𑁭. 𑀲𑀢𑁆𑀢𑀫𑁄 𑀧𑀭𑀺𑀘𑁆𑀙𑁂𑀤𑁄

𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁭𑁬. 𑀅𑀦𑀦𑁆𑀢𑀜𑀸𑀡𑁂𑀦𑀸𑀢𑀺 𑀅𑀦𑀦𑁆𑀢𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀜𑀸𑀡𑁂𑀦. 𑀦𑀺𑀭𑀗𑁆𑀕𑀡𑁂𑀦𑀸𑀢𑀺 𑀏𑀢𑁆𑀣 𑀭𑀸𑀕𑀸𑀤𑀬𑁄 𑀅𑀓𑀼𑀲𑀮𑀸 𑀅𑀗𑁆𑀕𑀦𑁆𑀢𑀺 𑀏𑀢𑁂𑀳𑀺 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀸 𑀦𑀺𑀳𑀻𑀦𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀗𑁆𑀕𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋

‘‘𑀭𑀸𑀕𑁄 𑀅𑀗𑁆𑀕𑀡𑀁, 𑀤𑁄𑀲𑁄 𑀅𑀗𑁆𑀕𑀡𑀁, 𑀫𑁄𑀳𑁄 𑀅𑀗𑁆𑀕𑀡𑀁, 𑀧𑀸𑀧𑀓𑀸𑀦𑀁 𑀔𑁄, 𑀆𑀯𑀼𑀲𑁄, 𑀅𑀓𑀼𑀲𑀮𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀥𑀺𑀯𑀘𑀦𑀁 𑀬𑀤𑀺𑀤𑀁 𑀅𑀗𑁆𑀕𑀡’’𑀦𑁆𑀢𑀺 𑀘 𑀆𑀤𑀺 (𑀯𑀺𑀪. 𑁯𑁨𑁪).

𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀲𑀻𑀮𑀸𑀤𑀺𑀕𑀼𑀡𑁂 𑀏𑀲𑀻 𑀕𑀯𑁂𑀲𑀻𑀢𑀺 𑀕𑀼𑀡𑁂𑀲𑀻, 𑀢𑁂𑀦 𑀕𑀼𑀡𑁂𑀲𑀺𑀦𑀸. 𑀓𑀭𑀼𑀡𑀸𑀬𑀁 𑀦𑀺𑀬𑀼𑀢𑁆𑀢𑁄, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀸 𑀓𑀸𑀭𑀼𑀡𑀺𑀓𑁄, 𑀢𑁂𑀦 𑀓𑀸𑀭𑀼𑀡𑀺𑀓𑁂𑀦. 𑀏𑀢𑁆𑀣 𑀘 ‘‘𑀅𑀦𑀦𑁆𑀢𑀜𑀸𑀡𑁂𑀦𑀸’’𑀢𑀺 𑀇𑀫𑀺𑀦𑀸 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀪𑀸𑀯𑀫𑀸𑀳, ‘‘𑀦𑀺𑀭𑀗𑁆𑀕𑀡𑁂𑀦𑀸’’𑀢𑀺 𑀔𑀻𑀡𑀸𑀲𑀯𑀪𑀸𑀯𑀁, ‘‘𑀕𑀼𑀡𑁂𑀲𑀺𑀦𑀸’’𑀢𑀺 𑀧𑀼𑀩𑁆𑀩𑀘𑀭𑀺𑀬𑀁, ‘‘𑀓𑀸𑀭𑀼𑀡𑀺𑀓𑁂𑀦𑀸’’𑀢𑀺 𑀫𑀳𑀸𑀓𑀭𑀼𑀡𑀸𑀲𑀫𑀗𑁆𑀕𑀺𑀪𑀸𑀯𑀁. 𑀏𑀢𑁆𑀢𑀓𑁂𑀦 𑀧𑀦 𑀣𑁄𑀫𑀦𑁂𑀦 𑀪𑀕𑀯𑀢𑁄 𑀯𑀺𑀧𑀸𑀓𑀤𑁂𑀲𑀦𑀸𑀬 𑀦𑀺𑀬𑁆𑀬𑀸𑀦𑀺𑀓𑀸𑀤𑀺𑀪𑀸𑀯𑀁 𑀤𑀻𑀧𑁂𑀢𑀺. 𑀅𑀲𑀩𑁆𑀩𑀜𑁆𑀜𑀼𑀦𑀸 𑀳𑀺 𑀤𑁂𑀲𑀺𑀢𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀳𑁄𑀢𑀺, 𑀅𑀔𑀻𑀡𑀸𑀲𑀯𑁂𑀦 𑀤𑁂𑀲𑀺𑀢𑀁 𑀦 𑀧𑀸𑀓𑀝𑀁, 𑀅𑀧𑀼𑀜𑁆𑀜𑀯𑀢𑀸 𑀤𑁂𑀲𑀺𑀢𑀁 𑀦𑀧𑁆𑀧𑀢𑀺𑀝𑁆𑀞𑀸𑀢𑀺, 𑀅𑀓𑀸𑀭𑀼𑀡𑀺𑀓𑁂𑀦 𑀯𑀼𑀢𑁆𑀢𑀁 𑀲𑀼𑀔𑀤𑀸𑀬𑀓𑀁 𑀦 𑀳𑁄𑀢𑀺. 𑀪𑀕𑀯𑀢𑁄 𑀧𑀦 𑀲𑀩𑁆𑀩𑀜𑁆𑀜𑀼𑀪𑀸𑀯𑀢𑁄 𑀢𑁂𑀦 𑀤𑁂𑀲𑀺𑀢𑀁 𑀦𑀺𑀬𑁆𑀬𑀸𑀦𑀺𑀓𑀁, 𑀔𑀻𑀡𑀸𑀲𑀯𑀢𑁆𑀢𑀸 𑀧𑀸𑀓𑀝𑀁, 𑀧𑀼𑀜𑁆𑀜𑀯𑀦𑁆𑀢𑀢𑀸𑀬 𑀧𑀢𑀺𑀝𑁆𑀞𑀸𑀢𑀺, 𑀫𑀳𑀸𑀓𑀭𑀼𑀡𑀸𑀲𑀫𑀗𑁆𑀕𑀺𑀢𑀸𑀬 𑀲𑀼𑀔𑀤𑀸𑀬𑀓𑀦𑁆𑀢𑀺. 𑀘𑀺𑀢𑁆𑀢𑀧𑁆𑀧𑀪𑀯𑀦𑁆𑀢𑀺 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀁.

𑁩𑁭𑁭-𑁮𑁬. 𑀇𑀤𑀸𑀦𑀺 𑀯𑀺𑀧𑀸𑀓𑀓𑀣𑀸𑀬 𑀫𑀸𑀢𑀺𑀓𑀸𑀯𑀲𑁂𑀦 𑀅𑀝𑁆𑀞𑀓𑀣𑀸𑀬 𑀞𑀧𑀺𑀢𑁂 𑀤𑀲𑀧𑁆𑀧𑀓𑀸𑀭𑁂 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀽𑀦𑀢𑀺𑀁𑀲 𑀓𑀫𑁆𑀫𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸𑀭𑀤𑁆𑀥𑀸𑀬 𑀯𑀺𑀧𑀸𑀓𑀓𑀣𑀸𑀬 𑀫𑀽𑀮𑀓𑀸𑀭𑀡𑀪𑀸𑀯𑀢𑁄 ‘‘𑀏𑀓𑀽𑀦𑀢𑀺𑀁𑀲 𑀓𑀫𑁆𑀫𑀸𑀦𑀻’’𑀢𑀺 𑀧𑀞𑀫𑀁 𑀓𑀫𑁆𑀫𑀯𑀯𑀢𑁆𑀣𑀸𑀦𑀁 𑀓𑀢𑀁. 𑀓𑀫𑁆𑀫𑁂 𑀧𑀦 𑀓𑀣𑀺𑀢𑁂 𑀯𑀺𑀧𑀸𑀓𑀓𑀣𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑀸 𑀯𑀺𑀧𑀸𑀓𑀸𑀧𑀺 𑀓𑀣𑁂𑀢𑀩𑁆𑀩𑀸𑀢𑀺 ‘‘𑀧𑀸𑀓𑀸 𑀤𑁆𑀯𑀢𑁆𑀢𑀺𑀁𑀲 𑀤𑀲𑁆𑀲𑀺𑀢𑀸’’𑀢𑀺 𑀤𑀼𑀢𑀺𑀬𑀁 𑀯𑀺𑀧𑀸𑀓𑀯𑀯𑀢𑁆𑀣𑀸𑀦𑀁 𑀓𑀢𑀁. 𑀓𑀫𑁆𑀫𑀯𑀺𑀧𑀸𑀓𑀸𑀦𑀜𑁆𑀘 𑀅𑀤𑁆𑀯𑀸𑀭𑁂𑀲𑀼 𑀅𑀤𑀺𑀲𑁆𑀲𑀦𑀢𑁄 ‘‘𑀢𑀻𑀲𑀼…𑀧𑁂… 𑀤𑀺𑀲𑁆𑀲𑀭𑁂’’𑀢𑀺 𑀢𑀢𑀺𑀬𑀁 𑀓𑀫𑁆𑀫𑀤𑁆𑀯𑀸𑀭𑀯𑀺𑀧𑀸𑀓𑀤𑁆𑀯𑀸𑀭𑀸 𑀯𑀼𑀢𑁆𑀢𑀸. 𑀓𑀫𑁆𑀫𑀯𑀺𑀧𑀸𑀓𑀸𑀦𑀁 𑀯𑀘𑀦𑀧𑁆𑀧𑀲𑀗𑁆𑀕𑁂𑀬𑁂𑀯 𑀏𑀓𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀢𑀁 𑀢𑀁 𑀧𑀘𑁆𑀘𑀬𑀫𑀸𑀕𑀫𑁆𑀫 𑀅𑀦𑁂𑀓𑀨𑀮𑀦𑀺𑀧𑁆𑀨𑀸𑀤𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀮𑀁…𑀧𑁂… 𑀯𑀺𑀯𑀺𑀥𑀁 𑀨𑀮’’𑀦𑁆𑀢𑀺 𑀘𑀢𑀼𑀢𑁆𑀣𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀻𑀲𑀼 𑀦𑀸𑀦𑀸𑀨𑀮𑀦𑀺𑀧𑁆𑀨𑀸𑀤𑀦𑀁 𑀯𑀼𑀢𑁆𑀢𑀁. 𑀏𑀯𑀁 𑀯𑀼𑀢𑁆𑀢𑁂 𑀧𑀦 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀻𑀦𑀁 𑀮𑀩𑁆𑀪𑀫𑀸𑀦𑀯𑀺𑀧𑀸𑀓𑀯𑀲𑁂𑀦 𑀯𑀼𑀢𑁆𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑀸 𑁋

‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸’’𑀢𑀺;

‘‘𑀏𑀓𑀁 𑀧𑀼𑀧𑁆𑀨𑀁 𑀘𑀚𑀺𑀢𑁆𑀯𑀸𑀦, 𑀅𑀲𑀻𑀢𑀺𑀓𑀧𑁆𑀧𑀓𑁄𑀝𑀺𑀬𑁄;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀻’’𑀢𑀺. 𑀘 𑁋

𑀏𑀯𑀫𑀸𑀤𑀺𑀯𑀘𑀦𑀲𑁆𑀲 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀓𑀸𑀬𑀧𑀺 𑀘𑁂𑀢𑀦𑀸𑀬 𑀧𑀼𑀦 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀫𑀜𑁆𑀜𑁂𑀬𑁆𑀬𑀼𑀦𑁆𑀢𑀺 ‘‘𑀏𑀓𑀸𑀬…𑀧𑁂… 𑀧𑀓𑀸𑀲𑀺𑀢𑀸’’𑀢𑀺 𑀧𑀜𑁆𑀘𑀫𑀁 𑀏𑀓𑁂𑀦 𑀓𑀫𑁆𑀫𑁂𑀦 𑀏𑀓𑀺𑀲𑁆𑀲𑀸𑀬𑁂𑀯 𑀧𑀝𑀺𑀲𑀦𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀦𑀁 𑀯𑀼𑀢𑁆𑀢𑀁. 𑀏𑀓𑀲𑁆𑀫𑀺𑀁 𑀪𑀯𑁂 𑀦𑀸𑀦𑀸𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑀸 ‘‘𑀤𑀺𑀲𑁆𑀯𑀸 𑀓𑀼𑀫𑀸𑀭𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑀸 ‘‘𑀦𑀸𑀦𑀸𑀓𑀫𑁆𑀫𑁂𑀦 𑀏𑀓𑀸𑀯 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀬𑁆𑀬𑀼𑀦𑁆𑀢𑀺 ‘‘𑀦𑀸𑀦𑀸…𑀧𑁂… 𑀧𑀝𑀺𑀲𑀦𑁆𑀥𑀺𑀬𑁄’’𑀢𑀺 𑀙𑀝𑁆𑀞𑀁 𑀦𑀸𑀦𑀸𑀓𑀫𑁆𑀫𑀲𑁆𑀲 𑀦𑀸𑀦𑀸𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀯𑀼𑀢𑁆𑀢𑀁. 𑀢𑀣𑀸 𑀯𑀺𑀧𑀘𑁆𑀘𑀦𑁆𑀢𑀲𑁆𑀲 𑀘 𑀏𑀓𑀲𑁆𑀲 𑀓𑀫𑁆𑀫𑀲𑁆𑀲 𑀲𑁄𑀴𑀲 𑀯𑀺𑀧𑀸𑀓𑀸𑀦𑀺 𑀤𑁆𑀯𑀸𑀤𑀲𑀫𑀕𑁆𑀕𑁄 𑀅𑀳𑁂𑀢𑀼𑀓𑀝𑁆𑀞𑀓𑀫𑁆𑀧𑀻𑀢𑀺 𑀅𑀬𑀁 𑀯𑀺𑀧𑀸𑀓𑀯𑀺𑀪𑀸𑀕𑁄 𑀳𑁂𑀢𑀼𑀪𑁂𑀤𑀯𑀲𑁂𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀢𑀺𑀳𑁂𑀢𑀼𑀓𑀁…𑀧𑁂… 𑀦 𑀘 𑀳𑁄𑀢𑀺 𑀢𑀺𑀳𑁂𑀢𑀼𑀓𑀸’’𑀢𑀺 𑀲𑀢𑁆𑀢𑀫𑀁 𑀅𑀝𑁆𑀞𑀓𑀣𑀸𑀬 𑀆𑀕𑀢𑀳𑁂𑀢𑀼𑀓𑀺𑀢𑁆𑀢𑀦𑀁 𑀤𑀲𑁆𑀲𑀺𑀢𑀁. 𑀢𑀁 𑀧𑀦 𑀳𑁂𑀢𑀼𑀓𑀺𑀢𑁆𑀢𑀦𑀁 𑀏𑀓𑁂𑀓𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀦𑁆𑀢𑀺. 𑀇𑀤𑀸𑀦𑀺 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀲𑁆𑀲, 𑀫𑁄𑀭𑀯𑀸𑀧𑀺𑀯𑀸𑀲𑀺𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀲𑁆𑀲, 𑀢𑀺𑀧𑀺𑀝𑀓𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲𑀸𑀢𑀺 𑀢𑀺𑀡𑁆𑀡𑀁 𑀣𑁂𑀭𑀸𑀦𑀁 𑀯𑀸𑀤𑁂𑀲𑀼 ‘‘𑀏𑀓𑀸𑀬 𑀘𑁂𑀢𑀦𑀸𑀬 𑀤𑁆𑀯𑀸𑀤𑀲 𑀯𑀺𑀧𑀸𑀓𑀸𑀦𑀺 𑀏𑀢𑁆𑀣𑁂𑀯 𑀤𑀲𑀓𑀫𑀕𑁆𑀕𑁄 𑀅𑀳𑁂𑀢𑀼𑀓𑀝𑁆𑀞𑀓𑀫𑁆𑀧𑀻’’𑀢𑀺 𑀆𑀕𑀢𑀲𑁆𑀲 𑀤𑀼𑀢𑀺𑀬𑀢𑁆𑀣𑁂𑀭𑀯𑀸𑀤𑀲𑁆𑀲, ‘‘𑀏𑀓𑀸𑀬 𑀘𑁂𑀢𑀦𑀸𑀬 𑀤𑀲 𑀯𑀺𑀧𑀸𑀓𑀸𑀦𑀺 𑀏𑀢𑁆𑀣𑁂𑀯 𑀅𑀳𑁂𑀢𑀼𑀓𑀝𑁆𑀞𑀓𑀫𑁆𑀧𑀻’’𑀢𑀺 𑀆𑀕𑀢𑀲𑁆𑀲 𑀢𑀢𑀺𑀬𑀢𑁆𑀣𑁂𑀭𑀲𑁆𑀲 𑀯𑀸𑀤𑀲𑁆𑀲 𑀘 𑀦 𑀲𑀫𑁆𑀫𑀸𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑁆𑀲 𑀧𑀞𑀫𑀢𑁆𑀣𑁂𑀭𑀯𑀸𑀤𑀲𑁆𑀲 𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀯𑀺𑀧𑀸𑀓𑁂𑀲𑀼 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀯𑀺𑀥𑀸𑀦𑀁 𑀧𑀘𑁆𑀘𑀬𑀩𑀮𑁂𑀦 𑀳𑁄𑀢𑀺, 𑀦𑁄 𑀓𑀫𑁆𑀫𑀩𑀮𑁂𑀦𑀸𑀢𑀺 𑀤𑀻𑀧𑀦𑀢𑁆𑀣𑀁 𑀅𑀝𑁆𑀞𑀫𑀁, ‘‘𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭’’𑀦𑁆𑀢𑀺𑀆𑀤𑀺𑀦𑀸 𑀓𑀫𑁆𑀫𑁂𑀦 𑀲𑀳 𑀅𑀲𑀫𑀸𑀦𑀫𑁆𑀧𑀺 𑀓𑀢𑁆𑀯𑀸 𑀲𑀗𑁆𑀔𑀸𑀭𑀪𑁂𑀤𑁄 𑀯𑀼𑀢𑁆𑀢𑁄. 𑀓𑀫𑁆𑀫𑀲𑁆𑀲 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀪𑀸𑀯𑁂𑀧𑀺 𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀯𑀺𑀧𑀸𑀓𑀯𑁂𑀤𑀦𑀸𑀬 𑀧𑀭𑀺𑀯𑀢𑁆𑀢𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀫𑀡𑁂𑀦…𑀧𑁂… 𑀧𑀭𑀺𑀯𑀢𑁆𑀢𑀦’’𑀦𑁆𑀢𑀺 𑀦𑀯𑀫𑀁 𑀆𑀭𑀫𑁆𑀫𑀡𑁂𑀦 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀁 𑀯𑀼𑀢𑁆𑀢𑀁. 𑀓𑀫𑁆𑀫𑀯𑀲𑁂𑀦 𑀘𑁂𑀯 𑀆𑀭𑀫𑁆𑀫𑀡𑀯𑀲𑁂𑀦 𑀘 𑀅𑀦𑀺𑀬𑀢𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀚𑀯𑀦𑀯𑀲𑁂𑀦 𑀦𑀺𑀬𑀫𑀤𑀲𑁆𑀲𑀦𑀢𑁆𑀣𑀁 ‘‘𑀢𑀤𑀸𑀭𑀫𑁆𑀫𑀡…𑀧𑁂… 𑀦𑀺𑀬𑀸𑀫𑀺𑀢’’𑀦𑁆𑀢𑀺 𑀤𑀲𑀫𑀁 𑀚𑀯𑀦𑁂𑀦 𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑁄 𑀯𑀼𑀢𑁆𑀢𑁄𑀢𑀺.

𑀏𑀓𑀽𑀦𑀢𑀺𑀁𑀲 𑀓𑀫𑁆𑀫𑀸𑀦𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀯𑀻𑀲𑀢𑀺 𑀧𑀭𑀺𑀢𑁆𑀢𑀸𑀦𑀺, 𑀦𑀯 𑀫𑀳𑀕𑁆𑀕𑀢𑀸𑀦𑀻𑀢𑀺 𑀏𑀓𑀽𑀦𑀢𑀺𑀁𑀲 𑀓𑀫𑁆𑀫𑀸𑀦𑀺. 𑀬𑀲𑁆𑀫𑀸 𑀧𑀦𑁂𑀲𑀸 𑀯𑀝𑁆𑀝𑀯𑀲𑁂𑀦 𑀯𑀺𑀧𑀸𑀓𑀓𑀣𑀸, 𑀢𑀲𑁆𑀫𑀸 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁 𑀯𑀚𑁆𑀚𑁂𑀢𑁆𑀯𑀸 𑀏𑀓𑀽𑀦𑀢𑀺𑀁𑀲𑁂𑀯 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀏𑀯𑀁 ‘‘𑀧𑀸𑀓𑀸 𑀤𑁆𑀯𑀢𑁆𑀢𑀺𑀁𑀲𑀸’’𑀢𑀺 𑀏𑀢𑁆𑀣𑀸𑀧𑀺 𑀢𑁂𑀯𑀻𑀲𑀢𑀺 𑀧𑀭𑀺𑀢𑁆𑀢𑀸, 𑀦𑀯 𑀫𑀳𑀕𑁆𑀕𑀢𑀸𑀢𑀺 𑀧𑀸𑀓𑀸 𑀤𑁆𑀯𑀢𑁆𑀢𑀺𑀁𑀲. 𑀢𑀻𑀲𑀼 𑀤𑁆𑀯𑀸𑀭𑁂𑀲𑀽𑀢𑀺 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑀯𑀲𑁂𑀦 𑀢𑀻𑀲𑀼 𑀓𑀫𑁆𑀫𑀤𑁆𑀯𑀸𑀭𑁂𑀲𑀼. 𑀓𑀫𑁆𑀫𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀁 𑀳𑁂𑀝𑁆𑀞𑀸 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑀺𑀢𑀫𑁂𑀯. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬 (𑀥. 𑀲. 𑀅𑀝𑁆𑀞. 𑁧 𑀓𑀸𑀬𑀓𑀫𑁆𑀫𑀤𑁆𑀯𑀸𑀭), 𑀢𑀁𑀲𑀁𑀯𑀡𑁆𑀡𑀦𑀸𑀤𑀺𑀢𑁄 𑀘 𑀕𑀳𑁂𑀢𑀩𑁆𑀩𑀁. 𑀓𑀸𑀫𑀁 𑀓𑀫𑁆𑀫𑀸𑀦𑀺𑀧𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀦𑁆𑀢𑀺, 𑀧𑀜𑁆𑀘𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸𑀦𑀺 𑀧𑀦 𑀅𑀯𑀺𑀧𑀸𑀓𑀸𑀦𑀺, 𑀫𑀦𑁄𑀤𑁆𑀯𑀸𑀭𑀤𑁆𑀯𑀸𑀭𑀢𑁆𑀢𑀬𑀯𑀲𑁂𑀦 𑀪𑀺𑀦𑁆𑀦𑀸𑀦𑀁 𑀯𑀺𑀧𑀸𑀓𑀤𑀸𑀬𑀓𑀸𑀦𑀫𑁂𑀯 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘‘𑀢𑀻𑀲𑀼 𑀤𑁆𑀯𑀸𑀭𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀙𑀲𑀽𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀺 𑀧𑀜𑁆𑀘, 𑀫𑀦𑁄𑀤𑁆𑀯𑀸𑀭𑀜𑁆𑀘𑀸𑀢𑀺 𑀙𑀲𑀼 𑀯𑀺𑀧𑀸𑀓𑀤𑁆𑀯𑀸𑀭𑁂𑀲𑀼.

𑀢𑀁 𑀢𑀁 𑀧𑀘𑁆𑀘𑀬𑀫𑀸𑀕𑀫𑁆𑀫𑀸𑀢𑀺 𑀓𑀸𑀮𑀲𑀫𑁆𑀧𑀤𑀸𑀤𑀺𑀓𑀁 𑀢𑀁 𑀢𑀁 𑀧𑀘𑁆𑀘𑀬𑀫𑀸𑀕𑀫𑁆𑀫. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀓𑀸𑀮𑁄𑀧𑀥𑀺𑀧𑁆𑀧𑀬𑁄𑀕𑀸𑀦𑀁, 𑀕𑀢𑀺𑀬𑀸 𑀘 𑀬𑀣𑀸𑀭𑀳𑀁;

𑀲𑀫𑁆𑀧𑀢𑁆𑀢𑀺𑀜𑁆𑀘 𑀯𑀺𑀧𑀢𑁆𑀢𑀺𑀜𑁆𑀘, 𑀓𑀫𑁆𑀫𑀫𑀸𑀕𑀫𑁆𑀫 𑀧𑀘𑁆𑀘𑀢𑀻’’𑀢𑀺.

𑀅𑀣 𑀯𑀸 𑀢𑀁 𑀢𑀁 𑀧𑀘𑁆𑀘𑀬𑀦𑁆𑀢𑀺 𑀲𑁄𑀫𑀦𑀲𑁆𑀲𑀸𑀤𑀺𑀳𑁂𑀢𑀼𑀪𑀽𑀢𑀁 𑀢𑀁 𑀢𑀁 𑀲𑀳𑀓𑀸𑀭𑀺𑀧𑀘𑁆𑀘𑀬𑀁. 𑀯𑀺𑀯𑀺𑀥𑀁 𑀨𑀮𑀦𑁆𑀢𑀺 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀨𑀮𑀁. 𑀏𑀓𑀸𑀬 𑀘𑁂𑀢𑀦𑀸𑀬𑀸𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀪𑀽𑀢𑀸𑀬, 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀪𑀽𑀢𑀸𑀬 𑀯𑀸 𑀏𑀓𑀸𑀬 𑀘𑁂𑀢𑀦𑀸𑀬. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀪𑀽𑀢𑀸 𑀧𑀦 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑁂𑀯 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀦𑁄 𑀧𑀝𑀺𑀲𑀦𑁆𑀥𑀺𑀁.

𑀓𑀺𑀜𑁆𑀘𑀸𑀧𑀺 ‘‘𑀢𑀺𑀳𑁂𑀢𑀼𑀓’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀉𑀓𑁆𑀓𑀝𑁆𑀞𑀫𑁂𑀯 𑀧𑀦 𑀢𑀺𑀳𑁂𑀢𑀼𑀓𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀁 𑀤𑁂𑀢𑀺, 𑀢𑀣𑀸 𑀤𑀼𑀳𑁂𑀢𑀼𑀓𑀫𑁆𑀧𑀺 𑀉𑀓𑁆𑀓𑀝𑁆𑀞𑀫𑁂𑀯 𑀤𑀼𑀳𑁂𑀢𑀼𑀓𑀯𑀺𑀧𑀸𑀓𑀁 𑀤𑁂𑀢𑀺. 𑀑𑀫𑀓𑀁 𑀧𑀦 𑀢𑀺𑀳𑁂𑀢𑀼𑀓𑀓𑀫𑁆𑀫𑀁 𑀤𑀼𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑀲𑀤𑀺𑀲𑀁, 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀫𑁂𑀯 𑀯𑀺𑀧𑀸𑀓𑀁 𑀤𑁂𑀢𑀺. 𑀢𑀣𑀸 𑀤𑀼𑀳𑁂𑀢𑀼𑀓𑀫𑁆𑀧𑀺 𑀅𑀳𑁂𑀢𑀼𑀓𑀫𑁂𑀯 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺. 𑀉𑀓𑁆𑀓𑀝𑁆𑀞𑁄𑀫𑀓𑀯𑀺𑀪𑀸𑀕𑁄 𑀘 𑀧𑀦𑁂𑀲 𑀓𑀼𑀲𑀮𑀸𑀓𑀼𑀲𑀮𑀧𑀭𑀺𑀯𑀸𑀭𑀮𑀸𑀪𑀢𑁄, 𑀆𑀲𑁂𑀯𑀦𑀯𑀺𑀧𑁆𑀧𑀝𑀺𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀯𑀸 𑀤𑀝𑁆𑀞𑀩𑁆𑀩𑁄. 𑀬𑀜𑁆𑀳𑀺 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑀸𑀮𑁂 𑀧𑀼𑀭𑀺𑀫𑀧𑀘𑁆𑀙𑀸𑀪𑀸𑀕𑀧𑁆𑀧𑀯𑀢𑁆𑀢𑁂𑀳𑀺 𑀓𑀼𑀲𑀮𑀥𑀫𑁆𑀫𑁂𑀳𑀺 𑀧𑀭𑀺𑀯𑀸𑀭𑀺𑀢𑀁, 𑀧𑀘𑁆𑀙𑀸 𑀯𑀸 𑀆𑀲𑁂𑀯𑀦𑀮𑀸𑀪𑁂𑀦 𑀲𑀫𑀼𑀤𑀸𑀘𑀺𑀡𑁆𑀡𑀁, 𑀢𑀁 𑀉𑀓𑁆𑀓𑀝𑁆𑀞𑀁. 𑀬𑀁 𑀧𑀦 𑀓𑀭𑀡𑀓𑀸𑀮𑁂 𑀅𑀓𑀼𑀲𑀮𑀥𑀫𑁆𑀫𑁂𑀳𑀺 𑀧𑀭𑀺𑀯𑀸𑀭𑀺𑀢𑀁, 𑀧𑀘𑁆𑀙𑀸 𑀯𑀸 ‘‘𑀤𑀼𑀓𑁆𑀓𑀝𑀁 𑀫𑀬𑀸’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀼𑀧𑁆𑀧𑀸𑀤𑀦𑁂𑀦 𑀧𑀭𑀺𑀪𑀸𑀯𑀺𑀢𑀁, 𑀢𑀁 𑀑𑀫𑀓𑀁 𑀦𑀸𑀫 𑀳𑁄𑀢𑀺.

𑀅𑀣𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁 𑀓𑀺𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁 𑀅𑀯𑀺𑀲𑁂𑀲𑁂𑀦, 𑀉𑀤𑀸𑀳𑀼 𑀧𑀯𑀢𑁆𑀢𑀺𑀯𑀲𑁂𑀦𑁂𑀯𑀸𑀢𑀺 𑀘𑁂? 𑀧𑀯𑀢𑁆𑀢𑀺𑀯𑀲𑁂𑀦𑁂𑀯, 𑀧𑀝𑀺𑀲𑀦𑁆𑀥𑀺𑀬𑀁 𑀧𑀦 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀺𑀳𑁂𑀢𑀼𑀓𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀧𑀺 𑀢𑀺𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑀓𑀫𑁆𑀫𑁂𑀦𑁂𑀯 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀑𑀫𑀓𑁂𑀦 𑀧𑀦 𑀤𑀼𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑁂𑀦 𑀘 𑀤𑀼𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺, 𑀤𑀼𑀳𑁂𑀢𑀼𑀓𑁄𑀫𑀓𑁂𑀦 𑀧𑀦 𑀅𑀳𑁂𑀢𑀼𑀓𑀸𑀯𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀜𑀸𑀡𑀁 𑀚𑀘𑁆𑀘𑀦𑁆𑀥𑀸𑀤𑀺𑀯𑀺𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀫𑁄𑀳𑀲𑁆𑀲, 𑀲𑀩𑁆𑀩𑀸𑀓𑀼𑀲𑀮𑀲𑁆𑀲 𑀯𑀸 𑀧𑀝𑀺𑀧𑀓𑁆𑀔𑀁, 𑀢𑀲𑁆𑀫𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀓𑀫𑁆𑀫𑀁 𑀚𑀘𑁆𑀘𑀦𑁆𑀥𑀸𑀤𑀺𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀁 𑀦 𑀳𑁄𑀢𑀻𑀢𑀺 𑀢𑀺𑀳𑁂𑀢𑀼𑀓𑀁 𑀅𑀢𑀺𑀤𑀼𑀩𑁆𑀩𑀮𑀫𑁆𑀧𑀺 𑀲𑀫𑀸𑀦𑀁 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀫𑁂𑀯 𑀆𑀓𑀟𑁆𑀠𑀢𑀺, 𑀦𑀸𑀳𑁂𑀢𑀼𑀓𑀦𑁆𑀢𑀺 𑀆𑀳 ‘‘𑀦 𑀘 𑀳𑁄𑀢𑀺 𑀅𑀳𑁂𑀢𑀼𑀓𑀸’’𑀢𑀺. 𑀬𑀲𑁆𑀫𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀲𑀼𑀕𑀢𑀺𑀬𑀁 𑀚𑀘𑁆𑀘𑀦𑁆𑀥𑀩𑀥𑀺𑀭𑀸𑀤𑀺𑀯𑀺𑀧𑀢𑁆𑀢𑀺𑀬𑀸 𑀅𑀳𑁂𑀢𑀼𑀓𑀽𑀧𑀧𑀢𑁆𑀢𑀺𑀁 𑀯𑀚𑁆𑀚𑁂𑀢𑁆𑀯𑀸 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀳𑁂𑀢𑀼𑀓𑀽𑀧𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺, 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀓𑀢𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺? 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑀸𑀧𑀺 𑀲𑀗𑁆𑀔𑀸𑀭𑀸. 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑀸𑀧𑀺 𑀲𑀗𑁆𑀔𑀸𑀭𑀸. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀅𑀩𑁆𑀬𑀸𑀓𑀢𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀧𑀺 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀧𑀺 𑀦𑀸𑀫𑀭𑀽𑀧’’𑀦𑁆𑀢𑀺 (𑀧𑀝𑀺. 𑀫. 𑁧.𑁨𑁩𑁧-𑁨𑁩𑁨) 𑁋

𑀏𑀯𑀁 𑀚𑀯𑀦𑀓𑁆𑀔𑀡𑁂 𑀢𑀺𑀡𑁆𑀡𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀦 𑀧𑀦 ‘‘𑀚𑀯𑀦𑀓𑁆𑀔𑀡𑁂 𑀤𑁆𑀯𑀺𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸’’𑀢𑀺, 𑀢𑀲𑁆𑀫𑀸 𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦𑁂𑀯 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀳𑁄𑀢𑀺, 𑀦 𑀤𑀼𑀳𑁂𑀢𑀼𑀓𑁂𑀦𑀸𑀢𑀺 𑀆𑀳 ‘‘𑀤𑀼𑀳𑁂𑀢𑀼𑀓𑁂𑀦…𑀧𑁂… 𑀦 𑀘 𑀳𑁄𑀢𑀺 𑀢𑀺𑀳𑁂𑀢𑀼𑀓𑀸’’𑀢𑀺. 𑀬𑀤𑀺 𑀳𑀺 𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀲𑀺𑀬𑀸, 𑀬𑀣𑀸 ‘‘𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀯𑀺𑀪𑀗𑁆𑀕𑁄 𑀓𑀢𑁄, 𑀏𑀯𑀁 ‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀓𑀢𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺? 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂…𑀧𑁂… 𑀲𑀗𑁆𑀔𑀸𑀭𑀸, 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂…𑀧𑁂… 𑀲𑀗𑁆𑀔𑀸𑀭𑀸, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀅𑀩𑁆𑀬𑀸𑀓𑀢𑀸 𑀢𑀲𑁆𑀫𑀺𑀁 𑀔𑀡𑁂…𑀧𑁂… 𑀦𑀸𑀫𑀭𑀽𑀧’’𑀦𑁆𑀢𑀺 𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀽𑀧𑀧𑀢𑁆𑀢𑀺𑀁 𑀯𑀢𑁆𑀯𑀸 𑀢𑀲𑁆𑀲 𑀯𑀺𑀪𑀗𑁆𑀕𑁄 𑀓𑀸𑀢𑀩𑁆𑀩𑁄 𑀲𑀺𑀬𑀸, 𑀦 𑀘 𑀧𑀦𑁂𑀯𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 ‘‘𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀦 𑀳𑁄𑀢𑀻’’𑀢𑀺.

𑀬𑀤𑀺 𑀏𑀯𑀁 𑁋

‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂 𑀙𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂 𑀓𑀢𑀫𑁂𑀲𑀁…𑀧𑁂… 𑀳𑁄𑀢𑀺? 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂…𑀧𑁂… 𑀲𑀗𑁆𑀔𑀸𑀭𑀸. 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂…𑀧𑁂… 𑀲𑀗𑁆𑀔𑀸𑀭𑀸. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀩𑁆𑀬𑀸𑀓𑀢𑀸 𑀢𑀲𑁆𑀫𑀺𑀁 𑀔𑀡𑁂…𑀧𑁂… 𑀦𑀸𑀫𑀭𑀽𑀧’’𑀦𑁆𑀢𑀺 𑁋

𑀏𑀯𑀁 𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀽𑀧𑀧𑀢𑁆𑀢𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂 𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂 𑀓𑀢𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺? 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂…𑀧𑁂… 𑀲𑀗𑁆𑀔𑀸𑀭𑀸. 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂…𑀧𑁂… 𑀲𑀗𑁆𑀔𑀸𑀭𑀸. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀩𑁆𑀬𑀸𑀓𑀢𑀸 𑀢𑀲𑁆𑀫𑀺𑀁 𑀔𑀡𑁂…𑀧𑁂… 𑀦𑀸𑀫𑀭𑀽𑀧’’𑀦𑁆𑀢𑀺 𑀏𑀯𑀁 𑀢𑀺𑀳𑁂𑀢𑀼𑀓𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸𑀧𑀺 𑀅𑀦𑀼𑀤𑁆𑀥𑀝𑀢𑁆𑀢𑀸 𑀲𑀸𑀧𑀺 𑀦 𑀳𑁄𑀢𑀻𑀢𑀺 𑀘𑁂? 𑀦𑁄 𑀦 𑀳𑁄𑀢𑀺, 𑀤𑀼𑀳𑁂𑀢𑀼𑀓𑁄𑀫𑀓𑀓𑀫𑁆𑀫𑁂𑀦 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀬 𑀢𑀺𑀳𑁂𑀢𑀼𑀓𑁄𑀫𑀓𑁂𑀦 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸𑀯 𑀤𑀸𑀢𑀩𑁆𑀩𑀢𑁆𑀢𑀸, 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀤𑀲𑁆𑀲𑀦𑀢𑁆𑀣𑀁 𑀧𑀦 𑀫𑀳𑀸𑀣𑁂𑀭𑁂𑀦 𑀧𑀸𑀞𑁄 𑀲𑀸𑀯𑀲𑁂𑀲𑁄 𑀓𑀢𑁄.

𑀬𑀤𑀺 𑀏𑀯𑀁 𑀧𑀼𑀭𑀺𑀫𑀯𑀼𑀢𑁆𑀢𑁂𑀳𑀺 𑀇𑀤𑀁 𑀲𑀫𑀸𑀦𑀁 𑀓𑀫𑁆𑀫𑀲𑀭𑀺𑀓𑁆𑀔𑀓𑀢𑀸𑀪𑀸𑀯𑀢𑁄𑀢𑀺 𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀦 𑀉𑀤𑁆𑀥𑀝𑀸, 𑀦 𑀧𑀦 𑀅𑀮𑀩𑁆𑀪𑀦𑀢𑁄𑀢𑀺? 𑀢𑀁 𑀦, 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀅𑀮𑁄𑀪𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄, 𑀅𑀮𑁄𑀪𑀨𑀮𑀼𑀧𑁆𑀧𑀸𑀤𑀦𑁂 𑀯𑀺𑀬 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀜𑀸𑀡𑀨𑀮𑀼𑀧𑁆𑀧𑀸𑀤𑀦𑁂 𑀅𑀲𑀫𑀢𑁆𑀣𑀪𑀸𑀯𑀢𑁄. 𑀧𑀜𑁆𑀜𑀸𑀩𑀮𑀲𑀫𑁆𑀧𑀬𑁄𑀕𑀢𑁄 𑀳𑀺 𑀢𑀁𑀜𑀸𑀡𑀨𑀮𑀼𑀧𑁆𑀧𑀸𑀤𑀦𑁂 𑀲𑀫𑀢𑁆𑀣𑀁 𑀳𑁄𑀢𑀺.

𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀦𑁂𑀢𑀁 𑀓𑀫𑁆𑀫𑀫𑁂𑀯 𑀧𑀝𑀺𑀲𑀦𑁆𑀥𑀺𑀁 𑀤𑁂𑀦𑁆𑀢𑀁 𑀅𑀢𑁆𑀢𑀦𑀸 𑀲𑀤𑀺𑀲𑀯𑁂𑀤𑀦𑀫𑁂𑀯 𑀤𑁂𑀢𑀺, 𑀉𑀤𑀸𑀳𑀼 𑀯𑀺𑀲𑀤𑀺𑀲𑀯𑁂𑀤𑀦𑀫𑁆𑀧𑀻𑀢𑀺? 𑀤𑀼𑀳𑁂𑀢𑀼𑀓𑁄𑀫𑀓𑀫𑁂𑀯 𑀯𑀺𑀲𑀤𑀺𑀲𑀯𑁂𑀤𑀦𑀁 𑀤𑁂𑀢𑀺, 𑀇𑀢𑀭𑀁 𑀧𑀦 𑀲𑀤𑀺𑀲𑀯𑁂𑀤𑀦𑀫𑁂𑀯. 𑀢𑀣𑀸 𑀳𑀺 𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑁂 𑀲𑀼𑀔𑀯𑁂𑀤𑀦𑀻𑀬𑀸𑀤𑀺𑀓𑀫𑁆𑀫𑀯𑀡𑁆𑀡𑀦𑀸𑀬 𑁋

‘‘𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘𑀢𑀲𑁆𑀲𑁄 𑀘𑁂𑀢𑀦𑀸, 𑀭𑀽𑀧𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑀼𑀓𑁆𑀓𑀚𑁆𑀛𑀸𑀦𑀘𑁂𑀢𑀦𑀸𑀢𑀺 𑀏𑀯𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑁂𑀲𑀼 𑀲𑀼𑀔𑀯𑁂𑀤𑀦𑀸𑀬 𑀚𑀦𑀦𑀢𑁄 𑀲𑀼𑀔𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀦𑀸𑀫. 𑀓𑀸𑀫𑀸𑀯𑀘𑀭𑀜𑁆𑀘𑁂𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀁𑀬𑁂𑀯 𑀏𑀓𑀦𑁆𑀢𑁂𑀦 𑀲𑀼𑀔𑀁 𑀚𑀦𑁂𑀢𑀺, 𑀧𑀯𑀢𑁆𑀢𑁂 𑀧𑀦 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀺.

‘‘𑀅𑀓𑀼𑀲𑀮𑀘𑁂𑀢𑀦𑀸 𑀧𑀯𑀢𑁆𑀢𑁂 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀤𑀼𑀓𑁆𑀔𑀲𑁆𑀲 𑀚𑀦𑀦𑀢𑁄 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀦𑀸𑀫.

‘‘𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘𑀢𑀲𑁆𑀲𑁄 𑀘𑁂𑀢𑀦𑀸, 𑀭𑀽𑀧𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑁂𑀢𑀦𑀸𑀢𑀺 𑀏𑀯𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑁂𑀲𑀼 𑀢𑀢𑀺𑀬𑀯𑁂𑀤𑀦𑀸𑀬 𑀚𑀦𑀦𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀦𑀸𑀫. 𑀏𑀢𑁆𑀣 𑀘 ‘‘𑀓𑀸𑀫𑀸𑀯𑀘𑀭𑀁 𑀧𑀝𑀺𑀲𑀦𑁆𑀥𑀺𑀬𑀁𑀬𑁂𑀯 𑀏𑀓𑀦𑁆𑀢𑁂𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀚𑀦𑁂𑀢𑀺, 𑀧𑀯𑀢𑁆𑀢𑁂 𑀇𑀝𑁆𑀞𑀸𑀭𑀫𑁆𑀫𑀡𑁂 𑀲𑀼𑀔𑀫𑁆𑀧𑀻’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁩𑁦𑁦) 𑁋

𑀯𑀼𑀢𑁆𑀢𑀁. 𑀦𑀦𑀼 𑀘 ‘‘𑀆𑀭𑀫𑁆𑀫𑀡𑁂𑀦 𑀳𑁄𑀢𑁂𑀯, 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦’’𑀦𑁆𑀢𑀺 𑀯𑀘𑀦𑀢𑁄 𑀆𑀭𑀫𑁆𑀫𑀡𑀯𑀲𑁂𑀦 𑀯𑁂𑀤𑀦𑀸𑀦𑀺𑀬𑀫𑁄 𑀳𑁄𑀢𑀺, 𑀦 𑀘 𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀲𑁆𑀲 𑀇𑀝𑁆𑀞𑀸𑀭𑀫𑁆𑀫𑀡𑀫𑁂𑀯 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀺𑀓𑀫𑀸𑀧𑀸𑀣𑀫𑀸𑀕𑀘𑁆𑀙𑀢𑀻𑀢𑀺 𑀦𑀺𑀬𑀫𑁄 𑀅𑀢𑁆𑀣𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀫𑁆𑀫𑁂𑀦 𑀯𑀸 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸 𑀓𑀣𑀁 𑀓𑀫𑁆𑀫𑀯𑀲𑁂𑀦𑁂𑀯 𑀯𑁂𑀤𑀦𑀸𑀦𑀺𑀬𑀫𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀇𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑀫𑁆𑀧𑀺 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀁 𑀓𑀫𑁆𑀫𑀩𑀮𑁂𑀦𑁂𑀯 𑀆𑀕𑀘𑁆𑀙𑀢𑀻𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂 𑀢𑀲𑁆𑀲 𑀩𑀮𑁂𑀦 𑀇𑀝𑁆𑀞𑀸𑀭𑀫𑁆𑀫𑀡𑀫𑀸𑀧𑀸𑀣𑀫𑀸𑀕𑀘𑁆𑀙𑀢𑀺, 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀫𑁆𑀫𑁂𑀦 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸 𑀓𑀫𑁆𑀫𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀦𑀺𑀬𑀫𑁄, 𑀆𑀭𑀫𑁆𑀫𑀡𑀯𑀲𑁂𑀦 𑀯𑁂𑀤𑀦𑀸𑀦𑀺𑀬𑀫𑁄𑀢𑀺. 𑀅𑀧𑀺𑀘 ‘‘𑀆𑀭𑀫𑁆𑀫𑀡𑁂𑀦 𑀳𑁄𑀢𑁂𑀯, 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦’’𑀦𑁆𑀢𑀺 𑀇𑀤𑀁 𑀢𑀤𑀸𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀦 𑀢𑁂𑀦 𑀧𑀝𑀺𑀲𑀦𑁆𑀥𑀺𑀬𑀸 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑁂𑀤𑀦𑀸𑀪𑀸𑀯𑁄 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀓𑀸, 𑀤𑀼𑀳𑁂𑀢𑀼𑀓𑁄𑀫𑀓𑀁 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑁆𑀧𑀺 𑀅𑀢𑁆𑀢𑀦𑁄 𑀦𑀺𑀳𑀻𑀦𑀢𑀸𑀬 𑀤𑀼𑀳𑁂𑀢𑀼𑀓𑀨𑀮𑀼𑀧𑁆𑀧𑀸𑀤𑀦𑁂 𑀅𑀲𑀫𑀢𑁆𑀣𑀢𑁆𑀢𑀸, 𑀅𑀳𑁂𑀢𑀼𑀓𑀸𑀬 𑀘 𑀅𑀢𑁆𑀢𑀦𑀸 𑀲𑀤𑀺𑀲𑀯𑁂𑀤𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀅𑀲𑀫𑁆𑀪𑀯𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀼𑀭𑀽𑀧𑀢𑁄 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀫𑀼𑀧𑀝𑁆𑀞𑀧𑁂𑀢𑁆𑀯𑀸 𑀢𑀤𑀸𑀭𑀫𑁆𑀫𑀡𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺.

𑀦𑀦𑀼 𑀘 ‘‘𑀧𑀘𑁆𑀙𑀺𑀫𑀪𑀯𑀺𑀓𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀁 𑀲𑁄𑀫𑀦𑀲𑁆𑀲𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀅𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀇𑀘𑁆𑀙𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀢𑁂𑀦 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀩𑀮𑀯𑀢𑀭𑀁, 𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺, 𑀢𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸 𑀳𑀺 𑀫𑀳𑀚𑁆𑀛𑀸𑀲𑀬𑀸 𑀳𑁄𑀦𑁆𑀢𑀺 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀯𑀺𑀬𑀸’’𑀢𑀺, 𑀢𑀲𑁆𑀫𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀼𑀲𑀮𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀧𑀝𑀺𑀲𑀦𑁆𑀥𑀺𑀧𑀺 𑀮𑀩𑁆𑀪𑀢𑀺 𑀬𑀣𑀸 𑀘, 𑀏𑀯𑀁 𑀢𑀣𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀧𑀻𑀢𑀺 𑀓𑀣𑀁 𑀓𑀫𑁆𑀫𑀲𑀤𑀺𑀲𑀯𑁂𑀤𑀦𑀸 𑀧𑀝𑀺𑀲𑀦𑁆𑀥𑀻𑀢𑀺? 𑀏𑀢𑁆𑀣𑀸𑀧𑀺 𑀘 𑀓𑀫𑁆𑀫𑀫𑁆𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯𑀸𑀢𑀺 𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀧𑀺𑀘𑀸𑀬𑀁 𑀯𑀸𑀤𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑁄𑀯. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀗𑁆𑀕𑀳𑀓𑀸𑀭𑁂𑀳𑀺 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀬𑀁 𑀣𑁂𑀭𑀲𑁆𑀲 𑀫𑀦𑁄𑀭𑀣𑁄, 𑀦𑀢𑁆𑀣𑀺 𑀏𑀢’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀳𑀺𑀢𑀽𑀧𑀘𑀸𑀭𑁄 𑀩𑀮𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀺𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀢𑁆𑀢𑀯𑀸𑀤𑀁 𑀕𑀳𑁂𑀢𑁆𑀯𑀸 𑀦 𑀲𑀓𑁆𑀓𑀸 𑀅𑀝𑁆𑀞𑀓𑀣𑀸𑀯𑀘𑀦𑀁 𑀘𑀸𑀮𑁂𑀢𑀼𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀯𑁂𑀢𑀁 𑀓𑀫𑁆𑀫𑀲𑀤𑀺𑀲𑀯𑁂𑀤𑀦𑀸 𑀧𑀝𑀺𑀲𑀦𑁆𑀥𑀻𑀢𑀺. 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁂𑀳𑀺 𑀯𑀸 𑀅𑀝𑁆𑀞𑀓𑀣𑀸𑀬 𑀅𑀥𑀺𑀧𑁆𑀧𑀸𑀬𑁄 𑀲𑀸𑀥𑀼𑀓𑀁 𑀓𑀣𑁂𑀢𑀩𑁆𑀩𑁄𑀢𑀺.

𑀅𑀲𑀗𑁆𑀔𑀸𑀭𑀦𑁆𑀢𑀺 𑀅𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑀁. 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀫𑁆𑀧𑀺 𑀨𑀮𑀁 𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀆𑀭𑀫𑁆𑀫𑀡𑁂𑀦𑀸𑀢𑀺 𑀇𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑁂𑀦. 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀦𑀼𑀭𑀽𑀧𑀢𑁄 𑀲𑁄𑀫𑀦𑀲𑁆𑀲𑀸𑀤𑀺𑀯𑁂𑀤𑀦𑀸𑀬 𑀧𑀭𑀺𑀯𑀢𑁆𑀢𑀦𑀁, 𑀓𑀼𑀲𑀮𑀯𑀺𑀧𑀸𑀓𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀸𑀦𑀺 𑀲𑀦𑁆𑀥𑀸𑀬 𑀘𑁂𑀢𑀁 𑀯𑀼𑀢𑁆𑀢𑀁. 𑀢𑀸𑀦𑀺 𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺. 𑀅𑀓𑀼𑀲𑀮𑀯𑀺𑀧𑀸𑀓𑀁 𑀧𑀦 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀁 𑀅𑀦𑀺𑀝𑁆𑀞𑁂, 𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂 𑀘 𑀆𑀭𑀫𑁆𑀫𑀡𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯. 𑀦 𑀳𑀺 𑀢𑀲𑁆𑀲 𑀆𑀭𑀫𑁆𑀫𑀡𑀯𑀲𑁂𑀦 𑀯𑁂𑀤𑀦𑀸𑀪𑁂𑀤𑁄 𑀅𑀢𑁆𑀣𑀺, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀤𑁆𑀯𑀻𑀲𑀼𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑁂𑀲𑀼 𑀘 𑀞𑀧𑁂𑀢𑁆𑀯𑀸 𑀓𑀸𑀬𑀯𑀺𑀜𑁆𑀜𑀸𑀡𑀤𑁆𑀯𑀬𑀁 𑀲𑁂𑀲𑀸𑀦𑀺 𑀇𑀝𑁆𑀞𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀓𑀸𑀭𑀡𑀯𑀲𑁂𑀦𑁂𑀯 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺, 𑀢𑀣𑀸 𑀓𑀸𑀬𑀯𑀺𑀜𑁆𑀜𑀸𑀡𑀁 𑀇𑀝𑁆𑀞𑀸𑀤𑀻𑀲𑀼 𑀲𑀼𑀔𑀲𑀳𑀕𑀢𑀁, 𑀅𑀦𑀺𑀝𑁆𑀞𑀸𑀤𑀻𑀲𑀼 𑀤𑀼𑀓𑁆𑀔𑀲𑀳𑀕𑀢𑀦𑁆𑀢𑀺. 𑀚𑀯𑀦𑁂𑀦 𑀦𑀺𑀬𑀫𑀺𑀢𑀁 𑀅𑀝𑁆𑀞𑀓𑀣𑀸𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁂𑀢𑀼𑀦𑀺𑀬𑀫𑀦𑀫𑁂𑀯 𑀘𑁂𑀢𑁆𑀣 𑀚𑀯𑀦𑀯𑀲𑁂𑀦 𑀳𑁄𑀢𑀺 𑀯𑁂𑀤𑀦𑀸𑀪𑁂𑀤𑀲𑁆𑀲 𑀆𑀭𑀫𑁆𑀫𑀡𑁂𑀦𑁂𑀯, 𑀲𑀗𑁆𑀔𑀸𑀭𑀪𑁂𑀤𑀲𑁆𑀲 𑀘 𑀧𑀘𑁆𑀘𑀬𑀯𑀲𑁂𑀦𑁂𑀯 𑀦𑀺𑀬𑀫𑀺𑀢𑀢𑁆𑀢𑀸. 𑀏𑀢𑁆𑀣 𑀘 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀯𑀺𑀪𑀸𑀕𑀸𑀪𑀸𑀯𑀢𑁄 𑀓𑀼𑀲𑀮𑀯𑀺𑀧𑀸𑀓𑀢𑀤𑀸𑀭𑀫𑁆𑀫𑀡𑀸𑀦𑀫𑁂𑀯 𑀆𑀭𑀫𑁆𑀫𑀡𑀚𑀯𑀦𑀧𑀘𑁆𑀘𑀬𑀯𑀲𑁂𑀦 𑀦𑀺𑀬𑀫𑀦𑀁 𑀳𑁄𑀢𑀺. 𑀢𑀁 𑀧𑀦 𑀲𑀭𑀽𑀧𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀢𑀺𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑀓𑀫𑁆𑀫𑁂𑀦 𑀳𑀺 𑀢𑀤𑀸𑀭𑀫𑁆𑀫𑀡𑀁 𑀧𑀯𑀢𑁆𑀢𑀫𑀸𑀦𑀁 𑀓𑀫𑁆𑀫𑀯𑀲𑁂𑀦 𑀦𑀺𑀬𑀫𑀸𑀪𑀸𑀯𑀢𑁄 𑀲𑀩𑁆𑀩𑁂𑀲𑀼𑀧𑀺 𑀓𑀼𑀲𑀮𑀯𑀺𑀧𑀸𑀓𑀢𑀤𑀸𑀭𑀫𑁆𑀫𑀡𑁂𑀲𑀼 𑀲𑀫𑁆𑀧𑀢𑁆𑀢𑁂𑀲𑀼 𑀆𑀭𑀫𑁆𑀫𑀡𑀚𑀯𑀦𑀧𑀘𑁆𑀘𑀬𑀯𑀲𑁂𑀦, 𑀆𑀭𑀫𑁆𑀫𑀡𑀚𑀯𑀦𑀯𑀲𑁂𑀦𑁂𑀯 𑀯𑀸 𑀦𑀺𑀬𑀢𑀁 𑀏𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀓𑀣𑀁? 𑀢𑀤𑀸𑀭𑀫𑁆𑀫𑀡𑁂𑀲𑀼 𑀳𑀺 𑀆𑀭𑀫𑁆𑀫𑀡𑀯𑀲𑁂𑀦 𑀯𑁂𑀤𑀦𑀸𑀦𑀺𑀬𑀫𑁄 𑀳𑁄𑀢𑀺, 𑀚𑀯𑀦𑀯𑀲𑁂𑀦 𑀳𑁂𑀢𑀼𑀦𑀺𑀬𑀫𑁄, 𑀧𑀘𑁆𑀘𑀬𑀯𑀲𑁂𑀦 𑀲𑀗𑁆𑀔𑀸𑀭𑀦𑀺𑀬𑀫𑁄. 𑀅𑀳𑁂𑀢𑀼𑀓𑁂𑀲𑀼 𑀧𑀦 𑀲𑀗𑁆𑀔𑀸𑀭𑀪𑁂𑀤𑀸𑀪𑀸𑀯𑀢𑁄 𑀧𑀘𑁆𑀘𑀬𑀯𑀲𑁂𑀦 𑀦𑀺𑀬𑀫𑀦𑀁 𑀦𑀢𑁆𑀣𑀺. 𑀢𑀢𑁆𑀣 𑀆𑀭𑀫𑁆𑀫𑀡𑁂𑀦 𑀯𑁂𑀤𑀦𑀸𑀦𑀺𑀬𑀫𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀚𑀯𑀦𑀯𑀲𑁂𑀦 𑀳𑁂𑀢𑀼𑀦𑀺𑀬𑀫𑀦𑁂 𑀧𑀦 𑀓𑀫𑁆𑀫𑀲𑀭𑀺𑀓𑁆𑀔𑀓𑀳𑁂𑀢𑀼𑀯𑀲𑁂𑀦 𑀢𑀺𑀳𑁂𑀢𑀼𑀓𑀸𑀦𑀺 𑀤𑀼𑀳𑁂𑀢𑀼𑀓𑀸𑀦𑀺 𑀅𑀳𑁂𑀢𑀼𑀓𑀸𑀦𑀻𑀢𑀺 𑀢𑀻𑀡𑀺 𑀚𑀯𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀓𑀫𑁆𑀫𑀲𑀭𑀺𑀓𑁆𑀔𑀓𑀳𑁂𑀢𑀼𑀯𑀲𑁂𑀦 𑀢𑀺𑀳𑁂𑀢𑀼𑀓𑀚𑀯𑀦𑀸𑀦𑀺 𑀦𑀸𑀫 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀚𑀯𑀦𑀸𑀦𑀺, 𑀤𑀼𑀳𑁂𑀢𑀼𑀓𑀚𑀯𑀦𑀸𑀦𑀺 𑀦𑀸𑀫 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀚𑀯𑀦𑀸𑀦𑀺, 𑀅𑀳𑁂𑀢𑀼𑀓𑀸𑀦𑀺 𑀦𑀸𑀫 𑀅𑀓𑀼𑀲𑀮𑀚𑀯𑀦𑀸𑀦𑀺 𑀘𑁂𑀯 𑀓𑀺𑀭𑀺𑀬𑀸𑀳𑁂𑀢𑀼𑀓𑀚𑀯𑀦𑀜𑁆𑀘. 𑀅𑀓𑀼𑀲𑀮𑀚𑀯𑀦𑀸𑀦𑀺𑀧𑀺 𑀳𑀺 𑀓𑀼𑀲𑀮𑀓𑀫𑁆𑀫𑀲𑀭𑀺𑀓𑁆𑀔𑀓𑀳𑁂𑀢𑀼𑀯𑀲𑁂𑀦 𑀅𑀳𑁂𑀢𑀼𑀓𑀸𑀦𑀺 𑀓𑀼𑀲𑀮𑀳𑁂𑀢𑀽𑀦𑀁 𑀢𑁂𑀲𑀼 𑀅𑀪𑀸𑀯𑀢𑁄.

𑀢𑀢𑁆𑀣 𑀓𑀫𑁆𑀫𑀲𑁆𑀲 𑀚𑀯𑀦𑀲𑀤𑀺𑀲𑀢𑀤𑀸𑀭𑀫𑁆𑀫𑀡𑀸𑀪𑀺𑀦𑀺𑀧𑁆𑀨𑀸𑀤𑀦𑀲𑀸𑀫𑀢𑁆𑀣𑀺𑀬𑁂 𑀲𑀢𑀺 𑀢𑀺𑀳𑁂𑀢𑀼𑀓𑀚𑀯𑀦𑁂 𑀚𑀯𑀺𑀢𑁂 𑀢𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀤𑀼𑀳𑁂𑀢𑀼𑀓𑀚𑀯𑀦𑁂 𑀚𑀯𑀺𑀢𑁂 𑀤𑀼𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁, 𑀅𑀳𑁂𑀢𑀼𑀓𑀚𑀯𑀦𑁂 𑀚𑀯𑀺𑀢𑁂 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀻𑀢𑀺. 𑀏𑀯𑀁 𑀚𑀯𑀦𑀯𑀲𑁂𑀦 𑀳𑁂𑀢𑀼𑀦𑀺𑀬𑀫𑀦𑀁 𑀤𑀝𑁆𑀞𑀩𑁆𑀩𑀁. 𑀓𑀣𑀁 𑀧𑀘𑁆𑀘𑀬𑀯𑀲𑁂𑀦 𑀲𑀗𑁆𑀔𑀸𑀭𑀦𑀺𑀬𑀫𑁄𑀢𑀺? 𑀓𑀸𑀮𑀲𑀫𑁆𑀧𑀤𑀸𑀤𑀻𑀦𑀁, 𑀉𑀢𑀼𑀲𑀫𑁆𑀧𑀤𑀸𑀤𑀻𑀦𑀜𑁆𑀘 𑀧𑀘𑁆𑀘𑀬𑀸𑀦𑀁 𑀩𑀮𑀯𑀪𑀸𑀯𑁂 𑀲𑀢𑀺 𑀅𑀲𑀗𑁆𑀔𑀸𑀭𑀺𑀓𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀤𑀼𑀩𑁆𑀩𑀮𑀪𑀸𑀯𑁂 𑀲𑀲𑀗𑁆𑀔𑀸𑀭𑀺𑀓𑀁. 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀲𑁆𑀲 𑀧𑀦 𑀧𑀘𑁆𑀘𑀬𑀯𑀲𑁂𑀦 𑀦𑀺𑀬𑀫𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀤𑀺 𑀇𑀝𑁆𑀞𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀤𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀢𑀤𑀸𑀭𑀫𑁆𑀫𑀡𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑁂𑀲𑀼𑀧𑀺 𑀅𑀦𑀺𑀬𑀫𑁂𑀦 𑀆𑀭𑀫𑁆𑀫𑀡𑀯𑀲𑁂𑀦 𑀲𑀩𑁆𑀩𑁂𑀲𑀼 𑀲𑀫𑁆𑀧𑀢𑁆𑀢𑁂𑀲𑀼 𑀚𑀯𑀦𑀲𑁆𑀲 𑀢𑀺𑀳𑁂𑀢𑀼𑀓𑀪𑀸𑀯𑁂 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑁂 𑀧𑀝𑀺𑀩𑀸𑀳𑀺𑀢𑁆𑀯𑀸 𑀢𑀺𑀳𑁂𑀢𑀼𑀓𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀢𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑁂𑀲𑀼𑀧𑀺 𑀅𑀦𑀺𑀬𑀫𑁂𑀦 𑀚𑀯𑀦𑀯𑀲𑁂𑀦 𑀲𑀩𑁆𑀩𑁂𑀲𑀼 𑀲𑀫𑁆𑀧𑀢𑁆𑀢𑁂𑀲𑀼 𑀧𑀘𑁆𑀘𑀬𑀲𑁆𑀲 𑀩𑀮𑀯𑀪𑀸𑀯𑁂 𑀲𑀢𑀺 𑀲𑀲𑀗𑁆𑀔𑀸𑀭𑀺𑀓𑀢𑀤𑀸𑀭𑀫𑁆𑀫𑀡𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀲𑀗𑁆𑀔𑀸𑀭𑀺𑀓𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀲𑁂𑀲𑀁 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀢𑀁𑀢𑀁𑀚𑀯𑀦𑀸𑀦𑀼𑀭𑀽𑀧𑀢𑁄 𑀦𑀺𑀬𑀫𑀦𑀁 𑀤𑀝𑁆𑀞𑀩𑁆𑀩𑀁.

𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀧𑀦 𑀧𑀘𑁆𑀘𑀬𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀆𑀭𑀫𑁆𑀫𑀡𑀯𑀲𑁂𑀦 𑀘𑁂𑀯 𑀚𑀯𑀦𑀯𑀲𑁂𑀦 𑀘 𑀦𑀺𑀬𑀫𑀦𑀁 𑀳𑁄𑀢𑀺. 𑀇𑀤𑀫𑁂𑀢𑁆𑀣 𑀬𑁂𑀪𑀼𑀬𑁆𑀬𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀦𑀺𑀬𑀫𑀦𑀁. 𑀓𑀤𑀸𑀘𑀺 𑀧𑀦 𑀆𑀭𑀫𑁆𑀫𑀡𑀯𑀲𑁂𑀦, 𑀧𑀘𑁆𑀘𑀬𑀯𑀲𑁂𑀦, 𑀧𑀭𑀺𑀘𑀺𑀢𑀯𑀲𑁂𑀦 𑀘 𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑁄 𑀳𑁄𑀢𑀺. 𑀢𑀢𑁆𑀣 𑀆𑀭𑀫𑁆𑀫𑀡𑀯𑀲𑁂𑀦 𑀘𑁂𑀯 𑀧𑀘𑁆𑀘𑀬𑀯𑀲𑁂𑀦 𑀘 𑀦𑀺𑀬𑀫𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀧𑀭𑀺𑀘𑀺𑀢𑀯𑀲𑁂𑀦 𑀧𑀦 𑀦𑀺𑀬𑀫𑀦𑁂 𑀬𑁂𑀪𑀼𑀬𑁆𑀬𑁂𑀦 𑀢𑀺𑀳𑁂𑀢𑀼𑀓𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀸 𑀢𑁂𑀲𑀼 𑀧𑀭𑀺𑀘𑀺𑀢𑀲𑁆𑀲 𑀓𑀤𑀸𑀘𑀺 𑀤𑀼𑀳𑁂𑀢𑀼𑀓𑁂, 𑀅𑀳𑁂𑀢𑀼𑀓𑁂 𑀯𑀸 𑀚𑀯𑀦𑁂 𑀚𑀯𑀺𑀢𑁂 𑀧𑀭𑀺𑀘𑀬𑀯𑀲𑁂𑀦 𑀢𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀘 𑀤𑀼𑀳𑁂𑀢𑀼𑀓𑀚𑀯𑀦𑀧𑁆𑀧𑀯𑀢𑁆𑀢𑀺𑀬𑀸 𑀢𑀢𑁆𑀣 𑀧𑀭𑀺𑀘𑀺𑀢𑀲𑁆𑀲 𑀓𑀤𑀸𑀘𑀺 𑀢𑀺𑀳𑁂𑀢𑀼𑀓𑁂, 𑀅𑀳𑁂𑀢𑀼𑀓𑁂 𑀯𑀸 𑀚𑀯𑀦𑁂 𑀚𑀯𑀺𑀢𑁂 𑀧𑀭𑀺𑀘𑀬𑀯𑀲𑁂𑀦 𑀤𑀼𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀺. 𑀢𑀣𑁂𑀯 𑀅𑀓𑀼𑀲𑀮𑁂𑀲𑀼 𑀧𑀭𑀺𑀘𑀺𑀢𑀲𑁆𑀲 𑀓𑀤𑀸𑀘𑀺 𑀢𑀺𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑁂𑀲𑀼𑀧𑀺 𑀚𑀯𑀦𑁂𑀲𑀼 𑀚𑀯𑀺𑀢𑁂𑀲𑀼 𑀧𑀭𑀺𑀘𑀬𑀯𑀲𑁂𑀦 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑁆𑀞𑀸𑀦𑁂 𑁋

‘‘𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀲𑀳𑁂𑀢𑀼𑀓𑁄 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀳𑁂𑀢𑀼𑀓𑁂 𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺, 𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀅𑀳𑁂𑀢𑀼𑀓𑁄 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑁋

𑀅𑀯𑀺𑀲𑁂𑀲𑁂𑀦 𑀅𑀓𑀼𑀲𑀮𑀚𑀯𑀦𑀸𑀦𑀦𑁆𑀢𑀭𑀫𑁆𑀧𑀺 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁, 𑀢𑀺𑀳𑁂𑀢𑀼𑀓𑀚𑀯𑀦𑀸𑀦𑀦𑁆𑀢𑀭𑀜𑁆𑀘 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁. 𑀢𑀺𑀳𑁂𑀢𑀼𑀓𑁄𑀫𑀓𑁂𑀦, 𑀧𑀦 𑀤𑀼𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑁂𑀦 𑀘 𑀓𑀫𑁆𑀫𑁂𑀦 𑀢𑀤𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀲𑁆𑀲 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀤𑀸𑀦𑁂 𑀅𑀲𑀫𑀢𑁆𑀣𑀢𑀸𑀬 𑀢𑀺𑀳𑁂𑀢𑀼𑀓𑀚𑀯𑀦𑁂𑀧𑀺 𑀚𑀯𑀺𑀢𑁂 𑀤𑀼𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀤𑀼𑀳𑁂𑀢𑀼𑀓𑁄𑀫𑀓𑁂𑀦 𑀧𑀦 𑀓𑀫𑁆𑀫𑁂𑀦 𑀢𑀤𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀬𑀁 𑀓𑀫𑁆𑀫𑀲𑁆𑀲 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀦𑀺𑀩𑁆𑀩𑀢𑁆𑀢𑀦𑁂 𑀅𑀲𑀫𑀢𑁆𑀣𑀢𑀸𑀬 𑀲𑀳𑁂𑀢𑀼𑀓𑀚𑀯𑀦𑁂𑀧𑀺 𑀚𑀯𑀺𑀢𑁂 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁩𑁮𑁭-𑁯𑁧. 𑀢𑀼𑀮𑁆𑀬𑁂𑀦 𑀧𑀸𑀓𑀘𑀺𑀢𑁆𑀢𑁂𑀦𑀸𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀅𑀲𑀗𑁆𑀔𑀸𑀭𑀺𑀓𑁂𑀦 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦. 𑀩𑀮𑀯𑀸𑀭𑀫𑁆𑀫𑀡𑁂𑀢𑀺 𑀅𑀢𑀺𑀫𑀳𑀦𑁆𑀢𑀸𑀭𑀫𑁆𑀫𑀡𑁂. 𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀆𑀭𑀫𑁆𑀫𑀡𑀁 𑀅𑀢𑀺𑀫𑀳𑀦𑁆𑀢𑀁 𑀫𑀳𑀦𑁆𑀢𑀁 𑀧𑀭𑀺𑀢𑁆𑀢𑀁 𑀅𑀢𑀺𑀧𑀭𑀺𑀢𑁆𑀢𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀢𑀣𑀸 𑀳𑀺 𑀯𑀺𑀲𑀬𑀁 𑀆𑀳𑀼, 𑀘𑀢𑀼𑀥𑀸 𑀏𑀢𑁆𑀣 𑀧𑀡𑁆𑀟𑀺𑀢𑀸;

𑀫𑀳𑀦𑁆𑀢𑀸𑀢𑀺𑀫𑀳𑀦𑁆𑀢𑀢𑁄, 𑀧𑀭𑀺𑀢𑁆𑀢𑀸𑀢𑀺𑀧𑀭𑀺𑀢𑁆𑀢𑀢𑁄’’𑀢𑀺.

𑀅𑀢𑀺𑀫𑀳𑀦𑁆𑀢𑀸𑀤𑀺𑀪𑀸𑀯𑁄 𑀘𑀲𑁆𑀲 𑀆𑀧𑀸𑀣𑀕𑀢𑀓𑀸𑀮𑁂 𑀉𑀧𑁆𑀧𑀚𑁆𑀚𑀦𑀓𑀘𑀺𑀢𑁆𑀢𑀓𑁆𑀔𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀆𑀧𑀸𑀣𑀕𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸, 𑀢𑀸𑀯 𑀯𑀺𑀚𑁆𑀚𑀫𑀸𑀦𑀸𑀬𑀼𑀓𑀆𑀭𑀫𑁆𑀫𑀡𑀁 𑀅𑀢𑀺𑀫𑀳𑀦𑁆𑀢𑀁 𑀦𑀸𑀫. 𑀧𑀦𑁆𑀦𑀭𑀲𑀘𑀼𑀤𑁆𑀤𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁 𑀫𑀳𑀦𑁆𑀢𑀁 𑀦𑀸𑀫. 𑀢𑁂𑀭𑀲𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁 𑀧𑀭𑀺𑀢𑁆𑀢𑀁 𑀦𑀸𑀫. 𑀢𑀢𑁄 𑀧𑀭𑀁 𑀅𑀢𑀺𑀧𑀭𑀺𑀢𑁆𑀢𑀁 𑀦𑀸𑀫. 𑀢𑀢𑁆𑀣 𑀅𑀢𑀺𑀫𑀳𑀦𑁆𑀢𑀸𑀭𑀫𑁆𑀫𑀡𑁂 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀫𑀳𑀦𑁆𑀢𑁂 𑀚𑀯𑀦𑀧𑀭𑀺𑀬𑁄𑀲𑀸𑀦𑀸𑀦𑀺, 𑀦𑀢𑁆𑀣𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄. 𑀧𑀭𑀺𑀢𑁆𑀢𑁂 𑀚𑀯𑀦𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺, 𑀲𑀦𑁆𑀢𑀻𑀭𑀡𑀸𑀦𑀦𑁆𑀢𑀭𑀁 𑀯𑁄𑀝𑁆𑀞𑀩𑁆𑀩𑀦𑀫𑁂𑀯 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀢𑀺. 𑀅𑀢𑀺𑀧𑀭𑀺𑀢𑁆𑀢𑁂 𑀪𑀯𑀗𑁆𑀕𑀘𑀮𑀦𑀫𑀢𑁆𑀢𑀫𑁂𑀯. 𑀓𑀣𑀁? 𑀅𑀢𑀺𑀫𑀳𑀦𑁆𑀢𑁂 𑀳𑀺 𑀆𑀭𑀫𑁆𑀫𑀡𑁂 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀬𑀣𑀸𑀦𑀼𑀭𑀽𑀧𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑁆𑀯𑀸𑀭𑁂 𑀆𑀧𑀸𑀣𑀕𑀢𑁂 𑀧𑀲𑀸𑀤𑀖𑀝𑁆𑀝𑀦𑀸𑀦𑀼𑀪𑀸𑀯𑁂𑀦 𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀸 𑀪𑀯𑀗𑁆𑀕𑀲𑀦𑁆𑀢𑀢𑀺 𑀯𑁄𑀘𑁆𑀙𑀺𑀚𑁆𑀚𑀢𑀺, 𑀯𑁄𑀘𑁆𑀙𑀺𑀚𑁆𑀚𑀫𑀸𑀦𑀸 𑀘 𑀲𑀳𑀲𑀸 𑀦 𑀑𑀘𑁆𑀙𑀺𑀚𑁆𑀚𑀢𑀺. 𑀬𑀣𑀸 𑀧𑀦 𑀯𑁂𑀕𑁂𑀦 𑀥𑀸𑀯𑀦𑁆𑀢𑁄 𑀧𑀼𑀭𑀺𑀲𑁄 𑀅𑀦𑁆𑀢𑀭𑀸 𑀞𑀸𑀢𑀼𑀓𑀸𑀫𑁄𑀧𑀺 𑀏𑀓𑀤𑁆𑀯𑁂𑀧𑀤𑀯𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀞𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀧𑀦 𑀞𑀸𑀢𑀼𑀓𑀸𑀫𑀢𑀸𑀬 𑀲𑀤𑁆𑀥𑀺𑀁𑀬𑁂𑀯, 𑀏𑀯𑀫𑁂𑀯 𑀤𑀻𑀧𑀲𑀺𑀔𑀸 𑀯𑀺𑀬, 𑀕𑀗𑁆𑀕𑀸𑀲𑁄𑀢𑁄 𑀯𑀺𑀬, 𑀯𑁂𑀕𑁂𑀦 𑀚𑀯𑀫𑀸𑀦𑀸 𑀪𑀯𑀗𑁆𑀕𑀲𑀦𑁆𑀢𑀢𑀺 𑀅𑀦𑁆𑀢𑀭𑀸 𑀑𑀘𑁆𑀙𑀺𑀚𑁆𑀚𑀫𑀸𑀦𑀸𑀧𑀺 𑀧𑀲𑀸𑀤𑀖𑀝𑁆𑀝𑀦𑀢𑁄 𑀧𑀭𑀁 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀯 𑀑𑀘𑁆𑀙𑀺𑀚𑁆𑀚𑀢𑀺. 𑀢𑀢𑁆𑀣 𑀧𑀞𑀫𑀘𑀺𑀢𑁆𑀢𑀁 𑀪𑀯𑀗𑁆𑀕𑀲𑀦𑁆𑀢𑀢𑀺𑀬𑀸 𑀘𑀮𑀦𑀸𑀓𑀸𑀭𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀪𑀯𑀗𑁆𑀕𑀘𑀮𑀦𑀁 𑀦𑀸𑀫, 𑀤𑀼𑀢𑀺𑀬𑀁 𑀉𑀧𑀘𑁆𑀙𑀺𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑁄 𑀦𑀸𑀫. 𑀘𑀮𑀦𑀜𑁆𑀘𑁂𑀢𑁆𑀣 𑀯𑀺𑀲𑀤𑀺𑀲𑀘𑀺𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀸𑀯𑀕𑀫𑀦𑀁. 𑀯𑀼𑀢𑁆𑀢𑀜𑁆𑀘 𑁋

‘‘𑀆𑀭𑀫𑁆𑀫𑀡𑀦𑁆𑀢𑀭𑀸𑀧𑀸𑀣𑁂, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀘𑀮𑀺𑀢𑁂 𑀫𑀦𑁄;

𑀘𑀺𑀢𑁆𑀢𑀦𑁆𑀢𑀭𑀲𑁆𑀲 𑀳𑁂𑀢𑀼𑀢𑁆𑀢𑀁, 𑀬𑀸𑀦𑀁 𑀘𑀮𑀦𑀫𑀻𑀭𑀺𑀢’’𑀦𑁆𑀢𑀺.

𑀬𑀤𑀺 𑀏𑀯𑀁 𑀤𑀼𑀢𑀺𑀬𑀲𑁆𑀲𑀧𑀺 𑀢𑀁 𑀅𑀢𑁆𑀣𑀻𑀢𑀺 𑀢𑀫𑁆𑀧𑀺 𑀪𑀯𑀗𑁆𑀕𑀘𑀮𑀦𑀫𑀺𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀲𑀘𑁆𑀘𑀁, 𑀪𑀯𑀗𑁆𑀕𑀲𑁆𑀲 𑀧𑀦 𑀉𑀧𑀘𑁆𑀙𑀺𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀲𑁆𑀲 𑀦𑀸𑀫𑀢𑁄 𑀯𑀺𑀲𑀤𑀺𑀲𑀦𑀸𑀫𑀁 𑀓𑀸𑀢𑀼𑀁 ‘‘𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀦𑀦𑀼 𑀘 𑀭𑀽𑀧𑀸𑀤𑀻𑀳𑀺 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀧𑀲𑀸𑀤𑀦𑀺𑀲𑁆𑀲𑀺𑀢𑀲𑁆𑀲𑁂𑀯 𑀘𑀮𑀦𑀁 𑀬𑀼𑀢𑁆𑀢𑀁, 𑀓𑀣𑀁 𑀧𑀦 𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀸𑀬 𑀪𑀯𑀗𑁆𑀕𑀲𑀦𑁆𑀢𑀢𑀺𑀬𑀸 𑀘𑀮𑀦𑀦𑁆𑀢𑀺? 𑀲𑀦𑁆𑀢𑀢𑀺𑀯𑀲𑁂𑀦 𑀏𑀓𑀸𑀩𑀤𑁆𑀥𑀢𑁆𑀢𑀸. 𑀬𑀣𑀸 𑀳𑀺 𑀪𑁂𑀭𑀺𑀬𑀸 𑀏𑀓𑀲𑁆𑀫𑀺𑀁 𑀢𑀮𑁂 𑀞𑀺𑀢𑀲𑀓𑁆𑀔𑀭𑀸𑀬 𑀫𑀓𑁆𑀔𑀺𑀓𑀸𑀬 𑀦𑀺𑀧𑀦𑁆𑀦𑀸𑀬 𑀅𑀧𑀭𑀲𑁆𑀫𑀺𑀁 𑀢𑀮𑁂 𑀤𑀡𑁆𑀟𑀸𑀤𑀺𑀦𑀸 𑀧𑀳𑀝𑁂 𑀅𑀦𑀼𑀓𑁆𑀓𑀫𑁂𑀦 𑀪𑁂𑀭𑀺𑀘𑀫𑁆𑀫𑀯𑀭𑀢𑁆𑀢𑀸𑀤𑀻𑀦𑀁 𑀘𑀮𑀦𑁂𑀦 𑀲𑀓𑁆𑀔𑀭𑀸𑀬 𑀘𑀮𑀺𑀢𑀸𑀬 𑀫𑀓𑁆𑀔𑀺𑀓𑀸𑀬 𑀧𑀮𑀸𑀬𑀦𑀁 𑀳𑁄𑀢𑀺, 𑀏𑀯𑀫𑁂𑀯 𑀭𑀽𑀧𑀸𑀤𑀺𑀫𑁆𑀳𑀺 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀢𑀦𑁆𑀦𑀺𑀲𑁆𑀲𑀬𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀘𑀮𑀺𑀢𑁂𑀲𑀼 𑀅𑀦𑀼𑀓𑁆𑀓𑀫𑁂𑀦 𑀢𑀁𑀲𑀫𑁆𑀩𑀦𑁆𑀥𑀸𑀦𑀁 𑀲𑁂𑀲𑀭𑀽𑀧𑀸𑀦𑀫𑁆𑀧𑀺 𑀘𑀮𑀦𑁂𑀦 𑀳𑀤𑀬𑀯𑀢𑁆𑀣𑀼𑀫𑁆𑀳𑀺 𑀘𑀮𑀺𑀢𑁂 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀪𑀯𑀗𑁆𑀕𑀲𑁆𑀲 𑀘𑀮𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀖𑀝𑁆𑀝𑀺𑀢𑁂 𑀅𑀜𑁆𑀜𑀯𑀢𑁆𑀣𑀼𑀫𑁆𑀳𑀺, 𑀅𑀜𑁆𑀜𑀦𑀺𑀲𑁆𑀲𑀺𑀢𑀓𑀫𑁆𑀧𑀦𑀁;

𑀏𑀓𑀸𑀩𑀤𑁆𑀥𑁂𑀦 𑀳𑁄𑀢𑀻𑀢𑀺, 𑀲𑀓𑁆𑀔𑀭𑁄𑀧𑀫𑀬𑀸 𑀯𑀤𑁂’’𑀢𑀺. (𑀲. 𑀲. 𑁧𑁭𑁬);

𑀏𑀯𑀁 𑀪𑀯𑀗𑁆𑀕𑀘𑀮𑀦𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂𑀲𑀼 ‘‘𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀯𑀤𑀦𑁆𑀢𑀻 𑀯𑀺𑀬 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀧𑀝𑀺𑀧𑀸𑀤𑁂𑀦𑁆𑀢𑀻 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲𑀸𑀦𑀦𑁆𑀢𑀭𑀁 𑀬𑀣𑀸𑀭𑀳𑀁 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼 𑀅𑀜𑁆𑀜𑀢𑀭𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀦𑀦𑁆𑀢𑀭𑀁 𑀢𑀸𑀬 𑀕𑀳𑀺𑀢𑀫𑁂𑀯𑀸𑀭𑀫𑁆𑀫𑀡𑀁 𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑀸 𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀦𑀦𑁆𑀢𑀭𑀁 𑀢𑀤𑁂𑀯𑀸𑀭𑀫𑁆𑀫𑀡𑀁 𑀲𑀦𑁆𑀢𑀻𑀭𑀬𑀫𑀸𑀦𑀸 𑀯𑀺𑀧𑀸𑀓𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀦𑀦𑁆𑀢𑀭𑀁 𑀢𑀫𑁂𑀯𑀸𑀭𑀫𑁆𑀫𑀡𑀁 𑀯𑀯𑀢𑁆𑀣𑀸𑀧𑀬𑀫𑀸𑀦𑀸 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀦𑀦𑁆𑀢𑀭𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀚𑀯𑀦𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀮𑀤𑁆𑀥𑀧𑀘𑁆𑀘𑀬𑀁 𑀢𑀤𑁂𑀯𑀸𑀭𑀫𑁆𑀫𑀡𑀁 𑀆𑀭𑀩𑁆𑀪 𑀚𑀯𑀦𑀁 𑀳𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀯𑀢𑀺, 𑀢𑀤𑀦𑀦𑁆𑀢𑀭𑀁 𑀏𑀓𑀸𑀤𑀲𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀁 𑀓𑀫𑁆𑀫𑀁 𑀆𑀭𑀫𑁆𑀫𑀡𑀁 𑀚𑀯𑀦𑀁 𑀧𑀘𑁆𑀘𑀬𑁄 𑀧𑀭𑀺𑀘𑀺𑀢𑀢𑀸𑀢𑀺 𑀇𑀫𑁂𑀲𑀁 𑀅𑀦𑀼𑀭𑀽𑀧𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀧𑀸𑀢𑁄 𑀳𑁄𑀢𑀺.

𑀇𑀥 𑀞𑀢𑁆𑀯𑀸 𑀇𑀫𑀺𑀲𑁆𑀲𑀸 𑀘𑀺𑀢𑁆𑀢𑀧𑀭𑀫𑁆𑀧𑀭𑀸𑀬 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀅𑀫𑁆𑀩𑁄𑀧𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀏𑀓𑁄 𑀓𑀺𑀭 𑀧𑀼𑀭𑀺𑀲𑁄 𑀨𑀮𑀺𑀢𑀫𑁆𑀩𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀸𑀬𑀢𑀺, 𑀅𑀣𑁂𑀓𑀁 𑀅𑀫𑁆𑀩𑀧𑀓𑁆𑀓𑀁 𑀯𑀡𑁆𑀝𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀢𑀲𑁆𑀲 𑀓𑀡𑁆𑀡𑀲𑀓𑁆𑀔𑀮𑀺𑀁 𑀧𑀼𑀜𑁆𑀙𑀫𑀸𑀦𑀁 𑀯𑀺𑀬 ‘‘𑀞’’𑀦𑁆𑀢𑀺 𑀪𑀽𑀫𑀺𑀬𑀁 𑀧𑀢𑀢𑀺, 𑀲𑁄 𑀢𑀲𑁆𑀲 𑀲𑀤𑁆𑀤𑁂𑀦 𑀧𑀩𑀼𑀚𑁆𑀛𑀺𑀢𑁆𑀯𑀸 𑀲𑀻𑀲𑀢𑁄 𑀯𑀢𑁆𑀣𑀁 𑀅𑀧𑀦𑁂𑀢𑁆𑀯𑀸 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀲𑀺, 𑀢𑀢𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀨𑀮𑀁 𑀕𑀳𑁂𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀉𑀧𑀲𑀺𑀗𑁆𑀖𑀺𑀢𑁆𑀯𑀸 𑀧𑀓𑁆𑀓𑀪𑀸𑀯𑀁 𑀜𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀔𑀕𑀢𑀁 𑀲𑀳 𑀲𑁂𑀫𑁆𑀳𑁂𑀦 𑀅𑀲𑁆𑀲𑀸𑀤𑁂𑀢𑁆𑀯𑀸 𑀧𑀼𑀦 𑀢𑀣𑁂𑀯 𑀦𑀺𑀤𑁆𑀤𑀸𑀬𑀢𑀺. 𑀢𑀢𑁆𑀣 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀦𑀺𑀤𑁆𑀤𑀸𑀬𑀦𑀓𑀸𑀮𑁄 𑀯𑀺𑀬 𑀪𑀯𑀗𑁆𑀕𑀲𑀫𑀗𑁆𑀕𑀺𑀓𑀸𑀮𑁄, 𑀅𑀫𑁆𑀩𑀧𑀓𑁆𑀓𑀲𑁆𑀲 𑀧𑀢𑀺𑀢𑀓𑀸𑀮𑁄 𑀯𑀺𑀬 𑀆𑀭𑀫𑁆𑀫𑀡𑀲𑁆𑀲 𑀧𑀲𑀸𑀤𑀖𑀝𑁆𑀝𑀦𑀓𑀸𑀮𑁄, 𑀧𑀢𑀦𑀲𑀤𑁆𑀤𑁂𑀦 𑀧𑀩𑀼𑀤𑁆𑀥𑀓𑀸𑀮𑁄 𑀯𑀺𑀬 𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀲𑁆𑀲 𑀆𑀯𑀝𑁆𑀝𑀺𑀢𑀓𑀸𑀮𑁄, 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑀺𑀢𑀓𑀸𑀮𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑀦𑀓𑀸𑀮𑁄, 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀕𑀳𑀺𑀢𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀓𑀸𑀮𑁄, 𑀕𑀳𑁂𑀢𑁆𑀯𑀸 𑀫𑀤𑁆𑀤𑀺𑀢𑀓𑀸𑀮𑁄 𑀯𑀺𑀬 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀲𑁆𑀲 𑀲𑀦𑁆𑀢𑀻𑀭𑀺𑀢𑀓𑀸𑀮𑁄, 𑀉𑀧𑀲𑀺𑀗𑁆𑀖𑀺𑀢𑀓𑀸𑀮𑁄 𑀯𑀺𑀬 𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀯𑀯𑀢𑁆𑀣𑀸𑀧𑀺𑀢𑀓𑀸𑀮𑁄, 𑀧𑀭𑀺𑀪𑀼𑀢𑁆𑀢𑀓𑀸𑀮𑁄 𑀯𑀺𑀬 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀭𑀲𑀅𑀦𑀼𑀪𑀯𑀺𑀢𑀓𑀸𑀮𑁄, 𑀫𑀼𑀔𑀕𑀢𑀁 𑀲𑀳 𑀲𑁂𑀫𑁆𑀳𑁂𑀦 𑀅𑀲𑁆𑀲𑀸𑀤𑀺𑀢𑀓𑀸𑀮𑁄 𑀯𑀺𑀬 𑀢𑀤𑀸𑀭𑀫𑁆𑀫𑀡𑀲𑁆𑀲 𑀚𑀯𑀦𑁂𑀦 𑀅𑀦𑀼𑀪𑀽𑀢𑀸𑀭𑀫𑁆𑀫𑀡𑀅𑀦𑀼𑀪𑀯𑀦𑀓𑀸𑀮𑁄, 𑀧𑀼𑀦 𑀦𑀺𑀤𑁆𑀤𑀸𑀬𑀦𑀁 𑀯𑀺𑀬 𑀧𑀼𑀦 𑀪𑀯𑀗𑁆𑀕𑀓𑀸𑀮𑁄𑀢𑀺 𑀏𑀯𑀫𑁂𑀢𑁆𑀣 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀬𑀁 𑀧𑀦 𑀉𑀧𑀫𑀸 𑀓𑀺𑀁 𑀤𑀻𑀧𑁂𑀢𑀺? 𑀆𑀭𑀫𑁆𑀫𑀡𑀲𑁆𑀲 𑀧𑀲𑀸𑀤𑀖𑀝𑁆𑀝𑀦𑀫𑁂𑀯 𑀓𑀺𑀘𑁆𑀘𑀁, 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀸𑀯𑀝𑁆𑀝𑀦𑀫𑁂𑀯 𑀓𑀺𑀘𑁆𑀘𑀁, 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀤𑀲𑁆𑀲𑀦𑀸𑀤𑀺𑀓𑀫𑁂𑀯 𑀓𑀺𑀘𑁆𑀘𑀁, 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀫𑁆𑀧𑀝𑀺𑀘𑁆𑀙𑀦𑀫𑁂𑀯 𑀓𑀺𑀘𑁆𑀘𑀁, 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀦𑁆𑀢𑀻𑀭𑀡𑀫𑁂𑀯 𑀓𑀺𑀘𑁆𑀘𑀁, 𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀯𑀯𑀢𑁆𑀣𑀸𑀧𑀦𑀫𑁂𑀯 𑀓𑀺𑀘𑁆𑀘𑀁, 𑀚𑀯𑀦𑀲𑁆𑀲𑁂𑀯 𑀧𑀦 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀢𑀤𑀸𑀭𑀫𑁆𑀫𑀡𑀲𑁆𑀲 𑀏𑀢𑁂𑀦 𑀅𑀦𑀼𑀪𑀽𑀢𑀲𑁆𑀲𑁂𑀯 𑀅𑀦𑀼𑀪𑀯𑀦𑀦𑁆𑀢𑀺 𑀏𑀯𑀁 𑀓𑀺𑀘𑁆𑀘𑀯𑀲𑁂𑀦 𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀲𑀁𑀓𑀺𑀡𑁆𑀡𑀢𑀁 𑀤𑀻𑀧𑁂𑀢𑀺, 𑀏𑀯𑀁 𑀧𑀯𑀢𑁆𑀢𑀫𑀸𑀦𑀁 𑀧𑀦 𑀘𑀺𑀢𑁆𑀢𑀁 ‘‘𑀢𑁆𑀯𑀁 𑀆𑀯𑀚𑁆𑀚𑀦𑀁 𑀦𑀸𑀫 𑀳𑁄𑀳𑀺, 𑀢𑁆𑀯𑀁 𑀤𑀲𑁆𑀲𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁, 𑀢𑁆𑀯𑀁 𑀲𑀫𑁆𑀧𑀝𑀺𑀘𑁆𑀙𑀦𑀁 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀦𑀺𑀬𑀼𑀜𑁆𑀚𑀓𑁂 𑀓𑀸𑀭𑀓𑁂 𑀅𑀲𑀢𑀺𑀧𑀺 𑀘𑀺𑀢𑁆𑀢𑀦𑀺𑀬𑀸𑀫𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦 𑀘𑀺𑀢𑁆𑀢𑀦𑀺𑀬𑀸𑀫𑀁 𑀲𑀤𑁆𑀥𑀺𑀁 𑀉𑀢𑀼𑀦𑀺𑀬𑀸𑀫𑀸𑀤𑀻𑀳𑀺 𑀧𑀭𑀺𑀘𑁆𑀙𑁂𑀤𑀸𑀯𑀲𑀸𑀦𑁂 𑀯𑀓𑁆𑀔𑀢𑀺. 𑀅𑀬𑀁 𑀢𑀸𑀯 𑀅𑀢𑀺𑀫𑀳𑀦𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀯𑀺𑀪𑀸𑀯𑀦𑀸.

𑀫𑀳𑀦𑁆𑀢𑀸𑀭𑀫𑁆𑀫𑀡𑁂 𑀧𑀦 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀢𑁄 𑀢𑀲𑁆𑀫𑀺𑀁 𑀆𑀧𑀸𑀣𑀕𑀢𑁂 𑀯𑀼𑀢𑁆𑀢𑀦𑀬𑁂𑀦 𑀚𑀯𑀦𑀧𑀭𑀺𑀬𑁄𑀲𑀸𑀦𑁂𑀲𑀼 𑀯𑀻𑀣𑀺𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀺, 𑀆𑀭𑀫𑁆𑀫𑀡𑀲𑁆𑀲 𑀧𑀦 𑀧𑀭𑀺𑀓𑁆𑀔𑀻𑀡𑀸𑀬𑀼𑀓𑀢𑁆𑀢𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀧𑁆𑀧𑀫𑀸𑀡𑁂𑀧𑀺 𑀯𑀸 𑀆𑀬𑀼𑀫𑁆𑀳𑀺 𑀲𑀢𑀺 𑀲𑀫𑀸𑀲𑀦𑁆𑀦𑀫𑀭𑀡𑁄 𑀯𑀺𑀬 𑀧𑀼𑀭𑀺𑀲𑁄 𑀤𑀼𑀩𑁆𑀩𑀮𑀪𑀸𑀯𑀢𑁄 𑀢𑀤𑀸𑀭𑀫𑁆𑀫𑀡𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀅𑀧𑀺𑀘 𑀢𑀤𑀸𑀭𑀫𑁆𑀫𑀡𑀫𑀼𑀧𑁆𑀧𑀚𑁆𑀚𑀦𑁆𑀢𑀁 𑀦𑀺𑀬𑀫𑀢𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀏𑀓𑀯𑀸𑀭𑀁. 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀯𑀲𑀺𑀝𑁆𑀞𑁂 𑀘 𑀆𑀭𑀫𑁆𑀫𑀡𑁂 𑀏𑀓𑀲𑁆𑀫𑀺𑀁 𑀢𑀤𑀸𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑁂𑀲𑀼 𑀤𑀼𑀢𑀺𑀬𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀢𑀲𑁆𑀲 𑀦𑀺𑀭𑀼𑀤𑁆𑀥𑀢𑁆𑀢𑀸 𑀦𑀼𑀧𑁆𑀧𑀚𑁆𑀚𑀢𑀺. 𑀦 𑀳𑀺 𑀤𑁆𑀯𑀻𑀲𑀼 𑀢𑀤𑀸𑀭𑀫𑁆𑀫𑀡𑁂𑀲𑀼 𑀏𑀓𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁, 𑀏𑀓𑀁 𑀅𑀢𑀻𑀢𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀤𑀼𑀢𑀺𑀬𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀞𑀫𑀫𑁆𑀧𑀺 𑀦𑀼𑀧𑁆𑀧𑀚𑁆𑀚𑀢𑀻𑀢𑀺. 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀧𑀦 𑀲𑀓𑀺𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀲𑁆𑀲 𑀧𑀯𑀢𑁆𑀢𑀺 𑀯𑀼𑀢𑁆𑀢𑀸. 𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑁂𑀧𑀺 𑀘 𑀢𑀫𑁂𑀯 𑀯𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀲𑀓𑀺𑀁 𑀤𑁆𑀯𑁂 𑀯𑀸 𑀢𑀤𑀸𑀮𑀫𑁆𑀩’’𑀦𑁆𑀢𑀺 (𑀧𑀭𑀫. 𑀯𑀺. 𑁧𑁧𑁬) 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀸𑀬𑀁 𑀲𑀩𑁆𑀩𑀯𑀸𑀭𑁂𑀲𑀼 𑀤𑁆𑀯𑁂 𑀏𑀯 𑀘𑀺𑀢𑁆𑀢𑀯𑀸𑀭𑀸𑀦𑀺 𑀆𑀕𑀢𑀸𑀦𑀻’’𑀢𑀺 𑀯𑀢𑁆𑀯𑀸 𑀢𑀁 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀁, 𑀢𑀲𑁆𑀫𑀸 𑀫𑀳𑀦𑁆𑀢𑀸𑀭𑀫𑁆𑀫𑀡𑁂 𑀚𑀯𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀺, 𑀦𑀢𑁆𑀣𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄, 𑀅𑀬𑀜𑁆𑀘 𑀢𑀤𑀸𑀭𑀫𑁆𑀫𑀡𑁂𑀳𑀺 𑀢𑀼𑀘𑁆𑀙𑀢𑀸𑀬 ‘‘𑀫𑁄𑀖𑀯𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺.

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂 𑀚𑀯𑀦𑀼𑀧𑁆𑀧𑀸𑀤𑀲𑁆𑀲𑀧𑀺 𑀅𑀪𑀸𑀯𑀢𑁄 𑀲𑀦𑁆𑀢𑀻𑀭𑀡𑀸𑀯𑀲𑀸𑀦𑁂𑀲𑀼 𑀯𑀻𑀣𑀺𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀤𑀦𑀦𑁆𑀢𑀭𑀁 𑀯𑁄𑀝𑁆𑀞𑀩𑁆𑀩𑀦𑀫𑁂𑀯 𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸 𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀢𑀺, 𑀢𑀢𑁄 𑀪𑀯𑀗𑁆𑀕𑀧𑀸𑀢𑁄 𑀳𑁄𑀢𑀺. 𑀯𑁄𑀝𑁆𑀞𑀩𑁆𑀩𑀦𑀁 𑀧𑀦 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀓𑀁 𑀧𑀢𑁆𑀯𑀸 𑀦𑀺𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀚𑀯𑀦𑀁 𑀧𑀦 𑀆𑀭𑀫𑁆𑀫𑀡𑀲𑁆𑀲 𑀅𑀧𑁆𑀧𑀸𑀬𑀼𑀓𑀪𑀸𑀯𑁂𑀦 𑀧𑀭𑀺𑀤𑀼𑀩𑁆𑀩𑀮𑀢𑁆𑀢𑀸 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀜𑁆𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀢𑁆𑀢𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀓𑀢𑀺𑀧𑀬𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑁂 𑀧𑀦 𑀧𑀞𑀫𑀚𑀯𑀦𑀫𑁂𑀯 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀤𑀦𑀼𑀧𑁆𑀧𑀢𑁆𑀢𑀺𑀬𑀜𑁆𑀳𑀺 𑀇𑀢𑀭𑀸𑀦𑀺𑀧𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂 𑀦𑀢𑁆𑀣𑀺 𑀚𑀯𑀦𑀼𑀧𑁆𑀧𑀸𑀤𑁄𑀢𑀺 𑀅𑀬𑀁 𑀤𑀼𑀢𑀺𑀬𑁄 𑀫𑁄𑀖𑀯𑀸𑀭𑁄 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑁄. 𑀝𑀻𑀓𑀸𑀓𑀸𑀭𑁄 𑀧𑀦 𑀢𑀣𑀸 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀜𑁆𑀜𑀣𑀸 𑀤𑀼𑀢𑀺𑀬𑀫𑁄𑀖𑀯𑀸𑀭𑀁 𑀧𑀓𑀧𑁆𑀧𑁂𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀢𑁂𑀦 𑀢𑀻𑀲𑀼 𑀫𑁄𑀖𑀯𑀸𑀭𑁂𑀲𑀼 𑀤𑀼𑀢𑀺𑀬𑀫𑁄𑀖𑀯𑀸𑀭𑁄 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀬𑀤𑀺 𑀳𑀺 𑀅𑀦𑀼𑀮𑁄𑀫𑁂 𑀯𑁂𑀤𑀦𑀸𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 ‘‘𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀫𑀕𑁆𑀕𑁂 𑀤𑁆𑀯𑁂, 𑀦𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀤𑁆𑀯𑁂’’𑀢𑀺 𑀘 𑀯𑀼𑀢𑁆𑀢𑀁 𑀲𑀺𑀬𑀸, 𑀲𑁄𑀧𑀺 𑀫𑁄𑀖𑀯𑀸𑀭𑁄 𑀮𑀩𑁆𑀪𑁂𑀬𑁆𑀬. 𑀬𑀤𑀺 𑀘 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀆𑀲𑁂𑀯𑀦𑀧𑀘𑁆𑀘𑀬𑁄 𑀲𑀺𑀬𑀸, 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑁆𑀧𑀺 𑀲𑀺𑀬𑀸. 𑀦 𑀳𑀺 𑀆𑀲𑁂𑀯𑀦𑀧𑀘𑁆𑀘𑀬𑀁 𑀮𑀤𑁆𑀥𑀼𑀁 𑀬𑀼𑀢𑁆𑀢𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑀻 𑀥𑀫𑁆𑀫𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀯𑀼𑀢𑁆𑀢𑁄 𑀅𑀢𑁆𑀣𑀺. 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀧𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄. ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀲𑁂𑀯𑀦𑀧𑀘𑁆𑀘𑀬𑀸. 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀲𑁂𑀯𑀦𑀧𑀘𑁆𑀘𑀬𑀸’’𑀢𑀺 𑀯𑀘𑀦𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀯. 𑀅𑀣𑀸𑀧𑀺 𑀲𑀺𑀬𑀸 ‘‘𑀅𑀲𑀫𑀸𑀦𑀯𑁂𑀤𑀦𑀸𑀦𑀁 𑀯𑀲𑁂𑀦𑁂𑀯𑀁 𑀯𑀼𑀢𑁆𑀢’’𑀦𑁆𑀢𑀺, 𑀏𑀯𑀫𑁆𑀧𑀺 𑀬𑀣𑀸 ‘‘𑀆𑀯𑀚𑁆𑀚𑀦𑀸 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁, 𑀅𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀯𑀼𑀢𑁆𑀢𑀁, 𑀏𑀯𑀁 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀚𑀸𑀢𑀺𑀪𑁂𑀤𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂, ‘‘𑀪𑀽𑀫𑀺𑀪𑀺𑀦𑁆𑀦𑀲𑁆𑀲 𑀓𑀸𑀫𑀸𑀯𑀘𑀭𑀲𑁆𑀲 𑀭𑀽𑀧𑀸𑀯𑀘𑀭𑀸𑀤𑀻𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁄 𑀯𑀺𑀬 𑀚𑀸𑀢𑀺𑀪𑀺𑀦𑁆𑀦𑀲𑁆𑀲𑀧𑀺 𑀪𑀯𑁂𑀬𑁆𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁄 𑀏𑀯 𑀲𑀺𑀬𑀸, 𑀅𑀪𑀺𑀦𑁆𑀦𑀚𑀸𑀢𑀺𑀓𑀲𑁆𑀲 𑀘 𑀯𑀲𑁂𑀦 𑀬𑀣𑀸 ‘‘𑀆𑀯𑀚𑁆𑀚𑀦𑀸 𑀲𑀳𑁂𑀢𑀼𑀓𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀢𑀼 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑁂𑀤𑀦𑀸𑀢𑁆𑀢𑀺𑀓𑁂𑀧𑀺 𑀲𑀁𑀔𑀺𑀢𑁆𑀢𑀸𑀬 𑀕𑀡𑀦𑀸𑀬 ‘‘𑀆𑀲𑁂𑀯𑀦𑀧𑀘𑁆𑀘𑀬𑀸 𑀦𑀫𑀕𑁆𑀕𑁂 𑀏𑀓𑀁, 𑀦𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀏𑀓’’𑀦𑁆𑀢𑀺 𑀏𑀯𑀁 𑀕𑀡𑀦𑀸𑀬 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀸𑀬 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀤𑀼𑀢𑀺𑀬𑁄 𑀫𑁄𑀖𑀯𑀸𑀭𑁄 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀯𑁄𑀝𑁆𑀞𑀩𑁆𑀩𑀦𑀁 𑀧𑀦 𑀯𑀻𑀣𑀺𑀯𑀺𑀧𑀸𑀓𑀲𑀦𑁆𑀢𑀢𑀺𑀬𑀸 𑀆𑀯𑀝𑁆𑀝𑀦𑀢𑁄 ‘‘𑀆𑀯𑀚𑁆𑀚𑀦𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑀢𑁄 𑀯𑀺𑀲𑀤𑀺𑀲𑀲𑁆𑀲 𑀚𑀯𑀦𑀲𑁆𑀲 𑀓𑀭𑀡𑀢𑁄 𑀫𑀦𑀲𑀺𑀓𑀸𑀭𑁄 𑀘. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑁆𑀞𑀸𑀦𑁂 ‘‘𑀯𑁄𑀝𑁆𑀞𑀩𑁆𑀩𑀦𑀁 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀁, ‘‘𑀆𑀯𑀚𑁆𑀚𑀦𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑁄𑀝𑁆𑀞𑀩𑁆𑀩𑀦𑀢𑁄 𑀘𑀢𑀼𑀦𑁆𑀦𑀁 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀸 𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀭𑀽𑀧𑀸𑀤𑀺𑀆𑀯𑀚𑁆𑀚𑀦𑀸𑀤𑀻𑀦𑀁 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀬𑀫𑁂𑀢𑀲𑁆𑀲 𑀲𑀪𑀸𑀯𑁄𑀢𑀺 𑀚𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀤𑀼𑀢𑀺𑀬𑁄 𑀫𑁄𑀖𑀯𑀸𑀭𑁄 𑀤𑀲𑁆𑀲𑁂𑀢𑀼𑀁 𑀬𑀼𑀢𑁆𑀢𑁄 𑀲𑀺𑀬𑀸𑀢𑀺.

𑀅𑀬𑀜𑁆𑀳𑀺 𑀆𑀘𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀆𑀲𑁂𑀯𑀦𑀧𑀘𑁆𑀘𑀬𑁄 𑀲𑀺𑀬𑀸, 𑀬𑀣𑀸 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀆𑀲𑁂𑀯𑀦𑀧𑀘𑁆𑀘𑀬𑀸 𑀦𑀫𑀕𑁆𑀕𑀧𑀘𑁆𑀘𑀬𑀸’’𑀢𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀺𑀬𑁂, 𑀧𑀘𑁆𑀘𑀦𑀺𑀬𑀸𑀦𑀼𑀮𑁄𑀫𑁂 𑀘 ‘‘𑀲𑀼𑀔𑀸…𑀧𑁂… 𑀦𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑀧𑀘𑁆𑀘𑀬𑀸’’𑀢𑀺 𑀘 𑀯𑀼𑀢𑁆𑀢𑀁 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀯𑀲𑁂𑀦, 𑀏𑀯𑀫𑁆𑀧𑀺 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀧𑀸𑀞𑁄 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀯𑀸𑀭𑀤𑁆𑀯𑀬𑀯𑀲𑁂𑀦 𑀕𑀡𑀦𑀸𑀬 ‘‘𑀆𑀲𑁂𑀯𑀦𑀧𑀘𑁆𑀘𑀬𑀸 𑀦𑀫𑀕𑁆𑀕𑁂 𑀤𑁆𑀯𑁂, 𑀦𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀤𑁆𑀯𑁂’’𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀧𑀦 𑀯𑀼𑀢𑁆𑀢𑀁, ‘‘𑀆𑀲𑁂𑀯𑀦𑀧𑀘𑁆𑀘𑀬𑀸 𑀦𑀫𑀕𑁆𑀕𑁂 𑀏𑀓𑀁, 𑀦𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀏𑀓’’𑀦𑁆𑀢𑀺𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀧𑀺𑀘 𑀬𑀤𑀺 𑀳𑀺 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀆𑀲𑁂𑀯𑀦𑀧𑀘𑁆𑀘𑀬𑁄 𑀲𑀺𑀬𑀸, 𑀤𑀼𑀢𑀺𑀬𑀫𑁄𑀖𑀯𑀸𑀭𑁄 𑀯𑀺𑀬 𑀧𑀼𑀭𑀺𑀫𑀯𑀸𑀭𑁂𑀲𑀼𑀧𑀺 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀅𑀢𑁆𑀢𑀦𑁄 𑀯𑀺𑀬 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑁆𑀧𑀺 𑀲𑀺𑀬𑀸. 𑀦 𑀳𑀺 𑀆𑀲𑁂𑀯𑀦𑀧𑀘𑁆𑀘𑀬𑀁 𑀮𑀤𑁆𑀥𑀼𑀁 𑀬𑀼𑀢𑁆𑀢𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑀻 𑀥𑀫𑁆𑀫𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀯𑀼𑀢𑁆𑀢𑁄 𑀅𑀢𑁆𑀣𑀺 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀅𑀦𑀯𑀲𑁂𑀲𑀢𑁄 𑀯𑀼𑀢𑁆𑀢𑀢𑁆𑀢𑀸, 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀧𑀦 𑀅𑀯𑀼𑀢𑁆𑀢𑁄 ‘‘𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀪𑀸𑀯𑀢𑁄. 𑀦 𑀓𑁂𑀯𑀮𑀁 𑀅𑀯𑀼𑀢𑁆𑀢𑁄𑀯, 𑀅𑀣 𑀔𑁄 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀨𑀲𑁆𑀲𑀸𑀤𑀺𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑁂 𑀧𑀝𑀺𑀘𑁆𑀘 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀯𑀢𑁆𑀯𑀸 𑀧𑀞𑀫𑀚𑀯𑀦𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀢𑁄 𑀆𑀲𑁂𑀯𑀦𑀧𑀘𑁆𑀘𑀬𑀸𑀮𑀸𑀪𑀁 𑀲𑀦𑁆𑀥𑀸𑀬 ‘‘𑀦𑀸𑀲𑁂𑀯𑀦𑀧𑀘𑁆𑀘𑀬𑀸’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁄𑀯.

𑀅𑀣𑀸𑀧𑁂𑀢𑁆𑀣 𑀲𑀫𑁄𑀥𑀸𑀦𑀁 𑀲𑀺𑀬𑀸, 𑀲𑀫𑀸𑀦𑀯𑁂𑀤𑀦𑀸𑀦𑀁 𑀏𑀯 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁄 𑀯𑁄𑀝𑁆𑀞𑀩𑁆𑀩𑀦𑁂𑀦 𑀅𑀲𑀫𑀸𑀦𑀯𑁂𑀤𑀦𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀯𑀲𑁂𑀦𑀸𑀬𑀁 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺. 𑀏𑀯𑀫𑁆𑀧𑀺 𑀲𑀢𑀺 𑀬𑀣𑀸 ‘‘𑀆𑀯𑀚𑁆𑀚𑀦𑀸 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀫𑀸𑀦𑀯𑁂𑀤𑀦𑀸𑀯𑀲𑁂𑀦 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀅𑀣 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀪𑀺𑀦𑁆𑀦𑀚𑀸𑀢𑀺𑀓𑀢𑁆𑀢𑀸 𑀢𑀲𑁆𑀲 𑀢𑁂𑀲𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄𑀢𑀺 𑀘𑁂. 𑀬𑀣𑀸 𑀪𑀽𑀫𑀺𑀯𑀲𑁂𑀦 𑀪𑀺𑀦𑁆𑀦𑀲𑁆𑀲 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀯𑀲𑁂𑀦 𑀞𑀺𑀢𑀲𑁆𑀲 𑀓𑀸𑀫𑀸𑀯𑀘𑀭𑀲𑁆𑀲 𑀭𑀽𑀧𑀸𑀯𑀘𑀭𑀸𑀤𑀻𑀦𑀁 𑀆𑀲𑁂𑀯𑀦𑀪𑀸𑀯𑁄 𑀤𑀺𑀲𑁆𑀲𑀢𑀺, 𑀏𑀯𑀁 𑀚𑀸𑀢𑀺𑀯𑀲𑁂𑀦 𑀪𑀺𑀦𑁆𑀦𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁂 𑀦 𑀓𑁄𑀘𑀺 𑀯𑀺𑀩𑀦𑁆𑀥𑁄, 𑀅𑀧𑀺𑀘 𑀅𑀪𑀺𑀦𑁆𑀦𑀯𑁂𑀤𑀦𑀲𑁆𑀲, 𑀅𑀪𑀺𑀦𑁆𑀦𑀚𑀸𑀢𑀺𑀓𑀲𑁆𑀲 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀬𑀣𑀸 ‘‘𑀆𑀯𑀚𑁆𑀚𑀦𑀸 𑀲𑀳𑁂𑀢𑀼𑀓𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀢𑀼 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑁂𑀤𑀦𑀸𑀢𑁆𑀢𑀺𑀓𑁂𑀧𑀺 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀢𑁆𑀢𑀲𑁆𑀲 𑀅𑀪𑀸𑀯𑀸 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀆𑀲𑁂𑀯𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄 𑀤𑀼𑀢𑀺𑀬𑁄 𑀫𑁄𑀖𑀯𑀸𑀭𑁄 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀸𑀦𑀁 𑀧𑀦 𑀅𑀦𑀢𑁆𑀣𑀦𑁆𑀢𑀭𑀪𑀸𑀯𑀢𑁄 𑀆𑀯𑀚𑁆𑀚𑀦𑀸𑀬 𑀘 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀲𑀢𑀺 𑀉𑀧𑁆𑀧𑀢𑁆𑀢𑀺𑀬𑀁 𑀯𑁄𑀝𑁆𑀞𑀩𑁆𑀩𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀚𑀯𑀦𑀸𑀦𑀁 𑀏𑀓𑀦𑁆𑀢𑀢𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀯𑀢𑁆𑀢𑁂𑀬𑁆𑀬, 𑀦 𑀧𑀦 𑀅𑀜𑁆𑀜𑀣𑀸𑀢𑀺 𑀫𑀼𑀜𑁆𑀙𑀸𑀫𑀭𑀡𑀸𑀲𑀦𑁆𑀦𑀯𑁂𑀮𑀸𑀤𑀻𑀲𑀼 𑀚𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑀸𑀬 𑀅𑀬𑀁 𑀤𑀲𑁆𑀲𑁂𑀢𑀩𑁆𑀩𑁄𑀢𑀺.

𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦𑁂𑀢𑁆𑀣 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀬𑀁 𑀚𑀯𑀦𑀪𑀸𑀯𑀧𑁆𑀧𑀢𑁆𑀢𑀁, 𑀢𑀁 𑀙𑀺𑀦𑁆𑀦𑀫𑀽𑀮𑀭𑀼𑀓𑁆𑀔𑀧𑀼𑀧𑁆𑀨𑀁 𑀯𑀺𑀬𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑀸𑀦𑀁 𑀧𑀯𑀢𑁆𑀢𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀓𑀺𑀭𑀺𑀬𑀪𑀸𑀯𑁄 𑀦 𑀲𑀺𑀬𑀸, 𑀯𑀼𑀢𑁆𑀢𑁄 𑀘 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀓𑀺𑀭𑀺𑀬𑀸 𑀦𑁂𑀯𑀓𑀼𑀲𑀮𑀸, 𑀦𑀸𑀓𑀼𑀲𑀮𑀸, 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸’’𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸’’𑀢𑀺 𑀯𑀘𑀦𑀁 𑀚𑀯𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀢𑁆𑀯𑀸 𑀦 𑀚𑀯𑀦𑀪𑀸𑀯𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁, ‘‘𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸’’𑀢𑀺 𑀘 ‘‘𑀆𑀲𑁂𑀯𑀦𑀁 𑀯𑀺𑀬 𑀆𑀲𑁂𑀯𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀦 𑀓𑁄𑀘𑀺 𑀯𑀺𑀭𑁄𑀥𑁄𑀢𑀺. 𑀯𑀺𑀧𑁆𑀨𑀸𑀭𑀺𑀓𑀲𑁆𑀲 𑀧𑀦 𑀲𑀢𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑁂𑀯𑁂𑀢𑁆𑀣 𑀆𑀲𑁂𑀯𑀦𑀲𑀤𑀺𑀲𑀢𑀸. 𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀳𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀜𑁆𑀘𑀲𑁆𑀲 𑀯𑀼𑀘𑁆𑀘𑀢𑀺. 𑀯𑀺𑀧𑁆𑀨𑀸𑀭𑀺𑀓𑀫𑁆𑀧𑀺 𑀚𑀯𑀦𑀁 𑀯𑀺𑀬 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀅𑀧𑁆𑀧𑀯𑀢𑁆𑀢𑀺𑀬𑀸 𑀤𑀼𑀩𑁆𑀩𑀮𑀢𑁆𑀢𑀸 𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁂𑀦 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀦 𑀇𑀫𑀲𑁆𑀲 𑀧𑀸𑀞𑁂 𑀆𑀲𑁂𑀯𑀦𑀢𑁆𑀢𑀁 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁, 𑀬𑀣𑀸 𑀨𑀮𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺. 𑀬𑀤𑀺𑀧𑀺 ‘‘𑀚𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸…𑀧𑁂… 𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁, ‘‘𑀆𑀯𑀚𑁆𑀚𑀦𑀸𑀤𑀻𑀦𑀁 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀧𑀞𑀫𑀫𑁄𑀖𑀯𑀸𑀭𑀢𑁄 𑀏𑀢𑀲𑁆𑀲 𑀦 𑀓𑁄𑀘𑀺 𑀯𑀺𑀲𑁂𑀲𑁄𑀢𑀺.

𑀘𑀓𑁆𑀔𑀼𑀲𑁆𑀲𑀸𑀧𑀸𑀣𑀫𑀸𑀕𑀢𑁂𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀲 𑀬𑁄𑀕𑁆𑀬𑀤𑁂𑀲𑀸𑀯𑀝𑁆𑀞𑀸𑀦𑀯𑀲𑁂𑀦 𑀆𑀧𑀸𑀣𑀫𑀸𑀕𑀢𑁂. 𑀢𑀸𑀬𑀸𑀢𑀺 𑀫𑀦𑁄𑀥𑀸𑀢𑀼𑀬𑀸 𑀪𑀯𑀗𑁆𑀕𑀸𑀯𑀝𑁆𑀝𑀦𑁂 𑀧𑀸𑀓𑀝𑀢𑀸𑀬 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀁 𑀧𑀘𑁆𑀘𑀸𑀫𑀲𑀢𑀺. 𑀆𑀯𑀝𑁆𑀝𑀺𑀢𑁂𑀢𑀺 𑀲𑀦𑁆𑀢𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑀼𑀁 𑀅𑀤𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁂, 𑀧𑀭𑀺𑀡𑀸𑀫𑀺𑀢𑁂 𑀯𑀸. 𑀚𑀸𑀢𑁂𑀲𑀼 𑀚𑀸𑀬𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀢𑁂𑀢𑀺 𑀦𑀺𑀭𑀼𑀤𑁆𑀥𑁂. 𑀢𑀤𑁂𑀯𑀸𑀢𑀺 𑀚𑀯𑀦𑀸𑀦𑀼𑀪𑀽𑀢𑀫𑁂𑀯 𑀇𑀝𑁆𑀞𑀸𑀭𑀫𑁆𑀫𑀡𑀁. 𑀢𑁂𑀦𑁂𑀯𑀸𑀢𑀺 𑀚𑀯𑀦𑀁 𑀳𑀼𑀢𑁆𑀯𑀸 𑀦𑀺𑀭𑀼𑀤𑁆𑀥𑁂𑀦 𑀢𑁂𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑁂𑀦. 𑀢𑀤𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑀦𑁆𑀢𑀺 𑀚𑀯𑀦𑀕𑁆𑀕𑀳𑀺𑀢𑁂𑀬𑁂𑀯 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑀢𑁄 ‘‘𑀩𑁆𑀭𑀳𑁆𑀫𑀲𑁆𑀲𑀭𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀢𑀲𑁆𑀲 𑀆𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀫𑀲𑁆𑀲𑀸𑀢𑀺 𑀫𑀚𑁆𑀛𑀧𑀤𑀮𑁄𑀧𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀦𑁆𑀢𑀺 𑀲𑀜𑁆𑀜𑀺𑀢𑀁. 𑀢𑀼𑀮𑁆𑀬𑀢𑁄𑀢𑀺 𑀆𑀭𑀫𑁆𑀫𑀡𑀢𑁄 𑀯𑀺𑀲𑀤𑀺𑀲𑀪𑀸𑀯𑁂𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀤𑀺𑀦𑀸 𑀲𑀤𑀺𑀲𑀢𑁆𑀢𑀸. 𑀫𑀽𑀮𑀲𑀤𑀺𑀲𑀁 𑀪𑀯𑀗𑁆𑀕𑀁 𑀫𑀽𑀮𑀪𑀯𑀗𑁆𑀕𑀁. 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀪𑀯𑀗𑁆𑀕𑀲𑀪𑀸𑀯𑀢𑁆𑀢𑀸 ‘‘𑀪𑀯𑀗𑁆𑀕’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁩.𑁧.𑁧𑁦𑁨). 𑀏𑀢𑁆𑀣 𑀳𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂 𑀏𑀯 𑀧𑀯𑀢𑁆𑀢𑀺𑀬𑀁 ‘‘𑀪𑀯𑀗𑁆𑀕’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀢𑀲𑁆𑀲 𑀳𑁂𑀢𑀼𑀯𑀲𑁂𑀦 𑀪𑁂𑀤𑁄𑀢𑀺 ‘‘𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦𑀸𑀧𑀺 𑀘𑁂𑀢𑀁 ‘‘𑀲𑀳𑁂𑀢𑀼𑀓𑀁 𑀘𑀼𑀢𑀺𑀁 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀪𑀯𑀲𑁆𑀲 𑀅𑀗𑁆𑀕𑀪𑀸𑀯𑀸𑀪𑀸𑀯𑀢𑁄 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀪𑀯𑀗𑁆𑀕𑀯𑁄𑀳𑀸𑀭𑀸𑀮𑀸𑀪𑀢𑁄𑀢𑀺 ‘‘𑀲𑀳𑁂𑀢𑀼𑀓𑀁 𑀪𑀯𑀗𑁆𑀕’’𑀦𑁆𑀢𑀺 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀢𑀤𑀸𑀭𑀫𑁆𑀫𑀡𑀲𑀜𑁆𑀜𑀺𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀫𑀽𑀮𑀪𑀯𑀗𑁆𑀕𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀸𑀫𑀤𑁆𑀯𑀬𑀫𑁆𑀧𑀺 𑀇𑀫𑀲𑁆𑀲 𑀮𑀩𑁆𑀪𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑁩𑁯𑁨. 𑀢𑀜𑁆𑀘𑀸𑀢𑀺 𑀢𑀤𑀸𑀭𑀫𑁆𑀫𑀡𑀜𑁆𑀘. 𑀏𑀢𑁆𑀣𑀸𑀢𑀺 𑀇𑀫𑁂𑀲𑀼 𑀯𑀻𑀣𑀺𑀘𑀺𑀢𑁆𑀢𑁂𑀲𑀼. 𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀻𑀢𑀺 𑀯𑀺𑀧𑀸𑀓𑀕𑀡𑀦𑀽𑀧𑀕𑀘𑀺𑀢𑁆𑀢𑀸𑀦𑀺.

𑁩𑁯𑁪. 𑀅𑀲𑀫𑀸𑀦𑀢𑁆𑀢𑀸𑀢𑀺 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁂𑀦 𑀅𑀲𑀫𑀸𑀦𑀢𑁆𑀢𑀸.

𑁩𑁯𑁬. 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀙 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀬𑁂𑀪𑀼𑀬𑁆𑀬𑀢𑁄 𑀇𑀝𑁆𑀞𑀸𑀭𑀫𑁆𑀫𑀡𑁂 𑀲𑁄𑀫𑀦𑀲𑁆𑀲𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀚𑀯𑀦𑀸𑀦𑀦𑁆𑀢𑀭𑀫𑁂𑀯 𑀲𑁄𑀫𑀦𑀲𑁆𑀲𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁. 𑀚𑀯𑀦𑀲𑁆𑀲 𑀧𑀦 𑀧𑀓𑀧𑁆𑀧𑁂𑀢𑁆𑀯𑀸 𑀆𑀭𑀫𑁆𑀫𑀡𑀕𑁆𑀕𑀳𑀡𑀲𑀩𑁆𑀪𑀸𑀯𑀢𑁄, 𑀯𑀺𑀧𑀸𑀓𑀲𑁆𑀲 𑀘 𑀢𑀤𑀪𑀸𑀯𑀢𑁄 𑀇𑀝𑁆𑀞𑀸𑀭𑀫𑁆𑀫𑀡𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀚𑀯𑀦𑁂𑀲𑀼𑀧𑀺 𑀚𑀯𑀺𑀢𑁂𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺.

𑁩𑁯𑁯-𑁪𑁦𑁩. 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀘𑀓𑁆𑀔𑀼𑀤𑁆𑀯𑀸𑀭𑁂. 𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑀢𑀻𑀢𑀺 𑀓𑀫𑁆𑀫𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁂𑀧𑀺 𑀆𑀭𑀫𑁆𑀫𑀡𑀲𑁆𑀲 𑀇𑀝𑁆𑀞𑀫𑀚𑁆𑀛𑀢𑁆𑀢𑀢𑀸𑀬 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀳𑁄𑀢𑀺. 𑀅𑀣 𑀯𑀸 𑀳𑁂𑀝𑁆𑀞𑀸 𑀯𑀺𑀧𑀸𑀓𑀯𑁂𑀤𑀦𑀸𑀬 𑀲𑁄𑀫𑀦𑀲𑁆𑀲𑀪𑀸𑀯𑁂𑀧𑀺 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀢𑀁𑀯𑀲𑁂𑀦 𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀚𑀯𑀦𑁂𑀲𑀼 𑀚𑀯𑀺𑀢𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀚𑀯𑀺𑀢𑁂𑀲𑀼 𑀘𑀢𑀽𑀲𑁆𑀯𑀧𑀻’’𑀢𑀺 𑀯𑀸 𑀧𑀸𑀞𑁄. 𑀚𑀸𑀬𑀭𑁂𑀢𑀺 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀚𑀸𑀬𑀦𑁆𑀢𑀺. 𑀯𑁂𑀤𑀦𑀸𑀬𑀸𑀢𑀺 𑀯𑁂𑀤𑀦𑀸𑀬 𑀓𑀭𑀡𑀪𑀽𑀢𑀸𑀬. 𑀅𑀲𑀫𑀸𑀦𑀢𑁆𑀢𑀸𑀢𑀺 𑀧𑀝𑀺𑀲𑀦𑁆𑀥𑀺𑀬𑀸 𑀲𑀳 𑀅𑀲𑀫𑀸𑀦𑀢𑁆𑀢𑀸. 𑀧𑀼𑀭𑀺𑀫𑁂𑀳𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑀤𑀸𑀭𑀫𑁆𑀫𑀡𑀘𑀢𑀼𑀓𑁆𑀓𑀢𑁄. 𑀅𑀣 𑀯𑀸 ‘‘𑀧𑀼𑀭𑀺𑀫𑁂𑀳𑀺 𑀅𑀲𑀫𑀸𑀦𑀢𑁆𑀢𑀸’’ 𑀇𑀘𑁆𑀘𑁂𑀯 𑀬𑁄𑀚𑀦𑀸. 𑀧𑀼𑀭𑀺𑀫𑁂𑀳𑀺 𑀲𑀳 𑀅𑀲𑀫𑀸𑀦𑀪𑀸𑀯𑁂 𑀯𑀼𑀢𑁆𑀢𑁂 𑀢𑁂𑀲𑀁 𑀲𑀦𑁆𑀥𑀺𑀬𑀸 𑀲𑀳 𑀅𑀲𑀫𑀸𑀦𑀪𑀸𑀯𑁄𑀧𑀺 𑀯𑀼𑀢𑁆𑀢𑁄𑀯 𑀳𑁄𑀢𑀻𑀢𑀺 𑀘𑀢𑁆𑀢𑀸𑀭𑀺 𑀦𑀸𑀫𑀢𑁄 𑀧𑀺𑀝𑁆𑀞𑀺𑀪𑀯𑀗𑁆𑀕𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀘-𑀲𑀤𑁆𑀤𑁂𑀦 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀸𑀦𑀺, 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀧𑀺 𑀘 𑀬𑁂𑀪𑀼𑀬𑁆𑀬𑁂𑀦 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀚𑀯𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀚𑀯𑀦𑀸𑀦𑀦𑁆𑀢𑀭𑀫𑁂𑀯 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀤𑀻𑀲𑀼 𑀚𑀯𑀺𑀢𑁂𑀲𑀼 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀢𑀤𑀸𑀭𑀫𑁆𑀫𑀡𑀸𑀦𑀁 𑀲𑀫𑁆𑀪𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀜𑁆𑀘𑀸𑀧𑀺 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀯𑀺𑀥𑀸𑀦𑀁 𑀚𑀯𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀉𑀢𑀼𑀪𑁄𑀚𑀦𑀸𑀤𑀺𑀧𑀘𑁆𑀘𑀬𑀸𑀦𑀁 𑀤𑀼𑀩𑁆𑀩𑀮𑀪𑀸𑀯𑁂 𑀚𑀯𑀦𑀲𑁆𑀲𑁂𑀯 𑀅𑀲𑀗𑁆𑀔𑀸𑀭𑀺𑀓𑀢𑁆𑀢𑀸𑀪𑀸𑀯𑀢𑁄 𑀅𑀲𑀗𑁆𑀔𑀸𑀭𑀚𑀯𑀦𑀸𑀯𑀲𑀸𑀦𑁂 𑀅𑀲𑀗𑁆𑀔𑀸𑀭𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀲𑀲𑀗𑁆𑀔𑀸𑀭𑀦𑁆𑀢𑀺 𑀦𑀺𑀬𑀫𑁄. 𑀧𑀘𑁆𑀘𑀬𑀲𑁆𑀲 𑀧𑀦 𑀩𑀮𑀯𑀪𑀸𑀯𑁂 𑀲𑀢𑀺𑀧𑀺 𑀧𑀭𑁂𑀲𑀁 𑀉𑀲𑁆𑀲𑀸𑀳𑀩𑀮𑁂𑀦 𑀲𑀲𑀗𑁆𑀔𑀸𑀭𑀲𑁆𑀲 𑀚𑀯𑀦𑀲𑁆𑀲 𑀲𑀫𑁆𑀪𑀯𑀢𑁄 𑀲𑀲𑀗𑁆𑀔𑀸𑀭𑀚𑀯𑀦𑀸𑀯𑀲𑀸𑀦𑁂 𑀲𑀲𑀗𑁆𑀔𑀸𑀭𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀲𑀲𑀗𑁆𑀔𑀸𑀭𑀺𑀓𑀢𑁆𑀢𑀸𑀪𑀸𑀯𑀢𑁄 𑀅𑀲𑀗𑁆𑀔𑀸𑀭𑀚𑀯𑀦𑀸𑀯𑀲𑀸𑀦𑁂 𑀅𑀲𑀗𑁆𑀔𑀸𑀭𑀫𑁂𑀯𑀸𑀢𑀺 𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀅𑀲𑀗𑁆𑀔𑀸𑀭𑀚𑀯𑀦𑀸𑀯𑀲𑀸𑀦𑁂 𑀅𑀲𑀗𑁆𑀔𑀸𑀭𑀫𑁆𑀧𑀺 𑀲𑀲𑀗𑁆𑀔𑀸𑀭𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀲𑀲𑀗𑁆𑀔𑀸𑀭𑀚𑀯𑀦𑀸𑀯𑀲𑀸𑀦𑁂 𑀲𑀲𑀗𑁆𑀔𑀸𑀭𑀫𑁆𑀧𑀺 𑀅𑀲𑀗𑁆𑀔𑀸𑀭𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀧𑀜𑁆𑀘𑀺𑀫𑀸𑀦𑀻𑀢𑀺 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀯𑀼𑀢𑁆𑀢𑀸𑀦𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀸𑀤𑀻𑀦𑀺 𑀧𑀜𑁆𑀘 𑀯𑀺𑀧𑀸𑀓𑀸𑀦𑀺. 𑀧𑀼𑀭𑀺𑀫𑁂𑀳𑀺 𑀲𑀢𑁆𑀢𑀳𑀻𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀯𑀼𑀢𑁆𑀢𑁂𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀲𑀢𑁆𑀢𑀳𑀺 𑀯𑀺𑀦𑀺𑀤𑁆𑀤𑀺𑀲𑁂 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁦𑁫-𑁬. 𑀏𑀓𑀸𑀬 𑀘𑁂𑀢𑀦𑀸𑀬𑀸𑀢𑀺 𑀏𑀓𑀸𑀬 𑀢𑀺𑀳𑁂𑀢𑀼𑀓𑀲𑁄𑀫𑀦𑀲𑁆𑀲𑀲𑀳𑀕𑀢𑀅𑀲𑀗𑁆𑀔𑀸𑀭𑀺𑀓𑀘𑁂𑀢𑀦𑀸𑀬. 𑀏𑀯𑀁 𑀲𑀫𑀲𑀝𑁆𑀞𑀺 𑀯𑀺𑀧𑀸𑀓𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀬𑁄 𑀯𑀺𑀬 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂𑀬𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑁄 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀫𑀦𑁄𑀤𑁆𑀯𑀸𑀭𑁂 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺 𑀦 𑀯𑀼𑀢𑁆𑀢𑀸. 𑀅𑀣 𑀯𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀕𑀳𑀺𑀢𑀸𑀦𑀫𑁂𑀯 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀕𑀳𑀡𑁂𑀦 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀕𑀳𑀺𑀢𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀫𑀦𑁄𑀤𑁆𑀯𑀸𑀭𑁂𑀧𑀺 𑀕𑀳𑀡𑀦𑀬𑀤𑀲𑁆𑀲𑀦𑀁 𑀓𑀢𑀁 𑀳𑁄𑀢𑀺, 𑀏𑀯𑀁 𑀲𑀢𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼𑀧𑀺 𑀲𑀫𑀲𑀢𑁆𑀢𑀢𑀺 𑀯𑀺𑀧𑀸𑀓𑀸𑀦𑀺 𑀳𑁄𑀦𑁆𑀢𑀺. 𑀅𑀣 𑀯𑀸 𑀫𑀦𑁄𑀤𑁆𑀯𑀸𑀭𑁂 𑀮𑀩𑁆𑀪𑀫𑀸𑀦𑀸𑀬𑀧𑀺 𑀧𑀜𑁆𑀘𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀫𑀦𑁄𑀤𑁆𑀯𑀸𑀭𑁂 𑀅𑀕𑁆𑀕𑀳𑀡𑁂𑀦 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀮𑀩𑁆𑀪𑀫𑀸𑀦𑀸𑀦𑀫𑁆𑀧𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀕𑀳𑀺𑀢𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀅𑀕𑁆𑀕𑀳𑀡𑀲𑁆𑀲 𑀦𑀬𑀤𑀲𑁆𑀲𑀦𑀁 𑀓𑀢𑀁 𑀳𑁄𑀢𑀺, 𑀏𑀯𑀁 𑀲𑀢𑀺 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀲𑁄𑀴𑀲 𑀯𑀺𑀧𑀸𑀓𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀕𑀳𑀺𑀢𑀸𑀕𑁆𑀕𑀳𑀡𑁂𑀦𑀸’’𑀢𑀺𑀆𑀤𑀺.

𑁪𑁦𑁮-𑁯. 𑀢𑀻𑀳𑀺 𑀯𑀺𑀧𑀸𑀓𑁂𑀳𑀻𑀢𑀺 𑀢𑁂𑀳𑀺 𑀢𑀻𑀳𑀺 𑀓𑀼𑀲𑀮𑀘𑀺𑀢𑁆𑀢𑁂𑀳𑀺 𑀲𑀫𑀸𑀦𑁂𑀳𑀺 𑀢𑀻𑀳𑀺 𑀯𑀺𑀧𑀸𑀓𑁂𑀳𑀺 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑁂𑀓𑁆𑀔𑀸𑀲𑀳𑀺𑀢𑀤𑁆𑀯𑀬𑁂𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀧𑀝𑀺𑀲𑀦𑁆𑀥𑀺𑀬𑀼𑀕𑀴𑁂. 𑀇𑀥 𑀞𑀢𑁆𑀯𑀸 𑀦𑀸𑀴𑀺𑀬𑀦𑁆𑀢𑀽𑀧𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀉𑀘𑁆𑀙𑀼𑀧𑀻𑀴𑀦𑀲𑀫𑀬𑁂 𑀓𑀺𑀭 𑀏𑀓𑀲𑁆𑀫𑀸 𑀕𑀸𑀫𑀸 𑀏𑀓𑀸𑀤𑀲 𑀬𑀦𑁆𑀢𑀯𑀸𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀁 𑀉𑀘𑁆𑀙𑀼𑀯𑀸𑀝𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀧𑀭𑀺𑀧𑀓𑁆𑀓𑀪𑀸𑀯𑀁 𑀜𑀢𑁆𑀯𑀸 𑀉𑀘𑁆𑀙𑀼𑀲𑀸𑀫𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀬𑀦𑁆𑀢𑀯𑀸𑀳𑀸 𑀫𑀬’’𑀦𑁆𑀢𑀺 𑀆𑀭𑁄𑀘𑁂𑀲𑀼𑀁. 𑀲𑁄 ‘‘𑀅𑀳𑀁 𑀢𑀼𑀫𑁆𑀳𑁂𑀬𑁂𑀯 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀘𑁆𑀙𑀼𑀲𑀸𑀮𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀢𑁂 𑀢𑀢𑁆𑀣 𑀦𑀸𑀴𑀺𑀬𑀦𑁆𑀢𑀁 𑀬𑁄𑀚𑁂𑀢𑁆𑀯𑀸 ‘‘𑀫𑀬𑀁 𑀏𑀓𑀸𑀤𑀲 𑀚𑀦𑀸 𑀅𑀧𑀭𑀫𑁆𑀧𑀺 𑀏𑀓𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀯𑀢𑁆𑀢𑀦𑁂𑀦 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀼. 𑀉𑀘𑁆𑀙𑀼𑀲𑀸𑀫𑀺𑀓𑁄 ‘‘𑀅𑀳𑀫𑁂𑀯 𑀲𑀳𑀸𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀉𑀘𑁆𑀙𑀼𑀲𑀸𑀮𑀁 𑀧𑀽𑀭𑀸𑀧𑁂𑀢𑁆𑀯𑀸 𑀢𑁂𑀲𑀁 𑀲𑀳𑀸𑀬𑁄 𑀅𑀳𑁄𑀲𑀺. 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸 𑀨𑀸𑀡𑀺𑀢𑀧𑀸𑀘𑀓𑁂𑀦 𑀉𑀘𑁆𑀙𑀼𑀭𑀲𑁂 𑀧𑀓𑁆𑀓𑁂 𑀕𑀼𑀴𑁂 𑀩𑀤𑁆𑀥𑁂 𑀉𑀘𑁆𑀙𑀼𑀲𑀸𑀫𑀺𑀓𑁂𑀦 𑀢𑀼𑀮𑀬𑀺𑀢𑁆𑀯𑀸 𑀪𑀸𑀕𑁂𑀲𑀼 𑀤𑀺𑀦𑁆𑀦𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀸𑀕𑀁 𑀆𑀤𑀸𑀬 𑀲𑀸𑀮𑀁 𑀲𑀸𑀮𑀲𑀸𑀫𑀺𑀓𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀧𑀭𑀸𑀲𑀼𑀧𑀺 𑀘𑀢𑀽𑀲𑀼 𑀲𑀸𑀮𑀸𑀲𑀼 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑀢𑁆𑀣 𑀧𑀜𑁆𑀘 𑀬𑀦𑁆𑀢𑀲𑀸𑀮𑀸 𑀯𑀺𑀬 𑀧𑀜𑁆𑀘 𑀧𑀲𑀸𑀤𑀸 𑀤𑀝𑁆𑀞𑀩𑁆𑀩𑀸, 𑀧𑀜𑁆𑀘 𑀉𑀘𑁆𑀙𑀼𑀯𑀸𑀝𑀸 𑀯𑀺𑀬 𑀧𑀜𑁆𑀘 𑀆𑀭𑀫𑁆𑀫𑀡𑀸𑀦𑀺, 𑀏𑀓𑀸𑀤𑀲 𑀯𑀺𑀘𑀭𑀡𑀓𑀬𑀦𑁆𑀢𑀯𑀸𑀳𑀸 𑀯𑀺𑀬 𑀏𑀓𑀸𑀤𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘 𑀉𑀘𑁆𑀙𑀼𑀲𑀸𑀮𑀲𑀸𑀫𑀺𑀦𑁄 𑀯𑀺𑀬 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀺, 𑀧𑀞𑀫𑀓𑀲𑀸𑀮𑀸𑀬 𑀲𑀸𑀮𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲𑀦𑁆𑀦𑀁 𑀚𑀦𑀸𑀦𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀢𑀓𑀫𑁆𑀫𑀸𑀦𑀁 𑀪𑀸𑀕𑀕𑁆𑀕𑀳𑀡𑀓𑀸𑀮𑁄 𑀯𑀺𑀬 𑀏𑀓𑀸𑀤𑀲𑀦𑁆𑀦𑀁 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀭𑀽𑀧𑀸𑀭𑀫𑁆𑀫𑀡𑁂 𑀲𑀓𑀲𑀓𑀓𑀺𑀘𑁆𑀘𑀓𑀭𑀡𑀓𑀸𑀮𑁄, 𑀲𑀸𑀮𑀲𑀸𑀫𑀺𑀓𑀲𑁆𑀲 𑀲𑀸𑀮𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀓𑀸𑀮𑁄 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀤𑁆𑀯𑀸𑀭𑀲𑀗𑁆𑀓𑀦𑁆𑀢𑀺𑀅𑀓𑀭𑀡𑀁, 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀲𑀸𑀮𑀸𑀬 𑀤𑁆𑀯𑀸𑀤𑀲𑀦𑁆𑀦𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀢𑀓𑀫𑁆𑀫𑀸𑀦𑀁 𑀪𑀸𑀕𑀕𑁆𑀕𑀳𑀡𑀓𑀸𑀮𑁄 𑀯𑀺𑀬 𑀏𑀓𑀸𑀤𑀲𑀦𑁆𑀦𑀁 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀸𑀬𑀤𑁆𑀯𑀸𑀭𑁂 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁂 𑀲𑀓𑀲𑀓𑀓𑀺𑀘𑁆𑀘𑀓𑀭𑀡𑀓𑀸𑀮𑁄, 𑀲𑀸𑀫𑀺𑀓𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀓𑀸𑀮𑁄 𑀯𑀺𑀬 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀤𑁆𑀯𑀸𑀭𑀲𑀗𑁆𑀓𑀦𑁆𑀢𑀺𑀅𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

𑁪𑁧𑁪. 𑀅𑀲𑁆𑀲𑀸𑀢𑀺 𑀇𑀫𑀲𑁆𑀲 𑀩𑀻𑀚𑀲𑁆𑀲. 𑀳𑁂𑀢𑀼𑀧𑀯𑀢𑁆𑀢𑀺𑀢𑁄𑀢𑀺 𑀧𑀘𑁆𑀘𑀬𑀧𑁆𑀧𑀯𑀢𑁆𑀢𑀺𑀢𑁄.

𑁪𑁧𑁫. 𑀇𑀤𑀸𑀦𑀺 𑀢𑀺𑀳𑁂𑀢𑀼𑀓𑁄𑀫𑀓𑀓𑀫𑁆𑀫𑁂𑀦 𑀕𑀳𑀺𑀢𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺 𑀤𑀼𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑁂𑀦 𑀕𑀳𑀺𑀢𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀬𑀸 𑀲𑀫𑀸𑀦𑀸𑀢𑀺 𑀢𑀁 𑀞𑀧𑁂𑀢𑁆𑀯𑀸 𑀤𑀼𑀳𑁂𑀢𑀼𑀓𑀓𑀫𑁆𑀫𑁂𑀦 𑀕𑀳𑀺𑀢𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲𑁂𑀯 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁧𑁮-𑁯. 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀓𑀸𑀫𑀸𑀯𑀘𑀭𑀢𑀺𑀳𑁂𑀢𑀼𑀓𑀚𑀯𑀦𑀸𑀦𑀁 𑀲𑀫𑁆𑀪𑀯𑁂𑀧𑀺 𑀓𑀫𑁆𑀫𑀲𑀭𑀺𑀓𑁆𑀔𑀓𑀸𑀦𑁂𑀯 𑀚𑀯𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀫𑀦𑀲𑁆𑀲…𑀧𑁂… 𑀤𑀼𑀳𑁂𑀢𑀼𑀓𑁂’’𑀢𑀺 𑀯𑀼𑀢𑁆𑀢𑀁. 𑀢𑀺𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂𑀧𑀺 𑀧𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀤𑀸𑀦𑁂 𑀅𑀲𑀫𑀢𑁆𑀣𑀦𑁆𑀢𑀺 𑀢𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀸𑀪𑀸𑀯𑀢𑁄, 𑀚𑀯𑀦𑀲𑁆𑀲 𑀘 𑀓𑀫𑁆𑀫𑀲𑀭𑀺𑀓𑁆𑀔𑀓𑀳𑁂𑀢𑀼𑀯𑀲𑁂𑀦 𑀤𑀼𑀳𑁂𑀢𑀼𑀓𑀪𑀸𑀯𑀢𑁄 𑀤𑀼𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀺.

𑁪𑁨𑁪. 𑀇𑀫𑀸𑀦𑀺 𑀘 𑀪𑀯𑀗𑁆𑀕𑀸𑀦𑀻𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀫𑀽𑀮𑀸𑀕𑀦𑁆𑀢𑀼𑀓𑀧𑀺𑀝𑁆𑀞𑀺𑀪𑀯𑀗𑁆𑀕𑀸𑀦𑀺. 𑀅𑀝𑁆𑀞 𑀳𑀻𑀢𑀺 𑀅𑀝𑁆𑀞𑁂𑀯.

𑁪𑁨𑁬. 𑀲𑁄𑀢𑀖𑀸𑀦𑀸𑀤𑀺𑀦𑀸𑀢𑀺 𑀲𑁄𑀢𑀖𑀸𑀦𑀸𑀤𑀺𑀯𑀺𑀜𑁆𑀜𑀸𑀡𑁂𑀳𑀺. 𑀏𑀢𑁆𑀣𑀸𑀧𑀺 𑀅𑀫𑁆𑀩𑁄𑀧𑀫𑀸 𑀧𑀸𑀓𑀝𑀺𑀓𑀸𑀯. 𑀬𑀦𑁆𑀢𑀯𑀸𑀳𑁄𑀧𑀫𑀸𑀬 𑀧𑀦𑁂𑀢𑁆𑀣 𑀲𑀢𑁆𑀢 𑀬𑀦𑁆𑀢𑀯𑀸𑀳𑀸 𑀢𑁂𑀳𑀺 𑀳𑀢𑁆𑀣𑀬𑀦𑁆𑀢𑁂 𑀦𑀸𑀫 𑀲𑀚𑁆𑀚𑀺𑀢𑁂 𑀲𑀸𑀮𑀲𑀸𑀫𑀺𑀓𑀁 𑀅𑀝𑁆𑀞𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁩𑁪-𑁬. 𑀯𑀼𑀤𑁆𑀥𑀺𑀫𑀼𑀧𑁂𑀢𑀲𑁆𑀲𑀸𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀁𑀯𑀭𑀸𑀲𑀁𑀯𑀭𑁂 𑀧𑀝𑁆𑀞𑀧𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑁂𑀦 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀲𑁆𑀲. 𑀓𑀺𑀜𑁆𑀘𑀸𑀧𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀓𑀫𑁆𑀫𑀲𑀭𑀺𑀓𑁆𑀔𑀓𑀚𑀯𑀦𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀳𑁂𑀢𑀽𑀦𑀁…𑀧𑁂… 𑀯𑀲𑀸𑀦𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀺𑀳𑁂𑀢𑀼𑀓𑀚𑀯𑀦𑀫𑁆𑀧𑀺 𑀧𑀦 𑀢𑁂𑀲𑀁 𑀚𑀯𑀢𑀺, 𑀚𑀯𑀦𑀲𑁆𑀲 𑀤𑀼𑀳𑁂𑀢𑀼𑀓𑀪𑀸𑀯𑁂𑀧𑀺 𑀓𑀫𑁆𑀫𑀲𑁆𑀲 𑀤𑀼𑀳𑁂𑀢𑀼𑀓𑀯𑀺𑀧𑀸𑀓𑀤𑀸𑀦𑁂 𑀅𑀲𑀫𑀢𑁆𑀣𑀢𑀸𑀬 ‘‘𑀅𑀳𑁂𑀢𑀼𑀓…𑀧𑁂… 𑀚𑀸𑀬𑀢𑁂’’𑀢𑀺 𑀯𑀼𑀢𑁆𑀢𑀁.

𑁪𑁪𑁩-𑁮. ‘‘𑀅𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀅𑀥𑀺𑀧𑁆𑀧𑀸𑀬𑁄 𑀳𑁂𑀝𑁆𑀞𑀸 𑀆𑀕𑀢𑁄𑀯. 𑀅𑀧𑀸𑀬𑁂𑀲𑀼 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺𑀢𑁄 𑀳𑀻𑀦𑀢𑀤𑀸𑀭𑀫𑁆𑀫𑀡𑀲𑁆𑀲 𑀅𑀦𑀺𑀧𑁆𑀨𑀦𑁆𑀦𑀢𑁄 𑀢𑀲𑁆𑀲 𑀮𑀩𑁆𑀪𑀫𑀸𑀦𑀝𑁆𑀞𑀸𑀦𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀕𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀢𑁂𑀦 𑀚𑀸𑀢𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑁂𑀦. ‘‘𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀮𑀩𑁆𑀪𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀯𑀺𑀲𑀬𑀤𑀲𑁆𑀲𑀦𑀢𑁆𑀣𑀁 ‘‘𑀣𑁂𑀭𑁄 𑀦𑁂𑀭𑀬𑀺𑀓𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀣𑁂𑀭𑁄𑀢𑀺 𑀦𑀺𑀭𑀬𑀘𑀸𑀭𑀺𑀓𑀸𑀬 𑀧𑀸𑀓𑀝𑀢𑁆𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀫𑀸𑀳. 𑀦𑀺𑀭𑀬𑁂 𑀪𑀯𑀸 𑀦𑁂𑀭𑀬𑀺𑀓𑀸. 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀦𑀺𑀭𑀬𑁂 𑀧𑀤𑀼𑀫𑀁 𑀫𑀸𑀧𑁂𑀢𑁆𑀯𑀸 𑀧𑀤𑀼𑀫𑀓𑀡𑁆𑀡𑀺𑀓𑀸𑀬 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀯𑀲𑁆𑀲𑀢𑀻𑀢𑀺 𑀅𑀦𑁆𑀢𑁄𑀳𑁂𑀢𑁆𑀯𑀢𑁆𑀣𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀯𑀲𑁆𑀲𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀣𑁂𑀭𑀁 𑀤𑀺𑀲𑁆𑀯𑀸𑀢𑀺 𑀣𑁂𑀭𑀲𑁆𑀲 𑀤𑀲𑁆𑀲𑀦𑀳𑁂𑀢𑀼. 𑀇𑀫𑀺𑀦𑀸 𑀇𑀦𑁆𑀤𑀦𑀻𑀮𑀧𑀝𑀺𑀫𑀸𑀯𑀡𑁆𑀡𑀲𑁆𑀲 𑀣𑁂𑀭𑀲𑁆𑀲 𑀇𑀝𑁆𑀞𑀸𑀭𑀫𑁆𑀫𑀡𑀪𑀸𑀯𑁂𑀦 𑀓𑀼𑀲𑀮𑀯𑀺𑀧𑀸𑀓𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 ‘‘𑀥𑀫𑁆𑀫𑀁 𑀲𑀼𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺. 𑀕𑀦𑁆𑀥𑀦𑁆𑀢𑀺 𑀢𑁂𑀦 𑀫𑀸𑀧𑀺𑀢𑀕𑀦𑁆𑀥𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀘𑀦𑁆𑀤𑀦𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀲𑁆𑀲 𑀘𑀻𑀯𑀭𑀕𑀦𑁆𑀥’’𑀦𑁆𑀢𑀺 (𑀥. 𑀲. 𑀅𑀝𑁆𑀞. 𑁪𑁯𑁮 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸) 𑀯𑀼𑀢𑁆𑀢𑀁. 𑀖𑀸𑀬𑀢𑀦𑁆𑀢𑀺 𑀖𑀸𑀬𑀦𑁆𑀢𑀸𑀦𑀁. 𑀲𑀦𑁆𑀢𑀻𑀭𑀡𑀤𑁆𑀯𑀬𑀦𑁆𑀢𑀺 𑀅𑀢𑀺𑀇𑀝𑁆𑀞𑀫𑀚𑁆𑀛𑀢𑁆𑀢𑀲𑁆𑀲 𑀕𑀦𑁆𑀥𑀸𑀤𑀺𑀦𑁄 𑀯𑀲𑁂𑀦 𑀲𑀦𑁆𑀢𑀻𑀭𑀡𑀤𑁆𑀯𑀬𑀁. 𑀓𑀼𑀲𑀮𑀯𑀺𑀧𑀸𑀓𑀸𑀦𑀁, 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀘 𑀦𑀺𑀭𑀬𑁂 𑀲𑀫𑁆𑀪𑀯𑀤𑀻𑀧𑀦𑁂𑀦 𑀲𑁂𑀲𑀸𑀧𑀸𑀬𑀢𑁆𑀢𑀬𑁂𑀧𑀺 𑀲𑀫𑁆𑀪𑀯𑁄 𑀤𑀲𑁆𑀲𑀺𑀢𑁄𑀯 𑀳𑁄𑀢𑀺.

𑁪𑁫𑁦. 𑀦𑀺𑀬𑀫𑁄𑀬𑁂𑀯 𑀦𑀺𑀬𑀫𑀢𑁆𑀢𑀁, 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀫𑁆𑀧𑀺 𑀚𑀯𑀦𑁂𑀦 𑀦𑀺𑀬𑀸𑀫𑀺𑀢𑀦𑁆𑀢𑀺 𑀯𑀼𑀢𑁆𑀢𑀦𑀺𑀬𑀫𑁄𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀁 𑀧𑀦 𑀲𑀦𑁆𑀥𑀸𑀬𑀸𑀢𑀺 𑀓𑀼𑀲𑀮𑀚𑀯𑀦𑀁 𑀲𑀦𑁆𑀥𑀸𑀬 𑀤𑀻𑀧𑀺𑀢𑀁 𑀅𑀝𑁆𑀞𑀓𑀣𑀸𑀬𑀁, 𑀓𑀼𑀲𑀮𑀲𑁆𑀲 𑀯𑀺𑀬 𑀅𑀓𑀼𑀲𑀮𑀲𑁆𑀲 𑀲𑀤𑀺𑀲𑀯𑀺𑀧𑀸𑀓𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀓𑀼𑀲𑀮𑀚𑀯𑀦𑀸𑀦𑀦𑁆𑀢𑀭𑀁 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀲𑁆𑀲𑁂𑀯 𑀯𑀘𑀦𑀁. 𑀚𑀯𑀦𑀲𑁆𑀲 𑀓𑀫𑁆𑀫𑀲𑀭𑀺𑀓𑁆𑀔𑀓𑀳𑁂𑀢𑀼𑀯𑀲𑁂𑀦 𑀲𑀳𑁂𑀢𑀼𑀓𑀢𑁆𑀢𑀸 𑀚𑀯𑀦𑀸𑀦𑀼𑀭𑀽𑀧𑀢𑁄 𑀯𑀼𑀢𑁆𑀢𑀁. 𑀧𑀭𑀺𑀘𑀺𑀢𑀯𑀲𑁂𑀦 𑀧𑀦 𑀅𑀜𑁆𑀜𑀓𑀫𑁆𑀫𑁂𑀦𑀸𑀧𑀺 𑀢𑀁 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀫𑁂𑀯 𑀓𑀫𑁆𑀫𑀁 𑀢𑀤𑀸𑀭𑀫𑁆𑀫𑀡𑀁 𑀚𑀦𑁂𑀢𑀺, 𑀅𑀣 𑀔𑁄 𑀅𑀜𑁆𑀜𑀓𑀫𑁆𑀫𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑀤𑀸𑀭𑀫𑁆𑀫𑀡𑀢𑁄 𑀯𑀺𑀲𑀤𑀺𑀲𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺. 𑀅𑀓𑀼𑀲𑀮𑀚𑀯𑀦𑀸𑀦𑀦𑁆𑀢𑀭𑀜𑁆𑀘 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀚𑀯𑀦𑀲𑁆𑀲 𑀓𑀫𑁆𑀫𑀲𑀭𑀺𑀓𑁆𑀔𑀓𑀳𑁂𑀢𑀼𑀓𑀢𑁆𑀢𑀸 𑀢𑀤𑀦𑀼𑀭𑀽𑀧𑀢𑁄 𑀯𑀼𑀢𑁆𑀢𑀁. 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀦 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀦 𑀳𑁄𑀢𑀻𑀢𑀺 𑀦𑀢𑁆𑀣𑀺.

𑁪𑁫𑁬-𑁭. 𑀏𑀢𑁆𑀢𑀸𑀯𑀢𑀸 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀯𑀸𑀤𑁂 𑀲𑁄𑀴𑀲 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀲𑀤𑁆𑀥𑀺𑀁 𑀤𑁆𑀯𑀸𑀤𑀲𑀓𑀫𑀕𑁆𑀕𑁂𑀦 𑀘𑁂𑀯 𑀅𑀳𑁂𑀢𑀼𑀓𑀝𑁆𑀞𑀓𑁂𑀦 𑀘 𑀯𑀺𑀪𑀸𑀯𑁂𑀢𑁆𑀯𑀸 𑀫𑁄𑀭𑀯𑀸𑀧𑀺𑀯𑀸𑀲𑀺𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀯𑀸𑀤𑁂 𑀯𑀺𑀲𑁂𑀲𑀸𑀪𑀸𑀯𑀢𑁄 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑁂 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀯𑀲𑁂𑀦 𑀧𑀺𑀡𑁆𑀟𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀁 𑀧𑀺𑀡𑁆𑀟𑀚𑀯𑀦𑀸𑀦𑀁 𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀫𑀦𑀲𑁆𑀲𑀬𑀼𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀫𑀦𑀲𑁆𑀲…𑀧𑁂… 𑀚𑀯𑀺𑀢𑁂𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀯𑀲𑁂𑀦 𑀲𑁄𑀫𑀦𑀲𑁆𑀲𑀬𑀼𑀢𑁂𑀲𑀼 𑀢𑁂𑀭𑀲𑀲𑀼 𑀚𑀯𑀦𑀘𑀺𑀢𑁆𑀢𑁂𑀲𑀼 𑀚𑀯𑀺𑀢𑁂𑀲𑀼. 𑀕𑀯𑁂𑀲𑀺𑀢𑀩𑁆𑀩𑀸…𑀧𑁂… 𑀫𑀸𑀦𑀲𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺 𑀧𑀜𑁆𑀘𑁂𑀯 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺 𑀕𑀯𑁂𑀲𑀺𑀢𑀩𑁆𑀩𑀸𑀦𑀺. 𑀉𑀧𑁂𑀓𑁆𑀔𑀸…𑀧𑁂… 𑀚𑀯𑀺𑀢𑁂𑀲𑀽𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀯𑀲𑁂𑀦 𑀘𑀼𑀤𑁆𑀤𑀲𑀲𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀚𑀯𑀦𑀘𑀺𑀢𑁆𑀢𑁂𑀲𑀼 𑀚𑀯𑀺𑀢𑁂𑀲𑀼. 𑀙 𑀕𑀯𑁂𑀲𑀺𑀢𑀩𑁆𑀩𑀸𑀦𑀻𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀙 𑀏𑀯 𑀕𑀯𑁂𑀲𑀺𑀢𑀩𑁆𑀩𑀸𑀦𑀺. 𑀔𑀻𑀡𑀸𑀲𑀯𑀸𑀦𑀁 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑀸𑀬 𑀓𑀺𑀭𑀺𑀬𑀸𑀚𑀯𑀦𑀁 𑀇𑀝𑁆𑀞𑀸𑀭𑀫𑁆𑀫𑀡𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀦 𑀳𑁄𑀢𑀻𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀺𑀭𑀺𑀬𑀸𑀚𑀯𑀦𑁂𑀲𑀼 𑀚𑀯𑀺𑀢𑁂𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀺. 𑀇𑀝𑁆𑀞𑀫𑀚𑁆𑀛𑀢𑁆𑀢𑁂, 𑀅𑀦𑀺𑀝𑁆𑀞𑀸𑀤𑀻𑀲𑀼 𑀘 𑀲𑁄𑀫𑀦𑀲𑁆𑀲𑀪𑀸𑀯𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑀺𑀭𑀺𑀬𑀸𑀚𑀯𑀦𑁂𑀲𑀼 𑀚𑀯𑀺𑀢𑁂𑀲𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀇𑀤𑀫𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑀸𑀬 𑀇𑀝𑁆𑀞𑀫𑀚𑁆𑀛𑀢𑁆𑀢𑁂, 𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀘 𑀲𑁄𑀫𑀦𑀲𑁆𑀲𑀲𑀳𑀕𑀢𑀚𑀯𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀚𑀯𑀦𑀸𑀯𑀲𑀸𑀦𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀺, 𑀦𑀢𑁆𑀣𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺 𑀦𑀸𑀬𑀁 𑀦𑀺𑀬𑀫𑁄. 𑀇𑀝𑁆𑀞𑀸𑀭𑀫𑁆𑀫𑀡𑁂𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀭𑀺𑀢𑁆𑀢𑀓𑀼𑀲𑀮𑀸𑀤𑁄𑀲-𑀧𑀸𑀧𑀲𑀸𑀢𑀓𑁆𑀭𑀺𑀬𑀸𑀚𑀯𑀸;

𑀧𑀜𑁆𑀘𑀲𑁆𑀯𑁂𑀓𑀁 𑀢𑀤𑀸𑀮𑀫𑁆𑀩𑀁, 𑀲𑀼𑀔𑀺𑀢𑁂𑀲𑀼 𑀬𑀣𑀸𑀭𑀳𑀁.

‘‘𑀧𑀸𑀧𑀸 𑀓𑀸𑀫𑀲𑀼𑀪𑀸 𑀘𑁂𑀯, 𑀲𑁄𑀧𑁂𑀓𑁆𑀔𑀸 𑀘 𑀓𑁆𑀭𑀺𑀬𑀸𑀚𑀯𑀸;

𑀲𑁄𑀧𑁂𑀓𑁆𑀔𑁂𑀲𑀼 𑀢𑀤𑀸𑀮𑀫𑁆𑀩𑀁, 𑀙𑀲𑁆𑀯𑁂𑀓𑀫𑀦𑀼𑀭𑀽𑀧𑀢𑁄’’𑀢𑀺.

𑁪𑁫𑁮-𑁬𑁨. 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀦𑀁 𑀯𑀺𑀧𑀸𑀓𑀸𑀯𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀛𑀸𑀦𑀼𑀧𑁆𑀧𑀸𑀤𑁄𑀬𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀢𑀺𑀳𑁂𑀢𑀼𑀲𑁄𑀫𑀦𑀲𑁆𑀲𑁂𑀦𑀸’’𑀢𑀺. 𑀛𑀸𑀦𑀢𑁄 𑀧𑀭𑀺𑀳𑀻𑀦𑀲𑁆𑀲𑀸𑀢𑀺 𑀉𑀧𑁆𑀧𑀸𑀤𑀺𑀢𑀮𑁄𑀓𑀺𑀬𑀚𑁆𑀛𑀸𑀦𑀢𑁄 𑀧𑀭𑀺𑀳𑀻𑀦𑀲𑁆𑀲. 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄𑀢𑀺 ‘‘𑀫𑀳𑀦𑁆𑀢𑁂𑀦 𑀯𑀸𑀬𑀸𑀫𑁂𑀦 𑀉𑀧𑁆𑀧𑀸𑀤𑀺𑀢𑁄 𑀫𑁂 𑀧𑀡𑀻𑀢𑀥𑀫𑁆𑀫𑁄 𑀦𑀝𑁆𑀞𑁄’’𑀢𑀺 𑀉𑀧𑁆𑀧𑀦𑁆𑀦𑀯𑀺𑀧𑁆𑀧𑀝𑀺𑀲𑀸𑀭𑀯𑀦𑁆𑀢𑀲𑁆𑀲. 𑀓𑀺𑀁…𑀧𑁂… 𑀫𑀸𑀦𑀲𑀦𑁆𑀢𑀺 𑀅𑀬𑀁 𑀅𑀦𑀼𑀫𑀢𑀺𑀧𑀼𑀘𑁆𑀙𑀸, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁 𑀚𑀸𑀬𑀢𑁂 𑀓𑀺𑀁, 𑀦 𑀯𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀪𑀯𑀗𑁆𑀕𑀧𑀸𑀢𑁄 𑀯𑀸 𑀳𑁄𑀢𑀼 𑀢𑀤𑀸𑀭𑀫𑁆𑀫𑀡𑀁 𑀯𑀸, 𑀓𑁄 𑀏𑀢𑁆𑀣 𑀯𑀺𑀩𑀦𑁆𑀥𑁄𑀢𑀺 𑀆𑀳 ‘‘𑀧𑀝𑁆𑀞𑀸𑀦𑁂 𑀧𑀝𑀺𑀲𑀺𑀤𑁆𑀥𑀸’’𑀢𑀺𑀆𑀤𑀺. 𑀅𑀯𑀘𑀦𑀫𑁂𑀯 𑀧𑀝𑀺𑀲𑁂𑀥𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀧𑀝𑀺𑀲𑀺𑀤𑁆𑀥𑀸’’𑀢𑀺. 𑀬𑀤𑀺 𑀲𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀁 𑀤𑁄𑀫𑀦𑀲𑁆𑀲𑀁, 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀁 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀤𑀸 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 (𑀧𑀝𑁆𑀞𑀸. 𑁧.𑁨.𑁪𑁫) 𑀯𑀺𑀬 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬…𑀧𑁂… 𑀲𑀼𑀔𑀸𑀬 𑀯𑁂𑀤𑀦𑀸𑀬…𑀧𑁂… 𑀧𑀘𑁆𑀘𑀬𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀣𑀸 𑀕𑀡𑀦𑀯𑀸𑀭𑁂 𑀏𑀓𑁂𑀓𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑀸 𑀲𑀫𑀸𑀦𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀲, 𑀇𑀢𑀭𑀯𑁂𑀤𑀦𑀸𑀤𑁆𑀯𑀬𑀲𑀫𑀗𑁆𑀕𑀺𑀲𑁆𑀲 𑀘 𑀧𑀘𑁆𑀘𑀬𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀅𑀦𑀦𑁆𑀢𑀭𑁂 𑀦𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀧𑀦𑁂𑀯𑀁 𑀧𑀸𑀴𑀺 𑀆𑀕𑀢𑀸. 𑀤𑁄𑀫𑀦𑀲𑁆𑀲𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀦 𑀅𑀜𑁆𑀜𑀫𑀜𑁆𑀜𑀅𑀦𑀦𑁆𑀢𑀭𑀧𑀘𑁆𑀘𑀬𑀯𑀲𑁂𑀦 𑀕𑀡𑀦𑀤𑁆𑀯𑀬𑀁 𑀧𑀭𑀺𑀳𑀸𑀧𑁂𑀢𑁆𑀯𑀸 ‘‘𑀅𑀦𑀦𑁆𑀢𑀭𑁂 𑀲𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀯𑀘𑀦𑀫𑁆𑀧𑀺 𑀧𑀝𑀺𑀲𑁂𑀥𑀲𑀤𑀺𑀲𑀁 𑀅𑀪𑀸𑀯𑀲𑁆𑀲𑁂𑀯 𑀤𑀻𑀧𑀦𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀲𑀺𑀤𑁆𑀥𑀸’’𑀢𑀺. 𑀅𑀲𑁆𑀲 𑀯𑀸 𑀅𑀦𑀦𑁆𑀢𑀭𑀁 𑀤𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀲𑁄𑀫𑀦𑀲𑁆𑀲𑀲𑁆𑀲.

𑀏𑀯𑀁 𑀪𑀯𑀗𑁆𑀕𑀧𑀸𑀢𑀸𑀪𑀸𑀯𑁂 𑀓𑀸𑀭𑀡𑀁 𑀯𑀢𑁆𑀯𑀸 𑀧𑀼𑀦 𑀢𑀤𑀸𑀭𑀫𑁆𑀫𑀡𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀳𑀕𑁆𑀕𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣𑁂𑀯 𑀧𑀝𑀺𑀲𑀺𑀤𑁆𑀥𑀦𑁆𑀢𑀺 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀘𑀦𑀸𑀪𑀸𑀯𑀢𑁄 𑀢𑀢𑁆𑀣𑁂𑀯 𑀧𑀝𑁆𑀞𑀸𑀦𑁂 𑀧𑀝𑀺𑀲𑀺𑀤𑁆𑀥𑀁. 𑀓𑀺𑀁 𑀦𑀼 𑀓𑀸𑀢𑀩𑁆𑀩𑀦𑁆𑀢𑀺 𑀓𑀺𑀁 𑀓𑀸𑀢𑀩𑁆𑀩𑀁. 𑀦 𑀳𑀺 𑀲𑀓𑁆𑀓𑀸 𑀏𑀢𑁆𑀢𑀓𑁂𑀦 ‘‘𑀅𑀘𑀺𑀢𑁆𑀢𑀓𑁄’’𑀢𑀺 𑀯𑀢𑁆𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀫𑁂𑀯 𑀤𑁄𑀫𑀦𑀲𑁆𑀲𑀚𑀯𑀦𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑁂 𑀧𑀦 𑀩𑀼𑀤𑁆𑀥𑀸𑀤𑀺𑀆𑀭𑀫𑁆𑀫𑀡𑁂𑀧𑀺 𑀤𑁄𑀫𑀦𑀲𑁆𑀲𑀚𑀯𑀦𑁂 𑀚𑀯𑀺𑀢𑁂 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑀫𑁆𑀪𑀯𑁄, 𑀪𑀯𑀗𑁆𑀕𑀧𑀸𑀢𑁄 𑀯𑀸 𑀦𑀢𑁆𑀣𑀺.

𑁪𑁬𑁪-𑁫. 𑀇𑀝𑁆𑀞𑀸𑀭𑀫𑁆𑀫𑀡𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀤𑀸𑀭𑀫𑁆𑀫𑀡𑀲𑁆𑀲 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀜𑁆𑀘 𑀲𑁄𑀫𑀦𑀲𑁆𑀲𑀲𑁆𑀲 𑀅𑀪𑀸𑀯𑀢𑁄 ‘‘𑀉𑀧𑁂𑀓𑁆𑀔𑀸𑀲𑀳𑀺𑀢𑀸 𑀳𑁂𑀢𑀽’’𑀢𑀺𑀆𑀤𑀺𑀦𑀸 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁂 𑀧𑀼𑀦 𑀘𑁄𑀤𑀓𑁄 𑀅𑀦𑀼𑀩𑀦𑁆𑀥𑀦𑁆𑀢𑁄 𑀆𑀳 ‘‘𑀆𑀯𑀚𑁆𑀚𑀦𑀁 𑀓𑀺𑀫𑀲𑁆𑀲𑀸’’𑀢𑀺. 𑀆𑀘𑀭𑀺𑀬𑁄 𑀧𑀦 𑀓𑀺𑀫𑁂𑀢𑁆𑀣 𑀆𑀯𑀚𑁆𑀚𑀦𑀕𑀯𑁂𑀲𑀦𑁂𑀦, 𑀢𑁂𑀦 𑀯𑀺𑀦𑀸𑀯 𑀇𑀤𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀦𑀢𑁆𑀣𑀺 𑀢’’𑀦𑁆𑀢𑀺. 𑀧𑀼𑀦 𑀘𑁄𑀤𑀓𑁄 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀅𑀯𑀺𑀲𑀳𑀦𑁆𑀢𑁄 𑀆𑀳 ‘‘𑀢𑀁 𑀚𑀸𑀬𑀢𑁂 𑀓𑀣’’𑀦𑁆𑀢𑀺. 𑀏𑀯𑀁 𑀧𑀦 𑀯𑀼𑀢𑁆𑀢𑁂 𑀆𑀘𑀭𑀺𑀬𑁄 𑀓𑀺𑀫𑁂𑀢𑁆𑀣 𑀆𑀯𑀚𑁆𑀚𑀦𑁂𑀦, 𑀓𑀺𑀜𑁆𑀘 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀇𑀤𑀁 𑀦 𑀏𑀓𑀦𑁆𑀢𑀺𑀓𑀦𑁆𑀢𑀺 𑀤𑀻𑀧𑁂𑀢𑀼𑀁 𑀦𑀺𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀸𑀦𑀁 𑀲𑀫𑁆𑀪𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀯𑀗𑁆𑀕𑀸𑀯𑀚𑁆𑀚𑀦𑀸𑀦’’𑀦𑁆𑀢𑀺𑀆𑀤𑀺, 𑀪𑀯𑀗𑁆𑀕𑀸𑀯𑀚𑁆𑀚𑀦𑀸𑀦𑀁 𑀓𑀺𑀁 𑀆𑀯𑀚𑁆𑀚𑀦𑀁, 𑀦𑀦𑀼 𑀦𑀢𑁆𑀣𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀘 𑀪𑀯𑀗𑁆𑀕𑀸𑀯𑀚𑁆𑀚𑀦𑀸𑀦𑀺 𑀢𑀸𑀯 𑀲𑀓𑀲𑀓𑀯𑀺𑀲𑀬𑁂𑀲𑀼 𑀦𑀺𑀦𑁆𑀦𑀢𑁆𑀢𑀸 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀉𑀧𑁆𑀧𑀢𑁆𑀢𑀺𑀬𑀁 𑀩𑀳𑀼𑀮𑀁 𑀘𑀺𑀡𑁆𑀡𑀢𑁆𑀢𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀬𑀁 𑀧𑀦 𑀓𑀣𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑀁 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑀧𑀼𑀦 𑀦𑀺𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀕𑁆𑀕𑀲𑁆𑀲𑀸’’𑀢𑀺𑀆𑀤𑀺. 𑀫𑀕𑁆𑀕𑀲𑁆𑀲 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀘𑀺𑀢𑁆𑀢𑀲𑁆𑀲. 𑀅𑀦𑀦𑁆𑀢𑀭𑀲𑁆𑀲 𑀨𑀮𑀲𑁆𑀲 𑀘𑀸𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀲𑁆𑀲 𑀨𑀮𑀲𑁆𑀲 𑀘 𑀅𑀢𑁆𑀣𑀸𑀬 𑀓𑀺𑀁 𑀆𑀯𑀚𑁆𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀦𑀢𑁆𑀣𑀻𑀢𑀺 𑀬𑀣𑀸 𑀏𑀢𑁂𑀲𑀁, 𑀏𑀯𑀫𑁂𑀢𑀲𑁆𑀲𑀸𑀧𑀺 𑀦𑀢𑁆𑀣𑀺.

𑀆𑀦𑀦𑁆𑀤𑀸𑀘𑀭𑀺𑀬𑁄 𑀧𑀦𑁂𑀢𑁆𑀣 𑀅𑀭𑀺𑀬𑀫𑀕𑁆𑀕𑀘𑀺𑀢𑁆𑀢𑀁, 𑀫𑀕𑁆𑀕𑀸𑀦𑀦𑁆𑀢𑀭𑀸𑀦𑀺 𑀨𑀮𑀸𑀦𑀺 𑀘 𑀧𑀭𑀺𑀓𑀫𑁆𑀫𑀸𑀯𑀚𑁆𑀚𑀦𑁂𑀦 𑀲𑀸𑀯𑀚𑁆𑀚𑀦𑀸𑀦𑀺 𑀲𑀫𑀸𑀦𑀸𑀦𑀺 𑀅𑀲𑀢𑀺𑀧𑀺 𑀦𑀺𑀭𑀸𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺𑀬𑀁 𑀦𑀺𑀦𑁆𑀦𑀸𑀤𑀺𑀪𑀸𑀯𑁂 𑀉𑀧𑁆𑀧𑀢𑁆𑀢𑀺𑀬𑀸 𑀦𑀺𑀤𑀲𑁆𑀲𑀦𑀫𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀯𑀡𑁆𑀡𑁂𑀢𑀺. 𑀅𑀬𑀁 𑀳𑀺𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀳𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀯𑀚𑁆𑀚𑀦𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸𑀦𑀺 𑀲𑀺𑀬𑀼𑀁, 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀸𑀦𑀺 𑀤𑀲𑁆𑀲𑀺𑀢𑀩𑁆𑀩𑀸𑀦𑀺 𑀲𑀺𑀬𑀼𑀁 𑀢𑁂𑀳𑁂𑀯 𑀏𑀢𑁂𑀲𑀁 𑀦𑀺𑀭𑀸𑀯𑀚𑁆𑀚𑀦𑀢𑀸𑀲𑀺𑀤𑁆𑀥𑀺𑀢𑁄, 𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀘 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁 𑀅𑀦𑀼𑀮𑁄𑀫𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀘𑀦𑀢𑁄 𑀲𑀫𑀸𑀦𑀸𑀭𑀫𑁆𑀫𑀡𑀸𑀯𑀚𑁆𑀚𑀦𑀭𑀳𑀺𑀢𑀢𑁆𑀢𑀸 𑀫𑀕𑁆𑀕𑀸𑀦𑀦𑁆𑀢𑀭𑀸𑀦𑀺 𑀨𑀮𑀘𑀺𑀢𑁆𑀢𑀸𑀦𑀻𑀢𑀺 𑀏𑀯𑀁 𑀲𑀫𑀸𑀧𑀢𑁆𑀢𑀺𑀨𑀮𑀘𑀺𑀢𑁆𑀢𑀸𑀦𑀺 𑀦 𑀯𑀚𑁆𑀚𑁂𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀸𑀦𑀺 𑀧𑀦 𑀬𑀤𑀺𑀧𑀺 𑀦𑀺𑀩𑁆𑀩𑀸𑀦𑁂 𑀘𑀺𑀡𑁆𑀡𑀸𑀦𑀺, 𑀲𑀫𑀼𑀤𑀸𑀘𑀺𑀢𑀸𑀦𑀺 𑀘 𑀦 𑀳𑁄𑀦𑁆𑀢𑀺, 𑀆𑀭𑀫𑁆𑀫𑀡𑀦𑁆𑀢𑀭𑁂 𑀘𑀺𑀡𑁆𑀡𑀲𑀫𑀼𑀤𑀸𑀘𑀺𑀢𑀸𑀦𑁂𑀯. 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀸𑀦𑀺 𑀘 𑀫𑀕𑁆𑀕𑀯𑀻𑀣𑀺𑀢𑁄 𑀉𑀤𑁆𑀥𑀁 𑀢𑀤𑀢𑁆𑀣𑀁 𑀧𑀭𑀺𑀓𑀫𑁆𑀫𑀲𑀩𑁆𑀪𑀸𑀯𑀸𑀢𑀺 𑀢𑁂𑀲𑀁 𑀕𑀳𑀡𑀁 𑀦 𑀓𑀢𑀁. 𑀅𑀦𑀼𑀮𑁄𑀫𑀸𑀦𑀦𑁆𑀢𑀭𑀜𑁆𑀘 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀘𑀺𑀡𑁆𑀡𑀲𑀫𑀼𑀤𑀸𑀘𑀺𑀢𑀁, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀦𑀦𑁆𑀢𑀭𑀁 𑀫𑀕𑁆𑀕𑀸𑀦𑀦𑁆𑀢𑀭𑀲𑁆𑀲 𑀯𑀺𑀬 𑀢𑀤𑀢𑁆𑀣𑀁 𑀧𑀭𑀺𑀓𑀫𑁆𑀫𑀸𑀪𑀸𑀯𑀸𑀢𑀺 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲𑀸’’𑀢𑀺 𑀢𑀜𑁆𑀘 𑀦𑀺𑀤𑀲𑁆𑀲𑀺𑀢𑀦𑁆𑀢𑀺.

𑁪𑁬𑁭. ‘‘𑀓𑀺𑀫𑀲𑁆𑀲𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀢𑁆𑀯𑀸 𑀦𑀺𑀭𑀸𑀯𑀚𑁆𑀚𑀦𑀪𑀸𑀯𑀁 𑀯𑀺𑀬 𑀅𑀦𑀸𑀭𑀫𑁆𑀫𑀡𑀪𑀸𑀯𑀫𑁆𑀧𑀺 𑀯𑀤𑁂𑀬𑁆𑀬𑀸𑀢𑀺 𑀢𑀩𑁆𑀪𑀸𑀯𑀤𑀲𑁆𑀲𑀦𑁂𑀦 𑀅𑀢𑁆𑀢𑀦𑁄 𑀯𑀘𑀦𑀁 𑀲𑀸𑀥𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀸 𑀆𑀭𑀫𑁆𑀫𑀡𑁂𑀦𑀸’’𑀢𑀺𑀆𑀤𑀺. 𑀬𑀁 𑀓𑀺𑀜𑁆𑀘𑀻𑀢𑀺 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀘𑀺𑀢𑀧𑀼𑀩𑁆𑀩𑀁 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪. 𑀦𑀦𑀼 𑀘 𑀢𑀤𑀸𑀭𑀫𑁆𑀫𑀡𑀺𑀓𑀁 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁, 𑀢𑀤𑀸𑀭𑀫𑁆𑀫𑀡𑀜𑁆𑀘 𑀚𑀯𑀦𑀸𑀭𑀫𑁆𑀫𑀡𑀫𑁂𑀯 𑀕𑀡𑁆𑀳𑀸𑀢𑀺 𑀇𑀢𑀭𑀣𑀸 𑀢𑀤𑀸𑀭𑀫𑁆𑀫𑀡𑀪𑀸𑀯𑀸𑀬𑁄𑀕𑀢𑁄𑀢𑀺 𑀓𑀣𑀫𑀲𑁆𑀲𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺? 𑀲𑀘𑁆𑀘𑀁, 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀦𑀸𑀲𑁆𑀲𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀪𑀸𑀯𑁄 𑀬𑀼𑀢𑁆𑀢𑁄, ‘‘𑀢𑀤𑀸𑀭𑀫𑁆𑀫𑀡’’𑀦𑁆𑀢𑀺 𑀘 𑀢𑀤𑀸𑀭𑀫𑁆𑀫𑀡𑀝𑁆𑀞𑀸𑀦𑁂 𑀉𑀧𑁆𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀢𑀲𑁆𑀲𑀸 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀲𑀫𑁆𑀪𑀯𑀢𑁄. 𑀓𑁂𑀦 𑀘𑀭𑀳𑀺 𑀓𑀺𑀘𑁆𑀘𑁂𑀦𑀸𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀁 𑀢𑀸𑀯 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄𑀯 𑀦𑀢𑁆𑀣𑀺, 𑀦𑀸𑀧𑀺 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀢𑀣𑀸 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀧𑀝𑀺𑀲𑀦𑁆𑀥𑀺𑀘𑀼𑀢𑀻𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀧𑀸𑀭𑀺𑀲𑁂𑀲𑀢𑁄 𑀧𑀦 𑀪𑀯𑀲𑁆𑀲 𑀅𑀗𑁆𑀕𑀪𑀸𑀯𑀢𑁄 𑀪𑀯𑀗𑁆𑀕𑀓𑀺𑀘𑁆𑀘𑀦𑁆𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸, 𑀧𑀝𑀺𑀲𑀦𑁆𑀥𑀺𑀪𑀽𑀢𑀫𑁂𑀯 𑀘𑀺𑀢𑁆𑀢𑀁 𑀪𑀯𑀗𑁆𑀕𑀦𑁆𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀘𑁆𑀘𑀢𑀻𑀢𑀺. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦𑀸𑀧𑀺 𑀳𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀯.

𑁪𑁬𑁮-𑁭𑁩. 𑀅𑀯𑀺𑀚𑁆𑀚𑀫𑀸𑀦𑁂 𑀓𑀸𑀭𑀓𑁂 𑀓𑀣𑀁 𑀓𑀲𑁆𑀲𑀘𑀺 𑀦𑀺𑀭𑀸𑀯𑀚𑁆𑀚𑀦𑀧𑁆𑀧𑀯𑀢𑁆𑀢𑀺𑀓𑀲𑁆𑀲 𑀲𑀸𑀯𑀚𑁆𑀚𑀦𑀪𑀸𑀯𑁂𑀦𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 𑀘𑀺𑀢𑁆𑀢𑀦𑀺𑀬𑀸𑀫𑀦𑀺𑀩𑁆𑀩𑀢𑁆𑀢𑀫𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀢𑀼𑀩𑀻𑀚𑀦𑀺𑀬𑀸𑀫𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀢𑀼𑀩𑀻𑀚𑀦𑀺𑀬𑀸𑀫𑁄 𑀘𑀸𑀢𑀺 𑀉𑀢𑀼𑀦𑀺𑀬𑀸𑀫𑁄 𑀘𑁂𑀯 𑀩𑀻𑀚𑀦𑀺𑀬𑀸𑀫𑁄 𑀘, 𑀉𑀢𑀼𑀲𑀪𑀸𑀯𑀦𑀺𑀬𑀸𑀫𑁄 𑀩𑀻𑀚𑀲𑀪𑀸𑀯𑀦𑀺𑀬𑀸𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀫𑁆𑀫𑀥𑀫𑁆𑀫𑀸𑀦𑀁 𑀦𑀺𑀬𑀸𑀫𑁄 𑀏𑀯 𑀓𑀫𑁆𑀫𑀥𑀫𑁆𑀫𑀦𑀺𑀬𑀸𑀫𑀢𑀸. 𑀏𑀓𑀧𑁆𑀧𑀳𑀸𑀭𑁂𑀦𑀸𑀢𑀺 𑀢𑀁 𑀢𑀁 𑀉𑀢𑀼𑀲𑀫𑀬𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀓𑀸𑀮𑁂. 𑀨𑀮𑀧𑀼𑀧𑁆𑀨𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀮𑁆𑀮𑀯𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀲𑀩𑁆𑀩𑁂𑀲𑀦𑁆𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀮𑀸𑀤𑀺𑀦𑀺𑀩𑁆𑀩𑀢𑁆𑀢𑀦𑀓𑀸𑀦𑀁 𑀲𑀩𑁆𑀩𑁂𑀲𑀁. 𑀢𑀁𑀢𑀁𑀢𑀼𑀮𑁆𑀬𑀨𑀮𑀼𑀩𑁆𑀪𑀯𑁄𑀢𑀺 𑀢𑁂𑀳𑀺 𑀢𑁂𑀳𑀺 𑀩𑀻𑀚𑁂𑀳𑀺 𑀲𑀤𑀺𑀲𑀸𑀦𑀁 𑀨𑀮𑀸𑀦𑀁 𑀦𑀺𑀩𑁆𑀩𑀢𑁆𑀢𑀺, 𑀢𑁂𑀲𑀁 𑀢𑁂𑀲𑀁 𑀩𑀻𑀚𑀸𑀦𑀁 𑀅𑀦𑀼𑀭𑀽𑀧𑀨𑀮𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀓𑀼𑀮𑀢𑁆𑀣𑀕𑀘𑁆𑀙𑀲𑁆𑀲 𑀉𑀢𑁆𑀢𑀭𑀕𑁆𑀕𑀪𑀸𑀯𑁄, 𑀤𑀓𑁆𑀔𑀺𑀡𑀯𑀮𑁆𑀮𑀺𑀬𑀸 𑀤𑀓𑁆𑀔𑀺𑀡𑀭𑀼𑀓𑁆𑀔𑀧𑀭𑀺𑀳𑀭𑀡𑀁, 𑀲𑀽𑀭𑀺𑀬𑀸𑀯𑀢𑁆𑀢𑀧𑀼𑀧𑁆𑀨𑀸𑀦𑀁 𑀲𑀽𑀭𑀺𑀬𑀸𑀪𑀺𑀫𑀼𑀔𑀪𑀸𑀯𑁄, 𑀫𑀸𑀮𑀼𑀯𑀮𑀢𑀸𑀬 𑀭𑀼𑀓𑁆𑀔𑀸𑀪𑀺𑀫𑀼𑀔𑀕𑀫𑀦’’𑀦𑁆𑀢𑀺 𑀏𑀯𑀫𑀸𑀤𑀻𑀦𑀺𑀧𑀺 𑀏𑀢𑁆𑀣𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀙𑀺𑀤𑁆𑀤𑀢𑁆𑀢𑀦𑁆𑀢𑀺 𑀙𑀺𑀤𑁆𑀤𑀯𑀦𑁆𑀢𑀪𑀸𑀯𑁄, 𑀙𑀺𑀤𑁆𑀤𑀁𑀬𑁂𑀯 𑀯𑀸. 𑀩𑀻𑀚𑀚𑁄𑀢𑀺 𑀩𑀻𑀚𑀲𑀫𑁆𑀪𑀯𑁄 𑀦𑀺𑀬𑀸𑀫𑁄. 𑀬𑀢𑁄 𑀤𑁂𑀢𑀻𑀢𑀺 𑀬𑀢𑁄 𑀬𑀢𑁄 𑀧𑀘𑁆𑀘𑀬𑀪𑀸𑀯𑀦𑀺𑀬𑀸𑀫𑀢𑁄 𑀤𑁂𑀢𑀺. 𑀅𑀬𑀦𑁆𑀢𑀺 𑀅𑀬𑀁 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀲𑁆𑀲, 𑀲𑀤𑀺𑀲𑀲𑁆𑀲, 𑀯𑀺𑀲𑀤𑀺𑀲𑀲𑁆𑀲 𑀘 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂 𑀦𑀺𑀬𑀸𑀫𑁄. 𑀅𑀧𑀺𑀘 𑁋

‘‘𑀦 𑀅𑀦𑁆𑀢𑀮𑀺𑀓𑁆𑀔𑁂 𑀦 𑀲𑀫𑀼𑀤𑁆𑀤𑀫𑀚𑁆𑀛𑁂,

𑀦 𑀧𑀩𑁆𑀩𑀢𑀸𑀦𑀁 𑀯𑀺𑀯𑀭𑀁 𑀧𑀯𑀺𑀲𑁆𑀲;

𑀦 𑀯𑀺𑀚𑁆𑀚𑀢𑀻 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄,

𑀬𑀢𑁆𑀣𑀝𑁆𑀞𑀺𑀢𑁄 𑀫𑀼𑀘𑁆𑀘𑁂𑀬𑁆𑀬 𑀧𑀸𑀧𑀓𑀫𑁆𑀫𑀸’’𑀢𑀺. (𑀥. 𑀧. 𑁧𑁨𑁭) 𑁋

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀆𑀕𑀢𑀁 𑀢𑀺𑀡𑀓𑀮𑀸𑀧𑀲𑁆𑀲 𑀕𑀳𑀺𑀢𑀅𑀕𑁆𑀕𑀺𑀦𑁄 𑀉𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑁂 𑀕𑀘𑁆𑀙𑀢𑁄 𑀓𑀸𑀓𑀲𑁆𑀲 𑀕𑀻𑀯𑀸𑀬 𑀧𑀝𑀺𑀫𑀼𑀘𑁆𑀘𑀦𑀁, 𑀦𑀸𑀯𑀺𑀓𑀲𑁆𑀲 𑀪𑀭𑀺𑀬𑀸𑀬 𑀯𑀸𑀮𑀼𑀓𑀖𑀝𑀁 𑀓𑀡𑁆𑀞𑁂 𑀩𑀦𑁆𑀥𑀺𑀢𑁆𑀯𑀸 𑀲𑀫𑀼𑀤𑁆𑀤𑀼𑀤𑀓𑁂 𑀧𑀓𑁆𑀔𑀺𑀧𑀦𑀁, 𑀧𑀩𑁆𑀩𑀢𑀓𑀽𑀝𑀲𑁆𑀲 𑀧𑀢𑀺𑀢𑁆𑀯𑀸 𑀮𑁂𑀡𑁂 𑀯𑀲𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑁆𑀯𑀸𑀭𑀧𑀺𑀤𑀳𑀦𑀦𑁆𑀢𑀺 𑀢𑀁𑀢𑀁𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑀫𑁆𑀧𑀺 𑀓𑀫𑁆𑀫𑀦𑀺𑀬𑀸𑀫𑁄𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀢𑀺𑀬𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀘𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁂 𑀘, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀪𑀺𑀲𑀫𑁆𑀩𑁄𑀥𑀺𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀸𑀤𑀻𑀲𑀼𑀧𑀺 𑀫𑁂𑀤𑀦𑀻𑀓𑀫𑁆𑀧𑀦𑀸𑀤𑀺𑀓𑀲𑁆𑀲 𑀲𑀫𑁆𑀪𑀯𑀢𑁄. 𑀩𑁄𑀥𑀺𑀲𑀢𑁆𑀢𑀲𑁆𑀲𑀸𑀢𑀺 𑀧𑀘𑁆𑀙𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀲𑁆𑀲. 𑀫𑁂𑀤𑀦𑀻𑀓𑀫𑁆𑀧𑀦𑀸𑀤𑀺𑀓𑀦𑁆𑀢𑀺 𑀧𑀣𑀯𑀻𑀓𑀫𑁆𑀧𑀦𑀸𑀤𑀺𑀓𑀁 𑀤𑁆𑀯𑀢𑁆𑀢𑀺𑀁𑀲𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀯𑀺𑀲𑁂𑀲𑀢𑁆𑀢𑀫𑀦𑁂𑀓𑀫𑁆𑀧𑀻𑀢𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀅𑀜𑁆𑀜𑀁 𑀢𑀤𑀸 𑀧𑀸𑀢𑀼𑀪𑀽𑀢𑀁 𑀲𑀩𑁆𑀩𑀁 𑀅𑀘𑁆𑀙𑀭𑀺𑀬𑀁. 𑀉𑀧𑁆𑀧𑀢𑁆𑀢𑀸𑀯𑀚𑁆𑀚𑀦𑀸𑀤𑀻𑀦𑀦𑁆𑀢𑀺 ‘‘𑀢𑁆𑀯𑀁 𑀆𑀯𑀚𑁆𑀚𑀦𑀁 𑀳𑁄𑀳𑀺, 𑀢𑁆𑀯𑀁 𑀤𑀲𑁆𑀲𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀬𑀼𑀜𑁆𑀚𑀓𑀲𑁆𑀲 𑀅𑀪𑀸𑀯𑁂𑀧𑀺 𑀢𑀁𑀢𑀁𑀓𑀺𑀘𑁆𑀘𑀯𑀲𑁂𑀦 𑀢𑁂𑀲𑀁 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺.

𑁪𑁭𑁪. 𑀳𑀤𑀬𑁂 𑀅𑀦𑁆𑀥𑀓𑀸𑀭𑁄 𑀯𑀺𑀬𑀸𑀢𑀺 𑀳𑀤𑀬𑀦𑁆𑀥𑀓𑀸𑀭𑁄, 𑀲𑀫𑁆𑀫𑁄𑀳𑁄𑀢𑀺 𑀅𑀢𑁆𑀣𑁄, 𑀢𑀲𑁆𑀲 𑀯𑀺𑀤𑁆𑀥𑀁𑀲𑀦𑀁 𑀧𑀳𑀸𑀦𑀓𑀭𑀡𑀦𑁆𑀢𑀺 𑀳𑀤𑀬𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀦𑀁. 𑀧𑀬𑀼𑀢𑁆𑀢𑁄𑀢𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀧𑁆𑀧𑀢𑁆𑀯𑀸 𑀅𑀦𑁄𑀲𑀓𑁆𑀓𑀫𑀸𑀦𑁂𑀦 𑀯𑀻𑀭𑀺𑀬𑁂𑀦 𑀯𑀻𑀭𑀺𑀬𑀯𑀸. 𑀫𑁄𑀳𑀦𑁆𑀥𑀓𑀸𑀭𑀸𑀧𑀕𑀫𑀦𑁆𑀢𑀺 𑀅𑀭𑀳𑀢𑁆𑀢𑀫𑀸𑀳.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.