𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀢𑁆𑀢𑀚𑀝𑀺𑀮𑀲𑀼𑀢𑁆𑀢𑀁

𑁧𑁨𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀢𑁆𑀢 𑀘 𑀚𑀝𑀺𑀮𑀸 𑀲𑀢𑁆𑀢 𑀘 𑀦𑀺𑀕𑀡𑁆𑀞𑀸 𑀲𑀢𑁆𑀢 𑀘 𑀅𑀘𑁂𑀮𑀓𑀸 𑀲𑀢𑁆𑀢 𑀘 𑀏𑀓𑀲𑀸𑀝𑀓𑀸 𑀲𑀢𑁆𑀢 𑀘 𑀧𑀭𑀺𑀩𑁆𑀩𑀸𑀚𑀓𑀸 𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀸 𑀔𑀸𑀭𑀺𑀯𑀺𑀯𑀺𑀥𑀫𑀸𑀤𑀸𑀬 [𑀔𑀸𑀭𑀺𑀯𑀺𑀥𑀁 𑀆𑀤𑀸𑀬 (𑀧𑀻.) 𑀤𑀻. 𑀦𑀺. 𑁧.𑁨𑁮𑁦 𑀢𑀤𑀝𑁆𑀞𑀓𑀣𑀸𑀧𑀺 𑀑𑀮𑁄𑀓𑁂𑀢𑀩𑁆𑀩𑀸] 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀢𑀺𑀓𑁆𑀓𑀫𑀦𑁆𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 𑀦𑀺𑀳𑀦𑁆𑀢𑁆𑀯𑀸 𑀬𑁂𑀦 𑀢𑁂 𑀲𑀢𑁆𑀢 𑀘 𑀚𑀝𑀺𑀮𑀸 𑀲𑀢𑁆𑀢 𑀘 𑀦𑀺𑀕𑀡𑁆𑀞𑀸 𑀲𑀢𑁆𑀢 𑀘 𑀅𑀘𑁂𑀮𑀓𑀸 𑀲𑀢𑁆𑀢 𑀘 𑀏𑀓𑀲𑀸𑀝𑀓𑀸 𑀲𑀢𑁆𑀢 𑀘 𑀧𑀭𑀺𑀩𑁆𑀩𑀸𑀚𑀓𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀦𑀸𑀫𑀁 𑀲𑀸𑀯𑁂𑀲𑀺 𑁋 ‘‘𑀭𑀸𑀚𑀸𑀳𑀁, 𑀪𑀦𑁆𑀢𑁂, 𑀧𑀲𑁂𑀦𑀤𑀺 𑀓𑁄𑀲𑀮𑁄…𑀧𑁂… 𑀭𑀸𑀚𑀸𑀳𑀁, 𑀪𑀦𑁆𑀢𑁂, 𑀧𑀲𑁂𑀦𑀤𑀺 𑀓𑁄𑀲𑀮𑁄’’𑀢𑀺.

𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 𑀲𑀢𑁆𑀢𑀲𑀼 𑀘 𑀚𑀝𑀺𑀮𑁂𑀲𑀼 𑀲𑀢𑁆𑀢𑀲𑀼 𑀘 𑀦𑀺𑀕𑀡𑁆𑀞𑁂𑀲𑀼 𑀲𑀢𑁆𑀢𑀲𑀼 𑀘 𑀅𑀘𑁂𑀮𑀓𑁂𑀲𑀼 𑀲𑀢𑁆𑀢𑀲𑀼 𑀘 𑀏𑀓𑀲𑀸𑀝𑀓𑁂𑀲𑀼 𑀲𑀢𑁆𑀢𑀲𑀼 𑀘 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑁂 𑀢𑁂, 𑀪𑀦𑁆𑀢𑁂, 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸 𑀏𑀢𑁂 𑀢𑁂𑀲𑀁 𑀅𑀜𑁆𑀜𑀢𑀭𑀸’’𑀢𑀺.

‘‘𑀤𑀼𑀚𑁆𑀚𑀸𑀦𑀁 𑀔𑁄 𑀏𑀢𑀁, 𑀫𑀳𑀸𑀭𑀸𑀚, 𑀢𑀬𑀸 𑀕𑀺𑀳𑀺𑀦𑀸 𑀓𑀸𑀫𑀪𑁄𑀕𑀺𑀦𑀸 𑀧𑀼𑀢𑁆𑀢𑀲𑀫𑁆𑀩𑀸𑀥𑀲𑀬𑀦𑀁 𑀅𑀚𑁆𑀛𑀸𑀯𑀲𑀦𑁆𑀢𑁂𑀦 𑀓𑀸𑀲𑀺𑀓𑀘𑀦𑁆𑀤𑀦𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑁂𑀦 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀸𑀭𑀬𑀦𑁆𑀢𑁂𑀦 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀬𑀦𑁆𑀢𑁂𑀦 𑁋 ‘𑀇𑀫𑁂 𑀯𑀸 𑀅𑀭𑀳𑀦𑁆𑀢𑁄, 𑀇𑀫𑁂 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀲𑀫𑀸𑀧𑀦𑁆𑀦𑀸’’’𑀢𑀺.

‘‘𑀲𑀁𑀯𑀸𑀲𑁂𑀦 𑀔𑁄, 𑀫𑀳𑀸𑀭𑀸𑀚, 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦. 𑀲𑀁𑀯𑁄𑀳𑀸𑀭𑁂𑀦 𑀔𑁄, 𑀫𑀳𑀸𑀭𑀸𑀚, 𑀲𑁄𑀘𑁂𑀬𑁆𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦. 𑀆𑀧𑀤𑀸𑀲𑀼 𑀔𑁄, 𑀫𑀳𑀸𑀭𑀸𑀚, 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦. 𑀲𑀸𑀓𑀘𑁆𑀙𑀸𑀬, 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁 𑀪𑀦𑁆𑀢𑁂! 𑀬𑀸𑀯 𑀲𑀼𑀪𑀸𑀲𑀺𑀢𑀫𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑁋 ‘𑀤𑀼𑀚𑁆𑀚𑀸𑀦𑀁 𑀔𑁄 𑀏𑀢𑀁, 𑀫𑀳𑀸𑀭𑀸𑀚, 𑀢𑀬𑀸 𑀕𑀺𑀳𑀺𑀦𑀸 𑀓𑀸𑀫𑀪𑁄𑀕𑀺𑀦𑀸 𑀧𑀼𑀢𑁆𑀢𑀲𑀫𑁆𑀩𑀸𑀥𑀲𑀬𑀦𑀁 𑀅𑀚𑁆𑀛𑀸𑀯𑀲𑀦𑁆𑀢𑁂𑀦 𑀓𑀸𑀲𑀺𑀓𑀘𑀦𑁆𑀤𑀦𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑁂𑀦 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀸𑀭𑀬𑀦𑁆𑀢𑁂𑀦 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀬𑀦𑁆𑀢𑁂𑀦 𑁋 𑀇𑀫𑁂 𑀯𑀸 𑀅𑀭𑀳𑀦𑁆𑀢𑁄, 𑀇𑀫𑁂 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀲𑀫𑀸𑀧𑀦𑁆𑀦𑀸’𑀢𑀺. 𑀲𑀁𑀯𑀸𑀲𑁂𑀦 𑀔𑁄, 𑀫𑀳𑀸𑀭𑀸𑀚, 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦. 𑀲𑀁𑀯𑁄𑀳𑀸𑀭𑁂𑀦 𑀔𑁄 𑀫𑀳𑀸𑀭𑀸𑀚, 𑀲𑁄𑀘𑁂𑀬𑁆𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦. 𑀆𑀧𑀤𑀸𑀲𑀼 𑀔𑁄, 𑀫𑀳𑀸𑀭𑀸𑀚, 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦. 𑀲𑀸𑀓𑀘𑁆𑀙𑀸𑀬 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸’’𑀢𑀺.

‘‘𑀏𑀢𑁂, 𑀪𑀦𑁆𑀢𑁂, 𑀫𑀫 𑀧𑀼𑀭𑀺𑀲𑀸 𑀘𑀭𑀸 𑀑𑀘𑀭𑀓𑀸 𑀚𑀦𑀧𑀤𑀁 𑀑𑀘𑀭𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺. 𑀢𑁂𑀳𑀺 𑀧𑀞𑀫𑀁 𑀑𑀘𑀺𑀡𑁆𑀡𑀁 𑀅𑀳𑀁 𑀧𑀘𑁆𑀙𑀸 𑀑𑀲𑀸𑀧𑀬𑀺𑀲𑁆𑀲𑀸𑀫𑀺 [𑀑𑀬𑀸𑀬𑀺𑀲𑁆𑀲𑀸𑀫𑀺 (𑀲𑀻.), 𑀑𑀳𑀬𑀺𑀲𑁆𑀲𑀸𑀫𑀺 (𑀲𑁆𑀬𑀸. 𑀓𑀁.)]. 𑀇𑀤𑀸𑀦𑀺 𑀢𑁂, 𑀪𑀦𑁆𑀢𑁂, 𑀢𑀁 𑀭𑀚𑁄𑀚𑀮𑁆𑀮𑀁 𑀧𑀯𑀸𑀳𑁂𑀢𑁆𑀯𑀸 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽 𑀑𑀤𑀸𑀢𑀯𑀢𑁆𑀣𑀸 [𑀑𑀤𑀸𑀢𑀯𑀢𑁆𑀣𑀯𑀲𑀦𑀸 (𑀲𑀻.)] 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀦 𑀯𑀡𑁆𑀡𑀭𑀽𑀧𑁂𑀦 𑀦𑀭𑁄 𑀲𑀼𑀚𑀸𑀦𑁄,

𑀦 𑀯𑀺𑀲𑁆𑀲𑀲𑁂 𑀇𑀢𑁆𑀢𑀭𑀤𑀲𑁆𑀲𑀦𑁂𑀦;

𑀲𑀼𑀲𑀜𑁆𑀜𑀢𑀸𑀦𑀜𑁆𑀳𑀺 𑀯𑀺𑀬𑀜𑁆𑀚𑀦𑁂𑀦,

𑀅𑀲𑀜𑁆𑀜𑀢𑀸 𑀮𑁄𑀓𑀫𑀺𑀫𑀁 𑀘𑀭𑀦𑁆𑀢𑀺.

‘‘𑀧𑀢𑀺𑀭𑀽𑀧𑀓𑁄 𑀫𑀢𑁆𑀢𑀺𑀓𑀸𑀓𑀼𑀡𑁆𑀟𑀮𑁄𑀯,

𑀮𑁄𑀳𑀟𑁆𑀠𑀫𑀸𑀲𑁄𑀯 𑀲𑀼𑀯𑀡𑁆𑀡𑀙𑀦𑁆𑀦𑁄;

𑀘𑀭𑀦𑁆𑀢𑀺 𑀮𑁄𑀓𑁂 [𑀏𑀓𑁂 (𑀲𑀻. 𑀧𑀻.)] 𑀧𑀭𑀺𑀯𑀸𑀭𑀙𑀦𑁆𑀦𑀸,

𑀅𑀦𑁆𑀢𑁄 𑀅𑀲𑀼𑀤𑁆𑀥𑀸 𑀩𑀳𑀺 𑀲𑁄𑀪𑀫𑀸𑀦𑀸’’𑀢𑀺.

𑁨. 𑀧𑀜𑁆𑀘𑀭𑀸𑀚𑀲𑀼𑀢𑁆𑀢𑀁

𑁧𑁨𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀜𑁆𑀘𑀦𑁆𑀦𑀁 𑀭𑀸𑀚𑀽𑀦𑀁 𑀧𑀲𑁂𑀦𑀤𑀺𑀧𑀫𑀼𑀔𑀸𑀦𑀁 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸𑀦𑀁 𑀲𑀫𑀗𑁆𑀕𑀻𑀪𑀽𑀢𑀸𑀦𑀁 𑀧𑀭𑀺𑀘𑀸𑀭𑀬𑀫𑀸𑀦𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀓𑀺𑀁 𑀦𑀼 𑀔𑁄 𑀓𑀸𑀫𑀸𑀦𑀁 𑀅𑀕𑁆𑀕’’𑀦𑁆𑀢𑀺? 𑀢𑀢𑁆𑀭𑁂𑀓𑀘𑁆𑀘𑁂 [𑀢𑀢𑁆𑀭𑁂𑀓𑁂 (𑀲𑀻. 𑀧𑀻.)] 𑀏𑀯𑀫𑀸𑀳𑀁𑀲𑀼 𑁋 ‘‘𑀭𑀽𑀧𑀸 𑀓𑀸𑀫𑀸𑀦𑀁 𑀅𑀕𑁆𑀕’’𑀦𑁆𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀤𑁆𑀤𑀸 𑀓𑀸𑀫𑀸𑀦𑀁 𑀅𑀕𑁆𑀕’’𑀦𑁆𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀕𑀦𑁆𑀥𑀸 𑀓𑀸𑀫𑀸𑀦𑀁 𑀅𑀕𑁆𑀕’’𑀦𑁆𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀭𑀲𑀸 𑀓𑀸𑀫𑀸𑀦𑀁 𑀅𑀕𑁆𑀕’’𑀦𑁆𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀨𑁄𑀝𑁆𑀞𑀩𑁆𑀩𑀸 𑀓𑀸𑀫𑀸𑀦𑀁 𑀅𑀕𑁆𑀕’’𑀦𑁆𑀢𑀺. 𑀬𑀢𑁄 𑀔𑁄 𑀢𑁂 𑀭𑀸𑀚𑀸𑀦𑁄 𑀦𑀸𑀲𑀓𑁆𑀔𑀺𑀁𑀲𑀼 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀜𑀸𑀧𑁂𑀢𑀼𑀁.

𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀢𑁂 𑀭𑀸𑀚𑀸𑀦𑁄 𑀏𑀢𑀤𑀯𑁄𑀘 𑁋 ‘‘𑀆𑀬𑀸𑀫, 𑀫𑀸𑀭𑀺𑀲𑀸, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫. 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’’𑀢𑀺 [𑀥𑀸𑀭𑁂𑀬𑁆𑀬𑀸𑀫𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. ‘‘𑀏𑀯𑀁, 𑀫𑀸𑀭𑀺𑀲𑀸’’𑀢𑀺 𑀔𑁄 𑀢𑁂 𑀭𑀸𑀚𑀸𑀦𑁄 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁.

𑀅𑀣 𑀔𑁄 𑀢𑁂 𑀧𑀜𑁆𑀘 𑀭𑀸𑀚𑀸𑀦𑁄 𑀧𑀲𑁂𑀦𑀤𑀺𑀧𑀫𑀼𑀔𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀜𑁆𑀘𑀦𑁆𑀦𑀁 𑀭𑀸𑀚𑀽𑀦𑀁 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸𑀦𑀁 𑀲𑀫𑀗𑁆𑀕𑀻𑀪𑀽𑀢𑀸𑀦𑀁 𑀧𑀭𑀺𑀘𑀸𑀭𑀬𑀫𑀸𑀦𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀓𑀺𑀁 𑀦𑀼 𑀔𑁄 𑀓𑀸𑀫𑀸𑀦𑀁 𑀅𑀕𑁆𑀕’𑀦𑁆𑀢𑀺? 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘𑀭𑀽𑀧𑀸 𑀓𑀸𑀫𑀸𑀦𑀁 𑀅𑀕𑁆𑀕’𑀦𑁆𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘𑀲𑀤𑁆𑀤𑀸 𑀓𑀸𑀫𑀸𑀦𑀁 𑀅𑀕𑁆𑀕’𑀦𑁆𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘𑀕𑀦𑁆𑀥𑀸 𑀓𑀸𑀫𑀸𑀦𑀁 𑀅𑀕𑁆𑀕’𑀦𑁆𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘𑀭𑀲𑀸 𑀓𑀸𑀫𑀸𑀦𑀁 𑀅𑀕𑁆𑀕’𑀦𑁆𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘𑀨𑁄𑀝𑁆𑀞𑀩𑁆𑀩𑀸 𑀓𑀸𑀫𑀸𑀦𑀁 𑀅𑀕𑁆𑀕’𑀦𑁆𑀢𑀺. 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀓𑀸𑀫𑀸𑀦𑀁 𑀅𑀕𑁆𑀕’’𑀦𑁆𑀢𑀺?

‘‘𑀫𑀦𑀸𑀧𑀧𑀭𑀺𑀬𑀦𑁆𑀢𑀁 𑀔𑁆𑀯𑀸𑀳𑀁, 𑀫𑀳𑀸𑀭𑀸𑀚, 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀕𑁆𑀕𑀦𑁆𑀢𑀺 𑀯𑀤𑀸𑀫𑀺. 𑀢𑁂𑀯 [𑀢𑁂 𑀘 (𑀲𑀻. 𑀧𑀻. 𑀓.), 𑀬𑁂 𑀘 (𑀲𑁆𑀬𑀸. 𑀓𑀁.)], 𑀫𑀳𑀸𑀭𑀸𑀚, 𑀭𑀽𑀧𑀸 𑀏𑀓𑀘𑁆𑀘𑀲𑁆𑀲 𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀢𑁂𑀯 [𑀢𑁂 𑀘 (𑀲𑀻. 𑀧𑀻. 𑀓.)] 𑀭𑀽𑀧𑀸 𑀏𑀓𑀘𑁆𑀘𑀲𑁆𑀲 𑀅𑀫𑀦𑀸𑀧𑀸 𑀳𑁄𑀦𑁆𑀢𑀺. 𑀬𑁂𑀳𑀺 𑀘 𑀬𑁄 𑀭𑀽𑀧𑁂𑀳𑀺 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄, 𑀲𑁄 𑀢𑁂𑀳𑀺 𑀭𑀽𑀧𑁂𑀳𑀺 𑀅𑀜𑁆𑀜𑀁 𑀭𑀽𑀧𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀧𑀢𑁆𑀣𑁂𑀢𑀺. 𑀢𑁂 𑀢𑀲𑁆𑀲 𑀭𑀽𑀧𑀸 𑀧𑀭𑀫𑀸 𑀳𑁄𑀦𑁆𑀢𑀺. 𑀢𑁂 𑀢𑀲𑁆𑀲 𑀭𑀽𑀧𑀸 𑀅𑀦𑀼𑀢𑁆𑀢𑀭𑀸 𑀳𑁄𑀦𑁆𑀢𑀺.

‘‘𑀢𑁂𑀯, 𑀫𑀳𑀸𑀭𑀸𑀚, 𑀲𑀤𑁆𑀤𑀸 𑀏𑀓𑀘𑁆𑀘𑀲𑁆𑀲 𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀢𑁂𑀯 𑀲𑀤𑁆𑀤𑀸 𑀏𑀓𑀘𑁆𑀘𑀲𑁆𑀲 𑀅𑀫𑀦𑀸𑀧𑀸 𑀳𑁄𑀦𑁆𑀢𑀺. 𑀬𑁂𑀳𑀺 𑀘 𑀬𑁄 𑀲𑀤𑁆𑀤𑁂𑀳𑀺 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄, 𑀲𑁄 𑀢𑁂𑀳𑀺 𑀲𑀤𑁆𑀤𑁂𑀳𑀺 𑀅𑀜𑁆𑀜𑀁 𑀲𑀤𑁆𑀤𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀧𑀢𑁆𑀣𑁂𑀢𑀺. 𑀢𑁂 𑀢𑀲𑁆𑀲 𑀲𑀤𑁆𑀤𑀸 𑀧𑀭𑀫𑀸 𑀳𑁄𑀦𑁆𑀢𑀺. 𑀢𑁂 𑀢𑀲𑁆𑀲 𑀲𑀤𑁆𑀤𑀸 𑀅𑀦𑀼𑀢𑁆𑀢𑀭𑀸 𑀳𑁄𑀦𑁆𑀢𑀺.

‘‘𑀢𑁂𑀯, 𑀫𑀳𑀸𑀭𑀸𑀚, 𑀕𑀦𑁆𑀥𑀸 𑀏𑀓𑀘𑁆𑀘𑀲𑁆𑀲 𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀢𑁂𑀯 𑀕𑀦𑁆𑀥𑀸 𑀏𑀓𑀘𑁆𑀘𑀲𑁆𑀲 𑀅𑀫𑀦𑀸𑀧𑀸 𑀳𑁄𑀦𑁆𑀢𑀺. 𑀬𑁂𑀳𑀺 𑀘 𑀬𑁄 𑀕𑀦𑁆𑀥𑁂𑀳𑀺 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄, 𑀲𑁄 𑀢𑁂𑀳𑀺 𑀕𑀦𑁆𑀥𑁂𑀳𑀺 𑀅𑀜𑁆𑀜𑀁 𑀕𑀦𑁆𑀥𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀧𑀢𑁆𑀣𑁂𑀢𑀺. 𑀢𑁂 𑀢𑀲𑁆𑀲 𑀕𑀦𑁆𑀥𑀸 𑀧𑀭𑀫𑀸 𑀳𑁄𑀦𑁆𑀢𑀺. 𑀢𑁂 𑀢𑀲𑁆𑀲 𑀕𑀦𑁆𑀥𑀸 𑀅𑀦𑀼𑀢𑁆𑀢𑀭𑀸 𑀳𑁄𑀦𑁆𑀢𑀺.

‘‘𑀢𑁂𑀯, 𑀫𑀳𑀸𑀭𑀸𑀚, 𑀭𑀲𑀸 𑀏𑀓𑀘𑁆𑀘𑀲𑁆𑀲 𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀢𑁂𑀯 𑀭𑀲𑀸 𑀏𑀓𑀘𑁆𑀘𑀲𑁆𑀲 𑀅𑀫𑀦𑀸𑀧𑀸 𑀳𑁄𑀦𑁆𑀢𑀺. 𑀬𑁂𑀳𑀺 𑀘 𑀬𑁄 𑀭𑀲𑁂𑀳𑀺 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄, 𑀲𑁄 𑀢𑁂𑀳𑀺 𑀭𑀲𑁂𑀳𑀺 𑀅𑀜𑁆𑀜𑀁 𑀭𑀲𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀧𑀢𑁆𑀣𑁂𑀢𑀺. 𑀢𑁂 𑀢𑀲𑁆𑀲 𑀭𑀲𑀸 𑀧𑀭𑀫𑀸 𑀳𑁄𑀦𑁆𑀢𑀺. 𑀢𑁂 𑀢𑀲𑁆𑀲 𑀭𑀲𑀸 𑀅𑀦𑀼𑀢𑁆𑀢𑀭𑀸 𑀳𑁄𑀦𑁆𑀢𑀺.

‘‘𑀢𑁂𑀯, 𑀫𑀳𑀸𑀭𑀸𑀚, 𑀨𑁄𑀝𑁆𑀞𑀩𑁆𑀩𑀸 𑀏𑀓𑀘𑁆𑀘𑀲𑁆𑀲 𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀢𑁂𑀯 𑀨𑁄𑀝𑁆𑀞𑀩𑁆𑀩𑀸 𑀏𑀓𑀘𑁆𑀘𑀲𑁆𑀲 𑀅𑀫𑀦𑀸𑀧𑀸 𑀳𑁄𑀦𑁆𑀢𑀺. 𑀬𑁂𑀳𑀺 𑀘 𑀬𑁄 𑀨𑁄𑀝𑁆𑀞𑀩𑁆𑀩𑁂𑀳𑀺 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄, 𑀲𑁄 𑀢𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀺 𑀅𑀜𑁆𑀜𑀁 𑀨𑁄𑀝𑁆𑀞𑀩𑁆𑀩𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀧𑀢𑁆𑀣𑁂𑀢𑀺. 𑀢𑁂 𑀢𑀲𑁆𑀲 𑀨𑁄𑀝𑁆𑀞𑀩𑁆𑀩𑀸 𑀧𑀭𑀫𑀸 𑀳𑁄𑀦𑁆𑀢𑀺. 𑀢𑁂 𑀢𑀲𑁆𑀲 𑀨𑁄𑀝𑁆𑀞𑀩𑁆𑀩𑀸 𑀅𑀦𑀼𑀢𑁆𑀢𑀭𑀸 𑀳𑁄𑀦𑁆𑀢𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀦𑁆𑀤𑀦𑀗𑁆𑀕𑀮𑀺𑀓𑁄 𑀉𑀧𑀸𑀲𑀓𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀘𑀦𑁆𑀤𑀦𑀗𑁆𑀕𑀮𑀺𑀓𑁄 𑀉𑀧𑀸𑀲𑀓𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁 𑀪𑀕𑀯𑀸, 𑀧𑀝𑀺𑀪𑀸𑀢𑀺 𑀫𑀁 𑀲𑀼𑀕𑀢𑀸’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁 𑀘𑀦𑁆𑀤𑀦𑀗𑁆𑀕𑀮𑀺𑀓𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

𑀅𑀣 𑀔𑁄 𑀘𑀦𑁆𑀤𑀦𑀗𑁆𑀕𑀮𑀺𑀓𑁄 𑀉𑀧𑀸𑀲𑀓𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀢𑀤𑀦𑀼𑀭𑀽𑀧𑀸𑀬 𑀕𑀸𑀣𑀸𑀬 𑀅𑀪𑀺𑀢𑁆𑀣𑀯𑀺 𑁋

‘‘𑀧𑀤𑀼𑀫𑀁 𑀬𑀣𑀸 𑀓𑁄𑀓𑀦𑀤𑀁 𑀲𑀼𑀕𑀦𑁆𑀥𑀁,

𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁;

𑀅𑀗𑁆𑀕𑀻𑀭𑀲𑀁 𑀧𑀲𑁆𑀲 𑀯𑀺𑀭𑁄𑀘𑀫𑀸𑀦𑀁,

𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂’’𑀢𑀺.

𑀅𑀣 𑀔𑁄 𑀢𑁂 𑀧𑀜𑁆𑀘 𑀭𑀸𑀚𑀸𑀦𑁄 𑀘𑀦𑁆𑀤𑀦𑀗𑁆𑀕𑀮𑀺𑀓𑀁 𑀉𑀧𑀸𑀲𑀓𑀁 𑀧𑀜𑁆𑀘𑀳𑀺 𑀉𑀢𑁆𑀢𑀭𑀸𑀲𑀗𑁆𑀕𑁂𑀳𑀺 𑀅𑀘𑁆𑀙𑀸𑀤𑁂𑀲𑀼𑀁. 𑀅𑀣 𑀔𑁄 𑀘𑀦𑁆𑀤𑀦𑀗𑁆𑀕𑀮𑀺𑀓𑁄 𑀉𑀧𑀸𑀲𑀓𑁄 𑀢𑁂𑀳𑀺 𑀧𑀜𑁆𑀘𑀳𑀺 𑀉𑀢𑁆𑀢𑀭𑀸𑀲𑀗𑁆𑀕𑁂𑀳𑀺 𑀪𑀕𑀯𑀦𑁆𑀢𑀁 𑀅𑀘𑁆𑀙𑀸𑀤𑁂𑀲𑀻𑀢𑀺.

𑁩. 𑀤𑁄𑀡𑀧𑀸𑀓𑀲𑀼𑀢𑁆𑀢𑀁

𑁧𑁨𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀤𑁄𑀡𑀧𑀸𑀓𑀓𑀼𑀭𑀁 [𑀤𑁄𑀡𑀧𑀸𑀓𑀲𑀼𑀤𑀁 (𑀲𑀻.), 𑀤𑁄𑀡𑀧𑀸𑀓𑀁 𑀲𑀼𑀤𑀁 (𑀧𑀻.)] 𑀪𑀼𑀜𑁆𑀚𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀼𑀢𑁆𑀢𑀸𑀯𑀻 𑀫𑀳𑀲𑁆𑀲𑀸𑀲𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀪𑀼𑀢𑁆𑀢𑀸𑀯𑀺𑀁 𑀫𑀳𑀲𑁆𑀲𑀸𑀲𑀺𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀫𑀦𑀼𑀚𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄,

𑀫𑀢𑁆𑀢𑀁 𑀚𑀸𑀦𑀢𑁄 𑀮𑀤𑁆𑀥𑀪𑁄𑀚𑀦𑁂;

𑀢𑀦𑀼𑀓𑀲𑁆𑀲 [𑀢𑀦𑀼 𑀢𑀲𑁆𑀲 (𑀲𑀻. 𑀧𑀻.)] 𑀪𑀯𑀦𑁆𑀢𑀺 𑀯𑁂𑀤𑀦𑀸,

𑀲𑀡𑀺𑀓𑀁 𑀚𑀻𑀭𑀢𑀺 𑀆𑀬𑀼𑀧𑀸𑀮𑀬’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀤𑀲𑁆𑀲𑀦𑁄 𑀫𑀸𑀡𑀯𑁄 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀧𑀺𑀝𑁆𑀞𑀺𑀢𑁄 𑀞𑀺𑀢𑁄 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀼𑀤𑀲𑁆𑀲𑀦𑀁 𑀫𑀸𑀡𑀯𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀢𑀸𑀢 𑀲𑀼𑀤𑀲𑁆𑀲𑀦, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀫𑀫 𑀪𑀢𑁆𑀢𑀸𑀪𑀺𑀳𑀸𑀭𑁂 (𑀪𑀢𑁆𑀢𑀸𑀪𑀺𑀳𑀸𑀭𑁂) [( ) 𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀪𑀸𑀲. 𑀅𑀳𑀜𑁆𑀘 𑀢𑁂 𑀤𑁂𑀯𑀲𑀺𑀓𑀁 𑀓𑀳𑀸𑀧𑀡𑀲𑀢𑀁 (𑀓𑀳𑀸𑀧𑀡𑀲𑀢𑀁) [( ) 𑀲𑀻. 𑀲𑁆𑀬𑀸. 𑀓𑀁. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀦𑀺𑀘𑁆𑀘𑀁 𑀪𑀺𑀓𑁆𑀔𑀁 𑀧𑀯𑀢𑁆𑀢𑀬𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁 𑀤𑁂𑀯𑀸’’𑀢𑀺 𑀔𑁄 𑀲𑀼𑀤𑀲𑁆𑀲𑀦𑁄 𑀫𑀸𑀡𑀯𑁄 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀪𑀢𑁆𑀢𑀸𑀪𑀺𑀳𑀸𑀭𑁂 𑀲𑀼𑀤𑀁 𑀪𑀸𑀲𑀢𑀺 𑁋

‘‘𑀫𑀦𑀼𑀚𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄,

𑀫𑀢𑁆𑀢𑀁 𑀚𑀸𑀦𑀢𑁄 𑀮𑀤𑁆𑀥𑀪𑁄𑀚𑀦𑁂;

𑀢𑀦𑀼𑀓𑀲𑁆𑀲 𑀪𑀯𑀦𑁆𑀢𑀺 𑀯𑁂𑀤𑀦𑀸,

𑀲𑀡𑀺𑀓𑀁 𑀚𑀻𑀭𑀢𑀺 𑀆𑀬𑀼𑀧𑀸𑀮𑀬’’𑀦𑁆𑀢𑀺.

𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀦𑀼𑀧𑀼𑀩𑁆𑀩𑁂𑀦 𑀦𑀸𑀴𑀺𑀓𑁄𑀤𑀦𑀧𑀭𑀫𑀢𑀸𑀬 [𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀸𑀬 (𑀓.)] 𑀲𑀡𑁆𑀞𑀸𑀲𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀼𑀲𑀮𑁆𑀮𑀺𑀔𑀺𑀢𑀕𑀢𑁆𑀢𑁄 𑀧𑀸𑀡𑀺𑀦𑀸 𑀕𑀢𑁆𑀢𑀸𑀦𑀺 𑀅𑀦𑀼𑀫𑀚𑁆𑀚𑀦𑁆𑀢𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀉𑀪𑀬𑁂𑀦 𑀯𑀢 𑀫𑀁 𑀲𑁄 𑀪𑀕𑀯𑀸 𑀅𑀢𑁆𑀣𑁂𑀦 𑀅𑀦𑀼𑀓𑀫𑁆𑀧𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀦 𑀘𑁂𑀯 𑀅𑀢𑁆𑀣𑁂𑀦 𑀲𑀫𑁆𑀧𑀭𑀸𑀬𑀺𑀓𑁂𑀦 𑀘𑀸’’𑀢𑀺.

𑁪. 𑀧𑀞𑀫𑀲𑀗𑁆𑀕𑀸𑀫𑀲𑀼𑀢𑁆𑀢𑀁

𑁧𑁨𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀅𑀩𑁆𑀪𑀼𑀬𑁆𑀬𑀸𑀲𑀺 𑀬𑁂𑀦 𑀓𑀸𑀲𑀺. 𑀅𑀲𑁆𑀲𑁄𑀲𑀺 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑁋 ‘‘𑀭𑀸𑀚𑀸 𑀓𑀺𑀭 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀫𑀁 𑀅𑀩𑁆𑀪𑀼𑀬𑁆𑀬𑀸𑀢𑁄 𑀬𑁂𑀦 𑀓𑀸𑀲𑀻’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀧𑀘𑁆𑀘𑀼𑀬𑁆𑀬𑀸𑀲𑀺 𑀬𑁂𑀦 𑀓𑀸𑀲𑀺. 𑀅𑀣 𑀔𑁄 𑀭𑀸𑀚𑀸 𑀘 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀭𑀸𑀚𑀸 𑀘 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀗𑁆𑀕𑀸𑀫𑁂𑀲𑀼𑀁. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀗𑁆𑀕𑀸𑀫𑁂 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀧𑀭𑀸𑀚𑁂𑀲𑀺. 𑀧𑀭𑀸𑀚𑀺𑀢𑁄 𑀘 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀓𑀫𑁂𑀯 [𑀲𑀗𑁆𑀕𑀸𑀫𑀸 (𑀓.)] 𑀭𑀸𑀚𑀥𑀸𑀦𑀺𑀁 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀼𑀬𑁆𑀬𑀸𑀲𑀺 [𑀧𑀸𑀬𑀸𑀲𑀺 (𑀲𑀻. 𑀧𑀻.)].

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀇𑀥, 𑀪𑀦𑁆𑀢𑁂, 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀅𑀩𑁆𑀪𑀼𑀬𑁆𑀬𑀸𑀲𑀺 𑀬𑁂𑀦 𑀓𑀸𑀲𑀺. 𑀅𑀲𑁆𑀲𑁄𑀲𑀺 𑀔𑁄, 𑀪𑀦𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑁋 ‘𑀭𑀸𑀚𑀸 𑀓𑀺𑀭 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀫𑀁 𑀅𑀩𑁆𑀪𑀼𑀬𑁆𑀬𑀸𑀢𑁄 𑀬𑁂𑀦 𑀓𑀸𑀲𑀻’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀧𑀘𑁆𑀘𑀼𑀬𑁆𑀬𑀸𑀲𑀺 𑀬𑁂𑀦 𑀓𑀸𑀲𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀭𑀸𑀚𑀸 𑀘 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀭𑀸𑀚𑀸 𑀘 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀗𑁆𑀕𑀸𑀫𑁂𑀲𑀼𑀁. 𑀢𑀲𑁆𑀫𑀺𑀁 𑀔𑁄 𑀧𑀦, 𑀪𑀦𑁆𑀢𑁂, 𑀲𑀗𑁆𑀕𑀸𑀫𑁂 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀧𑀭𑀸𑀚𑁂𑀲𑀺. 𑀧𑀭𑀸𑀚𑀺𑀢𑁄 𑀘, 𑀪𑀦𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀓𑀫𑁂𑀯 𑀭𑀸𑀚𑀥𑀸𑀦𑀺𑀁 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀼𑀬𑁆𑀬𑀸𑀲𑀻’’𑀢𑀺.

‘‘𑀭𑀸𑀚𑀸, 𑀪𑀺𑀓𑁆𑀔𑀯𑁂, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀧𑀸𑀧𑀫𑀺𑀢𑁆𑀢𑁄 𑀧𑀸𑀧𑀲𑀳𑀸𑀬𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑁄; 𑀭𑀸𑀚𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀅𑀚𑁆𑀚𑁂𑀯 [𑀅𑀚𑁆𑀚𑀢𑀜𑁆𑀘 (𑀲𑀻. 𑀧𑀻.), 𑀅𑀚𑁆𑀚𑁂𑀯𑀁 (𑀲𑁆𑀬𑀸. 𑀓𑀁.)], 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀇𑀫𑀁 𑀭𑀢𑁆𑀢𑀺𑀁 𑀤𑀼𑀓𑁆𑀔𑀁 𑀲𑁂𑀢𑀺 𑀧𑀭𑀸𑀚𑀺𑀢𑁄’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀚𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀤𑀼𑀓𑁆𑀔𑀁 𑀲𑁂𑀢𑀺 𑀧𑀭𑀸𑀚𑀺𑀢𑁄;

𑀉𑀧𑀲𑀦𑁆𑀢𑁄 𑀲𑀼𑀔𑀁 𑀲𑁂𑀢𑀺, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬’’𑀦𑁆𑀢𑀺.

𑁫. 𑀤𑀼𑀢𑀺𑀬𑀲𑀗𑁆𑀕𑀸𑀫𑀲𑀼𑀢𑁆𑀢𑀁

𑁧𑁨𑁬. [𑀏𑀢𑁆𑀣 ‘‘𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀅𑀩𑁆𑀪𑀼𑀬𑁆𑀬𑀸𑀲𑀻’’𑀢𑀺 𑀆𑀤𑀺𑀦𑀸 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀝𑁆𑀞𑀓𑀣𑀸𑀬𑀁 𑀳𑀺 ‘‘𑀅𑀩𑁆𑀪𑀼𑀬𑁆𑀬𑀸𑀲𑀻𑀢𑀺 𑀧𑀭𑀸𑀚𑀬𑁂 𑀕𑀭𑀳𑀧𑁆𑀧𑀢𑁆𑀢𑁄…𑀧𑁂… 𑀯𑀼𑀢𑁆𑀢𑀚𑀬𑀓𑀸𑀭𑀡𑀁 𑀲𑀼𑀢𑁆𑀯𑀸 𑀅𑀪𑀺𑀉𑀬𑁆𑀬𑀸𑀲𑀻’’𑀢𑀺 𑀯𑀼𑀢𑁆𑀢𑀁] 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀅𑀩𑁆𑀪𑀼𑀬𑁆𑀬𑀸𑀲𑀺 𑀬𑁂𑀦 𑀓𑀸𑀲𑀺. 𑀅𑀲𑁆𑀲𑁄𑀲𑀺 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑁋 ‘‘𑀭𑀸𑀚𑀸 𑀓𑀺𑀭 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀫𑀁 𑀅𑀩𑁆𑀪𑀼𑀬𑁆𑀬𑀸𑀢𑁄 𑀬𑁂𑀦 𑀓𑀸𑀲𑀻’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀧𑀘𑁆𑀘𑀼𑀬𑁆𑀬𑀸𑀲𑀺 𑀬𑁂𑀦 𑀓𑀸𑀲𑀺. 𑀅𑀣 𑀔𑁄 𑀭𑀸𑀚𑀸 𑀘 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀭𑀸𑀚𑀸 𑀘 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀗𑁆𑀕𑀸𑀫𑁂𑀲𑀼𑀁. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀗𑁆𑀕𑀸𑀫𑁂 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀧𑀭𑀸𑀚𑁂𑀲𑀺, 𑀚𑀻𑀯𑀕𑁆𑀕𑀸𑀳𑀜𑁆𑀘 𑀦𑀁 𑀅𑀕𑁆𑀕𑀳𑁂𑀲𑀺. 𑀅𑀣 𑀔𑁄 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀜𑁆𑀘𑀸𑀧𑀺 𑀔𑁄 𑀫𑁆𑀬𑀸𑀬𑀁 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀅𑀤𑀼𑀩𑁆𑀪𑀦𑁆𑀢𑀲𑁆𑀲 𑀤𑀼𑀩𑁆𑀪𑀢𑀺, 𑀅𑀣 𑀘 𑀧𑀦 𑀫𑁂 𑀪𑀸𑀕𑀺𑀦𑁂𑀬𑁆𑀬𑁄 𑀳𑁄𑀢𑀺. 𑀬𑀁𑀦𑀽𑀦𑀸𑀳𑀁 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀲𑀩𑁆𑀩𑀁 𑀳𑀢𑁆𑀣𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀅𑀲𑁆𑀲𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀭𑀣𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀧𑀢𑁆𑀢𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀻𑀯𑀦𑁆𑀢𑀫𑁂𑀯 𑀦𑀁 𑀑𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺 [𑀑𑀲𑁆𑀲𑀚𑁆𑀚𑁂𑀬𑁆𑀬𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀲𑀩𑁆𑀩𑀁 𑀳𑀢𑁆𑀣𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀅𑀲𑁆𑀲𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀭𑀣𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀧𑀢𑁆𑀢𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀻𑀯𑀦𑁆𑀢𑀫𑁂𑀯 𑀦𑀁 𑀑𑀲𑀚𑁆𑀚𑀺 [𑀑𑀲𑁆𑀲𑀚𑀺 (𑀲𑀻.), 𑀑𑀲𑁆𑀲𑀚𑁆𑀚𑀺 (𑀲𑁆𑀬𑀸. 𑀓𑀁. 𑀧𑀻.)].

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀇𑀥, 𑀪𑀦𑁆𑀢𑁂, 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀅𑀩𑁆𑀪𑀼𑀬𑁆𑀬𑀸𑀲𑀺 𑀬𑁂𑀦 𑀓𑀸𑀲𑀺. 𑀅𑀲𑁆𑀲𑁄𑀲𑀺 𑀔𑁄, 𑀪𑀦𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑁋 ‘𑀭𑀸𑀚𑀸 𑀓𑀺𑀭 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀫𑀁 𑀅𑀩𑁆𑀪𑀼𑀬𑁆𑀬𑀸𑀢𑁄 𑀬𑁂𑀦 𑀓𑀸𑀲𑀻’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀧𑀘𑁆𑀘𑀼𑀬𑁆𑀬𑀸𑀲𑀺 𑀬𑁂𑀦 𑀓𑀸𑀲𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀭𑀸𑀚𑀸 𑀘 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀭𑀸𑀚𑀸 𑀘 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀗𑁆𑀕𑀸𑀫𑁂𑀲𑀼𑀁. 𑀢𑀲𑁆𑀫𑀺𑀁 𑀔𑁄 𑀧𑀦, 𑀪𑀦𑁆𑀢𑁂, 𑀲𑀗𑁆𑀕𑀸𑀫𑁂 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀧𑀭𑀸𑀚𑁂𑀲𑀺, 𑀚𑀻𑀯𑀕𑁆𑀕𑀸𑀳𑀜𑁆𑀘 𑀦𑀁 𑀅𑀕𑁆𑀕𑀳𑁂𑀲𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀜𑁆𑀘𑀸𑀧𑀺 𑀔𑁄 𑀫𑁆𑀬𑀸𑀬𑀁 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀅𑀤𑀼𑀩𑁆𑀪𑀦𑁆𑀢𑀲𑁆𑀲 𑀤𑀼𑀩𑁆𑀪𑀢𑀺, 𑀅𑀣 𑀘 𑀧𑀦 𑀫𑁂 𑀪𑀸𑀕𑀺𑀦𑁂𑀬𑁆𑀬𑁄 𑀳𑁄𑀢𑀺. 𑀬𑀁𑀦𑀽𑀦𑀸𑀳𑀁 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀲𑀩𑁆𑀩𑀁 𑀳𑀢𑁆𑀣𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀅𑀲𑁆𑀲𑀓𑀸𑀬𑀁 𑀲𑀩𑁆𑀩𑀁 𑀭𑀣𑀓𑀸𑀬𑀁 𑀲𑀩𑁆𑀩𑀁 𑀧𑀢𑁆𑀢𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀻𑀯𑀦𑁆𑀢𑀫𑁂𑀯 𑀦𑀁 𑀑𑀲𑀚𑁆𑀚𑁂𑀬𑁆𑀬’’’𑀦𑁆𑀢𑀺.

‘‘𑀅𑀣 𑀔𑁄, 𑀪𑀦𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀲𑀩𑁆𑀩𑀁 𑀳𑀢𑁆𑀣𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀅𑀲𑁆𑀲𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀭𑀣𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀩𑁆𑀩𑀁 𑀧𑀢𑁆𑀢𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀻𑀯𑀦𑁆𑀢𑀫𑁂𑀯 𑀦𑀁 𑀑𑀲𑀚𑁆𑀚𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀯𑀺𑀮𑀼𑀫𑁆𑀧𑀢𑁂𑀯 𑀧𑀼𑀭𑀺𑀲𑁄, 𑀬𑀸𑀯𑀲𑁆𑀲 𑀉𑀧𑀓𑀧𑁆𑀧𑀢𑀺;

𑀬𑀤𑀸 𑀘𑀜𑁆𑀜𑁂 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀲𑁄 𑀯𑀺𑀮𑀼𑀢𑁆𑀢𑁄 𑀯𑀺𑀮𑀼𑀧𑁆𑀧𑀢𑀺 [𑀯𑀺𑀮𑀼𑀫𑁆𑀧𑀢𑀺 (𑀲𑀻. 𑀧𑀻. 𑀓.)].

‘‘𑀞𑀸𑀦𑀜𑁆𑀳𑀺 𑀫𑀜𑁆𑀜𑀢𑀺 𑀩𑀸𑀮𑁄, 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀺 𑀧𑀸𑀧𑀁, 𑀅𑀣 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺.

‘‘𑀳𑀦𑁆𑀢𑀸 𑀮𑀪𑀢𑀺 [𑀮𑀪𑀢𑀺 𑀳𑀦𑁆𑀢𑀸 (𑀲𑀻. 𑀲𑁆𑀬𑀸. 𑀓𑀁.)] 𑀳𑀦𑁆𑀢𑀸𑀭𑀁, 𑀚𑁂𑀢𑀸𑀭𑀁 𑀮𑀪𑀢𑁂 𑀚𑀬𑀁;

𑀅𑀓𑁆𑀓𑁄𑀲𑀓𑁄 𑀘 𑀅𑀓𑁆𑀓𑁄𑀲𑀁, 𑀭𑁄𑀲𑁂𑀢𑀸𑀭𑀜𑁆𑀘 𑀭𑁄𑀲𑀓𑁄;

𑀅𑀣 𑀓𑀫𑁆𑀫𑀯𑀺𑀯𑀝𑁆𑀝𑁂𑀦, 𑀲𑁄 𑀯𑀺𑀮𑀼𑀢𑁆𑀢𑁄 𑀯𑀺𑀮𑀼𑀧𑁆𑀧𑀢𑀻’’𑀢𑀺.

𑁬. 𑀫𑀮𑁆𑀮𑀺𑀓𑀸𑀲𑀼𑀢𑁆𑀢𑀁

𑁧𑁨𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀉𑀧𑀓𑀡𑁆𑀡𑀓𑁂 𑀆𑀭𑁄𑀘𑁂𑀲𑀺 𑁋 ‘‘𑀫𑀮𑁆𑀮𑀺𑀓𑀸, 𑀤𑁂𑀯, 𑀤𑁂𑀯𑀻 𑀥𑀻𑀢𑀭𑀁 𑀯𑀺𑀚𑀸𑀢𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺.

𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀅𑀦𑀢𑁆𑀢𑀫𑀦𑀢𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀇𑀢𑁆𑀣𑀻𑀧𑀺 𑀳𑀺 𑀏𑀓𑀘𑁆𑀘𑀺𑀬𑀸, 𑀲𑁂𑀬𑁆𑀬𑀸 𑀧𑁄𑀲 𑀚𑀦𑀸𑀥𑀺𑀧;

𑀫𑁂𑀥𑀸𑀯𑀺𑀦𑀻 𑀲𑀻𑀮𑀯𑀢𑀻, 𑀲𑀲𑁆𑀲𑀼𑀤𑁂𑀯𑀸 𑀧𑀢𑀺𑀩𑁆𑀩𑀢𑀸.

‘‘𑀢𑀲𑁆𑀲𑀸 𑀬𑁄 𑀚𑀸𑀬𑀢𑀺 𑀧𑁄𑀲𑁄, 𑀲𑀽𑀭𑁄 𑀳𑁄𑀢𑀺 𑀤𑀺𑀲𑀫𑁆𑀧𑀢𑀺;

𑀢𑀸𑀤𑀺𑀲𑀸 𑀲𑀼𑀪𑀕𑀺𑀬𑀸 [𑀲𑀼𑀪𑀭𑀺𑀬𑀸𑀧𑀼𑀢𑁆𑀢𑁄 (𑀓.)] 𑀧𑀼𑀢𑁆𑀢𑁄, 𑀭𑀚𑁆𑀚𑀫𑁆𑀧𑀺 𑀅𑀦𑀼𑀲𑀸𑀲𑀢𑀻’’𑀢𑀺.

𑁭. 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀁

𑁧𑁨𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀏𑀓𑁄 𑀥𑀫𑁆𑀫𑁄 𑀬𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘𑀸’’𑀢𑀺?

‘‘𑀅𑀢𑁆𑀣𑀺 𑀔𑁄, 𑀫𑀳𑀸𑀭𑀸𑀚, 𑀏𑀓𑁄 𑀥𑀫𑁆𑀫𑁄 𑀬𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘𑀸’’𑀢𑀺.

‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀏𑀓𑁄 𑀥𑀫𑁆𑀫𑁄, 𑀬𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘𑀸’’𑀢𑀺?

‘‘𑀅𑀧𑁆𑀧𑀫𑀸𑀤𑁄 𑀔𑁄, 𑀫𑀳𑀸𑀭𑀸𑀚, 𑀏𑀓𑁄 𑀥𑀫𑁆𑀫𑁄, 𑀬𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀬𑀸𑀦𑀺 𑀓𑀸𑀦𑀺𑀘𑀺 𑀚𑀗𑁆𑀕𑀮𑀸𑀦𑀁 [𑀚𑀗𑁆𑀕𑀫𑀸𑀦𑀁 (𑀲𑀻. 𑀧𑀻.)] 𑀧𑀸𑀡𑀸𑀦𑀁 𑀧𑀤𑀚𑀸𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀳𑀢𑁆𑀣𑀺𑀧𑀤𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀳𑀢𑁆𑀣𑀺𑀧𑀤𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑁋 𑀬𑀤𑀺𑀤𑀁 𑀫𑀳𑀦𑁆𑀢𑀢𑁆𑀢𑁂𑀦; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀧𑁆𑀧𑀫𑀸𑀤𑁄 𑀏𑀓𑁄 𑀥𑀫𑁆𑀫𑁄, 𑀬𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘𑀸’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀆𑀬𑀼𑀁 𑀅𑀭𑁄𑀕𑀺𑀬𑀁 𑀯𑀡𑁆𑀡𑀁, 𑀲𑀕𑁆𑀕𑀁 𑀉𑀘𑁆𑀘𑀸𑀓𑀼𑀮𑀻𑀦𑀢𑀁;

𑀭𑀢𑀺𑀬𑁄 𑀧𑀢𑁆𑀣𑀬𑀦𑁆𑀢𑁂𑀦, 𑀉𑀴𑀸𑀭𑀸 𑀅𑀧𑀭𑀸𑀧𑀭𑀸.

‘‘𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺, 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀧𑀡𑁆𑀟𑀺𑀢𑀸;

𑀅𑀧𑁆𑀧𑀫𑀢𑁆𑀢𑁄 𑀉𑀪𑁄 𑀅𑀢𑁆𑀣𑁂, 𑀅𑀥𑀺𑀕𑁆𑀕𑀡𑁆𑀳𑀸𑀢𑀺 𑀧𑀡𑁆𑀟𑀺𑀢𑁄.

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑁮. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀼𑀢𑁆𑀢𑀁

𑁧𑁨𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄, 𑀲𑁄 𑀘 𑀔𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲, 𑀦𑁄 𑀧𑀸𑀧𑀫𑀺𑀢𑁆𑀢𑀲𑁆𑀲 𑀦𑁄 𑀧𑀸𑀧𑀲𑀳𑀸𑀬𑀲𑁆𑀲 𑀦𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑀲𑁆𑀲𑀸’’’𑀢𑀺.

‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚! 𑀲𑁆𑀯𑀸𑀓𑁆𑀔𑀸𑀢𑁄, 𑀫𑀳𑀸𑀭𑀸𑀚, 𑀫𑀬𑀸 𑀥𑀫𑁆𑀫𑁄. 𑀲𑁄 𑀘 𑀔𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲, 𑀦𑁄 𑀧𑀸𑀧𑀫𑀺𑀢𑁆𑀢𑀲𑁆𑀲 𑀦𑁄 𑀧𑀸𑀧𑀲𑀳𑀸𑀬𑀲𑁆𑀲 𑀦𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑀲𑁆𑀲𑀸𑀢𑀺.

‘‘𑀏𑀓𑀫𑀺𑀤𑀸𑀳𑀁, 𑀫𑀳𑀸𑀭𑀸𑀚, 𑀲𑀫𑀬𑀁 𑀲𑀓𑁆𑀓𑁂𑀲𑀼 𑀯𑀺𑀳𑀭𑀸𑀫𑀺 𑀦𑀕𑀭𑀓𑀁 𑀦𑀸𑀫 𑀲𑀓𑁆𑀬𑀸𑀦𑀁 𑀦𑀺𑀕𑀫𑁄. 𑀅𑀣 𑀔𑁄, 𑀫𑀳𑀸𑀭𑀸𑀚, 𑀆𑀦𑀦𑁆𑀤𑁄 𑀪𑀺𑀓𑁆𑀔𑀼 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄, 𑀫𑀳𑀸𑀭𑀸𑀚, 𑀆𑀦𑀦𑁆𑀤𑁄 𑀪𑀺𑀓𑁆𑀔𑀼 𑀫𑀁 𑀏𑀢𑀤𑀯𑁄𑀘 𑁋 ‘𑀉𑀧𑀟𑁆𑀠𑀫𑀺𑀤𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑁋 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸’’’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑀸𑀳𑀁, 𑀫𑀳𑀸𑀭𑀸𑀚, 𑀆𑀦𑀦𑁆𑀤𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀁 𑁋 ‘𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀫𑀸 𑀳𑁂𑀯𑀁, 𑀆𑀦𑀦𑁆𑀤! 𑀲𑀓𑀮𑀫𑁂𑀯 𑀳𑀺𑀤𑀁, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁 𑁋 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑀺𑀲𑁆𑀲𑀢𑀺’’’.

‘‘𑀓𑀣𑀜𑁆𑀘, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀯𑀸𑀘𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀆𑀚𑀻𑀯𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀯𑀸𑀬𑀸𑀫𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀲𑀢𑀺𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁, 𑀆𑀦𑀦𑁆𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀲𑀓𑀮𑀫𑁂𑀯𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑁋 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸’’𑀢𑀺.

‘‘𑀫𑀫𑀜𑁆𑀳𑀺, 𑀆𑀦𑀦𑁆𑀤, 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀚𑀭𑀸𑀬 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀩𑁆𑀬𑀸𑀥𑀺𑀥𑀫𑁆𑀫𑀸 𑀲𑀢𑁆𑀢𑀸 𑀩𑁆𑀬𑀸𑀥𑀺𑀢𑁄 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀭𑀡𑁂𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀲𑀢𑁆𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀺. 𑀇𑀫𑀺𑀦𑀸 𑀔𑁄 𑀏𑀢𑀁, 𑀆𑀦𑀦𑁆𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀲𑀓𑀮𑀫𑁂𑀯𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑁋 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸’’𑀢𑀺.

‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀫𑀳𑀸𑀭𑀸𑀚, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀪𑀯𑀺𑀲𑁆𑀲𑀸𑀫𑀺 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄’𑀢𑀺. 𑀏𑀯𑀜𑁆𑀳𑀺 𑀢𑁂, 𑀫𑀳𑀸𑀭𑀸𑀚, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀢𑁂, 𑀫𑀳𑀸𑀭𑀸𑀚, 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑀅𑀬𑀁 𑀏𑀓𑁄 𑀥𑀫𑁆𑀫𑁄 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀸𑀢𑀩𑁆𑀩𑁄 𑁋 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

‘‘𑀅𑀧𑁆𑀧𑀫𑀢𑁆𑀢𑀲𑁆𑀲 𑀢𑁂, 𑀫𑀳𑀸𑀭𑀸𑀚, 𑀯𑀺𑀳𑀭𑀢𑁄 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬, 𑀇𑀢𑁆𑀣𑀸𑀕𑀸𑀭𑀲𑁆𑀲 𑀅𑀦𑀼𑀬𑀦𑁆𑀢𑀲𑁆𑀲 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀭𑀸𑀚𑀸 𑀔𑁄 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬. 𑀳𑀦𑁆𑀤, 𑀫𑀬𑀫𑁆𑀧𑀺 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀸𑀫, 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬𑀸’’’𑀢𑀺.

‘‘𑀅𑀧𑁆𑀧𑀫𑀢𑁆𑀢𑀲𑁆𑀲 𑀢𑁂, 𑀫𑀳𑀸𑀭𑀸𑀚, 𑀯𑀺𑀳𑀭𑀢𑁄 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬, 𑀔𑀢𑁆𑀢𑀺𑀬𑀸𑀦𑀫𑁆𑀧𑀺 𑀅𑀦𑀼𑀬𑀦𑁆𑀢𑀸𑀦𑀁 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀭𑀸𑀚𑀸 𑀔𑁄 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬. 𑀳𑀦𑁆𑀤, 𑀫𑀬𑀫𑁆𑀧𑀺 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀸𑀫, 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬𑀸’’’𑀢𑀺.

‘‘𑀅𑀧𑁆𑀧𑀫𑀢𑁆𑀢𑀲𑁆𑀲 𑀢𑁂, 𑀫𑀳𑀸𑀭𑀸𑀚, 𑀯𑀺𑀳𑀭𑀢𑁄 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬, 𑀩𑀮𑀓𑀸𑀬𑀲𑁆𑀲𑀧𑀺 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀭𑀸𑀚𑀸 𑀔𑁄 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀢𑀺 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬. 𑀳𑀦𑁆𑀤, 𑀫𑀬𑀫𑁆𑀧𑀺 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀸𑀫, 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬𑀸’’’𑀢𑀺.

‘‘𑀅𑀧𑁆𑀧𑀫𑀢𑁆𑀢𑀲𑁆𑀲 𑀢𑁂, 𑀫𑀳𑀸𑀭𑀸𑀚, 𑀯𑀺𑀳𑀭𑀢𑁄 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬, 𑀦𑁂𑀕𑀫𑀚𑀸𑀦𑀧𑀤𑀲𑁆𑀲𑀧𑀺 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀭𑀸𑀚𑀸 𑀔𑁄 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬. 𑀳𑀦𑁆𑀤, 𑀫𑀬𑀫𑁆𑀧𑀺 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀸𑀫, 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬𑀸’’’𑀢𑀺?

‘‘𑀅𑀧𑁆𑀧𑀫𑀢𑁆𑀢𑀲𑁆𑀲 𑀢𑁂, 𑀫𑀳𑀸𑀭𑀸𑀚, 𑀯𑀺𑀳𑀭𑀢𑁄 𑀅𑀧𑁆𑀧𑀫𑀸𑀤𑀁 𑀉𑀧𑀦𑀺𑀲𑁆𑀲𑀸𑀬, 𑀅𑀢𑁆𑀢𑀸𑀧𑀺 𑀕𑀼𑀢𑁆𑀢𑁄 𑀭𑀓𑁆𑀔𑀺𑀢𑁄 𑀪𑀯𑀺𑀲𑁆𑀲𑀢𑀺 𑁋 𑀇𑀢𑁆𑀣𑀸𑀕𑀸𑀭𑀫𑁆𑀧𑀺 𑀕𑀼𑀢𑁆𑀢𑀁 𑀭𑀓𑁆𑀔𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑀫𑁆𑀧𑀺 𑀕𑀼𑀢𑁆𑀢𑀁 𑀭𑀓𑁆𑀔𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀪𑁄𑀕𑁂 𑀧𑀢𑁆𑀣𑀬𑀫𑀸𑀦𑁂𑀦, 𑀉𑀴𑀸𑀭𑁂 𑀅𑀧𑀭𑀸𑀧𑀭𑁂;

𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺, 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀧𑀡𑁆𑀟𑀺𑀢𑀸.

‘‘𑀅𑀧𑁆𑀧𑀫𑀢𑁆𑀢𑁄 𑀉𑀪𑁄 𑀅𑀢𑁆𑀣𑁂, 𑀅𑀥𑀺𑀕𑁆𑀕𑀡𑁆𑀳𑀸𑀢𑀺 𑀧𑀡𑁆𑀟𑀺𑀢𑁄;

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑁯. 𑀧𑀞𑀫𑀅𑀧𑀼𑀢𑁆𑀢𑀓𑀲𑀼𑀢𑁆𑀢𑀁

𑁧𑁩𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀤𑀺𑀯𑀸 𑀤𑀺𑀯𑀲𑁆𑀲 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤, 𑀓𑀼𑀢𑁄 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀆𑀕𑀘𑁆𑀙𑀲𑀺 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺?

‘‘𑀇𑀥, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀗𑁆𑀓𑀢𑁄. 𑀢𑀫𑀳𑀁 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀭𑀸𑀚𑀦𑁆𑀢𑁂𑀧𑀼𑀭𑀁 𑀅𑀢𑀺𑀳𑀭𑀺𑀢𑁆𑀯𑀸 𑀆𑀕𑀘𑁆𑀙𑀸𑀫𑀺. 𑀅𑀲𑀻𑀢𑀺, 𑀪𑀦𑁆𑀢𑁂, 𑀲𑀢𑀲𑀳𑀲𑁆𑀲𑀸𑀦𑀺 𑀳𑀺𑀭𑀜𑁆𑀜𑀲𑁆𑀲𑁂𑀯, 𑀓𑁄 𑀧𑀦 𑀯𑀸𑀤𑁄 𑀭𑀽𑀧𑀺𑀬𑀲𑁆𑀲! 𑀢𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀏𑀯𑀭𑀽𑀧𑁄 𑀪𑀢𑁆𑀢𑀪𑁄𑀕𑁄 𑀅𑀳𑁄𑀲𑀺 𑁋 𑀓𑀡𑀸𑀚𑀓𑀁 𑀪𑀼𑀜𑁆𑀚𑀢𑀺 𑀩𑀺𑀮𑀗𑁆𑀕𑀤𑀼𑀢𑀺𑀬𑀁. 𑀏𑀯𑀭𑀽𑀧𑁄 𑀯𑀢𑁆𑀣𑀪𑁄𑀕𑁄 𑀅𑀳𑁄𑀲𑀺 𑁋 𑀲𑀸𑀡𑀁 𑀥𑀸𑀭𑁂𑀢𑀺 𑀢𑀺𑀧𑀓𑁆𑀔𑀯𑀲𑀦𑀁. 𑀏𑀯𑀭𑀽𑀧𑁄 𑀬𑀸𑀦𑀪𑁄𑀕𑁄 𑀅𑀳𑁄𑀲𑀺 𑁋 𑀚𑀚𑁆𑀚𑀭𑀭𑀣𑀓𑁂𑀦 𑀬𑀸𑀢𑀺 𑀧𑀡𑁆𑀡𑀙𑀢𑁆𑀢𑀓𑁂𑀦 𑀥𑀸𑀭𑀺𑀬𑀫𑀸𑀦𑁂𑀦𑀸’’𑀢𑀺.

‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚! 𑀅𑀲𑀧𑁆𑀧𑀼𑀭𑀺𑀲𑁄 𑀔𑁄, 𑀫𑀳𑀸𑀭𑀸𑀚, 𑀉𑀴𑀸𑀭𑁂 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀦𑁂𑀯𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀧𑀼𑀢𑁆𑀢𑀤𑀸𑀭𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀢𑀲𑁆𑀲 𑀢𑁂 𑀪𑁄𑀕𑁂 𑀏𑀯𑀁 𑀲𑀫𑁆𑀫𑀸 𑀅𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑁂 [𑀅𑀧𑀭𑀺𑀪𑀼𑀜𑁆𑀚𑀫𑀸𑀦𑁄 (𑀲𑀩𑁆𑀩𑀢𑁆𑀣)] 𑀭𑀸𑀚𑀸𑀦𑁄 𑀯𑀸 𑀳𑀭𑀦𑁆𑀢𑀺 𑀘𑁄𑀭𑀸 𑀯𑀸 𑀳𑀭𑀦𑁆𑀢𑀺 𑀅𑀕𑁆𑀕𑀺 𑀯𑀸 𑀟𑀳𑀢𑀺 𑀉𑀤𑀓𑀁 𑀯𑀸 𑀯𑀳𑀢𑀺 𑀅𑀧𑁆𑀧𑀺𑀬𑀸 𑀯𑀸 𑀤𑀸𑀬𑀸𑀤𑀸 𑀳𑀭𑀦𑁆𑀢𑀺. 𑀏𑀯𑀁𑀲 𑀢𑁂 [𑀏𑀯𑀁 𑀲𑀦𑁆𑀢𑁂 (𑀲𑀻. 𑀧𑀻.)], 𑀫𑀳𑀸𑀭𑀸𑀚, 𑀪𑁄𑀕𑀸 𑀲𑀫𑁆𑀫𑀸 𑀅𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀦𑁄 𑀧𑀭𑀺𑀪𑁄𑀕𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀅𑀫𑀦𑀼𑀲𑁆𑀲𑀝𑁆𑀞𑀸𑀦𑁂 𑀧𑁄𑀓𑁆𑀔𑀭𑀡𑀻 𑀅𑀘𑁆𑀙𑁄𑀤𑀓𑀸 𑀲𑀻𑀢𑁄𑀤𑀓𑀸 𑀲𑀸𑀢𑁄𑀤𑀓𑀸 𑀲𑁂𑀢𑁄𑀤𑀓𑀸 𑀲𑀼𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸. 𑀢𑀁 𑀚𑀦𑁄 𑀦𑁂𑀯 𑀳𑀭𑁂𑀬𑁆𑀬 𑀦 𑀧𑀺𑀯𑁂𑀬𑁆𑀬 𑀦 𑀦𑀳𑀸𑀬𑁂𑀬𑁆𑀬 𑀦 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁂𑀬𑁆𑀬. 𑀏𑀯𑀜𑁆𑀳𑀺 𑀢𑀁, 𑀫𑀳𑀸𑀭𑀸𑀚, 𑀉𑀤𑀓𑀁 𑀲𑀫𑁆𑀫𑀸 𑀅𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀁 [𑀅𑀧𑀭𑀺𑀪𑀼𑀜𑁆𑀚𑀫𑀸𑀦𑀁 (𑀲𑁆𑀬𑀸. 𑀓𑀁.)] 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑁂𑀬𑁆𑀬, 𑀦𑁄 𑀧𑀭𑀺𑀪𑁄𑀕𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀲𑀧𑁆𑀧𑀼𑀭𑀺𑀲𑁄 𑀉𑀴𑀸𑀭𑁂 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀦𑁂𑀯𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀧𑀼𑀢𑁆𑀢𑀤𑀸𑀭𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀢𑀲𑁆𑀲 𑀢𑁂 𑀪𑁄𑀕𑁂 𑀏𑀯𑀁 𑀲𑀫𑁆𑀫𑀸 𑀅𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑁂 𑀭𑀸𑀚𑀸𑀦𑁄 𑀯𑀸 𑀳𑀭𑀦𑁆𑀢𑀺 𑀘𑁄𑀭𑀸 𑀯𑀸 𑀳𑀭𑀦𑁆𑀢𑀺 𑀅𑀕𑁆𑀕𑀺 𑀯𑀸 𑀟𑀳𑀢𑀺 𑀉𑀤𑀓𑀁 𑀯𑀸 𑀯𑀳𑀢𑀺 𑀅𑀧𑁆𑀧𑀺𑀬𑀸 𑀯𑀸 𑀤𑀸𑀬𑀸𑀤𑀸 𑀳𑀭𑀦𑁆𑀢𑀺. 𑀏𑀯𑀁𑀲 𑀢𑁂 [𑀏𑀯𑀁 𑀲𑀦𑁆𑀢𑁂 (𑀲𑀻. 𑀧𑀻.)], 𑀫𑀳𑀸𑀭𑀸𑀚, 𑀪𑁄𑀕𑀸 𑀲𑀫𑁆𑀫𑀸 𑀅𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀦𑁄 𑀧𑀭𑀺𑀪𑁄𑀕𑀁.

‘‘𑀲𑀧𑁆𑀧𑀼𑀭𑀺𑀲𑁄 𑀘 𑀔𑁄, 𑀫𑀳𑀸𑀭𑀸𑀚, 𑀉𑀴𑀸𑀭𑁂 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀧𑀼𑀢𑁆𑀢𑀤𑀸𑀭𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀢𑀲𑁆𑀲 𑀢𑁂 𑀪𑁄𑀕𑁂 𑀏𑀯𑀁 𑀲𑀫𑁆𑀫𑀸 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑀦𑁆𑀢𑀺, 𑀦 𑀘𑁄𑀭𑀸 𑀳𑀭𑀦𑁆𑀢𑀺, 𑀦 𑀅𑀕𑁆𑀕𑀺 𑀟𑀳𑀢𑀺, 𑀦 𑀉𑀤𑀓𑀁 𑀯𑀳𑀢𑀺, 𑀦 𑀅𑀧𑁆𑀧𑀺𑀬𑀸 𑀤𑀸𑀬𑀸𑀤𑀸 𑀳𑀭𑀦𑁆𑀢𑀺. 𑀏𑀯𑀁𑀲 𑀢𑁂, 𑀫𑀳𑀸𑀭𑀸𑀚, 𑀪𑁄𑀕𑀸 𑀲𑀫𑁆𑀫𑀸 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀸 𑀧𑀭𑀺𑀪𑁄𑀕𑀁 𑀕𑀘𑁆𑀙𑀦𑁆𑀢𑀺, 𑀦𑁄 𑀧𑀭𑀺𑀓𑁆𑀔𑀬𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀅𑀯𑀺𑀤𑀽𑀭𑁂 𑀧𑁄𑀓𑁆𑀔𑀭𑀡𑀻 𑀅𑀘𑁆𑀙𑁄𑀤𑀓𑀸 𑀲𑀻𑀢𑁄𑀤𑀓𑀸 𑀲𑀸𑀢𑁄𑀤𑀓𑀸 𑀲𑁂𑀢𑁄𑀤𑀓𑀸 𑀲𑀼𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸. 𑀢𑀜𑁆𑀘 𑀉𑀤𑀓𑀁 𑀚𑀦𑁄 𑀳𑀭𑁂𑀬𑁆𑀬𑀧𑀺 𑀧𑀺𑀯𑁂𑀬𑁆𑀬𑀧𑀺 𑀦𑀳𑀸𑀬𑁂𑀬𑁆𑀬𑀧𑀺 𑀬𑀣𑀸𑀧𑀘𑁆𑀘𑀬𑀫𑁆𑀧𑀺 𑀓𑀭𑁂𑀬𑁆𑀬. 𑀏𑀯𑀜𑁆𑀳𑀺 𑀢𑀁, 𑀫𑀳𑀸𑀭𑀸𑀚, 𑀉𑀤𑀓𑀁 𑀲𑀫𑁆𑀫𑀸 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀁 𑀧𑀭𑀺𑀪𑁄𑀕𑀁 𑀕𑀘𑁆𑀙𑁂𑀬𑁆𑀬, 𑀦𑁄 𑀧𑀭𑀺𑀓𑁆𑀔𑀬𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀧𑁆𑀧𑀼𑀭𑀺𑀲𑁄 𑀉𑀴𑀸𑀭𑁂 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀧𑀼𑀢𑁆𑀢𑀤𑀸𑀭𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀢𑀲𑁆𑀲 𑀢𑁂 𑀪𑁄𑀕𑁂 𑀏𑀯𑀁 𑀲𑀫𑁆𑀫𑀸 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑀦𑁆𑀢𑀺, 𑀦 𑀘𑁄𑀭𑀸 𑀳𑀭𑀦𑁆𑀢𑀺, 𑀦 𑀅𑀕𑁆𑀕𑀺 𑀟𑀳𑀢𑀺, 𑀦 𑀉𑀤𑀓𑀁 𑀯𑀳𑀢𑀺, 𑀦 𑀅𑀧𑁆𑀧𑀺𑀬𑀸 𑀤𑀸𑀬𑀸𑀤𑀸 𑀳𑀭𑀦𑁆𑀢𑀺. 𑀏𑀯𑀁𑀲 𑀢𑁂, 𑀫𑀳𑀸𑀭𑀸𑀚, 𑀪𑁄𑀕𑀸 𑀲𑀫𑁆𑀫𑀸 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀸 𑀧𑀭𑀺𑀪𑁄𑀕𑀁 𑀕𑀘𑁆𑀙𑀦𑁆𑀢𑀺, 𑀦𑁄 𑀧𑀭𑀺𑀓𑁆𑀔𑀬’’𑀦𑁆𑀢𑀺.

‘‘𑀅𑀫𑀦𑀼𑀲𑁆𑀲𑀝𑁆𑀞𑀸𑀦𑁂 𑀉𑀤𑀓𑀁𑀯 𑀲𑀻𑀢𑀁,

𑀢𑀤𑀧𑁂𑀬𑁆𑀬𑀫𑀸𑀦𑀁 𑀧𑀭𑀺𑀲𑁄𑀲𑀫𑁂𑀢𑀺;

𑀏𑀯𑀁 𑀥𑀦𑀁 𑀓𑀸𑀧𑀼𑀭𑀺𑀲𑁄 𑀮𑀪𑀺𑀢𑁆𑀯𑀸,

𑀦𑁂𑀯𑀢𑁆𑀢𑀦𑀸 𑀪𑀼𑀜𑁆𑀚𑀢𑀺 𑀦𑁄 𑀤𑀤𑀸𑀢𑀺.

𑀥𑀻𑀭𑁄 𑀘 𑀯𑀺𑀜𑁆𑀜𑀽 𑀅𑀥𑀺𑀕𑀫𑁆𑀫 𑀪𑁄𑀕𑁂,

𑀲𑁄 𑀪𑀼𑀜𑁆𑀚𑀢𑀺 𑀓𑀺𑀘𑁆𑀘𑀓𑀭𑁄 𑀘 𑀳𑁄𑀢𑀺;

𑀲𑁄 𑀜𑀸𑀢𑀺𑀲𑀗𑁆𑀖𑀁 𑀦𑀺𑀲𑀪𑁄 𑀪𑀭𑀺𑀢𑁆𑀯𑀸,

𑀅𑀦𑀺𑀦𑁆𑀤𑀺𑀢𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦’’𑀦𑁆𑀢𑀺.

𑁧𑁦. 𑀤𑀼𑀢𑀺𑀬𑀅𑀧𑀼𑀢𑁆𑀢𑀓𑀲𑀼𑀢𑁆𑀢𑀁

𑁧𑁩𑁧. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀤𑀺𑀯𑀸 𑀤𑀺𑀯𑀲𑁆𑀲 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤, 𑀓𑀼𑀢𑁄 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀆𑀕𑀘𑁆𑀙𑀲𑀺 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺?

‘‘𑀇𑀥, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀗𑁆𑀓𑀢𑁄. 𑀢𑀫𑀳𑀁 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀭𑀸𑀚𑀦𑁆𑀢𑁂𑀧𑀼𑀭𑀁 𑀅𑀢𑀺𑀳𑀭𑀺𑀢𑁆𑀯𑀸 𑀆𑀕𑀘𑁆𑀙𑀸𑀫𑀺. 𑀲𑀢𑀁, 𑀪𑀦𑁆𑀢𑁂, 𑀲𑀢𑀲𑀳𑀲𑁆𑀲𑀸𑀦𑀺 𑀳𑀺𑀭𑀜𑁆𑀜𑀲𑁆𑀲𑁂𑀯, 𑀓𑁄 𑀧𑀦 𑀯𑀸𑀤𑁄 𑀭𑀽𑀧𑀺𑀬𑀲𑁆𑀲! 𑀢𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀏𑀯𑀭𑀽𑀧𑁄 𑀪𑀢𑁆𑀢𑀪𑁄𑀕𑁄 𑀅𑀳𑁄𑀲𑀺 𑁋 𑀓𑀡𑀸𑀚𑀓𑀁 𑀪𑀼𑀜𑁆𑀚𑀢𑀺 𑀩𑀺𑀮𑀗𑁆𑀕𑀤𑀼𑀢𑀺𑀬𑀁. 𑀏𑀯𑀭𑀽𑀧𑁄 𑀯𑀢𑁆𑀣𑀪𑁄𑀕𑁄 𑀅𑀳𑁄𑀲𑀺 𑁋 𑀲𑀸𑀡𑀁 𑀥𑀸𑀭𑁂𑀢𑀺 𑀢𑀺𑀧𑀓𑁆𑀔𑀯𑀲𑀦𑀁. 𑀏𑀯𑀭𑀽𑀧𑁄 𑀬𑀸𑀦𑀪𑁄𑀕𑁄 𑀅𑀳𑁄𑀲𑀺 𑁋 𑀚𑀚𑁆𑀚𑀭𑀭𑀣𑀓𑁂𑀦 𑀬𑀸𑀢𑀺 𑀧𑀡𑁆𑀡𑀙𑀢𑁆𑀢𑀓𑁂𑀦 𑀥𑀸𑀭𑀺𑀬𑀫𑀸𑀦𑁂𑀦𑀸’’𑀢𑀺.

‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚! 𑀪𑀽𑀢𑀧𑀼𑀩𑁆𑀩𑀁 𑀲𑁄, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀢𑀕𑁆𑀕𑀭𑀲𑀺𑀔𑀺𑀁 𑀦𑀸𑀫 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀧𑀸𑀤𑁂𑀲𑀺. ‘𑀤𑁂𑀣 𑀲𑀫𑀡𑀲𑁆𑀲 𑀧𑀺𑀡𑁆𑀟’𑀦𑁆𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀤𑀢𑁆𑀯𑀸 𑀘 𑀧𑀦 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺 𑁋 ‘𑀯𑀭𑀫𑁂𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀸𑀲𑀸 𑀯𑀸 𑀓𑀫𑁆𑀫𑀓𑀭𑀸 𑀯𑀸 𑀪𑀼𑀜𑁆𑀚𑁂𑀬𑁆𑀬𑀼’𑀦𑁆𑀢𑀺. 𑀪𑀸𑀢𑀼 𑀘 𑀧𑀦 𑀏𑀓𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀲𑁆𑀲 𑀓𑀸𑀭𑀡𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺.

‘‘𑀬𑀁 𑀔𑁄 𑀲𑁄, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀢𑀕𑁆𑀕𑀭𑀲𑀺𑀔𑀺𑀁 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀧𑀸𑀤𑁂𑀲𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺. 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀫𑀺𑀲𑁆𑀲𑀸𑀬𑁂𑀯 𑀲𑀸𑀯𑀢𑁆𑀣𑀺𑀬𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑁂𑀝𑁆𑀞𑀺𑀢𑁆𑀢𑀁 𑀓𑀸𑀭𑁂𑀲𑀺. 𑀬𑀁 𑀔𑁄 𑀲𑁄, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀤𑀢𑁆𑀯𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺 𑁋 ‘𑀯𑀭𑀫𑁂𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀸𑀲𑀸 𑀯𑀸 𑀓𑀫𑁆𑀫𑀓𑀭𑀸 𑀯𑀸 𑀪𑀼𑀜𑁆𑀚𑁂𑀬𑁆𑀬𑀼’𑀦𑁆𑀢𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀦𑀸𑀲𑁆𑀲𑀼𑀴𑀸𑀭𑀸𑀬 𑀪𑀢𑁆𑀢𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦𑀸𑀲𑁆𑀲𑀼𑀴𑀸𑀭𑀸𑀬 𑀯𑀢𑁆𑀣𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦𑀸𑀲𑁆𑀲𑀼𑀴𑀸𑀭𑀸𑀬 𑀬𑀸𑀦𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦𑀸𑀲𑁆𑀲𑀼𑀴𑀸𑀭𑀸𑀦𑀁 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀁 𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺. 𑀬𑀁 𑀔𑁄 𑀲𑁄, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀪𑀸𑀢𑀼 𑀘 𑀧𑀦 𑀏𑀓𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀲𑁆𑀲 𑀓𑀸𑀭𑀡𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀣. 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀤𑀁 𑀲𑀢𑁆𑀢𑀫𑀁 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀭𑀸𑀚𑀓𑁄𑀲𑀁 𑀧𑀯𑁂𑀲𑁂𑀢𑀺. 𑀢𑀲𑁆𑀲 𑀔𑁄, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀭𑀸𑀡𑀜𑁆𑀘 𑀧𑀼𑀜𑁆𑀜𑀁 𑀧𑀭𑀺𑀓𑁆𑀔𑀻𑀡𑀁, 𑀦𑀯𑀜𑁆𑀘 𑀧𑀼𑀜𑁆𑀜𑀁 𑀅𑀦𑀼𑀧𑀘𑀺𑀢𑀁. 𑀅𑀚𑁆𑀚 𑀧𑀦, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀫𑀳𑀸𑀭𑁄𑀭𑀼𑀯𑁂 𑀦𑀺𑀭𑀬𑁂 𑀧𑀘𑁆𑀘𑀢𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂, 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀫𑀳𑀸𑀭𑁄𑀭𑀼𑀯𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑁄’’𑀢𑀺. ‘‘𑀏𑀯𑀁, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀫𑀳𑀸𑀭𑁄𑀭𑀼𑀯𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑁄’’𑀢𑀺. 𑀇𑀤𑀫𑀯𑁄𑀘…𑀧𑁂….

‘‘𑀥𑀜𑁆𑀜𑀁 𑀥𑀦𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁, 𑀧𑀭𑀺𑀕𑁆𑀕𑀳𑀁 𑀯𑀸𑀧𑀺 𑀬𑀤𑀢𑁆𑀣𑀺 𑀓𑀺𑀜𑁆𑀘𑀺;

𑀤𑀸𑀲𑀸 𑀓𑀫𑁆𑀫𑀓𑀭𑀸 𑀧𑁂𑀲𑁆𑀲𑀸, 𑀬𑁂 𑀘𑀲𑁆𑀲 𑀅𑀦𑀼𑀚𑀻𑀯𑀺𑀦𑁄.

‘‘𑀲𑀩𑁆𑀩𑀁 𑀦𑀸𑀤𑀸𑀬 𑀕𑀦𑁆𑀢𑀩𑁆𑀩𑀁, 𑀲𑀩𑁆𑀩𑀁 𑀦𑀺𑀓𑁆𑀔𑀺𑀧𑁆𑀧𑀕𑀸𑀫𑀺𑀦𑀁 [𑀦𑀺𑀓𑁆𑀔𑀻𑀧𑀕𑀸𑀫𑀺𑀦𑀁 (𑀲𑁆𑀬𑀸. 𑀓𑀁. 𑀓.)];

𑀬𑀜𑁆𑀘 𑀓𑀭𑁄𑀢𑀺 𑀓𑀸𑀬𑁂𑀦, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸.

‘‘𑀢𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺, 𑀢𑀜𑁆𑀘 𑀆𑀤𑀸𑀬 𑀕𑀘𑁆𑀙𑀢𑀺;

𑀢𑀜𑁆𑀘𑀲𑁆𑀲 𑀅𑀦𑀼𑀕𑀁 𑀳𑁄𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

‘‘𑀢𑀲𑁆𑀫𑀸 𑀓𑀭𑁂𑀬𑁆𑀬 𑀓𑀮𑁆𑀬𑀸𑀡𑀁, 𑀦𑀺𑀘𑀬𑀁 𑀲𑀫𑁆𑀧𑀭𑀸𑀬𑀺𑀓𑀁;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀚𑀝𑀺𑀮𑀸 𑀧𑀜𑁆𑀘 𑀭𑀸𑀚𑀸𑀦𑁄, 𑀤𑁄𑀡𑀧𑀸𑀓𑀓𑀼𑀭𑁂𑀦 𑀘;

𑀲𑀗𑁆𑀕𑀸𑀫𑁂𑀦 𑀤𑁆𑀯𑁂 𑀯𑀼𑀢𑁆𑀢𑀸𑀦𑀺, 𑀫𑀮𑁆𑀮𑀺𑀓𑀸 [𑀥𑀻𑀢𑀭𑀸 (𑀩𑀳𑀽𑀲𑀼)] 𑀤𑁆𑀯𑁂 𑀅𑀧𑁆𑀧𑀫𑀸𑀤𑁂𑀦 𑀘;

𑀅𑀧𑀼𑀢𑁆𑀢𑀓𑁂𑀦 𑀤𑁆𑀯𑁂 𑀯𑀼𑀢𑁆𑀢𑀸, 𑀯𑀕𑁆𑀕𑁄 𑀢𑁂𑀦 𑀧𑀯𑀼𑀘𑁆𑀘𑀢𑀻𑀢𑀺.