𑁩. 𑀦𑀸𑀦𑀸𑀢𑀺𑀢𑁆𑀣𑀺𑀬𑀯𑀕𑁆𑀕𑁄

𑁧. 𑀲𑀺𑀯𑀲𑀼𑀢𑁆𑀢𑀁

𑁧𑁦𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀲𑀺𑀯𑁄 𑀤𑁂𑀯𑀧𑀼𑀢𑁆𑀢𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀺𑀯𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.

‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀧𑀜𑁆𑀜𑀸 𑀮𑀩𑁆𑀪𑀢𑀺 𑀦𑀸𑀜𑁆𑀜𑀢𑁄.

‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀲𑁄𑀓𑀫𑀚𑁆𑀛𑁂 𑀦 𑀲𑁄𑀘𑀢𑀺.

‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀜𑀸𑀢𑀺𑀫𑀚𑁆𑀛𑁂 𑀯𑀺𑀭𑁄𑀘𑀢𑀺.

‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺𑀁.

‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀲𑀢𑁆𑀢𑀸 𑀢𑀺𑀝𑁆𑀞𑀦𑁆𑀢𑀺 𑀲𑀸𑀢𑀢’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀺𑀯𑀁 𑀤𑁂𑀯𑀧𑀼𑀢𑁆𑀢𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺 𑁋

‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

𑁨. 𑀔𑁂𑀫𑀲𑀼𑀢𑁆𑀢𑀁

𑁧𑁦𑁩. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀔𑁂𑀫𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀘𑀭𑀦𑁆𑀢𑀺 𑀩𑀸𑀮𑀸 𑀤𑀼𑀫𑁆𑀫𑁂𑀥𑀸, 𑀅𑀫𑀺𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑀸;

𑀓𑀭𑁄𑀦𑁆𑀢𑀸 𑀧𑀸𑀧𑀓𑀁 𑀓𑀫𑁆𑀫𑀁, 𑀬𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮𑀁.

‘‘𑀦 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀅𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀁, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀺.

‘‘𑀢𑀜𑁆𑀘 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀧𑀢𑀻𑀢𑁄 𑀲𑀼𑀫𑀦𑁄, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀺.

‘‘𑀧𑀝𑀺𑀓𑀘𑁆𑀘𑁂𑀯 [𑀧𑀝𑀺𑀕𑀘𑁆𑀘𑁂𑀯 (𑀲𑀻.)] 𑀢𑀁 𑀓𑀬𑀺𑀭𑀸, 𑀬𑀁 𑀚𑀜𑁆𑀜𑀸 𑀳𑀺𑀢𑀫𑀢𑁆𑀢𑀦𑁄;

𑀦 𑀲𑀸𑀓𑀝𑀺𑀓𑀘𑀺𑀦𑁆𑀢𑀸𑀬, 𑀫𑀦𑁆𑀢𑀸 𑀥𑀻𑀭𑁄 𑀧𑀭𑀓𑁆𑀓𑀫𑁂.

‘‘𑀬𑀣𑀸 𑀲𑀸𑀓𑀝𑀺𑀓𑁄 𑀫𑀝𑁆𑀞𑀁 [𑀧𑀦𑁆𑀣𑀁 (𑀲𑀻.), 𑀧𑀲𑀢𑁆𑀣𑀁 (𑀲𑁆𑀬𑀸. 𑀓𑀁.)], 𑀲𑀫𑀁 𑀳𑀺𑀢𑁆𑀯𑀸 𑀫𑀳𑀸𑀧𑀣𑀁;

𑀯𑀺𑀲𑀫𑀁 𑀫𑀕𑁆𑀕𑀫𑀸𑀭𑀼𑀬𑁆𑀳, 𑀅𑀓𑁆𑀔𑀘𑁆𑀙𑀺𑀦𑁆𑀦𑁄𑀯 𑀛𑀸𑀬𑀢𑀺.

‘‘𑀏𑀯𑀁 𑀥𑀫𑁆𑀫𑀸 𑀅𑀧𑀓𑁆𑀓𑀫𑁆𑀫, 𑀅𑀥𑀫𑁆𑀫𑀫𑀦𑀼𑀯𑀢𑁆𑀢𑀺𑀬;

𑀫𑀦𑁆𑀤𑁄 𑀫𑀘𑁆𑀘𑀼𑀫𑀼𑀔𑀁 𑀧𑀢𑁆𑀢𑁄, 𑀅𑀓𑁆𑀔𑀘𑁆𑀙𑀺𑀦𑁆𑀦𑁄𑀯 𑀛𑀸𑀬𑀢𑀻’’𑀢𑀺.

𑁩. 𑀲𑁂𑀭𑀻𑀲𑀼𑀢𑁆𑀢𑀁

𑁧𑁦𑁪. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑁂𑀭𑀻 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀦𑁆𑀦𑀫𑁂𑀯𑀸𑀪𑀺𑀦𑀦𑁆𑀤𑀦𑁆𑀢𑀺, 𑀉𑀪𑀬𑁂 𑀤𑁂𑀯𑀫𑀸𑀦𑀼𑀲𑀸;

𑀅𑀣 𑀓𑁄 𑀦𑀸𑀫 𑀲𑁄 𑀬𑀓𑁆𑀔𑁄, 𑀬𑀁 𑀅𑀦𑁆𑀦𑀁 𑀦𑀸𑀪𑀺𑀦𑀦𑁆𑀤𑀢𑀻’’𑀢𑀺.

‘‘𑀬𑁂 𑀦𑀁 𑀤𑀤𑀦𑁆𑀢𑀺 𑀲𑀤𑁆𑀥𑀸𑀬, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑀫𑁂𑀯 𑀅𑀦𑁆𑀦𑀁 𑀪𑀚𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

‘‘𑀢𑀲𑁆𑀫𑀸 𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀁, 𑀤𑀚𑁆𑀚𑀸 𑀤𑀸𑀦𑀁 𑀫𑀮𑀸𑀪𑀺𑀪𑀽;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯𑀲𑀼𑀪𑀸𑀲𑀺𑀢𑀫𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑁋

‘‘𑀬𑁂 𑀦𑀁 𑀤𑀤𑀦𑁆𑀢𑀺 𑀲𑀤𑁆𑀥𑀸𑀬, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑀫𑁂𑀯 𑀅𑀦𑁆𑀦𑀁 𑀪𑀚𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

‘‘𑀢𑀲𑁆𑀫𑀸 𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀁, 𑀤𑀚𑁆𑀚𑀸 𑀤𑀸𑀦𑀁 𑀫𑀮𑀸𑀪𑀺𑀪𑀽;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

‘‘𑀪𑀽𑀢𑀧𑀼𑀩𑁆𑀩𑀸𑀳𑀁, 𑀪𑀦𑁆𑀢𑁂, 𑀲𑀺𑀭𑀻 [𑀲𑁂𑀭𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺𑀁 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀤𑀸𑀦𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀤𑀸𑀦𑀁 𑀤𑀻𑀬𑀺𑀢𑁆𑀣 𑀲𑀫𑀡-𑀩𑁆𑀭𑀸𑀳𑁆𑀫𑀡-𑀓𑀧𑀡𑀤𑁆𑀥𑀺𑀓-𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀁. 𑀅𑀣 𑀔𑁄 𑀫𑀁, 𑀪𑀦𑁆𑀢𑁂, 𑀇𑀢𑁆𑀣𑀸𑀕𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 [𑀇𑀢𑁆𑀣𑀸𑀕𑀸𑀭𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 (𑀓.)] 𑁋 ‘𑀤𑁂𑀯𑀲𑁆𑀲 𑀔𑁄 [𑀤𑁂𑀯𑀲𑁆𑀲𑁂𑀯 𑀔𑁄 (𑀓. 𑀲𑀻.)] 𑀤𑀸𑀦𑀁 𑀤𑀻𑀬𑀢𑀺; 𑀅𑀫𑁆𑀳𑀸𑀓𑀁 𑀤𑀸𑀦𑀁 𑀦 𑀤𑀻𑀬𑀢𑀺. 𑀲𑀸𑀥𑀼 𑀫𑀬𑀫𑁆𑀧𑀺 𑀤𑁂𑀯𑀁 𑀦𑀺𑀲𑁆𑀲𑀸𑀬 𑀤𑀸𑀦𑀸𑀦𑀺 𑀤𑀤𑁂𑀬𑁆𑀬𑀸𑀫, 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀸𑀫𑀸’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄𑀲𑁆𑀫𑀺 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀤𑀸𑀦𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀤𑀸𑀦𑀁 𑀤𑀲𑁆𑀲𑀸𑀫𑀸𑀢𑀺 𑀯𑀤𑀦𑁆𑀢𑁂 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬’𑀦𑁆𑀢𑀺? 𑀲𑁄 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀧𑀞𑀫𑀁 𑀤𑁆𑀯𑀸𑀭𑀁 𑀇𑀢𑁆𑀣𑀸𑀕𑀸𑀭𑀲𑁆𑀲 𑀅𑀤𑀸𑀲𑀺𑀁. 𑀢𑀢𑁆𑀣 𑀇𑀢𑁆𑀣𑀸𑀕𑀸𑀭𑀲𑁆𑀲 𑀤𑀸𑀦𑀁 𑀤𑀻𑀬𑀺𑀢𑁆𑀣; 𑀫𑀫 𑀤𑀸𑀦𑀁 𑀧𑀝𑀺𑀓𑁆𑀓𑀫𑀺.

‘‘𑀅𑀣 𑀔𑁄 𑀫𑀁, 𑀪𑀦𑁆𑀢𑁂, 𑀔𑀢𑁆𑀢𑀺𑀬𑀸 𑀅𑀦𑀼𑀬𑀦𑁆𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀤𑁂𑀯𑀲𑁆𑀲 𑀔𑁄 𑀤𑀸𑀦𑀁 𑀤𑀻𑀬𑀢𑀺; 𑀇𑀢𑁆𑀣𑀸𑀕𑀸𑀭𑀲𑁆𑀲 𑀤𑀸𑀦𑀁 𑀤𑀻𑀬𑀢𑀺; 𑀅𑀫𑁆𑀳𑀸𑀓𑀁 𑀤𑀸𑀦𑀁 𑀦 𑀤𑀻𑀬𑀢𑀺. 𑀲𑀸𑀥𑀼 𑀫𑀬𑀫𑁆𑀧𑀺 𑀤𑁂𑀯𑀁 𑀦𑀺𑀲𑁆𑀲𑀸𑀬 𑀤𑀸𑀦𑀸𑀦𑀺 𑀤𑀤𑁂𑀬𑁆𑀬𑀸𑀫, 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀸𑀫𑀸’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄𑀲𑁆𑀫𑀺 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀤𑀸𑀦𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀤𑀸𑀦𑀁 𑀤𑀲𑁆𑀲𑀸𑀫𑀸𑀢𑀺 𑀯𑀤𑀦𑁆𑀢𑁂 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬’𑀦𑁆𑀢𑀺? 𑀲𑁄 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀤𑀼𑀢𑀺𑀬𑀁 𑀤𑁆𑀯𑀸𑀭𑀁 𑀔𑀢𑁆𑀢𑀺𑀬𑀸𑀦𑀁 𑀅𑀦𑀼𑀬𑀦𑁆𑀢𑀸𑀦𑀁 𑀅𑀤𑀸𑀲𑀺𑀁. 𑀢𑀢𑁆𑀣 𑀔𑀢𑁆𑀢𑀺𑀬𑀸𑀦𑀁 𑀅𑀦𑀼𑀬𑀦𑁆𑀢𑀸𑀦𑀁 𑀤𑀸𑀦𑀁 𑀤𑀻𑀬𑀺𑀢𑁆𑀣, 𑀫𑀫 𑀤𑀸𑀦𑀁 𑀧𑀝𑀺𑀓𑁆𑀓𑀫𑀺.

‘‘𑀅𑀣 𑀔𑁄 𑀫𑀁, 𑀪𑀦𑁆𑀢𑁂, 𑀩𑀮𑀓𑀸𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀤𑁂𑀯𑀲𑁆𑀲 𑀔𑁄 𑀤𑀸𑀦𑀁 𑀤𑀻𑀬𑀢𑀺; 𑀇𑀢𑁆𑀣𑀸𑀕𑀸𑀭𑀲𑁆𑀲 𑀤𑀸𑀦𑀁 𑀤𑀻𑀬𑀢𑀺; 𑀔𑀢𑁆𑀢𑀺𑀬𑀸𑀦𑀁 𑀅𑀦𑀼𑀬𑀦𑁆𑀢𑀸𑀦𑀁 𑀤𑀸𑀦𑀁 𑀤𑀻𑀬𑀢𑀺; 𑀅𑀫𑁆𑀳𑀸𑀓𑀁 𑀤𑀸𑀦𑀁 𑀦 𑀤𑀻𑀬𑀢𑀺. 𑀲𑀸𑀥𑀼 𑀫𑀬𑀫𑁆𑀧𑀺 𑀤𑁂𑀯𑀁 𑀦𑀺𑀲𑁆𑀲𑀸𑀬 𑀤𑀸𑀦𑀸𑀦𑀺 𑀤𑀤𑁂𑀬𑁆𑀬𑀸𑀫, 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀸𑀫𑀸’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄𑀲𑁆𑀫𑀺 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀤𑀸𑀦𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀤𑀸𑀦𑀁 𑀤𑀲𑁆𑀲𑀸𑀫𑀸𑀢𑀺 𑀯𑀤𑀦𑁆𑀢𑁂 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬’𑀦𑁆𑀢𑀺? 𑀲𑁄 𑀔𑁆𑀯𑀸𑀳𑀁 𑀪𑀦𑁆𑀢𑁂, 𑀢𑀢𑀺𑀬𑀁 𑀤𑁆𑀯𑀸𑀭𑀁 𑀩𑀮𑀓𑀸𑀬𑀲𑁆𑀲 𑀅𑀤𑀸𑀲𑀺𑀁. 𑀢𑀢𑁆𑀣 𑀩𑀮𑀓𑀸𑀬𑀲𑁆𑀲 𑀤𑀸𑀦𑀁 𑀤𑀻𑀬𑀺𑀢𑁆𑀣, 𑀫𑀫 𑀤𑀸𑀦𑀁 𑀧𑀝𑀺𑀓𑁆𑀓𑀫𑀺.

‘‘𑀅𑀣 𑀔𑁄 𑀫𑀁, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀤𑁂𑀯𑀲𑁆𑀲 𑀔𑁄 𑀤𑀸𑀦𑀁 𑀤𑀻𑀬𑀢𑀺; 𑀇𑀢𑁆𑀣𑀸𑀕𑀸𑀭𑀲𑁆𑀲 𑀤𑀸𑀦𑀁 𑀤𑀻𑀬𑀢𑀺; 𑀔𑀢𑁆𑀢𑀺𑀬𑀸𑀦𑀁 𑀅𑀦𑀼𑀬𑀦𑁆𑀢𑀸𑀦𑀁 𑀤𑀸𑀦𑀁 𑀤𑀻𑀬𑀢𑀺; 𑀩𑀮𑀓𑀸𑀬𑀲𑁆𑀲 𑀤𑀸𑀦𑀁 𑀤𑀻𑀬𑀢𑀺; 𑀅𑀫𑁆𑀳𑀸𑀓𑀁 𑀤𑀸𑀦𑀁 𑀦 𑀤𑀻𑀬𑀢𑀺. 𑀲𑀸𑀥𑀼 𑀫𑀬𑀫𑁆𑀧𑀺 𑀤𑁂𑀯𑀁 𑀦𑀺𑀲𑁆𑀲𑀸𑀬 𑀤𑀸𑀦𑀸𑀦𑀺 𑀤𑀤𑁂𑀬𑁆𑀬𑀸𑀫, 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀸𑀫𑀸’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄𑀲𑁆𑀫𑀺 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀤𑀸𑀦𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀤𑀸𑀦𑀁 𑀤𑀲𑁆𑀲𑀸𑀫𑀸𑀢𑀺 𑀯𑀤𑀦𑁆𑀢𑁂 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬’𑀦𑁆𑀢𑀺? 𑀲𑁄 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀘𑀢𑀼𑀢𑁆𑀣𑀁 𑀤𑁆𑀯𑀸𑀭𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀅𑀤𑀸𑀲𑀺𑀁. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀤𑀸𑀦𑀁 𑀤𑀻𑀬𑀺𑀢𑁆𑀣, 𑀫𑀫 𑀤𑀸𑀦𑀁 𑀧𑀝𑀺𑀓𑁆𑀓𑀫𑀺.

‘‘𑀅𑀣 𑀔𑁄 𑀫𑀁, 𑀪𑀦𑁆𑀢𑁂, 𑀧𑀼𑀭𑀺𑀲𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀦 𑀔𑁄 𑀤𑀸𑀦𑀺 𑀤𑁂𑀯𑀲𑁆𑀲 𑀓𑁄𑀘𑀺 𑀤𑀸𑀦𑀁 𑀤𑀻𑀬𑀢𑀻’𑀢𑀺. 𑀏𑀯𑀁 𑀯𑀼𑀢𑁆𑀢𑀸𑀳𑀁, 𑀪𑀦𑁆𑀢𑁂, 𑀢𑁂 𑀧𑀼𑀭𑀺𑀲𑁂 𑀏𑀢𑀤𑀯𑁄𑀘𑀁 𑁋 ‘𑀢𑁂𑀦 𑀳𑀺, 𑀪𑀡𑁂, 𑀬𑁄 𑀩𑀸𑀳𑀺𑀭𑁂𑀲𑀼 𑀚𑀦𑀧𑀤𑁂𑀲𑀼 𑀆𑀬𑁄 𑀲𑀜𑁆𑀚𑀸𑀬𑀢𑀺 𑀢𑀢𑁄 𑀉𑀧𑀟𑁆𑀠𑀁 𑀅𑀦𑁆𑀢𑁂𑀧𑀼𑀭𑁂 𑀧𑀯𑁂𑀲𑁂𑀣, 𑀉𑀧𑀟𑁆𑀠𑀁 𑀢𑀢𑁆𑀣𑁂𑀯 𑀤𑀸𑀦𑀁 𑀤𑁂𑀣 𑀲𑀫𑀡-𑀩𑁆𑀭𑀸𑀳𑁆𑀫𑀡-𑀓𑀧𑀡𑀤𑁆𑀥𑀺𑀓-𑀯𑀦𑀺𑀩𑁆𑀩𑀓-𑀬𑀸𑀘𑀓𑀸𑀦’𑀦𑁆𑀢𑀺. 𑀲𑁄 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀓𑀢𑀸𑀦𑀁 𑀧𑀼𑀜𑁆𑀜𑀸𑀦𑀁 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀓𑀢𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀭𑀺𑀬𑀦𑁆𑀢𑀁 𑀦𑀸𑀥𑀺𑀕𑀘𑁆𑀙𑀸𑀫𑀺 𑁋 𑀏𑀢𑁆𑀢𑀓𑀁 𑀧𑀼𑀜𑁆𑀜𑀦𑁆𑀢𑀺 𑀯𑀸 𑀏𑀢𑁆𑀢𑀓𑁄 𑀧𑀼𑀜𑁆𑀜𑀯𑀺𑀧𑀸𑀓𑁄𑀢𑀺 𑀯𑀸 𑀏𑀢𑁆𑀢𑀓𑀁 𑀲𑀕𑁆𑀕𑁂 𑀞𑀸𑀢𑀩𑁆𑀩𑀦𑁆𑀢𑀺 𑀯𑀸𑀢𑀺. 𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯𑀲𑀼𑀪𑀸𑀲𑀺𑀢𑀫𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑁋

‘‘𑀬𑁂 𑀦𑀁 𑀤𑀤𑀦𑁆𑀢𑀺 𑀲𑀤𑁆𑀥𑀸𑀬, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑀫𑁂𑀯 𑀅𑀦𑁆𑀦𑀁 𑀪𑀚𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

‘‘𑀢𑀲𑁆𑀫𑀸 𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀁, 𑀤𑀚𑁆𑀚𑀸 𑀤𑀸𑀦𑀁 𑀫𑀮𑀸𑀪𑀺𑀪𑀽;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

𑁪. 𑀖𑀝𑀻𑀓𑀸𑀭𑀲𑀼𑀢𑁆𑀢𑀁

𑁧𑁦𑁫. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀖𑀝𑀻𑀓𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀅𑀯𑀺𑀳𑀁 𑀉𑀧𑀧𑀦𑁆𑀦𑀸𑀲𑁂, 𑀯𑀺𑀫𑀼𑀢𑁆𑀢𑀸 𑀲𑀢𑁆𑀢 𑀪𑀺𑀓𑁆𑀔𑀯𑁄;

𑀭𑀸𑀕𑀤𑁄𑀲𑀧𑀭𑀺𑀓𑁆𑀔𑀻𑀡𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

‘‘𑀓𑁂 𑀘 𑀢𑁂 𑀅𑀢𑀭𑀼𑀁 𑀧𑀗𑁆𑀓𑀁, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁;

𑀓𑁂 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑀺𑀩𑁆𑀩𑀬𑁄𑀕𑀁 𑀉𑀧𑀘𑁆𑀘𑀕𑀼’’𑀦𑁆𑀢𑀺.

‘‘𑀉𑀧𑀓𑁄 𑀧𑀮𑀕𑀡𑁆𑀟𑁄 [𑀨𑀮𑀕𑀡𑁆𑀟𑁄 (𑀓.)] 𑀘, 𑀧𑀼𑀓𑁆𑀓𑀼𑀲𑀸𑀢𑀺 𑀘 𑀢𑁂 𑀢𑀬𑁄;

𑀪𑀤𑁆𑀤𑀺𑀬𑁄 𑀔𑀡𑁆𑀟𑀤𑁂𑀯𑁄 𑀘, 𑀩𑀸𑀳𑀼𑀭𑀕𑁆𑀕𑀺 𑀘 𑀲𑀗𑁆𑀕𑀺𑀬𑁄 [𑀩𑀸𑀳𑀼𑀤𑀦𑁆𑀢𑀻 𑀘 𑀧𑀺𑀗𑁆𑀕𑀺𑀬𑁄 (𑀲𑀻. 𑀲𑁆𑀬𑀸.)];

𑀢𑁂 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑀺𑀩𑁆𑀩𑀬𑁄𑀕𑀁 𑀉𑀧𑀘𑁆𑀘𑀕𑀼’’𑀦𑁆𑀢𑀺.

‘‘𑀓𑀼𑀲𑀮𑀻 𑀪𑀸𑀲𑀲𑀻 𑀢𑁂𑀲𑀁, 𑀫𑀸𑀭𑀧𑀸𑀲𑀧𑁆𑀧𑀳𑀸𑀬𑀺𑀦𑀁;

𑀓𑀲𑁆𑀲 𑀢𑁂 𑀥𑀫𑁆𑀫𑀫𑀜𑁆𑀜𑀸𑀬, 𑀅𑀘𑁆𑀙𑀺𑀤𑀼𑀁 𑀪𑀯𑀩𑀦𑁆𑀥𑀦’’𑀦𑁆𑀢𑀺.

‘‘𑀦 𑀅𑀜𑁆𑀜𑀢𑁆𑀭 𑀪𑀕𑀯𑀢𑀸, 𑀦𑀸𑀜𑁆𑀜𑀢𑁆𑀭 𑀢𑀯 𑀲𑀸𑀲𑀦𑀸;

𑀬𑀲𑁆𑀲 𑀢𑁂 𑀥𑀫𑁆𑀫𑀫𑀜𑁆𑀜𑀸𑀬, 𑀅𑀘𑁆𑀙𑀺𑀤𑀼𑀁 𑀪𑀯𑀩𑀦𑁆𑀥𑀦𑀁.

‘‘𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀢𑀁 𑀢𑁂 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀅𑀘𑁆𑀙𑀺𑀤𑀼𑀁 𑀪𑀯𑀩𑀦𑁆𑀥𑀦’’𑀦𑁆𑀢𑀺.

‘‘𑀕𑀫𑁆𑀪𑀻𑀭𑀁 𑀪𑀸𑀲𑀲𑀻 𑀯𑀸𑀘𑀁, 𑀤𑀼𑀩𑁆𑀩𑀺𑀚𑀸𑀦𑀁 𑀲𑀼𑀤𑀼𑀩𑁆𑀩𑀼𑀥𑀁;

𑀓𑀲𑁆𑀲 𑀢𑁆𑀯𑀁 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀸𑀘𑀁 𑀪𑀸𑀲𑀲𑀺 𑀈𑀤𑀺𑀲’’𑀦𑁆𑀢𑀺.

‘‘𑀓𑀼𑀫𑁆𑀪𑀓𑀸𑀭𑁄 𑀧𑀼𑀭𑁂 𑀆𑀲𑀺𑀁, 𑀯𑁂𑀓𑀴𑀺𑀗𑁆𑀕𑁂 𑀖𑀝𑀻𑀓𑀭𑁄;

𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑁄 𑀆𑀲𑀺𑀁, 𑀓𑀲𑁆𑀲𑀧𑀲𑁆𑀲 𑀉𑀧𑀸𑀲𑀓𑁄.

‘‘𑀯𑀺𑀭𑀢𑁄 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀩𑁆𑀭𑀳𑁆𑀫𑀘𑀸𑀭𑀻 𑀦𑀺𑀭𑀸𑀫𑀺𑀲𑁄;

𑀅𑀳𑀼𑀯𑀸 𑀢𑁂 𑀲𑀕𑀸𑀫𑁂𑀬𑁆𑀬𑁄, 𑀅𑀳𑀼𑀯𑀸 𑀢𑁂 𑀧𑀼𑀭𑁂 𑀲𑀔𑀸.

‘‘𑀲𑁄𑀳𑀫𑁂𑀢𑁂 𑀧𑀚𑀸𑀦𑀸𑀫𑀺, 𑀯𑀺𑀫𑀼𑀢𑁆𑀢𑁂 𑀲𑀢𑁆𑀢 𑀪𑀺𑀓𑁆𑀔𑀯𑁄;

𑀭𑀸𑀕𑀤𑁄𑀲𑀧𑀭𑀺𑀓𑁆𑀔𑀻𑀡𑁂, 𑀢𑀺𑀡𑁆𑀡𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

‘‘𑀏𑀯𑀫𑁂𑀢𑀁 𑀢𑀤𑀸 𑀆𑀲𑀺, 𑀬𑀣𑀸 𑀪𑀸𑀲𑀲𑀺 𑀪𑀕𑁆𑀕𑀯;

𑀓𑀼𑀫𑁆𑀪𑀓𑀸𑀭𑁄 𑀧𑀼𑀭𑁂 𑀆𑀲𑀺, 𑀯𑁂𑀓𑀴𑀺𑀗𑁆𑀕𑁂 𑀖𑀝𑀻𑀓𑀭𑁄.

‘‘𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑁄 𑀆𑀲𑀺, 𑀓𑀲𑁆𑀲𑀧𑀲𑁆𑀲 𑀉𑀧𑀸𑀲𑀓𑁄;

𑀯𑀺𑀭𑀢𑁄 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀩𑁆𑀭𑀳𑁆𑀫𑀘𑀸𑀭𑀻 𑀦𑀺𑀭𑀸𑀫𑀺𑀲𑁄;

𑀅𑀳𑀼𑀯𑀸 𑀫𑁂 𑀲𑀕𑀸𑀫𑁂𑀬𑁆𑀬𑁄, 𑀅𑀳𑀼𑀯𑀸 𑀫𑁂 𑀧𑀼𑀭𑁂 𑀲𑀔𑀸’’𑀢𑀺.

‘‘𑀏𑀯𑀫𑁂𑀢𑀁 𑀧𑀼𑀭𑀸𑀡𑀸𑀦𑀁, 𑀲𑀳𑀸𑀬𑀸𑀦𑀁 𑀅𑀳𑀼 𑀲𑀗𑁆𑀕𑀫𑁄;

𑀉𑀪𑀺𑀦𑁆𑀦𑀁 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀲𑀭𑀻𑀭𑀦𑁆𑀢𑀺𑀫𑀥𑀸𑀭𑀺𑀦’’𑀦𑁆𑀢𑀺.

𑁫. 𑀚𑀦𑁆𑀢𑀼𑀲𑀼𑀢𑁆𑀢𑀁

𑁧𑁦𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽, 𑀓𑁄𑀲𑀮𑁂𑀲𑀼 𑀯𑀺𑀳𑀭𑀦𑁆𑀢𑀺 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀘𑀧𑀮𑀸 𑀫𑀼𑀔𑀭𑀸 𑀯𑀺𑀓𑀺𑀡𑁆𑀡𑀯𑀸𑀘𑀸 𑀫𑀼𑀝𑁆𑀞𑀲𑁆𑀲𑀢𑀺𑀦𑁄 𑀅𑀲𑀫𑁆𑀧𑀚𑀸𑀦𑀸 𑀅𑀲𑀫𑀸𑀳𑀺𑀢𑀸 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸.

𑀅𑀣 𑀔𑁄 𑀚𑀦𑁆𑀢𑀼 𑀤𑁂𑀯𑀧𑀼𑀢𑁆𑀢𑁄 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀼𑀔𑀚𑀻𑀯𑀺𑀦𑁄 𑀧𑀼𑀭𑁂 𑀆𑀲𑀼𑀁, 𑀪𑀺𑀓𑁆𑀔𑀽 𑀕𑁄𑀢𑀫𑀲𑀸𑀯𑀓𑀸;

𑀅𑀦𑀺𑀘𑁆𑀙𑀸 𑀧𑀺𑀡𑁆𑀟𑀫𑁂𑀲𑀦𑀸 [𑀧𑀺𑀡𑁆𑀟𑀫𑁂𑀲𑀸𑀦𑀸 (?)], 𑀅𑀦𑀺𑀘𑁆𑀙𑀸 𑀲𑀬𑀦𑀸𑀲𑀦𑀁;

𑀮𑁄𑀓𑁂 𑀅𑀦𑀺𑀘𑁆𑀘𑀢𑀁 𑀜𑀢𑁆𑀯𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀅𑀓𑀁𑀲𑀼 𑀢𑁂.

‘‘𑀤𑀼𑀧𑁆𑀧𑁄𑀲𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁, 𑀕𑀸𑀫𑁂 𑀕𑀸𑀫𑀡𑀺𑀓𑀸 𑀯𑀺𑀬;

𑀪𑀼𑀢𑁆𑀯𑀸 𑀪𑀼𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺, 𑀧𑀭𑀸𑀕𑀸𑀭𑁂𑀲𑀼 𑀫𑀼𑀘𑁆𑀙𑀺𑀢𑀸.

‘‘𑀲𑀗𑁆𑀖𑀲𑁆𑀲 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀇𑀥𑁂𑀓𑀘𑁆𑀘𑁂 𑀯𑀤𑀸𑀫𑀳𑀁 [𑀯𑀦𑁆𑀤𑀸𑀫𑀳𑀁 (𑀓.)];

𑀅𑀧𑀯𑀺𑀤𑁆𑀥𑀸 𑀅𑀦𑀸𑀣𑀸 𑀢𑁂, 𑀬𑀣𑀸 𑀧𑁂𑀢𑀸 𑀢𑀣𑁂𑀯 𑀢𑁂 [𑀢𑀣𑁂𑀯 𑀘 (𑀲𑀻.)].

‘‘𑀬𑁂 𑀔𑁄 𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑁂 𑀫𑁂 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁;

𑀬𑁂 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀦𑀫𑁄 𑀢𑁂𑀲𑀁 𑀓𑀭𑁄𑀫𑀳’’𑀦𑁆𑀢𑀺.

𑁬. 𑀭𑁄𑀳𑀺𑀢𑀲𑁆𑀲𑀲𑀼𑀢𑁆𑀢𑀁

𑁧𑁦𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀭𑁄𑀳𑀺𑀢𑀲𑁆𑀲𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀢𑁆𑀣 𑀦𑀼 𑀔𑁄, 𑀪𑀦𑁆𑀢𑁂, 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 [𑀦 𑀚𑀺𑀬𑁆𑀬𑀢𑀺 𑀦 𑀫𑀺𑀬𑁆𑀬𑀢𑀺 (𑀲𑁆𑀬𑀸. 𑀓𑀁. 𑀓.)] 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀲𑀓𑁆𑀓𑀸 𑀦𑀼 𑀔𑁄 𑀲𑁄, 𑀪𑀦𑁆𑀢𑁂, 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑁄 𑀜𑀸𑀢𑀼𑀁 𑀯𑀸 𑀤𑀝𑁆𑀞𑀼𑀁 𑀯𑀸 𑀧𑀸𑀧𑀼𑀡𑀺𑀢𑀼𑀁 𑀯𑀸’’𑀢𑀺? ‘‘𑀬𑀢𑁆𑀣 𑀔𑁄, 𑀆𑀯𑀼𑀲𑁄, 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀦𑀸𑀳𑀁 𑀢𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀜𑀸𑀢𑁂𑀬𑁆𑀬𑀁 𑀤𑀝𑁆𑀞𑁂𑀬𑁆𑀬𑀁 𑀧𑀢𑁆𑀢𑁂𑀬𑁆𑀬𑀦𑁆𑀢𑀺 𑀯𑀤𑀸𑀫𑀻’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯𑀲𑀼𑀪𑀸𑀲𑀺𑀢𑀫𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑁋 ‘𑀬𑀢𑁆𑀣 𑀔𑁄, 𑀆𑀯𑀼𑀲𑁄, 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀦𑀸𑀳𑀁 𑀢𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀜𑀸𑀢𑁂𑀬𑁆𑀬𑀁 𑀤𑀝𑁆𑀞𑁂𑀬𑁆𑀬𑀁 𑀧𑀢𑁆𑀢𑁂𑀬𑁆𑀬𑀦𑁆𑀢𑀺 𑀯𑀤𑀸𑀫𑀻’𑀢𑀺.

‘‘𑀪𑀽𑀢𑀧𑀼𑀩𑁆𑀩𑀸𑀳𑀁, 𑀪𑀦𑁆𑀢𑁂, 𑀭𑁄𑀳𑀺𑀢𑀲𑁆𑀲𑁄 𑀦𑀸𑀫 𑀇𑀲𑀺 𑀅𑀳𑁄𑀲𑀺𑀁 𑀪𑁄𑀚𑀧𑀼𑀢𑁆𑀢𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀭𑀽𑀧𑁄 𑀚𑀯𑁄 𑀅𑀳𑁄𑀲𑀺; 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀤𑀴𑁆𑀳𑀥𑀫𑁆𑀫𑀸 [𑀤𑀴𑁆𑀳𑀥𑀫𑁆𑀫𑁄 (𑀲𑀩𑁆𑀩𑀢𑁆𑀣) 𑀝𑀻𑀓𑀸 𑀘 𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡𑀁 𑀘 𑀑𑀮𑁄𑀓𑁂𑀢𑀩𑁆𑀩𑀁] 𑀥𑀦𑀼𑀕𑁆𑀕𑀳𑁄 𑀲𑀼𑀲𑀺𑀓𑁆𑀔𑀺𑀢𑁄 𑀓𑀢𑀳𑀢𑁆𑀣𑁄 𑀓𑀢𑀬𑁄𑀕𑁆𑀕𑁄 𑀓𑀢𑀽𑀧𑀸𑀲𑀦𑁄 𑀮𑀳𑀼𑀓𑁂𑀦 𑀅𑀲𑀦𑁂𑀦 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀢𑀺𑀭𑀺𑀬𑀁 𑀢𑀸𑀮𑀘𑁆𑀙𑀸𑀬𑀁 𑀅𑀢𑀺𑀧𑀸𑀢𑁂𑀬𑁆𑀬. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀭𑀽𑀧𑁄 𑀧𑀤𑀯𑀻𑀢𑀺𑀳𑀸𑀭𑁄 𑀅𑀳𑁄𑀲𑀺; 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀢𑁆𑀣𑀺𑀫𑀸 𑀲𑀫𑀼𑀤𑁆𑀤𑀸 𑀧𑀘𑁆𑀙𑀺𑀫𑁄 𑀲𑀫𑀼𑀤𑁆𑀤𑁄. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀭𑀽𑀧𑀁 𑀇𑀘𑁆𑀙𑀸𑀕𑀢𑀁 𑀉𑀧𑁆𑀧𑀚𑁆𑀚𑀺 𑁋 ‘𑀅𑀳𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀏𑀯𑀭𑀽𑀧𑁂𑀦 𑀚𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀏𑀯𑀭𑀽𑀧𑁂𑀦 𑀘 𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀜𑁆𑀜𑀢𑁆𑀭𑁂𑀯 𑀅𑀲𑀺𑀢-𑀧𑀻𑀢-𑀔𑀸𑀬𑀺𑀢-𑀲𑀸𑀬𑀺𑀢𑀸 𑀅𑀜𑁆𑀜𑀢𑁆𑀭 𑀉𑀘𑁆𑀘𑀸𑀭-𑀧𑀲𑁆𑀲𑀸𑀯𑀓𑀫𑁆𑀫𑀸 𑀅𑀜𑁆𑀜𑀢𑁆𑀭 𑀦𑀺𑀤𑁆𑀤𑀸𑀓𑀺𑀮𑀫𑀣𑀧𑀝𑀺𑀯𑀺𑀦𑁄𑀤𑀦𑀸 𑀯𑀲𑁆𑀲𑀲𑀢𑀸𑀬𑀼𑀓𑁄 𑀯𑀲𑁆𑀲𑀲𑀢𑀚𑀻𑀯𑀻 𑀯𑀲𑁆𑀲𑀲𑀢𑀁 𑀕𑀦𑁆𑀢𑁆𑀯𑀸 𑀅𑀧𑁆𑀧𑀢𑁆𑀯𑀸𑀯 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀅𑀦𑁆𑀢𑀭𑀸𑀯 𑀓𑀸𑀮𑀗𑁆𑀓𑀢𑁄.

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯𑀲𑀼𑀪𑀸𑀲𑀺𑀢𑀫𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑁋 ‘𑀬𑀢𑁆𑀣 𑀔𑁄, 𑀆𑀯𑀼𑀲𑁄, 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀦𑀸𑀳𑀁 𑀢𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀜𑀸𑀢𑁂𑀬𑁆𑀬𑀁 𑀤𑀝𑁆𑀞𑁂𑀬𑁆𑀬𑀁 𑀧𑀢𑁆𑀢𑁂𑀬𑁆𑀬𑀦𑁆𑀢𑀺 𑀯𑀤𑀸𑀫𑀻’’’𑀢𑀺.

‘‘𑀦 𑀔𑁄 𑀧𑀦𑀸𑀳𑀁, 𑀆𑀯𑀼𑀲𑁄, 𑀅𑀧𑁆𑀧𑀢𑁆𑀯𑀸 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀺. 𑀅𑀧𑀺 𑀘 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁𑀬𑁂𑀯 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀫𑀺 𑀮𑁄𑀓𑀲𑀫𑀼𑀤𑀬𑀜𑁆𑀘 𑀮𑁄𑀓𑀦𑀺𑀭𑁄𑀥𑀜𑁆𑀘 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀦𑁆𑀢𑀺.

‘‘𑀕𑀫𑀦𑁂𑀦 𑀦 𑀧𑀢𑁆𑀢𑀩𑁆𑀩𑁄, 𑀮𑁄𑀓𑀲𑁆𑀲𑀦𑁆𑀢𑁄 𑀓𑀼𑀤𑀸𑀘𑀦𑀁;

𑀦 𑀘 𑀅𑀧𑁆𑀧𑀢𑁆𑀯𑀸 𑀮𑁄𑀓𑀦𑁆𑀢𑀁, 𑀤𑀼𑀓𑁆𑀔𑀸 𑀅𑀢𑁆𑀣𑀺 𑀧𑀫𑁄𑀘𑀦𑀁.

‘‘𑀢𑀲𑁆𑀫𑀸 𑀳𑀯𑁂 𑀮𑁄𑀓𑀯𑀺𑀤𑀽 𑀲𑀼𑀫𑁂𑀥𑁄,

𑀮𑁄𑀓𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄;

𑀮𑁄𑀓𑀲𑁆𑀲 𑀅𑀦𑁆𑀢𑀁 𑀲𑀫𑀺𑀢𑀸𑀯𑀺 𑀜𑀢𑁆𑀯𑀸,

𑀦𑀸𑀲𑀻𑀲𑀢𑀺 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸’’𑀢𑀺.

𑁭. 𑀦𑀦𑁆𑀤𑀲𑀼𑀢𑁆𑀢𑀁

𑁧𑁦𑁮. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀦𑀦𑁆𑀤𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄,

𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀺;

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀧𑀼𑀜𑁆𑀜𑀸𑀦𑀺 𑀓𑀬𑀺𑀭𑀸𑀣 𑀲𑀼𑀔𑀸𑀯𑀳𑀸𑀦𑀻’’𑀢𑀺.

‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄,

𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀺;

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀮𑁄𑀓𑀸𑀫𑀺𑀲𑀁 𑀧𑀚𑀳𑁂 𑀲𑀦𑁆𑀢𑀺𑀧𑁂𑀓𑁆𑀔𑁄’’𑀢𑀺.

𑁮. 𑀦𑀦𑁆𑀤𑀺𑀯𑀺𑀲𑀸𑀮𑀲𑀼𑀢𑁆𑀢𑀁

𑁧𑁦𑁯. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀦𑀦𑁆𑀤𑀺𑀯𑀺𑀲𑀸𑀮𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁, 𑀧𑀼𑀡𑁆𑀡𑀁 𑀮𑁄𑀪𑁂𑀦 𑀲𑀁𑀬𑀼𑀢𑀁;

𑀧𑀗𑁆𑀓𑀚𑀸𑀢𑀁 𑀫𑀳𑀸𑀯𑀻𑀭, 𑀓𑀣𑀁 𑀬𑀸𑀢𑁆𑀭𑀸 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀙𑁂𑀢𑁆𑀯𑀸 𑀦𑀤𑁆𑀥𑀺𑀁 𑀯𑀭𑀢𑁆𑀢𑀜𑁆𑀘, 𑀇𑀘𑁆𑀙𑀸𑀮𑁄𑀪𑀜𑁆𑀘 𑀧𑀸𑀧𑀓𑀁;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀏𑀯𑀁 𑀬𑀸𑀢𑁆𑀭𑀸 𑀪𑀯𑀺𑀲𑁆𑀲𑀢𑀻’’𑀢𑀺.

𑁯. 𑀲𑀼𑀲𑀺𑀫𑀲𑀼𑀢𑁆𑀢𑀁

𑁧𑁧𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀢𑀼𑀬𑁆𑀳𑀫𑁆𑀧𑀺 𑀦𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄 𑀭𑀼𑀘𑁆𑀘𑀢𑀻’’𑀢𑀺?

‘‘𑀓𑀲𑁆𑀲 𑀳𑀺 𑀦𑀸𑀫, 𑀪𑀦𑁆𑀢𑁂, 𑀅𑀩𑀸𑀮𑀲𑁆𑀲 𑀅𑀤𑀼𑀝𑁆𑀞𑀲𑁆𑀲 𑀅𑀫𑀽𑀴𑁆𑀳𑀲𑁆𑀲 𑀅𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀲𑁆𑀲 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦 𑀭𑀼𑀘𑁆𑀘𑁂𑀬𑁆𑀬? 𑀧𑀡𑁆𑀟𑀺𑀢𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀫𑀳𑀸𑀧𑀜𑁆𑀜𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀧𑀼𑀣𑀼𑀧𑀜𑁆𑀜𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀳𑀸𑀲𑀧𑀜𑁆𑀜𑁄 [𑀳𑀸𑀲𑀼𑀧𑀜𑁆𑀜𑁄 (𑀲𑀻.)], 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀚𑀯𑀦𑀧𑀜𑁆𑀜𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀢𑀺𑀓𑁆𑀔𑀧𑀜𑁆𑀜𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀅𑀧𑁆𑀧𑀺𑀘𑁆𑀙𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀲𑀦𑁆𑀢𑀼𑀝𑁆𑀞𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀧𑀯𑀺𑀯𑀺𑀢𑁆𑀢𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀅𑀲𑀁𑀲𑀝𑁆𑀞𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀯𑀢𑁆𑀢𑀸, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀯𑀘𑀦𑀓𑁆𑀔𑀫𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀘𑁄𑀤𑀓𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀧𑀸𑀧𑀕𑀭𑀳𑀻, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀓𑀲𑁆𑀲 𑀳𑀺 𑀦𑀸𑀫, 𑀪𑀦𑁆𑀢𑁂, 𑀅𑀩𑀸𑀮𑀲𑁆𑀲 𑀅𑀤𑀼𑀝𑁆𑀞𑀲𑁆𑀲 𑀅𑀫𑀽𑀴𑁆𑀳𑀲𑁆𑀲 𑀅𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀲𑁆𑀲 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦 𑀭𑀼𑀘𑁆𑀘𑁂𑀬𑁆𑀬𑀸’’𑀢𑀺?

‘‘𑀏𑀯𑀫𑁂𑀢𑀁, 𑀆𑀦𑀦𑁆𑀤, 𑀏𑀯𑀫𑁂𑀢𑀁, 𑀆𑀦𑀦𑁆𑀤! 𑀓𑀲𑁆𑀲 𑀳𑀺 𑀦𑀸𑀫, 𑀆𑀦𑀦𑁆𑀤, 𑀅𑀩𑀸𑀮𑀲𑁆𑀲 𑀅𑀤𑀼𑀝𑁆𑀞𑀲𑁆𑀲 𑀅𑀫𑀽𑀴𑁆𑀳𑀲𑁆𑀲 𑀅𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑁄 𑀦 𑀭𑀼𑀘𑁆𑀘𑁂𑀬𑁆𑀬? 𑀧𑀡𑁆𑀟𑀺𑀢𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀫𑀳𑀸𑀧𑀜𑁆𑀜𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀧𑀼𑀣𑀼𑀧𑀜𑁆𑀜𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀳𑀸𑀲𑀧𑀜𑁆𑀜𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀚𑀯𑀦𑀧𑀜𑁆𑀜𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀢𑀺𑀓𑁆𑀔𑀧𑀜𑁆𑀜𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀅𑀧𑁆𑀧𑀺𑀘𑁆𑀙𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀲𑀦𑁆𑀢𑀼𑀝𑁆𑀞𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀧𑀯𑀺𑀯𑀺𑀢𑁆𑀢𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀅𑀲𑀁𑀲𑀝𑁆𑀞𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀯𑀢𑁆𑀢𑀸, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀯𑀘𑀦𑀓𑁆𑀔𑀫𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀘𑁄𑀤𑀓𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀧𑀸𑀧𑀕𑀭𑀳𑀻, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄. 𑀓𑀲𑁆𑀲 𑀳𑀺 𑀦𑀸𑀫, 𑀆𑀦𑀦𑁆𑀤, 𑀅𑀩𑀸𑀮𑀲𑁆𑀲 𑀅𑀤𑀼𑀝𑁆𑀞𑀲𑁆𑀲 𑀅𑀫𑀽𑀴𑁆𑀳𑀲𑁆𑀲 𑀅𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑁄 𑀦 𑀭𑀼𑀘𑁆𑀘𑁂𑀬𑁆𑀬𑀸’’𑀢𑀺?

𑀅𑀣 𑀔𑁄 𑀲𑀼𑀲𑀺𑀫𑁄 [𑀲𑀼𑀲𑀻𑀫𑁄 (𑀲𑀻.)] 𑀤𑁂𑀯𑀧𑀼𑀢𑁆𑀢𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀫𑀳𑀢𑀺𑀬𑀸 𑀤𑁂𑀯𑀧𑀼𑀢𑁆𑀢𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀼𑀲𑀺𑀫𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢. 𑀓𑀲𑁆𑀲 𑀳𑀺 𑀦𑀸𑀫, 𑀪𑀦𑁆𑀢𑁂, 𑀅𑀩𑀸𑀮𑀲𑁆𑀲 𑀅𑀤𑀼𑀝𑁆𑀞𑀲𑁆𑀲 𑀅𑀫𑀽𑀴𑁆𑀳𑀲𑁆𑀲 𑀅𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀲𑁆𑀲 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦 𑀭𑀼𑀘𑁆𑀘𑁂𑀬𑁆𑀬? 𑀧𑀡𑁆𑀟𑀺𑀢𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀫𑀳𑀸𑀧𑀜𑁆𑀜𑁄, 𑀪𑀦𑁆𑀢𑁂, 𑀧𑀼𑀣𑀼𑀧𑀜𑁆𑀜𑁄, 𑀪𑀦𑁆𑀢𑁂, 𑀳𑀸𑀲𑀧𑀜𑁆𑀜𑁄, 𑀪𑀦𑁆𑀢𑁂, 𑀚𑀯𑀦𑀧𑀜𑁆𑀜𑁄, 𑀪𑀦𑁆𑀢𑁂, 𑀢𑀺𑀓𑁆𑀔𑀧𑀜𑁆𑀜𑁄, 𑀪𑀦𑁆𑀢𑁂, 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄, 𑀪𑀦𑁆𑀢𑁂, 𑀅𑀧𑁆𑀧𑀺𑀘𑁆𑀙𑁄, 𑀪𑀦𑁆𑀢𑁂, 𑀲𑀦𑁆𑀢𑀼𑀝𑁆𑀞𑁄, 𑀪𑀦𑁆𑀢𑁂, 𑀧𑀯𑀺𑀯𑀺𑀢𑁆𑀢𑁄, 𑀪𑀦𑁆𑀢𑁂, 𑀅𑀲𑀁𑀲𑀝𑁆𑀞𑁄, 𑀪𑀦𑁆𑀢𑁂, 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀪𑀦𑁆𑀢𑁂, 𑀯𑀢𑁆𑀢𑀸, 𑀪𑀦𑁆𑀢𑁂, 𑀯𑀘𑀦𑀓𑁆𑀔𑀫𑁄, 𑀪𑀦𑁆𑀢𑁂, 𑀘𑁄𑀤𑀓𑁄, 𑀪𑀦𑁆𑀢𑁂, 𑀧𑀸𑀧𑀕𑀭𑀳𑀻, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀓𑀲𑁆𑀲 𑀳𑀺 𑀦𑀸𑀫, 𑀪𑀦𑁆𑀢𑁂, 𑀅𑀩𑀸𑀮𑀲𑁆𑀲 𑀅𑀤𑀼𑀝𑁆𑀞𑀲𑁆𑀲 𑀅𑀫𑀽𑀴𑁆𑀳𑀲𑁆𑀲 𑀅𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀲𑁆𑀲 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦 𑀭𑀼𑀘𑁆𑀘𑁂𑀬𑁆𑀬?

‘‘𑀅𑀳𑀫𑁆𑀧𑀺 𑀳𑀺, 𑀪𑀦𑁆𑀢𑁂, 𑀬𑀜𑁆𑀜𑀤𑁂𑀯 𑀤𑁂𑀯𑀧𑀼𑀢𑁆𑀢𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀁, 𑀏𑀢𑀤𑁂𑀯 𑀩𑀳𑀼𑀮𑀁 𑀲𑀤𑁆𑀤𑀁 𑀲𑀼𑀡𑀸𑀫𑀺 𑁋 ‘𑀧𑀡𑁆𑀟𑀺𑀢𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄; 𑀫𑀳𑀸𑀧𑀜𑁆𑀜𑁄 𑀆𑀬𑀲𑁆𑀫𑀸, 𑀧𑀼𑀣𑀼𑀧𑀜𑁆𑀜𑁄 𑀆𑀬𑀲𑁆𑀫𑀸, 𑀳𑀸𑀲𑀧𑀜𑁆𑀜𑁄 𑀆𑀬𑀲𑁆𑀫𑀸, 𑀚𑀯𑀦𑀧𑀜𑁆𑀜𑁄 𑀆𑀬𑀲𑁆𑀫𑀸, 𑀢𑀺𑀓𑁆𑀔𑀧𑀜𑁆𑀜𑁄 𑀆𑀬𑀲𑁆𑀫𑀸, 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀆𑀬𑀲𑁆𑀫𑀸, 𑀅𑀧𑁆𑀧𑀺𑀘𑁆𑀙𑁄 𑀆𑀬𑀲𑁆𑀫𑀸, 𑀲𑀦𑁆𑀢𑀼𑀝𑁆𑀞𑁄 𑀆𑀬𑀲𑁆𑀫𑀸, 𑀧𑀯𑀺𑀯𑀺𑀢𑁆𑀢𑁄 𑀆𑀬𑀲𑁆𑀫𑀸, 𑀅𑀲𑀁𑀲𑀝𑁆𑀞𑁄 𑀆𑀬𑀲𑁆𑀫𑀸, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀆𑀬𑀲𑁆𑀫𑀸, 𑀯𑀢𑁆𑀢𑀸 𑀆𑀬𑀲𑁆𑀫𑀸, 𑀯𑀘𑀦𑀓𑁆𑀔𑀫𑁄 𑀆𑀬𑀲𑁆𑀫𑀸, 𑀘𑁄𑀤𑀓𑁄 𑀆𑀬𑀲𑁆𑀫𑀸, 𑀧𑀸𑀧𑀕𑀭𑀳𑀻 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄’𑀢𑀺. 𑀓𑀲𑁆𑀲 𑀳𑀺 𑀦𑀸𑀫, 𑀪𑀦𑁆𑀢𑁂, 𑀅𑀩𑀸𑀮𑀲𑁆𑀲 𑀅𑀤𑀼𑀝𑁆𑀞𑀲𑁆𑀲 𑀅𑀫𑀽𑀴𑁆𑀳𑀲𑁆𑀲 𑀅𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑀲𑁆𑀲 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦 𑀭𑀼𑀘𑁆𑀘𑁂𑀬𑁆𑀬𑀸’’𑀢𑀺?

𑀅𑀣 𑀔𑁄 𑀲𑀼𑀲𑀺𑀫𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀧𑀭𑀺𑀲𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀫𑀦𑀸 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀉𑀘𑁆𑀘𑀸𑀯𑀘𑀸 𑀯𑀡𑁆𑀡𑀦𑀺𑀪𑀸 𑀉𑀧𑀤𑀁𑀲𑁂𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑁄 𑀪𑀸𑀲𑀢𑁂 𑀘 𑀢𑀧𑀢𑁂 𑀘 𑀯𑀺𑀭𑁄𑀘𑀢𑀺 𑀘; 𑀏𑀯𑀫𑁂𑀯𑀁 𑀲𑀼𑀲𑀺𑀫𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀧𑀭𑀺𑀲𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀫𑀦𑀸 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀉𑀘𑁆𑀘𑀸𑀯𑀘𑀸 𑀯𑀡𑁆𑀡𑀦𑀺𑀪𑀸 𑀉𑀧𑀤𑀁𑀲𑁂𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀦𑀺𑀓𑁆𑀔𑀁 𑀚𑀫𑁆𑀩𑁄𑀦𑀤𑀁 𑀤𑀓𑁆𑀔𑀓𑀫𑁆𑀫𑀸𑀭𑀧𑀼𑀢𑁆𑀢𑀉𑀓𑁆𑀓𑀸𑀫𑀼𑀔𑀲𑀼𑀓𑀼𑀲𑀮𑀲𑀫𑁆𑀧𑀳𑀝𑁆𑀞𑀁 𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑀁 𑀪𑀸𑀲𑀢𑁂 𑀘 𑀢𑀧𑀢𑁂 𑀘 𑀯𑀺𑀭𑁄𑀘𑀢𑀺 𑀘; 𑀏𑀯𑀫𑁂𑀯𑀁 𑀲𑀼𑀲𑀺𑀫𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀧𑀭𑀺𑀲𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀫𑀦𑀸 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀉𑀘𑁆𑀘𑀸𑀯𑀘𑀸 𑀯𑀡𑁆𑀡𑀦𑀺𑀪𑀸 𑀉𑀧𑀤𑀁𑀲𑁂𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀭𑀤𑀲𑀫𑀬𑁂 𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂 𑀤𑁂𑀯𑁂 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀑𑀲𑀥𑀺𑀢𑀸𑀭𑀓𑀸 𑀪𑀸𑀲𑀢𑁂 𑀘 𑀢𑀧𑀢𑁂 𑀘 𑀯𑀺𑀭𑁄𑀘𑀢𑀺 𑀘; 𑀏𑀯𑀫𑁂𑀯𑀁 𑀲𑀼𑀲𑀺𑀫𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀧𑀭𑀺𑀲𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀫𑀦𑀸 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀉𑀘𑁆𑀘𑀸𑀯𑀘𑀸 𑀯𑀡𑁆𑀡𑀦𑀺𑀪𑀸 𑀉𑀧𑀤𑀁𑀲𑁂𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀭𑀤𑀲𑀫𑀬𑁂 𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂 𑀤𑁂𑀯𑁂 𑀆𑀤𑀺𑀘𑁆𑀘𑁄 𑀦𑀪𑀁 𑀅𑀩𑁆𑀪𑀼𑀲𑁆𑀲𑀓𑁆𑀓𑀫𑀸𑀦𑁄 [𑀅𑀩𑁆𑀪𑀼𑀲𑁆𑀲𑀼𑀓𑁆𑀓𑀫𑀸𑀦𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀅𑀩𑁆𑀪𑀼𑀕𑁆𑀕𑀫𑀫𑀸𑀦𑁄 (𑀤𑀻. 𑀦𑀺. 𑁨.𑁨𑁫𑁮)] 𑀲𑀩𑁆𑀩𑀁 𑀆𑀓𑀸𑀲𑀕𑀢𑀁 𑀢𑀫𑀕𑀢𑀁 𑀅𑀪𑀺𑀯𑀺𑀳𑀘𑁆𑀘 𑀪𑀸𑀲𑀢𑁂 𑀘 𑀢𑀧𑀢𑁂 𑀘 𑀯𑀺𑀭𑁄𑀘𑀢𑀺 𑀘; 𑀏𑀯𑀫𑁂𑀯𑀁 𑀲𑀼𑀲𑀺𑀫𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀧𑀭𑀺𑀲𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀫𑀦𑀸 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀉𑀘𑁆𑀘𑀸𑀯𑀘𑀸 𑀯𑀡𑁆𑀡𑀦𑀺𑀪𑀸 𑀉𑀧𑀤𑀁𑀲𑁂𑀢𑀺.

𑀅𑀣 𑀔𑁄 𑀲𑀼𑀲𑀺𑀫𑁄 𑀤𑁂𑀯𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄, 𑀲𑀸𑀭𑀺𑀧𑀼𑀢𑁆𑀢𑁄 𑀅𑀓𑁄𑀥𑀦𑁄;

𑀅𑀧𑁆𑀧𑀺𑀘𑁆𑀙𑁄 𑀲𑁄𑀭𑀢𑁄 𑀤𑀦𑁆𑀢𑁄, 𑀲𑀢𑁆𑀣𑀼𑀯𑀡𑁆𑀡𑀸𑀪𑀢𑁄 𑀇𑀲𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀲𑀼𑀲𑀺𑀫𑀁 𑀤𑁂𑀯𑀧𑀼𑀢𑁆𑀢𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺 𑁋

‘‘𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄, 𑀲𑀸𑀭𑀺𑀧𑀼𑀢𑁆𑀢𑁄 𑀅𑀓𑁄𑀥𑀦𑁄;

𑀅𑀧𑁆𑀧𑀺𑀘𑁆𑀙𑁄 𑀲𑁄𑀭𑀢𑁄 𑀤𑀦𑁆𑀢𑁄, 𑀓𑀸𑀮𑀁 𑀓𑀗𑁆𑀔𑀢𑀺 𑀲𑀼𑀤𑀦𑁆𑀢𑁄’’ [𑀓𑀸𑀮𑀁 𑀓𑀗𑁆𑀔𑀢𑀺 𑀪𑀢𑀓𑁄 𑀲𑀼𑀤𑀦𑁆𑀢𑁄 (𑀲𑀻.), 𑀓𑀸𑀮𑀁 𑀓𑀗𑁆𑀔𑀢𑀺 𑀪𑀸𑀯𑀺𑀢𑁄 𑀲𑀼𑀤𑀦𑁆𑀢𑁄 (𑀲𑁆𑀬𑀸. 𑀓𑀁.), 𑀓𑀸𑀮𑀁 𑀓𑀗𑁆𑀔𑀢𑀺 𑀪𑀢𑀺𑀓𑁄 𑀲𑀼𑀤𑀦𑁆𑀢𑁄 (𑀧𑀻.)] 𑀢𑀺.

𑁧𑁦. 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀸𑀯𑀓𑀲𑀼𑀢𑁆𑀢𑀁

𑁧𑁧𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀤𑁂𑀯𑀧𑀼𑀢𑁆𑀢𑀸 𑀅𑀲𑀫𑁄 𑀘 𑀲𑀳𑀮𑀺 [𑀲𑀳𑀮𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘 𑀦𑀻𑀓𑁄 [𑀦𑀺𑀗𑁆𑀓𑁄 (𑀲𑀻. 𑀧𑀻.), 𑀦𑀺𑀓𑁄 (𑀲𑁆𑀬𑀸. 𑀓𑀁.)] 𑀘 𑀆𑀓𑁄𑀝𑀓𑁄 𑀘 𑀯𑁂𑀕𑀩𑁆𑀪𑀭𑀺 𑀘 [𑀯𑁂𑀝𑀫𑁆𑀩𑀭𑀻 𑀘 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀸𑀡𑀯𑀕𑀸𑀫𑀺𑀬𑁄 𑀘 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀅𑀲𑀫𑁄 𑀤𑁂𑀯𑀧𑀼𑀢𑁆𑀢𑁄 𑀧𑀽𑀭𑀡𑀁 𑀓𑀲𑁆𑀲𑀧𑀁 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀇𑀥 𑀙𑀺𑀦𑁆𑀤𑀺𑀢𑀫𑀸𑀭𑀺𑀢𑁂, 𑀳𑀢𑀚𑀸𑀦𑀻𑀲𑀼 𑀓𑀲𑁆𑀲𑀧𑁄;

𑀦 𑀧𑀸𑀧𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀧𑀼𑀜𑁆𑀜𑀁 𑀯𑀸 𑀧𑀦 𑀅𑀢𑁆𑀢𑀦𑁄;

𑀲 𑀯𑁂 𑀯𑀺𑀲𑁆𑀲𑀸𑀲𑀫𑀸𑀘𑀺𑀓𑁆𑀔𑀺, 𑀲𑀢𑁆𑀣𑀸 𑀅𑀭𑀳𑀢𑀺 𑀫𑀸𑀦𑀦’’𑀦𑁆𑀢𑀺.

𑀅𑀣 𑀔𑁄 𑀲𑀳𑀮𑀺 𑀤𑁂𑀯𑀧𑀼𑀢𑁆𑀢𑁄 𑀫𑀓𑁆𑀔𑀮𑀺𑀁 𑀕𑁄𑀲𑀸𑀮𑀁 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀧𑁄𑀚𑀺𑀕𑀼𑀘𑁆𑀙𑀸𑀬 𑀲𑀼𑀲𑀁𑀯𑀼𑀢𑀢𑁆𑀢𑁄,

𑀯𑀸𑀘𑀁 𑀧𑀳𑀸𑀬 𑀓𑀮𑀳𑀁 𑀚𑀦𑁂𑀦;