𑁨. 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑀘𑁂𑀢𑀲𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬𑁭. 𑀏𑀢𑁆𑀢𑀸𑀯𑀢𑀸 𑀘 𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁 𑀭𑀽𑀧𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀯𑀁 𑀉𑀤𑁆𑀤𑀺𑀝𑁆𑀞𑁂𑀲𑀼 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀢𑀸𑀯 𑀚𑀸𑀢𑀺𑀪𑀽𑀫𑀺𑀲𑀫𑁆𑀧𑀬𑁄𑀕𑀧𑁆𑀧𑀯𑀢𑁆𑀢𑀸𑀓𑀸𑀭𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑁂𑀦 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑀤𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑁂 𑀘𑁂𑀢𑀲𑀺𑀓𑀥𑀫𑁆𑀫𑁂 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀘𑀺𑀢𑁆𑀢𑀸𑀦𑀦𑁆𑀢𑀭𑀫𑀼𑀤𑁆𑀤𑀺𑀝𑁆𑀞𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀯𑀺𑀪𑀸𑀚𑀦𑀦𑁆𑀢𑀺 𑀚𑀸𑀢𑀺𑀪𑀽𑀫𑀺𑀆𑀤𑀺𑀯𑀲𑁂𑀦 𑀯𑀺𑀪𑀸𑀕𑀁, 𑀢𑁂𑀲𑀼 𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀬𑀣𑀸𑀭𑀳𑀁 𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀪𑀸𑀚𑀦𑀜𑁆𑀘.

𑀓𑀢𑀫𑁂 𑀧𑀦 𑀘𑁂𑀢𑀲𑀺𑀓𑀸, 𑀬𑁂𑀲𑀁 𑀯𑀺𑀪𑀸𑀚𑀦𑀁 𑀯𑀼𑀘𑁆𑀘𑀢𑀻𑀢𑀺 𑀢𑁂 𑀲𑀳 𑀦𑀺𑀩𑁆𑀩𑀘𑀦𑁂𑀦 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀇𑀤𑀁 𑀘𑁂𑀢𑀲𑀺𑀓𑀮𑀓𑁆𑀔𑀡𑀤𑀲𑁆𑀲𑀦𑀁. 𑀢𑁂𑀦 𑀬𑁂 𑀘𑀺𑀢𑁆𑀢𑁂𑀦 𑀲𑀳 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑁂𑀦 𑀬𑀼𑀢𑁆𑀢𑀸, 𑀢𑁂𑀬𑁂𑀯 𑀘𑁂𑀢𑀲𑀺𑀓𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀁 𑀧𑀦 𑀢𑀁 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀦𑁆𑀢𑀺? 𑀏𑀓𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀏𑀓𑀯𑀢𑁆𑀣𑀼𑀓𑀏𑀓𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀸 𑀧𑀓𑀸𑀭𑀸. 𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀸𑀢𑀺 𑀳𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀢𑀢𑁆𑀣 𑀬𑀤𑀺 𑀏𑀓𑀼𑀧𑁆𑀧𑀸𑀤𑀢𑀸𑀫𑀢𑁆𑀢𑁂𑀦𑁂𑀯 𑀘 𑀲𑀫𑁆𑀧𑀬𑀼𑀢𑁆𑀢𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀲𑀳𑀼𑀧𑁆𑀧𑀢𑁆𑀢𑀺𑀓𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀓𑀦𑀺𑀭𑁄𑀥-𑀕𑁆𑀕𑀳𑀡𑀁. 𑀏𑀯𑀫𑁆𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀓𑀯𑀢𑁆𑀣𑀼𑀓-𑀕𑁆𑀕𑀳𑀡𑀁. 𑀏𑀯𑀫𑁆𑀧𑀺 ‘‘𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑁂𑀲𑀼 𑀏𑀓𑀁 𑀫𑀳𑀸𑀪𑀽𑀢𑀁 𑀲𑁂𑀲𑀫𑀳𑀸𑀪𑀽𑀢𑁄𑀧𑀸𑀤𑀸𑀭𑀽𑀧𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀢𑀲𑁆𑀫𑀸 𑀢𑀸𑀦𑀺 𑀏𑀓𑀯𑀢𑁆𑀣𑀼𑀓𑀸𑀦𑀻𑀢𑀺, 𑀘𑀓𑁆𑀔𑀸𑀤𑀻𑀦𑀁 𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀯𑀸 𑀪𑀽𑀢𑀸𑀦𑀺 𑀏𑀓𑀁 𑀯𑀢𑁆𑀣𑀼 𑀏𑀢𑁂𑀲𑀼 𑀦𑀺𑀲𑁆𑀲𑀺𑀢𑀦𑁆𑀢𑀺 𑀏𑀓𑀯𑀢𑁆𑀣𑀼𑀓𑀸𑀦𑀻’’𑀢𑀺 𑀓𑀧𑁆𑀧𑁂𑀦𑁆𑀢𑀲𑁆𑀲 𑀢𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀢𑀸𑀧𑀢𑁆𑀢𑀺 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 𑀏𑀓𑀸𑀭𑀫𑁆𑀫𑀡-𑀕𑁆𑀕𑀳𑀡𑀁.

𑀧𑀝𑀺𑀮𑁄𑀫𑀢𑁄 𑀯𑀸 ‘‘𑀏𑀓𑀸𑀭𑀫𑁆𑀫𑀡𑀸’’𑀢𑀺 𑀯𑀼𑀢𑁆𑀢𑁂 𑀏𑀓𑀯𑀻𑀣𑀺𑀬𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁, 𑀦𑀸𑀦𑀸𑀯𑀻𑀣𑀺𑀬𑀁 𑀧𑀭𑀲𑀦𑁆𑀢𑀸𑀦𑁂 𑀘 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀪𑀺𑀦𑁆𑀦𑀯𑀢𑁆𑀣𑀼𑀓𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀓𑀯𑀢𑁆𑀣𑀼𑀓-𑀕𑁆𑀕𑀳𑀡𑀁. 𑀏𑀯𑀫𑁆𑀧𑀺 𑀫𑀭𑀡𑀸𑀲𑀦𑁆𑀦𑀯𑀻𑀣𑀺𑀬𑀁 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀤𑀻𑀦𑀁 𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀓𑀦𑀺𑀭𑁄𑀥-𑀕𑁆𑀕𑀳𑀡𑀁. 𑀓𑀺𑀁 𑀧𑀦 𑀦𑀸𑀦𑀼𑀧𑁆𑀧𑀸𑀤𑀸𑀧𑀺 𑀏𑀯𑀁 𑀢𑀺𑀯𑀺𑀥𑀮𑀓𑁆𑀔𑀡𑀸 𑀳𑁄𑀦𑁆𑀢𑀺, 𑀅𑀣 𑀏𑀓𑀼𑀧𑁆𑀧𑀸𑀤𑀸 𑀏𑀯𑀸𑀢𑀺 𑀯𑀺𑀘𑀸𑀭𑀡𑀸𑀬 𑀏𑀓𑀼𑀧𑁆𑀧𑀸𑀤𑀸 𑀏𑀯 𑀏𑀯𑀁 𑀢𑀺𑀯𑀺𑀥𑀮𑀓𑁆𑀔𑀡𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀏𑀓𑀼𑀧𑁆𑀧𑀸𑀤𑀸’’𑀢𑀺 𑀯𑀼𑀢𑁆𑀢𑀁. 𑀇𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑁂𑀳𑀺 𑀬𑁂 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂 𑀘𑁂𑀢𑀲𑀺𑀓𑀸 𑀦𑀸𑀫𑀸𑀢𑀺 𑀏𑀯𑀁 𑀘𑁂𑀢𑀲𑀺𑀓𑀮𑀓𑁆𑀔𑀡𑀁 𑀞𑀧𑀺𑀢𑀁 𑀳𑁄𑀢𑀺. 𑀓𑀣𑀁 𑀧𑀦𑁂𑀢𑁂 𑀘𑁂𑀢𑀲𑀺𑀓𑀸 𑀦𑀸𑀫𑀸𑀢𑀺 𑀆𑀳 ‘‘𑀘𑀺𑀢𑁆𑀢𑁂 𑀪𑀯𑀸’’𑀢𑀺. ‘‘𑀘𑁂𑀢𑀲𑀺 𑀪𑀯𑀸 𑀘𑁂𑀢𑀲𑀺𑀓𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀘𑀺𑀢𑁆𑀢-𑀲𑀤𑁆𑀤𑀲𑁆𑀲𑀧𑀺 𑀘𑁂𑀢𑁄-𑀲𑀤𑁆𑀤𑁂𑀦 𑀲𑀳 𑀲𑀫𑀸𑀦𑀢𑁆𑀣𑀢𑀸𑀬 𑀅𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑁂 𑀪𑀯𑀸 𑀘𑁂𑀢𑀲𑀺𑀓𑀸’’𑀢𑀺 𑀯𑀼𑀢𑁆𑀢𑀁.

𑀦𑀺𑀬𑀢𑀸𑀢𑀺 𑀦𑀺𑀬𑀢𑀼𑀧𑁆𑀧𑀢𑁆𑀢𑀺𑀓𑀸, 𑀓𑀭𑀼𑀡𑀸𑀫𑀼𑀤𑀺𑀢𑀸𑀤𑀬𑁄 𑀯𑀺𑀬 𑀓𑀤𑀸𑀘𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀤𑀸 𑀬𑀤𑀸 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀢𑀤𑀸𑀯 𑀢𑁂𑀦 𑀅𑀯𑀺𑀦𑀺𑀪𑀼𑀢𑁆𑀢𑀸 𑀳𑀼𑀢𑁆𑀯𑀸 𑀚𑀸𑀬𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀲𑀭𑀽𑀧𑁂𑀦 𑀆𑀕𑀢𑀸𑀢𑀺 𑀙𑀦𑁆𑀤𑀸𑀤𑀬𑁄 𑀯𑀺𑀬 ‘‘𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺 𑀏𑀯𑀁 𑀬𑁂𑀯𑀸𑀧𑀦𑀓𑀯𑀲𑁂𑀦 𑀅𑀦𑀸𑀕𑀦𑁆𑀢𑁆𑀯𑀸 ‘‘𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧) 𑀲𑀭𑀽𑀧𑁂𑀦𑁂𑀯 𑀧𑀸𑀴𑀺𑀬𑀁 𑀆𑀕𑀢𑀸. 𑀬𑁂𑀯𑀸𑀧𑀦𑀸𑀢𑀺 𑀏𑀯𑀁 𑀤𑁂𑀲𑀦𑀸 𑀏𑀢𑁂𑀲𑀦𑁆𑀢𑀺 𑀬𑁂𑀯𑀸𑀧𑀦𑀓𑀸. 𑀏𑀓𑀽𑀦𑀢𑀺𑀁𑀲 𑀥𑀫𑁆𑀫𑀸𑀢𑀺 𑀓𑀺𑀘𑁆𑀘𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀓𑁂𑀯𑀮𑀁 𑀅𑀲𑀫𑁆𑀪𑀺𑀦𑁆𑀦𑀥𑀫𑁆𑀫𑀯𑀲𑁂𑀦𑁂𑀯 𑀏𑀓𑁂𑀦𑀽𑀦𑀸 𑀢𑀺𑀁𑀲 𑀥𑀫𑁆𑀫𑀸. 𑀧𑀸𑀴𑀺𑀬𑀁 𑀧𑀦 𑀘𑀺𑀢𑁆𑀢𑁂𑀦 𑀲𑀳 𑀢𑀺𑀁𑀲 𑀥𑀫𑁆𑀫𑁂 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀓𑀺𑀘𑁆𑀘𑀪𑁂𑀤𑀢𑁄 𑀕𑀳𑀡𑁂𑀦 𑀙𑀧𑁆𑀧𑀜𑁆𑀜𑀸𑀲 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀲𑀭𑀽𑀧𑀧𑀼𑀘𑁆𑀙𑀸. 𑀨𑀲𑁆𑀲𑁄…𑀧𑁂… 𑀘𑀺𑀢𑁆𑀢𑀼𑀚𑀼𑀓𑀢𑀸𑀢𑀺 𑀬𑀣𑀸𑀧𑀼𑀘𑁆𑀙𑀺𑀢𑀸𑀦𑀁 𑀲𑀭𑀽𑀧𑀤𑀲𑁆𑀲𑀦𑀁. 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑁂, 𑀦𑀺𑀤𑀲𑁆𑀲𑀦𑁂 𑀯𑀸. 𑀧𑀼𑀦 𑀢𑁂𑀢𑁆𑀢𑀺𑀁𑀲 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀢𑁆𑀢𑀺𑀁𑀲 𑀳𑁄𑀦𑁆𑀢𑀻𑀢𑀺 𑀢𑁂𑀬𑁂𑀯 𑀏𑀓𑀽𑀦𑀢𑀺𑀁𑀲 𑀥𑀫𑁆𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀣𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀆𑀳 ‘‘𑀇𑀫𑁂𑀲𑀽’’𑀢𑀺𑀆𑀤𑀺. 𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀲𑁂𑀦𑀸𑀢𑀺 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬 𑀕𑁄𑀢𑁆𑀭𑀪𑀼𑀧𑀭𑀺𑀬𑁄𑀲𑀸𑀦𑀧𑁆𑀧𑀯𑀢𑁆𑀢𑀺𑀢𑀓𑀭𑀼𑀡𑀸𑀫𑀼𑀤𑀺𑀢𑀸𑀧𑀭𑀺𑀓𑀫𑁆𑀫𑀯𑀲𑁂𑀦. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄𑀢𑀺 𑀓𑀭𑀼𑀡𑀸𑀬 𑀧𑀼𑀩𑁆𑀩𑀪𑀸𑀕𑁄, 𑀧𑀭𑀺𑀓𑀫𑁆𑀫𑀧𑁆𑀧𑀦𑀸𑀯𑀲𑁂𑀦 𑀧𑀯𑀢𑁆𑀢𑀓𑀭𑀼𑀡𑀸𑀪𑀸𑀯𑀦𑀸𑀬 𑀅𑀧𑁆𑀧𑀦𑀸𑀓𑁄𑀝𑁆𑀞𑀸𑀲𑀢𑁄 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁄, 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬 𑀕𑁄𑀢𑁆𑀭𑀪𑀼𑀧𑀭𑀺𑀬𑁄𑀲𑀸𑀦𑀧𑁆𑀧𑀯𑀢𑁆𑀢𑀧𑀭𑀺𑀓𑀫𑁆𑀫𑀓𑁄𑀝𑁆𑀞𑀸𑀲𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 ‘‘𑀫𑀼𑀤𑀺𑀢𑀸𑀧𑀼𑀩𑁆𑀩𑀪𑀸𑀕𑁄’’𑀢𑀺 𑀏𑀢𑁆𑀣𑀸𑀧𑀺. 𑀪𑀸𑀕-𑀲𑀤𑁆𑀤𑀲𑁆𑀲 𑀤𑁆𑀭𑀩𑁆𑀬𑀯𑀼𑀢𑁆𑀢𑀺𑀢𑀸𑀬 𑀢𑀧𑁆𑀧𑀼𑀭𑀺𑀲𑀲𑁆𑀲 𑀘 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑀸𑀬 ‘‘𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄’’𑀢𑀺𑀆𑀤𑀺𑀦𑀸 𑀧𑀼𑀮𑁆𑀮𑀺𑀗𑁆𑀕𑁂𑀦 𑀯𑀼𑀢𑁆𑀢𑀁. 𑀏𑀢-𑀲𑀤𑁆𑀤𑀲𑁆𑀲 𑀧𑀦 𑀕𑀼𑀡𑀯𑀼𑀢𑁆𑀢𑀺𑀢𑀸𑀬 𑀕𑀼𑀡𑀯𑀺𑀲𑁂𑀲𑀯𑀢𑀺 𑀯𑀢𑁆𑀢𑀫𑀸𑀦𑁄 𑀢𑀲𑁆𑀲 𑀮𑀺𑀗𑁆𑀕𑀯𑀲𑁂𑀦 𑀧𑀭𑀺𑀡𑀫𑀢𑀻𑀢𑀺 𑀓𑀭𑀼𑀡𑀸𑀫𑀼𑀤𑀺𑀢𑀸𑀧𑁂𑀓𑁆𑀔𑀸𑀬 ‘‘𑀏𑀢𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀦 𑀧𑀦𑁂𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀺𑀜𑁆𑀘𑀭𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀳𑀺 ‘‘𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀯𑀸 𑀫𑀼𑀤𑀺𑀢𑀸𑀧𑀼𑀩𑁆𑀩𑀪𑀸𑀕𑁄 𑀯𑀸’’𑀢𑀺 𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀢𑀸 𑀤𑁆𑀯𑁂 𑀏𑀓𑀢𑁄 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸. 𑀓𑀭𑀼𑀡𑀸 𑀳𑀺 𑀤𑀼𑀓𑁆𑀔𑀺𑀢𑀲𑀢𑁆𑀢𑁂 𑀆𑀭𑀩𑁆𑀪 𑀢𑁂𑀲𑀁 𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀫𑀼𑀤𑀺𑀢𑀸 𑀲𑀼𑀔𑀺𑀢𑀲𑀢𑁆𑀢𑁂 𑀆𑀭𑀩𑁆𑀪 𑀢𑁂𑀲𑀁 𑀲𑀼𑀔𑀸𑀦𑀼𑀫𑁄𑀤𑀦𑀯𑀲𑁂𑀦, 𑀢𑀲𑁆𑀫𑀸 𑀉𑀪𑀺𑀦𑁆𑀦𑀫𑁆𑀧𑀺 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸 𑀦 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀉𑀧𑁆𑀧𑀢𑁆𑀢𑀺 𑀲𑀫𑁆𑀪𑀯𑀢𑀻𑀢𑀺. 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀺𑀘𑁆𑀙𑀸𑀯𑀸𑀘𑀸𑀫𑀺𑀘𑁆𑀙𑀸𑀚𑀻𑀯𑀸𑀦𑀁 𑀕𑀳𑀡𑀁. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀤𑀻𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀫𑁆𑀫𑀸𑀯𑀸𑀘𑀸𑀲𑀫𑁆𑀫𑀸𑀆𑀚𑀻𑀯𑀸𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀓𑁄 𑀯𑀺𑀭𑀢𑀻𑀢𑀺 𑀢𑀻𑀲𑀼 𑀏𑀓𑀸 𑀯𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀁 𑀧𑀽𑀭𑁂𑀦𑁆𑀢𑀻 𑀧𑀞𑀫𑀸, 𑀲𑀫𑁆𑀫𑀸𑀯𑀸𑀘𑀁 𑀧𑀽𑀭𑁂𑀦𑁆𑀢𑀻 𑀤𑀼𑀢𑀺𑀬𑀸, 𑀲𑀫𑁆𑀫𑀸𑀆𑀚𑀻𑀯𑀁 𑀧𑀽𑀭𑁂𑀦𑁆𑀢𑀻 𑀢𑀢𑀺𑀬𑀸 𑀯𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀫𑀼𑀤𑀺𑀢𑀸𑀳𑀺 𑀲𑀳 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀸𑀲𑀁 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸, 𑀯𑀺𑀭𑀢𑀺𑀬𑀸 𑀘 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸. 𑀅𑀜𑁆𑀜𑀫𑀜𑁆𑀜𑁂𑀦 𑀘 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲𑀧𑀺 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸. 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸𑀤𑀻𑀦𑀜𑁆𑀳𑀺 𑀆𑀭𑀫𑁆𑀫𑀡𑀸𑀦𑁂𑀯 𑀬𑀣𑀸𑀓𑁆𑀓𑀫𑀁 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀺 𑀢𑀢𑁄 𑀯𑀺𑀭𑀢𑀺𑀪𑀸𑀯𑀢𑁄. 𑀏𑀢𑁂𑀲𑀽𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼.

𑁬𑁮. 𑀯𑀺𑀭𑀢𑀻𑀦𑀫𑁆𑀧𑀺 𑀲𑀗𑁆𑀕𑀳𑀡𑀢𑁆𑀣𑀁 ‘‘𑀓𑀭𑀼𑀡𑀸𑀫𑀼𑀤𑀺𑀢𑀸𑀤𑀻𑀲𑀽’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀆𑀤𑀺-𑀲𑀤𑁆𑀤𑀮𑁄𑀧𑀯𑀲𑁂𑀦 ‘‘𑀓𑀭𑀼𑀡𑀸𑀫𑀼𑀤𑀺𑀢𑀸𑀲𑀽’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀏𑀓𑁂𑀦𑀸’’𑀢𑀺, 𑀇𑀢𑀭𑀣𑀸 ‘‘𑀏𑀓𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺.

𑁬𑁯-𑁭𑁧. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁, 𑀘𑀢𑀽𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀤𑁆𑀯𑁂 𑀇𑀥 𑀦𑀺𑀤𑁆𑀤𑀺𑀝𑁆𑀞𑀸, 𑀦 𑀇𑀢𑀭𑀸𑀢𑀺 𑀘𑁄𑀤𑁂𑀦𑁆𑀢𑁄 𑀆𑀳 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀉𑀧𑁂𑀓𑁆𑀔𑀸 𑀘 𑀦 𑀉𑀤𑁆𑀥𑀝𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀯𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀚𑀦𑀁 𑀭𑀜𑁆𑀚𑁂𑀢𑀻𑀢𑀺 𑀥𑀫𑁆𑀫𑀭𑀸𑀚𑀸. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂𑀳𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀦𑀼𑀲𑀸𑀲𑀢𑀻𑀢𑀺 𑀲𑀢𑁆𑀣𑀸. 𑀅𑀩𑁆𑀬𑀸𑀧𑀸𑀤𑁂𑀦 𑀫𑁂𑀢𑁆𑀢𑀸 𑀕𑀳𑀺𑀢𑀸 𑀢𑀲𑁆𑀲𑁂𑀯 𑀳𑀺𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀫𑁂𑀢𑁆𑀢𑀸𑀪𑀸𑀯𑀽𑀧𑀕𑀫𑀦𑀢𑁄. 𑀢𑁂𑀦𑁂𑀯 𑀳𑁂𑀲 ‘‘𑀫𑁂𑀢𑁆𑀢𑀸 𑀫𑁂𑀢𑁆𑀢𑀸𑀬𑀦𑀸’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀉𑀧𑁂𑀓𑁆𑀔𑀸 𑀕𑀳𑀺𑀢𑀸 𑀢𑀸𑀬𑁂𑀯 𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀸𑀬 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀢𑁄. 𑀆𑀤𑀺𑀘𑁆𑀘𑁂𑀦 𑀲𑀳 𑀲𑀫𑀸𑀦𑀕𑁄𑀢𑁆𑀢𑀢𑀸𑀬, 𑀅𑀭𑀺𑀬𑀲𑀸𑀯𑀓𑀪𑀸𑀯𑁂𑀦 𑀯𑀸 𑀢𑀲𑁆𑀲 𑀪𑀕𑀯𑀢𑁄 𑀧𑀼𑀢𑁆𑀢𑀢𑀸𑀬 𑀆𑀤𑀺𑀘𑁆𑀘𑁄 𑀩𑀦𑁆𑀥𑀼 𑀇𑀫𑀲𑁆𑀲, 𑀆𑀤𑀺𑀘𑁆𑀘𑀲𑁆𑀲 𑀯𑀸 𑀩𑀦𑁆𑀥𑀽𑀢𑀺 𑀆𑀤𑀺𑀘𑁆𑀘𑀩𑀦𑁆𑀥𑀼.

𑁭𑁨. 𑀭𑀸𑀲𑀺𑀦𑁆𑀢𑀺 𑀨𑀲𑁆𑀲𑀧𑀜𑁆𑀘𑀓𑀸𑀤𑀺𑀲𑀢𑁆𑀢𑀭𑀲𑀭𑀸𑀲𑀺𑀁. 𑀧𑀞𑀫𑀫𑀳𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀳𑀺 𑁋

‘‘𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀢𑀓𑁆𑀓𑁄 𑀳𑁄𑀢𑀺, 𑀯𑀺𑀘𑀸𑀭𑁄 𑀳𑁄𑀢𑀺, 𑀧𑀻𑀢𑀺 𑀳𑁄𑀢𑀺, 𑀲𑀼𑀔𑀁 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀲𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀢𑀺 𑀳𑁄𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑀳𑁄𑀢𑀺, 𑀲𑀤𑁆𑀥𑀸𑀩𑀮𑀁 𑀳𑁄𑀢𑀺, 𑀯𑀻𑀭𑀺𑀬𑀩𑀮𑀁 𑀳𑁄𑀢𑀺, 𑀲𑀢𑀺𑀩𑀮𑀁 𑀳𑁄𑀢𑀺, 𑀲𑀫𑀸𑀥𑀺𑀩𑀮𑀁 𑀳𑁄𑀢𑀺, 𑀧𑀜𑁆𑀜𑀸𑀩𑀮𑀁 𑀳𑁄𑀢𑀺, 𑀳𑀺𑀭𑀺𑀩𑀮𑀁 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀩𑀮𑀁 𑀳𑁄𑀢𑀺, 𑀅𑀮𑁄𑀪𑁄 𑀳𑁄𑀢𑀺, 𑀅𑀤𑁄𑀲𑁄 𑀳𑁄𑀢𑀺, 𑀅𑀫𑁄𑀳𑁄 𑀳𑁄𑀢𑀺, 𑀅𑀦𑀪𑀺𑀚𑁆𑀛𑀸 𑀳𑁄𑀢𑀺, 𑀅𑀩𑁆𑀬𑀸𑀧𑀸𑀤𑁄 𑀳𑁄𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀺, 𑀳𑀺𑀭𑀻 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀁 𑀳𑁄𑀢𑀺, 𑀓𑀸𑀬𑀧𑀲𑁆𑀲𑀤𑁆𑀥𑀺 𑀳𑁄𑀢𑀺, 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀳𑁄𑀢𑀺, 𑀓𑀸𑀬𑀮𑀳𑀼𑀢𑀸 𑀳𑁄𑀢𑀺, 𑀘𑀺𑀢𑁆𑀢𑀮𑀳𑀼𑀢𑀸 𑀳𑁄𑀢𑀺, 𑀓𑀸𑀬𑀫𑀼𑀤𑀼𑀢𑀸 𑀳𑁄𑀢𑀺, 𑀘𑀺𑀢𑁆𑀢𑀫𑀼𑀤𑀼𑀢𑀸 𑀳𑁄𑀢𑀺, 𑀓𑀸𑀬𑀓𑀫𑁆𑀫𑀜𑁆𑀜𑀢𑀸 𑀳𑁄𑀢𑀺, 𑀘𑀺𑀢𑁆𑀢𑀓𑀫𑁆𑀫𑀜𑁆𑀜𑀢𑀸 𑀳𑁄𑀢𑀺, 𑀓𑀸𑀬𑀧𑀸𑀕𑀼𑀜𑁆𑀜𑀢𑀸 𑀳𑁄𑀢𑀺, 𑀘𑀺𑀢𑁆𑀢𑀧𑀸𑀕𑀼𑀜𑁆𑀜𑀢𑀸 𑀳𑁄𑀢𑀺, 𑀓𑀸𑀬𑀼𑀚𑀼𑀓𑀢𑀸 𑀳𑁄𑀢𑀺, 𑀘𑀺𑀢𑁆𑀢𑀼𑀚𑀼𑀓𑀢𑀸 𑀳𑁄𑀢𑀺, 𑀲𑀢𑀺 𑀳𑁄𑀢𑀺, 𑀲𑀫𑁆𑀧𑀚𑀜𑁆𑀜𑀁 𑀳𑁄𑀢𑀺, 𑀲𑀫𑀣𑁄 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸 𑀳𑁄𑀢𑀺, 𑀧𑀕𑁆𑀕𑀸𑀳𑁄 𑀳𑁄𑀢𑀺, 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺 (𑀥. 𑀲. 𑁧) 𑁋

𑀏𑀯𑀁 𑀥𑀫𑁆𑀫𑀼𑀤𑁆𑀥𑀸𑀭𑀁 𑀓𑀭𑁄𑀦𑁆𑀢𑁂𑀦 𑀪𑀕𑀯𑀢𑀸 𑀨𑀲𑁆𑀲𑀸𑀤𑀬𑁄 𑀢𑀺𑀁𑀲 𑀥𑀫𑁆𑀫𑁂 𑀙𑀧𑁆𑀧𑀜𑁆𑀜𑀸𑀲 𑀓𑀢𑁆𑀯𑀸 𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀺 𑀛𑀸𑀦𑀧𑀜𑁆𑀘𑀓𑀭𑀸𑀲𑀺 𑀇𑀦𑁆𑀤𑁆𑀭𑀺𑀬𑀝𑁆𑀞𑀓𑀭𑀸𑀲𑀺 𑀫𑀕𑁆𑀕𑀧𑀜𑁆𑀘𑀓𑀭𑀸𑀲𑀺 𑀩𑀮𑀲𑀢𑁆𑀢𑀓𑀭𑀸𑀲𑀺 𑀳𑁂𑀢𑀼𑀢𑁆𑀢𑀺𑀓𑀭𑀸𑀲𑀺 𑀓𑀫𑁆𑀫𑀧𑀣𑀢𑀺𑀓𑀭𑀸𑀲𑀺 𑀮𑁄𑀓𑀧𑀸𑀮𑀤𑀼𑀓𑀭𑀸𑀲𑀺 𑀙𑀬𑀼𑀕𑀴𑀤𑀼𑀓𑀭𑀸𑀲𑀺 𑀉𑀧𑀓𑀸𑀭𑀤𑀼𑀓𑀭𑀸𑀲𑀺 𑀬𑀼𑀕𑀦𑀦𑁆𑀥𑀤𑀼𑀓𑀭𑀸𑀲𑀺 𑀯𑀻𑀭𑀺𑀬𑀲𑀫𑀣𑀤𑀼𑀓𑀭𑀸𑀲𑀻𑀢𑀺 𑀲𑀢𑁆𑀢𑀭𑀲𑀦𑁆𑀦𑀁 𑀭𑀸𑀲𑀻𑀦𑀁 𑀯𑀲𑁂𑀦 𑀯𑀺𑀪𑀸𑀕𑁄 𑀓𑀢𑁄.

𑀓𑀣𑀁? 𑀏𑀢𑁂𑀲𑀼𑀧𑀺 𑀘𑀺𑀢𑁆𑀢𑀁 𑀢𑀸𑀯 𑀨𑀲𑁆𑀲𑀧𑀜𑁆𑀘𑀓𑀁 𑀧𑀢𑁆𑀯𑀸 ‘‘𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 ‘‘𑀫𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀯𑀺𑀢𑀓𑁆𑀓𑁄 𑀛𑀸𑀦𑀗𑁆𑀕𑀸𑀦𑀺 𑀧𑀢𑁆𑀯𑀸 ‘‘𑀯𑀺𑀢𑀓𑁆𑀓𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄’’𑀢𑀺. 𑀲𑀤𑁆𑀥𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 ‘‘𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀸, 𑀩𑀮𑀸𑀦𑀺 𑀧𑀢𑁆𑀯𑀸 ‘‘𑀲𑀤𑁆𑀥𑀸𑀩𑀮’’𑀦𑁆𑀢𑀺. 𑀳𑀺𑀭𑀻 𑀩𑀮𑀸𑀦𑀺 𑀧𑀢𑁆𑀯𑀸 ‘‘𑀳𑀺𑀭𑀺𑀩𑀮𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀸, 𑀮𑁄𑀓𑀧𑀸𑀮𑀤𑀼𑀓𑀁 𑀧𑀢𑁆𑀯𑀸 ‘‘𑀳𑀺𑀭𑀻’’𑀢𑀺. 𑀑𑀢𑁆𑀢𑀧𑁆𑀧𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀮𑁄𑀪𑁄 𑀫𑀽𑀮𑀁 𑀧𑀢𑁆𑀯𑀸 ‘‘𑀅𑀮𑁄𑀪𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄, 𑀓𑀫𑁆𑀫𑀧𑀣𑀁 𑀧𑀢𑁆𑀯𑀸 ‘‘𑀅𑀦𑀪𑀺𑀚𑁆𑀛𑀸’’𑀢𑀺. 𑀅𑀤𑁄𑀲𑁄 𑀫𑀽𑀮𑀁 𑀧𑀢𑁆𑀯𑀸 ‘‘𑀅𑀤𑁄𑀲𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄, 𑀓𑀫𑁆𑀫𑀧𑀣𑀁 𑀧𑀢𑁆𑀯𑀸 ‘‘𑀅𑀩𑁆𑀬𑀸𑀧𑀸𑀤𑁄’’𑀢𑀺. 𑀇𑀫𑁂 𑀲𑀢𑁆𑀢 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀸. 𑀯𑁂𑀤𑀦𑀸 𑀧𑀦 𑀨𑀲𑁆𑀲𑀧𑀜𑁆𑀘𑀓𑀁 𑀧𑀢𑁆𑀯𑀸 ‘‘𑀯𑁂𑀤𑀦𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀸, 𑀛𑀸𑀦𑀗𑁆𑀕𑀸𑀦𑀺 𑀧𑀢𑁆𑀯𑀸 ‘‘𑀲𑀼𑀔’’𑀦𑁆𑀢𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 ‘‘𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀏𑀯𑀫𑀬𑀁 𑀏𑀓𑁄 𑀥𑀫𑁆𑀫𑁄 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑁄. 𑀯𑀻𑀭𑀺𑀬𑀁 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 ‘‘𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 ‘‘𑀲𑀫𑁆𑀫𑀸𑀯𑀸𑀬𑀸𑀫𑁄’’𑀢𑀺, 𑀩𑀮𑀸𑀦𑀺 𑀧𑀢𑁆𑀯𑀸 ‘‘𑀯𑀻𑀭𑀺𑀬𑀩𑀮’’𑀦𑁆𑀢𑀺, 𑀯𑀻𑀭𑀺𑀬𑀲𑀫𑀣𑀁 𑀧𑀢𑁆𑀯𑀸 ‘‘𑀧𑀕𑁆𑀕𑀸𑀳𑁄’’𑀢𑀺. 𑀲𑀢𑀺𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 ‘‘𑀲𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀸, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 ‘‘𑀲𑀫𑁆𑀫𑀸𑀲𑀢𑀻’’𑀢𑀺, 𑀩𑀮𑀸𑀦𑀺 𑀧𑀢𑁆𑀯𑀸 ‘‘𑀲𑀢𑀺𑀩𑀮’’𑀦𑁆𑀢𑀺, 𑀉𑀧𑀓𑀸𑀭𑀤𑀼𑀓𑀁 𑀧𑀢𑁆𑀯𑀸 ‘‘𑀲𑀢𑀺 𑀳𑁄𑀢𑀻’’𑀢𑀺. 𑀏𑀯𑀁 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑀸. 𑀲𑀫𑀸𑀥𑀺 𑀧𑀦 𑀛𑀸𑀦𑀗𑁆𑀕𑀸𑀦𑀺 𑀧𑀢𑁆𑀯𑀸 ‘‘𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 ‘‘𑀲𑀫𑀸𑀥𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺, 𑀩𑀮𑀸𑀦𑀺 𑀧𑀢𑁆𑀯𑀸 ‘‘𑀲𑀫𑀸𑀥𑀺𑀩𑀮’’𑀦𑁆𑀢𑀺, 𑀬𑀼𑀕𑀦𑀦𑁆𑀥𑀤𑀼𑀓𑀁 𑀧𑀢𑁆𑀯𑀸 ‘‘𑀲𑀫𑀣𑁄’’𑀢𑀺, 𑀯𑀻𑀭𑀺𑀬𑀲𑀫𑀣𑀁 𑀧𑀢𑁆𑀯𑀸 ‘‘𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺. 𑀏𑀯𑀫𑀬𑀁 𑀏𑀓𑁄 𑀥𑀫𑁆𑀫𑁄 𑀙𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑁄. 𑀧𑀜𑁆𑀜𑀸 𑀧𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀢𑁆𑀯𑀸 ‘‘𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀸, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀢𑁆𑀯𑀸 ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺, 𑀩𑀮𑀸𑀦𑀺 𑀧𑀢𑁆𑀯𑀸 ‘‘𑀧𑀜𑁆𑀜𑀸𑀩𑀮’’𑀦𑁆𑀢𑀺, 𑀫𑀽𑀮𑀸𑀦𑀺 𑀧𑀢𑁆𑀯𑀸 ‘‘𑀅𑀫𑁄𑀳𑁄’’𑀢𑀺, 𑀓𑀫𑁆𑀫𑀧𑀣𑀁 𑀧𑀢𑁆𑀯𑀸 ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺, 𑀉𑀧𑀓𑀸𑀭𑀤𑀼𑀓𑀁 𑀧𑀢𑁆𑀯𑀸 ‘‘𑀲𑀫𑁆𑀧𑀚𑀜𑁆𑀜’’𑀦𑁆𑀢𑀺, 𑀬𑀼𑀕𑀦𑀦𑁆𑀥𑀤𑀼𑀓𑀁 𑀧𑀢𑁆𑀯𑀸 ‘‘𑀯𑀺𑀧𑀲𑁆𑀲𑀦𑀸’’𑀢𑀺. 𑀏𑀯𑀫𑀬𑀁 𑀏𑀓𑁄 𑀥𑀫𑁆𑀫𑁄 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀯𑀺𑀪𑀢𑁆𑀢𑁄𑀢𑀺 𑀏𑀯𑀫𑁂𑀢𑁂 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀇𑀦𑁆𑀤𑁆𑀭𑀺𑀬𑀸𑀤𑀺𑀢𑀁𑀢𑀁𑀓𑀺𑀘𑁆𑀘𑀯𑀦𑁆𑀢𑀢𑀸𑀬 𑀤𑁆𑀯𑀺𑀝𑁆𑀞𑀸𑀦𑀺𑀓𑀸𑀤𑀺𑀪𑁂𑀤𑁂𑀦 𑀲𑀢𑁆𑀢𑀭𑀲𑀲𑀼 𑀭𑀸𑀲𑀻𑀲𑀼 𑀯𑀺𑀪𑀢𑁆𑀢𑀸. 𑀇𑀢𑀭𑁂 𑀅𑀝𑁆𑀞𑀸𑀭𑀲 𑀓𑀺𑀘𑁆𑀘𑀯𑀲𑁂𑀦 𑀪𑁂𑀤𑀸𑀪𑀸𑀯𑀢𑁄 𑀏𑀓𑀝𑁆𑀞𑀸𑀦𑀺𑀓𑀸𑀬𑁂𑀯𑀸𑀢𑀺 𑀇𑀫𑁂𑀲𑀼 𑀲𑀢𑁆𑀢𑀭𑀲𑀲𑀼 𑀭𑀸𑀲𑀻𑀲𑀼 𑀬𑁂𑀯𑀸𑀧𑀦𑀓𑀥𑀫𑁆𑀫𑀸 𑀏𑀓𑀭𑀸𑀲𑀺𑀫𑁆𑀧𑀺 𑀦 𑀪𑀚𑀦𑁆𑀢𑀺 𑀢𑀁𑀢𑀁𑀓𑀺𑀘𑁆𑀘𑀪𑀸𑀯𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀭𑀸𑀲𑀺𑀁 𑀪𑀚𑀦𑁆𑀢𑀺 𑀦𑀸’’𑀢𑀺.

𑀦𑀦𑀼 𑀘𑁂𑀢𑁂 𑀓𑀺𑀜𑁆𑀘𑀸𑀧𑀺 𑀲𑁂𑀲𑀭𑀸𑀲𑀬𑁄 𑀦 𑀪𑀚𑀦𑁆𑀢𑀺 𑀢𑁂𑀲𑀁 𑀲𑀤𑀺𑀲𑀓𑀺𑀘𑁆𑀘𑀲𑀗𑁆𑀕𑀳𑀯𑀲𑁂𑀦 𑀞𑀺𑀢𑀢𑁆𑀢𑀸. 𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀺 𑀧𑀦 𑀔𑀦𑁆𑀥𑀲𑀗𑁆𑀕𑀳𑀯𑀲𑁂𑀦𑁂𑀯 𑀞𑀧𑀺𑀢𑁄𑀢𑀺 𑀘𑁂𑀢𑀦𑀸𑀬 𑀯𑀺𑀬 𑀦𑁂𑀲𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀢𑁄 𑀢𑀢𑁆𑀣 𑀲𑀫𑀯𑀭𑁄𑀥𑁄 𑀬𑀼𑀢𑁆𑀢𑁄𑀢𑀺? 𑀢𑀁 𑀦, 𑀔𑀦𑁆𑀥𑀲𑀗𑁆𑀕𑀳𑀯𑀲𑁂𑀦 𑀞𑀧𑀺𑀢𑁄𑀧𑀺 𑀳𑀺 𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀺 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀥𑀫𑁆𑀫𑁂 𑀲𑀗𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑁄𑀢𑀺 𑀙𑀦𑁆𑀤𑀸𑀤𑀻𑀦𑀁 𑀢𑀺𑀡𑁆𑀡𑀁 𑀧𑀓𑀺𑀡𑁆𑀡𑀓𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀢𑀸𑀬 𑀅𑀪𑀸𑀯𑀢𑁄, 𑀫𑀦𑀲𑀺𑀓𑀸𑀭𑀲𑁆𑀲 𑀘 𑀲𑀢𑀺𑀧𑀺 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑁂 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀸𑀪𑀸𑀯𑀢𑁄 𑀦 𑀏𑀢𑁂𑀲𑀁 𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀺𑀪𑀚𑀦𑀫𑁆𑀧𑀺 𑀬𑀼𑀢𑁆𑀢𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀫𑀦𑀲𑀺𑀓𑀸𑀭𑀲𑁆𑀲 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀸𑀪𑀸𑀯𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀞𑀧𑁂𑀢𑁆𑀯𑀸 𑀘𑁂𑀢𑀦𑀁 𑀲𑁂𑀲𑀥𑀫𑁆𑀫𑀸𑀦𑀁 𑀲𑀓𑀲𑀓𑀓𑀺𑀘𑁆𑀘𑁂𑀲𑀼𑀧𑀺 𑀧𑀭𑀸𑀥𑀻𑀦𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀦 𑀮𑀩𑁆𑀪𑀢𑀺. 𑀬𑀤𑀺 𑀮𑀪𑁂𑀬𑁆𑀬, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀯𑁂𑀤𑀦𑀸𑀯𑀺𑀜𑁆𑀜𑀸𑀡𑀸𑀦𑀺 𑀯𑀺𑀬 𑀢𑀸𑀦𑀺 𑀨𑀲𑁆𑀲𑀧𑀜𑁆𑀘𑀓𑁂 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀦 𑀧𑀦𑁂𑀯𑀁 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀞𑀧𑁂𑀢𑁆𑀯𑀸 𑀘𑁂𑀢𑀦𑀁 𑀲𑁂𑀲𑀥𑀫𑁆𑀫𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀦 𑀮𑀩𑁆𑀪𑀢𑀻𑀢𑀺 𑀦 𑀢𑁂𑀲𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀔𑀦𑁆𑀥𑀲𑀗𑁆𑀕𑀳𑁄 𑀮𑀩𑁆𑀪𑀢𑀺. 𑀘𑁂𑀢𑀦𑀸𑀬𑀬𑁂𑀯 𑀧𑀦 𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀲𑁆𑀲 𑀅𑀢𑁆𑀣𑀺𑀢𑀸𑀬 𑀔𑀦𑁆𑀥𑀲𑀗𑁆𑀕𑀳𑁄 𑀮𑀩𑁆𑀪𑀢𑀻𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀨𑀲𑁆𑀲𑁄 𑀨𑀲𑁆𑀲𑀧𑀜𑁆𑀘𑀓𑁂 𑀯𑀼𑀢𑁆𑀢𑁄𑀢𑀺? ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸 (𑀯𑀺𑀪. 𑁨𑁨𑁫), 𑀨𑀼𑀝𑁆𑀞𑁄 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀲𑀁. 𑀦𑀺. 𑁪.𑁯𑁩) 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑁂𑀲𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀉𑀤𑁆𑀤𑁂𑀲𑀝𑁆𑀞𑀸𑀦𑁂 𑀞𑀢𑁆𑀯𑀸 𑀢𑁂𑀲𑀁 𑀧𑀘𑁆𑀘𑀬𑀲𑁆𑀲𑀧𑀺 𑀉𑀤𑁆𑀤𑀺𑀲𑀺𑀢𑀼𑀓𑀸𑀫𑀢𑀸𑀬 𑀨𑀲𑁆𑀲𑁄 𑀢𑀢𑁆𑀣 𑀯𑀼𑀢𑁆𑀢𑁄. 𑀤𑀼𑀩𑁆𑀩𑀮𑀸𑀢𑀺 𑀲𑀓𑀯𑀺𑀲𑀬𑁂𑀧𑀺 𑀧𑀭𑀸𑀬𑀢𑁆𑀢𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑀢𑁄 𑀤𑀼𑀩𑁆𑀩𑀮𑀸. 𑀅𑀥𑀺𑀫𑁄𑀓𑁆𑀔𑁄 𑀳𑀺 𑀲𑀫𑀸𑀥𑀺𑀲𑁆𑀲 𑀧𑀭𑀺𑀩𑁆𑀬𑀢𑁆𑀢𑀪𑀸𑀯𑁂 𑀧𑀭𑀺𑀩𑁆𑀬𑀢𑁆𑀢𑀪𑀸𑀯𑀢𑁄 𑀲𑀫𑀸𑀥𑀸𑀬𑀢𑁆𑀢𑀯𑀼𑀢𑁆𑀢𑀺, 𑀫𑀦𑀲𑀺𑀓𑀸𑀭𑁄𑀧𑀺 𑀘𑁂𑀢𑀦𑀸𑀬 𑀧𑀭𑀺𑀩𑁆𑀬𑀢𑁆𑀢𑀪𑀸𑀯𑀢𑁄 𑀘𑁂𑀢𑀦𑀸𑀬𑀢𑁆𑀢𑀯𑀼𑀢𑁆𑀢𑀻𑀢𑀺 𑀧𑀭𑀸𑀬𑀢𑁆𑀢𑀸𑀯 𑀢𑁂 𑀳𑁄𑀦𑁆𑀢𑀺.

𑁭𑁩. 𑀫𑀦𑀲𑀻 𑀘 𑀓𑀸𑀭𑁄𑀢𑀺 𑀫𑀦𑀲𑀺𑀓𑀸𑀭𑁄 𑀘. 𑀫𑀦𑀲𑀺𑀓𑀸𑀭𑀲𑀤𑁆𑀤𑀲𑁆𑀲 𑀳𑀺 𑀅𑀢𑁆𑀣𑀫𑀢𑁆𑀢𑀲𑀦𑁆𑀤𑀲𑁆𑀲𑀦𑀯𑀲𑁂𑀦 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀅𑀲𑀫𑀸𑀲𑀦𑀺𑀤𑁆𑀤𑁂𑀲𑁄, 𑀤𑀻𑀖𑀓𑀭𑀡𑀁, 𑀫𑀚𑁆𑀛𑁂 𑀘 𑀘-𑀲𑀤𑁆𑀤𑀯𑀘𑀦𑀦𑁆𑀢𑀺. 𑀢𑁂𑀦 𑀫𑀼𑀦𑀺𑀯𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁪-𑁮𑁦. 𑀧𑀞𑀫𑀸𑀪𑀺𑀦𑀺𑀧𑀸𑀢𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑁂 𑀨𑀼𑀲𑀦𑀯𑀲𑁂𑀦 𑀧𑀞𑀫𑀫𑁂𑀯 𑀅𑀪𑀺𑀦𑀺𑀧𑀢𑀦𑀢𑁄. 𑀲𑀩𑁆𑀩𑁂𑀧𑀺 𑀘𑁂𑀢𑀲𑀺𑀓𑀸 𑀘𑀺𑀢𑁆𑀢𑀸𑀬𑀢𑁆𑀢𑀸 𑀘𑀺𑀢𑁆𑀢𑀓𑀺𑀭𑀺𑀬𑀪𑀸𑀯𑁂𑀦 𑀯𑀼𑀘𑁆𑀘𑀦𑁆𑀢𑀻𑀢𑀺 ‘‘𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀓𑀺𑀭𑀸𑀢𑀺 𑀅𑀭𑀼𑀘𑀺𑀲𑀽𑀘𑀦𑀁. 𑀏𑀯𑀁 𑀫𑀳𑀸𑀲𑀁𑀖𑀺𑀓𑀫𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀯𑀺𑀢𑁆𑀣𑀸𑀭𑁂𑀢𑀼𑀁 ‘‘𑀨𑀼𑀲𑀺𑀢𑁆𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀳𑀸𑀲𑀁𑀖𑀺𑀓𑀸 𑀳𑀺 ‘‘𑀧𑀞𑀫𑀁 𑀨𑀲𑁆𑀲𑁄 𑀆𑀭𑀫𑁆𑀫𑀡𑀁 𑀨𑀼𑀲𑀢𑀺, 𑀅𑀣 𑀢𑁂𑀦 𑀨𑀼𑀝𑁆𑀞𑀁 𑀤𑀼𑀢𑀺𑀬𑀁 𑀯𑁂𑀤𑀦𑀸 𑀯𑁂𑀤𑀺𑀬𑀢𑀺, 𑀏𑀯𑀁 𑀏𑀢𑁂𑀳𑀺 𑀨𑀼𑀝𑁆𑀞𑀯𑁂𑀤𑀺𑀢𑀁 𑀢𑀢𑀺𑀬𑀁 𑀲𑀜𑁆𑀜𑀸 𑀲𑀜𑁆𑀚𑀸𑀦𑀸𑀢𑀺, 𑀢𑁂𑀳𑀺 𑀧𑀦 𑀨𑀼𑀝𑁆𑀞𑀯𑁂𑀤𑀺𑀢𑀲𑀜𑁆𑀜𑀸𑀢𑁂 𑀘𑀢𑀼𑀢𑁆𑀣𑀁 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀅𑀪𑀺𑀲𑀦𑁆𑀤𑀳𑀢𑀻’’𑀢𑀺𑀆𑀤𑀺𑀦𑀸 𑀯𑀤𑀦𑁆𑀢𑀺. 𑀩𑀮𑀯𑀧𑀘𑁆𑀘𑀬𑀢𑁆𑀢𑀸𑀢𑀺 𑀬𑀣𑀸 𑀧𑀸𑀲𑀸𑀤𑀁 𑀧𑀢𑁆𑀯𑀸 𑀣𑀫𑁆𑀪𑀸 𑀲𑁂𑀲𑀤𑀩𑁆𑀩𑀲𑀫𑁆𑀪𑀸𑀭𑀸𑀦𑀁 𑀩𑀮𑀯𑀧𑀘𑁆𑀘𑀬𑀸, 𑀏𑀯𑀫𑁂𑀲 𑀬𑀲𑁆𑀫𑀸 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀩𑀮𑀯𑀧𑀘𑁆𑀘𑀬𑁄, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀳𑁂𑀢𑀼𑀦𑀺𑀕𑀫𑀦𑀁.

𑀲𑀳𑁂𑀯 𑀘𑀸𑀢𑀺 𑀘-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀲𑁄 ‘‘𑀘𑀺𑀢𑁆𑀢𑀚𑀸𑀦’’𑀦𑁆𑀢𑀺 𑀇𑀫𑀲𑁆𑀲 𑀅𑀦𑀦𑁆𑀢𑀭𑀁 𑀤𑀝𑁆𑀞𑀩𑁆𑀩𑁄. 𑀓𑀲𑁆𑀫𑀸? 𑀘𑀺𑀢𑁆𑀢𑀸𑀦𑀁, 𑀘𑀺𑀢𑁆𑀢𑀚𑀸𑀦𑀜𑁆𑀘 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑁂𑀦 𑀲𑀳𑁂𑀯 𑀧𑀯𑀢𑁆𑀢𑀺𑀢𑁄𑀢𑀺 𑀏𑀯𑀫𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀦𑁆𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁, 𑀏𑀯𑀁 ‘‘𑀧𑀞𑀫𑀸𑀪𑀺𑀦𑀺𑀧𑀸𑀢𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀧𑀭𑀺𑀳𑀭𑀺𑀢𑁆𑀯𑀸 𑀇𑀤𑀸𑀦𑀺 ‘‘𑀩𑀮𑀯𑀧𑀘𑁆𑀘𑀬𑀢𑁆𑀢𑀸’’𑀢𑀺 𑀇𑀤𑀁 𑀧𑀭𑀺𑀳𑀭𑀦𑁆𑀢𑁄 𑀆𑀳 ‘‘𑀩𑀮𑀯…𑀧𑁂… 𑀤𑀺𑀲𑁆𑀲𑀢𑀻’’𑀢𑀺. 𑀘-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀦𑁂𑀯 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀥𑀫𑁆𑀫𑀸𑀦𑀫𑁆𑀧𑀺 𑀳𑀺 𑀲𑀳𑀚𑀸𑀢𑀧𑀘𑁆𑀘𑀬𑀪𑀸𑀯𑀲𑁆𑀲 𑀲𑀸𑀥𑀸𑀭𑀡𑀢𑁆𑀢𑀸 𑀢𑀲𑁆𑀲𑁂𑀯 𑀩𑀮𑀯𑀧𑀘𑁆𑀘𑀬𑀪𑀸𑀯𑁂 𑀦 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀤𑀺𑀲𑁆𑀲𑀢𑀻𑀢𑀺. 𑀬𑀤𑀺 𑀲𑀩𑁆𑀩𑀫𑀺𑀤𑀫𑀓𑀸𑀭𑀡𑀁, 𑀓𑀣𑀜𑁆𑀘𑀭𑀳𑀺 𑀨𑀲𑁆𑀲𑁄 𑀧𑀞𑀫𑀁 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀤𑁂𑀲𑀦𑀸𑀓𑁆𑀓𑀫𑀢𑁄’’𑀢𑀺𑀆𑀤𑀺. ‘‘𑀯𑁂𑀤𑀦𑀸 𑀳𑁄𑀢𑀺, 𑀨𑀲𑁆𑀲𑁄 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀨𑀲𑁆𑀲𑁄 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀨𑀲𑁆𑀲𑁄 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺, 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀯𑀺𑀢𑀓𑁆𑀓𑁄 𑀳𑁄𑀢𑀻’’𑀢𑀺𑀆𑀤𑀻𑀳𑀺 𑀆𑀳𑀭𑀺𑀢𑀼𑀫𑁆𑀧𑀺 𑀯𑀝𑁆𑀝𑁂𑀬𑁆𑀬, 𑀤𑁂𑀲𑀦𑀸𑀯𑀸𑀭𑁂𑀦 𑀧𑀦 𑀨𑀲𑁆𑀲𑁄𑀯 𑀧𑀞𑀫𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑁂𑀲𑀥𑀫𑁆𑀫𑁂𑀲𑀼𑀧𑀺 𑀧𑀼𑀩𑁆𑀩𑀸𑀧𑀭𑀓𑁆𑀓𑀫𑁄 𑀦𑀸𑀫 𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀻𑀳𑀻𑀢𑀺 𑀯𑀘𑀦𑀢𑁆𑀣𑀢𑁄 𑀘 𑀮𑀓𑁆𑀔𑀡𑀸𑀤𑀺𑀢𑁄 𑀘.

𑀨𑀼𑀲𑀢𑀻𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀢𑀢𑁆𑀣 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯, 𑀨𑀼𑀲𑀦𑁆𑀢𑀺 𑀏𑀢𑁂𑀦 𑀯𑀸𑀢𑀺 𑀨𑀲𑁆𑀲𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀳𑀺 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸 𑀢𑀁 𑀨𑀼𑀲𑀦𑀮𑀓𑁆𑀔𑀡𑁂𑀦 𑀨𑀲𑁆𑀲𑁂𑀦 𑀨𑀼𑀲𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀆𑀭𑀫𑁆𑀫𑀡𑀨𑀼𑀲𑀦𑀫𑀢𑁆𑀢𑀁 𑀯𑀸 𑀨𑀲𑁆𑀲𑁄𑀢𑀺𑀧𑀺 𑀲𑀸𑀥𑀦𑀢𑁆𑀢𑀬𑀫𑁆𑀧𑀺 𑀬𑀼𑀚𑁆𑀚𑀢𑁂𑀯. 𑀨𑀼𑀲𑀦𑀁 𑀮𑀓𑁆𑀔𑀡𑀫𑁂𑀢𑀲𑁆𑀲𑀸𑀢𑀺 𑀨𑀼𑀲𑀦𑀮𑀓𑁆𑀔𑀡𑁄, 𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀸𑀯𑀝𑁆𑀞𑁂𑀦 𑀆𑀭𑀫𑁆𑀫𑀡𑀨𑀼𑀲𑀦𑀮𑀓𑁆𑀔𑀡𑁄𑀢𑀺 𑀅𑀢𑁆𑀣𑁄. 𑀲𑀁𑀖𑀝𑁆𑀝𑀦𑀭𑀲𑁄𑀢𑀺 𑀫𑀦𑁄𑀤𑁆𑀯𑀸𑀭𑁂 𑀘𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀁 𑀲𑀁𑀖𑀝𑁆𑀝𑀦𑀢𑁄 𑀲𑀁𑀖𑀝𑁆𑀝𑀦𑀓𑀺𑀘𑁆𑀘𑁄. 𑀅𑀬𑀜𑁆𑀳𑀺 𑀆𑀭𑀫𑁆𑀫𑀡𑁂 𑀅𑀦𑀮𑁆𑀮𑀻𑀬𑀫𑀸𑀦𑁄𑀧𑀺 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼𑀁, 𑀲𑀤𑁆𑀤𑁄 𑀯𑀺𑀬 𑀘 𑀲𑁄𑀢𑀁 𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀜𑁆𑀘 𑀖𑀝𑁆𑀝𑁂𑀢𑀺. 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀯𑀸 𑀯𑀢𑁆𑀣𑀸𑀭𑀫𑁆𑀫𑀡𑀲𑀁𑀖𑀝𑁆𑀝𑀦𑁂𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀲𑀁𑀖𑀝𑁆𑀝𑀦𑀲𑀫𑁆𑀧𑀢𑁆𑀢𑀺𑀓𑁄 𑀨𑀲𑁆𑀲𑁄 ‘‘𑀲𑀁𑀖𑀝𑁆𑀝𑀦𑀭𑀲𑁄’’𑀢𑀺 𑀯𑀼𑀢𑁆𑀢𑁄. 𑀬𑀣𑀸 ‘‘𑀤𑁆𑀯𑁂 𑀧𑀸𑀡𑀻 𑀯𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺𑀆𑀤𑀻𑀲𑀼 𑀧𑀸𑀡𑀺𑀫𑁆𑀳𑀺 𑀖𑀝𑁆𑀝𑀦𑀁 𑀢𑀩𑁆𑀩𑀺𑀲𑁂𑀲𑀪𑀽𑀢𑀸 𑀭𑀽𑀧𑀥𑀫𑁆𑀫𑀸, 𑀏𑀯𑀁 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀲𑀁𑀖𑀝𑁆𑀝𑀦𑀁 𑀢𑀩𑁆𑀩𑀺𑀲𑁂𑀲𑀪𑀽𑀢𑁄 𑀏𑀓𑁄 𑀘𑁂𑀢𑀲𑀺𑀓𑀥𑀫𑁆𑀫𑁄 𑀤𑀝𑁆𑀞𑀩𑁆𑀩𑁄. 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀢𑀦𑁄 𑀓𑀸𑀭𑀡𑀲𑁆𑀲 𑀯𑀲𑁂𑀦 𑀧𑀯𑁂𑀤𑀺𑀢𑀢𑁆𑀢𑀸 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄. ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫; 𑀲𑀁. 𑀦𑀺 𑁨.𑁪.𑁬𑁦; 𑀓𑀣𑀸. 𑁪𑁬𑁫) 𑀳𑀺 𑀯𑀘𑀦𑀢𑁄 𑀘𑀓𑁆𑀔𑀼𑀭𑀽𑀧𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑀸𑀬 𑀉𑀧𑀝𑁆𑀞𑀸𑀦𑀢𑁄 𑀲𑀦𑁆𑀦𑀺𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀓𑀸𑀭𑀡𑀲𑁆𑀲 𑀯𑀲𑁂𑀦 𑀉𑀧𑀝𑁆𑀞𑀸𑀦𑀫𑀲𑁆𑀲𑀸𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸. ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 (𑀯𑀺𑀪. 𑁨𑁨𑁫) 𑀯𑀘𑀦𑀢𑁄 𑀯𑁂𑀤𑀦𑀸 𑀨𑀮𑀫𑀲𑁆𑀲𑀸𑀢𑀺 𑀯𑁂𑀤𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀢𑀚𑁆𑀚𑀲𑀫𑀦𑁆𑀦𑀸𑀳𑀸𑀭𑁂𑀦 𑀘𑁂𑀯 𑀇𑀦𑁆𑀤𑁆𑀭𑀺𑀬𑁂𑀦 𑀘 𑀧𑀭𑀺𑀓𑁆𑀔𑀢𑁂 𑀯𑀺𑀲𑀬𑁂 𑀅𑀦𑀦𑁆𑀢𑀭𑀸𑀬𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄. 𑀅𑀬𑀜𑁆𑀳𑀺 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀓𑀸𑀭𑀡𑀪𑀽𑀢𑁄 𑀢𑀤𑀦𑀼𑀭𑀽𑀧𑀪𑀽𑀢𑁄 𑀲𑀫𑀦𑁆𑀦𑀸𑀳𑀸𑀭𑁄𑀢𑀺 𑀢𑀚𑁆𑀚𑀲𑀫𑀦𑁆𑀦𑀸𑀳𑀸𑀭𑀲𑀗𑁆𑀔𑀸𑀢𑁂𑀦 𑀆𑀯𑀚𑁆𑀚𑀦𑁂𑀦 𑀘𑁂𑀯 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑁂𑀦 𑀘 𑀬𑀣𑀸𑀓𑁆𑀓𑀫𑀁 𑀆𑀭𑀫𑁆𑀫𑀡𑀓𑀭𑀡𑀢𑀤𑀪𑀺𑀫𑀼𑀔𑀪𑀸𑀯𑀯𑀲𑁂𑀦 𑀧𑀭𑀺𑀓𑁆𑀔𑀢𑁂 𑀅𑀪𑀺𑀲𑀗𑁆𑀔𑀸𑀢𑁂 𑀆𑀧𑀸𑀣𑀕𑀢𑁂𑀬𑁂𑀯 𑀯𑀺𑀲𑀬𑁂 𑀏𑀓𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀆𑀧𑀸𑀣𑀕𑀢𑁄 𑀯𑀺𑀲𑀬𑁄 𑀧𑀤𑀝𑁆𑀞𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀁 𑀇𑀫𑀲𑁆𑀲𑀸𑀢𑀺 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄.

𑀦𑀦𑀼 𑀘𑀸𑀬𑀁 𑀥𑀫𑁆𑀫𑁄 𑀘𑁂𑀢𑀲𑀺𑀓𑁄, 𑀲𑁆𑀯𑀸𑀬𑀁 𑀅𑀭𑀽𑀧𑀥𑀫𑁆𑀫𑁄 𑀲𑀫𑀸𑀦𑁄 𑀓𑀣𑀁 𑀨𑀼𑀲𑀦𑀮𑀓𑁆𑀔𑀡𑁄 𑀳𑁄𑀢𑀻𑀢𑀺 𑀅𑀦𑁆𑀢𑁄𑀮𑀻𑀦𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀢𑀲𑁆𑀲𑀸 𑀲𑁄𑀥𑀦𑀢𑁆𑀣𑀁 ‘‘𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀨𑀼𑀲𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀻’’𑀢𑀺 𑀇𑀫𑀺𑀦𑀸 𑀅𑀭𑀽𑀧𑀲𑁆𑀲𑀸𑀧𑀺 𑀲𑀢𑁄 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀬𑀁 𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀘 𑀢𑀲𑁆𑀲 𑀨𑀼𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺 𑀅𑀫𑁆𑀩𑀺𑀮𑀁 𑀅𑀫𑁆𑀩𑀧𑀓𑁆𑀓𑀸𑀤𑀺𑀁 𑀔𑀸𑀤𑀦𑁆𑀢𑀁 𑀧𑀲𑁆𑀲𑀦𑁆𑀢𑀲𑁆𑀲 𑀧𑀭𑀲𑁆𑀲 𑀔𑁂𑀴𑀼𑀧𑁆𑀧𑀢𑁆𑀢𑀺𑀧𑀭𑀁 𑀩𑀸𑀥𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 𑀤𑀬𑀸𑀮𑀼𑀓𑀲𑁆𑀲 𑀲𑀭𑀻𑀭𑀓𑀫𑁆𑀧𑀦𑀁, 𑀭𑀼𑀓𑁆𑀔𑀲𑀸𑀔𑀕𑁆𑀕𑁂 𑀤𑀼𑀝𑁆𑀞𑀺𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀪𑀽𑀫𑀺𑀬𑀁 𑀞𑀺𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀚𑀗𑁆𑀖𑀘𑀮𑀦𑀁, 𑀧𑀺𑀲𑀸𑀘𑀸𑀤𑀺𑀪𑀸𑀬𑀺𑀢𑀩𑁆𑀩𑀁 𑀤𑀺𑀲𑁆𑀯𑀸 𑀊𑀭𑀼𑀧𑀢𑁆𑀣𑀫𑁆𑀪𑁄𑀢𑀺 𑀏𑀯𑀫𑀸𑀤𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀲𑁄𑀢𑀺 𑀲𑁄 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀸𑀤𑀺𑀓𑁄 𑀨𑀲𑁆𑀲𑁄.

𑀲𑀼𑀦𑁆𑀤𑀭𑀦𑁆𑀢𑀺 𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀧𑀲𑀢𑁆𑀣𑀁. 𑀫𑀦𑁄𑀢𑀺 𑀯𑀺𑀜𑁆𑀜𑀸𑀡𑀁. 𑀲𑀼𑀫𑀦𑀲𑁆𑀲 𑀪𑀸𑀯𑁄𑀢𑀺 𑀲𑀼𑀫𑀦𑀲𑀗𑁆𑀔𑀸𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀪𑀸𑀯𑁄. 𑀬𑁆𑀯𑀸𑀬𑀁 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀩𑀦𑁆𑀥𑀦𑁄 𑀅𑀢𑁆𑀣𑁄, 𑀲𑁄 𑀲𑁄𑀫𑀦𑀲𑁆𑀲𑀁. 𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀳𑀺 𑀲𑀼𑀫𑀦-𑀲𑀤𑁆𑀤𑁄 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑁂 𑀧𑀯𑀢𑁆𑀢𑀢𑀺. 𑀯𑁂𑀤𑁂𑀦 𑀅𑀦𑀼𑀪𑀯𑀦𑀸𑀓𑀸𑀭𑁂𑀦 𑀅𑀬𑀺𑀢𑀁 𑀧𑀯𑀢𑁆𑀢𑀁 𑀯𑁂𑀤𑀬𑀺𑀢𑀁, 𑀢𑀁 𑀮𑀓𑁆𑀔𑀡𑀫𑀲𑁆𑀲𑀸𑀢𑀺 𑀯𑁂𑀤𑀬𑀺𑀢𑀮𑀓𑁆𑀔𑀡𑀸. 𑀇𑀝𑁆𑀞𑀲𑁆𑀲 𑀇𑀝𑁆𑀞𑀸𑀓𑀸𑀭𑀢𑁄𑀯 𑀅𑀦𑀼𑀪𑀯𑀦𑀁 𑀓𑀺𑀘𑁆𑀘𑀫𑀲𑁆𑀲𑀸𑀢𑀺 𑀇𑀝𑁆𑀞𑀸𑀓𑀸𑀭𑀸𑀦𑀼𑀪𑀯𑀦𑀭𑀲𑀸. 𑀲𑀸 𑀳𑀺 𑀲𑀪𑀸𑀯𑀢𑁄 𑀇𑀝𑁆𑀞𑀫𑀸𑀭𑀫𑁆𑀫𑀡𑀁 𑀇𑀝𑁆𑀞𑀯𑀲𑁂𑀦, 𑀇𑀢𑀭𑀜𑁆𑀘 𑀇𑀝𑁆𑀞𑀸𑀓𑀸𑀭𑁂𑀦𑁂𑀯 𑀅𑀦𑀼𑀪𑀯𑀢𑀺, 𑀢𑀢𑁆𑀣 𑀇𑀝𑁆𑀞𑀸𑀓𑀸𑀭𑀸𑀦𑀼𑀪𑀯𑀦𑀁 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸𑀬 𑀮𑀩𑁆𑀪𑀢𑀺 𑀢𑀲𑁆𑀲𑀸 𑀅𑀦𑀺𑀝𑁆𑀞𑀲𑁆𑀲𑀧𑀺 𑀓𑀧𑁆𑀧𑀦𑀸𑀯𑀲𑁂𑀦 𑀇𑀝𑁆𑀞𑀸𑀓𑀸𑀭𑁂𑀦 𑀕𑀳𑀡𑀢𑁄, 𑀲𑀪𑀸𑀯𑀢𑁄 𑀧𑀦 𑀇𑀝𑁆𑀞𑀸𑀦𑀼𑀪𑀯𑀦𑀁 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀬𑀧𑀺 𑀮𑀩𑁆𑀪𑀢𑀺 𑀢𑀲𑁆𑀲𑀸 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀸𑀪𑀸𑀯𑀢𑁄. ‘‘𑀭𑀸𑀚𑀸 𑀯𑀺𑀬 𑀲𑀼𑀪𑁄𑀚𑀦𑀭𑀲’’𑀦𑁆𑀢𑀺 𑀇𑀫𑀺𑀦𑀸 𑀇𑀫𑀁 𑀤𑀻𑀧𑁂𑀢𑀺 𑁋 𑀨𑀲𑁆𑀲𑀲𑁆𑀲 𑀨𑀼𑀲𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀦𑀫𑀢𑁆𑀢𑀫𑁂𑀯, 𑀘𑁂𑀢𑀦𑀸𑀬 𑀲𑀜𑁆𑀘𑁂𑀢𑀦𑀸𑀫𑀢𑁆𑀢𑀫𑁂𑀯, 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀚𑀸𑀦𑀦𑀫𑀢𑁆𑀢𑀫𑁂𑀯, 𑀏𑀓𑀁𑀲𑀢𑁄 𑀧𑀦 𑀇𑀲𑁆𑀲𑀭𑀯𑀢𑀸𑀬 𑀲𑀸𑀫𑀺𑀪𑀸𑀯𑁂𑀦 𑀯𑁂𑀤𑀦𑀸𑀯 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺, 𑀭𑀸𑀚𑀸 𑀯𑀺𑀬 𑀲𑀽𑀤𑀓𑀸𑀭𑁂𑀦 𑀲𑀫𑁆𑀧𑀸𑀤𑀺𑀢𑀲𑀼𑀪𑁄𑀚𑀦𑀭𑀲𑀦𑁆𑀢𑀺. 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀅𑀲𑁆𑀲𑀸𑀤𑁄, 𑀲𑀼𑀔𑀯𑁂𑀤𑀦𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀲𑁆𑀲𑀸𑀤𑁄’’𑀢𑀺. 𑀘𑁂𑀢𑁄𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀘𑁂𑀢𑀲𑀺 𑀪𑀯𑁄 𑀅𑀲𑁆𑀲𑀸𑀤𑁄𑀢𑀺 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑁄, 𑀢𑀣𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀻𑀢𑀺 𑀆𑀳 ‘‘𑀧𑀲𑁆𑀲𑀤𑁆𑀥𑀺𑀧𑀤𑀝𑁆𑀞𑀸𑀦𑀸’’𑀢𑀺. 𑀇𑀤𑀁 𑀧𑀦 𑀦𑀺𑀭𑀸𑀫𑀺𑀲𑀲𑁄𑀫𑀦𑀲𑁆𑀲𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀦𑀻𑀮𑀸𑀤𑀺𑀪𑁂𑀤𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀲𑀜𑁆𑀚𑀸𑀦𑀦𑀁 𑀢𑀫𑁂𑀯 𑀲𑀜𑁆𑀜𑀁 𑀓𑀢𑁆𑀯𑀸 𑀚𑀸𑀦𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸. 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀓𑀭𑀡𑀭𑀲𑀸𑀢𑀺 𑀧𑀢𑀺 𑀅𑀪𑀺𑀜𑁆𑀜𑀸𑀬𑀢𑀺 𑀏𑀢𑁂𑀦𑀸𑀢𑀺 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀁, 𑀢𑀤𑁂𑀯𑁂𑀢𑀦𑁆𑀢𑀺 𑀧𑀼𑀦 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀦𑀺𑀫𑀺𑀢𑁆𑀢𑀁 𑀲𑀡𑁆𑀞𑀸𑀦𑀸𑀤𑀺𑀓𑁄 𑀆𑀓𑀸𑀭𑁄, 𑀢𑀲𑁆𑀲 𑀓𑀭𑀡𑀭𑀲𑁄 𑀓𑀺𑀘𑁆𑀘𑀫𑀲𑁆𑀲𑀸𑀢𑀺 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀓𑀭𑀡𑀭𑀲𑀸. 𑀲𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀘𑁆𑀙𑀸 𑀲𑀜𑁆𑀚𑀸𑀦𑀦𑀲𑁆𑀲 𑀓𑀸𑀭𑀡𑀪𑀽𑀢𑀁 𑀲𑀡𑁆𑀞𑀸𑀦𑀸𑀤𑀺𑀓𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀇𑀤𑀜𑁆𑀘 𑀦𑀺𑀫𑀺𑀢𑁆𑀢𑀓𑀸𑀭𑀺𑀓𑀸𑀬 𑀦𑀺𑀫𑀺𑀢𑁆𑀢𑁂𑀦 𑀲𑀜𑁆𑀚𑀸𑀦𑀦𑁆𑀢𑀺𑀬𑀸 𑀘 𑀲𑀩𑁆𑀩𑀸𑀬 𑀲𑀫𑀸𑀦𑀲𑀜𑁆𑀜𑀸𑀬 𑀬𑁄𑀚𑁂𑀢𑀩𑁆𑀩𑀁. 𑀦𑀺𑀫𑀺𑀢𑁆𑀢𑁂𑀦 𑀲𑀜𑁆𑀚𑀸𑀦𑀦𑁆𑀢𑀻𑀧𑀺 𑀳𑀺 𑀧𑀼𑀦 𑀅𑀧𑀭𑀸𑀬 𑀲𑀜𑁆𑀜𑀸𑀬 𑀘 𑀲𑀜𑁆𑀚𑀸𑀦𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀻𑀢𑀺. 𑀢𑀜𑁆𑀘 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀚𑀯𑀦𑀲𑀜𑁆𑀜𑀁 𑀥𑀼𑀭𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦𑁂𑀢𑀁 𑀅𑀪𑀺𑀜𑁆𑀜𑀸𑀡𑀓𑀭𑀡𑀁 𑀓𑀣𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀆𑀳 ‘‘𑀯𑀟𑁆𑀠𑀓𑀺𑀲𑁆𑀲 𑀅𑀪𑀺𑀜𑁆𑀜𑀸𑀡𑀓𑀭𑀡𑀫𑀺𑀯𑀸’’𑀢𑀺. 𑀬𑀣𑀸 𑀯𑀟𑁆𑀠𑀓𑀺𑀲𑁆𑀲 𑀤𑀸𑀭𑀽𑀲𑀼 ‘‘𑀇𑀤𑀁 𑀉𑀤𑁆𑀥𑀁, 𑀇𑀤𑀁 𑀅𑀥𑁄’’𑀢𑀺 𑀏𑀯𑀁 𑀧𑀘𑁆𑀙𑀸 𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀪𑀽𑀢𑀲𑁆𑀲 𑀲𑀜𑁆𑀜𑀸𑀡𑀲𑁆𑀲 𑀓𑀭𑀡𑀁, 𑀏𑀯𑀫𑀲𑁆𑀲𑀸 𑀧𑀼𑀦 𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀢𑁆𑀣𑀺𑀤𑀲𑁆𑀲𑀓𑀅𑀦𑁆𑀥𑁄 𑀯𑀺𑀬 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀲𑀜𑁆𑀜𑀸𑀬 𑀬𑀣𑀸𑀕𑀳𑀺𑀢𑀦𑀺𑀫𑀺𑀢𑁆𑀢𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀓𑀭𑀡𑀢𑁄 𑀬𑀣𑀸…𑀧𑁂… 𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀏𑀢𑁂𑀦 𑀲𑀜𑁆𑀜𑀸𑀬 𑀆𑀓𑀸𑀭𑀕𑁆𑀕𑀳𑀡𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀤𑀺𑀝𑁆𑀞𑀺𑀆𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀅𑀓𑀼𑀲𑀮𑀲𑀜𑁆𑀜𑀸𑀬 𑀅𑀦𑀼𑀭𑀽𑀧𑀯𑀲𑁂𑀦 𑀨𑀮𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀅𑀣 𑀯𑀸 𑀅𑀪𑀺𑀦𑀺𑀯𑁂𑀲𑀓𑀭𑀡𑀦𑁆𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀲𑀜𑁆𑀜𑀸𑀪𑀺𑀦𑀺𑀯𑁂𑀲𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀸𑀪𑀸𑀯𑁂𑀦 𑀬𑀣𑀸𑀕𑀳𑀺𑀢𑀦𑀺𑀫𑀺𑀢𑁆𑀢𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀢𑁄 𑀆𑀓𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀢𑀺𑀡𑀧𑀼𑀭𑀺𑀲𑀓𑁂𑀲𑀼 𑀫𑀺𑀕𑀧𑁄𑀢𑀓𑀸𑀦𑀁 ‘‘𑀧𑀼𑀭𑀺𑀲𑀸’’𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸 𑀯𑀺𑀬 𑀅𑀯𑀺𑀓𑀧𑁆𑀧𑀲𑀪𑀸𑀯𑀢𑁆𑀢𑀸 𑀬𑀣𑀸𑀉𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸. 𑀏𑀢𑁆𑀣 𑀘 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀲𑀜𑁆𑀜𑀸𑀬 𑀆𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀘𑀺𑀢𑁆𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀲𑀜𑁆𑀜𑀸𑀦𑀼𑀕𑀢𑀺𑀓𑀁 𑀳𑁄𑀢𑀺. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀘𑀺𑀢𑁆𑀢𑁂 𑀧𑀦 𑀲𑀲𑀫𑁆𑀪𑀸𑀭𑀧𑀣𑀯𑀺𑀬𑀸 𑀅𑀦𑀼𑀕𑀢𑀸 𑀲𑁂𑀲𑀥𑀸𑀢𑀼𑀬𑁄 𑀯𑀺𑀬 𑀲𑀜𑁆𑀜𑀸𑀘𑀺𑀢𑁆𑀢𑀜𑁆𑀘 𑀅𑀩𑁆𑀩𑁄𑀳𑀸𑀭𑀺𑀓𑀁 𑀜𑀸𑀡𑀸𑀦𑀼𑀕𑀢𑀺𑀓𑀁 𑀳𑁄𑀢𑀺.

𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀧𑀩𑀦𑁆𑀥𑀢𑀺 𑀧𑀯𑀢𑁆𑀢𑁂𑀢𑀺, ‘‘𑀕𑀡𑁆𑀳𑀣 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀻 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀧𑀬𑁄𑀚𑁂𑀢𑀺, 𑀲𑀓𑀲𑀓𑀓𑀺𑀘𑁆𑀘𑁂 𑀘 𑀧𑀝𑁆𑀞𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀘𑁂𑀢𑀬𑀺𑀢𑀮𑀓𑁆𑀔𑀡𑀸𑀢𑀺 𑀦𑀺𑀤𑁆𑀤𑁄𑀓𑁆𑀓𑀦𑁆𑀢𑀲𑁆𑀲 𑀧𑀩𑀼𑀤𑁆𑀥𑀓𑁆𑀔𑀡𑁂 𑀲𑀫𑁆𑀪𑀫𑀧𑁆𑀧𑀯𑀢𑁆𑀢𑀺 𑀯𑀺𑀬 𑀘𑁂𑀢𑀲𑁄 𑀉𑀲𑁆𑀲𑀸𑀳𑀢𑀸𑀯 𑀮𑀓𑁆𑀔𑀡𑀸. 𑀅𑀣 𑀯𑀸 ‘‘𑀅𑀪𑀺𑀲𑀦𑁆𑀤𑀳𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀬𑁄𑀚𑀦𑀮𑀓𑁆𑀔𑀡𑀸𑀢𑁆𑀯𑁂𑀯 𑀅𑀢𑁆𑀣𑁄. 𑀆𑀬𑀽𑀳𑀦𑀭𑀲𑀸𑀢𑀺 𑀘𑁂𑀢𑀲𑀺𑀓𑀇𑀭𑀺𑀬𑀦𑀭𑀲𑀸, 𑀧𑀬𑁄𑀕𑀭𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑀸𑀬𑀬𑁂𑀯 𑀧𑀦𑁂𑀢𑀁 𑀮𑀩𑁆𑀪𑀢𑀺. 𑀲𑀁𑀯𑀺𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 ‘‘𑀢𑁆𑀯𑀁 𑀇𑀤𑀁 𑀓𑀭𑁄𑀳𑀻’’𑀢𑀺 𑀯𑀺𑀘𑀸𑀭𑁂𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀯𑀺𑀘𑀸𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀏𑀢𑀸𑀬 𑀳𑀺 𑀧𑀯𑀢𑁆𑀢𑀫𑀸𑀦𑀸𑀬 𑀲𑀩𑁆𑀩𑁂𑀧𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀬𑀣𑀸 𑀲𑀓𑀺𑀘𑁆𑀘𑀧𑀲𑀼𑀢𑀸 𑀳𑁄𑀦𑁆𑀢𑀺, 𑀢𑁂𑀦𑁂𑀯 𑀳𑁂𑀲𑀸 𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀺𑀓𑀸 𑀯𑀼𑀢𑁆𑀢𑀸. 𑀚𑁂𑀝𑁆𑀞𑀲𑀺𑀲𑁆𑀲𑁄 𑀧𑀭𑁂 𑀲𑀚𑁆𑀛𑀸𑀬𑀦𑁂 𑀉𑀬𑁆𑀬𑁄𑀚𑁂𑀦𑁆𑀢𑁄 𑀲𑀬𑀫𑁆𑀧𑀺 𑀲𑀚𑁆𑀛𑀸𑀬𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀲𑀚𑁆𑀛𑀸𑀬𑀺𑀢𑀼𑀁 𑀆𑀭𑀤𑁆𑀥𑁂 𑀲𑁂𑀲𑀲𑀺𑀲𑁆𑀲𑀸𑀧𑀺 𑀲𑀚𑁆𑀛𑀸𑀬𑀦𑁆𑀢𑀺. 𑀫𑀳𑀸𑀯𑀟𑁆𑀠𑀓𑀺𑀲𑁆𑀫𑀺𑀫𑁆𑀧𑀺 𑀯𑀟𑁆𑀠𑀓𑀺𑀓𑀫𑁆𑀫𑀁 𑀓𑀸𑀢𑀼𑀁 𑀆𑀭𑀤𑁆𑀥𑁂 𑀇𑀢𑀭𑁂𑀧𑀺 𑀓𑀭𑁄𑀦𑁆𑀢𑀺 𑀬𑁂𑀯𑀸𑀢𑀺 𑀆𑀳 ‘‘𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀺𑀆𑀤𑀬𑁄 𑀯𑀺𑀬𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀦𑀁 𑀕𑀳𑀡𑀁.

𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀦𑀢𑁆𑀣𑀺 𑀓𑀸𑀘𑀺 𑀯𑀲𑀯𑀢𑁆𑀢𑀺𑀢𑀸𑀢𑀺 𑀯𑀲𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 ‘‘𑀯𑀺𑀢𑀓𑁆𑀓𑀦𑀁 𑀯𑀺𑀢𑀓𑁆𑀓𑁄’’𑀢𑀺 𑀯𑀼𑀢𑁆𑀢𑀁. 𑀊𑀳𑀦𑀁 𑀆𑀭𑀫𑁆𑀫𑀡𑀲𑁆𑀲 𑀧𑀭𑀺𑀓𑀧𑁆𑀧𑀦𑀁, 𑀢𑀲𑁆𑀫𑀺𑀁 𑀅𑀪𑀺𑀦𑀺𑀭𑁄𑀧𑀦𑀦𑁆𑀢𑀺 𑀯𑀸 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀘𑀺𑀢𑁆𑀢𑀁 𑀯𑀺𑀢𑀓𑁆𑀓𑀩𑀮𑁂𑀦 𑀆𑀭𑀫𑁆𑀫𑀡𑀁 𑀅𑀪𑀺𑀭𑀼𑀴𑁆𑀳𑀁 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄’’𑀢𑀺. 𑀬𑀣𑀸 𑀳𑀺 𑀓𑁄𑀘𑀺 𑀕𑀸𑀫𑀯𑀸𑀲𑀻 𑀧𑀼𑀭𑀺𑀲𑁄 𑀭𑀸𑀚𑀯𑀮𑁆𑀮𑀪𑀁, 𑀢𑀁𑀲𑀫𑁆𑀩𑀦𑁆𑀥𑀺𑀦𑀁 𑀫𑀺𑀢𑁆𑀢𑀁 𑀯𑀸 𑀦𑀺𑀲𑁆𑀲𑀸𑀬 𑀭𑀸𑀚𑀕𑁂𑀳𑀁 𑀆𑀭𑁄𑀳𑀢𑀺 𑀅𑀦𑀼𑀧𑀯𑀺𑀲𑀢𑀺, 𑀏𑀯𑀁 𑀯𑀺𑀢𑀓𑁆𑀓𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀅𑀯𑀺𑀢𑀓𑁆𑀓𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺, 𑀦 𑀳𑀺 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀓𑁂 𑀯𑀺𑀢𑀓𑁆𑀓𑁄 𑀉𑀧𑀮𑀩𑁆𑀪𑀢𑀺, 𑀬𑀲𑁆𑀲 𑀩𑀮𑁂𑀦 𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺, 𑀢𑀲𑁆𑀫𑀸 𑀲𑀪𑀸𑀯𑀢𑁄 𑀪𑀸𑀯𑀦𑀸𑀩𑀮𑁂𑀦 𑀢𑀢𑁆𑀣 𑀅𑀦𑀼𑀧𑁆𑀧𑀚𑁆𑀚𑀦𑀓𑁄? 𑀲𑀘𑁆𑀘𑀁, 𑀢𑀫𑁆𑀧𑀺 𑀯𑀺𑀢𑀓𑁆𑀓𑀩𑀮𑁂𑀦 𑀆𑀭𑁄𑀳𑀢𑀺. 𑀬𑀣𑀸 𑀳𑀺 𑀲𑁄 𑀧𑀼𑀭𑀺𑀲𑁄 𑀧𑀭𑀺𑀘𑀬𑁂𑀦 𑀢𑁂𑀦 𑀯𑀺𑀦𑀸𑀧𑀺 𑀦𑀺𑀭𑀸𑀲𑀗𑁆𑀓𑁄 𑀭𑀸𑀚𑀕𑁂𑀳𑀁 𑀧𑀯𑀺𑀲𑀢𑀺, 𑀏𑀯𑀁 𑀧𑀭𑀺𑀘𑀬𑁂𑀦 𑀯𑀺𑀢𑀓𑁆𑀓𑁂𑀦 𑀯𑀺𑀦𑀸𑀧𑀺 𑀅𑀯𑀺𑀢𑀓𑁆𑀓𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺. 𑀧𑀭𑀺𑀘𑀬𑁄𑀢𑀺 𑀘𑁂𑀢𑁆𑀣 𑀲𑀦𑁆𑀢𑀸𑀦𑁂 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀘𑀺𑀢𑁆𑀢𑀪𑀸𑀯𑀦𑀸𑀲𑀗𑁆𑀔𑀸𑀢𑁄 𑀧𑀭𑀺𑀘𑀬𑁄. 𑀯𑀺𑀢𑀓𑁆𑀓𑀲𑁆𑀲 𑀳𑀺 𑀲𑀦𑁆𑀢𑀸𑀦𑁂 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀭𑁄𑀳𑀦𑀁 𑀘𑀺𑀭𑀧𑀭𑀺𑀘𑀺𑀢𑀁, 𑀢𑁂𑀦 𑀢𑀁 𑀘𑀺𑀢𑁆𑀢𑀁 𑀓𑀤𑀸𑀘𑀺 𑀯𑀺𑀢𑀓𑁆𑀓𑁂𑀦 𑀯𑀺𑀦𑀸𑀧𑀺 𑀢𑀢𑁆𑀣 𑀯𑀢𑁆𑀢𑀢𑁂𑀯. 𑀬𑀣𑀸 𑀢𑀁 𑀜𑀸𑀡𑀲𑀳𑀺𑀢𑀁 𑀳𑀼𑀢𑁆𑀯𑀸 𑀲𑀫𑁆𑀫𑀲𑀦𑀯𑀲𑁂𑀦 𑀘𑀺𑀭𑀧𑀭𑀺𑀘𑀺𑀢𑀁 𑀓𑀤𑀸𑀘𑀺 𑀜𑀸𑀡𑀭𑀳𑀺𑀢𑀫𑁆𑀧𑀺 𑀲𑀫𑁆𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀬𑀣𑀸 𑀯𑀸 𑀓𑀺𑀮𑁂𑀲𑀲𑀳𑀺𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀁 𑀲𑀩𑁆𑀩𑀲𑁄 𑀓𑀺𑀮𑁂𑀲𑀭𑀳𑀺𑀢𑀫𑁆𑀧𑀺 𑀧𑀭𑀺𑀘𑀬𑁂𑀦 𑀓𑀺𑀮𑁂𑀲𑀯𑀸𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀅𑀣 𑀯𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀁 𑀅𑀯𑀺𑀢𑀓𑁆𑀓𑀫𑁆𑀧𑀺 𑀯𑀢𑁆𑀣𑀸𑀭𑀫𑁆𑀫𑀡𑀖𑀝𑁆𑀝𑀦𑀲𑁆𑀲 𑀩𑀮𑀯𑀢𑀸𑀬, 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀘 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀪𑀸𑀯𑀦𑀸𑀬 𑀩𑀮𑀯𑀢𑀸𑀬 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀻𑀢𑀺. 𑀆𑀤𑀺𑀢𑁄, 𑀅𑀪𑀺𑀫𑀼𑀔𑀁 𑀯𑀸 𑀳𑀦𑀦𑀁 𑀧𑀳𑀭𑀡𑀫𑀢𑁆𑀢𑀁 𑀆𑀳𑀦𑀦𑀁, 𑀧𑀭𑀺𑀢𑁄, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀸 𑀳𑀦𑀦𑀁 𑀯𑀺𑀲𑁂𑀲𑁂𑀦 𑀧𑀳𑀭𑀡𑀁 𑀧𑀭𑀺𑀬𑀸𑀳𑀦𑀦𑀁, 𑀢𑀁 𑀓𑀺𑀘𑁆𑀘𑀫𑀲𑁆𑀲𑀸𑀢𑀺 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄. 𑀢𑀣𑀸 𑀳𑀺 𑀢𑁂𑀦 𑀬𑁄𑀕𑀸𑀯𑀘𑀭𑁄 𑀆𑀭𑀫𑁆𑀫𑀡𑀁 𑀯𑀺𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀆𑀦𑀬𑀦𑀁 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀉𑀧𑀦𑀬𑀦𑀁, 𑀆𑀓𑀟𑁆𑀠𑀦𑀁 𑀯𑀸, 𑀢𑀣𑀸 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀫𑀲𑁆𑀲𑀸𑀢𑀺 𑀆𑀦𑀬𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀢𑁂𑀦𑀸𑀢𑀺 𑀢𑁂𑀦 𑀯𑀺𑀘𑀸𑀭𑁂𑀦 𑀓𑀭𑀡𑀪𑀽𑀢𑁂𑀦, 𑀳𑁂𑀢𑀼𑀪𑀽𑀢𑁂𑀦 𑀯𑀸 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀯𑀺𑀘𑀭𑀢𑀺 𑀅𑀦𑀼𑀯𑀺𑀘𑀭𑀢𑀺, 𑀅𑀯𑀺𑀘𑀸𑀭𑀘𑀺𑀢𑁆𑀢𑀲𑁆𑀲 𑀧𑀦 𑀅𑀯𑀺𑀢𑀓𑁆𑀓𑀘𑀺𑀢𑁆𑀢𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀘𑀭𑀡𑀁 𑀅𑀦𑀼𑀲𑀜𑁆𑀘𑀭𑀡𑀁 𑀅𑀦𑀼𑀧𑀭𑀺𑀕𑀫𑀦𑀁. 𑀲𑁆𑀯𑀸𑀬𑀁 𑀯𑀺𑀲𑁂𑀲𑁄 𑀲𑀦𑁆𑀢𑀸𑀦𑀫𑁆𑀳𑀺 𑀮𑀩𑁆𑀪𑀫𑀸𑀦𑁄 𑀚𑀯𑀦𑀲𑀦𑁆𑀢𑀸𑀦𑁂 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀆𑀭𑀫𑁆𑀫𑀡𑀲𑁆𑀲 𑀅𑀦𑀼𑀫𑀚𑁆𑀚𑀦𑀁 𑀅𑀦𑀼𑀫𑀲𑀦𑀁 𑀧𑀭𑀺𑀫𑀚𑁆𑀚𑀦𑀫𑀲𑁆𑀲 𑀮𑀓𑁆𑀔𑀡𑀦𑁆𑀢𑀺 𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄. 𑀢𑀣𑀸 𑀳𑀺 𑀯𑀺𑀘𑀸𑀭𑁄 𑀧𑀭𑀺𑀫𑀚𑁆𑀚𑀦𑀳𑀢𑁆𑀣𑁄 𑀯𑀺𑀬, 𑀲𑀁𑀲𑀭𑀡𑀳𑀢𑁆𑀣𑁄 𑀯𑀺𑀬𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣𑀸𑀢𑀺 𑀆𑀭𑀫𑁆𑀫𑀡𑁂. 𑀲𑀳𑀚𑀸𑀢𑀸𑀦𑀁 𑀅𑀦𑀼𑀬𑁄𑀚𑀦𑀁 𑀆𑀭𑀫𑁆𑀫𑀡𑁂 𑀅𑀦𑀼𑀯𑀺𑀘𑀭𑀡𑀲𑀗𑁆𑀔𑀸𑀢𑀅𑀦𑀼𑀫𑀚𑁆𑀚𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀸𑀦𑀜𑁆𑀳𑀺 𑀲𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀸 𑀓𑀸𑀘𑀺 𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀺. 𑀢𑀣𑀸𑀕𑀳𑁂𑀢𑀩𑁆𑀩𑀸𑀓𑀸𑀭𑁄 𑀩𑁄𑀥𑀦𑁂𑀬𑁆𑀬𑀚𑀦𑀸𑀦𑀼𑀭𑁄𑀥𑁂𑀦 𑀧𑀭𑀫𑀢𑁆𑀣𑀢𑁄 𑀏𑀓𑀲𑀪𑀸𑀯𑁄𑀧𑀺 𑀲𑀪𑀸𑀯𑀥𑀫𑁆𑀫𑁄 𑀧𑀭𑀺𑀬𑀸𑀬𑀯𑀘𑀦𑁂𑀳𑀺 𑀯𑀺𑀲𑀬𑀲𑀫𑀸𑀭𑁄𑀧𑀺𑀢𑀭𑀽𑀧𑁂𑀳𑀺 𑀩𑀳𑀽𑀳𑀺 𑀧𑀓𑀸𑀭𑁂𑀳𑀺 𑀧𑀓𑀸𑀲𑀻𑀬𑀢𑀺. 𑀏𑀯𑀜𑁆𑀳𑀺 𑀲𑁄 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺. 𑀅𑀦𑀼𑀧𑀩𑀦𑁆𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀯𑀺𑀘𑁆𑀙𑀺𑀦𑁆𑀦𑀲𑁆𑀲 𑀯𑀺𑀬 𑀧𑀯𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀢𑀣𑀸 𑀳𑀺 𑀲𑁄 𑀅𑀦𑀼𑀲𑀦𑁆𑀥𑀸𑀦𑀢𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑁄.

𑀏𑀢𑁆𑀣 𑀘 𑀯𑀺𑀘𑀸𑀭𑀢𑁄 𑀑𑀴𑀸𑀭𑀺𑀓𑀝𑁆𑀞𑁂𑀦 𑀢𑀲𑁆𑀲𑁂𑀯 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀧𑀞𑀫𑀖𑀡𑁆𑀝𑀸𑀪𑀺𑀭𑀯𑁄 𑀯𑀺𑀬 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄, 𑀅𑀦𑀼𑀭𑀯𑁄 𑀯𑀺𑀬 𑀅𑀦𑀼𑀲𑀜𑁆𑀘𑀭𑀡𑀁 𑀯𑀺𑀘𑀸𑀭𑁄. 𑀬𑀣𑀸 𑀳𑀺 𑀖𑀡𑁆𑀝𑀸𑀪𑀺𑀖𑀸𑀢𑀚𑁄 𑀧𑀞𑀫𑀸𑀪𑀺𑀭𑀯𑁄 𑀅𑀦𑀼𑀭𑀯𑀢𑁄 𑀑𑀴𑀸𑀭𑀺𑀓𑁄, 𑀧𑀼𑀩𑁆𑀩𑀗𑁆𑀕𑀫𑁄 𑀘 𑀳𑁄𑀢𑀺, 𑀏𑀯𑀁 𑀆𑀭𑀫𑁆𑀫𑀡𑀸𑀪𑀺𑀭𑁄𑀧𑀦𑀝𑁆𑀞𑁂𑀦 𑀯𑀺𑀢𑀓𑁆𑀓𑁄 𑀑𑀴𑀸𑀭𑀺𑀓𑁄, 𑀧𑀼𑀩𑁆𑀩𑀗𑁆𑀕𑀫𑁄 𑀯𑀺𑀬 𑀘 𑀳𑁄𑀢𑀺. 𑀢𑀢𑁄 𑀲𑀼𑀔𑀼𑀫𑀝𑁆𑀞𑁂𑀦 𑀅𑀦𑀼𑀫𑀚𑁆𑀚𑀦𑀲𑀪𑀸𑀯𑁂𑀦 𑀘 𑀖𑀡𑁆𑀝𑀸𑀦𑀼𑀭𑀯𑁄 𑀯𑀺𑀬 𑀅𑀦𑀼𑀧𑀩𑀦𑁆𑀥𑁄 𑀯𑀺𑀘𑀸𑀭𑁄. 𑀯𑀺𑀧𑁆𑀨𑀸𑀭𑀯𑀸 𑀘𑁂𑀢𑁆𑀣 𑀯𑀺𑀢𑀓𑁆𑀓𑁄 𑀘𑀺𑀢𑁆𑀢𑀲𑁆𑀲 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀘𑀺𑀢𑁆𑀢𑀲𑁆𑀲 𑀧𑀭𑀺𑀧𑁆𑀨𑀦𑁆𑀤𑀦𑀪𑀽𑀢𑁄 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀼𑀓𑀸𑀫𑀲𑁆𑀲 𑀲𑀓𑀼𑀡𑀲𑁆𑀲 𑀧𑀓𑁆𑀔𑀯𑀺𑀓𑁆𑀔𑁂𑀧𑁄 𑀯𑀺𑀬, 𑀧𑀤𑀼𑀫𑀸𑀪𑀺𑀫𑀼𑀔𑀧𑀸𑀢𑁄 𑀯𑀺𑀬 𑀘 𑀕𑀦𑁆𑀥𑀸𑀦𑀼𑀩𑀦𑁆𑀥𑀘𑁂𑀢𑀲𑁄 𑀪𑀫𑀭𑀲𑁆𑀲. 𑀲𑀦𑁆𑀢𑀯𑀼𑀢𑁆𑀢𑀺 𑀯𑀺𑀘𑀸𑀭𑁄 𑀘𑀺𑀢𑁆𑀢𑀲𑁆𑀲 𑀦𑀸𑀢𑀺𑀧𑀭𑀺𑀧𑁆𑀨𑀦𑁆𑀤𑀦𑀪𑀸𑀯𑁄, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀲𑁆𑀲 𑀲𑀓𑀼𑀡𑀲𑁆𑀲 𑀧𑀓𑁆𑀔𑀧𑁆𑀧𑀲𑀸𑀭𑀡𑀁 𑀯𑀺𑀬, 𑀧𑀤𑀼𑀫𑀲𑁆𑀲 𑀉𑀧𑀭𑀺𑀪𑀸𑀕𑁂 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬 𑀘 𑀧𑀤𑀼𑀫𑀸𑀪𑀺𑀫𑀼𑀔𑀧𑀢𑀺𑀢𑀲𑁆𑀲 𑀪𑀫𑀭𑀲𑁆𑀲. 𑀆𑀕𑀫𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀧𑀭𑀺𑀬𑀸𑀬𑁂𑀦 𑀆𑀕𑀢𑀁. 𑀢𑀣𑀸 𑀘 𑀯𑀼𑀢𑁆𑀢𑀁 𑀤𑀼𑀓𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 𑁋

‘‘𑀆𑀓𑀸𑀲𑁂 𑀕𑀘𑁆𑀙𑀢𑁄 𑀫𑀳𑀸𑀲𑀓𑀼𑀡𑀲𑁆𑀲 𑀉𑀪𑁄𑀳𑀺 𑀧𑀓𑁆𑀔𑁂𑀳𑀺 𑀯𑀸𑀢𑀁 𑀕𑀳𑁂𑀢𑁆𑀯𑀸 𑀧𑀓𑁆𑀔𑁂 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀆𑀭𑀫𑁆𑀫𑀡𑁂 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀯𑀸𑀢𑀕𑁆𑀕𑀳𑀡𑀢𑁆𑀣𑀁 𑀧𑀓𑁆𑀔𑁂 𑀨𑀦𑁆𑀤𑀸𑀧𑀬𑀫𑀸𑀦𑀲𑁆𑀲 𑀕𑀫𑀦𑀁 𑀯𑀺𑀬 𑀅𑀦𑀼𑀫𑀚𑁆𑀚𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑀺𑀘𑀸𑀭𑁄’’𑀢𑀺.

𑀢𑀫𑁆𑀧𑀺 𑀅𑀦𑀼𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀺𑀬𑀁 𑀬𑀼𑀚𑁆𑀚𑀢𑀺. 𑀢𑀣𑀸 𑀳𑀺 𑀉𑀧𑀘𑀸𑀭𑁂, 𑀅𑀧𑁆𑀧𑀦𑀸𑀬𑀁 𑀯𑀸 𑀲𑀦𑁆𑀢𑀸𑀦𑁂𑀦 𑀧𑀯𑀢𑁆𑀢𑀺𑀬𑀁 𑀯𑀺𑀢𑀓𑁆𑀓𑁄 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀧𑀯𑀢𑁆𑀢𑀢𑀺, 𑀦 𑀧𑀞𑀫𑀸𑀪𑀺𑀦𑀺𑀧𑀸𑀢𑁂 𑀯𑀺𑀬 𑀧𑀸𑀓𑀝𑁄 𑀳𑁄𑀢𑀻𑀢𑀺.

𑀧𑀺𑀦𑀬𑀢𑀻𑀢𑀺 𑀓𑀸𑀬𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀺, 𑀯𑀟𑁆𑀠𑁂𑀢𑀺 𑀯𑀸. 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸𑀢𑀺 𑀆𑀭𑀫𑁆𑀫𑀡𑀁 𑀓𑀮𑁆𑀮𑀢𑁄 𑀕𑀳𑀡𑀮𑀓𑁆𑀔𑀡𑀸. 𑀧𑀻𑀡𑀦𑀭𑀲𑀸𑀢𑀺 𑀓𑀸𑀬𑀘𑀺𑀢𑁆𑀢𑀸𑀦𑀁 𑀧𑀭𑀺𑀩𑁆𑀭𑀽𑀳𑀦𑀓𑀺𑀘𑁆𑀘𑀸. 𑀨𑀭𑀡𑀭𑀲𑀸𑀢𑀺 𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀩𑁆𑀬𑀸𑀧𑀦𑀭𑀲𑀸, 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀳𑀺 𑀭𑀽𑀧𑁂𑀳𑀺 𑀲𑀓𑀮𑀭𑀽𑀧𑀓𑀸𑀬𑀩𑁆𑀬𑀸𑀧𑀦𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑀺 𑀅𑀜𑁆𑀜𑀣𑀸 𑀇𑀫𑀺𑀲𑁆𑀲𑀸 𑀨𑀭𑀡𑀁 𑀳𑁄𑀢𑀺, 𑀥𑀫𑁆𑀫𑀸𑀦𑀁 𑀅𑀩𑁆𑀬𑀸𑀧𑀸𑀭𑀢𑀸𑀬 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀲𑀗𑁆𑀓𑀫𑀦𑀸𑀪𑀸𑀯𑀢𑁄. 𑀉𑀤𑀕𑁆𑀕𑀪𑀸𑀯𑁄 𑀑𑀤𑀕𑁆𑀬𑀁.

𑀏𑀓𑀁 𑀆𑀭𑀫𑁆𑀫𑀡𑀁 𑀅𑀕𑁆𑀕𑀫𑁂𑀢𑀲𑁆𑀲𑀸𑀢𑀺 𑀏𑀓𑀕𑁆𑀕𑀁, 𑀘𑀺𑀢𑁆𑀢𑀁, 𑀬𑁂𑀦 𑀧𑀦 𑀥𑀫𑁆𑀫𑁂𑀦 𑀬𑁄𑀕𑀢𑁄 𑀢𑀁 𑀏𑀓𑀕𑁆𑀕𑀁 𑀦𑀸𑀫 𑀳𑁄𑀢𑀺, 𑀲𑁄 𑀏𑀓𑀕𑁆𑀕𑀪𑀸𑀯𑁄. 𑀲𑁄 𑀧𑀦 𑀘𑀺𑀢𑁆𑀢𑀲𑁆𑀲𑁂𑀯 𑀳𑁄𑀢𑀺, 𑀦 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀆𑀳 ‘‘𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀪𑀸𑀯𑁄’’𑀢𑀺, 𑀦𑀺𑀯𑀸𑀢𑁂 𑀤𑀻𑀧𑀲𑀺𑀔𑀸𑀬 𑀞𑀺𑀢𑀺 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀞𑀺𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀲𑀸𑀭𑀲𑁆𑀲 𑀩𑁆𑀬𑀕𑁆𑀕𑀪𑀸𑀯𑀲𑁆𑀲 𑀧𑀝𑀺𑀧𑀓𑁆𑀔𑁄 𑀲𑀪𑀸𑀯𑁄 𑀅𑀯𑀺𑀲𑀸𑀭𑁄, 𑀦 𑀯𑀺𑀲𑀸𑀭𑀸𑀪𑀸𑀯𑀫𑀢𑁆𑀢𑀁, 𑀢𑀁 𑀇𑀫𑀲𑁆𑀲 𑀮𑀓𑁆𑀔𑀡𑀦𑁆𑀢𑀺 𑀆𑀳 ‘‘𑀅𑀯𑀺𑀲𑀸𑀭𑀮𑀓𑁆𑀔𑀡𑁄’’𑀢𑀺. 𑀅𑀯𑀺𑀓𑁆𑀔𑁂𑀧𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀯𑀺𑀓𑁆𑀔𑀺𑀢𑁆𑀢𑀢𑀸, 𑀅𑀯𑀺𑀲𑀸𑀭𑀸𑀯𑀺𑀓𑁆𑀔𑁂𑀧𑀸𑀦𑀁 𑀲𑀫𑀸𑀥𑀸𑀦𑀪𑀸𑀯𑀢𑁄 𑀅𑀢𑁆𑀣𑀢𑁄 𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀲𑀫𑀼𑀔𑁂𑀦, 𑀲𑀫𑁆𑀧𑀬𑀼𑀢𑁆𑀢𑀫𑀼𑀔𑁂𑀦 𑀘 𑀉𑀪𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀽𑀧𑀲𑀫𑀮𑀓𑁆𑀔𑀡𑀲𑁆𑀲 𑀯𑀺𑀓𑁆𑀔𑁂𑀧𑀲𑁆𑀲 𑀧𑀝𑀺𑀧𑀓𑁆𑀔𑀢𑀸𑀬 𑀘𑀺𑀢𑁆𑀢𑀲𑁆𑀲 𑀉𑀧𑀲𑀫𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀉𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀯𑀺𑀲𑁂𑀲𑀢𑁄𑀢𑀺 𑀬𑁂𑀪𑀼𑀬𑁆𑀬𑁂𑀦. 𑀲𑀼𑀔𑀯𑀺𑀭𑀳𑀺𑀢𑁄𑀧𑀺 𑀳𑀺 𑀅𑀢𑁆𑀣𑀺 𑀲𑀫𑀸𑀥𑀻𑀢𑀺 𑀲𑁄 𑀬𑁂𑀪𑀼𑀬𑁆𑀬𑁂𑀦 𑀲𑀼𑀔𑀧𑀤𑀝𑁆𑀞𑀸𑀦𑁄 𑀳𑁄𑀢𑀺. 𑀅𑀣 𑀯𑀸 𑀯𑀺𑀲𑁂𑀲𑀢𑁄𑀢𑀺 𑀅𑀢𑀺𑀲𑀬𑁂𑀦. ‘‘𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀅. 𑀦𑀺. 𑁧𑁧.𑁧𑁧) 𑀯𑀘𑀦𑀢𑁄 𑀳𑀺 𑀲𑀼𑀔𑀁 𑀲𑀫𑀸𑀥𑀺𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀁 𑀲𑀼𑀔𑀯𑀺𑀭𑀳𑀺𑀢𑀲𑁆𑀲𑀧𑀺 𑀢𑀤𑀼𑀧𑀦𑀺𑀲𑁆𑀲𑀬𑁂𑀦𑁂𑀯 𑀲𑀫𑀺𑀚𑁆𑀛𑀦𑀢𑁄.

𑀲𑀤𑁆𑀤𑀳𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀫𑁆𑀫𑀨𑀮𑀸𑀤𑀺𑀲𑀤𑁆𑀤𑀳𑀦𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀢𑀢𑁆𑀣 𑀆𑀥𑀺𑀧𑀘𑁆𑀘𑀪𑀸𑀯𑁂𑀦 𑀲𑀤𑁆𑀥𑀸𑀬 𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸 𑀳𑀺 𑀥𑀫𑁆𑀫𑀸𑀦𑀁 𑀢𑀣𑀸 𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 ‘‘𑀲𑀤𑁆𑀤𑀳𑀢𑀻’’𑀢𑀺 𑀯𑁄𑀳𑀭𑀻𑀬𑀢𑀺. 𑀲𑀤𑁆𑀤𑀳𑀦𑀁 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀦𑁄 𑀧𑀢𑁆𑀢𑀺𑀬𑀸𑀬𑀦𑀁, 𑀢𑀁 𑀮𑀓𑁆𑀔𑀡𑀫𑁂𑀢𑀺𑀲𑁆𑀲𑀸𑀢𑀺 𑀲𑀤𑁆𑀤𑀳𑀦𑀮𑀓𑁆𑀔𑀡𑀸. 𑀓𑀸𑀮𑀼𑀲𑀺𑀬𑀫𑀮𑀁 𑀯𑀺𑀥𑀫𑁂𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁, 𑀧𑀼𑀕𑁆𑀕𑀮𑀲𑁆𑀲𑁂𑀯 𑀯𑀸 𑀧𑀲𑀸𑀤𑀁 𑀅𑀦𑀸𑀯𑀺𑀮𑀪𑀸𑀯𑀓𑀸𑀭𑀡𑀁 𑀓𑀺𑀘𑁆𑀘𑀫𑁂𑀢𑀺𑀲𑁆𑀲𑀸𑀢𑀺 𑀧𑀲𑀸𑀤𑀦𑀭𑀲𑀸. 𑀬𑀣𑀸 𑀓𑀣𑀁 𑀯𑀺𑀬𑀸𑀢𑀺 𑀆𑀳 ‘‘𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬𑀸’’𑀢𑀺. 𑀅𑀓𑀸𑀮𑀼𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀅𑀦𑀸𑀯𑀺𑀮𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀭𑀢𑀦𑀢𑁆𑀢𑀬𑀁 𑀓𑀫𑁆𑀫𑀁 𑀓𑀫𑁆𑀫𑀨𑀮𑀜𑁆𑀘 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼, 𑀢𑀁 𑀇𑀫𑀺𑀲𑁆𑀲𑀸 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀸. 𑀦 𑀳𑀺 𑀲𑀤𑁆𑀥𑀸𑀬 𑀅𑀯𑀢𑁆𑀣𑀼𑀪𑀽𑀢𑁂𑀲𑀼 𑀢𑀺𑀢𑁆𑀣𑀺𑀬𑀸𑀤𑀻𑀲𑀼 𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀸 𑀧𑀦𑀸𑀬𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀆𑀤𑀸𑀦𑁂 𑀳𑀢𑁆𑀣𑁄 𑀯𑀺𑀬, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀤𑀸𑀦𑁂 𑀯𑀺𑀢𑁆𑀢𑀁 𑀯𑀺𑀬, 𑀅𑀫𑀢𑀓𑀲𑀺𑀨𑀮𑀨𑀮𑀦𑁂 𑀩𑀻𑀚𑀁 𑀯𑀺𑀬 𑀘 𑀤𑀝𑁆𑀞𑀩𑁆𑀩𑀸. ‘‘𑀲𑀤𑁆𑀥𑀸𑀳𑀢𑁆𑀣𑁄, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄, 𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁪), 𑀲𑀤𑁆𑀥𑀸 𑀩𑀻𑀚𑀁 𑀢𑀧𑁄 𑀯𑀼𑀝𑁆𑀞𑀻’’𑀢𑀺𑀆𑀤𑀺𑀯𑀘𑀦𑀜𑁆𑀳𑁂𑀢𑁆𑀣 (𑀲𑀁. 𑀦𑀺. 𑁧.𑁧𑁯𑁭; 𑀲𑀼. 𑀦𑀺. 𑁭𑁭) 𑀲𑀸𑀥𑀓𑀁.

𑀲𑀭𑀦𑁆𑀢𑀺 𑁨𑁩𑁭 𑀏𑀢𑀸𑀬𑀸𑀢𑀺 𑀲𑀭𑀡𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀢𑀢𑁆𑀣 𑀆𑀥𑀺𑀧𑀘𑁆𑀘𑀪𑀸𑀯𑁂𑀦 𑀲𑀢𑀺𑀬𑀸 𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸 𑀳𑀺 𑀥𑀫𑁆𑀫𑀸𑀦𑀁 𑀢𑀣𑀸 𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 ‘‘𑀲𑀭𑀢𑀻’’𑀢𑀺 𑀯𑁄𑀳𑀭𑀻𑀬𑀢𑀺. 𑀉𑀤𑀓𑁂 𑀅𑀮𑀸𑀩𑀼 𑀯𑀺𑀬 𑀧𑀺𑀮𑀯𑀺𑀢𑁆𑀯𑀸 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀧𑀸𑀲𑀸𑀡𑀲𑁆𑀲 𑀯𑀺𑀬 𑀦𑀺𑀘𑁆𑀘𑀮𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀞𑀧𑀦𑀁 𑀅𑀲𑀫𑁆𑀫𑀼𑀝𑁆𑀞𑀢𑀸𑀓𑀭𑀡𑀁 𑀅𑀧𑀺𑀮𑀸𑀧𑀦𑀁, 𑀢𑀁 𑀮𑀓𑁆𑀔𑀡𑀫𑀲𑁆𑀲𑀸𑀢𑀺 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸. 𑀲𑀸 𑀳𑀺 𑀆𑀭𑀫𑁆𑀫𑀡𑁂 𑀤𑀴𑁆𑀳𑀁 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀏𑀲𑀺𑀓𑀸 𑀯𑀺𑀬 𑀯𑀼𑀘𑁆𑀘𑀢𑀺. 𑀲𑀫𑁆𑀫𑁄𑀲𑀧𑀘𑁆𑀘𑀦𑀻𑀓𑀓𑀺𑀘𑁆𑀘𑀁 𑀅𑀲𑀫𑁆𑀫𑁄𑀲𑀭𑀲𑁄, 𑀦 𑀲𑀫𑁆𑀫𑁄𑀲𑀸𑀪𑀸𑀯𑀫𑀢𑁆𑀢𑀁. ‘‘𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁧𑁦.𑁨𑁦) 𑀯𑀼𑀢𑁆𑀢𑀢𑁆𑀢𑀸 𑀘𑁂𑀢𑁄𑀕𑀼𑀡𑀭𑀢𑀦𑀳𑀸𑀭𑀓𑀸𑀦𑀁 𑀓𑀺𑀮𑁂𑀲𑀘𑁄𑀭𑀸𑀦𑀁 𑀦𑀺𑀯𑀸𑀭𑀡𑀢𑁄 𑀆𑀳 ‘‘𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺. 𑀢𑀣𑀸 𑀳𑁂𑀲𑀸 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀺𑀭𑀓𑁆𑀔𑀦𑀢𑁄 𑀤𑁄𑀯𑀸𑀭𑀺𑀓𑁄 𑀯𑀺𑀬𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀞𑀫𑀁 𑀲𑀜𑁆𑀜𑀸𑀬 𑀣𑀺𑀭𑀼𑀧𑁆𑀧𑀦𑁆𑀦𑀪𑀸𑀯𑁂 𑀧𑀘𑁆𑀙𑀸 𑀲𑀢𑀺𑀬𑀸 𑀧𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀆𑀳 ‘‘𑀣𑀺𑀭𑀲𑀜𑁆𑀜𑀸𑀧𑀤𑀝𑁆𑀞𑀸𑀦𑀸’’𑀢𑀺. 𑀅𑀣 𑀲𑀢𑀺𑀲𑀜𑁆𑀜𑀸𑀦𑀁 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺? 𑀲𑀜𑁆𑀜𑀸 𑀢𑀸𑀯 𑀧𑀞𑀫𑀁 𑀅𑀕𑁆𑀕𑀳𑀺𑀢𑀦𑀺𑀫𑀺𑀢𑁆𑀢𑀁 𑀲𑀜𑁆𑀚𑀸𑀦𑀸𑀢𑀺, 𑀕𑀳𑀺𑀢𑀦𑀺𑀫𑀺𑀢𑁆𑀢𑁂 𑀧𑀼𑀦 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺, 𑀧𑀞𑀫𑀁 𑀅𑀕𑁆𑀕𑀳𑀺𑀢𑁂 𑀧𑀦 𑀲𑀜𑁆𑀜𑀸𑀓𑀺𑀘𑁆𑀘𑀁 𑀅𑀧𑁆𑀧𑀥𑀸𑀦𑀁 𑀳𑁄𑀢𑀺, 𑀲𑀢𑀺 𑀧𑀦 𑀧𑀞𑀫𑀁 𑀅𑀕𑁆𑀕𑀳𑀺𑀢𑀦𑀺𑀫𑀺𑀢𑁆𑀢𑀫𑁆𑀧𑀺 𑀲𑀭𑀢𑀺 𑀕𑀳𑀺𑀢𑀦𑀺𑀫𑀺𑀢𑁆𑀢𑀫𑁆𑀧𑀺, 𑀕𑀳𑀺𑀢𑀦𑀺𑀫𑀺𑀢𑁆𑀢𑁂 𑀧𑀦 𑀲𑀢𑀺𑀓𑀺𑀘𑁆𑀘𑀁 𑀕𑀼𑀡𑀪𑀽𑀢𑀁 𑀳𑁄𑀢𑀻𑀢𑀺 𑀇𑀤𑀫𑁂𑀯 𑀢𑀸𑀲𑀁 𑀦𑀸𑀦𑀢𑁆𑀢𑀁.

𑀯𑀻𑀭𑀪𑀸𑀯𑁄𑀢𑀺 𑀬𑁂𑀦 𑀯𑀻𑀭𑀺𑀬𑁂𑀦 𑀯𑀻𑀭𑁄 𑀦𑀸𑀫 𑀳𑁄𑀢𑀺, 𑀲𑁄 𑀥𑀫𑁆𑀫𑁄. 𑀯𑀻𑀭𑀸𑀦𑀁 𑀯𑀸 𑀓𑀫𑁆𑀫𑀦𑁆𑀢𑀺 𑀬𑁂𑀦 𑀓𑀫𑁆𑀫𑁂𑀦 𑀯𑀻𑀭𑁄 𑀦𑀸𑀫 𑀳𑁄𑀢𑀺, 𑀢𑀁 𑀯𑀻𑀭𑀸𑀦𑀁 𑀓𑀫𑁆𑀫𑀁 𑀦𑀸𑀫. 𑀯𑀻𑀭𑀺𑀬𑀁 𑀧𑀦𑀲𑁆𑀲 𑀲𑀸𑀥𑀓𑀪𑀸𑀯𑀢𑁄 𑀢𑀣𑀸 𑀯𑀼𑀢𑁆𑀢𑀁. 𑀥𑀫𑁆𑀫𑀯𑀺𑀦𑀺𑀫𑀼𑀢𑁆𑀢𑀁 𑀯𑀸 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀯𑀻𑀭𑀺𑀬𑀫𑁂𑀯 𑀓𑀫𑁆𑀫𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀥𑀺𑀦𑀸 𑀈𑀭𑁂𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀸 𑀯𑀻𑀭𑀺𑀬𑀁. 𑀉𑀲𑁆𑀲𑀸𑀳𑁄 𑀢𑀁 𑀢𑀁 𑀓𑀺𑀘𑁆𑀘𑀁 𑀲𑀫𑀸𑀭𑀫𑁆𑀪𑁄, 𑀧𑀭𑀓𑁆𑀓𑀫𑁄 𑀯𑀸. 𑀉𑀧𑀢𑁆𑀣𑀫𑁆𑀪𑀦𑀁 𑀧𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀥𑀸𑀭𑀡𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀁. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀁𑀲𑀻𑀤𑀦𑀪𑀸𑀯𑀦𑀺𑀯𑀸𑀭𑀓𑁄 𑀥𑀫𑁆𑀫𑁄, 𑀦 𑀲𑀁𑀲𑀻𑀤𑀦𑀸𑀪𑀸𑀯𑀫𑀢𑁆𑀢𑀁, 𑀅𑀲𑀁𑀲𑀻𑀤𑀦𑀪𑀸𑀯𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀅𑀲𑀁𑀲𑀻𑀤𑀦𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁. ‘‘𑀲𑀁𑀯𑀺𑀕𑁆𑀕𑁄 𑀬𑁄𑀦𑀺𑀲𑁄 𑀧𑀤𑀳𑀢𑀻’’𑀢𑀺 (𑀅. 𑀦𑀺. 𑁪.𑁧𑁧𑁩) 𑀯𑀘𑀦𑀢𑁄 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁. 𑀲𑀁𑀯𑁂𑀕𑁄𑀢𑀺 𑀘𑁂𑀢𑁆𑀣 𑀲𑀁𑀯𑁂𑀕𑀫𑀬𑀁 𑀜𑀸𑀡𑀁. 𑀅𑀲𑀁𑀯𑁂𑀕𑀧𑀼𑀩𑁆𑀩𑀺𑀓𑀸𑀬 𑀧𑀦 𑀓𑀼𑀲𑀮𑀓𑀺𑀭𑀺𑀬𑀸𑀬 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁. 𑀢𑀢𑁆𑀣 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀽𑀦𑀺 𑀦𑀸𑀫 𑁋

‘‘𑀫𑀕𑁆𑀕𑁄 𑀕𑀦𑁆𑀢𑀩𑁆𑀩𑁄 𑀳𑁄𑀢𑀺, 𑀫𑀕𑁆𑀕𑁄 𑀕𑀢𑁄. 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀓𑀫𑁆𑀫𑀁 𑀓𑀢𑀁. 𑀅𑀧𑁆𑀧𑀫𑀢𑁆𑀢𑀓𑁄 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺, 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀳𑁄𑀢𑀺, 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸. 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀦 𑀮𑀪𑀢𑀺, 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁 𑀮𑀪𑀢𑀺…𑀧𑁂… 𑀧𑀸𑀭𑀺𑀧𑀽𑀭𑀺’’𑀦𑁆𑀢𑀺 𑁋

𑀏𑀯𑀁 𑀯𑀼𑀢𑁆𑀢𑀸𑀦𑀺 𑀏𑀢𑀸𑀦𑀺 𑀅𑀦𑀼𑀭𑀽𑀧𑀧𑀘𑁆𑀘𑀯𑁂𑀓𑁆𑀔𑀡𑀲𑀳𑀺𑀢𑀸𑀦𑀺 𑀅𑀝𑁆𑀞 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀽𑀦𑀺, 𑀢𑀫𑁆𑀫𑀽𑀮𑀓𑀸𑀦𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺. 𑀏𑀢𑁆𑀣 𑀘 𑀯𑀺𑀢𑀓𑁆𑀓𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑀁 𑀆𑀭𑁄𑀧𑁂𑀢𑀺. 𑀘𑁂𑀢𑀦𑀸 𑀢𑁂 𑀢𑀁𑀢𑀁𑀓𑀺𑀘𑁆𑀘𑁂𑀲𑀼 𑀦𑀺𑀬𑁄𑀚𑁂𑀢𑀺. 𑀯𑀻𑀭𑀺𑀬𑀁 𑀧𑀦 𑀢𑁂 𑀲𑀁𑀲𑀻𑀤𑀺𑀢𑀼𑀁 𑀅𑀤𑀢𑁆𑀯𑀸 𑀉𑀲𑁆𑀲𑀸𑀳𑁂𑀢𑀻𑀢𑀺 𑀅𑀬𑀁 𑀯𑀺𑀢𑀓𑁆𑀓𑀘𑁂𑀢𑀦𑀸𑀯𑀻𑀭𑀺𑀬𑀸𑀦𑀁 𑀯𑀺𑀲𑁂𑀲𑁄.

𑀯𑀺𑀚𑀸𑀦𑀦𑀮𑀓𑁆𑀔𑀡𑀸𑀢𑀺 𑀯𑀺𑀲𑁂𑀲𑁂𑀦 𑀚𑀸𑀦𑀦𑀮𑀓𑁆𑀔𑀡𑀸, 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑀸𑀢𑀺 𑀅𑀢𑁆𑀣𑁄. 𑀯𑀺𑀲𑀬𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀑𑀪𑀸𑀲𑀦𑀁 𑀧𑀓𑀸𑀲𑀦𑀁 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀲𑀫𑁆𑀫𑁄𑀳𑀦𑁆𑀥𑀓𑀸𑀭𑀲𑁆𑀲 𑀯𑀺𑀥𑀫𑀦𑀢𑁄𑀢𑀺 𑀯𑀺𑀲𑀬𑁄𑀪𑀸𑀲𑀦𑀁, 𑀢𑀁 𑀓𑀺𑀘𑁆𑀘𑀫𑀲𑁆𑀲𑀸𑀢𑀺 𑀯𑀺𑀲𑀬𑁄𑀪𑀸𑀲𑀦𑀭𑀲𑀸. 𑀓𑀢𑁆𑀣𑀘𑀺 𑀯𑀺𑀲𑀬𑁂 𑀅𑀲𑀫𑁆𑀫𑀼𑀬𑁆𑀳𑀦𑀸𑀓𑀸𑀭𑁂𑀦 𑀲𑀫𑁆𑀫𑁄𑀳𑀧𑀝𑀺𑀧𑀓𑁆𑀔𑀢𑀸𑀬 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄 𑀲𑀫𑁆𑀫𑁄𑀳𑀸𑀪𑀸𑀯𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄 𑀯𑀸 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀅𑀢𑁆𑀢𑀦𑀸 𑀅𑀦𑀼𑀧𑀸𑀮𑁂𑀢𑀩𑁆𑀩𑀸𑀦𑀁 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀦𑀼𑀧𑀸𑀮𑀦𑀁 𑀚𑀻𑀯𑀺𑀢𑀲𑁆𑀲 𑀩𑁆𑀬𑀸𑀧𑀸𑀭𑁄, 𑀢𑀜𑁆𑀘 𑀢𑁂𑀲𑀁 𑀚𑀻𑀯𑀦𑀦𑁆𑀢𑀺 𑀢𑀁 𑀢𑀲𑁆𑀲 𑀓𑀸𑀭𑀡𑀪𑀸𑀯𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀚𑀻𑀯𑀦𑁆𑀢𑀺 𑀢𑁂𑀦𑀸’’𑀢𑀺. 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑀼𑀭𑀽𑀧𑀢𑁄 𑀮𑀓𑁆𑀔𑀡𑀸𑀤𑀺𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑀸 𑀅𑀯𑀺𑀦𑀺𑀪𑀼𑀢𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀫𑁆𑀧𑀬𑀼𑀢𑁆𑀢𑀸𑀦’’𑀦𑁆𑀢𑀺 𑀳𑀺 𑀯𑀼𑀘𑁆𑀘𑀫𑀸𑀦𑁂 𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀗𑁆𑀕𑀳𑁄 𑀦 𑀲𑀺𑀬𑀸. ‘‘𑀅𑀯𑀺𑀦𑀺𑀪𑀼𑀢𑁆𑀢𑀸𑀦’’𑀦𑁆𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀬𑀸𑀦𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀲𑀤𑁆𑀥𑀺𑀁 𑀅𑀯𑀺𑀦𑀺𑀪𑀼𑀢𑁆𑀢𑀸𑀦𑀺 𑀅𑀯𑀺𑀲𑀁𑀲𑀝𑁆𑀞𑀸𑀦𑀺. 𑀬𑁂 𑀘 𑀅𑀭𑀽𑀧𑀥𑀫𑁆𑀫𑀸 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑁄 𑀳𑁄𑀢𑀻𑀢𑀺. 𑀧𑀯𑀢𑁆𑀢𑀦𑀭𑀲𑀦𑁆𑀢𑀺 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀪𑀗𑁆𑀕𑀸 𑀅𑀦𑀼𑀧𑀸𑀮𑀦𑀢𑁄 𑀅𑀦𑁆𑀢𑀭𑀸 𑀅𑀦𑀺𑀯𑀢𑁆𑀢𑀦𑀲𑀪𑀸𑀯𑀲𑀸𑀥𑀦𑁂𑀦 𑀢𑁂𑀲𑀁 𑀧𑀯𑀢𑁆𑀢𑀦𑀓𑀺𑀘𑁆𑀘𑀁. 𑀓𑁂𑀘𑀺 𑀧𑀦 ‘‘𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀢𑁂𑀲𑀁 𑀞𑀺𑀢𑀺𑀓𑁆𑀔𑀡𑀢𑁄 𑀧𑀝𑁆𑀞𑀸𑀬, 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀧𑀝𑁆𑀞𑀸𑀦𑁂 𑀳𑀺 ‘‘𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀁 𑀓𑀫𑁆𑀫𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀓𑀫𑁆𑀫𑀧𑀘𑁆𑀘𑀬𑀲𑀤𑀺𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀪𑀗𑁆𑀕𑀸 𑀞𑀧𑀦𑀢𑁄 𑀞𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀦𑀼𑀧𑀸𑀮𑀦𑀯𑀲𑁂𑀦 𑀬𑀸𑀧𑀬𑀺𑀢𑀩𑁆𑀩𑀸 𑀧𑀯𑀢𑁆𑀢𑁂𑀢𑀩𑁆𑀩𑀸 𑀥𑀫𑁆𑀫𑀸 𑀧𑀤𑀝𑁆𑀞𑀸𑀦𑀫𑀲𑁆𑀲𑀸𑀢𑀺 𑀬𑀸𑀧𑀬𑀺𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑀁. 𑀬𑀤𑀺 𑀏𑀯𑀁 𑀢𑁂𑀲𑀁 𑀅𑀦𑀼𑀧𑀸𑀮𑀦𑀸𑀤𑀺𑀲𑀸𑀥𑀓𑀁, 𑀓𑀣𑀁 𑀢𑁂𑀲𑀁 𑀦𑀺𑀭𑁄𑀥𑁄 𑀳𑁄𑀢𑀺. 𑀏𑀯𑀜𑁆𑀳𑀺 𑀲𑀩𑁆𑀩𑀓𑀸𑀮𑀁 𑀞𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀦𑁆𑀢𑁂𑀧𑀺 𑀘𑀸’’𑀢𑀺𑀆𑀤𑀺. 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀸𑀤𑀺𑀫𑁆𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀯𑀢𑁆𑀢𑀦𑀭𑀲𑀸𑀤𑀺𑀫𑁂𑀯 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯𑀸𑀢𑀺 𑀅𑀢𑁆𑀢𑀦𑀸 𑀅𑀦𑀼𑀧𑀸𑀮𑁂𑀢𑀩𑁆𑀩𑀸𑀦𑀁, 𑀅𑀢𑁆𑀢𑀦𑁄 𑀯𑀸 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯. 𑀉𑀤𑀓𑀦𑁆𑀢𑀺 𑀢𑀴𑀸𑀓𑀕𑀢𑀚𑀮𑀁, 𑀤𑀡𑁆𑀟𑀕𑀢𑀚𑀮𑀁 𑀯𑀸. 𑀢𑀢𑁆𑀣 𑀢𑀴𑀸𑀓𑀕𑀢𑀉𑀤𑀓𑀲𑁆𑀲 𑀕𑀳𑀡𑁂 𑀅𑀢𑁆𑀢𑀦𑀸 𑀅𑀦𑀼𑀧𑀸𑀮𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀓𑁆𑀔𑀡𑁂 𑀅𑀦𑀼𑀧𑀸𑀮𑀦𑀁 𑀲𑀸𑀥𑀺𑀢𑀁 𑀳𑁄𑀢𑀺, 𑀤𑀡𑁆𑀟𑀕𑀢𑀚𑀮𑀲𑁆𑀲 𑀧𑀦 𑀕𑀳𑀡𑁂 𑀅𑀢𑁆𑀢𑀦𑁄 𑀅𑀢𑁆𑀣𑀺𑀓𑁆𑀔𑀡𑁂 𑀅𑀦𑀼𑀧𑀸𑀮𑀦𑀁. 𑀅𑀢𑁆𑀢𑀦𑀸 𑀅𑀦𑀼𑀧𑁆𑀧𑀸𑀤𑀺𑀢𑀥𑀫𑁆𑀫𑁂 𑀓𑀣𑀁 𑀧𑀸𑀮𑁂𑀢𑀻𑀢𑀺 𑀆𑀳 ‘‘𑀥𑀸𑀢𑀺 𑀯𑀺𑀬 𑀓𑀼𑀫𑀸𑀭’’𑀦𑁆𑀢𑀺. 𑀬𑀤𑀺 𑀲𑁂𑀲𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀓𑀸𑀭𑀡𑁂𑀦 𑀓𑁂𑀦𑀘𑀺 𑀪𑀯𑀺𑀢𑀩𑁆𑀩𑀁, 𑀚𑀻𑀯𑀺𑀢𑀲𑁆𑀲 𑀧𑀦 𑀓𑀺𑀁 𑀧𑀯𑀢𑁆𑀢𑀺𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀲𑀬𑀁…𑀧𑁂… 𑀧𑀯𑀢𑁆𑀢𑀢𑀻’’𑀢𑀺. 𑀬𑀣𑀸 𑀓𑀣𑀁 𑀯𑀺𑀬𑀸𑀢𑀺 𑀆𑀳 ‘‘𑀦𑀺𑀬𑀸𑀫𑀓𑁄 𑀯𑀺𑀬𑀸’’𑀢𑀺. 𑀲𑁄𑀧𑀺 𑀅𑀢𑁆𑀢𑀦𑀸 𑀧𑀯𑀢𑁆𑀢𑀺𑀢𑀦𑀸𑀯𑀸𑀲𑀫𑁆𑀩𑀦𑁆𑀥𑁂𑀦 𑀧𑀯𑀢𑁆𑀢𑀢𑀺. 𑀬𑀤𑀺 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀁, 𑀪𑀗𑁆𑀕𑀢𑁄 𑀉𑀤𑁆𑀥𑀫𑁆𑀧𑀺 𑀓𑀺𑀁 𑀧𑀦 𑀧𑀯𑀢𑁆𑀢𑁂𑀢𑀻𑀢𑀺 𑀆𑀳 ‘‘𑀦 𑀪𑀗𑁆𑀕𑀢𑁄 𑀉𑀤𑁆𑀥’’𑀦𑁆𑀢𑀺. 𑀓𑀲𑁆𑀫𑀸𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀘 𑀧𑀯𑀢𑁆𑀢𑁂𑀢𑀩𑁆𑀩𑀸𑀦𑀜𑁆𑀘 𑀅𑀪𑀸𑀯𑀸’’𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀦 𑀪𑀗𑁆𑀕𑀓𑁆𑀔𑀡𑁂 𑀞𑀧𑁂𑀢𑀻’’𑀢𑀺.

𑀬𑀲𑁆𑀫𑀸 𑀧𑀦 𑀮𑁄𑀪𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄 𑀳𑁄𑀢𑀺, 𑀬𑁂 𑀥𑀫𑁆𑀫𑀸 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀁𑀲𑀫𑀗𑁆𑀕𑀺𑀦𑁄 𑀯𑀸 𑀲𑀢𑁆𑀢𑀸, 𑀢𑁂 𑀦 𑀮𑀼𑀩𑁆𑀪𑀦𑁆𑀢𑀺, 𑀲𑀬𑀫𑁆𑀧𑀺 𑀓𑀤𑀸𑀘𑀺 𑀦 𑀮𑀼𑀩𑁆𑀪𑀢𑁂𑀯, 𑀅𑀢𑁆𑀣𑀢𑁄 𑀯𑀸 𑀅𑀮𑀼𑀩𑁆𑀪𑀦𑀸𑀓𑀸𑀭𑁄 𑀏𑀯 𑀘 𑀲𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦𑀸’’𑀢𑀺𑀆𑀤𑀺. 𑀏𑀲 𑀦𑀬𑁄 ‘‘𑀦 𑀤𑀼𑀲𑁆𑀲𑀦𑁆𑀢𑀺 𑀢𑁂𑀦𑀸’’𑀢𑀺𑀆𑀤𑀻𑀲𑀼𑀧𑀺. 𑀅𑀮𑀕𑁆𑀕𑀪𑀸𑀯𑁄 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑁆𑀢𑀲𑁆𑀲𑀧𑀺 𑀢𑀢𑁆𑀣 𑀅𑀦𑀸𑀲𑀢𑁆𑀢𑀢𑀸. 𑀢𑁂𑀦𑀸𑀳 ‘‘𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀯𑀺𑀬𑀸’’𑀢𑀺. 𑀅𑀧𑀭𑀺𑀕𑁆𑀕𑀳𑁄 𑀓𑀲𑁆𑀲𑀘𑀺 𑀯𑀢𑁆𑀣𑀼𑀦𑁄 𑀫𑀫𑀢𑁆𑀢𑀯𑀲𑁂𑀦 𑀅𑀲𑀗𑁆𑀕𑀳𑁄. 𑀫𑀼𑀢𑁆𑀢𑀪𑀺𑀓𑁆𑀔𑀼 𑀯𑀺𑀬𑀸𑀢𑀺 𑀔𑀻𑀡𑀸𑀲𑀯𑀪𑀺𑀓𑁆𑀔𑀼 𑀯𑀺𑀬. 𑀲𑁄 𑀳𑀺 𑀫𑀼𑀢𑁆𑀢𑀭𑀸𑀕𑀢𑁆𑀢𑀸 𑀓𑀢𑁆𑀣𑀘𑀺 𑀫𑀫𑀸𑀬𑀦𑀭𑀳𑀺𑀢𑁄 𑀳𑁄𑀢𑀺. 𑀅𑀦𑀮𑁆𑀮𑀻𑀦𑁄 𑀪𑀸𑀯𑁄 𑀅𑀥𑀺𑀧𑁆𑀧𑀸𑀬𑁄 𑀏𑀢𑀲𑁆𑀲𑀸𑀢𑀺 𑀅𑀦𑀮𑁆𑀮𑀻𑀦𑀪𑀸𑀯𑁄. 𑀏𑀯𑀜𑁆𑀳𑀺 ‘‘𑀅𑀲𑀼𑀘𑀺𑀫𑁆𑀳𑀺 𑀧𑀢𑀺𑀢𑀧𑀼𑀭𑀺𑀲𑁄 𑀯𑀺𑀬𑀸’’𑀢𑀺 𑀉𑀧𑀫𑀸𑀬 𑀲𑀫𑁂𑀢𑀺. 𑀬𑀣𑀸 𑀳𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀢𑀺𑀧𑀺 𑀓𑀸𑀬𑁂𑀦 𑀅𑀮𑁆𑀮𑀻𑀬𑀦𑁂 𑀪𑀸𑀯𑁄 𑀅𑀦𑀮𑁆𑀮𑀻𑀦𑁄, 𑀏𑀯𑀁 𑀅𑀮𑁄𑀪𑁄𑀧𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀳𑀺𑀢𑁂𑀧𑀺 𑀆𑀭𑀫𑁆𑀫𑀡𑁂 𑀅𑀮𑀕𑁆𑀕𑀪𑀸𑀯𑁂𑀦 𑀅𑀦𑀮𑁆𑀮𑀻𑀦𑀪𑀸𑀯𑁄 𑀅𑀦𑀮𑁆𑀮𑀻𑀦𑀸𑀓𑀸𑀭𑁄𑀬𑁂𑀯 𑀧𑀯𑀢𑁆𑀢𑀢𑀺. 𑀏𑀯𑀁𑀲𑀪𑀸𑀯𑁄 𑀳𑀺 𑀲𑁄 𑀥𑀫𑁆𑀫𑁄𑀢𑀺.

𑀘𑀡𑁆𑀟𑀺𑀓𑀲𑁆𑀲 𑀪𑀸𑀯𑁄 𑀘𑀡𑁆𑀟𑀺𑀓𑁆𑀓𑀁, 𑀨𑀭𑀼𑀲𑀪𑀸𑀯𑁄, 𑀅𑀢𑁆𑀣𑀢𑁄 𑀧𑀦 𑀓𑁄𑀧𑁄𑀬𑁂𑀯, 𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀨𑀭𑀼𑀲𑀪𑀸𑀯𑁄 𑀅𑀘𑀡𑁆𑀟𑀺𑀓𑁆𑀓𑀁. 𑀅𑀯𑀺𑀭𑁄𑀥𑁄 𑀅𑀯𑀺𑀕𑁆𑀕𑀳𑁄 𑀅𑀧𑁆𑀧𑀝𑀺𑀧𑀓𑁆𑀔𑁄 𑀲𑀪𑀸𑀯𑁄. 𑀆𑀖𑀸𑀢𑀯𑀺𑀦𑀬𑀦𑀭𑀲𑁄𑀢𑀺 𑀏𑀢𑁆𑀣 𑀆𑀖𑀸𑀢𑁄 𑀦𑀸𑀫 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑁄 𑀧𑀭𑀁 𑀉𑀤𑁆𑀤𑀺𑀲𑁆𑀲, 𑀧𑀭𑀲𑁆𑀲𑁂𑀯 𑀘 𑀧𑀭𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑁄 𑀉𑀧𑀦𑀸𑀳𑁄 𑀩𑀮𑀯𑀓𑁄𑀧𑁄. 𑀢𑀲𑁆𑀲 𑀯𑀺𑀦𑀬𑀦𑀭𑀲𑁄 𑀅𑀧𑀦𑀬𑀦𑀭𑀲𑁄. 𑀲𑁄𑀫𑁆𑀫𑀪𑀸𑀯𑁄 𑀫𑀚𑁆𑀚𑀦𑀯𑀲𑁂𑀦 𑀳𑀺𑀮𑀸𑀤𑀦𑀺𑀬𑀢𑀸 𑀲𑀻𑀢𑀮𑀪𑀸𑀯𑁄. 𑀢𑁂𑀦𑀸𑀳 ‘‘𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬𑀸’’𑀢𑀺.

𑀓𑀸𑀬𑀤𑀼𑀘𑁆𑀘𑀭𑀻𑀢𑀸𑀤𑀻𑀳𑀻𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁. 𑀳𑀺𑀭𑀻𑀬𑀢𑀺 𑀮𑀚𑁆𑀚𑀦𑀸𑀓𑀸𑀭𑁂𑀦 𑀚𑀺𑀕𑀼𑀘𑁆𑀙𑀺𑀬𑀢𑀺. 𑀢𑁂𑀳𑀺𑀬𑁂𑀯𑀸𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺𑀬𑁂𑀯. 𑀑𑀢𑁆𑀢𑀧𑁆𑀧𑀢𑀻𑀢𑀺 𑀉𑀩𑁆𑀩𑀺𑀚𑁆𑀚𑀢𑀺. 𑀳𑀺𑀭𑀻 𑀧𑀸𑀧𑁂 𑀕𑀽𑀣𑁂 𑀯𑀺𑀬 𑀧𑀲𑁆𑀲𑀦𑁆𑀢𑀻 𑀚𑀺𑀕𑀼𑀘𑁆𑀙𑀢𑀻𑀢𑀺 𑀆𑀳 ‘‘𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻’’𑀢𑀺. 𑀑𑀢𑁆𑀢𑀧𑁆𑀧𑀁 𑀢𑁂 𑀉𑀡𑁆𑀳𑀁 𑀯𑀺𑀬 𑀧𑀲𑁆𑀲𑀦𑁆𑀢𑀁 𑀢𑀢𑁄 𑀉𑀢𑁆𑀢𑀲𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀸𑀲𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧’’𑀦𑁆𑀢𑀺. 𑀉𑀪𑁄𑀧𑀺 𑀧𑀸𑀧𑀸𑀦𑀁 𑀅𑀓𑀭𑀡𑀭𑀲𑀸𑀢𑀺 𑀮𑀚𑁆𑀚𑀦𑀸𑀓𑀸𑀭𑁂𑀦 𑀧𑀸𑀧𑀸𑀦𑀁 𑀅𑀓𑀭𑀡𑀭𑀲𑀸 𑀳𑀺𑀭𑀻, 𑀉𑀢𑁆𑀢𑀸𑀲𑀸𑀓𑀸𑀭𑁂𑀦 𑀑𑀢𑁆𑀢𑀧𑁆𑀧𑀁. 𑀧𑀸𑀧𑀢𑁄 𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀧𑀸𑀧𑀢𑁄 𑀲𑀗𑁆𑀓𑁄𑀘𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀅𑀢𑁆𑀢𑀕𑀸𑀭𑀯𑀧𑀭𑀕𑀸𑀭𑀯𑀧𑀤𑀝𑁆𑀞𑀸𑀦𑀸𑀢𑀺 𑀅𑀢𑁆𑀢𑀕𑀸𑀭𑀯𑀧𑀤𑀝𑁆𑀞𑀸𑀦𑀸 𑀳𑀺𑀭𑀻 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑀸𑀬, 𑀅𑀢𑁆𑀢𑀸𑀥𑀺𑀧𑀢𑀺𑀢𑀸𑀬 𑀘. 𑀧𑀭𑀕𑀸𑀭𑀯𑀧𑀤𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀢𑀸𑀬, 𑀮𑁄𑀓𑀸𑀥𑀺𑀧𑀢𑀺𑀢𑀸𑀬 𑀘. 𑀅𑀢𑁆𑀢𑀸𑀦𑀜𑁆𑀳𑀺 𑀕𑀭𑀼𑀁 𑀓𑀢𑁆𑀯𑀸 𑀳𑀺𑀭𑀺𑀬𑀸 𑀧𑀸𑀧𑀁 𑀧𑀚𑀳𑀢𑀺 𑀓𑀼𑀮𑀯𑀥𑀽 𑀯𑀺𑀬. 𑀧𑀭𑀁 𑀕𑀭𑀼𑀁 𑀓𑀢𑁆𑀯𑀸 𑀑𑀢𑁆𑀢𑀧𑁆𑀧𑁂𑀦 𑀧𑀸𑀧𑀁 𑀧𑀚𑀳𑀢𑀺 𑀯𑁂𑀲𑀺𑀬𑀸 𑀯𑀺𑀬. 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑀸 𑀘 𑀦𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀦 𑀧𑀦 𑀢𑁂𑀲𑀁 𑀓𑀤𑀸𑀘𑀺 𑀅𑀜𑁆𑀜𑀫𑀜𑁆𑀜𑀯𑀺𑀬𑁄𑀕𑀢𑁄. 𑀦 𑀳𑀺 𑀮𑀚𑁆𑀚𑀦𑀁 𑀦𑀺𑀩𑁆𑀪𑀬𑀁 𑀯𑀸 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀅𑀢𑁆𑀣𑀻𑀢𑀺. 𑀳𑀺𑀭𑀺𑀬𑀸 𑀩𑀮𑀯𑀪𑀸𑀯𑁂 𑀧𑀦 𑀑𑀢𑁆𑀢𑀧𑁆𑀧𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀲𑁆𑀲 𑀩𑀮𑀯𑀪𑀸𑀯𑁂 𑀳𑀺𑀭𑀻 𑀅𑀩𑁆𑀩𑁄𑀳𑀸𑀭𑀺𑀓𑀸. 𑀇𑀫𑁂 𑀘 𑀤𑁆𑀯𑁂 𑀥𑀫𑁆𑀫𑀸 ‘‘𑀮𑁄𑀓𑀧𑀸𑀮𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘, 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀦 𑀧𑀸𑀮𑁂𑀬𑁆𑀬𑀼𑀁, 𑀦𑀬𑀺𑀥 𑀧𑀜𑁆𑀜𑀸𑀬𑁂𑀣 ‘𑀫𑀸𑀢𑀸’𑀢𑀺 𑀯𑀸 ‘𑀫𑀸𑀢𑀼𑀘𑁆𑀙𑀸’𑀢𑀺 𑀯𑀸 ‘𑀫𑀸𑀢𑀼𑀮𑀸𑀦𑀻’𑀢𑀺 𑀯𑀸’’𑀢𑀺𑀆𑀤𑀺 (𑀅. 𑀦𑀺. 𑁨.𑁯).

𑀧𑀲𑁆𑀲𑀫𑁆𑀪𑀦𑀁 𑀤𑀭𑀣𑀯𑀽𑀧𑀲𑀫𑁄, 𑀓𑀸𑀬-𑀲𑀤𑁆𑀤𑁄 𑀲𑀫𑀽𑀳𑀯𑀘𑀦𑁄. 𑀲𑁄 𑀘𑁂𑀢𑁆𑀣 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀁. 𑀯𑀢𑁆𑀢𑀺𑀘𑁆𑀙𑀸𑀯𑀲𑁂𑀦 𑀳𑀺 𑀲𑀤𑁆𑀤𑁄 𑀯𑀺𑀲𑀺𑀝𑁆𑀞𑀯𑀼𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀓𑀸𑀬𑁄𑀢𑀺 𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀯𑁂𑀤𑀦𑀸𑀤𑀬𑁄𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀢𑀬𑁄 𑀔𑀦𑁆𑀥𑀸. 𑀢𑀣𑀸 𑀘 𑀯𑀼𑀢𑁆𑀢𑀁 𑀢𑀢𑁆𑀣 ‘‘𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀬𑀧𑀲𑁆𑀲𑀤𑁆𑀥𑀺 𑀳𑁄𑀢𑀺, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲𑀸’’𑀢𑀺𑀆𑀤𑀺 (𑀥. 𑀲. 𑁪𑁦). 𑀤𑀭𑀣𑁄 𑀲𑀸𑀭𑀫𑁆𑀪𑁄 𑀤𑁄𑀫𑀦𑀲𑁆𑀲𑀧𑀘𑁆𑀘𑀬𑀸𑀦𑀁 𑀉𑀤𑁆𑀥𑀘𑁆𑀘𑀸𑀤𑀻𑀦𑀁 𑀓𑀺𑀮𑁂𑀲𑀸𑀦𑀁, 𑀢𑀣𑀸 𑀧𑀯𑀢𑁆𑀢𑀸𑀦𑀁 𑀯𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀲 𑀯𑀽𑀧𑀲𑀫𑀁 𑀮𑀓𑁆𑀔𑀡𑀫𑀲𑁆𑀲𑀸𑀢𑀺 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸. 𑀓𑀸𑀬𑀘𑀺𑀢𑁆𑀢…𑀧𑁂… 𑀭𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀫𑁂𑀯 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀅𑀪𑀺𑀪𑀯𑀦𑀭𑀲𑀸. 𑀤𑀭𑀣𑀦𑀺𑀫𑁆𑀫𑀤𑁆𑀤𑀦𑁂𑀦 𑀧𑀭𑀺𑀴𑀸𑀳𑀧𑀭𑀺𑀧𑁆𑀨𑀦𑁆𑀤𑀦𑀯𑀺𑀭𑀳𑀺𑀢𑁄 𑀲𑀻𑀢𑀺𑀪𑀸𑀯𑁄 𑀅𑀧𑀭𑀺𑀧𑁆𑀨𑀦𑁆𑀤𑀦𑀲𑀻𑀢𑀺𑀪𑀸𑀯𑁄. 𑀅𑀯𑀽𑀧𑀲𑀫𑁄 𑀧𑀭𑀺𑀧𑁆𑀨𑀦𑁆𑀤𑀦𑀁 𑀅𑀲𑀦𑁆𑀢𑀯𑀼𑀢𑁆𑀢𑀺𑀢𑀸. 𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀸𑀢𑀺 𑀉𑀤𑁆𑀥𑀘𑁆𑀘𑀧𑁆𑀧𑀥𑀸𑀦𑀸 𑀉𑀤𑁆𑀥𑀘𑁆𑀘𑀸𑀥𑀺𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑁆𑀧𑀬𑀼𑀢𑁆𑀢𑀸 𑀓𑀺𑀮𑁂𑀲𑀸. 𑀢𑁂𑀧𑀺 𑀳𑀺 𑀉𑀤𑁆𑀥𑀘𑁆𑀘𑀯𑀲𑁂𑀦 𑀅𑀯𑀽𑀧𑀲𑀫𑀓𑀭𑀸. 𑀉𑀤𑁆𑀥𑀘𑁆𑀘𑀁 𑀯𑀸 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀬𑁂𑀯 𑀓𑀺𑀮𑁂𑀲𑀸 𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀕𑀭𑀼𑀪𑀸𑀯𑁄 𑀤𑀦𑁆𑀥𑀢𑀸, 𑀣𑀺𑀦𑀫𑀺𑀤𑁆𑀥𑀸𑀥𑀺𑀓𑀸𑀦𑀁 𑀢𑀣𑀸 𑀧𑀯𑀢𑁆𑀢𑀸𑀦𑀁 𑀯𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀦𑁆𑀥𑀢𑀸𑀬 𑀧𑀝𑀺𑀧𑀓𑁆𑀔𑁄 𑀅𑀤𑀦𑁆𑀥𑀢𑀸 𑀅𑀕𑀭𑀼𑀪𑀸𑀯𑁄.

𑀣𑀤𑁆𑀥𑀪𑀸𑀯𑁄 𑀣𑀫𑁆𑀪𑁄. 𑀤𑀺𑀝𑁆𑀞𑀺𑀫𑀸𑀦𑀸𑀥𑀺𑀓𑀸𑀦𑀁, 𑀢𑀧𑁆𑀧𑀥𑀸𑀦𑀸𑀦𑀁 𑀯𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀏𑀢𑀁 𑀦𑀸𑀫𑀁. 𑀣𑀤𑁆𑀥𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀢𑁄𑀬𑁂𑀯 𑀓𑀢𑁆𑀣𑀘𑀺 𑀆𑀭𑀫𑁆𑀫𑀡𑁂 𑀅𑀧𑁆𑀧𑀝𑀺𑀳𑀢𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑀸 𑀢𑀢𑁆𑀣 𑀅𑀧𑁆𑀧𑀝𑀺𑀖𑀸𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀅𑀧𑁆𑀧𑀝𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀓𑀫𑁆𑀫𑀦𑀺 𑀲𑀸𑀥𑀼 𑀓𑀫𑁆𑀫𑀜𑁆𑀜𑀁, 𑀦 𑀓𑀫𑁆𑀫𑀜𑁆𑀜𑀁 𑀅𑀓𑀫𑁆𑀫𑀜𑁆𑀜𑀁, 𑀢𑀲𑁆𑀲 𑀪𑀸𑀯𑁄 𑀅𑀓𑀫𑁆𑀫𑀜𑁆𑀜𑀪𑀸𑀯𑁄, 𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀅𑀲𑀫𑀢𑁆𑀣𑀢𑀸. 𑀅𑀢𑁆𑀣𑀢𑁄 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀲𑀁𑀓𑀺𑀮𑁂𑀲𑀥𑀫𑁆𑀫𑀸, 𑀢𑀧𑁆𑀧𑀥𑀸𑀦𑀸 𑀯𑀸 𑀘𑀢𑁆𑀢𑀸𑀭𑁄 𑀅𑀓𑀼𑀲𑀮𑀓𑁆𑀔𑀦𑁆𑀥𑀸. 𑀅𑀓𑀫𑁆𑀫𑀜𑁆𑀜𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑁂𑀦𑁂𑀯 𑀲𑀫𑁆𑀧𑀦𑁆𑀦𑀸𑀓𑀸𑀭𑁂𑀦 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑀁 𑀆𑀭𑀫𑁆𑀫𑀡𑀓𑀭𑀡𑀲𑀫𑁆𑀧𑀢𑁆𑀢𑀺. 𑀯𑀼𑀢𑁆𑀢𑀸𑀯𑀲𑁂𑀲𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀲𑁂𑀲𑀦𑀻𑀯𑀭𑀡𑀸𑀤𑀬𑁄. 𑀇𑀫𑀸 𑀧𑀦 𑀤𑁆𑀯𑁂 𑀯𑀺𑀦𑀺𑀩𑀦𑁆𑀥𑀦𑀺𑀫𑁆𑀫𑀤𑁆𑀤𑀦𑁂𑀦 𑀧𑀲𑀸𑀤𑀦𑀻𑀬𑀯𑀢𑁆𑀣𑀽𑀲𑀼 𑀧𑀲𑀸𑀤𑀸𑀯𑀳𑀸, 𑀳𑀺𑀢𑀓𑀺𑀭𑀺𑀬𑀸𑀲𑀼 𑀯𑀺𑀦𑀺𑀬𑁄𑀕𑀓𑁆𑀔𑀫𑀪𑀸𑀯𑀸𑀯𑀳𑀸 𑀲𑀼𑀯𑀡𑁆𑀡𑀯𑀺𑀲𑀼𑀤𑁆𑀥𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀕𑁂𑀮𑀜𑁆𑀜𑀁 𑀅𑀲𑁆𑀲𑀤𑁆𑀥𑀺𑀬𑀸𑀤𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀧𑀸𑀧𑀥𑀫𑁆𑀫𑀸, 𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀕𑁂𑀮𑀜𑁆𑀜𑀪𑀸𑀯𑁄 𑀮𑀓𑁆𑀔𑀡𑀁 𑀏𑀢𑀸𑀲𑀦𑁆𑀢𑀺 𑀅𑀕𑁂𑀮𑀜𑁆𑀜𑀪𑀸𑀯𑀮𑀓𑁆𑀔𑀡𑀸. 𑀕𑁂𑀮𑀜𑁆𑀜𑀦𑀺𑀫𑁆𑀫𑀤𑁆𑀤𑀦𑁂𑀦𑁂𑀯 𑀦𑀢𑁆𑀣𑀺 𑀏𑀢𑀸𑀲𑀁 𑀆𑀤𑀻𑀦𑀯𑁄 𑀤𑁄𑀲𑁄 𑀉𑀧𑀤𑁆𑀤𑀯𑁄 𑀯𑀸, 𑀦 𑀯𑀸 𑀏𑀢𑀸 𑀆𑀤𑀻𑀦𑀁 𑀓𑀧𑀡𑀁 𑀯𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀦𑀺𑀭𑀸𑀤𑀻𑀦𑀯𑀸, 𑀢𑁂𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀦𑁆𑀢𑀺, 𑀢𑀁 𑀯𑀸 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀦𑀺𑀭𑀸𑀤𑀻𑀦𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀓𑀸𑀬𑀲𑀫𑁆𑀩𑀦𑁆𑀥𑀻, 𑀘𑀺𑀢𑁆𑀢𑀲𑀫𑁆𑀩𑀦𑁆𑀥𑀻 𑀘 𑀉𑀚𑀼𑀪𑀸𑀯𑁄𑀢𑀺 𑀮𑀓𑁆𑀔𑀺𑀢𑀩𑁆𑀩𑀢𑀸𑀬 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀚𑁆𑀚𑀯𑀮𑀓𑁆𑀔𑀡𑀸. 𑀓𑀸𑀬𑀘𑀺𑀢𑁆𑀢𑀸𑀦𑀁 𑀦𑀗𑁆𑀕𑀮𑀲𑀻𑀲𑀘𑀦𑁆𑀤𑀓𑁄𑀝𑀺𑀕𑁄𑀫𑀼𑀢𑁆𑀢𑀯𑀗𑁆𑀓𑀢𑀸𑀲𑀗𑁆𑀔𑀸𑀢𑀸𑀦𑀁 𑀓𑀼𑀝𑀺𑀮𑀪𑀸𑀯𑀸𑀦𑀁 𑀅𑀢𑁆𑀣𑀢𑁄 𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀪𑀽𑀢𑀸𑀦𑀁 𑀦𑀺𑀫𑁆𑀫𑀤𑁆𑀤𑀦𑀢𑁄 𑀓𑀸𑀬𑀘𑀺𑀢𑁆𑀢𑀸𑀦𑀁 𑀓𑀼𑀝𑀺𑀮𑀪𑀸𑀯𑀦𑀺𑀫𑁆𑀫𑀤𑁆𑀤𑀦𑀭𑀲𑀸. 𑀢𑀢𑁄𑀬𑁂𑀯 𑀲𑀩𑁆𑀩𑀣𑀸𑀧𑀺 𑀅𑀚𑀺𑀫𑁆𑀳𑀪𑀸𑀯𑁂𑀦 𑀧𑀘𑁆𑀘𑀼𑀧𑀝𑁆𑀞𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑀸 𑀅𑀚𑀺𑀫𑁆𑀳𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀅𑀚𑀺𑀫𑁆𑀳𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀦𑀦𑀼 𑀘 𑀓𑀸𑀬𑀧𑀲𑁆𑀲𑀤𑁆𑀥𑀺𑀆𑀤𑀻𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁 𑀏𑀓𑁂𑀓𑀧𑀝𑀺𑀧𑀓𑁆𑀔𑀢𑁆𑀢𑀸 𑀤𑀭𑀣𑀦𑀺𑀫𑁆𑀫𑀤𑁆𑀤𑀦𑀸𑀤𑀺𑀓𑀺𑀘𑁆𑀘𑀁 𑀏𑀓𑁂𑀓𑀫𑁂𑀯 𑀓𑀭𑁄𑀢𑀺. 𑀓𑀲𑁆𑀫𑀸 𑀧𑀦 𑀤𑁆𑀯𑁂 𑀤𑁆𑀯𑁂 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺? 𑀦 𑀔𑁄 𑀧𑀦𑁂𑀯𑀁 𑀘𑀺𑀦𑁆𑀢𑀺𑀢𑀩𑁆𑀩𑀁 𑀪𑀕𑀯𑀢𑀸𑀧𑀺 𑀢𑀣𑁂𑀯 𑀤𑁂𑀲𑀺𑀢𑀢𑁆𑀢𑀸. 𑀓𑀲𑁆𑀫𑀸 𑀧𑀦 𑀪𑀕𑀯𑀢𑀸 𑀢𑀣𑀸 𑀤𑁂𑀲𑀺𑀢𑀸? 𑀲𑀪𑀸𑀯𑀥𑀫𑁆𑀫𑀪𑀸𑀯𑀢𑁄. 𑀦 𑀳𑀺 𑀪𑀕𑀯𑀢𑀸 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀫𑀸𑀦𑀸 𑀏𑀢𑁂 𑀥𑀫𑁆𑀫𑀸 𑀤𑁂𑀲𑀦𑀸𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀸, 𑀅𑀣 𑀔𑁄 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀬𑁂𑀯 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀫𑁆𑀫𑀸 𑀲𑀘𑁆𑀙𑀺𑀓𑀢𑁆𑀯𑀸 𑀬𑀣𑀸𑀲𑀪𑀸𑀯𑀸 𑀤𑁂𑀲𑀺𑀢𑀸, 𑀢𑀲𑁆𑀫𑀸 𑀓𑀣𑀫𑁂𑀢𑁆𑀣 𑀪𑀕𑀯𑀢𑀸 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀲𑁆𑀲 𑀳𑀸𑀧𑀦𑀁 𑀓𑀸𑀢𑀼𑀁 𑀲𑀓𑁆𑀓𑀸. 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀢𑀸𑀬 𑀘𑁂𑀢𑁆𑀣 𑀪𑀕𑀯𑀢𑁄 𑀯𑀘𑀦𑀫𑁂𑀯 𑀧𑀫𑀸𑀡𑀁. 𑀦 𑀳𑀺 𑀪𑀕𑀯𑀸 𑀬𑀣𑀸𑀥𑀫𑁆𑀫𑀲𑀸𑀲𑀦𑀸𑀥𑀺𑀓𑀸𑀭𑁂 𑀅𑀬𑀣𑀸𑀥𑀫𑁆𑀫𑀁 𑀓𑀣𑁂𑀬𑁆𑀬𑀸𑀢𑀺, 𑀬𑀲𑁆𑀲 𑀧𑀦 𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀧𑀺 𑀅𑀓𑀣𑀦𑀁, 𑀢𑀁 𑀅𑀜𑁆𑀜𑀳𑁂𑀢𑀼𑀓𑀁. 𑀦 𑀘𑁂𑀢𑁆𑀣 𑀢𑀸𑀤𑀺𑀲𑁄 𑀳𑁂𑀢𑀼 𑀉𑀧𑀮𑀩𑁆𑀪𑀢𑀺, 𑀬𑁂𑀦 𑀇𑀫𑁂𑀲𑀼 𑀏𑀓𑁂𑀓𑀥𑀫𑁆𑀫𑀲𑁆𑀲 𑀅𑀓𑀣𑀦𑀦𑁆𑀢𑀺. 𑀬𑀣𑀸 𑀧𑀦 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀏𑀓𑁄𑀬𑁂𑀯 𑀯𑁂𑀭𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀢𑁂 𑀧𑀼𑀭𑀺𑀲𑀸 𑀑𑀢𑀸𑀭𑀁 𑀤𑀺𑀲𑁆𑀯𑀸 𑀏𑀓𑀢𑁄 𑀳𑀼𑀢𑁆𑀯𑀸𑀯 𑀳𑀦𑀦𑁆𑀢𑀺, 𑀏𑀯𑀫𑁂𑀯 𑀤𑁆𑀯𑁂 𑀤𑁆𑀯𑁂 𑀥𑀫𑁆𑀫𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀏𑀓𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑀁 𑀳𑀦𑀦𑁆𑀢𑀺, 𑀬𑀣𑀸 𑀘 𑀧𑀦𑁂𑀢𑁂 𑀯𑀺𑀲𑀼𑀁 𑀤𑀺𑀲𑁆𑀯𑀸𑀧𑀺 𑀢𑀁 𑀯𑁂𑀭𑀺𑀁 𑀳𑀦𑀦𑁆𑀢𑀺, 𑀦 𑀏𑀯𑀫𑁂𑀢𑁂 𑀢𑀁 𑀯𑀺𑀲𑀼𑀁 𑀳𑀦𑀦𑁆𑀢𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀦𑀸𑀪𑀸𑀯𑀢𑁄𑀢𑀺, 𑀢𑀲𑁆𑀫𑀸 𑀏𑀢𑁂 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀏𑀓𑁂𑀓𑀪𑀸𑀯𑁂𑀧𑀺 𑀤𑁆𑀯𑁂 𑀤𑁆𑀯𑁂𑀬𑁂𑀯 𑀯𑀼𑀢𑁆𑀢𑀸𑀢𑀺, 𑀅𑀧𑀺𑀘 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀆𑀤𑀻𑀳𑀺 𑀘𑀺𑀢𑁆𑀢𑀫𑁂𑀯 𑀧𑀲𑁆𑀲𑀤𑁆𑀥𑀺 𑀮𑀳𑀼 𑀫𑀼𑀤𑀼 𑀓𑀫𑁆𑀫𑀜𑁆𑀜𑀁 𑀧𑀕𑀼𑀡𑀁 𑀉𑀚𑀼𑀜𑁆𑀘 𑀳𑁄𑀢𑀺. 𑀓𑀸𑀬𑀧𑀲𑁆𑀲𑀤𑁆𑀥𑀺𑀆𑀤𑀻𑀳𑀺 𑀧𑀦 𑀭𑀽𑀧𑀓𑀸𑀬𑁄𑀧𑀻𑀢𑀺 𑀢𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀪𑀕𑀯𑀢𑀸 𑀏𑀢𑁆𑀣𑁂𑀯 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸, 𑀦 𑀲𑀫𑀸𑀥𑀺𑀆𑀤𑀻𑀲𑀼.

𑀙𑀦𑁆𑀤𑀦𑀁 𑀙𑀦𑁆𑀤𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸. ‘‘𑀙𑀦𑁆𑀤𑁄 𑀓𑀸𑀫𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁧) 𑀧𑀦 𑀢𑀡𑁆𑀳𑀸𑀧𑀺 𑀙𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀻’’𑀢𑀺𑀆𑀤𑀻𑀲𑀼 𑀯𑀻𑀭𑀺𑀬𑀫𑁆𑀧𑀻𑀢𑀺 𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀼𑀢𑁆𑀢𑀁 ‘‘𑀓𑀢𑁆𑀢𑀼𑀓𑀫𑁆𑀬𑀢𑀸𑀬𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀓𑀢𑁆𑀢𑀼𑀓𑀫𑁆𑀬𑀢𑀸 𑀯𑀼𑀘𑁆𑀘𑀢𑀺 𑀓𑀭𑀡𑀺𑀘𑁆𑀙𑀸. 𑀘𑁂𑀢𑀲𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀲𑀸𑀭𑀫𑁆𑀫𑀡𑀢𑁆𑀢𑀸 𑀓𑀭𑀡𑀺𑀘𑁆𑀙𑀸 𑀦𑀸𑀫 𑀆𑀭𑀫𑁆𑀫𑀡𑀲𑁆𑀲 𑀆𑀮𑀫𑁆𑀩𑀺𑀢𑀼𑀓𑀸𑀫𑀢𑀸𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 𑀆𑀭𑀫𑁆𑀫𑀡𑀓𑀭𑀡𑀺𑀘𑁆𑀙𑀸𑀮𑀓𑁆𑀔𑀡𑁄 𑀙𑀦𑁆𑀤𑁄 ‘‘𑀓𑀢𑁆𑀢𑀼𑀓𑀫𑁆𑀬𑀢𑀸𑀮𑀓𑁆𑀔𑀡𑁄’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑁂𑀯𑀸𑀳 ‘‘𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀭𑀲𑁄, 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺 𑀘. 𑀬𑀤𑀕𑁆𑀕𑁂𑀦 𑀧𑀦𑀸𑀬𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀭𑀲𑁄, 𑀢𑀤𑀕𑁆𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀳𑁄𑀢𑀺𑀬𑁂𑀯 𑀏𑀓𑀸𑀭𑀫𑁆𑀫𑀡𑀢𑀸𑀬. 𑀢𑁂𑀦 𑀢𑁂𑀲𑀁 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀘𑁂𑀢𑀲𑁄 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀁 𑀧𑀦 𑀤𑀸𑀦𑀯𑀢𑁆𑀣𑀼𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑁄 𑀙𑀦𑁆𑀤𑁄 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑁄 𑀳𑁄𑀢𑀻𑀢𑀺? 𑀦𑀦𑀼 𑀅𑀯𑁄𑀘𑀼𑀫𑁆𑀳𑀸 ‘‘𑀆𑀭𑀫𑁆𑀫𑀡𑀓𑀭𑀡𑀺𑀘𑁆𑀙𑀸𑀮𑀓𑁆𑀔𑀡𑁄’’𑀢𑀺, 𑀢𑀲𑁆𑀫𑀸 𑀲𑀗𑁆𑀕𑀸𑀫𑀕𑀢𑀇𑀲𑁆𑀲𑀸𑀲𑀲𑁆𑀲 𑀔𑀺𑀧𑀺𑀢𑀩𑁆𑀩𑀉𑀲𑀽𑀦𑀁 𑀕𑀳𑀡𑁂 𑀅𑀢𑁆𑀣𑀺𑀓𑀢𑀸 𑀯𑀺𑀬 𑀤𑀸𑀦𑀯𑀢𑁆𑀣𑀼𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀘𑁆𑀙𑀦𑁆𑀤𑁄𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁂𑀦 𑀢𑁂𑀦 𑀅𑀢𑁆𑀣𑀺𑀓𑁄𑀬𑁂𑀯𑀸𑀢𑀺. 𑀲𑁆𑀯𑀸𑀬𑀁 𑀓𑀼𑀲𑀮𑁂𑀲𑀼 𑀉𑀧𑁆𑀧𑀦𑁆𑀦𑁄 𑀓𑀼𑀲𑀮𑀘𑁆𑀙𑀦𑁆𑀤𑁄 𑀦𑀸𑀫 𑀳𑁄𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀸𑀦𑀢𑁆𑀢𑀸. 𑀢𑀩𑁆𑀩𑀺𑀧𑀭𑀻𑀢𑀢𑁄 𑀧𑀦 𑀅𑀓𑀼𑀲𑀮𑁂𑀲𑀼 𑀉𑀧𑁆𑀧𑀦𑁆𑀦𑁄 𑀅𑀓𑀼𑀲𑀮𑀘𑁆𑀙𑀦𑁆𑀤𑁄.

𑀅𑀥𑀺𑀫𑀼𑀘𑁆𑀘𑀦𑀁 𑀆𑀭𑀫𑁆𑀫𑀡𑁂 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀦 𑀧𑀲𑀸𑀤𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄’’𑀢𑀺. 𑀬𑀣𑀸 𑀢𑀣𑀸 𑀳𑀺 𑀆𑀭𑀫𑁆𑀫𑀡𑁂 𑀦𑀺𑀘𑁆𑀙𑀬𑀦𑀁 𑀅𑀥𑀺𑀫𑀼𑀘𑁆𑀘𑀦𑀁 𑀅𑀦𑀥𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼, 𑀤𑀸𑀦𑀸𑀤𑀻𑀲𑀼 𑀯𑀸 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄, 𑀲𑀤𑁆𑀥𑀸 𑀧𑀦 𑀧𑀲𑀸𑀤𑀦𑀻𑀬𑁂𑀲𑀼 𑀧𑀲𑀸𑀤𑀸𑀥𑀺𑀫𑁄𑀓𑁆𑀔𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀯𑁄𑀝𑁆𑀞𑀩𑁆𑀩𑀦𑀁 𑀧𑀦 𑀬𑀣𑀸 𑀲𑀦𑁆𑀢𑀻𑀭𑀺𑀢𑁂 𑀅𑀢𑁆𑀣𑁂 𑀦𑀺𑀘𑁆𑀙𑀬𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑁆𑀯𑀸 𑀧𑀭𑀢𑁄 𑀧𑀯𑀢𑁆𑀢𑀫𑀸𑀦𑀸𑀦𑀁 𑀢𑀣𑀸 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀤𑀺 𑀏𑀯𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀣𑀦𑁆𑀢𑀺? 𑀢𑁂𑀲𑀫𑁆𑀧𑀺 𑀏𑀓𑀁𑀲𑁂𑀦𑁂𑀯 𑀲𑀁𑀲𑀧𑁆𑀧𑀦𑀸𑀓𑀸𑀭𑀲𑁆𑀲 𑀧𑀘𑁆𑀘𑀬𑀢𑀸𑀬 𑀤𑀝𑁆𑀞𑀩𑁆𑀩𑀁, 𑀤𑀸𑀭𑀓𑀲𑁆𑀲 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀲𑀁𑀲𑀧𑁆𑀧𑀦𑀲𑁆𑀲 ‘‘𑀓𑀭𑀺𑀲𑁆𑀲𑀸𑀫𑀺, 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀦𑀺𑀘𑁆𑀙𑀬𑀲𑁆𑀲 𑀧𑀝𑀺𑀧𑀓𑁆𑀔𑀓𑀺𑀭𑀺𑀬𑀸 𑀅𑀲𑀁𑀲𑀧𑁆𑀧𑀦𑀁. 𑀬𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀅𑀬𑀁 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄 𑀅𑀥𑀺𑀫𑁄𑀓𑁆𑀔𑁄, 𑀢𑁂𑀲𑀁 𑀆𑀭𑀫𑁆𑀫𑀡𑀥𑀫𑁆𑀫𑁄𑀬𑁂𑀯 𑀲𑀦𑁆𑀦𑀺𑀝𑁆𑀞𑀸𑀢𑀩𑁆𑀩𑀢𑁆𑀢𑀸 𑀲𑀦𑁆𑀦𑀺𑀝𑁆𑀞𑁂𑀬𑁆𑀬𑀥𑀫𑁆𑀫𑁄. 𑀲𑁄 𑀧𑀤𑀝𑁆𑀞𑀸𑀦𑀫𑀲𑁆𑀲𑀸𑀢𑀺 𑀲𑀦𑁆𑀦𑀺𑀝𑁆𑀞𑁂𑀬𑁆𑀬𑀥𑀫𑁆𑀫𑀧𑀤𑀝𑁆𑀞𑀸𑀦𑁄. 𑀇𑀦𑁆𑀤𑀔𑀺𑀮𑁄𑀢𑀺 𑀏𑀲𑀺𑀓𑀸𑀣𑀫𑁆𑀪𑁄 𑀯𑀼𑀘𑁆𑀘𑀢𑀺.

𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀬𑁂𑀲𑀼 𑀥𑀫𑁆𑀫𑁂𑀲𑀼 𑀲𑀬𑀁 𑀉𑀧𑁆𑀧𑀦𑁆𑀦𑀸, 𑀢𑁂𑀲𑀼 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑁂𑀲𑀼. 𑀅𑀦𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀳𑀺 𑀢𑁂𑀲𑀼 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀉𑀤𑀸𑀲𑀻𑀦𑀪𑀸𑀯𑁄 ‘‘𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀁 𑀅𑀯𑀺𑀲𑀫𑀁 𑀯𑀸𑀳𑀺𑀢𑀁 𑀅𑀢𑁆𑀢𑀦𑀸 𑀧𑀯𑀢𑁆𑀢𑀺𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑀸 𑀬𑀣𑀸𑀲𑀓𑀓𑀺𑀘𑁆𑀘𑁂𑀲𑀼 𑀧𑀯𑀢𑁆𑀢𑀦𑀁 𑀮𑀓𑁆𑀔𑀡𑀫𑁂𑀢𑀺𑀲𑁆𑀲𑀸𑀢𑀺 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀸. 𑀢𑀢𑁆𑀣 𑀲𑀫𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑀮𑀓𑁆𑀔𑀡𑀸𑀢𑀺 𑀅𑀢𑁆𑀣𑁂 𑀅𑀧𑀓𑁆𑀔𑀧𑀢𑀺𑀢𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺, 𑀅𑀯𑀺𑀲𑀫𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑀮𑀓𑁆𑀔𑀡𑀸𑀢𑀺 𑀅𑀢𑁆𑀣𑁂 𑀊𑀦𑀸𑀥𑀺𑀓𑀢𑀸𑀦𑀺𑀯𑀸𑀭𑀡𑀁. 𑀉𑀤𑀸𑀲𑀻𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀧𑀺 𑀳𑀺 𑀏𑀲𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀫𑀁 𑀓𑀢𑁆𑀯𑀸 𑀬𑀣𑀸𑀲𑀓𑀓𑀺𑀘𑁆𑀘𑁂𑀲𑀼 𑀧𑀯𑀢𑁆𑀢𑁂𑀢𑀺, 𑀬𑀣𑀸 𑀭𑀸𑀚𑀸 𑀢𑀼𑀡𑁆𑀳𑀻 𑀦𑀺𑀲𑀺𑀦𑁆𑀦𑁄𑀧𑀺 𑀅𑀥𑀺𑀓𑀭𑀡𑀥𑀫𑁆𑀫𑀝𑁆𑀞𑁂 𑀬𑀣𑀸𑀲𑀓𑀓𑀺𑀘𑁆𑀘𑁂𑀲𑀼 𑀲𑀫𑀁 𑀅𑀧𑁆𑀧𑀫𑀢𑁆𑀢𑁂 𑀧𑀯𑀢𑁆𑀢𑁂𑀢𑀺. 𑀅𑀮𑀻𑀦𑀸𑀦𑀼𑀤𑁆𑀥𑀢𑀧𑁆𑀧𑀯𑀢𑁆𑀢𑀺𑀧𑀘𑁆𑀘𑀬𑀸𑀦𑀁 𑀥𑀫𑁆𑀫𑀸𑀦𑀁 𑀊𑀦𑀸𑀥𑀺𑀓𑀢𑀸𑀬 𑀮𑀻𑀦𑀼𑀤𑁆𑀥𑀢𑀪𑀸𑀯𑀲𑁆𑀲 𑀦𑀺𑀯𑀸𑀭𑀡𑀓𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀊𑀦𑀸𑀥𑀺𑀓𑀢𑀸𑀦𑀺𑀯𑀸𑀭𑀡𑀭𑀲𑀸’’𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀲𑀳𑀚𑀸𑀢𑀸𑀥𑀺𑀧𑀢𑀻𑀦𑀁 𑀅𑀥𑀺𑀧𑀢𑀺𑀪𑀸𑀯𑁄. 𑀆𑀥𑀺𑀧𑀘𑁆𑀘𑀜𑁆𑀳𑀺 𑀢𑁂𑀲𑀁 𑀓𑀺𑀘𑁆𑀘𑀢𑁄 𑀅𑀥𑀺𑀓𑀪𑀸𑀯𑁄𑀢𑀺? 𑀦𑀸𑀬𑀁 𑀤𑁄𑀲𑁄. 𑀢𑀫𑁆𑀧𑀺 𑀢𑀲𑁆𑀲 𑀓𑀺𑀘𑁆𑀘𑀫𑁂𑀯, 𑀬𑀁 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑁂 𑀧𑀯𑀢𑁆𑀢𑀸𑀧𑀦𑀁. 𑀬𑀣𑀸 𑀳𑀺 𑀭𑀗𑁆𑀕𑀫𑀡𑁆𑀟𑀮𑀁 𑀕𑀢𑁄 𑀦𑀝𑀓𑀸𑀘𑀭𑀺𑀬𑁄 𑀢𑁂 𑀢𑁂 𑀦𑀝𑀓𑁂 𑀬𑀣𑀸𑀲𑀓𑀁 𑀅𑀦𑀼𑀭𑀽𑀧𑀁 𑀪𑀽𑀫𑀺𑀬𑀁 𑀬𑁄𑀚𑁂𑀢𑀺, 𑀏𑀯𑀫𑁂𑀲𑀸𑀧𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀅𑀥𑀺𑀧𑀢𑀺𑀪𑀸𑀯𑁂 𑀞𑀺𑀢𑁂 𑀅𑀥𑀺𑀧𑀢𑀺𑀪𑀸𑀯𑁂 𑀬𑁄𑀚𑁂𑀢𑀺, 𑀇𑀦𑁆𑀤𑁆𑀭𑀺𑀬𑀢𑁆𑀢𑁂 𑀞𑀺𑀢𑁂 𑀇𑀦𑁆𑀤𑁆𑀭𑀺𑀬𑀢𑁆𑀢𑁂, 𑀦 𑀧𑀦 𑀲𑀓𑀲𑀓𑀓𑀺𑀘𑁆𑀘𑀢𑁄 𑀊𑀦𑀢𑀁, 𑀅𑀥𑀺𑀓𑀢𑀁 𑀯𑀸 𑀧𑀢𑁆𑀢𑀼𑀁 𑀤𑁂𑀢𑀻𑀢𑀺. ‘‘𑀇𑀤𑀁 𑀦𑀺𑀳𑀻𑀦𑀓𑀺𑀘𑁆𑀘𑀁 𑀳𑁄𑀢𑀼, 𑀇𑀤𑀁 𑀅𑀢𑀺𑀭𑁂𑀓𑀓𑀺𑀘𑁆𑀘’’𑀦𑁆𑀢𑀺 𑀏𑀯𑀁 𑀧𑀓𑁆𑀔𑀧𑀸𑀢𑀯𑀲𑁂𑀦 𑀯𑀺𑀬 𑀧𑀯𑀢𑁆𑀢𑀺 𑀧𑀓𑁆𑀔𑀧𑀸𑀢𑁄. 𑀢𑀁 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸. 𑀲𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑁂𑀦 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀆𑀚𑀸𑀦𑀻𑀬𑁂𑀲𑀼 𑀲𑀸𑀭𑀣𑀺 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀓𑀺𑀭𑀺𑀬𑀸 𑀓𑀸𑀭𑁄𑀢𑀺 𑀓𑀸𑀭-𑀲𑀤𑁆𑀤𑀲𑁆𑀲 𑀪𑀸𑀯𑀲𑀸𑀥𑀦𑀢𑀁 𑀆𑀳. 𑀢𑁂𑀦 𑀓𑀸𑀭𑁄𑀢𑀺 𑀦𑀸𑀜𑁆𑀜𑀁, 𑀓𑀺𑀭𑀺𑀬𑀸𑀬𑁂𑀯𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀫𑀦𑀲𑁆𑀫𑀺𑀁 𑀓𑀸𑀭𑁄𑀢𑀺 𑀫𑀦𑀲𑀺 𑀆𑀭𑀫𑁆𑀫𑀡𑀲𑁆𑀲 𑀓𑀭𑀡𑀁. 𑀬𑁂𑀦 𑀳𑀺 𑀫𑀦𑁄 𑀆𑀭𑀫𑁆𑀫𑀡𑁂 𑀓𑀭𑀻𑀬𑀢𑀺 𑀆𑀭𑀫𑁆𑀫𑀡𑁂𑀦𑀲𑁆𑀲 𑀲𑀁𑀬𑁄𑀚𑀦𑀢𑁄, 𑀢𑀢𑁄 𑀏𑀯 𑀢𑁂𑀦 𑀆𑀭𑀫𑁆𑀫𑀡𑀫𑁆𑀧𑀺 𑀫𑀦𑀲𑀺 𑀓𑀭𑀻𑀬𑀢𑀻𑀢𑀺. 𑀫𑀦𑀲𑀺𑀓𑀸𑀭𑁄𑀢𑀺 𑀘𑁂𑀢𑁆𑀣 𑀅𑀮𑀼𑀢𑁆𑀢𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀧𑀼𑀭𑀺𑀫𑀫𑀦𑀢𑁄𑀢𑀺 𑀪𑀯𑀗𑁆𑀕𑀫𑀦𑀢𑁄. 𑀯𑀺𑀲𑀤𑀺𑀲𑀁 𑀫𑀦𑀦𑁆𑀢𑀺 𑀯𑀻𑀣𑀺𑀚𑀯𑀦𑀫𑀦𑀁, 𑀢𑀁 𑀓𑀭𑁄𑀢𑀻𑀢𑀺 𑀫𑀦𑀲𑀺𑀓𑀸𑀭𑁄, 𑀫𑀦𑀲𑀺𑀓𑀸𑀭𑀲𑀸𑀫𑀜𑁆𑀜𑁂𑀦 𑀯𑀻𑀣𑀺𑀚𑀯𑀦𑀧𑀝𑀺𑀧𑀸𑀤𑀓𑁂 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀧𑀦 𑀉𑀧𑀬𑁄𑀕𑀢𑁆𑀣𑀪𑀼𑀫𑁆𑀫𑀯𑀘𑀦𑁂 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀲𑀸𑀭𑁂𑀦𑁆𑀢𑁄 𑀧𑀬𑁄𑀚𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀫𑀦𑀲𑀺𑀓𑀸𑀭𑁄 𑀲𑀸𑀭𑀡𑀮𑀓𑁆𑀔𑀡𑁄𑀢𑀺 𑀯𑀼𑀢𑁆𑀢𑁄. 𑀲𑀁𑀬𑁄𑀚𑀦𑀭𑀲𑁄𑀢𑀺 𑀧𑀬𑁄𑀚𑀦𑀭𑀲𑁄. 𑀯𑀺𑀢𑀓𑁆𑀓𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑁂 𑀅𑀪𑀺𑀦𑀺𑀭𑁄𑀧𑀦𑀲𑀪𑀸𑀯𑀢𑁆𑀢𑀸 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀘𑁂𑀢𑀦𑀸 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀁 𑀕𑀡𑁆𑀳𑀦𑁆𑀢𑀻 𑀲𑀫𑁆𑀧𑀬𑀼𑀢𑁆𑀢𑁂𑀧𑀺 𑀲𑀓𑀲𑀓𑀓𑀺𑀘𑁆𑀘𑀁 𑀓𑀸𑀭𑁂𑀢𑀻𑀢𑀺 𑀅𑀢𑁆𑀢𑀦𑀸 𑀓𑀭𑀡𑁂𑀦 𑀩𑀮𑀁 𑀦𑀺𑀬𑁄𑀚𑁂𑀦𑁆𑀢𑁄 𑀩𑀮𑀦𑀸𑀬𑀓𑁄 𑀯𑀺𑀬 𑀳𑁄𑀢𑀺. 𑀫𑀦𑀲𑀺𑀓𑀸𑀭𑁄 𑀲𑀫𑁆𑀧𑀬𑀼𑀢𑁆𑀢𑁂 𑀆𑀭𑀫𑁆𑀫𑀡𑁂 𑀧𑀬𑁄𑀚𑁂𑀢𑀻𑀢𑀺 𑀆𑀚𑀸𑀦𑀻𑀬𑀧𑁆𑀧𑀬𑁄𑀚𑀦𑀓𑀲𑀸𑀭𑀣𑀺 𑀯𑀺𑀬𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀆𑀭𑀫𑁆𑀫𑀡𑁂 𑀲𑀁𑀬𑁄𑀚𑀦𑀯𑀲𑁂𑀦 𑀢𑀤𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀏𑀢𑁆𑀣 𑀲𑀢𑀺𑀬𑀸 𑀅𑀧𑁆𑀧𑀫𑀼𑀲𑁆𑀲𑀦𑀘𑁆𑀙𑀦𑁆𑀤𑀢𑀸 𑀯𑀺𑀲𑀬𑀸𑀪𑀺𑀫𑀼𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸, 𑀫𑀦𑀲𑀺𑀓𑀸𑀭𑀲𑁆𑀲 𑀧𑀦 𑀲𑀁𑀬𑁄𑀚𑀦𑀯𑀲𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑀸𑀯𑀘𑀦𑀁 𑀇𑀢𑀭𑀫𑀦𑀲𑀺𑀓𑀸𑀭𑀸𑀦𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀺. 𑀫𑀳𑀺𑀲𑀸𑀲𑀓𑀸 𑀧𑀦 ‘‘𑀆𑀯𑀚𑁆𑀚𑀦𑀲𑁆𑀲 𑀯𑀺𑀜𑁆𑀜𑀸𑀡𑀪𑀸𑀯𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀩𑁆𑀩𑀯𑀺𑀲𑀬𑀢𑀸 𑀧𑀭𑀺𑀳𑀸𑀬𑁂𑀬𑁆𑀬, 𑀢𑀲𑁆𑀫𑀸 𑀢𑀁 𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀢𑀁 𑀯𑀺𑀲𑀼𑀁 𑀘𑀺𑀢𑁆𑀢𑀲𑀪𑀸𑀯𑀁 𑀲𑀺𑀬𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀲𑁆𑀲 𑀢𑀲𑁆𑀲 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀚𑀯𑀦𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀦 𑀪𑀯𑁂𑀬𑁆𑀬, 𑀅𑀜𑁆𑀜𑀤𑀢𑁆𑀣𑀼 𑀅𑀢𑀻𑀢𑀸𑀭𑀫𑁆𑀫𑀡𑀢𑀸𑀯 𑀲𑀺𑀬𑀸, 𑀏𑀯𑀜𑁆𑀘 𑀲𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑀸𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀬 𑀅𑀪𑀸𑀯𑀢𑁄 𑀅𑀲𑀩𑁆𑀩𑀯𑀺𑀲𑀬𑀢𑀸 𑀆𑀧𑀚𑁆𑀚𑁂𑀬𑁆𑀬, 𑀬𑀤𑀕𑁆𑀕𑁂𑀦 𑀘 𑀢𑀁 𑀅𑀲𑀩𑁆𑀩𑀯𑀺𑀲𑀬𑀁, 𑀢𑀤𑀕𑁆𑀕𑁂𑀦 𑀲𑀸𑀯𑀭𑀡𑀫𑁆𑀧𑀺 𑀳𑁄𑀢𑀺 𑀬𑀢𑁆𑀣 𑀦 𑀧𑀯𑀢𑁆𑀢𑀢𑀺, 𑀢𑀢𑁆𑀣 𑀆𑀯𑀭𑀡𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸𑀲𑁆𑀲 𑀲𑀓𑀮𑀮𑁄𑀓𑀲𑀺𑀤𑁆𑀥𑁄 𑀲𑀩𑁆𑀩𑀜𑁆𑀜𑀼𑀪𑀸𑀯𑁄, 𑀅𑀦𑀸𑀯𑀭𑀡𑀪𑀸𑀯𑁄 𑀘 𑀧𑀭𑀺𑀳𑀸𑀬𑁂𑀣, 𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂 𑀧𑀦 𑀲𑀢𑀺 𑀆𑀯𑀚𑁆𑀚𑀦𑀲𑁆𑀲 𑀦𑀸𑀬𑀁 𑀇𑀝𑁆𑀞𑀯𑀺𑀖𑀸𑀢𑁄 𑀆𑀧𑀚𑁆𑀚𑀢𑀻𑀢𑀺. 𑀢𑀬𑀺𑀤𑀁 𑀢𑁂𑀲𑀫𑀪𑀺𑀦𑀺𑀯𑁂𑀲𑀫𑀢𑁆𑀢𑀁 ‘‘𑀆𑀯𑀚𑁆𑀚𑀦𑀸 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁, 𑀅𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀯𑀘𑀦𑁂𑀦 𑀢𑀲𑁆𑀲𑀸𑀦𑀦𑁆𑀢𑀭𑀁 𑀓𑀼𑀲𑀮𑀸𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀤𑀻𑀧𑀺𑀢𑀢𑁆𑀢𑀸. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀭𑀫𑁆𑀫𑀡𑀪𑀸𑀯𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀢𑀻𑀢𑀸𑀤𑀺𑀯𑀲𑁂𑀦 𑀳𑀺 𑀯𑀺𑀪𑀸𑀕𑀫𑀓𑀢𑁆𑀯𑀸 ‘‘𑀇𑀫𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀫𑀻’’𑀢𑀺 𑀧𑀯𑀢𑁆𑀢𑀲𑁆𑀲 𑀆𑀯𑀚𑁆𑀚𑀦𑀁 𑀲𑀸𑀫𑀜𑁆𑀜𑁂𑀦 𑀬𑀁 𑀓𑀺𑀜𑁆𑀘𑀺 𑀅𑀪𑀺𑀫𑀼𑀔𑀻𑀪𑀽𑀢𑀁 𑀘𑀺𑀢𑁆𑀢𑀫𑀸𑀯𑀚𑁆𑀚𑀢𑀺, 𑀢𑀢𑁄 𑀚𑀯𑀦𑀸𑀦𑀺𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀻𑀪𑀽𑀢𑀁 𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀦 𑀘𑁂𑀢𑁆𑀣 𑀚𑀯𑀦𑀸𑀦𑀁 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑀸 𑀆𑀲𑀗𑁆𑀓𑀺𑀢𑀩𑁆𑀩𑀸 𑀘𑀺𑀢𑁆𑀢𑀲𑀸𑀫𑀜𑁆𑀜𑁂𑀦 𑀆𑀭𑀫𑁆𑀫𑀡𑀲𑁆𑀲 𑀅𑀪𑀺𑀦𑁆𑀦𑀢𑁆𑀢𑀸, 𑀢𑀲𑁆𑀫𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀭𑀫𑁆𑀫𑀡𑀢𑀁 𑀧𑀝𑀺𑀘𑁆𑀘 𑀦 𑀓𑀸𑀘𑀺 𑀯𑀺𑀳𑁂𑀲𑀸 𑀅𑀦𑀼𑀪𑀯𑀺𑀢𑀩𑁆𑀩𑀸𑀢𑀺. 𑀓𑀺𑀁 𑀯𑀸 𑀏𑀢𑁂𑀦 𑀬𑀼𑀢𑁆𑀢𑀺𑀯𑀸𑀤𑁂𑀦, 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀘𑀺𑀦𑁆𑀢𑁂𑀬𑁆𑀬𑁄 𑀩𑀼𑀤𑁆𑀥𑀯𑀺𑀲𑀬𑁄’’𑀢𑀺 (𑀅. 𑀦𑀺. 𑁪.𑁭𑁭), 𑀢𑀲𑁆𑀫𑀸 𑀅𑀧𑀭𑀺𑀫𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁂𑀓𑀨𑀮𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀲𑀪𑀸𑀯𑀢𑁆𑀢𑀸 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸𑀧𑀺 𑀯𑀺𑀲𑀬𑀕𑁆𑀕𑀳𑀡𑁂 𑀯𑀺𑀩𑀦𑁆𑀥𑀦𑀸𑀪𑀸𑀯𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀯𑀢𑁆𑀢𑀺 𑀅𑀧𑁆𑀧𑀝𑀺𑀳𑀢𑀸𑀬𑁂𑀯𑀸𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀆𑀯𑀚𑁆𑀚𑀦𑀁 𑀅𑀦𑀸𑀕𑀢𑀘𑀺𑀢𑁆𑀢𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀚𑀯𑀦𑀫𑁂𑀯 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀸𑀭𑀫𑁆𑀫𑀡𑀁 𑀕𑀡𑁆𑀳𑀸𑀢𑀻’’𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 ‘‘𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀆𑀯𑀚𑁆𑀚𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀧𑀸𑀴𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀅𑀧𑁆𑀧𑀫𑀸𑀡𑀁.

𑀓𑀭𑁄𑀢𑀻𑀢𑀺 𑀓𑀭𑀼𑀡𑀸. 𑀓𑀺𑀁 𑀓𑀭𑁄𑀢𑀺, 𑀓𑁂𑀲𑀁 𑀓𑀺𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀳𑀤𑀬𑀓𑀫𑁆𑀧𑀦’’𑀦𑁆𑀢𑀺. 𑀓𑀫𑁆𑀧𑀦𑀦𑁆𑀢𑀺 𑀘 𑀧𑀭𑁂𑀲𑀁 𑀤𑀼𑀓𑁆𑀔𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀲𑀳𑀦𑀸𑀓𑀸𑀭𑁂𑀦 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀢𑀤𑀺𑀤𑀁 𑀲𑀧𑁆𑀧𑀼𑀭𑀺𑀲𑀸𑀦𑀁𑀬𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀸𑀥𑀽𑀦’’𑀦𑁆𑀢𑀺. 𑀲𑀧𑁆𑀧𑀼𑀭𑀺𑀲𑀸 𑀳𑀺 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀲𑀸𑀥𑀦𑁂𑀦 ‘‘𑀲𑀸𑀥𑀽’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀓𑀺𑀡𑀸𑀢𑀻’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀫𑀸𑀳 ‘‘𑀯𑀺𑀦𑀸𑀲𑁂𑀢𑀻’’𑀢𑀺, 𑀅𑀤𑀲𑁆𑀲𑀦𑀁 𑀕𑀫𑁂𑀢𑀺 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸’’𑀢𑀺. 𑀧𑀭𑁂𑀲𑀁 𑀤𑀼𑀓𑁆𑀔𑀲𑁆𑀲 𑀅𑀧𑀦𑀬𑀦𑀁 𑀳𑁄𑀢𑀼 𑀯𑀸, 𑀫𑀸 𑀯𑀸, 𑀲𑁄 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑁄, 𑀢𑀣𑀸𑀧𑀯𑀢𑁆𑀢𑀺𑀮𑀓𑁆𑀔𑀡𑀸𑀢𑀺 𑀧𑀭…𑀧𑁂… 𑀮𑀓𑁆𑀔𑀡𑀸. 𑀅𑀧𑀦𑁂𑀢𑀼𑀓𑀸𑀫𑀢𑀸𑀬 𑀧𑀭𑁂𑀲𑀁 𑀤𑀼𑀓𑁆𑀔𑀲𑁆𑀲 𑀅𑀲𑀳𑀦𑀁 𑀅𑀦𑀥𑀺𑀯𑀸𑀲𑀦𑀁 𑀧𑀭𑀤𑀼𑀓𑁆𑀔𑀸𑀲𑀳𑀦𑀁. 𑀦 𑀯𑀺𑀳𑀺𑀁𑀲𑀸 𑀅𑀯𑀺𑀳𑀺𑀁𑀲𑀸, 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀦𑀁, 𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺, 𑀯𑀺𑀳𑀺𑀁𑀲𑀸𑀬 𑀯𑀸 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀅𑀯𑀺𑀳𑀺𑀁𑀲𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀧𑀫𑁄𑀤𑀦𑀮𑀓𑁆𑀔𑀡𑀸𑀢𑀺 𑀧𑀭𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑁄𑀤𑀦𑀮𑀓𑁆𑀔𑀡𑀸. 𑀅𑀦𑀺𑀲𑁆𑀲𑀸𑀬𑀦𑀭𑀲𑀸𑀢𑀺 𑀇𑀲𑁆𑀲𑀸𑀬𑀦𑀲𑁆𑀲 𑀉𑀲𑀽𑀬𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀓𑀺𑀘𑁆𑀘𑀸. 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼, 𑀅𑀥𑀺𑀓𑀼𑀲𑀮𑀥𑀫𑁆𑀫𑁂𑀲𑀼 𑀘 𑀅𑀭𑀫𑀡𑀁 𑀅𑀭𑀢𑀺. 𑀲𑀸 𑀅𑀢𑁆𑀣𑀢𑁄 𑀇𑀲𑁆𑀲𑀸𑀥𑀺𑀓𑀁 𑀤𑁄𑀫𑀦𑀲𑁆𑀲𑀲𑀳𑀕𑀢𑀁, 𑀣𑀺𑀦𑀫𑀺𑀤𑁆𑀥𑀸𑀥𑀺𑀓𑀜𑁆𑀘 𑀉𑀤𑁆𑀥𑀘𑁆𑀘𑀁. 𑀢𑀢𑁆𑀣 𑀧𑀼𑀭𑀺𑀫𑀁 𑀧𑀭𑀲𑀫𑁆𑀧𑀢𑁆𑀢𑀺𑀯𑀺𑀲𑀬𑀁, 𑀤𑀼𑀢𑀺𑀬𑀁 𑀧𑀦𑁆𑀢𑀲𑁂𑀦𑀸𑀲𑀦𑀸𑀤𑀺𑀯𑀺𑀲𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀭𑀢𑀺𑀬𑀸 𑀯𑀺𑀳𑀦𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀢𑀲𑁆𑀲𑀸 𑀯𑀺𑀖𑀸𑀢𑀁 𑀯𑀸 𑀯𑀽𑀧𑀲𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀻𑀢𑀺 𑀅𑀭𑀢𑀺𑀯𑀺𑀖𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸. ‘‘𑀅𑀦𑀺𑀬𑀢𑁂 𑀇𑀘𑁆𑀙𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀘𑁂𑀢𑀲𑀺𑀓𑀦𑁆𑀢𑀭𑀪𑀸𑀯𑁂𑀦 𑀇𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀓𑀸𑀬𑀤𑀼𑀘𑁆𑀘𑀭𑀺𑀢𑀢𑁄𑀢𑀺 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀤𑀼𑀘𑁆𑀘𑀭𑀺𑀢𑀢𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀽𑀦𑀦𑁆𑀢𑀺 𑀧𑀭𑀧𑀸𑀡𑀧𑀭𑀥𑀦𑀧𑀭𑀇𑀢𑁆𑀣𑀺𑀆𑀤𑀻𑀦𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀫𑀸𑀮𑀫𑁆𑀩𑀡𑀪𑀽𑀢𑀸𑀦𑀫𑁂𑀯 𑀯𑀢𑁆𑀣𑀽𑀦𑀁. 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑀸𑀢𑀺 𑀅𑀫𑀤𑁆𑀤𑀦𑀮𑀓𑁆𑀔𑀡𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀼𑀢𑁄 𑀲𑀗𑁆𑀓𑁄𑀘𑀦𑀓𑀺𑀭𑀺𑀬𑀸𑀧𑀤𑁂𑀲𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀢𑁄𑀬𑁂𑀯 𑀲𑀗𑁆𑀓𑁄𑀘𑀦𑀓𑀺𑀭𑀺𑀬𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀯𑀺𑀭𑀢𑀺𑀬𑁄 𑀤𑀼𑀘𑁆𑀘𑀭𑀺𑀢𑀯𑀢𑁆𑀣𑀼𑀦𑁄 𑀅𑀓𑀺𑀭𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀬𑀼𑀚𑁆𑀚𑀦𑁆𑀢𑀺, 𑀅𑀣 𑀔𑁄 𑀤𑀼𑀘𑁆𑀘𑀭𑀺𑀢𑀲𑁆𑀲𑁂𑀯, 𑀯𑀺𑀭𑀢𑀻𑀦𑀜𑁆𑀘 𑀲𑁄𑀭𑀘𑁆𑀘𑀯𑀲𑁂𑀦 𑀲𑀗𑁆𑀓𑁄𑀘𑀦𑀁, 𑀅𑀓𑀺𑀭𑀺𑀬𑀸 𑀘 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀁 𑀚𑀺𑀕𑀼𑀘𑁆𑀙𑀸𑀤𑀺𑀯𑀲𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀲𑀤𑁆𑀥𑀸…𑀧𑁂… 𑀧𑀤𑀝𑁆𑀞𑀸𑀦𑀸𑀢𑀺 𑀏𑀢𑁆𑀣 𑀲𑀤𑁆𑀥𑀸𑀤𑀬𑁄 𑀲𑀩𑁆𑀩𑁂𑀯 𑀥𑀫𑁆𑀫𑀸 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀁 𑀧𑀤𑀝𑁆𑀞𑀸𑀦𑀸𑀢𑀺 𑀏𑀓𑁂. 𑀅𑀧𑀭𑁂 𑀧𑀦 ‘‘𑀓𑀫𑁆𑀫𑀁 𑀓𑀫𑁆𑀫𑀨𑀮𑀁 𑀲𑀤𑁆𑀤𑀳𑀦𑁆𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀅𑀓𑀭𑀡𑀢𑁄, 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀲𑁆𑀲 𑀫𑀼𑀲𑀸𑀯𑀸𑀤𑀸𑀤𑀺𑀅𑀓𑀣𑀦𑀢𑁄, 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀻𑀲𑀮𑁆𑀮𑁂𑀔𑀕𑀼𑀡𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀺𑀘𑁆𑀙𑀸𑀚𑀻𑀯𑀯𑀺𑀯𑀚𑁆𑀚𑀦𑀢𑁄 𑀘 𑀲𑀤𑁆𑀥𑀸𑀤𑀬𑁄 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀬𑀣𑀸𑀓𑁆𑀓𑀫𑁂𑀦 𑀧𑀤𑀝𑁆𑀞𑀸𑀦𑀸’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀇𑀫𑀸𑀲𑀽𑀢𑀺 𑀇𑀫𑀸𑀲𑀼 𑀢𑀻𑀲𑀼 𑀯𑀺𑀭𑀢𑀻𑀲𑀼. 𑀏𑀓𑁂𑀓𑀁 𑀦𑀺𑀬𑀢𑀁 𑀯𑀺𑀭𑀢𑀺𑀫𑀺𑀘𑁆𑀙𑀦𑁆𑀢𑀻𑀢𑀺 𑀅𑀜𑁆𑀜𑀁 𑀏𑀓𑀁 𑀘𑀢𑀼𑀢𑁆𑀣𑀦𑀺𑀬𑀢𑀯𑀺𑀭𑀢𑀺𑀫𑀺𑀘𑁆𑀙𑀦𑁆𑀢𑀺. 𑀅𑀣 𑀯𑀸 𑀦𑀺𑀤𑁆𑀥𑀸𑀭𑀡𑀢𑁆𑀣𑁂 𑀪𑀼𑀫𑁆𑀫𑀯𑀲𑁂𑀦 𑀇𑀫𑀸𑀲𑀁 𑀅𑀦𑁆𑀢𑀭𑁂 𑀏𑀓𑀁 𑀦𑀺𑀬𑀢𑀁 𑀯𑀺𑀭𑀢𑀺𑀫𑀺𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀪𑀬𑀣𑀸𑀧𑀺 𑀧𑀦 𑀢𑁂𑀲𑀁 𑀇𑀘𑁆𑀙𑀸 𑀦 𑀬𑀼𑀚𑁆𑀚𑀢𑀺 𑀅𑀧𑀭𑀸𑀬 𑀯𑀺𑀭𑀢𑀺𑀬𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸𑀧𑀺 𑀅𑀤𑁂𑀲𑀺𑀢𑀢𑁆𑀢𑀸, 𑀯𑀺𑀲𑀬𑀲𑁆𑀲 𑀘 𑀲𑀤𑀸 𑀲𑀦𑁆𑀦𑀺𑀳𑀺𑀢𑀢𑁆𑀢𑀸𑀪𑀸𑀯𑁂𑀦 𑀦𑀺𑀬𑀢𑀸𑀬 𑀏𑀯 𑀏𑀓𑀺𑀲𑁆𑀲𑀸 𑀅𑀪𑀸𑀯𑀢𑁄. 𑀢𑁂𑀦𑁂𑀯 𑀳𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄𑀬𑁂𑀯 𑀘 𑀓𑁂𑀘𑀺 𑀇𑀫𑀸𑀲𑀁 𑀢𑀺𑀯𑀺𑀥𑀢𑁆𑀢𑀁 𑀅𑀦𑀺𑀬𑀢𑀢𑁆𑀢𑀫𑁂𑀯 𑀘 𑀇𑀘𑁆𑀙𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀢𑁂𑀳𑀺 𑁋

‘‘𑀓𑀭𑀼𑀡𑀸𑀫𑀼𑀤𑀺𑀢𑀸 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀆𑀚𑀺𑀯𑀸;

𑀬𑁂𑀪𑀼𑀬𑁆𑀬𑀢𑁄 𑀅𑀦𑀺𑀬𑀢𑀸, 𑀳𑁄𑀦𑁆𑀢𑀺 𑀕𑁄𑀘𑀭𑀪𑁂𑀤𑀢𑁄’’𑀢𑀺. 𑁋

𑀏𑀢𑁆𑀣 𑀧𑀦 ‘‘𑀬𑁂𑀪𑀼𑀬𑁆𑀬𑀢𑁄’’𑀢𑀺 𑀯𑀘𑀦𑀁 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼 𑀲𑀩𑁆𑀩𑀤𑀸 𑀏𑀓𑀢𑁄𑀬𑁂𑀯 𑀘 𑀮𑀩𑁆𑀪𑀫𑀸𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸 𑀘𑀺𑀢𑁆𑀢𑀁, 𑀏𑀯𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀻𑀢𑀺 𑀤𑀼𑀢𑀺𑀬𑁂 𑀲𑀲𑀗𑁆𑀔𑀸𑀭𑀸 𑀏𑀯𑀸𑀢𑀺 𑀆𑀳 ‘‘𑀲𑀲𑀗𑁆𑀔𑀸𑀭𑀪𑀸𑀯𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄’’𑀢𑀺. 𑀢𑀣𑀸𑀢𑀺 𑀬𑀣𑀸 𑀢𑀢𑀺𑀬𑁂, 𑀢𑀣𑀸 𑀘𑀢𑀼𑀢𑁆𑀣𑁂𑀧𑀺 𑀧𑀻𑀢𑀺𑀬𑀸 𑀲𑀼𑀔𑀧𑀤𑀝𑁆𑀞𑀸𑀦𑀢𑁆𑀢𑀸. 𑀲𑀼𑀔𑀲𑁆𑀲 𑀘𑁂𑀢𑁆𑀣 𑀅𑀪𑀸𑀯𑀢𑁄 𑀆𑀳 ‘‘𑀞𑀧𑁂𑀢𑁆𑀯𑀸 𑀧𑀻𑀢𑀺’’𑀦𑁆𑀢𑀺. 𑀦𑀦𑀼 𑀘 ‘‘𑀓𑀭𑀼𑀡𑀸𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑁂 𑀦 𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸 𑀧𑀻𑀢𑀺𑀬𑀸, 𑀏𑀯𑀁 𑀢𑀸𑀲𑀫𑁆𑀧𑀺 𑀧𑀝𑀺𑀓𑁆𑀔𑁂𑀧𑁄 𑀓𑀸𑀢𑀩𑁆𑀩𑁄𑀢𑀺? 𑀦 𑀓𑀸𑀢𑀩𑁆𑀩𑁄, 𑀅𑀧𑁆𑀧𑀦𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀫𑁆𑀧𑀺 𑀲𑀫𑁆𑀪𑀯𑀢𑁄. 𑀓𑀭𑀼𑀡𑀸𑀫𑀼𑀤𑀺𑀢𑀸𑀪𑀸𑀯𑀦𑀸𑀓𑀸𑀮𑁂 𑀳𑀺 𑀅𑀧𑁆𑀧𑀦𑀸𑀯𑀻𑀣𑀺𑀢𑁄 𑀧𑀼𑀩𑁆𑀩𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑁂𑀦𑀸𑀧𑀺 𑀧𑀭𑀺𑀓𑀫𑁆𑀫𑀁 𑀳𑁄𑀢𑀺, 𑀅𑀧𑁆𑀧𑀦𑀸𑀯𑀻𑀣𑀺𑀬𑀁 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀦𑁂𑀯 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀸 𑀯𑁂𑀤𑀦𑀸𑀧𑀭𑀺𑀯𑀢𑁆𑀢𑀦𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀧𑀼𑀩𑁆𑀩𑀪𑀸𑀕𑀯𑀲𑁂𑀦𑁂𑀯 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀲𑀼 𑀲𑀫𑁆𑀪𑀯𑁄 𑀳𑁄𑀢𑀻𑀢𑀺 𑀆𑀘𑀭𑀺𑀬𑀸. 𑀅𑀧𑀭𑁂 𑀧𑀦 𑀲𑀩𑁆𑀩𑀤𑀸𑀧𑀺 𑀢𑀸𑀲𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀲𑀼 𑀲𑀫𑁆𑀪𑀯𑀁 𑀦 𑀇𑀘𑁆𑀙𑀦𑁆𑀢𑀺. ‘‘𑀅𑀯𑀲𑁂𑀲𑀸 𑀧𑀜𑁆𑀘𑀫𑁂𑀦 𑀲𑀫𑁆𑀧𑀬𑁄𑀕𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀇𑀤𑀸𑀦𑀺 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑁂 𑀘𑀸’’𑀢𑀺𑀆𑀤𑀺.

𑁮𑁧. 𑀓𑀭𑀼𑀡𑀸𑀫𑀼𑀤𑀺𑀢𑀸𑀤𑀬𑁄𑀢𑀺 𑀓𑀭𑀼𑀡𑀸𑀫𑀼𑀤𑀺𑀢𑀸 𑀘𑁂𑀯 𑀯𑀺𑀭𑀢𑀺𑀢𑁆𑀢𑀬𑀜𑁆𑀘. 𑀢𑁂𑀦𑀸𑀳 ‘‘𑀧𑀜𑁆𑀘𑀸’’𑀢𑀺.

𑀏𑀯𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀲𑁂𑀲𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬𑀦𑁆𑀢𑀺 𑀯𑀺𑀭𑀢𑀺𑀢𑁆𑀢𑀬𑀁 𑀯𑀚𑁆𑀚𑁂𑀢𑁆𑀯𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑀺𑀭𑀢𑀺𑀢𑁆𑀢𑀬𑀁 𑀧𑀭𑀺𑀘𑁆𑀘𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀼𑀯𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀸𑀤𑀺𑀓𑀲𑁆𑀲 𑀘𑀺𑀢𑁆𑀢𑀲𑀫𑀸𑀥𑀸𑀦𑀯𑀲𑁂𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀼𑀲𑀮𑀧𑁆𑀧𑀯𑀢𑁆𑀢𑀺, 𑀦 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑁄𑀥𑀦𑀯𑀲𑁂𑀦, 𑀦𑀸𑀧𑀺 𑀤𑀼𑀘𑁆𑀘𑀭𑀺𑀢𑀤𑀼𑀭𑀸𑀚𑀻𑀯𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦. 𑀢𑀣𑀸 𑀳𑀺 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀁 𑀅𑀯𑀢𑁆𑀣𑀢𑁆𑀢𑀬𑀁 𑀳𑁄𑀢𑀺 𑀯𑀻𑀢𑀺𑀓𑁆𑀓𑀫𑀸𑀯𑀢𑁆𑀣𑀸 𑀧𑀭𑀺𑀬𑀼𑀝𑁆𑀞𑀸𑀦𑀸𑀯𑀢𑁆𑀣𑀸 𑀅𑀦𑀼𑀲𑀬𑀸𑀯𑀢𑁆𑀣𑀸𑀢𑀺. 𑀢𑀢𑁆𑀣 𑀯𑀻𑀢𑀺𑀓𑁆𑀓𑀫𑀸𑀯𑀢𑁆𑀣𑀸𑀬 𑀧𑀝𑀺𑀧𑀓𑁆𑀔𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀧𑀭𑀺𑀬𑀼𑀝𑁆𑀞𑀸𑀦𑀸𑀯𑀢𑁆𑀣𑀸𑀬 𑀭𑀽𑀧𑀸𑀭𑀽𑀧𑀸𑀯𑀘𑀭𑀁, 𑀅𑀦𑀼𑀲𑀬𑀸𑀯𑀢𑁆𑀣𑀸𑀬 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁. 𑀤𑀼𑀘𑁆𑀘𑀭𑀺𑀢𑀤𑀼𑀭𑀸𑀚𑀻𑀯𑀸𑀦𑀁 𑀧𑀦 𑀞𑀧𑁂𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀸𑀯𑀢𑁆𑀣𑀁, 𑀅𑀦𑀼𑀲𑀬𑀸𑀯𑀢𑁆𑀣𑀜𑁆𑀘 𑀯𑀻𑀢𑀺𑀓𑁆𑀓𑀫𑀸𑀯𑀢𑁆𑀣𑀸𑀬 𑀯𑀺𑀲𑀼𑀁 𑀧𑀭𑀺𑀬𑀼𑀝𑁆𑀞𑀸𑀦𑀸𑀯𑀢𑁆𑀣𑀸 𑀦 𑀉𑀧𑀮𑀩𑁆𑀪𑀢𑀺. 𑀬𑀲𑁆𑀲𑀸 𑀯𑀺𑀧𑀘𑁆𑀘𑀦𑀻𑀓𑀁 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀲𑀺𑀬𑀸, 𑀢𑀲𑁆𑀫𑀸 𑀢𑀁 𑀦𑁂𑀯 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀯𑀺𑀬 𑀢𑁂𑀲𑀁 𑀯𑀻𑀢𑀺𑀓𑁆𑀓𑀫𑀸𑀯𑀢𑁆𑀣𑀁 𑀲𑁄𑀥𑁂𑀢𑀺, 𑀦 𑀘 𑀮𑁄𑀓𑀼𑀢𑁆𑀢𑀭𑀁 𑀯𑀺𑀬 𑀅𑀦𑀼𑀲𑀬𑀸𑀯𑀢𑁆𑀣𑀁 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀧𑀝𑀺𑀧𑀲𑁆𑀲𑀫𑁆𑀪𑁂𑀢𑀺 𑀯𑀸. 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀁 𑀲𑀻𑀮𑀲𑁄𑀥𑀦𑀯𑀲𑁂𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀦𑁂𑀯 𑀯𑀺𑀕𑀢𑀯𑀻𑀢𑀺𑀓𑁆𑀓𑀫𑀲𑁆𑀲 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀸𑀤𑀺𑀓𑀲𑁆𑀲 𑀬𑁄𑀕𑀺𑀦𑁄 𑀘𑀺𑀢𑁆𑀢𑀲𑀫𑀸𑀥𑀸𑀦𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀫𑀳𑀕𑁆𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀯𑀺𑀭𑀢𑀻𑀦𑀁 𑀅𑀲𑀫𑁆𑀪𑀯𑁄𑀬𑁂𑀯. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀲𑀸𑀥𑁂𑀢𑀼𑀁 ‘‘𑀯𑀺𑀭𑀢𑀺𑀬𑁄 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑁂𑀢𑁆𑀢𑀺𑀁𑀲 𑀯𑀸 𑀓𑀭𑀼𑀡𑀸𑀤𑀺𑀛𑀸𑀦𑀯𑀲𑁂𑀦 𑀧𑀯𑀢𑁆𑀢𑀦𑀓𑀸𑀮𑁂. 𑀢𑀢𑁄𑀢𑀺 𑀢𑀢𑁄 𑀢𑀢𑀺𑀬𑁂 𑀯𑀼𑀢𑁆𑀢𑀘𑁂𑀢𑀲𑀺𑀓𑀢𑁄. 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀁 𑀅𑀧𑁆𑀧𑀦𑀸𑀧𑀢𑁆𑀢𑀸𑀦𑀫𑁂𑀓𑀦𑁆𑀢𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑁆𑀢𑀸 𑀆𑀳 ‘‘𑀧𑀜𑁆𑀘𑀫𑁂𑀦…𑀧𑁂… 𑀓𑀭𑀼𑀡𑀸𑀫𑀼𑀤𑀺𑀢𑀸𑀯𑀚𑁆𑀚𑀸’’𑀢𑀺.

𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀢𑀺𑀁𑀲𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁 𑀭𑀽𑀧𑀸𑀯𑀘𑀭𑀢𑁄 𑀓𑁄 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀅𑀭𑀽𑀧𑀸𑀯𑀘𑀭𑀪𑀸𑀯𑁄𑀯𑁂𑀢𑁆𑀣 𑀯𑀺𑀲𑁂𑀲𑁄’’𑀢𑀺, 𑀧𑀜𑁆𑀘𑀫𑁂 𑀭𑀽𑀧𑀲𑀜𑁆𑀜𑀸𑀪𑀸𑀯𑀢𑁄 𑀭𑀽𑀧𑀸𑀯𑀘𑀭𑀪𑀸𑀯𑁄, 𑀇𑀥 𑀧𑀦 𑀭𑀽𑀧𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀪𑀸𑀯𑁄𑀢𑀺 𑀅𑀬𑀫𑁂𑀯𑀲𑁆𑀲 𑀢𑀢𑁄 𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄.

𑀧𑀞𑀫𑀚𑁆𑀛𑀸𑀦𑀺𑀓𑁂𑀢𑀺 𑀧𑀞𑀫𑀚𑁆𑀛𑀸𑀦𑀯𑀢𑀺. 𑀫𑀕𑁆𑀕𑀘𑀺𑀢𑁆𑀢𑁂𑀢𑀺 𑀘𑀢𑀼𑀩𑁆𑀩𑀺𑀥𑁂𑀧𑀺 𑀫𑀕𑁆𑀕𑀜𑀸𑀡𑁂. 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀺𑀪𑁂𑀤𑁂𑀢𑀺 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑁂. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀤𑀼𑀢𑀺𑀬𑁂𑀦 𑀯𑀺𑀢𑀓𑁆𑀓𑀯𑀚𑁆𑀚𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀓𑀺𑀁 𑀅𑀯𑀺𑀲𑁂𑀲𑁂𑀦𑀸𑀢𑀺 𑀘𑁂, 𑀦𑁄𑀢𑀺 𑀆𑀳 ‘‘𑀓𑀭𑀼𑀡𑀸𑀫𑀼𑀤𑀺𑀢𑀸𑀦’’𑀦𑁆𑀢𑀺𑀆𑀤𑀺. 𑀫𑀕𑁆𑀕𑀥𑀫𑁆𑀫𑁂𑀲𑀼 𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀓𑀤𑀸𑀘𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀯𑀺𑀭𑀳𑁄 𑀲𑀺𑀬𑀸, 𑀦 𑀧𑀦 𑀯𑀺𑀭𑀢𑀺𑀯𑀺𑀭𑀳𑁄, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀯𑀲𑁂𑀦𑁂𑀯 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀯𑀢𑁆𑀢𑀦𑀢𑁄𑀢𑀺 𑀆𑀳 ‘‘𑀦𑀺𑀬𑀢𑀯𑀺𑀭𑀢𑀺𑀪𑀸𑀯𑁄’’𑀢𑀺. 𑀮𑁄𑀓𑀼𑀢𑁆𑀢𑀭𑀪𑀸𑀯𑁄𑀢𑀺 𑀙𑀩𑁆𑀩𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀬 𑀧𑀢𑁆𑀢𑀩𑁆𑀩𑀢𑁆𑀢𑀸 𑀮𑁄𑀓𑀢𑁄 𑀉𑀢𑁆𑀢𑀭𑀡𑀪𑀸𑀯𑁄.

𑀏𑀯𑀁 𑀓𑀼𑀲𑀮𑀘𑁂𑀢𑀲𑀺𑀓𑀸𑀦𑀁 𑀲𑀫𑁆𑀧𑀬𑁄𑀕𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀓𑀼𑀲𑀮𑀘𑁂𑀢𑀲𑀺𑀓𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀓𑀼𑀲𑀮𑀸 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀙 𑀬𑁂𑀯𑀸𑀧𑀦𑀓𑀸𑀢𑀺 𑀓𑀺𑀜𑁆𑀘𑀸𑀧𑀺 𑀧𑀞𑀫𑁂 𑀅𑀦𑀺𑀬𑀢𑀬𑁂𑀯𑀸𑀧𑀦𑀓𑀸 𑀦 𑀮𑀩𑁆𑀪𑀦𑁆𑀢𑀺, 𑀅𑀓𑀼𑀲𑀮𑁂𑀲𑀼 𑀧𑀦 𑀮𑀩𑁆𑀪𑀫𑀸𑀦𑀓𑀬𑁂𑀯𑀸𑀧𑀦𑀥𑀫𑁆𑀫𑁂 𑀏𑀓𑀢𑁆𑀣 𑀤𑀲𑁆𑀲𑁂𑀢𑀼𑀁 𑀢𑁂𑀲𑀫𑁆𑀧𑀺 𑀇𑀥𑁂𑀯 𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀉𑀧𑀭𑀺 𑀥𑀫𑁆𑀫𑀸𑀦𑀁 𑀉𑀤𑁆𑀤𑁂𑀲𑀸𑀦𑀦𑁆𑀢𑀭𑀁 ‘‘𑀏𑀯𑀁 𑀬𑁂𑀯𑀸𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂 𑀙𑀦𑁆𑀤𑀸𑀥𑀺𑀫𑁄𑀓𑁆𑀔𑀸𑀦𑀁, 𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀙𑀦𑁆𑀤𑀲𑁆𑀲 𑀘 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀧𑀝𑀺𑀧𑀸𑀝𑀺𑀬𑀸 𑀤𑀲𑀲𑀼 𑀘𑀺𑀢𑁆𑀢𑁂𑀲𑀽’’𑀢𑀺.

𑁮𑁨. 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀦𑀺𑀲𑁆𑀲𑁂𑀲𑁂𑀦 𑀤𑀲𑁆𑀲𑀺𑀢𑀸. 𑀳𑀢𑀸 𑀯𑀺𑀳𑀢𑀸 𑀯𑀺𑀤𑁆𑀥𑀲𑁆𑀢𑀸 𑀧𑀸𑀧𑀸 𑀅𑀧𑀸𑀬𑀸𑀤𑀺𑀤𑀼𑀓𑁆𑀔𑀧𑀸𑀧𑀦𑀢𑁄 ‘‘𑀧𑀸𑀧𑀸’’𑀢𑀺 𑀲𑀗𑁆𑀔𑀸𑀢𑀸 𑀅𑀓𑀼𑀲𑀮𑀥𑀫𑁆𑀫𑀸 𑀬𑁂𑀦 𑀲𑁄 𑀪𑀕𑀯𑀸 𑀳𑀢𑀧𑀸𑀧𑁄, 𑀢𑁂𑀦. 𑀮𑀸𑀪𑁄 𑀅𑀮𑀸𑀪𑁄, 𑀬𑀲𑁄 𑀅𑀬𑀲𑁄, 𑀦𑀺𑀦𑁆𑀤𑀸 𑀧𑀲𑀁𑀲𑀸, 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀅𑀓𑀫𑁆𑀧𑀦𑀝𑁆𑀞𑁂𑀦 𑀢𑀸𑀤𑀺𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀲𑁄 𑀳𑀺 𑀮𑀸𑀪𑀸𑀤𑀻𑀲𑀼 𑀬𑀸𑀤𑀺𑀲𑁄, 𑀅𑀮𑀸𑀪𑀸𑀤𑀻𑀲𑀼𑀧𑀺 𑀢𑀸𑀤𑀺𑀲𑁄𑀬𑁂𑀯𑀸𑀢𑀺 ‘‘𑀢𑀸𑀤𑀻’’𑀢𑀺 𑀯𑀼𑀘𑁆𑀘𑀢𑀺.

𑀦 𑀳𑀺𑀭𑀻𑀬𑀢𑀻𑀢𑀺 𑀦 𑀮𑀚𑁆𑀚𑀢𑀺. 𑀅𑀳𑀺𑀭𑀺𑀓𑁄𑀢𑀺 𑀧𑀼𑀕𑁆𑀕𑀮𑁄 𑀥𑀫𑁆𑀫𑀲𑀫𑀽𑀳𑁄 𑀯𑀸. ‘‘𑀅𑀳𑀺𑀭𑀺𑀓𑁆𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁆𑀲 𑀓-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀅𑀳𑀺𑀭𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀑𑀢𑁆𑀢𑀧𑁆𑀧𑀦𑁆𑀢𑀺 𑀑𑀢𑁆𑀢𑀧𑁆𑀧𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀥𑀫𑁆𑀫𑀫𑀸𑀳. 𑀅𑀚𑀺𑀕𑀼𑀘𑁆𑀙𑀦𑀁 𑀅𑀳𑀻𑀴𑀦𑀁. 𑀅𑀮𑀚𑁆𑀚𑀦𑀁 𑀅𑀯𑀺𑀮𑀸. 𑀅𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀦𑁆𑀢𑀺 𑀲𑀪𑀸𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀮𑀚𑁆𑀚𑀦𑀮𑀓𑁆𑀔𑀡𑀦𑁆𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑁆𑀲 𑀲𑀸𑀥𑀸𑀭𑀡𑀸𑀬 𑀳𑀺𑀭𑀺𑀬𑀸 𑀧𑀝𑀺𑀧𑀓𑁆𑀔𑀯𑀲𑁂𑀦. 𑀢𑁂𑀳𑁂𑀯𑀸𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀏𑀯. 𑀅𑀲𑀸𑀭𑀚𑁆𑀚𑀦𑀁 𑀦𑀺𑀩𑁆𑀪𑀬𑀢𑀸. 𑀅𑀦𑀼𑀢𑁆𑀢𑀸𑀲𑁄 𑀅𑀲𑀫𑁆𑀪𑀫𑁄. 𑀭𑀲𑀸𑀤𑀻𑀦𑀺 𑀳𑀺𑀭𑀺𑀑𑀢𑁆𑀢𑀧𑁆𑀧𑁂𑀲𑀼 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀦 𑀢𑀸𑀦𑀺 𑀇𑀥 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀳𑀺 𑀅𑀮𑀚𑁆𑀚𑀦𑀸𑀓𑀸𑀭𑁂𑀦 𑀧𑀸𑀧𑀸𑀦𑀁 𑀓𑀭𑀡𑀭𑀲𑀁 𑀅𑀳𑀺𑀭𑀺𑀓𑀁. 𑀅𑀦𑀼𑀢𑁆𑀢𑀸𑀲𑀸𑀓𑀸𑀭𑁂𑀦 𑀅𑀦𑁄𑀢𑁆𑀢𑀧𑁆𑀧𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀧𑀸𑀧𑀢𑁄 𑀅𑀲𑀗𑁆𑀓𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺. 𑀅𑀢𑁆𑀢𑀦𑀺, 𑀧𑀭𑁂𑀲𑀼 𑀘 𑀅𑀕𑀸𑀭𑀯𑀧𑀤𑀝𑁆𑀞𑀸𑀦𑀸𑀦𑀺. 𑀕𑀸𑀫𑀲𑀽𑀓𑀭𑀲𑁆𑀲 𑀯𑀺𑀬 𑀅𑀲𑀼𑀘𑀺𑀢𑁄 𑀓𑀺𑀮𑁂𑀲𑀸𑀲𑀼𑀘𑀺𑀢𑁄 𑀅𑀚𑀺𑀕𑀼𑀘𑁆𑀙𑀦𑀁 𑀅𑀳𑀺𑀭𑀺𑀓𑁂𑀦 𑀳𑁄𑀢𑀺. 𑀲𑀮𑀪𑀲𑁆𑀲 𑀯𑀺𑀬 𑀅𑀕𑁆𑀕𑀺𑀢𑁄 𑀧𑀸𑀧𑀢𑁄 𑀅𑀦𑀼𑀢𑁆𑀢𑀸𑀲𑁄 𑀅𑀦𑁄𑀢𑁆𑀢𑀧𑁆𑀧𑁂𑀦 𑀳𑁄𑀢𑀺. 𑀬𑀣𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀚𑀺𑀕𑀼𑀘𑁆𑀙𑀢𑀺 𑀦𑀸𑀳𑀺𑀭𑀺𑀓𑁄, 𑀧𑀸𑀧𑀸 𑀕𑀽𑀣𑀸𑀯 𑀲𑀽𑀓𑀭𑁄;

𑀦 𑀪𑀸𑀬𑀢𑀺 𑀅𑀦𑁄𑀢𑁆𑀢𑀧𑁆𑀧𑁄, 𑀲𑀮𑀪𑁄 𑀯𑀺𑀬 𑀧𑀸𑀯𑀓𑀸’’𑀢𑀺.

𑀏𑀢𑁆𑀣 𑀘 𑀬𑀣𑀸 𑀳𑀺𑀭𑀺𑀬𑀸 𑀩𑀮𑀯𑀪𑀸𑀯𑁂 𑀑𑀢𑁆𑀢𑀧𑁆𑀧𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀲𑁆𑀲 𑀩𑀮𑀯𑀪𑀸𑀯𑁂 𑀳𑀺𑀭𑀻 𑀅𑀩𑁆𑀩𑁄𑀳𑀸𑀭𑀺𑀓𑀸, 𑀏𑀯𑀁 𑀅𑀳𑀺𑀭𑀺𑀓𑀲𑁆𑀲 𑀩𑀮𑀯𑀪𑀸𑀯𑁂 𑀅𑀦𑁄𑀢𑁆𑀢𑀧𑁆𑀧𑀁 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀅𑀦𑁄𑀢𑁆𑀢𑀧𑁆𑀧𑀲𑁆𑀲 𑀩𑀮𑀯𑀪𑀸𑀯𑁂 𑀅𑀳𑀺𑀭𑀺𑀓𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀳𑁄𑀢𑀻𑀢𑀺 𑀓𑁂𑀘𑀺, 𑀢𑀁 𑀦 𑀬𑀼𑀚𑁆𑀚𑀢𑀺. 𑀬𑀣𑀸 𑀳𑀺 𑀅𑀲𑀼𑀘𑀺𑀦𑀸 𑀅𑀢𑁆𑀢𑀸𑀦𑀁 𑀫𑀓𑁆𑀔𑁂𑀦𑁆𑀢𑁄, 𑀲𑀧𑁆𑀧𑀫𑀼𑀔𑁂 𑀳𑀢𑁆𑀣𑀁 𑀧𑀯𑁂𑀲𑁂𑀦𑁆𑀢𑁄 𑀩𑀸𑀮𑀤𑀸𑀭𑀓𑁄 𑀢𑀢𑁆𑀣 𑀧𑀝𑀺𑀓𑁆𑀓𑀽𑀮𑀪𑀸𑀯𑀲𑁆𑀲, 𑀆𑀤𑀻𑀦𑀯𑀲𑁆𑀲 𑀘 𑀅𑀦𑀼𑀧𑀧𑀭𑀺𑀓𑁆𑀔𑀦𑀢𑁄 𑀦𑁂𑀯 𑀚𑀺𑀕𑀼𑀘𑁆𑀙𑀢𑀺, 𑀦 𑀘 𑀉𑀢𑁆𑀢𑀲𑀢𑀺, 𑀏𑀯𑀫𑁂𑀯𑀁 𑀥𑀫𑁆𑀫𑀲𑀪𑀸𑀯𑀲𑁆𑀲 𑀅𑀜𑁆𑀜𑀸𑀡𑀢𑁄 𑀫𑁄𑀳𑁄 𑀧𑀸𑀧𑀢𑁄 𑀦𑁂𑀯 𑀚𑀺𑀕𑀼𑀘𑁆𑀙𑀢𑀺, 𑀦 𑀉𑀢𑁆𑀢𑀲𑀢𑀺, 𑀢𑀲𑁆𑀫𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀉𑀪𑀬𑀫𑁆𑀧𑀺 𑀩𑀮𑀯𑀢𑀭𑀁 𑀳𑁄𑀢𑀻𑀢𑀺.

𑀮𑀼𑀩𑁆𑀪𑀦𑁆𑀢𑀻𑀢𑀺 𑀅𑀪𑀺𑀕𑀺𑀚𑁆𑀛𑀦𑁆𑀢𑀺, 𑀅𑀮𑁆𑀮𑀻𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀭𑀫𑁆𑀫𑀡𑀕𑁆𑀕𑀳𑀡𑀮𑀓𑁆𑀔𑀡𑁄𑀢𑀺 𑀏𑀢𑁆𑀣 𑀆𑀭𑀫𑁆𑀫𑀡𑀕𑁆𑀕𑀳𑀡𑀁 𑀦𑀸𑀫 ‘‘𑀫𑀫 𑀇𑀤’’𑀦𑁆𑀢𑀺 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀦𑀁, 𑀦 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑀁. 𑀅𑀪𑀺𑀲𑀗𑁆𑀕𑁄 𑀅𑀢𑀺𑀲𑀬𑀯𑀢𑀸𑀬 𑀆𑀲𑀢𑁆𑀢𑀺𑀬𑀸 𑀤𑀼𑀫𑁆𑀫𑁄𑀘𑀦𑀻𑀬𑀪𑀸𑀯𑁄. 𑀅𑀧𑀭𑀺𑀘𑁆𑀘𑀸𑀕𑁄 𑀅𑀯𑀺𑀚𑀳𑀦𑀁. 𑀢𑁂𑀮𑀜𑁆𑀚𑀦𑀭𑀸𑀕𑁄 𑀯𑀺𑀬𑀸𑀢𑀺 𑀥𑁄𑀯𑀺𑀢𑁆𑀯𑀸𑀧𑀺 𑀧𑀭𑀺𑀘𑁆𑀘𑀚𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄 𑀢𑁂𑀮𑀫𑀓𑁆𑀔𑀺𑀢𑀅𑀜𑁆𑀚𑀦𑀭𑀸𑀕𑁄 𑀯𑀺𑀬. ‘‘𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 𑀯𑀘𑀦𑀢𑁄 𑀯𑀼𑀢𑁆𑀢𑀁 ‘‘𑀅𑀲𑁆𑀲𑀸𑀤𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑁄’’𑀢𑀺. 𑀢𑀢𑁆𑀣 𑀅𑀲𑁆𑀲𑀸𑀤𑀯𑀲𑁂𑀦 𑀤𑀲𑁆𑀲𑀦𑀁 𑀅𑀲𑁆𑀲𑀸𑀤𑀤𑀲𑁆𑀲𑀦𑀁. 𑀦𑀦𑀼 𑀘 𑀅𑀲𑁆𑀲𑀸𑀤𑀤𑀲𑁆𑀲𑀦𑀫𑁆𑀧𑀺 𑀅𑀢𑁆𑀣𑀢𑁄 𑀮𑁄𑀪𑁄𑀬𑁂𑀯𑀸𑀢𑀺 𑀓𑀣𑀁 𑀲𑀬𑀁 𑀅𑀢𑁆𑀢𑀦𑁄 𑀧𑀤𑀝𑁆𑀞𑀸𑀦𑀁 𑀳𑁄𑀢𑀻𑀢𑀺? 𑀲𑀘𑁆𑀘𑀁, 𑀧𑀞𑀫𑀁 𑀦𑀸𑀢𑀺𑀩𑀮𑀯𑀮𑁄𑀪𑀯𑀲𑁂𑀦 𑀅𑀲𑁆𑀲𑀸𑀤𑀤𑀲𑁆𑀲𑀦𑁄 𑀧𑀘𑁆𑀙𑀸 𑀩𑀮𑀯𑀮𑁄𑀪𑁄 𑀳𑁄𑀢𑀻𑀢𑀺 𑀢𑀲𑁆𑀲 𑀢𑀁𑀧𑀤𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸. 𑀢𑁂𑀦𑁂𑀯 𑀘 ‘‘𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 ‘‘𑀅𑀲𑁆𑀲𑀸𑀤𑁄 𑀦𑀸𑀫 𑀲𑀼𑀔𑀯𑁂𑀤𑀦𑀸, 𑀅𑀲𑁆𑀲𑀸𑀤𑀤𑀲𑁆𑀲𑀦𑀦𑁆𑀢𑀺 𑀅𑀲𑁆𑀲𑀸𑀤𑀤𑀺𑀝𑁆𑀞𑀻’’𑀢𑀺 𑀯𑀤𑀦𑁆𑀢𑀺. 𑀲𑀼𑀔𑀯𑁂𑀤𑀦𑀸𑀬 𑀯𑀸 𑀓𑀸𑀭𑀡𑀪𑀽𑀢𑀁 𑀲𑀼𑀪𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀤𑁄 𑀦𑀸𑀫, 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀧𑀯𑀢𑁆𑀢𑀸 𑀢𑀬𑁄 𑀯𑀺𑀧𑀮𑁆𑀮𑀸𑀲𑀸 𑀅𑀲𑁆𑀲𑀸𑀤𑀤𑀲𑁆𑀲𑀦𑀁 𑀦𑀸𑀫𑀸𑀢𑀺 𑀓𑁂𑀘𑀺.

𑀫𑀼𑀬𑁆𑀳𑀦𑁆𑀢𑀻𑀢𑀺 𑀦 𑀩𑀼𑀚𑁆𑀛𑀦𑁆𑀢𑀺. 𑀥𑀫𑁆𑀫𑀲𑀪𑀸𑀯𑀲𑁆𑀲 𑀬𑀸𑀣𑀸𑀯𑀢𑁄 𑀅𑀤𑀲𑁆𑀲𑀦𑀁 𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀪𑀸𑀯𑁄. 𑀅𑀜𑁆𑀜𑀸𑀡𑀁 𑀜𑀸𑀡𑀧𑀝𑀺𑀧𑀓𑁆𑀔𑁄 𑀥𑀫𑁆𑀫𑁄. 𑀢𑀢𑁆𑀣 𑀧𑀼𑀭𑀺𑀫𑀮𑀓𑁆𑀔𑀡𑀁 𑀲𑀪𑀸𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀁 𑀧𑀝𑀺𑀧𑀓𑁆𑀔𑀯𑀲𑁂𑀦. 𑀅𑀣 𑀯𑀸 𑀅𑀜𑁆𑀜𑀸𑀡𑀮𑀓𑁆𑀔𑀡𑁄𑀢𑀺 𑀓𑀺𑀘𑁆𑀘𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁄 𑀳𑀺 𑀅𑀲𑀫𑁆𑀧𑀝𑀺𑀯𑁂𑀥𑀭𑀲𑁄𑀢𑀺 𑀯𑀼𑀢𑁆𑀢𑁄. 𑀥𑀫𑁆𑀫𑀲𑀪𑀸𑀯𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀫𑀢𑁆𑀣𑀢𑀸 𑀅𑀲𑀫𑁆𑀧𑀝𑀺𑀯𑁂𑀥𑁄. 𑀆𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀭𑀲𑁄𑀢𑀺 𑀬𑀣𑀸 𑀅𑀜𑁆𑀜𑀸𑀡𑀁, 𑀫𑁄𑀳𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 𑀯𑀸 𑀆𑀭𑀫𑁆𑀫𑀡𑀲𑀪𑀸𑀯𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀮𑀪𑀢𑀺, 𑀫𑁄𑀳𑀲𑁆𑀲 𑀢𑀣𑀸 𑀧𑀯𑀢𑁆𑀢𑀺 𑀆𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀁. 𑀏𑀢𑁆𑀣 𑀘 𑀜𑀸𑀡𑀁 𑀆𑀭𑀫𑁆𑀫𑀡𑀁 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑀸𑀢𑀺, 𑀤𑀺𑀝𑁆𑀞𑀺 𑀬𑀣𑀸𑀲𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀅𑀬𑀸𑀣𑀸𑀯𑀢𑁄 𑀕𑀡𑁆𑀳𑀸𑀢𑀺, 𑀫𑁄𑀳𑁄 𑀧𑀦 𑀦 𑀓𑀣𑀜𑁆𑀘𑀺 𑀯𑀺𑀚𑀸𑀦𑀸𑀢𑀺. 𑀬𑀤𑀺 𑀏𑀯𑀁 𑀆𑀭𑀫𑁆𑀫𑀡𑀕𑁆𑀕𑀳𑀡𑀓𑀸𑀮𑁄 𑀓𑀣𑀁 𑀢𑀤𑀸 𑀲𑁄 𑀆𑀭𑀫𑁆𑀫𑀡𑀁 𑀚𑀸𑀦𑀸𑀢𑁂𑀯𑀸𑀢𑀺? 𑀢𑀤𑀸𑀧𑀺 𑀦 𑀚𑀸𑀦𑀸𑀢𑀺. 𑀬𑀣𑀸 𑀧𑀦 𑀨𑀲𑁆𑀲𑀸𑀤𑀬𑁄 𑀨𑀼𑀲𑀦𑀸𑀓𑀸𑀭𑀸𑀤𑀺𑀫𑀢𑁆𑀢𑀯𑀲𑁂𑀦𑁂𑀯 𑀆𑀭𑀫𑁆𑀫𑀡𑀁 𑀕𑀡𑁆𑀳𑀦𑁆𑀢𑀺, 𑀦 𑀚𑀸𑀦𑀦𑀯𑀲𑁂𑀦, 𑀏𑀯𑀫𑀬𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀧𑀝𑀺𑀘𑁆𑀙𑀸𑀤𑀦𑀸𑀓𑀸𑀭𑁂𑀦𑁂𑀯 𑀕𑀡𑁆𑀳𑀸𑀢𑀺, 𑀦 𑀧𑀦 𑀚𑀸𑀦𑀦𑀸𑀓𑀸𑀭𑁂𑀦𑀸𑀢𑀺. 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀅𑀦𑁆𑀥𑀓𑀭𑀡𑀁 𑀅𑀦𑁆𑀥𑀓𑀸𑀭𑁄, 𑀢𑀣𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀢𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀻𑀢𑀺 𑀅𑀦𑁆𑀥𑀓𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀫𑀺𑀘𑁆𑀙𑀸 𑀧𑀲𑁆𑀲𑀦𑁆𑀢𑀻𑀢𑀺 𑀥𑀫𑁆𑀫𑀲𑀪𑀸𑀯𑀲𑁆𑀲 𑀯𑀺𑀧𑀭𑀻𑀢𑀯𑀲𑁂𑀦 𑀅𑀦𑀺𑀘𑁆𑀘𑀸𑀤𑀺𑀁 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀲𑁆𑀲𑀦𑁆𑀢𑀺. 𑀅𑀬𑁄𑀦𑀺𑀲𑁄 𑀅𑀪𑀺𑀦𑀺𑀯𑁂𑀲𑁄 𑀉𑀧𑁆𑀧𑀣𑀸𑀪𑀺𑀦𑀺𑀯𑁂𑀲𑁄. 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑁄 𑀦𑀺𑀘𑁆𑀘𑀸𑀤𑀺𑀢𑁄 𑀯𑀸 𑀧𑀭𑀧𑁆𑀧𑀘𑁆𑀘𑀬𑀢𑁄 𑀯𑀸 𑀆𑀫𑀲𑀦𑀁 𑀧𑀭𑀸𑀫𑀸𑀲𑁄, 𑀯𑀺𑀧𑀭𑀻𑀢𑀕𑁆𑀕𑀸𑀳𑀯𑀲𑁂𑀦 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀦𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄. 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀸𑀫𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀤𑁆𑀥𑀫𑁆𑀫𑀅𑀲𑁄𑀢𑀼𑀓𑀸𑀫𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀉𑀤𑁆𑀥𑀢𑀁 𑀳𑁄𑀢𑀺 𑀘𑀺𑀢𑁆𑀢𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑀸, 𑀲𑁄 𑀥𑀫𑁆𑀫𑁄 𑀉𑀤𑁆𑀥𑀘𑁆𑀘𑀁. 𑀢𑁂𑀦𑀸𑀳 ‘‘𑀉𑀤𑁆𑀥𑀢𑀪𑀸𑀯𑁄’’𑀢𑀺. 𑀅𑀯𑀽𑀧𑀲𑀫𑁄𑀢𑀺 𑀅𑀲𑀦𑁆𑀦𑀺𑀲𑀺𑀦𑁆𑀦𑀪𑀸𑀯𑁄. 𑀯𑀸𑀢𑀸…𑀧𑁂… 𑀧𑀝𑀸𑀓𑀸𑀯𑀺𑀬𑀸𑀢𑀺 𑀬𑀣𑀸 𑀧𑀝𑀸𑀓𑀸 𑀬𑁄𑀢𑁆𑀢𑀩𑀮𑁂𑀦 𑀥𑀚𑀬𑀝𑁆𑀞𑀺𑀁 𑀅𑀫𑀼𑀜𑁆𑀘𑀦𑁆𑀢𑀻𑀧𑀺 𑀯𑀸𑀢𑀸𑀪𑀺𑀖𑀸𑀢𑁂𑀦 𑀏𑀢𑁆𑀣 𑀅𑀯𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀅𑀥𑀺𑀫𑁄𑀓𑁆𑀔𑀩𑀮𑁂𑀦 𑀆𑀭𑀫𑁆𑀫𑀡𑀁 𑀅𑀫𑀼𑀜𑁆𑀘𑀦𑁆𑀢𑀫𑁆𑀧𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀮𑁂𑀦 𑀆𑀭𑀫𑁆𑀫𑀡𑁂 𑀅𑀘𑀮𑀁 𑀅𑀯𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀸𑀢𑀧𑁆𑀧𑀳𑀸𑀭𑁂𑀦𑁂𑀯 𑀘𑀮𑀥𑀚𑀧𑀝𑀸𑀓𑀸 𑀯𑀺𑀬 𑀅𑀦𑀯𑀝𑁆𑀞𑀸𑀦𑀓𑀺𑀘𑁆𑀘𑀁. 𑀪𑀦𑁆𑀢𑀢𑁆𑀢𑀁 𑀧𑀭𑀺𑀩𑁆𑀪𑀫𑀦𑀸𑀓𑀸𑀭𑁄. 𑀉𑀤𑁆𑀥𑀘𑁆𑀘𑀲𑁆𑀲 𑀲𑀩𑁆𑀩𑀸𑀓𑀼𑀲𑀮𑀲𑀸𑀥𑀸𑀭𑀡𑀢𑁆𑀢𑀸, 𑀅𑀜𑁆𑀜𑁂𑀲𑀜𑁆𑀘 𑀅𑀓𑀼𑀲𑀮𑀲𑀸𑀥𑀸𑀭𑀡𑀸𑀦𑀁 𑀯𑀺𑀲𑀼𑀁 𑀧𑀤𑀝𑁆𑀞𑀸𑀦𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀬𑁄𑀦𑀺𑀲𑁄…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀬𑁂𑀦𑀸𑀓𑀸𑀭𑁂𑀦 𑀯𑀸 𑀫𑀦𑀲𑀺𑀓𑀭𑁄𑀢𑁄 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦𑀸𑀓𑀸𑀭𑁂𑀦 𑀫𑀦𑀲𑀺𑀓𑀭𑀡𑀁 𑀇𑀥 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀅𑀣 𑀯𑀸 𑀉𑀤𑁆𑀥𑀘𑁆𑀘𑀦𑀺𑀫𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀫𑀦𑀲𑀺𑀓𑀭𑀡𑀁 𑀇𑀥 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄.

𑀫𑀜𑁆𑀜𑀢𑀻𑀢𑀺 𑀅𑀪𑀺𑀫𑀜𑁆𑀜𑀢𑀺, 𑀅𑀳𑀁𑀓𑀸𑀭𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀉𑀘𑁆𑀘𑀢𑁄 𑀦𑀫𑀦𑀁 𑀉𑀡𑁆𑀡𑀢𑀺. 𑀲𑀫𑁆𑀧𑀕𑁆𑀕𑀳𑀭𑀲𑁄𑀢𑀺 𑀉𑀡𑁆𑀡𑀢𑀺𑀯𑀲𑁂𑀦𑁂𑀯 𑀅𑀢𑁆𑀢𑀦𑁄, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀲𑀫𑁆𑀧𑀕𑁆𑀕𑀡𑁆𑀳𑀦𑀓𑀺𑀘𑁆𑀘𑁄, 𑀦 𑀯𑀻𑀭𑀺𑀬𑀁 𑀯𑀺𑀬 𑀢𑀁𑀢𑀁𑀓𑀺𑀘𑁆𑀘𑀲𑀸𑀥𑀦𑁂𑀦. 𑀅𑀪𑀺𑀪𑀼𑀲𑁆𑀲𑀳𑀦𑀯𑀲𑁂𑀦 𑀳𑀻𑀦𑀲𑁆𑀲 𑀅𑀢𑁆𑀢𑀸𑀦𑀁 𑀦𑀻𑀘𑀁 𑀓𑀢𑁆𑀯𑀸 𑀕𑀳𑀡𑀫𑁆𑀧𑀺 𑀧𑀕𑁆𑀕𑀡𑁆𑀳𑀦𑀯𑀲𑁂𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀢𑀼…𑀧𑁂… 𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀏𑀢𑁆𑀣 𑀓𑁂𑀢𑀼 𑀯𑀼𑀘𑁆𑀘𑀢𑀺 𑀅𑀘𑁆𑀘𑀼𑀕𑁆𑀕𑀢𑀥𑀚𑁄, 𑀇𑀥 𑀧𑀦 𑀓𑁂𑀢𑀼 𑀯𑀺𑀬𑀸𑀢𑀺 𑀓𑁂𑀢𑀼, 𑀉𑀴𑀸𑀭𑀢𑀫𑀸𑀤𑀺𑀪𑀸𑀯𑁄, 𑀢𑀁 𑀓𑁂𑀢𑀼𑀪𑀸𑀯𑀲𑀗𑁆𑀔𑀸𑀢𑀁 𑀓𑁂𑀢𑀼𑀁 𑀓𑀫𑁆𑀬𑀢𑀻𑀢𑀺 𑀓𑁂𑀢𑀼𑀓𑀫𑁆𑀬𑀁, 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀢𑀁 𑀓𑁂𑀢𑀼𑀓𑀫𑁆𑀬𑀁, 𑀲𑁄 𑀓𑁂𑀢𑀼𑀓𑀫𑁆𑀬𑀢𑀸. ‘‘𑀅𑀳’’𑀦𑁆𑀢𑀺 𑀧𑀯𑀢𑁆𑀢𑀦𑀢𑁄 𑀫𑀸𑀦𑀲𑁆𑀲 𑀤𑀺𑀝𑁆𑀞𑀺𑀲𑀤𑀺𑀲𑀻 𑀧𑀯𑀢𑁆𑀢𑀢𑀻𑀢𑀺 𑀤𑀺𑀝𑁆𑀞𑀺𑀫𑀸𑀦𑀸 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀦 𑀧𑀯𑀢𑁆𑀢𑀦𑁆𑀢𑀺, 𑀤𑁆𑀯𑁂 𑀓𑁂𑀲𑀭𑀲𑀻𑀳𑀸 𑀯𑀺𑀬 𑀏𑀓𑀕𑀼𑀳𑀸𑀬𑀁, 𑀢𑀲𑁆𑀫𑀸 𑀫𑀸𑀦𑁄 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂 𑀲𑀩𑁆𑀩𑀤𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂 𑀦𑀺𑀬𑀫𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀧𑀤𑀝𑁆𑀞𑀸𑀦𑁄. 𑀫𑀸𑀦𑁄 𑀥𑀫𑁆𑀫𑀲𑀫𑀽𑀳𑀕𑁆𑀕𑀳𑀡𑁂 𑀩𑀮𑀯𑀁 𑀳𑀼𑀢𑁆𑀯𑀸 𑀅𑀢𑁆𑀢𑀼𑀓𑁆𑀓𑀁𑀲𑀦𑀪𑀸𑀯𑁂𑀦 𑀧𑀯𑀢𑁆𑀢𑀢𑀺, 𑀤𑀺𑀝𑁆𑀞𑀺 𑀏𑀓𑁂𑀓𑀥𑀫𑁆𑀫𑀫𑁆𑀧𑀺 𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑀻 𑀧𑀯𑀢𑁆𑀢𑀢𑀺. 𑀅𑀢𑁆𑀢𑀲𑀺𑀦𑁂𑀳𑀲𑀦𑁆𑀦𑀺𑀲𑁆𑀲𑀬𑁄 𑀯𑀸 𑀫𑀸𑀦𑁄, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀦𑁆𑀦𑀺𑀲𑁆𑀲𑀬𑀸 𑀤𑀺𑀝𑁆𑀞𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀇𑀲𑁆𑀲𑀢𑀻𑀢𑀺 𑀉𑀲𑀽𑀬𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀧𑀭𑀲𑀫𑁆𑀧𑀢𑁆𑀢𑀻𑀲𑀼𑀬𑁂𑀯. 𑀇𑀲𑁆𑀲𑀸𑀯𑀲𑁂𑀦 𑀧𑀭𑀲𑀫𑁆𑀧𑀢𑁆𑀢𑀻𑀲𑀼 𑀅𑀢𑀼𑀲𑁆𑀲𑀦𑀢𑁄 𑀯𑀼𑀢𑁆𑀢𑀁 ‘‘𑀅𑀦𑀪𑀺𑀭𑀢𑀺𑀭𑀲𑀸’’𑀢𑀺. 𑀢𑁂𑀦𑁂𑀯𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀇𑀲𑁆𑀲𑀸𑀦𑀮𑀲𑀺𑀔𑀸 𑀬𑁂𑀲𑀁, 𑀳𑀤𑀬𑁂 𑀚𑀮𑀢𑀻𑀥 𑀢𑁂;

𑀦𑁂𑀯 𑀯𑀺𑀦𑁆𑀤𑀦𑁆𑀢𑀺 𑀧𑀸𑀫𑁄𑀚𑁆𑀚𑀁, 𑀲𑀫𑁆𑀩𑀼𑀤𑁆𑀥𑀸𑀤𑀻𑀳𑀺 𑀲𑁂𑀯𑀺𑀢’’𑀦𑁆𑀢𑀺.

𑀫𑀘𑁆𑀙𑀭𑀬𑁄𑀕𑁂𑀦 𑀫𑀘𑁆𑀙𑀭𑀺𑀦𑀺 𑀧𑀯𑀢𑁆𑀢𑀁 𑀫𑀘𑁆𑀙𑀭-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀆𑀳 ‘‘𑀫𑀘𑁆𑀙𑀭𑀪𑀸𑀯𑁄 𑀫𑀘𑁆𑀙𑀭𑀺𑀬’’𑀦𑁆𑀢𑀺. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀦 ‘‘𑀫𑀸 𑀇𑀤𑀁 𑀅𑀘𑁆𑀙𑀭𑀺𑀬𑀁 𑀅𑀜𑁆𑀜𑁂𑀲𑀁 𑀳𑁄𑀢𑀼, 𑀫𑀬𑁆𑀳𑀁𑀯 𑀳𑁄𑀢𑀽’’𑀢𑀺 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑁄𑀭𑀸𑀡𑀸. 𑀦𑀺𑀕𑀼𑀳𑀡𑀁 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑁂𑀲𑀁 𑀅𑀤𑀲𑁆𑀲𑀦𑀁. 𑀲𑀗𑁆𑀓𑁄𑀘𑀦𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀻𑀦𑀁 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀓𑀭𑀡𑀲𑁆𑀲 𑀅𑀭𑀼𑀘𑁆𑀘𑀦𑀸𑀓𑀸𑀭𑁂𑀦 𑀧𑀝𑀺𑀓𑀼𑀝𑀦𑀁. ‘‘𑀫𑀸 𑀇𑀤𑀁 𑀧𑀭𑀲𑁆𑀲 𑀳𑁄𑀢𑀽’’𑀢𑀺 𑀧𑀭𑁂𑀲𑀼 𑀧𑀝𑀺𑀳𑀦𑀦𑀯𑀲𑁂𑀦 𑀅𑀢𑁆𑀢𑀲𑀦𑁆𑀢𑀓𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀢𑁄 𑀫𑀘𑁆𑀙𑁂𑀭𑀁 𑀧𑀝𑀺𑀖𑀘𑀺𑀢𑁆𑀢𑁂𑀲𑁆𑀯𑁂𑀯 𑀮𑀩𑁆𑀪𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀏𑀓𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀅𑀜𑁆𑀜𑀢𑁆𑀣 𑀧𑀝𑀺𑀳𑀜𑁆𑀜𑀺𑀢𑁆𑀯𑀸 𑀅𑀜𑁆𑀜𑀸𑀭𑀫𑁆𑀫𑀡𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑁂 𑀧𑀝𑀺𑀳𑀦𑀦𑀯𑀲𑁂𑀦 𑀧𑀦 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄 𑀫𑀘𑁆𑀙𑁂𑀭𑀁 𑀧𑀝𑀺𑀖𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀼𑀢𑁆𑀢𑀁. 𑀅𑀢𑁆𑀢𑀲𑀫𑁆𑀧𑀢𑁆𑀢𑀻𑀢𑀺 𑀆𑀯𑀸𑀲𑀸𑀤𑀺𑀲𑀫𑁆𑀧𑀢𑁆𑀢𑀺.

𑀓𑀼𑀘𑁆𑀙𑀺𑀢𑀁 𑀓𑀢𑀦𑁆𑀢𑀺 𑀏𑀢𑁆𑀣 𑀓𑀢𑀫𑁆𑀧𑀺 𑀅𑀓𑀢𑀫𑁆𑀧𑀺 𑀕𑀭𑀳𑀺𑀢𑀩𑁆𑀩𑀢𑁆𑀢𑀸 𑀓𑀼𑀘𑁆𑀙𑀺𑀢𑀁 𑀓𑀢𑀁 𑀦𑀸𑀫 𑀳𑁄𑀢𑀺. 𑀏𑀯𑀜𑁆𑀳𑀺 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺 ‘‘𑀬𑀁 𑀫𑀬𑀸 𑀦 𑀓𑀢𑀁, 𑀢𑀁 𑀓𑀼𑀓𑀢’’𑀦𑁆𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀭𑀲’’𑀦𑁆𑀢𑀺. 𑀏𑀯𑀁 𑀓𑀢𑀸𑀓𑀢𑀁 𑀤𑀼𑀘𑁆𑀘𑀭𑀺𑀢𑀁 𑀲𑀼𑀘𑀭𑀺𑀢𑀫𑁆𑀧𑀺 𑀓𑀼𑀘𑁆𑀙𑀺𑀢𑀁 𑀓𑀢𑀁 𑀦𑀸𑀫. 𑀲𑀼𑀘𑀭𑀺𑀢𑀫𑁆𑀧𑀺 𑀳𑀺 𑀕𑀭𑀳𑀦𑁆𑀢𑀲𑁆𑀲 𑀓𑀼𑀘𑁆𑀙𑀺𑀢𑀁 𑀓𑀢𑀦𑁆𑀢𑀺 𑀳𑁄𑀢𑀺. 𑀬𑀣𑀸 𑀧𑀦 𑀧𑀣𑀯𑀻𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁 𑀧𑀣𑀯𑀻𑀓𑀲𑀺𑀡𑀁, 𑀏𑀯𑀁 𑀓𑀼𑀓𑀢𑀁 𑀆𑀭𑀩𑁆𑀪 𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀢𑀁𑀲𑀳𑀘𑀭𑀺𑀢𑀢𑀸𑀬 𑀇𑀥 𑀓𑀼𑀓𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀣 𑀯𑀸 𑀓𑀢𑀸𑀓𑀢𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀯𑀺𑀧𑁆𑀧𑀝𑀺𑀲𑀸𑀭𑀘𑀺𑀢𑁆𑀢𑀁𑀬𑁂𑀯 𑀕𑀭𑀳𑀺𑀢𑀩𑁆𑀩𑀢𑁄 ‘‘𑀓𑀼𑀘𑁆𑀙𑀺𑀢𑀁 𑀓𑀢𑀁 𑀓𑀼𑀓𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀢𑀁 𑀘𑀺𑀢𑁆𑀢𑀁 𑀓𑀼𑀓𑀢𑀁 𑀦𑀸𑀫 𑀳𑁄𑀢𑀺, 𑀲𑁄 𑀥𑀫𑁆𑀫𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀢𑁂𑀦𑀸𑀳 ‘‘𑀓𑀼𑀓𑀢𑀁, 𑀢𑀲𑁆𑀲 𑀪𑀸𑀯𑁄’’𑀢𑀺. 𑀧𑀘𑁆𑀙𑀸 𑀅𑀦𑀼𑀢𑀧𑁆𑀧𑀦𑀁 𑀯𑀺𑀳𑁂𑀞𑀦𑀁 𑀧𑀘𑁆𑀙𑀸𑀦𑀼𑀢𑀸𑀧𑁄. 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀁 𑀓𑀢𑀸𑀓𑀢𑀲𑁆𑀲 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀲𑁆𑀲 𑀅𑀦𑀼𑀲𑁄𑀘𑀦𑀁, ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀢𑀧𑁆𑀧𑀦𑀁, ‘‘𑀅𑀓𑀢𑀁 𑀫𑀬𑀸 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑀓𑀫𑁆𑀫𑀁, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀓𑀭𑁄𑀫𑀻’’𑀢𑀺 𑀧𑀯𑀢𑁆𑀢𑀁 𑀧𑀦 𑀓𑀼𑀲𑀮𑀧𑀓𑁆𑀔𑀺𑀓𑀁 𑀯𑀻𑀭𑀺𑀬𑀫𑁂𑀯, 𑀦 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀁, 𑀓𑀢𑀸𑀓𑀢𑀸𑀓𑀸𑀭𑀯𑀺𑀲𑀺𑀝𑁆𑀞𑀲𑁆𑀲 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀲𑁆𑀲 𑀅𑀦𑀼𑀲𑁄𑀘𑀦𑀯𑀲𑁂𑀦 𑀯𑀺𑀭𑀽𑀧𑀁 𑀧𑀝𑀺𑀲𑀭𑀡𑀁 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀜𑁆𑀳𑀺 𑀅𑀯𑀟𑁆𑀠𑀺𑀲𑀫𑁆𑀧𑀸𑀤𑀦𑀢𑁄 𑀯𑀺𑀭𑀽𑀧𑀁 𑀧𑀝𑀺𑀲𑀭𑀡𑀁, 𑀢𑀁 𑀧𑀭𑀸𑀬𑀢𑁆𑀢𑀢𑀸𑀳𑁂𑀢𑀼𑀢𑀸𑀬 𑀤𑀸𑀲𑀩𑁆𑀬𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 𑀤𑀸𑀲𑀩𑁆𑀬𑁂 𑀲𑀢𑀺 𑀤𑀸𑀲𑁄 𑀧𑀭𑀸𑀬𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀓𑀼𑀓𑁆𑀓𑀼𑀘𑁆𑀘𑁂 𑀲𑀢𑀺 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄. 𑀦 𑀳𑀺 𑀲𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀓𑀼𑀲𑀮𑁂 𑀧𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀣 𑀯𑀸 𑀓𑀢𑀸𑀓𑀢𑀓𑀼𑀲𑀮𑀸𑀓𑀼𑀲𑀮𑀸𑀦𑀼𑀲𑁄𑀘𑀦𑀯𑀲𑁂𑀦 𑀆𑀬𑀢𑁆𑀢𑀢𑀸𑀬 𑀢𑀤𑀼𑀪𑀬𑀯𑀲𑁂𑀦 𑀓𑀼𑀓𑁆𑀓𑀼𑀘𑁆𑀘𑁂𑀦 𑀢𑀁𑀲𑀫𑀗𑁆𑀕𑀻 𑀳𑁄𑀢𑀻𑀢𑀺 𑀢𑀁 𑀤𑀸𑀲𑀩𑁆𑀬𑀁 𑀯𑀺𑀬 𑀳𑁄𑀢𑀺.

𑀅𑀦𑀼𑀲𑁆𑀲𑀸𑀳𑀦𑀸𑀯𑀲𑀻𑀤𑀦𑀯𑀲𑁂𑀦 𑀲𑀁𑀳𑀢𑀪𑀸𑀯𑁄 𑀣𑀺𑀦𑀁, 𑀢𑁂𑀦 𑀬𑁄𑀕𑀢𑁄 𑀘𑀺𑀢𑁆𑀢𑀁 𑀣𑀺𑀦𑀁, 𑀢𑀲𑁆𑀲 𑀪𑀸𑀯𑁄 𑀣𑀺𑀦𑀢𑀸. 𑀢𑁂𑀦𑀸𑀳 ‘‘𑀅𑀦𑀼𑀲𑁆𑀲𑀸𑀳𑀲𑀁𑀳𑀦𑀦𑀢𑀸’’𑀢𑀺. 𑀅𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑀯𑀲𑁂𑀦 𑀅𑀓𑀫𑁆𑀫𑀜𑁆𑀜𑀢𑀸 𑀫𑀺𑀤𑁆𑀥𑀁. 𑀢𑁂𑀦𑀸𑀳 ‘‘𑀅𑀲𑀢𑁆𑀢𑀺𑀯𑀺𑀖𑀸𑀢𑁄’’𑀢𑀺. 𑀬𑀲𑁆𑀫𑀸 𑀫𑀺𑀤𑁆𑀥𑀯𑀲𑁂𑀦𑁂𑀯 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀫𑁂𑀥𑀺𑀢𑀸 𑀯𑀺𑀳𑀢𑀲𑀸𑀫𑀢𑁆𑀣𑀺𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀫𑀺𑀤𑁆𑀥𑀢𑀸 𑀫𑀺𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀯𑀺𑀚𑁆𑀚𑀢𑀺 𑀉𑀲𑁆𑀲𑀸𑀳𑁄 𑀅𑀲𑁆𑀲𑀸𑀢𑀺 𑀅𑀦𑀼𑀲𑁆𑀲𑀸𑀳𑀁, 𑀢𑀩𑁆𑀪𑀸𑀯𑁄𑀧𑀺 𑀅𑀦𑀼𑀲𑁆𑀲𑀸𑀳𑀁. 𑀅𑀦𑀼𑀲𑁆𑀲𑀸𑀳𑀲𑀗𑁆𑀔𑀸𑀢𑁄 𑀲𑀁𑀳𑀦𑀦𑀪𑀸𑀯𑁄 𑀅𑀦𑀼𑀲𑁆𑀲𑀸𑀳𑀲𑀁𑀲𑀻𑀤𑀦𑀢𑀸, 𑀓𑀼𑀲𑀻𑀢𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑀢𑁆𑀢𑀺𑀯𑀺𑀖𑀸𑀢𑁄𑀢𑀺 𑀬𑀲𑁆𑀫𑀸 𑀢𑀁 𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀲𑀢𑁆𑀢𑀺𑀯𑀺𑀦𑀸𑀲𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀢𑁆𑀢𑀻𑀢𑀺 𑀢𑀁 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀁 𑀅𑀲𑀢𑁆𑀢𑀺, 𑀢𑀲𑁆𑀲 𑀪𑀸𑀯𑁄𑀧𑀺, 𑀅𑀲𑀢𑁆𑀢𑀺𑀬𑁂𑀯 𑀯𑀺𑀖𑀸𑀢𑁄𑀢𑀺 𑀅𑀲𑀢𑁆𑀢𑀺𑀯𑀺𑀖𑀸𑀢𑁄.

𑀅𑀦𑀼𑀲𑁆𑀲𑀸𑀳𑀦𑀮𑀓𑁆𑀔𑀡𑀦𑁆𑀢𑀺 𑀉𑀲𑁆𑀲𑀸𑀳𑀧𑀝𑀺𑀧𑀓𑁆𑀔𑀮𑀓𑁆𑀔𑀡𑀁. 𑀯𑀻𑀭𑀺𑀬𑀲𑁆𑀲 𑀯𑀺𑀦𑁄𑀤𑀦𑀁 𑀔𑁂𑀧𑀦𑀁 𑀯𑀻𑀭𑀺𑀬𑀯𑀺𑀦𑁄𑀤𑀦𑀁. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀁𑀲𑀻𑀤𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀢𑁂𑀲𑀁 𑀯𑀸 𑀲𑀁𑀲𑀻𑀤𑀦𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀻𑀢𑀺 𑀲𑀁𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀓𑀫𑁆𑀫𑀜𑁆𑀜𑀢𑀸𑀮𑀓𑁆𑀔𑀡𑀦𑁆𑀢𑀺 𑀏𑀢𑁆𑀣 𑀓𑀸𑀫𑀁 𑀣𑀺𑀦𑀫𑁆𑀧𑀺 𑀅𑀓𑀫𑁆𑀫𑀜𑁆𑀜𑀢𑀸𑀲𑀪𑀸𑀯𑀫𑁂𑀯, 𑀢𑀁 𑀧𑀦 𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀫𑀜𑁆𑀜𑀁, 𑀫𑀺𑀤𑁆𑀥𑀁 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀢𑀣𑀸 𑀳𑀺 𑀧𑀸𑀴𑀺𑀬𑀁 ‘‘𑀢𑀢𑁆𑀣 𑀓𑀢𑀫𑀁 𑀣𑀺𑀦𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸. 𑀓𑀢𑀫𑀁 𑀫𑀺𑀤𑁆𑀥𑀁? 𑀬𑀸 𑀓𑀸𑀬𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸’’𑀢𑀺 (𑀥. 𑀲. 𑁧𑁧𑁬𑁨) 𑀘 𑀆𑀤𑀺𑀦𑀸 𑀇𑀫𑁂𑀲𑀁 𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑁄. 𑀑𑀡𑀳𑀦𑀁 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀸𑀦𑀁 𑀧𑀺𑀤𑀳𑀦𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀩𑀦𑁆𑀥𑀦𑀁 𑀯𑀸. 𑀮𑀻𑀦𑀢𑀸 𑀮𑀻𑀦𑀸𑀓𑀸𑀭𑁄, 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀲𑀗𑁆𑀓𑁄𑀘𑁄. 𑀬𑀲𑁆𑀫𑀸 𑀣𑀺𑀦𑁂𑀦 𑀘𑀺𑀢𑁆𑀢𑀲𑁆𑀲𑁂𑀯 𑀲𑀁𑀳𑀦𑀦𑀁 𑀳𑁄𑀢𑀺, 𑀫𑀺𑀤𑁆𑀥𑁂𑀦 𑀧𑀦 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲 𑀯𑀺𑀬 𑀭𑀽𑀧𑀓𑀸𑀬𑀲𑁆𑀲𑀧𑀺, 𑀢𑀲𑁆𑀫𑀸 𑀢𑀁 𑀧𑀘𑀮𑀸𑀬𑀺𑀓𑀸𑀦𑀺𑀤𑁆𑀤𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀻𑀢𑀺 𑀧𑀘𑀮𑀸𑀬𑀺𑀓𑀸𑀦𑀺𑀤𑁆𑀤𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀦𑁆𑀢𑀺𑀧𑀺 𑀯𑀝𑁆𑀝𑀢𑀺. 𑀧𑁄𑀢𑁆𑀣𑀭𑀽𑀧𑀧𑀝𑀺𑀘𑁆𑀙𑀸𑀤𑀓𑀧𑀝𑁄 𑀯𑀺𑀬 𑀆𑀭𑀫𑁆𑀫𑀡𑀲𑀪𑀸𑀯𑀸𑀯𑀘𑁆𑀙𑀸𑀤𑀓𑁄 𑀫𑁄𑀳𑁄. 𑀫𑀼𑀔𑁂 𑀩𑀦𑁆𑀥𑀧𑀝𑁄 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀧𑀢𑁆𑀣𑀭𑀺𑀢𑀼𑀁 𑀅𑀤𑁂𑀦𑁆𑀢𑀁 𑀫𑀺𑀤𑁆𑀥𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀲𑁂𑀲𑀸𑀢𑀺 𑀇𑀥 𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀸 𑀨𑀲𑁆𑀲𑀸𑀤𑀬𑁄. 𑀓𑀼𑀲𑀮𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀮𑀓𑁆𑀔𑀡𑀸𑀤𑀺𑀢𑁄 𑀯𑀼𑀢𑁆𑀢𑀦𑀬𑁂𑀦. 𑀦 𑀓𑁄𑀘𑀺 𑀏𑀢𑁆𑀣 𑀯𑀺𑀲𑁂𑀲𑁄 𑀅𑀢𑁆𑀣𑀻𑀢𑀺 𑀘𑁂, 𑀦𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺, 𑀯𑀺𑀢𑀓𑁆𑀓𑀸𑀤𑀻𑀦𑀁 𑀢𑀺𑀡𑁆𑀡𑀁 𑀬𑀣𑀸𑀓𑁆𑀓𑀫𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀺𑀦𑀸𑀫𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄. 𑀏𑀓𑀽𑀦𑀯𑀻𑀲𑀢𑀻𑀢𑀺 𑀞𑀧𑁂𑀢𑁆𑀯𑀸 𑀫𑀸𑀦𑀸𑀤𑀬𑁄 𑀙 𑀅𑀦𑀺𑀬𑀢𑀬𑁂𑀯𑀸𑀧𑀦𑀓𑁂 𑀲𑁂𑀲𑀸 𑀲𑀭𑀽𑀧𑁂𑀦𑀸𑀕𑀢𑀸 𑀧𑀦𑁆𑀦𑀭𑀲 𑀙𑀦𑁆𑀤𑀸𑀤𑀬𑁄 𑀘 𑀘𑀢𑁆𑀢𑀸𑀭𑁄 𑀦𑀺𑀬𑀢𑀬𑁂𑀯𑀸𑀧𑀦𑀓𑀸𑀢𑀺 𑀇𑀫𑁂 𑀏𑀓𑁂𑀦 𑀊𑀦𑀸 𑀯𑀻𑀲𑀢𑀺 𑀘𑁂𑀢𑀲𑀺𑀓𑀸. 𑀅𑀦𑀺𑀬𑀢𑀬𑁂𑀯𑀸𑀧𑀦𑀓𑀸𑀦𑀁 𑀧𑀦 𑀇𑀥 𑀅𑀮𑀪𑀦𑁆𑀢𑀸𑀦𑀫𑁆𑀧𑀺 𑀏𑀢𑁆𑀣 𑀯𑀘𑀦𑁂 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯.

𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀦𑀺𑀬𑀢𑀪𑀸𑀯𑁄𑀢𑀺 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀦𑀺𑀬𑀢𑀲𑁆𑀲 𑀇𑀥 𑀉𑀧𑁆𑀧𑀚𑁆𑀚𑀦𑀓𑀪𑀸𑀯𑀫𑀸𑀳, 𑀦 𑀧𑀦 𑀧𑀞𑀫𑁂 𑀦𑀺𑀬𑀢𑀪𑀸𑀯𑀁 𑀢𑀢𑁆𑀣 𑀲𑀩𑁆𑀩𑀲𑁄𑀯 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀦 𑀳𑀺 𑀲𑀪𑀸𑀯𑀢𑀺𑀔𑀺𑀡𑀁 𑀘𑀺𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀬𑁄𑀕𑀻 𑀳𑁄𑀢𑀻𑀢𑀺. 𑀢𑀢𑀺𑀬𑁂 𑀫𑀸𑀦𑀲𑁆𑀲 𑀅𑀦𑀺𑀬𑀢𑀲𑁆𑀲 𑀲𑀫𑁆𑀪𑀯𑁂𑀧𑀺 𑀦𑀺𑀬𑀢𑀥𑀫𑁆𑀫𑁂 𑀲𑀦𑁆𑀥𑀸𑀬 ‘‘𑀅𑀝𑁆𑀞𑀸𑀭𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀫𑀸𑀦𑁄 𑀧𑀦𑁂𑀢𑁆𑀣 𑀅𑀦𑀺𑀬𑀢𑁄’’𑀢𑀺. 𑀤𑀺𑀝𑁆𑀞𑀺𑀬𑀸 𑀲𑀳 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀘𑀢𑀼𑀢𑁆𑀣𑁂 𑀅𑀯𑀲𑁂𑀲𑀸𑀢𑀺 𑀅𑀝𑁆𑀞𑀸𑀭𑀲𑁂𑀯, 𑀧𑀜𑁆𑀘𑀫𑁂 𑀞𑀧𑁂𑀢𑁆𑀯𑀸 𑀧𑀻𑀢𑀺𑀁 𑀤𑀺𑀝𑁆𑀞𑀺𑀬𑀸 𑀲𑀳 𑀅𑀝𑁆𑀞𑀸𑀭𑀲𑁂𑀯, 𑀢𑀣𑀸 𑀙𑀝𑁆𑀞𑁂𑀧𑀺. 𑀲𑀢𑁆𑀢𑀫𑁂 𑀧𑀻𑀢𑀺𑀬𑀸, 𑀤𑀺𑀝𑁆𑀞𑀺𑀬𑀸 𑀘 𑀅𑀪𑀸𑀯𑀢𑁄 𑀲𑀢𑁆𑀢𑀭𑀲, 𑀢𑀣𑀸 𑀅𑀝𑁆𑀞𑀫𑁂𑀧𑀺.

𑀏𑀢𑁂𑀧𑀺 𑀢𑀬𑁄𑀢𑀺 𑀦 𑀓𑁂𑀯𑀮𑀁 𑀓𑀭𑀼𑀡𑀸𑀫𑀼𑀤𑀺𑀢𑀸 𑀏𑀯, 𑀏𑀢𑁂𑀧𑀺 𑀢𑀬𑁄 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀬𑀪𑁂𑀤𑀢𑁄𑀬𑁂𑀯. 𑀢𑀣𑀸 𑀳𑀺 𑀇𑀲𑁆𑀲𑀸 𑀧𑀭𑀲𑀫𑁆𑀧𑀢𑁆𑀢𑀺𑀯𑀺𑀲𑀬𑀸, 𑀫𑀘𑁆𑀙𑀭𑀺𑀬𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑁂𑀳𑀺 𑀲𑀸𑀥𑀸𑀭𑀡𑀸𑀪𑀸𑀯𑀯𑀺𑀲𑀬𑀁, 𑀓𑀼𑀓𑁆𑀓𑀼𑀘𑁆𑀘𑀁 𑀓𑀢𑀸𑀓𑀢𑀯𑀺𑀲𑀬𑀦𑁆𑀢𑀺, 𑀢𑀲𑁆𑀫𑀸 𑀬𑀁 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀯𑀤𑀦𑁆𑀢𑀺 ‘‘𑀇𑀲𑁆𑀲𑀸𑀫𑀘𑁆𑀙𑁂𑀭𑀁 𑀬𑀤𑀺𑀘𑁆𑀙𑀸𑀯𑀲𑁂𑀦 𑀏𑀓𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺, 𑀦 𑀢𑀁 𑀕𑀳𑁂𑀢𑀩𑁆𑀩𑀁.

𑀲𑀪𑀸𑀯𑀢𑁄, 𑀧𑀭𑀺𑀓𑀧𑁆𑀧𑀦𑀢𑁄 𑀯𑀸 𑀅𑀦𑀺𑀝𑁆𑀞𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀦𑀺𑀝𑁆𑀞𑀸𑀓𑀸𑀭𑀁 𑀯𑀸 𑀆𑀭𑀫𑁆𑀫𑀡𑀲𑁆𑀲 𑀅𑀦𑀼𑀪𑀯𑀦𑀁 𑀲𑀫𑁆𑀪𑀼𑀜𑁆𑀚𑀦𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀁, 𑀢𑀁 𑀮𑀓𑁆𑀔𑀡𑀫𑀲𑁆𑀲𑀸𑀢𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀮𑀓𑁆𑀔𑀡𑀁. 𑀢𑁂𑀦𑀸𑀳 ‘‘𑀅𑀦𑀺𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲’’𑀦𑁆𑀢𑀺, 𑀬𑀣𑀸𑀪𑀽𑀢𑁂𑀦 𑀯𑀸 𑀅𑀬𑀣𑀸𑀪𑀽𑀢𑁂𑀦 𑀯𑀸 𑀅𑀦𑀺𑀝𑁆𑀞𑀸𑀓𑀸𑀭𑁂𑀦 𑀆𑀭𑀫𑁆𑀫𑀡𑀲𑁆𑀲 𑀲𑀫𑁆𑀪𑀼𑀜𑁆𑀚𑀦𑀭𑀲𑀁, 𑀧𑀘𑁆𑀘𑀸𑀦𑀼𑀪𑀯𑀦𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀢𑁆𑀣𑀺𑀬𑀸𑀤𑀻𑀦𑀜𑁆𑀳𑀺 𑀲𑀪𑀸𑀯𑀢𑁄 𑀇𑀝𑁆𑀞𑁂 𑀩𑀼𑀤𑁆𑀥𑀸𑀤𑀺𑀆𑀭𑀫𑁆𑀫𑀡𑁂𑀧𑀺 𑀅𑀦𑀺𑀝𑁆𑀞𑀸𑀓𑀸𑀭𑀢𑁄 𑀕𑀳𑀡𑀯𑀲𑁂𑀦 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀤𑁄𑀫𑀦𑀲𑁆𑀲𑀲𑁆𑀲 𑀏𑀓𑀦𑁆𑀢𑁂𑀦 𑀓𑀸𑀫𑀥𑀸𑀢𑀼𑀬𑀁𑀬𑁂𑀯 𑀧𑀯𑀢𑁆𑀢𑀦𑀢𑁄 𑀆𑀳 ‘‘𑀳𑀤𑀬𑀯𑀢𑁆𑀣𑀼𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀢𑀲𑁆𑀲 𑀳𑀺 𑀅𑀦𑀻𑀯𑀭𑀡𑀸𑀯𑀢𑁆𑀣𑀸𑀬 𑀅𑀪𑀸𑀯𑀢𑁄 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀁 𑀅𑀲𑀫𑁆𑀪𑀯𑁄.

𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀅𑀦𑀺𑀝𑁆𑀞𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦 𑀯𑀸 𑀯𑀺𑀭𑀽𑀧𑀁 𑀲𑀧𑁆𑀧𑀦𑀁 𑀯𑀺𑀲𑀧𑁆𑀧𑀦𑀁, 𑀅𑀦𑀺𑀝𑁆𑀞𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦𑁂𑀯 𑀯𑀸 𑀯𑀺𑀲𑀧𑁆𑀧𑀦𑀁 𑀲𑀭𑀻𑀭𑀓𑀫𑁆𑀧𑀦𑀁, 𑀢𑀁 𑀭𑀲𑁄 𑀓𑀺𑀘𑁆𑀘𑀁, 𑀲𑀫𑁆𑀧𑀢𑁆𑀢𑀺 𑀯𑀸 𑀅𑀲𑁆𑀲𑀸𑀢𑀺 𑀯𑀺𑀲𑀧𑁆𑀧𑀦𑀭𑀲𑁄, 𑀦𑀺𑀲𑁆𑀲𑀬𑀲𑁆𑀲 𑀳𑀤𑀬𑀯𑀢𑁆𑀣𑀼𑀦𑁄, 𑀲𑀓𑀮𑀲𑁆𑀲𑁂𑀯 𑀯𑀸 𑀓𑀸𑀬𑀲𑁆𑀲 𑀯𑀺𑀚𑁆𑀛𑀢𑁆𑀢𑀪𑀸𑀯𑀸𑀧𑀸𑀤𑀦𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀯𑀸’’𑀢𑀺, 𑀯𑀺𑀚𑁆𑀛𑀢𑁆𑀢𑀪𑀸𑀯𑀸𑀧𑀸𑀤𑀦𑀢𑁄𑀢𑀺 𑀘 𑀫𑀺𑀮𑀸𑀢𑀪𑀸𑀯𑀸𑀧𑀸𑀤𑀦𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀓𑀣𑀁 𑀯𑀺𑀬𑀸𑀢𑀺 𑀆𑀳 ‘‘𑀤𑀸𑀯𑀕𑁆𑀕𑀺 𑀯𑀺𑀬𑀸’’𑀢𑀺. 𑀲𑁄 𑀳𑀺 𑀯𑀦𑀖𑀝𑁂𑀬𑁂𑀯 𑀉𑀧𑁆𑀧𑀦𑁆𑀦𑁄 𑀢𑀫𑁂𑀯 𑀤𑀳𑀢𑀺. 𑀤𑀼𑀲𑁆𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀘 𑀤𑀽𑀲𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑁄 𑀳𑀺 𑀬𑀲𑁆𑀲 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑁄, 𑀢𑀁 𑀏𑀓𑀦𑁆𑀢𑁂𑀦 𑀅𑀦𑁆𑀢𑀫𑀲𑁄 𑀯𑀺𑀭𑀽𑀧𑀪𑀸𑀯𑀸𑀧𑀸𑀤𑀦𑁂𑀦𑀧𑀺 𑀤𑀽𑀲𑁂𑀢𑀺, 𑀧𑀭𑀁 𑀧𑀦 𑀤𑀽𑀲𑁂𑀢𑀼 𑀯𑀸, 𑀫𑀸 𑀯𑀸 𑀳𑀢𑁆𑀣𑁂𑀦 𑀕𑀳𑀺𑀢𑀅𑀲𑀼𑀘𑀺 𑀯𑀺𑀬. ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀻𑀦𑀺 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺 𑀧𑀤𑀝𑁆𑀞𑀸𑀦𑀫𑀲𑁆𑀲𑀸𑀢𑀺 𑀆𑀖𑀸𑀢𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄. 𑀲𑁄 𑀉𑀧𑀬𑁄𑀕𑀨𑀮𑀓𑀸𑀮𑁂𑀲𑀼 𑀅𑀦𑀺𑀝𑁆𑀞𑀢𑁆𑀢𑀸 𑀯𑀺𑀲𑀲𑀁𑀲𑀝𑁆𑀞𑀧𑀽𑀢𑀺𑀫𑀼𑀢𑁆𑀢𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀅𑀝𑁆𑀞𑀸𑀭𑀲 𑀯𑀸𑀢𑀺 𑀇𑀲𑁆𑀲𑀸𑀤𑀻𑀲𑀼 𑀅𑀦𑀺𑀬𑀢𑁂𑀲𑀼 𑀏𑀓𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀸𑀭𑀲 𑀯𑀸.

𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢𑀸𑀢𑀺 𑀘𑁂𑀢𑀲𑁄 𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀸 𑀞𑀺𑀢𑀺𑀫𑀢𑁆𑀢𑀸, 𑀫𑀕𑁆𑀕𑀗𑁆𑀕𑀸𑀤𑀺𑀪𑀸𑀯𑀁 𑀦 𑀕𑀘𑁆𑀙𑀢𑀺 𑀅𑀥𑀺𑀫𑁄𑀓𑁆𑀔𑀯𑀺𑀭𑀳𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢𑀸𑀢𑀺 𑀔𑀡𑀝𑁆𑀞𑀺𑀢𑀺𑀫𑀢𑁆𑀢𑀸. ‘‘𑀦𑀺𑀯𑀸𑀢𑁂 𑀤𑀻𑀧𑀘𑁆𑀘𑀻𑀦𑀁 𑀞𑀺𑀢𑀺 𑀯𑀺𑀬𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀝𑁆𑀞𑀺𑀢𑀺 𑀯𑀺𑀬 𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸 𑀦𑀺𑀘𑁆𑀙𑀬𑀸𑀪𑀸𑀯𑁂𑀦 𑀅𑀲𑀡𑁆𑀞𑀳𑀦𑀢𑁄 𑀘𑁂𑀢𑀲𑁄 𑀧𑀯𑀢𑁆𑀢𑀺𑀧𑀘𑁆𑀘𑀬𑀫𑀢𑁆𑀢𑀢𑀸𑀬 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢𑀸 𑀔𑀡𑀝𑁆𑀞𑀺𑀢𑀺𑀫𑀢𑁆𑀢𑀸 𑀧𑀯𑀢𑁆𑀢𑀺𑀧𑀘𑁆𑀘𑀬𑀫𑀢𑁆𑀢𑀸 𑀞𑀺𑀢𑀺 𑀧𑀯𑀢𑁆𑀢𑀺𑀝𑁆𑀞𑀺𑀢𑀻𑀢𑀺 𑀓𑀢𑁆𑀯𑀸. 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 ‘‘𑀧𑀺𑀲𑀼𑀡𑀸 𑀯𑀸𑀘𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀯𑀺𑀕𑀢𑀸 𑀢𑀺𑀓𑀺𑀘𑁆𑀙𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄. ‘‘𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸’’𑀢𑀺 𑀘𑀺𑀓𑀺𑀘𑁆𑀙𑀺𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀘𑁂𑀢𑀁 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀣𑀸 𑀘𑀺𑀓𑀺𑀘𑁆𑀙𑀸𑀬 𑀅𑀪𑀸𑀯𑀢𑁄. ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀲𑀁𑀲𑀧𑁆𑀧𑀦𑀯𑀲𑁂𑀦 𑀲𑁂𑀢𑀺, 𑀲𑀫𑀦𑁆𑀢𑀢𑁄 𑀯𑀸 𑀲𑁂𑀢𑀻𑀢𑀺 𑀲𑀁𑀲𑀬𑁄. 𑀓𑀫𑁆𑀧𑀦𑀭𑀲𑀸𑀢𑀺 𑀘𑀺𑀢𑁆𑀢𑀲𑁆𑀲 𑀓𑀫𑁆𑀧𑀦𑀓𑀺𑀘𑁆𑀘𑀸. 𑀉𑀤𑁆𑀥𑀘𑁆𑀘𑀜𑁆𑀳𑀺 𑀅𑀢𑁆𑀢𑀦𑀸 𑀕𑀳𑀺𑀢𑀸𑀓𑀸𑀭𑁂𑀬𑁂𑀯 𑀞𑀢𑁆𑀯𑀸 𑀪𑀫𑀢𑀻𑀢𑀺 𑀏𑀓𑀸𑀭𑀫𑁆𑀫𑀡𑀲𑁆𑀫𑀺𑀁 𑀏𑀯 𑀯𑀺𑀧𑁆𑀨𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀧𑀦 𑀬𑀤𑀺𑀧𑀺 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸𑀧𑀺 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺 𑀅𑀜𑁆𑀜𑀁 𑀕𑀳𑁂𑀢𑀩𑁆𑀩𑀸𑀓𑀸𑀭𑀁 𑀅𑀧𑁂𑀓𑁆𑀔𑀢𑀻𑀢𑀺 𑀦𑀸𑀦𑀸𑀭𑀫𑁆𑀫𑀡𑁂 𑀓𑀫𑁆𑀧𑀦𑀁 𑀳𑁄𑀢𑀺. 𑀅𑀦𑀺𑀘𑁆𑀙𑀬𑀸𑀓𑀸𑀭𑁂𑀦 𑀤𑁆𑀯𑁂𑀴𑁆𑀳𑀓𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀅𑀦𑀺𑀘𑁆𑀙𑀬𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀻𑀢𑀺 𑀅𑀦𑀺𑀘𑁆𑀙𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀅𑀥𑀺𑀫𑁄𑀓𑁆𑀔𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑀭𑀻𑀢𑀓𑀺𑀘𑁆𑀘𑀢𑀸𑀬 𑀆𑀳 ‘‘𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀪𑀸𑀯𑁂𑀦𑀸’’𑀢𑀺. 𑀲𑀫𑀸𑀥𑀻𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀲𑀸 𑀳𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀸 𑀆𑀥𑀸𑀦𑀢𑁄 ‘‘𑀲𑀫𑀸𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀩𑀮𑀯𑀸 𑀳𑁄𑀢𑀻𑀢𑀺 𑀩𑀮𑀯𑀫𑀺𑀢𑁆𑀢𑁂𑀦 𑀤𑀺𑀦𑁆𑀦𑀧𑀺𑀝𑁆𑀞𑀺𑀩𑀮𑁄 𑀧𑀼𑀭𑀺𑀲𑁄 𑀯𑀺𑀬 𑀩𑀮𑀯𑀸 𑀳𑁄𑀢𑀺, 𑀩𑀮𑀸𑀤𑀺𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸. 𑀦𑀦𑀼 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸𑀧𑀺 𑀯𑀺𑀧𑀸𑀓𑀸 𑀳𑁄𑀦𑁆𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸’’𑀢𑀺. 𑀓𑀼𑀢𑁄 𑀧𑀦 𑀯𑀺𑀭𑀢𑀻𑀦𑀁 𑀓𑀼𑀲𑀮𑀢𑁆𑀢𑀫𑁂𑀯𑀸𑀢𑀺 𑀘𑀸𑀭𑀺𑀢𑀦𑁆𑀢𑀺 𑀆𑀳 ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀓𑀼𑀲𑀮𑀸𑀢𑀺 (𑀯𑀺𑀪. 𑁭𑁧𑁫) 𑀳𑀺 𑀯𑀼𑀢𑁆𑀢’’𑀦𑁆𑀢𑀺. 𑀬𑀤𑀺 𑀏𑀯𑀁 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁂𑀲𑀼 𑀯𑀺𑀭𑀢𑀺𑀬𑁄 𑀦 𑀮𑀩𑁆𑀪𑀦𑁆𑀢𑀻𑀢𑀺? 𑀦𑁄 𑀦 𑀮𑀩𑁆𑀪𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀮𑁄𑀓𑀺𑀬𑀯𑀺𑀭𑀢𑀺𑀬𑁄𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦 𑀮𑁄𑀓𑀺𑀬𑀯𑀺𑀧𑀸𑀓𑁂𑀲𑀼𑀬𑁂𑀯 𑀯𑀺𑀭𑀢𑀺𑀬𑁄 𑀦 𑀲𑀫𑁆𑀪𑀯𑀦𑁆𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑀓𑀸𑀬𑀧𑀲𑀸𑀤𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀓𑀸𑀬𑁂 𑀪𑀯𑁄 𑀲𑀸𑀢𑀪𑀸𑀯𑁄 𑀮𑀓𑁆𑀔𑀡𑀫𑀲𑁆𑀲𑀸𑀢𑀺 𑀓𑀸𑀬𑀺𑀓𑀲𑀸𑀢𑀮𑀓𑁆𑀔𑀡𑀸. 𑀘𑁂𑀢𑀲𑀺𑀓𑀲𑀼𑀔𑁂 𑀯𑀼𑀢𑁆𑀢𑀦𑀬𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀤𑀬𑁄 𑀦𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀲𑁂𑀲𑀸 𑀯𑀼𑀢𑁆𑀢𑀦𑀬𑀸 𑀏𑀯𑀸’’𑀢𑀺.

𑁮𑁪-𑁬. 𑀦𑀦𑀼 𑀘 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀲𑀼𑀔𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀺𑀝𑁆𑀞𑁂 𑀤𑀼𑀓𑁆𑀔𑀯𑁂𑀤𑀦𑀸, 𑀇𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂 𑀉𑀧𑁂𑀓𑁆𑀔𑀸𑀯𑁂𑀤𑀦𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀘 𑀓𑀼𑀲𑀮𑀯𑀺𑀧𑀸𑀓𑀸 𑀇𑀝𑁆𑀞𑁂, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀯𑀸 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀬𑀼𑀢𑁆𑀢𑁄 𑀢𑀸𑀯 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬𑁄𑀕𑁄, 𑀦 𑀧𑀦 𑀇𑀝𑁆𑀞𑀸𑀭𑀫𑁆𑀫𑀡𑁂, 𑀦 𑀘𑀸𑀧𑀺 𑀏𑀢𑀁 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀧𑀭𑀺𑀓𑀧𑁆𑀧𑀦𑀸𑀯𑀲𑁂𑀦 𑀇𑀝𑁆𑀞𑀸𑀭𑀫𑁆𑀫𑀡𑀫𑁆𑀧𑀺 𑀇𑀝𑁆𑀞𑀫𑀚𑁆𑀛𑀢𑁆𑀢𑀢𑁄 𑀕𑀡𑁆𑀳𑀦𑁆𑀢𑀺 𑀬𑀣𑀸 ‘‘𑀓𑀫𑁆𑀫𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀺𑀧𑀸𑀓𑀸𑀦𑀁 𑀅𑀯𑀜𑁆𑀘𑀦𑀻𑀬𑀪𑀸𑀯𑀢𑁄, 𑀢𑀲𑁆𑀫𑀸 𑀓𑀣𑀁 𑀇𑀝𑁆𑀞𑁂, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀘 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑁂𑀲𑀼 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬𑁂𑀯 𑀲𑀫𑁆𑀪𑀯𑀢𑀺, 𑀦 𑀲𑀼𑀔𑀯𑁂𑀤𑀦𑀸, 𑀬𑀢𑁄 𑀢𑁂𑀲𑀼 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀯𑀼𑀢𑁆𑀢𑀸𑀢𑀺 𑀇𑀫𑀁 𑀘𑁄𑀤𑀦𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀇𑀝𑁆𑀞𑀸𑀭𑀫𑁆𑀫𑀡𑀬𑁄𑀕𑀲𑁆𑀫𑀺’’𑀦𑁆𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀼𑀦 𑀢𑀲𑁆𑀲𑀸 𑀲𑁄𑀥𑀦𑀢𑁆𑀣𑀁 ‘‘𑀉𑀧𑀸𑀤𑀸𑀬 𑀘 𑀭𑀽𑀧𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀽𑀢𑀭𑀽𑀧𑀁 𑀉𑀧𑀸𑀤𑀸𑀬 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀭𑀽𑀧𑀁 𑀉𑀧𑀸𑀤𑀸𑀬𑀭𑀽𑀧𑀁. ‘‘𑀉𑀧𑀸𑀤𑀸𑀬 𑀘 𑀭𑀽𑀧𑁂𑀦𑀸’’𑀢𑀺 𑀧𑀦 ‘‘𑀫𑀦𑀲𑀻 𑀘 𑀓𑀸𑀭𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯. ‘‘𑀉𑀧𑀸𑀤𑀸𑀬𑀓𑀭𑀽𑀧𑁂𑀦𑀸’’𑀢𑀺 𑀯𑀸 𑀧𑀸𑀞𑁄, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼𑀪𑀽𑀢𑁂𑀦 𑀘𑀓𑁆𑀔𑀼𑀧𑀲𑀸𑀤𑁂𑀦, 𑀢𑀣𑀸 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑁂𑀦 𑀲𑁄𑀢𑀧𑀲𑀸𑀤𑀸𑀤𑀺𑀦𑀸 𑀘 𑀉𑀧𑀸𑀤𑀸𑀬𑀭𑀽𑀧𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀧𑀸𑀤𑀸𑀭𑀽𑀧𑀓𑁂 𑀧𑀦𑀸𑀢𑀺 𑀬-𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀬𑀣𑀸𑀓𑁆𑀓𑀫𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀆𑀭𑀫𑁆𑀫𑀡𑀪𑀽𑀢𑁂 𑀭𑀽𑀧𑀲𑀤𑁆𑀤𑀸𑀤𑀺𑀓𑁂 𑀉𑀧𑀸𑀤𑀸𑀬𑀭𑀽𑀧𑁂𑀢𑀺 𑀅𑀢𑁆𑀣𑁄. 𑀲𑀁𑀖𑀝𑁆𑀝𑀦𑀸𑀦𑀺𑀖𑀁𑀲𑀲𑁆𑀲𑀸𑀢𑀺 𑀲𑀁𑀖𑀝𑁆𑀝𑀦𑀸𑀲𑀗𑁆𑀔𑀸𑀢𑀲𑁆𑀲 𑀦𑀺𑀖𑀁𑀲𑀲𑁆𑀲. 𑀲𑀁𑀖𑀝𑁆𑀝𑀦𑀸𑀬𑁂𑀯 𑀅𑀜𑁆𑀜𑀫𑀜𑁆𑀜𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑀲𑁆𑀲 𑀅𑀦𑀼𑀭𑀽𑀧𑀤𑁂𑀲𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀦𑀺𑀖𑀁𑀲𑁄 𑀯𑀺𑀬𑀸𑀢𑀺 𑀦𑀺𑀖𑀁𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀲𑀫𑁆𑀧𑀢𑁆𑀢𑀸𑀲𑀫𑁆𑀧𑀢𑁆𑀢𑀕𑁆𑀕𑀳𑀡𑀯𑀲𑁂𑀦 𑀲𑀁𑀖𑀝𑁆𑀝𑀦𑀸𑀬 𑀦𑀺𑀖𑀁𑀲𑀲𑁆𑀲 𑀘𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀭𑀽𑀧𑀲𑁄𑀢𑀲𑀤𑁆𑀤𑀸 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀧𑀢𑁆𑀢𑀸𑀬𑁂𑀯 𑀅𑀦𑀼𑀭𑀽𑀧𑀤𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑀦𑁆𑀢𑀺 𑀦𑀸𑀫. 𑀢𑀢𑁄 𑀢𑁂𑀲𑀁 𑀯𑀲𑁂𑀦 𑀖𑀝𑁆𑀝𑀦𑀸𑀓𑀸𑀭𑀪𑀽𑀢𑁄 𑀅𑀜𑁆𑀜𑀫𑀜𑁆𑀜𑀸𑀪𑀺𑀫𑀼𑀔𑀪𑀸𑀯𑁄 ‘‘𑀲𑀁𑀖𑀝𑁆𑀝𑀦𑀸’’𑀢𑀺 𑀯𑀼𑀢𑁆𑀢𑁄. 𑀖𑀸𑀦𑀕𑀦𑁆𑀥𑀸, 𑀧𑀦 𑀚𑀺𑀯𑁆𑀳𑀸𑀭𑀲𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀢𑁆𑀢𑀸𑀬𑁂𑀯 𑀆𑀲𑀦𑁆𑀦𑀢𑀭𑀤𑁂𑀲𑁂 𑀉𑀧𑁆𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀦𑀺𑀖𑀁𑀲𑁂𑀦𑁆𑀢𑀺 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺. 𑀢𑀢𑁄 𑀢𑁂𑀲𑀁 𑀯𑀲𑁂𑀦 𑀦𑀺𑀖𑀁𑀲𑁄 𑀯𑀼𑀢𑁆𑀢𑁄𑀢𑀺. 𑀤𑀼𑀩𑁆𑀩𑀮𑀢𑁆𑀢𑀸𑀢𑀺 𑀅𑀥𑀺𑀓𑀭𑀡𑀻𑀫𑀢𑁆𑀣𑀓𑁂 𑀧𑀺𑀘𑀼𑀧𑀺𑀡𑁆𑀟𑀓𑀁 𑀞𑀧𑁂𑀢𑁆𑀯𑀸 𑀧𑀺𑀘𑀼𑀧𑀺𑀡𑁆𑀟𑁂𑀦𑁂𑀯 𑀧𑀳𑀢𑀓𑀸𑀮𑁂 𑀯𑀺𑀬 𑀨𑀼𑀝𑁆𑀞𑀫𑀢𑁆𑀢𑀪𑀸𑀯𑁂𑀦 𑀤𑀼𑀩𑁆𑀩𑀮𑀢𑁆𑀢𑀸. 𑀤𑀻𑀧𑀬𑁂𑀢𑀺 𑀏𑀯𑀁 𑀲𑀁𑀖𑀝𑁆𑀝𑀦𑀸𑀦𑀺𑀖𑀁𑀲𑀲𑁆𑀲 𑀤𑀼𑀩𑁆𑀩𑀮𑀢𑁆𑀢𑀸 𑀯𑁂𑀤𑀦𑀸 𑀫𑀚𑁆𑀛𑀢𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀉𑀧𑁂𑀓𑁆𑀔𑀸𑀬𑁄𑀕𑀁 𑀧𑀓𑀸𑀲𑁂𑀬𑁆𑀬. 𑀬𑀤𑀺 𑀏𑀯𑀁 𑀓𑀸𑀬𑀯𑀺𑀜𑁆𑀜𑀸𑀡𑁂𑀧𑀺 𑀇𑀤𑀁 𑀲𑀫𑀸𑀦𑀦𑁆𑀢𑀺, 𑀦𑁄𑀢𑀺 𑀆𑀳 ‘‘𑀧𑀲𑀸𑀤𑀁 𑀧𑀦𑀸’’𑀢𑀺𑀆𑀤𑀺. 𑀬𑀣𑀸 𑀳𑀺 𑀅𑀥𑀺𑀓𑀭𑀡𑀻𑀫𑀢𑁆𑀣𑀓𑁂 𑀓𑀧𑁆𑀧𑀸𑀲𑀧𑀺𑀘𑀼𑀧𑀺𑀡𑁆𑀟𑀁 𑀞𑀧𑁂𑀢𑁆𑀯𑀸 𑀓𑀽𑀝𑁂𑀦 𑀧𑀳𑀭𑀦𑁆𑀢𑀲𑁆𑀲 𑀓𑀽𑀝𑀁 𑀧𑀺𑀘𑀼𑀧𑀺𑀡𑁆𑀟𑀫𑀢𑀺𑀓𑁆𑀓𑀫𑁆𑀫 𑀅𑀥𑀺𑀓𑀭𑀡𑀺𑀁 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯𑀁 𑀓𑀸𑀬𑀤𑁆𑀯𑀸𑀭𑁂 𑀩𑀳𑀺𑀤𑁆𑀥𑀸 𑀫𑀳𑀸𑀪𑀽𑀢𑀸𑀭𑀫𑁆𑀫𑀡𑀁 𑀅𑀚𑁆𑀛𑀢𑁆𑀢𑀺𑀓𑀓𑀸𑀬𑀧𑀲𑀸𑀤𑀁 𑀖𑀝𑁆𑀝𑁂𑀢𑁆𑀯𑀸 𑀢𑀁 𑀅𑀢𑀺𑀓𑁆𑀓𑀫𑁆𑀫 𑀧𑀲𑀸𑀤𑀧𑀘𑁆𑀘𑀬𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀧𑀝𑀺𑀳𑀜𑁆𑀜𑀢𑀺, 𑀦𑀺𑀖𑀁𑀲𑁄 𑀩𑀮𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀇𑀝𑁆𑀞𑀸𑀭𑀫𑁆𑀫𑀡𑁂 𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀼𑀔𑀯𑁂𑀤𑀦𑀸 𑀳𑁄𑀢𑀺, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀤𑀼𑀓𑁆𑀔𑀯𑁂𑀤𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑀦𑁄𑀥𑀸𑀢𑀼𑀦𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀥𑀸𑀢𑀼-𑀲𑀤𑁆𑀤𑁄 𑀇𑀥 𑀇𑀢𑁆𑀣𑀺𑀮𑀺𑀗𑁆𑀕𑁂𑀬𑁂𑀯 𑀤𑀺𑀲𑁆𑀲𑀢𑀺, 𑀇𑀫𑀺𑀦𑀸𑀬𑁂𑀯 𑀧𑀦 𑀆𑀘𑀭𑀺𑀬𑀲𑁆𑀲 𑀯𑀘𑀦𑁂𑀦 𑀧𑀼𑀮𑁆𑀮𑀺𑀗𑁆𑀕𑁄 𑀅𑀢𑁆𑀣𑀻𑀢𑀺 𑀲𑀺𑀤𑁆𑀥𑀁. 𑀓𑁂𑀘𑀺 𑀧𑀦 ‘‘𑀲𑀓𑁆𑀓𑀝𑀯𑁄𑀳𑀸𑀭𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀲𑀫𑁆𑀧𑀬𑀼𑀢𑁆𑀢𑀸 𑀤𑀲 𑀥𑀫𑁆𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀯𑁂𑀢𑁆𑀣𑀸𑀢𑀺 𑀏𑀢𑁆𑀣 𑀯-𑀓𑀸𑀭𑁄 𑀧𑀤𑀲𑀦𑁆𑀥𑀺𑀫𑀢𑁆𑀢𑀓𑀭𑁄.

𑀓𑀸𑀬𑀯𑀺𑀜𑁆𑀜𑀸𑀡𑁂 𑀤𑀼𑀓𑁆𑀔𑀯𑁂𑀤𑀦𑀸𑀢𑀺 𑀓𑀺𑀜𑁆𑀘𑀸𑀧𑀺 𑀲𑀼𑀔𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀓𑀼𑀲𑀮𑀯𑀺𑀧𑀸𑀓𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑁄 𑀯𑀼𑀢𑁆𑀢𑁄, 𑀇𑀥 𑀧𑀦𑀲𑁆𑀲𑀸 𑀮𑀓𑁆𑀔𑀡𑀸𑀤𑀺𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 ‘‘𑀓𑀸𑀬𑀯𑀺𑀜𑁆𑀜𑀸𑀡𑁂 𑀤𑀼𑀓𑁆𑀔𑀯𑁂𑀤𑀦𑀸’’𑀢𑀺 𑀉𑀧𑀜𑁆𑀜𑀸𑀲𑁄 𑀓𑀢𑁄, 𑀭𑀲𑀸𑀤𑀬𑁄 𑀧𑀦𑀲𑁆𑀲 𑀓𑀼𑀲𑀮𑀯𑀺𑀧𑀸𑀓𑁂 𑀲𑀼𑀔𑀯𑁂𑀤𑀦𑀸𑀬 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀬𑁄𑀚𑁂𑀢𑀩𑁆𑀩𑀸𑀢𑀺 𑀇𑀥 𑀦 𑀯𑀼𑀢𑁆𑀢𑀸. 𑀲𑁂𑀲𑀸𑀢𑀺 𑀲𑁂𑀲𑀘𑁂𑀢𑀲𑀺𑀓𑀸.

𑀩𑀮𑀧𑁆𑀧𑀢𑁆𑀢𑁄𑀢𑀺 𑀲𑁂𑀲𑀸𑀳𑁂𑀢𑀼𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺𑀢𑁄 𑀅𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀬𑁄𑀕𑁂𑀦 𑀩𑀮𑀯𑀪𑀸𑀯𑀧𑁆𑀧𑀢𑁆𑀢𑁄, 𑀦 𑀧𑀦 𑀩𑀮𑀭𑀸𑀲𑀺𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀘𑁂𑀢𑀲𑀺𑀓𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑁂 ‘‘𑀩𑀮𑀸𑀦𑀺 𑀤𑁆𑀯𑁂 𑀤𑁆𑀯𑀺𑀘𑀺𑀢𑁆𑀢𑁂𑀲𑀽’’𑀢𑀺 𑀯𑀼𑀢𑁆𑀢𑀁? 𑀢𑀢𑁆𑀣 𑀳𑀺 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀬𑀼𑀕𑀴𑀁 𑀲𑀦𑁆𑀥𑀸𑀬 𑀢𑀣𑀸 𑀯𑀼𑀢𑁆𑀢𑀁. 𑀲𑀩𑁆𑀩𑀁 𑀲𑁂𑀲𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀯𑀺𑀪𑀗𑁆𑀕𑁂 𑁋

‘‘𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀻’’𑀢𑀺 (𑀥. 𑀲. 𑁧𑁧) 𑁋

𑀏𑀢𑁆𑀢𑀓𑀫𑁂𑀯 𑀯𑀢𑁆𑀯𑀸 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀬 𑀏𑀓𑀕𑁆𑀕𑀢𑀸𑀬 𑀯𑀺𑀪𑀗𑁆𑀕𑁂 𑁋

‘‘𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀺 𑀅𑀯𑀺𑀲𑀸𑀳𑀸𑀭𑁄 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸 𑀲𑀫𑀣𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀩𑀮’’𑀦𑁆𑀢𑀺 (𑀥. 𑀲. 𑁧𑁧) 𑁋

𑀩𑀮𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀯𑀺𑀪𑀚𑀺𑀢𑀢𑁆𑀢𑀸 𑀯𑀻𑀭𑀺𑀬𑀯𑀺𑀪𑀗𑁆𑀕𑁂 𑀘 𑁋

‘‘𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀺𑀓𑁆𑀓𑀫𑁄 𑀧𑀭𑀓𑁆𑀓𑀫𑁄 𑀉𑀬𑁆𑀬𑀸𑀫𑁄 𑀯𑀸𑀬𑀸𑀫𑁄 𑀉𑀲𑁆𑀲𑀸𑀳𑁄 𑀉𑀲𑁆𑀲𑁄𑀴𑁆𑀳𑀻 𑀣𑀸𑀫𑁄 𑀥𑀺𑀢𑀺 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀥𑀼𑀭𑀲𑀫𑁆𑀧𑀕𑁆𑀕𑀸𑀳𑁄 𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀩𑀮’’𑀦𑁆𑀢𑀺 (𑀥. 𑀲. 𑁧𑁩) 𑁋

𑀩𑀮𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀯𑀺𑀪𑀚𑀺𑀢𑀢𑁆𑀢𑀸 𑀯𑀺𑀪𑀗𑁆𑀕𑀯𑀸𑀭𑁂 𑀆𑀕𑀢𑀁 𑀲𑀫𑀸𑀥𑀺𑀩𑀮𑀁, 𑀯𑀻𑀭𑀺𑀬𑀩𑀮𑀜𑁆𑀘 𑀲𑀦𑁆𑀥𑀸𑀬 ‘‘𑀩𑀮𑀸𑀦𑀺 𑀤𑁆𑀯𑁂 𑀤𑁆𑀯𑀺𑀘𑀺𑀢𑁆𑀢𑁂𑀲𑀽’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁂 𑀩𑀮𑀭𑀸𑀲𑀺𑀬𑀁 𑀆𑀕𑀢𑀩𑀮𑀁 𑀲𑀦𑁆𑀥𑀸𑀬 𑀲𑀩𑁆𑀩𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀥𑀫𑁆𑀫𑀼𑀤𑁆𑀤𑁂𑀲𑀲𑁆𑀲 𑀫𑀕𑁆𑀕𑀭𑀸𑀲𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀻𑀦𑀢𑁆𑀢𑀸.

𑁮𑁭. 𑀯𑀺𑀧𑀸𑀓𑀓𑀺𑀭𑀺𑀬𑀸𑀳𑀤𑀬𑁂𑀳𑀻𑀢𑀺 𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑁂𑀳𑀺. 𑀳𑀤𑀬𑀁 𑀫𑀦𑁄 𑀫𑀸𑀦𑀲𑀁 𑀘𑀺𑀢𑁆𑀢𑀦𑁆𑀢𑀺 𑀳𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀲𑁄𑀪𑀦𑀁 𑀕𑀢𑀁 𑀕𑀫𑀦𑀫𑀲𑁆𑀲𑀸𑀢𑀺 𑀲𑀼𑀕𑀢𑁄. 𑀪𑀕𑀯𑀢𑁄 𑀳𑀺 𑀯𑀺𑀦𑁂𑀬𑁆𑀬𑀚𑀦𑀽𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 𑀲𑁄𑀪𑀦𑀁, 𑀢𑀣𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀥𑀼𑀢𑀯𑀺𑀮𑀫𑁆𑀩𑀺𑀢𑀸𑀤𑀺𑀤𑁄𑀲𑀭𑀳𑀺𑀢𑀁 𑀅𑀯𑀳𑀲𑀺𑀢𑀭𑀸𑀚𑀳𑀁𑀲𑀯𑀲𑀪𑀯𑀸𑀭𑀡𑀫𑀺𑀕𑀭𑀸𑀚𑀕𑀫𑀦𑀁 𑀓𑀸𑀬𑀕𑀫𑀦𑀁, 𑀜𑀸𑀡𑀕𑀫𑀦𑀜𑁆𑀘 𑀦𑀺𑀫𑁆𑀫𑀮𑀯𑀺𑀧𑀼𑀮𑀓𑀭𑀼𑀡𑀸𑀲𑀢𑀺𑀯𑀻𑀭𑀺𑀬𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀻𑀪𑀽𑀢𑀫𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺𑀁 𑀅𑀦𑀯𑀚𑁆𑀚𑀢𑀸𑀬 𑀲𑁄𑀪𑀦𑀫𑁂𑀯𑀸𑀢𑀺. 𑀅𑀣 𑀯𑀸 𑀲𑀓𑀮𑀫𑁆𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀧𑀭𑀺𑀚𑀸𑀦𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄, 𑀢𑀣𑀸 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀚𑀳𑀦𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀢𑀻𑀢𑁄𑀢𑀺 𑀲𑀼𑀕𑀢𑁄, 𑀮𑁄𑀓𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄, 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀁 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀧𑀢𑁆𑀢𑁄𑀢𑀺 𑀲𑀼𑀕𑀢𑁄. 𑀅𑀣 𑀯𑀸 𑀲𑀫𑁆𑀫𑀸 𑀕𑀤𑀢𑀻𑀢𑀺 𑀲𑀼𑀕𑀢𑁄. 𑀪𑀕𑀯𑀸 𑀳𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁 𑀯𑀺𑀦𑁂𑀬𑁆𑀬𑀸𑀦𑀁 𑀬𑀣𑀸𑀭𑀳𑀁 𑀓𑀸𑀮𑀬𑀼𑀢𑁆𑀢𑀫𑁂𑀯 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸 𑀕𑀤𑀢𑀻𑀢𑀺 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 ‘‘𑀲𑀼𑀕𑀢𑁄’’𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀕𑀢𑁄𑀢𑀺 𑀲𑀼𑀕𑀢𑁄, 𑀢𑁂𑀦 𑀲𑀼𑀕𑀢𑁂𑀦.

𑁮𑁮. ‘‘𑀅𑀯𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 𑀬𑁄 𑀪𑀺𑀓𑁆𑀔𑀼 𑀅𑀦𑀽𑀦𑀁 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀦𑀽𑀦𑀁 𑀲𑀼𑀧𑀭𑀺𑀧𑀼𑀡𑁆𑀡𑀁 𑀢𑀢𑁄𑀬𑁂𑀯 𑀧𑀭𑀫𑀁 𑀯𑀺𑀲𑀺𑀝𑁆𑀞𑀁 𑀇𑀫𑀁 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀁 𑀦𑀸𑀫 𑀧𑀓𑀭𑀡𑀁 𑀅𑀯𑀕𑀘𑁆𑀙𑀢𑀺 𑀅𑀯𑀩𑀼𑀚𑁆𑀛𑀢𑀺, 𑀲𑀫𑁆𑀫𑀸𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀲𑀫𑁆𑀧𑀸𑀤𑀦𑀯𑀲𑁂𑀦 𑀑𑀕𑀸𑀳𑀺𑀢𑁆𑀯𑀸 𑀚𑀸𑀦𑀸𑀢𑀺. 𑀅𑀣 𑀯𑀸 𑀧𑀭𑀫𑀦𑀬𑀤𑀻𑀧𑀦𑀢𑁄 𑀧𑀭𑀫𑀁 𑀇𑀫𑀁 𑀧𑀓𑀭𑀡𑀁 𑀬𑁄 𑀅𑀦𑀽𑀦𑀁 𑀓𑀢𑁆𑀯𑀸 𑀅𑀯𑀕𑀘𑁆𑀙𑀢𑀺 𑀚𑀸𑀦𑀸𑀢𑀺, 𑀢𑀲𑁆𑀲𑁂𑀯𑀁 𑀅𑀯𑀕𑀘𑁆𑀙𑀢𑁄 𑀬𑀣𑀸𑀲𑀪𑀸𑀯𑀁 𑀫𑀦𑀦𑀢𑁄 𑀫𑀢𑀺𑀲𑀗𑁆𑀔𑀸𑀢𑀸 𑀧𑀜𑁆𑀜𑀸 𑀤𑀼𑀭𑀸𑀲𑀤𑁂 𑀫𑀁𑀲𑀘𑀓𑁆𑀔𑀼𑀦𑀸 𑀧𑀭𑀫𑀸𑀡𑀼 𑀯𑀺𑀬 𑀮𑁄𑀓𑀺𑀬𑀜𑀸𑀡𑁂𑀦 𑀤𑀼𑀭𑀸𑀲𑀤𑁂 𑀤𑀼𑀭𑀸𑀥𑀺𑀕𑀦𑁆𑀢𑀩𑁆𑀩𑁂 𑀅𑀥𑀺𑀕𑀦𑁆𑀢𑀼𑀁 𑀤𑀼𑀓𑁆𑀓𑀭𑀢𑀭𑁂, 𑀅𑀢𑀺𑀕𑀫𑁆𑀪𑀻𑀭𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸𑀦𑀁 𑀭𑀸𑀳𑀼𑀆𑀤𑀻𑀳𑀺 𑀫𑀳𑀸𑀓𑀸𑀬𑁂𑀳𑀺𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀚𑁆𑀛𑁄𑀕𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀫𑀳𑀸𑀲𑀫𑀼𑀤𑁆𑀤𑁂 𑀯𑀺𑀬 𑀞𑀧𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀫𑀳𑀸𑀜𑀸𑀡𑁂𑀳𑀺 𑀲𑀸𑀯𑀓𑁂𑀳𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀚𑁆𑀛𑁄𑀕𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀭𑀽𑀧𑁂 𑀅𑀪𑀺𑀥𑀫𑁆𑀫𑀦𑀬𑁂 𑀯𑀺𑀚𑀫𑁆𑀪𑀢𑁂 𑀳𑁂𑀫𑀦𑁆𑀢𑀲𑀸𑀮𑀧𑀦𑁆𑀢𑀺 𑀯𑀺𑀬 𑀧𑀢𑁆𑀣𑀭𑀢𑀺, 𑀅𑀪𑀺𑀫𑀼𑀔𑀸𑀪𑀺𑀫𑀼𑀔𑁂𑀬𑁂𑀯 𑀥𑀫𑁆𑀫𑁂 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀅𑀢𑁆𑀣𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀺𑀦𑀺𑀬𑀸 𑀦𑀸𑀫

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀲𑀁𑀯𑀡𑁆𑀡𑀦𑀸𑀬

𑀘𑁂𑀢𑀲𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.