𑁩. 𑀤𑁂𑀯𑀳𑀺𑀢𑀲𑀼𑀢𑁆𑀢𑀁

𑁧𑁯𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀯𑀸𑀢𑁂𑀳𑀸𑀩𑀸𑀥𑀺𑀓𑁄 𑀳𑁄𑀢𑀺; 𑀆𑀬𑀲𑁆𑀫𑀸 𑀘 𑀉𑀧𑀯𑀸𑀡𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀯𑀸𑀡𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀉𑀧𑀯𑀸𑀡, 𑀉𑀡𑁆𑀳𑁄𑀤𑀓𑀁 𑀚𑀸𑀦𑀸𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀤𑁂𑀯𑀳𑀺𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀤𑁂𑀯𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀯𑀸𑀡𑀁 𑀢𑀼𑀡𑁆𑀳𑀻𑀪𑀽𑀢𑀁 𑀏𑀓𑀫𑀦𑁆𑀢𑀁 𑀞𑀺𑀢𑀁. 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀉𑀧𑀯𑀸𑀡𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀢𑀼𑀡𑁆𑀳𑀻𑀪𑀽𑀢𑁄 𑀪𑀯𑀁 𑀢𑀺𑀝𑁆𑀞𑀁, 𑀫𑀼𑀡𑁆𑀟𑁄 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑁄;

𑀓𑀺𑀁 𑀧𑀢𑁆𑀣𑀬𑀸𑀦𑁄 𑀓𑀺𑀁 𑀏𑀲𑀁, 𑀓𑀺𑀁 𑀦𑀼 𑀬𑀸𑀘𑀺𑀢𑀼𑀫𑀸𑀕𑀢𑁄’’𑀢𑀺.

‘‘𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂, 𑀯𑀸𑀢𑁂𑀳𑀸𑀩𑀸𑀥𑀺𑀓𑁄 𑀫𑀼𑀦𑀺;

𑀲𑀘𑁂 𑀉𑀡𑁆𑀳𑁄𑀤𑀓𑀁 𑀅𑀢𑁆𑀣𑀺, 𑀫𑀼𑀦𑀺𑀦𑁄 𑀤𑁂𑀳𑀺 𑀩𑁆𑀭𑀸𑀳𑁆𑀫𑀡.

‘‘𑀧𑀽𑀚𑀺𑀢𑁄 𑀧𑀽𑀚𑀦𑁂𑀬𑁆𑀬𑀸𑀦𑀁, 𑀲𑀓𑁆𑀓𑀭𑁂𑀬𑁆𑀬𑀸𑀦 𑀲𑀓𑁆𑀓𑀢𑁄;

𑀅𑀧𑀘𑀺𑀢𑁄 𑀅𑀧𑀘𑁂𑀬𑁆𑀬𑀸𑀦𑀁 [𑀅𑀧𑀘𑀺𑀦𑁂𑀬𑁆𑀬𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁.) 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸], 𑀢𑀲𑁆𑀲 𑀇𑀘𑁆𑀙𑀸𑀫𑀺 𑀳𑀸𑀢𑀯𑁂’’𑀢𑀺.

𑀅𑀣 𑀔𑁄 𑀤𑁂𑀯𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀉𑀡𑁆𑀳𑁄𑀤𑀓𑀲𑁆𑀲 𑀓𑀸𑀚𑀁 𑀧𑀼𑀭𑀺𑀲𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀨𑀸𑀡𑀺𑀢𑀲𑁆𑀲 𑀘 𑀧𑀼𑀝𑀁 𑀆𑀬𑀲𑁆𑀫𑀢𑁄 𑀉𑀧𑀯𑀸𑀡𑀲𑁆𑀲 𑀧𑀸𑀤𑀸𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 [𑀦𑀳𑀸𑀧𑁂𑀢𑁆𑀯𑀸 (𑀲𑀻. 𑀧𑀻.)] 𑀉𑀡𑁆𑀳𑁄𑀤𑀓𑁂𑀦 𑀨𑀸𑀡𑀺𑀢𑀁 𑀆𑀮𑁄𑀮𑁂𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀸𑀲𑀺. 𑀅𑀣 𑀔𑁄 𑀪𑀕𑀯𑀢𑁄 𑀆𑀩𑀸𑀥𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺.

𑀅𑀣 𑀔𑁄 𑀤𑁂𑀯𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀤𑁂𑀯𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀢𑁆𑀣 𑀤𑀚𑁆𑀚𑀸 𑀤𑁂𑀬𑁆𑀬𑀥𑀫𑁆𑀫𑀁, 𑀓𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀓𑀣𑀜𑁆𑀳𑀺 𑀬𑀚𑀫𑀸𑀦𑀲𑁆𑀲, 𑀓𑀣𑀁 𑀇𑀚𑁆𑀛𑀢𑀺 𑀤𑀓𑁆𑀔𑀺𑀡𑀸’’𑀢𑀺.

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄 𑀯𑁂𑀤𑀻, 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺;

𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀫𑀼𑀦𑀺.

‘‘𑀏𑀢𑁆𑀣 𑀤𑀚𑁆𑀚𑀸 𑀤𑁂𑀬𑁆𑀬𑀥𑀫𑁆𑀫𑀁, 𑀏𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀏𑀯𑀜𑁆𑀳𑀺 𑀬𑀚𑀫𑀸𑀦𑀲𑁆𑀲, 𑀏𑀯𑀁 𑀇𑀚𑁆𑀛𑀢𑀺 𑀤𑀓𑁆𑀔𑀺𑀡𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀤𑁂𑀯𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.