𑁪. 𑀆𑀦𑀦𑁆𑀤𑀲𑀼𑀢𑁆𑀢𑀁

𑁨𑁧𑁨. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺 𑀆𑀬𑀲𑁆𑀫𑀢𑀸 𑀯𑀗𑁆𑀕𑀻𑀲𑁂𑀦 𑀧𑀘𑁆𑀙𑀸𑀲𑀫𑀡𑁂𑀦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀸𑀫𑀭𑀸𑀕𑁂𑀦 𑀟𑀬𑁆𑀳𑀸𑀫𑀺, 𑀘𑀺𑀢𑁆𑀢𑀁 𑀫𑁂 𑀧𑀭𑀺𑀟𑀬𑁆𑀳𑀢𑀺;

𑀲𑀸𑀥𑀼 𑀦𑀺𑀩𑁆𑀩𑀸𑀧𑀦𑀁 𑀩𑁆𑀭𑀽𑀳𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑀸’’𑀢𑀺.

‘‘𑀲𑀜𑁆𑀜𑀸𑀬 𑀯𑀺𑀧𑀭𑀺𑀬𑁂𑀲𑀸, 𑀘𑀺𑀢𑁆𑀢𑀁 𑀢𑁂 𑀧𑀭𑀺𑀟𑀬𑁆𑀳𑀢𑀺;

𑀦𑀺𑀫𑀺𑀢𑁆𑀢𑀁 𑀧𑀭𑀺𑀯𑀚𑁆𑀚𑁂𑀳𑀺, 𑀲𑀼𑀪𑀁 𑀭𑀸𑀕𑀽𑀧𑀲𑀁𑀳𑀺𑀢𑀁.

‘‘𑀲𑀗𑁆𑀔𑀸𑀭𑁂 𑀧𑀭𑀢𑁄 𑀧𑀲𑁆𑀲, 𑀤𑀼𑀓𑁆𑀔𑀢𑁄 𑀫𑀸 𑀘 𑀅𑀢𑁆𑀢𑀢𑁄;

𑀦𑀺𑀩𑁆𑀩𑀸𑀧𑁂𑀳𑀺 𑀫𑀳𑀸𑀭𑀸𑀕𑀁, 𑀫𑀸 𑀟𑀬𑁆𑀳𑀺𑀢𑁆𑀣𑁄 𑀧𑀼𑀦𑀧𑁆𑀧𑀼𑀦𑀁.

‘‘𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁;

𑀲𑀢𑀺 𑀓𑀸𑀬𑀕𑀢𑀸 𑀢𑁆𑀬𑀢𑁆𑀣𑀼, 𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄 𑀪𑀯.

‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺.