𑁬. 𑀚𑀝𑀸𑀲𑀼𑀢𑁆𑀢𑀁

𑁧𑁯𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀚𑀝𑀸𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀝𑀸𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀦𑁆𑀢𑁄𑀚𑀝𑀸 𑀩𑀳𑀺𑀚𑀝𑀸, 𑀚𑀝𑀸𑀬 𑀚𑀝𑀺𑀢𑀸 𑀧𑀚𑀸;

𑀢𑀁 𑀢𑀁 𑀕𑁄𑀢𑀫 𑀧𑀼𑀘𑁆𑀙𑀸𑀫𑀺, 𑀓𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺.

‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀁.

‘‘𑀬𑁂𑀲𑀁 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀢𑁂𑀲𑀁 𑀯𑀺𑀚𑀝𑀺𑀢𑀸 𑀚𑀝𑀸.

‘‘𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀧𑀝𑀺𑀖𑀁 𑀭𑀽𑀧𑀲𑀜𑁆𑀜𑀸 𑀘, 𑀏𑀢𑁆𑀣𑁂𑀲𑀸 𑀙𑀺𑀚𑁆𑀚𑀢𑁂 𑀚𑀝𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀚𑀝𑀸𑀪𑀸𑀭𑀤𑁆𑀯𑀸𑀚𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀪𑀸𑀭𑀤𑁆𑀯𑀸𑀚𑁄 𑀅𑀭𑀳𑀢𑀁 𑀅𑀳𑁄𑀲𑀻’’𑀢𑀺.