𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀧𑀼𑀕𑁆𑀕𑀮𑀲𑀼𑀢𑁆𑀢𑀁

𑁧𑁩𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀘𑀢𑁆𑀢𑀸𑀭𑁄𑀫𑁂, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀢𑀫𑁄𑀢𑀫𑀧𑀭𑀸𑀬𑀦𑁄, 𑀢𑀫𑁄𑀚𑁄𑀢𑀺𑀧𑀭𑀸𑀬𑀦𑁄, 𑀚𑁄𑀢𑀺𑀢𑀫𑀧𑀭𑀸𑀬𑀦𑁄, 𑀚𑁄𑀢𑀺𑀚𑁄𑀢𑀺𑀧𑀭𑀸𑀬𑀦𑁄’’.

‘‘𑀓𑀣𑀜𑁆𑀘, 𑀫𑀳𑀸𑀭𑀸𑀚 𑀧𑀼𑀕𑁆𑀕𑀮𑁄 𑀢𑀫𑁄𑀢𑀫𑀧𑀭𑀸𑀬𑀦𑁄 𑀳𑁄𑀢𑀺? 𑀇𑀥, 𑀫𑀳𑀸𑀭𑀸𑀚, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺, 𑀘𑀡𑁆𑀟𑀸𑀮𑀓𑀼𑀮𑁂 𑀯𑀸 𑀯𑁂𑀦𑀓𑀼𑀮𑁂 [𑀯𑁂𑀡𑀓𑀼𑀮𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀸 𑀦𑁂𑀲𑀸𑀤𑀓𑀼𑀮𑁂 𑀯𑀸 𑀭𑀣𑀓𑀸𑀭𑀓𑀼𑀮𑁂 𑀯𑀸 𑀧𑀼𑀓𑁆𑀓𑀼𑀲𑀓𑀼𑀮𑁂 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑀪𑁄𑀚𑀦𑁂 𑀓𑀲𑀺𑀭𑀯𑀼𑀢𑁆𑀢𑀺𑀓𑁂, 𑀬𑀢𑁆𑀣 𑀓𑀲𑀺𑀭𑁂𑀦 𑀖𑀸𑀲𑀘𑁆𑀙𑀸𑀤𑁄 𑀮𑀩𑁆𑀪𑀢𑀺. 𑀲𑁄 𑀘 𑀳𑁄𑀢𑀺 𑀤𑀼𑀩𑁆𑀩𑀡𑁆𑀡𑁄 𑀤𑀼𑀤𑁆𑀤𑀲𑀺𑀓𑁄 𑀑𑀓𑁄𑀝𑀺𑀫𑀓𑁄 𑀩𑀯𑁆𑀳𑀸𑀩𑀸𑀥𑁄 [𑀩𑀳𑁆𑀯𑀸𑀩𑀸𑀥𑁄 (𑀓.)] 𑀓𑀸𑀡𑁄 𑀯𑀸 𑀓𑀼𑀡𑀻 𑀯𑀸 𑀔𑀜𑁆𑀚𑁄 𑀯𑀸 𑀧𑀓𑁆𑀔𑀳𑀢𑁄 𑀯𑀸, 𑀦 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀦𑁆𑀥𑀓𑀸𑀭𑀸 𑀯𑀸 𑀅𑀦𑁆𑀥𑀓𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀢𑀫𑀸 𑀯𑀸 𑀢𑀫𑀁 𑀕𑀘𑁆𑀙𑁂𑀬𑁆𑀬, 𑀮𑁄𑀳𑀺𑀢𑀫𑀮𑀸 𑀯𑀸 𑀮𑁄𑀳𑀺𑀢𑀫𑀮𑀁 𑀕𑀘𑁆𑀙𑁂𑀬𑁆𑀬. 𑀢𑀣𑀽𑀧𑀫𑀸𑀳𑀁, 𑀫𑀳𑀸𑀭𑀸𑀚, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 𑀢𑀫𑁄𑀢𑀫𑀧𑀭𑀸𑀬𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 𑀢𑀫𑁄𑀚𑁄𑀢𑀺𑀧𑀭𑀸𑀬𑀦𑁄 𑀳𑁄𑀢𑀺? 𑀇𑀥, 𑀫𑀳𑀸𑀭𑀸𑀚, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺, 𑀘𑀡𑁆𑀟𑀸𑀮𑀓𑀼𑀮𑁂 𑀯𑀸 𑀯𑁂𑀦𑀓𑀼𑀮𑁂 𑀯𑀸 𑀦𑁂𑀲𑀸𑀤𑀓𑀼𑀮𑁂 𑀯𑀸 𑀭𑀣𑀓𑀸𑀭𑀓𑀼𑀮𑁂 𑀯𑀸 𑀧𑀼𑀓𑁆𑀓𑀼𑀲𑀓𑀼𑀮𑁂 𑀯𑀸 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑀪𑁄𑀚𑀦𑁂 𑀓𑀲𑀺𑀭𑀯𑀼𑀢𑁆𑀢𑀺𑀓𑁂, 𑀬𑀢𑁆𑀣 𑀓𑀲𑀺𑀭𑁂𑀦 𑀖𑀸𑀲𑀘𑁆𑀙𑀸𑀤𑁄 𑀮𑀩𑁆𑀪𑀢𑀺. 𑀲𑁄 𑀘 𑀔𑁄 𑀳𑁄𑀢𑀺 𑀤𑀼𑀩𑁆𑀩𑀡𑁆𑀡𑁄 𑀤𑀼𑀤𑁆𑀤𑀲𑀺𑀓𑁄 𑀑𑀓𑁄𑀝𑀺𑀫𑀓𑁄 𑀩𑀯𑁆𑀳𑀸𑀩𑀸𑀥𑁄, 𑀓𑀸𑀡𑁄 𑀯𑀸 𑀓𑀼𑀡𑀻 𑀯𑀸 𑀔𑀜𑁆𑀚𑁄 𑀯𑀸 𑀧𑀓𑁆𑀔𑀳𑀢𑁄 𑀯𑀸, 𑀦 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀣𑀯𑀺𑀬𑀸 𑀯𑀸 𑀧𑀮𑁆𑀮𑀗𑁆𑀓𑀁 𑀆𑀭𑁄𑀳𑁂𑀬𑁆𑀬, 𑀧𑀮𑁆𑀮𑀗𑁆𑀓𑀸 𑀯𑀸 𑀅𑀲𑁆𑀲𑀧𑀺𑀝𑁆𑀞𑀺𑀁 𑀆𑀭𑁄𑀳𑁂𑀬𑁆𑀬, 𑀅𑀲𑁆𑀲𑀧𑀺𑀝𑁆𑀞𑀺𑀬𑀸 𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀆𑀭𑁄𑀳𑁂𑀬𑁆𑀬, 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀯𑀸 𑀧𑀸𑀲𑀸𑀤𑀁 𑀆𑀭𑁄𑀳𑁂𑀬𑁆𑀬. 𑀢𑀣𑀽𑀧𑀫𑀸𑀳𑀁, 𑀫𑀳𑀸𑀭𑀸𑀚, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 𑀢𑀫𑁄𑀚𑁄𑀢𑀺𑀧𑀭𑀸𑀬𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 𑀚𑁄𑀢𑀺𑀢𑀫𑀧𑀭𑀸𑀬𑀦𑁄 𑀳𑁄𑀢𑀺? 𑀇𑀥, 𑀫𑀳𑀸𑀭𑀸𑀚, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀘𑁆𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀯𑀸, 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁂 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁂 𑀧𑀳𑀽𑀢𑀥𑀦𑀥𑀜𑁆𑀜𑁂. 𑀲𑁄 𑀘 𑀳𑁄𑀢𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄, 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀸𑀲𑀸𑀤𑀸 𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀑𑀭𑁄𑀳𑁂𑀬𑁆𑀬, 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀯𑀸 𑀅𑀲𑁆𑀲𑀧𑀺𑀝𑁆𑀞𑀺𑀁 𑀑𑀭𑁄𑀳𑁂𑀬𑁆𑀬, 𑀅𑀲𑁆𑀲𑀧𑀺𑀝𑁆𑀞𑀺𑀬𑀸 𑀯𑀸 𑀧𑀮𑁆𑀮𑀗𑁆𑀓𑀁 𑀑𑀭𑁄𑀳𑁂𑀬𑁆𑀬, 𑀧𑀮𑁆𑀮𑀗𑁆𑀓𑀸 𑀯𑀸 𑀧𑀣𑀯𑀺𑀁 𑀑𑀭𑁄𑀳𑁂𑀬𑁆𑀬, 𑀧𑀣𑀯𑀺𑀬𑀸 𑀯𑀸 𑀅𑀦𑁆𑀥𑀓𑀸𑀭𑀁 𑀧𑀯𑀺𑀲𑁂𑀬𑁆𑀬. 𑀢𑀣𑀽𑀧𑀫𑀸𑀳𑀁, 𑀫𑀳𑀸𑀭𑀸𑀚, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 𑀚𑁄𑀢𑀺𑀢𑀫𑀧𑀭𑀸𑀬𑀦𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 𑀚𑁄𑀢𑀺𑀚𑁄𑀢𑀺𑀧𑀭𑀸𑀬𑀦𑁄 𑀳𑁄𑀢𑀺? 𑀇𑀥, 𑀫𑀳𑀸𑀭𑀸𑀚, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀘𑁆𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀯𑀸, 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁂 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁂 𑀧𑀳𑀽𑀢𑀥𑀦𑀥𑀜𑁆𑀜𑁂. 𑀲𑁄 𑀘 𑀳𑁄𑀢𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄, 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀮𑁆𑀮𑀗𑁆𑀓𑀸 𑀯𑀸 𑀧𑀮𑁆𑀮𑀗𑁆𑀓𑀁 𑀲𑀗𑁆𑀓𑀫𑁂𑀬𑁆𑀬, 𑀅𑀲𑁆𑀲𑀧𑀺𑀝𑁆𑀞𑀺𑀬𑀸 𑀯𑀸 𑀅𑀲𑁆𑀲𑀧𑀺𑀝𑁆𑀞𑀺𑀁 𑀲𑀗𑁆𑀓𑀫𑁂𑀬𑁆𑀬, 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀲𑀗𑁆𑀓𑀫𑁂𑀬𑁆𑀬, 𑀧𑀸𑀲𑀸𑀤𑀸 𑀯𑀸 𑀧𑀸𑀲𑀸𑀤𑀁 𑀲𑀗𑁆𑀓𑀫𑁂𑀬𑁆𑀬. 𑀢𑀣𑀽𑀧𑀫𑀸𑀳𑀁, 𑀫𑀳𑀸𑀭𑀸𑀚, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 𑀚𑁄𑀢𑀺𑀚𑁄𑀢𑀺𑀧𑀭𑀸𑀬𑀦𑁄 𑀳𑁄𑀢𑀺. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀤𑀮𑀺𑀤𑁆𑀤𑁄 𑀧𑀼𑀭𑀺𑀲𑁄 𑀭𑀸𑀚, 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺 𑀫𑀘𑁆𑀙𑀭𑀻;

𑀓𑀤𑀭𑀺𑀬𑁄 𑀧𑀸𑀧𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀦𑀸𑀤𑀭𑁄.

‘‘𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀯𑀸𑀧𑀺, 𑀅𑀜𑁆𑀜𑁂 𑀯𑀸𑀧𑀺 𑀯𑀦𑀺𑀩𑁆𑀩𑀓𑁂;

𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀦𑀢𑁆𑀣𑀺𑀓𑁄 𑀳𑁄𑀢𑀺 𑀭𑁄𑀲𑀓𑁄.

‘‘𑀤𑀤𑀫𑀸𑀦𑀁 𑀦𑀺𑀯𑀸𑀭𑁂𑀢𑀺, 𑀬𑀸𑀘𑀫𑀸𑀦𑀸𑀦 𑀪𑁄𑀚𑀦𑀁;

𑀢𑀸𑀤𑀺𑀲𑁄 𑀧𑀼𑀭𑀺𑀲𑁄 𑀭𑀸𑀚, 𑀫𑀻𑀬𑀫𑀸𑀦𑁄 𑀚𑀦𑀸𑀥𑀺𑀧;

𑀉𑀧𑁂𑀢𑀺 𑀦𑀺𑀭𑀬𑀁 𑀖𑁄𑀭𑀁, 𑀢𑀫𑁄𑀢𑀫𑀧𑀭𑀸𑀬𑀦𑁄.

‘‘𑀤𑀮𑀺𑀤𑁆𑀤𑁄 𑀧𑀼𑀭𑀺𑀲𑁄 𑀭𑀸𑀚, 𑀲𑀤𑁆𑀥𑁄 𑀳𑁄𑀢𑀺 𑀅𑀫𑀘𑁆𑀙𑀭𑀻;

𑀤𑀤𑀸𑀢𑀺 𑀲𑁂𑀝𑁆𑀞𑀲𑀗𑁆𑀓𑀧𑁆𑀧𑁄, 𑀅𑀩𑁆𑀬𑀕𑁆𑀕𑀫𑀦𑀲𑁄 𑀦𑀭𑁄.

‘‘𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀯𑀸𑀧𑀺, 𑀅𑀜𑁆𑀜𑁂 𑀯𑀸𑀧𑀺 𑀯𑀦𑀺𑀩𑁆𑀩𑀓𑁂;

𑀉𑀝𑁆𑀞𑀸𑀬 𑀅𑀪𑀺𑀯𑀸𑀤𑁂𑀢𑀺, 𑀲𑀫𑀘𑀭𑀺𑀬𑀸𑀬 𑀲𑀺𑀓𑁆𑀔𑀢𑀺.

‘‘𑀤𑀤𑀫𑀸𑀦𑀁 𑀦 𑀯𑀸𑀭𑁂𑀢𑀺 [𑀦 𑀦𑀺𑀯𑀸𑀭𑁂𑀢𑀺 (𑀲𑀻.)], 𑀬𑀸𑀘𑀫𑀸𑀦𑀸𑀦 𑀪𑁄𑀚𑀦𑀁;

𑀢𑀸𑀤𑀺𑀲𑁄 𑀧𑀼𑀭𑀺𑀲𑁄 𑀭𑀸𑀚, 𑀫𑀻𑀬𑀫𑀸𑀦𑁄 𑀚𑀦𑀸𑀥𑀺𑀧;

𑀉𑀧𑁂𑀢𑀺 𑀢𑀺𑀤𑀺𑀯𑀁 𑀞𑀸𑀦𑀁, 𑀢𑀫𑁄𑀚𑁄𑀢𑀺𑀧𑀭𑀸𑀬𑀦𑁄.

‘‘𑀅𑀟𑁆𑀠𑁄 𑀘𑁂 [𑀅𑀟𑁆𑀠𑁄 𑀯𑁂 (𑀧𑀻. 𑀓.)] 𑀧𑀼𑀭𑀺𑀲𑁄 𑀭𑀸𑀚, 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺 𑀫𑀘𑁆𑀙𑀭𑀻;

𑀓𑀤𑀭𑀺𑀬𑁄 𑀧𑀸𑀧𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀦𑀸𑀤𑀭𑁄.

‘‘𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀯𑀸𑀧𑀺, 𑀅𑀜𑁆𑀜𑁂 𑀯𑀸𑀧𑀺 𑀯𑀦𑀺𑀩𑁆𑀩𑀓𑁂;

𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀦𑀢𑁆𑀣𑀺𑀓𑁄 𑀳𑁄𑀢𑀺 𑀭𑁄𑀲𑀓𑁄.

‘‘𑀤𑀤𑀫𑀸𑀦𑀁 𑀦𑀺𑀯𑀸𑀭𑁂𑀢𑀺, 𑀬𑀸𑀘𑀫𑀸𑀦𑀸𑀦 𑀪𑁄𑀚𑀦𑀁;

𑀢𑀸𑀤𑀺𑀲𑁄 𑀧𑀼𑀭𑀺𑀲𑁄 𑀭𑀸𑀚, 𑀫𑀻𑀬𑀫𑀸𑀦𑁄 𑀚𑀦𑀸𑀥𑀺𑀧;

𑀉𑀧𑁂𑀢𑀺 𑀦𑀺𑀭𑀬𑀁 𑀖𑁄𑀭𑀁, 𑀚𑁄𑀢𑀺𑀢𑀫𑀧𑀭𑀸𑀬𑀦𑁄.

‘‘𑀅𑀟𑁆𑀠𑁄 𑀘𑁂 𑀧𑀼𑀭𑀺𑀲𑁄 𑀭𑀸𑀚, 𑀲𑀤𑁆𑀥𑁄 𑀳𑁄𑀢𑀺 𑀅𑀫𑀘𑁆𑀙𑀭𑀻;

𑀤𑀤𑀸𑀢𑀺 𑀲𑁂𑀝𑁆𑀞𑀲𑀗𑁆𑀓𑀧𑁆𑀧𑁄, 𑀅𑀩𑁆𑀬𑀕𑁆𑀕𑀫𑀦𑀲𑁄 𑀦𑀭𑁄.

‘‘𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀯𑀸𑀧𑀺, 𑀅𑀜𑁆𑀜𑁂 𑀯𑀸𑀧𑀺 𑀯𑀦𑀺𑀩𑁆𑀩𑀓𑁂;

𑀉𑀝𑁆𑀞𑀸𑀬 𑀅𑀪𑀺𑀯𑀸𑀤𑁂𑀢𑀺, 𑀲𑀫𑀘𑀭𑀺𑀬𑀸𑀬 𑀲𑀺𑀓𑁆𑀔𑀢𑀺.

‘‘𑀤𑀤𑀫𑀸𑀦𑀁 𑀦 𑀯𑀸𑀭𑁂𑀢𑀺, 𑀬𑀸𑀘𑀫𑀸𑀦𑀸𑀦 𑀪𑁄𑀚𑀦𑀁;

𑀢𑀸𑀤𑀺𑀲𑁄 𑀧𑀼𑀭𑀺𑀲𑁄 𑀭𑀸𑀚, 𑀫𑀻𑀬𑀫𑀸𑀦𑁄 𑀚𑀦𑀸𑀥𑀺𑀧;

𑀉𑀧𑁂𑀢𑀺 𑀢𑀺𑀤𑀺𑀯𑀁 𑀞𑀸𑀦𑀁, 𑀚𑁄𑀢𑀺𑀚𑁄𑀢𑀺𑀧𑀭𑀸𑀬𑀦𑁄’’𑀢𑀺.

𑁨. 𑀅𑀬𑁆𑀬𑀺𑀓𑀸𑀲𑀼𑀢𑁆𑀢𑀁

𑁧𑁩𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤, 𑀓𑀼𑀢𑁄 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀆𑀕𑀘𑁆𑀙𑀲𑀺 𑀤𑀺𑀯𑀸𑀤𑀺𑀯𑀲𑁆𑀲𑀸’’𑀢𑀺?

‘‘𑀅𑀬𑁆𑀬𑀺𑀓𑀸 𑀫𑁂, 𑀪𑀦𑁆𑀢𑁂, 𑀓𑀸𑀮𑀗𑁆𑀓𑀢𑀸 𑀚𑀺𑀡𑁆𑀡𑀸 𑀯𑀼𑀟𑁆𑀠𑀸 𑀫𑀳𑀮𑁆𑀮𑀺𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀯𑀻𑀲𑀯𑀲𑁆𑀲𑀲𑀢𑀺𑀓𑀸 𑀚𑀸𑀢𑀺𑀬𑀸. 𑀅𑀬𑁆𑀬𑀺𑀓𑀸 𑀔𑁄 𑀧𑀦 𑀫𑁂, 𑀪𑀦𑁆𑀢𑁂, 𑀧𑀺𑀬𑀸 𑀳𑁄𑀢𑀺 𑀫𑀦𑀸𑀧𑀸. 𑀳𑀢𑁆𑀣𑀺𑀭𑀢𑀦𑁂𑀦 𑀘𑁂𑀧𑀸𑀳𑀁, 𑀪𑀦𑁆𑀢𑁂, 𑀮𑀪𑁂𑀬𑁆𑀬𑀁 ‘𑀫𑀸 𑀫𑁂 𑀅𑀬𑁆𑀬𑀺𑀓𑀸 𑀓𑀸𑀮𑀫𑀓𑀸𑀲𑀻’𑀢𑀺, 𑀳𑀢𑁆𑀣𑀺𑀭𑀢𑀦𑀫𑁆𑀧𑀸𑀳𑀁 𑀤𑀤𑁂𑀬𑁆𑀬𑀁 𑁋 ‘𑀫𑀸 𑀫𑁂 𑀅𑀬𑁆𑀬𑀺𑀓𑀸 𑀓𑀸𑀮𑀫𑀓𑀸𑀲𑀻’𑀢𑀺. 𑀅𑀲𑁆𑀲𑀭𑀢𑀦𑁂𑀦 𑀘𑁂𑀧𑀸𑀳𑀁, 𑀪𑀦𑁆𑀢𑁂, 𑀮𑀪𑁂𑀬𑁆𑀬𑀁 ‘𑀫𑀸 𑀫𑁂 𑀅𑀬𑁆𑀬𑀺𑀓𑀸 𑀓𑀸𑀮𑀫𑀓𑀸𑀲𑀻’𑀢𑀺, 𑀅𑀲𑁆𑀲𑀭𑀢𑀦𑀫𑁆𑀧𑀸𑀳𑀁 𑀤𑀤𑁂𑀬𑁆𑀬𑀁 𑁋 ‘𑀫𑀸 𑀫𑁂 𑀅𑀬𑁆𑀬𑀺𑀓𑀸 𑀓𑀸𑀮𑀫𑀓𑀸𑀲𑀻’𑀢𑀺. 𑀕𑀸𑀫𑀯𑀭𑁂𑀦 𑀘𑁂𑀧𑀸𑀳𑀁 𑀪𑀦𑁆𑀢𑁂, 𑀮𑀪𑁂𑀬𑁆𑀬𑀁 ‘𑀫𑀸 𑀫𑁂 𑀅𑀬𑁆𑀬𑀺𑀓𑀸 𑀓𑀸𑀮𑀫𑀓𑀸𑀲𑀻’𑀢𑀺, 𑀕𑀸𑀫𑀯𑀭𑀫𑁆𑀧𑀸𑀳𑀁 𑀤𑀤𑁂𑀬𑁆𑀬𑀁 𑁋 ‘𑀫𑀸 𑀫𑁂 𑀅𑀬𑁆𑀬𑀺𑀓𑀸 𑀓𑀸𑀮𑀫𑀓𑀸𑀲𑀻’𑀢𑀺. 𑀚𑀦𑀧𑀤𑀧𑀤𑁂𑀲𑁂𑀦 [𑀚𑀦𑀧𑀤𑁂𑀦 (𑀲𑀻. 𑀲𑁆𑀬𑀸. 𑀧𑀻.)] 𑀘𑁂𑀧𑀸𑀳𑀁, 𑀪𑀦𑁆𑀢𑁂, 𑀮𑀪𑁂𑀬𑁆𑀬𑀁 ‘𑀫𑀸 𑀫𑁂 𑀅𑀬𑁆𑀬𑀺𑀓𑀸 𑀓𑀸𑀮𑀫𑀓𑀸𑀲𑀻’𑀢𑀺, 𑀚𑀦𑀧𑀤𑀧𑀤𑁂𑀲𑀫𑁆𑀧𑀸𑀳𑀁 𑀤𑀤𑁂𑀬𑁆𑀬𑀁 𑁋 ‘𑀫𑀸 𑀫𑁂 𑀅𑀬𑁆𑀬𑀺𑀓𑀸 𑀓𑀸𑀮𑀫𑀓𑀸𑀲𑀻’𑀢𑀺. ‘𑀲𑀩𑁆𑀩𑁂 𑀲𑀢𑁆𑀢𑀸, 𑀫𑀳𑀸𑀭𑀸𑀚, 𑀫𑀭𑀡𑀥𑀫𑁆𑀫𑀸 𑀫𑀭𑀡𑀧𑀭𑀺𑀬𑁄𑀲𑀸𑀦𑀸 𑀫𑀭𑀡𑀁 𑀅𑀦𑀢𑀻𑀢𑀸’𑀢𑀺. ‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯𑀲𑀼𑀪𑀸𑀲𑀺𑀢𑀫𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑁋 𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀡𑀥𑀫𑁆𑀫𑀸 𑀫𑀭𑀡𑀧𑀭𑀺𑀬𑁄𑀲𑀸𑀦𑀸 𑀫𑀭𑀡𑀁 𑀅𑀦𑀢𑀻𑀢𑀸’’’𑀢𑀺.

‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚! 𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀡𑀥𑀫𑁆𑀫𑀸 𑀫𑀭𑀡𑀧𑀭𑀺𑀬𑁄𑀲𑀸𑀦𑀸 𑀫𑀭𑀡𑀁 𑀅𑀦𑀢𑀻𑀢𑀸. 𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀬𑀸𑀦𑀺 𑀓𑀸𑀦𑀺𑀘𑀺 𑀓𑀼𑀫𑁆𑀪𑀓𑀸𑀭𑀪𑀸𑀚𑀦𑀸𑀦𑀺 𑀆𑀫𑀓𑀸𑀦𑀺 𑀘𑁂𑀯 𑀧𑀓𑁆𑀓𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀪𑁂𑀤𑀦𑀥𑀫𑁆𑀫𑀸𑀦𑀺 𑀪𑁂𑀤𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀪𑁂𑀤𑀦𑀁 𑀅𑀦𑀢𑀻𑀢𑀸𑀦𑀺; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀡𑀥𑀫𑁆𑀫𑀸 𑀫𑀭𑀡𑀧𑀭𑀺𑀬𑁄𑀲𑀸𑀦𑀸 𑀫𑀭𑀡𑀁 𑀅𑀦𑀢𑀻𑀢𑀸’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀜𑁆𑀳𑀺 𑀚𑀻𑀯𑀺𑀢𑀁;

𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸;

𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀧𑀼𑀜𑁆𑀜𑀓𑀫𑁆𑀫𑀸 𑀘 𑀲𑀼𑀕𑁆𑀕𑀢𑀺𑀁.

‘‘𑀢𑀲𑁆𑀫𑀸 𑀓𑀭𑁂𑀬𑁆𑀬 𑀓𑀮𑁆𑀬𑀸𑀡𑀁, 𑀦𑀺𑀘𑀬𑀁 𑀲𑀫𑁆𑀧𑀭𑀸𑀬𑀺𑀓𑀁;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

𑁩. 𑀮𑁄𑀓𑀲𑀼𑀢𑁆𑀢𑀁

𑁧𑁩𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀮𑁄𑀓𑀲𑁆𑀲 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺? ‘‘𑀢𑀬𑁄 𑀔𑁄, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀲 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀓𑀢𑀫𑁂 𑀢𑀬𑁄? 𑀮𑁄𑀪𑁄 𑀔𑁄, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀲 𑀥𑀫𑁆𑀫𑁄, 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀤𑁄𑀲𑁄 𑀔𑁄, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀲 𑀥𑀫𑁆𑀫𑁄, 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀫𑁄𑀳𑁄 𑀔𑁄, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀲 𑀥𑀫𑁆𑀫𑁄, 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀢𑀬𑁄 𑀮𑁄𑀓𑀲𑁆𑀲 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀧𑀼𑀭𑀺𑀲𑀁 𑀧𑀸𑀧𑀘𑁂𑀢𑀲𑀁;

𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀫𑁆𑀨𑀮’’𑀦𑁆𑀢𑀺.

𑁪. 𑀇𑀲𑁆𑀲𑀢𑁆𑀢𑀲𑀼𑀢𑁆𑀢𑀁

𑁧𑁩𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑁆𑀣 𑀦𑀼 𑀔𑁄, 𑀪𑀦𑁆𑀢𑁂, 𑀤𑀸𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺? ‘‘𑀬𑀢𑁆𑀣 𑀔𑁄, 𑀫𑀳𑀸𑀭𑀸𑀚, 𑀘𑀺𑀢𑁆𑀢𑀁 𑀧𑀲𑀻𑀤𑀢𑀻’’𑀢𑀺. ‘‘𑀓𑀢𑁆𑀣 𑀧𑀦, 𑀪𑀦𑁆𑀢𑁂, 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺? ‘‘𑀅𑀜𑁆𑀜𑀁 𑀔𑁄 𑀏𑀢𑀁, 𑀫𑀳𑀸𑀭𑀸𑀚, 𑀓𑀢𑁆𑀣 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀅𑀜𑁆𑀜𑀁 𑀧𑀦𑁂𑀢𑀁 𑀓𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺? 𑀲𑀻𑀮𑀯𑀢𑁄 𑀔𑁄, 𑀫𑀳𑀸𑀭𑀸𑀚, 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦𑁄 𑀢𑀣𑀸 𑀤𑀼𑀲𑁆𑀲𑀻𑀮𑁂. 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸, 𑀢𑁂 𑀔𑀫𑁂𑀬𑁆𑀬, 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀇𑀥 𑀢𑁆𑀬𑀲𑁆𑀲 𑀬𑀼𑀤𑁆𑀥𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 [𑀲𑀫𑀽𑀧𑀩𑁆𑀩𑀽𑀴𑁆𑀳𑁄 (𑀲𑀻.), 𑀲𑀫𑀼𑀧𑀩𑁆𑀩𑀼𑀴𑁆𑀳𑁄 (𑀧𑀻.)]. 𑀅𑀣 𑀆𑀕𑀘𑁆𑀙𑁂𑀬𑁆𑀬 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀅𑀲𑀺𑀓𑁆𑀔𑀺𑀢𑁄 𑀅𑀓𑀢𑀳𑀢𑁆𑀣𑁄 𑀅𑀓𑀢𑀬𑁄𑀕𑁆𑀕𑁄 𑀅𑀓𑀢𑀽𑀧𑀸𑀲𑀦𑁄 𑀪𑀻𑀭𑀼 𑀙𑀫𑁆𑀪𑀻 𑀉𑀢𑁆𑀭𑀸𑀲𑀻 𑀧𑀮𑀸𑀬𑀻. 𑀪𑀭𑁂𑀬𑁆𑀬𑀸𑀲𑀺 𑀢𑀁 𑀧𑀼𑀭𑀺𑀲𑀁, 𑀅𑀢𑁆𑀣𑁄 𑀘 𑀢𑁂 𑀢𑀸𑀤𑀺𑀲𑁂𑀦 𑀧𑀼𑀭𑀺𑀲𑁂𑀦𑀸’’𑀢𑀺? ‘‘𑀦𑀸𑀳𑀁, 𑀪𑀦𑁆𑀢𑁂, 𑀪𑀭𑁂𑀬𑁆𑀬𑀁 𑀢𑀁 𑀧𑀼𑀭𑀺𑀲𑀁, 𑀦 𑀘 𑀫𑁂 𑀅𑀢𑁆𑀣𑁄 𑀢𑀸𑀤𑀺𑀲𑁂𑀦 𑀧𑀼𑀭𑀺𑀲𑁂𑀦𑀸’’𑀢𑀺. ‘‘𑀅𑀣 𑀆𑀕𑀘𑁆𑀙𑁂𑀬𑁆𑀬 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄 𑀅𑀲𑀺𑀓𑁆𑀔𑀺𑀢𑁄…𑀧𑁂… 𑀅𑀣 𑀆𑀕𑀘𑁆𑀙𑁂𑀬𑁆𑀬 𑀯𑁂𑀲𑁆𑀲𑀓𑀼𑀫𑀸𑀭𑁄 𑀅𑀲𑀺𑀓𑁆𑀔𑀺𑀢𑁄…𑀧𑁂… 𑀅𑀣 𑀆𑀕𑀘𑁆𑀙𑁂𑀬𑁆𑀬 𑀲𑀼𑀤𑁆𑀤𑀓𑀼𑀫𑀸𑀭𑁄 𑀅𑀲𑀺𑀓𑁆𑀔𑀺𑀢𑁄…𑀧𑁂… 𑀦 𑀘 𑀫𑁂 𑀅𑀢𑁆𑀣𑁄 𑀢𑀸𑀤𑀺𑀲𑁂𑀦 𑀧𑀼𑀭𑀺𑀲𑁂𑀦𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀇𑀥 𑀢𑁆𑀬𑀲𑁆𑀲 𑀬𑀼𑀤𑁆𑀥𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄. 𑀅𑀣 𑀆𑀕𑀘𑁆𑀙𑁂𑀬𑁆𑀬 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀲𑀼𑀲𑀺𑀓𑁆𑀔𑀺𑀢𑁄 𑀓𑀢𑀳𑀢𑁆𑀣𑁄 𑀓𑀢𑀬𑁄𑀕𑁆𑀕𑁄 𑀓𑀢𑀽𑀧𑀸𑀲𑀦𑁄 𑀅𑀪𑀻𑀭𑀼 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻. 𑀪𑀭𑁂𑀬𑁆𑀬𑀸𑀲𑀺 𑀢𑀁 𑀧𑀼𑀭𑀺𑀲𑀁, 𑀅𑀢𑁆𑀣𑁄 𑀘 𑀢𑁂 𑀢𑀸𑀤𑀺𑀲𑁂𑀦 𑀧𑀼𑀭𑀺𑀲𑁂𑀦𑀸’’𑀢𑀺? ‘‘𑀪𑀭𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀢𑀁 𑀧𑀼𑀭𑀺𑀲𑀁, 𑀅𑀢𑁆𑀣𑁄 𑀘 𑀫𑁂 𑀢𑀸𑀤𑀺𑀲𑁂𑀦 𑀧𑀼𑀭𑀺𑀲𑁂𑀦𑀸’’𑀢𑀺. ‘‘𑀅𑀣 𑀆𑀕𑀘𑁆𑀙𑁂𑀬𑁆𑀬 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄…𑀧𑁂… 𑀅𑀣 𑀆𑀕𑀘𑁆𑀙𑁂𑀬𑁆𑀬 𑀯𑁂𑀲𑁆𑀲𑀓𑀼𑀫𑀸𑀭𑁄…𑀧𑁂… 𑀅𑀣 𑀆𑀕𑀘𑁆𑀙𑁂𑀬𑁆𑀬 𑀲𑀼𑀤𑁆𑀤𑀓𑀼𑀫𑀸𑀭𑁄 𑀲𑀼𑀲𑀺𑀓𑁆𑀔𑀺𑀢𑁄 𑀓𑀢𑀳𑀢𑁆𑀣𑁄 𑀓𑀢𑀬𑁄𑀕𑁆𑀕𑁄 𑀓𑀢𑀽𑀧𑀸𑀲𑀦𑁄 𑀅𑀪𑀻𑀭𑀼 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻. 𑀪𑀭𑁂𑀬𑁆𑀬𑀸𑀲𑀺 𑀢𑀁 𑀧𑀼𑀭𑀺𑀲𑀁, 𑀅𑀢𑁆𑀣𑁄 𑀘 𑀢𑁂 𑀢𑀸𑀤𑀺𑀲𑁂𑀦 𑀧𑀼𑀭𑀺𑀲𑁂𑀦𑀸’’𑀢𑀺? ‘‘𑀪𑀭𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀢𑀁 𑀧𑀼𑀭𑀺𑀲𑀁, 𑀅𑀢𑁆𑀣𑁄 𑀘 𑀫𑁂 𑀢𑀸𑀤𑀺𑀲𑁂𑀦 𑀧𑀼𑀭𑀺𑀲𑁂𑀦𑀸’’𑀢𑀺.

‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀲𑁆𑀫𑀸 𑀓𑀲𑁆𑀫𑀸 𑀘𑁂𑀧𑀺 [𑀬𑀲𑁆𑀫𑀸 𑀘𑁂𑀧𑀺 (𑀲𑀻. 𑀲𑁆𑀬𑀸. 𑀓𑀁. 𑀓.)] 𑀓𑀼𑀮𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀲𑁄 𑀘 𑀳𑁄𑀢𑀺 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀺𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀓𑀢𑀫𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺? 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀦𑁄 𑀳𑁄𑀢𑀺, 𑀩𑁆𑀬𑀸𑀧𑀸𑀤𑁄 𑀧𑀳𑀻𑀦𑁄 𑀳𑁄𑀢𑀺, 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀦𑀁 𑀳𑁄𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀦𑀁 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀦𑀸 𑀳𑁄𑀢𑀺. 𑀇𑀫𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺? 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀢𑀺 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁂 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑁋

‘‘𑀇𑀲𑁆𑀲𑀢𑁆𑀢𑀁 [𑀇𑀲𑁆𑀲𑀢𑁆𑀣𑀁 (𑀲𑀻. 𑀲𑁆𑀬𑀸. 𑀓𑀁.)] 𑀩𑀮𑀯𑀻𑀭𑀺𑀬𑀜𑁆𑀘 [𑀩𑀮𑀯𑀺𑀭𑀺𑀬𑀜𑁆𑀘 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀬𑀲𑁆𑀫𑀺𑀁 𑀯𑀺𑀚𑁆𑀚𑁂𑀣 𑀫𑀸𑀡𑀯𑁂;

𑀢𑀁 𑀬𑀼𑀤𑁆𑀥𑀢𑁆𑀣𑁄 𑀪𑀭𑁂 𑀭𑀸𑀚𑀸, 𑀦𑀸𑀲𑀽𑀭𑀁 𑀚𑀸𑀢𑀺𑀧𑀘𑁆𑀘𑀬𑀸.

‘‘𑀢𑀣𑁂𑀯 𑀔𑀦𑁆𑀢𑀺𑀲𑁄𑀭𑀘𑁆𑀘𑀁, 𑀥𑀫𑁆𑀫𑀸 𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸;

𑀅𑀭𑀺𑀬𑀯𑀼𑀢𑁆𑀢𑀺𑀁 𑀫𑁂𑀥𑀸𑀯𑀺𑀁, 𑀳𑀻𑀦𑀚𑀘𑁆𑀘𑀫𑁆𑀧𑀺 𑀧𑀽𑀚𑀬𑁂.

‘‘𑀓𑀸𑀭𑀬𑁂 𑀅𑀲𑁆𑀲𑀫𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂;

𑀧𑀧𑀜𑁆𑀘 𑀯𑀺𑀯𑀦𑁂 𑀓𑀬𑀺𑀭𑀸, 𑀤𑀼𑀕𑁆𑀕𑁂 𑀲𑀗𑁆𑀓𑀫𑀦𑀸𑀦𑀺 𑀘.

‘‘𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

‘‘𑀬𑀣𑀸 𑀳𑀺 𑀫𑁂𑀖𑁄 𑀣𑀦𑀬𑀁, 𑀯𑀺𑀚𑁆𑀚𑀼𑀫𑀸𑀮𑀻 𑀲𑀢𑀓𑁆𑀓𑀓𑀼;

𑀣𑀮𑀁 𑀦𑀺𑀦𑁆𑀦𑀜𑁆𑀘 𑀧𑀽𑀭𑁂𑀢𑀺, 𑀅𑀪𑀺𑀯𑀲𑁆𑀲𑀁 𑀯𑀲𑀼𑀦𑁆𑀥𑀭𑀁.

‘‘𑀢𑀣𑁂𑀯 𑀲𑀤𑁆𑀥𑁄 𑀲𑀼𑀢𑀯𑀸, 𑀅𑀪𑀺𑀲𑀗𑁆𑀔𑀘𑁆𑀘 𑀪𑁄𑀚𑀦𑀁;

𑀯𑀦𑀺𑀩𑁆𑀩𑀓𑁂 𑀢𑀧𑁆𑀧𑀬𑀢𑀺, 𑀅𑀦𑁆𑀦𑀧𑀸𑀦𑁂𑀦 𑀧𑀡𑁆𑀟𑀺𑀢𑁄.

‘‘𑀆𑀫𑁄𑀤𑀫𑀸𑀦𑁄 𑀧𑀓𑀺𑀭𑁂𑀢𑀺, 𑀤𑁂𑀣 𑀤𑁂𑀣𑀸𑀢𑀺 𑀪𑀸𑀲𑀢𑀺;

𑀢𑀁 𑀳𑀺𑀲𑁆𑀲 𑀕𑀚𑁆𑀚𑀺𑀢𑀁 𑀳𑁄𑀢𑀺, 𑀤𑁂𑀯𑀲𑁆𑀲𑁂𑀯 𑀧𑀯𑀲𑁆𑀲𑀢𑁄;

𑀲𑀸 𑀧𑀼𑀜𑁆𑀜𑀥𑀸𑀭𑀸 𑀯𑀺𑀧𑀼𑀮𑀸, 𑀤𑀸𑀢𑀸𑀭𑀁 𑀅𑀪𑀺𑀯𑀲𑁆𑀲𑀢𑀻’’𑀢𑀺.

𑁫. 𑀧𑀩𑁆𑀩𑀢𑀽𑀧𑀫𑀲𑀼𑀢𑁆𑀢𑀁

𑁧𑁩𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤, 𑀓𑀼𑀢𑁄 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀆𑀕𑀘𑁆𑀙𑀲𑀺 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺? ‘‘𑀬𑀸𑀦𑀺 𑀢𑀸𑀦𑀺, 𑀪𑀦𑁆𑀢𑁂, 𑀭𑀜𑁆𑀜𑀁 𑀔𑀢𑁆𑀢𑀺𑀬𑀸𑀦𑀁 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀸𑀦𑀁 𑀇𑀲𑁆𑀲𑀭𑀺𑀬𑀫𑀤𑀫𑀢𑁆𑀢𑀸𑀦𑀁 𑀓𑀸𑀫𑀕𑁂𑀥𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑀸𑀦𑀁 𑀫𑀳𑀦𑁆𑀢𑀁 𑀧𑀣𑀯𑀺𑀫𑀡𑁆𑀟𑀮𑀁 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀦𑁆𑀢𑀸𑀦𑀁 𑀭𑀸𑀚𑀓𑀭𑀡𑀻𑀬𑀸𑀦𑀺 𑀪𑀯𑀦𑁆𑀢𑀺, 𑀢𑁂𑀲𑀼 𑀔𑁆𑀯𑀸𑀳𑀁, 𑀏𑀢𑀭𑀳𑀺 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑁄’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀇𑀥 𑀢𑁂 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀤𑁆𑀥𑀸𑀬𑀺𑀓𑁄 𑀧𑀘𑁆𑀘𑀬𑀺𑀓𑁄. 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀬𑀕𑁆𑀖𑁂, 𑀫𑀳𑀸𑀭𑀸𑀚, 𑀚𑀸𑀦𑁂𑀬𑁆𑀬𑀸𑀲𑀺, 𑀅𑀳𑀁 𑀆𑀕𑀘𑁆𑀙𑀸𑀫𑀺 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬. 𑀢𑀢𑁆𑀣𑀤𑁆𑀤𑀲𑀁 𑀫𑀳𑀦𑁆𑀢𑀁 𑀧𑀩𑁆𑀩𑀢𑀁 𑀅𑀩𑁆𑀪𑀲𑀫𑀁 𑀲𑀩𑁆𑀩𑁂 𑀧𑀸𑀡𑁂 𑀦𑀺𑀧𑁆𑀧𑁄𑀣𑁂𑀦𑁆𑀢𑁄 𑀆𑀕𑀘𑁆𑀙𑀢𑀺. 𑀬𑀁 𑀢𑁂, 𑀫𑀳𑀸𑀭𑀸𑀚, 𑀓𑀭𑀡𑀻𑀬𑀁, 𑀢𑀁 𑀓𑀭𑁄𑀳𑀻’𑀢𑀺. 𑀅𑀣 𑀤𑀼𑀢𑀺𑀬𑁄 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬…𑀧𑁂… 𑀅𑀣 𑀢𑀢𑀺𑀬𑁄 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬…𑀧𑁂… 𑀅𑀣 𑀘𑀢𑀼𑀢𑁆𑀣𑁄 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀤𑁆𑀥𑀸𑀬𑀺𑀓𑁄 𑀧𑀘𑁆𑀘𑀬𑀺𑀓𑁄. 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀬𑀕𑁆𑀖𑁂 𑀫𑀳𑀸𑀭𑀸𑀚, 𑀚𑀸𑀦𑁂𑀬𑁆𑀬𑀸𑀲𑀺, 𑀅𑀳𑀁 𑀆𑀕𑀘𑁆𑀙𑀸𑀫𑀺 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬. 𑀢𑀢𑁆𑀣𑀤𑁆𑀤𑀲𑀁 𑀫𑀳𑀦𑁆𑀢𑀁 𑀧𑀩𑁆𑀩𑀢𑀁 𑀅𑀩𑁆𑀪𑀲𑀫𑀁 𑀲𑀩𑁆𑀩𑁂 𑀧𑀸𑀡𑁂 𑀦𑀺𑀧𑁆𑀧𑁄𑀣𑁂𑀦𑁆𑀢𑁄 𑀆𑀕𑀘𑁆𑀙𑀢𑀺. 𑀬𑀁 𑀢𑁂, 𑀫𑀳𑀸𑀭𑀸𑀚, 𑀓𑀭𑀡𑀻𑀬𑀁 𑀢𑀁 𑀓𑀭𑁄𑀳𑀻’𑀢𑀺. 𑀏𑀯𑀭𑀽𑀧𑁂 𑀢𑁂, 𑀫𑀳𑀸𑀭𑀸𑀚, 𑀫𑀳𑀢𑀺 𑀫𑀳𑀩𑁆𑀪𑀬𑁂 𑀲𑀫𑀼𑀧𑁆𑀧𑀦𑁆𑀦𑁂 𑀤𑀸𑀭𑀼𑀡𑁂 𑀫𑀦𑀼𑀲𑁆𑀲𑀓𑁆𑀔𑀬𑁂 [𑀫𑀦𑀼𑀲𑁆𑀲𑀓𑀸𑀬𑁂 (𑀓.)] 𑀤𑀼𑀮𑁆𑀮𑀪𑁂 𑀫𑀦𑀼𑀲𑁆𑀲𑀢𑁆𑀢𑁂 𑀓𑀺𑀫𑀲𑁆𑀲 𑀓𑀭𑀡𑀻𑀬’’𑀦𑁆𑀢𑀺?

‘‘𑀏𑀯𑀭𑀽𑀧𑁂 𑀫𑁂, 𑀪𑀦𑁆𑀢𑁂, 𑀫𑀳𑀢𑀺 𑀫𑀳𑀩𑁆𑀪𑀬𑁂 𑀲𑀫𑀼𑀧𑁆𑀧𑀦𑁆𑀦𑁂 𑀤𑀸𑀭𑀼𑀡𑁂 𑀫𑀦𑀼𑀲𑁆𑀲𑀓𑁆𑀔𑀬𑁂 𑀤𑀼𑀮𑁆𑀮𑀪𑁂 𑀫𑀦𑀼𑀲𑁆𑀲𑀢𑁆𑀢𑁂 𑀓𑀺𑀫𑀲𑁆𑀲 𑀓𑀭𑀡𑀻𑀬𑀁 𑀅𑀜𑁆𑀜𑀢𑁆𑀭 𑀥𑀫𑁆𑀫𑀘𑀭𑀺𑀬𑀸𑀬 𑀅𑀜𑁆𑀜𑀢𑁆𑀭 𑀲𑀫𑀘𑀭𑀺𑀬𑀸𑀬 𑀅𑀜𑁆𑀜𑀢𑁆𑀭 𑀓𑀼𑀲𑀮𑀓𑀺𑀭𑀺𑀬𑀸𑀬 𑀅𑀜𑁆𑀜𑀢𑁆𑀭 𑀧𑀼𑀜𑁆𑀜𑀓𑀺𑀭𑀺𑀬𑀸𑀬𑀸’’𑀢𑀺?

‘‘𑀆𑀭𑁄𑀘𑁂𑀫𑀺 𑀔𑁄 𑀢𑁂, 𑀫𑀳𑀸𑀭𑀸𑀚, 𑀧𑀝𑀺𑀯𑁂𑀤𑁂𑀫𑀺 𑀔𑁄 𑀢𑁂, 𑀫𑀳𑀸𑀭𑀸𑀚, 𑀅𑀥𑀺𑀯𑀢𑁆𑀢𑀢𑀺 𑀔𑁄 𑀢𑀁, 𑀫𑀳𑀸𑀭𑀸𑀚, 𑀚𑀭𑀸𑀫𑀭𑀡𑀁. 𑀅𑀥𑀺𑀯𑀢𑁆𑀢𑀫𑀸𑀦𑁂 𑀘𑁂 𑀢𑁂, 𑀫𑀳𑀸𑀭𑀸𑀚, 𑀚𑀭𑀸𑀫𑀭𑀡𑁂 𑀓𑀺𑀫𑀲𑁆𑀲 𑀓𑀭𑀡𑀻𑀬’’𑀦𑁆𑀢𑀺? ‘‘𑀅𑀥𑀺𑀯𑀢𑁆𑀢𑀫𑀸𑀦𑁂 𑀘 𑀫𑁂, 𑀪𑀦𑁆𑀢𑁂, 𑀚𑀭𑀸𑀫𑀭𑀡𑁂 𑀓𑀺𑀫𑀲𑁆𑀲 𑀓𑀭𑀡𑀻𑀬𑀁 𑀅𑀜𑁆𑀜𑀢𑁆𑀭 𑀥𑀫𑁆𑀫𑀘𑀭𑀺𑀬𑀸𑀬 𑀲𑀫𑀘𑀭𑀺𑀬𑀸𑀬 𑀓𑀼𑀲𑀮𑀓𑀺𑀭𑀺𑀬𑀸𑀬 𑀧𑀼𑀜𑁆𑀜𑀓𑀺𑀭𑀺𑀬𑀸𑀬? 𑀬𑀸𑀦𑀺 𑀢𑀸𑀦𑀺, 𑀪𑀦𑁆𑀢𑁂, 𑀭𑀜𑁆𑀜𑀁 𑀔𑀢𑁆𑀢𑀺𑀬𑀸𑀦𑀁 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀸𑀦𑀁 𑀇𑀲𑁆𑀲𑀭𑀺𑀬𑀫𑀤𑀫𑀢𑁆𑀢𑀸𑀦𑀁 𑀓𑀸𑀫𑀕𑁂𑀥𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑀸𑀦𑀁 𑀫𑀳𑀦𑁆𑀢𑀁 𑀧𑀣𑀯𑀺𑀫𑀡𑁆𑀟𑀮𑀁 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀦𑁆𑀢𑀸𑀦𑀁 𑀳𑀢𑁆𑀣𑀺𑀬𑀼𑀤𑁆𑀥𑀸𑀦𑀺 𑀪𑀯𑀦𑁆𑀢𑀺; 𑀢𑁂𑀲𑀫𑁆𑀧𑀺, 𑀪𑀦𑁆𑀢𑁂, 𑀳𑀢𑁆𑀣𑀺𑀬𑀼𑀤𑁆𑀥𑀸𑀦𑀁 𑀦𑀢𑁆𑀣𑀺 𑀕𑀢𑀺 𑀦𑀢𑁆𑀣𑀺 𑀯𑀺𑀲𑀬𑁄 𑀅𑀥𑀺𑀯𑀢𑁆𑀢𑀫𑀸𑀦𑁂 𑀚𑀭𑀸𑀫𑀭𑀡𑁂. 𑀬𑀸𑀦𑀺𑀧𑀺 𑀢𑀸𑀦𑀺, 𑀪𑀦𑁆𑀢𑁂, 𑀭𑀜𑁆𑀜𑀁 𑀔𑀢𑁆𑀢𑀺𑀬𑀸𑀦𑀁 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀸𑀦𑀁…𑀧𑁂… 𑀅𑀚𑁆𑀛𑀸𑀯𑀲𑀦𑁆𑀢𑀸𑀦𑀁 𑀅𑀲𑁆𑀲𑀬𑀼𑀤𑁆𑀥𑀸𑀦𑀺 𑀪𑀯𑀦𑁆𑀢𑀺…𑀧𑁂… 𑀭𑀣𑀬𑀼𑀤𑁆𑀥𑀸𑀦𑀺 𑀪𑀯𑀦𑁆𑀢𑀺 …𑀧𑁂… 𑀧𑀢𑁆𑀢𑀺𑀬𑀼𑀤𑁆𑀥𑀸𑀦𑀺 𑀪𑀯𑀦𑁆𑀢𑀺; 𑀢𑁂𑀲𑀫𑁆𑀧𑀺, 𑀪𑀦𑁆𑀢𑁂, 𑀧𑀢𑁆𑀢𑀺𑀬𑀼𑀤𑁆𑀥𑀸𑀦𑀁 𑀦𑀢𑁆𑀣𑀺 𑀕𑀢𑀺 𑀦𑀢𑁆𑀣𑀺 𑀯𑀺𑀲𑀬𑁄 𑀅𑀥𑀺𑀯𑀢𑁆𑀢𑀫𑀸𑀦𑁂 𑀚𑀭𑀸𑀫𑀭𑀡𑁂. 𑀲𑀦𑁆𑀢𑀺 𑀔𑁄 𑀧𑀦, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀫𑀦𑁆𑀢𑀺𑀦𑁄 𑀫𑀳𑀸𑀫𑀢𑁆𑀢𑀸, 𑀬𑁂 𑀧𑀳𑁄𑀦𑁆𑀢𑀺 [𑀬𑁂𑀲𑀁 𑀳𑁄𑀦𑁆𑀢𑀺 (𑀓.)] 𑀆𑀕𑀢𑁂 𑀧𑀘𑁆𑀘𑀢𑁆𑀣𑀺𑀓𑁂 𑀫𑀦𑁆𑀢𑁂𑀳𑀺 𑀪𑁂𑀤𑀬𑀺𑀢𑀼𑀁. 𑀢𑁂𑀲𑀫𑁆𑀧𑀺, 𑀪𑀦𑁆𑀢𑁂, 𑀫𑀦𑁆𑀢𑀬𑀼𑀤𑁆𑀥𑀸𑀦𑀁 𑀦𑀢𑁆𑀣𑀺 𑀕𑀢𑀺 𑀦𑀢𑁆𑀣𑀺 𑀯𑀺𑀲𑀬𑁄 𑀅𑀥𑀺𑀯𑀢𑁆𑀢𑀫𑀸𑀦𑁂 𑀚𑀭𑀸𑀫𑀭𑀡𑁂. 𑀲𑀁𑀯𑀺𑀚𑁆𑀚𑀢𑀺 𑀔𑁄 𑀧𑀦, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀧𑀳𑀽𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀪𑀽𑀫𑀺𑀕𑀢𑀜𑁆𑀘𑁂𑀯 𑀯𑁂𑀳𑀸𑀲𑀝𑁆𑀞𑀜𑁆𑀘, 𑀬𑁂𑀦 𑀫𑀬𑀁 𑀧𑀳𑁄𑀫 𑀆𑀕𑀢𑁂 𑀧𑀘𑁆𑀘𑀢𑁆𑀣𑀺𑀓𑁂 𑀥𑀦𑁂𑀦 𑀉𑀧𑀮𑀸𑀧𑁂𑀢𑀼𑀁. 𑀢𑁂𑀲𑀫𑁆𑀧𑀺, 𑀪𑀦𑁆𑀢𑁂, 𑀥𑀦𑀬𑀼𑀤𑁆𑀥𑀸𑀦𑀁 𑀦𑀢𑁆𑀣𑀺 𑀕𑀢𑀺 𑀦𑀢𑁆𑀣𑀺 𑀯𑀺𑀲𑀬𑁄 𑀅𑀥𑀺𑀯𑀢𑁆𑀢𑀫𑀸𑀦𑁂 𑀚𑀭𑀸𑀫𑀭𑀡𑁂. 𑀅𑀥𑀺𑀯𑀢𑁆𑀢𑀫𑀸𑀦𑁂 𑀘 𑀫𑁂, 𑀪𑀦𑁆𑀢𑁂, 𑀚𑀭𑀸𑀫𑀭𑀡𑁂 𑀓𑀺𑀫𑀲𑁆𑀲 𑀓𑀭𑀡𑀻𑀬𑀁 𑀅𑀜𑁆𑀜𑀢𑁆𑀭 𑀥𑀫𑁆𑀫𑀘𑀭𑀺𑀬𑀸𑀬 𑀲𑀫𑀘𑀭𑀺𑀬𑀸𑀬 𑀓𑀼𑀲𑀮𑀓𑀺𑀭𑀺𑀬𑀸𑀬 𑀧𑀼𑀜𑁆𑀜𑀓𑀺𑀭𑀺𑀬𑀸𑀬𑀸’’𑀢𑀺?

‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚! 𑀅𑀥𑀺𑀯𑀢𑁆𑀢𑀫𑀸𑀦𑁂 𑀚𑀭𑀸𑀫𑀭𑀡𑁂 𑀓𑀺𑀫𑀲𑁆𑀲 𑀓𑀭𑀡𑀻𑀬𑀁 𑀅𑀜𑁆𑀜𑀢𑁆𑀭 𑀥𑀫𑁆𑀫𑀘𑀭𑀺𑀬𑀸𑀬 𑀲𑀫𑀘𑀭𑀺𑀬𑀸𑀬 𑀓𑀼𑀲𑀮𑀓𑀺𑀭𑀺𑀬𑀸𑀬 𑀧𑀼𑀜𑁆𑀜𑀓𑀺𑀭𑀺𑀬𑀸𑀬𑀸’’𑀢𑀺? 𑀇𑀤𑀫𑀯𑁄𑀘 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑁋

‘‘𑀬𑀣𑀸𑀧𑀺 𑀲𑁂𑀮𑀸 𑀯𑀺𑀧𑀼𑀮𑀸, 𑀦𑀪𑀁 𑀆𑀳𑀘𑁆𑀘 𑀧𑀩𑁆𑀩𑀢𑀸;

𑀲𑀫𑀦𑁆𑀢𑀸𑀦𑀼𑀧𑀭𑀺𑀬𑀸𑀬𑁂𑀬𑁆𑀬𑀼𑀁, 𑀦𑀺𑀧𑁆𑀧𑁄𑀣𑁂𑀦𑁆𑀢𑁄 𑀘𑀢𑀼𑀤𑁆𑀤𑀺𑀲𑀸.

‘‘𑀏𑀯𑀁 𑀚𑀭𑀸 𑀘 𑀫𑀘𑁆𑀘𑀼 𑀘, 𑀅𑀥𑀺𑀯𑀢𑁆𑀢𑀦𑁆𑀢𑀺 𑀧𑀸𑀡𑀺𑀦𑁂 [𑀧𑀸𑀡𑀺𑀦𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀔𑀢𑁆𑀢𑀺𑀬𑁂 𑀩𑁆𑀭𑀸𑀳𑁆𑀫𑀡𑁂 𑀯𑁂𑀲𑁆𑀲𑁂, 𑀲𑀼𑀤𑁆𑀤𑁂 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑁂;

𑀦 𑀓𑀺𑀜𑁆𑀘𑀺 [𑀦 𑀓𑀜𑁆𑀘𑀺 (?)] 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀩𑁆𑀩𑀫𑁂𑀯𑀸𑀪𑀺𑀫𑀤𑁆𑀤𑀢𑀺.

‘‘𑀦 𑀢𑀢𑁆𑀣 𑀳𑀢𑁆𑀣𑀻𑀦𑀁 𑀪𑀽𑀫𑀺, 𑀦 𑀭𑀣𑀸𑀦𑀁 𑀦 𑀧𑀢𑁆𑀢𑀺𑀬𑀸;

𑀦 𑀘𑀸𑀧𑀺 𑀫𑀦𑁆𑀢𑀬𑀼𑀤𑁆𑀥𑁂𑀦, 𑀲𑀓𑁆𑀓𑀸 𑀚𑁂𑀢𑀼𑀁 𑀥𑀦𑁂𑀦 𑀯𑀸.

‘‘𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀩𑀼𑀤𑁆𑀥𑁂 𑀥𑀫𑁆𑀫𑁂 𑀘 𑀲𑀗𑁆𑀖𑁂 𑀘, 𑀥𑀻𑀭𑁄 𑀲𑀤𑁆𑀥𑀁 𑀦𑀺𑀯𑁂𑀲𑀬𑁂.

‘‘𑀬𑁄 𑀥𑀫𑁆𑀫𑀁 𑀘𑀭𑀺 [𑀥𑀫𑁆𑀫𑀘𑀸𑀭𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑀸𑀬𑁂𑀦, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺.

𑀢𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀼𑀕𑁆𑀕𑀮𑁄 𑀅𑀬𑁆𑀬𑀺𑀓𑀸 𑀮𑁄𑀓𑁄, 𑀇𑀲𑁆𑀲𑀢𑁆𑀢𑀁 [𑀇𑀲𑁆𑀲𑀢𑁆𑀣𑀁 (𑀲𑀻. 𑀲𑁆𑀬𑀸. 𑀓𑀁.)] 𑀧𑀩𑁆𑀩𑀢𑀽𑀧𑀫𑀸;

𑀤𑁂𑀲𑀺𑀢𑀁 𑀩𑀼𑀤𑁆𑀥𑀲𑁂𑀝𑁆𑀞𑁂𑀦, 𑀇𑀫𑀁 𑀓𑁄𑀲𑀮𑀧𑀜𑁆𑀘𑀓𑀦𑁆𑀢𑀺.

𑀓𑁄𑀲𑀮𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.