𑁬. 𑀫𑀮𑁆𑀮𑀺𑀓𑀸𑀲𑀼𑀢𑁆𑀢𑀁

𑁧𑁨𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀉𑀧𑀓𑀡𑁆𑀡𑀓𑁂 𑀆𑀭𑁄𑀘𑁂𑀲𑀺 𑁋 ‘‘𑀫𑀮𑁆𑀮𑀺𑀓𑀸, 𑀤𑁂𑀯, 𑀤𑁂𑀯𑀻 𑀥𑀻𑀢𑀭𑀁 𑀯𑀺𑀚𑀸𑀢𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺.

𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀅𑀦𑀢𑁆𑀢𑀫𑀦𑀢𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀇𑀢𑁆𑀣𑀻𑀧𑀺 𑀳𑀺 𑀏𑀓𑀘𑁆𑀘𑀺𑀬𑀸, 𑀲𑁂𑀬𑁆𑀬𑀸 𑀧𑁄𑀲 𑀚𑀦𑀸𑀥𑀺𑀧;

𑀫𑁂𑀥𑀸𑀯𑀺𑀦𑀻 𑀲𑀻𑀮𑀯𑀢𑀻, 𑀲𑀲𑁆𑀲𑀼𑀤𑁂𑀯𑀸 𑀧𑀢𑀺𑀩𑁆𑀩𑀢𑀸.

‘‘𑀢𑀲𑁆𑀲𑀸 𑀬𑁄 𑀚𑀸𑀬𑀢𑀺 𑀧𑁄𑀲𑁄, 𑀲𑀽𑀭𑁄 𑀳𑁄𑀢𑀺 𑀤𑀺𑀲𑀫𑁆𑀧𑀢𑀺;

𑀢𑀸𑀤𑀺𑀲𑀸 𑀲𑀼𑀪𑀕𑀺𑀬𑀸 [𑀲𑀼𑀪𑀭𑀺𑀬𑀸𑀧𑀼𑀢𑁆𑀢𑁄 (𑀓.)] 𑀧𑀼𑀢𑁆𑀢𑁄, 𑀭𑀚𑁆𑀚𑀫𑁆𑀧𑀺 𑀅𑀦𑀼𑀲𑀸𑀲𑀢𑀻’’𑀢𑀺.