑀯 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀧𑀦 𑀧𑀜𑁆𑀘𑀤𑁆𑀯𑀸𑀭𑁂𑀧𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀜𑁆𑀘𑀤𑁆𑀯𑀸𑀭𑀕𑁆𑀕𑀳𑀺𑀢𑁂𑀧𑀺 𑀆𑀭𑀫𑁆𑀫𑀡𑁂 𑀧𑀝𑀺𑀲𑀦𑁆𑀥𑀺 𑀳𑁄𑀢𑀺. 𑀅𑀧𑀭𑁂 𑀧𑀦 𑀕𑀢𑀺𑀦𑀺𑀫𑀺𑀢𑁆𑀢𑀫𑁆𑀧𑀺 𑀙𑀤𑁆𑀯𑀸𑀭𑁂𑀲𑀼 𑀮𑀩𑁆𑀪𑀢𑀻𑀢𑀺 𑀯𑀡𑁆𑀡𑁂𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀲𑀘𑁆𑀘𑀲𑀗𑁆𑀔𑁂𑀧𑁂 𑁋

‘‘𑀧𑀜𑁆𑀘𑀤𑁆𑀯𑀸𑀭𑁂 𑀲𑀺𑀬𑀸 𑀲𑀦𑁆𑀥𑀺, 𑀯𑀺𑀦𑀸 𑀓𑀫𑁆𑀫𑀁 𑀤𑁆𑀯𑀺𑀕𑁄𑀘𑀭𑁂’’𑀢𑀺. (𑀲. 𑀲. 𑁧𑁭𑁩).

𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀕𑀢𑀺𑀦𑀺𑀫𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑀤𑀸𑀭𑀫𑁆𑀫𑀡𑀸𑀬 𑀘 𑀧𑀜𑁆𑀘𑀤𑁆𑀯𑀸𑀭𑀺𑀓𑀧𑀝𑀺𑀲𑀦𑁆𑀥𑀺𑀬𑀸 𑀅𑀤𑀲𑁆𑀲𑀺𑀢𑀢𑁆𑀢𑀸, 𑀫𑀽𑀮𑀝𑀻𑀓𑀸𑀤𑀻𑀲𑀼 𑀘 ‘‘𑀓𑀫𑁆𑀫𑀩𑀮𑁂𑀦 𑀉𑀧𑀝𑁆𑀞𑀸𑀧𑀺𑀢𑀁 𑀯𑀡𑁆𑀡𑀸𑀬𑀢𑀦𑀁 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀬, 𑀤𑀺𑀩𑁆𑀩𑀘𑀓𑁆𑀔𑀼𑀓𑀲𑁆𑀲 𑀯𑀺𑀬 𑀘 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀻’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀢𑁂𑀲𑀁 𑀯𑀘𑀦𑀁 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺 𑀆𑀘𑀭𑀺𑀬𑀸. 𑀓𑀫𑁆𑀫𑀦𑀺𑀫𑀺𑀢𑁆𑀢𑀜𑁆𑀘 𑀧𑀦𑁂𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀜𑁆𑀘𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀁 𑀘𑀼𑀢𑀺𑀓𑀸𑀮𑀸𑀲𑀦𑁆𑀦𑁂 𑀓𑀢𑀓𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀁 𑀢𑀁𑀲𑀤𑀺𑀲𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀇𑀢𑀭𑀣𑀸 𑀢𑀤𑁂𑀯 𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀼𑀧𑀝𑁆𑀞𑀸𑀧𑀓𑀁 𑀢𑀤𑁂𑀯 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀪𑀯𑁂𑀬𑁆𑀬, 𑀦 𑀘 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀘𑀸𑀭𑀪𑀽𑀢𑀸𑀦𑀺 𑀯𑀺𑀬, ‘‘𑀏𑀢𑀲𑁆𑀫𑀺𑀁 𑀢𑀬𑀸 𑀧𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀁 𑀅𑀦𑀼𑀧𑁆𑀧𑀤𑁂𑀦𑁆𑀢𑀸𑀦𑀺 𑀯𑀺𑀬 𑀘 𑀧𑀯𑀢𑁆𑀢𑀸𑀦𑀺 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀸𑀦𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀦𑀺 𑀪𑀯𑁂𑀬𑁆𑀬𑀼𑀁. ‘‘𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀤𑀸 𑀘 𑀧𑀝𑀺𑀲𑀦𑁆𑀥𑀺𑀬𑀸 𑀏𑀓𑀯𑀻𑀣𑀺𑀬𑀁 𑀯𑀺𑀬 𑀧𑀯𑀢𑁆𑀢𑀫𑀸𑀦𑀸𑀦𑀺 𑀓𑀣𑀁 𑀓𑀢𑀽𑀧𑀘𑀺𑀢𑀸𑀦𑀺 𑀲𑀺𑀬𑀼𑀁, 𑀅𑀲𑁆𑀲𑀸𑀤𑀦𑀪𑀽𑀢𑀸𑀬 𑀢𑀡𑁆𑀳𑀸𑀬 𑀅𑀧𑀭𑀸𑀫𑀝𑁆𑀞𑀸𑀦𑀺 𑀓𑀣𑀁 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀓𑀸𑀦𑀺, 𑀦 𑀘 𑀮𑁄𑀓𑀺𑀬𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺 𑀯𑀺𑀬 𑀲𑀫𑀸𑀦𑀯𑀻𑀣𑀺𑀨𑀮𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀢𑀁 𑀚𑀯𑀦𑀯𑀺𑀜𑁆𑀜𑀸𑀡𑀁. 𑀏𑀓𑀢𑁆𑀢𑀦𑀬𑁂𑀦 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀢𑀤𑀸𑀲𑀦𑁆𑀦𑀯𑀺𑀜𑁆𑀜𑀸𑀡𑀸𑀦𑀜𑁆𑀳𑀺 𑀲𑀦𑁆𑀢𑀢𑀺𑀯𑀲𑁂𑀦 𑀯𑀺𑀜𑁆𑀜𑀸𑀡𑀦𑁆𑀢𑀺 𑀉𑀧𑀦𑀻𑀢𑁂𑀓𑀢𑁆𑀢𑀁 𑀇𑀥 𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁.

𑀅𑀯𑀺𑀚𑁆𑀚𑀸𑀬 𑀧𑀝𑀺𑀘𑁆𑀙𑀦𑁆𑀦𑀸𑀤𑀻𑀦𑀯𑁂𑀢𑀺 𑀅𑀦𑀼𑀲𑀬𑀯𑀲𑁂𑀦 𑀧𑀯𑀢𑁆𑀢𑀸𑀬 𑀪𑀯𑀢𑀡𑁆𑀳𑀸𑀬, 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀬 𑀯𑀸 𑀅𑀯𑀺𑀚𑁆𑀚𑀸𑀬 𑀙𑀸𑀤𑀺𑀢𑀤𑀼𑀓𑁆𑀔𑀸𑀤𑀻𑀦𑀯𑁂. 𑀢𑀣𑀸𑀪𑀽𑀢𑁂 𑀧𑀦 𑀓𑀫𑁆𑀫𑀸𑀤𑀺𑀯𑀺𑀲𑀬𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂. 𑀢𑀡𑁆𑀳𑀸𑀬 𑀅𑀧𑁆𑀧𑀳𑀻𑀦𑀢𑁆𑀢𑀸 𑀏𑀯 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸𑀬 𑀘 𑀲𑀦𑁆𑀢𑀢𑀺𑀬𑀸 𑀢𑀣𑀸𑀧𑀭𑀺𑀡𑀢𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀯𑀺𑀜𑁆𑀜𑀸𑀡𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀢𑀡𑁆𑀳𑀸 𑀦𑀫𑁂𑀢𑀻’’𑀢𑀺. 𑀲𑀳𑀚𑀸 𑀧𑀦 𑀲𑀗𑁆𑀔𑀸𑀭𑀸𑀢𑀺 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀯𑀺𑀜𑁆𑀜𑀸𑀡𑀲𑀳𑀚𑀸𑀢𑀘𑁂𑀢𑀦𑀸, 𑀲𑀩𑁆𑀩𑁂𑀧𑀺 𑀯𑀸 𑀨𑀲𑁆𑀲𑀸𑀤𑀬𑁄. 𑀔𑀺𑀧𑀦𑁆𑀢𑀻𑀢𑀺 𑀔𑀺𑀧𑀦𑁆𑀢𑀸 𑀯𑀺𑀬 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀜𑁆𑀜𑀸𑀡𑀧𑀢𑀺𑀝𑁆𑀞𑀸𑀦𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀢𑀦𑁆𑀢𑀺 𑀢𑀁 𑀯𑀺𑀜𑁆𑀜𑀸𑀡𑀁. ‘‘𑀲𑀦𑁆𑀢𑀢𑀺𑀯𑀲𑀸’’𑀢𑀺 𑀯𑀤𑀦𑁆𑀢𑁄 𑀢𑀤𑁂𑀯 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀇𑀫𑀜𑁆𑀘 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀢𑀺 𑀳𑀺 𑀦𑀸𑀦𑀢𑁆𑀢𑀦𑀬𑁂 𑀲𑀦𑁆𑀢𑀢𑀺𑀯𑀲𑁂𑀦 𑀏𑀓𑀢𑁆𑀢𑀦𑀬𑁄 𑀳𑁄𑀢𑀻𑀢𑀺.

𑁫𑁯𑁯. 𑀆𑀭𑀫𑁆𑀫𑀡𑀸𑀤𑀻𑀳𑀺…𑀧𑁂… 𑀧𑀯𑀢𑁆𑀢𑀢𑀻𑀢𑀺 𑀆𑀭𑀫𑁆𑀫𑀡𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀤𑀻𑀳𑀺 𑀧𑀯𑀢𑁆𑀢𑀢𑀺. 𑀓𑀣𑀁? 𑀆𑀲𑀦𑁆𑀦𑀫𑀭𑀡𑀲𑁆𑀲 𑀳𑀺 𑀓𑀫𑁆𑀫𑀩𑀮𑁂𑀦 𑀫𑀦𑁄𑀤𑁆𑀯𑀸𑀭𑁂 𑀉𑀧𑀝𑁆𑀞𑀸𑀧𑀺𑀢𑀁 𑀅𑀯𑀺𑀚𑁆𑀚𑀸𑀬 𑀧𑀝𑀺𑀘𑁆𑀙𑀦𑁆𑀦𑀸𑀤𑀻𑀦𑀯𑀁 𑀓𑀫𑁆𑀫𑀸𑀤𑀺𑀯𑀺𑀲𑀬𑀁 𑀆𑀭𑀩𑁆𑀪 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀫𑀭𑀡𑀸𑀲𑀦𑁆𑀦𑀯𑀻𑀣𑀺𑀬𑀸 𑀯𑀢𑁆𑀣𑀼𑀤𑀼𑀩𑁆𑀩𑀮𑀪𑀸𑀯𑁂𑀦 𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀘𑀢𑁆𑀢𑀸𑀭𑀺, 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑁂 𑀲𑀢𑀺, 𑀅𑀲𑀢𑀺 𑀯𑀸 𑀪𑀯𑀗𑁆𑀕𑀯𑀺𑀲𑀬𑀫𑀸𑀮𑀫𑁆𑀩𑀺𑀢𑁆𑀯𑀸 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀪𑀯𑀗𑁆𑀕𑀸𑀦𑀦𑁆𑀢𑀭𑀫𑁆𑀧𑀺 𑀘𑀼𑀢𑀺 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀘𑀼𑀢𑀺𑀘𑀺𑀢𑁆𑀢𑁂 𑀧𑀦 𑀦𑀺𑀭𑀼𑀤𑁆𑀥𑁂 𑀢𑀤𑁂𑀯 𑀆𑀧𑀸𑀣𑀕𑀢𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀺𑀁 𑀆𑀭𑀩𑁆𑀪 𑀅𑀦𑀼𑀧𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀩𑀮𑀯𑀦𑀺𑀫𑀺𑀢𑁆𑀢𑀁 𑀲𑀳𑀚𑀸𑀢𑀲𑀗𑁆𑀔𑀸𑀭𑁂𑀳𑀺 𑀓𑀫𑁆𑀫𑀸𑀤𑀺𑀆𑀭𑀫𑁆𑀫𑀡𑁂 𑀔𑀺𑀧𑀺𑀬𑀫𑀸𑀦𑀁 𑀑𑀭𑀺𑀫𑀢𑀻𑀭𑀭𑀼𑀓𑁆𑀔𑀯𑀺𑀦𑀺𑀩𑀦𑁆𑀥𑀁 𑀭𑀚𑁆𑀚𑀼𑀁 𑀆𑀮𑀫𑁆𑀩𑀺𑀢𑁆𑀯𑀸 𑀫𑀸𑀢𑀺𑀓𑀸𑀢𑀺𑀓𑁆𑀓𑀸𑀫𑀓𑁄 𑀯𑀺𑀬 𑀧𑀼𑀭𑀺𑀫𑀜𑁆𑀘 𑀦𑀺𑀲𑁆𑀲𑀬𑀁 𑀚𑀳𑀢𑀺, 𑀅𑀧𑀭𑀜𑁆𑀘 𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀁 𑀦𑀺𑀲𑁆𑀲𑀬𑀁 𑀅𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀅𑀦𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀆𑀭𑀫𑁆𑀫𑀡𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀢𑀺. 𑀏𑀢𑁆𑀣 𑀘 𑀑𑀭𑀺𑀫𑀢𑀻𑀭𑀁 𑀯𑀺𑀬 𑀧𑀼𑀭𑀺𑀫𑀪𑀯𑁄 𑀤𑀝𑁆𑀞𑀩𑁆𑀩𑁄, 𑀢𑀢𑁆𑀣 𑀞𑀺𑀢𑀭𑀼𑀓𑁆𑀔𑁄 𑀯𑀺𑀬 𑀧𑀼𑀭𑀺𑀫𑀪𑀯𑁂 𑀧𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀸, 𑀭𑀚𑁆𑀚𑀼 𑀯𑀺𑀬 𑀓𑀫𑁆𑀫𑀸𑀤𑀺𑀆𑀭𑀫𑁆𑀫𑀡𑀁. 𑀓𑁂𑀘𑀺 𑀧𑀦 ‘‘𑀭𑀚𑁆𑀚𑀼 𑀯𑀺𑀬 𑀳𑀤𑀬𑀯𑀢𑁆𑀣𑀽’’𑀢𑀺 𑀯𑀤𑀦𑁆𑀢𑀺, ‘‘𑀭𑀚𑁆𑀚𑀼 𑀯𑀺𑀬 𑀢𑀡𑁆𑀳𑀸’’𑀢𑀺𑀧𑀺 𑀅𑀧𑀭𑁂. 𑀧𑀼𑀭𑀺𑀲𑁄 𑀯𑀺𑀬 𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀭𑀚𑁆𑀚𑀼𑀕𑁆𑀕𑀳𑀡𑀁 𑀯𑀺𑀬 𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀦𑀫𑀦𑀁, 𑀧𑀬𑁄𑀕𑁄 𑀯𑀺𑀬 𑀔𑀺𑀧𑀦𑀓𑀲𑀗𑁆𑀔𑀸𑀭𑀸, 𑀫𑀸𑀢𑀺𑀓𑀸 𑀯𑀺𑀬 𑀘𑀼𑀢𑀺𑀘𑀺𑀢𑁆𑀢𑀁, 𑀧𑀭𑀢𑀻𑀭𑀁 𑀯𑀺𑀬 𑀧𑀭𑀮𑁄𑀓𑁄.

𑁬𑁦𑁦. 𑀬𑀣𑀸 𑀧𑀼𑀭𑀺𑀲𑁄 𑀧𑀭𑀢𑀻𑀭𑁂 𑀧𑀢𑀺𑀝𑁆𑀞𑀳𑀫𑀸𑀦𑁄 𑀧𑀭𑀢𑀻𑀭𑀭𑀼𑀓𑁆𑀔𑀯𑀺𑀦𑀺𑀩𑀦𑁆𑀥𑀁 𑀓𑀺𑀜𑁆𑀘𑀺 𑀅𑀲𑁆𑀲𑀸𑀤𑀬𑀫𑀸𑀦𑁄 𑀯𑀸 𑀅𑀦𑀲𑁆𑀲𑀸𑀤𑀬𑀫𑀸𑀦𑁄 𑀯𑀸 𑀓𑁂𑀯𑀮𑀁 𑀧𑀣𑀯𑀺𑀬𑀁 𑀲𑀓𑀩𑀮𑀧𑁆𑀧𑀬𑁄𑀕𑁂𑀳𑁂𑀯 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀪𑀯𑀦𑁆𑀢𑀭𑀢𑁆𑀢𑀪𑀸𑀯𑀯𑀺𑀦𑀺𑀩𑀦𑁆𑀥𑀳𑀤𑀬𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀬𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀘𑀢𑀼𑀯𑁄𑀓𑀸𑀭𑀪𑀯𑁂 𑀅𑀦𑀲𑁆𑀲𑀸𑀤𑀬𑀫𑀸𑀦𑀁 𑀯𑀸 𑀓𑁂𑀯𑀮𑀁 𑀆𑀭𑀫𑁆𑀫𑀡𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑁂𑀯 𑀧𑀯𑀢𑁆𑀢𑀢𑀻𑀢𑀺 𑀢𑀁 𑀯𑀺𑀜𑁆𑀜𑀸𑀡𑀁 𑀦𑀸𑀧𑀺 𑀇𑀥𑀸𑀕𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀪𑀯𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸. 𑀓𑀫𑁆𑀫𑀸𑀤𑀺𑀦𑁆𑀢𑀺 𑀅𑀢𑀻𑀢𑀪𑀯𑀦𑀺𑀩𑁆𑀩𑀢𑁆𑀢𑀓𑀫𑁆𑀫𑀸𑀤𑀺𑀁. 𑀆𑀤𑀺-𑀲𑀤𑁆𑀤𑁂𑀦 𑀔𑀺𑀧𑀦𑀓𑀲𑀗𑁆𑀔𑀸𑀭𑀸𑀦𑀁, 𑀦𑀫𑀦𑀯𑀲𑁂𑀦 𑀧𑀯𑀢𑁆𑀢𑀢𑀡𑁆𑀳𑀸𑀬, 𑀓𑀫𑁆𑀫𑀸𑀤𑀺𑀯𑀺𑀲𑀬𑀸𑀬 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀺𑀓𑀸𑀬 𑀘 𑀅𑀯𑀺𑀚𑁆𑀚𑀸𑀬, 𑀤𑀴𑁆𑀳𑀕𑁆𑀕𑀸𑀳𑀸𑀤𑀺𑀓𑀭𑀸𑀦𑀁 𑀉𑀧𑀸𑀤𑀸𑀦𑀸𑀤𑀻𑀦𑀜𑁆𑀘 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀓𑀫𑁆𑀫𑀁 𑀦𑀸𑀫 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀪𑀽𑀢𑀁, 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀪𑀽𑀢𑀁 𑀯𑀸 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀁. 𑀔𑀺𑀧𑀦𑀓𑀲𑀗𑁆𑀔𑀸𑀭𑀸 𑀦𑀸𑀫 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑀲𑀳𑀚𑀸𑀢𑀲𑀗𑁆𑀔𑀸𑀭𑀸, 𑀧𑀝𑀺𑀲𑀦𑁆𑀥𑀺𑀚𑀦𑀓𑀓𑀫𑁆𑀫𑀲𑀳𑀕𑀢𑀲𑀗𑁆𑀔𑀸𑀭𑀸 𑀯𑀸, 𑀢𑀢𑁄 𑀧𑀼𑀭𑀺𑀫𑀚𑀯𑀦𑀲𑀳𑀕𑀢𑀲𑀗𑁆𑀔𑀸𑀭𑀸𑀢𑀺 𑀯𑀸 𑀓𑁂𑀘𑀺. 𑀦𑀫𑀦𑀯𑀲𑁂𑀦 𑀧𑀯𑀢𑁆𑀢𑀢𑀡𑁆𑀳𑀸 𑀦𑀸𑀫 𑀅𑀦𑀼𑀲𑀬𑀸𑀯𑀢𑁆𑀣𑀸𑀬 𑀧𑀯𑀢𑁆𑀢𑀢𑀡𑁆𑀳𑀸. 𑀏𑀲 𑀦𑀬𑁄 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀓𑀅𑀯𑀺𑀚𑁆𑀚𑀸𑀬𑀧𑀺. 𑀓𑀫𑁆𑀫𑀸𑀤𑀺𑀯𑀺𑀲𑀬𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀬𑁂𑀯. 𑀤𑀴𑁆𑀳𑀕𑁆𑀕𑀸𑀳𑀓𑀭𑀉𑀧𑀸𑀤𑀸𑀦𑀸 𑀦𑀸𑀫 𑀫𑀡𑁆𑀟𑀽𑀓𑀁 𑀧𑀦𑁆𑀦𑀕𑁄 𑀯𑀺𑀬 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀤𑀴𑁆𑀳𑀕𑁆𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀸 𑀓𑀸𑀫𑀼𑀧𑀸𑀤𑀸𑀦𑀸𑀤𑀬𑁄.

𑁬𑁦𑁧-𑁫. 𑀲𑀤𑁆𑀤𑀧𑀝𑀺𑀖𑁄𑀲𑀸𑀤𑀻𑀦𑀁 𑀲𑀢𑀺𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂 𑀲𑀦𑁆𑀢𑀸𑀦𑀩𑀦𑁆𑀥𑁄 𑀦 𑀧𑀸𑀓𑀝𑁄𑀢𑀺 𑀢𑁂𑀲𑀁 𑀏𑀓𑀢𑁆𑀢𑀦𑀸𑀦𑀢𑁆𑀢𑀪𑀸𑀯𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀦𑀸𑀕𑀢𑀫𑀢𑀻𑀢𑀳𑁂𑀢𑀼𑀲𑀫𑀼𑀧𑁆𑀧𑀸𑀤𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀸𑀥𑀺𑀓𑀸𑀭𑁂. 𑀧𑀝𑀺𑀖𑁄𑀲𑀤𑀻𑀧𑀫𑀼𑀤𑁆𑀤𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀤𑀸𑀲𑀢𑀮𑀕𑀢𑀫𑀼𑀔𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀕𑀳𑀡𑀁. 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸𑀢𑀺 𑀲𑀤𑁆𑀤𑀸𑀤𑀺𑀧𑀘𑁆𑀘𑀬𑀤𑁂𑀲𑀁 𑀅𑀦𑀼𑀧𑀕𑀦𑁆𑀢𑁆𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀲𑀤𑁆𑀤𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀧𑀤𑁂𑀲𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀧𑀝𑀺𑀖𑁄𑀲𑁄 𑀲𑀤𑁆𑀤𑀳𑁂𑀢𑀼𑀓𑁄, 𑀧𑀤𑀻𑀧𑁄 𑀧𑀤𑀻𑀧𑀦𑁆𑀢𑀭𑀸𑀤𑀺𑀳𑁂𑀢𑀼𑀓𑁄, 𑀫𑀼𑀤𑁆𑀤𑀸 𑀮𑀜𑁆𑀙𑀦𑀳𑁂𑀢𑀼𑀓𑁄, 𑀫𑀼𑀔𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀆𑀤𑀸𑀲𑀸𑀤𑀺𑀅𑀪𑀺𑀫𑀼𑀔𑀸𑀤𑀺𑀳𑁂𑀢𑀼𑀓𑀁 𑀳𑁄𑀢𑀺 𑀢𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸, 𑀏𑀯𑀫𑀺𑀤𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀦 𑀳𑁂𑀢𑀼𑀤𑁂𑀲𑀁 𑀕𑀦𑁆𑀢𑁆𑀯𑀸 𑀢𑀁𑀳𑁂𑀢𑀼𑀓𑀁 𑀳𑁄𑀢𑀺 𑀢𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸, 𑀢𑀲𑁆𑀫𑀸 𑀦 𑀇𑀤𑀁 𑀳𑁂𑀢𑀼𑀤𑁂𑀲𑀢𑁄 𑀧𑀼𑀭𑀺𑀫𑀪𑀯𑀢𑁄 𑀇𑀥𑀸𑀕𑀢𑀁 𑀧𑀝𑀺𑀖𑁄𑀲𑀸𑀤𑀬𑁄 𑀯𑀺𑀬 𑀲𑀤𑁆𑀤𑀸𑀤𑀺𑀤𑁂𑀲𑀢𑁄, 𑀦𑀸𑀧𑀺 𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸 𑀉𑀧𑁆𑀧𑀦𑁆𑀦𑀁 𑀲𑀤𑁆𑀤𑀸𑀤𑀻𑀳𑀺 𑀯𑀺𑀦𑀸 𑀧𑀝𑀺𑀖𑁄𑀲𑀸𑀤𑀬𑁄 𑀯𑀺𑀬𑀸𑀢𑀺. 𑀅𑀣 𑀯𑀸 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀧𑀘𑁆𑀘𑀬𑀧𑀤𑁂𑀲𑁂 𑀲𑀦𑁆𑀦𑀺𑀳𑀺𑀢𑀸 𑀳𑀼𑀢𑁆𑀯𑀸 𑀢𑀢𑁄 𑀅𑀜𑁆𑀜𑀢𑁆𑀭 𑀕𑀦𑁆𑀢𑁆𑀯𑀸 𑀢𑀧𑁆𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀪𑀸𑀯𑀸, 𑀦𑀸𑀧𑀺 𑀲𑀤𑁆𑀤𑀸𑀤𑀺𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀏𑀯𑀁 𑀇𑀤𑀫𑁆𑀧𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀲𑀦𑁆𑀢𑀸𑀦𑀩𑀦𑁆𑀥𑀢𑁄 𑀦𑀢𑁆𑀣𑀻𑀢𑀺 𑀲𑀦𑁆𑀢𑀸𑀦𑀧𑁆𑀧𑀩𑀦𑁆𑀥𑀢𑁄 𑀦𑀢𑁆𑀣𑀺 𑀏𑀓𑀢𑀸 𑀲𑀦𑁆𑀢𑀸𑀦𑁂𑀓𑀢𑁆𑀢𑁂𑀧𑀺 𑀅𑀜𑁆𑀜𑀲𑁆𑀲𑁂𑀯 𑀯𑀺𑀜𑁆𑀜𑀸𑀡𑀲𑁆𑀲 𑀧𑀸𑀢𑀼𑀪𑀯𑀦𑀢𑁄, 𑀦𑀸𑀧𑀺 𑀦𑀸𑀦𑀢𑀸 𑀅𑀧𑀼𑀩𑁆𑀩𑀸𑀦𑀁 𑀅𑀧𑀼𑀩𑁆𑀩𑀸𑀦𑀁 𑀉𑀧𑁆𑀧𑀸𑀤𑁂𑀧𑀺 𑀧𑀞𑀫𑀼𑀧𑁆𑀧𑀦𑁆𑀦𑀁 𑀥𑀫𑁆𑀫𑀁 𑀯𑀺𑀦𑀸 𑀧𑀘𑁆𑀙𑀺𑀫𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀧𑀤𑀻𑀧𑀲𑁆𑀲 𑀯𑀺𑀬 𑀦𑀸𑀦𑀢𑀸 𑀦 𑀲𑀺𑀬𑀸. 𑀔𑀡𑀺𑀓𑀸𑀧𑀺 𑀳𑀺 𑀧𑀤𑀻𑀧𑀚𑀸𑀮𑀸 𑀲𑀦𑁆𑀢𑀸𑀦𑁂𑀓𑀢𑁆𑀢𑀁 𑀉𑀧𑀸𑀤𑀸𑀬 𑀲𑀸 𑀏𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀅𑀢𑁆𑀢𑀓𑀺𑀘𑁆𑀘𑀜𑁆𑀘 𑀲𑀸𑀥𑁂𑀢𑀺. ‘‘𑀲𑀢𑀺 𑀲𑀦𑁆𑀢𑀸𑀦𑀩𑀦𑁆𑀥𑁂’’𑀢𑀺𑀆𑀤𑀺𑀦𑀸 𑀲𑀦𑁆𑀢𑀸𑀦𑀩𑀦𑁆𑀥𑁂 𑀏𑀓𑀦𑁆𑀢𑀁 𑀏𑀓𑀢𑁆𑀢𑀸𑀬 𑀘 𑀦𑀸𑀦𑀢𑁆𑀢𑀸𑀬 𑀘 𑀅𑀕𑁆𑀕𑀳𑁂𑀢𑀩𑁆𑀩𑀢𑀁, 𑀕𑀳𑀡𑁂 𑀘 𑀤𑁄𑀲𑀁 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀦𑁆𑀢𑀸𑀦𑀩𑀦𑁆𑀥𑁂 𑀲𑀢𑀺 𑀬𑀤𑀺 𑀏𑀓𑀦𑁆𑀢𑁂𑀦 𑀏𑀓𑀢𑀸 𑀲𑀺𑀬𑀸, 𑀔𑀻𑀭𑀤𑀥𑀻𑀦𑀫𑁆𑀧𑀺 𑀅𑀦𑀜𑁆𑀜𑀪𑀸𑀯𑀢𑁄, 𑀅𑀢𑁆𑀢𑀢𑁄𑀬𑁂𑀯 𑀘 𑀲𑀬𑀁 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀔𑀻𑀭𑀢𑁄 𑀤𑀥𑀺𑀲𑀫𑁆𑀪𑀽𑀢𑀁 𑀦 𑀪𑀯𑁂𑀬𑁆𑀬. 𑀅𑀣𑀸𑀧𑀺 𑀲𑀦𑁆𑀢𑀸𑀦𑀩𑀦𑁆𑀥𑁂 𑀲𑀢𑀺 𑀏𑀓𑀦𑁆𑀢𑀁 𑀦𑀸𑀦𑀢𑀸 𑀪𑀯𑁂𑀬𑁆𑀬, 𑀔𑀻𑀭𑀤𑀥𑀻𑀦𑀫𑁆𑀧𑀺 𑀦𑀸𑀦𑀢𑁆𑀢𑀸, 𑀅𑀜𑁆𑀜𑀲𑁆𑀲 𑀘 𑀲𑀸𑀫𑀺𑀪𑀸𑀯𑀫𑀢𑁆𑀢𑁂𑀦 𑀅𑀧𑀭𑀲𑁆𑀲 𑀲𑀸𑀫𑀺𑀪𑀸𑀯𑀸𑀬𑁄𑀕𑀢𑁄 𑀔𑀻𑀭𑀲𑀸𑀫𑀺 𑀦𑀭𑁄 𑀤𑀥𑀺𑀲𑀸𑀫𑀺 𑀦 𑀪𑀯𑁂𑀬𑁆𑀬, 𑀦 𑀘 𑀧𑀦𑁂𑀯𑀁 𑀮𑁄𑀓𑁂 𑀤𑀺𑀲𑁆𑀲𑀢𑀻𑀢𑀺.

𑁬𑁦𑁬. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀮𑁄𑀓𑀯𑁄𑀳𑀸𑀭𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺, 𑀢𑀲𑁆𑀫𑀸 𑀏𑀓𑀦𑁆𑀢𑀁 𑀏𑀓𑀢𑀸, 𑀦𑀸𑀦𑀢𑀸𑀧𑀺 𑀯𑀸 𑀦 𑀘𑁂𑀯 𑀉𑀧𑀕𑀦𑁆𑀢𑀩𑁆𑀩𑀸. 𑀏𑀓𑀢𑁆𑀢𑁂 𑀧𑀦 𑀅𑀥𑀺𑀧𑁆𑀧𑁂𑀢𑁂 𑀥𑀫𑁆𑀫𑀢𑁄 𑀅𑀕𑁆𑀕𑀳𑁂𑀢𑁆𑀯𑀸 𑀲𑀦𑁆𑀢𑀸𑀦𑀢𑁄𑀯 𑀕𑀳𑁂𑀢𑀩𑁆𑀩𑀁, 𑀦𑀸𑀦𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑁂 𑀲𑀦𑁆𑀢𑀸𑀦𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀢𑁄𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀤𑀺𑀝𑁆𑀞𑀲𑀦𑁆𑀢𑀸𑀦𑀩𑀦𑁆𑀥𑀲𑁆𑀫𑀺𑀁, 𑀏𑀓𑀜𑁆𑀜𑀢𑁆𑀢𑀯𑀺𑀘𑀸𑀭𑀡𑁂;

𑀲𑀪𑀸𑀕𑀼𑀧𑁆𑀧𑀢𑁆𑀢𑀺𑀬𑁂𑀓𑀢𑁆𑀢-𑀫𑀜𑁆𑀜𑀢𑁆𑀢𑀁 𑀔𑀡𑀪𑁂𑀤𑀢𑁄’’𑀢𑀺.

𑀏𑀢𑁆𑀣 𑀘 𑀏𑀓𑀦𑁆𑀢𑀁 𑀏𑀓𑀢𑀸𑀧𑀝𑀺𑀲𑁂𑀥𑁂𑀦 ‘‘𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀇𑀫𑀁 𑀤𑀺𑀝𑁆𑀞𑀺𑀁 𑀦𑀺𑀯𑀸𑀭𑁂𑀢𑀺, 𑀏𑀓𑀦𑁆𑀢𑀁 𑀦𑀸𑀦𑀢𑀸𑀧𑀝𑀺𑀲𑁂𑀥𑁂𑀦 ‘‘𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺.

𑁬𑁦𑁭-𑁯. 𑀦𑀦𑀼 𑀦 𑀲𑀼𑀦𑁆𑀤𑀭𑀁, 𑀦𑀦𑀼 𑀲𑀺𑀬𑀸𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀅𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑁂𑀢𑀺 𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑀭𑀳𑀺𑀢𑁂, 𑀅𑀲𑀗𑁆𑀓𑀦𑁆𑀢𑀺𑀯𑀲𑁂𑀦 𑀯𑀸 𑀧𑀸𑀢𑀼𑀪𑀸𑀯𑁂, 𑀅𑀲𑀗𑁆𑀓𑀫𑀺𑀢𑁆𑀯𑀸𑀯 𑀧𑀸𑀢𑀼𑀪𑀸𑀯𑁂𑀢𑀺 𑀅𑀢𑁆𑀣𑁄. 𑀔𑀦𑁆𑀥𑀸𑀪𑀺𑀲𑀫𑁆𑀪𑀯𑀸𑀢𑀺 𑀅𑀪𑀺𑀲𑀫𑁆𑀪𑀽𑀢𑀓𑁆𑀔𑀦𑁆𑀥𑀸, 𑀅𑀣 𑀯𑀸 𑀅𑀪𑀺𑀲𑀫𑁆𑀪𑀯𑀢𑀺 𑀓𑀫𑁆𑀫𑀁 𑀏𑀢𑁂𑀲𑀽𑀢𑀺 𑀅𑀪𑀺𑀲𑀫𑁆𑀪𑀯𑀸, 𑀔𑀦𑁆𑀥𑀸, 𑀏𑀯𑀁 𑀅𑀪𑀺𑀲𑀫𑁆𑀪𑀯𑀸 𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀪𑀽𑀢𑀸 𑀔𑀦𑁆𑀥𑀸𑀢𑀺 𑀅𑀢𑁆𑀣𑁄. 𑀇𑀥 𑀦𑀺𑀭𑀼𑀤𑁆𑀥𑀢𑁆𑀢𑀸𑀢𑀺 𑀨𑀮𑀸𑀥𑀺𑀝𑁆𑀞𑀸𑀦𑀪𑀽𑀢𑀁 𑀧𑀭𑀮𑁄𑀓𑀁 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯 𑀦𑀺𑀭𑀼𑀤𑁆𑀥𑀢𑁆𑀢𑀸. 𑀧𑀭𑀢𑁆𑀣𑀸𑀕𑀫𑀢𑁄𑀢𑀺 𑀧𑀭𑀮𑁄𑀓𑀁 𑀅𑀕𑀫𑀦𑀢𑁄. 𑀢𑀲𑁆𑀲𑀸𑀢𑀺 𑀓𑀫𑁆𑀫𑀲𑁆𑀲. 𑀅𑀜𑁆𑀜𑀲𑁆𑀲𑀸𑀢𑀺 𑀬𑁂𑀦 𑀢𑀁 𑀓𑀫𑁆𑀫𑀁 𑀓𑀢𑀁, 𑀢𑀢𑁄 𑀅𑀜𑁆𑀜𑀲𑁆𑀲. 𑀅𑀜𑁆𑀜𑀢𑁄𑀢𑀺 𑀬𑀁 𑀢𑀁 𑀓𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀢𑁄 𑀅𑀜𑁆𑀜𑀢𑁄. 𑀏𑀢𑀁 𑀯𑀺𑀥𑀸𑀦𑀦𑁆𑀢𑀺 𑀇𑀥𑀮𑁄𑀓𑀢𑁄 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸 𑀦𑀢𑁆𑀣𑀺, 𑀢𑀢𑁆𑀣 ‘‘𑀅𑀜𑁆𑀜𑁂𑀯 𑀔𑀦𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀇𑀤𑀁 𑀲𑀩𑁆𑀩𑀁 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁.

𑁬𑁧𑁧-𑁪. ‘‘𑀲𑀦𑁆𑀢𑀸𑀦𑁂…𑀧𑁂… 𑀲𑀸𑀥𑀓𑁄’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 ‘‘𑀏𑀓𑀲𑁆𑀫𑀺𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂𑀢𑀺 𑀬𑀲𑁆𑀫𑀺𑀁 𑀥𑀫𑁆𑀫𑀧𑀼𑀜𑁆𑀚𑁂 𑀓𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀲𑁂𑀯 𑀲𑀦𑁆𑀢𑀸𑀦𑁂𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀲𑁆𑀲𑀸𑀢𑀺𑀧𑀺 𑀯𑀸…𑀧𑁂… 𑀳𑁄𑀢𑀺. 𑀢𑀢𑁆𑀣 𑀏𑀓𑀦𑁆𑀢𑀁 𑀏𑀓𑀢𑁆𑀢𑀦𑀸𑀦𑀢𑁆𑀢𑀸𑀦𑀁 𑀧𑀝𑀺𑀲𑀺𑀤𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑀲𑁆𑀲𑀢𑁆𑀣𑀲𑁆𑀲𑀸𑀢𑀺 𑀳𑁂𑀢𑀼𑀨𑀮𑀸𑀦𑀁 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑁂𑀧𑀺 𑀢𑁂𑀦𑁂𑀯 𑀳𑁂𑀢𑀼𑀨𑀮𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀢𑁆𑀢𑀸 𑀢𑀁 𑀨𑀮𑀁 𑀅𑀜𑁆𑀜𑀲𑁆𑀲, 𑀅𑀜𑁆𑀜𑀢𑁄𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲. 𑀩𑀻𑀚𑀸𑀦𑀦𑁆𑀢𑀺 𑀅𑀫𑁆𑀩𑀫𑀸𑀢𑀼𑀮𑀼𑀗𑁆𑀕𑀩𑀻𑀚𑀸𑀦𑀁. 𑀅𑀪𑀺𑀲𑀗𑁆𑀔𑀸𑀭𑁄𑀢𑀺 𑀫𑀥𑀼𑀆𑀤𑀺𑀧𑀭𑀺𑀪𑀸𑀯𑀦𑀁. 𑀫𑀥𑀼𑀆𑀤𑀺𑀦𑀸𑀢𑀺 𑀫𑀥𑀼𑀘𑀢𑀼𑀫𑀥𑀼𑀭𑀅𑀮𑀢𑁆𑀢𑀓𑀭𑀲𑀸𑀤𑀺𑀦𑀸. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀧𑀭𑀺𑀪𑀸𑀯𑀺𑀢𑀩𑀻𑀚𑀲𑁆𑀲. 𑀧𑀞𑀫𑀁 𑀮𑀤𑁆𑀥𑀧𑀘𑁆𑀘𑀬𑁄𑀢𑀺 𑀫𑀥𑀼𑀭𑀪𑀸𑀯𑀽𑀧𑀕𑀫𑀦𑀢𑁄 𑀧𑀞𑀫𑀫𑁂𑀯 𑀮𑀤𑁆𑀥𑀧𑀘𑁆𑀘𑀬𑁄. 𑀓𑀸𑀮𑀦𑁆𑀢𑀭𑁂𑀢𑀺 𑀨𑀮𑀓𑀸𑀮𑁂. 𑀏𑀯𑀁 𑀜𑁂𑀬𑁆𑀬𑀫𑀺𑀤𑀫𑁆𑀧𑀺 𑀘𑀸𑀢𑀺 𑀬𑀣𑀸 𑀏𑀢𑀁, 𑀏𑀯𑀁 𑀇𑀤𑀫𑁆𑀧𑀺 𑀜𑀸𑀢𑀩𑁆𑀩𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀳𑀺 𑀅𑀫𑁆𑀩𑀩𑀻𑀚𑀸𑀤𑀻𑀲𑀼 𑀫𑀥𑀼𑀦𑀸, 𑀘𑀢𑀼𑀫𑀥𑀼𑀭𑁂𑀦 𑀯𑀸 𑀬𑁄𑀚𑁂𑀢𑁆𑀯𑀸 𑀭𑁄𑀧𑀺𑀢𑁂𑀲𑀼 𑀨𑀮𑀭𑀲𑁄 𑀫𑀥𑀼𑀭𑁄 𑀳𑁄𑀢𑀺, 𑀫𑀸𑀢𑀼𑀮𑀼𑀗𑁆𑀕𑀩𑀻𑀚𑁂 𑀘 𑀅𑀮𑀢𑁆𑀢𑀓𑀭𑀲𑁂𑀦 𑀭𑀚𑀺𑀢𑁆𑀯𑀸 𑀭𑁄𑀧𑀺𑀢𑁂 𑀅𑀫𑁆𑀩𑀺𑀮𑀪𑀡𑁆𑀟𑁄 𑀭𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀁 𑀩𑀻𑀚𑀁 𑀅𑀪𑀺𑀲𑀗𑁆𑀔𑀭𑀡𑀁 𑀯𑀸 𑀨𑀮𑀝𑁆𑀞𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀓𑀸𑀮𑀦𑁆𑀢𑀭𑁂 𑀨𑀮𑀯𑀺𑀲𑁂𑀲𑁄 𑀦 𑀅𑀜𑁆𑀜𑀩𑀻𑀚𑀲𑀦𑁆𑀢𑀸𑀦𑁂 𑀳𑁄𑀢𑀺, 𑀦 𑀘 𑀅𑀜𑁆𑀜𑀲𑁆𑀫𑀺𑀁 𑀩𑀻𑀚𑁂 𑀅𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀢𑁄 𑀳𑁄𑀢𑀺, 𑀏𑀯𑀫𑁂𑀯 𑀬𑁂 𑀇𑀥 𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀸, 𑀢𑁂𑀲𑀼 𑀦𑀺𑀧𑁆𑀨𑀦𑁆𑀦𑀁 𑀓𑀫𑁆𑀫𑀁 𑀯𑀸 𑀧𑀭𑀮𑁄𑀓𑀁 𑀦 𑀕𑀘𑁆𑀙𑀦𑁆𑀢𑀺. 𑀏𑀯𑀫𑁆𑀧𑀺 𑀓𑀸𑀮𑀦𑁆𑀢𑀭𑁂 𑀯𑀺𑀧𑀸𑀓𑀓𑁆𑀔𑀦𑁆𑀥𑀸 𑀅𑀜𑁆𑀜𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀦 𑀘 𑀅𑀜𑁆𑀜𑀓𑀫𑁆𑀫𑀧𑀘𑁆𑀘𑀬𑀢𑁄 𑀳𑁄𑀦𑁆𑀢𑀻𑀢𑀺.

𑀏𑀢𑁆𑀣 𑀳𑀺 𑀅𑀪𑀺𑀲𑀗𑁆𑀔𑀢𑀁 𑀩𑀻𑀚𑀁 𑀯𑀺𑀬 𑀓𑀫𑁆𑀫𑀁 𑀯𑀸 𑀲𑀢𑁆𑀢𑁄, 𑀅𑀪𑀺𑀲𑀗𑁆𑀔𑀸𑀭𑁄 𑀯𑀺𑀬 𑀓𑀫𑁆𑀫𑀁, 𑀩𑀻𑀚𑀲𑁆𑀲 𑀅𑀗𑁆𑀓𑀼𑀭𑀸𑀤𑀺𑀧𑁆𑀧𑀩𑀦𑁆𑀥𑁄 𑀯𑀺𑀬 𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀸𑀤𑀺𑀧𑁆𑀧𑀩𑀦𑁆𑀥𑁄. 𑀢𑀢𑁆𑀣𑀼𑀧𑁆𑀧𑀦𑁆𑀦𑀲𑁆𑀲 𑀫𑀥𑀼𑀭𑀭𑀲𑀲𑁆𑀲 𑀅𑀫𑁆𑀩𑀺𑀮𑀪𑀡𑁆𑀟𑁂 𑀭𑀢𑁆𑀢𑀲𑁆𑀲 𑀘 𑀢𑀲𑁆𑀲𑁂𑀯 𑀩𑀻𑀚𑀲𑁆𑀲 𑀢𑀢𑁄 𑀏𑀯 𑀘 𑀅𑀪𑀺𑀲𑀗𑁆𑀔𑀸𑀭𑀢𑁄 𑀪𑀸𑀯𑁄 𑀯𑀺𑀬 𑀓𑀫𑁆𑀫𑀓𑀸𑀭𑀓𑀲𑁆𑀲𑁂𑀯 𑀲𑀢𑁆𑀢𑀲𑁆𑀲 𑀢𑀢𑁄 𑀏𑀯 𑀘 𑀅𑀪𑀺𑀲𑀗𑁆𑀔𑀭𑀡𑀢𑁄 𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁧𑁫. 𑀩𑀸𑀮𑀓𑀸𑀮𑁂…𑀧𑁂… 𑀨𑀮𑀤𑀸𑀬𑀺𑀦𑀸𑀢𑀺 𑀩𑀸𑀮𑀲𑀭𑀻𑀭𑁂 𑀓𑀢𑀁 𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀁, 𑀲𑀺𑀧𑁆𑀧𑀲𑀺𑀓𑁆𑀔𑀦𑀁, 𑀑𑀲𑀥𑀽𑀧𑀬𑁄𑀕𑁄 𑀘 𑀦 𑀯𑀼𑀟𑁆𑀠𑀲𑀭𑀻𑀭𑀁 𑀕𑀘𑁆𑀙𑀢𑀺, 𑀅𑀣 𑀘 𑀢𑀦𑁆𑀦𑀺𑀫𑀺𑀢𑁆𑀢𑀁 𑀯𑀺𑀚𑁆𑀚𑀸𑀧𑀸𑀝𑀯𑀁, 𑀲𑀺𑀧𑁆𑀧𑀚𑀸𑀦𑀦𑀁, 𑀅𑀦𑀸𑀫𑀬𑀢𑀸𑀤𑀺 𑀘 𑀯𑀼𑀟𑁆𑀠𑀲𑀭𑀻𑀭𑁂 𑀳𑁄𑀦𑁆𑀢𑀺, 𑀦 𑀘 𑀢𑀸𑀦𑀺 𑀅𑀜𑁆𑀜𑀲𑁆𑀲 𑀳𑁄𑀦𑁆𑀢𑀺 𑀢𑀁𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀏𑀯 𑀲𑀤𑀺𑀲𑁂 𑀉𑀧𑁆𑀧𑀚𑁆𑀚𑀦𑀢𑁄. 𑀦 𑀘 𑀬𑀣𑀸 𑀧𑀬𑀼𑀢𑁆𑀢𑁂𑀦 𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀸𑀤𑀺𑀦𑀸 𑀯𑀺𑀦𑀸 𑀢𑀸𑀦𑀺 𑀅𑀜𑁆𑀜𑀢𑁄 𑀳𑁄𑀦𑁆𑀢𑀺 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄, 𑀏𑀯𑀁 𑀇𑀥𑀸𑀧𑀺 𑀲𑀦𑁆𑀢𑀸𑀦𑁂 𑀬𑀁 𑀨𑀮𑀁, 𑀏𑀢𑀁 𑀦𑀸𑀜𑁆𑀜𑀲𑁆𑀲, 𑀦 𑀘 𑀅𑀜𑁆𑀜𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁂𑀦 𑀘 𑀲𑀗𑁆𑀔𑀸𑀭𑀸𑀪𑀸𑀯𑁂 𑀨𑀮𑀸𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀅𑀜𑁆𑀜𑀧𑀘𑁆𑀘𑀬𑀦𑀺𑀯𑀸𑀭𑀡𑀁 𑀓𑀭𑁄𑀢𑀺.

𑁬𑁧𑁬-𑁮. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀅𑀲𑀗𑁆𑀓𑀦𑁆𑀢𑀺𑀧𑀸𑀢𑀼𑀪𑀸𑀯𑁂. 𑀢𑀢𑁆𑀣 𑀘 𑀬𑀣𑀸𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀭𑀡𑁂 𑀲𑀢𑀺 𑀲𑀺𑀤𑁆𑀥𑁂𑀧𑀻𑀢𑀺 𑀅𑀢𑁆𑀣𑁄. 𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀧𑀤𑀻𑀧𑀲𑁆𑀲 𑀯𑀝𑁆𑀝𑀺𑀓𑀸𑀲𑁆𑀦𑁂𑀳𑁄 𑀯𑀺𑀬 𑀯𑀺𑀚𑁆𑀚𑀫𑀸𑀦𑀁 𑀅𑀦𑀺𑀭𑀼𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀸𑀪𑀸𑀯𑀲𑁆𑀲 𑀅𑀭𑀳𑀢𑁄 𑀘𑀼𑀢𑀺𑀘𑀺𑀢𑁆𑀢𑀁 𑀯𑀺𑀬 𑀅𑀯𑀺𑀚𑁆𑀚𑀫𑀸𑀦𑀁 𑀦𑀺𑀭𑀼𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀢𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂𑀢𑀺 𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀫𑀸𑀦𑀓𑁆𑀔𑀡𑁂𑀬𑁂𑀯. 𑀢𑁂𑀦𑀸𑀳 ‘‘𑀲𑀤𑁆𑀥𑀺𑀫𑁂𑀯 𑀘 𑀳𑁂𑀢𑀼𑀦𑀸’’𑀢𑀺. 𑀅𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀧𑀯𑀢𑁆𑀢𑀺𑀓𑁆𑀔𑀡𑀢𑁄 𑀧𑀼𑀩𑁆𑀩𑁂 𑀯𑀺𑀚𑁆𑀚𑀫𑀸𑀦𑀢𑀁 𑀅𑀲𑀫𑁆𑀧𑀢𑁆𑀢𑀁. 𑀦𑀺𑀭𑀼𑀤𑁆𑀥𑀦𑁆𑀢𑀺 𑀔𑀡𑀢𑁆𑀢𑀬𑀁 𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀁. 𑀢𑁂𑀦𑀸𑀳 𑁋

‘‘𑀧𑀯𑀢𑁆𑀢𑀺𑀓𑁆𑀔𑀡𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀦𑀺𑀘𑁆𑀘𑀨𑀮𑀁 𑀲𑀺𑀬𑀸’’𑀢𑀺.

𑀧𑀼𑀩𑁆𑀩𑁂𑀢𑀺 𑀓𑀫𑁆𑀫𑀸𑀬𑀽𑀳𑀦𑀢𑁄 𑀧𑀼𑀩𑁆𑀩𑁂. 𑀅𑀯𑀺𑀚𑁆𑀚𑀫𑀸𑀦𑀢𑀸𑀲𑀸𑀫𑀜𑁆𑀜𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀧𑀘𑁆𑀙𑀸𑀢𑀺 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀢𑁄 𑀧𑀘𑁆𑀙𑀸 𑀘.

𑁬𑁧𑁯-𑁨𑁦. 𑀓𑀝𑀢𑁆𑀢𑀸𑀧𑀘𑁆𑀘𑀬𑁄𑀢𑀺 𑀓𑀝𑀢𑁆𑀢𑀸 𑀏𑀯 𑀧𑀘𑁆𑀘𑀬𑁄, 𑀦 𑀯𑀺𑀚𑁆𑀚𑀫𑀸𑀦𑀢𑀸𑀬 𑀅𑀯𑀺𑀚𑁆𑀚𑀫𑀸𑀦𑀢𑀸𑀬 𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀸𑀫𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀺 (𑀥. 𑀲. 𑁪𑁩𑁧). 𑀬𑀤𑀺 𑀏𑀯𑀁 𑀅𑀭𑀳𑀢𑀸 𑀓𑀢𑀓𑀫𑁆𑀫𑀫𑁆𑀧𑀺 𑀓𑀝𑀢𑁆𑀢𑀸𑀧𑀘𑁆𑀘𑀬𑁄 𑀲𑀺𑀬𑀸𑀢𑀺? 𑀦𑀬𑀺𑀤𑀫𑁂𑀯𑀁. 𑀬𑀣𑀸 𑀳𑀺 𑀅𑀘𑁆𑀙𑀺𑀦𑁆𑀦𑀫𑀽𑀮𑀲𑁆𑀫𑀺𑀁 𑀭𑀼𑀓𑁆𑀔𑁂 𑀧𑀼𑀧𑁆𑀨𑀺𑀢𑀁 𑀩𑀻𑀚𑀲𑀫𑀢𑁆𑀣𑀫𑁆𑀧𑀺 𑀓𑀼𑀲𑀼𑀫𑀁 𑀫𑀽𑀮𑁂 𑀙𑀺𑀦𑁆𑀦𑀫𑀢𑁆𑀢𑁂 𑀨𑀮𑀤𑀸𑀬𑀓𑀁 𑀦 𑀳𑁄𑀢𑀺, 𑀏𑀯𑀁 𑀅𑀭𑀳𑀢𑁄𑀧𑀺 𑀓𑀺𑀮𑁂𑀲𑀫𑀽𑀮𑀲𑁆𑀲 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀓𑀸𑀮𑁂 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀫𑁆𑀧𑀺 𑀓𑀫𑁆𑀫𑀁 𑀓𑀺𑀮𑁂𑀲𑀫𑀽𑀮𑀘𑁆𑀙𑀺𑀦𑁆𑀦𑀫𑀢𑁆𑀢𑁂𑀬𑁂𑀯 𑀨𑀮𑀤𑀸𑀦𑁂 𑀅𑀲𑀫𑀢𑁆𑀣𑀪𑀸𑀯𑀁 𑀆𑀧𑀦𑁆𑀦𑀦𑁆𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀩𑀸𑀮𑀚𑀦𑀚𑁆𑀛𑀸𑀭𑀼𑀴𑁆𑀳𑁄,

𑀚𑀸𑀢𑀺𑀭𑀣𑁄 𑀓𑀫𑁆𑀫𑀓𑀺𑀮𑁂𑀲𑀘𑀓𑁆𑀓𑁄𑀬𑀁;

𑀓𑀺𑀮𑁂𑀲𑀘𑀓𑁆𑀓𑀯𑀺𑀥𑀫𑀦𑁄,

𑀦 𑀬𑀸𑀢𑀺 𑀓𑀫𑁆𑀫𑁂𑀓𑀘𑀓𑁆𑀓𑁂𑀧𑀻’’𑀢𑀺.

𑀓𑀝𑀢𑁆𑀢𑀸 𑀘𑁂 𑀧𑀘𑁆𑀘𑀬𑁄, 𑀦𑀺𑀘𑁆𑀘𑀨𑀮𑀤𑀸𑀬𑀓𑁄 𑀯𑀺𑀩𑀦𑁆𑀥𑁄𑀢𑀺 𑀆𑀳 ‘‘𑀧𑀸𑀝𑀺𑀪𑁄𑀕𑀸𑀤𑀺𑀓’’𑀦𑁆𑀢𑀺𑀆𑀤𑀺. 𑀧𑀸𑀝𑀺𑀪𑁄𑀕𑀸𑀤𑀺𑀓𑀦𑁆𑀢𑀺 𑀫𑀽𑀮𑀪𑀸𑀯𑀽𑀧𑀕𑀫𑀦𑀸𑀤𑀺𑀓𑀁. 𑀆𑀤𑀺-𑀕𑁆𑀕𑀳𑀡𑁂𑀦 ‘‘𑀧𑀘𑁆𑀙𑀸 𑀫𑀽𑀮𑀁 𑀤𑀲𑁆𑀲𑀸𑀫𑀻’’𑀢𑀺 𑀪𑀡𑁆𑀟𑀕𑁆𑀕𑀳𑀡𑀁, 𑀇𑀡𑀕𑁆𑀕𑀳𑀡𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀧𑀸𑀝𑀺𑀪𑁄𑀕𑀓𑀺𑀭𑀺𑀬𑀸𑀤𑀻𑀦𑀁 𑀯𑀺𑀚𑁆𑀚𑀫𑀸𑀦𑀢𑀸, 𑀅𑀯𑀺𑀚𑁆𑀚𑀫𑀸𑀦𑀢𑀸 𑀯𑀸 𑀦𑀺𑀬𑁆𑀬𑀸𑀢𑀦𑁂, 𑀧𑀝𑀺𑀪𑀡𑁆𑀟𑀤𑀸𑀦𑁂, 𑀇𑀡𑀤𑀸𑀦𑁂 𑀘 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀅𑀣 𑀔𑁄 𑀓𑀭𑀡𑀫𑀢𑁆𑀢𑀁, 𑀦 𑀘 𑀢𑀁 𑀦𑀺𑀬𑁆𑀬𑀸𑀢𑀦𑀸𑀤𑀻𑀦𑀁 𑀦𑀺𑀘𑁆𑀘𑀫𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺 𑀦𑀺𑀬𑁆𑀬𑀸𑀢𑀦𑀸𑀤𑀺𑀫𑁆𑀳𑀺 𑀓𑀢𑁂 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄, 𑀏𑀯𑀫𑁂𑀯 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑁂𑀧𑀺 𑀓𑀫𑁆𑀫𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑀸, 𑀅𑀯𑀺𑀚𑁆𑀚𑀫𑀸𑀦𑀢𑀸 𑀯𑀸 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀅𑀣 𑀔𑁄 𑀓𑀭𑀡𑀫𑀢𑁆𑀢𑀫𑁂𑀯, 𑀓𑀭𑀡𑀫𑀢𑁆𑀢𑁂 𑀘 𑀲𑀢𑀺 𑀯𑀺𑀧𑀓𑁆𑀓𑀯𑀺𑀧𑀸𑀓𑀸𑀦𑀁 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺.

𑁬𑁨𑁧. 𑀧𑀭𑀫𑀲𑁆𑀲 𑀉𑀢𑁆𑀢𑀫𑀲𑁆𑀲 𑀅𑀢𑁆𑀣𑀲𑁆𑀲 𑀧𑀓𑀸𑀲𑀦𑀢𑁄 𑀧𑀭𑀫𑀢𑁆𑀣𑀧𑁆𑀧𑀓𑀸𑀲𑀦𑁄. 𑀧𑀻𑀢𑀺𑀩𑀼𑀤𑁆𑀥𑀺𑀯𑀺𑀯𑀟𑁆𑀠𑀦𑁄𑀢𑀺 𑀧𑀻𑀢𑀺𑀬𑀸, 𑀜𑀸𑀡𑀲𑁆𑀲 𑀘, 𑀧𑀻𑀢𑀺𑀲𑀳𑀕𑀢𑀲𑁆𑀲 𑀯𑀸 𑀜𑀸𑀡𑀲𑁆𑀲 𑀯𑀺𑀯𑀟𑁆𑀠𑀦𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀧𑀼𑀜𑁆𑀜𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.