𑁨. 𑀉𑀤𑀬𑀲𑀼𑀢𑁆𑀢𑀁

𑁧𑁯𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀉𑀤𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀉𑀤𑀬𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀢𑁆𑀢𑀁 𑀑𑀤𑀦𑁂𑀦 𑀧𑀽𑀭𑁂𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀉𑀤𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀉𑀤𑀬𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀢𑁆𑀢𑀁 𑀑𑀤𑀦𑁂𑀦 𑀧𑀽𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀓𑀝𑁆𑀞𑀓𑁄𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀧𑀼𑀦𑀧𑁆𑀧𑀼𑀦𑀁 𑀆𑀕𑀘𑁆𑀙𑀢𑀻’’𑀢𑀺.

‘‘𑀧𑀼𑀦𑀧𑁆𑀧𑀼𑀦𑀜𑁆𑀘𑁂𑀯 𑀯𑀧𑀦𑁆𑀢𑀺 𑀩𑀻𑀚𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀲𑁆𑀲𑀢𑀺 𑀤𑁂𑀯𑀭𑀸𑀚𑀸;

𑀧𑀼𑀦𑀧𑁆𑀧𑀼𑀦𑀁 𑀔𑁂𑀢𑁆𑀢𑀁 𑀓𑀲𑀦𑁆𑀢𑀺 𑀓𑀲𑁆𑀲𑀓𑀸, 𑀧𑀼𑀦𑀧𑁆𑀧𑀼𑀦𑀁 𑀥𑀜𑁆𑀜𑀫𑀼𑀧𑁂𑀢𑀺 𑀭𑀝𑁆𑀞𑀁.

‘‘𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀓𑀸 𑀬𑀸𑀘𑀬𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀦𑁆𑀢𑀺;

𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀺𑀢𑁆𑀯𑀸, 𑀧𑀼𑀦𑀧𑁆𑀧𑀼𑀦𑀁 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦𑀁.

‘‘𑀧𑀼𑀦𑀧𑁆𑀧𑀼𑀦𑀁 𑀔𑀻𑀭𑀦𑀺𑀓𑀸 𑀤𑀼𑀳𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀯𑀘𑁆𑀙𑁄 𑀉𑀧𑁂𑀢𑀺 𑀫𑀸𑀢𑀭𑀁;

𑀧𑀼𑀦𑀧𑁆𑀧𑀼𑀦𑀁 𑀓𑀺𑀮𑀫𑀢𑀺 𑀨𑀦𑁆𑀤𑀢𑀺 𑀘, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄.

‘‘𑀧𑀼𑀦𑀧𑁆𑀧𑀼𑀦𑀁 𑀚𑀸𑀬𑀢𑀺 𑀫𑀻𑀬𑀢𑀺 𑀘, 𑀧𑀼𑀦𑀧𑁆𑀧𑀼𑀦𑀁 𑀲𑀺𑀯𑀣𑀺𑀓𑀁 [𑀲𑀻𑀯𑀣𑀺𑀓𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀳𑀭𑀦𑁆𑀢𑀺;

𑀫𑀕𑁆𑀕𑀜𑁆𑀘 𑀮𑀤𑁆𑀥𑀸 𑀅𑀧𑀼𑀦𑀩𑁆𑀪𑀯𑀸𑀬, 𑀦 𑀧𑀼𑀦𑀧𑁆𑀧𑀼𑀦𑀁 𑀚𑀸𑀬𑀢𑀺 𑀪𑀽𑀭𑀺𑀧𑀜𑁆𑀜𑁄’’𑀢𑀺 [𑀧𑀼𑀦𑀧𑁆𑀧𑀼𑀦𑀁 𑀚𑀸𑀬𑀢𑀺 𑀪𑀽𑀭𑀺𑀧𑀜𑁆𑀜𑁄𑀢𑀺 (𑀲𑁆𑀬𑀸. 𑀓𑀁. 𑀓.)].

𑀏𑀯𑀁 𑀯𑀼𑀢𑁆𑀢𑁂, 𑀉𑀤𑀬𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.