𑁬. 𑀓𑀸𑀫𑀤𑀲𑀼𑀢𑁆𑀢𑀁

𑁮𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀓𑀸𑀫𑀤𑁄 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀼𑀓𑁆𑀓𑀭𑀁 𑀪𑀕𑀯𑀸, 𑀲𑀼𑀤𑀼𑀓𑁆𑀓𑀭𑀁 𑀪𑀕𑀯𑀸’’𑀢𑀺.

‘‘𑀤𑀼𑀓𑁆𑀓𑀭𑀁 𑀯𑀸𑀧𑀺 𑀓𑀭𑁄𑀦𑁆𑀢𑀺 (𑀓𑀸𑀫𑀤𑀸𑀢𑀺 𑀪𑀕𑀯𑀸),

𑀲𑁂𑀔𑀸 𑀲𑀻𑀮𑀲𑀫𑀸𑀳𑀺𑀢𑀸;

𑀞𑀺𑀢𑀢𑁆𑀢𑀸 𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲,

𑀢𑀼𑀝𑁆𑀞𑀺 𑀳𑁄𑀢𑀺 𑀲𑀼𑀔𑀸𑀯𑀳𑀸’’𑀢𑀺.

‘‘𑀤𑀼𑀮𑁆𑀮𑀪𑀸 𑀪𑀕𑀯𑀸 𑀬𑀤𑀺𑀤𑀁 𑀢𑀼𑀝𑁆𑀞𑀻’’𑀢𑀺.

‘‘𑀤𑀼𑀮𑁆𑀮𑀪𑀁 𑀯𑀸𑀧𑀺 𑀮𑀪𑀦𑁆𑀢𑀺 (𑀓𑀸𑀫𑀤𑀸𑀢𑀺 𑀪𑀕𑀯𑀸),

𑀘𑀺𑀢𑁆𑀢𑀯𑀽𑀧𑀲𑀫𑁂 𑀭𑀢𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘,

𑀪𑀸𑀯𑀦𑀸𑀬 𑀭𑀢𑁄 𑀫𑀦𑁄’’𑀢𑀺.

‘‘𑀤𑀼𑀲𑁆𑀲𑀫𑀸𑀤𑀳𑀁 𑀪𑀕𑀯𑀸 𑀬𑀤𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺.

‘‘𑀤𑀼𑀲𑁆𑀲𑀫𑀸𑀤𑀳𑀁 𑀯𑀸𑀧𑀺 𑀲𑀫𑀸𑀤𑀳𑀦𑁆𑀢𑀺 (𑀓𑀸𑀫𑀤𑀸𑀢𑀺 𑀪𑀕𑀯𑀸),

𑀇𑀦𑁆𑀤𑁆𑀭𑀺𑀬𑀽𑀧𑀲𑀫𑁂 𑀭𑀢𑀸;

𑀢𑁂 𑀙𑁂𑀢𑁆𑀯𑀸 𑀫𑀘𑁆𑀘𑀼𑀦𑁄 𑀚𑀸𑀮𑀁,

𑀅𑀭𑀺𑀬𑀸 𑀕𑀘𑁆𑀙𑀦𑁆𑀢𑀺 𑀓𑀸𑀫𑀤𑀸’’𑀢𑀺.

‘‘𑀤𑀼𑀕𑁆𑀕𑀫𑁄 𑀪𑀕𑀯𑀸 𑀯𑀺𑀲𑀫𑁄 𑀫𑀕𑁆𑀕𑁄’’𑀢𑀺.

‘‘𑀤𑀼𑀕𑁆𑀕𑀫𑁂 𑀯𑀺𑀲𑀫𑁂 𑀯𑀸𑀧𑀺, 𑀅𑀭𑀺𑀬𑀸 𑀕𑀘𑁆𑀙𑀦𑁆𑀢𑀺 𑀓𑀸𑀫𑀤;

𑀅𑀦𑀭𑀺𑀬𑀸 𑀯𑀺𑀲𑀫𑁂 𑀫𑀕𑁆𑀕𑁂, 𑀧𑀧𑀢𑀦𑁆𑀢𑀺 𑀅𑀯𑀁𑀲𑀺𑀭𑀸;

𑀅𑀭𑀺𑀬𑀸𑀦𑀁 𑀲𑀫𑁄 𑀫𑀕𑁆𑀕𑁄, 𑀅𑀭𑀺𑀬𑀸 𑀳𑀺 𑀯𑀺𑀲𑀫𑁂 𑀲𑀫𑀸’’𑀢𑀺.