𑁧. 𑀧𑀞𑀫𑀯𑀕𑁆𑀕𑁄

𑁧. 𑀤𑀳𑀭𑀲𑀼𑀢𑁆𑀢𑀁

𑁧𑁧𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀯𑀫𑁆𑀧𑀺 𑀦𑁄 𑀕𑁄𑀢𑀫𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀝𑀺𑀚𑀸𑀦𑀸𑀢𑀻’’𑀢𑀺? ‘‘𑀬𑀜𑁆𑀳𑀺 𑀢𑀁, 𑀫𑀳𑀸𑀭𑀸𑀚, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 ‘𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺, 𑀫𑀫𑁂𑀯 [𑀫𑀫𑀁 (𑀲𑀩𑁆𑀩𑀢𑁆𑀣)] 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬. 𑀅𑀳𑀜𑁆𑀳𑀺, 𑀫𑀳𑀸𑀭𑀸𑀚, 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺.

‘‘𑀬𑁂𑀧𑀺 𑀢𑁂, 𑀪𑁄 𑀕𑁄𑀢𑀫, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀗𑁆𑀖𑀺𑀦𑁄 𑀕𑀡𑀺𑀦𑁄 𑀕𑀡𑀸𑀘𑀭𑀺𑀬𑀸 𑀜𑀸𑀢𑀸 𑀬𑀲𑀲𑁆𑀲𑀺𑀦𑁄 𑀢𑀺𑀢𑁆𑀣𑀓𑀭𑀸 𑀲𑀸𑀥𑀼𑀲𑀫𑁆𑀫𑀢𑀸 𑀩𑀳𑀼𑀚𑀦𑀲𑁆𑀲, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀽𑀭𑀡𑁄 𑀓𑀲𑁆𑀲𑀧𑁄, 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄, 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄, 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄, 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄; 𑀢𑁂𑀧𑀺 𑀫𑀬𑀸 ‘𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀝𑀺𑀚𑀸𑀦𑀸𑀣𑀸’𑀢𑀺 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀦 𑀧𑀝𑀺𑀚𑀸𑀦𑀦𑁆𑀢𑀺. 𑀓𑀺𑀁 𑀧𑀦 𑀪𑀯𑀁 𑀕𑁄𑀢𑀫𑁄 𑀤𑀳𑀭𑁄 𑀘𑁂𑀯 𑀚𑀸𑀢𑀺𑀬𑀸 𑀦𑀯𑁄 𑀘 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺?

‘‘𑀘𑀢𑁆𑀢𑀸𑀭𑁄 𑀔𑁄 𑀫𑁂, 𑀫𑀳𑀸𑀭𑀸𑀚, 𑀤𑀳𑀭𑀸𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑀸, 𑀤𑀳𑀭𑀸𑀢𑀺 𑀦 𑀧𑀭𑀺𑀪𑁄𑀢𑀩𑁆𑀩𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀔𑀢𑁆𑀢𑀺𑀬𑁄 𑀔𑁄, 𑀫𑀳𑀸𑀭𑀸𑀚, 𑀤𑀳𑀭𑁄𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑁄, 𑀤𑀳𑀭𑁄𑀢𑀺 𑀦 𑀧𑀭𑀺𑀪𑁄𑀢𑀩𑁆𑀩𑁄. 𑀉𑀭𑀕𑁄 𑀔𑁄, 𑀫𑀳𑀸𑀭𑀸𑀚, 𑀤𑀳𑀭𑁄𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑁄, 𑀤𑀳𑀭𑁄𑀢𑀺 𑀦 𑀧𑀭𑀺𑀪𑁄𑀢𑀩𑁆𑀩𑁄. 𑀅𑀕𑁆𑀕𑀺 𑀔𑁄, 𑀫𑀳𑀸𑀭𑀸𑀚, 𑀤𑀳𑀭𑁄𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑁄, 𑀤𑀳𑀭𑁄𑀢𑀺 𑀦 𑀧𑀭𑀺𑀪𑁄𑀢𑀩𑁆𑀩𑁄. 𑀪𑀺𑀓𑁆𑀔𑀼, 𑀔𑁄, 𑀫𑀳𑀸𑀭𑀸𑀚, 𑀤𑀳𑀭𑁄𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑁄, 𑀤𑀳𑀭𑁄𑀢𑀺 𑀦 𑀧𑀭𑀺𑀪𑁄𑀢𑀩𑁆𑀩𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀘𑀢𑁆𑀢𑀸𑀭𑁄 𑀤𑀳𑀭𑀸𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑀸, 𑀤𑀳𑀭𑀸𑀢𑀺 𑀦 𑀧𑀭𑀺𑀪𑁄𑀢𑀩𑁆𑀩𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀔𑀢𑁆𑀢𑀺𑀬𑀁 𑀚𑀸𑀢𑀺𑀲𑀫𑁆𑀧𑀦𑁆𑀦𑀁, 𑀅𑀪𑀺𑀚𑀸𑀢𑀁 𑀬𑀲𑀲𑁆𑀲𑀺𑀦𑀁;

𑀤𑀳𑀭𑁄𑀢𑀺 𑀦𑀸𑀯𑀚𑀸𑀦𑁂𑀬𑁆𑀬, 𑀦 𑀦𑀁 𑀧𑀭𑀺𑀪𑀯𑁂 𑀦𑀭𑁄.

‘‘𑀞𑀸𑀦𑀜𑁆𑀳𑀺 𑀲𑁄 𑀫𑀦𑀼𑀚𑀺𑀦𑁆𑀤𑁄, 𑀭𑀚𑁆𑀚𑀁 𑀮𑀤𑁆𑀥𑀸𑀦 𑀔𑀢𑁆𑀢𑀺𑀬𑁄;

𑀲𑁄 𑀓𑀼𑀤𑁆𑀥𑁄 𑀭𑀸𑀚𑀤𑀡𑁆𑀟𑁂𑀦, 𑀢𑀲𑁆𑀫𑀺𑀁 𑀧𑀓𑁆𑀓𑀫𑀢𑁂 𑀪𑀼𑀲𑀁;

𑀢𑀲𑁆𑀫𑀸 𑀢𑀁 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀭𑀓𑁆𑀔𑀁 𑀚𑀻𑀯𑀺𑀢𑀫𑀢𑁆𑀢𑀦𑁄.

‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸 𑀭𑀜𑁆𑀜𑁂, 𑀬𑀢𑁆𑀣 𑀧𑀲𑁆𑀲𑁂 𑀪𑀼𑀚𑀗𑁆𑀕𑀫𑀁;

𑀤𑀳𑀭𑁄𑀢𑀺 𑀦𑀸𑀯𑀚𑀸𑀦𑁂𑀬𑁆𑀬, 𑀦 𑀦𑀁 𑀧𑀭𑀺𑀪𑀯𑁂 𑀦𑀭𑁄.

‘‘𑀉𑀘𑁆𑀘𑀸𑀯𑀘𑁂𑀳𑀺 𑀯𑀡𑁆𑀡𑁂𑀳𑀺, 𑀉𑀭𑀕𑁄 𑀘𑀭𑀢𑀺 𑀢𑁂𑀚𑀲𑀻 [𑀢𑁂𑀚𑀲𑀸 (𑀲𑀻. 𑀓.), 𑀢𑁂𑀚𑀲𑀺 (𑀧𑀻. 𑀓.)];

𑀲𑁄 𑀆𑀲𑀚𑁆𑀚 𑀟𑀁𑀲𑁂 𑀩𑀸𑀮𑀁, 𑀦𑀭𑀁 𑀦𑀸𑀭𑀺𑀜𑁆𑀘 𑀏𑀓𑀤𑀸;

𑀢𑀲𑁆𑀫𑀸 𑀢𑀁 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀭𑀓𑁆𑀔𑀁 𑀚𑀻𑀯𑀺𑀢𑀫𑀢𑁆𑀢𑀦𑁄.

‘‘𑀧𑀳𑀽𑀢𑀪𑀓𑁆𑀔𑀁 𑀚𑀸𑀮𑀺𑀦𑀁, 𑀧𑀸𑀯𑀓𑀁 𑀓𑀡𑁆𑀳𑀯𑀢𑁆𑀢𑀦𑀺𑀁;

𑀤𑀳𑀭𑁄𑀢𑀺 𑀦𑀸𑀯𑀚𑀸𑀦𑁂𑀬𑁆𑀬, 𑀦 𑀦𑀁 𑀧𑀭𑀺𑀪𑀯𑁂 𑀦𑀭𑁄.

‘‘𑀮𑀤𑁆𑀥𑀸 𑀳𑀺 𑀲𑁄 𑀉𑀧𑀸𑀤𑀸𑀦𑀁, 𑀫𑀳𑀸 𑀳𑀼𑀢𑁆𑀯𑀸𑀦 𑀧𑀸𑀯𑀓𑁄;

𑀲𑁄 𑀆𑀲𑀚𑁆𑀚 𑀟𑀳𑁂 [𑀤𑀳𑁂] 𑀩𑀸𑀮𑀁, 𑀦𑀭𑀁 𑀦𑀸𑀭𑀺𑀜𑁆𑀘 𑀏𑀓𑀤𑀸;

𑀢𑀲𑁆𑀫𑀸 𑀢𑀁 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀭𑀓𑁆𑀔𑀁 𑀚𑀻𑀯𑀺𑀢𑀫𑀢𑁆𑀢𑀦𑁄.

‘‘𑀯𑀦𑀁 𑀬𑀤𑀕𑁆𑀕𑀺 𑀟𑀳𑀢𑀺 [𑀤𑀳𑀢𑀺 (𑀓.)], 𑀧𑀸𑀯𑀓𑁄 𑀓𑀡𑁆𑀳𑀯𑀢𑁆𑀢𑀦𑀻;

𑀚𑀸𑀬𑀦𑁆𑀢𑀺 𑀢𑀢𑁆𑀣 𑀧𑀸𑀭𑁄𑀳𑀸, 𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂.

‘‘𑀬𑀜𑁆𑀘 𑀔𑁄 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀪𑀺𑀓𑁆𑀔𑀼 𑀟𑀳𑀢𑀺 𑀢𑁂𑀚𑀲𑀸;

𑀦 𑀢𑀲𑁆𑀲 𑀧𑀼𑀢𑁆𑀢𑀸 𑀧𑀲𑀯𑁄, 𑀤𑀸𑀬𑀸𑀤𑀸 𑀯𑀺𑀦𑁆𑀤𑀭𑁂 𑀥𑀦𑀁;

𑀅𑀦𑀧𑀘𑁆𑀘𑀸 𑀅𑀤𑀸𑀬𑀸𑀤𑀸, 𑀢𑀸𑀮𑀸𑀯𑀢𑁆𑀣𑀽 𑀪𑀯𑀦𑁆𑀢𑀺 𑀢𑁂.

‘‘𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀪𑀼𑀚𑀗𑁆𑀕𑀫𑀁 𑀧𑀸𑀯𑀓𑀜𑁆𑀘, 𑀔𑀢𑁆𑀢𑀺𑀬𑀜𑁆𑀘 𑀬𑀲𑀲𑁆𑀲𑀺𑀦𑀁;

𑀪𑀺𑀓𑁆𑀔𑀼𑀜𑁆𑀘 𑀲𑀻𑀮𑀲𑀫𑁆𑀧𑀦𑁆𑀦𑀁, 𑀲𑀫𑁆𑀫𑀤𑁂𑀯 𑀲𑀫𑀸𑀘𑀭𑁂’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂! 𑀲𑁂𑀬𑁆𑀬𑀣𑀸𑀧𑀺 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 [𑀦𑀺𑀓𑀼𑀚𑁆𑀚𑀺𑀢𑀁 (?)] 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑁨. 𑀧𑀼𑀭𑀺𑀲𑀲𑀼𑀢𑁆𑀢𑀁

𑁧𑁧𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺?

‘‘𑀢𑀬𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀓𑀢𑀫𑁂 𑀢𑀬𑁄? 𑀮𑁄𑀪𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀤𑁄𑀲𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀫𑁄𑀳𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀢𑀬𑁄 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀧𑀼𑀭𑀺𑀲𑀁 𑀧𑀸𑀧𑀘𑁂𑀢𑀲𑀁;

𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀫𑁆𑀨𑀮’’𑀦𑁆𑀢𑀺 [𑀲𑀧𑁆𑀨𑀮𑀦𑁆𑀢𑀺 (𑀲𑁆𑀬𑀸. 𑀓𑀁.)].

𑁩. 𑀚𑀭𑀸𑀫𑀭𑀡𑀲𑀼𑀢𑁆𑀢𑀁

𑁧𑁧𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀚𑀸𑀢𑀲𑁆𑀲 𑀅𑀜𑁆𑀜𑀢𑁆𑀭 𑀚𑀭𑀸𑀫𑀭𑀡𑀸’’𑀢𑀺? ‘‘𑀦𑀢𑁆𑀣𑀺 𑀔𑁄, 𑀫𑀳𑀸𑀭𑀸𑀚, 𑀚𑀸𑀢𑀲𑁆𑀲 𑀅𑀜𑁆𑀜𑀢𑁆𑀭 𑀚𑀭𑀸𑀫𑀭𑀡𑀸. 𑀬𑁂𑀧𑀺 𑀢𑁂, 𑀫𑀳𑀸𑀭𑀸𑀚, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸 𑀅𑀟𑁆𑀠𑀸 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸 𑀧𑀳𑀽𑀢𑀥𑀦𑀥𑀜𑁆𑀜𑀸, 𑀢𑁂𑀲𑀫𑁆𑀧𑀺 𑀚𑀸𑀢𑀸𑀦𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀚𑀭𑀸𑀫𑀭𑀡𑀸. 𑀬𑁂𑀧𑀺 𑀢𑁂, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸…𑀧𑁂… 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀅𑀟𑁆𑀠𑀸 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸 𑀧𑀳𑀽𑀢𑀥𑀦𑀥𑀜𑁆𑀜𑀸, 𑀢𑁂𑀲𑀫𑁆𑀧𑀺 𑀚𑀸𑀢𑀸𑀦𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀚𑀭𑀸𑀫𑀭𑀡𑀸. 𑀬𑁂𑀧𑀺 𑀢𑁂, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀽 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑀯𑀼𑀲𑀺𑀢𑀯𑀦𑁆𑀢𑁄 𑀓𑀢𑀓𑀭𑀡𑀻𑀬𑀸 𑀑𑀳𑀺𑀢𑀪𑀸𑀭𑀸 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑀸 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑀸 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑀸, 𑀢𑁂𑀲𑀁 𑀧𑀸𑀬𑀁 𑀓𑀸𑀬𑁄 𑀪𑁂𑀤𑀦𑀥𑀫𑁆𑀫𑁄 𑀦𑀺𑀓𑁆𑀔𑁂𑀧𑀦𑀥𑀫𑁆𑀫𑁄’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀚𑀻𑀭𑀦𑁆𑀢𑀺 𑀯𑁂 𑀭𑀸𑀚𑀭𑀣𑀸 𑀲𑀼𑀘𑀺𑀢𑁆𑀢𑀸,

𑀅𑀣𑁄 𑀲𑀭𑀻𑀭𑀫𑁆𑀧𑀺 𑀚𑀭𑀁 𑀉𑀧𑁂𑀢𑀺;

𑀲𑀢𑀜𑁆𑀘 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀺,

𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺.

𑁪. 𑀧𑀺𑀬𑀲𑀼𑀢𑁆𑀢𑀁

𑁧𑁧𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀓𑁂𑀲𑀁 𑀦𑀼 𑀔𑁄 𑀧𑀺𑀬𑁄 𑀅𑀢𑁆𑀢𑀸, 𑀓𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀘 𑀔𑁄 𑀓𑁂𑀘𑀺 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺; 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸’. 𑀓𑀺𑀜𑁆𑀘𑀸𑀧𑀺 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀧𑀺𑀬𑁄 𑀦𑁄 𑀅𑀢𑁆𑀢𑀸’𑀢𑀺, 𑀅𑀣 𑀔𑁄 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀜𑁆𑀳𑀺 𑀅𑀧𑁆𑀧𑀺𑀬𑁄 𑀅𑀧𑁆𑀧𑀺𑀬𑀲𑁆𑀲 𑀓𑀭𑁂𑀬𑁆𑀬, 𑀢𑀁 𑀢𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀓𑀭𑁄𑀦𑁆𑀢𑀺; 𑀢𑀲𑁆𑀫𑀸 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀬𑁂 𑀘 𑀔𑁄 𑀓𑁂𑀘𑀺 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺; 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀧𑁆𑀧𑀺𑀬𑁄 𑀦𑁄 𑀅𑀢𑁆𑀢𑀸’𑀢𑀺; 𑀅𑀣 𑀔𑁄 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀜𑁆𑀳𑀺 𑀧𑀺𑀬𑁄 𑀧𑀺𑀬𑀲𑁆𑀲 𑀓𑀭𑁂𑀬𑁆𑀬, 𑀢𑀁 𑀢𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀓𑀭𑁄𑀦𑁆𑀢𑀺; 𑀢𑀲𑁆𑀫𑀸 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸’’𑀢𑀺.

‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚! 𑀬𑁂 𑀳𑀺 𑀓𑁂𑀘𑀺, 𑀫𑀳𑀸𑀭𑀸𑀚, 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺; 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀧𑀺𑀬𑁄 𑀦𑁄 𑀅𑀢𑁆𑀢𑀸’𑀢𑀺, 𑀅𑀣 𑀔𑁄 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀜𑁆𑀳𑀺, 𑀫𑀳𑀸𑀭𑀸𑀚, 𑀅𑀧𑁆𑀧𑀺𑀬𑁄 𑀅𑀧𑁆𑀧𑀺𑀬𑀲𑁆𑀲 𑀓𑀭𑁂𑀬𑁆𑀬, 𑀢𑀁 𑀢𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀓𑀭𑁄𑀦𑁆𑀢𑀺; 𑀢𑀲𑁆𑀫𑀸 𑀢𑁂𑀲𑀁 𑀅𑀧𑁆𑀧𑀺𑀬𑁄 𑀅𑀢𑁆𑀢𑀸. 𑀬𑁂 𑀘 𑀔𑁄 𑀓𑁂𑀘𑀺, 𑀫𑀳𑀸𑀭𑀸𑀚, 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺; 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀧𑁆𑀧𑀺𑀬𑁄 𑀦𑁄 𑀅𑀢𑁆𑀢𑀸’𑀢𑀺; 𑀅𑀣 𑀔𑁄 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀜𑁆𑀳𑀺 𑀫𑀳𑀸𑀭𑀸𑀚, 𑀧𑀺𑀬𑁄 𑀧𑀺𑀬𑀲𑁆𑀲 𑀓𑀭𑁂𑀬𑁆𑀬, 𑀢𑀁 𑀢𑁂 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀓𑀭𑁄𑀦𑁆𑀢𑀺; 𑀢𑀲𑁆𑀫𑀸 𑀢𑁂𑀲𑀁 𑀧𑀺𑀬𑁄 𑀅𑀢𑁆𑀢𑀸’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀅𑀢𑁆𑀢𑀸𑀦𑀜𑁆𑀘𑁂 𑀧𑀺𑀬𑀁 𑀚𑀜𑁆𑀜𑀸, 𑀦 𑀦𑀁 𑀧𑀸𑀧𑁂𑀦 𑀲𑀁𑀬𑀼𑀚𑁂;

𑀦 𑀳𑀺 𑀢𑀁 𑀲𑀼𑀮𑀪𑀁 𑀳𑁄𑀢𑀺, 𑀲𑀼𑀔𑀁 𑀤𑀼𑀓𑁆𑀓𑀝𑀓𑀸𑀭𑀺𑀦𑀸.

‘‘𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀚𑀳𑀢𑁄 𑀫𑀸𑀦𑀼𑀲𑀁 𑀪𑀯𑀁;

𑀓𑀺𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺, 𑀓𑀺𑀜𑁆𑀘 𑀆𑀤𑀸𑀬 𑀕𑀘𑁆𑀙𑀢𑀺;

𑀓𑀺𑀜𑁆𑀘𑀲𑁆𑀲 𑀅𑀦𑀼𑀕𑀁 𑀳𑁄𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻 [𑀅𑀦𑀼𑀧𑀸𑀬𑀺𑀦𑀻 (𑀲𑁆𑀬𑀸. 𑀓𑀁. 𑀓.)].

‘‘𑀉𑀪𑁄 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀬𑀁 𑀫𑀘𑁆𑀘𑁄 𑀓𑀼𑀭𑀼𑀢𑁂 𑀇𑀥;

𑀢𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺, 𑀢𑀜𑁆𑀘 [𑀢𑀁𑀯 (?)] 𑀆𑀤𑀸𑀬 𑀕𑀘𑁆𑀙𑀢𑀺;

𑀢𑀜𑁆𑀘𑀲𑁆𑀲 [𑀢𑀁𑀯𑀲𑁆𑀲 (?)] 𑀅𑀦𑀼𑀕𑀁 𑀳𑁄𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

‘‘𑀢𑀲𑁆𑀫𑀸 𑀓𑀭𑁂𑀬𑁆𑀬 𑀓𑀮𑁆𑀬𑀸𑀡𑀁, 𑀦𑀺𑀘𑀬𑀁 𑀲𑀫𑁆𑀧𑀭𑀸𑀬𑀺𑀓𑀁;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

𑁫. 𑀅𑀢𑁆𑀢𑀭𑀓𑁆𑀔𑀺𑀢𑀲𑀼𑀢𑁆𑀢𑀁

𑁧𑁧𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀓𑁂𑀲𑀁 𑀦𑀼 𑀔𑁄 𑀭𑀓𑁆𑀔𑀺𑀢𑁄 𑀅𑀢𑁆𑀢𑀸, 𑀓𑁂𑀲𑀁 𑀅𑀭𑀓𑁆𑀔𑀺𑀢𑁄 𑀅𑀢𑁆𑀢𑀸’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺; 𑀢𑁂𑀲𑀁 𑀅𑀭𑀓𑁆𑀔𑀺𑀢𑁄 𑀅𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀢𑁂 𑀳𑀢𑁆𑀣𑀺𑀓𑀸𑀬𑁄 𑀯𑀸 𑀭𑀓𑁆𑀔𑁂𑀬𑁆𑀬, 𑀅𑀲𑁆𑀲𑀓𑀸𑀬𑁄 𑀯𑀸 𑀭𑀓𑁆𑀔𑁂𑀬𑁆𑀬, 𑀭𑀣𑀓𑀸𑀬𑁄 𑀯𑀸 𑀭𑀓𑁆𑀔𑁂𑀬𑁆𑀬, 𑀧𑀢𑁆𑀢𑀺𑀓𑀸𑀬𑁄 𑀯𑀸 𑀭𑀓𑁆𑀔𑁂𑀬𑁆𑀬; 𑀅𑀣 𑀔𑁄 𑀢𑁂𑀲𑀁 𑀅𑀭𑀓𑁆𑀔𑀺𑀢𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀸𑀳𑀺𑀭𑀸 𑀳𑁂𑀲𑀸 𑀭𑀓𑁆𑀔𑀸, 𑀦𑁂𑀲𑀸 𑀭𑀓𑁆𑀔𑀸 𑀅𑀚𑁆𑀛𑀢𑁆𑀢𑀺𑀓𑀸; 𑀢𑀲𑁆𑀫𑀸 𑀢𑁂𑀲𑀁 𑀅𑀭𑀓𑁆𑀔𑀺𑀢𑁄 𑀅𑀢𑁆𑀢𑀸. 𑀬𑁂 𑀘 𑀔𑁄 𑀓𑁂𑀘𑀺 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺; 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀅𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀢𑁂 𑀦𑁂𑀯 𑀳𑀢𑁆𑀣𑀺𑀓𑀸𑀬𑁄 𑀭𑀓𑁆𑀔𑁂𑀬𑁆𑀬, 𑀦 𑀅𑀲𑁆𑀲𑀓𑀸𑀬𑁄 𑀭𑀓𑁆𑀔𑁂𑀬𑁆𑀬, 𑀦 𑀭𑀣𑀓𑀸𑀬𑁄 𑀭𑀓𑁆𑀔𑁂𑀬𑁆𑀬, 𑀦 𑀧𑀢𑁆𑀢𑀺𑀓𑀸𑀬𑁄 𑀭𑀓𑁆𑀔𑁂𑀬𑁆𑀬; 𑀅𑀣 𑀔𑁄 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀚𑁆𑀛𑀢𑁆𑀢𑀺𑀓𑀸 𑀳𑁂𑀲𑀸 𑀭𑀓𑁆𑀔𑀸, 𑀦𑁂𑀲𑀸 𑀭𑀓𑁆𑀔𑀸 𑀩𑀸𑀳𑀺𑀭𑀸; 𑀢𑀲𑁆𑀫𑀸 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀅𑀢𑁆𑀢𑀸’’’𑀢𑀺.

‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚! 𑀬𑁂 𑀳𑀺 𑀓𑁂𑀘𑀺, 𑀫𑀳𑀸𑀭𑀸𑀚, 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺…𑀧𑁂… 𑀢𑁂𑀲𑀁 𑀅𑀭𑀓𑁆𑀔𑀺𑀢𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀸𑀳𑀺𑀭𑀸 𑀳𑁂𑀲𑀸, 𑀫𑀳𑀸𑀭𑀸𑀚, 𑀭𑀓𑁆𑀔𑀸, 𑀦𑁂𑀲𑀸 𑀭𑀓𑁆𑀔𑀸 𑀅𑀚𑁆𑀛𑀢𑁆𑀢𑀺𑀓𑀸; 𑀢𑀲𑁆𑀫𑀸 𑀢𑁂𑀲𑀁 𑀅𑀭𑀓𑁆𑀔𑀺𑀢𑁄 𑀅𑀢𑁆𑀢𑀸. 𑀬𑁂 𑀘 𑀔𑁄 𑀓𑁂𑀘𑀺, 𑀫𑀳𑀸𑀭𑀸𑀚, 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀦𑁆𑀢𑀺; 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀅𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀢𑁂 𑀦𑁂𑀯 𑀳𑀢𑁆𑀣𑀺𑀓𑀸𑀬𑁄 𑀭𑀓𑁆𑀔𑁂𑀬𑁆𑀬, 𑀦 𑀅𑀲𑁆𑀲𑀓𑀸𑀬𑁄 𑀭𑀓𑁆𑀔𑁂𑀬𑁆𑀬, 𑀦 𑀭𑀣𑀓𑀸𑀬𑁄 𑀭𑀓𑁆𑀔𑁂𑀬𑁆𑀬, 𑀦 𑀧𑀢𑁆𑀢𑀺𑀓𑀸𑀬𑁄 𑀭𑀓𑁆𑀔𑁂𑀬𑁆𑀬; 𑀅𑀣 𑀔𑁄 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀅𑀢𑁆𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀚𑁆𑀛𑀢𑁆𑀢𑀺𑀓𑀸 𑀳𑁂𑀲𑀸, 𑀫𑀳𑀸𑀭𑀸𑀚, 𑀭𑀓𑁆𑀔𑀸, 𑀦𑁂𑀲𑀸 𑀭𑀓𑁆𑀔𑀸 𑀩𑀸𑀳𑀺𑀭𑀸; 𑀢𑀲𑁆𑀫𑀸 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀅𑀢𑁆𑀢𑀸’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀯𑀸𑀘𑀸𑀬 𑀲𑀁𑀯𑀭𑁄;

𑀫𑀦𑀲𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀲𑀩𑁆𑀩𑀢𑁆𑀣 𑀲𑀁𑀯𑀭𑁄;

𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀮𑀚𑁆𑀚𑀻, 𑀭𑀓𑁆𑀔𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑁬. 𑀅𑀧𑁆𑀧𑀓𑀲𑀼𑀢𑁆𑀢𑀁

𑁧𑁧𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀮𑁄𑀓𑀲𑁆𑀫𑀺𑀁 𑀬𑁂 𑀉𑀴𑀸𑀭𑁂 𑀉𑀴𑀸𑀭𑁂 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀦 𑀘𑁂𑀯 𑀫𑀚𑁆𑀚𑀦𑁆𑀢𑀺, 𑀦 𑀘 𑀧𑀫𑀚𑁆𑀚𑀦𑁆𑀢𑀺, 𑀦 𑀘 𑀓𑀸𑀫𑁂𑀲𑀼 𑀕𑁂𑀥𑀁 𑀆𑀧𑀚𑁆𑀚𑀦𑁆𑀢𑀺, 𑀦 𑀘 𑀲𑀢𑁆𑀢𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀮𑁄𑀓𑀲𑁆𑀫𑀺𑀁 𑀬𑁂 𑀉𑀴𑀸𑀭𑁂 𑀉𑀴𑀸𑀭𑁂 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀫𑀚𑁆𑀚𑀦𑁆𑀢𑀺 𑀘𑁂𑀯 𑀧𑀫𑀚𑁆𑀚𑀦𑁆𑀢𑀺, 𑀘 𑀓𑀸𑀫𑁂𑀲𑀼 𑀘 𑀕𑁂𑀥𑀁 𑀆𑀧𑀚𑁆𑀚𑀦𑁆𑀢𑀺, 𑀲𑀢𑁆𑀢𑁂𑀲𑀼 𑀘 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀻’’’𑀢𑀺.

‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚! 𑀅𑀧𑁆𑀧𑀓𑀸 𑀢𑁂, 𑀫𑀳𑀸𑀭𑀸𑀚, 𑀲𑀢𑁆𑀢𑀸 𑀮𑁄𑀓𑀲𑁆𑀫𑀺𑀁, 𑀬𑁂 𑀉𑀴𑀸𑀭𑁂 𑀉𑀴𑀸𑀭𑁂 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀦 𑀘𑁂𑀯 𑀫𑀚𑁆𑀚𑀦𑁆𑀢𑀺, 𑀦 𑀘 𑀧𑀫𑀚𑁆𑀚𑀦𑁆𑀢𑀺, 𑀦 𑀘 𑀓𑀸𑀫𑁂𑀲𑀼 𑀕𑁂𑀥𑀁 𑀆𑀧𑀚𑁆𑀚𑀦𑁆𑀢𑀺, 𑀦 𑀘 𑀲𑀢𑁆𑀢𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀮𑁄𑀓𑀲𑁆𑀫𑀺𑀁, 𑀬𑁂 𑀉𑀴𑀸𑀭𑁂 𑀉𑀴𑀸𑀭𑁂 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀫𑀚𑁆𑀚𑀦𑁆𑀢𑀺 𑀘𑁂𑀯 𑀧𑀫𑀚𑁆𑀚𑀦𑁆𑀢𑀺 𑀘 𑀓𑀸𑀫𑁂𑀲𑀼 𑀘 𑀕𑁂𑀥𑀁 𑀆𑀧𑀚𑁆𑀚𑀦𑁆𑀢𑀺, 𑀲𑀢𑁆𑀢𑁂𑀲𑀼 𑀘 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀻’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀲𑀸𑀭𑀢𑁆𑀢𑀸 𑀓𑀸𑀫𑀪𑁄𑀕𑁂𑀲𑀼, 𑀕𑀺𑀤𑁆𑀥𑀸 𑀓𑀸𑀫𑁂𑀲𑀼 𑀫𑀼𑀘𑁆𑀙𑀺𑀢𑀸;

𑀅𑀢𑀺𑀲𑀸𑀭𑀁 𑀦 𑀩𑀼𑀚𑁆𑀛𑀦𑁆𑀢𑀺, 𑀫𑀺𑀕𑀸 𑀓𑀽𑀝𑀁𑀯 𑀑𑀟𑁆𑀟𑀺𑀢𑀁;

𑀧𑀘𑁆𑀙𑀸𑀲𑀁 𑀓𑀝𑀼𑀓𑀁 𑀳𑁄𑀢𑀺, 𑀯𑀺𑀧𑀸𑀓𑁄 𑀳𑀺𑀲𑁆𑀲 𑀧𑀸𑀧𑀓𑁄’’𑀢𑀺.

𑁭. 𑀅𑀟𑁆𑀟𑀓𑀭𑀡𑀲𑀼𑀢𑁆𑀢𑀁

𑁧𑁧𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀅𑀟𑁆𑀟𑀓𑀭𑀡𑁂 [𑀅𑀢𑁆𑀣𑀓𑀭𑀡𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀺𑀲𑀺𑀦𑁆𑀦𑁄 𑀧𑀲𑁆𑀲𑀸𑀫𑀺 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑁂𑀧𑀺 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂𑀧𑀺 𑀕𑀳𑀧𑀢𑀺𑀫𑀳𑀸𑀲𑀸𑀮𑁂𑀧𑀺 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁂 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁂 𑀧𑀳𑀽𑀢𑀥𑀦𑀥𑀜𑁆𑀜𑁂 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀦𑁆𑀢𑁂. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀮𑀁 𑀤𑀸𑀦𑀺 𑀫𑁂 𑀅𑀟𑁆𑀟𑀓𑀭𑀡𑁂𑀦, 𑀪𑀤𑁆𑀭𑀫𑀼𑀔𑁄 𑀤𑀸𑀦𑀺 𑀅𑀟𑁆𑀟𑀓𑀭𑀡𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’’𑀢𑀺.

‘‘(𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁 𑀫𑀳𑀸𑀭𑀸𑀚!) [( ) 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀬𑁂𑀧𑀺 𑀢𑁂, 𑀫𑀳𑀸𑀭𑀸𑀚, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀅𑀟𑁆𑀠𑀸 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸 𑀧𑀳𑀽𑀢𑀥𑀦𑀥𑀜𑁆𑀜𑀸 𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡𑀁 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀦𑁆𑀢𑀺; 𑀢𑁂𑀲𑀁 𑀢𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺. 𑀇𑀤𑀫𑀯𑁄𑀘…𑀧𑁂…

‘‘𑀲𑀸𑀭𑀢𑁆𑀢𑀸 𑀓𑀸𑀫𑀪𑁄𑀕𑁂𑀲𑀼, 𑀕𑀺𑀤𑁆𑀥𑀸 𑀓𑀸𑀫𑁂𑀲𑀼 𑀫𑀼𑀘𑁆𑀙𑀺𑀢𑀸;

𑀅𑀢𑀺𑀲𑀸𑀭𑀁 𑀦 𑀩𑀼𑀚𑁆𑀛𑀦𑁆𑀢𑀺, 𑀫𑀘𑁆𑀙𑀸 𑀔𑀺𑀧𑁆𑀧𑀁𑀯 𑀑𑀟𑁆𑀟𑀺𑀢𑀁;

𑀧𑀘𑁆𑀙𑀸𑀲𑀁 𑀓𑀝𑀼𑀓𑀁 𑀳𑁄𑀢𑀺, 𑀯𑀺𑀧𑀸𑀓𑁄 𑀳𑀺𑀲𑁆𑀲 𑀧𑀸𑀧𑀓𑁄’’𑀢𑀺.

𑁮. 𑀫𑀮𑁆𑀮𑀺𑀓𑀸𑀲𑀼𑀢𑁆𑀢𑀁

𑁧𑁧𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀫𑀮𑁆𑀮𑀺𑀓𑀸𑀬 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀫𑀮𑁆𑀮𑀺𑀓𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀢𑁂, 𑀫𑀮𑁆𑀮𑀺𑀓𑁂, 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’𑀢𑀺? ‘‘𑀦𑀢𑁆𑀣𑀺 𑀔𑁄 𑀫𑁂, 𑀫𑀳𑀸𑀭𑀸𑀚, 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄. 𑀢𑀼𑀬𑁆𑀳𑀁 𑀧𑀦, 𑀫𑀳𑀸𑀭𑀸𑀚, 𑀅𑀢𑁆𑀣𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’𑀢𑀺? ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀫𑀮𑁆𑀮𑀺𑀓𑁂, 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’𑀢𑀺.

𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀧𑀸𑀲𑀸𑀤𑀸 𑀑𑀭𑁄𑀳𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀫𑀮𑁆𑀮𑀺𑀓𑀸𑀬 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀫𑀮𑁆𑀮𑀺𑀓𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘𑀁 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀢𑁂, 𑀫𑀮𑁆𑀮𑀺𑀓𑁂, 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀫𑀁 𑀏𑀢𑀤𑀯𑁄𑀘 𑁋 ‘𑀦𑀢𑁆𑀣𑀺 𑀔𑁄 𑀫𑁂, 𑀫𑀳𑀸𑀭𑀸𑀚, 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄. 𑀢𑀼𑀬𑁆𑀳𑀁 𑀧𑀦, 𑀫𑀳𑀸𑀭𑀸𑀚, 𑀅𑀢𑁆𑀣𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’𑀢𑀺? 𑀏𑀯𑀁 𑀯𑀼𑀢𑁆𑀢𑀸𑀳𑀁, 𑀪𑀦𑁆𑀢𑁂, 𑀫𑀮𑁆𑀮𑀺𑀓𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘𑀁 𑁋 ‘𑀫𑀬𑁆𑀳𑀫𑁆𑀧𑀺 𑀔𑁄, 𑀫𑀮𑁆𑀮𑀺𑀓𑁂, 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀧𑀭𑀺𑀕𑀫𑁆𑀫 𑀘𑁂𑀢𑀲𑀸,

𑀦𑁂𑀯𑀚𑁆𑀛𑀕𑀸 𑀧𑀺𑀬𑀢𑀭𑀫𑀢𑁆𑀢𑀦𑀸 𑀓𑁆𑀯𑀘𑀺;

𑀏𑀯𑀁 𑀧𑀺𑀬𑁄 𑀧𑀼𑀣𑀼 𑀅𑀢𑁆𑀢𑀸 𑀧𑀭𑁂𑀲𑀁,

𑀢𑀲𑁆𑀫𑀸 𑀦 𑀳𑀺𑀁𑀲𑁂 𑀧𑀭𑀫𑀢𑁆𑀢𑀓𑀸𑀫𑁄’’𑀢𑀺.

𑁯. 𑀬𑀜𑁆𑀜𑀲𑀼𑀢𑁆𑀢𑀁

𑁧𑁨𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀧𑀜𑁆𑀘 𑀘 𑀉𑀲𑀪𑀲𑀢𑀸𑀦𑀺 𑀧𑀜𑁆𑀘 𑀘 𑀯𑀘𑁆𑀙𑀢𑀭𑀲𑀢𑀸𑀦𑀺 𑀧𑀜𑁆𑀘 𑀘 𑀯𑀘𑁆𑀙𑀢𑀭𑀺𑀲𑀢𑀸𑀦𑀺 𑀧𑀜𑁆𑀘 𑀘 𑀅𑀚𑀲𑀢𑀸𑀦𑀺 𑀧𑀜𑁆𑀘 𑀘 𑀉𑀭𑀩𑁆𑀪𑀲𑀢𑀸𑀦𑀺 𑀣𑀽𑀡𑀽𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬. 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸, 𑀢𑁂𑀧𑀺 𑀤𑀡𑁆𑀟𑀢𑀚𑁆𑀚𑀺𑀢𑀸 𑀪𑀬𑀢𑀚𑁆𑀚𑀺𑀢𑀸 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀫𑀸𑀦𑀸 𑀧𑀭𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀧𑀜𑁆𑀘 𑀘 𑀉𑀲𑀪𑀲𑀢𑀸𑀦𑀺 𑀧𑀜𑁆𑀘 𑀘 𑀯𑀘𑁆𑀙𑀢𑀭𑀲𑀢𑀸𑀦𑀺 𑀧𑀜𑁆𑀘 𑀘 𑀯𑀘𑁆𑀙𑀢𑀭𑀺𑀲𑀢𑀸𑀦𑀺 𑀧𑀜𑁆𑀘 𑀘 𑀅𑀚𑀲𑀢𑀸𑀦𑀺 𑀧𑀜𑁆𑀘 𑀘 𑀉𑀭𑀩𑁆𑀪𑀲𑀢𑀸𑀦𑀺 𑀣𑀽𑀡𑀽𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬. 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸, 𑀢𑁂𑀧𑀺 𑀤𑀡𑁆𑀟𑀢𑀚𑁆𑀚𑀺𑀢𑀸 𑀪𑀬𑀢𑀚𑁆𑀚𑀺𑀢𑀸 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀫𑀸𑀦𑀸 𑀧𑀭𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀅𑀲𑁆𑀲𑀫𑁂𑀥𑀁 𑀧𑀼𑀭𑀺𑀲𑀫𑁂𑀥𑀁, 𑀲𑀫𑁆𑀫𑀸𑀧𑀸𑀲𑀁 𑀯𑀸𑀚𑀧𑁂𑀬𑁆𑀬𑀁 𑀦𑀺𑀭𑀕𑁆𑀕𑀴𑁆𑀳𑀁;

𑀫𑀳𑀸𑀬𑀜𑁆𑀜𑀸 𑀫𑀳𑀸𑀭𑀫𑁆𑀪𑀸 [𑀯𑀸𑀚𑀧𑁂𑀬𑁆𑀬𑀼𑀁; 𑀦𑀺𑀭𑀕𑁆𑀕𑀴𑀁 𑀫𑀳𑀸𑀭𑀫𑁆𑀪𑀸 (𑀓.)], 𑀦 𑀢𑁂 𑀳𑁄𑀦𑁆𑀢𑀺 𑀫𑀳𑀧𑁆𑀨𑀮𑀸.

‘‘𑀅𑀚𑁂𑀴𑀓𑀸 𑀘 𑀕𑀸𑀯𑁄 𑀘, 𑀯𑀺𑀯𑀺𑀥𑀸 𑀬𑀢𑁆𑀣 𑀳𑀜𑁆𑀜𑀭𑁂;

𑀦 𑀢𑀁 𑀲𑀫𑁆𑀫𑀕𑁆𑀕𑀢𑀸 𑀬𑀜𑁆𑀜𑀁, 𑀉𑀧𑀬𑀦𑁆𑀢𑀺 𑀫𑀳𑁂𑀲𑀺𑀦𑁄.

‘‘𑀬𑁂 𑀘 𑀬𑀜𑁆𑀜𑀸 𑀦𑀺𑀭𑀸𑀭𑀫𑁆𑀪𑀸, 𑀬𑀚𑀦𑁆𑀢𑀺 𑀅𑀦𑀼𑀓𑀼𑀮𑀁 𑀲𑀤𑀸;

𑀅𑀚𑁂𑀴𑀓𑀸 𑀘 𑀕𑀸𑀯𑁄 𑀘, 𑀯𑀺𑀯𑀺𑀥𑀸 𑀦𑁂𑀢𑁆𑀣 𑀳𑀜𑁆𑀜𑀭𑁂;

𑀏𑀢𑀁 𑀲𑀫𑁆𑀫𑀕𑁆𑀕𑀢𑀸 𑀬𑀜𑁆𑀜𑀁, 𑀉𑀧𑀬𑀦𑁆𑀢𑀺 𑀫𑀳𑁂𑀲𑀺𑀦𑁄.

‘‘𑀏𑀢𑀁 𑀬𑀚𑁂𑀣 𑀫𑁂𑀥𑀸𑀯𑀻, 𑀏𑀲𑁄 𑀬𑀜𑁆𑀜𑁄 𑀫𑀳𑀧𑁆𑀨𑀮𑁄;

𑀏𑀢𑀜𑁆𑀳𑀺 𑀬𑀚𑀫𑀸𑀦𑀲𑁆𑀲, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄;

𑀬𑀜𑁆𑀜𑁄 𑀘 𑀯𑀺𑀧𑀼𑀮𑁄 𑀳𑁄𑀢𑀺, 𑀧𑀲𑀻𑀤𑀦𑁆𑀢𑀺 𑀘 𑀤𑁂𑀯𑀢𑀸’’𑀢𑀺.

𑁧𑁦. 𑀩𑀦𑁆𑀥𑀦𑀲𑀼𑀢𑁆𑀢𑀁

𑁧𑁨𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀫𑀳𑀸𑀚𑀦𑀓𑀸𑀬𑁄 𑀩𑀦𑁆𑀥𑀸𑀧𑀺𑀢𑁄 𑀳𑁄𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀭𑀚𑁆𑀚𑀽𑀳𑀺 𑀅𑀧𑁆𑀧𑁂𑀓𑀘𑁆𑀘𑁂 𑀅𑀦𑁆𑀤𑀽𑀳𑀺 𑀅𑀧𑁆𑀧𑁂𑀓𑀘𑁆𑀘𑁂 𑀲𑀗𑁆𑀔𑀮𑀺𑀓𑀸𑀳𑀺.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀫𑀳𑀸𑀚𑀦𑀓𑀸𑀬𑁄 𑀩𑀦𑁆𑀥𑀸𑀧𑀺𑀢𑁄, 𑀅𑀧𑁆𑀧𑁂𑀓𑀘𑁆𑀘𑁂 𑀭𑀚𑁆𑀚𑀽𑀳𑀺 𑀅𑀧𑁆𑀧𑁂𑀓𑀘𑁆𑀘𑁂 𑀅𑀦𑁆𑀤𑀽𑀳𑀺 𑀅𑀧𑁆𑀧𑁂𑀓𑀘𑁆𑀘𑁂 𑀲𑀗𑁆𑀔𑀮𑀺𑀓𑀸𑀳𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸,

𑀬𑀤𑀸𑀬𑀲𑀁 𑀤𑀸𑀭𑀼𑀚𑀁 𑀧𑀩𑁆𑀩𑀚𑀜𑁆𑀘;

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼,

𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸.

‘‘𑀏𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸,

𑀑𑀳𑀸𑀭𑀺𑀦𑀁 𑀲𑀺𑀣𑀺𑀮𑀁 𑀤𑀼𑀧𑁆𑀧𑀫𑀼𑀜𑁆𑀘𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀧𑀭𑀺𑀩𑁆𑀩𑀚𑀦𑁆𑀢𑀺,

𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸’’𑀢𑀺.

𑀧𑀞𑀫𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑀳𑀭𑁄 𑀧𑀼𑀭𑀺𑀲𑁄 𑀚𑀭𑀸, 𑀧𑀺𑀬𑀁 𑀅𑀢𑁆𑀢𑀸𑀦𑀭𑀓𑁆𑀔𑀺𑀢𑁄;

𑀅𑀧𑁆𑀧𑀓𑀸 𑀅𑀟𑁆𑀟𑀓𑀭𑀡𑀁, 𑀫𑀮𑁆𑀮𑀺𑀓𑀸 𑀬𑀜𑁆𑀜𑀩𑀦𑁆𑀥𑀦𑀦𑁆𑀢𑀺.