𑁯. 𑀯𑀦𑀲𑀁𑀬𑀼𑀢𑁆𑀢𑀁

𑁧. 𑀯𑀺𑀯𑁂𑀓𑀲𑀼𑀢𑁆𑀢𑀁

𑁨𑁨𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀤𑀺𑀯𑀸𑀯𑀺𑀳𑀸𑀭𑀕𑀢𑁄 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀢𑀺 𑀕𑁂𑀳𑀦𑀺𑀲𑁆𑀲𑀺𑀢𑁂. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀢𑀁 𑀪𑀺𑀓𑁆𑀔𑀼𑀁 𑀲𑀁𑀯𑁂𑀚𑁂𑀢𑀼𑀓𑀸𑀫𑀸 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀯𑀺𑀯𑁂𑀓𑀓𑀸𑀫𑁄𑀲𑀺 𑀯𑀦𑀁 𑀧𑀯𑀺𑀝𑁆𑀞𑁄,

𑀅𑀣 𑀢𑁂 𑀫𑀦𑁄 𑀦𑀺𑀘𑁆𑀙𑀭𑀢𑀻 𑀩𑀳𑀺𑀤𑁆𑀥𑀸;

𑀚𑀦𑁄 𑀚𑀦𑀲𑁆𑀫𑀺𑀁 𑀯𑀺𑀦𑀬𑀲𑁆𑀲𑀼 𑀙𑀦𑁆𑀤𑀁,

𑀢𑀢𑁄 𑀲𑀼𑀔𑀻 𑀳𑁄𑀳𑀺𑀲𑀺 𑀯𑀻𑀢𑀭𑀸𑀕𑁄.

‘‘𑀅𑀭𑀢𑀺𑀁 𑀧𑀚𑀳𑀸𑀲𑀺 𑀲𑀢𑁄, 𑀪𑀯𑀸𑀲𑀺 𑀲𑀢𑀁 𑀢𑀁 𑀲𑀸𑀭𑀬𑀸𑀫𑀲𑁂;

𑀧𑀸𑀢𑀸𑀮𑀭𑀚𑁄 𑀳𑀺 𑀤𑀼𑀢𑁆𑀢𑀭𑁄, 𑀫𑀸 𑀢𑀁 𑀓𑀸𑀫𑀭𑀚𑁄 𑀅𑀯𑀸𑀳𑀭𑀺.

‘‘𑀲𑀓𑀼𑀡𑁄 𑀬𑀣𑀸 𑀧𑀁𑀲𑀼𑀓𑀼𑀦𑁆𑀣𑀺𑀢𑁄 [𑀧𑀁𑀲𑀼𑀓𑀼𑀡𑁆𑀞𑀺𑀢𑁄 (𑀓.), 𑀧𑀁𑀲𑀼𑀓𑀼𑀡𑁆𑀟𑀺𑀢𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀯𑀺𑀥𑀼𑀦𑀁 𑀧𑀸𑀢𑀬𑀢𑀺 𑀲𑀺𑀢𑀁 𑀭𑀚𑀁;

𑀏𑀯𑀁 𑀪𑀺𑀓𑁆𑀔𑀼 𑀧𑀥𑀸𑀦𑀯𑀸 𑀲𑀢𑀺𑀫𑀸, 𑀯𑀺𑀥𑀼𑀦𑀁 𑀧𑀸𑀢𑀬𑀢𑀺 𑀲𑀺𑀢𑀁 𑀭𑀚’’𑀦𑁆𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀸𑀬 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑁄 𑀲𑀁𑀯𑁂𑀕𑀫𑀸𑀧𑀸𑀤𑀻𑀢𑀺.

𑁨. 𑀉𑀧𑀝𑁆𑀞𑀸𑀦𑀲𑀼𑀢𑁆𑀢𑀁

𑁨𑁨𑁨. 𑀏𑀓𑀁 𑀲𑀫𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀤𑀺𑀯𑀸𑀯𑀺𑀳𑀸𑀭𑀕𑀢𑁄 𑀲𑀼𑀧𑀢𑀺. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀢𑀁 𑀪𑀺𑀓𑁆𑀔𑀼𑀁 𑀲𑀁𑀯𑁂𑀚𑁂𑀢𑀼𑀓𑀸𑀫𑀸 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀉𑀝𑁆𑀞𑁂𑀳𑀺 𑀪𑀺𑀓𑁆𑀔𑀼 𑀓𑀺𑀁 𑀲𑁂𑀲𑀺, 𑀓𑁄 𑀅𑀢𑁆𑀣𑁄 𑀲𑀼𑀧𑀺𑀢𑁂𑀦 [𑀲𑀼𑀧𑀺𑀦𑁂𑀦 (𑀲𑀻.)] 𑀢𑁂;

𑀆𑀢𑀼𑀭𑀲𑁆𑀲 𑀳𑀺 𑀓𑀸 𑀦𑀺𑀤𑁆𑀤𑀸, 𑀲𑀮𑁆𑀮𑀯𑀺𑀤𑁆𑀥𑀲𑁆𑀲 𑀭𑀼𑀧𑁆𑀧𑀢𑁄.

‘‘𑀬𑀸𑀬 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄 [𑀬𑀸𑀬 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 (𑀲𑀻. 𑀲𑁆𑀬𑀸. 𑀓𑀁.)], 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀢𑀫𑁂𑀯 𑀲𑀤𑁆𑀥𑀁 𑀩𑁆𑀭𑀽𑀳𑁂𑀳𑀺, 𑀫𑀸 𑀦𑀺𑀤𑁆𑀤𑀸𑀬 𑀯𑀲𑀁 𑀕𑀫𑀻’’𑀢𑀺.

‘‘𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀓𑀸𑀫𑀸, 𑀬𑁂𑀲𑀼 𑀫𑀦𑁆𑀤𑁄𑀯 𑀫𑀼𑀘𑁆𑀙𑀺𑀢𑁄;

𑀩𑀤𑁆𑀥𑁂𑀲𑀼 [𑀔𑀦𑁆𑀥𑁂𑀲𑀼 (𑀲𑀻.)] 𑀫𑀼𑀢𑁆𑀢𑀁 𑀅𑀲𑀺𑀢𑀁, 𑀓𑀲𑁆𑀫𑀸 𑀧𑀩𑁆𑀩𑀚𑀺𑀢𑀁 𑀢𑀧𑁂.

‘‘𑀙𑀦𑁆𑀤𑀭𑀸𑀕𑀲𑁆𑀲 𑀯𑀺𑀦𑀬𑀸, 𑀅𑀯𑀺𑀚𑁆𑀚𑀸𑀲𑀫𑀢𑀺𑀓𑁆𑀓𑀫𑀸;

𑀢𑀁 𑀜𑀸𑀡𑀁 𑀧𑀭𑀫𑁄𑀤𑀸𑀦𑀁 [𑀧𑀭𑀺𑀬𑁄𑀤𑀸𑀢𑀁 (𑀲𑀻. 𑀧𑀻.), 𑀧𑀭𑀫𑁄𑀤𑀸𑀢𑀁 (𑀲𑁆𑀬𑀸. 𑀓𑀁.), 𑀧𑀭𑀫𑀯𑁄𑀤𑀸𑀦𑀁 (𑀲𑀻. 𑀅𑀝𑁆𑀞.)], 𑀓𑀲𑁆𑀫𑀸 𑀧𑀩𑁆𑀩𑀚𑀺𑀢𑀁 𑀢𑀧𑁂.

‘‘𑀙𑁂𑀢𑁆𑀯𑀸 [𑀪𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀯𑀺𑀚𑁆𑀚𑀁 𑀯𑀺𑀚𑁆𑀚𑀸𑀬, 𑀆𑀲𑀯𑀸𑀦𑀁 𑀧𑀭𑀺𑀓𑁆𑀔𑀬𑀸;

𑀅𑀲𑁄𑀓𑀁 𑀅𑀦𑀼𑀧𑀸𑀬𑀸𑀲𑀁, 𑀓𑀲𑁆𑀫𑀸 𑀧𑀩𑁆𑀩𑀚𑀺𑀢𑀁 𑀢𑀧𑁂.

‘‘𑀆𑀭𑀤𑁆𑀥𑀯𑀻𑀭𑀺𑀬𑀁 𑀧𑀳𑀺𑀢𑀢𑁆𑀢𑀁, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑀁;

𑀦𑀺𑀩𑁆𑀩𑀸𑀦𑀁 𑀅𑀪𑀺𑀓𑀗𑁆𑀔𑀦𑁆𑀢𑀁, 𑀓𑀲𑁆𑀫𑀸 𑀧𑀩𑁆𑀩𑀚𑀺𑀢𑀁 𑀢𑀧𑁂’’𑀢𑀺.

𑁩. 𑀓𑀲𑁆𑀲𑀧𑀕𑁄𑀢𑁆𑀢𑀲𑀼𑀢𑁆𑀢𑀁

𑁨𑁨𑁩. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀓𑀲𑁆𑀲𑀧𑀕𑁄𑀢𑁆𑀢𑁄 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀓𑀲𑁆𑀲𑀧𑀕𑁄𑀢𑁆𑀢𑁄 𑀤𑀺𑀯𑀸𑀯𑀺𑀳𑀸𑀭𑀕𑀢𑁄 𑀅𑀜𑁆𑀜𑀢𑀭𑀁 𑀙𑁂𑀢𑀁 𑀑𑀯𑀤𑀢𑀺. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀆𑀬𑀲𑁆𑀫𑀦𑁆𑀢𑀁 𑀓𑀲𑁆𑀲𑀧𑀕𑁄𑀢𑁆𑀢𑀁 𑀲𑀁𑀯𑁂𑀚𑁂𑀢𑀼𑀓𑀸𑀫𑀸 𑀬𑁂𑀦𑀸𑀬𑀲𑁆𑀫𑀸 𑀓𑀲𑁆𑀲𑀧𑀕𑁄𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀓𑀲𑁆𑀲𑀧𑀕𑁄𑀢𑁆𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀕𑀺𑀭𑀺𑀤𑀼𑀕𑁆𑀕𑀘𑀭𑀁 𑀙𑁂𑀢𑀁, 𑀅𑀧𑁆𑀧𑀧𑀜𑁆𑀜𑀁 𑀅𑀘𑁂𑀢𑀲𑀁;

𑀅𑀓𑀸𑀮𑁂 𑀑𑀯𑀤𑀁 𑀪𑀺𑀓𑁆𑀔𑀼, 𑀫𑀦𑁆𑀤𑁄𑀯 𑀧𑀝𑀺𑀪𑀸𑀢𑀺 𑀫𑀁.

‘‘𑀲𑀼𑀡𑀸𑀢𑀺 𑀦 𑀯𑀺𑀚𑀸𑀦𑀸𑀢𑀺, 𑀆𑀮𑁄𑀓𑁂𑀢𑀺 𑀦 𑀧𑀲𑁆𑀲𑀢𑀺;

𑀥𑀫𑁆𑀫𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑀲𑁆𑀫𑀺𑀁, 𑀅𑀢𑁆𑀣𑀁 𑀩𑀸𑀮𑁄 𑀦 𑀩𑀼𑀚𑁆𑀛𑀢𑀺.

‘‘𑀲𑀘𑁂𑀧𑀺 𑀤𑀲 𑀧𑀚𑁆𑀚𑁄𑀢𑁂, 𑀥𑀸𑀭𑀬𑀺𑀲𑁆𑀲𑀲𑀺 𑀓𑀲𑁆𑀲𑀧;

𑀦𑁂𑀯 𑀤𑀓𑁆𑀔𑀢𑀺 𑀭𑀽𑀧𑀸𑀦𑀺, 𑀘𑀓𑁆𑀔𑀼 𑀳𑀺𑀲𑁆𑀲 𑀦 𑀯𑀺𑀚𑁆𑀚𑀢𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀓𑀲𑁆𑀲𑀧𑀕𑁄𑀢𑁆𑀢𑁄 𑀢𑀸𑀬 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑁄 𑀲𑀁𑀯𑁂𑀕𑀫𑀸𑀧𑀸𑀤𑀻𑀢𑀺.

𑁪. 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀁

𑁨𑁨𑁪. 𑀏𑀓𑀁 𑀲𑀫𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀯𑀺𑀳𑀭𑀦𑁆𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀯𑀲𑁆𑀲𑀁𑀯𑀼𑀝𑁆𑀞𑀸 [𑀯𑀲𑁆𑀲𑀁𑀯𑀼𑀢𑁆𑀣𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀢𑁂𑀫𑀸𑀲𑀘𑁆𑀘𑀬𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑁂 𑀪𑀺𑀓𑁆𑀔𑀽 𑀅𑀧𑀲𑁆𑀲𑀦𑁆𑀢𑀻 𑀧𑀭𑀺𑀤𑁂𑀯𑀫𑀸𑀦𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀅𑀭𑀢𑀺 𑀯𑀺𑀬 𑀫𑁂𑀚𑁆𑀚 𑀔𑀸𑀬𑀢𑀺,

𑀩𑀳𑀼𑀓𑁂 𑀤𑀺𑀲𑁆𑀯𑀸𑀦 𑀯𑀺𑀯𑀺𑀢𑁆𑀢𑁂 𑀆𑀲𑀦𑁂;

𑀢𑁂 𑀘𑀺𑀢𑁆𑀢𑀓𑀣𑀸 𑀩𑀳𑀼𑀲𑁆𑀲𑀼𑀢𑀸,

𑀓𑁄𑀫𑁂 𑀕𑁄𑀢𑀫𑀲𑀸𑀯𑀓𑀸 𑀕𑀢𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀢𑀁 𑀤𑁂𑀯𑀢𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺 𑁋

‘‘𑀫𑀸𑀕𑀥𑀁 𑀕𑀢𑀸 𑀓𑁄𑀲𑀮𑀁 𑀕𑀢𑀸, 𑀏𑀓𑀘𑁆𑀘𑀺𑀬𑀸 𑀧𑀦 𑀯𑀚𑁆𑀚𑀺𑀪𑀽𑀫𑀺𑀬𑀸;

𑀫𑀕𑀸 𑀯𑀺𑀬 𑀅𑀲𑀗𑁆𑀕𑀘𑀸𑀭𑀺𑀦𑁄, 𑀅𑀦𑀺𑀓𑁂𑀢𑀸 𑀯𑀺𑀳𑀭𑀦𑁆𑀢𑀺 𑀪𑀺𑀓𑁆𑀔𑀯𑁄’’𑀢𑀺.

𑁫. 𑀆𑀦𑀦𑁆𑀤𑀲𑀼𑀢𑁆𑀢𑀁

𑁨𑁨𑁫. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀢𑀺𑀯𑁂𑀮𑀁 𑀕𑀺𑀳𑀺𑀲𑀜𑁆𑀜𑀢𑁆𑀢𑀺𑀩𑀳𑀼𑀮𑁄 𑀯𑀺𑀳𑀭𑀢𑀺. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀁𑀯𑁂𑀚𑁂𑀢𑀼𑀓𑀸𑀫𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀭𑀼𑀓𑁆𑀔𑀫𑀽𑀮𑀕𑀳𑀦𑀁 𑀧𑀲𑀓𑁆𑀓𑀺𑀬, 𑀦𑀺𑀩𑁆𑀩𑀸𑀦𑀁 𑀳𑀤𑀬𑀲𑁆𑀫𑀺𑀁 𑀑𑀧𑀺𑀬;

𑀛𑀸 𑀕𑁄𑀢𑀫 𑀫𑀸 𑀧𑀫𑀸𑀤𑁄 [𑀫𑀸 𑀘 𑀧𑀫𑀸𑀤𑁄 (𑀲𑀻. 𑀧𑀻.)], 𑀓𑀺𑀁 𑀢𑁂 𑀩𑀺𑀴𑀺𑀩𑀺𑀴𑀺𑀓𑀸 𑀓𑀭𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀸𑀬 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑁄 𑀲𑀁𑀯𑁂𑀕𑀫𑀸𑀧𑀸𑀤𑀻𑀢𑀺.

𑁬. 𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀁

𑁨𑁨𑁬. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀢𑀸𑀯𑀢𑀺𑀁𑀲𑀓𑀸𑀬𑀺𑀓𑀸 𑀤𑁂𑀯𑀢𑀸 𑀚𑀸𑀮𑀺𑀦𑀻 𑀦𑀸𑀫 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀬𑁂𑀦𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀺𑀥𑁂𑀳𑀺, 𑀬𑀢𑁆𑀣 𑀢𑁂 𑀯𑀼𑀲𑀺𑀢𑀁 𑀧𑀼𑀭𑁂;

𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀲𑀼;

𑀧𑀼𑀭𑀓𑁆𑀔𑀢𑁄 𑀧𑀭𑀺𑀯𑀼𑀢𑁄, 𑀤𑁂𑀯𑀓𑀜𑁆𑀜𑀸𑀳𑀺 𑀲𑁄𑀪𑀲𑀻’’𑀢𑀺.

‘‘𑀤𑀼𑀕𑁆𑀕𑀢𑀸 𑀤𑁂𑀯𑀓𑀜𑁆𑀜𑀸𑀬𑁄, 𑀲𑀓𑁆𑀓𑀸𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸;

𑀢𑁂 𑀘𑀸𑀧𑀺 𑀤𑀼𑀕𑁆𑀕𑀢𑀸 𑀲𑀢𑁆𑀢𑀸, 𑀤𑁂𑀯𑀓𑀜𑁆𑀜𑀸𑀳𑀺 𑀧𑀢𑁆𑀣𑀺𑀢𑀸’’𑀢𑀺.

‘‘𑀦 𑀢𑁂 𑀲𑀼𑀔𑀁 𑀧𑀚𑀸𑀦𑀦𑁆𑀢𑀺, 𑀬𑁂 𑀦 𑀧𑀲𑁆𑀲𑀦𑁆𑀢𑀺 𑀦𑀦𑁆𑀤𑀦𑀁;

𑀆𑀯𑀸𑀲𑀁 𑀦𑀭𑀤𑁂𑀯𑀸𑀦𑀁, 𑀢𑀺𑀤𑀲𑀸𑀦𑀁 𑀬𑀲𑀲𑁆𑀲𑀺𑀦’’𑀦𑁆𑀢𑀺.

‘‘𑀦 𑀢𑁆𑀯𑀁 𑀩𑀸𑀮𑁂 𑀯𑀺𑀚𑀸𑀦𑀸𑀲𑀺, 𑀬𑀣𑀸 𑀅𑀭𑀳𑀢𑀁 𑀯𑀘𑁄;

𑀅𑀦𑀺𑀘𑁆𑀘𑀸 𑀲𑀩𑁆𑀩𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄.

‘‘𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀸𑀯𑀸𑀲𑁄, 𑀤𑁂𑀯𑀓𑀸𑀬𑀲𑁆𑀫𑀺 𑀚𑀸𑀮𑀺𑀦𑀺;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

𑁭. 𑀦𑀸𑀕𑀤𑀢𑁆𑀢𑀲𑀼𑀢𑁆𑀢𑀁

𑁨𑁨𑁭. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀦𑀸𑀕𑀤𑀢𑁆𑀢𑁄 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀦𑀸𑀕𑀤𑀢𑁆𑀢𑁄 𑀅𑀢𑀺𑀓𑀸𑀮𑁂𑀦 𑀕𑀸𑀫𑀁 𑀧𑀯𑀺𑀲𑀢𑀺, 𑀅𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀢𑀺. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀆𑀬𑀲𑁆𑀫𑀢𑁄 𑀦𑀸𑀕𑀤𑀢𑁆𑀢𑀲𑁆𑀲 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀤𑀢𑁆𑀢𑀁 𑀲𑀁𑀯𑁂𑀚𑁂𑀢𑀼𑀓𑀸𑀫𑀸 𑀬𑁂𑀦𑀸𑀬𑀲𑁆𑀫𑀸 𑀦𑀸𑀕𑀤𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀤𑀢𑁆𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀸𑀮𑁂 𑀧𑀯𑀺𑀲 𑀦𑀸𑀕𑀤𑀢𑁆𑀢, 𑀤𑀺𑀯𑀸 𑀘 𑀆𑀕𑀦𑁆𑀢𑁆𑀯𑀸 𑀅𑀢𑀺𑀯𑁂𑀮𑀘𑀸𑀭𑀻;

𑀲𑀁𑀲𑀝𑁆𑀞𑁄 𑀕𑀳𑀝𑁆𑀞𑁂𑀳𑀺, 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄.

‘‘𑀪𑀸𑀬𑀸𑀫𑀺 𑀦𑀸𑀕𑀤𑀢𑁆𑀢𑀁 𑀲𑀼𑀧𑁆𑀧𑀕𑀩𑁆𑀪𑀁, 𑀓𑀼𑀮𑁂𑀲𑀼 𑀯𑀺𑀦𑀺𑀩𑀤𑁆𑀥𑀁;

𑀫𑀸 𑀳𑁂𑀯 𑀫𑀘𑁆𑀘𑀼𑀭𑀜𑁆𑀜𑁄 𑀩𑀮𑀯𑀢𑁄, 𑀅𑀦𑁆𑀢𑀓𑀲𑁆𑀲 𑀯𑀲𑀁 𑀉𑀧𑁂𑀲𑀻’’𑀢𑀺 [𑀯𑀲𑀫𑁂𑀬𑁆𑀬𑀸𑀢𑀺 (𑀲𑀻. 𑀧𑀻.), 𑀯𑀲𑀫𑁂𑀲𑀻𑀢𑀺 (𑀲𑁆𑀬𑀸. 𑀓𑀁.)].

𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀤𑀢𑁆𑀢𑁄 𑀢𑀸𑀬 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑁄 𑀲𑀁𑀯𑁂𑀕𑀫𑀸𑀧𑀸𑀤𑀻𑀢𑀺.

𑁮. 𑀓𑀼𑀮𑀖𑀭𑀡𑀻𑀲𑀼𑀢𑁆𑀢𑀁

𑁨𑁨𑁮. 𑀏𑀓𑀁 𑀲𑀫𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑁂 𑀅𑀢𑀺𑀯𑁂𑀮𑀁 𑀅𑀚𑁆𑀛𑁄𑀕𑀸𑀴𑁆𑀳𑀧𑁆𑀧𑀢𑁆𑀢𑁄 𑀯𑀺𑀳𑀭𑀢𑀺. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀢𑀁 𑀪𑀺𑀓𑁆𑀔𑀼𑀁 𑀲𑀁𑀯𑁂𑀚𑁂𑀢𑀼𑀓𑀸𑀫𑀸 𑀬𑀸 𑀢𑀲𑁆𑀫𑀺𑀁 𑀓𑀼𑀮𑁂 𑀓𑀼𑀮𑀖𑀭𑀡𑀻, 𑀢𑀲𑁆𑀲𑀸 𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀦𑀤𑀻𑀢𑀻𑀭𑁂𑀲𑀼 𑀲𑀡𑁆𑀞𑀸𑀦𑁂, 𑀲𑀪𑀸𑀲𑀼 𑀭𑀣𑀺𑀬𑀸𑀲𑀼 𑀘;

𑀚𑀦𑀸 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀦𑁆𑀢𑀺, 𑀫𑀜𑁆𑀘 𑀢𑀜𑁆𑀘 [𑀢𑁆𑀯𑀜𑁆𑀘 (𑀓.)] 𑀓𑀺𑀫𑀦𑁆𑀢𑀭’’𑀦𑁆𑀢𑀺.

‘‘𑀩𑀳𑀽𑀳𑀺 𑀲𑀤𑁆𑀤𑀸 𑀧𑀘𑁆𑀘𑀽𑀳𑀸, 𑀔𑀫𑀺𑀢𑀩𑁆𑀩𑀸 𑀢𑀧𑀲𑁆𑀲𑀺𑀦𑀸;

𑀦 𑀢𑁂𑀦 𑀫𑀗𑁆𑀓𑀼 𑀳𑁄𑀢𑀩𑁆𑀩𑀁, 𑀦 𑀳𑀺 𑀢𑁂𑀦 𑀓𑀺𑀮𑀺𑀲𑁆𑀲𑀢𑀺.

‘‘𑀬𑁄 𑀘 𑀲𑀤𑁆𑀤𑀧𑀭𑀺𑀢𑁆𑀢𑀸𑀲𑀻, 𑀯𑀦𑁂 𑀯𑀸𑀢𑀫𑀺𑀕𑁄 𑀬𑀣𑀸;

𑀮𑀳𑀼𑀘𑀺𑀢𑁆𑀢𑁄𑀢𑀺 𑀢𑀁 𑀆𑀳𑀼, 𑀦𑀸𑀲𑁆𑀲 𑀲𑀫𑁆𑀧𑀚𑁆𑀚𑀢𑁂 𑀯𑀢’’𑀦𑁆𑀢𑀺.

𑁯. 𑀯𑀚𑁆𑀚𑀺𑀧𑀼𑀢𑁆𑀢𑀲𑀼𑀢𑁆𑀢𑀁

𑁨𑁨𑁯. 𑀏𑀓𑀁 𑀲𑀫𑀬𑀁 𑀅𑀜𑁆𑀜𑀢𑀭𑁄 𑀯𑀚𑁆𑀚𑀺𑀧𑀼𑀢𑁆𑀢𑀓𑁄 𑀪𑀺𑀓𑁆𑀔𑀼 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑁄 𑀲𑀩𑁆𑀩𑀭𑀢𑁆𑀢𑀺𑀘𑀸𑀭𑁄 𑀳𑁄𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀯𑁂𑀲𑀸𑀮𑀺𑀬𑀸 𑀢𑀽𑀭𑀺𑀬-𑀢𑀸𑀴𑀺𑀢-𑀯𑀸𑀤𑀺𑀢-𑀦𑀺𑀕𑁆𑀖𑁄𑀲𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀏𑀓𑀓𑀸 𑀫𑀬𑀁 𑀅𑀭𑀜𑁆𑀜𑁂 𑀯𑀺𑀳𑀭𑀸𑀫,

𑀅𑀧𑀯𑀺𑀤𑁆𑀥𑀁𑀯 [𑀅𑀧𑀯𑀺𑀝𑁆𑀞𑀁𑀯 (𑀲𑁆𑀬𑀸. 𑀓𑀁.)] 𑀯𑀦𑀲𑁆𑀫𑀺𑀁 𑀤𑀸𑀭𑀼𑀓𑀁;

𑀏𑀢𑀸𑀤𑀺𑀲𑀺𑀓𑀸𑀬 𑀭𑀢𑁆𑀢𑀺𑀬𑀸,

𑀓𑁄 𑀲𑀼 𑀦𑀸𑀫𑀫𑁆𑀳𑁂𑀳𑀺 [𑀦𑀸𑀫 𑀅𑀫𑁆𑀳𑁂𑀳𑀺 (𑀲𑀻. 𑀧𑀻.)] 𑀧𑀸𑀧𑀺𑀬𑁄’’𑀢𑀺.

𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀢𑀁 𑀪𑀺𑀓𑁆𑀔𑀼𑀁 𑀲𑀁𑀯𑁂𑀚𑁂𑀢𑀼𑀓𑀸𑀫𑀸 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀏𑀓𑀓𑁄𑀯 𑀢𑁆𑀯𑀁 𑀅𑀭𑀜𑁆𑀜𑁂 𑀯𑀺𑀳𑀭𑀲𑀺, 𑀅𑀧𑀯𑀺𑀤𑁆𑀥𑀁𑀯 𑀯𑀦𑀲𑁆𑀫𑀺𑀁 𑀤𑀸𑀭𑀼𑀓𑀁;

𑀢𑀲𑁆𑀲 𑀢𑁂 𑀩𑀳𑀼𑀓𑀸 𑀧𑀺𑀳𑀬𑀦𑁆𑀢𑀺, 𑀦𑁂𑀭𑀬𑀺𑀓𑀸 𑀯𑀺𑀬 𑀲𑀕𑁆𑀕𑀕𑀸𑀫𑀺𑀦’’𑀦𑁆𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀸𑀬 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑁄 𑀲𑀁𑀯𑁂𑀕𑀫𑀸𑀧𑀸𑀤𑀻𑀢𑀺.

𑁧𑁦. 𑀲𑀚𑁆𑀛𑀸𑀬𑀲𑀼𑀢𑁆𑀢𑀁

𑁨𑁩𑁦. 𑀏𑀓𑀁 𑀲𑀫𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀬𑀁 𑀲𑀼𑀤𑀁 𑀧𑀼𑀩𑁆𑀩𑁂 𑀅𑀢𑀺𑀯𑁂𑀮𑀁 𑀲𑀚𑁆𑀛𑀸𑀬𑀩𑀳𑀼𑀮𑁄 𑀯𑀺𑀳𑀭𑀢𑀺 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑀼𑀡𑁆𑀳𑀻𑀪𑀽𑀢𑁄 𑀲𑀗𑁆𑀓𑀲𑀸𑀬𑀢𑀺. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀥𑀫𑁆𑀫𑀁 𑀅𑀲𑀼𑀡𑀦𑁆𑀢𑀻 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀲𑁆𑀫𑀸 𑀢𑀼𑀯𑀁 𑀥𑀫𑁆𑀫𑀧𑀤𑀸𑀦𑀺 𑀪𑀺𑀓𑁆𑀔𑀼, 𑀦𑀸𑀥𑀻𑀬𑀲𑀺 𑀪𑀺𑀓𑁆𑀔𑀽𑀳𑀺 𑀲𑀁𑀯𑀲𑀦𑁆𑀢𑁄;

𑀲𑀼𑀢𑁆𑀯𑀸𑀦 𑀥𑀫𑁆𑀫𑀁 𑀮𑀪𑀢𑀺𑀧𑁆𑀧𑀲𑀸𑀤𑀁, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀮𑀪𑀢𑀺𑀧𑁆𑀧𑀲𑀁𑀲’’𑀦𑁆𑀢𑀺.

‘‘𑀅𑀳𑀼 𑀧𑀼𑀭𑁂 𑀥𑀫𑁆𑀫𑀧𑀤𑁂𑀲𑀼 𑀙𑀦𑁆𑀤𑁄, 𑀬𑀸𑀯 𑀯𑀺𑀭𑀸𑀕𑁂𑀦 𑀲𑀫𑀸𑀕𑀫𑀺𑀫𑁆𑀳;

𑀬𑀢𑁄 𑀯𑀺𑀭𑀸𑀕𑁂𑀦 𑀲𑀫𑀸𑀕𑀫𑀺𑀫𑁆𑀳, 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀅𑀜𑁆𑀜𑀸𑀬 𑀦𑀺𑀓𑁆𑀔𑁂𑀧𑀦𑀫𑀸𑀳𑀼 𑀲𑀦𑁆𑀢𑁄’’𑀢𑀺.

𑁧𑁧. 𑀅𑀓𑀼𑀲𑀮𑀯𑀺𑀢𑀓𑁆𑀓𑀲𑀼𑀢𑁆𑀢𑀁

𑁨𑁩𑁧. 𑀏𑀓𑀁 𑀲𑀫𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀤𑀺𑀯𑀸𑀯𑀺𑀳𑀸𑀭𑀕𑀢𑁄 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀯𑀺𑀢𑀓𑁆𑀓𑀁, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀢𑀁 𑀪𑀺𑀓𑁆𑀔𑀼𑀁 𑀲𑀁𑀯𑁂𑀚𑁂𑀢𑀼𑀓𑀸𑀫𑀸 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀲𑁄 𑀯𑀺𑀢𑀓𑁆𑀓𑁂𑀳𑀺 𑀔𑀚𑁆𑀚𑀲𑀺;

𑀅𑀬𑁄𑀦𑀺𑀲𑁄 [𑀅𑀬𑁄𑀦𑀺𑀁 (𑀧𑀻. 𑀓.)] 𑀧𑀝𑀺𑀦𑀺𑀲𑁆𑀲𑀚𑁆𑀚, 𑀬𑁄𑀦𑀺𑀲𑁄 𑀅𑀦𑀼𑀘𑀺𑀦𑁆𑀢𑀬.

‘‘𑀲𑀢𑁆𑀣𑀸𑀭𑀁 𑀥𑀫𑁆𑀫𑀫𑀸𑀭𑀩𑁆𑀪, 𑀲𑀗𑁆𑀖𑀁 𑀲𑀻𑀮𑀸𑀦𑀺 𑀅𑀢𑁆𑀢𑀦𑁄;

𑀅𑀥𑀺𑀕𑀘𑁆𑀙𑀲𑀺 𑀧𑀸𑀫𑁄𑀚𑁆𑀚𑀁, 𑀧𑀻𑀢𑀺𑀲𑀼𑀔𑀫𑀲𑀁𑀲𑀬𑀁;

𑀢𑀢𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀲𑀻’’𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀸𑀬 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑁄 𑀲𑀁𑀯𑁂𑀕𑀫𑀸𑀧𑀸𑀤𑀻𑀢𑀺.

𑁧𑁨. 𑀫𑀚𑁆𑀛𑀦𑁆𑀳𑀺𑀓𑀲𑀼𑀢𑁆𑀢𑀁

𑁨𑁩𑁨. 𑀏𑀓𑀁 𑀲𑀫𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀅𑀣 𑀔𑁄 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 [𑀲𑀦𑁆𑀦𑀺𑀲𑀺𑀦𑁆𑀦𑁂𑀲𑀼 (𑀲𑁆𑀬𑀸. 𑀓𑀁. 𑀧𑀻.)] 𑀧𑀓𑁆𑀔𑀺𑀲𑀼;

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁, 𑀢𑀁 𑀪𑀬𑀁 𑀧𑀝𑀺𑀪𑀸𑀢𑀺 𑀫𑀁.

‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 𑀧𑀓𑁆𑀔𑀺𑀲𑀼;

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁, 𑀲𑀸 𑀭𑀢𑀺 𑀧𑀝𑀺𑀪𑀸𑀢𑀺 𑀫’’𑀦𑁆𑀢𑀺.

𑁧𑁩. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀁

𑁨𑁩𑁩. 𑀏𑀓𑀁 𑀲𑀫𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀯𑀺𑀳𑀭𑀦𑁆𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀘𑀧𑀮𑀸 𑀫𑀼𑀔𑀭𑀸 𑀯𑀺𑀓𑀺𑀡𑁆𑀡𑀯𑀸𑀘𑀸 𑀫𑀼𑀝𑁆𑀞𑀲𑁆𑀲𑀢𑀺𑀦𑁄 𑀅𑀲𑀫𑁆𑀧𑀚𑀸𑀦𑀸 𑀅𑀲𑀫𑀸𑀳𑀺𑀢𑀸 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀢𑁂 𑀪𑀺𑀓𑁆𑀔𑀽 𑀲𑀁𑀯𑁂𑀚𑁂𑀢𑀼𑀓𑀸𑀫𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀼𑀔𑀚𑀻𑀯𑀺𑀦𑁄 𑀧𑀼𑀭𑁂 𑀆𑀲𑀼𑀁, 𑀪𑀺𑀓𑁆𑀔𑀽 𑀕𑁄𑀢𑀫𑀲𑀸𑀯𑀓𑀸;

𑀅𑀦𑀺𑀘𑁆𑀙𑀸 𑀧𑀺𑀡𑁆𑀟𑀫𑁂𑀲𑀦𑀸, 𑀅𑀦𑀺𑀘𑁆𑀙𑀸 𑀲𑀬𑀦𑀸𑀲𑀦𑀁;

𑀮𑁄𑀓𑁂 𑀅𑀦𑀺𑀘𑁆𑀘𑀢𑀁 𑀜𑀢𑁆𑀯𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀅𑀓𑀁𑀲𑀼 𑀢𑁂.

‘‘𑀤𑀼𑀧𑁆𑀧𑁄𑀲𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁, 𑀕𑀸𑀫𑁂 𑀕𑀸𑀫𑀡𑀺𑀓𑀸 𑀯𑀺𑀬;

𑀪𑀼𑀢𑁆𑀯𑀸 𑀪𑀼𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺, 𑀧𑀭𑀸𑀕𑀸𑀭𑁂𑀲𑀼 𑀫𑀼𑀘𑁆𑀙𑀺𑀢𑀸.

‘‘𑀲𑀗𑁆𑀖𑀲𑁆𑀲 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀇𑀥𑁂𑀓𑀘𑁆𑀘𑁂 𑀯𑀤𑀸𑀫𑀳𑀁;

𑀅𑀧𑀯𑀺𑀤𑁆𑀥𑀸 [𑀅𑀧𑀯𑀺𑀝𑁆𑀞𑀸 (𑀲𑁆𑀬𑀸. 𑀓𑀁.)] 𑀅𑀦𑀸𑀣𑀸 𑀢𑁂, 𑀬𑀣𑀸 𑀧𑁂𑀢𑀸 𑀢𑀣𑁂𑀯 𑀢𑁂.

‘‘𑀬𑁂 𑀔𑁄 𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑁂 𑀫𑁂 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁;

𑀬𑁂 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀦𑀫𑁄 𑀢𑁂𑀲𑀁 𑀓𑀭𑁄𑀫𑀳’’𑀦𑁆𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀸𑀬 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑀸 𑀲𑀁𑀯𑁂𑀕𑀫𑀸𑀧𑀸𑀤𑀼𑀦𑁆𑀢𑀺.

𑁧𑁪. 𑀕𑀦𑁆𑀥𑀢𑁆𑀣𑁂𑀦𑀲𑀼𑀢𑁆𑀢𑀁

𑁨𑁩𑁪. 𑀏𑀓𑀁 𑀲𑀫𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑁂𑀢𑁆𑀯𑀸 𑀧𑀤𑀼𑀫𑀁 𑀉𑀧𑀲𑀺𑀗𑁆𑀖𑀢𑀺. 𑀅𑀣 𑀔𑁄 𑀬𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀢𑀁 𑀪𑀺𑀓𑁆𑀔𑀼𑀁 𑀲𑀁𑀯𑁂𑀚𑁂𑀢𑀼𑀓𑀸𑀫𑀸 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀬𑀫𑁂𑀢𑀁 𑀯𑀸𑀭𑀺𑀚𑀁 𑀧𑀼𑀧𑁆𑀨𑀁, 𑀅𑀤𑀺𑀦𑁆𑀦𑀁 𑀉𑀧𑀲𑀺𑀗𑁆𑀖𑀲𑀺;

𑀏𑀓𑀗𑁆𑀕𑀫𑁂𑀢𑀁 𑀣𑁂𑀬𑁆𑀬𑀸𑀦𑀁, 𑀕𑀦𑁆𑀥𑀢𑁆𑀣𑁂𑀦𑁄𑀲𑀺 𑀫𑀸𑀭𑀺𑀲𑀸’’𑀢𑀺.

‘‘𑀦 𑀳𑀭𑀸𑀫𑀺 𑀦 𑀪𑀜𑁆𑀚𑀸𑀫𑀺, 𑀆𑀭𑀸 𑀲𑀺𑀗𑁆𑀖𑀸𑀫𑀺 𑀯𑀸𑀭𑀺𑀚𑀁;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀢𑁆𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀬𑁆𑀯𑀸𑀬𑀁 𑀪𑀺𑀲𑀸𑀦𑀺 𑀔𑀦𑀢𑀺, 𑀧𑀼𑀡𑁆𑀟𑀭𑀻𑀓𑀸𑀦𑀺 𑀪𑀜𑁆𑀚𑀢𑀺;

𑀏𑀯𑀁 𑀆𑀓𑀺𑀡𑁆𑀡𑀓𑀫𑁆𑀫𑀦𑁆𑀢𑁄, 𑀓𑀲𑁆𑀫𑀸 𑀏𑀲𑁄 𑀦 𑀯𑀼𑀘𑁆𑀘𑀢𑀻’’𑀢𑀺.

‘‘𑀆𑀓𑀺𑀡𑁆𑀡𑀮𑀼𑀤𑁆𑀤𑁄 𑀧𑀼𑀭𑀺𑀲𑁄, 𑀥𑀸𑀢𑀺𑀘𑁂𑀮𑀁𑀯 𑀫𑀓𑁆𑀔𑀺𑀢𑁄;

𑀢𑀲𑁆𑀫𑀺𑀁 𑀫𑁂 𑀯𑀘𑀦𑀁 𑀦𑀢𑁆𑀣𑀺, 𑀢𑁆𑀯𑀜𑁆𑀘𑀸𑀭𑀳𑀸𑀫𑀺 𑀯𑀢𑁆𑀢𑀯𑁂.

‘‘𑀅𑀦𑀗𑁆𑀕𑀡𑀲𑁆𑀲 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀲𑀼𑀘𑀺𑀕𑀯𑁂𑀲𑀺𑀦𑁄;

𑀯𑀸𑀮𑀕𑁆𑀕𑀫𑀢𑁆𑀢𑀁 𑀧𑀸𑀧𑀲𑁆𑀲, 𑀅𑀩𑁆𑀪𑀸𑀫𑀢𑁆𑀢𑀁𑀯 𑀔𑀸𑀬𑀢𑀻’’𑀢𑀺.

‘‘𑀅𑀤𑁆𑀥𑀸 𑀫𑀁 𑀬𑀓𑁆𑀔 𑀚𑀸𑀦𑀸𑀲𑀺, 𑀅𑀣𑁄 𑀫𑁂 𑀅𑀦𑀼𑀓𑀫𑁆𑀧𑀲𑀺;

𑀧𑀼𑀦𑀧𑀺 𑀬𑀓𑁆𑀔 𑀯𑀚𑁆𑀚𑀸𑀲𑀺, 𑀬𑀤𑀸 𑀧𑀲𑁆𑀲𑀲𑀺 𑀏𑀤𑀺𑀲’’𑀦𑁆𑀢𑀺.

‘‘𑀦𑁂𑀯 𑀢𑀁 𑀉𑀧𑀚𑀻𑀯𑀸𑀫, 𑀦𑀧𑀺 𑀢𑁂 𑀪𑀢𑀓𑀸𑀫𑁆𑀳𑀲𑁂;

𑀢𑁆𑀯𑀫𑁂𑀯 𑀪𑀺𑀓𑁆𑀔𑀼 𑀚𑀸𑀦𑁂𑀬𑁆𑀬, 𑀬𑁂𑀦 𑀕𑀘𑁆𑀙𑁂𑀬𑁆𑀬 𑀲𑀼𑀕𑁆𑀕𑀢𑀺’’𑀦𑁆𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀸𑀬 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑁄 𑀲𑀁𑀯𑁂𑀕𑀫𑀸𑀧𑀸𑀤𑀻𑀢𑀺.

𑀯𑀦𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.