𑁮. 𑀢𑀸𑀬𑀦𑀲𑀼𑀢𑁆𑀢𑀁

𑁮𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀢𑀸𑀬𑀦𑁄 𑀤𑁂𑀯𑀧𑀼𑀢𑁆𑀢𑁄 𑀧𑀼𑀭𑀸𑀡𑀢𑀺𑀢𑁆𑀣𑀓𑀭𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀢𑀸𑀬𑀦𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀙𑀺𑀦𑁆𑀤 𑀲𑁄𑀢𑀁 𑀧𑀭𑀓𑁆𑀓𑀫𑁆𑀫, 𑀓𑀸𑀫𑁂 𑀧𑀦𑀼𑀤 𑀩𑁆𑀭𑀸𑀳𑁆𑀫𑀡;

𑀦𑀧𑁆𑀧𑀳𑀸𑀬 𑀫𑀼𑀦𑀻 𑀓𑀸𑀫𑁂, 𑀦𑁂𑀓𑀢𑁆𑀢𑀫𑀼𑀧𑀧𑀚𑁆𑀚𑀢𑀺.

‘‘𑀓𑀬𑀺𑀭𑀸 𑀘𑁂 𑀓𑀬𑀺𑀭𑀸𑀣𑁂𑀦𑀁, 𑀤𑀴𑁆𑀳𑀫𑁂𑀦𑀁 𑀧𑀭𑀓𑁆𑀓𑀫𑁂;

𑀲𑀺𑀣𑀺𑀮𑁄 𑀳𑀺 𑀧𑀭𑀺𑀩𑁆𑀩𑀸𑀚𑁄, 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚𑀁.

‘‘𑀅𑀓𑀢𑀁 𑀤𑀼𑀓𑁆𑀓𑀝𑀁 [𑀤𑀼𑀓𑁆𑀓𑀢𑀁 (𑀲𑀻. 𑀧𑀻.)] 𑀲𑁂𑀬𑁆𑀬𑁄, 𑀧𑀘𑁆𑀙𑀸 𑀢𑀧𑀢𑀺 𑀤𑀼𑀓𑁆𑀓𑀝𑀁;

𑀓𑀢𑀜𑁆𑀘 𑀲𑀼𑀓𑀢𑀁 𑀲𑁂𑀬𑁆𑀬𑁄, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺.

‘‘𑀓𑀼𑀲𑁄 𑀬𑀣𑀸 𑀤𑀼𑀕𑁆𑀕𑀳𑀺𑀢𑁄, 𑀳𑀢𑁆𑀣𑀫𑁂𑀯𑀸𑀦𑀼𑀓𑀦𑁆𑀢𑀢𑀺;

𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁, 𑀦𑀺𑀭𑀬𑀸𑀬𑀽𑀧𑀓𑀟𑁆𑀠𑀢𑀺.

‘‘𑀬𑀁 𑀓𑀺𑀜𑁆𑀘𑀺 𑀲𑀺𑀣𑀺𑀮𑀁 𑀓𑀫𑁆𑀫𑀁, 𑀲𑀁𑀓𑀺𑀮𑀺𑀝𑁆𑀞𑀜𑁆𑀘 𑀬𑀁 𑀯𑀢𑀁;

𑀲𑀗𑁆𑀓𑀲𑁆𑀲𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦 𑀢𑀁 𑀳𑁄𑀢𑀺 𑀫𑀳𑀧𑁆𑀨𑀮’’𑀦𑁆𑀢𑀺.

𑀇𑀤𑀫𑀯𑁄𑀘 𑀢𑀸𑀬𑀦𑁄 𑀤𑁂𑀯𑀧𑀼𑀢𑁆𑀢𑁄; 𑀇𑀤𑀁 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀢𑀸𑀬𑀦𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀧𑀼𑀭𑀸𑀡𑀢𑀺𑀢𑁆𑀣𑀓𑀭𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀢𑀸𑀬𑀦𑁄 𑀤𑁂𑀯𑀧𑀼𑀢𑁆𑀢𑁄 𑀫𑀫 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀙𑀺𑀦𑁆𑀤 𑀲𑁄𑀢𑀁 𑀧𑀭𑀓𑁆𑀓𑀫𑁆𑀫, 𑀓𑀸𑀫𑁂 𑀧𑀦𑀼𑀤 𑀩𑁆𑀭𑀸𑀳𑁆𑀫𑀡;

𑀦𑀧𑁆𑀧𑀳𑀸𑀬 𑀫𑀼𑀦𑀻 𑀓𑀸𑀫𑁂, 𑀦𑁂𑀓𑀢𑁆𑀢𑀫𑀼𑀧𑀧𑀚𑁆𑀚𑀢𑀺.

‘‘𑀓𑀬𑀺𑀭𑀸 𑀘𑁂 𑀓𑀬𑀺𑀭𑀸𑀣𑁂𑀦𑀁, 𑀤𑀴𑁆𑀳𑀫𑁂𑀦𑀁 𑀧𑀭𑀓𑁆𑀓𑀫𑁂;

𑀲𑀺𑀣𑀺𑀮𑁄 𑀳𑀺 𑀧𑀭𑀺𑀩𑁆𑀩𑀸𑀚𑁄, 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚𑀁.

‘‘𑀅𑀓𑀢𑀁 𑀤𑀼𑀓𑁆𑀓𑀝𑀁 𑀲𑁂𑀬𑁆𑀬𑁄, 𑀧𑀘𑁆𑀙𑀸 𑀢𑀧𑀢𑀺 𑀤𑀼𑀓𑁆𑀓𑀝𑀁;

𑀓𑀢𑀜𑁆𑀘 𑀲𑀼𑀓𑀢𑀁 𑀲𑁂𑀬𑁆𑀬𑁄, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺.

‘‘𑀓𑀼𑀲𑁄 𑀬𑀣𑀸 𑀤𑀼𑀕𑁆𑀕𑀳𑀺𑀢𑁄, 𑀳𑀢𑁆𑀣𑀫𑁂𑀯𑀸𑀦𑀼𑀓𑀦𑁆𑀢𑀢𑀺;

𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁, 𑀦𑀺𑀭𑀬𑀸𑀬𑀽𑀧𑀓𑀟𑁆𑀠𑀢𑀺.

‘‘𑀬𑀁 𑀓𑀺𑀜𑁆𑀘𑀺 𑀲𑀺𑀣𑀺𑀮𑀁 𑀓𑀫𑁆𑀫𑀁, 𑀲𑀁𑀓𑀺𑀮𑀺𑀝𑁆𑀞𑀜𑁆𑀘 𑀬𑀁 𑀯𑀢𑀁;

𑀲𑀗𑁆𑀓𑀲𑁆𑀲𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦 𑀢𑀁 𑀳𑁄𑀢𑀺 𑀫𑀳𑀧𑁆𑀨𑀮’’𑀦𑁆𑀢𑀺.

‘‘𑀇𑀤𑀫𑀯𑁄𑀘, 𑀪𑀺𑀓𑁆𑀔𑀯𑁂, 𑀢𑀸𑀬𑀦𑁄 𑀤𑁂𑀯𑀧𑀼𑀢𑁆𑀢𑁄, 𑀇𑀤𑀁 𑀯𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺. 𑀉𑀕𑁆𑀕𑀡𑁆𑀳𑀸𑀣, 𑀪𑀺𑀓𑁆𑀔𑀯𑁂, 𑀢𑀸𑀬𑀦𑀕𑀸𑀣𑀸; 𑀧𑀭𑀺𑀬𑀸𑀧𑀼𑀡𑀸𑀣, 𑀪𑀺𑀓𑁆𑀔𑀯𑁂, 𑀢𑀸𑀬𑀦𑀕𑀸𑀣𑀸; 𑀥𑀸𑀭𑁂𑀣, 𑀪𑀺𑀓𑁆𑀔𑀯𑁂, 𑀢𑀸𑀬𑀦𑀕𑀸𑀣𑀸. 𑀅𑀢𑁆𑀣𑀲𑀁𑀳𑀺𑀢𑀸, 𑀪𑀺𑀓𑁆𑀔𑀯𑁂, 𑀢𑀸𑀬𑀦𑀕𑀸𑀣𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀺𑀓𑀸’’𑀢𑀺.