𑁨. 𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀕𑁆𑀕𑁄

𑁧. 𑀘𑀦𑁆𑀤𑀺𑀫𑀲𑀲𑀼𑀢𑁆𑀢𑀁

𑁯𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀘𑀦𑁆𑀤𑀺𑀫𑀲𑁄 [𑀘𑀦𑁆𑀤𑀺𑀫𑀸𑀲𑁄 (𑀓.)] 𑀤𑁂𑀯𑀧𑀼𑀢𑁆𑀢𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀘𑀦𑁆𑀤𑀺𑀫𑀲𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑁂 𑀳𑀺 𑀲𑁄𑀢𑁆𑀣𑀺𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀓𑀘𑁆𑀙𑁂 𑀯𑀸𑀫𑀓𑀲𑁂 𑀫𑀕𑀸;

𑀛𑀸𑀦𑀸𑀦𑀺 𑀉𑀧𑀲𑀫𑁆𑀧𑀚𑁆𑀚, 𑀏𑀓𑁄𑀤𑀺 𑀦𑀺𑀧𑀓𑀸 𑀲𑀢𑀸’’𑀢𑀺.

‘‘𑀢𑁂 𑀳𑀺 𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀙𑁂𑀢𑁆𑀯𑀸 𑀚𑀸𑀮𑀁𑀯 𑀅𑀫𑁆𑀩𑀼𑀚𑁄;

𑀛𑀸𑀦𑀸𑀦𑀺 𑀉𑀧𑀲𑀫𑁆𑀧𑀚𑁆𑀚, 𑀅𑀧𑁆𑀧𑀫𑀢𑁆𑀢𑀸 𑀭𑀡𑀜𑁆𑀚𑀳𑀸’’𑀢𑀺.

𑁨. 𑀯𑁂𑀡𑁆𑀟𑀼𑀲𑀼𑀢𑁆𑀢𑀁

𑁯𑁩. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀯𑁂𑀡𑁆𑀟𑀼 [𑀯𑁂𑀡𑁆𑀳𑀼 (𑀲𑀻.)] 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀼𑀔𑀺𑀢𑀸𑀯 𑀢𑁂 [𑀲𑀼𑀔𑀺𑀢𑀸 𑀯𑀢 𑀢𑁂 (𑀲𑀻. 𑀲𑁆𑀬𑀸. 𑀓𑀁.)] 𑀫𑀦𑀼𑀚𑀸, 𑀲𑀼𑀕𑀢𑀁 𑀧𑀬𑀺𑀭𑀼𑀧𑀸𑀲𑀺𑀬;

𑀬𑀼𑀜𑁆𑀚𑀁 [𑀬𑀼𑀚𑁆𑀚 (𑀲𑀻.), 𑀬𑀼𑀜𑁆𑀚 (𑀲𑁆𑀬𑀸. 𑀓𑀁. 𑀧𑀻.)] 𑀕𑁄𑀢𑀫𑀲𑀸𑀲𑀦𑁂, 𑀅𑀧𑁆𑀧𑀫𑀢𑁆𑀢𑀸 𑀦𑀼 𑀲𑀺𑀓𑁆𑀔𑀭𑁂’’𑀢𑀺.

‘‘𑀬𑁂 𑀫𑁂 𑀧𑀯𑀼𑀢𑁆𑀢𑁂 𑀲𑀺𑀝𑁆𑀞𑀺𑀧𑀤𑁂 [𑀲𑀢𑁆𑀣𑀺𑀧𑀤𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] (𑀯𑁂𑀡𑁆𑀟𑀽𑀢𑀺 𑀪𑀕𑀯𑀸),

𑀅𑀦𑀼𑀲𑀺𑀓𑁆𑀔𑀦𑁆𑀢𑀺 𑀛𑀸𑀬𑀺𑀦𑁄;

𑀓𑀸𑀮𑁂 𑀢𑁂 𑀅𑀧𑁆𑀧𑀫𑀚𑁆𑀚𑀦𑁆𑀢𑀸,

𑀦 𑀫𑀘𑁆𑀘𑀼𑀯𑀲𑀕𑀸 𑀲𑀺𑀬𑀼’’𑀦𑁆𑀢𑀺.

𑁩. 𑀤𑀻𑀖𑀮𑀝𑁆𑀞𑀺𑀲𑀼𑀢𑁆𑀢𑀁

𑁯𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀤𑀻𑀖𑀮𑀝𑁆𑀞𑀺 𑀤𑁂𑀯𑀧𑀼𑀢𑁆𑀢𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀤𑀻𑀖𑀮𑀝𑁆𑀞𑀺 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀪𑀺𑀓𑁆𑀔𑀼 𑀲𑀺𑀬𑀸 𑀛𑀸𑀬𑀻 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄,

𑀆𑀓𑀗𑁆𑀔𑁂 𑀘𑁂 𑀳𑀤𑀬𑀲𑁆𑀲𑀸𑀦𑀼𑀧𑀢𑁆𑀢𑀺𑀁;

𑀮𑁄𑀓𑀲𑁆𑀲 𑀜𑀢𑁆𑀯𑀸 𑀉𑀤𑀬𑀩𑁆𑀩𑀬𑀜𑁆𑀘,

𑀲𑀼𑀘𑁂𑀢𑀲𑁄 𑀅𑀦𑀺𑀲𑁆𑀲𑀺𑀢𑁄 𑀢𑀤𑀸𑀦𑀺𑀲𑀁𑀲𑁄’’𑀢𑀺.

𑁪. 𑀦𑀦𑁆𑀤𑀦𑀲𑀼𑀢𑁆𑀢𑀁

𑁯𑁫. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀦𑀦𑁆𑀤𑀦𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀕𑁄𑀢𑀫 𑀪𑀽𑀭𑀺𑀧𑀜𑁆𑀜,

𑀅𑀦𑀸𑀯𑀝𑀁 𑀪𑀕𑀯𑀢𑁄 𑀜𑀸𑀡𑀤𑀲𑁆𑀲𑀦𑀁;

𑀓𑀣𑀁𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺,

𑀓𑀣𑀁𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀺;

𑀓𑀣𑀁𑀯𑀺𑀥𑁄 𑀤𑀼𑀓𑁆𑀔𑀫𑀢𑀺𑀘𑁆𑀘 𑀇𑀭𑀺𑀬𑀢𑀺,

𑀓𑀣𑀁𑀯𑀺𑀥𑀁 𑀤𑁂𑀯𑀢𑀸 𑀧𑀽𑀚𑀬𑀦𑁆𑀢𑀻’’𑀢𑀺.

‘‘𑀬𑁄 𑀲𑀻𑀮𑀯𑀸 𑀧𑀜𑁆𑀜𑀯𑀸 𑀪𑀸𑀯𑀺𑀢𑀢𑁆𑀢𑁄,

𑀲𑀫𑀸𑀳𑀺𑀢𑁄 𑀛𑀸𑀦𑀭𑀢𑁄 𑀲𑀢𑀻𑀫𑀸;

𑀲𑀩𑁆𑀩𑀲𑁆𑀲 𑀲𑁄𑀓𑀸 𑀯𑀺𑀕𑀢𑀸 𑀧𑀳𑀻𑀦𑀸,

𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻.

‘‘𑀢𑀣𑀸𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺,

𑀢𑀣𑀸𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀺;

𑀢𑀣𑀸𑀯𑀺𑀥𑁄 𑀤𑀼𑀓𑁆𑀔𑀫𑀢𑀺𑀘𑁆𑀘 𑀇𑀭𑀺𑀬𑀢𑀺,

𑀢𑀣𑀸𑀯𑀺𑀥𑀁 𑀤𑁂𑀯𑀢𑀸 𑀧𑀽𑀚𑀬𑀦𑁆𑀢𑀻’’𑀢𑀺.

𑁫. 𑀘𑀦𑁆𑀤𑀦𑀲𑀼𑀢𑁆𑀢𑀁

𑁯𑁬. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀘𑀦𑁆𑀤𑀦𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀣𑀁𑀲𑀼 [𑀓𑁄𑀲𑀼𑀥 (𑀲𑀻.)] 𑀢𑀭𑀢𑀺 𑀑𑀖𑀁, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄;

𑀅𑀧𑁆𑀧𑀢𑀺𑀝𑁆𑀞𑁂 𑀅𑀦𑀸𑀮𑀫𑁆𑀩𑁂, 𑀓𑁄 𑀕𑀫𑁆𑀪𑀻𑀭𑁂 𑀦 𑀲𑀻𑀤𑀢𑀻’’𑀢𑀺.

‘‘𑀲𑀩𑁆𑀩𑀤𑀸 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀧𑀜𑁆𑀜𑀯𑀸 𑀲𑀼𑀲𑀫𑀸𑀳𑀺𑀢𑁄;

𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀑𑀖𑀁 𑀢𑀭𑀢𑀺 𑀤𑀼𑀢𑁆𑀢𑀭𑀁.

‘‘𑀯𑀺𑀭𑀢𑁄 𑀓𑀸𑀫𑀲𑀜𑁆𑀜𑀸𑀬, 𑀭𑀽𑀧𑀲𑀁𑀬𑁄𑀚𑀦𑀸𑀢𑀺𑀕𑁄;

𑀦𑀦𑁆𑀤𑀻𑀭𑀸𑀕𑀧𑀭𑀺𑀓𑁆𑀔𑀻𑀡𑁄, 𑀲𑁄 𑀕𑀫𑁆𑀪𑀻𑀭𑁂 𑀦 𑀲𑀻𑀤𑀢𑀻’’𑀢𑀺.

𑁬. 𑀯𑀸𑀲𑀼𑀤𑀢𑁆𑀢𑀲𑀼𑀢𑁆𑀢𑀁

𑁯𑁭. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀯𑀸𑀲𑀼𑀤𑀢𑁆𑀢𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 [𑀟𑀬𑁆𑀳𑀫𑀸𑀦𑁂𑀯 (𑀲𑀩𑁆𑀩𑀢𑁆𑀣)] 𑀫𑀢𑁆𑀣𑀓𑁂;

𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑁭. 𑀲𑀼𑀩𑁆𑀭𑀳𑁆𑀫𑀲𑀼𑀢𑁆𑀢𑀁

𑁯𑁮. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀼𑀩𑁆𑀭𑀳𑁆𑀫𑀸 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀦𑀺𑀘𑁆𑀘𑀁 𑀉𑀢𑁆𑀭𑀲𑁆𑀢𑀫𑀺𑀤𑀁 𑀘𑀺𑀢𑁆𑀢𑀁, 𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀫𑀺𑀤𑀁 [𑀉𑀩𑁆𑀩𑀺𑀕𑁆𑀕𑀺𑀤𑀁 (𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁)] 𑀫𑀦𑁄;

𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀙𑁂𑀲𑀼 [𑀓𑀺𑀘𑁆𑀘𑁂𑀲𑀼 (𑀩𑀳𑀽𑀲𑀼)], 𑀅𑀣𑁄 𑀉𑀧𑁆𑀧𑀢𑀺𑀢𑁂𑀲𑀼 𑀘;

𑀲𑀘𑁂 𑀅𑀢𑁆𑀣𑀺 𑀅𑀦𑀼𑀢𑁆𑀭𑀲𑁆𑀢𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺.

‘‘𑀦𑀸𑀜𑁆𑀜𑀢𑁆𑀭 𑀩𑁄𑀚𑁆𑀛𑀸 𑀢𑀧𑀲𑀸 [𑀩𑁄𑀚𑁆𑀛𑀗𑁆𑀕𑀢𑀧𑀲𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀦𑀸𑀜𑁆𑀜𑀢𑁆𑀭𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀸;

𑀦𑀸𑀜𑁆𑀜𑀢𑁆𑀭 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀫𑀺 𑀧𑀸𑀡𑀺𑀦’’𑀦𑁆𑀢𑀺.

‘‘𑀇𑀤𑀫𑀯𑁄𑀘…𑀧𑁂… 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻’’𑀢𑀺.

𑁮. 𑀓𑀓𑀼𑀥𑀲𑀼𑀢𑁆𑀢𑀁

𑁯𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀓𑁂𑀢𑁂 𑀯𑀺𑀳𑀭𑀢𑀺 𑀅𑀜𑁆𑀚𑀦𑀯𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀅𑀜𑁆𑀚𑀦𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀦𑁆𑀤𑀲𑀺, 𑀲𑀫𑀡𑀸’’𑀢𑀺? ‘‘𑀓𑀺𑀁 𑀮𑀤𑁆𑀥𑀸, 𑀆𑀯𑀼𑀲𑁄’’𑀢𑀺? ‘‘𑀢𑁂𑀦 𑀳𑀺, 𑀲𑀫𑀡, 𑀲𑁄𑀘𑀲𑀻’’𑀢𑀺? ‘‘𑀓𑀺𑀁 𑀚𑀻𑀬𑀺𑀢𑁆𑀣, 𑀆𑀯𑀼𑀲𑁄’’𑀢𑀺? ‘‘𑀢𑁂𑀦 𑀳𑀺, 𑀲𑀫𑀡, 𑀦𑁂𑀯 𑀦𑀦𑁆𑀤𑀲𑀺 𑀦 𑀘 [𑀦𑁂𑀯 (𑀲𑀻. 𑀲𑁆𑀬𑀸. 𑀓𑀁.)] 𑀲𑁄𑀘𑀲𑀻’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺.

‘‘𑀓𑀘𑁆𑀘𑀺 𑀢𑁆𑀯𑀁 𑀅𑀦𑀖𑁄 [𑀅𑀦𑀺𑀖𑁄 (𑀲𑀩𑁆𑀩𑀢𑁆𑀣)] 𑀪𑀺𑀓𑁆𑀔𑀼, 𑀓𑀘𑁆𑀘𑀺 𑀦𑀦𑁆𑀤𑀻 [𑀦𑀦𑁆𑀤𑀺 (𑀲𑀻. 𑀲𑁆𑀬𑀸. 𑀓𑀁.)] 𑀦 𑀯𑀺𑀚𑁆𑀚𑀢𑀺;

𑀓𑀘𑁆𑀘𑀺 𑀢𑀁 𑀏𑀓𑀫𑀸𑀲𑀻𑀦𑀁, 𑀅𑀭𑀢𑀻 𑀦𑀸𑀪𑀺𑀓𑀻𑀭𑀢𑀻’’𑀢𑀺.

‘‘𑀅𑀦𑀖𑁄 𑀯𑁂 𑀅𑀳𑀁 𑀬𑀓𑁆𑀔, 𑀅𑀣𑁄 𑀦𑀦𑁆𑀤𑀻 𑀦 𑀯𑀺𑀚𑁆𑀚𑀢𑀺;

𑀅𑀣𑁄 𑀫𑀁 𑀏𑀓𑀫𑀸𑀲𑀻𑀦𑀁, 𑀅𑀭𑀢𑀻 𑀦𑀸𑀪𑀺𑀓𑀻𑀭𑀢𑀻’’𑀢𑀺.

‘‘𑀓𑀣𑀁 𑀢𑁆𑀯𑀁 𑀅𑀦𑀖𑁄 𑀪𑀺𑀓𑁆𑀔𑀼, 𑀓𑀣𑀁 𑀦𑀦𑁆𑀤𑀻 𑀦 𑀯𑀺𑀚𑁆𑀚𑀢𑀺;

𑀓𑀣𑀁 𑀢𑀁 𑀏𑀓𑀫𑀸𑀲𑀻𑀦𑀁, 𑀅𑀭𑀢𑀻 𑀦𑀸𑀪𑀺𑀓𑀻𑀭𑀢𑀻’’𑀢𑀺.

‘‘𑀅𑀖𑀚𑀸𑀢𑀲𑁆𑀲 𑀯𑁂 𑀦𑀦𑁆𑀤𑀻, 𑀦𑀦𑁆𑀤𑀻𑀚𑀸𑀢𑀲𑁆𑀲 𑀯𑁂 𑀅𑀖𑀁;

𑀅𑀦𑀦𑁆𑀤𑀻 𑀅𑀦𑀖𑁄 𑀪𑀺𑀓𑁆𑀔𑀼, 𑀏𑀯𑀁 𑀚𑀸𑀦𑀸𑀳𑀺 𑀆𑀯𑀼𑀲𑁄’’𑀢𑀺.

‘‘𑀘𑀺𑀭𑀲𑁆𑀲𑀁 𑀯𑀢 𑀧𑀲𑁆𑀲𑀸𑀫𑀺, 𑀩𑁆𑀭𑀸𑀳𑁆𑀫𑀡𑀁 𑀧𑀭𑀺𑀦𑀺𑀩𑁆𑀩𑀼𑀢𑀁;

𑀅𑀦𑀦𑁆𑀤𑀺𑀁 𑀅𑀦𑀖𑀁 𑀪𑀺𑀓𑁆𑀔𑀼𑀁, 𑀢𑀺𑀡𑁆𑀡𑀁 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑁯. 𑀉𑀢𑁆𑀢𑀭𑀲𑀼𑀢𑁆𑀢𑀁

𑁧𑁦𑁦. 𑀭𑀸𑀚𑀕𑀳𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀉𑀢𑁆𑀢𑀭𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀉𑀧𑀦𑀻𑀬𑀢𑀺 𑀚𑀻𑀯𑀺𑀢𑀫𑀧𑁆𑀧𑀫𑀸𑀬𑀼,

𑀚𑀭𑀽𑀧𑀦𑀻𑀢𑀲𑁆𑀲 𑀦 𑀲𑀦𑁆𑀢𑀺 𑀢𑀸𑀡𑀸;

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀧𑀼𑀜𑁆𑀜𑀸𑀦𑀺 𑀓𑀬𑀺𑀭𑀸𑀣 𑀲𑀼𑀔𑀸𑀯𑀳𑀸𑀦𑀻’’𑀢𑀺.

‘‘𑀉𑀧𑀦𑀻𑀬𑀢𑀺 𑀚𑀻𑀯𑀺𑀢𑀫𑀧𑁆𑀧𑀫𑀸𑀬𑀼,

𑀚𑀭𑀽𑀧𑀦𑀻𑀢𑀲𑁆𑀲 𑀦 𑀲𑀦𑁆𑀢𑀺 𑀢𑀸𑀡𑀸;

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀮𑁄𑀓𑀸𑀫𑀺𑀲𑀁 𑀧𑀚𑀳𑁂 𑀲𑀦𑁆𑀢𑀺𑀧𑁂𑀓𑁆𑀔𑁄’’𑀢𑀺.

𑁧𑁦. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀁

𑁧𑁦𑁧. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀇𑀤𑀜𑁆𑀳𑀺 𑀢𑀁 𑀚𑁂𑀢𑀯𑀦𑀁, 𑀇𑀲𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀁;

𑀆𑀯𑀼𑀢𑁆𑀣𑀁 𑀥𑀫𑁆𑀫𑀭𑀸𑀚𑁂𑀦, 𑀧𑀻𑀢𑀺𑀲𑀜𑁆𑀚𑀦𑀦𑀁 𑀫𑀫.

‘‘𑀓𑀫𑁆𑀫𑀁 𑀯𑀺𑀚𑁆𑀚𑀸 𑀘 𑀥𑀫𑁆𑀫𑁄 𑀘, 𑀲𑀻𑀮𑀁 𑀚𑀻𑀯𑀺𑀢𑀫𑀼𑀢𑁆𑀢𑀫𑀁;

𑀏𑀢𑁂𑀦 𑀫𑀘𑁆𑀘𑀸 𑀲𑀼𑀚𑁆𑀛𑀦𑁆𑀢𑀺, 𑀦 𑀕𑁄𑀢𑁆𑀢𑁂𑀦 𑀥𑀦𑁂𑀦 𑀯𑀸.

‘‘𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀁, 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀺.

‘‘𑀲𑀸𑀭𑀺𑀧𑀼𑀢𑁆𑀢𑁄𑀯 𑀧𑀜𑁆𑀜𑀸𑀬, 𑀲𑀻𑀮𑁂𑀦 𑀉𑀧𑀲𑀫𑁂𑀦 𑀘;

𑀬𑁄𑀧𑀺 𑀧𑀸𑀭𑀗𑁆𑀕𑀢𑁄 𑀪𑀺𑀓𑁆𑀔𑀼, 𑀏𑀢𑀸𑀯𑀧𑀭𑀫𑁄 𑀲𑀺𑀬𑀸’’𑀢𑀺.

𑀇𑀤𑀫𑀯𑁄𑀘 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀤𑁂𑀯𑀧𑀼𑀢𑁆𑀢𑁄. 𑀇𑀤𑀁 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀅𑀜𑁆𑀜𑀢𑀭𑁄 𑀤𑁂𑀯𑀧𑀼𑀢𑁆𑀢𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀤𑁂𑀯𑀧𑀼𑀢𑁆𑀢𑁄 𑀫𑀫 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀇𑀤𑀜𑁆𑀳𑀺 𑀢𑀁 𑀚𑁂𑀢𑀯𑀦𑀁, 𑀇𑀲𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀁;

𑀆𑀯𑀼𑀢𑁆𑀣𑀁 𑀥𑀫𑁆𑀫𑀭𑀸𑀚𑁂𑀦, 𑀧𑀻𑀢𑀺𑀲𑀜𑁆𑀚𑀦𑀦𑀁 𑀫𑀫.

‘‘𑀓𑀫𑁆𑀫𑀁 𑀯𑀺𑀚𑁆𑀚𑀸 𑀘 𑀥𑀫𑁆𑀫𑁄 𑀘, 𑀲𑀻𑀮𑀁 𑀚𑀻𑀯𑀺𑀢𑀫𑀼𑀢𑁆𑀢𑀫𑀁;

𑀏𑀢𑁂𑀦 𑀫𑀘𑁆𑀘𑀸 𑀲𑀼𑀚𑁆𑀛𑀦𑁆𑀢𑀺, 𑀦 𑀕𑁄𑀢𑁆𑀢𑁂𑀦 𑀥𑀦𑁂𑀦 𑀯𑀸.

‘‘𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀁, 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀺.

‘‘𑀲𑀸𑀭𑀺𑀧𑀼𑀢𑁆𑀢𑁄𑀯 𑀧𑀜𑁆𑀜𑀸𑀬, 𑀲𑀻𑀮𑁂𑀦 𑀉𑀧𑀲𑀫𑁂𑀦 𑀘;

𑀬𑁄𑀧𑀺 𑀧𑀸𑀭𑀗𑁆𑀕𑀢𑁄 𑀪𑀺𑀓𑁆𑀔𑀼, 𑀏𑀢𑀸𑀯𑀧𑀭𑀫𑁄 𑀲𑀺𑀬𑀸’’𑀢𑀺.

‘‘𑀇𑀤𑀫𑀯𑁄𑀘, 𑀪𑀺𑀓𑁆𑀔𑀯𑁂, 𑀲𑁄 𑀤𑁂𑀯𑀧𑀼𑀢𑁆𑀢𑁄. 𑀇𑀤𑀁 𑀯𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑁄 𑀳𑀺 𑀦𑀽𑀦, 𑀪𑀦𑁆𑀢𑁂, 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢𑁂 𑀅𑀪𑀺𑀧𑁆𑀧𑀲𑀦𑁆𑀦𑁄 𑀅𑀳𑁄𑀲𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀆𑀦𑀦𑁆𑀤, 𑀬𑀸𑀯𑀢𑀓𑀁 𑀔𑁄, 𑀆𑀦𑀦𑁆𑀤, 𑀢𑀓𑁆𑀓𑀸𑀬 𑀧𑀢𑁆𑀢𑀩𑁆𑀩𑀁 𑀅𑀦𑀼𑀧𑁆𑀧𑀢𑁆𑀢𑀁 𑀢𑀁 𑀢𑀬𑀸. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀳𑀺 𑀲𑁄, 𑀆𑀦𑀦𑁆𑀤, 𑀤𑁂𑀯𑀧𑀼𑀢𑁆𑀢𑁄’’𑀢𑀺.

𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀘𑀦𑁆𑀤𑀺𑀫𑀲𑁄 [𑀘𑀦𑁆𑀤𑀺𑀫𑀸𑀲𑁄 (𑀧𑀻. 𑀓.)] 𑀘 𑀯𑁂𑀡𑁆𑀟𑀼 [𑀯𑁂𑀡𑁆𑀳𑀼 (𑀲𑀻. 𑀓.)] 𑀘, 𑀤𑀻𑀖𑀮𑀝𑁆𑀞𑀺 𑀘 𑀦𑀦𑁆𑀤𑀦𑁄;

𑀘𑀦𑁆𑀤𑀦𑁄 𑀯𑀸𑀲𑀼𑀤𑀢𑁆𑀢𑁄 𑀘, 𑀲𑀼𑀩𑁆𑀭𑀳𑁆𑀫𑀸 𑀓𑀓𑀼𑀥𑁂𑀦 𑀘;

𑀉𑀢𑁆𑀢𑀭𑁄 𑀦𑀯𑀫𑁄 𑀯𑀼𑀢𑁆𑀢𑁄, 𑀤𑀲𑀫𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀢𑀺.