𑁧. 𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑁄

𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀡𑁆𑀡𑀦𑀸

𑁮. 𑀏𑀯𑀁 𑀢𑀸𑀯 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀸𑀤𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀭𑀤𑁆𑀥𑀧𑁆𑀧𑀓𑀭𑀡𑀲𑁆𑀲 𑀅𑀢𑁆𑀣𑀲𑀭𑀻𑀭𑀪𑀽𑀢𑀫𑀪𑀺𑀥𑀫𑁆𑀫𑀁 𑀲𑀗𑁆𑀔𑁂𑀧𑀢𑁄 𑀉𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀘𑀺𑀢𑁆𑀢𑀁 𑀘𑁂𑀢𑀲𑀺𑀓’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀘𑀺𑀢𑁆𑀢𑀲𑀤𑁆𑀤𑀲𑁆𑀲 𑀢𑀸𑀯 𑀯𑀘𑀦𑀢𑁆𑀣𑀁 𑀲𑀬𑀫𑁂𑀯 𑀅𑀦𑀦𑁆𑀢𑀭𑀁 𑀯𑀺𑀧𑀜𑁆𑀘𑁂𑀢𑀺. ‘‘𑀘𑁂𑀢𑀲𑀺𑀓’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀅𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦 𑀘𑁂𑀢𑀲𑀺 𑀘𑀺𑀢𑁆𑀢𑁂 𑀦𑀺𑀬𑀼𑀢𑁆𑀢𑀁, 𑀢𑀢𑁆𑀣 𑀯𑀸 𑀪𑀯𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀘𑁂𑀢𑀲𑀺𑀓𑀁, 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀭𑀼𑀧𑁆𑀧𑀢𑀺, 𑀭𑀽𑀧𑀻𑀬𑀢𑀻𑀢𑀺 𑀯𑀸 𑀭𑀽𑀧𑀁, 𑀲𑀻𑀢𑀼𑀡𑁆𑀳𑀸𑀤𑀻𑀳𑀺 𑀯𑀺𑀓𑀸𑀭𑀫𑀸𑀧𑀚𑁆𑀚𑀢𑀺, 𑀆𑀧𑀸𑀤𑀻𑀬𑀢𑀻𑀢𑀺 𑀅𑀢𑁆𑀣𑁄, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁, 𑀘𑀢𑀼𑀯𑀻𑀲𑀢𑀺𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘 𑀯𑀲𑁂𑀦 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀪𑀯𑀸𑀪𑀯𑀁 𑀯𑀺𑀦𑀦𑀢𑁄 𑀲𑀁𑀲𑀺𑀩𑁆𑀩𑀦𑀢𑁄 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀦 𑀯𑀺𑀚𑁆𑀚𑀢𑀺 𑀲𑀸 𑀏𑀢𑁆𑀣, 𑀢𑀢𑁄 𑀯𑀸 𑀦𑀺𑀓𑁆𑀔𑀦𑁆𑀢𑀁 𑀏𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀅𑀫𑀢𑀁 𑀅𑀲𑀗𑁆𑀔𑀢𑀁 𑀯𑀢𑁆𑀣𑀼. 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑁂. 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀢𑁆𑀢𑀭𑀺𑀢𑀭𑁄𑀢𑀺 𑀦𑀺𑀭𑀼𑀢𑁆𑀢𑀭𑁄. 𑀅𑀣 𑀯𑀸 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀳𑀸𑀭𑀢𑁆𑀢𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀢𑁆𑀢𑀭𑀁 𑀧𑀘𑁆𑀘𑀦𑀻𑀓𑀯𑀘𑀦𑀦𑁆𑀢𑀺 𑀦𑀺𑀭𑀼𑀢𑁆𑀢𑀭𑁄. 𑀜𑀸𑀡𑀧𑁆𑀧𑀳𑀸𑀦𑀅𑀦𑁆𑀢𑀭𑀸𑀬𑀦𑀺𑀬𑁆𑀬𑀸𑀦𑀺𑀓𑁂𑀲𑀼 𑀳𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀦 𑀓𑁄𑀘𑀺 𑀲𑀢𑁆𑀣𑀼 𑀲𑀳𑀥𑀫𑁆𑀫𑀺𑀓𑀁 𑀉𑀢𑁆𑀢𑀭𑀁 𑀯𑀘𑀦𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀅𑀢𑁆𑀣𑀻𑀢𑀺. 𑀢𑀢𑁆𑀭 𑀪𑀕𑀯𑀸 𑀉𑀢𑁆𑀭𑀸𑀲𑀸𑀪𑀸𑀯𑀢𑁄 𑀯𑀺𑀲𑀸𑀭𑀤𑁄𑀯 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀢𑀢𑁆𑀭 𑀯𑀢 𑀫𑀁 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀲𑀳𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑁂𑀲𑁆𑀲𑀢𑀻𑀢𑀺 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀏𑀢𑀫𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀦𑀺𑀫𑀺𑀢𑁆𑀢𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀔𑁂𑀫𑀧𑁆𑀧𑀢𑁆𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀯𑀺𑀳𑀭𑀸𑀫𑀺.

‘‘𑀔𑀻𑀡𑀸𑀲𑀯𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀇𑀫𑁂 𑀆𑀲𑀯𑀸 𑀅𑀧𑀭𑀺𑀓𑁆𑀔𑀻𑀡𑀸𑀢𑀺 𑀢𑀢𑁆𑀭 𑀯𑀢 𑀫𑀁…𑀧𑁂… 𑀯𑀺𑀳𑀭𑀸𑀫𑀺.

‘‘𑀬𑁂 𑀘 𑀔𑁄 𑀧𑀦 𑀢𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸𑀢𑀺 𑀢𑀢𑁆𑀭 𑀯𑀢 𑀫𑀁…𑀧𑁂… 𑀯𑀺𑀳𑀭𑀸𑀫𑀺.

‘‘𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀢𑀢𑁆𑀭 𑀯𑀢 𑀫𑀁…𑀧𑁂… 𑀯𑀺𑀳𑀭𑀸𑀫𑀻’’𑀢𑀺 (𑀫. 𑀦𑀺. 𑁧.𑁧𑁫𑁦).

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑀻𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑁄. 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑀯𑀲𑁂𑀦 𑀳𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀬𑀣𑀸𑀳, ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁩). 𑀢𑀢𑁆𑀣 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀅𑀦𑁂𑀓𑀼𑀧𑀤𑁆𑀤𑀯𑀸𑀥𑀺𑀝𑁆𑀞𑀸𑀦𑀢𑀸𑀬 𑀥𑀼𑀯𑀲𑀼𑀪𑀸𑀤𑀺𑀯𑀺𑀭𑀳𑁂𑀦, 𑀓𑀼𑀘𑁆𑀙𑀺𑀢𑀢𑀼𑀘𑁆𑀙𑀝𑁆𑀞𑁂𑀦 𑀘 𑀤𑀼𑀓𑁆𑀔𑀁 𑀦𑀸𑀫. 𑀓𑀫𑁆𑀫𑀸𑀤𑀺𑀯𑀺𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀪𑀸𑀯𑁂𑀦 𑀢𑀡𑁆𑀳𑀸 𑀲𑀫𑀼𑀤𑀬𑁄 𑀦𑀸𑀫 ‘‘𑀲𑀫𑁂𑀘𑁆𑀘 𑀉𑀤𑁂𑀢𑀺 𑀤𑀼𑀓𑁆𑀔𑀁 𑀇𑀫𑀲𑁆𑀫𑀸’’𑀢𑀺 𑀓𑀢𑁆𑀯𑀸. 𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀧𑀘𑁆𑀘𑀬𑀢𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀢𑀁 𑀧𑀦 𑀤𑀼𑀓𑁆𑀔𑀦𑀺𑀭𑁄𑀥𑀁 𑀆𑀮𑀫𑁆𑀩𑀡𑀓𑀭𑀡𑀯𑀲𑁂𑀦 𑀕𑀫𑀦𑀢𑁄 𑀧𑀸𑀧𑀼𑀡𑀦𑀢𑁄, 𑀢𑀤𑀥𑀺𑀕𑀫𑀸𑀬 𑀧𑀝𑀺𑀧𑀤𑀸𑀪𑀸𑀯𑀢𑁄 𑀘𑀸𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀲𑀘𑁆𑀘𑀝𑁆𑀞𑁄 𑀧𑀦 𑀢𑁂𑀲𑀁 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 ‘‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁦) 𑀯𑀺𑀢𑁆𑀣𑀸𑀭𑁄. 𑀏𑀢𑁆𑀣 𑀧𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀨𑀮𑀸𑀦𑀁, 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀲𑀘𑁆𑀘𑀯𑀺𑀦𑀺𑀲𑁆𑀲𑀝𑀪𑀸𑀯𑁂𑀧𑀺 𑀇𑀥 𑀫𑀕𑁆𑀕𑀦𑀺𑀩𑁆𑀩𑀸𑀦𑀧𑁆𑀧𑀓𑀸𑀲𑀦𑀢𑀸𑀯𑀘𑀦𑁂𑀦𑁂𑀯 𑀢𑀧𑁆𑀧𑀓𑀸𑀲𑀦𑀢𑁆𑀣𑀫𑁆𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀦𑀸𑀲𑀯𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸 𑀢𑀁𑀢𑀁𑀳𑁂𑀢𑀼𑀓𑀯𑀺𑀲𑀬𑀪𑀸𑀯𑀢𑁄 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀘 ‘‘𑀦𑀺𑀭𑀼𑀢𑁆𑀢𑀭𑁄 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑁄’’𑀢𑀺 𑀇𑀫𑁂𑀳𑀺 𑀪𑀕𑀯𑀢𑁄 𑀘𑀺𑀢𑁆𑀢𑀸𑀤𑀺𑀘𑀢𑀼𑀩𑁆𑀩𑀺𑀥𑀥𑀫𑁆𑀫𑀤𑁂𑀲𑀦𑀸𑀦𑀼𑀓𑀽𑀮𑀕𑀼𑀡𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺 𑀅𑀢𑀣𑀸𑀯𑀺𑀥𑀲𑁆𑀲 𑀢𑀁𑀤𑁂𑀲𑀦𑀸𑀲𑀸𑀫𑀢𑁆𑀣𑀺𑀬𑀸𑀬𑁄𑀕𑀢𑁄. 𑀅𑀣 𑀯𑀸 ‘‘𑀦𑀺𑀭𑀼𑀢𑁆𑀢𑀭𑁄’’𑀢𑀺 𑀯𑀘𑀦𑁂𑀦 𑀘𑀢𑀼𑀩𑁆𑀩𑀺𑀥𑀥𑀫𑁆𑀫𑀲𑁆𑀲 𑀅𑀦𑀜𑁆𑀜𑀣𑀢𑁆𑀢𑀁 𑀤𑀻𑀧𑁂𑀢𑀺. ‘‘𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑁄’’𑀢𑀺 𑀧𑀦 𑀇𑀫𑀺𑀦𑀸 𑀬𑁂 𑀢𑁂 𑀥𑀫𑁆𑀫𑀸 𑀪𑀕𑀯𑀢𑀸 𑀯𑀺𑀦𑁂𑀬𑁆𑀬𑀧𑀭𑀺𑀧𑀸𑀘𑀦𑀢𑁆𑀣𑀁 𑀤𑁂𑀲𑀺𑀢𑀸, 𑀦 𑀢𑁂 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀬𑁂 𑀧𑀦 𑀧𑀭𑀺𑀧𑀸𑀘𑀺𑀢𑁂𑀳𑀺 𑀢𑁂𑀳𑀺 𑀅𑀪𑀺𑀲𑀫𑁂𑀢𑀩𑁆𑀩𑀯𑀲𑁂𑀦 𑀤𑀼𑀓𑁆𑀔𑀸𑀤𑀬𑁄 𑀘𑀢𑀼𑀩𑁆𑀩𑀺𑀥𑀸 𑀯𑀼𑀢𑁆𑀢𑀸, 𑀢𑁂𑀬𑁂𑀯 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀣𑁂𑀦 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀲𑀗𑁆𑀔𑁂𑀧𑀢𑁄 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀉𑀤𑁆𑀤𑁂𑀲𑁄 𑀦𑀸𑀫 𑀦𑀺𑀤𑁆𑀤𑁂𑀲𑀢𑁆𑀣𑀸𑀬 𑀳𑁄𑀢𑀻𑀢𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑀥𑀫𑁆𑀫𑁂 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀢𑀢𑁆𑀣 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀺𑀢𑁆𑀢𑀸𑀤𑀻𑀲𑀼 𑀥𑀫𑁆𑀫𑁂𑀲𑀼. 𑀯𑀺𑀲𑀬𑀯𑀺𑀚𑀸𑀦𑀦𑀁 𑀘𑀺𑀢𑁆𑀢𑀦𑁆𑀢𑀺 𑀬𑀁 𑀯𑀺𑀲𑀬𑀲𑀗𑁆𑀔𑀸𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀯𑀺𑀚𑀸𑀦𑀦𑀁 𑀉𑀧𑀮𑀤𑁆𑀥𑀺, 𑀢𑀁 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀧𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀁, 𑀅𑀦𑀺𑀘𑁆𑀘𑀢𑀁, 𑀅𑀓𑀸𑀭𑀓𑀢𑀜𑁆𑀘 𑀤𑀻𑀧𑁂𑀢𑀺. ‘‘𑀯𑀺𑀲𑀬𑀯𑀺𑀚𑀸𑀦𑀦’’𑀦𑁆𑀢𑀺 𑀳𑀺 𑀆𑀭𑀫𑁆𑀫𑀡𑁂𑀦 𑀘𑀺𑀢𑁆𑀢𑀁 𑀉𑀧𑀮𑀓𑁆𑀔𑁂𑀦𑁆𑀢𑁄 𑀢𑀲𑁆𑀲 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀁, 𑀢𑀁𑀤𑀻𑀧𑀦𑁂𑀦 𑀘 𑀢𑀤𑀪𑀺𑀫𑀼𑀔𑀓𑀸𑀮𑁂𑀬𑁂𑀯 𑀉𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁄 𑀅𑀦𑀺𑀘𑁆𑀘𑀪𑀸𑀯𑀜𑁆𑀘 𑀤𑀻𑀧𑁂𑀢𑀺. 𑀪𑀸𑀯𑀦𑀺𑀤𑁆𑀤𑁂𑀲𑁂𑀦 𑀧𑀦 𑀯𑀺𑀚𑀸𑀦𑀦𑀫𑀢𑁆𑀢𑀤𑀻𑀧𑀦𑀢𑁄 𑀅𑀓𑀸𑀭𑀓𑀪𑀸𑀯𑀁. 𑀬𑀣𑀸𑀧𑀘𑁆𑀘𑀬𑀜𑁆𑀳𑀺 𑀧𑀯𑀢𑁆𑀢𑀺𑀫𑀢𑁆𑀢𑀫𑁂𑀯𑁂𑀢𑀁, 𑀬𑀤𑀺𑀤𑀁 𑀲𑀪𑀸𑀯𑀥𑀫𑁆𑀫𑁄 𑀦𑀸𑀫𑀸𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀩𑁆𑀩𑁂𑀲𑀫𑁆𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑀸𑀦𑀁 𑀪𑀸𑀯𑀲𑀸𑀥𑀦𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀮𑀩𑁆𑀪𑀢𑀺. 𑀬𑀁 𑀧𑀦 ‘‘𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁, 𑀢𑁂𑀦 𑀘𑀺𑀢𑁆𑀢𑀁 𑀯𑀺𑀘𑀭𑀢𑀻𑀢𑀺 𑀯𑀺𑀘𑀸𑀭𑁄’’𑀢𑀺𑀆𑀤𑀺𑀦𑀸 𑀓𑀢𑁆𑀢𑀼𑀓𑀭𑀡𑀯𑀲𑁂𑀦 𑀦𑀺𑀩𑁆𑀩𑀘𑀦𑀁 𑀯𑀼𑀘𑁆𑀘𑀢𑀺, 𑀢𑀁 𑀧𑀭𑀺𑀬𑀸𑀬𑀓𑀣𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀓𑀲𑀓𑀓𑀺𑀘𑁆𑀘𑁂𑀲𑀼 𑀳𑀺 𑀥𑀫𑁆𑀫𑀸𑀦𑀁 𑀅𑀢𑁆𑀢𑀧𑁆𑀧𑀥𑀸𑀦𑀢𑀸𑀲𑀫𑀸𑀭𑁄𑀧𑀦𑁂𑀦 𑀓𑀢𑁆𑀢𑀼𑀪𑀸𑀯𑁄, 𑀢𑀤𑀦𑀼𑀓𑀽𑀮𑀪𑀸𑀯𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑀫𑀽𑀳𑁂 𑀓𑀢𑁆𑀢𑀼𑀪𑀸𑀯𑀲𑀫𑀸𑀭𑁄𑀧𑀦𑁂𑀦 𑀓𑀭𑀡𑀢𑁆𑀢𑀜𑁆𑀘 𑀧𑀭𑀺𑀬𑀸𑀬𑀢𑁄𑀯 𑀮𑀩𑁆𑀪𑀢𑀻𑀢𑀺. 𑀢𑀣𑀸 𑀦𑀺𑀤𑀲𑁆𑀲𑀦𑀁 𑀧𑀦 𑀥𑀫𑁆𑀫𑀲𑀪𑀸𑀯𑀢𑁄 𑀅𑀜𑁆𑀜𑀲𑁆𑀲 𑀓𑀢𑁆𑀢𑀸𑀤𑀺𑀦𑁄 𑀅𑀪𑀸𑀯𑀧𑀭𑀺𑀤𑀻𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀯𑀺𑀲𑀬𑀯𑀺𑀚𑀸𑀦𑀦’’𑀦𑁆𑀢𑀺 𑀘 𑀏𑀢𑁂𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺𑀮𑀓𑁆𑀔𑀡𑀢𑀸 𑀯𑀼𑀢𑁆𑀢𑀸𑀢𑀺 𑀇𑀤𑀸𑀦𑀺𑀲𑁆𑀲 𑀭𑀲𑀸𑀤𑀻𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀩𑁆𑀩𑀗𑁆𑀕𑀫𑀭𑀲𑀜𑁆𑀳𑀺 𑀘𑀺𑀢𑁆𑀢𑀁 𑀲𑀦𑁆𑀥𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀁. 𑀤𑁆𑀯𑀸𑀭𑀁 𑀧𑀢𑁆𑀯𑀸 𑀢𑀤𑀸𑀭𑀫𑁆𑀫𑀡𑀜𑁆𑀳𑀺 𑀯𑀺𑀪𑀸𑀯𑀦𑀝𑁆𑀞𑁂𑀦 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀸𑀭𑀺𑀓𑀁. 𑀢𑀣𑀸 𑀳𑀺 𑀘𑀓𑁆𑀔𑀼𑀤𑁆𑀯𑀸𑀭𑁂𑀦 𑀤𑀝𑁆𑀞𑀩𑁆𑀩𑀁 𑀭𑀽𑀧𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑁂𑀦𑁂𑀯 𑀚𑀸𑀦𑀸𑀢𑀺…𑀧𑁂… 𑀫𑀦𑁄𑀤𑁆𑀯𑀸𑀭𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑁂𑀦𑁂𑀯 𑀚𑀸𑀦𑀸𑀢𑀺. 𑀬𑀣𑀸 𑀳𑀺 𑀦𑀕𑀭𑀕𑀼𑀢𑁆𑀢𑀺𑀓𑁄 𑀦𑀕𑀭𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀬𑀁 𑀦𑁂𑀯𑀸𑀲𑀺𑀓𑁄, 𑀅𑀬𑀁 𑀆𑀕𑀦𑁆𑀢𑀼𑀓𑁄’’𑀢𑀺 𑀆𑀕𑀢𑀸𑀕𑀢𑀁 𑀚𑀦𑀁 𑀉𑀧𑀥𑀸𑀭𑁂𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀫𑀸 𑀤𑁆𑀯𑀸𑀭𑀁 𑀧𑀢𑁆𑀯𑀸 𑀢𑀤𑀸𑀭𑀫𑁆𑀫𑀡𑀁 𑀯𑀺𑀪𑀸𑀯𑀦𑀝𑁆𑀞𑁂𑀦 𑀧𑀼𑀭𑁂𑀘𑀸𑀭𑀺𑀓𑀦𑁆𑀢𑀺 𑀧𑀼𑀩𑁆𑀩𑀗𑁆𑀕𑀫𑀭𑀲𑀁. 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀦𑀺𑀭𑀦𑁆𑀢𑀭𑀁 𑀓𑀢𑁆𑀯𑀸 𑀲𑀦𑁆𑀤𑀳𑀫𑀸𑀦𑀫𑀺𑀯 𑀉𑀧𑀝𑁆𑀞𑀸𑀢𑀺, 𑀕𑀳𑀡𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀲𑀦𑁆𑀥𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀜𑁆𑀘𑀯𑁄𑀓𑀸𑀭𑁂 𑀧𑀦𑀲𑁆𑀲 𑀦𑀺𑀬𑀫𑀢𑁄 𑀦𑀸𑀫𑀭𑀽𑀧𑀁, 𑀘𑀢𑀼𑀯𑁄𑀓𑀸𑀭𑀪𑀯𑁂 𑀦𑀸𑀫𑀫𑁂𑀯 𑀧𑀤𑀝𑁆𑀞𑀸𑀦𑀦𑁆𑀢𑀺 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀜𑁆𑀘 𑀳𑁄𑀢𑀺. 𑀦𑀸𑀦𑀢𑁆𑀢𑀁 𑀧𑀦 𑀮𑀓𑁆𑀔𑀡𑀸𑀤𑀻𑀦𑀁 𑀉𑀧𑀭𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀓𑁆𑀔𑀢𑀺 𑀳𑀺 𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑁋

‘‘𑀲𑀸𑀫𑀜𑁆𑀜𑀁 𑀯𑀸 𑀲𑀪𑀸𑀯𑁄 𑀯𑀸, 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀁 𑀫𑀢𑀁;

𑀓𑀺𑀘𑁆𑀘𑀁 𑀯𑀸 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺, 𑀭𑀲𑁄𑀢𑀺 𑀧𑀭𑀺𑀤𑀻𑀧𑀺𑀢𑁄.

‘‘𑀨𑀮𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀉𑀧𑀝𑁆𑀞𑀸𑀦𑀦𑀬𑁄𑀧𑀺 𑀯𑀸;

𑀆𑀲𑀦𑁆𑀦𑀓𑀸𑀭𑀡𑀁 𑀬𑀁 𑀢𑀼, 𑀢𑀁 𑀧𑀤𑀝𑁆𑀞𑀸𑀦𑀲𑀜𑁆𑀜𑀺𑀢’’𑀦𑁆𑀢𑀺. (𑀅𑀪𑀺𑀥. 𑁬𑁩𑁩-𑁬𑁩𑁪);

𑀬𑀢𑁆𑀣 𑀬𑀢𑁆𑀣 𑀧𑀦 𑀮𑀓𑁆𑀔𑀡𑀸𑀤𑀻𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀇𑀫𑀺𑀦𑀸𑀯 𑀦𑀬𑁂𑀦 𑀢𑁂𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀯𑀘𑀦𑀢𑁆𑀣𑀯𑀺𑀚𑀸𑀦𑀦𑁂𑀦 𑀯𑀺𑀤𑀺𑀢𑀘𑀺𑀢𑁆𑀢𑀲𑀸𑀫𑀜𑁆𑀜𑀲𑁆𑀲 𑀉𑀢𑁆𑀢𑀭𑀺 𑀘𑀺𑀢𑁆𑀢𑀯𑀺𑀪𑀸𑀕𑁄 𑀯𑀼𑀘𑁆𑀘𑀫𑀸𑀦𑁄 𑀲𑁄𑀪𑁂𑀬𑁆𑀬𑀸𑀢𑀺 𑀯𑀘𑀦𑀢𑁆𑀣𑀯𑀺𑀚𑀸𑀦𑀦𑀫𑁂𑀯 𑀢𑀸𑀯 𑀆𑀤𑀺𑀫𑁆𑀳𑀺 𑀬𑀼𑀢𑁆𑀢𑀢𑀭𑀦𑁆𑀢𑀺 𑀢𑀁 𑀢𑀸𑀯 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀧𑀼𑀘𑁆𑀙𑀢𑀺 ‘‘𑀢𑀲𑁆𑀲 𑀧𑀦 𑀓𑁄 𑀯𑀘𑀦𑀢𑁆𑀣𑁄’’𑀢𑀺. 𑀧𑀜𑁆𑀘𑀯𑀺𑀥𑀸 𑀳𑀺 𑀧𑀼𑀘𑁆𑀙𑀸 𑁋 (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁪𑁪𑁯; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁧; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦) 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺. 𑀢𑀢𑁆𑀣 𑀬𑀁 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁, 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀧𑀜𑁆𑀳𑀸𑀓𑀭𑀡𑀁 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸 𑀦𑀸𑀫. 𑀬𑀁 𑀧𑀦 𑀜𑀸𑀢𑀁 𑀤𑀺𑀝𑁆𑀞𑀁, 𑀢𑀲𑁆𑀲 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀁𑀲𑀦𑁆𑀤𑀦𑀢𑁆𑀣𑀸𑀬 𑀧𑀜𑁆𑀳𑀸𑀓𑀭𑀡𑀁 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀦𑀸𑀫. 𑀧𑀓𑀢𑀺𑀬𑀸 𑀧𑀦 𑀲𑀁𑀲𑀬𑀧𑀓𑁆𑀔𑀦𑁆𑀤𑀦𑀲𑁆𑀲 𑀅𑀢𑁆𑀢𑀦𑁄 𑀲𑀁𑀲𑀬𑀲𑀫𑀼𑀕𑁆𑀖𑀸𑀝𑀦𑀢𑁆𑀣𑀁 𑀧𑀜𑁆𑀳𑀸𑀓𑀭𑀡𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸 𑀦𑀸𑀫. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺? 𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁭𑁯; 𑀫𑀳𑀸𑀯. 𑁨𑁧) 𑀅𑀦𑀼𑀫𑀢𑀺𑀕𑁆𑀕𑀳𑀡𑀢𑁆𑀣𑀁 𑀧𑀜𑁆𑀳𑀸𑀓𑀭𑀡𑀁 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀦𑀸𑀫. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁭𑁩; 𑀲𑀁. 𑀦𑀺. 𑁫.𑁪𑁦𑁨-𑁪𑁦𑁪) 𑀧𑀦 𑀢𑀁𑀢𑀁𑀥𑀫𑁆𑀫𑀸𑀦𑀁 𑀤𑁂𑀲𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀜𑁆𑀳𑀸𑀓𑀭𑀡𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸 𑀦𑀸𑀫.

𑀢𑀸𑀲𑀼 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄 𑀆𑀘𑀭𑀺𑀬𑀸𑀦𑀁 𑀦 𑀲𑀫𑁆𑀪𑀯𑀦𑁆𑀢𑀺. 𑀦 𑀳𑀺 𑀢𑁂 𑀕𑀦𑁆𑀣𑀓𑀭𑀡𑀢𑁆𑀣𑀸𑀬 𑀆𑀭𑀪𑀺𑀢𑁆𑀯𑀸 𑀇𑀤𑀸𑀦𑀺 𑀅𑀤𑀺𑀝𑁆𑀞𑀁 𑀚𑁄𑀢𑁂𑀦𑁆𑀢𑀺, 𑀤𑀺𑀝𑁆𑀞𑀁 𑀲𑀁𑀲𑀦𑁆𑀤𑁂𑀦𑁆𑀢𑀺, 𑀲𑀁𑀲𑀬𑀁 𑀯𑀸 𑀧𑀓𑁆𑀔𑀦𑁆𑀤𑀦𑁆𑀢𑀺 𑀢𑀩𑁆𑀩𑀺𑀲𑁄𑀥𑀦𑀧𑀼𑀩𑁆𑀩𑀓𑀫𑁂𑀯 𑀕𑀦𑁆𑀣𑀓𑀭𑀡𑁂 𑀅𑀪𑀺𑀦𑀺𑀯𑁂𑀲𑀦𑀢𑁄. 𑀇𑀢𑀭𑀸 𑀧𑀦 𑀤𑁆𑀯𑁂 𑀲𑀫𑁆𑀪𑀯𑀦𑁆𑀢𑀺. 𑀢𑀸𑀲𑀼 𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀅𑀧𑀺𑀘 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀸 𑀆𑀘𑀭𑀺𑀬𑀸 𑀅𑀜𑁆𑀜𑀁 𑀘𑁄𑀤𑀓𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀢𑀲𑁆𑀲 𑀯𑀘𑀦𑀯𑀲𑁂𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀢𑀁𑀯𑀲𑁂𑀦𑁂𑀢𑁆𑀣 𑀅𑀤𑀺𑀝𑁆𑀞𑀚𑁄𑀢𑀦𑀸𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸𑀧𑀺 𑀮𑀩𑁆𑀪𑀦𑁆𑀢𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀘𑀺𑀢𑁆𑀢-𑀲𑀤𑁆𑀤𑀲𑁆𑀲. 𑀘𑀺𑀢𑁆𑀢𑁂 𑀳𑀺 𑀅𑀥𑀺𑀕𑀢𑁂 𑀢𑀲𑁆𑀲 𑀯𑀸𑀘𑀓𑁄 𑀲𑀤𑁆𑀤𑁄𑀧𑀺 𑀲𑀳𑀘𑀭𑀺𑀬𑀢𑁄 𑀅𑀥𑀺𑀕𑀢𑁄𑀯 𑀳𑁄𑀢𑀻𑀢𑀺 𑀢𑀲𑁆𑀲 𑀇𑀥 𑀢-𑀲𑀤𑁆𑀤𑁂𑀦 𑀧𑀭𑀺𑀕𑁆𑀕𑀳𑁄. 𑀓𑁂𑀘𑀺 𑀧𑀦 ‘‘𑀢𑀲𑁆𑀲 𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 ‘‘𑀢𑀲𑁆𑀲 𑀓𑁄 𑀯𑀘𑀦𑀢𑁆𑀣𑁄’’𑀢𑀺 𑀇𑀫𑀺𑀦𑀸 𑀦 𑀲𑀫𑁂𑀢𑀺. 𑀦 𑀳𑀺 𑀘𑀺𑀢𑁆𑀢𑀲𑁆𑀲 ‘‘𑀓𑁄 𑀯𑀘𑀦𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀸 𑀲𑀫𑁆𑀪𑀯𑀢𑀻𑀢𑀺.

𑀇𑀤𑀸𑀦𑀺 𑀬𑀣𑀸𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀯𑀼𑀘𑁆𑀘𑀢𑁂’’𑀢𑀺 𑀢𑀸𑀯 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 ‘‘𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀫𑀸𑀭𑀤𑁆𑀥𑀁. 𑀢𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦𑀸𑀢𑀺 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀉𑀧𑀸𑀤𑀸𑀬 𑀲𑀩𑁆𑀩𑁂𑀲𑀁 𑀆𑀭𑀫𑁆𑀫𑀡𑀯𑀺𑀚𑀸𑀦𑀦𑀲𑀪𑀸𑀯𑀢𑁆𑀢𑀸 𑀢𑁂𑀲𑀁 𑀲𑀩𑁆𑀩𑁂𑀲𑀫𑁂𑀯 𑀲𑀗𑁆𑀕𑀸𑀳𑀓𑀯𑀲𑁂𑀦, 𑀦 𑀧𑀦 𑀯𑀓𑁆𑀔𑀫𑀸𑀦𑀦𑀺𑀩𑁆𑀩𑀘𑀦𑁂𑀲𑀼 𑀯𑀺𑀬 𑀬𑀣𑀸𑀮𑀸𑀪𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀘𑀺𑀦𑁆𑀢𑁂𑀢𑀻𑀢𑀺 𑀯𑀺𑀚𑀸𑀦𑀸𑀢𑀺. 𑀘𑀺𑀦𑁆𑀢𑁂𑀦𑁆𑀢𑀺 𑀢𑁂𑀦 𑀕𑁄𑀘𑀭𑀦𑁆𑀢𑀺 𑀯𑀸 𑀘𑀺𑀢𑁆𑀢𑀁. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀓𑀢𑁆𑀢𑀼𑀢𑀸𑀲𑀫𑀸𑀭𑁄𑀧𑀦𑁂𑀦 𑀳𑀺𑀲𑁆𑀲 𑀓𑀭𑀡𑀪𑀸𑀯𑁄 𑀮𑀩𑁆𑀪𑀢𑀺. 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀢𑀸𑀯 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀮𑀸𑀪𑀯𑀲𑁂𑀦𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀲𑀦𑁆𑀢𑀸𑀦𑀁 𑀯𑀸 𑀘𑀺𑀦𑁄𑀢𑀻𑀢𑀺𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀳𑀺 𑀘𑀺𑀢𑁆𑀢-𑀲𑀤𑁆𑀤𑀲𑁆𑀲 𑀬𑀢𑁆𑀣 𑀬𑀢𑁆𑀣 𑀬𑀣𑀸 𑀬𑀣𑀸 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀣𑀸 𑀢𑀣𑀸 𑀕𑀳𑁂𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀯𑀺𑀲𑁂𑀲𑁄 𑀦 𑀮𑀩𑁆𑀪𑀢𑀺, 𑀢𑀁 𑀭𑀼𑀴𑁆𑀳𑀻𑀯𑀲𑁂𑀦 𑀘𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀓𑀺𑀮𑀜𑁆𑀚𑀸𑀤𑀻𑀳𑀺 𑀓𑀢𑀫𑁆𑀧𑀺 𑀢𑀸𑀮𑀧𑀡𑁆𑀡𑁂𑀳𑀺 𑀓𑀢𑀲𑀭𑀺𑀓𑁆𑀔𑀓𑀢𑀸𑀬 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 ‘‘𑀢𑀸𑀮𑀯𑀡𑁆𑀝’’𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺. 𑀅𑀢𑁆𑀢𑀲𑀦𑁆𑀢𑀸𑀦𑀦𑁆𑀢𑀺 𑀲𑀓𑀲𑀦𑁆𑀢𑀸𑀦𑀁, 𑀚𑀯𑀦𑀲𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢-𑀲𑀤𑁆𑀤𑀲𑁆𑀲 𑀳𑀺 𑀧𑀭𑀧𑀘𑁆𑀘𑀦𑀻𑀓𑀯𑀘𑀦𑀢𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁄𑀢𑀺 𑀲𑀤𑀺𑀲𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀚𑀯𑀦𑀲𑀦𑁆𑀢𑀸𑀦𑁄 𑀯𑀼𑀘𑁆𑀘𑀢𑀺. 𑀢𑀁 𑀘𑀺𑀦𑁄𑀢𑀺 𑀭𑀸𑀲𑀺𑀁 𑀓𑀭𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀲𑀸𑀲𑁂𑀯𑀦𑀓𑀸𑀦𑀁 𑀚𑀯𑀦𑀘𑀺𑀢𑁆𑀢𑀸𑀦𑀁 𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀢𑀸𑀦𑀺 𑀳𑀺 𑀧𑀼𑀭𑁂𑀚𑀸𑀢𑀸𑀦𑀺 𑀧𑀘𑁆𑀙𑀸𑀚𑀸𑀢𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀚𑀯𑀦𑀲𑀦𑁆𑀢𑀸𑀦𑀲𑁆𑀲 𑀧𑀕𑀼𑀡𑀩𑀮𑀯𑀪𑀸𑀯𑀓𑀭𑀡𑁂𑀦 𑀢𑀁 𑀘𑀺𑀦𑀦𑁆𑀢𑀺 𑀦𑀸𑀫. 𑀯𑀸-𑀲𑀤𑁆𑀤𑁄 𑀅𑀲𑀩𑁆𑀩𑀲𑀗𑁆𑀕𑀸𑀳𑀓𑀢𑁆𑀣𑀯𑀺𑀓𑀧𑁆𑀧𑀦𑁂. 𑀧𑀺-𑀲𑀤𑁆𑀤𑁄 𑀓𑀺𑀭𑀺𑀬𑀸𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁂. 𑀅𑀣 𑀯𑀸 ‘‘𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦𑀸’’𑀢𑀺 𑀇𑀫𑀲𑁆𑀲 𑀇𑀥𑀸𑀧𑀺 𑀲𑀫𑁆𑀩𑀦𑁆𑀥𑁄 𑀳𑁄𑀢𑀻𑀢𑀺 𑀇𑀤𑀫𑁆𑀧𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀬𑁆𑀳𑀫𑀸𑀦𑁂 𑀅𑀢𑁆𑀢𑀲𑀦𑁆𑀢𑀸𑀦𑀦𑁆𑀢𑀺 𑀯𑀺𑀜𑁆𑀜𑀸𑀡𑀯𑀘𑀦𑀲𑁆𑀲 𑀅𑀢𑁆𑀢-𑀲𑀤𑁆𑀤𑀲𑁆𑀲 𑀲𑀓𑀢𑁆𑀣𑀯𑀼𑀢𑁆𑀢𑀺𑀢𑁆𑀢𑀸𑀬𑁂𑀯 𑀢𑀁𑀯𑀲𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀳𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀧𑁆𑀧𑀯𑀢𑁆𑀢𑀺𑀓𑀭𑀡𑀢𑁄 𑀲𑀩𑁆𑀩𑀫𑁂𑀯 𑀘𑀺𑀢𑁆𑀢𑀚𑀸𑀢𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀘𑀺𑀦𑁄𑀢𑀺 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀯𑀸-𑀲𑀤𑁆𑀤𑁄 𑀓𑀺𑀭𑀺𑀬𑀸𑀯𑀺𑀓𑀧𑁆𑀧𑀦𑀢𑁆𑀣𑁄. 𑀧𑀺-𑀲𑀤𑁆𑀤𑁄 ‘‘𑀘𑀺𑀢𑁆𑀢’’𑀦𑁆𑀢𑀺 𑀇𑀫𑀲𑁆𑀲 𑀆𑀓𑀟𑁆𑀠𑀦𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀫𑀧𑀓𑁆𑀔𑁂 𑀧𑀦 𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀓𑀸𑀭𑀢𑁄𑀯 𑀕𑀳𑁂𑀢𑀩𑁆𑀩𑀁.

𑁯. 𑀯𑀺𑀘𑀺𑀢𑁆𑀢𑀁 𑀓𑀭𑁄𑀢𑀺, 𑀯𑀺𑀘𑀺𑀢𑁆𑀢𑀲𑁆𑀲 𑀯𑀸 𑀓𑀭𑀡𑀦𑁆𑀢𑀺 𑀯𑀺𑀘𑀺𑀢𑁆𑀢𑀓𑀭𑀡𑀁, 𑀢𑀢𑁄 𑀯𑀺𑀘𑀺𑀢𑁆𑀢𑀓𑀭𑀡𑀸, 𑀯𑀺𑀘𑀺𑀢𑁆𑀢𑀘𑀺𑀢𑁆𑀢𑀓𑀫𑁆𑀫𑀸𑀤𑀻𑀦𑀁 𑀓𑀭𑀡𑀢𑁄𑀢𑀺 𑀅𑀢𑁆𑀣𑁄. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀬𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀪𑁂𑀤𑀁 𑀯𑀺𑀘𑀺𑀢𑁆𑀢𑀁 𑀲𑀺𑀧𑁆𑀧𑀚𑀸𑀢𑀁, 𑀲𑀩𑁆𑀩𑀁 𑀢𑀁 𑀘𑀺𑀢𑁆𑀢𑁂𑀦𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀓𑀭𑀻𑀬𑀢𑀻𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀤𑀺𑀝𑁆𑀞𑀁 𑀯𑁄, 𑀪𑀺𑀓𑁆𑀔𑀯𑁂, 𑀘𑀭𑀡𑀁 𑀦𑀸𑀫 𑀘𑀺𑀢𑁆𑀢𑀦𑁆𑀢𑀺? 𑀏𑀯𑀁, 𑀪𑀦𑁆𑀢𑁂. 𑀢𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀭𑀡𑀁 𑀦𑀸𑀫 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦𑁂𑀯 𑀘𑀺𑀦𑁆𑀢𑀺𑀢’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁦𑁦). 𑀲𑁆𑀯𑀸𑀬𑀫𑀢𑁆𑀣𑁄 𑀲𑀯𑀺𑀜𑁆𑀜𑀢𑁆𑀢𑀺𑀓𑀸𑀦𑀁 𑀩𑀸𑀢𑁆𑀢𑀺𑀁𑀲𑀘𑀺𑀢𑁆𑀢𑀸𑀦𑀫𑀼𑀧𑀮𑀩𑁆𑀪𑀢𑀺. 𑀲𑀸𑀲𑀯𑀓𑀼𑀲𑀮𑀸𑀓𑀼𑀲𑀮𑀁 𑀯𑀸 𑀯𑀺𑀘𑀺𑀢𑁆𑀢𑀕𑀢𑀺𑀆𑀤𑀺𑀓𑀭𑀡𑀢𑁄 𑀯𑀸 𑀯𑀺𑀘𑀺𑀢𑁆𑀢𑀓𑀭𑀡𑀝𑁆𑀞𑁂𑀦 𑀘𑀺𑀢𑁆𑀢𑀁. 𑀦𑀦𑀼 𑀘 𑀯𑀺𑀘𑀺𑀢𑁆𑀢𑀕𑀢𑀺𑀆𑀤𑀬𑁄 𑀓𑀫𑁆𑀫𑀯𑀲𑁂𑀦 𑀦𑀺𑀧𑁆𑀨𑀚𑁆𑀚𑀦𑁆𑀢𑀺. 𑀬𑀣𑀸𑀳 𑁋

‘‘𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸𑀦𑀁 𑀕𑀢𑀺𑀬𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺 𑀅𑀧𑀤𑀸 𑀤𑁆𑀯𑀺𑀧𑀤𑀸 𑀘𑀢𑀼𑀧𑁆𑀧𑀤𑀸 𑀩𑀳𑀼𑀧𑁆𑀧𑀤𑀸 𑀭𑀽𑀧𑀺𑀦𑁄 𑀅𑀭𑀽𑀧𑀺𑀦𑁄 𑀲𑀜𑁆𑀜𑀺𑀦𑁄 𑀅𑀲𑀜𑁆𑀜𑀺𑀦𑁄 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀦𑁄, 𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸𑀦𑀁 𑀉𑀧𑀧𑀢𑁆𑀢𑀺𑀬𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺 𑀉𑀘𑁆𑀘𑀦𑀻𑀘𑀢𑀸 𑀳𑀻𑀦𑀧𑀡𑀻𑀢𑀢𑀸 𑀲𑀼𑀕𑀢𑀤𑀼𑀕𑁆𑀕𑀢𑀢𑀸, 𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑁂 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀢𑀸 𑀲𑀼𑀚𑀸𑀢𑀤𑀼𑀚𑁆𑀚𑀸𑀢𑀢𑀸 𑀲𑀼𑀲𑀡𑁆𑀞𑀺𑀢𑀤𑀼𑀲𑁆𑀲𑀡𑁆𑀞𑀺𑀢𑀢𑀸, 𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸𑀦𑀁 𑀮𑁄𑀓𑀥𑀫𑁆𑀫𑁂 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺 𑀮𑀸𑀪𑀸𑀮𑀸𑀪𑁂 𑀬𑀲𑀸𑀬𑀲𑁂 𑀦𑀺𑀦𑁆𑀤𑀸𑀧𑀲𑀁𑀲𑀸𑀬𑀁 𑀲𑀼𑀔𑀤𑀼𑀓𑁆𑀔𑁂’’𑀢𑀺 (𑀥. 𑀲. 𑀅𑀝𑁆𑀞. 𑁧).

𑀢𑀲𑁆𑀫𑀸 𑀓𑀫𑁆𑀫𑀪𑁂𑀤𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀕𑀢𑀺𑀆𑀤𑀻𑀦𑀁 𑀘𑀺𑀢𑁆𑀢𑀢𑀸. 𑀓𑀫𑁆𑀫𑀦𑁆𑀢𑀺 𑀘 𑀘𑁂𑀢𑀲𑀺𑀓𑀥𑀫𑁆𑀫𑀪𑀽𑀢𑀸 𑀘𑁂𑀢𑀦𑀸, 𑀅𑀪𑀺𑀚𑁆𑀛𑀸𑀤𑀬𑁄 𑀘 𑀯𑀼𑀘𑁆𑀘𑀦𑁆𑀢𑀺, 𑀦 𑀘𑀺𑀢𑁆𑀢𑀦𑁆𑀢𑀺. 𑀓𑀣𑀁 𑀘𑀺𑀢𑁆𑀢𑀲𑁆𑀲 𑀯𑀺𑀘𑀺𑀢𑁆𑀢𑀕𑀢𑀺𑀆𑀤𑀺𑀓𑀭𑀡𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀓𑀫𑁆𑀫𑀲𑁆𑀲 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀢𑀦𑁆𑀦𑀺𑀧𑁆𑀨𑀸𑀤𑀺𑀢𑀫𑁆𑀧𑀺 𑀘𑀺𑀢𑁆𑀢𑁂𑀦𑁂𑀯 𑀓𑀢𑀁 𑀳𑁄𑀢𑀺, 𑀬𑀣𑀸 𑀭𑀸𑀚𑀬𑁄𑀥𑁂𑀦 𑀧𑀭𑀸𑀚𑀺𑀢𑁄 𑀲𑀢𑁆𑀢𑀼𑀭𑀜𑁆𑀜𑀸 𑀚𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀘𑀺𑀢𑁆𑀢𑀁 𑀓𑀭𑀡𑀫𑀲𑁆𑀲𑀸𑀢𑀺 𑀯𑀸 𑀯𑀺𑀘𑀺𑀢𑁆𑀢𑀓𑀭𑀡𑀁. 𑀢𑀢𑁄 𑀏𑀓𑀝𑁆𑀞𑀸𑀦𑀺𑀓𑀯𑀚𑁆𑀚𑀺𑀢𑀜𑁆𑀳𑀺 𑀘𑀺𑀢𑁆𑀢𑀁 𑀧𑀘𑁆𑀘𑁂𑀓𑀁 𑀧𑀝𑀺𑀲𑀦𑁆𑀥𑀸𑀤𑀺𑀯𑀺𑀘𑀺𑀢𑁆𑀢𑀓𑀺𑀭𑀺𑀬𑀯𑀦𑁆𑀢𑀢𑀸𑀬, 𑀲𑀩𑁆𑀩𑀫𑁂𑀯 𑀯𑀸 𑀘𑀺𑀢𑁆𑀢𑀁 𑀆𑀯𑀚𑁆𑀚𑀦𑀸𑀤𑀺𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑀓𑀺𑀭𑀺𑀬𑀯𑀦𑁆𑀢𑀢𑀸𑀬 𑀯𑀺𑀘𑀺𑀢𑁆𑀢𑀓𑀭𑀡𑀁 𑀬𑀼𑀢𑁆𑀢𑀦𑁆𑀢𑀺. 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀼𑀧𑀺 ‘‘𑀭𑀽𑀧𑀪𑀯𑁄 𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀉𑀢𑁆𑀢𑀭𑀧𑀤𑀮𑁄𑀧𑁄 𑀘𑀺𑀢𑁆𑀢𑀧𑀭𑀺𑀬𑀸𑀬𑁂𑀦 𑀘 𑀯𑀺𑀘𑀺𑀢𑁆𑀢-𑀲𑀤𑁆𑀤𑁂𑀦 𑀯𑀸 𑀯𑀺𑀕𑁆𑀕𑀳𑁄 𑀯𑀺-𑀲𑀤𑁆𑀤𑀮𑁄𑀧𑁄 𑀯𑀸 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 ‘‘𑀯𑀺𑀘𑀺𑀢𑁆𑀢𑀓𑀭𑀡𑀸’’𑀢𑀺 𑀇𑀤𑀁 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀪𑀸𑀯𑀲𑁆𑀲 𑀜𑀸𑀧𑀓𑀳𑁂𑀢𑀼𑀦𑀺𑀤𑀲𑁆𑀲𑀦𑀁. 𑀢𑁂𑀦 𑀬𑀲𑁆𑀫𑀸 𑀇𑀤𑀁 𑀯𑀺𑀘𑀺𑀢𑁆𑀢𑀓𑀭𑀡𑀁, 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀘𑀺𑀢𑁆𑀢𑀲𑁆𑀲 𑀦𑀺𑀧𑁆𑀨𑀸𑀤𑀓𑀁 𑀲𑀬𑀫𑁆𑀧𑀺 𑀢𑀣𑁂𑀯 𑀯𑀺𑀘𑀺𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀏𑀯𑀁 𑀓𑀭𑀡𑀯𑀺𑀘𑀺𑀢𑁆𑀢𑀢𑀸𑀬 𑀯𑀺𑀘𑀺𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀞𑀧𑁂𑀢𑁆𑀯𑀸 𑀢𑀁 𑀓𑀭𑀡𑀯𑀺𑀘𑀺𑀢𑁆𑀢𑀢𑀸𑀬 𑀯𑀺𑀘𑀺𑀢𑁆𑀢𑀪𑀸𑀯𑀁 𑀅𑀢𑁆𑀢𑀦𑁄 𑀏𑀯 𑀚𑀸𑀢𑀺𑀪𑀽𑀫𑀺𑀲𑀫𑁆𑀧𑀬𑁄𑀕𑀸𑀤𑀺𑀯𑀲𑁂𑀦 𑀯𑀺𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀘𑀺𑀢𑁆𑀢𑀢𑀸𑀬 𑀯𑀸’’𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀅𑀜𑁆𑀜𑀤𑁂𑀯 𑀓𑀼𑀲𑀮𑀁, 𑀅𑀜𑁆𑀜𑀁 𑀅𑀓𑀼𑀲𑀮𑀁, 𑀅𑀜𑁆𑀜𑀁 𑀅𑀩𑁆𑀬𑀸𑀓𑀢𑀁, 𑀅𑀜𑁆𑀜𑀁 𑀓𑀸𑀫𑀸𑀯𑀘𑀭𑀁, 𑀅𑀜𑁆𑀜𑀁 𑀭𑀽𑀧𑀸𑀯𑀘𑀭𑀸𑀤𑀺𑀪𑁂𑀤𑀁, 𑀅𑀜𑁆𑀜𑀁 𑀲𑀭𑀸𑀕𑀁, 𑀅𑀜𑁆𑀜𑀁 𑀯𑀻𑀢𑀭𑀸𑀕𑀁, 𑀅𑀜𑁆𑀜𑀁 𑀲𑀤𑁄𑀲𑀁, 𑀅𑀜𑁆𑀜𑀁 𑀯𑀻𑀢𑀤𑁄𑀲𑀁, 𑀅𑀜𑁆𑀜𑀁 𑀲𑀫𑁄𑀳𑀁, 𑀅𑀜𑁆𑀜𑀁 𑀯𑀻𑀢𑀫𑁄𑀳𑀁, 𑀅𑀜𑁆𑀜𑀁 𑀭𑀽𑀧𑀸𑀭𑀫𑁆𑀫𑀡𑀁, 𑀅𑀜𑁆𑀜𑀁 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀁, 𑀭𑀽𑀧𑀸𑀭𑀫𑁆𑀫𑀡𑁂𑀲𑀼 𑀘 𑀅𑀜𑁆𑀜𑀁 𑀦𑀻𑀮𑀸𑀭𑀫𑁆𑀫𑀡𑀁, 𑀅𑀜𑁆𑀜𑀁 𑀧𑀻𑀢𑀸𑀤𑀺𑀆𑀭𑀫𑁆𑀫𑀡𑀁. 𑀏𑀯𑀁 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁. 𑀲𑀩𑁆𑀩𑁂𑀲𑀼 𑀘𑁂𑀯 𑀢𑁂𑀲𑀼 𑀅𑀜𑁆𑀜𑀁 𑀳𑀻𑀦𑀁, 𑀅𑀜𑁆𑀜𑀁 𑀫𑀚𑁆𑀛𑀺𑀫𑀁, 𑀅𑀜𑁆𑀜𑀁 𑀧𑀡𑀻𑀢𑀁, 𑀳𑀻𑀦𑀸𑀤𑀻𑀲𑀼 𑀘 𑀅𑀜𑁆𑀜𑀁 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀁, 𑀅𑀜𑁆𑀜𑀁 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁, 𑀅𑀜𑁆𑀜𑀁 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀁, 𑀅𑀜𑁆𑀜𑀁 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀚𑀸𑀢𑀺𑀪𑀽𑀫𑀺𑀲𑀫𑁆𑀧𑀬𑀼𑀢𑁆𑀢𑀆𑀭𑀫𑁆𑀫𑀡𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀅𑀥𑀺𑀧𑀢𑀺𑀆𑀤𑀻𑀦𑀁 𑀯𑀲𑁂𑀦 𑀯𑀺𑀘𑀺𑀢𑁆𑀢𑀫𑀦𑁂𑀓𑀧𑁆𑀧𑀓𑀸𑀭𑀁, 𑀢𑀲𑁆𑀫𑀸 𑀇𑀫𑀸𑀬 𑀅𑀢𑁆𑀢𑀯𑀺𑀘𑀺𑀢𑁆𑀢𑀢𑀸𑀬 𑀯𑀸 𑀘𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀓𑀸𑀫𑀜𑁆𑀘𑁂𑀢𑁆𑀣 𑀏𑀓𑀫𑁂𑀯 𑀘𑀺𑀢𑁆𑀢𑀁 𑀏𑀯𑀁 𑀯𑀺𑀘𑀺𑀢𑁆𑀢𑀁 𑀦𑀸𑀫 𑀦 𑀳𑁄𑀢𑀺, 𑀯𑀺𑀘𑀺𑀢𑁆𑀢𑀸𑀦𑀁 𑀧𑀦 𑀅𑀦𑁆𑀢𑁄𑀕𑀥𑀢𑁆𑀢𑀸 𑀏𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀯𑀺𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀲𑀫𑀼𑀤𑀸𑀬𑀯𑁄𑀳𑀸𑀭𑁂𑀦 𑀅𑀯𑀬𑀯𑀲𑁆𑀲𑀸𑀧𑀺 𑀯𑁄𑀳𑀭𑀺𑀬𑀫𑀸𑀦𑀢𑁆𑀢𑀸 𑀬𑀣𑀸 𑀧𑀩𑁆𑀩𑀢𑀦𑀤𑀻𑀲𑀫𑀼𑀤𑁆𑀤𑀸𑀤𑀻𑀦𑀫𑁂𑀓𑀤𑁂𑀲𑀸 𑀤𑀺𑀝𑁆𑀞𑀸 𑀧𑀩𑁆𑀩𑀢𑀸𑀤𑀬𑁄 𑀤𑀺𑀝𑁆𑀞𑀸𑀢𑀺, 𑀬𑀣𑀸 𑀘 𑀏𑀓𑁂𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀯𑁂𑀤𑀦𑀸𑀤𑀬𑁄 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀯𑁄𑀳𑀸𑀭𑁂𑀦 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺𑀘𑁂𑀢𑁆𑀣 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀘𑀺𑀢𑀦𑁆𑀢𑀺 𑀘𑀺𑀢𑁆𑀢𑀁, 𑀢𑀁 𑀓𑀺𑀮𑁂𑀲𑀲𑀳𑀸𑀬𑁂𑀦 𑀓𑀫𑁆𑀫𑀼𑀦𑀸 𑀨𑀮𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁 𑀢𑁂𑀳𑀺 𑀘𑀺𑀢𑀁 𑀦𑀸𑀫 𑀳𑁄𑀢𑀺. 𑀳𑁄𑀢𑀼 𑀢𑀸𑀯𑀺𑀤𑀁 𑀮𑁄𑀓𑀺𑀬𑀯𑀺𑀧𑀸𑀓𑀁 𑀲𑀦𑁆𑀥𑀸𑀬, 𑀮𑁄𑀓𑀼𑀢𑁆𑀢𑀭𑀁 𑀧𑀦 𑀧𑀢𑁆𑀯𑀸 𑀓𑀣𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 ‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺…𑀧𑁂… 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀅𑀭𑀺𑀬𑀫𑀕𑁆𑀕𑀘𑁂𑀢𑀦𑀸𑀬𑀧𑀺 𑀅𑀯𑀺𑀚𑁆𑀚𑀽𑀧𑀦𑀺𑀲𑁆𑀲𑀬𑀪𑀸𑀯𑀲𑁆𑀲 𑀧𑀓𑀸𑀲𑀺𑀢𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲𑀸𑀧𑀺 𑀅𑀦𑀼𑀲𑀬𑀸 𑀉𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀓𑀺𑀮𑁂𑀲𑀲𑀜𑁆𑀘𑀺𑀢𑀢𑀸𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺. 𑀘𑀺𑀢𑀁 𑀢𑀸𑀬𑀢𑀻𑀢𑀺 𑀯𑀸 𑀘𑀺𑀢𑁆𑀢𑀁. 𑀓𑀫𑁆𑀫𑀸𑀤𑀺𑀲𑀜𑁆𑀘𑀺𑀢𑁄𑀧𑀺 𑀳𑀺 𑀅𑀢𑁆𑀢𑀪𑀸𑀯𑁄 𑀯𑀺𑀜𑁆𑀜𑀸𑀡𑀽𑀧𑀭𑀫𑁂 𑀫𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀆𑀬𑀼 𑀉𑀲𑁆𑀫𑀸 𑀘 𑀯𑀺𑀜𑁆𑀜𑀸𑀡𑀁, 𑀬𑀤𑀸 𑀓𑀸𑀬𑀁 𑀚𑀳𑀦𑁆𑀢𑀺𑀫𑀁;

𑀅𑀧𑁆𑀧𑀯𑀺𑀤𑁆𑀥𑁄 𑀢𑀤𑀸 𑀲𑁂𑀢𑀺, 𑀦𑀺𑀭𑀢𑁆𑀣𑀁𑀯 𑀓𑀮𑀺𑀗𑁆𑀕𑀭’’𑀦𑁆𑀢𑀺. (𑀲𑀁. 𑀦𑀺. 𑁩.𑁯𑁫);

𑀲𑁄 𑀧𑀦𑀸𑀬𑀁 𑀘𑀺𑀢𑁆𑀢-𑀲𑀤𑁆𑀤𑁄 𑀓𑀺𑀜𑁆𑀘𑀸𑀧𑀺 𑀅𑀦𑁂𑀓𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀘𑀺𑀢𑁆𑀢𑁄 𑀘 𑀕𑀳𑀧𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁨.𑁧𑁩𑁩; 𑁪.𑁧𑁭𑁬) 𑀧𑀜𑁆𑀜𑀢𑁆𑀢𑀺𑀬𑀁 𑀆𑀕𑀢𑁄. ‘‘𑀲𑀩𑁆𑀩𑁄 𑀮𑁄𑀓𑁄 𑀧𑀭𑀘𑀺𑀢𑁆𑀢𑁂𑀦 𑀅𑀘𑀺𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀜𑁆𑀜𑀸𑀡𑁂. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀦𑀺𑀓𑀸𑀬𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀏𑀯𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁧𑁦𑁦) 𑀯𑀺𑀘𑀺𑀢𑁆𑀢𑁂, 𑀦𑀸𑀦𑀧𑁆𑀧𑀓𑀸𑀭𑁂𑀢𑀺 𑀅𑀢𑁆𑀣𑁄. ‘‘𑀘𑀭𑀡𑀁 𑀦𑀸𑀫 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀓𑀫𑁆𑀫𑀓𑁂. 𑀇𑀥 𑀧𑀦 𑀘𑀢𑀼𑀩𑁆𑀩𑀺𑀥𑀥𑀫𑁆𑀫𑁂 𑀦𑀺𑀤𑁆𑀤𑁂𑀲𑀢𑁄 𑀧𑀓𑀭𑀡𑀯𑀲𑁂𑀦 𑀬𑀣𑀸𑀯𑀼𑀢𑁆𑀢𑀯𑀘𑀦𑀢𑁆𑀣𑀬𑀼𑀢𑁆𑀢𑁄 𑀯𑀺𑀜𑁆𑀜𑀸𑀡𑀯𑀘𑀦𑁄𑀯 𑀤𑀝𑁆𑀞𑀩𑁆𑀩𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀻’’𑀢𑀺𑀆𑀤𑀺. 𑀧𑀜𑁆𑀜𑀸𑀧𑀻𑀬𑀢𑀺 𑀏𑀢𑀸𑀬𑀸𑀢𑀺 𑀧𑀜𑁆𑀜𑀢𑁆𑀢𑀺, 𑀢𑀲𑁆𑀲𑀁 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑁄𑀢𑀺 𑀳𑀺 𑀏𑀓𑀲𑁆𑀲 𑀕𑀳𑀧𑀢𑀺𑀦𑁄 𑀦𑀸𑀫𑀁. 𑀧𑀺-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀯𑀺𑀜𑁆𑀜𑀸𑀡𑁂𑀢𑀺 𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀪𑁂𑀤𑁂 𑀘𑀺𑀢𑁆𑀢𑁂. 𑀢𑀜𑁆𑀳𑀺 𑀯𑀺𑀚𑀸𑀦𑀦𑀝𑁆𑀞𑁂𑀦 ‘‘𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀯𑀺𑀚𑀸𑀦𑀸𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀘𑀺𑀢𑁆𑀢𑀲𑀫𑁆𑀫𑀼𑀢𑀻𑀢𑀺 𑀘𑀺𑀢𑁆𑀢𑀯𑁄𑀳𑀸𑀭𑁄. 𑀤𑀝𑁆𑀞𑀩𑁆𑀩𑀸𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀘𑀢𑀼𑀩𑁆𑀩𑀺𑀥𑀥𑀫𑁆𑀫𑀦𑀺𑀤𑁆𑀤𑁂𑀲𑀝𑁆𑀞𑀸𑀦𑁂. 𑀯𑀺𑀜𑁆𑀜𑀼𑀦𑀸𑀢𑀺 𑀯𑀺𑀚𑀸𑀦𑀢𑀸, 𑀆𑀪𑀺𑀥𑀫𑁆𑀫𑀺𑀓𑁂𑀦𑀸𑀢𑀺 𑀅𑀢𑁆𑀣𑁄.

𑀯𑀺𑀪𑀸𑀕𑀯𑀦𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑁂𑀦 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀭𑀫𑁆𑀫𑀡𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀆𑀮𑀫𑁆𑀩𑀦𑁆𑀢𑀺 𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀭𑀫𑁆𑀫𑀡𑀁, 𑀧𑀘𑁆𑀘𑀬𑁄, 𑀕𑁄𑀘𑀭𑁄 𑀘. 𑀢𑀣𑀸 𑀳𑀺 ‘‘𑀮𑀪𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁, 𑀮𑀪𑀢𑀺 𑀫𑀸𑀭𑁄 𑀑𑀢𑀸𑀭’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁮𑁦) 𑀧𑀘𑁆𑀘𑀬𑁄 ‘‘𑀆𑀭𑀫𑁆𑀫𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀦𑀺𑀫𑀺𑀢𑁆𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀅𑀦𑀸𑀭𑀫𑁆𑀫𑀡𑀫𑁂𑀓𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁧𑁫𑁯) 𑀕𑁄𑀘𑀭𑁄. 𑀇𑀥 𑀧𑀦 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀺 𑀲𑀩𑁆𑀩𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀲𑀧𑁆𑀧𑀘𑁆𑀘𑀬𑀲𑀕𑁄𑀘𑀭𑀢𑁆𑀢𑀸. 𑀲𑀳 𑀆𑀭𑀫𑁆𑀫𑀡𑁂𑀦 𑀯𑀢𑁆𑀢𑀢𑀺 𑀢𑀤𑀯𑀺𑀦𑀸𑀪𑀸𑀯𑀢𑁄𑀢𑀺 𑀲𑀸𑀭𑀫𑁆𑀫𑀡𑀁. 𑀪𑀸𑀯𑀧𑁆𑀧𑀥𑀸𑀦𑀦𑀺𑀤𑁆𑀤𑁂𑀲𑀯𑀲𑁂𑀦 𑀘𑁂𑀢𑁆𑀣 𑀲𑀸𑀭𑀫𑁆𑀫𑀡𑀪𑀸𑀯𑁄 𑀲𑀸𑀭𑀫𑁆𑀫𑀡-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄 𑀬𑀣𑀸 ‘‘𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀁 (𑀔𑀼. 𑀧𑀸. 𑁬.𑁩). 𑀘𑀓𑁆𑀔𑀼 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁮𑁫) 𑀭𑀢𑀦𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀪𑀸𑀯𑁄 𑀭𑀢𑀦𑀸𑀤𑀻𑀳𑀺 𑀲𑀤𑁆𑀤𑁂𑀳𑀻𑀢𑀺, 𑀢𑀢𑁄 𑀲𑀸𑀭𑀫𑁆𑀫𑀡𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀫𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀦𑀼𑀭𑀽𑀧𑀁 𑀤𑀝𑁆𑀞𑀩𑁆𑀩𑀁. 𑀏𑀓𑀯𑀺𑀥𑀦𑁆𑀢𑀺 𑀏𑀓𑀧𑁆𑀧𑀓𑀸𑀭𑀁, 𑀏𑀓𑀓𑁄𑀝𑁆𑀞𑀸𑀲𑀦𑁆𑀢𑀺 𑀅𑀢𑁆𑀣𑁄.

𑀲𑀯𑀺𑀧𑀸𑀓𑀸𑀯𑀺𑀧𑀸𑀓𑀢𑁄𑀢𑀺 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀪𑀸𑀯𑀲𑁆𑀲 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀪𑀸𑀯𑀢𑁄. 𑀯𑀺𑀧𑀸𑀓-𑀲𑀤𑁆𑀤𑁄 𑀳𑀺 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀧𑀯𑀢𑁆𑀢𑀢𑀺. 𑀓𑀢𑁆𑀣𑀘𑀺 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑁂𑀲𑀼 𑀅𑀭𑀽𑀧𑀥𑀫𑁆𑀫𑁂𑀲𑀼, 𑀓𑀢𑁆𑀣𑀘𑀺 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀪𑀸𑀯𑁂. 𑀢𑀣𑀸 𑀳𑁂𑀲 ‘‘𑀯𑀺𑀧𑀸𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁩) 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑁂𑀲𑀼 𑀅𑀭𑀽𑀧𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀢𑀺. ‘‘𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁩) 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀪𑀸𑀯𑁂. 𑀇𑀥 𑀧𑀦 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀇𑀢𑀭𑀣𑀸 𑀳𑀺 𑀅𑀪𑀺𑀜𑁆𑀜𑀸𑀓𑀼𑀲𑀮𑀸𑀤𑀻𑀦𑀁 𑀲𑀯𑀺𑀧𑀸𑀓-𑀧𑀤𑁂 𑀅𑀲𑀗𑁆𑀕𑀳𑀺𑀢𑀪𑀸𑀯𑀸𑀧𑀢𑁆𑀢𑀺 𑀲𑀺𑀬𑀸. 𑀢𑀣𑀸 𑀳𑀺 𑀬𑀤𑀺 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑀸 𑀏𑀯 𑀥𑀫𑁆𑀫𑀸 𑀇𑀥 𑀕𑀳𑀺𑀢𑀸 𑀲𑀺𑀬𑀼𑀁, 𑀢𑁂 𑀬𑀲𑁆𑀲 𑀲𑀦𑁆𑀢𑀺, 𑀢𑀁 𑀲𑀯𑀺𑀧𑀸𑀓𑀫𑀺𑀢𑀭𑀫𑀯𑀺𑀧𑀸𑀓𑀦𑁆𑀢𑀺 𑀅𑀪𑀺𑀜𑁆𑀜𑀸𑀓𑀼𑀲𑀮𑀲𑁆𑀲 𑀘𑁂𑀯 𑀓𑀤𑀸𑀘𑀺 𑀅𑀯𑀺𑀧𑀸𑀓𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀺𑀓𑀫𑁆𑀫𑀲𑁆𑀲 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀓𑀼𑀲𑀮𑀲𑁆𑀲 𑀘 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀅𑀯𑀺𑀧𑀸𑀓-𑀧𑀤𑀲𑀗𑁆𑀕𑀳𑁄 𑀲𑀺𑀬𑀸, 𑀏𑀯𑀜𑁆𑀘 𑀲𑀢𑀺 ‘‘𑀅𑀯𑀺𑀧𑀸𑀓𑀁 𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀦𑁂𑀲𑀁 𑀅𑀩𑁆𑀬𑀸𑀓𑀢𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀦 𑀘𑁂𑀢𑀫𑀺𑀝𑁆𑀞𑀁 𑀓𑀼𑀲𑀮𑀸𑀓𑀼𑀲𑀮𑀦𑀺𑀤𑁆𑀤𑁂𑀲𑁂𑀬𑁂𑀯 𑀢𑁂𑀲𑀁 𑀦𑀺𑀤𑁆𑀤𑁂𑀲𑀢𑁄. 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀪𑀸𑀯𑁂 𑀧𑀦 𑀕𑀳𑀺𑀢𑁂 𑀢𑀁𑀲𑀪𑀸𑀯𑁄 𑀦𑀸𑀫 𑀅𑀦𑀼𑀧𑀘𑁆𑀙𑀺𑀦𑁆𑀦𑀸𑀯𑀺𑀚𑁆𑀚𑀫𑀸𑀦𑀢𑀡𑁆𑀳𑀸𑀦𑀼𑀲𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀩𑁆𑀬𑀸𑀧𑀸𑀭𑀧𑁆𑀧𑀯𑀢𑁆𑀢𑀺 𑀏𑀯𑀸𑀢𑀺 𑀢𑀲𑁆𑀲𑀸 𑀢𑁂𑀲𑀼𑀧𑀺 𑀅𑀢𑁆𑀣𑀺𑀢𑀸𑀬 𑀅𑀲𑀢𑀺𑀧𑀺 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑁂 𑀲𑀯𑀺𑀧𑀸𑀓-𑀧𑀤𑀲𑀗𑁆𑀕𑀳𑁄 𑀲𑀺𑀤𑁆𑀥𑁄𑀢𑀺 𑀦 𑀓𑁄𑀘𑀺 𑀇𑀝𑁆𑀞𑀯𑀺𑀖𑀸𑀢𑁄 𑀆𑀧𑀚𑁆𑀚𑀢𑀺. 𑀬𑁂𑀦 𑀧𑀦 𑀓𑀸𑀭𑀡𑁂𑀦 𑀅𑀪𑀺𑀜𑁆𑀜𑀸𑀓𑀼𑀲𑀮𑀸𑀤𑀺𑀓𑀫𑀯𑀺𑀧𑀸𑀓𑀁, 𑀬𑁄 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀲𑀩𑁆𑀩𑀁 𑀢𑀲𑁆𑀲 𑀢𑀲𑁆𑀲 𑀆𑀕𑀢𑀝𑁆𑀞𑀸𑀦𑁂𑀬𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫.

𑀓𑀢𑀫𑀁 𑀧𑀦𑁂𑀢𑁆𑀣 𑀲𑀯𑀺𑀧𑀸𑀓𑀁, 𑀓𑀢𑀫𑀫𑀯𑀺𑀧𑀸𑀓𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀣 𑀲𑀯𑀺𑀧𑀸𑀓’’𑀦𑁆𑀢𑀺𑀆𑀤𑀺. 𑀅𑀩𑁆𑀬𑀸𑀓𑀢𑀦𑁆𑀢𑀺 𑀯𑀺𑀧𑀸𑀓𑀓𑀺𑀭𑀺𑀬𑀸𑀯𑀲𑁂𑀦 𑀤𑀼𑀯𑀺𑀥𑀫𑀩𑁆𑀬𑀸𑀓𑀢𑀁. 𑀢𑁂𑀲𑀼 𑀯𑀺𑀧𑀸𑀓𑀘𑀺𑀢𑁆𑀢𑀁 𑀢𑀸𑀯 𑀆𑀤𑀸𑀲𑀢𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀦𑀺𑀭𑀼𑀲𑁆𑀲𑀸𑀳𑀢𑁆𑀢𑀸 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑁂 𑀅𑀲𑀫𑀢𑁆𑀣𑀁. 𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼 𑀘 𑀬𑀤𑁂𑀢𑀁 𑀔𑀻𑀡𑀸𑀲𑀯𑀲𑀦𑁆𑀢𑀸𑀦𑁂𑀬𑁂𑀯 𑀦𑀺𑀬𑀢𑀫𑀝𑁆𑀞𑀸𑀭𑀲𑀯𑀺𑀥𑀁 𑀯𑀺𑀜𑁆𑀜𑀸𑀡𑀁, 𑀢𑀁 𑀉𑀧𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑀸𑀬 𑀲𑀦𑁆𑀢𑀢𑀺𑀬𑀁 𑀧𑀯𑀢𑁆𑀢𑀢𑀻𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀫𑀽𑀮𑀸𑀬 𑀮𑀢𑀸𑀬 𑀧𑀼𑀧𑁆𑀨𑀁 𑀯𑀺𑀬 𑀨𑀮𑀤𑀸𑀬𑀻 𑀦 𑀳𑁄𑀢𑀺. 𑀆𑀯𑀚𑁆𑀚𑀦𑀤𑁆𑀯𑀬𑀁 𑀧𑀦 𑀅𑀦𑀼𑀧𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑁂𑀧𑀺 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀫𑀸𑀦𑀁 𑀅𑀦𑀸𑀲𑁂𑀯𑀦𑀪𑀸𑀯𑁂𑀦 𑀤𑀼𑀩𑁆𑀩𑀮𑀢𑁆𑀢𑀸 𑀫𑁄𑀖𑀧𑀼𑀧𑁆𑀨𑀫𑀺𑀯 𑀩𑀻𑀚𑀪𑀸𑀯𑁂 𑀅𑀲𑀫𑀢𑁆𑀣𑀁 𑀅𑀨𑀮𑀫𑁂𑀯. 𑀇𑀢𑀺 𑀲𑀩𑁆𑀩𑀫𑁂𑀢𑀁 𑀅𑀩𑁆𑀬𑀸𑀓𑀢𑀁 𑀯𑀺𑀧𑀸𑀓𑀸𑀭𑀳𑀢𑀸𑀪𑀸𑀯𑀢𑁄 𑀅𑀯𑀺𑀧𑀸𑀓𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀧𑀸𑀓𑀁 𑀅𑀩𑁆𑀬𑀸𑀓𑀢’’𑀦𑁆𑀢𑀺. 𑀚𑀸𑀬𑀦𑁆𑀢𑀺 𑀏𑀢𑁆𑀣 𑀅𑀲𑀤𑀺𑀲𑀸𑀧𑀺 𑀲𑀤𑀺𑀲𑀸𑀓𑀸𑀭𑀸𑀢𑀺 𑀚𑀸𑀢𑀺, 𑀲𑀫𑀸𑀦𑀸𑀓𑀸𑀭𑁄, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀚𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀚𑀸𑀢𑀺, 𑀢𑀲𑁆𑀲𑀸 𑀪𑁂𑀤𑀢𑁄 𑀢𑀺𑀯𑀺𑀥𑀁 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀦𑁆𑀢𑀺. 𑀯𑀘𑀦𑀢𑁆𑀣𑀧𑀼𑀘𑁆𑀙𑀸𑀬 𑀧𑀬𑁄𑀚𑀦𑀁 𑀯𑀼𑀢𑁆𑀢𑀫𑁂𑀯.

𑁧𑁦. ‘‘𑀓𑀼𑀘𑁆𑀙𑀺𑀢𑀸𑀦’’𑀦𑁆𑀢𑀺𑀆𑀤𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀢𑁆𑀣 𑀓𑀼𑀘𑁆𑀙𑀺𑀢𑀸𑀦𑀦𑁆𑀢𑀺 𑀦𑀺𑀦𑁆𑀤𑀺𑀢𑀸𑀦𑀁, 𑀅𑀲𑀼𑀘𑀺 𑀯𑀺𑀬 𑀦𑀸𑀕𑀭𑀺𑀓𑁂𑀳𑀺 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀮𑀦𑀢𑁄𑀢𑀺 𑀳𑀺𑀁𑀲𑀦𑀢𑁄, 𑀅𑀧𑀦𑀬𑀦𑀢𑁄 𑀯𑀸. 𑀓𑀼𑀲𑀮𑀜𑁆𑀳𑀺 𑀬𑀣𑀸𑀦𑀼𑀭𑀽𑀧𑀁 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀥𑀫𑁆𑀫𑁂 𑀧𑀚𑀳𑀦𑁆𑀢𑀁 𑀢𑁂 𑀳𑀺𑀁𑀲𑀢𑀺, 𑀅𑀧𑀦𑀬𑀢𑀻𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀲𑀮𑀦𑀢𑁄 𑀲𑀁𑀯𑀭𑀡𑀢𑁄, 𑀧𑀺𑀤𑀳𑀦𑀢𑁄𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀥𑀫𑁆𑀫𑀯𑀲𑁂𑀦 𑀳𑀺 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦, 𑀅𑀧𑁆𑀧𑀯𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀘 𑀫𑀦𑀘𑁆𑀙𑀝𑁆𑀞𑁂𑀲𑀼 𑀤𑁆𑀯𑀸𑀭𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀬𑀸 𑀲𑀁𑀯𑀼𑀢𑀸 𑀧𑀺𑀳𑀺𑀢𑀸 𑀳𑁄𑀦𑁆𑀢𑀺. 𑀓𑀼𑀲𑀸𑀦𑀦𑁆𑀢𑀺 𑀭𑀸𑀕𑀸𑀤𑀺𑀅𑀲𑀼𑀘𑀺𑀲𑀫𑁆𑀧𑀬𑁄𑀕𑁂𑀦 𑀦𑀸𑀦𑀸𑀯𑀺𑀥𑀤𑀼𑀓𑁆𑀔𑀳𑁂𑀢𑀼𑀢𑀸𑀬 𑀘 𑀓𑀼𑀘𑁆𑀙𑀺𑀢𑁂𑀦𑀸𑀓𑀸𑀭𑁂𑀦 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀲𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀓𑀼𑀲𑀸, 𑀧𑀸𑀧𑀥𑀫𑁆𑀫𑀸. 𑀅𑀣 𑀯𑀸 𑀓𑀼𑀘𑁆𑀙𑀺𑀢𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀲𑀸𑀯𑀚𑁆𑀚𑀥𑀫𑁆𑀫𑀸𑀦𑀁 𑀲𑀸𑀦𑀢𑁄 𑀦𑀺𑀲𑀸𑀦𑀢𑁄 𑀢𑁂𑀚𑀦𑀢𑁄 𑀓𑀼𑀲𑀸, 𑀤𑁄𑀲𑀮𑁄𑀪𑀸𑀤𑀬𑁄. 𑀤𑁄𑀲𑀸𑀤𑀻𑀦𑀜𑁆𑀳𑀺 𑀯𑀲𑁂𑀦 𑀘𑁂𑀢𑀦𑀸𑀬 𑀢𑀺𑀓𑁆𑀔𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀫𑀳𑀸𑀲𑀸𑀯𑀚𑁆𑀚𑀢𑀸𑀢𑀺. 𑀢𑁂𑀲𑀁 𑀮𑀯𑀦𑁂𑀦 𑀙𑀺𑀦𑁆𑀤𑀦𑁂𑀦 𑀬𑀣𑀸𑀦𑀼𑀭𑀽𑀧𑀁 𑀧𑀚𑀳𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀼𑀲𑁂𑀦𑀸𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀦𑀢𑁄 𑀢𑀦𑀼𑀓𑀭𑀡𑀢𑁄, 𑀑𑀲𑀸𑀦𑀓𑀭𑀡𑀢𑁄 𑀯𑀸 ‘‘𑀓𑀼𑀲𑀸’’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀜𑀸𑀡𑁂𑀦. 𑀮𑀸𑀢𑀩𑁆𑀩𑀢𑁆𑀢𑀸𑀢𑀺 𑀆𑀤𑀸𑀢𑀩𑁆𑀩𑀢𑁆𑀢𑀸, 𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸. 𑀜𑀸𑀡𑀜𑁆𑀳𑀺 𑀢𑀺𑀳𑁂𑀢𑀼𑀓𑀓𑀼𑀲𑀮𑀁 𑀲𑀳𑀚𑀸𑀢𑀪𑀸𑀯𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀘, 𑀤𑀼𑀳𑁂𑀢𑀼𑀓𑀓𑀼𑀲𑀮𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦𑁂𑀯 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑁂𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁄 𑀓𑀼𑀲𑀮𑀝𑁆𑀞𑁄𑀢𑀺 𑀲𑀩𑁆𑀩𑀓𑀼𑀲𑀮𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 𑀅𑀢𑁆𑀣𑁄 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀓𑀼𑀲𑁂𑀦𑀸𑀢𑀺 𑀚𑀸𑀢𑀺𑀲𑀤𑁆𑀤𑀢𑀸𑀬 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄, 𑀓𑀼𑀲𑁂𑀳𑀻𑀢𑀺 𑀧𑀦 𑀅𑀢𑁆𑀣𑁄. 𑀧𑀼𑀜𑁆𑀜𑀓𑀺𑀭𑀺𑀬𑀸𑀯𑀲𑁂𑀦 𑀳𑀺 𑀧𑀯𑀢𑁆𑀢𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 ‘‘𑀓𑀼𑀲𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀳𑀺 𑀮𑀸𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀦𑀬𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸. 𑀅𑀧𑀺𑀘𑁂𑀢𑁆𑀣 𑁋

‘‘𑀓𑀼𑀲𑁄 𑀯𑀺𑀬 𑀮𑀼𑀦𑀸𑀢𑀻𑀢𑀺, 𑀓𑀼𑀲𑀸 𑀯𑀺𑀬 𑀮𑀼𑀦𑀸𑀢𑀺 𑀯𑀸;

𑀓𑀼𑀲𑀮𑀁 𑀓𑀼𑀁 𑀲𑀮𑁂𑀢𑀻𑀢𑀺, 𑀮𑀼𑀦𑀸𑀢𑀺 𑀓𑀼𑀲𑀫𑀺𑀘𑁆𑀘𑀧𑀻’’𑀢𑀺.

𑀢𑀢𑁆𑀣 𑀬𑀣𑀸 𑀓𑀼𑀲𑁄 𑀕𑀳𑀺𑀢𑁄 𑀉𑀪𑀬𑀪𑀸𑀕𑀕𑀢𑀁 𑀳𑀢𑁆𑀣𑀧𑀤𑁂𑀲𑀁 𑀮𑀼𑀦𑀸𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀯𑀲𑁂𑀦 𑀉𑀪𑀬𑀪𑀸𑀕𑀕𑀢𑀁 𑀓𑀺𑀮𑁂𑀲𑀧𑀓𑁆𑀔𑀁 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀺, 𑀲𑁂𑀬𑁆𑀬𑀣𑀸𑀧𑀺 𑁋 ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺, 𑀯𑀸𑀬𑀫𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁…𑀧𑁂… 𑀧𑀳𑀸𑀦𑀸𑀬𑀸’’𑀢𑀺 𑀆𑀕𑀢𑀁 𑀲𑀫𑁆𑀫𑀧𑁆𑀧𑀥𑀸𑀦𑀁. 𑀢𑀲𑁆𑀫𑀸 𑀓𑀼𑀲𑁄 𑀯𑀺𑀬 𑀮𑀼𑀦𑀸𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀲𑀸 𑀯𑀺𑀬 𑀮𑀼𑀦𑀸𑀢𑀻𑀢𑀺 𑀏𑀢𑁆𑀣 ‘‘𑀓𑀼’’𑀇𑀢𑀺 𑀪𑀽𑀫𑀺 𑀯𑀼𑀘𑁆𑀘𑀢𑀺, 𑀥𑀫𑁆𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀢𑀁𑀲𑀤𑀺𑀲𑀢𑀸𑀬 𑀇𑀥 𑀭𑀽𑀧𑀸𑀭𑀽𑀧𑀓𑁆𑀔𑀦𑁆𑀥𑁄 𑀯𑀼𑀢𑁆𑀢𑁄. 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀢𑀲𑁆𑀲 𑀏𑀢𑀭𑀳𑀺, 𑀆𑀬𑀢𑀺𑀜𑁆𑀘 𑀅𑀦𑀼𑀤𑀳𑀦𑀢𑁄 𑀯𑀺𑀦𑀸𑀲𑀦𑀢𑁄 𑀓𑀼𑀁 𑀲𑀸𑀬𑀦𑁆𑀢𑀻𑀢𑀺 𑀓𑀼𑀲𑀸, 𑀭𑀸𑀕𑀸𑀤𑀬𑁄, 𑀢𑁂 𑀯𑀺𑀬 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀁. 𑀧𑀬𑁄𑀕𑀲𑀫𑁆𑀧𑀸𑀤𑀺𑀢𑀸 𑀳𑀺 𑀓𑀼𑀲𑀮𑀥𑀫𑁆𑀫𑀸 𑀅𑀘𑁆𑀘𑀦𑁆𑀢𑀫𑁂𑀯 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑀸𑀧𑀦𑀢𑁄𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀧𑀦 ‘‘𑀓𑀼’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀭𑀽𑀧𑀸𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀲𑀮𑀦𑀢𑁄 𑀅𑀧𑀦𑀬𑀦𑀢𑁄 𑀓𑀼𑀁 𑀲𑀮𑁂𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀲𑀁 𑀮𑀼𑀦𑀸𑀢𑀻𑀢𑀺 𑀧𑀦 𑀓𑀼𑀘𑁆𑀙𑀺𑀢𑀸 𑀏𑀢𑁆𑀣 𑀲𑀬𑀦𑁆𑀢𑀻𑀢𑀺 𑀓𑀼𑀲𑁄, 𑀓𑀸𑀬𑁄, 𑀢𑀁 𑀮𑀼𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀲𑁂𑀦𑁂𑀯𑀸𑀢𑀺 𑀓𑀼𑀲𑀮𑀁.

𑁧𑁧. 𑀇𑀤𑀸𑀦𑀺 𑀓𑀼𑀲𑀮-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀤𑀲𑁆𑀲𑀦𑀢𑁆𑀣𑀫𑀸𑀳 ‘‘𑀙𑁂𑀓𑁂 𑀓𑀼𑀲𑀮-𑀲𑀤𑁆𑀤𑁄𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀓𑀼𑀲𑀮𑁄 𑀢𑁆𑀯𑀁 𑀭𑀣𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 (𑀫. 𑀦𑀺. 𑁨.𑁮𑁭), 𑀓𑀼𑀲𑀮𑀸𑀦𑀘𑁆𑀘𑀕𑀻𑀢𑀲𑁆𑀲, 𑀲𑀺𑀓𑁆𑀔𑀺𑀢𑀸 𑀘𑀸𑀢𑀼𑀭𑀺𑀢𑁆𑀣𑀺𑀬𑁄’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁨.𑁯𑁪) 𑀙𑁂𑀓𑁂 𑀤𑀺𑀝𑁆𑀞𑁄, 𑀙𑁂𑀓𑀧𑀭𑀺𑀬𑀸𑀬𑁄 𑀧𑀯𑀻𑀡𑀢𑁆𑀣𑁄𑀢𑀺 𑀅𑀢𑁆𑀣𑁄. ‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁫.𑁧𑁪𑁬; 𑁨.𑁨𑁦.𑁧𑁨𑁯) 𑀆𑀭𑁄𑀕𑁆𑀬𑁂. ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀓𑀸𑀬𑀲𑀫𑀸𑀘𑀸𑀭𑁄 𑀓𑀼𑀲𑀮𑁄? 𑀬𑁄 𑀔𑁄, 𑀫𑀳𑀸𑀭𑀸𑀚, 𑀓𑀸𑀬𑀲𑀫𑀸𑀘𑀸𑀭𑁄 𑀅𑀦𑀯𑀚𑁆𑀚𑁄’’𑀢𑀺 (𑀫. 𑀦𑀺. 𑁨.𑁩𑁬𑁧) 𑀘 ‘‘𑀅𑀧𑀭𑀁 𑀧𑀦, 𑀪𑀦𑁆𑀢𑁂, 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁, 𑀬𑀣𑀸 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 (𑀤𑀻. 𑀦𑀺. 𑁩.𑁧𑁪𑁫) 𑀘 𑀏𑀯𑀫𑀸𑀤𑀻𑀲𑀼 𑀅𑀦𑀯𑀚𑁆𑀚𑁂. ‘‘𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀺 (𑀤𑀻. 𑀦𑀺. 𑁩.𑁮𑁦), 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸’’𑀢𑀺 (𑀥. 𑀲. 𑁪𑁩𑁧) 𑀘 𑀆𑀤𑀻𑀲𑀼 𑀇𑀝𑁆𑀞𑀯𑀺𑀧𑀸𑀓𑁂. 𑀅𑀦𑀯𑀚𑁆𑀚𑀸𑀤𑀺𑀓𑁂𑀢𑀺 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑁂, ‘‘𑀅𑀦𑀯𑀚𑁆𑀚𑀸𑀤𑀺𑀓𑁂’’𑀢𑀺 𑀘 𑀅𑀢𑁆𑀢𑀦𑀸 𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑀲𑁆𑀲 𑀅𑀦𑀼𑀭𑀽𑀧𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀧𑀦 𑀆𑀭𑁄𑀕𑁆𑀬𑀢𑁆𑀣𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀓𑀺𑀮𑁂𑀲𑀭𑁄𑀕𑀲𑁆𑀲 𑀳𑀺 𑀅𑀪𑀸𑀯𑀢𑁄 𑀓𑀼𑀲𑀮𑀁 𑀆𑀭𑁄𑀕𑁆𑀬𑀁 𑀳𑁄𑀢𑀺.

𑀯𑀚𑁆𑀚𑀸 𑀭𑀸𑀕𑀸𑀤𑀬𑁄, 𑀢𑁂 𑀬𑀲𑁆𑀲 𑀦 𑀲𑀦𑁆𑀢𑀺, 𑀢𑀁 𑀅𑀦𑀯𑀚𑁆𑀚𑀁, 𑀇𑀝𑁆𑀞𑁄 𑀯𑀺𑀧𑀸𑀓𑁄 𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁄 𑀬𑀲𑁆𑀲, 𑀢𑀁 𑀇𑀝𑁆𑀞𑀯𑀺𑀧𑀸𑀓𑀁, 𑀇𑀝𑁆𑀞𑀯𑀺𑀧𑀸𑀓𑀢𑀸 𑀘𑀲𑁆𑀲 𑀢𑀁𑀲𑀪𑀸𑀯𑀯𑀦𑁆𑀢𑀢𑀸𑀬 𑀤𑀝𑁆𑀞𑀩𑁆𑀩𑀸, 𑀦 𑀢𑀲𑁆𑀲 𑀅𑀯𑀲𑁆𑀲𑀁 𑀇𑀝𑁆𑀞𑀯𑀺𑀧𑀸𑀓𑀲𑀫𑁆𑀪𑀯𑀢𑁄𑀬𑁂𑀯, 𑀮𑀓𑁆𑀔𑀻𑀬𑀢𑀺 𑀅𑀦𑁂𑀦𑀸𑀢𑀺 𑀮𑀓𑁆𑀔𑀡𑀁, 𑀅𑀦𑀯𑀚𑁆𑀚𑀜𑁆𑀘 𑀢𑀁 𑀇𑀝𑁆𑀞𑀯𑀺𑀧𑀸𑀓𑀜𑁆𑀘𑀸𑀢𑀺 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀁. 𑀢𑀁 𑀮𑀓𑁆𑀔𑀡𑀫𑀲𑁆𑀲𑀸𑀢𑀺 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀁.

𑀦𑀦𑀼 𑀘 𑀓𑀼𑀲𑀮𑀫𑁂𑀯 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀁, 𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀧𑀦 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀢𑁄 𑀅𑀜𑁆𑀜𑀁 𑀓𑀼𑀲𑀮𑀁 𑀲𑀺𑀬𑀸. 𑀦 𑀳𑀺 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀮𑀓𑁆𑀔𑀡𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄 𑀧𑀭𑀺𑀜𑁆𑀜𑀸𑀢𑀸𑀧𑀭𑀺𑀜𑁆𑀜𑀸𑀢𑀯𑀘𑀦𑀢𑁆𑀣𑀪𑀸𑀯𑀪𑁂𑀤𑁂 𑀏𑀓𑀲𑁆𑀲𑀸𑀧𑀺 𑀮𑀓𑁆𑀔𑀺𑀢𑀩𑁆𑀩𑀮𑀓𑁆𑀔𑀡𑀪𑀸𑀯𑀧𑀭𑀺𑀓𑀧𑁆𑀧𑀦𑀢𑁄. ‘‘𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓’’𑀦𑁆𑀢𑀺 𑀳𑀺 𑀧𑀭𑀺𑀜𑁆𑀜𑀸𑀢𑀯𑀘𑀦𑀢𑁆𑀣𑀁. ‘‘𑀓𑀼𑀲𑀮’’𑀦𑁆𑀢𑀺 𑀅𑀧𑀭𑀺𑀜𑁆𑀜𑀸𑀢𑀯𑀘𑀦𑀢𑁆𑀣𑀁. 𑀏𑀯𑀜𑁆𑀘 𑀬𑁂𑀦 𑀲𑀪𑀸𑀯𑁂𑀦 𑀧𑀭𑀺𑀜𑁆𑀜𑀸𑀢𑀯𑀘𑀦𑀢𑁆𑀣𑀲𑁆𑀲 𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁄𑀢𑀺, 𑀬𑁂𑀦 𑀘 𑀅𑀧𑀭𑀺𑀜𑁆𑀜𑀸𑀢𑀯𑀘𑀦𑀢𑁆𑀣𑀲𑁆𑀲, 𑀢𑁂𑀲𑀁 𑀧𑀭𑀺𑀜𑁆𑀜𑀸𑀢𑀸𑀧𑀭𑀺𑀜𑁆𑀜𑀸𑀢𑀯𑀘𑀦𑀢𑁆𑀣𑀲𑀪𑀸𑀯𑀸𑀦𑀁 𑀪𑁂𑀤𑁂𑀦 𑀢𑀁𑀲𑀫𑀗𑁆𑀕𑀺𑀲𑁆𑀲 𑀓𑀼𑀲𑀮𑀲𑁆𑀲 𑀏𑀓𑀲𑁆𑀲𑀸𑀧𑀺 𑀪𑁂𑀤𑁄 𑀧𑀭𑀺𑀓𑀧𑁆𑀧𑀻𑀬𑀢𑀺 𑀬𑀣𑀸 ‘‘𑀧𑀼𑀭𑁂 𑀪𑀯𑀁 𑀧𑀝𑀼 𑀆𑀲𑀺, 𑀧𑀝𑀼𑀢𑀭𑁄 𑀏𑀢𑀭𑀳𑀻’’𑀢𑀺 𑀕𑀼𑀡𑀪𑁂𑀤𑁂𑀦, 𑀯𑀢𑁆𑀣𑀼𑀪𑁂𑀤𑁂𑀦 𑀘 𑀧𑀭𑀺𑀓𑀧𑁆𑀧𑀻𑀬𑀢𑀺, 𑀢𑀲𑁆𑀫𑀸 𑀧𑀭𑀺𑀜𑁆𑀜𑀸𑀢𑀯𑀘𑀦𑀢𑁆𑀣𑀪𑀸𑀯𑁂𑀦 𑀮𑀓𑁆𑀔𑀡𑀁, 𑀅𑀧𑀭𑀺𑀜𑁆𑀜𑀸𑀢𑀯𑀘𑀦𑀢𑁆𑀣𑀪𑀸𑀯𑁂𑀦 𑀮𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀧𑀭𑀺𑀓𑀧𑁆𑀧𑀺𑀢𑀪𑁂𑀤𑁂 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁂 𑀦 𑀓𑁄𑀘𑀺 𑀤𑁄𑀲𑁄 𑀆𑀧𑀚𑁆𑀚𑀢𑀺.

𑀅𑀣 𑀯𑀸 𑀮𑀓𑁆𑀔𑀻𑀬𑀢𑀻𑀢𑀺 𑀮𑀓𑁆𑀔𑀡𑀁, 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀜𑁆𑀘 𑀢𑀁 𑀮𑀓𑁆𑀔𑀡𑀜𑁆𑀘𑀸𑀢𑀺 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀁, 𑀬𑀁 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀁 𑀳𑀼𑀢𑁆𑀯𑀸 𑀮𑀓𑁆𑀔𑀻𑀬𑀢𑀺, 𑀢𑀁 𑀓𑀼𑀲𑀮𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀦𑀯𑀚𑁆𑀚-𑀲𑀤𑁆𑀤𑁂𑀦 𑀅𑀦𑀯𑀚𑁆𑀚𑀪𑀸𑀯𑁄 𑀯𑀼𑀢𑁆𑀢𑁄, 𑀇𑀝𑁆𑀞𑀯𑀺𑀧𑀸𑀓𑀲𑀤𑁆𑀤𑁂𑀦 𑀇𑀝𑁆𑀞𑀯𑀺𑀧𑀸𑀓𑀪𑀸𑀯𑁄, 𑀢𑀲𑁆𑀫𑀸 𑀅𑀦𑀯𑀚𑁆𑀚𑁄 𑀘 𑀇𑀝𑁆𑀞𑀯𑀺𑀧𑀸𑀓𑁄 𑀘 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀁, 𑀢𑀁 𑀮𑀓𑁆𑀔𑀡𑀫𑁂𑀢𑀲𑁆𑀲𑀸𑀢𑀺 𑀓𑀭𑀡𑀢𑁆𑀣𑁂, 𑀓𑀫𑁆𑀫𑀢𑁆𑀣𑁂 𑀯𑀸 𑀮𑀓𑁆𑀔𑀡-𑀲𑀤𑁆𑀤𑁂𑀦 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀦𑁆𑀢𑀺 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀲𑀪𑀸𑀯𑀯𑀦𑁆𑀢𑀁, 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀪𑀸𑀯𑁂𑀦 𑀮𑀓𑁆𑀔𑀺𑀢𑀩𑁆𑀩𑀁 𑀯𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁 𑀧𑀤𑀤𑁆𑀯𑀬𑀧𑀭𑀺𑀕𑁆𑀕𑀳𑁂𑀦, 𑀦𑀦𑀼 𑀏𑀓𑁂𑀦𑁂𑀯 𑀧𑀤𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺 𑀲𑀺𑀬𑀸. 𑀓𑀺𑀜𑁆𑀘𑀸𑀧𑀺 𑀳𑀺 ‘‘𑀅𑀦𑀯𑀚𑁆𑀚𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀧𑀭𑀁 𑀧𑀦, 𑀪𑀦𑁆𑀢𑁂, 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁, 𑀬𑀣𑀸 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁪𑁫) 𑀯𑀺𑀬 𑀯𑀚𑁆𑀚𑀭𑀳𑀺𑀢𑀢𑁆𑀢𑀸 𑀅𑀩𑁆𑀬𑀸𑀓𑀢𑀲𑁆𑀲𑀸𑀧𑀺 𑀧𑀲𑀗𑁆𑀕𑁄 𑀲𑀺𑀬𑀸𑀢𑀺 𑀇𑀝𑁆𑀞𑀯𑀺𑀧𑀸𑀓-𑀧𑀤𑀁 𑀯𑀢𑁆𑀢𑀩𑁆𑀩𑀫𑁂𑀯, ‘‘𑀇𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡’’𑀦𑁆𑀢𑀺 𑀧𑀦 𑀯𑀼𑀢𑁆𑀢𑁂 𑀇𑀢𑀭𑀁 𑀦 𑀯𑀢𑁆𑀢𑀩𑁆𑀩𑀁 𑀅𑀩𑁆𑀬𑀸𑀓𑀢𑀲𑁆𑀲 𑀯𑀺𑀧𑀸𑀓𑀸𑀭𑀳𑀪𑀸𑀯𑁂𑀦 𑀇𑀝𑁆𑀞𑀯𑀺𑀧𑀸𑀓𑀢𑀸𑀧𑀲𑀗𑁆𑀕𑀪𑀸𑀯𑀢𑁄? 𑀲𑀘𑁆𑀘𑀫𑁂𑀢𑀁, 𑀅𑀦𑀯𑀚𑁆𑀚-𑀧𑀤𑁂𑀦 𑀓𑀼𑀲𑀮𑀲𑁆𑀲 𑀧𑀯𑀢𑁆𑀢𑀺𑀲𑀼𑀔𑀢𑀁, 𑀇𑀝𑁆𑀞𑀯𑀺𑀧𑀸𑀓-𑀧𑀤𑁂𑀦 𑀘 𑀯𑀺𑀧𑀸𑀓𑀲𑀼𑀔𑀢𑀁 𑀤𑀲𑁆𑀲𑁂𑀢𑀼𑀁 𑀧𑀤𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀅𑀦𑀯𑀚𑁆𑀚𑀧𑀤𑀜𑁆𑀳𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀲𑀪𑀸𑀯𑀯𑀲𑁂𑀦 𑀮𑀓𑁆𑀔𑀡𑀯𑀘𑀦𑀁, 𑀇𑀢𑀭𑀁 𑀓𑀸𑀮𑀦𑁆𑀢𑀭𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀯𑀲𑁂𑀦𑀸𑀢𑀺. 𑀅𑀣 𑀯𑀸 𑀓𑀼𑀲𑀮𑀲𑁆𑀲 𑀅𑀢𑁆𑀣𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 𑀧𑀼𑀭𑀺𑀫𑀧𑀤𑀁 𑀯𑀼𑀢𑁆𑀢𑀁, 𑀧𑀭𑀺𑀲𑀼𑀤𑁆𑀥𑀯𑀺𑀧𑀸𑀓𑀢𑀁 𑀤𑀲𑁆𑀲𑁂𑀢𑀼𑀁 𑀧𑀘𑁆𑀙𑀺𑀫𑀁. 𑀧𑀼𑀭𑀺𑀫𑀁 𑀯𑀸 𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑀪𑀸𑀯𑀢𑁄 𑀦𑀺𑀯𑀢𑁆𑀢𑀦𑀁, 𑀧𑀘𑁆𑀙𑀺𑀫𑀁 𑀅𑀩𑁆𑀬𑀸𑀓𑀢𑀲𑀪𑀸𑀯𑀢𑁄𑀢𑀺 𑀅𑀮𑀫𑀢𑀺𑀧𑀧𑀜𑁆𑀘𑁂𑀦. 𑀏𑀢𑁆𑀣 𑀘 ‘‘𑀅𑀦𑀯𑀚𑁆𑀚…𑀧𑁂… 𑀮𑀓𑁆𑀔𑀡’’𑀦𑁆𑀢𑀺 𑀯𑀘𑀦𑁂𑀦 𑀓𑀼𑀲𑀮𑀲𑁆𑀲 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀯𑀼𑀢𑁆𑀢𑀁 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀲𑀪𑀸𑀯𑀲𑁆𑀲 𑀓𑀼𑀲𑀮𑀚𑀸𑀢𑀺𑀬𑀸 𑀲𑀸𑀥𑀸𑀭𑀡𑀢𑁆𑀢𑀸. 𑀅𑀓𑀼𑀲𑀮𑀸𑀤𑀻𑀦𑀫𑀲𑀸𑀥𑀸𑀭𑀡𑀪𑀸𑀯𑁂𑀦 𑀲𑀪𑀸𑀯𑀮𑀓𑁆𑀔𑀡𑀁 𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀦𑁆𑀢𑀺 𑀬𑀣𑀸𑀦𑀼𑀭𑀽𑀧𑀁 𑀅𑀓𑀼𑀲𑀮𑀧𑁆𑀧𑀚𑀳𑀦𑀓𑀺𑀘𑁆𑀘𑀁. 𑀓𑀼𑀲𑀮𑀜𑁆𑀳𑀺 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀪𑁂𑀤𑀪𑀺𑀦𑁆𑀦𑀁 𑀬𑀣𑀸𑀓𑁆𑀓𑀫𑀁 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑀁 𑀧𑀚𑀳𑀢𑀺. 𑀅𑀣 𑀢𑀤𑀗𑁆𑀕𑀸𑀤𑀺𑀧𑁆𑀧𑀳𑀸𑀦𑀸𑀦𑀁 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀕𑀢𑁂𑀦 𑀢𑁂𑀦 𑀢𑁂𑀦 𑀓𑀼𑀲𑀮𑀗𑁆𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀫𑀘𑁆𑀙𑁂𑀭𑀸𑀤𑀺𑀅𑀓𑀼𑀲𑀮𑀗𑁆𑀕𑀲𑁆𑀲 𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁, 𑀢𑀁 𑀤𑀻𑀧𑀸𑀮𑁄𑀓𑁂𑀦 𑀅𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀦𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁, 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀁 𑀧𑀭𑀺𑀢𑁆𑀢𑀸𑀦𑀼𑀪𑀸𑀯𑀢𑀸𑀬 𑀢𑁂𑀳𑀺 𑀅𑀢𑁆𑀢𑀦𑁄 𑀞𑀺𑀢𑀺𑀓𑁆𑀔𑀡𑁂 𑀯𑀺𑀤𑁆𑀥𑀁𑀲𑀺𑀢𑀸𑀦𑀫𑀓𑀼𑀲𑀮𑀸𑀦𑀁 𑀢𑀤𑀧𑀕𑀫𑁂 𑀲𑀢𑀺 𑀧𑀼𑀦 𑀆𑀕𑀫𑁂𑀦 𑀯𑁄𑀢𑁆𑀣𑀭𑀡𑀢𑁄. 𑀢𑁂𑀲𑀁 𑀢𑁂𑀲𑀁 𑀦𑀻𑀯𑀭𑀡𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀲𑀗𑁆𑀔𑀸𑀢𑀁 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑀯𑀲𑁂𑀦 𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁, 𑀢𑀁 𑀖𑀝𑀧𑁆𑀧𑀳𑀸𑀭𑁂𑀦 𑀚𑀮𑀢𑀮𑁂 𑀲𑁂𑀯𑀸𑀮𑀯𑀺𑀬𑀽𑀳𑀦𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 𑀩𑀮𑀯𑀢𑀸 𑀖𑀝𑀧𑁆𑀧𑀳𑀸𑀭𑁂𑀦 𑀤𑀽𑀭𑀻𑀓𑀢𑀁 𑀲𑁂𑀯𑀸𑀮𑀁 𑀢𑀲𑁆𑀫𑀺𑀁 𑀅𑀧𑀦𑀻𑀢𑁂𑀧𑀺 𑀢𑀁𑀧𑀳𑀸𑀭𑀯𑁂𑀕𑁂𑀦 𑀲𑀳𑀲𑀸 𑀦 𑀑𑀢𑁆𑀣𑀭𑀢𑀺, 𑀏𑀯𑀫𑁂𑀯 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀢𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂𑀧𑀺 𑀢𑀲𑁆𑀲 𑀩𑀮𑁂𑀦 𑀲𑀳𑀲𑀸 𑀦 𑀑𑀢𑁆𑀣𑀭𑀦𑁆𑀢𑀻𑀢𑀺. 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀲𑀗𑁆𑀔𑀸𑀢𑀁 𑀲𑀫𑁆𑀫𑀸 𑀉𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁, 𑀢𑀁 𑀧𑀦 𑀅𑀲𑀦𑀺𑀲𑀫𑁆𑀧𑀸𑀢𑁂𑀦 𑀭𑀼𑀓𑁆𑀔𑀸𑀤𑀻𑀦𑀁 𑀲𑀫𑀽𑀮𑀯𑀺𑀤𑁆𑀥𑀁𑀲𑀦𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀸 𑀅𑀦𑀼𑀲𑀬𑀫𑀢𑁆𑀢𑀓𑁂𑀦𑀸𑀧𑀺 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀦𑁆𑀢𑀺. 𑀬𑀣𑀸 𑀧𑀦 𑀏𑀓𑀯𑀸𑀭𑀧𑁆𑀧𑀯𑀢𑁆𑀢𑁂𑀦𑀧𑀺 𑀇𑀦𑁆𑀤𑀕𑁆𑀕𑀺𑀦𑀸 𑀲𑀳 𑀫𑀽𑀮𑁂𑀳𑀺 𑀯𑀺𑀤𑁆𑀥𑀁𑀲𑀺𑀢𑀸 𑀭𑀼𑀓𑁆𑀔𑀸𑀤𑀬𑁄 𑀦 𑀧𑀼𑀦 𑀯𑀺𑀭𑀼𑀳𑀦𑁆𑀢𑀺, 𑀏𑀯𑀫𑁂𑀯𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁂𑀦𑀧𑀺 𑀢𑁂𑀦 𑀅𑀢𑁆𑀢𑀦𑁄 𑀉𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀯 𑀅𑀦𑀼𑀲𑀬𑀫𑀢𑁆𑀢𑀝𑁆𑀞𑀸𑀬𑀺𑀦𑁄𑀧𑀺 𑀓𑀺𑀮𑁂𑀲𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀺𑀤𑁆𑀥𑀁𑀲𑀺𑀢𑀸𑀬𑁂𑀯 𑀳𑁄𑀦𑁆𑀢𑀺.

𑀯𑁄𑀤𑀸𑀦𑀁 𑀯𑀺𑀲𑀼𑀤𑁆𑀥𑀺, 𑀲𑀁𑀓𑀺𑀮𑁂𑀲𑀫𑀮𑀯𑀺𑀫𑀼𑀢𑁆𑀢𑀻𑀢𑀺 𑀅𑀢𑁆𑀣𑁄, 𑀢𑀣𑀸 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀫𑀲𑁆𑀲𑀸𑀢𑀺 𑀯𑁄𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀧𑀭𑀺𑀲𑀼𑀤𑁆𑀥𑀸𑀓𑀸𑀭𑁂𑀦 𑀬𑁄𑀕𑀺𑀦𑁄 𑀜𑀸𑀡𑀲𑁆𑀲 𑀉𑀧𑀝𑁆𑀞𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀓𑀼𑀲𑀮𑀲𑁆𑀲 𑀯𑀚𑁆𑀚𑀭𑀳𑀺𑀢𑀇𑀝𑁆𑀞𑀯𑀺𑀧𑀸𑀓𑀲𑀪𑀸𑀯𑁂𑀳𑀺 𑀮𑀓𑁆𑀔𑀡𑀁, 𑀓𑀺𑀘𑁆𑀘𑀉𑀧𑀝𑁆𑀞𑀸𑀦𑀸𑀓𑀸𑀭𑀯𑀲𑁂𑀦 𑀘 𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺 𑀯𑀢𑁆𑀯𑀸 𑀧𑀼𑀦 𑀯𑀚𑁆𑀚𑀧𑀝𑀺𑀧𑀓𑁆𑀔𑀪𑀸𑀯𑀯𑀲𑁂𑀦 𑀘 𑀮𑀓𑁆𑀔𑀡𑀁, 𑀲𑀫𑁆𑀧𑀢𑁆𑀢𑀺𑀨𑀮𑀯𑀲𑁂𑀦 𑀘 𑀭𑀲𑀸𑀤𑀺𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀚𑁆𑀚𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑁄 𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑁆𑀢𑀁, 𑀢𑀢𑁄. 𑀏𑀢𑁂𑀦 ‘‘𑀅𑀦𑀯𑀚𑁆𑀚𑀮𑀓𑁆𑀔𑀡’’𑀦𑁆𑀢𑀺 𑀏𑀢𑁆𑀣 𑀅-𑀓𑀸𑀭𑁄 𑀧𑀝𑀺𑀧𑀓𑁆𑀔𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦 𑀧𑀦𑀲𑁆𑀲 𑀅𑀩𑁆𑀬𑀸𑀓𑀢𑀢𑁄 𑀦𑀺𑀯𑀢𑁆𑀢𑀦𑀁 𑀓𑀢𑀁. 𑀇𑀢𑀭𑀣𑀸 𑀳𑀺 𑀦𑀸𑀲𑁆𑀲 𑀯𑀚𑁆𑀚𑀁, 𑀯𑀚𑁆𑀚𑀢𑁄 𑀅𑀜𑁆𑀜𑀁 𑀯𑀸 𑀅𑀦𑀯𑀚𑁆𑀚𑀦𑁆𑀢𑀺 𑀅𑀩𑁆𑀬𑀸𑀓𑀢𑀲𑁆𑀲𑀸𑀧𑀺 𑀢𑀁𑀮𑀓𑁆𑀔𑀡𑀢𑀸𑀧𑀲𑀗𑁆𑀕𑁄 𑀲𑀺𑀬𑀸. ‘‘𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑁆𑀢𑀸’’𑀢𑀺 𑀧𑀦 𑀯𑀼𑀢𑁆𑀢𑁂 𑀬𑀲𑁆𑀫𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑁂𑀯 𑀧𑀳𑀸𑀬𑀓𑀧𑁆𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀆𑀮𑁄𑀓𑀦𑁆𑀥𑀓𑀸𑀭𑀸𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑁄, 𑀢𑀲𑁆𑀫𑀸 𑀓𑀼𑀲𑀮𑀫𑁂𑀯 𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀦𑀯𑀚𑁆𑀚𑀮𑀓𑁆𑀔𑀡𑀁, 𑀦 𑀅𑀜𑁆𑀜𑀦𑁆𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀯𑁄𑀤𑀸𑀦𑀪𑀸𑀯𑀭𑀲𑀦𑁆𑀢𑀺 𑀯𑁄𑀤𑀸𑀦𑀪𑀸𑀯𑀲𑀫𑁆𑀧𑀢𑁆𑀢𑀺𑀓𑀁, 𑀓𑀺𑀮𑁂𑀲𑀫𑀮𑁂𑀳𑀺 𑀅𑀲𑀁𑀓𑀺𑀮𑀺𑀝𑁆𑀞𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀼𑀧𑀝𑁆𑀞𑀸𑀧𑀻𑀬𑀢𑀺 𑀉𑀧𑀦𑀻𑀬𑀢𑀺 𑀓𑀸𑀭𑀡𑁂𑀦, 𑀅𑀢𑁆𑀢𑀦𑁄 𑀯𑀸 𑀓𑀸𑀭𑀡𑀁 𑀧𑀝𑀺𑀘𑁆𑀘, 𑀢𑀧𑁆𑀧𑀝𑀺𑀩𑀤𑁆𑀥𑀪𑀸𑀯𑁂𑀦 𑀧𑀝𑀺𑀫𑀼𑀔𑀁 𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀇𑀝𑁆𑀞𑁄 𑀯𑀺𑀧𑀸𑀓𑁄 𑀧𑀘𑁆𑀘𑀼𑀧𑀝𑁆𑀞𑀸𑀦𑀫𑀲𑁆𑀲𑀸𑀢𑀺 𑀇𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀅𑀲𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀓𑀼𑀲𑀮𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀲𑀢𑀺 𑀘 𑀢𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀦𑀢𑁄 𑀢𑀲𑁆𑀲 𑀲𑁄 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀢𑀢𑁆𑀣 𑀬𑁄𑀦𑀺𑀲𑁄 𑀧𑀣𑁂𑀦 𑀉𑀧𑀸𑀬𑁂𑀦 𑀫𑀦𑀲𑀺𑀓𑀸𑀭𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀅𑀢𑁆𑀣𑀢𑁄 𑀧𑀦 𑀲𑀸𑀦𑀼𑀲𑀬𑀲𑀦𑁆𑀢𑀸𑀦𑀯𑀢𑁄 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀫𑀸𑀧𑀸𑀣𑀕𑀢𑁂𑀲𑁆𑀯𑀸𑀭𑀫𑁆𑀫𑀡𑁂𑀲𑀼 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀸𑀯𑀚𑁆𑀚𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫. 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀧𑀺 𑀤𑀝𑁆𑀞𑀩𑁆𑀩𑁄. 𑀬𑀁 𑀧𑀦 𑀦𑀺𑀭𑀦𑀼𑀲𑀬𑀲𑀦𑁆𑀢𑀸𑀦𑀲𑀫𑀗𑁆𑀕𑀺𑀲𑁆𑀲 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀞𑀧𑁂𑀢𑁆𑀯𑀸 𑀦𑀺𑀭𑀯𑀚𑁆𑀚𑀥𑀫𑁆𑀫𑀁 𑀲𑀸𑀯𑀚𑁆𑀚𑀥𑀫𑁆𑀫𑀲𑁆𑀲 𑀓𑀲𑁆𑀲𑀘𑀺 𑀧𑀘𑁆𑀘𑀬𑀪𑀸𑀯𑀸𑀦𑀼𑀧𑀕𑀫𑀦𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀓𑁆𑀔𑀁 𑀯𑀸 𑀪𑀚𑁂𑀬𑁆𑀬. 𑀔𑀻𑀡𑀸𑀲𑀯𑀲𑀦𑁆𑀢𑀸𑀦𑀕𑀢𑀢𑁆𑀢𑀸 𑀬𑁄𑀦𑀺𑀲𑁄𑀅𑀬𑁄𑀦𑀺𑀲𑁄𑀪𑀸𑀯𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀆𑀧𑀸𑀣𑀕𑀢𑀸𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑀁 𑀯𑀺𑀦𑀸 𑀦 𑀓𑀲𑁆𑀲𑀘𑀺 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀢𑀤𑀼𑀪𑀬𑀯𑀲𑁂𑀦 𑀦𑀯𑀢𑁆𑀢𑀩𑁆𑀩𑀢𑁆𑀢𑀸 𑀅𑀩𑁆𑀬𑀸𑀓𑀢𑀫𑀦𑀲𑀺𑀓𑀸𑀭𑁄𑀢𑀺 𑀯𑀸 𑀲𑀗𑁆𑀔𑀁 𑀕𑀘𑁆𑀙𑁂𑀬𑁆𑀬𑀸𑀢𑀺.

𑀲𑀸𑀯𑀚𑁆𑀚𑀸𑀦𑀺𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀫𑀓𑀼𑀲𑀮𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀯𑀚𑁆𑀚𑀸 𑀭𑀸𑀕𑀸𑀤𑀬𑁄, 𑀢𑁂 𑀬𑀲𑁆𑀲 𑀲𑀦𑁆𑀢𑀺, 𑀢𑀁 𑀲𑀸𑀯𑀚𑁆𑀚𑀁, 𑀅𑀦𑀺𑀝𑁆𑀞𑁄 𑀯𑀺𑀧𑀸𑀓𑁄 𑀬𑀲𑁆𑀲, 𑀢𑀁 𑀅𑀦𑀺𑀝𑁆𑀞𑀯𑀺𑀧𑀸𑀓’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀧𑀝𑀺𑀧𑀓𑁆𑀔𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀭𑀲𑀸𑀤𑀺𑀢𑁄 𑀧𑀦𑁂𑀢𑀁 𑀅𑀦𑀢𑁆𑀣𑀚𑀦𑀦𑀭𑀲𑀁, 𑀲𑀁𑀓𑀺𑀮𑁂𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀣 𑀯𑀸 𑀕𑀸𑀭𑀬𑁆𑀳𑀪𑀸𑀯𑀢𑁄 𑀲𑀸𑀯𑀚𑁆𑀚𑀮𑀓𑁆𑀔𑀡𑀫𑁂𑀯, 𑀲𑀁𑀓𑀺𑀮𑁂𑀲𑀪𑀸𑀯𑀭𑀲𑀁, 𑀅𑀦𑀺𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁. 𑀯𑀘𑀦𑀢𑁆𑀣𑀢𑁄 𑀧𑀦 𑀦 𑀓𑀼𑀲𑀮𑀦𑁆𑀢𑀺 𑀅𑀓𑀼𑀲𑀮𑀁, 𑀓𑀼𑀲𑀮𑀧𑀝𑀺𑀧𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀓𑁆𑀔𑀢𑁆𑀣𑁂 𑀳𑀺 𑀅𑀬𑀁 𑀅𑀓𑀸𑀭𑁄, 𑀦 𑀧𑀦 𑀅𑀜𑁆𑀜𑀢𑁆𑀣𑁂, 𑀦𑀸𑀧𑀺 𑀅𑀪𑀸𑀯𑁂. 𑀇𑀢𑀭𑀣𑀸 𑀳𑀺 𑀢𑀺𑀓𑀁 𑀦 𑀲𑀺𑀬𑀸, 𑀤𑀼𑀓𑀁, 𑀘𑀢𑀼𑀓𑁆𑀓𑀁 𑀯𑀸 𑀆𑀧𑀚𑁆𑀚𑁂𑀬𑁆𑀬. 𑀢𑀣𑀸 𑀳𑀺 𑀬𑀤𑀺 𑀓𑀼𑀲𑀮𑀢𑁄 𑀅𑀜𑁆𑀜𑀫𑀓𑀼𑀲𑀮𑀁 𑀲𑀺𑀬𑀸, 𑀢𑀤𑀸 𑀅𑀩𑁆𑀬𑀸𑀓𑀢𑀲𑁆𑀲𑀸𑀧𑀺 𑀢𑀢𑁄 𑀅𑀜𑁆𑀜𑀪𑀸𑀯𑁂𑀦 𑀅𑀓𑀼𑀲𑀮-𑀲𑀤𑁆𑀤𑀲𑀗𑁆𑀕𑀳𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀚𑀸𑀢𑀺𑀪𑁂𑀤𑀢𑁄 𑀤𑀼𑀯𑀺𑀥𑀦𑁆𑀢𑀺 𑀤𑀼𑀓𑀁 𑀯𑀢𑁆𑀢𑀩𑁆𑀩𑀁. 𑀬𑀤𑀺 𑀘 𑀓𑀼𑀲𑀮𑀸𑀪𑀸𑀯𑁄 𑀅𑀓𑀼𑀲𑀮𑀁, 𑀢𑁂𑀦 𑀦 𑀓𑀸𑀘𑀺 𑀚𑀸𑀢𑀺 𑀕𑀬𑁆𑀳𑀢𑀻𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀚𑀸𑀢𑀺𑀪𑁂𑀤𑀢𑁄 𑀤𑀼𑀓𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀅𑀣 𑀲𑀺𑀬𑀸 ‘‘𑀅𑀪𑀸𑀯𑁄𑀧𑀺 𑀯𑀺𑀲𑀼𑀁 𑀕𑀳𑁂𑀢𑀩𑁆𑀩𑁄’’𑀢𑀺, 𑀏𑀯𑀁 𑀲𑀢𑀺 𑀢𑀲𑁆𑀲 𑀚𑀸𑀢𑀺𑀬𑀸 𑀅𑀪𑀸𑀯𑀢𑁄 𑀚𑀸𑀢𑀺-𑀲𑀤𑁆𑀤𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄 𑀦 𑀲𑀺𑀬𑀸. 𑀯𑀺𑀚𑁆𑀚𑀫𑀸𑀦𑀲𑁆𑀲 𑀳𑀺 𑀚𑀸𑀢𑀺 𑀦𑀸𑀫 𑀳𑁄𑀢𑀺. 𑀬𑀣𑁂𑀯 𑀯𑀸 𑀓𑀼𑀲𑀮𑀲𑁆𑀲 𑀅𑀪𑀸𑀯𑁄, 𑀏𑀯𑀁 𑀅𑀩𑁆𑀬𑀸𑀓𑀢𑀲𑁆𑀲𑀸𑀧𑀺 𑀅𑀪𑀸𑀯𑁄 𑀅𑀢𑁆𑀣𑀻𑀢𑀺 𑀅𑀦𑀩𑁆𑀬𑀸𑀓𑀢𑀚𑀸𑀢𑀺𑀧𑀺 𑀯𑀢𑁆𑀢𑀩𑁆𑀩𑀸𑀢𑀺 𑀘𑀢𑀼𑀓𑁆𑀓𑀁 𑀆𑀧𑀚𑁆𑀚𑁂𑀬𑁆𑀬. 𑀦 𑀘𑁂𑀢𑀫𑀺𑀝𑁆𑀞𑀁 𑀓𑀼𑀲𑀮𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀚𑀸𑀢𑀺𑀬𑀸 𑀏𑀯 𑀇𑀘𑁆𑀙𑀺𑀢𑀢𑁆𑀢𑀸, 𑀧𑀸𑀴𑀺𑀬𑀜𑁆𑀘 ‘‘𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺 𑀢𑀺𑀓𑀯𑀲𑁂𑀦𑁂𑀯 𑀯𑀼𑀢𑁆𑀢𑀢𑁆𑀢𑀸 ‘‘𑀓𑀼𑀲𑀮𑀧𑀝𑀺𑀧𑀓𑁆𑀔’’𑀦𑁆𑀢𑀺 𑀧𑀦 𑀯𑀼𑀘𑁆𑀘𑀫𑀸𑀦𑁂 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑁄 𑀅𑀫𑀺𑀢𑁆𑀢𑁄 𑀯𑀺𑀬, 𑀮𑁄𑀪𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄 𑀯𑀺𑀬 𑀘 𑀬𑀁 𑀥𑀫𑁆𑀫𑀚𑀸𑀢𑀁 𑀓𑀼𑀲𑀮𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀁, 𑀢𑀁 𑀅𑀓𑀼𑀲𑀮𑀦𑁆𑀢𑀺 𑀢𑀲𑁆𑀲 𑀯𑀲𑁂𑀦 𑀢𑀺𑀓𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺, 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸 𑀘𑀲𑁆𑀲 𑀲𑀸𑀯𑀚𑁆𑀚𑀸𑀦𑀺𑀝𑁆𑀞𑀯𑀺𑀧𑀸𑀓𑀢𑁆𑀢𑀸, 𑀢𑁂𑀦 𑀧𑀳𑀸𑀢𑀩𑁆𑀩𑀪𑀸𑀯𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸, 𑀦 𑀧𑀦 𑀓𑀼𑀲𑀮𑀯𑀺𑀦𑀸𑀲𑀦𑀢𑁄. 𑀦 𑀳𑀺 𑀅𑀓𑀼𑀲𑀮𑁂𑀦 𑀓𑀼𑀲𑀮𑀁 𑀧𑀳𑀻𑀬𑀢𑀺, 𑀫𑀳𑀸𑀩𑀮𑀢𑁆𑀢𑀸 𑀧𑀦 𑀓𑀼𑀲𑀮𑀫𑁂𑀯 𑀢𑀁 𑀧𑀚𑀳𑀢𑀺. 𑀓𑀼𑀲𑀮𑀜𑁆𑀳𑀺 𑀫𑀳𑀸𑀩𑀮𑀁, 𑀅𑀓𑀼𑀲𑀮𑀁 𑀤𑀼𑀩𑁆𑀩𑀮𑀁. 𑀢𑁂𑀦𑁂𑀯𑀸𑀳 ‘‘𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺, 𑀫𑀤𑁆𑀤𑀦𑁆𑀢𑁂𑀦𑀁 𑀧𑀭𑀺𑀲𑁆𑀲𑀬𑀸’’𑀢𑀺 (𑀲𑀼. 𑀦𑀺. 𑁭𑁭𑁬), 𑀢𑀲𑁆𑀫𑀸 𑀓𑀼𑀲𑀮𑀫𑁂𑀯 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀓𑀼𑀲𑀮𑀲𑁆𑀲 𑀧𑀳𑀸𑀬𑀓𑀁, 𑀦𑀸𑀓𑀼𑀲𑀮𑀁 𑀇𑀢𑀭𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀤𑀼𑀪𑀬…𑀧𑁂… 𑀅𑀩𑁆𑀬𑀸𑀓𑀢𑀦𑁆𑀢𑀺 𑀬𑀁 𑀥𑀫𑁆𑀫𑀚𑀸𑀢𑀁 𑀓𑀼𑀲𑀮𑀁 𑀯𑀺𑀬 𑀦 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀁, 𑀦𑀸𑀧𑀺 𑀅𑀓𑀼𑀲𑀮𑀁 𑀯𑀺𑀬 𑀲𑀸𑀯𑀚𑁆𑀚𑀸𑀦𑀺𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑀁, 𑀅𑀣 𑀔𑁄 𑀅𑀯𑀺𑀧𑀸𑀓𑀢𑁆𑀢𑀸 𑀢𑀤𑀼𑀪𑀬𑀯𑀺𑀧𑀭𑀻𑀢𑀮𑀓𑁆𑀔𑀡𑀁, 𑀢𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀦𑀼 𑀘 ‘‘𑀢𑀤𑀼𑀪𑀬𑀯𑀺𑀧𑀭𑀻𑀢𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀯𑀺𑀧𑀭𑀻𑀢𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀯𑀺𑀬 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀸𑀓𑀸𑀦𑀁 𑀯𑀺𑀧𑀭𑀻𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀯𑀺𑀧𑀸𑀓𑁄 𑀬𑀲𑁆𑀲 𑀅𑀢𑁆𑀣𑀺, 𑀢𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀢𑀣𑀸 𑀅𑀲𑀫𑁆𑀪𑀯𑀢𑁄. 𑀬𑀣𑀸 𑀳𑀺 𑀆𑀮𑁄𑀓𑀦𑁆𑀥𑀓𑀸𑀭𑀸𑀦𑀁 𑀯𑀺𑀧𑀭𑀻𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀦𑀢𑁆𑀣𑀺, 𑀏𑀯𑀫𑀺𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀸𑀓𑀸𑀦𑀁 𑀯𑀺𑀧𑀭𑀻𑀢𑁄 𑀦 𑀓𑁄𑀘𑀺 𑀯𑀺𑀧𑀸𑀓𑁄 𑀅𑀢𑁆𑀣𑀻𑀢𑀺. 𑀅𑀣 𑀯𑀸 𑀢𑀁-𑀲𑀤𑁆𑀤𑁄 𑀇𑀥 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀸𑀓𑀦𑀺𑀭𑀧𑁂𑀓𑁆𑀔𑀁 𑀓𑀼𑀲𑀮𑀸𑀓𑀼𑀲𑀮𑀫𑀢𑁆𑀢𑀫𑁂𑀯 𑀧𑀘𑁆𑀘𑀸𑀫𑀲𑀢𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀯𑀺𑀧𑀸𑀓𑀢𑁆𑀢𑀸 𑀢𑀤𑀼𑀪𑀬𑀯𑀺𑀧𑀭𑀻𑀢𑀮𑀓𑁆𑀔𑀡𑀁, 𑀢𑀁 𑀅𑀯𑀺𑀧𑀸𑀓𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄𑀢𑀺 𑀅𑀮𑀫𑁂𑀢𑁆𑀣 𑀅𑀦𑀼𑀬𑁄𑀕𑁂𑀦. 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀦 𑀩𑁆𑀬𑀸𑀓𑀢𑀦𑁆𑀢𑀺 𑀅𑀩𑁆𑀬𑀸𑀓𑀢𑀁. 𑀓𑀼𑀲𑀮𑀸𑀓𑀼𑀲𑀮𑀜𑁆𑀳𑀺 𑀯𑀢𑁆𑀯𑀸 𑀅𑀩𑁆𑀬𑀸𑀓𑀢𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦𑁂𑀯 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀦 𑀧𑀓𑀸𑀭𑀦𑁆𑀢𑀭𑁂𑀦. 𑀢𑀣𑀸 𑀅𑀯𑀘𑀦𑀜𑁆𑀘 𑀢𑀲𑁆𑀲 𑀢𑀤𑀼𑀪𑀬𑀯𑀺𑀧𑀭𑀻𑀢𑀮𑀓𑁆𑀔𑀡𑀢𑁆𑀢𑀸𑀬𑁂𑀯, 𑀦 𑀧𑀦 𑀅𑀯𑀢𑁆𑀢𑀩𑁆𑀩𑀢𑁆𑀢𑀸𑀫𑀢𑁆𑀢𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀯𑀺-𑀲𑀤𑁆𑀤𑁄 𑀯𑀺𑀭𑁄𑀥𑀺𑀯𑀘𑀦𑁄. 𑀆-𑀲𑀤𑁆𑀤𑁄 𑀅𑀪𑀺𑀫𑀼𑀔𑀪𑀸𑀯𑀧𑁆𑀧𑀓𑀸𑀲𑀦𑁄, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑁄𑀥𑀸𑀪𑀺𑀫𑀼𑀔𑀢𑀁 𑀓𑀢𑀁 𑀮𑀓𑁆𑀔𑀡𑀯𑀺𑀭𑁄𑀥𑀢𑁄 𑀧𑀳𑀸𑀬𑀓𑀧𑁆𑀧𑀳𑀸𑀢𑀩𑁆𑀩𑀪𑀸𑀯𑀢𑁄 𑀯𑀸𑀢𑀺 𑀩𑁆𑀬𑀸𑀓𑀢𑀁, 𑀓𑀼𑀲𑀮𑀸𑀓𑀼𑀲𑀮𑀁. 𑀢𑀢𑁄 𑀅𑀜𑁆𑀜𑀁 𑀅𑀩𑁆𑀬𑀸𑀓𑀢𑀁. 𑀢𑀜𑁆𑀳𑀺 𑀮𑀓𑁆𑀔𑀡𑀢𑁄 𑀅𑀜𑁆𑀜𑀫𑀜𑁆𑀜𑀁 𑀓𑀼𑀲𑀮𑀸𑀓𑀼𑀲𑀮𑀁 𑀯𑀺𑀬 𑀦 𑀢𑀲𑁆𑀲 𑀯𑀺𑀭𑀼𑀤𑁆𑀥𑀁. 𑀦 𑀳𑀺 𑀅𑀯𑀺𑀧𑀸𑀓𑀢𑀁 𑀅𑀦𑀺𑀝𑁆𑀞𑀯𑀺𑀧𑀸𑀓𑀢𑀸 𑀯𑀺𑀬, 𑀇𑀝𑁆𑀞𑀯𑀺𑀧𑀸𑀓𑀢𑀸𑀬 𑀇𑀝𑁆𑀞𑀯𑀺𑀧𑀸𑀓𑀢𑀸 𑀯𑀺𑀬 𑀘 𑀅𑀦𑀺𑀝𑁆𑀞𑀯𑀺𑀧𑀸𑀓𑀢𑀸𑀬 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀸𑀓𑀢𑀸𑀳𑀺 𑀯𑀺𑀭𑀼𑀚𑁆𑀛𑀢𑀺, 𑀦 𑀘𑀸𑀧𑀺 𑀅𑀩𑁆𑀬𑀸𑀓𑀢𑀁 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀓𑀺𑀜𑁆𑀘𑀺 𑀧𑀚𑀳𑀢𑀺, 𑀦 𑀘 𑀓𑁂𑀦𑀘𑀺 𑀧𑀳𑀸𑀢𑀩𑁆𑀩𑀦𑁆𑀢𑀺. ‘‘𑀢𑀤𑀼𑀪𑀬𑀯𑀺𑀧𑀭𑀻𑀢𑀮𑀓𑁆𑀔𑀡𑀫𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑁂 𑀅𑀳𑁄𑀲𑀺 𑀓𑀫𑁆𑀫𑀁, 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀇𑀫𑀺𑀦𑀸 𑀢𑀺𑀓𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀕𑀢𑀺𑀉𑀧𑀥𑀺𑀓𑀸𑀮𑀧𑁆𑀧𑀬𑁄𑀕𑀯𑀺𑀧𑀢𑁆𑀢𑀻𑀳𑀺 𑀅𑀯𑀺𑀧𑀸𑀓𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀺𑀓𑀫𑁆𑀫𑀲𑁆𑀲 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀲𑁆𑀲 𑀅𑀓𑀼𑀲𑀮𑀲𑁆𑀲 𑀘 𑀅𑀪𑀺𑀜𑁆𑀜𑀸𑀓𑀼𑀲𑀮𑀲𑁆𑀲 𑀘 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀸𑀪𑀸𑀯𑀢𑁄 ‘‘𑀲𑀺𑀬𑀸 𑀦𑀼 𑀔𑁄 𑀅𑀩𑁆𑀬𑀸𑀓𑀢𑀪𑀸𑀯𑁄 𑀯𑀸’’𑀢𑀺 𑀓𑀤𑀸𑀘𑀺 𑀓𑁄𑀘𑀺 𑀘𑀺𑀦𑁆𑀢𑁂𑀬𑁆𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀫𑀸𑀳 ‘‘𑀅𑀯𑀺𑀧𑀸𑀓𑀸𑀭𑀳𑀁 𑀯𑀸’’𑀢𑀺, 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀦𑀸𑀭𑀳𑀢𑀺 𑀢𑀢𑁆𑀣 𑀲𑀸𑀫𑀢𑁆𑀣𑀺𑀬𑀸𑀪𑀸𑀯𑀢𑁄𑀢𑀺 𑀅𑀯𑀺𑀧𑀸𑀓𑀸𑀭𑀳𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀬𑁄 𑀢𑀸𑀯 𑀧𑀘𑁆𑀘𑀬𑀯𑁂𑀓𑀮𑁆𑀮𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀅𑀯𑀺𑀧𑀸𑀓𑀸, 𑀲𑀘𑁂 𑀧𑀦𑁂𑀢𑁂 𑀢𑀩𑁆𑀩𑀺𑀤𑀽𑀭𑀸 𑀅𑀲𑁆𑀲𑀼, 𑀢𑀤𑀸 𑀯𑀺𑀧𑀸𑀓𑀤𑀸𑀦𑁂 𑀲𑀫𑀢𑁆𑀣𑀢𑀸𑀬 𑀯𑀺𑀧𑀸𑀓𑀸𑀭𑀳𑀸𑀬𑁂𑀯, 𑀢𑀁 𑀧𑀦 𑀦 𑀢𑀣𑀸, 𑀅𑀣 𑀔𑁄 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀯𑀺𑀧𑀸𑀓𑀤𑀸𑀦𑁂 𑀅𑀲𑀫𑀢𑁆𑀣𑀢𑀸𑀬𑁂𑀯 𑀯𑀺𑀧𑀸𑀓𑀸𑀭𑀳𑀁 𑀦 𑀳𑁄𑀢𑀺, 𑀢𑀁 𑀅𑀩𑁆𑀬𑀸𑀓𑀢𑀁 𑀦𑀸𑀫𑀸𑀢𑀺.

𑀇𑀤𑀸𑀦𑀺 𑀏𑀯𑀁 𑀢𑀺𑀓𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀓𑀼𑀲𑀮𑀸𑀤𑀻𑀲𑀼 𑀧𑀞𑀫𑀁 𑀢𑀸𑀯 𑀓𑀼𑀲𑀮𑀘𑀺𑀢𑁆𑀢𑀁 𑀯𑀺𑀪𑀚𑀦𑁆𑀢𑁄 ‘‘𑀢𑀢𑁆𑀣 𑀓𑀼𑀲𑀮𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀕𑀡𑀦𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺. 𑀏𑀓𑀯𑀻𑀲𑀢𑀺𑀯𑀺𑀥𑀦𑁆𑀢𑀺 𑀅𑀝𑁆𑀞 𑀓𑀸𑀫𑀸𑀯𑀘𑀭𑀸𑀦𑀺, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀭𑀽𑀧𑀸𑀯𑀘𑀭𑀸𑀦𑀺, 𑀘𑀢𑁆𑀢𑀸𑀭𑀺 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀏𑀓𑀯𑀻𑀲𑀢𑀺𑀯𑀺𑀥𑀁. 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀓𑀸𑀫𑀭𑀽𑀧𑀸𑀭𑀽𑀧𑀮𑁄𑀓𑀼𑀢𑁆𑀢𑀭𑀪𑀽𑀫𑀺𑀲𑀗𑁆𑀔𑀸𑀢𑀸𑀦𑀁 𑀘𑀢𑀼𑀦𑁆𑀦𑀁 𑀪𑀽𑀫𑀻𑀦𑀁 𑀯𑀲𑁂𑀦 𑀢𑀢𑁆𑀣 𑀧𑀯𑀢𑁆𑀢𑀫𑀸𑀦𑀁 𑀘𑀺𑀢𑁆𑀢𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀽𑀫𑀺, 𑀞𑀸𑀦𑀁, 𑀅𑀯𑀢𑁆𑀣𑀸 𑀘. 𑀅𑀯𑀢𑁆𑀣𑀸𑀧𑀺 𑀳𑀺 𑀅𑀯𑀢𑁆𑀣𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀯𑀺𑀬 𑀕𑀬𑁆𑀳𑀢𑀺. 𑀏𑀯𑀜𑁆𑀳𑀺 𑀦𑁂𑀲𑀁 𑀲𑀼𑀔𑀕𑁆𑀕𑀳𑀡𑀁 𑀳𑁄𑀢𑀺. 𑀅𑀯𑀢𑁆𑀣𑀸𑀢𑀺 𑀘𑁂𑀢𑁆𑀣 𑀥𑀫𑁆𑀫𑀸𑀦𑀁 𑀓𑀸𑀫𑀢𑀡𑁆𑀳𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀸𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀯𑁄. 𑀢𑀢𑁆𑀣 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄 𑀪𑀽𑀫𑀺𑀬𑁄 𑀉𑀪𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀇𑀢𑀭𑀸 𑀅𑀯𑀢𑁆𑀣𑀸𑀯𑀲𑁂𑀦𑁂𑀯. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀓𑀸𑀫𑀪𑀯𑀸𑀤𑀺𑀢𑁄 𑀅𑀜𑁆𑀜𑀁 𑀞𑀸𑀦𑀫𑀼𑀧𑀮𑀩𑁆𑀪𑀢𑀻𑀢𑀺.

𑀅𑀜𑁆𑀜𑀢𑁆𑀣 𑀧𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀓𑀸𑀫𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀪𑀽𑀫𑀺𑀢𑁄 𑀏𑀓𑀯𑀺𑀥𑀦𑁆𑀢𑀺. 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀪𑁂𑀤𑀢𑁄𑀢𑀺 𑀘𑀓𑁆𑀔𑀸𑀤𑀻𑀦𑀺 𑀧𑀜𑁆𑀘, 𑀳𑀤𑀬𑀜𑁆𑀘𑀸𑀢𑀺 𑀙 𑀯𑀢𑁆𑀣𑀽𑀦𑀺. 𑀓𑀼𑀲𑀮𑀲𑁆𑀲 𑀧𑀦 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀺𑀢𑀢𑁆𑀢𑀸𑀪𑀸𑀯𑀢𑁄 𑀳𑀤𑀬𑀯𑀢𑁆𑀣𑀼 𑀇𑀥 𑀯𑀢𑁆𑀣𑀽𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦 𑀲𑀳𑀺𑀢𑀁 𑀏𑀓𑀦𑁆𑀢𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑀧𑁆𑀧𑀯𑀢𑁆𑀢𑀺𑀢𑁄𑀢𑀺 𑀲𑀯𑀢𑁆𑀣𑀼𑀓𑀁, 𑀓𑀸𑀫𑀭𑀽𑀧𑀥𑀸𑀢𑀼𑀬𑀁 𑀧𑀯𑀢𑁆𑀢𑀫𑀸𑀦𑀯𑀺𑀜𑁆𑀜𑀸𑀡𑀁. 𑀢𑀢𑁆𑀣 𑀳𑀺 𑀅𑀭𑀽𑀧𑀲𑁆𑀲 𑀭𑀽𑀧𑀧𑀝𑀺𑀩𑀦𑁆𑀥𑀧𑁆𑀧𑀯𑀢𑁆𑀢𑀺, 𑀅𑀭𑀽𑀧𑀥𑀸𑀢𑀼𑀬𑀁 𑀧𑀦 𑀭𑀽𑀧𑀸𑀪𑀸𑀯𑀢𑁄 𑀯𑀢𑁆𑀣𑀼𑀯𑀺𑀭𑀳𑀺𑀢𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀢𑀢𑁆𑀣 𑀧𑀯𑀢𑁆𑀢𑀫𑀸𑀦𑀁 𑀅𑀯𑀢𑁆𑀣𑀼𑀓𑀁. 𑀳𑀻𑀦…𑀧𑁂… 𑀢𑀺𑀯𑀺𑀥𑀦𑁆𑀢𑀺 𑀏𑀢𑁆𑀣 𑀧𑀘𑁆𑀘𑀬𑀢𑁄, 𑀨𑀮𑀢𑁄 𑀘 𑀫𑀚𑁆𑀛𑀺𑀫𑀧𑀡𑀻𑀢𑁂𑀳𑀺 𑀦𑀺𑀳𑀻𑀦𑀁, 𑀢𑁂𑀲𑀁 𑀯𑀸 𑀕𑀼𑀡𑁂𑀳𑀺 𑀧𑀭𑀺𑀳𑀻𑀦𑀦𑁆𑀢𑀺 𑀳𑀻𑀦𑀁, 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀥𑀸𑀦𑀪𑀸𑀯𑀁 𑀦𑀻𑀢𑀦𑁆𑀢𑀺 𑀧𑀡𑀻𑀢𑀁, 𑀉𑀪𑀺𑀦𑁆𑀦𑀁 𑀯𑁂𑀫𑀚𑁆𑀛𑁂 𑀪𑀯𑀁 𑀫𑀚𑁆𑀛𑀺𑀫𑀁. 𑀢𑀢𑁆𑀣 𑀳𑀻𑀦𑁂𑀦 𑀙𑀦𑁆𑀤𑁂𑀦 𑀘𑀺𑀢𑁆𑀢𑁂𑀦 𑀯𑀻𑀭𑀺𑀬𑁂𑀦 𑀯𑀻𑀫𑀁𑀲𑀸𑀬 𑀯𑀸 𑀧𑀯𑀢𑁆𑀢𑀺𑀢𑀁 𑀳𑀻𑀦𑀁, 𑀫𑀚𑁆𑀛𑀺𑀫𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁, 𑀧𑀡𑀻𑀢𑁂𑀳𑀺 𑀧𑀡𑀻𑀢𑀁. 𑀙𑀦𑁆𑀤𑀸𑀤𑀻𑀦𑀁 𑀧𑀦 𑀳𑀻𑀦𑀸𑀤𑀺𑀪𑀸𑀯𑁄 𑀅𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀳𑀺 𑀦𑁂𑀲𑀁 𑀳𑀻𑀦𑀢𑀸, 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀧𑀡𑀻𑀢𑀢𑀸, 𑀢𑀤𑀼𑀪𑀬𑀯𑁂𑀫𑀚𑁆𑀛𑀯𑀲𑁂𑀦 𑀫𑀚𑁆𑀛𑀺𑀫𑀢𑀸. 𑀬𑀲𑀓𑀸𑀫𑀢𑀸𑀬 𑀯𑀸 𑀓𑀢𑀁 𑀓𑀼𑀲𑀮𑀁 𑀳𑀻𑀦𑀁, 𑀧𑀼𑀜𑁆𑀜𑀨𑀮𑀓𑀸𑀫𑀢𑀸𑀬 𑀫𑀚𑁆𑀛𑀺𑀫𑀁, ‘‘𑀧𑀼𑀜𑁆𑀜𑀁 𑀦𑀸𑀫𑁂𑀢𑀁 𑀲𑀸𑀥𑀽𑀳𑀺 𑀓𑀢𑁆𑀢𑀩𑁆𑀩𑀫𑁂𑀯𑀸’’𑀢𑀺 𑀏𑀯𑀁 𑀅𑀭𑀺𑀬𑀪𑀸𑀯𑀁 𑀦𑀺𑀲𑁆𑀲𑀸𑀬 𑀓𑀢𑀁 𑀧𑀡𑀻𑀢𑀁. ‘‘𑀅𑀳𑀫𑀲𑁆𑀫𑀺 𑀤𑀸𑀦𑀧𑀢𑀺, 𑀇𑀫𑁂 𑀧𑀦𑀜𑁆𑀜𑁂 𑀤𑀸𑀦𑀤𑀸𑀲𑀸𑀤𑀬𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀸𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀧𑀯𑀢𑁆𑀢𑀺𑀢𑀁 𑀯𑀸 𑀳𑀻𑀦𑀁, 𑀢𑀣𑀸 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀁 𑀫𑀚𑁆𑀛𑀺𑀫𑀁, 𑀫𑀕𑁆𑀕𑀨𑀮𑀧𑀤𑀝𑁆𑀞𑀸𑀦𑀁 𑀧𑀡𑀻𑀢𑀁. 𑀪𑀯𑀪𑁄𑀕𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀯𑀸 𑀓𑀢𑀁 𑀳𑀻𑀦𑀁, 𑀲𑀸𑀯𑀓𑀧𑀘𑁆𑀘𑁂𑀓𑀩𑁄𑀥𑀺𑀧𑀸𑀭𑀫𑀺𑀢𑀸𑀯𑀲𑁂𑀦 𑀅𑀢𑁆𑀢𑀦𑁄 𑀯𑀺𑀫𑁄𑀓𑁆𑀔𑀢𑁆𑀣𑀸𑀬 𑀓𑀢𑀁 𑀫𑀚𑁆𑀛𑀺𑀫𑀁, 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀧𑀸𑀭𑀫𑀺𑀢𑀸𑀯𑀲𑁂𑀦 𑀲𑀩𑁆𑀩𑁂𑀲𑀁 𑀯𑀺𑀫𑁄𑀓𑁆𑀔𑀢𑁆𑀣𑀸𑀬 𑀓𑀢𑀁 𑀧𑀡𑀻𑀢𑀦𑁆𑀢𑀺.

𑀲𑁄𑀫𑀦𑀲𑁆𑀲𑀼…𑀧𑁂… 𑀪𑁂𑀤𑀢𑁄𑀢𑀺 𑀪𑁂𑀤-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄 ‘‘𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀪𑁂𑀤𑀢𑁄 𑀜𑀸𑀡𑀪𑁂𑀤𑀢𑁄 𑀧𑀬𑁄𑀕𑀪𑁂𑀤𑀢𑁄’’𑀢𑀺. 𑀢𑀢𑁆𑀣 𑀧𑀬𑁄𑀕𑀪𑁂𑀤𑀢𑁄𑀢𑀺 𑀲𑀗𑁆𑀔𑀸𑀭𑀪𑁂𑀤𑀢𑁄𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀪𑁂𑀤𑁄 𑀢𑀸𑀯 𑀬𑀼𑀢𑁆𑀢𑁄 𑀢𑁂𑀲𑀁 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸. 𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑁄 𑀧𑀦 𑀓𑀣𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀜𑀸𑀡𑀧𑁆𑀧𑀬𑁄𑀕𑀓𑀢𑁄 𑀪𑁂𑀤𑁄 𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑁄 𑀢𑁂𑀲𑀁 𑀪𑀸𑀯𑀸𑀪𑀸𑀯𑀫𑀼𑀧𑀸𑀤𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀇𑀤𑀸𑀦𑀺 𑀢𑀫𑁂𑀯 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀤𑀺𑀪𑁂𑀤𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀬𑁆𑀬𑀣𑀺𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀢𑁆𑀣 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀢𑀁 𑀓𑀢𑀫𑀁, 𑀢𑀁 𑀓𑀣𑀦𑁆𑀢𑀺 𑀯𑀸 𑀅𑀢𑁆𑀣𑁄.

𑀲𑁄𑀪𑀦𑀁 𑀫𑀦𑁄, 𑀲𑁄𑀪𑀦𑀁 𑀯𑀸 𑀫𑀦𑁄 𑀏𑀢𑀲𑁆𑀲𑀸𑀢𑀺 𑀲𑀼𑀫𑀦𑁄, 𑀢𑀲𑁆𑀲 𑀪𑀸𑀯𑁄 𑀲𑁄𑀫𑀦𑀲𑁆𑀲𑀁, 𑀫𑀸𑀦𑀲𑀺𑀓𑀲𑀼𑀔𑀯𑁂𑀤𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁, 𑀲𑁄𑀫𑀦𑀲𑁆𑀲𑁂𑀦 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀦𑀺𑀭𑁄𑀥𑀸 𑀲𑀳𑀕𑀢𑀁 𑀧𑀯𑀢𑁆𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑁄𑀫𑀦𑀲𑁆𑀲𑁂𑀦 𑀲𑀳 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀁 𑀕𑀢𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁. 𑀚𑀸𑀦𑀸𑀢𑀺 𑀬𑀣𑀸𑀲𑀪𑀸𑀯𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀜𑀸𑀡𑀁, 𑀢𑁂𑀦 𑀲𑀫𑀁 𑀏𑀓𑀼𑀧𑁆𑀧𑀸𑀤𑀸𑀤𑀻𑀳𑀺 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀦𑁆𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁. 𑀦𑀸𑀲𑁆𑀲 𑀲𑀗𑁆𑀔𑀸𑀭𑁄 𑀅𑀢𑁆𑀣𑀻𑀢𑀺 𑀅𑀲𑀗𑁆𑀔𑀸𑀭𑀁, 𑀅𑀲𑀗𑁆𑀔𑀸𑀭𑀫𑁂𑀯 𑀅𑀲𑀗𑁆𑀔𑀸𑀭𑀺𑀓𑀁. 𑀲𑀳 𑀲𑀗𑁆𑀔𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀲𑀗𑁆𑀔𑀸𑀭𑀁, 𑀢𑀤𑁂𑀯 𑀲𑀲𑀗𑁆𑀔𑀸𑀭𑀺𑀓𑀁. 𑀲𑀗𑁆𑀔𑀸𑀭𑁄𑀢𑀺 𑀘𑁂𑀢𑁆𑀣 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀯𑀸 𑀧𑀼𑀩𑁆𑀩𑀧𑁆𑀧𑀬𑁄𑀕𑁄 ‘‘𑀲𑀗𑁆𑀔𑀭𑁄𑀢𑀺 𑀢𑀺𑀓𑁆𑀔𑀪𑀸𑀯𑀲𑀗𑁆𑀔𑀸𑀢𑁂𑀦 𑀫𑀡𑁆𑀟𑀦𑀯𑀺𑀲𑁂𑀲𑁂𑀦 𑀲𑀚𑁆𑀚𑁂𑀢𑀺, 𑀲𑀗𑁆𑀔𑀭𑀻𑀬𑀢𑀺 𑀯𑀸 𑀲𑀚𑁆𑀚𑀻𑀬𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸. 𑀢𑀢𑁆𑀣 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀭𑀡𑀓𑀸𑀮𑁂 𑀫𑀘𑁆𑀙𑁂𑀭𑀫𑀮𑀣𑀺𑀦𑀫𑀺𑀤𑁆𑀥𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀲𑀁𑀲𑀻𑀤𑀫𑀸𑀦𑁂 𑀘𑀺𑀢𑁆𑀢𑁂 𑀉𑀧𑀓𑁆𑀓𑀺𑀮𑁂𑀲𑀯𑀽𑀧𑀲𑀫𑀯𑀲𑁂𑀦, 𑀘𑀺𑀢𑁆𑀢𑀲𑁆𑀲 𑀘 𑀉𑀲𑁆𑀲𑀸𑀳𑀚𑀦𑀦𑀯𑀲𑁂𑀦 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀅𑀢𑁆𑀢𑀦𑁄 𑀧𑀬𑁄𑀕𑁄 𑀦𑀸𑀫. 𑀓𑀼𑀲𑀮𑀓𑀭𑀡𑁂 𑀦𑀺𑀭𑀼𑀲𑁆𑀲𑀸𑀳𑀲𑁆𑀲 𑀧𑀦 ‘‘𑀅𑀫𑁆𑀪𑁄, 𑀲𑀧𑁆𑀧𑀼𑀭𑀺𑀲, 𑀓𑀼𑀲𑀮𑀓𑀭𑀡𑀁 𑀦𑀸𑀫 𑀧𑀡𑁆𑀟𑀺𑀢𑁂𑀳𑀺 𑀆𑀲𑁂𑀯𑀺𑀢𑀫𑀕𑁆𑀕𑁄, 𑀢𑀢𑁆𑀣 𑀢𑀬𑀸𑀧𑀺 𑀧𑀝𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀤𑀸𑀦𑀁 𑀤𑁂𑀳𑀺, 𑀲𑀻𑀮𑀁 𑀭𑀓𑁆𑀔, 𑀢𑀜𑁆𑀳𑀺 𑀢𑁂 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀓𑀭𑀡𑀢𑁆𑀣𑀸𑀬 𑀉𑀲𑁆𑀲𑀸𑀳𑀚𑀦𑀦𑀯𑀲𑁂𑀦 𑀧𑀭𑁂𑀲𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀸 𑀆𑀡𑀢𑁆𑀢𑀺 𑀧𑀭𑀧𑁆𑀧𑀬𑁄𑀕𑁄 𑀦𑀸𑀫. 𑀢𑁂𑀲𑀼 𑀧𑀦 𑀧𑀼𑀭𑀺𑀫𑁄 𑀧𑀼𑀩𑁆𑀩𑀪𑀸𑀕𑀧𑁆𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁂, 𑀧𑀘𑁆𑀙𑀺𑀫𑁄 𑀧𑀭𑁂𑀲𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀬𑁂𑀯 𑀲𑀫𑁆𑀪𑀯𑀢𑀻𑀢𑀺 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀢𑁄 𑀘𑀺𑀢𑁆𑀢𑀲𑁆𑀲 𑀢𑀺𑀓𑁆𑀔𑀪𑀸𑀯𑀲𑀗𑁆𑀔𑀸𑀢𑁄 𑀯𑀺𑀲𑁂𑀲𑁄 𑀇𑀥 𑀉𑀧𑀘𑀸𑀭𑀢𑁄 𑀲𑀗𑁆𑀔𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳𑀼 𑀆𑀘𑀭𑀺𑀬𑀸 𑁋

‘‘𑀧𑀼𑀩𑁆𑀩𑀧𑁆𑀧𑀬𑁄𑀕𑀲𑀫𑁆𑀪𑀽𑀢𑁄, 𑀯𑀺𑀲𑁂𑀲𑁄 𑀘𑀺𑀢𑁆𑀢𑀲𑀫𑁆𑀪𑀯𑀻;

𑀲𑀗𑁆𑀔𑀸𑀭𑁄 𑀇𑀢𑀺 𑀲𑀗𑁆𑀔𑀸𑀭-𑀲𑀪𑀸𑀯𑀜𑁆𑀜𑀽𑀳𑀺 𑀓𑀺𑀢𑁆𑀢𑀺𑀢𑁄’’𑀢𑀺.

𑀅𑀣 𑀯𑀸 ‘‘𑀲𑀲𑀗𑁆𑀔𑀸𑀭𑀺𑀓𑀫𑀲𑀗𑁆𑀔𑀸𑀭𑀺𑀓’’𑀦𑁆𑀢𑀺 𑀘 𑀏𑀢𑀁 𑀓𑁂𑀯𑀮𑀁 𑀲𑀗𑁆𑀔𑀸𑀭𑀲𑁆𑀲 𑀪𑀸𑀯𑀸𑀪𑀸𑀯𑀫𑀢𑁆𑀢𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀁, 𑀦 𑀢𑀲𑁆𑀲 𑀲𑀳𑀧𑁆𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀸𑀪𑀸𑀯𑀢𑁄𑀢𑀺 𑀪𑀺𑀦𑁆𑀦𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀺𑀦𑁄𑀧𑀺 𑀲𑀗𑁆𑀔𑀸𑀭𑀲𑁆𑀲 𑀇𑀤𑀫𑀢𑁆𑀣𑀺𑀢𑀸𑀬 𑀢𑀁𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀁 𑀘𑀺𑀢𑁆𑀢𑀁 𑀲𑀗𑁆𑀔𑀸𑀭𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀲𑀗𑁆𑀔𑀸𑀭𑀺𑀓𑀁 𑀲𑀳-𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀣𑀧𑀭𑀺𑀤𑀻𑀧𑀦𑀢𑁄 ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀩𑁆𑀩𑀺𑀧𑀭𑀻𑀢𑀁 𑀧𑀦 𑀢𑀤𑀪𑀸𑀯𑀢𑁄 𑀬𑀣𑀸𑀯𑀼𑀢𑁆𑀢𑀯𑀲𑁂𑀦𑁂𑀯 𑀅𑀲𑀗𑁆𑀔𑀸𑀭𑀺𑀓𑀁. 𑀅𑀣 𑀯𑀸 𑀲𑀗𑁆𑀔𑀭𑀡𑀁, 𑀲𑀗𑁆𑀔𑀭𑀻𑀬𑀢𑀺 𑀯𑀸 𑀏𑀢𑁂𑀦 𑀆𑀕𑀦𑁆𑀢𑀼𑀓𑀲𑀫𑁆𑀪𑀽𑀢𑁂𑀦 𑀘𑀺𑀢𑁆𑀢𑀲𑀁𑀲𑀻𑀤𑀦𑀲𑀪𑀸𑀯𑀸𑀧𑀦𑀬𑀦𑀯𑀲𑁂𑀦𑁂𑀯 𑀲𑀚𑁆𑀚𑀻𑀬𑀢𑀺, 𑀲𑀗𑁆𑀔𑀭𑁄𑀢𑀺 𑀯𑀸 𑀢𑀁 𑀬𑀣𑀸𑀯𑀼𑀢𑁆𑀢𑀯𑀲𑁂𑀦𑁂𑀯𑀸𑀢𑀺 𑀲𑀗𑁆𑀔𑀸𑀭𑁄𑀢𑀺 𑀉𑀚𑀼𑀓𑀫𑁂𑀯 𑀧𑀼𑀩𑁆𑀩𑀧𑁆𑀧𑀬𑁄𑀕𑀚𑀦𑀺𑀢𑁄 𑀢𑀺𑀓𑁆𑀔𑀪𑀸𑀯𑁄 𑀯𑀼𑀘𑁆𑀘𑀢𑀺, 𑀢𑀤𑀪𑀸𑀯𑀢𑁄 𑀅𑀲𑀗𑁆𑀔𑀸𑀭𑀺𑀓𑀁, 𑀲𑀪𑀸𑀯𑀢𑀺𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀢𑀁𑀲𑀳𑀕𑀢𑀸𑀬 𑀲𑀲𑀗𑁆𑀔𑀸𑀭𑀺𑀓𑀁, 𑀅𑀣 𑀯𑀸 𑀫𑀘𑁆𑀙𑁂𑀭𑀫𑀮𑀸𑀤𑀻𑀳𑀺 𑀲𑀗𑁆𑀔𑀭𑀻𑀬𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀘𑀺𑀢𑁆𑀢𑀲𑁆𑀲 𑀲𑀁𑀲𑀻𑀤𑀦𑀲𑀪𑀸𑀯𑁄, 𑀲𑁄 𑀬𑀲𑁆𑀲 𑀦𑀢𑁆𑀣𑀻𑀢𑀺 𑀅𑀲𑀗𑁆𑀔𑀸𑀭𑀺𑀓𑀁, 𑀇𑀢𑀭𑀁 𑀲𑀲𑀗𑁆𑀔𑀸𑀭𑀺𑀓𑀁. 𑀧𑀡𑀻𑀢𑀉𑀢𑀼𑀪𑁄𑀚𑀦𑀸𑀤𑀺𑀓𑁄 𑀯𑀸 𑀩𑀮𑀯𑀧𑀘𑁆𑀘𑀬𑁄 𑀲𑀗𑁆𑀔𑀸𑀭𑁄 ‘‘𑀲𑀗𑁆𑀔𑀭𑁄𑀢𑀺 𑀘𑀺𑀢𑁆𑀢𑀁 𑀢𑀺𑀓𑁆𑀔𑀪𑀸𑀯𑁂𑀦, 𑀲𑀗𑁆𑀔𑀭𑀻𑀬𑀢𑀺 𑀯𑀸 𑀢𑀁 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸. 𑀅-𑀓𑀸𑀭𑀲𑁆𑀲 𑀯𑀼𑀟𑁆𑀠𑀢𑁆𑀣𑀯𑀼𑀢𑁆𑀢𑀺𑀢𑀸𑀬 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀲𑀗𑁆𑀔𑀸𑀭𑁄 𑀅𑀲𑁆𑀲𑀸𑀢𑀺 𑀅𑀲𑀗𑁆𑀔𑀸𑀭𑀺𑀓𑀁, 𑀩𑀮𑀯𑀧𑀘𑁆𑀘𑀬𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀟𑁆𑀠𑀺𑀧𑀭𑀺𑀤𑀻𑀧𑀓𑁂𑀦 𑀧𑀦 𑀅-𑀓𑀸𑀭𑁂𑀦 𑀅𑀯𑀺𑀲𑁂𑀲𑀺𑀢𑀢𑁆𑀢𑀸 𑀲𑀲𑀗𑁆𑀔𑀸𑀭𑀺𑀓𑀁 𑀲𑀧𑁆𑀧𑀘𑁆𑀘𑀬𑀁 𑀤𑀼𑀩𑁆𑀩𑀮𑀧𑀘𑁆𑀘𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀜𑀸𑀡𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀁 𑀯𑀺𑀭𑀳𑀺𑀢𑀦𑁆𑀢𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁.

𑀉𑀧𑁂𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀯𑁂𑀤𑀺𑀬𑀫𑀸𑀦𑀸𑀧𑀺 𑀆𑀭𑀫𑁆𑀫𑀡𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀫𑀚𑁆𑀛𑀢𑁆𑀢𑀸𑀓𑀸𑀭𑀲𑀡𑁆𑀞𑀺𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀇𑀝𑁆𑀞𑁂, 𑀅𑀦𑀺𑀝𑁆𑀞𑁂 𑀘 𑀆𑀭𑀫𑁆𑀫𑀡𑁂 𑀧𑀓𑁆𑀔𑀧𑀸𑀢𑀸𑀪𑀸𑀯𑁂𑀦 𑀉𑀧𑀧𑀢𑁆𑀢𑀺𑀢𑁄 𑀬𑀼𑀢𑁆𑀢𑀺𑀢𑁄 𑀇𑀓𑁆𑀔𑀢𑀺 𑀅𑀦𑀼𑀪𑀯𑀢𑀻𑀢𑀺 𑀉𑀧𑁂𑀓𑁆𑀔𑀸. 𑀅𑀣 𑀯𑀸 𑀉𑀧𑁂𑀢𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀯𑀺𑀭𑀼𑀤𑁆𑀥𑀸 𑀇𑀓𑁆𑀔𑀸 𑀅𑀦𑀼𑀪𑀯𑀦𑀦𑁆𑀢𑀺 𑀉𑀧𑁂𑀓𑁆𑀔𑀸. 𑀅𑀯𑀺𑀭𑀼𑀤𑁆𑀥𑀢𑁆𑀢𑀸𑀬𑁂𑀯 𑀳𑁂𑀲𑀸 𑀢𑁂𑀲𑀁 𑀅𑀦𑀦𑁆𑀢𑀭𑀫𑁆𑀧𑀺 𑀧𑀯𑀢𑁆𑀢𑀢𑀺. 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸 𑀧𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸 𑀦𑀸𑀜𑁆𑀜𑀫𑀜𑁆𑀜𑀁 𑀅𑀦𑀦𑁆𑀢𑀭𑀁 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀧𑀝𑁆𑀞𑀸𑀦𑁂 𑀲𑁄𑀫𑀦𑀲𑁆𑀲𑀲𑁆𑀲 𑀅𑀦𑀦𑁆𑀢𑀭𑀁 𑀤𑁄𑀫𑀦𑀲𑁆𑀲𑀲𑁆𑀲, 𑀤𑁄𑀫𑀦𑀲𑁆𑀲𑀲𑁆𑀲 𑀅𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀲𑁆𑀲 𑀘 𑀉𑀧𑁆𑀧𑀢𑁆𑀢𑀺 𑀧𑀝𑀺𑀲𑀺𑀤𑁆𑀥𑀸. 𑀅𑀬𑀜𑁆𑀘 𑀅𑀢𑁆𑀣𑁄 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸𑀬𑀧𑀺 𑀮𑀩𑁆𑀪𑀢𑀺, 𑀧𑀼𑀭𑀺𑀫𑀸 𑀧𑀦 𑀤𑁆𑀯𑁂 𑀦 𑀢𑀣𑀸. 𑀦 𑀳𑀺 𑀮𑁄𑀪𑀲𑀳𑀕𑀢𑀸𑀤𑀻𑀦𑀁 𑀫𑀚𑁆𑀛𑀢𑁆𑀢𑀸𑀓𑀸𑀭𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀦𑀁, 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀦𑀁 𑀯𑀸 𑀅𑀢𑁆𑀣𑀻𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀦𑀦𑀼 𑀘 𑀅𑀜𑁆𑀜𑁂𑀧𑀺 𑀨𑀲𑁆𑀲𑀸𑀤𑀬𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀅𑀢𑁆𑀣𑀻𑀢𑀺 𑀲𑁄𑀫𑀦𑀲𑁆𑀲𑀸𑀤𑀻𑀦𑀁 𑀯𑀲𑁂𑀦𑁂𑀯 𑀧𑀦 𑀅𑀝𑁆𑀞𑀯𑀺𑀥𑀢𑀸 𑀓𑀲𑁆𑀫𑀸 𑀕𑀳𑀺𑀢𑀸𑀢𑀺? 𑀪𑁂𑀤𑀓𑀭𑀪𑀸𑀯𑀢𑁄. 𑀨𑀲𑁆𑀲𑀸𑀤𑀻𑀦𑀜𑁆𑀳𑀺 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸, 𑀲𑀤𑁆𑀥𑀸𑀤𑀻𑀦𑀜𑁆𑀘 𑀲𑀩𑁆𑀩𑀓𑀼𑀲𑀮𑀲𑀸𑀥𑀸𑀭𑀡𑀢𑁆𑀢𑀸 𑀦 𑀢𑁂𑀳𑀺 𑀘𑀺𑀢𑁆𑀢𑀲𑁆𑀲 𑀯𑀺𑀪𑀸𑀕𑁄, 𑀲𑁄𑀫𑀦𑀲𑁆𑀲𑀸𑀤𑀬𑁄 𑀧𑀦 𑀓𑀢𑁆𑀣𑀘𑀺 𑀘𑀺𑀢𑁆𑀢𑁂 𑀳𑁄𑀦𑁆𑀢𑀺, 𑀓𑀢𑁆𑀣𑀘𑀺 𑀦 𑀳𑁄𑀦𑁆𑀢𑀻𑀢𑀺 𑀧𑀸𑀓𑀝𑁄𑀯 𑀢𑁂𑀳𑀺 𑀘𑀺𑀢𑁆𑀢𑀲𑁆𑀲 𑀯𑀺𑀪𑀸𑀕𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁂 𑀓𑀢𑁆𑀣𑀘𑀺 𑀘𑀺𑀢𑁆𑀢𑁂 𑀳𑁄𑀦𑁆𑀢𑀺, 𑀓𑀢𑁆𑀣𑀘𑀺 𑀦 𑀳𑁄𑀦𑁆𑀢𑀻𑀢𑀺? 𑀓𑀸𑀭𑀡𑀲𑁆𑀲 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄. 𑀓𑀺𑀁 𑀧𑀦 𑀦𑁂𑀲𑀁 𑀓𑀸𑀭𑀡𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀢𑁆𑀣 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁄 𑀢𑀸𑀯 𑀆𑀭𑀫𑁆𑀫𑀡𑀯𑀲𑁂𑀦 𑀳𑁄𑀢𑀺. 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀫𑀺𑀜𑁆𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀢𑀺. 𑀦𑀦𑀼 𑀘 𑀇𑀝𑁆𑀞𑀸𑀭𑀫𑁆𑀫𑀡𑀁 𑀮𑁄𑀪𑀲𑁆𑀲 𑀯𑀢𑁆𑀣𑀼 𑀭𑀚𑁆𑀚𑀦𑀻𑀬𑀢𑁆𑀢𑀸𑀢𑀺 𑀓𑀣𑀁 𑀢𑀢𑁆𑀣 𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑀬𑀺𑀤𑀫𑁂𑀓𑀦𑁆𑀢𑀺𑀓𑀁 𑀇𑀝𑁆𑀞𑁂𑀧𑀺 𑀆𑀭𑀫𑁆𑀫𑀡𑁂 𑀦𑀺𑀬𑀫𑀺𑀢𑀸𑀤𑀺𑀯𑀲𑁂𑀦 𑀓𑀼𑀲𑀮𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄. 𑀬𑀲𑁆𑀲 𑀳𑀺 ‘‘𑀓𑀼𑀲𑀮𑀫𑁂𑀯 𑀫𑀬𑀸 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀓𑀼𑀲𑀮𑀓𑀭𑀡𑁂𑀬𑁂𑀯 𑀘𑀺𑀢𑁆𑀢𑀁 𑀦𑀺𑀬𑀫𑀺𑀢𑀁 𑀳𑁄𑀢𑀺, 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀢𑁄𑀯 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀼𑀲𑀮𑀓𑀭𑀡𑁂𑀬𑁂𑀯 𑀧𑀭𑀺𑀡𑀸𑀫𑀺𑀢𑀁, 𑀅𑀪𑀺𑀡𑁆𑀳𑀓𑀭𑀡𑁂𑀦 𑀘 𑀓𑀼𑀲𑀮𑀁 𑀲𑀫𑀼𑀤𑀸𑀘𑀺𑀡𑁆𑀡𑀁, 𑀧𑀝𑀺𑀭𑀽𑀧𑀤𑁂𑀲𑀯𑀸𑀲𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀲𑀗𑁆𑀔𑀸𑀢𑀘𑀢𑀼𑀘𑀓𑁆𑀓𑀽𑀧𑀦𑀺𑀲𑁆𑀲𑀬𑀯𑀲𑁂𑀦, 𑀬𑁄𑀦𑀺𑀲𑁄 𑀘 𑀆𑀪𑁄𑀕𑁄 𑀧𑀯𑀢𑁆𑀢𑀢𑀺, 𑀢𑀲𑁆𑀲 𑀇𑀝𑁆𑀞𑁂𑀧𑀺 𑀆𑀭𑀫𑁆𑀫𑀡𑁂 𑀅𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑀢𑀺, 𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀁. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀦𑀺𑀬𑀸𑀫𑀧𑀭𑀺𑀡𑀸𑀫𑁂𑀳𑀺, 𑀲𑀫𑀼𑀤𑀸𑀘𑀺𑀡𑁆𑀡𑀢𑀸𑀬 𑀘;

𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀸𑀪𑁄𑀕𑀸, 𑀇𑀝𑁆𑀞𑁂𑀧𑀺 𑀓𑀼𑀲𑀮𑀁 𑀲𑀺𑀬𑀸’’𑀢𑀺.

𑀅𑀧𑀺𑀘 𑀲𑀤𑁆𑀥𑀸𑀩𑀳𑀼𑀮𑀢𑀸𑀤𑀻𑀳𑀺 𑀘 𑀓𑀸𑀭𑀡𑁂𑀳𑀺 𑀘𑀺𑀢𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀲𑁆𑀲𑀤𑁆𑀥𑀸𑀦𑀁, 𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀜𑁆𑀘 𑀏𑀓𑀦𑁆𑀢𑀫𑀺𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀁 𑀢𑀣𑀸𑀕𑀢𑀭𑀽𑀧𑀫𑁆𑀧𑀺 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀬𑁂 𑀘 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀁 𑀆𑀦𑀺𑀲𑀁𑀲𑀁 𑀦 𑀧𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀧𑀭𑁂𑀳𑀺 𑀉𑀲𑁆𑀲𑀸𑀳𑀺𑀢𑀸𑀦𑀁 𑀓𑀼𑀲𑀮𑀁 𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀲𑁄𑀫𑀦𑀲𑁆𑀲𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀤𑁆𑀥𑀸𑀩𑀳𑀼𑀮𑀢𑀸 𑀯𑀺𑀲𑀼𑀤𑁆𑀥𑀺𑀤𑀺𑀝𑁆𑀞𑀺𑀢𑀸 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀢𑀺 𑀇𑀫𑁂𑀳𑀺𑀧𑀺 𑀓𑀸𑀭𑀡𑁂𑀳𑀺 𑀘𑀺𑀢𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀸 𑀳𑁄𑀢𑀺.

𑀅𑀧𑀺𑀘 𑀬𑁂 𑀢𑁂 𑀏𑀓𑀸𑀤𑀲 𑀥𑀫𑁆𑀫𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺 𑀲𑀁𑀖𑀸𑀦𑀼𑀲𑁆𑀲𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺 𑀤𑁂𑀯𑀢𑀸𑀦𑀼𑀲𑁆𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀺 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀁 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀸 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑁂𑀳𑀺𑀧𑀺 𑀓𑀸𑀭𑀡𑁂𑀳𑀺 𑀘𑀺𑀢𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀼𑀤𑁆𑀥𑀸𑀤𑀺𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀳𑀺 𑀬𑀸𑀯 𑀉𑀧𑀘𑀸𑀭𑀼𑀧𑁆𑀧𑀸𑀤𑀸 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀤𑀻𑀖𑀭𑀢𑁆𑀢𑀁 𑀅𑀓𑁆𑀔𑀡𑁆𑀟𑀢𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑀸 𑀭𑀓𑁆𑀔𑀺𑀢𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀕𑀺𑀳𑀺𑀦𑁄 𑀤𑀲𑀲𑀻𑀮𑀁 𑀧𑀜𑁆𑀘𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀤𑀼𑀩𑁆𑀪𑀺𑀓𑁆𑀔𑀪𑀬𑀸𑀤𑀻𑀲𑀼 𑀧𑀡𑀻𑀢𑀁 𑀪𑁄𑀚𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀤𑀢𑁆𑀯𑀸 ‘‘𑀏𑀯𑀁𑀦𑀸𑀫 𑀤𑀸𑀦𑀁 𑀅𑀤𑀸𑀲𑀺’’𑀦𑁆𑀢𑀺 𑀅𑀢𑁆𑀢𑀦𑁄𑀘𑀸𑀕𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀕𑀺𑀳𑀺𑀦𑁄𑀧𑀺 𑀢𑀣𑀸𑀭𑀽𑀧𑁂 𑀓𑀸𑀮𑁂 𑀲𑀻𑀮𑀯𑀦𑁆𑀢𑀸𑀦𑀁 𑀤𑀺𑀦𑁆𑀦𑀤𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀬𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀤𑁂𑀯𑀸 𑀤𑁂𑀯𑀢𑁆𑀢𑀁 𑀕𑀢𑀸, 𑀢𑀣𑀸𑀭𑀽𑀧𑀸𑀦𑀁 𑀕𑀼𑀡𑀸𑀦𑀁 𑀅𑀢𑁆𑀢𑀦𑀺 𑀅𑀢𑁆𑀣𑀺𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑁂 𑀲𑀝𑁆𑀞𑀺𑀧𑀺 𑀲𑀢𑁆𑀢𑀢𑀺𑀧𑀺 𑀯𑀲𑁆𑀲𑀸𑀦𑀺 𑀅𑀲𑀫𑀼𑀤𑀸𑀘𑀭𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀳𑁄 𑀫𑀬𑁆𑀳𑀁 𑀓𑀺𑀮𑁂𑀲𑀸 𑀦 𑀲𑀫𑀼𑀤𑀸𑀘𑀭𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲, 𑀘𑁂𑀢𑀺𑀬𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑁂𑀲𑀼 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀁𑀲𑀼𑀘𑀺𑀢𑀮𑀽𑀔𑀪𑀸𑀯𑁂𑀦 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀕𑀤𑁆𑀭𑀪𑀧𑀺𑀝𑁆𑀞𑁂 𑀭𑀚𑀲𑀤𑀺𑀲𑁂 𑀮𑀽𑀔𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀦𑁆𑀢𑀲𑁆𑀲, 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀩𑀳𑀼𑀮𑁂 𑀫𑀼𑀤𑀼𑀘𑀺𑀢𑁆𑀢𑁂 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑁂 𑀧𑀝𑀺𑀲𑁂𑀯𑀦𑁆𑀢𑀲𑁆𑀲, 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀓𑁂 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼𑀧𑀺 𑀧𑀻𑀢𑀺𑀉𑀧𑁆𑀧𑀸𑀤𑀦𑀢𑁆𑀣𑀁 𑀢𑀦𑁆𑀦𑀺𑀦𑁆𑀦𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀧𑀻𑀢𑀺𑀬𑀸 𑀘 𑀲𑁄𑀫𑀦𑀲𑁆𑀲𑁂𑀦 𑀲𑀳 𑀅𑀯𑀺𑀦𑀸𑀪𑀸𑀯𑀢𑁄 𑀢𑀤𑀼𑀧𑁆𑀧𑀢𑁆𑀢𑀺𑀬𑀸 𑀢𑀲𑁆𑀲𑀸𑀧𑀺 𑀉𑀧𑁆𑀧𑀢𑁆𑀢𑀺 𑀦𑀺𑀬𑀢𑀸𑀢𑀺 𑀏𑀯𑀁 𑀧𑀻𑀢𑀺𑀓𑀸𑀭𑀡𑀸𑀦𑀺𑀧𑀺 𑀲𑁄𑀫𑀦𑀲𑁆𑀲𑀓𑀸𑀭𑀡𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀓𑀺𑀜𑁆𑀘 𑁋 𑀅𑀕𑀫𑁆𑀪𑀻𑀭𑀧𑀓𑀢𑀺𑀢𑀸, 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀢𑀸𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀸 𑀳𑁄𑀢𑀺. 𑀬𑁄 𑀳𑀺 𑀅𑀕𑀫𑁆𑀪𑀻𑀭𑀧𑀓𑀢𑀺𑀓𑁄 𑀳𑁄𑀢𑀺, 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀳𑀺𑀢𑁄𑀧𑀓𑀭𑀡𑁂 𑀢𑀼𑀲𑁆𑀲𑀢𑀺, 𑀬𑁄 𑀘 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑁄 𑀅𑀧𑁆𑀧𑀲𑀦𑁆𑀦𑁂𑀲𑀼 𑀆𑀭𑀫𑁆𑀫𑀡𑁂𑀲𑀼𑀧𑀺 𑀅𑀧𑁆𑀧𑀝𑀺𑀓𑁆𑀓𑀽𑀮𑀤𑀲𑁆𑀲𑀸𑀯𑀻, 𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀦 𑀲𑁄𑀫𑀦𑀲𑁆𑀲𑀓𑀸𑀭𑀡𑀸𑀦𑀫𑀪𑀸𑀯𑁂𑀦 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑀸𑀬 𑀘 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀧𑀦 𑀓𑀫𑁆𑀫𑀢𑁄 𑀉𑀧𑀧𑀢𑁆𑀢𑀺𑀢𑁄 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀢𑁄 𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀢𑁄𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀳𑁄𑀢𑀺. 𑀬𑁄 𑀳𑀺 𑀧𑀭𑁂𑀲𑀁 𑀳𑀺𑀢𑀚𑁆𑀛𑀸𑀲𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀳𑀻𑀦𑀼𑀓𑁆𑀓𑀝𑁆𑀞𑀸𑀤𑀻𑀦𑀺 𑀘 𑀦𑀴𑀓𑀸𑀭𑀫𑀼𑀤𑁆𑀤𑀸𑀕𑀡𑀦𑀸𑀤𑀻𑀦𑀺 𑀲𑀺𑀧𑁆𑀧𑀸𑀬𑀢𑀦𑀸𑀦𑀺, 𑀯𑀟𑁆𑀠𑀓𑀻𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀻𑀦𑀺 𑀘 𑀓𑀫𑁆𑀫𑀸𑀬𑀢𑀦𑀸𑀦𑀺, 𑀯𑀺𑀲𑀳𑀭𑀡𑀸𑀤𑀻𑀦𑀺 𑀘 𑀯𑀺𑀚𑁆𑀚𑀸𑀬𑀢𑀦𑀸𑀦𑀻𑀢𑀺 𑀏𑀯𑀁 𑀦𑀺𑀭𑀯𑀚𑁆𑀚𑀲𑀺𑀧𑁆𑀧𑀸𑀬𑀢𑀦𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑁂𑀢𑀺, 𑀲𑀬𑀁 𑀯𑀸 𑀲𑀺𑀓𑁆𑀔𑀢𑀺, 𑀥𑀫𑁆𑀫𑀓𑀣𑀺𑀓𑀲𑁆𑀲 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀓𑀣𑀸𑀧𑁂𑀢𑀺, ‘‘𑀆𑀬𑀢𑀺𑀁 𑀧𑀜𑁆𑀜𑀯𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲𑁂𑀯𑀁 𑀦𑀸𑀦𑀧𑁆𑀧𑀓𑀸𑀭𑀁 𑀧𑀜𑁆𑀜𑀸𑀲𑀁𑀯𑀢𑁆𑀢𑀦𑀺𑀓𑀓𑀫𑁆𑀫𑀁 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑀁 𑀓𑀼𑀲𑀮𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀅𑀩𑁆𑀬𑀸𑀧𑀚𑁆𑀚𑁂 𑀮𑁄𑀓𑁂 𑀉𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑀁 𑀓𑀼𑀲𑀮𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑀲𑁆𑀲 𑀢𑀢𑁆𑀣 𑀲𑀼𑀔𑀺𑀦𑁄 𑀥𑀫𑁆𑀫𑀧𑀤𑀸𑀦𑀺 𑀧𑀺𑀮𑀯𑀦𑁆𑀢𑀺, 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄, 𑀅𑀣 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀫𑁂𑀯 𑀯𑀺𑀲𑁂𑀲𑀪𑀸𑀕𑀻 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁧𑁯𑁧).

𑀢𑀣𑀸 𑀧𑀜𑁆𑀜𑀸𑀤𑀲𑀓𑀁 𑀲𑀫𑁆𑀧𑀢𑁆𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑀁 𑀓𑀼𑀲𑀮𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺. 𑀬𑁂𑀦 𑀧𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀳𑀺 𑀓𑀺𑀮𑁂𑀲𑀸 𑀯𑀺𑀓𑁆𑀔𑀫𑁆𑀪𑀺𑀢𑀸, 𑀢𑀲𑁆𑀲 𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸𑀳 𑁋

‘‘𑀬𑁄𑀕𑀸 𑀯𑁂 𑀚𑀸𑀬𑀢𑁂 𑀪𑀽𑀭𑀺, 𑀅𑀬𑁄𑀕𑀸 𑀪𑀽𑀭𑀺𑀲𑀗𑁆𑀔𑀬𑁄’’𑀢𑀺. (𑀥. 𑀧. 𑁨𑁮𑁨).

𑀅𑀧𑀺𑀘 𑀬𑁂 𑀢𑁂 𑀥𑀫𑁆𑀫𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀭𑀺𑀧𑀼𑀘𑁆𑀙𑀓𑀢𑀸 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁄 𑀳𑁄𑀢𑀺. 𑀢𑀣𑀸 𑀳𑀺 𑀬𑁄 𑀧𑀜𑁆𑀜𑀯𑀦𑁆𑀢𑁂 𑀉𑀧𑀲𑀗𑁆𑀓𑀫𑁆𑀫 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑁄 𑀳𑁄𑀢𑀺, 𑀢𑀲𑁆𑀲 𑀢𑀁𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀲𑀼𑀢𑀫𑀬𑀜𑀸𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀜𑀸𑀡𑀲𑀳𑀕𑀢𑀁 𑀳𑁄𑀢𑀺. 𑀬𑁂𑀦 𑀧𑀦 𑀦𑀔𑀓𑁂𑀲𑀘𑀻𑀯𑀭𑀲𑁂𑀦𑀸𑀲𑀦𑀸𑀤𑀻𑀦𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀢𑁆𑀣𑀽𑀦𑀺 𑀧𑀼𑀩𑁆𑀩𑁂 𑀅𑀯𑀺𑀲𑀤𑀸𑀦𑀺 𑀙𑁂𑀤𑀦𑀫𑀮𑀳𑀭𑀡𑀸𑀤𑀺𑀦𑀸 𑀯𑀺𑀲𑀤𑀸𑀦𑀺 𑀓𑀢𑀸𑀦𑀺, 𑀢𑀲𑁆𑀲𑁂𑀯𑀁 𑀯𑀺𑀲𑀤𑀯𑀢𑁆𑀣𑀼𑀓𑀲𑁆𑀲 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀯𑀺𑀲𑀤𑀁 𑀜𑀸𑀡𑀁 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀓𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀬𑀲𑁆𑀲 𑀘 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀩𑀮𑀯𑀁 𑀳𑁄𑀢𑀺, 𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀺, 𑀢𑀢𑁄 𑀢𑀸𑀦𑀺 𑀲𑀓𑀲𑀓𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀢𑀲𑁆𑀲 𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁂 𑀆𑀕𑀢𑀦𑀬𑁂𑀦 𑀢𑁂𑀦 𑀢𑁂𑀦 𑀆𑀓𑀸𑀭𑁂𑀦 𑀲𑀫𑀢𑁆𑀢𑀁 𑀧𑀝𑀺𑀧𑀸𑀤𑁂𑀢𑀺, 𑀢𑀲𑁆𑀲𑁂𑀯𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀢𑁆𑀢𑀁 𑀧𑀝𑀺𑀧𑀸𑀤𑁂𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀤𑀻𑀦𑀁 𑀯𑀲𑁂𑀦 𑀘𑀺𑀢𑁆𑀢𑀁 𑀜𑀸𑀡𑀲𑀳𑀕𑀢𑀁 𑀳𑁄𑀢𑀺. 𑀬𑁄 𑀧𑀦 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑁂 𑀯𑀸 𑀧𑀬𑀺𑀭𑀼𑀧𑀸𑀲𑀢𑀺, 𑀔𑀦𑁆𑀥𑀸𑀤𑀻𑀲𑀼 𑀑𑀕𑀸𑀴𑁆𑀳𑀁 𑀪𑀕𑀯𑀢𑁄 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀁 𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀢𑀤𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀯𑀸 𑀯𑀺𑀳𑀭𑀢𑀺, 𑀇𑀫𑁂𑀲𑀫𑁆𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀓𑀼𑀲𑀮𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺. 𑀅𑀧𑀺𑀘 𑀩𑀼𑀤𑁆𑀥𑀸𑀤𑀺𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦𑀧𑀺 𑀘𑀺𑀢𑁆𑀢𑀁 𑀜𑀸𑀡𑀲𑀳𑀕𑀢𑀁 𑀳𑁄𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲…𑀧𑁂… 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀢𑀣𑀸𑀕𑀢𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧).

𑀏𑀯𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀬𑁄𑀧𑀺 𑀭𑀸𑀕𑀸𑀤𑀺𑀫𑀮𑀯𑀺𑀲𑁄𑀥𑀦𑁂𑀦 𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀓𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘 𑁋 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀢𑀸 𑀜𑀸𑀡𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸 𑀳𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀪𑀯𑀗𑁆𑀕𑀲𑀦𑁆𑀢𑀢𑀺𑀯𑀲𑁂𑀦 𑀩𑀳𑀼𑀮𑀁 𑀧𑀯𑀢𑁆𑀢𑀫𑀸𑀦𑀸 𑀲𑀦𑁆𑀢𑀸𑀦𑀧𑀭𑀺𑀪𑀸𑀯𑀦𑁂𑀦 𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀲𑀯𑀺𑀲𑁂𑀲𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀅𑀲𑀗𑁆𑀔𑀸𑀭𑀺𑀓𑀢𑁆𑀢𑀁 𑀧𑀦 𑀲𑀧𑁆𑀧𑀸𑀬𑀉𑀢𑀼𑀪𑁄𑀚𑀦𑀆𑀯𑀸𑀲𑀸𑀤𑀺𑀧𑀘𑁆𑀘𑀬𑁂𑀳𑀺 𑀳𑁄𑀢𑀻𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀇𑀝𑁆𑀞𑀸𑀭𑀫𑁆𑀫𑀡𑀢𑀸 𑀲𑀤𑁆𑀥𑀸𑀩𑀸𑀳𑀼𑀮𑁆𑀬𑀁 𑀤𑀺𑀝𑁆𑀞𑀺𑀲𑀼𑀤𑁆𑀥𑀺 𑀘;

𑀨𑀮𑀤𑀲𑁆𑀲𑀸𑀯𑀺𑀢𑀸 𑀘𑁂𑀯, 𑀧𑀻𑀢𑀺𑀩𑁄𑀚𑁆𑀛𑀗𑁆𑀕𑀳𑁂𑀢𑀼𑀬𑁄.

‘‘𑀏𑀓𑀸𑀤𑀲 𑀢𑀣𑀸 𑀥𑀫𑁆𑀫𑀸, 𑀅𑀕𑀫𑁆𑀪𑀻𑀭𑀲𑀪𑀸𑀯𑀢𑀸;

𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸 𑀲𑀦𑁆𑀥𑀺, 𑀇𑀘𑁆𑀘𑁂𑀢𑁂 𑀲𑀼𑀔𑀳𑁂𑀢𑀼𑀬𑁄.

‘‘𑀅𑀪𑀸𑀯𑁄 𑀲𑀼𑀔𑀳𑁂𑀢𑀽𑀦𑀁, 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀘;

𑀉𑀧𑁂𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼 𑀘, 𑀏𑀯𑀁 𑀜𑁂𑀬𑁆𑀬𑀸 𑀯𑀺𑀪𑀸𑀯𑀺𑀦𑀸.

‘‘𑀓𑀫𑁆𑀫𑀽𑀧𑀧𑀢𑁆𑀢𑀺𑀢𑁄 𑀘𑁂𑀯, 𑀢𑀣𑀸 𑀇𑀦𑁆𑀤𑁆𑀭𑀺𑀬𑀧𑀸𑀓𑀢𑁄;

𑀓𑀺𑀮𑁂𑀲𑀽𑀧𑀲𑀫𑀸 𑀥𑀫𑁆𑀫-𑀯𑀺𑀘𑀬𑀲𑁆𑀲 𑀘 𑀳𑁂𑀢𑀼𑀳𑀺.

‘‘𑀲𑀢𑁆𑀢𑀥𑀫𑁆𑀫𑁂𑀳𑀺 𑀩𑀼𑀤𑁆𑀥𑀸𑀤𑀺-𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘;

𑀲𑀧𑁆𑀧𑀜𑁆𑀜𑀲𑀦𑁆𑀥𑀺𑀢𑁄 𑀘𑁂𑀯, 𑀘𑀺𑀢𑁆𑀢𑀁 𑀜𑀸𑀡𑀬𑀼𑀢𑀁 𑀲𑀺𑀬𑀸.

‘‘𑀉𑀢𑀼𑀪𑁄𑀚𑀦𑀆𑀯𑀸𑀲-𑀲𑀧𑁆𑀧𑀸𑀬𑀸𑀤𑀻𑀳𑀺 𑀳𑁂𑀢𑀼𑀳𑀺;

𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁄𑀧𑀺, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸’’𑀢𑀺.

𑀏𑀯𑀁 𑀯𑁂𑀤𑀦𑀸𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳 ‘‘𑀇𑀤𑀁…𑀧𑁂… 𑀦𑀸𑀫𑀸’’𑀢𑀺.

𑁧𑁨. 𑀬𑁂𑀦 𑀧𑀦𑀢𑁆𑀣𑁂𑀦 𑀇𑀤𑀁 ‘‘𑀓𑀸𑀫𑀸𑀯𑀘𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀤𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀤𑁆𑀤𑀸𑀦𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀉𑀤𑁆𑀤𑀸𑀦𑀢𑁄𑀢𑀺 𑀉𑀤𑁆𑀤𑁂𑀲𑀢𑁄, 𑀲𑀗𑁆𑀔𑁂𑀧𑀢𑁄𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀤𑀬𑁄 𑀯𑀺𑀬 𑀓𑀺𑀮𑁂𑀲𑀓𑀸𑀫𑁄𑀧𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑀸𑀬 𑀯𑀢𑁆𑀣𑀼𑀓𑀸𑀫𑁂 𑀲𑀗𑁆𑀕𑀳𑀺𑀢𑁄 𑀜𑀸𑀡𑀁 𑀯𑀺𑀬 𑀜𑁂𑀬𑁆𑀬𑁂𑀢𑀺 𑀲𑀗𑁆𑀔𑁂𑀧𑀢𑁄 𑀏𑀓𑁄𑀬𑁂𑀯 𑀓𑀸𑀫𑁄 𑀲𑀺𑀬𑀸, 𑀢𑀣𑀸𑀧𑀺 𑀓𑀺𑀮𑁂𑀲𑀓𑀸𑀫𑁄 𑀯𑀢𑁆𑀣𑀼𑀓𑀸𑀫𑀪𑀸𑀯𑀁 𑀕𑀘𑁆𑀙𑀦𑁆𑀢𑁄 𑀓𑀸𑀫𑀦𑀻𑀬𑀝𑁆𑀞𑁂𑀦 𑀕𑀘𑁆𑀙𑀢𑀺, 𑀦 𑀓𑀸𑀫𑀦𑀯𑀲𑁂𑀦. 𑀓𑀸𑀫𑀦𑀯𑀲𑁂𑀦 𑀘 𑀧𑀦 𑀓𑀺𑀮𑁂𑀲𑀓𑀸𑀫𑁄𑀯 𑀳𑁄𑀢𑀺, 𑀦 𑀧𑀦 𑀯𑀢𑁆𑀣𑀼𑀓𑀸𑀫𑁄𑀢𑀺 𑀆𑀳 ‘‘𑀓𑁆𑀮𑁂𑀲𑀯𑀢𑁆𑀣𑀼𑀯𑀲𑀸’’𑀢𑀺𑀆𑀤𑀺. 𑀓𑁄 𑀧𑀦𑁂𑀢𑁆𑀣 𑀯𑀢𑁆𑀣𑀼𑀓𑀸𑀫𑁄, 𑀓𑁄 𑀓𑀺𑀮𑁂𑀲𑀓𑀸𑀫𑁄𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬 ‘‘𑀙𑀦𑁆𑀤𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄, 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄’’𑀢𑀺 (𑀫𑀳𑀸𑀦𑀺. 𑁧) 𑀏𑀯𑀁 𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀁 𑀆𑀕𑀢𑀸 𑀦𑀺𑀤𑁆𑀤𑀺𑀝𑁆𑀞𑀸 𑀓𑀸𑀫𑀢𑀡𑁆𑀳𑀸𑀯 𑀇𑀥 𑀓𑀺𑀮𑁂𑀲𑀓𑀸𑀫𑁄. 𑀯𑀢𑁆𑀣𑀼𑀓𑀸𑀫𑁄𑀢𑀺 𑀘 ‘‘𑀫𑀦𑀸𑀧𑀺𑀓𑀸 𑀭𑀽𑀧𑀸…𑀧𑁂… 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸…𑀧𑁂… 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸…𑀧𑁂… 𑀲𑀩𑁆𑀩𑁂𑀧𑀺 𑀭𑀽𑀧𑀸𑀯𑀘𑀭𑀸…𑀧𑁂… 𑀲𑀩𑁆𑀩𑁂𑀧𑀺 𑀅𑀭𑀽𑀧𑀸𑀯𑀘𑀭𑀸…𑀧𑁂… 𑀓𑀸𑀫𑀸’’𑀢𑀺 (𑀫𑀳𑀸𑀦𑀺. 𑁧) 𑀢𑀢𑁆𑀣𑁂𑀯 𑀦𑀺𑀤𑁆𑀤𑀺𑀝𑁆𑀞𑀸 𑀲𑀯𑀺𑀜𑁆𑀜𑀸𑀡𑀸𑀯𑀺𑀜𑁆𑀜𑀸𑀡𑀧𑁆𑀧𑀪𑁂𑀤𑀸 𑀢𑁂𑀪𑀽𑀫𑀓𑀥𑀫𑁆𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀺𑀮𑁂𑀲𑁄…𑀧𑁂… 𑀯𑀝𑁆𑀝𑀓’’𑀦𑁆𑀢𑀺. ‘‘𑀙𑀦𑁆𑀤𑀭𑀸𑀕𑁄𑀯𑀸’’𑀢𑀺 𑀅𑀯𑀥𑀸𑀭𑀡𑁂𑀦 𑀓𑀺𑀮𑁂𑀲𑀪𑀸𑀯𑁂𑀦 𑀦𑀺𑀭𑀼𑀴𑁆𑀳𑁂𑀲𑀼 𑀮𑁄𑀪𑀤𑁄𑀲𑀫𑁄𑀳𑀸𑀤𑀻𑀲𑀼 𑀤𑀲𑀲𑀼 𑀤𑁄𑀲𑀫𑁄𑀳𑀸𑀤𑀬𑁄 𑀦𑀯 𑀓𑀺𑀮𑁂𑀲𑁂 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀸𑀫𑀭𑀽𑀧𑀸𑀭𑀽𑀧𑀢𑀡𑁆𑀳𑀸𑀬 𑀯𑀢𑁆𑀣𑀼 𑀧𑀢𑀺𑀝𑁆𑀞𑀸𑀦𑀁, 𑀓𑀸𑀭𑀡𑀪𑀽𑀢𑀦𑁆𑀢𑀺 𑀯𑀸 𑀯𑀢𑁆𑀣𑀼.

𑁧𑁩. 𑀓𑀣𑀁 𑀧𑀦 𑀓𑀺𑀮𑁂𑀲𑀓𑀸𑀫𑁄 𑀦𑀸𑀫, 𑀓𑀣𑀜𑁆𑀘 𑀯𑀢𑁆𑀣𑀼𑀓𑀸𑀫𑁄𑀢𑀺 𑀆𑀳 ‘‘𑀓𑀺𑀮𑁂𑀲𑀓𑀸𑀫𑁄’’𑀢𑀺𑀆𑀤𑀺. 𑀓𑀸𑀫𑁂𑀢𑀻𑀢𑀺 𑀯𑀢𑁆𑀣𑀼𑀓𑀸𑀫𑀁 𑀧𑀢𑁆𑀣𑁂𑀢𑀺. 𑀓𑀸𑀫𑀻𑀬𑀢𑀻𑀢𑀺 𑀓𑀺𑀮𑁂𑀲𑀓𑀸𑀫𑁂𑀦 𑀧𑀢𑁆𑀣𑀻𑀬𑀢𑀺. 𑀇𑀢𑀺-𑀲𑀤𑁆𑀤𑁄 ‘‘𑀢𑀲𑁆𑀫𑀸’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑁂. 𑀘-𑀲𑀤𑁆𑀤𑁄 𑀏𑀯-𑀓𑀸𑀭𑀢𑁆𑀣𑁂, 𑀢𑁂𑀦 𑀬𑀲𑁆𑀫𑀸 𑀓𑀺𑀮𑁂𑀲𑀓𑀸𑀫𑁄 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄, 𑀯𑀢𑁆𑀣𑀼𑀓𑀸𑀫𑁄 𑀘 𑀓𑀸𑀫𑀻𑀬𑀢𑀻𑀢𑀺, 𑀢𑀲𑁆𑀫𑀸 𑀏𑀯 𑀓𑀺𑀮𑁂𑀲𑀓𑀸𑀫𑁄, 𑀯𑀢𑁆𑀣𑀼𑀓𑀸𑀫𑁄 𑀘𑀸𑀢𑀺 𑀤𑀼𑀯𑀺𑀥𑁄𑀧𑀺 𑀏𑀲 𑀓𑀸𑀫𑁄 𑀓𑀸𑀭𑀓𑀤𑁆𑀯𑀬𑁂 𑀓𑀢𑁆𑀢𑀭𑀺, 𑀓𑀫𑁆𑀫𑀦𑀺 𑀘 𑀲𑀺𑀚𑁆𑀛𑀢𑀺, 𑀓𑀢𑁆𑀢𑀼𑀪𑀸𑀯𑀁, 𑀓𑀫𑁆𑀫𑀪𑀸𑀯𑀜𑁆𑀘 𑀧𑀘𑁆𑀘𑀦𑀼𑀪𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀤𑀼𑀯𑀺𑀥𑁄𑀢𑀺 𑀤𑁆𑀯𑀺𑀦𑁆𑀦𑀁 𑀓𑀸𑀫𑀸𑀦𑀁 𑀯𑀸𑀘𑀓𑀢𑁄 𑀤𑀼𑀯𑀺𑀥𑁄. ‘‘𑀓𑀸𑀫𑁄’’𑀢𑀺 𑀅𑀬𑀁 𑀲𑀤𑁆𑀤𑁄 𑀓𑀸𑀭𑀓𑀤𑁆𑀯𑀬𑁂 𑀲𑀺𑀚𑁆𑀛𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀓𑀬𑀼𑀕𑀴𑁂 𑀦𑀺𑀧𑁆𑀨𑀚𑁆𑀚𑀢𑀺, 𑀓𑀢𑁆𑀢𑀭𑀺, 𑀓𑀫𑁆𑀫𑀦𑀺 𑀘 ‘‘𑀓𑀸𑀫𑁄’’𑀢𑀺 𑀧𑀤𑀲𑀫𑁆𑀪𑀯𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑁄-𑀓𑀸𑀭𑁄 𑀧𑀦 𑀦𑀺𑀧𑀸𑀢𑀫𑀢𑁆𑀢𑀁 ‘‘𑀏𑀯𑀁 𑀯𑁄 𑀓𑀸𑀮𑀸𑀫𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀯𑀺𑀬. 𑀅𑀣 𑀯𑀸 𑀯𑁄𑀓𑀸𑀭𑀓𑀤𑁆𑀯𑀬𑁂𑀢𑀺 𑀔𑀦𑁆𑀥𑀤𑁆𑀯𑀬𑁂𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑀓𑀸𑀫𑁄 𑀳𑀺 𑀲𑀗𑁆𑀔𑀸𑀭𑀲𑀪𑀸𑀯𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂, 𑀯𑀢𑁆𑀣𑀼𑀓𑀸𑀫𑁄 𑀘 𑀯𑀓𑁆𑀔𑀫𑀸𑀦𑀦𑀬𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀪𑀽𑀢𑁄 𑀭𑀽𑀧𑀲𑀪𑀸𑀯𑀢𑁆𑀢𑀸 𑀭𑀽𑀧𑀓𑁆𑀔𑀦𑁆𑀥𑁂𑀢𑀺 𑀏𑀯𑀁 𑀤𑀼𑀯𑀺𑀥𑁄𑀧𑁂𑀲 𑀓𑀸𑀫𑁄 𑀔𑀦𑁆𑀥𑀤𑁆𑀯𑀬𑁂 𑀲𑀺𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀺, 𑀅𑀦𑁆𑀢𑁄𑀪𑀸𑀯𑀁 𑀕𑀘𑁆𑀙𑀢𑀻𑀢𑀺.

𑁧𑁪. 𑀲𑀫𑁆𑀧𑀚𑁆𑀚𑀦𑀸𑀦𑀺 𑀲𑀫𑁆𑀧𑀢𑁆𑀢𑀺𑀬𑁄, 𑀢𑀸𑀲𑀁 𑀯𑀲𑁂𑀦 𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀫𑁄𑀲𑀭𑀡𑀯𑀲𑁂𑀦, 𑀲𑀫𑁆𑀧𑀸𑀧𑀼𑀡𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀧𑀦 𑀇𑀤𑀁 𑀤𑀻𑀧𑁂𑀢𑀺 𑁋 𑀬𑀢𑁆𑀣 𑀤𑀼𑀯𑀺𑀥𑁄𑀧𑀺 𑀓𑀸𑀫𑁄 𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑁂𑀦 𑀲𑀳𑀺𑀢𑁄 𑀧𑀯𑀢𑁆𑀢𑀢𑀺, 𑀲𑁄𑀬𑁂𑀯 𑀏𑀓𑀸𑀤𑀲𑀯𑀺𑀥𑁄 𑀧𑀤𑁂𑀲𑁄 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑁄. 𑀬𑀢𑁆𑀣 𑀧𑀦 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑀁 𑀓𑁂𑀯𑀮𑀁 𑀯𑀢𑁆𑀣𑀼𑀓𑀸𑀫𑁄𑀯 𑀧𑀯𑀢𑁆𑀢𑀢𑀺, 𑀦 𑀲𑁄 𑀧𑀤𑁂𑀲𑁄 𑀓𑀸𑀫𑀸𑀯𑀘𑀭𑁄 𑀦𑀸𑀫𑀸𑀢𑀺. 𑀦𑀦𑀼 𑀘 𑀤𑀼𑀯𑀺𑀥𑁄𑀧𑀺 𑀲𑀳𑀺𑀢𑁄 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀧𑀯𑀢𑁆𑀢𑀢𑀺, 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀦𑀁 𑀯𑀢𑁆𑀣𑀼𑀓𑀸𑀫𑀢𑁆𑀢𑀸, 𑀢𑀤𑀸𑀭𑀫𑁆𑀫𑀡𑀪𑀽𑀢𑀸𑀦𑀜𑁆𑀘 𑀭𑀽𑀧𑀸𑀭𑀽𑀧𑀢𑀡𑁆𑀳𑀸𑀦𑀁 𑀢𑀁𑀬𑁄𑀕𑁂𑀦 𑀓𑀺𑀮𑁂𑀲𑀓𑀸𑀫𑀪𑀸𑀯𑀲𑀺𑀤𑁆𑀥𑀺𑀢𑁄𑀢𑀺? 𑀦𑀬𑀺𑀤𑀫𑁂𑀯𑀁 𑀑𑀭𑀫𑁆𑀪𑀸𑀕𑀺𑀬𑀪𑀽𑀢𑀲𑁆𑀲 𑀩𑀳𑀮𑀓𑀺𑀮𑁂𑀲𑀲𑁆𑀲𑁂𑀯 𑀓𑀸𑀫𑀭𑀸𑀕𑀲𑁆𑀲 𑀇𑀥 𑀓𑀺𑀮𑁂𑀲𑀓𑀸𑀫𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. ‘‘𑀉𑀤𑁆𑀤𑀸𑀦𑀢𑁄 𑀤𑀼𑀯𑁂 𑀓𑀸𑀫𑀸’’𑀢𑀺 𑀲𑀩𑁆𑀩𑁂 𑀓𑀸𑀫𑁂 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀳𑀺 ‘‘𑀧𑀤𑁂𑀲𑁄 𑀘𑀢𑀼𑀧𑀸𑀬𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑀬𑀦𑀺𑀬𑀫𑀦𑁂𑀦 ‘‘𑀤𑀼𑀯𑀺𑀥𑁄𑀧𑀺 𑀅𑀬’’𑀦𑁆𑀢𑀺 𑀏𑀢𑁆𑀣 𑀓𑀸𑀫𑁂𑀓𑀤𑁂𑀲𑀪𑀽𑀢𑁄 𑀦𑀻𑀯𑀭𑀡𑀸𑀯𑀢𑁆𑀣𑀸𑀬 𑀓𑀣𑀺𑀢𑁄 𑀓𑀸𑀫𑀭𑀸𑀕𑁄 𑀓𑀺𑀮𑁂𑀲𑀓𑀸𑀫𑀪𑀸𑀯𑁂𑀦, 𑀢𑀩𑁆𑀩𑀢𑁆𑀣𑀼𑀓𑀸𑀬𑁂𑀯 𑀥𑀫𑁆𑀫𑀸 𑀯𑀢𑁆𑀣𑀼𑀓𑀸𑀫𑀪𑀸𑀯𑁂𑀦 𑀕𑀳𑀺𑀢𑀸, 𑀦 𑀭𑀽𑀧𑀸𑀭𑀽𑀧𑀢𑀡𑁆𑀳𑀸, 𑀢𑀩𑁆𑀩𑀢𑁆𑀣𑀼𑀓𑀥𑀫𑁆𑀫𑀸 𑀘𑀸𑀢𑀺 𑀜𑀸𑀧𑀻𑀬𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀉𑀧𑀭𑀺 𑀯𑀓𑁆𑀔𑀫𑀸𑀦𑀸 𑀲𑀲𑀢𑁆𑀣𑀸𑀯𑀘𑀭𑀽𑀧𑀫𑀸 𑀉𑀧𑀧𑀦𑁆𑀦𑀸 𑀳𑁄𑀢𑀺, 𑀬𑀣𑀸𑀯𑀼𑀢𑁆𑀢𑀸𑀦𑀫𑁂𑀯 𑀓𑀸𑀫𑀸𑀦𑀁 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀯𑀢𑁆𑀣𑀸𑀮𑀗𑁆𑀓𑀸𑀭𑀧𑀭𑀺𑀢𑁆𑀢𑀓𑀼𑀲𑀮𑀸𑀤𑀺𑀪𑁂𑀤𑁂𑀲𑀼 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑁄 𑀙𑀦𑁆𑀤𑀭𑀸𑀕𑁄 𑀓𑀺𑀮𑁂𑀲𑀓𑀸𑀫𑁄 𑀦𑀸𑀫 𑀦 𑀳𑁄𑀢𑀺, 𑀦 𑀘 𑀢𑀩𑁆𑀩𑀢𑁆𑀣𑀼𑀪𑀽𑀢𑀁 𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀧𑀭𑀺𑀢𑁆𑀢𑀥𑀫𑁆𑀫𑀚𑀸𑀢𑀁 𑀯𑀢𑁆𑀣𑀼𑀓𑀸𑀫𑁄 𑀦𑀸𑀫𑀸𑀢𑀺 𑀲𑀺𑀤𑁆𑀥𑀁. 𑀢𑁂𑀦𑁂𑀯𑀸𑀳 ‘‘𑀓𑀸𑀫𑁄 𑀯𑀸 𑀓𑀸𑀫𑀲𑀜𑁆𑀜𑀸 𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦 𑀯𑀺𑀚𑁆𑀚𑀢𑀻’’𑀢𑀺. 𑀓𑀸𑀫𑀸𑀯𑀘𑀭𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀢𑀡𑁆𑀳𑀸𑀬 𑀯𑀺𑀲𑀬𑀪𑀸𑀯𑁂 𑀲𑀢𑀺 𑀧𑀦 𑀢𑀁𑀬𑁄𑀕𑁂𑀦 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼𑀧𑀺 𑀧𑀯𑀢𑁆𑀢𑀫𑀸𑀦𑁄 𑀧𑀭𑀺𑀢𑁆𑀢𑀥𑀫𑁆𑀫𑁄 𑀯𑀢𑁆𑀣𑀼𑀓𑀸𑀫𑁄𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀦𑀺𑀤𑁆𑀤𑁂𑀲𑁂 𑀆𑀕𑀢𑀦𑀬𑁂𑀦 𑀦𑀺𑀭𑀯𑀲𑁂𑀲𑁄 𑀓𑀺𑀮𑁂𑀲𑀓𑀸𑀫𑁄 𑀓𑀸𑀫𑀢𑀡𑁆𑀳𑀸𑀪𑀯𑀢𑀡𑁆𑀳𑀸𑀯𑀺𑀪𑀯𑀢𑀡𑁆𑀳𑀸𑀦𑀺𑀭𑁄𑀥𑀢𑀡𑁆𑀳𑀸𑀧𑀪𑁂𑀤𑁄 𑀇𑀥 𑀧𑀯𑀢𑁆𑀢𑀢𑀺. 𑀯𑀢𑁆𑀣𑀼𑀓𑀸𑀫𑁂𑀲𑀼𑀧𑀺 𑀅𑀧𑁆𑀧𑀓𑀁 𑀭𑀽𑀧𑀸𑀭𑀽𑀧𑀯𑀺𑀧𑀸𑀓𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁄𑀬𑁂𑀯 𑀇𑀥 𑀧𑀯𑀢𑁆𑀢𑀢𑀻𑀢𑀺 𑀅𑀦𑀯𑀲𑁂𑀲𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀓𑀸𑀫𑁄𑀬𑀁 𑀤𑀼𑀯𑀺𑀥𑁄𑀧𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀯𑀼𑀢𑁆𑀢𑀁, 𑀢𑁂𑀲𑀼 𑀧𑀦 𑀩𑀳𑀮𑀓𑀺𑀮𑁂𑀲𑀓𑀸𑀫𑀪𑀽𑀢𑁄 𑀩𑀳𑀮𑀓𑀸𑀫𑀭𑀸𑀕𑁄 𑀘 𑀢𑀩𑁆𑀩𑀢𑁆𑀣𑀼𑀓𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀘 𑀇𑀥 𑀕𑀳𑀺𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀫𑁆𑀧𑀢𑁆𑀢𑀻𑀦𑀁 𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀧𑀚𑁆𑀚𑀦𑀯𑀲𑁂𑀦, 𑀲𑀫𑀺𑀚𑁆𑀛𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀯𑀘𑀭𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺, 𑀬𑀲𑁆𑀫𑀸 𑀤𑀼𑀯𑀺𑀥𑁄𑀧𑀺 𑀅𑀬𑀁 𑀓𑀸𑀫𑁄 𑀅𑀯𑀘𑀭𑀢𑀺, 𑀢𑀲𑁆𑀫𑀸 𑀓𑀸𑀫𑁄 𑀏𑀢𑁆𑀣 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑁄𑀢𑀺 𑀅𑀢𑁆𑀣𑁄.

𑁧𑁫. 𑀲𑀕𑁆𑀕𑀫𑁄𑀓𑁆𑀔𑀳𑁂𑀢𑀼𑀪𑀽𑀢𑀸 𑀧𑀼𑀜𑁆𑀜𑀲𑀫𑁆𑀫𑀢𑀸 𑀅𑀬𑀸 𑀬𑁂𑀪𑀼𑀬𑁆𑀬𑁂𑀦 𑀅𑀧𑁂𑀢𑀸𑀢𑀺 𑀅𑀧𑀸𑀬𑀸. 𑀦𑀺𑀭𑀬𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀘𑀢𑀼𑀧𑀸𑀬𑀸. 𑀙𑀦𑁆𑀦𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀬𑀸𑀫𑀸𑀢𑀼𑀲𑀺𑀢𑀸𑀦𑀺𑀫𑁆𑀫𑀸𑀦𑀭𑀢𑀺𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀲𑀗𑁆𑀔𑀸𑀢𑀸𑀦𑀁 𑀙𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁. 𑀫𑁂𑀭𑀼𑀧𑀸𑀤𑀯𑀸𑀲𑀺𑀦𑁄 𑀧𑀦 𑀅𑀲𑀼𑀭𑀸 𑀢𑀸𑀯𑀢𑀺𑀁𑀲𑁂𑀲𑀼𑀬𑁂𑀯 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀦𑀲𑁄 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸, 𑀲𑀢𑀺𑀲𑀽𑀭𑀪𑀸𑀯𑀩𑁆𑀭𑀳𑁆𑀫𑀘𑀭𑀺𑀬𑀬𑁄𑀕𑁆𑀬𑀢𑀸𑀤𑀺𑀕𑀼𑀡𑀯𑀲𑁂𑀦 𑀉𑀧𑀘𑀺𑀢𑀫𑀸𑀦𑀲𑀢𑀸𑀬 𑀉𑀓𑁆𑀓𑀝𑁆𑀞𑀕𑀼𑀡𑀘𑀺𑀢𑁆𑀢𑀢𑀸𑀬𑀸𑀢𑀺 𑀅𑀢𑁆𑀣𑁄, 𑀢𑁂 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀳 𑁋

‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀘 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂. 𑀓𑀢𑀫𑁂𑀳𑀺 𑀢𑀻𑀳𑀺? 𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 (𑀅. 𑀦𑀺. 𑁯.𑁨𑁧).

𑀢𑁂𑀳𑀺 𑀧𑀦 𑀲𑀫𑀸𑀦𑀭𑀽𑀧𑀸𑀤𑀺𑀢𑀸𑀬 𑀲𑀤𑁆𑀥𑀺𑀁 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀇𑀢𑀭𑀫𑀳𑀸𑀤𑀻𑀧𑀯𑀸𑀲𑀺𑀦𑁄𑀧𑀺 ‘‘𑀫𑀦𑀼𑀲𑁆𑀲𑀸’’𑀇𑀘𑁆𑀘𑁂𑀯 𑀧𑀜𑁆𑀜𑀸𑀬𑀺𑀁𑀲𑀼. 𑀮𑁄𑀓𑀺𑀬𑀸 𑀧𑀦 𑀫𑀦𑀼𑀦𑁄 𑀅𑀧𑀘𑁆𑀘𑀪𑀸𑀯𑁂𑀦𑁂𑀯 ‘‘𑀫𑀦𑀼𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀏𑀓𑀸𑀤𑀲𑀯𑀺𑀥𑁄𑀢𑀺 𑀘𑀢𑀼𑀭𑀸𑀧𑀸𑀬𑁂𑀲𑀼 𑀢𑀺𑀭𑀘𑁆𑀙𑀸𑀦𑀧𑁂𑀢𑁆𑀢𑀺𑀯𑀺𑀲𑀬𑀸𑀦𑀁 𑀯𑀺𑀲𑀼𑀁 𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀑𑀓𑀸𑀲𑀲𑁆𑀲 𑀅𑀪𑀸𑀯𑁂𑀧𑀺 𑀬𑀢𑁆𑀣 𑀢𑁂 𑀅𑀭𑀜𑁆𑀜𑀲𑀫𑀼𑀤𑁆𑀤𑀧𑀩𑁆𑀩𑀢𑀧𑀸𑀤𑀸𑀤𑀺𑀓𑁂 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑀺, 𑀢𑀸𑀤𑀺𑀲𑀲𑁆𑀲 𑀞𑀸𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 𑀏𑀓𑀸𑀤𑀲𑀯𑀺𑀥𑁄.

𑁧𑁬. 𑀦𑀦𑀼 𑀘𑁂𑀢𑁆𑀣 𑀅𑀜𑁆𑀜𑁂𑀲𑀫𑁆𑀧𑀺 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄 𑀓𑀸𑀫𑀲𑁆𑀲𑁂𑀯 𑀅𑀯𑀘𑀭𑀡𑀯𑀲𑁂𑀦 𑀓𑀣𑀁 𑀦𑀸𑀫𑀮𑀸𑀪𑁄𑀢𑀺 𑀆𑀳 ‘‘𑀅𑀲𑁆𑀲𑀸𑀪𑀺𑀮𑀓𑁆𑀔𑀺𑀢𑀢𑁆𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀲𑁆𑀲𑀸𑀢𑀺 𑀇𑀫𑀲𑁆𑀲 𑀤𑀼𑀯𑀺𑀥𑀲𑁆𑀲 𑀓𑀸𑀫𑀲𑁆𑀲. 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸𑀢𑀺 𑀏𑀓𑀸𑀤𑀲𑀯𑀺𑀥𑁂 𑀧𑀤𑁂𑀲𑁂 𑀧𑀸𑀓𑀝𑀢𑁆𑀢𑀸. 𑀅𑀣 𑀯𑀸 𑀅𑀲𑁆𑀲𑀸𑀢𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀢𑀲𑁆𑀫𑀸 𑀅𑀦𑁂𑀦 𑀤𑀼𑀯𑀺𑀥𑁂𑀦 𑀓𑀸𑀫𑁂𑀦 𑀏𑀓𑀸𑀤𑀲𑀯𑀺𑀥𑀲𑁆𑀲 𑀧𑀤𑁂𑀲𑀲𑁆𑀲 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸, 𑀧𑀜𑁆𑀜𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀯𑀲𑁂𑀦 𑀅𑀲𑁆𑀲 𑀏𑀓𑀸𑀤𑀲𑀯𑀺𑀥𑀲𑁆𑀲 𑀧𑀤𑁂𑀲𑀲𑁆𑀲 𑀢𑁂𑀦 𑀤𑀼𑀯𑀺𑀥𑁂𑀦 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀳 𑀲𑀢𑁆𑀣𑁂𑀳𑀻𑀢𑀺 𑀲𑀲𑀢𑁆𑀣𑀸, 𑀬𑀢𑁆𑀣 𑀢𑁂 𑀅𑀯𑀘𑀭𑀦𑁆𑀢𑀺, 𑀲𑁄 𑀲𑀲𑀢𑁆𑀣𑀸𑀯𑀘𑀭𑁄, 𑀧𑀤𑁂𑀲𑁄. 𑀲𑁄 𑀯𑀺𑀬. 𑀬𑀣𑀸 𑀳𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀲𑀲𑀢𑁆𑀣𑀸 𑀧𑀼𑀭𑀺𑀲𑀸 𑀅𑀯𑀘𑀭𑀦𑁆𑀢𑀺, 𑀲𑁄 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀤𑀻𑀲𑀼 𑀅𑀯𑀘𑀭𑀦𑁆𑀢𑁂𑀲𑀼 𑀢𑁂𑀲𑀁 𑀢𑀢𑁆𑀣 𑀧𑀸𑀓𑀝𑀢𑁆𑀢𑀸, 𑀢𑁂𑀳𑀺 𑀯𑀸 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸 ‘‘𑀲𑀲𑀢𑁆𑀣𑀸𑀯𑀘𑀭𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀭𑀽𑀧𑀸𑀯𑀘𑀭𑀸𑀤𑀻𑀲𑀼 𑀅𑀯𑀘𑀭𑀦𑁆𑀢𑁂𑀲𑀼 𑀅𑀪𑀺𑀮𑀓𑁆𑀔𑀡𑀯𑀲𑁂𑀦 𑀅𑀬𑀁 𑀧𑀤𑁂𑀲𑁄 ‘‘𑀓𑀸𑀫𑀸𑀯𑀘𑀭𑁄’’𑀢𑁆𑀯𑁂𑀯 𑀲𑀜𑁆𑀜𑀺𑀢𑁄𑀢𑀺. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼.

𑁧𑁭-𑁮. 𑀦𑀦𑀼 𑀘 𑀘𑀺𑀢𑁆𑀢𑀁 𑀓𑀸𑀫𑀸𑀯𑀘𑀭𑀦𑁆𑀢𑀺 𑀯𑀼𑀢𑁆𑀢𑀁, 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀦 𑀧𑀤𑁂𑀲𑀲𑁆𑀲 𑀕𑀳𑀺𑀢𑀢𑁆𑀢𑀸 𑀓𑀣𑀁 𑀢𑀢𑁆𑀣 𑀅𑀯𑀘𑀭𑀦𑁆𑀢𑀁 𑀓𑀸𑀫𑀸𑀯𑀘𑀭𑀁 𑀦𑀸𑀫𑀸𑀢𑀺 𑀆𑀳 ‘‘𑀲𑁆𑀯𑀸𑀬’’𑀦𑁆𑀢𑀺𑀆𑀤𑀺. 𑀲𑁄 𑀅𑀬𑀁 𑀓𑀸𑀫𑀸𑀯𑀘𑀭𑁄 ‘‘𑀓𑀸𑀫𑁄’’𑀢𑀺 𑀲𑀜𑁆𑀜𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀽𑀧𑀪𑀯𑁄 𑀭𑀽𑀧𑀦𑁆𑀢𑀺 𑀬𑀣𑀸 𑀭𑀽𑀧𑀪𑀯𑁄 𑀭𑀽𑀧𑀁. 𑀅𑀯𑀼𑀢𑁆𑀢𑁄𑀧𑀺 𑀳𑀺 𑀬𑀣𑀸𑀲𑀤𑁆𑀤𑁄 𑀏𑀯𑀁-𑀲𑀤𑁆𑀤𑀲𑀦𑁆𑀦𑀺𑀝𑁆𑀞𑀸𑀦𑀢𑁄 𑀮𑀩𑁆𑀪𑀢𑀺. 𑀬𑀣𑀸 ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺 𑀏𑀢𑁆𑀣 ‘‘𑀭𑀽𑀧𑀪𑀯𑀽𑀧𑀧𑀢𑁆𑀢𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀭𑀽𑀧𑀪𑀯𑁄 ‘‘𑀭𑀽𑀧’’𑀦𑁆𑀢𑀺 𑀲𑀜𑁆𑀜𑀺𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀓𑀣𑀁 𑀧𑀦𑁂𑀲 𑀏𑀯𑀁 𑀲𑀜𑁆𑀜𑀺𑀢𑁄𑀢𑀺 𑀆𑀳 ‘‘𑀉𑀢𑁆𑀢𑀭𑀲𑁆𑀲𑀸’’𑀢𑀺𑀆𑀤𑀺. 𑀅𑀣 𑀯𑀸 𑀬𑀣𑀸 𑀉𑀢𑁆𑀢𑀭𑀲𑁆𑀲 𑀧𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀉𑀤𑀻𑀭𑀺𑀢𑁄 𑀏𑀲 𑀭𑀽𑀧𑀪𑀯𑁄 ‘‘𑀭𑀽𑀧’’𑀦𑁆𑀢𑀺 𑀲𑀜𑁆𑀜𑀺𑀢𑁄, 𑀏𑀯𑀁 𑀲𑁆𑀯𑀸𑀬𑀁 𑀓𑀸𑀫𑀸𑀯𑀘𑀭𑁄 𑀓𑀸𑀫𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀺𑀁 𑀓𑀸𑀫𑁂𑀢𑀺 𑀢𑀲𑁆𑀫𑀺𑀁 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀓𑀸𑀫𑀲𑀜𑁆𑀜𑀺𑀢𑁂 𑀧𑀤𑁂𑀲𑁂. 𑀇𑀤𑀦𑁆𑀢𑀺 𑀇𑀤𑀁 𑀅𑀝𑁆𑀞𑀯𑀺𑀥𑀁 𑀘𑀺𑀢𑁆𑀢𑀁. 𑀅𑀥𑀺𑀓𑀸𑀭𑀯𑀲𑁂𑀦 𑀧𑀦 𑀢𑀲𑁆𑀲 𑀕𑀳𑀡𑁂𑀧𑀺 𑀲𑀩𑁆𑀩𑁂𑀲𑀫𑁂𑀯 𑀧𑀭𑀺𑀢𑁆𑀢𑀘𑀺𑀢𑁆𑀢𑀸𑀦𑀫𑀬𑀫𑀢𑁆𑀣𑁄 𑀮𑀩𑁆𑀪𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀓𑀸𑀫𑁂 𑀅𑀯𑀘𑀭𑀡𑀢𑁄. 𑀲𑀤𑀸𑀢𑀺 𑀲𑀩𑁆𑀩𑀓𑀸𑀮𑀁, 𑀩𑀸𑀳𑀼𑀮𑁆𑀬𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀺𑀦𑀸 𑀧𑀦 𑀇𑀤𑀁 𑀤𑀻𑀧𑁂𑀢𑀺 𑁋 𑀬𑀣𑀸 𑀲𑀗𑁆𑀕𑀸𑀫𑁂 𑀬𑁂𑀪𑀼𑀬𑁆𑀬𑁂𑀦 𑀅𑀯𑀘𑀭𑀦𑁆𑀢𑁄 ‘‘𑀲𑀗𑁆𑀕𑀸𑀫𑀸𑀯𑀘𑀭𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀳𑀢𑁆𑀣𑀻 𑀅𑀜𑁆𑀜𑀢𑁆𑀣 𑀅𑀯𑀘𑀭𑀦𑁆𑀢𑁄𑀧𑀺 𑀩𑀸𑀳𑀼𑀮𑁆𑀮𑀧𑁆𑀧𑀯𑀢𑁆𑀢𑀺𑀯𑀲𑁂𑀦 ‘‘𑀲𑀗𑁆𑀕𑀸𑀫𑀸𑀯𑀘𑀭𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀺, 𑀏𑀯𑀫𑀺𑀤𑀁 𑀅𑀜𑁆𑀜𑀢𑁆𑀣 𑀅𑀯𑀘𑀭𑀦𑁆𑀢𑀫𑁆𑀧𑀺 𑀓𑀸𑀫𑀮𑁄𑀓𑁂 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄 ‘‘𑀓𑀸𑀫𑀸𑀯𑀘𑀭’’𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀦𑁆𑀢𑀺. 𑀢𑁂𑀦 𑀧𑀦 𑀦𑀦𑀼 𑀘𑁂𑀢𑀁 𑀭𑀽𑀧𑀸𑀭𑀽𑀧𑀪𑀯𑁂𑀲𑀼𑀧𑀺 𑀅𑀯𑀘𑀭𑀡𑀢𑁄 𑀭𑀽𑀧𑀸𑀯𑀘𑀭𑀸𑀤𑀺𑀦𑀸𑀫𑀫𑁆𑀧𑀺 𑀮𑀪𑁂𑀬𑁆𑀬𑀸𑀢𑀺 𑀇𑀤𑀁 𑀘𑁄𑀤𑀦𑀁 𑀧𑀭𑀺𑀳𑀭𑀢𑀺. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀓𑀸𑀫𑁂𑀯𑀘𑀭𑀢𑀻𑀢𑁆𑀬𑁂𑀢𑀁, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁;

𑀲𑁂𑀲𑁂 𑀅𑀯𑀘𑀭𑀦𑁆𑀢𑀫𑁆𑀧𑀺, 𑀲𑀗𑁆𑀕𑀸𑀫𑀸𑀯𑀘𑀭𑁄 𑀬𑀣𑀸’’𑀢𑀺.

𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺. 𑀘-𑀲𑀤𑁆𑀤𑁄 𑀯𑀢𑁆𑀢𑀩𑁆𑀩𑀦𑁆𑀢𑀭𑀲𑀫𑀼𑀘𑁆𑀘𑀬𑁂. 𑀢𑁂𑀦 𑀬𑀲𑁆𑀫𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀓𑀸𑀫𑀸𑀯𑀘𑀭𑁄 ‘‘𑀓𑀸𑀫𑁄’’𑀢𑀺 𑀲𑀜𑁆𑀜𑀺𑀢𑁄, 𑀬𑀲𑁆𑀫𑀸 𑀘 𑀢𑀲𑁆𑀫𑀺𑀁 𑀓𑀸𑀫𑁂 𑀇𑀤𑀁 𑀘𑀺𑀢𑁆𑀢𑀁 𑀲𑀤𑀸 𑀅𑀯𑀘𑀭𑀢𑀺, 𑀢𑀲𑁆𑀫𑀸 ‘‘𑀓𑀸𑀫𑀸𑀯𑀘𑀭’’𑀫𑀺𑀘𑁆𑀘𑁂𑀯 𑀓𑀣𑀺𑀢𑀁, 𑀦 𑀧𑀦 𑀓𑀸𑀫𑀸𑀯𑀘𑀭𑀸𑀯𑀘𑀭𑀁, 𑀦𑀸𑀧𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀦𑁆𑀢𑀺 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀖𑀸𑀢𑀺𑀦𑀸𑀢𑀺 𑀤𑁂𑀲𑀦𑀸𑀜𑀸𑀡𑁂𑀦 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑀕𑀢𑀲𑁆𑀲 𑀓𑀺𑀮𑁂𑀲𑀓𑀸𑀫𑀲𑁆𑀲 𑀳𑀦𑀦𑀲𑀻𑀮𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦.

𑁧𑁯. 𑀧𑀝𑀺𑀲𑀦𑁆𑀥𑀺𑀁 …𑀧𑁂… 𑀅𑀯𑀘𑀸𑀭𑀬𑀢𑀻𑀢𑀺 𑀯𑀸𑀢𑀺 𑀅𑀣 𑀯𑀸 𑀬𑀲𑁆𑀫𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑁆𑀧𑀦𑁆𑀦𑀫𑁆𑀧𑀺 𑀓𑀸𑀫𑁂 𑀪𑀯𑁂𑀬𑁂𑀯 𑀧𑀝𑀺𑀲𑀦𑁆𑀥𑀺𑀁 𑀅𑀯𑀘𑀸𑀭𑀬𑀢𑀺, 𑀢𑀲𑁆𑀫𑀸 𑀇𑀤𑀁 𑀓𑀸𑀫𑁂 𑀅𑀯𑀘𑀸𑀭𑀬𑀢𑀻𑀢𑀺 ‘‘𑀓𑀸𑀫𑀸𑀯𑀘𑀭’’𑀦𑁆𑀢𑀺 𑀓𑀣𑀺𑀢𑀁 𑀘𑀸-𑀲𑀤𑁆𑀤𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀧𑀤𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀦𑀸𑀧𑀺 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀸𑀫𑀸𑀯𑀘𑀭-𑀲𑀤𑁆𑀤𑀲𑁆𑀲 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀢𑀢𑁆𑀭 𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀓𑀸𑀫𑀪𑀯𑁂. 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀦𑁆𑀢𑁄𑀕𑀥𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋

‘‘𑀓𑀢𑀫𑁂 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸? 𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁. 𑀇𑀫𑁂 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸’’𑀢𑀺 (𑀥. 𑀲. 𑁧𑁨𑁮𑁭) 𑁋

𑀯𑀼𑀢𑁆𑀢𑀢𑁆𑀢𑀸 𑀬𑀣𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀺𑀓𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀫𑁂𑀯 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ‘‘𑀢𑀺𑀭𑀘𑁆𑀙𑀸𑀦𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀤𑀁 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀉𑀧𑁆𑀧𑀦𑁆𑀦𑀫𑁆𑀧𑀺 𑀓𑀸𑀫𑀪𑀯𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ‘‘𑀓𑀸𑀫𑀸𑀯𑀘𑀭’’𑀫𑀺𑀘𑁆𑀘𑁂𑀯 𑀓𑀣𑀺𑀢𑀦𑁆𑀢𑀺. 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸 𑀘𑀲𑁆𑀲 𑀅𑀯𑀻𑀘𑀺𑀧𑀭𑀦𑀺𑀫𑁆𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑁄𑀓𑀸𑀲𑀦𑀺𑀦𑁆𑀦𑀸𑀬 𑀓𑀸𑀫𑀢𑀡𑁆𑀳𑀸𑀬 𑀯𑀺𑀲𑀬𑀪𑀸𑀯𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀦𑀺𑀓𑁆𑀔𑁂𑀧𑀓𑀡𑁆𑀟𑁂𑀧𑀺 ‘‘‘𑀏𑀢𑁆𑀣𑀸𑀯𑀘𑀭𑀸’𑀢𑀺 𑀯𑀘𑀦𑀁 𑀅𑀯𑀻𑀘𑀺𑀧𑀭𑀦𑀺𑀫𑁆𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑁄𑀓𑀸𑀲𑀸𑀬 𑀓𑀸𑀫𑀢𑀡𑁆𑀳𑀸𑀬 𑀯𑀺𑀲𑀬𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀧𑀤𑀲𑀫𑁆𑀪𑀯𑁄 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀓𑀸𑀫𑀢𑀡𑁆𑀳𑀸 𑀓𑀸𑀫𑁄, 𑀲𑁄 𑀏𑀢𑁆𑀣 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑀦𑁆𑀢𑀺. 𑀦𑀦𑀼 𑀘𑁂𑀢𑁆𑀣 𑀓𑀢𑀫𑀸 𑀓𑀸𑀫𑀢𑀡𑁆𑀳𑀸, 𑀬𑀸 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀭𑀫𑁆𑀫𑀡𑀸 𑀢𑀡𑁆𑀳𑀸. 𑀓𑀢𑀫𑁂 𑀓𑀸𑀫𑀸𑀯𑀘𑀭𑀥𑀫𑁆𑀫𑀸, 𑀬𑁂 𑀓𑀸𑀫𑀢𑀡𑁆𑀳𑀸𑀯𑀺𑀲𑀬𑀸𑀢𑀺 𑀏𑀯𑀁 𑀇𑀢𑀭𑀻𑀢𑀭𑀦𑀺𑀲𑁆𑀲𑀬𑀢𑀸𑀤𑁄𑀲𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀅𑀯𑀻𑀘𑀺𑀆𑀤𑀺𑀏𑀓𑀸𑀤𑀲𑁄𑀓𑀸𑀲𑀦𑀺𑀦𑁆𑀦𑀢𑀸𑀬 𑀬𑀁𑀓𑀺𑀜𑁆𑀘𑀺 𑀢𑀡𑁆𑀳𑀁 𑀓𑀸𑀫𑀢𑀡𑁆𑀳𑀸𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀢𑀁𑀲𑀪𑀸𑀯𑀸𑀬 𑀢𑀡𑁆𑀳𑀸𑀬 𑀯𑀺𑀲𑀬𑀪𑀸𑀯𑁂𑀦 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀦𑀁 𑀉𑀧𑀮𑀓𑁆𑀔𑁂𑀢𑀩𑁆𑀩𑀪𑀸𑀯𑀢𑁄. 𑀅𑀣 𑀯𑀸 𑀓𑀺𑀮𑁂𑀲𑀯𑀢𑁆𑀣𑀼𑀯𑀲𑁂𑀦 𑀤𑀼𑀯𑀺𑀥𑁄𑀧𑀺 𑀓𑀸𑀫𑁄 𑀬𑀣𑀸𑀭𑀳𑀁 𑀲𑀳𑀚𑀸𑀢𑀯𑀲𑁂𑀦 𑀏𑀢𑁆𑀣 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑀁, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀯𑀸 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀏𑀢𑀁 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑀁. 𑀅𑀣 𑀯𑀸 𑀫𑀜𑁆𑀘𑀦𑀺𑀲𑁆𑀲𑀺𑀢𑀓𑁂𑀲𑀼 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑁂𑀲𑀼 𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑀸𑀦𑀁 𑀅𑀪𑁂𑀤𑀲𑁆𑀲 𑀩𑀼𑀤𑁆𑀥𑀺𑀬𑀸 𑀕𑀳𑀺𑀢𑀢𑁆𑀢𑀸 𑀦𑀺𑀲𑁆𑀲𑀺𑀢𑀓𑁂𑀲𑀼 𑀦𑀺𑀲𑁆𑀲𑀬𑀽𑀧𑀘𑀸𑀭𑀯𑀲𑁂𑀦 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀪𑀯𑁂 𑀧𑀯𑀢𑁆𑀢𑀦𑀯𑀲𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 ‘‘𑀓𑀸𑀫𑀸𑀯𑀘𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀓𑀸𑀫𑁄𑀯𑀘𑀭𑀢𑀻𑀢𑁆𑀬𑁂𑀢𑁆𑀣, 𑀓𑀸𑀫𑁂𑀯𑀘𑀭𑀢𑀻𑀢𑀺 𑀯𑀸;

𑀞𑀸𑀦𑀽𑀧𑀘𑀸𑀭𑀢𑁄 𑀯𑀸𑀧𑀺, 𑀢𑀁 𑀓𑀸𑀫𑀸𑀯𑀘𑀭𑀁 𑀪𑀯𑁂’’𑀢𑀺.

𑁨𑁦. 𑀧𑀼𑀚𑁆𑀚𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄, 𑀅𑀢𑁆𑀢𑀲𑀦𑁆𑀢𑀸𑀦𑀁 𑀧𑀼𑀦𑀦𑀢𑁄 𑀘 𑀧𑀼𑀜𑁆𑀜𑀸𑀦𑀺, 𑀓𑀢𑁆𑀢𑀩𑁆𑀩𑀢𑀸𑀬 𑀓𑀺𑀭𑀺𑀬𑀸, 𑀢𑁂𑀲𑀁 𑀢𑁂𑀲𑀁 𑀆𑀦𑀺𑀲𑀁𑀲𑀸𑀦𑀁 𑀯𑀢𑁆𑀣𑀼𑀢𑀸𑀬 𑀯𑀢𑁆𑀣𑀽𑀦𑀺 𑀘𑀸𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺. 𑀕𑀡𑀦𑀢𑁄 𑀤𑀲𑀧𑀭𑀺𑀫𑀸𑀡𑀢𑁆𑀢𑀸 𑀤𑀲 𑀘 𑀢𑀸𑀦𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀘𑀸𑀢𑀺 𑀤𑀲 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺, 𑀢𑁂𑀲𑀁 𑀯𑀲𑁂𑀦𑀸𑀢𑀺 𑀤𑀲𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀼𑀯𑀲𑁂𑀦, 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀪𑀸𑀯𑁂𑀦 𑀢𑀁𑀫𑀬𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯-𑀓𑀸𑀭𑁂𑀦 𑀧𑀦 𑀭𑀽𑀧𑀸𑀭𑀽𑀧𑀮𑁄𑀓𑀼𑀢𑁆𑀢𑀭𑀁 𑀯𑀺𑀬 𑀦 𑀓𑁂𑀯𑀮𑀁 𑀪𑀸𑀯𑀦𑀸𑀯𑀲𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀦 𑀧𑀦 𑀧𑀭𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀧𑀭𑀧𑀲𑀁𑀲𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀏𑀯-𑀲𑀤𑁆𑀤𑁂𑀦 𑀅𑀯𑀥𑀸𑀭𑀡𑀁. 𑀬𑀢𑁄 𑀯𑀓𑁆𑀔𑀢𑀺 ‘‘𑀲𑀩𑁆𑀩𑀸𑀦𑀼𑀲𑁆𑀲𑀢𑀺𑀧𑀼𑀜𑁆𑀜𑀜𑁆𑀘𑀸’’𑀢𑀺𑀆𑀤𑀺.

𑁨𑁧. 𑀓𑀸𑀦𑀺 𑀧𑀦 𑀢𑀸𑀦𑀺 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺, 𑀬𑁂𑀲𑀁 𑀯𑀲𑁂𑀦 𑀇𑀤𑀁 𑀅𑀝𑁆𑀞𑀯𑀺𑀥𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀁 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑀸𑀦𑀁 𑀲𑀻𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀺𑀬𑁆𑀬𑀢𑀺 𑀏𑀢𑁂𑀦𑀸𑀢𑀺 𑀤𑀸𑀦𑀁, 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸. 𑀇𑀥 𑀧𑀦 𑀘𑀺𑀢𑁆𑀢𑀸𑀥𑀺𑀓𑀸𑀭𑀯𑀲𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀢𑀣𑀸 ‘‘𑀲𑀻𑀮𑀸’’𑀤𑀻𑀲𑀼𑀧𑀺. 𑀲𑀻𑀮𑀢𑀻𑀢𑀺 𑀲𑀻𑀮𑀁, 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀲𑀫𑀸𑀤𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀲𑀺𑀮𑁆𑀬𑀯𑀲𑁂𑀦 𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀅𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀲𑀫𑁆𑀧𑀢𑀺, 𑀆𑀬𑀢𑀺𑀜𑁆𑀘 𑀳𑀺𑀢𑀲𑀼𑀔𑀸𑀯𑀳𑀸𑀦𑀺 𑀲𑀫𑁆𑀫𑀸 𑀞𑀧𑀺𑀢𑀸𑀦𑀺 𑀲𑀫𑀸𑀳𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀲𑀻𑀮𑀬𑀢𑀺 𑀉𑀧𑀥𑀸𑀭𑁂𑀢𑀻𑀢𑀺 𑀯𑀸 𑀲𑀻𑀮𑀁. 𑀉𑀧𑀥𑀸𑀭𑀡𑀁 𑀧𑀦𑁂𑀢𑁆𑀣 𑀓𑀼𑀲𑀮𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑁄. 𑀪𑀸𑀯𑁂𑀢𑀺 𑀓𑀼𑀲𑀮𑀥𑀫𑁆𑀫𑁂 𑀆𑀲𑁂𑀯𑀢𑀺 𑀯𑀟𑁆𑀠𑁂𑀢𑀺 𑀏𑀢𑀸𑀬𑀸𑀢𑀺 𑀪𑀸𑀯𑀦𑀸. 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀧𑁆𑀨𑀦𑁆𑀦𑀸 𑀧𑀢𑁆𑀢𑀺 𑀤𑀺𑀬𑁆𑀬𑀢𑀺 𑀏𑀢𑁂𑀦𑀸𑀢𑀺 𑀧𑀢𑁆𑀢𑀺𑀤𑀸𑀦𑀁. 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑁂 𑀩𑁆𑀬𑀸𑀯𑀝𑀲𑁆𑀲 𑀪𑀸𑀯𑁄 𑀯𑁂𑀬𑁆𑀬𑀸𑀯𑀘𑁆𑀘𑀁. 𑀤𑁂𑀲𑁂𑀢𑀺 𑀏𑀢𑀸𑀬𑀸𑀢𑀺 𑀤𑁂𑀲𑀦𑀸. 𑀧𑀢𑁆𑀢𑀺𑀁 𑀅𑀦𑀼𑀫𑁄𑀤𑀢𑀺 𑀏𑀢𑁂𑀦𑀸𑀢𑀺 𑀧𑀢𑁆𑀢𑀸𑀦𑀼𑀫𑁄𑀤𑁄. 𑀧𑀼𑀩𑁆𑀩𑀧𑀤𑀮𑁄𑀧𑁂𑀦 𑀧𑀦 ‘‘𑀅𑀦𑀼𑀫𑁄𑀤𑁄’’𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀬𑀸 𑀉𑀚𑀼𑀪𑀸𑀯𑁄 𑀤𑀺𑀝𑁆𑀞𑀺𑀚𑀼𑀢𑁆𑀢𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀚𑀼𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀯𑀸 𑀳𑀺𑀢𑀚𑁆𑀛𑀸𑀲𑀬𑀯𑀲𑁂𑀦 𑀲𑀫𑁆𑀫𑀸 𑀲𑀼𑀡𑀦𑁆𑀢𑀺 𑀏𑀢𑀸𑀬𑀸𑀢𑀺 𑀲𑀁𑀲𑀼𑀢𑀺. 𑀧𑀽𑀚𑀸𑀯𑀲𑁂𑀦 𑀅𑀧𑀘𑀸𑀬𑀢𑀺 𑀲𑀸𑀫𑀻𑀘𑀺𑀁 𑀓𑀭𑁄𑀢𑀺 𑀏𑀢𑁂𑀦𑀸𑀢𑀺 𑀅𑀧𑀘𑀸𑀬𑁄. 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁 𑀧𑀪𑁂𑀤𑁄 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀧𑁆𑀧𑀪𑁂𑀤𑁄. 𑀫𑀚𑁆𑀛𑀧𑀤𑀮𑁄𑀧𑀯𑀲𑁂𑀦 𑀧𑀦 ‘‘𑀧𑀼𑀜𑁆𑀜𑀯𑀢𑁆𑀣𑀼𑀧𑁆𑀧𑀪𑁂𑀤𑁄’’𑀢𑀺 𑀯𑀼𑀢𑁆𑀢𑀁 𑀬𑀣𑀸 𑀆𑀚𑀜𑁆𑀜𑀬𑀼𑀢𑁆𑀢𑁄 𑀭𑀣𑁄 ‘‘𑀆𑀚𑀜𑁆𑀜𑀭𑀣𑁄’’𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀯𑀺𑀘𑀸𑀭𑁄.

𑀅𑀬𑀁 𑀧𑀦 𑀯𑀺𑀦𑀺𑀘𑁆𑀙𑀬𑁄 𑁋 𑀢𑀢𑁆𑀣 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀭𑀁 𑀉𑀤𑁆𑀤𑀺𑀲𑁆𑀲 𑀧𑀽𑀚𑀸𑀦𑀼𑀕𑁆𑀕𑀳𑀓𑀸𑀫𑀢𑀸𑀬 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀯𑀢𑁆𑀣𑀼𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀧𑀯𑀢𑁆𑀢𑀸 𑀘𑁂𑀢𑀦𑀸 𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫. 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀢𑀣𑀸 𑀧𑀯𑀢𑁆𑀢𑀸 𑀤𑀸𑀦𑀫𑁂𑀯, 𑀲𑀸 𑀧𑀦 𑀧𑀼𑀜𑁆𑀜𑀓𑀺𑀭𑀺𑀬𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀦 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀧𑀼𑀚𑁆𑀚𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄, 𑀳𑀺 𑀅𑀢𑁆𑀢𑀲𑀦𑁆𑀢𑀸𑀦𑀁 𑀧𑀼𑀦𑀦𑀢𑁄 𑀘 𑀧𑀼𑀜𑁆𑀜𑀁, 𑀦 𑀘 𑀔𑀻𑀡𑀸𑀲𑀯𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸 𑀨𑀮𑀦𑀺𑀩𑁆𑀩𑀢𑁆𑀢𑀺𑀓𑀸 𑀳𑁄𑀢𑀺, 𑀦 𑀘 𑀢𑀁 𑀧𑀼𑀦𑀸𑀢𑀺 𑀯𑀺𑀲𑀼𑀤𑁆𑀥𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀢𑁆𑀢𑀸𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀬𑀸 𑀧𑀦 𑀦𑀺𑀘𑁆𑀘𑀲𑀻𑀮𑀉𑀧𑁄𑀲𑀣𑀲𑀻𑀮𑀸𑀤𑀺𑀯𑀲𑁂𑀦 𑀧𑀜𑁆𑀘𑀲𑀻𑀮𑀁 𑀅𑀝𑁆𑀞𑀲𑀻𑀮𑀁 𑀤𑀲𑀲𑀻𑀮𑀁 𑀲𑀫𑀸𑀤𑀺𑀬𑀦𑁆𑀢𑀲𑁆𑀲, 𑀅𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀧𑀺 𑀓𑀼𑀮𑀘𑀸𑀭𑀺𑀢𑁆𑀢𑀯𑀲𑁂𑀦 𑀲𑀫𑁆𑀧𑀢𑁆𑀢𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲, 𑀉𑀧𑀲𑀫𑁆𑀧𑀤𑀫𑀸𑀴𑀓𑁂 𑀲𑀁𑀯𑀭𑀁 𑀲𑀫𑀸𑀤𑀺𑀬𑀦𑁆𑀢𑀲𑁆𑀲, 𑀧𑀸𑀢𑀺𑀫𑁄𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑀲𑁆𑀲, 𑀆𑀧𑀸𑀣𑀕𑀢𑀯𑀺𑀲𑀬𑁂𑀲𑀼 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀣𑀓𑁂𑀦𑁆𑀢𑀲𑁆𑀲, 𑀘𑀻𑀯𑀭𑀸𑀤𑀺𑀓𑁂 𑀘 𑀧𑀘𑁆𑀘𑀬𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀓𑀼𑀳𑀦𑀸𑀤𑀺𑀯𑀢𑁆𑀣𑀼𑀢𑁄 𑀆𑀚𑀻𑀯𑀁 𑀧𑀭𑀺𑀲𑁄𑀥𑁂𑀦𑁆𑀢𑀲𑁆𑀲 𑀧𑀯𑀢𑁆𑀢𑀸 𑀘𑁂𑀢𑀦𑀸, 𑀅𑀬𑀁 𑀲𑀻𑀮𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀦𑀸𑀫. 𑀏𑀢𑁆𑀣𑀸𑀳 𑁋 ‘‘𑀤𑀸𑀦𑀁 𑀦𑀸𑀫𑁂𑀢𑀁 𑀫𑀬𑁆𑀳𑀁 𑀓𑀼𑀮𑀯𑀁𑀲𑁄 𑀓𑀼𑀮𑀘𑀸𑀭𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀘𑀸𑀭𑀺𑀢𑁆𑀢𑀲𑀻𑀮𑁂 𑀞𑀢𑁆𑀯𑀸 𑀤𑁂𑀦𑁆𑀢𑀲𑁆𑀲 𑀧𑀯𑀢𑁆𑀢𑀸 𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀓𑀺𑀁, 𑀉𑀤𑀸𑀳𑀼 𑀲𑀻𑀮𑀫𑀬𑀦𑁆𑀢𑀺? 𑀲𑀻𑀮𑀫𑀬𑀫𑁂𑀯 𑀘𑀸𑀭𑀺𑀢𑁆𑀢𑀲𑀻𑀮𑀪𑀸𑀯𑀢𑁄. 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀧𑀯𑀢𑁆𑀢𑀸𑀧𑀺 𑀳𑁂𑀲𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀅𑀧𑀭𑀪𑀸𑀕𑁂 𑀘𑁂𑀢𑀦𑀸𑀬 𑀘 𑀢𑀣𑀸 𑀧𑀯𑀢𑁆𑀢𑀢𑁆𑀢𑀸 𑀲𑀻𑀮𑀫𑀬𑀫𑁂𑀯 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼, 𑀦 𑀤𑀸𑀦𑀫𑀬𑀁. 𑀧𑀽𑀚𑀸𑀦𑀼𑀕𑁆𑀕𑀳𑀓𑀸𑀫𑀢𑀸𑀬 𑀳𑀺 𑀤𑀺𑀦𑁆𑀦𑀁 𑀤𑀸𑀦𑀫𑀬𑀦𑁆𑀢𑀺.

‘‘𑀘𑀓𑁆𑀔𑀼 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀘𑀓𑁆𑀔𑀸𑀤𑀺𑀓𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑀲𑁆𑀲 𑀧𑀯𑀢𑁆𑀢𑀸 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀧𑀭𑀺𑀬𑁄𑀲𑀸𑀦𑀸 𑀯𑀺𑀧𑀲𑁆𑀲𑀦𑀸𑀘𑁂𑀢𑀦𑀸, 𑀓𑀲𑀺𑀡𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑀸 𑀕𑁄𑀢𑁆𑀭𑀪𑀼𑀧𑀭𑀺𑀬𑁄𑀲𑀸𑀦𑀸 𑀧𑀭𑀺𑀓𑀫𑁆𑀫𑀘𑁂𑀢𑀦𑀸 𑀘𑀸𑀢𑀺 𑀅𑀬𑀁 𑀪𑀸𑀯𑀦𑀸𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫. 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀧𑀺 𑀪𑀸𑀯𑀦𑀸𑀬𑁂𑀯, 𑀲𑀸 𑀧𑀦 𑀦 𑀓𑀸𑀫𑀸𑀯𑀘𑀭𑀸𑀢𑀺 𑀇𑀥 𑀦 𑀕𑀳𑀺𑀢𑀸. 𑀦𑀺𑀭𑀯𑀚𑁆𑀚𑀯𑀺𑀚𑁆𑀚𑀸𑀬𑀢𑀦𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀸𑀦𑀁 𑀲𑀺𑀓𑁆𑀔𑀦𑀘𑁂𑀢𑀦𑀸𑀧𑀺 𑀪𑀸𑀯𑀦𑀸𑀫𑀬𑁂𑀬𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀻𑀢𑀺 𑀆𑀘𑀭𑀺𑀬𑀸. 𑀬𑀸 𑀘𑁂𑀢𑁆𑀣 𑀤𑁂𑀬𑁆𑀬𑀥𑀫𑁆𑀫𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀤𑀤𑀢𑁄 𑀧𑀯𑀢𑁆𑀢𑀸, 𑀲𑀸𑀧𑀺 𑀧𑀼𑀩𑁆𑀩𑁂 𑀯𑀺𑀬 𑀉𑀪𑀬𑀪𑀸𑀕𑁂 𑀘𑁂𑀢𑀦𑀸𑀦𑀁 𑀢𑀣𑀸 𑀧𑀯𑀢𑁆𑀢𑀢𑁆𑀢𑀸 𑀪𑀸𑀯𑀦𑀸𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀸𑀦𑀸𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺 𑀲𑀼𑀘𑀭𑀺𑀢𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀅𑀲𑀼𑀓𑀲𑁆𑀲 𑀘 𑀦𑀸𑀫 𑀧𑀢𑁆𑀢𑀺 𑀳𑁄𑀢𑀼, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀸 𑀳𑁄𑀢𑀽’’𑀢𑀺 𑀏𑀯𑀁 𑀅𑀢𑁆𑀢𑀦𑀸 𑀓𑀢𑀲𑁆𑀲 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀁 𑀧𑀘𑁆𑀘𑀸𑀲𑀻𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 𑀧𑀢𑁆𑀢𑀺𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫. 𑀓𑀺𑀁 𑀧𑀦𑁂𑀯𑀁 𑀧𑀢𑁆𑀢𑀺𑀁 𑀤𑀤𑀢𑁄 𑀧𑀼𑀜𑁆𑀜𑀓𑁆𑀔𑀬𑁄 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀬𑀣𑀸 𑀧𑀦 𑀏𑀓𑀁 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀢𑀢𑁄 𑀤𑀻𑀧𑀲𑀳𑀲𑁆𑀲𑀁 𑀚𑀸𑀮𑁂𑀦𑁆𑀢𑀲𑁆𑀲 𑀧𑀞𑀫𑀤𑀻𑀧𑁄 𑀔𑀻𑀡𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀧𑀼𑀭𑀺𑀫𑀸𑀮𑁄𑀓𑁂𑀦 𑀧𑀦 𑀲𑀤𑁆𑀥𑀺𑀁 𑀧𑀘𑁆𑀙𑀺𑀫𑀸𑀮𑁄𑀓𑀲𑁆𑀲 𑀏𑀓𑀻𑀪𑀸𑀯𑁂 𑀅𑀢𑀺𑀫𑀳𑀸𑀯 𑀳𑁄𑀢𑀺, 𑀏𑀯𑀫𑁂𑀯 𑀧𑀢𑁆𑀢𑀺𑀁 𑀤𑀤𑀢𑁄 𑀧𑀭𑀺𑀳𑀸𑀦𑀺 𑀦𑀸𑀫 𑀦 𑀳𑁄𑀢𑀺, 𑀯𑀼𑀟𑁆𑀠𑀺𑀬𑁂𑀯 𑀧𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀓𑀣𑀁 𑀧𑀦𑁂𑀲𑀸 𑀤𑀺𑀦𑁆𑀦𑀸 𑀦𑀸𑀫 𑀳𑁄𑀢𑀻𑀢𑀺? ‘‘𑀇𑀤𑀁 𑀫𑁂 𑀧𑀼𑀜𑁆𑀜𑀓𑀫𑁆𑀫𑀁 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀅𑀲𑀼𑀓𑀲𑁆𑀲 𑀯𑀸 𑀧𑀭𑀺𑀡𑀫𑀢𑀽’’𑀢𑀺 𑀏𑀯𑀁 𑀧𑀼𑀩𑁆𑀩𑀪𑀸𑀕𑁂, 𑀧𑀘𑁆𑀙𑀸𑀧𑀺 𑀯𑀸 𑀯𑀘𑀻𑀪𑁂𑀤𑀁 𑀓𑀭𑁄𑀦𑁆𑀢𑁂𑀦 𑀫𑀦𑀲𑀸 𑀏𑀯 𑀯𑀸 𑀘𑀺𑀦𑁆𑀢𑁂𑀦𑁆𑀢𑁂𑀦 𑀤𑀺𑀦𑁆𑀦𑀸 𑀦𑀸𑀫 𑀳𑁄𑀢𑀺. 𑀓𑁂𑀘𑀺 𑀧𑀦 ‘‘𑀬𑀁 𑀫𑀬𑀸 𑀓𑀢𑀁 𑀲𑀼𑀘𑀭𑀺𑀢𑀁, 𑀢𑀲𑁆𑀲 𑀨𑀮𑀁 ‘𑀤𑀫𑁆𑀫𑀻’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀢𑁆𑀢𑀺 𑀤𑀺𑀦𑁆𑀦𑀸𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀼𑀲𑀮𑀓𑀫𑁆𑀫𑀸𑀥𑀺𑀓𑀸𑀭𑀢𑁆𑀢𑀸 𑀧𑀦 𑀧𑀭𑁂𑀳𑀺 𑀘 𑀓𑀫𑁆𑀫𑀲𑁆𑀲𑁂𑀯 𑀅𑀦𑀼𑀫𑁄𑀤𑀺𑀢𑀩𑁆𑀩𑀢𑁆𑀢𑀸 𑀓𑀫𑁆𑀫𑀫𑁂𑀯 𑀤𑀸𑀢𑀩𑁆𑀩𑀁, 𑀅𑀦𑀼𑀫𑁄𑀤𑁂𑀦𑁆𑀢𑁂𑀦𑀧𑀺 𑀓𑀫𑁆𑀫𑀫𑁂𑀯 𑀅𑀦𑀼𑀫𑁄𑀤𑀺𑀢𑀩𑁆𑀩𑀦𑁆𑀢𑀺 𑀇𑀤𑀫𑁂𑀢𑁆𑀣 𑀆𑀘𑀭𑀺𑀬𑀸𑀦𑀁 𑀲𑀦𑁆𑀦𑀺𑀝𑁆𑀞𑀸𑀦𑀁.

𑀘𑀻𑀯𑀭𑀸𑀤𑀻𑀲𑀼 𑀧𑀘𑁆𑀘𑀸𑀲𑀸𑀭𑀳𑀺𑀢𑀲𑁆𑀲 𑀅𑀲𑀁𑀓𑀺𑀮𑀺𑀝𑁆𑀞𑁂𑀦 𑀅𑀚𑁆𑀛𑀸𑀲𑀬𑁂𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀭𑀡𑀯𑀲𑁂𑀦, 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀯𑁂𑀬𑁆𑀬𑀸𑀯𑀘𑁆𑀘𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫.

𑀆𑀫𑀺𑀲𑀓𑀺𑀜𑁆𑀘𑀓𑁆𑀔𑀸𑀤𑀺𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀧𑀕𑀼𑀡𑀁 𑀥𑀫𑁆𑀫𑀁 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀤𑁂𑀲𑁂𑀦𑁆𑀢𑀲𑁆𑀲, 𑀢𑀣𑁂𑀯 𑀦𑀺𑀭𑀯𑀚𑁆𑀚𑀯𑀺𑀚𑁆𑀚𑀸𑀬𑀢𑀦𑀸𑀤𑀺𑀓𑀁 𑀉𑀧𑀤𑀺𑀲𑀦𑁆𑀢𑀲𑁆𑀲 𑀘 𑀧𑀯𑀢𑁆𑀢𑀸 𑀤𑁂𑀲𑀦𑀸𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫. 𑀧𑀭𑁂𑀳𑀺 𑀓𑀢𑀁 𑀬𑀁 𑀓𑀺𑀜𑁆𑀘𑀺 𑀲𑀼𑀘𑀭𑀺𑀢𑀓𑀫𑁆𑀫𑀁 𑀤𑀺𑀦𑁆𑀦𑀫𑀤𑀺𑀦𑁆𑀦𑀫𑁆𑀧𑀺 𑀯𑀸 𑀇𑀲𑁆𑀲𑀸𑀫𑀘𑁆𑀙𑁂𑀭𑀫𑀮𑀁 𑀧𑀳𑀸𑀬 ‘‘𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀅𑀦𑀼𑀫𑁄𑀤𑀦𑁆𑀢𑀲𑁆𑀲 𑀧𑀯𑀢𑁆𑀢𑀸 𑀅𑀦𑀼𑀫𑁄𑀤𑀦𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫, ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀯𑀲𑁂𑀦 𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀦𑁆𑀢𑀲𑁆𑀲 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫. 𑀬𑀤𑀺 𑀏𑀯𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀧𑀼𑀜𑁆𑀜𑀓𑀺𑀭𑀺𑀬𑀢𑀸 𑀦 𑀮𑀩𑁆𑀪𑀢𑀻𑀢𑀺? 𑀦𑁄 𑀦 𑀮𑀩𑁆𑀪𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀘𑁂𑀢𑀦𑀸𑀦𑀫𑁆𑀧𑀺 𑀢𑀁𑀢𑀁𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑁆𑀯𑁂𑀯 𑀲𑀗𑁆𑀕𑀡𑁆𑀳𑀦𑀢𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋

‘‘𑀧𑀼𑀭𑀺𑀫𑀸 𑀫𑀼𑀜𑁆𑀘𑀦𑀸 𑀘𑁂𑀯, 𑀧𑀭𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀦𑀸;

𑀳𑁄𑀢𑀺 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁, 𑀏𑀯𑀁 𑀲𑁂𑀲𑁂𑀲𑀼 𑀤𑀻𑀧𑀬𑁂’’𑀢𑀺.

𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀉𑀚𑀼𑀓𑀭𑀡𑀯𑁂𑀮𑀸𑀬𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀳𑁄𑀢𑀺, 𑀧𑀼𑀭𑀺𑀫𑀧𑀘𑁆𑀙𑀸𑀪𑀸𑀕𑁂 𑀧𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀫𑁆𑀧𑀺 𑀳𑁄𑀢𑀻𑀢𑀺 𑀢𑀲𑁆𑀲𑀸𑀧𑀺 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀧𑀼𑀜𑁆𑀜𑀓𑀺𑀭𑀺𑀬𑀪𑀸𑀯𑁄 𑀉𑀧𑁆𑀧𑀚𑁆𑀚𑀢𑀺.

𑀅𑀧𑀭𑁂 𑀧𑀦𑀸𑀳𑀼 𑁋 𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀡𑀯𑀲𑁂𑀦 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺, 𑀘𑀺𑀢𑁆𑀢𑀁 𑀧𑀜𑁆𑀜𑀸 𑀘. 𑀤𑀺𑀝𑁆𑀞𑀺𑀬𑀸 𑀉𑀚𑀼𑀪𑀸𑀯𑁄 𑀤𑀺𑀝𑁆𑀞𑀺𑀚𑀼𑀢𑁆𑀢𑀁. 𑀓𑀺𑀁 𑀢𑀁? 𑀓𑀼𑀲𑀮𑀜𑁆𑀘 𑀯𑀺𑀜𑁆𑀜𑀸𑀡𑀁 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀸𑀤𑀺 𑀘 𑀲𑀫𑁆𑀫𑀸𑀤𑀲𑁆𑀲𑀦𑀁. 𑀢𑀢𑁆𑀣 𑀓𑀼𑀲𑀮𑀯𑀺𑀜𑁆𑀜𑀸𑀡𑁂𑀦 𑀜𑀸𑀡𑀼𑀧𑁆𑀧𑀸𑀤𑁂𑀧𑀺 𑀅𑀢𑁆𑀢𑀦𑁄 𑀲𑀼𑀘𑀭𑀺𑀢𑀸𑀦𑀼𑀲𑁆𑀲𑀭𑀡𑀧𑀭𑀕𑀼𑀡𑀧𑀲𑀁𑀲𑀸𑀲𑀭𑀡𑀕𑀫𑀦𑀸𑀦𑀁 𑀲𑀗𑁆𑀕𑀳𑁄, 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑁂𑀦 𑀓𑀫𑁆𑀫𑀧𑀣𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀢𑀺. 𑀤𑀸𑀦𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀁 𑀧𑀦 𑀜𑀸𑀡𑀁 𑀤𑀸𑀦𑀸𑀤𑀻𑀲𑁆𑀯𑁂𑀯 𑀅𑀦𑁆𑀢𑁄𑀕𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀏𑀯𑀫𑀺𑀫𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀯𑀺𑀲𑁂𑀲𑀁 𑀅𑀥𑀺𑀕𑀫𑀺𑀲𑁆𑀲𑀸𑀫𑀺, 𑀩𑀳𑀼𑀲𑁆𑀲𑀼𑀢𑁄 𑀯𑀸 𑀳𑀼𑀢𑁆𑀯𑀸 𑀧𑀭𑁂 𑀥𑀫𑁆𑀫𑀤𑁂𑀲𑀦𑀸𑀬 𑀅𑀦𑀼𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄, 𑀧𑀭𑁂𑀲𑀁 𑀯𑀸 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂𑀦 𑀲𑀤𑁆𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀧𑀯𑀢𑁆𑀢𑀸 𑀲𑀯𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫. 𑀦𑀺𑀭𑀯𑀚𑁆𑀚𑀯𑀺𑀚𑁆𑀚𑀸𑀬𑀢𑀦𑀸𑀤𑀺𑀲𑀯𑀦𑀘𑁂𑀢𑀦𑀸𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀧𑀽𑀚𑀸𑀭𑀳𑁂, 𑀕𑀭𑀼𑀝𑁆𑀞𑀸𑀦𑀺𑀬𑁂, 𑀫𑀳𑀮𑁆𑀮𑀓𑁂 𑀘 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀫𑀕𑁆𑀕𑀤𑀸𑀦𑀅𑀪𑀺𑀯𑀸𑀤𑀦𑀅𑀜𑁆𑀚𑀮𑀺𑀓𑀫𑁆𑀫𑀓𑀭𑀡𑀆𑀲𑀦𑀧𑀼𑀧𑁆𑀨𑀕𑀦𑁆𑀥𑀸𑀤𑀺𑀅𑀪𑀺𑀳𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀘 𑀧𑀯𑀢𑁆𑀢𑀸 𑀩𑀳𑀼𑀫𑀸𑀦𑀘𑁂𑀢𑀦𑀸 𑀅𑀧𑀘𑀺𑀢𑀺𑀲𑀳𑀕𑀢𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫. 𑀯𑁂𑀬𑁆𑀬𑀸𑀯𑀘𑁆𑀘𑀸𑀧𑀘𑀸𑀬𑀦𑀸𑀦𑀜𑁆𑀳𑀺 𑀅𑀬𑀁 𑀯𑀺𑀲𑁂𑀲𑁄 𑁋 𑀯𑀬𑀲𑀸, 𑀕𑀼𑀡𑁂𑀦 𑀘 𑀚𑁂𑀝𑁆𑀞𑀸𑀦𑀁, 𑀕𑀺𑀮𑀸𑀦𑀸𑀦𑀜𑁆𑀘 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑀁 𑀯𑁂𑀬𑁆𑀬𑀸𑀯𑀘𑁆𑀘𑀁, 𑀲𑀸𑀫𑀻𑀘𑀺𑀓𑀺𑀭𑀺𑀬𑀸 𑀅𑀧𑀘𑀸𑀬𑀦𑀦𑁆𑀢𑀺.

𑁨𑁨-𑁩. 𑀏𑀯𑀁 𑀅𑀝𑁆𑀞𑀓𑀣𑀸𑀬 𑀆𑀕𑀢𑀦𑀬𑁂𑀦 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦 𑀤𑀸𑀦𑀁 𑀲𑀻𑀮𑀁 𑀪𑀸𑀯𑀦𑀸𑀢𑀺 𑀢𑀻𑀡𑀺𑀬𑁂𑀯 𑀤𑀲𑁆𑀲𑁂𑀢𑀼𑀁 𑀢𑁂𑀲𑀼 𑀇𑀢𑀭𑁂𑀲𑀫𑁆𑀧𑀺 𑀲𑀗𑁆𑀕𑀳𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀕𑀘𑁆𑀙𑀦𑁆𑀢𑀺 𑀲𑀗𑁆𑀕𑀳’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀧𑀢𑁆𑀢𑀺𑀤𑀸𑀦𑀸𑀦𑀼𑀫𑁄𑀤𑀦𑀸 𑀤𑀸𑀦𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀢𑀁𑀲𑀪𑀸𑀯𑀢𑁆𑀢𑀸. 𑀤𑀸𑀦𑀫𑁆𑀧𑀺 𑀳𑀺 𑀇𑀲𑁆𑀲𑀸𑀫𑀘𑁆𑀙𑁂𑀭𑀸𑀦𑀁 𑀧𑀝𑀺𑀧𑀓𑁆𑀔𑀁, 𑀏𑀢𑁂𑀧𑀺, 𑀢𑀲𑁆𑀫𑀸 𑀲𑀫𑀸𑀦𑀧𑀝𑀺𑀧𑀓𑁆𑀔𑀢𑀸𑀬 𑀤𑀸𑀦𑁂𑀦 𑀲𑀳 𑀏𑀓𑀮𑀓𑁆𑀔𑀡𑀢𑁆𑀢𑀸 𑀏𑀢𑁂 𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀫𑁆𑀳𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀯𑁂𑀬𑁆𑀬𑀸𑀯𑀘𑁆𑀘𑀸𑀧𑀘𑀸𑀬𑀦𑀸 𑀲𑀻𑀮𑀫𑀬𑁂 𑀧𑀼𑀜𑁆𑀜𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀘𑀸𑀭𑀺𑀢𑁆𑀢𑀲𑀻𑀮𑀲𑀪𑀸𑀯𑀢𑁆𑀢𑀸. 𑀤𑁂𑀲𑀦𑀸𑀲𑀯𑀦𑀤𑀺𑀝𑁆𑀞𑀺𑀉𑀚𑀼𑀓𑀸 𑀧𑀦 𑀓𑀼𑀲𑀮𑀥𑀫𑁆𑀫𑀸𑀲𑁂𑀯𑀦𑀢𑁄 𑀪𑀸𑀯𑀦𑀢𑁄 𑀪𑀸𑀯𑀦𑀸𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀤𑁂𑀲𑁂𑀦𑁆𑀢𑁄, 𑀲𑀼𑀡𑀦𑁆𑀢𑁄 𑀘 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛 𑀤𑁂𑀲𑁂𑀢𑀺, 𑀲𑀼𑀡𑀸𑀢𑀺 𑀘, 𑀢𑀸𑀦𑀺 𑀘 𑀤𑁂𑀲𑀦𑀸𑀲𑀯𑀦𑀸𑀦𑀺 𑀧𑀝𑀺𑀯𑁂𑀥𑀫𑁂𑀯 𑀆𑀳𑀭𑀦𑁆𑀢𑀻𑀢𑀺 𑀤𑁂𑀲𑀦𑀸𑀲𑀯𑀦𑀁 𑀪𑀸𑀯𑀦𑀸𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 𑀯𑀤𑀦𑁆𑀢𑀺. 𑀥𑀫𑁆𑀫𑀤𑀸𑀦𑀪𑀸𑀯𑀢𑁄 ‘‘𑀤𑁂𑀲𑀦𑀸 𑀤𑀸𑀦𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺𑀧𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀲𑀩𑁆𑀩𑀢𑁆𑀣𑀸𑀧𑀺 𑀲𑀩𑁆𑀩𑁂𑀲𑀁 𑀦𑀺𑀬𑀫𑀦𑀮𑀓𑁆𑀔𑀡𑀢𑁆𑀢𑀸𑀢𑀺. 𑀤𑀸𑀦𑀸𑀤𑀻𑀲𑀼 𑀳𑀺 𑀬𑀁 𑀓𑀺𑀜𑁆𑀘𑀺 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀯 𑀯𑀺𑀲𑁄𑀥𑀺𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 ‘‘𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀧𑀦 𑀲𑀩𑁆𑀩𑁂𑀲𑀁 𑀦𑀺𑀬𑀫𑀦𑀮𑀓𑁆𑀔𑀡’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫) 𑀯𑀼𑀢𑁆𑀢𑀁. 𑀫𑀳𑀸𑀲𑀁𑀖𑀺𑀬𑀸 𑀧𑀦 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀘 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀯𑀺𑀲𑀼𑀁 𑀧𑀼𑀜𑁆𑀜𑀓𑀺𑀭𑀺𑀬𑀪𑀸𑀯𑁂𑀦 𑀦 𑀕𑀡𑁆𑀳𑀦𑁆𑀢𑀺. 𑀢𑀣𑀸 𑀳𑀺 𑀢𑁂 𑀤𑀸𑀦𑀁 𑀲𑀻𑀮𑀁 𑀪𑀸𑀯𑀦𑀸 𑀲𑀁𑀲𑀼𑀢𑀺 𑀤𑁂𑀲𑀦𑀸𑀦𑀼𑀲𑁆𑀲𑀢𑀺𑀫𑁄𑀤𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀧𑀽𑀚𑀸𑀲𑀭𑀡𑀧𑁆𑀧𑀢𑁆𑀢𑀺𑀧𑀲𑀁𑀲𑀸 𑀘𑀸𑀢𑀺 𑀅𑀢𑁆𑀢𑀦𑀸 𑀓𑀢𑀧𑀼𑀜𑁆𑀜𑀸𑀦𑀼𑀲𑁆𑀲𑀭𑀡𑀁 𑀩𑀼𑀤𑁆𑀥𑀸𑀤𑀻𑀲𑀼 𑀲𑀭𑀡𑀕𑀫𑀦𑀁 𑀧𑀭𑀕𑀼𑀡𑀧𑀲𑀁𑀲𑀸𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀤𑁆𑀯𑀸𑀤𑀲 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀧𑀼𑀦 𑀢𑀻𑀡𑁂𑀯𑀸𑀢𑀺 𑀧𑀞𑀫𑀁 𑀤𑀲𑀸𑀧𑀺 𑀲𑀫𑀸𑀦𑀸 𑀧𑀼𑀦 𑀲𑀗𑁆𑀔𑁂𑀧𑀢𑁄 𑀢𑀻𑀡𑁂𑀯 𑀲𑀫𑁆𑀪𑁄𑀦𑁆𑀢𑀺.

𑁨𑁪. 𑀇𑀤𑀸𑀦𑀺 𑀧𑀭𑁂𑀳𑀺 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑀸𑀦𑀁 𑀧𑀼𑀜𑁆𑀜𑀸𑀦𑀼𑀲𑁆𑀲𑀭𑀡𑀸𑀤𑀻𑀦𑀁 𑀅𑀢𑁆𑀢𑀦𑀸 𑀦𑀺𑀤𑁆𑀤𑀺𑀝𑁆𑀞𑁂𑀲𑁆𑀯𑁂𑀯 𑀲𑀫𑁄𑀥𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀸𑀦𑀼𑀲𑁆𑀲𑀢𑀺𑀧𑀼𑀜𑁆𑀜𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀲𑁆𑀲𑁂𑀯 𑀅𑀢𑁆𑀢𑀦𑀸 𑀓𑀢𑀲𑀼𑀘𑀭𑀺𑀢𑀲𑁆𑀲 𑀅𑀦𑀼𑀲𑁆𑀲𑀭𑀡𑀁 𑀲𑀩𑁆𑀩𑀸𑀦𑀼𑀲𑁆𑀲𑀢𑀺𑀧𑀼𑀜𑁆𑀜𑀁 𑀦𑀸𑀫. 𑀧𑀲𑀁𑀲𑀸𑀢𑀺 𑀧𑀭𑁂𑀳𑀺 𑀓𑀢𑀸𑀬 𑀧𑀼𑀜𑁆𑀜𑀓𑀺𑀭𑀺𑀬𑀸𑀬, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀘 𑀯𑀺𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀧𑀲𑀁𑀲𑀦𑀁, 𑀲𑀦𑁆𑀢𑀼𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀭𑀡𑀢𑁆𑀢𑀬𑀦𑁆𑀢𑀺 𑀏𑀢𑁆𑀣 𑀲𑀭𑀦𑁆𑀢𑀺 𑀳𑀺𑀁𑀲𑀦𑁆𑀢𑀻𑀢𑀺 𑀲𑀭𑀡𑀸𑀦𑀺, 𑀩𑀼𑀤𑁆𑀥𑀸𑀤𑀻𑀦𑀺 𑀢𑀻𑀡𑀺 𑀭𑀢𑀦𑀸𑀦𑀺. 𑀢𑀸𑀦𑀺 𑀳𑀺 𑀲𑀭𑀡𑀕𑀢𑀸𑀦𑀁 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀪𑀬𑀁 𑀲𑀦𑁆𑀢𑀸𑀲𑀁 𑀤𑀼𑀕𑁆𑀕𑀢𑀺𑀧𑀭𑀺𑀓𑁆𑀓𑀺𑀮𑁂𑀲𑀁 𑀳𑀺𑀁𑀲𑀦𑁆𑀢𑀺 𑀯𑀺𑀦𑀸𑀲𑁂𑀦𑁆𑀢𑀺. 𑀢𑀬𑁄 𑀅𑀯𑀬𑀯𑀸 𑀅𑀲𑁆𑀲𑀸𑀢𑀺 𑀢𑀬𑀁, 𑀢𑀻𑀳𑀺 𑀅𑀯𑀬𑀯𑁂𑀳𑀺 𑀬𑀼𑀢𑁆𑀢𑀲𑀫𑀼𑀤𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀲𑀭𑀡𑀸𑀦𑀁 𑀢𑀬𑀁 𑀲𑀭𑀡𑀢𑁆𑀢𑀬𑀁, 𑀢𑀻𑀡𑀺 𑀲𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀻𑀢𑀺. 𑀇𑀥 𑀧𑀦 𑀲𑀭𑀡𑀢𑁆𑀢𑀬𑀕𑁆𑀕𑀳𑀡𑁂𑀦 𑀉𑀧𑀘𑀸𑀭𑀢𑁄, 𑀉𑀢𑁆𑀢𑀭𑀧𑀤𑀮𑁄𑀧𑀢𑁄 𑀯𑀸 𑀲𑀭𑀡𑀕𑀫𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀦 𑀳𑀺 𑀲𑀭𑀡𑀢𑁆𑀢𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫 𑀳𑁄𑀢𑀺. 𑀅𑀢𑁆𑀣𑀢𑁄 𑀧𑀦𑁂𑀢𑀁 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀁𑀖𑁄’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀧𑀝𑀺𑀮𑀸𑀪𑀯𑀲𑁂𑀦 𑀧𑀯𑀢𑁆𑀢𑀸 𑀘𑁂𑀢𑀦𑀸 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀲𑁆𑀫𑀺𑀁 𑀲𑀗𑁆𑀕𑀳𑀁 𑀬𑀦𑁆𑀢𑀺 𑀢𑀁𑀯𑀲𑁂𑀦𑁂𑀯 𑀢𑁂𑀲𑀁 𑀇𑀚𑁆𑀛𑀢𑁄. 𑀦 𑀳𑀺 𑀯𑀺𑀧𑀭𑀻𑀢𑀤𑀺𑀝𑁆𑀞𑀺𑀓𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀲𑀫𑁆𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀏𑀓𑀦𑁆𑀢𑁂𑀦 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀦 𑀯𑀺𑀲𑀼𑀁 𑀧𑀼𑀜𑁆𑀜𑀓𑀺𑀭𑀺𑀬𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀦𑀢𑁆𑀣𑀺 𑀲𑀁𑀲𑀬𑁄’’𑀢𑀺. 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀲𑁆𑀲 𑀪𑀸𑀯𑀦𑀸𑀫𑀬𑀲𑀗𑁆𑀕𑀳𑁂𑀧𑀺 𑀲𑀗𑁆𑀔𑁂𑀧𑀦𑀬𑁂𑀦 𑀪𑀸𑀯𑀦𑀸𑀫𑀬𑁂 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀯𑀺𑀢𑁆𑀣𑀸𑀭𑀦𑀬𑁂𑀦 𑀧𑀦 ‘‘𑀓𑀢𑁆𑀣 𑀦𑀼 𑀔𑁄’’𑀢𑀺 𑀲𑀁𑀲𑀬𑁄 𑀲𑀺𑀬𑀸𑀢𑀺 𑀇𑀫𑁂𑀲𑀁 𑀪𑀸𑀯𑀦𑀸𑀫𑀬𑀲𑀗𑁆𑀕𑀳𑁄 𑀦 𑀯𑀼𑀢𑁆𑀢𑁄. 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀲𑁆𑀲 𑀯𑀸 𑀲𑀩𑁆𑀩𑁂𑀲𑀁 𑀫𑀳𑀧𑁆𑀨𑀮𑀪𑀸𑀯𑀦𑀺𑀬𑀸𑀫𑀓𑀢𑁆𑀢𑁂𑀦 𑀫𑀽𑀮𑀪𑀽𑀢𑀢𑁆𑀢𑀸 𑀢𑀲𑁆𑀲 𑀧𑀥𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀺𑀲𑀼𑀁 𑀢𑀢𑁆𑀣 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 ‘‘𑀲𑀗𑁆𑀕𑀡𑁆𑀳𑀦𑁆𑀢𑁄 𑀲𑀗𑁆𑀕𑀡𑁆𑀳𑀸𑀢𑀺, 𑀕𑀡𑁆𑀳𑀦𑁆𑀢𑁄 ‘𑀫𑀼𑀜𑁆𑀘𑀢𑀻’𑀢𑀺 𑀯𑀘𑀦𑀢𑁄 𑀲𑀭𑀡𑀕𑀫𑀦𑀲𑁆𑀲 𑀲𑀻𑀮𑀲𑀫𑀸𑀤𑀸𑀦𑁂 𑀯𑀺𑀬 𑀕𑀳𑀡𑀁 𑀲𑀫𑁆𑀪𑀯𑀢𑀻𑀢𑀺 𑀲𑀻𑀮𑀫𑀬𑁂 𑀲𑀗𑁆𑀕𑀬𑁆𑀳𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀲𑀭𑀡𑀕𑀫𑀦𑀁 𑀧𑀡𑀺𑀧𑀸𑀢𑀪𑀸𑀯𑀢𑁄 𑀅𑀧𑀘𑀺𑀢𑀺𑀲𑀳𑀕𑀢𑁂 𑀲𑀗𑁆𑀕𑀬𑁆𑀳𑀢𑀻’’𑀢𑀺 𑀓𑁂𑀘𑀺.

𑁨𑁫. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀕𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀧𑀺 𑀘𑁂𑀢𑀦𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑀺𑀫𑀸 𑀫𑀼𑀜𑁆𑀘𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀸𑀢𑀺 𑀤𑀸𑀦𑀢𑁆𑀣𑀸𑀬 𑀤𑁂𑀬𑁆𑀬𑀥𑀫𑁆𑀫𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲, 𑀉𑀧𑁆𑀧𑀦𑁆𑀦𑀁 ‘‘𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀘 𑀬𑀸𑀯 𑀯𑀢𑁆𑀣𑀼𑀦𑁄 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀳𑀢𑁆𑀣𑁂 𑀯𑀺𑀲𑁆𑀲𑀚𑁆𑀚𑀦𑀁, 𑀧𑀭𑀺𑀡𑀸𑀫𑀦𑀁 𑀯𑀸, 𑀢𑀸𑀯 𑀧𑀯𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸. 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀧𑀦 𑀳𑀢𑁆𑀣𑁂 𑀯𑀺𑀲𑁆𑀲𑀚𑁆𑀚𑀦𑀘𑁂𑀢𑀦𑀸, 𑀧𑀭𑀺𑀡𑀸𑀫𑀦𑀘𑁂𑀢𑀦𑀸 𑀯𑀸 𑀫𑀼𑀜𑁆𑀘𑀦𑀘𑁂𑀢𑀦𑀸 𑀦𑀸𑀫. 𑀲𑀸𑀬𑁂𑀯 𑀦𑀺𑀕𑁆𑀕𑀳𑀻𑀢𑀮𑁄𑀧𑁂𑀦 ‘‘𑀫𑀼𑀘𑀦𑀸’’𑀢𑀺 𑀯𑀼𑀢𑁆𑀢𑀸. ‘‘𑀫𑀼𑀜𑁆𑀘𑀦𑀸’’𑀇𑀢𑀺𑀬𑁂𑀯 𑀯𑀸 𑀧𑀸𑀞𑁄. 𑀧𑀭𑀸𑀢𑀺 𑀅𑀢𑁆𑀢𑀦𑀸 𑀯𑀺𑀲𑁆𑀲𑀝𑁆𑀞𑀯𑀢𑁆𑀣𑀼𑀫𑁆𑀳𑀺 𑀆𑀮𑀬𑀁 𑀅𑀓𑀢𑁆𑀯𑀸 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀅𑀕𑁆𑀕𑀁 𑀤𑀸𑀦𑀁 𑀫𑁂 𑀤𑀺𑀦𑁆𑀦’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀅𑀧𑀭𑀪𑀸𑀕𑀘𑁂𑀢𑀦𑀸. 𑀢𑀺𑀲𑁆𑀲𑁄𑀧𑀺 𑀘𑁂𑀢𑀦𑀸𑀢𑀺 𑀇𑀢𑀺 𑀅𑀬𑀜𑁆𑀘 𑀧𑀼𑀭𑀺𑀫𑀸 𑀘𑁂𑀢𑀦𑀸, 𑀅𑀬𑀜𑁆𑀘 𑀫𑀼𑀜𑁆𑀘𑀦𑀘𑁂𑀢𑀦𑀸, 𑀅𑀬𑀜𑁆𑀘 𑀅𑀧𑀭𑀘𑁂𑀢𑀦𑀸𑀢𑀺 𑀢𑀺𑀲𑁆𑀲𑁄𑀧𑀺 𑀘𑁂𑀢𑀦𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀳𑁄𑀢𑀺, 𑀤𑀸𑀦𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀧𑀼𑀜𑁆𑀜’’𑀦𑁆𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀳𑁄𑀢𑀻’’𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑁂𑀲𑁂𑀲𑀼𑀧𑀺 𑀅𑀢𑀺𑀤𑀺𑀲𑀦𑁆𑀢𑁄 𑀆𑀳 ‘‘𑀏𑀯𑀁 𑀲𑁂𑀲𑁂𑀲𑀼 𑀤𑀻𑀧𑀬𑁂’’𑀢𑀺. 𑀲𑁂𑀲𑁂𑀲𑀽𑀢𑀺 𑀲𑀻𑀮𑀸𑀤𑀻𑀲𑀼 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀲𑀼 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 ‘‘𑀲𑀻𑀮𑀁 ‘𑀭𑀓𑁆𑀔𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲, ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀯𑀢𑁆𑀢𑀸 𑀧𑀼𑀭𑀺𑀫𑀘𑁂𑀢𑀦𑀸, 𑀲𑀻𑀮𑀁 𑀲𑀫𑀸𑀤𑀺𑀬𑀦𑁆𑀢𑀲𑁆𑀲, 𑀧𑀩𑁆𑀩𑀚𑀦𑁆𑀢𑀲𑁆𑀲, 𑀲𑀻𑀮𑀁 𑀧𑀭𑀺𑀧𑀽𑀭𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀫𑀚𑁆𑀛𑀺𑀫𑀘𑁂𑀢𑀦𑀸, ‘𑀧𑀽𑀭𑀺𑀢𑀁 𑀫𑁂’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀅𑀧𑀭𑀘𑁂𑀢𑀦𑀸𑀢𑀺 𑀏𑀯𑀁 𑀢𑀺𑀲𑁆𑀲𑁄𑀧𑀺 𑀘𑁂𑀢𑀦𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀲𑀻𑀮𑀫𑀬𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀤𑀻𑀧𑀬𑁂, 𑀧𑀓𑀸𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀅𑀢𑁆𑀢𑀦𑀸 𑀓𑀢𑀧𑀼𑀜𑁆𑀜𑀸𑀦𑀼𑀲𑁆𑀲𑀭𑀡𑀘𑁂𑀢𑀦𑀸 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀲𑀗𑁆𑀕𑀳𑀺𑀢𑀸, 𑀅𑀬𑀜𑁆𑀘 𑀅𑀧𑀭𑀘𑁂𑀢𑀦𑀸 𑀲𑀸𑀬𑁂𑀯𑀸𑀢𑀺 𑀓𑀣𑀫𑀲𑁆𑀲𑀸 𑀢𑀢𑁆𑀣 𑀲𑀗𑁆𑀕𑀳𑁄𑀢𑀺? 𑀦𑀸𑀬𑀁 𑀤𑁄𑀲𑁄, 𑀯𑀺𑀲𑀬𑀪𑁂𑀤𑁂𑀦 𑀉𑀪𑀺𑀦𑁆𑀦𑀫𑁆𑀧𑀺 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀧𑀼𑀜𑁆𑀜𑀸𑀦𑀼𑀲𑁆𑀲𑀭𑀡𑀜𑁆𑀳𑀺 𑀅𑀢𑁆𑀢𑀦𑀸 𑀓𑀢𑀧𑀼𑀜𑁆𑀜𑀯𑀺𑀲𑀬𑀫𑁂𑀯. 𑀅𑀬𑀁 𑀧𑀦 𑀢𑀩𑁆𑀩𑀢𑁆𑀣𑀼𑀯𑀺𑀲𑀬𑀸𑀢𑀺 𑀧𑀸𑀓𑀝𑁄𑀬𑁂𑀯 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀬𑀁 𑀯𑀼𑀢𑁆𑀢𑀁 ‘‘𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻’’𑀢𑀺, 𑀢𑀢𑁆𑀣 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀲𑀭𑀽𑀧𑀢𑁄, 𑀲𑀗𑁆𑀕𑀳𑀢𑁄 𑀘 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑀣𑀸𑀧𑀯𑀢𑁆𑀢𑀫𑀸𑀦𑀲𑁆𑀲 𑀘𑀲𑁆𑀲 𑀧𑀸𑀝𑁂𑀓𑁆𑀓𑀁 𑀧𑀯𑀢𑁆𑀢𑀸𑀓𑀸𑀭𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀸𑀦𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀬𑀦𑁆𑀢𑀺 𑀯𑀓𑁆𑀔𑀫𑀸𑀦𑀦𑀺𑀤𑀲𑁆𑀲𑀦𑀁. 𑀤𑀸𑀢𑀩𑁆𑀩𑁄 𑀥𑀫𑁆𑀫𑁄 𑀤𑁂𑀬𑁆𑀬𑀥𑀫𑁆𑀫𑁄, 𑀅𑀦𑁆𑀦𑀸𑀤𑀺𑀤𑀲𑀯𑀺𑀥𑀁 𑀯𑀢𑁆𑀣𑀼. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁;

𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁, 𑀤𑀸𑀦𑀯𑀢𑁆𑀣𑀽 𑀤𑀲𑀸𑀯𑀺𑀫𑁂’’𑀢𑀺.

𑀧𑀝𑀺𑀕𑁆𑀕𑀸𑀳𑀓𑁄 𑀆𑀤𑀺 𑀬𑁂𑀲𑀁 𑀤𑁂𑀲𑀓𑀸𑀮𑀫𑀺𑀢𑁆𑀢𑀸𑀤𑀻𑀦𑀁 𑀢𑁂 𑀧𑀝𑀺𑀕𑁆𑀕𑀸𑀳𑀓𑀸𑀤𑀬𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲, 𑀧𑀝𑀺𑀕𑁆𑀕𑀸𑀳𑀓𑀸𑀤𑀻𑀦𑀜𑁆𑀘 𑀲𑀫𑁆𑀧𑀢𑁆𑀢𑀺 𑀲𑀫𑁆𑀧𑀦𑁆𑀦𑀢𑀸 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺. 𑀢𑀢𑁆𑀣 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀡𑀻𑀢𑀫𑀦𑀸𑀧𑀪𑀸𑀯𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑀪𑀸𑀯𑁄 𑀤𑁂𑀬𑁆𑀬𑀥𑀫𑁆𑀫𑀲𑀫𑁆𑀧𑀢𑁆𑀢𑀺. 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑁄 𑀧𑀝𑀺𑀕𑁆𑀕𑀸𑀳𑀓𑀲𑀫𑁆𑀧𑀢𑁆𑀢𑀺. 𑀤𑀼𑀮𑁆𑀮𑀪𑀅𑀦𑁆𑀦𑀧𑀸𑀦𑀸𑀤𑀺𑀓𑁄 𑀤𑁂𑀲𑁄 𑀤𑁂𑀲𑀲𑀫𑁆𑀧𑀢𑁆𑀢𑀺. 𑀢𑀸𑀤𑀺𑀲𑁄𑀯 𑀓𑀸𑀮𑁄 𑀓𑀸𑀮𑀲𑀫𑁆𑀧𑀢𑁆𑀢𑀺. 𑀤𑀼𑀮𑁆𑀮𑀪𑀅𑀦𑁆𑀦𑀧𑀸𑀦𑀸𑀤𑀺𑀓𑁂 𑀳𑀺 𑀤𑁂𑀲𑁂, 𑀓𑀸𑀮𑁂 𑀯𑀸 𑀤𑀺𑀦𑁆𑀦𑀁 𑀅𑀚𑁆𑀛𑀸𑀲𑀬𑀲𑁆𑀲 𑀩𑀮𑀯𑀢𑀸𑀬 𑀫𑀳𑀧𑁆𑀨𑀮𑀁, 𑀲𑁄𑀫𑀦𑀲𑁆𑀲𑀳𑁂𑀢𑀼𑀓𑀜𑁆𑀘 𑀳𑁄𑀢𑀺, 𑀢𑀲𑁆𑀫𑀸 𑀢𑁂 𑀤𑀸𑀦𑀲𑁆𑀲 𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀸. 𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺 𑀧𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀪𑀸𑀯𑁄. 𑀓𑀮𑁆𑀬𑀸𑀡𑀫𑀺𑀢𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀤𑀸𑀦𑀸𑀤𑀻𑀲𑀼 𑀘𑀺𑀢𑁆𑀢𑀁 𑀑𑀤𑀕𑁆𑀬𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀘𑀸𑀭𑀺𑀓𑀲𑀫𑁆𑀧𑀢𑁆𑀢𑀺 𑀧𑀦 𑀅𑀦𑀸𑀡𑀢𑁆𑀢𑀺𑀬𑀸𑀧𑀺 𑀢𑀁𑀢𑀁𑀓𑀺𑀘𑁆𑀘𑀲𑀫𑁆𑀧𑀸𑀤𑀦𑁂 𑀅𑀧𑁆𑀧𑀫𑀢𑁆𑀢𑀲𑁆𑀲 𑀧𑀭𑀺𑀘𑀸𑀭𑀺𑀓𑀚𑀦𑀲𑁆𑀲 𑀧𑀝𑀺𑀮𑀸𑀪𑁄. 𑀅𑀜𑁆𑀜𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀼𑀦𑁆𑀢𑀺 𑀲𑀤𑁆𑀥𑀸𑀩𑀳𑀼𑀮𑀢𑀸𑀯𑀺𑀲𑀼𑀤𑁆𑀥𑀺𑀤𑀺𑀝𑁆𑀞𑀺𑀢𑀸𑀤𑀺𑀪𑁂𑀤𑀁 𑀅𑀜𑁆𑀜𑀁 𑀲𑁄𑀫𑀦𑀲𑁆𑀲𑀓𑀸𑀭𑀡𑀁 𑀯𑀸. 𑀆𑀕𑀫𑁆𑀫𑀸𑀢𑀺 𑀉𑀧𑀸𑀕𑀫𑁆𑀫, 𑀧𑀝𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀳𑀝𑁆𑀞𑀧𑀳𑀝𑁆𑀞𑁄𑀢𑀺 𑀲𑁄𑀫𑀦𑀲𑁆𑀲𑀯𑀲𑁂𑀦 𑀳𑀝𑁆𑀞𑁄 𑀘𑁂𑀯 𑀧𑀳𑀝𑁆𑀞𑁄 𑀘. 𑀉𑀪𑀬𑁂𑀦𑀧𑀺 𑀅𑀥𑀺𑀓𑀲𑁄𑀫𑀦𑀲𑁆𑀲𑀁 𑀯𑀼𑀢𑁆𑀢𑀁. 𑀅𑀢𑁆𑀣𑀺…𑀧𑁂… 𑀧𑀯𑀢𑁆𑀢𑀦𑁆𑀢𑀺 ‘‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞𑀁, 𑀅𑀢𑁆𑀣𑀺 𑀳𑀼𑀢𑀁, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀫𑀸𑀢𑀸, 𑀅𑀢𑁆𑀣𑀺 𑀧𑀺𑀢𑀸, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁪𑁪𑁧) 𑀏𑀯𑀁 𑀧𑀯𑀢𑁆𑀢𑀁 𑀤𑀲𑀯𑀺𑀥𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀢𑁆𑀣𑀼𑀯𑀲𑁂𑀦 𑀘𑁂𑀯 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸𑀤𑀻𑀦𑀁 𑀯𑀲𑁂𑀦 𑀘 𑀧𑀯𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀳𑀺 𑀦 𑀓𑁂𑀯𑀮𑀁 𑀦𑀯𑀦𑁆𑀦𑀁𑀬𑁂𑀯 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀢𑁆𑀣𑀽𑀦𑀁 𑀕𑀳𑀡𑀁, 𑀅𑀣 𑀔𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸𑀦𑀫𑁆𑀧𑀺 𑀲𑀗𑁆𑀕𑀳𑁄. 𑀲𑀫𑁆𑀫𑀸 𑀜𑀸𑀬𑁂𑀦 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺, 𑀧𑀲𑀢𑁆𑀣𑀸 𑀯𑀸 𑀤𑀺𑀝𑁆𑀞𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑀁. 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸. 𑀢𑀜𑁆𑀘 𑀔𑁄 𑀲𑀳𑀚𑀸𑀢𑀧𑀼𑀩𑁆𑀩𑀗𑁆𑀕𑀫𑀯𑀲𑁂𑀦 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧-𑁨) 𑀯𑀺𑀬 𑀲𑀫𑁆𑀧𑀬𑁄𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀅𑀦𑀼𑀲𑁆𑀲𑀸𑀳𑀺𑀢𑁄𑀢𑀺 𑀮𑁄𑀪𑀫𑀘𑁆𑀙𑀭𑀺𑀬𑀸𑀤𑀺𑀯𑀲𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀗𑁆𑀓𑁄𑀘𑀁 𑀅𑀦𑀸𑀧𑀚𑁆𑀚𑀦𑀢𑁄 𑀅𑀢𑁆𑀢𑀦𑀸, 𑀧𑀭𑁂𑀦 𑀯𑀸 𑀓𑁂𑀦𑀘𑀺 𑀅𑀦𑀼𑀲𑁆𑀲𑀸𑀳𑀺𑀢𑁄 𑀳𑀼𑀢𑁆𑀯𑀸. 𑀲𑀪𑀸𑀯𑀢𑁄 𑀳𑀺 𑀧𑀼𑀜𑁆𑀜𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀫𑀺𑀤𑀁. 𑀧𑀭𑁂𑀳𑀻𑀢𑀺 𑀧𑀦 𑀧𑀭𑀧𑀸𑀓𑀝𑀼𑀲𑁆𑀲𑀸𑀳𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀞𑀫𑀦𑁆𑀢𑀺 𑀤𑁂𑀲𑀦𑀸𑀓𑁆𑀓𑀫𑁂𑀦, 𑀇𑀥 𑀦𑀺𑀤𑁆𑀤𑀺𑀝𑁆𑀞𑀓𑁆𑀓𑀫𑁂𑀦 𑀯𑀸 𑀧𑀞𑀫𑀁. 𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀸𑀤𑀺𑀅𑀗𑁆𑀕𑀧𑀸𑀭𑀺𑀧𑀽𑀭𑀺𑀬𑀸 𑀫𑀳𑀦𑁆𑀢𑀁 𑀓𑀼𑀲𑀮𑀘𑀺𑀢𑁆𑀢𑀁. 𑀅𑀣 𑀯𑀸 𑀧𑀘𑁆𑀙𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀢𑁄 𑀫𑀳𑀦𑁆𑀢𑀁 𑀧𑀽𑀚𑀺𑀢𑀁 𑀓𑀼𑀲𑀮𑀘𑀺𑀢𑁆𑀢𑀦𑁆𑀢𑀺 𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺 𑀫𑁂𑀢𑁆𑀢𑀸𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀢𑀺𑀳𑁂𑀢𑀼𑀓𑀲𑁄𑀫𑀦𑀲𑁆𑀲𑀫𑀬𑀲𑁆𑀲 𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑀲𑁆𑀲 𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 ‘‘𑀤𑁂𑀬𑁆𑀬𑀥𑀫𑁆𑀫…𑀧𑁂… 𑀳𑀝𑁆𑀞𑀧𑀳𑀝𑁆𑀞𑁄’’𑀢𑀺 𑀏𑀢𑁆𑀢𑀸𑀯𑀢𑀸 𑀇𑀫𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑀫𑀸𑀳, ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸’’𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑀁, ‘‘𑀅𑀦𑀼𑀲𑁆𑀲𑀸𑀳𑀺𑀢𑁄’’𑀢𑀺 𑀧𑀦 𑀇𑀫𑀺𑀦𑀸 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀁, 𑀅𑀜𑁆𑀜𑀁 𑀯𑀸 𑀲𑁄𑀫𑀦𑀲𑁆𑀲𑀓𑀸𑀭𑀡𑀁 𑀆𑀕𑀫𑁆𑀫𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦. 𑀉𑀲𑁆𑀲𑀸𑀳𑀺𑀢𑁄𑀢𑀺 𑀤𑁂𑀬𑁆𑀬𑀥𑀫𑁆𑀫𑁂 𑀲𑀸𑀧𑁂𑀓𑁆𑀔𑀸𑀤𑀺𑀢𑀸𑀬, 𑀲𑀻𑀮𑀲𑀫𑁆𑀧𑀤𑀸𑀤𑀻𑀲𑀼 𑀅𑀦𑀥𑀺𑀫𑀼𑀢𑁆𑀢𑀢𑀸𑀤𑀻𑀳𑀺 𑀘 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀗𑁆𑀓𑁄𑀘𑀸𑀧𑀚𑁆𑀚𑀦𑀢𑁄 𑀅𑀢𑁆𑀢𑀦𑀸, 𑀧𑀭𑁂𑀦 𑀯𑀸 𑀓𑁂𑀦𑀘𑀺 𑀉𑀲𑁆𑀲𑀸𑀳𑀺𑀢𑁄. 𑀧𑀭𑁂𑀳𑀻𑀢𑀺 𑀧𑀦 𑀯𑀼𑀢𑁆𑀢𑀦𑀬𑀫𑁂𑀯. 𑀓𑀭𑁄𑀢𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑁂𑀯𑀸𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀤𑀺𑀦𑀸 𑀢𑀁𑀲𑀤𑀺𑀲𑀢𑀸𑀬 𑀯𑀼𑀢𑁆𑀢𑀁. 𑀳𑁄𑀢𑀺 𑀳𑀺 𑀢𑀁𑀲𑀤𑀺𑀲𑁂𑀧𑀺 𑀢𑀁𑀯𑁄𑀳𑀸𑀭𑁄 𑀬𑀣𑀸 𑀘 ‘‘𑀲𑀸𑀬𑁂𑀯 𑀢𑀺𑀢𑁆𑀢𑀺𑀭𑀻, 𑀢𑀸𑀦𑀺𑀬𑁂𑀯 𑀑𑀲𑀥𑀸𑀦𑀻’’𑀢𑀺. 𑀏𑀢𑁆𑀣 𑀧𑀦 ‘‘𑀉𑀲𑁆𑀲𑀸𑀳𑀺𑀢𑁄’’𑀢𑀺 𑀇𑀫𑀺𑀦𑀸 𑀲𑀲𑀗𑁆𑀔𑀸𑀭𑀺𑀓𑀢𑀁 𑀤𑀲𑁆𑀲𑁂𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂𑀢𑀺 𑀇𑀫𑀲𑁆𑀫𑀺𑀁 𑀲𑀲𑀗𑁆𑀔𑀸𑀭𑀺𑀓𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁂, 𑀉𑀲𑁆𑀲𑀸𑀳𑀺𑀢𑀩𑁆𑀩𑀘𑀺𑀢𑁆𑀢𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀢𑀁𑀯𑀺𑀲𑀬𑁂𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀧𑁆𑀧𑀬𑁄𑀕𑀲𑁆𑀲𑀸𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀗𑁆𑀓𑁄𑀘𑁂 𑀚𑀸𑀬𑀫𑀸𑀦𑁂 𑀢𑀢𑁄 𑀯𑀺𑀯𑁂𑀘𑁂𑀢𑁆𑀯𑀸 𑀲𑀫𑀼𑀲𑁆𑀲𑀸𑀳𑀦𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀧𑁆𑀧𑀬𑁄𑀕𑀲𑁆𑀲. 𑀧𑀼𑀩𑁆𑀩-𑀕𑁆𑀕𑀳𑀡𑀁 𑀧𑀦𑁂𑀢𑁆𑀣 𑀢𑀣𑀸𑀧𑀯𑀢𑁆𑀢𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀲𑁄 𑀧𑀬𑁄𑀕𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀢𑀲𑁆𑀲 𑀧𑀼𑀩𑁆𑀩𑀓𑀸𑀮𑀺𑀓𑀢𑀸𑀬𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄.

𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦𑀸𑀢𑀺 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀚𑀦𑀯𑀦𑁆𑀤𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦. 𑀩𑀮𑀦𑁆𑀢𑀺 𑀅𑀦𑀦𑁆𑀢𑀻𑀢𑀺 𑀩𑀸𑀮𑀸, 𑀅𑀲𑁆𑀲𑀸𑀲𑀺𑀢𑀧𑀲𑁆𑀲𑀸𑀲𑀺𑀢𑀫𑀢𑁆𑀢𑁂𑀦𑁂𑀯 𑀚𑀻𑀯𑀦𑁆𑀢𑀺, 𑀦 𑀧𑀜𑁆𑀜𑀸𑀚𑀻𑀯𑀺𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀸𑀮𑀸𑀬𑁂𑀯 𑀩𑀸𑀮𑀓𑀸. 𑀢𑁂 𑀧𑀦 𑀇𑀥 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀪𑀸𑀯𑁂𑀦 𑀅𑀲𑀜𑁆𑀚𑀸𑀢𑀩𑀼𑀤𑁆𑀥𑀺𑀦𑁄 𑀤𑀸𑀭𑀓𑀸. 𑀧𑀸𑀓𑀝𑀯𑀲𑁂𑀦 𑀘𑁂𑀢𑁆𑀣 𑀩𑀸𑀮𑀓-𑀕𑁆𑀕𑀳𑀡𑀁. 𑀲𑀳𑀲𑀸 𑀓𑀭𑀡𑀸𑀤𑀺𑀓𑀸𑀮𑁂 𑀧𑀦 𑀇𑀢𑀭𑁂𑀲𑀫𑁆𑀧𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀳𑁄𑀢𑀻𑀢𑀺. 𑀲𑁄𑀫𑀦𑀲𑁆𑀲𑀁 𑀚𑀸𑀢𑀁 𑀏𑀢𑁂𑀲𑀦𑁆𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸, 𑀚𑀸𑀢𑀲𑁄𑀫𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀳𑀲𑀸𑀢𑀺 𑀲𑀻𑀖𑀁 𑀲𑀻𑀖𑀁 𑀤𑀸𑀢𑀼𑀓𑀸𑀫𑀢𑀸𑀬 𑀉𑀧𑁆𑀧𑀢𑁆𑀢𑀺𑀲𑀫𑀓𑀸𑀮𑀫𑁂𑀯.

𑀏𑀢𑁆𑀣 𑀘 ‘‘𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀭𑁂𑀲𑀁 𑀧𑀬𑁄𑀕𑀸𑀪𑀸𑀯𑀫𑀸𑀳, ‘‘𑀚𑀸𑀢𑀧𑀭𑀺𑀘𑀬𑀸’’𑀢𑀺 𑀅𑀢𑁆𑀢𑀦𑁄 𑀧𑀬𑁄𑀕𑀸𑀪𑀸𑀯𑀁. 𑀉𑀪𑀬𑁂𑀦𑀸𑀧𑀺 𑀇𑀫𑀲𑁆𑀲 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀩𑀸𑀮𑀓𑀸, 𑀲𑀳𑀲𑀸’’𑀢𑀺 𑀘 𑀇𑀫𑁂𑀳𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑀫𑀸𑀳, ‘‘𑀪𑀺𑀓𑁆𑀔𑀽…𑀧𑁂… 𑀚𑀸𑀢𑀸’’𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑀁. 𑀅𑀣 𑀯𑀸 ‘‘𑀧𑀝𑀺𑀧𑀢𑁆𑀢𑀺…𑀧𑁂… 𑀧𑀭𑀺𑀘𑀬𑀸’’𑀢𑀺 𑀇𑀫𑀺𑀦𑀸 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀲𑁆𑀲 ‘‘𑀩𑀸𑀮𑀓𑀸 𑀪𑀺𑀓𑁆𑀔𑀽…𑀧𑁂… 𑀚𑀸𑀢𑀸’’𑀢𑀺 𑀘 𑀇𑀫𑁂𑀳𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑀲𑁆𑀲 𑀘 𑀤𑀻𑀧𑀺𑀢𑀢𑁆𑀢𑀸 ‘‘𑀲𑀳𑀲𑀸’’𑀢𑀺 𑀯𑀘𑀦𑁂𑀦 𑀬𑀣𑀸𑀯𑀼𑀢𑁆𑀢𑀫𑁂𑀯 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀁 𑀧𑀓𑀸𑀲𑁂𑀢𑀺. 𑀏𑀯𑀁 𑀲𑀢𑀺 𑀧𑀝𑀺𑀮𑁄𑀫𑀢𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀤𑀺𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀅𑀦𑀼𑀮𑁄𑀫𑀢𑁄 𑀧𑀦 ‘‘𑀲𑁄𑀫𑀦𑀲𑁆𑀲𑀚𑀸𑀢𑀸’’𑀢𑀺 𑀇𑀫𑀺𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑀁, 𑀲𑀳𑀲𑀸-𑀕𑁆𑀕𑀳𑀡𑁂𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀲𑀗𑁆𑀔𑀸𑀭𑀺𑀓𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀧𑀝𑀺𑀧𑀢𑁆𑀢𑀺…𑀧𑁂… 𑀤𑀺𑀲𑁆𑀯𑀸’’𑀢𑀺 𑀏𑀢𑁆𑀢𑀸𑀯𑀢𑀸 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀤𑀺𑀪𑀸𑀯𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺. 𑀢𑁂𑀢𑀺 𑀢𑁂 𑀜𑀸𑀢𑀓𑀸, 𑀢𑁂 𑀩𑀸𑀮𑀓𑀸𑀢𑀺 𑀯𑀸 𑀅𑀢𑁆𑀣𑁄. ‘‘𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑀁 𑀆𑀕𑀫𑁆𑀫𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁 𑀢𑀣𑀸𑀭𑀽𑀧𑁂 𑀘𑁂𑀢𑁄𑀪𑀺𑀲𑀗𑁆𑀔𑀸𑀭𑀸𑀤𑀬𑁄𑀧𑀺 𑀳𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀸𑀬 𑀓𑀸𑀭𑀡𑀫𑁂𑀯𑀸𑀢𑀺. 𑀘𑀺𑀢𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀸𑀪𑀸𑀯𑁂 𑀧𑀼𑀕𑁆𑀕𑀮𑀲𑁆𑀲𑀧𑀺 𑀲𑁄𑀫𑀦𑀲𑁆𑀲𑀭𑀳𑀺𑀢𑀢𑀸 𑀳𑁄𑀢𑀻𑀢𑀺 ‘‘𑀘𑀢𑀽𑀲𑀼𑀧𑀺…𑀧𑁂… 𑀳𑁄𑀦𑁆𑀢𑀻’’𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀯’’𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀇𑀫𑁂𑀲𑀼 𑀧𑀦 𑀅𑀝𑁆𑀞𑀲𑀼 𑀯𑀺𑀜𑁆𑀜𑀸𑀡𑁂𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀩𑀮𑀯𑀢𑀭𑀁, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁, 𑀲𑀲𑀗𑁆𑀔𑀸𑀭𑀺𑀓𑀢𑁄 𑀅𑀲𑀗𑁆𑀔𑀸𑀭𑀺𑀓𑀁 𑀲𑀤𑀺𑀲𑀁 𑀩𑀮𑀯𑀢𑀭𑀁. 𑀯𑀺𑀲𑀤𑀺𑀲𑀁 𑀧𑀦 𑀯𑁂𑀤𑀦𑀸𑀜𑀸𑀡𑀧𑁆𑀧𑀬𑁄𑀕𑀯𑀲𑁂𑀦 𑀩𑀮𑀯𑀁, 𑀤𑀼𑀩𑁆𑀩𑀮𑀜𑁆𑀘 𑀳𑁄𑀢𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀺𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀢𑁄 𑀳𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀢𑀺𑀳𑁂𑀢𑀼𑀓𑀲𑀲𑀗𑁆𑀔𑀸𑀭𑀺𑀓𑀁 𑀩𑀮𑀯𑀢𑀭𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀤𑀼𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀢𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀢𑀺𑀳𑁂𑀢𑀼𑀓𑀅𑀲𑀗𑁆𑀔𑀸𑀭𑀺𑀓𑀁 𑀩𑀮𑀯𑀢𑀭𑀁. 𑀇𑀢𑀺 𑀘𑀢𑀼𑀢𑁆𑀣𑀘𑀺𑀢𑁆𑀢𑀢𑁄 𑀢𑀢𑀺𑀬𑀘𑀺𑀢𑁆𑀢𑀁 𑀩𑀮𑀯𑀢𑀭𑀁, 𑀢𑀢𑁄 𑀅𑀝𑁆𑀞𑀫𑀘𑀺𑀢𑁆𑀢𑀁, 𑀢𑀢𑁄 𑀲𑀢𑁆𑀢𑀫𑀘𑀺𑀢𑁆𑀢𑀁, 𑀢𑀢𑁄 𑀤𑀼𑀢𑀺𑀬𑀘𑀺𑀢𑁆𑀢𑀁, 𑀢𑀢𑁄 𑀧𑀞𑀫𑀘𑀺𑀢𑁆𑀢𑀁, 𑀢𑀢𑁄 𑀙𑀝𑁆𑀞𑀘𑀺𑀢𑁆𑀢𑀁, 𑀢𑀢𑁄 𑀧𑀜𑁆𑀘𑀫𑀘𑀺𑀢𑁆𑀢𑀦𑁆𑀢𑀺 𑀏𑀯𑀫𑀺𑀫𑁂𑀲𑀁 𑀩𑀮𑀯𑀩𑀮𑀯𑀢𑀭𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁬. 𑀏𑀯𑀁 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦 𑀯𑁂𑀤𑀦𑀸𑀜𑀸𑀡𑀧𑁆𑀧𑀬𑁄𑀕𑀪𑁂𑀤𑀢𑁄 𑀅𑀝𑁆𑀞𑀯𑀺𑀥𑀢𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀧𑀼𑀜𑁆𑀜𑀓𑀺𑀭𑀺𑀬𑀸𑀤𑀻𑀦𑀁 𑀯𑀲𑁂𑀦𑀧𑀺 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀲 𑀧𑀼𑀜𑁆𑀜𑀓𑁆𑀭𑀺𑀬𑀸𑀤𑀻𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀙𑀦𑁆𑀦𑀁 𑀆𑀭𑀫𑁆𑀫𑀡𑀸𑀦𑀁, 𑀘𑀢𑀼𑀦𑁆𑀦𑀁 𑀅𑀥𑀺𑀧𑀢𑀻𑀦𑀁, 𑀢𑀺𑀡𑁆𑀡𑀁 𑀓𑀫𑁆𑀫𑀸𑀦𑀁, 𑀳𑀻𑀦𑀸𑀤𑀺𑀪𑁂𑀤𑀲𑁆𑀲 𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳𑀼 𑁋

‘‘𑀓𑀫𑁂𑀦 𑀧𑀼𑀜𑁆𑀜𑀯𑀢𑁆𑀣𑀽𑀳𑀺, 𑀕𑁄𑀘𑀭𑀸𑀥𑀺𑀧𑀢𑀻𑀳𑀺 𑀘;

𑀓𑀫𑁆𑀫𑀳𑀻𑀦𑀸𑀤𑀺𑀢𑁄 𑀘𑀸𑀧𑀺, 𑀕𑀡𑁂𑀬𑁆𑀬 𑀦𑀬𑀓𑁄𑀯𑀺𑀤𑁄’’𑀢𑀺.

𑁨𑁭. 𑀇𑀤𑀸𑀦𑀺 𑀢𑀣𑀸𑀧𑀯𑀢𑁆𑀢𑀫𑀸𑀦𑀲𑁆𑀲 𑀢𑀲𑁆𑀲 𑀬𑁄 𑀬𑁄 𑀢𑁂𑀲𑀁 𑀢𑁂𑀲𑀁 𑀯𑀲𑁂𑀦 𑀮𑀩𑁆𑀪𑀫𑀸𑀦𑁄 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀢𑀁 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀭𑀲 𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑁂𑀯𑀁 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀇𑀫𑀸𑀦𑀺 𑀢𑀸𑀯 𑀅𑀝𑁆𑀞 𑀯𑀺𑀜𑁆𑀜𑀸𑀡𑀸𑀦𑀺 𑀤𑀲𑀦𑁆𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁 𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀧𑀘𑁆𑀘𑁂𑀓𑀁 𑀤𑀲 𑀤𑀲𑀸𑀢𑀺 𑀓𑀢𑁆𑀯𑀸 𑀅𑀲𑀻𑀢𑀺 𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀘 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀦𑀢𑁄 𑀙𑀕𑁆𑀕𑀼𑀡𑀺𑀢𑀸𑀦𑀺 𑀲𑀸𑀲𑀻𑀢𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀘𑀢𑀼𑀦𑁆𑀦𑀁 𑀅𑀥𑀺𑀧𑀢𑀻𑀦𑀁 𑀲𑀳𑀬𑁄𑀕𑀯𑀲𑁂𑀦 𑀘𑀢𑀼𑀕𑁆𑀕𑀼𑀡𑀺𑀢𑀸𑀦𑀺 𑀲𑀳𑀲𑁆𑀲𑀁, 𑀯𑀻𑀲𑀸𑀥𑀺𑀓𑀸𑀦𑀺 𑀘 𑀦𑀯 𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀘 𑀓𑀸𑀬𑀯𑀘𑀻𑀫𑀦𑁄𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀓𑀫𑁆𑀫𑀸𑀦𑀁 𑀯𑀲𑁂𑀦 𑀢𑀺𑀕𑀼𑀡𑀺𑀢𑀸𑀦𑀺 𑀲𑀲𑀝𑁆𑀞𑀺𑀲𑀢𑁆𑀢𑀲𑀢𑀸𑀥𑀺𑀓𑀸𑀦𑀺 𑀧𑀜𑁆𑀘 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀘 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑀢𑁄 𑀢𑀺𑀕𑀼𑀡𑀺𑀢𑀸𑀦𑀺 𑀲𑀸𑀲𑀻𑀢𑀺𑀓𑀤𑁆𑀯𑀺𑀲𑀢𑀸𑀥𑀺𑀓𑀸𑀦𑀺 𑀲𑀢𑁆𑀢𑀭𑀲 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀦𑀦𑀼 𑀘 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑀁 𑀯𑀻𑀫𑀁𑀲𑀸𑀥𑀺𑀧𑀢𑀺𑀲𑀳𑀬𑁄𑀕𑀸𑀪𑀸𑀯𑀢𑁄 𑀅𑀥𑀺𑀧𑀢𑀺𑀯𑀲𑁂𑀦 𑀲𑀳𑀲𑁆𑀲𑀁, 𑀲𑀸𑀲𑀻𑀢𑀺𑀓𑀸𑀦𑀺 𑀘 𑀙 𑀲𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺 𑀓𑀫𑁆𑀫𑀸𑀤𑀻𑀦𑀁 𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑀸𑀦𑀺 𑀯𑀻𑀲𑀲𑀢𑀸𑀥𑀺𑀓𑀸𑀦𑀺 𑀧𑀦𑁆𑀦𑀭𑀲 𑀲𑀳𑀲𑁆𑀲𑀸𑀦𑀺 𑀪𑀯𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀲𑁄𑀢𑀧𑀢𑀺𑀢𑀯𑀲𑁂𑀦 𑀧𑀦 𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀥𑀺𑀧𑀢𑀺𑀕𑀡𑀦𑀸 𑀕𑀳𑀺𑀢𑀸𑀢𑀺 𑀦 𑀢𑀲𑁆𑀲 𑀯𑀲𑁂𑀦 𑀕𑀡𑀦𑀳𑀸𑀦𑀺 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀦𑀼 𑀘 ‘‘𑀲𑀯𑀺𑀧𑀸𑀓𑀁 𑀓𑀼𑀲𑀮’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀓𑀣𑀁, 𑀓𑀼𑀳𑀺𑀁, 𑀓𑀺𑀁 𑀨𑀮𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀁 𑀧𑀦𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀢𑀺𑀳𑁂𑀢𑀼𑀓𑀁 𑀓𑀼𑀲𑀮𑀁 𑀢𑀺𑀳𑁂𑀢𑀼𑀓𑀁 𑀯𑀸 𑀤𑀼𑀳𑁂𑀢𑀼𑀓𑀁 𑀯𑀸 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀦𑀸𑀳𑁂𑀢𑀼𑀓𑀁 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺. 𑀬𑀤𑀸 𑀘 𑀢𑀺𑀳𑁂𑀢𑀼𑀓𑀁 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀺, 𑀢𑀤𑀸 𑀧𑀯𑀢𑁆𑀢𑁂 𑀲𑁄𑀴𑀲 𑀯𑀺𑀧𑀸𑀓𑀸𑀦𑀺 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺. 𑀬𑀤𑀸 𑀤𑁆𑀯𑀺𑀳𑁂𑀢𑀼𑀓𑀁, 𑀢𑀤𑀸 𑀤𑁆𑀯𑀸𑀤𑀲. 𑀤𑀼𑀳𑁂𑀢𑀼𑀓𑀁 𑀧𑀦 𑀤𑀼𑀳𑁂𑀢𑀼𑀓𑀫𑀳𑁂𑀢𑀼𑀓𑀜𑁆𑀘 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀺, 𑀦 𑀢𑀺𑀳𑁂𑀢𑀼𑀓𑀁. 𑀬𑀤𑀸 𑀘 𑀤𑀼𑀳𑁂𑀢𑀼𑀓𑀁 𑀚𑀦𑁂𑀢𑀺, 𑀢𑀤𑀸 𑀧𑀯𑀢𑁆𑀢𑀺𑀬𑀁 𑀤𑁆𑀯𑀸𑀤𑀲. 𑀬𑀤𑀸 𑀅𑀳𑁂𑀢𑀼𑀓𑀁, 𑀢𑀤𑀸 𑀅𑀝𑁆𑀞. 𑀬𑁂 𑀧𑀦 𑀆𑀕𑀫𑀦𑀢𑁄 𑀯𑀺𑀧𑀸𑀓𑀲𑁆𑀲 𑀲𑀗𑁆𑀔𑀸𑀭𑀪𑁂𑀤𑀫𑀺𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀢𑀺𑀳𑁂𑀢𑀼𑀓𑀁 𑀤𑁆𑀯𑀸𑀤𑀲, 𑀤𑀲 𑀯𑀸 𑀯𑀺𑀧𑀘𑁆𑀘𑀢𑀺, 𑀤𑀼𑀳𑁂𑀢𑀼𑀓𑀁 𑀤𑀲, 𑀅𑀝𑁆𑀞 𑀯𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀬𑀣𑀸𑀦𑀼𑀭𑀽𑀧’’𑀦𑁆𑀢𑀺. 𑀦𑀸𑀦𑀸𑀯𑀺𑀥𑀲𑀫𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑁄𑀪𑀦𑀸, 𑀕𑀦𑁆𑀢𑀩𑁆𑀩𑀢𑁄 𑀕𑀢𑀺 𑀘𑀸𑀢𑀺 𑀲𑀼𑀕𑀢𑀺, 𑀓𑀸𑀫𑀸𑀯𑀘𑀭𑀪𑀯𑁄𑀯 𑀲𑀼𑀕𑀢𑀺 𑀓𑀸𑀫𑀸𑀯𑀘𑀭𑀲𑀼𑀕𑀢𑀺. 𑀢𑀲𑁆𑀲𑀁 𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀬𑀁. 𑀪𑀯𑀪𑁄𑀕𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀏𑀢𑁆𑀣 𑀘 𑀪𑀯𑀢𑀻𑀢𑀺 𑀪𑀯𑁄, 𑀉𑀧𑀧𑀢𑁆𑀢𑀺𑀪𑀯𑀲𑀗𑁆𑀔𑀸𑀢𑀸𑀦𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁂𑀢𑀁 𑀕𑀳𑀡𑀁, 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀪𑁄𑀕𑁄, 𑀧𑀯𑀢𑁆𑀢𑀺𑀬𑀁 𑀧𑀝𑀺𑀮𑀪𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺, 𑀪𑀯𑁄𑀢𑀺 𑀯𑀸 𑀧𑀝𑀺𑀲𑀦𑁆𑀥𑀺, 𑀪𑁄𑀕𑁄 𑀲𑁂𑀲𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑁂𑀳𑀺 𑀲𑀳 𑀧𑀯𑀢𑁆𑀢𑀺𑀬𑀁 𑀧𑀝𑀺𑀮𑀪𑀺𑀢𑀩𑁆𑀩𑀸 𑀲𑀫𑁆𑀧𑀢𑁆𑀢𑀺, 𑀪𑀯𑁄 𑀘 𑀪𑁄𑀕𑁄 𑀘 𑀪𑀯𑀪𑁄𑀕𑁄, 𑀢𑁂𑀬𑁂𑀯 𑀲𑀫𑁆𑀧𑀦𑁆𑀦𑀪𑀸𑀯𑀢𑁄 𑀲𑀫𑁆𑀧𑀢𑁆𑀢𑀺, 𑀢𑁂𑀲𑀁 𑀯𑀸 𑀲𑀫𑁆𑀧𑀢𑁆𑀢𑀺 𑀪𑀯𑀪𑁄𑀕𑀲𑀫𑁆𑀧𑀢𑁆𑀢𑀺, 𑀢𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀚𑀦𑀓𑀯𑀲𑁂𑀦 𑀘 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀪𑀯𑀪𑁄𑀕𑀲𑀫𑁆𑀧𑀢𑁆𑀢𑀻𑀦𑀁 𑀦𑀺𑀭𑀯𑀲𑁂𑀲𑀢𑁄 𑀮𑀩𑁆𑀪𑀫𑀸𑀦𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 ‘‘𑀓𑀸𑀫𑀸𑀯𑀘𑀭𑀲𑀼𑀕𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀳𑁂𑀢𑀼𑀓𑀯𑀺𑀧𑀸𑀓𑀯𑀚𑁆𑀚𑀁 𑀧𑀦 𑀧𑀯𑀢𑁆𑀢𑀺𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀲𑀪𑀸𑀯𑀁 𑀪𑀯𑀲𑀫𑁆𑀧𑀢𑁆𑀢𑀺𑀁, 𑀏𑀓𑀘𑁆𑀘𑀪𑁄𑀕𑀲𑀫𑁆𑀧𑀢𑁆𑀢𑀺𑀜𑁆𑀘, 𑀪𑁄𑀕𑀲𑀫𑁆𑀧𑀤𑀫𑁂𑀯 𑀯𑀸 𑀅𑀯𑀺𑀲𑁂𑀲𑁂𑀦 𑀲𑀼𑀕𑀢𑀺𑀬𑀁 𑀤𑀼𑀕𑁆𑀕𑀢𑀺𑀬𑀫𑁆𑀧𑀺 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺𑀬𑁂𑀯. 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀫𑁆𑀧𑀺 𑀳𑀺𑀲𑁆𑀲 𑀤𑁂𑀯𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀫𑀦𑀼𑀜𑁆𑀜𑀁 𑀪𑁄𑀕𑀚𑀸𑀢𑀁, 𑀢𑀩𑁆𑀩𑀺𑀲𑀬𑀸𑀦𑀺 𑀘 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀲𑀼𑀯𑀡𑁆𑀡𑀢𑀸𑀲𑀼𑀲𑁆𑀲𑀭𑀢𑀸𑀤𑀺 𑀘 𑀢𑀁 𑀲𑀩𑁆𑀩𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲𑁂𑀯 𑀨𑀮𑀁. 𑀦 𑀳𑀺 𑀅𑀓𑀼𑀲𑀮𑀲𑁆𑀲 𑀇𑀝𑁆𑀞𑀨𑀮𑀁 𑀅𑀢𑁆𑀣𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀅𑀓𑀼𑀲𑀮𑀲𑁆𑀲 𑀇𑀝𑁆𑀞𑁄 𑀓𑀦𑁆𑀢𑁄 𑀯𑀺𑀧𑀸𑀓𑁄 𑀲𑀁𑀯𑀺𑀚𑁆𑀚𑀢𑀻’’𑀢𑀺.

𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀡𑁆𑀡𑀦𑀸

𑀇𑀤𑀸𑀦𑀺 𑀬𑀲𑁆𑀫𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀲𑁆𑀲 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀦𑀺𑀤𑁆𑀤𑁂𑀲𑀸𑀯𑀓𑀸𑀲𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀇𑀢𑀭𑁂𑀲𑀽’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀇𑀢𑀭𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀇𑀢𑀭𑁂𑀲𑀼, 𑀭𑀽𑀧𑀸𑀯𑀘𑀭𑀸𑀤𑀻𑀲𑀽𑀢𑀺 𑀅𑀢𑁆𑀣𑁄. 𑀲𑀯𑀢𑁆𑀣𑀼𑀓𑀢𑁄 𑀏𑀓𑀯𑀺𑀥𑀁 𑀏𑀓𑀦𑁆𑀢𑁂𑀦 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸. 𑀦 𑀳𑀺 𑀅𑀭𑀽𑀧𑀥𑀸𑀢𑀼𑀬𑀁 𑀭𑀽𑀧𑀸𑀯𑀘𑀭𑀥𑀫𑁆𑀫𑀸 𑀮𑀩𑁆𑀪𑀦𑁆𑀢𑀺 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀬 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀧𑀼𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄.

𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀪𑁂𑀤𑀢𑁄𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀯𑀺𑀬 𑀅𑀥𑀺𑀧𑀢𑀻𑀦𑀁 𑀳𑀻𑀦𑀸𑀤𑀺𑀪𑀸𑀯𑁂𑀳𑀺 𑀛𑀸𑀦𑀲𑁆𑀲 𑀳𑀻𑀦𑀸𑀤𑀺𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀅𑀣 𑀯𑀸 𑀧𑀝𑀺𑀮𑀤𑁆𑀥𑀫𑀢𑁆𑀢𑀫𑀦𑀸𑀲𑁂𑀯𑀺𑀢𑀁 𑀳𑀻𑀦𑀁 𑀧𑀭𑀺𑀤𑀼𑀩𑁆𑀩𑀮𑀪𑀸𑀯𑀢𑁄, 𑀦𑀸𑀢𑀺𑀲𑀼𑀪𑀸𑀯𑀺𑀢𑀁 𑀅𑀧𑀭𑀺𑀧𑀼𑀡𑁆𑀡𑀯𑀲𑀺𑀪𑀸𑀯𑀁 𑀫𑀚𑁆𑀛𑀺𑀫𑀁, 𑀅𑀢𑀺𑀯𑀺𑀬 𑀲𑀼𑀪𑀸𑀯𑀺𑀢𑀁 𑀧𑀦 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀯𑀲𑀺𑀪𑀸𑀯𑀁 𑀧𑀡𑀻𑀢𑀁. 𑀢𑀣𑀸 𑀉𑀴𑀸𑀭𑀧𑀼𑀜𑁆𑀜𑀨𑀮𑀓𑀸𑀫𑀢𑀸𑀯𑀲𑁂𑀦 𑀧𑀯𑀢𑁆𑀢𑀺𑀢𑀁 𑀳𑀻𑀦𑀁, 𑀮𑁄𑀓𑀺𑀬𑀸𑀪𑀺𑀜𑁆𑀜𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁, 𑀯𑀺𑀯𑁂𑀓𑀓𑀸𑀫𑀢𑀸𑀬 𑀅𑀭𑀺𑀬𑀪𑀸𑀯𑁂 𑀞𑀺𑀢𑁂𑀦 𑀧𑀯𑀢𑁆𑀢𑀺𑀢𑀁 𑀧𑀡𑀻𑀢𑀁. 𑀅𑀢𑁆𑀢𑀳𑀺𑀢𑀸𑀬 𑀯𑀸 𑀧𑀯𑀢𑁆𑀢𑀺𑀢𑀁 𑀳𑀻𑀦𑀁, 𑀓𑁂𑀯𑀮𑀁 𑀅𑀮𑁄𑀪𑀚𑁆𑀛𑀸𑀲𑀬𑁂𑀦 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁, 𑀧𑀭𑀳𑀺𑀢𑀸𑀬 𑀧𑀯𑀢𑁆𑀢𑀺𑀢𑀁 𑀧𑀡𑀻𑀢𑀁. 𑀯𑀝𑁆𑀝𑀚𑁆𑀛𑀸𑀲𑀬𑁂𑀦 𑀯𑀸 𑀧𑀯𑀢𑁆𑀢𑀺𑀢𑀁 𑀳𑀻𑀦𑀁, 𑀯𑀺𑀯𑁂𑀓𑀚𑁆𑀛𑀸𑀲𑀬𑁂𑀦 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁, 𑀯𑀺𑀯𑀝𑁆𑀝𑀚𑁆𑀛𑀸𑀲𑀬𑁂𑀦 𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀢𑁆𑀣𑀁 𑀧𑀯𑀢𑁆𑀢𑀺𑀢𑀁 𑀧𑀡𑀻𑀢𑀁.

𑀧𑀝𑀺𑀧𑀤𑀸𑀤𑀺𑀪𑁂𑀤𑀢𑁄𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀤𑀻𑀦𑀁 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀦𑀁 𑀪𑁂𑀤𑁂𑀦. 𑀧𑀝𑀺𑀧𑀤𑀸𑀯𑀘𑀦𑁂𑀦𑁂𑀯 𑀯𑀸 𑀢𑀤𑀯𑀺𑀦𑀸𑀪𑀸𑀯𑀢𑁄 𑀅𑀪𑀺𑀜𑁆𑀜𑀸𑀧𑀺 𑀮𑀩𑁆𑀪𑀢𑀺. 𑀢𑀣𑀸 𑀳𑁂𑀢𑁆𑀣 𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀥𑀺𑀧𑀢𑀺𑀆𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀫𑀸 𑀧𑀝𑀺𑀧𑀤𑀸𑀤𑀺𑀪𑁂𑀤𑀢𑁄𑀢𑀺 𑀧𑀝𑀺𑀧𑀤𑀸𑀪𑁂𑀤𑀢𑁄, 𑀅𑀥𑀺𑀧𑀢𑀺𑀪𑁂𑀤𑀢𑁄, 𑀆𑀭𑀫𑁆𑀫𑀡𑀪𑁂𑀤𑀢𑁄, 𑀳𑀸𑀦𑀪𑀸𑀕𑀺𑀬𑀸𑀤𑀺𑀪𑁂𑀤𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀝𑀺𑀧𑀤𑀸𑀪𑁂𑀤𑀢𑁄 𑀢𑀸𑀯 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀤𑀼𑀓𑁆𑀔𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀁, 𑀲𑀼𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀲𑀼𑀔𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀦𑁆𑀢𑀺 𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀅𑀲𑁆𑀲𑀸𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁. 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀅𑀲𑁆𑀲𑀸𑀢𑀺 𑀤𑀦𑁆𑀥𑀸𑀪𑀺𑀜𑁆𑀜𑀁. 𑀏𑀲 𑀦𑀬𑁄 ‘‘𑀤𑀼𑀓𑁆𑀔𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜’’𑀦𑁆𑀢𑀺𑀆𑀤𑀻𑀲𑀼𑀧𑀺.

𑀢𑀢𑁆𑀣 𑀅𑀧𑁆𑀧𑀳𑀻𑀦𑀦𑀻𑀯𑀭𑀡𑀲𑁆𑀲, 𑀅𑀯𑀺𑀓𑁆𑀔𑀫𑁆𑀪𑀺𑀢𑀛𑀸𑀦𑀦𑀺𑀓𑀦𑁆𑀢𑀺𑀓𑀲𑁆𑀲 𑀘 𑀜𑀸𑀡𑀓𑀺𑀘𑁆𑀘𑀲𑁆𑀲 𑀅𑀧𑀭𑀺𑀩𑁆𑀬𑀢𑁆𑀢𑀢𑀸𑀬 𑀧𑀭𑀺𑀦𑀺𑀝𑁆𑀞𑀺𑀢𑀲𑀓𑀮𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 ‘‘𑀧𑀣𑀯𑀻 𑀧𑀣𑀯𑀻’’𑀢𑀺 𑀯𑀸 ‘‘𑀆𑀧𑁄 𑀆𑀧𑁄’’𑀢𑀺 𑀯𑀸 𑀏𑀯𑀁 𑀧𑀯𑀢𑁆𑀢𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲 𑀉𑀧𑀘𑀸𑀭𑀼𑀧𑁆𑀧𑀢𑁆𑀢𑀺𑀬𑀸 𑀦𑀻𑀯𑀭𑀡𑀧𑁆𑀧𑀳𑀸𑀦𑀁, 𑀦𑀺𑀓𑀦𑁆𑀢𑀺𑀯𑀺𑀓𑁆𑀔𑀫𑁆𑀪𑀦𑀜𑁆𑀘 𑀳𑁄𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸 𑀧𑀝𑀺𑀧𑀤𑀸 𑀦𑀸𑀫 ‘‘𑀧𑀝𑀺𑀧𑀚𑁆𑀚𑀢𑀺 𑀛𑀸𑀦𑀁 𑀏𑀢𑀸𑀬𑀸’’𑀢𑀺 𑀓𑀢𑁆𑀯𑀸. 𑀧𑀳𑀻𑀦𑀦𑀻𑀯𑀭𑀡𑀲𑁆𑀲, 𑀧𑀦 𑀯𑀺𑀓𑁆𑀔𑀫𑁆𑀪𑀺𑀢𑀛𑀸𑀦𑀦𑀺𑀓𑀦𑁆𑀢𑀺𑀓𑀲𑁆𑀲 𑀘 𑀜𑀸𑀡𑀓𑀺𑀘𑁆𑀘𑀲𑁆𑀲 𑀧𑀭𑀺𑀩𑁆𑀬𑀢𑁆𑀢𑀪𑀸𑀯𑀢𑁄 𑀉𑀧𑀘𑀸𑀭𑀚𑁆𑀛𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀧𑁆𑀧𑀦𑀸𑀬 𑀉𑀧𑁆𑀧𑀢𑁆𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀧𑀜𑁆𑀜𑀸 𑀧𑀼𑀩𑁆𑀩𑀪𑀸𑀕𑀧𑀜𑁆𑀜𑀸𑀬 𑀯𑀺𑀲𑀺𑀝𑁆𑀞𑀪𑀸𑀯𑀢𑁄 𑀅𑀪𑀺𑀜𑁆𑀜𑀸 𑀦𑀸𑀫, 𑀢𑀲𑁆𑀫𑀸 𑀬𑁄 𑀆𑀤𑀺𑀢𑁄 𑀓𑀺𑀮𑁂𑀲𑁂 𑀛𑀸𑀦𑀦𑀺𑀓𑀦𑁆𑀢𑀺𑀜𑁆𑀘 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀤𑀼𑀓𑁆𑀔𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀛𑀸𑀦𑀦𑀺𑀓𑀦𑁆𑀢𑀺 𑀘 𑀅𑀧𑁆𑀧𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁄 𑀘𑀺𑀭𑁂𑀦 𑀅𑀗𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀧𑀝𑀺𑀧𑀤𑀁, 𑀤𑀦𑁆𑀥𑀸𑀪𑀺𑀜𑁆𑀜𑀜𑁆𑀘 𑀛𑀸𑀦𑀁 𑀳𑁄𑀢𑀺. 𑀬𑁄 𑀧𑀦 𑀲𑀲𑀗𑁆𑀔𑀸𑀭𑁂𑀦 𑀓𑀺𑀮𑁂𑀲𑀸𑀤𑀺𑀓𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀦 𑀘𑀺𑀭𑁂𑀦 𑀅𑀗𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀧𑀝𑀺𑀧𑀤𑀁, 𑀔𑀺𑀧𑁆𑀧𑀸𑀪𑀺𑀜𑁆𑀜𑀜𑁆𑀘. 𑀬𑁄 𑀓𑀺𑀮𑁂𑀲𑀸𑀤𑀺𑀓𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀲𑀼𑀔𑁂𑀦 𑀅𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀅𑀧𑁆𑀧𑀦𑀸𑀧𑀭𑀺𑀯𑀸𑀲𑀁 𑀧𑀦 𑀘𑀺𑀭𑀸𑀬𑀢𑀺, 𑀢𑀲𑁆𑀲 𑀲𑀼𑀔𑀧𑀝𑀺𑀧𑀤𑀁, 𑀤𑀦𑁆𑀥𑀸𑀪𑀺𑀜𑁆𑀜𑀁. 𑀬𑁄 𑀧𑀦 𑀲𑀼𑀔𑁂𑀦𑁂𑀯 𑀓𑀺𑀮𑁂𑀲𑀸𑀤𑀺𑀓𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀻𑀖𑀫𑁂𑀯 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀲𑀼𑀔𑀧𑀝𑀺𑀧𑀤𑀁, 𑀔𑀺𑀧𑁆𑀧𑀸𑀪𑀺𑀜𑁆𑀜𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑁄 𑀧𑀦𑀸𑀬𑀁 𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀦𑀁 𑀪𑁂𑀤𑁄 𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀲 𑀳𑀺 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 𑀢𑀺𑀩𑁆𑀩𑀸 𑀳𑁄𑀦𑁆𑀢𑀺, 𑀲𑀤𑁆𑀥𑀸𑀧𑀜𑁆𑀘𑀫𑀓𑀸𑀦𑀺 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑀫𑀼𑀤𑀽𑀦𑀺. 𑀬𑁄 𑀘 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀅𑀓𑀢𑀸𑀥𑀺𑀓𑀸𑀭𑁄, 𑀢𑀲𑁆𑀲 𑀧𑀯𑀢𑁆𑀢𑀛𑀸𑀦𑀁 𑀤𑀼𑀓𑁆𑀔𑀧𑀝𑀺𑀧𑀤𑀁, 𑀤𑀦𑁆𑀥𑀸𑀪𑀺𑀜𑁆𑀜𑀜𑁆𑀘 𑀳𑁄𑀢𑀺. 𑀢𑀲𑁆𑀲 𑀳𑀺 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀢𑀺𑀩𑁆𑀩𑀢𑀸𑀬 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀲𑀫𑀺𑀚𑁆𑀛𑀦𑀢𑁄 𑀧𑀝𑀺𑀧𑀤𑀸 𑀤𑀼𑀓𑁆𑀔𑀸 𑀅𑀲𑀼𑀔𑀸, 𑀢𑀲𑁆𑀲𑁂𑀯 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀫𑀼𑀤𑀼𑀢𑀸𑀬 𑀅𑀪𑀺𑀜𑁆𑀜𑀸𑀧𑀺 𑀤𑀦𑁆𑀥𑀸 𑀫𑀦𑁆𑀤𑀸 𑀅𑀲𑀻𑀖𑀧𑁆𑀧𑀯𑀢𑁆𑀢𑀺𑀦𑀻 𑀳𑁄𑀢𑀺. 𑀪𑀯𑀦𑁆𑀢𑀭𑁂 𑀯𑀸 𑀲𑀫𑀣𑁂 𑀅𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀧𑀝𑀺𑀧𑀤𑀸 𑀤𑀼𑀓𑁆𑀔𑀸, 𑀯𑀺𑀧𑀲𑁆𑀲𑀦𑀸𑀬 𑀅𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀅𑀪𑀺𑀜𑁆𑀜𑀸𑀧𑀺 𑀤𑀦𑁆𑀥𑀸. 𑀬𑁄 𑀧𑀦 𑀯𑀼𑀢𑁆𑀢𑀯𑀺𑀧𑀭𑀻𑀢𑁄 𑀳𑁄𑀢𑀺, 𑀢𑀲𑁆𑀲 𑀓𑀺𑀮𑁂𑀲𑀸𑀦𑀁 𑀅𑀢𑀺𑀩𑁆𑀩𑀲𑀫𑀼𑀤𑀸𑀘𑀸𑀭𑀢𑀸𑀬, 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀢𑀺𑀔𑀻𑀡𑀢𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀓𑀢𑀸𑀥𑀺𑀓𑀸𑀭𑀢𑀸𑀬 𑀬𑀣𑀸𑀓𑁆𑀓𑀫𑀁 𑀲𑀼𑀔𑀧𑀝𑀺𑀧𑀤𑀸, 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀘 𑀳𑁄𑀢𑀺. 𑀪𑀯𑀦𑁆𑀢𑀭𑁂 𑀓𑀢𑀧𑀭𑀺𑀘𑀬𑀲𑁆𑀲 𑀳𑀺 𑀬𑀣𑀸 𑀧𑀕𑀼𑀡𑀁 𑀓𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀕𑀦𑁆𑀣𑁄 𑀅𑀧𑁆𑀧𑀫𑀢𑁆𑀢𑀓𑁂𑀦 𑀧𑀬𑁄𑀕𑁂𑀦 𑀲𑀼𑀧𑁆𑀧𑀯𑀢𑁆𑀢𑀺 𑀯𑀸𑀘𑀼𑀕𑁆𑀕𑀢𑁄 𑀘 𑀳𑁄𑀢𑀺, 𑀏𑀯𑀁 𑀪𑀸𑀯𑀦𑀸 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀇𑀚𑁆𑀛𑀢𑀻𑀢𑀺. 𑀲𑁆𑀯𑀸𑀬𑀁 𑀅𑀓𑀢𑁄, 𑀓𑀢𑁄 𑀘 𑀅𑀥𑀺𑀓𑀸𑀭𑁄 𑀲𑀫𑀣𑀦𑀺𑀲𑁆𑀲𑀺𑀢𑁄 𑀧𑀝𑀺𑀧𑀤𑀸𑀬𑀁 𑀯𑀼𑀢𑁆𑀢𑁄 𑀲𑀫𑀸𑀥𑀺𑀧𑁆𑀧𑀥𑀸𑀦𑀢𑁆𑀢𑀸 𑀧𑀝𑀺𑀧𑀤𑀸𑀬. 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀺𑀢𑁄 𑀅𑀪𑀺𑀜𑁆𑀜𑀸𑀬 𑀜𑀸𑀡𑀧𑁆𑀧𑀥𑀸𑀦𑀢𑁆𑀢𑀸 𑀅𑀧𑁆𑀧𑀦𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀬𑁄 𑀧𑀦 𑀢𑀺𑀩𑁆𑀩𑀓𑀺𑀮𑁂𑀲𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀯𑀺𑀧𑀲𑁆𑀲𑀦𑀸𑀬𑀫𑁂𑀯 𑀯𑀸 𑀓𑀢𑀸𑀥𑀺𑀓𑀸𑀭𑁄 𑀳𑁄𑀢𑀺, 𑀢𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸, 𑀔𑀺𑀧𑁆𑀧𑀸 𑀧𑀦 𑀅𑀪𑀺𑀜𑁆𑀜𑀸 𑀳𑁄𑀢𑀺, 𑀢𑀩𑁆𑀩𑀺𑀧𑀭𑀻𑀢𑀲𑁆𑀲 𑀲𑀼𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸𑀢𑀺. 𑀢𑀲𑁆𑀫𑀸 𑀓𑀺𑀮𑁂𑀲𑀸𑀦𑀁 𑀢𑀺𑀩𑁆𑀩𑀫𑀦𑁆𑀤𑀪𑀸𑀯𑀢𑁄, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀔𑀺𑀡𑀫𑀼𑀤𑀼𑀪𑀸𑀯𑀢𑁄, 𑀧𑀼𑀩𑁆𑀩𑀧𑀭𑀺𑀘𑀬𑀲𑁆𑀲 𑀘 𑀲𑀫𑁆𑀪𑀯𑀸𑀲𑀫𑁆𑀪𑀯𑀯𑀲𑁂𑀦𑀸𑀢𑀺 𑀏𑀯𑀁 𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑀸𑀭𑀯𑀲𑁂𑀦 𑀇𑀫𑀸𑀲𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘 𑀬𑀸𑀦𑀺 𑀧𑀭𑀢𑁄 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀸𑀦𑀺, 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀻𑀦𑀺 𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺, 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸𑀦𑀺 𑀘 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀢𑁂𑀲𑀼 𑀬𑁄 𑀉𑀧𑀘𑀸𑀭𑀸𑀥𑀺𑀕𑀫𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀘 𑀅𑀲𑀧𑁆𑀧𑀸𑀬𑀲𑁂𑀯𑀻 𑀳𑁄𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸, 𑀤𑀦𑁆𑀥𑀸 𑀘 𑀅𑀪𑀺𑀜𑁆𑀜𑀸 𑀳𑁄𑀢𑀺. 𑀉𑀪𑀬𑀢𑁆𑀣 𑀲𑀧𑁆𑀧𑀸𑀬𑀲𑁂𑀯𑀺𑀦𑁄 𑀲𑀼𑀔𑀸 𑀧𑀝𑀺𑀧𑀤𑀸, 𑀔𑀺𑀧𑁆𑀧𑀸 𑀘 𑀅𑀪𑀺𑀜𑁆𑀜𑀸. 𑀬𑁄 𑀧𑀦 𑀢𑀢𑁄 𑀧𑀼𑀩𑁆𑀩𑀪𑀸𑀕𑁂 𑀅𑀲𑀧𑁆𑀧𑀸𑀬𑀁 𑀲𑁂𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀧𑁆𑀧𑀸𑀬𑀲𑁂𑀯𑀻 𑀳𑁄𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸, 𑀔𑀺𑀧𑁆𑀧𑀸 𑀅𑀪𑀺𑀜𑁆𑀜𑀸. 𑀢𑀩𑁆𑀩𑀺𑀧𑀭𑀻𑀢𑀲𑁆𑀲 𑀲𑀼𑀔𑀸 𑀧𑀝𑀺𑀧𑀤𑀸, 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀺𑀧𑀼𑀩𑁆𑀩𑀓𑀺𑀘𑁆𑀘𑀁 𑀅𑀲𑀫𑁆𑀧𑀸𑀤𑁂𑀢𑁆𑀯𑀸 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀲𑀧𑀭𑀺𑀧𑀦𑁆𑀣𑀢𑀸𑀬 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸, 𑀯𑀺𑀧𑀭𑀺𑀬𑀸𑀬𑁂𑀦 𑀅𑀧𑀭𑀺𑀧𑀦𑁆𑀣𑀢𑀸𑀬 𑀲𑀼𑀔𑀸. 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸𑀦𑀺 𑀅𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀜𑀸𑀡𑀲𑁆𑀲 𑀅𑀯𑀺𑀲𑀤𑀢𑀸𑀬 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀳𑁄𑀢𑀺, 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀯𑀺𑀧𑀭𑀺𑀬𑀸𑀬𑀢𑁄 𑀔𑀺𑀧𑁆𑀧𑀸 𑀅𑀪𑀺𑀜𑁆𑀜𑀸𑀢𑀺. 𑀓𑀺𑀜𑁆𑀘 𑁋 𑀢𑀡𑁆𑀳𑀸𑀯𑀺𑀚𑁆𑀚𑀸𑀢𑀺𑀪𑀯𑀦𑀯𑀲𑁂𑀦 𑀏𑀢𑀸𑀲𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀡𑁆𑀳𑀸𑀪𑀺𑀪𑀽𑀢𑀲𑁆𑀲 𑀳𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀢𑀲𑁆𑀲𑀸 𑀲𑀫𑀸𑀥𑀺𑀲𑁆𑀲 𑀉𑀚𑀼𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀫𑀣𑀧𑀝𑀺𑀧𑀤𑀸𑀬 𑀧𑀭𑀺𑀧𑀦𑁆𑀣𑀓𑀪𑀸𑀯𑀢𑁄, 𑀅𑀦𑀪𑀺𑀪𑀽𑀢𑀲𑁆𑀲 𑀢𑀤𑀪𑀸𑀯𑀢𑁄 𑀲𑀼𑀔𑀸. 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀲𑁆𑀲 𑀘 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸, 𑀇𑀢𑀭𑀲𑁆𑀲 𑀔𑀺𑀧𑁆𑀧𑀸 𑀅𑀪𑀺𑀜𑁆𑀜𑀸𑀢𑀺. 𑀲𑁄 𑀧𑀦𑀸𑀬𑀁 𑀧𑀝𑀺𑀧𑀤𑀸𑀪𑁂𑀤𑁄 𑀓𑁂𑀯𑀮𑀁 𑀲𑀫𑀣𑀪𑀸𑀯𑀦𑀸𑀯𑀲𑁂𑀦 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀲𑁆𑀲, 𑀫𑀕𑁆𑀕𑀸𑀥𑀺𑀕𑀫𑀯𑀲𑁂𑀦 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀲𑁆𑀲 𑀧𑀦 𑀦𑀢𑁆𑀣𑀺 𑀤𑀼𑀓𑁆𑀔𑀧𑀝𑀺𑀧𑀤𑀸𑀤𑀺𑀪𑁂𑀤𑁄. 𑀓𑁂𑀘𑀺 𑀧𑀦 𑀫𑀕𑁆𑀕𑀯𑀲𑁂𑀦𑁂𑀯 𑀢𑀲𑁆𑀲 𑀧𑀝𑀺𑀧𑀤𑀸𑀤𑀺𑀪𑁂𑀤𑀁 𑀯𑀡𑁆𑀡𑁂𑀦𑁆𑀢𑀺 ‘‘𑀫𑀕𑁆𑀕𑀲𑁆𑀲 𑀳𑀺 𑀤𑀼𑀓𑁆𑀔𑀧𑀝𑀺𑀧𑀤𑀸𑀤𑀺𑀪𑀸𑀯𑁂 𑀢𑀲𑁆𑀫𑀺𑀁 𑀤𑀼𑀓𑁆𑀔𑀧𑀝𑀺𑀧𑀤𑀸𑀤𑀺𑀓’’𑀦𑁆𑀢𑀺.

𑀅𑀥𑀺𑀧𑀢𑀺𑀪𑁂𑀤𑀸𑀤𑀻𑀲𑀼 𑀧𑀦 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀁 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀁 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀏𑀯𑀁 𑀅𑀥𑀺𑀧𑀢𑀺𑀪𑁂𑀤𑀢𑁄, 𑀧𑀭𑀺𑀢𑁆𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀧𑀭𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, 𑀅𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀅𑀧𑁆𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀦𑁆𑀢𑀺 𑀏𑀯𑀁 𑀆𑀭𑀫𑁆𑀫𑀡𑀪𑁂𑀤𑀢𑁄, 𑀳𑀸𑀦𑀪𑀸𑀕𑀺𑀬𑀁 𑀞𑀺𑀢𑀺𑀪𑀸𑀕𑀺𑀬𑀁 𑀯𑀺𑀲𑁂𑀲𑀪𑀸𑀕𑀺𑀬𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀦𑁆𑀢𑀺 𑀏𑀯𑀁 𑀳𑀸𑀦𑀪𑀸𑀕𑀺𑀬𑀸𑀤𑀺𑀪𑁂𑀤𑀢𑁄 𑀘 𑀘𑀢𑀼𑀩𑁆𑀩𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 ‘‘𑀙𑀦𑁆𑀤𑀯𑀢𑁄 𑀘𑁂 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀫𑀬𑁆𑀳𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀙𑀦𑁆𑀤𑀁 𑀥𑀼𑀭𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀁. 𑀏𑀲 𑀦𑀬𑁄 ‘‘𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸’’𑀤𑀻𑀲𑀼𑀧𑀺. 𑀅𑀧𑁆𑀧𑀕𑀼𑀡𑀁 𑀧𑀦 𑀉𑀧𑀭𑀺𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀧𑀭𑀺𑀢𑁆𑀢𑀁, 𑀲𑀼𑀧𑁆𑀧𑀲𑀭𑀸𑀯𑀫𑀢𑁆𑀢𑁂𑀲𑀼 𑀅𑀯𑀟𑁆𑀠𑀺𑀢𑀸𑀭𑀫𑁆𑀫𑀡𑁂𑀲𑀼 𑀦𑀺𑀩𑁆𑀩𑀢𑁆𑀢𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁. 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀢𑁄 𑀧𑀦 𑀬𑀣𑀸𑀓𑁆𑀓𑀫𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀳𑀸𑀦𑀪𑀸𑀕𑀺𑀬𑀸𑀤𑀺𑀯𑀺𑀲𑁂𑀲𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺.

𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄𑀢𑀺 𑀓𑀢𑁆𑀣𑀘𑀺 𑀧𑀜𑁆𑀘 𑀛𑀸𑀦𑀗𑁆𑀕𑀸𑀦𑀺, 𑀓𑀢𑁆𑀣𑀘𑀺 𑀘𑀢𑁆𑀢𑀸𑀭𑀺, 𑀓𑀢𑁆𑀣𑀘𑀺 𑀢𑀻𑀡𑀺, 𑀓𑀢𑁆𑀣𑀘𑀺 𑀤𑁆𑀯𑁂, 𑀓𑀢𑁆𑀣𑀘𑀺 𑀅𑀧𑀭𑀸𑀦𑀺 𑀤𑁆𑀯𑁂𑀢𑀺 𑀏𑀯𑀁 𑀛𑀸𑀦𑀗𑁆𑀕𑀸𑀦𑀁 𑀲𑀫𑁆𑀧𑀬𑁄𑀕𑀪𑁂𑀤𑀢𑁄. 𑀦𑀦𑀼 𑀘𑁂𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑁂 𑀯𑀺𑀬 𑀲𑀗𑁆𑀔𑀸𑀭𑀪𑁂𑀤𑁄 𑀓𑀲𑁆𑀫𑀸 𑀦 𑀕𑀳𑀺𑀢𑁄. 𑀇𑀤𑀫𑁆𑀧𑀺 𑀳𑀺 𑀓𑁂𑀯𑀮𑀁 𑀲𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀧𑀝𑀺𑀮𑀤𑁆𑀥𑀁 𑀲𑀲𑀗𑁆𑀔𑀸𑀭𑀁, 𑀫𑀕𑁆𑀕𑀸𑀥𑀺𑀕𑀫𑀯𑀲𑁂𑀦 𑀧𑀝𑀺𑀮𑀤𑁆𑀥𑀫𑀲𑀗𑁆𑀔𑀸𑀭𑀁, 𑀢𑀲𑁆𑀫𑀸 ‘‘𑀛𑀸𑀦𑀗𑁆𑀕𑀲𑀗𑁆𑀔𑀸𑀭𑀬𑁄𑀕𑀪𑁂𑀤𑀢𑁄 𑀤𑀲𑀯𑀺𑀥’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁, 𑀫𑀕𑁆𑀕𑀸𑀥𑀺𑀕𑀫𑀯𑀲𑁂𑀦 𑀲𑀢𑁆𑀢𑀺𑀢𑁄 𑀧𑀝𑀺𑀮𑀤𑁆𑀥𑀲𑁆𑀲𑀸𑀧𑀺 𑀅𑀧𑀭𑀪𑀸𑀕𑁂 𑀧𑀭𑀺𑀓𑀫𑁆𑀫𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑀢𑁄, 𑀢𑀲𑁆𑀫𑀸 𑀲𑀩𑁆𑀩𑀲𑁆𑀲𑀧𑀺 𑀛𑀸𑀦𑀲𑁆𑀲 𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀅𑀥𑀺𑀓𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 ‘‘𑀅𑀲𑀗𑁆𑀔𑀸𑀭’’𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀅𑀥𑀺𑀓𑀸𑀭𑁂𑀦 𑀘 𑀯𑀺𑀦𑀸 𑀓𑁂𑀯𑀮𑀁 𑀧𑀭𑀺𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁂𑀦𑁂𑀯 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 ‘‘𑀲𑀲𑀗𑁆𑀔𑀸𑀭’’𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀢𑀸 𑀘 𑀯𑀼𑀢𑁆𑀢𑀸𑀢𑀺.

𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀣𑀺𑀦𑀫𑀺𑀤𑁆𑀥𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀯𑀺𑀧𑁆𑀧𑀳𑀻𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀓𑀸𑀫𑀘𑁆𑀙𑀦𑁆𑀤…𑀧𑁂… 𑀯𑀺𑀧𑁆𑀧𑀳𑀻𑀦𑀁. ‘‘𑀅𑀕𑁆𑀬𑀸𑀳𑀺𑀢𑁄’’𑀢𑀺 𑀏𑀢𑁆𑀣 𑀆𑀳𑀺𑀢-𑀲𑀤𑁆𑀤𑀲𑁆𑀲 𑀯𑀺𑀬 𑀯𑀺𑀧𑁆𑀧𑀳𑀻𑀦-𑀲𑀤𑁆𑀤𑀲𑁆𑀲𑁂𑀢𑁆𑀣 𑀧𑀭𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀳𑀺 𑀯𑀸 𑀯𑀺𑀧𑁆𑀧𑀳𑀻𑀦𑀁 𑀯𑀺𑀲𑀁𑀬𑀼𑀢𑁆𑀢𑀁 𑀢𑁂𑀲𑀁 𑀧𑀳𑀸𑀬𑀓𑀪𑀸𑀯𑁂𑀦𑀸𑀢𑀺 𑀓𑀸𑀫𑀘𑁆𑀙𑀦𑁆𑀤…𑀧𑁂… 𑀯𑀺𑀧𑁆𑀧𑀳𑀻𑀦𑀁. 𑀢𑀢𑁆𑀣 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄, 𑀙𑀦𑁆𑀤𑀦𑀝𑁆𑀞𑁂𑀦 𑀙𑀦𑁆𑀤𑁄 𑀘𑀸𑀢𑀺 𑀓𑀸𑀫𑀘𑁆𑀙𑀦𑁆𑀤𑁄, 𑀩𑀳𑀮𑀓𑀸𑀫𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀩𑁆𑀬𑀸𑀧𑀸𑀤𑀸𑀤𑀻𑀦𑀫𑀢𑁆𑀣𑀁 𑀯𑀓𑁆𑀔𑀢𑀺. 𑀬𑀲𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀲𑀼 𑀅𑀧𑁆𑀧𑀳𑀻𑀦𑁂𑀲𑀼 𑀛𑀸𑀦𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀸𑀦𑀺𑀲𑁆𑀲 𑀧𑀳𑀸𑀦𑀗𑁆𑀕𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀦𑀦𑀼 𑀅𑀜𑁆𑀜𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀇𑀫𑀺𑀦𑀸 𑀛𑀸𑀦𑁂𑀦 𑀧𑀳𑀻𑀬𑀦𑁆𑀢𑀺, 𑀅𑀣 𑀓𑀲𑁆𑀫𑀸 𑀧𑀜𑁆𑀘𑁂𑀯 𑀧𑀳𑀸𑀦𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺? 𑀯𑀺𑀲𑁂𑀲𑁂𑀦 𑀛𑀸𑀦𑀦𑁆𑀢𑀭𑀸𑀬𑀓𑀭𑀢𑁆𑀢𑀸. 𑀓𑀸𑀫𑀘𑁆𑀙𑀦𑁆𑀤𑀯𑀲𑁂𑀦 𑀳𑀺 𑀦𑀸𑀦𑀸𑀯𑀺𑀲𑀬𑀧𑀮𑁄𑀪𑀺𑀢𑀁 𑀘𑀺𑀢𑁆𑀢𑀁 𑀦 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀲𑀫𑀸𑀥𑀺𑀬𑀢𑀺. 𑀓𑀸𑀫𑀘𑁆𑀙𑀦𑁆𑀤𑀸𑀪𑀺𑀪𑀽𑀢𑀁 𑀯𑀸 𑀦𑀸𑀦𑀸𑀯𑀺𑀲𑀬𑀲𑀫𑀼𑀧𑀩𑁆𑀬𑀽𑀴𑁆𑀳𑀸𑀬 𑀓𑀸𑀫𑀥𑀸𑀢𑀼𑀬𑀸 𑀧𑀳𑀸𑀦𑀧𑀝𑀺𑀧𑀤𑀁 𑀦 𑀧𑀝𑀺𑀧𑀚𑁆𑀚𑀢𑀺, 𑀩𑁆𑀬𑀸𑀧𑀸𑀤𑁂𑀦 𑀘 𑀆𑀭𑀫𑁆𑀫𑀡𑁂 𑀧𑀝𑀺𑀳𑀜𑁆𑀜𑀫𑀸𑀦𑀁 𑀦 𑀲𑀫𑀸𑀳𑀺𑀢𑀁 𑀧𑀯𑀢𑁆𑀢𑀢𑀺, 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑀁 𑀅𑀓𑀫𑁆𑀫𑀜𑁆𑀜𑀁 𑀳𑁄𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑀁 𑀅𑀯𑀽𑀧𑀲𑀦𑁆𑀢𑀫𑁂𑀯 𑀳𑀼𑀢𑁆𑀯𑀸 𑀧𑀭𑀺𑀩𑁆𑀪𑀫𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸𑀉𑀧𑀳𑀢𑀁 𑀛𑀸𑀦𑀸𑀥𑀺𑀕𑀫𑀧𑀝𑀺𑀧𑀤𑀁 𑀦𑀸𑀭𑁄𑀳𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀼 𑀔𑁄, 𑀦 𑀦𑀼 𑀔𑁄, 𑀧𑀣𑀯𑀻 𑀧𑀣𑀯𑀻’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁂𑀦 ‘‘𑀛𑀸𑀦𑀁 𑀲𑀺𑀬𑀸 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑀲𑁆𑀲 𑀛𑀸𑀦𑀸𑀥𑀺𑀕𑀫𑀧𑀝𑀺𑀧𑀤𑀸𑀬 𑀅𑀲𑀁𑀲𑀺𑀚𑁆𑀛𑀦𑀢𑁄. 𑀬𑀢𑁄 𑀯𑀓𑁆𑀔𑀢𑀺 𑁋

‘‘𑀪𑀸𑀕𑀻 𑀅𑀲𑁆𑀲𑀫𑀳𑀁 𑀅𑀤𑁆𑀥𑀸, 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸;

𑀧𑀯𑀺𑀯𑁂𑀓𑀲𑀼𑀔𑀲𑁆𑀲𑀸𑀢𑀺, 𑀓𑀢𑁆𑀯𑀸 𑀉𑀲𑁆𑀲𑀸𑀳𑀫𑀼𑀢𑁆𑀢𑀫’’𑀦𑁆𑀢𑀺.

𑀢𑀲𑁆𑀫𑀸 𑀲𑀫𑀸𑀥𑀺𑀆𑀤𑀻𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑁂𑀦 𑀯𑀺𑀲𑁂𑀲𑁂𑀦 𑀛𑀸𑀦𑀸𑀥𑀺𑀕𑀫𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑀢𑁄 𑀏𑀢𑀸𑀦𑁂𑀯 𑀧𑀳𑀸𑀦𑀗𑁆𑀕𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀧𑀘𑁆𑀘𑀦𑀻𑀓𑀸 𑀬𑀢𑁄 𑀧𑀜𑁆𑀘, 𑀲𑀫𑀸𑀥𑀸𑀤𑀻𑀦𑀫𑁂𑀢𑁆𑀣 𑀳𑀺;

𑀛𑀸𑀦𑀦𑁆𑀢𑀭𑀸𑀬𑀺𑀓𑀸 𑀢𑀲𑁆𑀫𑀸, 𑀧𑀳𑀸𑀦𑀗𑁆𑀕𑁂 𑀦𑀺𑀬𑀸𑀫𑀺𑀢𑀸’’𑀢𑀺.

𑀏𑀯𑀫𑀺𑀤𑀁 𑀧𑀳𑀸𑀦𑀗𑁆𑀕𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀧𑀬𑁄𑀕𑀗𑁆𑀕𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀢𑀓𑁆𑀓…𑀧𑁂… 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀢𑀓𑁆𑀓𑀸𑀤𑀬𑁄 𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀉𑀧𑀭𑀺 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀇𑀫𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀛𑀸𑀦𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀢𑁂𑀦𑀲𑁆𑀲 𑀇𑀫𑀸𑀦𑀺 𑀲𑀫𑁆𑀧𑀬𑁄𑀕𑀗𑁆𑀕𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀦 𑀏𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀜𑁆𑀜𑀤𑁂𑀯 𑀛𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀧𑀦 𑀦𑁂𑀫𑀺𑀆𑀤𑀺𑀅𑀗𑁆𑀕𑀲𑀫𑀼𑀤𑀸𑀬𑁂 𑀭𑀣𑀸𑀤𑀺𑀯𑁄𑀳𑀸𑀭𑁄 𑀳𑁄𑀢𑀺, 𑀏𑀯𑀁 𑀛𑀸𑀦𑀗𑁆𑀕𑀲𑀫𑀼𑀤𑀸𑀬𑁂 𑀛𑀸𑀦𑀯𑁄𑀳𑀸𑀭𑁄. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀯𑀺𑀪𑀗𑁆𑀕𑁂 ‘‘𑀛𑀸𑀦𑀦𑁆𑀢𑀺 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀯𑀺𑀪. 𑁫𑁬𑁯). 𑀓𑀲𑁆𑀫𑀸 𑀧𑀦 𑀅𑀜𑁆𑀜𑁂𑀲𑀼𑀧𑀺 𑀨𑀲𑁆𑀲𑀸𑀤𑀻𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀇𑀫𑀸𑀦𑀺𑀬𑁂𑀯 𑀧𑀜𑁆𑀘 𑀛𑀸𑀦𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀯𑀦𑁆𑀢𑀢𑀸𑀬, 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀘. 𑀯𑀺𑀢𑀓𑁆𑀓𑁄 𑀳𑀺 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀯𑀺𑀘𑀸𑀭𑁄 𑀅𑀦𑀼𑀩𑀦𑁆𑀥𑀢𑀺. 𑀏𑀯𑀁 𑀛𑀸𑀦𑀸𑀥𑀺𑀕𑀫𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀪𑀽𑀢𑁂𑀳𑀺 𑀢𑁂𑀳𑀺 𑀅𑀯𑀺𑀓𑁆𑀔𑁂𑀧𑀸𑀬 𑀲𑀫𑀸𑀤𑀳𑀺𑀢𑀧𑀬𑁄𑀕𑀲𑁆𑀲 𑀘𑁂𑀢𑀲𑁄 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸 𑀧𑀻𑀢𑀺 𑀧𑀻𑀡𑀦𑀁, 𑀲𑀼𑀔𑀜𑁆𑀘 𑀉𑀧𑀩𑁆𑀭𑀽𑀳𑀦𑀁 𑀓𑀭𑁄𑀢𑀺. 𑀅𑀣 𑀦𑀁 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀏𑀢𑁂𑀳𑀺 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀩𑀦𑁆𑀥𑀦𑀧𑀻𑀡𑀦𑀉𑀧𑀩𑁆𑀭𑀽𑀳𑀦𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀏𑀓𑀕𑁆𑀕𑀢𑀸 𑀲𑀫𑀸𑀥𑀸𑀦𑀓𑀺𑀘𑁆𑀘𑁂𑀦 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑀸𑀧𑁂𑀦𑁆𑀢𑀻 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀲𑀫𑀁, 𑀲𑀫𑁆𑀫𑀸 𑀘 𑀆𑀥𑀺𑀬𑀢𑀺, 𑀇𑀦𑁆𑀤𑁆𑀭𑀺𑀬𑀲𑀫𑀢𑀸𑀯𑀲𑁂𑀦 𑀲𑀫𑀁, 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀮𑀻𑀦𑀼𑀤𑁆𑀥𑀘𑁆𑀘𑀸𑀪𑀸𑀯𑁂𑀦 𑀲𑀫𑁆𑀫𑀸 𑀘 𑀞𑀧𑁂𑀢𑀻𑀢𑀺 𑀏𑀯𑀫𑁂𑀢𑁂𑀲𑀫𑁂𑀯 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀁 𑀆𑀯𑁂𑀡𑀺𑀓𑀁. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀦 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀏𑀯𑀁 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀯𑀦𑁆𑀢𑀢𑀸𑀬, 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀘 𑀇𑀫𑁂𑀬𑁂𑀯 𑀧𑀜𑁆𑀘 𑀛𑀸𑀦𑀗𑁆𑀕𑀪𑀸𑀯𑁂𑀦 𑀯𑀯𑀢𑁆𑀣𑀺𑀢𑀸𑀢𑀺. 𑀬𑀣𑀸𑀳𑀼 𑁋

‘‘𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀢𑁆𑀢𑀸, 𑀓𑀸𑀫𑀸𑀤𑀺𑀧𑀝𑀺𑀧𑀓𑁆𑀔𑀢𑁄;

𑀲𑀦𑁆𑀢𑁂𑀲𑀼𑀧𑀺 𑀘 𑀅𑀜𑁆𑀜𑁂𑀲𑀼, 𑀧𑀜𑁆𑀘𑁂𑀯 𑀛𑀸𑀦𑀲𑀜𑁆𑀜𑀺𑀢𑀸’’𑀢𑀺.

𑀤𑁂𑀲𑀦𑀸𑀓𑁆𑀓𑀫𑀢𑁄, 𑀫𑀳𑀕𑁆𑀕𑀢𑀥𑀫𑁆𑀫𑁂𑀲𑀼 𑀧𑀞𑀫𑀁 𑀅𑀥𑀺𑀕𑀦𑁆𑀢𑀩𑁆𑀩𑀢𑁄 𑀘 𑀧𑀞𑀫𑀁, 𑀧𑀞𑀫𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺𑀧𑀺 𑀧𑀞𑀫𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦 𑀦 𑀏𑀓𑀦𑁆𑀢𑀮𑀓𑁆𑀔𑀡𑀁 𑀛𑀸𑀦𑀧𑀝𑀺𑀮𑁄𑀫𑀸𑀤𑀺𑀯𑀲𑁂𑀦 𑀲𑀫𑀸𑀧𑀚𑁆𑀚𑀦𑁂 𑀅𑀲𑀫𑁆𑀪𑀯𑀢𑁄.

𑀧𑀼𑀭𑀺𑀫𑀧𑀘𑁆𑀙𑀺𑀫𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲𑀸𑀧𑀺 𑀅𑀧𑁆𑀧𑀦𑀸𑀓𑁆𑀔𑀡𑁂 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀯𑀺𑀢𑀓𑁆𑀓𑁄 𑀯𑀺𑀧𑁆𑀧𑀳𑀻𑀦𑁄 𑀏𑀢𑀲𑁆𑀲, 𑀢𑀢𑁄 𑀯𑀸 𑀏𑀢𑀁 𑀯𑀺𑀧𑁆𑀧𑀳𑀻𑀦𑀦𑁆𑀢𑀺 𑀯𑀺𑀢𑀓𑁆𑀓𑀯𑀺𑀧𑁆𑀧𑀳𑀻𑀦𑀁. 𑀪𑀸𑀯𑀦𑀸𑀬 𑀳𑀺 𑀧𑀳𑀻𑀦𑀢𑁆𑀢𑀸 𑀯𑀺𑀢𑀓𑁆𑀓𑁄 𑀛𑀸𑀦𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀢𑀺. 𑀅𑀲𑀁𑀓𑀺𑀮𑀺𑀝𑁆𑀞𑀲𑀪𑀸𑀯𑀢𑁆𑀢𑀸 𑀧𑀦 𑀉𑀧𑀘𑀸𑀭𑀪𑀸𑀯𑀦𑀸𑀬 𑀘 𑀢𑀁 𑀧𑀳𑀸𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀢𑁄 𑀧𑀼𑀭𑀺𑀫𑀪𑀸𑀕𑁂, 𑀧𑀘𑁆𑀙𑀸𑀪𑀸𑀕𑁂 𑀘 𑀅𑀧𑀘𑁆𑀘𑀦𑀻𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀢𑁄 𑀉𑀧𑁆𑀧𑀚𑁆𑀚𑀢𑀺𑀬𑁂𑀯𑀸𑀢𑀺.

𑀦𑀦𑀼 𑀘 ‘‘𑀅𑀲𑀁𑀓𑀺𑀮𑀺𑀝𑁆𑀞𑀲𑀪𑀸𑀯𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀅𑀣 𑀓𑀣𑀁 𑀛𑀸𑀦𑁂𑀦 𑀏𑀲 𑀧𑀳𑀻𑀬𑀢𑀺? 𑀦 𑀳𑀺 𑀓𑀼𑀲𑀮𑁂𑀳𑀺 𑀅𑀲𑀁𑀓𑀺𑀮𑀺𑀝𑁆𑀞𑀥𑀫𑁆𑀫𑀲𑁆𑀲 𑀧𑀳𑀸𑀦𑀁 𑀅𑀢𑁆𑀣𑀺 𑀭𑀸𑀕𑀸𑀤𑀺𑀲𑀁𑀓𑀺𑀮𑀺𑀝𑁆𑀞𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀫𑁂𑀢𑀲𑁆𑀲 𑀉𑀚𑀼𑀧𑀝𑀺𑀧𑀓𑁆𑀔𑀪𑀸𑀯𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀲𑀁𑀓𑀺𑀮𑀺𑀝𑁆𑀞𑀲𑀪𑀸𑀯𑀲𑁆𑀲𑀸𑀧𑀺 𑀏𑀢𑀲𑁆𑀲 𑀑𑀴𑀸𑀭𑀺𑀓𑀢𑀸𑀬 𑀤𑀼𑀩𑁆𑀩𑀮𑀪𑀸𑀯𑀢𑁄 𑀛𑀸𑀦𑀓𑁆𑀔𑀡𑁂 𑀅𑀦𑀼𑀧𑁆𑀧𑀢𑁆𑀢𑀺𑀲𑀪𑀸𑀯𑀸𑀧𑀸𑀤𑀦𑀢𑁆𑀣𑀁 𑀢𑀢𑁆𑀣 𑀦𑀺𑀓𑀦𑁆𑀢𑀺𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀪𑀸𑀯𑀦𑀸 𑀳𑁄𑀢𑀻𑀢𑀺 𑀢𑀲𑁆𑀲𑀸 𑀩𑀮𑁂𑀦 𑀢𑀁 𑀛𑀸𑀦𑀓𑁆𑀔𑀡𑁂 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑀁 𑀦𑀺𑀓𑀦𑁆𑀢𑀺𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀺𑀢𑀁 𑀧𑀳𑀻𑀦𑀁 𑀦𑀸𑀫 𑀳𑁄𑀢𑀺. 𑀬𑀤𑀺 𑀏𑀯𑀁 𑀉𑀧𑀘𑀸𑀭𑁂𑀦𑀧𑀺 𑀦𑀺𑀓𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀻𑀬𑀢𑀻𑀢𑀺 𑀢𑀢𑁆𑀣𑀧𑀺𑀲𑁆𑀲 𑀧𑀳𑀸𑀦𑀁 𑀲𑀺𑀬𑀸, 𑀬𑀣𑀸 𑀧𑀞𑀫𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑁂 𑀦𑀻𑀯𑀭𑀡𑀸𑀦𑀻𑀢𑀺? 𑀦𑀬𑀺𑀤𑀫𑁂𑀯𑀁, 𑀦𑀻𑀯𑀭𑀡𑀧𑁆𑀧𑀳𑀸𑀦𑀲𑁆𑀲 𑀯𑀺𑀬 𑀯𑀺𑀢𑀓𑁆𑀓𑀸𑀭𑀫𑁆𑀫𑀡𑀺𑀓𑀦𑀺𑀓𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀉𑀧𑀘𑀸𑀭𑁂𑀦 𑀲𑀸𑀢𑀺𑀲𑀬𑀁 𑀅𑀦𑀺𑀧𑁆𑀨𑀚𑁆𑀚𑀦𑀢𑁄. 𑀲𑀸𑀢𑀺𑀲𑀬𑀜𑁆𑀳𑀺 𑀢𑀢𑁆𑀣 𑀦𑀺𑀓𑀦𑁆𑀢𑀺𑀧𑁆𑀧𑀳𑀸𑀦𑀁 𑀅𑀧𑁆𑀧𑀦𑀸𑀬 𑀏𑀯 𑀳𑁄𑀢𑀺, 𑀢𑀲𑁆𑀫𑀸 𑀬𑀤𑀯𑁄𑀘𑀼𑀫𑁆𑀳𑀸 ‘‘𑀉𑀧𑀘𑀸𑀭𑀪𑀸𑀯𑀦𑀸𑀬 𑀘 𑀢𑀁 𑀧𑀳𑀸𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀢𑁄’’𑀢𑀺, 𑀢𑀁 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀯𑀺𑀘𑀸𑀭𑀯𑀺𑀧𑁆𑀧𑀳𑀻𑀦’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀢𑀺𑀬𑀚𑁆𑀛𑀸𑀦𑁂𑀬𑁂𑀯 𑀧𑀳𑀻𑀦𑀲𑁆𑀲 𑀯𑀺𑀢𑀓𑁆𑀓𑀲𑁆𑀲 𑀇𑀥 𑀅𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀺𑀧𑁆𑀧𑀳𑀻𑀦’’𑀦𑁆𑀢𑀺 𑀯𑀺𑀢𑀓𑁆𑀓-𑀕𑁆𑀕𑀳𑀡𑀁 𑀓𑀢𑀁. 𑀏𑀯𑀁 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀯𑀺𑀧𑁆𑀧𑀳𑀻𑀦’’𑀦𑁆𑀢𑀺𑀆𑀤𑀻𑀲𑀼𑀧𑀺.

𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀬𑀁 𑀬𑀁 𑀆𑀭𑀫𑁆𑀫𑀡𑀁 𑀬𑀲𑁆𑀲 𑀬𑀲𑁆𑀲 𑀲𑀫𑁆𑀪𑀯𑀢𑀺, 𑀢𑀤𑀦𑀢𑀺𑀓𑁆𑀓𑀫𑀢𑁄. 𑀓𑀲𑀺𑀡𑀸𑀦𑀸𑀧𑀸𑀦𑁂𑀲𑀼 𑀳𑀺 𑀧𑀜𑁆𑀘𑁂𑀯 𑀛𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀅𑀲𑀼𑀪𑀓𑀸𑀬𑀕𑀢𑀸𑀲𑀢𑀻𑀲𑀼 𑀧𑀞𑀫𑀚𑁆𑀛𑀸𑀦𑀁, 𑀅𑀦𑀼𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀧𑀜𑁆𑀘𑀫𑀚𑁆𑀛𑀸𑀦𑀯𑀚𑁆𑀚𑀸𑀦𑀺, 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀧𑀜𑁆𑀘𑀫𑀚𑁆𑀛𑀸𑀦𑀦𑁆𑀢𑀺.

𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀕𑁆𑀕𑀳𑀡𑁂𑀦 𑀓𑁂𑀯𑀮𑀁 𑀆𑀧𑁄𑀓𑀲𑀺𑀡𑀸𑀤𑀻𑀦𑀫𑁂𑀯, 𑀅𑀣 𑀔𑁄 𑀅𑀲𑀼𑀪𑀸𑀤𑀻𑀦𑀫𑁆𑀧𑀺 𑀅𑀧𑁆𑀧𑀦𑀸𑀯𑀳𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀲𑀗𑁆𑀕𑀳𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀅𑀪𑀺𑀪𑀸𑀬𑀢𑀦𑀯𑀺𑀫𑁄𑀓𑁆𑀔𑀛𑀸𑀦𑀸𑀦𑀺 𑀧𑀯𑀢𑁆𑀢𑀸𑀓𑀸𑀭𑀫𑀢𑁆𑀢𑀢𑁄 𑀪𑀺𑀦𑁆𑀦𑀸𑀦𑀺, 𑀆𑀭𑀫𑁆𑀫𑀡𑀢𑁄 𑀧𑀦 𑀓𑀲𑀺𑀡𑀸𑀬𑀢𑀦𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀓𑀲𑀺𑀡𑀸𑀬𑀢𑀦𑀛𑀸𑀦𑁂𑀳𑁂𑀯 𑀢𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺. ‘‘𑀬𑀣𑀸𑀲𑀫𑁆𑀪𑀯𑀁…𑀧𑁂… 𑀅𑀦𑁂𑀓𑀯𑀺𑀥’’𑀦𑁆𑀢𑀺 𑀯𑀸 𑀯𑀘𑀦𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀲𑀩𑁆𑀩𑁄𑀧𑀺 𑀮𑀩𑁆𑀪𑀫𑀸𑀦𑀓𑀪𑁂𑀤𑁄 𑀲𑀗𑁆𑀕𑀳𑀺𑀢𑁄𑀢𑀺 𑀅𑀪𑀺𑀪𑀸𑀬𑀢𑀦𑀯𑀺𑀫𑁄𑀓𑁆𑀔𑀛𑀸𑀦𑀸𑀦𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀧𑀦 𑀲𑀭𑀽𑀧𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀜𑀸𑀡𑀼𑀢𑁆𑀢𑀭𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀧𑀣𑀯𑀻𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀁 𑀅𑀪𑀺𑀪𑀯𑀺𑀢𑁆𑀯𑀸 ‘‘𑀦 𑀫𑁂𑀢𑁆𑀣 𑀅𑀧𑁆𑀧𑀦𑀸𑀦𑀺𑀩𑁆𑀩𑀢𑁆𑀢𑀦𑁂 𑀪𑀸𑀭𑁄’’𑀢𑀺 𑀧𑀝𑀺𑀧𑀦𑁆𑀦𑀲𑁆𑀲 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀉𑀤𑁆𑀥𑀁 𑀤𑀼𑀢𑀺𑀬𑀢𑀢𑀺𑀬𑀯𑀻𑀣𑀺𑀬𑀁, 𑀘𑀢𑀼𑀢𑁆𑀣𑀧𑀜𑁆𑀘𑀫𑀯𑀻𑀣𑀺𑀬𑀁 𑀯𑀸 𑀧𑀝𑀺𑀮𑀤𑁆𑀥𑀁 𑀛𑀸𑀦𑀁 𑀅𑀪𑀺𑀪𑀸𑀬𑀢𑀦𑀁 𑀦𑀸𑀫. 𑀢𑀜𑁆𑀳𑀺 𑀆𑀭𑀫𑁆𑀫𑀡𑀁 𑀅𑀪𑀺𑀪𑀯𑀢𑀻𑀢𑀺 𑀅𑀪𑀺𑀪𑀽, 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀢𑀸𑀬, 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀯𑀸 𑀆𑀬𑀢𑀦𑀦𑁆𑀢𑀺 𑀅𑀪𑀺𑀪𑀸𑀬𑀢𑀦𑀁, 𑀅𑀪𑀺𑀪𑀯𑀺𑀢𑀩𑁆𑀩𑀁 𑀯𑀸 𑀅𑀪𑀺𑀪𑀽, 𑀆𑀮𑀫𑁆𑀩𑀡𑀁, 𑀢𑀁 𑀆𑀬𑀢𑀦𑀫𑀲𑁆𑀲𑀸𑀢𑀺 𑀅𑀪𑀺𑀪𑀸𑀬𑀢𑀦𑀁. 𑀅𑀣 𑀯𑀸 𑀆𑀮𑀫𑁆𑀩𑀡𑀸𑀪𑀺𑀪𑀯𑀦𑀢𑁄𑀬𑁂𑀯 𑀅𑀪𑀺𑀪𑀽, 𑀧𑀭𑀺𑀓𑀫𑁆𑀫𑀁, 𑀜𑀸𑀡𑀁 𑀯𑀸, 𑀢𑀁 𑀆𑀬𑀢𑀦𑀁 𑀓𑀸𑀭𑀡𑀫𑀲𑁆𑀲𑀸𑀢𑀺 𑀅𑀪𑀺𑀪𑀸𑀬𑀢𑀦𑀁. 𑀧𑀭𑀺𑀓𑀫𑁆𑀫𑀁, 𑀜𑀸𑀡𑀁 𑀯𑀸 𑀆𑀮𑀫𑁆𑀩𑀡𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀉𑀧𑀘𑀸𑀭𑀼𑀧𑁆𑀧𑀢𑁆𑀢𑀺𑀢𑁄 𑀧𑀜𑁆𑀘𑀫𑀯𑀻𑀣𑀺𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀧𑀜𑁆𑀘𑀫𑀯𑀻𑀣𑀺𑀢𑁄 𑀧𑀭𑀁 𑀦𑀺𑀩𑁆𑀩𑀢𑁆𑀢𑀁 𑀧𑀦 𑀅𑀪𑀺𑀪𑀯𑀺𑀢𑀼𑀓𑀸𑀫𑀢𑀸𑀬 𑀦𑀺𑀩𑁆𑀩𑀢𑁆𑀢𑀺𑀢𑀫𑁆𑀧𑀺 𑀅𑀪𑀺𑀪𑀸𑀬𑀢𑀦𑀁 𑀦𑀸𑀫 𑀦 𑀳𑁄𑀢𑀺. 𑀲𑀸𑀫𑀜𑁆𑀜𑀕𑀢𑀺𑀬𑀸 𑀧𑀦 𑀓𑀲𑀺𑀡𑀸𑀬𑀢𑀦𑀫𑁂𑀯 𑀳𑁄𑀢𑀺. 𑀇𑀫𑀫𑁂𑀯 𑀳𑀺 𑀲𑀻𑀖𑀢𑀭𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁨𑁦𑁪) 𑀯𑀼𑀢𑁆𑀢𑀁. 𑀦𑀦𑀼 𑀘 𑀅𑀝𑁆𑀞𑀓𑀣𑀸𑀬𑀁 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀅𑀢𑁆𑀣𑁄 𑀓𑀲𑁆𑀫𑀸 𑀦 𑀕𑀬𑁆𑀳𑀢𑀺. ‘‘𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑀸’’𑀢𑀺 (𑀥. 𑀲. 𑀅𑀝𑁆𑀞. 𑁨𑁦𑁪) 𑀳𑀺 𑀯𑀼𑀢𑁆𑀢𑀢𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀲𑀳𑀼𑀧𑁆𑀧𑀦𑁆𑀦𑀁 𑀛𑀸𑀦𑀫𑀪𑀺𑀪𑀸𑀬𑀢𑀦𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀦𑀬𑀺𑀤𑀫𑁂𑀯𑀁, 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀲𑀳 𑀅𑀧𑁆𑀧𑀦𑀸𑀬 𑀅𑀲𑀫𑁆𑀪𑀯𑀢𑁄. 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀳𑀺 𑀇𑀥 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀢𑀤𑀸𑀭𑀫𑁆𑀫𑀡𑀲𑁆𑀲 𑀯𑀸 𑀉𑀧𑀘𑀸𑀭𑀚𑁆𑀛𑀸𑀦𑀲𑁆𑀲, 𑀓𑀺𑀁 𑀢𑀸𑀯 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀲𑀳 𑀅𑀧𑁆𑀧𑀦𑀸𑀬 𑀦𑀺𑀩𑁆𑀩𑀢𑁆𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑁂 𑀅𑀲𑀢𑀺 𑀢𑀲𑁆𑀲𑀸 𑀅𑀲𑀫𑁆𑀪𑀯𑀢𑁄, 𑀦𑀸𑀧𑀺 𑀉𑀧𑀘𑀸𑀭𑀚𑁆𑀛𑀸𑀦𑁂𑀦 𑀲𑀳 𑀏𑀓𑀯𑀻𑀣𑀺𑀬𑀁 𑀦𑀺𑀩𑁆𑀩𑀢𑁆𑀢𑀺 𑀢𑀲𑁆𑀲𑀸 𑀉𑀧𑀘𑀸𑀭𑀪𑀸𑀯𑀦𑀸𑀧𑀩𑀦𑁆𑀥𑀲𑁂𑀯𑀺𑀢𑀩𑁆𑀩𑀪𑀸𑀯𑁂𑀦 𑀢𑀤𑀸 𑀅𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸 𑀦𑀸𑀢𑀺𑀘𑀺𑀭𑀸𑀬𑀦𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀲𑀫𑀻𑀧𑀺𑀫𑁆𑀳𑀺 𑀲𑀫𑀻𑀧𑀓𑀸𑀭𑀻𑀬𑀽𑀧𑀘𑀸𑀭𑁂𑀦 𑀅𑀝𑁆𑀞𑀓𑀣𑀸𑀬𑀁 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀦𑀸𑀢𑀺𑀘𑀺𑀭𑀧𑁆𑀧𑀯𑀢𑁆𑀢𑀫𑀪𑀺𑀪𑀸𑀬𑀢𑀦𑀁, 𑀓𑀣𑀁 𑀢𑀲𑁆𑀲 𑀤𑀦𑁆𑀥𑀸𑀪𑀺𑀜𑁆𑀜𑀸𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀪𑁂𑀤𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑀯𑀦𑀯𑀻𑀣𑀺𑀬𑀁 𑀉𑀧𑁆𑀧𑀦𑁆𑀦𑀁 𑀘𑀺𑀭𑀓𑀸𑀮𑀦𑀺𑀩𑁆𑀩𑀢𑁆𑀢𑀺𑀢𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀤𑀼𑀢𑀺𑀬𑀢𑀢𑀺𑀬𑀯𑀻𑀣𑀺𑀬𑀁 𑀉𑀧𑁆𑀧𑀦𑁆𑀦𑀁 𑀢𑀩𑁆𑀩𑀺𑀧𑀭𑀻𑀢𑀮𑀓𑁆𑀔𑀡𑀢𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀅𑀪𑀺𑀪𑀸𑀬𑀢𑀦𑀁 𑀦𑀸𑀫 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀫𑁂𑀯, 𑀦𑁂𑀢𑀭’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀤𑀽𑀭𑀢𑀭𑀪𑀸𑀯𑁂𑀦 ‘‘𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀲𑀳 𑀯𑀺𑀭𑀼𑀚𑁆𑀛𑀦𑀢𑁄.

𑀅𑀧𑀺𑀘 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀁 𑀛𑀸𑀦𑀁 𑀅𑀪𑀺𑀪𑀯𑀦𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑀁 𑀯𑀲𑀺𑀪𑀸𑀯𑀩𑀮𑁂𑀦𑁂𑀯 𑀲𑀓𑁆𑀓𑀘𑁆𑀘𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀦 𑀢𑀁 𑀅𑀪𑀺𑀪𑀸𑀬𑀢𑀦𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀢𑁆𑀢𑀯𑀲𑀺𑀪𑀸𑀯𑀸 𑀧𑀞𑀫𑀼𑀧𑁆𑀧𑀦𑁆𑀦𑀸𑀬𑁂𑀯 𑀅𑀪𑀺𑀪𑀸𑀬𑀢𑀦𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀬𑀤𑀺 𑀏𑀯𑀁 𑀓𑀣𑀁 ‘‘𑀅𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀅𑀧𑁆𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡’’𑀦𑁆𑀢𑀺 (𑀥. 𑀲. 𑁨𑁧𑁨-𑁨𑁧𑁩) 𑀅𑀪𑀺𑀪𑀸𑀬𑀢𑀦𑀤𑁂𑀲𑀦𑀸𑀬𑀁 𑀯𑀼𑀢𑁆𑀢𑀁. 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀜𑁆𑀳𑀺 𑀛𑀸𑀦𑀁 𑀅𑀧𑁆𑀧𑀫𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘 𑀉𑀧𑁆𑀧𑀦𑁆𑀦𑀫𑀢𑁆𑀢𑀢𑁆𑀢𑀸 𑀧𑀭𑀺𑀢𑁆𑀢𑀫𑁂𑀯𑀸𑀢𑀺? 𑀦𑀸𑀬𑀁 𑀤𑁄𑀲𑁄. 𑀧𑀞𑀫𑀁 𑀅𑀪𑀺𑀪𑀸𑀬𑀢𑀦𑀯𑀲𑁂𑀦 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀁 𑀧𑀘𑁆𑀙𑀸 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀫𑁆𑀧𑀺 𑀅𑀪𑀺𑀪𑀸𑀬𑀢𑀦𑀦𑀸𑀫𑀫𑁂𑀯 𑀮𑀪𑀢𑀻𑀢𑀺 𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀫𑀪𑀺𑀪𑀸𑀬𑀢𑀦𑀁 𑀅𑀧𑁆𑀧𑀫𑀸𑀡𑀁, 𑀇𑀢𑀭𑀁 𑀧𑀭𑀺𑀢𑁆𑀢𑀁.