𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀦𑀗𑁆𑀓𑀼𑀫𑀸𑀭𑀲𑀼𑀢𑁆𑀢𑀁

𑁧𑁮𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀲𑀧𑁆𑀧𑀺𑀦𑀻𑀢𑀻𑀭𑁂. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀲𑀧𑁆𑀧𑀺𑀦𑀻𑀢𑀻𑀭𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁, 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄, 𑀲𑁄 𑀲𑁂𑀝𑁆𑀞𑁄 𑀤𑁂𑀯𑀫𑀸𑀦𑀼𑀲𑁂’’𑀢𑀺.

𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄. 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 ‘‘𑀲𑀫𑀦𑀼𑀜𑁆𑀜𑁄 𑀫𑁂 𑀲𑀢𑁆𑀣𑀸’’𑀢𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁨. 𑀤𑁂𑀯𑀤𑀢𑁆𑀢𑀲𑀼𑀢𑁆𑀢𑀁

𑁧𑁮𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀤𑁂𑀯𑀤𑀢𑁆𑀢𑁂. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀨𑀮𑀁 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀺, 𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴𑀁;

𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀳𑀦𑁆𑀢𑀺, 𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀬𑀣𑀸’’𑀢𑀺.

𑁩. 𑀅𑀦𑁆𑀥𑀓𑀯𑀺𑀦𑁆𑀤𑀲𑀼𑀢𑁆𑀢𑀁

𑁧𑁮𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀸𑀕𑀥𑁂𑀲𑀼 𑀯𑀺𑀳𑀭𑀢𑀺 𑀅𑀦𑁆𑀥𑀓𑀯𑀺𑀦𑁆𑀤𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀤𑁂𑀯𑁄 𑀘 𑀏𑀓𑀫𑁂𑀓𑀁 𑀨𑀼𑀲𑀸𑀬𑀢𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀅𑀦𑁆𑀥𑀓𑀯𑀺𑀦𑁆𑀤𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺,

𑀘𑀭𑁂𑀬𑁆𑀬 𑀲𑀁𑀬𑁄𑀚𑀦𑀯𑀺𑀧𑁆𑀧𑀫𑁄𑀓𑁆𑀔𑀸;

𑀲𑀘𑁂 𑀭𑀢𑀺𑀁 𑀦𑀸𑀥𑀺𑀕𑀘𑁆𑀙𑁂𑀬𑁆𑀬 𑀢𑀢𑁆𑀣,

𑀲𑀗𑁆𑀖𑁂 𑀯𑀲𑁂 𑀭𑀓𑁆𑀔𑀺𑀢𑀢𑁆𑀢𑁄 𑀲𑀢𑀻𑀫𑀸.

‘‘𑀓𑀼𑀮𑀸𑀓𑀼𑀮𑀁 𑀧𑀺𑀡𑁆𑀟𑀺𑀓𑀸𑀬 𑀘𑀭𑀦𑁆𑀢𑁄,

𑀇𑀦𑁆𑀤𑁆𑀭𑀺𑀬𑀕𑀼𑀢𑁆𑀢𑁄 𑀦𑀺𑀧𑀓𑁄 𑀲𑀢𑀻𑀫𑀸;

𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺,

𑀪𑀬𑀸 𑀧𑀫𑀼𑀢𑁆𑀢𑁄 𑀅𑀪𑀬𑁂 𑀯𑀺𑀫𑀼𑀢𑁆𑀢𑁄.

‘‘𑀬𑀢𑁆𑀣 𑀪𑁂𑀭𑀯𑀸 𑀲𑀭𑀻𑀲𑀧𑀸 [𑀲𑀺𑀭𑀺𑀁 𑀲𑀧𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)],

𑀯𑀺𑀚𑁆𑀚𑀼 𑀲𑀜𑁆𑀘𑀭𑀢𑀺 𑀣𑀦𑀬𑀢𑀺 𑀤𑁂𑀯𑁄;

𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬 𑀭𑀢𑁆𑀢𑀺𑀬𑀸,

𑀦𑀺𑀲𑀻𑀤𑀺 𑀢𑀢𑁆𑀣 𑀪𑀺𑀓𑁆𑀔𑀼 𑀯𑀺𑀕𑀢𑀮𑁄𑀫𑀳𑀁𑀲𑁄.

‘‘𑀇𑀤𑀜𑁆𑀳𑀺 𑀚𑀸𑀢𑀼 𑀫𑁂 𑀤𑀺𑀝𑁆𑀞𑀁, 𑀦𑀬𑀺𑀤𑀁 𑀇𑀢𑀺𑀳𑀻𑀢𑀺𑀳𑀁;

𑀏𑀓𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀫𑀺𑀁, 𑀲𑀳𑀲𑁆𑀲𑀁 𑀫𑀘𑁆𑀘𑀼𑀳𑀸𑀬𑀺𑀦𑀁.

‘‘𑀪𑀺𑀬𑁆𑀬𑁄 [𑀪𑀻𑀬𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀜𑁆𑀘𑀲𑀢𑀸 𑀲𑁂𑀓𑁆𑀔𑀸, 𑀤𑀲𑀸 𑀘 𑀤𑀲𑀥𑀸 𑀤𑀲;

𑀲𑀩𑁆𑀩𑁂 𑀲𑁄𑀢𑀲𑀫𑀸𑀧𑀦𑁆𑀦𑀸, 𑀅𑀢𑀺𑀭𑀘𑁆𑀙𑀸𑀦𑀕𑀸𑀫𑀺𑀦𑁄.

‘‘𑀅𑀣𑀸𑀬𑀁 [𑀅𑀢𑁆𑀣𑀸𑀬𑀁-𑀇𑀢𑀺𑀧𑀺 𑀤𑀻. 𑀦𑀺. 𑁨.𑁨𑁯𑁦] 𑀇𑀢𑀭𑀸 𑀧𑀚𑀸, 𑀧𑀼𑀜𑁆𑀜𑀪𑀸𑀕𑀸𑀢𑀺 𑀫𑁂 𑀫𑀦𑁄;

𑀲𑀗𑁆𑀔𑀸𑀢𑀼𑀁 𑀦𑁄𑀧𑀺 𑀲𑀓𑁆𑀓𑁄𑀫𑀺, 𑀫𑀼𑀲𑀸𑀯𑀸𑀤𑀲𑁆𑀲 𑀑𑀢𑁆𑀢𑀧’’𑀦𑁆𑀢𑀺 [𑀑𑀢𑁆𑀢𑀧𑁂𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀑𑀢𑁆𑀢𑀧𑁆𑀧𑁂𑀢𑀺 (𑀓.)].

𑁪. 𑀅𑀭𑀼𑀡𑀯𑀢𑀻𑀲𑀼𑀢𑁆𑀢𑀁

𑁧𑁮𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀅𑀳𑁄𑀲𑀺 𑀅𑀭𑀼𑀡𑀯𑀸 𑀦𑀸𑀫. 𑀭𑀜𑁆𑀜𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀅𑀭𑀼𑀡𑀯𑀢𑁄 𑀅𑀭𑀼𑀡𑀯𑀢𑀻 𑀦𑀸𑀫 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺. 𑀅𑀭𑀼𑀡𑀯𑀢𑀺𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀭𑀸𑀚𑀥𑀸𑀦𑀺𑀁 [𑀅𑀭𑀼𑀡𑀯𑀢𑀺𑀬𑀁 𑀔𑁄 𑀧𑀦 𑀪𑀺𑀓𑁆𑀔𑀯𑁂 𑀭𑀸𑀚𑀥𑀸𑀦𑀺𑀬𑀁 (𑀧𑀻. 𑀓.)] 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀸𑀲𑀺. 𑀲𑀺𑀔𑀺𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀪𑀺𑀪𑀽𑀲𑀫𑁆𑀪𑀯𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀪𑀺𑀪𑀼𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘𑀆𑀬𑀸𑀫, 𑀩𑁆𑀭𑀸𑀳𑁆𑀫𑀡, 𑀬𑁂𑀦 𑀅𑀜𑁆𑀜𑀢𑀭𑁄 𑀩𑁆𑀭𑀳𑁆𑀫𑀮𑁄𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫, 𑀬𑀸𑀯 𑀪𑀢𑁆𑀢𑀲𑁆𑀲 𑀓𑀸𑀮𑁄 𑀪𑀯𑀺𑀲𑁆𑀲𑀢𑀻’𑀢𑀺. ‘𑀏𑀯𑀁, 𑀪𑀦𑁆𑀢𑁂’𑀢𑀺 𑀔𑁄 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀽 𑀪𑀺𑀓𑁆𑀔𑀼 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀪𑀺𑀪𑀽 𑀘 𑀪𑀺𑀓𑁆𑀔𑀼 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀅𑀭𑀼𑀡𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀅𑀦𑁆𑀢𑀭𑀳𑀺𑀢𑀸 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁂𑀲𑀼𑀁.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀪𑀺𑀪𑀼𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘𑀧𑀝𑀺𑀪𑀸𑀢𑀼, 𑀩𑁆𑀭𑀸𑀳𑁆𑀫𑀡, 𑀢𑀁 𑀩𑁆𑀭𑀳𑁆𑀫𑀼𑀦𑁄 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸𑀬 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀜𑁆𑀘 𑀥𑀫𑁆𑀫𑀻 𑀓𑀣𑀸’𑀢𑀺. ‘𑀏𑀯𑀁, 𑀪𑀦𑁆𑀢𑁂’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀽 𑀪𑀺𑀓𑁆𑀔𑀼 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀩𑁆𑀭𑀳𑁆𑀫𑀸𑀦𑀜𑁆𑀘 𑀩𑁆𑀭𑀳𑁆𑀫𑀧𑀭𑀺𑀲𑀜𑁆𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁂 𑀘 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀘 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 [𑀔𑀻𑀬𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀓𑀣𑀜𑁆𑀳𑀺 𑀦𑀸𑀫 𑀲𑀢𑁆𑀣𑀭𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀸𑀯𑀓𑁄 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀻’’’𑀢𑀺!

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀪𑀺𑀪𑀼𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘𑀉𑀚𑁆𑀛𑀸𑀬𑀦𑁆𑀢𑀺 𑀔𑁄 𑀢𑁂, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀳𑁆𑀫𑀸 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀘 𑁋 𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄, 𑀓𑀣𑀜𑁆𑀳𑀺 𑀦𑀸𑀫 𑀲𑀢𑁆𑀣𑀭𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀸𑀯𑀓𑁄 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀻𑀢𑀺! 𑀢𑁂𑀦 𑀳𑀺 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀩𑁆𑀭𑀳𑁆𑀫𑀸𑀦𑀜𑁆𑀘 𑀩𑁆𑀭𑀳𑁆𑀫𑀧𑀭𑀺𑀲𑀜𑁆𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁂 𑀘 𑀲𑀁𑀯𑁂𑀚𑁂𑀳𑀻’𑀢𑀺. ‘𑀏𑀯𑀁, 𑀪𑀦𑁆𑀢𑁂’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀽 𑀪𑀺𑀓𑁆𑀔𑀼 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀓𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀅𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀓𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀳𑁂𑀝𑁆𑀞𑀺𑀫𑁂𑀦 𑀉𑀧𑀟𑁆𑀠𑀓𑀸𑀬𑁂𑀦 𑀅𑀤𑀺𑀲𑁆𑀲𑀫𑀸𑀦𑁂𑀦 𑀉𑀧𑀭𑀺𑀫𑁂𑀦 𑀉𑀧𑀟𑁆𑀠𑀓𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀉𑀧𑀭𑀺𑀫𑁂𑀦 𑀉𑀧𑀟𑁆𑀠𑀓𑀸𑀬𑁂𑀦 𑀅𑀤𑀺𑀲𑁆𑀲𑀫𑀸𑀦𑁂𑀦 𑀳𑁂𑀝𑁆𑀞𑀺𑀫𑁂𑀦 𑀉𑀧𑀟𑁆𑀠𑀓𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀘 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀅𑀳𑁂𑀲𑀼𑀁 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄, 𑀲𑀫𑀡𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸’’’𑀢𑀺!

‘‘𑀅𑀣 𑀔𑁄 𑀅𑀪𑀺𑀪𑀽 𑀪𑀺𑀓𑁆𑀔𑀼 𑀲𑀺𑀔𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘𑀅𑀪𑀺𑀚𑀸𑀦𑀸𑀫𑀺 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑁋 𑀧𑀳𑁄𑀫𑀺 𑀔𑁆𑀯𑀸𑀳𑀁 𑀆𑀯𑀼𑀲𑁄, 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 [𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼’𑀦𑁆𑀢𑀺. ‘𑀏𑀢𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀓𑀸𑀮𑁄, 𑀏𑀢𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀓𑀸𑀮𑁄; 𑀬𑀁 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀬𑁆𑀬𑀸𑀲𑀻’𑀢𑀺. ‘𑀏𑀯𑀁, 𑀪𑀦𑁆𑀢𑁂’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀽 𑀪𑀺𑀓𑁆𑀔𑀼 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀆𑀭𑀫𑁆𑀪𑀣 [𑀆𑀭𑀩𑁆𑀪𑀣 (𑀲𑀩𑁆𑀩𑀢𑁆𑀣)] 𑀦𑀺𑀓𑁆𑀓𑀫𑀣 [𑀦𑀺𑀓𑁆𑀔𑀫𑀣 (𑀲𑀻. 𑀧𑀻.)], 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄.

‘‘𑀬𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀲𑁆𑀲𑀢𑀺;

𑀧𑀳𑀸𑀬 𑀚𑀸𑀢𑀺𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀔𑀻 𑀘 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀪𑀺𑀪𑀽 𑀘 𑀪𑀺𑀓𑁆𑀔𑀼 𑀩𑁆𑀭𑀳𑁆𑀫𑀸𑀦𑀜𑁆𑀘 𑀩𑁆𑀭𑀳𑁆𑀫𑀧𑀭𑀺𑀲𑀜𑁆𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁂 𑀘 𑀲𑀁𑀯𑁂𑀚𑁂𑀢𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫…𑀧𑁂… 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑀸 𑀅𑀭𑀼𑀡𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀧𑀸𑀢𑀼𑀭𑀳𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘𑀅𑀲𑁆𑀲𑀼𑀢𑁆𑀣 𑀦𑁄, 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀼𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀲𑁆𑀲 𑀕𑀸𑀣𑀸𑀬𑁄 𑀪𑀸𑀲𑀫𑀸𑀦𑀲𑁆𑀲𑀸’𑀢𑀺? ‘𑀅𑀲𑁆𑀲𑀼𑀫𑁆𑀳 𑀔𑁄 𑀫𑀬𑀁, 𑀪𑀦𑁆𑀢𑁂, 𑀅𑀪𑀺𑀪𑀼𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀲𑁆𑀲 𑀕𑀸𑀣𑀸𑀬𑁄 𑀪𑀸𑀲𑀫𑀸𑀦𑀲𑁆𑀲𑀸’𑀢𑀺. ‘𑀬𑀣𑀸 𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑁆𑀣 𑀅𑀪𑀺𑀪𑀼𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀲𑁆𑀲 𑀕𑀸𑀣𑀸𑀬𑁄 𑀪𑀸𑀲𑀫𑀸𑀦𑀲𑁆𑀲𑀸’’’𑀢𑀺? 𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀅𑀲𑁆𑀲𑀼𑀫𑁆𑀳 𑀅𑀪𑀺𑀪𑀼𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀲𑁆𑀲 𑀕𑀸𑀣𑀸𑀬𑁄 𑀪𑀸𑀲𑀫𑀸𑀦𑀲𑁆𑀲 𑁋

‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄.

‘‘𑀬𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀲𑁆𑀲𑀢𑀺;

𑀧𑀳𑀸𑀬 𑀚𑀸𑀢𑀺𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺.

‘‘‘𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀅𑀲𑁆𑀲𑀼𑀫𑁆𑀳 𑀅𑀪𑀺𑀪𑀼𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀲𑁆𑀲 𑀕𑀸𑀣𑀸𑀬𑁄 𑀪𑀸𑀲𑀫𑀸𑀦𑀲𑁆𑀲𑀸’𑀢𑀺. ‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀯𑁂; 𑀲𑀸𑀥𑀼 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂! 𑀅𑀲𑁆𑀲𑀼𑀢𑁆𑀣 𑀅𑀪𑀺𑀪𑀼𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀲𑁆𑀲 𑀕𑀸𑀣𑀸𑀬𑁄 𑀪𑀸𑀲𑀫𑀸𑀦𑀲𑁆𑀲𑀸’’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸, 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑁫. 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀁

𑁧𑁮𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀲𑀺𑀦𑀸𑀭𑀸𑀬𑀁 𑀯𑀺𑀳𑀭𑀢𑀺 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀳𑀦𑁆𑀤 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀆𑀫𑀦𑁆𑀢𑀬𑀸𑀫𑀺 𑀯𑁄 𑁋 ‘𑀯𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸, 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’𑀢𑀺. 𑀅𑀬𑀁 𑀢𑀣𑀸𑀕𑀢𑀲𑁆𑀲 𑀧𑀘𑁆𑀙𑀺𑀫𑀸 𑀯𑀸𑀘𑀸’’.

𑀅𑀣 𑀔𑁄 𑀪𑀕𑀯𑀸 𑀧𑀞𑀫𑀁 𑀛𑀸𑀦𑀁 [𑀧𑀞𑀫𑀚𑁆𑀛𑀸𑀦𑀁 (𑀲𑁆𑀬𑀸. 𑀓𑀁.) 𑀏𑀯𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀇𑀘𑁆𑀘𑀸𑀤𑀻𑀲𑀼𑀧𑀺] 𑀲𑀫𑀸𑀧𑀚𑁆𑀚𑀺. 𑀧𑀞𑀫𑀸 𑀛𑀸𑀦𑀸 [𑀧𑀞𑀫𑀚𑁆𑀛𑀸𑀦𑀸 (𑀲𑁆𑀬𑀸. 𑀓𑀁.) 𑀏𑀯𑀁 𑀤𑀼𑀢𑀺𑀬𑀸 𑀛𑀸𑀦𑀸 𑀇𑀘𑁆𑀘𑀸𑀤𑀻𑀲𑀼𑀧𑀺] 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀤𑀼𑀢𑀺𑀬𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀢𑀢𑀺𑀬𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀘𑀢𑀼𑀢𑁆𑀣𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺.

𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀘𑀢𑀼𑀢𑁆𑀣𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀢𑀢𑀺𑀬𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀤𑀼𑀢𑀺𑀬𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀧𑀞𑀫𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀤𑀼𑀢𑀺𑀬𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀢𑀢𑀺𑀬𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀘𑀢𑀼𑀢𑁆𑀣𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀦𑀦𑁆𑀢𑀭𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀩𑁆𑀩𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬𑀁;

𑀬𑀢𑁆𑀣 𑀏𑀢𑀸𑀤𑀺𑀲𑁄 𑀲𑀢𑁆𑀣𑀸, 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀢𑀣𑀸𑀕𑀢𑁄 𑀩𑀮𑀧𑁆𑀧𑀢𑁆𑀢𑁄, 𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺.

𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀤𑀸𑀲𑀺 𑀬𑀁 𑀪𑀺𑀁𑀲𑀦𑀓𑀁, 𑀢𑀤𑀸𑀲𑀺 𑀮𑁄𑀫𑀳𑀁𑀲𑀦𑀁;

𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑁂𑀢𑁂, 𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂’’𑀢𑀺.

𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀦𑀸𑀳𑀼 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄, 𑀞𑀺𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀅𑀦𑁂𑀚𑁄 𑀲𑀦𑁆𑀢𑀺𑀫𑀸𑀭𑀩𑁆𑀪, 𑀘𑀓𑁆𑀔𑀼𑀫𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 [𑀬𑀁 𑀓𑀸𑀮𑀫𑀓𑀭𑀻 𑀫𑀼𑀦𑀺 (𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑁂)].

‘‘𑀅𑀲𑀮𑁆𑀮𑀻𑀦𑁂𑀦 𑀘𑀺𑀢𑁆𑀢𑁂𑀦, 𑀯𑁂𑀤𑀦𑀁 𑀅𑀚𑁆𑀛𑀯𑀸𑀲𑀬𑀺;

𑀧𑀚𑁆𑀚𑁄𑀢𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀁, 𑀯𑀺𑀫𑁄𑀓𑁆𑀔𑁄 𑀘𑁂𑀢𑀲𑁄 𑀅𑀳𑀽’’𑀢𑀺.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀩𑁆𑀭𑀳𑁆𑀫𑀸𑀲𑀦𑀁 𑀤𑁂𑀯𑀤𑀢𑁆𑀢𑁄, 𑀅𑀦𑁆𑀥𑀓𑀯𑀺𑀦𑁆𑀤𑁄 𑀅𑀭𑀼𑀡𑀯𑀢𑀻;

𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀘 𑀤𑁂𑀲𑀺𑀢𑀁, 𑀇𑀤𑀁 𑀩𑁆𑀭𑀳𑁆𑀫𑀧𑀜𑁆𑀘𑀓𑀦𑁆𑀢𑀺.

𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁. [𑀇𑀢𑁄 𑀧𑀭𑀁 𑀫𑀭𑀫𑁆𑀫𑀧𑁄𑀢𑁆𑀣𑀓𑁂𑀲𑀼 𑀏𑀯𑀫𑁆𑀧𑀺 𑀤𑀺𑀲𑁆𑀲𑀢𑀺 𑁋§𑀩𑁆𑀭𑀳𑁆𑀫𑀸𑀬𑀸𑀘𑀦𑀁 𑀅𑀕𑀸𑀭𑀯𑀜𑁆𑀘, 𑀩𑁆𑀭𑀳𑁆𑀫𑀤𑁂𑀯𑁄 𑀩𑀓𑁄 𑀘 𑀩𑁆𑀭𑀳𑁆𑀫𑀸.§𑀅𑀜𑁆𑀜𑀢𑀭𑁄 𑀘 𑀩𑁆𑀭𑀳𑁆𑀫𑀸𑀓𑁄𑀓𑀸𑀮𑀺𑀓𑀜𑁆𑀘, 𑀢𑀺𑀲𑁆𑀲𑀓𑀜𑁆𑀘 𑀢𑀼𑀭𑀽 𑀘.§𑀩𑁆𑀭𑀳𑁆𑀫𑀸 𑀓𑁄𑀓𑀸𑀮𑀺𑀓𑀪𑀺𑀓𑁆𑀔𑀼, 𑀲𑀦𑀗𑁆𑀓𑀼𑀫𑀸𑀭𑁂𑀦 𑀤𑁂𑀯𑀤𑀢𑁆𑀢𑀁.§𑀅𑀦𑁆𑀥𑀓𑀯𑀺𑀦𑁆𑀤𑀁 𑀅𑀭𑀼𑀡𑀯𑀢𑀺, 𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀦𑁆𑀦𑀭𑀲𑀸𑀢𑀺.]