𑁧𑁦. 𑀲𑀽𑀭𑀺𑀬𑀲𑀼𑀢𑁆𑀢𑀁

𑁯𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀽𑀭𑀺𑀬𑁄 𑀤𑁂𑀯𑀧𑀼𑀢𑁆𑀢𑁄 𑀭𑀸𑀳𑀼𑀦𑀸 𑀅𑀲𑀼𑀭𑀺𑀦𑁆𑀤𑁂𑀦 𑀕𑀳𑀺𑀢𑁄 𑀳𑁄𑀢𑀺. 𑀅𑀣 𑀔𑁄 𑀲𑀽𑀭𑀺𑀬𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀅𑀦𑀼𑀲𑁆𑀲𑀭𑀫𑀸𑀦𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦𑀫𑁄 𑀢𑁂 𑀩𑀼𑀤𑁆𑀥 𑀯𑀻𑀭𑀢𑁆𑀣𑀼, 𑀯𑀺𑀧𑁆𑀧𑀫𑀼𑀢𑁆𑀢𑁄𑀲𑀺 𑀲𑀩𑁆𑀩𑀥𑀺;

𑀲𑀫𑁆𑀩𑀸𑀥𑀧𑀝𑀺𑀧𑀦𑁆𑀦𑁄𑀲𑁆𑀫𑀺, 𑀢𑀲𑁆𑀲 𑀫𑁂 𑀲𑀭𑀡𑀁 𑀪𑀯𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀽𑀭𑀺𑀬𑀁 𑀤𑁂𑀯𑀧𑀼𑀢𑁆𑀢𑀁 𑀆𑀭𑀩𑁆𑀪 𑀭𑀸𑀳𑀼𑀁 𑀅𑀲𑀼𑀭𑀺𑀦𑁆𑀤𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀢𑀣𑀸𑀕𑀢𑀁 𑀅𑀭𑀳𑀦𑁆𑀢𑀁, 𑀲𑀽𑀭𑀺𑀬𑁄 𑀲𑀭𑀡𑀁 𑀕𑀢𑁄;

𑀭𑀸𑀳𑀼 𑀲𑀽𑀭𑀺𑀬𑀁 [𑀲𑀼𑀭𑀺𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀫𑀼𑀜𑁆𑀘𑀲𑁆𑀲𑀼, 𑀩𑀼𑀤𑁆𑀥𑀸 𑀮𑁄𑀓𑀸𑀦𑀼𑀓𑀫𑁆𑀧𑀓𑀸.

‘‘𑀬𑁄 𑀅𑀦𑁆𑀥𑀓𑀸𑀭𑁂 𑀢𑀫𑀲𑀺 𑀧𑀪𑀗𑁆𑀓𑀭𑁄,

𑀯𑁂𑀭𑁄𑀘𑀦𑁄 𑀫𑀡𑁆𑀟𑀮𑀻 𑀉𑀕𑁆𑀕𑀢𑁂𑀚𑁄;

𑀫𑀸 𑀭𑀸𑀳𑀼 𑀕𑀺𑀮𑀻 𑀘𑀭𑀫𑀦𑁆𑀢𑀮𑀺𑀓𑁆𑀔𑁂,

𑀧𑀚𑀁 𑀫𑀫𑀁 𑀭𑀸𑀳𑀼 𑀧𑀫𑀼𑀜𑁆𑀘 𑀲𑀽𑀭𑀺𑀬’’𑀦𑁆𑀢𑀺.

𑀅𑀣 𑀔𑁄 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀲𑀽𑀭𑀺𑀬𑀁 𑀤𑁂𑀯𑀧𑀼𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀭𑀫𑀸𑀦𑀭𑀽𑀧𑁄 𑀬𑁂𑀦 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀭𑀸𑀳𑀼𑀁 𑀅𑀲𑀼𑀭𑀺𑀦𑁆𑀤𑀁 𑀯𑁂𑀧𑀘𑀺𑀢𑁆𑀢𑀺 𑀅𑀲𑀼𑀭𑀺𑀦𑁆𑀤𑁄 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀁 𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀭𑀸𑀳𑀼 𑀲𑀽𑀭𑀺𑀬𑀁 𑀧𑀫𑀼𑀜𑁆𑀘𑀲𑀺;

𑀲𑀁𑀯𑀺𑀕𑁆𑀕𑀭𑀽𑀧𑁄 𑀆𑀕𑀫𑁆𑀫, 𑀓𑀺𑀁 𑀦𑀼 𑀪𑀻𑀢𑁄𑀯 𑀢𑀺𑀝𑁆𑀞𑀲𑀻’’𑀢𑀺.

‘‘𑀲𑀢𑁆𑀢𑀥𑀸 𑀫𑁂 𑀨𑀮𑁂 𑀫𑀼𑀤𑁆𑀥𑀸, 𑀚𑀻𑀯𑀦𑁆𑀢𑁄 𑀦 𑀲𑀼𑀔𑀁 𑀮𑀪𑁂;

𑀩𑀼𑀤𑁆𑀥𑀕𑀸𑀣𑀸𑀪𑀺𑀕𑀻𑀢𑁄𑀫𑁆𑀳𑀺, 𑀦𑁄 𑀘𑁂 𑀫𑀼𑀜𑁆𑀘𑁂𑀬𑁆𑀬 𑀲𑀽𑀭𑀺𑀬’’𑀦𑁆𑀢𑀺.

𑀧𑀞𑀫𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀓𑀲𑁆𑀲𑀧𑀸 𑀘 𑀫𑀸𑀖𑁄 𑀘, 𑀫𑀸𑀕𑀥𑁄 𑀤𑀸𑀫𑀮𑀺 𑀓𑀸𑀫𑀤𑁄;

𑀧𑀜𑁆𑀘𑀸𑀮𑀘𑀡𑁆𑀟𑁄 𑀢𑀸𑀬𑀦𑁄, 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀦 𑀢𑁂 𑀤𑀲𑀸𑀢𑀺.