𑁧𑁨. 𑀫𑀚𑁆𑀛𑀦𑁆𑀳𑀺𑀓𑀲𑀼𑀢𑁆𑀢𑀁

𑁨𑁩𑁨. 𑀏𑀓𑀁 𑀲𑀫𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀅𑀣 𑀔𑁄 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 [𑀲𑀦𑁆𑀦𑀺𑀲𑀺𑀦𑁆𑀦𑁂𑀲𑀼 (𑀲𑁆𑀬𑀸. 𑀓𑀁. 𑀧𑀻.)] 𑀧𑀓𑁆𑀔𑀺𑀲𑀼;

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁, 𑀢𑀁 𑀪𑀬𑀁 𑀧𑀝𑀺𑀪𑀸𑀢𑀺 𑀫𑀁.

‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 𑀧𑀓𑁆𑀔𑀺𑀲𑀼;

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁, 𑀲𑀸 𑀭𑀢𑀺 𑀧𑀝𑀺𑀪𑀸𑀢𑀺 𑀫’’𑀦𑁆𑀢𑀺.