𑁫. 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄

𑀪𑀽𑀫𑀺𑀧𑀼𑀕𑁆𑀕𑀮𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁮𑁨-𑁮. 𑀩𑀼𑀤𑁆𑀥𑀺𑀬𑀸 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀓𑀭𑁄𑀢𑀻𑀢𑀺 𑀩𑀼𑀤𑁆𑀥𑀺𑀯𑀼𑀤𑁆𑀥𑀺𑀓𑀭𑀁. 𑀬𑀲𑁆𑀲 𑀬𑀲𑁆𑀲 𑀦𑀬𑀲𑁆𑀲 𑀓𑀣𑀦𑀁 𑀧𑀝𑀺𑀜𑁆𑀜𑀸𑀢𑀁, 𑀢𑀁 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀺𑀢𑁆𑀢𑀸𑀦𑀁 𑀪𑀽𑀫𑀻𑀲𑀼𑀧𑁆𑀧𑀢𑁆𑀢𑀺’’𑀦𑁆𑀢𑀺. 𑀢𑀁 𑀯𑀢𑁆𑀯𑀸 𑀪𑀽𑀫𑀻𑀦𑀁 𑀆𑀥𑀸𑀭𑀯𑀲𑁂𑀦 𑀧𑀲𑀗𑁆𑀕𑀸𑀕𑀢𑀁 𑀕𑀢𑀺𑀪𑁂𑀤𑀁, 𑀪𑀯𑀪𑁂𑀤𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀤𑁂𑀯𑀸 𑀘𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀘𑀢𑀲𑁆𑀲𑁄𑀧𑀸𑀬𑀪𑀽𑀫𑀺𑀬𑁄’’𑀢𑀺 𑀯𑀢𑁆𑀯𑀸 𑀅𑀲𑀼𑀭𑀕𑀢𑀺𑀬𑀸 𑀧𑁂𑀢𑀕𑀢𑀺𑀬𑀁𑀬𑁂𑀯 𑀲𑀗𑁆𑀕𑀳𑀺𑀢𑀢𑁆𑀢𑀸 ‘‘𑀕𑀢𑀺𑀬𑁄 𑀧𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀫𑀬𑀁 𑀧𑀦 ‘‘𑀢𑀺𑀲𑁆𑀲𑁄𑀯𑀸𑀧𑀸𑀬𑀪𑀽𑀫𑀺𑀬𑁄’’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀫𑀜𑁆𑀜𑀸𑀫. 𑀦 𑀳𑀺 𑀏𑀲 𑀅𑀦𑀸𑀓𑀼𑀮𑀯𑀘𑀦𑁄 𑀆𑀘𑀭𑀺𑀬𑁄 𑀈𑀤𑀺𑀲𑀁 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀁 𑀯𑀺𑀬 𑀲𑀫𑁆𑀫𑁄𑀳𑀚𑀦𑀓𑀁 𑀯𑀘𑀦𑀁 𑀪𑀸𑀲𑀢𑀺. 𑀧𑀸𑀴𑀺𑀬𑀫𑁆𑀧𑀺 𑀳𑀺 𑁋

‘‘𑀧𑀜𑁆𑀘 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀕𑀢𑀺𑀬𑁄. 𑀓𑀢𑀫𑀸 𑀧𑀜𑁆𑀘? 𑀦𑀺𑀭𑀬𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑁂𑀢𑁆𑀢𑀺𑀯𑀺𑀲𑀬𑁄 𑀫𑀦𑀼𑀲𑁆𑀲𑀸 𑀤𑁂𑀯𑀸’’𑀢𑀺 (𑀅. 𑀦𑀺. 𑁯.𑁬𑁮) 𑁋

𑀏𑀯𑀁 𑀢𑀺𑀡𑁆𑀡𑀫𑁂𑀯 𑀅𑀧𑀸𑀬𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀸𑀫𑀭𑀽𑀧𑀸𑀭𑀽𑀧𑀯𑀲𑁂𑀦 𑀢𑀬𑁄 𑀪𑀯𑀸. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀪𑀯𑁂𑀲𑀼. 𑀢𑀺𑀁𑀲𑁂𑀯𑀸𑀢𑀺 𑀘𑀢𑀲𑁆𑀲𑁄 𑀅𑀧𑀸𑀬𑀪𑀽𑀫𑀺𑀬𑁄, 𑀲𑀢𑁆𑀢𑀯𑀺𑀥𑀸 𑀓𑀸𑀫𑀲𑀼𑀕𑀢𑀺𑀪𑀽𑀫𑀺, 𑀲𑁄𑀴𑀲 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀸, 𑀘𑀢𑀲𑁆𑀲𑁄 𑀅𑀭𑀽𑀧𑀪𑀽𑀫𑀺𑀬𑁄𑀢𑀺 𑀏𑀓𑀢𑀺𑀁𑀲𑀪𑀽𑀫𑀻𑀦𑀫𑀦𑁆𑀢𑀭𑁂 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀅𑀥𑀺𑀓𑀸𑀭𑀢𑁆𑀢𑀸 𑀅𑀲𑀜𑁆𑀜𑀪𑀽𑀫𑀺𑀁 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑀸 𑀢𑀺𑀁𑀲𑁂𑀯 𑀪𑀽𑀫𑀺𑀬𑁄𑀢𑀺 𑀅𑀢𑁆𑀣𑁄. 𑀢𑀸𑀲𑀼 𑀢𑀺𑀁𑀲𑁂𑀯 𑀧𑀼𑀕𑁆𑀕𑀮𑀸𑀢𑀺 𑀢𑀸𑀲𑀼 𑀪𑀽𑀫𑀻𑀲𑀼 𑀉𑀧𑁆𑀧𑀦𑁆𑀦𑀸 𑀧𑀼𑀕𑁆𑀕𑀮𑀸 𑀪𑀽𑀫𑀺𑀕𑀡𑀦𑀯𑀲𑁂𑀦 𑀢𑀺𑀁𑀲𑁂𑀯 𑀳𑁄𑀦𑁆𑀢𑀺. 𑀪𑀽𑀫𑀺𑀯𑀲𑁂𑀦 𑀢𑀺𑀁𑀲𑀯𑀺𑀥𑀸𑀧𑀺 𑀧𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀕𑀡𑀦𑀸𑀬 𑀏𑀓𑀽𑀦𑀯𑀻𑀲𑀢𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀽𑀫𑀻𑀲𑁆𑀯𑁂𑀢𑀸𑀲𑀽’’𑀢𑀺𑀆𑀤𑀺.

𑀧𑀝𑀺𑀲𑀦𑁆𑀥𑀺𑀓𑀘𑀺𑀢𑁆𑀢𑀸𑀦𑀦𑁆𑀢𑀺 𑀤𑀲 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀻𑀢𑀺 𑀇𑀫𑁂𑀲𑀁 𑀏𑀓𑀽𑀦𑀯𑀻𑀲𑀢𑀺𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀁 𑀯𑀲𑁂𑀦. 𑀅𑀲𑀜𑁆𑀜𑀻𑀦𑀫𑀘𑀺𑀢𑁆𑀢𑀓𑀸𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀅𑀘𑀺𑀢𑁆𑀢𑀓𑀸 𑀧𑀝𑀺𑀲𑀦𑁆𑀥𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀲𑀜𑁆𑀜𑀲𑀢𑁆𑀢𑀸 𑀤𑁂𑀯𑀸 𑀅𑀳𑁂𑀢𑀼𑀓𑀸 𑀅𑀦𑀸𑀳𑀸𑀭𑀓𑀸 𑀅𑀨𑀲𑁆𑀲𑀓𑀸 𑀅𑀯𑁂𑀤𑀦𑀓𑀸 𑀅𑀲𑀜𑁆𑀜𑀓𑀸 𑀅𑀘𑁂𑀢𑀦𑀓𑀸 𑀅𑀘𑀺𑀢𑁆𑀢𑀓𑀸 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺.

𑀬𑀤𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀻𑀲𑀢𑀺 𑀧𑀼𑀕𑁆𑀕𑀮𑀸, 𑀓𑀣𑀁 𑀪𑀽𑀫𑀺𑀯𑀲𑁂𑀦 𑀢𑀺𑀁𑀲𑀸𑀢𑀺 𑀯𑀼𑀢𑁆𑀢𑀸. 𑀏𑀓𑀢𑀺𑀁𑀲𑀸𑀢𑀺 𑀳𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀇𑀥𑀸’’𑀢𑀺𑀆𑀤𑀺.

𑀦 𑀯𑀺𑀚𑁆𑀚𑀢𑀺 𑀳𑁂𑀢𑀼 𑀇𑀫𑁂𑀲𑀦𑁆𑀢𑀺 𑀅𑀳𑁂𑀢𑀽, 𑀤𑀼𑀯𑁂, 𑀢𑀻𑀡𑀺 𑀘 𑀳𑁂𑀢𑀽 𑀇𑀫𑁂𑀲𑀦𑁆𑀢𑀺 𑀤𑁆𑀯𑀺𑀢𑀺𑀳𑁂𑀢𑀽, 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀳𑁂𑀢𑀼𑀓𑀸, 𑀤𑀼𑀳𑁂𑀢𑀼𑀓𑀸, 𑀢𑀺𑀳𑁂𑀢𑀼𑀓𑀸 𑀘𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀳𑁂𑀢𑀼𑀓𑀸 𑀆𑀧𑀸𑀬𑀺𑀓𑀸 𑀘, 𑀏𑀓𑀘𑁆𑀘𑁂 𑀪𑀽𑀫𑀤𑁂𑀯𑀸, 𑀫𑀦𑀼𑀲𑁆𑀲𑁂𑀲𑀼 𑀚𑀘𑁆𑀘𑀦𑁆𑀥𑀚𑀘𑁆𑀘𑀩𑀥𑀺𑀭𑀚𑀘𑁆𑀘𑀼𑀫𑁆𑀫𑀢𑁆𑀢𑀓𑀦𑀧𑀼𑀁𑀲𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀤𑀬𑁄 𑀘. 𑀯𑀼𑀢𑁆𑀢𑀸𑀯𑀲𑁂𑀲𑀸 𑀓𑀸𑀫𑀲𑀼𑀕𑀢𑀺𑀯𑀸𑀲𑀺𑀦𑁄𑀯 𑀤𑀼𑀳𑁂𑀢𑀼𑀓𑀸. 𑀢𑀺𑀳𑁂𑀢𑀼𑀓𑀸 𑀧𑀦 𑀓𑀸𑀫𑀲𑀼𑀕𑀢𑀺𑀯𑀸𑀲𑀺𑀦𑁄𑀯. 𑀅𑀭𑀺𑀬𑀸 𑀧𑀦 𑀅𑀝𑁆𑀞𑀸𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀻𑀦𑀁, 𑀘𑀢𑀼𑀦𑁆𑀦𑀜𑁆𑀘 𑀅𑀭𑀺𑀬𑀨𑀮𑀲𑀫𑀗𑁆𑀕𑀻𑀦𑀁 𑀯𑀲𑁂𑀦 𑀅𑀝𑁆𑀞 𑀅𑀭𑀺𑀬𑀧𑀼𑀕𑁆𑀕𑀮𑀸. 𑀦𑀦𑀼 𑀘 𑀅𑀭𑀺𑀬𑀸𑀧𑀺 𑀢𑀺𑀳𑁂𑀢𑀼𑀓𑀸𑀬𑁂𑀯𑀸𑀢𑀺? 𑀲𑀘𑁆𑀘𑀁, 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀧𑀦 𑀧𑀢𑁆𑀯𑀸 𑀢𑁂𑀲𑀁 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄 𑀯𑀺𑀲𑀼𑀁𑀬𑁂𑀯 𑀉𑀤𑁆𑀥𑀝𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁮𑁯-𑁯𑁨. ‘‘𑀪𑀽𑀫𑀻𑀲𑀼𑀧𑁆𑀧𑀢𑁆𑀢𑀺𑀁 𑀪𑀡𑀢𑁄 𑀫𑁂 𑀦𑀺𑀩𑁄𑀥𑀣𑀸’’𑀢𑀺 𑀲𑀼𑀢𑁆𑀯𑀸 𑀘𑁄𑀤𑀓𑁄 ‘‘𑀢𑀺𑀁𑀲𑀪𑀽𑀫𑀻𑀲𑀽’’𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀲𑀁 𑀪𑀽𑀫𑀻𑀦𑀁 𑀲𑀸𑀥𑀸𑀭𑀡𑀘𑀺𑀢𑁆𑀢𑀸𑀦𑀺 𑀧𑀼𑀘𑁆𑀙𑀢𑀺, 𑀇𑀢𑀭𑁄 ‘‘𑀘𑀼𑀤𑁆𑀤𑀲𑁂𑀯𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀢𑁆𑀣 𑀅𑀝𑁆𑀞 𑀧𑀭𑀺𑀢𑁆𑀢𑀓𑀼𑀲𑀮𑀸𑀦𑀺, 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺, 𑀉𑀤𑁆𑀥𑀘𑁆𑀘𑀲𑀳𑀕𑀢𑀁, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘𑀸𑀢𑀺 𑀘𑀼𑀤𑁆𑀤𑀲𑁂𑀯, 𑀦 𑀊𑀦𑀸𑀦𑀺 𑀦𑀸𑀥𑀺𑀓𑀸𑀦𑀺, 𑀲𑀩𑁆𑀩𑀸𑀲𑀼 𑀢𑀺𑀁𑀲𑀪𑀽𑀫𑀻𑀲𑀼 𑀳𑁄𑀦𑁆𑀢𑀺, 𑀲𑀩𑁆𑀩𑀪𑀽𑀫𑀻𑀦𑀁 𑀲𑀸𑀥𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄.

𑀲𑀤𑀸…𑀧𑁂… 𑀲𑀺𑀬𑀼𑀦𑁆𑀢𑀺 𑀤𑁆𑀯𑁂 𑀤𑁄𑀲𑀫𑀽𑀮𑀸𑀦𑀺, 𑀓𑀼𑀲𑀮𑀯𑀺𑀧𑀸𑀓𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀺 𑀅𑀝𑁆𑀞𑀸𑀭𑀲 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀻𑀢𑀺 𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀲𑀤𑀸 𑀓𑀸𑀫𑁂𑀬𑁂𑀯 𑀪𑀯𑁂 𑀲𑀺𑀬𑀼𑀁, 𑀦 𑀓𑀤𑀸𑀘𑀺 𑀅𑀜𑁆𑀜𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀩𑁆𑀭𑀳𑁆𑀫𑀽𑀦𑀫𑁆𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀓𑀸𑀫𑀪𑀯𑁂 𑀅𑀦𑀺𑀝𑁆𑀞𑀭𑀽𑀧𑀸𑀤𑀬𑁄 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑁆𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀢𑁂𑀲𑀁 𑀅𑀪𑀸𑀯𑀢𑁄𑀢𑀺 𑀓𑀸𑀫𑀪𑀯𑁂𑀬𑁂𑀯 𑀦𑀺𑀬𑀫𑀺𑀢𑀸𑀦𑀺. 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀧𑀜𑁆𑀘 𑀭𑀽𑀧𑀸𑀯𑀘𑀭𑀪𑀯𑁂𑀬𑁂𑀯 𑀲𑀺𑀬𑀼𑀁, 𑀘𑀢𑁆𑀢𑀸𑀭𑁄 𑀘 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸 𑀅𑀭𑀽𑀧𑀻𑀲𑀽𑀢𑀺 𑀆𑀳 ‘‘𑀧𑀜𑁆𑀘 𑀭𑀽𑀧𑀪𑀯𑁂’’𑀢𑀺𑀆𑀤𑀺.

𑀓𑀸𑀫 …𑀧𑁂… 𑀪𑀯𑀦𑁆𑀢𑀻𑀢𑀺 𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀘𑁂𑀯 𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀘 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀦𑀺 𑀯𑁄𑀝𑁆𑀞𑀩𑁆𑀩𑀦𑀯𑀚𑁆𑀚𑀸𑀦𑀺 𑀘 𑀤𑁆𑀯𑁂 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀧𑀞𑀫𑀫𑀕𑁆𑀕𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀝𑁆𑀞𑀸𑀭𑀲 𑀘𑀺𑀢𑁆𑀢𑀸𑀦𑀺 𑀓𑀸𑀫𑀭𑀽𑀧𑀪𑀯𑁂𑀬𑁂𑀯 𑀪𑀯𑀦𑁆𑀢𑀺, 𑀦 𑀅𑀭𑀽𑀧𑀪𑀯𑁂. 𑀢𑀢𑁆𑀣 𑀳𑀺 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀯𑀢𑁆𑀣𑀼𑀤𑁆𑀯𑀸𑀭𑀯𑀺𑀭𑀳𑀢𑁄, 𑀳𑀲𑀺𑀢𑀼𑀧𑁆𑀧𑀸𑀤𑁄 𑀏𑀓𑀦𑁆𑀢𑀯𑀢𑁆𑀣𑀼𑀦𑀺𑀲𑁆𑀲𑀬𑀢𑁆𑀢𑀸, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀧𑀭𑀢𑁄𑀖𑁄𑀲𑀧𑀘𑁆𑀘𑀬𑀸𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑀢𑁄 𑀦 𑀉𑀧𑁆𑀧𑀚𑁆𑀚𑀢𑀺. 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀸𑀢𑀺 𑀅𑀝𑁆𑀞 𑀧𑀭𑀺𑀢𑁆𑀢𑀓𑀼𑀲𑀮𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀭𑀽𑀧𑀓𑀼𑀲𑀮𑀸𑀦𑀺, 𑀧𑀞𑀫𑀫𑀕𑁆𑀕𑀯𑀚𑁆𑀚𑀸𑀦𑀺 𑀲𑀢𑁆𑀢 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺, 𑀧𑀝𑀺𑀖𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀺 𑀘 𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀅𑀳𑁂𑀢𑀼𑀓𑀓𑀺𑀭𑀺𑀬𑀸𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀺 𑀦𑀯 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀻𑀢𑀺 𑀏𑀯𑀁 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀢𑀻𑀲𑀼 𑀪𑀯𑁂𑀲𑀼 𑀳𑁄𑀦𑁆𑀢𑀺.

𑁧𑁯𑁩-𑁨𑁦𑁪. 𑀏𑀯𑀁 𑀪𑀯𑀯𑀲𑁂𑀦 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀸𑀮𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀞𑀧𑁂𑀢𑁆𑀯𑀸 𑀧𑀦𑀸’’𑀢𑀺𑀆𑀤𑀺. 𑀲𑀩𑁆𑀩𑀸𑀲𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀸, 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀘𑀺𑀢𑁆𑀢𑀸𑀦𑀺, 𑀅𑀦𑀸𑀕𑀸𑀫𑀺𑀨𑀮𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀓𑀺𑀭𑀺𑀬𑀸𑀢𑀺 𑀢𑁂𑀭𑀲𑁂𑀯 𑀘𑀺𑀢𑁆𑀢𑀸𑀦𑀺 𑀅𑀧𑀸𑀬𑀭𑀳𑀺𑀢𑀸𑀲𑀼 𑀙𑀩𑁆𑀩𑀻𑀲𑀪𑀽𑀫𑀻𑀲𑀼 𑀳𑁄𑀦𑁆𑀢𑀺 𑀅𑀧𑀸𑀬𑁂𑀲𑀼 𑀯𑀺𑀧𑀸𑀓𑀸𑀯𑀭𑀡𑀲𑀩𑁆𑀪𑀸𑀯𑁂 𑀏𑀢𑁂𑀲𑀁 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀅𑀧𑀭𑀸𑀦𑀺 𑀙 𑀘𑀺𑀢𑁆𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀦𑀺 𑀧𑀦 𑀭𑀽𑀧𑀪𑀯𑀲𑀸𑀥𑀸𑀭𑀡𑀸𑀦𑀁 𑀧𑀜𑁆𑀘𑀧𑀭𑀺𑀢𑁆𑀢𑀯𑀺𑀧𑀸𑀓𑀸𑀦𑀁, 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀬𑀸 𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀜𑁆𑀘 𑀘𑀺𑀢𑁆𑀢𑀸𑀦𑀻𑀢𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀧𑀜𑁆𑀘 𑀘𑀺𑀢𑁆𑀢𑀸𑀦𑀺. 𑀢𑀸𑀦𑀺 𑀳𑀺 𑀧𑀜𑁆𑀘𑀲𑀼 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀻𑀲𑀼 𑀦 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀣 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸𑀦𑀫𑁂𑀯 𑀅𑀥𑀺𑀯𑀼𑀢𑁆𑀣𑀢𑁆𑀢𑀸, 𑀢𑁂𑀲𑀜𑁆𑀘 𑀧𑀞𑀫𑀫𑀕𑁆𑀕𑁂𑀦𑁂𑀯 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑀢𑁆𑀢𑀸.

𑀅𑀧𑀭𑀸𑀦𑀺 𑀤𑀼𑀯𑁂𑀢𑀺 𑀢𑀢𑀺𑀬𑀸𑀭𑀼𑀧𑁆𑀧𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺. 𑀢𑀸𑀦𑀺 𑀳𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂𑀲𑀼 𑀅𑀢𑀺𑀓𑁆𑀓𑀦𑁆𑀢𑀸𑀭𑀫𑁆𑀫𑀡𑀢𑁆𑀢𑀸, 𑀅𑀧𑀸𑀬𑁂𑀲𑀼 𑀘 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀘𑀢𑀼𑀯𑀻𑀲𑀢𑀻𑀪𑀽𑀫𑀺𑀲𑀼 𑀤𑁆𑀯𑁂 𑀘𑀸𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀼𑀲𑀮𑀓𑀺𑀭𑀺𑀬𑀸𑀯𑀲𑁂𑀦 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺. 𑀢𑁂𑀯𑀻𑀲𑀪𑀽𑀫𑀺𑀲𑀼 𑀤𑁆𑀯𑁂𑀬𑁂𑀯𑀸𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺.

𑀏𑀓𑀸𑀤𑀲𑀯𑀺𑀥𑀦𑁆𑀢𑀺 𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸 𑀳𑀲𑀺𑀢𑀼𑀧𑁆𑀧𑀸𑀤𑁄𑀢𑀺 𑀏𑀓𑀸𑀤𑀲. 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀬𑀸𑀯 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀘𑀢𑁆𑀢𑀸𑀭𑀺 𑀘 𑀘𑀺𑀢𑁆𑀢𑀸𑀦𑀺 𑀲𑀼𑀤𑁆𑀥𑀸𑀯𑀸𑀲𑀅𑀧𑀸𑀬𑀯𑀚𑁆𑀚𑀸𑀲𑀼 𑀏𑀓𑀯𑀻𑀲𑀢𑀺𑀪𑀽𑀫𑀻𑀲𑀼 𑀪𑀯𑀦𑁆𑀢𑀺. 𑀏𑀓𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁 𑀲𑀼𑀤𑁆𑀥𑀸𑀯𑀸𑀲𑀅𑀧𑀸𑀬𑀅𑀭𑀽𑀧𑀪𑀽𑀫𑀺𑀯𑀚𑁆𑀚𑁂𑀲𑀼 𑀲𑀢𑁆𑀢𑀭𑀲𑀲𑀼 𑀪𑀽𑀫𑀻𑀲𑀼 𑀚𑀸𑀬𑀢𑀺. 𑀤𑁆𑀯𑁂 𑀤𑁄𑀲𑀫𑀽𑀮𑀸𑀦𑀺, 𑀓𑀼𑀲𑀮𑀯𑀺𑀧𑀸𑀓𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺, 𑀲𑀢𑁆𑀢 𑀅𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀤𑁆𑀯𑀸𑀤𑀲 𑀘𑀺𑀢𑁆𑀢𑀸𑀦𑀺 𑀫𑀳𑀕𑁆𑀕𑀢𑀪𑀽𑀫𑀺𑀯𑀚𑁆𑀚𑀸𑀲𑀼 𑀏𑀓𑀸𑀤𑀲𑀲𑀼 𑀓𑀸𑀫𑀪𑀽𑀫𑀻𑀲𑀼 𑀚𑀸𑀬𑀦𑁆𑀢𑀺. 𑀅𑀝𑁆𑀞 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀓𑀸𑀫𑀸𑀯𑀘𑀭𑀤𑁂𑀯𑀫𑀦𑀼𑀲𑁆𑀲𑀯𑀲𑁂𑀦 𑀲𑀢𑁆𑀢𑀪𑀽𑀫𑀻𑀲𑀼 𑀚𑀸𑀬𑀦𑁆𑀢𑀺. 𑀙𑀲𑀼 𑀪𑀽𑀫𑀺𑀲𑀽𑀢𑀺 𑀯𑁂𑀳𑀧𑁆𑀨𑀮𑀲𑀼𑀤𑁆𑀥𑀸𑀯𑀸𑀲𑀲𑀗𑁆𑀔𑀸𑀢𑀸𑀲𑀼 𑀙𑀲𑀼 𑀧𑀜𑁆𑀘𑀫𑀚𑁆𑀛𑀸𑀦𑀪𑀽𑀫𑀻𑀲𑀼.

𑀘𑀢𑁆𑀢𑀸𑀭𑀺…𑀧𑁂… 𑀪𑀽𑀫𑀺𑀲𑀽𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀧𑀸𑀓𑁄 𑀧𑀭𑀺𑀢𑁆𑀢𑀲𑀼𑀪𑀅𑀧𑁆𑀧𑀫𑀸𑀡𑀲𑀼𑀪𑀲𑀼𑀪𑀓𑀺𑀡𑁆𑀳𑀯𑀲𑁂𑀦 𑀢𑀻𑀲𑀼 𑀪𑀽𑀫𑀻𑀲𑀼 𑀚𑀸𑀬𑀢𑀺, 𑀤𑀼𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑁄, 𑀢𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑁄 𑀘 𑀧𑀭𑀺𑀢𑁆𑀢𑀸𑀪𑀸𑀅𑀧𑁆𑀧𑀫𑀸𑀡𑀸𑀪𑀸𑀆𑀪𑀲𑁆𑀲𑀭𑀯𑀲𑁂𑀦 𑀢𑀻𑀲𑀼 𑀪𑀽𑀫𑀻𑀲𑀼, 𑀧𑀞𑀫𑀚𑁆𑀛𑀸𑀦𑀯𑀺𑀧𑀸𑀓𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀯𑀲𑁂𑀦 𑀢𑀻𑀲𑀼 𑀪𑀽𑀫𑀻𑀲𑀼 𑀳𑁄𑀢𑀻𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺 𑀏𑀓𑁂𑀓𑀯𑀲𑁂𑀦 𑀢𑀻𑀲𑀼 𑀢𑀻𑀲𑀼 𑀪𑀽𑀫𑀻𑀲𑀼 𑀚𑀸𑀬𑀦𑁆𑀢𑀺.

𑁨𑁦𑁬-𑁯. 𑀏𑀯𑀁 𑀏𑀢𑁆𑀢𑀓𑀸𑀦𑁂𑀯 𑀘𑀺𑀢𑁆𑀢𑀸𑀦𑀺 𑀏𑀢𑁆𑀢𑀓𑀸𑀲𑀼 𑀪𑀽𑀫𑀻𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀘𑀺𑀢𑁆𑀢𑀦𑀺𑀬𑀫𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀏𑀢𑁆𑀢𑀓𑀸𑀲𑀼 𑀏𑀯 𑀪𑀽𑀫𑀻𑀲𑀼 𑀏𑀢𑁆𑀢𑀓𑀸𑀦𑁂𑀯 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀪𑀽𑀫𑀺𑀦𑀺𑀬𑀫𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀮𑀸𑀓𑀼𑀲𑀮𑀸 𑀓𑀸𑀫𑁂’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀸𑀫𑁂 𑀓𑀼𑀲𑀮𑀸𑀓𑀼𑀲𑀮𑀸 𑀯𑀻𑀲𑀢𑀺, 𑀢𑁂𑀲𑀁 𑀧𑀦𑁆𑀦𑀭𑀲 𑀅𑀳𑁂𑀢𑀼𑀓𑀸 𑀧𑀸𑀓𑀸, 𑀆𑀯𑀚𑁆𑀚𑀦𑀤𑁆𑀯𑀬𑀜𑁆𑀘𑀸𑀢𑀺 𑀲𑀢𑁆𑀢𑀢𑀺𑀁𑀲𑁂𑀯 𑀫𑀸𑀦𑀲𑀸 𑀦𑀭𑀓𑀸𑀤𑀻𑀲𑀼 𑀘𑀢𑀽𑀲𑀼𑀧𑀺 𑀅𑀧𑀸𑀬𑁂𑀲𑀼 𑀚𑀸𑀬𑀭𑁂. 𑀅𑀯𑀲𑁂𑀲𑀸𑀦𑀺 𑀧𑀦 𑀲𑀢𑁆𑀢𑀭𑀲 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺, 𑀧𑀜𑁆𑀘𑀢𑀺𑀁𑀲 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀤𑁆𑀯𑁂𑀧𑀜𑁆𑀜𑀸𑀲 𑀫𑀸𑀦𑀲𑀸 𑀓𑀤𑀸𑀘𑀺𑀧𑀺 𑀢𑁂𑀲𑀼 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀅𑀪𑀽𑀫𑀺𑀪𑀸𑀯𑀢𑁄𑀢𑀺 𑀅𑀢𑁆𑀣𑁄.

𑀅𑀲𑀻𑀢𑀺 𑀳𑀤𑀬𑀸𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀺 𑀅𑀲𑀻𑀢𑀺 𑀘𑀺𑀢𑁆𑀢𑀸𑀦𑀺. 𑀖𑀸𑀦𑀸𑀤𑀺𑀯𑀺𑀜𑁆𑀜𑀸𑀡𑀢𑁆𑀢𑀬𑀦𑁆𑀢𑀺 𑀓𑀼𑀲𑀮𑀯𑀺𑀧𑀸𑀓𑀖𑀸𑀦𑀸𑀤𑀺𑀯𑀺𑀜𑁆𑀜𑀸𑀡𑀢𑁆𑀢𑀬𑀁. ‘‘𑀅𑀧𑀼𑀜𑁆𑀜𑀚𑀸 𑀧𑀸𑀓𑀸’’𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀲𑀩𑁆𑀩𑁂𑀲𑀫𑁂𑀯 𑀕𑀳𑀺𑀢𑀢𑁆𑀢𑀸 𑀖𑀸𑀦𑀸𑀤𑀺𑀯𑀺𑀜𑁆𑀜𑀸𑀡𑀢𑁆𑀢𑀬𑀁 𑀅𑀕𑁆𑀕𑀳𑀺𑀢𑀯𑀺𑀲𑁂𑀲𑀫𑁆𑀧𑀺 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀓𑀼𑀲𑀮𑀯𑀺𑀧𑀸𑀓𑀫𑁂𑀯 𑀯𑀺𑀜𑁆𑀜𑀸𑀬𑀢𑀺.

𑁨𑁧𑁩. 𑀤𑁄𑀫𑀦𑀲𑁆𑀲𑀦𑁆𑀢𑀺 𑀤𑁄𑀫𑀦𑀲𑁆𑀲𑀲𑀳𑀕𑀢𑀁. 𑀓𑁆𑀭𑀺𑀬𑀸 𑀘 𑀤𑁆𑀯𑁂𑀢𑀺 𑀯𑁄𑀝𑁆𑀞𑀩𑁆𑀩𑀦𑀯𑀚𑁆𑀚𑀺𑀢𑀸 𑀤𑁆𑀯𑁂 𑀅𑀳𑁂𑀢𑀼𑀓𑀓𑀺𑀭𑀺𑀬𑀸.

𑁨𑁧𑁪. 𑀪𑀽𑀫𑀺𑀯𑀲𑁂𑀦𑁂𑀯𑀸𑀢𑀺 𑀧𑀼𑀕𑁆𑀕𑀮𑁂 𑀅𑀦𑀸𑀫𑀲𑀺𑀢𑁆𑀯𑀸 𑀓𑁂𑀯𑀮𑀁 𑀪𑀽𑀫𑀺𑀯𑀲𑁂𑀦. 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀘 𑀪𑀽𑀫𑀺𑀯𑀲𑁂𑀦 𑀘 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀁 𑀯𑀺𑀪𑀸𑀯𑀬𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁧𑁬-𑁮. 𑀧𑀜𑁆𑀘𑀪𑀽𑀫𑀺𑀲𑀽𑀢𑀺 𑀘𑀢𑀼𑀭𑀸𑀧𑀸𑀬𑀫𑀦𑀼𑀲𑁆𑀲𑀯𑀲𑁂𑀦 𑀧𑀜𑁆𑀘𑀪𑀽𑀫𑀻𑀲𑀼. 𑀅𑀳𑁂𑀢𑀼𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀲𑀤𑀺𑀲𑀢𑀤𑀸𑀭𑀫𑁆𑀫𑀡𑀯𑀲𑁂𑀦 ‘‘𑀲𑀢𑁆𑀢𑀢𑀺𑀁𑀲𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀅𑀜𑁆𑀜𑀓𑀫𑁆𑀫𑁂𑀦 𑀧𑀦 𑀤𑁆𑀯𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀲𑁆𑀲𑀸𑀧𑀺 𑀲𑀫𑁆𑀪𑀯𑀢𑁄 𑀏𑀓𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺. 𑀆𑀘𑀭𑀺𑀬𑀚𑁄𑀢𑀺𑀧𑀸𑀮𑀢𑁆𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁂𑀦 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑁂𑀳𑀺𑀧𑀺 𑀲𑀤𑁆𑀥𑀺𑀁 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀳𑁂𑀢𑀼𑀓𑀲𑁆𑀲 𑀯𑀼𑀢𑁆𑀢𑁂𑀳𑀻𑀢𑀺 𑀅𑀳𑁂𑀢𑀼𑀓𑀲𑀢𑁆𑀢𑀲𑁆𑀲 𑀯𑀼𑀢𑁆𑀢𑁂𑀳𑀺 𑀲𑀢𑁆𑀢𑀢𑀺𑀁𑀲𑀫𑀸𑀦𑀲𑁂𑀳𑀺 𑀲𑀳. 𑀦𑀯 𑀓𑁆𑀭𑀺𑀬𑀸𑀢𑀺 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀸, 𑀳𑀲𑀺𑀢𑀼𑀧𑁆𑀧𑀸𑀤𑁄 𑀘𑀸𑀢𑀺 𑀇𑀫𑀸𑀦𑀺 𑀅𑀲𑀸𑀥𑀸𑀭𑀡𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀦𑀯.

𑁨𑁨𑁦-𑁧. ‘‘𑀘𑀢𑀼𑀧𑀜𑁆𑀜𑀸𑀲 𑀫𑀸𑀦𑀲𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀲𑀭𑀽𑀧𑀢𑁄 𑀤𑀲𑁆𑀲𑀦𑀢𑁆𑀣𑀁 𑀆𑀳 ‘‘𑀤𑁆𑀯𑀺𑀳𑁂𑀢𑀼𑀓𑀲𑁆𑀲𑀸’’𑀢𑀺𑀆𑀤𑀺. 𑀧𑀼𑀦 ‘‘𑀘𑀢𑀼𑀧𑀜𑁆𑀜𑀸𑀲𑀸’’𑀢𑀺𑀆𑀤𑀺 𑀧𑀦 𑀦𑀺𑀕𑀫𑀦𑀁.

𑁨𑁨𑁩-𑁪. 𑀧𑀜𑁆𑀜𑀸𑀲𑁂𑀯𑀲𑁆𑀲 𑀘𑀺𑀢𑁆𑀢𑀸𑀦𑀻𑀢𑀺 𑀢𑀺𑀳𑁂𑀢𑀼𑀓𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀼𑀢𑁆𑀢𑀘𑀢𑀼𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀯𑀚𑁆𑀚𑀸𑀦𑀺 𑀏𑀓𑀽𑀦𑀧𑀜𑁆𑀜𑀸𑀲, 𑀲𑁄𑀢𑀸𑀧𑀢𑁆𑀢𑀺𑀨𑀮𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀜𑀸𑀲𑁂𑀯 𑀘𑀺𑀢𑁆𑀢𑀸𑀦𑀺 𑀅𑀲𑁆𑀲 𑀓𑀸𑀫𑀸𑀯𑀘𑀭𑀲𑁆𑀲 𑀲𑁄𑀢𑀸𑀧𑀦𑁆𑀦𑀤𑁂𑀳𑀺𑀦𑁄 𑀚𑀸𑀬𑀦𑁆𑀢𑁂. 𑀦𑀯𑀢𑀺𑀁𑀲𑁂𑀯𑀸𑀢𑀺 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀘𑀺𑀢𑁆𑀢𑀸𑀦𑀺. 𑀧𑀞𑀫𑀁 𑀨𑀮𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁.

𑁨𑁨𑁫-𑁮. 𑀤𑀼𑀢𑀺𑀬𑀜𑁆𑀘 𑀨𑀮𑀁 𑀳𑀺𑀢𑁆𑀯𑀸𑀢𑀺 𑀲𑀓𑀤𑀸𑀕𑀸𑀫𑀺𑀨𑀮𑀁 𑀳𑀺𑀢𑁆𑀯𑀸. 𑀘-𑀲𑀤𑁆𑀤𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀨𑀮𑁂𑀦 𑀲𑀳 𑀬𑀸𑀦𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀅𑀦𑀸𑀕𑀸𑀫𑀺𑀲𑁆𑀲 𑀲𑀢𑁆𑀢𑀲𑁆𑀲 𑀚𑀸𑀬𑀦𑁆𑀢𑀺. 𑀘𑀢𑁆𑀢𑀸𑀮𑀻𑀲𑀜𑁆𑀘 𑀘𑀢𑁆𑀢𑀸𑀭𑀻𑀢𑀺 𑀢𑁂𑀯𑀻𑀲𑀢𑀺 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀯𑀻𑀲𑀢𑀺 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺, 𑀅𑀭𑀳𑀢𑁆𑀢𑀨𑀮𑀜𑁆𑀘𑀸𑀢𑀺 𑀘𑀢𑀼𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺. 𑀲𑀓𑀁 𑀲𑀓𑀦𑁆𑀢𑀺 ‘‘𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀲𑀓𑀤𑀸𑀕𑀸𑀫𑀺𑀦𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀕𑁆𑀕𑀘𑀺𑀢𑁆𑀢𑀁. 𑀓𑀲𑁆𑀫𑀸 𑀧𑀦 𑀢𑁂𑀲𑀁 𑀏𑀓𑁂𑀓𑀫𑁂𑀯 𑀘𑀺𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀳𑀺 𑀢𑁂’’𑀢𑀺. 𑀧𑀜𑁆𑀘𑀢𑀺𑀁𑀲𑁂𑀯𑀸𑀢𑀺 𑀲𑀢𑁆𑀢𑀭𑀲 𑀓𑀸𑀫𑀭𑀽𑀧𑀸𑀭𑀽𑀧𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀧𑀝𑀺𑀖𑀤𑁆𑀯𑀬𑀯𑀚𑁆𑀚𑀸𑀦𑀺 𑀤𑀲 𑀅𑀓𑀼𑀲𑀮𑀸𑀦𑀺, 𑀭𑀽𑀧𑀪𑀯𑁂 𑀮𑀩𑁆𑀪𑀫𑀸𑀦𑀓𑀸𑀦𑀺 𑀧𑀜𑁆𑀘 𑀅𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀺, 𑀆𑀯𑀚𑁆𑀚𑀦𑀤𑁆𑀯𑀬𑀁, 𑀧𑀞𑀫𑀚𑁆𑀛𑀸𑀦𑀯𑀺𑀧𑀸𑀓𑁄 𑀘𑀸𑀢𑀺 𑀧𑀜𑁆𑀘𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀢𑀻𑀲𑀼 𑀧𑀞𑀫𑀚𑁆𑀛𑀸𑀦𑀪𑀽𑀫𑀻𑀲𑀼 𑀧𑀼𑀣𑀼𑀚𑁆𑀚𑀦𑀲𑁆𑀲 𑀚𑀸𑀬𑀦𑁆𑀢𑀺.

𑁨𑁩𑁨-𑁫. 𑀳𑀺𑀢𑁆𑀯𑀸 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀧𑀞𑀫𑀨𑀮𑀲𑁆𑀲 𑀕𑀳𑀡𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀅𑀧𑀼𑀜𑁆𑀜𑀧𑀜𑁆𑀘𑀓𑀁 𑀳𑀺𑀢𑁆𑀯𑀸 𑀧𑀞𑀫𑀁 𑀨𑀮𑀁 𑀕𑀳𑁂𑀢𑁆𑀯𑀸 𑀘𑀸𑀢𑀺 𑀅𑀢𑁆𑀣𑁄. 𑀅𑀧𑀼𑀜𑁆𑀜𑀧𑀜𑁆𑀘𑀓𑀦𑁆𑀢𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀯𑀲𑁂𑀦 𑀧𑀜𑁆𑀘 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑁄𑀢𑀸𑀧𑀦𑁆𑀦𑀲𑁆𑀲 𑀯𑀼𑀢𑁆𑀢𑁂𑀲𑀼. 𑀢𑀢𑁆𑀣𑁂𑀯𑀸𑀢𑀺 𑀲𑀓𑀤𑀸𑀕𑀸𑀫𑀺𑀲𑁆𑀲 𑀯𑀼𑀢𑁆𑀢𑁂𑀲𑀼. 𑀧𑀼𑀜𑁆𑀜𑀚𑀁 𑀲𑀫𑁆𑀧𑀝𑀺𑀘𑁆𑀙𑀦𑀁 𑀲𑀦𑁆𑀢𑀻𑀭𑀡𑀤𑁆𑀯𑀬𑀜𑁆𑀘𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁩𑁭. 𑀏𑀯𑀁 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀫𑁂𑀯 𑀯𑀲𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀤𑀼𑀢𑀺𑀬𑀚𑁆𑀛𑀸𑀦𑀢𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀸𑀦𑀁 𑀏𑀓𑀲𑀢𑁆𑀢𑀲𑁆𑀲𑁂𑀯 𑀅𑀲𑀫𑁆𑀪𑀯𑁂𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑀢𑀮𑁂 𑀦𑀺𑀩𑁆𑀩𑀢𑁆𑀢𑁂 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀧𑀼𑀣𑀼𑀚𑁆𑀚𑀦𑀸𑀤𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀢𑁄 𑀕𑀳𑁂𑀢𑁆𑀯𑀸 ‘‘𑀤𑀼𑀢𑀺𑀬𑀚𑁆𑀛𑀸𑀦𑀢𑀢𑀺𑀬𑀚𑁆𑀛𑀸𑀦𑀧𑀸𑀓𑀢𑁄’’𑀢𑀺 𑀯𑀼𑀢𑁆𑀢𑀁.

𑁨𑁪𑁨. 𑀧𑀭𑀺𑀢𑁆𑀢𑀲𑀼𑀪𑀸𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀓𑀦𑀺𑀝𑁆𑀞𑀸 𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀻𑀲𑀼 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀯𑀼𑀢𑁆𑀢𑀕𑀡𑀦𑀸𑀬 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀧𑀭𑀺𑀢𑁆𑀢𑀓𑀲𑀼𑀪𑀸𑀤𑀻𑀦’’𑀦𑁆𑀢𑀺𑀆𑀤𑀺.

𑁨𑁪𑁭. 𑀘𑀢𑀼𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀻𑀢𑀺 𑀅𑀝𑁆𑀞𑀧𑀭𑀺𑀢𑁆𑀢𑀓𑀼𑀲𑀮𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀭𑀽𑀧𑀓𑀼𑀲𑀮𑀸𑀦𑀺, 𑀧𑀝𑀺𑀖𑀤𑁆𑀯𑀬𑀯𑀚𑁆𑀚𑀺𑀢𑀸𑀦𑀺 𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀧𑀞𑀫𑀸𑀭𑀼𑀧𑁆𑀧𑀯𑀺𑀧𑀸𑀓𑁄, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘𑀸𑀢𑀺 𑀘𑀢𑀼𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀚𑀸𑀬𑀦𑁆𑀢𑀺.

𑁨𑁫𑁦-𑁩. 𑀤𑀲 𑀧𑀜𑁆𑀘𑀸𑀢𑀺 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀸, 𑀘𑀢𑀲𑁆𑀲𑁄 𑀅𑀭𑀽𑀧𑀓𑀺𑀭𑀺𑀬𑀸, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁, 𑀧𑀞𑀫𑀸𑀭𑀼𑀧𑁆𑀧𑀯𑀺𑀧𑀸𑀓𑁄, 𑀅𑀭𑀳𑀢𑁆𑀢𑀨𑀮𑀜𑁆𑀘𑀸𑀢𑀺 𑀧𑀦𑁆𑀦𑀭𑀲 𑀘𑀺𑀢𑁆𑀢𑀸𑀦𑀺 𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀅𑀭𑀳𑀢𑁄 𑀳𑁄𑀦𑁆𑀢𑀺.

𑀢𑁂𑀯𑀻𑀲𑀸𑀢𑀺 𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀼𑀢𑁆𑀢𑁂𑀲𑀼 𑀘𑀢𑀼𑀯𑀻𑀲𑀢𑀺𑀘𑀺𑀢𑁆𑀢𑁂𑀲𑀼 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀯𑀺𑀧𑀸𑀓𑀯𑀚𑁆𑀚𑀸 𑀩𑀸𑀯𑀻𑀲𑀢𑀺 𑀘 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀧𑀸𑀓𑁄 𑀘𑀸𑀢𑀺 𑀢𑁂𑀯𑀻𑀲𑀢𑀺 𑀤𑀼𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀳𑁄𑀦𑁆𑀢𑀺. 𑀢𑀢𑁆𑀣𑁂𑀯 𑀢𑀺𑀡𑁆𑀡𑀁 𑀨𑀮𑀝𑁆𑀞𑀲𑁂𑀔𑀸𑀦𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀼𑀢𑁆𑀢𑁂𑀲𑀼 𑀅𑀓𑀼𑀲𑀮𑀧𑀜𑁆𑀘𑀓𑀯𑀚𑁆𑀚𑀸𑀦𑀺 𑀅𑀝𑁆𑀞𑀸𑀭𑀲, 𑀢𑀁𑀢𑀁𑀨𑀮𑀜𑁆𑀘𑀸𑀢𑀺 𑀏𑀓𑀽𑀦𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑀓𑁆𑀭𑀺𑀬𑀸 𑀤𑁆𑀯𑀸𑀤𑀲𑀸𑀢𑀺 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀚𑁆𑀚𑀺𑀢𑀸 𑀢𑀺𑀲𑁆𑀲𑁄 𑀅𑀭𑀽𑀧𑀓𑀺𑀭𑀺𑀬𑀸, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀦𑁆𑀢𑀺 𑀤𑁆𑀯𑀸𑀤𑀲 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺. 𑀧𑀸𑀓𑁂𑀓𑁄𑀢𑀺 𑀏𑀓𑁄 𑀅𑀭𑀽𑀧𑀯𑀺𑀧𑀸𑀓𑁄.

𑀤𑀼𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀼𑀢𑁆𑀢𑁂𑀲𑀼 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀼𑀲𑀮𑀯𑀺𑀧𑀸𑀓𑀯𑀚𑁆𑀚𑀸𑀦𑀺 𑀏𑀓𑀯𑀻𑀲𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑁄 𑀘𑀸𑀢𑀺 𑀩𑀸𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀢𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁨𑁫𑁪-𑁬𑁦. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀼𑀢𑁆𑀢𑁂𑀲𑀼 𑀅𑀧𑀼𑀜𑁆𑀜𑀧𑀜𑁆𑀘𑀓𑀯𑀚𑁆𑀚𑀸𑀦𑀺 𑀲𑀢𑁆𑀢𑀭𑀲, 𑀧𑀞𑀫𑀨𑀮𑀜𑁆𑀘𑀸𑀢𑀺 𑀅𑀝𑁆𑀞𑀸𑀭𑀲 𑀢𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀲𑁄𑀢𑀸𑀧𑀦𑁆𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀦𑀻𑀢𑀺 𑀢𑀸𑀦𑁂𑀯 𑀅𑀝𑁆𑀞𑀸𑀭𑀲 𑀘𑀺𑀢𑁆𑀢𑀸𑀦𑀺. ‘‘𑀞𑀧𑁂𑀢𑁆𑀯𑀸 𑀧𑀞𑀫𑀁 𑀨𑀮’’𑀦𑁆𑀢𑀺 𑀳𑀺 𑀯𑀘𑀦𑀢𑁄 𑀤𑀼𑀢𑀺𑀬𑀨𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀬𑀫𑀢𑁆𑀣𑁄 𑀅𑀯𑀼𑀢𑁆𑀢𑀲𑀺𑀤𑁆𑀥𑁄. 𑀦 𑀳𑀺 𑀲𑀓𑀤𑀸𑀕𑀸𑀫𑀺𑀦𑁄 𑀲𑀓𑀤𑀸𑀕𑀸𑀫𑀺𑀨𑀮𑀜𑁆𑀘 𑀦𑀼𑀧𑁆𑀧𑀚𑁆𑀚𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀁 𑀨𑀮’’𑀦𑁆𑀢𑀺. 𑀏𑀢𑁆𑀣𑀸𑀧𑀺 𑀅𑀦𑀸𑀕𑀸𑀫𑀺𑀨𑀮𑀁 𑀧𑀓𑀭𑀡𑀲𑀺𑀤𑁆𑀥𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀸, 𑀤𑁆𑀯𑁂 𑀢𑀢𑀺𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀓𑀺𑀭𑀺𑀬𑀸, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑁄, 𑀅𑀭𑀳𑀢𑁆𑀢𑀨𑀮𑀦𑁆𑀢𑀺 𑀢𑁂𑀭𑀲 𑀘𑀺𑀢𑁆𑀢𑀸𑀦𑀺 𑀢𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀔𑀻𑀡𑀸𑀲𑀯𑀲𑁆𑀲 𑀚𑀸𑀬𑀦𑁆𑀢𑀺. 𑀢𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀼𑀢𑁆𑀢𑁂𑀲𑀼 𑀤𑁆𑀯𑀸𑀯𑀻𑀲𑀢𑀺𑀘𑀺𑀢𑁆𑀢𑁂𑀲𑀼 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀼𑀲𑀮𑀯𑀺𑀧𑀸𑀓𑀯𑀚𑁆𑀚𑀸𑀢𑀺 𑀯𑀻𑀲𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑁄𑀢𑀺 𑀏𑀓𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀚𑀸𑀬𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀼𑀢𑁆𑀢𑁂𑀲𑀼 𑀅𑀧𑀼𑀜𑁆𑀜𑀧𑀜𑁆𑀘𑀓𑀯𑀚𑁆𑀚𑀸𑀦𑀺 𑀲𑁄𑀴𑀲, 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘𑀸𑀢𑀺 𑀲𑀢𑁆𑀢𑀭𑀲 𑀢𑀢𑁆𑀣𑁂𑀯 𑀲𑁄𑀢𑀸𑀧𑀦𑁆𑀦𑀲𑁆𑀲 𑀳𑁄𑀦𑁆𑀢𑀺. 𑀅𑀝𑁆𑀞 𑀫𑀳𑀸𑀓𑀺𑀭𑀺𑀬𑀸, 𑀤𑁆𑀯𑁂 𑀘 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑀓𑀺𑀭𑀺𑀬𑀸, 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁, 𑀅𑀭𑀳𑀢𑁆𑀢𑀨𑀮𑀜𑁆𑀘𑀸𑀢𑀺 𑀤𑁆𑀯𑀸𑀤𑀲 𑀘𑀺𑀢𑁆𑀢𑀸𑀦𑀺 𑀢𑀢𑁆𑀣𑁂𑀯 𑀅𑀭𑀳𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁨𑁬𑁧-𑁩. 𑀅𑀭𑀽𑀧𑀓𑀼𑀲𑀮𑀸 𑀘𑁂𑀯 𑀓𑀺𑀭𑀺𑀬𑀸𑀧𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀧𑀦 𑀯𑀺𑀧𑀸𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀤𑁆𑀥𑀫𑀼𑀤𑁆𑀥𑀫𑀭𑀽𑀧𑀻𑀦𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀤𑀻𑀲𑀼 𑀅𑀭𑀽𑀧𑀻𑀦𑀁. 𑀳𑁂𑀝𑁆𑀞𑀺𑀫𑀸𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀺𑀓𑀸𑀦𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀯𑀺𑀧𑀸𑀓𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀺𑀓𑀸𑀦𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀏𑀯𑀫𑀸𑀤𑀺𑀦𑀸 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀅𑀭𑀽𑀧𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸𑀢𑀺 𑀆𑀳 ‘‘𑀤𑀺𑀝𑁆𑀞𑀸𑀤𑀻𑀦𑀯𑀢𑁄 𑀓𑀺𑀭𑀸’’𑀢𑀺. 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀼𑀢𑀺𑀬𑀁. 𑀤𑀺𑀝𑁆𑀞𑀸𑀤𑀻𑀦𑀯𑀢𑁄𑀢𑀺 𑀆𑀭𑀫𑁆𑀫𑀡𑁂, 𑀛𑀸𑀦𑁂 𑀘 𑀤𑀺𑀝𑁆𑀞𑀤𑁄𑀲𑀢𑁆𑀢𑀸. 𑀓𑀼𑀲𑀮𑀸𑀦𑀼𑀢𑁆𑀢𑀭𑀸𑀢𑀺 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸.

𑁨𑁬𑁬. 𑀲𑀩𑁆𑀩𑁄 𑀭𑀽𑀧𑁄 𑀫𑀳𑀕𑁆𑀕𑀢𑁄𑀢𑀺 𑀲𑀩𑁆𑀩𑁄 𑀭𑀽𑀧𑀸𑀯𑀘𑀭𑀫𑀳𑀕𑁆𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀫𑀦𑁄𑀥𑀸𑀢𑀽𑀢𑀺 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀯𑀺𑀧𑀸𑀓𑀫𑀦𑁄𑀥𑀸𑀢𑀽𑀦𑀁 𑀓𑀸𑀫𑀯𑀺𑀧𑀸𑀓-𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸.

𑁨𑁬𑁯-𑁭𑁩. 𑀏𑀯𑀁…𑀧𑁂… 𑀳𑁂𑀝𑁆𑀞𑀺𑀫𑀦𑁆𑀢𑀺 𑀤𑀼𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀯𑀼𑀢𑁆𑀢𑁂𑀲𑀼 𑀤𑀼𑀢𑀺𑀬𑀸𑀭𑀼𑀧𑁆𑀧𑀢𑁆𑀢𑀬𑀁 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀓𑁂𑀦 𑀲𑀳 𑀢𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀘𑀺𑀢𑁆𑀢𑀸𑀦𑀺 𑀢𑀢𑁆𑀣𑀯𑀼𑀢𑁆𑀢𑁂𑀲𑀼 𑀢𑀢𑀺𑀬𑀸𑀭𑀼𑀧𑁆𑀧𑀢𑁆𑀢𑀬𑀁 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀓𑁂𑀦 𑀲𑀳 𑀲𑀢𑁆𑀢𑀢𑀺𑀁𑀲𑀸𑀢𑀺 𑀏𑀯𑀁 𑀲𑁂𑀲𑀤𑁆𑀯𑀬𑁂𑀧𑀺 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀁 𑀳𑀺𑀢𑁆𑀯𑀸 𑀘𑀺𑀢𑁆𑀢𑀕𑀡𑀦𑀸 𑀜𑁂𑀬𑁆𑀬𑀸. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄𑀢𑀺 𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀧𑀞𑀫𑀸𑀭𑀼𑀧𑁆𑀧𑀯𑀺𑀧𑀸𑀓𑁄, 𑀤𑀼𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀧𑀸𑀓𑁄𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀧𑀸𑀓𑀸 𑀘𑀢𑁆𑀢𑀸𑀭𑁄 𑀘 𑀅𑀦𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸𑀢𑀺 𑀏𑀯𑀁 𑀘𑀢𑀽𑀲𑀼 𑀅𑀭𑀽𑀧𑀪𑀽𑀫𑀻𑀲𑀼 𑀏𑀓𑁂𑀓𑀸𑀬 𑀪𑀽𑀫𑀺𑀬𑀸 𑀧𑀜𑁆𑀘 𑀧𑀜𑁆𑀘 𑀯𑀺𑀧𑀸𑀓𑀸 𑀚𑀸𑀬𑀦𑁆𑀢𑀺. 𑀬𑀸 𑀓𑀺𑀭𑀺𑀬𑀸 𑀢𑁂𑀭𑀲𑁂𑀯 𑀲𑀺𑀬𑀼𑀁, 𑀢𑀸 𑀲𑀩𑁆𑀩𑀧𑀞𑀫𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀔𑀻𑀡𑀸𑀲𑀯𑀲𑁆𑀲 𑀚𑀸𑀬𑀦𑁆𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀔𑀻𑀡𑀸𑀲𑀯𑀲𑁆𑀲 𑀧𑀞𑀫𑀸𑀭𑀼𑀧𑁆𑀧𑀓𑀺𑀭𑀺𑀬𑀘𑀺𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀤𑁆𑀯𑀸𑀤𑀲𑁂𑀯 𑀓𑁆𑀭𑀺𑀬𑀸 𑀳𑁄𑀦𑁆𑀢𑀺. 𑀢𑀢𑀺𑀬𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀤𑀼𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀘𑀺𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀏𑀓𑀸𑀤𑀲. 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀽𑀫𑀺𑀬𑀁 𑀢𑀢𑀺𑀬𑀸𑀭𑀼𑀧𑁆𑀧𑀓𑀺𑀭𑀺𑀬𑀘𑀺𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀤𑀲𑁂𑀯 𑀯𑀺𑀜𑁆𑀜𑁂𑀬𑁆𑀬𑀸.

𑁨𑁭𑁪-𑁫. 𑀇𑀤𑀸𑀦𑀺 𑀓𑁂𑀯𑀮𑀁 𑀧𑀼𑀕𑁆𑀕𑀮𑀯𑀲𑁂𑀦 𑀢𑁂𑀲𑀫𑁂𑀯 𑀧𑀼𑀕𑁆𑀕𑀮𑀸𑀦𑀁 𑀆𑀯𑁂𑀡𑀺𑀓𑀘𑀺𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀳𑀢𑁄 𑀧𑀦𑀸’’𑀢𑀺𑀆𑀤𑀺𑀦𑀸 𑀅𑀭𑀳𑀢𑁄𑀬𑁂𑀯 𑀉𑀧𑁆𑀧𑀚𑁆𑀚𑀦𑀓𑀘𑀺𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀆𑀤𑀻𑀦𑀁 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀲𑀓𑀲𑀓𑀨𑀮𑀘𑀺𑀢𑁆𑀢𑀁 𑀧𑀸𑀓𑀝𑀫𑁂𑀯𑀸𑀢𑀺 𑀲𑀁𑀔𑀺𑀢𑁆𑀢𑀁. 𑀅𑀭𑀳𑀢𑁄𑀢𑀺 𑀔𑀻𑀡𑀸𑀲𑀯𑀲𑁆𑀲. 𑀅𑀭𑀳𑀢𑁄 𑀪𑀸𑀯𑁄 𑀅𑀭𑀳𑀢𑁆𑀢𑀁, 𑀅𑀭𑀳𑀢𑁆𑀢𑀨𑀮𑀦𑁆𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 ‘‘𑀅𑀭𑀻𑀦𑀁 𑀳𑀢𑀢𑁆𑀢𑀸 𑀅𑀭𑀳𑀸’’𑀢𑀺𑀆𑀤𑀺𑀦𑀸 𑀅𑀭𑀳𑀦𑁆𑀢-𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀸𑀯𑁂𑀦 ‘‘𑀅𑀭𑀳𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺 𑀢𑁂𑀲𑀁 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀲𑀸𑀥𑀸𑀭𑀡𑀘𑀺𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀦𑁆𑀦𑀜𑁆𑀘 𑀨𑀮𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁨𑁯𑁦. 𑀲𑀼𑀲𑀸𑀭𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀯𑀲𑁂𑀦 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀲𑁆𑀲 𑀨𑁂𑀕𑁆𑀕𑀼𑀲𑁆𑀲 𑀅𑀪𑀸𑀯𑀢𑁄 𑀲𑀼𑀝𑁆𑀞𑀼 𑀲𑀸𑀭𑀁, 𑀲𑀩𑁆𑀩𑀲𑁄 𑀲𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀦𑁆𑀢𑀺 𑀲𑀼𑀲𑀸𑀭𑀢𑁆𑀢𑀸 𑀏𑀯 𑀧𑀭𑀁. 𑀲𑀢𑁆𑀢𑀸𑀦𑀁 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀲𑁆𑀲 𑀯𑀺𑀥𑀫𑀦𑀢𑁄 𑀫𑁄𑀳𑀦𑁆𑀥𑀓𑀸𑀭𑀧𑁆𑀧𑀤𑀻𑀧𑀁. 𑀘𑀺𑀦𑁆𑀢𑁂𑀢𑀻𑀢𑀺 𑀅𑀢𑁆𑀣𑀯𑀲𑁂𑀦 𑀘𑀺𑀦𑁆𑀢𑁂𑀢𑀺. 𑀯𑀸𑀘𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀯𑀲𑁂𑀦 𑀲𑀚𑁆𑀛𑀸𑀬𑀢𑀺. 𑀭𑀸𑀕𑀤𑁄𑀲𑀸𑀦𑀁 𑀫𑁄𑀳𑁂𑀦 𑀲𑀳 𑀅𑀯𑀺𑀦𑀸𑀪𑀸𑀯𑀢𑁄 𑀢𑀲𑁆𑀲 𑀅𑀦𑀼𑀧𑀕𑀫𑀦𑀁 𑀅𑀢𑁆𑀣𑀲𑀺𑀤𑁆𑀥𑀫𑁂𑀯𑀸𑀢𑀺 ‘‘𑀫𑁄𑀳𑀦𑁆𑀥𑀓𑀸𑀭𑀧𑁆𑀧𑀤𑀻𑀧’’𑀦𑁆𑀢𑀺 𑀯𑀢𑁆𑀯𑀸𑀧𑀺 ‘‘𑀦𑀭𑀁…𑀧𑁂… 𑀦𑁄𑀧𑀬𑀦𑁆𑀢𑀻’’𑀢𑀺 𑀭𑀸𑀕𑀤𑁄𑀲𑀸𑀦𑀼𑀧𑀕𑀫𑀦𑀫𑁂𑀯 𑀯𑀼𑀢𑁆𑀢𑀁. ‘‘𑀫𑁄𑀳𑀦𑁆𑀥𑀓𑀸𑀭𑀧𑁆𑀧𑀤𑀻𑀧’’𑀦𑁆𑀢𑀺 𑀯𑀸 𑀯𑀘𑀦𑁂𑀦𑁂𑀯 𑀫𑁄𑀳𑀲𑁆𑀲 𑀅𑀦𑀼𑀧𑀕𑀫𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀭𑀸𑀕𑀤𑁄𑀲𑀸𑀦𑀫𑁂𑀯 𑀅𑀦𑀼𑀧𑀕𑀫𑀦𑀁 𑀯𑀼𑀢𑁆𑀢𑀁. 𑀫𑀽𑀮𑀪𑀽𑀢𑀸𑀦𑀁 𑀧𑀦 𑀢𑀺𑀡𑁆𑀡𑀁 𑀅𑀦𑀼𑀧𑀕𑀫𑀦𑀯𑀘𑀦𑁂𑀦 𑀲𑁂𑀲𑀓𑀺𑀮𑁂𑀲𑀸𑀦𑀫𑁆𑀧𑀺 𑀅𑀦𑀼𑀧𑀕𑀫𑀦𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀪𑀽𑀫𑀺𑀧𑀼𑀕𑁆𑀕𑀮𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀸𑀯𑀢𑀸𑀭-𑀅𑀪𑀺𑀦𑀯𑀝𑀻𑀓𑀸

(𑀤𑀼𑀢𑀺𑀬𑁄 𑀪𑀸𑀕𑁄)