𑁧𑁦. 𑀩𑀳𑀼𑀥𑀻𑀢𑀭𑀲𑀼𑀢𑁆𑀢𑀁

𑁧𑁯𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀢𑀼𑀤𑁆𑀤𑀲 𑀩𑀮𑀻𑀩𑀤𑁆𑀤𑀸 𑀦𑀝𑁆𑀞𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂 𑀩𑀮𑀻𑀩𑀤𑁆𑀤𑁂 𑀕𑀯𑁂𑀲𑀦𑁆𑀢𑁄 𑀬𑁂𑀦 𑀲𑁄 𑀯𑀦𑀲𑀡𑁆𑀟𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀤𑁆𑀤𑀲 𑀪𑀕𑀯𑀦𑁆𑀢𑀁 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀦𑀺𑀲𑀺𑀦𑁆𑀦𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀤𑀺𑀲𑁆𑀯𑀸𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀦 𑀳𑀺 𑀦𑀽𑀦𑀺𑀫𑀲𑁆𑀲 [𑀦𑀳𑀦𑀽𑀦𑀺𑀫𑀲𑁆𑀲 (𑀲𑀻. 𑀲𑁆𑀬𑀸. 𑀓𑀁.)] 𑀲𑀫𑀡𑀲𑁆𑀲, 𑀩𑀮𑀻𑀩𑀤𑁆𑀤𑀸 𑀘𑀢𑀼𑀤𑁆𑀤𑀲;

𑀅𑀚𑁆𑀚𑀲𑀝𑁆𑀞𑀺𑀁 𑀦 𑀤𑀺𑀲𑁆𑀲𑀦𑁆𑀢𑀺, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

‘‘𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀢𑀺𑀮𑀸𑀔𑁂𑀢𑁆𑀢𑀲𑁆𑀫𑀺 𑀧𑀸𑀧𑀓𑀸;

𑀏𑀓𑀧𑀡𑁆𑀡𑀸 𑀤𑀼𑀧𑀡𑁆𑀡𑀸 [𑀤𑁆𑀯𑀺𑀧𑀡𑁆𑀡𑀸 (𑀲𑀻. 𑀧𑀻.)] 𑀘, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

‘‘𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀢𑀼𑀘𑁆𑀙𑀓𑁄𑀝𑁆𑀞𑀲𑁆𑀫𑀺 𑀫𑀽𑀲𑀺𑀓𑀸;

𑀉𑀲𑁆𑀲𑁄𑀴𑁆𑀳𑀺𑀓𑀸𑀬 𑀦𑀘𑁆𑀘𑀦𑁆𑀢𑀺, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

‘‘𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀲𑀦𑁆𑀣𑀸𑀭𑁄 𑀲𑀢𑁆𑀢𑀫𑀸𑀲𑀺𑀓𑁄;

𑀉𑀧𑁆𑀧𑀸𑀝𑀓𑁂𑀳𑀺 𑀲𑀜𑁆𑀙𑀦𑁆𑀦𑁄, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

‘‘𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀯𑀺𑀥𑀯𑀸 𑀲𑀢𑁆𑀢 𑀥𑀻𑀢𑀭𑁄;

𑀏𑀓𑀧𑀼𑀢𑁆𑀢𑀸 𑀤𑀼𑀧𑀼𑀢𑁆𑀢𑀸 [𑀤𑁆𑀯𑀺𑀧𑀼𑀢𑁆𑀢𑀸 (𑀲𑀻. 𑀧𑀻.)] 𑀘, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

‘‘𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀧𑀺𑀗𑁆𑀕𑀮𑀸 𑀢𑀺𑀮𑀓𑀸𑀳𑀢𑀸;

𑀲𑁄𑀢𑁆𑀢𑀁 𑀧𑀸𑀤𑁂𑀦 𑀩𑁄𑀥𑁂𑀢𑀺, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

‘‘𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀧𑀘𑁆𑀘𑀽𑀲𑀫𑁆𑀳𑀺 𑀇𑀡𑀸𑀬𑀺𑀓𑀸;

𑀤𑁂𑀣 𑀤𑁂𑀣𑀸𑀢𑀺 𑀘𑁄𑀤𑁂𑀦𑁆𑀢𑀺, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻’’𑀢𑀺.

‘‘𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀩𑀮𑀻𑀩𑀤𑁆𑀤𑀸 𑀘𑀢𑀼𑀤𑁆𑀤𑀲;

𑀅𑀚𑁆𑀚𑀲𑀝𑁆𑀞𑀺𑀁 𑀦 𑀤𑀺𑀲𑁆𑀲𑀦𑁆𑀢𑀺, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

‘‘𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀢𑀺𑀮𑀸𑀔𑁂𑀢𑁆𑀢𑀲𑁆𑀫𑀺 𑀧𑀸𑀧𑀓𑀸;

𑀏𑀓𑀧𑀡𑁆𑀡𑀸 𑀤𑀼𑀧𑀡𑁆𑀡𑀸 𑀘, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

‘‘𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀢𑀼𑀘𑁆𑀙𑀓𑁄𑀝𑁆𑀞𑀲𑁆𑀫𑀺 𑀫𑀽𑀲𑀺𑀓𑀸;

𑀉𑀲𑁆𑀲𑁄𑀴𑁆𑀳𑀺𑀓𑀸𑀬 𑀦𑀘𑁆𑀘𑀦𑁆𑀢𑀺, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

‘‘𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀣𑀸𑀭𑁄 𑀲𑀢𑁆𑀢𑀫𑀸𑀲𑀺𑀓𑁄;

𑀉𑀧𑁆𑀧𑀸𑀝𑀓𑁂𑀳𑀺 𑀲𑀜𑁆𑀙𑀦𑁆𑀦𑁄, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

‘‘𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀯𑀺𑀥𑀯𑀸 𑀲𑀢𑁆𑀢 𑀥𑀻𑀢𑀭𑁄;

𑀏𑀓𑀧𑀼𑀢𑁆𑀢𑀸 𑀤𑀼𑀧𑀼𑀢𑁆𑀢𑀸 𑀘, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

‘‘𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀧𑀺𑀗𑁆𑀕𑀮𑀸 𑀢𑀺𑀮𑀓𑀸𑀳𑀢𑀸;

𑀲𑁄𑀢𑁆𑀢𑀁 𑀧𑀸𑀤𑁂𑀦 𑀩𑁄𑀥𑁂𑀢𑀺, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

‘‘𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀧𑀘𑁆𑀘𑀽𑀲𑀫𑁆𑀳𑀺 𑀇𑀡𑀸𑀬𑀺𑀓𑀸;

𑀤𑁂𑀣 𑀤𑁂𑀣𑀸𑀢𑀺 𑀘𑁄𑀤𑁂𑀦𑁆𑀢𑀺, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺; 𑀏𑀯𑀫𑁂𑀯 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀮𑀪𑁂𑀬𑁆𑀬𑀸𑀳𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑀅𑀮𑀢𑁆𑀣 𑀔𑁄 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀧𑀦𑀸𑀬𑀲𑁆𑀫𑀸 𑀪𑀸𑀭𑀤𑁆𑀯𑀸𑀚𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀪𑀸𑀭𑀤𑁆𑀯𑀸𑀚𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺.

𑀅𑀭𑀳𑀦𑁆𑀢𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀥𑀦𑀜𑁆𑀚𑀸𑀦𑀻 𑀘 𑀅𑀓𑁆𑀓𑁄𑀲𑀁, 𑀅𑀲𑀼𑀭𑀺𑀦𑁆𑀤𑀁 𑀩𑀺𑀮𑀗𑁆𑀕𑀺𑀓𑀁;

𑀅𑀳𑀺𑀁𑀲𑀓𑀁 𑀚𑀝𑀸 𑀘𑁂𑀯, 𑀲𑀼𑀤𑁆𑀥𑀺𑀓𑀜𑁆𑀘𑁂𑀯 𑀅𑀕𑁆𑀕𑀺𑀓𑀸;

𑀲𑀼𑀦𑁆𑀤𑀭𑀺𑀓𑀁 𑀩𑀳𑀼𑀥𑀻𑀢𑀭𑁂𑀦 𑀘 𑀢𑁂 𑀤𑀲𑀸𑀢𑀺.