𑁪. 𑀧𑀞𑀫𑀫𑀸𑀭𑀧𑀸𑀲𑀲𑀼𑀢𑁆𑀢𑀁

𑁧𑁪𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀫𑀬𑁆𑀳𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀅𑀦𑀼𑀢𑁆𑀢𑀭𑀸 𑀯𑀺𑀫𑀼𑀢𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀸, 𑀅𑀦𑀼𑀢𑁆𑀢𑀭𑀸 𑀯𑀺𑀫𑀼𑀢𑁆𑀢𑀺 𑀲𑀘𑁆𑀙𑀺𑀓𑀢𑀸. 𑀢𑀼𑀫𑁆𑀳𑁂𑀧𑀺, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀁 𑀅𑀦𑀼𑀧𑀸𑀧𑀼𑀡𑀸𑀣, 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀁 𑀲𑀘𑁆𑀙𑀺𑀓𑀭𑁄𑀣𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀩𑀤𑁆𑀥𑁄𑀲𑀺 𑀫𑀸𑀭𑀧𑀸𑀲𑁂𑀦, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀫𑀸𑀭𑀩𑀦𑁆𑀥𑀦𑀩𑀤𑁆𑀥𑁄𑀲𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺.

‘‘𑀫𑀼𑀢𑁆𑀢𑀸𑀳𑀁 [𑀫𑀼𑀢𑁆𑀢𑁄𑀳𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀸𑀭𑀧𑀸𑀲𑁂𑀦, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀫𑀸𑀭𑀩𑀦𑁆𑀥𑀦𑀫𑀼𑀢𑁆𑀢𑁄𑀫𑁆𑀳𑀺, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸…𑀧𑁂… 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.