𑁭. 𑀉𑀧𑀘𑀸𑀮𑀸𑀲𑀼𑀢𑁆𑀢𑀁

𑁧𑁬𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀉𑀧𑀘𑀸𑀮𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀉𑀧𑀘𑀸𑀮𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀧𑀘𑀸𑀮𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑁆𑀣 𑀦𑀼 𑀢𑁆𑀯𑀁, 𑀪𑀺𑀓𑁆𑀔𑀼𑀦𑀺, 𑀉𑀧𑁆𑀧𑀚𑁆𑀚𑀺𑀢𑀼𑀓𑀸𑀫𑀸’’𑀢𑀺? ‘‘𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀓𑀢𑁆𑀣𑀘𑀺 𑀉𑀧𑁆𑀧𑀚𑁆𑀚𑀺𑀢𑀼𑀓𑀸𑀫𑀸’’𑀢𑀺.

‘‘𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀸 𑀘, 𑀢𑀼𑀲𑀺𑀢𑀸 𑀘𑀸𑀧𑀺 𑀤𑁂𑀯𑀢𑀸;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑀸, 𑀬𑁂 𑀤𑁂𑀯𑀸 𑀯𑀲𑀯𑀢𑁆𑀢𑀺𑀦𑁄;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀺𑀥𑁂𑀳𑀺, 𑀭𑀢𑀺𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀲𑀻’’𑀢𑀺.

‘‘𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀸 𑀘, 𑀢𑀼𑀲𑀺𑀢𑀸 𑀘𑀸𑀧𑀺 𑀤𑁂𑀯𑀢𑀸;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑀸, 𑀬𑁂 𑀤𑁂𑀯𑀸 𑀯𑀲𑀯𑀢𑁆𑀢𑀺𑀦𑁄;

𑀓𑀸𑀫𑀩𑀦𑁆𑀥𑀦𑀩𑀤𑁆𑀥𑀸 𑀢𑁂, 𑀏𑀦𑁆𑀢𑀺 𑀫𑀸𑀭𑀯𑀲𑀁 𑀧𑀼𑀦.

‘‘𑀲𑀩𑁆𑀩𑁄 𑀆𑀤𑀻𑀧𑀺𑀢𑁄 [𑀲𑀩𑁆𑀩𑁄𑀯 𑀆𑀤𑀺𑀢𑁆𑀢𑁄 (𑀲𑁆𑀬𑀸. 𑀓𑀁.)] 𑀮𑁄𑀓𑁄, 𑀲𑀩𑁆𑀩𑁄 𑀮𑁄𑀓𑁄 𑀧𑀥𑀽𑀧𑀺𑀢𑁄;

𑀲𑀩𑁆𑀩𑁄 𑀧𑀚𑁆𑀚𑀮𑀺𑀢𑁄 [𑀧𑀚𑁆𑀚𑀮𑀺𑀢𑁄 (𑀲𑀩𑁆𑀩𑀢𑁆𑀣)] 𑀮𑁄𑀓𑁄, 𑀲𑀩𑁆𑀩𑁄 𑀮𑁄𑀓𑁄 𑀧𑀓𑀫𑁆𑀧𑀺𑀢𑁄.

‘‘𑀅𑀓𑀫𑁆𑀧𑀺𑀢𑀁 𑀅𑀧𑀚𑁆𑀚𑀮𑀺𑀢𑀁 [𑀅𑀘𑀮𑀺𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀅𑀧𑀼𑀣𑀼𑀚𑁆𑀚𑀦𑀲𑁂𑀯𑀺𑀢𑀁;

𑀅𑀕𑀢𑀺 𑀬𑀢𑁆𑀣 𑀫𑀸𑀭𑀲𑁆𑀲, 𑀢𑀢𑁆𑀣 𑀫𑁂 𑀦𑀺𑀭𑀢𑁄 𑀫𑀦𑁄’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀉𑀧𑀘𑀸𑀮𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.