𑁯. 𑀲𑀼𑀦𑁆𑀤𑀭𑀺𑀓𑀲𑀼𑀢𑁆𑀢𑀁

𑁧𑁯𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀲𑀼𑀦𑁆𑀤𑀭𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀲𑀼𑀦𑁆𑀤𑀭𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀅𑀕𑁆𑀕𑀺𑀁 𑀚𑀼𑀳𑀢𑀺, 𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀭𑀺𑀘𑀭𑀢𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀅𑀕𑁆𑀕𑀺𑀁 𑀚𑀼𑀳𑀺𑀢𑁆𑀯𑀸 𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀭𑀺𑀘𑀭𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀲𑀺 𑁋 ‘‘𑀓𑁄 𑀦𑀼 𑀔𑁄 𑀇𑀫𑀁 𑀳𑀩𑁆𑀬𑀲𑁂𑀲𑀁 𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺? 𑀅𑀤𑁆𑀤𑀲𑀸 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀲𑀲𑀻𑀲𑀁 𑀧𑀸𑀭𑀼𑀢𑀁 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀳𑀩𑁆𑀬𑀲𑁂𑀲𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀓𑀫𑀡𑁆𑀟𑀮𑀼𑀁 𑀕𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀪𑀕𑀯𑀸 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀤𑀲𑀤𑁆𑀤𑁂𑀦 𑀲𑀻𑀲𑀁 𑀯𑀺𑀯𑀭𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 ‘𑀫𑀼𑀡𑁆𑀟𑁄 𑀅𑀬𑀁 𑀪𑀯𑀁, 𑀫𑀼𑀡𑁆𑀟𑀓𑁄 𑀅𑀬𑀁 𑀪𑀯’𑀦𑁆𑀢𑀺 𑀢𑀢𑁄𑀯 𑀧𑀼𑀦 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀫𑀼𑀡𑁆𑀟𑀸𑀧𑀺 𑀳𑀺 𑀇𑀥𑁂𑀓𑀘𑁆𑀘𑁂 𑀩𑁆𑀭𑀸𑀳𑁆𑀫𑀡𑀸 𑀪𑀯𑀦𑁆𑀢𑀺; 𑀬𑀁𑀦𑀽𑀦𑀸𑀳𑀁 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀸𑀢𑀺𑀁 𑀧𑀼𑀘𑁆𑀙𑁂𑀬𑁆𑀬’𑀦𑁆𑀢𑀺.

𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘𑀓𑀺𑀁𑀚𑀘𑁆𑀘𑁄 𑀪𑀯’𑀦𑁆𑀢𑀺?

‘‘𑀫𑀸 𑀚𑀸𑀢𑀺𑀁 𑀧𑀼𑀘𑁆𑀙 𑀘𑀭𑀡𑀜𑁆𑀘 𑀧𑀼𑀘𑁆𑀙,

𑀓𑀝𑁆𑀞𑀸 𑀳𑀯𑁂 𑀚𑀸𑀬𑀢𑀺 𑀚𑀸𑀢𑀯𑁂𑀤𑁄;

𑀦𑀻𑀘𑀸𑀓𑀼𑀮𑀻𑀦𑁄𑀧𑀺 𑀫𑀼𑀦𑀺 𑀥𑀺𑀢𑀺𑀫𑀸,

𑀆𑀚𑀸𑀦𑀻𑀬𑁄 𑀳𑁄𑀢𑀺 𑀳𑀺𑀭𑀻𑀦𑀺𑀲𑁂𑀥𑁄.

‘‘𑀲𑀘𑁆𑀘𑁂𑀦 𑀤𑀦𑁆𑀢𑁄 𑀤𑀫𑀲𑀸 𑀉𑀧𑁂𑀢𑁄,

𑀯𑁂𑀤𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄;

𑀬𑀜𑁆𑀜𑁄𑀧𑀦𑀻𑀢𑁄 𑀢𑀫𑀼𑀧𑀯𑁆𑀳𑀬𑁂𑀣,

𑀓𑀸𑀮𑁂𑀦 𑀲𑁄 𑀚𑀼𑀳𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁂’’𑀢𑀺.

‘‘𑀅𑀤𑁆𑀥𑀸 𑀲𑀼𑀬𑀺𑀝𑁆𑀞𑀁 𑀲𑀼𑀳𑀼𑀢𑀁 𑀫𑀫 𑀬𑀺𑀤𑀁,

𑀬𑀁 𑀢𑀸𑀤𑀺𑀲𑀁 𑀯𑁂𑀤𑀕𑀼𑀫𑀤𑁆𑀤𑀲𑀸𑀫𑀺;

𑀢𑀼𑀫𑁆𑀳𑀸𑀤𑀺𑀲𑀸𑀦𑀜𑁆𑀳𑀺 𑀅𑀤𑀲𑁆𑀲𑀦𑁂𑀦,

𑀅𑀜𑁆𑀜𑁄 𑀚𑀦𑁄 𑀪𑀼𑀜𑁆𑀚𑀢𑀺 𑀳𑀩𑁆𑀬𑀲𑁂𑀲’’𑀦𑁆𑀢𑀺.

‘‘𑀪𑀼𑀜𑁆𑀚𑀢𑀼 𑀪𑀯𑀁 𑀕𑁄𑀢𑀫𑁄. 𑀩𑁆𑀭𑀸𑀳𑁆𑀫𑀡𑁄 𑀪𑀯’’𑀦𑁆𑀢𑀺.

‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬𑀁,

𑀲𑀫𑁆𑀧𑀲𑁆𑀲𑀢𑀁 𑀩𑁆𑀭𑀸𑀳𑁆𑀫𑀡 𑀦𑁂𑀲 𑀥𑀫𑁆𑀫𑁄;

𑀕𑀸𑀣𑀸𑀪𑀺𑀕𑀻𑀢𑀁 𑀧𑀦𑀼𑀤𑀦𑁆𑀢𑀺 𑀩𑀼𑀤𑁆𑀥𑀸,

𑀥𑀫𑁆𑀫𑁂 𑀲𑀢𑀺 𑀩𑁆𑀭𑀸𑀳𑁆𑀫𑀡 𑀯𑀼𑀢𑁆𑀢𑀺𑀭𑁂𑀲𑀸.

‘‘𑀅𑀜𑁆𑀜𑁂𑀦 𑀘 𑀓𑁂𑀯𑀮𑀺𑀦𑀁 𑀫𑀳𑁂𑀲𑀺𑀁,

𑀔𑀻𑀡𑀸𑀲𑀯𑀁 𑀓𑀼𑀓𑁆𑀓𑀼𑀘𑁆𑀘𑀯𑀽𑀧𑀲𑀦𑁆𑀢𑀁;

𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀳𑀲𑁆𑀲𑀼,

𑀔𑁂𑀢𑁆𑀢𑀜𑁆𑀳𑀺 𑀢𑀁 𑀧𑀼𑀜𑁆𑀜𑀧𑁂𑀓𑁆𑀔𑀲𑁆𑀲 𑀳𑁄𑀢𑀻’’𑀢𑀺.

‘‘𑀅𑀣 𑀓𑀲𑁆𑀲 𑀘𑀸𑀳𑀁, 𑀪𑁄 𑀕𑁄𑀢𑀫, 𑀇𑀫𑀁 𑀳𑀩𑁆𑀬𑀲𑁂𑀲𑀁 𑀤𑀫𑁆𑀫𑀻’’𑀢𑀺? ‘‘𑀦 𑀔𑁆𑀯𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀬𑀲𑁆𑀲𑁂𑀲𑁄 𑀳𑀩𑁆𑀬𑀲𑁂𑀲𑁄 𑀪𑀼𑀢𑁆𑀢𑁄 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑁂𑀬𑁆𑀬 𑀅𑀜𑁆𑀜𑀢𑁆𑀭, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑀸𑀯𑀓𑀲𑁆𑀲 𑀯𑀸. 𑀢𑁂𑀦 𑀳𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀢𑀁 𑀳𑀩𑁆𑀬𑀲𑁂𑀲𑀁 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀳𑀺 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀳𑀻’’𑀢𑀺.

𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀳𑀩𑁆𑀬𑀲𑁂𑀲𑀁 𑀅𑀧𑁆𑀧𑀸𑀡𑀓𑁂 𑀉𑀤𑀓𑁂 𑀑𑀧𑀺𑀮𑀸𑀧𑁂𑀲𑀺. 𑀅𑀣 𑀔𑁄 𑀲𑁄 𑀳𑀩𑁆𑀬𑀲𑁂𑀲𑁄 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁄 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀲𑀦𑁆𑀥𑀽𑀧𑀸𑀬𑀢𑀺 𑀲𑀫𑁆𑀧𑀥𑀽𑀧𑀸𑀬𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀨𑀸𑀮𑁄 [𑀮𑁄𑀳𑁄 (𑀓.)] 𑀤𑀺𑀯𑀲𑀁𑀲𑀦𑁆𑀢𑀢𑁆𑀢𑁄 [𑀤𑀺𑀯𑀲𑀲𑀦𑁆𑀢𑀢𑁆𑀢𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁄 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀲𑀦𑁆𑀥𑀽𑀧𑀸𑀬𑀢𑀺 𑀲𑀫𑁆𑀧𑀥𑀽𑀧𑀸𑀬𑀢𑀺; 𑀏𑀯𑀫𑁂𑀯 𑀲𑁄 𑀳𑀩𑁆𑀬𑀲𑁂𑀲𑁄 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁄 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀲𑀦𑁆𑀥𑀽𑀧𑀸𑀬𑀢𑀺 𑀲𑀫𑁆𑀧𑀥𑀽𑀧𑀸𑀬𑀢𑀺.

𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀸 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀫𑀸 𑀩𑁆𑀭𑀸𑀳𑁆𑀫𑀡 𑀤𑀸𑀭𑀼 𑀲𑀫𑀸𑀤𑀳𑀸𑀦𑁄,

𑀲𑀼𑀤𑁆𑀥𑀺𑀁 𑀅𑀫𑀜𑁆𑀜𑀺 𑀩𑀳𑀺𑀤𑁆𑀥𑀸 𑀳𑀺 𑀏𑀢𑀁;

𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺,

𑀬𑁄 𑀩𑀸𑀳𑀺𑀭𑁂𑀦 𑀧𑀭𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑁂.

‘‘𑀳𑀺𑀢𑁆𑀯𑀸 𑀅𑀳𑀁 𑀩𑁆𑀭𑀸𑀳𑁆𑀫𑀡 𑀤𑀸𑀭𑀼𑀤𑀸𑀳𑀁

𑀅𑀚𑁆𑀛𑀢𑁆𑀢𑀫𑁂𑀯𑀼𑀚𑁆𑀚𑀮𑀬𑀸𑀫𑀺 [𑀅𑀚𑁆𑀛𑀢𑁆𑀢𑀫𑁂𑀯 𑀚𑀮𑀬𑀸𑀫𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀚𑁄𑀢𑀺𑀁;

𑀦𑀺𑀘𑁆𑀘𑀕𑁆𑀕𑀺𑀦𑀻 𑀦𑀺𑀘𑁆𑀘𑀲𑀫𑀸𑀳𑀺𑀢𑀢𑁆𑀢𑁄,

𑀅𑀭𑀳𑀁 𑀅𑀳𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺.

‘‘𑀫𑀸𑀦𑁄 𑀳𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀔𑀸𑀭𑀺𑀪𑀸𑀭𑁄,

𑀓𑁄𑀥𑁄 𑀥𑀼𑀫𑁄 𑀪𑀲𑁆𑀫𑀦𑀺 𑀫𑁄𑀲𑀯𑀚𑁆𑀚𑀁;

𑀚𑀺𑀯𑁆𑀳𑀸 𑀲𑀼𑀚𑀸 𑀳𑀤𑀬𑀁 𑀚𑁄𑀢𑀺𑀞𑀸𑀦𑀁,

𑀅𑀢𑁆𑀢𑀸 𑀲𑀼𑀤𑀦𑁆𑀢𑁄 𑀧𑀼𑀭𑀺𑀲𑀲𑁆𑀲 𑀚𑁄𑀢𑀺.

‘‘𑀥𑀫𑁆𑀫𑁄 𑀭𑀳𑀤𑁄 𑀩𑁆𑀭𑀸𑀳𑁆𑀫𑀡 𑀲𑀻𑀮𑀢𑀺𑀢𑁆𑀣𑁄,

𑀅𑀦𑀸𑀯𑀺𑀮𑁄 𑀲𑀩𑁆𑀪𑀺 𑀲𑀢𑀁 𑀧𑀲𑀢𑁆𑀣𑁄;

𑀬𑀢𑁆𑀣 𑀳𑀯𑁂 𑀯𑁂𑀤𑀕𑀼𑀦𑁄 𑀲𑀺𑀦𑀸𑀢𑀸,

𑀅𑀦𑀮𑁆𑀮𑀕𑀢𑁆𑀢𑀸𑀯 [𑀅𑀦𑀮𑁆𑀮𑀻𑀦𑀕𑀢𑁆𑀢𑀸𑀯 (𑀲𑀻. 𑀧𑀻. 𑀓.)] 𑀢𑀭𑀦𑁆𑀢𑀺 𑀧𑀸𑀭𑀁.

‘‘𑀲𑀘𑁆𑀘𑀁 𑀥𑀫𑁆𑀫𑁄 𑀲𑀁𑀬𑀫𑁄 𑀩𑁆𑀭𑀳𑁆𑀫𑀘𑀭𑀺𑀬𑀁,

𑀫𑀚𑁆𑀛𑁂 𑀲𑀺𑀢𑀸 𑀩𑁆𑀭𑀸𑀳𑁆𑀫𑀡 𑀩𑁆𑀭𑀳𑁆𑀫𑀧𑀢𑁆𑀢𑀺;

𑀲 𑀢𑀼𑀚𑁆𑀚𑀼𑀪𑀽𑀢𑁂𑀲𑀼 𑀦𑀫𑁄 𑀓𑀭𑁄𑀳𑀺,

𑀢𑀫𑀳𑀁 𑀦𑀭𑀁 𑀥𑀫𑁆𑀫𑀲𑀸𑀭𑀻𑀢𑀺 𑀩𑁆𑀭𑀽𑀫𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀪𑀸𑀭𑀤𑁆𑀯𑀸𑀚𑁄 𑀅𑀭𑀳𑀢𑀁 𑀅𑀳𑁄𑀲𑀻’’𑀢𑀺.