𑁨. 𑀔𑁂𑀫𑀲𑀼𑀢𑁆𑀢𑀁

𑁧𑁦𑁩. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀔𑁂𑀫𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀘𑀭𑀦𑁆𑀢𑀺 𑀩𑀸𑀮𑀸 𑀤𑀼𑀫𑁆𑀫𑁂𑀥𑀸, 𑀅𑀫𑀺𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑀸;

𑀓𑀭𑁄𑀦𑁆𑀢𑀸 𑀧𑀸𑀧𑀓𑀁 𑀓𑀫𑁆𑀫𑀁, 𑀬𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮𑀁.

‘‘𑀦 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀅𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀁, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀺.

‘‘𑀢𑀜𑁆𑀘 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀧𑀢𑀻𑀢𑁄 𑀲𑀼𑀫𑀦𑁄, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀺.

‘‘𑀧𑀝𑀺𑀓𑀘𑁆𑀘𑁂𑀯 [𑀧𑀝𑀺𑀕𑀘𑁆𑀘𑁂𑀯 (𑀲𑀻.)] 𑀢𑀁 𑀓𑀬𑀺𑀭𑀸, 𑀬𑀁 𑀚𑀜𑁆𑀜𑀸 𑀳𑀺𑀢𑀫𑀢𑁆𑀢𑀦𑁄;

𑀦 𑀲𑀸𑀓𑀝𑀺𑀓𑀘𑀺𑀦𑁆𑀢𑀸𑀬, 𑀫𑀦𑁆𑀢𑀸 𑀥𑀻𑀭𑁄 𑀧𑀭𑀓𑁆𑀓𑀫𑁂.

‘‘𑀬𑀣𑀸 𑀲𑀸𑀓𑀝𑀺𑀓𑁄 𑀫𑀝𑁆𑀞𑀁 [𑀧𑀦𑁆𑀣𑀁 (𑀲𑀻.), 𑀧𑀲𑀢𑁆𑀣𑀁 (𑀲𑁆𑀬𑀸. 𑀓𑀁.)], 𑀲𑀫𑀁 𑀳𑀺𑀢𑁆𑀯𑀸 𑀫𑀳𑀸𑀧𑀣𑀁;

𑀯𑀺𑀲𑀫𑀁 𑀫𑀕𑁆𑀕𑀫𑀸𑀭𑀼𑀬𑁆𑀳, 𑀅𑀓𑁆𑀔𑀘𑁆𑀙𑀺𑀦𑁆𑀦𑁄𑀯 𑀛𑀸𑀬𑀢𑀺.

‘‘𑀏𑀯𑀁 𑀥𑀫𑁆𑀫𑀸 𑀅𑀧𑀓𑁆𑀓𑀫𑁆𑀫, 𑀅𑀥𑀫𑁆𑀫𑀫𑀦𑀼𑀯𑀢𑁆𑀢𑀺𑀬;

𑀫𑀦𑁆𑀤𑁄 𑀫𑀘𑁆𑀘𑀼𑀫𑀼𑀔𑀁 𑀧𑀢𑁆𑀢𑁄, 𑀅𑀓𑁆𑀔𑀘𑁆𑀙𑀺𑀦𑁆𑀦𑁄𑀯 𑀛𑀸𑀬𑀢𑀻’’𑀢𑀺.