𑁨. 𑀧𑀼𑀭𑀺𑀲𑀲𑀼𑀢𑁆𑀢𑀁

𑁧𑁧𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺?

‘‘𑀢𑀬𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀓𑀢𑀫𑁂 𑀢𑀬𑁄? 𑀮𑁄𑀪𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀤𑁄𑀲𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀫𑁄𑀳𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀢𑀬𑁄 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀧𑀼𑀭𑀺𑀲𑀁 𑀧𑀸𑀧𑀘𑁂𑀢𑀲𑀁;

𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀫𑁆𑀨𑀮’’𑀦𑁆𑀢𑀺 [𑀲𑀧𑁆𑀨𑀮𑀦𑁆𑀢𑀺 (𑀲𑁆𑀬𑀸. 𑀓𑀁.)].