𑁮. 𑀯𑀗𑁆𑀕𑀻𑀲𑀲𑀁𑀬𑀼𑀢𑁆𑀢𑀁

𑁧. 𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀁

𑁨𑁦𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀆𑀬𑀲𑁆𑀫𑀢𑀸 𑀦𑀺𑀕𑁆𑀭𑁄𑀥𑀓𑀧𑁆𑀧𑁂𑀦 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀦𑀯𑀓𑁄 𑀳𑁄𑀢𑀺 𑀅𑀘𑀺𑀭𑀧𑀩𑁆𑀩𑀚𑀺𑀢𑁄 𑀑𑀳𑀺𑀬𑁆𑀬𑀓𑁄 𑀯𑀺𑀳𑀸𑀭𑀧𑀸𑀮𑁄. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀲𑀫𑀮𑀗𑁆𑀓𑀭𑀺𑀢𑁆𑀯𑀸 𑀬𑁂𑀦 𑀅𑀕𑁆𑀕𑀸𑀴𑀯𑀓𑁄 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 𑀯𑀺𑀳𑀸𑀭𑀧𑁂𑀓𑁆𑀔𑀺𑀓𑀸𑀬𑁄. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀢𑀸 𑀇𑀢𑁆𑀣𑀺𑀬𑁄 𑀤𑀺𑀲𑁆𑀯𑀸 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀮𑀸𑀪𑀸 𑀯𑀢 𑀫𑁂, 𑀦 𑀯𑀢 𑀫𑁂 𑀮𑀸𑀪𑀸; 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂, 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀁; 𑀬𑀲𑁆𑀲 𑀫𑁂 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸, 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸, 𑀬𑀁 𑀫𑁂 𑀧𑀭𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀬𑀁𑀦𑀽𑀦𑀸𑀳𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀦𑀺𑀓𑁆𑀔𑀦𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀯𑀺𑀢𑀓𑁆𑀓𑀸 𑀉𑀧𑀥𑀸𑀯𑀦𑁆𑀢𑀺, 𑀧𑀕𑀩𑁆𑀪𑀸 𑀓𑀡𑁆𑀳𑀢𑁄 𑀇𑀫𑁂.

‘‘𑀉𑀕𑁆𑀕𑀧𑀼𑀢𑁆𑀢𑀸 𑀫𑀳𑀺𑀲𑁆𑀲𑀸𑀲𑀸, 𑀲𑀺𑀓𑁆𑀔𑀺𑀢𑀸 𑀤𑀴𑁆𑀳𑀥𑀫𑁆𑀫𑀺𑀦𑁄;

𑀲𑀫𑀦𑁆𑀢𑀸 𑀧𑀭𑀺𑀓𑀺𑀭𑁂𑀬𑁆𑀬𑀼𑀁, 𑀲𑀳𑀲𑁆𑀲𑀁 𑀅𑀧𑀮𑀸𑀬𑀺𑀦𑀁.

‘‘𑀲𑀘𑁂𑀧𑀺 𑀏𑀢𑀢𑁄 [𑀏𑀢𑁆𑀢𑀢𑁄 (𑀲𑀻. 𑀧𑀻. 𑀓.), 𑀏𑀢𑁆𑀢𑀓𑀸 (𑀲𑁆𑀬𑀸. 𑀓𑀁.)] 𑀪𑀺𑀬𑁆𑀬𑁄, 𑀆𑀕𑀫𑀺𑀲𑁆𑀲𑀦𑁆𑀢𑀺 𑀇𑀢𑁆𑀣𑀺𑀬𑁄;

𑀦𑁂𑀯 𑀫𑀁 𑀩𑁆𑀬𑀸𑀥𑀬𑀺𑀲𑁆𑀲𑀦𑁆𑀢𑀺 [𑀩𑁆𑀬𑀸𑀣𑀬𑀺𑀲𑁆𑀲𑀦𑁆𑀢𑀺 (?)], 𑀥𑀫𑁆𑀫𑁂 𑀲𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀁.

‘‘𑀲𑀓𑁆𑀔𑀻 𑀳𑀺 𑀫𑁂 𑀲𑀼𑀢𑀁 𑀏𑀢𑀁, 𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀢𑀢𑁆𑀣 𑀫𑁂 𑀦𑀺𑀭𑀢𑁄 𑀫𑀦𑁄.

‘‘𑀏𑀯𑀜𑁆𑀘𑁂 𑀫𑀁 𑀯𑀺𑀳𑀭𑀦𑁆𑀢𑀁, 𑀧𑀸𑀧𑀺𑀫 𑀉𑀧𑀕𑀘𑁆𑀙𑀲𑀺;

𑀢𑀣𑀸 𑀫𑀘𑁆𑀘𑀼 𑀓𑀭𑀺𑀲𑁆𑀲𑀸𑀫𑀺, 𑀦 𑀫𑁂 𑀫𑀕𑁆𑀕𑀫𑁆𑀧𑀺 𑀤𑀓𑁆𑀔𑀲𑀻’’𑀢𑀺.

𑁨. 𑀅𑀭𑀢𑀺𑀲𑀼𑀢𑁆𑀢𑀁

𑁨𑁧𑁦. 𑀏𑀓𑀁 𑀲𑀫𑀬𑀁…𑀧𑁂… 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀆𑀬𑀲𑁆𑀫𑀢𑀸 𑀦𑀺𑀕𑁆𑀭𑁄𑀥𑀓𑀧𑁆𑀧𑁂𑀦 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀦𑀺𑀕𑁆𑀭𑁄𑀥𑀓𑀧𑁆𑀧𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀢𑀺, 𑀲𑀸𑀬𑀁 𑀯𑀸 𑀦𑀺𑀓𑁆𑀔𑀫𑀢𑀺 𑀅𑀧𑀭𑀚𑁆𑀚𑀼 𑀯𑀸 𑀓𑀸𑀮𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀮𑀸𑀪𑀸 𑀯𑀢 𑀫𑁂, 𑀦 𑀯𑀢 𑀫𑁂 𑀮𑀸𑀪𑀸; 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂, 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀁; 𑀬𑀲𑁆𑀲 𑀫𑁂 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸, 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺; 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸, 𑀬𑀁 𑀫𑁂 𑀧𑀭𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀬𑀁𑀦𑀽𑀦𑀸𑀳𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀅𑀭𑀢𑀺𑀜𑁆𑀘 𑀭𑀢𑀺𑀜𑁆𑀘 𑀧𑀳𑀸𑀬, 𑀲𑀩𑁆𑀩𑀲𑁄 𑀕𑁂𑀳𑀲𑀺𑀢𑀜𑁆𑀘 𑀯𑀺𑀢𑀓𑁆𑀓𑀁;

𑀯𑀦𑀣𑀁 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺, 𑀦𑀺𑀩𑁆𑀩𑀦𑀣𑁄 𑀅𑀭𑀢𑁄 𑀲 𑀳𑀺 𑀪𑀺𑀓𑁆𑀔𑀼 [𑀲 𑀪𑀺𑀓𑁆𑀔𑀼 (𑀓.)].

‘‘𑀬𑀫𑀺𑀥 𑀧𑀣𑀯𑀺𑀜𑁆𑀘 𑀯𑁂𑀳𑀸𑀲𑀁, 𑀭𑀽𑀧𑀕𑀢𑀜𑁆𑀘 𑀚𑀕𑀢𑁄𑀕𑀥𑀁;

𑀓𑀺𑀜𑁆𑀘𑀺 𑀧𑀭𑀺𑀚𑀻𑀬𑀢𑀺 𑀲𑀩𑁆𑀩𑀫𑀦𑀺𑀘𑁆𑀘𑀁, 𑀏𑀯𑀁 𑀲𑀫𑁂𑀘𑁆𑀘 𑀘𑀭𑀦𑁆𑀢𑀺 𑀫𑀼𑀢𑀢𑁆𑀢𑀸.

‘‘𑀉𑀧𑀥𑀻𑀲𑀼 𑀚𑀦𑀸 𑀕𑀥𑀺𑀢𑀸𑀲𑁂 [𑀕𑀣𑀺𑀢𑀸𑀲𑁂 (𑀲𑀻.)], 𑀤𑀺𑀝𑁆𑀞𑀲𑀼𑀢𑁂 𑀧𑀝𑀺𑀖𑁂 𑀘 𑀫𑀼𑀢𑁂 𑀘;

𑀏𑀢𑁆𑀣 𑀯𑀺𑀦𑁄𑀤𑀬 𑀙𑀦𑁆𑀤𑀫𑀦𑁂𑀚𑁄, 𑀬𑁄 𑀏𑀢𑁆𑀣 𑀦 𑀮𑀺𑀫𑁆𑀧𑀢𑀺 𑀢𑀁 𑀫𑀼𑀦𑀺𑀫𑀸𑀳𑀼.

‘‘𑀅𑀣 𑀲𑀝𑁆𑀞𑀺𑀦𑀺𑀲𑁆𑀲𑀺𑀢𑀸 𑀲𑀯𑀺𑀢𑀓𑁆𑀓𑀸, 𑀧𑀼𑀣𑀽 𑀚𑀦𑀢𑀸𑀬 𑀅𑀥𑀫𑁆𑀫𑀸 𑀦𑀺𑀯𑀺𑀝𑁆𑀞𑀸;

𑀦 𑀘 𑀯𑀕𑁆𑀕𑀕𑀢𑀲𑁆𑀲 𑀓𑀼𑀳𑀺𑀜𑁆𑀘𑀺, 𑀦𑁄 𑀧𑀦 𑀤𑀼𑀝𑁆𑀞𑀼𑀮𑁆𑀮𑀪𑀸𑀡𑀻 𑀲 𑀪𑀺𑀓𑁆𑀔𑀼.

‘‘𑀤𑀩𑁆𑀩𑁄 𑀘𑀺𑀭𑀭𑀢𑁆𑀢𑀲𑀫𑀸𑀳𑀺𑀢𑁄, 𑀅𑀓𑀼𑀳𑀓𑁄 𑀦𑀺𑀧𑀓𑁄 𑀅𑀧𑀺𑀳𑀸𑀮𑀼;

𑀲𑀦𑁆𑀢𑀁 𑀧𑀤𑀁 𑀅𑀚𑁆𑀛𑀕𑀫𑀸 𑀫𑀼𑀦𑀺 𑀧𑀝𑀺𑀘𑁆𑀘, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀓𑀗𑁆𑀔𑀢𑀺 𑀓𑀸𑀮’’𑀦𑁆𑀢𑀺.

𑁩. 𑀧𑁂𑀲𑀮𑀲𑀼𑀢𑁆𑀢𑀁

𑁨𑁧𑁧. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀆𑀬𑀲𑁆𑀫𑀢𑀸 𑀦𑀺𑀕𑁆𑀭𑁄𑀥𑀓𑀧𑁆𑀧𑁂𑀦 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑁂𑀦 𑀅𑀜𑁆𑀜𑁂 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀅𑀢𑀺𑀫𑀜𑁆𑀜𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀮𑀸𑀪𑀸 𑀯𑀢 𑀫𑁂, 𑀦 𑀯𑀢 𑀫𑁂 𑀮𑀸𑀪𑀸; 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂, 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀁; 𑀬𑁆𑀯𑀸𑀳𑀁 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑁂𑀦 𑀅𑀜𑁆𑀜𑁂 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀅𑀢𑀺𑀫𑀜𑁆𑀜𑀸𑀫𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀫𑀸𑀦𑀁 𑀧𑀚𑀳𑀲𑁆𑀲𑀼 𑀕𑁄𑀢𑀫, 𑀫𑀸𑀦𑀧𑀣𑀜𑁆𑀘 𑀧𑀚𑀳𑀲𑁆𑀲𑀼;

𑀅𑀲𑁂𑀲𑀁 𑀫𑀸𑀦𑀧𑀣𑀲𑁆𑀫𑀺𑀁, 𑀲𑀫𑀼𑀘𑁆𑀙𑀺𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑀻𑀳𑀼𑀯𑀸 𑀘𑀺𑀭𑀭𑀢𑁆𑀢𑀁.

‘‘𑀫𑀓𑁆𑀔𑁂𑀦 𑀫𑀓𑁆𑀔𑀺𑀢𑀸 𑀧𑀚𑀸, 𑀫𑀸𑀦𑀳𑀢𑀸 𑀦𑀺𑀭𑀬𑀁 𑀧𑀧𑀢𑀦𑁆𑀢𑀺;

𑀲𑁄𑀘𑀦𑁆𑀢𑀺 𑀚𑀦𑀸 𑀘𑀺𑀭𑀭𑀢𑁆𑀢𑀁, 𑀫𑀸𑀦𑀳𑀢𑀸 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸.

‘‘𑀦 𑀳𑀺 𑀲𑁄𑀘𑀢𑀺 𑀪𑀺𑀓𑁆𑀔𑀼 𑀓𑀤𑀸𑀘𑀺, 𑀫𑀕𑁆𑀕𑀚𑀺𑀦𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄;

𑀓𑀺𑀢𑁆𑀢𑀺𑀜𑁆𑀘 𑀲𑀼𑀔𑀜𑁆𑀘 𑀅𑀦𑀼𑀪𑁄𑀢𑀺, 𑀥𑀫𑁆𑀫𑀤𑀲𑁄𑀢𑀺 𑀢𑀫𑀸𑀳𑀼 𑀧𑀳𑀺𑀢𑀢𑁆𑀢𑀁.

‘‘𑀢𑀲𑁆𑀫𑀸 𑀅𑀔𑀺𑀮𑁄𑀥 𑀧𑀥𑀸𑀦𑀯𑀸, 𑀦𑀻𑀯𑀭𑀡𑀸𑀦𑀺 𑀧𑀳𑀸𑀬 𑀯𑀺𑀲𑀼𑀤𑁆𑀥𑁄;

𑀫𑀸𑀦𑀜𑁆𑀘 𑀧𑀳𑀸𑀬 𑀅𑀲𑁂𑀲𑀁, 𑀯𑀺𑀚𑁆𑀚𑀸𑀬𑀦𑁆𑀢𑀓𑀭𑁄 𑀲𑀫𑀺𑀢𑀸𑀯𑀻’’𑀢𑀺.

𑁪. 𑀆𑀦𑀦𑁆𑀤𑀲𑀼𑀢𑁆𑀢𑀁

𑁨𑁧𑁨. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺 𑀆𑀬𑀲𑁆𑀫𑀢𑀸 𑀯𑀗𑁆𑀕𑀻𑀲𑁂𑀦 𑀧𑀘𑁆𑀙𑀸𑀲𑀫𑀡𑁂𑀦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀸𑀫𑀭𑀸𑀕𑁂𑀦 𑀟𑀬𑁆𑀳𑀸𑀫𑀺, 𑀘𑀺𑀢𑁆𑀢𑀁 𑀫𑁂 𑀧𑀭𑀺𑀟𑀬𑁆𑀳𑀢𑀺;

𑀲𑀸𑀥𑀼 𑀦𑀺𑀩𑁆𑀩𑀸𑀧𑀦𑀁 𑀩𑁆𑀭𑀽𑀳𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑀸’’𑀢𑀺.

‘‘𑀲𑀜𑁆𑀜𑀸𑀬 𑀯𑀺𑀧𑀭𑀺𑀬𑁂𑀲𑀸, 𑀘𑀺𑀢𑁆𑀢𑀁 𑀢𑁂 𑀧𑀭𑀺𑀟𑀬𑁆𑀳𑀢𑀺;

𑀦𑀺𑀫𑀺𑀢𑁆𑀢𑀁 𑀧𑀭𑀺𑀯𑀚𑁆𑀚𑁂𑀳𑀺, 𑀲𑀼𑀪𑀁 𑀭𑀸𑀕𑀽𑀧𑀲𑀁𑀳𑀺𑀢𑀁.

‘‘𑀲𑀗𑁆𑀔𑀸𑀭𑁂 𑀧𑀭𑀢𑁄 𑀧𑀲𑁆𑀲, 𑀤𑀼𑀓𑁆𑀔𑀢𑁄 𑀫𑀸 𑀘 𑀅𑀢𑁆𑀢𑀢𑁄;

𑀦𑀺𑀩𑁆𑀩𑀸𑀧𑁂𑀳𑀺 𑀫𑀳𑀸𑀭𑀸𑀕𑀁, 𑀫𑀸 𑀟𑀬𑁆𑀳𑀺𑀢𑁆𑀣𑁄 𑀧𑀼𑀦𑀧𑁆𑀧𑀼𑀦𑀁.

‘‘𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁;

𑀲𑀢𑀺 𑀓𑀸𑀬𑀕𑀢𑀸 𑀢𑁆𑀬𑀢𑁆𑀣𑀼, 𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄 𑀪𑀯.

‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺.

𑁫. 𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀁

𑁨𑁧𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸 𑀳𑁄𑀢𑀺, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸; 𑀅𑀦𑀯𑀚𑁆𑀚𑀸 𑀘 𑀅𑀦𑀦𑀼𑀯𑀚𑁆𑀚𑀸 𑀘 𑀯𑀺𑀜𑁆𑀜𑀽𑀦𑀁. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀪𑀸𑀲𑀺𑀢𑀁𑀬𑁂𑀯 𑀪𑀸𑀲𑀢𑀺 𑀦𑁄 𑀤𑀼𑀩𑁆𑀪𑀸𑀲𑀺𑀢𑀁, 𑀥𑀫𑁆𑀫𑀁𑀬𑁂𑀯 𑀪𑀸𑀲𑀢𑀺 𑀦𑁄 𑀅𑀥𑀫𑁆𑀫𑀁, 𑀧𑀺𑀬𑀁𑀬𑁂𑀯 𑀪𑀸𑀲𑀢𑀺 𑀦𑁄 𑀅𑀧𑁆𑀧𑀺𑀬𑀁, 𑀲𑀘𑁆𑀘𑀁𑀬𑁂𑀯 𑀪𑀸𑀲𑀢𑀺 𑀦𑁄 𑀅𑀮𑀺𑀓𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸 𑀳𑁄𑀢𑀺, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸, 𑀅𑀦𑀯𑀚𑁆𑀚𑀸 𑀘 𑀅𑀦𑀦𑀼𑀯𑀚𑁆𑀚𑀸 𑀘 𑀯𑀺𑀜𑁆𑀜𑀽𑀦’’𑀦𑁆𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀲𑀼𑀪𑀸𑀲𑀺𑀢𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄,

𑀥𑀫𑁆𑀫𑀁 𑀪𑀡𑁂 𑀦𑀸𑀥𑀫𑁆𑀫𑀁 𑀢𑀁 𑀤𑀼𑀢𑀺𑀬𑀁;

𑀧𑀺𑀬𑀁 𑀪𑀡𑁂 𑀦𑀸𑀧𑁆𑀧𑀺𑀬𑀁 𑀢𑀁 𑀢𑀢𑀺𑀬𑀁,

𑀲𑀘𑁆𑀘𑀁 𑀪𑀡𑁂 𑀦𑀸𑀮𑀺𑀓𑀁 𑀢𑀁 𑀘𑀢𑀼𑀢𑁆𑀣’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁 𑀪𑀕𑀯𑀸, 𑀧𑀝𑀺𑀪𑀸𑀢𑀺 𑀫𑀁 𑀲𑀼𑀕𑀢𑀸’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁 𑀯𑀗𑁆𑀕𑀻𑀲𑀸’’𑀢𑀺 𑀪𑀕𑀯𑀸 𑀅𑀯𑁄𑀘. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺 𑁋

‘‘𑀢𑀫𑁂𑀯 𑀯𑀸𑀘𑀁 𑀪𑀸𑀲𑁂𑀬𑁆𑀬, 𑀬𑀸𑀬𑀢𑁆𑀢𑀸𑀦𑀁 𑀦 𑀢𑀸𑀧𑀬𑁂;

𑀧𑀭𑁂 𑀘 𑀦 𑀯𑀺𑀳𑀺𑀁𑀲𑁂𑀬𑁆𑀬, 𑀲𑀸 𑀯𑁂 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸.

‘‘𑀧𑀺𑀬𑀯𑀸𑀘𑀁𑀯 𑀪𑀸𑀲𑁂𑀬𑁆𑀬, 𑀬𑀸 𑀯𑀸𑀘𑀸 𑀧𑀝𑀺𑀦𑀦𑁆𑀤𑀺𑀢𑀸;

𑀬𑀁 𑀅𑀦𑀸𑀤𑀸𑀬 𑀧𑀸𑀧𑀸𑀦𑀺, 𑀧𑀭𑁂𑀲𑀁 𑀪𑀸𑀲𑀢𑁂 𑀧𑀺𑀬𑀁.

‘‘𑀲𑀘𑁆𑀘𑀁 𑀯𑁂 𑀅𑀫𑀢𑀸 𑀯𑀸𑀘𑀸, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄;

𑀲𑀘𑁆𑀘𑁂 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀆𑀳𑀼 𑀲𑀦𑁆𑀢𑁄 𑀧𑀢𑀺𑀝𑁆𑀞𑀺𑀢𑀸.

‘‘𑀬𑀁 𑀩𑀼𑀤𑁆𑀥𑁄 𑀪𑀸𑀲𑀢𑁂 𑀯𑀸𑀘𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀲𑀸 𑀯𑁂 𑀯𑀸𑀘𑀸𑀦𑀫𑀼𑀢𑁆𑀢𑀫𑀸’’𑀢𑀺.

𑁬. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀁

𑁨𑁧𑁪. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀮𑀸𑀬 [𑀅𑀦𑁂𑀴𑀕𑀮𑀸𑀬 (𑀲𑀻. 𑀓.), 𑀅𑀦𑁂𑀮𑀕𑀴𑀸𑀬 (𑀲𑁆𑀬𑀸. 𑀓𑀁. 𑀧𑀻.)] 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀮𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀧𑀝𑀺𑀪𑀸𑀢𑀺 𑀫𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁, 𑀆𑀯𑀼𑀲𑁄 𑀯𑀗𑁆𑀕𑀻𑀲𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺 𑁋

‘‘𑀕𑀫𑁆𑀪𑀻𑀭𑀧𑀜𑁆𑀜𑁄 𑀫𑁂𑀥𑀸𑀯𑀻, 𑀫𑀕𑁆𑀕𑀸𑀫𑀕𑁆𑀕𑀲𑁆𑀲 𑀓𑁄𑀯𑀺𑀤𑁄;

𑀲𑀸𑀭𑀺𑀧𑀼𑀢𑁆𑀢𑁄 𑀫𑀳𑀸𑀧𑀜𑁆𑀜𑁄, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀪𑀺𑀓𑁆𑀔𑀼𑀦𑀁.

‘‘𑀲𑀁𑀔𑀺𑀢𑁆𑀢𑁂𑀦𑀧𑀺 𑀤𑁂𑀲𑁂𑀢𑀺, 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀢𑀺;

𑀲𑀸𑀴𑀺𑀓𑀸𑀬𑀺𑀯 𑀦𑀺𑀕𑁆𑀖𑁄𑀲𑁄, 𑀧𑀝𑀺𑀪𑀸𑀦𑀁 𑀉𑀤𑀻𑀭𑀬𑀺 [𑀉𑀤𑀻𑀭𑀺𑀬𑀺 (𑀲𑁆𑀬𑀸. 𑀓𑀁.) 𑀉𑀤𑀻𑀭𑀺𑀬𑀢𑀺 (𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀝𑀻𑀓𑀸𑀦𑀼𑀭𑀽𑀧𑀁)].

‘‘𑀢𑀲𑁆𑀲 𑀢𑀁 𑀤𑁂𑀲𑀬𑀦𑁆𑀢𑀲𑁆𑀲, 𑀲𑀼𑀡𑀦𑁆𑀢𑀺 𑀫𑀥𑀼𑀭𑀁 𑀕𑀺𑀭𑀁;

𑀲𑀭𑁂𑀦 𑀭𑀚𑀦𑀻𑀬𑁂𑀦, 𑀲𑀯𑀦𑀻𑀬𑁂𑀦 𑀯𑀕𑁆𑀕𑀼𑀦𑀸;

𑀉𑀤𑀕𑁆𑀕𑀘𑀺𑀢𑁆𑀢𑀸 𑀫𑀼𑀤𑀺𑀢𑀸, 𑀲𑁄𑀢𑀁 𑀑𑀥𑁂𑀦𑁆𑀢𑀺 𑀪𑀺𑀓𑁆𑀔𑀯𑁄’’𑀢𑀺.

𑁭. 𑀧𑀯𑀸𑀭𑀡𑀸𑀲𑀼𑀢𑁆𑀢𑀁

𑁨𑁧𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀧𑀯𑀸𑀭𑀡𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀼𑀡𑁆𑀳𑀻𑀪𑀽𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀳𑀦𑁆𑀤 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑁂𑀫𑀺 𑀯𑁄. 𑀦 𑀘 𑀫𑁂 𑀓𑀺𑀜𑁆𑀘𑀺 𑀕𑀭𑀳𑀣 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀓𑀺𑀜𑁆𑀘𑀺 𑀕𑀭𑀳𑀸𑀫 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸. 𑀪𑀕𑀯𑀸 𑀳𑀺, 𑀪𑀦𑁆𑀢𑁂, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄. 𑀫𑀕𑁆𑀕𑀸𑀦𑀼𑀕𑀸 𑀘, 𑀪𑀦𑁆𑀢𑁂, 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸; 𑀅𑀳𑀜𑁆𑀘 𑀔𑁄, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀧𑀯𑀸𑀭𑁂𑀫𑀺. 𑀦 𑀘 𑀫𑁂 𑀪𑀕𑀯𑀸 𑀓𑀺𑀜𑁆𑀘𑀺 𑀕𑀭𑀳𑀢𑀺 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸’’𑀢𑀺.

‘‘𑀦 𑀔𑁆𑀯𑀸𑀳𑀁 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀜𑁆𑀘𑀺 𑀕𑀭𑀳𑀸𑀫𑀺 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸. 𑀧𑀡𑁆𑀟𑀺𑀢𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀫𑀳𑀸𑀧𑀜𑁆𑀜𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀼𑀣𑀼𑀧𑀜𑁆𑀜𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀳𑀸𑀲𑀧𑀜𑁆𑀜𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀚𑀯𑀦𑀧𑀜𑁆𑀜𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀢𑀺𑀓𑁆𑀔𑀧𑀜𑁆𑀜𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢. 𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀚𑁂𑀝𑁆𑀞𑀧𑀼𑀢𑁆𑀢𑁄 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀁 𑀲𑀫𑁆𑀫𑀤𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺; 𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀫𑀬𑀸 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀲𑀫𑁆𑀫𑀤𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀲𑀻’’𑀢𑀺.

‘‘𑀦𑁄 𑀘𑁂 𑀓𑀺𑀭 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀓𑀺𑀜𑁆𑀘𑀺 𑀕𑀭𑀳𑀢𑀺 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸. 𑀇𑀫𑁂𑀲𑀁 𑀧𑀦, 𑀪𑀦𑁆𑀢𑁂, 𑀪𑀕𑀯𑀸 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀦 𑀓𑀺𑀜𑁆𑀘𑀺 𑀕𑀭𑀳𑀢𑀺 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸’’𑀢𑀺. ‘‘𑀇𑀫𑁂𑀲𑀫𑁆𑀧𑀺 𑀔𑁆𑀯𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀦 𑀓𑀺𑀜𑁆𑀘𑀺 𑀕𑀭𑀳𑀸𑀫𑀺 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸. 𑀇𑀫𑁂𑀲𑀜𑁆𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀢𑁂𑀯𑀺𑀚𑁆𑀚𑀸, 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀙𑀴𑀪𑀺𑀜𑁆𑀜𑀸, 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸, 𑀅𑀣 𑀇𑀢𑀭𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁 𑀪𑀕𑀯𑀸, 𑀧𑀝𑀺𑀪𑀸𑀢𑀺 𑀫𑀁 𑀲𑀼𑀕𑀢𑀸’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁, 𑀯𑀗𑁆𑀕𑀻𑀲𑀸’’𑀢𑀺 𑀪𑀕𑀯𑀸 𑀅𑀯𑁄𑀘. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺 𑁋

‘‘𑀅𑀚𑁆𑀚 𑀧𑀦𑁆𑀦𑀭𑀲𑁂 𑀯𑀺𑀲𑀼𑀤𑁆𑀥𑀺𑀬𑀸, 𑀪𑀺𑀓𑁆𑀔𑀽 𑀧𑀜𑁆𑀘𑀲𑀢𑀸 𑀲𑀫𑀸𑀕𑀢𑀸;

𑀲𑀁𑀬𑁄𑀚𑀦𑀩𑀦𑁆𑀥𑀦𑀘𑁆𑀙𑀺𑀤𑀸, 𑀅𑀦𑀻𑀖𑀸 𑀔𑀻𑀡𑀧𑀼𑀦𑀩𑁆𑀪𑀯𑀸 𑀇𑀲𑀻.

‘‘𑀘𑀓𑁆𑀓𑀯𑀢𑁆𑀢𑀻 𑀬𑀣𑀸 𑀭𑀸𑀚𑀸, 𑀅𑀫𑀘𑁆𑀘𑀧𑀭𑀺𑀯𑀸𑀭𑀺𑀢𑁄;

𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑁂𑀢𑀺, 𑀲𑀸𑀕𑀭𑀦𑁆𑀢𑀁 𑀫𑀳𑀺𑀁 𑀇𑀫𑀁.

‘‘𑀏𑀯𑀁 𑀯𑀺𑀚𑀺𑀢𑀲𑀗𑁆𑀕𑀸𑀫𑀁, 𑀲𑀢𑁆𑀣𑀯𑀸𑀳𑀁 𑀅𑀦𑀼𑀢𑁆𑀢𑀭𑀁;

𑀲𑀸𑀯𑀓𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑁄.

‘‘𑀲𑀩𑁆𑀩𑁂 𑀪𑀕𑀯𑀢𑁄 𑀧𑀼𑀢𑁆𑀢𑀸, 𑀧𑀮𑀸𑀧𑁂𑀢𑁆𑀣 𑀦 𑀯𑀺𑀚𑁆𑀚𑀢𑀺;

𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀳𑀦𑁆𑀢𑀸𑀭𑀁, 𑀯𑀦𑁆𑀤𑁂 𑀆𑀤𑀺𑀘𑁆𑀘𑀩𑀦𑁆𑀥𑀼𑀦’’𑀦𑁆𑀢𑀺.

𑁮. 𑀧𑀭𑁄𑀲𑀳𑀲𑁆𑀲𑀲𑀼𑀢𑁆𑀢𑀁

𑁨𑁧𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀮𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀪𑀺𑀓𑁆𑀔𑀽 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁 𑀪𑀕𑀯𑀸, 𑀧𑀝𑀺𑀪𑀸𑀢𑀺 𑀫𑀁 𑀲𑀼𑀕𑀢𑀸’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁, 𑀯𑀗𑁆𑀕𑀻𑀲𑀸’’𑀢𑀺 𑀪𑀕𑀯𑀸 𑀅𑀯𑁄𑀘. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺 𑁋

‘‘𑀧𑀭𑁄𑀲𑀳𑀲𑁆𑀲𑀁 𑀪𑀺𑀓𑁆𑀔𑀽𑀦𑀁, 𑀲𑀼𑀕𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀤𑁂𑀲𑁂𑀦𑁆𑀢𑀁 𑀯𑀺𑀭𑀚𑀁 𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀁 𑀅𑀓𑀼𑀢𑁄𑀪𑀬𑀁.

‘‘𑀲𑀼𑀡𑀦𑁆𑀢𑀺 𑀥𑀫𑁆𑀫𑀁 𑀯𑀺𑀫𑀮𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀲𑁄𑀪𑀢𑀺 𑀯𑀢 𑀲𑀫𑁆𑀩𑀼𑀤𑁆𑀥𑁄, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄.

‘‘𑀦𑀸𑀕𑀦𑀸𑀫𑁄𑀲𑀺 𑀪𑀕𑀯𑀸, 𑀇𑀲𑀻𑀦𑀁 𑀇𑀲𑀺𑀲𑀢𑁆𑀢𑀫𑁄;

𑀫𑀳𑀸𑀫𑁂𑀖𑁄𑀯 𑀳𑀼𑀢𑁆𑀯𑀸𑀦, 𑀲𑀸𑀯𑀓𑁂 𑀅𑀪𑀺𑀯𑀲𑁆𑀲𑀢𑀺.

‘‘𑀤𑀺𑀯𑀸𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀲𑀢𑁆𑀣𑀼𑀤𑀲𑁆𑀲𑀦𑀓𑀫𑁆𑀬𑀢𑀸 [𑀲𑀢𑁆𑀣𑀼𑀤𑀲𑁆𑀲𑀦𑀓𑀸𑀫𑀢𑀸 (𑀲𑀻. 𑀲𑁆𑀬𑀸. 𑀓𑀁.)];

𑀲𑀸𑀯𑀓𑁄 𑀢𑁂 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀢𑀺 𑀯𑀗𑁆𑀕𑀻𑀲𑁄’’𑀢𑀺.

‘‘𑀓𑀺𑀁 𑀦𑀼 𑀢𑁂, 𑀯𑀗𑁆𑀕𑀻𑀲, 𑀇𑀫𑀸 𑀕𑀸𑀣𑀸𑀬𑁄 𑀧𑀼𑀩𑁆𑀩𑁂 𑀧𑀭𑀺𑀯𑀺𑀢𑀓𑁆𑀓𑀺𑀢𑀸, 𑀉𑀤𑀸𑀳𑀼 𑀞𑀸𑀦𑀲𑁄𑀯 𑀢𑀁 𑀧𑀝𑀺𑀪𑀦𑁆𑀢𑀻’’𑀢𑀺? ‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀇𑀫𑀸 𑀕𑀸𑀣𑀸𑀬𑁄 𑀧𑀼𑀩𑁆𑀩𑁂 𑀧𑀭𑀺𑀯𑀺𑀢𑀓𑁆𑀓𑀺𑀢𑀸, 𑀅𑀣 𑀔𑁄 𑀞𑀸𑀦𑀲𑁄𑀯 𑀫𑀁 𑀧𑀝𑀺𑀪𑀦𑁆𑀢𑀻’𑀢𑀺. ‘𑀢𑁂𑀦 𑀳𑀺 𑀢𑀁, 𑀯𑀗𑁆𑀕𑀻𑀲, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀼𑀩𑁆𑀩𑁂 𑀅𑀧𑀭𑀺𑀯𑀺𑀢𑀓𑁆𑀓𑀺𑀢𑀸 𑀕𑀸𑀣𑀸𑀬𑁄 𑀧𑀝𑀺𑀪𑀦𑁆𑀢𑀽’𑀢𑀺. ‘𑀏𑀯𑀁, 𑀪𑀦𑁆𑀢𑁂’𑀢𑀺 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀪𑀕𑀯𑀦𑁆𑀢𑀁 𑀧𑀼𑀩𑁆𑀩𑁂 𑀅𑀧𑀭𑀺𑀯𑀺𑀢𑀓𑁆𑀓𑀺𑀢𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺 𑁋

‘‘𑀉𑀫𑁆𑀫𑀕𑁆𑀕𑀧𑀣𑀁 [𑀉𑀫𑁆𑀫𑀕𑁆𑀕𑀲𑀢𑀁 (𑀲𑁆𑀬𑀸. 𑀓𑀁. 𑀓.)] 𑀫𑀸𑀭𑀲𑁆𑀲 𑀅𑀪𑀺𑀪𑀼𑀬𑁆𑀬, 𑀘𑀭𑀢𑀺 𑀧𑀪𑀺𑀚𑁆𑀚 𑀔𑀺𑀮𑀸𑀦𑀺;

𑀢𑀁 𑀧𑀲𑁆𑀲𑀣 𑀩𑀦𑁆𑀥𑀧𑀫𑀼𑀜𑁆𑀘𑀓𑀭𑀁, 𑀅𑀲𑀺𑀢𑀁 𑀪𑀸𑀕𑀲𑁄 𑀧𑀯𑀺𑀪𑀚𑀁.

‘‘𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀁, 𑀅𑀦𑁂𑀓𑀯𑀺𑀳𑀺𑀢𑀁 𑀫𑀕𑁆𑀕𑀁 𑀅𑀓𑁆𑀔𑀸𑀲𑀺;

𑀢𑀲𑁆𑀫𑀺𑀜𑁆𑀘𑁂 𑀅𑀫𑀢𑁂 𑀅𑀓𑁆𑀔𑀸𑀢𑁂, 𑀥𑀫𑁆𑀫𑀤𑁆𑀤𑀲𑀸 𑀞𑀺𑀢𑀸 𑀅𑀲𑀁𑀳𑀻𑀭𑀸.

‘‘𑀧𑀚𑁆𑀚𑁄𑀢𑀓𑀭𑁄 𑀅𑀢𑀺𑀯𑀺𑀚𑁆𑀛 [𑀅𑀢𑀺𑀯𑀺𑀚𑁆𑀛 𑀥𑀫𑁆𑀫𑀁 (𑀲𑀻. 𑀲𑁆𑀬𑀸. 𑀓𑀁.)], 𑀲𑀩𑁆𑀩𑀝𑁆𑀞𑀺𑀢𑀻𑀦𑀁 𑀅𑀢𑀺𑀓𑁆𑀓𑀫𑀫𑀤𑁆𑀤𑀲;

𑀜𑀢𑁆𑀯𑀸 𑀘 𑀲𑀘𑁆𑀙𑀺𑀓𑀢𑁆𑀯𑀸 𑀘, 𑀅𑀕𑁆𑀕𑀁 𑀲𑁄 𑀤𑁂𑀲𑀬𑀺 𑀤𑀲𑀤𑁆𑀥𑀸𑀦𑀁.

‘‘𑀏𑀯𑀁 𑀲𑀼𑀤𑁂𑀲𑀺𑀢𑁂 𑀥𑀫𑁆𑀫𑁂,

𑀓𑁄 𑀧𑀫𑀸𑀤𑁄 𑀯𑀺𑀚𑀸𑀦𑀢𑀁 𑀥𑀫𑁆𑀫𑀁 [𑀓𑁄 𑀧𑀫𑀸𑀤𑁄 𑀯𑀺𑀚𑀸𑀦𑀢𑀁 (𑀲𑀻. 𑀲𑁆𑀬𑀸. 𑀓𑀁.)];

𑀢𑀲𑁆𑀫𑀸 𑀳𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂;

𑀅𑀧𑁆𑀧𑀫𑀢𑁆𑀢𑁄 𑀲𑀤𑀸 𑀦𑀫𑀲𑁆𑀲𑀫𑀦𑀼𑀲𑀺𑀓𑁆𑀔𑁂’’𑀢𑀺.

𑁯. 𑀓𑁄𑀡𑁆𑀟𑀜𑁆𑀜𑀲𑀼𑀢𑁆𑀢𑀁

𑁨𑁧𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 [𑀅𑀜𑁆𑀜𑀸𑀓𑁄𑀡𑁆𑀟𑀜𑁆𑀜𑁄 (𑀲𑀻. 𑀲𑁆𑀬𑀸. 𑀓𑀁.)] 𑀲𑀼𑀘𑀺𑀭𑀲𑁆𑀲𑁂𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀸𑀦𑀺 𑀫𑀼𑀔𑁂𑀦 𑀘 𑀧𑀭𑀺𑀘𑀼𑀫𑁆𑀩𑀢𑀺, 𑀧𑀸𑀡𑀻𑀳𑀺 𑀘 𑀧𑀭𑀺𑀲𑀫𑁆𑀩𑀸𑀳𑀢𑀺, 𑀦𑀸𑀫𑀜𑁆𑀘 𑀲𑀸𑀯𑁂𑀢𑀺 𑁋 ‘‘𑀓𑁄𑀡𑁆𑀟𑀜𑁆𑀜𑁄𑀳𑀁, 𑀪𑀕𑀯𑀸, 𑀓𑁄𑀡𑁆𑀟𑀜𑁆𑀜𑁄𑀳𑀁, 𑀲𑀼𑀕𑀢𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 𑀲𑀼𑀘𑀺𑀭𑀲𑁆𑀲𑁂𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀸𑀦𑀺 𑀫𑀼𑀔𑁂𑀦 𑀘 𑀧𑀭𑀺𑀘𑀼𑀫𑁆𑀩𑀢𑀺, 𑀧𑀸𑀡𑀻𑀳𑀺 𑀘 𑀧𑀭𑀺𑀲𑀫𑁆𑀩𑀸𑀳𑀢𑀺, 𑀦𑀸𑀫𑀜𑁆𑀘 𑀲𑀸𑀯𑁂𑀢𑀺 𑁋 ‘𑀓𑁄𑀡𑁆𑀟𑀜𑁆𑀜𑁄𑀳𑀁, 𑀪𑀕𑀯𑀸, 𑀓𑁄𑀡𑁆𑀟𑀜𑁆𑀜𑁄𑀳𑀁, 𑀲𑀼𑀕𑀢𑀸’𑀢𑀺. 𑀬𑀁𑀦𑀽𑀦𑀸𑀳𑀁 𑀆𑀬𑀲𑁆𑀫𑀦𑁆𑀢𑀁 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁, 𑀪𑀕𑀯𑀸, 𑀧𑀝𑀺𑀪𑀸𑀢𑀺 𑀫𑀁, 𑀲𑀼𑀕𑀢𑀸’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁, 𑀯𑀗𑁆𑀕𑀻𑀲𑀸’’𑀢𑀺 𑀪𑀕𑀯𑀸 𑀅𑀯𑁄𑀘. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀆𑀬𑀲𑁆𑀫𑀦𑁆𑀢𑀁 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺 𑁋

‘‘𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁄 𑀲𑁄 𑀣𑁂𑀭𑁄, 𑀓𑁄𑀡𑁆𑀟𑀜𑁆𑀜𑁄 𑀢𑀺𑀩𑁆𑀩𑀦𑀺𑀓𑁆𑀓𑀫𑁄;

𑀮𑀸𑀪𑀻 𑀲𑀼𑀔𑀯𑀺𑀳𑀸𑀭𑀸𑀦𑀁, 𑀯𑀺𑀯𑁂𑀓𑀸𑀦𑀁 𑀅𑀪𑀺𑀡𑁆𑀳𑀲𑁄.

‘‘𑀬𑀁 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁, 𑀲𑀢𑁆𑀣𑀼𑀲𑀸𑀲𑀦𑀓𑀸𑀭𑀺𑀦𑀸;

𑀲𑀩𑁆𑀩𑀲𑁆𑀲 𑀢𑀁 𑀅𑀦𑀼𑀧𑁆𑀧𑀢𑁆𑀢𑀁, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀲𑀺𑀓𑁆𑀔𑀢𑁄.

‘‘𑀫𑀳𑀸𑀦𑀼𑀪𑀸𑀯𑁄 𑀢𑁂𑀯𑀺𑀚𑁆𑀚𑁄, 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑁄;

𑀓𑁄𑀡𑁆𑀟𑀜𑁆𑀜𑁄 𑀩𑀼𑀤𑁆𑀥𑀤𑀸𑀬𑀸𑀤𑁄 [𑀩𑀼𑀤𑁆𑀥𑀲𑀸𑀯𑀓𑁄 (𑀧𑀻.)], 𑀧𑀸𑀤𑁂 𑀯𑀦𑁆𑀤𑀢𑀺 𑀲𑀢𑁆𑀣𑀼𑀦𑁄’’𑀢𑀺.

𑁧𑁦. 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀁

𑁨𑁧𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀇𑀲𑀺𑀕𑀺𑀮𑀺𑀧𑀲𑁆𑀲𑁂 𑀓𑀸𑀴𑀲𑀺𑀮𑀸𑀬𑀁 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺. 𑀢𑁂𑀲𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀲𑀫𑀦𑁆𑀦𑁂𑀲𑀢𑀺 [𑀲𑀫𑀦𑁆𑀯𑁂𑀲𑀢𑀺 (𑀲𑁆𑀬𑀸. 𑀅𑀝𑁆𑀞.)] 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀭𑀼𑀧𑀥𑀺𑀁. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀇𑀲𑀺𑀕𑀺𑀮𑀺𑀧𑀲𑁆𑀲𑁂 𑀓𑀸𑀴𑀲𑀺𑀮𑀸𑀬𑀁 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺. 𑀢𑁂𑀲𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀲𑀫𑀦𑁆𑀦𑁂𑀲𑀢𑀺 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀭𑀼𑀧𑀥𑀺𑀁. 𑀬𑀁𑀦𑀽𑀦𑀸𑀳𑀁 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁, 𑀪𑀕𑀯𑀸, 𑀧𑀝𑀺𑀪𑀸𑀢𑀺 𑀫𑀁, 𑀲𑀼𑀕𑀢𑀸’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁, 𑀯𑀗𑁆𑀕𑀻𑀲𑀸’’𑀢𑀺 𑀪𑀕𑀯𑀸 𑀅𑀯𑁄𑀘. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺 𑁋

‘‘𑀦𑀕𑀲𑁆𑀲 𑀧𑀲𑁆𑀲𑁂 𑀆𑀲𑀻𑀦𑀁, 𑀫𑀼𑀦𑀺𑀁 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀼𑀁;

𑀲𑀸𑀯𑀓𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑁄.

‘‘𑀢𑁂 𑀘𑁂𑀢𑀲𑀸 𑀅𑀦𑀼𑀧𑀭𑀺𑀬𑁂𑀢𑀺 [𑀅𑀦𑀼𑀧𑀭𑀺𑀬𑁂𑀲𑀢𑀺 (𑀲𑀻. 𑀲𑁆𑀬𑀸. 𑀓𑀁.)], 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀺𑀤𑁆𑀥𑀺𑀓𑁄;

𑀘𑀺𑀢𑁆𑀢𑀁 𑀦𑁂𑀲𑀁 𑀲𑀫𑀦𑁆𑀦𑁂𑀲𑀁 [𑀲𑀫𑀦𑁆𑀯𑁂𑀲𑀁 (𑀲𑁆𑀬𑀸. 𑀅𑀝𑁆𑀞.)], 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀭𑀽𑀧𑀥𑀺𑀁.

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁, 𑀫𑀼𑀦𑀺𑀁 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀼𑀁;

𑀅𑀦𑁂𑀓𑀸𑀓𑀸𑀭𑀲𑀫𑁆𑀧𑀦𑁆𑀦𑀁, 𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀕𑁄𑀢𑀫’’𑀦𑁆𑀢𑀺.

𑁧𑁧. 𑀕𑀕𑁆𑀕𑀭𑀸𑀲𑀼𑀢𑁆𑀢𑀁

𑁨𑁧𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀢𑁆𑀢𑀳𑀺 𑀘 𑀉𑀧𑀸𑀲𑀓𑀲𑀢𑁂𑀳𑀺 𑀲𑀢𑁆𑀢𑀳𑀺 𑀘 𑀉𑀧𑀸𑀲𑀺𑀓𑀸𑀲𑀢𑁂𑀳𑀺 𑀅𑀦𑁂𑀓𑁂𑀳𑀺 𑀘 𑀤𑁂𑀯𑀢𑀸𑀲𑀳𑀲𑁆𑀲𑁂𑀳𑀺. 𑀢𑁆𑀬𑀸𑀲𑁆𑀲𑀼𑀤𑀁 𑀪𑀕𑀯𑀸 𑀅𑀢𑀺𑀭𑁄𑀘𑀢𑀺 [𑀅𑀢𑀺𑀯𑀺𑀭𑁄𑀘𑀢𑀺 (𑀓.)] 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀪𑀕𑀯𑀸 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀢𑁆𑀢𑀳𑀺 𑀘 𑀉𑀧𑀸𑀲𑀓𑀲𑀢𑁂𑀳𑀺 𑀲𑀢𑁆𑀢𑀳𑀺 𑀘 𑀉𑀧𑀸𑀲𑀺𑀓𑀸𑀲𑀢𑁂𑀳𑀺 𑀅𑀦𑁂𑀓𑁂𑀳𑀺 𑀘 𑀤𑁂𑀯𑀢𑀸𑀲𑀳𑀲𑁆𑀲𑁂𑀳𑀺. 𑀢𑁆𑀬𑀸𑀲𑁆𑀲𑀼𑀤𑀁 𑀪𑀕𑀯𑀸 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀬𑀁𑀦𑀽𑀦𑀸𑀳𑀁 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀬 𑀕𑀸𑀣𑀸𑀬 𑀅𑀪𑀺𑀢𑁆𑀣𑀯𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁, 𑀪𑀕𑀯𑀸, 𑀧𑀝𑀺𑀪𑀸𑀢𑀺 𑀫𑀁, 𑀲𑀼𑀕𑀢𑀸’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁, 𑀯𑀗𑁆𑀕𑀻𑀲𑀸’’𑀢𑀺 𑀪𑀕𑀯𑀸 𑀅𑀯𑁄𑀘. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀬 𑀕𑀸𑀣𑀸𑀬 𑀅𑀪𑀺𑀢𑁆𑀣𑀯𑀺 𑁋

‘‘𑀘𑀦𑁆𑀤𑁄 𑀬𑀣𑀸 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂,

𑀯𑀺𑀭𑁄𑀘𑀢𑀺 𑀯𑀺𑀕𑀢𑀫𑀮𑁄𑀯 𑀪𑀸𑀡𑀼𑀫𑀸;

𑀏𑀯𑀫𑁆𑀧𑀺 𑀅𑀗𑁆𑀕𑀻𑀭𑀲 𑀢𑁆𑀯𑀁 𑀫𑀳𑀸𑀫𑀼𑀦𑀺,

𑀅𑀢𑀺𑀭𑁄𑀘𑀲𑀺 𑀬𑀲𑀲𑀸 𑀲𑀩𑁆𑀩𑀮𑁄𑀓’’𑀦𑁆𑀢𑀺.

𑁧𑁨. 𑀯𑀗𑁆𑀕𑀻𑀲𑀲𑀼𑀢𑁆𑀢𑀁

𑁨𑁨𑁦. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀅𑀘𑀺𑀭𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 [𑀳𑁄𑀢𑀺 (𑀲𑀻. 𑀲𑁆𑀬𑀸. 𑀓𑀁.)] 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀻 [𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻 (𑀲𑀻. 𑀧𑀻.)] 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀓𑀸𑀯𑁂𑀬𑁆𑀬𑀫𑀢𑁆𑀢𑀸 𑀯𑀺𑀘𑀭𑀺𑀫𑁆𑀳 𑀧𑀼𑀩𑁆𑀩𑁂, 𑀕𑀸𑀫𑀸 𑀕𑀸𑀫𑀁 𑀧𑀼𑀭𑀸 𑀧𑀼𑀭𑀁;

𑀅𑀣𑀤𑁆𑀤𑀲𑀸𑀫 𑀲𑀫𑁆𑀩𑀼𑀤𑁆𑀥𑀁, 𑀲𑀤𑁆𑀥𑀸 𑀦𑁄 𑀉𑀧𑀧𑀚𑁆𑀚𑀣.

‘‘𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 [𑀔𑀦𑁆𑀥𑁂 𑀆𑀬𑀢𑀦𑀸𑀦𑀺 𑀥𑀸𑀢𑀼𑀬𑁄 (𑀲𑁆𑀬𑀸. 𑀓𑀁. 𑀧𑀻. 𑀓.)];

𑀢𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

‘‘𑀩𑀳𑀼𑀦𑁆𑀦𑀁 𑀯𑀢 𑀅𑀢𑁆𑀣𑀸𑀬, 𑀩𑁄𑀥𑀺𑀁 𑀅𑀚𑁆𑀛𑀕𑀫𑀸 𑀫𑀼𑀦𑀺;

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀬𑁂 𑀦𑀺𑀬𑀸𑀫𑀕𑀢𑀤𑁆𑀤𑀲𑀸.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀺𑀢𑀁;

𑀢𑁂𑀯𑀺𑀚𑁆𑀚𑁄 𑀇𑀤𑁆𑀥𑀺𑀧𑀢𑁆𑀢𑁄𑀫𑁆𑀳𑀺, 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑁄’’𑀢𑀺.

𑀯𑀗𑁆𑀕𑀻𑀲𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.