𑁨𑁪. 𑀘𑀢𑀼𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩𑁯𑁫. 𑀭𑀽𑀧𑀁 𑀭𑀽𑀧𑀲𑁆𑀲𑀸𑀢𑀺 𑀭𑀽𑀧𑀁 𑀭𑀽𑀧𑀲𑁆𑀲. 𑀅𑀭𑀽𑀧𑀲𑁆𑀲 𑀦𑀸𑀫𑀲𑁆𑀲.

𑁧𑁩𑁯𑁬. 𑀫𑀺𑀲𑁆𑀲𑀓𑀲𑁆𑀲𑀸𑀢𑀺 𑀦𑀸𑀫𑀭𑀽𑀧𑀫𑀺𑀲𑁆𑀲𑀓𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁧𑁩𑁯𑁭. 𑀢𑀺𑀧𑀜𑁆𑀘 𑀘𑀸𑀢𑀺 𑀧𑀦𑁆𑀦𑀭𑀲 𑀘.

𑁧𑁩𑁯𑁯. 𑀏𑀓𑁄𑀢𑀺 𑀓𑀫𑁆𑀫𑀧𑀘𑁆𑀘𑀬𑁄. 𑀤𑁆𑀯𑁂𑀓𑀸𑀮𑀺𑀓𑁄𑀢𑀺 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀯𑀲𑁂𑀦 𑀤𑁆𑀯𑀻𑀲𑀼 𑀓𑀸𑀮𑁂𑀲𑀼 𑀦𑀺𑀬𑀼𑀢𑁆𑀢𑁄. 𑀤𑀲𑁆𑀲𑀺𑀢𑁄𑀢𑀺 𑀪𑀕𑀯𑀢𑀸 𑀤𑁂𑀲𑀺𑀢𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀝𑀻𑀓𑀸𑀬

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁧𑁪𑁦𑁧. 𑀲𑀼𑀫𑀢𑀺𑀫𑀢𑀺𑀯𑀺𑀘𑀸𑀭𑀩𑁄𑀥𑀦𑁄𑀢𑀺 𑀲𑀼𑀫𑀢𑀻𑀦𑀁 𑀲𑀼𑀦𑁆𑀤𑀭𑀧𑀜𑁆𑀜𑀸𑀦𑀁 𑀓𑀯𑀻𑀦𑀁 𑀫𑀢𑀺𑀬𑀸 𑀯𑀺𑀘𑀸𑀭𑀲𑁆𑀲 𑀩𑁄𑀥𑀦𑁄. 𑀯𑀺𑀫𑀢𑀺𑀯𑀺𑀫𑁄𑀳𑀯𑀺𑀦𑀸𑀲𑀦𑁄𑀢𑀺 𑀯𑀺𑀫𑀢𑀻𑀦𑀁 𑀩𑀸𑀮𑀸𑀦𑀁 𑀯𑀺𑀫𑁄𑀳𑀲𑁆𑀲 𑀯𑀺𑀦𑀸𑀲𑀦𑁄. 𑀓𑀼𑀫𑀢𑀺𑀫𑀢𑀺𑀫𑀳𑀸𑀢𑀫𑁄𑀦𑀸𑀲𑁄𑀢𑀺 𑀓𑀼𑀫𑀢𑀻𑀦𑀁 𑀩𑀸𑀮𑀸𑀦𑀁 𑀫𑀳𑀸𑀢𑀫𑀲𑀦𑁆𑀦𑀺𑀪𑀸𑀬 𑀫𑀢𑀺𑀬𑀸 𑀦𑀸𑀲𑀓𑁄. 𑀧𑀝𑀼𑀫𑀢𑀺𑀪𑀸𑀲𑀓𑀭𑁄𑀢𑀺 𑀧𑀝𑀽𑀦𑀁 𑀧𑀡𑁆𑀟𑀺𑀢𑀸𑀦𑀁 𑀢𑀺𑀓𑁆𑀔𑀧𑀜𑁆𑀜𑀸𑀬 𑀑𑀪𑀸𑀲𑀓𑀭𑁄.

𑁧𑁪𑁦𑁨. 𑀲𑀼𑀫𑀢𑀺𑀦𑀸𑀫𑀓𑁄 𑀪𑀺𑀓𑁆𑀔𑀼 𑀅𑀲𑀫𑀸𑀦𑀢𑁄 𑀅𑀲𑀤𑀺𑀲𑀸𑀬 𑀧𑀽𑀚𑀸𑀬 𑀫𑀫 𑀆𑀬𑀸𑀘𑀺𑀢𑁄 𑀬𑀢𑁄 𑀬𑀲𑁆𑀫𑀸 𑀓𑀸𑀭𑀡𑀸, 𑀢𑀢𑁄 𑀢𑀲𑁆𑀫𑀸 𑀓𑀸𑀭𑀡𑀸 𑀅𑀬𑀁 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄. 𑀧𑀤𑀸𑀢𑁄 𑀧𑀤𑀸𑀢𑀺 𑀓𑁄𑀝𑁆𑀞𑀸𑀲𑀢𑁄 𑀓𑁄𑀝𑁆𑀞𑀸𑀲𑀢𑁄. 𑀳𑀺𑀢𑀯𑀺𑀪𑀸𑀯𑀦𑀸 𑀪𑀸𑀯𑀦𑀸𑀢𑀺 𑀳𑀺𑀢𑀧𑁆𑀧𑀓𑀸𑀲𑀦𑀸𑀬 𑀪𑀸𑀯𑀦𑀸𑀬 𑀫𑀬𑀸 𑀭𑀘𑀺𑀢𑁄. 𑀅𑀣 𑀯𑀸 𑀅𑀳𑀁 𑀲𑀼𑀫𑀢𑀺𑀦𑀸 𑀪𑀺𑀓𑁆𑀔𑀼𑀦𑀸 𑀅𑀲𑀫𑀸𑀦𑀢𑁄 𑀫𑀸𑀦𑀢𑁄 𑀆𑀬𑀸𑀘𑀺𑀢𑁄 𑀬𑀢𑁄 𑀬𑀲𑁆𑀫𑀸, 𑀢𑀢𑁄 𑀢𑀲𑁆𑀫𑀸.

𑁧𑁪𑁦𑁫. 𑀢𑀺𑀯𑀺𑀥𑀸 𑀩𑁆𑀬𑀧𑁆𑀧𑀣𑀸𑀦𑀜𑁆𑀳𑀺 𑀕𑀢𑀺𑀬𑁄𑀢𑀺 𑀩𑁆𑀬𑀧𑁆𑀧𑀣𑀸𑀦𑀁 𑀯𑀘𑀦𑀸𑀦𑀁 𑀅𑀢𑁆𑀣𑀕𑀦𑁆𑀣𑀬𑀼𑀢𑁆𑀢𑀺𑀯𑀲𑁂𑀦 𑀢𑀺𑀯𑀺𑀥𑀸 𑀕𑀢𑀺𑀬𑁄.

𑁧𑁪𑁦𑁬. 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀻𑀢𑀺 𑀅𑀜𑁆𑀜𑀲𑁆𑀫𑀺𑀁 𑀦𑀺𑀓𑀸𑀬𑁂 𑀮𑀤𑁆𑀥𑀻𑀳𑀺. 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢𑁄𑀢𑀺 𑀯𑀘𑀦𑀧𑁆𑀧𑀩𑀦𑁆𑀥𑀦𑀺𑀲𑁆𑀲𑀺𑀢𑁄.

𑁧𑁪𑁧𑁦. 𑀅𑀲𑀁𑀓𑀺𑀡𑁆𑀡𑀓𑀼𑀮𑀸𑀓𑀼𑀮𑁂𑀢𑀺 𑀅𑀲𑀫𑁆𑀫𑀺𑀲𑁆𑀲𑀓𑀼𑀮𑁂𑀳𑀺 𑀆𑀓𑀺𑀡𑁆𑀡𑁂. 𑀲𑀼𑀧𑀲𑀦𑁆𑀦𑀲𑀺𑀢𑁄𑀤𑀓𑁂𑀢𑀺 𑀫𑀥𑀼𑀭𑀲𑀻𑀢𑁄𑀤𑀓𑁂.

𑁧𑁪𑁧𑁧. 𑀲𑀗𑁆𑀓𑀝𑁂𑀢𑀺 𑀲𑀫𑁆𑀩𑀸𑀥𑁂.

𑁧𑁪𑁧𑁨. 𑀓𑁂𑀮𑀸𑀲𑀲𑀺𑀔𑀭𑀸𑀓𑀸𑀭𑀧𑀸𑀲𑀸𑀤𑀧𑀝𑀺𑀫𑀡𑁆𑀟𑀺𑀢𑁂𑀢𑀺 𑀭𑀚𑀢𑀧𑀩𑁆𑀩𑀢𑀫𑀢𑁆𑀣𑀓𑀦𑀺𑀪𑁂𑀳𑀺 𑀧𑀸𑀲𑀸𑀤𑁂𑀳𑀺 𑀅𑀮𑀗𑁆𑀓𑀢𑁂.

𑁧𑁪𑁧𑁩. 𑀯𑀺𑀯𑀺𑀥𑀸𑀓𑀸𑀭𑀘𑀸𑀭𑀼𑀧𑀸𑀓𑀸𑀭𑀕𑁄𑀧𑀼𑀭𑁂𑀢𑀺 𑀯𑀺𑀯𑀺𑀥𑀲𑀡𑁆𑀞𑀸𑀦𑀫𑀦𑀼𑀜𑁆𑀜𑀧𑀸𑀓𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑁂.

𑁧𑁪𑁧𑁪. 𑀲𑀮𑁆𑀮𑁂𑀔𑀸𑀢𑀺 𑀲𑀮𑁆𑀮𑁂𑀔𑀯𑀼𑀢𑁆𑀢𑀺. 𑀲𑀸𑀔𑀮𑁆𑀬𑁂𑀢𑀺 𑀲𑀔𑀺𑀮𑀪𑀸𑀯𑁂. 𑀲𑀢𑀸𑀢𑀺 𑀲𑀢𑀺𑀲𑀫𑁆𑀧𑀦𑁆𑀦𑁂𑀦.

𑁧𑁪𑁧𑁫. 𑀯𑀲𑁆𑀲𑀯𑀮𑀸𑀳𑀓𑀸 𑀤𑁂𑀯𑀸𑀢𑀺 𑀯𑀲𑁆𑀲𑀯𑀮𑀸𑀳𑀓𑀪𑀽𑀢𑀸 𑀤𑁂𑀯𑀸 𑀅𑀫𑀭𑀸.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀧𑀼𑀭𑀸𑀡𑀝𑀻𑀓𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀸𑀯𑀢𑀸𑀭-𑀅𑀪𑀺𑀦𑀯𑀝𑀻𑀓𑀸

(𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

(𑀓) 𑀯𑀺𑀲𑀼𑀤𑁆𑀥𑀓𑀭𑀼𑀡𑀸𑀜𑀸𑀡𑀁, 𑀩𑀼𑀤𑁆𑀥𑀁 𑀲𑀫𑁆𑀩𑀼𑀤𑁆𑀥𑀧𑀽𑀚𑀺𑀢𑀁;

𑀥𑀫𑁆𑀫𑀁 𑀲𑀤𑁆𑀥𑀫𑁆𑀫𑀲𑀫𑁆𑀪𑀽𑀢𑀁, 𑀯𑀦𑁆𑀤𑁂 𑀲𑀁𑀖𑀁 𑀦𑀺𑀭𑀗𑁆𑀕𑀡𑀁.

(𑀔) 𑀲𑀸𑀭𑀺𑀧𑀼𑀢𑁆𑀢𑀁 𑀫𑀳𑀸𑀣𑁂𑀭𑀁, 𑀧𑀭𑀺𑀬𑀢𑁆𑀢𑀺𑀯𑀺𑀲𑀸𑀭𑀤𑀁;

𑀦𑀫𑀸𑀫𑀺 𑀲𑀦𑁆𑀢𑀯𑀼𑀢𑁆𑀢𑀺𑀁 𑀫𑁂, 𑀕𑀼𑀭𑀼𑀁 𑀕𑀸𑀭𑀯𑀪𑀸𑀚𑀦𑀁.

(𑀕) 𑀯𑀦𑁆𑀤𑀦𑁆𑀢𑁂𑀦 𑀫𑀬𑀸 𑀏𑀯𑀁,

𑀬𑀸 𑀮𑀤𑁆𑀥𑀸 𑀧𑀼𑀜𑁆𑀜𑀲𑀫𑁆𑀧𑀤𑀸;

𑀳𑀺𑀢𑁆𑀯𑀸 𑀢𑀲𑁆𑀲𑀸𑀦𑀼𑀪𑀸𑀯𑁂𑀦,

𑀅𑀦𑁆𑀢𑀭𑀸𑀬𑁂 𑀅𑀲𑁂𑀲𑀢𑁄.

(𑀖) 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀣𑁂𑀭𑀸𑀦𑀁 𑀣𑀺𑀭𑀲𑀻𑀮𑀺𑀦𑀁;

𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦, 𑀪𑀽𑀢𑀸𑀦𑀼𑀕𑁆𑀕𑀳𑀓𑀸𑀭𑀺𑀦𑀸.

(𑀗) 𑀣𑁂𑀭𑁂𑀦 𑀩𑀼𑀤𑁆𑀥𑀤𑀢𑁆𑀢𑁂𑀦, 𑀭𑀘𑀺𑀢𑀁 𑀬𑀁 𑀫𑀦𑁄𑀭𑀫𑀁;

𑀧𑀺𑀝𑀓𑁂 𑀅𑀪𑀺𑀥𑀫𑁆𑀫𑀲𑁆𑀫𑀺𑀁, 𑀑𑀢𑀸𑀭𑀼𑀧𑀸𑀬𑀪𑀸𑀯𑀢𑁄.

(𑀘) 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄𑀢𑀺, 𑀮𑀤𑁆𑀥𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑀁;

𑀦𑀸𑀦𑀸𑀦𑀺𑀧𑀼𑀡𑀕𑀫𑁆𑀪𑀻𑀭𑀦𑀬𑀁 𑀧𑀓𑀭𑀡𑀼𑀢𑁆𑀢𑀫𑀁.

(𑀙) 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀢𑀲𑁆𑀲, 𑀆𑀭𑀪𑀺𑀲𑁆𑀲𑀁 𑀬𑀣𑀸𑀩𑀮𑀁;

𑀧𑀸𑀫𑁄𑀚𑁆𑀚𑀚𑀦𑀦𑀢𑁆𑀣𑀸𑀬, 𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀼𑀦𑀦𑁆𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑁧. 𑀧𑀭𑀫𑀦𑀺𑀧𑀼𑀡𑀯𑀺𑀘𑀺𑀢𑁆𑀢𑀦𑀬𑀲𑀫𑀦𑁆𑀦𑀸𑀕𑀢𑀁 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀯𑀺𑀕𑁆𑀕𑀸𑀳𑀡𑀲𑀫𑀢𑁆𑀣𑀁 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀁 𑀧𑀓𑀭𑀡𑀫𑀺𑀤𑀫𑀸𑀭𑀪𑀦𑁆𑀢𑁄𑀬𑀫𑀸𑀘𑀭𑀺𑀬𑁄 𑀧𑀞𑀫𑀁 𑀢𑀸𑀯 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀓𑀭𑀡𑁂𑀦 𑀅𑀦𑁆𑀢𑀭𑀸𑀬𑀦𑀺𑀯𑀸𑀭𑀡𑀜𑁆𑀘𑁂𑀯 𑀧𑀜𑁆𑀜𑀸𑀧𑀸𑀝𑀯𑀜𑁆𑀘 𑀧𑀢𑁆𑀣𑁂𑀢𑀺. 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑁄 𑀳𑀺 𑀅𑀢𑁆𑀣𑀢𑁄 𑀧𑀡𑀸𑀫𑀓𑀺𑀭𑀺𑀬𑀸𑀪𑀺𑀦𑀺𑀧𑁆𑀨𑀸𑀤𑀺𑀓𑀸 𑀓𑀼𑀲𑀮𑀘𑁂𑀢𑀦𑀸. 𑀲𑀸 𑀘 𑀯𑀦𑁆𑀤𑀦𑁂𑀬𑁆𑀬𑀯𑀦𑁆𑀤𑀓𑀸𑀦𑀁 𑀔𑁂𑀢𑁆𑀢𑀚𑁆𑀛𑀸𑀲𑀬𑀲𑀫𑁆𑀧𑀤𑀸𑀳𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀪𑀽𑀢𑀸 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀦𑀯𑀲𑁂𑀦 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀧𑀸𑀓𑀲𑀦𑁆𑀢𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑀸𑀦𑀺 𑀉𑀧𑀧𑀻𑀴𑀓𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀸𑀦𑀺 𑀧𑀝𑀺𑀩𑀸𑀳𑀺𑀢𑁆𑀯𑀸 𑀢𑀦𑁆𑀦𑀺𑀤𑀸𑀦𑀸𑀦𑀁 𑀬𑀣𑀸𑀥𑀺𑀧𑁆𑀧𑁂𑀢𑀲𑀺𑀤𑁆𑀥𑀺𑀯𑀺𑀩𑀦𑁆𑀥𑀓𑀸𑀦𑀁 𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑀸𑀦𑀫𑀧𑁆𑀧𑀯𑀢𑁆𑀢𑀺𑀁 𑀲𑀸𑀥𑁂𑀢𑀺, 𑀭𑀸𑀕𑀸𑀤𑀺𑀫𑀮𑀯𑀺𑀓𑁆𑀔𑀸𑀮𑀦𑁂𑀦 𑀘 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀧𑀭𑀺𑀲𑁄𑀥𑁂𑀢𑁆𑀯𑀸 𑀢𑀦𑁆𑀦𑀺𑀲𑁆𑀲𑀺𑀢𑀸𑀬 𑀧𑀜𑁆𑀜𑀸𑀬 𑀬𑀣𑀸𑀥𑀺𑀧𑁆𑀧𑁂𑀢𑀲𑀺𑀤𑁆𑀥𑀺𑀲𑀫𑁆𑀧𑀸𑀤𑀓𑀁 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀫𑀸𑀯𑀳𑀢𑀺. 𑀓𑀺𑀜𑁆𑀘𑀺 𑀆𑀘𑀺𑀡𑁆𑀡𑀫𑁂𑀢𑀁 𑀧𑀡𑁆𑀟𑀺𑀢𑀸𑀦𑀁, 𑀬𑀤𑀺𑀤𑀁 𑀕𑀦𑁆𑀣𑀲𑀫𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀓𑀭𑀡𑀁, 𑀢𑀲𑁆𑀫𑀸 𑀲𑀧𑁆𑀧𑀼𑀭𑀺𑀲𑀸𑀘𑀸𑀭𑀸𑀦𑀼𑀭𑀓𑁆𑀔𑀡𑀢𑁆𑀣𑀜𑁆𑀘 𑀆𑀤𑀺𑀫𑁆𑀳𑀺 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸 𑀆𑀭𑀤𑁆𑀥𑀸𑀢𑀺 𑀏𑀯𑀫𑀸𑀤𑀺𑀦𑀸 𑀅𑀜𑁆𑀜𑀸𑀦𑀺𑀧𑀺 𑀩𑀳𑀽𑀦𑀺 𑀧𑀬𑁄𑀚𑀦𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀧𑀦 𑀢𑀢𑁆𑀣 𑀢𑀢𑁆𑀣 𑀩𑀳𑀼𑀥𑀸 𑀯𑀺𑀢𑁆𑀣𑀸𑀭𑀺𑀢𑀸𑀦𑀻𑀢𑀺 𑀢𑀁 𑀧𑀧𑀜𑁆𑀘𑀧𑀭𑀺𑀲𑁆𑀲𑀫𑀁 𑀞𑀧𑁂𑀢𑁆𑀯𑀸 𑀬𑀣𑀸𑀦𑀼𑀧𑁆𑀧𑀢𑁆𑀢𑀫𑁂𑀯 𑀢𑀸𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀏𑀢𑁆𑀣 𑀘 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀁 𑀓𑀢𑁆𑀢𑀼𑀓𑀸𑀫𑁄 𑀢𑀣𑀸𑀕𑀢𑀫𑀽𑀮𑀓𑀢𑁆𑀢𑀸 𑀲𑁂𑀲𑀭𑀢𑀦𑀸𑀦𑀁 𑀧𑀞𑀫𑀁 𑀢𑀸𑀯 𑀢𑀣𑀸𑀕𑀢𑀲𑁆𑀲 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀡𑀸𑀫𑀫𑀸𑀭𑀪𑀦𑁆𑀢𑁄 𑀆𑀳 ‘‘𑀅𑀦𑀦𑁆𑀢𑀓𑀭𑀼𑀡𑀸𑀧𑀜𑁆𑀜’’𑀦𑁆𑀢𑀺𑀆𑀤𑀺. 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑁂𑀦 𑀳𑀺 𑀧𑀡𑀸𑀫𑁂𑀦 𑀲𑀢𑁆𑀣𑀼 𑀕𑀼𑀡𑀸𑀢𑀺𑀲𑀬𑀬𑁄𑀕𑁄, 𑀢𑀢𑁄 𑀘𑀲𑁆𑀲 𑀅𑀦𑀼𑀢𑁆𑀢𑀭𑀯𑀦𑁆𑀤𑀦𑀻𑀬𑀪𑀸𑀯𑁄, 𑀢𑁂𑀦 𑀘 𑀅𑀢𑁆𑀢𑀦𑁄 𑀯𑀦𑁆𑀤𑀦𑀸𑀬 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑁄, 𑀔𑁂𑀢𑁆𑀢𑀗𑁆𑀕𑀢𑀸𑀬 𑀘 𑀯𑀦𑁆𑀤𑀦𑀸𑀬 𑀬𑀣𑀸𑀥𑀺𑀧𑁆𑀧𑁂𑀢𑀦𑀺𑀧𑁆𑀨𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁄 𑀘 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀢𑀢𑁆𑀣 𑀯𑀦𑁆𑀤𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀢𑀲𑁆𑀲 𑀧𑀦 𑀑𑀲𑀸𑀦𑀕𑀸𑀣𑀸𑀬𑀁 ‘‘𑀧𑀯𑀓𑁆𑀔𑀸𑀫𑀻’’𑀢𑀺 𑀇𑀫𑀺𑀦𑀸 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄. 𑀩𑀼𑀤𑁆𑀥𑀦𑁆𑀢𑀺 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. ‘‘𑀅𑀦𑀦𑁆𑀢𑀓𑀭𑀼𑀡𑀸𑀧𑀜𑁆𑀜’’𑀦𑁆𑀢𑀺𑀆𑀤𑀺𑀓𑀁 𑀧𑀦 𑀢𑀩𑁆𑀩𑀺𑀲𑁂𑀲𑀦𑀁. 𑀢𑀢𑁆𑀣 𑀓𑀺𑀭𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀭𑀻𑀬𑀢𑀺 𑀤𑀼𑀓𑁆𑀔𑀺𑀢𑁂𑀲𑀼 𑀧𑀲𑀸𑀭𑀻𑀬𑀢𑀻𑀢𑀺 𑀯𑀸 𑀓𑀭𑀼𑀡𑀸. 𑀅𑀣 𑀯𑀸 𑀓𑀭𑁄𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀓𑀫𑁆𑀧𑀦𑀁 𑀳𑀤𑀬𑀔𑁂𑀤𑀁 𑀚𑀦𑀬𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀡𑀸𑀢𑀻𑀢𑀺 𑀯𑀸 𑀓𑀭𑀼𑀡𑀸, 𑀧𑀭𑀲𑁆𑀲 𑀤𑀼𑀓𑁆𑀔𑀁 𑀧𑀘𑁆𑀘𑀬𑀯𑁂𑀓𑀮𑁆𑀮𑀓𑀭𑀡𑀢𑁄 𑀳𑀺𑀁𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸 𑀘 𑀧𑀜𑁆𑀜𑀸 𑀘 𑀓𑀭𑀼𑀡𑀸𑀧𑀜𑁆𑀜𑀸, 𑀦𑀢𑁆𑀣𑀺 𑀏𑀢𑀸𑀲𑀁 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀸, 𑀅𑀦𑀦𑁆𑀢𑀸 𑀓𑀭𑀼𑀡𑀸𑀧𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀅𑀦𑀦𑁆𑀢𑀓𑀭𑀼𑀡𑀸𑀧𑀜𑁆𑀜𑁄, 𑀢𑀁 𑀅𑀦𑀦𑁆𑀢𑀓𑀭𑀼𑀡𑀸𑀧𑀜𑁆𑀜𑀁.

𑀏𑀢𑁆𑀣 𑀘 𑀉𑀧𑁆𑀧𑀸𑀤𑀯𑀬𑀦𑁆𑀢𑀢𑀸𑀯𑀲𑁂𑀦 𑀘𑁂𑀯 𑀲𑀦𑁆𑀢𑀢𑀺𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀘 𑀲𑀢𑀺𑀧𑀺 𑀪𑀕𑀯𑀢𑁄 𑀓𑀭𑀼𑀡𑀸𑀧𑀜𑁆𑀜𑀸𑀦𑀁 𑀲𑀧𑀭𑀺𑀬𑀦𑁆𑀢𑀪𑀸𑀯𑁂 𑀅𑀦𑀦𑁆𑀢𑀸𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀦𑀢𑁄 𑀅𑀦𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀳𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀫𑀳𑀸𑀓𑀭𑀼𑀡𑀸 𑀓𑀜𑁆𑀘𑀺 𑀲𑀢𑁆𑀢𑀁 𑀅𑀯𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑁂𑀲𑀼 𑀲𑀢𑁆𑀢𑁂𑀲𑀼 𑀦𑀺𑀭𑀯𑀲𑁂𑀲𑁂𑀦 𑀧𑀯𑀢𑁆𑀢𑀢𑀺, 𑀢𑀣𑀸 𑀲𑀩𑁆𑀩𑀥𑀫𑁆𑀫𑀲𑀪𑀸𑀯𑀩𑁄𑀥𑀦𑀲𑀫𑀢𑁆𑀣𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀸 𑀧𑀜𑁆𑀜𑀸𑀧𑀺 𑀲𑀓𑀮𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀅𑀦𑀯𑀲𑁂𑀲𑀢𑁄 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀦𑀦𑁆𑀢𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀓𑀭𑀼𑀡𑀸𑀜𑀸𑀡𑀯𑀦𑁆𑀢𑀢𑀸𑀬 𑀅𑀦𑀦𑁆𑀢𑀓𑀭𑀼𑀡𑀸𑀧𑀜𑁆𑀜𑁄 𑀪𑀕𑀯𑀸. 𑀓𑀭𑀼𑀡𑀸𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀪𑀕𑀯𑀢𑁄 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀢𑀣𑀸 𑀳𑀺 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀮𑁄𑀓𑀺𑀬𑁂𑀲𑀼 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀲𑀸𑀥𑀸𑀭𑀡𑀕𑀼𑀡𑀤𑀻𑀧𑀦𑀢𑁄 𑀲𑀓𑀮𑀮𑁄𑀓𑀺𑀬𑀕𑀼𑀡𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀫𑀕𑁆𑀕𑀜𑀸𑀡𑀤𑀻𑀧𑀦𑀢𑁄 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸𑀢𑀺.

𑀅𑀧𑀺𑀘 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀓𑀭𑀼𑀡𑀸 𑀆𑀤𑀺, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀁. 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀳𑀺 𑀪𑀕𑀯𑀸 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀢𑁆𑀢𑀸𑀦𑀁 𑀲𑀫𑀼𑀤𑁆𑀥𑀭𑀡𑀢𑁆𑀣𑀸𑀬 𑀓𑀢𑀸𑀪𑀺𑀦𑀻𑀳𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀅𑀥𑀺𑀕𑀫𑁂𑀦 𑀲𑀓𑀮𑀩𑀼𑀤𑁆𑀥𑀕𑀼𑀡𑁂 𑀧𑀝𑀺𑀮𑀪𑀺. 𑀇𑀢𑀺 𑀲𑀓𑀮𑀩𑀼𑀤𑁆𑀥𑀕𑀼𑀡𑀸𑀦𑀁 𑀢𑀦𑁆𑀦𑀺𑀤𑀸𑀦𑀪𑀸𑀯𑀢𑁄 𑀓𑀭𑀼𑀡𑀸 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀫𑀸𑀤𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀲𑁆𑀲 𑀧𑀦 𑀫𑀕𑁆𑀕𑀜𑀸𑀡𑀲𑁆𑀲 𑀧𑀝𑀺𑀮𑀪𑀦𑀢𑁄 𑀉𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀁. 𑀆𑀤𑀺𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑁂𑀦 𑀘 𑀲𑀓𑀮𑀩𑀼𑀤𑁆𑀥𑀕𑀼𑀡𑀸 𑀦𑀬𑀢𑁄 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀦𑀬𑀕𑁆𑀕𑀸𑀳𑁄 𑀏𑀯 𑀳𑀺 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀤𑀲𑁆𑀲𑀦𑀼𑀧𑀸𑀬𑁄, 𑀇𑀢𑀭𑀣𑀸 𑀢𑀸𑀤𑀺𑀲𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲𑀧𑀺 𑀯𑀘𑀦𑀧𑀣𑀸𑀢𑀻𑀢𑀁 𑀢𑀣𑀸𑀕𑀢𑀕𑀼𑀡𑀁 𑀅𑀦𑀼𑀧𑀤𑀁 𑀯𑀡𑁆𑀡𑁂𑀦𑁆𑀢𑁄 𑀓𑁄 𑀦𑀸𑀫 𑀧𑀭𑀺𑀬𑁄𑀲𑀸𑀦𑀫𑀸𑀳𑀭𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺.

𑀏𑀯𑀁 𑀓𑀭𑀼𑀡𑀸𑀧𑀜𑁆𑀜𑀸𑀫𑀼𑀔𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀩𑀼𑀤𑁆𑀥𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑁆𑀯𑀸𑀧𑀺 𑀧𑀼𑀦 𑀅𑀢𑁆𑀢𑀦𑁄 𑀩𑀼𑀤𑁆𑀥𑀕𑀼𑀡𑀲𑀁𑀓𑀺𑀢𑁆𑀢𑀦𑁂 𑀅𑀢𑀺𑀢𑁆𑀢𑀸𑀪𑀸𑀯𑁂𑀦 𑀘𑁂𑀯 𑀧𑀭𑁂𑀲𑀜𑁆𑀘 𑀧𑀲𑀸𑀤𑀩𑀸𑀳𑀼𑀮𑁆𑀮𑀚𑀦𑀦𑀢𑁆𑀣𑀁 𑀢𑀤𑀦𑁆𑀢𑁄𑀕𑀥𑁂𑀧𑀺 𑀯𑀺𑀲𑀺𑀝𑁆𑀞𑀕𑀼𑀡𑁂 𑀧𑀥𑀸𑀦𑀪𑀸𑀯𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀣𑀸𑀕𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀢𑀣𑀸𑀕𑀢’’𑀦𑁆𑀢𑀺 𑀢𑀣𑀸 𑀆𑀕𑀢𑀢𑀸𑀤𑀻𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀢𑀣𑀸𑀕𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁧𑁨; 𑀩𑀼. 𑀯𑀁. 𑀅𑀝𑁆𑀞. 𑁧.𑁨 𑀦𑀺𑀤𑀸𑀦𑀓𑀣𑀸; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦) 𑁋

‘‘𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄, 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄, 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄’’𑀢𑀺.

‘‘𑀓𑀣𑀁 𑀪𑀕𑀯𑀸 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀣𑀸 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑀸 𑀧𑀼𑀭𑀺𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀆𑀕𑀢𑀸, 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀫𑀦𑀼𑀲𑁆𑀲𑀢𑁆𑀢𑀸𑀤𑀺𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦 𑀢𑁂 𑀪𑀕𑀯𑀦𑁆𑀢𑁄 𑀆𑀕𑀢𑀸, 𑀢𑁂𑀦𑁂𑀯 𑀘 𑀅𑀪𑀺𑀦𑀻𑀳𑀸𑀭𑁂𑀦 𑀅𑀬𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄, 𑀬𑀣𑀸 𑀘 𑀢𑁂 𑀪𑀕𑀯𑀦𑁆𑀢𑁄 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀆𑀕𑀢𑀸, 𑀬𑀣𑀸 𑀘 𑀢𑁂 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀽𑀳𑁂𑀢𑁆𑀯𑀸 𑀆𑀕𑀢𑀸, 𑀢𑀣𑀸 𑀅𑀬𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄𑀢𑀺 𑀏𑀯𑀁 𑀢𑀸𑀯 𑀢𑀣𑀸 𑀆𑀕𑀢𑁄’’𑀢𑀺 𑀢𑀣𑀸𑀕𑀢𑁄. (𑁧)

‘‘𑀓𑀣𑀁 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀣𑀸 𑀲𑀫𑁆𑀧𑀢𑀺𑀚𑀸𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀢𑀸, 𑀬𑀣𑀸 𑀯𑀸 𑀢𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀳𑀺 𑀢𑀁 𑀢𑀁 𑀅𑀓𑀼𑀲𑀮𑀧𑀓𑁆𑀔𑀁 𑀯𑀺𑀥𑀫𑀺𑀢𑁆𑀯𑀸 𑀕𑀢𑀸, 𑀢𑀣𑀸 𑀅𑀬𑀫𑁆𑀧𑀺 𑀪𑀕𑀯𑀸 𑀕𑀢𑁄, 𑀏𑀯𑀁 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄. (𑁨)

‘‘𑀓𑀣𑀁 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀲𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀬𑀁 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀁 𑀢𑀣𑀁 𑀅𑀯𑀺𑀢𑀣𑀁, 𑀢𑀜𑁆𑀘𑁂𑀲 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄 𑀬𑀸𑀣𑀸𑀯𑀢𑁄 𑀅𑀥𑀺𑀕𑀢𑁄, 𑀢𑀲𑁆𑀫𑀸 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄 𑀕𑀫𑀦𑀢𑁆𑀣𑀸𑀦𑀁 𑀩𑀼𑀚𑁆𑀛𑀦𑀢𑁆𑀣𑀲𑀫𑁆𑀪𑀯𑀢𑁄. 𑀢𑀣𑀸 𑀳𑀺 𑀯𑀤𑀦𑁆𑀢𑀺 ‘𑀬𑁂 𑀕𑀢𑀺𑀅𑀢𑁆𑀣𑀸, 𑀢𑁂 𑀩𑀼𑀚𑁆𑀛𑀦𑀢𑁆𑀣𑀸. 𑀬𑁂 𑀩𑀼𑀚𑁆𑀛𑀦𑀢𑁆𑀣𑀸, 𑀢𑁂 𑀕𑀢𑀺𑀅𑀢𑁆𑀣𑀸’𑀢𑀺. (𑁩)

‘‘𑀓𑀣𑀁 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄? 𑀬𑀲𑁆𑀫𑀸 ‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀲𑀁. 𑀦𑀺. 𑁫.𑁧𑁦𑁯𑁦) ‘𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀢𑀣𑁄 𑀅𑀯𑀺𑀢𑀣𑁄 𑀅𑀦𑀜𑁆𑀜𑀣𑁄’𑀢𑀺𑀆𑀤𑀺𑀯𑀘𑀦𑀢𑁄 𑀘 𑀢𑀣𑀥𑀫𑁆𑀫𑀲𑀗𑁆𑀔𑀸𑀢𑁂 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀬𑀸𑀣𑀸𑀯𑀢𑁄 𑀆𑀕𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄. (𑁪)

‘‘𑀓𑀣𑀁 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄? 𑀬𑀲𑁆𑀫𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀙𑀤𑁆𑀯𑀸𑀭𑀕𑁆𑀕𑀳𑀺𑀢𑁂 𑀆𑀭𑀫𑁆𑀫𑀡𑁂 𑀅𑀯𑀺𑀧𑀭𑀻𑀢𑀫𑁂𑀯 𑀧𑀲𑁆𑀲𑀢𑀺 𑀚𑀸𑀦𑀸𑀢𑀺, 𑀜𑀢𑁆𑀯𑀸 𑀘 𑀧𑀦𑁂𑀯𑀁 ‘𑀓𑀢𑀫𑀁 𑀢𑀁 𑀭𑀽𑀧𑀸𑀬𑀢𑀦𑀁, 𑀬𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸’𑀢𑀺𑀆𑀤𑀺𑀦𑀸 (𑀥. 𑀲. 𑁬𑁧𑁬 𑀆𑀤𑀬𑁄) 𑀢𑀣𑀫𑁂𑀲 𑀅𑀯𑀺𑀧𑀭𑀻𑀢𑀁 𑀯𑀺𑀪𑀚𑀢𑀺 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀢𑀣𑀁 𑀆𑀕𑀘𑁆𑀙𑀢𑀺 𑀧𑀲𑁆𑀲𑀢𑀺 𑀚𑀸𑀦𑀸𑀢𑀺, 𑀢𑀁 𑀯𑀸 𑀆𑀕𑀫𑀬𑀢𑀺 𑀤𑀲𑁆𑀲𑁂𑀢𑀻𑀢𑀺 𑀢𑀣𑀸𑀕𑀢𑁄𑀢𑀺 𑀏𑀯𑀁 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄. (𑁫)

‘‘𑀓𑀣𑀁 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄? 𑀬𑀲𑁆𑀫𑀸 𑀏𑀲 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀭𑀸𑀕𑀫𑀤𑀸𑀤𑀺𑀦𑀺𑀫𑁆𑀫𑀣𑀦𑀯𑀲𑁂𑀦 𑀏𑀓𑀲𑀤𑀺𑀲𑀫𑁂𑀯 𑀥𑀫𑁆𑀫𑀁 𑀢𑀣𑀁 𑀅𑀯𑀺𑀢𑀣𑀁 𑀪𑀸𑀲𑀢𑀺, 𑀢𑀲𑁆𑀫𑀸 𑀢𑀣𑀁 𑀕𑀤𑀢𑀺, 𑀢𑀣𑁄 𑀅𑀯𑀺𑀧𑀭𑀻𑀢𑁄 𑀆𑀕𑀤𑁄𑀯𑀘𑀦𑀫𑁂𑀢𑀲𑁆𑀲𑀸𑀢𑀺 𑀯𑀸 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄𑀢𑀺 𑀯𑀼𑀢𑁆𑀢𑁄𑀢𑀺 𑀏𑀯𑀁 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄. (𑁬)

‘‘𑀓𑀣𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄? 𑀪𑀕𑀯𑀸 𑀳𑀺 ‘𑀬𑀣𑀸 𑀯𑀸𑀤𑀻 𑀢𑀣𑀸 𑀓𑀸𑀭𑀻’𑀢𑀺 (𑀅. 𑀦𑀺. 𑁪.𑁨𑁩; 𑀘𑀽𑀴𑀦𑀺. 𑀧𑁄𑀲𑀸𑀮𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁩) 𑀯𑀘𑀦𑀢𑁄 𑀅𑀢𑁆𑀢𑀦𑁄 𑀯𑀸𑀘𑀸𑀬 𑀅𑀦𑀼𑀭𑀽𑀧𑀫𑁂𑀯 𑀓𑀭𑁄𑀢𑀺, 𑀢𑀲𑁆𑀫𑀸 𑀬𑀣𑀸 𑀯𑀸𑀘𑀸, 𑀢𑀣𑀸 𑀓𑀸𑀬𑁄𑀧𑀺 𑀕𑀢𑁄 𑀧𑀯𑀢𑁆𑀢𑁄 𑀇𑀫𑀲𑁆𑀲𑀸𑀢𑀺 𑀢𑀣𑀸𑀕𑀢𑁄𑀢𑀺 𑀏𑀯𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄. (𑁭)

‘‘𑀓𑀣𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄? 𑀬𑀲𑁆𑀫𑀸 𑀧𑀦𑁂𑀲 𑀅𑀦𑀼𑀧𑀫𑀸𑀬 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀤𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀭𑁂𑀯𑀁 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀕𑀤𑁄 𑀯𑀺𑀬𑀸𑀢𑀺 𑀅𑀕𑀤𑁄, 𑀤𑁂𑀲𑀦𑀸𑀯𑀺𑀮𑀸𑀲𑁄 𑀘𑁂𑀯 𑀧𑀼𑀜𑁆𑀜𑀼𑀲𑁆𑀲𑀬𑁄 𑀘. 𑀢𑁂𑀦 𑀳𑁂𑀲 𑀫𑀳𑀸𑀦𑀼𑀪𑀸𑀯𑁄 𑀪𑀺𑀲𑀓𑁆𑀓𑁄 𑀯𑀺𑀬 𑀤𑀺𑀩𑁆𑀩𑀸𑀕𑀤𑁂𑀦 𑀲𑀧𑁆𑀧𑁂 𑀲𑀩𑁆𑀩𑀧𑀭𑀧𑁆𑀧𑀯𑀸𑀤𑀺𑀦𑁄, 𑀲𑀤𑁂𑀯𑀓𑀜𑁆𑀘 𑀮𑁄𑀓𑀁 𑀅𑀪𑀺𑀪𑀯𑀢𑀺. 𑀇𑀢𑀺 𑀲𑀩𑁆𑀩𑀮𑁄𑀓𑀸𑀪𑀺𑀪𑀯𑀦𑁂 𑀢𑀣𑁄 𑀅𑀯𑀺𑀧𑀭𑀻𑀢𑁄 𑀬𑀣𑀸𑀯𑀼𑀢𑁆𑀢𑁄 𑀅𑀕𑀤𑁄 𑀏𑀢𑀲𑁆𑀲𑀸𑀢𑀺 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀤𑀻𑀖𑀸𑀕𑀫𑀲𑀁𑀯𑀡𑁆𑀡𑀦𑀸𑀤𑀻𑀲𑀼 𑀕𑀳𑁂𑀢𑀩𑁆𑀩𑁄. 𑀆𑀳 𑀘𑁂𑀢𑁆𑀣 𑁋

‘‘𑀬𑀣𑁂𑀯 𑀮𑁄𑀓𑀫𑁆𑀳𑀺 𑀯𑀺𑀧𑀲𑁆𑀲𑀺𑀆𑀤𑀬𑁄,

𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀫𑀼𑀦𑀬𑁄 𑀇𑀥𑀸𑀕𑀢𑀸;

𑀢𑀣𑀸 𑀅𑀬𑀁 𑀲𑀓𑁆𑀬𑀫𑀼𑀦𑀻𑀧𑀺 𑀆𑀕𑀢𑁄,

𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 𑀢𑁂𑀦 𑀘𑀓𑁆𑀔𑀼𑀫𑀸. (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁧𑁨; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦; 𑀩𑀼. 𑀯𑀁. 𑀅𑀝𑁆𑀞. 𑁧.𑁨 𑀦𑀺𑀤𑀸𑀦𑀓𑀣𑀸);

‘‘𑀧𑀳𑀸𑀬 𑀓𑀸𑀫𑀸𑀤𑀺𑀫𑀮𑁂 𑀬𑀣𑀸 𑀕𑀢𑀸,

𑀲𑀫𑀸𑀥𑀺𑀜𑀸𑀡𑁂𑀳𑀺 𑀯𑀺𑀧𑀲𑁆𑀲𑀺𑀆𑀤𑀬𑁄;

𑀫𑀳𑁂𑀲𑀺𑀦𑁄 𑀲𑀓𑁆𑀬𑀫𑀼𑀦𑀻 𑀚𑀼𑀢𑀺𑀦𑁆𑀥𑀭𑁄,

𑀢𑀣𑀸 𑀕𑀢𑁄 𑀢𑁂𑀦 𑀢𑀣𑀸𑀕𑀢𑁄 𑀫𑀢𑁄.

‘‘𑀢𑀣𑀜𑁆𑀘 𑀥𑀸𑀢𑁆𑀯𑀸𑀬𑀢𑀦𑀸𑀤𑀺𑀮𑀓𑁆𑀔𑀡𑀁,

𑀲𑀪𑀸𑀯𑀲𑀸𑀫𑀜𑁆𑀜𑀯𑀺𑀪𑀸𑀕𑀪𑁂𑀤𑀢𑁄;

𑀲𑀬𑀫𑁆𑀪𑀼𑀜𑀸𑀡𑁂𑀦 𑀚𑀺𑀦𑁄𑀬𑀫𑀸𑀕𑀢𑁄,

𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 𑀲𑀓𑁆𑀬𑀧𑀼𑀗𑁆𑀕𑀯𑁄.

‘‘𑀢𑀣𑀸𑀦𑀺 𑀲𑀘𑁆𑀘𑀸𑀦𑀺 𑀲𑀫𑀦𑁆𑀢𑀘𑀓𑁆𑀔𑀼𑀦𑀸,

𑀢𑀣𑀸 𑀇𑀤𑀧𑁆𑀧𑀘𑁆𑀘𑀬𑀢𑀸 𑀘 𑀲𑀩𑁆𑀩𑀲𑁄;

𑀅𑀦𑀜𑁆𑀜𑀜𑁂𑀬𑁆𑀬𑁂𑀦 𑀬𑀢𑁄 𑀯𑀺𑀪𑀸𑀯𑀺𑀢𑀸,

𑀬𑀸𑀣𑀸𑀯𑀢𑁄 𑀢𑁂𑀦 𑀚𑀺𑀦𑁄 𑀢𑀣𑀸𑀕𑀢𑁄.

‘‘𑀅𑀦𑀦𑁆𑀢𑀪𑁂𑀤𑀸𑀲𑀼𑀧𑀺 𑀮𑁄𑀓𑀥𑀸𑀢𑀼𑀲𑀼,

𑀚𑀺𑀦𑀲𑁆𑀲 𑀭𑀽𑀧𑀸𑀬𑀢𑀦𑀸𑀤𑀺𑀕𑁄𑀘𑀭𑁂;

𑀯𑀺𑀘𑀺𑀢𑁆𑀢𑀪𑁂𑀤𑁂 𑀢𑀣𑀫𑁂𑀯 𑀤𑀲𑁆𑀲𑀦𑀁,

𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀮𑁄𑀘𑀦𑁄.

‘‘𑀬𑀢𑁄 𑀘 𑀥𑀫𑁆𑀫𑀁 𑀢𑀣𑀫𑁂𑀯 𑀪𑀸𑀲𑀢𑀺,

𑀓𑀭𑁄𑀢𑀺 𑀯𑀸𑀘𑀸𑀬𑀦𑀼𑀮𑁄𑀫𑀫𑀢𑁆𑀢𑀦𑁄;

𑀕𑀼𑀡𑁂𑀳𑀺 𑀮𑁄𑀓𑀁 𑀅𑀪𑀺𑀪𑀼𑀬𑁆𑀬𑀺𑀭𑀻𑀬𑀢𑀺,

𑀢𑀣𑀸𑀕𑀢𑁄 𑀢𑁂𑀦𑀧𑀺 𑀮𑁄𑀓𑀦𑀸𑀬𑀓𑁄’’𑀢𑀺. (𑀇𑀢𑀺𑀯𑀼. 𑀅𑀝𑁆𑀞. 𑁩𑁮; 𑀤𑀻. 𑀦𑀺. 𑀝𑀻. 𑁧.𑁭);

𑀓𑁂𑀦𑀘𑀺 𑀕𑀼𑀡𑁂𑀦 𑀅𑀢𑁆𑀢𑀦𑁄 𑀯𑀺𑀲𑀺𑀝𑁆𑀞𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀢𑁆𑀢𑀭𑁄𑀢𑀺 𑀅𑀦𑀼𑀢𑁆𑀢𑀭𑁄. 𑀪𑀕𑀯𑀢𑁄 𑀳𑀺 𑀅𑀯𑀻𑀘𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀯𑀕𑁆𑀕𑀁 𑀢𑀺𑀭𑀺𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀦 𑀓𑁄𑀘𑀺 𑀓𑁂𑀦𑀘𑀺 𑀕𑀼𑀡𑁂𑀦 𑀲𑀫𑀲𑀫𑁄𑀧𑀺 𑀅𑀢𑁆𑀣𑀺, 𑀓𑀼𑀢𑁄 𑀧𑀦 𑀉𑀢𑁆𑀢𑀭𑀺𑀢𑀭𑁄. 𑀬𑀣𑀸𑀳 𑁋

‘‘𑀭𑀽𑀧𑁂 𑀲𑀻𑀮𑁂 𑀲𑀫𑀸𑀥𑀺𑀫𑁆𑀳𑀺, 𑀧𑀜𑁆𑀜𑀸𑀬 𑀘 𑀅𑀲𑀸𑀤𑀺𑀲𑁄;

𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀲𑀫𑁄, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂’’𑀢𑀺.

𑀯𑀺𑀦𑁆𑀤𑀺𑀢𑁆𑀯𑀸𑀢𑀺 𑀢𑀻𑀳𑀺 𑀯𑀦𑁆𑀤𑀦𑀸𑀳𑀺 𑀢𑀦𑁆𑀦𑀺𑀦𑁆𑀦𑀢𑀸𑀤𑀺𑀯𑀲𑁂𑀦 𑀦𑀫𑀲𑁆𑀲𑀺𑀢𑁆𑀯𑀸. 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑀯𑀲𑁂𑀦 𑀳𑀺 𑀢𑀺𑀲𑁆𑀲𑁄 𑀯𑀦𑁆𑀤𑀦𑀸. 𑀬𑀣𑀸𑀳 ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑀦𑁆𑀤𑀦𑀸 𑀓𑀸𑀬𑁂𑀦 𑀯𑀦𑁆𑀤𑀢𑀺, 𑀯𑀘𑀲𑀸 𑀯𑀦𑁆𑀤𑀢𑀺, 𑀫𑀦𑀲𑀸 𑀯𑀦𑁆𑀤𑀢𑀻’’𑀢𑀺. 𑀢𑀢𑁆𑀣 𑀩𑀼𑀤𑁆𑀥𑀸𑀤𑀺𑀕𑀼𑀡𑀸𑀭𑀫𑁆𑀫𑀡𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸𑀦𑀫𑀜𑁆𑀜𑀢𑀭𑀸 𑀘𑁂𑀢𑀦𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀓𑀸𑀬𑀯𑀦𑁆𑀤𑀦𑀸𑀢𑀺 𑀯𑀼𑀘𑁆𑀘𑀢𑀺, 𑀲𑀸𑀬𑁂𑀯 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀘𑀻𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀯𑀘𑀻𑀯𑀦𑁆𑀤𑀦𑀸𑀢𑀺, 𑀉𑀪𑀬𑀯𑀺𑀜𑁆𑀜𑀢𑁆𑀢𑀺𑀬𑁄 𑀧𑀦 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑁂𑀯𑀮𑀁 𑀫𑀦𑁄𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀫𑀦𑁄𑀯𑀦𑁆𑀤𑀦𑀸𑀢𑀺. 𑀲𑀺𑀭𑀲𑀸𑀢𑀺 𑀉𑀢𑁆𑀢𑀫𑀗𑁆𑀕𑁂𑀦 𑀓𑀭𑀡𑀪𑀽𑀢𑁂𑀦. 𑀅𑀩𑀼𑀚𑁆𑀛𑀺, 𑀩𑁄𑀥𑁂𑀢𑀻𑀢𑀺 𑀯𑀸 𑀩𑀼𑀤𑁆𑀥𑁄. 𑀅𑀬𑀜𑁆𑀳𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀲𑀬𑀫𑁆𑀧𑀺 𑀅𑀩𑀼𑀚𑁆𑀛𑀺, 𑀧𑀭𑁂𑀧𑀺 𑀩𑁄𑀥𑁂𑀢𑀺, 𑀢𑀲𑁆𑀫𑀸 𑀩𑀼𑀚𑁆𑀛𑀦𑀩𑁄𑀥𑀦𑀝𑁆𑀞𑁂𑀦 ‘‘𑀩𑀼𑀤𑁆𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁨). 𑀅𑀣 𑀯𑀸 𑀩𑀼𑀥-𑀲𑀤𑁆𑀤𑀲𑁆𑀲 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑁂𑀲𑀼𑀧𑀺 𑀧𑀯𑀢𑁆𑀢𑀦𑀢𑁄 𑀅𑀩𑀼𑀚𑁆𑀛𑀺 𑀲𑀯𑀸𑀲𑀦𑀲𑀫𑁆𑀫𑁄𑀳𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀁 𑀯𑀺𑀕𑀢𑁄, 𑀩𑀼𑀤𑁆𑀥𑀺𑀬𑀸 𑀯𑀺𑀓𑀲𑀺𑀢𑀯𑀸𑀢𑀺 𑀯𑀸 𑀩𑀼𑀤𑁆𑀥𑁄. 𑀪𑀕𑀯𑀸 𑀳𑀺 𑀯𑀢𑁆𑀣𑀼𑀲𑀪𑀸𑀯𑀤𑀲𑁆𑀲𑀦𑀯𑀺𑀩𑀦𑁆𑀥𑀺𑀓𑀸𑀬 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀸𑀬 𑀦𑀺𑀤𑁆𑀤𑀸𑀬 𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑀢𑁄 𑀅𑀘𑁆𑀘𑀦𑁆𑀢𑀁 𑀯𑀺𑀕𑀢𑁄. 𑀧𑀭𑀫𑀭𑀼𑀘𑀺𑀭𑀲𑀺𑀭𑀺𑀲𑁄𑀪𑀕𑁆𑀕𑀲𑀫𑀸𑀕𑀫𑁂𑀦 𑀯𑀺𑀓𑀲𑀺𑀢𑀫𑀺𑀯 𑀧𑀤𑀼𑀫𑀁 𑀅𑀧𑀭𑀺𑀫𑀺𑀢𑀕𑀼𑀡𑀕𑀡𑀸𑀮𑀗𑁆𑀓𑀢𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀫𑀸𑀕𑀫𑁂𑀦 𑀯𑀺𑀓𑀲𑀺𑀢𑁄 𑀯𑀺𑀓𑀸𑀲𑀫𑀦𑀼𑀧𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑀯𑀲𑁂𑀦𑀧𑀺 ‘‘𑀩𑀼𑀤𑁆𑀥𑁄’’𑀢𑀺 𑀯𑀼𑀘𑁆𑀘𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀓𑀢𑀸 𑀳𑁄𑀢𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀢𑁄, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀢𑁄 𑀘. 𑀢𑀸𑀲𑀼 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀅𑀦𑀸𑀯𑀭𑀡𑀜𑀸𑀡𑀸𑀥𑀺𑀕𑀫𑁄 𑀲𑀯𑀸𑀲𑀦𑀲𑀓𑀮𑀲𑀁𑀓𑀺𑀮𑁂𑀲𑀸𑀦𑀫𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁄 𑀘, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀧𑀦 𑀆𑀲𑀬𑀧𑁆𑀧𑀬𑁄𑀕𑀯𑀲𑁂𑀦 𑀤𑀼𑀯𑀺𑀥𑀁 𑀧𑀭𑀳𑀺𑀢𑀲𑀫𑀻𑀳𑀦𑀁. 𑀢𑀢𑁆𑀣 𑀥𑀫𑁆𑀫𑀤𑁂𑀲𑀦𑀸𑀬 𑀅𑀪𑀸𑀚𑀦𑁂𑀲𑀼 𑀤𑁂𑀯𑀤𑀢𑁆𑀢𑀸𑀤𑀻𑀲𑀼 𑀯𑀺𑀭𑁄𑀥𑀺𑀲𑀢𑁆𑀢𑁂𑀲𑀼𑀧𑀺 𑀦𑀺𑀘𑁆𑀘𑀁 𑀳𑀺𑀢𑀚𑁆𑀛𑀸𑀲𑀬𑀢𑀸 𑀅𑀧𑀭𑀺𑀧𑀸𑀓𑀕𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀓𑀸𑀮𑀸𑀕𑀫𑀦𑀜𑁆𑀘 𑀆𑀲𑀬𑁄 𑀦𑀸𑀫. 𑀢𑀤𑀜𑁆𑀜𑀲𑀢𑁆𑀢𑀸𑀦𑀁 𑀧𑀦 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀲𑁆𑀲 𑀬𑀸𑀦𑀢𑁆𑀢𑀬𑀫𑀼𑀔𑁂𑀦 𑀲𑀩𑁆𑀩𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀸 𑀧𑀬𑁄𑀕𑁄 𑀦𑀸𑀫. 𑀤𑀼𑀯𑀺𑀥𑀸𑀲𑀼 𑀧𑀦𑁂𑀢𑀸𑀲𑀼 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀻𑀲𑀼, 𑀢𑀺𑀯𑀺𑀥𑀸𑀲𑀼 𑀘 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀻𑀲𑀼 𑀅𑀦𑀦𑁆𑀢𑀓𑀭𑀼𑀡𑀸-𑀯𑀘𑀦𑁂𑀦, 𑀢𑀣𑀸 𑀆𑀕𑀢𑀝𑁆𑀞𑁂𑀦 𑀘 𑀢𑀣𑀸𑀕𑀢-𑀲𑀤𑁆𑀤𑁂𑀦 𑀆𑀲𑀬𑀯𑀲𑁂𑀦 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀩𑁄𑀥𑀦𑀝𑁆𑀞𑁂𑀦 𑀩𑀼𑀤𑁆𑀥-𑀲𑀤𑁆𑀤𑁂𑀦, 𑀢𑀣𑀤𑀲𑁆𑀲𑀦𑀝𑁆𑀞𑁂𑀦 𑀘 𑀢𑀣𑀸𑀕𑀢𑀝𑁆𑀞𑁂𑀦 𑀘 𑀢𑀣𑀸𑀕𑀢𑀲𑀤𑁆𑀤𑁂𑀦 𑀧𑀬𑁄𑀕𑀯𑀲𑁂𑀦, 𑀅𑀦𑀦𑁆𑀢𑀧𑀜𑁆𑀜𑀸-𑀯𑀘𑀦𑁂𑀦, 𑀜𑀸𑀡𑀕𑀢𑀺𑀤𑀻𑀧𑀓𑁂𑀦 𑀢𑀣𑀸𑀕𑀢-𑀲𑀤𑁆𑀤𑁂𑀦, 𑀩𑀼𑀚𑁆𑀛𑀦𑀚𑀸𑀕𑀭𑀡𑀯𑀺𑀓𑀲𑀦𑀝𑁆𑀞𑁂𑀦 𑀘 𑀩𑀼𑀤𑁆𑀥-𑀲𑀤𑁆𑀤𑁂𑀦 𑀢𑀺𑀯𑀺𑀥𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀅𑀦𑀼𑀢𑁆𑀢𑀭𑀯𑀘𑀦𑁂𑀦 𑀘 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 𑀳𑁂𑀢𑀼𑀨𑀮𑀲𑀢𑁆𑀢𑀽𑀧𑀓𑀸𑀭𑀲𑀫𑁆𑀧𑀤𑀸𑀯𑀲𑁂𑀦 𑀢𑀻𑀳𑀸𑀓𑀸𑀭𑁂𑀳𑀺𑀧𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀧𑀯𑀢𑁆𑀢𑀢𑀻𑀢𑀺 𑀢𑀁𑀯𑀲𑁂𑀦𑀧𑁂𑀢𑁆𑀣 𑀣𑁄𑀫𑀦𑀸 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀳𑁂𑀢𑀼𑀲𑀫𑁆𑀧𑀤𑀸 𑀦𑀸𑀫 𑀫𑀳𑀸𑀓𑀭𑀼𑀡𑀸𑀲𑀫𑀸𑀬𑁄𑀕𑁄, 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀜𑁆𑀘 𑀢𑀫𑁆𑀫𑀽𑀮𑀓𑀢𑁆𑀢𑀸 𑀲𑀓𑀮𑀩𑀼𑀤𑁆𑀥𑀕𑀼𑀡𑀸𑀦𑀁. 𑀨𑀮𑀲𑀫𑁆𑀧𑀤𑀸 𑀧𑀦 𑀘𑀢𑀼𑀩𑁆𑀩𑀺𑀥𑀸 𑀜𑀸𑀡𑀲𑀫𑁆𑀧𑀤𑀸, 𑀧𑀳𑀸𑀦𑀲𑀫𑁆𑀧𑀤𑀸, 𑀆𑀦𑀼𑀪𑀸𑀯𑀲𑀫𑁆𑀧𑀤𑀸, 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀘𑀸𑀢𑀺. 𑀢𑀸𑀲𑀼 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑀫𑁆𑀫𑀽𑀮𑀓𑀸𑀦𑀺 𑀘 𑀤𑀲𑀩𑀮𑀸𑀤𑀺𑀜𑀸𑀡𑀸𑀦𑀺 𑀜𑀸𑀡𑀲𑀫𑁆𑀧𑀤𑀸 𑀦𑀸𑀫. 𑀅𑀕𑁆𑀕𑀫𑀕𑁆𑀕𑀪𑀸𑀯𑀦𑀸𑀬 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀲𑀳 𑀯𑀸𑀲𑀦𑀸𑀳𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀁 𑀧𑀳𑀸𑀦𑀲𑀫𑁆𑀧𑀤𑀸. 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑀺𑀢𑀸𑀦𑀁 𑀲𑀩𑁆𑀩𑀮𑁄𑀓𑀳𑀺𑀢𑀸𑀦𑀁 𑀦𑀺𑀧𑁆𑀨𑀸𑀤𑀦𑁂, 𑀲𑀤𑁂𑀯𑀓𑀮𑁄𑀓𑀸𑀪𑀺𑀪𑀯𑀦𑁂 𑀘 𑀆𑀥𑀺𑀧𑀘𑁆𑀘𑀁 𑀆𑀦𑀼𑀪𑀸𑀯𑀲𑀫𑁆𑀧𑀤𑀸. 𑀲𑀓𑀮𑀮𑁄𑀓𑀦𑀬𑀦𑀸𑀪𑀺𑀲𑁂𑀓𑀪𑀽𑀢𑀸 𑀧𑀦 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀸 𑀅𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀦𑀸𑀫. 𑀲𑀢𑁆𑀢𑀽𑀧𑀓𑀸𑀭𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀸𑀲𑀼 𑀧𑀦 𑀅𑀦𑀦𑁆𑀢𑀓𑀭𑀼𑀡𑀸-𑀯𑀘𑀦𑁂𑀦, 𑀢𑀣𑀸 𑀆𑀕𑀢𑀝𑁆𑀞𑁂𑀦 𑀘 𑀢𑀣𑀸𑀕𑀢-𑀲𑀤𑁆𑀤𑁂𑀦 𑀳𑁂𑀢𑀼𑀲𑀫𑁆𑀧𑀤𑀸 𑀤𑀲𑁆𑀲𑀺𑀢𑀸. 𑀨𑀮𑀲𑀫𑁆𑀧𑀤𑀸𑀲𑀼 𑀜𑀸𑀡𑀲𑀫𑁆𑀧𑀤𑀸 𑀘𑁂𑀯 𑀧𑀳𑀸𑀦𑀲𑀫𑁆𑀧𑀤𑀸 𑀘 𑀅𑀦𑀦𑁆𑀢𑀧𑀜𑁆𑀜𑀸-𑀯𑀘𑀦𑁂𑀦, 𑀅𑀪𑀺𑀲𑀫𑀬𑀧𑀭𑀺𑀤𑀻𑀧𑀓𑁂𑀦 𑀢𑀣𑀸𑀕𑀢𑀲𑀤𑁆𑀤𑁂𑀦, 𑀩𑀼𑀚𑁆𑀛𑀦𑀚𑀸𑀕𑀭𑀡𑀯𑀺𑀓𑀲𑀦𑀝𑁆𑀞𑁂𑀦, 𑀘 𑀩𑀼𑀤𑁆𑀥-𑀲𑀤𑁆𑀤𑁂𑀦 𑀤𑀲𑁆𑀲𑀺𑀢𑀸, 𑀆𑀦𑀼𑀪𑀸𑀯𑀲𑀫𑁆𑀧𑀤𑀸𑀧𑀺 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢-𑀲𑀤𑁆𑀤𑁂𑀦, 𑀅𑀦𑀼𑀢𑁆𑀢𑀭-𑀯𑀘𑀦𑁂𑀦 𑀘 𑀯𑀺𑀪𑀸𑀯𑀺𑀢𑀸, 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀧𑀦 𑀭𑀽𑀧𑀕𑁆𑀕𑀧𑁆𑀧𑀢𑁆𑀢𑀺𑀤𑀻𑀧𑀓𑁂𑀦 𑀅𑀦𑀼𑀢𑁆𑀢𑀭-𑀲𑀤𑁆𑀤𑁂𑀦 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀩𑀼𑀤𑁆𑀥𑀭𑀢𑀦𑀲𑁆𑀲 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀲𑁂𑀲𑀭𑀢𑀦𑀸𑀦𑀫𑁆𑀧𑀺 𑀧𑀡𑀸𑀫𑀫𑀸𑀭𑀪𑀦𑁆𑀢𑁄 𑀆𑀳 ‘‘𑀥𑀫𑁆𑀫𑀁 𑀲𑀸𑀥𑀼𑀕𑀡𑀫𑁆𑀧𑀺 𑀘𑀸’’𑀢𑀺. 𑀪𑀕𑀯𑀢𑁄 𑀣𑁄𑀫𑀦𑁂𑀦 𑀘 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀬𑁄 𑀥𑀫𑁆𑀫𑀕𑀼𑀡𑀸, 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀬𑁄 𑀲𑀗𑁆𑀖𑀕𑀼𑀡𑀸 𑀘 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀢𑀧𑁆𑀧𑀪𑀯𑀲𑁆𑀲 𑀅𑀦𑀜𑁆𑀜𑀣𑀸𑀪𑀸𑀯𑀢𑁄𑀢𑀺 𑀦 𑀢𑁂𑀲𑀁 𑀯𑀺𑀲𑀼𑀁 𑀣𑁄𑀫𑀦𑀸 𑀓𑀢𑀸. 𑀅𑀥𑀺𑀕𑀢𑀫𑀕𑁆𑀕𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂 𑀧𑀼𑀕𑁆𑀕𑀮𑁂 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘 𑀅𑀧𑀸𑀬𑀤𑀼𑀓𑁆𑀔𑁂𑀲𑀼 𑀘𑁂𑀯 𑀯𑀝𑁆𑀝𑀤𑀼𑀓𑁆𑀔𑁂𑀲𑀼 𑀘 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀲𑁄 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁, 𑀘𑀢𑀼𑀦𑁆𑀦𑀜𑁆𑀘 𑀲𑀸𑀫𑀜𑁆𑀜𑀨𑀮𑀸𑀦𑀁, 𑀦𑀺𑀩𑁆𑀩𑀸𑀦𑀲𑁆𑀲, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀘 𑀯𑀲𑁂𑀦 𑀤𑀲𑀯𑀺𑀥𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀙𑀢𑁆𑀢𑀯𑀺𑀫𑀸𑀦𑁂 𑁋

‘‘𑀭𑀸𑀕𑀯𑀺𑀭𑀸𑀕𑀫𑀦𑁂𑀚𑀫𑀲𑁄𑀓𑀁,

𑀥𑀫𑁆𑀫𑀫𑀲𑀗𑁆𑀔𑀢𑀫𑀧𑁆𑀧𑀝𑀺𑀓𑀽𑀮𑀁;

𑀫𑀥𑀼𑀭𑀫𑀺𑀫𑀁 𑀧𑀕𑀼𑀡𑀁 𑀲𑀼𑀯𑀺𑀪𑀢𑁆𑀢𑀁,

𑀥𑀫𑁆𑀫𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺. (𑀯𑀺. 𑀯. 𑁮𑁮𑁭);

𑀏𑀢𑁆𑀣 𑀳𑀺 𑀓𑀸𑀫𑀭𑀸𑀕𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀭𑀸𑀕𑁄 𑀯𑀺𑀭𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 ‘‘𑀭𑀸𑀕𑀯𑀺𑀭𑀸𑀕𑁄’’𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬, 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀲𑁆𑀲 𑀘 𑀲𑁄𑀓𑀲𑁆𑀲 𑀢𑀤𑀼𑀧𑁆𑀧𑀢𑁆𑀢𑀺𑀬𑀁 𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 ‘‘𑀅𑀦𑁂𑀚𑀫𑀲𑁄𑀓’’𑀦𑁆𑀢𑀺 𑀨𑀮𑀁 𑀓𑀣𑀺𑀢𑀁. 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀅𑀲𑀗𑁆𑀔𑀢𑀢𑁆𑀢𑀸 ‘‘𑀥𑀫𑁆𑀫𑀫𑀲𑀗𑁆𑀔𑀢’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀁. 𑀅𑀯𑀺𑀭𑁄𑀥𑀤𑀻𑀧𑀦𑀢𑁄 𑀧𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑁆𑀲 𑀲𑀫𑁆𑀧𑀦𑁆𑀦𑀢𑀸𑀬, 𑀧𑀓𑀝𑁆𑀞𑀕𑀼𑀡𑀯𑀺𑀪𑀸𑀯𑀦𑀢𑁄 𑀲𑀼𑀝𑁆𑀞𑀼 𑀯𑀺𑀪𑀚𑀺𑀢𑀢𑁆𑀢𑀸 𑀘 ‘‘𑀅𑀧𑁆𑀧𑀝𑀺𑀓𑀽𑀮’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑁄𑀧𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀓𑀣𑀺𑀢𑁄. 𑀢𑀢𑁆𑀣 𑀅𑀭𑀺𑀬𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀦𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀅𑀧𑀸𑀬𑀸𑀤𑀺𑀢𑁄 𑀥𑀸𑀭𑀡𑀢𑁄 𑀥𑀫𑁆𑀫𑁄, 𑀨𑀮𑀧𑀭𑀺𑀬𑀢𑁆𑀢𑀺𑀬𑁄 𑀧𑀦 𑀧𑀭𑀺𑀬𑀸𑀬𑁂𑀦. 𑀢𑀣𑀸 𑀳𑁂𑀢𑁆𑀣 𑀥𑀸𑀭𑀡𑀁 𑀦𑀸𑀫 𑀅𑀧𑀸𑀬𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀁. 𑀇𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑀓𑀢𑀸𑀬, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀆𑀮𑀫𑁆𑀩𑀡𑀪𑀸𑀯𑁂𑀦 𑀢𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺𑀳𑁂𑀢𑀼𑀢𑀸𑀬𑀧𑀺 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀮𑀩𑁆𑀪𑀢𑀺. 𑀇𑀢𑀭𑁂𑀲𑀼 𑀧𑀦 𑀅𑀭𑀺𑀬𑀨𑀮𑀲𑁆𑀲 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑀲𑁆𑀲𑀤𑁆𑀥𑀓𑀺𑀘𑁆𑀘𑀢𑀸𑀬, 𑀫𑀕𑁆𑀕𑀸𑀦𑀼𑀓𑀽𑀮𑀧𑁆𑀧𑀯𑀢𑁆𑀢𑀺𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀘 𑀢𑀤𑀥𑀺𑀕𑀫𑀳𑁂𑀢𑀼𑀢𑀸𑀬𑀸𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀧𑀭𑀺𑀬𑀸𑀬𑀢𑁄𑀯 𑀮𑀩𑁆𑀪𑀢𑀻𑀢𑀺.

𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀁 𑀲𑀸𑀥𑁂𑀦𑁆𑀢𑀻𑀢𑀺 𑀲𑀸𑀥𑀽, 𑀢𑁂𑀲𑀁 𑀕𑀡𑁄 𑀲𑀫𑀼𑀤𑀸𑀬𑁄𑀢𑀺 𑀲𑀸𑀥𑀼𑀕𑀡𑁄, 𑀲𑀸𑀥𑀼 𑀘𑀸𑀬𑀁 𑀕𑀡𑁄 𑀘𑀸𑀢𑀺 𑀯𑀸 𑀲𑀸𑀥𑀼𑀕𑀡𑁄, 𑀲𑀸𑀥𑀼𑀦𑁄 𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀆𑀬𑀢𑁆𑀢𑁄 𑀕𑀡𑁄 𑀢𑀲𑁆𑀲 𑀑𑀭𑀲𑀧𑀼𑀢𑁆𑀢𑀪𑀸𑀯𑀢𑁄𑀢𑀺 𑀲𑀸𑀥𑀼𑀕𑀡𑁄. 𑀲𑁄 𑀧𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀻𑀦𑀁, 𑀘𑀢𑀼𑀦𑁆𑀦𑀜𑁆𑀘 𑀨𑀮𑀲𑀫𑀗𑁆𑀕𑀻𑀦𑀁 𑀯𑀲𑁂𑀦 𑀅𑀝𑁆𑀞𑀯𑀺𑀥𑁄 𑀅𑀭𑀺𑀬𑀲𑀗𑁆𑀖𑁄, 𑀢𑀁 𑀲𑀸𑀥𑀼𑀕𑀡𑀁. 𑀧𑀺𑀘𑀸𑀢𑀺 𑀦𑀺𑀧𑀸𑀢𑀲𑀫𑀼𑀤𑀸𑀬𑁄, 𑀏𑀓𑁄 𑀯𑀸 𑀦𑀺𑀧𑀸𑀢𑁄, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀓𑁂𑀘𑀺 ‘‘𑀕𑀡𑁄’’𑀢𑀺 𑀇𑀥 𑀧𑀓𑀭𑀡𑀢𑁄𑀯 𑀅𑀭𑀺𑀬𑀕𑀡𑀧𑀼𑀕𑁆𑀕𑀮𑁄𑀯 𑀮𑀩𑁆𑀪𑀢𑀻𑀢𑀺 𑀲𑀸𑀥𑀽𑀢𑀺 𑀪𑀸𑀯𑀦𑀧𑀼𑀁𑀲𑀓𑀯𑀲𑁂𑀦 ‘‘𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀳 𑀬𑁄𑀚𑁂𑀦𑁆𑀢𑀺, 𑀢𑀤𑀸 𑀧𑀦 𑀲𑀸𑀥𑀽𑀢𑀺 𑀪𑀬𑀮𑀸𑀪𑀸𑀤𑀺𑀯𑀺𑀭𑀳𑁂𑀦 𑀲𑀓𑁆𑀓𑀘𑁆𑀘𑀁 𑀆𑀤𑀭𑀦𑁆𑀢𑀺 𑀅𑀢𑁆𑀣𑁄.

𑁨. 𑀏𑀯𑀁 𑀧𑀓𑀭𑀡𑀸𑀭𑀫𑁆𑀪𑁂 𑀬𑀣𑀸𑀥𑀺𑀧𑁆𑀧𑁂𑀢𑀁 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀬𑀢𑁆𑀣 𑀧𑀸𑀝𑀯𑀢𑁆𑀣𑀸𑀬 𑀇𑀤𑀁 𑀧𑀓𑀭𑀡𑀁 𑀧𑀝𑁆𑀞𑀧𑀻𑀬𑀢𑀺, 𑀢𑀁 𑀲𑀤𑁆𑀥𑀺𑀁 𑀤𑁂𑀲𑀓𑀤𑁂𑀲𑀧𑀝𑀺𑀕𑁆𑀕𑀸𑀳𑀓𑀲𑀫𑁆𑀧𑀢𑁆𑀢𑀻𑀳𑀺 𑀯𑀺𑀪𑀸𑀯𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀡𑁆𑀟𑀼𑀓𑀫𑁆𑀩𑀮𑀦𑀸𑀫𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀤𑁂𑀯𑀭𑀸𑀚𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀦𑀸𑀫𑀸𑀬 𑀲𑀺𑀮𑀸𑀬 𑀯𑀺𑀫𑀮𑁂 𑀲𑀻𑀢𑀮𑁂 𑀢𑀮𑁂 𑀦𑀺𑀲𑀺𑀦𑁆𑀦𑁄 𑀅𑀢𑀼𑀮𑀯𑀺𑀓𑁆𑀓𑀫𑁄 𑀤𑁂𑀯𑀤𑁂𑀯𑁂𑀳𑀺 𑀧𑀽𑀚𑀺𑀢𑁄 𑀤𑁂𑀯𑀤𑁂𑀯𑁄 𑀤𑁂𑀯𑀧𑀼𑀭𑀓𑁆𑀔𑀢𑁄 𑀤𑁂𑀯𑀸𑀦𑀁 𑀤𑁂𑀯𑀮𑁄𑀓𑀲𑁆𑀫𑀺𑀁 𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀧𑀡𑁆𑀟𑀼𑀓𑀫𑁆𑀩𑀮𑀲𑀭𑀺𑀓𑁆𑀔𑀯𑀡𑁆𑀡𑀢𑀸𑀬 ‘‘𑀧𑀡𑁆𑀟𑀼𑀓𑀫𑁆𑀩𑀮’’𑀦𑁆𑀢𑀺 𑀦𑀸𑀫𑀁 𑀲𑀫𑀜𑁆𑀜𑀸 𑀏𑀢𑀺𑀲𑁆𑀲𑀸𑀢𑀺 𑀧𑀡𑁆𑀟𑀼𑀓𑀫𑁆𑀩𑀮𑀦𑀸𑀫𑀸. 𑀲𑀸 𑀳𑀺 𑀲𑀓𑁆𑀓𑀲𑁆𑀲 𑀢𑀸𑀤𑀺𑀲𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀸 𑀧𑀡𑁆𑀟𑀼𑀓𑀫𑁆𑀩𑀮𑀚𑀬𑀲𑀼𑀫𑀦𑀧𑀼𑀧𑁆𑀨𑀲𑀫𑀸𑀦𑁂𑀦 𑀯𑀡𑁆𑀡𑁂𑀦 𑀲𑀩𑁆𑀩𑀓𑀸𑀮𑀁 𑀯𑀺𑀭𑁄𑀘𑀢𑀺, 𑀧𑀫𑀸𑀡𑀢𑁄 𑀧𑀦 𑀲𑀝𑁆𑀞𑀺𑀬𑁄𑀚𑀦𑀸𑀬𑀸𑀫𑀸, 𑀧𑀜𑁆𑀜𑀸𑀲𑀬𑁄𑀚𑀦𑀯𑀺𑀢𑁆𑀣𑀸𑀭𑀸, 𑀧𑀦𑁆𑀦𑀭𑀲𑀬𑁄𑀚𑀦𑀼𑀩𑁆𑀩𑁂𑀥𑀸 𑀘 𑀳𑁄𑀢𑀺. 𑀲𑀺𑀮𑀸𑀬𑀸𑀢𑀺 𑀅𑀯𑀬𑀯𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀢𑀼𑀮𑀸𑀬 𑀲𑀫𑁆𑀫𑀺𑀢𑁄 𑀢𑀼𑀮𑁆𑀬𑁄, 𑀦 𑀢𑀼𑀮𑁆𑀬𑁄 𑀅𑀢𑀼𑀮𑁆𑀬𑁄, 𑀅𑀢𑀼𑀮𑁆𑀬𑁄 𑀯𑀺𑀓𑁆𑀓𑀫𑁄 𑀩𑀮𑀁 𑀏𑀢𑀲𑁆𑀲𑀸𑀢𑀺 𑀅𑀢𑀼𑀮𑁆𑀬𑀯𑀺𑀓𑁆𑀓𑀫𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀳𑀺 𑀧𑀭𑀫𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑀲𑀁𑀲𑀺𑀤𑁆𑀥𑁂𑀦 𑀳𑀢𑁆𑀣𑀺𑀕𑀡𑀦𑀸𑀬 𑀓𑁄𑀝𑀺𑀲𑀳𑀲𑁆𑀲𑀳𑀢𑁆𑀣𑀻𑀦𑀁, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀓𑁄𑀝𑀺𑀲𑀳𑀲𑁆𑀲𑀧𑀼𑀭𑀺𑀲𑀸𑀦𑀁 𑀩𑀮𑁂𑀳𑀺 𑀲𑀫𑀧𑁆𑀧𑀫𑀸𑀡𑁂𑀦 𑀓𑀸𑀬𑀩𑀮𑁂𑀦, 𑀅𑀧𑁆𑀧𑀫𑀸𑀡𑁂𑀦 𑀘 𑀜𑀸𑀡𑀩𑀮𑁂𑀦 𑀦 𑀓𑀲𑁆𑀲𑀘𑀺 𑀤𑁂𑀯𑀩𑁆𑀭𑀳𑁆𑀫𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲 𑀩𑀮𑀢𑀼𑀮𑀦𑀸𑀬 𑀉𑀧𑀦𑁂𑀢𑀩𑁆𑀩𑀁 𑀅𑀢𑁆𑀣𑀺. 𑀅𑀣 𑀯𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀅𑀢𑀼𑀮𑁆𑀬𑁄 𑀧𑀭𑀓𑁆𑀓𑀫𑀲𑀗𑁆𑀔𑀸𑀢𑁄 𑀅𑀧𑀭𑀺𑀫𑀸𑀡𑀕𑀼𑀡𑀯𑀺𑀲𑁂𑀲𑀸𑀯𑀳𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀸 𑀅𑀢𑀼𑀮𑁆𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑀲𑀗𑁆𑀔𑀸𑀢𑁄 𑀯𑀺𑀓𑁆𑀓𑀫𑁄 𑀇𑀫𑀲𑁆𑀲𑀸𑀢𑀺 𑀅𑀢𑀼𑀮𑁆𑀬𑀯𑀺𑀓𑁆𑀓𑀫𑁄. ‘‘𑀅𑀢𑀼𑀮𑁆𑀬𑀯𑀺𑀓𑁆𑀓𑀫𑁄’’𑀢𑀺 𑀘 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀬-𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 ‘‘𑀅𑀢𑀼𑀮𑀯𑀺𑀓𑁆𑀓𑀫𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀲𑀫𑁆𑀫𑀺𑀢𑀢𑁆𑀣𑁂 𑀅-𑀓𑀸𑀭𑀧𑀘𑁆𑀘𑀬𑀲𑁆𑀲𑀸𑀧𑀺 𑀲𑀫𑁆𑀪𑀯𑀢𑁄 𑀅𑀢𑀼𑀮𑁄 𑀯𑀺𑀓𑁆𑀓𑀫𑁄 𑀅𑀲𑁆𑀲𑀸𑀢𑀺 ‘‘𑀅𑀢𑀼𑀮𑀯𑀺𑀓𑁆𑀓𑀫𑁄’’𑀢𑀺 𑀯𑀼𑀢𑁆𑀢𑀁.

𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸, 𑀧𑀜𑁆𑀘𑀓𑀸𑀫𑀕𑀼𑀡𑀸𑀤𑀻𑀳𑀺 𑀓𑀻𑀴𑀦𑁆𑀢𑀺, 𑀢𑁂𑀲𑀼 𑀯𑀸 𑀯𑀺𑀳𑀭𑀦𑁆𑀢𑀺, 𑀯𑀺𑀚𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀺𑀓𑁂 𑀧𑀘𑁆𑀘𑀢𑁆𑀣𑀺𑀓𑁂 𑀯𑀺𑀚𑁂𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀇𑀲𑁆𑀲𑀭𑀺𑀬𑀥𑀦𑀸𑀤𑀺𑀲𑀓𑁆𑀓𑀸𑀭𑀤𑀸𑀦𑀕𑁆𑀕𑀳𑀡𑀁, 𑀢𑀁𑀢𑀁𑀅𑀢𑁆𑀣𑀸𑀦𑀼𑀲𑀸𑀲𑀦𑀜𑁆𑀘 𑀓𑀭𑁄𑀦𑁆𑀢𑀸 𑀯𑁄𑀳𑀭𑀦𑁆𑀢𑀺, 𑀧𑀼𑀜𑁆𑀜𑀜𑀸𑀡𑀸𑀦𑀼𑀪𑀸𑀯𑀧𑁆𑀧𑀢𑁆𑀢𑀸𑀬 𑀚𑀼𑀢𑀺𑀬𑀸 𑀚𑁄𑀢𑁂𑀦𑁆𑀢𑀺, 𑀬𑀣𑀸𑀥𑀺𑀧𑁆𑀧𑁂𑀢𑀜𑁆𑀘 𑀯𑀺𑀲𑀬𑀁 𑀅𑀧𑁆𑀧𑀝𑀺𑀖𑀸𑀢𑁂𑀦 𑀕𑀘𑁆𑀙𑀦𑁆𑀢𑀺, 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑁂 𑀘 𑀲𑀓𑁆𑀓𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀤𑁂𑀯𑀦𑀻𑀬𑀸 𑀢𑀁𑀢𑀁𑀩𑁆𑀬𑀲𑀦𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁂𑀳𑀺 ‘‘𑀲𑀭𑀡𑀁 𑀧𑀭𑀸𑀬𑀡’’𑀦𑁆𑀢𑀺 𑀕𑀫𑀦𑀻𑀬𑀸, 𑀅𑀪𑀺𑀢𑁆𑀣𑀯𑀦𑀻𑀬𑀸 𑀲𑁄𑀪𑀸𑀯𑀺𑀲𑁂𑀲𑀬𑁄𑀕𑁂𑀦 𑀓𑀫𑀦𑀻𑀬𑀸𑀢𑀺 𑀯𑀸 𑀤𑁂𑀯𑀸, 𑀢𑁂 𑀢𑀺𑀯𑀺𑀥𑀸 𑁋 𑀲𑀫𑁆𑀫𑀼𑀢𑀺𑀤𑁂𑀯𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀢𑀺. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫 𑀫𑀳𑀸𑀲𑀫𑁆𑀫𑀢𑀸𑀤𑀬𑁄 𑀔𑀢𑁆𑀢𑀺𑀬𑀸. 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀉𑀧𑀸𑀤𑀸𑀬 𑀢𑀤𑀼𑀢𑁆𑀢𑀭𑀺𑀤𑁂𑀯𑀸. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫 𑀔𑀻𑀡𑀸𑀲𑀯𑀸. 𑀇𑀥 𑀧𑀦 𑀉𑀧𑀧𑀢𑁆𑀢𑀺𑀤𑁂𑀯𑀸 𑀤𑀝𑁆𑀞𑀩𑁆𑀩𑀸. 𑀦𑁄 𑀘 𑀔𑁄 𑀢𑁂𑀧𑀺 𑀅𑀯𑀺𑀲𑁂𑀲𑁂𑀦, 𑀞𑀧𑁂𑀢𑁆𑀯𑀸 𑀧𑀦 𑀬𑀸𑀫𑀸𑀤𑀺𑀓𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀯𑀸𑀲𑀺𑀦𑁄𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀁 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀭𑀜𑁆𑀚𑀦𑀢𑁄 𑀭𑀸𑀚𑀸, 𑀤𑁂𑀯𑀸𑀦𑀁 𑀭𑀸𑀚𑀸 𑀇𑀲𑁆𑀲𑀭𑁄 𑀤𑁂𑀯𑀭𑀸𑀚𑀸, 𑀢𑀲𑁆𑀲 𑀤𑁂𑀯𑀭𑀸𑀚𑀲𑁆𑀲, ‘‘𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄’’𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀅𑀜𑁆𑀜𑁂𑀲𑀁 𑀤𑁂𑀯𑀮𑁄𑀓𑁂𑀲𑀼 𑀦𑀺𑀲𑀺𑀦𑁆𑀦𑁄 𑀪𑀕𑀯𑀸 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑁂𑀲𑀻𑀢𑀺.

𑁩. 𑀬𑀦𑁆𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄, 𑀢𑀲𑁆𑀲 𑀧𑀦 ‘‘𑀢𑀢𑁆𑀣𑀸’’𑀢𑀺 𑀇𑀫𑀺𑀦𑀸 𑀦𑀺𑀬𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀤𑁂𑀯𑀸𑀦𑀁 𑀉𑀢𑁆𑀢𑀫𑁄 𑀤𑁂𑀯𑁄 𑀢𑁂𑀳𑀺 𑀲𑀩𑁆𑀩𑁂𑀳𑀺 𑀅𑀥𑀺𑀓𑀢𑀭𑀁 𑀓𑀻𑀴𑀦𑀸𑀤𑀺𑀬𑁄𑀕𑀢𑁄𑀢𑀺 𑀤𑁂𑀯𑀤𑁂𑀯𑁄, 𑀪𑀕𑀯𑀸. 𑀲𑁄 𑀳𑀺 𑀦𑀺𑀭𑀢𑀺𑀲𑀬𑀸𑀬 𑀅𑀪𑀺𑀜𑁆𑀜𑀸𑀓𑀻𑀴𑀸𑀬 𑀉𑀢𑁆𑀢𑀫𑁂𑀳𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀺 𑀲𑀧𑀭𑀲𑀦𑁆𑀢𑀸𑀦𑀲𑀺𑀤𑁆𑀥𑀸𑀬 𑀧𑀜𑁆𑀘𑀯𑀺𑀥𑀫𑀸𑀭𑀯𑀺𑀚𑀬𑀺𑀘𑁆𑀙𑀸𑀦𑀺𑀩𑁆𑀩𑀢𑁆𑀢𑀺𑀬𑀸 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀲𑀢𑁆𑀢𑀥𑀦𑀸𑀤𑀺𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑀓𑁆𑀓𑀸𑀭𑀤𑀸𑀦𑀕𑁆𑀕𑀳𑀡𑀲𑀗𑁆𑀔𑀸𑀢𑁂𑀦, 𑀬𑀣𑀸𑀧𑀭𑀸𑀥𑀬𑀣𑀸𑀦𑀼𑀮𑁄𑀫𑀬𑀣𑀸𑀥𑀫𑁆𑀫𑀸𑀦𑀼𑀲𑀸𑀲𑀦𑀲𑀗𑁆𑀔𑀸𑀢𑁂𑀦 𑀘 𑀯𑁄𑀳𑀸𑀭𑀸𑀢𑀺𑀲𑀬𑁂𑀦 𑀧𑀭𑀫𑀸𑀬 𑀧𑀜𑁆𑀜𑀸𑀬 𑀘 𑀲𑀭𑀻𑀭𑀧𑁆𑀧𑀪𑀸𑀲𑀗𑁆𑀔𑀸𑀢𑀸𑀬 𑀚𑀼𑀢𑀺𑀬𑀸 𑀅𑀦𑀼𑀧𑀫𑀸𑀬 𑀜𑀸𑀡𑀲𑀭𑀻𑀭𑀕𑀢𑀺𑀬𑀸 𑀫𑀸𑀭𑀯𑀺𑀚𑀬𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀭𑀳𑀺𑀢𑀦𑀺𑀧𑁆𑀨𑀸𑀤𑀦𑁂𑀲𑀼 𑀅𑀧𑁆𑀧𑀝𑀺𑀳𑀢𑀸𑀬 𑀲𑀢𑁆𑀢𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀤𑁂𑀯𑀓𑁂𑀦 𑀯𑀸 𑀮𑁄𑀓𑁂𑀦 ‘‘𑀲𑀭𑀡’’𑀦𑁆𑀢𑀺 𑀕𑀫𑀦𑀻𑀬𑀢𑁄, 𑀅𑀪𑀺𑀢𑁆𑀣𑀯𑀦𑀻𑀬𑀢𑁄, 𑀪𑀢𑁆𑀢𑀺𑀯𑀲𑁂𑀦 𑀓𑀫𑀦𑀻𑀬𑀢𑁄 𑀘 𑀲𑀩𑁆𑀩𑁂 𑀢𑁂 𑀤𑁂𑀯𑁂 𑀢𑁂𑀳𑀺 𑀢𑁂𑀳𑀺 𑀕𑀼𑀡𑁂𑀳𑀺 𑀅𑀪𑀺𑀪𑀼𑀬𑁆𑀬 𑀞𑀺𑀢𑁄𑀢𑀺 𑀲𑀩𑁆𑀩𑀤𑁂𑀯𑁂𑀳𑀺 𑀧𑀽𑀚𑀦𑀻𑀬𑀢𑀭𑁄 𑀤𑁂𑀯𑁄, 𑀯𑀺𑀲𑀼𑀤𑁆𑀥𑀺𑀤𑁂𑀯𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀯𑀸 𑀲𑀩𑁆𑀩𑀜𑁆𑀜𑀼𑀕𑀼𑀡𑀸𑀮𑀗𑁆𑀓𑀸𑀭𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀅𑀜𑁆𑀜𑁂𑀲𑀜𑁆𑀘 𑀤𑁂𑀯𑀸𑀦𑀁 𑀅𑀢𑀺𑀲𑀬𑁂𑀦 𑀤𑁂𑀯𑁄𑀢𑀺 𑀤𑁂𑀯𑀤𑁂𑀯𑁄. 𑀤𑁂𑀯𑀸𑀦𑀦𑁆𑀢𑀺 𑀢𑀤𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀥𑀺𑀯𑀸𑀲𑀻𑀦𑀁 𑀫𑀸𑀢𑀼𑀤𑁂𑀯𑀧𑀼𑀢𑁆𑀢𑀧𑁆𑀧𑀫𑀼𑀔𑀸𑀦𑀁 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀫𑁆𑀧𑁂𑀢𑁆𑀣 𑀕𑀳𑀡𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂 𑀧𑀦 𑀉𑀧𑀧𑀢𑁆𑀢𑀺𑀤𑁂𑀯𑁂𑀲𑁆𑀯𑁂𑀯 𑀲𑀗𑁆𑀕𑀳𑀺𑀢𑀸 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀸𑀦𑀁 𑀢𑀢𑁆𑀣 𑀅𑀪𑀸𑀯𑀢𑁄. 𑀤𑁂𑀯𑀤𑁂𑀯𑁂𑀳𑀻𑀢𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑁂𑀳𑀺. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀳𑀺 𑀯𑀼𑀢𑁆𑀢𑀦𑀬𑁂𑀦 𑀇𑀢𑀭𑀤𑁂𑀯𑁂𑀳𑀺 𑀲𑀸𑀢𑀺𑀲𑀬𑀁 𑀓𑀻𑀴𑀦𑀸𑀤𑀺𑀬𑁄𑀕𑀢𑁄 𑀇𑀥 ‘‘𑀤𑁂𑀯𑀤𑁂𑀯𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀢𑁂𑀳𑀺. 𑀧𑀽𑀚𑀺𑀢𑁄𑀢𑀺 𑀧𑀽𑀚𑀺𑀢𑀩𑁆𑀩𑁄, 𑀧𑀽𑀚𑀺𑀢𑀼𑀁 𑀅𑀭𑀳𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀯𑀺𑀲𑀼𑀤𑁆𑀥𑀺𑀤𑁂𑀯𑁂𑀲𑀼𑀧𑀺 𑀪𑀕𑀯𑀢𑁄 𑀅𑀕𑁆𑀕𑀧𑀼𑀕𑁆𑀕𑀮𑀢𑀁 𑀤𑀻𑀧𑁂𑀢𑀺. 𑀤𑁂𑀲𑁂𑀲𑀻𑀢𑀺 𑀫𑀥𑀼𑀭𑀓𑀭𑀯𑀻𑀓𑀲𑀤𑁆𑀤𑀲𑀤𑀺𑀲𑀁 𑀩𑁆𑀭𑀳𑁆𑀫𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀧𑀓𑀸𑀲𑁂𑀲𑀺. 𑀤𑁂𑀯𑀮𑁄𑀓𑀲𑁆𑀫𑀺𑀦𑁆𑀢𑀺 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂. 𑀲𑀪𑀸𑀯𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀓𑀼𑀲𑀮𑀸𑀤𑀺𑀪𑁂𑀤𑁄 𑀅𑀪𑀺𑀥𑀫𑁆𑀫𑁄, 𑀇𑀥 𑀧𑀦 𑀢𑀧𑁆𑀧𑀓𑀸𑀲𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 ‘‘𑀥𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀧𑀺𑀝𑀓𑀼𑀢𑁆𑀢𑀫𑁂’’𑀢𑀺. 𑀤𑁂𑀯𑀧𑀼𑀭𑀓𑁆𑀔𑀢𑁄𑀢𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀯𑀸𑀲𑀺𑀤𑀺𑀩𑁆𑀩𑀩𑁆𑀭𑀳𑁆𑀫𑁂𑀳𑀺 𑀧𑀼𑀭𑀓𑁆𑀔𑀢𑁄, 𑀧𑀭𑀺𑀯𑀸𑀭𑀺𑀢𑁄𑀢𑀺 𑀅𑀢𑁆𑀣𑁄.

𑀦𑀦𑀼 𑀘 ‘‘𑀤𑁂𑀯𑀸𑀦’’𑀦𑁆𑀢𑀺 𑀯𑀘𑀦𑁂𑀦𑁂𑀯 𑀤𑁂𑀯𑀧𑀼𑀭𑀓𑁆𑀔𑀢𑀪𑀸𑀯𑁄 𑀲𑀺𑀤𑁆𑀥𑁄𑀢𑀺 𑀓𑀺𑀁 ‘‘𑀤𑁂𑀯𑀧𑀼𑀭𑀓𑁆𑀔𑀢𑁄’’𑀢𑀺 𑀯𑀘𑀦𑁂𑀦? 𑀦𑀸𑀬𑀁 𑀤𑁄𑀲𑁄. 𑀪𑀕𑀯𑀸 𑀳𑀺 𑀓𑀤𑀸𑀘𑀺 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀸𑀤𑀻𑀦𑀁 𑀯𑀺𑀬 𑀧𑀭𑀫𑁆𑀫𑀼𑀔𑁂𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀢𑁆𑀢𑀸𑀦𑀁 𑀲𑀫𑁆𑀫𑀼𑀔𑁂 𑀦𑀺𑀲𑀺𑀦𑁆𑀦𑀁 𑀯𑀺𑀬 𑀤𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀓𑀤𑀸𑀘𑀺𑀧𑀺 𑀧𑀸𑀭𑀸𑀬𑀦𑀺𑀓𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀯𑀺𑀬 𑀲𑀫𑁆𑀫𑀼𑀔𑁂𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀜𑁂𑀳𑀺 𑀘 𑀧𑀭𑀺𑀯𑀼𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀇𑀥 𑀧𑀦 𑀦 𑀢𑀣𑀸, 𑀤𑁂𑀯𑁂𑀳𑀺𑀬𑁂𑀯 𑀧𑀭𑀺𑀯𑀼𑀢𑁄 𑀤𑁂𑀯𑀸𑀦𑀁 𑀤𑁂𑀲𑁂𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀤𑁂𑀯𑀧𑀼𑀭𑀓𑁆𑀔𑀢𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺.

𑁪. 𑀏𑀯𑀫𑁂𑀢𑀲𑁆𑀫𑀺𑀁 𑀧𑀓𑀭𑀡𑁂 𑀕𑀸𑀭𑀯𑀚𑀦𑀦𑀢𑁆𑀣𑀁 𑀢𑁂𑀦 𑀲𑀫𑁆𑀧𑀸𑀤𑁂𑀢𑀩𑁆𑀩𑀧𑀸𑀝𑀯𑀯𑀺𑀲𑀬𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑀓𑀸𑀤𑀺𑀲𑀫𑁆𑀧𑀢𑁆𑀢𑀻𑀳𑀺 𑀲𑀳 𑀯𑀺𑀪𑀸𑀯𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀥𑀺𑀧𑁆𑀧𑁂𑀢𑀧𑀓𑀭𑀡𑀸𑀭𑀫𑁆𑀪𑀧𑀬𑁄𑀚𑀦𑀸𑀪𑀺𑀥𑀸𑀦𑀸𑀪𑀺𑀥𑁂𑀬𑁆𑀬𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀦𑀓𑀭𑀡𑀧𑁆𑀧𑀓𑀸𑀭𑀸𑀦𑀺 𑀘 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣𑀸𑀳’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀧𑀸𑀝𑀯𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀧𑀓𑀭𑀡𑀸𑀭𑀫𑁆𑀪𑀧𑀬𑁄𑀚𑀦𑀁 𑀯𑀼𑀢𑁆𑀢𑀁. ‘‘𑀅𑀪𑀺𑀥𑀫𑁆𑀫𑀸𑀯𑀢𑀸𑀭’’𑀦𑁆𑀢𑀺 𑀇𑀫𑀺𑀦𑀸 𑀅𑀪𑀺𑀥𑀸𑀦𑀸𑀪𑀺𑀥𑁂𑀬𑁆𑀬𑀸𑀦𑀺. ‘‘𑀫𑀥𑀼𑀭’’𑀦𑁆𑀢𑀺𑀆𑀤𑀻𑀳𑀺 𑀧𑀓𑀭𑀡𑀁 𑀯𑀺𑀲𑁂𑀲𑁂𑀢𑀺. ‘‘𑀲𑀫𑀸𑀲𑁂𑀦𑀸’’𑀢𑀺 𑀘 𑀇𑀫𑀺𑀦𑀸 𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀦𑀓𑀭𑀡𑀧𑁆𑀧𑀓𑀸𑀭𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀅𑀳’’𑀦𑁆𑀢𑀺 𑀓𑀢𑁆𑀢𑀼𑀪𑀽𑀢𑀁 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀢𑀣𑀸 𑀳𑀺 𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀢𑀸 ‘‘𑀅𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀝𑀼𑀦𑁄 𑀪𑀸𑀯𑁄 𑀧𑀸𑀝𑀯𑀁, 𑀢𑀁𑀬𑁂𑀯 𑀅𑀢𑁆𑀣𑁄 𑀧𑀬𑁄𑀚𑀦𑀝𑁆𑀞𑁂𑀦𑀸𑀢𑀺 𑀧𑀸𑀝𑀯𑀢𑁆𑀣𑁄, 𑀢𑀤𑀢𑁆𑀣𑀸𑀬. 𑀢𑀁 𑀲𑀦𑁆𑀥𑀸𑀬 𑀯𑀺𑀯𑀺𑀥𑀦𑀬𑀕𑁆𑀕𑀳𑀡𑀲𑀫𑀢𑁆𑀣𑀲𑁆𑀲 𑀲𑀼𑀢𑀫𑀬𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀦𑁆𑀢𑀺, 𑀪𑀺𑀦𑁆𑀤𑀦𑁆𑀢𑀺 𑀯𑀸 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀪𑀺𑀓𑁆𑀔𑀽, 𑀢𑁂𑀲𑀁. 𑀧𑀺𑀝𑀓𑀜𑁆𑀘 𑀢𑀁 𑀉𑀢𑁆𑀢𑀫𑀜𑁆𑀘𑀸𑀢𑀺 𑀧𑀺𑀝𑀓𑀼𑀢𑁆𑀢𑀫𑀁, 𑀢𑀲𑁆𑀫𑀺𑀁 𑀧𑀺𑀝𑀓𑀼𑀢𑁆𑀢𑀫𑁂, 𑀅𑀪𑀺𑀥𑀫𑁆𑀫𑀧𑀺𑀝𑀓𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀜𑁆𑀳𑀺 𑀧𑀭𑀺𑀬𑀢𑁆𑀢𑀺𑀪𑀸𑀚𑀦𑀢𑁆𑀣𑀢𑁄 𑀧𑀺𑀝𑀓𑀁, 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀯𑀺𑀲𑀺𑀝𑁆𑀞𑀪𑀸𑀯𑀢𑁄 𑀉𑀢𑁆𑀢𑀫𑀜𑁆𑀘𑀸𑀢𑀺 𑀧𑀺𑀝𑀓𑀼𑀢𑁆𑀢𑀫𑀁. 𑀢𑀢𑁆𑀣 𑀧𑀭𑀺𑀬𑀢𑁆𑀢𑀺𑀪𑀸𑀚𑀦𑀢𑁆𑀣𑀢𑁄𑀢𑀺 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑁂𑀦 𑀘𑁂𑀯 𑀪𑀸𑀚𑀦𑀢𑁆𑀣𑁂𑀦 𑀘. 𑀢𑀣𑀸 𑀳𑀺 ‘‘𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀧𑀭𑀺𑀬𑀢𑁆𑀢𑀺 𑀧𑀺𑀝𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀓𑀼𑀤𑀸𑀮𑀧𑀺𑀝𑀓’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨𑁮; 𑀅. 𑀦𑀺. 𑁩.𑁭𑁦) 𑀬𑀁 𑀓𑀺𑀜𑁆𑀘𑀺 𑀪𑀸𑀚𑀦𑀫𑁆𑀧𑀺. 𑀢𑀲𑁆𑀫𑀸 𑀇𑀤𑀫𑁆𑀧𑀺 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀝𑁆𑀞𑁂𑀦 𑀧𑀭𑀺𑀬𑀢𑁆𑀢𑀺, 𑀅𑀪𑀺𑀥𑀫𑁆𑀫𑀢𑁆𑀣𑀸𑀦𑀫𑀸𑀥𑀸𑀭𑀡𑀢𑁆𑀣𑁂𑀦 𑀪𑀸𑀚𑀦𑀜𑁆𑀘𑀸𑀢𑀺 𑀧𑀭𑀺𑀬𑀢𑁆𑀢𑀺𑀪𑀸𑀚𑀦𑀢𑁆𑀣𑀢𑁄 𑀧𑀺𑀝𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳𑀼 𑁋

‘‘𑀧𑀺𑀝𑀓𑀁 𑀧𑀺𑀝𑀓𑀢𑁆𑀣𑀯𑀺𑀤𑀽,

𑀧𑀭𑀺𑀬𑀢𑁆𑀢𑀺𑀩𑁆𑀪𑀸𑀚𑀦𑀢𑁆𑀣𑀢𑁄 𑀆𑀳𑀼;

𑀢𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸,

𑀢𑀬𑁄𑀧𑀺 𑀯𑀺𑀦𑀬𑀸𑀤𑀬𑁄 𑀜𑁂𑀬𑁆𑀬𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸);

𑀯𑀺𑀲𑀺𑀝𑁆𑀞𑀪𑀸𑀯𑁄 𑀧𑀦𑀲𑁆𑀲 𑀮𑁄𑀓𑀯𑁄𑀳𑀸𑀭𑀫𑀢𑀺𑀓𑁆𑀓𑀫𑁆𑀫 𑀬𑀣𑀸𑀲𑀪𑀸𑀯𑀯𑀲𑁂𑀦 𑀤𑁂𑀲𑀦𑀢𑁄, 𑀯𑀺𑀲𑀺𑀝𑁆𑀞𑀥𑀫𑁆𑀫𑀓𑁆𑀔𑀦𑁆𑀥𑀯𑀺𑀪𑀸𑀯𑀦𑀢𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀳𑀺 ‘‘𑀲𑀢𑁆𑀢𑁄 𑀧𑀼𑀕𑁆𑀕𑀮𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀓𑀁 𑀮𑁄𑀓𑀯𑁄𑀳𑀸𑀭𑀫𑀢𑀺𑀓𑁆𑀓𑀫𑁆𑀫 ‘‘𑀔𑀦𑁆𑀥𑀥𑀸𑀢𑀼𑀆𑀬𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀥𑀫𑁆𑀫𑀯𑀲𑁂𑀦𑁂𑀯 𑀩𑀸𑀳𑀼𑀮𑁆𑀮𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀦 𑀇𑀢𑀭𑁂𑀲𑀼 𑀯𑀺𑀬 𑀬𑀣𑀸𑀯𑀼𑀢𑁆𑀢𑀯𑁄𑀳𑀸𑀭𑀯𑀲𑁂𑀦, 𑀬𑀢𑁄 𑀇𑀤𑀁 𑀬𑀣𑀸𑀥𑀫𑁆𑀫𑀲𑀸𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀩𑁆𑀩𑀲𑀗𑁆𑀔𑀢𑀥𑀫𑁆𑀫𑀯𑀺𑀲𑀺𑀝𑁆𑀞𑁄 𑀘𑁂𑀢𑁆𑀣 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑀺𑀲𑁂𑀲𑀢𑁄 𑀯𑀺𑀪𑀸𑀯𑀺𑀢𑁄, 𑀢𑀲𑁆𑀫𑀸 𑀢𑀺𑀡𑁆𑀡𑀫𑁆𑀧𑀺 𑀧𑀺𑀝𑀓𑀸𑀦𑀁 𑀩𑀼𑀤𑁆𑀥𑀯𑀘𑀦𑀪𑀸𑀯𑁂𑀧𑀺 𑀬𑀣𑀸𑀲𑀪𑀸𑀯𑀸𑀦𑀢𑀺𑀓𑁆𑀓𑀫𑀤𑁂𑀲𑀦𑀸𑀤𑀺𑀢𑁄 𑀇𑀤𑀫𑁂𑀯 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀯𑀺𑀲𑀺𑀝𑁆𑀞𑀦𑁆𑀢𑀺 𑀬𑀼𑀢𑁆𑀢𑀁. 𑀅𑀧𑀺𑀘 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀪𑀸𑀯𑀢𑁄 𑀘𑀲𑁆𑀲 𑀯𑀺𑀲𑀺𑀝𑁆𑀞𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀥𑀫𑁆𑀫𑁂 𑀳𑀺 𑀦𑀺𑀧𑁆𑀧𑀤𑁂𑀲𑀢𑁄 𑀔𑀦𑁆𑀥𑀸𑀬𑀢𑀦𑀸𑀤𑀺𑀥𑀫𑁆𑀫𑀸𑀦𑀁 𑀯𑀺𑀪𑀢𑁆𑀢𑀢𑁆𑀢𑀸 𑀇𑀢𑀭𑀤𑁆𑀯𑀬𑀢𑁄 𑀅𑀢𑀺𑀭𑁂𑀓𑀢𑀭𑀸, 𑀯𑀺𑀲𑀺𑀝𑁆𑀞𑀸 𑀘 𑀧𑀸𑀴𑀺 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑀺𑀭𑁂𑀓𑀲𑁆𑀲, 𑀯𑀺𑀲𑀺𑀝𑁆𑀞𑀲𑁆𑀲 𑀘 𑀧𑀸𑀴𑀺𑀥𑀫𑁆𑀫𑀲𑁆𑀲 𑀯𑀲𑁂𑀦 𑀇𑀤𑀫𑁂𑀯 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀉𑀢𑁆𑀢𑀫𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸𑀯𑀼𑀢𑁆𑀢𑀯𑀺𑀲𑀺𑀝𑁆𑀞𑀪𑀸𑀯𑀬𑁄𑀕𑀢𑁄𑀬𑁂𑀯 𑀘𑁂𑀢𑀁 ‘‘𑀅𑀪𑀺𑀥𑀫𑁆𑀫𑀧𑀺𑀝𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀪𑀺-𑀲𑀤𑁆𑀤𑀲𑁆𑀲 𑀯𑀺𑀲𑀺𑀝𑁆𑀞𑀪𑀸𑀯𑀚𑁄𑀢𑀦𑀢𑁄. 𑀅𑀧𑀺𑀘 𑀯𑀼𑀟𑁆𑀠𑀺𑀫𑀦𑁆𑀢𑀸𑀤𑀺𑀥𑀫𑁆𑀫𑀸𑀦𑀁 𑀏𑀢𑁆𑀣 𑀯𑀼𑀢𑁆𑀢𑀢𑁆𑀢𑀸 𑀘𑁂𑀢𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁. 𑀬𑀣𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀁 𑀏𑀢𑁆𑀣 𑀯𑀼𑀟𑁆𑀠𑀺𑀫𑀦𑁆𑀢𑁄, 𑀲𑀮𑀓𑁆𑀔𑀡𑀸 𑀧𑀽𑀚𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸;

𑀯𑀼𑀢𑁆𑀢𑀸𑀥𑀺𑀓𑀸 𑀘 𑀥𑀫𑁆𑀫𑀸, 𑀅𑀪𑀺𑀥𑀫𑁆𑀫𑁄 𑀢𑁂𑀦 𑀅𑀓𑁆𑀔𑀸𑀢𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸);

𑀢𑀣𑀸 𑀳𑁂𑀢𑁆𑀣 ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁬𑁦 𑀆𑀤𑀬𑁄) 𑀯𑀼𑀟𑁆𑀠𑀺𑀫𑀦𑁆𑀢𑁄𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸, ‘‘𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧) 𑀦𑀬𑁂𑀦 𑀆𑀭𑀫𑁆𑀫𑀡𑀸𑀤𑀻𑀳𑀺 𑀮𑀓𑁆𑀔𑀺𑀢𑀩𑁆𑀩𑀢𑁆𑀢𑀸 𑀲𑀮𑀓𑁆𑀔𑀡𑀸𑀧𑀺 ‘‘𑀲𑁂𑀓𑁆𑀔𑀸 𑀥𑀫𑁆𑀫𑀸 𑀅𑀲𑁂𑀓𑁆𑀔𑀸 𑀥𑀫𑁆𑀫𑀸, 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀽𑀚𑀺𑀢𑀸 𑀧𑀽𑀚𑀸𑀭𑀳𑀸𑀧𑀺 ‘‘𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧) 𑀦𑀬𑁂𑀦 𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀧𑀺 ‘‘𑀫𑀳𑀕𑁆𑀕𑀢𑀸 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸 𑀥𑀫𑁆𑀫𑀸 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁨, 𑀤𑀼𑀓𑀫𑀸𑀢𑀺𑀓𑀸 𑁯𑁯), 𑀅𑀦𑀼𑀢𑁆𑀢𑀭𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀥𑀺𑀓𑀸 𑀯𑀺𑀲𑀺𑀝𑁆𑀞𑀸𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀅𑀪𑀺-𑀲𑀤𑁆𑀤𑀲𑁆𑀲 𑀯𑀼𑀟𑁆𑀠𑀺𑀆𑀤𑀺𑀅𑀢𑁆𑀣𑁂𑀲𑀼𑀧𑀺 𑀧𑀯𑀢𑁆𑀢𑀦𑀢𑁄 ‘‘𑀯𑀼𑀟𑁆𑀠𑀺𑀫𑀦𑁆𑀢𑁄 𑀥𑀫𑁆𑀫𑀸 𑀏𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀦𑀺𑀩𑁆𑀩𑀘𑀦𑁂𑀦 𑀇𑀤𑀁 𑀧𑀺𑀝𑀓𑀁 ‘‘𑀅𑀪𑀺𑀥𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀥𑀫𑁆𑀫𑀁 𑀑𑀢𑀭𑀦𑁆𑀢𑀺 𑀅𑀦𑁂𑀦𑀸𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀁 𑀦𑀸𑀫 𑀧𑀓𑀭𑀡𑀁. 𑀇𑀫𑀺𑀦𑀸 𑀧𑀦𑀲𑁆𑀲 𑀅𑀢𑁆𑀣𑀸𑀦𑀼𑀕𑀢𑀫𑀪𑀺𑀥𑀸𑀦𑀁 𑀤𑀲𑁆𑀲𑁂𑀢𑀺. 𑀢𑀼-𑀲𑀤𑁆𑀤𑁄 𑀧𑀤𑀧𑀽𑀭𑀡𑁂. 𑀆𑀘𑀭𑀺𑀬𑁂𑀦 𑀳𑀺 𑀕𑀸𑀣𑀸𑀧𑀤𑀧𑀽𑀭𑀡𑀢𑁆𑀣𑀁 𑀬𑁂𑀪𑀼𑀬𑁆𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀦𑀺𑀧𑀸𑀢𑀸 𑀯𑀼𑀘𑁆𑀘𑀦𑁆𑀢𑀺. 𑀬𑀢𑁆𑀣 𑀧𑀦 𑀦𑁂𑀲𑀁 𑀧𑀬𑁄𑀚𑀦𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺, 𑀢𑀢𑁆𑀣𑁂𑀯 𑀢𑀫𑀢𑁆𑀣𑀁 𑀯𑀓𑁆𑀔𑀸𑀫. 𑀫𑀥𑀼𑀭𑀦𑁆𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀫𑀥𑀼𑀭-𑀲𑀤𑁆𑀤𑁄𑀬𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑁂 𑀭𑀲𑀯𑀺𑀲𑁂𑀲𑁂 𑀯𑀢𑁆𑀢𑀢𑀺, 𑀇𑀥 𑀧𑀦 𑀇𑀝𑁆𑀞𑀪𑀸𑀯𑀲𑀸𑀫𑀜𑁆𑀜𑁂𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺 𑀫𑀥𑀼𑀭𑀲𑀤𑁆𑀤𑁂𑀦 𑀯𑀼𑀢𑁆𑀢𑀸. 𑀪𑀯𑀢𑀺 𑀳𑀺 𑀢𑀁𑀲𑀤𑀺𑀲𑀲𑁆𑀲 𑀢𑀁-𑀲𑀤𑁆𑀤𑁂𑀦𑀸𑀪𑀺𑀥𑀸𑀦𑀁 𑀬𑀣𑀸 ‘‘𑀅𑀕𑁆𑀕𑀺𑀫𑀸𑀡𑀯𑁄’’𑀢𑀺. 𑀢𑁂𑀦 𑀧𑀦 𑀫𑀥𑀼𑀭𑁂𑀦 𑀬𑁄𑀕𑀢𑁄 𑀇𑀤𑀫𑁆𑀧𑀺 𑀫𑀥𑀼𑀭𑀁 𑀬𑀣𑀸 𑀦𑀻𑀮𑀕𑀼𑀡𑀬𑁄𑀕𑀢𑁄 𑀦𑀻𑀮𑀼𑀧𑁆𑀧𑀮𑀦𑁆𑀢𑀺. 𑀦𑀺𑀧𑀼𑀡𑀕𑀫𑁆𑀪𑀻𑀭𑀸𑀬 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀪𑀺𑀥𑀫𑁆𑀫𑀯𑀺𑀲𑀬𑀁 𑀫𑀢𑀺𑀁 𑀯𑀟𑁆𑀠𑁂𑀢𑀻𑀢𑀺 𑀫𑀢𑀺𑀯𑀟𑁆𑀠𑀦𑀁. 𑀅𑀣 𑀯𑀸 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 ‘‘𑀫𑀥𑀼𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 ‘‘𑀫𑀢𑀺𑀯𑀟𑁆𑀠𑀦’’𑀦𑁆𑀢𑀺.

𑁫. 𑀢𑀸𑀴𑀦𑁆𑀢𑀺 𑀓𑀼𑀜𑁆𑀘𑀺𑀓𑀁, 𑀓𑀼𑀜𑁆𑀘𑀺𑀓𑀸𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦𑀸𑀢𑀺 𑀫𑁄𑀳𑁄, 𑀅𑀯𑀺𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁, 𑀫𑁄𑀳𑁄𑀬𑁂𑀯 𑀅𑀪𑀺𑀥𑀫𑁆𑀫𑀫𑀳𑀸𑀧𑀼𑀭𑀁 𑀧𑀯𑀺𑀲𑀦𑁆𑀢𑀸𑀦𑀁 𑀧𑀯𑁂𑀲𑀦𑀦𑀺𑀯𑀸𑀭𑀡𑀢𑁆𑀢𑀸 𑀓𑀯𑀸𑀝𑀪𑀽𑀢𑁄𑀢𑀺 𑀫𑁄𑀳𑀓𑀯𑀸𑀝𑀁, 𑀢𑀲𑁆𑀲. 𑀯𑀺𑀖𑀸𑀝𑁂𑀢𑀺, 𑀯𑀺𑀖𑀸𑀝𑀻𑀬𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀯𑀺𑀖𑀸𑀝𑀦𑀁. 𑀦𑀦𑀼 𑀘 𑀅𑀯𑀺𑀚𑁆𑀚𑀸𑀓𑀯𑀸𑀝𑀁 𑀧𑀜𑁆𑀜𑀸𑀬 𑀉𑀕𑁆𑀖𑀸𑀝𑀻𑀬𑀢𑀺. 𑀲𑀸 𑀳𑀺 𑀢𑀲𑁆𑀲𑀸 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀸𑀢𑀺? 𑀲𑀘𑁆𑀘𑀁, 𑀇𑀤𑀫𑁆𑀧𑀺 𑀢𑀲𑁆𑀲𑀸 𑀓𑀸𑀭𑀡𑀪𑀸𑀯𑁂𑀦 ‘‘𑀫𑁄𑀳𑀓𑀯𑀸𑀝𑀯𑀺𑀖𑀸𑀝𑀦𑀓𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀸𑀭𑀡𑀓𑀸𑀭𑀡𑀫𑁆𑀧𑀺 𑀳𑀺 𑀓𑀸𑀭𑀡𑀯𑀲𑁂𑀦 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀘𑁄𑀭𑁂𑀳𑀺 𑀕𑀸𑀫𑁄 𑀤𑀟𑁆𑀠𑁄, 𑀢𑀺𑀡𑁂𑀳𑀺 𑀪𑀢𑁆𑀢𑀁 𑀲𑀺𑀤𑁆𑀥’’𑀦𑁆𑀢𑀺.

𑁬. 𑀲𑀼𑀤𑀼𑀢𑁆𑀢𑀭𑀦𑁆𑀢𑀺 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀘𑀢𑀼𑀕𑀫𑁆𑀪𑀻𑀭𑀪𑀸𑀯𑀧𑀝𑀺𑀲𑀁𑀬𑀼𑀢𑁆𑀢𑀢𑀸𑀬 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀢𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀢𑀺𑀤𑀼𑀢𑁆𑀢𑀭𑀁, 𑀢𑁂𑀦𑁂𑀯 𑀘𑁂𑀤𑀁 𑀫𑀳𑁄𑀤𑀥𑀺𑀲𑀫𑀸𑀦𑀢𑁆𑀢𑀸 ‘‘𑀫𑀳𑁄𑀤𑀥𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀡𑁆𑀡𑀯𑁄𑀧𑀺 𑀳𑀺 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁄 𑀦 𑀲𑀓𑁆𑀓𑀸 𑀅𑀜𑁆𑀜𑀢𑁆𑀭 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀢𑁄 𑀓𑁂𑀦𑀘𑀺 𑀧𑀢𑀺𑀝𑁆𑀞𑀁 𑀮𑀤𑁆𑀥𑀼𑀁, 𑀏𑀯𑀫𑀺𑀤𑀫𑁆𑀧𑀺 𑀘𑀢𑀼𑀕𑀫𑁆𑀪𑀻𑀭𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀸 𑀦 𑀓𑁂𑀦𑀘𑀺 𑀧𑀢𑀺𑀝𑁆𑀞𑀁 𑀮𑀤𑁆𑀥𑀼𑀁 𑀲𑀓𑁆𑀓𑀸𑀢𑀺. 𑀢𑀭𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑀕𑁆𑀕𑀳𑀡𑀯𑀲𑁂𑀦 𑀉𑀢𑁆𑀢𑀭𑀺𑀢𑀼𑀓𑀸𑀫𑀸𑀦𑀁. 𑀏𑀢𑁆𑀣 𑀘 ‘‘𑀢𑀭𑀁𑀯𑀸’’𑀢𑀺 𑀅𑀥𑀺𑀓𑀸𑀭𑀯𑀲𑁂𑀦 𑀯𑀢𑁆𑀢𑀩𑁆𑀩𑀁, 𑀯𑀓𑁆𑀔𑀫𑀸𑀦𑀁 𑀯𑀸 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀭𑀦𑁆𑀢𑀸𑀦𑀦𑁆𑀢𑀺 𑀧𑀭𑀢𑀻𑀭𑀲𑀫𑁆𑀧𑀸𑀧𑀼𑀡𑀦𑀢𑁆𑀣𑀁 𑀉𑀢𑁆𑀢𑀭𑀦𑁆𑀢𑀸𑀦𑀁. 𑀢𑀭𑀁𑀯𑀸𑀢𑀺 𑀉𑀴𑀼𑀫𑁆𑀧𑀁 𑀯𑀺𑀬, 𑀢𑀁𑀲𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀓𑀭𑀸 𑀦𑀸𑀫 𑀫𑀘𑁆𑀙𑀚𑀸𑀢𑀺𑀓𑀸, 𑀢𑁂𑀲𑀁 𑀆𑀓𑀭𑁄 𑀦𑀺𑀯𑀸𑀲𑀪𑀽𑀫𑀻𑀢𑀺 𑀫𑀓𑀭𑀸𑀓𑀭𑁄, 𑀢𑀁.

𑁭. 𑀅𑀪𑀺𑀥𑀫𑁆𑀫𑁂 𑀦𑀺𑀬𑀼𑀢𑁆𑀢𑀸 𑀆𑀪𑀺𑀥𑀫𑁆𑀫𑀺𑀓𑀸, 𑀢𑁂𑀲𑀁. 𑀳𑀢𑁆𑀣𑀲𑀸𑀭𑀁 𑀯𑀺𑀬𑀸𑀢𑀺 𑀳𑀢𑁆𑀣𑀲𑀸𑀭𑀁. 𑀬𑀣𑀸 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀩𑀳𑀽𑀲𑀼 𑀭𑀢𑀦𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀆𑀧𑀤𑀸𑀲𑀼 𑀘 𑀲𑀼𑀔𑀧𑀭𑀺𑀪𑁄𑀕𑀢𑁆𑀣𑀁 𑀳𑀢𑁆𑀣𑁂 𑀓𑀬𑀺𑀭𑀫𑀸𑀦𑀁 𑀲𑀸𑀭𑀭𑀢𑀦𑀸𑀤𑀺𑀓𑀁 ‘‘𑀳𑀢𑁆𑀣𑀲𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀲𑀢𑀺𑀧𑀺 𑀫𑀳𑀦𑁆𑀢𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀢𑀲𑁆𑀲 𑀲𑀩𑁆𑀩𑀲𑁄 𑀯𑀺𑀢𑁆𑀢𑀺𑀡𑁆𑀡𑀢𑀸𑀬 𑀧𑀭𑀺𑀳𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀢𑀤𑀢𑁆𑀣𑀲𑀸𑀭𑀲𑀫𑁆𑀧𑀺𑀡𑁆𑀟𑀦𑀯𑀲𑁂𑀦 𑀓𑀬𑀺𑀭𑀫𑀸𑀦𑀁 𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽𑀦𑀁 𑀲𑀼𑀔𑀧𑀭𑀺𑀳𑀭𑀡𑀢𑁆𑀣𑀸𑀬 𑀲𑀫𑁆𑀧𑀚𑁆𑀚𑀢𑀻𑀢𑀺 𑀳𑀢𑁆𑀣𑀲𑀸𑀭𑀲𑀤𑀺𑀲𑀢𑁆𑀢𑀸 ‘‘𑀳𑀢𑁆𑀣𑀲𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀯𑀓𑁆𑀔𑀸𑀫𑀻𑀢𑀺 𑀧𑀓𑀸𑀭𑁂𑀦 𑀓𑀣𑁂𑀲𑁆𑀲𑀸𑀫𑀺, 𑀅𑀦𑀸𑀕𑀢𑀯𑀘𑀦𑀜𑁆𑀘𑁂𑀢𑀁, 𑀯𑀢𑁆𑀢𑀫𑀸𑀦𑀲𑀫𑀻𑀧𑀢𑁆𑀢𑀸 𑀯𑀸 𑀅𑀦𑀸𑀕𑀢𑁂 𑀯𑀢𑁆𑀢𑀫𑀸𑀦𑀽𑀧𑀘𑀸𑀭𑀢𑁄 𑀯𑀢𑁆𑀢𑀫𑀸𑀦𑀯𑀘𑀦𑀁, 𑀧𑀝𑀺𑀜𑁆𑀜𑀸𑀦𑀦𑁆𑀢𑀭𑀫𑁂𑀯 𑀯𑀓𑁆𑀔𑀢𑀻𑀢𑀺. 𑀅𑀢𑁆𑀣𑀯𑀲𑁂𑀦 𑀧𑀓𑀸𑀭𑁂𑀦 𑀓𑀣𑁂𑀦𑁆𑀢𑁄𑀧𑀺 𑀲𑀤𑁆𑀤𑀯𑀲𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀸𑀲𑁂𑀦𑀸’’𑀢𑀺. 𑀲𑀫𑀲𑀦𑀁 𑀲𑀁𑀔𑀺𑀧𑀦𑀁 𑀲𑀫𑀸𑀲𑁄, 𑀢𑁂𑀦 𑀲𑀫𑀸𑀲𑁂𑀦, 𑀦 𑀩𑁆𑀬𑀸𑀲𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀧𑀬𑁄𑀚𑀦𑀸𑀪𑀺𑀥𑀸𑀦𑀸𑀪𑀺𑀥𑁂𑀬𑁆𑀬𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀦𑀓𑀭𑀡𑀧𑁆𑀧𑀓𑀸𑀭𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀦𑀁 𑀦𑀸𑀫 𑀢𑁂𑀲𑀁 𑀲𑀓𑁆𑀓𑀘𑁆𑀘𑀲𑀯𑀦𑁂 𑀦𑀺𑀬𑀼𑀜𑁆𑀚𑀦𑀁, 𑀢𑀲𑁆𑀫𑀸 𑀢𑁂 𑀢𑀢𑁆𑀣 𑀦𑀺𑀬𑁄𑀚𑁂𑀦𑁆𑀢𑁄 𑀆𑀳 ‘‘𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸’’𑀢𑀺. 𑀲𑀓𑁆𑀓𑀘𑁆𑀘𑀲𑀯𑀦𑀧𑀝𑀺𑀩𑀤𑁆𑀥𑀸 𑀳𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀻𑀢𑀺. 𑀢𑀢𑁆𑀣 𑀢𑀦𑁆𑀢𑀺 𑀢𑀁 𑀫𑀬𑀸 𑀯𑀓𑁆𑀔𑀫𑀸𑀦𑀁 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀁 𑀲𑀼𑀡𑀸𑀣 𑀦𑀺𑀲𑀸𑀫𑀬𑀣. 𑀲𑀫𑀸𑀳𑀺𑀢𑀸 𑀲𑀫𑁆𑀫𑀸 𑀆𑀳𑀺𑀢𑀸, 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.