𑁬. 𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄

𑀆𑀭𑀫𑁆𑀫𑀡𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁯𑁧-𑁩. 𑀏𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀁. 𑀦𑀦𑀼 𑀘 ‘‘𑀘𑀺𑀢𑁆𑀢𑀁 𑀘𑁂𑀢𑀲𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀸𑀤𑀻𑀦𑀺𑀬𑁂𑀯 𑀉𑀤𑁆𑀤𑀺𑀝𑁆𑀞𑀸𑀦𑀻𑀢𑀺 𑀢𑀸𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺, 𑀆𑀭𑀫𑁆𑀫𑀡𑀁 𑀧𑀦 𑀅𑀧𑁆𑀧𑀓𑀢𑀁, 𑀢𑀁 𑀓𑀲𑁆𑀫𑀸 𑀇𑀥 𑀯𑀼𑀘𑁆𑀘𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀆𑀳 ‘‘𑀢𑁂𑀦 𑀯𑀺𑀦𑀸 𑀦𑀢𑁆𑀣𑀺 𑀳𑀺 𑀲𑀫𑁆𑀪𑀯𑁄’’𑀢𑀺. 𑀬𑀲𑁆𑀫𑀸 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀘𑀺𑀢𑁆𑀢𑀲𑀫𑁆𑀪𑀯𑁄 𑀦𑀢𑁆𑀣𑀺, 𑀦 𑀳𑀺 𑀅𑀦𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀸 ‘‘𑀢𑀬𑀺𑀤𑀁 𑀘𑀺𑀢𑁆𑀢𑀁 𑀓𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀆𑀲𑀗𑁆𑀓𑀸𑀦𑀺𑀯𑀸𑀭𑀡𑀢𑁆𑀣𑀁 𑀇𑀢𑁄 𑀧𑀭𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀢𑀺𑀯𑀺𑀥𑀁 𑀧𑀦 𑀢𑀁 𑀆𑀭𑀫𑁆𑀫𑀡𑀁, 𑀓𑀺𑀁 𑀲𑀭𑀽𑀧𑀜𑁆𑀘𑀸𑀢𑀺 𑀆𑀳 ‘‘𑀭𑀽𑀧𑀁 𑀲𑀤𑁆𑀤’’𑀦𑁆𑀢𑀺𑀆𑀤𑀺. 𑀯𑀘𑀦𑀢𑁆𑀣𑀁 𑀧𑀦 𑀦𑁂𑀲𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀙𑀴𑀸𑀭𑀫𑁆𑀫𑀡𑀓𑁄𑀯𑀺𑀤𑀸𑀢𑀺 𑀙𑀦𑁆𑀦𑀁 𑀆𑀭𑀫𑁆𑀫𑀡𑀸𑀦𑀁 𑀩𑁆𑀬𑀸𑀓𑀭𑀡𑀓𑀼𑀲𑀮𑀸 𑀩𑀼𑀤𑁆𑀥𑀸𑀤𑀬𑁄.

𑀪𑀽𑀢𑁂𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑁂. 𑀉𑀧𑀸𑀤𑀸𑀬𑀸𑀢𑀺 𑀦𑀺𑀲𑁆𑀲𑀸𑀬. 𑀘𑀢𑀼𑀲𑀫𑀼𑀝𑁆𑀞𑀺𑀢𑁄𑀢𑀺 𑀓𑀫𑁆𑀫𑀸𑀤𑀻𑀳𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀫𑀼𑀝𑁆𑀞𑀺𑀢𑁄. 𑀦𑀺𑀤𑀲𑁆𑀲𑀺𑀢𑀩𑁆𑀩𑀁 𑀦𑀺𑀤𑀲𑁆𑀲𑀦𑀁. 𑀓𑀺𑀁 𑀢𑀁? 𑀤𑀝𑁆𑀞𑀩𑁆𑀩𑀪𑀸𑀯𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑁄, 𑀲𑀳 𑀦𑀺𑀤𑀲𑁆𑀲𑀦𑁂𑀦𑀸𑀢𑀺 𑀲𑀦𑀺𑀤𑀲𑁆𑀲𑀦𑁄. 𑀧𑀝𑀺𑀳𑀜𑁆𑀜𑀢𑀺, 𑀧𑀝𑀺𑀳𑀦𑀦𑀦𑁆𑀢𑀺 𑀯𑀸 𑀧𑀝𑀺𑀖𑁄, 𑀬𑁂𑀦 𑀩𑁆𑀬𑀸𑀧𑀸𑀭𑀸𑀤𑀺𑀯𑀺𑀓𑀸𑀭𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑁂𑀲𑀼 𑀘𑀓𑁆𑀔𑀸𑀤𑀻𑀦𑀁 𑀦𑀺𑀲𑁆𑀲𑀬𑁂𑀲𑀼 𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺, 𑀲𑁄 𑀲𑀬𑀁 𑀦𑀺𑀲𑁆𑀲𑀬𑀯𑀲𑁂𑀦 𑀘 𑀲𑀫𑁆𑀧𑀢𑁆𑀢𑀸𑀦𑀁, 𑀅𑀲𑀫𑁆𑀧𑀢𑁆𑀢𑀸𑀦𑀜𑁆𑀘 𑀧𑀝𑀺𑀫𑀼𑀔𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀧𑀢𑀦𑀁 𑀧𑀝𑀺𑀖𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀬𑀁 𑀲𑀫𑁆𑀧𑀢𑁆𑀢𑀺𑀁 𑀨𑁄𑀝𑁆𑀞𑀩𑁆𑀩𑀲𑁆𑀲 𑀦𑀺𑀲𑁆𑀲𑀬𑀯𑀲𑁂𑀦 𑀲𑀫𑁆𑀧𑀢𑁆𑀢𑀺 𑀕𑀦𑁆𑀥𑀭𑀲𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀦𑀁. 𑀇𑀢𑀭𑁂𑀲𑀁 𑀉𑀪𑀬𑀣𑀸𑀧𑀺 𑀅𑀲𑀫𑁆𑀧𑀢𑁆𑀢𑀺, 𑀢𑀲𑁆𑀫𑀸 𑀇𑀥 𑀅𑀲𑀫𑁆𑀧𑀢𑁆𑀢𑀸𑀦𑀁 𑀧𑀝𑀺𑀫𑀼𑀔𑀪𑀸𑀯𑁄 ‘‘𑀧𑀝𑀺𑀖𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀳 𑀧𑀝𑀺𑀖𑁂𑀦𑀸𑀢𑀺 𑀲𑀧𑁆𑀧𑀝𑀺𑀖𑁄, 𑀲𑀦𑀺𑀤𑀲𑁆𑀲𑀦𑁄 𑀘 𑀲𑁄 𑀲𑀧𑁆𑀧𑀝𑀺𑀖𑁄 𑀘𑀸𑀢𑀺 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑁄. 𑀏𑀢𑁆𑀣𑀸𑀳 𑁋 𑀬𑀲𑁆𑀲 𑀤𑀝𑁆𑀞𑀩𑁆𑀩𑀪𑀸𑀯𑁄 𑀅𑀢𑁆𑀣𑀺, 𑀲𑁄 𑀲𑀦𑀺𑀤𑀲𑁆𑀲𑀦𑁄, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀕𑁄𑀘𑀭𑀪𑀸𑀯𑁄𑀯 𑀤𑀝𑁆𑀞𑀩𑁆𑀩𑀪𑀸𑀯𑁄. 𑀢𑀲𑁆𑀲 𑀘 𑀭𑀽𑀧𑀸𑀬𑀢𑀦𑀢𑁄 𑀅𑀦𑀜𑁆𑀜𑀢𑁆𑀢𑀸 𑀓𑀣𑀁 𑀲𑀳 𑀦𑀺𑀤𑀲𑁆𑀲𑀦𑁂𑀦 𑀲𑀦𑀺𑀤𑀲𑁆𑀲𑀦𑁄𑀢𑀺 𑀬𑀼𑀚𑁆𑀚𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀦𑀜𑁆𑀜𑀢𑁆𑀢𑁂𑀧𑀺 𑀢𑀲𑁆𑀲 𑀅𑀜𑁆𑀜𑁂𑀳𑀺 𑀥𑀫𑁆𑀫𑁂𑀳𑀺 𑀭𑀽𑀧𑀸𑀬𑀢𑀦𑀁 𑀯𑀺𑀲𑁂𑀲𑁂𑀢𑀼𑀁 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀳 𑀦𑀺𑀤𑀲𑁆𑀲𑀦𑁂𑀦 𑀲𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀥𑀫𑁆𑀫𑀲𑀪𑀸𑀯𑀲𑀸𑀫𑀜𑁆𑀜𑁂𑀦 𑀳𑀺 𑀏𑀓𑀻𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀦𑀸𑀦𑀢𑁆𑀢𑀓𑀭𑁄 𑀯𑀺𑀲𑁂𑀲𑁄, 𑀲𑁄 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀸𑀭𑀺𑀢𑀼𑀁 𑀬𑀼𑀢𑁆𑀢𑁄. 𑀏𑀯𑀜𑁆𑀳𑀺 𑀅𑀢𑁆𑀣𑀯𑀺𑀲𑁂𑀲𑀸𑀯𑀩𑁄𑀥𑁄 𑀳𑁄𑀢𑀺. 𑀭𑀽𑀧𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑁄𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀯𑀡𑁆𑀡𑁄 𑀭𑀽𑀧𑀸𑀭𑀫𑁆𑀫𑀡𑀦𑁆𑀢𑀺 𑀲𑀜𑁆𑀜𑀺𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑁂 𑀉𑀧𑀸𑀤𑀸𑀬 𑀢𑁂 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀉𑀢𑀼𑀲𑀫𑀼𑀝𑁆𑀞𑀸𑀦𑁄 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑁄 𑀘 𑀦𑀻𑀮𑀸𑀤𑀺𑀯𑀲𑁂𑀦 𑀤𑀺𑀲𑁆𑀲𑀫𑀸𑀦𑁄 𑀇𑀦𑁆𑀤𑁆𑀭𑀺𑀬𑁂𑀳𑀺 𑀖𑀝𑁆𑀝𑁂𑀦𑁆𑀢𑁄 𑀘 𑀯𑀡𑁆𑀡𑁄 𑀭𑀽𑀧𑀸𑀭𑀫𑁆𑀫𑀡𑀁 𑀦𑀸𑀫𑀸𑀢𑀺.

𑁨𑁯𑁪-𑁭. 𑀘𑀺𑀢𑁆𑀢𑀜𑁆𑀘 𑀉𑀢𑀼 𑀘 𑀘𑀺𑀢𑁆𑀢𑁄𑀢𑀼, 𑀢𑁂𑀳𑀺 𑀲𑀫𑁆𑀪𑀯𑀢𑀺, 𑀢𑁂 𑀯𑀸 𑀲𑀫𑁆𑀪𑀯𑀸 𑀧𑀘𑁆𑀘𑀬𑀸 𑀇𑀫𑀲𑁆𑀲𑀸𑀢𑀺 𑀘𑀺𑀢𑁆𑀢𑁄𑀢𑀼𑀲𑀫𑁆𑀪𑀯𑁄. 𑀲𑀳 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀯𑀺𑀜𑁆𑀜𑀸𑀡𑁂𑀦 𑀧𑀯𑀢𑁆𑀢𑁄 𑀲𑀤𑁆𑀤𑁄 𑀲𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑁄, 𑀲𑀯𑀺𑀜𑁆𑀜𑀸𑀡𑀓𑀲𑀤𑁆𑀤𑁄 𑀧𑀦 𑀦 𑀓𑁂𑀯𑀮𑀁 𑀲𑀯𑀺𑀜𑁆𑀜𑀸𑀡𑀓𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑁄𑀯 𑀓𑀼𑀘𑁆𑀙𑀺𑀲𑀤𑁆𑀤𑀸𑀤𑀺𑀯𑀲𑁂𑀦 𑀢𑀲𑁆𑀲 𑀉𑀢𑀼𑀲𑀫𑀼𑀝𑁆𑀞𑀺𑀢𑀲𑁆𑀲𑀸𑀧𑀺 𑀲𑀫𑁆𑀪𑀯𑀢𑁄.

𑀥𑀭𑀻𑀬𑀢𑀻𑀢𑀺 𑀓𑀮𑀸𑀧𑀧𑀭𑀫𑁆𑀧𑀭𑀸𑀬 𑀲𑀦𑁆𑀥𑀸𑀭𑀻𑀬𑀢𑀺. 𑀲𑀽𑀘𑀦𑀢𑁄𑀢𑀺 𑀅𑀢𑁆𑀢𑀦𑁄 𑀯𑀢𑁆𑀣𑀼𑀲𑁆𑀲 𑀲𑀼𑀧𑀸𑀓𑀝𑀓𑀭𑀡𑀢𑁄. 𑀕𑀦𑁆𑀥𑁄 𑀳𑀺 ‘‘𑀇𑀤𑀁 𑀲𑀼𑀕𑀦𑁆𑀥𑀁, 𑀇𑀤𑀁 𑀤𑀼𑀕𑁆𑀕𑀦𑁆𑀥’’𑀦𑁆𑀢𑀺 𑀧𑀓𑀸𑀲𑁂𑀢𑀺, 𑀧𑀝𑀺𑀘𑁆𑀙𑀦𑁆𑀦𑀧𑀼𑀧𑁆𑀨𑀨𑀮𑀸𑀤𑀻𑀦𑀺 ‘‘𑀇𑀤𑀫𑁂𑀢𑁆𑀣 𑀅𑀢𑁆𑀣𑀻’’𑀢𑀺 𑀧𑁂𑀲𑀼𑀜𑁆𑀜𑀁 𑀓𑀭𑁄𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺.

𑀭𑀲𑀫𑀸𑀦𑀸𑀢𑀺 𑀅𑀲𑁆𑀲𑀸𑀤𑀯𑀲𑁂𑀦 𑀢𑀼𑀲𑁆𑀲𑀫𑀸𑀦𑀸. 𑀭𑀲𑀦𑁆𑀢𑀻𑀢𑀺 𑀅𑀲𑀦𑁆𑀢𑀺, 𑀅𑀦𑀼𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀏𑀯𑀜𑁆𑀳𑀺 ‘‘𑀭𑀲𑀫𑀸𑀦𑀸 𑀦𑀁 𑀅𑀲𑀦𑁆𑀢𑀻𑀢𑀺 𑀭𑀲𑁄’’𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁄 𑀲𑀼𑀦𑁆𑀤𑀭𑁄 𑀳𑁄𑀢𑀺. 𑀇𑀢𑀭𑀣𑀸 ‘‘𑀭𑀲𑀦𑁆𑀢𑀺 𑀅𑀲𑁆𑀲𑀸𑀤𑁂𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂 ‘‘𑀭𑀲𑀫𑀸𑀦𑀸’’𑀢𑀺 𑀇𑀤𑀁 𑀦𑀺𑀭𑀢𑁆𑀣𑀓𑀫𑁂𑀯 𑀲𑀺𑀬𑀸. 𑀅𑀣 𑀯𑀸 ‘‘𑀭𑀲𑀫𑀸𑀦𑀸’’𑀢𑀺 𑀇𑀢𑁄 𑀭-𑀓𑀸𑀭𑀁, ‘‘𑀭𑀲𑀦𑁆𑀢𑀻’’𑀢𑀺 𑀇𑀢𑁄 𑀲-𑀓𑀸𑀭𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀭𑀲𑁄’’𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁄 𑀤𑀝𑁆𑀞𑀩𑁆𑀩𑁄.

𑁨𑁯𑁮. 𑀨𑀼𑀲𑀻𑀬𑀢𑀻𑀢𑀺 𑀖𑀝𑁆𑀝𑀻𑀬𑀢𑀺. 𑀓𑀺𑀁 𑀢𑀁 𑀨𑁄𑀝𑁆𑀞𑀩𑁆𑀩𑀁 𑀦𑀸𑀫𑀸𑀢𑀺 𑀆𑀳 ‘‘𑀧𑀣𑀯𑀻𑀢𑁂𑀚𑀯𑀸𑀬𑀯𑁄’’𑀢𑀺. 𑀇𑀫𑀺𑀦𑀸 𑀥𑀸𑀢𑀼𑀢𑁆𑀢𑀬𑀫𑁂𑀯 𑀓𑀸𑀬𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀲𑀗𑁆𑀔𑀸𑀢𑀨𑁄𑀝𑁆𑀞𑀩𑁆𑀩𑀁 𑀦𑀸𑀫, 𑀦 𑀅𑀜𑁆𑀜𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀆𑀧𑁄𑀥𑀸𑀢𑀼 𑀦 𑀕𑀳𑀺𑀢𑀸, 𑀦𑀦𑀼 𑀲𑀻𑀢𑀢𑀸 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑀢𑀺, 𑀲𑀸 𑀘 𑀆𑀧𑁄𑀥𑀸𑀢𑀼 𑀏𑀯𑀸𑀢𑀺? 𑀲𑀘𑁆𑀘𑀁 𑀕𑀬𑁆𑀳𑀢𑀺, 𑀦 𑀧𑀦 𑀆𑀧𑁄𑀥𑀸𑀢𑀼, 𑀓𑀺𑀜𑁆𑀘𑀭𑀳𑀺 𑀢𑁂𑀚𑁄𑀥𑀸𑀢𑀼 𑀏𑀯. 𑀫𑀦𑁆𑀤𑁂 𑀳𑀺 𑀉𑀡𑁆𑀳𑀪𑀸𑀯𑁂 𑀲𑀻𑀢𑀯𑀼𑀤𑁆𑀥𑀺, 𑀦 𑀲𑀻𑀢𑀢𑀸 𑀦𑀸𑀫 𑀓𑁄𑀘𑀺 𑀕𑀼𑀡𑁄 𑀅𑀢𑁆𑀣𑀺. 𑀓𑁂𑀯𑀮𑀁 𑀧𑀦 𑀉𑀡𑁆𑀳𑀪𑀸𑀯𑀲𑁆𑀲 𑀫𑀦𑁆𑀤𑀢𑀸𑀬 𑀲𑀻𑀢𑀢𑀸𑀪𑀺𑀫𑀸𑀦𑁄. 𑀓𑀣𑀁 𑀧𑀦𑁂𑀢𑀁 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀘𑁂? 𑀲𑀻𑀢𑀯𑀼𑀤𑁆𑀥𑀺𑀬𑀸 𑀅𑀦𑀯𑀝𑁆𑀞𑀺𑀢𑀪𑀸𑀯𑀢𑁄 𑀧𑀸𑀭𑀸𑀧𑀸𑀭𑁂 𑀯𑀺𑀬. 𑀢𑀣𑀸 𑀳𑀺 𑀖𑀫𑁆𑀫𑀓𑀸𑀮𑁂 𑀆𑀢𑀧𑁂 𑀞𑀢𑁆𑀯𑀸 𑀙𑀸𑀬𑀁 𑀧𑀯𑀺𑀝𑁆𑀞𑀸𑀦𑀁 𑀲𑀻𑀢𑀯𑀼𑀤𑁆𑀥𑀺 𑀳𑁄𑀢𑀺, 𑀢𑀢𑁆𑀣𑁂𑀯 𑀧𑀣𑀯𑀻𑀕𑀩𑁆𑀪𑀢𑁄 𑀉𑀝𑁆𑀞𑀺𑀢𑀸𑀦𑀁 𑀉𑀡𑁆𑀳𑀯𑀼𑀤𑁆𑀥𑀺 𑀘. 𑀓𑀺𑀜𑁆𑀘𑀭𑀳𑀺 𑀳𑀺𑀫𑀧𑀸𑀢𑀲𑀫𑀬𑀸𑀤𑀻𑀲𑀼 𑀲𑀻𑀢𑀲𑁆𑀲 𑀧𑀭𑀺𑀧𑀸𑀘𑀓𑀢𑁆𑀢𑀤𑀲𑁆𑀲𑀦𑀢𑁄 𑀘 𑀢𑁂𑀚𑁄𑀥𑀸𑀢𑀼 𑀏𑀯 𑀲𑀻𑀢𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀘 𑀲𑀻𑀢𑀢𑀸 𑀆𑀧𑁄𑀥𑀸𑀢𑀼 𑀲𑀺𑀬𑀸, 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀉𑀡𑁆𑀳𑀪𑀸𑀯𑁂𑀦 𑀲𑀤𑁆𑀥𑀺𑀁 𑀉𑀧𑀮𑀩𑁆𑀪𑁂𑀬𑁆𑀬 𑀤𑁆𑀯𑀺𑀦𑁆𑀦𑀁 𑀥𑀸𑀢𑀽𑀦𑀁 𑀅𑀯𑀺𑀦𑀺𑀩𑁆𑀪𑁄𑀕𑀧𑁆𑀧𑀯𑀢𑁆𑀢𑀺𑀢𑁄, 𑀦 𑀘 𑀧𑀦𑁂𑀯𑀁 𑀉𑀧𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀜𑀸𑀬𑀢𑀺 ‘‘𑀦 𑀆𑀧𑁄𑀥𑀸𑀢𑀼 𑀲𑀻𑀢𑀢𑀸’’𑀢𑀺. 𑀇𑀤𑀁 𑀘𑀢𑀼𑀫𑀳𑀸𑀪𑀽𑀢𑀸𑀦𑀁 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀢𑀁 𑀇𑀘𑁆𑀙𑀦𑁆𑀢𑀸𑀦𑀁 𑀉𑀢𑁆𑀢𑀭𑀁, 𑀅𑀦𑀺𑀘𑁆𑀙𑀦𑁆𑀢𑀸𑀦𑀫𑁆𑀧𑀺 𑀧𑀦 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀓𑀺𑀘𑁆𑀘𑀤𑀲𑁆𑀲𑀦𑁂𑀦 𑀲𑀪𑀸𑀕𑀯𑀼𑀢𑁆𑀢𑀺𑀢𑀸𑀬 𑀲𑀸𑀥𑀺𑀢𑀸𑀬 𑀇𑀤𑀫𑁂𑀯 𑀉𑀢𑁆𑀢𑀭𑀁. 𑀓𑁂𑀘𑀺 𑀧𑀦 ‘‘𑀯𑀸𑀬𑁄𑀥𑀸𑀢𑀼 𑀲𑀻𑀢𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀇𑀤𑀫𑁂𑀯 𑀉𑀢𑁆𑀢𑀭𑀁. 𑀬𑀤𑀺 𑀯𑀸𑀬𑁄𑀥𑀸𑀢𑀼 𑀲𑀻𑀢𑀢𑀸 𑀲𑀺𑀬𑀸, 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀉𑀡𑁆𑀳𑀪𑀸𑀯𑁂𑀦 𑀲𑀤𑁆𑀥𑀺𑀁 𑀉𑀧𑀮𑀩𑁆𑀪𑁂𑀬𑁆𑀬, 𑀦 𑀘 𑀧𑀦𑁂𑀯𑀁 𑀉𑀧𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀬𑀢𑀺 ‘‘𑀦 𑀯𑀸𑀬𑁄𑀥𑀸𑀢𑀼 𑀲𑀻𑀢𑀢𑀸’’𑀢𑀺. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀤𑁆𑀭𑀯𑀢𑀸 𑀆𑀧𑁄𑀥𑀸𑀢𑀼, 𑀲𑀸 𑀘 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑀢𑀻’’𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀤𑁆𑀭𑀯𑀪𑀸𑀯𑁄𑀧𑀺 𑀦𑀸𑀫 𑀨𑀼𑀲𑀻𑀬𑀢𑀻𑀢𑀺 𑀇𑀤𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀅𑀥𑀺𑀫𑀸𑀦𑀫𑀢𑁆𑀢𑀁 𑀲𑀡𑁆𑀞𑀸𑀦𑁂 𑀯𑀺𑀬𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀤𑁆𑀭𑀯𑀪𑀸𑀲𑀳𑀯𑀼𑀢𑁆𑀢𑀻𑀦𑀺, 𑀢𑀻𑀡𑀺 𑀪𑀽𑀢𑀸𑀦𑀺 𑀲𑀫𑁆𑀨𑀼𑀲𑀁;

𑀤𑁆𑀭𑀯𑀢𑀁 𑀲𑀫𑁆𑀨𑀼𑀲𑀸𑀫𑀻𑀢𑀺, 𑀮𑁄𑀓𑁄𑀬𑀫𑀪𑀺𑀫𑀜𑁆𑀜𑀢𑀺.

‘‘𑀪𑀽𑀢𑁂 𑀨𑀼𑀲𑀺𑀢𑁆𑀯𑀸 𑀲𑀡𑁆𑀞𑀸𑀦𑀁, 𑀫𑀦𑀲𑀸 𑀕𑀬𑁆𑀳𑀢𑁂 𑀬𑀣𑀸;

𑀧𑀘𑁆𑀘𑀓𑁆𑀔𑀢𑁄 𑀨𑀼𑀲𑀸𑀫𑀻𑀢𑀺, 𑀜𑀸𑀢𑀩𑁆𑀩𑀸 𑀤𑁆𑀭𑀯𑀢𑀸 𑀢𑀣𑀸’’𑀢𑀺.

𑁨𑁯𑁯. 𑀲𑀩𑁆𑀩𑀁 𑀦𑀸𑀫𑀦𑁆𑀢𑀺 𑀲𑀩𑁆𑀩𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀲𑀫𑁆𑀫𑀢𑀁 𑀦𑀸𑀫𑀁. 𑀘𑀺𑀢𑁆𑀢𑀘𑁂𑀢𑀲𑀺𑀓𑀜𑁆𑀳𑀺 𑀆𑀭𑀫𑁆𑀫𑀡𑀁 𑀧𑀢𑀺 𑀦𑀫𑀦𑀢𑁄 𑀦𑀸𑀫𑀁. 𑀦𑀺𑀩𑁆𑀩𑀸𑀦𑀁 𑀧𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑁆𑀲 𑀅𑀢𑁆𑀢𑀸𑀦𑀁 𑀧𑀢𑀺 𑀦𑀸𑀫𑀦𑀢𑁄 𑀦𑀸𑀫𑀁. 𑀭𑀽𑀧𑀦𑁆𑀢𑀺 𑀦𑀺𑀧𑁆𑀨𑀦𑁆𑀦𑀭𑀽𑀧𑀁. 𑀓𑀺𑀁 𑀅𑀯𑀺𑀲𑁂𑀲𑁂𑀦𑀸𑀢𑀺 𑀘𑁂, 𑀦𑁄𑀢𑀺 𑀆𑀳 ‘‘𑀳𑀺𑀢𑁆𑀯𑀸 𑀭𑀽𑀧𑀸𑀤𑀺𑀧𑀜𑁆𑀘𑀓’’𑀦𑁆𑀢𑀺. 𑀮𑀓𑁆𑀔𑀡𑀸𑀦𑀻𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀺. 𑀧𑀜𑁆𑀜𑀢𑁆𑀢𑀻𑀢𑀺 𑀦𑀸𑀫𑀼𑀧𑀸𑀤𑀸𑀬𑀯𑀲𑁂𑀦 𑀤𑀼𑀯𑀺𑀥𑀸 𑀧𑀜𑁆𑀜𑀢𑁆𑀢𑀺.

𑁩𑁦𑁦. 𑀇𑀫𑀸𑀦𑀺 𑀧𑀦 𑀙𑀩𑁆𑀩𑀺𑀥𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀲𑀩𑁆𑀩𑀸𑀦𑀺 𑀲𑀩𑁆𑀩𑀢𑁆𑀣 𑀮𑀩𑁆𑀪𑀦𑁆𑀢𑀺, 𑀉𑀤𑀸𑀳𑀼 𑀓𑀢𑁆𑀣𑀘𑀺 𑀓𑀸𑀦𑀺𑀘𑀻𑀢𑀺 𑀆𑀳 ‘‘𑀙𑀴𑀸𑀭𑀫𑁆𑀫𑀡𑀸𑀦𑀻’’𑀢𑀺𑀆𑀤𑀺. 𑀢𑀻𑀡𑀺 𑀭𑀽𑀧𑁂𑀢𑀺 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁 𑀭𑀽𑀧𑀲𑀤𑁆𑀤𑀥𑀫𑁆𑀫𑀯𑀲𑁂𑀦 𑀢𑀻𑀡𑀺 𑀆𑀭𑀫𑁆𑀫𑀡𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀖𑀸𑀦𑀸𑀤𑀺𑀢𑁆𑀢𑀬𑀲𑁆𑀲 𑀧𑀦 𑀢𑀢𑁆𑀣 𑀅𑀪𑀸𑀯𑀢𑁄 𑀕𑀦𑁆𑀥𑀸𑀭𑀫𑁆𑀫𑀡𑀸𑀤𑀻𑀦𑀺 𑀥𑀫𑁆𑀫𑀸𑀭𑀫𑁆𑀫𑀡𑀢𑁄 𑀯𑀺𑀲𑀼𑀁 𑀦 𑀮𑀩𑁆𑀪𑀦𑁆𑀢𑀺. 𑀅𑀭𑀽𑀧𑀪𑀯𑁂 𑀧𑀦 𑀲𑀩𑁆𑀩𑀲𑁄 𑀭𑀽𑀧𑀸𑀦𑀁 𑀅𑀪𑀸𑀯𑀢𑁄 𑀏𑀓𑀁 𑀥𑀫𑁆𑀫𑀸𑀭𑀫𑁆𑀫𑀡𑀫𑁂𑀯 𑀮𑀩𑁆𑀪𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀆𑀳 ‘‘𑀅𑀭𑀽𑀧𑁂 𑀥𑀫𑁆𑀫𑀸𑀭𑀫𑁆𑀫𑀡𑀫𑁂𑀓𑀓’’𑀦𑁆𑀢𑀺. 𑀦𑀦𑀼 𑀘 𑀅𑀭𑀽𑀧𑀪𑀯𑀢𑁄 𑀘𑀯𑀺𑀢𑁆𑀯𑀸 𑀓𑀸𑀫𑀪𑀯𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀸𑀦𑀁 𑀅𑀭𑀽𑀧𑀪𑀯𑁂𑀬𑁂𑀯 𑀕𑀢𑀺𑀦𑀺𑀫𑀺𑀢𑁆𑀢𑀯𑀲𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀉𑀧𑀝𑁆𑀞𑀸𑀢𑀻𑀢𑀺? 𑀲𑀘𑁆𑀘𑀁 𑀉𑀧𑀝𑁆𑀞𑀸𑀢𑀺, 𑀢𑀁 𑀧𑀦 𑀓𑀸𑀫𑀪𑀯𑁂𑀬𑁂𑀯 𑀆𑀭𑀫𑁆𑀫𑀡𑀁. 𑀉𑀧𑀧𑀚𑁆𑀚𑀺𑀢𑀩𑁆𑀩𑀪𑀯𑀲𑁆𑀫𑀺𑀜𑁆𑀳𑀺 𑀯𑀡𑁆𑀡𑁄 𑀕𑀢𑀺𑀦𑀺𑀫𑀺𑀢𑁆𑀢𑀯𑀲𑁂𑀦 𑀉𑀧𑀝𑁆𑀞𑀸𑀢𑀺.

𑁩𑁦𑁧-𑁨. 𑀏𑀯𑀁 𑀙 𑀆𑀭𑀫𑁆𑀫𑀡𑀸𑀦𑀺 𑀲𑀭𑀽𑀧𑀢𑁄, 𑀧𑀯𑀢𑁆𑀢𑀺𑀧𑁆𑀧𑀪𑁂𑀤𑀢𑁄 𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀅𑀪𑀬𑀕𑀺𑀭𑀺𑀯𑀸𑀲𑀻𑀦𑀁 𑀓𑀺𑀜𑁆𑀘𑀺 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 ‘‘𑀔𑀡𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀔𑀡𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑁆𑀢𑀸𑀢𑀺 𑀔𑀡𑀲𑁆𑀲 𑀘𑁂𑀯 𑀯𑀢𑁆𑀣𑀼𑀦𑁄 𑀘 𑀧𑀭𑀺𑀢𑁆𑀢𑀢𑁆𑀢𑀸. 𑀬𑁂 𑀭𑀽𑀧𑀸𑀤𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀆𑀘𑀭𑀺𑀬𑀸𑀦𑀁 𑀮𑀤𑁆𑀥𑀺. 𑀬𑁂𑀲𑀦𑁆𑀢𑀺 𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑁂𑀦 𑀲𑀳 𑀲𑀫𑁆𑀩𑀦𑁆𑀥𑀻𑀪𑀸𑀯𑀢𑁄, 𑀯𑀼𑀢𑁆𑀢𑀁 𑀯𑀯𑀢𑁆𑀣𑀸𑀧𑀓𑀢𑁆𑀢𑀸 𑀘. 𑀢𑁂 𑀳𑀺 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀯𑀢𑁆𑀣𑀸𑀧𑁂𑀦𑁆𑀢𑁄 𑀅𑀢𑁆𑀢𑀦𑀸 𑀲𑀳 𑀢𑀁 𑀲𑀫𑁆𑀩𑀦𑁆𑀥𑁂𑀦𑁆𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀸𑀭𑀫𑁆𑀫𑀡𑁂𑀦 𑀲𑀳 𑀲𑀫𑁆𑀩𑀦𑁆𑀥𑀻𑀪𑀸𑀯𑀸𑀧𑁂𑀓𑁆𑀔𑀸𑀬 ‘‘𑀬𑁂𑀲’’𑀦𑁆𑀢𑀺 𑀲𑀸𑀫𑀺𑀯𑀘𑀦𑀦𑁆𑀢𑀺. 𑀇𑀫𑀺𑀦𑀸 𑀧𑀦 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂 𑀭𑀽𑀧𑀸𑀤𑀬𑁄 𑀧𑀜𑁆𑀘 𑀆𑀭𑀫𑁆𑀫𑀡𑀸 𑀲𑀦𑁆𑀢𑀢𑁆𑀢𑀅𑀬𑁄𑀕𑀼𑀴𑁂 𑀧𑀢𑀺𑀢𑀚𑀮𑀩𑀺𑀦𑁆𑀤𑀼 𑀯𑀺𑀬 𑀧𑀭𑀺𑀢𑁆𑀢𑀓𑁆𑀔𑀡𑀺𑀓𑀸, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑀕𑁆𑀕𑀳𑀡𑀸 𑀧𑀭𑀫𑀸𑀡𑀼 𑀯𑀺𑀬 𑀧𑀭𑀺𑀢𑁆𑀢𑀯𑀢𑁆𑀣𑀼𑀓𑀸, 𑀢𑀢𑁄 𑀘 𑀲𑀓𑀲𑀓𑀯𑀺𑀜𑁆𑀜𑀸𑀡𑀸𑀦𑀁 𑀆𑀧𑀸𑀣𑀁 𑀦 𑀕𑀘𑁆𑀙𑀦𑁆𑀢𑀺, 𑀓𑁂𑀯𑀮𑀁 𑀧𑀦 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀕𑁄𑀘𑀭𑀸, 𑀢𑁂 𑀥𑀫𑁆𑀫𑀸𑀭𑀫𑁆𑀫𑀡𑀁 𑀦𑀸𑀫𑀸𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀢𑁂 𑀬𑁂𑀲𑀁 𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑀁 𑀦𑀸𑀫𑀸𑀢𑀺. 𑀏𑀢𑁂𑀦𑁂𑀯 𑀘 𑀅𑀢𑀻𑀢𑀸𑀦𑀸𑀕𑀢𑀪𑀸𑀯𑁂𑀦 𑀅𑀢𑀺𑀤𑀽𑀭𑀅𑀘𑁆𑀘𑀸𑀲𑀦𑁆𑀦𑀪𑀸𑀯𑁂𑀦, 𑀓𑀼𑀝𑁆𑀝𑀸𑀤𑀺𑀅𑀦𑁆𑀢𑀭𑀺𑀢𑀸𑀪𑀸𑀯𑁂𑀦 𑀘 𑀆𑀧𑀸𑀣𑀁 𑀅𑀦𑀸𑀕𑀘𑁆𑀙𑀦𑁆𑀢𑀸𑀦𑀫𑁆𑀧𑀺 𑀭𑀽𑀧𑀸𑀤𑀻𑀦𑀁 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀻𑀢𑀺. 𑀏𑀯𑀁𑀮𑀤𑁆𑀥𑀺𑀓𑀸 𑀧𑀦 𑀢𑁂 𑁋

‘‘𑀇𑀫𑁂𑀲𑀁 𑀔𑁄, 𑀆𑀯𑀼𑀲𑁄, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀸𑀦𑀸𑀯𑀺𑀲𑀬𑀸𑀦𑀁 𑀦𑀸𑀦𑀸𑀕𑁄𑀘𑀭𑀸𑀦𑀁 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀸𑀦𑀁 𑀫𑀦𑁄 𑀧𑀝𑀺𑀲𑁆𑀲𑀭𑀡𑀁, 𑀫𑀦𑁄 𑀘 𑀦𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁫𑁫) 𑁋

𑀇𑀤𑀁 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀯𑀸𑀢𑀺 𑀦 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀸. 𑀅𑀜𑁆𑀜𑀫𑀜𑁆𑀜…𑀧𑁂… 𑀪𑁄𑀦𑁆𑀢𑀸𑀦𑀦𑁆𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑁄𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀕𑁄𑀘𑀭𑀁 𑀦 𑀧𑀘𑁆𑀘𑀦𑀼𑀪𑁄𑀢𑀺, 𑀢𑀣𑀸 ‘‘𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀭𑀫𑁆𑀫𑀡𑀁 𑀦𑁂𑀯 𑀧𑀘𑁆𑀘𑀦𑀼𑀪𑁄𑀦𑁆𑀢𑀸𑀦𑀁 𑀦𑀸𑀦𑀼𑀪𑀯𑀦𑁆𑀢𑀸𑀦𑀁 𑀦 𑀕𑀡𑁆𑀳𑀦𑁆𑀢𑀸𑀦𑀁. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁.

𑁩𑁦𑁩. 𑀢𑀜𑁆𑀘 𑀕𑁄𑀘𑀭𑀁 𑀫𑀦𑁄 𑀧𑀘𑁆𑀘𑀦𑀼𑀪𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀭𑀽𑀧𑀸𑀤𑀺𑀧𑀜𑁆𑀘𑀯𑀺𑀥𑀁 𑀆𑀭𑀫𑁆𑀫𑀡𑀁 𑀘-𑀲𑀤𑁆𑀤𑁂𑀦 𑀥𑀫𑁆𑀫𑀸𑀭𑀫𑁆𑀫𑀡𑀜𑁆𑀘 𑀫𑀦𑁄 𑀧𑀘𑁆𑀘𑀦𑀼𑀪𑁄𑀢𑀺, 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀘𑀓𑁆𑀔𑀸𑀤𑀻𑀦𑀫𑀸𑀧𑀸𑀣𑀕𑀢𑀸𑀦𑀺 𑀯𑀺𑀦𑀸 𑀅𑀯𑀲𑁂𑀲𑀸 𑀥𑀫𑁆𑀫𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀢𑀤𑀸 𑀢𑀁𑀯𑀺𑀲𑀬𑀁 𑀘𑀺𑀢𑁆𑀢𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀁 𑀦𑀸𑀫 𑀦 𑀳𑁄𑀢𑀺, 𑀅𑀢𑁆𑀢𑀦𑁄𑀬𑁂𑀯 𑀧𑀦 𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀁 𑀦𑀸𑀫 𑀳𑁄𑀢𑀺. 𑀏𑀯𑀜𑁆𑀘 𑀲𑀢𑀺 𑀫𑀦𑁄𑀯 𑀢𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻𑀢𑀺 𑀤𑀼𑀧𑁆𑀧𑀭𑀺𑀳𑀸𑀭𑀺𑀬𑀁 𑀪𑀯𑁂𑀬𑁆𑀬, 𑀦 𑀘 𑀢𑀁 𑀲𑀼𑀢𑁆𑀢𑀯𑀘𑀦𑀁 𑀲𑀓𑁆𑀓𑀸 𑀅𑀢𑀺𑀓𑁆𑀓𑀫𑁂𑀢𑀼𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀘𑀓𑁆𑀔𑀸𑀤𑀻𑀦𑀁 𑀅𑀦𑀸𑀧𑀸𑀣𑀕𑀢𑀸𑀧𑀺 𑀫𑀦𑁄𑀕𑁄𑀘𑀭𑀸 𑀭𑀽𑀧𑀸𑀤𑀬𑁄 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑁂𑀯 𑀳𑁄𑀦𑁆𑀢𑀺, 𑀦 𑀥𑀫𑁆𑀫𑀸𑀭𑀫𑁆𑀫𑀡𑀸𑀢𑀺. 𑀬𑀤𑀺 𑀭𑀽𑀧𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀦𑀸𑀦𑀼𑀪𑁄𑀢𑀺, 𑀧𑀭𑀯𑀺𑀲𑀬𑀫𑁂𑀯 𑀅𑀦𑀼𑀪𑁄𑀢𑀺, 𑀓𑀣𑀁 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺? 𑀢𑀁𑀢𑀁𑀓𑀺𑀘𑁆𑀘𑀸𑀦𑀁 𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀯𑀢𑁆𑀣𑀼𑀦𑁄 𑀅𑀦𑀺𑀲𑁆𑀲𑀺𑀢𑀢𑁆𑀢𑀸. 𑀓𑀣𑀜𑁆𑀘𑀭𑀳𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀺 𑀦𑀸𑀫? 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀲𑁆𑀲 𑀅𑀓𑀭𑀡𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀤𑀺𑀝𑁆𑀞𑀸𑀤𑀺𑀆𑀓𑀸𑀭𑀲𑁆𑀲𑁂𑀯 𑀕𑀳𑀡𑀢𑁄 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀺 𑀦𑀸𑀫. 𑀬𑀤𑀺 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀤𑀺𑀝𑁆𑀞𑀸𑀤𑀺𑀆𑀓𑀸𑀭𑀁 𑀦 𑀕𑀡𑁆𑀳𑀸𑀢𑀺, 𑀭𑀽𑀧𑀸𑀤𑀻𑀦𑀁 𑀦𑀻𑀮𑀢𑁆𑀢𑀸𑀤𑀺𑀯𑀲𑁂𑀦 𑀚𑀸𑀦𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀫𑁂𑀯 𑀓𑀭𑁄𑀢𑀺, 𑀦 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀻𑀢𑀺 𑀢𑀣𑀸 𑀚𑀸𑀦𑀦𑀫𑁂𑀯 𑀦 𑀳𑁄𑀢𑀺. 𑀢𑀲𑁆𑀲 𑀧𑀦 𑀅𑀢𑁆𑀣𑀺𑀢𑀸𑀬𑁂𑀯𑁂𑀢𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑁋 𑀅𑀦𑀸𑀧𑀸𑀣𑀕𑀢𑀭𑀽𑀧𑀸𑀤𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀦 𑀧𑀘𑁆𑀘𑀦𑀼𑀪𑁄𑀢𑀺 𑀦𑀸𑀫. 𑀅𑀣 𑀔𑁄 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑀬𑀫𑁂𑀯 𑀧𑀘𑁆𑀘𑀦𑀼𑀪𑁄𑀢𑀻𑀢𑀺. 𑀅𑀣 𑀲𑀺𑀬𑀸, 𑀦 𑀫𑀬𑀁 𑀘𑀺𑀢𑁆𑀢𑀲𑁆𑀲 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀺𑀲𑀬𑀸𑀦𑀼𑀪𑀯𑀦𑀁 𑀧𑀝𑀺𑀓𑁆𑀔𑀺𑀧𑀸𑀫, 𑀢𑀲𑁆𑀲 𑀧𑀦 𑀅𑀦𑀼𑀪𑀯𑀦𑀁 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀯𑀺𑀭𑀳𑁂𑀦 𑀥𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦𑁂𑀯𑀸𑀢𑀺 𑀘𑁂? 𑀢𑀫𑁆𑀧𑀺 𑀦, 𑀲𑀼𑀢𑁆𑀢𑁂 𑀢𑀣𑀸 𑀆𑀕𑀢𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀢𑁄. 𑀬𑀤𑀺 𑀳𑀺 𑀘𑀺𑀢𑁆𑀢𑀁 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀯𑀺𑀭𑀳𑁂𑀦 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀺𑀲𑀬𑀁 𑀥𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦𑁂𑀯 𑀧𑀘𑁆𑀘𑀦𑀼𑀪𑁄𑀢𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑀯𑀫𑀸𑀦𑀸 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀧𑀺 𑀥𑀫𑁆𑀫𑀸𑀭𑀫𑁆𑀫𑀡𑀸𑀬𑁂𑀯 𑀲𑀺𑀬𑀸, 𑀏𑀯𑀜𑁆𑀘 𑀲𑀢𑀺 ‘‘𑀥𑀫𑁆𑀫𑀸𑀬𑀢𑀦𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀧𑀝𑁆𑀞𑀸𑀦𑁂 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀣𑀸 𑀧𑀦 𑀅𑀯𑀢𑁆𑀯𑀸 𑁋

‘‘𑀭𑀽𑀧𑀸𑀬𑀢𑀦𑀁 𑀲𑀤𑁆𑀤𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁨),

‘‘𑀭𑀽𑀧𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸𑀬𑀢𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀘 (𑀧𑀝𑁆𑀞𑀸. 𑁧.𑁧.𑁨) 𑁋

𑀯𑀼𑀢𑁆𑀢𑀢𑁆𑀢𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀻 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀁𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑀬𑀯𑀲𑁂𑀦 𑀧𑀘𑁆𑀘𑀦𑀼𑀪𑁄𑀢𑀺, 𑀦 𑀥𑀫𑁆𑀫𑀸𑀬𑀢𑀦𑀯𑀲𑁂𑀦𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑁩𑁦𑁪-𑁫. 𑀏𑀯𑀁 𑀏𑀓𑁂𑀦𑀸𑀓𑀸𑀭𑁂𑀦 𑀧𑀝𑀺𑀓𑁆𑀔𑁂𑀧𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀧𑀭𑁂𑀦𑀧𑀺 𑀓𑀸𑀭𑀡𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀺𑀩𑁆𑀩𑀘𑀓𑁆𑀔𑀸𑀤𑀻’’𑀢𑀺𑀆𑀤𑀺. 𑀆𑀤𑀺-𑀕𑁆𑀕𑀳𑀡𑁂𑀦 𑀤𑀺𑀩𑁆𑀩𑀲𑁄𑀢𑀜𑀸𑀡𑀕𑁆𑀕𑀳𑀡𑀁. 𑀇𑀢𑀺𑀧𑀺 𑀦 𑀬𑀼𑀚𑁆𑀚𑀢𑀻𑀢𑀺 𑀦 𑀓𑁂𑀯𑀮𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦𑁂𑀯 𑀓𑀸𑀭𑀡𑁂𑀦, 𑀅𑀣 𑀔𑁄 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀦 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺𑀧𑀺 𑀘𑀓𑁆𑀔𑀸𑀤𑀻𑀦𑀁 𑀅𑀦𑀸𑀧𑀸𑀣𑀕𑀢𑀭𑀽𑀧𑀸𑀤𑀻𑀦𑀺 𑀥𑀫𑁆𑀫𑀸𑀭𑀫𑁆𑀫𑀡𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀤𑀸 𑀤𑀺𑀩𑁆𑀩𑀘𑀓𑁆𑀔𑀸𑀤𑀻𑀦𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀦 𑀲𑀺𑀬𑀼𑀁 𑀢𑁂𑀲𑀁 𑀧𑀲𑀸𑀤𑀯𑀺𑀲𑀬𑀸𑀦𑀁 𑀭𑀽𑀧𑀲𑀤𑁆𑀤𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑀢𑁄, 𑀏𑀯𑀜𑁆𑀘 𑀲𑀢𑀺 𑀲𑀼𑀢𑁆𑀢𑁂𑀲𑀼 𑀤𑀺𑀩𑁆𑀩𑀘𑀓𑁆𑀔𑀼𑀤𑀺𑀩𑁆𑀩𑀲𑁄𑀢𑀸𑀦𑀁 𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀯 𑀯𑀢𑁆𑀢𑀩𑁆𑀩𑀸, 𑀦 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀢𑀸, 𑀯𑀼𑀢𑁆𑀢𑀸 𑀘 𑀲𑀸, 𑀢𑀲𑁆𑀫𑀸 𑀘𑀓𑁆𑀔𑀸𑀤𑀻𑀦𑀁 𑀅𑀯𑀺𑀲𑀬𑀸 𑀭𑀽𑀧𑀸𑀤𑀬𑁄 𑀭𑀽𑀧𑀸𑀤𑀸𑀭𑀫𑁆𑀫𑀡𑀸𑀦𑁂𑀯, 𑀦 𑀥𑀫𑁆𑀫𑀸𑀭𑀫𑁆𑀫𑀡𑀸𑀢𑀺. 𑀢𑁂𑀦𑁂𑀯 𑀘 𑀥𑀫𑁆𑀫𑀲𑀗𑁆𑀕𑀳𑁂𑀧𑀺 𑁋

‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀕𑀦𑁆𑀥𑀸𑀭𑀫𑁆𑀫𑀡𑀁 𑀯𑀸 𑀭𑀲𑀸𑀭𑀫𑁆𑀫𑀡𑀁 𑀯𑀸 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸, 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺 (𑀥. 𑀲. 𑁧) 𑁋

𑀯𑀼𑀢𑁆𑀢𑀁. 𑀓𑀺𑀜𑁆𑀘 𑀅𑀦𑀸𑀧𑀸𑀣𑀕𑀢𑀸𑀦𑀁 𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺 𑀆𑀧𑀚𑁆𑀚𑀢𑀻𑀢𑀺. 𑀏𑀯𑀁 𑀲𑀢𑀻𑀢𑀺 𑀬𑀤𑀺 𑀓𑀤𑀸𑀘𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀓𑀤𑀸𑀘𑀺 𑀥𑀫𑁆𑀫𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀓𑀤𑀸𑀘𑀺 𑀥𑀫𑁆𑀫𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀓𑀤𑀸𑀘𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀤𑀸 𑀢𑁂𑀲𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀦𑀺𑀬𑀫𑁄𑀧𑀺 𑀓𑀣𑀁 𑀪𑀯𑁂 ‘‘𑀇𑀤𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁, 𑀇𑀤𑀁 𑀥𑀫𑁆𑀫𑀸𑀭𑀫𑁆𑀫𑀡’’𑀦𑁆𑀢𑀺 𑀦𑀺𑀬𑀫𑁄 𑀦 𑀪𑀯𑁂𑀬𑁆𑀬, 𑀆𑀭𑀫𑁆𑀫𑀡𑀲𑀗𑁆𑀓𑀭𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁩𑁦𑁬. 𑀏𑀯𑀁 𑀙𑀩𑁆𑀩𑀺𑀥𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀅𑀦𑀦𑁆𑀢𑀭𑀪𑁂𑀤𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀢𑁆𑀢𑀺𑀓𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀁 𑀆𑀭𑀫𑁆𑀫𑀡’’𑀦𑁆𑀢𑀺𑀆𑀤𑀺. 𑀙𑀩𑁆𑀩𑀺𑀥𑀁 𑀧𑀭𑀺𑀢𑁆𑀢𑀢𑁆𑀢𑀺𑀓𑀸𑀤𑀺𑀓𑀁 𑀢𑀁 𑀏𑀢𑀁 𑀲𑀩𑁆𑀩𑀁 𑀆𑀭𑀫𑁆𑀫𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀢𑁆𑀢𑀢𑁆𑀢𑀺𑀓𑀸𑀤𑀻𑀦𑀦𑁆𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀸𑀤𑀻𑀦𑀁. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁄 𑀳𑀺 𑀇𑀥 ‘‘𑀧𑀭𑀺𑀢𑁆𑀢𑀢𑁆𑀢𑀺𑀓𑁄’’𑀢𑀺 𑀯𑀼𑀢𑁆𑀢𑁄 𑀫𑀚𑁆𑀛𑀧𑀤𑀮𑁄𑀧𑀯𑀲𑁂𑀦. 𑀆𑀤𑀺-𑀕𑁆𑀕𑀳𑀡𑁂𑀦 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁄 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁄 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁄𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀢𑀺𑀓𑀸𑀦𑀁 𑀲𑀗𑁆𑀕𑀳𑁄. 𑀢𑀢𑁆𑀣 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀕𑀢𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁄. 𑀆𑀤𑀺𑀧𑀤𑀯𑀲𑁂𑀦 ‘‘𑀫𑀕𑁆𑀕𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀫𑀕𑁆𑀕𑀳𑁂𑀢𑀼𑀓𑀸 𑀥𑀫𑁆𑀫𑀸, 𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀕𑀢𑁄 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁄. ‘‘𑀅𑀢𑀻𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀕𑀢𑁄 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁄. ‘‘𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀥𑀫𑁆𑀫𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀕𑀢𑁄 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁦𑁭-𑁯. 𑀓𑁆𑀭𑀺𑀬𑀸𑀳𑁂𑀢𑀼𑀤𑁆𑀯𑀬𑀦𑁆𑀢𑀺 𑀅𑀳𑁂𑀢𑀼𑀓𑀓𑀺𑀭𑀺𑀬𑀤𑁆𑀯𑀬𑀁 𑀳𑀲𑀺𑀢𑀼𑀧𑁆𑀧𑀸𑀤𑀫𑀦𑁄𑀥𑀸𑀢𑀼 𑀇𑀢𑀭𑀲𑁆𑀲 𑀫𑀳𑀕𑁆𑀕𑀢𑀸𑀤𑀺𑀆𑀭𑀫𑁆𑀫𑀡𑀢𑀸𑀯𑀲𑁂𑀦𑀸𑀧𑀺 𑀯𑀓𑁆𑀔𑀫𑀸𑀦𑀢𑁆𑀢𑀸. ‘‘𑀇𑀝𑁆𑀞𑀸𑀤𑀺𑀪𑁂𑀤𑀸’’𑀢𑀺𑀆𑀤𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀪𑀸𑀯𑀯𑀺𑀪𑀸𑀯𑀦𑀁. 𑀇𑀝𑁆𑀞𑀸𑀤𑀺𑀪𑁂𑀤𑀸𑀢𑀺 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀪𑁂𑀤𑀸. 𑀧𑀝𑀺𑀧𑀸𑀝𑀺𑀬𑀸𑀢𑀺 ‘‘𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲, 𑀲𑀤𑁆𑀤𑁄 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀓𑁆𑀓𑀫𑀢𑁄. 𑀭𑀽𑀧𑀸𑀤𑀺…𑀧𑁂… 𑀢𑁆𑀢𑀬𑀲𑁆𑀲 𑀢𑀽𑀢𑀺 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀬𑀸 𑀘𑁂𑀯 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀯𑀺𑀪𑀸𑀕𑀯𑀲𑁂𑀦 𑀤𑁆𑀯𑀺𑀦𑁆𑀦𑀁 𑀫𑀦𑁄𑀥𑀸𑀢𑀽𑀦𑀜𑁆𑀘 𑀲𑀩𑁆𑀩𑀁 𑀭𑀽𑀧𑀸𑀤𑀺𑀧𑀜𑁆𑀘𑀓𑀕𑁄𑀘𑀭𑀁. 𑀢𑀸 𑀳𑀺 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀸 𑀳𑀼𑀢𑁆𑀯𑀸 𑀦𑀺𑀬𑀢𑀸 𑀭𑀽𑀧𑀸𑀤𑀻𑀦𑁂𑀯 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀺.

𑁩𑁧𑁧. 𑀓𑀸𑀫𑀥𑀸𑀢𑀼𑀬𑀦𑁆𑀢𑀺 𑀓𑀸𑀫𑀪𑀯𑁂. 𑀢𑀢𑁆𑀣 𑀳𑀺 𑀦𑁂𑀲𑀁 𑀲𑀩𑁆𑀩𑁂𑀲𑀁 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀘𑀢𑁆𑀢𑀸𑀭𑀻𑀢𑀺 𑀢𑁂𑀲𑁆𑀯𑁂𑀯 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼, 𑀓𑀼𑀲𑀮𑀯𑀺𑀧𑀸𑀓𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀸𑀦𑀺, 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀦𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺. 𑀲𑁂𑀲𑀸𑀦𑀺 𑀧𑀦 𑀯𑀢𑁆𑀣𑀸𑀭𑀫𑁆𑀫𑀡𑀸𑀪𑀸𑀯𑁂𑀦 𑀢𑀢𑁆𑀣 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀦𑁂𑀯 𑀓𑀺𑀜𑁆𑀘𑀻𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀲𑀩𑁆𑀩𑀲𑁄 𑀅𑀪𑀸𑀯𑀢𑁄 𑀏𑀢𑁂𑀲𑀼 𑀓𑀺𑀜𑁆𑀘𑀺 𑀦 𑀚𑀸𑀬𑀢𑀺.

𑁩𑁧𑁨-𑁩. ‘‘𑀫𑀳𑀸𑀧𑀸𑀓𑀸𑀦’’𑀦𑁆𑀢𑀺𑀆𑀤𑀺 𑀧𑀞𑀫𑀧𑀭𑀺𑀘𑁆𑀙𑁂𑀤𑁂 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀧𑀝𑀼𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸.

𑁩𑁧𑁪. 𑀏𑀯𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑁂 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑁂 𑀘 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀁 𑀧𑀞𑀫𑀸𑀭𑀼𑀧𑁆𑀧𑀸𑀭𑀫𑁆𑀫𑀡𑀢𑁄, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀁 𑀢𑀢𑀺𑀬𑀸𑀭𑀼𑀧𑁆𑀧𑀸𑀭𑀫𑁆𑀫𑀡𑀢𑁄 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁. 𑀙𑀩𑁆𑀩𑀺𑀥𑀦𑁆𑀢𑀺 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀢𑀸𑀬 𑀙𑀧𑁆𑀧𑀓𑀸𑀭𑀁.

𑁩𑁧𑁬-𑁨𑁦. 𑀜𑀸𑀡𑀁 𑀧𑀭𑀺𑀳𑀻𑀦𑀁 𑀏𑀢𑁂𑀲𑀁, 𑀜𑀸𑀡𑀢𑁄 𑀧𑀭𑀺𑀳𑀻𑀦𑀸𑀢𑀺 𑀯𑀸 𑀜𑀸𑀡𑀳𑀻𑀦𑀸. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸…𑀧𑁂… 𑀳𑁄𑀦𑁆𑀢𑀺 𑀢𑁂𑀢𑀺 𑀅𑀝𑁆𑀞 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑁂𑀔𑀧𑀼𑀣𑀼𑀚𑁆𑀚𑀦𑀔𑀻𑀡𑀸𑀲𑀯𑀸𑀦𑀁 𑀓𑀤𑀸𑀘𑀺 𑀦𑀺𑀭𑀼𑀲𑁆𑀲𑀼𑀓𑁆𑀓𑀪𑀸𑀯𑁂𑀦 𑀆𑀤𑀭𑀸𑀓𑀭𑀡𑀯𑀲𑁂𑀦 𑀅𑀓𑀫𑁆𑀫𑀜𑁆𑀜𑀲𑀭𑀻𑀭𑀢𑀸𑀅𑀜𑁆𑀜𑀯𑀺𑀳𑀺𑀢𑀢𑀸𑀳𑀺 𑀯𑀸 𑀅𑀲𑀓𑁆𑀓𑀘𑁆𑀘𑀤𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀲𑀼 𑀅𑀢𑀺𑀧𑀕𑀼𑀡𑀯𑀺𑀧𑀲𑁆𑀲𑀦𑀸𑀬 𑀘 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀅𑀢𑀺𑀧𑀕𑀼𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸. 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺𑀧𑀜𑁆𑀜𑀢𑁆𑀢𑀺𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀦𑀯𑀢𑁆𑀢𑀩𑁆𑀩𑀸. 𑀅𑀓𑀼𑀲𑀮𑁂𑀲𑀼 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀢𑀼𑀧𑀜𑁆𑀜𑀸𑀲𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀦𑀁, 𑀭𑀽𑀧𑀲𑁆𑀲 𑀘 ‘‘𑀅𑀢𑁆𑀢𑀸 𑀲𑀢𑁆𑀢𑁄’’𑀢𑀺 𑀧𑀭𑀸𑀫𑀲𑀦𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀓𑀸𑀮𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀢𑁂𑀦𑁂𑀯𑀸𑀓𑀸𑀭𑁂𑀦 𑀲𑀢𑁆𑀢𑀯𑀻𑀲𑀢𑀺𑀫𑀳𑀕𑁆𑀕𑀢𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸. 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀦𑀓𑀸𑀮𑁂 𑀲𑀺𑀬𑀸 𑀦𑀯𑀢𑁆𑀢𑀩𑁆𑀩𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀢𑁂𑀬𑁂𑀯 𑀥𑀫𑁆𑀫𑁂 𑀆𑀭𑀩𑁆𑀪 𑀯𑀺𑀦𑀸 𑀧𑀭𑀸𑀫𑀸𑀲𑁂𑀦 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀁, 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀤𑁄𑀫𑀦𑀲𑁆𑀲𑀯𑀲𑁂𑀦 𑀧𑀯𑀢𑁆𑀢𑀺𑀬𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁 𑀤𑁆𑀯𑁂𑀴𑁆𑀳𑀓𑀪𑀸𑀯𑁂𑀦, 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀯𑀺𑀓𑁆𑀔𑀺𑀧𑀦𑀯𑀲𑁂𑀦, 𑀅𑀯𑀽𑀧𑀲𑀫𑀯𑀲𑁂𑀦 𑀘 𑀧𑀯𑀢𑁆𑀢𑀺𑀬𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑁆𑀭𑀺𑀬𑀢𑁄𑀧𑀺 𑀘 𑀢𑀣𑀸𑀢𑀺 𑀓𑀺𑀭𑀺𑀬𑀘𑀺𑀢𑁆𑀢𑀢𑁄𑀧𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑀢𑁆𑀢𑀸𑀭𑁄𑀢𑀺 𑀅𑀢𑁆𑀣𑁄. 𑀓𑁆𑀭𑀺𑀬𑀸𑀯𑁄𑀝𑁆𑀞𑀩𑁆𑀩𑀦𑀦𑁆𑀢𑀺 𑀲𑀭𑀽𑀧𑀓𑀣𑀦𑀫𑁂𑀢𑀁, 𑀦 𑀧𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸.

𑀢𑀺𑀯𑀺𑀥𑁄 𑀳𑁄𑀢𑀺 𑀕𑁄𑀘𑀭𑁄𑀢𑀺 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀅𑀧𑁆𑀧𑀫𑀸𑀡𑀯𑀲𑁂𑀦 𑀢𑀺𑀯𑀺𑀥𑁄𑀧𑀺 𑀕𑁄𑀘𑀭𑁄 𑀳𑁄𑀢𑀺. 𑀓𑀣𑀁? 𑀓𑀼𑀲𑀮𑀓𑀺𑀭𑀺𑀬𑀸𑀯𑀲𑁂𑀦 𑀅𑀝𑁆𑀞 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑁂𑀔𑀧𑀼𑀣𑀼𑀚𑁆𑀚𑀦𑀔𑀻𑀡𑀸𑀲𑀯𑀸𑀦𑀁 𑀲𑀓𑁆𑀓𑀘𑁆𑀘𑀤𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀥𑀫𑁆𑀫𑀲𑁆𑀲𑀯𑀦𑀯𑀺𑀧𑀲𑁆𑀲𑀦𑀸𑀤𑀻𑀲𑀼 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀓𑀸𑀮𑁂 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀺𑀓𑀅𑀪𑀺𑀜𑁆𑀜𑀸𑀬 𑀧𑀭𑀺𑀓𑀫𑁆𑀫𑀸𑀦𑀼𑀮𑁄𑀫𑀓𑀸𑀮𑁂 𑀘 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸. 𑀧𑀞𑀫𑀚𑁆𑀛𑀸𑀦𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀛𑀸𑀦𑀸𑀤𑀻𑀦𑀁 𑀧𑀭𑀺𑀓𑀫𑁆𑀫𑀓𑀸𑀮𑁂 𑀫𑀳𑀕𑁆𑀕𑀢𑀥𑀫𑁆𑀫𑁂 𑀆𑀭𑀩𑁆𑀪 𑀲𑀫𑁆𑀫𑀲𑀦𑀓𑀸𑀮𑁂 𑀘 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺. 𑀬𑀣𑀸𑀮𑀸𑀪𑀁 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀓𑀸𑀮𑁂 𑀧𑀦 𑀮𑁄𑀓𑀼𑀢𑁆𑀢𑀭𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀪𑀺𑀜𑁆𑀜𑀸𑀬 𑀧𑀭𑀺𑀓𑀫𑁆𑀫𑀓𑀸𑀮𑁂 𑀘 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸. 𑀧𑀡𑁆𑀡𑀢𑁆𑀢𑀺𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀧𑀡𑁆𑀡𑀢𑁆𑀢𑀸𑀭𑀫𑁆𑀫𑀡𑀺𑀓𑀛𑀸𑀦𑀸𑀪𑀺𑀜𑁆𑀜𑀸𑀦𑀁 𑀧𑀭𑀺𑀓𑀫𑁆𑀫𑀓𑀸𑀮𑁂 𑀘 𑀦𑀯𑀢𑁆𑀢𑀩𑁆𑀩𑀸. 𑀅𑀪𑀺𑀜𑁆𑀜𑀸𑀤𑁆𑀯𑀬𑀲𑁆𑀲 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀢𑀁 𑀲𑀢𑁆𑀢𑀭𑀲𑀫𑀧𑀭𑀺𑀘𑁆𑀙𑁂𑀤𑁂 𑀯𑀓𑁆𑀔𑀢𑀺. 𑀓𑀺𑀭𑀺𑀬𑀸𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀢𑀁𑀢𑀁𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀧𑀼𑀭𑁂𑀘𑀭𑀁 𑀳𑀼𑀢𑁆𑀯𑀸 𑀢𑀁 𑀢𑀤𑁂𑀯 𑀆𑀯𑀚𑁆𑀚𑀦𑁆𑀢𑀁 𑀧𑀯𑀢𑁆𑀢𑀢𑀻𑀢𑀺 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁. 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀫𑁂𑀯.

𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀯𑀲𑀺𑀝𑁆𑀞𑀸𑀦𑀺 𑀧𑀦𑁆𑀦𑀭𑀲 𑀭𑀽𑀧𑀸𑀯𑀘𑀭𑀸𑀦𑀺 𑀧𑀞𑀫𑀢𑀢𑀺𑀬𑀸𑀦𑀺, 𑀙 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀻𑀢𑀺 𑀏𑀓𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺. 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑀻𑀢𑀺 𑀧𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀦𑀯𑀢𑁆𑀢𑀩𑁆𑀩𑀲𑁆𑀲 𑀓𑀲𑀺𑀡𑀸𑀤𑀺𑀦𑀺𑀫𑀺𑀢𑁆𑀢𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀆𑀓𑀸𑀲𑀯𑀺𑀜𑁆𑀜𑀸𑀡𑀸𑀪𑀸𑀯𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀢𑁄 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑀺.

𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀁 𑀲𑀫𑀢𑁆𑀢𑀁.

𑁩𑁨𑁧-𑁨. 𑀏𑀯𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀯𑀲𑁂𑀦 𑀯𑀺𑀲𑀬𑀻𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀦𑀺𑀤𑁆𑀤𑁂𑀲𑁂𑀦𑁂𑀯 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑀲𑀗𑁆𑀕𑀳𑀺𑀢𑁄𑀧𑀺 𑀯𑀺𑀲𑀬𑀻𑀯𑀺𑀪𑀸𑀕𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀧𑀳𑀸𑀬 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑀺𑀢𑁆𑀢𑀁 𑀅𑀢𑀻𑀢𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀢𑁄, 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀁 𑀢𑀢𑀺𑀬𑀸𑀭𑀼𑀧𑁆𑀧𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀢𑁄 𑀏𑀓𑀦𑁆𑀢𑀅𑀢𑀻𑀢𑀸𑀭𑀫𑁆𑀫𑀡𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯 𑀕𑁄𑀘𑀭𑀸𑀢𑀺 𑀭𑀽𑀧𑀸𑀤𑀺𑀫𑁆𑀳𑀺 𑀥𑀭𑀫𑀸𑀦𑁂𑀬𑁂𑀯 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑀢𑁄. 𑀅𑀦𑀸𑀕𑀢𑀸𑀭𑀫𑁆𑀫𑀡𑀁 𑀧𑀦 𑀦𑀺𑀬𑀢𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀧𑀺 𑀧𑀜𑁆𑀘𑀫𑀚𑁆𑀛𑀸𑀦𑀢𑁄 𑀅𑀪𑀺𑀦𑁆𑀦𑀢𑁆𑀢𑀸.

𑁩𑁨𑁪-𑁬. 𑀲𑀺𑀬𑀸…𑀧𑁂… 𑀦𑀸𑀕𑀢𑀕𑁄𑀘𑀭𑀸𑀢𑀺 𑀅𑀝𑁆𑀞 𑀢𑀸𑀯 𑀫𑀳𑀸𑀯𑀺𑀧𑀸𑀓𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀁 𑀅𑀢𑀻𑀢𑀸𑀭𑀫𑁆𑀫𑀡𑀸. 𑀪𑀯𑀗𑁆𑀕𑀘𑀼𑀢𑀺𑀓𑀸𑀮𑁂𑀧𑀺 𑀏𑀲𑁂𑀯 𑀦𑀬𑁄. 𑀕𑀢𑀺𑀦𑀺𑀫𑀺𑀢𑁆𑀢𑀁 𑀧𑀦 𑀓𑀤𑀸𑀘𑀺 𑀓𑀫𑁆𑀫𑀦𑀺𑀫𑀺𑀢𑁆𑀢𑀜𑁆𑀘 𑀆𑀭𑀩𑁆𑀪 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂, 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀓𑀸𑀮𑁂 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸, 𑀢𑀣𑀸 𑀧𑀜𑁆𑀘𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀁. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀦𑀁 𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀬𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸. 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀜𑁆𑀳𑀺 𑀢𑀸 𑀬𑀣𑀸𑀓𑁆𑀓𑀫𑀁 𑀫𑀦𑀼𑀲𑁆𑀲𑁂𑀲𑀼 𑀚𑀘𑁆𑀘𑀦𑁆𑀥𑀸𑀤𑀻𑀦𑀁, 𑀅𑀧𑀸𑀬𑁂𑀲𑀼 𑀘 𑀲𑀩𑁆𑀩𑁂𑀲𑀁 𑀧𑀝𑀺𑀲𑀦𑁆𑀥𑀺 𑀳𑁄𑀦𑁆𑀢𑀺. 𑀧𑀜𑁆𑀘𑀤𑁆𑀯𑀸𑀭𑁂 𑀘 𑀲𑀦𑁆𑀢𑀻𑀭𑀡𑀓𑀸𑀮𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀯 𑀳𑁄𑀦𑁆𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀧𑀦 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀯𑀲𑁂𑀦, 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀘 𑀧𑀯𑀢𑁆𑀢𑀺𑀓𑀸𑀮𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸, 𑀫𑀦𑁄𑀤𑁆𑀯𑀸𑀭𑁂 𑀘 𑀢𑀤𑀸𑀭𑀫𑁆𑀫𑀡𑀓𑀸𑀮𑁂 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀁 𑀧𑀦 𑀔𑀻𑀡𑀸𑀲𑀯𑀸𑀦𑀁 𑀧𑀜𑁆𑀘𑀤𑁆𑀯𑀸𑀭𑁂 𑀳𑀝𑁆𑀞𑀧𑀳𑀝𑁆𑀞𑀸𑀓𑀸𑀭𑀁 𑀓𑀼𑀭𑀼𑀫𑀸𑀦𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀅𑀢𑀻𑀢𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀳𑀲𑀺𑀢𑀼𑀧𑁆𑀧𑀸𑀤𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁. ‘‘𑀓𑀼𑀲𑀮𑀸𑀓𑀼𑀲𑀮𑀸’’𑀢𑀺𑀆𑀤𑀻𑀲𑀼 𑀓𑀼𑀲𑀮𑁂𑀲𑀼 𑀢𑀸𑀯 𑀘𑀢𑁆𑀢𑀸𑀭𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁, 𑀅𑀢𑀻𑀢𑀸𑀤𑀺𑀪𑁂𑀤𑀸𑀦𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀲𑀫𑁆𑀫𑀲𑀦𑀓𑀸𑀮𑁂, 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂, 𑀅𑀢𑀻𑀢𑀸𑀤𑀺𑀆𑀭𑀫𑁆𑀫𑀡𑀺𑀓𑀅𑀪𑀺𑀜𑁆𑀜𑀸𑀦𑀁 𑀧𑀭𑀺𑀓𑀫𑁆𑀫𑀓𑀸𑀮𑁂 𑀘 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸. 𑀧𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂, 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀓𑀸𑀮𑁂, 𑀧𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀺𑀓𑀅𑀪𑀺𑀜𑁆𑀜𑀸𑀦𑀁 𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀮𑁂 𑀘 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀧𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀸𑀦𑀸𑀦𑀺 𑀳𑀺 𑀇𑀥 𑀅𑀢𑀻𑀢𑀸𑀤𑀺𑀓𑀸𑀮𑀯𑀲𑁂𑀦 𑀦𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀢𑀤𑀸𑀭𑀫𑁆𑀫𑀡𑀸𑀦𑀺 𑀅𑀢𑀻𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀦𑀯𑀢𑁆𑀢𑀩𑁆𑀩𑀸𑀦𑀺. 𑀢𑁂𑀦𑀸𑀳 ‘‘𑀲𑀦𑁆𑀢𑀧𑀜𑁆𑀜𑀢𑁆𑀢𑀺𑀓𑀸𑀮𑁂𑀧𑀻’’𑀢𑀺, 𑀬𑀣𑀸𑀲𑀫𑁆𑀪𑀯𑀁 𑀲𑀦𑁆𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲, 𑀧𑀜𑁆𑀜𑀢𑁆𑀢𑀺𑀬𑀸 𑀘 𑀆𑀭𑀫𑁆𑀫𑀡𑀓𑀭𑀡𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀲𑀦𑁆𑀢𑁂 𑀧𑀜𑁆𑀜𑀢𑁆𑀢𑀺𑀓𑀸𑀮𑁂𑀲𑀽’’𑀢𑀺 𑀮𑀺𑀔𑀦𑁆𑀢𑀺, 𑀲𑁄 𑀅𑀧𑀸𑀞𑁄. 𑀢𑀲𑁆𑀲 𑀧𑀦 𑀅𑀧𑀸𑀞𑀪𑀸𑀯𑀁 𑀅𑀚𑀸𑀦𑀦𑁆𑀢𑀸 𑀅𑀢𑁆𑀣𑀳𑀸𑀦𑀺𑀫𑁆𑀧𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀘𑀦𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀧𑀜𑁆𑀜𑀢𑁆𑀢𑀺𑀓𑀸𑀮𑀲𑁆𑀫𑀺𑀁 𑀲𑀢𑀻𑀢𑀺 𑀅𑀢𑁆𑀣𑀁 𑀮𑀺𑀔𑀦𑁆𑀢𑀺. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑁂𑀯𑀮𑀜𑁆𑀳𑀺 𑀢𑁂𑀲𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀦𑀢𑁆𑀣𑀺. 𑀜𑀸𑀡𑀯𑀺𑀭𑀳𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀭𑀫𑁆𑀫𑀡𑁂 𑀅𑀲𑀫𑀢𑁆𑀣𑀪𑀸𑀯𑀢𑁄𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑀅𑀓𑀼𑀲𑀮𑁂𑀲𑀼 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀢𑀻𑀢𑀸𑀤𑀺𑀪𑁂𑀤𑀸𑀦𑀁 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀧𑀭𑀸𑀫𑀲𑀦𑀓𑀸𑀮𑁂 𑀅𑀢𑀻𑀢𑀸𑀤𑀺𑀆𑀭𑀫𑁆𑀫𑀡𑀸. 𑀢𑀣𑁂𑀯 𑀧𑀜𑁆𑀜𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀧𑀭𑀸𑀫𑀸𑀲𑀕𑁆𑀕𑀳𑀡𑀁 𑀦𑀢𑁆𑀣𑀺. 𑀤𑁆𑀯𑁂 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀢𑀻𑀢𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀤𑀼𑀲𑁆𑀲𑀦𑀓𑀸𑀮𑁂 𑀅𑀢𑀻𑀢𑀸𑀤𑀺𑀆𑀭𑀫𑁆𑀫𑀡𑀸, 𑀧𑀡𑁆𑀡𑀢𑁆𑀢𑀺𑀁 𑀆𑀭𑀩𑁆𑀪 𑀤𑀼𑀲𑁆𑀲𑀦𑀓𑀸𑀮𑁂 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀸 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀺𑀝𑁆𑀞𑀗𑁆𑀕𑀢𑀪𑀸𑀯𑁂𑀦 𑀘 𑀅𑀯𑀽𑀧𑀲𑀫𑀯𑀺𑀓𑁆𑀔𑁂𑀧𑀯𑀲𑁂𑀦 𑀘 𑀧𑀯𑀢𑁆𑀢𑀺𑀬𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀓𑀺𑀭𑀺𑀬𑀸𑀲𑀼 𑀅𑀝𑁆𑀞 𑀲𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀺𑀓𑀸 𑀏𑀯. 𑀢𑀢𑁆𑀣 𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀓𑀼𑀲𑀮𑁂𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀳𑀺, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑀸𑀦𑀸. 𑀓𑁂𑀯𑀮𑀁 𑀧𑀦 𑀢𑁂 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀇𑀫𑁂 𑀔𑀻𑀡𑀸𑀲𑀯𑀸𑀦𑀦𑁆𑀢𑀺 𑀅𑀬𑀫𑁂𑀯𑁂𑀢𑁆𑀣 𑀯𑀺𑀲𑁂𑀲𑁄. 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸, 𑀫𑀦𑁄𑀤𑁆𑀯𑀸𑀭𑁂 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀦𑀜𑁆𑀘𑁂𑀯 𑀧𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀜𑁆𑀘 𑀚𑀯𑀦𑀸𑀦𑀁 𑀧𑀼𑀭𑁂𑀘𑀸𑀭𑀺𑀓𑀓𑀸𑀮𑁂 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀅𑀪𑀺𑀜𑁆𑀜𑀸𑀤𑁆𑀯𑀬𑀲𑁆𑀲 𑀅𑀢𑀻𑀢𑀸𑀤𑀺𑀆𑀭𑀫𑁆𑀫𑀡𑀢𑀁 𑀯𑀓𑁆𑀔𑀢𑀺. 𑀦𑀯𑀢𑁆𑀢𑀩𑁆𑀩𑀸…𑀧𑁂… 𑀆𑀤𑀺𑀦𑀸𑀢𑀺 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀅𑀢𑀻𑀢𑀸𑀭𑀫𑁆𑀫𑀡𑀸𑀤𑀺𑀦𑀸 𑀦𑀯𑀢𑁆𑀢𑀩𑁆𑀩𑀸.

𑁩𑁨𑁭. 𑀓𑁆𑀭𑀺𑀬𑀸 𑀧𑀜𑁆𑀘𑀸𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑀢𑀲𑁆𑀲𑁄, 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺 𑀇𑀫𑀸 𑀧𑀜𑁆𑀘 𑀓𑀺𑀭𑀺𑀬𑀸. 𑀭𑀽𑀧𑀢𑁄 𑀧𑀜𑁆𑀘𑀫𑀻 𑀓𑁆𑀭𑀺𑀬𑀸𑀢𑀺 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑀸 𑀓𑀺𑀭𑀺𑀬𑀸𑀪𑀺𑀜𑁆𑀜𑀸 𑀘. 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀕𑁄𑀘𑀭𑀦𑁆𑀢𑀺 𑀅𑀢𑀻𑀢𑀸𑀤𑀺𑀪𑁂𑀤𑁂𑀲𑀼, 𑀓𑀸𑀮𑀯𑀺𑀫𑀼𑀢𑁆𑀢𑁂𑀲𑀼 𑀘 𑀅𑀕𑁄𑀘𑀭𑀁 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀲𑀩𑁆𑀩𑀫𑁂𑀯 𑀦𑁂𑀲𑀁 𑀕𑁄𑀘𑀭𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀁.

𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀲𑀗𑁆𑀕𑀳𑀺𑀢𑁄𑀧𑀺 𑀯𑀺𑀲𑀬𑀻𑀯𑀺𑀪𑀸𑀕𑁄 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀲𑁄 𑀯𑀺𑀲𑀼𑀁 𑀦 𑀉𑀤𑁆𑀥𑀝𑁄. 𑀲𑀭𑀽𑀧𑀢𑁄 𑀧𑀦𑁂𑀲 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑁂 𑀢𑀸𑀯 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑀲𑁂𑀦 𑀙 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀲𑀫𑁆𑀩𑀦𑁆𑀥𑀁 𑀳𑁂𑀝𑁆𑀞𑀺𑀫𑀁 𑀲𑀫𑀸𑀧𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸. 𑀭𑀽𑀧𑀸𑀯𑀘𑀭𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀦𑀺, 𑀧𑀞𑀫𑀢𑀢𑀺𑀬𑀸𑀭𑀽𑀧𑁆𑀧𑀸𑀦𑀺, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀘 𑀦𑀺𑀬𑀓𑀚𑁆𑀛𑀢𑁆𑀢𑀢𑁄 𑀩𑀳𑀺𑀪𑀸𑀯𑁂𑀦 𑀩𑀳𑀺𑀤𑁆𑀥𑀸𑀪𑀽𑀢𑀸𑀦𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑀺. 𑀲𑀩𑁆𑀩𑁂𑀯 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀜𑁆𑀘 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀦𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀢𑁆𑀢𑀦𑁄 𑀔𑀦𑁆𑀥𑀸𑀤𑀻𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀧𑀭𑁂𑀲𑀁 𑀔𑀦𑁆𑀥𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑁂, 𑀧𑀡𑁆𑀡𑀢𑁆𑀢𑀺𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑁂 𑀘 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀢𑀤𑀼𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀜𑁆𑀳𑀺 𑀢𑁂𑀲𑀁 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀺. 𑀅𑀓𑀼𑀲𑀮𑀸𑀧𑀺 𑀅𑀢𑁆𑀢𑀦𑁄 𑀔𑀦𑁆𑀥𑀸𑀤𑀻𑀦𑀁 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀧𑀭𑀸𑀫𑀸𑀲𑀸𑀤𑀺𑀓𑀸𑀮𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀧𑀭𑀲𑁆𑀲 𑀔𑀦𑁆𑀥𑀸𑀤𑀻𑀲𑀼 𑀘𑁂𑀯 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀓𑀲𑀺𑀡𑀸𑀤𑀻𑀲𑀼 𑀘 𑀢𑀣𑁂𑀯 𑀧𑀯𑀢𑁆𑀢𑀺𑀓𑀸𑀮𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀢𑀤𑀼𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺, 𑀢𑀺𑀲𑁆𑀲𑁄 𑀘 𑀫𑀦𑁄𑀥𑀸𑀢𑀼𑀬𑁄𑀢𑀺 𑀇𑀫𑁂 𑀢𑁂𑀭𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀢𑁆𑀢𑀦𑁄 𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀧𑀭𑀲𑁆𑀲 𑀭𑀽𑀧𑀸𑀤𑀻𑀲𑀼 𑀧𑀯𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀢𑀤𑀼𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀲𑀦𑁆𑀢𑀻𑀭𑀡𑀁 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀅𑀢𑁆𑀢𑀦𑁄 𑀧𑀜𑁆𑀘𑀭𑀽𑀧𑀸𑀤𑀺𑀥𑀫𑁆𑀫𑁂 𑀫𑀦𑁄𑀤𑁆𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀅𑀜𑁆𑀜𑁂𑀧𑀺 𑀅𑀚𑁆𑀛𑀢𑁆𑀢𑀺𑀓𑁂 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀧𑀭𑁂𑀲𑀁 𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀢𑀤𑀼𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸. 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀓𑁂𑀯𑀮𑀁 𑀧𑀦 𑀢𑀁 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀲𑀼 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀯𑀲𑁂𑀦𑀸𑀧𑀺 𑀅𑀚𑁆𑀛𑀢𑁆𑀢𑀸𑀤𑀺𑀪𑁂𑀤𑁂𑀲𑀼 𑀓𑀫𑁆𑀫𑀸𑀤𑀻𑀲𑀼 𑀧𑀯𑀢𑁆𑀢𑀢𑀺. 𑀅𑀝𑁆𑀞 𑀫𑀳𑀸𑀯𑀺𑀧𑀸𑀓𑀸𑀦𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀅𑀚𑁆𑀛𑀢𑁆𑀢𑀸𑀤𑀺𑀪𑁂𑀤𑁂𑀲𑀼 𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀦𑀢𑁄 𑀅𑀚𑁆𑀛𑀢𑁆𑀢𑀸𑀤𑀺𑀆𑀮𑀫𑁆𑀩𑀡𑀸𑀦𑀺. 𑀳𑀲𑀺𑀢𑀼𑀧𑁆𑀧𑀸𑀤𑀫𑁆𑀧𑀺 𑀅𑀢𑁆𑀢𑀦𑁄 𑀭𑀽𑀧𑀸𑀤𑀻𑀦𑀺 𑀆𑀭𑀩𑁆𑀪 𑀧𑀳𑀝𑁆𑀞𑀸𑀓𑀸𑀭𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀲𑁆𑀲 𑀭𑀽𑀧𑀸𑀤𑀻𑀲𑀼 𑀧𑀯𑀢𑁆𑀢𑀁 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁. 𑀫𑀦𑁄𑀤𑁆𑀯𑀸𑀭𑁂𑀧𑀺 𑀅𑀢𑁆𑀢𑀦𑁄 𑀓𑀢𑀓𑀺𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀳𑀲𑀺𑀢𑀼𑀧𑁆𑀧𑀸𑀤𑀦𑁂 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑁂𑀲𑀁 𑀓𑀢𑀓𑀺𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀢𑀤𑀼𑀪𑀬𑀯𑀲𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁. 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀧𑀦 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀯𑀲𑁂𑀦, 𑀧𑀜𑁆𑀘𑀤𑁆𑀯𑀸𑀭𑁂 𑀘 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀅𑀚𑁆𑀛𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁. 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀸 𑀓𑀼𑀲𑀮𑀕𑀢𑀺𑀓𑀸𑀬𑁂𑀯. 𑀓𑁂𑀯𑀮𑀜𑁆𑀳𑀺 𑀢𑀸 𑀔𑀻𑀡𑀸𑀲𑀯𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀼𑀲𑀮𑀸𑀦𑀺 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀦𑀸𑀦𑀢𑁆𑀢𑀁. 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀲𑁆𑀲 𑀅𑀚𑁆𑀛𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀢𑀁 𑀯𑀓𑁆𑀔𑀢𑀺.

𑁩𑁨𑁯. ‘‘𑀨𑀮𑀁, 𑀫𑀕𑁆𑀕’’𑀦𑁆𑀢𑀺 𑀘 𑀲𑀸𑀫𑀜𑁆𑀜𑁂𑀦 𑀧𑀼𑀘𑁆𑀙𑀺𑀢𑀢𑁆𑀢𑀸 𑀆𑀳 ‘‘𑀘𑀢𑁆𑀢𑀸𑀭𑁄…𑀧𑁂… 𑀧𑀼𑀜𑁆𑀜𑀢𑁄’’𑀢𑀺.

𑁩𑁩𑁨-𑁪. 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀸𑀦𑀺 𑀧𑀦 𑀢𑁂 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀣𑀸 𑀓𑀼𑀲𑀮𑀸𑀪𑀺𑀜𑁆𑀜𑀸 𑀘. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀲𑀼 𑀧𑀦𑀸’’𑀢𑀺𑀆𑀤𑀺. 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀆𑀯𑀚𑁆𑀚𑀦𑀓𑀺𑀘𑁆𑀘𑀲𑀫𑀬𑀁 𑀲𑀦𑁆𑀥𑀸𑀬 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 ‘‘𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀘𑀸’’𑀢𑀺 𑀯𑀼𑀢𑁆𑀢𑀁. ‘‘𑀘𑀢𑁆𑀢𑀸𑀭𑁄…𑀧𑁂… 𑀧𑀼𑀜𑁆𑀜𑀢𑁄’’𑀢𑀺 𑀇𑀤𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑀸𑀧𑀺 𑀲𑁂𑀔𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀲𑁆𑀲 𑀅𑀕𑁆𑀕𑀫𑀕𑁆𑀕𑀨𑀮𑀚𑀸𑀦𑀦𑁂 𑀅𑀲𑀫𑀢𑁆𑀣𑀢𑀸𑀬 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀓𑀼𑀲𑀮𑀸𑀪𑀺𑀜𑁆𑀜𑀸𑀘𑀺𑀢𑁆𑀢𑀫𑁆𑀧𑀺 𑀧𑀦 𑀢𑀁 𑀕𑁄𑀘𑀭𑀁 𑀓𑀸𑀢𑀼𑀫𑀲𑀫𑀢𑁆𑀣𑀫𑁂𑀯. 𑀏𑀯𑀜𑁆𑀘 𑀓𑀢𑁆𑀯𑀸 𑀳𑁂𑀝𑁆𑀞𑀸 ‘‘𑀓𑁆𑀭𑀺𑀬𑀸𑀪𑀺𑀜𑁆𑀜𑀸 𑀫𑀦𑁄𑀥𑀸𑀢𑀽’’𑀢𑀺 𑀯𑀼𑀢𑁆𑀢𑀁.

𑁩𑁩𑁫-𑁮. 𑀓𑀲𑁆𑀫𑀸𑀢𑀺 𑀓𑀸𑀭𑀡𑀧𑀼𑀘𑁆𑀙𑀸. ‘‘𑀅𑀭𑀳𑀢𑁄’’𑀢𑀺𑀆𑀤𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀳𑀺-𑀲𑀤𑁆𑀤𑁄 ‘‘𑀬𑀲𑁆𑀫𑀸’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑁂. 𑀬𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀲𑁂𑀔𑀸 𑀯𑀸 𑀅𑀭𑀳𑀢𑁄 𑀫𑀕𑁆𑀕𑀘𑀺𑀢𑁆𑀢𑀁, 𑀨𑀮𑀫𑀸𑀦𑀲𑀜𑁆𑀘 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀘 𑀦𑁂𑀲𑀁 𑀅𑀲𑀫𑀢𑁆𑀣𑀢𑀸 𑀅𑀦𑀥𑀺𑀕𑀢𑀢𑁆𑀢𑀸 𑀅𑀦𑀥𑀺𑀕𑀢𑁂 𑀘 𑀯𑀺𑀲𑀬𑁂 𑀲𑀩𑁆𑀩𑁂𑀲𑀫𑁆𑀧𑀺 𑀫𑁄𑀳𑁄 𑀅𑀢𑁆𑀣𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀣𑀼𑀚𑁆𑀚𑀦𑁄 𑀦 𑀚𑀸𑀦𑀸𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀫𑀸𑀦𑀲𑀦𑁆𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑀮𑁄𑀓𑀼𑀢𑁆𑀢𑀭𑀫𑀸𑀦𑀲𑀁. 𑀏𑀯𑀁 ‘‘𑀲𑀓𑀤𑀸𑀕𑀸𑀫𑀺𑀲𑁆𑀲 𑀫𑀸𑀦𑀲’’𑀦𑁆𑀢𑀺𑀆𑀤𑀻𑀲𑀼𑀧𑀺. 𑀮𑁄𑀓𑀺𑀬𑀫𑀸𑀦𑀲𑀁 𑀧𑀦 𑀅𑀭𑀳𑀦𑁆𑀢𑀲𑁆𑀲𑀸𑀧𑀺 𑀚𑀸𑀦𑀸𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬𑀸’’𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑁂𑀝𑁆𑀞𑀺𑀫𑁄 𑀳𑁂𑀝𑁆𑀞𑀺𑀫𑁄’’𑀢𑀺𑀆𑀤𑀺. 𑀬𑀣𑁂𑀯 𑀳𑁂𑀝𑁆𑀞𑀺𑀫𑁄 𑀳𑁂𑀝𑁆𑀞𑀺𑀫𑁄 𑀧𑀼𑀕𑁆𑀕𑀮𑁄 𑀉𑀧𑀭𑀽𑀧𑀭𑀺 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀏𑀯𑀁 𑀉𑀧𑀭𑀺𑀫𑁄 𑀉𑀧𑀭𑀺𑀫𑁄𑀧𑀺 𑀳𑁂𑀝𑁆𑀞𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀲𑁆𑀲 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀘𑁂? 𑀦𑁄 𑀦 𑀚𑀸𑀦𑀸𑀢𑀺, 𑀲𑁄 𑀧𑀦 𑀅𑀢𑁆𑀢𑀦𑀸 𑀅𑀥𑀺𑀕𑀢𑀯𑀺𑀲𑀬𑀢𑁆𑀢𑀸 𑀚𑀸𑀦𑀸𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀭𑀽𑀧𑀭𑀻’’𑀢𑀺𑀆𑀤𑀺. 𑀬𑀣𑀸 ‘‘𑀉𑀧𑀭𑀽𑀧𑀭𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀳𑁂𑀝𑁆𑀞𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀁 𑀳𑁂𑀝𑁆𑀞𑀺𑀫-𑀲𑀤𑁆𑀤𑀁 𑀘-𑀲𑀤𑁆𑀤𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀳𑁂𑀝𑁆𑀞𑀺𑀫𑀲𑁆𑀲 𑀘 𑀫𑀸𑀦𑀲’’𑀦𑁆𑀢𑀺 𑀯𑀼𑀢𑁆𑀢𑀁.

𑁩𑁩𑁯-𑁪𑁧. 𑀏𑀯𑀫𑁆𑀧𑀺 𑀯𑀺𑀲𑀬𑀻𑀧𑀥𑀸𑀦𑀯𑀲𑁂𑀦 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑀬𑀧𑁆𑀧𑀥𑀸𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀥𑀫𑁆𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀫𑁂𑀯 𑀆𑀭𑀫𑁆𑀫𑀡𑀦𑁆𑀢𑀺 𑀓𑀼𑀲𑀮𑀸𑀭𑀫𑁆𑀫𑀡𑀁. 𑀓𑀸𑀫𑁂𑀢𑀺 𑀧𑀤𑀁 𑀉𑀪𑀬𑀢𑁆𑀣 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 ‘‘𑀓𑀸𑀫𑁂 𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑁂 𑀓𑀼𑀲𑀮𑀸𑀓𑀼𑀲𑀮𑀲𑁆𑀲𑀸’’𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀅𑀓𑀼𑀲𑀮𑀲𑁆𑀲 𑀏𑀓𑀦𑁆𑀢𑀓𑀸𑀫𑀸𑀯𑀘𑀭𑀢𑁆𑀢𑀸 𑀦 𑀏𑀢𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀢𑀸 𑀅𑀢𑁆𑀣𑀺, 𑀓𑀼𑀲𑀮𑀁 𑀧𑀦 𑀯𑀺𑀲𑁂𑀲𑀺𑀢𑀩𑁆𑀩𑀫𑁂𑀯𑀸𑀢𑀺 𑀢𑀁 𑀅𑀧𑁂𑀓𑁆𑀔𑀸𑀬 ‘‘𑀓𑀸𑀫𑁂’’𑀢𑀺 𑀉𑀧𑀭𑀺𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀫𑁂𑀯. 𑀅𑀣 𑀯𑀸 𑀅𑀓𑀼𑀲𑀮𑀲𑀳𑀘𑀭𑀺𑀬𑀢𑁄 𑀓𑀼𑀲𑀮𑀫𑁆𑀧𑀺 𑀓𑀸𑀫𑀸𑀯𑀘𑀭𑀫𑁂𑀯 𑀕𑀬𑁆𑀳𑀢𑀻𑀢𑀺 ‘‘𑀓𑀸𑀫𑁂’’𑀢𑀺 𑀇𑀤𑀁 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁.

𑀓𑀸𑀫𑀸𑀯𑀘𑀭𑀧𑀸𑀓𑀲𑁆𑀲𑀸𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀁 𑀏𑀓𑀦𑁆𑀢𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀭𑀫𑁆𑀫𑀡𑀢𑁆𑀢𑀸 𑀢𑀤𑀯𑀲𑁂𑀲𑀲𑁆𑀲 𑀏𑀓𑀸𑀤𑀲𑀯𑀺𑀥𑀲𑁆𑀲 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲. 𑀓𑀸𑀫𑀓𑁆𑀭𑀺𑀬𑀲𑁆𑀲𑀸𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀦𑁄𑀥𑀸𑀢𑀼𑀯𑀚𑁆𑀚𑀺𑀢𑀲𑁆𑀲 𑀤𑀲𑀯𑀺𑀥𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲. 𑀏𑀢𑁂𑀲𑀁…𑀧𑁂… 𑀆𑀭𑀫𑁆𑀫𑀡𑀁 𑀲𑀺𑀬𑀸𑀢𑀺 𑀏𑀢𑁆𑀣 𑀓𑀼𑀲𑀮𑀲𑁆𑀲 𑀢𑀸𑀯 𑀅𑀢𑁆𑀢𑀦𑀸 𑀓𑀢𑀲𑁆𑀲 𑀤𑀸𑀦𑀸𑀤𑀺𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀅𑀦𑀼𑀲𑁆𑀲𑀭𑀡𑀓𑀸𑀮𑁂, 𑀢𑀣𑁂𑀯 𑀧𑀭𑁂𑀳𑀺 𑀓𑀢𑀲𑁆𑀲 𑀅𑀦𑀼𑀫𑁄𑀤𑀦𑀓𑀸𑀮𑁂, 𑀢𑀲𑁆𑀲𑁂𑀯 𑀤𑀼𑀯𑀺𑀥𑀲𑁆𑀲𑀸𑀧𑀺 𑀅𑀦𑀺𑀘𑁆𑀘𑀢𑀸𑀤𑀺𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂, 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀤𑀻𑀦𑀁 𑀧𑀭𑀺𑀢𑁆𑀢𑀓𑀼𑀲𑀮𑀸𑀭𑀫𑁆𑀫𑀡𑀺𑀓𑀅𑀪𑀺𑀜𑁆𑀜𑀸𑀦𑀁 𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀮𑁂 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀅𑀓𑀼𑀲𑀮𑁂𑀲𑀼 𑀘 𑀘𑀢𑀼𑀦𑁆𑀦𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀆𑀭𑀩𑁆𑀪 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀧𑀭𑀸𑀫𑀲𑀦𑀓𑀸𑀮𑁂, 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀓𑁂𑀯𑀮𑀁 𑀅𑀲𑁆𑀲𑀸𑀤𑀦𑀸𑀤𑀺𑀓𑀸𑀮𑁂 𑀘 𑀤𑁆𑀯𑀺𑀦𑁆𑀦𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀢𑁆𑀢𑀦𑀸, 𑀧𑀭𑁂𑀳𑀺 𑀘 𑀓𑀢𑀓𑀼𑀲𑀮𑀫𑀸𑀭𑀩𑁆𑀪 𑀯𑀺𑀧𑁆𑀧𑀝𑀺𑀲𑀸𑀭𑀤𑀼𑀲𑁆𑀲𑀦𑀓𑀸𑀮𑁂, 𑀯𑀺𑀘𑀺𑀓𑀺𑀘𑁆𑀙𑀸𑀘𑀺𑀢𑁆𑀢𑀲𑁆𑀲 𑀅𑀲𑀦𑁆𑀦𑀺𑀝𑁆𑀞𑀸𑀦𑀓𑀸𑀮𑁂, 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀅𑀯𑀽𑀧𑀲𑀫𑀯𑀺𑀓𑁆𑀔𑁂𑀧𑀓𑀸𑀮𑁂 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀤𑁆𑀯𑀬𑁂 𑀓𑀼𑀲𑀮𑀲𑁆𑀲 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀢𑁆𑀢𑀦𑀸, 𑀧𑀭𑁂𑀳𑀺 𑀯𑀸 𑀓𑀢𑀓𑀼𑀲𑀮𑀲𑁆𑀲 𑀅𑀦𑀼𑀲𑁆𑀲𑀭𑀡𑀓𑀸𑀮𑁂, 𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀓𑀸𑀮𑁂, ‘‘𑀇𑀫𑀺𑀦𑀸 𑀧𑀼𑀜𑁆𑀜𑀓𑀫𑁆𑀫𑁂𑀦 𑀫𑀦𑀼𑀲𑁆𑀲𑁂𑀲𑀼, 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀘 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺 𑀚𑀸𑀦𑀦𑀓𑀸𑀮𑁂, ‘‘𑀅𑀦𑀸𑀕𑀢𑁂 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀫𑀺, 𑀓𑀭𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑀓𑀸𑀮𑁂 𑀘 𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲𑀸𑀧𑀺 𑀔𑀻𑀡𑀸𑀲𑀯𑀸𑀦𑀁 𑀅𑀢𑁆𑀢𑀦𑀸, 𑀧𑀭𑁂𑀳𑀺 𑀯𑀸 𑀓𑀢𑀓𑀫𑁆𑀫𑀸𑀦𑀼𑀲𑁆𑀲𑀭𑀡𑀓𑀸𑀮𑀸𑀤𑀻𑀲𑀼 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁂𑀲𑀼 𑀦𑀯𑀦𑁆𑀦𑀁 𑀲𑀼𑀕𑀢𑀺𑀧𑀝𑀺𑀲𑀦𑁆𑀥𑀻𑀦𑀁 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀺𑀓𑀧𑀝𑀺𑀲𑀦𑁆𑀥𑀺𑀓𑀸𑀮𑁂, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀸𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀭𑀫𑁆𑀫𑀡𑀺𑀓𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀓𑀸𑀮𑁂 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺. 𑀤𑀲𑀯𑀺𑀥𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀲𑀼 𑀘 𑀅𑀝𑁆𑀞𑀦𑁆𑀦𑀁 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑁆𑀫𑀲𑀦𑀓𑀸𑀮𑁂, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀺𑀓𑀓𑀺𑀭𑀺𑀬𑀸𑀪𑀺𑀜𑁆𑀜𑀸𑀦𑀁 𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀮𑁂, 𑀳𑀲𑀺𑀢𑀼𑀧𑁆𑀧𑀸𑀤𑀲𑁆𑀲 𑀤𑀸𑀦𑀸𑀤𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀢𑀼𑀲𑁆𑀲𑀦𑀓𑀸𑀮𑁂, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀭𑀫𑁆𑀫𑀡𑀺𑀓𑀚𑀯𑀦𑀸𑀦𑀁 𑀧𑀼𑀭𑁂𑀘𑀸𑀭𑀺𑀓𑀓𑀸𑀮𑁂 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀏𑀯𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺.

𑁩𑁪𑁨. 𑀢𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀭𑀸𑀲𑀺𑀢𑁄. 𑀢𑁂𑀦𑀸𑀳 ‘‘𑀧𑀜𑁆𑀘𑀦𑁆𑀦𑀁 𑀧𑀦 𑀭𑀸𑀲𑀻𑀦’’𑀦𑁆𑀢𑀺. 𑀏𑀢𑁆𑀣 𑀘 𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀳𑀲𑀺𑀢𑀼𑀧𑁆𑀧𑀸𑀤𑁄 𑀦 𑀲𑀫𑁆𑀪𑀯𑀢𑀺 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀢𑀸𑀯 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀛𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑁆𑀫𑀲𑀦𑀓𑀸𑀮𑁂, 𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀭𑀫𑁆𑀫𑀡𑀺𑀓𑀅𑀪𑀺𑀜𑁆𑀜𑀸𑀦𑀁 𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀮𑁂, 𑀅𑀓𑀼𑀲𑀮𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀧𑀭𑀸𑀫𑀲𑀦𑀸𑀤𑀺𑀓𑀸𑀮𑁂, 𑀅𑀪𑀺𑀜𑁆𑀜𑀸𑀲𑀼 𑀓𑀼𑀲𑀮𑀸𑀪𑀺𑀜𑁆𑀜𑀸𑀬 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀢𑁆𑀢𑀦𑀸, 𑀧𑀭𑁂𑀳𑀺 𑀯𑀸 𑀅𑀢𑀻𑀢𑀪𑀯𑁂 𑀉𑀧𑁆𑀧𑀸𑀤𑀺𑀢𑀛𑀸𑀦𑀸𑀦𑀼𑀲𑁆𑀲𑀭𑀡𑀓𑀸𑀮𑁂, 𑀧𑀭𑁂𑀲𑀁 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀧𑀭𑀺𑀘𑁆𑀙𑀺𑀦𑁆𑀤𑀦𑀓𑀸𑀮𑁂, ‘‘𑀇𑀫𑀺𑀦𑀸 𑀓𑀫𑁆𑀫𑁂𑀦 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑀓𑀸𑀮𑁂 𑀘 ‘‘𑀅𑀦𑀸𑀕𑀢𑁂 𑀛𑀸𑀦𑀁 𑀪𑀸𑀯𑁂𑀲𑁆𑀲𑀢𑀻’’𑀢𑀺 𑀯𑀸 𑀚𑀸𑀦𑀦𑀓𑀸𑀮𑁂, 𑀓𑀺𑀭𑀺𑀬𑀸𑀪𑀺𑀜𑁆𑀜𑀸𑀬 𑀘 𑀔𑀻𑀡𑀸𑀲𑀯𑀸𑀦𑀁 𑀬𑀣𑀸𑀯𑀼𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀺𑀓𑀸𑀮𑁂 𑀘 𑀦𑀯𑀯𑀺𑀥𑀲𑁆𑀲 𑀧𑀦 𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂𑀢𑀺 𑀏𑀯𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺.

𑁩𑁪𑁩-𑁭. 𑀆𑀭𑀼𑀧𑁆𑀧𑀓𑀼𑀲𑀮𑀜𑁆𑀘𑀸𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀪𑀽𑀫𑀓𑀓𑀼𑀲𑀮𑀲𑁆𑀲𑀸𑀢𑀺 𑀲𑀩𑁆𑀩𑀲𑁆𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲, 𑀭𑀽𑀧𑀸𑀯𑀘𑀭𑀓𑀼𑀲𑀮𑁂𑀲𑀼 𑀓𑀼𑀲𑀮𑀸𑀪𑀺𑀜𑁆𑀜𑀸𑀬, 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑁂𑀲𑀼 𑀤𑀼𑀢𑀺𑀬𑀘𑀢𑀼𑀢𑁆𑀣𑀓𑀼𑀲𑀮𑀲𑁆𑀲 𑀘𑀸𑀢𑀺 𑀇𑀫𑀲𑁆𑀲 𑀢𑁂𑀪𑀽𑀫𑀓𑀓𑀼𑀲𑀮𑀲𑁆𑀲. 𑀏𑀲 𑀦𑀬𑁄 ‘‘𑀢𑁂𑀪𑀽𑀫𑀓𑀓𑁆𑀭𑀺𑀬𑀲𑁆𑀲𑀸’’𑀢𑀺 𑀏𑀢𑁆𑀣𑀸𑀧𑀺. ‘‘𑀘𑀢𑀼𑀢𑁆𑀣𑀤𑀽𑀦’’𑀦𑁆𑀢𑀺 𑀯𑀸 ‘‘𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦’’𑀦𑁆𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀯𑀺𑀪𑀢𑁆𑀢𑀺𑀬𑀸, 𑀲𑀯𑀺𑀪𑀢𑁆𑀢𑀺𑀲𑁆𑀲 𑀯𑀸 𑀢𑀺𑀬-𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀘𑀢𑀼𑀢𑁆𑀣𑀤𑀽’’𑀢𑀺 𑀯𑀼𑀢𑁆𑀢𑀁. 𑀇𑀫𑁂𑀲𑀁…𑀧𑁂… 𑀧𑀘𑁆𑀘𑀬𑁄𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲, 𑀢𑀸𑀯 𑀅𑀪𑀺𑀜𑁆𑀜𑀸𑀓𑀼𑀲𑀮𑀲𑁆𑀲 𑀘 𑀭𑀽𑀧𑀸𑀯𑀘𑀭𑀸𑀭𑀫𑁆𑀫𑀡𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑁆𑀲 𑀧𑀞𑀫𑀢𑀢𑀺𑀬𑀯𑀲𑁂𑀦𑀸𑀢𑀺 𑀏𑀯𑀁 𑀢𑁂𑀪𑀽𑀫𑀓𑀓𑀼𑀲𑀮𑀲𑁆𑀲 𑀢𑀣𑀸 𑀲𑁂𑀔𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀕𑀢𑀲𑁆𑀲, 𑀧𑀭𑀲𑀦𑁆𑀢𑀸𑀦𑀕𑀢𑀲𑁆𑀲 𑀯𑀸 𑀆𑀭𑀼𑀧𑁆𑀧𑀓𑀼𑀲𑀮𑀲𑁆𑀲 𑀧𑀚𑀸𑀦𑀦𑀓𑀸𑀮𑁂 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲 𑀲𑁂𑀔𑀧𑀼𑀣𑀼𑀚𑁆𑀚𑀦𑀓𑀸𑀮𑁂𑀬𑁂𑀯 𑀅𑀢𑁆𑀢𑀦𑀸 𑀦𑀺𑀩𑁆𑀩𑀢𑁆𑀢𑀺𑀢𑀁 𑀧𑀞𑀫𑀢𑀢𑀺𑀬𑀸𑀭𑀼𑀧𑁆𑀧𑀁 𑀆𑀭𑀩𑁆𑀪 𑀔𑀻𑀡𑀸𑀲𑀯𑀓𑀸𑀮𑁂 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀦𑀺𑀩𑁆𑀩𑀢𑁆𑀢𑀦𑁂 𑀅𑀭𑀽𑀧𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲𑀸𑀢𑀺 𑀏𑀯𑀁 𑀢𑁂𑀪𑀽𑀫𑀓𑀓𑀺𑀭𑀺𑀬𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀓𑀼𑀲𑀮𑀲𑁆𑀲, 𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦𑀜𑁆𑀘 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀦𑁆𑀢𑀺 𑀏𑀯𑀫𑁂𑀢𑁂𑀲𑀁 𑀅𑀝𑁆𑀞𑀦𑁆𑀦𑀁 𑀭𑀸𑀲𑀻𑀦𑀁 𑀅𑀭𑀽𑀧𑀓𑀼𑀲𑀮𑀫𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀧𑀭𑀺𑀘𑁆𑀙𑀺𑀚𑁆𑀚 𑀕𑀸𑀳𑀺𑀓𑀸𑀬 𑀢𑀡𑁆𑀳𑀸𑀬 𑀆𑀧𑀦𑁆𑀦𑀦𑁆𑀢𑀺 𑀧𑀭𑀺𑀬𑀸𑀧𑀦𑁆𑀦𑀁, 𑀢𑁂𑀪𑀽𑀫𑀓𑀥𑀫𑁆𑀫𑀚𑀸𑀢𑀁, 𑀦 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀧𑀭𑀺𑀬𑀸𑀧𑀦𑁆𑀦𑀁, 𑀢𑀤𑁂𑀯 𑀧𑀼𑀜𑁆𑀜𑀜𑁆𑀘𑀸𑀢𑀺 𑀅𑀧𑀭𑀺𑀬𑀸𑀧𑀦𑁆𑀦𑀧𑀼𑀜𑁆𑀜𑀁. 𑀓𑀸𑀫𑀸𑀯𑀘𑀭𑀢𑁄𑀧𑀺 𑀓𑀼𑀲𑀮𑀲𑁆𑀲 𑀓𑀺𑀭𑀺𑀬𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀽𑀧𑀢𑁄𑀢𑀺 𑀭𑀽𑀧𑀸𑀯𑀘𑀭𑀢𑁄. 𑀘𑀢𑀼𑀦𑁆𑀦𑀁…𑀧𑁂… 𑀲𑀤𑀸𑀢𑀺 𑀲𑁂𑀔𑀸𑀦𑀁 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀺𑀓𑀓𑀼𑀲𑀮𑀸𑀪𑀺𑀜𑁆𑀜𑀸𑀬 𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀮𑁂 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀲𑁆𑀲, 𑀔𑀻𑀡𑀸𑀲𑀯𑀸𑀦𑀁 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂 𑀫𑀕𑁆𑀕𑀸𑀭𑀫𑁆𑀫𑀡𑀺𑀓𑀓𑀺𑀭𑀺𑀬𑀸𑀪𑀺𑀜𑁆𑀜𑀸𑀬 𑀘 𑀧𑀭𑀺𑀓𑀫𑁆𑀫𑀓𑀸𑀮𑁂 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲, 𑀢𑁂𑀲𑀁 𑀢𑁂𑀲𑀁 𑀚𑀯𑀦𑀸𑀦𑀁 𑀧𑀼𑀭𑁂𑀘𑀭𑀯𑀲𑁂𑀦 𑀧𑀯𑀢𑁆𑀢𑀺𑀓𑀸𑀮𑁂 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲, 𑀲𑁂𑀔𑀸𑀦𑀁 𑀅𑀢𑁆𑀢𑀦𑁄, 𑀧𑀭𑁂𑀲𑀁 𑀯𑀸 𑀫𑀕𑁆𑀕𑀚𑀸𑀦𑀦𑀓𑀸𑀮𑁂 𑀅𑀪𑀺𑀜𑁆𑀜𑀸𑀤𑁆𑀯𑀬𑀲𑁆𑀲𑀸𑀢𑀺 𑀏𑀯𑀫𑁂𑀢𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀫𑀸𑀭𑀫𑁆𑀫𑀡𑀁 𑀳𑁄𑀢𑀺.

𑀢𑀣𑁂𑀯𑀸𑀓𑀼𑀲𑀮𑀁…𑀧𑁂… 𑀈𑀭𑀺𑀢𑀦𑁆𑀢𑀺 𑀲𑁂𑀔𑀸𑀦𑀁 𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂, 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀢𑁆𑀢𑀦𑁄, 𑀧𑀭𑁂𑀲𑀁 𑀯𑀸 𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀸𑀓𑀼𑀲𑀮𑀲𑀫𑁆𑀫𑀲𑀦𑀓𑀸𑀮𑁂, 𑀅𑀓𑀼𑀲𑀮𑀸𑀭𑀫𑁆𑀫𑀡𑀺𑀓𑀓𑀼𑀲𑀮𑀸𑀪𑀺𑀜𑁆𑀜𑀸𑀬 𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀮𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀢𑁆𑀢𑀦𑁄, 𑀧𑀭𑁂𑀲𑀁 𑀯𑀸 𑀧𑀯𑀢𑁆𑀢𑀅𑀓𑀼𑀲𑀮𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀔𑀻𑀡𑀸𑀲𑀯𑀸𑀦𑀁 𑀧𑀳𑀻𑀦𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀅𑀜𑁆𑀜𑀲𑀦𑁆𑀢𑀸𑀦𑀕𑀢𑀅𑀓𑀼𑀲𑀮𑀲𑀫𑁆𑀫𑀲𑀦𑀸𑀤𑀺𑀓𑀸𑀮𑁂, 𑀧𑀳𑀻𑀦𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀢𑀼𑀲𑁆𑀲𑀦𑀓𑀸𑀮𑁂, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀁𑀢𑀁𑀚𑀯𑀦𑀸𑀦𑀁 𑀧𑀼𑀭𑁂𑀘𑀭𑀓𑀸𑀮𑁂 𑀘 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲, 𑀓𑀼𑀲𑀮𑀸𑀪𑀺𑀜𑁆𑀜𑀸𑀬 𑀯𑀼𑀢𑁆𑀢𑀦𑀬𑁂𑀦 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲, 𑀧𑀭𑀸𑀫𑀸𑀲𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀅𑀓𑀼𑀲𑀮𑀲𑁆𑀲, 𑀉𑀤𑁆𑀥𑀘𑁆𑀘𑀭𑀳𑀺𑀢𑀓𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦 𑀅𑀓𑀼𑀲𑀮𑀯𑀺𑀧𑀸𑀓𑀲𑀦𑁆𑀢𑀻𑀭𑀡𑀲𑁆𑀲, 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀁 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀲𑀩𑁆𑀩𑀫𑁆𑀧𑀺 𑀏𑀓𑀸𑀤𑀲𑀢𑀤𑀸𑀭𑀫𑁆𑀫𑀡𑀯𑀺𑀧𑀸𑀓𑀲𑁆𑀲𑀸𑀢𑀺 𑀏𑀯𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀦𑁆𑀢𑀺 𑀏𑀯𑀫𑁂𑀢𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀅𑀓𑀼𑀲𑀮𑀫𑀸𑀭𑀫𑁆𑀫𑀡𑀁 𑀳𑁄𑀢𑀺.

𑁩𑁪𑁮-𑁫𑁬. 𑀯𑀺𑀧𑀸𑀓𑀸𑀭𑀫𑁆𑀫𑀡𑀁…𑀧𑁂… 𑀧𑀘𑁆𑀘𑀬𑁄𑀢𑀺 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀺𑀧𑀸𑀓𑀲𑀫𑁆𑀫𑀲𑀦𑀸𑀤𑀺𑀓𑀸𑀮𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲, 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀔𑀻𑀡𑀸𑀲𑀯𑀸𑀦𑀁 𑀯𑀺𑀧𑀸𑀓𑀲𑀫𑁆𑀫𑀲𑀦𑀸𑀤𑀺𑀓𑀸𑀮𑁂, 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀅𑀦𑀺𑀝𑁆𑀞𑀯𑀺𑀧𑀸𑀓𑀸𑀪𑀸𑀯𑀁 𑀆𑀭𑀩𑁆𑀪 𑀢𑀼𑀲𑁆𑀲𑀦𑀓𑀸𑀮𑁂, 𑀬𑀣𑀸𑀯𑀼𑀢𑁆𑀢𑀚𑀯𑀦𑀸𑀦𑀁 𑀧𑀼𑀭𑁂𑀘𑀭𑀓𑀸𑀮𑁂 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲, 𑀓𑀼𑀲𑀮𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲, 𑀯𑀺𑀧𑀸𑀓𑀁 𑀆𑀭𑀩𑁆𑀪 𑀢𑀤𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀬𑀁 𑀯𑀺𑀧𑀸𑀓𑀸𑀭𑀫𑁆𑀫𑀡𑀺𑀓𑀓𑀫𑁆𑀫𑀼𑀦𑀸 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀲𑁆𑀲 𑀓𑀫𑁆𑀫𑀦𑀺𑀫𑀺𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀺𑀬𑀜𑁆𑀘 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀅𑀓𑀼𑀲𑀮𑀲𑁆𑀲𑀸𑀢𑀺 𑀏𑀯𑀫𑁂𑀢𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀫𑀸𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀭𑀫𑁆𑀫𑀡𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 𑀢𑀁 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀘 𑀳𑀲𑀺𑀢𑀼𑀧𑁆𑀧𑀸𑀤𑀲𑁆𑀲𑀸𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸𑀦𑀫𑀸𑀭𑀫𑁆𑀫𑀡𑀓𑁆𑀓𑀫𑁄 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀤𑀻𑀦𑀁 𑀙𑀦𑁆𑀦𑀁 𑀭𑀸𑀲𑀻𑀦𑀫𑀸𑀭𑀫𑁆𑀫𑀡𑀓𑁆𑀓𑀫𑁄 𑀓𑀼𑀲𑀮𑀸𑀭𑀫𑁆𑀫𑀡𑁂 𑀯𑀼𑀢𑁆𑀢𑀲𑀤𑀺𑀲𑁄𑀯. 𑀓𑁂𑀯𑀮𑀜𑁆𑀳𑀺 𑀏𑀢𑁆𑀣 𑀬𑀤𑁂𑀢𑀁 𑀔𑀻𑀡𑀸𑀲𑀯𑀲𑀦𑁆𑀢𑀸𑀦𑀲𑁆𑀲𑁂𑀯 𑀦𑀺𑀬𑀢𑀁 𑀦𑀯𑀯𑀺𑀥𑀁 𑀓𑀺𑀭𑀺𑀬𑀘𑀺𑀢𑁆𑀢𑀁, 𑀢𑀁 𑀧𑀭𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀓𑀼𑀲𑀮𑀸𑀓𑀼𑀲𑀮𑀲𑁆𑀲, 𑀲𑀲𑀦𑁆𑀢𑀸𑀦𑁂𑀯 𑀲𑁂𑀔𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀅𑀦𑀸𑀕𑀢𑀸𑀭𑀫𑁆𑀫𑀡𑀺𑀓𑀅𑀪𑀺𑀜𑁆𑀜𑀸𑀬 𑀧𑀭𑀺𑀓𑀫𑁆𑀫𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀯𑀺𑀧𑀸𑀓𑁂𑀲𑀼 𑀘 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀲𑀗𑁆𑀔𑀸𑀢𑀸𑀦𑀁 𑀯𑀺𑀧𑀸𑀓𑀸𑀦𑀁 𑀓𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀓𑁆𑀓𑀫𑁄 𑀓𑀼𑀲𑀮𑀸𑀭𑀫𑁆𑀫𑀡𑁂 𑀯𑀼𑀢𑁆𑀢𑀲𑀤𑀺𑀲𑁄𑀯. 𑀯𑀺𑀲𑁂𑀲𑁄𑀧𑀺 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀭𑀫𑁆𑀫𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀼𑀧𑁆𑀧𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲𑀸𑀧𑀺 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀕𑁄𑀘𑀭𑀪𑀸𑀯𑁄 𑀯𑀼𑀢𑁆𑀢𑀲𑀤𑀺𑀲𑁄𑀯. 𑀆𑀭𑀼𑀧𑁆𑀧𑀓𑀺𑀭𑀺𑀬𑀲𑁆𑀲 𑀧𑀦 𑀧𑀞𑀫𑀢𑀢𑀺𑀬𑀁 𑀤𑀼𑀢𑀺𑀬𑀘𑀢𑀼𑀢𑁆𑀣𑀲𑁆𑀲𑁂𑀯 𑀕𑁄𑀘𑀭𑁄 𑀳𑁄𑀢𑀺.

𑁩𑁫𑁭-𑁮. 𑀏𑀯𑀁 𑀭𑀽𑀧𑀦𑀺𑀩𑁆𑀩𑀸𑀦𑀯𑀚𑁆𑀚𑀺𑀢𑀫𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀭𑀽𑀧𑀸𑀭𑀫𑁆𑀫𑀡𑀁, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀘𑀢𑀼𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀭𑀽𑀧𑀦𑁆𑀢𑀺 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑁄 𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀪𑀺𑀦𑁆𑀦𑁄 𑀭𑀽𑀧𑀓𑁆𑀔𑀦𑁆𑀥𑁄. 𑀓𑀺𑀜𑁆𑀘𑀸𑀧𑀺 𑀦 𑀲𑀩𑁆𑀩𑀫𑁂𑀯 𑀭𑀽𑀧𑀁 𑀧𑀘𑁆𑀘𑁂𑀓𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀁, 𑀲𑀫𑀼𑀤𑀺𑀢𑁄 𑀧𑀦 𑀭𑀽𑀧𑀓𑁆𑀔𑀦𑁆𑀥𑁄 𑀘𑀢𑀽𑀳𑀺 𑀏𑀯 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀘𑀢𑀼𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺. 𑀓𑀸𑀫𑀧𑀸𑀓𑀓𑀺𑀭𑀺𑀬𑀲𑁆𑀲𑀸𑀢𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲 𑀘, 𑀢𑀢𑁆𑀣 𑀘 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀢𑀸𑀯 𑀯𑀡𑁆𑀡𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀓𑀸𑀮𑁂, 𑀯𑀡𑁆𑀡𑀸𑀤𑀻𑀦𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀫𑁆𑀫𑀲𑀦𑀓𑀸𑀮𑁂, 𑀅𑀪𑀺𑀜𑁆𑀜𑀸𑀬 𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀮𑁂, 𑀅𑀓𑀼𑀲𑀮𑀲𑁆𑀲 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀧𑀭𑀸𑀫𑀸𑀲𑀸𑀤𑀺𑀓𑀸𑀮𑁂, 𑀅𑀪𑀺𑀜𑁆𑀜𑀸𑀤𑁆𑀯𑀬𑀲𑁆𑀲 𑀇𑀤𑁆𑀥𑀺𑀯𑀺𑀥𑀪𑀽𑀢𑀲𑁆𑀲 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀤𑀺𑀭𑀽𑀧𑀦𑀺𑀫𑁆𑀫𑀸𑀦𑀓𑀸𑀮𑁂, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀪𑀽𑀢𑀲𑁆𑀲 ‘‘𑀧𑀼𑀭𑀺𑀫𑀪𑀯𑁂 𑀏𑀯𑀁𑀯𑀡𑁆𑀡𑁄 𑀅𑀳𑁄𑀲𑀺’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀲𑁆𑀲𑀭𑀡𑀓𑀸𑀮𑁂, 𑀤𑀺𑀩𑁆𑀩𑀘𑀓𑁆𑀔𑀼𑀪𑀽𑀢𑀲𑁆𑀲 𑀘𑀯𑀫𑀸𑀦𑀉𑀧𑀧𑀚𑁆𑀚𑀫𑀸𑀦𑀲𑀢𑁆𑀢𑀸𑀦𑀁 𑀯𑀡𑁆𑀡𑀤𑀲𑁆𑀲𑀦𑀓𑀸𑀮𑁂, 𑀤𑀺𑀩𑁆𑀩𑀲𑁄𑀢𑀪𑀽𑀢𑀲𑁆𑀲 𑀲𑀤𑁆𑀤𑀲𑀯𑀦𑀓𑀸𑀮𑁂, 𑀅𑀦𑀸𑀕𑀢𑀁𑀲𑀜𑀸𑀡𑀪𑀽𑀢𑀲𑁆𑀲 ‘‘𑀅𑀦𑀸𑀕𑀢𑁂 𑀏𑀯𑀁𑀯𑀡𑁆𑀡𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀚𑀸𑀦𑀦𑀓𑀸𑀮𑁂, 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁂𑀲𑀼 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀤𑁆𑀯𑀬𑀲𑁆𑀲 𑀬𑀣𑀸𑀬𑁄𑀕𑀁 𑀭𑀽𑀧𑀸𑀤𑀺𑀯𑀺𑀚𑀸𑀦𑀦𑀓𑀸𑀮𑁂, 𑀲𑀼𑀔𑀲𑀦𑁆𑀢𑀻𑀭𑀡𑀲𑁆𑀲 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀓𑀸𑀮𑁂, 𑀉𑀧𑁂𑀓𑁆𑀔𑀸𑀲𑀦𑁆𑀢𑀻𑀭𑀡𑀤𑁆𑀯𑀬𑀲𑁆𑀲 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀓𑀸𑀮𑁂, 𑀲𑀳𑁂𑀢𑀼𑀓𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀓𑀸𑀮𑁂, 𑀢𑀤𑀸𑀭𑀫𑁆𑀫𑀡𑀓𑀸𑀮𑁂 𑀘, 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀲𑀼 𑀧𑀦 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀝𑁆𑀞𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲, ‘‘𑀏𑀯𑀭𑀽𑀧𑀁 𑀯𑀡𑁆𑀡𑀸𑀤𑀺𑀫𑀤𑀸𑀲𑀺’’𑀦𑁆𑀢𑀺 𑀢𑀼𑀲𑁆𑀲𑀦𑀓𑀸𑀮𑁂 𑀳𑀲𑀺𑀢𑀼𑀧𑁆𑀧𑀸𑀤𑀲𑁆𑀲, 𑀧𑀜𑁆𑀘𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑁂𑀲𑀼 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀓𑀸𑀮𑁂 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲, 𑀧𑀜𑁆𑀘𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀓𑀸𑀮𑁂 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀏𑀯𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀭𑀽𑀧𑀁 𑀙𑀦𑁆𑀦𑀁 𑀭𑀸𑀲𑀻𑀦𑀫𑀸𑀭𑀫𑁆𑀫𑀡𑀁 𑀳𑁄𑀢𑀺.

𑁩𑁫𑁯-𑁬𑁦. 𑀦𑀺𑀩𑁆𑀩𑀸𑀦𑀁 𑀧𑀦 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀓𑀸𑀮𑁂, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀺𑀓𑀅𑀪𑀺𑀜𑁆𑀜𑀸𑀬 𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀮𑁂 𑀘 𑀓𑀸𑀫𑀸𑀯𑀘𑀭𑀢𑀺𑀳𑁂𑀢𑀼𑀓𑀓𑀼𑀲𑀮𑀲𑁆𑀲, 𑀅𑀢𑀻𑀢𑀪𑀯𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑀸𑀦𑀼𑀲𑁆𑀲𑀭𑀡𑀓𑀆𑀮𑀸𑀤𑀻𑀲𑀼 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀫𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲, 𑀫𑀕𑁆𑀕𑀝𑁆𑀞𑀸𑀦𑀁 𑀢𑀤𑀦𑀦𑁆𑀢𑀭𑀨𑀮𑀯𑀴𑀜𑁆𑀚𑀦𑀨𑀮𑀓𑀸𑀮𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀘𑀸𑀢𑀺 𑀏𑀯𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀪𑀬𑀲𑁆𑀲𑀸𑀢𑀺 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀲𑁂𑀦 𑀤𑀼𑀯𑀺𑀥𑀲𑁆𑀲.

𑁩𑁬𑁧-𑁨. 𑀦𑀸𑀦𑀧𑁆𑀧𑀓𑀸𑀭𑀓𑀦𑁆𑀢𑀺 𑀤𑁆𑀯𑀸𑀤𑀲𑀫𑀧𑀭𑀺𑀘𑁆𑀙𑁂𑀤𑁂 𑀯𑀓𑁆𑀔𑀫𑀸𑀦𑀦𑀬𑁂𑀦 𑀦𑀸𑀦𑀸𑀯𑀺𑀥𑀧𑁆𑀧𑀓𑀸𑀭𑀁. 𑀦𑀯𑀦𑁆𑀦𑀁…𑀧𑁂… 𑀧𑀘𑁆𑀘𑀬𑁄𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀳𑀲𑀺𑀢𑀼𑀧𑁆𑀧𑀸𑀤𑀫𑀦𑁄𑀥𑀸𑀢𑀼𑀯𑀚𑁆𑀚𑀺𑀢𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀜𑁆𑀘𑁂𑀯 𑀤𑁆𑀯𑀺𑀦𑁆𑀦𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀦𑀜𑁆𑀘 𑀲𑀩𑁆𑀩𑀸𑀧𑀺 𑀧𑀜𑁆𑀜𑀢𑁆𑀢𑀺, 𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺𑀓𑀸, 𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀁 𑀆𑀓𑀸𑀲𑀧𑀜𑁆𑀜𑀢𑁆𑀢𑀺, 𑀢𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀸𑀤𑀻𑀦𑀁 𑀢𑀺𑀡𑁆𑀡𑀁 𑀅𑀪𑀸𑀯𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀧𑀜𑁆𑀜𑀢𑁆𑀢𑀺 𑀦𑀯𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑁩𑁬𑁩-𑁫. 𑀏𑀯𑀁 𑀬𑁄 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀁 𑀏𑀓𑁂𑀓𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑁂 𑀘𑀢𑀼𑀪𑀽𑀫𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀙𑀳𑀺 𑀆𑀭𑀫𑁆𑀫𑀡𑁂𑀳𑀺 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀸𑀭𑀫𑁆𑀫𑀡𑀺𑀓𑀸 𑀤𑁆𑀯𑁂’’𑀢𑀺𑀆𑀤𑀺 𑀕𑀸𑀣𑀸𑀢𑁆𑀢𑀬𑀁 𑀯𑀼𑀢𑁆𑀢𑀁. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁩𑁬𑁬-𑁯. ‘‘𑀧𑀞𑀫𑀸𑀭𑀼𑀧𑁆𑀧𑀓𑀼𑀲𑀮’’𑀦𑁆𑀢𑀺𑀆𑀤𑀺 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁆𑀧𑀺 𑀅𑀭𑀽𑀧𑀸𑀯𑀘𑀭𑀸𑀭𑀫𑁆𑀫𑀡𑁂𑀲𑀼 𑀅𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀦𑀁 𑀲𑁂𑀔𑀸𑀲𑁂𑀔𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀯𑀢𑁆𑀢𑀺𑀆𑀓𑀸𑀭𑀁 𑀧𑀓𑀸𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀓𑀼𑀲𑀮𑀲𑁆𑀲𑀸𑀢𑀺 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀲𑁆𑀲. 𑀯𑀺𑀧𑀸𑀓𑀲𑁆𑀲 𑀧𑀦 𑀔𑀻𑀡𑀸𑀲𑀯𑀸𑀦𑀁 𑀧𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺 𑀢𑀲𑁆𑀲 𑀧𑀼𑀭𑀺𑀫𑀪𑀯𑁂 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸. 𑀅𑀭𑀽𑀧𑀪𑀯𑁂 𑀅𑀢𑀺𑀲𑀦𑁆𑀢𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 𑀪𑀯𑀗𑁆𑀕𑀘𑀺𑀢𑁆𑀢𑀁 𑀦 𑀪𑀸𑀯𑀦𑀸𑀬 𑀧𑀭𑀺𑀲𑀼𑀤𑁆𑀥𑀁 𑀉𑀧𑀝𑁆𑀞𑀸𑀢𑀻𑀢𑀺 𑀆𑀳 ‘‘𑀧𑀞𑀫𑀸𑀭𑀼𑀧𑁆𑀧𑀧𑀸𑀓𑁄’’𑀢𑀺𑀆𑀤𑀺. 𑀧𑀞𑀫𑀁 𑀢𑀼 𑀓𑀺𑀭𑀺𑀬𑀘𑀺𑀢𑁆𑀢𑀁 𑀧𑀼𑀜𑁆𑀜𑀲𑁆𑀲 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺, 𑀯𑀺𑀧𑀸𑀓𑀲𑁆𑀲 𑀤𑀼𑀢𑀺𑀬𑀸𑀭𑀼𑀧𑁆𑀧𑀘𑁂𑀢𑀲𑁄 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀔𑀻𑀡𑀸𑀲𑀯𑀓𑀸𑀮𑁂 𑀓𑀲𑁆𑀲𑀘𑀺 𑀓𑀼𑀲𑀮𑀲𑁆𑀲 𑀅𑀪𑀸𑀯𑀢𑁄 ‘‘𑀦 𑀧𑀼𑀜𑁆𑀜𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀺𑀭𑀺𑀬𑀸𑀲𑀫𑀗𑁆𑀕𑀺𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀯𑀺𑀧𑀸𑀓𑀘𑀺𑀢𑁆𑀢𑀁 𑀦 𑀧𑀯𑀢𑁆𑀢𑀢𑀻𑀢𑀺 ‘‘𑀦 𑀧𑀸𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀔𑀻𑀡𑀸𑀲𑀯𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁, 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀢𑁆𑀣𑀜𑁆𑀘 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀓𑀺𑀭𑀺𑀬𑀘𑀺𑀢𑁆𑀢𑀁 𑀤𑀼𑀢𑀺𑀬𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀞𑀫𑀁 𑀢𑀼 𑀓𑁆𑀭𑀺𑀬𑀸𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺.

𑁩𑁭𑁦-𑁩. ‘‘𑀤𑁆𑀯𑀺𑀥𑀸’’𑀢𑀺 𑀘 𑀯𑀢𑁆𑀯𑀸 𑀢𑀫𑁂𑀯 𑀤𑀼𑀯𑀺𑀥𑀢𑀁, 𑀢𑀺𑀯𑀺𑀥𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀮𑀁 𑀓𑀼𑀲𑀮𑀲𑁆𑀲𑀸’’𑀢𑀺, ‘‘𑀓𑁆𑀭𑀺𑀬𑀲𑁆𑀲𑀸𑀧𑀺 𑀓𑁆𑀭𑀺𑀬𑀸 𑀳𑁄𑀢𑀻’’𑀢𑀺 𑀘 𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀯𑀫𑁂𑀯 …𑀧𑁂… 𑀲𑀺𑀬𑀸𑀢𑀺 𑀧𑀞𑀫𑀸𑀭𑀼𑀧𑁆𑀧𑀘𑀺𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀤𑁆𑀯𑀺𑀥𑀸, 𑀔𑀻𑀡𑀸𑀲𑀯𑀸𑀦𑀜𑁆𑀘 𑀢𑀺𑀥𑀸 𑀆𑀭𑀫𑁆𑀫𑀡𑀁 𑀪𑀯𑀢𑀻𑀢𑀺 𑀅𑀢𑁆𑀣𑁄.

𑁩𑁭𑁪-𑁫. 𑀬𑀁 𑀬𑀁 𑀕𑁄𑀘𑀭𑀁 𑀆𑀭𑀩𑁆𑀪𑀸𑀢𑀺 𑀭𑀽𑀧𑀸𑀭𑀽𑀧𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀻𑀲𑀼 𑀬𑀁 𑀬𑀁 𑀕𑁄𑀘𑀭𑀁 𑀆𑀭𑀩𑁆𑀪. 𑀬𑁂 𑀬𑁂𑀢𑀺 𑀅𑀭𑀽𑀧𑀥𑀫𑁆𑀫𑀸. 𑀬𑁄 𑀦𑀭𑁄𑀢𑀺 𑀬𑁄 𑀕𑀳𑀝𑁆𑀞𑁄, 𑀧𑀩𑁆𑀩𑀚𑀺𑀢𑁄 𑀯𑀸 𑀫𑀸𑀡𑀯𑁄. 𑀓𑀺𑀭𑀸𑀢𑀺 𑀅𑀦𑀼𑀫𑀢𑀺𑀬𑀁. 𑀢𑀲𑁆𑀲 ‘‘𑀉𑀢𑁆𑀢𑀭𑀢𑁂𑀯𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀧𑀸𑀭𑀦𑁆𑀢𑀺 𑀅𑀯𑀲𑀸𑀦𑀁. 𑀢𑀁 𑀇𑀫𑀲𑁆𑀲 𑀧𑀭𑀫𑀦𑀺𑀧𑀼𑀡𑀕𑀫𑁆𑀪𑀻𑀭𑀦𑀬𑀲𑀫𑀗𑁆𑀕𑀺𑀢𑀸𑀬 𑀬𑀸𑀣𑀸𑀯𑀢𑁄 𑀑𑀢𑀭𑀦𑁆𑀢𑁂𑀳𑀺 𑀅𑀓𑀲𑀺𑀭𑁂𑀦 𑀢𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀼𑀧𑁆𑀧𑀸𑀧𑀼𑀡𑁂𑀬𑁆𑀬𑀦𑁆𑀢𑀺 𑀓𑀢𑁆𑀯𑀸 𑀆𑀳 ‘‘𑀤𑀼𑀢𑁆𑀢𑀭’’𑀦𑁆𑀢𑀺. 𑀉𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀫𑀁. 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑁆𑀲 𑀳𑀺 𑀉𑀢𑁆𑀢𑀫𑀢𑀸𑀬 𑀢𑀤𑁂𑀓𑀤𑁂𑀲𑀪𑀽𑀢𑀧𑀸𑀭𑀫𑁆𑀧𑀺 𑀉𑀢𑁆𑀢𑀫𑀫𑁂𑀯 𑀳𑁄𑀢𑀺. 𑀲𑁄𑀢𑀺 𑀲𑁄 𑀲𑀫𑀼𑀢𑁆𑀢𑀺𑀡𑁆𑀡𑀸𑀪𑀺𑀥𑀫𑁆𑀫𑀸𑀯𑀢𑀸𑀭𑀧𑀸𑀭𑁄 𑀦𑀭𑁄. 𑀉𑀢𑁆𑀢𑀭𑀢𑁂𑀯, 𑀦 𑀧𑀦 𑀦 𑀲𑀓𑁆𑀓𑁄𑀢𑀺 𑀢𑀁 𑀉𑀢𑁆𑀢𑀭𑀺𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀆𑀭𑀫𑁆𑀫𑀡𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.