𑁧𑁦. 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀸𑀯𑀓𑀲𑀼𑀢𑁆𑀢𑀁

𑁧𑁧𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀤𑁂𑀯𑀧𑀼𑀢𑁆𑀢𑀸 𑀅𑀲𑀫𑁄 𑀘 𑀲𑀳𑀮𑀺 [𑀲𑀳𑀮𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘 𑀦𑀻𑀓𑁄 [𑀦𑀺𑀗𑁆𑀓𑁄 (𑀲𑀻. 𑀧𑀻.), 𑀦𑀺𑀓𑁄 (𑀲𑁆𑀬𑀸. 𑀓𑀁.)] 𑀘 𑀆𑀓𑁄𑀝𑀓𑁄 𑀘 𑀯𑁂𑀕𑀩𑁆𑀪𑀭𑀺 𑀘 [𑀯𑁂𑀝𑀫𑁆𑀩𑀭𑀻 𑀘 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀸𑀡𑀯𑀕𑀸𑀫𑀺𑀬𑁄 𑀘 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀅𑀲𑀫𑁄 𑀤𑁂𑀯𑀧𑀼𑀢𑁆𑀢𑁄 𑀧𑀽𑀭𑀡𑀁 𑀓𑀲𑁆𑀲𑀧𑀁 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀇𑀥 𑀙𑀺𑀦𑁆𑀤𑀺𑀢𑀫𑀸𑀭𑀺𑀢𑁂, 𑀳𑀢𑀚𑀸𑀦𑀻𑀲𑀼 𑀓𑀲𑁆𑀲𑀧𑁄;

𑀦 𑀧𑀸𑀧𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀧𑀼𑀜𑁆𑀜𑀁 𑀯𑀸 𑀧𑀦 𑀅𑀢𑁆𑀢𑀦𑁄;

𑀲 𑀯𑁂 𑀯𑀺𑀲𑁆𑀲𑀸𑀲𑀫𑀸𑀘𑀺𑀓𑁆𑀔𑀺, 𑀲𑀢𑁆𑀣𑀸 𑀅𑀭𑀳𑀢𑀺 𑀫𑀸𑀦𑀦’’𑀦𑁆𑀢𑀺.

𑀅𑀣 𑀔𑁄 𑀲𑀳𑀮𑀺 𑀤𑁂𑀯𑀧𑀼𑀢𑁆𑀢𑁄 𑀫𑀓𑁆𑀔𑀮𑀺𑀁 𑀕𑁄𑀲𑀸𑀮𑀁 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀧𑁄𑀚𑀺𑀕𑀼𑀘𑁆𑀙𑀸𑀬 𑀲𑀼𑀲𑀁𑀯𑀼𑀢𑀢𑁆𑀢𑁄,

𑀯𑀸𑀘𑀁 𑀧𑀳𑀸𑀬 𑀓𑀮𑀳𑀁 𑀚𑀦𑁂𑀦;

𑀲𑀫𑁄𑀲𑀯𑀚𑁆𑀚𑀸 𑀯𑀺𑀭𑀢𑁄 𑀲𑀘𑁆𑀘𑀯𑀸𑀤𑀻,

𑀦 𑀳𑀺 𑀦𑀽𑀦 𑀢𑀸𑀤𑀺𑀲𑀁 𑀓𑀭𑁄𑀢𑀺 [𑀦 𑀳 𑀦𑀼𑀦 𑀢𑀸𑀤𑀻 𑀧𑀓𑀭𑁄𑀢𑀺 (𑀲𑀻. 𑀲𑁆𑀬𑀸. 𑀓𑀁.)] 𑀧𑀸𑀧’’𑀦𑁆𑀢𑀺.

𑀅𑀣 𑀔𑁄 𑀦𑀻𑀓𑁄 𑀤𑁂𑀯𑀧𑀼𑀢𑁆𑀢𑁄 𑀦𑀺𑀕𑀡𑁆𑀞𑀁 𑀦𑀸𑀝𑀧𑀼𑀢𑁆𑀢𑀁 [𑀦𑀸𑀣𑀧𑀼𑀢𑁆𑀢𑀁 (𑀲𑀻.)] 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀚𑁂𑀕𑀼𑀘𑁆𑀙𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀘𑀸𑀢𑀼𑀬𑀸𑀫𑀲𑀼𑀲𑀁𑀯𑀼𑀢𑁄;

𑀤𑀺𑀝𑁆𑀞𑀁 𑀲𑀼𑀢𑀜𑁆𑀘 𑀆𑀘𑀺𑀓𑁆𑀔𑀁, 𑀦 𑀳𑀺 𑀦𑀽𑀦 𑀓𑀺𑀩𑁆𑀩𑀺𑀲𑀻 𑀲𑀺𑀬𑀸’’𑀢𑀺.

𑀅𑀣 𑀔𑁄 𑀆𑀓𑁄𑀝𑀓𑁄 𑀤𑁂𑀯𑀧𑀼𑀢𑁆𑀢𑁄 𑀦𑀸𑀦𑀸𑀢𑀺𑀢𑁆𑀣𑀺𑀬𑁂 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀧𑀓𑀼𑀥𑀓𑁄 𑀓𑀸𑀢𑀺𑀬𑀸𑀦𑁄 𑀦𑀺𑀕𑀡𑁆𑀞𑁄,

𑀬𑁂 𑀘𑀸𑀧𑀺𑀫𑁂 𑀫𑀓𑁆𑀔𑀮𑀺𑀧𑀽𑀭𑀡𑀸𑀲𑁂;

𑀕𑀡𑀲𑁆𑀲 𑀲𑀢𑁆𑀣𑀸𑀭𑁄 𑀲𑀸𑀫𑀜𑁆𑀜𑀧𑁆𑀧𑀢𑁆𑀢𑀸,

𑀦 𑀳𑀺 𑀦𑀽𑀦 𑀢𑁂 𑀲𑀧𑁆𑀧𑀼𑀭𑀺𑀲𑁂𑀳𑀺 𑀤𑀽𑀭𑁂’’𑀢𑀺.

𑀅𑀣 𑀔𑁄 𑀯𑁂𑀕𑀩𑁆𑀪𑀭𑀺 𑀤𑁂𑀯𑀧𑀼𑀢𑁆𑀢𑁄 𑀆𑀓𑁄𑀝𑀓𑀁 𑀤𑁂𑀯𑀧𑀼𑀢𑁆𑀢𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺 𑁋

‘‘𑀲𑀳𑀸𑀘𑀭𑀺𑀢𑁂𑀦 [𑀲𑀳𑀸𑀭𑀯𑁂𑀦𑀸𑀧𑀺 (𑀓. 𑀲𑀻.), 𑀲𑀕𑀸𑀭𑀯𑁂𑀦𑀸𑀧𑀺 (𑀧𑀻.)] 𑀙𑀯𑁄 𑀲𑀺𑀕𑀸𑀮𑁄 [𑀲𑀺𑀗𑁆𑀕𑀸𑀮𑁄 (𑀓.)],

𑀦 𑀓𑁄𑀢𑁆𑀣𑀼𑀓𑁄 𑀲𑀻𑀳𑀲𑀫𑁄 𑀓𑀤𑀸𑀘𑀺;

𑀦𑀕𑁆𑀕𑁄 𑀫𑀼𑀲𑀸𑀯𑀸𑀤𑀻 𑀕𑀡𑀲𑁆𑀲 𑀲𑀢𑁆𑀣𑀸,

𑀲𑀗𑁆𑀓𑀲𑁆𑀲𑀭𑀸𑀘𑀸𑀭𑁄 𑀦 𑀲𑀢𑀁 𑀲𑀭𑀺𑀓𑁆𑀔𑁄’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀩𑁂𑀕𑀩𑁆𑀪𑀭𑀺𑀁 𑀤𑁂𑀯𑀧𑀼𑀢𑁆𑀢𑀁 𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀧𑁄𑀚𑀺𑀕𑀼𑀘𑁆𑀙𑀸𑀬 𑀆𑀬𑀼𑀢𑁆𑀢𑀸, 𑀧𑀸𑀮𑀬𑀁 𑀧𑀯𑀺𑀯𑁂𑀓𑀺𑀬𑀁;

𑀭𑀽𑀧𑁂 𑀘 𑀬𑁂 𑀦𑀺𑀯𑀺𑀝𑁆𑀞𑀸𑀲𑁂, 𑀤𑁂𑀯𑀮𑁄𑀓𑀸𑀪𑀺𑀦𑀦𑁆𑀤𑀺𑀦𑁄;

𑀢𑁂 𑀯𑁂 𑀲𑀫𑁆𑀫𑀸𑀦𑀼𑀲𑀸𑀲𑀦𑁆𑀢𑀺, 𑀧𑀭𑀮𑁄𑀓𑀸𑀬 𑀫𑀸𑀢𑀺𑀬𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸, ‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’ 𑀇𑀢𑀺 𑀯𑀺𑀤𑀺𑀢𑁆𑀯𑀸, 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺 𑁋

‘‘𑀬𑁂 𑀓𑁂𑀘𑀺 𑀭𑀽𑀧𑀸 𑀇𑀥 𑀯𑀸 𑀳𑀼𑀭𑀁 𑀯𑀸,

𑀬𑁂 𑀘𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁 𑀧𑀪𑀸𑀲𑀯𑀡𑁆𑀡𑀸;

𑀲𑀩𑁆𑀩𑁂𑀯 𑀢𑁂 𑀢𑁂 𑀦𑀫𑀼𑀘𑀺𑀧𑁆𑀧𑀲𑀢𑁆𑀣𑀸,

𑀆𑀫𑀺𑀲𑀁𑀯 𑀫𑀘𑁆𑀙𑀸𑀦𑀁 𑀯𑀥𑀸𑀬 𑀔𑀺𑀢𑁆𑀢𑀸’’𑀢𑀺.

𑀅𑀣 𑀔𑁄 𑀫𑀸𑀡𑀯𑀕𑀸𑀫𑀺𑀬𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀯𑀺𑀧𑀼𑀮𑁄 𑀭𑀸𑀚𑀕𑀳𑀻𑀬𑀸𑀦𑀁, 𑀕𑀺𑀭𑀺𑀲𑁂𑀝𑁆𑀞𑁄 𑀧𑀯𑀼𑀘𑁆𑀘𑀢𑀺;

𑀲𑁂𑀢𑁄 𑀳𑀺𑀫𑀯𑀢𑀁 𑀲𑁂𑀝𑁆𑀞𑁄, 𑀆𑀤𑀺𑀘𑁆𑀘𑁄 𑀅𑀖𑀕𑀸𑀫𑀺𑀦𑀁.

‘‘𑀲𑀫𑀼𑀤𑁆𑀤𑁄 𑀉𑀤𑀥𑀺𑀦𑀁 𑀲𑁂𑀝𑁆𑀞𑁄, 𑀦𑀓𑁆𑀔𑀢𑁆𑀢𑀸𑀦𑀜𑁆𑀘 𑀘𑀦𑁆𑀤𑀺𑀫𑀸 [𑀦𑀓𑁆𑀔𑀢𑁆𑀢𑀸𑀦𑀁𑀯 𑀘𑀦𑁆𑀤𑀺𑀫𑀸 (𑀓.)];

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀩𑀼𑀤𑁆𑀥𑁄 𑀅𑀕𑁆𑀕𑁄 𑀧𑀯𑀼𑀘𑁆𑀘𑀢𑀻’’𑀢𑀺.

𑀦𑀸𑀦𑀸𑀢𑀺𑀢𑁆𑀣𑀺𑀬𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀺𑀯𑁄 𑀔𑁂𑀫𑁄 𑀘 𑀲𑁂𑀭𑀻 𑀘, 𑀖𑀝𑀻 𑀚𑀦𑁆𑀢𑀼 𑀘 𑀭𑁄𑀳𑀺𑀢𑁄;

𑀦𑀦𑁆𑀤𑁄 𑀦𑀦𑁆𑀤𑀺𑀯𑀺𑀲𑀸𑀮𑁄 𑀘, 𑀲𑀼𑀲𑀺𑀫𑁄 𑀦𑀸𑀦𑀸𑀢𑀺𑀢𑁆𑀣𑀺𑀬𑁂𑀦 𑀢𑁂 𑀤𑀲𑀸𑀢𑀺.

𑀤𑁂𑀯𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.