𑁫. 𑀤𑀸𑀫𑀮𑀺𑀲𑀼𑀢𑁆𑀢𑀁

𑁮𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀤𑀸𑀫𑀮𑀺 𑀤𑁂𑀯𑀧𑀼𑀢𑁆𑀢𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀤𑀸𑀫𑀮𑀺 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀓𑀭𑀡𑀻𑀬𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑁂𑀦, 𑀧𑀥𑀸𑀦𑀁 𑀅𑀓𑀺𑀮𑀸𑀲𑀼𑀦𑀸;

𑀓𑀸𑀫𑀸𑀦𑀁 𑀯𑀺𑀧𑁆𑀧𑀳𑀸𑀦𑁂𑀦, 𑀦 𑀢𑁂𑀦𑀸𑀲𑀻𑀲𑀢𑁂 𑀪𑀯’’𑀦𑁆𑀢𑀺.

‘‘𑀦𑀢𑁆𑀣𑀺 𑀓𑀺𑀘𑁆𑀘𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 (𑀤𑀸𑀫𑀮𑀻𑀢𑀺 𑀪𑀕𑀯𑀸),

𑀓𑀢𑀓𑀺𑀘𑁆𑀘𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄.

‘‘𑀬𑀸𑀯 𑀦 𑀕𑀸𑀥𑀁 𑀮𑀪𑀢𑀺 𑀦𑀤𑀻𑀲𑀼,

𑀆𑀬𑀽𑀳𑀢𑀺 𑀲𑀩𑁆𑀩𑀕𑀢𑁆𑀢𑁂𑀪𑀺 𑀚𑀦𑁆𑀢𑀼;

𑀕𑀸𑀥𑀜𑁆𑀘 𑀮𑀤𑁆𑀥𑀸𑀦 𑀣𑀮𑁂 𑀞𑀺𑀢𑁄 𑀬𑁄,

𑀦𑀸𑀬𑀽𑀳𑀢𑀻 𑀧𑀸𑀭𑀕𑀢𑁄 𑀳𑀺 𑀲𑁄𑀯 [𑀲𑁄𑀢𑀺 (𑀲𑀻. 𑀧𑀻. 𑀓.), 𑀳𑁄𑀢𑀺 (𑀲𑁆𑀬𑀸. 𑀓𑀁.), 𑀲𑁄 (?)].

‘‘𑀏𑀲𑀽𑀧𑀫𑀸 𑀤𑀸𑀫𑀮𑀺 𑀩𑁆𑀭𑀸𑀳𑁆𑀫𑀡𑀲𑁆𑀲,

𑀔𑀻𑀡𑀸𑀲𑀯𑀲𑁆𑀲 𑀦𑀺𑀧𑀓𑀲𑁆𑀲 𑀛𑀸𑀬𑀺𑀦𑁄;

𑀧𑀧𑁆𑀧𑀼𑀬𑁆𑀬 𑀚𑀸𑀢𑀺𑀫𑀭𑀡𑀲𑁆𑀲 𑀅𑀦𑁆𑀢𑀁,

𑀦𑀸𑀬𑀽𑀳𑀢𑀻 𑀧𑀸𑀭𑀕𑀢𑁄 𑀳𑀺 𑀲𑁄’’𑀢𑀺 [𑀳𑁄𑀢𑀻𑀢𑀺 (𑀲𑁆𑀬𑀸. 𑀓𑀁.)].