𑁪. 𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄

𑀏𑀓𑀯𑀺𑀥𑀸𑀤𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁨𑁮-𑁩𑁦. 𑀯𑀺𑀚𑀸𑀦𑀦𑀲𑀪𑀸𑀯𑀢𑁄𑀢𑀺 𑀆𑀭𑀫𑁆𑀫𑀡𑀯𑀺𑀚𑀸𑀦𑀦𑀲𑀪𑀸𑀯𑀢𑁆𑀢𑀸. 𑀦𑀦𑀼 𑀘 𑀳𑁂𑀝𑁆𑀞𑀸 𑀲𑀸𑀭𑀫𑁆𑀫𑀡𑀢𑁄 𑀏𑀓𑀯𑀺𑀥𑀪𑀸𑀯𑁄 𑀯𑀼𑀢𑁆𑀢𑁄𑀢𑀺? 𑀲𑀘𑁆𑀘𑀁 𑀯𑀼𑀢𑁆𑀢𑁄, 𑀲𑁄 𑀧𑀦 𑀘𑁂𑀢𑀲𑀺𑀓𑀸𑀦𑀜𑁆𑀘 𑀲𑀸𑀥𑀸𑀭𑀡𑁄𑀢𑀺 𑀇𑀥 𑀢𑀩𑁆𑀩𑀺𑀯𑀚𑁆𑀚𑀦𑀢𑁆𑀣𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀢𑀸𑀯 𑀯𑀼𑀢𑁆𑀢𑀸. 𑀲𑀗𑁆𑀔𑁂𑀧𑀕𑀡𑀦𑀯𑀲𑁂𑀦 𑀘 𑀲𑀳𑁂𑀢𑀼𑀓𑀸𑀦𑀁 𑀏𑀓𑀲𑀢𑁆𑀢𑀢𑀺𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀳𑁂𑀢𑀼𑀯𑀸𑀤𑀺𑀦𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀳𑁂𑀢𑀽𑀦𑀁 𑀩𑁆𑀬𑀸𑀓𑀭𑀡𑀓𑀼𑀲𑀮𑁂𑀦. 𑀅𑀣 𑀯𑀸 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸, 𑀢𑁂𑀲𑀁 𑀳𑁂𑀢𑀼𑀁 𑀢𑀣𑀸𑀕𑀢𑁄 𑀆𑀳𑀸’’𑀢𑀺 (𑀅𑀧. 𑀣𑁂𑀭 𑁧.𑁧.𑁨𑁮𑁬; 𑀫𑀳𑀸𑀯. 𑁬𑁦) 𑀯𑀘𑀦𑀢𑁄 𑀢𑀁𑀢𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀢𑀁𑀢𑀁𑀧𑀘𑁆𑀘𑀬𑀯𑀸𑀤𑀺𑀦𑀸.

𑁧𑁩𑁧-𑁪. 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀢𑁄𑀢𑀺 𑀏𑀓𑀦𑁆𑀢𑁂𑀦 𑀲𑀩𑁆𑀩𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀪𑀸𑀯𑀢𑁄 𑀘𑁂𑀯 𑀢𑀤𑀪𑀸𑀯𑀢𑁄 𑀘. 𑀓𑁂𑀘𑀺 𑀧𑀦 𑀳𑀤𑀬𑀯𑀢𑁆𑀣𑀼𑀯𑀲𑁂𑀦 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀢𑀁 𑀯𑀡𑁆𑀡𑁂𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺 𑀲𑀯𑀢𑁆𑀣𑀼𑀓𑀦𑀺𑀤𑁆𑀤𑁂𑀲𑁂 ‘‘𑀲𑀩𑁆𑀩𑁄 𑀓𑀸𑀫𑀯𑀺𑀧𑀸𑀓𑁄’’𑀢𑀺 𑀧𑀲𑀸𑀤𑀦𑀺𑀲𑁆𑀲𑀺𑀢𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀉𑀪𑀬𑀯𑀲𑁂𑀦𑀸𑀢𑀺 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀯𑀲𑁂𑀦. 𑀓𑀸𑀦𑀺𑀘𑀺 𑀳𑀺 𑀘𑀺𑀢𑁆𑀢𑀸𑀦𑀺 𑀏𑀓𑀦𑁆𑀢𑁂𑀦 𑀲𑀯𑀢𑁆𑀣𑀼𑀓𑀸𑀦𑀺, 𑀓𑀸𑀦𑀺𑀘𑀺 𑀅𑀯𑀢𑁆𑀣𑀼𑀓𑀸𑀦𑁂𑀯, 𑀓𑀸𑀦𑀺𑀘𑀺 𑀉𑀪𑀬𑀲𑀪𑀸𑀯𑀸𑀦𑀺. 𑀢𑀣𑀸 𑀘𑁂𑀯 𑀦𑀺𑀤𑁆𑀤𑀺𑀲𑀢𑀺 ‘‘𑀲𑀩𑁆𑀩𑁄 𑀓𑀸𑀫𑀯𑀺𑀧𑀸𑀓𑁄 𑀘𑀸’’𑀢𑀺𑀆𑀤𑀺.

𑀲𑀩𑁆𑀩𑁄 𑀓𑀸𑀫𑀯𑀺𑀧𑀸𑀓𑁄 𑀘𑀸𑀢𑀺 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀪𑀺𑀦𑁆𑀦𑁄 𑀲𑀩𑁆𑀩𑁄 𑀢𑁂𑀯𑀻𑀲𑀢𑀺𑀯𑀺𑀥𑁄 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁄 𑀘. 𑀆𑀤𑀺𑀫𑀕𑁆𑀕𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄. 𑀲𑁄 𑀳𑀺 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑁂𑀲𑀼 𑀆𑀤𑀺𑀢𑁄 𑀉𑀧𑁆𑀧𑀚𑁆𑀚𑀦𑀢𑁄, 𑀅𑀝𑁆𑀞𑀲𑀼 𑀅𑀭𑀺𑀬𑀧𑀼𑀕𑁆𑀕𑀮𑁂𑀲𑀼 𑀆𑀤𑀺𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀩𑀦𑁆𑀥𑀻𑀢𑀺 𑀯𑀸 ‘‘𑀆𑀤𑀺𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀦𑀸 𑀯𑀢𑁆𑀣𑀼𑀦𑁆𑀢𑀺 𑀲𑀓𑀲𑀓𑀯𑀢𑁆𑀣𑀼𑀁 𑀯𑀺𑀦𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀦𑁂𑀯 𑀳𑁂𑀢𑀸𑀦𑀺 𑀅𑀭𑀽𑀧𑀪𑀯𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀢𑀢𑁆𑀣 𑀯𑀢𑁆𑀣𑀽𑀦𑀁 𑀅𑀪𑀸𑀯𑀢𑁄. ‘‘𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀯𑀺𑀦𑀸 𑀯𑀢𑁆𑀣𑀼’’𑀦𑁆𑀢𑀺 𑀘 𑀇𑀤𑀁 𑀅𑀦𑁆𑀢𑁄𑀪𑀸𑀯𑀺𑀢𑀓𑀸𑀭𑀡𑀢𑁆𑀣𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦 𑀬𑀲𑁆𑀫𑀸 𑀯𑀢𑁆𑀣𑀼𑀁 𑀯𑀺𑀦𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀦𑁆𑀢𑁂𑀦 𑀲𑀯𑀢𑁆𑀣𑀼𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀓𑀦𑁆𑀢𑁂𑀦 𑀅𑀯𑀢𑁆𑀣𑀼𑀓𑀸 𑀅𑀭𑀽𑀧𑀪𑀯𑁂𑀬𑁂𑀯 𑀧𑀝𑀺𑀲𑀦𑁆𑀥𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀓𑀣𑀁 𑀧𑀦 𑀭𑀽𑀧𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀢𑀢𑁆𑀣 𑀅𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀓𑀲𑁆𑀫𑀸 𑀦 𑀧𑀯𑀢𑁆𑀢𑀢𑀺 𑀧𑀜𑁆𑀘𑀯𑁄𑀓𑀸𑀭𑁂𑀢𑀺? 𑀢𑀣𑀸 𑀅𑀤𑀲𑁆𑀲𑀦𑀢𑁄. 𑀬𑀤𑀺 𑀏𑀯𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀦𑀧𑀺 𑀯𑀺𑀦𑀸 𑀭𑀽𑀧𑀥𑀸𑀢𑀼𑀬𑀁 𑀭𑀽𑀧𑁂𑀦 𑀧𑀯𑀢𑁆𑀢𑀺𑀢𑀩𑁆𑀩𑀁, 𑀓𑀺𑀁 𑀓𑀸𑀭𑀡𑀸? 𑀓𑀸𑀫𑀥𑀸𑀢𑀼𑀬𑀁 𑀢𑀣𑀸 𑀅𑀤𑀲𑁆𑀲𑀦𑀢𑁄. 𑀅𑀧𑀺 𑀢𑀼 𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀧𑀯𑀢𑁆𑀢𑀺𑀓𑀸𑀭𑀡𑀁 𑀭𑀽𑀧𑁂 𑀅𑀯𑀺𑀕𑀢𑀢𑀡𑁆𑀳𑀁, 𑀢𑀲𑁆𑀲 𑀲𑀳 𑀭𑀽𑀧𑁂𑀦 𑀧𑀯𑀢𑁆𑀢𑀺. 𑀬𑀲𑁆𑀲 𑀧𑀦 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀁 𑀭𑀽𑀧𑁂 𑀯𑀺𑀕𑀢𑀢𑀡𑁆𑀳𑀁, 𑀢𑀲𑁆𑀲 𑀯𑀺𑀦𑀸 𑀭𑀽𑀧𑁂𑀦 𑀧𑀯𑀢𑁆𑀢𑀺 𑀓𑀸𑀭𑀡𑀲𑁆𑀲 𑀢𑀁𑀯𑀺𑀫𑀼𑀔𑀢𑀸𑀬𑀸𑀢𑀺 𑀭𑀽𑀧𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀢𑀢𑁆𑀣 𑀅𑀭𑀽𑀧𑀁 𑀧𑀯𑀢𑁆𑀢𑀢𑀺. 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀲𑁂𑀲𑀸𑀦𑀻𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀓𑀼𑀲𑀮𑀓𑀺𑀭𑀺𑀬𑀸𑀯𑀲𑁂𑀦 𑀲𑁄𑀴𑀲 𑀓𑀸𑀫𑀸𑀯𑀘𑀭𑀸𑀦𑀺, 𑀢𑀣𑁂𑀯 𑀅𑀝𑁆𑀞 𑀅𑀭𑀽𑀧𑀸𑀯𑀘𑀭𑀸𑀦𑀺, 𑀧𑀞𑀫𑀫𑀕𑁆𑀕𑀯𑀚𑁆𑀚𑀸𑀦𑀺 𑀲𑀢𑁆𑀢 𑀮𑁄𑀓𑀼𑀢𑁆𑀢𑀭𑀸𑀦𑀺, 𑀧𑀝𑀺𑀖𑀤𑁆𑀯𑀬𑀯𑀚𑁆𑀚𑀺𑀢𑀤𑀲𑀅𑀓𑀼𑀲𑀮𑀸𑀦𑀺 𑀘𑁂𑀢𑀺 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀯𑀼𑀢𑁆𑀢𑀸𑀯𑀲𑁂𑀲𑀘𑀺𑀢𑁆𑀢𑀸𑀦𑀺.

𑁧𑁩𑁫-𑁭. 𑀭𑀽𑀧𑀸𑀤𑀻𑀲𑀼 𑀏𑀓𑁂𑀓𑀫𑁂𑀯 𑀆𑀭𑀫𑁆𑀫𑀡𑀁 𑀇𑀫𑀲𑁆𑀲𑀸𑀢𑀺 𑀏𑀓𑁂𑀓𑀸𑀭𑀫𑁆𑀫𑀡𑀁. 𑀢𑀲𑁆𑀲 𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀆𑀧𑀸𑀣𑀕𑀢𑀓𑀸𑀮𑁂 𑀢𑀁𑀢𑀁𑀯𑀺𑀚𑀸𑀦𑀦𑀯𑀲𑁂𑀦 𑀧𑀜𑁆𑀘𑀧𑀺 𑀆𑀭𑀫𑁆𑀫𑀡𑀸𑀦𑀺 𑀇𑀫𑀲𑁆𑀲𑀸𑀢𑀺 𑀧𑀜𑁆𑀘𑀸𑀭𑀫𑁆𑀫𑀡𑀁. 𑀏𑀯𑀫𑁆𑀧𑀻𑀢𑀺 𑀦 𑀓𑁂𑀯𑀮𑀁 𑀲𑀯𑀢𑁆𑀣𑀼𑀓𑀸𑀤𑀺𑀯𑀲𑁂𑀦𑁂𑀯, 𑀅𑀣 𑀔𑁄 𑀏𑀓𑁂𑀓𑀸𑀭𑀫𑁆𑀫𑀡𑀸𑀤𑀺𑀢𑁄𑀧𑀺. 𑀅𑀪𑀺𑀜𑁆𑀜𑀸𑀯𑀚𑁆𑀚𑀺𑀢𑀸𑀦𑀁 𑀲𑀩𑁆𑀩𑀫𑀳𑀕𑁆𑀕𑀢𑀸𑀦𑀫𑁆𑀧𑀺 𑀥𑀫𑁆𑀫𑀸𑀭𑀫𑁆𑀫𑀡𑀪𑀸𑀯𑁂𑀦 𑀏𑀓𑀸𑀭𑀫𑁆𑀫𑀡𑀢𑁆𑀢𑀸 𑀆𑀳 ‘‘𑀲𑀩𑁆𑀩𑀁 𑀫𑀳𑀕𑁆𑀕𑀢’’𑀦𑁆𑀢𑀺. 𑀧𑀡𑁆𑀡𑀢𑁆𑀢𑀸𑀭𑀫𑁆𑀫𑀡𑀢𑁄 𑀏𑀓𑀸𑀭𑀫𑁆𑀫𑀡𑀦𑁆𑀢𑀺 𑀓𑁂𑀘𑀺. 𑀢𑀁 𑀅𑀭𑀽𑀧𑀸𑀯𑀘𑀭𑀤𑀼𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀺 𑀧𑀢𑁆𑀯𑀸 𑀦 𑀬𑀼𑀚𑁆𑀚𑀢𑀺 𑀢𑁂𑀲𑀁 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀢𑁆𑀢𑀸. 𑀅𑀪𑀺𑀜𑁆𑀜𑀸𑀤𑁆𑀯𑀬𑀲𑁆𑀲 𑀙𑀴𑀸𑀭𑀫𑁆𑀫𑀡𑀺𑀓𑀪𑀸𑀯𑁂𑀦, 𑀢𑀲𑁆𑀲 𑀘 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀢𑁄 𑀅𑀪𑀺𑀦𑁆𑀦𑀢𑁆𑀢𑀸 𑀢𑀁 𑀧𑀳𑀸𑀬 ‘‘𑀢𑁂𑀘𑀢𑁆𑀢𑀸𑀮𑀻𑀲𑀸’’𑀢𑀺 𑀯𑀼𑀢𑁆𑀢𑀁.

𑁧𑁪𑁧. 𑀧𑀼𑀜𑁆𑀜𑀯𑀺𑀧𑀸𑀓𑀓𑀺𑀭𑀺𑀬𑀢𑁄 𑀓𑀸𑀫𑁂 𑀤𑁆𑀯𑀸𑀤𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀼𑀜𑁆𑀜𑀯𑀺𑀧𑀸𑀓𑀓𑁆𑀭𑀺𑀬𑀢𑁄𑀢𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀢𑁄.

𑁧𑁪𑁩-𑁯. 𑀇𑀭𑀺𑀬𑀸𑀬 𑀓𑀸𑀬𑀺𑀓𑀸𑀬 𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀺𑀧𑀣𑀪𑀸𑀯𑀢𑁄 𑀇𑀭𑀺𑀬𑀸𑀧𑀣𑁄, 𑀕𑀫𑀦𑀸𑀤𑀺. 𑀅𑀢𑁆𑀣𑀢𑁄 𑀢𑀤𑀯𑀢𑁆𑀣𑀸 𑀭𑀽𑀧𑀧𑁆𑀧𑀯𑀢𑁆𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑁄 𑀇𑀭𑀺𑀬𑀸𑀧𑀣𑁄, 𑀯𑀺𑀜𑁆𑀜𑀢𑁆𑀢𑀺 𑀯𑀸 𑀦𑀢𑁆𑀣𑀺, 𑀢𑀣𑀸𑀧𑀺 𑀲𑀩𑁆𑀩𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀁 𑀇𑀭𑀺𑀬𑀸𑀧𑀣𑀼𑀧𑀢𑁆𑀣𑀫𑁆𑀪𑀓𑀁, 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀼𑀧𑁆𑀧𑀸𑀤𑀦𑀜𑁆𑀘 𑀳𑁄𑀢𑀺. 𑀬𑀁 𑀧𑀦 𑀘𑀺𑀢𑁆𑀢𑀁 𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀁, 𑀢𑀁 𑀏𑀓𑀁𑀲𑀢𑁄 𑀇𑀢𑀭𑀤𑁆𑀯𑀬𑀲𑁆𑀲 𑀚𑀦𑀓𑀁 𑀅𑀯𑀺𑀦𑀸𑀪𑀸𑀯𑀢𑁄, 𑀢𑀣𑀸 𑀇𑀭𑀺𑀬𑀸𑀧𑀣𑀼𑀧𑀢𑁆𑀣𑀫𑁆𑀪𑀓𑀁 𑀭𑀽𑀧𑀲𑁆𑀲𑀸𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀭𑀽𑀧𑀻𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺-𑀚𑀦𑀓𑀸𑀚𑀦𑀓𑀸𑀤𑀺𑀢𑁄’’𑀢𑀺 𑀇𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀻𑀦𑀁 𑀯𑀺𑀲𑀼𑀁 𑀕𑀳𑀡𑀁. 𑀚𑀦𑀓𑀸𑀚𑀦𑀓𑀸𑀤𑀺𑀢𑁄𑀢𑀺 𑀢𑀺𑀡𑁆𑀡𑀫𑁆𑀧𑀺 𑀚𑀦𑀓𑀢𑁄, 𑀓𑀲𑁆𑀲𑀘𑀺𑀧𑀺 𑀅𑀚𑀦𑀓𑀢𑁄, 𑀤𑁆𑀯𑀺𑀦𑁆𑀦𑀁 𑀏𑀓𑀲𑁆𑀲 𑀘 𑀚𑀦𑀓𑀢𑁄. 𑀓𑀸𑀦𑀺𑀘𑀺 𑀳𑀺 𑀘𑀺𑀢𑁆𑀢𑀸𑀦𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀦𑁆𑀢𑀺, 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀦𑁆𑀢𑀺. 𑀓𑀸𑀦𑀺𑀘𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀇𑀭𑀺𑀬𑀸𑀧𑀣𑀁 𑀓𑀧𑁆𑀧𑁂𑀦𑁆𑀢𑀺, 𑀯𑀺𑀜𑁆𑀜𑀢𑁆𑀢𑀺𑀁 𑀦 𑀚𑀦𑀬𑀦𑁆𑀢𑀺. 𑀓𑀸𑀦𑀺𑀘𑀺 𑀭𑀽𑀧𑀫𑁂𑀯 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀇𑀢𑀭𑀤𑁆𑀯𑀬𑀁 𑀦 𑀓𑀭𑁄𑀦𑁆𑀢𑀺. 𑀓𑀸𑀦𑀺𑀘𑀺 𑀢𑀻𑀡𑀺 𑀦 𑀓𑀭𑁄𑀦𑁆𑀢𑁂𑀯. 𑀢𑀣𑀸 𑀘𑁂𑀯 𑀤𑀲𑁆𑀲𑁂𑀢𑀺 ‘‘𑀤𑁆𑀯𑀸𑀤𑀲𑀸𑀓𑀼𑀲𑀮𑀸’’𑀢𑀺𑀆𑀤𑀺. 𑀏𑀯𑀜𑁆𑀘𑀸𑀧𑀺 𑀳𑀺 𑀢𑀁 𑀘𑀺𑀢𑁆𑀢𑀦𑁆𑀢𑀺 𑀦 𑀓𑁂𑀯𑀮𑀁 𑀅𑀳𑁂𑀢𑀼𑀓𑀸𑀤𑀺𑀢𑁄𑀯, 𑀏𑀯𑀁 𑀭𑀽𑀧𑀸𑀤𑀺𑀚𑀦𑀓𑀸𑀤𑀺𑀢𑁄𑀧𑀺 𑀢𑀁 𑀘𑀢𑀼𑀩𑁆𑀩𑀺𑀥𑀁. ‘‘𑀏𑀯𑀜𑁆𑀘𑀸𑀤𑀺𑀫𑁆𑀳𑀺 𑀢’’𑀦𑁆𑀢𑀺𑀧𑀺 𑀮𑀺𑀔𑀦𑁆𑀢𑀺. 𑀢𑀲𑁆𑀲 𑀧𑀦 𑀆𑀤𑀺𑀫𑁆𑀳𑀺 𑀦𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢𑀁 𑀏𑀯𑀜𑁆𑀘 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀭𑀽𑀧𑀚𑀦𑀓𑀸𑀤𑀻𑀲𑀼. 𑀤𑀲 𑀓𑀺𑀭𑀺𑀬𑀸𑀢𑀺 𑀫𑀦𑁄𑀥𑀸𑀢𑀼𑀯𑀚𑁆𑀚𑀸 𑀤𑀲 𑀓𑀺𑀭𑀺𑀬𑀸.

𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑀭𑀽𑀧𑀸𑀦𑀻𑀢𑀺 𑀅𑀢𑁆𑀢𑀦𑁄 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀅𑀢𑁆𑀢𑀦𑀸 𑀚𑀦𑁂𑀢𑀩𑁆𑀩𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀓𑀧𑁆𑀧𑁂𑀦𑁆𑀢𑀻𑀢𑀺 𑀲𑀦𑁆𑀦𑀸𑀫𑁂𑀦𑁆𑀢𑀺. 𑀬𑀣𑀸𑀧𑀯𑀢𑁆𑀢𑀁 𑀇𑀭𑀺𑀬𑀸𑀧𑀣𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀺. 𑀬𑀣𑀸 𑀳𑀺 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀳𑀺 𑀯𑀻𑀣𑀺𑀘𑀺𑀢𑁆𑀢𑁂𑀳𑀺 𑀅𑀩𑁆𑀩𑁄𑀓𑀺𑀡𑁆𑀡𑁂 𑀪𑀯𑀗𑁆𑀕𑁂 𑀧𑀯𑀢𑁆𑀢𑀫𑀸𑀦𑁂 𑀅𑀗𑁆𑀕𑀸𑀦𑀺 𑀑𑀲𑀻𑀤𑀦𑁆𑀢𑀺, 𑀧𑀯𑁂𑀥𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀦 𑀏𑀯𑀁 𑀤𑁆𑀯𑀢𑁆𑀢𑀺𑀁𑀲𑀯𑀺𑀥𑁂𑀲𑀼 𑀯𑀓𑁆𑀔𑀫𑀸𑀦𑁂𑀲𑀼 𑀘 𑀙𑀩𑁆𑀩𑀻𑀲𑀢𑀺𑀯𑀺𑀥𑁂𑀲𑀼 𑀚𑀸𑀕𑀭𑀡𑀘𑀺𑀢𑁆𑀢𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼. 𑀢𑀤𑀸 𑀧𑀦 𑀅𑀗𑁆𑀕𑀸𑀦𑀺 𑀉𑀧𑀢𑁆𑀣𑀤𑁆𑀥𑀸𑀦𑀺 𑀬𑀣𑀸𑀧𑀯𑀢𑁆𑀢𑀇𑀭𑀺𑀬𑀸𑀧𑀣𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀚𑀦𑀬𑀦𑁆𑀢𑀺 𑀘 𑀯𑀺𑀜𑁆𑀜𑀢𑁆𑀢𑀺𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀏𑀯 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀦𑁆𑀢𑀺, 𑀦 𑀧𑀦 𑀧𑀜𑁆𑀘𑀤𑁆𑀯𑀸𑀭𑁂 𑀧𑀯𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀛𑀸𑀦𑀗𑁆𑀕𑀬𑁄𑀕𑀸𑀪𑀸𑀯𑁂𑀦 𑀭𑀽𑀧𑀸𑀚𑀦𑀓𑀢𑁆𑀢𑀸 𑀆𑀳 ‘‘𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸’’𑀢𑀺. 𑀛𑀸𑀦𑀗𑁆𑀕𑀸𑀦𑀺 𑀳𑀺 𑀘𑀺𑀢𑁆𑀢𑁂𑀦 𑀲𑀳 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀸𑀦𑀺, 𑀢𑁂𑀲𑀁 𑀅𑀦𑀼𑀩𑀮𑀧𑁆𑀧𑀤𑀸𑀬𑀓𑀸𑀦𑀺 𑀫𑀕𑁆𑀕𑀗𑁆𑀕𑀸𑀤𑀻𑀦𑀺 𑀢𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀲𑀯𑀺𑀲𑁂𑀲𑀁 𑀭𑀽𑀧𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁄. 𑀅𑀭𑀽𑀧𑀯𑀺𑀧𑀸𑀓𑀸 𑀧𑀦 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀬 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀳𑁂𑀢𑀼𑀦𑁄 𑀢𑀁𑀯𑀺𑀫𑀼𑀔𑀢𑀸𑀬 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀧𑀸𑀓𑀸 𑀘 𑀅𑀭𑀽𑀧𑀺𑀲𑀽’’𑀢𑀺.

𑁧𑁫𑁦. 𑀲𑀩𑁆𑀩𑁂𑀲𑀁 𑀲𑀦𑁆𑀥𑀺𑀘𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁. 𑀢𑀜𑁆𑀳𑀺 𑀯𑀢𑁆𑀣𑀼𑀤𑀼𑀩𑁆𑀩𑀮𑀢𑀸𑀬, 𑀅𑀧𑁆𑀧𑀢𑀺𑀝𑁆𑀞𑀺𑀢𑀢𑀸𑀬, 𑀧𑀘𑁆𑀘𑀬𑀯𑁂𑀓𑀮𑁆𑀮𑀢𑁄, 𑀆𑀕𑀦𑁆𑀢𑀼𑀓𑀢𑀸𑀬 𑀘 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 𑀳𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀳𑀚𑀸𑀢𑀁 𑀯𑀢𑁆𑀣𑀼 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀭𑀳𑀺𑀢𑀁, 𑀆𑀳𑀸𑀭𑀸𑀤𑀻𑀳𑀺 𑀘 𑀅𑀦𑀼𑀧𑀢𑁆𑀣𑀤𑁆𑀥𑀁 𑀤𑀼𑀩𑁆𑀩𑀮𑀁, 𑀢𑀲𑁆𑀲 𑀘 𑀤𑀼𑀩𑁆𑀩𑀮𑀢𑁆𑀢𑀸 𑀢𑀦𑁆𑀦𑀺𑀲𑁆𑀲𑀺𑀢𑀯𑀺𑀜𑁆𑀜𑀸𑀡𑀫𑁆𑀧𑀺 𑀤𑀼𑀩𑁆𑀩𑀮𑀦𑁆𑀢𑀺. 𑀬𑀣𑀸 𑀘 𑀧𑀧𑀸𑀢𑁂 𑀧𑀢𑀺𑀢𑁄 𑀅𑀜𑁆𑀜𑀲𑁆𑀲 𑀦𑀺𑀲𑁆𑀲𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀢𑀫𑁆𑀧𑀺 𑀪𑀺𑀦𑁆𑀦𑀲𑀦𑁆𑀢𑀢𑀺𑀬𑀁 𑀓𑀫𑁆𑀫𑀓𑁆𑀔𑀺𑀢𑁆𑀢𑀢𑀸𑀬 𑀧𑀧𑀸𑀢𑁂 𑀧𑀢𑀺𑀢𑀁 𑀯𑀺𑀬 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀦 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂 𑀉𑀲𑁆𑀲𑀳𑀢𑀺 𑀘 𑀯𑀢𑁆𑀣𑀼𑀦𑁄 𑀘 𑀅𑀢𑁆𑀢𑀦𑀸 𑀲𑀳 𑀅𑀧𑀘𑁆𑀙𑀸 𑀅𑀧𑀼𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀢𑁆𑀢𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀲𑁆𑀲 𑀅𑀮𑀸𑀪𑀢𑁄. 𑀬𑀣𑀸 𑀧𑀦 𑀆𑀕𑀦𑁆𑀢𑀼𑀓𑁄 𑀧𑀼𑀭𑀺𑀲𑁄 𑀅𑀕𑀢𑀧𑀼𑀩𑁆𑀩𑀁 𑀤𑁂𑀲𑀁 𑀕𑀢𑁄 𑀅𑀜𑁆𑀜𑁂𑀲𑀁 ‘‘𑀏𑀣 𑀪𑁄 𑀅𑀦𑁆𑀢𑁄𑀕𑀸𑀫𑁂 𑀯𑁄 𑀅𑀦𑁆𑀦𑀧𑀸𑀦𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀢𑁆𑀢𑀦𑁄 𑀅𑀯𑀺𑀲𑀬𑀢𑀸𑀬, 𑀅𑀧𑁆𑀧𑀳𑀼𑀢𑀸𑀬 𑀘, 𑀏𑀯𑀫𑁂𑀯𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀫𑁆𑀧𑀺 𑀆𑀕𑀦𑁆𑀢𑀼𑀓𑀦𑁆𑀢𑀺. 𑀏𑀯𑀁 𑀯𑀢𑁆𑀣𑀼𑀤𑀼𑀩𑁆𑀩𑀮𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀅𑀧𑀺𑀘 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦 𑀬𑁂𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀲𑀩𑁆𑀩𑁂𑀳𑀺 𑀧𑀝𑀺𑀲𑀦𑁆𑀥𑀺𑀬𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀲𑀫𑀢𑀺𑀁𑀲𑀓𑀫𑁆𑀫𑀚𑀭𑀽𑀧𑀸𑀦𑀁 𑀬𑀣𑀸𑀬𑁄𑀕𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑁆𑀞𑀸𑀦𑁂 𑁋

‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 (𑀧𑀝𑁆𑀞𑀸. 𑁧.𑁧.𑁪𑁨𑁯).

𑀢𑀲𑁆𑀫𑀸 𑀲𑀫𑀢𑀺𑀁𑀲𑀓𑀫𑁆𑀫𑀚𑀭𑀽𑀧𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀞𑀸𑀦𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸𑀦𑀻𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀼𑀢𑀺𑀘𑀺𑀢𑁆𑀢𑀜𑁆𑀘𑀸𑀭𑀳𑀢𑁄𑀢𑀺 𑀏𑀢𑁆𑀣 𑀔𑀻𑀡𑀸𑀲𑀯𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑀲𑀦𑁆𑀢𑀯𑀝𑁆𑀝𑀫𑀽𑀮𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀸𑀢𑀺𑀲𑀬𑀁 𑀲𑀦𑁆𑀢𑀯𑀼𑀢𑁆𑀢𑀺𑀢𑀸𑀬 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀅𑀦𑀸𑀕𑀸𑀫𑀺𑀆𑀤𑀻𑀦𑀁 𑀢𑀤𑀪𑀸𑀯𑀢𑁄𑀢𑀺 𑀯𑀤𑀦𑁆𑀢𑀺. 𑀝𑀻𑀓𑀸𑀓𑀸𑀭𑁄 𑀧𑀦 𑀆𑀦𑀦𑁆𑀤𑀸𑀘𑀭𑀺𑀬𑁄 𑀪𑀡𑀢𑀺 𑁋

‘‘𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀭𑀽𑀧𑀸𑀯𑀘𑀭𑁂, 𑀅𑀭𑀽𑀧𑀸𑀯𑀘𑀭𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁, 𑀬𑁂 𑀘 𑀭𑀽𑀧𑀸𑀯𑀘𑀭𑀁, 𑀅𑀭𑀽𑀧𑀸𑀯𑀘𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀘𑀯𑀦𑁆𑀢𑀸𑀦𑀁, 𑀢𑁂𑀲𑀁 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄 𑀘 𑀢𑁂𑀲𑀁 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀯𑀘𑀦𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺.

𑀆𑀘𑀭𑀺𑀬𑀲𑁆𑀲 𑀳𑀺 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀏𑀢𑁂𑀦 𑀅𑀯𑀺𑀲𑁂𑀲𑁂𑀦 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀘𑀼𑀢𑀺𑀘𑀺𑀢𑁆𑀢𑀲𑁆𑀲, ‘‘𑀬𑁂 𑀘 𑀭𑀽𑀧𑀸𑀯𑀘𑀭𑀁…𑀧𑁂… 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀫𑀪𑀯𑀢𑁄 𑀘𑀯𑀺𑀢𑁆𑀯𑀸 𑀭𑀽𑀧𑀸𑀭𑀽𑀧𑀪𑀯𑀽𑀧𑀧𑀚𑁆𑀚𑀦𑀓𑀸𑀦𑀁 𑀓𑀸𑀫𑀸𑀯𑀘𑀭𑀘𑀼𑀢𑀺𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀸𑀤𑀓𑁆𑀔𑀡𑀢𑁄 𑀉𑀤𑁆𑀥𑀁 𑀯𑀘𑀻𑀲𑀗𑁆𑀔𑀸𑀭𑀲𑁆𑀲 𑀦𑀺𑀭𑁄𑀥𑀁 𑀯𑀢𑁆𑀯𑀸 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀢𑀤𑀪𑀸𑀯𑀯𑀘𑀦𑀢𑁄 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀸𑀲𑀫𑀼𑀝𑁆𑀞𑀸𑀧𑀦𑀁 𑀲𑀺𑀤𑁆𑀥𑀁. 𑀬𑀤𑀕𑁆𑀕𑁂𑀦 𑀘 𑀢𑀁 𑀓𑀸𑀬𑀲𑀗𑁆𑀔𑀸𑀭𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀤𑀕𑁆𑀕𑁂𑀦 𑀢𑀁 𑀲𑁂𑀲𑀭𑀽𑀧𑀫𑁆𑀧𑀺 𑀦 𑀚𑀦𑁂𑀢𑀺. 𑀦 𑀳𑀺 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀲𑁆𑀲 𑀕𑀩𑁆𑀪𑀕𑀢𑀢𑀸𑀤𑀺𑀯𑀺𑀩𑀦𑁆𑀥𑀸𑀪𑀸𑀯𑁂 𑀓𑀸𑀬𑀲𑀗𑁆𑀔𑀸𑀭𑀸𑀲𑀫𑀼𑀝𑁆𑀞𑀸𑀧𑀦𑁂 𑀓𑀸𑀭𑀡𑀁 𑀅𑀢𑁆𑀣𑀺. 𑀦 𑀘 𑀬𑀼𑀢𑁆𑀢𑀁 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘𑀲𑁆𑀲 𑀭𑀽𑀧𑀁 𑀧𑀯𑀢𑁆𑀢𑀢𑀻𑀢𑀺, 𑀦𑀸𑀧𑀺 ‘‘𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 𑀧𑀸𑀴𑀺 𑀅𑀢𑁆𑀣𑀺, 𑀦 𑀘𑀸𑀧𑀺 𑀯𑀝𑁆𑀝𑀫𑀽𑀮𑀸𑀦𑀼𑀧𑀲𑀫𑁄 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀭𑀽𑀧𑀼𑀧𑁆𑀧𑀸𑀤𑀦𑁂 𑀓𑀸𑀭𑀡𑀁 𑀘𑀼𑀢𑀺𑀘𑀺𑀢𑁆𑀢𑁂𑀦 𑀦 𑀉𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀢𑀢𑁄 𑀧𑀼𑀭𑀺𑀫𑀢𑀭𑁂𑀳𑀺 𑀉𑀧𑁆𑀧𑀦𑁆𑀦𑀸𑀦𑀁 𑀯𑀺𑀬 𑀪𑀯𑀦𑁆𑀢𑀭𑁂 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀫𑁆𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺. 𑀬𑀤𑀺 𑀓𑀸𑀬𑀲𑀗𑁆𑀔𑀸𑀭𑀲𑀫𑀼𑀝𑁆𑀞𑀸𑀧𑀦𑀫𑁂𑀯 𑀭𑀽𑀧𑀚𑀦𑀦𑀸𑀭𑀳𑀪𑀸𑀯𑀁 𑀲𑀸𑀥𑁂𑀢𑀺, 𑀢𑀤𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀓𑀣𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄, 𑀢𑀲𑁆𑀲 𑀪𑀸𑀯𑀦𑀸𑀩𑀮𑁂𑀦 𑀲𑀸𑀢𑀺𑀲𑀬𑀁 𑀲𑀦𑁆𑀢𑀯𑀼𑀢𑁆𑀢𑀺𑀢𑀸𑀬 𑀓𑀸𑀬𑀲𑀗𑁆𑀔𑀸𑀭𑀸𑀲𑀫𑀼𑀝𑁆𑀞𑀸𑀧𑀦𑁂𑀧𑀺 𑀫𑀭𑀡𑀸𑀲𑀦𑁆𑀦𑀘𑀺𑀢𑁆𑀢𑀸𑀦𑀁 𑀯𑀺𑀬 𑀧𑀭𑀺𑀤𑀼𑀩𑁆𑀩𑀮𑀢𑁆𑀢𑀸𑀪𑀸𑀯𑀢𑁄 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂 𑀯𑀺𑀩𑀦𑁆𑀥𑁄 𑀦𑀢𑁆𑀣𑀻𑀢𑀺. 𑀓𑀼𑀢𑁄 𑀧𑀦 𑀧𑀝𑁆𑀞𑀸𑀬 𑀘𑀺𑀢𑁆𑀢𑀚𑀭𑀽𑀧𑀁 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀬𑀢𑁄 𑀧𑀝𑁆𑀞𑀸𑀬 𑀓𑀸𑀬𑀲𑀗𑁆𑀔𑀸𑀭𑁂 𑀦𑀼𑀧𑁆𑀧𑀚𑁆𑀚𑀢𑀺. 𑀓𑀤𑀸 𑀘 𑀓𑀸𑀬𑀲𑀗𑁆𑀔𑀸𑀭𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀘𑀼𑀢𑀺𑀢𑁄 𑀧𑀼𑀩𑁆𑀩𑁂 𑀤𑁆𑀯𑀢𑁆𑀢𑀺𑀁𑀲𑀫𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀦𑀼𑀧𑁆𑀧𑀚𑁆𑀚𑀢𑀺, 𑀢𑁂𑀢𑁆𑀢𑀺𑀁𑀲𑀫𑀘𑀺𑀢𑁆𑀢𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀧𑀘𑁆𑀙𑀺𑀫𑀲𑁄𑀴𑀲𑀓𑀢𑁄 𑀧𑀼𑀭𑁂𑀢𑀭𑀫𑁂𑀯 𑀦𑀺𑀭𑀼𑀚𑁆𑀛𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁧𑁧𑁩) 𑀧𑀜𑁆𑀳𑁂 ‘‘𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀓𑀸𑀬𑀲𑀗𑁆𑀔𑀸𑀭𑁄 𑀘 𑀦 𑀦𑀺𑀭𑀼𑀚𑁆𑀛𑀢𑀺, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀘 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲𑁂𑀯 𑀯𑀚𑁆𑀚𑀺𑀢𑀢𑁆𑀢𑀸 𑀘𑀼𑀢𑀺𑀢𑁄 𑀤𑀼𑀢𑀺𑀬𑀢𑀢𑀺𑀬𑀘𑀺𑀢𑁆𑀢𑁂𑀦𑀸𑀧𑀺 𑀲𑀳 𑀦𑀺𑀭𑀼𑀚𑁆𑀛𑀢𑀻𑀢𑀺 𑀅𑀧𑀭𑁂. 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 ‘‘𑀬𑀲𑁆𑀲𑀸’’𑀢𑀺 𑀓𑀸𑀫𑀸𑀯𑀘𑀭𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀁 𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀢𑀲𑁆𑀲 𑀉𑀧𑁆𑀧𑀸𑀤𑀢𑁄𑀧𑀺 𑀉𑀤𑁆𑀥𑀁 𑀓𑀸𑀬𑀲𑀗𑁆𑀔𑀸𑀭𑀸𑀪𑀸𑀯𑀯𑀘𑀦𑁂𑀦 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀘𑀼𑀢𑀺𑀢𑁄 𑀢𑀢𑀺𑀬𑀘𑀺𑀢𑁆𑀢𑁂𑀦𑁂𑀯 𑀲𑀳 𑀦𑀺𑀭𑀼𑀚𑁆𑀛𑀢𑀺. 𑀤𑀼𑀢𑀺𑀬𑀘𑀺𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀏𑀓𑁂.

𑁧𑁫𑁧-𑁭. 𑀏𑀓𑀁 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀇𑀫𑀲𑁆𑀲𑀸𑀢𑀺 𑀏𑀓𑀤𑁆𑀯𑀺𑀢𑀺𑀘𑀢𑀼𑀝𑁆𑀞𑀸𑀦𑀁, 𑀏𑀓𑀤𑁆𑀯𑀺𑀢𑀺𑀘𑀢𑀼𑀝𑁆𑀞𑀸𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀞𑀸𑀦𑀦𑁆𑀢𑀺 𑀘 𑀇𑀥 𑀓𑀺𑀘𑁆𑀘𑀫𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀸 𑀅𑀯𑀝𑁆𑀞𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 ‘‘𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀁𑀲𑀘𑀓𑁆𑀔𑀼𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀘𑀓𑁆𑀔𑀼𑀩𑀼𑀤𑁆𑀥𑀘𑀓𑁆𑀔𑀼𑀲𑀫𑀦𑁆𑀢𑀘𑀓𑁆𑀔𑀼𑀯𑀲𑁂𑀦 𑀧𑀜𑁆𑀘 𑀦𑀺𑀫𑁆𑀫𑀮𑀸𑀦𑀺 𑀮𑁄𑀘𑀦𑀸𑀦𑀺 𑀇𑀫𑀲𑁆𑀲𑀸𑀢𑀺 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄.

𑀦𑀺𑀧𑁆𑀧𑀧𑀜𑁆𑀘𑁂𑀦𑀸𑀢𑀺 𑀭𑀸𑀕𑀸𑀤𑀺𑀧𑀧𑀜𑁆𑀘𑀭𑀳𑀺𑀢𑁂𑀦. 𑀭𑀸𑀕𑀸𑀤𑀬𑁄 𑀳𑀺 𑀲𑀁𑀲𑀸𑀭𑁂 𑀧𑀧𑀜𑁆𑀘𑀦𑀢𑁄 ‘‘𑀧𑀧𑀜𑁆𑀘𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀆𑀯𑀚𑁆𑀚𑀦𑁂 𑀧𑀝𑀺𑀘𑁆𑀙𑀦𑁂 𑀞𑀸𑀦𑁂 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀝𑁆𑀞𑀸𑀦𑁂, 𑀯𑀺𑀧𑀸𑀓𑀤𑁆𑀯𑀬𑀁 𑀲𑀫𑁆𑀧𑀝𑀺𑀘𑁆𑀙𑀦𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄.

‘‘𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀲𑀦𑁆𑀢𑀻𑀭𑀡𑀁 𑀧𑀜𑁆𑀘𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀁 𑀲𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀦𑁆𑀢𑀻𑀭𑀡’’𑀦𑁆𑀢𑀺 𑀅𑀥𑀺𑀓𑀸𑀭𑀢𑁄𑀯 𑀮𑀩𑁆𑀪𑀢𑀻𑀢𑀺 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 ‘‘𑀲𑁄𑀫𑀦𑀲𑁆𑀲𑀬𑀼𑀢’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁.

𑀩𑀮𑀯𑀸𑀭𑀫𑁆𑀫𑀡𑁂 𑀲𑀢𑀻𑀢𑀺 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀲𑁆𑀲 𑀩𑀮𑀯𑀸𑀭𑀫𑁆𑀫𑀡𑁂𑀬𑁂𑀯 𑀮𑀩𑁆𑀪𑀦𑀢𑁄 𑀯𑀼𑀢𑁆𑀢𑀁, 𑀦 𑀇𑀫𑀲𑁆𑀲𑁂𑀯 𑀆𑀯𑁂𑀡𑀺𑀓𑀪𑀸𑀯𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀸𑀦𑀁 𑀩𑀮𑀯𑀸𑀭𑀫𑁆𑀫𑀡𑁂𑀬𑁂𑀯 𑀉𑀧𑁆𑀧𑀚𑁆𑀚𑀦𑀢𑁄. 𑀯𑁄𑀝𑁆𑀞𑀩𑁆𑀩𑀦𑀦𑁆𑀢𑀺 𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀔𑀸𑀢𑀁 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁 𑀘𑀺𑀢𑁆𑀢𑀁.

𑁧𑁫𑁮-𑁯. 𑀲𑀩𑁆𑀩𑁂𑀲𑀦𑁆𑀢𑀺 𑀲𑀩𑁆𑀩𑁂𑀲𑀁 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑀺𑀓𑀲𑀢𑁆𑀢𑀸𑀦𑀁. 𑀇𑀫𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁 𑀓𑁂𑀲𑀜𑁆𑀘𑀺𑀤𑁂𑀯 𑀲𑀢𑁆𑀢𑀸𑀦𑀁 𑀅𑀭𑀽𑀧𑀪𑀯𑁂 𑀲𑀩𑁆𑀩𑀲𑁄 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸, 𑀭𑀽𑀧𑀪𑀯𑁂 𑀘 𑀤𑁆𑀯𑀸𑀭𑀢𑁆𑀢𑀬𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀧𑀦 𑀲𑀩𑁆𑀩𑁂𑀲𑀫𑁂𑀯 𑀲𑀘𑀺𑀢𑁆𑀢𑀓𑀲𑀢𑁆𑀢𑀸𑀦𑀁 𑀓𑀭𑁄𑀢𑀻𑀢𑀺. 𑀤𑁆𑀯𑀺𑀝𑁆𑀞𑀸𑀦𑀺𑀓𑀁 𑀦𑀸𑀫 𑀳𑁄𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀤𑁆𑀯𑀬𑀯𑀦𑁆𑀢𑀢𑀸𑀬 𑀤𑁆𑀯𑀺𑀝𑁆𑀞𑀸𑀦𑀺𑀓𑀘𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀓𑁂𑀘𑀺 𑀧𑀦 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢𑀲𑀦𑁆𑀢𑀻𑀭𑀡𑀁 𑀓𑀸𑀫𑀲𑀼𑀕𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺, 𑀢𑀲𑁆𑀫𑀸 𑀢𑀁 𑀧𑀜𑁆𑀘𑀝𑁆𑀞𑀸𑀦𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀧𑀝𑁆𑀞𑀸𑀦𑁂 𑀢𑀣𑀸 𑀅𑀤𑀻𑀧𑀺𑀢𑀢𑁆𑀢𑀸. 𑀢𑀢𑁆𑀣 𑀳𑀺 𑁋

‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 (𑀧𑀝𑁆𑀞𑀸. 𑁨.𑁭.𑁮) ‘‘𑀅𑀳𑁂𑀢𑀼𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸, 𑀢𑀬𑁄 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄, 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸, 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸, 𑀢𑀬𑁄 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄, 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸’’𑀢𑀺 (𑀧𑀝𑁆𑀞𑀸. 𑁨.𑁭.𑁮) 𑁋

𑀏𑀯𑀁 𑀉𑀧𑁂𑀓𑁆𑀔𑀸𑀲𑀳𑀕𑀢-𑀧𑀤𑀲𑁆𑀲 𑀧𑀯𑀢𑁆𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀝𑀺𑀘𑁆𑀘𑀦𑀬𑁄 𑀉𑀤𑁆𑀥𑀝𑁄. 𑀧𑀻𑀢𑀺𑀲𑀳𑀕𑀢𑀲𑀼𑀔𑀲𑀳𑀕𑀢-𑀧𑀤𑀸𑀦𑀁 𑀧𑀦 𑁋

‘‘𑀧𑀻𑀢𑀺𑀲𑀳𑀕𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀧𑀻𑀢𑀺𑀲𑀳𑀕𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸. 𑀅𑀳𑁂𑀢𑀼𑀓𑀁 𑀧𑀻𑀢𑀺𑀲𑀳𑀕𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸, 𑀢𑀬𑁄 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄, 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸. 𑀲𑀼𑀔𑀲𑀳𑀕𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀼𑀔𑀲𑀳𑀕𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸. 𑀅𑀳𑁂𑀢𑀼𑀓𑀁 𑀲𑀼𑀔𑀲𑀳𑀕𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸, 𑀢𑀬𑁄 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀏𑀓𑁄 𑀔𑀦𑁆𑀥𑁄, 𑀤𑁆𑀯𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸’’𑀢𑀺 (𑀧𑀝𑁆𑀞𑀸. 𑁨.𑁭.𑁬) 𑁋

𑀏𑀯𑀁 𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀉𑀤𑁆𑀥𑀝𑁄, 𑀦 ‘‘𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂’’𑀢𑀺𑀆𑀤𑀺𑀦𑀸 𑀧𑀝𑀺𑀲𑀦𑁆𑀥𑀺𑀯𑀲𑁂𑀦, 𑀢𑀲𑁆𑀫𑀸 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀯𑀘𑀦𑀫𑁆𑀧𑀺 𑀅𑀪𑀸𑀯𑀫𑁂𑀯 𑀤𑀻𑀧𑁂𑀢𑀻𑀢𑀺 𑀦 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀅𑀢𑁆𑀣𑀻𑀢𑀺 𑀤𑁆𑀯𑀺𑀝𑁆𑀞𑀸𑀦𑀺𑀓𑀢𑀸𑀯 𑀯𑀼𑀢𑁆𑀢𑀸𑀢𑀺. 𑀢𑁂 𑀫𑀳𑀕𑁆𑀕𑀢𑀯𑀺𑀧𑀸𑀓𑀸 𑀦𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁬𑁨. 𑀙𑀤𑁆𑀯𑀸𑀭𑀸 𑀏𑀯 𑀙𑀤𑁆𑀯𑀸𑀭𑀺𑀓𑀸. 𑀅𑀣 𑀯𑀸 𑀙𑀤𑁆𑀯𑀸𑀭𑀺𑀓𑁂𑀲𑀽𑀢𑀺 𑀙𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀲𑀽𑀢𑀺 𑀅𑀢𑁆𑀣𑁄.

𑁧𑁬𑁪-𑁬. ‘‘𑀧𑀜𑁆𑀘𑀓𑀺𑀘𑁆𑀘’’𑀦𑁆𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀸𑀦𑀫𑁂𑀯 𑀦𑀺𑀕𑀫𑀦𑀁. 𑀲𑁂𑀲𑀦𑁆𑀢𑀺 𑀅𑀝𑁆𑀞𑀲𑀝𑁆𑀞𑀺𑀯𑀺𑀥𑀁 𑀘𑀺𑀢𑁆𑀢𑀁. 𑀏𑀓𑀓𑀺𑀘𑁆𑀘𑀬𑁄𑀕𑀢𑁄, 𑀏𑀓𑀁 𑀓𑀺𑀘𑁆𑀘𑀫𑀲𑁆𑀲𑀸𑀢𑀺 𑀯𑀸 𑀏𑀓𑀁, 𑀏𑀓𑀫𑁂𑀯 𑀏𑀓𑀓𑀁. 𑀲𑀩𑁆𑀩𑀘𑀺𑀢𑁆𑀢𑀸𑀦𑀁 𑀓𑀺𑀘𑁆𑀘𑀯𑀲𑁂𑀦 𑀦𑀺𑀤𑁆𑀤𑁂𑀲𑀝𑁆𑀞𑀸𑀦𑁂𑀬𑁂𑀯 𑀓𑀺𑀘𑁆𑀘𑀸𑀦𑀁 𑀧𑀝𑀺𑀧𑀸𑀝𑀺𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀪𑀯𑀗𑁆𑀕𑀸𑀯𑀚𑁆𑀚𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀲𑀘𑁆𑀘𑀁, 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀦𑀁 𑀧𑀦 𑀧𑀸𑀓𑀝𑀢𑁆𑀢𑀸 𑀢𑀣𑀸 𑀦 𑀯𑀼𑀢𑁆𑀢𑀁. 𑀪𑀯𑀲𑁆𑀲 𑀳𑀺 𑀧𑀝𑀺𑀲𑀦𑁆𑀥𑀺 𑀆𑀤𑀺, 𑀘𑀼𑀢𑀺 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀧𑀸𑀓𑀝𑀫𑁂𑀯, 𑀢𑀲𑁆𑀫𑀸 𑀧𑀸𑀓𑀝𑀝𑁆𑀞𑀸𑀦𑀁 𑀧𑀳𑀸𑀬 𑀅𑀧𑀸𑀓𑀝𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 𑀪𑀯𑀗𑁆𑀕𑀫𑁂𑀯 𑀆𑀤𑀺𑀢𑁄 𑀯𑀼𑀢𑁆𑀢𑀁. 𑀢𑀤𑀸𑀭𑀫𑁆𑀫𑀡𑀁 𑀧𑀦 𑀓𑀺𑀜𑁆𑀘𑀸𑀧𑀺 𑀅𑀧𑀸𑀓𑀝𑀁, 𑀅𑀣 𑀔𑁄 𑀅𑀦𑁂𑀓𑀦𑁆𑀢𑀺𑀓𑀁 𑀓𑀺𑀲𑁆𑀫𑀺𑀜𑁆𑀘𑀺 𑀪𑀯𑁂 𑀓𑀢𑁆𑀣𑀘𑀺 𑀚𑀯𑀦𑀯𑀻𑀣𑀺𑀬𑀁 𑀅𑀮𑀩𑁆𑀪𑀦𑀢𑁄𑀢𑀺 𑀏𑀓𑀦𑁆𑀢𑀮𑀩𑁆𑀪𑀫𑀸𑀦𑀧𑀭𑀺𑀤𑀻𑀧𑀦𑀢𑁆𑀣𑀁 𑀢𑀁 𑀦 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀫𑁆𑀧𑀺 𑀬𑁂𑀪𑀼𑀬𑁆𑀬𑁂𑀦 𑀪𑀯𑀗𑁆𑀕𑀦𑀸𑀫𑀁 𑀮𑀩𑁆𑀪𑀢𑀻𑀢𑀺 𑀧𑀼𑀭𑀺𑀫𑀚𑀯𑀦𑀯𑀻𑀣𑀺𑀬𑀁 𑀢𑀤𑀸𑀭𑀫𑁆𑀫𑀡𑀁 𑀧𑀘𑁆𑀙𑀺𑀫𑀚𑀯𑀦𑀯𑀻𑀣𑀺𑀬𑀸 𑀆𑀯𑀚𑁆𑀚𑀦𑀲𑁆𑀲 𑀧𑀼𑀭𑁂𑀘𑀭𑀪𑀽𑀢𑀁 𑀪𑀯𑀗𑁆𑀕-𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀢𑀸𑀬 𑀤𑀲𑁆𑀲𑀦𑀢𑁆𑀣𑀁 ‘𑀪𑀯𑀗𑁆𑀕𑀸𑀯𑀚𑁆𑀚𑀦’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀢𑁆𑀣 𑀧𑀦 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀦𑀁 𑀓𑁂𑀲𑀜𑁆𑀘𑀺 𑀲𑀩𑁆𑀪𑀸𑀯𑀢𑁄 𑀢𑀁 𑀦 𑀬𑀼𑀚𑁆𑀚𑀢𑀺, 𑀙𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀙𑀩𑁆𑀩𑀺𑀥𑀢𑁆𑀢𑀦𑀬𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸 𑀘𑁂𑀢𑁆𑀣 ‘‘𑀪𑀯𑀗𑁆𑀕𑀸𑀯𑀚𑁆𑀚𑀦’’𑀦𑁆𑀢𑀺𑀆𑀤𑀺𑀦𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀼𑀢𑁆𑀢𑀁, 𑀏𑀯𑀁 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀤𑀲𑁆𑀲𑀦𑀸𑀤𑀺𑀁 𑀅𑀧𑀦𑁂𑀢𑁆𑀯𑀸 𑀲𑀯𑀦𑀸𑀤𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀺𑀘𑁆𑀘𑀧𑁆𑀧𑀯𑀢𑁆𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑁋

‘‘𑀪𑀯𑀗𑁆𑀕𑀁 𑀧𑀞𑀫𑀁 𑀳𑁄𑀢𑀺, 𑀢𑀢𑁄 𑀆𑀯𑀚𑁆𑀚𑀦𑀁 𑀫𑀢𑀁;

𑀤𑀼𑀢𑀺𑀬𑀁 𑀢𑀫𑀢𑀺𑀓𑁆𑀓𑀫𑁆𑀫, 𑀚𑀯𑀦𑀁 𑀢𑀢𑀺𑀬𑀁 𑀲𑀺𑀬𑀸’’𑀢𑀺. 𑁋

𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀙𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁, 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀘. 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁, 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀲𑁆𑀲𑀸𑀢𑀺 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁.

𑁧𑁬𑁯-𑁭𑁧. 𑀧𑀜𑁆𑀘𑀸𑀪𑀺𑀜𑁆𑀜𑀸𑀯𑀺𑀯𑀚𑁆𑀚𑀺𑀢𑀦𑁆𑀢𑀺 𑁋

‘‘𑀇𑀤𑁆𑀥𑀺𑀯𑀺𑀥𑀁 𑀤𑀺𑀩𑁆𑀩𑀲𑁄𑀢𑁄, 𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀸;

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺, 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀧𑀜𑁆𑀘𑀥𑀸’’𑀢𑀺. 𑁋

𑀏𑀯𑀫𑀸𑀕𑀢𑀸𑀳𑀺 𑀧𑀜𑁆𑀘𑀳𑀺 𑀅𑀪𑀺𑀜𑁆𑀜𑀸𑀳𑀺 𑀬𑀼𑀢𑁆𑀢𑁂𑀦 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀘𑀺𑀢𑁆𑀢𑁂𑀦 𑀯𑀚𑁆𑀚𑀺𑀢𑀁. 𑀤𑀺𑀩𑁆𑀩𑀲𑁄𑀢𑀸𑀤𑀻𑀦𑀁 𑀏𑀓𑁂𑀓𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀧𑀜𑁆𑀘𑀦𑁆𑀦𑀫𑁆𑀧𑀺 𑀅𑀪𑀺𑀜𑁆𑀜𑀸𑀦𑀁 𑀏𑀓𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀅𑀯𑀢𑁆𑀣𑀸𑀪𑁂𑀤𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀸𑀪𑀺𑀜𑁆𑀜𑀸𑀯𑀺𑀯𑀚𑁆𑀚𑀺𑀢’’𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀇𑀥 𑀏𑀓𑀦𑁆𑀢𑁂𑀦 𑀥𑀫𑁆𑀫𑀸𑀭𑀫𑁆𑀫𑀡𑀺𑀓𑀘𑀺𑀢𑁆𑀢𑀸𑀦𑀫𑁂𑀯 𑀯𑀘𑀦𑀢𑁄 𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀁 𑀯𑀚𑁆𑀚𑁂𑀢𑁆𑀯𑀸 𑀅𑀦𑀸𑀕𑀢𑀁𑀲𑀜𑀸𑀡𑁂𑀦 𑀲𑀳 𑀧𑀜𑁆𑀘𑀸𑀪𑀺𑀜𑁆𑀜𑀸𑀦𑀁 𑀧𑀝𑀺𑀓𑁆𑀔𑁂𑀧𑁄’’𑀢𑀺 𑀯𑀤𑀦𑁆𑀢𑀺.

𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁, 𑀫𑀦𑁄𑀥𑀸𑀢𑀼𑀢𑁆𑀢𑀬𑀲𑁆𑀲 𑀘 𑀧𑀭𑀺𑀘𑁆𑀘𑀸𑀕𑁂𑀦 𑀏𑀓𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀘𑀢𑁆𑀢𑀸𑀮𑀻𑀲𑀁 𑀢𑀣𑁂𑀓𑀓’’𑀦𑁆𑀢𑀺. 𑀅𑀪𑀺𑀜𑁆𑀜𑀸𑀦𑀺 𑀘𑀸𑀢𑀺 𑀘-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀲𑁄 ‘‘𑀘𑀢𑁆𑀢𑀸𑀮𑀻𑀲𑀁 𑀢𑀣𑁂𑀓𑀓’’𑀦𑁆𑀢𑀺 𑀇𑀫𑀲𑁆𑀲𑀸𑀦𑀦𑁆𑀢𑀭𑀁 𑀤𑀝𑁆𑀞𑀩𑁆𑀩𑁄, 𑀢𑁂𑀦 𑀧𑀦 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀤𑁆𑀯𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀣 𑀯𑀸 𑀅𑀪𑀺𑀜𑁆𑀜𑀸 𑀦𑀸𑀫 𑀳𑁂𑀝𑁆𑀞𑀸 𑀏𑀓𑁂𑀓𑀸𑀭𑀫𑁆𑀫𑀡𑀺𑀓𑁂𑀲𑀼 𑀯𑀼𑀢𑁆𑀢𑀲𑁆𑀲 𑀧𑀜𑁆𑀘𑀫𑀚𑁆𑀛𑀸𑀦𑀲𑁆𑀲𑁂𑀯 𑀅𑀯𑀢𑁆𑀣𑀸𑀯𑀺𑀲𑁂𑀲𑁄𑀢𑀺 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀦𑀁 𑀙𑀴𑀸𑀭𑀫𑁆𑀫𑀡𑀺𑀓𑁂𑀲𑀼 𑀅𑀕𑁆𑀕𑀳𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁭𑁨-𑁩. 𑀢𑀺𑀥𑀸 𑀓𑀢𑁆𑀯𑀸𑀢𑀺 𑀢𑀺𑀥𑀸 𑀓𑀭𑀡𑀳𑁂𑀢𑀼. 𑀳𑁂𑀢𑁆𑀯𑀢𑁆𑀣𑁄 𑀳𑀺 𑀅𑀬𑀁 𑀢𑁆𑀯𑀸-𑀲𑀤𑁆𑀤𑁄 𑀬𑀣𑀸 ‘‘𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺. ‘‘𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀚𑀸𑀢𑀺𑀪𑀽𑀫𑀺𑀳𑁂𑀢𑀼𑀯𑁂𑀤𑀦𑀸𑀤𑀺𑀯𑀲𑁂𑀦 𑀬𑀸𑀯 𑀙𑀲𑀢𑁆𑀢𑀢𑀺𑀯𑀺𑀥𑁄 𑀪𑁂𑀤𑁄, 𑀢𑀸𑀯 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀁𑀯𑀲𑁂𑀦 𑀘𑀺𑀢𑁆𑀢𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀦𑀬𑀤𑀸𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁭𑁫. 𑀢𑀺𑀥𑀸 𑀓𑀢𑁆𑀯𑀸𑀢𑀺 𑀧𑀞𑀫𑀁 𑀯𑀺𑀧𑀸𑀓𑀤𑁆𑀯𑀬𑀓𑀺𑀭𑀺𑀬𑀸𑀪𑁂𑀤𑀢𑁄, 𑀤𑀼𑀢𑀺𑀬𑀁 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀢𑁄𑀢𑀺 𑀏𑀯𑀁 𑀥𑀸𑀢𑀼𑀤𑁆𑀯𑀬𑀁 𑀧𑀘𑁆𑀘𑁂𑀓𑀁 𑀢𑀺𑀥𑀸 𑀓𑀢𑁆𑀯𑀸.

𑁧𑁮𑁦. 𑀪𑀽𑀫𑀺…𑀧𑁂… 𑀯𑀺𑀪𑀸𑀯𑀬𑁂𑀢𑀺 𑀢𑀺𑀁𑀲𑀪𑀽𑀫𑀻𑀦𑀁 𑀦𑀸𑀦𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀢𑀺𑀁𑀲𑀯𑀺𑀥𑀁, 𑀢𑀢𑁆𑀣𑁂𑀯 𑀢𑀺𑀁𑀲𑀧𑀼𑀕𑁆𑀕𑀮𑀸𑀦𑀁 𑀦𑀸𑀦𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀘 𑀢𑀺𑀁𑀲𑀯𑀺𑀥𑀦𑁆𑀢𑀺𑀆𑀤𑀺𑀦𑀸 𑀇𑀤𑀁 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀘𑀺𑀢𑁆𑀢𑀁 𑀩𑀳𑀼𑀥𑀸 𑀳𑁄𑀢𑀻𑀢𑀺 𑀘 𑀯𑀺𑀪𑀸𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁧𑁮𑁧. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀳𑀢𑁆𑀣𑀕𑀢𑀸𑀫𑀮𑀓𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀬𑀣𑀸 𑀳𑀢𑁆𑀣𑀕𑀢𑀁 𑀆𑀫𑀮𑀓𑀁 𑀘𑀓𑁆𑀔𑀼𑀫𑀢𑁄 𑀲𑀼𑀧𑀸𑀓𑀝𑀁 𑀳𑁄𑀢𑀺, 𑀏𑀯𑀫𑀺𑀫𑀲𑁆𑀲 𑀫𑀢𑀺𑀫𑀢𑁄 𑀪𑀺𑀓𑁆𑀔𑀼𑀦𑁄 𑀅𑀪𑀺𑀥𑀫𑁆𑀫𑀧𑀺𑀝𑀓𑀕𑀢𑀸 𑀅𑀢𑁆𑀣𑀸 𑀲𑀼𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀆𑀯𑀚𑁆𑀚𑀺𑀢𑀸𑀯𑀚𑁆𑀚𑀺𑀢𑀓𑁆𑀔𑀡𑁂 𑀲𑀼𑀯𑀺𑀲𑀤𑀸𑀯 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀏𑀓𑀯𑀺𑀥𑀸𑀤𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.