𑁯. 𑀘𑀦𑁆𑀤𑀺𑀫𑀲𑀼𑀢𑁆𑀢𑀁

𑁯𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀦𑁆𑀤𑀺𑀫𑀸 𑀤𑁂𑀯𑀧𑀼𑀢𑁆𑀢𑁄 𑀭𑀸𑀳𑀼𑀦𑀸 𑀅𑀲𑀼𑀭𑀺𑀦𑁆𑀤𑁂𑀦 𑀕𑀳𑀺𑀢𑁄 𑀳𑁄𑀢𑀺. 𑀅𑀣 𑀔𑁄 𑀘𑀦𑁆𑀤𑀺𑀫𑀸 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀅𑀦𑀼𑀲𑁆𑀲𑀭𑀫𑀸𑀦𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦𑀫𑁄 𑀢𑁂 𑀩𑀼𑀤𑁆𑀥 𑀯𑀻𑀭𑀢𑁆𑀣𑀼, 𑀯𑀺𑀧𑁆𑀧𑀫𑀼𑀢𑁆𑀢𑁄𑀲𑀺 𑀲𑀩𑁆𑀩𑀥𑀺;

𑀲𑀫𑁆𑀩𑀸𑀥𑀧𑀝𑀺𑀧𑀦𑁆𑀦𑁄𑀲𑁆𑀫𑀺, 𑀢𑀲𑁆𑀲 𑀫𑁂 𑀲𑀭𑀡𑀁 𑀪𑀯𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀘𑀦𑁆𑀤𑀺𑀫𑀁 𑀤𑁂𑀯𑀧𑀼𑀢𑁆𑀢𑀁 𑀆𑀭𑀩𑁆𑀪 𑀭𑀸𑀳𑀼𑀁 𑀅𑀲𑀼𑀭𑀺𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀢𑀣𑀸𑀕𑀢𑀁 𑀅𑀭𑀳𑀦𑁆𑀢𑀁, 𑀘𑀦𑁆𑀤𑀺𑀫𑀸 𑀲𑀭𑀡𑀁 𑀕𑀢𑁄;

𑀭𑀸𑀳𑀼 𑀘𑀦𑁆𑀤𑀁 𑀧𑀫𑀼𑀜𑁆𑀘𑀲𑁆𑀲𑀼, 𑀩𑀼𑀤𑁆𑀥𑀸 𑀮𑁄𑀓𑀸𑀦𑀼𑀓𑀫𑁆𑀧𑀓𑀸’’𑀢𑀺.

𑀅𑀣 𑀔𑁄 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀘𑀦𑁆𑀤𑀺𑀫𑀁 𑀤𑁂𑀯𑀧𑀼𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀭𑀫𑀸𑀦𑀭𑀽𑀧𑁄 𑀬𑁂𑀦 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀭𑀸𑀳𑀼𑀁 𑀅𑀲𑀼𑀭𑀺𑀦𑁆𑀤𑀁 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀁 𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀭𑀸𑀳𑀼 𑀘𑀦𑁆𑀤𑀁 𑀧𑀫𑀼𑀜𑁆𑀘𑀲𑀺;

𑀲𑀁𑀯𑀺𑀕𑁆𑀕𑀭𑀽𑀧𑁄 𑀆𑀕𑀫𑁆𑀫, 𑀓𑀺𑀁 𑀦𑀼 𑀪𑀻𑀢𑁄𑀯 𑀢𑀺𑀝𑁆𑀞𑀲𑀻’’𑀢𑀺.

‘‘𑀲𑀢𑁆𑀢𑀥𑀸 𑀫𑁂 𑀨𑀮𑁂 𑀫𑀼𑀤𑁆𑀥𑀸, 𑀚𑀻𑀯𑀦𑁆𑀢𑁄 𑀦 𑀲𑀼𑀔𑀁 𑀮𑀪𑁂;

𑀩𑀼𑀤𑁆𑀥𑀕𑀸𑀣𑀸𑀪𑀺𑀕𑀻𑀢𑁄𑀫𑁆𑀳𑀺, 𑀦𑁄 𑀘𑁂 𑀫𑀼𑀜𑁆𑀘𑁂𑀬𑁆𑀬 𑀘𑀦𑁆𑀤𑀺𑀫’’𑀦𑁆𑀢𑀺.