𑁮. 𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁭𑁫-𑁬. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀘𑀺𑀢𑁆𑀢𑀸𑀦𑀁 𑀧𑀸𑀓𑀝𑀪𑀸𑀯𑀢𑁆𑀣𑀁 𑁋

‘‘𑀲𑀼𑀢𑁆𑀢𑀁 𑀤𑁄𑀯𑀸𑀭𑀺𑀓𑁄 𑀘𑁂𑀯,

𑀕𑀸𑀫𑀺𑀮𑁆𑀮𑁄 𑀅𑀫𑁆𑀩𑀕𑁄𑀴𑀺𑀬𑁄;

𑀚𑀘𑁆𑀘𑀦𑁆𑀥𑁄 𑀧𑀻𑀞𑀲𑀧𑁆𑀧𑀻 𑀘,

𑀉𑀧𑀦𑀺𑀲𑁆𑀲𑀬𑀫𑀢𑁆𑀣𑀲𑁄’’𑀢𑀺. (𑀥. 𑀲. 𑀅𑀝𑁆𑀞. 𑁪𑁯𑁮 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸) 𑁋

𑀅𑀝𑁆𑀞𑀓𑀣𑀸𑀬 𑀆𑀕𑀢𑀫𑀸𑀢𑀺𑀓𑀸𑀬 𑀯𑀲𑁂𑀦 𑀧𑀓𑀺𑀡𑁆𑀡𑀓𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀸𑀦𑀺 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀫𑀦𑀲𑀦𑁆𑀢𑀺 𑀘𑀺𑀢𑁆𑀢𑀸𑀦𑀁. ‘‘𑀫𑀸𑀦𑀲’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀧𑀦𑁆𑀣𑀫𑀓𑁆𑀓𑀝𑀓𑁄𑀢𑀺 𑀧𑀸𑀡𑀓𑀧𑀝𑀗𑁆𑀕𑀸𑀤𑀻𑀦𑀁 𑀲𑀜𑁆𑀘𑀭𑀡𑀝𑁆𑀞𑀸𑀦𑁂 𑀚𑀸𑀮𑀁 𑀧𑀲𑀸𑀭𑁂𑀢𑁆𑀯𑀸 𑀢𑁂𑀲𑀁 𑀫𑀕𑁆𑀕𑀭𑀓𑁆𑀔𑀡𑀢𑁄 ‘‘𑀧𑀦𑁆𑀣𑀫𑀓𑁆𑀓𑀝𑀓𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀉𑀡𑁆𑀡𑀦𑀸𑀪𑀺. 𑀤𑀺𑀲𑀸𑀲𑀼 𑀧𑀦 𑀧𑀜𑁆𑀘𑀲𑀽𑀢𑀺 𑀉𑀧𑀫𑁂𑀢𑀩𑁆𑀩𑀸𑀦𑀁 𑀧𑀜𑁆𑀘𑀧𑀲𑀸𑀤𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀫𑀕𑁆𑀕𑁂, 𑀢𑀢𑁆𑀣 𑀚𑀸𑀮𑀫𑀚𑁆𑀛𑁂𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀲𑀼𑀢𑁆𑀢𑀁 𑀧𑀲𑀸𑀭𑁂𑀢𑁆𑀯𑀸𑀢𑀺 𑀚𑀸𑀮𑀩𑀦𑁆𑀥𑀦𑀫𑀸𑀳.

𑁪𑁭𑁮-𑁮𑁦. 𑀦𑁆𑀢𑀺 𑀭𑀼𑀥𑀺𑀭𑀫𑀸𑀳. 𑀤𑀺𑀲𑀸𑀲𑀼 𑀤𑀼𑀢𑀺𑀬𑀸𑀤𑀻𑀲𑀼 𑀲𑀼𑀢𑁆𑀢𑁂…𑀧𑁂… 𑀖𑀝𑁆𑀝𑀺𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀲𑀸𑀤𑀸 𑀧𑀜𑁆𑀘 𑀤𑀝𑁆𑀞𑀩𑁆𑀩𑀸’’𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀘𑀺𑀢𑁆𑀢𑀁…𑀧𑁂… 𑀯𑀺𑀬𑀸𑀢𑀺 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀫𑀸𑀦𑀘𑀺𑀢𑁆𑀢𑀁 𑀚𑀸𑀮𑀫𑀚𑁆𑀛𑁂 𑀦𑀺𑀧𑀦𑁆𑀦𑀫𑀓𑁆𑀓𑀝𑀓𑁄 𑀯𑀺𑀬 𑀤𑀝𑁆𑀞𑀩𑁆𑀩𑀁.

𑁪𑁮𑁨-𑁫. 𑀧𑀲𑀸𑀤𑀖𑀝𑁆𑀝𑀦𑀦𑁆𑀢𑀺 𑀧𑀲𑀸𑀤𑁂 𑀖𑀝𑁆𑀝𑀺𑀢𑀁. 𑀪𑀯𑀗𑁆𑀕𑀸𑀯𑀝𑁆𑀝𑀦𑀦𑁆𑀢𑀺 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀦𑁆𑀢𑀁. 𑀥𑀫𑁆𑀫𑀢𑁄 𑀅𑀜𑁆𑀜𑀸 𑀓𑀸𑀘𑀺 𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀥𑀫𑁆𑀫𑀫𑁂𑀯 𑀘𑀮𑀦𑁂𑀦 𑀲𑀳 𑀉𑀧𑀫𑁂𑀢𑀺. 𑀲𑀼𑀢𑁆𑀢𑀸𑀦𑀼𑀲𑀸𑀭𑀁𑀯𑀸𑀢𑀺 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀕𑀫𑀦𑀁 𑀯𑀺𑀬. 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀢𑁄 𑀢𑀲𑁆𑀲 𑀧𑀯𑀢𑁆𑀢𑀺 𑀬𑀽𑀲𑀧𑀸𑀦𑁂𑀦 𑀲𑀤𑁆𑀥𑀺𑀁 𑀉𑀧𑀫𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀯𑀢𑁆𑀣𑀼𑀁𑀬𑁂𑀯𑀸𑀢𑀺 𑀬𑀣𑀸 𑀧𑀼𑀭𑀺𑀫𑀘𑀺𑀢𑁆𑀢𑀸𑀦𑀺 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸𑀦𑀺 𑀧𑀲𑀸𑀤𑀯𑀢𑁆𑀣𑀼𑀁 𑀅𑀦𑀼𑀕𑀢𑀸𑀦𑀺 𑀅𑀜𑁆𑀜𑀸𑀭𑀫𑁆𑀫𑀡𑀸𑀦𑀺 𑀘 𑀳𑁄𑀦𑁆𑀢𑀺, 𑀦 𑀏𑀯𑀁 𑀪𑀯𑀗𑁆𑀕𑀁. 𑀢𑀁 𑀧𑀦 𑀯𑀢𑁆𑀣𑀸𑀭𑀫𑁆𑀫𑀡𑀦𑁆𑀢𑀭𑀭𑀳𑀺𑀢𑀁 𑀓𑁂𑀯𑀮𑀁 𑀳𑀤𑀬𑀯𑀢𑁆𑀣𑀼𑀫𑁂𑀯 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀻𑀢𑀺 𑀤𑀻𑀧𑁂𑀢𑀺. 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀧𑀼𑀦 𑀪𑀯𑀗𑁆𑀕𑀪𑀸𑀯𑁂𑀦 𑀧𑀭𑀺𑀯𑀢𑁆𑀢𑀦𑀁. 𑀪𑀯𑀗𑁆𑀕𑀸𑀯𑀚𑁆𑀚𑀦𑀸𑀤𑀻𑀦𑀁 𑀥𑀫𑁆𑀫𑀢𑁄 𑀪𑁂𑀤𑁂𑀧𑀺 𑀲𑀦𑁆𑀢𑀢𑀺𑀯𑀲𑁂𑀦 𑀏𑀓𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦𑁂𑀯 𑀫𑀓𑁆𑀓𑀝𑀓𑁂𑀦 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑀼𑀢𑁆𑀢𑀁.

𑁪𑁮𑁬-𑁯𑁦. 𑀉𑀧𑀫𑀸 𑀏𑀯 𑀑𑀧𑀫𑁆𑀫𑀁. 𑀢𑀢𑁄 𑀧𑀲𑀸𑀤𑀯𑀢𑁆𑀣𑀼𑀢𑁄 𑀘𑀺𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀻𑀧𑀺𑀢𑀁 𑀇𑀫𑀺𑀦𑀸 𑀑𑀧𑀫𑁆𑀫𑁂𑀦. 𑀏𑀓𑁂𑀓𑀸𑀭𑀫𑁆𑀫𑀡𑀦𑁆𑀢𑀺 𑀭𑀽𑀧𑀸𑀤𑀻𑀲𑀼 𑀧𑀜𑁆𑀘𑀲𑀼 𑀏𑀓𑁂𑀓𑀁 𑀆𑀭𑀫𑁆𑀫𑀡𑀁. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀏𑀓𑁂𑀓𑀸𑀭𑀫𑁆𑀫𑀡𑀲𑁆𑀲 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀆𑀧𑀸𑀣𑀕𑀫𑀦𑀁 𑀧𑀓𑀸𑀲𑁂𑀢𑀼𑀁 ‘‘𑀭𑀽𑀧𑀁 𑀘𑀓𑁆𑀔𑀼𑀧𑀲𑀸𑀤𑀫𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀔𑁂 𑀆𑀓𑀸𑀲𑁂 𑀕𑀘𑁆𑀙𑀢𑀻𑀢𑀺 𑀔𑀕𑁄, 𑀧𑀓𑁆𑀔𑀺. 𑀲𑀸𑀔𑀺𑀦𑁄𑀢𑀺 𑀭𑀼𑀓𑁆𑀔𑀲𑁆𑀲.

𑁪𑁯𑁨-𑁩. 𑀭𑀽𑀧𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁, 𑀢𑀲𑁆𑀲 𑀧𑀦 𑀖𑀝𑁆𑀝𑀦𑀁, 𑀆𑀧𑀸𑀣𑀕𑀫𑀦𑀫𑁆𑀧𑀺 𑀘𑀸𑀢𑀺 𑀤𑁆𑀯𑀻𑀳𑀺 𑀲𑀳 𑀲𑀫𑁆𑀩𑀦𑁆𑀥𑁄. 𑀧𑀲𑀸𑀤𑀲𑁆𑀲𑀸𑀢𑀺 𑀓𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀢𑁆𑀣𑀢𑁄 𑀆𑀧𑀸𑀣𑀕𑀫𑀦𑀫𑁆𑀧𑀺 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀭𑀫𑁆𑀫𑀡𑀯𑀲𑁂𑀦, 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀲𑁆𑀲𑀧𑀺 𑀧𑀲𑀸𑀤𑀖𑀝𑁆𑀝𑀦𑁂𑀦 𑀘 𑀪𑀯𑀗𑁆𑀕𑀘𑀮𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀆𑀧𑀸𑀣𑀁 𑀯𑀺𑀬 𑀉𑀧𑀕𑀫𑀦𑀦𑁆𑀢𑀺 𑀅𑀢𑁆𑀣𑁄.

𑁪𑁯𑁪-𑁫. 𑀢𑀢𑁄𑀢𑀺 𑀪𑀯𑀗𑁆𑀕𑀘𑀮𑀦𑀢𑁄 𑀧𑀭𑀁, 𑀓𑀼𑀲𑀮𑀁 𑀚𑀯𑀦𑀁 𑀘𑀺𑀢𑁆𑀢𑀦𑁆𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀚𑀯𑀦𑀘𑀺𑀢𑁆𑀢𑀁. 𑀅𑀓𑀼𑀲𑀮𑀫𑁂𑀯 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀲𑀺𑀬𑀸 𑁋 𑀓𑁄 𑀧𑀦𑁂𑀢𑀁 𑀚𑀯𑀦𑀁 𑀓𑀼𑀲𑀮𑀢𑀸𑀬 𑀯𑀸 𑀅𑀓𑀼𑀲𑀮𑀢𑀸𑀬 𑀯𑀸 𑀦𑀺𑀬𑀫𑁂𑀢𑀻𑀢𑀺? 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘𑁂𑀯 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘. 𑀬𑀲𑁆𑀲 𑀳𑀺 𑀘𑀢𑀼𑀘𑀓𑁆𑀓𑀲𑀫𑁆𑀧𑀤𑀸𑀯𑀲𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑀢𑀺, 𑀆𑀯𑀚𑁆𑀚𑀦𑀁, 𑀯𑁄𑀝𑁆𑀞𑀩𑁆𑀩𑀦𑀜𑁆𑀘 𑀬𑁄𑀦𑀺𑀲𑁄𑀯 𑀆𑀯𑀝𑁆𑀝𑁂𑀢𑀺, 𑀯𑀯𑀢𑁆𑀣𑀸𑀧𑁂𑀢𑀺 𑀘, 𑀢𑀲𑁆𑀲 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺 𑀦𑀢𑁆𑀣𑀺. 𑀬𑀲𑁆𑀲 𑀧𑀦 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘 𑀳𑁄𑀢𑀺, 𑀆𑀯𑀚𑁆𑀚𑀦𑀁, 𑀯𑁄𑀝𑁆𑀞𑀩𑁆𑀩𑀦𑀜𑁆𑀘 𑀅𑀬𑁄𑀦𑀺𑀲𑁄 𑀘 𑀆𑀯𑀝𑁆𑀝𑁂𑀢𑀺, 𑀯𑀯𑀢𑁆𑀣𑀸𑀧𑁂𑀢𑀺 𑀘, 𑀢𑀲𑁆𑀲 𑀓𑀼𑀲𑀮𑀚𑀯𑀦𑀼𑀧𑁆𑀧𑀢𑁆𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀓𑀼𑀲𑀮𑀢𑀸𑀬, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀅𑀓𑀼𑀲𑀮𑀢𑀸𑀬 𑀘 𑀦𑀺𑀬𑀫𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀭𑀺𑀬𑀸𑀚𑀯𑀦𑀁 𑀧𑀦 𑀅𑀭𑀳𑀢𑁆𑀢𑀫𑁂𑀯 𑀦𑀺𑀬𑀫𑁂𑀢𑀺. 𑀓𑁂𑀘𑀺 𑀧𑀦 ‘‘𑀓𑀺𑀭𑀺𑀬𑀸𑀚𑀯𑀦𑀁 𑀧𑀦 𑀫𑀦𑀲𑀺𑀓𑀸𑀭𑁄 𑀘 𑀦𑀺𑀬𑀫𑁂𑀢𑀺. 𑀬𑀣𑀸 𑀳𑀺 𑀆𑀯𑀚𑁆𑀚𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀏𑀯𑀁 𑀓𑀺𑀭𑀺𑀬𑀸𑀚𑀯𑀦𑀲𑁆𑀲𑀸𑀧𑀻’’𑀢𑀺 𑀯𑀤𑀦𑁆𑀢𑀺.

𑁪𑁯𑁭. 𑀤𑁄𑀯𑀸𑀭𑀺𑀓𑁄𑀧𑀫𑀸𑀤𑀻𑀦𑀻𑀢𑀺 𑀏𑀢𑁆𑀣 𑀏𑀓𑁄 𑀭𑀸𑀚𑀸 𑀲𑀬𑀦𑀕𑀢𑁄 𑀦𑀺𑀤𑁆𑀤𑀸𑀬𑀢𑀺, 𑀢𑀲𑁆𑀲 𑀧𑀭𑀺𑀘𑀸𑀭𑀓𑁄 𑀧𑀸𑀤𑁂 𑀧𑀭𑀺𑀫𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺, 𑀩𑀥𑀺𑀭𑀤𑁄𑀯𑀸𑀭𑀺𑀓𑁄 𑀤𑁆𑀯𑀸𑀭𑁂 𑀞𑀺𑀢𑁄, 𑀢𑀬𑁄 𑀧𑀝𑀺𑀳𑀸𑀭𑀸 𑀲𑀬𑀦𑀲𑁆𑀲, 𑀤𑁆𑀯𑀸𑀭𑀲𑁆𑀲 𑀘 𑀫𑀚𑁆𑀛𑁂 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸. 𑀅𑀣𑁂𑀓𑁄 𑀧𑀘𑁆𑀘𑀦𑁆𑀢𑀯𑀸𑀲𑀻 𑀫𑀦𑀼𑀲𑁆𑀲𑁄 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀤𑁆𑀯𑀸𑀭𑀁 𑀆𑀓𑁄𑀝𑁂𑀲𑀺, 𑀩𑀥𑀺𑀭𑀤𑁄𑀯𑀸𑀭𑀺𑀓𑁄 𑀲𑀤𑁆𑀤𑀁 𑀦 𑀲𑀼𑀡𑀸𑀢𑀺, 𑀧𑀸𑀤𑀧𑀭𑀺𑀫𑀚𑁆𑀚𑀓𑁄 𑀲𑀜𑁆𑀜𑀁 𑀅𑀓𑀸𑀲𑀺, 𑀢𑀸𑀬 𑀲𑀜𑁆𑀜𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀲𑁆𑀲𑀺, 𑀧𑀞𑀫𑀧𑀝𑀺𑀳𑀸𑀭𑁄 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑀲𑁆𑀲 𑀅𑀤𑀸𑀲𑀺, 𑀤𑀼𑀢𑀺𑀬𑁄 𑀢𑀢𑀺𑀬𑀲𑁆𑀲, 𑀢𑀢𑀺𑀬𑁄 𑀭𑀜𑁆𑀜𑁄, 𑀭𑀸𑀚𑀸 𑀧𑀭𑀺𑀪𑀼𑀜𑁆𑀚𑀺. 𑀢𑀢𑁆𑀣 𑀭𑀸𑀚𑀸 𑀯𑀺𑀬 𑀚𑀯𑀦𑀁 𑀤𑀝𑁆𑀞𑀩𑁆𑀩𑀁, 𑀧𑀸𑀤𑀧𑀭𑀺𑀫𑀚𑁆𑀚𑀓𑁄 𑀯𑀺𑀬 𑀆𑀯𑀚𑁆𑀚𑀦𑀁, 𑀩𑀥𑀺𑀭𑀤𑁄𑀯𑀸𑀭𑀺𑀓𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀬𑁄 𑀧𑀝𑀺𑀳𑀸𑀭𑀸 𑀯𑀺𑀬 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀺 𑀢𑀻𑀡𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺, 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀤𑁆𑀯𑀸𑀭𑀸𑀓𑁄𑀝𑀦𑀁 𑀯𑀺𑀬 𑀆𑀭𑀫𑁆𑀫𑀡𑀲𑁆𑀲 𑀧𑀲𑀸𑀤𑀖𑀝𑁆𑀝𑀦𑀁, 𑀧𑀸𑀤𑀧𑀭𑀺𑀫𑀚𑁆𑀚𑀓𑁂𑀦 𑀲𑀜𑁆𑀜𑀸𑀬 𑀤𑀺𑀦𑁆𑀦𑀓𑀸𑀮𑁄 𑀯𑀺𑀬 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀲𑁆𑀲 𑀆𑀯𑀝𑁆𑀝𑀺𑀢𑀓𑀸𑀮𑁄, 𑀢𑁂𑀦 𑀤𑀺𑀦𑁆𑀦𑀲𑀜𑁆𑀜𑀸𑀬 𑀩𑀥𑀺𑀭𑀤𑁄𑀯𑀸𑀭𑀺𑀓𑀲𑁆𑀲 𑀤𑁆𑀯𑀸𑀭𑀯𑀺𑀯𑀭𑀓𑀸𑀮𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑁂 𑀤𑀲𑁆𑀲𑀦𑀓𑀺𑀘𑁆𑀘𑀲𑀸𑀥𑀦𑀓𑀸𑀮𑁄, 𑀧𑀞𑀫𑀧𑀝𑀺𑀳𑀸𑀭𑁂𑀦 𑀧𑀡𑁆𑀡𑀸𑀓𑀸𑀭𑀲𑁆𑀲 𑀕𑀳𑀺𑀢𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀓𑀸𑀮𑁄, 𑀧𑀞𑀫𑁂𑀦 𑀤𑀼𑀢𑀺𑀬𑀲𑁆𑀲 𑀤𑀺𑀦𑁆𑀦𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀦𑁆𑀢𑀻𑀭𑀺𑀢𑀓𑀸𑀮𑁄, 𑀤𑀼𑀢𑀺𑀬𑁂𑀦 𑀢𑀢𑀺𑀬𑀲𑁆𑀲 𑀤𑀺𑀦𑁆𑀦𑀓𑀸𑀮𑁄 𑀯𑀺𑀬 𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀯𑀯𑀢𑁆𑀣𑀸𑀧𑀺𑀢𑀓𑀸𑀮𑁄, 𑀢𑀢𑀺𑀬𑁂𑀦 𑀭𑀜𑁆𑀜𑁄 𑀤𑀺𑀦𑁆𑀦𑀓𑀸𑀮𑁄 𑀯𑀺𑀬 𑀯𑁄𑀝𑁆𑀞𑀩𑁆𑀩𑀦𑁂𑀦 𑀚𑀯𑀦𑀲𑁆𑀲 𑀦𑀺𑀬𑁆𑀬𑀸𑀢𑀺𑀢𑀓𑀸𑀮𑁄, 𑀭𑀜𑁆𑀜𑁄 𑀧𑀭𑀺𑀪𑁄𑀕𑀓𑀸𑀮𑁄 𑀯𑀺𑀬 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀓𑀸𑀮𑁄𑀢𑀺 𑀅𑀬𑀁 𑀤𑁄𑀯𑀸𑀭𑀺𑀓𑁄𑀧𑀫𑀸.

‘‘𑀇𑀤𑀁 𑀧𑀦 𑀑𑀧𑀫𑁆𑀫𑀁 𑀓𑀺𑀁 𑀤𑀻𑀧𑁂𑀢𑀻’’𑀢𑀺𑀆𑀤𑀺 𑀉𑀘𑁆𑀙𑀼𑀬𑀦𑁆𑀢𑀽𑀧𑀫𑀸𑀬 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑀫𑁆𑀩𑀳𑀼𑀮𑀸 𑀕𑀸𑀫𑀤𑀸𑀭𑀓𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀧𑀁𑀲𑀼𑀁 𑀓𑀻𑀴𑀦𑁆𑀢𑀺, 𑀢𑀢𑁆𑀣𑁂𑀓𑀲𑁆𑀲 𑀳𑀢𑁆𑀣𑁂 𑀓𑀳𑀸𑀧𑀡𑁄 𑀧𑀝𑀺𑀳𑀜𑁆𑀜𑀺. 𑀲𑁄 ‘‘𑀫𑀬𑁆𑀳𑀁 𑀳𑀢𑁆𑀣𑁂 𑀧𑀝𑀺𑀳𑀢𑀁, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀆𑀳. 𑀅𑀣𑁂𑀓𑁄 ‘‘𑀧𑀡𑁆𑀟𑀭𑀁 𑀏𑀢’’𑀦𑁆𑀢𑀺 𑀆𑀳. 𑀅𑀧𑀭𑁄 𑀲𑀳 𑀧𑀁𑀲𑀼𑀦𑀸 𑀕𑀸𑀴𑁆𑀳𑀁 𑀕𑀡𑁆𑀳𑀺. 𑀅𑀜𑁆𑀜𑁄 ‘‘𑀧𑀼𑀣𑀼𑀮𑀁 𑀘𑀢𑀼𑀭𑀲𑁆𑀲𑀁 𑀏𑀢’’𑀦𑁆𑀢𑀺 𑀆𑀳. 𑀅𑀧𑀭𑁄 ‘‘𑀓𑀳𑀸𑀧𑀡𑁄 𑀏𑀲𑁄’’𑀢𑀺 𑀆𑀳. 𑀅𑀣 𑀆𑀳𑀭𑀺𑀢𑁆𑀯𑀸 𑀫𑀸𑀢𑀼 𑀅𑀤𑀁𑀲𑀼, 𑀲𑀸 𑀓𑀫𑁆𑀫𑁂 𑀉𑀧𑀦𑁂𑀲𑀺. 𑀢𑀢𑁆𑀣 𑀲𑀫𑁆𑀩𑀳𑀼𑀮𑀸𑀦𑀁 𑀤𑀸𑀭𑀓𑀸𑀦𑀁 𑀅𑀦𑁆𑀢𑀭𑀯𑀻𑀣𑀺𑀬𑀁 𑀓𑀻𑀴𑀦𑁆𑀢𑀸𑀦𑀁 𑀲𑀦𑁆𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑀺𑀬 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀓𑀳𑀸𑀧𑀡𑀲𑁆𑀲 𑀳𑀢𑁆𑀣𑁂 𑀧𑀝𑀺𑀳𑀢𑀓𑀸𑀮𑁄 𑀯𑀺𑀬 𑀆𑀭𑀫𑁆𑀫𑀡𑁂𑀦 𑀧𑀲𑀸𑀤𑀲𑁆𑀲 𑀖𑀝𑁆𑀝𑀺𑀢𑀓𑀸𑀮𑁄, ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀲𑁆𑀲 𑀆𑀯𑀝𑁆𑀝𑀺𑀢𑀓𑀸𑀮𑁄, ‘‘𑀧𑀡𑁆𑀟𑀭𑀁 𑀏𑀢’’𑀦𑁆𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀲𑁆𑀲𑀦𑀓𑀺𑀘𑁆𑀘𑀲𑁆𑀲 𑀲𑀸𑀥𑀺𑀢𑀓𑀸𑀮𑁄, 𑀲𑀳 𑀧𑀁𑀲𑀼𑀦𑀸 𑀕𑀸𑀴𑁆𑀳𑀁 𑀕𑀳𑀺𑀢𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀓𑀸𑀮𑁄, ‘‘𑀧𑀼𑀣𑀼𑀮𑀁 𑀘𑀢𑀼𑀭𑀲𑁆𑀲𑀁 𑀏𑀢’’𑀦𑁆𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀦𑁆𑀢𑀻𑀭𑀺𑀢𑀓𑀸𑀮𑁄, ‘‘𑀓𑀳𑀸𑀧𑀡𑁄 𑀏𑀲𑁄’’𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀯𑀯𑀢𑁆𑀣𑀸𑀧𑀺𑀢𑀓𑀸𑀮𑁄, 𑀫𑀸𑀢𑀭𑀸 𑀓𑀫𑁆𑀫𑁂 𑀉𑀧𑀦𑀻𑀢𑀓𑀸𑀮𑁄 𑀯𑀺𑀬 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀕𑀸𑀫𑀤𑀸𑀭𑀓𑁄𑀧𑀫𑀸.

𑀇𑀤𑀁 𑀑𑀧𑀫𑁆𑀫𑀁 𑀓𑀺𑀁 𑀤𑀻𑀧𑁂𑀢𑀺? 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼 𑀅𑀤𑀺𑀲𑁆𑀯𑀸𑀯 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺, 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀅𑀤𑀺𑀲𑁆𑀯𑀸𑀯 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀤𑀺𑀲𑁆𑀯𑀸𑀯 𑀲𑀦𑁆𑀢𑀻𑀭𑁂𑀢𑀺, 𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀤𑀺𑀲𑁆𑀯𑀸𑀯 𑀯𑀯𑀢𑁆𑀣𑀸𑀧𑁂𑀢𑀺, 𑀚𑀯𑀦𑀁 𑀅𑀤𑀺𑀲𑁆𑀯𑀸𑀯 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺, 𑀏𑀓𑀦𑁆𑀢𑁂𑀦 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁂𑀯 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀤𑀻𑀧𑁂𑀢𑀺. 𑀚𑀘𑁆𑀘𑀦𑁆𑀥𑀧𑀻𑀞𑀲𑀧𑁆𑀧𑀻𑀉𑀧𑀫𑀸 𑀉𑀧𑀭𑀺 𑀆𑀕𑀫𑀺𑀲𑁆𑀲𑀢𑀺.

𑁪𑁯𑁮-𑁫𑁦𑁯. 𑀏𑀢𑁆𑀢𑀓𑀸 𑀉𑀧𑀫𑀸 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀤𑁄𑀯𑀸𑀭𑀺𑀓𑁄𑀧𑀫𑀸𑀤𑀻𑀦𑀻’’𑀢𑀺 𑀯𑀢𑁆𑀯𑀸 ‘‘𑀉𑀧𑀦𑀺𑀲𑁆𑀲𑀬𑀫𑀢𑁆𑀣𑀲𑁄’’𑀢𑀺 𑀏𑀢𑁆𑀣 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀧𑀓𑀸𑀲𑁂𑀢𑀼𑀁 ‘‘𑀅𑀲𑀫𑁆𑀪𑁂𑀤𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑀫𑁆𑀪𑁂𑀤𑁂𑀦𑀸𑀢𑀺 𑀅𑀯𑀺𑀦𑀝𑁆𑀞𑀪𑀸𑀯𑁂𑀦, 𑀯𑀸𑀢𑀧𑀺𑀢𑁆𑀢𑀸𑀤𑀻𑀳𑀺 𑀅𑀦𑀼𑀧𑀳𑀢𑀪𑀸𑀯𑁂𑀦 𑀘. 𑀯𑀸𑀢𑀧𑀺𑀢𑁆𑀢𑀸𑀤𑀺𑀉𑀧𑀳𑀢𑀫𑁆𑀧𑀺 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑀸𑀦𑀼𑀧𑀕𑀫𑀦𑀢𑁄 𑀲𑀫𑁆𑀪𑀺𑀦𑁆𑀦𑀫𑁂𑀯 𑀦𑀸𑀫 𑀳𑁄𑀢𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯 𑀦𑀺𑀲𑁆𑀲𑀬𑀪𑀸𑀯𑀽𑀧𑀕𑀫𑀦𑀢𑁄 𑀔𑀡𑀯𑀲𑁂𑀦 𑀅𑀲𑀫𑁆𑀪𑁂𑀤𑁄𑀧𑀺 𑀬𑀼𑀚𑁆𑀚𑀢𑀺. 𑀏𑀲 𑀦𑀬𑁄 𑀲𑁄𑀢𑀧𑀲𑀸𑀤𑀸𑀤𑀻𑀲𑀼𑀧𑀺. 𑀭𑀽𑀧𑀸𑀧𑀸𑀣𑀕𑀫𑁂𑀦𑀸𑀢𑀺 𑀤𑀽𑀭𑁂 𑀞𑀺𑀢𑀲𑁆𑀲 𑀨𑀮𑀺𑀓𑀸𑀤𑀻𑀳𑀺 𑀅𑀦𑁆𑀢𑀭𑀺𑀢𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀬𑁄𑀕𑁆𑀬𑀤𑁂𑀲𑁂 𑀅𑀯𑀝𑁆𑀞𑀺𑀢𑀯𑀲𑁂𑀦 𑀭𑀽𑀧𑀲𑁆𑀲 𑀆𑀧𑀸𑀣𑀕𑀫𑀦𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸 𑀤𑀽𑀭𑁂 𑀞𑀺𑀢𑀁, 𑀧𑀭𑀫𑁆𑀫𑀼𑀔𑁂 𑀞𑀺𑀢𑀫𑁆𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀕𑀢𑀫𑁂𑀯 𑀦𑀸𑀫 𑀳𑁄𑀢𑀺. 𑀆𑀮𑁄𑀓𑀦𑀺𑀲𑁆𑀲𑀬𑁂𑀦𑀸𑀧𑀻𑀢𑀺 𑀭𑀽𑀧𑀸𑀯𑀪𑀸𑀲𑀦𑀲𑀫𑀢𑁆𑀣𑀆𑀮𑁄𑀓𑀲𑀗𑁆𑀔𑀸𑀢𑀦𑀺𑀲𑁆𑀲𑀬𑁂𑀦. 𑀆𑀮𑁄𑀓𑁂 𑀲𑀢𑀺 𑀲𑀫𑁆𑀪𑀯𑁄 𑀘𑁂𑀢𑁆𑀣 𑀆𑀮𑁄𑀓𑀦𑀺𑀲𑁆𑀲𑀬𑀢𑀸, 𑀦 𑀆𑀮𑁄𑀓𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀸. 𑀫𑀦𑀓𑁆𑀓𑀸𑀭𑁄𑀯 𑀳𑁂𑀢𑀼 𑀫𑀦𑀓𑁆𑀓𑀸𑀭𑀳𑁂𑀢𑀼, 𑀢𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀫𑀦𑀓𑁆𑀓𑀸𑀭𑀳𑁂𑀢𑀼. 𑀢𑁂𑀦 𑀆𑀮𑁄𑀓𑀦𑀺𑀲𑁆𑀲𑀺𑀢𑀁 𑀤𑀲𑁆𑀲𑁂𑀢𑀺. 𑀲𑀫𑁂𑀢𑁂𑀳𑀻𑀢𑀺 𑀲𑀁𑀬𑀼𑀢𑁆𑀢𑁂𑀳𑀺 𑀏𑀓𑀻𑀪𑀽𑀢𑁂𑀳𑀺, 𑀦 𑀏𑀓𑀲𑁆𑀲𑀧𑀺 𑀯𑀺𑀭𑀳𑁂𑀦𑀸𑀢𑀺 𑀅𑀢𑁆𑀣𑁄.

𑀆𑀓𑀸𑀲𑀦𑀺𑀲𑁆𑀲𑀬𑁂𑀦𑀸𑀢𑀺 𑀓𑀡𑁆𑀡𑀘𑁆𑀙𑀺𑀤𑁆𑀤𑀲𑀗𑁆𑀔𑀸𑀢𑀆𑀓𑀸𑀲𑀦𑀺𑀲𑁆𑀲𑀬𑁂𑀦. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀦 𑀳𑀺 𑀧𑀺𑀳𑀺𑀢𑀓𑀡𑁆𑀡𑀘𑁆𑀙𑀺𑀤𑁆𑀤𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑀁. 𑀩𑀸𑀳𑀺𑀭𑀸𑀓𑀸𑀲𑀫𑁆𑀧𑀺 𑀧𑀦 𑀇𑀘𑁆𑀙𑀺𑀢𑀫𑁂𑀯. 𑀢𑀣𑀸 𑀳𑀺 𑀅𑀯𑀺𑀯𑀭𑁂 𑀕𑁂𑀳𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸𑀦𑀁 𑀩𑀳𑀺 𑀞𑀺𑀢𑀸 𑀦 𑀲𑀼𑀡𑀦𑁆𑀢𑀺. 𑀯𑀸𑀬𑁄𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀢𑀺 𑀦𑀸𑀲𑀺𑀓𑀘𑁆𑀙𑀺𑀤𑁆𑀤𑀁 𑀧𑀯𑀺𑀲𑀦𑀯𑀸𑀬𑀼𑀲𑀦𑁆𑀦𑀺𑀲𑁆𑀲𑀬𑁂𑀦. 𑀆𑀧𑁄𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀢𑀺 𑀔𑁂𑀴𑀲𑀗𑁆𑀔𑀸𑀢𑀆𑀧𑁄𑀲𑀦𑁆𑀦𑀺𑀲𑁆𑀲𑀬𑁂𑀦. 𑀧𑀣𑀯𑀻𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀢𑀺 𑀓𑀸𑀬𑀧𑀲𑀸𑀤𑀯𑀢𑁆𑀣𑀼𑀲𑁆𑀲 𑀧𑀣𑀯𑀻𑀥𑀸𑀢𑀼𑀲𑀦𑁆𑀦𑀺𑀲𑁆𑀲𑀬𑁂𑀦. 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀁.

𑁫𑁧𑁦-𑁧𑁧. 𑀫𑀦𑁄…𑀧𑁂… 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 ‘‘𑀅𑀲𑀫𑁆𑀪𑁂𑀤𑀸 𑀫𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀫𑀦𑁄 𑀪𑀯𑀗𑁆𑀕𑀘𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦 𑀘𑀼𑀢𑀺𑀯𑀲𑁂𑀦 𑀦𑀺𑀭𑀼𑀤𑁆𑀥𑀫𑁆𑀧𑀺 𑀓𑀺𑀭𑀺𑀬𑀸𑀫𑀬𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀓𑁂𑀯𑀮𑀁 𑀪𑀯𑀗𑁆𑀕𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀫𑀦𑁆𑀤𑀣𑀸𑀫𑀕𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑀫𑁆𑀧𑀺 𑀲𑀫𑁆𑀪𑀺𑀦𑁆𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀸𑀬𑀁 𑀲𑀩𑁆𑀩𑀢𑁆𑀣 𑀕𑀘𑁆𑀙𑀢𑀻𑀢𑀺 𑀘𑀢𑀼𑀯𑁄𑀓𑀸𑀭𑁂 𑀅𑀮𑀩𑁆𑀪𑀦𑀢𑁄. 𑀢𑁂𑀦𑀸𑀳 ‘‘𑀪𑀯𑀁 𑀢𑀼 𑀧𑀜𑁆𑀘𑀯𑁄𑀓𑀸𑀭’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑁄𑀓𑀸𑀭𑁄 𑀏𑀢𑁆𑀣𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑁄. 𑀳𑁄𑀢𑀺 𑀳𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀫𑁆𑀧𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄 𑀬𑀣𑀸 ‘‘𑀉𑀭𑀲𑀺𑀮𑁄𑀫𑁄’’𑀢𑀺. 𑀅𑀣 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀯𑁄𑀓𑀭𑀻𑀬𑀢𑀻𑀢𑀺 𑀧𑀜𑁆𑀘𑀯𑁄𑀓𑀸𑀭𑁄. ‘‘𑀅𑀢𑁆𑀣𑀢𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀧𑀤𑀁 𑀘𑀓𑁆𑀔𑀸𑀤𑀻𑀦𑀺 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀸𑀦𑀻𑀢𑀺 𑀏𑀢𑁆𑀢𑀓𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀯𑀺𑀲𑁂𑀲𑀦𑀦𑁆𑀢𑀺 𑀦 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄.

𑁫𑁧𑁨-𑁪. 𑀲𑀩𑁆𑀩𑀸𑀦𑀻𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑀩𑁆𑀩𑀸𑀦𑀺. 𑀓𑀫𑁆𑀫𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀓𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀪𑀽𑀢𑀸, 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀪𑀽𑀢𑀸 𑀯𑀸 𑀘𑁂𑀢𑀦𑀸. 𑀓𑀫𑁆𑀫𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀆𑀬𑀽𑀳𑀦𑀓𑀸𑀮𑁂 𑀓𑀫𑁆𑀫𑀁 𑀆𑀬𑀽𑀳𑀢𑀺, 𑀢𑀁 𑀤𑀸𑀦𑀽𑀧𑀓𑀭𑀡𑀸𑀤𑀺𑀓𑀁, 𑀧𑀸𑀡𑀖𑀸𑀢𑁄𑀧𑀓𑀭𑀡𑀸𑀤𑀺𑀓𑀜𑁆𑀘. 𑀕𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀪𑀯𑀦𑁆𑀢𑀭𑀫𑀼𑀧𑀧𑀚𑁆𑀚𑀺𑀢𑀩𑁆𑀩𑀪𑀯𑀧𑀭𑀺𑀬𑀸𑀧𑀦𑁆𑀦𑀯𑀡𑁆𑀡𑀸𑀬𑀢𑀦𑀁, 𑀢𑀁 𑀧𑀦 𑀲𑀼𑀕𑀢𑀺𑀬𑀁 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀲𑁆𑀲 𑀭𑀢𑁆𑀢𑀓𑀫𑁆𑀩𑀮𑀲𑀤𑀺𑀲𑀫𑀸𑀢𑀼𑀓𑀼𑀘𑁆𑀙𑀺𑀯𑀡𑁆𑀡𑀯𑀲𑁂𑀦, 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀲𑁆𑀲 𑀉𑀬𑁆𑀬𑀸𑀦𑀓𑀧𑁆𑀧𑀭𑀼𑀓𑁆𑀔𑀯𑀡𑁆𑀡𑀯𑀲𑁂𑀦, 𑀤𑀼𑀕𑁆𑀕𑀢𑀺𑀬𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀲𑁆𑀲 𑀅𑀕𑁆𑀕𑀺𑀚𑀸𑀮𑀸𑀤𑀺𑀯𑀡𑁆𑀡𑀯𑀲𑁂𑀦, 𑀧𑁂𑀢𑀢𑀺𑀭𑀘𑁆𑀙𑀸𑀦𑀬𑁄𑀦𑀻𑀲𑀼 𑀧𑁂𑀢𑀢𑀺𑀭𑀘𑁆𑀙𑀸𑀦𑀸𑀦𑀁 𑀦𑀺𑀩𑀤𑁆𑀥𑀲𑀜𑁆𑀘𑀭𑀡𑀝𑁆𑀞𑀸𑀦𑀧𑀭𑀺𑀬𑀸𑀧𑀦𑁆𑀦𑀢𑀸𑀯𑀡𑁆𑀡𑀯𑀲𑁂𑀦 𑀘 𑀤𑀝𑁆𑀞𑀩𑁆𑀩𑀁. ‘‘𑀢𑀺𑀯𑀺𑀥’’𑀦𑁆𑀢𑀺 𑀇𑀤𑀁 𑀬𑀣𑀸𑀲𑀫𑁆𑀪𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀭𑀽𑀧𑀸𑀭𑀽𑀧𑀲𑀫𑁆𑀩𑀦𑁆𑀥𑀻𑀦𑀁 𑀧𑀦 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀢𑀣𑀸 𑀳𑀺 𑀫𑀳𑀕𑁆𑀕𑀢𑀯𑀺𑀧𑀸𑀓𑀸𑀦𑀺 𑀏𑀓𑀦𑁆𑀢𑁂𑀦 𑀓𑀫𑁆𑀫𑀲𑀤𑀺𑀲𑀸𑀭𑀫𑁆𑀫𑀡𑀸𑀦𑀺 𑀯𑀼𑀢𑁆𑀢𑀸𑀦𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀁 𑀯𑀸𑀢𑀺 𑀔𑀡𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀁 𑀯𑀸. 𑀢𑀢𑁆𑀣 𑀕𑀢𑀺𑀦𑀺𑀫𑀺𑀢𑁆𑀢𑀁 𑀏𑀓𑀦𑁆𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯, 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀁 𑀯𑀸, 𑀓𑀫𑁆𑀫𑀁 𑀧𑀦 𑀅𑀢𑀻𑀢𑀫𑁂𑀯. 𑀅𑀦𑀸𑀕𑀢𑀸𑀭𑀫𑁆𑀫𑀡𑀁 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀺𑀬 𑀅𑀦𑀸𑀧𑀸𑀣𑀕𑀢𑀢𑁆𑀢𑀸, 𑀅𑀢𑀻𑀢𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀺𑀬 𑀅𑀦𑀦𑀼𑀪𑀽𑀢𑀢𑁆𑀢𑀸 𑀘 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀦𑁄𑀧𑀢𑀺𑀝𑁆𑀞𑀸𑀢𑀻𑀢𑀺 𑀅𑀢𑀺𑀲𑀦𑁆𑀢𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀝𑀺𑀲𑀦𑁆𑀥𑀺 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀢𑁆𑀣𑀺 𑀅𑀦𑀸𑀕𑀢’’𑀦𑁆𑀢𑀺. 𑀫𑀳𑀕𑁆𑀕𑀢𑀧𑀝𑀺𑀲𑀦𑁆𑀥𑀻𑀦𑀁 𑀏𑀓𑀦𑁆𑀢𑁂𑀦 𑀓𑀫𑁆𑀫𑀲𑀤𑀺𑀲𑀸𑀭𑀫𑁆𑀫𑀡𑀪𑀸𑀯𑁂𑀦 𑀓𑀫𑁆𑀫𑀲𑁆𑀲 𑀯𑀺𑀬 𑀅𑀢𑀻𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀸 𑀦 𑀢𑀸𑀲𑀁 𑀯𑀺𑀲𑀼𑀁 𑀆𑀭𑀫𑁆𑀫𑀡𑀁 𑀉𑀤𑁆𑀥𑀝𑀁. 𑀢𑀢𑁆𑀣 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀽𑀧𑀧𑀝𑀺𑀲𑀦𑁆𑀥𑀻𑀦𑀁 𑀅𑀢𑀻𑀢𑀫𑁂𑀯 𑀆𑀭𑀫𑁆𑀫𑀡𑀁 𑀇𑀢𑀭𑀸𑀲𑀁 𑀦𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁫𑁧𑁭-𑁨𑁦. 𑀫𑀳𑀸𑀯𑀺𑀧𑀸𑀓𑀸𑀦𑀁 𑀧𑀝𑀺𑀲𑀦𑁆𑀥𑀸𑀤𑀺𑀘𑀢𑀼𑀓𑀺𑀘𑁆𑀘𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑀢𑁄 𑀭𑀽𑀧𑀸𑀭𑀽𑀧𑀪𑀯𑁂 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦 𑀢𑀁𑀢𑀁𑀯𑀺𑀧𑀸𑀓𑀲𑁆𑀲𑁂𑀯 𑀧𑀯𑀢𑁆𑀢𑀺𑀢𑁄, 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘 𑀅𑀪𑀸𑀯𑁂𑀦 𑀢𑀢𑁆𑀣 𑀦 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀫𑀳𑀸𑀧𑀸𑀓𑀸…𑀧𑁂… 𑀤𑁆𑀯𑀬𑁂’’𑀢𑀺. 𑀅𑀦𑀺𑀝𑁆𑀞𑀭𑀽𑀧𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑁂 𑀅𑀲𑀫𑁆𑀪𑀯𑁂𑀧𑀺 𑀢𑀢𑁆𑀣 𑀞𑀢𑁆𑀯𑀸 𑀇𑀥 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀧𑀲𑁆𑀲𑀦𑁆𑀢𑀸𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀭𑀽𑀧𑀪𑀯𑁂𑀧𑀺 𑀲𑀦𑁆𑀢𑀻𑀭𑀡𑀢𑁆𑀢𑀬𑀁 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑀘𑁆𑀘𑀲𑀗𑁆𑀔𑁂𑀧𑀸𑀤𑀻𑀲𑀼𑀧𑀺 𑀳𑀺 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 𑀭𑀽𑀧𑀮𑁄𑀓𑁂 𑀅𑀓𑀼𑀲𑀮𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀅𑀧𑀭𑁂 𑀧𑀦 ‘‘𑀓𑀸𑀫𑀪𑀯𑁂 𑀲𑀦𑁆𑀢𑀻𑀭𑀡𑀢𑁆𑀢𑀬𑀁, 𑀭𑀽𑀧𑀪𑀯𑁂 𑀲𑀦𑁆𑀢𑀻𑀭𑀡𑀤𑁆𑀯𑀬𑀦𑁆𑀢𑀺 𑀬𑀣𑀸𑀮𑀸𑀪𑀯𑀲𑁂𑀦 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺.

𑀓𑀤𑀸𑀘𑀺𑀧𑀻𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂𑀲𑀼 𑀧𑀭𑀺𑀢𑁆𑀢𑀚𑀯𑀦𑀸𑀦𑀁 𑀉𑀧𑁆𑀧𑀸𑀤𑁂𑀧𑀺. ‘‘𑀩𑀻𑀚𑀲𑁆𑀲𑀸𑀪𑀸𑀯𑀢𑁄’’𑀢𑀺 𑀭𑀽𑀧𑀸𑀭𑀽𑀧𑀪𑀯𑀤𑁆𑀯𑀬𑁂 𑀢𑀤𑀸𑀭𑀫𑁆𑀫𑀡𑀸𑀪𑀸𑀯𑀲𑁆𑀲 𑀓𑀸𑀭𑀡𑀁 𑀯𑀢𑁆𑀯𑀸 𑀢𑀫𑁂𑀯 𑀧𑀓𑀸𑀲𑁂𑀢𑀼𑀁 ‘‘𑀧𑀝𑀺𑀲𑀦𑁆𑀥𑀺𑀩𑀻𑀚’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀲𑀦𑁆𑀥𑀺𑀬𑁂𑀯 𑀩𑀻𑀚𑀪𑀽𑀢𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀩𑀻𑀚𑀁. 𑀢𑀲𑁆𑀲𑀸𑀢𑀺 𑀢𑀤𑀸𑀭𑀫𑁆𑀫𑀡𑀲𑁆𑀲.

𑁫𑁨𑁧. 𑀬𑀤𑀺 𑀏𑀯𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀫𑁆𑀧𑀺 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀩𑀻𑀚𑀢𑁆𑀢𑀸 𑀢𑀢𑁆𑀣 𑀅𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁄𑀤𑁂𑀦𑁆𑀢𑁄 𑀆𑀳 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦’’𑀦𑁆𑀢𑀺𑀆𑀤𑀺. 𑀇𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀽𑀢𑀸𑀦𑀁 𑀘𑀓𑁆𑀔𑀸𑀤𑀻𑀦𑀫𑀺𑀦𑁆𑀤𑁆𑀭𑀺𑀬𑀸𑀦𑀁. 𑀧𑀯𑀢𑁆𑀢𑀸𑀦𑀼𑀪𑀸𑀯𑀢𑁄𑀢𑀺 𑀢𑁂𑀲𑀁 𑀢𑀢𑁆𑀣 𑀅𑀢𑁆𑀣𑀺𑀢𑀸𑀦𑀼𑀪𑀸𑀯𑀢𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀸𑀦𑀁 𑀯𑀢𑁆𑀣𑀼𑀪𑀽𑀢𑀸𑀦𑀺 𑀘𑀓𑁆𑀔𑀼𑀲𑁄𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀢𑁆𑀣 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑁂𑀲𑀁 𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑀢𑁄 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀲𑀢𑀺 𑀘 𑀢𑁂𑀲𑀁 𑀧𑀯𑀢𑁆𑀢𑀺𑀬𑀁 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦𑀺𑀬𑀢𑁄𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀺𑀬 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀦𑀫𑁆𑀧𑀺 𑀢𑀢𑁆𑀣 𑀲𑀫𑁆𑀪𑀯𑁄 𑀲𑀺𑀤𑁆𑀥𑁄𑀢𑀺.

𑁫𑁨𑁩-𑁪. 𑀅𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀢𑀺 𑀓𑀸𑀫𑀸𑀯𑀘𑀭𑀥𑀫𑁆𑀫𑀢𑁄 𑀅𑀜𑁆𑀜𑁂 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂. 𑀦𑀸𑀦𑀼𑀩𑀦𑁆𑀥𑀢𑀻𑀢𑀺 𑀦𑀸𑀦𑀼𑀯𑀢𑁆𑀢𑀢𑀺. 𑀚𑀦𑀓𑀁…𑀧𑁂… 𑀅𑀦𑀼𑀩𑀦𑁆𑀥𑀢𑀻𑀢𑀺 𑀬𑀣𑀸 𑀦𑀸𑀫 𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀕𑀦𑁆𑀢𑀼𑀓𑀸𑀫𑁄 𑀢𑀭𑀼𑀡𑀤𑀸𑀭𑀓𑁄 𑀅𑀢𑁆𑀢𑀦𑁄 𑀚𑀦𑀓𑀁 𑀧𑀺𑀢𑀭𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀺𑀢𑀼𑀲𑀤𑀺𑀲𑀁 𑀳𑀺𑀢𑀓𑀸𑀫𑀁 𑀜𑀸𑀢𑀺𑀁 𑀅𑀗𑁆𑀕𑀼𑀮𑀺𑀬𑀁 𑀕𑀳𑁂𑀢𑁆𑀯𑀸 𑀅𑀦𑀼𑀩𑀦𑁆𑀥𑀢𑀺, 𑀦 𑀅𑀜𑁆𑀜𑀁 𑀭𑀸𑀚𑀧𑀼𑀭𑀺𑀲𑀸𑀤𑀺𑀁, 𑀢𑀣𑀸 𑀏𑀢𑀫𑁆𑀧𑀺 𑀪𑀯𑀗𑁆𑀕𑀸𑀭𑀫𑁆𑀫𑀡𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑀲𑀪𑀸𑀕𑀢𑀸𑀬 𑀅𑀢𑁆𑀢𑀦𑁄 𑀚𑀦𑀓𑀁 𑀧𑀞𑀫𑀓𑀼𑀲𑀮𑀸𑀤𑀺𑀓𑀁 𑀲𑀤𑀺𑀲𑀁 𑀯𑀸 𑀤𑀼𑀢𑀺𑀬𑀓𑀼𑀲𑀮𑀸𑀤𑀺𑀓𑀸𑀫𑀸𑀯𑀘𑀭𑀚𑀯𑀦𑀫𑁂𑀯 𑀅𑀦𑀼𑀩𑀦𑁆𑀥𑀢𑀺, 𑀦 𑀅𑀜𑁆𑀜𑀁 𑀫𑀳𑀕𑁆𑀕𑀢𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀦𑁆𑀢𑀺 𑀆𑀤𑀺-𑀕𑁆𑀕𑀳𑀡𑁂𑀦 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀦𑀦𑁆𑀤𑀸𑀘𑀭𑀺𑀬𑁄 𑀧𑀦 𑀧𑀝𑁆𑀞𑀸𑀦𑁂 ‘‘𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁩.𑁧.𑁯𑁮) 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀫𑁂𑀯𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁. 𑀯𑀺𑀧𑁆𑀨𑀸𑀭𑀯𑀦𑁆𑀢𑀜𑁆𑀳𑀺 𑀚𑀯𑀦𑀁 𑀦𑀸𑀯𑀁 𑀯𑀺𑀬 𑀦𑀤𑀻𑀲𑁄𑀢𑁄 𑀪𑀯𑀗𑁆𑀕𑀁 𑀅𑀦𑀼𑀩𑀦𑁆𑀥𑀢𑀺, 𑀦 𑀧𑀦 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀢𑁄 𑀲𑀦𑁆𑀢𑀯𑀼𑀢𑁆𑀢𑀺𑀁 𑀓𑀺𑀭𑀺𑀬𑀸𑀚𑀯𑀦𑀁 𑀧𑀡𑁆𑀡𑀧𑀼𑀝𑀁 𑀯𑀺𑀬 𑀦𑀤𑀻𑀲𑁄𑀢𑁄𑀢𑀺 𑀓𑀺𑀭𑀺𑀬𑀸𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀦 𑀇𑀘𑁆𑀙𑀢𑀺, 𑀆𑀘𑀭𑀺𑀬𑀚𑁄𑀢𑀺𑀧𑀸𑀮𑀢𑁆𑀣𑁂𑀭𑀸𑀤𑀬𑁄 𑀧𑀦 ‘‘𑀮𑀩𑁆𑀪𑀫𑀸𑀦𑀲𑁆𑀲𑀧𑀺 𑀓𑁂𑀦𑀘𑀺 𑀅𑀥𑀺𑀧𑁆𑀧𑀸𑀬𑁂𑀦 𑀓𑀢𑁆𑀣𑀘𑀺 𑀅𑀯𑀘𑀦𑀁 𑀤𑀺𑀲𑁆𑀲𑀢𑀺, 𑀬𑀣𑀸 𑀢𑀁 𑀥𑀫𑁆𑀫𑀲𑀗𑁆𑀕𑀳𑁂 𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀮𑀩𑁆𑀪𑀫𑀸𑀦𑁄𑀧𑀺 𑀅𑀥𑀺𑀧𑀢𑀺 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀬𑀤𑀺 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀭𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀁 𑀯𑀼𑀘𑁆𑀘𑁂𑀬𑁆𑀬, 𑀢𑀤𑀸 𑀯𑁄𑀝𑁆𑀞𑀩𑁆𑀩𑀦𑀸𑀦𑀦𑁆𑀢𑀭𑀫𑁆𑀧𑀺 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀫𑀜𑁆𑀜𑁂𑀬𑁆𑀬𑀼𑀦𑁆𑀢𑀺 𑀓𑀺𑀭𑀺𑀬𑀸𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀦 𑀯𑀼𑀢𑁆𑀢𑀁, 𑀦 𑀧𑀦 𑀅𑀮𑀩𑁆𑀪𑀦𑀢𑁄. 𑀬𑀜𑁆𑀘𑁂𑀢𑁆𑀣 𑀧𑀡𑁆𑀡𑀧𑀼𑀝𑀁 𑀦𑀺𑀤𑀲𑁆𑀲𑀺𑀢𑀁, 𑀢𑀁 𑀦𑀺𑀤𑀲𑁆𑀲𑀺𑀢𑀩𑁆𑀩𑁂𑀦 𑀲𑀫𑀸𑀦𑀁 𑀦 𑀳𑁄𑀢𑀺, 𑀦𑀸𑀯𑀸𑀧𑀡𑁆𑀡𑀧𑀼𑀝𑀸𑀦𑀜𑁆𑀳𑀺 𑀦𑀤𑀻𑀲𑁄𑀢𑀲𑁆𑀲 𑀆𑀯𑀝𑁆𑀝𑀦𑀁 𑀕𑀢𑀺 𑀘 𑀯𑀺𑀲𑀤𑀺𑀲𑀻𑀢𑀺 𑀦𑀸𑀯𑀸𑀬𑀁 𑀦𑀤𑀻𑀲𑁄𑀢𑀲𑁆𑀲 𑀅𑀦𑀼𑀩𑀦𑁆𑀥𑀦𑀁, 𑀧𑀡𑁆𑀡𑀧𑀼𑀝𑀲𑁆𑀲 𑀅𑀦𑀦𑀼𑀩𑀦𑁆𑀥𑀦𑀜𑁆𑀘 𑀬𑀼𑀚𑁆𑀚𑀢𑀺, 𑀇𑀥 𑀧𑀦 𑀓𑀺𑀭𑀺𑀬𑀸𑀚𑀯𑀦𑁂𑀢𑀭𑀚𑀯𑀦𑀸𑀦𑀁 𑀪𑀯𑀗𑁆𑀕𑀲𑁄𑀢𑀲𑁆𑀲 𑀆𑀯𑀝𑁆𑀝𑀦𑀁 𑀕𑀢𑀺 𑀘 𑀲𑀤𑀺𑀲𑀻𑀢𑀺 𑀏𑀢𑀲𑁆𑀲 𑀅𑀦𑀦𑀼𑀩𑀦𑁆𑀥𑀦𑀁, 𑀇𑀢𑀭𑀲𑁆𑀲 𑀅𑀦𑀼𑀩𑀦𑁆𑀥𑀦𑀜𑁆𑀘 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀯 𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑁫𑁨𑁫-𑁬. 𑀬𑀣𑀸 𑀘𑁂𑀢𑀁 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀦𑀸𑀦𑀼𑀯𑀢𑁆𑀢𑀢𑀺, 𑀢𑀣𑀸 𑀬𑀤𑀸 𑀏𑀢𑁂 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀧𑀺 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀥𑀫𑁆𑀫𑀸𑀭𑀫𑁆𑀫𑀡𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀢𑀤𑀸 𑀢𑁂𑀧𑀺 𑀦𑀸𑀦𑀼𑀩𑀦𑁆𑀥𑀢𑀻𑀢𑀺 𑀆𑀳 ‘‘𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀧𑀻’’𑀢𑀺𑀆𑀤𑀺. 𑀫𑀳𑀕𑁆𑀕𑀢𑀸-𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀮𑁄𑀓𑀼𑀢𑁆𑀢𑀭𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑁂 𑀘𑀸𑀧𑀻𑀢𑀺 𑀘-𑀲𑀤𑁆𑀤𑁂𑀦 𑀮𑁄𑀓𑀼𑀢𑁆𑀢𑀭𑀸𑀭𑀫𑁆𑀫𑀡𑀸𑀦𑀁 𑀕𑀳𑀡𑀁. 𑀓𑀲𑁆𑀫𑀸 𑀦𑀸𑀦𑀼𑀩𑀦𑁆𑀥𑀢𑀻𑀢𑀺 𑀆𑀳 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸’’𑀢𑀺𑀆𑀤𑀺. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀏𑀓𑀦𑁆𑀢𑁂𑀦 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸. 𑀢𑀣𑀸𑀧𑀭𑀺𑀘𑀺𑀢𑀢𑁆𑀢𑀸𑀢𑀺 𑀬𑀣𑀸 𑀚𑀯𑀦𑀁, 𑀏𑀯𑀁 𑀅𑀧𑀭𑀺𑀘𑀺𑀢𑀢𑁆𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀳𑀺 𑀲𑁄 𑀧𑀺𑀢𑀭𑀁, 𑀧𑀺𑀢𑀼𑀲𑀤𑀺𑀲𑀁 𑀯𑀸 𑀓𑀜𑁆𑀘𑀺 𑀅𑀦𑀼𑀩𑀦𑁆𑀥𑀦𑁆𑀢𑁄 𑀢𑀭𑀼𑀡𑀤𑀸𑀭𑀓𑁄 𑀖𑀭𑀤𑁆𑀯𑀸𑀭𑀦𑁆𑀢𑀭𑀯𑀻𑀣𑀺𑀘𑀢𑀼𑀓𑁆𑀓𑀸𑀤𑀺𑀫𑁆𑀳𑀺 𑀧𑀭𑀺𑀘𑀺𑀢𑁂𑀬𑁂𑀯 𑀤𑁂𑀲𑁂 𑀅𑀦𑀼𑀕𑀘𑁆𑀙𑀢𑀺, 𑀦 𑀅𑀭𑀜𑁆𑀜𑀁 𑀯𑀸 𑀭𑀓𑁆𑀔𑀲𑀪𑀽𑀫𑀺𑀁 𑀯𑀸 𑀕𑀘𑁆𑀙𑀦𑁆𑀢𑀁, 𑀏𑀯𑀁 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀅𑀦𑀼𑀩𑀦𑁆𑀥𑀦𑁆𑀢𑀫𑁆𑀧𑀺 𑀧𑀭𑀺𑀢𑁆𑀢𑀫𑁆𑀳𑀺 𑀧𑀭𑀺𑀘𑀺𑀢𑁂𑀬𑁂𑀯 𑀤𑁂𑀲𑁂 𑀧𑀯𑀢𑁆𑀢𑀫𑀸𑀦𑁂 𑀢𑁂 𑀥𑀫𑁆𑀫𑁂 𑀅𑀦𑀼𑀩𑀦𑁆𑀥𑀢𑀺, 𑀦 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑁂𑀧𑀺.

𑁫𑁨𑁭-𑁩𑁨. 𑀇𑀤𑀸𑀦𑀺 𑀓𑀺𑀁 𑀇𑀫𑀸𑀬 𑀬𑀼𑀢𑁆𑀢𑀺𑀓𑀣𑀸𑀬, 𑀅𑀝𑁆𑀞𑀓𑀣𑀸𑀧𑀫𑀸𑀡𑀢𑁄 𑀘𑁂𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀺𑀁 𑀢𑁂𑀦𑀸’’𑀢𑀺𑀆𑀤𑀺. 𑀚𑀯𑀦𑁂𑀢𑀺 𑀓𑀸𑀫𑀸𑀯𑀘𑀭𑀚𑀯𑀦𑁂. 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺 ‘‘𑀢𑀤𑀸𑀭𑀫𑁆𑀫𑀡’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀸𑀦𑀺 𑀘𑀺𑀢𑁆𑀢𑀸𑀦𑀺 𑀢𑀤𑀸𑀭𑀫𑁆𑀫𑀡𑀪𑀸𑀯𑀁 𑀦 𑀕𑀡𑁆𑀳𑀦𑁆𑀢𑀺, 𑀢𑀤𑀸𑀭𑀫𑁆𑀫𑀡𑀪𑀸𑀯𑁂𑀦 𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀸𑀫𑀕𑁄𑀢𑁆𑀢𑀁 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀁 𑀢𑀲𑁆𑀲 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀕𑀡𑁆𑀳𑀦𑁆𑀢𑀺 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 ‘‘𑀚𑀯𑀦𑁂 𑀚𑀯𑀺𑀢𑁂𑀧𑀺 𑀢𑀤𑀸𑀭𑀫𑁆𑀫𑀡𑀁 𑀦 𑀕𑀡𑁆𑀳𑀦𑁆𑀢𑀻’’𑀢𑀺 𑀆𑀓𑀟𑁆𑀠𑀢𑀺. 𑀧𑀡𑁆𑀡𑀢𑁆𑀢𑀺𑀁 𑀆𑀭𑀩𑁆𑀪𑀸𑀢𑀺 𑀓𑀸𑀫𑀪𑀯𑁂𑀧𑀺 𑀧𑀡𑁆𑀡𑀢𑁆𑀢𑀺𑀁 𑀆𑀭𑀩𑁆𑀪. 𑀮𑀓𑁆𑀔𑀡𑀸𑀭𑀫𑁆𑀫𑀡𑀸𑀬𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀸𑀭𑀫𑁆𑀫𑀡𑀸𑀬, 𑀩𑀮𑀯𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀅𑀢𑁆𑀣𑁄. ‘‘𑀢𑀻𑀡𑀺 𑀮𑀓𑁆𑀔𑀡𑀸𑀦𑀺, 𑀢𑀺𑀲𑁆𑀲𑁄 𑀘 𑀧𑀜𑁆𑀜𑀢𑁆𑀢𑀺𑀬𑁄 𑀓𑀼𑀲𑀮𑀢𑁆𑀢𑀺𑀓𑁂 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀢𑁆𑀢𑀸 𑀢𑀺𑀡𑁆𑀡𑀁 𑀮𑀓𑁆𑀔𑀡𑀸𑀦𑀁 𑀥𑀫𑁆𑀫𑀢𑁄 𑀅𑀪𑀸𑀯𑁂𑀦 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑀤𑀸𑀭𑀫𑁆𑀫𑀡𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺. 𑀧𑀝𑁆𑀞𑀸𑀦𑁂 𑀧𑀦 ‘‘𑀲𑁂𑀔𑀸 𑀯𑀸 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀓𑀼𑀲𑀮𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀺, 𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁬) 𑀯𑀘𑀦𑀢𑁄 𑀔𑀦𑁆𑀥𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀢𑀤𑀸𑀭𑀫𑁆𑀫𑀡𑀁 𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀲𑀽𑀢𑀺 ‘‘𑀓𑀢𑀫𑁂 𑀥𑀫𑁆𑀫𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸? 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺 (𑀥. 𑀲. 𑁧𑁪𑁨𑁬) 𑀏𑀯𑀫𑀸𑀕𑀢𑁂𑀲𑀼 𑀫𑀺𑀘𑁆𑀙𑀸𑀕𑀸𑀳𑀯𑀲𑁂𑀦 𑀧𑀯𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀚𑀯𑀦𑀁 𑀳𑀼𑀢𑁆𑀯𑀸 𑀚𑀯𑀺𑀢𑁂𑀲𑀼. 𑀓𑀲𑁆𑀫𑀸 𑀧𑀦 𑀢𑁂𑀲𑀼 𑀚𑀯𑀺𑀢𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀻𑀢𑀺? 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀜𑁆𑀳𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀺𑀬 ‘‘𑀅𑀢𑁆𑀢𑀸 𑀑𑀘𑁆𑀙𑀺𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀧𑀭𑀺𑀓𑀧𑁆𑀧𑀦𑀸𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑀧𑁆𑀧𑀯𑀢𑁆𑀢𑁂𑀲𑀼 𑀢𑁂𑀲𑀼 𑀚𑀯𑀺𑀢𑁂𑀲𑀼 𑀢𑀤𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀸𑀦𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑀧𑁆𑀧𑀯𑀢𑁆𑀢𑁂𑀲𑀼 𑀧𑀦 𑀚𑀯𑀺𑀢𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀦𑀢𑁆𑀣𑀺. 𑀅𑀣 𑀯𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀲𑀽𑀢𑀺 𑀫𑀺𑀘𑁆𑀙𑀸𑀪𑀸𑀯𑀦𑀺𑀬𑀢𑀲𑀪𑀸𑀯𑁂𑀲𑀼 𑀢𑀁𑀯𑀺𑀲𑀬𑁂𑀲𑀽𑀢𑀺 𑀅𑀢𑁆𑀣𑁄. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀥𑀫𑁆𑀫𑀸𑀦𑀁 𑀥𑀫𑁆𑀫𑀲𑀪𑀸𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑀪𑀸𑀯𑀲𑁆𑀲𑁂𑀯 𑀕𑀳𑀡𑀢𑁄, 𑀢𑀲𑁆𑀲 𑀘 𑀯𑀺𑀧𑀸𑀓𑀸𑀦𑀁 𑀅𑀯𑀺𑀪𑀽𑀢𑀢𑁆𑀢𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑀪𑀸𑀯𑁂 𑀆𑀭𑀩𑁆𑀪 𑀢𑀤𑀸𑀭𑀫𑁆𑀫𑀡𑀸 𑀦 𑀮𑀩𑁆𑀪𑀦𑁆𑀢𑀺. 𑀧𑀺-𑀲𑀤𑁆𑀤𑁂𑀦 𑀲𑀫𑁆𑀫𑀢𑁆𑀢𑀦𑀺𑀬𑀢𑁂𑀲𑀼𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺, ‘‘𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀆𑀭𑀩𑁆𑀪𑀸’’𑀢𑀺 𑀯𑀸 𑀏𑀢𑁂𑀦 𑀲𑀺𑀤𑁆𑀥𑀢𑁆𑀢𑀸 𑀦 𑀢𑁂𑀲𑀁 𑀯𑀺𑀲𑀼𑀁 𑀉𑀤𑁆𑀥𑀭𑀡𑀁 𑀓𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑀫𑁆𑀫𑀢𑁆𑀢𑀦𑀺𑀬𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀩𑀮𑀯𑀪𑀸𑀯𑀢𑁄 𑀢𑀤𑀸𑀭𑀫𑁆𑀫𑀡𑀲𑁆𑀲 𑀅𑀯𑀢𑁆𑀣𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀦𑁆𑀢𑀭𑀁 𑀲𑀫𑁆𑀫𑀢𑁆𑀢𑀦𑀺𑀬𑀢𑀸𑀧𑀺 𑀉𑀤𑁆𑀥𑀝𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑀪𑀸𑀯𑀲𑁆𑀲 𑀯𑀺𑀬 𑀧𑀝𑀺𑀲𑀫𑁆𑀪𑀺𑀤𑀸𑀲𑀪𑀸𑀯𑀲𑁆𑀲𑀧𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀅𑀯𑀺𑀪𑀽𑀢𑀪𑀸𑀯𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀺 𑀆𑀭𑀩𑁆𑀪 𑀚𑀯𑀦𑁂 𑀚𑀯𑀺𑀢𑁂 𑀢𑀤𑀸𑀭𑀫𑁆𑀫𑀡𑀁 𑀦 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀻’’𑀢𑀺𑀆𑀤𑀺. 𑀫𑀦𑁄𑀤𑁆𑀯𑀸𑀭𑁂𑀧𑀻𑀢𑀺 𑀦 𑀓𑁂𑀯𑀮𑀁 𑀧𑀜𑁆𑀘𑀤𑁆𑀯𑀸𑀭𑁂𑀲𑀼𑀬𑁂𑀯, 𑀅𑀣 𑀔𑁄 𑀫𑀦𑁄𑀤𑁆𑀯𑀸𑀭𑁂𑀧𑀺. 𑀲𑀩𑁆𑀩𑁂𑀲𑀦𑁆𑀢𑀺 𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀸𑀤𑀻𑀦𑀁 𑀲𑀩𑁆𑀩𑁂𑀲𑀁. 𑀅𑀦𑀼𑀧𑀼𑀩𑁆𑀩𑀢𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀅𑀦𑀼𑀓𑁆𑀓𑀫𑀢𑁄.

𑁫𑁩𑁩. 𑀦 𑀯𑀺𑀚𑁆𑀚𑀢𑀻𑀢𑀺 𑀫𑀦𑁄𑀤𑁆𑀯𑀸𑀭𑀲𑁆𑀲 𑀅𑀧𑁆𑀧𑀝𑀺𑀖𑀪𑀸𑀯𑁂𑀦 𑀦 𑀯𑀺𑀚𑁆𑀚𑀢𑀺. 𑀪𑀯𑀗𑁆𑀕𑀢𑁄𑀢𑀺 𑀪𑀯𑀗𑁆𑀕𑀲𑀦𑁆𑀢𑀸𑀦𑀢𑁄, 𑀢𑀲𑁆𑀲 𑀆𑀭𑀫𑁆𑀫𑀡𑀢𑁄 𑀯𑀸. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀪𑀯𑀗𑁆𑀕𑀲𑀦𑁆𑀢𑀸𑀦𑁂, 𑀢𑀲𑁆𑀲𑀸𑀭𑀫𑁆𑀫𑀡𑁂 𑀯𑀸 𑀲𑀢𑀺 𑀢𑀲𑁆𑀲 𑀯𑀼𑀝𑁆𑀞𑀸𑀦𑀁.

𑁫𑁩𑁫-𑁬. 𑀲𑀢𑁆𑀢 𑀲𑀢𑁆𑀢𑀸𑀢𑀺 𑀏𑀓𑁂𑀓𑀲𑁆𑀲 𑀲𑀢𑁆𑀢 𑀲𑀢𑁆𑀢𑀸𑀢𑀺 𑀓𑀢𑁆𑀯𑀸. 𑀧𑀸𑀧𑀧𑀸𑀓𑀸𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀸. ‘‘𑀤𑁆𑀯𑀸𑀤𑀲𑀸𑀧𑀼𑀜𑁆𑀜𑀘𑀺𑀢𑁆𑀢𑀸𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀧𑀸𑀧𑀧𑀸𑀓𑀸’’𑀢𑀺 𑀯𑀘𑀦𑀁 ‘‘𑀢𑀢𑁆𑀭𑀺𑀤𑀁 𑀲𑀼𑀕𑀢𑀲𑁆𑀲 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀲𑀜𑁆𑀜𑀸𑀲𑀤𑁆𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀯𑀁 𑀧𑀯𑀢𑁆𑀢𑀺𑀬𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀲𑀦𑁆𑀥𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀸𑀤𑀲𑀯𑀺𑀥𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀬 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀦𑀫𑀢𑁆𑀢𑀁 𑀯𑀺𑀦𑀸 𑀧𑀝𑀺𑀲𑀦𑁆𑀥𑀺𑀤𑀸𑀦𑀸𑀪𑀸𑀯𑀢𑁄 𑀆𑀳 ‘‘𑀳𑀺𑀢𑁆𑀯𑀸 𑀉𑀤𑁆𑀥𑀘𑁆𑀘𑀫𑀸𑀦𑀲’’𑀦𑁆𑀢𑀺. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁, 𑀅𑀥𑀺𑀫𑁄𑀓𑁆𑀔𑀯𑀺𑀭𑀳𑁂𑀦 𑀲𑀩𑁆𑀩𑀤𑀼𑀩𑁆𑀩𑀮𑀫𑁆𑀧𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺, 𑀅𑀥𑀺𑀫𑁄𑀓𑁆𑀔𑀲𑀪𑀸𑀯𑀢𑁄 𑀢𑀢𑁄 𑀩𑀮𑀯𑀢𑀭𑀫𑁆𑀧𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀦𑀸𑀓𑀟𑁆𑀠𑀢𑀻𑀢𑀺? 𑀧𑀝𑀺𑀲𑀦𑁆𑀥𑀺𑀤𑀸𑀦𑀲𑀪𑀸𑀯𑀸𑀪𑀸𑀯𑀢𑁄. ‘‘𑀩𑀮𑀯𑀁 𑀆𑀓𑀟𑁆𑀠𑀢𑀺, 𑀤𑀼𑀩𑁆𑀩𑀮𑀁 𑀦𑀸𑀓𑀟𑁆𑀠𑀢𑀻’’𑀢𑀺 𑀳𑀺 𑀅𑀬𑀁 𑀯𑀺𑀘𑀸𑀭𑀡𑀸 𑀧𑀝𑀺𑀲𑀦𑁆𑀥𑀺𑀤𑀸𑀦𑀲𑀪𑀸𑀯𑁂𑀲𑀼𑀬𑁂𑀯. 𑀬𑀲𑁆𑀲 𑀧𑀦 𑀧𑀝𑀺𑀲𑀦𑁆𑀥𑀺𑀤𑀸𑀦𑀲𑀪𑀸𑀯𑁄 𑀏𑀯 𑀦𑀢𑁆𑀣𑀺, 𑀦 𑀢𑀲𑁆𑀲 𑀩𑀮𑀯𑀪𑀸𑀯𑁄 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑁂 𑀓𑀸𑀭𑀡𑀦𑁆𑀢𑀺.

𑀓𑀣𑀁 𑀧𑀦𑁂𑀢𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 ‘‘𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀤𑀸𑀦𑀲𑀪𑀸𑀯𑁄 𑀦𑀢𑁆𑀣𑀻’’𑀢𑀺? 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂𑀲𑀼 𑀅𑀦𑀸𑀕𑀢𑀢𑁆𑀢𑀸. 𑀢𑀺𑀯𑀺𑀥𑀸 𑀳𑀺 𑀅𑀓𑀼𑀲𑀮𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸, 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀲𑀺𑀬𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀦𑀸𑀫. 𑀬𑀣𑀸𑀳 ‘‘𑀓𑀢𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸? 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 (𑀥. 𑀲. 𑁧𑁪𑁦𑁮). 𑀢𑁂 𑀳𑀺 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 ‘‘𑀤𑀲𑁆𑀲𑀦’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑁂𑀯 𑀧𑀳𑀸𑀢𑀩𑁆𑀩𑀢𑁆𑀢𑀸 ‘‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁄 𑀦𑀸𑀫. 𑀬𑀣𑀸𑀳 ‘‘𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸? 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺. 𑀲𑁄 𑀳𑀺 𑀅𑀕𑁆𑀕𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀢𑁆𑀢𑀸 ‘‘𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁄. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀜𑁆𑀳𑀺 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀲𑁆𑀫𑀺𑀁𑀬𑁂𑀯 𑀪𑀸𑀯𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀓𑀺𑀜𑁆𑀘𑀺 𑀧𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀪𑀸𑀯𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀦 𑀲𑀺𑀬𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀲𑀺𑀬𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸 𑀦𑀸𑀫. 𑀬𑀣𑀸𑀳 ‘‘𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀸 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸. 𑀇𑀫𑁂 𑀥𑀫𑁆𑀫𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀲𑀺𑀬𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸’’𑀢𑀺 (𑀥. 𑀲. 𑁧𑁪𑁦𑁯). 𑀢𑁂 𑀳𑀺 𑀅𑀧𑀸𑀬𑀦𑀺𑀩𑁆𑀩𑀢𑁆𑀢𑀓𑀸𑀯𑀢𑁆𑀣𑀸𑀬 𑀧𑀞𑀫𑀫𑀕𑁆𑀕𑁂𑀦, 𑀲𑁂𑀲𑀸𑀯𑀢𑁆𑀣𑀸𑀬 𑀉𑀧𑀭𑀺𑀫𑀕𑁆𑀕𑁂𑀳𑀺 𑀧𑀳𑀻𑀬𑀫𑀸𑀦𑀢𑁆𑀢𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀲𑀺𑀬𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸 𑀦𑀸𑀫. 𑀢𑀢𑁆𑀣 𑀲𑀺𑀬𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀫𑁆𑀧𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀲𑀸𑀫𑀜𑁆𑀜𑁂𑀦 𑀇𑀥 ‘‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸’’𑀢𑁆𑀯𑁂𑀯 𑀯𑁄𑀳𑀭𑀦𑁆𑀢𑀺. 𑀬𑀤𑀺 𑀘 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀧𑀝𑀺𑀲𑀦𑁆𑀥𑀺𑀁 𑀤𑀤𑁂𑀬𑁆𑀬, 𑀢𑀤𑀸 𑀅𑀓𑀼𑀲𑀮𑀧𑀝𑀺𑀲𑀦𑁆𑀥𑀺𑀬𑀸 𑀲𑀼𑀕𑀢𑀺𑀬𑀁 𑀅𑀲𑀫𑁆𑀪𑀯𑀢𑁄 𑀅𑀧𑀸𑀬𑁂𑀲𑁆𑀯𑁂𑀯 𑀤𑀤𑁂𑀬𑁆𑀬, 𑀅𑀧𑀸𑀬𑀕𑀫𑀦𑀻𑀬𑀜𑁆𑀘 𑀏𑀓𑀦𑁆𑀢𑁂𑀦 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀲𑀺𑀬𑀸, 𑀇𑀢𑀭𑀣𑀸 𑀅𑀧𑀸𑀬𑀕𑀫𑀦𑀻𑀬𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀲𑁂𑀔𑀸𑀦𑀁 𑀅𑀧𑀸𑀬𑀼𑀧𑁆𑀧𑀢𑁆𑀢𑀺 𑀆𑀧𑀚𑁆𑀚𑀢𑀺, 𑀦 𑀘 𑀧𑀦𑁂𑀢𑀁 𑀬𑀼𑀢𑁆𑀢𑀁, ‘‘𑀘𑀢𑀽𑀳𑀧𑀸𑀬𑁂𑀳𑀺 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄 (𑀔𑀼. 𑀧𑀸. 𑁬.𑁧𑁧; 𑀲𑀼. 𑀦𑀺. 𑁨𑁩𑁪), 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀲𑀳 𑀯𑀺𑀭𑀼𑀚𑁆𑀛𑀦𑀢𑁄, 𑀲𑀢𑀺 𑀘 𑀧𑀦𑁂𑀢𑀲𑁆𑀲 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀪𑀸𑀯𑁂 ‘‘𑀲𑀺𑀬𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸’’𑀢𑀺 𑀇𑀫𑀲𑁆𑀲 𑀯𑀺𑀪𑀗𑁆𑀕𑁂 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀧𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺. 𑀅𑀣 𑀲𑀺𑀬𑀸 ‘‘𑀅𑀧𑀸𑀬𑀕𑀫𑀦𑀻𑀬𑁄 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’’𑀢𑀺 𑀏𑀯𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂𑀲𑀼 𑀯𑀼𑀢𑁆𑀢𑀢𑁆𑀢𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲𑀸𑀧𑀺 𑀢𑀢𑁆𑀣 𑀲𑀗𑁆𑀕𑀳𑁄 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺? 𑀢𑀁 𑀦, 𑀢𑀲𑁆𑀲 𑀦𑀺𑀬𑀸𑀫𑀢𑁄 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸𑀢𑀺 𑀢𑀲𑁆𑀫𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂𑀲𑀼 𑀅𑀯𑀘𑀦𑀫𑁂𑀯 𑀧𑀝𑀺𑀲𑀦𑁆𑀥𑀺𑀤𑀸𑀦𑀸𑀪𑀸𑀯𑀁 𑀲𑀸𑀥𑁂𑀢𑀻𑀢𑀺.

𑀦𑀦𑀼 𑀘 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 𑁋

‘‘𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀁, 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁩𑁧) 𑁋

𑀏𑀯𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀲 𑀯𑀺𑀧𑀸𑀓𑁄𑀧𑀺 𑀉𑀤𑁆𑀥𑀝𑁄𑀢𑀺 𑀓𑀣𑀫𑀲𑁆𑀲 𑀧𑀝𑀺𑀲𑀦𑁆𑀥𑀺𑀤𑀸𑀦𑀸𑀪𑀸𑀯𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄𑀢𑀺? 𑀦 𑀇𑀤𑀁 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀲𑀦𑁆𑀥𑀸𑀬 𑀉𑀤𑁆𑀥𑀝𑀁, 𑀅𑀣 𑀔𑁄 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀲𑀦𑁆𑀥𑀸𑀬. 𑀧𑀝𑁆𑀞𑀸𑀦𑁂 𑀧𑀦 𑁋

‘‘𑀲𑀳𑀚𑀸𑀢𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀸𑀦𑀓𑁆𑀔𑀡𑀺𑀓𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁮.𑁮𑁯) 𑁋

𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀘𑁂𑀢𑀦𑀸𑀬 𑀏𑀯 𑀲𑀳𑀚𑀸𑀢𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀁 𑀉𑀤𑁆𑀥𑀭𑀺𑀢𑁆𑀯𑀸𑀯 ‘‘𑀲𑀳𑀚𑀸𑀢𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀘𑁂𑀢𑀦𑀸𑀬 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄𑀯 𑀉𑀤𑁆𑀥𑀝𑁄, 𑀦 𑀧𑀦 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄. 𑀢𑀣𑀸 𑀧𑀘𑁆𑀘𑀦𑀻𑀬𑀦𑀬𑁂𑀧𑀺 𑁋

‘‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢… 𑀉𑀧𑀦𑀺𑀲𑁆𑀲𑀬…𑀧𑁂… 𑀧𑀘𑁆𑀙𑀸𑀚𑀸𑀢… 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁮.𑁯𑁮) 𑁋

𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀲𑁆𑀲𑁂𑀯 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀁 𑀉𑀤𑁆𑀥𑀭𑀺𑀢𑁆𑀯𑀸 𑁋

‘‘𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢… 𑀉𑀧𑀦𑀺𑀲𑁆𑀲𑀬… 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁮.𑁯𑁯) 𑁋

𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁄𑀯 𑀯𑀼𑀢𑁆𑀢𑁄, 𑀦 𑀧𑀦 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄, 𑀦 𑀘 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀁 𑀯𑀺𑀦𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀢𑀲𑁆𑀲 𑀲𑀩𑁆𑀩𑀣𑀸𑀧𑀺 𑀧𑀝𑀺𑀲𑀦𑁆𑀥𑀺𑀤𑀸𑀦𑀁. 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀧𑀦𑀲𑁆𑀲 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 𑀉𑀤𑁆𑀥𑀘𑁆𑀘𑀲𑀳𑀕𑀢𑀸𑀦𑀫𑁆𑀧𑀺 𑀯𑀺𑀧𑀸𑀓𑀲𑁆𑀲 𑀉𑀤𑁆𑀥𑀝𑀢𑁆𑀢𑀸, 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀲𑁆𑀲 𑀘 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀫𑁂𑀯 𑀲𑀦𑁆𑀥𑀸𑀬 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀏𑀯𑀜𑁆𑀘 𑀧𑀦 𑀓𑀢𑁆𑀯𑀸 𑀬𑀤𑁂𑀓𑁂 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺 ‘‘𑀉𑀤𑁆𑀥𑀘𑁆𑀘𑀘𑁂𑀢𑀦𑀸 𑀉𑀪𑀬𑀯𑀺𑀧𑀸𑀓𑀫𑁆𑀧𑀺 𑀦 𑀤𑁂𑀢𑀺 𑀧𑀝𑁆𑀞𑀸𑀦𑁂 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸’’𑀢𑀺, 𑀢𑀁 𑀢𑁂𑀲𑀁 𑀅𑀪𑀺𑀦𑀺𑀯𑁂𑀲𑀫𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀤𑀺 𑀘 𑀢𑁂 𑀯𑀤𑁂𑀬𑁆𑀬𑀼𑀁 𑁋 𑀬𑀣𑀸 ‘‘𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸’’𑀢𑀺 𑀏𑀢𑁆𑀣 𑀯𑀺𑀧𑀸𑀓-𑀲𑀤𑁆𑀤𑁂𑀦 𑀯𑀺𑀧𑀸𑀓𑀸𑀭𑀳𑀢𑀸 𑀯𑀼𑀘𑁆𑀘𑀢𑀺, 𑀏𑀯𑀁 𑀇𑀥𑀸𑀧𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀸𑀦𑀁 𑀯𑀺𑀧𑀸𑀓𑀸𑀭𑀳𑀢𑀁 𑀲𑀦𑁆𑀥𑀸𑀬 ‘‘𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑀲𑁆𑀲 𑀅𑀪𑀸𑀯𑁂𑀧𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀼𑀘𑁆𑀘𑀦𑀲𑀢𑁆𑀢𑀺𑀯𑀺𑀲𑁂𑀲𑀁 𑀕𑀳𑁂𑀢𑁆𑀯𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀥𑀫𑁆𑀫𑁄 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀥𑀫𑁆𑀫𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀯𑀺𑀧𑀸𑀓𑀸𑀭𑀳𑀪𑀸𑀯𑀲𑁆𑀲 𑀅𑀪𑀸𑀯𑁂𑀧𑀺 𑀥𑀫𑁆𑀫𑀸𑀦𑀫𑁂𑀯 𑀯𑀺𑀧𑀸𑀓𑀸𑀭𑀳𑀲𑀸𑀫𑀢𑁆𑀣𑀺𑀬𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀯𑀼𑀢𑁆𑀢𑁄. 𑀬𑀤𑀺 𑀘 𑀢𑁂 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑀤𑁂𑀬𑁆𑀬𑀼𑀁, 𑀬𑀣𑀸 𑁋

‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀸𑀦𑀓𑁆𑀔𑀡𑀺𑀓𑀸’’𑀢𑀺 (𑀧𑀝𑁆𑀞𑀸. 𑁧.𑁨.𑁫𑁭) 𑁋

𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲𑀧𑀺 𑀯𑀲𑁂𑀦 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀏𑀯𑀫𑁂𑀢𑁆𑀣𑀸𑀧𑀺 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀦 𑀳𑀺 𑀮𑀩𑁆𑀪𑀫𑀸𑀦𑀲𑁆𑀲 𑀅𑀯𑀘𑀦𑁂 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺 𑀢𑀲𑁆𑀫𑀸 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀯𑀘𑀦𑀫𑁆𑀧𑀺 𑀅𑀪𑀸𑀯𑀫𑁂𑀯 𑀤𑀻𑀧𑁂𑀢𑀺. 𑀅𑀧𑀺𑀘 𑀬𑀤𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀦𑀁 𑀅𑀥𑀺𑀧𑁆𑀧𑁂𑀢𑀁 𑀲𑀺𑀬𑀸, 𑀢𑀤𑀸 ‘‘𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀥𑀫𑁆𑀫𑀲𑁆𑀲 𑀦 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀧𑀝𑀺𑀲𑁂𑀥𑁄 𑀦 𑀓𑀸𑀢𑀩𑁆𑀩𑁄 𑀲𑀺𑀬𑀸. 𑀦 𑀳𑀺 𑀞𑀧𑁂𑀢𑁆𑀯𑀸 𑀉𑀤𑁆𑀥𑀘𑁆𑀘𑀁 𑀅𑀜𑁆𑀜𑁄 𑀓𑁄𑀘𑀺 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀲𑀫𑀢𑁆𑀣𑁄 𑀅𑀢𑁆𑀣𑀻𑀢𑀺, 𑀢𑀬𑀺𑀤𑀫𑁂𑀢𑁂𑀲𑀁 𑀅𑀪𑀺𑀮𑀸𑀧𑀫𑀢𑁆𑀢𑀁. 𑀢𑀣𑀸 𑀳𑀺 𑀬𑀁 𑀢𑀸𑀯 𑀯𑀼𑀢𑁆𑀢𑀁 ‘‘𑀯𑀺𑀧𑀸𑀓𑀸𑀭𑀳𑀪𑀸𑀯𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀯𑀺𑀧𑀸𑀓𑁂𑀢𑀺 𑀯𑀼𑀢𑁆𑀢’’𑀦𑁆𑀢𑀺, 𑀢𑀤𑁂𑀯 𑀢𑀲𑁆𑀲 𑀯𑀺𑀧𑀸𑀓𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺. 𑀦 𑀳𑀺 𑀯𑀺𑀧𑀸𑀓𑀸𑀭𑀳𑀪𑀸𑀯𑁂 𑀲𑀢𑀺 𑀅𑀪𑀺𑀜𑁆𑀜𑀸𑀤𑀻𑀦𑀁 𑀯𑀺𑀬 𑀢𑀲𑁆𑀲 𑀅𑀯𑀺𑀧𑀸𑀓𑀢𑀸𑀬 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺. 𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀲𑁆𑀲 𑀅𑀯𑀘𑀦𑀁 𑀯𑀺𑀧𑀸𑀓𑀪𑀸𑀯𑀁 𑀤𑀻𑀧𑁂𑀢𑀻’’𑀢𑀺, 𑀢𑀫𑁆𑀧𑀺 𑀦 𑀲𑀼𑀦𑁆𑀤𑀭𑀁, 𑀮𑀩𑁆𑀪𑀫𑀸𑀦𑀲𑁆𑀲𑀸𑀧𑀺 𑀓𑀢𑁆𑀣𑀘𑀺 𑀓𑁂𑀦𑀘𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀯𑀘𑀦𑀢𑁄. 𑀢𑀣𑀸 𑀳𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀮𑀩𑁆𑀪𑀫𑀸𑀦𑀫𑁆𑀧𑀺 𑀳𑀤𑀬𑀯𑀢𑁆𑀣𑀼 𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀤𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀲𑀦𑁆𑀥𑀸𑀬 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀯𑀼𑀘𑁆𑀘𑁂𑀬𑁆𑀬, 𑀢𑀤𑀸 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀤𑀸𑀦𑀫𑁆𑀧𑀺𑀲𑁆𑀲 𑀫𑀜𑁆𑀜𑁂𑀬𑁆𑀬𑀼𑀦𑁆𑀢𑀺 𑀮𑀩𑁆𑀪𑀫𑀸𑀦𑀲𑁆𑀲𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲 𑀯𑀲𑁂𑀦 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄𑀢𑀺. 𑀬𑀁 𑀧𑀦 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑁆𑀲 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁 𑀧𑀢𑀺 𑀓𑀫𑁆𑀫𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑀯𑀘𑀦𑀁, 𑀢𑀁 𑀅𑀪𑀺𑀜𑁆𑀜𑀸𑀓𑀼𑀲𑀮𑀸𑀤𑀺𑀓𑁂 𑀲𑀦𑁆𑀥𑀸𑀬𑀸𑀢𑀺 𑀦 𑀏𑀢𑁆𑀢𑀸𑀯𑀢𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀦𑀁 𑀲𑀩𑁆𑀩𑀣𑀸𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀓𑀸𑀢𑀺. 𑀬𑀫𑁆𑀧𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀣𑀸 𑀘 𑀅𑀪𑀺𑀜𑁆𑀜𑀸𑀘𑁂𑀢𑀦𑀸, 𑀏𑀯𑀫𑀼𑀤𑁆𑀥𑀘𑁆𑀘𑀘𑁂𑀢𑀦𑀸𑀧𑀺 ‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀏𑀢𑁆𑀣 𑀅𑀧𑀦𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀬 𑀢𑀢𑁆𑀣 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑀸𑀬 𑀬𑀣𑀸 𑀇𑀢𑀭𑀸 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦 𑀤𑀼𑀯𑀺𑀥𑀲𑁆𑀲𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄, 𑀏𑀯𑀫𑀼𑀤𑁆𑀥𑀘𑁆𑀘𑀘𑁂𑀢𑀦𑀸𑀧𑀻𑀢𑀺 𑀕𑀡𑁆𑀳𑁂𑀬𑁆𑀬𑀼𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀢𑀲𑁆𑀲 𑀧𑀯𑀢𑁆𑀢𑀺𑀯𑀺𑀧𑀸𑀓𑀸𑀪𑀸𑀯𑀢𑁄𑀢𑀺.

𑀆𑀘𑀭𑀺𑀬𑀩𑀼𑀤𑁆𑀥𑀫𑀺𑀢𑁆𑀢𑀸𑀤𑀬𑁄 𑀧𑀦 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀤𑁆𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀏𑀓𑀲𑁆𑀲 𑀉𑀪𑀬𑀯𑀺𑀧𑀸𑀓𑀤𑀸𑀦𑀁, 𑀏𑀓𑀲𑁆𑀲 𑀲𑀩𑁆𑀩𑀣𑀸𑀧𑀺 𑀯𑀺𑀧𑀸𑀓𑀸𑀪𑀸𑀯𑀁 𑀯𑀡𑁆𑀡𑁂𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀅𑀢𑁆𑀣𑀺 𑀉𑀤𑁆𑀥𑀘𑁆𑀘𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀫𑁆𑀧𑀺, 𑀅𑀢𑁆𑀣𑀺 𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀫𑁆𑀧𑀺. 𑀢𑁂𑀲𑀼 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀁 𑀲𑁂𑀔𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀁, 𑀇𑀢𑀭𑀁 𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀁. 𑀨𑀮𑀤𑀸𑀦𑀜𑁆𑀘 𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀲𑁆𑀲𑁂𑀯, 𑀦𑁂𑀢𑀭𑀲𑁆𑀲. 𑀢𑀣𑀸 𑀳𑀺 𑀤𑀲𑁆𑀲𑀦𑀪𑀸𑀯𑀦𑀸𑀦𑀁 𑀅𑀪𑀸𑀯𑁂𑀧𑀺 𑀬𑁂𑀲𑀁 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀲𑁂𑀔𑀸𑀦𑀜𑁆𑀘 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀪𑀯𑀺𑀢𑀩𑁆𑀩𑀁, 𑀢𑁂𑀲𑀁 𑀢𑀤𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀢𑀸𑀳𑀺 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀅𑀓𑀼𑀲𑀮𑀸 ‘‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸, 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀪𑀸𑀯𑀦𑀸𑀬 𑀅𑀪𑀸𑀯𑀢𑁄 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀘𑀺𑀦𑁆𑀢𑀸 𑀦𑀢𑁆𑀣𑀺, 𑀢𑁂𑀦 𑀢𑁂𑀲𑀁 𑀧𑀯𑀢𑁆𑀢𑀫𑀸𑀦𑀸 𑀢𑁂 𑀤𑀲𑁆𑀲𑀦𑁂𑀦 𑀧𑀳𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀧𑀺 ‘‘𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸’’𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀺 𑀯𑀼𑀘𑁆𑀘𑁂𑀬𑁆𑀬𑀼𑀁, 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀲𑀜𑁆𑀘𑀺 𑀓𑁂𑀘𑀺 𑀓𑀤𑀸𑀘𑀺 𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀪𑀯𑁂𑀬𑁆𑀬𑀼𑀁. 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀻𑀦𑀜𑁆𑀳𑀺 𑀓𑁂𑀲𑀜𑁆𑀘𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀬𑁄 𑀓𑁂𑀘𑀺 𑀅𑀢𑀻𑀢𑀸𑀤𑀻𑀲𑀼 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀦𑀢𑁆𑀣𑀺, 𑀦 𑀘 𑀧𑀝𑁆𑀞𑀸𑀦𑁂 ‘‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀦𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑁂𑀲𑀼 𑀧𑀯𑀢𑁆𑀢𑀫𑀸𑀦𑀸𑀦𑀫𑀓𑀼𑀲𑀮𑀸𑀦𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀧𑀭𑀺𑀬𑀸𑀬𑁄. 𑀬𑀤𑀺 𑀢𑀢𑁆𑀣 𑀅𑀯𑀘𑀦𑀫𑁂𑀯 𑀧𑀫𑀸𑀡𑀁, 𑀏𑀯𑀁 𑀲𑀢𑀺 𑀲𑁂𑀔𑀲𑀦𑁆𑀢𑀸𑀦𑀧𑀯𑀢𑁆𑀢𑀸𑀦𑀫𑁆𑀧𑀺 𑀅𑀓𑀼𑀲𑀮𑀸𑀦𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀧𑀭𑀺𑀬𑀸𑀬𑁄 𑀦𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀲𑁂𑀔𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀸𑀦𑀁 𑀪𑀸𑀯𑀦𑀸𑀬 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀢𑁂𑀦𑁂𑀯 𑀘 𑀓𑀺𑀜𑁆𑀘𑀺 𑀓𑀢𑁆𑀯𑀸 𑀲𑁂𑀔𑀸𑀦𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀦𑀁 𑀅𑀓𑀼𑀲𑀮𑀸𑀦𑀁 𑀧𑀳𑀻𑀦𑀪𑀸𑀯𑁂𑀦 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀸𑀦𑀁 𑀯𑀢𑁆𑀣𑀽𑀦𑀺 𑀦 𑀳𑁄𑀦𑁆𑀢𑀺. 𑀧𑀳𑀻𑀦𑀢𑀸𑀬 𑀏𑀯 𑀲𑁄𑀫𑀦𑀲𑁆𑀲𑀲𑁆𑀲 𑀳𑁂𑀢𑀼𑀪𑀽𑀢𑀸, 𑀅𑀯𑀺𑀓𑁆𑀔𑁂𑀧𑀳𑁂𑀢𑀼𑀪𑀽𑀢𑀸 𑀘 𑀦 𑀤𑁄𑀫𑀦𑀲𑁆𑀲𑀁, 𑀉𑀤𑁆𑀥𑀘𑁆𑀘𑀜𑁆𑀘 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀦 𑀢𑁂𑀲𑀁 𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀦 𑀳𑀺 𑀧𑀳𑀻𑀦𑀓𑀺𑀮𑁂𑀲𑁂 𑀉𑀧𑀦𑀺𑀲𑁆𑀲𑀸𑀬 𑀅𑀭𑀺𑀬𑀸 𑀭𑀸𑀕𑀤𑁄𑀲𑀯𑀺𑀓𑁆𑀔𑁂𑀧𑁂 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺, 𑀦 𑀧𑀘𑁆𑀘𑁂𑀢𑀺, 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄, 𑀲𑀓𑀤𑀸𑀕𑀸𑀫𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦…𑀧𑁂… 𑀲𑀼𑀕𑀢𑁄’’𑀢𑀺. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀁 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, ‘‘𑀤𑀺𑀝𑁆𑀞𑀺𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀘𑀺𑀓𑀺𑀘𑁆𑀙𑀁 𑀆𑀭𑀩𑁆𑀪 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁭) 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀉𑀤𑁆𑀥𑀘𑁆𑀘𑀸𑀭𑀫𑁆𑀫𑀡𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀏𑀢𑁆𑀣 𑀳𑀺 𑀉𑀤𑁆𑀥𑀘𑁆𑀘𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂𑀲𑀼𑀧𑀺 𑀮𑀩𑁆𑀪𑀫𑀸𑀦𑀘𑁂𑀢𑀲𑀺𑀓𑀁 𑀉𑀤𑁆𑀥𑀘𑁆𑀘𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 ‘‘𑀤𑀺𑀝𑁆𑀞𑀺𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁫) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺, 𑀢𑀲𑁆𑀫𑀸 𑀲𑁂𑀔𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀸𑀦𑀫𑀓𑀼𑀲𑀮𑀸𑀦𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀦𑁆𑀢𑀸𑀦𑁂𑀯 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀦𑀫𑀓𑀼𑀲𑀮𑀸𑀦𑀁 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀧𑀝𑁆𑀞𑀸𑀦𑁂 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀦𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀲𑁆𑀲 𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀸𑀦𑀼𑀤𑁆𑀥𑀭𑀡𑀁 𑀲𑁂𑀔𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀸𑀦𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀧𑀭𑀺𑀬𑀸𑀬𑀪𑀸𑀯𑀁 𑀲𑀸𑀥𑁂𑀢𑀺, 𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂𑀬𑁂𑀯 𑀦𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀦𑀫𑀓𑀼𑀲𑀮𑀸𑀦𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀧𑀭𑀺𑀬𑀸𑀬𑀪𑀸𑀯𑀁 𑀦 𑀲𑀸𑀥𑁂𑀢𑀺, 𑀢𑀲𑁆𑀫𑀸 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑀸𑀦𑀁 𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀢𑁆𑀢𑁂𑀧𑀺 𑀬𑀸𑀤𑀺𑀲𑀸𑀦𑀁 𑀢𑀸𑀳𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸 𑀆𑀧𑀸𑀤𑁂𑀢𑀩𑁆𑀩𑀸, 𑀢𑁂 𑀧𑀼𑀣𑀼𑀚𑁆𑀚𑀦𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀤𑀲𑁆𑀲𑀦𑀫𑀕𑁆𑀕𑀸𑀧𑁂𑀓𑁆𑀔𑀸𑀬 𑀢𑀤𑀧𑁆𑀧𑀯𑀢𑁆𑀢𑀺𑀬𑀫𑁆𑀧𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀦𑀸𑀫. 𑀲𑁂𑀔𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀪𑀸𑀯𑀦𑀸𑀬 𑀧𑀳𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀢𑀤𑀧𑁆𑀧𑀯𑀢𑁆𑀢𑀺𑀬𑀫𑁆𑀧𑀺 𑀢𑀤𑀧𑁂𑀓𑁆𑀔𑀸𑀬 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸 𑀦𑀸𑀫. 𑀤𑀲𑁆𑀲𑀦𑁂𑀦 𑀧𑀳𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸 𑀧𑀦 𑀧𑀼𑀣𑀼𑀚𑁆𑀚𑀦𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀦𑁂𑀯𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸, 𑀢𑁂𑀲𑀼 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸 𑀲𑀳𑀸𑀬𑀯𑀺𑀭𑀳𑀢𑁄 𑀯𑀺𑀧𑀸𑀓𑀁 𑀦 𑀚𑀦𑁂𑀦𑁆𑀢𑀺. 𑀢𑀣𑀸 𑀳𑀺 𑀢𑁂𑀲𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀲𑀗𑁆𑀔𑀸𑀢𑀁 𑀲𑀳𑀓𑀸𑀭𑀻𑀓𑀸𑀭𑀡𑀁 𑀲𑀳𑀸𑀬𑀪𑀽𑀢𑀁 𑀦𑀢𑁆𑀣𑀻𑀢𑀺 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀘𑁂𑀢𑀦𑀸𑀬 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄. 𑀅𑀧𑁂𑀓𑁆𑀔𑀺𑀢𑀩𑁆𑀩𑀤𑀲𑁆𑀲𑀦𑀪𑀸𑀯𑀦𑀸𑀭𑀳𑀺𑀢𑀸𑀦𑀁 𑀧𑀦 𑀧𑀼𑀣𑀼𑀚𑁆𑀚𑀦𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀻𑀦𑀁, 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀘 𑀲𑀁𑀬𑁄𑀚𑀦𑀢𑁆𑀢𑀬𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑀸𑀬 𑀅𑀧𑀭𑀺𑀓𑁆𑀔𑀻𑀡𑀲𑀳𑀸𑀬𑀸𑀦𑀁 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁄𑀢𑀺.

𑀬𑀤𑀺 𑀏𑀯𑀁, 𑀅𑀧𑁂𑀓𑁆𑀔𑀺𑀢𑀩𑁆𑀩𑀤𑀲𑁆𑀲𑀦𑀪𑀸𑀯𑀦𑀸𑀭𑀳𑀺𑀢𑀸𑀦𑀁 𑀅𑀓𑀼𑀲𑀮𑀸𑀦𑀁 ‘‘𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀅𑀧𑁆𑀧𑀳𑀸𑀢𑀩𑁆𑀩𑀲𑀪𑀸𑀯𑀸𑀦𑀁 𑀓𑀼𑀲𑀮𑀸𑀤𑀻𑀦𑀁 ‘‘𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀅𑀧𑁆𑀧𑀳𑀸𑀢𑀩𑁆𑀩𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸 𑀘 𑀅𑀓𑀼𑀲𑀮𑀸𑀦𑀁. 𑀬𑀤𑀺 𑀏𑀯𑀁 𑀢𑁂 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀦𑀯𑀢𑁆𑀢𑀩𑁆𑀩𑀸𑀢𑀺 𑀯𑀢𑁆𑀢𑀩𑁆𑀩𑀸 𑀆𑀧𑀚𑁆𑀚𑀦𑁆𑀢𑀻𑀢𑀺? 𑀦𑀸𑀧𑀚𑁆𑀚𑀦𑁆𑀢𑀺, 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀤𑀲𑁆𑀲𑀺𑀢𑀸𑀦𑀁 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀬𑀣𑀸 𑀳𑀺 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀥𑀫𑁆𑀫𑀯𑀲𑁂𑀦 𑀲𑀩𑁆𑀩𑁂𑀲𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀓𑀸𑀮𑀯𑀲𑁂𑀦 𑀅𑀲𑀗𑁆𑀕𑀳𑀺𑀢𑀸𑀧𑀺 𑀅𑀢𑀻𑀢𑀸 ‘‘𑀦𑀯𑀢𑁆𑀢𑀩𑁆𑀩𑀸’’𑀢𑀺 𑀦 𑀯𑀼𑀢𑁆𑀢𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀼𑀭𑀽𑀧𑁂𑀦 𑀲𑀗𑁆𑀕𑀳𑀺𑀢𑁂𑀲𑀼 𑀦𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀸, 𑀏𑀯𑀁 𑀇𑀥𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀪𑀸𑀯𑁂𑀦 𑀲𑀗𑁆𑀕𑀳𑀺𑀢𑁂𑀲𑀼 𑀦𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 ‘‘𑀦𑀯𑀢𑁆𑀢𑀩𑁆𑀩𑀸’’𑀢𑀺 𑀦 𑀯𑀼𑀢𑁆𑀢𑀸. 𑀲𑀩𑁆𑀩𑁂𑀦 𑀲𑀩𑁆𑀩𑀜𑁆𑀳𑀺 𑀥𑀫𑁆𑀫𑀯𑀲𑁂𑀦 𑀅𑀲𑀗𑁆𑀕𑀳𑀺𑀢𑀲𑁆𑀲 𑀢𑀺𑀓𑀤𑀼𑀓𑁂𑀲𑀼 𑀦𑀯𑀢𑁆𑀢𑀩𑁆𑀩𑀢𑀸𑀧𑀢𑁆𑀢𑀺. 𑀬𑀢𑁆𑀣 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀓𑁄𑀘𑀺 𑀦𑀺𑀬𑁄𑀕𑀢𑁄 𑀦𑀯𑀢𑁆𑀢𑀩𑁆𑀩𑁄 𑀅𑀢𑁆𑀣𑀺, 𑀢𑀢𑁆𑀣 𑀢𑁂𑀲𑀁 𑀘𑀢𑀼𑀢𑁆𑀣𑁄 𑀓𑁄𑀝𑁆𑀞𑀸𑀲𑁄 𑀅𑀢𑁆𑀣𑀻𑀢𑀺 𑀬𑀣𑀸𑀯𑀼𑀢𑁆𑀢𑀧𑀤𑁂𑀲𑀼 𑀯𑀺𑀬 𑀢𑀢𑁆𑀣𑀸𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀪𑀺𑀦𑁆𑀤𑀺𑀢𑁆𑀯𑀸 𑀪𑀸𑀚𑁂𑀢𑀺 ‘‘𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀆𑀤𑀺𑀦𑀸, 𑀢𑀤𑀪𑀸𑀯𑀸 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂, 𑀇𑀥 𑀘 𑀢𑀣𑀸 𑀦 𑀯𑀼𑀢𑁆𑀢𑀦𑁆𑀢𑀺.

𑀅𑀣 𑀯𑀸 𑀬𑀣𑀸 𑀲𑀧𑁆𑀧𑀝𑀺𑀖𑁂𑀳𑀺 𑀲𑀫𑀸𑀦𑀲𑀪𑀸𑀯𑀢𑁆𑀢𑀸 𑀭𑀽𑀧𑀥𑀸𑀢𑀼𑀬𑀁 ‘‘𑀢𑀬𑁄 𑀫𑀳𑀸𑀪𑀽𑀢𑀸 𑀲𑀧𑁆𑀧𑀝𑀺𑀖𑀸’’𑀢𑀺 𑀯𑀼𑀢𑁆𑀢𑀸, 𑀬𑀣𑀸𑀳 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁 𑀏𑀓𑀁 𑀫𑀳𑀸𑀪𑀽𑀢’’𑀦𑁆𑀢𑀺, 𑀏𑀯𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀯𑀢𑁆𑀢𑀫𑀸𑀦𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀲𑀫𑀸𑀦𑀲𑀪𑀸𑀯𑀸 ‘‘𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸’’𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀦𑁆𑀢𑀺 𑀦𑀢𑁆𑀣𑀺 𑀦𑀯𑀢𑁆𑀢𑀩𑁆𑀩𑀢𑀸𑀧𑀲𑀗𑁆𑀕𑁄. 𑀏𑀯𑀜𑁆𑀘 𑀲𑀢𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀯𑀢𑁆𑀢𑀫𑀸𑀦𑀸𑀧𑀺 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀬𑁄 𑀧𑀭𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀭𑀸𑀕𑁄 𑀘 𑀭𑀸𑀕𑀤𑀺𑀝𑁆𑀞𑀻𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀢𑀺 𑀅𑀬𑀫𑀢𑁆𑀣𑁄 𑀮𑀤𑁆𑀥𑁄 𑀳𑁄𑀢𑀺. 𑀢𑁂𑀦𑁂𑀯 𑀳𑀺 𑁋

‘‘𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄, 𑀧𑀓𑀢𑀽𑀧𑀦𑀺𑀲𑁆𑀲𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁮.𑁮𑁪) 𑁋

𑀇𑀫𑀺𑀲𑁆𑀲𑀸 𑀦𑀺𑀤𑁆𑀤𑁂𑀲𑁂 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀻𑀥𑀫𑁆𑀫𑁂 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀪𑀕𑀯𑀢𑀸 𑁋

‘‘𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀧𑀢𑁆𑀣𑀦𑀁 𑀉𑀧𑀦𑀺𑀲𑁆𑀲𑀸𑀬 𑀧𑀸𑀡𑀁 𑀳𑀦𑀢𑀺…𑀧𑁂… 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁄 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀧𑀢𑁆𑀣𑀦𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀲𑁆𑀲 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲 𑀫𑀸𑀦𑀲𑁆𑀲 𑀤𑀺𑀝𑁆𑀞𑀺𑀬𑀸 𑀧𑀢𑁆𑀣𑀦𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑁄 𑀧𑀭𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀲𑁆𑀲 𑀉𑀧…𑀧𑁂… 𑀲𑀓𑀧𑀭𑀺𑀕𑁆𑀕𑀳𑁂 𑀙𑀦𑁆𑀤𑀭𑀸𑀕𑁄 𑀧𑀭𑀧𑀭𑀺𑀕𑁆𑀕𑀳𑁂 𑀙𑀦𑁆𑀤𑀭𑀸𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁮.𑁮𑁪) 𑁋

𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂 𑀧𑀢𑁆𑀣𑀦𑀸𑀤𑀬𑁄 𑀦𑀺𑀤𑁆𑀤𑀺𑀝𑁆𑀞𑀸.

𑀏𑀯𑀫𑁆𑀧𑀺 𑀬𑀣𑀸 𑀅𑀨𑁄𑀝𑁆𑀞𑀩𑁆𑀩𑀢𑁆𑀢𑀸 𑀭𑀽𑀧𑀥𑀸𑀢𑀼𑀬𑀁 𑀢𑀬𑁄 𑀫𑀳𑀸𑀪𑀽𑀢𑀸 𑀦 𑀧𑀭𑀫𑀢𑁆𑀣𑀢𑁄 𑀲𑀧𑁆𑀧𑀝𑀺𑀖𑀸, 𑀏𑀯𑀁 𑀅𑀧𑁂𑀓𑁆𑀔𑀺𑀢𑀩𑁆𑀩𑀪𑀸𑀯𑀦𑀸𑀭𑀳𑀺𑀢𑀸 𑀧𑀼𑀣𑀼𑀚𑁆𑀚𑀦𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀬𑁄 𑀧𑀦 𑀧𑀭𑀫𑀢𑁆𑀣𑀢𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀦𑀁 𑀦𑀸𑀦𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀢𑀸 𑀦 𑀯𑀼𑀢𑁆𑀢𑀸, 𑀦 𑀘 ‘‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀦𑀁 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀸. 𑀬𑁂 𑀳𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀧𑀘𑁆𑀘𑀬𑀸 𑀓𑀺𑀮𑁂𑀲𑀸, 𑀦 𑀢𑁂 𑀤𑀲𑁆𑀲𑀦𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀦𑁆𑀢𑀺. 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀧𑀘𑁆𑀘𑀬𑀲𑁆𑀲𑀸𑀧𑀺 𑀧𑀦 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀲𑀳𑀸𑀬𑀯𑁂𑀓𑀮𑁆𑀮𑀫𑀢𑁆𑀢𑀫𑁂𑀯 𑀤𑀲𑁆𑀲𑀦𑁂𑀦 𑀓𑀢𑀁, 𑀦 𑀢𑀲𑁆𑀲 𑀓𑁄𑀘𑀺 𑀪𑀸𑀯𑁄 𑀤𑀲𑁆𑀲𑀦𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑁄𑀢𑀺 𑀢𑀲𑁆𑀲 𑀏𑀓𑀦𑁆𑀢𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀢𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀉𑀤𑁆𑀥𑀘𑁆𑀘𑀪𑀸𑀯𑁂𑀦 𑀏𑀓𑀲𑀪𑀸𑀯𑀲𑁆𑀲𑁂𑀯 𑀢𑀲𑁆𑀲 𑀲𑀢𑀺 𑀲𑀳𑀸𑀬𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀯𑀘𑀦𑀁, 𑀅𑀲𑀢𑀺 𑀘 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀺. 𑀢𑀬𑀺𑀤𑀁 𑀲𑀩𑁆𑀩𑀫𑁂𑀢𑁂𑀲𑀁 𑀆𑀘𑀭𑀺𑀬𑀸𑀦𑀁 𑀅𑀳𑁄𑀧𑀼𑀭𑀺𑀲𑀺𑀓𑀸𑀭𑀫𑀢𑁆𑀢𑀁. 𑀓𑀲𑁆𑀫𑀸? 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀏𑀓𑀦𑁆𑀢𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀏𑀯𑀜𑁆𑀳𑀺 𑀯𑀼𑀢𑁆𑀢𑀁 𑀪𑀕𑀯𑀢𑀸 ‘‘𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸. 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 (𑀥. 𑀲. 𑁧𑁪𑁦𑁬). 𑀬𑀤𑀺 𑀘 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀁 𑀅𑀪𑀯𑀺𑀲𑁆𑀲, 𑀬𑀣𑀸 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 ‘‘𑀦𑀺𑀬𑁄𑀕𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀦𑀢𑁆𑀣𑀻’’𑀢𑀺 (𑀥. 𑀲. 𑁧𑁪𑁩𑁩) 𑀯𑀢𑁆𑀯𑀸 𑀯𑀺𑀪𑀚𑁆𑀚 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 ‘‘𑀦𑀺𑀬𑁄𑀕𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀲𑀺𑀬𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁄 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑁄 ‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁄’𑀢𑀺𑀧𑀺 ‘𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑁄’𑀢𑀺𑀧𑀻’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀢𑀣𑀸 𑀯𑀼𑀢𑁆𑀢𑀁. 𑀬𑀸 𑀘 ‘‘𑀢𑀫𑀢𑁆𑀣𑀁 𑀧𑀝𑀺𑀧𑀸𑀤𑁂𑀦𑁆𑀢𑁂𑀳𑀺 𑀬𑀤𑀺 𑀯𑀼𑀘𑁆𑀘𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀬𑀼𑀢𑁆𑀢𑀺 𑀯𑀼𑀢𑁆𑀢𑀸, 𑀲𑀸𑀧𑀺 𑀅𑀬𑀼𑀢𑁆𑀢𑀺. 𑀓𑀲𑁆𑀫𑀸? 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑀁 𑀭𑀸𑀕𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀉𑀤𑁆𑀥𑀘𑁆𑀘𑀸𑀦𑀁 𑀢𑁂𑀦 𑀢𑁂𑀦 𑀧𑀳𑀸𑀢𑀩𑁆𑀩𑀪𑀸𑀯𑀯𑀲𑁂𑀦 𑀇𑀘𑁆𑀙𑀺𑀢𑀢𑁆𑀢𑀸. 𑀬𑀜𑁆𑀘 ‘‘𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀉𑀤𑁆𑀥𑀘𑁆𑀘𑀲𑁆𑀲 𑀅𑀦𑀼𑀤𑁆𑀥𑀭𑀡𑀁 𑀓𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀅𑀓𑀸𑀭𑀡𑀁 𑀅𑀜𑁆𑀜𑀢𑁆𑀣𑀸𑀧𑀺 𑀲𑀸𑀯𑀲𑁂𑀲𑀧𑀸𑀞𑀸𑀦𑀁 𑀤𑀲𑁆𑀲𑀦𑀢𑁄. 𑀢𑀣𑀸 𑀳𑀺 ‘‘𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲, 𑀅𑀦𑀸𑀕𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁂𑀲𑀁 𑀯𑀺𑀪𑀗𑁆𑀕𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀕𑁆𑀕𑀳𑀡𑀁 𑀓𑀢𑁆𑀯𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺 𑀇𑀫𑀲𑁆𑀲 𑀯𑀺𑀪𑀗𑁆𑀕𑁂 𑀮𑀩𑁆𑀪𑀫𑀸𑀦𑀫𑁆𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀦 𑀕𑀳𑀺𑀢𑀁. 𑀬𑀫𑁆𑀧𑀺 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀲𑁆𑀲 𑀯𑀺𑀧𑀸𑀓𑀤𑀸𑀦𑀫𑁆𑀳𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀲𑁆𑀲 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 𑀓𑀺𑀁 𑀅𑀯𑀺𑀚𑁆𑀚𑀸𑀤𑀺 𑀯𑀺𑀬 𑀤𑀸𑀦𑀲𑀻𑀮𑀸𑀤𑀻𑀦𑀁 𑀉𑀧𑀧𑀢𑁆𑀢𑀺𑀬𑀁𑀬𑁂𑀯 𑀯𑀺𑀧𑀸𑀓𑀤𑀸𑀦𑀲𑀸𑀫𑀢𑁆𑀣𑀺𑀬𑀸 𑀞𑀸𑀦𑀯𑀲𑁂𑀦 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀦𑀁 𑀲𑀳𑀓𑀸𑀭𑀻𑀓𑀸𑀭𑀡𑀁 𑀳𑁄𑀢𑀺, 𑀉𑀤𑀸𑀳𑀼 𑀓𑀺𑀮𑁂𑀲𑁄 𑀯𑀺𑀬 𑀓𑀫𑁆𑀫𑀲𑁆𑀲 𑀧𑀝𑀺𑀲𑀦𑁆𑀥𑀺𑀤𑀸𑀦𑀫𑁆𑀳𑀻𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀧𑀼𑀭𑀺𑀫𑁄 𑀦𑀬𑁄, 𑀲𑁂𑀔𑀲𑀦𑁆𑀢𑀸𑀦𑁂 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀲𑁆𑀲 𑀅𑀓𑀺𑀭𑀺𑀬𑀸𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀧𑀳𑀻𑀦𑀸𑀯𑀺𑀚𑁆𑀚𑀸𑀫𑀸𑀦𑀢𑀡𑁆𑀳𑀸𑀦𑀼𑀲𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀤𑀸𑀦𑀸𑀤𑀺 𑀯𑀺𑀬 𑀲𑀳𑀸𑀬𑀯𑁂𑀓𑀮𑁆𑀮𑁂𑀦 𑀅𑀯𑀺𑀧𑀸𑀓𑀲𑀪𑀸𑀯𑀢𑀁 𑀆𑀧𑀦𑁆𑀦𑀢𑁆𑀢𑀸. 𑀅𑀣 𑀤𑀼𑀢𑀺𑀬𑁄, 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀢𑁆𑀢𑁂𑀦 𑀅𑀪𑀺𑀫𑀢𑀲𑁆𑀲𑀸𑀧𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀧𑀝𑀺𑀲𑀦𑁆𑀥𑀺𑀤𑀸𑀦𑁂 𑀲𑀢𑀺 𑀅𑀧𑀸𑀬𑀕𑀫𑀦𑀻𑀬𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀯𑀺𑀧𑀸𑀓𑀤𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀦 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀯𑀘𑀦𑀁. 𑀧𑀝𑁆𑀞𑀸𑀦𑀸𑀦𑀼𑀲𑀸𑀭𑀻𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺.

𑁫𑁩𑁭-𑁮. 𑀬𑀦𑁆𑀢𑀺 𑀬𑀁 𑀆𑀯𑀚𑁆𑀚𑀦𑀤𑁆𑀯𑀬𑀁. 𑀓𑀭𑀡𑀫𑀢𑁆𑀢𑀢𑁆𑀢𑀸𑀢𑀺 𑀓𑀭𑀡𑀫𑀢𑁆𑀢𑀫𑁂𑀯 𑀞𑀧𑁂𑀢𑁆𑀯𑀸 𑀨𑀮𑀤𑀸𑀦𑀸𑀪𑀸𑀯𑀢𑁄. 𑀯𑀸𑀢𑀧𑀼𑀧𑁆𑀨𑀲𑀫𑀦𑁆𑀢𑀺 𑀫𑁄𑀖𑀧𑀼𑀧𑁆𑀨𑀲𑀫𑀁, 𑀬𑀣𑀸 𑀢𑀁 𑀧𑀞𑀫𑀲𑀜𑁆𑀚𑀸𑀢𑀁 𑀅𑀘𑁆𑀙𑀺𑀦𑁆𑀦𑀫𑀽𑀮𑁂𑀧𑀺 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀁 𑀧𑀼𑀭𑀺𑀫𑁂𑀳𑀺 𑀅𑀤𑀺𑀦𑁆𑀦𑀨𑀮𑀢𑁆𑀢𑀸 𑀨𑀮𑀦𑀺𑀩𑁆𑀩𑀢𑁆𑀢𑀓𑀁 𑀦 𑀳𑁄𑀢𑀺, 𑀏𑀯𑀫𑀺𑀤𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑁂𑀧𑀺 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀁 𑀅𑀦𑀸𑀲𑁂𑀯𑀦𑀪𑀸𑀯𑁂𑀦 𑀨𑀮𑀤𑀸𑀬𑀓𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀚𑀯𑀦𑀢𑁆𑀢𑀁 𑀢𑀼 𑀲𑀫𑁆𑀧𑀢𑁆𑀢𑀦𑁆𑀢𑀺 𑀅𑀝𑁆𑀞𑀸𑀭𑀲𑀯𑀺𑀥𑀁 𑀔𑀻𑀡𑀸𑀲𑀯𑀸𑀯𑁂𑀡𑀺𑀓𑀁 𑀯𑀺𑀜𑁆𑀜𑀸𑀡𑀫𑀸𑀳. 𑀓𑀺𑀘𑁆𑀘𑀲𑀸𑀥𑀦𑀢𑁄𑀢𑀺 𑀪𑀯𑀢𑀡𑁆𑀳𑀸𑀫𑀽𑀮𑀲𑁆𑀲 𑀅𑀯𑁄𑀘𑁆𑀙𑀺𑀦𑁆𑀦𑀪𑀸𑀯𑁂 𑀲𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀓𑀺𑀘𑁆𑀘𑀲𑁆𑀲 𑀲𑀸𑀥𑀦𑀢𑁄, 𑀤𑀸𑀦𑀸𑀤𑀺𑀢𑀁𑀢𑀁𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀳𑀺 𑀙𑀺𑀦𑁆𑀦𑀫𑀽𑀮𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀼𑀧𑁆𑀨𑀁 𑀧𑀼𑀧𑁆𑀨𑀦𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀨𑀮𑀫𑁂𑀯 𑀳𑁄𑀢𑀺, 𑀏𑀯𑀫𑁂𑀢𑀫𑁆𑀧𑀺 𑀢𑀁𑀢𑀁𑀓𑀺𑀘𑁆𑀘𑀲𑀸𑀥𑀦𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀫𑀼𑀘𑁆𑀙𑀺𑀦𑁆𑀦𑀪𑀯𑀢𑀡𑁆𑀳𑀸𑀫𑀽𑀮𑁂 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀦𑀢𑁄 𑀅𑀨𑀮𑀫𑁂𑀯𑀸𑀢𑀺.

𑁫𑁩𑁯-𑁪𑁦. 𑀧𑀝𑀺𑀘𑁆𑀘𑀸𑀢𑀺 𑀳𑁂𑀢𑀼𑀥𑀫𑁆𑀫𑀲𑁆𑀲 𑀧𑀝𑀺𑀫𑀼𑀔𑀁 𑀕𑀦𑁆𑀢𑁆𑀯𑀸 𑀢𑀁 𑀅𑀧𑀘𑁆𑀘𑀓𑁆𑀔𑀸𑀬. 𑀏𑀢𑀻𑀢𑀺 𑀧𑀯𑀢𑁆𑀢𑀢𑀺, 𑀢𑀺𑀝𑁆𑀞𑀢𑀺 𑀉𑀧𑁆𑀧𑀚𑁆𑀚𑀢𑀺 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀏𑀢𑀻’’𑀢𑀺 𑀳𑀺 𑀇𑀤𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀺𑀢𑀻𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑀓𑀁. 𑀢𑁂𑀦𑁂𑀯𑀸𑀳 ‘‘𑀞𑀺𑀢𑀺𑀬𑀼𑀧𑁆𑀧𑀢𑁆𑀢𑀺𑀬𑀸𑀧𑀺 𑀯𑀸’’𑀢𑀺. 𑀏𑀓𑀘𑁆𑀘𑁄 𑀳𑀺 𑀧𑀘𑁆𑀘𑀬𑁄 𑀞𑀺𑀢𑀺𑀬𑀸 𑀏𑀯 𑀉𑀧𑀓𑀸𑀭𑀓𑁄 𑀳𑁄𑀢𑀺 𑀬𑀣𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄, 𑀏𑀓𑀘𑁆𑀘𑁄 𑀉𑀧𑁆𑀧𑀢𑁆𑀢𑀺𑀬𑀸 𑀏𑀯 𑀬𑀣𑀸 𑀅𑀦𑀦𑁆𑀢𑀭𑀸𑀤𑀺𑀓𑁄, 𑀏𑀓𑀘𑁆𑀘𑁄 𑀉𑀪𑀬𑀲𑁆𑀲 𑀬𑀣𑀸 𑀳𑁂𑀢𑀼𑀆𑀤𑀬𑁄. 𑀏𑀯𑀁 𑀧𑀘𑁆𑀘𑀬-𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀘𑁆𑀘𑀬𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀥𑀫𑁆𑀫𑁄’’𑀢𑀺𑀆𑀤𑀺. 𑀬𑁄𑀢𑀺 𑀳𑁂𑀢𑀼𑀥𑀫𑁆𑀫𑁄. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀨𑀮𑀥𑀫𑁆𑀫𑀲𑁆𑀲. 𑀞𑀺𑀢𑀺𑀬𑀼𑀧𑁆𑀧𑀢𑁆𑀢𑀺𑀬𑀸𑀧𑀺 𑀯𑀸𑀢𑀺 𑀞𑀺𑀢𑀺𑀢𑁆𑀣𑀁, 𑀉𑀧𑁆𑀧𑀢𑁆𑀢𑀺𑀢𑁆𑀣𑀁 𑀯𑀸. 𑀞𑀺𑀢𑀺𑀬𑀸𑀢𑀺 𑀯𑀸 𑀞𑀺𑀢𑀺𑀓𑁆𑀔𑀡𑁂, 𑀉𑀧𑁆𑀧𑀢𑁆𑀢𑀺𑀬𑀸𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑁂. 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀓𑀸𑀭𑁄, 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. ‘‘𑀉𑀧𑀓𑀸𑀭𑁄’’𑀢𑀺 𑀇𑀫𑀺𑀦𑀸 𑀥𑀫𑁆𑀫𑁂𑀦 𑀥𑀫𑁆𑀫𑀲𑀢𑁆𑀢𑀺𑀉𑀧𑀓𑀸𑀭𑀓𑀁 𑀤𑀲𑁆𑀲𑁂𑀢𑀺. ‘‘𑀲𑀫𑁆𑀪𑀯𑁄’’𑀢𑀺𑀆𑀤𑀺 𑀧𑀘𑁆𑀘𑀬𑀲𑁆𑀲𑁂𑀯 𑀧𑀭𑀺𑀬𑀸𑀬𑀤𑀲𑁆𑀲𑀦𑀁. 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄. 𑀢𑀣𑀸 𑀧𑀪𑀯𑁄. 𑀳𑀺𑀦𑁄𑀢𑀺 𑀧𑀢𑀺𑀝𑁆𑀞𑀸𑀢𑀺 𑀏𑀢𑁆𑀣𑀸𑀢𑀺 𑀳𑁂𑀢𑀼. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦𑀁 𑀳𑀺-𑀲𑀤𑁆𑀤𑁄 𑀫𑀽𑀮-𑀲𑀤𑁆𑀤𑁄 𑀯𑀺𑀬 𑀧𑀢𑀺𑀝𑁆𑀞𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀳𑀺𑀦𑁄𑀢𑀺 𑀯𑀸 𑀏𑀢𑁂𑀦 𑀓𑀫𑁆𑀫𑀦𑀺𑀤𑀸𑀦𑀪𑀽𑀢𑁂𑀦 𑀉𑀤𑁆𑀥𑀁 𑀑𑀚𑀁 𑀅𑀪𑀺𑀳𑀭𑀦𑁆𑀢𑁂𑀦 𑀫𑀽𑀮𑁂𑀦 𑀯𑀺𑀬 𑀧𑀸𑀤𑀧𑁄 𑀢𑀧𑁆𑀧𑀘𑁆𑀘𑀬𑀁 𑀨𑀮𑀁 𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀆𑀧𑀚𑁆𑀚𑀢𑀻𑀢𑀺 𑀳𑁂𑀢𑀼. 𑀅𑀢𑁆𑀢𑀦𑁄 𑀨𑀮𑀁 𑀓𑀭𑁄𑀢𑀻𑀢𑀺 𑀓𑀸𑀭𑀡𑀁. 𑀧𑀘𑁆𑀘𑀬𑁄 𑀫𑀢𑁄𑀢𑀺 𑀧𑀘𑁆𑀘𑀬𑁄𑀯 ‘‘𑀲𑀫𑁆𑀪𑀯𑁄’’𑀢𑀺𑀆𑀤𑀺𑀢𑁄 𑀫𑀢𑁄. 𑀅𑀢𑁆𑀣𑀢𑁄 𑀏𑀢𑁂 𑀲𑀫𑀸𑀦𑀸, 𑀩𑁆𑀬𑀜𑁆𑀚𑀦𑀫𑀢𑁆𑀢𑀁𑀬𑁂𑀯 𑀦𑁂𑀲𑀁 𑀦𑀸𑀦𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁪𑁧-𑁫. 𑀏𑀯𑀁 𑀧𑀝𑁆𑀞𑀸𑀦𑁂 𑀆𑀕𑀢𑀲𑀩𑁆𑀩𑀧𑀘𑁆𑀘𑀬𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀲𑁆𑀲𑁂𑀯 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀪𑀸𑀤𑀺 𑀧𑀦 𑀬𑁄 𑀥𑀫𑁆𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀽𑀮𑀝𑁆𑀞𑁂𑀦𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀲𑀗𑁆𑀔𑀸𑀢𑀫𑀽𑀮𑀝𑁆𑀞𑁂𑀦. 𑀙𑀴𑁂𑀯𑀸𑀢𑀺 𑀫𑀽𑀮𑀝𑁆𑀞𑁂𑀦𑀽𑀧𑀓𑀸𑀭𑀓𑀪𑀸𑀯𑀲𑁆𑀲 𑀢𑁂𑀲𑀫𑁂𑀯 𑀆𑀯𑁂𑀡𑀺𑀓𑀪𑀸𑀯𑁂𑀦 𑀏𑀢𑁂 𑀙𑀴𑁂𑀯. 𑀚𑀸𑀢𑀺𑀢𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀚𑀸𑀢𑀺𑀢𑁄. 𑀦𑀯𑀥𑀸𑀢𑀺 𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽𑀢𑀺 𑀦𑀯𑀥𑀸. 𑀥𑀫𑁆𑀫𑀸𑀦𑀁…𑀧𑁂… 𑀲𑀸𑀥𑀓𑁄𑀢𑀺 𑀬𑀣𑀸 𑀲𑀸𑀮𑀺𑀯𑀻𑀳𑀺𑀩𑀻𑀚𑀸𑀤𑀻𑀦𑀺 𑀲𑀸𑀮𑀺𑀯𑀻𑀳𑀺𑀆𑀤𑀺𑀪𑀸𑀯𑀲𑁆𑀲 𑀲𑀸𑀥𑀓𑀸𑀦𑀺, 𑀫𑀡𑀺𑀆𑀤𑀺𑀧𑀪𑀸𑀯𑀢𑁆𑀣𑀽𑀦𑀜𑁆𑀘 𑀦𑀻𑀮𑀸𑀤𑀺𑀯𑀡𑁆𑀡𑀸𑀦𑀺 𑀦𑀻𑀮𑀸𑀤𑀺𑀫𑀡𑀺𑀧𑀪𑀸𑀬 𑀲𑀸𑀥𑀓𑀸𑀦𑀺, 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬𑁄 𑀬𑀣𑀸𑀭𑀳𑀁 𑀅𑀢𑁆𑀢𑀦𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀓𑀼𑀲𑀮𑀸𑀤𑀺𑀢𑁆𑀢𑀲𑀸𑀥𑀓𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀁 𑀬𑀣𑀸𑀓𑁆𑀓𑀫𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀪𑀸𑀯𑀲𑀸𑀥𑀓𑁄 𑀫𑀽𑀮𑀝𑁆𑀞𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀏𑀓𑁂 𑀆𑀘𑀭𑀺𑀬𑀸𑀢𑀺 𑀭𑁂𑀯𑀢𑀸𑀘𑀭𑀺𑀬𑀁, 𑀢𑀲𑁆𑀲 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑁂 𑀘 𑀲𑀦𑁆𑀥𑀸𑀬𑀸𑀳. 𑀅𑀣 𑀯𑀸 𑀕𑀭𑀼𑀫𑁆𑀳𑀺 𑀩𑀳𑀼𑀯𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑀻𑀢𑀺 𑀭𑁂𑀯𑀢𑀸𑀘𑀭𑀺𑀬𑀫𑁂𑀯 𑀲𑀦𑁆𑀥𑀸𑀬 ‘‘𑀏𑀓𑁂 𑀆𑀘𑀭𑀺𑀬𑀸’’𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀲𑀦𑁆𑀢𑁂𑀢𑀺 𑀬𑀤𑀺 𑀫𑀽𑀮𑀝𑁆𑀞𑁄 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀓𑁄, 𑀏𑀯𑀁 𑀲𑀢𑀺. 𑀬𑀣𑀸 𑀘𑀺𑀢𑁆𑀢𑀁 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀏𑀯𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀻𑀢𑀺 𑀆𑀳 ‘‘𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀺𑀲𑀽’’𑀢𑀺, 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑀽𑀢𑀺 𑀅𑀢𑁆𑀣𑁄. 𑀦𑁂𑀯 𑀲𑀫𑁆𑀧𑀚𑁆𑀚𑀢𑀻𑀢𑀺 𑀦 𑀲𑀺𑀚𑁆𑀛𑀢𑀺, ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑁄 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁄 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀓𑀼𑀲𑀮𑀸𑀓𑀼𑀲𑀮𑀸 𑀳𑁂𑀢𑀽 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀓𑀼𑀲𑀮𑀸𑀤𑀺𑀪𑀸𑀯𑀸𑀬 𑀦 𑀧𑀭𑀺𑀬𑀢𑁆𑀢𑀸, 𑀏𑀯𑀁 𑀅𑀩𑁆𑀬𑀸𑀓𑀢𑁄𑀧𑀺 𑀳𑁂𑀢𑀼 𑀢𑀁𑀲𑀫𑀼𑀝𑁆𑀞𑀸𑀦𑀲𑁆𑀲 𑀭𑀽𑀧𑀲𑁆𑀲 𑀅𑀩𑁆𑀬𑀸𑀓𑀢𑀪𑀸𑀯𑀸𑀬 𑀦 𑀧𑀭𑀺𑀬𑀢𑁆𑀢𑁄. 𑀲𑀪𑀸𑀯𑁂𑀦 𑀳𑀺 𑀢𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀬𑀤𑀺 𑀓𑀼𑀲𑀮𑀸𑀤𑀺𑀪𑀸𑀯𑀁 𑀦 𑀲𑀸𑀥𑁂𑀦𑁆𑀢𑀺, 𑀧𑀘𑁆𑀘𑀬𑀸𑀧𑀺 𑀦 𑀳𑁄𑀦𑁆𑀢𑀻𑀢𑀺 𑀯𑀤𑁂𑀬𑁆𑀬𑀸𑀢𑀺 𑀆𑀳 ‘‘𑀦 𑀢𑁂𑀲’’𑀦𑁆𑀢𑀺𑀆𑀤𑀺. ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧) 𑀯𑀘𑀦𑀢𑁄 𑀢𑁂 𑀅𑀮𑁄𑀪𑀸𑀤𑀬𑁄 𑀢𑁂𑀲𑀁 𑀭𑀽𑀧𑀸𑀦𑀁 𑀧𑀘𑁆𑀘𑀬𑀸 𑀦 𑀦 𑀳𑁄𑀦𑁆𑀢𑀺, 𑀪𑀯𑀦𑁆𑀢𑁂𑀯𑀸𑀢𑀺 𑀅𑀢𑁆𑀣𑁄.

𑁫𑁪𑁬-𑁭. 𑀦 𑀕𑀦𑁆𑀢𑀩𑁆𑀩𑁄𑀢𑀺 𑀦 𑀧𑀘𑁆𑀘𑁂𑀢𑀩𑁆𑀩𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺 𑀓𑀼𑀲𑀮𑀸𑀤𑀺𑀳𑁂𑀢𑀼𑀬𑁄 𑀅𑀢𑁆𑀢𑀦𑁄 𑀯𑀺𑀬 𑀅𑀢𑁆𑀢𑀳𑁂𑀢𑀼𑀓𑀸𑀦𑀁 𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀁 𑀲𑀸𑀥𑁂𑀦𑁆𑀢𑀺, 𑀓𑀼𑀲𑀮𑀸𑀓𑀼𑀲𑀮𑀳𑁂𑀢𑀼𑀧𑀘𑁆𑀘𑀬𑀲𑀫𑁆𑀪𑀽𑀢𑀸 𑀭𑀽𑀧𑀥𑀫𑁆𑀫𑀸𑀧𑀺 𑀢𑁂 𑀯𑀺𑀬 𑀓𑀼𑀲𑀮𑀸𑀤𑀬𑁄 𑀲𑀺𑀬𑀼𑀁, 𑀳𑁂𑀢𑀼𑀬𑁄 𑀯𑀸 𑀭𑀽𑀧𑀸𑀦𑀁 𑀧𑀘𑁆𑀘𑀬𑀸 𑀦 𑀲𑀺𑀬𑀼𑀁, 𑀦 𑀘 𑀧𑀦𑁂𑀢𑀁 𑀉𑀪𑀬𑀫𑁆𑀧𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀓𑀼𑀲𑀮𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀓𑁄 𑀫𑀽𑀮𑀝𑁆𑀞𑁄𑀢𑀺 𑀦 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺. 𑀅𑀧𑀺𑀘 𑀬𑀤𑀺 𑀳𑁂𑀢𑀼𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀢𑀤𑀸 𑀅𑀩𑁆𑀬𑀸𑀓𑀢𑀪𑀸𑀯𑁄𑀧𑀺 𑀢𑀧𑁆𑀧𑀝𑀺𑀩𑀤𑁆𑀥𑁄 𑀲𑀺𑀬𑀸, 𑀅𑀳𑁂𑀢𑀼𑀓𑀸𑀦𑀁 𑀅𑀩𑁆𑀬𑀸𑀓𑀢𑀪𑀸𑀯𑁄 𑀦 𑀲𑀺𑀚𑁆𑀛𑀢𑀺. 𑀬𑀤𑀺 𑀘 𑀳𑁂𑀢𑀼𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀳𑁂𑀢𑀽𑀦𑀫𑁆𑀧𑀺 𑀓𑀼𑀲𑀮𑀸𑀤𑀺𑀪𑀸𑀯𑁄 𑀅𑀧𑁆𑀧𑀝𑀺𑀩𑀤𑁆𑀥𑁄 𑀲𑀺𑀬𑀸. 𑀅𑀣 𑀢𑁂𑀲𑀫𑁆𑀧𑀺 𑀲𑁂𑀲𑀳𑁂𑀢𑀼𑀧𑀝𑀺𑀩𑀤𑁆𑀥𑁄, 𑀏𑀯𑀫𑁆𑀧𑀺 𑀫𑁄𑀫𑀽𑀳𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀳𑁂𑀢𑀼𑀦𑁄 𑀅𑀓𑀼𑀲𑀮𑀪𑀸𑀯𑁄 𑀦 𑀲𑀺𑀚𑁆𑀛𑁂𑀬𑁆𑀬. 𑀅𑀣 𑀢𑀲𑁆𑀲 𑀲𑁄 𑀅𑀜𑁆𑀜𑀳𑁂𑀢𑀼𑀓𑁄 𑀲𑀺𑀬𑀸, 𑀏𑀯𑀁 𑀲𑀢𑀺 𑀲𑁂𑀲𑀳𑁂𑀢𑀽𑀦𑀫𑁆𑀧𑀺 𑀢𑀁𑀳𑁂𑀢𑀼𑀓𑁄𑀯 𑀲𑀺𑀬𑀸. 𑀬𑀣𑀸 𑀘 𑀲𑁂𑀲𑀳𑁂𑀢𑀽𑀦𑀁, 𑀏𑀯𑀁 𑀅𑀯𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀢𑀁𑀳𑁂𑀢𑀼𑀓𑁄𑀯 𑀲𑀺𑀬𑀸. 𑀅𑀣 𑀲𑀺𑀬𑀸 𑀳𑁂𑀢𑀽𑀦𑀁 𑀲𑀪𑀸𑀯𑀢𑁄𑀯 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀦 𑀳𑁂𑀢𑀼𑀧𑀝𑀺𑀩𑀤𑁆𑀥𑁄𑀢𑀺, 𑀏𑀯𑀁 𑀲𑀢𑀺 𑀅𑀮𑁄𑀪𑁄 𑀓𑀼𑀲𑀮𑁄 𑀯𑀸 𑀲𑀺𑀬𑀸 𑀅𑀩𑁆𑀬𑀸𑀓𑀢𑁄 𑀯𑀸. 𑀬𑀤𑀺 𑀳𑀺 𑀲𑁄 𑀲𑀪𑀸𑀯𑀢𑁄 𑀓𑀼𑀲𑀮𑁄, 𑀢𑀁𑀲𑀪𑀸𑀯𑀢𑁆𑀢𑀸 𑀅𑀩𑁆𑀬𑀸𑀓𑀢𑁄 𑀦 𑀲𑀺𑀬𑀸. 𑀅𑀣 𑀅𑀩𑁆𑀬𑀸𑀓𑀢𑁄, 𑀢𑀁𑀲𑀪𑀸𑀯𑀢𑁆𑀢𑀸 𑀓𑀼𑀲𑀮𑁄 𑀦 𑀲𑀺𑀬𑀸 𑀅𑀮𑁄𑀪𑀲𑀪𑀸𑀯𑀲𑁆𑀲 𑀅𑀤𑁄𑀲𑀢𑁆𑀢𑀸𑀪𑀸𑀯𑁄 𑀯𑀺𑀬. 𑀬𑀲𑁆𑀫𑀸 𑀧𑀦 𑀉𑀪𑀬𑀣𑀸𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸 𑀉𑀪𑀬𑀣𑀸 𑀳𑁄𑀦𑁆𑀢𑁂𑀲𑀼 𑀲𑀤𑁆𑀥𑀸𑀤𑀻𑀲𑀼 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀳𑁂𑀢𑀼𑀧𑀝𑀺𑀩𑀤𑁆𑀥𑀁 𑀓𑀼𑀲𑀮𑀸𑀤𑀺𑀪𑀸𑀯𑀁 𑀧𑀭𑀺𑀬𑁂𑀲𑀣, 𑀦 𑀲𑀪𑀸𑀯𑀢𑁄, 𑀏𑀯𑀁 𑀳𑁂𑀢𑀽𑀲𑀼𑀧𑀺 𑀓𑀼𑀲𑀮𑀸𑀤𑀺𑀢𑀸 𑀅𑀜𑁆𑀜𑀧𑀝𑀺𑀩𑀤𑁆𑀥𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸, 𑀦 𑀲𑀪𑀸𑀯𑀢𑁄. 𑀲𑀸 𑀧𑀦 𑀧𑀭𑀺𑀬𑁂𑀲𑀺𑀬𑀫𑀸𑀦𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑀸 𑀳𑁄𑀢𑀻𑀢𑀺 𑀳𑁂𑀢𑀽𑀲𑀼 𑀯𑀺𑀬 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀦 𑀳𑁂𑀢𑀼𑀧𑀝𑀺𑀩𑀤𑁆𑀥𑁄𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺 𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁧.𑁬𑁭).

𑀲𑀫𑀬𑀜𑁆𑀜𑀼𑀦𑀸𑀢𑀺 𑀆𑀪𑀺𑀥𑀫𑁆𑀫𑀺𑀓𑀫𑀢𑀯𑁂𑀤𑀺𑀦𑀸. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑁆𑀲 𑀲𑀸𑀥𑀦𑁂𑀦𑀸𑀢𑀺 𑀅𑀢𑁆𑀢𑀳𑁂𑀢𑀼𑀓𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑁆𑀫𑀸 𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑁆𑀲 𑀣𑀺𑀭𑀪𑀸𑀯𑀲𑁆𑀲 𑀲𑀸𑀥𑀦𑁂𑀦. 𑀮𑀤𑁆𑀥𑀳𑁂𑀢𑀼𑀧𑀘𑁆𑀘𑀬𑀸 𑀳𑀺 𑀥𑀫𑁆𑀫𑀸 𑀯𑀺𑀭𑀼𑀴𑁆𑀳𑀫𑀽𑀮𑀸 𑀯𑀺𑀬 𑀧𑀸𑀤𑀧𑀸 𑀣𑀺𑀭𑀸 𑀳𑁄𑀦𑁆𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸, 𑀅𑀳𑁂𑀢𑀼𑀓𑀸 𑀢𑀺𑀮𑀩𑀻𑀚𑀸𑀤𑀺𑀲𑁂𑀯𑀸𑀮𑀸 𑀯𑀺𑀬 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸𑀢𑀺.

𑁫𑁪𑁮. 𑀲𑀩𑁆𑀩𑀲𑁄𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀲𑀩𑁆𑀩𑀪𑀸𑀕𑁂𑀦.

𑁫𑁫𑁦-𑁧. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀅𑀪𑀸𑀯𑀢𑁄 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁, 𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁂𑀯 𑀘 𑀧𑀘𑁆𑀘𑀬𑀪𑀸𑀯𑁄𑀢𑀺 𑀆𑀳 ‘‘𑀅𑀢𑁆𑀢𑀦𑀸…𑀧𑁂… 𑀚𑀸𑀢𑀸𑀦’’𑀦𑁆𑀢𑀺. 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀏𑀯 𑀘 𑀉𑀧𑀘𑀺𑀢𑀢𑁆𑀢𑀸 𑀘 𑀦 𑀇𑀲𑁆𑀲𑀭𑀸𑀤𑀺𑀳𑁂𑀢𑀼𑀦𑁄 𑀲𑀫𑁆𑀪𑀽𑀢𑀸𑀦𑀺 𑀭𑀽𑀧𑀸𑀦𑀺 𑀓𑀝𑀢𑁆𑀢𑀸𑀭𑀽𑀧𑀸𑀦𑀺, 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀻𑀢𑀺 𑀅𑀢𑁆𑀣𑁄, 𑀓𑀝𑀢𑁆𑀢𑀸𑀭𑀽𑀧𑀸𑀦𑁂𑀯 𑀚𑀸𑀢𑀸𑀦𑀺 𑀪𑀽𑀢𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀻𑀢𑀺 𑀓𑀝𑀢𑁆𑀢𑀸𑀭𑀽𑀧𑀚𑀸𑀢𑀸𑀦𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀏𑀯𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀚𑀸𑀦𑀜𑁆𑀘𑀸𑀢𑀺 𑀘-𑀲𑀤𑁆𑀤𑁂𑀦 ‘‘𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦’’𑀦𑁆𑀢𑀺 𑀆𑀓𑀟𑁆𑀠𑀢𑀺.

𑁫𑁫𑁩. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄 𑀦𑀢𑁆𑀣𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁄𑀢𑀺 𑀆𑀳 ‘‘𑀘𑀺𑀢𑁆𑀢𑀚𑀸𑀦’’𑀦𑁆𑀢𑀺𑀆𑀤𑀺.

𑁫𑁫𑁫. 𑀳𑁂𑀢𑀼𑀧𑀘𑁆𑀘𑀬𑀲𑀫𑁆𑀪𑀯𑁄𑀢𑀺 𑀳𑁂𑀢𑀼𑀧𑀘𑁆𑀘𑀬𑀲𑀫𑁆𑀪𑀽𑀢𑀥𑀫𑁆𑀫𑁄, 𑀳𑁂𑀢𑀼𑀧𑀘𑁆𑀘𑀬𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀲𑀫𑁆𑀪𑀯𑀸𑀓𑀸𑀭𑁄 𑀯𑀸. 𑀲𑀜𑁆𑀚𑀸𑀢𑀲𑀼𑀔𑀳𑁂𑀢𑀼𑀦𑀸𑀢𑀺 𑀲𑀜𑁆𑀚𑀸𑀢𑀜𑀸𑀡𑁂𑀦, 𑀲𑀫𑁆𑀧𑀚𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. 𑀜𑀸𑀡𑀜𑁆𑀳𑀺 ‘‘𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀲𑀼𑀔𑀁 𑀳𑁂𑀢𑀼 𑀏𑀢𑀲𑁆𑀲𑀸𑀢𑀺,

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄,

𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄,

𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁨𑁯) 𑁋

𑀆𑀤𑀺𑀯𑀘𑀦𑀢𑁄 𑀲𑀼𑀔𑀲𑁆𑀲 𑀳𑁂𑀢𑀽𑀢𑀺 𑀯𑀸 ‘‘𑀲𑀼𑀔𑀳𑁂𑀢𑀽’’𑀢𑀺 𑀯𑀼𑀘𑁆𑀘𑀢𑀺.

𑁫𑁫𑁬. 𑀮𑁄𑀓𑀲𑁆𑀲 𑀅𑀥𑀺𑀧𑀢𑀺 𑀮𑁄𑀓𑀸𑀥𑀺𑀧𑀢𑀺, 𑀲𑀓𑀮𑀮𑁄𑀓𑀦𑀸𑀬𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸𑀥𑀻𑀦𑀸𑀦𑀁 𑀧𑀢𑀺𑀦𑁄𑀢𑀺 𑀅𑀥𑀺𑀧𑀢𑀻. 𑀙𑀦𑁆𑀤𑀁 𑀢𑀼 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸𑀢𑀺 ‘‘𑀙𑀦𑁆𑀤𑀯𑀢𑁄 𑀓𑀺𑀁 𑀦𑀸𑀫 𑀦 𑀲𑀺𑀚𑁆𑀛𑀢𑀻’’𑀢𑀺𑀆𑀤𑀺𑀓𑀁 𑀧𑀼𑀭𑀺𑀫𑀸𑀪𑀺𑀲𑀗𑁆𑀔𑀸𑀭𑀽𑀧𑀦𑀺𑀲𑁆𑀲𑀬𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀙𑀦𑁆𑀤𑁄 𑀚𑁂𑀝𑁆𑀞𑀓𑀪𑀽𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀯𑀲𑁂 𑀯𑀢𑁆𑀢𑀫𑀸𑀦𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀢𑀲𑁆𑀲 𑀯𑀲𑁂 𑀧𑀯𑀢𑁆𑀢𑀦𑁆𑀢𑀺 𑀳𑀻𑀦𑀸𑀤𑀺𑀪𑀸𑀯𑁂𑀦 𑀢𑀤𑀦𑀼𑀯𑀢𑁆𑀢𑀦𑀢𑁄𑀢𑀺 𑀆𑀳 ‘‘𑀙𑀦𑁆𑀤𑀁 𑀢𑀼 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀓𑀢𑁆𑀯𑀸 𑀥𑀼𑀭𑀦𑁆𑀢𑀺 𑀲𑀳𑀚𑀸𑀢𑀧𑀼𑀩𑁆𑀩𑀗𑁆𑀕𑀫𑀯𑀲𑁂𑀦 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸. 𑀙𑀦𑁆𑀤𑀸𑀥𑀺𑀧𑀢𑀺 𑀦𑀸𑀫 𑀲𑁄 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀙𑀦𑁆𑀤𑀸𑀥𑀺𑀧𑀢𑀺 𑀦𑀸𑀫 ‘‘𑀙𑀦𑁆𑀤𑁄 𑀅𑀥𑀺𑀧𑀢𑀺 𑀇𑀫𑀲𑁆𑀲𑀸’’𑀢𑀺 𑀓𑀢𑁆𑀯𑀸. 𑀏𑀲𑁂𑀯𑀸𑀢𑀺 ‘‘𑀘𑀺𑀢𑁆𑀢𑀁 𑀥𑀼𑀭𑀁 𑀓𑀢𑁆𑀯𑀸…𑀧𑁂… 𑀓𑀸𑀮𑀲𑁆𑀫𑀺𑀁 𑀘𑀺𑀢𑁆𑀢𑀸𑀥𑀺𑀧𑀢𑀺 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑁄𑀯 𑀦𑀬𑁄. 𑀲𑁂𑀲𑁂𑀲𑀽𑀢𑀺 𑀘𑀺𑀢𑁆𑀢𑀸𑀤𑀻𑀲𑀼. 𑀏𑀢𑁆𑀣 𑀘 ‘‘𑀙𑀦𑁆𑀤𑀁…𑀧𑁂… 𑀓𑀸𑀮𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀮𑀲𑁆𑀲 𑀦𑀺𑀬𑀫𑀺𑀢𑀢𑁆𑀢𑀸 𑀘𑀢𑁆𑀢𑀸𑀭𑁄𑀧𑁂𑀢𑁂 𑀏𑀓𑀓𑁆𑀔𑀡𑁂 𑀅𑀥𑀺𑀧𑀢𑀻 𑀦 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑁆𑀞𑀸𑀦𑁂 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁩) 𑀘𑀢𑀼𑀦𑁆𑀦𑀫𑁆𑀧𑀺 𑀅𑀥𑀺𑀧𑀢𑀻𑀦𑀁 𑀧𑀘𑁆𑀘𑀬𑀪𑀸𑀯𑁄 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀉𑀤𑁆𑀥𑀝𑁄. 𑀬𑀤𑀺 𑀳𑀺 𑀢𑁂 𑀏𑀓𑀓𑁆𑀔𑀡𑁂𑀬𑁂𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀲𑀺𑀬𑀼𑀁, 𑀢𑀤𑀸 𑀬𑀣𑀸 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑀪𑀸𑀯𑀲𑁆𑀲 𑀯𑀺𑀚𑁆𑀚𑀫𑀸𑀦𑁂𑀦 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀫𑁆𑀧𑀺 𑀳𑁂𑀢𑀽𑀦𑀁 𑀏𑀓𑀓𑁆𑀔𑀡𑁂 𑀧𑀘𑁆𑀘𑀬𑀪𑀸𑀯𑀽𑀧𑀕𑀫𑀦𑀢𑁄, 𑀏𑀯𑀁 𑀏𑀓𑀓𑁆𑀔𑀡𑁂𑀬𑁂𑀯 𑀩𑀳𑀽𑀦𑀁 𑀚𑁂𑀝𑁆𑀞𑀓𑀪𑀸𑀯𑁂 𑀲𑀢𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂𑀧𑀺 ‘‘𑀅𑀥𑀺𑀧𑀢𑀻 𑀅𑀥𑀺𑀧𑀢𑀺𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀲𑁆𑀫𑀸 𑀧𑀦 𑀏𑀯𑀁 𑀅𑀯𑀢𑁆𑀯𑀸 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀘𑀢𑁆𑀢𑀸𑀭𑁄𑀯 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀏𑀓𑁂𑀓𑀥𑀫𑁆𑀫𑁄𑀬𑁂𑀯 𑀏𑀓𑀓𑁆𑀔𑀡𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀚𑁂𑀝𑁆𑀞𑀝𑁆𑀞𑁂𑀦𑀸𑀢𑀺 𑀧𑀫𑀼𑀔𑀪𑀸𑀯𑁂𑀦.

𑀲𑁄𑀪𑀦𑀸 𑀫𑀢𑀺, 𑀲𑁄𑀪𑀦𑀁 𑀯𑀸 𑀫𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀼𑀫𑀢𑀺𑀦𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸𑀢𑀺 𑀅𑀢𑁆𑀣𑁄, 𑀢𑁂𑀲𑀁 𑀫𑀢𑀺𑀁 𑀯𑀺𑀩𑁄𑀥𑁂𑀢𑀺 𑀧𑀩𑁄𑀥𑁂𑀢𑀻𑀢𑀺 𑀲𑀼𑀫𑀢𑀺𑀫𑀢𑀺𑀯𑀺𑀩𑁄𑀥𑀦𑀁. 𑀓𑀼𑀘𑁆𑀙𑀺𑀢𑀸 𑀫𑀢𑀺, 𑀓𑀼𑀘𑁆𑀙𑀺𑀢𑀁 𑀯𑀸 𑀫𑀢𑀁 𑀏𑀢𑁂𑀲𑀦𑁆𑀢𑀺 𑀓𑀼𑀫𑀢𑀺𑀦𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸, 𑀢𑁂𑀲𑀁 𑀫𑀢𑀺𑀪𑀽𑀢𑀸 𑀫𑀢𑀺𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑀺𑀢𑀢𑁆𑀢𑀸𑀢𑀺 𑀓𑀼𑀫𑀢𑀺𑀫𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀲𑀸𑀬𑁂𑀯 𑀇𑀦𑁆𑀥𑀦𑀲𑀤𑀺𑀲𑀢𑀸𑀬 𑀇𑀦𑁆𑀥𑀦𑀁 𑀢𑀲𑁆𑀲 𑀧𑀸𑀯𑀓𑀁 𑀅𑀕𑁆𑀕𑀺 𑀯𑀺𑀬𑀸𑀢𑀺 𑀓𑀼𑀫𑀢𑀺…𑀧𑁂… 𑀧𑀸𑀯𑀓𑀁. 𑀅𑀢𑀺𑀫𑀥𑀼𑀭𑀦𑁆𑀢𑀺 𑀦𑀺𑀧𑀼𑀡𑀕𑀫𑁆𑀪𑀻𑀭𑁂𑀦 𑀅𑀢𑁆𑀣𑀭𑀲𑁂𑀦 𑀘𑁂𑀯 𑀲𑀼𑀯𑀺𑀫𑀮𑀲𑀔𑀺𑀮𑁂𑀦 𑀩𑁆𑀬𑀜𑁆𑀚𑀦𑀭𑀲𑁂𑀦 𑀘 𑀫𑀥𑀼𑀭𑀁. 𑀅𑀯𑁂𑀤𑀻𑀢𑀺 𑀑𑀕𑀸𑀳𑁂𑀢𑁆𑀯𑀸 𑀚𑀸𑀦𑀸𑀢𑀺. 𑀬𑁄 𑀬𑁄𑀢𑀺 𑀣𑁂𑀭𑀦𑀯𑀫𑀚𑁆𑀛𑀺𑀫𑁂𑀲𑀼 𑀬𑁄 𑀓𑁄𑀘𑀺. 𑀚𑀺𑀦𑀯𑀘𑀦𑀁 𑀲𑀓𑀮𑀁 𑀅𑀯𑁂𑀤𑀻𑀢𑀺 𑀢𑁂𑀧𑀺𑀝𑀓𑀲𑁆𑀲𑀧𑀺 𑀲𑀓𑀮𑀚𑀺𑀦𑀯𑀘𑀦𑀲𑁆𑀲 𑀕𑀳𑀡𑀲𑀫𑀢𑁆𑀣𑀢𑀸𑀧𑀝𑀺𑀮𑀸𑀪𑁂𑀦 𑀢𑀁 𑀅𑀯𑀕𑀘𑁆𑀙𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.