𑁫. 𑀅𑀳𑀺𑀁𑀲𑀓𑀲𑀼𑀢𑁆𑀢𑀁

𑁧𑁯𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀅𑀳𑀺𑀁𑀲𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀳𑀺𑀁𑀲𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀺𑀁𑀲𑀓𑀸𑀳𑀁, 𑀪𑁄 𑀕𑁄𑀢𑀫, 𑀅𑀳𑀺𑀁𑀲𑀓𑀸𑀳𑀁, 𑀪𑁄 𑀕𑁄𑀢𑀫𑀸’’𑀢𑀺.

‘‘𑀬𑀣𑀸 𑀦𑀸𑀫𑀁 𑀢𑀣𑀸 𑀘𑀲𑁆𑀲, 𑀲𑀺𑀬𑀸 𑀔𑁄 𑀢𑁆𑀯𑀁 𑀅𑀳𑀺𑀁𑀲𑀓𑁄;

𑀬𑁄 𑀘 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀘 𑀦 𑀳𑀺𑀁𑀲𑀢𑀺;

𑀲 𑀯𑁂 𑀅𑀳𑀺𑀁𑀲𑀓𑁄 𑀳𑁄𑀢𑀺, 𑀬𑁄 𑀧𑀭𑀁 𑀦 𑀯𑀺𑀳𑀺𑀁𑀲𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀺𑀁𑀲𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀅𑀳𑀺𑀁𑀲𑀓𑀪𑀸𑀭𑀤𑁆𑀯𑀸𑀚𑁄 𑀅𑀭𑀳𑀢𑀁 𑀅𑀳𑁄𑀲𑀻’’𑀢𑀺.