𑁩. 𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀘𑁂𑀢𑀲𑀺𑀓𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁯. 𑀦𑀸𑀫𑀲𑀸𑀫𑀜𑁆𑀜𑀢𑁄𑀬𑁂𑀯 𑀤𑁆𑀯𑁂𑀧𑀜𑁆𑀜𑀸𑀲𑀸𑀢𑀺 𑀨𑀲𑁆𑀲𑀸𑀤𑀺𑀦𑀸𑀫𑀲𑀸𑀫𑀜𑁆𑀜𑁂𑀦 𑀤𑁆𑀯𑀻𑀳𑀺 𑀅𑀥𑀺𑀓𑀸 𑀧𑀡𑁆𑀡𑀸𑀲 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀪𑁂𑀤𑀢𑁄 𑀧𑀦 𑀏𑀓𑀽𑀦𑀦𑀯𑀼𑀢𑀺𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄 𑀨𑀲𑁆𑀲𑁄 𑀏𑀓𑀽𑀦𑀦𑀯𑀼𑀢𑀺𑀯𑀺𑀥𑁄𑀢𑀺 𑀏𑀯𑀫𑀸𑀤𑀺𑀦𑀸 𑀩𑀳𑀼𑀯𑀺𑀥𑀸𑀧𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀦𑀦𑀼 𑀘 𑀨𑀲𑁆𑀲𑀸𑀤𑀬𑁄 𑀳𑁂𑀝𑁆𑀞𑀸 𑀧𑀸𑀴𑀺𑀓𑁆𑀓𑀫𑁂𑀦 𑀤𑀲𑁆𑀲𑀺𑀢𑀸, 𑀇𑀥 𑀧𑀦 𑀓𑀲𑁆𑀫𑀸 𑀦 𑀢𑀣𑀸 𑀯𑀼𑀢𑁆𑀢𑀸𑀢𑀺? 𑀏𑀓𑁂𑀓𑀲𑀪𑀸𑀯𑀯𑀦𑁆𑀢𑀸𑀦𑀁 𑀢𑀁𑀢𑀁𑀲𑀸𑀫𑀜𑁆𑀜𑀸𑀧𑁂𑀓𑁆𑀔𑀸𑀬 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀤𑁆𑀤𑀺𑀲𑀺𑀢𑀼𑀓𑀸𑀫𑀢𑁆𑀢𑀸. 𑀨𑀲𑁆𑀲𑀸𑀤𑀬𑁄 𑀳𑀺 𑀫𑀦𑀓𑁆𑀓𑀸𑀭𑀸𑀯𑀲𑀸𑀦𑀸 𑀢𑁂𑀭𑀲 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑀸𑀫𑀜𑁆𑀜𑀢𑁄 𑀏𑀓𑀢𑁄 𑀯𑀼𑀢𑁆𑀢𑀸, 𑀫𑀚𑁆𑀛𑀢𑁆𑀢𑀸𑀤𑀬𑁄 𑀫𑀼𑀤𑀺𑀢𑀸𑀯𑀲𑀸𑀦𑀸 𑀧𑀜𑁆𑀘𑀯𑀻𑀲𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑀸𑀫𑀜𑁆𑀜𑀢𑁄, 𑀮𑁄𑀪𑀸𑀤𑀬𑁄 𑀧𑀦 𑀅𑀦𑁄𑀢𑁆𑀢𑀧𑁆𑀧𑀸𑀯𑀲𑀸𑀦𑀸 𑀅𑀓𑀼𑀲𑀮𑀪𑀸𑀯𑀲𑀸𑀫𑀜𑁆𑀜𑀢𑁄𑀢𑀺 𑀏𑀯𑀁 𑀢𑀁𑀢𑀁𑀲𑀸𑀫𑀜𑁆𑀜𑀸𑀧𑁂𑀓𑁆𑀔𑀸𑀬 𑀲𑀫𑀸𑀦𑀲𑀪𑀸𑀯𑀸 𑀥𑀫𑁆𑀫𑀸 𑀏𑀓𑀢𑁄 𑀯𑀼𑀢𑁆𑀢𑀸𑀢𑀺.

𑁯𑁦. 𑀏𑀯𑀁 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 ‘‘𑀏𑀢𑁆𑀢𑀓𑁂𑀲𑀼 𑀅𑀬𑀁 𑀥𑀫𑁆𑀫𑁄 𑀲𑀫𑀼𑀧𑀮𑀩𑁆𑀪𑀢𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀢𑁂𑀲𑀁 𑀧𑀬𑁄𑀕𑀁 𑀤𑀲𑁆𑀲𑁂𑀢𑀼𑀁 𑀧𑀞𑀫𑀁 𑀢𑀸𑀯 𑀘𑀺𑀢𑁆𑀢𑀕𑀡𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀢𑀼𑀧𑀜𑁆𑀜𑀸𑀲𑀥𑀸’’𑀢𑀺𑀆𑀤𑀺. 𑀓𑀸𑀫𑁂𑀢𑀺 𑀓𑀸𑀫𑀸𑀯𑀘𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 ‘‘𑀭𑀽𑀧𑁂 𑀅𑀭𑀽𑀧𑁂’’𑀢𑀺 𑀏𑀢𑁆𑀣𑀸𑀧𑀺. 𑀆𑀲𑀯𑀯𑀺𑀲𑀬𑀢𑁆𑀢𑀸𑀪𑀸𑀯𑀢𑁄 𑀦 𑀯𑀺𑀚𑁆𑀚𑀦𑁆𑀢𑀺 𑀏𑀢𑁂𑀲𑀼 𑀆𑀲𑀯𑀸𑀢𑀺 𑀅𑀦𑀸𑀲𑀯𑀸.

𑁯𑁧-𑁨. 𑀲𑀫𑀸𑀲𑀢𑁄𑀢𑀺 𑀯𑀺𑀢𑁆𑀣𑀸𑀭𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀁, 𑀦 𑀇𑀢𑁄𑀧𑀺 𑀲𑀫𑀸𑀲𑀲𑁆𑀲 𑀅𑀪𑀸𑀯𑀢𑁄. 𑀅𑀢𑀺𑀲𑀗𑁆𑀔𑁂𑀧𑀢𑁄 𑀧𑀦 𑀏𑀓𑀽𑀦𑀦𑀯𑀼𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀳𑁄𑀦𑁆𑀢𑀺. 𑀏𑀢𑁂𑀲𑀽𑀢𑀺 𑀇𑀫𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼. 𑀢𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀏𑀓𑁂𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀪𑀺𑀓𑁆𑀔𑀽𑀦𑀁 𑀧𑀸𑀝𑀯𑀢𑁆𑀣𑀸𑀬 𑀧𑀯𑀓𑁆𑀔𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀓𑀦𑁆𑀢𑀺 𑀏𑀓𑁂𑀓𑀁, 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀏-𑀓𑀸𑀭𑀮𑁄𑀧𑁄.

𑁯𑁩. 𑀘𑁂𑀢𑀲𑀺𑀓𑀯𑀺𑀪𑀸𑀕𑀁 𑀯𑀢𑁆𑀢𑀼𑀓𑀸𑀫𑁄𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 𑀘𑀺𑀢𑁆𑀢𑁂𑀦 𑀲𑀳 𑀏𑀓𑀢𑁄 𑀓𑀢𑁆𑀯𑀸 𑀆𑀳 ‘‘𑀨𑀲𑁆𑀲𑀧𑀜𑁆𑀘𑀓’’𑀦𑁆𑀢𑀺. 𑀏𑀓𑀢𑁄 𑀉𑀧𑁆𑀧𑀸𑀤𑁄 𑀏𑀢𑁂𑀲𑀦𑁆𑀢𑀺 𑀏𑀓𑀼𑀧𑁆𑀧𑀸𑀤𑀸, 𑀲𑀳 𑀔𑀻𑀬𑀦𑁆𑀢𑀻𑀢𑀺 𑀲𑀳𑀓𑁆𑀔𑀬𑀸, 𑀏𑀓𑀢𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀏𑀓𑀢𑁄 𑀦𑀺𑀭𑀼𑀚𑁆𑀛𑀦𑀓𑀸𑀢𑀺 𑀅𑀢𑁆𑀣𑁄.

𑁯𑁪. 𑀲𑀩𑁆𑀩𑁂𑀲𑁆𑀯𑁂𑀯 𑀏𑀓𑀯𑀻𑀲𑀲𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀲𑀫𑀼𑀧𑀮𑀩𑁆𑀪𑀦𑀢𑁄 𑀲𑀩𑁆𑀩𑀲𑀸𑀥𑀸𑀭𑀡𑀸. 𑀓𑀺𑀜𑁆𑀘𑀸𑀧𑀺 𑀅𑀦𑀦𑁆𑀢𑀭𑀕𑀸𑀣𑀸𑀬 𑀘𑀺𑀢𑁆𑀢𑁂𑀦 𑀲𑀳 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀓𑀣𑀦𑁂𑀦𑁂𑀯 𑀇𑀫𑁂𑀲𑀁 𑀲𑀩𑁆𑀩𑀲𑀸𑀥𑀸𑀭𑀡𑀢𑀸 𑀯𑀼𑀢𑁆𑀢𑀸, 𑀢𑀢𑁆𑀣 𑀧𑀦 𑀏𑀓𑀼𑀧𑁆𑀧𑀸𑀤𑀸𑀤𑀺𑀫𑀢𑁆𑀢𑀓𑀣𑀦𑀫𑁂𑀯 𑀇𑀘𑁆𑀙𑀺𑀢𑀁, 𑀦 𑀲𑀩𑁆𑀩𑀲𑀸𑀥𑀸𑀭𑀡𑀢𑀸. 𑀯𑀼𑀢𑁆𑀢𑁄𑀧𑀺 𑀯𑀸𑀬𑀫𑀢𑁆𑀣𑁄 𑀢𑀢𑁆𑀣 𑀅𑀧𑀸𑀓𑀝𑀢𑁆𑀢𑀸 𑀧𑀼𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀇𑀥 𑀯𑀼𑀢𑁆𑀢𑁄𑀢𑀺.

𑁯𑁫-𑁧𑁦𑁦. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀘𑀢𑀼𑀘𑀢𑁆𑀢𑀸𑀮𑀻𑀲𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀲𑀼, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀏𑀓𑀸𑀤𑀲𑀲𑀼 𑀧𑀞𑀫𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀧𑀜𑁆𑀘𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 𑀯𑀺𑀢𑀓𑁆𑀓𑀲𑁆𑀲 𑀤𑁂𑀲𑀺𑀢𑀢𑁆𑀢𑀸 𑀆𑀳 ‘‘𑀯𑀺𑀢𑀓𑁆𑀓𑁄…𑀧𑁂… 𑀲𑀫𑀼𑀤𑀻𑀭𑀺𑀢𑁄’’𑀢𑀺. 𑀯𑀺𑀘𑀸𑀭𑁄 𑀧𑀜𑁆𑀘𑀧𑀜𑁆𑀜𑀸𑀲𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑁂𑀲𑀼 𑀘𑁂𑀯 𑀏𑀓𑀸𑀤𑀲𑀲𑀼 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀙𑀲𑀝𑁆𑀞𑀺𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀘𑀸𑀭𑁄…𑀧𑁂… 𑀚𑀸𑀬𑀢𑁂’’𑀢𑀺.

𑀏𑀓𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 𑀧𑀻𑀢𑀻𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑁂𑀲𑀼 𑀅𑀝𑁆𑀞𑀸𑀭𑀲𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀲𑀼 𑀘𑁂𑀯 𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀯𑀚𑁆𑀚𑀺𑀢𑀢𑁂𑀢𑁆𑀢𑀺𑀁𑀲𑀭𑀽𑀧𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀏𑀓𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼 𑀧𑀻𑀢𑀺 𑀚𑀸𑀬𑀢𑀺. 𑀢𑁂𑀲𑀝𑁆𑀞𑀺𑀬𑀸 𑀲𑀼𑀔𑀦𑁆𑀢𑀺 𑀏𑀓𑀧𑀡𑁆𑀡𑀸𑀲𑀲𑀧𑁆𑀧𑀻𑀢𑀺𑀓𑀘𑀺𑀢𑁆𑀢𑁂𑀲𑀼 𑀘𑁂𑀯 𑀏𑀓𑀸𑀤𑀲𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑁂𑀲𑀼, 𑀓𑀼𑀲𑀮𑀯𑀺𑀧𑀸𑀓𑀓𑀸𑀬𑀯𑀺𑀜𑁆𑀜𑀸𑀡𑁂 𑀘𑀸𑀢𑀺 𑀢𑁂𑀲𑀝𑁆𑀞𑀺𑀬𑀸 𑀘𑀺𑀢𑁆𑀢𑁂𑀲𑀼 𑀲𑀼𑀔𑀁 𑀚𑀸𑀬𑀢𑀺. 𑀢𑁂𑀲𑀝𑁆𑀞𑀺𑀲𑀼𑀔𑀲𑀳𑀕𑀢𑀘𑀺𑀢𑁆𑀢𑀸𑀦𑀺 𑀘𑁂𑀯 𑀢𑀻𑀡𑀺 𑀘 𑀤𑀼𑀓𑁆𑀔𑀲𑀳𑀕𑀢𑀸𑀦𑀻𑀢𑀺 𑀙𑀲𑀝𑁆𑀞𑀺𑀘𑀺𑀢𑁆𑀢𑁂 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀧𑀜𑁆𑀘𑀧𑀡𑁆𑀡𑀸𑀲𑀘𑀺𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀉𑀧𑁂𑀓𑁆𑀔𑀸 𑀧𑀜𑁆𑀘𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀽’’𑀢𑀺. 𑀤𑀼𑀓𑁆𑀔𑀁 𑀢𑀻𑀲𑀽𑀢𑀺 𑀤𑁆𑀯𑀻𑀲𑀼 𑀧𑀝𑀺𑀖𑀘𑀺𑀢𑁆𑀢𑁂𑀲𑀼 𑀘𑁂𑀯 𑀅𑀓𑀼𑀲𑀮𑀯𑀺𑀧𑀸𑀓𑀓𑀸𑀬𑀯𑀺𑀜𑁆𑀜𑀸𑀡𑁂 𑀘𑀸𑀢𑀺 𑀢𑀻𑀲𑀼 𑀘𑀺𑀢𑁆𑀢𑁂𑀲𑀼 𑀤𑀼𑀓𑁆𑀔𑀁 𑀚𑀸𑀬𑀢𑀺. 𑀳𑁄𑀢𑀺…𑀧𑁂… 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀢𑁂𑀲𑀝𑁆𑀞𑀺𑀬𑀸 𑀲𑀼𑀔𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀏𑀓𑀫𑁂𑀯 𑀓𑀸𑀬𑀯𑀺𑀜𑁆𑀜𑀸𑀡𑀁 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑁂𑀲𑀼 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺. 𑀅𑀓𑀼𑀲𑀮𑀯𑀺𑀧𑀸𑀓𑀓𑀸𑀬𑀯𑀺𑀜𑁆𑀜𑀸𑀡𑀯𑀲𑁂𑀦 𑀏𑀓𑀫𑁂𑀯 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑀳𑀕𑀢𑀁, 𑀢𑀣𑀸 𑀓𑀼𑀲𑀮𑀯𑀺𑀧𑀸𑀓𑀓𑀸𑀬𑀯𑀺𑀜𑁆𑀜𑀸𑀡𑀫𑁂𑀯 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀲𑀼𑀔𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺.

𑀅𑀳𑁂𑀢𑀼𑀓𑀯𑀺𑀧𑀸𑀓𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀯𑀚𑁆𑀚𑀺𑀢𑁂𑀲𑀼 𑀫𑀚𑁆𑀛𑀺𑀫𑀕𑀡𑀦𑀸𑀬 𑀧𑀜𑁆𑀘𑀸𑀥𑀺𑀓𑀲𑀢𑀧𑀭𑀺𑀫𑀺𑀢𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀘𑀺𑀢𑁆𑀢𑁂𑀲𑀼 𑀯𑀻𑀭𑀺𑀬𑀁 𑀤𑁂𑀲𑀺𑀢𑀦𑁆𑀢𑀺 𑀆𑀳 ‘‘𑀧𑀜𑁆𑀘𑀼𑀢𑁆𑀢𑀭…𑀧𑁂… 𑀆𑀳𑀸’’𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂𑀲𑀼 𑀲𑀢𑁆𑀢𑁂 𑀯𑀺𑀦𑁂𑀢𑀺, 𑀯𑀺𑀕𑀢𑁄 𑀯𑀸 𑀦𑀸𑀬𑀓𑁄 𑀇𑀫𑀲𑁆𑀲, 𑀯𑀺𑀲𑀺𑀝𑁆𑀞𑁄 𑀯𑀸 𑀲𑀩𑁆𑀩𑀮𑁄𑀓𑀲𑁆𑀲 𑀦𑀸𑀬𑀓𑁄 𑀲𑀸𑀫𑀺, 𑀯𑀺𑀲𑁂𑀲𑁂𑀦 𑀯𑀸 𑀯𑀺𑀦𑁂𑀬𑁆𑀬𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀧𑀼𑀭𑀁 𑀦𑁂𑀢𑀻𑀢𑀺 𑀯𑀺𑀦𑀸𑀬𑀓𑁄. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀘𑀺𑀓𑀺𑀘𑁆𑀙𑀸𑀯𑀚𑁆𑀚𑀺𑀢𑀯𑀻𑀭𑀺𑀬𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀘𑀢𑀼𑀢𑁆𑀢𑀭𑀲𑀢𑁂’’𑀢𑀺𑀆𑀤𑀺.

𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺, 𑀤𑁆𑀯𑁂 𑀏𑀓𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀘 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀏𑀓𑀼𑀢𑁆𑀢𑀭𑀲𑀢𑁂 𑀘𑀺𑀢𑁆𑀢𑁂 𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀸𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀲 𑀯𑀺𑀜𑁆𑀜𑀸𑀡𑁂𑀢𑀺 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀯𑀲𑁂𑀦 𑀤𑁆𑀯𑀺𑀕𑀼𑀡𑀺𑀢𑁂 𑀘𑀓𑁆𑀔𑀸𑀤𑀺𑀓𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑁂.

𑁧𑁦𑁨-𑁬. 𑀦𑀺𑀬𑀢𑀸 𑀦 𑀬𑁂𑀯𑀸𑀧𑀦𑀓𑀸 𑀯𑀺𑀬 𑀓𑀤𑀸𑀘𑀻𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦𑁂𑀢𑁂 𑀏𑀓𑀦𑀯𑀼𑀢𑀺𑀬𑀸 𑀘𑀺𑀢𑁆𑀢𑁂𑀲𑁆𑀯𑁂𑀯 𑀚𑀸𑀬𑀦𑁆𑀢𑀻𑀢𑀺 𑀆𑀳 ‘‘𑀅𑀳𑁂𑀢𑀼𑀓𑁂𑀲𑀽’’𑀢𑀺𑀆𑀤𑀺. 𑀏𑀓𑀽𑀦𑀸𑀲𑀻𑀢𑀺𑀬𑀸𑀢𑀺 𑀤𑁆𑀯𑀸𑀤𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀸𑀦𑀺, 𑀧𑀜𑁆𑀘𑀤𑀲 𑀭𑀽𑀧𑀸𑀯𑀘𑀭𑀸𑀦𑀺, 𑀤𑁆𑀯𑀸𑀤𑀲 𑀅𑀭𑀽𑀧𑀸𑀯𑀘𑀭𑀸𑀦𑀺, 𑀲𑀫𑀘𑀢𑁆𑀢𑀸𑀮𑀻𑀲 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀻𑀢𑀺 𑀏𑀯𑀁 𑀏𑀓𑀽𑀦𑀸𑀲𑀻𑀢𑀺𑀬𑀸 𑀢𑀺𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼. 𑀅𑀝𑁆𑀞𑀯𑀻𑀲𑀢𑀺𑀬𑀸 𑀘𑀺𑀢𑁆𑀢𑁂𑀢𑀺 𑀲𑁄𑀴𑀲𑀲𑀼 𑀓𑀸𑀫𑀸𑀯𑀘𑀭𑀓𑀼𑀲𑀮𑀫𑀳𑀸𑀓𑀺𑀭𑀺𑀬𑀸𑀲𑀼, 𑀤𑁆𑀯𑀸𑀤𑀲𑀲𑀼 𑀘 𑀮𑁄𑀓𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀅𑀝𑁆𑀞𑀯𑀻𑀲𑀢𑀺𑀘𑀺𑀢𑁆𑀢𑁂𑀲𑀼. 𑀲𑀸𑀝𑁆𑀞𑀓𑁂 𑀘𑀢𑁆𑀢𑀸𑀮𑀻𑀲𑀯𑀺𑀥𑁂𑀢𑀺 𑀅𑀝𑁆𑀞𑀲𑀳𑀺𑀢𑁂 𑀘𑀢𑁆𑀢𑀸𑀮𑀻𑀲𑀯𑀺𑀥𑁂, 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀺𑀥𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀙 𑀬𑀼𑀕𑀴𑀸𑀦𑀻𑀢𑀺 𑀓𑀸𑀬𑀧𑀲𑁆𑀲𑀤𑁆𑀥𑀺𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀸𑀤𑀻𑀦𑀺 𑀙 𑀬𑀼𑀕𑀴𑀸𑀦𑀺. 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀘𑀸𑀢𑀺 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑁄𑀕𑀢𑁄 𑀓𑀼𑀲𑀮𑀸, 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑁆𑀧𑀬𑁄𑀕𑀢𑁄 𑀅𑀩𑁆𑀬𑀸𑀓𑀢𑀸𑀢𑀺 𑀓𑀼𑀲𑀮𑁂𑀦𑀧𑀓𑀸𑀲𑀦𑀯𑀺𑀥𑀸𑀦𑁂𑀲𑀼 𑀙𑁂𑀓𑁂𑀦 𑀲𑀢𑁆𑀣𑀼𑀦𑀸 𑀧𑀓𑀸𑀲𑀺𑀢𑀸 𑀤𑁂𑀲𑀺𑀢𑀸𑀢𑀺 𑀅𑀢𑁆𑀣𑁄.

𑁧𑁦𑁮-𑁧𑁧𑁧. 𑀲𑀁𑀲𑀬𑁄𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀳𑀺 𑀲𑀁𑀲𑁂𑀢𑀺 𑀲𑀫𑀦𑁆𑀢𑀢𑁄 𑀲𑁂𑀢𑀺, ‘‘𑀏𑀯𑀁 𑀦𑀼 𑀔𑁄, 𑀦𑁄 𑀦𑀼 𑀔𑁄’’𑀢𑀺 𑀧𑀭𑀺𑀲𑀧𑁆𑀧𑀢𑀻𑀢𑀺 𑀲𑀁𑀲𑀬𑁄. 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀓𑁂 𑀏𑀲𑀢𑀺 𑀕𑀯𑁂𑀲𑀢𑀻𑀢𑀺 𑀫𑀳𑁂𑀲𑀻. 𑀢𑁂𑀦 𑀫𑀳𑁂𑀲𑀺𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀅𑀝𑁆𑀞𑀲𑀽𑀢𑀺 𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼. 𑀘𑀢𑀽𑀲𑀽𑀢𑀺 𑀢𑁂𑀲𑁆𑀯𑁂𑀯 𑀤𑀺𑀝𑁆𑀞𑀺𑀲𑀳𑀕𑀢𑀘𑀺𑀢𑁆𑀢𑁂𑀲𑀼. 𑀤𑀺𑀝𑁆𑀞𑀺𑀯𑀺𑀬𑀼𑀢𑁆𑀢𑁂𑀲𑀼 𑀘𑀢𑀽𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑀻𑀲𑁆𑀯𑁂𑀯𑀸𑀢𑀺 𑀤𑁆𑀯𑀻𑀲𑀼 𑀤𑁄𑀲𑀫𑀽𑀮𑀓𑀘𑀺𑀢𑁆𑀢𑁂𑀲𑀼. 𑀤𑁆𑀯𑀻𑀲𑀼 𑀚𑀸𑀬𑀦𑁆𑀢𑀺 𑀦𑁄 𑀲𑀳𑀸𑀢𑀺 𑀤𑁄𑀲𑀫𑀽𑀮𑁂𑀲𑁆𑀯𑁂𑀯 𑀤𑁆𑀯𑀻𑀲𑀼 𑀚𑀸𑀬𑀦𑁆𑀢𑀺, 𑀲𑀳 𑀧𑀦 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀲𑀽𑀬𑀦𑀓𑀸𑀮𑁂 𑀇𑀲𑁆𑀲𑀸, 𑀫𑀘𑁆𑀙𑀭𑀡𑀓𑀸𑀮𑁂 𑀫𑀘𑁆𑀙𑁂𑀭𑀦𑁆𑀢𑀺𑀆𑀤𑀺𑀦𑀸 𑀦𑀸𑀦𑀸 𑀳𑀼𑀢𑁆𑀯𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀜𑁆𑀘𑀲𑀽𑀢𑀺 𑀧𑀜𑁆𑀘𑀲𑀼 𑀲𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀲𑀼.

𑁧𑁧𑁨. 𑀘𑀺𑀢𑁆𑀢𑀲𑁆𑀲 𑀘𑁂𑀢𑀲𑀺𑀓𑀢𑁆𑀢𑀸𑀪𑀸𑀯𑁂𑀧𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀁 𑀕𑀡𑀦𑀝𑁆𑀞𑀸𑀦𑀢𑁄 ‘‘𑀫𑀦𑁄’’𑀢𑀺 𑀘𑀺𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀁.

𑁧𑁧𑁪-𑁫. 𑀏𑀢𑁆𑀢𑀸𑀯𑀢𑀸 𑀘𑁂𑀢𑀲𑀺𑀓𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀏𑀓𑁂𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀮𑀩𑁆𑀪𑀫𑀸𑀦𑀭𑀸𑀲𑀻𑀲𑀼 𑀅𑀗𑁆𑀕𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 ‘‘𑀏𑀓𑀽𑀦𑀢𑀺𑀁𑀲𑀘𑀺𑀢𑁆𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀦𑀼 𑀘 𑀨𑀲𑁆𑀲𑀧𑀜𑁆𑀘𑀫𑀓𑀭𑀸𑀲𑀺 𑀲𑀩𑁆𑀩𑀧𑀞𑀫𑀁 𑀆𑀕𑀢𑀸, 𑀲𑀸 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀸𑀢𑀺? 𑀲𑀩𑁆𑀩𑀲𑀸𑀥𑀸𑀭𑀡𑀪𑀸𑀯𑀢𑁄. 𑀦 𑀳𑀺 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀢𑁆𑀣𑀺, 𑀬𑁄 𑀨𑀲𑁆𑀲𑀧𑀜𑁆𑀘𑀫𑀓𑀯𑀺𑀦𑀺𑀫𑀼𑀢𑁆𑀢𑁄𑀢𑀺. 𑀏𑀓𑀸𑀤𑀲 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺, 𑀤𑁆𑀯𑀸𑀤𑀲 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀸𑀦𑀺, 𑀢𑀣𑀸 𑀘𑀢𑁆𑀢𑀸𑀭𑀺 𑀅𑀓𑀼𑀲𑀮𑀸𑀦𑀺, 𑀲𑀼𑀔𑀲𑀦𑁆𑀢𑀻𑀭𑀡𑀳𑀲𑀺𑀢𑀼𑀧𑁆𑀧𑀸𑀤𑀸𑀦𑀺 𑀤𑁆𑀯𑁂𑀢𑀺 𑀏𑀓𑀽𑀦𑀢𑀺𑀁𑀲𑀘𑀺𑀢𑁆𑀢𑁂𑀲𑀼 𑀧𑀜𑁆𑀘𑀗𑁆𑀕𑀺𑀓𑀁 𑀛𑀸𑀦𑀁 𑀧𑀜𑁆𑀘𑀓𑀭𑀸𑀲𑀺𑀲𑀗𑁆𑀔𑀸𑀢𑀁 𑀫𑀢𑀁. 𑀘𑀢𑀼…𑀧𑁂… 𑀦𑀺𑀤𑁆𑀤𑀺𑀲𑁂𑀢𑀺 𑀏𑀓𑀸𑀤𑀲 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀦𑀺, 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑀲𑁂𑀦 𑀤𑁆𑀯𑀸𑀤𑀲 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀸𑀦𑀺, 𑀉𑀧𑁂𑀓𑁆𑀔𑀸𑀤𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺 𑀅𑀝𑁆𑀞 𑀅𑀓𑀼𑀲𑀮𑀸𑀦𑀺, 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀙 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀘𑀸𑀢𑀺 𑀇𑀫𑀸𑀦𑀺 𑀲𑀢𑁆𑀢𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀬𑀣𑀸𑀬𑁄𑀕𑀁 𑀘𑀢𑀽𑀳𑀺 𑀛𑀸𑀦𑀗𑁆𑀕𑁂𑀳𑀺 𑀬𑀼𑀢𑁆𑀢𑀸𑀦𑀺. 𑀏𑀢𑁆𑀣 𑀳𑀺 𑀏𑀓𑀸𑀤𑀲 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀦𑀺 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀲𑀫𑀸𑀥𑀻𑀳𑀺 𑀲𑀳𑀕𑀢𑀸𑀦𑀺, 𑀇𑀢𑀭𑀸𑀦𑀺 𑀬𑀣𑀸𑀬𑁄𑀕𑀁 𑀉𑀧𑁂𑀓𑁆𑀔𑀸𑀤𑁄𑀫𑀦𑀲𑁆𑀲𑁂𑀲𑀼 𑀏𑀓𑁂𑀓𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀸𑀥𑀻𑀳𑀻𑀢𑀺 𑀘𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀺.

𑀏𑀓𑀸𑀤𑀲𑀯𑀺𑀥𑀦𑁆𑀢𑀺 𑀏𑀓𑀸𑀤𑀲𑀯𑀺𑀥𑀁 𑀢𑀢𑀺𑀬𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑀁 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑁄𑀕𑀢𑁄 𑀢𑀺𑀯𑀗𑁆𑀕𑀺𑀓𑀫𑀼𑀤𑀻𑀭𑀺𑀢𑀁. 𑀘𑀢𑀼𑀢𑁆𑀢𑀺𑀁𑀲…𑀧𑁂… 𑀫𑀼𑀤𑀻𑀭𑀺𑀢𑀦𑁆𑀢𑀺 𑀤𑁆𑀯𑀸𑀤𑀲 𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀤𑁆𑀯𑀸𑀯𑀻𑀲𑀢𑀺 𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀺 𑀲𑀸𑀲𑀯𑀸𑀦𑀸𑀲𑀯𑀸𑀦𑀻𑀢𑀺 𑀘𑀢𑀼𑀢𑁆𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀬𑀣𑀸𑀬𑁄𑀕𑀁 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀬𑁄𑀕𑀢𑁄, 𑀲𑀼𑀔𑁂𑀓𑀕𑁆𑀕𑀢𑀸𑀬𑁄𑀕𑀢𑁄 𑀘 𑀤𑀼𑀯𑀗𑁆𑀕𑀺𑀓𑀫𑀼𑀤𑀻𑀭𑀺𑀢𑀁. 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸𑀦𑀺 𑀳𑀺 𑀏𑀓𑀸𑀤𑀲 𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀸𑀦𑀺, 𑀲𑁂𑀲𑀸𑀦𑀺 𑀢𑁂𑀯𑀻𑀲𑀢𑀺 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀸𑀦𑀺.

𑁧𑁧𑁬. 𑀲𑀪𑀸𑀯𑁂𑀦𑀸𑀯𑀺𑀢𑀓𑁆𑀓𑁂𑀲𑀽𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀬𑁄 𑀯𑀺𑀬 𑀪𑀸𑀯𑀦𑀸𑀩𑀮𑁂𑀦 𑀯𑀺𑀦𑀸 𑀲𑀪𑀸𑀯𑁂𑀦𑁂𑀯 𑀅𑀯𑀺𑀢𑀓𑁆𑀓𑁂𑀲𑀼 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼. 𑀢𑁂𑀲𑀼 𑀳𑀺 𑀯𑀺𑀚𑁆𑀚𑀫𑀸𑀦𑀸𑀦𑀺𑀧𑀺 𑀲𑁂𑀲𑀛𑀸𑀦𑀗𑁆𑀕𑀸𑀦𑀺 𑀯𑀺𑀢𑀓𑁆𑀓𑀯𑀺𑀭𑀳𑁂𑀦 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑁂𑀲𑀼 𑀅𑀲𑀫𑀢𑁆𑀣𑀸𑀦𑀺. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀯𑀺𑀢𑀓𑁆𑀓𑀧𑀘𑁆𑀙𑀺𑀫𑀓𑀜𑁆𑀳𑀺 𑀛𑀸𑀦𑀗𑁆𑀕𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀪𑀸𑀯𑀦𑀸𑀬 𑀅𑀯𑀺𑀢𑀓𑁆𑀓𑀪𑀸𑀯𑀧𑁆𑀧𑀢𑁆𑀢𑀸𑀦𑀺 𑀧𑀦 𑀪𑀸𑀯𑀦𑀸𑀩𑀮𑁂𑀦𑁂𑀯 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑁂𑀲𑀼 𑀧𑀝𑀼𑀢𑀭𑀸, 𑀢𑀲𑁆𑀫𑀸 𑀲𑀪𑀸𑀯𑁂𑀦𑀸𑀯𑀺𑀢𑀓𑁆𑀓𑁂𑀲𑀼 𑀛𑀸𑀦𑀗𑁆𑀕𑀸𑀦𑀺 𑀦 𑀉𑀤𑁆𑀥𑀭𑁂𑀬𑁆𑀬. ‘‘𑀦 𑀉𑀤𑁆𑀥𑀝𑀸’’𑀢𑀺 𑀯𑀸 𑀧𑀸𑀞𑁄, 𑀦 𑀉𑀤𑁆𑀥𑀝𑀸𑀦𑀻𑀢𑀺 𑀅𑀢𑁆𑀣𑁄.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀲𑀭𑀽𑀧𑁂𑀦𑁂𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀯𑀼𑀢𑁆𑀢𑀸, 𑀦𑀦𑀼 𑀢𑀲𑁆𑀲𑀸 𑀯𑀺𑀢𑀓𑁆𑀓𑀯𑀺𑀭𑀳𑁂𑀦 𑀛𑀸𑀦𑀗𑁆𑀕𑀓𑀺𑀘𑁆𑀘𑁂 𑀅𑀲𑀫𑀢𑁆𑀣𑀢𑀸𑀬 𑀭𑀸𑀲𑀺𑀪𑀚𑀦𑀸𑀪𑀸𑀯𑀢𑁄 𑀬𑁂𑀯𑀸𑀧𑀦𑀓𑀯𑀲𑁂𑀦 𑀯𑀘𑀦𑀁 𑀬𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀅𑀯𑀺𑀚𑁆𑀚𑀫𑀸𑀦𑀥𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀲𑀼𑀧𑀺 𑀅𑀦𑀼𑀧𑀮𑀩𑁆𑀪𑀦𑀢𑁄 𑀛𑀸𑀦𑀗𑁆𑀕𑀓𑀺𑀘𑁆𑀘𑀲𑁆𑀲 𑀅𑀓𑀭𑀡𑁂𑀧𑀺 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀤𑁂𑀲𑀺𑀢𑀦𑀺𑀬𑀸𑀫𑁂𑀦𑁂𑀯 𑀲𑀭𑀽𑀧𑁂𑀦 𑀇𑀥𑀸𑀧𑀺 𑀯𑀼𑀢𑁆𑀢𑀸. 𑀳𑁄𑀢𑀼 𑀢𑀸𑀯 𑀏𑀢𑀁, 𑀛𑀸𑀦𑀭𑀸𑀲𑀺𑀬𑀁 𑀯𑁂𑀤𑀦𑀸 𑀓𑀲𑁆𑀫𑀸 𑀯𑀼𑀢𑁆𑀢𑀸. 𑀲𑀸 𑀳𑀺 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀪𑀸𑀯𑀢𑁄 𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀺𑀫𑁆𑀳𑀺 𑀘𑁂𑀯, 𑀉𑀧𑁂𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀪𑀸𑀯𑀢𑁄 𑀇𑀦𑁆𑀤𑁆𑀭𑀺𑀬𑀭𑀸𑀲𑀺𑀫𑁆𑀳𑀺𑀬𑁂𑀯 𑀯𑀢𑁆𑀢𑀩𑁆𑀩𑀸, 𑀦 𑀇𑀢𑀭𑀢𑁆𑀣 𑀢𑀤𑀪𑀸𑀯𑀢𑁄𑀢𑀺? 𑀲𑀘𑁆𑀘𑀁, 𑀯𑁂𑀤𑀦𑀸 𑀧𑀦 𑀲𑀩𑁆𑀩𑀯𑁂𑀤𑀦𑀸𑀦𑀁 𑀲𑀸𑀫𑀜𑁆𑀜𑀲𑀪𑀸𑀯𑁂𑀦 𑀨𑀲𑁆𑀲𑀧𑀜𑁆𑀘𑀓𑁂 𑀆𑀕𑀢𑀯𑁂𑀤𑀦𑀸 𑀘 𑀅𑀧𑀭𑁂𑀦 𑀯𑀺𑀲𑁂𑀲𑀯𑀘𑀦𑁂𑀦 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀸, 𑀦 𑀢𑀢𑁆𑀣 𑀅𑀦𑁆𑀢𑁄𑀓𑀭𑀡𑀢𑁆𑀣𑀁. 𑀢𑁂𑀦𑁂𑀯 𑀳𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀲𑀗𑁆𑀕𑀳𑀯𑀸𑀭𑁂 𑀛𑀸𑀦𑀗𑁆𑀕𑀭𑀸𑀲𑀺 𑀦 𑀉𑀤𑁆𑀥𑀝𑀸𑀢𑀺 𑀭𑀽𑀧𑀥𑀸𑀢𑀼𑀬𑀁 𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀁 𑀅𑀧𑁆𑀧𑀝𑀺𑀖𑀪𑀸𑀯𑁂𑀧𑀺 𑀓𑀸𑀫𑀥𑀸𑀢𑀼𑀬𑀁 𑀲𑀧𑁆𑀧𑀝𑀺𑀖𑀫𑀳𑀸𑀪𑀽𑀢𑁂𑀳𑀺 𑀲𑀫𑀸𑀦𑀪𑀸𑀯𑀢𑁄 𑀢𑀢𑁆𑀣𑀸𑀧𑀺 𑀲𑀧𑁆𑀧𑀝𑀺𑀖𑀪𑀸𑀯𑁄 𑀯𑀺𑀬 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀯𑁂𑀤𑀦𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀁 𑀯𑀺𑀢𑀓𑁆𑀓𑀯𑀺𑀬𑁄𑀕𑁂𑀦 𑀛𑀸𑀦𑀓𑀺𑀘𑁆𑀘𑀸𑀓𑀭𑀡𑁂𑀧𑀺 𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑁂𑀲𑀼 𑀛𑀸𑀦𑀘𑀺𑀢𑁆𑀢𑀲𑀫𑀗𑁆𑀕𑀻𑀯𑁂𑀤𑀦𑀸𑀤𑀻𑀳𑀺 𑀲𑀫𑀸𑀦𑀢𑁆𑀢𑀸 𑀛𑀸𑀦𑀗𑁆𑀕𑀪𑀸𑀯𑁂𑀦 𑀯𑀘𑀦𑀁 𑀦𑀸𑀫 𑀬𑀼𑀢𑁆𑀢𑀁. 𑀢𑁂𑀦𑁂𑀯 𑀘 𑀦𑀸𑀫𑀭𑀽𑀧𑀲𑀫𑀸𑀲𑁂 ‘‘𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀺𑀛𑀸𑀦𑀤𑀼𑀓𑀭𑀸𑀲𑀺𑀇𑀦𑁆𑀤𑁆𑀭𑀺𑀬𑀢𑁆𑀢𑀺𑀓𑀭𑀸𑀲𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀅𑀣 𑀯𑀸 𑀓𑀺𑀁 𑀏𑀢𑀸𑀬 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬, 𑀥𑀫𑁆𑀫𑀲𑀪𑀸𑀯𑀯𑁂𑀤𑀺𑀦𑀸 𑀢𑀣𑀸𑀕𑀢𑁂𑀦 𑀥𑀫𑁆𑀫𑀲𑀪𑀸𑀯𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀤𑁂𑀲𑀺𑀢𑀦𑁆𑀢𑀺 𑀦 𑀏𑀢𑁆𑀣 𑀅𑀦𑀼𑀬𑁄𑀕𑁄 𑀓𑀸𑀢𑀩𑁆𑀩𑁄𑀢𑀺. 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑀸𑀪𑀸𑀯𑁂𑀦 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸…𑀧𑁂… 𑀦 𑀉𑀤𑁆𑀥𑀭𑁂’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀳𑁂𑀢𑀼𑀧𑀘𑁆𑀙𑀺𑀫𑀓𑁄 𑀫𑀕𑁆𑀕𑁄’’𑀢𑀺.

𑁧𑁧𑁭. 𑀢𑀻𑀡𑀺 𑀲𑁄𑀴𑀲𑀘𑀺𑀢𑁆𑀢𑁂𑀲𑀽𑀢𑀺 𑀧𑀦𑁆𑀦𑀭𑀲𑀲𑀼 𑀅𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑁂𑀲𑀼 𑀘𑁂𑀯 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀫𑁆𑀳𑀺 𑀘𑀸𑀢𑀺 𑀲𑁄𑀴𑀲𑀲𑀼 𑀘𑀺𑀢𑁆𑀢𑁂𑀲𑀼. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑁂𑀤𑀦𑀺𑀦𑁆𑀤𑁆𑀭𑀺𑀬𑁂𑀲𑀼 𑀮𑀩𑁆𑀪𑀫𑀸𑀦𑀫𑁂𑀓𑀦𑁆𑀢𑀺 𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺. 𑀇𑀫𑁂𑀲𑀼𑀧𑀺 𑀓𑀼𑀲𑀮𑀯𑀺𑀧𑀸𑀓𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀲𑀼𑀔𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀓𑀼𑀲𑀮𑀯𑀺𑀧𑀸𑀓𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑁂𑀦 𑀲𑀳 𑀢𑀻𑀡𑀺, 𑀲𑀼𑀔𑀲𑀦𑁆𑀢𑀻𑀭𑀡𑁂 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀦 𑀲𑀳 𑀢𑀻𑀡𑀺, 𑀅𑀯𑀲𑁂𑀲𑀢𑁂𑀭𑀲𑀘𑀺𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑁂𑀦 𑀲𑀳 𑀢𑀻𑀡𑀻𑀢𑀺. 𑀏𑀢𑁆𑀣 𑀘𑀺𑀢𑁆𑀢𑀦𑁆𑀢𑀺 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲𑀸𑀧𑀺 𑀆𑀥𑀸𑀭𑀪𑀸𑀯𑁄 𑀬𑀼𑀚𑁆𑀚𑁂𑀬𑁆𑀬. 𑀇𑀢𑀭𑀣𑀸 𑀳𑀺 𑀫𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀘𑀺𑀢𑁆𑀢𑀲𑁆𑀲𑁂𑀯 𑀕𑀳𑀡𑁂 𑀢𑀲𑁆𑀲 𑀅𑀢𑁆𑀢𑀦𑁄 𑀘 𑀆𑀥𑀸𑀭𑀪𑀸𑀯𑁄 𑀦 𑀬𑀼𑀚𑁆𑀚𑀢𑀻𑀢𑀺. 𑀏𑀓𑀲𑁆𑀫𑀺𑀁 𑀧𑀦 𑀘𑀢𑁆𑀢𑀸𑀭𑀻𑀢𑀺 𑀏𑀓𑀲𑁆𑀫𑀺𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀫𑀦𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀘𑀢𑁆𑀢𑀸𑀭𑀺. 𑀧𑀜𑁆𑀘 𑀢𑁂𑀭𑀲𑀲𑀽𑀢𑀺 𑀞𑀧𑁂𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁 𑀅𑀯𑀲𑁂𑀲𑀸𑀦𑀺 𑀏𑀓𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑀦𑁆𑀢𑀺 𑀢𑁂𑀭𑀲𑀲𑀼 𑀘𑀺𑀢𑁆𑀢𑁂𑀲𑀼 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀢𑀻𑀡𑀺, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀯𑁂𑀤𑀦𑀺𑀦𑁆𑀤𑁆𑀭𑀺𑀬𑁂𑀲𑀼 𑀮𑀩𑁆𑀪𑀫𑀸𑀦𑀁 𑀏𑀓𑀦𑁆𑀢𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀏𑀢𑁆𑀣 𑀳𑀺 𑀤𑁆𑀯𑀻𑀲𑀼 𑀤𑁄𑀲𑀫𑀽𑀮𑁂𑀲𑀼 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀫𑀦𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀧𑀜𑁆𑀘, 𑀧𑀜𑁆𑀘𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀲𑀼 𑀧𑀼𑀭𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘, 𑀲𑁂𑀲𑁂𑀲𑀼 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘 𑀳𑁄𑀦𑁆𑀢𑀺.

𑁧𑁧𑁮. 𑀲𑀢𑁆𑀢 𑀤𑁆𑀯𑀸𑀤𑀲𑀘𑀺𑀢𑁆𑀢𑁂𑀲𑀽𑀢𑀺 𑀤𑁆𑀯𑀸𑀤𑀲𑀲𑀼 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼 𑀲𑀤𑁆𑀥𑀸𑀲𑀢𑀺𑀲𑀫𑀸𑀥𑀺𑀯𑀻𑀭𑀺𑀬𑀚𑀻𑀯𑀺𑀢𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀘 𑀯𑁂𑀤𑀦𑀺𑀦𑁆𑀤𑁆𑀭𑀺𑀬𑁂𑀲𑀼 𑀮𑀩𑁆𑀪𑀫𑀸𑀦𑀫𑁂𑀓𑀦𑁆𑀢𑀺 𑀲𑀢𑁆𑀢 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑀢𑁆𑀣 𑀳𑀺 𑀙𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀲𑀼 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀙 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢, 𑀇𑀢𑀭𑁂𑀲𑀼 𑀙𑀲𑀼 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 𑀳𑁄𑀦𑁆𑀢𑀺. 𑀏𑀓𑁂𑀦𑀽𑀦𑁂𑀲𑀼…𑀧𑁂… 𑀫𑀦𑁂𑀲𑀼 𑀘𑀸𑀢𑀺 𑀤𑁆𑀯𑀸𑀤𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺, 𑀲𑀢𑁆𑀢𑀯𑀻𑀲𑀢𑀺 𑀮𑁄𑀓𑀺𑀬𑀚𑁆𑀛𑀸𑀦𑀘𑀺𑀢𑁆𑀢𑀸𑀦𑀺 𑀘𑀸𑀢𑀺 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀯𑀺𑀥𑁂𑀲𑀼 𑀮𑁄𑀓𑀺𑀬𑀘𑀺𑀢𑁆𑀢𑁂𑀲𑀼 𑀧𑀼𑀭𑀺𑀫𑀸𑀦𑀺 𑀲𑀢𑁆𑀢, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘𑀸𑀢𑀺 𑀅𑀝𑁆𑀞𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀏𑀢𑁆𑀣 𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀲𑀼 𑀙𑀲𑀼 𑀓𑀸𑀫𑀸𑀯𑀘𑀭𑁂𑀲𑀼, 𑀤𑁆𑀯𑀸𑀤𑀲𑀲𑀼 𑀭𑀽𑀧𑀸𑀯𑀘𑀭𑀘𑀢𑀼𑀓𑁆𑀓𑀚𑁆𑀛𑀸𑀦𑁂𑀲𑀼 𑀘𑀸𑀢𑀺 𑀅𑀝𑁆𑀞𑀸𑀭𑀲𑀘𑀺𑀢𑁆𑀢𑁂𑀲𑀼 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀦, 𑀲𑁂𑀲𑁂𑀲𑀼 𑀘 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀅𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁧𑁧𑁯. 𑀘𑀢𑁆𑀢𑀸𑀮𑀻𑀲𑀸𑀬 𑀘𑀺𑀢𑁆𑀢𑁂𑀲𑀼 𑀦𑀯𑀓𑀦𑁆𑀢𑀺 𑀲𑀫𑀘𑀢𑁆𑀢𑀸𑀮𑀻𑀲𑀯𑀺𑀥𑁂𑀲𑀼 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼 𑀧𑀼𑀭𑀺𑀫𑀸𑀦𑀺 𑀅𑀝𑁆𑀞𑀇𑀦𑁆𑀤𑁆𑀭𑀺𑀬𑀸𑀦𑀺, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀫𑁂𑀲𑀼 𑀮𑀩𑁆𑀪𑀫𑀸𑀦𑀫𑁂𑀓𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀯𑀓𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀲𑀼 𑀳𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀮𑀩𑁆𑀪𑀢𑀺. 𑀲𑁄𑀢𑀸𑀧𑀢𑁆𑀢𑀺𑀨𑀮𑀢𑁄 𑀧𑀝𑁆𑀞𑀸𑀬 𑀅𑀭𑀳𑀢𑁆𑀢𑀫𑀕𑁆𑀕𑀧𑀭𑀺𑀬𑁄𑀲𑀸𑀦𑁂𑀲𑀼 𑀢𑀁 𑀦 𑀮𑀩𑁆𑀪𑀢𑀺. 𑀢𑀲𑁆𑀲 𑀞𑀸𑀦𑁂 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀅𑀭𑀳𑀢𑁆𑀢𑀨𑀮𑁂 𑀢𑀫𑁆𑀧𑀺 𑀦 𑀮𑀩𑁆𑀪𑀢𑀺. 𑀢𑀲𑁆𑀲 𑀞𑀸𑀦𑁂 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀢𑀺𑀝𑁆𑀞𑀢𑀻𑀢𑀺. 𑀏𑀯𑀦𑁆𑀢𑀺 𑀙𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄 𑀓𑀢𑁆𑀣𑀘𑀺 𑀢𑀻𑀡𑀺, 𑀓𑀢𑁆𑀣𑀘𑀺 𑀘𑀢𑁆𑀢𑀸𑀭𑀺, 𑀓𑀢𑁆𑀣𑀘𑀺 𑀧𑀜𑁆𑀘, 𑀓𑀢𑁆𑀣𑀘𑀺 𑀲𑀢𑁆𑀢, 𑀓𑀢𑁆𑀣𑀘𑀺 𑀅𑀝𑁆𑀞, 𑀓𑀢𑁆𑀣𑀘𑀺 𑀦𑀯𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀏𑀯𑀁 𑀙𑀳𑀺 𑀆𑀓𑀸𑀭𑁂𑀳𑀺 𑀇𑀦𑁆𑀤𑁆𑀭𑀺𑀬𑀬𑁄𑀕𑁄𑀧𑀺, 𑀦 𑀓𑁂𑀯𑀮𑀁 𑀛𑀸𑀦𑀗𑁆𑀕𑀬𑁄𑀕𑁄𑀯, 𑀅𑀣 𑀔𑁄 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀲𑀫𑁆𑀧𑀬𑁄𑀕𑁄𑀧𑀺 𑀯𑁂𑀤𑀺𑀢𑀩𑁆𑀩𑁄𑀢𑀺.

𑁧𑁨𑁦-𑁩. 𑀇𑀤𑀸𑀦𑀺 𑀫𑀕𑁆𑀕𑀗𑁆𑀕𑀲𑀫𑁆𑀧𑀬𑁄𑀕𑀁 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀁 𑀢𑀸𑀯 𑀬𑁂𑀲𑀼 𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑀗𑁆𑀕𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀫𑀕𑁆𑀕𑀗𑁆𑀕𑀬𑁄𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀏𑀓𑀯𑀻𑀲𑀲𑀢𑀧𑁆𑀧𑀪𑁂𑀤𑁂 𑀘𑀺𑀢𑁆𑀢𑀲𑁆𑀫𑀺𑀁, 𑀇𑀫𑀲𑁆𑀫𑀺𑀁 𑀫𑀕𑁆𑀕𑀗𑁆𑀕𑀸𑀥𑀺𑀓𑀸𑀭𑁂 𑀯𑀸. 𑀯𑀺𑀜𑁆𑀜𑀸𑀡𑁂𑀲𑀼 𑀤𑁆𑀯𑀺𑀧𑀜𑁆𑀘𑀲𑀽𑀢𑀺 𑀲𑀪𑀸𑀯𑀸𑀯𑀺𑀢𑀓𑁆𑀓𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼. 𑀓𑀺𑀜𑁆𑀘𑀸𑀧𑀺 𑀳𑁂𑀝𑁆𑀞𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀛𑀸𑀦𑀗𑁆𑀕𑀸𑀪𑀸𑀯𑁄, 𑀅𑀳𑁂𑀢𑀼𑀓𑁂𑀲𑀼 𑀘 𑀫𑀕𑁆𑀕𑀗𑁆𑀕𑀸𑀪𑀸𑀯𑁄 𑀯𑀼𑀢𑁆𑀢𑁄𑀯, 𑀅𑀛𑀸𑀦𑀗𑁆𑀕𑀸𑀦𑀺 𑀧𑀦 𑀢𑀢𑁆𑀣 𑀅𑀥𑀺𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀇𑀥 𑀧𑀲𑀗𑁆𑀕𑀸𑀕𑀢𑀯𑀲𑁂𑀦. 𑀅𑀫𑀕𑁆𑀕𑀗𑁆𑀕𑀸𑀦𑀺 𑀢𑀢𑁆𑀣 𑀧𑀲𑀗𑁆𑀕𑀸𑀕𑀢𑀯𑀲𑁂𑀦, 𑀇𑀥 𑀅𑀥𑀺𑀓𑀸𑀭𑀯𑀲𑁂𑀦𑀸𑀢𑀺 𑀦 𑀓𑁄𑀘𑀺 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄.

𑀏𑀓𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁. 𑀢𑀜𑁆𑀳𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀫𑀺𑀘𑁆𑀙𑀸𑀯𑀸𑀬𑀸𑀫𑀬𑁄𑀕𑀢𑁄 𑀤𑁆𑀯𑁂 𑀫𑀕𑁆𑀕𑀗𑁆𑀕𑀸𑀦𑀺 𑀏𑀢𑁆𑀣𑀸𑀢𑀺 𑀤𑀼𑀫𑀕𑁆𑀕𑀗𑁆𑀕𑀁. 𑀢𑀺𑀫𑀕𑁆𑀕𑀗𑁆𑀕𑀸𑀦𑀺 𑀲𑀢𑁆𑀢𑀲𑀽𑀢𑀺 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺, 𑀤𑁆𑀯𑁂 𑀤𑁄𑀲𑀫𑀽𑀮𑀸𑀦𑀺, 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀦𑁆𑀢𑀺 𑀲𑀢𑁆𑀢𑀲𑀼 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀫𑀺𑀘𑁆𑀙𑀸𑀯𑀸𑀬𑀸𑀫𑀫𑀺𑀘𑁆𑀙𑀸𑀲𑀫𑀸𑀥𑀺𑀬𑁄𑀕𑀢𑁄 𑀢𑀺𑀫𑀕𑁆𑀕𑀗𑁆𑀕𑀸𑀦𑀺. 𑀘𑀢𑁆𑀢𑀸𑀮𑀻𑀲…𑀧𑁂… 𑀘𑀢𑀼𑀭𑀗𑁆𑀕𑀺𑀓𑁄𑀢𑀺 𑀤𑁆𑀯𑀸𑀤𑀲 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀺, 𑀧𑀞𑀫𑀚𑁆𑀛𑀸𑀦𑀺𑀓𑀯𑀚𑁆𑀚𑀸𑀦𑀺 𑀘𑀢𑀼𑀯𑀻𑀲𑀢𑀺 𑀫𑀳𑀕𑁆𑀕𑀢𑀘𑀺𑀢𑁆𑀢𑀸𑀦𑀻𑀢𑀺 𑀘𑀢𑁆𑀢𑀸𑀮𑀻𑀲𑀘𑀺𑀢𑁆𑀢𑁂𑀲𑀼 𑀬𑁄 𑀫𑀕𑁆𑀕𑁄 𑀮𑀩𑁆𑀪𑀢𑀺, 𑀲𑁄 𑀬𑀣𑀸𑀬𑁄𑀕𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑀫𑁆𑀫𑀸𑀯𑀸𑀬𑀸𑀫𑀲𑀫𑁆𑀫𑀸𑀲𑀢𑀺𑀲𑀫𑁆𑀫𑀸𑀲𑀫𑀸𑀥𑀺𑀬𑁄𑀕𑀢𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀫𑀺𑀘𑁆𑀙𑀸𑀯𑀸𑀬𑀸𑀫𑀫𑀺𑀘𑁆𑀙𑀸𑀲𑀫𑀸𑀥𑀺𑀬𑁄𑀕𑀢𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀯𑀸𑀬𑀸𑀫𑀲𑀫𑁆𑀫𑀸𑀲𑀢𑀺𑀲𑀫𑁆𑀫𑀸𑀲𑀫𑀸𑀥𑀺𑀬𑁄𑀕𑀢𑁄 𑀘 𑀘𑀢𑀼𑀭𑀗𑁆𑀕𑀺𑀓𑁄 𑀫𑀢𑁄. 𑀢𑀢𑁆𑀣 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀤𑁆𑀯𑀸𑀤𑀲𑀲𑀼 𑀧𑀞𑀫𑀸𑀦𑀺 𑀘𑀢𑁆𑀢𑀸𑀭𑀺, 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀫𑀚𑁆𑀛𑀺𑀫𑀸𑀦𑀺, 𑀲𑁂𑀲𑁂𑀲𑀼 𑀧𑀘𑁆𑀙𑀺𑀫𑀸𑀦𑀺 𑀮𑀩𑁆𑀪𑀦𑁆𑀢𑀺.

𑀧𑀜𑁆𑀘𑀤𑁆𑀤𑀲𑀲𑀼…𑀧𑁂… 𑀧𑀜𑁆𑀘𑀗𑁆𑀕𑀺𑀓𑁄𑀢𑀺 𑀤𑁆𑀯𑀸𑀤𑀲𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑁂𑀲𑀼 𑀘𑁂𑀯 𑀢𑀻𑀲𑀼 𑀮𑁄𑀓𑀺𑀬𑀧𑀞𑀫𑀚𑁆𑀛𑀸𑀦𑀺𑀓𑁂𑀲𑀼 𑀘𑀸𑀢𑀺 𑀧𑀦𑁆𑀦𑀭𑀲𑀲𑀼 𑀘𑀺𑀢𑁆𑀢𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑀫𑁆𑀫𑀸𑀯𑀸𑀬𑀸𑀫𑀲𑀫𑁆𑀫𑀸𑀲𑀢𑀺𑀲𑀫𑁆𑀫𑀸𑀲𑀫𑀸𑀥𑀺𑀯𑀲𑁂𑀦 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀦𑀦𑀼 𑀘 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀓𑀸𑀫𑀸𑀯𑀘𑀭𑁂𑀲𑀼 𑀮𑀩𑁆𑀪𑀦𑁆𑀢𑀻𑀢𑀺? 𑀲𑀘𑁆𑀘𑀁 𑀮𑀩𑁆𑀪𑀦𑁆𑀢𑀺, 𑀧𑀸𑀞𑁂 𑀧𑀦 𑀅𑀦𑀸𑀕𑀢𑀢𑁆𑀢𑀸 𑀇𑀥 𑀧𑀭𑀺𑀘𑁆𑀘𑀢𑁆𑀢𑀸𑀢𑀺. 𑀤𑁆𑀯𑀢𑁆𑀢𑀺𑀁𑀲𑀘𑀺𑀢𑁆𑀢𑁂𑀲𑀽𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑀯𑀚𑁆𑀚𑁂𑀲𑀼 𑀤𑁆𑀯𑀢𑁆𑀢𑀺𑀁𑀲𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼. 𑀲𑀢𑁆𑀢𑀗𑁆𑀕𑀺𑀓𑁄𑀢𑀺 𑀅𑀯𑀺𑀢𑀓𑁆𑀓𑀢𑁆𑀢𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀦 𑀮𑀩𑁆𑀪𑀢𑀻𑀢𑀺 𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀯𑀲𑁂𑀲𑀲𑀢𑁆𑀢𑀫𑀕𑁆𑀕𑀗𑁆𑀕𑀯𑀲𑁂𑀦 𑀲𑀢𑁆𑀢𑀗𑁆𑀕𑀺𑀓𑁄 𑀯𑀼𑀢𑁆𑀢𑁄.

𑀬𑀢𑁆𑀣 𑀧𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀢𑁂𑀦 𑀲𑀳 𑀅𑀝𑁆𑀞𑀗𑁆𑀕𑀺𑀓𑁄𑀢𑀺 𑀆𑀳 ‘‘𑀫𑀕𑁆𑀕𑁄 𑀅𑀝𑁆𑀞𑀲𑀽’’𑀢𑀺𑀆𑀤𑀺. 𑀢𑀢𑁆𑀣 𑀅𑀝𑁆𑀞𑀲𑀼 𑀘𑀺𑀢𑁆𑀢𑁂𑀲𑀽𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑁂𑀲𑀼 𑀅𑀝𑁆𑀞𑀲𑀼 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼. 𑀏𑀯𑀦𑁆𑀢𑀺 𑀙𑀳𑀺 𑀫𑀕𑁆𑀕𑀗𑁆𑀕𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄 𑀓𑀢𑁆𑀣𑀘𑀺 𑀤𑁆𑀯𑁂 𑀫𑀕𑁆𑀕𑀗𑁆𑀕𑀸𑀦𑀺, 𑀓𑀢𑁆𑀣𑀘𑀺 𑀢𑀻𑀡𑀺, 𑀓𑀢𑁆𑀣𑀘𑀺 𑀘𑀢𑁆𑀢𑀸𑀭𑀺, 𑀓𑀢𑁆𑀣𑀘𑀺 𑀧𑀜𑁆𑀘, 𑀓𑀢𑁆𑀣𑀘𑀺 𑀲𑀢𑁆𑀢, 𑀓𑀢𑁆𑀣𑀘𑀺 𑀅𑀝𑁆𑀞𑀸𑀢𑀺 𑀏𑀯𑀁 𑀙𑀳𑀺 𑀧𑀓𑀸𑀭𑁂𑀳𑀺.

𑁧𑁨𑁪-𑁬. 𑀇𑀤𑀸𑀦𑀺 𑀩𑀮𑀲𑀫𑁆𑀧𑀬𑁄𑀕𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀮𑀸𑀦𑀺 𑀤𑁆𑀯𑁂’’𑀢𑀺𑀆𑀤𑀺. 𑀢𑀢𑁆𑀣 𑀯𑀻𑀭𑀺𑀬𑀩𑀮𑀲𑀫𑀸𑀥𑀺𑀩𑀮𑀯𑀲𑁂𑀦 𑀤𑁆𑀯𑁂 𑀩𑀮𑀸𑀦𑀺 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀤𑁆𑀯𑀬𑁂 𑀯𑀺𑀪𑀗𑁆𑀕𑀯𑀸𑀭𑁂 𑀆𑀕𑀢𑀸𑀦𑀺 𑀯𑀻𑀭𑀺𑀬𑀩𑀮𑀲𑀫𑀸𑀥𑀺𑀩𑀮𑀸𑀦𑀺 𑀧𑀘𑁆𑀘𑁂𑀓𑀁 𑀮𑀩𑁆𑀪𑀦𑁆𑀢𑀻𑀢𑀺 ‘‘𑀤𑁆𑀯𑁂 𑀤𑁆𑀯𑀺𑀘𑀺𑀢𑁆𑀢𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀏𑀓𑀲𑁆𑀫𑀺𑀁 𑀢𑀻𑀡𑀻𑀢𑀺 𑀏𑀓𑀲𑁆𑀫𑀺𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂 𑀯𑀻𑀭𑀺𑀬𑀩𑀮𑀅𑀳𑀺𑀭𑀺𑀓𑀩𑀮𑀅𑀦𑁄𑀢𑁆𑀢𑀧𑁆𑀧𑀩𑀮𑀯𑀲𑁂𑀦 𑀢𑀻𑀡𑀺 𑀩𑀮𑀸𑀦𑀺. 𑀏𑀓𑀸𑀤𑀲𑀲𑀼 𑀘𑀢𑁆𑀢𑀸𑀭𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀯𑀚𑁆𑀚𑁂𑀲𑀼 𑀏𑀓𑀸𑀤𑀲𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀲𑀫𑀸𑀥𑀺𑀩𑀮𑀜𑁆𑀘𑁂𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺 𑀢𑀻𑀡𑀻𑀢𑀺 𑀘𑀢𑁆𑀢𑀸𑀭𑀺𑀩𑀮𑀸𑀦𑀺. 𑀙 𑀤𑁆𑀯𑀸𑀤𑀲𑀲𑀽𑀢𑀺 𑀤𑁆𑀯𑀸𑀤𑀲𑀲𑀼 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀳𑀺𑀭𑀺𑀑𑀢𑁆𑀢𑀧𑁆𑀧𑀯𑀲𑁂𑀦 𑀙 𑀩𑀮𑀸𑀦𑀺.

𑀏𑀓𑀽𑀦𑀸𑀲𑀻𑀢𑀺𑀬𑀸 𑀲𑀢𑁆𑀢𑀸𑀢𑀺 𑀤𑁆𑀯𑀸𑀤𑀲𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀲𑀼 𑀘𑁂𑀯 𑀲𑀢𑁆𑀢𑀯𑀻𑀲𑀢𑀺𑀫𑀳𑀕𑁆𑀕𑀢𑀘𑀺𑀢𑁆𑀢𑁂𑀲𑀼 𑀘 𑀘𑀢𑁆𑀢𑀸𑀮𑀻𑀲𑀸𑀬 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼 𑀘𑀸𑀢𑀺 𑀏𑀓𑀽𑀦𑀸𑀲𑀻𑀢𑀺𑀯𑀺𑀥𑁂𑀲𑀼 𑀘𑀺𑀢𑁆𑀢𑁂𑀲𑀼 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀸𑀳𑀺𑀭𑀺𑀑𑀢𑁆𑀢𑀧𑁆𑀧𑀯𑀲𑁂𑀦 𑀲𑀢𑁆𑀢 𑀩𑀮𑀸𑀦𑀺. 𑀲𑁄𑀴𑀲𑁂𑀯𑀸𑀩𑀮𑀸𑀦𑀻𑀢𑀺 𑀧𑀜𑁆𑀘𑀤𑀲 𑀅𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀺, 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀆𑀯𑀚𑁆𑀚𑀦𑀜𑁆𑀘𑀸𑀢𑀺 𑀲𑁄𑀴𑀲 𑀩𑀮𑀯𑀺𑀧𑁆𑀧𑀬𑁄𑀕𑀢𑁄 𑀅𑀩𑀮𑀘𑀺𑀢𑁆𑀢𑀸𑀦𑀺. 𑀏𑀯𑀦𑁆𑀢𑀺 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄 𑀓𑀢𑁆𑀣𑀘𑀺 𑀤𑁆𑀯𑁂, 𑀓𑀢𑁆𑀣𑀘𑀺 𑀢𑀻𑀡𑀺, 𑀓𑀢𑁆𑀣𑀘𑀺 𑀘𑀢𑁆𑀢𑀸𑀭𑀺, 𑀓𑀢𑁆𑀣𑀘𑀺 𑀙, 𑀓𑀢𑁆𑀣𑀘𑀺 𑀲𑀢𑁆𑀢𑀸𑀢𑀺 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀲𑀩𑀮𑀁, 𑀇𑀫𑁂𑀲𑀼 𑀏𑀓𑀲𑁆𑀲𑀸𑀧𑀺 𑀅𑀪𑀸𑀯𑀢𑁄 𑀅𑀩𑀮𑀫𑁆𑀧𑀺 𑀘 𑀯𑀺𑀜𑁆𑀜𑁂𑀬𑁆𑀬𑀁, 𑀯𑀺𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀭𑀸𑀲𑀺𑀆𑀤𑀬𑁄 𑀯𑀺𑀦𑀺𑀘𑁆𑀙𑀬𑀪𑀸𑀯𑀢𑁄 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁂𑀲𑀼 𑀘𑀺𑀢𑁆𑀢𑁂𑀲𑀼 𑀬𑀸𑀦𑀺 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀩𑀮𑀺𑀦𑁆𑀤𑁆𑀭𑀺𑀬𑀸𑀦𑀺 𑀚𑀸𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀑𑀲𑀸𑀦𑀓𑀭𑀡𑀁.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀘𑁂𑀢𑀲𑀺𑀓𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.